རིན་ཆེན་མཁའ་འགྲོའི་དུར་ཁྲོད་ཀྱི་རྒྱུད

From Rangjung Yeshe Wiki Texts
Revision as of 07:00, 21 November 2026 by Eric (talk | contribs) (Longchenpa Project: generated page (21 November 2026))
(diff) ← Older revision | Latest revision (diff) | Newer revision → (diff)

LONGCHENPA-PECIN-26-LA-005
Jump to navigation Jump to search

ཟབ་དོན་ཐུགས་ཀྱི་སྙིང་པོའི་སྒྲུབ་ཐབས་དངོས་གྲུབ་སྒོ་འབྱེད་ཀྱི་ཤོག་དྲིལ་ལྷན་ཐབས klong chen rab 'byams kyi gsung 'bum (pe cin 2009)· Volume 26(LA) རྨི་ལམ་ཉི་ཟླ་སྒོ་འབྱེད

Title རིན་ཆེན་མཁའ་འགྲོའི་དུར་ཁྲོད་ཀྱི་རྒྱུད
Wylie rin chen mkha' 'gro'i dur khrod kyi rgyud
Catalogue title mkha' 'gro'i dur khrod kyi rgyud (BDRC outline)
Author Longchenpa ཀློང་ཆེན་རབ་འབྱམས་པ་དྲི་མེད་འོད་ཟེར།
Location klong chen rab 'byams kyi gsung 'bum (pe cin 2009), volume 26(LA), text 5, pages 63–66 (BDRC scan pages)
Section klong chen rab 'byams pa dri med 'od zer gyi gsung thor bu › gcod kyi skor


Tibetan text E-text from the typeset Pe cin edition (input 2020 on rywikitexts), cleaned 21 November 2026; not proofread against the print.
BDRC MW1KG4884, outline 6.10.1.08
Citation Klong chen rab 'byams pa. mkha' 'gro'i dur khrod kyi rgyud. In Kun mkhyen klong chen rab 'byams kyi gsung 'bum, vol. 26, pp. 63–66. Pe cin: Krung go'i bod rig pa dpe skrun khang, 2009. BDRC MW1KG4884.
Notes Title from the first line of the e-text; text boundaries and page numbers from the BDRC outline of MW1KG4884.
[edit]

༈ རིན་ཆེན་མཁའ་འགྲོའི་དུར་ཁྲོད་ཀྱི་རྒྱུད་བཞུགས་སོ། ། རྒྱལ་བའི་ཡུམ་ལ་ཕྱག་འཚལ་ལོ། །མ་གཅིག་ལབ་ཀྱི་སྒྲོན་མ་ཡིས། །རིན་ཆེན་མཁའ་འགྲོའི་དུར་ཁྲོད་གླིང་ཆེན་གྱི། །མཁའ་འགྲོ་དབང་དུ་བསྡུས་ནས་བྲན་ལ་བཀོལ། །ཐོད་སྨྱོན་བསམ་འགྲུབ་ཀྱིས་སྙན་དུ་བརྒྱུད། དེ་ལ་ལྷོ་ཕྱོགས་དུར་ཁྲོད་ཀྱི་མཁའ་འགྲོ་མ་སྟག་གི་མགོ་ཅན། ལྷོ་ཕྱོགས་གླིང་ཆེན་བཞི་ལ་ཡང་དེ་འདྲ་བཞི། དེ་སྒྲུབ་པའི་སྐོར་ནི། མཎྜལ་ས་ཚོན་གོང་དང་འདྲ། བསྐྱེད་རིམ་ནི། རང་དུར་ཁྲོད་ཀྱི་མཁའ་འགྲོ་མ་སྐུུ་མདོག་སེར་མོ་སྟག་མགོ་ཅན། ཞལ་གཅིག་ཕྱག་གཉིས། སྐུ་ལ་དུར་ཁྲོད་ཀྱི་ཆས་ཀྱིས་བརྒྱན་པ། གཡས་ཞིང་ཆེན་གྱི་རྒྱལ་མཚན། གཡོན་པས་ནོར་བུ། རང་གི་དབུ་ཐོག་ནས་རིན་ཆེན་འབྱུང་ལྡན་ཡབ་ཡུམ་བསྐྱེད། སྙིང་གི་དཀྱིལ་དུའང་རིན་ཆེན་འབྱུང་ལྡན་ཡབ་ཡུམ། དེའི་ཤར་དུ་སྔོན་མོ་སྟག་གི་མགོ་ཅན། ལྷོ་ཕྱོགས་སུ་སེར་མོ་སྟག་མགོ་མ། ནུབ་ཏུ་དམར་མོ་སྟག་མགོ་ཅན། བྱང་དུ་ལྗང་མོ་སྟག་མགོ་མ། གསང་བའི་གནས་ཆེན་བཞི་ལ། དེ་འདྲ་བཞི་ཡོད། རང་གི་ཕྱོགས་བཞིར་དེ་འདྲ་བཞི་བསྒོམ། གཡས་ཐམས་ཅད་ཞིང་གི་རྒྱལ་མཚན། གཡོན་ཐམས་ཅད་ན་ནོར་བུ། སྐུུ་ལ་དུར་ཁྲོད་ཀྱི་ཆས་ཀྱིས་བརྒྱན་པ་ཧ་དང་ཧཱུྃ་གི་སྒྲ་སྒྲོག་པ། གསང་བའི་གནས་ཆེན་བཞིའི་དུར་ཁྲོད་ཀྱི་མཁའ་འགྲོ་མ་བཀུག་ ཅིང༌། རང་གི་ཕྱོགས་མཚམས་ཐམས་ཅད་དུ་འུབ་ཀྱིས་འདུས་པར་བསྐྱེད། དེ་ནས་ངག་ཏུ་ཕཊ་བརྗོད་པས། དེ་རྣམས་ཀྱི་སྟོང་གསུམ་གྱི་བཅུད་དང་ཚེ་བཀྲག་བསྡུས་ནས་རང་ལ་བསྟིམས། ཕཊ་དྲག་ཏུ་བརྗོད་ནས་འགྲོ་བ་ཕོ་མོ་དབང་དུ་བསྡུས་ནས་རང་ལ་ཐིམས། བྲན་གཡོག་གི་ཚུལ་དུ་འཁོར་བར་བསྐྱེད། དེ་ནས་སྙིང་པོ་འདི་ཉིད་བགྲངས། ཧ་རི་ནི་ས་མ་མ་རཏྣ་དྲོངས། མུ་འདུས་ཧ་ཡ་ཕཊ། ཧ་རི་ནི་ས་ར་ན་བང་འདུས། དེ་དུས་སྙིང་པོ་གྲངས་མེད་བསྒྲངས་ལ། གཉན་ཁྲོད་འགྲིམ་ཞིང་དམིགས་པ་གཅུན་ན་ཐུན་མོང་གི་དངོས་གྲུབ་མ་ལུས་པ་ཐོབ་པར་འགྱུར་རོ། །རིན་ཆེན་དུར་ཁྲོད་གསང་སྒྲུབ་རྫོགས་སོ།། །། ༈ དུར་ཁྲོད་ཀྱི་གནས་སུ་ཉལ་བའི་དུས་སུ། དུར་ཁྲོད་རོ་ཆས་ཀྱི་དམིགས་པ་འདི་བཞིན་བྱའོ། །རང་གི་མདུན་དུར་ཁྲོད་ཀྱི་མཁའ་འགྲོ་མ། སྐུ་མདོག་སེར་མོ་སྟག་གི་མགོ་ཅན། གཡས་གྲི་གུག་གཡོན་ཐོད་ཁྲག །སྐུ་ལ་དུར་ཁྲོད་ཆས་ཀྱིས་བརྒྱན་པ་ཞིག་ཏུ་བསྐྱེད་དེ། ཕཊ་བྱས་ལ་རིག་པ་དབྱིངས་སུ་ཐིམས། རང་གི་སྨིན་མཚམས་ནས་རྦད་ཀྱིས་བཅད་ལ་མདུན་དུ་བཞག །བྲང་བྲེག་སྙིང་བཏོན་དེའི་ནང་དུ་བཅུག །ཤ་ཁྲག་རྣམས་དེའི་ནང་དུ་སྤུངས། ཞལ་བུའི་ནང་དུ་རཾ་ཞིག་བསྐྱེད་ལ། རཾ་ལས་མེ་འབར་བག་ཆགས་དྲི་མ་རྣམས་བསྲེགས་པས། ཨོཾ་ཨཱཿཧཱུཾ་གིས་བྱིན་གྱིས་བརླབས། ཡར་བླ་མ་ཡི་དམ་མཁའ་འགྲོའི་ཚོགས་ལ་དངས་མ་འབུལ། བར་ཡོན་ཏན་གྱི་མགྲོན་ལ་འབུལ། ཐ་མ་ལན་ཆགས་དང་སྙིང་རྗེའི་མགྲོན་ལ་འབུལ། དུས་གསུམ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའི་ཚོགས་རྣམས་ལ་འབུལ། ཡོན་ཏན་གྱི་མགྲོན་རྣམས་སྐོང་བར་གྱུར་ཅིག །ལན་ཆགས་ཀྱི་མགྲོན་རྣམས་ཚིམས་པར་གྱུར་ཅིག །སྙིང་རྗེའི་མགྲོན་རྣམས་ཕུན་སུམ་ཚོགས་པར་གྱུར་ཅིག །ཡང་ན་ཚོགས་གསོགས་འདི་ལྟར་བྱ། རང་གི་མདུན་དུ་མཁའ་འགྲོ་མ་སྐུ་མདོག་སེར་སྐྱ་ཞིག །ཕཊ་བྱས་པས་རིག་པ་མ་ལ་བསྟིམ། ལྤགས་པ་དེ་དམར་ཕྱམ་གྱིས་བཏིང་ནས། སྟོང་གསུམ་གང་བར་བསམ། ཡང་ཕཊ་བྱས་པས་ཤ་རྣམས་ཉིལ་གྱིས་སོང༌། ཁྲག་རྣམས་བདུད་རྩིར་ལྟེམ་གྱིས་སོང༌། རུས་པ་རྣམས་འདོད་དགུར་སོང༌། ཕཊ་བྱས་པས་མགོ་བོ་དེ་ཀླུའི་ཕོ་བྲང་ཆེན་པོ་ཞིག་ཏུ་བསམ། ཀླུ་ཐམས་ཅད་ཀྱི་བཅུད་བསྡུས་ནས་བསྟིམ། རཾ་ཡཾ་ཁཾ་གིས་གཡོས་བྱས། ཨོཾ་ཨཱཿཧཱུཾ་གསུམ་གྱིས་བྱིན་གྱིས་བརླབས། བླ་མ་ཡི་དམ་མཁའ་འགྲོའི་ཚོགས་ལ་དངས་མ་འབུལ། །སྙིགས་མ་རིགས་དྲུག་ལན་ཆགས་ཡོངས་ལ་བསྔོ། །དགོས་འདོད་ཕུན་སུམ་ཚོགས་པའི་ཚོགས་གསོགས་འདི། །བླ་མ་ཡི་དམ་མཁའ་འགྲོའི་ཚོགས་ལ་འབུལ། །ཚངས་པ་བརྒྱ་བྱིན་རྒྱལ་ཆེན་སྡེ་བཞི་མཉེས་གྱུར་ཅིག །ལན་ཆགས་འགྲོ་དྲུག་ཚིམས་གྱུར་ཅིག །རང་གི་མདུན་དུ་མཁའ་འགྲོ་མ་སྐུ་མདོག་སེར་མོ་སྟག་གི་མགོ་ཅན་བསྐྱེད་ལ། ཕཊ་བྱས་པས་རིག་པ་རང་ལ་བསྟིམ། ལྤགས་པ་དམར་ཕྱམ་གྱིས་སོང་བ་ལ། གཡང་གཞི་ཞིག་ཏུ་གྱུར་པར་བསམ། གླིང་བཞི་ཁེངས་པར་བསམ། མགོ་བོ་འཛམ་བུའི་གླིང་དུ་ཡོད་པར་བསམ། ཕཊ་བྱས་པས་ཤ་རུས་རྣམས་ཉིལ་གྱིས་སོང་བར་བསམ། འདོད་ཡོན་ཕུན་སུམ་ཚོགས་པར་བསམ། ཁྲག་རྣམས་བདུད་རྩིར་བསམ། ཕཊ་བྱས་པས་རིའི་རྒྱལ་པོ་རི་རབ་འདོད་དགུ་ཕུན་སུམ་ཚོགས་པར་བསམ། ཁྲག་རྣམས་བདུད་རྩིར་བསམ། ཕཊ་བྱས་པས་རིའི་རྒྱལ་པོ་རི་རབ་ཕུན་སུམ་ཚོགས་པར་གླིང་བཞིའི་སྐྱེ་འགྲོའི་བཅུད་བསྡུས་ནས། རཾ་ཡཾ་ཁཾ་གིས་བསྲེག་སྦྱངས་བྱ། ཨོཾ་ཨཱཿཧཱུཾ་གསུམ་གྱི་བྱིན་གྱིས་བརླབས། དུས་གསུམ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་རྣམས་ལ། བདུད་རྩི་དྲི་ཞིམ་པ། རོ་མངར་བ། ཕུན་སུམ་ཚོགས་པ་ཕུལ་བས་མཉེས་པར་བསམ། ཡོན་ཏན་གྱི་མགྲོན་རྣམས་ཐམས་ཅད་དང༌། རིགས་དྲུག་རྣམས་ལ་ཕུལ་བས་ཕུན་སུམ་ཚོགས་པར་གྱུར་ཅིག །ད་ནི་གཟུགས་བསྐྱུར་ལ། རང་གི་མདུན་གྱི་བར་སྣང་ལ། མ་ཅིག་བསྐྱེད་ལ་རིག་པ་དེ་ལ་བསྟིམ། ཕཊ་བྱས་པས་མགོ་བོ་བཅད་ནས་སྣང་སྲིད་ཀྱི་ལྷ་འདྲེ་ཐམས་ཅད་ཀྱི་དབང་པོ་རྣམ་པ་ལྔ་ཚིམས་པར་བསམ། །ཡང་ཕཊ་བྱས་པས། ལག་གཡས་བཅད་ནས་སྣང་སྲིད་ཀྱི་ལྷ་འདྲེ་ཐམས་ཅད་ཚིམས་པར་བསམ། ཡང་ཕཊ་བྱས་པས་རྐང་པ་གཡས་བཅད་ནས་སྣང་སྲིད་ལྷ་འདྲེ་ཐམས་ཅད་ཚིམས་པར་བསམ། ཕཊ་བྱས་པས་ལག་པ་གཡོན་པས་ཚིམས་པར་བསམ། ཕཊ་བྱས་པས་རྐང་པ་གཡོན་པས་ཚིམས་པར་བསམ། ཡང་ཕཊ་བྱས་པས་ཟོ་ཁོག་དེ་ལྷ་མ་སྲིན་སྡེ་བརྒྱད་ཀྱིས་ཟོས་ནས་ཚིམས་པར་བསམ། ཁྲག་གི་མཚོ་མོ་ཀུན་གྱིས་འཐུངས་པས་ཚིམས་པར་བསམ་མོ།། །།དགེའོ། །དགེའོ། །དགེའོ། །མངྒལཾ།།

[edit]

This page is a cleaned copy of the following rywikitexts page, which stay unchanged:

Cleaning (21 November 2026): removed 1 running heads, 3 Word page fields. The «» marks are kept: in this e-text they enclose the small-print notes of the print.

Part of the Longchenpa Collected Works (about this project).