Introduction
Jump to navigation
Jump to search
༄༅། །གནས་ལུགས་རིན་པོ་ཆེའི་མཛོད་ཅེས་བྱ་བ་བཞུགས།
རྒྱ་གར་སྐད་དུ། ཏ་ཐ་ཏྭ་རཏྣ་ཀོ་ཥ་ནཱ་མ།
བོད་སྐད་དུ། གནས་ལུགས་རིན་པོ་ཆེའི་མཛོད་ཅེས་བྱ་བ།
དཔལ་ཀུན་ཏུ་བཟང་པོ་ལ་ཕྱག་འཚལ་ལོ།
།གདོད་ནས་སངས་རྒྱས་མངོན་པར་བྱང་ཆུབ་གཞི།
།མི་འགྱུར་ལྷུན་གྲུབ་རྡོ་རྗེ་སྙིང་པོའི་དབྱིངས།
།སེམས་ཉིད་རང་བཞིན་རྫོགས་པ་ཆེན་པོ་ལ།
།བཏང་བཞག་འགྲོ་འོང་མེད་པས་ཕྱག་འཚལ་ལོ།
།ཆོས་རྣམས་རང་བཞིན་བརྗོད་དུ་མེད་པའི་ཀློང༌།
།ལྟ་བའི་ཡང་རྩེ་རྫོགས་པ་ཆེན་པོ་ནི།
།གང་དང་མི་འདྲ་ཀུན་ལས་འདས་པའི་དོན།
།ཇི་ལྟར་བདག་གིས་རྟོགས་བཞིན་བཤད་ཀྱིས་ཉོན།
།སེམས་ཀློང་མན་ངག་སྙིང་པོའི་མཐར་ཐུག་དོན།
།མེད་པ་ཕྱལ་པ་ལྷུན་གྲུབ་གཅིག་པུ་སྟེ།
།རེ་རེའང་གནད་བཀྲོལ་འགག་བསྡམས་ཆིངས་སུ་བཅིངས།
།ལ་བཟླའི་དོན་དང་རྣམ་པ་བཞི་བཞིར་གནས།