Sems nyid ngal gso - Part two

<tib size="30" tibpos="bottom">rdzogs pa chen po sems nyid ngal gso zhes bya ba bzhugs so/</tib>

<tib> /de ltar rnyed dka'i dal ba thob gyur kyang/
/skad cig mi rtag 'jig pa'i chos can te/
/rnam par brtags na snying po 'ga' med la/
/dbu ba rdos 'dra yid brtan mi rung ba/
/nyin mtshan kun tu nges par 'chi ba bsam/
/sdug bsngal yid mi bde ba kun gyi gzhi/
/nyon mongs 'byung khungs cher gyur lus 'di la/
/gos rgyan me tog phreng sogs bklubs gyur cing/
/bza' btung bzang dgus mchod cing bsnyen bkur yang/
/dus mthar mi rtag 'jig cing 'bral ba ste/
</tib><tib> /wa dang bya rgod ce sbyang zas 'di la/
/gces spras rtag 'dzin gtsang ba'i sems bor la/
/da lta nyid nas dam pa'i chos mdzod cig
/sa gsum 'byor pa dam pa'i gzhir gyur pa/
/tshangs dang bde 'byung mig stong dbang po sogs/
/grags dang bsod nams gzi 'od 'bar ba yang/
/'chi bdag gnas las rgyal ba'i skabs med la/
/bsam gtan grub pas bskal par gnas pa yang/
/las zad tshe na 'chi ba'i skabs mchis shing/
/lha dang lha min grub pa rig sngags 'chang/
</tib><tib> /mi dbang 'gro ba phal pa ji snyed kyang/
/'chi bas 'jigs pa'i skye ba pha mtha' yas tshe 'di/
/mi rtag rol ba'i char sprin nang/
/'chi bdag glog gi phreng ba gar byed cing/
/nyin mtshan dus rnams 'gyur ba'i char 'bab pas/
/sa gsum myu gu ji snyed brlan par gyur/
/snod bcud mi rtag srid pa chags 'jig gi/
/me bdun chus gcig rlung gis 'thor ba'i tshe/
/khor yug rgya mtsho gling dang ris bskor ba'i/
/lhun po rin chen bzhi yang mi rtag cing/
</tib><tib> /thams cad nam mkha' gcig tu 'gyur ba'i skabs/
/nges par bsams te snying nas chos mdzod cig
/'jig rten 'dren pa rang rgyal slob ma'i tshogs/
/thub dbang sras kyis bskor ba'i mgon po rnams/
/dvangs pa'i mkha' la sngon med ri bong 'dzin/
/rgyu skar phreng ba rnams kyis bskor ba bzhin/
/lha ma me lhang nge lhan nor gsal ba yang/
/mi rtag mya ngan 'da' tshul ston mdzod cing/
/bstan pa rin chen nyi ma dpag med kyang/
/sngon rabs sngon rabs nub par gyur la ltos/
</tib><tib> /chu shing snying po med 'dra rang gi lus/
/sgyu ma'i khang pa 'dra ba cis mi 'jig
/de phyir nges par 'chi dang nam 'chi dang/
/'dir 'chi 'dis 'chi nges pa 'ga' med de/
/tshe 'di snod med rtag tu god 'gyur zhing/
/'chi ba'i rkyen mang 'tsho ba'i shas nyung bas/
/tshe la long med blo sna bstungs byas te/
/di ring nyid nas chos la brtson par rigs/
/'byung bzhi 'dus pa'i lding khang sems pa can/
/g.yo ba'i kun rtog skye bos brgyan pa yang/
</tib><tib> /rkyen las skyes phyir 'dus byas 'jig pa'i chos/
/grong khyer rnying pa bzhin du mi rtag gis/
/myur pa nyid du dam pa'i chos mdzod cig
/ji ltar rlung dmar nang zhugs mar me bzhin/
/skad cig mi rtag g.yo ba'i rang bzhin dang/
/glo bur 'chi rkyen drag pos gtugs pa'i tshe/
/yun du mi gnas nges par 'chi bas na/
/da lta nyid du dam pa'i chos mdzod cig 'khor dang/
/longs spyod nye bar 'brel ba'i gnyen/
/gzugs dang lang tsho dbang phyug rigs bzang yang/
</tib><tib> /thams cad bor te gcig pur 'gro dgos shing/
/gang gis mi bstongs dkar nag rjes 'brang ba/
/de tshe chos las skyabs gzhan 'ga' med na/
/ding du brtson pas ci phyir 'da' mi byed/
/'di ltar 'jig rten snga phyi'i rgyud soms dang/
/snga rabs skye bo dpag med 'das gyur cing/
/da lta'i sa steng 'gro ba phal cher yang/
/lo brgya'i nang du nges par mi rtag la/
/ma 'ongs rnams kyang tshul de'i rjes su 'gro/
/rgan rabs gzhon rabs skal mnyam 'das la ltos/
</tib><tib> /bdag kyang rang bzhin de las ma 'das pas/
/nges par 'chi bsams nas chos mdzod cig sa/
/gsum dmyal ba srid rtse'i bar dag na/
/'chi bdag gnas las thar pa 'ga' med de/
/kun kyang mi rtag 'gyur zhing snying po med/
/yid brtan mi rung shing rta'i 'phang lo 'dra/
/khyad par mi yi 'jig rten 'tshe ba mang/
/nad gdon gnod pa du ma'i gzhir gyur cing /
/mtshon dang me dang g.yang sa gcan gzan dug
/rgyal po dgra dang chom rkun la sogs kyis/
</tib><tib> /'tsho ba'i srog 'joms phun tshogs 'jig par byed/
/'tshe ba med kyang skyes bu'i tshe 'gro ste/
/nyin mtshan skad cig thang cig 'gyur bas kyang/
/'chi bdag gnas su nye bar gyur pa ni/
/'bab chu'i tshogs rnams rgya mtshor snyeg pa'am/
/nyi ma'i dkyil 'khor nub rir ltung ba bzhin/
/zas bcas 'tsho ba'i rkyen rnams phun tshogs kyang/
/dug bzhin sdug bsngal byed pa'i skabs mchis na/
/mi mthun gnod mang phun tshogs cis mi 'jig
/des na 'chi ba'i rkyen du ma gyur med/
</tib><tib> /gar 'chi cis 'chi nam 'chi cha med kyi/
/don med slu ba 'jig rten chos spongs la/
/snying nas mi rtag 'chi chos bsgrub par mdzod/
/'dir ni bdag gis dal 'byor gru rnyed cing/
/bla ma'i man ngag gru 'dzin yod bzhin du/
/sdug bsngal chu bo brgal phyir mi brtson na/
/de las bslus pa 'di na gzhan med do/
/gang phyir ston pas rab bsngags rin chen snod/
/nyes kun mthar 'byin yang dag thob bzhin du/
/rang gzhan don gnyis 'byor pa mi 'dzin na/
</tib><tib> /'khor ba'i btson rar rang nyid 'ching bar zad/
/kye ma ji ltar rdo la 'doms pa bzhin/
/'jig rten phal cher bsams shing skyo ba 'phel/
/bstan pas mi rtogs bshad pas go ba med/
/sang nyin 'chi yang rgyun ring rtag par 'dzin/
/'khor bas mi skyo nges 'byung rdul tsam med/
/shes bzhin nga rgyal go bzhin 'khrul pa byed/
/'du 'dzis g.yengs la nyon mongs char 'bab pa'i/
/'gro la nam zhing bdag gis phan thogs 'gyur/
/'dir ni nyes pa'i chu gter brgal 'dod cing/
</tib><tib> /legs pa'i yon tan rmad byung bsgrub 'dod pas/
/da lta nyid du nges par 'chi ba bsam/
/nyin mtshan kun tu mi rtag 'ba' zhig bsgom/
/yang dang yang du nges 'byung skyo shas bskyed/
/des na 'di phyir phan bde'i chos 'grub cing/
/brtson 'grus drag pos sgrub la brtson pa dang/
/tshe 'di blos thongs bdag 'dzin 'khrul pa 'jig
/mdor na legs pa'i yon tan thams cad 'grub/
/nyes kun mthar 'byin thar pa dam pa'i rgyu/
/chos kun rtsa ba mi rtag blo sna btsungs/
</tib><tib> /de ltar chos tshul sprin gyi rnga sgra las/
/phan pa'i gdams ngag zab cing snyan bsgrags pas/
/'gro kun rnam g.yeng nyon mongs rtag 'dzin gyis/
/dub pa'i sems nyid di ring ngal sos shig
/rdzogs pa chen po sems nyid ngal gso las/
/tshe mi rtag pa'i le'u ste gnyis pa'o/
</tib>