Sems nyid ngal gso - Part two

རྫོགས་པ་ཆེན་པོ་སེམས་ཉིད་ངལ་གསོ་ཞེས་བྱ་བ་བཞུགས་སོ།

།དེ་ལྟར་རྙེད་དཀའི་དལ་བ་ཐོབ་གྱུར་ཀྱང།
།སྐད་ཅིག་མི་རྟག་འཇིག་པའི་ཆོས་ཅན་ཏེ།
།རྣམ་པར་བརྟགས་ན་སྙིང་པོ་འགའ་མེད་ལ།
།དབུ་བ་རྡོས་འདྲ་ཡིད་བརྟན་མི་རུང་བ།
།ཉིན་མཚན་ཀུན་ཏུ་ངེས་པར་འཆི་བ་བསམ།
།སྡུག་བསྔལ་ཡིད་མི་བདེ་བ་ཀུན་གྱི་གཞི།
།ཉོན་མོངས་འབྱུང་ཁུངས་ཆེར་གྱུར་ལུས་འདི་ལ།
།གོས་རྒྱན་མེ་ཏོག་ཕྲེང་སོགས་བཀླུབས་གྱུར་ཅིང།
།བཟའ་བཏུང་བཟང་དགུས་མཆོད་ཅིང་བསྙེན་བཀུར་ཡང།
།དུས་མཐར་མི་རྟག་འཇིག་ཅིང་འབྲལ་བ་སྟེ།

།ཝ་དང་བྱ་རྒོད་ཅེ་སྦྱང་ཟས་འདི་ལ།
།གཅེས་སྤྲས་རྟག་འཛིན་གཙང་བའི་སེམས་བོར་ལ།
།ད་ལྟ་ཉིད་ནས་དམ་པའི་ཆོས་མཛོད་ཅིག
།ས་གསུམ་འབྱོར་པ་དམ་པའི་གཞིར་གྱུར་པ།
།ཚངས་དང་བདེ་འབྱུང་མིག་སྟོང་དབང་པོ་སོགས།
།གྲགས་དང་བསོད་ནམས་གཟི་འོད་འབར་བ་ཡང།
།འཆི་བདག་གནས་ལས་རྒྱལ་བའི་སྐབས་མེད་ལ།
།བསམ་གཏན་གྲུབ་པས་བསྐལ་པར་གནས་པ་ཡང།
།ལས་ཟད་ཚེ་ན་འཆི་བའི་སྐབས་མཆིས་ཤིང།
།ལྷ་དང་ལྷ་མིན་གྲུབ་པ་རིག་སྔགས་འཆང།

།མི་དབང་འགྲོ་བ་ཕལ་པ་ཇི་སྙེད་ཀྱང།
།འཆི་བས་འཇིགས་པའི་སྐྱེ་བ་ཕ་མཐའ་ཡས་ཚེ་འདི།
།མི་རྟག་རོལ་བའི་ཆར་སྤྲིན་ནང།
།འཆི་བདག་གློག་གི་ཕྲེང་བ་གར་བྱེད་ཅིང།
།ཉིན་མཚན་དུས་རྣམས་འགྱུར་བའི་ཆར་འབབ་པས།
།ས་གསུམ་མྱུ་གུ་ཇི་སྙེད་བརླན་པར་གྱུར།
།སྣོད་བཅུད་མི་རྟག་སྲིད་པ་ཆགས་འཇིག་གི།
།མེ་བདུན་ཆུས་གཅིག་རླུང་གིས་འཐོར་བའི་ཚེ།
།ཁོར་ཡུག་རྒྱ་མཚོ་གླིང་དང་རིས་བསྐོར་བའི།
།ལྷུན་པོ་རིན་ཆེན་བཞི་ཡང་མི་རྟག་ཅིང།

།ཐམས་ཅད་ནམ་མཁའ་གཅིག་ཏུ་འགྱུར་བའི་སྐབས།
།ངེས་པར་བསམས་ཏེ་སྙིང་ནས་ཆོས་མཛོད་ཅིག
།འཇིག་རྟེན་འདྲེན་པ་རང་རྒྱལ་སློབ་མའི་ཚོགས།
།ཐུབ་དབང་སྲས་ཀྱིས་བསྐོར་བའི་མགོན་པོ་རྣམས།
།དབ༹ངས་པའི་མཁའ་ལ་སྔོན་མེད་རི་བོང་འཛིན།
།རྒྱུ་སྐར་ཕྲེང་བ་རྣམས་ཀྱིས་བསྐོར་བ་བཞིན།
།ལྷ་མ་མེ་ལྷང་ངེ་ལྷན་ནོར་གསལ་བ་ཡང།
།མི་རྟག་མྱ་ངན་འདའ་ཚུལ་སྟོན་མཛོད་ཅིང།
།བསྟན་པ་རིན་ཆེན་ཉི་མ་དཔག་མེད་ཀྱང།
།སྔོན་རབས་སྔོན་རབས་ནུབ་པར་གྱུར་ལ་ལྟོས།

།ཆུ་ཤིང་སྙིང་པོ་མེད་འདྲ་རང་གི་ལུས།
།སྒྱུ་མའི་ཁང་པ་འདྲ་བ་ཅིས་མི་འཇིག
།དེ་ཕྱིར་ངེས་པར་འཆི་དང་ནམ་འཆི་དང།
།འདིར་འཆི་འདིས་འཆི་ངེས་པ་འགའ་མེད་དེ།
།ཚེ་འདི་སྣོད་མེད་རྟག་ཏུ་གོད་འགྱུར་ཞིང།
།འཆི་བའི་རྐྱེན་མང་འཚོ་བའི་ཤས་ཉུང་བས།
།ཚེ་ལ་ལོང་མེད་བློ་སྣ་བསྟུངས་བྱས་ཏེ།
།དི་རིང་ཉིད་ནས་ཆོས་ལ་བརྩོན་པར་རིགས།
།འབྱུང་བཞི་འདུས་པའི་ལྡིང་ཁང་སེམས་པ་ཅན།
།གཡོ་བའི་ཀུན་རྟོག་སྐྱེ་བོས་བརྒྱན་པ་ཡང།

།རྐྱེན་ལས་སྐྱེས་ཕྱིར་འདུས་བྱས་འཇིག་པའི་ཆོས།
།གྲོང་ཁྱེར་རྙིང་པ་བཞིན་དུ་མི་རྟག་གིས།
།མྱུར་པ་ཉིད་དུ་དམ་པའི་ཆོས་མཛོད་ཅིག
།ཇི་ལྟར་རླུང་དམར་ནང་ཞུགས་མར་མེ་བཞིན།
།སྐད་ཅིག་མི་རྟག་གཡོ་བའི་རང་བཞིན་དང།
།གློ་བུར་འཆི་རྐྱེན་དྲག་པོས་གཏུགས་པའི་ཚེ།
།ཡུན་དུ་མི་གནས་ངེས་པར་འཆི་བས་ན།
།ད་ལྟ་ཉིད་དུ་དམ་པའི་ཆོས་མཛོད་ཅིག་འཁོར་དང།
།ལོངས་སྤྱོད་ཉེ་བར་འབྲེལ་བའི་གཉེན།
།གཟུགས་དང་ལང་ཚོ་དབང་ཕྱུག་རིགས་བཟང་ཡང།

།ཐམས་ཅད་བོར་ཏེ་གཅིག་པུར་འགྲོ་དགོས་ཤིང།
།གང་གིས་མི་བསྟོངས་དཀར་ནག་རྗེས་འབྲང་བ།
།དེ་ཚེ་ཆོས་ལས་སྐྱབས་གཞན་འགའ་མེད་ན།
།དིང་དུ་བརྩོན་པས་ཅི་ཕྱིར་འདའ་མི་བྱེད།
།འདི་ལྟར་འཇིག་རྟེན་སྔ་ཕྱིའི་རྒྱུད་སོམས་དང།
།སྔ་རབས་སྐྱེ་བོ་དཔག་མེད་འདས་གྱུར་ཅིང།
།ད་ལྟའི་ས་སྟེང་འགྲོ་བ་ཕལ་ཆེར་ཡང།
།ལོ་བརྒྱའི་ནང་དུ་ངེས་པར་མི་རྟག་ལ།
།མ་འོངས་རྣམས་ཀྱང་ཚུལ་དེའི་རྗེས་སུ་འགྲོ།
།རྒན་རབས་གཞོན་རབས་སྐལ་མཉམ་འདས་ལ་ལྟོས།

།བདག་ཀྱང་རང་བཞིན་དེ་ལས་མ་འདས་པས།
།ངེས་པར་འཆི་བསམས་ནས་ཆོས་མཛོད་ཅིག་ས།
།གསུམ་དམྱལ་བ་སྲིད་རྩེའི་བར་དག་ན།
།འཆི་བདག་གནས་ལས་ཐར་པ་འགའ་མེད་དེ།
།ཀུན་ཀྱང་མི་རྟག་འགྱུར་ཞིང་སྙིང་པོ་མེད།
།ཡིད་བརྟན་མི་རུང་ཤིང་རྟའི་འཕང་ལོ་འདྲ།
།ཁྱད་པར་མི་ཡི་འཇིག་རྟེན་འཚེ་བ་མང།
།ནད་གདོན་གནོད་པ་དུ་མའི་གཞིར་གྱུར་ཅིང་།
།མཚོན་དང་མེ་དང་གཡང་ས་གཅན་གཟན་དུག
།རྒྱལ་པོ་དགྲ་དང་ཆོམ་རྐུན་ལ་སོགས་ཀྱིས།

།འཚོ་བའི་སྲོག་འཇོམས་ཕུན་ཚོགས་འཇིག་པར་བྱེད།
།འཚེ་བ་མེད་ཀྱང་སྐྱེས་བུའི་ཚེ་འགྲོ་སྟེ།
།ཉིན་མཚན་སྐད་ཅིག་ཐང་ཅིག་འགྱུར་བས་ཀྱང།
།འཆི་བདག་གནས་སུ་ཉེ་བར་གྱུར་པ་ནི།
།འབབ་ཆུའི་ཚོགས་རྣམས་རྒྱ་མཚོར་སྙེག་པའམ།
།ཉི་མའི་དཀྱིལ་འཁོར་ནུབ་རིར་ལྟུང་བ་བཞིན།
།ཟས་བཅས་འཚོ་བའི་རྐྱེན་རྣམས་ཕུན་ཚོགས་ཀྱང།
།དུག་བཞིན་སྡུག་བསྔལ་བྱེད་པའི་སྐབས་མཆིས་ན།
།མི་མཐུན་གནོད་མང་ཕུན་ཚོགས་ཅིས་མི་འཇིག
།དེས་ན་འཆི་བའི་རྐྱེན་དུ་མ་གྱུར་མེད།

།གར་འཆི་ཅིས་འཆི་ནམ་འཆི་ཆ་མེད་ཀྱི།
།དོན་མེད་སླུ་བ་འཇིག་རྟེན་ཆོས་སྤོངས་ལ།
།སྙིང་ནས་མི་རྟག་འཆི་ཆོས་བསྒྲུབ་པར་མཛོད།
།འདིར་ནི་བདག་གིས་དལ་འབྱོར་གྲུ་རྙེད་ཅིང།
།བླ་མའི་མན་ངག་གྲུ་འཛིན་ཡོད་བཞིན་དུ།
།སྡུག་བསྔལ་ཆུ་བོ་བརྒལ་ཕྱིར་མི་བརྩོན་ན།
།དེ་ལས་བསླུས་པ་འདི་ན་གཞན་མེད་དོ།
།གང་ཕྱིར་སྟོན་པས་རབ་བསྔགས་རིན་ཆེན་སྣོད།
།ཉེས་ཀུན་མཐར་འབྱིན་ཡང་དག་ཐོབ་བཞིན་དུ།
།རང་གཞན་དོན་གཉིས་འབྱོར་པ་མི་འཛིན་ན།

།འཁོར་བའི་བཙོན་རར་རང་ཉིད་འཆིང་བར་ཟད།
།ཀྱེ་མ་ཇི་ལྟར་རྡོ་ལ་འདོམས་པ་བཞིན།
།འཇིག་རྟེན་ཕལ་ཆེར་བསམས་ཤིང་སྐྱོ་བ་འཕེལ།
།བསྟན་པས་མི་རྟོགས་བཤད་པས་གོ་བ་མེད།
།སང་ཉིན་འཆི་ཡང་རྒྱུན་རིང་རྟག་པར་འཛིན།
།འཁོར་བས་མི་སྐྱོ་ངེས་འབྱུང་རྡུལ་ཙམ་མེད།
།ཤེས་བཞིན་ང་རྒྱལ་གོ་བཞིན་འཁྲུལ་པ་བྱེད།
།འདུ་འཛིས་གཡེངས་ལ་ཉོན་མོངས་ཆར་འབབ་པའི།
།འགྲོ་ལ་ནམ་ཞིང་བདག་གིས་ཕན་ཐོགས་འགྱུར།
།འདིར་ནི་ཉེས་པའི་ཆུ་གཏེར་བརྒལ་འདོད་ཅིང།

།ལེགས་པའི་ཡོན་ཏན་རྨད་བྱུང་བསྒྲུབ་འདོད་པས།
།ད་ལྟ་ཉིད་དུ་ངེས་པར་འཆི་བ་བསམ།
།ཉིན་མཚན་ཀུན་ཏུ་མི་རྟག་འབའ་ཞིག་བསྒོམ།
།ཡང་དང་ཡང་དུ་ངེས་འབྱུང་སྐྱོ་ཤས་བསྐྱེད།
།དེས་ན་འདི་ཕྱིར་ཕན་བདེའི་ཆོས་འགྲུབ་ཅིང།
།བརྩོན་འགྲུས་དྲག་པོས་སྒྲུབ་ལ་བརྩོན་པ་དང།
།ཚེ་འདི་བློས་ཐོངས་བདག་འཛིན་འཁྲུལ་པ་འཇིག
།མདོར་ན་ལེགས་པའི་ཡོན་ཏན་ཐམས་ཅད་འགྲུབ།
།ཉེས་ཀུན་མཐར་འབྱིན་ཐར་པ་དམ་པའི་རྒྱུ།
།ཆོས་ཀུན་རྩ་བ་མི་རྟག་བློ་སྣ་བཙུངས།

།དེ་ལྟར་ཆོས་ཚུལ་སྤྲིན་གྱི་རྔ་སྒྲ་ལས།
།ཕན་པའི་གདམས་ངག་ཟབ་ཅིང་སྙན་བསྒྲགས་པས།
།འགྲོ་ཀུན་རྣམ་གཡེང་ཉོན་མོངས་རྟག་འཛིན་གྱིས།
།དུབ་པའི་སེམས་ཉིད་དི་རིང་ངལ་སོས་ཤིག
།རྫོགས་པ་ཆེན་པོ་སེམས་ཉིད་ངལ་གསོ་ལས།
།ཚེ་མི་རྟག་པའི་ལེའུ་སྟེ་གཉིས་པའོ།