གཞི་སྣང་ཡེ་ཤེས་སྒྲོན་མེ

From Rangjung Yeshe Wiki Texts
Revision as of 21:16, 21 November 2026 by Eric (talk | contribs) (Longchenpa Project: Tibetan in the wiki's TibetanMachineUni font; «…» notes in small print (22 November 2026))
(diff) ← Older revision | Latest revision (diff) | Newer revision → (diff)

LONGCHENPA-PECIN-10-THA-007
Jump to navigation Jump to search

རྟོག་མེད་ནམ་མཁའ་སྤྲིན་ཕུང klong chen rab 'byams kyi gsung 'bum (pe cin 2009)· Volume 10(THA) དཔེ་དོན་གསལ་བྱེད་སྒྲོན་མེ

Title གཞི་སྣང་ཡེ་ཤེས་སྒྲོན་མེ
Wylie gzhi snang ye shes sgron me


Author Longchenpa ཀློང་ཆེན་རབ་འབྱམས་པ་དྲི་མེད་འོད་ཟེར།
Location klong chen rab 'byams kyi gsung 'bum (pe cin 2009), volume 10(THA), text 7, pages 76–87 (BDRC scan pages)
Section snying thig ya bzhi › bla ma yang tig


Tibetan text E-text from the typeset Pe cin edition (input 2020 on rywikitexts), cleaned 21 November 2026; not proofread against the print.
BDRC MW1KG4884, outline 1.4.2.09
Citation Klong chen rab 'byams pa. gzhi snang ye shes sgron me. In Kun mkhyen klong chen rab 'byams kyi gsung 'bum, vol. 10, pp. 76–87. Pe cin: Krung go'i bod rig pa dpe skrun khang, 2009. BDRC MW1KG4884.
Notes Title from the first line of the e-text; text boundaries and page numbers from the BDRC outline of MW1KG4884.
[edit]

༄༅། །གཞི་སྣང་ཡེ་ཤེས་སྒྲོན་མེ་བཞུགས་སོ། །

«མཁྱེན་བརྩེའི་ཡོན་ཏན་མཆོག་མངའ་རྒྱལ་བའི་མཛོད། །གདོད་མའི་མགོན་པོ་ཀུན་ཏུ་བཟང་ལ་འདུད། །འཁོར་འདས་ཀུན་འབྱུང་རང་བཞིན་གནས་པའི་དོན། །གཞི་སྣང་ཡེ་ཤེས་སྒྲོན་མེ་གསལ་བར་བཤད། །དེ་ལ་ཐེག་པ་ཀུན་གྱི་རྩེ་མོ་གསང་བ་སྙིང་ཏིག་གི་གདམས་པའི་དབྱིངས་རྒྱ་ཆེ་བ་ནམ་མཁའ་ལྟ་བུ་ཚིག་ཉུང་ངུས་ཉེ་བར་མཚོན་ན་ལྔ་སྟེ། གདོད་མའི་གཞི་སྣང་གི་འཆར་གཞི། དེ་ལས་གཞི་སྣང་འཆར་ཚུལ། ཤར་བ་གང་དུ་ནུབ་ཚུལ། ནུབ་ནས་ཡང་གཅིག་འཆར་ཚུལ། ཤར་ནས་ཇི་ལྟར་གྲོལ་ཚུལ་ལོ། །དང་པོ་ནི། མར་འཁོར་བར་མ་འཁྲུལ། ཡར་མྱ་ངན་ལས་མ་འདས། གང་དུའང་རྒྱ་ཆད་དང་ཕྱོགས་ལྷུང་མེད་པའི་སྔོན་རོལ་ན། སེམས་ཉིད་རང་བཞིན་གྱིས་འོད་གསལ་བ། སོ་སོ་རང་རིག་པའི་ཡེ་ཤེས་གདོད་མའི་གནས་ཚུལ་ནི། ངོ་བོ་རང་བཞིན་ཐུགས་རྗེ་གསུམ་གྱི་རང་བཞིན། སྐུ་གསུམ་འདུ་འབྲལ་མེད་པའི་དགོངས་པར་གནས་ཏེ། སྟོང་ལ་གོ་འབྱེད་པ་ནམ་མཁའ་ཡངས་པའི་དཀྱིལ་ལྟ་བུ། གསལ་ལ་འགྲིབ་པ་མེད་པ་ཉི་ཟླ་གཟའ་སྐར་བཀྲམ་པ་ལྟ་བུ། རིག་ལ་འཆར་གཞིར་གྱུར་པ་མེ་ལོང་གཡའ་དག་པ་ལྟ་བུ། དབྱིངས་སུ་གནས་ལ་ཕྱིར་མ་འཕྲོས་པ། སྣང་བར་གསལ་ལ་ངང་ལས་མི་གཡོ་བ། རིག་པར་གནས་ལ་རྟོག་པར་མ་འགྱུས་པ། སྟོང་གསལ་རང་བྱུང་གི་ཡེ་ཤེས། གཞོན་ནུ་བུམ་པ་སྐུའི་ཞིང་ན། ཆོས་ཉིད་འོད་གསལ་བའི་ངང་ལ་བཞུགས་པ་ནི་ཀ་དག་ཆེན་པོ་ཞེས་བྱ་སྟེ། རིག་པ་རང་ཤར་གྱི་རྒྱུད་ལས། ང་མེད་པའི་སྔོན་རོལ་ན། གཞིའི་གནས་ལུགས་འདི་ལྟར་གནས་ཏེ། གཞི་ཀ་དག་ཆེན་པོ་ཞེས་བྱ་བ་ངོ་བོ་རང་བཞིན་ཐུགས་རྗེ་གསུམ་དུ་གནས་སོ། །ངོ་བོ་མི་འགྱུར་བའི་ཡེ་ཤེས་མ་འགགས་པར་གསལ་བ་གཞོན་ནུ་བུམ་པ་སྐུའི་གནས་ལུགས་ཞེས་བྱ་བའོ། ། རང་བཞིན་འོད་ལྔའི་སྣང་བ་མ་འགགས་པའོ། །ཐུགས་རྗེའི་སྣང་བ་ནི། དཔེར་ན་ནམ་མཁའ་སྤྲིན་མེད་པ་ལྟ་བུའོ། །དེ་དག་ནི་ཀ་དག་གི་གནས་ལུགས་ཞེས་བྱ་སྟེ། རྒྱ་གར་ཡང་མ་ཆད། ཕྱོགས་གང་དུ་ཡང་མ་ལྷུང་བའོ། །ཞེས་གསུངས་སོ། །དེ་ཡང་བུམ་པའི་སྐུ་ནི་དཔེས་མཚོན་པ་སྟེ། ནང་དུ་གསལ་ལ་ཕྱིར་མི་གསལ་བའོ། །གཅིག་ཏུ་ན་གནམ་གང་གི་ཉིན་པར་ནམ་མཁའ་དག་པ་ལ་ཟླ་བ་དང་སྐར་མ་དབྱིངས་ན་ཡོད་པ་ལས་ཕྱིར་མི་མངོན་པར་ལྟར། དབྱིངས་ནང་གསལ་དུ་ལོངས་སྐུའི་ཞིང་ཁམས་འོད་ཟེར་རྒྱན་ཁྲི་དང་བཅས་པ་ཡོད་ཀྱང་ཕྱིར་མི་གསལ་བ་སྟེ། འཆར་གཞི་ཙམ་དུ་གནས་པའི་ངོ་བོར་རྟོགས་པར་ བྱའོ། །སེམས་ཉིད་འོད་གསལ་པའི་དབྱིངས་ན་དེ་ལྟར་མེད་ན། ཕྱིས་སྐུ་དང་ཡེ་ཤེས་འབྱུང་མི་སྲིད་པའི་སྐྱོན་དུ་འགྱུར་རོ། །བྱས་ཤིང་བསྒྲུབ་པས་མ་ཡིན་ཏེ། འདུས་མ་བྱས་ཤིང་ལྷུན་གྱིས་གྲུབ་པའི་ཕྱིར། རྒྱུད་བླ་མ་ལས། འདུས་མ་བྱས་ཤིང་ལྷུན་གྱིས་གྲུབ། གཞན་གྱི་རྐྱེན་གྱིས་རྟོགས་མིན་དང༌། མཁྱེན་དང་བརྩེ་དང་ནུས་པར་ལྡན། །དོན་གཉིས་ལྡན་པའི་སངས་རྒྱས་ཉིད། །ཅེས་གསུངས་པས་སོ། །སངས་རྒྱས་དུས་སྔར་ཡོད་ཀྱི་དྲི་མ་དག་པ་ལས། རྒྱུ་རྐྱེན་གཞན་གྱིས་བསྐྱེད་པ་མེད་པ་དང༌། མདོ་སྡེ་རྒྱན་ལས། སྔ་མ་ཕྱི་མ་ཁྱད་མེད་ཀྱང༌། །དེ་བཞིན་ཉིད་ནི་དག་གྱུར་པ། །ཞེས་པ་བཞིན་ཏེ། རིགས་སམ་སྙིང་པོ་གདོད་མ་ནས་སྐུ་དང་ཡེ་ཤེས་སུ་གནས་པའི་སྟེང་གི་དྲི་མ་དག་པས་སངས་རྒྱས་པར་བསྟན་པ་ནི། ཁམས་བྱང་ཆུབ་ཏུ་གྱུར་པའི་ཚུལ་དང་གཅིག་པས། གདོད་མའི་དབྱིངས་སམ་འཆར་གཞི་དེ་ལྟར་ཤེས་པར་བྱའོ། །དེ་ལྟར་ནང་གསལ་དུ་གནས་པའི་འཆར་གཞི་དབྱིངས་དང༌། སྣང་བ་སྐུ་དང་རིག་པ་ཡེ་ཤེས་རྣམས་སོ་སོ་མ་ཡིན་ཏེ། ཆུའི་དབྱིངས་ན་གཟུགས་བརྙན་ལྟར་རྟག་ཆད་འགྲོ་འོང་ལས་འདས་པ་ཉིད། སྒྲོན་མ་རྣམ་བཀོད་ལས། དེ་ལྟ་བུ་ཡི་བཞུགས་ཚུལ་ནི། སྟོང་གསལ་ཆུ་ཡི་གཟུགས་བརྙན་བཞིན། །ཞེས་སོ། །དེ་ཡང་ཆོས་སྐུ་ལྷུན་གྲུབ་རིན་པོ་ཆེའི་སྦུབས་དེ་ན་རིག་པ་བཞུགས་དུས་རང་སྣང་སྐུ་དང་ཡེ་ཤེས་སུ་གསལ་བ་ཐམས་ཅད་ལ། ཆོས་ཉིད་དག་པའི་ཡེ་གདངས་ཞེས་བྱ་སྟེ། ཡེ་ནས་ལྷུན་གྱིས་གྲུབ་པར་སྣང་བའི་ཕྱིར་རོ། །དེའི་ཚེ་སྐུ་རྣམ་པར་དག་པར་གཟུགས་བརྙན་ལྟ་བུ་རྟག་ཆད་མཚན་མ་ལས་འདས་པ། གསུང་རྣམ་པར་དག་པ་བརྗོད་མེད་རླུང་ལྔའི་ངང་དུ་རང་གསལ་བ། ཐུགས་རྣམ་པར་དག་པ་གཞི་ལ་མཁྱེན་ཆར་གནས་ལ་རྩལ་གྱིས་རྣམ་པར་མཁྱེན་པར་མ་བསྐྱོད་པས། ཡོན་ཏན་ལྷུན་གྱིས་གྲུབ་པ་ནོར་བུ་ལྟར་གནས་ཤིང༌། ཕྲིན་ལས་ཡེ་རྫོགས་ཆེན་པོར་བཞུགས་པ་ཡིན་ནོ། །རླུང་གི་གནས་ཚུལ་རིག་པའི་ངང་ན། སྲོག་རླུང་ཡན་ལག་བཞི་པ་ཡེ་ཤེས་ཀྱི་ངོ་བོར་གནས་ཏེ། རྩ་བའི་སྲོག་རླུང་ནི་རིག་པའི་ཡེ་ཤེས་ཤེས་རབ་ཏུ་གནས་ཏེ། རྟོག་དཔྱོད་འཆར་བའི་འཁྲུལ་གཞི་དང༌། རང་རིག་པའི་གྲོལ་གཞི་གཉིས་འཆར་རུང་དུ་ཡོད་ལ། དེ་དུས་མ་ཤར་བ་ཡུལ་རིག་པའི་ཡེ་ཤེས་སུ་གནས་པས། ཡེ་ཤེས་ཐམས་ཅད་ཀྱི་འཆར་གཞི་གྱུར་པའོ། ། ཡན་ལག་གི་རླུང་བཞི་ནི་དེ་ལས་གྱེས་པའི་གདངས་སམ་རྩལ་དུ་རང་ཤར་བ་སྟེ། གྱེན་དུ་རྒྱུ་བ་ཤེས་རབ་ཀྱི་རྟ་དང༌། ཐུར་དུ་སེལ་བ་ཤེས་རབ་ཀྱི་ཟེར་གདངས་འོད་དང༌། མེ་དང་མཉམ་པ་སྨིན་པར་བྱེད་པའི་སྟོབས་ཅན་དང༌། ཁྱབ་བྱེད་རྫོགས་པར་བྱེད་པའི་སྟོབས་ཅན་ཏེ། དབྱིངས་སུ་ནི་མ་འཕྲོས་པ་ལས་འཕྲོ་གཞི་མ་འགགས་པའི་སྙིང་པོར་གནས་པའོ། །ཕྱིས་ཕྱིར་གསལ་གྱི་དུས་སུ་ཡན་ལག་འདི་བཞིར་འཕྲོས་ནས་སོ་སོའི་ལས་བྱེད་ལ། ད་ལྟ་དབྱིངས་ཀྱི་དུས་སུ་སྲོག་རླུང་ཡེ་ཤེས་ཀྱི་ཆ་གཅིག་པུ་གསལ་བར་ཡོད་པ་ཡིན་ནོ། །རླུང་ལྔ་པོ་ཡང་འབྱུང་བ་མ་ལ་ཞ་བའི་ཚེ། ཡེ་ཤེས་དབྱིངས་སུ་འཁྱིལ་ནས། སྲོག་རླུང་ཡེ་ཤེས་ཆེན་པོ་འཕོ་འགྱུར་མེད་ཀྱང༌། ཡན་ཡག་གི་རླུང་བཞི་དམ་ཚིག་གི་ལྷ་མོ་བཞིར་གནས་པ་ཡིན་ནོ། །ཐུགས་རྗེ་ནི་ཡེ་ཤེས་ལྔའི་ངོ་བོ་བཞུགས་པས། ཡེ་དག་སྤྲོས་བྲལ་ཉག་གཅིག་ཏུ་བཞུགས་སོ། །དེས་ནི་ནང་གསལ་གདོད་མའི་གནས་ལུགས་བསྟན་པའོ། ། དོན་གཉིས་པ། དེ་ལས་གཞི་སྣང་གི་འཚར་ཚུལ་ལ། དབྱིངས་ནས་ཉམས་སུ་ཤར་བ་ཟ་འོག་བེར་ཁྱིམ་བཀྲམ་པ་ལྟར་སྣང་དུས། རང་སྣང་དེ་ལ་གང་འོག་ཏུ་གནས་པས་རིམ་པ་ལྟར་བཤད་པ་ནི། གདོད་མའི་ནང་གསལ་ལས་རིག་པའི་ཡེ་ཤེས་སྲོག་རླུང་གིས་བསྐྱོད་པའི་གདངས་ཕྱིར་སྣང་བ་ནི་འོད་དང་སྐུ་དང་ཟེར་དུ་ཤར་བ་ལས། ཆ་ཤས་ཀྱི་སྒོ་ནས་དབྱེ་ན། འཆར་ལུགས་དྲུག་སྒོ་གཉིས་དང་བརྒྱད་ཀྱི་ཆ་ནས་ལྷུན་གྲུབ་རིན་པོ་ཆེའི་སྣང་བ་ཞེས་བྱ། ངེས་པ་མེད་པའི་ལྷུན་གྲུབ་ཅེས་བྱའོ། །འཆར་ལུགས་དྲུག་ནི། ཐུགས་རྗེ་ལྟར་ཤར་བས་སྙིང་རྗེ་ཕྱོགས་རིས་མེད། འོད་ལྟར་ཤར་བས་ཐམས་ཅད་འོད་ལྔར་སྣང༌། སྐུ་ལྟར་ཤར་བས་ཞི་ཁྲོའི་ཚོམ་བུས་ནམ་མཁའ་གང༌། ཡེ་ཤེས་ལྟར་ཤར་བས་ལོངས་སྐུའི་ཞིང་ཁམས་རང་སྣང༌། གཉིས་མེད་ལྟར་ཤར་བས་གང་ལའང་རྣམ་པར་མི་རྟོག །མཐའ་གྲོལ་ལྟར་ཤར་བས་ཡེ་ཤེས་ཟང་ཐལ་ལོ། ། སྒོ་གཉིས་ནི་དག་པ་ཡེ་ཤེས་ཀྱི་སྒོ་ལྟར་ཤར་བས་ཀུན་ཏུ་བཟང་པོའི་གྲོལ་གཞིར་རང་བྱུང༌། མ་དག་པ་འཁོར་བའི་སྒོ་ལྟར་ཤར་བས་མ་རིག་པ་སེམས་ཅན་གྱི་འཁྲུལ་གཞིང་རང་བྱུང་བའོ། །སྣང་བདེའི་འོག་ན་གཞི་སྣང་ཆེན་པོ་ཞེས་བྱ་བ་ཡོད་དེ། ཡེ་ཤེས་བཞི་སྦྱོར་ལས་ཁྱད་པར་དུ། ལྔ་ལྡན་འོད་ཀྱི་སྣམ་བུས་ནམ་མཁའ་ཁྱབ་པའོ། །དེའི་འོག་ན་ལོངས་སྐུའི་སྣང་བ་ཡོད་དེ། རིགས་ལྔའི་ཚོམ་བུ་གྲངས་མེད་པའོ། །དེའི་འོག་ན་རང་བཞིན་སྤྲུལ་པ་སྐུའི་ཞིང་སྣང་ཡོད་དེ། དག་པའི་ཞིང་ཁམས་གྲངས་མེད་པ་སངས་རྒྱས་དང་བྱང་ཆུབ་སེམས་དཔས་བསྐོར་བར་སྣང་པའོ། །དེའི་འོག་ན་ལྷུན་གྲུབ་གྱི་སྣང་བ་ལས། འགྲོ་བ་རིགས་དྲུག་གི་ཞིང་ན་ཐུབ་པ་དྲུག་གི་སྟོན་པ་དང་བཅས་པ་གྲངས་མེད་བསམ་གྱིས་མི་ཁྱབ་པ་སྣང་བ་ཡོད་དོ། །དེ་ཐམས་ཅད་ཀྱང་ཡར་ཀ་དག་གི་སྣང་བ། ནམ་མཁའ་སྤྲིན་དང་བྲལ་བ་ལྟ་བུའི་ངང་ན་ཀུན་བཟང་ཡབ་ཡུམ་མཐིང་ཀར་སྣང་ལ། བར་འོད་གསལ་ཡེ་ཤེས་ཀྱི་ཞིང་སྣང་འཇའ་ཚོན་ལྟ་བུ་ན་རིགས་ལྔའི་སངས་རྒྱས་ནམ་མཁས་གར་ཁྱབ་ཙམ་དུ་རང་སྣང་ཞིང༌། ཡར་དག་པའི་ཞིང་དང༌། མར་མ་དག་པའི་ཞིང་ན། གདུལ་བྱ་དང་འདུལ་བྱེད་ཀྱི་སྟོན་པར་སྣང་བ་ནི། ཆོས་ཐམས་ཅད་རིག་པའི་ཡེ་ཤེས་ལ་ཡེ་ནས་ལྷུན་གྲུབ་ཏུ་རང་ཤར་རང་སྣང་བ་སྟེ། དབང་རྣམ་པར་ཕྱེ་བ་ལས། འཁོར་བ་ངན་སོང་རོལ་པ་ཡེ་ཤར་ ལ། །ཞེས་དང༌། འཁོར་འདས་ཐམས་ཅད་རིག་པའི་ཆོས་འཕྲུལ་ལ། །ཞེས་པའི་དོན་ཏོ། །འདི་དག་གི་རང་བཞིན་ཤེས་བྱེད་ལུང་དང་སྦྱར་ན། རིག་པ་རང་ཤར་ལས། དེའི་འོག་ན་ལྷུན་གྲུབ་རིན་པོ་ཆེའི་གནས་ལུགས་ཞེས་ བྱའོ། །དེ་ལ་འཆར་ལུགས་རྣམ་པ་དྲུག་ཡོད་དོ། །སྒོ་རྣམ་པ་གཉིས་ཡོད་དོ། ། དེ་ནི་ལྷུན་གྲུབ་ཅེས་ཀྱང་བྱའོ། །གཞི་མ་ངེས་པ་ཞེས་ཀྱང་བྱའོ། །གཞི་སྣང་སྣ་ཚོགས་སུ་འཆར་བ་ཞེས་ཀྱང་བྱའོ། །དེ་མན་ཆད་ན་ལྡོག་པའི་ས་ཡོད་དོ། ། དེའི་འོག་ན་གཞི་སྣང་ཆེན་པོ་ཞེས་བྱ་བ་ཡོད་དོ། །དེའི་འོག་ན་ལོངས་སྐུའི་སྣང་བ་ཡོད་དོ། །དེ་ནི་ལམ་མངོན་པར་སྣང་བའི་གཞི་ཞེས་བྱའོ། །དེ་ཡང་གསལ་བ། དྲོ་བ། བསིལ་བ། ཡང་བ། གཡོ་བའི་བདག་ཉིད་འཛིན་པ། སྐུ་ལྔ་དང་ལྡན་པ། ཡེ་ཤེས་ལྔ་དང་ལྡན་པ། རིགས་ལྔ་དང༌། ཁ་དོག་ལྔ་དང༌། འོད་ལྔ་དང༌། ཡུལ་ལྔ་དང༌། གཟུགས་ལྔ་དང༌། སྒྲ་ལྔ་དང༌། དྲི་ལྔ་དང༌། རོ་ལྔ་དང༌། རེག་ལྔ་དང༌། ཆོས་ལྔ་དང༌། སྣང་བ་ལྔ་དང༌། གཙོ་བོ་ལྔ་དང༌། འཁོར་ལྔ་དང་ལྡན་པའོ། །དེ་ཡང་མཚན་བཟང་པོ་སུམ་ཅུ་རྩ་གཉིས་དང་ལྡན་པའོ། ། དཔེ་བྱད་བཟང་པོ་བརྒྱད་ཅུ་དང་ལྡན་པའོ། །སྤངས་པའི་ཆོས་དྲུག་དང་ལྡན་པའོ། །དེ་དག་ནི་ལོངས་སྐུའི་སྣང་ལུགས་སོ། །དེ་དང་དེ་ལས་བྱུང་བའི་འབྲེལ་བའོ། །དེའི་སྣང་བ་ལས་རང་བཞིན་སྤྲུལ་པ་སྐུའི་སྣང་བ་དང༌། འགྲོ་བ་འདུལ་བ་སྤྲུལ་པ་སྐུའི་སྣང་ལུགས་དང༌། མ་དག་པས་སྤྲུལ་པ་སྐུའི་སྣང་ལུགས་སོ། ། དེ་ཡང་རང་བཞིན་སྤྲུལ་པའི་སྐུ་ནི་ངོ་བོ་ལྷུན་གྲུབ་ལས་ཤར་བའོ། །སྣང་ལུགས་ནི་འཁོར་མི་ཟད་པ་དང༌། ལོངས་སྤྱོད་ཟད་མི་ཤེས་པ་དང༌། ཡོན་ཏན་ཟད་མི་ཤེས་པ་དང༌། སྟོབས་ཟད་མི་ཤེས་པ་དང༌། རྩལ་ཟད་མི་ཤེས་པ་དང༌། ཆོས་འཕྲུལ་ཟད་མི་ཤེས་པ་དང༌། ཚེའི་ཚད་གྲངས་མེད་པ་དང༌། ནད་ཀྱི་སྡུག་བསྔལ་ཐམས་ཅད་དང་བྲལ་བ་གཞལ་ཡས་ཁང་བསམ་གྱིས་མི་ཁྱབ་པ་དང༌། ཆོས་བསམ་གྱིས་མི་ཁྱབ་པ་སྒྲོགས་པ་སྟེ། རང་བཞིན་སྤྲུལ་པ་སྐུ་ཡི་སྣང་ལུགས་སོ། །དེ་ལས་འགྲོ་བ་འདུལ་བ་སྤྲུལ་པའི་སྐུ་འབྱུང་ངོ༌། །དེ་ཡང་སྣ་ཚོགས་སུ་སྣང་བ། སྣ་ཚོགས་ཀྱི་དོན་ཤེས་པ། སྣང་ཡང་རྗེས་སུ་མ་འཆད་ པའོ། །ཞེས་གསུངས་སོ། །དེ་ལྟར་སྣང་བ་ལྔ་པོ་གང་འོག་ཏུ་བསྟན་པ་རྣམས་ཀྱང༌། དབྱིངས་ནས་སྐུ་དང་ཡེ་ཤེས་ཀྱི་གདངས་ལས་མ་ངེས་པའི་ལྷུན་གྲུབ་ཤར་བ་དང་མཉམ་དུ། གཞི་སྣང་ཆེན་པོ་ལས་ལོངས་སྐུ་དང༌། དེ་ལས་རང་བཞིན་སྤྲུལ་སྐུ་དང༌། དེ་ལས་འགྲོ་འདུལ་སྤྲུལ་སྐུ་རྣམས་སྔ་ཕྱི་མེད་པར་ཤར་བ། བཞིན་གྱི་མདངས་མེ་ལོང་དུ་ཤར་བ་བཞིན་སྔ་ཕྱི་མེད་པ་ལྟར་སྣང་བས་རིམ་པ་ལྟར་སྨོས་པ་ཡིན་ནོ། །འཆར་བ་དང་འཆར་གཞི་ལ་ལྟོས་ནས་རིམ་པར་སྨོས་པ་དང་སྔ་ཕྱིའི་རིམ་པ་མ་ཡིན་ནོ། །དེ་ཡང་སྣང་བ་དེ་ལྟར་ཤར་དུས། གདོད་མའི་ཀུན་ཏུ་བཟང་པོའི་རང་སྣང་དབྱིངས་ནས་ཤར་བ། བཞིན་དང་མེ་ལོང་གི་གཟུགས་སམ་ལུས་དང་གྲིབ་མ་བཞིན་ཤེས་པས་བྱེ་བྲག་ཕྱེད་པའི་སྐད་ཅིག་ལ་རང་སྣང་གི་གཞི་རྣམས་ནང་གསལ་དུ་ཐིམ་ནས། གདོད་མའི་དབྱིངས་སུ་འཕོ་འགྱུར་མེད་པའི་ངང་ལས། གཞན་དོན་ལྷུན་གྲུབ་ཏུ་ཐུགས་རྗེ་དང་ཕྲིན་ལས། བྱིན་རླབས་ཀྱི་ཆོ་འཕྲུལ། གདུལ་བྱ་མོས་པའི་རང་སྣང་དུ་འཆར་བ་ནི་འབད་རྩོལ་མེད་པ་རང་བྱུང་བའོ། །དེ་སྐད་དུ་རང་བྱུང་བདེ་བ་འཁོར་ལོའི་རྒྱུད་ལས། ཉུང་ཙམ་ལས་ནི་རང་བྱུང་ནས། །ཝལ་གྱིས་བསལ་ནས་སྒྲོ་སྐུར་བྲལ། །ཞེས་པས། དབྱིངས་ནས་ཡེ་ཤེས་སྐད་ཅིག་དང་པོར་ཉུག་ཙམ་སྣང་བ་ལ་ཤར་དུས། །རང་སྣང་དུ་ཧྲིག་གིས་རིག་པས་བྱེ་བྲག་ཕྱེད་དེ། སྐད་ཅིག་གཉིས་པར་མ་རིག་པའི་སྒྲིབ་པ་ཐམས་ཅད་ཝལ་གྱི་བསལ་ནས་དབྱིངས་སུ་བྱང་ཆུབ་བའོ། །དེ་ཉིད་མཚན་བརྗོད་ལས། སྐད་ཅིག་གཅིག་གིས་བྱེ་བྲག་ཕྱེད། །སྐད་ཅིག་གཅིག་གིས་རྫོགས་སངས་རྒྱས། །ཞེས་སོ། །རང་སྣང་དུ་ཤེས་ཚུལ། ཀུན་བྱེད་ལས། གྲིབ་མ་གཟུགས་ཀྱི་དཔེ་བཞིན་ངོ་མཚར་མཐོང་བའི་མིག» «།ཅེས་སོ། །དེ་ཚེ་ཀུན་ཏུ་བཟང་པོས་ཆོས་དྲུག་བརྙེས་ནས་གྲོལ་བ་ནི། ལུང་ལས་མ་བྱུང་བའི་གདམས་ངག» «།སེམས་ལས་མ་བྱུང་བའི་སངས་རྒྱས། རྒྱུ་ལས་མ་བྱུང་བའི་འབྲས་བུ། རང་སྣང་རང་ཤར་རང་གྲོལ་དུ་ཤེས་ནས་སངས་རྒྱས་སོ། །ལུང་ལས་མ་བྱུང་སྟེ། སྟོན་བྱེད་ཀྱི་སློབ་དཔོན་མེད་པས་དཔལ་རང་བྱུང་གིས་སངས་རྒྱས་སོ། །སེམས་ལས་མ་བྱུང་སྟེ་ཡེ་ཤེས་ཉིད་རང་གསལ་དུ་སངས་རྒྱས་སོ། །རྒྱུ་ལས་མ་བྱུང་སྟེ་རིག་མཁན་ཉིད་རང་གྲོལ་དུ་སངས་རྒྱས་སོ། །རང་སྣང་སྟེ་དབྱིངས་སེམས་ཉིད་འོད་གསལ་བ་རང་ངོར་ཤར་རོ། །རང་ཤར་ཏེ་རིག་པ་དེ་ཉིད་དེ་ལྟར་སྣང་བའོ། །རང་གྲོལ་ཏེ་རིག་དུས་རིག་པ་རང་འཁྲུལ་མེད་ཡེ་ཡིན་ཆེན་པོར་རྟོགས་པའི་ཕྱིར་རོ། ། འདིར་སེམས་ཉིད་ཅེས་སྨོས་པས་སེམས་ཀྱི་ཟད་ས་རིག་པ་འཆར་གཞི་ཉིད་ལ་ཟེར་གྱིས། སེམས་ལ་མི་ཟེར་རོ། །བླུན་རྨོངས་པ་འགས། སེམས་དང་སེམས་ཉིད་ཀྱང་མ་བྱེད་པར་གཅིག་ཏུ་སྨྲ་བ་ནི་བཞད་བགད་ཀྱི་གནས་སོ། །དེའི་ཚེ་རང་སྣང་དུ་རིག་པས་རིག་པར་སྐྱེས་པའི་ཆས་ལྷན་ཅིག་སྐྱེས་པའི་མ་རིག་པ་བཅོམ། རིག་པར་ཤར་བས་མ་རིག་པ་མེད་དེ་བདག་ཉིད་གཅིག་པའི་མ་རིག་པ་བཅོམ། རང་སྣང་དུ་རང་རིག་པས་གཞན་ཞེས་གཟུང་འཛིན་མེད་པས་ཀུན་ཏུ་བརྟགས་པའི་མ་རིག་པ་བཅོམ་ནས་དབྱྀངས་ནས་ཕྱིར་གསལ་དུ་ཉུག་ཙམ་བྱུང་བས། གདོད་མའི་ངང་ལས་ཅུང་ཟད་ཡུད་ཙམ་སྟོང་ཞིང་གཡོས་ཀྱང་དེ་མ་ཐག་ཏུ་རང་རིག་པས་རིག་མཁན་ཉིད་ཀྱང་གྲོལ་ནས། འཛིན་པ་མེད་པས་གཟུང་འཛིན་གྱི་བློ་སྟོང་དུས་ཕྱིར་སྣང་འོད་ཀྱི་སྣང་བ་རིག་པ་ཡེ་ཤེས་ཀྱི་གདངས་སུ་ཤེས་ཏེ། རིག་པ་དང་རིག་གདངས་ཤན་ཕྱེད་པའི་སྐད་ཅིག་ལ་མ་རིག་པ་སངས་ནས་རྟག་ཆད་སྒྲོ་སྐུར་དང་བྲལ་ཏེ། གདོད་མའི་ངང་དུ་གྲོལ་བ་ནམ་མཁའ་ལྟ་བུའོ། །དེའི་ཚེ་དབྱིངས་ནས་ཤར་བའི་སྣང་བ་ལུང་མ་བསྟན་གྲོལ་འཁྲུལ་གྱི་གཞི་ཅན། རང་སྣང་རིག་པའི་གདངས་སུ་ཤེས་པས་གདོད་མར་ཐིམ་པ་ནི། ལུང་མ་བསྟན་རང་བརླག་ལ་སོང་བའི་རི་བོ་ཏ་ལར་ཉི་མ་ཤར་བས་མུན་པའི་གནས་རང་སངས་ལ་སོང་བ་ལྟ་བུ་སྟེ། དགོངས་པ་བཀའ་བགྲོས་རྒྱུད་ལས། དེ་ཚེ་ཀུན་བཟང་ཆོས་དྲུག་གིས། །གཞི་ཤེས་མ་རིག་གསུམ་བཅོམ་ནས། །ཉུག་ཙམ་ལས་ནི་ཡུད་ཙམ་སྟོང༌། །རིག་ཙམ་བྱུང་བས་རིག་འགྲིབ་བརླག» «།སལ་གྱིས་བསལ་བས་མུན་ཁོང་སངས། །ཝལ་གྱིས་བྱུང་བས་འཐིབས་པ་མེད། །སྒྲོ་སྐུར་བྲལ་བས་མ་རིག་དག། འགྱུར་བ་མེད་པས་ནམ་མཁའ་འདྲ། །དེ་ཡང་རྡོ་རྗེ་སེམས་དཔའ་ཉོན། །འཁྲུལ་པ་མ་རིག་ལོག་བཅོམ་པས། །ལུང་མ་བསྟན་པ་རང་བརླག་སྟོང༌། །བེམས་རིག་ཕྱེད་པས་གཞི་དང་འཕྲད། །དེ་ཕྱིར་མ་རིག་མུན་པ་སངས། །རི་བོ་ཏ་ལར་ཉི་ཤར་འདྲ། །ཞེས་ སོ། །རི་བོ་ཏ་ལ་ནི་ཤར་གྱི་རི་ཐམས་ཅད་དེ། ཉི་མ་ཐོག་མར་ཤར་བས་མུན་པ་སངས་པ་ལྟར་ཡེ་ཤེས་དང་པོར་རིག་པས་སངས་རྒྱས་པ་ཡིན་ནོ། །དབྱིངས་སུ་སངས་རྒྱས་ནས་དབྱིངས་ལས་མ་གཡོས་པར་སྐུ་གསུང་ཐུགས་ཀྱི་རོལ་པ་ཆེན་པོའི་མཐུ་དང་གདུལ་བྱའི་མོས་པ་ལས་དོན་མཛད་པ་ནི་གཟུགས་བརྙན་ལྟ་བུ་སྟེ། རྒྱུད་བླ་མ་ལས། ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་དང༌། །དགའ་ལྡན་གནས་ནས་འཕོ་བ་དང༌། །ཞེས་པ་ལ་སོགས་པ་དང༌། ཇི་ལྟར་བེ་ཌཱུར་ས་གཞི་དག་པ་ལ། །ལྷ་དབང་ལུས་ཀྱི་གཟུགས་བརྙན་སྣང་བ་ལྟར། །དེ་བཞིན་འགྲོ་སེམས་ས་གཞི་གཙང་མ་ལ། །ཐུབ་པའི་དབང་པོའི་སྐུ་ཡི་གཟུགས་བརྙན་སྣང༌། །འགྲོ་ལ་འཆར་ནུབ་སྣ་ཚོགས་གང་སྣང་བ། །རྙོག་པའི་རང་སེམས་རབ་འཇུག་དབང་གིས་འཇུག། ཅེས་སོ། །དེ་ལྟར་སངས་རྒྱས་པའི་སྟོན་པ་ནི་ཀུན་ཏུ་བཟང་པོ་སྟེ། གཞི་ལས་འཕགས་པའི་སྐད་ཅིག་ལ་བྱེ་བྲག་ཕྱེད་ནས་སངས་རྒྱས་ཏེ། འཁོར་འདས་ཀུན་གྱི་དཔལ་མགོན་དུ་གྱུར་པ་ཡིན་ནོ། །གྲོལ་ཚུལ་དེ་ལྟ་བུ་ནི་ཅིག་ཆར་བ་གཞི་མས་གྲོལ་བ་ཞེས་བྱའོ། ། དོན་གསུམ་པ། ཤར་བ་གང་དུ་ནུབ་ཚུལ་ནི། དེ་ལྟར་དབྱིངས་ནས་ཤར་བ་རང་སྣང་དུ་མ་རིག་པས། གཞན་དུ་འཁྲུལ་པ་རྨི་ལམ་ནང་གི་འཇིགས་སྣང་ལྟར་ཇེ་རགས་སུ་མཐུད་པས་ན། སྣང་བ་རང་ལོག་ནས་མ་དག་པ་རིགས་དྲུག་སོ་སོའི་གནས་དང༌། ལུས་དང་སེམས་སུ་འཁྲུལ་ཏེ། བདེ་སྡུག་གི་སྣང་བ་མི་འདྲ་བ་དུ་མ་བག་ཆགས་སྣ་ཚོགས་སུ་བསབས་ཤིང་གོམས་པས་རང་སྣང་སྟེ། དྷ་དུ་ར་ཟོས་པའི་སྣང་བ་ལྟ་བུའམ། རྨི་ལམ་སྒྱུ་མ་ལྟར། སེམས་གཅིག་གི་ངོ་ཁ་ལ་སྣང་ཚུལ་དྲུག་ཤར་བས། འགྲོ་བ་རིགས་དྲུག་ཏུ་བཏགས་ཏེ་འཁོར་བར་འཁྱམས་པའོ། །དེ་སྐད་དུ་སྒྲོན་མ་སྣང་བྱེད་ལས། སྔོན་བྱུང་ཐོག་མ་ཀ་དག་གཞི། །ངོ་བོ་རང་བཞིན་ཐུགས་རྗེ་ནི། །ཡེ་ཤེས་གསུམ་གྱི་བདག་ཉིད་དོ། །དེ་ལས་མ་ངེས་ལྷུན་གྲུབ་གཞི། །མ་རིག་གསུམ་དང་རྐྱེན་བཞི་དང༌། །ཤེས་པ་སྦགས་པས་འཁྲུལ་པའོ། །ཞེས་སོ། །མ་རིག་པ་གསུམ་ནི། བདག་ཉིད་གཅིག་པ་ཡེ་ལྡན་གྱི་ཚུལ། ལྷན་ཅིག་སྐྱེས་པ་དུས་མཉམ་གྱི་ཚུལ། ཀུན་ཏུ་བརྟགས་པ་ཕྱིས་འབྱུང་གི་ཚུལ་དུ་རང་མ་རིག་པའི་ཆ་ལས་སོ་སོར་བཏགས་སོ། །རྐྱེན་བཞི་ནི། རྒྱུའི་རྐྱེན་མ་རིག་པ་གསུམ། བདག་པོའི་རྐྱེན་རིག་པ། ཡུལ་གྱི་རྐྱེན་སྣང་བ་སྟེ་དམིགས་པའི་རྐྱེན་ནོ། །དེ་མ་ཐག་པའི་རྐྱེན་ཅེ་གསུམ་དུས་མཚུངས་པའི་ཆའོ། །ཤེས་པས་སྤགས་པའི་འཁྲུལ་པ་ནི། འགྲོ་དྲུག་སོ་སོའི་སྣང་བ་རྣམས་སོ། །འཁྲུལ་དུས་སྙིང་གར་ཡེ་ཤེས་རང་གནས་ཀྱི་ངང་ནས་གཞི་རྣམས་ཀྱང་ཆད་པ་དང་ལྷག་པ་མེད་པར་འཆར་གཞིར་གནས་ཏེ། མེ་ལོང་ལས། དེ་ལྟར་གཞིར་སྣང་ལྔ་རྣམས་ཀྱང༌། །འཁྲུལ་དུས་ནང་གསལ་འཆར་གཞིའི་ ཚུལ། །སེམས་ཅན་ཀུན་གྱི་སྙིང་ལ་གནས། །འགྲོ་དྲུག་སྣང་བ་དེ་ལྟར་རོ། ། ཞེས་སོ། །དེའི་དུས་སུ་ཀ་དག་གིས་སྟོང་པར་ཐག་བཅད་ནས་ཁྲེགས་ཆོད་དུ་བསྟན། ལྷུན་གྲུབ་ཀྱིས་ཡེ་གྲུབ་ཏུ་ངོ་སྤྲད་ལ་ཐོད་རྒལ་གྱིས་ཉམས་སུ་བླངས་པས། བརྩོན་འགྲུས་རབ་རྣམས་སྣང་བ་འདི་ཉིད་ལ་རྡོས་བཅས་དག་ནས་སངས་རྒྱས་པའོ། །དེ་ཡང་སྣང་བ་གོང་འཕེལ་གྱི་ཚེ། ཐིག་ལེའི་ནང་དུ་འགྲོ་དྲུག་གི་གཟུགས་དང་བདེ་སྡུག་ཉན་རང་ལ་སོགས་པའི་གཟུགས། ཚད་དུ་ཕེབས་དུས་སངས་རྒྱས་ཀྱི་ཞིང་སྣང་འཆར་བའི་གནད་ཀྱང་གཞི་ལ་སྣང་བ་དེ་ཀུན་ཡོད་པ་ཤར་བའི་གནད་ཀྱིས་སོ། །དོན་བཞི་པ། ནུབ་ནས་ཡང་ཅིག་འཆར་ཚུལ་ནི། འབྱུང་བ་རིམ་གྱིས་ཐིམ་ནས་འོད་གསལ་གྱི་ཚེ་སྣང་བ་དུས་གཅིག་ལ་ཤར། སྣང་བར་ངེས་པའི་ཤེས་རབ་རིམ་གྱིས་སྐྱེ་བའི་ཚུལ་གྱིས་ལྷུན་གྲུབ་ཀྱི་སྣང་བ་སྐུ་དང༌། གཞི་སྣང་ཆེན་པོའི་ཡེ་ཤེས་དང༌། ལོངས་སྐུའི་སྣང་བ་ཚོམ་བུ་དང༌། རང་བཞིན་སྤྲུལ་སྐུ་དང༌། འགྲོ་འདུལ་སྤྲུལ་སྐུའི་སྣང་བ། ལྷུན་གྲུབ་རིན་པོ་ཆེའི་སྣང་བ་ཐ་མ་རྣམས་བར་དོའི་གདམས་ངག་ཏུ་བཤད་པ་ལྟར་འཆར་ཏེ། སྒྲོན་མ་སྣང་བྱེད་ལས། རང་རིག་ཡེ་ནས་རང་ཤར་དང༌། །ཉམས་བླང་དུས་ན་རང་ཤར་དང༌། །ཡུལ་རྐྱེན་འཕྲད་ཚེ་རང་ཤར་དང༌། །བར་དོའི་ཡུལ་ལ་རང་ཤར་རོ། །ཞེས་སོ། ། དོན་ལྔ་པ་ཤར་ནས་ཇི་ལྟར་གྲོལ་ཚུལ་ནི། རང་སྣང་རང་ངོ་ཤེས་པའི་སྐད་ཅིག་ལ་གདོད་མར་གྲོལ་ཏེ། སྣང་བ་རྣམས་མ་ལ་ཐིམ་ནས། སྐུ་དང་ཡེ་ཤེས་འདུ་འབྲལ་མེད་པའི་ངང་ལས་མི་གཡོ་བར། ཐུགས་རྗེ་ཆེན་པོའི་བྱིན་བརླབས་དང༌། གདུལ་བྱའི་མོས་པའི་སྐལ་བ་ཇི་ལྟ་བར་དོན་མཛད་དེ། སྒྱུ་འཕྲུལ་ལས། ཐུགས་རྗེ་ཆེན་པོས་འབྲེལ་པས་ན། །ཡེ་ཤེས་དབྱིངས་ལས་མི་གཞན་ཕྱིར། ། འགྲོ་དྲུག་དུས་གནས་མ་ལུས་པར། །མཐུན་པའི་ཡེ་ཤེས་རང་སྣང་བའོ། །ཞེས་སོ། །དེ་ལྟར་རྟོགས་དཀའ་རྡོ་རྗེ་སྙིང་པོའི་དོན། །བླ་མའི་ལུང་ལ་བརྟེན་ནས་བཤད་པ་འདིས། །མ་ལུས་འགྲོ་ཀུན་གདོད་མའི་སར་གཞོལ་ཏེ། །དབྱིངས་དང་ཡེ་ཤེས་འདུ་འབྲལ་མེད་པར་ཤོག །གསང་བ་སྙིང་ཏིག་གི་གནད་ཀྱི་གདམས་པ་མཆོག་ཏུ་གསང་བ་ལས། གཞི་སྣང་ཡེ་ཤེས་ཀྱི་སྒྲོན་མེ་ཞེས་བྱ་བ། ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་གངས་རི་ཐོད་ཀར་དུ་བཀོད་པ་རྫོགས་སོ།། །།དགེའོ། །དགེའོ། །དགེའོ།།

[edit]

This page is a cleaned copy of the following rywikitexts page, which stay unchanged:

Cleaning (21 November 2026): removed 1 running heads, 3 Word page fields. The «» marks are kept in the text: they enclose the small-print notes of the print, which are shown in small print with the marks hidden.

Part of the Longchenpa Collected Works (about this project).