དཔེ་དོན་གསལ་བྱེད་སྒྲོན་མེ

From Rangjung Yeshe Wiki Texts
LONGCHENPA-PECIN-10-THA-008
Jump to navigation Jump to search

གཞི་སྣང་ཡེ་ཤེས་སྒྲོན་མེ klong chen rab 'byams kyi gsung 'bum (pe cin 2009)· Volume 10(THA) ཉམས་ལེན་གནད་གྱི་སྒྲོན་མེ

Title དཔེ་དོན་གསལ་བྱེད་སྒྲོན་མེ
Wylie dpe don gsal byed sgron me


Author Longchenpa ཀློང་ཆེན་རབ་འབྱམས་པ་དྲི་མེད་འོད་ཟེར།
Location klong chen rab 'byams kyi gsung 'bum (pe cin 2009), volume 10(THA), text 8, pages 88–98 (BDRC scan pages)
Section snying thig ya bzhi › bla ma yang tig


Tibetan text E-text from the typeset Pe cin edition (input 2020 on rywikitexts), cleaned 21 November 2026; not proofread against the print.
BDRC MW1KG4884, outline 1.4.2.10
Citation Klong chen rab 'byams pa. dpe don gsal byed sgron me. In Kun mkhyen klong chen rab 'byams kyi gsung 'bum, vol. 10, pp. 88–98. Pe cin: Krung go'i bod rig pa dpe skrun khang, 2009. BDRC MW1KG4884.
Notes Title from the first line of the e-text; text boundaries and page numbers from the BDRC outline of MW1KG4884.
[edit]

༄༅། །དཔེ་དོན་གསལ་བྱེད་སྒྲོན་མེ་བཞུགས་སོ། །

«བཅོམ་ལྡན་འདས་གཟི་བརྗིད་མཐའ་ཡས་ལ་ཕྱག་འཚལ་ལོ། །སེམས་ཉིད་འོད་གསལ་བྱང་ཆུབ་སྙིང་པོའི་དོན། །ཇི་བཞིན་སྟོན་བྱེད་རྒྱུད་དོན་གསལ་བ་ལས། །དཔེ་དོན་གསལ་བྱེད་ཡིད་བཞིན་སྒྲོན་མེ་ནི། །སྐལ་བཟང་རྣམས་ཀྱི་དོན་དུ་བཤད་ཀྱིས་ཉོན། །དེ་ལ་རྡོ་རྗེ་སེམས་དཔའི་མེ་ལོང་རང་བཞིན་གྱིས་དྭངས་ལ་ཟུར་མང་བ་སྤོས་ཆུས་བཀྲུས་ལ། ཡི་གེ་བརྒྱ་པ་མང་དུ་བཟླས་ཏེ། རྡོ་རྗེ་སེམས་དཔར་བསྐྱེད་ལ་ཕྱག་དང་མཆོད་པ་བྱས་ནས། དར་ཟབ་ཀྱིས་གྲིལ་ལ་ངོ་སྤྲོད་ཀྱི་དུས་སུ་བསྟན་པ་ནི། སྤྲོས་པ་མེད་པའི་ཀློང༌། བསོད་ནམས་བརྒྱན་པའི་སྐུ། སྤྲུལ་པའི་སྐུ། རྡོ་རྗེ་འོད་སྲུངས་ལ། བཅོམ་ལྡན་འདས་གཟི་བརྗིད་མཐའ་ཡས་ཀྱིས་སྐྱེ་མེད་དག་པའི་ཀློང་ནས་སྙིང་པོ་བྱང་ཆུབ་མཆོག་གི་ཐིགས་པ་གསུམ་སྤྲོས་ཏེ། སྐུ་མངོན་པར་སྣང་བ་ཆུ་ཟླའི་དཀྱིལ་འཁོར་ལྟ་བུ་ནས། །སྐུའི་ཐིགས་པ་མན་ཤེལ་གསང་བའི་སྐུ་ཕྱུང་ནས་དཔེའི་ཡེ་ཤེས་སུ་བཞག །གསུང་སྤྲོས་པ་མེད་པའི་ཀློང་ནས་གསུང་གི་ཐིགས་པ་བདུད་རྩི་བྱང་ཆུབ་ཀྱི་སེམས་ཀྱི་ཡང་ཞུན་ཕྱུང་ནས་དོན་གྱི་ཡེ་ཤེས་ངོ་སྤྲད། ཐུགས་རྡོ་རྗེ་ལྟར་མི་འགྱུར་བའི་དབྱིངས་ཀློང་ནས་ཐུགས་ཀྱི་ཐིགས་པ་སྙིང་པོ་བྱང་ཆུབ་ཀྱི་སེམས་གསལ་བའི་སྒྲོན་མ་ཕྱུང་ནས། རྟགས་ཀྱི་ཡེ་ཤེས་ཀྱིས་ཡིད་ཆེས་པར་གཏན་ལ་ཕབ་བོ། སྐུའི་ཐིགས་པ་རང་བྱུང་གི་ཡེ་ཤེས་ལྔ་སྤྲོས་པ་རང་བཞིན་རྣམ་པར་དག་པ། དྲི་མ་མེད་པའི་ཡེ་ཤེས་མདུན་རྒྱབ་མེད་པར་གསལ་བས་ཡེ་ཤེས་ཟང་ཐལ་ཆེན་པོ་ཕྱི་ནང་མེད་པར་གསལ་བས་གཉིས་སུ་མེད་པའི་ཡེ་ཤེས་ཟང་ཐལ་ཆེན་པོ་ཕྱི་ནང་མེད་པའི་ནང་ནས་རྐྱེན་མེད་པའི་ཡེ་ཤེས་མ་འདྲེས་པར་གསལ་བས་མ་འདྲེས་པ་ཡོངས་སུ་རྫོགས་པའི་ཡེ་ཤེས་ཁྱེའུ་སྣང་བ་དམ་པ་བསམ་གྱིས་མི་ཁྱབ་པ་དང་དུས་མཉམ་དུ་བྱུང་བས་ལྷན་ཅིག་ཏུ་སྐྱེས་པའི་ཡེ་ཤེས་སོ། །སྣང་བ་མཐའ་ཡས་ཀྱི་སྐུའི་གདུང་འཛིན་ཅིང་སེམས་ཅན་གྱི་རྟོག་པ་སེལ་བས་སྐུ་གདུང་རིང་བསྲེལ་ཆེན་པོ་ཞེས་བྱ་ལ་ཆོས་ཀྱི་སྐུའི་དཔེ་མཚོན་པར་བྱེད་པས་རྡོ་རྗེ་སེམས་དཔའི་ཡེ་ཤེས་གསལ་བས་རྡོ་རྗེ་སེམས་དཔའི་མེ་ལོང་ཞེས་བྱའོ། །འདི་ཉིད་བསྐལ་པ་དང་པོར་དགའ་ལྡན་བརྩེགས་པའི་དུས་ན་ཁྱེའུ་སྣང་བ་དམ་པས་དཔེས་ངོ་སྤྲོད་དུ་སྣང་བ་མཐའ་ཡས་ཀྱི་ཐུགས་ཀ་ནས་ཤེལ་གྱི་མཆོད་རྟེན་ཁྲི་འཕང་ལྔ་བབས་པ་ལས་ངོ་སྤྲད་ཅིང༌། དེ་ནས་སུམ་ཅུ་རྩ་གསུམ་གྱི་གནས་རྣམ་པར་རྒྱལ་བའི་ཁང་བཟངས་ཀྱི་ཡང་ཐོག་པ་ཏི་རི་ཀང་ཀ་ཞེས་བྱ་བར་བབས་སོ། །དེ་ནས་རི་བོ་རྩེ་ལྔའི་རྩེ་ལ་བབས་ སོ། །དེ་ནས་རྡོ་རྗེ་གདན་དུ་བབས་སོ། །དེ་ནས་གངས་ཏི་སི་ལ་བབས་ཏེ། མཆོད་རྟེན་ཆེན་པོ་དེ་ལས་ཕྱོགས་བཅུར་འོད་དུ་འཕྲོས་པ་ལས་སེམས་ཅན་གྱི་རྟོག་པ་བསལ་ལོ། །ཇི་ལྟར་ཞེ་ན། འཁོར་བ་དོང་དཀྲུགས་ཆེན་པོའི་རྒྱུད་ལས། སངས་རྒྱས་ལྔ་ཡི་གདུང་འཛིན་པ། །ཤེལ་གྱི་མཆོད་རྟེན་ཁྲི་འཕང་ལྔ། །ཡེ་ཤེས་ལྔ་ཡི་རང་བཞིན་ཅན། །མཁའ་ཀློང་ལྔ་ཡི་གདུང་འཛིན་པ། །སྣང་མེད་མཁའ་ལ་ཁྱབ་པར་གདལ། ཁ་དོག་མ་འདྲེས་སོ་སོར་གསལ། །ངོ་བོར་རང་བཞིན་ཐུགས་རྗེ་གསུམ། །ངོ་བོ་འགགས་མེད་དག་པའི་གཞི། །རང་བཞིན་འབྱུང་བ་ཆེན་པོ་ལྔ། །ཐུགས་རྗེ་གཟུགས་སྐུ་ཡོངས་སུ་བསྟན། །རྡོ་རྗེ་དབྱིངས་ཀྱི་དཀྱིལ་འཁོར་ནས། །རང་བཞིན་ལྷུན་གྱིས་གྲུབ་པའི་སྐུ། །ཡེ་ཤེས་ལྔ་ལྡན་ཆུ་ཟླའི་སྐུ། །མི་གསལ་གསལ་བའི་བདག་ཉིད་ཅན། །ཤེལ་གྱི་མཆོད་རྟེན་ཁྲི་འཕང་ལྔ། །རྡོ་རྗེ་འཆང་གི་གཡོན་དུ་བབས། །གདངས་ཀྱི་རྣམ་པ་གསུམ་ལྡན་པ། །བྱང་ཤར་མཚམས་ནས་ཟུར་ལ་འཇུག །མཚན་མོའི་ཕྱོགས་ནས་ཉིན་མོ་ལྟ། །ཤེས་རབ་གཡས་ཟུར་དྲུང་བཞག་ནས། །སངས་རྒྱས་ཉག་གཅིག་དེས་མཐོང་འགྱུར། །ཤེས་རབ་ལྷག་མཐོང་ཡེ་ཤེས་ནི། །སངས་རྒྱས་དགོངས་པ་ཉག་གཅིག་ཡིན། །བདུད་རྩི་ལྕེ་ཡི་དོན་སྦྱར་ན། །རིག་པའི་ཁུ་བྱུག་ཚིག་གཅིག་ཡིན། །འགྱུར་མེད་རྡོ་རྗེ་ལུས་ཀྱི་མཆོག །མན་ངག་ཏི་ལ་ཟུང་འགྲོས་ཅན། །རྡོ་རྗེ་སེམས་དཔའི་ཞལ་ཆེམས་ཡིན། །ཞེས་པ་དང༌། ངོ་སྤྲོད་སྤྲས་པའི་རྒྱུད་ལས། སྐུ་གསུམ་འབྲས་བུ་མངོན་དུ་བལྟ་འདོད་ན། །བཅུད་ཀྱི་སྙིང་པོ་དཔེ་ཡི་ཡེ་ཤེས་ལྟོས། །ཡིད་བཞིན་རིན་ཆེན་ནོར་བུ་འོད་འབར་རམ། །སྣ་ཚོགས་ནོར་བུ་མར་གད་ཆུ་ཤེལ་ལམ། །ས་ཡི་སྙིང་པོ་རིན་ཆེན་མིག་མ་ཕུག» «། རྡོ་ཡི་སྙིང་པོ་རིན་ཆེན་མན་ཤེལ་གྱིས། །སངས་རྒྱས་རྣམས་ཀྱི་གནས་ལུགས་གཏན་ལ་འབེབས། །དེ་ཡི་ཕྱིར་ན་འདི་དག་མཁས་པས་བཙལ། །སྐྱེས་བུ་རྣམས་ཀྱིས་དོན་ལ་འཇུག་པའི་ཐབས། །དཔེ་ཡི་ཡེ་ཤེས་བལྟ་བར་གང་འདོད་པ། །མདོར་ན་སྐྱེས་བུས་འདི་ལྟར་རིག་པར་བྱ། །དཔེ་ཡི་འོད་ཀྱིས་ཕྱི་ཡི་དབྱིངས་རྣམས་བསྟན། །དཔེ་ཡི་ཐབས་ཀྱིས་སྐུ་ཡི་ངོ་བོ་བསྟན། །དཔེ་ཡི་མཐོང་བས་རང་གི་གནས་ལུགས་བསྟན། །དེ་ཕྱིར་འོད་སྐུའི་ཐིག་ལེ་ཡེ་ཤེས་དང༌། །རིག་པ་དང་ནི་དབྱིངས་ཀྱི་ཚད་འཛིན་པ། །རྣལ་འབྱོར་རྣམས་ཀྱིས་དཔེ་ལ་མཁས་པར་བྱ། །གང་ཟག་རྣམས་ཀྱི་དབང་པོའི་བྱེ་བྲག་གིས། །ངོ་དང་རྣལ་འབྱོར་ཤེས་པ་སྤྲད་པའི་ཕྱིར། །རང་ངོ་མཐོང་བར་འདོད་ན་འདི་དག་ལྟོས། །ཞེས་གསུངས་པས། དཔེ་ལ་བརྟེན་ནས་དོན་ངོ་ཤེས་ཏེ། མཚོན་དཔེ་མང་ན་ཡང་རིན་པོ་ཆེ་ཤེལ་ལ་བྱ་སྟེ། ཤེལ་རང་བཞིན་གྱིས་རྣམ་པར་དག་ཅིང་ཕྱི་ནང་མེད་པར་གསལ་བས་ཆོས་སྐུ་ངོ་ཤེས། ཤེལ་གྱི་ནང་འོད་ལ་བསྟན་ནས་ཤེས་རབ་སྲོག་ཏུ་གྱུར་པའི་རླུང་ཡན་ལག་བཞི་ལྡན་ལས། ཤེས་རབ་ཀྱི་གདངས་གསལ་བས་ལོངས་སྐུ་ངོ་ཤེས། ཕྱིར་གསལ་གྱི་འོད་ལ་བརྟེན་ནས་སྤྲུལ་པའི་སྐུ་འོད་ཀྱི་ཤར་ལུགས་ངོ་ཤེས། ཤེལ་ལ་བརྟེན་ཅིང་མཚོན་ནས་གཞི་གནས་ཀྱི་ཡེ་ཤེས་ངོ་ཤེས། ནང་གསལ་གྱིས་མཚན་ཉིད་འཛིན་པའི་ཡེ་ཤེས་ངོ་ཤེས། ཕྱི་གསལ་གྱིས་རྣམ་པ་ཐམས་ཅད་མཁྱེན་པའི་ཡེ་ཤེས་ངོ་ཤེས། ནང་དུ་ཐིམ་པས་ཐམས་ཅད་མཁྱེན་པའི་ཡེ་ཤེས་ངོ་ཤེས། ཤེལ་གྱི་སྣང་བ་སྣ་ཚོགས་མཚོན་པས་སྣང་ལུགས་ངོ་ཤེས། ཤེལ་རང་གིས་ངོ་བོ་མཚོན་པས་གནས་ལུགས་ཉག་གཅིག་ཏུ་ངོ་ཤེས། ཤེལ་འོད་དང་བཅས་པས་རིག་པའི་ཡེ་ཤེས་ངོ་ཤེས། འདི་དག་གསང་སྔགས་དོན་གྱི་ཚད་མའི་དཔེ་དོན་རྟགས་གསུམ་དུ་ཡིད་ཆེས་པས་གྲོལ་བར་བྱ་སྟེ། སྒྲོན་མ་རྣམ་པར་བཀོད་པའི་རྒྱུད་ལས། དགོངས་པ་བརྡ་དང་སྙན་བརྒྱུད་ནས། །གསང་སྔགས་དོན་གྱི་ཚད་མ་འབྱུང༌། །དཔེ་ལ་བརྟེན་ནས་དོན་ངོ་ཤེས། །རྟགས་ལ་བརྟེན་ནས་ཡིད་ཆེས་འགྱུར། །དོན་གྱི་སྙིང་པོར་ཐག་ཆོད་པས། །གཞི་ལ་གྲུབ་པའི་ཤེས་རབ་གསུམ། །ས་བོན་ཚུལ་དུ་གནས་པ་སྟེ། །རྐྱེན་ལས་འབྱུང་བའི་ཤེས་རབ་ཀྱིས། །འབྲས་བུའི་ཚུལ་དུ་སྨིན་པ་ཡིན། །མ་རིག་པ་ཡི་མུན་པ་སངས། །ཤེས་བྱའི་སྒྲིབ་པ་རང་དག་ པས། །མ་བཙལ་འབྲས་བུ་རང་གིས་མཐོང༌། །ཞེས་གསུངས་པའི་དོན་རྣམས་རྒྱས་པར་ངོ་སྤྲད་ན་བརྒྱད་ལས། དང་པོ་གདོད་མའི་སྤྱི་གཞི་རང་བྱུང་ངོ་བོ་ཉིད་ཀྱི་སྐུ་ནི། ངོ་བོ་སྟོང་པ། རང་བཞིན་གསལ་བ། ཐུགས་རྗེའི་འགགས་པ་མེད་པ་ཐིག་ལེ་ཉག་གཅིག་སྟོང་པ་རིག་པའི་སྙིང་པོ་ཅན་ནི་མན་ཤེལ་དྭངས་པ་དང་འདྲ་སྟེ། ངོ་བོ་སྟོང་པས་ཆོས་སྐུ་མཚོན་ཏེ་ཟང་ཐལ། འོད་ལྔ་ཕྱིར་མི་གསལ་ཡང་ནང་གསལ་དུ་ཡོད་པས་རང་བཞིན་གསལ་བ་ལོངས་སྐུ་མཚོན། འོད་དཀར་ཕྲ་ཕྲོ་བ་ཡང་ཕྱིར་མི་གསལ་ཡང༌། ནང་གསལ་འཆར་གཞི་མ་འགགས་པར་ཡོད་པས་ཐུགས་རྗེ་མཚོན་ནས་སྤྲུལ་སྐུ་རང་ཆས་སུ་གནས་པས། ཡེ་ཐོག་གཞིའི་དུས་ནས་རང་གི་རིག་པ་ལ་སྐུ་གསུམ་འདུ་འབྲལ་མེད་པར་ཚང་སྟེ། ངོ་སྤྲོད་སྤྲས་པ་ལས། ཀུན་ཏུ་བཟང་པོའི་སྣང་གསལ་མེ་ལོང་འདི། ། ཕྱོགས་མཐུན་དཔེ་ཡི་རང་བཞིན་རྟོགས་པར་བྱེད། །རྟོགས་པའི་དོན་དེ་རང་སྣང་ངོ་སྤྲོད་ཡིན། །དང་པོ་ཀུན་བཟང་གནས་ལུགས་ངོ་སྤྲོད་ནི། །རིག་པ་ཟང་ཐལ་གནས་པས་མན་ཤེལ་འདྲ། །རིག་པ་རྟོག་མེད་གསལ་བས་མན་ཤེལ་འདྲ། །རིག་པ་ལྷུན་གྲུབ་གནས་པས་མན་ཤེལ་འདྲ། །རིག་པ་མ་འགགས་ཕྱོགས་མེད་མན་ཤེལ་འདྲ། །ཞེས་སོ། །གཉིས་པ་དེ་ལས། འཁོར་འདས་ཀྱི་གྱེས་གཞི་ངོ་སྤྲད་པ་ནི། ཤེལ་ཉི་མ་ལ་ཕྱར་ནས། ནང་འོད་གཉིས་ཕྱིར་བསྟན་ལ། རྒྱུ་བདག་ཉིད་གཅིག་པའི་མ་རིག་པ་རྒྱུའི་རྐྱེན། ཁ་དོག་ལྔ་ལྡན་ཡུལ་གྱི་རྐྱེན། འོད་དཀར་པོ་དེ་ཀུན་ཏུ་ཚོལ་བ་ཡིད་མཚུངས་པ་དེ་མ་ཐག་པའི་རྐྱེན། ཐོག་མའི་འགྱུ་བ་དེ་འོད་དང་ལྷན་ཅིག་ཤར་བས་ལྷན་ཅྀག་སྐྱེས་པའི་མ་རིག་པ་ཤེས་བྱའི་སྒྲིབ་པར་ཤར་བའི་དུས་སོ། །འདི་ལ་འཁྲུལ་གཞི་ཞེས་གསུངས་ཀྱང་གྲོལ་འཁྲུལ་གཉིས་ཀའི་གཞིར་འདུག་པས་ཀྱེས་གཞིར་འཐད་དོ། ། གསུམ་པ་ཀུན་ཏུ་བཟང་པོའི་གྲོལ་ཚུལ་ནི། ཤེལ་འོད་ལྔ་ལྡན་གྱི་ཐོག་ཏུ་དཀར་པོ་བཞག་ནས་ནང་དུ་བསྡུས་པའི་དཔེས་མཚོན་ཏེ། འོད་ལྔ་རང་སྣང་གི་དཔེ་དཀར་པོ་སྐད་ཅིག་ལ་རིག་ནས་དེ་ཐོག་ཏུ་བཞག་པས་གྲོལ་པའི་དཔེ། ནང་དུ་བསྡུས་པ་རྩལ་གཞི་ཐོག་ཏུ་ཐིམ་པས། དབྱིངས་སུ་ཡེ་ཤེས་འཁྱིལ་ནས་མི་གཡོ་བའི་དཔེ་སྟེ། སྐད་ཅིག་གཅིག་གིས་བྱེ་བྲག་ཕྱེད། །སྐད་ཅིག་གཅིག་གིས་རྫོགས་སངས་རྒྱས། །ཞེས་པ་དང༌། །དང་པོའི་སངས་རྒྱས་རྒྱུ་མེད་པ། ། ཞེས་གསུངས་པ་བཞིན་ནོ། །བཞི་པ་མ་རིག་པ་སེམས་ཅན་གྱི་འཁྲུལ་ཚུལ་ནི། ཤེལ་འོད་བསྟན་ལ་འོད་ལྔ་ཡུལ་གྱི་འཁྲུལ་གཞི་ལ། དཀར་པོ་ཀུན་ཏུ་ཚོལ་བའི་ཡིད་ཀྱིས་རང་སྣང་དུ་ངོ་མ་ཤེས་པར་གཞན་དུ་བཟུང་བས་ཀུན་ཏུ་བརྟགས་པའི་མ་རིག་པ་ཤར་ནས། རང་ངོ་མ་ཤེས་པས་ལྷན་ཅིག་སྐྱེས་པའི་མ་རིག་པ་མཚུངས་ལྡན་དུ་ཡོད་པས། རིག་པ་ལྡང་ཉལ་གྱིས་འཁྲུལ་པ་སྣ་ཚོགས་སུ་ཤར་ཏེ། འོད་ལྔས་ཕྱི་ཡུལ་ནང་ལུས་ཀྱི་འཁྲུལ་པ་བྱས། །རིག་པ་རྟོག་པར་འཁྲུལ་བས་ལས་དང་ཉོན་མོངས་པའི་འཁྲུལ་པ་སྐྱེས་ནས། འགྲོ་དྲུག་སོ་སོའི་གནས་དང༌། ལུས་དང༌། སེམས་སུ་བག་ཆགས་པ་ནི། ཤེལ་གྱི་རང་འོད་ཁ་དོག་སྣ་ཚོགས་ཀྱི་སྟེང་དུ། འོད་དཀར་པོ་དེ་རེས་མོས་ཀྱིས་ལན་ལྔར་བཞག་པ་ལ་ངོ་སྤྲད་དོ། །འོད་དཀར་པོ་སེམས་ཀྱི་རྟོག་པ་དེས་འོད་ལྔའི་དཀར་པོ་ལ་བཟུང་བས་ཆུར་འཁྲུལ་ཞེ་སྡང་བསྐྱེད། སེར་པོ་ལ་བཟུང་བས་ས་དང་ང་རྒྱལ་བསྐྱེད། དམར་པོ་ལ་བཟུང་བས་མེ་དང་འདོད་ཆགས་བསྐྱེད། ལྗང་ཀུ་ལ་བཟུང་བས་རླུང་དང་ཕྲག་དོག་བསྐྱེད། མཐིང་ཀ་ལ་བཟུང་བས་ནམ་མཁའ་དང་གཏི་མུག་བསྐྱེད། སྣོད་བཅུད་ཀྱི་ཁ་དོག་ཏུ་འཁྲུལ་ལོ། །དེ་ཡང་འོད་ལྔས་ཡུལ་དང་ལུས་ཀྱི་འབྱུང་བ་བསྐྱེད་ཅིང༌། སེམས་ཀྱིས་ལས་དང་ཉོན་མོངས་པ་ལས་བདེ་སྡུག་སོ་སོར་བསྐྱེད་ནས་འཁོར་བར་འཁྲུལ་བ་ངོ་སྤྲད་དེ། དེ་སྐད་དུ་ཡང༌། ངོ་སྤྲོད་སྤྲས་པ་ལས། འཁྲུལ་པ་རྐྱེན་ལས་བྱུང་བས་མན་ཤེལ་འོད་དང་འདྲ། དངོས་པོ་སྣ་ཚོགས་སྣང་བས་མན་ཤེལ་འོད་དང་འདྲ། སྣང་ཡང་ངོ་བོ་འགྱུར་མེད་མན་ཤེལ་འོད་དང་འདྲ། ཟད་མེད་འཕེལ་བ་མེད་པས་མན་ཤེལ་འོད་དང་འདྲ། །ཞེས་སོ། །ལྔ་པ་འཁྲུལ་དུས་སེམས་ཅན་ལ་འོད་གསལ་གནས་ཚུལ་ནི། ཤེལ་འོད་བསྟན་ལ། སྙིང་དབུས་འོད་རྩའི་སྦུབས་ན། རིག་པའི་ངོ་བོ་ཤེལ་སྒོང་ལྟར་དྲི་མ་མེད་ཅིང༌། སྟོང་པ་ཆོས་སྐུའི་ངང་ནས་སྐུ་དང་ཡེ་ཤེས་ནང་གསལ་གྱི་གདངས་ལས། མིག་ཏུ་ཤེལ་སྦུག་ཅན་ནས་ཕར་འོད་གསལ་སྣང་བ་འོད་ལྔར་ངོ་སྤྲད། སྙིང་ནས་གློ་བར་འབྲེལ་བའི་ནང་ན་རླུང་གི་རྟ་བྱས་པའི་རིག་གདངས་མི་ལྟ་བུ་དབྱེར་མེད་དུ་ཡོད་པ་ལ་སེམས་ཞེས་བྱ་སྟེ། དབང་པོའི་སྒོ་སོ་སོ་ལ་ཐོན་ནས་རྩལ་རྟག་པར་འཕྲོ་བ་འོད་དཀར་པོས་ངོ་སྤྲད་དོ། །དེ་ཡང་འོད་ལྔ་ཡེ་ཤེས་ཀྱི་དཔེ། གཞི་འཛིན་པའི་རིག་པ་སྙིང་གར་གནས་པ་ལ་ངོ་སྤྲད་དོ། དཀར་པོ་དེའི་གདངས་སམ་རྩལ་སེམས་ཀྱི་དཔེ་མཚན་ཉིད་སྣ་ཚོགས་ལ་རྟོག་དཔྱོད་པས་མཚན་ཉིད་འཛིན་པའི་རིག་པར་ངོ་སྤྲད་དོ། །དྲུག་པ་ཉམས་སུ་བླང་ཚུལ་ནི། ཤེལ་འོད་ལྔ་པོའི་སྟེང་དུ་དཀར་པོ་བཞག་ནས། མི་གཡོ་བའི་དཔེས། རིག་པ་སྟོང་པའི་ངང་ལས་གསལ་བའི་འོད་གདངས་ཕྱིར་ནམ་མཁའི་དཀྱིལ་དུ་སྣང་བ་ནི། ཡུལ་སྣང་གི་རིག་པ་རྡོ་རྗེ་ལུ་གུ་རྒྱུད་ཅེས་བྱ་སྟེ། དེ་ལ་གཏད་དུས་སེམས་འོད་གསལ་ཡེ་ཤེས་ཀྱི་ངང་དུ་ཐིམ་ནས་ཡེ་ཤེས་འབའ་ཞིག་ལ་གནས་པས་སྟོང་གསལ་སྤྲོས་པ་དང་བྲལ་བའི་ཡེ་ཤེས་ཁོང་ནས་ཤར་བ་ནི། ཡེ་ཤེས་ཉམས་སུ་ལེན་པའོ། །ཡང་འོད་དཀར་པོ་ཤེལ་ནང་དུ་ཐིམ་ཞིང་ཡང་མཆེད་པའི་དཔེས། རྣམ་རྟོག་གང་ཤར་གྱི་སྟེང་དུ་བཅོས་བསླད་མེད་པར་བཞག་དུས། རྩལ་གཞི་ལ་ཐིམ་ནས་ཆོས་སྐུ་སྟོང་པའི་ངང་ལ་གནས་པ་དང༌། ཡང་རྟོག་པ་ཤར་དུས་དེ་བཞིན་དུ་ངོ་སྤྲོད་དོ། །འོད་ལྔ་དང་དཀར་པོ་གཉིས་ཀ་ཤེལ་ནང་དུ་བསྡུས་ནས་མི་གཡོ་བའི་དཔེས། མཉམ་བཞག་རྟོག་པ་མེད་པའི་ངང་དུ་བཞག་དུས། འོད་སྣང་དང༌། ཤར་གྲོལ་གྱི་ཐབས་གཉིས་གང་ལ་ཡང་མ་བསྟན་པར། བློ་འདས་ཀ་དག་གི་རང་བཞིན་བརྗོད་མེད་རང་གནས་ཆེན་པོའི་དགོངས་པ་ལ། ནང་དུ་གནས་པར་ངོ་སྤྲད་དོ། མདོར་ན་སེམས་ཀྱི་ངོ་སྤྲད་ཤར་གྲོལ། ཡེ་ཤེས་ཀྱི་ངོ་སྤྲད་མངོན་གསུམ། གཉིས་མེད་ཀྱི་ངོ་སྤྲད་བློ་འདས་ཏེ། ཉམས་སུ་ལེན་ཚུལ་གསུམ་དུ་ངོ་སྤྲད་ནས་ཉམས་སུ་བླངས་པས། གཞི་ལ་ཡོད་པའི་ངོ་བོ་ཉིད་ཀྱི་ཆོས་སྐུ་ལམ་ཤེས་རབ་ཀྱིས་ཉམས་སུ་བླངས་པས། ཤེས་རབ་སྐུ་རུ་སྨིན་ནས་གྲོལ་བར་བྱེད་དོ། །དེ་ཡང་གཞིའི་ངོ་བོ་ཉིད་ནི་འཁྲུལ་གྲོལ་གང་དུའང་མ་ཆད་ལ། རྐྱེན་གྱིས་གཉིས་ཀའི་གཞི་བྱེད་པས། དེ་ལས་ཤེས་རབ་སྐྱེད་ནས་ཉམས་སུ་ལེན་པ་གལ་ ཆེའོ། །བདུན་པ། བར་དོའི་འཆར་ཚུལ་ནི། ཤེལ་འོད་བསྟན་ལ་ཕྱིས་བྱུང་ནུབ། ནང་འབྱུང་འགགས། གསང་འབྱུང་འོད་གསལ་གྱི་དཀྱིལ་འཁོར་འདི་བཞིན་དུ་འཆར་ཏེ། དང་པོ་མིག་གཉིས་ནས་ཐུགས་རྗེ་རྒྱུན་གྱི་ཟེར་ཐག་འཆར་བ་ལྔ་ལྡན་ལ་ངོ་སྤྲད་ལ། དཀར་པོ་དེ་ཐོག་ཏུ་བཞག་པས་སྣང་བ་རང་སྣང་དུ་ཤེས་ནས། དེ་ཐོག་ཏུ་བཞག་པས་གྲོལ་བའི་དཔེ། འོད་གཉིས་ནང་དུ་བསྡུས་པས་རང་སྣང་གདོད་མར་གྲོལ་བའི་ཚུལ་ངོ་སྤྲད་དོ། །དེའི་དབུས་སུ་སྒྲ་འོད་ཟེར་གསུམ་ཤེལ་འོད་མྱུར་བར་བསྐོར་ལ་ངོ་སྤྲད་དོ། །དེ་ནས་འོད་ལྔའི་སྣང་བས་ཚོམ་བུའི་དཀྱིལ་འཁོར་ཡེ་ཤེས་ལྔར་རང་ངོ་ཤེས་པ་ལས་འཆར་བ། འོད་དཀར་པོ་ལྔ་ལྡན་ལ་བསྲེས་པས་ངོ་སྤྲད། དེ་ཉིད་ནང་ཐིམ་གྱིས་གདོད་མར་གྲོལ་བ་ལ་ངོ་སྤྲད། དེ་ནས་འོད་ལྔས་ལྷུན་གྲུབ་ཀྱི་སྣང་བ་དང་དཀར་པོ་བསྲེས་པས་རང་ངོ་ཤེས་པ་དང་ནང་དུ་ཐིམ་པས་གདོད་མར་གྲོལ་བར་ངོ་སྤྲད་དོ། ཁྱད་པར་དུ་ཤེལ་ལས་འོད་འཆར་བས་རྩ་དར་དཀར་གྱི་སྐུད་པ་འདྲ་བ་ལས་ཡེ་ཤེས་འཆར་བར་ངོ་སྤྲད་དོ། །གཞི་ལས་ཤར་བའི་འོད་གསལ་ཤེས་རབ་ཀྱིས་ངོ་ཤེས་པས་ཆོས་སྐུ་གདོད་མར་སྨིན་པར་བྱེད་དོ། །ངོ་སྤྲོད་སྤྲས་པ་ལས། གཞི་ཉིད་འབྲས་བུར་སྨིན་བྱེད་ཤེས་རབ་སྟེ། །ཤེས་རབ་སྐུ་རུ་སྨིན་པ་ཡིས། །ངོ་བོ་ཉིད་ཀྱི་ཆོས་སྐུ་སྟེ། །ཡེ་ཤེས་ཆོས་ཀྱི་སྐུ་རུ་སྨིན། །ཞེས་སོ། ། བརྒྱད་པ་འབྲས་བུར་གྲོལ་ཚུལ་ནི། ཤེལ་འོད་རང་ཐིམ་ལ་གནས་པས། ནང་གསལ་ཐམས་ཅད་མཁྱེན་པའི་ཡེ་ཤེས་ཀྱི་སྐུ་དང་ཡེ་ཤེས་འདུ་འབྲལ་མེད་པ་མི་གསལ་གསལ་བའི་བདག་ཉིད་ཅན་དུ་ངོ་སྤྲད་དོ། །དེ་ཡང་འོད་ལྔ་རང་ཐིམ་གྱིས་སྐུ་ལྔ་ཡེ་ཤེས་ལྔ་དང་བཅས་པ་མཚོན་ནོ། །དཀར་པོ་རང་ཐིམ་གྱིས་ཐུགས་རྗེའི་གདངས་མ་འགགས་པར་ཡོད་པ་མཚོན་ནོ། །ཤེལ་ཟང་ཀ་དེས་ཀ་དག་གི་ཡེ་ཤེས་ཆོས་སྐུ་མཚོན་ནོ། །དེ་ཡང་དབུ་མ་རབ་ཏུ་མི་གནས་པའམ། རྫོགས་ཆེན་པས་ཀ་དག་ལ་ཡེ་ཤེས་མེད་པར་འདོད་པ་ནི། ཕྱིར་གསལ་ལ་མེད་པ་ཙམ་ལ་དགོངས་ཀྱི་དོན་ལ་མེད་ན་ཆོས་སྐུའི་ངང་ལས་གཟུགས་སྐུ་མི་འཆར་བའི་སྐྱོན་ཡོད་པས་ཕྱང་ཆད་ལ་སོང་བ་ཡིན་ནོ། །དེས་ན་འཁྲུལ་པ་རྩད་ནས་ངག་ཀྱང་གདོད་མའི་ངང་ལས་སྐུ་གཉིས་མི་འགགས་པར་འཆར་པས། འོད་ལྔ་དཀར་པོ་དང་འདྲེས་པའི་ཆ་དེ་མེ་ལོང་ཡེ་ཤེས་ཏེ། དེའི་ངང་ལས་ལོངས་སྐུའི་སྣང་བ་དང་ཡེ་ཤེས་གཞན་བཞི་འཆར་བའི་རྟེན་བྱེད་པའོ། །ཡང་ཤེལ་ཀ་དག་ཆོས་སྐུའི་དཔེ་དེའི་འོད་ལྔ་ནང་གསལ་ལས་ཉི་མའི་རྐྱེན་གྱིས་ཕྱིར་གསལ་དུ་འོད་ལྔ་འཆར་བ་ལྟར། གདུལ་བྱའི་རྐྱེན་གྱིས་ཆོས་སྐུའི་ངང་ནས་ནང་གསལ་མེ་ལོང་ཡེ་ཤེས་ལས། ཕྱིར་གསལ་ལོངས་སྐུ་ངེས་པ་ལྔ་ལྡན་འཆར་བའི་དཔེའི། འོད་ལྔའི་ནང་ནས་འོད་དཀར་པོ་ལ་སོགས་སུ་འཆར་བའི་དཔེས། ལོངས་སྐུ་ལས་སྤྲུལ་སྐུ་འཆར་བ་མཚོན་པའོ། །འདི་དག་དབྱིངས་ལས་ཡེ་ཤེས་མཆེད་པས་སེམས་ཅན་གྱི་དོན་མཛད་པ་བྱུང་ཚུལ་ལོ། །དེ་ནས་ཡང་སྤྲུལ་སྐུ་མྱ་ངན་ལས་འདས་པ་ལྟ་བུའི་ཚེ་ལོངས་སྐུར་ཐིམ། ལོངས་སྐུ་ཆོས་སྐུར་ཐིམ་པས། སངས་རྒྱས་མྱ་ངན་ལས་འདས་པ་ཞེས་བྱའོ། །ཤེལ་འོད་ནང་དུ་བསྡུས་པས་ངོ་སྤྲད་དོ། །དེ་ཡང་སྔོན་ཐོག་མཐའ་གང་དུ་ཡང་མ་ཕྱེ་བའི་དུས་ཀྱི་གཞི་དེ་དང༌། ངོ་བོ་ལ་ཁྱད་མེད་ཀྱང་རིག་མ་རིག་གི་ཁྱད་ཀྱིས་ཕྱིས་ཤེས་རབ་ཀྱིས་གྲོལ་ནས། ནང་གསལ་གདོད་མའི་གཞིར་ཐིམ་དུས་ཐམས་ཅད་ཡེ་ཤེས་ཀྱི་སྐུར་སངས་རྒྱས་པས་ཐམས་ཅད་མཁྱེན་པ་ཞེས་བྱ་ལ། གང་དུའང་མ་ངེས་པའི་དུས་ཀྱི་གཞི་དེ་ལ་རང་བྱུང་ངོ་བོ་ཉིད་ཀྱི་སྐུ་འམ་སྤྱི་གཞི་ཞེས་བརྗོད་པ་ཡིན་ནོ། །དེ་ཡང་རིག་པས་ཐོག་མར་གྲོལ་དུས་ཀྱི་གཞི་དེ་ཉིད་རང་བྱུང་གི་ངོ་བོ་ཉིད་ཀྱི་སྐུ་དང་དབྱེར་མེད། སྐུ་གཉིས་ཀ་དག་དང་འདྲེས་པ་ལེན་ཚྭ་ཆུ་ལ་ཐིམ་པ་ལྟར་དབྱེར་མེད་ངོ་བོ་ཉིད་སྐུ་དང་འདྲེས་པས་ནང་གསལ་སྐུ་དང་ཡེ་ཤེས་འདུ་འབྲལ་མེད་པའི་དགོངས་པ་ལ་རྟག་ཏུ་བཞུགས་པའོ། །འདིའི་ངང་ལས་ལོངས་སྐུ་དང་སྤྲུལ་སྐུ་ཤར་དུས་ངོ་བོ་ཉིད་སྐུ་གཡོས་པ་མེད་དེ། རྒྱུད་བླ་མ་ལས། ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་ན། །དགའ་ལྡན་གནས་ནས་འཕོ་བ་དང༌། ། ཞེས་པ་ལ་སོགས་པ་བྱུང་བ་བཞིན་ནོ། །ཚུལ་འདི་དག་རང་གིས་ཤིན་ཏུ་ངེས་པས་གཞན་ལ་བསྟན་པར་བྱའོ། །འ་འོལ་ཙམ་དུ་མ་ཡིན་ནོ། །འདི་ཉིད་ལེགས་པར་རྟོགས་ན་རྡོ་རྗེ་སྙིང་པོའི་དགོངས་པ་མཐར་ཐུག་རྟོགས་པས། ཚེ་འདི་ཉིད་ཀྱིས་འཁོར་བ་ལས་ལྡོག» «།ཐར་པ་རང་ལས་རྙེད། བྱང་ཆུབ་སྙིང་པོར་ཕྱིན་ནས་སངས་རྒྱས་པ་ཡིན་ནོ། །ཆོས་ཚུལ་ཉི་མ་འོད་གསལ་སྙིང་པོ་ འདིས། །འགྲོ་ཀུན་གདོད་མའི་དབྱིངས་སུ་རང་གྲོལ་ཏེ། །སྐུ་དང་ཡེ་ཤེས་འདུ་འབྲལ་མེད་པ་ཡིས། །རང་གཞན་དོན་གཉིས་ལྷུན་གྱིས་གྲུབ་པར་ཤོག» «།རང་གནད་གསང་བ་ཡང་གསང་རྨད་དུ་བྱུང་བ་ལས། །དཔེ་དོན་གསལ་བྱེད་སྒྲོན་མེ་ཞེས་བྱ་བ། །ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་བཀོད་པ་རྫོགས་སོ།། །། དཔལ་སྔགས་ཀྱི་བདག་མོ་དང༌། གཟའི་དགེ་བསྙེན་ཆེན་པོ་དང༌། དམ་ཅན་རྡོ་རྗེ་ལེགས་པས་བཀའ་འདི་སྲུངས་ཤིང༌། འདྲ་མིན་གྱི་ཡི་གེ་འཆོས་པ་བྱུང་ན་ཁ་ནས་ཁྲག་སྐྱུགས། མིག་འབྲས་ཐང་ལ་ཕྲུལ་ཅིག» «ས་མ་ཡ། རྒྱ་རྒྱ་ རྒྱ། །དགེའོ། དགེའོ། །དགེའོ།། །།

[edit]

This page is a cleaned copy of the following rywikitexts page, which stay unchanged:

Cleaning (21 November 2026): removed 1 running heads, 3 Word page fields. The «» marks are kept in the text: they enclose the small-print notes of the print, which are shown in small print with the marks hidden.

Part of the Longchenpa Collected Works (about this project).