Sems nyid ngal gso - Part eleven

<tib size="30" tibpos="bottom">rdzogs pa chen po sems nyid ngal gso zhes bya ba bzhugs so/</tib>

<tib> /de ltar chos kun mnyam pa'i don mthong nas/
/gnas lugs ngang la ji bzhin gzhag pa gces/
/de yang dbang po'i rim pas bstan pa ste/
/dbang po yang rab gnas lugs rtogs pas grol/
/sgom dang bsgom bya gnyis med don mthong nas/
/snang srid gzhi grol sems nyid bya btsal med/
/phyogs bral rig pa chu bo'i rgyun bzhin 'char/
/thun mtshams ris med 'di yin nges gzung med/
/thams cad rang grol kun tu bzang po'i zhing/
/rtags dang tshad med rang byung gzhi klong yangs/
</tib><tib> /ji bzhin ngang la ye bzhin gnas pas na/
/gol dang gol sa rtsal sbyong bogs 'byin med/
/thob dang ma thob med par thag chod pas/
/'bras bur smon med da lta rdzogs sangs rgyas/
/de 'dra'i rnal 'byor nam mkha' rab 'byams yin/
/'bring dang tha mas goms la brtson dgos te/
/ji srid bdag 'dzin dbyings su ma nub par/
/de srid sna tshogs thabs kyis bsgom par bya/
/khyad par rnam rtog ngan pas srid par 'khrid/
/de nyid grol phyir bsam gtan thabs la brten/
</tib><tib> /phyi nas shes rab mtha' grol klong yangs 'char/
/zhi gnas kyis ni nyon mongs mgo gnon la/
/lhag mthong gis ni nyon mongs rtsa ba 'byin/
/des na rab kyis ngan rtog chos skur lhongs/
/bzang ngan med na gnyen po bsgom mi dgos/
/'bring gis ngang dvangs zung 'brel bsgoms pa yis/
/bzang ngan rtog pa dbyings su nub gyur nas/
/zung 'brel rtogs pa nam mkha' lta bu 'char/
/tha mas thog mar zhi gnas btsal ba yis/
/gang dmigs de la brtan pa thob par sal/
</tib><tib> /de nas lhag mthong so sor rtog bsgoms pas/
/phyi nang snang sems gzhi grol chen por 'char/
/des na dbang po'i rim pa shes pa gces/
/da ni dbang po 'bring gi sgom pa bstan/
/ji ltar chu ni dba' rlabs rnyog pa na/
/dvangs pa'i gzugs brnyan mi gsal g.yo ba ltar/
/yid ni mi bsrun kun rtog 'phyar zhing g.yo/
/sna tshogs spros la kun tu 'chel ba na/
/sems nyid 'od gsal dvangs pa'i ye shes dang/
/spyan dang mngon shes gza' skar mi 'char bas/
</tib><tib> /gcig tu mi g.yo mnyam par gzhag pa gces/
/lus ni chos bdun ri rgyal lta bu la/
/dbang po mtha' bral rdzing bu'i gza' skar 'dra/
/sems nyid stong gsal dvangs pa'i nam mkha' bzhin/
/bying rgod gnyis med spros dang bral bar gzhag
/de tshe rang bzhin gcig ste gdod ma'i ngang/
/gzung dang 'dzin pa mi dmigs chos kyi sku/
/dri med 'od gsal nyi ma'i snying po ni/
/bde gsal mi rtog mtha' dbus med pa 'char/
/snang dang stong pa thams cad phyam gcig la/
</tib><tib> /yod dang med pa kun gyi mtha' las 'das/
/srid dang zhi ba gnyis su mi rtog pa/
/shes dang shes bya gcig pa'i ngo bo nyid/
/mnyam dang mi mnyam med pa'i chos nyid mthong/
/'di ni 'phags pa'i bden mthong ye shes rgyu/
/phyi nas de bzhin nyid mthong blo mig gis/
/rgyal ba'i chos sku phun tshogs bsgrub pas na/
/skal bzang rnams kyis rtag tu mnyam par zhog
/sems nyid ma skyes mkha' ltar dag pa'i ngang/
/sems byung mi dmigs sprin tshogs dengs pa bzhin/
</tib><tib> /yeng med spros dang bral ba'i shes pa yis/
/ji bzhin ngang la ye bzhin mnyam par shog
/dvangs shing stongs pa rgya mtsho lta bu la/
/gzung 'dzin rnyog bral dba' rlabs med par zhog
/stong zhing gsal la nam mkha' lta bu la/
/kun rtog sprin med phyogs lhung bral bar shog
/brtan zhing mi g.yo ri rgyal lta bu la/
/dgag sgrub gnyis med re dogs bral bar shog
/dag cing gsal la me long lta bu la/
/snang yul ma 'gags gzugs brnyan lta bur zhog
</tib><tib> /ye grol sor gzhag 'ja' tshon lta bu la/
/bying rgod gnyis med dag cing gsal la zhog
/gzhan du ma yengs mda' mkhan lta bu la/
/gnyug ma'i ye shes spro bsdu bral bar zhog
/thag chod shes pa las zin lta bu la/
/re dogs gnyis med lhun gyis grub par shog
/'di ni rang bzhin dag pa'i ting nge 'dzin/
/zhi gnas lhag mthong zung du 'brel ba yin/
/skye med ngang dor gnas pas zhi gnas la/
/gsal stong spros dang bral bas lhag mthong nyid/
</tib><tib> /dbyer med ngo bo gcig pas zung du 'brel/
/de tshe zab zhi spros dang bral ba'i sems/
/smra bsam brjod du med pa'i don mthong bas/
/snang ba'i ye shes shin tu mi rtog pa/
/'od gsal gsar pa pha rol phyin zhes bya/
/de nyid mthong bas sems ni rab zhi zhing/
/phyi nang chos la dgag sgrub zhen pa chung
/stong pa'i ngang nas snying rje phyogs med 'char/
/rang gzhan don du dge la spyod cing bskul/
/dben par dga' zhing rnam g.yeng 'du 'dzi nyung/
</tib><tib> /rmi lam na yang dge ba'i chos la spyod/
/des na thar pa'i lam sna zin pa yin/
/de nas ches cher gong du goms pa yis/
/sems gsal ye shes sngon pas rgya che zhing/
/snang ba rmi lam sgyu mar rab tu rtogs/
/chos rnams gnyis med ngang du ro gcig pas/
/skyes dang ma skyes med par mthong ba'i tshe/
/mched pa'i ye shes shin tu mi rtog pa
/bsam gtan dga' bas brgyan pa thob pa yin/
/de tshe lus sems sngon pas rab dag cing/
</tib><tib> /thabs dang shes rab dri med rtogs pa 'char/
/mngon shes ldan zhing snying rjes phan pa 'grub/
/srid pa skyo bas sems ni nges par 'byung/
/rmi lam na yang chos kun de 'drar rtogs/
/lus kyi phyi nang shig sro 'bu srin med/
/bying rgod bral zhing nyin mtshan ting 'dzin 'grub/
/skye bo des ni 'phags lam myur du mthong/
/de nas ches cher goms pas sngon pas lhag
/ting 'dzin rtogs pa'i nyi ma sngon med 'char/
/chos kun tshul gcig mnyam pa'i don mthong nas/
</tib><tib> /spyan dang mngon shes sgrib pa med mnga' bas/
/zhing khams brgya stong bye ba dpag med mthong/
/de tshe zag med 'phags pa'i ye shes te/
/thob pa zhes bya mngon du gyur pa yin/
/de las ches cher gong du 'phel ba yis/
/rtogs pa'i ting 'dzin yon tan grangs med cing/
/rtog dang mi rtog mnyam pa'i chos nyid las/
/gzungs sprin ye shes dri med rgya che zhing/
/mnyam par gzhag dang ma bzhag gnyis med par/
/rtag tu mnyam gzhag sprus pa bsam yas ston/
</tib><tib> /tshad med zhing dang ye shes gzigs pa 'jug
/rtsa khams dag cing rlung sems yon tan mchog
/shin tu rgya che dri ma med pa na/
/nye bar thob pa zhes bya'i ye shes te/
/'phags lam rdzogs nas myur du byang chub 'thob/
/'di ni 'od gsal snying po'i theg pa ste/
/skal bzang 'bras bu tshe 'dir grol ba yin/
/dbang po tha mas bsgom pa'i rim pa yang/
/dang por zhi ga so sor rtsal sbyang ste/
/brtan par gyur nas zung 'jug dbyer med bsgom/
</tib><tib> /de yang thabs tshul dpag med tshul bslab/
/thog mar zhi gnas btsal ba'i rim pa ni/
/dben pa'i phyogs su stan la rab 'dug nas/
/dbugs dbyung 'jug pa'i kha dog grangs rnams kyis/
/nyin 'gar rnam rtog 'dul zhing gnas par bya/
/de nas byams sogs bzhi dang sems gnyis dang/
/bskyed rim ngang ni bris sku glegs bam sogs/
/dge ba'i yul ni gang yang rung zhig la/
/dmigs pa rtse gcig ma yengs mnyam par gzhag
/de ltar bzhag pas sems ni las rung zhing/
</tib><tib> /gzhan du mi 'phro gar gtad yul la zin/
/ji tsam bzhag pa de tsam mnyam par gnas/
/lus ngag sems ni dga' bdes khyab pa na/
/rtse gcig mi g.yo'i zhi gnas grub pa yin/
/de nas lhag mthong don la bslab pa ni/
/phyi rol snang srid 'khor 'das chos 'di rnams/
/sna tshogs snang bas rmi lam sgyu 'dra zhing/
/gzugs brnyan sprul pa sgra brnyan dri za'i grong/
/mig yor smig rgyu 'dra zhing snying po med/
/snang bas stong ste rang bzhin stong pa'i ngang/
</tib><tib> /thams cad nam mkha' 'dra zhing bdag med pas/
/skye med spros dang bral bar mnyam pa bzhag
/de yis phyi rol chos la bdag med cing/
/gzung dang gzung yul rang bzhin med par rtogs/
/de nas nang gi sems la 'di ltar brtag
/sna tshogs rtog la ngo bo med pa'i sems/
/dgag sgrub bden brdzun bde sdug btang snyoms sogs/
/yul la 'phro zhing ngos gzung med pa khyod/
/dang po gang 'ongs da lta gang na gnas/
/tha ma gar 'gro dbyibs dang kha dog ci/
</tib><tib> /snyam du brtags tshe 'di ltar mthong bar 'gyur/
/sems ni dang por skye ba'i rgyus stong zhing/
/bar du gnas dang tha mar 'gag pas stong/
/kha dog dbyibs med ngo bo ngos gzung med/
/'das pa 'gags shing ma 'ongs ma skyes la/
/da lta mi gnas phyi nang gang na'ang med/
/nam mkha' 'dra zhing spros dang bral bar shes/
/de tshe sems la gang yang mi bsam par/
/chad pa ngal gso bzhin du lhod kyis glod/
/ci yang mi bsam yid la byed pa bor/
</tib><tib> /thams cad gnyis med mnyam pa'i ngang la gzhag
/de yis ngar 'dzin gang zag bdag med cing/
/'dzin pa'i sems la rang bzhin med par rtogs/
/de nas zung 'jug gnyug ma'i ye shes ni/
/snang sems gnyis med chu dang chu zla bzhin/
/gnyis su gzung bas srid par 'khrul na yang/
/gnyis med shes pas mya ngan 'das zhir 'gro/
/de bas gnyis med don la 'di ltar bslab/
/chos rnams ma skyes sems kyi ngo bo nyid/
/sems kyi rang bzhin dag cing dri ma med/
</tib><tib> /dri med stong gsal spros dang bral bar gzhag
/de yis nyon mongs rnyog pa rab zhi zhing/
/rnam par mi rtog ye shes chen por gnas/
/rig dang mngon shes ting 'dzin 'grub 'gyur zhing/
/gzung 'dzin gnyis med mtha' bral dbu mar rtogs/
/de tshe sems ni nam mkha' lta bu la/
/yul ni mi dmigs rang bzhin spros dang bral/
/sgom dang bsgom bya med pa'i chos nyid la/
/bya rgyu byed mkhan med pas gdod ma'i ngang/
/dri med rang bzhin dag pa'i sangs rgyas yin/
</tib><tib> /gzung yul mi dmigs chu zla mig yor la/
/'dzin mkhan mi dmigs g.yo med phyogs lhung bral/
/snang sems gnyis med pha rol phyin pa'i ngang/
/zab zhi spros bral 'od gsal 'dus ma byas/
/bdud rtsi lta bu'i chos nyid khong du chud/
/'dzin med yangs pa'i ting 'dzin gru chen gyis/
/srid gsum rgya mtsho'i pha rol brgal bas na/
/gzhi bde'i steng du blo bde rgyun ma 'chad/
/rang bzhin rdzogs pa chen po'i ngang du phyin/
/gnas pas zhi gnas chos sku stong pa la/
</tib><tib> /gsal bas lhag mthong gzugs sku snang ba nyid/
/thabs dang shes rab tshogs gnyis bskyed rdzogs grub/
/lhag mthong rtogs pa'i shes rab bskyed byas nas/
/zhi gnas kyis ni de yi ngang la gnas/
/gang tshe gzung 'dzin dngos dang dngos med du/
/blo yi rnam par rab tu mi gnas pa/
/de tshe dbyings dang ye shes gnyis med par/
/sems dang sems byung dmigs pa med par zhi/
/rang bzhin gdod nas dag pa'i sems nyid la/
/gnas skabs glo bur kun rtog dag pa na/
</tib><tib> /snyoms 'jug dgu dang rdzu 'phrul mngon shes 'grub/
/ting 'dzin grangs med gzugs sprin lhun gyis grub/
/rang sa 'dod pa'i sems gang rtse gcig pa/
/de las rtog dang dpyod pa'i ting nge 'dzin/
/dga' bde'i yan lag bsam gtan dang po skye/
/de las rtog med dpyod pa'i ting nge 'dzin/
/sems gsal dga' bde'i rang bzhin gnyis pa skye/
/de las rtog dpyod gnyis med ting nge 'dzin/
/dga' bdes brlan pa'i yan lag gsum pa skye/
/de las dga' ba sdud pa'i ting nge 'dzin/
</tib><tib> /bzhi pa phan yon yan lag bcas pa skye/
/de las mkha' ltar dag cing dvangs pa'i sems/
/nam mkha' mtha' yas skye mched thob par 'gyur/
/de las chos kun sems nyid spros pa med/
/rnam shes mtha' yas skye mched thob par 'gyur/
/de las snang sems mi dmigs spros dang bral/
/ci yang med pa'i skye mched 'grub par 'gyur/
/de las yod med spros kun bral ba'i sems/
/yod min med min skye mched 'grub par 'gyur/
/de las sna tshogs nyon mongs spros pa'i sems/
</tib><tib> /rang bzhin 'gog pa zhi ba thob par 'gyur/
/de ltar mthar gyis snyoms 'jug dgu po yang/
/rim dang rim min thod rgal rtsal sbyangs pas/
/rang gzhan snga phyi'i tshe rabs las rnams dang/
/sems kyi spyod yul gang yin shes pa dang/
/'chi 'pho skye dang sgrib pas chod kyang mthong/
/gcig dang du mar rdzu zhing rnam par 'phrul/
/nyon mongs med cing ji snyed ji bzhin shes/
/zhing rnams bde gshegs sras kyis gang ba mthong/
/de tshe snang ba sgyu mar rab rtogs pas/
</tib><tib> /sgyu ma lta bu'i ting 'dzin nyid dang ni/
/sems kyi gdung bral rnyog pa rab zhi'i phyir/
/zla ba dri ma med pa'i ting 'dzin dang/
/chos kun mi dmigs mnyam pa'i ngang gcig pas/
/mkha' ltar gos pa med pa'i ting 'dzin sogs/
/brgya stong grangs med rab tu 'grub par 'gyur/
/lhag mthong gis ni rab tu rtogs pa'i don/
/zhi gnas dam pas rtse gcig pa'i gzung ba'i phyir/
/gzungs dang ting 'dzin zung 'brel lhun gyis grub/
/lam lnga'i rim pa bgrod las grol ba ste/
</tib><tib> /tshogs lam chung ngur lus tshor sems dang chos/
/dran pa nye bar gzhag pa bzhi bsgom zhing/
/'bring du 'dun dang 'bad rtsol brtson 'grus bzhis/
/dge dang mi dge'i zhen bzhi yang dag spong/
/chen por 'dun sems dpyod dang dran pa bzhis/
/rdzu 'phrul rten 'grub rkang pa bzhi po bsgom/
/sbyor lam bzhi ste drod dang rtse mo ru/
/dad brtson dran dang ting 'dzin shes rab kyis/
/dbang po lnga dang bzod pa chos mchog tu/
/dad sogs stobs lnga rab tu sgom par byed/
</tib><tib> /mthong ba'i lam ste rab tu dga' ba'i sar/
/dad brtson dran pa ting 'dzin shes rab dga'/
/shin tu sbyangs pa yang dag byang chub kyi/
/yan lag bdun po dag ni legs bsgom zhing/
/sgom lam chung 'bring chen po re re zhing/
/chung ngu'i chung ngu chung ngu'i 'bring dang ni/
/chung ngu'i che sogs sa dgu rim pa bzhin/
/dri ma med dang 'od byed 'od 'phro can/
/sbyang dka' mngon gyur ring song mi g.yo ba/
/legs pa'i blo gros chos kyi sprin rnams su/
</tib><tib> /yang dag lta dang rtog pa ngag dang las/
/'tsho rtsol dran pa ting 'dzin 'phags lam brgyad/
/de ltar byang chub phyogs chos sum cu bdun/
/slob pa'i lam bzhir bsgom pa'i mjug thogs su/
/mi slob sa la mi gnas mya ngan 'da'/
/de ltar sa dang lam rnams ma bgrod pa'i/
/sangs rgyas de 'dra nam yang 'byung ba med/
/bskal mang tshe rabs du ma tshe gang grol/
/de da kun kyang lam 'dir brten pas na/
/rgyu 'phras theg pa gang la zhugs rnams kyis/
</tib><tib> /sa dang lam rnams mkhyen nas bgrod par mdzod/
/de ltar zab zhi 'od gsal snying po yis/
/'gro kun sems kyi rnyog pa rab zhi nas/
/srid 'dir yun ring spros la 'chel ba yis/
/dub pa'i sems nyid di ring ngal sos shig
</tib><tib> /rdzogs pa chen po sems nyid ngal gso las/
/lam bsam gtan dri ma med pa zhi lhag/
/zung du 'brel ba'i le'u ste bcu gcig pa'o/
</tib>