Sems nyid ngal gso - Part nine

<tib size="30" tibpos="bottom">rdzogs pa chen po sems nyid ngal gso zhes bya ba bzhugs so/</tib>

<tib> /de ltar byang chub mchog tu sems bskyed nas/
/gsang sngags phyi nang bskyed rdzogs don la 'jug
/de yang thabs mang dka' ba med phyir dang/
/don gcig na yang 'jug tshul ma rmongs dang/
/dbang po shin tu rnon po'i dbang mdzad de/
/bya spyod rnal 'byor bla na med bzhi bstan/
/dus dang mi rigs dbang po'i rim pa ste/
/rdzogs ldan sum ldan nyis ldan rtsod ldan dang/
/bram ze rnge'u rigs rgyal rigs gdol ba'am dmangs/
/rtul po 'bring rnon shin tu rnon po la/
</tib><tib> /khrus dang gtsang sbra gtsor ston bya ba'i rgyud/
/lus ngag bya dang sems kyi sgom pa kun/
/cha mnyam ston pa spyod pa'i rgyud sde dang/
/sgom pa gtsor ston lus ngag spyod pa kun/
/grogs tsam ston pa rnal 'byor rgyud dang ni/
/sgo gsum bya bral gzung 'dzin mi dmigs par/
/sems kyi chos nyid 'od gsal brtul zhugs mchog
/gtsang sbra chung rnams ngor ni rnal 'byor che/
/de yang bya spyod rnal 'byor thub pa rgyud/
/kra'i ya u pa yo ga zhes bya'o/
</tib><tib> /de dag gsang sngags phyi ste lha rnams kyang/
/yab yum zung 'brel bsgom par mi nus shing/
/sha lnga bdud rtsi lnga sogs bsten mi byed/
/gtsang sbra kun tu spyod pas gnas pa yin/
/rnal 'byor bla med rgyud la'ang gsum yin te/
/pha ma gnyis su med pa bla na med/
/bskyed rdzogs gnyis med gtso bor ston pa ste/
/ma h'a a nu a ti zhes bya'o/
/lha yang 'khril sbyor dam rdzas khyad par can/
/gtsang btsog gnyis med thams cad ro gcig tu/
</tib><tib> /dkyil 'khor gcig gi rol par ston pa yin/
/bya bas rang nyid dman la lha nyid mchog
/rje khol tshul du bsgrub pas dngos grub len/
/spyod pas rang dang lha nyid mnyam par blta/
/rang nyid dam tshig mdun du ye shes lha/
/grogs po'i tshul gyis dngos grub len pa yin/
/rnal 'byor dngos gzhir gnyis su med pa la/
/sbyor rjes lha ni dgug gshegs gnyis su byed/
/chu la chu bzhag gnyis med dngos grub len/
/ma h'as rlung dang bskyed rim thabs gtso la/
</tib><tib> /a nus khams dang rdzogs rim shes rab gtso/
/a tis thams cad gnyis med ye shes gtso/
/kun kyi chos kun ye nas mnyam pa nyid/
/yin par shes pa'i tshul gyis nyams su len/
/bdag dang 'gro kun ye nas sangs rgyas pas/
/phung po khams ngad skye mched la sogs kun/
/dkyil 'khor gcig tu gsal btab rim gnyis bsgom/
/de yang skye bzhi'i rim pas sgom tshul bzhi/
/sgong skyes bag chags sbyang phyir sngon 'gro'i tshe/
/skyabs 'gro sems bskyed bskyed rim mdor bsdus nas/
</tib><tib> /bsod nams shing rab spyad drangs mchod pa'i mthar/
/rang bzhin med bsgom tshogs gnyis sngon song nas/
/gdod kyis bskyed rdzogs rgyas par bsgom pa ni/
/thog mar sgo nga de las bya skye bzhin/
/mdor bsdus rgyas pa'i bskyed rdzogs rim pas bsgom/
/mngal skyes bag chags sbyang phyir bstan pa ni/
/skyabs 'gro sems bskyed stong las sa bon dang/
/phyag mtshan las ni sku dang 'od zer sogs/
/rim gyis rgyal par bsgom gyis sngar bzhin du/
/mdor bsdus sngon du mi 'gro'i bskyed rdzogs ni/
</tib><tib> /ji ltar rlung sems thig le dkar dmar las/
/mer nur ltar dang mkhrang gyur la sogs nas/
/lus yongs rdzogs te btsa' ba'i bar bzhin no/
/drod gsher las skyes bag chags sbyang bya'i phyir/
/skyabs 'gro sems bskyed stong las lha rnams kyi/
/mtshan tsam brjod las lhar gsal bskyed rdzogs bsgom/
/ji ltar drod gsher 'dus pas grub pa'i lus/
/shin tu 'grub par sla bas btsa' ba bzhin/
/sa bon phyag mtshan spros pa dgos pa med/
/brdzus te skye ba'i bag chags sbyang bya'i phyir/
</tib><tib> /skad cig tsam gyis wal gyis bskyed rdzogs bsgom/
/ji ltar rdzus skyes skad cig snang ba bzhin/
/ming las rim gyis bskyed rdzogs bsgom mi dgos/
/de ltar sgom tshul rnam pa bzhi nyid kyang/
/gtso bor skye ba gang bsdus des bsgoms la/
/bag chags sbyang phyir kun gyis de bzhin bsgom/
/khyad par las dang po yis sgong skyes bzhin/
/cung zad brtan pas mngal skyes bzhin bsgoms la/
/brtan pa che bas drod gsher skyes bzhin bsgom/
/shin tu goms pa yang dag brtan pa yis/
</tib><tib> /rdzus skyes bzhin du skad cig dkrong bskyed bya/
/rdzogs rim de yang snang bcas snang med de/
/bskyed rim bsdus nam mkha' la sprin dengs bzhin/
/mi dmigs ngang du 'jog pa snang ba med/
/bskyed rim de nyid rdzogs par shes bya ste/
/snang dus nyid nas rang bzhin spros dang bral/
/ma yengs bsgom pa snang bcas rim pa bzhin/
/las dang po yis bskyed rim zhen pa dgag
/snang la bden par zhen pa'i gnyen po byed/
/brtan pa rnams kyis rdzogs rim zhen pa dgag
</tib><tib> /stong la mtshan mar zhen pa'i gnyen po byed/
/phyi nas gang snang bskyed rim thabs nyid la/
/'dzin med shes pa rdzogs rim shes rab nyid/
/dus rnams kun tu 'du 'bral med par 'chang
/bskyed rim snang 'di'i bden zhen 'gog pa ste/
/rdzogs rim sgyu mar zhen pa'i rtog pa spong/
/gang la snang stong bden zhen med pa na/
/bskyed rdzogs gnyis med rang bzhin dag pa yin/
/'di ni mthar thug rdo rje'i theg pa ste/
/dbang po rnon po tshe 'dir rdzogs sangs rgya/
</tib><tib> /de rjes gdul bya'i 'jig rten gang yod der/
/sangs rgyas mdzad pa sna tshogs lhun gyis grub/
/'di ni grangs med rdo rje 'chang rnams kyis/
/nye lam sbas pa shin tu zab mo ste/
/skal bzang tshe 'dir grol 'dod rnams kyis bsten/
/de yang gang mos rgyud sde'i rim pa la/
/brten nas rdzogs pa'i byang chub bsgrub par bya/
/'thog mar rig gtad rjes gnang dbang la sogs/
/rang rang gzhung nas gsungs pa'i lung mnos te/
/rang gi sems 'di yongs su smin par bya/
</tib><tib> /khyad par mchog gsang rnal 'byor chen po'i lam/
/smin byed dbang bzhi grol byed bskyed rdzogs te/
/bum dbang lus dang gsang bas ngag dang ni/
/shes rab ye shes yid dang tshig dbang gis/
/bag chags mtha' dag sbyong zhing dngos grub ster/
/dang po gsum gyis bsod nams tshogs rdzogs la/
/bzhi pas ye shes tshogs rdzogs de bzhin du/
/nyon mongs pa dang shes ba'i sgrib kun sbyong/
/de phyir smin byed dbang bzhi thob pa yis/
/grol byed bskyed rdzogs don la bslab par bya/
</tib><tib> /'dir ni dbang rdzogs dam tshig ldan pa yis/
/gnyis med a ti'i dgongs par 'jug 'dod pas/
/bde ba'i stan la skyil krung rab bcas nas/
/skyabs su 'gro dang byang chub sems bskyed de/
/chos rnams thams cad stong zhing bdag med pa/
/rang bzhin spros dang bral ba'i ngang nyid las/
/h'uM las steng 'og phyogs mtshams thams cad du/
/bsrung ba'i 'khor lo yangs shing rgya che ba/
/rtsibs bcu khro bo bcu yis mtshan pa ste/
/phyi nang me dpung 'bar ba'i dbus na dpal/
</tib><tib> /kun tu bzang po'i dkyil 'khor chen po ni/
/sgo bzhi gru bzhi rta babs bzhis brgyan zhing/
/rtsig pa lnga dang 'dod yon snam bu dang/
/pha gu dra phyed mda' yab pu shus mdzes/
/phyur bu'i thod pa rin chen rdo rje'i tog
/dur khrod brgyad kyis bskor ba'i dkyil 'khor dbus/
/seng ge glang chen rta dang rma bya dang/
/shang shang padma nyi zlas spras pa'i steng/
/rigs lnga so so'i yum dang sems dpa' brgyad/
/sems ma brgyad dang sgo ba yab yum brgyad/
</tib><tib> /thub pa drug rnams so so'i gnas bzhugs te/
/sku mdog phyag mtshan rgyan rnams rdzogs pa las/
/mu med 'od zer phyogs mtha' gtugs par 'phro/
/gtso bo'i thugs kar gzhi yi kun tu bzang/
/yab yum 'khril sbyor mtshan dpes brgyan pa'i sku/
/mkha' ltar dri med mthon mthing skyil krung tshul/
/tshon gang 'od kyi gong bu 'bar bar bsgom/
/de las 'od 'phros snang srid snod bcud sbyangs/
/thams cad rnam dag lha dang lha mo'i ngang/
/yi ge gsum dang rigs lnga'i sa bon bzlas/
</tib><tib> /grag stong skye med brag ca ji bzhin no/
/de nyid ngang la ma bcos mnyam par gzhag
/rang sems ye nas lha yi rang bzhin la/
/lus ni dkyil 'khor sgra tshig gsang sngags nyid/
/thams cad lhun rdzogs ye shes chen po'i ngang/
/dam tshig ye shes gnyis med dgug gzhug med/
/gshegs gsol mi dgos bzang ngan blang dor med/
/ye nas dkyil 'khor yin pa'i bdag nyid la/
/yin par shes pa'i tshul gyis gsal 'debs las/
/ma grub pa la yang grub byed pa min/
</tib><tib> /rjes la zhen pa yod na rim gyis bsdu/
/gang du'ang mi dmigs spros dang bral bar gzhag
/med na sgyu ma chu zla'i ngang nyid nas/
/dge ba sems can don du bsngo bar bya/
/spyod lam kun tu stong gsal sgyu ma'i tshul/
/snang dang grag pa thams cad lha dang sngags/
/dran dang sems pa thams cad ye shes su/
/skad cig skad cig ma yengs shes par bya/
/rtsa ba yan lag dam tshig gtsang ma bsrung/
/shes dang mi spang spyad dang dang du blang/
</tib><tib> /bsgrub par bya ba'i dam tshig lnga lnga ste/
/nyi shu rtsa lnga mdor bsdus sku gsung thugs/
/de yang rang sems rnam dag tshul la bslab/
/nya dang gnam stong tshes brgyad nyi shu dgu/
/tshes bcu yar ngo mar ngo'i nyin dang mtshan/
/bsnyen sgrub tshogs mchod bskang bshags 'bad par bya/
/rlung sems rtsa dang thig le'i rnal 'byor sogs/
/yang zab gnad la nan tan snying por bya/
/bde gsal mi rtog zung 'jug lam bsgoms pas/
/rdo rje 'dzin pa tshe 'dir rdzogs sangs rgya/
</tib><tib> /de ltar rab gsang bla med snying po 'dis/
/he ru ka dpal grong du nyer 'tsho zhing/
/'gro kun las dang nyon mongs srid pa 'dir/
/dub pa'i sems nyid di ring ngal sos shig
</tib><tib> /rdzogs pa chen po sems nyid ngal gso las/
/bskyed rdzogs zung du 'jug pa'i le'u ste dgu pa'o/
</tib>