སྟོན་པ་ཐམས་ཅད་མཁྱེན་པའི་སྐྱེས་རབས་ཕྲེང་།

༄༅། །སྟོན་པ་ཐམས་ཅད་མཁྱེན་པའི་སྐྱེས་རབས་ཕྲེང་། །བཅུ་ཕྲག་གསུམ་དང་བཞི་ནི་དཔའ་བོའི་སྟེ། །ཕྱི་ནས་རང་བྱུང་རྡོ་རྗེས་བདུན་ལྷག་པའི། །དྲུག་ཅུས་བརྒྱ་རྩ་རྫོགས་པར་མཛད་པ་བཞུགས། །

༄༅། །རྒྱ་གར་སྐད་དུ། ཛཱ་ཏ་ཀ་མཱ་ལཱ། བོད་སྐད་དུ། སྐྱེས་པའི་རབས་ཀྱི་རྒྱུད། བམ་པོ་དང་པོ། བཅོམ་ལྡན་འདས་ངག་གི་དབང་ཕྱུག་ལ་ཕྱག་འཚལ་ལོ། །དཔལ་ལྡན་ཡོན་ཏན་དམ་པས་ཡོངས་བཟུང་བཀྲ་ཤིས་བ། གྲགས་པའི་གཞིར་གྱུར་མ་རྨད་ཤིན་ཏུ་ཡིད་དུ་འོང་། ཐུབ་པའི་སྐུ་ཚེ་སྔ་མའི་སྤྱོད་པ་རྨད་བྱུང་རྣམས། བདག་གི་སྙན་ངག་མེ་ཏོག་སྙིམ་པས་གུས་པར་མཆོད། གྲགས་པའི་མཚན་མར་གྱུར་པ་བཟང་པོ་འདི་རྣམས་ཀྱིས། བདེ་བར་གཤེགས་གྱུར་ལམ་རྣམས་གང་ཡིན་བསྟན་པར་འགྱུར། ཡིད་ལ་དད་པ་མེད་པ་རྣམས་ཀྱང་དད་པར་འགྱུར། །ཆོས་དང་ལྡན་པའི་གཏམ་གྱིས་རབ་ཏུ་དགའ་བར་འགྱུར། འཇིག་རྟེན་མཆོག་གི་སྤྱོད་པ་དམ་པའི་ཕྱོགས་ཙམ་གྱིས། བདག་གི་སྙན་དངགས་མཉན་དུ་རུང་བར་བྱ་བའི་ཕྱིར། །ལུང་དང་གཙུག་ལག་རིགས་པར་མི་འགལ་ལམ་དག་གིས། དེ་ལྟར་འཇིག་རྟེན་དོན་འགྱུར་སྙམ་ནས་འདི་བརྩམས་སོ། །རང་དོན་བརྩོན་པས་གཞན་དོན་བརྩོན་པ་གང་ཡིན་པའི། །ཡོན་ཏན་སྒྲུབ་པ་བཟང་པོའི་རྗེས་སུ་མཐུན་མ་གྱུར། །ཐམས་ཅད་མཁྱེན་ཅེས་བརྗོད་པ་མ་ནོར་གསལ་བར་གྲགས། །མཉམ་མེད་དེ་དང་ཆོས་དང་དགེ་འདུན་སྤྱི་བོས་འདུད། །བཅོམ་ལྡན་འདས་དེ་སྐུ་ཚེ་སྔ་མ་ལའང་སེམས་ཅན་ཐམས་ཅད་ལ་རྒྱུ་མེད་པར་རབ་ཏུ་བྱམས་པའི་ངོ་བོ་ཉིད་ཡིན་པས། སངས་རྒྱས་བཅོམ་ལྡན་འདས་ལ་སེམས་རབ་ཏུ་དང་བར་བྱའོ། །དེ་ཡང་འདི་སྐད་ཐོས་སོ། །བདག་ཅག་གི་བླ་མ་དཀོན་མཆོག་གསུམ་བླ་མར་བྱེད་པ། བསྒྲུབ་པའི་ཡོན་ཏན་རྣམས་ཀྱིས་བླ་མ་མགུ་བར་བྱས་པ། ཡོན་ཏན་གྱི་ཚོགས་ཀྱིས་བླ་མར་གྱུར་པ་རྣམས་ཀྱིས། བཅོམ་ལྡན་འདས་ཀྱི་སྐུ་ཚེ་སྔ་མའི་རྟོགས་པ་བརྗོད་པ་འདི་དག་ཡོངས་སུ་བསྒྲགས་པ་རྗེས་སུ་ཐོས་ཏེ། བྱང་ཆུབ་སེམས་དཔའ་ཡི་དམ་བཅས་པ་ཁྱད་པར་ཅན་དང་མཐུན་པར་གྱུར་པ། སྦྱིན་པ་དང་། ཚིག་སྙན་པ་དང་། དོན་སྤྱོད་པ་ལ་སོགས་པ་ཤེས་རབ་ཀྱིས་ཡོངས་སུ་ཟིན་པས། སྐྱོན་མེད་ཅིང་སྙིང་རྗེའི་རྒྱུ་མཐུན་པ་རྣམས་ཀྱིས་འཇིག་རྟེན་ཡོངས་སུ་འཛིན་པ་ན། རང་གི་ཆོས་ལས་མངོན་པར་དགའ་བ་ལས་གྱུར་པའི་གཙང་སྦྲ་དང་། སྤྱོད་པ་དང་ལྡན་པའི་བྲམ་ཟེའི་རིགས་ཆེན་པོ་ཇེ་མཐོ་ཇེ་མཐོར་གྱུར་པ་ཞིག་ཏུ་སྐྱེ་བ་ཡོངས་སུ་བཟུང་བར་གྱུར་ཏོ་ཞེས་གྲག་གོ །དེ་སྐྱེས་པའི་ལས་བྱ་བ་ལ་སོགས་པས་སྦྱང་པ་རིམ་བཞིན་དུ་བྱས་ཤིང་མངོན་པར་མཐོ་བར་སྐྱེས་པ་ན། རང་བཞིན་གྱིས་ཡིད་གཞུངས་པ་དང་། མགོན་སྐྱབས་ཀྱི་ཁྱད་པར་དང་། ཤེས་པ་ཆེད་ཆེར་འཛིན་པ་དང་། ལེ་ལོ་མེད་པས་རིང་པོ་མ་ཐོགས་པར་རིག་པའི་གནས་བཅོ་བརྒྱད་དང་། བདག་གི་རིགས་དང་མི་འགལ་བའི་རྒྱུ་རྩལ་རྣམས་ལ་སློབ་དཔོན་གྱི་གོ་འཕང་ཐོབ་པར་གྱུར་ཏོ། །རིག་བྱེད་ཤེས་ལ་དེ་ནི་ཚངས་པ་བཞིན། རྒྱལ་པོ་རྣམས་ཀྱིས་བཀུར་བ་རྒྱལ་པོ་བཞིན། སྐྱེ་དགུ་རྣམས་ལ་བརྒྱ་བྱིན་མངོན་སུམ་བཞིན། །ཤེས་འདོད་རྣམས་ལ་དོན་སྤྱོད་ཕ་དང་འདྲ། །དེ་སྐལ་བ་དང་ལྡན་ཞིང་ཡོན་ཏན་ཁྱད་པར་ཅན་དུ་གྱུར་པས། རྙེད་པ་དང་། བཀུར་སྟི་དང་། གྲགས་པའི་ཁྱད་པར་རྣམས་རབ་ཏུ་བྱུང་བར་གྱུར་ཏོ། །བྱང་ཆུབ་སེམས་དཔའ་དེ་བློ་ཆོས་ལ་གོམས་པར་སྒོམ་པ་དང་། རབ་ཏུ་བྱུང་བ་ལ་འདྲིས་པར་བྱས་པས། དེ་ལ་མངོན་པར་དགའ་བར་མ་གྱུར་ཏོ། །སྔོན་གྱི་སྤྱོད་པས་དེ་བློ་ཡོངས་སུ་དག །འདོད་པ་རྣམས་ལ་སྐྱོན་མང་མཐོང་ནས་ནི། །ཁྱིམ་ན་གནས་པ་ནད་བཞིན་ཡོངས་སྤངས་ནས། །ནགས་ཚལ་གནས་ཤིག་རབ་ཏུ་བརྒྱན་པར་གྱུར། །དེ་ནི་དེར་ཡང་ཆགས་མེད་དེ་ཡིས་སུ། །ཤེས་རབ་ཡོངས་སུ་སྦྱངས་ཤིང་ཞི་བ་ཡིས། །མི་ཡི་འཇིག་རྟེན་དམ་པའི་སྤྱོད་བྲལ་བ། །ངན་པར་སྤྱོད་ལ་ཆགས་པ་བཟློག་པ་བཞིན། །དེ་ཡིས་རང་བཞིན་བྱམས་པའི་བདག་ཉིད་ཀྱིས། །རྣམ་པར་བརླན་པ་བཞིན་དུ་སེམས་མཐུན་ཞིང་། །ཕན་ཚུན་གནོད་པ་མེད་པའི་སེམས་གྱུར་ནས། །དཀའ་ཐུབ་ཅན་བཞིན་གཅན་ཟན་ཁྲོ་བོའང་སྤྱོད། །སྤྱོད་པ་དག་ཅིང་དབང་པོ་དུལ་བ་དང་། །ཆོག་ཤེས་ལྡན་ཞིང་སྙིང་རྗེའི་ཡོན་ཏན་གྱིས། །འཇིག་རྟེན་དག་ན་སྐྱེ་བོ་མ་འདྲིས་པའང་། གཞན་ལ་དེ་བྱམས་བཞིན་དུ་དེ་ལ་བྱམས། འདོད་པ་ཆུང་ལ་ངན་གཡོ་མི་ཤེས་ཤིང་། །རྙེད་དང་གྲགས་དང་བདེ་ལ་མ་ཆགས་བས། །དེ་ནི་ལྷ་རྣམས་ཡིད་ཀྱང་མགུ་གྱུར་ནས། །དང་ཞིང་གུས་ལ་རབ་ཏུ་གཞོལ་བར་བྱེད། །དེ་ན་རབ་ཏུ་བྱུང་བར་མིས་ཐོས་ཏེ། དེ་ཡི་ཡོན་ཏན་རྣམས་ཀྱིས་སེམས་དྲངས་ནས། །གཉེན་དང་ཡོངས་སུ་བཟུང་བ་རྣམ་སྤངས་ཏེ། དགོས་སྒྲུབ་བཞིན་དུ་དེ་ཡི་སློབ་མར་གྱུར། །ཚུལ་ཁྲིམས་གཙང་སྦྲ་དབང་པོ་དུལ་བ་དང་། །དྲན་པ་མི་ཉམས་རབ་ཏུ་དབེན་པ་དང་། །བྱམས་ལ་སོགས་དང་ཡིད་ནི་ཏིང་འཛིན་ལ། །དེ་ནི་སློབ་མ་རྣམས་ལ་ཅི་ནུས་སྟོན། །དེ་ནས་བདག་ཉིད་ཆེན་པོ་དེ་རེ་ཤིག་ཅིག་ན་སློབ་མའི་ཚོགས་རྣམས་ནི་ཕལ་ཆེར་ཡོངས་སུ་རྫོགས་ཤིང་རྒྱ་ཆེར་གྱུར། དགེ་བའི་ལམ་ལ་ནི་རབ་ཏུ་བཀོད། འཇིག་རྟེན་པ་རྣམས་ནི་ངེས་པའི་ལམ་དམ་པ་ལ་བཙུད། །ངན་སོང་གི་སྒོ་ནི་བཅད་པ་བཞིན་དུ་བྱས། བདེ་འགྲོའི་ལམ་ནི་ལམ་པོ་ཆེ་བཞིན་དུ་བྱས་ནས། །ཚེ་འདི་ལ་བདེ་བ་སྤྱད་པའི་ཕྱིར། །དེའི་ཚེ་རྗེས་སུ་མཐུན་པའི་སློབ་མ་མ་ཕམ་པ་དང་འགྲོགས་ཏེ། རྣལ་འབྱོར་དང་རྗེས་སུ་མཐུན་པའི་གནས་རིའི་སུལ་སྨན་ལྗོངས་ཤིག་ཏུ་གནས་ཤིང་སྤྱོད་དོ། །དེ་ནས་རི་ཁྲོད་དེ་ན་ནི། སྟག་མོ་ཕྲུ་གུ་བགྲངས་པ་ཞིག །ཕྲུ་གུ་བགྲངས་པའི་སྡུག་བསྔལ་གྱིས། །སྤྱོད་པ་ཉམས་པར་གྱུར་པ་མཐོང་། །མིག་གཉིས་བལྟ་བ་ཞན་པར་གྱུར། །བཀྲེས་པས་ལྟོ་བ་རབ་ཏུ་རྙོང་། །ཕྲུ་གུ་བདག་གི་བུ་ཡིན་ཡང་། །ཁ་ཟས་བཞིན་དུ་བལྟ་བར་གྱུར། །མ་ལ་ཡིད་གཅུགས་འཇིགས་མེད་ཅིང་། །ནུ་བོ་འདོད་ཕྱིར་ལྷགས་པ་ལ། །སྟག་སྐད་ཉེར་ཉེར་སྒྲ་འབྱིན་ཅིང་། །གཞན་གྱི་བུ་བཞིན་སྤོང་བར་གྱུར། །བྱང་ཆུབ་སེམས་དཔས་དེ་མཐོང་ནས། བརྟན་ཡང་སྙིང་རྗེའི་དབང་གྱུར་པས། །ས་གཡོས་པ་ཡི་ལྗོན་ཤིང་བཞིན། །གཞན་གྱི་སྡུག་བསྔལ་གདུངས་པས་འདར། །བདག་གི་སྡུག་བསྔལ་ཆེན་པོས་ཀྱང་། །སྙིང་རྗེའི་བདག་ཉིད་བརྟན་པ་གསལ། །གཞན་གྱི་སྡུག་བསྔལ་ཆུང་ངུས་ཀྱང་། །འདར་བར་གྱུར་པ་དེ་རྨད་དོ། །དེ་ནས་བྱང་ཆུབ་སེམས་དཔའ་རྟབས་ཤིང་རིངས་རིངས་སྐད་དུ་སྨྲ་བའི་ཚིག་རང་བཞིན་ཁྱད་པར་ཅན་གསལ་བར་སྟོན་པ། །སྙིང་རྗེའི་དབང་གིས་ཚིག་འབྲུ་གསལ་བར་སློབ་མ་ལ་སྨྲས་པ། བུ་བུ་འཁོར་བ་ཡོན་ཏན་མེད་ལ་ལྟོས། །གཅན་ཟན་མོ་འདི་ལྟོགས་ནས་སུ། །བྱམས་པའི་མཚམས་ལས་འདས་ནས་ནི། །བདག་གི་བུ་ཡང་ཟ་བར་འདོད། །ཀྱེ་མ་བདག་ལ་བྱམས་པ་འདི། ཧ་ཅང་མ་འོས་མི་བཟད་དོ། །གང་ཕྱིར་མ་ཡང་བདག་གི་བུ། །ཟ་བར་འདོད་པ་ག་ལ་སྲིད། །གང་ཕྱིར་འདི་འདྲའི་ལས་དག་ཀྱང་། །བྱེད་པར་རྩོམ་པ་བདེ་ལྟ་བུའི། །བདག་ལ་བྱམས་པའི་དགྲ་བོ་དེ། །འཕེལ་བར་བྱེད་པ་སུ་ཞིག་ཡོད། །དེ་བས་ན་སྟག་མོ་དག་དང་ཕྲུ་གུ་རྣམས་མ་རུང་པར་མ་གྱུར་པར་འདི་བཀྲེས་པའི་སྡུག་བསྔལ་བསལ་བའི་རྒྱུ་གང་ཞིག་ནས་མྱུར་དུ་ཚོལ་ཅིག །བདག་ཀྱང་འདིའི་ཐུབ་ཆོད་འདི་ལས་བཟློག་པའི་ཕྱིར་འབད་དོ། །དེས་ཀྱང་དེ་མཉན་ཏེ། །དེ་བཞིན་དུ་བགྱིའོ་ཞེས་ནས། །དེའི་ཟས་ཚོལ་བ་ལ་འབད་པར་གྱུར་ཏོ། །དེ་ནས་བྱང་ཆུབ་སེམས་དཔས་སློབ་མ་དེ་བསྙད་བཏགས་ཏེ་བཏང་ནས་བསམས་པ། བདག་གི་ལུས་འདི་ཚང་བར་ཡོང་བཞིན་དུ། །ཅི་ཕྱིར་གཞན་ལས་ཤ་ནི་བཙལ་བར་བྱ། །དེས་ཀྱང་རྙེད་དམ་མི་རྙེད་གཏོལ་མེད་ལ། །བདག་གི་དགོས་པ་འདི་ཡང་མི་འགྲུབ་སྲིད། །གཉིས་སུ་ན། བདག་མེད་འཇིག་ལ་སྙིང་པོ་མེད་པའི་ལུས། །སྡུག་བསྔལ་དྲི་མེད་རྟག་ཏུ་མི་གཙང་བའི། །ལུས་ཀྱིས་གཞན་ལ་ཕན་འདོགས་འགྱུར་བ་ལ། །དཀའ་བར་མི་འགྱུར་དེ་ནི་མཁས་མ་ཡིན། །བདག་གི་བདེ་ལ་ཆགས་ནས་གཞན་དག་གི །སྡུག་བསྔལ་ཡལ་བར་འདོར་བ་མཐུ་མེད་དམ། །གཞན་དག་སྡུག་བསྔལ་དག་ལ་བདེ་བ་མེད། །ནུས་པ་ཡོད་བཞིན་ཅི་སྟེ་ཡལ་བར་འདོར། །ནུས་པ་ཡོད་བཞིན་བདག་གིས་ཡལ་བོར་ན། །གསོད་པའི་དགྲ་ཡང་སྡུག་བསྔལ་བྱིང་བ་ལ། །ཡལ་བར་བོར་ན་སྡིག་པ་བྱས་པ་བཞིན། །བདག་གི་སེམས་ནི་འདམ་བུ་མེས་ཚིག་བཞིན། །དེ་བས་ལུས་ཀྱིས་བསྲུང་བར་བྱ་བ་ནི། །གཡང་སར་ལྷུང་ལ་ཐུག་པའི་སྲོག་ཡོད་པས། །ཕྲུ་གུ་གསོད་ལས་གཅན་མོ་བསྲུང་བ་དང་། །གཅན་མོ་ལས་ཀྱང་དེ་ཡི་ཕྲུ་གུ་བསྲུང་། །གཞན་ཡང་། འཇིག་རྟེན་ཕན་བརྩོན་རྣམས་ལ་བསྟན་པ་དང་། །བརྩོན་འགྲུས་ཞན་ལ་སྤྲོ་བ་བསྐྱེད་པ་དང་། །གཏོང་ཕོད་རྣམས་ནི་དགའ་བ་བསྐྱེད་པ་དང་། །སྐྱེ་བོ་དམ་པའི་ཡིད་ནི་དྲང་བ་དང་། །བདུད་ཀྱི་སྡེ་ཆེན་དཔའ་ནི་བསྐོང་བ་དང་། །སངས་རྒྱས་ཡོན་ཏན་དགའ་བ་དང་བ་དང་། །བདག་གི་དོན་བརྩོན་ངོ་ཚ་བསྐྱེད་པ་དང་། །འཇུངས་དང་འདོད་ཆེན་ཅན་ཡང་ངོ་ཚ་བསྐྱེད། །ཐེག་པ་མཆོག་ལ་བརྟེན་པ་དད་བསྐྱེད་ཅིང་། །གཏོང་བ་སྙེམས་པ་ངོ་མཚར་བསྐྱེད་པ་དང་། །གཏོང་ལ་དགའ་བ་རྗེས་སུ་ཡི་རང་རྣམས། །མཐོ་རིས་ལམ་ཆེན་རྣམ་པར་སྦྱང་ཕྱིར་རོ། །ལུས་ཙམ་གྱིས་ཀྱང་གཞན་ལ་ཕན་ཐོག་པར། །ནམ་ཞིག་འགྱུར་ཞེས་བདག་གིས་གང་བསམས་པ། །སྨོན་ལམ་དེ་ནི་འབྲས་བུ་ཡོད་པར་བྱ། །བྱང་ཆུབ་མཆོག་ཀྱང་རབ་ཏུ་ཉེ་བར་བྱ། །འགྲན་ཕྱིར་མ་ཡིན་གྲགས་པ་འདོད་ཕྱིར་མིན། །མཐོ་རིས་འདོད་དང་རྒྱལ་སྲིད་བསྒྲུབ་ཕྱིར་མིན། །བདག་གི་བདེ་བ་མཆོག་ཐོབ་ཕྱིར་མིན་གྱི། །གཞན་དོན་བསྒྲུབ་ཕྱིར་བདག་ནི་འདི་རྩོམ་མོ། །དེ་བས་བདག་ནི་འདི་ཡིས་དུས་གཅིག་ཏུ། །འཇིག་རྟེན་དག་ལ་སྡུག་བསྔལ་བདེ་འབྱུང་བ། །བསལ་ཞིང་བསྒྲུབ་པ་རྟག་ཏུ་ནུས་གྱུར་ཅིག །ཉི་མས་མུན་བསལ་སྣང་འབྱུང་ནུས་བཞིན་ནོ། །མཐོང་ཞིང་ཐོས་སམ་རྗེས་སུ་དྲན་ཡང་རུང་། རེག་གམ་གཏམ་དུ་བརྗོད་པར་གྱུར་ཡང་རུང་། །རྣམ་པ་ཀུན་དུ་འགྲོ་ལ་ཕན་པ་ནི། །བདེ་དང་ལྡན་པ་རྟག་ཏུ་བྱེད་གྱུར་ཅིག །དེ་ལྟར་གཞན་དོན་བསྒྲུབ་ཕྱིར་ངེས་བྱས་ནས། །སྲོག་དང་བྲལ་ཡང་རབ་ཏུ་དགའ་འགྱུར་ཏེ། །བརྟན་པའི་ལྷ་རྣམས་ངོ་མཚར་སྐྱེ་འགྱུར་བར། །བདག་གི་ལུས་ནི་དེ་ནས་བོར་བར་གྱུར། །དེ་ནས་སྟག་མོ་དེ་བྱང་ཆུབ་སེམས་དཔའ་ལུས་བོར་བའི་སྒྲ་དེ་ཐོས་ཤིང་ངོ་མཚར་སྐྱེས་ནས། །བདག་གི་ཕྲུ་གུ་བཅའ་བ་བཏང་སྟེ། །དེ་ནས་མིག་གཉིས་ཀྱིས་བལྟས་པ་ན། །བྱང་ཆུབ་སེམས་དཔའ་དེའི་ལུས་སྲོག་དང་བྲལ་བ་མཐོང་ནས། །དེ་མ་ཐག་ཏུ་ཉེ་བར་འོངས་ནས་བཟའ་བར་བརྩམས་སོ། །དེའི་འོག་ཏུ་དེའི་སློབ་མ་དེས་ཤ་མ་རྙེད་པར་སླར་འོངས་ཏེ། །མཁན་པོ་གང་ན་བཞུགས་སྙམ་ནས་བལྟས་པ་ན། །བྱང་ཆུབ་སེམས་དཔའ་དེའི་ལུས་སྲོག་དང་བྲལ་བ་སྟག་མོ་དེས་ཟ་ཞིང་འདུག་པ་མཐོང་བ་དང་། །དེས་དེའི་སྤྱོད་པ་ཁྱད་པར་ཅན་ངོ་མཚར་ཆེ་བར་བཟུང་ནས། མྱ་ངན་དང་སྡུག་བསྔལ་གྱི་ཤུགས་བཏང་སྟེ། དེའི་ཡོན་ཏན་གྱི་གཞི་ལ་སྨོན་པའི་ཚིག་ཏུ་སྨྲ་བ་བཞིན་དུ་ཡིད་ལ་བསམས་པ་ཚིག་ཏུ་སྨྲས་ན་ལེགས་ཏེ། །ཨེ་མའོ་སྡུག་བསྔལ་ཅན་ལ་འདི་སྙིང་རྗེ། །བདག་ཉིད་ཆེ་བ་བདག་གི་བདེ་མ་ཆགས། །དམ་པ་རྣམས་ཀྱི་སྤྱོད་པ་མཆོག་ཏུ་བྱས། །གཞན་གྱི་དཔལ་དང་གྲགས་པ་ཟིལ་གྱིས་མནན། །ཨེ་མའོ་རབ་ཏུ་དཔའ་ལ་འཇིགས་པ་མེད། །ཡོན་ཏན་གཞི་ལྡན་བྱམས་མཆོག་རྣམ་པར་བརྟན། །ཨེ་མའོ་ཡོན་ཏན་ཆེན་པོས་བདག་གི་ལུས། །ཕྱག་གི་གནས་ཀྱི་ཁྱད་པར་ཅན་དུ་བྱས། །རང་བཞིན་ཞི་བ་ས་གཞི་བཞིན་དུ་བརྟན། །ཨེ་མའོ་གཞན་གྱི་སྡུག་བསྔལ་མི་བཟོད་པ། །ཨེ་མའོ་དཔའ་བ་ཕུན་སུམ་ཚོགས་པ་འདིས། །བདག་གི་སྐྱོན་ནི་རབ་ཏུ་གྲགས་པར་གྱུར། །མགོན་པོ་འདིས་ནི་མགོན་དང་བཅས་བྱས་པས། །ད་ནི་འགྲོ་བ་མྱ་ངན་བྱ་མི་དགོས། །གཞན་གྱི་ཕམ་དུ་དོགས་པའི་བདུད་དག་ཀྱང་། །ད་ནི་ངེས་པར་ཤུགས་ཀྱང་ནར་ཞེས་འབྱིན། །ཡོང་ཡེ་སྐལ་བ་ཆེན་པོ། །སེམས་ཅན་ཐམས་ཅད་ཀྱི་སྐྱབས་སུ་གྱུར་པ། །ཐུགས་རྗེ་ཤིན་དུ་རླབས་ཆེ་བ། །སྙིང་སྟོབས་དཔག་ཏུ་མེད་པ། །བྱང་ཆུབ་སེམས་དཔའི་དོན་ཇི་ལྟ་བ་ཉིད་ལ་ཕྱག་འཚལ་ལོ། །ཞེས་སྨྲས་ནས། དེ་ནས་ངེས་དོན་དེ་ཚངས་པ་མཚུངས་པར་སྤྱོད་པ་རྣམས་ལ་སྦྲན་ཏོ། །དེ་ནས་དེ་ཡི་སྤྱོད་པས་ངོ་མཚར་གྱུར་པའི་སློབ་མ་དང་། །དྲི་ཟ་གནོད་སྦྱིན་ཀླུ་དང་སུམ་ཅུ་རྩ་གསུམ་བདག་པོ་རྣམས། །ཕྲེང་བ་ན་བཟའ་རྒྱན་དང་ཙན་དན་ཕྱེ་མ་ཆར་ཕབ་པས། །དེ་ཡི་སྐུ་གདུང་རིན་ཆེན་འཛིན་པའི་ས་གཞི་ཁེབས་པར་བྱས། །དེ་བས་ན། དེ་ལྟར་བཅོམ་ལྡན་འདས་དེ་སྐུ་ཚེ་སྔ་མ་ལའང་། །སེམས་ཅན་ཐམས་ཅད་ལ་རྒྱུ་མེད་པར་རབ་ཏུ་བྱམས་པའི་རང་བཞིན་ཅན། སེམས་ཅན་ཐམས་ཅད་བདག་གིར་གྱུར་པ་ཡིན་པས། །སངས་རྒྱས་བཅོམ་ལྡན་འདས་ལ་རབ་ཏུ་དང་བར་བྱའོ། །དད་པ་བསྐྱེད་པ་རྣམས་ཀྱིས་སངས་རྒྱས་བཅོམ་ལྡན་འདས་ལ་དགའ་བ་བསྐྱེད་པར་བྱའོ། །དེ་ལྟ་བས་ན་དེ་ནི་བདག་ཅག་གི་དད་པར་བྱ་བའི་གནས་ཡིན་ནོ། །ཞེས་དེ་ལྟར་ཡང་སྦྱར་བར་བྱའོ། །དེ་ལྟར་ཆོས་ཀྱང་བྱ་དཀའ་བ་མང་པོས་བསྒྲུབས་པ་ཡིན་པའི་ཕྱིར་རིམ་གྲོ་བསྐྱེད་དེ་ཆོས་མཉན་པར་བྱའོ། །དེ་ལྟར་ན་སྙིང་རྗེ་ནི་གཞན་ལ་ཕན་འདོགས་པའི་རྒྱུ་ཡིན་ཞིང་། །ངོ་བོ་ཉིད་ཁྱད་པར་ཅན་བསྒྲུབ་པ་ཡིན་པའི་ཕྱིར་སྙིང་རྗེའི་ཡོན་ཏན་བསྔགས་པ་ལའང་བརྗོད་པར་བྱའོ། །བྱང་ཆུབ་སེམས་དཔའི་རྟོགས་པ་བརྗོད་པའི་རྒྱུད་ལས། །རྟོགས་པ་བརྗོད་པ་དང་པོའོ།། །།བཅོམ་ལྡན་འདས་དེས་བྱ་དཀའ་བ་བརྒྱ་ཕྲག་མང་པོས་བདག་ཅག་གི་དོན་དུ། །དམ་པའི་ཆོས་འདི་ཡང་དག་པར་བསྒྲུབ་པའི་ཕྱིར་རིམ་གྲོ་བསྐྱེད་དེ་ཆོས་མཉན་པར་བྱའོ། །དེ་ཡང་འདི་སྐད་ཐོས་སོ། །བཅོམ་ལྡན་འདས་འདི་བྱང་ཆུབ་སེམས་དཔར་གྱུར་པའི་ཚེ། །དཔག་ཏུ་མེད་པའི་དུས་ནས་གོམས་པར་བྱས་པས། །བསོད་ནམས་ཀྱི་ལས་བསགས་ཤིང་འདྲིས་པར་བྱས་པ་དེས། །རེ་ཤིག་ཡུལ་ཤི་བི་པ་རྣམས་ཀྱི་རྒྱལ་པོར་གྱུར་ཏོ་ཞེས་གྲགས་སོ། །དེ་བྱིས་པ་ནས་རྒན་པ་ལ་བསྙེན་བཀུར་བྱེད་པར་དགའ་བ། །དུལ་བ་ལ་རྗེས་སུ་དགའ་བ། རྗེ་བློན་ལ་བྱམས་པ། རང་བཞིན་གྱི་ཡིད་གཞུངས་པས། རིག་པ་དུ་མ་རྟོགས་པས་བློ་རྒྱ་ཆེ་བ། སྤྲོ་བ་དང་། གསང་ཚིག་དང་། གཟི་བྱིན་གྱི་མཐུ་དང་། སྐལ་པ་ཕུན་སུམ་ཚོགས་པས་སྐྱེ་དགུ་རྣམས་བདག་གི་བུ་བཞིན་དུ་སྐྱོང་བར་གྱུར་ཏོ། །དེ་ལ་འཁོར་གསུམ་རྗེས་མཐུན་ཡོན་ཏན་ཚོགས། །ཕན་ཚུན་འགྲན་པ་བཞིན་དུ་གནས་པར་གྱུར། །དངོས་པོ་ཐམས་ཅད་ཡོངས་སུ་རྫོགས་གྱུར་ཅིག །འགའ་ཞིང་འཁྲུག་པས་མཛེས་པ་མེད་མ་གྱུར། །མ་དུལ་འཕྱར་བ་རྣམས་ལ་འཕྱས་འགྱུར་བ། །བླུན་པོ་རྣམས་ནི་རབ་ཏུ་ཕུང་བྱེད་པ། །བདག་ཉིད་ཆུང་ངུ་རྣམས་ནི་མྱོས་འགྱུར་གང་། །དཔལ་དེ་དེ་ལ་མིང་ནི་དོན་བཞིན་འགྱུར། །རང་བཞིན་རྒྱ་ཆེ་སྙིང་རྗེའི་ཡོན་ཏན་ལྡན། །རྒྱལ་པོ་དེ་ནི་ནོར་ལ་དབང་ཡོད་ཕྱིར། །ཕོངས་པ་རྣམས་ནི་འདོད་པའི་དོན་འགྲུབ་པས། །ངོ་ཟུམ་མི་གནག་བཞིན་བཟངས་མཐོང་བས་དགའ། དེ་ནས་རྒྱལ་པོ་དེ་སྦྱིན་པ་ལ་དགའ་བས། །གྲོང་ཁྱེར་གྱི་ཁོ་ར་ཁོར་ཡུག་ཏུ་སྦྱིན་པའི་ཁང་པ་ནོར་དང་། འབྲུ་དང་ཡོ་བྱད་ཐམས་ཅད་ཕུན་སུམ་ཚོགས་པ་བརྩིག་ཏུ་བཅུག་ནས། །བདག་གི་བདག་ཉིད་ཆེ་བ་དང་རྗེས་སུ་མཐུན་པ། རེ་བ་ཇི་ལྟ་བ་བཞིན་དུ་སྐོང་བ། གུས་པ་དང་བཅས་པས་ཡིད་དགའ་བར་བྱེད་པ། །དུས་བཞིན་དུ་འབྱོར་བས་ཡིད་དུ་འོང་བའི་སྦྱིན་པའི་ཆར་རྫོགས་ལྡན་གྱི་དུས་ཀྱི་སྤྲིན་བཞིན་དུ་ཕབ་པར་གྱུར་ཏེ། ཟས་འདོད་པ་རྣམས་ལ་ནི་ཟས། བཏུང་བ་འདོད་པ་རྣམས་ལ་ནི་བཏུང་བ། མལ་ཆ་དང་། སྟན་དང་། གོས་དང་། བཟའ་བ་དང་། བྱུག་པ་དང་། སྤོས་དང་། ཕྲེང་བ་དང་། གསེར་དང་། དངུལ་ལ་སོགས་པ་འདོད་པ་རྣམས་ལ་དེ་དག་ཆར་བཞིན་དུ་ཕབ་པོ། དེ་ནས་རྒྱལ་པོ་དེའི་སྦྱིན་པ་རླབས་པོ་ཆེ་ཐོས་ནས། ཕྱོགས་ཐ་དད་བའི་ཡུལ་ན་གནས་པའི་མི་རྣམས་ཡ་མཚན་ཆེ་ཞིང་སྙིང་དགའ་བར་གྱུར་ཏེ་ཡུལ་དེར་ལྷགས་སོ། །མི་ཡུལ་ཀུན་དུ་ཡིད་ཀྱིས་བརྟགས་ན་ཡང་། གཞན་དུ་བླང་པའི་སྐབས་ནི་མ་རྙེད་ནས། །ཕོངས་བ་རྣམས་ནི་དགའ་ཞིང་དེར་ལྷགས་པ། །ནགས་ཚལ་གླང་པོ་མཚོ་ཆེན་ངོགས་ལྷགས་བཞིན། དེ་ནས་རྒྱལ་པོ་དེ་སྐྱེ་བོ་སློང་བ་ཐོབ་ཏུ་རེ་བས་ཡིད་དགའ་བར་གྱུར་པ། འགྲོན་པོའི་ཆས་སུ་ཞུགས་པས་མི་སྡུག་བར་གྱུར་པ་རྣམས་སོ་སོ་ནས་ལྷགས་པ་དང་། སྐྱེ་བོ་མཛའ་བཤེས་བྱེས་ནས་འོངས་པ་དག །མཐོང་བར་གྱུར་ནས་དགའ་བའི་མིག་དགྲད་བཞིན། སློང་པའི་ཚིག་ནི་གཏམ་སྙན་ཐོས་བཞིན་དགའ། །བྱིན་ནས་དགའ་བ་སློང་བ་བས་ཀྱང་ལྷག །སྦྱིན་པ་ལས་བྱུང་དེ་ཡི་གྲགས་པའི་དྲི། །ཕོངས་པའི་ཚིག་གི་རླུང་གིས་བསྒྲགས་པ་དག །རྒྱལ་པོ་གཞན་གྱི་གྲགས་པ་མེད་བྱས་པ། །སྤོས་ཀྱི་གླང་པོས་གླང་པོ་གཞན་གྱི་བཞིན། །དེ་ནས་རེ་ཞིག་ཅིག་རྒྱལ་པོ་དེ་སྦྱིན་གཏོང་གི་ཁང་པ་རྣམས་ཉུལ་དུ་སོང་སོང་བ་དང་། ཕོངས་པ་རྣམས་རེ་བ་བསྐོངས་པས། །སློང་པའི་སྐྱེ་བོ་འདུ་བ་ཉུང་བར་མཐོང་ནས། །སྦྱིན་པའི་བསོད་ནམས་མི་འཕེལ་བར་གྱུར་བས་མགུ་བར་མ་གྱུར་ཏོ། །དེ་ལ་བརྟེན་ནས་ཕོངས་པ་ཚིམ་པར་གྱུར། །སྦྱིན་ལ་དཔའ་བ་དེ་ནི་སྙིང་མ་ཚིམ། །ཕོངས་པ་རྣམས་ཀྱིས་སློང་བའི་ཚད་དག་གིས། །དེ་ཡི་སྦྱིན་པའི་ཚད་ལ་ཐུབ་མ་གྱུར། །དེས་བསམས་པ། ཕོངས་པ་རྣམས་འཛེམ་པ་མེད་ཅིང་བག་བརྐྱང་སྟེ། །བདག་གི་ལུས་སློང་བ་ཡོད་པའི་སྐྱེས་བུ་དམ་པ་ཡ་རབས་དེ་དག་རེ་སྐྱིད། །ངས་ཉོན་མོངས་པ་ཕོངས་པ་རྣམས་ཚིག་རྩུབ་པོས་བསྡིགས་ཏེ་བསྐྲད་པ་བཞིན་དུ་ནོར་ཙམ་ལའང་བག་བརྐྱང་སྟེ། སློང་མ་ཕོད་པར་གྱུར་ཏོ་སྙམ་མོ། །དེ་ནས་རྒྱལ་པོའི་སྦྱིན་པ་རླབས་པོ་ཆེ། །བདག་གི་ལུས་ལའང་རབ་ཏུ་མ་ཆགས་པར། །སྦྱིན་པར་བྱ་བའི་རྣམ་རྟོག་དེ་རིག་ནས། །བུད་མེད་ཁྱོ་ལ་གདུངས་བཞིན་ས་གཡོས་སོ། །དེ་ནས་ལྷའི་དབང་པོ་བརྒྱ་བྱིན་ས་གཡོས་པས། །རིའི་རྒྱལ་པོ་རི་རབ་རིན་པོ་ཆེའི་འོད་གསལ་བ་གཡོས་པར་གྱུར་པ་དང་། །འདི་ཅི་ཞིག་སྙམ་དུ་རྟོག་པ་སྐྱེས་སོ། །རྒྱལ་པོ་དེའི་རྣམ་པར་རྟོགས་པ་ཁྱད་པར་ཅན་འདི་ལས་ས་གཡོས་པར་གྱུར་པར་རིག་ནས། །སེམས་ལ་ཡ་མཚན་ཆེན་པོར་གྱུར་ཏེ་བསམས་པ། །སྦྱིན་ལ་རབ་ཏུ་དགའ་བའི་ཡིད་ཀྱིས་སུ། །འདི་ནི་རྒྱལ་པོས་གྱི་ནར་རྣམ་བརྟགས་སམ། །བདག་གི་ལུས་ནི་ངེས་པར་སྦྱིན་བྱས་ནས། །འོན་ཏེ་སྙིང་ནས་འབད་དེ་བསགས་པ་ཡིན། །དེ་བས་ན་འདི་རེ་ཤིག་བརྟག་པར་བྱའོ་སྙམ་མོ། །དེ་ནས་རྒྱལ་པོ་དེ་བློན་པོའི་ཚོགས་ཀྱིས་བསྐོར་ཏེ་འཁོར་གྱི་ནང་ན་འདུག་ཅིང་། །ཕོངས་པ་རྣམས་ལ་འོས་འོས་སུ། །གང་ཅི་འདོད་ཅེས་བོས་ཏེ། །ནོར་བུ་རིན་པོ་ཆེ་དང་། གསེར་དང་། དངུལ་དང་། ནོར་གྱི་ཚོགས་རྣམས་ནི་ཕྱུང་སྟེ། །དཀོར་གྱི་བླ་རྣམས་ཀྱིས་སྤྱན་བྱས། །གོས་རྣམ་པ་སྣ་ཚོགས་ཀྱིས་བཀང་བའི་གོས་ཀྱི་སྣོད་རྣམས་ནི་ཁ་ཕྱེ། བཞོན་པ་དུལ་བ་རྣམ་པ་སྣ་ཚོགས་ཀྱིས་དྲངས་པའི་ཤིང་རྟའི་ཁྱད་པར་བཟང་པོ་རྣམས་ནི་བསོགས། སྐྱེ་བོ་ཕོངས་པ་རྣམས་ནི་སོ་སོ་ནས་ལྷགས་པ་དང་། །ལྷ་རྣམས་ཀྱི་དབང་པོ་བརྒྱ་བྱིན་བྲམ་ཟེ་རྒན་པོ་ལོང་བ་ཞིག་གི་གཟུགས་སུ་བསྒྱུར་ནས། །རྒྱལ་པོའི་སྤྱན་སྔར་འོངས་པར་གྱུར་ཏོ། །དེ་ནས་རྒྱལ་པོ་དེ་སྙིང་རྗེ་དང་བྱམས་པས་བསྒོས་པའི་ལྟ་བ་བརྟན་ཞིང་། གསལ་ལ་ཞི་བས་བསུ་བ་བཞིན་འཁྱུད་པ་བཞིན་དུ་བལྟས་པ་དང་། རྒྱལ་པོའི་འཁོར་རྣམས་ཀྱིས་ཅི་འདོད་ཅེས་དྲིས་པ་ན། །མིའི་བདག་པོ་དང་ཉེ་བར་འོངས་ནས། རྒྱལ་བར་གྱུར་ཅིག་ཅེས་བྱ་བའི་ཚིག་གིས་ཤིས་པ་བརྗོད་དེ། །རྒྱལ་པོ་ལ་འདི་སྐད་ཅེས་སྨྲས་སོ། །ས་བདག་དམ་པ་ཁྱོད་ཀྱི་སྤྱན་འཚལ་ཕྱིར། །རྒན་པོ་རིང་ནས་མི་མཐོང་བཞིན་དུ་མཆིས། །པདྨའི་སྤྱན་མངའ་སྤྱན་ནི་གཅིག་པུས་ཀྱང་། །འཇིག་རྟེན་བདག་པོ་འཇིག་རྟེན་བགྱི་བ་འགྲུབ། །དེ་ནས་བྱང་ཆུབ་སེམས་དཔའ་ཡིད་ལ་བསམས་ཤིང་སྨོན་པ་རབ་ཏུ་གྲུབ་པས། །རབ་ཏུ་དགའ་ཞིང་སྤྲོ་བར་གྱུར་ཏེ། །ཅི་བྲམ་ཟེ་འདིས་འདི་བདེན་པར་སྨྲས་སམ། འོན་ཏེ་འདི་ལྟ་བུའི་རྟོག་པ་ལ་གོམས་པས། བདག་ཉིད་ཀྱིས་འདི་ལྟར་ཟིན་སྙམ་དུ་རྟོག་པ་སྐྱེས་ནས། ཡིད་ལ་མིག་སློང་བའི་ཚིག་སྙན་པ་ཉན་པར་འདོད་དེ། མིག་ལོང་བ་དེ་ལ་སྨྲས་པ། །བྲམ་ཟེའི་གཙོ་བོ་ང་ལ་མིག་སློང་བར། །སུ་ཡིས་བསྟན་ནས་ཁྱོད་ནི་འདི་རུ་འོངས། །མིག་ནི་རབ་ཏུ་བཏང་དཀའ་ཞེས་གྲགས་པའི། །སྲིད་པ་སུ་ཞིག་ང་ལ་མེད་པར་འགྱུར། །དེ་ནས་བྲམ་ཟེའི་ཆ་ལུགས་སུ་བསྒྱུར་བའི་བརྒྱ་བྱིན་དེས། །རྒྱལ་པོ་དེའི་བསམ་པ་རིག་ནས་སྨྲས་པ། བརྒྱ་བྱིན་འདྲ་བ་བརྒྱ་བྱིན་གྱིས་བསྟན་ནས། །ཁྱོད་ལ་སྤྱན་སློང་སླད་དུ་འདིར་མཆིས་སོ། །དེ་ཡི་སྲིད་དང་བདག་གི་ར་བ་དག །སྤྱན་སྩལ་བས་ནི་འབྲས་བུ་མཆིས་པར་མཛོད། །དེ་ནས་རྒྱལ་པོ་དེ་བརྒྱ་བྱིན་སྨོས་པས། ལྷའི་མཐུས་བྲམ་ཟེ་འདི་གདོན་མི་ཟ་བར་ཆོག་འདིས་མིག་དང་ལྡན་པར་འགྱུར་རོ་སྙམ་དུ་བསམས་ནས། །རབ་ཏུ་དགའ་བའི་ཚིག་གསལ་བས་དེ་ལ་འདི་སྐད་ཅེས་སྨྲས་སོ། །ཡིད་ལ་རེ་བ་གང་གིས་འདིར་འོངས་པའི། །བྲམ་ཟེ་ཁྱོད་ཀྱི་རེ་བ་དེ་ངས་བསྐང་། །ང་ཡི་མིག་ནི་ཡ་གཅིག་འདོད་པ་ལ། །ཁྱོད་ལ་མིག་ནི་གཉིས་ཀ་ངས་སྦྱིན་གྱིས། །དེས་ཁྱོད་ཨུཏྤལ་རྒྱས་པའི་མིག་གིས་གདོང་བརྒྱན་ནས། །ཅི་གེ་དེ་འདི་ཡིན་ནམ་འོན་ཏེ་མ་ཡིན་ཞེས། །རྣམ་རྟོག་གཡེལ་བས་དེ་འདི་ཡིན་ཞེས་ངོ་མཚར་གྱུར། །ཇི་ལྟར་འདོད་པའི་གནས་སུ་འགྲོ་བ་མཐོང་བར་སོང་། །དེ་ནས་རྒྱལ་པོ་དེའི་བློན་པོ་རྣམས་མིག་སྦྱིན་པར་རྩོལ་བར་རིག་ནས། །བརྟབས་པ་དང་བཅས་པའི་ཤུགས་ཀྱིས་སྐྲག་པས་གདུངས་པའི་ཡིད་དུ་གྱུར་ནས། །རྒྱལ་པོ་ལ་སྨྲས་པ། སྦྱིན་པ་ལ་དགྱེས་ཆེས་ནས་མི་རིགས་པ་དང་གནོད་པར་འགྱུར་བ་མི་བརྟག་པར། ལྷ་དེ་ལྟར་མི་མཛད་དུ་གསོལ། །སྤྱན་སྩལ་བ་མི་རིགས་སོ། །བྲམ་ཟེ་འདི་ནི་གཅིག་པུའི་ཕྱིར། །བདག་ཅག་ཐམས་ཅད་མི་འདོར་གསོལ། །སྐྱེ་དགུ་བདེ་བར་བསྐྱེད་པ་རྣམས། །མྱ་ངན་ཤུགས་ཀྱིས་མི་སྲེག་གསོལ། །དཔལ་ཆེན་བསྐྱེད་པར་འགྱུར་བའི་ནོར་རྣམས་དང་། །དཔལ་དང་ལྡན་པའི་རིན་ཆེན་བ་བཞོན་དང་། །དུལ་བའི་རྟ་དང་སྦྱར་བའི་ཤིང་རྟ་སྩོལ། །གླང་པོ་དྲེགས་པ་གཟི་ལྡན་འགྱིང་བ་སྩོལ། །རྐང་གདུབ་འཕྲོལ་བའི་སྒྲ་རྣམས་གྲག་པ་ཡིས། །ཁང་པ་དུས་རྣམས་ཀུན་དུ་བདེ་ལྡན་པ། །སྟོན་ཀའི་སྤྲིན་བས་རབ་ཏུ་དཀར་བ་སྩོལ། །འགྲོ་བའི་མིག་གཅིག་ཉིད་ཀྱི་སྤྱན་མ་སྩལ། །གཞན་ཡང་རྒྱལ་པོ་ཆེན་པོ་རེ་ཤིགས་དགོངས་སུས་གསོལ། །གཞན་གྱི་མིག་གཞན་ལ་ཇི་ལྟར་སྦྱར་དུ་རུང་། །དེ་སྟེ་འདི་ལྷའི་མཐུ་ཞིག་ལགས་ན། །ཁྱོད་ཀྱི་སྤྱན་ལ་ལྟོས་ཅི་འཚལ། ལྷ་གཞན་ཡང་། གཞན་གྱི་འབྱོར་པ་དབང་བྱེད་པ། །མིག་གིས་དབུལ་ལ་ཅི་ཞིག་བགྱི། །དེ་བས་དཀོར་ལས་སྩལ་དུ་གསོལ། །ལྷ་གཅིག་ཐུབ་ཆོད་མི་མཛད་གསོལ། །དེ་ནས་རྒྱལ་པོ་དེས་བློན་པོ་དེ་རྣམས་ལ་བྱམས་པའི་ཚིག་འཇམ་པོས་སྨྲས་པ། །གང་ཞིག་སྦྱིན་ཞེས་སྨྲས་ནས་ནི། །མི་སྦྱིན་བ་ཡི་བློ་སྐྱེས་པ། །དེ་ན་འདོད་པའི་ཞགས་པ་ཡིས། །བདག་ཉིད་སླར་ནི་འཆིང་བར་བྱེད། །སྦྱིན་ནོ་ཞེས་ནི་ཁས་བླངས་ནས། །གང་ཞིག་ཡིད་ལ་གཞན་སེམས་པ། །སེར་སྣ་མ་ངེས་བློ་ཅན་དེས། །དེ་ལས་སྡིག་ཆེ་གང་ཞིག་ཡོད། །སྦྱིན་ནོ་ཞེས་ནི་ཁས་བླངས་པས། །ཕོངས་པའི་རེ་བ་བརྟན་བྱས་ནས། །བསླུ་བའི་ཚིག་ནི་རྩུབ་པོ་དེའི། །སྦྱིན་པ་བསབ་པ་ཅི་ཡང་མེད། །གང་ཡང་ཁྱོད་ན་རེ། དེ་ལྷའི་མཐུ་ཉིད་ཀྱིས། །འདི་ཡི་མིག་ཡོད་པར་ཅིའི་ཕྱིར་མི་འགྱུར་ཞེས་ཟེར་བ་དེ་ཡང་ཉོན་ཅིག །རྒྱུ་གཅིག་གིས་ནི་འགྲུབ་བ་ཡི། །འབྲས་བུ་གང་ཡང་ཡོད་མ་ཡིན། །ལྷ་རྣམས་ཀྱིས་ནི་བྱས་པ་ཡང་། །རྒྱུ་རྐྱེན་གཞན་ལ་ལྟོས་པ་ཡོད། །དེ་བས་ན་ང་སྦྱིན་པ་ཆེན་པོ་བྱེད་པ་ལ། ཁྱེད་ཀྱིས་གེགས་བྱ་བ་མི་རིགས་སོ། །བློན་པོ་རྣམས་ཀྱིས་སྨྲས་པ། ལྷ་ནོར་དང་། འབྲུ་དང་། རིན་པོ་ཆེ་ལ་སོགས་པ་སྩལ་བར་རིགས་ཀྱི། ཉིད་ཀྱི་སྤྱན་ནི་སྩལ་བར་མི་རིགས་སོ་ཞེས་བདག་ཅག་གིས་སྔར་གསོལ་བ་ལགས་ཏེ། དེ་བས་ན་བདག་ཅག་ལྷ་བཤུལ་མ་ལགས་པར་གཤེགས་སུ་མི་གསོལ་ལོ། །རྒྱལ་པོས་སྨྲས་པ། གང་ཞིག་སློང་བ་དེ་ཉིད་སྦྱིན་པར་བྱ། མི་འདོད་པ་ནི་བྱིན་ཡང་དགའ་མི་འགྱུར། །ཆུས་ཁྱེར་བ་ལ་ཆུ་ཡིས་ཅི་ཞིག་བྱ། །དེ་བས་བླངས་པའི་དོན་ནི་འདི་ལ་སྦྱིན། །དེ་ནས་རྒྱལ་པོ་དེའི་བློན་པོ་ཆེན་པོ་རབ་ཏུ་ཡིད་བཅུགས་ཤིང་། འདྲིས་པ་ཞིག་བྱམས་པའི་ཤུགས་ཀྱིས་ཞེ་ས་བཏང་སྟེ་རྒྱལ་པོ་དེ་ལ་སྨྲས་པ། ཀྱེ་ཅུང་ཞིག་བཞེས་ཤིག །ལ་ལས་དཀའ་ཐུབ་ཏིང་འཛིན་ཆོ་ག་ཆེན་པོས་གང་ཞིག་ཐོབ་འགྱུར་ཞིང་། །གང་ལ་བརྟེན་ནས་མཆོད་སྦྱིན་ཆེན་པོ་མང་པོས་གྲགས་དང་མཐོ་རིས་ཐོབ། །བརྒྱ་བྱིན་ལོངས་སྤྱོད་ལ་ཡང་འགྲན་པའི་རྒྱལ་སྲིད་ཐོབ་པ་དེ་སྤངས་ནས། །ཅི་ཞིག་མཐོང་ནས་ཁྱོད་ཀྱིས་མིག་སྦྱིན་ཆོ་ག་འདི་ནི་སུ་ལས་ཐོས། །མཆོད་སྦྱིན་བྱས་པས་སུམ་ཅུ་རྩ་གསུམ་ཉིད། །གྲགས་པས་ཀུན་དུ་རབ་ཏུ་གསལ་གྱུར་ཅིང་། །མི་དབང་གཙུག་གི་འོད་ཀྱིས་རྐང་བརྒྱན་པ། །ཅི་ཞིག་འདོད་ཕྱིར་མིག་ནི་སྦྱིན་པར་བྱེད། །དེ་ནས་རྒྱལ་པོ་དེས་བློན་པོ་དེ་ལ་བྱམས་པ་དང་བཅས་པའི་ཚིག་གིས་སྨྲས་པ། དེ་འབད་འདི་ནི་ས་ཀུན་འཐོབ་ཕྱིར་མིན། །མཐོ་རིས་ཐར་པ་གྲགས་པ་འཐོབ་ཕྱིར་མིན། །སློང་བ་འདི་ནི་དོན་མེད་མི་འགྱུར་ཞིང་། །འཇིག་རྟེན་སྐྱབས་ཕྱིར་ང་ནི་འདི་ལྟར་འབད། །དེ་ནས་རྒྱལ་པོ་དེས་མེ་ཏོག་ཨུཏྤ་ལ་མཐིང་གའི་འདབ་མ་ལྟར་མཛེས་ཤིང་ཡིད་དུ་འོང་བའི་མིག་ཡ་གཅིག་སྨན་དཔྱད་པས་བྱུང་བ་བཞིན་དུ། དལ་བུས་མ་སྣང་བར་ཕྱུང་སྟེ། །རབ་ཏུ་དགའ་བཞིན་དུ་མིག་སློང་བ་ལ་བྱིན་ནོ། །དེ་ནས་ལྷའི་དབང་པོ་བརྒྱ་བྱིན་གྱིས། །ཅི་ནས་ཀྱང་མིག་དེའི་མིག་ཏུ་གནས་པར་གྱུར་པ། རྒྱལ་པོ་འཁོར་དང་བཅས་པ་དེས་མཐོང་བར་འགྱུར་བ་དེ་ལྟ་བུའི་རྫུ་འཕྲུལ་མངོན་པར་འདུ་བྱས་སོ། །དེ་ནས་མིག་ཡ་གཅིག་ཕྱེ་སྟེ་སློང་བ་ལ་བལྟས་པ་དང་། རྒྱལ་པོ་དེ་སྙིང་རབ་ཏུ་དགའ་བར་གྱུར་ནས། མིག་ཡ་གཅིག་ཀྱང་དེ་ལ་བྱིན་ནོ། །དེ་ནས་རྒྱལ་པོ་དེ་ཡིས་མིག་བྱིན་ནས། །པདྨ་མེད་པ་པདྨའི་མཚོ་འདྲ་གདོང་། གཞན་ལ་མེད་པའི་རབ་ཏུ་དགའ་བར་གྱུར། །བྲམ་ཟེའང་མིག་དང་ལྡན་པར་འཁོར་གྱིས་མཐོང་། །རྒྱལ་པོའི་བཙུན་མོའི་འཁོར་དང་ཕོ་བྲང་འཁོར་རྣམས་ཀྱང་། །མྱ་ངན་མཆི་མས་ས་གཞི་ཐམས་ཅད་ཆག་ཆག་བཏབ། །རྒྱལ་པོ་རྫོགས་པའི་བྱང་ཆུབ་བློ་བརྟན་མཐོང་ནས་ནི། །བརྒྱ་བྱིན་དེ་ཡང་ངོ་མཚར་ཆེ་ཞིང་རབ་ཏུ་དགའ། །དེ་ནས་བརྒྱ་བྱིན་ངོ་མཚར་ཆེན་པོས་སེམས་རབ་ཏུ་དད་པར་གྱུར་ནས། །འདི་སྙམ་དུ་སེམས་སོ། །ཨེ་མའོ་བརྟན་ཞིང་སྙིང་སྟོབས་ཆེ། །ཨེ་མའོ་སེམས་ཅན་ཕན་འདོགས་པ། །ལས་འདི་མངོན་སུམ་གསལ་གྱུར་ཀྱང་། །ཐེ་ཚོམ་ཟ་བར་གྱུར་པ་འདྲ། །དེ་བས་ན་ངོ་མཚར་ཆེ་བའི་སེམས་ཅན་འདི་ཡུན་རིང་དུ་འདི་ལྟར་ཉོན་མོངས་སུ་གཞུག་པར་མི་རིགས་ཀྱིས། ཐབས་ཀྱིས་འདིའི་མིག་སླར་སྐྱེ་བར་འགྱུར་བར་བྱའོ་སྙམ་མོ། །དེ་ནས་རྒྱལ་པོ་དེ་རིམ་གྱིས་མིག་གི་རྨ་ནི་སོས། བཙུན་མོའི་འཁོར་དང་ཕོ་བྲང་འཁོར་གྱི་མི་རྣམས་ཀྱི་མྱ་ངན་ནི་བསྲབས་ཤིང་སངས་ནས། །རབ་ཏུ་དབེན་པ་འདོད་པའི་ཕྱིར་རྫིང་བུའི་འགྲམ་ན་མེ་ཏོག་གི་ལྗིད་ཀྱིས་ནོན་པའི་ཤིང་བཟང་པོ་སྟུག་པོ་ཡོད་པ། བསེར་བུ་བསིལ་ཞིང་བདེ་ལ་བསུང་ཞིམ་པོའི་ངད་ལྡང་བ། བུང་བ་མང་པོ་སྒྲ་འབྱིན་པ་ཞིག་ཏུ་སྐྱིལ་མོ་དཀྲུང་བཅས་ཏེ་འདུག་འདུག་པ་དང་། །ལྷའི་དབང་པོ་བརྒྱ་བྱིན་མདུན་དུ་འོངས་སོ། །དེ་ནས་རྒྱལ་པོས་འདི་སུ་ཞེས་དྲིས་པ་དང་། སྨྲས་པ། ང་ནི་ལྷའི་དབང་པོ་བརྒྱ་བྱིན་ཡིན་ཏེ། ཁྱོད་ཀྱི་དྲུང་དུ་འོངས་སོ། །གཤེགས་པ་ལེགས་སོ་ཅི་བཞེད་པ་བཀའ་སྩལ་དུ་གསོལ་ཞེས་ཞེ་ས་དང་བཅས་པར་སྨྲས་པ་དང་། རྒྱལ་པོ་ལའང་སྨྲས་པ། རྒྱལ་པོ་དྲང་སྲོང་ཅི་འདོད་པའི་མཆོག་དེ་སློངས་ཤིག དེ་ནས་རྒྱལ་པོ་དེ་སྦྱིན་པ་ལ་གོམས་ཀྱིས། འཇུངས་ཤིང་སློང་བ་ལ་མ་གོམས་པའི་ཕྱིར། བརྟན་པས་ངོ་མཚར་མི་ཆེ་ཞིང་། རླབས་ཅན་དུ་སྨྲས་པ། བརྒྱ་བྱིན་བདག་ནི་ནོར་མང་ཞིང་། །དམག་ཚོགས་ཆེ་ལ་མཐུ་དང་ལྡན། །ད་ནི་ལོང་བར་གྱུར་པས་བདག །འཆི་བ་འབའ་ཞིག་མངོན་པར་འདོད། །གཞན་ཡང་། སློང་བ་རྣམས་ནི་ཡིད་ལ་རེ་བ་ཀུན། །ཡོངས་སུ་བསྐངས་བས་རབ་ཏུ་དགའ་འགྱུར་ཞིང་། །ལེགས་པར་བལྟ་བའི་བཞིན་རྣམས་མི་མཐོང་བས། དེ་ཕྱིར་དབང་པོ་བདག་ནི་འཆི་བར་དགའ། །བརྒྱ་བྱིན་གྱིས་སྨྲས་པ། སྐྱེས་བུ་དམ་པ་རྣམས་འདི་ལྟ་བུ་མྱོང་བར་གྱུར་གྱིས་དེ་སྙམ་དུ་མ་སེམས་ཤིག །འོན་ཀྱང་རེ་ཤིག་ཁྱོད་ལ་ངས་འདྲིའོ། །སློང་བ་རྣམས་ཀྱིས་འདི་ལྟའི་གནས་སྐབས་རྒྱུར་བྱས་ན། །ད་ནི་དེ་ལ་ཁྱོད་ཀྱི་ཡིད་ནི་ཅི་སྙམ་སེམས། །ཅི་ནས་ཡིད་ནི་རབ་ཏུ་ཆེས་པར་འགྱུར་བ་རུ། །དེ་ནི་གསང་བ་མེད་པར་རབ་ཏུ་སྨྲ་བར་གྱིས། རྒྱལ་པོས་སྨྲས་པ། བདག་ངོམ་དུ་གཞུག་པར་དེ་ཙམ་དུ་ཁྱེད་ལ་ཅི་ཡིད་ཆེས། འོན་ཀྱང་ལྷའི་དབང་པོ་གསན་དུ་གསོལ། །དེ་ཚེ་དང་ནི་ད་ལྟའི་སློང་རྣམས་ཀྱིས། སླང་ཞེས་ངེས་པར་སྨྲ་བའི་ཚིག་རྣམས་ལ། །ཤིས་པ་བརྗོད་པ་བཞིན་དུ་བདག་དགའ་ན། །བདག་གི་མིག་ནི་ཡ་གཅིག་མཐོང་བར་ཤོག །དེ་ནས་རྒྱལ་པོས་དེའི་བདེན་པའི་བྱིན་གྱིས་བརླབས་ཀྱི་མཐུ་དང་། །བསོད་ནམས་སྤེལ་བའི་ཁྱད་པར་གྱིས། །ཚིག་དེ་སྐད་སྨྲས་མ་ཐག་ཏུ། །མེ་ཏོག་ཨུཏྤལ་མཐིང་གའི་དབུས་རིན་པོ་ཆེ་ཨན་ད་རྙིལ་གྱིས་སྤྲས་པ་འདྲ་བའི་མིག་ཡ་གཅིག་མཐོང་བར་གྱུར་ཏོ། །ཡ་མཚན་ཆེ་བའི་མིག་དེ་མཐོང་བར་གྱུར་ནས། རྒྱལ་པོ་དེ་སེམས་རབ་ཏུ་དགའ་བས་ཡང་བརྒྱ་བྱིན་ལ་སྨྲས་པ། གང་ཡང་བདག་ལ་ཡ་གཅིག་མིག་བསླངས་ན། དེ་ལ་བདག་གིས་མིག་གཉིས་དགའ་བཞིན་བྱིན། །དགའ་བཞིན་སྤྲོ་ལ་རྩེ་གཅིག་སེམས་གྱུར་ན། །ཡ་གཅིག་མིག་ཀྱང་བདག་ལ་ཡོད་པར་ཤོག །དེ་ནས་དེ་སྐད་སྨྲས་མ་ཐག་ཏུ་རྒྱལ་པོ་དེའི་མིག་ཡ་གཅིག་ཀྱང་མིག་སྔ་མ་དང་འགྲན་པ་བཞིན་དུ་ཡོད་པར་གྱུར་ཏོ། །དེ་ནས་རི་དང་བཅས་པའི་ས་ཆེན་གཡོས། །རྒྱ་མཚོའི་རླབས་ཀྱང་དུས་ལས་འདས་ཏེ་བྱུང་། ལྷ་རྣམས་ཀྱི་ནི་རྔ་བོ་ཆེ་དག་ཀྱང་། །ཟབ་ཅིང་སྙན་པའི་སྒྲ་ཆེན་སྒྲོགས་པར་གྱུར། །ཕྱོགས་རྣམས་ཀུན་ཀྱང་དང་ཞིང་གསལ་བར་སྣང་། སྟོན་ཀའི་དུས་བཞིན་ཟླ་བ་གསལ་གྱུར་ཅིང་། །ཙན་དན་ཕྱེ་མས་བསྒོས་པའི་མེ་ཏོག་རྣམས། །ནམ་མཁའི་ནང་ནས་ལྡིང་ཞིང་འབབ་པར་གྱུར། །ལྷ་ཡི་བུ་མོའི་འཁོར་བཅས་ལྷ་རྣམས་ཀྱང་། །ཡ་མཚན་ཆེ་བའི་མིག་བགྲད་དེར་ལྷགས་གྱུར། །བསེར་བུ་ཡིད་དུ་འོང་བ་བདེ་བ་ལྡང་། །འགྲོ་བ་རྣམས་ཀྱི་ཡིད་ནི་དགའ་བར་གྱུར། །འབྱུང་པོ་མཐུ་ཆེན་ངོ་མཚར་གྱུར་པ་རྣམས། །ཡིད་ནི་རབ་ཏུ་དགའ་བས་ཁྱབ་གྱུར་ནས། །རྒྱལ་པོ་སྤྱོད་མཆོག་བསྟོད་པའི་གཞི་བརྗོད་པ། །སྙན་པའི་ཚིག་རྣམས་ཀུན་དུ་གྲགས་པར་གྱུར། །ཨེ་མའོ་རླབས་ཆེ་ཨེ་མའོ་སྙིང་རྗེ་ཆེ། །འདི་ཡི་སེམས་ནི་ཇི་ལྟར་རྣམ་དག་ལྟོས། །ཨེ་མའོ་བདག་གི་བདེ་ལ་སེམས་མ་ཆགས། །བརྟན་ཞིང་དཔའ་མཆོག་ཁྱོད་ལ་ཕྱག་འཚལ་ལོ། །པདྨའི་སྤྱན་ནི་དཔལ་ལྡན་སླར་རྒྱས་པས། །ཁྱོད་ཀྱི་འགྲོ་བ་མགོན་བཅས་བགྱིས་པ་ལེགས། །ཨེ་མའོ་བསོད་ནམས་ཚོགས་ནི་དོན་ཡོད་པ། །རིང་ཞིག་ལོན་ནས་ཁྱོད་ཀྱི་བྱིན་གྱིས་རྒྱལ། །དེ་ནས་བརྒྱ་བྱིན་གྱིས་ལེགས་སོ་ལེགས་སོ་ཞེས་བྱ་བས་དེ་མགུ་བར་བྱས་ནས་ཡང་སྨྲས་པ། རྒྱལ་པོ་ཁྱོད་ཀྱི་བསམ་པ་དག་པ་ནི། །ང་ཡིས་སྔ་ནས་མི་ཤེས་མ་ཡིན་ཏེ། །རྒྱལ་པོ་ཁྱོད་ཀྱི་མིག་འདི་གཉིས། །དེ་ལྟར་ཁྱོད་ལ་བྱིན་པས་ན། །དཔག་ཚད་བརྒྱ་ནི་ཁོར་ཡུག་ཏུ། བྲག་རི་རྣམས་ཀྱིས་བར་བཅད་ཀྱང་། །ཁྱོད་ཀྱི་མིག་ནི་འདི་གཉིས་ཀྱིས། །ཐོགས་པ་མེད་པར་མཐོང་བར་འགྱུར། །ཞེས་སྨྲས་ནས་བརྒྱ་བྱིན་དེ་ཉིད་དུ་མི་སྣང་བར་གྱུར་ཏོ། །དེ་ནས་བྱང་ཆུབ་སེམས་དཔའ་བློན་པོ་ཆེན་པོ་རྣམས་དང་། རྗེས་སུ་འབྲང་བ་རྣམས་དང་། ཕོ་བྲང་འཁོར་གྱི་མི་རྣམས་ཡ་མཚན་ཆེ་ཞིང་སེམས་རབ་ཏུ་དགའ་བར་གྱུར་པའི་མིག་གིས་བལྟ་ཞིང་། བྲམ་ཟེ་རྣམས་ཀྱིས་ཀྱང་རྒྱལ་བར་གྱུར་ཅིག་ཅེས་བྱ་བ་ཤིས་པ་བརྗོད་པའི་ཚིག་སྨྲ་བས་མངོན་པར་དགའ་བར་བྱས་ཏེ། ཕོ་བྲང་དམ་པ་རྒྱལ་མཚན་དང་བ་དན་སྣ་ཚོགས་བཙུགས་པ། མངོན་པར་མཐོ་བའི་རྒྱན་རྣམས་ཀྱིས་བརྒྱན་པར་ཕྱིན་ནས། འཁོར་གྱི་ནང་དུ་འདུག་སྟེ། དགའ་བར་བལྟ་བའི་ཕྱིར་ལྷགས་པའི་བློན་པོ་ཆེན་པོ་ལ་སོགས་པ་བྲམ་ཟེ་དང་། ཕོ་བྲང་འཁོར་གྱི་མི་ཡ་རབས་རྣམས་ལ། དེ་ལྟར་བདག་གིས་ཉམས་སུ་མྱོང་བའི་ཆོས་བཤད་དོ། །རབ་ཏུ་སྦྱིན་པའི་བསོད་ནམས་ལས་གྱུར་པའོ། །ལྷ་ཡི་མཐུ་ལྡན་ང་ཡི་མིག་མཐོང་ནས། །ཕོངས་པ་རྣམས་ནི་ནོར་གྱིས་མགུ་བྱ་ལ། །འཇིག་རྟེན་ན་ནི་སུ་ཞིག་སྒྲིམ་པ་ལྷོད། །དཔག་ཚད་བརྒྱ་ནི་ཚུན་ཆད་དུ། །བྲག་རི་མང་པོས་བར་བཅད་ཀྱང་། །ཤིན་དུ་རིང་ན་གནས་པ་ཡི། །བལྟ་བར་བྱ་བ་གསལ་བར་མཐོང་། །གང་ཕྱིར་མི་ཡི་མིག་ནི་འདི་བྱིན་ནས། མི་ལས་འདས་པའི་ལྷ་མིག་བདག་གིས་ཐོབ། །གཞན་ལ་བརྩེ་ཞིང་དུལ་བ་ལས་བྱུང་བའི། །སྦྱིན་ལས་གཞན་པའི་མངོན་མཐོའི་ཐབས་གང་ཡོད། ཤི་བི་པ་རྣམས་དེ་ལྟར་རིག་བྱས་ནས། །སྦྱིན་དང་སྤྱད་པས་ནོར་རྣམས་དོན་ཡོད་བྱོས། །འཇིག་རྟེན་འདི་དག་གཞན་ལའང་འདི་ཉིད་ནི། གྲགས་པ་ཆེ་བའི་བདེ་བ་འབྱུང་བའི་ལམ། །འཇིག་རྟེན་ཕན་ཕྱིར་བྱིན་པ་གང་ཡིན་པ། །སྙིང་པོ་མེད་པའི་ནོར་ཡང་སྙིང་པོ་ཡོད། །སྦྱིན་པ་བྱས་ན་གཏེར་དང་འདྲ་བར་འགྱུར། །མ་བྱིན་ན་ནི་ཤིན་དུ་ཆུད་ཟོས་འགྱུར། །དེ་ལྟར་བཅོས་ལྡན་འདས་དེས་བདག་ཅག་གི་ཕྱིར། །བྱ་དཀའ་བ་མང་པོས་དམ་པའི་ཆོས་འདི་བསྒྲུབས་པ་ཡིན་པས། རིམ་གྲོ་བསྐྱེད་དེ་ཆོས་མཉན་པར་བྱའོ། །དེ་བཞིན་གཤེགས་པའི་ཆེ་བ་ཉིད་དང་། །སྔ་མ་བཞིན་དུ་སྙིང་རྗེའི་ཡོན་ཏན་བསྔགས་པ་དང་། ཚེ་འདི་ཉིད་ལ་བསོད་ནམས་ཀྱི་འབྲས་བུ་མཐོང་བར་འགྱུར་བ་ལ་ཡང་བརྗོད་པར་བྱའོ། །དེ་ལྟར་རིམ་གྲོ་བསྐྱེད་དེ་བསོད་ནམས་བསགས་པ་ནི། །བདག་གི་མཐུ་ཆེན་པོ་ཐོབ་པར་འགྱུར་བའི་མེ་ཏོག་དང་གྲགས་པའི་རྒྱུན་ཆགས་པ་ཡིད་དུ་འོང་བ་ཚེ་འདི་ཉིད་ལ་བསྟན་པ་ཡིན་ནོ། །ཡུལ་ཤི་བི་པའི་རྒྱལ་པོར་སྐྱེས་པའི་རབས་ཏེ་གཉིས་པའོ།། །།སེམས་རབ་ཏུ་དང་བ་ལས་བྱུང་བ་དང་སྣོད་ཁྱད་པར་ཅན་ལ་བྱིན་པའི་སྦྱིན་པ་ནི། རྣམ་པར་སྨིན་པ་ཆེ་བའི་ཕྱིར་ཆུང་ཞེས་བྱ་བ་གང་ཡང་མེད་དོ། །དེ་ཡང་འདི་སྐད་ཐོས་ཏེ། བཅོམ་ལྡན་འདས་འདི་སྔོན་བྱང་ཆུབ་སེམས་དཔར་གྱུར་པའི་ཚེ། །ཡུལ་ཀོ་ས་ལའི་བདག་པོར་གྱུར་ཏོ་ཞེས་གྲག་གོ །དེ་ཡང་སྤྲོ་བ་དང་། གསང་ཚིག་དང་། མཐུ་དང་། ནུས་པ་ཕུན་སུམ་ཚོགས་པ་ལ་སོགས་པ་རྒྱལ་པོའི་ཡོན་ཏན་རྣམས་མཆོག་ཏུ་གྱུར་དུ་ཟིན་ཀྱང་སྐལ་བ་ཕུན་སུམ་ཚོགས་པའི་ཡོན་ཏན་བཟང་པོས་འབྱོར་བ་ལྷག་པར་གྱུར་ཏོ། །སྐལ་པ་ཕུན་སུམ་ཚོགས་བརྒྱན་པས། །དེ་ཡི་ཡོན་ཏན་ལྷག་པར་གསལ། །སྟོན་ཀའི་དཔལ་ནི་གསལ་གྱུར་པའི། །ཟླ་བའི་འོད་ཟེར་གསལ་བ་བཞིན། །དེའི་དགྲ་དྲེགས་པ་རྣམས་ཀྱང་བཏང་། །དེ་ལ་བརྟན་པ་རྣམས་ཀྱང་ཆགས། །ཁྲོས་དང་བྱམས་པའི་རྗེས་འབྲང་དཔལ། །རྒྱལ་པོ་གཞན་ལ་དེ་ལྟར་གྱུར། །དེ་ནི་ཆོས་ཀྱི་བདག་ཉིད་གྱུར་པས་ན། །གཞན་ལ་གནོད་པའི་སེམས་གདུག་མེད་པར་གྱུར། །དེ་ཡི་དཔལ་ནི་དགྲ་ལ་མི་འགོ་བས། །འབངས་ཀྱང་དེ་ལ་གློ་བ་ཉེ་བར་འགྱུར། །དེ་བདག་གི་ཚེ་སྔ་མ་འདས་པ་རྗེས་སུ་དྲན་པར་གྱུར་ཏོ། །དེ་རྗེས་སུ་དྲན་པར་གྱུར་པས་རབ་ཏུ་སྐྱོ་བར་གྱུར་ནས། དགེ་སྦྱོང་དང་། བྲམ་ཟེ་དང་། ཕོངས་པ་དང་། སློང་པ་རྣམས་ལ་བདེ་བའི་རྒྱུ་དང་། གཞིར་གྱུར་པའི་སྦྱིན་པ་ཁྱད་པར་ཅན་བྱིན་པར་གྱུར་ཏོ། །ཚུལ་ཁྲིམས་ཀྱི་སྡོམ་པ་ངན་པ་མ་ཡིན་པ་དང་། གསོ་སྦྱོང་དང་། ངེས་པར་གནས་པ་དག་ཀྱང་དུས་མཚམས་ཀྱི་ཉིན་པར་ཡང་དག་པར་ལེན་ཏོ། རྒྱལ་པོའི་འཁོར་དང་། བདག་གི་བཙུན་མོའི་འཁོར་གྱི་ནང་དུ་བསོད་ནམས་ཀྱི་མཐུ་བསྒྲགས་པ་དང་། འཇིག་རྟེན་པ་རྣམས་ལེགས་པ་ལ་འགོད་པར་འདོད་པས། དང་བའི་སེམས་ཀྱིས་དོན་ངེས་པའི་ཚིགས་སུ་བཅད་པ་འདི་གཉིས་ཡང་དང་ཡང་དུ་སྨྲའོ། །བདེ་བར་གཤེགས་ལ་བཀུར་སྟི་བྱས་པ་ཆུང་ངུ་ཡང་། འབྲས་བུ་འབྱོར་པ་ཆུང་ངུ་མེད་ཅེས་སྔོན་ཐོས་ཀྱིས། །ཟན་དྲོན་ཁེངས་པ་རྩུབ་པོ་ལན་ཚ་མེད་པ་ཡི། །འབྲས་བུ་འབྱོར་པ་ཆེན་པོ་འདི་ལྟར་གྱུར་ལ་ལྟོས། །ཤིང་རྟ་སྣ་ཚོགས་རྟ་དང་གླང་པོ་འགྱིང་པ་དང་། །བདག་གི་དམག་ཚོགས་ཆེན་པོ་འདི་དང་ས་ཆེན་འདི། །ནོར་མང་དཔལ་ཡང་རྗེས་ཆགས་བཙུན་མོ་རྒྱ་ཆེ་ལྡན། །ཟན་དྲོན་ཆངས་གཅིག་འབྲས་བུ་གྲུབ་པ་བཟང་པོ་ལྟོས། །བློན་པོ་ཆེན་པོ་རྣམས་དང་། བྲམ་ཟེ་རྒན་པོ་རྣམས་དང་། ཕོ་བྲང་འཁོར་གྱི་མི་སྟོང་རིམས་རྣམས་ཡིད་ལ་ངོ་མཚར་ཆེ་བར་གྱུར་ཀྱང་། རྒྱལ་པོ་ཆེན་པོ་ཅི་ལ་དགོངས་ཏེ། ཚིགས་སུ་བཅད་པ་འདི་གཉིས་རྟག་ཏུ་གསུང་ཞེས་དེ་ལ་སླར་ཞུ་མ་ནུས་སོ། །དེ་ནས་རྒྱལ་པོ་དེའི་བཙུན་མོ་གནང་ཆེན་སྤོབས་པ་ཐོགས་པ་མེད་པ་ཞིག་ངོ་མཚར་སྐྱེས་ནས། །གཏམ་གླེང་བའི་སྐབས་སུ་བབ་སྟེ། །འཁོར་གྱི་ནང་དུ་དེ་ལ་ཞུས་པ། །མིའི་དབང་པོ་ངེས་པར་གསུང་བ་ནི། །ཐུགས་ལ་དགོངས་པའི་དགྱེས་པ་ཞལ་དུ་བྱུང་། །ཁྱོད་ཀྱིས་དེ་སྐད་གསུངས་པ་བདག་གི་སེམས། །ངོ་མཚར་ཆེ་བས་རབ་ཏུ་གཡེངས་བར་གྱུར། །སྐྱེ་བོ་འདི་ཡིས་དེ་ནི་ཐོས་རུང་ན། །རྒྱལ་པོ་ཅི་ཕྱིར་གསུངས་བ་བཀའ་སྩལ་གསོལ། །གསང་ན་དེ་སྐད་གར་ཡང་མི་བསྒྲགས་ཏེ། །དེ་བས་བདག་གིས་བསྒྲགས་པར་ཞུས་པ་ལགས། །དེ་ནས་རྒྱལ་པོ་དེ་རབ་ཏུ་དགའ་ཞིང་རབ་ཏུ་བྱམས་པའི་ལྟ་བས་བཙུན་མོ་ལ་བལྟས་ཏེ། འཛུམ་པའི་བཞིན་མདངས་དང་ལྡན་པས་སྨྲས་པ། དོན་དང་རྒྱུ་མཚན་མ་ཕྱེ་བར། །ང་ཡིས་སྨྲས་པ་འདི་ཐོས་ནས། འདིར་ནི་ཁྱོད་ནི་འབའ་ཞིག་ཏུ། །ངོ་མཚར་ཆེར་འགྱུར་ཡིད་གཡོས་མིན། །བློན་པོ་ཆེན་པོ་ཚོགས་པ་འདི་དག་ཐམས་ཅད་ཀྱང་། །ཡིད་ནི་ངོ་མཚར་ཆེན་པོས་རབ་ཏུ་གཡོས་པར་གྱུར། །ང་ཡི་ཕོ་བྲང་འཁོར་དང་བཙུན་མོར་བཅས་པ་ཡང་། གང་ཕྱིར་ང་ཡིས་དེ་སྐད་སྨྲས་པ་མཉན་པར་གྱིས། །གཉིད་ལས་སད་པ་བཞིན་དུ་སྐྱེ་བ་ངས་དྲན་པས། །ཚུལ་དང་ལྡན་ཀྱང་ནོར་ཙམ་གྱིས་ནི་མ་ཐོབ་ལ། །ལས་ཀྱིས་མགུ་བར་བྱས་ནས་དམན་ཚིས་འཚོ་བ་ཡི། །གླ་མི་ཞིག་ཏུ་གྲོང་ཁྱེར་འདིར་ནི་ང་གྱུར་ཏོ། །གཞན་གྱིས་བརྙས་ཤིང་ངལ་ལ་དམན་པའི་གླ་དེ་ཡང་། །སྐྱབས་སུ་རེ་ཞིང་མི་ཚོར་དོགས་ནས་དེ་ལ་ཞུགས། །དགེ་སློང་བཞི་ཞིག་བསོད་ནམས་ཕྱིར་ལྷགས་མཐོང་བར་གྱུར། །དབང་པོ་དུལ་ཞིང་དགེ་སྦྱོང་དཔལ་གྱིས་རྗེས་འབྲངས་བཞིན། །དང་ཞིང་འཇམ་པའི་ཡིད་ཀྱིས་དེ་ལ་ཕྱག་བྱས་ནས། །ཟན་དྲོན་ཙམ་ཞིག་བདག་གིས་ཁྱིམ་དུ་གུས་པར་བྱིན། །དེ་ཡི་མྱུ་གུ་ཙམ་ཞིག་བྱུང་འདྲ་འདི་ཡིན་ཏེ། །རྒྱལ་པོ་གཞན་གྱི་གཙུག་གིས་ང་ཡི་ཞབས་ལ་གཏུགས། །ང་ཡིས་དེ་ལ་བསམས་ནས་ནི། །ལྷ་མོ་ཁྱོད་ལ་སྨྲས་པ་ཡིན། །བསོད་ནམས་ཀྱིས་ནི་ངོམས་མི་མྱོང་། །དགྲ་བཅོམ་མཐོང་བས་མི་ངོམས་སོ། །དེ་ནས་ལྷ་མོ་དེ་དགའ་ཞིང་ཡ་མཚན་ཆེ་བའི་མིག་དགྲད་ནས། རྒྱལ་པོ་ལ་རབ་ཏུ་གུས་པར་བལྟ་ཞིང་སྨྲས་པ། མངོན་པར་མཐོ་བའི་ཁྱད་པར་འདི་ལྟ་བུ་ནི་བསོད་ནམས་ཀྱི་རྣམ་པར་སྨིན་པ་ལགས་པར་གདའོ། རྒྱལ་པོ་ཆེན་པོ་འདི་ལྟར་བསོད་ནམས་མཛད་པ་ལ་གུས་པ་ནི། བསོད་ནམས་ཀྱི་འབྲས་བུ་མངོན་སུམ་དུ་གྱུར་པའི་སླད་དུའོ། །དེ་བས་ན་འདི་ལྟར་དངོས་སྡིག་མི་མཛད་པ་དང་། སྐྱེ་དགུ་རྣམས་ལ་ཕ་བཞིན་དུ་ཡོངས་སུ་སྐྱོང་བ་ལགས་པར་མཛད་པ་དང་། བསོད་ནམས་ཀྱི་ཡོན་ཏན་ལེགས་པར་བསྒྲུབ་པ་ལ་མངོན་པར་ཕྱོགས་པ་ལེགས་སོ། །གྲགས་དང་དཔལ་དང་སྦྱིན་པ་ཕུན་སུམ་ཚོགས་པས་འབར། །བཀའ་ལུང་གཉན་པོ་རྒྱལ་པོ་གཞན་གྱི་སྤྱི་བོས་ནོད། །བསེར་མ་ལངས་པས་རླབས་བསྐྱོད་རྒྱ་མཚོའི་གོས་གྱོན་པའི། །ཆོས་ཀྱི་ཚུལ་བཞིན་ས་ཆེན་ཡུན་རིང་སྐྱོང་བར་གྱུར། །རྒྱལ་པོས་སྨྲས་པ། །ལྷ་མོ་དེ་དེ་ལྟར་ག་ལ་ཞིག་མ་ཡིན། མཚན་མ་བཟང་པོས་མངོན་པར་མཚོན་པ་ལེགས་པའི་ལམ། །དེ་ཉིད་ལ་ནི་ད་རུང་བདག་གིས་བསྟེན་པར་བྱ། །འཇིག་རྟེན་པ་ནི་སྦྱིན་པའི་འབྲས་བུ་ཐོས་ནས་སྟེར། །ང་བདག་ཉམས་སུ་མྱོང་ན་ཅི་ཕྱིར་སྦྱིན་མི་བྱ། །དེ་ནས་རྒྱལ་པོ་དེས། །ལྷ་མོ་བཞིན་དུ་དཔལ་འབར་བའི་ལྷ་མོ་ལ་རབ་ཏུ་བྱམས་པས་བལྟས་ནས། །དཔལ་ཕུན་སུམ་ཚོགས་པ་ལ་སེམས་ཞེན་པས་ཡང་སྨྲས་པ། སྐར་མའི་ནང་ན་ཟླ་བ་བཞིན། །བུད་མེད་ནང་ན་རྣམ་པར་མཛེས། །ཤིན་ཏུ་ཡིད་འོང་འབྱུང་བའི་ལས། །དགེ་ལྡན་ཁྱོད་ཀྱིས་ཅི་ཞིག་བྱས། །ལྷ་མོས་སྨྲས་པ། ལྷ་བདག་གིས་ཀྱང་ཚེ་སྔ་མ་ལ་ཅུང་ཟད་ཅིག་བགྱིས་པ་རྗེས་སུ་དྲན་ནོ། །དེ་སྨྲོས་ཤིག་སྨྲོས་ཤིག་ཅེས་རྒྱལ་པོས་དྲིས་པ་དང་། སྨྲས་པ། བྱིས་པའི་དུས་ན་མྱོང་བ་དེ་ནི་རྗེས་དྲན་བཞིན། །བདག་ནི་བྲན་མོ་བགྱིད་པའི་ཚེ་ན་ཟན་ཆངས་གཅིག །ཐུབ་པ་ཟག་པ་ཟད་ལ་གུས་པར་ཕུལ་བ་ཡིས། །དེ་ཚེ་གཉིད་ཀྱི་ལོག་པ་འདིར་ནི་སད་པ་བཞིན། །མི་རྗེ་ལྷས་མཛད་དགེ་བ་དེ་ནི་བདག་གིས་དྲན། །དེ་ཡིས་བདག་ནི་ས་དང་བཅས་པའི་མགོན་ཁྱོད་གྱུར། །ཟག་པ་ཟད་ལ་བྱས་པ་ཆུང་བ་གང་ཡང་མེད། །ཇི་ལྟར་ཐུབ་པས་བཀའ་སྩལ་བཞིན་དུ་ཁྱོད་ཀྱིས་གསུངས། །དེ་ནས་རྒྱལ་པོ་དེས་བསོད་ནམས་ཀྱི་འབྲས་བུ་མཐོང་བས་བསོད་ནམས་ལ་གུས་པ་བསྐྱེད་པ་སེམས་རབ་ཏུ་དང་བར་གྱུར་པའི་འཁོར་ལ་ཡ་མཚན་རྩེ་གཅིག་ཏུ་གྱུར་པར་རིག་ནས་ངེས་པ་འདི་འདྲ་བ་ཅུང་ཟད་ཅིག་རྗེས་སུ་བསྟན་ཏོ། །དགེ་བ་མི་ཆེ་བས་ཀྱང་རྣམ་སྨིན་རྒྱ་ཆེ་དཔལ་འདི་མཐོང་ནས་སུ། །སྦྱིན་དང་ཚུལ་ཁྲིམས་སྤྱོད་ལ་བསོད་ནམས་བྱ་ལ་མི་འབད་སུ་ཞིག་ཡོད། །ནོར་གྱིས་ཆོག་པར་ཡོད་ཀྱང་སེར་སྣའི་མུན་པས་གང་ཞིག་བློ་བསྒྲིབས་ན། །སྦྱིན་པས་གྲགས་པ་ཐོབ་པར་མི་བྱེད་མི་དེ་བལྟར་མི་རུང་། དབང་མེད་པར་ནི་གང་ཞིག་བཏང་དགོས་དེ་བཞིན་སུ་ལའང་ཕན་མི་ཐོགས། ནོར་དེ་རིགས་པར་བཏང་ན་གལ་ཏེ་ཡོན་ཏན་གང་ཞིག་འཐོབ་འགྱུར་ན། ཡོན་ཏན་ཉམས་ནི་ཡོད་བཞིན་དེ་ལ་སུ་ཞིག་སེར་སྣའི་ལམ་ལ་བརྟེན། །སྦྱིན་པ་ལས་བྱུང་ཡོན་ཏན་དགའ་ལ་སོགས་པ་སྣ་ཚོགས་གྲགས་དང་ལྡན། །སྦྱིན་པ་ཞེས་བྱ་གཏེར་ཆེན་རྗེས་འགྲོ་རྐུན་པོ་ལ་སོགས་ཐུན་མོང་མིན། །སྦྱིན་པ་འདོད་དང་སེར་སྣའི་སྐྱོན་གྱི་རྡུལ་ཅན་སེམས་ནི་སྦྱོང་བར་བྱེད། སྦྱིན་པས་འཁོར་བའི་ལམ་བགྲོད་ངལ་བ་མེད་བར་བཞོན་པ་བདེ་བ་ཡིན། སྦྱིན་པ་བདེ་བ་མང་པོ་འགྲུབ་ཅིང་གྲོགས་པོ་བཟང་པོའི་མཆོག་ཡིན་ནོ། །འབྱོར་པ་ཕུན་སུམ་ཚོགས་པའམ་བཀའ་ལུང་གཉན་པོའི་ཡོན་ཏན་ནམ། །སུམ་ཅུ་རྩ་གསུམ་ཕོ་བྲང་གནས་སམ་གཟུགས་བཟང་ཡོན་ཏན་ནམ། །གང་ཞིག་འདོད་པ་དེ་དག་ཐམས་ཅད་སྦྱིན་པས་ཐོབ་པར་འགྱུར། །དེ་ལྟར་ངེས་དོན་གཏན་ལ་ཕབ་ན་སྦྱིན་པ་སུ་མི་བྱེད། །སྦྱིན་པས་ནོར་གྱི་སྙིང་པོ་ལེན་པར་གསུངས། སྦྱིན་པ་དབང་ཕྱུག་རྣམས་ཀྱི་རྒྱུ་ཞེས་གསུངས། སྦྱིན་པ་དཔལ་ལྡན་སྐྱེ་བོ་མཆོག་གི་ཚུལ། །ཤེས་རབ་ཆུང་ངུས་རྡུལ་ཙམ་སྦྱིན་མི་ནུས། །དེ་ནས་འཁོར་དེ་དག་གིས་རྒྱལ་པོ་དེའི་ཚིག་གཟུང་དུ་རུང་བ་ལ། རབ་ཏུ་གུས་ཤིང་དགའ་བར་བྱས་ནས། སྦྱིན་པ་ལ་སོགས་པའི་ཡོན་ཏན་བསྒྲུབ་པ་ལ་མངོན་དུ་ཕྱོགས་པར་གྱུར་ཏོ། །དེ་བས་ན་དེ་ལྟར་སེམས་རབ་ཏུ་དང་བ་ལས་བྱུང་བ་དང་། སྣོད་ཁྱད་པར་ཅན་ལ་བྱིན་པ་ནི་རྣམ་པར་སྨིན་པ་ཆེ་བའི་ཕྱིར་སྦྱིན་པ་ཆུང་ཞེས་བྱ་བ་གང་ཡང་མེད་དོ། །དེ་བས་ན་སེམས་རབ་ཏུ་དང་བས། བླ་ན་མེད་པའི་བསོད་ནམས་ཀྱི་ཞིང་འཕགས་པའི་དགེ་འདུན་ལ་སྦྱིན་པ་བྱིན་ན། བདག་ཀྱང་དེ་ལྟ་བུའི་ཕུན་སུམ་ཚོགས་པའམ། དེ་བས་ཀྱང་ཁྱད་པར་དུ་འཕགས་པ་ཐོབ་པར་འགྱུར་བ་རིང་པོ་མི་ཐོགས་སོ་སྙམ་དུ་རབ་ཏུ་བསམས་ཏེ་དགའ་བ་བསྐྱེད་པར་བྱའོ། །ཟན་དྲོན་ཆངས་བ་ཕུལ་བར་སྐྱེས་པའི་རབས་ཏེ་གསུམ་པའོ། །བམ་པོ་གཉིས་པ།། །།སྐྱེས་བུ་དམ་པ་རྣམས་ནི་བདག་བརླག་པར་གྱུར་པ་ལ་ཡང་མི་འཛེམ་པར་སྦྱིན་པ་བྱིན་པར་བྱེད་ན། བདེ་བར་འདུག་པ་ལྟ་སུ་ཞིག་སྦྱིན་པར་མི་བྱེད། དེ་ཡང་འདི་སྐད་ཐོས་ཏེ། བཅོམ་ལྡན་འདས་འདི་སྔོན་བྱང་ཆུབ་སེམས་དཔར་གྱུར་པའི་ཚེ། །སྐལ་པ་ཁྱད་པར་ཅན་དང་ལྡན་པ་ཡོན་ཏན་དང་སྤྲོ་བ་ཕུན་སུམ་ཚོགས་པས། ནོར་ཕུན་སུམ་ཚོགས་པ་དང་ནི་ལྡན། །སྤྱོད་ཚུལ་མི་མཐུན་པ་མེད་པའི་ངང་ཚུལ་ཅན་ཡིན་པས། འཇིག་རྟེན་པ་རྣམས་ཀྱིས་བཀུར་སྟི་བྱ་བའི་གནས་སུ་ནི་གྱུར། ཁྱོ་རིགས་བཙུན་པ་དང་ནི་ལྡན། རིག་པ་དང་རྒྱུ་རྩལ་གྱི་ཁྱད་པར་རྣམ་པ་དུ་མ་ཁོང་དུ་ཆུད་པས། བློ་རབ་ཏུ་དྲི་མ་མེད་པར་ནི་གྱུར། ཡོན་ཏན་ཆེ་བས་རྒྱལ་པོས་ནི་བཀུར་སྟི་བྱས། རབ་ཏུ་སྦྱིན་པའི་ངང་ཚུལ་ཅན་ཡིན་པས། འབྱོར་པ་རྣམས་ནི་འཇིག་རྟེན་པ་རྣམས་དང་ཐུན་མོང་དུ་སྤྱོད་པའི་ཚོང་དཔོན་ཞིག་ཏུ་གྱུར་ཏོ་ཞེས་གྲག་གོ །ཕོངས་པ་རྣམས་ནི་དགའ་གྱུར་པས། །ཕན་ཚུན་ཀུན་དུ་བསྒྲགས་པ་ནི། །དེ་མིང་སྦྱིན་ལ་དཔའ་བ་ཞེས། །ཕྱོགས་བཅུ་ཀུན་དུ་ཁྱབ་པར་གྱུར། སྦྱིན་ནམ་མི་སྦྱིན་སྙམ་པའི་རྣམ་རྟོག་པ། །ཡིད་ལ་སེམས་པ་ཕོངས་པ་རྣམས་ལས་མེད། །དེ་ཡི་སྦྱིན་པའི་མཐུ་ཆེན་གྲགས་པར་གྱུར། །ཕོངས་པ་རྣམས་ནི་ཡིད་ཆེས་སྤོབས་ཤིང་སློང་། དེ་ནི་བདག་གི་བདེ་ཕྱིར་ནོར་མི་སྦེད། །འགྲན་པ་དང་ནི་ཆགས་པའི་ཟིལ་མནོན་མིན། །དེ་ནི་ཕོངས་པའི་སྡུག་བསྔལ་བཟོད་མི་ནུས། དེ་བས་མེད་ཅེས་སྨྲ་བ་སྦས་པར་གྱུར། །དེ་ནས་རེ་ཤིག་ཅིག་སེམས་དཔའ་ཆེན་པོ་དེ་ཟས་ཀྱི་དུས་ལ་བབ་པའི་ཚེ། །ཁྲུས་བྱས་བྱུག་སྤོས་ཀྱིས་བྱུགས་པ་དང་། གཡོ་མཁན་མཁས་པས་གཡོས་པའི་བཟའ་བ་དང་བཅའ་བ་བསུང་དང་རོ་དང་འཇམ་པ་ལ་སོགས་པའི་ཡོན་ཏན་དང་ལྡན་པ་རྣམ་པ་སྣ་ཚོགས་བཤམ་པ་དང་། རང་སངས་རྒྱས་ཉོན་མོངས་པའི་བུད་ཤིང་ཐམས་ཅད་བསྲེགས་པ། དེའི་བསོད་ནམས་ཀྱི་ཚོགས་རྣམ་པར་འཕེལ་བར་འདོད་པ་ཞིག་དེའི་ཁྱིམ་དུ་བསོད་སྙོམས་ཀྱི་ཕྱིར་འོངས་སོ། །འོངས་ནས་ཀྱང་སྒོ་ཁང་ན་སྡོད་ཅིང་འདུག་གོ །དོགས་མེད་མི་གཡོ་བརྟན་ཞིང་ཞི་བ་ཡི། །མིག་གིས་ས་ལ་གཉའ་ཤིང་གང་དུ་བལྟ། །རབ་ཏུ་ཞི་བར་གྱུར་ཅིང་དེ་ན་སྡོད། །དེ་ལག་པདྨའི་མཆོག་ནི་ལྷུང་བཟེད་ཐོགས། །དེ་ནས་བདུད་སྡིག་ཅན་བྱང་ཆུབ་སེམས་དཔའི་སྦྱིན་པ་ཕུན་སུམ་ཚོགས་པ་དེ་མི་བཟོད་པས། །དེ་ལ་གེགས་བྱ་བའི་ཕྱིར་བཙུན་པ་དེ་དང་། བར་སྒོ་གཉིས་ཀྱི་བར་དུ་སེམས་ཅན་དམྱལ་བའི་ནང་ན་མེ་ཆེན་པོ་འབར་བ། ཟབས་སུ་མི་འགྲེང་དུ་མ་ཡོད་པ་རབ་ཏུ་ཟབ་པ། མཐོང་ན་རབ་ཏུ་འཇིགས་པ། འཇིགས་སུ་རུང་བའི་སྒྲ་གྲག་པ། སྐྱེ་བོ་མང་པོ་རྣམ་པར་གཡོ་བས་གང་བ་ཞིག་མངོན་པར་སྤྲུལ་ཏོ། །དེ་ནས་བྱང་ཆུབ་སེམས་དཔས་རང་སངས་རྒྱས་བསོད་སྙོམས་ལ་གཤེགས་པར་མཐོང་ནས། ཆུང་མ་ལ་བདག་ཉིད་ཀྱིས་འཕགས་པ་ལ་བསོད་སྙོམས་ཕུལ་ཅིག་ཅེས་སྨྲས་སོ། །དེས་དེ་ལྟར་མཉན་ཏེ་དེ་བཞིན་བགྱིའོ་ཞེས་སྨྲས་ནས་བཟའ་བ་དང་བཅས་པ་བཟང་པོ་ཁྱེར་ནས་སོང་སོང་བ་ལས། སེམས་ཅན་དམྱལ་བ་མཐོང་བ་དང་། འཇིགས་ཤིང་སྐྲག་པའི་མིག་རིག་རིག་པོར་གྱུར་ཏེ། སྒོ་དྲུང་ནས་སླར་ལོག་པ་དང་། འདི་ཅི་ཉེས་ཞེས་ཁྱིམ་ཐབ་ཀྱིས་དྲིས་སོ། །དེ་བརྟབས་པས་སྐད་འགགས་ནས། དེ་ལ་སྨྲ་ཡང་དེའུ་མ་ནུས་ཏེ་སྨྲས་སོ། །དེ་ནས་བྱང་ཆུབ་སེམས་དཔས་བསམས་པ། །ཨེ་མའོ་འཕགས་པ་འདི་བདག་གི་ཁྱིམ་ནས་བསོད་སྙོམས་མ་བཞེས་བར་སླར་བཞུད་ན། ག་ལ་རུང་སྙམ་ནས་དེས་སྨྲས་པ་མ་ཉན་པར། རིང་རིངས་ལྟར་བཟའ་བ་དང་བཅའ་བ་བཟང་པོ་བདག་ཉིད་ཀྱིས་ཁྱེར་ཏེ་མཐུ་ཆེན་པོ་དེ་ལ་བསོད་སྙོམས་དབུལ་བའི་ཕྱིར་སྒོ་ཁང་གི་དྲུང་དུ་ཕྱིན་པ་དང་། བར་དེར་སེམས་ཅན་དམྱལ་བ་ཆེན་པོ་རབ་ཏུ་འཇིགས་པ་དེ་མཐོང་བར་གྱུར་ཏོ། །དེ་ནས་འདི་ཅི་ཞིག་ཡིན་སྙམ་དུ་རྣམ་པར་རྟོག་པ་སྐྱེས་པ་དང་། བདུད་སྡིག་ཅན་ཁང་པའི་ངོས་ཀྱི་རྩིག་པའི་ནང་ནས་བྱུང་སྟེ། ལྷའི་ལུས་ཡ་མཚན་ཆེ་བ་མངོན་སུམ་དུ་བསྟན་ནས། བར་སྣང་ལ་གནས་ཏེ། ཕན་པར་འདོད་པ་བཞིན་དུ་གསལ་བར་སྨྲས་པ། ཀྱེ་ཁྱིམ་བདག་སེམས་ཅན་དམྱལ་བ་ཆེན་པོ་འདི་ནི་འབོད་སྒྲོགས་ཞེས་བྱ་བ་ཡིན་ནོ། །ཕོངས་པས་བསྔགས་པའི་ཚིག་གིས་བསླུས་ནས་ནི། སྦྱིན་ལ་ཞུགས་པས་གང་གིས་ནོར་ཆུད་གསན། །དེ་དག་ལོ་ནི་སྟོང་ཕྲག་དུ་མར་ཡང་། འདི་ན་གནས་འགྱུར་དབྱུང་བར་ཤིན་དུ་དཀའ། །ནོར་ནི་འཁོར་གསུམ་ཁྱད་པར་རྒྱུ་ཡིན་ཏེ། །དེ་མེད་བྱས་ན་སུ་ཡིས་ཆོས་མ་བརླག །ནོར་ཆུད་གསན་པས་ཆོས་ནི་བརླག་འགྱུར་ན། །ཅི་ཕྱིར་སེམས་ཅན་དམྱལ་བར་གནས་མི་འགྱུར། །སྦྱིན་པའི་ཕྱིར་ནི་ཆོས་ཀྱི་རྩར་གྱུར་པའི། །ནོར་ནི་འཁོར་གསུམ་ཁྱད་པར་རྒྱུ་ཡིན་ཏེ། །དེ་མེད་བྱས་ན་སུ་ཡིས་ཆོས་མ་བརླག །ནོར་ཆུད་གསན་པས་ཆོས་ནི་བརླག་འགྱུར་ན། །ཅི་ཕྱིར་སེམས་ཅན་དམྱལ་བར་གནས་མི་འགྱུར། །སྦྱིན་པའི་ཕྱིར་ནི་ཆོས་ཀྱི་རྩར་གྱུར་པའོ། །ནོར་ནི་ཁྱོད་ཀྱིས་ཆུད་གསན་སྡིག་བྱས་པས། །དམྱལ་བའི་གཤེད་པོ་མི་བཟད་འབར་བའི་ལྕེ། །དེ་ཕྱིར་ཁྱོད་ནི་ཟ་བར་འདིར་འོངས་སོ། །དེ་བས་བློ་ནི་སྦྱིན་ལས་བཟློག་ན་ལེགས། །འོན་ཀྱང་འཕྲལ་དུ་ལྷུང་བར་ཁྱོད་མི་འགྱུར། །སྙིང་རྗེར་ངུ་ཞིང་འདྲེ་ལྡོག་བྱེད་པ་ཡི། །གཏོང་བ་འདི་དང་ལྷན་ཅིག་ཁྱོད་མ་འགྲོགས། །སྦྱིན་པ་ཚུལ་བཞིན་མི་བྱེད་ལེན་པ་པོའི། །སྐྱེ་བོ་རྣམས་ནི་ལྷ་ཡུལ་འགྲོ་བར་འགྱུར། །དེ་བས་མཐོ་རིས་ལམ་སྒྲིབ་བཏང་ནས་ནི། །སྦྱིན་ལ་བརྩོན་ལ་གནས་པར་མི་བྱའོ། དེ་ནས་བྱང་ཆུབ་སེམས་དཔས་བསམས་པ། འདི་སྐད་ཟེར་བའི་བདག་ཉིད་ངན་པ་འདི་ནི། །བདག་སྦྱིན་པ་བྱེད་པ་དེ་ལ་ངེས་པར་གེགས་བྱེད་པ་ཡིན་ནོ་སྙམ་ནས། བདག་གི་སྙིང་སྟོབས་ཀྱི་ཁར་བོར་ཏེ་བརྟན་པར་བྱས་ནས། ཚིག་འཇམ་པོས་དེ་ལ་རྒྱུན་མི་འཆད་བར་འདི་སྐད་ཅེས་སྨྲས་པར་ངེས་སོ། །བདག་ཅག་འདྲ་ལ་ཕན་པར་དགོངས་ནས་ནི། །ཁྱོད་ཀྱིས་འཕགས་པའི་ལམ་འདི་རྣམས་བསྟན་པ། །གཞན་ལ་ཕན་འདོགས་མཁས་པའི་སྤྱོད་པ་ཅན། །ལྷ་རྣམས་ཀྱིས་ནི་དེ་ལྟར་བགྱི་བའི་རིགས། །ཉེས་པ་བྱུང་པའི་སྔོན་ནམ་འོག་ཏུ་ཡང་། །ཞི་བའི་ལམ་དེར་འཆི་བར་རབ་ཏུ་རིགས། །ནད་ལ་ཆོ་ག་སྤྱད་པ་ནོངས་པ་ཡིས། །ཚབས་ཆེར་གྱུར་ལ་དཔྱད་ཀྱིས་སྨན་མི་ཐོགས། །སྦྱིན་ལ་ཞུགས་པ་བདག་གི་སྡུག་བསྔལ་འདིས། །དཔྱད་ཀྱིས་སློན་པར་རབ་ཏུ་མི་འགྱུར་དོགས། །ཁྱོད་ཀྱིས་ཕན་པར་བསྟན་པའང་མི་མཉན་པར། །བདག་གི་སེམས་ནི་སྦྱིན་ལ་སླར་མི་ལྡོག །སྦྱིན་ལས་སྡིག་པར་འགྱུར་ཞེས་གང་སྨྲས་ཤིང་། །ནོར་ཡང་ཆོས་ཀྱི་རྒྱུ་ཡིན་ཞེས་བགྱི་བ། སྦྱིན་པ་མ་གཏོགས་ཆོས་ལམ་གཞན་ཡོད་པའམ། །དེ་ནི་གཏེར་སྦས་ཆོས་ཀྱི་རྒྱུར་འགྱུར་བའམ། །འོན་ཏེ་རྐུན་པོས་ངོ་མཐོན་ཕྲོགས་གྱུར་ཏམ། །འོང་པས་ཁྱེར་ཏེ་མི་སྣང་གྱུར་བའམ། །མེ་ཡིས་ཚིག་ན་བསོད་ནམས་ཐོབ་འགྱུར་བར། །མི་ཡི་བློས་ནི་རྟོགས་པར་མི་ནུས་སོ། །ནོར་སྦྱིན་བས་ནི་དམྱལ་བར་འགྲོ་བ་དང་། །ལེན་པ་ལྷ་ཡུལ་འགྲོ་ཞེས་བྱ་བ་ཡང་། ཁྱོད་ཀྱིས་སྦྱིན་ལས་བཟློག་པར་བྱས་མོད་ཀྱི། །དེ་ཡིས་བདག་ནི་སྦྱིན་ལ་བརྩོན་པར་གྱུར། །ཁྱོད་ཀྱི་ཚིག་དེ་གཞན་དུ་མ་གྱུར་ཅིག །བདག་ལ་སློང་བ་དེ་དག་མཐོ་རིས་དང་། །འཇིག་རྟེན་ཕན་ཕྱིར་བདག་ནི་སྦྱིན་པར་བྱེད། །བདག་གི་བདེ་བ་བསྒྲུབ་ཕྱིར་འདི་མི་བྱེད། །དེ་ནས་ཡང་བདུད་སྡིག་ཅན་ཕན་པར་འདོད་པ་བཞིན་བརྟན་པར་བྱ་བའི་ལག་པ་བརྐྱང་སྟེ། བྱང་ཆུབ་སེམས་དཔའ་ལ་སྨྲས་པ། འདི་ནི་ང་ཡིས་ཕན་པའམ་བརྫུན་སྨྲས་པ། །ལེགས་པར་རྟོགས་ལ་གང་དུ་དགའ་བར་སོང་། བདེ་དང་ལྡན་ན་གུས་བཅས་དྲན་པར་གྱིས། །ཡང་ན་འགྱོད་བཞིན་ང་ནི་དྲན་པར་བྱོས། །བྱང་ཆུབ་སེམས་དཔས་གྲོགས་པོ་ཁྱོད་བཟོད་པར་མཛོད་ཅིག་ཅེས་སྨྲས་ནས། ཕོངས་པ་རྣམས་ཀྱིས་ངག་ཕབ་སྤོངས་ཏེ་བསླངས་པ་ལ། །སྦྱིན་པའི་དུས་སུ་བརྙས་ཏེ་མ་བྱིན་དགའ་བ་བས། །མི་བཟད་མེ་ལྕེ་འབར་བའི་སེམས་ཅན་དམྱལ་བ་དེར། །མེ་ལྕེ་འབར་བས་ཕོག་ནས་སྤྱི་ཚུགས་ལྷུང་ཡང་རུང་། །དེ་སྐད་ཅེས་སྨྲས་ནས་བྱང་ཆུབ་སེམས་དཔའ་བདག་གི་སྐལ་བའི་མཐུ་ལ་བརྟེན་ནས། སྦྱིན་པ་ལ་ཉེས་དམིགས་མེད་པར་ཡང་ཤེས་ཏེ། །བུ་སྨད་དང་གཡོག་འཁོར་འགྲོར་མི་སྟེར་བར་ཐེན་པ་རྣམས་བོར་ནས། བློ་ལ་ཚམ་ཚོམ་མེད་ཅིང་སྦྱིན་པ་བྱེད་པར་འདོད་པ་སྐྱེས་ཏེ། །དམྱལ་བའི་ནང་ན་ཕར་སོང་ངོ་། །དེ་ནས་དེ་ཡི་བསོད་ནམས་མཐུ་ཡིས་དེར། །འདམ་རྫབ་མེད་པར་འདམ་ལས་སྐྱེས་པ་བྱུང་། །ཟེ་འབྲུ་དཀར་པོ་སོ་ཡི་ཕྲེང་བ་དང་། བདུད་ལ་འཕྱ་བ་བཞིན་དུ་རྒོད་པར་གྱུར། །དེ་ནས་བྱང་ཆུབ་སེམས་དཔའ་བདག་གི་བསོད་ནམས་ཁྱད་པར་ཅན་ལས་བྱུང་བ་པདྨའི་སྟེགས་ལ་སོང་སྟེ། །རང་སངས་རྒྱས་ཀྱི་དྲུང་དུ་ཕྱིན་ནས། །སེམས་རབ་ཏུ་དགའ་ཞིང་དང་བས་དེ་ལ་བསོད་སྙོམས་ཕུལ་ལོ། །དེ་ཡི་ཡིད་ནི་རབ་ཏུ་དང་བྱའི་ཕྱིར། །དེ་ནས་དགེ་སློང་དེ་ནི་མཁའ་ལ་ལྡིང་། །དེ་ནི་དེ་ན་ཆར་འབེབས་འབར་བར་བྱེད། །གློག་དང་བཅས་པའི་སྤྲིན་གྱི་དཔལ་བཞིན་མཛེས། །བདུད་ནི་ཡིད་ལ་བསམ་པ་མ་གྲུབ་ནས། །ཡི་ཆད་ནས་ནི་མདངས་ཀྱང་ཉམས་པར་གྱུར། །དེ་ལ་ཕྱོགས་ནས་ལྟ་ཡང་མ་ནུས་པར། །དམྱལ་དང་བཅས་པར་དེ་ནས་མི་སྣང་གྱུར། །འདི་ཅིའི་ཕྱིར་བཤད་ཅེ་ན། །དེ་ལྟར་སྐྱེས་བུ་དམ་པ་རྣམས་ནི་བདག་བརླག་པར་འགྱུར་བ་ལའང་མི་འཛེམ་པར་སྦྱིན་པར་བྱེད་ན། བདེ་བར་འདུག་པ་ལྟ་སུ་ཞིག་སྦྱིན་པ་མི་བྱེད། དེ་བས་ན་སྙིང་སྟོབས་ཅན་ནི་བསྡིགས་ཀྱང་མི་རིགས་པ་བྱེད་དུ་གཞུག་མི་ནུས་སོ། །ཞེས་ཀྱང་བཤད་པར་བྱའོ། །ཚོང་དཔོན་དུ་སྐྱེས་པའི་རབས་ཏེ་བཞི་པའོ།། །།སྐྱེས་བུ་དམ་པ་རྣམས་ནི་འབྱོར་པ་ཟད་དུ་དོགས་ནས། །སྦྱིན་པ་བྱེད་པ་ལ་ཞུམ་པར་མི་འགྱུར་རོ། །དེ་ཡང་འདི་སྐད་ཐོས་ཏེ། །བྱང་ཆུབ་སེམས་དཔའ་གཏོང་བ་དང་། །ཚུལ་ཁྲིམས་དང་། ཆོ་རིགས་དང་། དུལ་བ་དང་། མང་དུ་ཐོས་པ་དང་། ཤེས་པ་དང་། དྲེགས་པ་མེད་པ་ལ་སོགས་པའི་ཡོན་ཏན་དང་ནི་ལྡན། འབྱོར་པ་ཕུན་སུམ་ཚོགས་པ་ནི་ནོར་སྦྱིན་པོ་དང་འདྲ། གློ་བུར་བ་ཐམས་ཅད་ལ་སྦྱིན་པ་བྱེད་པས་སྦྱིན་པའི་འབྱོར་པ་ནི་རྒྱུན་མི་འཆད། །འཇིག་རྟེན་ལ་ཕན་པའི་དོན་བྱེད་པའི་ཕྱིར། སྦྱིན་པ་པོའི་གཙོ་བོ་ཚོང་དཔོན་ཞིག་ཏུ་གྱུར་ཏོ་ཞེས་གྲག་གོ །སེར་སྣ་ལ་སོགས་པའི་ཉེས་པས་ཟིལ་གྱིས་མ་ནོན་པའི་ཕྱིར། །མིང་ཡང་ཟིལ་གྱིས་མི་ནོན་པ་ཞེས་བཏགས་སོ། །འདོད་བའི་དོན་འབྱོར་ཐེ་ཚོམ་མེད་གྱུར་པས། དགའ་བ་བསྐྱེད་པའི་ཁྱད་པར་རྒྱུར་གྱུར་པ། །ཕོངས་པ་རྣམས་ཀྱི་དེ་ནི་མཐོང་བ་བཞིན། །དེས་ཀྱང་ཕོངས་པ་རྣམས་ནི་མཐོང་ན་དགའ། །སློང་བས་བླང་ཞེས་ངེས་པར་སྨྲས་པ་ལ། །དེ་ནི་མེད་ཅེས་སྨྲ་བར་མི་ནུས་ཏེ། །དེ་ཡི་སེམས་ནི་ནོར་ལ་ཆགས་པའི་སྐབས། །སྙིང་རྗེ་ཆེན་པོས་རབ་ཏུ་མེད་པར་བྱས། །ཕོངས་པ་རྣམས་ཀྱིས་དེ་ཡི་ཁྱིམ་ནས་ནི། །ནོར་གྱི་སྙིང་པོ་ཕྱུང་ཡང་རབ་ཏུ་དགའ། །རྒྱུ་རྐྱེན་མེད་པར་མྱུར་དུ་ཆུད་ཟ་བའི། །ནོར་ནི་ཤིན་དུ་མི་བཟད་ནོར་མིན་རིག །འཇིག་རྟེན་དག་ན་ནོར་ནི་ཕལ་ཆེར་ཡང་། །ཆགས་པའི་གཞི་དང་ངན་འགྲོའི་གྲོགས་སུ་འགྱུར། །དེ་ཡི་ནོར་ནི་བདག་དང་གཞན་དག་གི །འབྱོར་པ་ཐོབ་པས་དོན་དང་མཐུན་པར་གྱུར། །དེ་ནས་བྱང་ཆུབ་སེམས་དཔའ་ཆེན་པོ་དེས་ཀུན་དུ་སློང་བ་རྣམས་ཇི་ལྟར་འདོད་པ་བཞིན་དུ་ཉོན་མ་མོངས་པར་གུས་པ་ཁྱད་པར་ཅན་གྱི་བརྒྱན་ཅིང་། ནོར་སྦྱིན་པ་རླབས་ཆེན་པོས་རབ་ཏུ་ཚིམ་པར་བྱས་པ་དང་ལྷ་རྣམས་ཀྱི་དབང་པོ་བརྒྱ་བྱིན་གྱིས་སྦྱིན་པ་རླབས་ཆེན་པོ་ཐོས་ནས། ཡིད་ལ་ཡ་མཚན་ཆེ་བར་གྱུར་ཏེ། འདི་སྦྱིན་པ་ལ་བརྟན་ནམ་མི་བརྟན་ཉམས་སྐྱེད་པ་དང་། འདི་ནོར་ཟད་དུ་དོགས་པས་སེར་སྣ་བྱེད་དུ་གཞུག་པའི་ཕྱིར། ཉིན་རེ་བཞིན་རིམ་གྱིས་ནོར་དང་འབྲུ་དང་རིན་པོ་ཆེ་དང་ཡོ་བྱད་ཀྱི་རྣམ་པ་དེ་དང་དེ་དག་མི་སྣང་བར་བྱས་སོ། །སེམས་དཔའ་ཆེན་པོ་དེ་ནི་སྦྱིན་པ་ལ་མོས་པས། ཆུ་ཡི་ཐིགས་པ་ཉི་མས་ཕོག་པ་བཞིན། །དེ་ཡི་ནོར་ནི་ཇི་ཙམ་ཟད་འགྱུར་བ། །དེ་ཙམ་དུ་ནི་སྦྱིན་པ་ཆེན་པོ་ཡིས། །མེ་ཡིས་ཚིག་པ་བཞིན་དུ་ཁྱིམ་ནས་འབྱིན། །དེ་ནས་ལྷའི་དབང་པོ་བརྒྱ་བྱིན་གྱིས། སེམས་དཔའ་ཆེན་པོ་དེ་ནོར་གྱི་མཆོག་ཟད་པར་གྱུར་ཀྱང་། སྦྱིན་པ་ལ་རབ་ཏུ་གཞོལ་བར་གྱུར་པར་རིག་ནས། བློ་ལ་ཤིན་དུ་ངོ་མཚར་དུ་གྱུར་ཏེ། དེའི་ནོར་གཅེས་པ་ཐམས་ཅད་ནུབ་གཅིག་ཏུ་མི་སྣང་བར་བྱས་ནས། །ཐག་པ་གཅིག་དང་། ཟོར་བ་གཅིག་བཞག་གོ །དེ་ནས་བྱང་ཆུབ་སེམས་དཔས་ནང་པར་ནམ་ལངས་ནས། །དུས་བཞིན་དུ་ལངས་ནས་བལྟས་ན་བདག་གི་ཁྱིམ་གྱི་ནོར་དང་འབྲུ་དང་ཡོ་བྱད་དང་མི་རྣམས་ནི་མེད། སྒྲ་ཅ་ཅོ་ཅིའང་མེད་ལ། སྡུག་སྡུག་ལྟར་འདུག་ཅིང་། སྲིན་པོས་ཕུང་བར་བྱས་པ་བཞིན་དུ། བལྟ་ན་ཉམས་མི་དགའ་བར་གྱུར་པ་མཐོང་ནས། འདི་ཅི་ཉེས་སྙམ་དུ་རྟོག་པ་སྐྱེས་ཏེ། ཀུན་ཏུ་ཉུལ་བ་དང་། ཐག་པ་སྡོག་པ་ཞིག་དང་། ཟོར་བ་ཞིག་དེ་ན་འདུག་པ་མཐོང་ནས་དེས་བསམས་པ། གལ་ཏེ་འགའ་ཞིག་གིས་སློང་བའི་ཚིག་སྨྲ་མི་ཕོད་དེ། བདག་གི་ཞོ་ཤས་འཚོ་བས་བདག་གི་ཁྱིམ་དུ་སྤོབས་པ་དེ་ལྟ་བུ་བསྟན་ན་ནི་བདག་གི་ནོར་ལེགས་པར་སྤྱད་པ་ཉིད་དུ་འགྱུར་རོ། །དེ་སྟེ་བདག་སྐལ་བ་ཆུང་བའི་སྐྱོན་གྱིས་མཐོང་བར་འགྱུར་བ་མ་བཟོད་ནས། །སུས་ཀྱང་མ་སྤྱད་པར་མེད་པར་གྱུར་ན་ནི་མ་རུངས་པར་གྱུར་ཏོ་སྙམ་མོ། །ནོར་རྣམས་ངོ་ནི་མི་རྟག་པར། །བདག་གིས་སྔ་ནས་ཤེས་ཟིན་ན། །ཕོངས་པ་རྣམས་ཀྱི་སྡུག་བསྔལ་གྱིས། །བདག་གི་ཡིད་ནི་འདིར་བསྲེགས་སོ། །སྦྱིན་དང་བཀུར་སྟིས་ཡུན་རིང་བདེ་བྱས་པ། །བདག་གི་ཁྱིམ་ནི་ནོར་དང་བྲལ་མཐོང་བ། །མཚོ་སྐམས་དྲུང་དུ་སྐོམ་པ་ལྷགས་པ་བཞིན། །བདག་གི་ཕོངས་པ་དེ་དག་ཅི་ལྟར་འགྱུར། །དེ་ནས་བྱང་ཆུབ་སེམས་དཔའ་བདག་གི་བརྟན་པ་ལ་བརྟེན་པས་ཞུམ་པ་དང་སྤྲོ་ཞི་བར་མ་གྱུར་ཏོ། །དེའི་གནས་སྐབས་ན་ཡང་སློང་བ་ལ་མ་གོམས་པས། །ངོ་ཤེས་ཀྱང་གཞན་ལ་སློང་མ་ཕོད་པ་དང་སློང་བ་ནི་དེ་ལྟར་དཀའ་བ་ལྟ་ཞིག་སྙམ་ནས་དེ་སློང་བ་རྣམས་ལ་དེ་བས་ཀྱང་རྗེས་སུ་བརྩེ་བར་གྱུར་ཏོ། །དེ་ནས་བདག་ཉིད་ཆེན་པོ་དེ་སློང་བ་རྣམས་ལ་འོངས་པ་ལེགས་སོ་ཞེས་བྱ་བ་ཙམ་ལ་ལྟོས་ནས། །བདག་ཉིད་ཀྱིས་ཐག་པ་སྡོགས་པ་དེ་དང་ཟོར་བ་བླངས་ཏེ་ཉིན་རེ་བཞིན་རྩྭ་རྩོངས་པ་དེའི་རིན་རྙེད་པ་ཙམ་གྱིས། སྐྱེ་བོ་ཕོངས་པ་རྣམས་སློང་བ་ལ་མགུ་བར་བྱེད་དོ། །དེ་ནས་ལྷའི་དབང་པོ་བརྒྱ་བྱིན་གྱིས། །དེ་རབ་ཏུ་དབུལ་བར་གྱུར་ཀྱང་འདི་ལྟར་རབ་ཏུ་ཞུམ་པ་མེད་ཅིང་། སྦྱིན་པ་ལ་རབ་ཏུ་གཞོལ་བར་མཐོང་ནས། །ཡ་མཚན་ཆེ་ཞིང་གུས་པར་གྱུར་ཏེ། ལྷའི་ལུས་མངོན་སུམ་དུ་བསྟན་ནས་བར་སྣང་ལ་གནས་ཏེ། སྦྱིན་པ་ལས་བཟློག་པའི་ཕྱིར་སེམས་དཔའ་ཆེན་པོ་དེ་ལ་སྨྲས་པ། །ཁྱིམ་བདག་བྱམས་ཀྱིས་འགྱོད་པའི་གནས་སྐབས་འདི་ལྟ་བུར། །སྦྱིན་པ་དྲགས་པས་ཁྱོད་ཀྱི་མྱོང་བ་ནི། །རྐུན་པོས་མ་ཁྱེར་ཆུ་དང་མེས་མ་ཚིག །རྒྱལ་པོ་རྣམས་ཀྱིས་ནོར་ཡང་མ་ཕྲོགས་སོ། །དེ་བས་ཁྱོད་ལ་ཕན་ཕྱིར་ངས་སྨྲ་ཡིས། །སྦྱིན་ལ་ཞུགས་པའི་ཆགས་པ་བཏང་བར་གྱིས། །འདི་ལྟར་གྱུར་ཀྱང་གལ་ཏེ་མ་བྱིན་ན། །སྔོན་གྱི་འབྱོར་བ་བཟང་པོ་འཐོབ་པར་འགྱུར། །ཆུང་ངུ་གོད་ཀྱང་རྟག་ཏུ་སྤྱད་ན་ནི། །ཡུན་རིངས་སྤྱད་ན་མིག་སྨན་ཟད་ལ་ལྟོས། །བསགས་ན་གྲོག་མཁར་འཐོན་པོར་གྱུར་ལ་ལྟོས། །དར་བར་འདོད་པས་བསྡམ་པར་བྱས་ན་ལེགས། །དེ་ནས་བྱང་ཆུབ་སེམས་དཔས་སྦྱིན་པའི་ཡོན་ཏན་བསྟན་པའི་ཕྱིར། བརྒྱ་བྱིན་ལ་སྨྲས་བ། སྤྱན་སྟོང་མངའ་བ་རབ་ཏུ་ཕོངས་གྱུར་ཀྱང་། །འཕགས་པས་མ་རབས་ཆོས་བྱ་རབ་ཏུ་དཀའ། །གང་ཞིག་ཐོབ་ཕྱིར་སེར་སྣའི་སེམས་འབྱུང་བ། །བརྒྱ་བྱིན་ནོར་དེ་བདག་ལ་མེད་ཀྱང་རུང་། །སློང་བའི་སྡུག་བསྔལ་ཤི་དང་འདྲ་བ་ཡི། །གཉེན་པོའི་ལམ་དུ་འགྲོ་བར་འདོད་པ་ལ། །དེ་ཡིས་ཕོངས་པ་ཡ་རབས་གཟི་བྱིན་ཅན། །སུ་ཞིག་མེད་ཅེས་ཟེར་བའི་སེར་བས་རྡེག །སློང་བས་གདུངས་ནས་ངོ་ཟུམ་གནག་གྱུར་པ། །ཕོངས་པ་རྣམས་ནི་མགུ་བར་མི་འགྱུར་བའི། །ནོར་རམ་རིན་ཆེན་ལྷ་ཡི་རྒྱལ་སྲིད་ཀྱང་། །དེ་ལྟ་བུ་དག་བདག་ནི་སོགས་སམ་ཅི། །གང་ཞིག་སེར་སྣའི་སྐྱོན་ནི་འཕེལ་འགྱུར་ཞིང་། །གཏོང་བའི་སེམས་ཀྱང་སྐྱེ་བར་མི་འགྱུར་བ། །བདག་ལྟ་བུ་ཡིས་དེ་ནི་བཏང་བར་རིགས། །ཡོངས་སུ་བཟུང་བར་སྙད་གདགས་ཕོངས་པ་ཡིན། །གློག་ནི་འགྱུ་བ་བཞིན་དུ་མི་བརྟན་ནོར། །ཀུན་དང་ཐུན་མོང་ཕོངས་པ་དུ་མའི་རྒྱུ། །བདེ་བ་འབྱུང་བའི་རྒྱུ་ནི་སྦྱིན་ཡིན་ན། །ཡ་རབས་སུ་ཞིག་སེར་སྣའི་ལམ་ལ་བརྟེན། །བརྒྱ་བྱིན་ཁྱོད་ཀྱིས་བདག་ལ་གཉེན་པར་བསྟན། །ཕན་པ་སྨྲས་པས་བདག་ལ་བརྩེ་བར་གྱིས། །སྦྱིན་པས་ཡིད་ནི་དགའ་བ་གོམས་པར་འགྱུར། །དེ་བས་ལམ་མིན་སུ་ཞིག་དགའ་བར་འགྱུར། །ཁྱོད་ཀྱི་ཐུགས་ནི་ཁྲོས་པར་གྱུར་པ་ཡི། །ལམ་དུ་འཇུག་པར་བགྱི་བ་མི་རིགས་སོ། །ངོ་བོ་ཉིད་ནི་མི་མཐུན་ཕྱོགས་ཀྱི་ལམ། །བགྲོད་དཀར་བཞུགས་པ་སླ་བ་མ་ཡིན་ནོ། །བརྒྱ་བྱིན་གྱིས་སྨྲས་པ། ཁྱིམ་བདག་འབྱོར་བ་ཕུན་སུམ་ཚོགས་ཤིང་། བང་མཛོད་ཡོངས་སུ་གང་བ་དང་ཞིང་གི་རྣམས་ལེགས་པར་བྱེད་ཅིང་། རླངས་ཆེ་ལ་རྣམ་པ་སྣ་ཚོགས་བྱེད་པ་དང་། དབང་ཕྱུག་དབང་དུ་གྱུར་པ་ལ་རིམ་པ་འདི་འཇིག་རྟེན་ན་དར་བར་འགྱུར་གྱི། །གནས་སྐབས་འདི་ལྟ་བུར་གྱུར་པ་ལ་ནི་མི་རུང་ངོ་། །ལྟོས་ཤིག །བདག་གིས་བློ་ཡིས་ལྕོགས་ཤིང་མ་གཡེངས་པའམ། གྲགས་པའི་རྗེས་མཐུན་རིགས་དང་མཐུན་པའམ། །ལས་ཀྱི་ཡོན་ཏན་གྱིས་ནི་འབྱོར་ཐོབ་ནས། ཉི་མ་བཞིན་དུ་འགྲན་ཟླ་ཟིལ་མནན་ཏེ། །སྐྱེ་བོ་རྣམས་ནི་ཞར་ལ་གྲོགས་བཙལ་ནས། །མཛའ་བོར་བཅས་པའི་གཉེན་རྣམས་མགུ་བྱས་ཏེ། །རྒྱལ་པོ་ལས་ཀྱང་བཀུར་སྟི་ཐོབ་གྱུར་ནས། །མངོན་པར་ཆགས་ཤིང་དཔལ་གྱིས་འཁྱུད་གྱུར་ན། །དེ་ནས་སྦྱིན་པའམ་བདེ་བའི་རིམ་པ་ལ། །རབ་ཏུ་ཞུགས་ནས་སྐྱེ་བོས་འཕྱས་གདགས་མེད། །འདབ་བཤོག་མ་རྫོགས་མཁའ་ལ་འཕུར་འདོད་བཞིན། །སྦྱིན་པ་འབའ་ཞིག་འདོད་པས་བརླག་པར་འགྱུར། །དེ་བས་སྡོམ་ཞིང་མི་གཡེང་གནས་བྱས་ལ། །སྦྱིན་པ་ཐོང་ལ་རེ་ཤིག་ནོར་སོགས་ཤིག །འབྱོར་པ་མེད་པར་གང་ཞིག་མི་སྦྱིན་པ། དེ་ལ་མ་རབས་འགྱུར་བ་ཅི་ཞིག་ཡོད། །བྱང་ཆུབ་སེམས་དཔས་སྨྲས་པ། །ཁྱོད་དེ་ལྟར་ཧ་ཅང་དུ་ནན་ཏན་མ་ཆེ་བར་ཐོང་ཞིག །གཞན་གྱི་དོན་བས་གང་ཞིག་བདག་དོན་ཆེར་འཛིན་པ། །དེས་ཀྱང་འབྱོར་པ་ཁྱད་དུ་བསད་ནས་སྦྱིན་དགོས་སོ། །གང་དག་ཆགས་པ་སྤངས་ནས་སྦྱིན་པས་དགའ་འགྱུར་པ། །འབྱོར་པ་ཆེན་པོ་ཡིས་ཀྱང་དགའ་བ་དེ་མི་མྱོང་། འབྱོར་པ་འབའ་ཞིག་གིས་ཀྱང་མཐོ་རིས་ཐོབ་མི་འགྱུར། །སྦྱིན་པ་ཡིས་ནི་གྲགས་པ་སྙན་པ་ཐོས་པར་འགྱུར། །སེར་སྣ་ལ་སོགས་སྐྱོན་གྱིས་ཟིལ་གྱིས་མནོན་མི་འགྱུར། །དེ་བས་འབྱོར་པ་དེའི་ཕྱིར་སྦྱིན་པ་སུ་མི་བྱེད། །གང་ཞིག་སྐྱེ་ཤིས་ཉེན་པའི་འཇིག་རྟེན་སྐྱོང་འདོད་པ། །སྙིང་རྗེའི་དབང་གིས་བདག་ཀྱང་རབ་ཏུ་གཏོང་བྱེད་ཅིང་། །གཞན་སྡུག་བསྔལ་བས་བདག་གིས་བདེ་བ་མི་མྱོང་བ། །དེ་ལ་ཁྱོད་ཀྱི་དཔལ་ལྡན་ནོར་ཡང་ཅི་ཞིག་བྱ། །ལྷའི་དབང་པོ་གཞན་ཡང་། །ནོར་རྣམས་ཕུན་སུམ་ཚོགས་པ་བཞིན། །ཚེ་ཡི་གནས་པ་མི་བརྟན་ཏེ། །དེ་བས་སློང་བ་མཐོང་ནས་ནི། །ཕུན་སུམ་ཚོགས་ལ་མི་བལྟའོ། །ཤིང་རྟ་གཅིག་གིས་ས་ལ་གང་དུ་ལམ་དྲངས་པ། །དེ་བཞིན་གཞན་དང་གཞན་ཡང་ལམ་དེར་བརཏན་ཏེ་འདོང་། དེ་ལྟར་ཐོག་མའི་ལམ་ནི་བདེ་བ་འདི་བོར་ནས། །ཡང་དག་མ་ཡིན་ལམ་དུ་འཇུག་པར་བདག་མི་དགའ། །གལ་ཏེ་བདག་ནི་ཕྱིས་ཀྱང་ནོར་དང་ལྡན་གྱུར་ན། །སློང་བ་རྣམས་ཀྱི་སེམས་ནི་ངེས་པར་མགུ་བར་བྱ། །འདི་ལྟར་གྱུར་ཀྱང་ཅི་འབྱོར་པ་ནི་སྦྱིན་པར་བྱ། །བརྒྱ་བྱིན་བདག་ནི་སྦྱིན་ལས་ལྡོག་པར་མ་གྱུར་ཅིག །དེ་སྐད་ཅེས་སྨྲས་པ་དང་། ལྷའི་དབང་པོ་བརྒྱ་བྱིན་ཡིད་རབ་ཏུ་དགའ་བར་གྱུར་ནས་ལེགས་སོ་ལེགས་སོ་ཞེས་བྱ་བས་དེ་མགུ་བར་བྱས་ཏེ། རབ་ཏུ་གུས་ཤིང་བྱམས་པའི་ལྟ་བས་བལྟས་ནས་སྨྲས་པ། །སྐྱེ་བོ་རྣམས་ནི་གྲགས་དང་འགལ་བར་འགྱུར་བའི་ལས། །མི་བཟད་ངན་པ་རྣམས་ཀྱིས་འབྱོར་པ་ཐོབ་པར་འདོད། །བདག་གི་བདེ་ལ་ཆགས་པས་ཉེས་དམིགས་མ་མཐོང་ནས། །ཤིན་ཏུ་གཡེངས་བའི་སེམས་ཀྱིས་རབ་ཏུ་འཇུག །ཁྱོད་ཀྱིས་ནོར་ནི་ཟད་པར་གྱུར་པའང་མ་བསམས་ཤིང་། །བདག་གི་བདེ་ཉམས་ང་ཡིས་བསླུས་པའང་མ་བསམས་བར། །གཞན་ཕྱིར་དོན་བསྒྲུབ་པ་ལ་སེམས་ནི་བརྟེན་གྱུར་པས། །བདག་ཉིད་ཕུན་སུམ་ཚོགས་པ་རབ་ཏུ་ཆེ་བ་བསྟན། །ཨེ་མའོ་རླབས་ཆེན་ཁྱད་པར་འཕགས་པ་གསལ་བ་ཡིས། །སྙིང་གི་སེར་སྣའི་མུན་པ་རབ་ཏུ་བསལ་བར་གྱུར། །ནོར་ནི་མེད་པར་གྱུར་ཀྱང་དེ་ལ་ཆགས་པ་ཡིས། །རབ་ཏུ་སྦྱིན་ལས་ཞུམ་པའི་སྐྱོན་དུ་ཡོང་མ་གྱུར། །གཞན་སྡུག་བ་ཡིས་སྡུག་ལས་ངོ་མཚར་མི་ཆེ་སྟེ། །སྙིང་རྗེའི་དབང་གིས་ཁྱོད་ནི་འཇིག་རྟེན་ཕན་པར་འདོད། །གངས་ཀྱི་རི་བོ་རླུང་གིས་བསྐྱོད་པར་མི་ནུས་བཞིན། །རབ་ཏུ་སྦྱིན་ལ་བདག་གིས་བསྐྱོང་བར་མ་ནུས་སོ། །གྲགས་པ་ཀུན་དུ་བསྒྲགས་ཕྱིར་ཡོངས་སུ་བརྟགས་པ་འདིས། །ཁྱོད་ཀྱི་ནོར་འདི་རྣམས་ནི་བདག་གིས་སྦས་པར་གྱུར། །དེ་ལྟར་མ་བྱས་ན་ནི་ནོར་བུ་བཟང་པོ་ཡང་། །ནོར་བུ་དེ་ནི་གྲགས་དང་རིན་ཆེན་མི་ལྡོམ་མོ། །དེ་བས་སློང་བ་རྣམས་ལ་སྦྱིན་པ་ཆར་བཞིན་ཕོབ། སྤྲིན་ཆེན་གྱིས་ནི་མཚོ་རྣམས་བཀང་བ་བཞིན་དུ་བྱོས། ངས་ནི་རྗེས་སུ་བཟུང་བའི་ནོར་ཡང་ཟད་མི་འགྱུར། །བདག་གིས་གཅེས་པ་འདི་ཡང་ཁྱོད་ཀྱིས་བཟོད་པ་བྱོས། ཞེས་བྱ་བས་དེ་མགུ་བར་བྱས་ནས་བརྒྱ་བྱིན་གྱིས་དེའི་ནོར་གྱི་རྣམ་པ་དེ་དག་ཀྱང་སླར་བྱིན་ཏེ་བཟོད་པར་བྱས་ནས་དེ་ཉིད་དུ་མི་སྣང་བར་གྱུར་ཏོ། །དེ་ལྟ་བས་ན་སྐྱེས་བུ་དམ་པ་ནི་བདོག་བཟང་དུ་དོགས་པའམ། །འབྱོར་བ་ལ་ཆགས་པའི་ཕྱིར་སྦྱིན་པ་དང་འགལ་བར་མི་བྱེད་དོ། །ཚོང་དཔོན་ཟིལ་གྱིས་མི་ནོན་པར་སྐྱེས་པའི་རབས་ཏེ་ལྔ་པའོ།། །།སེམས་དཔའ་ཆེན་པོ་རྣམས་ནི་དུད་འགྲོར་གྱུར་ཀྱང་སྦྱིན་པ་ཅི་ནུས་སུ་བྱེད་པ་ཡོད་ན། མིར་གྱུར་པ་ལྟ་སུ་ཞིག་སྦྱིན་པར་མི་བྱེད། དེ་ཡང་འདི་སྐད་ཐོས་ཏེ། དགོན་པའི་གནས་ལྡུམ་བུ་དང་རྩྭ་དང་ཤིང་ལྗོན་པ་ཡིད་དུ་འོང་བ་ཡོད་པ། མེ་ཏོག་དང་འབྲས་བུར་ལྡན་པ། ཆུ་གཙང་མ་བཻ་ཌཱུརྻ་མཐིང་ག་འདྲ་བ་འབབ་པའི་མཚོས་མཐའ་བསྐོར་བ་དང་། ས་གཞི་ནི་ནེའུ་སིང་སྔོན་པོ་འཇམ་པོ་དང་ལྡན་པ། སྐྱེ་བོ་དཀའ་ཐུབ་ཅན་དག་གནས་པ་ཞིག་ན། བྱང་ཆུབ་སེམས་དཔའ་རི་བོང་ཞིག་ཏུ་གྱུར་ཏེ་གནས་སོ་ཞེས་གྲག་གོ །དེ་ནི་ལུས་བཟང་སྙིང་སྟོབས་ཆེ་བ་དང་། སྟོབས་ཀྱང་ཆེ་ཞིང་གཟི་མདངས་ཆེ་བས་ན། གཅན་ཟན་ངན་པས་གླགས་ལྟར་བག་མི་ཚ། །རི་དྭགས་རྒྱལ་པོའི་ཚུལ་གྱིས་དེ་ན་གནས། བདག་གི་པགས་པ་ཨ་ཛིན་གྱོན། །བདག་གི་སྤུ་ཡིས་ཤུན་ལྤགས་བྱས། རྩྭ་ཡི་མྱུ་གུས་སེམས་མགུ་ཞིང་། ཐུབ་པ་བཞིན་དུ་དེ་ན་མཛེས། །དེ་ཡི་ལུས་དང་ངག་ཡིད་ལས། བྱམས་པས་ཡོངས་སུ་དཀར་བ་ཡིས། །རི་དྭགས་སློབ་མ་བདེར་གནས་ཤིང་། །བདག་ཉིད་ངན་པ་སྤངས་པར་གྱུར། །དེའི་ཡོན་ཏན་ཁྱད་པར་ཅན་གྱིས་བྱམས་བ་དང་གུས་པ་སྐྱེས་པས་སེམས་རབ་ཏུ་ཆགས་བའི་གྲོགས་གསུམ་ཞིག་ཡོད་བར་གྱུར་ཏེ། སྲམ་དང་། ལྕེ་སྤྱང་དང་། སྤྲེའུ་རྣམས་སོ། །དེ་དག་ཀྱང་ཕན་ཚུན་གཉེན་དུ་འབྲེལ་བ་བཞིན་དུ་ཅིག་ལ་ཅིག་བྱམས་ཤིང་ཆགས་པར་ནི་གྱུར། ཅིག་ལ་ཅིག་སྤོབས་ཤིང་བཀུར་སྟི་བྱེད་པས་རབ་ཏུ་མཛའ་བར་གྱུར་པའི་གྲོགས་པོ་བཞིན་དུ་དགའ་བཞིན་དེ་ན་གནས་ཏེ། དུད་འགྲོའི་རང་བཞིན་ལ་ནི་མི་ཕྱོགས་པ། །སྲོག་ཆགས་རྣམས་ལ་སྙིང་རྗེ་ཆེ་བ་དང་། བརྐམ་པ་མེད་པ་དང་། རྐུ་བ་མི་དྲན་པ་དང་། ཆོས་དང་མཐུན་པའི་འཚོ་བ་ལ་གནས་པ་དང་། རྣམ་པར་ཤེས་པ་གསལ་བས་དུལ་བ་དང་། སྡོམ་པ་དང་སྤྱོད་པ་བརྟན་པའི་ཕྱིར་ལྷ་རྣམས་ཀྱང་ཡ་མཚན་དུ་གྱུར་ཏོ། །བདེ་དང་མཐུན་ཞིང་ཡོན་ཏན་མི་མཐུན་ཚུལ། །ཡོན་ཏན་མཐུན་ཞིང་བདེ་དང་མི་མཐུན་ཚུལ། །མི་ཡང་ཡོན་ཏན་ཕྱོགས་ལ་བརྟེན་ན་ནི། །རྣམ་པར་མཛེས་ན་དུད་འགྲོ་སྨོས་ཅི་དགོས། །རི་བོང་གཟུགས་ཅན་མཁས་པ་དེ་ནི་དེ་རྣམས་ཀྱི། གཞན་ལ་སྙིང་རྗེ་ཆེ་བའི་བླ་མར་གྱུར། །ཡོན་ཏན་རྗེས་འགྲོ་རང་བཞིན་ཕུན་སུམ་ཚོགས། དེ་རྣམས་གྲགས་པ་ལྷ་ཡུལ་དུ་ཡང་གྲགས། །དེ་ནས་རེ་ཤིག་བདག་ཉིད་ཆེན་པོ་དེ་ཕྱི་དྲོའི་དུས་སུ་གྲོགས་དེ་རྣམས་ཆོས་ཉན་པའི་ཕྱིར་ལྷགས་ཏེ། རབ་ཏུ་གུས་པར་བཀུར་སྟི་བྱས་པ་དང་། ཟླ་བ་ཡར་གྱི་ངོའི་ཚེས་བཅུ་བཞི་ལ། དཀྱིལ་འཁོར་ཡོངས་སུ་རྫོགས་སུ་ཉེ་བའི་ཉི་མ་དང་ཐག་རིང་བས་རྣམ་པར་དཀར་ཞིང་མཛེས་པ། དངུལ་གྱི་མེ་ལོང་ལུང་མེད་པ་འདྲ་བ། ངོས་གཅིག་ཅུང་ཟད་སྔོ་བ། ཤར་བ་ལ་བལྟས་ནས། གྲོགས་རྣམས་ལ་སྨྲས་པ། དཀྱིལ་འཁོར་ཅུང་ཟད་མ་རྫོགས་པ། །བཟང་པོ་འདི་ནི་རྒོད་པ་བཞིན། །དགེ་བ་རྣམས་ལ་གསོ་སྦྱོང་གི། སྤྲོ་བ་ཟླ་བ་འདི་སྟོན་ནོ། །དེ་བས་ན་ངེས་པར་སང་ནི་ཚེས་བཅོ་ལྔ་སྟེ། ཁྱོད་ཀྱིས་ཀྱང་གསོ་སྦྱོང་དང་སྡོམ་པ་རྣམས་བྱ་བར་བརྩམ་ཞིང་རིགས་པར་རྙེད་པའི་ཁ་ཟས་ཀྱིས་དུས་སུ་ལྷགས་པའི་གློ་བུར་བ་རྣམས་ལ་མགྲོན་གྱིས་ལ་སྲོག་གཟུང་བར་བྱ་བར་རིགས་སོ། །ཁྱེད་རྣམས་ལྟོས་ཤིག །འདུ་བ་གང་ཡོད་མཐའ་ནི་འབྲལ་བར་འགྱུར། །དར་བ་ཡོད་ན་ངན་དང་རྒུད་པའི་མཐའ། །ཚེ་ཡང་གློག་བཞིན་འགྱུར་བཞིན་མི་བརྟན་ནོ། །དེ་ཕྱིར་བག་ཡོད་པ་ལ་བརྟེན་པར་གྱིས། །དེ་བས་སྦྱིན་པ་ཚུལ་ཁྲིམས་བརྒྱན་པ་ཡིས། །བསོད་ནམས་དག་ནི་ཁྱེད་ཀྱིས་སྤེལ་བར་གྱིས། །སྐྱེ་བོ་ངན་འགྲོའི་ནང་ན་འཁོར་བའི་ཚེ། །འཇིག་རྟེན་རྣམས་ལ་བསོད་ནམས་རྟེན་གྱི་མཆོག །སྐར་མ་རྣམས་ཀྱི་དཔལ་ནི་ཟིལ་མནན་ནས། །གཟི་མདངས་ཡོན་ཏན་གྱིས་ནི་ཟླ་བ་མཛེས། །འོད་ཟེར་ཅན་རྣམས་ཉི་མས་ཟིལ་མནན་ནས། །མཛེས་པར་གང་གྱུར་དེ་ནི་བསོད་ནམས་མཐུ། །ས་ཡི་དབང་ཕྱུག་རྣམས་ཀྱི་བསོད་ནམས་མཐུས། །རྒྱལ་པོ་རྣམས་དང་བློན་པོ་དྲེགས་པ་རྣམས། །དྲགས་པ་ཀུན་སྤངས་རྟ་མཆོག་ཚུལ་དག་གིས། །དགའ་བ་བཞིན་དུ་བཀའ་ལུང་ཉན་པར་བྱེད། །སོ་ཚིལ་བྱ་བའི་ཚུལ་ལ་འབད་གྱུར་ཀྱང་། །བསོད་ནམས་མི་ལྡན་དཔལ་མིན་རྗེས་སུ་འབྲང་། བསོད་ནམས་ཆེ་བས་དེ་ནི་བསྐྲད་པ་བཞིན། །དེ་དང་མི་མཐུན་དྲུང་ནས་ཁྲོས་བཞིན་འགྲོ། །སྡུག་བསྔལ་གཞིར་འགྱུར་གཏམ་ངན་རྗེས་འབྲང་བའི། །སྡིག་པའི་ལམ་ལས་དེ་བས་སླར་ལོག་ལ། །དེ་བས་བསོད་ནམས་སྤྱོད་པ་དཔལ་ལྡན་བ། །བདེ་བ་རབ་འབྱུང་བསྒྲུབ་ལ་བློ་བྱོས་ཤིག །དེ་དག་གིས་དེ་བཞིན་བགྱིའོ་ཟེར་ནས་དེས་རྗེས་སུ་བསྟན་པ་ལ་ཉན་ཏེ་ཕྱག་འཚལ་བསྐོར་བ་བྱས་ཏེ་བདག་བདག་གི་གནས་སུ་དོང་ངོ་། །གྲོགས་པོ་དེ་དག་སོང་ནས་རིང་པོ་མ་ལོན་བར། བདག་ཉིད་ཆེན་པོ་དེས་བསམས་པ། མགྲོན་ཞིག་འོངས་ན་དེ་དག་གིས། །ཅི་ཡང་རུང་བས་མགྲོན་བྱར་ཡོད། བདག་གིས་ཅི་ཡང་སྦྱིན་དུ་མེད། །བདག་གིས་སོ་རྩེས་བཅད་པ་ཡི། །རྩྭ་ཡི་མྱུ་གུ་ཁ་བོ་ནི། །འགྲོན་ལ་སྦྱིན་དུ་ཡོང་མི་རུང་། །མི་ནུས་བས་ནི་ཡོང་ཡེ་སྨད། །དེ་བས་ཅི་ཡང་མི་ནུས་བ། །བདག་ནི་གསོན་ཡང་ཅི་ལ་ཕན། བདག་གི་འགྲོན་ཞིག་འོངས་གྱུར་ན། །དགའ་ཞིང་མྱ་ངན་སྐྱེ་བར་འགྱུར་སྙམ་མོ། །ད་ནི་མགྲོན་བྱར་མི་རུང་བ་སྙིང་པོ་མེད་པའི་ལུས་འདི་གར་བོར་ན་འགའ་ཞིག་ལ་ཕན་ཐོགས་པར་འགྱུར་དུ་བསམས་པ་དང་། བདག་ཉིད་ཆེན་པོ་དེས་དྲན་པ་རྙེད་པ་དང་། ཨེ་མའོ་དབང་བདག་ལ་ཡོང་ཅིང་རྙེད་སླ་བ་བདག་གི་ལུས་ཉིད་མགྲོན་རྣམས་ལ་སྦྱིན་དུ་རུང་བའི་ནོར་ཁ་ན་མ་ཐོ་བ་མེད་པ་བདག་ལ་ཡོད་བཞིན་དུ་ཅིའི་ཕྱིར་མྱ་ངན་བྱ། བདག་གི་མགྲོན་བྱར་རུང་བ་འདི་རྙེད་ཀྱིས། སྙིང་ཁྱོད་ད་ནི་མི་དགའ་བ་མ་བྱེད་ཅིག །བདག་གིས་ད་ནི་མགྲོན་རྣམས་སྤོབས་པ་ལ་རྫོགས་པར་ཡོད་པའི་ལུས་འདིས་བཀུར་སྟི་བྱའོ་སྙམ་དུ་ངེས་པར་བསམས་ནས། སེམས་དཔའ་ཆེན་པོ་དེ་རྙེད་པ་མཆོག་རྙེད་པ་བཞིན་དུ། ཡིད་རབ་ཏུ་དགའ་བར་གྱུར་ཅིང་དེ་ན་འདུག་གོ །དེ་ཡི་སྙིང་ལ་རྣམ་རྟོག་པ། ཁྱད་པར་ཅན་ནི་སྐྱེས་གྱུར་པས། མཐུ་དང་རབ་ཏུ་དང་བ་དག །ལྷ་རྣམས་ལ་ནི་བསྟན་པར་གྱུར། །དེ་ནས་ས་གཞི་རི་དང་བཅས་པ་གཡོས་བ་ནི། །རྒྱ་མཚོ་འཁྲུག་པའི་གོས་གྱོན་དགའ་བ་བཞིན། །མཁའ་ལས་ལྷ་ཡི་རྔ་སྒྲ་རྒྱས་པར་གྲག །ཕྱོགས་ཀྱང་རབ་ཏུ་དང་བའི་གོས་གྱོན་གསལ། སྤྲིན་ཀྱང་གློག་དང་ལྡན་པ་འབྲུག་གི་སྒྲ། །རྒྱུན་ཆགས་དལ་བུས་སྒྲོག་ཅིང་རྒོད་པ་བཞིན། །ཕན་ཚུན་བདས་པས་རྡུལ་རྣམས་ལྷགས་པ་ཡི། །མེ་ཏོག་རྒྱུན་ཆགས་རྣམས་ཀྱིས་དེ་ལ་འཐོར། །བསེར་བུ་དལ་བུས་ལྡང་བའི་རླུང་གིས་ཀྱང་། །ལྗོན་ཤིང་སྣ་ཚོགས་མེ་ཏོག་དྲི་ཞིམ་རྡུལ། །རབ་ཏུ་འཁྲིགས་པ་སྲབ་མོའི་གོས་བཀྲམ་བཞིན། །རབ་ཏུ་དགའ་བས་དེ་ལ་མཆོད་བྱེད་འདྲ། །དེའི་རྣམ་པར་རྟོག་པ་རྨད་དུ་བྱུང་བ་དེ་ལ་རབ་ཏུ་དགའ་ཞིང་ཡིད་ལ་ངོ་མཚར་སྐྱེས་པའི་ལྷ་རྣམས་ཀྱིས་ཀུན་དུ་བསྒྲགས་པ། ལྷའི་དབང་པོ་བརྒྱ་བྱིན་གྱིས་ཐོས་ནས་ཡིད་ལ་ཡ་མཚན་དང་ངོ་མཚར་ཆེ་བར་གྱུར་ཏེ། དེའི་བསམ་པ་ཉམས་བསྐྱེད་པའི་ཕྱིར། ཕྱི་དེ་ཉིན་ཉི་མ་ཕྱེད་ཀྱི་དུས་ན། ཉི་ཟེར་གྱི་འོད་ནི་རབ་ཏུ་བསལ་བར་གྱུར། ཕྱོགས་རྣམས་ཀྱང་སྨིག་རྒྱུ་འཁྲིགས་པའི་གོས་ནི་གྱོན། །ཉི་མ་ཚ་བའི་འོད་ཀྱིས་ནི་མགོ་གཡོགས། མིག་གིས་བལྟར་ཡང་མི་བཟོད་པར་གྱུར་པའི་ཚེ་ན། ནགས་ཚལ་རྣམས་ཀྱི་གྲིབ་མ་ནི་འདུས་པར་གྱུར། །ཚ་བའི་སྦྲང་བུ་རྣམས་ཀྱི་སྒྲ་ནི་ཆེར་གྲག །བྱ་རྣམས་ལྡིང་ཞིང་རྒྱུ་བའི་རྒྱུན་ནི་ཆད། འགྲོན་པོ་རྣམས་ནི་ཚ་བས་གདུངས་ཤིང་ངལ་བར་གྱུར་པ་ན། ལྷ་རྣམས་ཀྱི་དབང་པོ་བརྒྱ་བྱིན་བྲམ་ཟེའི་གཟུགས་སུ་བསྒྱུར་ནས་ལམ་ནོར་བ་འདྲ་བར་བྱས་ཏེ། བཀྲེས་པ་དང་སྐོམ་པའི་ངལ་བས་གདུངས་ཤིང་མགྲིན་པ་འགགས་པ་བཞིན་དུ་དེ་དག་དང་ཉེ་བ་ཞིག་ཏུ་སྒྲ་ཕྱུང་སྟེ་ངུ་ཞིང་བོས་པ། གྲོགས་དང་བྲལ་བ་གཅིག་པུར་གྱུར། །ནགས་ཚལ་སྟུག་པོའི་ནང་དུ་འཁྱམས། །བཀྲེས་ཤིང་ངལ་བས་བདག་ལུས་དུབ། །དགེ་བ་རྣམས་ཀྱིས་བསྐྱབ་པའི་རིགས། །བདག་ནི་ལམ་དང་ལམ་མིན་སེམས་མི་ཤེས། །གཅིག་པུ་ཕྱོགས་བསླད་གར་འགྲོ་ཏོལ་ཀྱང་མེད། །དགོན་པ་འདི་ན་ཚ་ཞིང་སྐོམ་པས་གདུངས། །མ་འཇིགས་སྒྲ་ཡིས་སུ་ཡིས་བདག་ཚིམ་བྱེད། །དེ་ནས་སེམས་ཅན་ཆེན་པོ་དེ་དག་དེའི་སྒྲ་སྙིང་རྗེ་རྗེ་སྐད་ཟེར་བས། སྙིང་འདར་བར་གྱུར་ནས། །རིངས་རིངས་ལྟར་མགྱོགས་སུ་དོང་སྟེ། །ཕྱོགས་དེར་ཕྱིན་པ་དང་། འགྲོན་པོ་ལམ་ནོར་ཏེ་ཉམས་ཐག་པ་དེ་མཐོང་ནས། ཉེ་བར་ལྷགས་ཏེ་གུས་པ་དང་བཅས་པས་དབུགས་འབྱིན་ཅིང་སྨྲས་པ། བདག་ནི་དགོན་པར་འཁྱམས་སྙམ་དུ། ཁྱོད་ཀྱི་བརྟབས་པ་དེ་ཐོང་ཞིག །བདག་གི་སློབ་མའི་འཁོར་བཞིན་དུ། །བདག་ཅག་གང་ཞིག་ཉེ་བར་འཁོད། །དེ་བས་དེ་རིང་བདག་ཅག་གིས། །བཀུར་སྟི་བྱ་བ་ཡོངས་བཟུང་ཞིང་། །ཞི་བ་རྗེས་སུ་བཟུང་ནས་སུ། །སང་ནི་ཅི་ལྟར་འདོད་པར་སོང་། །དེ་ནས་དེ་ཅི་ཡང་མི་ཟེར་བས། མགྲོན་དུ་བོས་པ་ཁས་བླངས་པ་སྲམ་གྱིས་རིག་ནས། དགའ་བས་རྟབ་རྟབ་པོར་གྱུར་ཅིང་མགྱོགས་པར་སོང་སྟེ། ཉ་མོ་བདུན་ཁྱེར་ཏེ་འོངས་ནས་དེ་ལ་སྨྲས་པ། །ཉ་པ་རྣམས་ཀྱིས་བརྗེད་ནས་བོར་བའམ། །དངངས་ཏེ་རྒ་བས་ཐང་ལ་འགྲེས་པ་དག །མི་དགའ་གཉིད་ཀྱི་ལོག་བཞིན་ཉ་བདུན་པོ། །བདག་གིས་རྙེད་པ་འདི་དག་ཟོ་ལ་འདུག །དེ་ནས་ལྕེ་སྦྱང་ཡང་ཅི་རྙེད་པའི་ཟས་དག་ཁྱེར་ཏེ་འོངས་ནས་དེ་ལ་ཕྱག་བྱས་ཏེ། གུས་པར་སྨྲས་པ། སྐྱིན་གོར་གཅིག་དང་ཞོ་ནི་རྫིའུ་གང་ཞིག །ལ་ལ་ཞིག་གིས་བོར་བ་རྙེད་པ་འདི། །བདག་ལ་ཕན་པའི་ཕྱིར་སྣོམས་ལ། །ཡོན་ཏན་གནས་ཁྱོད་ནགས་ཚལ་འདིར་བཞུགས་ཤིག །ཅེས་སྨྲས་ནས་ཡིད་དགའ་བཞིན་དུ་དེ་ལ་བྱིན་ནོ། །དེ་ནས་སྤྲེའུས་ཤིང་ཨཱ་མྲའི་འབྲས་བུ་རབ་ཏུ་སྨིན་པ་འཇམ་པོ་ལྡོང་རོས་ཀྱི་ཕྱེ་མས་ཁ་དོག་བསྒྱུར་བ་འདྲ་བ་རྩི་སེར་བ། རྩ་བ་དམར་བའི་སྙེ་མ་དག་ཅིག་ཁྱེར་ཏེ་འོངས་ནས་ཐལ་མོ་སྦྱར་ཏེ་དེ་ལ་སྨྲས་པ། ཨཱ་མྲ་སྨིན་ཅིང་ཡིད་དུ་འོང་བའི་ཆུ། གྲིབ་མ་བསིལ་བ་དམ་པ་རྣམས་དང་འགྲོགས། བདག་ལ་མཆིས་ཀྱིས་ཚངས་པ་རིགས་པའི་མཆོག །འདི་དག་སྣོམས་ལ་ཁྱོད་ནི་འདིར་བཞུགས་ཤིག །དེ་ནས་རི་བོང་གིས་ཞེས་ས་བྱས་ཏེ་དྲུང་དུ་འོངས་ཏེ་གུས་པར་བལྟ་ཞིང་། །བདག་གི་ལུས་ཀྱིས་འགྲོན་བྱེད་པ་ནི། ནགས་ཀྱི་རི་བོང་ང་ལ་ཅི་ཡང་མེད། །མུད་ག་དང་ནི་ཏིལ་དང་འབྲས་ཀྱང་མེད། །བདག་གི་ལུས་ནི་མེ་ལ་བསྲེགས་པ་འདི། །སྣོམས་ལ་དི་རིང་དཀའ་ཐུབ་ནགས་ལ་བཞུགས། །བདག་གི་དོན་བསྒྲུབ་ནོར་ནི་ཅི་ཡོད་པ། །ཕོངས་པ་འོངས་ན་དེ་ནི་དེ་ལ་དབུལ། །བདག་ལ་ལུས་ལས་ལྷགས་པའི་ནོར་ཡང་མེད། །དེ་བས་བདག་གི་ནོར་དབྱིག་འདི་ཁྱེར་ཅིག །བརྒྱ་བྱིན་གྱིས་སྨྲས་པ། བདག་ཅག་ལྟ་བུ་གཞན་དག་གི །སྲོག་ཀྱང་གཅོད་པར་མི་བྱེད་ན། དེ་ལྟར་རབ་ཏུ་བྱམས་བརྟན་པ། །ཁྱོད་ལྟ་བུ་ལ་སྨོས་ཅི་དགོས། །རི་བོང་གིས་སྨྲས་པ། བྲམ་ཟེའི་ཆོས་ལ་འདི་ལྟ་བུའི་སྙིང་རྗེ་ཉེ་བར་གནས་པ་ནི་རིགས་ཀྱིས། དེ་བས་ན་བདག་ལ་ཕན་པའི་ཐབས་འགའ་ཞིག་གུད་ནས་བཙལ་ཏེ། འོང་གི་བར་དུ་བདག་ལ་ཕན་གདགས་པའི་སླད་དུ། ཁྱོད་རེ་ཤིག་འདིར་བཞུགས་ཤིག །དེ་ནས་ལྷའི་དབང་པོ་བརྒྱ་བྱིན་གྱིས་དེའི་བསམ་པ་ཤེས་ནས། མདག་མའི་ཕུང་པོ་གསེར་བཙོ་མའི་ཁ་དོག་འདྲ་བ། ཅུང་ཟད་འབར་བ། མེ་སྟག་རྣམ་པར་འཕྲོ་བ་དུ་བ་མེད་པ་ཞིག་མངོན་པར་སྤྲུལ་ཏོ། དེ་ནས་རི་བོང་གིས་ཕྱོགས་ཀུན་དུ་བལྟས་པ་དང་མེའི་ཕུང་པོ་དེ་མཐོང་ངོ་། །མཐོང་ནས་ཀྱང་ཡིད་རབ་ཏུ་དགའ་ནས། བརྒྱ་བྱིན་ལ་སྨྲས་པ། བདག་ལ་ཕན་པའི་ཐབས་འདི་བདག་གིས་རྙེད་དེ། དེ་བས་ན་བདག་གི་ལུས་ལོངས་སྤྱོད་དུ་བྱས་པ། ཕན་གདགས་པའི་བསམ་པ་འབྲས་བུ་དང་བཅས་པར་བདག་ལ་མཛད་པའི་རིགས་སོ། །བྲམ་ཟེ་ཆེན་པོ་གཟིགས་སུ་གསོལ། སྦྱིན་པར་བྱ་དང་སྦྱིན་འདོད་གཞོལ་སེམས་དང་། ཁྱོད་ལྟ་བུ་ཡི་འགྲོན་དང་ལྡན་གྱུར་པ། །འདི་ལྟ་བུ་ཡི་རྙེད་པ་རབ་ཏུ་དཀོན། ཁྱོད་ལ་བརྟེན་ནས་བདག་ནི་དོན་ཡོད་གྱུར། །ཅེས་འགྲོན་ལ་དགའ་བའི་ཕྱིར་གུས་ཤིང་རིམ་གྲོ་བསྐྱེད་དེ་དེ་ལ་དེ་སྐད་སྨྲས་ཏེ། དེ་ནས་དེ་ནི་མེ་འབར་དེའི་ནང་དུ། །ནོར་འདོད་བ་དག་གཏེར་ནི་མཐོང་བ་བཞིན། །རབ་ཏུ་དགའ་བས་མེ་ཡི་ནང་དུ་ཞུགས། །པད་འདབ་རྒྱས་པའི་ཆུ་ནང་ངང་པ་བཞིན། །ལྷ་རྣམས་ཀྱི་བདག་པོས་དེ་མཐོང་ནས་ཡིད་ལ་ངོ་མཚར་སྐྱེས་ཏེ། བདག་ཉིད་ཀྱི་ལུས་སུ་གནས་ནས། ལྷའི་མེ་ཏོག་ཆར་བཞིན་འབབ་པ་དང་བཅས་པའི་ཚིག་རྣར་སྙན་ཅིང་ཡིད་དུ་འོང་བས་མངོན་པར་བསྟོད་དེ། བདག་ཉིད་ཀྱི་ལག་པ་པདྨའི་འདབ་མ་འདྲ་བ། དཔལ་ཕུན་སུམ་ཚོགས་པར་སོར་གདུབ་ཀྱི་རྒྱན་བཟང་པོས་བརྒྱན་པ་གཉིས་ཀྱིས་དེ་བླངས་ནས་སུམ་ཅུ་རྩ་གསུམ་གྱི་ལྷའི་རིས་སུ་ཁྱེར་ཏེ་བསྟན་ཏོ། སུམ་ཅུ་རྩ་གསུམ་གྱི་ལྷའི་རིས་ན་གནས་པའི་ལྷ་ཁྱེད་རྣམས་ལྟོས་ཤིག །སྐྱེས་བུ་ཆེན་བོ་འདིའི་ལུས་རབ་ཏུ་ཡ་མཚན་ཆེ་བ་འདི་ལ་རྗེས་སུ་ཡི་རང་བར་གྱིས་ཤིག །འགྲོན་ལ་བྱམས་པས་དེ་རིང་ཆགས་མེད་བར། །ཨེ་མའོ་འདི་ཡིས་ཇི་ལྟར་ལུས་བཏང་བ། །སེམས་ཅན་མི་བརྟན་རྣམས་ཀྱིས་དམན་མ་ཡང་། །དེ་ལྟར་ཐེ་ཚོམ་མེད་པར་གཏོང་མི་ནུས། །འདི་ལྟའི་རིགས་དང་དེ་དང་འགལ་བ་ཡི། །གཏོང་བ་རྒྱ་ཆེན་སེམས་ཀྱང་གསལ་བ་འདི། །ལྷ་མི་བསོད་ནམས་མི་བྱེད་པ་རྣམས་ལ། །དཔེ་བསྟན་བཞིན་དུ་འདི་ནི་རྣམ་པར་གསལ། །ཨེ་མའོ་ཡོན་ཏན་གོམས་བྱས་པ། །འདི་ཡི་བློ་ལ་དགོས་པ་དང་། །ཨེ་མའོ་དམ་པའི་སྤྱོད་གཞོལ་བ། །སྤྱོད་པ་རྒྱ་ཆེན་འདི་ཡིས་བསྟན། །དེ་ནས་བརྒྱ་བྱིན་གྱིས་དེའི་ལུས་ཁྱད་པར་ཅན་བསྟན་པའི་ཕྱིར། །འཇིག་རྟེན་ལ་ཕན་པར་བསམས་ནས། ཁང་བཟང་མཆོག་རྣམ་པར་རྒྱལ་བ་དང་ལྷའི་མདུན་ས་ཆོས་བཟང་གི་ཁང་པ་རྩེགས་པ་དང་། ཟླ་བའི་དཀྱིལ་འཁོར་ལ་རི་བོང་གི་གཟུགས་བརྙན་གྱིས་བརྒྱན་ཏེ་བཞག་གོ །ཟླ་བའི་དཀྱིལ་འཁོར་གང་བ་ལ། །དིང་སང་དུ་ཡང་རི་བོང་གཟུགས། །མེ་ལོང་དཀྱིལ་ན་གཟུགས་བརྙན་བཞིན། །རབ་ཏུ་མངོན་པར་མཛེས་པར་སྣང་། །དེ་དག་ཕྱིན་ཆད་འཇིག་རྟེན་པས། །ཀུ་མུ་ད་ནི་ཁ་འབྱེད་པ། །མཚན་མོའི་མཚན་མ་ཟླ་བ་ལ། །རི་བོང་མཚན་མ་ཅན་ཞེས་བསྒྲགས། །དེ་བས་ན་དེ་ལྟར་སེམས་ཅན་ཆེན་པོ་དུད་འགྲོར་གྱུར་པ་རྣམས་ཀྱང་ཅི་ནུས་པར་སྦྱིན་པ་བྱེད་པར་མཐོང་ན། མིར་གྱུར་པ་སུ་ཞིག་སྦྱིན་པ་མི་བྱེད། དེ་བཞིན་དུ་དུད་འགྲོར་གྱུར་པ་ཡང་ཡོན་ཏན་ལ་དགའ་ན། དམ་པ་རྣམས་ཀྱིས་མཆོད་པར་འགྱུར་བའི་ཕྱིར་ཡོན་ཏན་ལ་གུས་པར་བྱའོ་ཞེས་ཀྱང་བཤད་པར་བྱའོ། རི་བོང་དུ་སྐྱེས་པའི་རབས་ཏེ་དྲུག་པའོ།། །།དཀའ་ཐུབ་ཀྱི་ནགས་ཚལ་ན་གནས་པ་རྣམས་ལའང་གཏོང་བ་དང་། དཔའ་བ་གཉིས་རྒྱན་དུ་འགྱུར་ན་ཁྱིམ་ན་གནས་པ་རྣམས་ལྟ་སྨོས་ཀྱང་ཅི་དགོས། དེ་ཡང་འདི་སྐད་ཐོས་ཏེ། བཅོམ་ལྡན་འདས་འདི་སྔོན་བྱང་ཆུབ་སེམས་དཔར་གྱུར་པའི་ཚེ་འཇིག་རྟེན་ལ་ཕན་པའི་ཕྱིར་འཁོར་བ་ན་གནས་པའི་ཚེ། སྤྱོད་པ་དང་ཡོན་ཏན་རྣམ་པར་དག་པས་མངོན་པར་མཚོན་པ་སའི་སྟེང་ན་རྒྱན་དུ་གྱུར་པ། ཟླ་བའི་དཀྱིལ་འཁོར་ཡོངས་སུ་རྫོགས་པ་ནམ་མཁའ་ལ་ཤར་བ་བཞིན་དུ། བྲམ་ཟེའི་རིགས་ཤིག་ཏུ་སྐྱེས་པར་གྱུར་ཏོ་ཞེས་གྲག་གོ །དེ་རིམ་པ་བཞིན་དུ་ཐོས་པ་དང་དྲན་པ་ལས་བྱུང་བའི་ཆོ་ག་བཞིན་དུ་སྐྱེས་བའི་ལས་ལ་སོགས་པ་བྱ་བ་རྣམས་ནི་བྱས། རིག་བྱེད་ཡན་ལག་དང་བཅས་པ་ནི་བསླབས། མཁས་པའི་གྲགས་པ་ནི་མིའི་འཇིག་རྟེན་མ་ལུས་པར་ཁྱབ་པར་བྱས། སྦྱིན་པ་པོ་ཡོན་ཏན་ལ་དགའ་བ་རྣམས་ཀྱིས་གསོལ་བ་བཏབ་སྟེ་ཕུལ་བ་རྣམས་བླངས་པས། འབྱོར་བའི་ཕྱིར་ནོར་རབ་ཏུ་ཕུན་སུམ་ཚོགས་པར་གྱུར་ཏོ། །གཉེན་དང་མཛའ་བཤེས་རྟེན་དང་ཕོངས་རྣམས་དང་། །འགྲོན་དང་བླ་མ་བཀུར་སྟི་བྱ་བ་རྣམས། །འབྱོར་བ་དེས་ན་རབ་ཏུ་ཚིམ་བྱས་པ། །ཡུལ་དུ་སྤྲིན་གྱི་ཆར་ཆེན་ཕབ་པ་བཞིན། །མཁས་པའི་ཕྱིར་ནི་དེ་ཡི་གྲགས་པ་དེ། །གཏོང་བ་དང་ནི་དཔའ་བས་ལྷག་གྱུར་པ། །སྟོན་ཀའི་ཟླ་བ་རྣམ་པར་དག་པ་དང་། །ཡོངས་སུ་རྫོགས་པས་ལྷག་པར་གསལ་བ་བཞིན། །དེ་ནས་བདག་ཉིད་ཆེན་པོ་དེ་ཁྱིམ་ན་གནས་པ་བྱ་བ་ངན་པས་བྲེལ་བའི་ཉེས་པས་གླགས་པ། བག་མེད་པའི་གནས་སུ་གྱུར་པ། །ནོར་སྒྲུབ་ཅིང་བསྲུང་བའི་ཞར་གྱིས་རྣམ་པར་དཀྲུགས་པ། ཉེ་བར་ཞི་བ་དང་འགལ་བ། སྡུག་བསྔལ་མང་པོའི་མདའི་འབེན་དུ་གྱུར་པ། སོ་ཚིལ་ཀྱི་ལས་སྒྲུབ་པ་མཐའ་ཡས་པས་དུབ་པར་གྱུར་པ། ཆོག་མི་ཤེས་པ། བདེ་བ་མྱོང་བ་ཆུང་བར་རིག་ནས། རབ་ཏུ་བྱུང་བ་ནི་དེའི་ཉེས་པ་མེད་ཅིང་བདེ་ལ། ཆོས་སྒྲུབ་པ་དང་རྗེས་སུ་མཐུན་པ་ཐར་པའི་ཆོས་བརྩམ་པའི་གནས་སུ་གྱུར་པར་མཐོང་བས། ཉོན་མ་མོངས་པར་རྙེད་པའི་ནོར་ཕུན་སུམ་ཚོགས་པ་འཇིག་རྟེན་གྱིས་བཀུར་སྟི་བྱས་པས་ཡིད་དུ་འོང་བ་དེ་དག་ཀྱང་རྩྭ་བཞིན་དུ་སྤངས་ནས། རབ་ཏུ་འབྱུང་བ་དཀའ་ཐུབ་ཅན་གྱི་འདུལ་བ་དང་སྡོམ་པ་ལ་རབ་ཏུ་འབད་པར་གྱུར་ཏོ། །སེམས་དཔའ་ཆེན་པོ་དེ་རབ་ཏུ་བྱུང་བར་གྱུར་ཀྱང་གྲགས་པ་ཆེ་བ་དང་སྔོན་ཤེས་པ་རྗེས་སུ་དྲན་པ་དང་། སྲིད་པའི་ཡོན་ཏན་དང་། རབ་ཏུ་ཞི་བས་མཚན་པའི་ཕྱིར། ལེགས་པར་འདོད་པའི་སྐྱེ་བོ་རྣམས་དེའི་ཡོན་ཏན་མང་པོས་ཡིད་མགུ་བས་དེ་བཞིན་དུ་འདུ་ཞིང་ཡོང་བར་གྱུར་ཏོ། །དེ་སྐྱེ་བོ་ཁྱིམ་པའི་འདུ་འཛིས་རབ་ཏུ་དབེན་པའི་བདེ་བ་མེད་པར་བྱེད་པ། འཁྲུག་པ་དང་། གཡེང་བ་དང་། བར་ཆད་དུ་གྱུར་པ་དེ་ལ་མི་དགའ་ནས་རབ་ཏུ་དབེན་པ་ལ་དགའ་བའི་ཕྱིར། ཀ་ར་ཞེས་བྱ་བའི་གླིང་། །ལྷོ་ཕྱོགས་ཀྱི་རྒྱ་མཚོའི་ནང་ན་འདུག་པ། རྒྱ་མཚོའི་རླབས་རླུང་གིས་བསྐྱོད་བ། ཨནྡ་རྙིལ་གྱི་བཅག་འཕྲོ་ལྟར་སྔོ་བ་འཐོར་བས་ཐ་མ་བསྐོར་བ། ས་གཞི་བྱེ་མ་སྐྱ་བོས་ཁེབས་པ། ཤིང་ལྗོན་པ་རྣམས་པ་སྣ་ཚོགས་མེ་ཏོག་དང་། འབྲས་བུ་དང་འདབ་མས་བརྒྱན་པ་རྣམས་ཀྱིས་མཛེས་པར་བྱས་པ། ཆུ་གཙང་མ་བཏུང་ཏུ་རུང་བ་ཡོད་པ་ཞིག་ཏུ་གནས་ནས་དཀའ་ཐུབ་ཀྱི་གནས་དཔལ་དང་ལྡན་པར་བྱས་སོ། །ལུས་བཟང་དེ་ནི་དཀའ་ཐུབ་ཀྱིས། །རིང་བར་གྱུར་ཅིང་དེ་ན་མཛེས། །མཁའ་ལ་ཟླ་བ་མཛེས་པ་བཞིན། །གཟི་མདངས་ཆེ་བ་མཁའ་ལ་སྣང་། །སྤྱོད་དང་དབང་པོ་རབ་ཏུ་ཞི་ཞིང་དུལ། །བརཏལ་ཞུགས་སྡོམ་ལ་ངེས་བྱས་ནགས་ཚལ་གནས། བློ་ཡི་མཐུ་ཆུང་རྣམས་ཀྱི་ཐུབ་པ་ཞེས། །བྱ་དང་རི་དྭགས་རྣམས་ཀྱང་དེ་ལ་འཁོར། །དེ་ནས་བདག་ཉིད་ཆེན་པོ་དེ་དཀའ་ཐུབ་ཀྱི་ནགས་ཚལ་ན་གནས་ཀྱང་སྦྱིན་པ་ལ་རབ་ཏུ་གོམས་པས། གློ་བུར་བ་རྣམས་དུས་སུ་འོངས་པ་ན། །རྩ་བ་དང་འབྲས་བུ་ཅི་རྙེད་པ་དང་། ཆུ་གཙང་མ་དང་འདིར་འོངས་པ་ལེགས་སོ་ཞེས་བྱ་བའི་ཚིག་གིས་ཤིས་པ་བརྗོད་པ་ཡིད་དུ་འོང་བའི་སྐྱེ་བོ་དཀའ་ཐུབ་ཅན་ལ་འོས་པ་རྣམས་ཀྱིས་མཆོད་པར་བྱེད་དོ། །གློ་བུར་དུ་ལྷགས་པ་རྣམས་ལ་འགྲོན་བྱས་པའི་ལྷག་མ་ནགས་ཚལ་ནས་བྱུང་བས་འཚོ་བའི་ཕྱིར་ཟ་ཞིང་གནས་སོ། །དེའི་དཀའ་ཐུབ་མཆོག་ཏུ་གྱུར་པའི་གྲགས་པ་འཕྲོས་པས་ལྷ་རྣམས་ཀྱི་དབང་པོ་བརྒྱ་བྱིན་སེམས་མགུ་བར་གྱུར་ནས། སེམས་དཔའ་ཆེན་པོ་དེ་བརྟན་མི་བརྟན་ཉམས་བསྐྱེད་པའི་ཕྱིར། །དགོན་པའི་གནས་དེ་ན་རྩ་བ་དང་། འབྲས་བུ་དཀའ་ཐུབ་ཅན་རྣམས་ཀྱིས་བཟར་རུང་བ་ཐམས་ཅད་མཐར་གྱིས་མི་སྣང་བར་བྱས་སོ། །བྱང་ཆུབ་སེམས་དཔའ་ཡང་ཡིད་བསམ་གཏན་ལ་ཞུགས་པས་ཆོག་ཤེས་པ་ལ་གོམས་པ་དང་། ཁ་ཟས་ལ་ཞེན་པ་མེད་པ་དང་། ལུས་ལ་མ་ཆགས་པའི་ཕྱིར་དེ་དག་མི་སྣང་བར་གྱུར་བའི་རྒྱུ་ཡིད་ལ་མི་བྱེད་དོ། །དེ་ཤིང་གི་ལོ་མ་གཞོན་ནུ་དག་བཙོས་ཏེ། དེས་ཟས་ཀྱི་དགོས་པ་བྱས་ཏེ་ཞེན་པ་མེད་ཅིང་ཟས་ཁྱད་པར་ཅན་མི་ཚོལ་བར་བློ་བདེ་བར་བྱས་ཏེ་དེ་བཞིན་དུ་གནས་སོ། །ཆོག་ཤེས་ངེས་པའི་བདག་ཉིད་ཅན། །འཚོ་བ་གང་ཡང་བཙལ་མི་དཀའ། །རྩྭ་དང་ལོ་མ་ཆུ་ཡི་གནས། །གང་ན་མེད་པ་མ་ཡིན་ནོ། །དེ་དེ་ལྟར་གནས་པས་ལྷའི་དབང་པོ་བརྒྱ་བྱིན་ཡིད་ལ་ངོ་མཚར་ཆེ་བར་གྱུར་ནས། ཡོན་ཏན་རབ་ཏུ་བརྟན་པར་གྱུར་པ་དེ་བརྟག་པའི་ཕྱིར་ནགས་ཚལ་དགོན་པ་དེ་ན་ཤིང་ལྗོན་པ་དང་ལྡུམ་བུ་ཐམས་ཅད་དཔྱིད་ཀྱི་རླུང་གིས་བཏབ་པ་བཞིན་དུ་ལོ་མ་མེད་པར་བྱས་སོ། །དེ་ནས་བྱང་ཆུབ་སེམས་དཔའ་ལོ་མ་ལྷགས་ཤིང་རྙིང་པ་ཅུང་ཟད་རློན་པ་རྣམས་བཏུས་ཏེ་ཆུའི་ནང་དུ་བཙོས་པ་དེ་དག་ཟ་ཞིང་མི་དགའ་བ་མེད་པར་བསམ་གཏན་གྱི་བདེ་བས་ཡིད་ཚིམ་པར་བྱས་ཏེ། དེ་ན་བདུད་རྩིས་ངོམས་པ་བཞིན་དུ་དེ་གནས་སོ། །མང་དུ་ཐོས་པས་བསྙེམས་པ་མེད། །འབྱོར་པ་རྣམས་ནི་སེར་སྣ་མེད། ནགས་ཚལ་གནས་རྣམས་ཆོག་ཤེས་པ། ཡོན་ཏན་རྒྱན་གྱི་མཆོག་ཡིན་ནོ། །དེ་ནས་དེའི་ཆོག་ཤེས་པ་བརྟན་པ་ངོ་མཚར་དུ་གྱུར་པ་དེས། བརྒྱ་བྱིན་ངོ་མཚར་ཆེར་གྱུར་ནས་ཁྲོས་པ་བཞིན་དུ་སེམས་དཔའ་ཆེན་པོ་དེ་དྲོ་ལ་བབ་པའི་ཚེ། མེ་ལ་སྦྱིན་སྲེག་བྱ་བ་ནི་ཟིན། བཟླས་བརྗོད་ནི་རྫོགས་ནས། སྐྱེ་བོ་གློ་བུར་དུ་འོངས་པ་བལྟ་བའི་ཕྱིར་ཕྱོགས་སུ་བལྟས་པ་དང་། ལྷའི་དབང་པོ་བརྒྱ་བྱིན་བྲམ་ཟེའི་ལུས་སུ་བསྒྱུར་ནས་གློ་བུར་དུ་འོངས་པ་འདྲ་བར་མདུན་དུ་འོངས་སོ། །བྱང་ཆུབ་སེམས་དཔའ་ཡིད་རབ་ཏུ་དགའ་བས་དེའི་དྲུང་དུ་འོངས་ཏེ། འདིར་འོངས་པ་ལེགས་སོ་ཞེས་བྱ་བ་ལ་སོགས་པའི་ཚིག་སྙན་པ་བརྗོད་དེ། ཟས་ཀྱི་དུས་ལ་བབ་པ་བསྟན་ནས་མགྲོན་དུ་བོས་སོ། །དེ་ཅང་མི་སྨྲ་བས་ཁས་བླངས་བར་བདག་ཉིད་ཆེན་པོ་དེས་ཤེས་ནས། སྦྱིན་པར་འདོད་པས་མིག་དགྲད་བཞིན་ནི་འཛུམ་པས་མཛེས། ཡིད་འོང་རྣར་སྙན་ཚིག་གིས་དགའ་བར་བྱས་ནས་ནི། །དཀའ་བས་རྙེད་དེ་བཅོས་པ་དེ་དག་ཐམས་ཅད་ཀྱང་། དེ་ལ་བྱིན་ནས་བདག་ཉིད་དགའ་བས་ཚིམ་པར་གྱུར། དེ་དེ་བཞིན་དུ་བསམ་གཏན་གྱི་གནས་སུ་ཞུགས་ནས་དགའ་ཞིང་མགུ་བ་དེ་ཉིད་ཀྱིས་ཉིན་མཚན་འདས་སོ། །དེ་ནས་བརྒྱ་བྱིན་དེའི་ཕྱི་དེ་ཉིད་དང་། ཉི་མ་གསུམ་པ་ལའང་དེ་བཞིན་དུ་བརཏལ་ཞུགས་ཀྱི་ཚེ་དེའི་མདུན་དུ་འོངས་སོ། །དེ་ཡང་ཡིད་རབ་ཏུ་དགའ་ནས་དེ་བཞིན་དུ་དེ་ལ་མཆོད་པ་བྱས་སོ། །སྦྱིན་པར་འདོད་པའི་དགེ་བ་རྣམས། །སྙིང་རྗེའི་གོམས་པ་ལས་སྐྱེས་པས། །སྡུག་བསྔལ་སྲོག་ལ་བབ་ན་ཡང་། །དམན་ཞིང་ཞུམ་པར་ཡོངས་མི་འགྱུར། །དེ་ནས་བརྒྱ་བྱིན་གྱི་སེམས་ལ་ངོ་མཚར་རབ་ཏུ་ཆེ་བར་གྱུར་ཏེ། །འདི་ནི་དཀའ་ཐུབ་ཆེ་བས། །སུམ་ཅུ་རྩ་གསུམ་པའི་བདག་པོའི་དཔལ་ཐོབ་པར་བྱ་བའང་འདོད་པ་ཙམ་གྱིས་འགྲུབ་པར་རིག་ནས། དོགས་པ་དང་འཇིགས་པ་སྐྱེས་ཏེ། བདག་གི་ལུས་ལྷའི་ཆ་ལུགས་ངོ་མཚར་ཆེ་བ་བཟང་པོ་དང་ལྡན་པ་མངོན་པར་བསྟན་ནས། དེ་ལ་དཀའ་ཐུབ་ཀྱི་དགོས་པ་དྲིས་སོ། །གཉེན་དང་མཛའ་བཤེས་མཆི་མས་འཇུ་བ་དང་། །བདེ་བའི་རྒྱུར་གྱུར་ཡོངས་སུ་བཟུང་བོར་ཏེ། །བསམ་པའི་ལྕགས་ཀྱུས་གང་དུ་དམིགས་ནས་ནི། དཀའ་ཐུབ་སྡུག་བསྔལ་འདི་ལ་གནས་པར་གྱུར། །བདེ་བར་འབྱོར་བའི་ལོངས་སྤྱོད་ཡོངས་བོར་ཞིང་། །གཉེན་པ་རྣམས་ཀྱང་མྱ་ངན་བསླང་ནས་སུ། །རྒྱུ་རྐྱེན་ཆུང་དུ་དག་གིས་བརྟན་པ་རྣམས། །བདེ་དང་འགལ་བའི་དཀའ་ཐུབ་ནགས་མི་འགྲོ། །གང་གིས་ཡོན་ཏན་ཐོས་ནས་ཁྱོད་ལྟ་བུའི། །བློ་ཡང་དེ་ལྟར་དབང་དུ་བྱས་པ་དེ། །བདག་ལ་གལ་ཏེ་སྨྲ་བ་བྱར་རུང་ན། །དེ་བས་བདག་གི་རྟོག་པ་བསལ་བའི་རིགས། །བྱང་ཆུབ་སེམས་དཔས་སྨྲས་པ། །གང་གི་ཕྱིར་བདག་འདི་ལྟར་འབད་པ། གྲོགས་པོ་ཁྱོད་ཉོན་ཅིག །ཡང་དང་ཡང་དུ་སྐྱེ་བའི་སྡུག་བསྔལ་དང་། །རྒ་དང་རྒུད་དང་ན་བའི་སྡུག་བསྔལ་དང་། འཆི་བར་འགྱུར་སྙམ་སེམས་པའི་འཇིག་རྟེན་རྣམས། བསྐྱབས་པའི་ཕྱིར་ནི་བདག་ནི་དེ་ལྟར་གནས། །དེ་ནས་བརྒྱ་བྱིན་གྱིས་བསམས་པ། འདི་ནི་བདག་གི་དཔལ་འདོད་པ་མ་ཡིན་ནོ་སྙམ་ནས་དབུགས་ཕྱིན་ཏེ། ལེགས་པར་སྨྲས་པ་དེས་ཡིད་དགའ་བར་གྱུར་ནས། དེའི་ཚིག་དེ་རིགས་སོ་ཞེས་བྱ་བས་དགའ་བ་བསྐྱེད་དེ། བྱང་ཆུབ་སེམས་དཔའ་ལ་མཆོག་སྦྱིན་པར་བྱས་སོ། །འདིར་ཁྱོད་ཀྱིས་དཀའ་ཐུབ་ཅན་དང་མཐུན་པའི་ཚིག་ལེགས་པར་སྨྲས་པའི་ཕྱིར་འོད་སྲུངས་ཁྱོད་ལ་མཆོག་སྦྱིན་གྱིས་གང་འདོད་པ་དེ་སློང་ཤིག །དེ་ནས་བྱང་ཆུབ་སེམས་དཔའ་བདེ་བ་ལ་མ་ཆགས་པ་དང་། སློང་བ་ཉིད་སྡུག་བསྔལ་དུ་རིག་ཅིང་ཆོག་ཤེས་པ་ལ་གོམས་པས། བརྒྱ་བྱིན་ལ་སྨྲས་པ། རྗེས་སུ་ཕན་པར་འགྱུར་བའི་མཆོག །གལ་ཏེ་བདག་ལ་སྦྱིན་འདོད་ན། །ལྷ་ཡི་མཆོག་ལ་དམ་པ་འདི། །བདག་གིས་ད་ནི་བླང་བར་བྱ། །ཆུང་མ་ཡིད་དུ་འོང་དང་བུ་དང་དབང་བྱེད་དང་། །མངོན་པར་འདོད་པའི་ནོར་རྣམས་རྒྱ་ཆེན་ཐོབ་གྱུར་ཀྱང་། གང་གིས་ཡིད་གདུངས་ནམ་ཡང་ཆོག་མི་ཤེས་པ་ཡི། །བརྐམ་པའི་རླུང་དེ་བདག་གི་སྙིང་ལ་མེད་པར་བྱོས། དེ་ནས་དེའི་ཆོག་ཤེས་པ་ལ་གཞོལ་བ་ལེགས་པར་སྨྲ་བས་གསལ་བར་བྱས་པ་དེས། བརྒྱ་བྱིན་ཡིད་རབ་ཏུ་དང་བར་གྱུར་ནས། བྱང་ཆུབ་སེམས་དཔའ་ལ་ལེགས་སོ་ཞེས་བྱ་བས་བསྟོད་དེ། དེ་ཡང་མཆོག་སྦྱིན་པས་འདུན་པར་བྱས་སོ། །འདིར་ཡང་སྐྱེ་བོ་ཐུབ་པ་དང་མཐུན་པའི་ཚིག་ཁྱོད་ཀྱིས་ལེགས་པར་སྨྲས་པ་ལ་དགའ་བས་སྐྱེས་ལན་དང་འདྲ་བར་མཆོག་གཞན་ཡང་སྦྱིན་པར་བྱའོ། །དེ་ནས་བྱང་ཆུབ་སེམས་དཔའ་མཆོག་བླང་བ་ལ་སྙད་བཏགས་ཏེ། ཉོན་མོངས་པ་དང་བྲལ་བ་ཐོབ་དཀའ་བ་ཉིད་དེ་ལ་བསྟན་པའི་ཕྱིར་ཡང་དེ་ལ་ཆོས་བསྟན་ཏོ། །ཡོན་ཏན་མཆོག་གནས་བརྒྱ་བྱིན་ཁྱོད། །ང་ལ་གལ་ཏེ་མཆོག་སྦྱིན་ན། །ལྷ་ཡི་དབང་པོ་དམ་པའི་མཆོག །དེ་བས་གཞན་ཡང་འདི་བསླང་ངོ་། །སེམས་ཅན་གང་གི་ཟིལ་གནོན་དགྲ་བོ་བཞིན། ནོར་ཡང་ཉམས་ཤིང་མདོག་བཟང་གྲགས་པ་དང་། བདེ་བ་ལས་ཀྱང་ཉམས་པར་འགྱུར་བ་ཡི། །ཞེ་སྡང་མེ་དེ་བདག་ལས་རིང་བར་བྱོས། །ལྷའི་དབང་པོ་བརྒྱ་བྱིན་གྱིས་དེ་ཐོས་ནས་ངོ་མཚར་དུ་གྱུར་ཏེ་ལེགས་སོ་ཞེས་བྱ་བས་དེ་ལ་གུས་པར་བསྟོད་དེ། ཡང་སྨྲས་པ། རབ་ཏུ་བྱུང་ལ་གྲགས་པ་དེར། །རྗེས་སུ་ཆགས་ཤིང་བརྟེན་པ་འོས། དེ་བས་ལེགས་པར་སྨྲས་པ་ཡི། །མཆོག་དེ་བདག་ལས་བཞེས་སུ་གསོལ། །དེ་ནས་བྱང་ཆུབ་སེམས་དཔས་ཉོན་མོངས་པ་དང་མི་མཐུན་པའི་ཕྱིར་མཆོག་འདོད་པ་ལ་སྙད་བཏགས་ནས་སེམས་ཅན་ཉོན་མོངས་པ་ཅན་དང་འགྲོགས་པ་སྨད་པའི་ཕྱིར་འདི་སྐད་ཅེས་སྨྲས་སོ། །བྱིས་པ་རྣམས་ནི་ནམ་ཡང་མི་ཐོས་ཤིང་། །མཐོང་བར་མི་འགྱུར་ནམ་ཡང་མི་སྨྲ་ཡང་། །དེ་དང་འགྲོགས་པས་སྐྱོ་བའི་སྡུག་བསྔལ་ཡང་། །མི་མྱོང་མཆོག་དེ་བདག་ནི་ཁྱོད་ལ་སློང་། བརྒྱ་བྱིན་གྱིས་སྨྲས་པ། ཕོངས་བར་གྱུར་ལ་ཁྱད་པར་དུ། །དམ་པས་ཕན་གདགས་མ་ཡིན་ནམ། །ཕོངས་པའི་གནས་སུ་གྱུར་པའི་ཕྱིར། །བྱིས་པ་ཐ་མ་ཡིན་པར་འདོད། བྱིས་པ་འདི་དག་ཁྱད་པར་དུ། །སྙིང་རྗེའི་གནས་སུ་གྱུར་པ་ན། །ཅི་ཕྱིར་སྙིང་རྗེ་ཅན་ཡིན་ཡང་། །མཐོང་བ་ཙམ་དུའང་ཁྱོད་མི་འདོད། །བྱང་ཆུབ་སེམས་དཔས་སྨྲས་པ། །གྲོགས་པོ་མི་ནུས་མོད། འདི་ལ་ཁྱོད་ལྟོས་ཤིག །ཇི་ལྟར་བྱས་ཀྱང་བྱིས་པ་ལ། །ཕན་གདགས་པར་ནི་མི་ནུས་ཏེ། །བདག་ཅག་ལྟ་བུ་ཅི་ལྟར་ན། །དེ་ལ་ཕན་པར་བརྩོན་མི་བྱེད། །དེ་ལྟ་བས་ན། འདི་དག་ཕན་གདགས་པར་བྱ་བའི་སྣོད་མ་ཡིན་པར་ཟུང་ཞིག །འདི་དག་ཚུལ་མིན་པའང་ཚུལ་བཞིན་བྱེད། གཞན་ཡང་འདི་ལ་རབ་ཏུ་སྦྱོར་བར་འདོད། །འདུལ་དང་དྲང་པོའི་རིམ་པ་མི་མཐུན་པར། །ཕན་པ་བསྟན་ཀྱང་རབ་ཏུ་འཁྲུག་པར་འགྱུར། །མཁས་པའི་ང་རྒྱལ་གཏི་མུག་མེས་བསྲེགས་ཤིང་། །ཕན་པར་སྨྲ་ལ་ཁྲོ་བས་རྩུབ་འགྱུར་བ། །འདུལ་ལ་བརྩོན་འགྲུས་ཆུང་བས་གཟུ་ལུམས་ཅན། དེ་ལ་ཇི་ལྟར་ཕན་གདགས་རུང་བ་སྨྲོས། ལྷ་ཡི་གཙོ་བོ་དེ་བས་ན། སྙིང་རྗེ་ཆེ་བར་གྱུར་བ་ཡང་། བྱིས་པ་རྫས་སུ་མི་རུང་པ། །མཐོང་བ་ཙམ་དུའང་མི་འདོད་དོ། །བརྒྱ་བྱིན་གྱིས་དེ་ཐོས་ནས། །ལེགས་སོ་ལེགས་སོ་ཞེས་དེ་ལ་བསྟོད་དེ། །ལེགས་པར་སྨྲས་པས་སེམས་རབ་ཏུ་དང་བར་གྱུར་ནས། ཡང་སྨྲས་པ། ལེགས་པར་སྨྲས་པ་རིན་ཆེན་ལ། རིན་ནི་ཅི་ཡང་ཡོད་པ་ཡིན། དགའ་བས་མེ་ཏོག་སྙིམ་བཀང་བཞིན། །འདིར་ཡང་ཁྱོད་ལ་མཆོག་སྦྱིན་ནོ། །དེ་ནས་བྱང་ཆུབ་སེམས་དཔས་སྐྱེས་བུ་དམ་པ་གནས་སྐབས་ཐམས་ཅད་དུ་བདེ་བ་སྟོན་པའི་ཕྱིར། །བརྒྱ་བྱིན་ལ་སྨྲས་པ། བརྟན་པ་མཐོང་ཞིང་བརྟན་པ་ཐོས་པ་དང་། །དེ་དག་ཉིད་དང་བརྒྱ་བྱིན་བདག་འགྲོགས་འགྱུར། །དེ་དང་སྨྲ་ཞིང་སྤོབས་པའི་བདེ་ལྡན་གྱུར། །ལྷ་ཡི་དམ་པ་མཆོག་དེ་བདག་ལ་སྩོལ། །བརྒྱ་བྱིན་གྱིས་སྨྲས་པ། ཁྱོད་ནི་བརྟན་པ་ལ་རབ་ཏུ་དགའ་བ་འདྲ་ན། དེ་སྨྲོས་ཤིག །བརྟན་པས་ཁྱོད་ལ་ཅི་ཞིག་བྱ། འོད་སྲུངས་དེ་ཡི་རྒྱུ་སྨྲོས་ཤིག །བརྟན་པ་མཐོང་བར་འདོད་པ་ཡིས། །གང་ཕྱིར་མི་བརྟན་བཞིན་དུ་གྱུར། །དེ་ནས་བྱང་ཆུབ་སེམས་དཔས་དེ་ལ་སྐྱེས་བུ་དམ་པའི་ཡོན་ཏན་བསྟན་པའི་ཕྱིར་སྨྲས་པ། བདག་གང་གི་ཕྱིར་བརྟན་པ་འབའ་ཞིག་མཐོང་བར་འདོད་པ་དེ་གྲོགས་པོ་ཉོན་ཅིག །ཡོན་ཏན་ལམ་དུ་བདག་ཉིད་འགྲོ་བར་བྱེད། །གཞན་ཡང་ལམ་དེ་ཉིད་དུ་འཛུད་པར་བྱེད། །རྩུབ་མོའི་ཚིག་ཀྱང་མི་བཟོད་སྐྱེ་མི་འགྱུར། །དེ་ཡི་ཚིག་ནི་ཕན་དང་ལྡན་པ་ཡིན། །གཡོ་སྒྱུ་མེད་པའི་འདུལ་བས་རྟག་ཏུ་བརྒྱན། །དེ་ལྟར་ཕན་པ་དག་ཀྱང་བསྟན་པར་ནུས། །དེ་བས་བདག་བློ་ཡོན་ཏན་དགའ་བ་ལ། །ཡོན་ཏན་དགའ་ཕྱིར་རབ་ཏུ་གཞོལ་བར་འགྱུར། །དེ་ནས་དེ་ལ་བརྒྱ་བྱིན་གྱིས་ལེགས་སོ་འདི་ནི་རིགས་སོ་ཞེས་བསྟོད་དེ། སེམས་རབ་ཏུ་དང་བར་གྱུར་ནས། ཡང་མཆོག་སྦྱིན་པར་བྱས་སོ། །ཆོག་ཤེས་པ་ལ་གོམས་གྱུར་བས། །ཁྱོད་ཀྱིས་ཀུན་དུ་བཟློག་གྱུར་ཀྱང་། །བདག་ལ་ཕན་གདགས་བློ་ཡིས་སུ། །མཆོག་ནི་བླང་བར་བྱ་བའི་རིགས། །གུས་དང་ཕན་པའི་བསམ་པ་དང་། །མཐུ་ཡང་ཅི་འདོད་ཐམས་ཅད་ཀྱིས། མཆོག་ནི་སྦྱིན་པར་བྱ་བ་ལས། །མ་བླངས་བ་ནི་སྡུག་བསྔལ་ཆེ། །དེ་ནས་བྱང་ཆུབ་སེམས་དཔས་དེ་རབ་ཏུ་ཕན་འདོགས་པར་འདོད་པ་རྟོགས་ནས། དེ་ལ་དགའ་བ་དང་ཕན་པར་འདོད་པས། སྦྱིན་པ་ལ་རབ་ཏུ་དགའ་བ་དེ་ལ་བསྟན་པའི་ཕྱིར་སྨྲས་པ། ཁྱོད་ཀྱིས་ཁ་ཟས་ཟད་པའི་ཉེས་པ་སྤངས། །ཡིད་ཀྱང་སྦྱིན་པར་དགའ་དང་མཐུན་འགྱུར་བའི། །སློང་བ་རྣམས་ཀྱང་ཚུལ་ཁྲིམས་རྣམ་དག་བརྒྱན། །འདི་དག་བདག་ལ་ཡོད་འགྱུར་མཆོག་སློང་ངོ་། །བརྒྱ་བྱིན་གྱི་སྨྲས་བ། འདིར་ཡང་ཁྱོད་ནི་ལེགས་པར་སྨྲས་པ་རིན་པོ་ཆེའི་འབྱུང་ཁུངས་སུ་གྱུར་ཏོ། །གཞན་ཡང་ཁྱོད་ཀྱིས་གང་བླངས་པ། །དེ་དག་ཐམས་ཅད་དེ་བཞིན་འགྱུར། །ལེགས་པར་སྨྲས་པ་འདི་ལ་ཡང་། ཁྱོད་ལ་མཆོག་ནི་སྦྱིན་པར་བྱ། བྱང་ཆུབ་སེམས་དཔས་སྨྲས་པ། །ལྷ་རྣམས་ཀུན་གྱི་མཆོག་ཏུ་འགྱུར་བ་ཁྱོད། །བདག་ལ་ཕན་འདོགས་རྒྱུར་འགྱུར་མཆོག་སྦྱིན་ན། །གསལ་བར་བདག་དྲུང་སླན་ཆད་མི་འབྱོན་པའི། །མཆོག་འདི་ལྷ་མིན་འཇོམས་པ་ཁྱོད་ལ་སློང་། དེ་ནས་བརྒྱ་བྱིན་ངོ་མཚར་དུ་གྱུར་ནས། །མི་བཟོད་པ་བཞིན་དུ་དེ་ལ་སྨྲས་པ། །ཁྱོད་རེ་ཤིག་སྡོད་ཅིག་དང་། བཟླས་བརྗོད་བརཏལ་ཞུགས་མཆོག་སྦྱིན་དཀའ་ཐུབ་སྦྱང་བ་ཡིས། །སྐྱེ་བོ་འདི་དག་ཁོ་བོ་རྗེས་སུ་མཐོང་འདོད་ན། །ཁོ་བོ་མཆོག་སྦྱིན་འདོད་ཕྱིར་འདི་ལྟར་འོངས་པ་ལ། ཁྱོད་ནི་དེ་ལྟར་མཐོང་བར་མི་འདོད་ཅི་ཡི་ཕྱིར། བྱང་ཆུབ་སེམས་དཔས་སྨྲས་པ། །འདི་ལ་བདག་གིས་ཁྱོད་མཉེས་པར་བགྱི་ཡིས། །ལྷའི་རྒྱལ་པོ་ཁྱོད་མ་བཀྱོན་ཅིག །འདི་མི་སྲུན་པའི་ཚུལ་ཀྱང་མ་ལགས། །མ་གུས་པར་བགྱིས་པའང་མ་ལགས། །ཁྱོད་དང་ཕྲད་པར་མི་འཚལ་པའང་མ་ལགས་ན། ལྷ་ཡི་གཟུགས་མཆོག་རྨད་དུ་བྱུང་བ་མཐོང་བ་དང་། གཟི་བརྗིད་གསལ་ཞིང་མདངས་དང་ལྡན་པ་མཐོང་འགྱུར་ན། །ཁྱོད་ནི་རབ་ཏུ་དང་ཞིང་ཞི་བར་གྱུར་པ་ཡང་། བདག་གི་དཀའ་ཐུབ་ཉམས་པར་གྱུར་དུ་དོགས་ལགས་མོད། དེ་ནས་བརྒྱ་བྱིན་གྱིས་དེ་ལ་ཕྱག་འཚལ་ཏེ་བསྐོར་བ་བྱས་ནས་དེ་ཉིད་དུ་མི་སྣང་བར་གྱུར་ཏོ། །དེ་ནས་ནམ་ལངས་པ་དང་ལྷའི་བཟའ་བ་དང་། བཏུང་བ་བརྒྱ་བྱིན་གྱིས་སྦྱར་བ་རྣམས་དང་། རང་སངས་རྒྱས་བརྒྱ་ཕྲག་དུ་མ་བརྒྱ་བྱིན་གྱིས་སྤྱན་དྲངས་པ་རྣམས་དང་། ལྷའི་བུ་གཞོན་ནུ་བཤོས་འབྲིམ་པར་ཆས་ཤིང་བསྡོགས་པ་དུ་མ་ཙམ་ལྷགས་པར་བྱང་ཆུབ་སེམས་དཔས་མཐོང་བར་གྱུར་ཏོ། །བཟའ་བ་དང་ནི་བཏུང་བར་སྦྱར་བ་དེ་དག་གིས། །དྲང་སྲོང་ཆེན་པོ་དེ་དག་མཆོད་པ་བྱས་པ་དང་། ཐུབ་པ་དེ་ནི་དགའ་བ་ཆེན་པོ་ཐོབ་པར་གྱུར། །སྐྱེ་བོ་དཀའ་ཐུབ་ཅན་དང་མཐུན་པའི་ཚུལ་དག་དང་། བསམ་གཏན་ཚད་མེད་སྡོམ་དང་ཞི་བའི་ཚུལ་གྱིས་གནས། །དེ་བས་དེ་ལྟར་དཀའ་ཐུབ་ཀྱི་ནགས་ཚལ་ན་གནས་པ་རྣམས་ལའང་གཏོང་ཕོད་པ་དང་དཔའ་བརྒྱན་དུ་འགྱུར་ན། ཁྱིམ་ན་གནས་པ་རྣམས་ལྟ་སྨོས་ཀྱང་ཅི་དགོས་ཏེ། དེ་བས་ན་མི་རྣམས་ཀྱིས་ཀྱང་གཏོང་ཕོད་པས་བདག་བརྒྱན་པར་བྱའོ། །ཞེས་ཁྱིམ་བདག་གཟེངས་བསྟོད་པའི་ཕྱིར། །དེ་ལྟར་བཅོམ་ལྡན་འདས་དེ་སྐུ་ཚེ་སྔ་མ་ལའང་ལེགས་པར་གསུངས་པ་ཁྱད་པར་ཅན་རིན་པོ་ཆེའི་འབྱུང་གནས་སུ་གྱུར་པ་ཡིན་ན་མངོན་པར་རྫོགས་པར་སངས་རྒྱས་ནས་ལྟ་སྨོས་ཀྱང་ཅི་དགོས་ཞེས། དེ་བཞིན་གཤེགས་པའི་ཆེ་བ་ཉིད་བསྟན་པ་ལའང་སྦྱར་བར་བྱའོ། ཨ་ག་སྟར་སྐྱེས་པའི་རབས་ཏེ་བདུན་པའོ།། །།བམ་པོ་གསུམ་པ།། །།སྙིང་རྗེ་ཆེན་པོས། གཞན་གྱི་སྡུག་བསྔལ་གྱིས་གདུངས་པ་རྣམས་ནི་བདག་གི་བདེ་བ་ལ་མི་ལྟ་སྟེ། དེ་ཡང་འདི་སྐད་ཐོས་ཏེ། བྱང་ཆུབ་སེམས་དཔའ་བདག་གི་ཆེ་བ་ཉིད་ཀྱིས་སྙིང་རྗེ་དང་ལྡན་ཞིང་འགྲོ་བ་ཡོངས་སུ་སྐྱབ་པ། ལྷག་པའི་བསམ་པ་ཅན། སྦྱིན་པ་དང་། དུལ་བ་དང་། སྡོམ་པ་དང་། དེས་པ་ལ་སོགས་པ་འཇིག་རྟེན་ལ་ཕན་འདོགས་པ་དང་། མཐུན་པའི་ཡོན་ཏན་ཁྱད་པར་ཅན་མངོན་པར་འཕེལ་བ། སེམས་ཅན་ཐམས་ཅད་ལ་བྱམས་པའི་ཡིད་དུ་གྱུར་པ། བྱམས་པའི་སྟོབས་ཞེས་བྱ་བའི་རྒྱལ་པོར་གྱུར་ཏོ་ཞེས་གྲག་གོ །སྐྱེ་དགུ་རྣམས་ཀྱི་བདེ་དང་སྡུག་བསྔལ་གང་། རྒྱལ་པོ་དེ་ཡང་དེ་དག་བཞིན་དུ་གྱུར། དེ་བས་དེ་ནི་སྐྱེད་དགུ་བསྲུང་ལ་མཁས། མཚོན་ཆ་དང་ནི་གཙུག་ལག་རྣམས་ལ་གོམས། །མི་ཡི་དབང་པོས་བཀའ་ཁྲིམས་སྤྱི་བོས་མནོས། །དེ་ཡི་མཚོན་ཆ་རྒྱན་དང་འདྲ་བར་གྱུར། །འཇིག་རྟེན་ཕན་འབྱུང་སྙན་ངག་ཚུལ་རྣམས་ཀྱིས། །གཙུག་ལག་དག་ཀྱང་རྣམ་པར་གསལ་བར་སྣང་། །ཚར་བཅད་པ་དང་ཕན་འདོགས་བྱ་བ་ལ། ཆོས་དང་འགལ་བ་དེ་ནི་ཡོང་མི་བྱེད། །ཚུལ་ལ་མཁས་ཤིང་ཕན་པར་སེམས་པའི་ཕྱིར། །སྐྱེ་དགུ་རྣམས་ལ་སྟོན་མཁས་ཕ་དང་འདྲ། དེ་དེ་ལྟར་སྐྱེ་དགུ་རྣམས་ཆོས་ཀྱིས་སྐྱོང་བ་ན། བདེན་པ་དང་གཏོང་བ་དང་ཉེ་བར་ཞི་བ་དང་ཤེས་རབ་ལ་སོགས་པ་གཞན་ལ་ཕན་པར་ཡོངས་སུ་བསྔོས་པའི་ཕྱིར། ཁྱད་པར་ཅན་དུ་གྱུར་ལ་རླབས་ཆེ་བའི་རིམ་པས་བྱང་ཆུབ་ཀྱི་ཚོགས་བསགས་ཤིང་མངོན་པར་དར་བ་ལས། རེ་ཤིག་ཅིག་ཉེས་པ་འགའ་ཞིག་བྱུང་བའི་ཕྱིར། གནོད་སྦྱིན་གཞན་གསོད་པ་ལ་མཁས་པ་མདངས་འཕྲོག་པ་ལྔ་ཞིག །གནོད་སྦྱིན་གྱི་བདག་པོས་རང་གི་ཡུལ་ནས་སྡུགས་པ་དེ་དེའི་ཡུལ་དུ་ལྷགས་སོ། །དེའི་ཡུལ་ན་གནོད་པ་ཐམས་ཅད་མེད་པ་དང་། རྟག་ཏུ་དགའ་བ་སྣ་ཚོགས་ཡོད་པ་དང་། ཕུན་སུམ་ཚོགས་པ་མཆོག་དང་ལྡན་པས་མི་རྣམས་རབ་ཏུ་དགའ་མགུ་ཞིང་དར་བ་མཐོང་ནས། དེ་དག་ཡུལ་དེ་ན་གནས་པའི་མི་རྣམས་ཀྱི་མདངས་འཕྲོག་འདོད་པར་གྱུར་ཏོ། །དེ་དག་རབ་ཏུ་བསྒྲིགས་ནས་ནི། །རང་གི་ལས་ལ་འཇུག་བྱས་ཀྱང་། །དེ་ན་གནས་པ་རྣམས་ཀྱི་མདངས། །འཕྲོག་པར་བྱ་བར་མ་ནུས་སོ། །རྒྱལ་པོ་དེའི་མཐུ་ཁྱད་པར་ཆེ་བས་ན། །བདག་གི་ཡིན་པའི་བློ་ནི་གར་བཞག་བ། །དེ་ཉིད་དེ་ཡི་བསྲུང་བ་མཆོག་ཡིན་པས། །དེ་དག་གིས་ནི་མདངས་འཕྲོག་ནུས་མ་གྱུར། །དེ་ལྟར་རབ་ཏུ་འབད་ཀྱང་ཡུལ་དེ་ན་གནས་པ་གང་གི་མདངས་ཀྱང་འཕྲོག་པར་མ་ནུས་པ་དེའི་ཚེ། །དེ་དག་ཅིག་ལ་ཅིག་བལྟས་ནས། །གྲོགས་པོ་དག་འདི་ཅི་ཞིག་ཡིན་སྙམ་དུ་སེམས་པར་གྱུར་ཏོ། །བདག་ཅག་མཐུ་ལ་གནོད་པར་ནུས་པ་ཡི། །རིག་སྔགས་དཀའ་ཐུབ་དངོས་གྲུབ་ཁྱད་པར་ཡང་། །དེ་དག་ལ་ནི་ཡོད་པ་མ་ཡིན་ན། །འོན་ཀྱང་དེ་རིང་བདག་ཅག་ཐམས་ཅད་ཀྱི། །མིང་ནི་དོན་དང་མཐུན་པར་མ་གྱུར་ཏོ། །དེ་ནས་གནོད་སྦྱིན་དེ་དག་བྲམ་ཟེའི་གཟུགས་སུ་བསྒྱུར་ཏེ། །དོང་དོང་བ་དང་གྲིབ་ཤིང་སྔོན་པོ་ཞིག་གི་དྲུང་ན། ནགས་ན་རྒྱུ་བའི་བ་ལང་རྫི་གཅིག་གཅིག་ལྷམ་དང་བཅས་པར་འདུག་ཅིང་། ནགས་ཚལ་གྱི་ཤིང་གི་མེ་ཏོག་ལོ་མ་དང་བཅས་པའི་ཕྲེང་བ་ནི་ཐོགས། །དབྱུག་པ་དང་དགྲ་སྟ་ནི་གཡས་རོལ་དུ་བཞག །གཅིག་པུ་སྲད་བུ་ནི་འཁལ། །ཤུག་གླུ་ནི་ལེན་ཅིང་འདུག་པ་མཐོང་ནས། དེའི་དྲུང་དུ་ལྷགས་ཏེ་སྨྲས་པ། ཀྱེ་བ་ལང་རྫི་འདི་ལྟ་བུའི་དགོན་པ་དབེན་པ་འགྲོ་བ་མེད་པ་ན། གཅིག་པུ་ཇི་ལྟར་མི་འཇིགས། དེས་དེ་དག་ལ་བལྟས་ནས། སུ་ལ་འཇིགས་ཞེས་སྨྲས་སོ། །གནོད་སྦྱིན་རྣམས་ཀྱིས་སྨྲས་པ། །སྲིན་པོ་རྣམས་དང་འདྲེ་རྣམས་རང་བཞིན་གྱིས་གཏུམ་ཞིག་མ་རུངས་པ་ཡིན་པར་ཁྱོད་ཀྱིས་སྔོན་མ་ཐོས་སམ། རིག་སྔགས་དཀའ་ཐུབ་བདེ་ལེགས་ལྡན་པ་དག །གྲོགས་ཀྱིས་བསྐོར་བའི་ནང་ན་འདུག་གྱུར་ཅིང་། །དཔའ་ལ་འཇིགས་པ་མེད་པའི་མི་དག་ཀྱང་། །གང་ལས་ཐར་པར་གྱུར་པར་རབ་དཀའ་བ། །ནགས་ཚལ་རབ་ཏུ་དབེན་ཞིང་ཟབ་པ་ལ། འཇིགས་པའི་ས་ན་གྲོགས་ཀྱང་ཡོང་མེད་པར། །མི་ཡི་ཤ་དང་ཚིལ་དག་ཟ་བ་ཡི། །སྲིན་པོ་དེ་དག་ཅི་ཕྱིར་ཁྱོད་མི་འཇིགས། །དེ་སྐད་སྨྲས་པ་དང་། བ་ལང་རྫི་དེས་དགོད་ནས་དེ་དག་ལ་སྨྲས་པ། བདེ་ལེགས་ཆེན་པོས་འགྲོ་བ་འདི། །ཡོངས་སུ་བསྐྱངས་པར་གྱུར་པས་ན། །ལྷ་ཡི་དབང་པོ་དག་གིས་ཀྱང་། །འདི་དག་གཙེ་བར་མི་ནུས་ན། །ཤ་ཟ་དག་གིས་ག་ལ་ནུས། །དེ་བས་ནགས་ནའང་ཁྱིམ་བཞིན་དུ། །མཚན་མོ་དག་ཀྱང་ཉིན་མོ་བཞིན། །གཅིག་པུའང་གྲོགས་ཀྱི་ནང་འདུག་འདྲ། །བདག་ནི་འཇིགས་པ་མེད་པར་འདུག །དེ་ནས་གནོད་སྦྱིན་དེ་དག་ངོ་མཚར་ཆེ་བར་གྱུར་ནས། དེ་ལ་ཟིལ་གྱིས་གནོན་པ་བཞིན་དུ་ཆེར་ཆེར་བྱས་ནས་སྨྲས་པ། ཀྱེ་བཟང་པོ་ཁྱོད་ཀྱི་བདེ་ལེགས་ཀྱི་བྱེ་བྲག་དེ་ཅི་འདྲ་བ་ཞིག་རེ་ཤིག་སྨྲོས་ཤིག །དེ་དགོད་ཅིང་དེ་དག་ལ་སྨྲས་པ། བདག་ཅག་གི་བདེ་ལེགས་ཀྱི་བྱེ་བྲག་རྨད་དུ་བྱུང་བ་ཅི་འདྲ་བ་ཉོན་ཅིག །གསེར་གྱི་རི་བོའི་བྲག་ལྟར་ཡངས་པའི་བྲང་། སྟོན་ཀའི་ཟླ་བ་དྲི་མེད་མཛེས་པའི་ཞལ། །དཔུང་བ་གསེར་གྱི་སྡོང་པོ་ལྟ་བུར་རྒྱས། །མི་དབང་ཁྱུ་མཆོག་སྤྱན་འདྲ་རྣམ་པར་གནོན། །བདག་ཅག་གི་བདེ་ལེགས་ཀྱི་ཁྱད་པར་ནི་འདི་འདྲའོ་ཞེས་སྨྲས་ནས། ངོ་མཚར་ཆེ་ཞིང་ཁྲོ་བ་དང་བཅས་པས་གནོད་སྦྱིན་དེ་དག་ལ་བལྟས་ཏེ་ཡང་སྨྲས་པ། ཨེ་མའོ་འདི་ནི་ངོ་མཚར་ཆེའོ། །མི་དབང་མཐུ་ཆེན་འདི་ལྟར་གྲགས་པ་ཡང་། །ཁྱེད་ཀྱི་རྣ་ལམ་ཇི་ལྟར་མ་གྲགས་ཀྱེ། འོན་ཏེ་ཐོས་ཀྱང་ཤིན་དུ་རྨད་བྱུང་བས། །ཁྱེད་ཅག་ཡིད་མི་ཆེས་ཕྱིར་མ་བཟུང་གྲང་། ཁྱེར་ཅག་གང་ནས་ལྷགས་པའི་ཡུལ་དེ་ཡི། །མི་རྣམས་ཡོན་ཏན་ཚོལ་ལ་མི་མཁས་སམ། ཆེད་ཆེར་མི་འཛིན་སྐལ་པ་མེད་པའི་ཕྱིར། །མི་དབང་གྲགས་པས་རྣམ་པར་སྤངས་སུ་དོགས། །དེ་བས་ན་དེ་ལྟ་བུ་ཡུལ་མཐའ་འཁོབ་ནས་འདིར་ལྷགས་པ་ན་ཁྱོད་རྣམས་ལ་སྐལ་བ་ཅུང་ཟད་ཅིག་ཡོད་དོ། །གནོད་སྦྱིན་རྣམས་ཀྱིས་སྨྲས་པ། བཟང་པོ་དེའི་ཡུལ་ན་གནས་པའི་སྐྱེ་བོ་རྣམས་ལ་མི་མ་ཡིན་པ་རྣམས་ཀྱིས་གནོད་པར་བྱ་བར་མི་ནུས་པ། རྒྱལ་པོ་དེའི་མཐུ་དེ་ལྟ་བུ་ཅི་ལས་གྱུར། བ་ལང་རྫིས་སྨྲས་པ། ངེད་ཀྱི་རྒྱལ་པོ་ཆེན་པོ་འདིའི་མཐུ་འདི་ལྟ་བུ་ནི་རང་གི་ཆེ་བ་ཉིད་ཀྱིས་ཐོབ་པའོ། བྲམ་ཟེ་དག་ལྟོས་ཤིག །དེའི་དཔུང་བྱམས་པ་རུ་མཚོན་ཁྲ་བོའི་དཔུང་ནི་ཆོ་ག་ཙམ། དེ་ནི་མི་ཁྲོ་ཚིག་རྩུབ་མི་སྨྲ་ས་ཡང་ལེགས་པར་བསྲུང་། །དེ་ཡི་བཀའ་ཁྲིམས་ཆོས་ཡིན་རྒྱུ་མེད་ནོར་ཡང་དམ་པ་མཆོད། །དེ་ལྟར་རྨད་དུ་བྱུང་ཡང་ངན་པའི་ཆོས་ཉིད་དྲེགས་པ་མེད། ཁོ་བོ་ཅག་གི་རྗེ་འདི་ན་དེ་ལྟ་བུ་ལ་སོགས་པའི་ཡོན་ཏན་མང་པོ་དང་ལྡན་ཏེ། དེ་བས་ན་དེའི་ཡུལ་ན་གནས་པའི་སྐྱེ་བོ་རྣམས་ལ་གནོད་པ་བྱེད་མི་ནུས་སོ། །དེ་ལྟ་བས་ན་ཁོ་བོས་ཁྱེད་ལ་ཇི་སྙེད་པས་སྨྲ་བར་མི་ནུས་ཀྱི། མིའི་བདག་པོའི་ཡོན་ཏན་ཐོས་པར་འདོད་ན། ཁྱོད་གྲོང་ཁྱེར་ཉིད་དུ་འདོད་པའི་རིགས་སོ། །ཁྱེད་དེར་དོང་ན་སྐྱེ་བོ་རྣམས་རང་གི་ངང་གིས་ཆོས་ལ་དགའ་བས་ཡ་རབས་ཀྱི་ཚུལ་ལ་གནས་པ་དང་། རྟག་ཏུ་བདེ་ཞིང་ལོ་ལེགས་པས་རབ་ཏུ་དགའ་བས་ཕུན་སུམ་ཚོགས་ཤིང་ཆ་ལུགས་བཟང་ལ་མི་འཕྱར་བ་དང་། སྐྱེ་བོ་གློ་བུར་དུ་ལྷགས་པ་རྣམས་ལ་ཁྱད་པར་དུ་བྱམས་པ་དང་། མིའི་བདག་པོའི་ཡོན་ཏན་སྙིང་ལ་དྲན་པ་དང་། དེའི་གྲགས་པའི་གཞི་བསྟོད་པའི་བཀྲ་ཤིས་དང་། བདེ་ལེགས་བཞིན་དུ་རབ་ཏུ་དགའ་ཞིང་གོམས་པར་བྱེད་པ་དག་མཐོང་ན། རྒྱལ་པོའི་ཡོན་ཏན་རྒྱ་ཆེར་ཤེས་པར་འགྱུར་རོ། །དེ་ལྟར་ཡོན་ཏན་མང་པོ་བརྗོད་པས། དེ་མཐོང་བར་འདོད་པ་ལ་ངེས་པར་དེའི་ཡོན་ཏན་མངོན་སུམ་དུ་འགྱུར་རོ། །དེ་ནས་གནོད་སྦྱིན་དེ་དག་རང་གི་མཐུས་མ་ཚུགས་པས། རྒྱལ་པོ་དེ་ལ་སེམས་མི་བཟོད་པ་དང་བཅས་པས་ཡོན་ཏན་སྙིང་ནས་བརྗོད་ཅིང་རིགས་པ་དང་བདེན་པར་སྨྲས་པ་དེས་ཀྱང་། སེམས་འཇམ་པོར་མ་གྱུར་ཏོ། །དམན་པ་རྣམས་ནི་ཕལ་ཆེར་ཡང་། །མི་བཟོད་པས་ནི་ཡིད་གདུངས་ནས། །དངོས་པོ་གང་ལ་དེ་གྲགས་པ། །དེ་ཡིས་ལྷག་པར་གདུངས་པར་འགྱུར། །རྒྱལ་པོ་སྦྱིན་པ་ལ་དགའ་བར་ཤེས་ནས། །དེ་ལ་གནོད་པ་བྱེད་པར་འདོད་པའི་གནོད་སྦྱིན་དེ་དག་གིས་རྒྱལ་པོ་མཐོང་ནས། མཐོང་བའི་ཚེ་བཟའ་བ་སླངས་སོ། །དེ་ནས་རྒྱལ་པོ་དེ་རབ་ཏུ་དགའ་ནས། །དེའི་ལས་སུ་བསྐོས་པའི་མི་རྣམས་ལ་ཁ་ཟས་ཞིམ་པོ་བྲམ་ཟེ་རྣམས་ལ་མྱུར་དུ་བྱིན་ཅིག །ཅེས་བཀའ་སྩལ་ཏོ། །དེ་ནས་རྒྱལ་པོ་ལ་འོས་པའི་ཁ་ཟས་རྣམས་ཁྱེར་ཏེ་འོངས་ནའང་། གནོད་སྦྱིན་དེ་དག་ན་རེ། ཁ་ཟས་དེ་ལྟ་བུ་དག་ནི་བདག་ཅག་མི་ཟའོ། །ཞེས་སྨྲས་ནས་སྟག་གཟིག་རྩྭ་སྔོན་པོ་མི་འདོད་པ་བཞིན་དུ། ལེན་དུ་མ་བཏུབ་བོ། །དེ་རྒྱལ་པོས་ཐོས་པས། དེ་དག་གི་དྲུང་དུ་སོང་སྟེ། འོ་ན་ཁྱེད་ཅག་ཁ་ཟས་ཇི་ལྟ་བུ་འདོད་དེ་འདྲ་བ་བཙལ་ལོ་ཞེས་སྨྲས་སོ། །གནོད་སྦྱིན་རྣམས་ཀྱིས་སྨྲས་པ། མི་ཤ་ཤིན་དུ་དྲོན་མོ་དང་། །མི་ཡི་ཁྲག་ནི་དྲོན་མོ་དག །བརཏལ་ཞུགས་མ་ཉམས་པདྨའི་སྤྱན། །གནོད་སྦྱིན་རྣམས་ཀྱི་བཟའ་བཏུང་ལགས། ཞེས་སྨྲས་ནས་རང་གི་ལུས་ཁ་ནས་མཆེ་བ་གཙིགས་པ། མིག་འབར་ཞིང་སེར་ལ་ཡོ་ཞིང་མི་སྡུག་པ་དང་། སྣ་ལམ་ཞིང་མི་སྡུག་པ་དང་། སྐྲ་དང་ཁ་སྤུ་མེར་འབར་བ་ལྟར་སེར་བ་དང་། ལུས་ཆར་སྤྲིན་ལྟར་ངམ་གནག་ཅིང་མི་སྡུག་པ་འཇིགས་པ་བསྟན་པ་དང་དེ་དག་མཐོང་ནས་རྒྱལ་པོ་དེས་བསམས་པ། འདི་དག་ནི་ཤ་ཟ་ཡིན་ཏེ་མི་མ་ཡིན་ནོ། །དེ་བས་ན་བདག་ཅག་གི་བཟའ་བ་དང་བཏུང་བ་མི་འདོད་དོ་སྙམ་དུ་ངེས་པར་གྱུར་ཏོ། །དེ་ནས་མིའི་དབང་པོ་དེ་སྙིང་རྗེ་ཅན་གྱི་རང་བཞིན་པས། བསམ་པ་དག་པས་དེ་དག་ལ་སྙིང་རྗེ་དེ་བས་ཀྱང་ཆེར་གྱུར་ནས། སྙིང་ལ་སྙིང་རྗེ་འབའ་ཞིག་སེམས་པས་གནོད་སྦྱིན་དེ་དག་ལ་མྱ་ངན་བྱེད་ཅིང་། དོན་འདི་ལྟ་བུ་སེམས་པར་ངེས་སོ། །སྙིང་རྗེ་ཅན་ལ་འདི་ལྟ་བུའི། །བཟའ་དང་བཅའ་བ་རབ་ཏུ་དཀོན། །ཉིན་རེ་ཞིང་ཡང་དེ་བཙལ་བ། །དེ་བས་སྡུག་བསྔལ་ཆེ་བ་མེད། །སྙིང་རྗེ་མེད་ཅིང་མི་ནུས་ནའང་། །འབད་པའི་དོན་ནི་མེད་པར་འགྱུར། །ནུས་ནའང་ཕན་བྱེད་གོམ་པ་ལ། །དེ་བས་དཀའ་བ་ཅི་ཞིག་ཡོད། །སྙིང་རྗེ་མེད་ཅིང་ཡིད་ནི་མ་ཞི་བ། །དེ་ལྟ་བུ་ཡི་ཁ་ཟས་ཟ་བ་རྣམས། །ཚེ་འདི་དང་ནི་ཕ་རོལ་རང་དོན་སྲེག །འདི་དག་སྡུག་བསྔལ་ནམ་ཞིག་མེད་པར་འགྱུར། །ད་འདི་དག་གི་ཁ་ཟས་སྦྱར་བས་ཉིན་འགའ་ཙམ་ཡང་གཞན་གསོད་པ་ལ་ཞུགས་པ་འདི་ལས་ཅི་ལྟར་བཟློག་པར་བྱ། ཕོངས་ཏེ་སློང་དུ་འོངས་པ་རྣམས་ཀྱི་གདོང་། རེ་བ་བཟློག་པས་ངོ་ཟུམ་གནག་འགྱུར་བ། །བུ་ཡུག་རླུང་གིས་པདྨ་རྙིངས་པ་བཞིན། །མི་དགའ་བྱས་པ་ནམ་ཡང་བདག་མི་དྲན། །གདོན་མི་ཟ་བར་བདག་གི་ལུས་ནི་བརྟན་ཅིང་རྒྱས་པ་ལས། །ཁྲག་དང་བཅས་པའི་ཤ་རྣམས་སྦྱིན་པར་བྱ། །ཕོངས་པ་འོངས་པ་དེ་ནི་རིགས་པ་སྙམ། །དེ་ལས་གཞན་པ་བདག་གིས་གང་དུ་བཙལ། །བདག་རང་ཤི་བའི་ཤ་རྣམས་དྲོད་མེད་ལ། །ཁྲག་རྣམས་དེ་ལ་ཡོད་པ་མ་ཡིན་ཞིང་། །བྲུ་བ་ཚ་བས་སེམས་ནི་གདུངས་པ་ལ། །དེ་ཡིས་ལེགས་པར་མགུ་བར་འགྱུར་མ་ཡིན། །གསོན་པོའི་ཤའང་གུད་ནས་བདག་གིས་ཇི་ལྟར་བཙལ་བར་བྱ། །འདི་དག་བདག་གི་ཐད་དུ་འོངས་ནས་བཀྲེས་པ་དང་སྐོམ་པས་མིག་དང་གདོང་གི་མདངས་ཉམས་ཤིང་བསླངས་པ་དང་རེ་བའི་འབྲས་བུ་མེད་པས་ལྷག་པར་ཡིད་ལ་སྡུག་བསྔལ་ཞིང་། །ཕོངས་བཞིན་དུ་སླར་དོང་ཡང་ཇི་ལྟར་བྱ། །དེ་བས་འདི་ནི་དུས་ལ་བབ་ཀྱིས། རྟག་ཏུ་ན་ཞིང་སྡུག་པའི་རྨ་འདྲ་བ། །ནད་ཀྱི་འབྱུང་ཁུངས་ངན་པའི་ལུས་འདི་ལས། །དགོས་པ་ཁྱད་པར་ཅན་དུ་སྤྱད་པ་ཡིས། །བཅོས་པའི་སྡུག་བསྔལ་ཤིན་ཏུ་བཟང་པོར་བྱ། །དེ་ལྟར་ངེས་པར་བྱས་ནས་རྒྱལ་པོ་དེ་རབ་ཏུ་དགའ་བར་གྱུར་པས། མིག་རྩ་དང་གདོང་གི་མདངས་བཟང་པོས་རང་གི་ལུས་བསྟན་ནས། །གནོད་སྦྱིན་དེ་དག་ལ་སྨྲས་པ། །བདག་གི་ཤ་ནི་ཁྲག་དང་བཅས་པ་འདི། །འཇིག་རྟེན་རྣམས་ལ་ཕན་པའི་ཕྱིར་བཟུང་སྟེ། །གལ་ཏེ་དེ་རིང་འགྲོན་དུ་བྱར་རུང་ན། །དེ་ནི་བདག་གི་མངོན་པར་མཐོ་བར་འགྱུར། །དེ་ནས་གནོད་སྦྱིན་དེ་དག་རྒྱལ་པོ་དེའི་ལྷག་པའི་བསམ་པ་ཤེས་བཞིན་དུ། །ངོ་མཚར་རབ་ཏུ་ཆེ་བས་ཡིད་མ་ཆེས་ནས་རྒྱལ་པོ་ལ་སྨྲས་པ། ཕོངས་པས་བདག་གི་སྡུག་བསྔལ་དག །སློང་ཞིང་དམན་པས་བསྟན་པ་ལགས། །དེ་ལ་སྦྱིན་པ་པོ་ཉིད་ཀྱིས། །དུས་ལ་བབ་པར་མཁྱེན་པར་མཛོད། །དེ་ནས་རྒྱལ་པོ་དེས་བསམས་པ། དེ་ནི་འདི་དག་འདོད་དོ་སྙམ་ནས་སྙིང་རབ་ཏུ་དགའ་ནས། རྩ་བཀྲོལ་བའི་ཕྱིར་སྨན་པ་རྣམས་བོས་ཤིག །ཅེས་བཀའ་སྩལ་ཏོ། །དེ་ནས་རྒྱལ་པོ་དེའི་བློན་པོ་རྣམས་རྒྱལ་པོའི་ཤ་དང་ཁྲག་རྣམས་སྦྱིན་པར་རྩོལ་བར་རིག་ནས། རྟབ་རྟབ་པོར་གྱུར་ནས་མི་བཟོད་ཅིང་སེམས་འཁྲུགས་ནས། བྱམས་པའི་དབང་གིས་དོན་འདི་ལྟ་བུ་ཅུང་ཟད་ཅིག་གསལ་བར་སྨྲས་སོ། །ལྷ་སྦྱིན་པ་ལ་ཧ་ཅང་དགྱེས་ཆེས་པས་འབངས་གློ་བ་ཉེ་བ་རྣམས་ལ་ཕན་པ་དང་། གནོད་པར་འགྱུར་བ་མི་གཟིགས་པ་མི་རིགས་སོ། །ལྷས་འདི་དག་མི་མཁྱེན་པ་ཡང་མ་ལགས་ཏེ། འདི་ལྟར། སྐྱེ་དགུ་རྣམས་ལ་གནོད་པ་གང་དང་གང་། དེ་དང་དེ་དག་གནོད་སྦྱིན་རྣམས་ལ་དགའ། །གཞན་ལ་གནོད་པས་འཚོ་ཞིང་དགའ་བ་སྐྱེ། །འདི་དག་རིགས་དང་རང་བཞིན་དེ་ལྟར་ལགས། རྒྱལ་སྲིད་དཔལ་འདི་འཇིག་རྟེན་ཕན་པའི་ཕྱིར། །དེ་ལ་མ་ཆགས་ལྷ་ཡིས་བཟུང་བར་མཛོད། དེ་བས་བདག་གི་ཤ་སྦྱིན་རྩོལ་བ་ཡིས། །ལོག་པའི་ལམ་དུ་ཡི་དམ་བཅས་པ་ཐོང་། སྐྱེས་བུ་དཔའ་བོ་ཁྱོད་ཀྱི་མཐུས་བསྐྱབས་པའི། །འཇིག་རྟེན་གདོན་མི་ཟ་བར་འདི་མི་བཟོད། །ཕུང་བར་བྱེད་ལ་མཁས་པ་འདི་དག་ནི། །ཚུལ་མིན་ཚུལ་གྱིས་སྐྱེ་དགུ་ཕུང་བར་བྱེད། །མཆོད་སྦྱིན་ཚེ་ན་སུམ་ཅུ་རྩ་གསུམ་པའང་། །ཚིལ་དང་ཞག་ལ་སོགས་པ་སྲེགས་པས་མགུ། །ཁྱོད་ཀྱི་ཞལ་ཟས་ཕུན་སུམ་ཚོགས་པ་དག །གུས་པར་བྱིན་ཡང་འདི་དག་འདོད་མི་འགྱུར། །ལྷའི་ཐུགས་ནི་བདག་ཅག་ལྟ་བུའི་སྐྱེ་བོས་བཅོས་པ་མ་ལགས་མོད་ཀྱི། འོན་ཀྱང་འདི་ནི་བདག་གི་དོན་དུ་གཅེས་པའི་སླད་དུ། བདག་ཅག་འདི་ལྟར་རྐོ་ལོང་གསོལ་བར་གྱུར་ཏོ། །གནོད་སྦྱིན་ལྔ་བོ་འདི་རྣམས་ཀྱི་སླད་དུ། འབངས་ཐམས་ཅད་མགོན་མ་མཆིས་པར་བགྱིའམ། ལྷ་འདི་ལྟ་བུའི་ཆོས་གང་གི་ལམ་ལགས། གཞན་ཡང་འདི་ལྟར་བདག་ཅག་ལ་མི་བྱམས་པ་ཅི་ལས་གྱུར། རྗེའི་སླད་དུ་འཚལ་བ་ལ། ཤ་དང་ཁྲག་ཡོངས་སུ་རྫོགས་པར་མཆིས་པ་འདི་དག་སྔོན་བདག་ཅག་གང་གིས་སྦས་ཏེ་མ་ཕུལ་ན་ལྷ་ཉིད་ཀྱི་བཙལ་བར་བཞེད། དེ་ནས་རྒྱལ་པོ་དག་བློན་པོ་དེ་དག་ལ་སྨྲས་པ། ཡོད་བཞིན་དུ་ནི་མེད་ཅེས་སུ། །ངེད་ཅག་ལྟ་བུ་ཅི་ལྟར་སྨྲ། །བརཏལ་ཏེ་གསལ་བར་བླངས་པ་ནས། །མི་སྦྱིན་ཞེས་ཀྱང་ཇི་སྐད་སྨྲ། །ཆོས་ཀྱི་བཀའ་ཁྲིམས་ཐོག་མར་འགྲོ་བ་དག །གལ་ཏེ་ངན་པའི་ལམ་དུ་བདག་སོང་ན། །ང་ཡི་སྤྱོད་པའི་རྗེས་སུ་འཇུག་པ་ཡི། །ང་ཡི་འབངས་རྣམས་གནས་སྐབས་ཇི་ལྟར་འགྱུར། །འདི་ཡང་སྐྱེ་དགུ་རྣམས་ཀྱི་དོན་གྱི་ཕྱིར། །ངེས་ནི་ལུས་ལ་སྙིང་པོ་དབྱུང་བར་བྱ། །ང་ཡི་སེམས་ནི་སེར་སྣས་ཕྲོགས་གྱུར་ན། །སྐྱེ་བའི་དོན་ལ་དགེ་བའི་གཟི་ཅི་འདྲ། ཁྱེད་ཀྱི་ང་ལ་གུས་པ་དང་བཅས་པར་བྱམས་པ་དང་། བག་ཕབ་སྟེ་གང་སྨྲས་པ་འདི་ལྟར་བདག་ཅག་ལ་མི་བྱམས་ཅི་ལས་གྱུར། ཤ་དང་ཁྲག་བདག་ལ་ཡོངས་སུ་རྫོགས་པར་མཆིས་བཞིན་དུ། ལྷ་ཉིད་ཀྱིས་བཙལ་བར་བཞེད་ཅེས་ཟེར་བ་དེ་ཡང་ཁྱེད་ལ་བཤད་ཀྱིས་ང་ཁྱེད་ལ་མི་འཇར་ཞིང་མི་བྱམས་པའང་མ་ཡིན་ལ། མ་སྦྱིན་དུ་དོགས་པའང་མེད་མོད་ཀྱི། རིམས་ཀྱིས་ནོར་ནི་ཉུང་དུ་གྱུར་པའམ། སྐལ་པ་ཆུང་བས་ཟད་པར་གྱུར་ན་ནི། མཛའ་བོ་རྣམས་ལ་སློང་བ་མཛེས་པར་འགྱུར། །ནོར་ལྡན་དབུལ་ལ་སློང་བ་ཡོད་མི་མཛེས། །སྐྱེ་བོ་ཕོངས་པ་རྣམས་ཀྱི་ཕྱིར་བསྐྱེད་པའི། །ལུས་ནི་ཤ་རྒྱས་ཤིན་དུ་མཐོ་བ་དག །ང་བདག་ཉིད་ལ་ཆེན་པོ་ཡོད་བཞིན་དུ། །ཁྱེད་ལ་སློང་བ་ལེགས་པ་མ་ཡིན་ནོ། །མི་ཤེས་གཞན་གྱི་གནོད་པའང་མི་བཟོད་ན། །ཁྱེད་ཀྱི་གནོད་པ་བདག་གིས་ག་ལ་བཟོད། །འདི་དག་ཁྱེད་ལ་མི་སློང་ང་ལ་སློང་། །དེ་བས་བདག་གི་ཤ་ནི་སྦྱིན་པར་བྱ། །དེ་བས་ན་ང་ལ་རབ་ཏུ་བྱམས་པས། ཆོས་ཀྱི་གེགས་ལ་འཇོམ་པ་མེད་པ་འདི་ཐོང་ཞིག ངའི་དོན་དུ་ཁྱོད་ཀྱི་སྤྱོད་པ་འདི་ལྟ་བུ་བྱ་བ་མི་རིགས་སོ། །འདི་ནི་རེ་ཤིག་དཔྱད་དགོས་ཏེ། བཟའ་ལ་སོགས་པ་བདག་དོན་དུ། །སྦྱིན་ལ་འགོག་པར་ཇི་ལྟར་འགྱུར། །ལེགས་སམ་གལ་ཏེ་མ་ལེགས་ཀྱང་། དེ་ལྟར་བྱེད་པ་ཇི་འདྲར་འགྱུར། །དེ་ལྟར་འདིར་གལ་གྱིས་འཆུ་བ་དེ་ཐོང་ལ། ངའི་གྲོགས་རྗེས་སུ་མཐུན་པར་བྱ་ན། རིགས་པས་དཔྱད་པར་བྱའོ། །ལམ་བཟློག་པར་འགྲོ་བ་ལས་ལོག་པའི་ཡིད་ཅན་དུ་བྱས་ལ་རྗེས་སུ་ཡི་རང་བ་དང་མཐུན་པར་ཡིད་ལ་ཁྱེད་ཀྱི་བྱས་ན་བཟང་གི །དེ་ལྟར་མི་བརྟན་པར་བྱ་བ་མི་རིགས་སོ། །དེ་ཅིའི་ཕྱིར་ཞེ་ན། ནོར་ནི་གཅིག་པུས་དཔྱད་པ་མ་ཡིན་ལ། སློང་བ་ཉིན་རེ་རྟག་ཏུ་འོང་མ་ཡིན། །སློང་བ་འདི་ལྟ་བུ་དང་ཕྲད་པ་ནི། ལྷ་དག་མཉེས་པར་བྱས་ཀྱང་མི་འགྲུབ་ན། །སློང་བ་འདི་ལྟ་བུ་ཡང་འོང་འགྱུར་ཞིང་། །ལུས་ཀྱང་ཆུད་ཟ་མི་བདེའི་གནས་འགྱུར་ལ། །ཐེ་ཚོམ་ཟ་ནའང་རྒྱ་ཆེར་མི་འགྱུར་ན། །འཇུངས་ཤིང་ཞུམ་པ་མུན་པའི་མཆོག་ཡིན་ནོ། །དེ་ལྟར་རྒྱལ་པོ་དེས་རང་གི་འཁོར་རྣམས་ལ་ཁྱེད་ཀྱི་དེ་ལྟར་ང་ལ་དགག་པ་མི་རིགས་སོ། །ཞེས་ཚིག་འཇམ་པོས་བསྒོས་ནས། སྨན་པ་རྣམས་བོས་ཏེ། རང་གི་ལུས་ལ་རྩ་ལྔ་བཀྲོས་ཏེ། གནོད་སྦྱིན་དེ་དག་ལ་སྨྲས་པ། ང་ཡི་ལུས་འདི་ཁྱེར་ནས་ནི། །ཆོས་ཀྱི་གྲོགས་ཀྱང་བྱ་བ་དང་། །ང་ཡང་རབ་ཏུ་དགའ་གྱུར་པར། །ཁྱེད་ཀྱི་ད་ནི་བྱ་བའི་རིགས། །དེ་དག་གིས་དེ་ལྟར་བགྱིའོ་ཞེས་སྨྲས་ནས། །རྒྱལ་པོའི་ཁྲག་ཙན་དན་དམར་པོའི་ཁུ་བ་འདྲ་བ་སྙིམ་པ་བཟེད་དེ་བཏུང་བར་ཆས་སོ། །རྒྱལ་པོ་དེའི་ལུས་གསེར་མདོག་འདྲ་བ་ལ། །མཚན་མོ་སྤྱོད་པ་རྣམས་ནི་ཁྲག་འཐུང་བ། །རི་རབ་ལྷུན་པོའི་རི་ལ་དུས་མཚམས་ཀྱི། །ཆར་སྤྲིན་སྨུག་པོས་ཉེ་བར་བསྐོར་བ་བཞིན། །དགའ་བ་མཆོག་ལྡན་བརྟན་དང་ལྡན་པ་དང་། །ལུས་ཀྱི་ཡོན་ཏན་ལྡན་པས་རྒྱལ་པོ་དེ། །ལུས་ཀྱང་མ་ཉམས་སེམས་ཀྱང་བརྒྱལ་བ་མེད། །ཁྲག་གི་རྒྱུན་ཀྱང་ཟད་པར་ཡོང་མ་གྱུར། གནོད་སྦྱིན་དེ་དག་སྐོམ་གྱིས་གདུངས་པ་ཞི་ནས། །ད་ནི་འདིས་འཚལ་ཏོ་ཞེས་རྒྱལ་པོ་ལ་སྨྲས་སོ། །སྡུག་བསྔལ་མང་པོ་འབྱུང་བའི་གནས་ཀྱི་ལུས། །རྟག་ཏུ་བྱས་མི་གཟོ་ཡང་རྒྱལ་པོ་དེ། །སློང་པ་དག་ལ་སྦྱིན་པའི་དོན་གྲུབ་པས། རབ་ཏུ་དགའ་དང་རྗེས་མཐུན་བཟུང་བར་གྱུར། །དེ་ནས་རྒྱལ་པོ་དེ་རབ་ཏུ་དགའ་བས་བསྐུལ་བས་མིག་དང་བཞིན་གྱི་མདངས་ལྷག་པར་གསལ་བར་གྱུར་ནས། ཨུཏྤ་ལ་མཐིང་གའི་འདབ་མ་ལྟར་མདོག་སྔོ་བའི་རལ་གྲི་རྣོན་པོ་དངོ་རིན་པོ་ཆེས་སྤྲས་པའི་འོད་ཀྱི་མཛེས་པ་བླངས་ཏེ། བདག་གི་ཤ་བཅད་ཅིང་དེ་དག་ལ་བྱིན་ནོ། །སྦྱིན་ལ་དགའ་བས་ཡང་དང་ཡང་། །སྐབས་ནི་མེད་པར་བྱས་པས་ན། །བཅད་པའི་སྡུག་བསྔལ་དེ་ཡིད་ལ། དམིགས་པར་བྱེད་ནི་མ་ནུས་སོ། །རལ་གྲི་རྣོན་པོས་བཅད་ནས་དྲངས་བ་དང་། །དགའ་བས་ཕྱིར་ཡང་རིང་དུ་བསྐྲད་པ་དང་། དེའི་སྡུག་བསྔལ་སྐྱོ་ཞིང་ངལ་བ་བཞིན། །ཡིད་ལ་འཇུག་པར་བྱེད་པ་ཆུང་བར་གྱུར། རང་གི་ཤ་ཡིས་གནོད་སྦྱིན་དེ་དག་ནི། །ཚིམ་པར་བྱས་པས་དེ་ནི་དེ་བཞིན་དགའ། དེ་དག་སེམས་ནི་ཁྲོ་བའི་རང་བཞིན་ཡང་། དེ་ལྟར་བྱས་པས་འཇམ་ཞིང་ངེས་པར་གྱུར། ཆོས་ལ་དགའ་ཞིང་སྙིང་རྗེའི་དབང་གྱུར་ཏེ། །གཞན་གྱི་དོན་དུ་བདག་ལུས་གཅེས་བཏང་བས། ཞེ་སྡང་མེ་ཡིས་བསྲེགས་པའི་ཡིད་རྣམས་ཀྱང་། །རབ་ཏུ་དང་ཞིང་མདོག་ཀྱང་གསལ་བར་བྱས། །དེ་ནས་གནོད་སྦྱིན་དེ་དག་རྒྱལ་པོ་དེ་རང་གི་ཤ་གཅོད་པ་ལ་འབད་ཅིང་ཤ་བཅད་པའི་སྡུག་བསྔལ་གྱིས་བཞིན་མདངས་མ་འགྱུར་བ་དང་། མི་གཡོ་བ་དེ་བཞིན་དུ་འདུག་པ་མཐོང་ནས། རབ་ཏུ་དང་ཞིང་ངོ་མཚར་ཆེར་གྱུར་ཏོ། །ཨེ་མའོ་ངོ་མཚར་རྨད་བྱུང་འདི་དག་ཅི། །བདེན་ནམ་རྫུན་ཞེས་བརྗོད་ཅིང་དགའ་བ་སྐྱེས། །རྒྱལ་ལ་མི་བཟོད་ཞི་ནས་ཡིད་ཀྱང་དང་། །དེ་ལ་བསྟོད་ཅིང་ཕྱག་ཀྱང་འཚལ་བར་གྱུར། །ལྷ་ཉིད་ཀྱི་སྐུ་འོ་བརྒྱལ་བར་མཛད་པ་གཏང་དུ་གསོལ། །བདག་ཅག་ཀྱང་ཚིམ་པར་བགྱིས་ལགས་ཀྱིས་སྐྱེ་བོ་སློང་བ་ཡིད་དགའ་བར་བགྱིད་པ་ཤིན་ཏུ་རྨད་དུ་བྱུང་བ་ཁྱོད་ཀྱི་སྤྱོད་པ་འདི། ད་འཚལ་གྱིས་གཏང་དུ་གསོལ་ཞེས་རྒྱལ་པོ་ལ་གུས་པ་དང་བཅས་ཕྱག་འཚལ་བ་དང་བཅས་པར་རབ་ཏུ་དང་ཞིང་གདོང་མཆི་མ་ཅན་གྱིས་བལྟས་ནས་ཡང་སྨྲས་པ། །གུས་པའི་དབང་གིས་སྐྱེ་བོ་ཁྱོད་ཀྱི་གྲགས་པ་སྒྲོགས་པ་ཐོག་ཏུ་བབ། །དཔལ་ཡང་པདྨའི་ནགས་ཚལ་བཏང་སྟེ་ཁྱོད་ལ་བརྟེན་པ་ཐོག་ཏུ་བབ། བརྒྱ་བྱིན་མགོན་དུ་གྱུར་ཀྱང་ཁྱོད་ཀྱི་མཐུས་བསྐྱབས་ས་ཡི་ལྷ་མོ་འདི། མཐོ་རིས་ཀྱིས་མཐོང་སྨོན་པར་ངེས་ཏེ་གལ་ཏེ་མི་སྨོན་བསླུས་སུ་ཟད། །མང་དུ་སྨོས་ཀྱང་ཅི་དགོས་ཏེ། སྐྱེ་བོ་འདི་ལྟ་བུས་མངོན་པར་བཟུང་བའི་མིའི་འཇིག་རྟེན་འདི་དག་ནི་སྐལ་བ་དང་ལྡན་པའོ། །ཁྱོད་ལྟ་བུ་འོ་བརྒྱལ་བར་བགྱིས་པ་འདིས་ནི་བདག་ཅག་བསྲེགས་ཀྱིས་མ་མཆིས་སོ། །ད་འདི་ལྟར་གྱུར་པ་ལས་ཀྱང་སྐྱེ་བོ་ཁྱོད་ལྟ་བུ་ལ་བརྟེན་ནས་བདག་ཅག་ཐར་བར་ནུས་གྲང་། བདག་ཅག་གིས་ནོངས་པར་བགྱིས་པ་གསོལ་བའི་སླད་དུ་ཞུ་བར་འཚལ་ལོ། །བདེ་བ་བརྙེས་པར་གྱུར་པ་དང་། །རྒྱལ་པོའི་དཔལ་ཡང་བོར་ནས་ནི། །འདི་ལྟ་བུ་ཡི་སྤྱོད་པ་ཡིས། རྨད་དུ་བྱུང་བའི་གནས་ཅི་བཞེད། །ཐམས་ཅད་ས་ཡི་བདག་པོའམ། །ནོར་གྱིས་ཕྱུག་པའམ་དབང་པོའམ། །ཚངས་པའམ་རྣམ་པར་གྲོལ་བ་དག །དཀའ་ཐུབ་འདི་ཡིས་བཞེད་ལགས་སམ། །འདི་ལྟ་བུ་ཡི་རྩོལ་ཕོད་པས། བཞེད་པའི་དོན་ནི་མི་རིང་སྟེ། །གལ་ཏེ་བདག་ཅག་ཐོས་རུང་ན། །བདག་ཅག་ལ་ནི་བཀའ་སྩལ་རིགས། །རྒྱལ་པོས་སྨྲས་པ། །ཅིའི་ཕྱིར་ང་འདི་ལྟར་བྱེད་པ་ཉོན་ཅིག །རྙེད་པར་དཀའ་ལ་འཇིག་པར་སླ་བ་དང་། ཆོག་པའི་བདེ་མེད་རབ་ཏུ་ཞི་མེད་པའི། །སྲིད་པའི་ལོངས་སྤྱོད་བདེ་བ་ང་མི་འདོད། །ལྷ་དབང་དཔལ་ཡང་འདོད་པ་མ་ཡིན་ན། དེ་ལས་གཞན་པ་སྨོས་ཀྱང་ཅི་ཞིག་དགོས། །བདག་གི་སྡུག་བསྔལ་ཟད་པ་ཙམ་གྱི་ཕྱིར། །ང་ཡི་ཡིད་ནི་མགུ་བར་འགྱུར་མ་ཡིན། །སྡུག་བསྔལ་མི་བཟད་ནད་ཀྱིས་ཉེན་པ་ཡི། །ལུས་ཅན་མགོན་མེད་འདི་རྣམས་ངས་བལྟས་ནས། །བསོད་ནམས་འདི་ཡིས་ཐམས་ཅད་གཟིགས་པ་ཡི། གོ་འཕང་ཐོབ་ཅིང་སྐྱོན་གྱི་དགྲ་བཏུལ་ནས། །རྒ་དང་ན་དང་འཆི་བའི་རླབས་འཁྲུགས་པའི། །སྲིད་པའི་མཚོ་ལས་སྐྱེ་བོ་འདོན་པར་འདོད། །དེ་ནས་གནོད་སྦྱིན་དེ་དག་རབ་ཏུ་དགའ་ཞིང་བ་སྤུ་ལངས་ནས། རྒྱལ་པོ་ལ་ཕྱག་འཚལ་ཏེ་སྨྲས་པ། འདི་ལྟ་བུའི་རྩོལ་བ་ཁྱད་པར་ཅན་གྱི་ལས་འདི་ནི་རིགས་ཏེ། དེ་བས་ན་ཁྱོད་ལྟ་བུའི་དགོངས་པ་འགྲུབ་པ་ནི་རིང་པོ་མི་ཐོབས་སོ་སྙམ་དུ་ཡིད་ལ་ངེས་པར་བསམས་ནས་གསོལ་བ་བཏབ་པ། ཁྱོད་ཀྱི་མཛད་པ་འདི་ཀུན་ནི། །འཇིག་རྟེན་ཕན་པའི་ཕྱིར་ལགས་ཀྱང་། །བདག་ཅག་རང་ལ་ཕན་འཚལ་བས། །དེ་ཚེ་བདག་ཅག་དགོངས་སུ་གསོལ། །མ་འཚལ་བས་ན་བདག་ཅག་གིས། །བདག་གི་དོན་ཡང་མ་མཐོང་བས། །དེ་ལྟར་ཁྱོད་ནི་འོ་བརྒྱལ་བས། །དེ་ཡང་བཟོད་པ་མཛད་དུ་གསོལ། །ཁྱོད་ཀྱི་བཀའ་ཡང་བདག་ཅག་ལ། །རྗེས་སུ་བཟུང་བའི་རྒྱུར་གྱུར་པ། །བློན་པོ་དག་ལ་བགྱི་བ་བཞིན། །འཛེམ་པ་མེད་པར་བཙལ་བའི་རིགས། །དེ་ནས་རྒྱལ་པོ་དེས་དེ་དག་སེམས་རབ་ཏུ་དང་ཞིང་འཇམ་པར་གྱུར་བར་རིག་ནས་སྨྲས་པ། འདི་ནི་ང་ལ་ཕན་པ་ཡིན་གྱི། གནོད་པ་མིན་པས་མི་བཟོད་དུ་དོགས་པ་མ་བསྐྱེད་ཅིག །གཞན་ཡང་། ཆོས་ཀྱི་ལམ་ལ་འདི་ལྟར་གྲོགས་བྱེད་པ། བྱང་ཆུབ་ཐོབ་ནས་བརྗེད་པར་ག་ལ་འགྱུར། །རྣམ་པར་ཐར་པའི་ཆོས་ཀྱི་བདུད་རྩི་ལས། །ཁྱེད་ཅག་ཉིད་ལ་ཐོག་མར་བགོ་བར་བྱ། །ད་ནི་དེ་ལ་དགའ་བར་ཤེས་བྱས་ནས། །སྲོག་གཅོད་ཁྱེད་ཀྱི་དུག་བཞིན་སྤང་བར་བྱོས། གཞན་ནོར་ཆུང་མ་དག་ལ་ཆགས་པ་དང་། །རྫུན་དུ་སྨྲ་དང་ཆང་གི་སྡིག་པ་སྤོངས། །དེ་ནས་གནོད་སྦྱིན་དེ་དག་དེ་བཞིན་དུ་བགྱིའོ་ཞེས་དེ་ལ་མཉན་ནས། དེ་ལ་བསྐོར་བ་བྱས་ཏེ་ཕྱག་འཚལ་ནས་དེ་ཉིད་དུ་མི་སྣང་བར་གྱུར་ཏོ། །སེམས་དཔའ་ཆེན་པོ་དེས་བདག་གི་ཤ་དང་ཁྲག་ངེས་པར་སྦྱིན་པར་བྱས་པ་དེ་ཉིད་ཀྱི་ཚེ། ས་ནི་རྣམ་པ་མང་པོར་གཡོས་པར་གྱུར། །གསེར་གྱི་རི་བོ་རྣམ་པར་འགུལ་བར་གྱུར། །དེ་ན་གནས་པའི་རྔ་རྣམས་སྒྲ་ཡང་འབྱིན། །ཤིང་རྣམས་འགུལ་བས་མེ་ཏོག་ལྷགས་པར་གྱུར། །དེ་དག་རྫས་བསྐྱོད་མཁའ་ལ་སྤྲིན་ལྟར་ཆགས། ལ་ལར་བླ་རེར་བྲིས་ཤིང་བྱ་རྒྱུས་བཞིན། ཁ་ཅིག་ཏུ་ནི་ཕྲེང་བ་བརྒྱུས་པ་བཞིན། །མི་ཡི་བདག་པོའི་ཁོར་ཡུག་མཉམ་པར་ལྷགས། །རྒྱ་མཚོ་ཆེན་པོ་ཤིན་ཏུ་བདོ་བའི་རླབས། །རང་བཞིན་ལས་ནི་ལྷགས་པའི་ཤུགས་དང་སྒྲས། །འགྲོ་ལ་བརཏན་པའི་ལུས་ནི་གཟི་མདངས་ཅན། །ས་ཡི་བདག་པོ་བཟློག་པ་བཞིན་དུ་བྱུང་། །དེ་ནས་ལྷ་ཡི་བདག་པོ་འདི་ཅི་ཞེས། །བརྟབས་པར་གྱུར་ནས་དེ་ཡི་རྒྱུ་རྟོག་ཅིང་། །རྒྱལ་པོ་ཉེས་པར་དོགས་ཏེ་རབ་མྱུར་བར། །རྒྱལ་པོའི་ཕོ་བྲང་མྱ་ངན་འཁྲུག་པར་འོངས། །ས་ཡི་བདག་པོ་དེ་ལྟར་གྱུར་ན་ཡང་། །གཟི་མདོག་གསལ་བས་ལྷག་པར་ཡ་མཚན་སྐྱེས། །ཐད་དུ་འོངས་ནས་སྙན་པའི་ཚིག་རྣམས་ཀྱིས། །དང་ཞིང་དགའ་བས་དེ་ཡི་སྤྱོད་པ་བསྟོད། །ཨེ་མའོ་སྐྱེ་བོ་དམ་པའི་ཆོས་རེ་བཟང་། །ཨེ་མའོ་ཡོན་ཏན་སྒོམ་པ་རྒྱ་རེ་ཆེ། །ཨེ་མའོ་གཞན་ལ་ཕན་པའི་བློ་རེ་ངེས། །ས་འདི་ཁྱོད་ལ་གཏང་པ་མགོན་དང་བཅས། །ཞེས་དེ་བསྟོད་ནས། ལྷའི་དབང་པོ་བརྒྱ་བྱིན་གྱིས་ལྷ་དང་མིའི་སྨན་གྱི་ཁྱད་པར་རྨ་གསར་པ་སོས་པར་བྱེད་ནུས་པ་རྣམས་ཀྱིས། དེའི་ལུས་སྔོན་བཞིན་དུ་སྡུག་བསྔལ་མེད་པར་བྱས་ནས། རྒྱལ་པོ་དེས་ཀྱང་མཐུན་པ་དང་། །གུས་པའི་ཡོ་བྱད་ཀྱིས་སླར་མཆོད་པ་བྱས་ཏེ་ཉིད་ཀྱི་གནས་སུ་སླར་དོང་ངོ་། །དེ་ལྟར་ན་སྙིང་རྗེ་ཆེན་པོ་རྣམས་ནི་གཞན་གྱི་སྡུག་བསྔལ་གྱིས་སྡུག་བསྔལ་ཞིང་བདག་གི་བདེ་བ་ལ་མི་ལྟ་བ་ཡིན་ན། ནོར་ཙམ་ལ་ཆགས་ནས་གཏོང་མི་ཕོད་པ་ལྟ་སུ་ཞིག་ཡོད་ཅེས་སྐྱེ་བོ་སྦྱིན་པ་བྱེད་པ་དག་ལ་གཟེངས་བསྟོད་པ་དང་། སྙིང་རྗེའི་ཡོན་ཏན་ལ་བསྔགས་པ་དང་། དེ་བཞིན་གཤེགས་པའི་ཆེ་བ་བསྟན་པ་དང་། བསྟི་སྟང་དུ་བྱས་ཏེ་ཆོས་མཉན་པ་ལའང་བརྗོད་པར་བྱའོ། །བཅོམ་ལྡན་འདས་ཀྱིས་དགེ་སློང་ལྔ་པོ་འདི་དག་ནི་མང་དུ་བྱེད་བྱེད་པའོ་ཞེས་གང་གསུངས་པ་དེ་ཡང་འདི་ལ་དགོངས་སོ། །དེའི་ཚེ་ན་གནོད་སྦྱིན་ལྔ་པོར་གྱུར་པ་དེ་དག་ལ་བཅོམ་ལྡན་འདས་ཀྱི་ཅི་ལྟར་ཞལ་གྱིས་བཞེས་པ་དེ་བཞིན་དུ་ཆོས་ཀྱི་བདུད་རྩི་བྱིན་པ་ཡིན་ནོ། །བྱམས་པའི་སྟོབས་ཀྱི་སྐྱེས་པའི་རབས་ཏེ་བརྒྱད་པའོ།། །།བྱང་ཆུབ་སེམས་དཔའི་སྤྱོད་པ་ནི། སེམས་ཅན་ཕལ་པ་རྣམས་ཀྱི་རྗེས་སུ་ཡི་རང་བ་ཙམ་ཡང་ལེགས་པར་བྱེད་མི་ནུས་ན། ཀུན་དུ་སྤྱད་པ་ལྟ་ག་ལ་ནུས། དེ་ཡང་འདི་སྐད་ཐོས་ཏེ། དབང་པོ་དུལ་བ། གོམས་པར་གྱུར་པ། དཔའ་བ་དང་། ཚུལ་དང་དུལ་བ་ཕུན་སུམ་ཚོགས་པས་རྣམ་པར་རྒྱལ་བའི་དཔལ་ཐོབ་པ། རྒན་པ་ལ་བསྙེན་བཀུར་ངེས་པར་བྱས་པས། རིག་བྱེད་གསུམ་དང་། བརྟག་པའི་དོན་གྱི་དེ་ཁོ་ན་ཉིད་ཁོང་དུ་ཆུད་པ། ནང་གི་འཁོར་རང་གི་ཆོས་དང་ལས་ལ་འབད་པ། ཡིད་མ་བྱུང་ཞིང་བདེ་བར་འཚོ་བ། སྙིང་ཉེ་བ་རྣམས་ཀྱི་བཀའ་ཁྲིམས་བཟང་པོ་བསྒྲགས་པ། འཚོ་ཚིས་བྱ་བ་ལེགས་པར་འབྱོར་བ། ཡུལ་ཤི་བི་པ་རྣམས་ཀྱི་རྒྱལ་པོ་ཀུན་དུ་རྒྱལ་བ་ཞེས་བྱ་བ་ཞིག་བྱུང་ངོ་། །ཡོན་ཏན་ལྡན་པའི་མི་ཡི་བདག་པོའི་དཔལ། །རིགས་ལྡན་ཆུང་མ་བཞིན་དུ་སྙིང་ཉེ་བ། །རི་ཕུག་སེང་གེ་བསྲུངས་པའི་རི་དྭགས་བཞིན། །ས་ཡི་བདག་པོ་གཞན་རྣམས་གླགས་མི་ལྟ། །དཀའ་ཐུབ་རྣམས་དང་རིགས་དང་རྒྱུ་རྩལ་ལ། གང་གི་འཁོར་གྱིས་གོམས་པར་བྱས་པ་རྣམས། །འོངས་ན་རིམ་གྲོ་ལྷག་པར་ཆེ་བར་འགྱུར། །བཀུར་སྟི་བྱས་པས་གཙོ་བོ་ཡིན་པར་སྣང་། དེ་རྒྱལ་སྲིད་ཐོབ་མ་ཐག་ཏུ་དེའི་བུ་ཐམས་ཅད་སྒྲོལ་ཞེས་བྱ་བ་ཡོན་ཏན་མང་པོ་རྟགས་ཏུ་གྲགས་པ་ཞིག་རྒྱལ་ཚབ་ཏུ་གྱུར་ཏེ། དེའི་ཚེ་རྒྱལ་ཚབ་དེ་བཅོམ་ལྡན་འདས་འདི་ཉིད་ཡིན་ནོ། །གཞོན་ཡང་རྒན་པའི་ཉེ་བར་ཞི་ལ་དགའ། །གཟི་བྱིན་ཆེ་ཡང་བཟོད་ཅིང་དེས་པའི་ངང་། །མཁས་པར་གྱུར་ཀྱང་ཤེས་པའི་ང་རྒྱལ་མེད། །དཔལ་དང་ལྡན་ཞིང་འབྱོར་ཡང་དྲེགས་པ་མེད། །དེ་ཡི་གྲགས་པས་འཇིག་རྟེན་གསུམ་ཁྱབ་པས། ཕྱོགས་རྣམས་རབ་ཏུ་རྒྱ་ཆེན་མཐོང་གྱུར་ཀྱང་། །གཞན་གྱི་གྲགས་པ་ཅུང་ཟད་ཡོད་པ་རྣམས། །འཕྲོ་བའི་སྐབས་ནི་མེད་པ་བཞིན་དུ་གྱུར། །སྐྱེ་བོ་རྣམས་ལ་སྡུག་བསྔལ་དབང་བྱེད་པ། །དེ་ཡིས་མ་བཟོད་སྙིང་རྗེའི་གཞུ་དྲག་དང་། སྦྱིན་པའི་མདའ་རྣམས་ཆར་བཞིན་འབེབས་པ་ཡིས། །དེ་དང་ལྷན་ཅིག་གཡུལ་ཆེན་འགྱེད་པ་འདྲ། །དེ་ཉིད་རེ་ཞིང་སློང་བ་ལྷགས་པ་རྣམས་ལ། བསླངས་པ་བས་ཀྱང་ལྷག་པར་ཉོན་མ་མོངས་བར་ནོར་གཏོང་ཞིང་། ཚིག་འཇམ་པ་དང་གུས་པ་དང་ཡིད་དུ་འོང་བས་རབ་ཏུ་ཚིམ་པར་བྱེད་པར་གྱུར་ཏོ། །དུས་མཚམས་ཀྱི་ཉི་མ་དག་ལ་ཡང་། གསོ་སྦྱོང་དང་། ངེས་པར་གནས་པ་དང་། རབ་ཏུ་ཞི་བས་བརྒྱན་ཏེ། མགོ་ཁྲུས་བྱས་ཤིང་གོས་དཀར་པོ་གྱོན་ནས། གླང་པོ་ཆེའི་མཆོག་གངས་རི་འདྲ་བ། དྲེགས་པའི་དངུལ་གྱིས་གདོང་བརྒྱན་པ། མཚན་ཉིད་དང་། དུལ་བ་དང་། མགྱོགས་པ་དང་། སྙིང་སྟོབས་ཆེ་བ་ཕུན་སུམ་ཚོགས་པ། གྲགས་པ་བཞོན་པར་འོས་པའི་སྤོས་ཀྱི་གླང་པོ་ཆེ་མཆོག་ཞོན་ནས་གྲོང་ཁྱེར་གྱི་ཁོ་ར་ཁོར་ཡུག་ན་བདག་གི་སྦྱིན་གཏོང་གི་ཁང་པ་སྐྱེ་བོ་ཕོངས་པ་རྣམས་ཀྱི་རྫིང་བུ་དང་འདྲ་བཤམས་ཏེ་བཞག་པ་རྣམས་ཉུལ་དུ་སོང་ངོ་། །དགའ་བའི་ཁྱད་པར་འདི་ལྟ་བུ་དག་ཀྱང་ཐོབ་པར་གྱུར་ཏེ། །ཕྱོགས་པ་རྣམས་ལ་སྦྱིན་འདོད་པའི། །དགའ་བ་གང་དག་སྐྱེ་བ་ནི། ཁྱིམ་ན་གནས་པའི་ལོངས་སྤྱོད་ལ། །དེ་ཙམ་དུ་ནི་དགའ་བ་མེད། །དེ་ནས་རེ་ཤིག་ཅིག་དེ་དེ་ལྟར་སྦྱིན་པ་བྱེད་པ་ལ། སྙིང་རབ་ཏུ་དགའ་བའི་སློངས་མོ་པ་རྣམས་ཀྱིས་ཀུན་དུ་གྲགས་པ་ཐོས་ནས། །དེའི་ཉི་འོག་གི་རྒྱལ་པོ་གཞན་ཞིག་གིས་བསམས་པ། འདི་ནི་སྦྱིན་པ་ལ་དགའ་བའི་དབང་དུ་གྱུར་པས་བསླུ་བར་ནུས་སོ་སྙམ་ནས། གླང་པོ་ཆེའི་མཆོག་བླང་བའི་ཕྱིར་དེར་བྲམ་ཟེ་དག་ཅིག་བཏང་ངོ་། །དེ་ནས་ཐམས་ཅད་སྒྲོལ་རང་གི་སྦྱིན་གཏོང་གི་ཁང་པ་ཉུལ་ཞིང་རབ་ཏུ་དགའ་བས་བཞིན་གྱི་མདངས་བཟང་པོ་ལ། བྲམ་ཟེ་དེ་དག་གིས་རྒྱལ་བ་དང་། ཤིས་པ་བརྗོད་ནས། ལག་པ་གཡས་པ་བསྒྲེང་སྟེ་བསྟོད་ནས། མདུན་དུ་བསྡད་པ་དང་། དེས་གླང་པོ་ཆེའི་མཆོག་དེའི་ཁ་བཟུང་ནས་ཞེ་ས་དང་བཅས་པར་ཅི་བཞེད་གསུངས་ཅེས་ཅིའི་ཕྱིར་ལྷགས་པ་དྲིས་སོ། །བྲམ་ཟེ་རྣམས་ཀྱིས་སྨྲས་པ། ཁྱོད་ནི་སྦྱིན་ལ་དཔའ་བ་དང་། །ཁྱོད་ཀྱི་གླང་པོ་ཆེན་པོ་འདི། །འགྲོས་བཟང་འགྱིང་ཞིང་བགྲོ་བ་ཡི། །ཡོན་ཏན་འཚོལ་ཕྱིར་བདག་ཅག་མཆིས། །ཏེ་སེའི་གངས་དང་འདྲ་བ་ཡི། །གླང་ཆེན་འདི་ནི་བཙལ་བ་ཡིས། །འཇིག་རྟེན་འདི་དག་ཡ་མཚན་གྱིས། །ཡིད་ནི་རབ་ཏུ་དང་བར་མཛོད། ཅེས་སྨྲས་པ་དང་། བྱང་ཆུབ་སེམས་དཔའ་སྙིང་རབ་ཏུ་དགའ་བས་ཀུན་དུ་རྒྱས་པར་གྱུར་ནས། ཡུན་རིང་མོ་ཞིག་ན་གདོང་སློངས་མོ་པའི་སྐྱེ་བོ་རླབས་ཆེར་སློང་ཕོད་པ་མཐོང་བར་གྱུར་ཏོ་སྙམ་དུ་བསམས་སོ། །བྲམ་ཟེ་འདི་དག་ལ་ནི་གླང་པོ་ཆེའི་རྒྱལ་པོ་འདི་ལྟ་བུ་དག་ཀྱང་མི་དགོས་ཀྱི། གདོན་མི་ཟ་བར་འདི་ནི་བརྐམ་པ་དང་ཕྲག་དོག་གི་སྐྱོན་གྱི་ཡིད་དཀྲུགས་པའི་རྒྱལ་པོ་འགའ་ཞིག་གི་འདོད་ཆེན་གྱིས་སྦྱར་ཏེ་བཏང་ངོ་སྙམ་དུ་ངེས་སོ། །གྲགས་དང་ཆོས་ལའང་མ་བལྟས་པར། །ང་ལ་ཕན་བཞིན་གང་བྱེད་པ། །རྒྱལ་པོ་དེ་ཡི་བསམ་པ་དག །རེ་ཐག་ཆད་པར་མི་བྱའོ། །དེ་ལྟར་ངེས་པར་བྱས་ནས་བདག་ཉིད་ཆེན་པོ་དེ་གླང་པོ་ཆེའི་མཆོག་དེ་ལས་མྱུར་དུ་བབས་ཏེ། བཞེས་སུ་གསོལ་ཞེས་བྱས་ནས་གསེར་གྱི་རིལ་བ་བཏུད་དེ་དེ་དག་གི་མདུན་དུ་འདུག་གོ །ནོར་སྒྲུབ་དོར་ནི་ཆོས་ལམ་མི་མཐུན་པའི། །རྒྱལ་པོའི་གཙུག་ལག་དག་ལ་མཁས་གྱུར་ཀྱང་། །ཆོས་ལ་དགའ་བས་དེ་ནས་གླང་ཆེན་བྱིན། །ཚུལ་དང་འགལ་བས་དེ་ནི་གཡོས་མ་གྱུར། །གླང་ཆེན་གསེར་གྱི་དྲ་བས་མཛེས་པར་ལེགས་བརྒྱན་པ། །སྟོན་ཀའི་སྤྲིན་ཚོགས་གློག་འགྱུ་འདྲ་བ་དེ་བྱིན་ནས། །མི་ཡི་དབང་པོའི་སྲས་དེ་རབ་ཏུ་དགའ་བར་གྱུར། ཚུལ་གྱི་ཕྱོགས་ལ་དགའ་བས་གྲོང་ཁྱེར་བ་རྣམས་འཁྲུགས། །དེ་ནས་གླང་པོ་ཆེའི་རྒྱལ་པོ་དེ་བྱིན་པ་ཐོས་ནས། །ཡུལ་ཤི་བི་པའི་བྲམ་ཟེ་རྒན་པོ་དང་། །བློན་པོ་བཀའ་ལ་གཏོགས་པ་དང་། དམག་མི་དང་། གྲོང་ཁྱེར་གྱི་གཙོ་བོ་རྣམས་ཅ་ཅོའི་སྒྲ་ཕྱུང་ནས། རྒྱལ་པོ་ཀུན་དུ་རྒྱལ་བ་དེའི་དྲུང་དུ་ལྷགས་ཏེ། རྟབ་རྟབ་བོར་གྱུར་ཏེ་མི་བཟོད་ཅིང་རྔམས་ཏེ། ཞེ་ས་བཏང་ནས་རྐོ་ལོང་དུ་སྨྲས་པ་ལྷ་རྒྱལ་སྲིད་ཀྱི་དཔལ་འདི་ལྟར་ཆབ་བཙལ་ཀྱང་ཡལ་བར་འདོར་བ་འདི་ཅི་ལགས། ལྷ་ཉིད་ཀྱི་རྒྱལ་སྲིད་འདི་ལྟར་ཉམས་པར་གྱུར་པ་བཟོད་པ་མཛད་པ་མི་རིགས་སོ། །རྒྱལ་པོས་རིངས་རིངས་སྐད་དུ་འདི་ཅི་ཉེས་ཞེས་སྨྲས་པ་དང་། ཡང་སྨྲས་པ། ཅི་ལྷ་མི་མཁྱེན་ཏམ། གང་གི་འགྲམ་པ་བུང་བ་སྒྲ་སྒྲོགས་པ། །རྡུལ་གྱི་དྲི་ཞིམ་རླུང་གིས་རེག་པ་ཡི། །གཞན་གྱི་གླང་པོ་མྱོས་ཤིང་དྲེགས་པ་རྣམས། །རྩལ་བའི་སྡུག་བསྔལ་མེད་པར་ཟིལ་མནོན་པ། །གང་གི་གཟི་ཡིས་ཁྱོད་ཀྱི་དགྲ་བོ་རྣམས། །མཐུ་སྟོབས་མནན་ཅིང་དྲེགས་པ་མེད་བྱས་པ། །ཐམས་ཅད་སྒྲོལ་གྱིས་གླང་པོ་དེ་བྱིན་པས། །ཁྱོད་ཀྱི་རྒྱལ་བ་གཟུགས་ཅན་གཞན་ཡུལ་སོང་། །བ་དང་གསེར་དང་གོས་དང་བཟའ་བ་དག །རྒྱལ་པོ་བྲམ་ཟེ་རྣམས་ལ་སྦྱིན་པར་འོས། གང་ལ་དཔལ་དང་རྒྱལ་བ་དེས་ཡོད་པའི། །གླང་ཆེན་བཏང་བས་སྦྱིན་པ་དཔའ་ཆེས་སོ། །ཚུལ་དང་འགལ་བའི་ལམ་དུ་སོང་བ་འདི། །རྒྱལ་པོའི་དཔལ་ནི་ཇི་ལྟར་འགོ་བར་འགྱུར། །འདི་ནི་ཡལ་བར་བོར་ན་ཁྱོད་ལ་གནོད། །ཁྱོད་ཀྱི་དགྲ་ནི་མདུན་ནས་དགའ་བར་བྱེད། །དེ་སྐད་ཐོས་ནས་རྒྱལ་པོ་དེ་བུ་ལ་བྱམས་པས། །དེ་དག་ཉིད་ལ་ཅུང་ཟད་ཅིག་ཡིད་མི་དགའ་བར་གྱུར་ནས། དགོས་པའི་དབང་གིས་མི་དགའ་བཞིན་དུ་དེ་ལྟར་བྱའོ་ཞེས་སྨྲས་ནས། ཡུལ་ཤི་བི་པ་རྣམས་ལ་ཡིད་བཞོས་ཏེ་སྨྲས་པ། ཐམས་ཅད་སྒྲོལ་འདི་སྦྱིན་པ་ལ་ཞུགས་ཤིང་ཚུལ་གྱི་རིམ་པ་ལ་མི་ལྟ་བར་ངས་ཤེས་ཏེ། རྒྱལ་སྲིད་ལ་དབང་བྱེད་དུ་བཅུག་པ་ནི། །དེ་ལྟར་ཡང་བྱ་བ་མི་རིགས་མོད་ཀྱི། འདིས་ཀྱང་རང་གི་གླང་པོ་ཆེ་བྱིན་ཟིན་པས། །སྐྱུགས་པ་དང་འདྲ་བར་བོར་བ་ལྟ་ག་ལ་སུ་ཞིག་སླར་འཕྲོག །འོན་ཀྱང་ངས་འདི་ཅི་ནས་ཀྱང་སྦྱིན་པ་ལ་ཚོད་ཟིན་པར་བྱ་ཡིས། ཁྱེད་འདི་ལྟར་འཁྲུག་པར་མ་བྱེད་ཅིག །ཤི་བི་པ་རྣམས་ཀྱིས་སྨྲས་པ། །རྒྱལ་པོ་ཆེན་པོ་ཐམས་ཅད་སྒྲོལ་འདི་ནི། །དོན་འདི་ལྟ་བུ་དག་ལ་གཏམས་པ་ཙམ་གྱི་མཆིས་སུ་བཏུབ་པ་མ་ལགས་སོ། །ཀུན་དུ་རྒྱལ་བས་སྨྲས་པ། འོ་ན་དེ་ལ་ངས་གཞན་ཅི་ཞིག་བྱ། ཉེས་པར་སྤྱོད་ལ་གང་ཞིག་མི་དགའ་ཞིང་། །ཡོན་ཏན་སྟེན་ལ་སྐྱོན་དུ་བཟུང་ངམ་ཅི། །གླང་པོ་དེ་ཡི་ཕྱི་ནི་བདག་གི་བུ། །གསོད་དམ་འོན་ཏེ་གཟུང་ངམ་ཅི་ཞིག་བྱ། །དེ་བས་ན་ཁྱེད་འདི་ལ་རྔམ་ཞིང་འཁྲུལ་པར་མ་བྱེད་ཅིག་དང་ངས་ཐམས་ཅད་སྒྲོལ་འདི་ལྟ་བུ་དག་བྱེད་དུ་མི་གཞུག་གོ །དེ་ནས་ཡུལ་ཤི་བི་པ་རྣམས་ཁྲོས་ནས་རྒྱལ་པོ་ལ་སྨྲས་པ། མི་ཡི་དབང་པོ་ཁྱོད་ཀྱི་སྲས་དེ་ལ། གསད་དམ་བཅིང་ངམ་རྡེག་པ་སུ་ཞིག་འཚལ། །ཆོས་ལ་ཞེན་པ་སྙིང་རྗེའི་བདག་ཉིད་བས། །འདིས་ནི་རྒྱལ་སྲིད་གཟུང་བར་ཡོང་མི་ནུས། །འཁོར་གསུམ་སྟེན་ལ་མཁས་ཤིང་གཟི་ཆེ་ལ། གྲགས་པ་ཐོབ་པས་སེང་གེའི་ཁྲི་ལ་འོས། །ཚུལ་ལ་མི་ལྟ་ཆོས་ལ་རབ་དགའ་བས། འདི་ནི་དཀའ་ཐུབ་ནགས་ན་གནས་པར་འོས། །ས་ཡི་བདག་པོ་རྣམས་ཀྱི་ཚུལ་ཉེས་སྐྱོན། །དེ་ལ་བརྟེན་པ་རྣམས་ལ་འབྱུང་མོད་ཀྱི། །འོན་ཀྱང་དེ་དག་བཅོས་སུ་རུང་བ་མཆིས། །ས་བདག་གཙོ་བོ་ཉམས་ན་བཅོས་མི་རུང་། འདི་ལ་མང་དུ་གསོལ་ཡང་ཅི་འཚལ་ཏེ། །ཁྱོད་ཀྱི་སྲིད་ཉམས་མི་བཟོད་ཤི་བི་བ། །འདི་རྣམས་ཀྱིས་ནི་འདི་ལྟར་ངེས་པར་བཅད། །མི་རྗེའི་སྲས་འདི་དཀའ་ཐུབ་འཕེལ་བའི་ཕྱིར། །གྲུབ་པས་བསྟེན་པའི་རི་བོ་བང་གར་བཏང་། །ཚུལ་མ་ཡིན་པས་ཉམས་སུ་དོགས་ཤིང་ཕན་པར་དགའ་བའི་སྐྱེ་བོ་དེ་དག་གི་ངོ་བཟློག་ཕོད་པར་སྨྲས་པ་དང་། །དེ་ནས་རྒྱལ་པོ་དེ་བུ་དང་འབྲལ་བས་སེམས་གདུངས་བས་ཁོང་སྡངས་ཤིང་ངོ་ཚ་བ་བཞིན་དུ་མགོ་སྨད་དེ་ཉམ་ང་ང་ལྟར་ཤུགས་ནར་ཞེས་ཕྱུང་ནས། །བྱམས་ཤིང་སྒྲོགས་པ་དང་ཡིད་བཅུགས་པའི་དབང་གིས་ཡུལ་ཤི་བི་པ་རྣམས་ལ་སྨྲས་པ། ཁྱེད་དེ་ལྟར་འདི་ལ་གལ་གྱི་འཆུ་ན་རེ་ཤིག་ཉིན་ཞག་གཅིག་ཙམ་སྤྲོ་བསྲིངས་ཤིག་དང་། སང་ནང་པ་ཁྱོད་ཀྱི་བསམས་པ་བཞིན་དུ་ཐམས་ཅད་སྒྲོལ་བྱེད་དུ་གཞུག་གོ །ཡུལ་ཤི་བི་པ་རྣམས་ཀྱིས་དེ་ལྟར་བགྱིའོ་ཞེས་སྨྲས་ནས། བསྒོ་བ་མཉན་པ་དང་། རྒྱལ་པོ་དེས་གསོལ་ཀ་བ་ལ་ཁྱོད་སོང་ལ་འདི་ལྟར་གྱུར་པ་ཐམས་ཅད་སྒྲོལ་ལ་སྦྲོན་ཅིག་ཅེས་བཀའ་སྩལ་ཏོ། །དེས་ཀྱང་དེ་བཞིན་དུ་བགྱིའོ་ཞེས་མཉན་ནས། མྱ་ངན་གྱི་མཆི་མས་གདོང་ཁེབས་ཤིང་ཐམས་ཅད་སྒྲོལ་རང་གི་ཁང་པ་ན་འདུག་པའི་དྲུང་དུ་སོང་སྟེ། མྱ་ངན་གྱི་སྡུག་བསྔལ་གྱི་ཤུགས་ཀྱི་སྐད་ཕྱུང་སྟེ་ངུས་ནས་དེའི་རྐང་པ་གཉིས་ལ་ཕྱག་འཚལ་ཏོ། ཐམས་ཅད་སྒྲོལ་གྱི་རྟབས་རྟབས་ལྟར། ཨེ་མའོ་རྒྱལ་པོ་ཐུགས་བདེ འམ་ཞེས་དྲིས་པ་དང་། མི་དགའ་བས་ཚིག་མི་གསལ་བར་དེ་ལ་རྒྱལ་པོ་ནི་ཐུགས་བདེའོ་ཞེས་སྨྲས་སོ། །འོ་ནི་ཅིའི་ཕྱིར་དེ་ལྟར་མི་བརྟན་བར་གྱུར་ཅེས་ཐམས་ཅད་སྒྲོལ་གྱིས་ཡང་དྲིས་པ་དང་། གསོལ་ཀ་པ་མཆི་མས་བརྣངས་ཤིང་སྐད་འཛེར་བ་ལ་དབུགས་ཀྱིས་བརྣངས་པའི་ཚིག་མི་གསལ་བས་གཅོམ་ཆུང་ངུས་སྨྲས་པ། ཤི་བི་པ་རྣམས་མི་སྲུན་པར། འཁྲུགས་པར་གྱུར་ནས་རྒྱལ་པོའི་བཀའ། །འཇམ་པོས་སྩལ་བའང་མི་ཉན་བར། །རྒྱལ་པོ་ཁྱོད་ནི་ཡུལ་ནས་འབྱིན། །ཐམས་ཅད་སྒྲོལ་གྱིས་སྨྲས་པ། །ཡུལ་ཤི་བི་པ་རྣམས་ཅིའི་ཕྱིར་འཁྲུགས་ནས་ང་སྐྲོད། །འདུལ་དང་འགལ་བའི་ལམ་མི་འགྲོ། །བག་མེད་པ་ལ་ང་མི་དགའ། །ཉེས་པར་བྱས་པའང་མ་མཐོང་ན། །ཤི་བི་པ་རྣམས་ཅིའི་ཕྱིར་འཁྲུག གསོལ་ཀ་བས་སྨྲས་པ། །ཧ་ཅང་རླབས་ཆེས་པས་ལན་ནོ། །ཁྱོད་ནི་ཆགས་པ་མེད་ལ་དགའ་བར་གྱུར། །སློང་བ་རྣམས་ཀྱི་ཡིད་ནི་ཆགས་ལ་དགའ། །གླང་པོའི་རྒྱལ་པོ་ཁྱོད་ཀྱིས་བྱིན་པའི་ཕྱིར། །ཤི་བི་པ་རྣམས་འཁྲུགས་ནས་བརྟན་པ་ཉམས། དེ་བས་རང་གི་ཆོས་བོར་ཏེ། །ཁྱོད་ལ་ཚམ་ཚོམ་མེད་པར་ནི། །གང་དུ་སྤྱུགས་མི་དོང་བ་ཡི། །ལམ་དེར་ཁྱོད་ཀྱང་སོང་ཞེས་ཟེར། །དེ་ནས་བྱང་ཆུབ་སེམས་དཔའ་སྙིང་བརྩེ་བ་ལ་གོམས་པའི་ཤས་ཆེ་བ་དང་། སྐྱེ་བོ་སློང་བ་ལ་བྱམས་པ་དང་། རང་གི་བརྟན་པ་ཕུན་སུམ་ཚོགས་པ་བསྟན་པའི་ཕྱིར་སྨྲས་པ། ཡུལ་ཤི་བི་པ་རྣམས་ནི་མི་བརྟན་པའི་རང་བཞིན་ཅན་ཏེ་ངའི་རང་བཞིན་མི་ཤེས་པ་ལྟར་བྱེད་མོད། འཇིག་རྟེན་དོན་དུ་ང་ལུས་འདི་འཛིན་ན། ཕྱི་རོལ་ནོར་ལྟ་སྨོས་ཀྱང་ཅི་ཞིག་དགོས། །རང་གི་མིག་དང་མགོ་ཡང་ངས་སྦྱིན་ན། །ཕྱི་རོལ་ནོར་སྦྱིན་སྨོས་ཀྱང་ཅི་ཞིག་དགོས། །སློང་བ་རྣམས་ཀྱིས་བླངས་པའི་ཚིག་དག་ལ། །རང་གི་ལུས་ཀྱང་གཏོང་བར་སེམས་པ་ལ། །སྐྲག་པར་བྱས་ནས་མི་སྦྱིན་སྙམ་སེམས་པ། །བྱིས་པ་རྣམས་ཀྱི་མི་བརྟན་སྟོན་དུ་ཟད། །ཤི་བི་པ་རྣམས་ཐམས་ཅད་ཀྱིས། །ང་ནི་བསད་དམ་སྤྱུགས་ཀྱང་རུང་། །མི་སྦྱིན་པར་ནི་ང་མི་བྱེད། །དཀའ་ཐུབ་ཚལ་དུ་འགྲོར་ཟད་མོད། །དེ་ནས་བྱང་ཆུབ་སེམས་དཔའི་བཙུན་མོས་གཏམ་ངན་ཐོས་ཏེ་བཞིན་གྱུར་པ་ལ་ཡུལ་ཤི་བི་པ་རྣམས་ཀྱི་འདིར་ཇི་ལྟར་ངེས་པར་བྱས་པ་ཁྱོད་ཀྱིས་ཐོས་སམ། ང་ལས་ཁྱོད་ཀྱིས་ཅི་ཐོབ་དང་། །གང་ཡང་ཁྱོད་ཀྱི་ཕ་མ་ཡིས། །ནོར་རྣམས་ཅུང་ཟད་ཅི་ཡོད་པ། །དེ་དག་ཁྱོད་ཀྱིས་གཏེར་དུ་སྦོས། མཱ་ཏྲྀས་སྨྲས་པ། ལྷ་འདི་དག་གར་གཏེར་དུ་སྦ་བར་བགྱི། ཐམས་ཅད་སྒྲོལ་གྱི་སྨྲས་པ། རྟག་པར་ཚུལ་ཁྲིམས་ལྡན་པ་ལ། །སྦྱིན་པ་བཀུར་སྟིས་བརྒྱན་པ་བྱིན། །ནོར་རྣམས་དེ་ལྟར་གཏེར་བཅུག་པ། །རྗེས་སུ་འགྲོ་ཞིང་འཕྲོག་ཏུ་མེད། །གྱོས་རྒྱུག་གཉིས་པོ་བདེ་བར་མཛོད། །བྱིས་པ་གཉིས་ཀྱང་ཡོངས་སུ་སྐྱོངས། ཆོས་ལ་གཅིག་ཏུ་བག་ཡོད་བྱོས། །ང་མེད་མྱ་ངན་མ་བྱེད་ཅིག །མཱ་ཏྲྀས་དེ་ཐོས་ནས། །སྙིང་རབ་ཏུ་གདུངས་ཀྱང་། །ཁྱིམ་ཐབ་མི་དགའ་བ་སྤང་བའི་ཕྱིར། མྱ་ངན་དང་མི་དགའ་བ་བཏང་ཏེ་སྨྲས་པ། རྒྱལ་པོ་ཆེན་པོ་ཉག་གཅིག་དུ། །ནགས་སུ་གཤེགས་པ་ཆོས་མ་མཆིས། རྒྱལ་རིགས་གང་དུ་གཤེགས་པ་དེར། །བདག་ཀྱང་དེ་བས་མཆི་བར་འཚལ། །ལྷ་བདག་གིས་ནི་ནགས་ཚལ་ན་གནས་པ་མི་བདེ་བར་མ་མཐོང་ལགས་སོ། །ཅིའི་སླད་དུ་ཞེ་ན། མི་སྲུན་མི་མེད་ཤིང་དང་ཆུ་མ་སྤྱད། བྱ་རྣམས་སྣ་ཚོགས་སྒྲ་འབྱིན་རི་དྭགས་མང་། ནེའུ་སིང་སྔོན་པོ་ཡིད་འོང་བཻ་ཌཱུར་འདྲ། །སྐྱེད་མོས་ཚལ་བས་དཀའ་ཐུབ་ནགས་ཚལ་དགྱེས། ལྷ་གཞན་ཡང་། ནགས་ཚལ་ལྕག་མའི་ཁྲོད་དག་ན། གཞོན་ནུ་འདི་གཉིས་འཕྲེང་བ་ཡིས། །བརྒྱན་ཅིང་བརྩེ་བ་གཟིགས་ན་ནི། །རྒྱལ་སྲིད་དག་དང་དགོངས་མི་འགྱུར། །དུས་ཀྱི་དབང་གིས་གྱུར་པ་ཡི། །ནགས་ཚལ་མཛེས་པ་གསར་པ་དང་། །སྨན་ལྗོངས་འབབ་ཚུལ་བཅས་པ་ཡི། །ནགས་ཚལ་དག་ན་དགྱེས་པར་འགྱུར། །དགའ་བ་འཚལ་པའི་བྱ་རྣམས་ནི། །སྣ་ཚོགས་སྒྲ་འབྱིན་སིལ་སྙན་བཞིན། །འདོད་ཆགས་བདོ་བའི་སློབ་དཔོན་གྱིས། །བསྟན་པའི་རྨ་བྱ་གར་ཡང་འགྱིང་། བུང་བའི་ན་ཆུང་གླུ་ལེན་པ། །རབ་ཏུ་སྙན་ཅིང་མ་སྨད་པའང་། །ནགས་ཚལ་དག་ན་གླུ་གར་གྱི། །ཁྱོད་ཀྱི་ཐུགས་ནི་དགྱེས་པར་བགྱིས། །ནགས་ཚལ་དག་ན་མཚན་མོའི་ཟླ་འོད་ནི། རས་དཀར་བཟང་པོས་གཡོགས་པའི་རྡོ་ལེབ་དང་། །མེ་ཏོག་ཤིང་གིས་དྲི་ཞིམ་བསྒོས་པ་ཡིས། །ནགས་ཚལ་བསེར་བུ་བསིལ་ཡབ་གཡོབ་པར་བགྱིད། །འབབ་ཆུའི་ན་ཆུང་གོར་ནས་བསྐྱོད་པ་ཡི། །ཆབ་སྒྲ་སྙན་པ་ལྷུང་ལྷུང་སྒྲ་སྒྲོགས་པ། །རྒྱན་གྱི་སྒྲ་རྣམས་སིལ་ཁྲོལ་མཆི་བ་བཞིན། །ཁྱོད་ཀྱི་ཐུགས་ནི་རབ་ཏུ་དགྱེས་པར་བགྱིས། །དེ་དེ་ལྟར་བཙུན་མོ་གནད་ཆེན་གྱིས་ཡིད་བཞོས་པ་དང་། ནགས་ཚལ་དུ་འགྲོ་བ་ལ་སེམས་སྤྲོ་བར་གྱུར་ནས། སྐྱེ་བོ་སློངས་མོ་པ་རྣམས་ལ་བལྟས་ཏེ། སྦྱིན་པ་ཆེན་པོ་བྱིན་པ་ལ་ཞུགས་སོ། །དེ་ནས་ཐམས་ཅད་སྒྲོལ་དེ་ལྟར་བཏང་བར་གྱུར་པ་ཐོས་ནས། རྒྱལ་པོའི་ཕོ་བྲང་ན་ངུད་མོའི་སྒྲ་ཆེན་པོ་བྱུང་བར་གྱུར་ཏོ། །སྐྱེ་བོ་སློངས་མོ་བ་རྣམས་ཀྱང་མྱ་ངན་གྱི་གདུངས་པའི་ཤུགས་ཀྱིས་བརྒྱལ་བ་བཞིན་དུ་གྱུར་ཅིང་། སྨྱོ་བླ་ཅན་དུ་གྱུར་པ་བཞིན་དུ་སྨྲེ་སྔགས་རྣམ་པ་མང་པོ་འདོན་པར་གྱུར་ཏོ། །འབྲས་བུ་ཞིམ་པོ་ཡོད་པའི་གྲིབ་ཤིང་དག །བཅད་པའི་ཕྱིར་ནི་སྟ་རེ་གཟས་པ་རྣམས། །འཛིན་པའི་ས་ནི་ངོ་མཚར་མ་གྱུར་པ། །འདི་ནི་སེམས་པ་མེད་པར་གསལ་བར་མངོན། །ཆུ་གཙང་ཞིམ་པོ་བསིལ་བས་གང་བ་ཡི། །རྫིང་བུ་འདྲལ་བ་དག་ཀྱང་མི་འགོག་ན། འཇིག་རྟེན་སྐྱོང་རྣམས་མིང་ནི་དོན་མེད་གྱུར། །གྲགས་པར་ཟད་དམ་གལ་ཏེ་གུད་དུ་དོང་། །གང་ན་རྒྱལ་པོ་ཐམས་ཅད་སྒྲོལ། །རང་གི་སྲིད་ལས་ཕྱུང་བས་ན། །ཀྱེ་མའོ་ཆོས་མིན་གཉིད་མ་ལོག །ཆོས་ནི་གཉིད་ལོག་ཡང་ན་ཤི། བདག་ཅག་ཕོངས་པ་སློངས་མོ་བ། །ཉེས་པ་ཅུང་ཟད་མེད་པ་ལ། སྲོག་ལ་རྒོལ་བ་མི་སྲུན་པ། །དེ་ལས་ཕུང་བྱེད་མཁས་པ་མེད། །དེ་ནས་བྱང་ཆུབ་སེམས་དཔས་ནོར་བུ་རིན་པོ་ཆེ་དང་། གསེར་དང་དངུལ་གྱིས་གང་པའི་མཛོད་འབུམ་ཕྲག་དུ་མ་དང་། ནོར་དང་འབྲུ་མང་པོ་ལྡན་པའི་བང་མཛོད་རྣམས་དང་། བྲན་པོ་དང་བྲན་མོ་དང་ཐེག་པ་དང་། བཞོན་པ་དང་། གོས་དང་ཡོ་བྱད་ལ་སོགས་པ་ཐམས་ཅད་ཕོངས་པ་རྣམས་ལ་ཇི་ལྟར་རིགས་པར་བྱིན་ཏེ། ཕ་མ་མྱ་ངན་གྱི་སྡུག་བསྔལ་གྱིས་བརྟན་པ་ཟིལ་གྱིས་ནོན་པ་གཉིས་ཀྱི་རྐང་པ་གཉིས་ལ་ཕྱག་འཚལ་ནས་བུ་དང་ཆུང་མར་བཅས་ཏེ། ཤིང་རྟའི་མཆོག་ལ་ཞོན་ནས་བསོད་ནམས་ཀྱི་ཉིན་བར་གྱི་སྦྲུ་བཞིན་དུ་སྐྱེ་བོ་མང་པོ་ཆོ་ངེ་འདོན་པའི་སྒྲ་སྒྲོགས་ཤིང་། །གྲོང་ཁྱེར་གྱི་མཆོག་གི་ནང་ནས་ཕྱིར་ཕྱུང་སྟེ། རྗེས་སུ་ཆགས་པའི་དབང་གིས་རྗེས་སུ་འབྲང་བའི་སྐྱེ་བོ་མྱ་ངན་གྱི་གདུངས་པའི་མཆི་མས་གདོང་ཡོག་པ་རྣམས་ནན་གྱིས་སླར་བཟློག་སྟེ་བཀྱེ་ནས། །བདག་ཉིད་ཀྱིས་སྲབ་སྐྱོགས་བཟུང་སྟེ། རི་བདག་གང་ན་བདེར་སོང་ངོ་། །གྲོང་ཁྱེར་གྱི་མཆོག་གི་ཉེན་ཀོར་སྐྱེད་མོས་ཚལ་བཟང་པོ་ཡིད་དུ་འོང་བ་དངར་བ་འདས་ནས་ཀྱང་། ཡིད་འཁྲུག་པ་མེད་པར་མཐར་གྱིས་གྲིབ་ཤིང་ཉུང་ཞིང་སྐྱེ་བོ་འགྲུལ་བའི་རྒྱུན་ཆད་པ། རི་དྭགས་མང་པོ་རབ་ཏུ་རྒྱུ་བ། ཕྱོགས་གསལ་བར་སྣང་བ། ཚད་བྱིའུ་ཙ་ཙིའི་སྒྲ་གྲག་པའི་དགོན་པ་ཞིག་ཏུ་ཕྱིན་ཏོ། དེ་ནས་བྲམ་ཟེ་འཁྱམས་པ་དག་ཅིག་གིས་དེ་ལ་ཤིང་རྟ་འདྲེན་པའི་རྟ་བླངས་སོ། །དཔག་ཚད་དུ་མའི་ལམ་དུ་དེ་ལུས་ལ། །བུ་སྨད་བཅས་ཤིང་གྲོགས་ནི་མེད་གྱུར་ཀྱང་། །སྦྱིན་ལ་དགའ་བས་ཕྱི་རྗེས་མི་བལྟ་བར། བྲམ་ཟེ་རྣམས་ལ་རྟ་བཞི་ཉིན་པར་གྱུར། །དེ་ནས་བྱང་ཆུབ་སེམས་དཔའ་བདག་ཉིད་ཀྱིས་ཤིང་རྟ་དྲང་བར་བསམས་ནས། ལེགས་པར་ཆས་པ་དང་། གནོད་སྦྱིན་གཞོན་ནུ་བཞི་ཞིག་རི་དྭགས་དམར་པོའི་གཟུགས་སུ་བསྒྱུར་ནས། རྟ་བཟང་པོ་རབ་ཏུ་དུལ་བ་བཞིན་དུ་བདག་ཅག་ཉིད་ཀྱི་ཤིང་རྟའི་གཉའ་ཤིང་གཉའ་བར་ཐོགས་པར་གྱུར་ཏོ། །དེ་མཐོང་བ་དང་། མཱ་ཏྲྀ་དགའ་ཞིང་ངོ་མཚར་དུ་གྱུར་པས། མིག་དགྲད་པ་ལ། བྱང་ཆུབ་སེམས་དཔས་སྨྲས་པ། གང་ན་འདི་ལྟར་གློ་བུར་འོངས་པ་ལ། བྱམས་པའི་རྩྭ་ཟུག་རི་དྭགས་མཆོག་འཁོད་ནགས། དཀའ་ཐུབ་ཅན་གྱི་གནས་བཅས་བཀུར་བ་ཡི། །མཐུ་ཆེན་ཁྱད་པར་འཕགས་པ་འདི་ལ་ལྟོས། མཱ་ཏྲྀས་སྨྲས་པ། དམ་པ་རྣམས་ཀྱི་ཡོན་ཏན་དག །རབ་ཏུ་གོམས་ཀྱང་མི་འདྲ་བས། །བདག་གིས་བསམས་ན་མཐུ་ཆེན་འདི། །རྒྱལ་པོ་ཁྱོད་ཀྱི་ལགས་པ་སྙམ། །མཚོ་ཡི་ནང་ན་སྐར་མའི་གཟུགས་བརྙན་རྣམས། །ཀུ་མུད་རྒྱས་པས་ལྷག་པར་མཛེས་གྱུར་བ། ཟླ་བའི་འོད་ཟེར་ལྟད་མོ་བལྟ་བ་བཞིན། །འདིར་མཆིས་པ་རྣམས་རྒྱུར་གྱུར་ལགས་པ་སྙམ། །དེ་ལྟར་དེ་དག་ཕན་ཚུན་རྗེས་སུ་མཐུན་པས་ཅིག་ལ་ཅིག་སྙན་པར་སྨྲས་ཤིང་ལམ་དུ་ཞུགས་ཏེ་དོང་བ་ལས། བྲམ་ཟེ་ཞིག་འོངས་ནས། བྱང་ཆུབ་སེམས་དཔའ་ལ་ཤིང་རྟ་སླངས་སོ། །སློང་ལ་དགའ་བའི་གཉེན་གྱུར་པ། །བདག་གི་བདེ་ལ་མ་ཆགས་ངེས །ཤིང་རྟ་བྱིན་པས་བྲམ་ཟེ་དེའི། །རེ་བ་ཡོངས་སུ་རྫོགས་པར་བྱས། དེ་ནས་བྱང་ཆུབ་སེམས་དཔའ་ཡིད་དགའ་བཞིན་དུ། བདག་གི་བུ་སྨད་ཤིང་རྟ་ལས་ཕབ་སྟེ། ཤིང་རྟའི་མཆོག་བྲམ་ཟེ་དེ་ལ་བྱིན་ནས། གཞོན་ནུ་དྲ་བ་ཅན་པང་དུ་ཐོགས་ཏེ་རྐང་པས་ལམ་དུ་ཞུགས་སོ། །མཱ་ཏྲྀའང་ཡིད་ལ་མི་དགའ་བ་མེད་པར་གཞོན་ནུ་མ་ཀྲྀཥྞ་འཛིན་པང་དུ་ཐོགས་ཏེ་དེ་དང་འགྲོགས་ཏེ་སོང་ངོ་། །ལྗོན་པའི་ཤིང་རྣམས་འབྲས་བུ་བཟང་པོ་ཡིས། །རྩེ་མོ་བཏུད་ནས་མགྲོན་དུ་གཉེར་བ་བཞིན། །བསོད་ནམས་མཐུ་ཡིས་མངོན་དུ་ལྟ་བྱེད་ཅིང་། །སློབ་མ་དུལ་བ་ཕྱག་ཀྱང་འཚལ་བ་འདྲ། གང་དུ་ཆུ་འདོད་གྱུར་པ་དེ་དག་ཏུ། །ངང་མོའི་དཔུང་མགོས་པདྨ་བསྐྱོད་པ་ཡིས། །ཟེ་བ་ལྷགས་པས་སེར་པོར་གསལ་གྱུར་པའི། །མཚོ་རྣམས་དེ་ལ་རབ་ཏུ་བྱུང་བར་གྱུར། །སྤྲིན་རྣམས་ཀྱིས་ཀྱང་བླ་རེ་བཟང་པོ་བྲེས། །བསེར་བུ་བདེ་བ་དྲི་ཞིམ་ངད་ཀྱང་ལྡང་། །ངལ་བའི་སྡུག་བསྔལ་མྱོང་བ་མི་བཟོད་པས། །གནོད་སྦྱིན་རྣམས་ཀྱིས་དེ་ཡི་ལམ་ཡང་བསྟུངས། དེ་ལྟར་བྱང་ཆུབ་སེམས་དཔའ་སྐྱེད་མོས་ཚལ་གྱི་ནང་ནས་འགྲོ་བ་བཞིན་དུ། འཆག་ན་དགའ་བའི་བདེ་བ་རྗེས་སུ་མྱོང་ཞིང་། ལམ་གྱིས་དུབ་པའི་སྡུག་བསྔལ་མ་མྱོང་བར། བུ་སྨད་དང་བཅས་ཏེ་ཕྱིན་ནས་བང་གའི་རི་མཐོང་བར་གྱུར་ཏོ། །དེ་ན་ཡང་མེ་ཏོག་དང་འབྲས་བུ་དང་ལོ་མས་བརྒྱན་པའི་ཤིང་ལྗོན་པ་སྣུམ་སྣུམ་ལྟར་འདུག་པ་རྣམ་པ་དུ་མས་གང་བ། བྱ་མང་པོ་འདོད་པས་མྱོས་ཤིང་དགའ་བའི་སྒྲ་འབྱིན་པ། རྨ་བྱ་མང་པོ་གར་བྱེད་པས་མཛེས་པར་གྱུར་པ། རི་དྭགས་ཀྱི་རིགས་དུ་མ་རྒྱུ་བ། མཚོ་ཆུ་སྔོན་པོ་གཙང་མས་ཆེད་དུ་བསྐོར་བ་ལྟར་འདུག་པ། མེ་ཏོག་གི་དྲིས་བསྒོས་པའི་བསེར་བུ་ངད་ལྡང་བའི་དཀའ་ཐུབ་ཀྱི་ནགས་ཚལ་དུ། ནགས་ཚལ་ན་རྒྱུ་བ་རྣམས་ཀྱིས་ལམ་མཚོན་ཏེ་ཞུགས་པ་དང་། དེ་ནའང་བརྒྱ་བྱིན་གྱིས་བཀའ་སྩལ་ཏེ། ལས་སྣ་ཚོགས་བྱེད་པ་ཉིད་ཀྱི་བྱས་པ། ཤིང་ལོའི་ཁང་པ་མཐོང་ན་ཡིད་དུ་འོང་བ། དུས་ཐམས་ཅད་དུ་བདེ་བ། དེ་ལྟ་བུ་ཞིག་ཏུ་གནས་བཅས་ཏེ་འདུག་གོ །ནགས་ཚལ་དེ་ན་ཆུང་མ་སྡུག་པས་བཀུར་སྟི་བྱས། བདག་གི་བྱིས་པའི་སྙན་དངགས་མ་བསྒྲིབས་སྙན་པ་ཉན། །སྐྱེད་མོས་ཚལ་ན་འདུག་བཞིན་རྒྱལ་སྲིད་བསམ་པ་མེད། །ལོ་ཕྱེད་ལྷག་ཙམ་དེ་ནི་དཀའ་ཐུབ་སྤྱོད་པར་གྱུར། །དེ་ནས་རེ་ཤིག་ཅིག་རྒྱལ་པོའི་བཙུན་མོ་རྩ་བ་དང་འབྲས་བུ་ཚོལ་དུ་སོང་བའི་འོག་ཏུ། བྱིས་པ་གཉིས་བསྐྱང་པའི་ཕྱིར། རྒྱལ་པོའི་བུ་གནས་བསྲུང་ཞིང་འདུག་པ་ན། བྲམ་ཟེ་ལམ་གྱི་རྡུལ་གྱིས་རྐང་པ་དང་། བྱིན་པ་རྩུབ་རྩུག་ལྟར་འདུག་པ། ངལ་བས་བཞིན་མདོག་དང་མིག་རྩ་ཉམས་པ། རིལ་བ་སྤྱི་བླུགས་དབྱིག་པ་ལ་བཏགས་པ་ཕྲག་པ་ལ་ཐོགས་པ། ཆུང་མས་གཡོག་ཁྲིད་དེ་ཤོག་ཅིག་པར་ཆེད་ཆེར་སྦྲིང་བ་ཞིག་ཕྱོགས་དེར་འོངས་པར་གྱུར་ཏོ། །དེ་ནས་བྱང་ཆུབ་སེམས་དཔས་ཡུན་རིང་མོ་ཞིག་ན་གདོང་ཕོངས་པ་འོངས་པར་མཐོང་ནས། ཡིད་རབ་ཏུ་དང་བས་མིག་དང་བཞིན་གྱི་མདངས་རབ་ཏུ་གསལ་བར་གྱུར་ནས། བསུ་སྟེ་འོངས་བ་ལེགས་སོ་ཞེས་བྱ་བ་ལ་སོགས་ཏེ་ཚིག་སྙན་པ་བརྗོད་དེ། དཀའ་ཐུབ་ཀྱི་ནགས་ཀྱི་ནང་དུ་བཞག་ནས། གློ་བུར་དུ་འོངས་པ་ལ་བཀུར་སྟི་བྱ་བ་བྱས་ཏེ། ཅིའི་ཕྱིར་འོངས་པ་དྲིས་སོ། །དེ་ནས་བྲམ་ཟེ་དེ་ཆུང་མ་ལ་བྱམས་པས། བརྟན་པ་དང་ངོ་ཚ་བ་བོར་ཞིང་བསང་བ་འབའ་ཞིག་ཏུ་ཆས་པས། དོན་འདི་ལྟ་བུ་སྨྲས་སོ། །གང་ན་སྣང་ཞིག་མཉམ་པའི་ལམ་ཡོད་པ། །འཇིག་རྟེན་འདི་དག་དེར་དོང་ཉམ་ངར་མིན། འགྲོ་བ་འདི་ནི་ཕལ་ཆེར་སེར་སྣས་བསྒྲིབས། །བདག་གིས་གཞན་དུ་སླང་བའི་ཆག་མ་ཕྱིན། །སྦྱིན་ལ་དཔའ་བའི་གྲགས་དང་དཔལ་དག་གིས། །མཐར་ཕྱུང་མ་ལུས་ཁྱོད་ཀྱིས་མཐར་ཕྱིན་པས། །དེ་ཕྱིར་བདག་ནི་སློངས་མོ་བགྱིས་པར་གྱུར། །དེ་བས་སྲས་གཉིས་གཡོག་ཏུ་བདག་ལ་སྩོལ། །དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ། །སྦྱིན་ལ་དགའ་བ་གོམས་བྱས་ཤིང་། སླར་ཟློག་པ་ནི་མ་བསླབས་པས། རབ་ཏུ་སྡུག་པའི་བུ་གཉིས་ཀྱང་། ཚམ་ཚོམ་མེད་བར་སྦྱིན་ཞེས་སྨྲས། བདེ་ལེགས་སུ་གྱུར་ཅིག །ད་འདི་ན་མཆིས་ཏེ་ཅི་བགྱི་ཞེས་བྲམ་ཟེས་སྨྲས་པ་དང་། བུ་གཉིས་ཀྱིས་བྱིན་པའི་གཏམ་ཐོས་པས་སྐྲག་པའི་མིག་རིག་རིག་པོར་གྱུར་པ་ལ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པའི་ཤུགས་ཀྱི་སྙིང་འདུངས་པར་གྱུར་པས་སྨྲས་པ། ཁྱོད་ལ་འདི་གཉིས་ངས་བྱིན་ན། །འདི་གཉིས་མ་ནི་ནགས་ཚལ་དུ། །རྩ་བ་འབྲས་བུ་ཚོལ་དུ་སོང་། །དེ་ཡང་དེ་རིང་འདིར་འོང་གིས། །འདིར་ནི་ཞག་གཅིག་ངལ་སོས་ལ། །དེ་དང་ཕྲད་ནས་འོ་བྱས་པ། །རྒྱན་གྱིས་བརྒྱན་ཅིང་འཕྲེང་བ་ཅན། །ང་ཡི་བུ་གཉིས་སང་ཁྲིད་ཅིག བྲམ་ཟེས་སྨྲས་པ། ཁྱོད་འདི་ལ་དུས་ཀྱི་འཆུ་བ་འདི་ཐོང་ཞིང་། བུད་མེད་རྣམས་ནི་མི་དྲང་བས། །མིང་ནི་གཡོན་ཅན་ཞེས་སུ་བཏགས། །ཁྱོད་ཀྱི་སྦྱིན་པ་གེགས་བྱེད་ཀྱི། །དེ་བས་བདག་ནི་འདུག་མི་འདོད། བྱང་ཆུབ་སེམས་དཔས་སྨྲས་པ་སྦྱིན་པའི་གེགས་སུ་གྱུར་དུ་མ་དོགས་ཤིག །དེ་ནི་ངའི་ཆོས་སྤྱོད་པའི་གྲོགས་ཡིན་མོད་ཀྱི། འོན་ཀྱང་འདི་ལ་ཁྱོད་ཅི་དགར་ཟད་དོ། །གཞན་ཡང་བྲམ་ཟེ་ཆེན་པོ། རབ་ཏུ་གཞོན་ཞིང་བྱིས་པ་ལ། གཡོག་གི་བྱ་བ་མི་མཁས་པས། འདི་གཉིས་ཁྱོད་ཀྱི་བྲན་བྱེད་ཀྱང་། །ཇི་ལྟ་བུར་ན་མགུ་བར་འགྱུར། །ཤི་བའི་རྒྱལ་བོ་ང་ཡི་ཡབ། །འདི་གཉིས་འདི་ལྟར་གྱུར་མཐོང་ན། །འདི་གཉིས་བླུ་བའི་ནོར་དག་ནི། །ཅི་འདོད་ཁྱོད་ལ་ངེས་བར་སྟེར། །དེ་བས་དེ་ཡི་ཡུལ་དུ་ནི། འདི་གཉིས་ཁྲིད་ན་ལེགས་པར་འགྱུར། །དེ་ལྟར་བྱས་ན་ནོར་ཆེན་དང་། །ཆོས་རྣམས་དང་ཡང་ལྡན་པར་འགྱུར། །བྲམ་ཟེས་སྨྲས་པ། བདག་ནི་རྒྱལ་པོ་སྦྲུལ་གདུག་པ་དང་འདྲ་བའི་དྲུང་དུ། མི་དགའ་བའི་སྐྱེས་འཚལ་ཏེ་མཆི་བའི་རྔོ་མི་ཐོག་གོ །རྒྱལ་པོས་བདག་ལ་འདི་གཉིས་འགྲོག །ཡང་ན་ཆད་པས་གཅོད་ཀྱང་སྲིད། །དེ་བས་འདི་གཉིས་བྲམ་ཟེ་མོའི། །གཡོག་ཏུ་བདག་ཉིད་ཁྲིད་དེ་མཆི། དེ་ནས་བྱང་ཆུབ་སེམས་དཔས་དོན་ཡོངས་སུ་མ་རྫོགས་པར། འོ་ན་ད་ཅི་དགར་ཟད་ཅེས་སྨྲས་ནས། །བུ་གཉིས་ལ་རྗེས་སུ་ཆགས་པ་དང་བཅས་པར་གཡོགས་ལེགས་པར་བྱོས་ཤིག་ཅེས་རྗེས་སུ་བཏགས་ནས། ལེན་དུ་གཞུག་པའི་ཕྱིར། བྲམ་ཟེའི་ལག་པ་བརྐྱང་བ་ལ་རིལ་བ་སྤྱི་བླུགས་བཏུད་དོ། །དེ་ཡིས་བསྒྲིམས་པའི་མཐུ་དག་གིས། །རིལ་བ་ལས་ནི་ཆུ་བྱུང་ན། །མིག་ནི་པདྨ་དམར་འདྲ་ལས། །མ་བསྒྲིམས་པར་ཡང་མཆི་མ་བྱུང་། །དེ་ནས་བྲམ་ཟེ་དེ་བརྐམ་པས་ཧ་ཅང་ཡང་དགའ་ཆེས་ནས། བརྟགས་པ་དང་བཅས་པའི་ཡིད་ཀྱིས། བྱང་ཆུབ་སེམས་དཔའི་བུ་དབྲོག་པར་རིངས་པས་ཤིས་བར་བརྗོད་པའི་ཚིག་མདོར་སྨྲས་ནས། ཚིག་དྲག་པོ་རྩུབ་པོས་ཕྱིར་བྱུང་ཞེས་སྨྲས་ནས། གཞོན་ནུ་གཉིས་དཀའ་ཐུབ་ཀྱི་ནགས་ནས་ཕྱིར་ཕྱུང་ངོ་། །དེ་ནས་གཞོན་ནུ་གཉིས་བྲལ་བའི་སྡུག་བསྔལ་གྱིས་སྙིང་གདུངས་པས་ཕ་ལ་ཕྱག་འཚལ་ནས། མིག་མཆི་མས་གང་བཞིན་དུ་སྨྲས་པ། ཡབ་ཅིག་ཡུམ་ཡང་སླད་རོལ་ཕྱུང་། ཁྱོད་ཀྱང་བདག་ཅག་བཏང་བར་བཞེད། །དེ་དང་མཇལ་གྱི་བར་དུ་གཞེས། །དེ་ནས་བདག་ཅག་ཁྱོད་ཀྱིས་སྩོལ། དེ་ནས་བྲམ་ཟེ་དེས་བསམས་པ། འདི་གཉིས་ཀྱི་མའང་དེའུ་རེ་འདི་ནས་ཚུར་འོང་ལ། འདི་ཡང་བུ་ལ་བྱམས་པས། འགྱོད་པ་སྐྱེ་ཡང་སྲིད་དོ་སྙམ་ནས། པདྨའི་བམ་པོ་བཅིངས་པ་བཞིན་དུ། དེ་གཉིས་ཀྱི་ལག་པ་ལྕུག་མས་བཅིངས་པ་དང་། དེ་གཉིས་ཅིག་ལ་ཅིག་འཁྲི་ཞིང་། ཕ་ལ་བཞིན་སླར་ཕྱོགས་ཏེ་ལྟ་བ་རབ་ཏུ་ཞན་པའི་གཞོན་ནུ་གཞོན་ཤ་ཅན་གཉིས་བསྡིགས་ཤིང་ཁྲིད་དོ། །དེ་ནས་གཞོན་ནུ་མ་ཀྲྀཥྞ་འཛིན་སྡུག་བསྔལ་དང་པོ་མྱོང་བ་དེས་སྐད་ཕྱུང་སྟེ་ངུ་ཞིང་ཕ་ལ་སྨྲས་པ། ཕ་ཅི་ལ་བདག་ལ་བྲམ་ཟེ་འདི། བརྩེ་བ་མེད་པར་ལྕུག་མས་འཇུ། བྲམ་ཟེ་ཆོས་དང་ལྡན་ཞེས་གདའ། འདི་ནི་བྲམ་ཟེ་མ་ལགས་ངེས། །གནོད་སྦྱིན་བྲམ་ཟེར་བསྒྱུར་ནས་ནི། །ངེས་པར་བཟའ་བའི་ཕྱིར་ཁྲིད་དོ། །ཤ་ཟས་བདག་ཅག་ཁྲིད་གྱུར་ན། །ཡབ་ཅིག་ཅི་ཕྱིར་ཡལ་བར་དོར། །དེ་ནས་གཞོན་ནུ་དྲ་བ་ཅན་ཡང་། མའི་སྨྲེ་སྔགས་འདོན་ཅིང་སྨྲས་པ། བྲམ་ཟེ་བདག་ལ་རྡེག་པ་འདི། །དེ་ཙམ་སྡུག་བསྔལ་མི་ཆེ་ཡི། །དེ་རིང་ཡུམ་དང་མ་མཇལ་བ། །དེ་ཡིས་བདག་ནི་བཀས་པ་བཞིན། །དཀའ་ཐུབ་ནགས་ཚལ་སྟོང་པ་ན། ཡུམ་ནི་ངེས་པར་ཡུན་རིངས་བཤུམས། །ཉོན་མོངས་བུ་ཡི་སྡུག་བསྔལ་གྱིས། །བྱེའུ་ཕྲུག་བསད་པའི་མ་མོ་བཞིན། བདག་ཅག་ཕྱིར་ནི་ནགས་ཚལ་ནས། །རྩ་བ་ཤིང་ཐོག་མང་པོ་རྣམས། །བསྣམས་ཏེ་བྱོན་ནས་གནས་སྟོང་འདི། གཟིགས་ནས་ཡུམ་ནི་ཅི་ལྟར་འགྱུར། །ཡབ་ཅིག་ཆིབས་རྟ་འདི་རྣམས་དང་། །གླང་ཆེན་ཤིང་རྟ་གང་མཆིས་ལས། །ཕྱེད་ཙམ་ཡུམ་ལ་ཕུལ་ན་ནི། །དེ་ཡིས་ཐུགས་ངན་ཆུང་ཡང་སྲིད། །འཕྲིན་གྱིས་ཡུམ་ལ་ཕྱག་འཚལ་ཞིང་། །ཐུགས་ངན་མཛད་ལས་བཟློག་ཏུ་གསོལ། །ཡབ་ཅིག་ཁྱོད་དང་ཡུམ་དེ་ཡི། །ཞལ་ནི་མཐོང་བར་རབ་ཏུ་དཀའ། །ཀྲྀཥྞ་ཚུར་ཤོག་བདག་ཅག་འདོང་། བྲམ་ཟེ་བྲན་གཡོག་འདོད་པ་ལ། །ཡབ་ཀྱིས་བདག་ཅག་བྱིན་ཟིན་གྱིས། །བདག་ཅག་གསོན་ཡང་ཅི་ཞིག་རུང་། དེ་ནས་བྱང་ཆུབ་སེམས་དཔའ། བུ་སྨྲེ་སྔགས་འདོན་པ་སྙིང་རྗེ་རྗེ་སྐད་ཟེར་བ་དེས་བློ་རབ་ཏུ་བསྐྱོད་ཀྱང་བྱིན་ཟིན་པས་ད་འགྱོད་ཀྱང་ཅི་ཕན་སྙམ་ནས། མྱ་ངན་གྱི་མེ་བཟློག་དཀའ་བས་སྙིང་བཅོས་ཏེ། དུག་ལངས་པས་བརྒྱལ་བ་བཞིན་དུ། སེམས་བློང་བློང་བོར་གྱུར་ནས་དེ་ཉིད་དུ་འདུག་གོ །བསེར་བུ་བསིལ་བའི་རླུང་ཡབ་ཀྱིས་འདུ་ཤེས་སླར་རྙེད་པ་དང་། སྒྲ་ཅི་ཡང་མི་གྲག་ཅིང་བུ་མི་འཁོད་པའི་གནས་མཐོང་ནས། མགྲིན་པ་དབུགས་ཀྱིས་བརྣངས་བཞིན་དུ། རང་ལ་རང་སྨྲས་པ། ངའི་སྙིང་བུ་གཅེས་པ་ལ། །འཛེམ་འདོགས་མེད་པར་མངོན་སུམ་དུ། །མཚོན་གྱིས་འདེབས་པ་ཇི་ལྟར་ན། །བྲམ་ཟེ་ངན་པ་ངོ་མི་ཚ། །ལྷམ་ཡང་མེད་པར་རྐང་གིས་དོང་། །རབ་ཏུ་གཞོན་པས་ངལ་མི་བཟོད། །ཇི་ལྟར་ལམ་དུ་ཞུགས་ཏེ་དོང་། །ཅི་ལྟར་དེ་ཡི་བྲན་གཡོག་བྱེད། ལམ་གྱིས་ངལ་ཞིང་དུབ་པ་ལ། །སུ་ཞིག་དེ་རིང་ངལ་སོར་འཇུག །བཀྲེས་སྐོམ་སྡུག་བསྔལ་ཉེན་པ་གཉིས། །བསླང་པའི་གནས་ཀྱང་སུ་ཞིག་ཡོད། །བདག་ནི་བརྟན་པར་བྱེད་འདོད་ཀྱང་། །འདི་ལྟ་བུར་ནི་སྡུག་བསྔལ་ན། །ང་བུ་བདེ་བར་བསྐྱེད་པ་གཉིས། །གནས་སྐབས་ཅི་ལྟར་གྱུར་ཅིང་འཁོད། །ཀྱེ་མའོ་བུ་དང་བྲལ་བ་ཡི། །སྡུག་བསྔལ་མེ་ཡིས་བདག་སེམས་སྲེག དམ་པ་རྣམས་ནི་ཆོས་དྲན་ནས། །སུ་ཞིག་རྗེས་སུ་འགྱོད་པར་བྱེད། །དེ་ནས་མཱ་ཏྲྀ་མི་དགའ་བ་འབྱུང་བའི་ལྟས་ངན་པ་རྣམས་ཀྱིས་ཡིད་མི་དགའ་བར་གྱུར་བཞིན་དུ། རྩ་བ་དང་འབྲས་བུ་ཁྱེར་ཏེ་རབ་ཏུ་མྱུར་བར་འོང་འདོད་ཀྱང་། གཅན་ཟན་ཁྲོ་བོ་རྣམས་ཀྱི་ལམ་ཆོད་པས། རིང་ཞིག་ལོན་ནས་དཀའ་ཐུབ་ཀྱི་ནགས་སུ་ཕྱིན་ནས་བསུར་འོང་རན་པའི་ས་དང་། རྩེད་མོ་རྩེ་བའི་ས་དག་ན་བུ་གཉིས་མི་སྣང་བ་དང་། རབ་ཏུ་མི་དགའ་བའི་དབང་དུ་གྱུར་ཏོ། །ལྟས་ངན་བྱུང་བས་དོགས་པ་སྐྱེས་བར་གྱུར། །དེ་ནས་བུ་བཙལ་ཕྱིར་ནི་མིག་ཀྱང་བལྟ། །ཡང་དང་ཡང་བོས་དེ་གཉིས་ལན་མེད་པས། །མྱ་ངན་འདུངས་ནས་སྨྲེ་སྔགས་འདོན་པར་གྱུར། །བྱིས་པ་སྨྲ་བའི་སྒྲ་གྲག་ནགས་ཚལ་འདིར། སྔོན་ནི་བདག་ལ་མང་པོ་ཚོགས་བཞིན་སྣང་། །དེ་གཉིས་མི་སྣང་དེ་གཉིས་དེ་རིང་ནི། །བདག་ལ་དགོན་པ་བཞིན་དུ་སྐྱབས་མེད་སྣང་། །ཀྱེ་མ་གཞོན་ནུ་འདི་གཉིས་ཅི་ཉེས་ཀྱེ། །རྩེ་རྩེ་ངལ་ནས་གཉིད་ཀྱིས་ལོག་གྱུར་ཏམ། །ནགས་ཚལ་སྟུག་པོར་བརླག་གམ་འོན་ཏེ་ཉལ། །བདག་འོང་འཕྱིས་པས་མ་མགུ་འཆུས་ཕྱུར་ཏམ། །བྱིས་པར་གྱུར་པས་ག་ཤེད་གབ་ཅིང་འཁོད། །གལ་ཏེ་དེ་བསད་མཐོང་ན་འཁྲུགས་ནས་ནི། །བྱ་འདི་ཀུན་ཀྱང་ཅི་སྟེ་སྒྲ་མི་འབྱིན། །འབབ་ཆུ་དྲག་པོ་རླབས་ཆེན་འཁྲུགས་པ་ཡི། །ཆུ་ཡིས་གལ་ཏེ་དེ་གཉིས་ཁྱེར་གྱུར་ཏམ། །འོན་ཀྱང་ང་ནི་བདག་གི་ལོག་པར་རྟོག་པ་འདི་ལྟར་མ་གྱུར་ཅིག །རྒྱལ་པོ་ཡབ་སྲས་བདེ་ལེགས་སུ་གྱུར་ཅིག །ལྟས་ངན་མཚན་མ་ངན་པ་སྟོན་པ་ཡང་། བདག་གི་ལུས་ལ་སྨིན་པར་གྱུར་ཅིང་། བདག་གི་སྙིང་འདིའང་ལྟས་ངན་པས་དགའ་བ་ནི་ཟློག །མི་དགའ་བའི་མུན་བླ་ནི་ཁེབས་ནས། གས་པ་བཞིན་དུ་གྱུར་ཏམ་ནི། བདག་གི་ལུས་ཀྱང་ལྷུ་ཚིགས་བྲལ་བ་སྙམ་བྱེད། ཕྱོག་རྣམས་ཀྱང་འཁྲུགས་པ་སྙམ་བྱེད། ནགས་ཚལ་འདིའང་དཔལ་ཉམས་ཤིང་གཡལ་སྙམ་བྱེད་པར་གྱུར་ཏོ། །དེ་ནས་དཀའ་ཐུབ་ཀྱི་ནགས་ཀྱི་ནང་དུ་འོངས་ནས། །རྩ་བ་དང་འབྲས་བུ་རྣམས་ཕྱོགས་གཅིག་ཏུ་བཞག་སྟེ། ཞེ་ས་དང་བཅས་པར་ཁྱིམ་ཐབ་ལ་བུ་གཉིས་གར་མཆིས་ཞེས་དྲིས་སོ། །དེ་ནས་བྱང་ཆུབ་སེམས་དཔའ་མ་ནི་བུ་ལ་བྱམས་པས་སྙིང་སྟོབས་ཆུང་བ་དང་། མི་དགའ་བའི་ཚིག་བརྗོད་དཀའ་བར་ཤེས་ནས། དེ་ལ་ཅུང་ཟད་ཀྱང་སྨྲ་མ་ནུས་སོ། །དགའ་བར་བྱ་རིགས་སྐྱེ་བོ་ལ། །མི་དགའ་སྨྲ་བའི་མི་དག་གིས། ཆེད་དཀར་ཡིད་ནི་གདུང་བྱ་བ། །སྙིང་རྗེ་ཅན་གྱིས་རབ་ཏུ་དཀའ། དེ་ནས་མཱ་ཏྲྀས་བསམས་པ། འདི་འདི་ལྟར་མྱ་ངན་གྱིས་གདུངས་ནས་ཅང་མི་སྨྲ་བ་དང་སྦྱར་ན། བདག་གི་བུ་གཉིས་གདོན་མི་ཟ་བར་མ་རུང་བར་གྱུར་ཏོ་སྙམ་ནས། དཀའ་ཐུབ་ཀྱི་ནགས་ཀུན་དུ་སེམས་ཀྱི་བརྟགས་ནས། བུ་གཉིས་མི་སྣང་བས། མཆི་མས་བརྣངས་ནས་ཡང་སྨྲས་པ། བྱིས་པ་གཉིས་ཀྱང་ཡོང་མི་སྣང་། ཁྱོད་ཀྱང་བདག་ལ་ཅང་མི་གསུང་། །མི་དགར་གྱུར་པ་མི་གསུངས་པས། །ཀྱི་ཧུད་བདག་ནི་བསད་ཀྱིས་མོད། དེ་སྐད་ཅེས་སྨྲས་ནས། མྱ་ངན་གྱི་མེས་སྙིང་བསྲེགས་ནས། ལྕུག་མ་རྩ་བ་ནས་བཅད་པ་བཞིན་དུ་འགྱེལ་ལོ། །དེ་འགྱེལ་མ་ཐག་ཏུ་བྱང་ཆུབ་སེམས་དཔས་བླངས་ནས། །རྩའི་སྟན་ལ་བཞག་སྟེ། ཆུ་གྲང་མོ་བཏབ་ནས་སླར་སད་པ་དང་། དབུགས་དབྱུང་བའི་ཕྱིར་སྨྲས་པ། བྱམས་པའི་ཡིད་ཀྱིས་མི་བཟོད་ལ། །བརྟན་པ་མེད་དུ་དོགས་པས་ན། །མཱ་ཏྲྀ་ཁྱོད་ལ་ང་ཡིས་ནི། །སྡུག་བསྔལ་མྱུར་དུ་མ་སྨྲས་སོ། །རྒས་ཤིང་དབུལ་པོའི་སྡུག་བསྔལ་གྱིས། །ཉེན་པའི་བྲམ་ཟེ་ང་གན་འོངས། །དེ་ལ་ང་ཡི་བུ་གཉིས་བྱིན། །མྱ་ངན་མ་བྱེད་སྤྲོ་བསྲིངས་ལ། །བུ་ལ་མ་སེམས་ང་ལ་ལྟོས། །ང་ཡི་མྱ་ངན་གདུངས་སྙིང་ལ། །མཚོན་གྱི་འདེབས་པ་བཞིན་མ་བྱེད། བསླངས་པར་གྱུར་ན་སྲོག་དག་ཀྱང་། །མི་སྦྱིན་པར་ནི་ཅི་ལྟར་ནུས། །དེ་བས་ང་ཡི་སྦྱིན་པ་ལ། །བཟང་མོ་རྗེས་སུ་ཡི་རང་བྱོས། །མཱ་ཏྲྀས་དེ་ཐོས་ནས། བུ་ཤིར་དོགས་ནས་སྙིང་གཙེས་པ་ལ། བུ་གཉིས་གསོན་པའི་གཏམ་ཐོས་པས། མྱ་ངན་ཆུང་དུ་གྱུར་ནས། ཁྱིམ་ཐབ་མྱ་ངན་བསལ་བའི་ཕྱིར་མིག་གཉིས་མཆི་མ་ཕྱིས་ཏེ། ཡ་མཚན་ཆེ་བར་བལྟས་ནས། ཁྱིམ་ཐབ་ལ་སྨྲས་པ། མང་དུ་གསོལ་ཡང་ཅི་འཚལ་ཏེ་ངོ་མཚར་ཆེའོ། །འདི་ལྟར་ཁྱོད་ཀྱི་ཐུགས་ལ་ནི། །འཇུངས་པའི་སྐབས་ཀྱང་མ་རྙེད་པ། ལྷ་ཡི་སེམས་ཀྱང་ངེས་པར་ནི། །ཡ་མཚན་ཆེ་བའི་དབང་དུ་གྱུར། །ཁྱོད་ཀྱི་གྲགས་པའི་ཚིག་སྡེབས་སྒྲ་གྲགས་སམ། །ལྷ་ཡི་རྔ་ཆེན་བརྡུངས་པའི་སྒྲ་རྣམས་ཀྱིས། བྲག་ཅའི་སྒྲ་ཡིས་ཕྱོགས་རྣམས་ཐམས་ཅད་དུ། །ཚིག་འབྲུ་གསལ་བས་ནམ་མཁའ་ཁྱབ་པར་གྱུར། །ས་གཞི་རི་ཡི་ནུ་མ་གཡོ་བ་ཅན། །འདོད་ཆགས་ལངས་པ་བཞིན་དུ་རབ་ཏུ་གཡོས། །གསེར་གྱི་མེ་ཏོག་རྣམས་ཀྱང་མཁའ་ལས་ལྷགས། གློག་འགྱུར་འོད་ཀྱིས་ནམ་མཁའ་གསལ་གྱུར་ཅིང་། །དེ་བས་ཐུགས་ངན་མ་མཛད་པར། །སྩལ་བས་ཐུགས་ནི་དགྱེས་པར་མཛོད། །འཇིག་རྟེན་རྣམས་ལ་བཏུང་ཆུ་བཞིན། །སླན་ཆད་ཀྱང་ནི་སྦྱིན་བདག་མཛོད། །དེ་ནས་ལྷའི་དབང་པོ་བརྒྱ་བྱིན་ས་གཞི་གཡོས་པས་རིའི་རྒྱལ་པོ་རི་རབ་འགུལ་བ་དང་། འདི་ཅི་ཞིག་ཅེས་རྟོག་པ་སྐྱེས་པ་དང་འཇིག་རྟེན་སྐྱོང་བ་ཡ་མཚན་སྐྱེས་པས། མིག་བགྲད་པ་རྣམས་ལས་ས་གཡོས་པའི་རྒྱུ། ཐམས་ཅད་སྒྲོལ་གྱི་སྦྱིན་པ་ཡིན་པར་རྟོགས་ནས། སེམས་རབ་ཏུ་དགའ་བར་གྱུར་ཏེ། དེའི་མཚན་མོ་ནམ་ལངས་བ་དང་། བརྒྱ་བྱིན་བྲམ་ཟེའི་གཟུགས་སུ་བསྒྱུར་ནས། སློངས་མོ་བ་འདྲ་བར་བྱས་ཏེ་ཐམས་ཅད་སྒྲོལ་གྱི་དྲུང་དུ་འོངས་སོ། །བྱང་ཆུབ་སེམས་དཔས་གློ་བུར་དུ་འོངས་པ་ལ་བཀུར་སྟི་བྱས་ནས། ཅི་འདོད་ཅེས་སྐབས་ཕྱེ་བ་དང་། དེ་ལ་ཆུང་མ་སླངས་སོ། །མཚོ་ཆེན་དག་ལ་ཆུ་ནི་མི་ཟད་བཞིན། །དམ་པ་རྣམས་ལ་སྦྱིན་པའི་ཆོས་མི་ཟད། །དེ་བས་ལྷ་འདྲེ་ཁྱོད་ལ་འཕགས་མ་སློང་། །བཙུན་མོ་འདི་ནི་བདག་ལ་སྩལ་བའི་རིགས། །བྱང་ཆུབ་སེམས་དཔའ་ཡིད་མི་དགའ་བ་མེད་པ་ཉིད་དུ་དེ་བཞིན་དུ་བྱའོ་ཞེས་ནས། སྦྱིན་པར་བྱས་སོ། །དེ་ནས་དེ་ན་ལག་གཡོན་མཱ་ཏྲྀ་བཟུང་། གཡས་པས་རིལ་བ་སྤྱི་བླུགས་བཟུང་ནས་ནི། །དེ་ཡི་ལག་གཡས་རྩེ་ལ་ཆུ་སྦྲེངས་ནས། །འདོད་ལྷའི་སེམས་ནི་མྱ་ངན་མེ་ཡིས་ཚིག །དེ་ཡི་རང་བཞིན་ཕན་སེམས་ཤེས་ནས་ནི། །སེམས་ཀྱང་མ་འཁྲུགས་དུས་ཀྱང་མ་དུས་ན། །སྔོན་མེད་སྡུག་བསྔལ་ཁུར་གྱིས་ནོན་གྱུར་ནས། །དེ་ལ་མིག་ཚུགས་བལྟ་ཞིང་བྲིས་བཞིན་འདུག །ལྷའི་དབང་པོ་བརྒྱ་བྱིན་གྱི་དེ་མཐོང་ནས། །སྙིང་ལ་ངོ་མཚར་རབ་ཏུ་ཆེ་བར་གྱུར་ཏེ། སེམས་དཔའ་ཆེན་པོ་དེ་ལ་བསྟོད་ནས་སྨྲས་པ། ཡ་རབས་མ་རབས་ཆོས་གཉིས་ནི། །ཨེ་མ་ཁྱད་པར་རེ་ཆེ་གེ །བདག་ཉིད་མ་སྦྱངས་པ་རྣམས་ནི། །སུས་ཀྱང་ཡིད་ཆེས་མི་ནུས་སོ། །འདོད་ཆགས་བྲལ་བར་མ་གྱུར་པས། །བུ་སྨད་རབ་ཏུ་སྡུག་པ་དང་། །དེ་ལྟར་མ་ཆགས་སྦྱིན་བྱེད་པ། །འདི་འདྲའི་རླབས་ཆེན་སུ་ལ་ཡོད། །ཁྱོད་ཀྱི་ཡོན་ཏན་ཆགས་པའི་གཏམ་དག་གིས། །ཁྱོད་ཀྱི་གྲགས་པ་ཕྱོགས་སུ་སྒྲགས་པར་ངེས། ཉི་མའི་འོད་ཀྱིས་གཞན་འོད་ཟིལ་མནན་བཞིན། །གཞན་གྱི་དཔལ་གྲགས་ཟིལ་གྱིས་ནོན་པར་གྱུར། །ཁྱོད་ཀྱི་སྤྱོད་པ་མི་ལས་འདས། །འདི་ལ་གནོན་སྦྱིན་དྲི་ཟ་དང་། །ལྟོས་འགྲོ་སུམ་བཅུ་རྩ་གསུམ་པ། བརྒྱ་བྱིན་བཅས་པར་ཡི་རང་འགྱུར། །བརྒྱ་བྱིན་གྱི་དེ་སྐད་སྨྲས་ཏེ། བདག་གི་ལུས་འོད་གསལ་བར་འདུག་པ་བསྟན་ནས། བདག་ནི་བརྒྱ་བྱིན་ལགས་སོ་ཞེས་སྦྲན་ཏེ། བྱང་ཆུབ་སེམས་དཔའ་ལ་སྨྲས་པ། ཟླ་བ་བཏང་སྟེ་ཟླ་འོད་རྣམས། །གཞན་དུ་འགྲོ་བའི་མི་རིགས་ཀྱིས། །ཁྱོད་ཀྱི་བཙུན་མོ་མཱ་ཏྲྀ་འདི། །ཁྱོ་བདག་ཉིད་ལ་བདག་འབུལ་ལོ། །བརྟན་པ་རྣམས་ནི་སླངས་ན་སྟེར། །སེང་གེའི་ཆུང་མ་ལྕེ་སྦྱང་ལ། །བྱིན་ཡང་དེ་ཡིས་ཅི་ཞིག་བྱ། དེ་ནི་སེང་གེ་ཉིད་ལ་འོས། །མཐོན་པོ་རྣམས་དང་དམན་པ་ལ། །རྒྱལ་བའི་མྱུ་གུ་འདྲ་བར་སེམས། །དེ་བས་དེ་ཡི་སྤྱོད་པ་དེས། །འཇིག་རྟེན་རྣམས་ནི་དགའ་བར་འགྱུར། །དེ་བས་བུ་དང་བྲལ་བར་མ་སེམས་ཤིག རྒྱལ་སྲིད་ཉམས་པའི་མྱ་ངན་མ་བྱེད་ཅིག །ཁྱོད་ཀྱི་ཡབ་ནི་ཚ་དབྱུག་གཉིས་དང་འགྲོགས། །ཁྱོད་ཀྱི་མགོན་བྱས་མགོན་བཅས་རྒྱལ་སྲིད་བྱེད། །དེ་སྐད་ཅེས་སྨྲས་ནས། བརྒྱ་བྱིན་དེ་ཉིད་དུ་མི་སྣང་བར་གྱུར་ཏོ། །བརྒྱ་བྱིན་གྱི་མཐུས་བྲམ་ཟེ་དེའང་བྱང་ཆུབ་སེམས་དཔའི་བུ་གཉིས་ཡུལ་ཤི་བར་ཁྲིད་དེ་སོང་ངོ་། །དེ་ནས་ཡུལ་ཤི་བི་བ་རྣམས་དང་། ཤི་བི་བའི་རྒྱལ་པོ་ཀུན་དུ་རྒྱལ་བས། བྱང་ཆུབ་སེམས་དཔའི་སྤྱོད་པ་ལ་རབ་ཏུ་སྙིང་རྗེ་བ་ཤིན་དུ་བྱ་དཀའ་བ་ཐོས་ནས། སྙིང་བརླན་པར་གྱུར་ཏེ། །བྲམ་ཟེ་ལས་བྱང་ཆུབ་སེམས་དཔའི་བུ་གཉིས་བླུས་ནས། ཐམས་ཅད་སྒྲོལ་མགུ་བར་བྱས་ཏེ། བསུ་ནས་རྒྱལ་སྲིད་བྱེད་དུ་བཅུག་གོ །དེ་ལྟར་བྱང་ཆུབ་སེམས་དཔའི་སྤྱོད་པ་ནི་ཤིན་དུ་རྨད་དུ་བྱུང་བ་ཡིན་པས། དེ་ལ་ཕྱོགས་པའི་སེམས་ཅན་ཁྱད་པར་ཅན་རྣམས་ལ་བརྙས་པའམ། གནོད་པ་མི་བྱའོ། དེ་བཞིན་གཤེགས་པའི་ཡོན་ཏན་བསྔགས་པ་དང་། བཀུར་སྟི་བསྐྱེད་དེ། དམ་པའི་ཆོས་མཉན་པ་ལའང་སྦྱར་བར་བྱའོ། །ཐབས་ཅད་སྒྲོལ་གྱི་སྐྱེས་པའི་རབས་ཏེ་དགུ་པའོ།། །།བམ་བོ་བཞི་པ།། །།བསམ་པ་དགེ་བ་རྣམས་ནི་སྡིག་པ་བྱེད་དུ་གཞུག་པར་བསླུར་མི་ཚུགས་ཏེ། དེ་བས་ན་བསམ་པ་དག་པར་བྱ་བ་ལ་འབད་བར་བྱའོ། དེ་ཡང་འདི་ལྟར་བྱང་ཆུབ་སེམས་དཔའ་རང་གི་བསོད་ནམས་ཀྱི་མཐུས་ཐོབ་པ། རྒྱལ་ཕྲན་ཐམས་ཅད་ཕྱག་འཚལ་བ། བདག་དང་གཞན་གྱི་འཁོར་ལ་སོགས་པའི་གནོད་པ་རབ་ཏུ་ཞི་བས། འཚེ་བ་མེད་པ་གདུགས་ཟླ་མེད་པ་བགོ་སྐལ་གྱི་རིམ་པས་ཐོས་པའི་མ་སྐྱོང་ཞིང་འདུག་གོ་ཞེས་གྲག་གོ །དབང་པོའི་དགྲ་ཐུལ་དེ་ནི་ས་ཡི་མགོན། །འབྲས་བུ་སྨྲས་པ་སྦྱང་ལ་མ་ཆགས་ཤིང་། དངོས་པོ་ཀུན་གྱིས་འགྲོ་ལ་ཕན་བྱེད་པ། །ཐུབ་པ་བཞིན་དུ་ཆོས་དོན་གཅིག་དུ་བྱེད། །སྐྱེ་དགུ་རྣམས་ནི་གཙོ་བོའི་རྗེས་སྤྱོད་པར། །འཇིག་རྟེན་རང་བཞིན་དེ་ཡིས་ཤེས་གྱུར་ནས། །སྐྱེ་དགུ་རྣམས་ནི་དགེ་ལ་གཟུང་བའི་ཕྱིར། །ཁྱད་པར་དུ་ནི་ཆོས་ལ་སྤྱོད་པར་གྱུར། །ནོར་ཡང་བྱིན་ཞིང་ཚུལ་ཁྲིམས་སྦྱང་བ་མཐོང་། །བཟོད་པ་བསྟེན་ཅིང་འགྲོ་བའི་དོན་ཡང་སྤྱོད། །འགྲོ་ལ་ཕན་སེམས་མཐོང་བ་ཞི་བར་སྣང་། །གཟུགས་ཅན་ཆོས་བཞིན་དེ་ནི་རྣམ་པར་མཛེས། །དེ་ནས་རེ་ཤིག་ཅིག་དེའི་མཐུས་དེའི་ཡུལ་བསྐྱངས་ཀྱང་མ་ཕན་ཏེ། སེམས་ཅན་རྣམས་ཀྱི་ལས་ཀྱི་ཉེས་པ་དང་། ལྷའི་བྲུ་ཆར་འབེབས་པའི་ལས་སུ་བསྐོས་པ་རྣམས་བག་མེད་པར་གྱུར་པའི་དབང་གིས། ཁ་ཅིག་ཏུ་ཐན་པ་བྱུང་བས་འཁྲུག་ཅིང་གནོད་པར་གྱུར་ཏོ། །དེ་ནས་རྒྱལ་པོ་དེས་བསམས་པ། འདི་ནི་བདག་གམ་སྐྱེ་དགུ་རྣམས་ཀྱི་ཆོས་ལེགས་པས་མ་སྦྱང་བས་ལན་གྱི་མ་རུང་བར་གྱུར་ཏོ་སྙམ་དུ་བློ་ངེས་པར་གྱུར་ཏོ། །སྐྱེ་དགུ་རྣམས་ལ་ཕན་པའི་བསམ་པ་ཆེ་བ་དང་། དེའི་སྡུག་བསྔལ་མི་བཟོད་པས། ཆོས་ཀྱི་དེ་ཁོ་ན་ཉིད་ལ་མཁས་པར་བཀུར་བ་མདུན་ན་འདོན་པའི་གཙོ་བོ་བྲམ་ཟེ་རྒན་པ་རྣམས་དང་། བློན་པོ་རྣམས་ལ་དེ་ལས་ཐར་བར་བྱ་བའི་ཐབས་དྲིས་སོ། །དེ་ནས་དེ་དག་གིས་མཆོད་སྦྱིན་གྱི་ཆོ་ག།རིག་བྱེད་ལས་འབྱུང་བའི་སྲོག་ཆགས་དུ་མ་གསོད་པ་འཇིགས་འཇིགས་སྐད་ཟེར་བ་བྱས་ན། ཆར་ལེགས་པར་འབབས་པར་འགྱུར་བར་བསམ་ནས། ཆོ་ག་དེ་དེ་ལ་གསོལ་ཏོ། །རྒྱལ་པོ་དེས་མཆོད་སྦྱིན་ལས་འབྱུང་བའི་ཆོ་ག་སྲོག་ཆགས་གསོད་པའི་རྒྱུ་ཤེས་ནས། སྙིང་རྗེའི་བདག་ཉིད་ཡིན་པའི་ཕྱིར་དེ་དག་གི་ཚིག་དེ་ཡིད་ལ་འབབ་བར་མ་གྱུར་ཏེ། འདུལ་བའི་རྗེས་སུ་མཐུན་པར་དེ་དག་ལ་ངོ་ཟློག་ཕོད་པའི་ཚིག་རྩུབ་པོ་མ་སྨྲས་པར། སྐབས་གཞན་གྱིས་དེ་དག་གི་གཏམ་དེ་ཁྱད་དུ་བསད་དོ། །དེ་དག་ཡང་རྒྱལ་པོ་དེ་ལ་ཆོས་ཀྱི་གཏམ་བྱ་བའི་སྐབས་རྙེད་ནས། །དེའི་བསམ་པ་ཟབ་ཅིང་བརྟག་བཀའ་བ་མ་ཤེས་ནས། མཆོད་སྦྱིན་བྱ་བའི་གྲོས་འདེབས་སོ། །རྒྱལ་པོས་བགྱི་བ་ངེས་པ་གང་ལ་ལག་པ། །ས་གཞི་ཐོབ་དང་ཡོངས་སུ་བསྐྱང་བ་སྟེ། །དེ་དག་ཁྱོད་ནི་དུས་ལས་བདའ་མི་མཛད། དེ་དག་གོ་རིམས་ཆོས་དང་བདེ་བ་བཞིན། །འཁོར་གསུམ་སྟེན་ལ་མཁས་པར་གྱུར་པ་དང་། །འབངས་ལ་ཕན་ཕྱིར་གནམ་དུ་བསྣམས་པ་དེ། །མཆོད་སྦྱིན་ཆོ་ག་མཐོ་རིས་ཐེམ་སྐས་ལ། །ཇི་ལྟར་ཁྱོད་ཐུགས་བག་མེད་དབང་དུ་གྱུར། །ཁྱོད་ཀྱི་བཀའ་ནི་རྒྱལ་པོ་གཞན་རྣམས་ཀྱིས། །འདི་ནི་དངོས་གྲུབ་མངོན་དུ་གྲུབ་ཡིན་ཞེས། །འབངས་དང་འདྲ་བར་རབ་ཏུ་གུས་ནོད་ན། མཆོད་སྦྱིན་དག་གི་གྲགས་འབར་ལེགས་པ་དག །ད་ནི་ཁྱོད་ཀྱི་མཛད་པའི་དུས་ལ་བབ། །སྦྱིན་པ་མཛད་ཅིང་སྡོམ་པ་གནས་པ་ཡིས། །རྟག་པར་ཁྱོད་ནི་དབང་བསྒྱུར་ལགས་གྱུར་ཀྱང་། །འོན་ཀྱང་རིག་བྱེད་གྲགས་པའི་མཆོད་སྦྱིན་གྱིས། །ལྷ་ཡི་བུ་ལོན་བྲལ་བར་མཛད་པའི་རིགས། མཆོད་སྦྱིན་ལེགས་པར་བགྱིས་པས་ལྷ་མཉེས་ན། ཆར་པ་འབབ་པས་འབྱུང་པོ་མགུ་བར་འཕྱིད། །དེ་བས་འབངས་དང་བདག་ལ་ཕན་པའི་ཕྱིར། །གྲགས་པར་འགྱུར་བའི་མཆོད་སྦྱིན་ཆོ་ག་མཛོད། དེས་བསམས་པ། ཀྱེ་མའོ་གཞན་གྱི་དྲིང་ལ་འཇོག་ཅིང་། བློ་ཆུང་ལ། དཔྱོད་མི་ནུས་པ། ཆོས་ཙམ་ལ་དགའ་ཞིང་དད་པ་སྐྱེ་བའི་འགྲོ་བ་འདི་དག་ནི་ཤིན་དུ་མ་ལེགས་པར་བསྟན་ཏོ། གང་ན་འདི་ལྟར། འཇིག་རྟེན་དག་ན་གང་ལ་སྐྱབས་བཙལ་བ། །དེ་དག་བསད་པས་ཆོས་སུ་འགྱུར་བ་ནི། དེ་ཡིས་བསྟན་པ་སྐྱེ་བོ་ལམ་ངན་སོང་། །ངན་སོང་མི་བདེ་དོག་པའི་ནང་ན་འཁོད། ཕྱུགས་རྣམས་བསད་པ་ཆོས་འགྱུར་ཞིང་། །ལྷ་ཡི་འཇིག་རྟེན་སྐྱེ་བ་དང་། །ལྷ་ཡང་མཉེས་པར་འགྱུར་བ་དག །ཅི་ལྟ་བུར་ན་དད་པར་འགྱུར། །ཕྱུགས་རྣམས་བསད་པ་བསྔགས་ཀྱི་མཐུས། །མཐོ་རིས་འགྲོ་ཕྱིར་དེ་བས་དེ་བསད་ན། །ཆོས་སུ་འགྱུར་ཞེས་ཟེར་བ་དེ་ཡང་བརྫུན། །གཞན་གྱིས་བྱས་པ་ཕ་རོལ་སུ་ཞིག་འཐོབ། །ལོག་པར་སྤྱོད་ལས་ཡིད་ནི་མ་བཟློག་ཅིང་། །དགེ་བའི་ལས་ལ་ངེས་པར་མ་བྱས་པའི། །ཕྱུགས་རྣམས་མཆོད་སྦྱིན་དག་ལ་བསད་གྱུར་ཀྱང་། བདག་བྱས་གཞི་མེད་ཇི་ལྟར་མཐོ་རིས་སྐྱེ། མཆོད་སྦྱིན་ལ་བསད་མཐོ་རིས་འགྲོ་ན་ནི། །བྲམ་ཟེ་བདག་ཉིད་ཕྱུགས་སུ་བསྒྱུར་ལ་རབ། གང་ཕྱིར་ཚུལ་འདི་གང་ནའང་མི་སྣང་བས། །དེ་ལྟར་དེ་དག་ཚིག་ནི་སུ་ཞིག་ཉན། མཚུངས་མེད་མཐུ་བསུང་རོ་དང་གཟི་ལྡན་པའི། བདུད་རྩི་ཟས་མཆོག་ལྷ་མོས་ཕུལ་བ་དག །བོར་ནས་ཕྱུགས་བསད་ཤ་ཁྲག་ལ་སོགས་པས། །ལྷ་རྣམས་མགུ་བར་འགྱུར་བ་ག་ལ་སྲིད། རྒྱལ་པོ་དེས་ད་ནི་འདིར་འདི་ལྟར་བྱ་དགོས་སོ་སྙམ་དུ་བསམས་ནས། མཆོད་སྦྱིན་བྱ་བ་ལ་མོས་པ་འདྲ་བར་བྱས་ཏེ། དེ་དག་གི་ཚིག་དེ་མཉན་ནས། དེ་དག་ལ་སྨྲས་པ། ཁྱེད་ཅག་འདི་ལྟར་བདག་ལ་ཕན་པར་སེམས་པ་ནི། བདག་མགོན་དང་བཅས་ཤིང་ཕན་འདོགས་པ་དང་ལྡན་པར་གྱུར་ཏོ། །དེ་བས་ན་བདག་ནི་མི་སྟོང་གི་མཆོད་སྦྱིན་བྱེད་འདོད་ཀྱིས་ཇི་ལྟར་བསྐོས་པའི་བློན་པོ་རྣམས་དེའི་ཡོ་བྱད་སྦྱོར་དུ་ཆུག་ཅིག །བཀང་ས་རྩིག་ཏུ་རུང་བའི་ས་ཕྱོགས་དང་། དེ་རང་མཐུན་པའི་ཚེས་གྲངས་དང་བྱེད་པ་དང་ཡུད་ཙམ་དང་། རྒྱུ་སྐར་དང་སྦྱོར་བའང་རྟོགས་ཤིག །དེ་ནས་དེ་ལ་མདུན་ན་འདོན་གྱི་སྨྲས་པ། འདོད་པའི་དོན་གྲུབ་པར་བགྱི་བའི་སླད་དུ། །རྒྱལ་པོ་ཆེན་པོ་རེ་ཤིག་ཁྲུས་མཛོད་ཅིག་དང་། མཆོད་སྦྱིན་ཅིག་བགྱིས་ལགས་ནས། སླད་མ་རྣམས་རིམ་གྱི་བརྩམ་མོ། །ཅིག་ཅར་མི་སྟོང་བཟུང་ན། ཁྱོད་ཀྱི་འབངས་རྣམས་གདོན་མི་ཟ་བར་ཡིད་འབྱུང་བར་འགྱུར་རོ། །བྲམ་ཟེ་རྣམས་ཀྱི་ཀྱང་དེ་མད་དོ་ཞེས་སྨྲས་སོ། །རྒྱལ་པོ་དེས་དེ་དག་ལ་སྨྲས་པ། ཁྱེད་འབངས་རྣམས་འཁྲུག་པར་གྱུར་དུ་མ་དོགས་ཤིག་དང་། བདག་གིས་ཅི་ནས་ཀྱང་འབངས་རྣམས་ཡིད་དབྱུང་བར་མི་འགྱུར་བ་དེ་ལྟར་བྱའོ། དེ་ནས་རྒྱལ་པོ་དེས། གྲོང་ཁྱེར་གྱི་མི་རྣམས་བསྡུས་ནས་སྨྲས་པ། ད་ནི་མི་སྟོང་གི་མཆོད་སྦྱིན་བྱེད་འདོད་ན། ཉེས་པ་མེད་པར་མི་འདོད་བཞིན་དུ། སུ་ཡང་ཕྱུགས་སུ་བྱར་ངས་མི་ནུས་ཀྱི། དེ་བས་ན་དེང་ཕན་ཆད་ཁྱེད་ཅག་ལས་གང་དང་གང་ཚུལ་དང་བཀའ་ཁྲིམས་ལས་འགལ་བར་བྱེད་ཅིང་། ངའི་བཀའ་གཅོག་པ་དེ་དང་དེ་དག །ངའི་རྟོག་ཆེན་གྱི་མིག་བག་མེད་པའི་གཉིད་ཀྱིས་མ་ལོག་ཅིང་དྲི་མ་མེད་པས་བརྟག་པར་བྱའོ། རང་གི་རིགས་ལ་གནོད་པ་དང་། ཡུལ་ན་གནོད་པ་བྱེད་པ་དག་ཡོད་ན་ངས་ཕྱུགས་ཀྱི་གོ་ར་བཟུང་བར་ཁྱེད་ཀྱིས་ཤེས་པར་གྱིས་ཤིག །དེ་ནས་དེ་དག་གི་ནང་གི་གཙོ་བོ་རྣམས་ཀྱིས་ཐལ་མོ་སྦྱར་ཏེ་དེ་ལ་སྨྲས་པ། ཁྱོད་ཀྱི་སྤྱོད་པ་ཐམས་ཅད་འབངས་ལ་ཕན་པར་གཞོལ། །མི་རྗེ་ལྷས་མཛད་དེ་ལ་འགལ་བར་ག་ལ་བགྱིད། །ཁྱོད་ཀྱི་སྤྱོད་ལ་ཚངས་པའང་རྗེས་སུ་ཡི་རང་འོས། ཁྱོད་ནི་ལེགས་པ་ཚད་མའི་ནང་ན་ཚད་མ་མཆོག །ལྷ་ཅིག་དགྱེས་པ་གང་ལགས་པ། །བདག་ཅག་ཀུན་ཀྱང་དེ་ལ་དགའ། །འོ་སྐོལ་དགྱེས་ཤིང་སྨོན་པ་ལས། །དགྱེས་པ་གུད་ན་གཞན་མ་མཆིས། དེ་ལྟར་གྲོང་ཁྱེར་གྱི་འབངས་རྣམས་ཀྱིས་བཀའ་སྩལ་པ་ཉན་པ་དང་། རྒྱལ་པོ་དེས་བློན་པོ་ཐུགས་ཆེས་པ་རྣམས་སྐྱེ་བོ་མང་པོས་མཐོང་བར་འགྱུར་བའི་ཡོ་ལང་ཆེན་པོ་དང་བཅས་པར་ལྗོངས་དང་། གྲོང་ཁྱེར་རྣམས་སུ་སྡིག་བྱེད་པའི་མི་རྣམས་འཛིན་དུ་བཀྱེའོ། ཁོ་ར་ཁོར་ཡུག་ཏུ་ཡང་ཉིན་རེ་བཞིན་འདི་སྐད་བསྒོའོ། །བརྟན་ཞིག་གཙང་ལ་ཚུལ་ཁྲིམས་ནོར་ལྡན་མི་མཆོག་ལ། རྒྱལ་པོ་མི་འཇིགས་སྦྱིན་པ་མི་འཇིགས་སྦྱིན་པར་མཛད། །འབངས་ལ་ཕན་ཕྱིར་ཚུལ་མིན་བྱེད་པའི་མི་རྣམས་ནི། ཕྱུགས་སུ་བསྒྱུར་བ་སྟོང་གིས་མཆོད་སྦྱིན་མཛད་པར་བཞེད། །དེ་བས་དེ་རིང་ཕྱིན་ཆད་གང་ཞིག་ཚུལ་མིན་རྗེས་སྤྱོད་ཅིང་། །རྒྱལ་པོའི་བཀའ་ལུང་ས་སྐྱོང་བློན་པོས་བཀུར་ཏང་འགལ་བྱེད་པ། །དེ་ནི་རང་གི་ལས་ཀྱི་མཆོད་སྦྱིན་ཕྱུགས་སུ་བྱས་གྱུར་ནས། །མཆོད་སྡོང་ལུས་བཏགས་གྲམ་ཞིང་བསྐམས་པ་སྐྱེ་བོས་མཐོང་བར་འགྱུར། །དེ་ནས་ཡུལ་དེ་ན་གནས་པའི་མི་རྣམས་ཀྱི་མཆོད་སྦྱིན་གྱི་ཕྱུགས་སུ་བྱ་བའི་ཕྱིར། རྒྱལ་པོ་ཚུལ་བཞིན་མི་བྱེད་པའི་མི་ཚོལ་དུ་འཇུག་པ་དང་། ཉིན་རེ་བཞིན་འཇིགས་འཇིགས་སྐད་བསྒོ་བ་དེ་ཐོས་པ་དང་། རྒྱལ་པོའི་མི་རྣམས་སྡིག་བྱེད་པའི་མི་བཟུང་བའི་ཕྱིར་ཐམས་ཅད་དུ་ཚོལ་ཞིང་འོང་བ་མཐོང་ནས། ཚུལ་བཞིན་མ་ཡིན་པར་བྱེད་པ་ལ་དགའ་བ་ནི་བཏང་། ཚུལ་ཁྲིམས་དང་སྡོམ་པ་ཡང་དག་པར་བླང་བ་ལ་ནི་འབད། དགྲར་འཛིན་པ་ལས་ནི་ཕྱིར་ཕྱོགས། ཅིག་ལ་ཅིག་དགའ་བ་དང་གུས་པར་ནི་བྱེད། འཐབ་པ་དང་རྩོད་པ་ནི་རབ་ཏུ་ཞི། བླ་མའི་ངག་ཉན་ཅིང་རྗེས་སུ་མཐུན་པར་ནི་བྱེད། བགོ་བཤའ་བྱེད་པ་ལ་ནི་བག་ཚ་བ་མེད། གློ་བུར་དུ་འོངས་པ་ལ་ནི་དགའ། དུལ་བ་དང་གུས་པར་བྱ་བ་ལ་ནི་འབད་བར་གྱུར་ཏེ། རྫོགས་ལྡན་གྱི་དུས་བཞིན་དུ་གྱུར་ཏོ། །ཤི་བས་འཇིགས་ཤིང་འཇིག་རྟེན་ཕ་རོལ་སེམས། །རིགས་ཀྱི་ང་རྒྱལ་གྲགས་པ་བསྲུང་བ་དང་། །བསམ་པ་དག་ཅིང་ངོ་ཚ་ཤེས་པ་ཡིས། །སྐྱེ་བོ་རང་གི་ཚུལ་ཁྲིམས་དྲི་མེད་བརྒྱན། །ཇི་ལྟ་ཇི་ལྟར་སྐྱེ་བོ་ཆོས་འབད་པ། །དེ་ལྟ་དེ་ལྟར་བསྲུངས་མ་ཁྱད་པར་དུ། །ཚུལ་བཞིན་མི་བྱེད་སྐྱེ་བོ་ཚོལ་བར་གྱུར། དེ་ནས་ཆོས་ལས་སུ་ཡང་གཡོས་མ་གྱུར། །རང་གི་ཡུལ་ནི་དེ་ལྟར་གྱུར་ཐོས་ནས། །རྒྱལ་པོ་དགའ་བའི་ཁྱད་པར་བརྒྱན་པ་ནི། །དགའ་བའི་གཏམ་སྙན་རྒྱ་ཆེར་བསྒྲགས་པ་ཡིས། །བློན་པོ་མགུ་བར་བྱས་ནས་བཀའ་སྩལ་པ། །ངག་ནི་འབངས་རྣམས་བསྲུང་བར་རབ་ཏུ་སེམས། །དེ་རྣམས་ཀུན་ཀྱང་ད་ནི་སྦྱིན་གནས་གྱུར། །ང་ནི་མཆོད་སྦྱིན་བྱེད་འདོད་བཅས་བསམས་ནས། །མཆོད་སྦྱིན་ཕྱིར་ནི་ནོར་རྫས་བསགས་པ་ནི། །གང་ཞིག་བདེ་བ་བསྐྱེད་པའི་ནོར་གང་འདོད། །ང་ཡི་དྲུང་ནས་དེ་དག་ཅི་བདེར་ཁྱེར། །འདི་ལྟར་ང་ཡི་ཡུལ་ནི་དབྱེན་སྤྱོ་བའི། །དབུལ་བ་ཅི་ནས་ཡུལ་ན་མེད་པར་གྱུར། །འབངས་རྣམས་བསྲུང་བར་སེམས་པ་ང་འདུག་ཅིང་། །གྲོགས་ལྡན་ཡོ་བྱད་ཕུན་སུམ་ཚོགས་བཞིན་དུ། །སྐྱེ་བོ་ཕོངས་བྱེད་ང་ནི་མི་བཟོད་པ། །ང་ཡི་སེམས་ནི་ཡང་ཡང་བསྲེགས་པ་བཞིན། །དེ་ནས་རྒྱལ་པོ་དེའི་བློན་པོ་རྣམས་ལེགས་སོ་སྙམ་ནས་དེའི་ཚིག་མཉན་ཏེ། གྲོང་དང་། ལྗོངས་དང་། གྲོང་ཁྱེར་ཐམས་ཅད་དང་། ལམ་གྱི་ངལ་བསོ་བའི་ས་ཕྱོགས་ཐམས་ཅད་དུ་སྦྱིན་གཏོང་གི་ཁང་པ་བརྩིགས་ནས། རྒྱལ་པོས་ཇི་སྐད་བཀའ་སྩལ་བ་བཞིན་དུ། ཉིན་རེ་བཞིན་འཕོངས་པ་རྣམས་ཅི་འདོད་པའི་ནོར་གྱིས་མགུ་བར་བྱས་སོ། །དེ་ནས་སྐྱེ་བོ་དེ་དག་དབུལ་བོར་ཏེ། །ས་བདག་ལས་ནི་མཐུན་པར་ནོར་ཐོབ་ནས། །རྣམ་མང་གོས་དང་སྣ་ཚོགས་རྒྱན་གྱིས་བརྒྱན། །དགའ་སྟོན་བཞིན་དུ་བཟང་པོས་རྒྱས་པར་གྱུར། །ཕོངས་པས་རབ་ཏུ་དགའ་བའི་བསྟོད་པའི་ཚིག །རྒྱལ་པོའི་གྲགས་པ་ཕྱོགས་སུ་རྒྱས་གྱུར་པ། །མཚོ་ནང་པདྨའི་གེ་སར་ཕྱ་མ་དག །རླབས་ཀྱིས་བསྐྱོད་དེ་ཀུན་དུ་ཁྱབ་པ་བཞིན། །དེ་ལྟར་རྒྱལ་པོའི་ཚུལ་བཟང་ཡོན་ཏན་བཞིན། སྐྱེ་བོ་མ་ལུས་ལེགས་པར་སྤྱོད་གྱུར་པས། །དགེ་བ་ཆེན་པོས་གནོད་པ་རྣམས་ཀྱི་མཐུ། །ཟིལ་གྱིས་མནན་ནས་ཆགས་མེད་ཟད་པར་གྱུར། །དུས་ཚིགས་རྣམས་ཀྱང་དུས་བཞིན་མཐུན་པར་བདེ། །རྒྱལ་པོ་བཞིན་དུ་ཆོས་ལ་གཞོལ་བར་གྱུར། །ས་གཞི་འབྲུ་རྣམས་སྣ་ཚོགས་སྐྱེ་བར་གྱུར། །ཆུ་གཞི་ཆུ་གཙང་སྔོན་པོ་པདྨར་བཅས། །འགྲོ་བ་ནད་ཆེན་དག་གིས་མི་འདེབས་གྱུར། །སྨན་རྣམས་ཡོན་ཏན་རབ་ཏུ་ཆེ་བར་གྱུར། །དུས་ཚིགས་དབང་གིས་བསེར་བུ་ངད་ཀྱང་ལྡང་། གཟའ་རྣམས་ལམ་ནི་བཟང་པོར་རྒྱུ་བར་གྱུར། །གཞན་གྱི་དམག་གི་འཇིགས་པ་མེད་པར་གྱུར། །ཕན་ཚུན་གནོད་དང་གནམ་གྱི་འཇིགས་པའང་མེད། །སྐྱེ་བོ་ངེས་པར་ཆོས་སྤྱོད་དུལ་གྱུར་བས། །རྫོགས་ལྡན་དུས་བཞིན་ཕུན་སུམ་ཚོགས་པར་གྱུར། །དེ་ནས་རྒྱལ་པོས་ཆོས་ཀྱི་མཆོད་སྦྱིན་དེ་ལྟར་བྱས་པ་དང་། སྐྱེ་བོ་ཕོངས་པ་རྣམས་ཀྱི་སྡུག་བསྔལ་དང་གནོད་པ་ནི་རབ་ཏུ་ཞི་བར་གྱུར། །ས་གཞི་ནི་སྐྱེ་བོ་རབ་ཏུ་དགའ་བ་མང་པོས་རབ་ཏུ་གང་ཞིང་མངོན་པར་མཐོ་བ་ཉམས་དགའ་བར་ནི་སྣང་། འཇིག་རྟེན་པ་རྣམས་ནི་རྒྱལ་པོའི་ཤིས་པར་བརྗོད་པ་འབའ་ཞིག་ཁ་ཏོན་དུ་བྱེད། །རྒྱལ་པོའི་གྲགས་པ་ནི་ཐམས་ཅད་དུ་རྒྱས་པར་གྱུར་པ་དང་། བློན་པོའི་གཙོ་བོ་གཅིག་གཅིག་ཡིད་རབ་ཏུ་དགའ་བར་གྱུར་ནས། རྒྱལ་པོ་ལ་འདི་སྐད་ཅེས་གསོལ་ཏོ། །མཆོག་དང་འབྲིང་དང་ཐ་མ་ཡི། །དགོས་པ་རྟག་ཏུ་གཟིགས་པས་ན། དབང་ཕྱུག་རྣམས་ཀྱི་བློ་དག་ནི། །གོང་ནས་གོང་དུ་སྤྱོད་པར་འགྱུར། །ཞེས་བྱ་བ་འདི་ནི་ཤིན་ཏུ་ལེགས་པར་སྨྲས་པ་ལགས་སོ། །འདི་ལྟར་ལྷའི་ཞལ་སྔ་ནས་ཕྱུགས་དགུམ་པའི་སྐྱོན་མ་མཆིས་པར་ཆོས་ཀྱི་མཆོད་སྦྱིན་གྱིས་འབངས་རྣམས་འཇིག་རྟེན་གཉིས་ག་ལ་ཕན་པར་བགྱིས་སོ། །གནོད་པ་དང་དབུལ་བའི་སྡུག་བསྔལ་ཡང་རབ་ཏུ་ཞི་བར་གྱུར་ཏོ། །མང་དུ་གསོལ་ཡང་ཅི་འཚལ་ཏེ། འབངས་དེ་དག་ནི་སྐལ་བ་དང་ལྡན་པ་ལགས་སོ། །ཟླ་བ་བཞིན་དུ་སྐུ་ལ་ཀྲྀཥྞ་ཛི་ན་མ་གསོལ་ཅིང་། །དབང་བསྐུར་གདམས་པས་རང་བཞིན་མཛེས་པའི་སྤྱོད་པ་ཡོངས་མ་ཞུམ། །སྤྱི་བོ་གདུགས་དང་འདྲ་བའི་དབུ་མཛེས་བསྐྱིལ་བ་དེ་བཞིན་གནས། །ཁྱོད་ཀྱི་གཏོང་བས་བརྒྱ་བྱིན་གྲགས་པ་རྨད་བྱུང་ཟིལ་གྱིས་ནོན། །འཇིག་རྟེན་མཆོད་སྦྱིན་ཕལ་ཆེར་གསོད་ཅིང་དམན། །འབྲས་བུ་འཚལ་བས་མཆོད་སྦྱིན་མ་ལགས་ཀྱི། །ཁྱོད་ཀྱི་མཆོད་སྦྱིན་གྲགས་པའི་རྒྱན་གྱིས་བརྒྱན། །ཚུལ་ཁྲིམས་སྐྱོན་མེད་ཡིད་དུ་འོང་དང་མཐུན། །གང་རྣམས་སྐྱོབ་པ་ཁྱོད་བཞུགས་པའི། །སྐྱེ་དགུ་དེ་རྣམས་སྐལ་དང་ལྡན། །བུ་རྣམས་ལ་ཡང་ཕ་དག་ནི། །ངེས་པར་དེ་ལྟར་སྐྱོབ་མི་འགྱུར། །གཞན་ཞིག་གིས་སྨྲས་པ། སྦྱིན་ཞེས་བྱ་བའི་ནོར་ཡོད་སྟེར་བའི་སྐྱེ་བོ་དེ་ཡི་དབང་དུ་གྱུར། །ཚུལ་ཁྲིམས་བསྲུང་བའང་འཇིག་རྟེན་བདེ་ལ་ཕྱོགས་ཤིང་མཐོ་རིས་འདོད་ལ་ཆགས། །གཞན་གྱི་དོན་བསྒྲུབ་ཕྱིར་ནི་དེ་གཉིས་དེ་བཞིན་སྤྱོད་པ་གང་ལགས་པ། །མཁས་པ་མི་ལགས་སེམས་སྟོབས་མི་ལྡན་བ་ལ་དེ་དག་ཡོང་མ་མཆིས། །དེ་ལྟ་བས་ན་བསམ་པ་དགེ་བ་རྣམས་ནི་སྡིག་བྱེད་དུ་གཞུག་པར་བསྐུར་མི་ཚུགས་པས་བསམ་པ་དག་པར་བྱ་བ་ལ་འབད་པར་བྱའོ། །དེ་བས་འབངས་ལ་ཕན་བརྩོན་པ། ལེགས་དང་གྲགས་དང་བདེ་བ་འཐོབ། །དེ་བས་རྒྱལ་པོའི་ཚུལ་དེ་ལས། །འགལ་བར་བྱ་བའི་ཡོང་མི་རིགས། །དེ་བཞིན་དུ་རྒྱལ་པོའི་གདམ་ངག་ལའང་བརྗོད་པར་བྱའོ། ཆོས་ལ་གོམས་པར་བྱས་པ་ནི་སྐྱེ་དགུ་རྣམས་ལོངས་སྤྱོད་ཆེ་བར་འགྱུར་བས་ན། ལོངས་སྤྱོད་ཆེ་བར་འདོད་པས་ཆོས་ཀྱི་རྗེས་སུ་འབྲང་བར་བྱའོ། །ཞེས་དེ་ལྟར་ཡང་སྦྱར་བར་བྱའོ། །མངོན་པར་མཐོ་བ་ནི་སྦྱིན་པ་དང་དུལ་བ་དང་སྡོམ་པ་ལ་གནས་པས་འཐོབ་པར་འགྱུར་གྱི། ཕྱུགས་བསད་པས་ནི་ནམ་ཡང་མངོན་པར་མཐོ་བར་མི་འགྱུར་རོ། །དེ་བས་དེ་འདོད་པའི་སྦྱིན་པ་ལ་སོགས་པ་ལ་འབད་པར་བྱའོ་ཞེས་དེ་ལྟར་ཡང་སྦྱར་བར་བྱའོ། བཅོམ་ལྡན་འདས་དེ་ནི་སྐུ་ཚེ་སྔ་མ་ལའང་འཇིག་རྟེན་གྱི་དོན་སྤྱོད་པ་ལའང་ཐུགས་གཞོལ་བ་ཡིན་ནོ་ཞེས་དེ་བཞིན་གཤེགས་པའི་ཡོན་ཏན་བསྔགས་པ་ལའང་བརྗོད་བར་བྱའོ། །མཆོད་སྦྱིན་བྱེད་ཀྱི་སྐྱེས་པའི་རབས་ཏེ་བཅུ་པའོ།། །།སྡོམ་ལ། སྟག་མོ་ཤི་བི་ཀོ་སལ་བདག །ཚོང་དཔོན་གཉིས་དང་རི་བོང་དང་། ཨ་ག་སྟི་དང་ཤ་བྱིན་དང་། ཐམས་ཅད་སྒྲོལ་དང་མཆོད་སྦྱིན་བྱེད།། །།བདག་ཉིད་ཆེན་པོ་རྣམས་ནི་རྒུད་པར་གྱུར་ཏམ། དབང་ཕྱུག་ཕུན་སུམ་ཚོགས་པར་གྱུར་ཀྱང་རུང་སྟེ། སེམས་ཅན་རྣམས་ལ་སྙིང་བརྩེ་བ་ལྷོད་པར་མི་འགྱུར་རོ། །དེ་ཡང་འདི་ལྟར་བྱང་ཆུབ་སེམས་དཔའ་ཡུན་རིང་པོ་ནས་བསོད་ནམས་སྤྱོད་པ་ལ་རབ་ཏུ་གོམས་ཤིང་སྦྱིན་པ་དང་དུལ་བ་དང་སྡོམ་པ་དང་། སྙིང་རྗེ་ལ་འདྲིས་པར་གྱུར་པ། གཞན་ལ་ཕན་པར་སྤྱོད་པ་ཁྱད་པར་ཅན་ལ་ངེས་པར་སྤྱོད་པ་དེ། རེ་ཤིག་ཅིག་ལྷ་རྣམས་ཀྱི་དབང་པོ་བརྒྱ་བྱིན་དུ་གྱུར་ཏོ་ཞེས་གྲག་གོ །ལྷ་དབང་དཔལ་ནི་དེ་ལ་བརྟེན་བཅས་པས། གཟི་བྱིན་ཆེན་པོ་ལྷག་པར་མཛེས་གྱུར་པ། །ཡང་ཐོག་རྡོ་ཐལ་གསར་དུ་བསྐུལ་བ་ལ། །ཟླ་བའི་འོད་ཟེར་བྱུང་བ་གསལ་བ་བཞིན། །གང་ཕྱིར་ལྷ་མ་ཡིན་རྣམས་ཚམ་ཚོམ་མེད་པར་ནི། ཕྱོགས་ཀྱི་གླང་ཆེན་མཆེ་བ་ལྟོ་བས་ཟེར་འོང་བ། །སྐལ་བ་ཆེ་བས་བདེ་བ་ཐོབ་པའི་དཔལ་དེ་ནི། །དེའི་སྙིང་དྲེགས་པའི་དྲི་མ་ཅན་དུ་བྱེད་མ་གྱུར། དེ་ལྷའི་ཡུལ་དང་མིའི་ཡུལ་ལེགས་པར་བསྐྱངས་པ་ལས་གྱུར་པའི་གྲགས་པ་ཕུན་སུམ་ཚོགས་པ་འཇིག་རྟེན་ཐམས་ཅད་ཀྱི་མཐའ་ཀླས་པ། རྨད་དུ་བྱུང་བའི་དཔལ་དེ་ལྷ་མ་ཡིན་རྣམས་ཀྱིས་མ་བཟོད་ནས། གླང་པོ་ཆེ་དང་ཤིང་རྟ་དང་། རྟ་པ་དང་། རྐང་ཐང་གི་དམག་བཤམས་པ་ཆས་པ་རབ་ཏུ་འཇིགས་འཇིགས་ལྟར་སྣང་བ། སྒྲ་འཇིགས་འཇིགས་སྐད་སྒྲོགས་པས་རྒྱ་མཚོ་འཁྲུགས་པར་བྱེད་པ། །མཚོན་ཆ་དང་གོ་ཆ་དྲི་མ་མེད་པར་ཕྱིས་པ་འབར་འབར་ལྟར་འདུག་པ། མིག་མི་བཟོད་པའི་དཔུང་གི་ཚོགས་ཆེན་པོ་དང་བཅས་ཏེ། དེ་ལ་དམག་རྒོལ་དུ་ལྷགས་སོ། །ཆོས་ཀྱི་བདག་ཉིད་ཡིན་ཡང་། དེ་ལ་གཞན་བསྔོ་བ། རོལ་པའི་བགེགས་འགྱུར་ཡིད་འབྱུང་འགྲོ་བ་འཇིགས་པར་འགྱུར། །གཟི་བརྗིད་ཅན་གྱི་ཚུལ་བཞིན་བྱ་བའི་རིགས་པས་ན། །སྙིང་ནི་དམག་དྲང་གཡེངས་ལ་མངོན་པར་ཕྱོགས་པར་གྱུར། དེ་ནས་སེམས་དཔའ་ཆེན་པོ་དེ་གསེར་གྱི་ཤིང་རྟ་དམ་པ། རྟ་བཟང་པོ་སྟོང་དང་སྦྱར་བ། གོས་བཟང་པོ་འོས་པས། བ་དན་མཛེས་པ་ཕྱར་བའི་རྒྱལ་མཚན་བསྒྲེང་བ། རིན་པོ་ཆེ་སྣ་ཚོགས་ཀྱི་འོད་གསལ་བར་སྣང་བ། ལུས་འབར་བ། རྒྱན་གདགས་པའི་གོ་རིམས་ངེས་པར་བྱས་པ། ངོས་གཉིས་མཚོན་ཆ་རྣོན་པོ་རྣམ་པ་སྣ་ཚོགས་འབར་བས་མཛེས་པར་བྱས་པ། ལྷའི་གོས་དཀར་པོ་ཅན་གྱི་སྟེང་དུ་འདུག་ནས། རྟ་དང་། གླང་པོ་ཆེ་དང་། ཤིང་རྟ་དང་། རྐང་ཐང་རྣམ་པ་སྣ་ཚོགས་དང་ལྡན་པའི་ལྷའི་དམག་གི་དཔུང་ཆེན་པོས་ཡོངས་སུ་བསྐོར་ནས། ལྷ་མ་ཡིན་གྱི་དམག་གི་ཚོགས་དེ་རྒྱ་མཚོའི་འགྲམ་དུ་ཐུག་པར་བསུའོ། །དེ་ནས་དེར་ནི་གཡུལ་བསྲེས་པ། སྔར་མ་རྣམས་ནི་སྐྲག་པར་བྱེད། །ཕན་ཚུན་མཚོན་འདེབས་ཕྱེ་མར་ལྷགས། །གོ་ཆ་རྣམས་ནི་རལ་བར་གྱུར། ང་ནི་འདི་ན་འདུག་བཞིན་དུ། །མཐོང་ཞིང་ཐར་པར་ག་ལ་འགྱུར། །ཐོབ་ཤིག་ད་ནི་མེད་ཟིན་ཏོ། །དེ་ལྟར་ཕན་ཚུན་དམྱལ་རྡོར་གྱུར། །དེ་ནས་མཚོན་ཆ་འཁྲུགས་པ་ཡི། །སྒྲ་ཆེན་གཡུལ་ནི་བསྲེས་པ་དང་། རྔ་བརྡུངས་སྒྲ་ནི་གྲག་པ་ཡིས། །ནམ་མཁའི་ངོས་ནི་རལ་བ་བཞིན། །བྲག་ལྟར་འཇིགས་པའི་གླང་ཆེན་དག །ཕན་ཚུན་འཐབ་མོ་འགྱེད་པ་ཡི། །རྡུལ་གྱི་དྲི་ནི་མི་བཟོད་པས། །དུས་མཐའི་རླུང་གིས་གཡོས་པ་བཞིན། །གློག་ལྟར་འགྱུར་བའི་བ་དན་ཅན། །ཤིང་རྟའི་སྒྲ་ཆེན་གྲག་པ་ནི། །ཕྱོགས་རྣམས་ཀུན་དུ་ཁྱབ་གྱུར་པ། །སྤྲིན་ཆེན་གློ་བུར་ལངས་པ་བཞིན། །ཕན་ཚུན་མདའ་རྣམས་འཕངས་པ་ཡིས། །ལྷ་དང་ལྷ་མིན་དཔའ་བོ་དང་། །གདུགས་དང་རྒྱལ་མཚན་གོ་ཆ་དང་། །ཅོད་པན་དག་ནི་འགྱེལ་བར་གྱུར། །དེ་ནས་ལྷ་མིན་མདས་འཕངས་བདས་པ་དང་། །ལྷ་དབང་དཔུང་ནི་འཇིགས་པས་བྱེད་པར་གྱུར། །དགྲ་ཡི་དཔུང་ནི་ཤིང་རྟས་རྣམ་བཅིལ་ནས། །ལྷ་དབང་གཅིག་པུ་གཡུལ་ངོར་ཐེན་པར་གྱུར། །དེ་ནས་ལྷ་མ་ཡིན་གྱི་དཔུང་རབ་ཏུ་དགའ་བས་ཤིན་དུ་བདོ་བར་གྱུར་ཏེ། ཅ་ཅོའི་སྒྲ་ཆེན་པོ་སེང་གེའི་སྒྲ་བཞིན་སྒྲོགས་པ་མཐོང་བ་དང་། ལྷའི་དབང་པོའི་ཁ་ལོ་པ་མ་ཏ་ལིས། བདག་ཅག་གི་དཔུང་བྲོས་པར་གྱུར་པ་མཐོང་ནས། ད་ནི་སླར་ལྡོག་པའི་དུས་ལ་བབ་པོ་སྙམ་ནས། ལྷའི་དབང་པོའི་ཤིང་རྟ་སླར་བཟློག་གོ །དེ་ནས་ལྷའི་དབང་པོ་བརྒྱ་བྱིན་གྱི་ཤིང་ཤཱལ་མ་ལཱི་ལ་ནམ་མཁའ་ལྡིང་གི་ཚང་བཅས་པ་དག་ཅིག །ཤིང་རྟ་དྲངས་པའི་གཉའ་ཤིང་གི་རྩེ་མོས་ཕོག་པར་འགྱུར་བའི་ལམ་དུ་བབ་པར་མཐོང་ངོ་། །མཐོང་མ་ཐག་ཏུ་སེམས་སྙིང་རྗེ་ལ་དམིགས་ནས། ཁ་ལོ་པ་མཱ་ཏ་ལི་ལ་འདི་སྐད་ཅེས་སྨྲས་སོ། །ཤཱལ་མ་ལཱིའི་ཤིང་ལ་བྱ་ཚང་དག །བཅས་པའི་ནང་ན་བྱ་ཕྲུག་མ་ཚར་བ། །འཁོད་པ་འདི་དག་ཤིང་རྟའི་གཉའ་ཤིང་གིས། །ཕོག་ནས་མི་ལྟུང་བར་ནི་ཤིང་རྟ་དྲོངས། མཱ་ཏ་ལིས་སྨྲས་པ། འཕགས་པ་ལྷ་མ་ཡིན་གྱི་དམག་འདི་དག་ད་ཅུང་སླར་མི་ལྡོག་གོ །བརྒྱ་བྱིན་གྱིས་སྨྲས་པ། འོ་ན་ཅི་ཉེས། ནམ་མཁའ་ལྡིང་གི་ཚང་འདི་དག་ལས་ལེགས་པར་ཟུར་ཅིག་ལེགས་པར་ཟུར་ཅིག །མཱ་ཏ་ལིས་ཡང་སྨྲས་པ། ཤིང་རྟ་འདི་ནི་སླད་དུ་བཟློག་ན་གདོད། །བྱ་རྣམས་ལ་ནི་རབ་ཏུ་ཕན་འགྱུར་ན། །ལྷ་རྣམས་ལ་ནི་གནས་ནས་སྐབས་རྙེད་པའི། །དགྲ་ཡི་དམག་ཚོགས་འདི་དག་མངོན་ཕྱོགས་མཆི། དེ་ནས་ལྷའི་དབང་པོ་བརྒྱ་བྱིན་སྙིང་རྗེའི་དབང་གིས་རང་གི་ལྷག་པའི་བསམ་པ་ཁྱད་པར་ཅན་དང་། སྙིང་སྟོབས་ཀྱི་ཁྱད་པར་བསྟན་པའི་ཕྱིར་སྨྲས་པ། སེམས་ཅན་འཇིགས་པས་ཉེན་པ་འདི་བསད་ཕྱིར། །སྨད་པའི་གཏམ་ངན་ཕོག་ཅིང་གསོན་པ་བས། །ལྷ་མིན་མཚོན་ཀྱིས་ཕོག་སྟེ་ཤི་ཡང་བླ། །དེ་བས་ཤིང་རྟ་སླད་དུ་ཟློག་པར་བྱོས། །དེ་ནས་མཱ་ཏ་ལིས་དེ་ལྟར་བགྱིའོ་ཞེས་མཉན་ནས། །དེའི་ཤིང་རྟ་རྟ་སྟོང་དང་ལྡན་པ་སླར་བཟློག་གོ །དགྲ་རྣམས་ཀྱིས་ནི་དེའི་མཐུ་སྔར་མཐོང་ཞིང་། །ཤིང་རྟ་གཡུལ་ངོར་སླར་ལོག་མཐོང་བ་དང་། །ཆར་སྤྲིན་ནག་པོ་རླུང་གིས་གཏོར་བ་བཞིན། །སྐྲག་ནས་བརྟབས་ཤིང་རབ་ཏུ་མགྱོགས་པར་བྱེད། །བདག་གི་དམག་ཚོགས་ཕམ་ཡང་སླར་ལོག་ཅིང་། །དགྲ་ཡི་དམག་ཚོགས་ལམ་ནི་བཀག་སྟེ་ཐེན། །གཅིག་པུར་གྱུར་ཀྱང་རབ་ཏུ་དཔའ་སྲིད་པས། །དགྲ་རྣམས་དཔའ་ནི་རབ་ཏུ་བཀོང་བར་གྱུར། །ལྷ་མིན་གཡུལ་དེ་ཕམ་པར་གྱུར་མཐོང་ནས། །ལྷ་དབང་དཔུང་ཡང་དེ་ནས་སླར་ལོག་གྱུར། །ལྷ་ཡི་དགྲ་རྣམས་འཇིགས་ནས་བྱེར་གྱུར་པ། །དེ་དག་སླར་ལོག་ཕོང་པར་ཡོངས་མ་གྱུར། །ལྷ་ཡང་དགའ་ཞིག་ངོ་ཡང་མཚར་བཞིན་དུ། །ལྷ་ཡི་བདག་པོ་ལ་ནི་ཕྱག་ཀྱང་བྱེད། །རྒྱལ་བའི་དཔལ་གྱི་ལུས་མཛེས་མདངས་གསལ་ཞིང་། སྲས་རྣམས་དགའ་བའི་མཁར་གྱི་ནང་དུ་སོང་། །དེ་ལྟར་དེ་ཉིད་དེའི་གཡུལ་ལས་རྣམ་པར་རྒྱལ་བར་གྱུར་ཏོ། །དེ་བས་ན་གསུངས་པ། །ངན་པ་རྣམས་ནི་སྙིང་རྗེ་མེད་པར་སྡིག་པ་སྦྱོང་། །བློ་འབྲིང་རྣམས་ནི་ཕོངས་ནས་སྙིང་རྗེར་བཅས་ཤིང་སྤྱོད། །སྐྱེ་བོ་དགེ་བ་རྣམས་ནི་སྲོག་དང་བྲལ་གྱུར་ཀྱང་། །རྒྱ་མཚོའི་དུས་བཞིན་རང་གི་ཚུལ་དང་འགལ་མི་བྱེད། །དེ་ལྟར་ལྷའི་རྒྱལ་སྲིད་དང་སྲོག་ཀྱང་བོར་ཏེ་བཅོམ་ལྡན་འདས་ཀྱི་ཡུན་རིང་པོ་ནས་སེམས་ཅན་རྣམས་ཡོངས་སུ་བསྐྱངས་བས་ན། ཤེས་རབ་ཅན་གྱིས་དེ་དག་ལ་འདིར་ངན་སེམས་བསྐྱེད་པའང་མི་རིགས་ན། །གནོད་པར་བྱ་བ་ལྟ་སྨོས་ཀྱང་ཅི་དགོས། །དེ་བས་ན་འཕགས་པ་རྣམས་ཀྱིས་སྲོག་ཆགས་རྣམས་ལ་སྙིང་རྗེ་དང་ལྡན་པར་བྱ་བའི་རིགས་སོ། །དེ་ལྟ་བས་ན་ཆོས་སྤྱོད་པ་རྣམས་ནི་ཆོས་ཉིད་སྲུང་བར་བྱེད་དོ་ཞེས་གསུངས་པ་དང་ཡང་སྦྱར་བར་བྱའོ། །དེ་བཞིན་གཤེགས་པའི་ཡོན་ཏན་བསྔགས་པ་དང་། །རིམ་གྲོ་བསྐྱེད་དེ་ཆོས་མཉན་པ་ལའང་སྦྱར་བར་བྱའོ། །བརྒྱ་བྱིན་གྱི་སྐྱེས་པའི་རབས་ཏེ་བཅུ་གཅིག་པའོ།། །།སྐྱེས་བུ་དམ་པ་རྣམས་ནི་བདག་ངོ་ཚ་བ་ཉིད་ཀྱིས། །སྤྱོད་ཚུལ་གྱི་དུས་ལས་མི་འདའོ། །དེ་ཡང་འདི་ལྟར་བྱང་ཆུབ་སེམས་དཔའ་བྲམ་ཟེའི་རིགས་ཆེན་པོ་རུས་དང་སྤྱོད་པ་མ་སྨད་པ། རང་གི་ཆོས་ལ་སྤྱོད་པའི་སྒྲ་གྲགས་པ། འདུལ་བ་དང་། སྤྱོད་ཚུལ་བཟང་པོ་ཞིག་ཏུ་སྐྱེ་བ་ཡོངས་སུ་བཟུང་བར་གྱུར་ཏོ་ཞེས་གྲག་གོ །དེ་གོ་རིམས་བཞིན་དུ་སྐྱེས་བུའི་ཁྲུས་བྱ་བ་དང་། སྐྲ་མཚམས་དབྱེ་བ་དང་། བཙས་པའི་ཆོ་ག་བྱ་བ་ལ་སོགས་པས་ཡོངས་སུ་སྦྱངས་ནས། རིག་བྱེད་བསླབ་པའི་ཕྱིར་བླ་མ་ཐོས་པ་དང་། རིགས་བཙུན་པ་དང་། སྤྱོད་ཚུལ་ཕུན་སུམ་ཚོགས་པ་ཞིག་ལ་བཅར་ཏེ་གནས་པར་གྱུར་ཏོ། །དེ་ནི་ཐོས་པ་ལྡོབ་ཅིང་འཛིན་གསལ་དང་། རང་རིགས་གྲགས་པའི་གུས་དང་དུལ་བ་དང་། །ལང་ཚོའི་ཚེ་ཡང་ཞི་ཞིང་ཆོས་བཟང་བས། དེ་ལ་བླ་མ་བྱམས་ཤིང་དགའ་བར་གྱུར། །ཡོན་ཏན་དབང་དུ་བྱེད་པའི་སྔགས། །རྟག་ཏུ་མི་ཉམས་མཐུ་དང་ལྡན། །ཞེ་སྡང་འཁྲུགས་པའང་དབང་བྱེད་ན། །ཐ་མལ་སེམས་ལྟ་སྨོས་ཅི་དགོས། །དེ་ནས་དེའི་མཁན་པོ་སློབ་མ་ཐམས་ཅད་ཀྱི་ངང་ཚུལ་བརྟག་པའི་ཕྱིར། །བསང་དུས་དག་ཏུ་བདག་ཉིད་དབུལ་བའི་སྡུག་བསྔལ་རྟག་ཏུ་བསྒྲགས་སོ། །དབུལ་ལ་འབྲས་བུ་རེ་བ་མེད། བདག་གིས་མི་ལའང་སྨྲས་མེད་ཅིང་། །དགའ་སྟོན་ཚེ་ཡང་དགའ་མི་མྱོང་། །ཀྱི་ཧུད་སྦྱིན་པའི་གཏམ་ཡང་ཞན། །སྨ་འབབ་གནས་གྱུར་ཉོན་མོངས་ངལ་བའི་གཞི། །བདེ་བ་ཡོངས་སྤངས་ཤིན་ཏུ་མི་བརྗིད་པ། །ཉམ་ཉེས་བཞིན་དུ་རྟག་ཏུ་མྱ་ངན་བྱེད། །ནོར་མེད་གྱུར་པ་ཤིན་ཏུ་འཇིགས་སུ་རུང་། །དེ་ནས་དེའི་སློབ་མ་དེ་དག་རྟ་བཟང་པོ་ལྕག་གིས་བསྐུལ་བ་བཞིན་དུ། བླ་མ་ལ་བྱམས་པས་མི་དགའ་བར་གྱུར་ཏེ། །བསོད་སྙོམས་རབ་ཏུ་བཟང་ཞིང་ཤིན་དུ་མང་དུ་བསླངས་སོ། །དེས་དེ་དག་ལ་སྨྲས་པ། །བསོད་སྙོམས་ཀྱི་ཁ་ཟས་ཀྱིས་སུའི་དབུལ་འཕོངས་ལའང་ཕྱིད་པར་མི་འགྱུར་གྱི། ཁྱེད་ཅག་ཉོན་མོངས་པར་བྱེད་པ་འདི་ཐོང་ཞིག །ང་ཉོན་མོངས་པ་མི་བཟོད་ན་ཁྱེད་ཀྱིས་ནོར་བསྒྲུབ་པར་བྱ་བ་ལ་འབད་པ་འདི་ནི་རིགས་སོ། །ཅིའི་ཕྱིར་ཞེ་ན། བཀྲེས་སྐོམ་ཟན་དང་ཆུ་ཡིས་ཕྱིད། །སྨན་བཅས་སྔགས་ཀྱིས་ནད་སོས་གྱུར། །རྒྱུན་གནས་ནོར་ཡིས་དབུལ་པོར་གྱུར། །སློབ་མ་རྣམས་ཀྱི་སྨྲས་པ། །བདག་ཅག་སྐལ་བ་ཆུང་བས་འདི་ཙམ་ལས་ལྷག་པར་རྔོ་མི་ཐོགས་ན། ཅི་ལྟར་བགྱི། གཞན་ཡང་། མཁན་པོ་ནོར་ཡང་བསོད་སྙོམས་བཞིན། གལ་ཏེ་རྙེད་པར་འགྱུར་ན་ནི། །ཁྱོད་ཀྱི་དབུལ་བའི་སྡུག་བསྔལ་འདི། །དེ་ལྟར་བདག་ཅག་ག་ལ་བཟོད། །བྲམ་ཟེ་རྣམས་ཀྱིས་ནོར་སྒྲུབ་ཏུ། །བླང་བའི་ཐབས་ནི་རབ་ཏུ་ཆུང་། །སྐྱེ་བོ་འདི་ཡང་སྦྱིན་མི་ཕོད། །དེ་བས་ཐབས་མེད་བདག་ཅག་ཕུང་། མཁན་པོས་སྨྲས་པ། །བྲམ་ཟེ་རྣམས་ལ་ནི་ནོར་སྒྲུབ་པའི་ཐབས་གཙུག་ལག་ལས་འབྱུང་བ་གཞན་དག་ཀྱང་ཡོད་ན། །བདག་ནི་རྒས་པས་མཐུ་མེད་པར་གྱུར་ཏེ། དེ་སྒྲུབ་མི་ནུས་སོ། །སློབ་མ་རྣམས་ཀྱིས་སྨྲས་པ། སློབ་དཔོན་བདག་ཅག་ནི་རྒས་པས་མཐུ་ཉམས་པར་མ་གྱུར་ན། །གལ་ཏེ་གཙུག་ལག་ལས་འབྱུང་བའི་ཐབས་དེ་དག་བདག་ཅག་གིས་སྒྲུབ་ཏུ་རུང་བར་དགོངས་ན་གསུངས་ཤིག་དང་། བདག་ཅག་ལ་ཆོས་འཆད་པའི་དྲིན་ལ་ལན་གླན་པར་བགྱིའོ། །མཁན་པོས་སྨྲས་པ། །གཞོན་ཡང་སྙིང་ལ་རྩོལ་མི་ཕོད་པ་རྣམས་ཀྱིས་ནི་འདི་ལྟ་བུའི་ནོར་སྒྲུབ་པར་དཀའ་མོད་ཀྱི། །འོན་ཀྱང་དེ་ལྟར་ཁྱེད་དུས་ཀྱིས་འཆུ་ན་ལེགས་ཀྱིས་ཉོན་ཅིག །ནོར་སྒྲུབ་པའི་རིམ་པ་གཅིག་གཅིག་ཡོད་པ་དེ་ཡང་གང་ཞེ་ན། བྲམ་ཟེ་རྒུད་ཚེ་རྐུ་བ་ཆོས་སུ་བཤད། །འཇིག་རྟེན་ན་ཡང་ནོར་མེད་རྒུད་པའི་མཆོག །དེ་བས་གཞན་ནོར་མ་མཐོང་བླང་བར་གྱིས། །འདི་དག་ཀུན་ཀྱང་བྲམ་ཟེའི་ནོར་ཡིན་ནོ། །ངོ་མཐོན་དུ་ནི་ནོར་ཕྲོག་ནུས་གྱུར་ཀྱང་། །བདག་གི་གྲགས་པ་བསྲུང་བར་བྱ་དགོས་པས། །ཁྱེད་ཅག་ལྟ་བུས་འདི་ལྟར་བྱར་མི་རུང་། །དེ་བས་དེ་ལྟར་མ་མཐོང་བསྒྲུབ་བར་བྱ། །དེ་ལྟར་དེས་བསྡམས་པ་གློད་པ་དང་། །སློབ་མ་དེ་དག་གིས་དེའི་ཚིག་དེ་མི་རིགས་ཀྱང་། རིག་པ་བཞིན་དུ་དེ་ལྟར་བགྱིའོ་ཞེས་མཉན་ཏོ། །བྱང་ཆུབ་སེམས་དཔའ་འབའ་ཞིག་ནི་མ་གཏོགས་སོ། །དེ་ནི་རང་བཞིན་དགེ་བས་ན། །དེ་ལ་རྗེས་སུ་ཡི་མི་རང་། །དེ་དག་གིས་ནི་མ་བརྟགས་པར། །བྱར་རུང་བཞིན་དུ་ཁས་བླངས་སོ། །བྱང་ཆུབ་སེམས་དཔའ་ནི་ངོ་ཚ་བས་མགོ་སྨད་དེ། །ཅུང་ཟད་ཅིག་ཤུགས་ནར་གྱིས་ཕྱུང་ནས། །ཅང་མི་སྨྲ་བར་འདུག་གོ །དེ་ནས་དེ་དག་གི་མཁན་པོ་དེ། །བྱང་ཆུབ་སེམས་དཔའ་ཆོ་ག་བསྟན་པ་དེ་ལ་དགའ་བར་ཡང་མ་གྱུར། །སླར་ཟློག་པར་ཡང་མ་གྱུར་པར་མཐོང་ནས། སེམས་དཔའ་ཆེན་པོ་དེ་ལ་ཡོན་ཏན་ཞིག་ཡོད་པར་བསམས་ནས། འདི་ཅི་རྩོལ་མི་ཕོད་དམ། ང་ལ་མི་བྱམས་སམ། འོན་ཏེ་ཆོས་ཀྱི་འདུ་ཤེས་ཀྱིས་རྐུན་པོ་བྱེད་དུ་མི་བཏུབ་བམ་སྙམ་ནས། དེའི་རང་བཞིན་བརྟག་པའི་ཕྱིར་བྱང་ཆུབ་སེམས་དཔའ་ལ་སྨྲས་པ། ཀྱེ་བྲམ་ཟེ་ཆེན་པོ། བྲམ་ཟེ་འདི་རྣམས་ང་རྒུད་མི་བཟོད་པས། །མི་རྣམས་དཔའ་བོའི་ལམ་ལ་བརྟེན་པར་གྱུར། །ཁྱོད་ནི་སྤྲོ་བ་མེད་ཅིང་བླུན་པར་མངོན། །ང་རྒུད་པས་ནི་ངེས་པར་མ་གདུངས་སོ། །ང་ཡི་སྡུག་བསྔལ་རྒྱ་ཆེར་རབ་བསྒྲགས་ཤིང་། །ཚིག་ཏུ་སྨྲས་པས་མ་བཅབས་བསྟན་གྱུར་ཀྱང་། །ཁྱོད་ནི་ཇི་ལྟར་མི་སྒྲིབ་བརྟན་གྱུར་ནས། དེ་ལྟར་ཐ་མལ་བཞིན་དུ་གནས་པར་གྱུར། །དེ་ནས་བྱང་ཆུབ་སེམས་དཔས་གུས་པ་དང་བཅས་པར་ཕྱག་བྱས་ཏེ། མཁན་པོ་ལ་སྨྲས་པ། སྡིག་པ་ཞི་བར་གྱུར་ཅིག །བདག་ནི་མི་བྱམས་ཤིང་སྙིང་སྲ་བའི་ཕྱིར། །བླ་མའི་སྡུག་བསྔལ་གྱིས་མ་གདུངས་ཏེ། འདི་ལྟར་མཆིས་པ་མ་ལགས་ཀྱི། མཁན་པོས་བསྟན་པའི་རིམ་པ་འདི་མི་སྲིད་པའི་ཕྱིར། འདི་ལྟར་མཆིས་སོ། །སུས་ཀྱང་མ་མཐོང་བར་སྡིག་པ་སྤྱད་དུ་རུང་བ་ནི་གང་ནའང་མ་མཆིས་སོ། །ཅིའི་སླད་དུ་ཞེ་ན། དབེན་པ་ནི་མི་སྲིད་པའི་སླད་དུའོ། །སྡིག་པའི་ལས་རྣམས་བྱེད་པ་ན། །འཇིག་རྟེན་ན་ནི་དབེན་པ་མེད། །མི་སྣང་བ་ཡི་འབྱུང་པོ་རྣམས། །མི་རྣམས་ལ་ནི་ལྟ་བར་བྱེད། །ལྷ་ཡི་སྤྱན་ནི་ཕྱེ་བ་ཡིས། །ཐུབ་པ་བདག་ཉིད་སྦྱངས་པ་རྣམས། །དེ་ཡིས་མ་མཐོང་དབེན་སྙམ་ནས། །བྱིས་པ་སྡིག་པ་སྤྱོད་ལ་འཇུག །བདག་གིས་གང་ནའང་སྟོང་པ་ནི། །ཅུང་ཟད་མཆིས་པ་མ་མཐོང་ངོ་། །གང་ན་གཞན་དག་མི་སྣང་བ། །དེ་ན་བདག་གིས་སྟོང་མ་ལགས། །ཉེས་བྱས་གཞན་གྱིས་མཐོང་བ་དང་། གང་ཡང་བདག་གིས་མཐོང་བ་དག །བདག་གིས་མཐོང་བ་གང་ཡིན་པ། དེ་ནི་ལེགས་པར་མཐོང་བ་ཡིན། །བདག་གི་དགོས་པས་ཡིད་ནི་གཡེངས་གྱུར་ཕྱིར། །ཕ་རོལ་སྤྱོད་པ་གཞན་གྱི་མི་མཐོང་སྲིད། །བདག་ནི་ཆགས་པས་རྩེ་གཅིག་ཡིད་གྱུར་ཕྱིར། །སྡིག་པ་བྱེད་པ་ངེས་པར་རིག་པར་འགྱུར། །དེའི་སླད་དུ་བདག་དེ་ལྟར་མཆིས་པར་གྱུར་ཏོ། །དེ་ནས་བྱང་ཆུབ་སེམས་དཔས་མཁན་པོའི་ཡིད་དགའ་བར་གྱུར་པ་རིག་ནས། །ཡང་སྨྲས་པ། ཁྱོད་ནི་དེ་ལྟར་ནོར་གྱི་ཕྱིར་ཞུགས་པར། བདག་ནི་ཡིད་ལ་ངེས་པར་མི་འཛིན་ཏོ། །སྐྱོན་དང་ཡོན་ཏན་བྱེ་བྲག་ཤེས་གྱུར་པ། །སུ་ཞིག་ནོར་ཕྱིར་ཡོན་ཏན་ཆུད་གསོན་བྱེད། །ལྷ་དབང་ཕྱིར་ཡང་ངོ་ཚ་བོར་ནས་ནི། །ཡིད་ལ་ཆོས་དང་འགལ་བར་བྱེད་པ་བས། གྱོ་མོའི་སྣོད་ཐོགས་གོས་ངན་གྱོན་ནས་ནི། །དགྲ་ཡི་ཁྱིམ་དུ་འབྱོར་པ་མཐོང་ཡང་བླ། དེ་ནས་དེའི་མཁན་པོ་དེ་སྙིང་རབ་ཏུ་དགའ་ཞིང་ཡ་མཚན་དུ་གྱུར་ནས། །སྟན་ལས་ལངས་ཏེ་དེ་ལ་ལག་པས་འཁྱུད་ནས་སྨྲས་པ། བུ་ལེགས་སོ་ལེགས་སོ། །བྲམ་ཟེ་ཆེན་པོ་ལེགས་སོ་ཁྱོད་ཀྱི་ཤེས་རབ་རབ་ཏུ་ཞི་བས་བརྒྱན་པ་འདི་ལ་ནི་དེ་རིགས་སོ། །བྱིས་པ་རྣམས་ནི་མཚན་མ་ཅུང་ཟད་ལ། །བརྟེན་ནས་རང་གི་ཆོས་ལམ་འདོར་བར་བྱེད། །དཀའ་ཐུབ་ཐོས་དང་ཤེས་པའི་ནོར་ལྡན་པ། །དགེ་བ་རྣམས་ནི་ཕོངས་ཀྱང་མི་འགྱུར་རོ། །ཁྱོད་ཀྱིས་རང་རིགས་དྲི་མེད་བརྒྱན་པ་ནི། །སྟོན་ཟླ་ཤར་བས་ནམ་མཁའ་བརྒྱན་པ་བཞིན། །ཁྱོད་ཀྱི་ཐོས་པ་རྣམས་གྲགས་དོན་དང་ལྡན། ང་ཡི་འབད་པ་དོན་ཡོད་ལེགས་པར་བྱུང་། །དེ་བས་ན་སྐྱེས་བུ་དམ་པ་རྣམས་ནི་དེ་ལྟར་བདག་ངོ་ཚ་བ་ཉིད་ཀྱི་སྤྱོད་ཚུལ་གྱི་དུས་ལས་འདའ་བར་མི་བྱེད་དོ། །དེ་བཞིན་དུ་འཕགས་པ་རྣམས་ཀྱི་ཀྱང་། ངོ་ཚ་ཤེས་པའི་སྟོབས་དང་ལྡན་པར་བྱ་བའི་རིགས་སོ། །དེ་བཞིན་དུ་འཕགས་པ་ཉན་ཐོས་རྣམས་ནི་ངོ་ཚ་ཤེས་པའི་འོབས་ཀྱི་རབ་ཏུ་བསྐོར་བས་མི་དགེ་བ་རབ་ཏུ་སྤོང་བར་འགྱུར་རོ་ཞེས་བྱ་བ་ལ་སོགས་པས་ངོ་ཚ་ཤེས་པ་བསྔགས་པ་དང་ལྡན་པའི་མདོ་སྡེ་དང་། འཇིག་རྟེན་ལ་དབང་བྱེད་པའི་མདོ་སྡེ་དག་ལའང་སྦྱར་བར་བྱའོ། བྲམ་ཟེའི་སྐྱེས་པའི་རབས་ཏེ་བཅུ་གཉིས་པའོ།། །།སྐྱེས་བུ་དམ་པ་རྣམས་ནི་བདག་རང་སྲན་ཐུབ་པས་བརྟན་པའི་ཕྱིར་སྡུག་བསྔལ་མི་བཟད་པས་གདུངས་ཀྱང་ལམ་ངན་པར་འཇུག་པར་མི་འགྱུར་རོ། །དེ་ཡང་འདི་ལྟར་བྱང་ཆུབ་སེམས་དཔའ་བདེན་པ་དང་གཏོང་བ་དང་། ཉེ་བར་ཞི་བ་དང་ཤེས་རབ་ལ་སོགས་པའི་ཡོན་ཏན་ཁྱད་པར་ཅན་རྣམས་ཀྱིས་འཇིག་རྟེན་ལ་ཕན་པར་བརྩོན་པ་དེ་རེ་ཤིག་ཅིག་ཡུལ་ཤི་བི་པ་རྣམས་ཀྱི་རྒྱལ་པོར་གྱུར་ཏོ་ཞེས་གྲག་གོ །ཆོས་དང་འདུལ་བ་མངོན་སུམ་དུ་གྱུར་པ་བཞིན་དུ། སྐྱེ་དགུ་རྣམས་ལ་ཕ་མ་དང་འདྲ་བར་ཕན་འདོགས་ནུས་པར་གྱུར་ཏོ། །ཉེས་པར་སྤྱོད་ལ་རྣམ་པར་བཟློག་པ་དང་། །ཡོན་ཏན་འཕེལ་ལ་རབ་ཏུ་དགོད་པའི་ཕྱིར། །རྒྱལ་པོ་དེས་ནི་ཕ་ཡི་བུ་དགའ་བཞིན། །འཇིག་རྟེན་གཉི་གར་མི་རྣམས་དགའ་བར་གྱུར། །ནང་གི་མི་དང་ཕྱི་མི་འདྲ་བར་སྙོམས། །དེ་ཡི་བཀའ་ཁྲིམས་ཆོས་དང་རྗེས་སུ་མཐུན། །སྐྱེ་བོའི་ཆོས་མིན་ལམ་ནི་བསྒྲིབས་ནས་སུ། །མཐོ་རིས་ལམ་ནི་ཐེམ་སྐས་རིམ་པ་བཞིན། །འཇིག་རྟེན་ཕན་པ་ཆོས་ལྡན་དེ་མཐོང་ནས། །མི་རྣམས་སྐྱོང་བ་ཆོས་རྣམས་འབའ་ཞིག་སྤྱོད། །རྣམ་པ་ཀུན་དུ་ཆོས་ཀྱི་ལམ་ལ་དགའ། །གཞན་གྱི་ཆོས་ལ་གནོད་བྱས་ཡོང་མི་བཟོད། །རྒྱལ་པོ་དེའི་བློན་པོ་ཆེན་པོའི་བུ་མོ་ཞིག །དཔལ་མོ་གཟུགས་དང་ལྡན་པ་བཞིན །དགའ་བ་མངོན་སུམ་དུ་གྱུར་པ་བཞིན། ལྷའི་བུ་མོ་བཞིན་གཟུགས་དང་གཟི་མདངས་མཆོག་དང་ལྡན་པ། །ལྟ་ན་རབ་ཏུ་སྡུག་པ། བུད་མེད་རིན་པོ་ཆེར་རབ་ཏུ་བཀུར་བ་ཞིག་ཡོད་པར་གྱུར་ཏོ། །འདོད་ཆགས་མ་བྲལ་བ་ཡིས་དེ་ཡི་ལུས། །ཇི་སྲིད་མཐོང་བར་གྱུར་པ་དེ་སྲིད་དུ། དེ་ཡི་གཟུགས་དང་ཡོན་ཏན་རྣམས་ལ་ཆགས། དེ་ལ་ལྟ་བ་ཟློག་པར་ཡོང་མི་ནུས། །དེ་བས་ན་གཉེན་རྣམས་ཀྱིས་ཀྱང་། །དེའི་མིང་མྱོས་བྱེད་མ་ཞེས་བཏགས་སོ། །དེ་ནས་དེའི་ཕས་རྒྱལ་པོ་ལ་བདས་པར་གསོལ་བ། ལྷ་ཁྱོད་ཀྱི་ཡུལ་དུ་བུད་མེད་རིན་པོ་ཆེ་ཞིག་བྱུང་བར་གྱུར་ན། ཕྱག་ཏུ་བཞེས་སམ་མི་བཞེས་པ་ནི་ལྷ་ཉིད་མཁྱེན་ཏོ་ཞེས་གསོལ་ཏོ། །དེ་ནས་རྒྱལ་པོ་དེས་བུད་མེད་ཀྱི་མཚན་ཉིད་ལ་མཁས་པའི་བྲམ་ཟེ་རྣམས་ལ་འདི་ཅི་ལ་འོས་པ་ཡིན་ནམ་མ་ཡིན། །ཁྱེད་ཀྱིས་རྟོགས་ཤིག་ཅེས་བཀའ་སྩལ་ཏོ། །དེ་ནས་བུ་མོའི་དེའི་ཕས་བྲམ་ཟེ་དེ་དག་རང་གི་ཁྱིམ་དུ་ཁྲིད་ནས། མྱོས་བྱེད་མ་ལ་བཟང་མོ་ཁྱོད་རང་གིས་བྲམ་ཟེ་རྣམས་ལ་ཁ་ཟས་བྲིམས་ཤིག་ཅེས་སྨྲས་པ་དང་། བུ་མོ་དེས་དེ་བཞིན་དུ་བགྱིའོ་ཞེས་མཉན་ནས། །བྲམ་ཟེ་རྣམས་ལ་གོ་རིམས་བཞིན་དུ་ཁ་ཟས་བྲིམས་སོ། །དེ་ནས་བྲམ་ཟེ་དེ་དག །དེ་ཡི་གདོང་དུ་མིག་མི་འཛུམས་པར་ལྟ། །འདོད་ཆགས་ཀྱིས་ནི་བརྟན་པ་ཉམས་པར་གྱུར། །མིག་དང་ཡིད་ལ་དབང་ཡང་མེད་པར་གྱུར། །འདོད་པས་མྱོས་ནས་འདུ་ཤེས་ཉམས་པར་གྱུར། །གང་གི་ཚེ་བརྟན་ཞིང་མི་གཡོ་བར་འཁོད་པར་ཡང་མནགས་མ་ཆུས་པར་གྱུར་པ་དེའི་ཚེ་ཁ་ཟས་ཟ་བར་ལྟ་ག་ལ་ནུས་ཏེ། དེ་ནས་ཁྱིམ་བདག་དེས་རང་གི་བུ་མོ་དེ་དག་གི་མིག་ལམ་དུ་མི་སྣང་བར་བྱས་ནས། །བདག་ཉིད་ཀྱི་བྲམ་ཟེ་རྣམས་ལ་ཁ་ཟས་བྲིམས་ཏེ་སླར་བཀྱེའོ། །དེ་ནས་དེ་དག་གིས་བསམས་པ། །འདི་ནི་བཅོས་མའི་གཟུགས་བཞིན་ཏེ། བུ་མོ་འདིའི་བྱད་གཟུགས་ནི་ཡིད་འཕྲོག་པ་ཞིག་གོ་སྙམ་ནས། འདི་ནི་རྒྱལ་པོས་གཟིགས་པར་བྱ་བའང་མི་རིག་ན། བཙུན་མོར་དབུལ་དུ་ལྟ་ག་ལ་རུང་། །འདི་བྱད་བཞིན་བཟང་ཆེས་བས་གདོན་མི་ཟ་བར་རྒྱལ་པོ་དེ་སེམས་མྱོས་ནས་ཆོས་དང་སྲིད་ཀྱི་དོན་སྒྲུབ་པ་ལ་གཡེལ་བར་འགྱུར་ཞིང་། རྒྱལ་པོའི་དོན་སྒྲུབ་པ་དུས་ལས་ཡོལ་བས། འབངས་རྣམས་ལ་ཕན་པ་དང་བདེ་བ་འབྱུང་བའི་ལམ་ཆད་དེ། དེའི་ཕུང་བར་འགྱུར་རོ། །འདི་ནི་མཐོང་བར་གྱུར་པ་ཙམ་གྱིས་ཀྱང་། །དྲང་སྲོང་རྣམས་ལའང་དངོས་གྲུབ་གེགས་འགྱུར་ན། །འདོད་ཆགས་ཅན་གྱི་མིག་ལྟར་ལང་ཚོར་ལྡན། །རྒྱལ་པོ་བདེ་བར་གནས་པ་སྨོས་ཅི་དགོས། དེ་བས་ན་ད་ནི་དུས་ལ་བབ་པོ་སྙམ་ནས། སྐབས་ཤིག་ཏུ་རྒྱལ་པོའི་སྤྱན་སྔར་དོང་སྟེ། རྒྱལ་པོ་ཆེན་པོ་བུ་མོ་དེ་བདག་ཅག་གིས་མཐོང་སྟེ། དེའི་བྱད་གཟུགས་ནི་རབ་ཏུ་བཟང་ན། མཚན་ངན་ཏེ། དཔལ་དང་མི་ལྡན་པ་ཞིག་ལགས་པས། རྒྱལ་པོ་ཆེན་པོས་འདི་གཟིགས་སུ་ཡང་མི་རུང་ན། ཁབ་ཏུ་བགྱིར་ལྟ་ག་ལ་རུང་། སྨད་པའི་བུད་མེད་ཁྱིམ་ནི་གཉིས་ཀར་ཡང་། །གྲགས་པ་དང་ནི་འབྱོར་པ་མེད་པར་བྱེད། མཚན་མོའི་ཟླ་བ་སྤྲིན་རུམ་ནུབ་པ་ནི། །གནམ་སའི་བྱེ་བྲག་མཛེས་པ་མེད་པ་བཞིན། །རྒྱལ་པོ་དེས་དེའི་དོན་ཐོས་ནས་བུ་མོ་དེ་མཚན་ངན་ཅེས་གྲག་པས། ངའི་རིགས་དང་མཐུན་པ་མ་ཡིན་ནོ། །སྙམ་ནས་དེ་ལ་ཆགས་པ་མེད་པར་གྱུར་ཏོ། །རྒྱལ་པོ་མི་བཞེད་པར་ཤེས་ནས། ཁྱིམ་བདག་དེས་བུ་མོ་དེ་རྒྱལ་པོ་དེ་ཉིད་ཀྱི་བློན་པོ་ཞིག་ལ་བྱིན་ནོ། །དེ་ནས་རེ་ཤིག་ཅིག་རྒྱལ་པོ་དེ་མཐར་གྱིས་བདག་རང་གི་གྲོར་ཁྱེར་ན་མེ་ཏོག་ཀུ་མུ་དའི་དགའ་སྟོན་བཟང་པོ་བྱུང་བ་ལྟ་བར་འདོད་ནས། ཤིང་རྟ་མཆོག་ལ་ཞོན་ཏེ། ལམ་པོ་ཆེ་དང་། གྲོང་ཁྱེར་གྱི་སྲང་དང་ཚོང་ཁང་ཕྱག་དར་བྱས་ཤིང་ཆག་ཆག་བཏབ་པ། གདུགས་དང་། རྒྱལ་མཚན་དང་། བ་དན་བསྒྲེང་བ་དང་། སའི་སྟེང་ཐོག་ཐག་མེ་ཏོག་སིལ་མ་བཀྲམ་པ། གླུ་གར་དང་བཞད་གར་དང་རྩེད་མོ་དང་སིལ་སྙན་སྒྲོགས་པ། མེ་ཏོག་དང་། བདུག་སྤོས་དང་། ཕྱེ་མ་དང་། གོས་དང་། ཕྲེང་བ་དང་། ཁྲུས་དང་། བྱུག་སྤོས་ཀྱི་ངད་བསུང་ཞིམ་པོའི་ངད་ལྡང་བ། ཚོང་ཟོང་བཟང་པོ་རྣམ་པ་མང་པོ་བཀྲམ་པ། གྲོང་ཁྱེར་གྱི་མི་དར་ཅིང་དགའ་ལ་ཆས་རབ་ཏུ་བཟང་བ་རྣམས་ཀྱིས་གང་བའི་གྲོང་ཁྱེར་མཆོག་གི་ནང་ནས་སོང་སོང་བ་ལས། བློན་པོ་དེའི་ཁྱིམ་དང་ཉེ་བ་ཞིག་ཏུ་ཕྱིན་པ་དང་། དེ་ནས་མྱོས་བྱེད་མས་བསམས་པ། བདག་ནི་རྒྱལ་པོ་འདིས་མཚན་ངན་ཅེས་བཏགས་ནས་སྤངས་སོ་སྙམ་ཏེ། སྙིང་ན་བཞིན་དུ། རྒྱལ་པོ་བལྟ་འདོད་པ་འདྲ་བར་བྱས་ནས་ལུས་བྱད་མཛེས་པ་བསྟན་ནས། སྤྲིན་གྱི་སྟེང་ན་གློག་འགྱུ་བ་བཞིན་དུ། ཡང་ཏོག་གི་སྟེང་ན་རབ་ཏུ་གསལ་བར་སྣང་བར་བྱས་ཏེ་འདུག་གོ་བདག་ལྟ་བུ་མཚན་ངན་པ་མཐོང་ན་འདིས་དྲན་པ་རྣམ་པར་གཡོ་བ་བདག་རང་གིས་འཛིན་ནུས་སམ་མི་ནུས་བལྟའོ་སྙམ་མོ། །དེ་ནས་རྒྱལ་པོ་དེ་གྲོང་ཁྱེར་མཆོག་བརྒྱན་པ་ལྟ་ལྟ་བ་ལས། བུ་མོར་མིག་སྔ་ན་སྣང་བར་འདུག་འདུག་པ་མཐོང་བར་གྱུར་ཏོ། །དེ་ནས་རྒྱལ་པོ་དེ། ཕོ་བྲང་སླས་ཀྱི་ན་ཆུང་བཟང་མོ་ཡི། །ལུས་བཟང་ཆས་པ་ཚིམ་པར་མཐོང་གྱུར་ཅིང་། །ཆོས་ལམ་རྗེས་སུ་དགའ་བས་མ་འཕྱར་བ། དབང་པོ་ཐུལ་བར་བྱེད་ལ་བརྩོན་འགྱུར་ཞིང་། །བརྟན་པའི་ཡོན་ཏན་ཆེ་ལ་ངོ་ཚ་ཤེས། །གཞན་གྱི་བུད་མེད་བལྟ་ལ་མ་མོས་ཀྱང་། །འདོད་ཆགས་ལངས་ཤིང་ཡ་མཚན་ཆེར་གྱུར་ནས། །བུ་མེད་དེ་ལ་མིག་གིས་རིང་ཞིག་བལྟས། འདི་ཅི་ཀུ་མུ་ཏ་ཡིན་ནམ། །འོན་ཏེ་ཁྱིམ་འདིའི་ལྷ་ཡིན་ནམ། །ལྷ་འམ་ལྷ་མིན་ཆུང་མ་ཡིན། འདི་ནི་མི་ལུས་མ་ཡིན་ནོ། །སྙམ་ནས་རྒྱལ་པོ་དེ་དེ་ལྟར་དཔྱོད་དཔྱོད་ནས་དེ་ལ་ལྟ་བས་ཚིམ་པར་མ་གྱུར་བཞིན་དུ་ཤིང་རྟ་དེ་ཕྱོགས་དེ་ནས་ཐལ་དུ་བྱེད་པ་དང་ཡིད་ལ་མི་འབབ་པར་གྱུར་ཏོ། །དེ་ནས་རྒྱལ་པོ་དེ་སྙིང་སྟོར་བ་བཞིན་དུ་དེ་ལ་སེམས་རྩེ་གཅིག་ཏུ་གྱུར་ཅིང་བདག་གི་གནས་སུ་ཕྱིན་པ་དང་། འདོད་ཆགས་ཀྱི་བརྟན་པ་མེད་པར་གྱུར་པ་དང་། ཁ་ལོ་བསྒྱུར་བ་རབ་ཏུ་དགའ་བ་ཞེས་བྱ་བ་ལ་གསང་སྟེ་དྲིས་པ། ཕྱི་ར་དཀར་པོས་བསྐོར་བ་ཡི། །ཁྱིམ་དེ་སུའི་ཡིན་ཁྱོད་ཤེས་སམ། སྤྲིན་དཀར་སྟེང་ན་གློག་བཞིན་དུ། དེ་ན་མཛེས་མ་སུ་ཞིག་ཡིན། ཁ་ལོ་བསྒྱུར་བས་སྨྲས་པ། ལྷ་ཉིད་ཀྱི་བློན་པོ་ཨ་བྷི་པཱ་ར་ཀ་ཞེས་བགྱི་བ་ཞིག་མཆིས་ཏེ། ཁྱིམ་དེ་ནི་དེའི་ལགས་སོ། །བུ་མོ་དེའང་དེ་ཉིད་ཀྱི་མཆིས་བྲང་ལགས་ཏེ། ཀི་རཱི་ཊ་པ་བཏབ་ཞེས་བགྱི་བའི་བུ་མོ་མྱོས་བྱེད་མ་ཞེས་བགྱི་བ་ལགས་སོ། །རྒྱལ་པོ་དེ་སྐད་ཐོས་ནས། གཞན་གྱི་ཆུང་མ་ཡིན་ནོ་སྙམ་སྟེ། རེ་ཐག་ཆད་ནས་སེམས་ཁོང་དུ་ཆུད་ཅིང་མིག་རྩ་དང་མདངས་ཉམས་ཤིང་། ཤུགས་ནར་ཞེས་ཕྱུང་ནས་དེ་ལ་སེམས་ཆགས་བཞིན་དུ། དལ་བུས་བདག་རང་ལ་སྨྲས་པ། ཨེ་མའོ་འདི་མིང་ཇི་ལྟར་བཏགས་པ་ནི། །དོན་དང་རྗེས་སུ་མཐུན་ཞིང་ཚིག་ཀྱང་སྙན། །འཛུམ་པའི་མདངས་དཀར་མྱོས་བྱེད་མ་ཞེས་པ། །འདི་ལྟར་བདག་ནི་མྱོས་པ་བཞིན་དུ་བྱེད། །དེ་ནི་བརྗེད་པར་བདག་འདོད་ན། །སེམས་ཀྱིས་མཐོང་བ་བཞིན་དུ་གྱུར། །བདག་གི་སེམས་ནི་དེ་ལ་གནས། །སེམས་དེ་དེ་ཡི་དབང་དུ་གྱུར། །གཞན་གྱི་ཆུང་མ་ཡིན་པ་ལ། །བདག་ཀྱང་དེ་ལྟར་མི་བརྟན་པ། །དེ་ནི་མྱོས་ཏེ་ངོ་ཚ་དང་། །བྲལ་བ་བཞིན་དུ་གཉིད་དང་བྲལ། དེ་ནི་ལུས་བཟང་བཅས་ཤིང་འགྲེང་དང་ལྟ་བ་ལ། ཆགས་པས་རྩེ་གཅིག་ཡིད་དུ་གྱུར་ཅིག་འདུག་པའི་ཚེ། །དོན་སྒྲུབ་གོ་རིམས་སྦྲོན་པའི་ཆབ་ཚོད་སྒྲ་གྲགས་པའི། །ཆབ་ཚོད་དེ་ནི་ང་ཡི་སེམས་ལ་ཞེ་སྡང་ལྡང་། །དེ་ལྟར་རྒྱལ་པོ་དེ་འདོད་པས་མྱོས་པའི་མཐུས། བརྟན་པ་ནི་ཉམས། བདག་རང་གིས་མནགས་ཏེ་བོར་ཡང་མདངས་ནི་སེར་སྐྱར་གྱུར་ཅིང་ལུས་ཀྱང་ཤི་བྲི་སྲབ་མོར་གྱུར། སེམས་ཁོང་དུ་ཚུད་ཅིང་ཤུགས་ཀྱང་ནར་ཞེས་འབྱུང་ལ། གླལ་ཡང་དང་ཡང་དུ་ནི་འབྱུང་། འདོད་ཆགས་ཀྱིས་མྱོས་པར་གྱུར་པའི་རྣམ་པ་ནི་རབ་ཏུ་མངོན་པར་གྱུར་ཏོ། །བརྟན་པ་ཆེན་པོས་མནགས་ཤིང་བསྒྲིབ་བྱས་ཀྱང་། རྒྱལ་པོ་དེ་ཡི་ཡིད་ནི་གྱུར་པ་དེ། སེམས་ཁོང་ཆུད་པའི་མིག་དང་བཞིན་མདངས་དང་། ཤ་བྲི་སྲབ་མོར་གྱུར་པས་མངོན་པར་གྱུར། །དེ་ནས་བློན་པོ་ཨ་བྷི་པཱ་ར་ཀ་བརྡ་དང་མཚན་མ་ལ་མཁས་པ་དེས། རྒྱལ་པོ་དེ་དེ་ལྟར་གྱུར་པར་ཤེས་ནས། སྙིང་ཉེ་བས་རྒྱལ་པོ་དེ་མ་རུང་བར་འགྱུར་དུ་དོགས་པ་དང་། འདོད་ཆགས་ཀྱང་མཐུ་ཆེ་བར་ཤེས་ནས། རྒྱལ་པོ་ལ་ཞུས་ཏེ་ནང་དུ་མཆི་བར་སྣང་བ་དང་། དབེན་པར་གསང་ཏེ་གསོལ་བ། ད་ནང་བདག་ནི་ལྷ་མཆོད་བགྱིད་པའི་ཚེ། །གནོད་སྦྱིན་གཅིག་གཅིག་མངོན་སུམ་མཆིས་ནས་ནི། །མྱོས་བྱེད་མ་ལ་རྒྱལ་པོའི་ཐུགས་ཆགས་པ། ཁྱོད་ཀྱིས་མི་ཤེས་སམ་ཤེས་བདག་ལ་མཆི། དེ་སྐད་སྦྲན་ནས་མོད་ལ་མི་སྣང་གྱུར། །བདག་ནི་རྟོག་པ་སྐྱེས་ནས་འདིར་མཆིས་ལགས། །དེ་ལྟར་མེད་ན་ལྷ་ཅིག་འདི་ལྟ་བུར། །ཅི་ཡི་སླད་དུ་བདག་ལ་བཀའ་མི་སྩལ། །དེ་བས་ན་ལྷ་བདག་ལ་ཐུགས་བརྩེ་བའི་སླད་དུ། བུ་མོ་འདི་ཕྱག་ཏུ་བཞེས་པའི་རིགས་སོ། །དེ་ནས་རྒྱལ་པོ་དེ་ལྟས་ཀྱིས་བསྐུལ་བས་ངོ་ཚ་སྟེ་མགོ་སྨད་ནས། འདོད་ཆགས་ཀྱི་དབང་དུ་གྱུར་ཀྱང་ཆོས་ལ་སེམས་པ་རབ་ཏུ་གོམས་པའི་ཕྱིར། བརྟན་པ་ཉམས་པར་མི་འདོད་པའི་ཚིག་གསལ་བས་དེ་ལ་སྨྲས་པ། དེ་མི་རིགས་སོ། །ཅིའི་ཕྱིར་ཞེ་ན། བསོད་ནམས་ཉམས་འགྱུར་བདག་ཀྱང་མི་འཆི་མིན། །བདག་གི་སྡིག་འདིའང་གཞན་གྱིས་ཤེས་པར་འགྱུར། །དེ་དང་བྲལ་བས་འགྱོད་པར་གྱུར་པའི་མེས། །ཁྱོད་ཀྱི་སེམས་ཀྱང་རྩྭ་བཞིན་བསྲེགས་པར་འགྱུར། །འཇིག་རྟེན་འདི་དང་ཕ་རོལ་གཉིས་ཀ་ལ། བདག་ཅག་གཉིས་ལ་དེ་ལྟར་གནོད་པའི་ལས། །གང་ཕྱིར་མི་མཁས་བསྟེན་པར་བྱེད་འགྱུར་བ། །དེ་ཕྱིར་མཁས་པ་བསྟེན་པར་ཡོང་མི་བྱེད། ཨ་བྷི་པཱ་ར་ཀས་སྨྲས་པ། ལྷ་ཆོས་དང་འགལ་བར་དོགས་པ་མི་མཛད་དུ་གསོལ། །སྦྱིན་པ་བགྱིད་པའི་གྲོགས་བགྱིས་པས། ཁྱོད་ལ་བསོད་ནམས་ཉིད་དུ་འགྱུར། །དེ་ནི་བདག་ལས་མ་བཞེས་ན། །སྦྱིན་པ་འགགས་པས་ཆོས་མིན་འགྱུར། །ལྷ་ལ་བཀའ་མཆིད་ངན་བའི་སྐྱབས་ཀྱང་མ་མཐོང་ངོ་། །དེ་ཅིའི་སླད་དུ་ཞེ་ན། འོ་སྐོལ་གཉིས་ལས་མ་གཏོགས་པ། །གཞན་ནི་སུ་ཞིག་འདི་ཤེས་འགྱུར། །དེ་བས་མི་ཡིས་ཁྲེལ་འགྱུར་བའི། །ཐུགས་ལ་དོགས་པ་མ་མཛད་ཅིག །དེ་ལྟར་བགྱིས་ན་བདག་ལ་སྨན་ཡོན་བཏགས་པར་འགྱུར་གྱི། གནོད་པར་ནི་མི་འགྱུར་རོ། །རྗེའི་དོན་དུ་སྤྱད་པས་མགུ་བ་ཡིས། །སེམས་ལ་ཁྱབ་པར་གྱུར་ན་ག་ལ་གནོད། །དེ་བས་ཐུགས་ལ་བཞེད་པ་དོན་བཅས་མཛོད། །བདག་ལ་གནོད་པར་དོགས་པ་ཁྱོད་མ་མཛད། རྒྱལ་པོས་སྨྲས་པ། སྡིག་པ་ཞི་བར་གྱུར་ཅིག །ང་ལ་རབ་ཏུ་བྱམས་པའི་ཕྱིར། །ཁྱོད་ཀྱིས་འདི་ནི་མ་བརྟགས་སོ། །འདི་ལྟར་སྦྱིན་པ་ཐམས་ཅད་དུ། །ཆོས་སྒྲུབ་པ་ཡི་གྲོགས་མ་ཡིན། །རབ་ཏུ་བྱམས་པས་ང་ཡི་ཕྱིར། །སྲོག་ཀྱང་ཕངས་པར་མི་ལྟ་བ། གཉེན་བས་ལྷག་པ་དེ་ལྟ་བུའོ། །གྲོགས་པོའི་ཆུང་མ་གྲོགས་མོ་ཡིན། དེ་བས་ན་ང་འདི་ལྟར་བྱེད་དུ་གཞུག་བའི་མི་རིགས་སོ། །གང་ཡང་འདི་གཞན་སུས་ཀྱང་ཤེས་པར་མི་འགྱུར་རོ་ཞེས་ཟེར་བ་དེ་ཡང་། འདི་ཅི་སྡིག་ཏུ་མི་འགྱུར་རམ། །མ་མཐོང་བར་ནི་སྡིག་པ་བྱས་པ་དག །དུག་ཟོས་བཞིན་དུ་བདེ་བར་ཇི་ལྟར་འགྱུར། །ལྷ་དང་རྣལ་འབྱོར་ཅན་གྱི་མི་དག་ནི། །རྣམ་དག་མིག་གིས་མི་མཐོང་མི་སྲིད་དོ། །གཞན་ཡང་། དེ་ནི་ཁྱོད་ལ་མི་ཕངས་ཞེའམ། །དེ་ནི་བཏང་མ་ཐག་ཏུ་ཡང་། སྡུག་བསྔལ་འབྱུང་བར་མི་འགྱུར་ཞེས། །སུ་ཞིག་དེ་ལ་ཡིད་ཆེས་འགྱུར། །ཨ་བྷི་པཱ་ར་ཀས་སྨྲས་པ། །བདག་ནི་བུ་སྨད་བཅས་པར་འབངས། །ཁྱོད་ནི་བདག་གི་རྗེ་དང་ལྷ། །དེ་བས་བྲན་མོ་འདི་ལྟ་ལ། །ཆོས་དང་འགལ་བ་ཅི་ཞིག་མཆིས། །འདི་བདག་ལ་ཕན་ཞེས་བགྱི་བ་དེ་ཡང་ཕངས་ན་ཕངས་སུ་བས་མོད། འདི་ནི་བདག་ལ་ཕངས་བ་ལགས་མོད་ཀྱི། །དེ་ཡི་སླད་དུ་འདི་ནི་ཁྱོད་ལ་འབུལ། །ཕངས་པ་བྱིན་ན་ཚེ་རབས་ཕྱི་མ་ལ། །རབ་ཏུ་དགའ་ཞིང་ཕངས་པ་ཐོབ་པར་འགྱུར། །ལྷ་དེ་བས་ན་འདི་བཞེས་སུ་གསོལ། །རྒྱལ་པོས་སྨྲས་པ། དེ་ལྟར་བྱར་མི་རུང་གི་དེ་སྐད་མ་ཟེར་ཅིག ཅིའི་ཕྱིར་ཞེ་ན། ཆོས་སྤྱད་པ་ལས་དཔལ་ནི་ཐོབ་འགྱུར་ན། །དེ་ཉིད་ལ་ཡང་གནོད་པ་བྱེད་པ་བས། བདག་ནི་མཚོན་ཆ་རྣོན་པོས་བཏབ་པའམ། མེ་སྟག་འཕྲོ་བའི་མེ་ནང་ཞུགས་ཀྱང་བླ། །ཨ་བྷི་པཱ་ར་ཀས་སྨྲས་པ། །གལ་ཏེ་འདི་གཞན་གྱི་མཆིས་བྲང་ལགས་པའི་སླད་དུ་ལྷ་མི་བཞེད་ནའང་། འདི་བདག་གིས་སྐྱེ་བོ་ཐམས་ཅད་ཀྱིས་བཏུས་སུ་རུང་བར་སྨད་འཚོང་མའི་ཚུལ་འཛིན་དུ་སྩལ་བར་འཚལ་ལོ། །དེ་ནས་ལྷ་འདི་བཞེས་སུ་གསོལ། །རྒྱལ་པོས་སྨྲས་པ། ཁྱོད་སྨྱོས་སམ་ཅི། སྐྱོན་མེད་ཆུང་མ་བོར་ན་ནི། །ང་ཡི་ཆད་པས་བཅད་ཏ་རེ། །སྨད་པའི་གནས་སུ་ཁྱོད་གྱུར་ན། །འདི་དག་ཕ་རོལ་བསྲེགས་པར་འགྱུར། །དེ་བས་ན་བྱར་མི་རུང་བ་ལ་དུས་མཆེས་པར་རིགས་པ་ལ་དགའ་བར་གྱིས་ཤིག །ཨ་བྷི་པཱ་ར་ཀས་སྨྲས་པ། ཁྱོད་ལ་བདེ་བས་བདག་ཡིད་བདེར་གྱུར་ན། །གལ་ཏེ་ཆོས་དང་འགལ་བར་གྱུར་ཀྱང་རུང་། །སྐྱེ་བོ་སྨད་ཅིང་བདེ་བ་ཉམས་ཀྱང་རུང་། །དེ་དག་ཐམས་ཅད་ལྟོ་བས་བཟེད་པར་བགྱི། །ས་བདག་ཆེན་པོ་འཇིག་རྟེན་འདི་ན་ནི། །ཁྱོད་ལས་ལྷག་པའི་འགྲོན་མཆོག་གཞན་མ་མཐོང་། །བདག་གི་བསོད་ནམས་འཕེལ་ཕྱིར་མྱོས་བྱེད་མ། །དུས་ཚིགས་མཆོད་པའི་ཡོན་བཞིན་བཞེས་སུ་གསོལ། །རྒྱལ་པོས་སྨྲས་པ། ང་ལ་རབ་ཏུ་བྱམས་པའི་ཕྱིར། བདག་ལ་ཕན་པ་དང་གནོད་པར་འགྱུར་བ་ལའང་མི་ལྟ་བར་ཁྱོད་འདི་ལྟར་འབད་པ་ནི་ངའི་དོན་དུ་སྤྱོད་པ་ཡིན་པས། དེའི་ཕྱིར་ཡང་ཁྱོད་ལྷག་པར་ཡལ་བར་དོར་དུ་མི་རུང་ངོ་། །འཇིག་རྟེན་པས་སྨད་པ་ལའང་འཛེམ་པ་མེད་པར་བྱ་བར་མི་རིགས་སོ། །ལྟོས་ཤིག །འཇིག་རྟེན་སྨོད་པས་འཛེམ་པ་མེད་པ་དང་། །ཆོས་དང་ཕྱི་མའི་འབྲས་བུ་མི་ལྟ་བས། །གང་ཡིན་དེ་ལ་སྐྱེ་བོ་ཡིད་མི་ཆེས། །ལྷ་དང་དཔལ་གྱིས་རབ་ཏུ་སྤངས་བར་འགྱུར། །དེ་བས་ན་ཁྱོད་ལ་ང་སྨྲའོ། །སྲོག་གི་ཕྱིར་ཡང་ཆོས་དང་ནི། འགལ་བར་འགྱུར་བ་འགའ་མ་བྱེད། །ཉེས་པ་ཆེར་འགྱུར་གདོན་མི་ཟ། །ལེགས་འབྱུང་ཆུང་ལ་དོགས་དང་བཅས། གཞན་ཡང་། དམ་པ་རྣམས་ནི་ཕ་རོལ་སྨད་ལ་སོགས། །སྡུག་བསྔལ་བྱས་ནས་བདག་ཉིད་བདེ་མི་སྒྲུབ། །དེ་བས་ང་ནི་གཅིག་ལའང་མི་གནོད་པར། །ཆོས་ལ་གནས་ནས་བདག་གི་དོན་སྒྲུབ་པོ། །ཨ་བྷི་པཱ་ར་ཀས་སྨྲས་པ། རྗེའི་དོན་དུ་གུས་པའི་དབང་གིས་སྤྱད་པ་འདི་ལ། བདག་དང་ཆོས་མ་ལགས་པར་འགྱུར་བའི་སྐབས་ཅི་ཞིག་མཆིས །འདི་བདག་གིས་ཕུལ་བ་ལྷས་བཞེས་པ་ལའང་ནོངས་པ་ཅི་མཆིས། དེའི་སླད་དུ་ཡུལ་ཤི་བི་པའི་མི་ལྗོངས་ཀྱི་མི་དང་བཅས་པས་ཀྱང་། འདི་ལ་ཆོས་མ་ལགས་པར་སྙད་གདགས་སུ་ཅི་ཞིག་མཆིས། དེ་བས་ན་ལྷ་འདི་བཞེས་སུ་གསོལ། རྒྱལ་པོས་སྨྲས་པ། ཁྱོད་ནི་ངའི་དོན་སྤྱོད་པ་ལ་རབ་ཏུ་གཞོལ་བར་སེམས་མོད་ཀྱི། འདི་ལ་འུ་བུ་ཅག་གཉིས་དང་། ཡུལ་ཤི་བི་པའི་མི་ལྗོངས་ཀྱི་མི་དང་བཅས་པའི་ནང་ན་སུ་ཆོས་ཤེས་པ་མཆོག་ཡིན་པ་འདི་དཔྱད་དགོས་སོ། །དེ་ནས་ཨ་བྷི་པཱ་ར་ཀས་གུས་པ་དང་བཅས་པར་རྒྱལ་པོ་ལ་སྨྲས་པ། རྒན་པ་བསྙེན་བཀུར་བྱ་བ་བྱས་པ་དང་། །ཐོས་པ་མང་ཞིང་བློ་ཡང་རྣོ་བ་དང་། །འཁོར་གསུམ་དོན་གྱི་དེ་ཉིད་རིག་པ་ནི། ལྷ་ཅིག་ཁྱོད་དང་བདག་པོ་ཆེ་ལ་མཆིས། རྒྱལ་པོས་སྨྲས་པ། དེ་བས་འདི་ལའང་བསླུ་བའི་མི་རིགས་སོ། །ཅིའི་ཕྱིར་ཞེ་ན། འཇིག་རྟེན་པ་ལ་ཕན་དང་གནོད་པ་ནི། རྒྱལ་པོ་རྣམས་ཀྱི་སྤྱོད་ལ་རག་ལུས་ཏེ། །དེ་བས་འབངས་རྣམས་སྙིང་ཉེ་བསམས་ནས་ནི། །གཏམ་སྙན་འབྱུང་བའི་ལམ་གྱི་མཆོག་ལ་དགའ། །ཁྱུ་མཆོག་འགྲོ་བ་དྲང་ངམ་ཡོ་བ་བཞིན། །རྗེས་སུ་འགྲོ་བ་རྣམས་ནི་དོགས་མེད་ཅིང་། །འཁྲུལ་པ་མེད་པར་རྗེས་སུ་འབྲང་བ་བཞིན། འབངས་ཀྱང་དེ་བཞིན་རྒྱལ་པོའི་རྗེས་སུ་འབྲང་། །གཞན་ཡང་ཁྱོད་ལྟོས་ཤིག །ང་བདག་རང་ཡང་བསྲུང་བར་ནི། །གང་ཚེ་ནུས་པར་མ་གྱུར་པ། །དེ་ཚེ་ང་ཡིས་བསྲུང་འདོད་པའི། །སྐྱེ་བོ་རྣམས་ནི་ཇི་ལྟར་འགྱུར། །དེ་ལྟར་འབངས་ལ་ཕན་པར་བལྟ་བ་དང་། །བདག་གི་ཆོས་དང་གྲགས་པ་དྲི་མེད་ལ། །བལྟས་ནས་སེམས་ཀྱི་དབང་དུ་ང་མི་འགྲོ། །ཁྱུ་མཆོག་བཞིན་དུ་ང་ནི་འབངས་ཀྱི་མགོན། །དེ་ནས་བློན་པོ་ཨ་བྷི་པཱ་ར་ཀ། རྒྱལ་པོས་སྲན་བཙུགས་པ་དེས་མགུ་ནས་རྒྱལ་པོ་ལ་ཕྱག་འཚལ་ཏེ་ཐལ་མོ་སྦྱར་ནས་སྨྲས་པ། གང་རྣམས་བསྲུང་བ་རྒྱལ་པོ་ཁྱོད་བཞུགས་པའི། །ཨེ་མའོ་འབངས་རྣམས་སྐལ་བ་ཕུན་སུམ་ཚོགས། །ཆོས་ལ་དགྱེས་ཤིང་བདེ་ལ་མ་ཆགས་པ། །དེ་ལྟ་བུ་ནི་དཀའ་ཐུབ་ནགས་ནའང་དཀོན། །རྒྱལ་པོ་ཆེན་པོ་ཆེན་པོའི་སྒྲ། །འདི་ནི་རྒྱལ་པོ་ཁྱོད་ལ་མཛེས། །ཡོན་ཏན་མེད་ལ་ཡོན་ཏན་བརྗོད། །སྨད་ཅིང་རྩུབ་པའི་ཚིག་ཏུ་འགྱུར། །རྒྱ་མཚོ་རིན་ཆེན་འབྱུང་གནས་བཞིན། །ཡོན་ཏན་འབྱུང་གནས་ཁྱོད་ལགས་པས། །ཁྱོད་ནི་དེ་ལྟར་ཞིར་གྱུར་པ། །དེ་ལ་ངོ་མཚར་ཆེར་མི་འཛིན། །དེ་ལྟར་སྐྱེ་བུ་དམ་པ་རྣམས་ནི་བདག་རང་སྲན་ཐུབ་པས་བསྟན་པ་དང་། །ཆོས་ཀྱི་འདུ་ཤེས་རབ་ཏུ་གོམས་པར་བྱས་པའི་ཕྱིར། །སྡུག་བསྔལ་མི་བཟད་པས་གདུངས་ཀྱང་ལམ་ངན་པར་འཇུག་པར་མི་འགྱུར་རོ། །དེ་བས་ན་སྲན་ཐུབ་པར་བྱ་བ་དང་། །ཆོས་ལ་གོམས་པར་བྱ་བ་ལ་བརྩོན་པར་བྱའོ། །མྱོས་བྱེད་མའི་སྐྱེས་པའི་རབས་ཏེ་བཅུ་གསུམ་པའོ།། །།བམ་པོ་ལྔ་པ། ཆོས་ལ་གནས་ན་བདེན་པའི་ཚིག་ཙམ་གྱིས་ཀྱང་མ་རུང་བར་འགྱུར་བ་ལས་ཐར་བར་འགྱུར་ན། དེའི་འབྲས་བུ་ལྟ་སྨོས་ཀྱང་ཅི་དགོས། དེ་བས་ན་ཆོས་ཀྱི་རྗེས་སུ་འཇུག་པར་བྱའོ། །དེ་ཡང་འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བློ་རབ་ཏུ་རྣོ་བ། གྲུའི་ཁ་ལོ་བསྒྱུར་བ་ཞིག་ཏུ་གྱུར་ཏོ་ཞེས་གྲག་གོ །འདི་ལྟར་བྱང་ཆུབ་སེམས་དཔའ་རྣམས་ནི་རང་བཞིན་གྱི་ཤེས་རབ་རྣོ་བས་གཙུག་ལག་ཁྱད་པར་ཅན་གང་དང་གང་སློབ་པར་འདོད་པ་དང་། སྒྱུ་རྩལ་ཁྱད་པར་ཅན་གང་དང་གང་སློབ་པར་འདོད་པ་དེ་དང་དེ་དག་ལ་ཤེས་རབ་རྣོ་ཞིང་སྐྱེ་བོ་གཞན་ལས་ལྷག་པར་འགྱུར་རོ། །བདག་ཉིད་ཆེན་པོ་དེ་སྐར་མ་རྒྱུ་བ་ལ་མཁས་པས། །ཕྱོགས་ཀྱི་བྱེ་བྲག་ལ་བློ་མ་རྨོངས་ཤིང་ནར་མ་དང་གློ་བུར་དུ་འབྱུང་བའི་ལྟས་ཤེས་ལ་མཚན་མ་ལ་མཁས་ཤིང་དུས་དང་དུས་མ་ཡིན་པའི་གོ་རིམས་ལ་མཁས་པས། ཉ་དང་ཆུའི་ཁ་དོག་དང་སའི་བྱེ་བྲག་དང་བྱ་དང་རི་ལ་སོགས་པའི་མཚན་མས་རྒྱ་མཚོའི་ཕྱོགས་ནི་ལེགས་པར་རྟོགས། དྲན་པ་དང་ལྡན་ཞིང་ལེ་ལོ་དང་གཉིད་ནི་ཆུང་། གྲང་བ་དང་ཚ་བ་དང་ཆར་འབབ་པ་ལ་སོགས་པའི་སྡུག་བསྔལ་ལ་ནི་ཇི་མི་སྙམ། བག་ཆེ་ལ་བརྟན་པ་དང་ནི་ལྡན། དྲང་བ་དང་ཟློག་པ་ལ་སོགས་པ་ལ་མཁས་པའི་ཕྱིར་ཚོང་པ་རྣམས་འདོད་པའི་ཡུལ་དུ་ཕྱིན་པར་བྱེད་པ་ཞིག་ཏུ་གྱུར་ཏོ། །དེ་འགྲོ་བའི་དོན་རབ་ཏུ་གྲུབ་པར་གྱུར་པའི་ཕྱིར་མིང་ཡང་ལེགས་པར་ཕ་རོལ་དུ་ཕྱིན་པར་བྱེད་པ་ཞེས་བྱའོ། །དེ་གནས་པའི་ཡུལ་གྱི་མིང་ཡང་ལེགས་པར་ཕ་རོལ་དུ་ཕྱིན་པ་ཞེས་སྔོན་གྲགས་སོ། །དེང་སང་ནི་སཱུ་ར་པཱ་ར་ཀ་ཞེས་བྱའོ། །དེ་རབ་ཏུ་བཀྲ་ཤིས་ཤིང་ཕུན་སུམ་ཚོགས་པའི་ཕྱིར་རྒས་པར་གྱུར་ཀྱང་། །རྒྱ་མཚོར་འདོང་བའི་ཚོང་པ་དོན་གྲུབ་པར་འདོད་པ་རྣམས་ཀྱིས་གསོལ་བ་བཏབ་པ་དང་། བཀུར་སྟི་ཆེར་བྱས་ཏེ། གྲུ་བོ་ཆེའི་ནང་དུ་འཇོག་པར་བྱེད་དོ། །དེ་ནས་རེ་ཤིག་ཅིག་ཡུལ་བྷ་རུ་ཀཙྪ་ནས། ཚོང་པ་གསེར་གླིང་དུ་འདོད་པ་དོན་གྲུབ་པར་འདོད་པ་དག་ཅིག་ཡུལ་ལེགས་པར་ཕ་རོལ་དུ་ཕྱིན་པར་ལྷགས་ནས། སེམས་དཔའ་ཆེན་པོ་དེ་གྲུ་བོ་ཆེའི་ནང་དུ་གཞུགས་པའི་ཕྱིར་གསོལ་བ་བཏབ་པོ། དེས་དེ་ལ་སྨྲས་པ། རྒས་པའི་དབང་གིས་ལྟ་བ་ཉམས་གྱུར་ཅིང་། ཞོ་ཤ་ཆུང་བས་དྲན་པ་རབ་ཏུ་ཉམས། །བདག་གི་ལུས་ཀྱི་བྱ་བའང་ཉམ་ཆུང་ན། །བདག་ལ་གྲོགས་བྱར་རེ་བ་ག་ལ་སྲིད། །ཚོང་པ་རྣམས་ཀྱིས་སྨྲས་པ། །ཁྱོད་ཀྱི་ལུས་ཀྱི་གནས་སྐབས་ཅི་འདྲ་བ་བདག་ཅག་གིས་འཚལ་ཏེ། ཁྱོད་ལ་དྲག་ཤུལ་སྤྱད་པའི་མཐུ་མཆིས་སུ་ལགས་ཀྱང་། བདག་ཅག་ནི་ཁྱོད་ལ་འཕྲིན་ལས་བགྱི་བར་མི་གསོལ་གྱི། གཞན་དུ་ན། ཁྱོད་ཀྱི་ཞབས་ནི་པདྨ་ལ་བསྟེན་པའི། །རྡུལ་གྱིས་གྲུ་འདི་བཀྲ་ཤིས་ལྡན་གྱུར་ན། །མཚོ་ཡི་ནང་ནས་རབ་ཏུ་བགྲོད་དཀའ་ཡང་། །བདེ་བར་ཐར་འགྱུར་སླད་དུ་བདག་ཅག་མཆིས། །དེ་ནས་བདག་ཉིད་ཆེན་པོ་དེ་དེ་དག་ལ་སྙིང་བརྩེ་བའི་ཕྱིར་རྒས་པས་ལུས་ཤིག་ཤིག་པོར་གྱུར་དུ་ཟིན་ཀྱང་། གྲུ་བོ་ཆེ་དེའི་ནང་དུ་ཞུགས་སོ། །དེ་གྲུའི་ནང་དུ་ཞུགས་པ་དང་། ཚོང་པ་དེ་དག་ཐམས་ཅད་ཀྱིས་བསམས་པ། ད་ནི་གདོན་མི་ཟ་བར་བདག་ཅག་དོན་གྱི་མཆོག་གྲུབ་པར་འགྱུར་རོ་སྙམ་ནས་སེམས་རབ་ཏུ་དགའ་བར་གྱུར་ཏོ། །དེ་ནས་མཐར་གྱིས་རྒྱ་མཚོ་ཆེན་པོ་ཉའི་རིགས་རྣམས་པ་སྣ་ཚོགས་རྣམ་པར་རྒྱུ་བ། ཆུ་རླབས་ཀྱི་སྒྲ་ཆེན་པོ་གྲག་པ། རླུང་གིས་བསྐྱོད་པའི་ཆུ་རླབས་མང་པོ་བསྙེར་བ། རིན་པོ་ཆེ་རྣམ་པ་སྣ་ཚོགས་པ་དང་། སའི་ཁ་དོག་གི་ཁྱད་པར་མང་པོས་མདོག་བསྒྱུར་བ་དབུ་བ་སྦྲེངས་པས་མེ་ཏོག་གི་ཕྲེང་བ་བཞིན་དུ་མཛེས་པར་བྱས་པ། ལྷ་མ་ཡིན་དང་ཀླུ་མཆོག་རྣམས་ཀྱི་གནས་སུ་གྱུར་པ། གཏིང་དཔག་དཀའ་བ། ཆུ་ཚད་མེད་པའི་ནང་དུ་ཞུགས་སོ། །དེ་ནས་ཨནྡ་རྙིལ་གྱི་འོད་ལྟར་སྔོ། །ཉི་མའི་འོད་ཀྱི་གནམ་སྔོ་བཞུ་བ་བཞིན། །ཁོ་ར་ཁོར་ཡུག་ཆུ་འགྲམ་ལྟར་མི་སྣང་། །གཏིང་དཔག་དཀའ་བའི་མཚོ་འཇིང་ནང་དུ་ཞུགས། །དེ་ནས་དེ་དག་དེར་ཕྱིན་པ་དང་། །ཕྱི་དྲོའི་དུས་སུ་ཉི་མའི་འོད་ཀྱི་དཀྱིལ་འཁོར་ནི་ཆུང་ངུ་གྱུར། །གློ་བུར་དུ་ལྟས་ངན་ཆེན་པོ་རབ་ཏུ་འཇིགས་སུ་རུང་བ་ཞིག་བྱུང་བ་དང་། རླབས་ནི་རྣམ་པར་འཁྲུག་ཅིང་དབུ་བ་འཐོར། །དྲག་པོའི་རླུང་གིས་བསྐྱོད་པས་འཇིགས་སྒྲ་འབྱིན། །ཆུ་ཀུན་ཐ་མལ་འདུག་ལས་རབ་ཏུ་གཡོས། །རྒྱ་མཚོ་དེ་མ་ཐག་ཏུ་འཁྲུགས་པར་གྱུར། །ལྟས་ངན་གློ་བུར་ལངས་པའི་རླུང་གིས་བསྐྱོད། །རླབས་ཆེན་འཇིགས་སུ་རུང་བའི་ཤུགས་ཀྱིས་དཀྲུགས། །དུས་མཐའི་རླུང་གིས་རི་གཡོས་ས་གཞི་བཞིན། །རྒྱ་མཚོའི་འཇིང་ནི་རབ་ཏུ་འཁྲུགས་པར་གྱུར། །གློག་ཕྲན་འགྱུར་བའི་འོད་ཀྱི་ལྕེ་གཡོ་བ། །སྤྲུལ་ནག་མགོ་མངས་བཞིན་དུ་མདོག་སྔོ་བའི། །སྤྲིན་གྱིས་ཉི་མའི་ལམ་ཡང་བསྒྲིབས་པར་གྱུར། །འབྲུག་སྒྲ་འཇིགས་སུ་རུང་བ་བརྒྱུད་མར་གྲག །སྤྲིན་ཆེན་སྟུག་པོས་འོད་ཀྱི་དྲ་བ་བསྒྲིབས། །ཉི་མ་མཐར་གྱིས་ནུབ་ཏུ་ཉེ་བར་གྱུར། །ཉི་མ་ནུབ་པའི་སྐབས་ནི་རྙེད་པ་དང་། །མུན་པའང་རིམ་གྱིས་གནག་ཏུ་ཉེ་བར་གྱུར། ཆར་རྒྱུན་མདའ་ཡི་རླབས་ལ་ཕོག་པ་དང་། །རྒྱ་མཚོའི་འཇིང་ནི་གནམ་དུ་རྒལ་བ་འདྲ། །གྲུ་ཡང་འཇིགས་པ་བཞིན་དུ་རབ་གཡོས་ནས། །དེ་དག་སྙིང་ལ་འཇིགས་པ་སྐྱེད་པར་བྱེད། །དེ་དག་སྐྲག་ཅིང་སྤ་གོང་མི་སྨྲ་ཞུམ། །བརྟན་པོ་དག་ནི་ཐར་པའི་ཐབས་ལ་འབད། །ཁ་ཅིག་རང་གི་ལྷ་ལ་གསོལ་བ་འདེབས། །སེམས་སྟོབས་ཡོན་ཏན་བསམ་པ་རྣམ་པར་སྟོན། །དེ་ནས་ཚོང་པ་དེ་དག་རླུང་དང་ཆུའི་ཤུགས་ཀྱིས་བདས་པའི་གྲུ་བོ་ཆེས་གཡེངས་ནས་ཉིན་ཞག་དུ་མར་ཡང་ཆུའི་འགྲམ་མ་མཐོང་ཞིང་། །རྒྱ་མཚོའི་མཚན་མ་ཇི་ལྟར་འདོད་པ་ཡང་མ་མཐོང་ལ། རྒྱ་མཚོའི་མཚན་མ་སྔོན་མ་མཐོང་བ་ཤ་སྟག་མཐོང་བས། ཕྱི་ཕྱིར་ཞིང་སེམས་མི་དགའ་ལ་འཇིགས་ཤིང་བག་ཚ་བས་ཅི་བྱ་གཏོལ་མེད་པར་གྱུར་ཏོ། །དེ་ནས་བྱང་ཆུབ་སེམས་དཔའ་ལེགས་པར་ཕ་རོལ་དུ་ཕྱིན་པས་དེ་དག་སྤྲོ་བསྲིང་པའི་ཕྱིར་སྨྲས་པ། རྒྱ་མཚོའི་ནང་དུ་ཞུགས་པ་རྣམས་ལ་ལྟས་ངན་གློ་བུར་དུ་བྱུང་བས་འཁྲུགས་ཤིང་ཉོན་མོངས་པར་འགྱུར་བ་འདི་ལྟ་བུ་ངོ་མཚར་མི་ཆེ་ཡི། ཁྱེད་ཅག་བག་ཚ་བར་མ་བྱེད་ཅིག །ཞུམ་པས་ཕོངས་ལས་ཐར་ལ་མི་ཕན་གྱི། །དེ་བས་མྱ་ངན་གདུང་བ་མ་བྱེད་པར། །དགོས་པ་དོན་སྒྲུབ་མཁས་ལ་བརྟན་བྱས་ན། །རབ་ཏུ་དཀའ་བའང་སླ་བས་ཐར་བར་འགྱུར། །དེ་བས་འཇིགས་ཤིང་མི་དགའ་མ་བྱེད་པར། །ཅི་ལྟར་བྱ་བའི་ཐབས་ཀྱིས་དགོས་པ་སྒྲུབས། །མཁས་པའི་གཟི་བརྗིད་བརྟན་པས་གཟེངས་བསྟོད་ན། །དོན་རྣམས་ཐམས་ཅད་འགྲུབ་པ་ལག་ན་ཡོད། །དེ་ལྟར་བདག་ཉིད་ཆེན་པོ་དེས། །ཚོང་པ་དེ་དག་སེམས་བརྟན་པར་བྱས་པ་དང་། རྒྱ་མཚོའི་འགྲམ་མཐོང་དུ་རེ་ནས། །རྒྱ་མཚོ་ལ་བལྟས་ན། །མིའི་གཟུགས་འདྲ་བ། དངུལ་གྱི་ཡ་ལད་གྱོན་པ་དག་ཅིག་ཆུའི་ནང་དུའང་བྱིང་སྟེང་དུའང་བྱུང་བ་མཐོང་ངོ་། །དེ་དག་གི་བྱད་གཟུགས་དང་མཚན་མ་ལེགས་པར་བརྟགས་ནས་ཡ་མཚན་ཆེར་གྱུར་ཏེ། ལེགས་པར་ཕ་རོལ་དུ་ཕྱིན་པ་ལ་སྨྲས་པ། །རྒྱ་མཚོ་འདིའི་ནང་ན་སྔོན་མ་མཐོང་པའི་མཚན་མ་དག་ཅིག་སྣང་སྟེ། དེ་དག་ནི། ལྷ་མིན་དམག་མི་བཞིན་དུ་དངུལ་གྱི་གོ་ཆ་བགོས། མིག་མི་སྡུག་ལ་སྣ་ཡང་སྤུ་གྲི་འདྲ་བར་སྣང་། སྟེང་དུ་འབྱུང་ཞིང་རྐྱལ་པའི་ཞར་ལ་ནི། །རྒྱ་མཚོའི་ཆུ་ལ་རྩེད་མོ་བྱེད་པ་སུ་ཞིག་ལགས། །ལེགས་པར་ཕ་རོལ་དུ་ཕྱིན་པས་སྨྲས་པ། འདི་དག་མི་ནི་མ་ཡིན་གྱི་འདི་དག་ནི་ཉ་མི་འདྲ་བར་སྣང་བ་དག་ཅིག་ཡིན་གྱི། འདི་དག་གིས་མ་འཇིགས་ཤིག་འོན་ཀྱང་བདག་ཅག་ཡུལ་ནི་གཉིས་ཀ་ལས། རབ་ཏུ་རིང་དུ་དོང་བར་གྱུར། །རྒྱ་མཚོ་འདི་ནི་སྤུ་གྲི་འཕྲེང་། །དེ་བས་བཟློག་ལ་འབད་པར་གྱིས། །ཆུ་རབ་ཏུ་དྲག་པོ་འབབ་པ་དང་། ནུབ་ཕྱོགས་ནས་ལངས་བའི་རླུང་རབ་ཏུ་དྲག་པོས་གྲུ་མགྱོགས་པར་སོང་བས། ཚོང་པ་དེ་དག་གིས་སླར་ཟློག་མ་ནུས་སོ། །དེ་ནས་ཆུས་ཁྱེར་བ་ལ་མཐར་གྱིས་དངུལ་གྱི་མདོག་འདྲ་བའི་ཆུ་དཀར་པོ་དབུ་བ་མང་པོ་འཁྲིགས་པའི་རྒྱ་མཚོ་གཞན་ཞིག་མཐོང་ནས། ཡ་མཚན་ཆེར་གྱུར་ཏེ། ལེགས་པར་ཕ་རོལ་དུ་ཕྱིན་པ་ལ་སྨྲས་པ། ཆུ་རྣམས་རང་གི་དབུ་བས་གཡོག་པ་བཞིན། །རྒྱ་མཚོ་ཆེན་པོ་གོས་དཀར་གྱོན་པ་བཞིན། ཟླ་བའི་འོད་ཟེར་ཞུ་བ་འབབ་པ་བཞིན། །ངང་པ་བཞིན་དུ་འབབ་པ་འདི་ཅི་ལགས། ལེགས་པར་ཕ་རོལ་དུ་ཕྱིན་པས་སྨྲས་པ། རབ་ཏུ་རིང་དུ་ཆུས་ཁྱེར་བས་ཤིན་དུ་དཀའོ། །འོ་མའི་རྒྱ་མཚོ་ཞེས་བྱ་སྟེ། །འདི་ནི་ཞོ་འཕྲེང་རྒྱ་མཚོ་ཡིན། །གལ་ཏེ་ཟློག་པར་ནུས་ན་ནི། །འདི་ལས་ཐལ་ཏེ་འགྲོར་མི་རུང་། །ཚོང་པ་རྣམས་ཀྱིས་སྨྲས་པ། །གྲུ་བོ་ཆེ་རབ་ཏུ་མགྱོགས་པ་དང་། །རླུང་ཡང་དྲག་ཏུ་ལངས་བས་གྲུ་དལ་བུས་བཏང་བར་ཡང་མི་ནུས་ན། །སླར་ཟློག་པར་ལྟ་ག་ལ་ནུས། །དེ་ནས་རྒྱ་མཚོ་དེ་ཡང་འདས་པ་དང་། ཡང་རྒྱ་མཚོ་གཞན་ཞིག་རླབས་ཀྱི་ཕྲེང་བ་རབ་ཏུ་འཁྲུག་པ། གསེར་གྱི་མདོག་འདྲ་བ། ཆུའི་མདོག་མེ་འབར་བ་འདྲ་བ་མཐོང་ནས། ཚོང་པ་དེ་དག་ཡ་མཚན་དང་ངོ་མཚར་ཆེར་གྱུར་ཏེ། ལེགས་པར་ཕ་རོལ་དུ་ཕྱིན་པ་ལ་དྲིས་པ། ཉི་མ་འཆར་ཀའི་ཁ་དོག་འདྲ་བ་ལ། །སྔོན་པོ་མ་ཡིན་ཆུ་རླབས་གནམ་དུ་རྒལ། །མེ་ཆེན་རབ་ཏུ་འབར་བ་འདྲ་བ་ཡི། །རྒྱ་མཚོ་འདི་མིང་འདི་ཅི་ལྟར་ཕྱིར་གྱུར། །ལེགས་པར་ཕ་རོལ་དུ་ཕྱིན་པས་སྨྲས་པ། །འདི་ལྟར་སྣང་བའི་རྒྱ་མཚོ་འདི། །མེ་ཡི་ཕྲེང་བ་ཞེས་གྲགས་ཏེ། །དེ་བས་འདི་ལས་ཟློག་ནུས་ན། །ཁྱེད་ལ་རབ་ཏུ་ལེགས་པར་འགྱུར། །དེ་ལྟར་བདག་ཉིད་ཆེན་པོ་དེས་མིང་ཙམ་ཞིག་བསྟན་ནས། །རྒྱང་རིང་དུ་བལྟས་པས་ཆུའི་ཁ་དོག་གྱུར་པའི་གཏན་ཚིགས་ནི་མ་བསྟན་ནོ། །དེ་ནས་ཡང་ཚོང་པ་དེ་དག་རྒྱ་མཚོ་དེ་ལས་ཀྱང་ཐལ་བ་དང་། ཡང་རྒྱ་མཚོ་གཞན་ཆུའི་ཁ་དོག་རིན་པོ་ཆེ་སྤུར་ལོང་ཨནྡ་རྙིལ་གྱི་མདོག་ཀྱང་འདྲ་ལ། རྩྭ་ཀུ་ཤ་སྨིན་པའི་ཁ་དོག་ཀྱང་འདྲ་བ་མཐོང་ནས་ངོ་མཚར་དུ་གྱུར་ཏེ། ལེགས་པར་ཕ་རོལ་དུ་ཕྱིན་པ་ལ་དྲིས་པ། ཀུ་ཤ་སྨིན་པའི་འདབ་མ་འདྲ་བའི་མདོག །དྲག་ཏུ་ལངས་པའི་རླུང་གིས་བསྐྱོད་པའི་རླབས། །དབུ་བ་བཀྲམ་པ་མེ་ཏོག་བཅས་པ་བཞིན། འདི་ལྟར་གདའ་བ་རྒྱ་མཚོ་གང་ཞིག་ལགས། །ལེགས་པར་ཕ་རོལ་དུ་ཕྱིན་པས་སྨྲས་པ། ཀྱེ་དེད་དཔོན་དག་སླར་ཟློག་པའི་ཕྱིར་འབད་པར་གྱིས་ཤིག །འདི་ལས་འདས་ན་ནི་མི་རུང་ངོ་། །ཀུ་ཤའི་འཕྲེང་ཅན་རྒྱ་མཚོ་འདི། །གླང་པོ་ལྕགས་ཀྱུ་མེད་པ་བཞིན། །བཟོད་པར་དཀའ་བའི་ཆུ་འབབ་པ། བདག་ཅག་དགའ་བ་འཕྲོག་པར་བྱེད། །དེ་ནས་ཚོང་པ་དེ་དག་གིས་རབ་ཏུ་འབད་ཀྱང་གྲུ་བོ་ཆེ་ཟློག་མ་ནུས་ན། རྒྱ་མཚོ་དེ་ལས་ཀྱང་ཐལ་ཏེ། ཆུའི་མདོག་སྔོན་པོ་སྨྱིག་མའི་མདོག་དང་བཻ་ཌཱུརྻའི་འོད་འདྲ་བའི་རྒྱ་མཚོ་གཞན་ཞིག་མཐོང་ནས། ལེགས་པར་ཕ་རོལ་དུ་ཕྱིན་པ་ལ་དྲིས་པ། རིན་ཆེན་མར་གད་མདོག་ལྟར་སྔོ་བའི་ཆུ། །ནེའུ་སིང་སྔོན་པོ་མཛེས་པ་བཞིན་དུ་འབབ། ཀུ་མུ་ད་དང་འདྲ་བའི་དབུ་བས་བརྒྱན། །དེ་ལྟར་གདའ་བའི་རྒྱ་མཚོ་འདི་གང་ལགས། །དེ་ནས་བདག་ཉིད་ཆེན་པོ་དེ་ཚོང་པ་དེ་དག་སྡུག་བསྔལ་དུ་གྱུར་པ་དེས་སེམས་གདུངས་ནས་མི་དགའ་ཞིང་ཤུགས་རིངས་ནར་ཞེས་བྱུང་སྟེ། །དལ་བུས་སྨྲས་པ། ད་ནི་རབ་ཏུ་རིང་དུ་ཐལ། །འདི་ལ་བཟློག་པར་རབ་ཏུ་དཀའ། །འཇིག་རྟེན་ཐ་མར་བྱེད་པ་བཞིན། །རྒྱ་མཚོ་འདི་ནི་འདམ་བུའི་འཕྲེང་། །ཚོང་པ་དེ་དག་གིས་དེ་ཐོས་ནས། །མི་དགའ་ཞིང་སེམས་ནི་ཞུམ་ལུགས་ཀྱི་ཚིགས་ནི་ཤིག་ཤིག་པོར་གྱུར། ཤུགས་ནར་ཞེས་འབྱིན་པ་ཙམ་ལ་བརྟེན་ཅིང་དེ་ཉིད་དུ་མཆིས་སོ་ཞེས་འཁོད་དོ། །རྒྱ་མཚོར་ལས་ཐལ་ནས། །ཕྱི་དྲོའི་དུས་ལ་བབ་ཅིང་ཉི་མའི་འོད་ཟེར་ཇེ་ཆུང་ཇེ་ཆུང་དུ་གྱུར་ཏེ། ཉི་མའང་རྒྱ་མཚོའི་ནང་དུ་ནུབ་པར་གྱུར་པ་འདྲ་ལ། །རྒྱ་མཚོའང་བླ་འོག་བཟློག་པ་འདྲ་ཞིང་། །རྒྱ་མཚོའི་ཆུ་སྒྲའང་སེར་བ་དྲག་པོ་འབབ་པ་དང་། སྨྱིག་མའི་ཚལ་མེས་ཚིག་སྟེ་ཏོག་ཡར་གྱིས་འགེགས་པ་དང་འདྲ་བར་སྒྲ་ཆེ་ཞིང་རབ་ཏུ་འཇིགས་པར་བྱེད་པ་ཐོས་པར་གྱུར་ཏོ། །དེ་ཐོས་ནས་ཀྱང་རབ་ཏུ་སྐྲག་ཅིང་སྙིང་འདར་བཞིན་དུ་ལ་གོར་དུ་ལངས་ནས་ཀུན་དུ་བལྟས་ན། ཆུའི་འཇིང་ཆེན་པོ་དེ་གཡང་ས་དང་གཅོང་རོང་གི་ནང་དུ་འབབ་པ་འདྲ་བ་མཐོང་ངོ་། །དེ་ལྟ་བུ་མཐོང་ནས། རབ་ཏུ་བློང་བློང་པོར་གྱུར་ཏེ། ལེགས་པར་ཕ་རོལ་དུ་ཕྱིན་པའི་དྲུང་དུ་ལྷགས་ནས་སྨྲས་པ། བདག་ཅག་རྣ་བ་གས་ཤིང་སྙིང་ཡང་འཇིགས་པས་དཀྲུགས་པ་བཞིན་དུ་གྱུར། །ཆུ་ཡི་བདག་པོ་ཁྲོས་པ་འདྲ་བའི་སྒྲ་འདི་རྒྱང་རིང་ནས་ཀྱང་གྲག །ཆུ་འདི་ཐམས་ཅད་གཅོང་རུང་འཇིགས་པའི་ནང་དུ་མདུན་དུ་འབེབ་པ་འདྲ། །རྒྱ་མཚོ་འདི་འདྲ་ཅི་ལགས་ཁྱོད་ཀྱང་འདི་ལ་ཇི་ལྟར་བགྱི་བར་དགོངས། དེ་ནས་བདག་ཉིད་ཆེན་པོ་དེ་རྟབ་རྟབ་པོར་གྱུར་ཏེ། ཨེ་མའོ་མཚར་བྱས་མཚར་བྱས་ཤེས་སྨྲས་ཏེ། རྒྱ་མཚོ་ལ་བལྟས་ནས་སྨྲས་པ། །གང་དུ་ཕྱིན་ན་སླར་མི་ལྡོག །འཆི་བདག་ཁར་ནི་སྔོན་སོང་བཞིན། །བདག་ཅག་མ་རུང་གྱུར་གྱིས་མེད། །རྒྱ་མཚོའི་ཀློང་དེ་འདི་ཡིན་ནོ། །ཚོང་པ་དེ་རྣམས་ཀྱི་དེ་སྐད་ཐོས་པ་དང་། བདག་ཅག་ནི་རྒྱ་མཚོའི་ཀློང་གི་ཁར་སོང་ངོ་སྙམ་ནས། གསོན་དུ་རེ་བ་མེད་ཅིང་། ཤི་བས་འཇིགས་པས་སེམས་བློང་བློང་པོར་གྱུར་ཏེ། ཁ་ཅིག་སྐད་ཕྱུང་ངུས་པར་གྱུར། །ཁ་ཅིག་སྨྲེ་སྔགས་འདོན་ཅིང་འབོད། ཁ་ཅིག་ཅི་ཡང་བྱེད་མ་ནུས། །ཁ་ཅིག་སྐྲག་ནས་སེམས་ཀྱང་སྟོར། །ཕོངས་པར་གྱུར་པའི་ཡིད་ཀྱིས་རབ་བསྐུལ་ནས། །ཁ་ཅིག་ལྷ་དབང་གུས་པར་ཕྱག་ཀྱང་འཚལ། །ཁ་ཅིག་ཉི་མ་དྲག་པོ་ཐད་ཀར་དང་། །ནོར་ལྷ་རྒྱ་མཚོ་ཉིད་ལ་སྐྱབས་སུ་དོང་། །ལ་ལ་དག་ནི་གསང་སྔགས་བཟླས་བརྗོད་བྱེད། །གཞན་དག་ལྷ་མོ་ཉིད་ལ་ཕྱག་འཚལ་གྱུར། །ལེགས་པར་ཕ་རོལ་ཕྱིན་ལ་ཁ་ཅིག་གིས། །དྲུང་དུ་འོངས་ནས་བསྐོར་ཏེ་སྨྲེ་སྔགས་འདོན། ཕོངས་པར་གྱུར་ལ་འཇིགས་པ་མེད་བྱེད་པ། །གཞན་ལ་ཕན་འདོགས་ཡོན་ཏན་བསགས་པ་ཡི། །ཁྱོད་ཀྱི་མཐུ་ཆེན་ཁྱད་པར་ཅན་དེ་ནི། །ད་ནི་སྦྱར་པའི་དུས་ལ་བབ་ཅིང་མཆིས། །བདག་ཅག་མགོན་མེད་ཕེབས་ནས་སྐྱབས་སུ་མཆི། །དེ་བས་བརྟན་པོར་སྐྱབ་པ་ཐུགས་ལ་དགོངས། །རྒྱ་མཚོ་འདི་ནི་ཁྲོས་བཞིན་བདག་ཅག་རྣམས། །རྒྱ་མཚོའི་ཀློང་གིས་གཅིག་ཅར་རིལ་མིད་བགྱིད། །སྐྱེ་བོ་ཆབ་ཀྱི་ནང་དུ་འགུམ་པ་འདི། །ཁྱོད་ཀྱིས་ཡལ་བར་འདོར་བར་མི་རིགས་སོ། །རྒྱ་མཚོ་འདི་ཡང་ཁྱོད་ཀྱི་བཀའ་མི་གཅོག །དེ་བས་འཁྲུགས་པར་གྱུར་པ་འདི་ལས་ཟློག །དེ་ནས་བདག་ཉིད་ཆེན་པོ་དེ་སྙིང་རྗེ་ཆེན་པོས་སེམས་གདུངས་ནས། ཚོང་པ་དེ་དག་སྤྲོ་བསྲིང་བའི་ཕྱིར་སྨྲས་པ། འདི་ལའང་བདག་ལ་བཅོས་སུ་རུང་བའི་ཐབས་འགལ་ཞིག་ཡོད་པར་མཐོང་སྟེ། དེ་རེ་ཤིག་ཇི་སྦྱར་བར་བྱས་དེའི་ཕྱིར་ཁྱེད་ཅག་རེ་ཤིག་སྤྲོ་བསྲིངས་ཤིག་ཅེས་སྨྲས་པ་དང་། དེ་ནས་ཚོང་པ་དེ་དག་འདི་ལའང་བཅོས་སུ་རུང་བའི་ཐབས་ཡོད་ཅེས་ཟེར་རོ་སྙམ་ནས། རེ་ཐགས་མ་ཆད་དེ་བརྟན་པ་རྟས་པར་གྱུར་ནས། དེ་ལ་ཡིད་རྟོན་ཅིང་ཁ་རོག་སྟེ་འཁོད་པར་གྱུར་ཏོ། །དེ་ནས་བྱང་ཆུབ་སེམས་དཔའ་ལེགས་པར་ཕ་རོལ་དུ་ཕྱིན་པས་བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་གྲུ་བོ་ཆེ་ལ་བཙུགས་ནས། ལུས་ཐམས་ཅད་ཀྱིས་བཏུད་ནས། དེ་བཞིན་གཤེགས་པ་རྣམས་ལ་ཕྱག་བྱས་ཏེ། ཚོང་པ་དེ་དག་ལ་སྨྲས་པ། ཚོང་པ་ཁྱེད་རྣམས་དང་། རྒྱ་མཚོ་དང་ནམ་མཁའ་ལ་གནས་པའི་ལྷ་ཁྱད་པར་ཅན་རྣམས་བསོན་ཅིག །བདག་ནི་ཤེད་བྱེ་ཚུན་ཆད་དུ། །ནམ་ཡང་ཆེད་དུ་བསམས་ནས་ནི། སྲོག་ཆགས་རྣམས་ནི་གང་དུ་ཡང་། བསད་པར་བདག་ནི་ཡོང་མི་དྲན། །བདེན་པའི་ཚིག་ནི་འདི་དག་དང་། བདག་གི་བསོད་ནམས་མཐུ་དག་གིས། །རྒྱ་མཚོའི་ཀློང་དུ་མ་སོང་བར། །གྲུ་འདི་བདེ་བར་སླར་ལོག་ཅིག །དེ་ནས་བདག་ཉིད་ཆེན་པོ་དེའི་བདེན་པའི་བྱིན་གྱི་རླབས་ཀྱི་མཐུ་དང་། བསོད་ནམས་ཀྱི་མཐུས། རླུང་དེ་ཆུའམ་ཤུགས་དང་བཅས་པར་སླར་ལོག་པ་དང་། གྲུ་དེ་ཡང་སླར་ལོག་པར་གྱུར་ཏོ། །གྲུ་དེ་དེ་ལྟར་སླར་ལོག་པ་མཐོང་ནས། ཚོང་པ་དེ་དག་རབ་ཏུ་ཡ་མཚན་ཆེ་ཞིང་ཡིད་རབ་ཏུ་དགའ་བར་གྱུར་ནས། །ལེགས་པར་ཕ་རོལ་དུ་ཕྱིན་པ་ལ་ཕྱག་འཚལ་ཞིང་ཞེ་ས་བསྐྱེད་དེ། གྲུ་སླར་ལོག་གོ་སླར་ལོག་གོ་ཞེས་སྨྲས་སོ། །དེ་ནས་བདག་ཉིད་ཆེན་པོ་དེས་ཚོང་པ་དེ་དག་ལ་སྨྲས་པ། བ་དན་མྱུར་དུ་ཚུགས་ཤིག་ཅེས་དེས་བསྒོ་བ་དང་། དེའི་ལས་སུ་བསྐོས་པ་དེ་དག་རབ་ཏུ་དགའ་ཞིང་སྟོབས་དང་སྤྲོ་བ་བསྐྱེད་ཏེ། བསྒོ་བ་བཞིན་དུ་བྱས་སོ། །དེ་ནས་སྐྱེ་བོ་དགའ་བའི་སྒྲ་འབྱིན་པ། །བ་དན་དཀར་པོ་ཕྱར་བའི་འདབ་མ་མཛེས། །རྒྱ་མཚོའི་ནང་ན་འདུག་པའི་གྲུ་མཛེས་པ། །སྤྲིན་མེད་མཁའ་ལ་ངང་མོ་མཛེས་པ་བཞིན། །གྲུ་དེ་དེ་ལྟར་སླར་ལོག་སྟེ། ཆུ་དང་རླུང་མཐུན་པར་འབབ་ཅིང་ལངས་པས་གཞལ་མེད་ཁང་མཛེས་པའི་ཚུལ་དུ་རང་དགར་ནི་འགྲོ །ནམ་སྲོས་སུ་ཉེ་བའི་མཚམས་ཀྱི་དུས་ནི་ཁད་ཀྱི་སྔོ་ཞིང་། ཕྱོགས་རྣམས་མུན་ནག་གི་བླ་རེས་ཁེབས་ཤིང་སྐར་མའི་རྒྱན་གྱིས་ནི་རྒྱན་པར་སྣང་། ཉི་མ་ནུབ་པའི་ལམ་གྱི་འོད་ནི་ཅུང་ཟད་སྣང་། ནམ་སྲོས་པའི་དུས་ལ་ནི་བབ་པ་དང་། ལེགས་པར་ཕ་རོལ་དུ་ཕྱིན་པས་ཚོང་པ་དེ་དག་ལ་སྨྲས་པ། ཀྱེ་དེད་དཔོན་དག་འདམ་བུའི་འཕྲེང་བ་ཚུན་ཆད་ཀྱི་རྒྱ་མཚོ་ལ་བྱེ་མ་དང་རྡོ་བ་ཅི་མཐོང་བ་རྣམས་ལོང་ལ་གྲུས་ཅི་ཐེག་པ་གྲུའི་ནང་དུ་རྫོངས་ཤིག །དེ་ལྟར་བྱས་ན་གྲུ་འདི་ལྕིད་ཀྱིས་ནོན་པས་ལྡོག་པར་ཡང་མི་འགྱུར་རོ། །བྱེ་མ་དང་རྡོ་བ་འདི་དག་ཀྱང་བཀྲ་ཤིས་པར་བཀུར་བ་ཤ་སྟག་ཡིན་པས། །ཁྱེད་གདོན་མི་ཟ་བར་རྙེད་པ་གྲུབ་པར་འགྱུར་རོ། །ལེགས་པར་ཕ་རོལ་དུ་ཕྱིན་པ་ལ་ཡིད་དགའ་ཞིང་གུས་པར་གྱུར་པའི་ལྷ་རྣམས་ཀྱིས་བསྟན་པའི་གླིང་རྣམས་ལས་དེ་དག་གིས་བྱེ་མ་དང་རྡོ་བ་ཡིན་སྙམ་པའི་བློས། བཻ་ཌཱུརྻ་ལ་སོགས་པ་རིན་པོ་ཆེ་རྣམས་བླངས་ནས། གྲུ་བོ་ཆེའི་ནང་དུ་བརྫངས་སོ། །དེ་ཉིད་ཀྱི་མཚན་མོ་ལ་གྲུ་དེ་ཡུལ་བྷཱ་རུ་ཀཙྪར་ཕྱིན་ཏོ། །དེ་ནས་ནང་པར་དངུལ་དང་ཨནྡ་རྙིལ། བཻ་ཌཱུརྻ་དང་གསེར་གྱིས་གྲུ་བཀང་སྟེ། །དེ་དག་བདག་ཡུལ་ཆུ་འགྲམ་ཕྱིན་པར་གྱུར། །རབ་དགའ་བྱམས་པས་དེ་ལ་མཆོད་པ་བྱས། དེ་བས་ན་དེ་ལྟར་ཆོས་ལ་གནས་ན། བདེན་པའི་ཚིག་ཙམ་གྱིས་ཀྱང་མ་རུང་བར་འགྱུར་པ་ལས་ཐར་བར་འགྱུར་ན། དེའི་འབྲས་བུ་ལྟ་སྨོས་ཀྱང་ཅི་དགོས། དེ་བས་ན་ཆོས་ཀྱི་རྗེས་སུ་འཇུག་པར་བྱའོ། །དགེ་བའི་བཤེས་གཉེན་ལ་བསྟེན་ན། དེ་ལྟར་བདེ་བ་ཐོབ་པར་འགྱུར་བས་ན། དགེ་བའི་བཤེས་གཉེན་ལ་བསྟེན་པའི་ཡོན་ཏན་བསྔགས་པ་ལའང་བརྗོད་པར་བྱའོ། །ལེགས་པར་ཕ་རོལ་དུ་ཕྱིན་པའི་སྐྱེས་པའི་རབས་ཏེ་བཅུ་བཞི་པའོ།། །།ཚུལ་ཁྲིམས་དང་ལྡན་པ་རྣམས་ནི། ཚེ་འདི་ཉིད་ལའང་དགེ་བའི་བསམ་པ་གྲུབ་པར་འགྱུར་ན་ཚེ་རབས་གཞན་ལ་ལྟ་སྨོས་ཀྱང་ཅི་དགོས། དེ་བས་ན་ཚུལ་ཁྲིམས་རྣམ་པར་དག་པ་ལ་འབད་བར་བྱའོ། །དེ་ཡང་འདི་ལྟར་བྱང་ཆུབ་སེམས་དཔའ་རེ་ཤིག་ཅིག་མཚོ་མི་ཆེ་བ་མེ་ཏོག་ཀ་ལྷ་ར་དང་། པདྨ་དམར་པོ་དང་པདྨ་དཀར་པོ་དང་། ཨུཏྤ་ལ་རྣམས་ཀྱིས་ཆུ་བཟང་པོ་བརྒྱན་པ། ངང་པ་དང་། བྱ་ཀ་རན་ད་བ་དང་། ངུར་བ་ཤུག་ཏུ་འགྲོགས་པ་རྣམས་ཀྱིས་མཛེས་པར་བྱས་པ། ཆུ་འགྲམ་ན་ཤིང་ལྗོན་པ་དང་། མེ་ཏོག་མང་པོ་ཡོད་པ་ཞིག་ན། ཉའི་རྒྱལ་པོ་ཞིག་ཏུ་གྱུར་ཏོ་ཞེས་གྲག་གོ །ཚེ་རབས་མང་པོར་གཞན་གྱི་དོན་སྦྱང་པ་ལ་གོམས་པར་བྱས་པས། དེ་ན་གནས་པའི་ཚེའང་། གཞན་ལ་ཕན་པ་དང་། བདེ་བ་བྱེད་པ་འབའ་ཞིག་ཏུ་གྱུར་ཏོ། །དགེ་དང་མི་དགེའི་ལས་རྣམས་གོམས་བྱས་ན། །མི་རྣམས་ལ་ནི་འདྲིས་པ་ཉིད་དུ་འགྱུར། །དེ་ལྟ་བུ་དག་ཆེད་དུ་མ་བསྒྲིམས་ཀྱང་། ཚེ་རབས་གཞན་ལ་རྨི་ལམ་བཞིན་དུ་སྦྱོང་། སེམས་དཔའ་ཆེན་པོ་དེ་ཉ་དེ་རྣམས་ལ་བདག་གི་བུ་སྡུག་པ་རྣམས་ལ་བྱམས་པ་བཞིན་དུ། སྦྱིན་པ་དང་། ཚིག་འཇམ་པོ་དང་དོན་སྤྱོད་པ་ལ་སོགས་པའི་རིམ་པས་རབ་ཏུ་ཕན་འདོགས་པར་གྱུར་ཏོ། །ཕན་ཚུན་གནོད་པ་བྱེད་ལས་རབ་ཏུ་ཟློག །གཅིག་ལ་གཅིག་ནི་བྱམས་པ་རབ་ཏུ་བསྐྱེད། ཐབས་ལ་མཁས་ཤིང་རིགས་པས་དེ་དག་ལ། །ཉ་ཡི་ཆོས་ཚུལ་རབ་ཏུ་རྗོད་པར་བྱེད། །དེ་ཡིས་དེ་དག་ལེགས་པར་བསྐྱངས་པས་ན། །ཉ་རིགས་དེ་དག་རབ་ཏུ་དར་བར་གྱུར། །མི་ཡི་བདག་པོ་ཚུལ་བཞིན་སྤྱོད་པ་ཡིས། །འབངས་རྣམས་བསྐྱངས་པས་གནོད་པ་མེད་པ་བཞིན། །དེ་ནས་རེ་ཤིག་ཅིག་སེམས་ཅན་རྣམས་སྐལ་བ་མེད་པར་གྱུར་པ་དང་། ཆར་འབེབས་པའི་ལྷའི་བུ་རྣམས་བག་མེད་པར་གྱུར་པས། ཆར་ལེགས་པར་མ་བབ་པར་གྱུར་ཏོ། །དེ་ལྟར་ཆར་ལེགས་པར་མ་བབ་པ་དང་། མཚོ་དེ་མེ་ཏོག་རྒྱས་པ་དཀར་པོ་དང་ལྡན་པའི་ཆུ་གཙང་མས་སྔོན་བཞིན་དུ་གང་བར་མ་གྱུར་ཏོ། །དེ་ནས་རིམ་གྱིས་དཔྱིད་ཀྱི་དུས་ལ་བབ་པ་དང་། ངལ་ཞིང་ལེ་ལོའི་དབང་གིས་བུལ་བར་གྱུར་པ་འདྲ་བའི་ཉི་མའི་འོད་ཟེར་རྣོ་ཞིང་ཚ་བས་ས་གཞི་མངོན་པར་གདུངས་ཤིང་འབར་བར་གྱུར་བའི་རྗེས་སུ་འབྲང་བའི་རླུང་སྐོམ་པའི་དབང་གིས་བསིལ་བར་འདོད་པས་ཉིན་རེ་ཞིང་འཐུངས་བ་བཞིན་དུ་མཚོ་དེ་ལྟེང་ཀ་བཞིན་དུ་གྱུར་ཏོ། །དཔྱིད་ཀྱི་དུས་ཀྱི་ཉི་མ་འབར་བ་དང་། འབར་བའི་རྗེས་འབྲང་རླུང་ནི་དྲག་པོ་དང་། རིམས་ནད་གདུངས་འདྲའི་ས་གཞི་ཚ་བ་ཡིས། །ཁྲོས་པ་བཞིན་དུ་ཆུ་ནི་སྐམས་པར་བྱས། །དེ་ནས་བྱང་ཆུབ་སེམས་དཔས་ཉ་མང་པོ་རྣམས་ལ་ཁ་རྣམས་ཀྱིས་ཀྱང་གླགས་ལྟ་བར་གྱུར་ན། ཆུ་འགྲམ་ན་རྒྱུ་བའི་བྱ་རྣམས་ཀྱིས་ལྟ་སྨོས་ཀྱང་ཅི་དགོས་ཏེ། སྤ་གོང་ཞིང་མི་དགའ་བའི་དབང་དུ་ནི་གྱུར། ཅུང་ཟད་འགུལ་ནུས་པ་ཙམ་ལ་བལྟས་ནས། སྙིང་རྗེ་བཞིན་དུ་བསམས་པ། ཀྱི་ཧུད་ཀྱེ་ཉ་འདི་རྣམས་ནི་མ་རུང་བར་གྱུར་གྱིས་མེད་དོ་སྙམ་ནས། ཆུ་ཡང་ཉིན་རེ་བྲི་བར་གྱུར། །ཚེ་ཟད་པ་དང་འགྲན་པ་བཞིན། ཆར་སྤྲིན་འདུ་བར་འགྱུར་བ་ཡང་། །ཅུང་ཟད་རབ་ཏུ་དཀའ་བ་འདྲ། །བྲོས་ཏེ་འདོང་བའི་ལམ་ཡང་མེད། །གཞན་དུ་ཁྱེར་བའང་སུ་ཡང་མེད། །བདག་ཅག་བརླག་པར་དགའ་བ་ཡི། །ངེད་ཀྱི་དགྲ་ཡང་དེའུ་རེ་འོང་། ཆུ་ཡི་ལྷག་མ་འདི་བསྐམས་ན །གདོན་མི་ཟ་བར་གཡོ་བཞིན་ཡང་། བདག་གིས་མངོན་སུམ་མཐོང་བཞིན་དུ། དགྲ་རྣམས་ཀྱིས་ནི་ཟོས་ཡང་དག །དེ་ལ་འདིར་ཇི་ལྟར་བྱས་ན་རུང་སྙམ་དུ་བདག་ཉིད་ཆེན་པོ་དེས་རྣམ་པར་བརྟགས་ན། བདེན་པའི་བྱིན་གྱི་བརླབས་འབའ་ཞིག་གིས་ཕོངས་པ་ལས་ཕན་ཐོགས་པར་མཐོང་ངོ་། །སྙིང་རྗེས་ཀྱང་སེམས་གདུངས་པས་ཤུགས་ནར་ཞེས་ཕྱུང་སྟེ། གནམ་དུ་བལྟས་ནས་སྨྲས་པ། རབ་ཏུ་ཕོངས་པར་གྱུར་ཀྱང་བདག་གིས་ནི། བསམས་བཞིན་སྲོག་ཆགས་བསད་པར་མི་དྲན་ཏེ། བདེན་པ་འདིས་ནི་ལྷ་ཡི་རྒྱལ་པོ་རྣམས། ཆར་པ་འབེབས་ཤིང་མཚོ་ནི་གང་བར་གྱུར། །དེ་ནས་བདག་ཉིད་ཆེན་པོ་དེའི་བསོད་ནམས་བསགས་པའི་ཡོན་ཏན་དང་། བདེན་པའི་བྱིན་གྱི་བརླབས་ཀྱི་མཐུ་དང་། ང་ལ་དགའ་བར་གྱུར་པའི་ལྷ་དང་ཀླུ་དང་གནོད་སྦྱིན་རྣམས་ཀྱི་མཐུས། དུས་མ་ཡིན་པའི་སྤྲིན་ཆུས་གང་བའི་གཟུགས་ཅན་རྣམས་སྒྲ་སྙན་པ་ཟབ་མོ་ནི་སྒྲོགས། གློག་འགྱུ་བས་ནི་བརྒྱན་སྤྲིན་མགོ་སྔོན་པོ་རྒྱ་ཆེན་པོ་རབ་ཏུ་འཕྲོ་བ་ནི་ཁ་གླལ་བ་བཞིན། སྤྲིན་གྱི་རྩེ་མོ་ཕན་ཚུན་དུ་འདུས་པ་ནི་ལག་པས་འཁྱུད་པ་འདྲ་བར་སྤྲིན་ནག་པོ་རྣམས་བྱུང་བར་གྱུར་ཏོ། །ནག་པོའི་སྤྲིན་རྣམས་རི་བོའི་གྲིབ་མ་བཞིན། །ཕྱོགས་ཀྱི་ཐག་གྲུའི་ཚད་ནི་འཇལ་བ་འདྲ། །སྤྲིན་མགོ་ནག་པོས་མུན་ནག་སྦལ་བ་བཞིན། །མེ་ལོང་ནང་བཞིན་ནམ་མཁའི་དཀྱིལ་ན་མཛེས། རྨ་བྱ་རབ་དགའ་ཟེ་བ་འབྲེལ་བ་རྣམས། །གླུ་གར་མཛེས་པས་རབ་ཏུ་བསྟོད་པ་བཞིན། སྤྲིན་ཚོགས་དེ་དག་དཔའ་བོ་དགོང་པ་བཞིན། །རྒྱུན་ཆགས་ཟབ་མོའི་སྒྲ་འབྱིན་རྣམ་པར་མཛེས། །དེ་ཡིས་ཆར་ཕབ་མུ་ཏིག་གཏོར་བ་བཞིན། །ཆུ་རྒྱུན་བབ་པས་རྡུལ་རྣམས་རབ་ཏུ་ཞི། །ཆར་སྤྲིན་ལངས་པའི་རླུང་གིས་རབ་བསྐྱོད་པས། །ས་གཞི་དྲི་ཞིམ་ངད་ཀྱིས་ཁྱབ་པར་གྱུར། །དཔྱིད་ཀྱི་དུས་ལ་བབ་པས་རྣམ་སྤེལ་ཀྱང་། །ཉི་མའི་འོད་ཟེར་སྣང་བ་མེད་པར་གྱུར། །དབུ་བའི་འཕྲེང་བའི་ཁྲིགས་པས་བསྐོར་བ་ཡི། །ཆུ་རྣམས་གཤོང་བུ་དམའ་བར་འབབ་བར་གྱུར། །འབྲུག་གི་རྔ་སྒྲག་རབ་ཏུ་དགར་གྱུར་ནས། །གློག་ཕྲན་འགྱུ་བ་བྲོ་གར་བྱེད་པ་བཞིན། །ཡང་དང་ཡང་དུ་གསེར་འོད་གསལ་བ་ཡི། འོད་ཟེར་འཕྲོ་བས་ཕྱོགས་རྣམས་ཁྱབ་པར་གྱུར། །དེ་ནས་ཆར་པའི་རྒྱུན་མདོག་སྐྱ་བོ་ཀུན་དུ་ཁྱབ་པར་བབ་པས་མཚོ་གང་བར་གྱུར་ཏེ། ཆར་གྱི་རྒྱུན་བབ་མ་ཐག་ཏུ། བྱ་ཁཱ་ལ་སོགས་པ་བྱ་མང་པོ་རྣམས་ནི་བྱེར། ཉ་མང་པོ་རྣམས་ནི་གསོན་དུ་རེ་བའི་བསམ་པ་གྲུབ་ཅིང་རབ་ཏུ་དགའ་བར་གྱུར་པ་དང་། བྱང་ཆུབ་སེམས་དཔའ་སྙིང་རབ་ཏུ་དགའ་བར་གྱུར་ཀྱང་ཆར་ཆད་དུ་དོགས་ནས། ཡང་ཆར་སྤྲིན་ལ་སྨྲས་པ། ཆར་སྤྲིན་འབྲུག་སྒྲ་ཟབ་ཅིང་བརྟན་པ་སྒྲོགས། ཁྭ་རྣམས་རབ་ཏུ་དགའ་བ་མེད་པར་མཛོད། གློག་རྒྱུན་འབར་བ་འགྱུར་བའི་འོད་ཟེར་ཅན། །ཆར་པའི་རྒྱུན་རྣམས་རིན་ཆེན་འདྲ་བ་ཕོབ། །ལྷའི་དབང་པོ་བརྒྱ་བྱིན་གྱིས་ཚིག་དེ་ཐོས་ནས་ཡིད་ཡ་མཚན་རབ་ཏུ་ཆེ་བར་གྱུར་ཏེ། དེའི་དྲུང་དུ་མངོན་སུམ་དུ་འོངས་ནས་མགུ་བར་བྱས་ཏེ་སྨྲས་པ། ཆར་སྤྲིན་འབྲུག་སྒྲ་སྙན་པ་རབ་སྒྲོགས་ཤིང་། །བུམ་པ་བཏུད་པ་བཞིན་དུ་གང་འབབ་པ། །འདི་ནི་ཉ་དབང་མཐུ་ཆེན་ཁྱོད་ཉིད་ཀྱི། །བདེན་པ་ཁྱད་པར་ཅན་གྱི་མཐུ་ཡིན་ཏེ། །འཇིག་རྟེན་དོན་ལ་བརྩོན་པར་གྱུར་པའི་ཡིད། །སྐྱེས་བུ་ཁྱེད་ལྟ་བུ་ཡི་སྤྱོད་པ་ལ། །ངན་གྲོགས་བྱ་བ་བདག་གིས་མ་བྱས་པ། །བདག་གིས་བག་མེད་འཁྲུལ་པ་མཚར་ཅིག་བྱས། །སྐྱེས་བུ་དམ་པའི་སྲོག་ནི་བདག་བགྱིད་ཀྱི། །དེ་རིང་སླན་ཆད་དེ་ལྟར་ཁྱོད་མ་དགོངས། །ཡུལ་ཕྱོགས་འདིར་ཡང་ཁྱོད་ཀྱི་ཡོན་ཏན་གཞེས། །སླན་ཆད་འདི་ལྟར་ཕོངས་པར་ཡོང་མི་འགྱུར། དེ་ལྟར་ཚིག་སྙན་པས་མགུ་བར་བྱས་ནས་དེ་ཉིད་དུ་མི་སྣང་བར་གྱུར་ཏོ། །མཚོ་དེ་ཡང་ཆུས་གང་ཞིང་རབ་ཏུ་འབྱོར་པར་གྱུར་ཏོ། །དེ་ལྟར་ན་ཚུལ་ཁྲིམས་དང་ལྡན་པ་རྣམས་ནི་ཚེ་འདི་ཉིད་ལའང་དགེ་བའི་བསམ་པ་འགྲུབ་པར་འགྱུར་ན། ཚེ་རབས་གཞན་ལྟ་སྨོས་ཀྱང་ཅི་དགོས། དེ་བས་ན་ཚུལ་ཁྲིམས་རྣམ་པར་དག་པ་ལ་འབད་པར་བྱའོ། །ཉའི་སྐྱེས་པའི་རབས་ཏེ་བཅོ་ལྔ་པའོ།། །།བདེན་པའི་ཚིག་བསྒོམས་ན་མེའང་འདའ་བར་བྱེད་མི་ནུས་སོ། །དེ་བས་ན་བདེན་པའི་ཚིག་ལ་བརྩོན་པར་བྱའོ། །དེ་ཡང་འདི་ལྟར་བྱང་ཆུབ་སེམས་དཔའ་དགོན་པའི་གནས་ཤིག་ན། བྱ་སྲེག་པའི་ཕྲུ་གུ་ཞིག་ཏུ་གྱུར་ཏོ་ཞེས་གྲག་གོ །དེ་ཡང་སྒོ་ངའི་སྦུབས་ནས་བྱུང་ནས་ཞག་གྲངས་མང་པོ་ནི་མ་ལོན །སྤུ་གསར་པ་ནི་གདོད་སྐྱེ། རབ་ཏུ་རིད་པས་ཡན་ལག་དང་། ཉིང་ལག་གི་ཕྱོགས་རྣམས་ནི་གསལ་བར་མངོན། །ཕ་མ་གཉིས་ཀྱིས་རྩྭ་དང་ལྡུམ་བུ་ལྟུག་པོའི་ནང་དུ་ཚང་བཅས་པའི་ནང་ན་ཕྲུ་གུ་མང་པོའི་སྤུན་དང་ལྷན་ཅིག་ཏུ་འཁོད་དོ། །དེ་ལྟ་བུའི་གནས་སྐབས་ནའང་ཆོས་ཀྱི་འདུ་ཤེས་མ་ཉམས་པའི་ཕྱིར། ཕ་མ་གཉིས་ཀྱིས་སྙེད་པར་སྲོག་ཆགས་ཁྱེར་ཏེ་འོངས་པ་ནི་ཟར་མི་བཏུབ་ཀྱི། གང་རྩྭའི་ས་བོན་དང་། ཤིང་ན་གྲོ་དྷའི་འབྲས་བུ་ཁྱེར་ཏེ་འོངས་པ་དེ་འབའ་ཞིག་ཟ་སྟེ། ཕ་མ་གཉིས་ཀྱིས་ཀྱང་དེ་འབའ་ཞིག་གིས་གསོས་སོ། །དེ་ཁ་ཟས་རྩུབ་ཅིང་ཆུང་བ་དེས་ལུས་བརྟས་པར་མ་གྱུར། འདབ་གཤོག་ཀྱང་མ་རྫོགས་སོ། །བྱ་སྲེག་པའི་ཕྲུ་གུ་གཞན་རྣམས་ནི་བཟས་ཅི་འོངས་ཟོས་པས་མཐུ་ཆེ་ཞིང་འདབ་གཤོག་རྣམས་ཀྱང་རྒྱས་པར་གྱུར་ཏོ། །འདི་ནི་ཆོས་ཉིད་ཡིན་ཏེ། འདི་ལྟར་ཆོས་དང་ཆོས་མིན་མི་འཛེམ་ཞིང་། ཐམས་ཅད་ཟ་བ་བདེ་བར་གནས། །ཆོས་དང་ལྡན་པའི་ཚུལ་འདོད་ན། །ཆོ་གའི་ཟས་ཟ་བཞིན་དུ་སྡུག །བཅོམ་ལྡན་འདས་ཀྱིས་ཀྱང་ངོ་ཚ་མི་ཤེས་པ་ནི་བདེ་བར་འཚོ་ཞེས་ཚིགས་སུ་བཅད་པ་གཉིས་གསུངས་ཏེ། དེ་ཡང་འཕགས་པ་གནས་བརྟན་པའི་གཞུང་ལས་འབྱུང་བ། བརྐམ་ཞིང་བྱ་རོག་ལྟར་དཔའ་བ། །ངོ་ཚ་མེད་པ་ལེགས་པར་འཚོ། །བརྣབ་ཅིང་སྤྱི་རྟོལ་ཆེ་བ་ཡི། །འཚོ་བ་ཤིན་དུ་ཉོན་མོངས་ལྡན། །རྟག་ཏུ་སྐྱོན་མེད་འཚོལ་བ་དང་། ཞུམ་ཞིང་བག་དང་བཅས་པ་དང་། །འཚོ་བ་སྐྱོན་མེད་ལྟ་བ་དང་། །ངོ་ཚ་ཤེས་པའི་འཚོ་མི་བདེ། །དེ་དག་གི་གནས་དང་མི་རིང་བ་ཞིག་ནས། །ནགས་ཚལ་མེ་ཆེན་པོས་ཚིག་སྟེ། འཇིགས་སུ་རུང་བའི་སྒྲ་ནི་འུར་འུར་ཟེར། དུད་པའི་ཚོགས་ནི་འཁྱིལ། །མེ་ལྕེ་གཡོ་བ་འཁྲུགས་ཤིག་མེ་སྟག་ནི་རྣམ་པར་འཕྲོ། །ནགས་ཚལ་ན་རྒྱུ་བ་རྣམས་ནི་སྐྲག་པ་བྱེད་ལ། །ནགས་ཚལ་སྟུག་པོ་རྣམས་ན་འཇིགས་པར་བྱེད་པ་ཞིག་བྱུང་བར་གྱུར་ཏོ། །དེ་ནི་རླུང་ཡིས་བསྐྱོད་པས་རྣམ་པར་འཕྲོ། །མེ་ལྕེ་འཁྱུག་པའི་ལག་པ་གར་མཛེས་བྱེད། །དུད་པ་འཁྲིགས་པའི་སྐྲ་ནི་གསིགས་པ་བཞིན། །སྒྲ་དང་བཅས་པས་དེ་དག་འཇིགས་པ་སྐྱེད། །དྲག་པོའི་རླུང་གིས་བསྐྱོད་པས་རབ་ཏུ་གཡོ། །ནགས་ཚལ་རྩྭ་རྣམས་འཇིགས་པས་ཉེན་པ་འདྲ །མེ་དེ་རྔམ་པ་བཞིན་དུ་མངོན་པར་འོངས། །མེ་སྟག་འཕྲོ་བ་མང་པོས་ཁྱབ་པར་བསྲེག །བྱ་ཚོགས་མང་པོ་སྐྲག་ནས་རབ་ཏུ་འབྱེར། །རི་དྭགས་འཇིགས་པས་དཀྱུ་ཞིང་ཀུན་དུ་འབྲོས། །དུད་པའི་ནང་ནས་མེ་སྒྲ་དྲག་པོ་གྲག །དེ་ཡིས་སྐྲག་ནས་ནགས་ཚལ་དུ་བ་འདྲ། །མེ་དེ་རླུང་དྲག་པོས་བདས་པས་གནོད་པ་བཞིན་དུ་རྩ་སྟུག་པོ་ལ་མཆེད་ནས། དེ་དག་གི་ཚང་དང་ཉེ་བར་འོངས་སོ། །དེ་ནས་སྲེག་པའི་ཕྲུ་གུ་དེ་རྣམས་འཇིགས་ཤིང་སྐྲག་པས་འཁྲུགས་པའི་སྒྲ་མི་སྙན་པ་འབྱིན་ཅིང་ཅིག་ལ་ཅིག་མི་ལྟ་བར་བརྟབས་བཞིན་དུ་འཕུར་ཏེ་དོང་ངོ་། །བྱང་ཆུབ་སེམས་དཔའ་ནི་ཉམ་ཆུང་བ་དང་། འདབ་གཤོག་མ་རྫོགས་པས་འཕུར་བར་མ་བརྩམ་ཏོ། བྱང་ཆུབ་སེམས་དཔའ་ཆེན་པོ་དེ་བདག་གི་མཐུ་སྟོབས་ཤེས་པས་མ་འཁྲུལ་པ་ཉིད་དུ། མེ་དེ་བཙན་ཐབས་སུ་འོངས་པ་འདྲ་བ་ལ་ཚིག་འཇམ་པོས་སྨྲས་པ། བདག་གི་རྐང་པ་མིང་དོན་མེད་ཅིང་འདབ་མ་མེད། །བདག་གི་ཕ་མ་གཉིས་ཀྱང་ཁྱོད་ཀྱི་སྐྲག་ནས་བྱེར། །ཁྱོད་ལ་འགྲོན་བྱར་རུང་བའང་འདི་ན་ཅི་ཡང་མེད། དེ་བས་མེ་ཁྱོད་འདི་ནས་སླར་ནི་ལོག་པའི་རིགས། །སེམས་དཔའ་ཆེན་པོ་དེས་བདེན་པ་ཡོངས་སུ་བསྒོམས་པའི་ཚིག་གིས་དེ་སྐད་སྨྲས་པ་དང་། རྩྭ་རྣམས་ཚང་ཚིང་སྐམ་པོ་འདབ་ཆགས་ལ། མེ་དེ་རླུང་གིས་རབ་ཏུ་སྦར་གྱུར་ཀྱང་། འབབ་ཆུ་ཀླུང་ཆེན་བྲུབ་དང་དྲང་པ་བཞིན། །དེ་ཡི་ཚིག་ཐོས་དེ་མ་ཐག་ཏུ་ཞི། །དེང་སང་དུ་ཡང་གངས་རིའི་ཁྲོད་ནས་ས་ཕྱོགས་དེར། །དགོན་པའི་མེ་ལྕེ་རླུང་གིས་བསྐྱོད་དེ་དགོད་པ་ཡང་། མགོ་མངས་སྦྲུལ་ནི་སྔགས་ཀྱིས་བཏབ་སྟེ་བཟློགས་པ་བཞིན། །མེ་ལྕེ་གཡོ་བ་དལ་ཞིང་ཞི་བར་གྱུར་ཅེས་གྲག །དེ་ཅིའི་ཕྱིར་འདི་ལྟར་བསྟན་ཅེ་ན། སྨྲས་པ། རྒྱ་མཚོ་དུས་ཕྱུགས་རབ་ཏུ་གཡོ་བའི་གདེངས་ཅན་དང་། བདག་ལ་ཕན་འདོད་ཐུབ་དབང་བསྟན་པའི་བསླབ་པ་བཞིན། །བདེན་པའི་བདག་ཉིད་ཅན་གྱིས་གང་དག་བསྒོ་བ་ནི། མེ་ཡང་མི་འདའ་དེ་བས་བདེན་པ་མི་གཏོང་ངོ་། །དེ་ལྟར་ན་བདེན་པ་ཡོངས་སུ་བསྒོམས་པའི་ཚིག་ནི་མེས་ཀྱང་འདའ་བར་མི་ནུས་ཏེ། དེ་བས་ན་བདེན་པའི་ཚིག་ལ་བརྩོན་པར་བྱའོ། །དེ་བཞིན་གཤེགས་པའི་ཡོན་ཏན་བསྔགས་པ་ལའང་བརྗོད་པར་བྱའོ། །བྱ་སྲེག་པའི་ཕྲུ་གུར་སྐྱེས་པའི་རབས་ཏེ་བཅུ་དྲུག་པའོ།། །།ཆང་འཐུང་བ་ནི་ཉེས་པ་དུ་མ་འབྱུང་ཞིང་ཤིན་དུ་མ་རུང་པར་འགྱུར་བའི་ཕྱིར་དགེ་བ་རྣམས་ནི་གཞན་དག་ཀྱང་འདི་ལས་ཟློག་པར་བྱེད་ན། བདག་ཉིད་ལྟ་སྨོས་ཀྱང་ཅི་དགོས། །དེ་ཡང་འདི་ལྟར་བྱང་ཆུབ་སེམས་དཔའ་སྙིང་རྗེ་ཆེན་པོ་ཡོངས་སུ་བསྒོམས་པའི་བློ་ཅན་གཞན་ལ་ཕན་ཅིང་བདེ་བར་བྱེད་པ་ལ་དགའ་བ། སྦྱིན་པ་དང་དུལ་བ་དང་ཞི་བ་ལ་སོགས་པས་བསོད་ནམས་སྤེལ་བ་ཉམས་སུ་ལེན་པ་དེ་རེ་ཤིག་ཅིག་ལྷ་རྣམས་ཀྱི་དབང་པོ་བརྒྱ་བྱིན་དུ་གྱུར་ཏེ་ཞེས་གྲག་གོ །དེ་ལྷའི་ལོངས་སྤྱོད་ཀྱི་བདེ་བ་རྣམས་ཕུན་སུམ་ཚོགས་ཀྱང་སྙིང་རྗེའི་དབང་དུ་གྱུར་པས་འཇིག་རྟེན་གྱི་དོན་བྱ་བ་ལ་བརྩོན་པ་ལྷོད་པར་མ་གྱུར་ཏོ། །འཇིག་རྟེན་ཡོངས་ཀྱི་ཕལ་ཆེར་དཔལ་ལྡན་ན། །ཆང་གིས་མྱོས་བཞིན་བདག་གི་དོན་ཀྱང་འདོར། །བག་ཡོད་རྣམས་ནི་གཞན་གྱི་དོན་ལ་ཡང་། །ལྷ་དབང་དཔལ་དང་ལྡན་ཡང་དེས་མི་མྱོས། །སྡུག་བསྔལ་མང་པོས་གདུངས་བའི་སེམས་ཅན་ལ། །གཉེན་བཤེས་སྡུག་པ་རྣམས་ལ་བྱམས་པ་བཞིན། །བརྟན་ཞིང་དཔལ་གྱི་རང་བཞིན་ཤེས་པས་ན། །དེ་ནི་གཞན་གྱི་དོན་སྤྱོད་ཡོང་མི་བརྗེད། །དེ་ནས་རེ་ཤིག་ཅིག་བདག་ཉིད་ཆེན་པོ་དེ་མིའི་འཇིག་རྟེན་དུ་ཉུལ་བའི་ཚེ། །སྙིང་བརྩེ་བ་དང་བྱམས་ཤིང་མཐུ་ཆེ་བའི་མིག་གིས་མཐོང་བ་ནི། །ཐམས་ཅད་ཀྱི་མཛའ་བོ་ཞེས་བྱ་བའི་རྒྱལ་པོ་ཞིག་མི་དགེ་བའི་བཤེས་གཉེན་ལ་བརྟེན་པའི་སྐྱོན་གྱིས། བློན་པོ་དང་འབངས་སུ་བཅས་པ་ཆང་འཐུང་བ་ལ་དགའ་བར་གྱུར་ཏེ། དེ་ལ་སྐྱོན་དུའང་མི་ལྟ་བར་གྱུར་པ་ལ་ཆང་འཐུང་བ་ལའང་སྐྱོན་ཆེ་བར་མཐོང་ནས། བདག་ཉིད་ཆེན་པོ་དེ་སྙིང་རྗེ་ཆེན་པོས་སྙིང་མི་དགའ་བར་གྱུར་ཏེ་བསམས་པ། ཀྱེ་མའོ་འཇིག་རྟེན་འདི་དག་ནི་རབ་ཏུ་མ་རུངས་པར་གྱུར་ཞིང་འཁོད་དོ་སྙམ་ནས། འཐུངས་ན་ཐོག་མར་རབ་ཏུ་ཞིམ། སྐྱོན་དུ་ལྟ་བ་རྨོངས་པར་འགྱུར། །ལེགས་བར་འགྱུར་བ་མེད་པར་བྱས། །ལོག་པའི་ལམ་ནི་བཟང་པོ་བཞིན། །དེ་ལ་འདི་ཇི་ལྟར་བྱས་ན་རུང་སྙམ་པ་དང་། །མཐོང་བ་དོན་ཡོད་དོ་སྙམ་ནས། །གཙོ་བོར་གྱུར་པ་རྣམ་པར་གང་སྤྱོད་པ། །སྐྱེ་བོ་རྣམས་ཀྱང་དེ་ཡི་རྗེས་སུ་འཇུག །དེ་བས་འདིར་ནི་རྒྱལ་པོ་ཉིད་བཅོམ་ན། །འཇིག་རྟེན་དག་ན་དགེ་སྡིག་དེ་ལས་འབྱུང་། །དེ་ལྟར་རྣམ་པར་ངེས་པར་བྱས་ནས་སེམས་དཔའ་ཆེན་པོ་དེ་གསེར་བཙོ་མའི་མདོག་ལྟར་ཡིད་དུ་འོང་བ། སྐྲའི་ཐོར་ཚུགས་ཅུང་ཟད་རྩུབ་ལ་འཁྱིལ་བ་ཅན་ཤིང་གི་ཤུན་ལྤགས་དང་། རི་དྭགས་ཨ་ཛི་ནའི་པགས་གྱོན་པ། ཚངས་པའི་ལུས་གཟི་བརྗིད་དང་ལྡན་པ་ཞིག་ཏུ་མངོན་པར་སྤྲུལ་ནས་ཆང་གིས་གང་བའི་བུམ་པ་ཧ་ཅང་ཡང་མི་ཆེ་བ་ཞིག་ནི་ལག་པ་གཡོན་པ་ན་ཐོགས་ཏེ་འོངས་བ་དང་། དེ་ནས་ཐམས་ཅད་མཛའ་བོའི་རྒྱལ་པོའི་འཁོར་གྱི་ནང་དུ་འདུས་ཏེ། ཆང་དང་སྦྲང་ཆང་དང་། བུ་རམ་ཤིང་གི་ཆང་དང་། ཆང་བཅོས་མ་དང་། རྒུན་ཆང་གི་གཏམ་གྱི་སྐབས་གླེང་བསླང་བའི་ཚེ་མདུན་གྱི་ནམ་མཁའ་ལ་བྱུང་སྟེ་འདུག་པར་གྱུར་ཏོ། །དེ་ནས་སྐྱེ་བོ་དེ་དག་ངོ་མཚར་ཆེ་ཞིང་རབ་ཏུ་གུས་པར་ལངས་ཏེ་ཐལ་མོ་སྦྱར་ཏེ་རིམ་གྲོ་བསྐྱེད་པ་དང་། ཆར་སྤྲིན་འབྲུག་སྒྲ་ཟབ་མོའི་སྒྲ་འབྱིན་པ་བཞིན་དུ། གསང་བསྟོད་དེ་སྨྲས་པ། །མེ་ཏོག་ཕྲེང་བ་མགུལ་ན་བཀོད། །མགྲིན་པ་མན་ཆད་རབ་ཏུ་གང་། བུམ་པའི་རྒྱན་གྱིས་བརྒྱན་པ་ཡི། །བུམ་པ་འདི་ནི་སུ་ཉོ་འདོད། མེ་ཏོག་ཕྲེང་བས་གདུ་བུ་བཏགས་པ་བཞིན། །བུམ་པའི་ཁ་རྒྱན་ལྡུམ་བུས་བརྒྱན་པ་དག །རླུང་གིས་བསྐྱོད་པས་རབ་ཏུ་གཡོ་བ་ཡི། །བུམ་པ་འདི་ནི་རིན་གྱི་སུ་ཉོ་འདོད། །དེ་ནས་དེ་ལ་རྒྱལ་པོ་དེ་ཡང་ཡ་མཚན་དང་ངོ་མཚར་ཆེར་གྱུར་ཏེ། རབ་ཏུ་གུས་པར་ལྟ་ཞིང་ཐལ་མོ་སྦྱར་ཏེ་སྨྲས་པ། གཟི་ཆེན་ཉི་མ་འཆར་འདྲ་མཛེས་པ་ཟླ་བ་བཞིན། །ཁྱོད་ཀྱི་སྐུ་མཛེས་ཐུབ་པ་འགའ་ཞིག་ལགས་པར་གདའ། །དེ་བས་འཇིག་རྟེན་ཀུན་གྱིས་འཚལ་བར་གསུང་བའི་རིགས། །ཁྱོད་ཀྱི་ཡོན་ཏན་མཚར་ཞིག་མཆིས་པར་བདག་ཅག་རེ། །བརྒྱ་བྱིན་གྱིས་སྨྲས་པ། ང་ནི་སུ་ཡིན་ཕྱིས་ཀྱང་ཤེས་འགྱུར་གྱི། །ཁྱེད་ཅག་འཇིག་རྟེན་གཞན་ལ་མི་འཇིགས་ཤིང་། །ཚེ་འདི་ལའང་བརླག་པས་མི་འཇིགས་ན། །བུམ་པ་འདི་ནི་ང་ལས་ཉོ་བར་གྱིས། །རྒྱལ་པོས་སྨྲས་པ། །ཨེ་མའོ་ཁྱོད་ཀྱི་ཚོང་ཟོང་བཙོང་བ་འདི་ནི་སྔོན་མ་བྱུང་བ་ཞིག་གོ །འཇིག་རྟེན་ན་ནི་ཚོང་ཟོང་རྣམས། །གང་ལ་ངན་ཡང་ཡོན་ཏན་བརྗོད། །ཉེས་པའི་སྐྱོན་ནི་བཅབ་པ་ཡིན། །ཚོང་ཟོང་བཙོང་བ་དེ་ལྟར་གྲགས། །བརྫུན་དུ་སྨྲ་བས་འཇིགས་པ་རྣམས། །ཁྱོད་ལྟ་བུ་ཡི་ཚུལ་འཛིན་ཏེ། དགེ་བ་རྣམས་ནི་བདེན་པ་དག །ཕོངས་པར་གྱུར་ཀྱང་མི་གཏོང་ན། བུམ་པ་འདི་ནི་ཅི་ཡིས་གང་། །ཁེ་སྤོགས་ཆེན་པོ་ཅི་ཡོད་ན། །ཁྱོད་ལྟ་བུ་ཡང་ངེད་ལ་འཚོང་། །བདག་ཉིད་ཆེན་པོ་དེ་སྨྲོས་ཤིག །བརྒྱ་བྱིན་གྱིས་སྨྲས་པ། རྒྱལ་པོ་ཆེན་པོ་གསོན་ཅིག །འདི་ནི་ཆུ་དང་ཞོ་དང་དར་བའམ་མུ་སྟེགས་ཆུ་ཡིས་གང་བ་མིན། །གེ་སར་དྲི་ཞིམ་ཁུ་བའི་ཆང་དང་མར་གྱིས་གང་བའང་མ་ཡིན་ལ། །ཀུ་མུ་ད་དང་སྤྲིན་མེད་ཟླ་འོད་འདྲ་བའི་འོ་མས་གང་བའང་མིན། སྡིག་པའི་རང་བཞིན་ཅན་གྱིས་གང་བའི་བུམ་པ་འདི་ཡི་ཡོན་ཏན་ཉོན། །གང་ཞིག་འཐུངས་ན་ར་རོ་སློང་ནས་གོམ་པའང་དབང་མེད་འདོར་ཞིང་འགྲོ །ཡུལ་ཕྱོགས་མ་འདྲིས་པར་ཡང་འཁྱམ་ཞིང་རྡེག་འཆོས་དྲན་པ་ཉམས་པར་འགྱུར། བཟའ་དང་མི་བཟའ་དཔྱད་པ་མེད་པར་དེ་དང་དེ་དག་ཟར་འགྱུར་བ། །དེ་དང་དེ་ཡིས་གང་བའི་བུམ་པ་ཐ་ཤལ་འདི་ཉོས་ཤིག །གང་གིས་བདག་གི་སེམས་ལ་དབང་མེད་བློ་ཉམས་རྣམ་པར་འཁྱམ། །ཕྱུགས་དང་འདྲ་བར་བླུན་ཞིང་དགྲ་བོས་འཕྱས་ཀྱང་བྱས་པར་འགྱུར། །གང་གིས་འདུན་སར་གར་བྱེད་འགྱུར་ཞིང་རང་གི་ཁ་རྔ་བརྡུང་། །དགེ་བ་མེད་པ་བུམ་པའི་ཆང་འདི་ཁྱོད་ཀྱིས་ཉོ་བའི་རིགས། །འཐུངས་ན་གང་གིས་བདག་གི་ངོ་ཚ་འོས་པ་འདོར། །གོས་དང་བྲལ་ཞིང་གཅེར་བུར་བྱུང་ཡང་མི་དགའ་མེད། །གྲོང་ཁྱེར་སྐྱེ་བོ་མང་པོའི་ལམ་དུ་ཡིད་རྟོན་འགྲོ །བུམ་པ་འདིར་ནི་བཙོང་བར་འོས་པ་དེ་བླུགས་སོ། །གང་འཐུངས་ན་ནི་སྐྱུགས་པའི་ཟས་ཀྱི་གོས་འགྱུར་ཞིང་། །ཁྱི་ཡིས་ཁ་ཡང་དོགས་པ་མེད་པར་ལྡག་པར་འགྱུར། དྲན་པ་མེད་པར་ལམ་པོ་ཆེ་ནའང་ཉལ་འགྱུར་བ། །བཙོང་ན་བྲིམ་པ་དེ་ནི་བུམ་པ་འདིར་བླུགས་སོ། །གང་ཞིག་འཐུངས་ན་མྱོས་ཏེ་དབང་མེད་པར། ཕ་མ་དག་ཀྱང་ཤིང་ལ་འཆིང་བར་བྱེད། ནོར་གྱི་བདག་པོ་དག་ཀྱང་ཁྱད་དུ་གསོད། །ཕན་རླག་དེ་ནི་བུམ་པ་འདིར་བླུགས་སོ། །གང་ཞིག་འཐུངས་ན་མྱོས་པས་དྲན་བརླག་སྟེ། །བྲྀཥྞ་ཨན་དྷ་དག་ཀྱང་དམེ་བྱུང་ནས། དབྱིག་ཆེན་ཐོགས་ཏེ་ཕན་ཚུན་ཐལ་མར་ཕྱུང་། མྱོས་འགྱུར་དེ་ནི་བུམ་པ་འདིར་བླུགས་སོ། །གང་ལ་ཆགས་ན་དཔལ་གྱི་གཞིར་འགྱུར་རིགས། །ཇེ་མཐོ་ཇེ་མཐོར་འགྱུར་བའང་བརླག་པར་འགྱུར། །ནོར་གྱི་དབྱིག་ལྡན་རིགས་ཀྱང་ཕུང་འགྱུར་བ། །བཙོང་རྒྱུ་དེ་ནི་བུམ་པ་འདི་ན་འདུག །གློ་བུར་ངུ་ཞིང་འདུག་ལ་དགོད་ཅིང་མ་ངེས་སྨྲ། །གདོན་གྱི་ཟིན་པ་བཞིན་དུ་མིག་ནི་མཆི་མས་གང་། སྨད་ཅིང་བརྙས་པར་འགྱུར་བའི་གནས་སུ་ངེས་འགྱུར་བ། བློ་ཉམས་འགྱུར་བ་འདི་ནི་བུམ་པ་འདི་ན་ཡོད། །རྒས་པར་གྱུར་ཀྱང་གང་གིས་སེམས་ཉམས་ཤིང་། བདག་ལ་ཕན་པའི་ལམ་དུ་མི་འཇུག་ལ། མ་བརྟགས་མང་དུ་སྨྲ་བར་ངེས་འགྱུར་བ། བཙོང་རྒྱུ་དེ་ནི་བུམ་པ་འདི་ན་ཡོད། གང་གིས་ཉེས་པས་སྔོན་གྱི་ལྷ་རྣམས་མྱོས། །ལྷ་ཡི་རྒྱལ་པོའི་དཔལ་ན་ཉམས་བྱས་ནས། །སྐྱབས་འདོད་ཕྱིར་ནི་རྒྱ་མཚོའི་ནང་དུ་གབ། །དེ་ཡིས་གང་དེའི་བུམ་པ་འདི་ཉོས་ཤིག མི་བདེན་པ་ཡང་བདེན་པ་བཞིན་དུ་ངོ་མཐོན་སྨྲ། །མི་བྱ་བ་ཡང་བྱ་བ་བཞིན་དུ་དགའ་བཞིན་བྱེད། །གང་གིས་ལན་གྱི་ཡོད་མེད་ཕྱིན་ཅི་ལོག་ཏུ་ཤེས། །དེ་ནི་སྨོད་པའི་ལུས་བཞིན་བུམ་པ་འདི་ན་འདུག །མྱོས་འགྱུར་རིག་སྔགས་སྡུག་བསྔལ་རྒྱུར་འགྱུར་བ། སྡིག་པའི་མ་མོའི་བྱུར་ངན་མངོན་སུམ་བཞིན། །རྩོད་པའི་ལམ་དང་ཐ་དད་མ་ཡིན་པ། །སྙིང་གི་མུན་པ་མི་བཟོད་དེ་ཉོས་ཤིག །གང་གི་བློ་ནི་རབ་ཏུ་ཉམས་གྱུར་ནས། །ཕ་མ་ཉེས་པ་མེད་པའང་གསོད་འགྱུར་ཞིང་། བདེ་ལ་མ་ཆགས་དཀའ་ཐུབ་ཅན་ཡང་གསོད། །བཙོང་པའི་ཆོ་གས་རྒྱལ་ལ་ཕུལ་བ་བཞེས། །མི་ཡི་བདག་པོས་ཆང་ནི་དེ་འདྲ་ཡང་། །འཇིག་རྟེན་ན་ནི་ལྷ་ཞེས་རབ་ཏུ་གྲགས། །ཡོན་ཏན་ལ་ནི་གང་དག་མི་དགའ་བ། །དེ་དག་ཆང་འདི་ཉོ་ལ་འབད་པར་གྱིས། །གང་ཞིག་བསྟེན་ན་ངན་པ་སྤྱོད་པར་འགྱུར། །རབ་ཏུ་འཇིགས་པའི་སེམས་ཅན་དམྱལ་བར་ལྟུང་། །དུད་འགྲོའི་གནས་དང་ཡི་དྭགས་དབུལ་འགྱུར་བ། །མཐོང་བར་འདོད་པའང་དེ་ནི་སུ་ཞིག་ཡོད། །ཆང་དེ་ཉུང་ངུའང་འཐུང་ཀྱང་རྣམ་པར་སྨིན་པ་ནི། །མི་ཡི་གནས་སུ་སྐྱེས་ཀྱང་ཚུལ་ཁྲིམས་ལྟ་བ་ཉམས། །གང་གིས་ཕྱིས་ཀྱང་མནར་མེད་འབར་བས་བསྲེགས་པར་འགྲོ། ཡི་དྭགས་ཡུལ་དང་དུད་འགྲོ་དམན་པར་གནས་པར་འགྱུར། །ཚུལ་ཁྲིམས་ཉམས་པར་འགྱུར་ཞིང་གཏམ་ངན་མངོན་དུ་འབྱུང་། །ངོ་ཚ་མེད་ཅིང་བློ་གྲོས་དྲི་མ་ཅན་དུ་འགྱུར། །གང་ཞིག་འཐུངས་ན་ཡོན་ཏན་དེ་དང་དེ་དག་ཉམས། །དེ་བས་རྒྱལ་པོ་ཁྱེད་ཀྱིས་ཆང་འཐུང་ག་ལ་རིགས། །དེ་ནས་རྒྱལ་པོ་དེ་སྙིང་ལ་བབ་པའི་ཚིག་རྣམས་ཀྱིས་ཆང་འཐུང་བའི་ཉེས་པ་ཁོང་དུ་ཆུད་པར་བྱས་པ་དང་། ཆང་འཐུང་བ་ལ་ཆགས་ཤིང་ཞེན་པ་མེད་པར་གྱུར་ནས། བརྒྱ་བྱིན་ལ་འདི་སྐད་ཅེས་སྨྲས་སོ། །བྱམས་པའི་ཕ འམ་འདུལ་བས་མཉེས་བྱས་བླ་མ་བཞིན། །ཚུལ་དང་ཚུལ་མིན་མཁས་པའི་ཐུབ་པས་སྨྲས་པ་བཞིན། །ཁྱེད་ཀྱིས་བདག་ལ་ཕན་ཕྱིར་ལེགས་པར་གདམས་པ་དེ། །སྤྱོད་པ་ཉམས་སུ་བླངས་ཏེ་ཚུལ་བཞིན་མཉེས་པར་བགྱིའོ། །ལེགས་པས་སྨྲས་པའི་ལན་དུ་མཆོད་པ། །འདི་བདག་ལས་ཁྱོད་ཀྱིས་བཞེས་པའི་རིགས་སོ། །ཡུལ་གྲུ་བཟང་པོ་ལྔ་ཡང་ཁྱོད་ལ་འབུལ། །བྲན་མོ་བརྒྱ་དང་བ་བཞོན་ལྔ་བརྒྱ་འབུལ། །རྟ་མཆོག་སྦྱར་བའི་ཤིང་རྟ་འདི་བཅུ་བཞེས། །བདག་གི་བླ་མ་ཕན་པ་སྟོན་པར་འགྱུར། །གཞན་ཡང་བདག་གིས་གང་དང་གང་བགྱི་བ་འདིར་སྤྲིང་ཞིང་སླན་ཆད་ཀྱང་བདག་ལ་སྤྱན་རས་ཀྱིས་བཙའ་བར་གསོལ། བརྒྱ་བྱིན་གྱིས་སྨྲས་པ། ཡུལ་གྲུ་མཆོག་ལ་སོགས་པའང་ང་མི་འདོད། །ལྷ་དབང་ང་ཡིན་རྒྱལ་པོས་ཤེས་པར་བྱོས། །ཕན་པར་སྨྲ་ལ་མཆོད་པ་བྱ་བ་ནི། །བསྒོ་བའི་ཚིག་བཞིན་ཉམས་སུ་ལེན་པ་ཡིན། གྲགས་དང་དཔལ་གྱི་ལམ་ནི་འདི་ཡིན་ཏེ། །ཚེ་རབས་གཞན་ལ་བདེ་བ་དེ་ཡང་འཐོབ། །དེ་བས་ཆང་ལ་ཆགས་པ་རབ་སྤོངས་ལ། །ཆོས་ལ་གནས་པས་ང་ཡི་ཡུལ་ལ་སྟེན། །དེ་སྐད་ཅེས་སྨྲས་ནས། བརྒྱ་བྱིན་དེ་ཉིད་དུ་མི་སྣང་བར་གྱུར་ཏེ། རྒྱལ་པོ་དེ་ཡང་བློན་པོ་དང་འབངས་སུ་བཅས་པ་ཆང་མི་འཐུང་བར་གྱུར་ཏོ། །དེ་ལྟར་ན་ཆང་འཐུང་བ་ནི་ཉེས་པ་དུ་མ་འབྱུང་ཞིང་ཤིན་དུ་མ་རུངས་པར་འགྱུར་བའི་ཕྱིར། དགེ་བ་རྣམས་ནི་གཞན་དག་ཀྱང་འདི་ལས་ཟློག་པར་བྱེད་ན་བདག་ཉིད་ལྟ་སྨོས་ཀྱང་ཅི་དགོས། །བཅོམ་ལྡན་འདས་དེ་ཚེ་རབས་སྔ་མ་ལའང་འཇིག་རྟེན་ལ་ཕན་པ་འབའ་ཞིག་མཛད་པའོ་ཞེས་དེ་བཞིན་གཤེགས་པའི་ཡོན་ཏན་བསྔགས་པ་ལའང་བརྗོད་པར་བྱའོ། །བུམ་པའི་སྐྱེས་པའི་རབས་ཏེ་བཅུ་བདུན་པའོ།། །།ཁྱིམ་ན་གནས་པ་རྣམས་ནི་ཚུལ་ཁྲིམས་ཀྱི་གཉེན་པོར་འགྱུར་ཞིང་གནོད་པའི་ཕྱིར་བདག་ལ་ཕན་པར་འདོད་པ་རྣམས་ནི་ཁྱིམ་ན་གནས་པ་ཡོངས་སུས་གཏོང་ངོ་། །དེ་ཡང་འདི་ལྟར་བྱང་ཆུབ་སེམས་དཔའ་རེ་ཤིག་ཅིག་རྒྱལ་རིགས་ཕྱུག་པོའི་རིགས་འཚོ་བའི་ཚུལ་དང་སྤྱོད་པ་ཕུན་སུམ་ཚོགས་པ། ཆོ་རིགས་མཐོན་པོ་ལ་དགའ་བ་རྣམས་ཀྱིས་གཉེན་བྱ་བར་གསོལ་བ་གདབ་པ། དགེ་སྦྱོང་དང་བྲམ་ཟེ་རྣམས་ཀྱི་རེ་བའི་གནས་སུ་གྱུར་པ། བང་མཛོད་རྣམས་ནི། གཉེན་བཤེས་དང་ཐུན་མོང་དུ་སྤྱོད་པ། ཕོངས་ཤིང་སློང་བ་རྣམས་ནི་མངོན་པར་འཁོར་བ། ལས་བཟོ་རྣམས་ཀྱིས་འཚོ་བའི་གནས་སུ་གྱུར་པ། དཔལ་གྱི་གཞིར་གྱུར་པ་རྒྱལ་པོས་བཀུར་སྟི་བྱ་ཞིང་ཕན་གདགས་པར་གྱུར་པ། འཇིག་རྟེན་པས་མངོན་པར་བཀུར་བའི་ཁྱིམ་ཞིག་ཏུ་སྐྱེས་པར་གྱུར་ཏོ་ཞེས་གྲག་གོ །དེ་རིམ་གྱིས་ནར་སོན་པར་གྱུར་པ་དང་། འཇིག་རྟེན་པས་བསྔགས་པའི་རིག་པའི་གནས་རྣམས་ནི་བསླབས། སྒྱུ་རྩལ་གྱི་ཐབས་རྣམ་པ་སྣ་ཚོགས་ལ་ནི་བློ་གསལ་བར་གྱུར། །ལུས་བྱད་བཟང་པོ་སྐྱེ་བོའི་མིག་ཏུ་སྡུག་པ་དང་། ཆོས་དང་མི་འགལ་བའི་འཇིག་རྟེན་ཚུལ་ལ་མཁས་པས་འཇིག་རྟེན་པ་རྣམས་ཀྱི་ནང་མི་བཞིན་དུ་སྙིང་ལ་ཆགས་པར་གྱུར་ཏོ། །ནང་མི་རྣམས་ནི་ནང་མི་ཞེས། ལྷག་པར་དགའ་བར་གྱུར་པ་མེད། །ཕྱི་མི་རྣམས་ཀྱང་ཕྱི་མི་ཞེས། །ནང་མི་དག་ལས་གཞན་དུ་མིན། །སྐྱོན་དང་ཡོན་ཏན་ལས་བརྟགས་ནས། །ནང་མིའམ་ཡང་ན་ཕྱི་མིའང་རུང་། འཇིག་རྟེན་ན་ནི་བཀུར་སྟི་དང་། སྨད་པར་བྱ་བའི་གནས་སུ་འགྱུར། སེམས་དཔའ་ཆེན་པོ་དེ་སྔོན་རབ་ཏུ་བྱུང་བ་ལ་གོམས་པར་བྱས་པས། །ཁྱིམ་ན་གནས་པ་འཚོལ་བའི་སྡུག་བསྔལ་དང་། ཆོས་དང་འགལ་བ་རབ་ཏུ་ཤེས་གྱུར་ཅིང་། དཀའ་ཐུབ་ནགས་ཚལ་བདེ་འབྱུང་གནས་རིག་ནས། །ཁྱིམ་གྱི་བདེ་ལ་ཡིད་ནི་ཆགས་མ་གྱུར། །དེ་ཕ་མ་གཉིས་ཚེ་འདས་པས། །སྙིང་མི་དགའ་བར་གྱུར་ནས། །ཁྱིམ་གྱི་རྫས་དང་དབྱིག་བརྒྱ་སྟོང་དུ་མ་ཡོད་པ། དེ་ཡང་གཉེན་བཤེས་དང་། དགེ་སྦྱོང་དང་། བྲམ་ཟེ་དང་། ཕོངས་པ་དང་སློང་བ་རྣམས་ལ་ཇི་ལྟར་རིགས་པར་བྱིན་ནས་རབ་ཏུ་བྱུང་བར་གྱུར་ཏོ། །དེ་རིམས་ཀྱིས་གྲོང་དང་ལྗོངས་དང་ཕོ་བྲང་འཁོར་དུ་རྒྱུ་ཞིང་སོང་སོང་བ་ལས། གྲོང་ཁྱེར་ཞིག་ཏུ་བརྟེན་ནས་ནགས་ཚལ་གྱི་གནས་ཤིག་ཏུ་གནས་པར་གྱུར་ཏོ། །དེ་བསམ་གཏན་གྱི་ཡོན་ཏན་ལ་གོམས་པས་ཚུལ་བཅོས་པ་མ་ཡིན་པར། དབང་པོ་རང་བཞིན་གྱིས་དང་བ་དང་། མ་ཁེངས་པ་དང་། རྙེང་པ་ལ་རེ་བའི་བརྐམ་པ་དང་། ཞུམ་པ་མེད་པ་དང་། དུལ་ཞིང་གཟི་བྱིན་ཆེ་བ་དང་། ཇི་ལྟར་རིགས་པར་འཇམ་པོར་སྨྲ་ཞིང་གསལ་བ་དང་། ཆོས་དང་ཆོས་མ་ཡིན་པ་རབ་ཏུ་འབྱེད་པ་ལ་མཁས་པ་དང་། རྣ་བ་དང་སྙིང་ཚིམ་པར་བྱེད་པའི་ཚིག་མཁས་པ་ཡིན་པར་མངོན་པར་སྨྲ་བ་དང་། རབ་ཏུ་བྱུང་བའི་སྤྱོད་ཚུལ་བཟང་པོ་དང་། ཡ་རབས་རྣམས་དགའ་བའི་སྤྱོད་པས་དེ་ན་ཡང་རབ་ཏུ་གྲགས་པར་གྱུར་ཏོ། །སྐྱེ་བོ་རྟོག་དཔྱོད་ཅན་རྣམས་ཀྱིས་ཀྱང་དེ་ཚེ་རིགས་བཙུན་པ་ལས་རབ་ཏུ་བྱུང་བར་ཤེས་ནས་དེ་ན་འཇིག་རྟེན་པ་རྣམས་ཀྱིས་བཀུར་སྟི་ཆེར་བྱས་པར་གྱུར་ཏོ། །རིགས་དང་གཟུགས་ཀྱི་ཡོན་ཏན་ལས། ཡོན་ཏན་རབ་ཏུ་བརྗོད་པར་གྱུར། །ས་གཞི་རབ་ཏུ་བཟང་པོ་ལ། །ཟླ་བའི་འོད་ཟེར་ཤར་བ་བཞིན། །དེ་ནས་དེ་དེར་འོངས་བར་དེའི་ཕའི་མཛའ་བོས་ཤེས་ནས། དེའི་དྲུང་དུ་འོངས་ཏེ་ཡོན་ཏན་བརྗོད་ཅིང་གུས་པར་ནད་དྲིས་ནས། །དེ་ལ་བདག་དེའི་ཕའི་མཛའ་བོ་ཡིན་པར་ཡང་ཤེས་པར་བྱས་ཏེ། གཏམ་གྱི་གླེང་བསླང་ནས། །དེ་ལ་ཚིག་འཇམ་པོས་སྨྲས་པ། ན་ཚོད་འདི་ཙམ་ལ་ཆོ་རིགས་ལའང་མི་ལྟ་བར་འདི་ལྟར་རབ་ཏུ་བྱུང་བ་ནི་བཙུན་པ་ཁྱོད་ཀྱིས་མི་བརྟན་པ་བཞིན་དུ་བྱས་སོ། །ཁྱིམ་ན་འདུག་གམ་དགོན་པར་སོང་ཡང་རུང་། ལེགས་པར་བསྒྲུབས་པས་ཆོས་ནི་མཉེས་འགྱུར་ན། །ཁྱིམ་བཟང་དཔལ་དང་ལྡན་པ་བོར་ནས་ནི། །ཅི་ལྟར་ཁྱོད་བློ་དགོན་པར་དགའ་བར་འགྱུར། །གཞན་གྱི་དྲིང་ལ་ལྟོས་ཤིང་སློངས་མོ་སྤྱོད། །ངན་པ་བཞིན་དུ་སྐྱེ་བོ་རྣམས་ཀྱིས་སྨད། ངན་པའི་གོས་གྱོན་གཉེན་བཤེས་རྣམས་དང་བྲལ། །བས་མཐའི་ས་ན་ལུས་ནི་བསྐྱུར་ཏེ་བོར། །དབུལ་པོའི་ལུས་ནི་ཉེ་བར་བླངས་པ་བཞིན། །ཁྱོད་ཀྱི་གནས་སྐབས་འདི་ལ་བལྟས་ན་ནི། །དགྲ་ཡི་མིག་ཀྱང་མཆི་མས་གང་འགྱུར་ན། །མྱ་ངན་དབང་དུ་ཇི་ལྟར་མ་གྱུར་ཀྱེ། །དེ་བས་ཁྱེད་ནི་ཕ་ཡི་ཁྱིམ་དུ་འདོང་། །ཐོས་པའི་དོན་ནི་ཁྱོད་ཀྱིས་ཡོད་པར་བྱོས། །བུ་མཆོག་ཁྱོད་ཀྱིས་དེར་ནི་གནས་བཅས་ནས། །ཆོས་དང་ཡིད་ལ་བསམ་པ་གྲུབ་པར་གྱིས། །འཇིག་རྟེན་ནའང་འདི་སྐད་དུ་གྲགས་ཏེ། །གཞན་གྱི་ལས་བྱེད་པ་དག་ཀྱང་། བདག་གི་ཁྱིམ་ནི་རེ་གནས་བདེ། །འབྱོར་བའི་དཔལ་ནི་འབར་འགྱུར་བ། བདེ་བ་འཐོབ་པ་སྨོས་ཅི་དགོས། །དེ་ནས་བྱང་ཆུབ་སེམས་དཔའ་དབེན་པ་ན་གནས་པ་བདེ་བའི་བདུད་རྩིས་བློ་གོམས་པར་བྱས་པ། །སྙིང་དེ་ལ་གཞོལ་བར་གྱུར་པ་ཁྱིམ་ན་གནས་པ་དང་ནགས་ཚལ་ན་གནས་པའི་བྱེ་བྲག་ཤེས་པར་འགྱུར་བ་ལྟོ་འདྲངས་ཟིན་པ་ལ་ཁ་ཟས་ཀྱི་གཏམ་ཟེར་བ་ཡིད་དུ་མི་འོང་བ་བཞིན་དུ་འདོད་པ་ལ་ལྟོས་པ། ཡིད་དུ་མི་འོང་བར་གྱུར་ནས་སྨྲས་པ། །ཁྱོད་ཀྱི་ཚིག་འདི་བྱམས་པ་ཡིས། །སྨྲས་པ་ཉེས་པ་ཆུང་མོད་ཀྱི། །བཙོན་ར་འདྲ་བའི་ཁྱིམ་ལ་ནི། །ནམ་ཡང་བདེ་བར་མ་སེམས་ཤིག །ཕྱུག་གམ་ཡང་ན་དབུལ་ཡང་རུང་། ཁྱིམ་ན་གནས་པ་ནད་དུ་ཆེ། །གཅིག་ནི་བསྲུང་བས་ཉོན་མོངས་ལ། གཉིས་པ་འཚོལ་བས་ཤ་ཐང་ངོ་། །ཕྱུག་གམ་ཡང་ན་དབུལ་ཡང་རུང་། །གང་ན་བདེ་བ་མེད་གྱུར་བ། །དེ་ལ་དགའ་བར་རྨོངས་པ་ནི། །སྡིག་པའི་འབྲས་བུ་སྨད་པ་ཉིད། །ཁྱིམ་ན་གནས་པས་ཀྱང་ཆོས་འདི་མཉེས་པར་བྱར་རུང་ངོ་ཞེས་གང་ཟེར་བ་དེ་ཡང་ཁྱིམ་ནི་ཆོས་ཀྱི་གཉེན་པོ་དང་འདོམ་པ་དང་ལས་སུ་བྱ་བ་མང་ཆེ་བས་རབ་ཏུ་དཀའོ། ཁྱོད་ལྟོས་ཤིག །ཁྱིམ་གྱི་སོ་ནམ་བྱས་ན་ནི། རྫུན་དུ་མི་སྨྲར་མི་རུང་ཞིང་། ཕ་རོལ་ཉེས་པ་བྱེད་པ་ལ། །ནན་ཐུར་མི་བྱར་མི་རུང་ངོ་། །དེ་ལྟ་བས་ན་སྐྱེ་བོ་འདི་དག་ཁྱིམ་གྱི་བདེ་བ་ལ་སྙིང་ཆགས་ནས། །སྒྲུབ་པ་ལ་འབད་པ་ནི། གལ་ཏེ་ཆོས་སྤྱོད་ཁྱིམ་གྱི་སོ་ནམ་འཆོར། ཁྱིམ་ལ་ཕྱོགས་ན་ཆོས་ཀྱང་ག་ལ་འགྲུབ། །ཆོས་ཀྱི་ལམ་ནི་རབ་ཏུ་ཞི་བ་ཡིན། །ཁྱིམ་གྱི་དོན་ནི་དྲག་ཤུལ་ཅན་གྱིས་འགྲུབ། དེ་བས་ཆོས་དང་། དེ་འགལ་བའི་སྐྱོན་ཡོད་ཕྱིར། །བདག་ལ་ཕན་འདོད་སུ་ཞིག་ཁྱིམ་ན་གནས། །ཆོས་ནི་བདེ་ལ་ཆགས་པ་སྤོང་བ་ཡིན། །བདེ་བ་འགྲུབ་པའང་ངེས་པ་ཡོད་མ་ཡིན། །གདོན་མི་ཟ་བར་གྲགས་པ་མེད་པར་འགྱུར། །ཡིད་ལ་གདུང་བ་སྐྱེ་ཞིང་ངན་འགྲོར་ལྟུང་། །དེ་བས་ཆོས་དང་འགལ་བ་བདེ་བའི་ཐབས། །ཚུལ་ལ་མཁས་པ་རྣམས་ཀྱིས་མི་སྒྲུབ་པོ། །གཞན་ཡང་ཁྱིམ་ན་གནས་པ་བདེའོ་ཞེས་བྱ་བ་འདིའང་དད་པས་ཡིད་ཆེས་པ་བྱ་བ་ཡིན་པར་བདག་གིས་མ་མཐོང་ངོ་། །བསྒྲུབ་ཅིང་བསྲུང་ལ་སོགས་པའི་སྡུག་བསྔལ་དེས། །བཅིང་ཞིང་གསོད་པའི་སྡུག་བསྔལ་གཞིར་གྱུར་པ། །རྒྱལ་པོ་དག་ཀྱང་འབྱོར་བས་ཆོག་མི་ཤེས། །ཆར་ཆུ་བབ་པས་རྒྱ་མཚོ་མི་གང་བཞིན། །ཡོངས་སུ་རྟོག་པའི་དབང་དུ་མ་གྱུར་ན། །འདི་ལ་ཇི་ལྟར་ནས་ཞིག་ག་ལ་བདེ། །རྨོངས་པས་འདོད་ཆགས་ཉེ་བར་སྤྱོད་པ་ཡང་། །རྨ་གཡའ་ཕྲུགས་པའི་བདེ་བ་བཞིན་དུ་ཟད། །གཞན་ཡང་ཕལ་ཆེར་ནི་འདི་ལྟ་བུ་ཡིན་ནོ། །ཁྱིམ་ནི་འབྱོར་ན་ཕལ་ཆེར་རྒྱགས་པར་འགྱུར། །རིགས་བཙུན་ང་རྒྱལ་ཆེ་ཞིང་སྟབས་ཀྱིས་བསྙེམས། །སྡུག་བསྔལ་ཁྲོ་ཞིང་རྒུད་ན་ཞུམ་པར་འགྱུར། །དེས་ན་ནམ་ཞིག་རབ་ཏུ་ཞི་བར་འགྱུར། དེ་བས་ན་འདིར་བཙུན་པ་ཁྱོད་ལ་གདམས་ངག་ཏུ་བྱ་བ་ནི། དྲེགས་དང་ང་རྒྱལ་གཏི་མུག་སྦྲུལ་གྱི་ཚང་། རབ་ཏུ་ཞི་ལ་དགའ་བའི་བདེ་འཇིག་པ། སྡུག་བསྔལ་མི་བཟད་མང་པོའི་གནས་གྱུར་ཁྱིམ། ཁུང་དང་འདུ་བར་སུ་ཞིག་གནས་པར་བྱེད། །སྐྱེ་བོ་ཆོས་ཤེས་རྣམས་ཀྱི་ཁྱིམ། །རབ་ཏུ་བདེ་བ་དབེན་པའི་ཚལ། །ཇི་ལྟར་སེམས་ནི་དགའ་འགྱུར་བ། །དེ་འདྲ་ལྷའི་ཡུལ་ནའང་མེད། །དེ་བས་ཚལ་ན་ངན་པའི་གོས་གྱོན་ཏེ། །གཞན་གྱི་དྲིང་ལ་འཇོག་ཅིང་འཚོ་ཡང་རུང་། །བདག་ལ་ཕན་འདོད་དུག་ཅན་མི་ཟ་བཞིན། །ཆོས་མིན་འདྲེས་པའི་བདེ་བ་མི་འདོད་དོ། །དེ་ལྟར་དེས་ཡིད་དུ་འོང་བའི་ཚིག་གིས། ཕའི་མཛའ་བོ་དེ་ཡིད་ཆེས་པར་བྱས་པ་དང་། སེམས་དཔའ་ཆེན་པོ་དེ་ལ་རབ་ཏུ་གུས་ཤིང་བཀུར་སྟི་བྱ་བ་ཁྱད་པར་ཅན་གྱིས་རབ་ཏུ་མགུ་བར་བྱས་སོ། །དེ་ལྟ་བས་ན་ཁྱིམ་ན་གནས་པ་ནི་ཚུལ་ཁྲིམས་དང་རབ་ཏུ་ཞི་བའི་གཉེན་པོར་གྱུར་ལ། གནོད་པ་ཡིན་པས་བདག་ལ་ཕན་པར་འདོད་པས་ཁྱིམ་རྣམས་ཡོངས་སུ་གཏོང་ངོ་། །རབ་ཏུ་དབེན་པའི་རོ་མྱོང་ནས་འདོད་པ་ལས་སླར་ལྡོག་གོ་ཞེས་རབ་ཏུ་དབེན་པའི་གཏམ་བྱ་བ་ལའང་སྦྱར་བར་བྱའོ། རྒྱལ་རིགས་ཕྱུག་པོའི་སྐྱེས་པའི་རབས་སྟེ་བཅོ་བརྒྱད་པའོ།། །།བམ་པོ་དྲུག་པ། རབ་ཏུ་དབེན་པའི་བདེ་བའི་རོ་མྱོང་བ་རྣམས་ནི་འདོད་པ་ལ་ཕྱས་ཀྱི་གནས་དང་གནོད་པ་ལྟ་བུར་མི་མཐུན་པར་སེམས་སོ། །དེ་ཡང་འདི་ལྟར་བྱང་ཆུབ་སེམས་དཔའ་རེ་ཤིག་ཅིག་བྲམ་ཟེའི་རིགས་ཆེན་པོ་ཡོན་ཏན་གྱི་གྲགས་པ་རྒྱས་པ་ཕྱས་སུ་བྱ་བའི་སྐྱོན་མེད་པ་ཞིག་ཏུ་སྐྱེས་པར་གྱུར་ཏོ་ཞེས་གྲག་གོ །དེ་ལ་ནུ་བོ་དྲུག་ཅིག་ཡོད་པའང་དེའི་གཟུགས་དང་ཡོན་ཏན་དང་མཐུན་པར་བྱམས་ཤིང་གུས་པའི་ཡོན་ཏན་དང་ལྡན་པ། རྟག་ཏུ་རྗེས་སུ་འབྲང་བ་དག་ཅིག་དང་། སྲིང་མོ་དང་བརྒྱད་འཁོད་པ་ལས། དེ་ནི་རིག་བྱེད་ཡན་ལག་དང་བཅས་པ། ཉེ་བའི་རིག་བྱེད་དང་བཅས་པ་ནི་ལོབས། མཁས་པའི་གྲགས་པ་ནི་ཐོབ། སྐྱེ་བོ་རྣམས་ཀྱིས་ནི་བཀུར་སྟི་བྱས། ཕ་མ་གཉིས་ལ་ནི་ལྷ་བཞིན་དུ་རབ་ཏུ་གུས་པར་བསྙེན་བཀུར་བྱེད། ནུ་བོ་དེ་རྣམས་ལ་ནི་སློབ་དཔོན་དང་ཕ་བཞིན་དུ་རིག་པ་སློབ་ཅིང་སྦྱོར། ཚུལ་དང་འདུལ་བ་ལ་མཁས་པར་བྱས་ནས་ཁྱིམ་ན་གནས་སོ། །དེ་ཡུན་རིང་ཞིག་ན་ཕ་མ་གཉིས་དུས་བྱས་པའི་མྱ་ངན་གྱིས་གདུངས་པ་ལས། ཕ་མ་གཉིས་ཀྱི་ཤིད་བྱས་ཟིན་ཏེ་མྱ་ངན་བྱེད་པའི་ཉིན་ཞག་འདས་པ་དང་། ནུ་བོ་དེ་དག་བསོགས་ནས་སྨྲས་པ། ཡུན་རིང་ལྷན་ཅིག་འཁོད་འཁོད་ཀྱང་། འཆི་བས་སོ་སོར་འབྲལ་འགྱུར་ཞིང་། །མྱ་ངན་ཆེན་པོས་གདུངས་འགྱུར་བ། །འདི་ནི་འཇིག་རྟེན་འདི་ན་ངེས། །བདག་ནི་ཁྱིམ་ལ་ཆགས་བཞིན་དུ། །འཆི་བའི་དགྲ་ཡིས་དེའུ་རེ་བསད། །དེ་བས་ཕན་པའི་ལམ་བཟང་པོས། །བདག་ནི་རབ་ཏུ་འབྱུང་བར་འདོད། །དེ་བས་ན་ཁྱེད་ཐམས་ཅད་ཤེས་པར་གྱིས་ཤིག །བྲམ་ཟེའི་ཁྱིམ་འདི་ན་ཆོས་ཀྱི་ལམ་གྱིས་རྙེད་པའི་ལོངས་སྤྱོད་ཙམ་ཡོད་དེ། འདིས་འཚོ་བ་འབྱོར་གྱིས། དེ་བས་ན་ཁྱེད་ཀུན་ཕན་ཚུན་བྱམས་པ་དང་བཀུར་སྟི་ནི་བྱེད། ཚུལ་ཁྲིམས་དང་གཙང་སྦྲ་སྤྱད་པ་ལ་ནི་འབད་རིག་བྱེད་སློབ་པ་ལ་ནི་འགྲུས། མཛའ་བོ་དང་མགོན་དང་གཉེན་བཤེས་དང་སློང་བ་རྣམས་ནི་རེ་ཐག་མི་གཅོད། ཆོས་ལ་ནི་གཞོལ་བར་བྱོས་ལ་ཁྱིམ་ན་ལེགས་པར་འཁོད་ཅིང་། འདུལ་བ་ལ་ནི་རྟག་ཏུ་འབད། ཁ་ཏོན་སློབ་པ་དག་ལ་འགྲུས། སྦྱིན་པ་ལེགས་པར་རབ་བྱིན་ཞིང་། །ཁྱིམ་གྱི་དཀའ་ཐུབ་སྤྱད་པར་གྱིས། །དེ་ལྟར་བྱས་ན་ཁྱེད་ལ་གྲགས་པ་འཕེལ། །ཆོས་དང་སྲིད་དང་བདེ་བའང་འཕེལ། །འཇིག་རྟེན་ཕྱི་མ་ལ་ཡང་བདེ་བར་འགྱུར། དེ་བས་བག་ཡོད་ཁྱིམ་ན་གནས་པར་གྱིས། །དེ་ནས་དེའི་ནུ་བོ་དེ་རྣམས་ཀྱིས་དེ་རབ་ཏུ་འབྱུང་ཞེས་ཟེར་བ་ཐོས་ནས། བྲལ་དུ་དོགས་པའི་མྱ་ངན་གྱིས་སེམས་གདུངས་ཏེ། མྱ་ངན་གྱི་མཆི་མས་གདོང་ཁེབས་བཞིན་དུ་བྱ་བ་འཚལ་ཏེ་དེ་ལ་འདི་སྐད་ཅེས་སྨྲས་སོ། །བདག་ཅག་ཕ་མ་དང་བྲལ་བའི་མྱ་ངན་ཟུག་རྔུའི་རྨ་མ་སོས་པར་སྡུག་བསྔལ་གཞན་གྱིས་མནན་ཏེ། ཁྱོད་ཀྱིས་འདིར་རྨ་དཀྲུག་པ་མི་རིགས་སོ། །ཕ་མའི་མྱ་ངན་ཟུག་རྔུ་ད་ཅུང་དུ། བདག་ཅག་ཡིད་ལ་རྨ་ནི་མ་སོས་བཞིན། །དེ་བས་བརྟན་པོའི་བློ་ཅན་འདི་བཏང་ལེགས། །བདག་ཅག་རྨ་ནི་འཇིག་པར་མ་མཛད་ཅིག །འོན་ཏེ་ཁྱིམ་ན་གནས་པ་མི་བཞེད་ལ། །ནགས་ཚལ་གནས་པ་བདེ་བའི་ལམ་ལགས་ན། བདག་ཅག་མགོན་མེད་ཁྱིམ་དུ་བོར་ནས་སུ། །ཅི་ཕྱིར་གཅིག་པུ་ནགས་སུ་བཞུད་པར་དགྱེས། དེ་བས་ན་ཁྱོད་གང་དུ་གཞུད་པ་དེར་བདག་ཅག་ཀྱང་མཆིས་ཏེ། བདག་ཅག་ཀྱང་རབ་ཏུ་འབྱུང་ངོ་ཞེས་སྨྲས་པ་དང་། བྱང་ཆུབ་སེམས་དཔས་སྨྲས་པ། དབེན་པར་གནས་ལ་མ་གོམས་ཤིང་། འདོད་ལ་ཆགས་བའི་རྗེས་འབྲང་བའི །སྐྱེ་བོ་ཕལ་ཆེར་རབ་བྱུང་ལ། གཡང་སར་ལྷུང་བ་བཞིན་དུ་ལྟ། །དེ་ལྟ་བས་ན་ཁྱིམ་ན་གནས་པ་དང་། །ནགས་ཚལ་ན་གནས་པའི་བྱེ་བྲག་ཤེས་བཞིན་དུ། །རབ་ཏུ་འབྱུང་བ་ལ་གནས་པར་བདག་གིས་ཆེད་དུ་མ་སྨྲས་སོ། །དེ་ལྟར་ཁྱོད་རབ་ཏུ་འབྱུང་བར་འདོད་ན་འུ་ཅག་རབ་ཏུ་འབྱུང་གིས་འདོད་དོ། །དེ་ནས་སྤུན་བདུན་པོ་དེ་དང་སྲིང་མོ་དང་བརྒྱད་ཆར་གྱི། །ཁྱིམ་གྱི་ལོངས་སྤྱོད་ཆེན་པོ་བཟང་པོ་དང་། མཛའ་བོ་དང་། ནང་མི་དང་། ཉེ་དུའི་འཁོར་གདོང་མཆི་མས་གང་བ་རྣམས་བོར་ཏེ། དཀའ་ཐུབ་ཅན་དུ་རབ་ཏུ་བྱུང་ངོ་། །དེ་དག་གི་གྲོགས་པོ་གཅིག་དང་། བྲན་པོ་དང་བྲན་མོ་སྙིང་ཉེ་བ་ཞིག་ཀྱང་དེའི་ཕྱི་བཞིན་དུ་རབ་ཏུ་བྱུང་ངོ་། །དེ་དག་དགོན་པའི་གནས་ཆེན་པོ་ཞིག་ན། །མཚོ་ཆེན་པོ་མེ་ཏོག་པདྨ་མང་པོ་ཁ་བྱེ་བ་མཛེས་པ་ནི་འབར་བ་བཞིན། མེ་ཏོག་ཀུ་མུད་མང་པོ་ཁ་འབུས་པ་ནི་བཀོད་པ་བཞིན། །བུང་བ་མང་པོ་ནི་དིར་དིར་ཟེར། ཆུ་གཙང་མ་སྔོན་པོས་ནི་གང་བ་ཞིག་གི་འགྲམ་དུ་བརྟེན་ནས། །ཤིང་ལོའི་སྤྱིལ་པོ་རབ་ཏུ་གཙང་ཞིང་ཡིད་དུ་འོང་བར་གྲིབ་ཤིང་གིས་བསྒྲིབས་པ། སོ་སོར་བར་མི་ཉེ་བར་བྱས་པ་རྣམས་སུ་བརཏལ་ཞུགས་དང་སྡོམ་པ་ལ་འབད་ཅིང་ཡིད་བསམ་གཏན་ལ་སྦྱོར་བས་གནས་པར་གྱུར་ཏོ། །ཞེས་ལྔ་ལྔ་ཞིང་། བྱང་ཆུབ་སེམས་དཔའི་དྲུང་དུ་ཆོས་མཉན་པའི་ཕྱིར་འདུའོ། །བྱང་ཆུབ་སེམས་དཔའ་དེ་ཡང་དེ་དག་ལ་བསམ་གཏན་གྱི་མན་ངག་ལ་འཇུག་པ། འདོད་པའི་ཉེས་དམིགས་སྟོན་པ། སྐྱོ་ཞིང་ཡིད་འབྱུང་བར་འགྱུར་བ། རབ་ཏུ་དབེན་པ་དང་ཆོག་ཤེས་པའི་བསྔགས་པ་མང་དུ་འབྱུང་བ། ཚུལ་འཆོས་བ་དང་གཡོ་སྒྱུ་དང་ལེ་ལོ་ལ་སོགས་པའི་སྐྱོན་ལ་སྨོད་པ། ཉེ་བར་ཞི་བ་དང་རབ་ཏུ་དང་བའི་ལམ་དུ་གྱུར་པའི་ཆོས་ཀྱི་གཏམ་དེ་དང་དེ་དག་ཟེར་རོ། །དེ་དག་གི་བྲན་མོ་དེ་ཡང་རབ་ཏུ་གུས་ཤིང་སྙིང་ཉེ་བས་དེ་བཞིན་དུ་གཡོག་བྱེད་དོ། །དེས་མཚོ་དེའི་ནང་ནས་པདྨའི་རྩ་བ་བཏོན་ཏེ། པདྨའི་ལོ་མ་ཆེན་པོ་ལ་མཚོ་འགྲམ་དུ་གཙང་མར་ཆ་མཉམ་པར་བཀོད་ནས། །ཏོག་བརྡུངས་པའི་སྒྲས། །དུས་བསྟན་ཏེ་སླར་སོང་ངོ་། །དེ་ནས་དྲང་སྲོང་དེ་དག་བཟླས་བརྗོད་དང་སྦྱིན་སྲེག་གི་ཆོ་ག་བྱས་ཟིན་ནས། །རྒན་རིམས་ཀྱི་རེ་རེ་ནས་སོང་སྟེ། པདྨའི་རྩ་བ་ཆེར་དགོས་ཏེ་བཞག་པ་ལས་གོ་རིམས་བཞིན་དུ་རེ་རེ་བླངས་ནས། རང་རང་གི་ཤིང་ལོའི་སྤྱི་པོར་ཆོས་བཞིན་དུ་ཟོས་ཏེ། བསམ་གཏན་ལ་བརྩོན་པའི་བློས་གནས་སོ། །དེ་དག་དེ་ལྟར་འཁོད་པ་ན་ཆོས་ཉན་པའི་དུས་ལ་བབ་པ་མ་གཏོགས་པར་ཅིག་ལ་ཅིག་ལྟར་མི་འདོད་དོ། །དེ་དག་དེ་ལྟར་ཚུལ་ཁྲིམས་དང་སྤྱོད་ཚུལ་དེ་ལྟ་བུ་དང་རབ་ཏུ་དབེན་པ་ལ་དགའ་བ་དང་། བསམ་གཏན་ལ་གཞོལ་བས་གྲགས་པ་ཆེར་གྱུར་ཏོ། །ལྷའི་དབང་པོ་བརྒྱ་བྱིན་གྱིས་དེ་ཐོས་ནས་དེ་བརྟག་པའི་ཕྱིར་དེར་སོང་ངོ་། །དེས་ཀྱང་དེ་དག་བསམ་གཏན་ལ་མངོན་པར་ཕྱོགས་པ་དང་། བྱ་བ་ངན་པ་དང་མ་འབྲེལ་ཞིང་གདུང་བ་མེད་ལ་རབ་ཏུ་ཞི་བ་ལ་མངོན་པར་དགའ་ཞིང་འཁོད་པར་མཐོང་ནས། ཡོན་ཏན་རབ་ཏུ་བརྟན་པ་ཡོད་པར་རེ་ཞིང་། དེ་བརྟག་པ་ལ་ཡིད་གཞོལ་བར་གྱུར་ཏོ། །རྩོལ་བ་མེད་བར་བས་མཐའ་ན། །ཞི་ལ་རབ་ཏུ་གཞོལ་ཞིང་འཁོད། །དགེ་བ་རྣམས་ནི་ཡོན་ཏན་ལ། །རེ་བ་སྙིང་ལ་འཇོག་པར་བྱེད། །དོན་ནས་པདྨའི་རྩ་བ་གླང་པོ་ཆེའི་ཕྲུ་གུའི་མཆེ་བ་ལྟར་དཀར་ལ་འཇམ་པ་རྣམས་བཏོན་ཏེ་བཀྲུས་ནས། པདྨའི་ལོ་མ་སྔོན་པོ་རིན་པོ་ཆེ་མར་གད་འདྲ་བ་གཙང་མ་པདྨའི་མེ་ཏོག་གི་འདབ་མ་དང་ཟེ་བའི་རྒྱན་གྱིས་བརྒྱན་པ་ལ་ཆ་མཉམ་པར་བཀོད་ནས། ཏོག་བརྡུངས་བའི་སྒྲས། དྲང་སྲོང་དེ་དག་ལ་དུས་བསྟན་ཏེ། བྲན་མོ་དེ་སླར་ལོག་པ་དང་། བྱང་ཆུབ་སེམས་དཔའ་དེ་བརྟག་པའི་ཕྱིར་ལྷའི་དབང་པོ་བརྒྱ་བྱིན་གྱི་པདྨའི་རྩ་བའི་ཆ་དང་པོ་མི་སྣང་བར་བྱས་སོ། །སྡུག་བསྔལ་བྱུང་བར་གྱུར་པ་དང་། བདེ་བ་མེད་པར་གྱུར་ཀྱང་རུང་། དགེ་བ་རྣམས་ནི་བརྟན་པའི་རྒྱུ། །རྣམ་པར་འཕྲོ་བ་བཞིན་དུ་མངོན། །དེ་ནས་བྱང་ཆུབ་སེམས་དཔའ་སོང་སོང་ན། ཆ་དང་པོའི་གནས་ན་པདྨའི་རྩ་བ་ནི་མེད། པདྨའི་ལོ་མ་ནི་རྒྱན་འཁྲུགས་ཤིང་འདུག་པ་མཐོང་ནས། བདག་གི་པདྨའི་རྩ་བའི་སྐལ་བ་ཅིག་གིས་ཁྱེར་རོ་སྙམ་ཏེ་སེམས་འཁྲུགས་པ་དང་། ཁྲོ་བ་མེད་པར་དེ་ནས་སླར་ལོག་ནས་ཤིང་ལོའི་སྤྱིལ་པོར་ཞུགས་ཏེ་བསམ་གཏན་གྱི་ཆོ་ག་ཚུལ་བཞིན་དུ་རྩོམ་མོ། །དྲང་སྲོང་གཞན་རྣམས་སྙིང་མི་དགའ་བར་མི་འགྱུར་བར་བྱ་བའི་ཕྱིར་དོན་དེ་མ་སྨྲས་སོ། །དེའི་ནུ་བོ་གཞན་གྱི་སྙིང་ལམ་ན་འདིས་རང་གི་སྐལ་བ་ངེས་པར་བླངས་དྲངས་སྙམ་ནས། རང་རང་གི་པདྨའི་རྩ་བའི་སྐལ་བ་བླངས་ནས། རང་རང་གི་ལོ་མའི་སྤྱིལ་པོར་ཆོ་ག་བཞིན་དུ་ཟོས་ཏེ་བསམ་གཏན་བྱེད་ཅིང་འཁོད་དོ། །དེ་བཞིན་དུ་ཞག་གཉིས་པ་དང་། གསུམ་པ་དང་། བཞི་པ་དང་། ཞག་ལྔ་པའི་བར་དུའང་དེའི་པདྨའི་རྩ་བའི་སྐལ་པ་བརྒྱ་བྱིན་གྱི་མི་སྣང་བར་བྱས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཡང་དེ་བཞིན་དུ་སེམས་འཁྲུག་པ་མེད་ཅིང་རབ་ཏུ་ཞི་བར་གྱུར་ཏོ། །དམ་པ་རྣམས་ནི་སེམས་འཁྲུག་པས། །ཚེ་ཟད་ནས་ནི་ཤི་ཡང་བླ། །དེ་བས་མཁས་པ་སྲོག་ཕྱིར་ཡང་། །ཡིད་ནི་འཁྲུག་པར་མི་འགྱུར་རོ། །དེ་ནས་ཕྱི་དྲོའི་དུས་ལ་བབ་སྟེ། །དང་སྲོང་དེ་དག་ཆོས་ཉན་པའི་ཕྱིར། །བྱང་ཆུབ་སེམས་དཔའི་ཤིང་ལོའི་སྤྱིལ་པོར་གོ་རིམ་བཞིན་དུ་ལྷགས་པ་དང་། །དེའི་ལུས་ནི་རབ་ཏུ་རིད། །འགྲམ་པ་དག་དང་མིག་ནི་ཀོང་། བཞིན་གྱི་མདངས་ནི་ངན། སྐད་ཀྱི་གདངས་ཟབ་མོ་ནི་ཆུང་། ཉམས་དམས་ཀྱང་བརྟན་པ་དང་རབ་ཏུ་ཞི་བའི་ཡོན་ཏན་ཟླ་བ་ཚེས་པ་མཐོང་ན་དགའ་བ་དང་འདྲ་བ་མཐོང་བ་དང་ཉེ་བར་བསྙེན་ནས། ཞེ་ས་བསྐྱེད་དེ་བརྟབས་པ་བཞིན་དུ་འདི་ཅི་ནོངས་ཞེས་རིད་པར་གྱུར་པའི་རྒྱུ་དེ་ལ་དྲིས་སོ། །དེ་ནས་བྱང་ཆུབ་སེམས་དཔའ་དེས་དེ་དག་དེའི་དོན་ཇི་ལྟར་གྱུར་པ་སྨྲས་སོ། །དེ་ནས་དཀའ་ཐུབ་ཅན་དེ་དག་འདི་ལྟ་བུའི་ཆོས་མ་ཡིན་པ་འདི་དག་མི་སྲིད་དོ་སྙམ་ནས། དེ་ཉམས་ཐག་པས་ཀྱང་མི་དགའ་བར་གྱུར་ཏེ། མཚར་བྱས་སོ་ཅེས་ཅིག་ལ་ཅིག་སྨྲས་ནས་ངོ་ཚ་ཞིང་མགོ་སྨད་ནས་འཁོད་དོ། །ཤེས་པ་འཇུག་པའི་ཡུལ་ཡང་བརྒྱ་བྱིན་གྱི་མཐུས་བསྒྲིབས་པས་འདི་ཅི་ལས་གྱུར་པའང་ཤེས་པར་མ་གྱུར་ཏོ། །དེ་ནས་བྱང་ཆུབ་སེམས་དཔའི་ནུ་བོ་འོག་མས་རང་གི་ཡིད་ལ་གཅགས་པ་དང་། བདག་ཉིད་གཙང་མར་བསྟན་པའི་ཕྱིར། མནའ་ཁྱད་པར་ཅན་བོར་བ། བྲམ་ཟེ་ཁྱོད་ཀྱི་རྩ་བ་སུས་ཁྱེར་བ། །འབྱོར་པའི་མཚན་མས་བརྒྱན་པའི་ཁྱིམ་བདག་དང་། །ཆུང་མ་ཡིད་དུ་འོང་བའང་རྙེད་པར་ཤོག །བུ་དང་ཚ་བོ་རྣམས་དང་ལྡན་པར་ཤོག །དེའི་འོག་མས་སྨྲས་པ། བྲམ་ཟེ་ཁྱོད་ཀྱི་རྩ་བསུས་ཁྱེར་བ། ཕྲེང་བ་དོ་ཤལ་ཙན་དན་གོས་བཟང་དང་། བུ་ཡིས་རེག་པའི་རྒྱན་རྣམས་ཐོགས་པ་ཡི། །འདོད་པ་མི་ཟད་པ་ལ་སྤྱོད་པར་ཤོག །ཡང་ཅིག་གིས་སྨྲས་པ། ཁྱོད་ཀྱི་རྩ་བ་གང་གིས་ཁྱེར་བ་དེ། །ཞིང་རྨོས་པ་ལ་ནོར་དང་བྲན་རྙེད་ཅིང་། བུ་དང་སྨྲ་བས་རབ་ཏུ་དགའ་བར་གྱུར། །ཚེ་ལའང་མི་ལྟ་ཁྱིམ་ལ་དགའ་བར་གྱུར། །ཡང་ཅིག་གིས་སྨྲས་པ། ཁྱོད་ཀྱི་རྩ་བ་བསམ་པས་གང་ཁྱེར་བ། །རྒྱལ་པོའི་བྲན་བཞིན་དུལ་བར་སྤྱོད་པ་ཡི། །གཙུག་ཏོར་བཏུང་བས་རབ་ཏུ་ཕྱག་བྱས་ཤིང་། རྒྱལ་པོའི་ཚུལ་གྱི་མ་ལུས་ས་སྐྱོང་གྱུར། །ཡང་ཅིག་གིས་སྨྲས་པ། ཁྱོད་ལྟ་བུ་ཡི་རྩ་བ་གང་ཁྱེར་བ། །དེ་ནི་རྒྱལ་པོའི་མདུན་ན་འདོན་གྱུར་ཏེ། སྔགས་ལ་སོགས་པས་བདེ་ལེགས་བྱེད་གྱུར་ཅིང་། དེ་བཞིན་རྒྱལ་པོས་བཀུར་སྟི་བྱ་བར་ཤོག །ཡང་ཅིག་གིས་སྨྲས་པ། །རྩ་བ་འདོད་ཅིང་ཡོན་ཏན་མི་འདོད་པ། །ལེགས་བྱེད་ལེགས་པར་སློབས་ནས་སྟོན་པར་བྱེད། །དཀའ་ཐུབ་ཅན་དུ་རེ་བ་ཆེན་པོ་ཡིས། །ཡུལ་མི་ཀུན་གྱིས་དེ་ལ་མཆོད་པར་ཤོག གྲོགས་པོས་སྨྲས་པ། ཁྱོད་ལྟ་བུ་ཡི་རྩ་བ་ལ་ཆགས་གང་། །ཡུལ་གྲུ་དམ་པ་འབྱོར་བ་བཞི་བརྒྱ་ཙམ། །རྒྱལ་པོ་དག་ལས་ཐོབ་ནས་སྤྱོད་གྱུར་ཅིང་། །འདོད་ཆགས་མ་བྲལ་བར་ནི་ཤི་བར་གྱུར། །བྲན་གྱིས་སྨྲས་པ། རྩ་བའི་ཕྱིར་ནི་བདག་དོན་ཆུད་གསོན་པ། །གྲོགས་པོའི་ནང་ན་དེ་ནི་གྲོང་དཔོན་གྱུར། །རྒྱལ་པོའི་ཆད་པ་དག་གིས་མེ་ཆོད་བར། །བུད་མེད་གླུ་གར་དག་གིས་དགའ་བར་གྱུར། །སྲིང་མོས་སྨྲས་པ། ཁྱོད་ལྟ་བུ་ཡི་རྩ་བ་གང་ཁྱེར་བ། དེ་ནི་རྒྱལ་པོའི་བཙུན་མོར་གྱུར་ནས་སུ། །གཟུགས་དང་དཔལ་གྱི་གཟི་བྱིན་འབར་གྱུར་ཅིང་། །བཙུན་མོ་དམ་པ་སྟོང་གི་མཆོག་ཏུ་གྱུར། །བྲན་མོས་སྨྲས་པ། གང་གིས་རྩ་བ་མཐོང་ལ་ཆོས་མ་མཐོང་། དེ་ནི་གཅིག་ཏུ་དགེ་བ་རྣམས་དང་བྲལ། བཀུར་སྟི་བྱས་པས་མྱོས་པར་བྱས་ནས་སུ། ཁ་ཟས་ཞིམ་པོར་དག་ལ་དགའ་བར་གྱུར། །དེ་ནས་ནགས་ཚལ་དེ་ན་འཁོར་བའི་གནོད་སྦྱིན་དང་གླང་པོ་ཆེ་དང་། སྤྲེའུ་དག་ཅིག་དེར་ཆོས་ཉན་དུ་ལྷགས་པས། གཏམ་དེ་ཐོས་ནས་རབ་ཏུ་ངོ་ཚ་ཞིང་མི་དགའ་བར་གྱུར་ཏེ། དེ་ནས་གནོད་སྦྱིན་གྱིས་བདག་གཙང་མར་བསྟན་པའི་ཕྱིར། དེ་དག་གི་མདུན་དུ་མནའ་བོར་བ། ཁྱོད་ཀྱི་རྩ་བའི་ཕྱིར་ནི་གང་འཁྲུལ་པ། གཙུག་ལག་ཁང་ཆེན་དག་ན་རྐྱེན་པར་གྱུར། །བཀྲུ་བཤལ་སྟོར་ཁུང་དག་གི་ཞིག་རལ་འཆོས། །ཉི་མའི་འོད་ཀྱི་སྣང་བ་བྱེད་པར་གྱུར། །གླང་པོ་ཆེས་སྨྲས་པ། ཐུབ་མཆོག་ཁྱེད་ཀྱི་རྩ་བ་གང་རྐུ་བ། །དེ་ནི་ཞགས་པ་དམ་པོ་དྲུག་བརྒྱས་བཅིངས། །ལྕགས་ཀྱུ་རྣོན་པོས་བཀུག་པའི་རྨ་ན་ཞིང་། །ནགས་ཚལ་ཉམས་དགའ་བོར་ནས་གྲོང་འདབ་སོང་། སྤྲེའུས་སྨྲས་པ། ཁྱོད་ཀྱི་རྩ་བ་བརྐམ་པས་གང་རྐུ་བ། དེ་ནི་མེ་ཏོག་ཕྲེང་ཅན་ཞ་ཉེ་ཐོགས། །དབྱིག་པས་རྡེག་ཅིང་སྦྲུལ་གྱི་ཁར་གཏོང་ཞིང་། །སེ་རལ་ཁར་བཅིངས་ཁྱིམ་ན་གནས་པར་ཤོག །དེ་ནས་བྱང་ཆུབ་སེམས་དཔའ་དེ་དག་ཐམས་ཅད་ལ་འཇམ་ཞིང་དུལ་བ་དང་། བཟོད་པ་དང་། ཟབ་པ་སྟོན་པའི་ཚིགས་གིས་འདི་སྐད་ཅེས་སྨྲས་སོ། །གང་གིས་མ་བརླག་བར་ནི་བརླག་ཅེའམ། གང་ཞིག་འདི་འདྲར་ཁྱེད་ལ་དོགས་གྱུར་པ། །འདོད་པ་ཡིད་འོང་ཅི་བདེར་སྤྱད་ནས་སུ། ཁྱིམ་ན་གནས་བཞིན་འཆི་བའི་དུས་བྱེད་གྱུར། དེ་ནས་ལྷའི་དབང་པོ་བརྒྱ་བྱིན་དེ་དག་གི་འདོད་པ་ལ་ཉེ་བར་སྤྱོད་པ་དང་མི་མཐུན་པར་སྨོད་པ། ཞི་གནས་ཁྱད་པར་ཅན་དུ་གྱུར་པར་སྨྲ་བ་དེ་གུས་པ་དང་ཡ་མཚན་སྐྱེས་པར་གྱུར་ཏེ། བདག་རང་གི་གཟུགས་འབར་བ་དྲང་སྲོང་དེ་རྣམས་གྱི་དྲུང་ཏུ་བསྟན་ནས། མི་བཟོད་པ་བཞིན་དུ་སྨྲས་པ། ཁྱེད་རེ་ཤིག་སྟོད་ཅིག །གང་དག་ཐོབ་ཕྱིར་ཡིད་ལ་རྩོལ་བྱེད་ཅིང་། བདེ་བ་འདོད་ཕྱིར་ཡིད་ལ་གཉིས་ཀྱང་མེད། །དཀའ་ཐུབ་འབར་བས་གང་དག་ཐོབ་འདོད་པའི། འདོད་པ་དེ་དག་ཅི་ཕྱར་སྨོད་པར་བྱེད། །བྱང་ཆུབ་སེམས་དཔའ་སྨྲས་པ། གྲོགས་པོ་འདོད་པ་ནི་ཉེས་དམིགས་མཐའ་ཡས་ཏེ། གང་ལ་བརྟགས་ནས་ཐུབ་པ་རྣམས་འདོད་པ་ལ་མི་སྤྱོད་པ་དེ་མདོ་ཙམ་ཤིག་ཉོན་ཅིག །འདོད་པའི་ཕྱིར་ནི་འཇིག་རྟེན་བཅིང་ཞིང་གསོད་པར་འགྱུར། མྱ་ངན་གདུངས་ཤིང་འཇིགས་པ་མང་པོའི་སྡུག་བསྔལ་མྱོང་། །རྒྱལ་པོ་རྣམས་ཀྱང་འདོད་པའི་ཕྱིར་ནི་བརླག་པར་འགྱུར། །ཕྱི་མ་ལ་ཡང་ཆོས་ཉམས་སེམས་ཅན་དམྱལ་བར་ལྟུང་། །གང་གིས་མཛའ་བོ་རྣམས་དང་མྱུར་དུ་འཁོན་འབྱུང་འགྱུར། །གང་གིས་གཡོ་སྒྱུ་དྲི་མ་ཅན་གྱི་ལམ་དུ་འགྲོ། །གྲགས་པ་ཉམས་ཤིང་ཕྱི་མ་ལའང་སྡུག་བསྔལ་མྱོང་། །དེ་དག་འཐབ་པར་འགྱུར་བའི་རྒྱུ་ནི་འདོད་པ་ཡིན། །དེ་བས་རབ་དང་འབྲིང་དང་ཐ་མ་རྣམས། །འདི་དང་ཕ་རོལ་དུ་ཡང་འདོད་པས་གསོད་པར་བྱེད། །བདག་ལ་ཕན་འདོད་སྦྲུལ་གདུག་ཁྲོས་པ་བཞིན། །ཐུབ་པ་རྣམས་ནི་དེ་ལ་མི་བརྟེན་ནོ། །དེ་ནས་ལྷའི་དབང་པོ་བརྒྱ་བྱིན་གྱིས། །ཚིགས་དེ་བདེན་ནོ་སྙམ་ནས་མངོན་པར་བསྟོད་དེ། །དྲང་སྲོང་དེ་དག་གི་མཐུས་དེ་ཡིད་དགའ་བར་གྱུར་ནས། །དེ་དག་ལ་བདག་གི་ཉེས་པ་ཁས་བླངས་སོ། །གང་དག་བརྟགས་ནས་ཡོན་ཏན་རྣམས། །རེ་བ་བཞིན་དུ་རྟོགས་པར་འགྱུར། །བརྟག་པའི་ཕྱིར་ནི་བདག་གིས་འདིར། །པདྨའི་རྩ་བ་སྦས་པ་བཞིན། །པདྨའི་རྩ་བ་འདི་དག་གིས། །ཁྱེད་ཅག་རྣམ་དག་སྤྱོད་པ་བསྟན། །ཐུབ་པ་བདེན་པར་སྨྲ་བ་ཡིས། །འགྲོ་བ་མགོན་དང་བཅས་པར་མཐོང་། །དེ་སྐད་ཅེས་སྨྲས་ནས། པདྨའི་རྩ་བ་དེ་དག་བྱང་ཆུབ་སེམས་དཔའ་ལ་ཕུལ་ལོ། །དེ་ནས་བྱང་ཆུབ་སེམས་དཔའ་དེའི་སྤྱོད་པ་བཟང་པོ་དེ་ལ། གཟི་བྱིན་གྱི་ནོན་པའི་ཚིག་དྲག་པོས་སྤྱོས་སོ། །ངེད་ཅག་ཁྱོད་ཀྱི་གྲོགས་དང་གཉེན་མ་ཡིན། །གར་མཁན་ཁྱོད་མིན་ངེད་ཅག་འཕྱས་གདགས་མིན། ལྷ་དབང་ཅི་ཕྱིར་ཁྱད་དུ་བསད་ནས་སུ། །དྲང་སྲོང་རྣམས་ལ་རྩེད་མོའི་ལམ་བཞིན་བྱ། །དེ་སྐད་ཅེས་སྨྲས་པ་དང་། ལྷའི་དབང་པོ་བརྒྱ་བྱིན་རབ་ཏུ་གུས་པས་རྣ་ཆ་དང་། ཅོད་པན་འགུལ་བའི་འོད་ཀྱི་གདོང་གསལ་བར་གྱུར་ཏེ། རབ་ཏུ་གུས་པར་ཕྱག་འཚལ་ནས་དེ་ལ་བཟོད་པ་གསོལ་བ། བདག་གིས་འདི་ལྟར་མི་བརྟན་པ། །བགྱིས་པའི་དགོས་པ་སྔར་སྨྲས་ལགས། །ཕ་དང་སློབ་དཔོན་འདྲ་བ་རུ། །བདག་ལ་ཁྱོད་ཀྱི་གཟོད་པར་མཛོད། །ཤེས་པའི་མིག་ནི་བཙུམ་པར་གྱུར་བ་རྣམས། །རང་བཞིན་གྱི་ནི་མཉམ་ལའང་འཁྲུལ་བར་གྱུར། བདག་ལ་ཕན་པས་དེ་ལ་བཟོད་པ་མཛོད། །དེ་བས་བདག་ལ་ཐུགས་ལ་མི་བཅང་གསོལ། །དེ་ལྟར་བཟོད་པར་གསོལ་ནས་དེ་ཉིད་མི་སྣང་བར་གྱུར་ཏོ། །དེ་ལྟ་བས་ན་རབ་ཏུ་དབེན་པའི་བདེ་བའི་རོ་མྱོང་བ་རྣམས་ནི་འདོད་པ་ལ་ཕྱས་ཀྱིས་གནས་དང་། གནོད་པ་ལྟ་བུར་མི་མཐུན་པར་སེམས་སོ། །དེ་ལ་སྐྱེས་པའི་རབས་འདི་ཡང་བཅོམ་ལྡན་འདས་ཀྱི་ལུང་བསྟན་ཏེ། ང་དང་ཤཱ་ར་དྭཱ་ཏིའི་བུ། མོའུ་གལ་བུ་དང་འོད་སྲུངས་དང་། །གང་པོ་མ་འགགས་ཀུན་དགའ་བོ། །དེ་ཡི་ཚེ་ན་སྤུན་དུ་གྱུར། །སྲིང་མོ་ཨུཏྤལ་མདོག་ཡིན་ནོ། །བྲན་མོ་ཀུ་བ་ཛ་ཨུཏ་ཏ་ར། །བྲན་ཕོ་ཁྱིམ་བདག་མཛེས་པ་ཡིན། །གནོད་སྦྱིན་རི་བོང་བདེ་བ་ཡིན། །གླང་པོ་བ་རི་ལེ་ཡ་ཡིན། །སྤྲེའུ་ནི་སྤང་རྩེ་འབུལ་བ་ཡིན། །བརྒྱ་བྱིན་ནག་པོ་འཆར་ཀ་ཡིན། །སྐྱེས་པའི་རབས་ནི་དེ་ལྟར་ཟུང་། །པདྨའི་རྩ་བའི་སྐྱེས་པའི་རབ་ཏེ་བཅུ་དགུ་པའོ།། །།ཡོན་ཏན་མེད་པ་ལ་ཡོད་པར་གྲགས་པ་ནི། སྐྱེས་བུ་དགེ་བ་རྣམས་ལ་བསྐུལ་མ་བ་དང་འདྲ་བར་འགྱུར་ཏེ། དེ་བས་ན་ཡོན་ཏན་བསྒྲུབ་པ་ལ་འབད་པར་བྱའོ། དེ་ཡང་འདི་ལྟར་བྱང་ཆུབ་སེམས་དཔའ་ཐོས་པ་དང་དུལ་བ་དང་། ཆོ་རིགས་བཙུན་པ་མ་འཇུངས་ཤིང་ཁོང་བཟོ་བ། འཇིག་རྟེན་གྱི་ཐ་སྙད་དུ་བྱ་བ་ལ་འགལ་བ་མེད་པ། གཙུག་ལག་མང་པོ་ལ་གོམས་པས། ཚིག་ལ་མཁས་པར་གྲགས་པ། སྙིང་རྗེ་དང་ལྡན་ཞིང་སྦྱིན་གཏོང་ཆེ་བས་ནོར་གྱི་འབྱོར་པ་ཐམས་ཅད་དུ་ཁྱབ་པ། རབ་ཏུ་ཕྱུག་པས་ཁྱིམ་བདག་རིན་པོ་ཆེ་ལྟར་བཀུར་བ། རྒྱལ་པོ་ཞིག་གི་ཚོང་དཔོན་དུ་གྱུར་ཏོ་ཞེས་གྲག་གོ །དེ་ནི་རང་བཞིན་ཆོས་ཀྱི་བདག །ཐོས་ལ་སོགས་པའི་ཡོན་ཏན་བརྒྱན། །འཇིག་རྟེན་དག་གིས་ཕལ་ཆེར་ནི། །བཀུར་སྟི་བྱ་བའི་གནས་སུ་གྱུར། །དེ་ནས་རེ་ཤིག་ཅིག་སེམས་དཔའ་ཆེན་པོ་དེ་རྒྱལ་པོའི་ཕོ་བྲང་དུ་སོང་བའི་འོག་ཏུ། དེའི་སྒྱུག་མོ་དོན་ཞིག་གཉེར་ཞིང་བུ་མོ་དང་ཕྲད་པའི་ཕྱིར་དེའི་ཁྱིམ་དུ་སོང་ངོ་། །འགྲོན་འོངས་བའི་བཀུར་སྟི་བྱ་བ་བྱས་ནས། གཏམ་གླེང་བསླང་བ་དང་། རང་གི་བུ་མོ་བྱང་ཆུབ་སེམས་དཔའི་ཆུང་མ་ལ། བདེའམ་མི་བདེ་དྲི་བའི་སྐབས་སུ། བུ་མོ་ཁྱོད་ཀྱི་ཁྱིམ་ཐབ་ཁྱོད་ལ་བྱམས་སམ་མི་བྱམས། ཁྱོད་ཀྱི་བཀུར་སྟི་བྱས་པའི་ཡོན་ཏན་དྲིན་དུ་བཟོའམ་མི་བཟོ། མི་བདེ་བ་ལྟ་ཡོད་དམ་མེད་ཅེས་དྲིས་པ་དང་། དེ་ངོ་ཚ་བས་མགོ་སྨད་དེ་མི་སྤོབས་བཞིན་དུ་གཅོམ་སྐྱུངས་ཏེ་སྨྲས་པ་དེ་ལྟ་བུའི་ཚུལ་ཁྲིམས་དང་ཡོན་ཏན་དང་སྤྱོད་ཚུལ་ན་རབ་ཏུ་བྱུང་བ་ལ་ཡང་མ་མཆིས་སོ། །ཞེས་བྱས་པ་དང་། དེ་ན་དེའི་མ་ནི་ན་སོ་རྒས་པས་རྣ་བ་མི་གསང་ཞིང་སེམས་མི་གསལ་བ་དང་བུ་མོ་དེས་དེ་སྐད་ཅེས་སྨྲས་པའི་ཚིག་ཀྱང་ངོ་ཚ་ཞིང་གཅོམ་ཆུང་བས་ལེགས་པར་མ་ཐོས་ལ། རབ་ཏུ་བྱུང་བའི་སྒྲ་ཞིག་ཀྱང་ཐོས་པས། བདག་གི་མག་པ་ངེས་པར་རབ་ཏུ་བྱུང་བ་ལྟ་ཞིག་སྙམ་ནས། བུ་མོའི་མྱ་ངན་དང་། དེའི་སྡུག་བསྔལ་གྱི་དབང་དུ་གྱུར་ནས། སྨྲེ་སྔགས་འདོན་ཞིང་དེས་སྐད་ཕྱུང་སྟེ་ངུས་སོ། །འདི་ལྟར་སྙིང་ཉེ་བའི་བདག་གི་བུ་མོའང་བོར་སྟེ། རབ་ཏུ་བྱུང་བའི་ཚུལ་ཁྲིམས་ཀྱི་ཡོན་ཏན་དང་སྤྱོད་ཚུལ་ཡང་ཅི་འདྲ་བ་ཞིག་གོ །བུ་དེའི་རབ་ཏུ་བྱུང་བའང་ཅི་ལྟ་བུ་ཞིག་གོ །དར་ལ་བབ་ཅིང་བྱད་གཟུགས་བཟང་། གཞོན་ཤ་ཅན་ལ་བདེ་བར་གནས། དེ་ནི་རྒྱལ་པོའི་གནས་ཆེན་ཡིན། །དགོན་པར་གནས་བློ་ཇི་ལྟར་སྐྱེས། །ནང་མི་དག་དང་ཁོན་མ་བྱུང་། །རྒས་པས་མི་སྡུག་མ་གྱུར་ཅིང་། །ནད་མེད་ཇི་ལྟར་ཚིག་གཅིག་གིས །ཁྱིམ་གྱི་ལོངས་སྤྱོད་དེ་ཡིས་བཏང་། །འཛངས་དང་དུལ་བའི་རྒྱན་གྱིས་བརྒྱན། །གཞན་ལ་སྙིང་བརྩེ་མཉེས་ཀྱང་གཤིན། །མི་བརྟེན་ནང་མི་སྙིང་རྗེ་མེད། །འདི་ལྟ་བུ་ནི་ཇི་ལྟར་ལོབས། །དགེ་སྦྱོང་བྲམ་ཟེ་མཛའ་བོའི་རྟེན། །ནང་མི་དག་དང་ཕོངས་པ་གསོ། ནགས་ཚལ་དགོན་པར་གང་བཙལ་བ། གཙང་སྦྲ་ཚུལ་ཁྲིམས་ནོར་ལྡན་པའི། །ཁྱིམ་ན་རྙེད་པར་མི་འགྱུར་རམ། །རྗེས་སུ་མཐུན་ཞིང་ཆོས་གྲོགས་བྱེད། །ཉེས་པ་མེད་པ་བོར་ནས་ནི། །ཧ་ཅང་ཆོས་ལ་དད་ཆེ་ནས། །ཆོས་དང་འགལ་བ་འདིར་མི་ལྟ། །འདི་ལྟར་གུས་པའི་སྐྱེ་བོ་སྤངས། ཡིད་ལ་སྙིང་རྗེ་ཅུང་ཟད་མེད། །ཆོས་ནི་ཅུང་ཟད་འགྲུབ་རེ་སྐན། །ཀྱེ་མའོ་གནས་ཀྱི་མནར་བ་བལྟ། །དེ་ནས་བྱང་ཆུབ་སེམས་དཔའི་ཆུང་མ། །བདག་གི་ཁྱིམ་ཐབ་རབ་ཏུ་བྱུང་བའི་ཕྱིར། བདག་གི་མ་སྙིང་རྗེ་ཞིང་སྙིང་ནས་སྨྲེ་སྔགས་འདོན་པ་དེས། །བུད་མེད་ཀྱི་རང་བཞིན་ཡིན་པའི་ཕྱིར་སྙིང་མི་དགའ་བས་འཁམས་ཤིང་བློང་བློང་བོར་ནི་གྱུར། །མྱ་ངན་གྱི་སྡུག་བསྔལ་གྱིས་སེམས་དཀྲུགས་ནས་གཏམ་གླེང་བསླང་བའི་འཕྲོ་ཡང་བརྗོད། བདག་གི་ཁྱིམ་ཐབ་རབ་ཏུ་བྱུང་བའི་གཏམ་ངན་ནི་ཐོས་ནས། བདག་གིས་མ། བདག་མྱ་ངན་བསང་བའི་ཕྱིར་ཁྱིམ་འདིར་འོངས་སོ་སྙམ་ནས། །བུ་མོ་དེ་སྨྲེ་སྔགས་འདོན་ཅིང་སྐད་ཕྱུང་སྟེ་ངུ་བ་ལས་བརྒྱལ་བར་གྱུར་ཏོ། །ཁྱིམ་མི་དང་གཡོག་འཁོར་རྣམས་ཀྱིས་ཀྱང་དེ་ཐོས་ནས། མྱ་ངན་གྱི་སྡུག་བསྔལ་གྱི་ཤུགས་ཀྱིས་ཆོ་ངེས་བཏབ་བོ། །ཁྱིམ་མཚེས་དང་མཛའ་བོ་དང་གཉེན་བཤེས་དང་། དེ་ལ་བརྟེན་པའི་སྐྱེ་བོ་དང་བྲམ་ཟེ་དང་། ཁྱིམ་བདག་རྣམས་ཀྱིས་ཀྱང་དེ་ཐོས་ནས། ཁྱིམ་བདག་དེ་ལ་རྗེས་སུ་ཆགས་པའི་དབང་དུ་གྱུར་པ་རྣམས་དང་། ཕོ་བྲང་འཁོར་གྱི་མི་རྣམས་ཀྱང་ཕལ་ཆེར་ཁྱིམ་དེར་དོང་ངོ་། །གང་ཕྱིར་འཇིག་རྟེན་དག་ན་སྲིད་པ་ནི། །བདེ་བར་སྡུག་བསྔལ་དག་ལ་མཚུངས་པར་སྤྱོད། །དེ་བས་འདི་ལའང་འཇིག་རྟེན་སློབ་མ་བཞིན། །བདེ་དང་སྡུག་བསྔལ་དག་ལ་མཚུངས་སྤྱོད་འགྱུར། །དེ་ནས་བྱང་ཆུབ་སེམས་དཔའ་རྒྱལ་པོའི་ཕོ་བྲང་ནས་སླར་ལོག་སྟེ། བདག་གི་ཁྱིམ་དང་ཉེ་བ་ཞིག་ཏུ་ཕྱིན་པ་ན། བདག་གི་ཁྱིམ་ན་ཆོ་ངེས་འདེབས་པ་དང་། མི་མང་པོ་འདུས་པ་མཐོང་ནས། བདག་གིས་གཡོག་ལ་དེ་ལྟ་བུར་གྱུར་པ་ཅི་ཉེས་རྟོགས་ཏེ་ཤོག་ཅིག་ཅེས་བསྒོའོ། །དེས་དེ་ལྟར་གྱུར་པ་བརྟགས་ནས། །དེའི་དྲུང་དུ་ཕྱིན་ཏེ་དེ་ལ་བཟླས་པ། ཇོ་བོས་འབྱོར་པའི་ཁྱིམ་སྤངས་ནས། །རབ་ཏུ་བྱུང་ཞེས་ཐོས་ནས་ནི། །སྐྱེ་བོ་འདི་དག་གང་ཞིག་ནས། །བྱམས་པའི་དབང་གིས་འདུས་པར་གྱུར། །དེ་ནས་བྱང་ཆུབ་སེམས་དཔའ་རང་བཞིན་གྱི་བསམ་པ་དག་པས་ཚིག་དེས་བསྐུལ་བ་བཏབ་པ་བཞིན་དུ། ངོ་ཚ་ཞིང་མི་དགའ་བར་གྱུར་ནས་བསམ་པ། ཨེ་མའོ་སྐྱེ་བོ་རྣམས་དེ་ལྟར་བདག་ལ་རེ་བ་ནི་ལེགས་སོ་སྙམ་མོ། །སྐྱེ་བོ་རྣམས་ཀྱི་ཡོན་ཏན་དུ། །བརྗོད་ཅིང་གྲགས་པ་ཐོབ་འགྱུར་ལ། །གལ་ཏེ་ཁྱིམ་ལ་ཕྱོགས་ན་ནི། །བདག་ལྟ་མིར་ཡང་ག་ལ་རུང་། །དེ་ལྟར་བདག་ནི་སྐྱོན་ལ་དད་གྱུར་ཅིང་། །ཡོན་ཏན་ཁྱད་དུ་གསོད་ལ་ཚུལ་ངན་ན། སྐྱེ་བོ་དགེ་བས་ཡང་བར་རྩི་བར་འགྱུར། །དེ་ལྟར་གྱུར་ན་གསོན་ཡང་ཅི་ཞིག་རུང་། དེ་བས་སྐྱེ་བོ་རེ་བར་འགྱུར་བ་འདི། །སྤྱོད་པ་ངན་པས་ཉོན་མོངས་ཁྱིམ་སྤངས་ནས། །དཀའ་ཐུབ་ནགས་ན་དགའ་བའི་ཡོན་ཏན་གྱིས། །ཉམས་སུ་བླངས་ཏེ་རབ་ཏུ་བསྐང་བར་བྱ། །བདག་ཉིད་ཆེན་པོ་དེས་དེ་ལྟར་ངེས་པར་བྱས་ནས། །དེ་ལྟར་སླར་ལོག་སྟེ། །རྒྱལ་པོའི་གསོལ་ཀ་བ་ལ། ཚོང་དཔོན་སྤྱན་སྔར་མཆི་འཚལ་ལོ་ཞེས་གསོལ་ཅིག་ཅེས་སྨྲས་སོ། །སྤྱན་སྔར་མཆི་བར་གནང་ནས་ཀྱང་ཚུལ་བཞིན་དུ་རྒྱལ་པོའི་སྤྱན་སྔར་འོངས་པ་དང་། རྒྱལ་པོས་ཅིའི་ཕྱིར་འོངས་ཞེས་སྨྲས་སོ། །ལྷ་བདག་ནི་རབ་ཏུ་བྱུང་བར་འཚལ་ན་གནང་བའི་རིགས་སོ། །དེ་ནས་དེ་ལ་རྒྱལ་པོ་དེས་རིམ་གྲོ་བསྐྱེད་དེ། །བྱམས་པའི་ཚིག་གིས་འདི་སྐད་ཅེས་སྨྲས་སོ། །ངེད་འདྲ་གཉེན་དང་མཛའ་མཆོག་ཡོད་བཞིན་དུ། །ནོར་དང་ཐབས་དང་མཐུ་རྩལ་གང་དག་གིས། །ང་ཡིས་ཐུབ་པར་གྱུར་པ་མ་ཡིན་པའི། །སྡུག་བསྔལ་གང་གིས་ཁྱོད་ནི་བས་མཐར་འགྲོ། གལ་ཏེ་ནོར་འདོད་ང་ལས་ནོར་ཁྱེར་ཅིག །གནོད་པ་ཡོད་ན་དེ་ལས་བཟློག་པར་བྱ། །ང་དང་གཉེན་བཤེས་གསོལ་བ་འདེབས་པ་རྣམས། །བོར་ནས་ཅི་ཞིག་མེད་ཕྱིར་བས་མཐར་འགྲོ། དེ་ལྟར་བདག་ཉིད་ཆེན་པོ་དེ་ལ་རྒྱལ་པོས་བྱམས་པ་དང་གུས་པས་བསྒོ་བ་དང་། དེ་ལ་ཚིག་འཇམ་པོས་སྨྲས་པ། ཁྱོད་ལ་བརྟེན་པ་གནོད་པ་ག་ལ་མཆིས། །ནོར་གྱིས་ཕོངས་བའང་མཆིས་བར་ག་ལ་འགྱུར། །དེ་བས་ཕོངས་ཏེ་བས་མཐར་བདག་མི་མཆི། །གང་གི་སླད་དུ་མཆི་བ་གསན་དུ་གསོལ། །སྐྱེ་བོ་མྱ་ངན་གདུངས་པའི་མཆི་མ་ཅན་དག་གིས། །བདག་ནི་རབ་ཏུ་བྱུང་བར་གྱུར་ཅེས་རབ་ཏུ་བསྒྲགས། །བདག་ནི་ཡོན་ཏན་ལྡན་ཞེས་དད་པའི་གནས་སུ་གྱུར། །དེ་བས་བདག་ནི་བས་མཐའ་དབེན་པར་གནས་པར་འཚལ། །རྒྱལ་པོས་སྨྲས་པ། ཁྱོད་སྐྱེ་བོ་རྣམས་ཀྱི་ཚིག་ཙམ་གྱིས་ངེད་དོར་བར་མི་རིགས་སོ། །ཁྱོད་ལྟ་བུའི་ཡོན་ཏན་ཕུན་སུམ་ཚོགས་པ་ནི་སྐྱེ་བོའི་ཚིག་བསྲུངས་བ་ཙམ་གྱི་ཆོག་པའང་མ་ཡིན་ལ། དེ་མ་བྱས་ན་མི་རུང་པའང་མ་ཡིན་ནོ། །འཇིག་རྟེན་མུ་ཅོར་སྨྲ་བའི་གཏམ་རྣམས་ནི། །རང་དགར་རྟོག་པ་བདག་ལ་རྣམ་པར་འཕྲོ། །གང་ཞིག་དེ་དག་སྙད་ལ་སེམས་ན་ཡང་། །ཕྱས་སུ་འགྱུར་ན་བྱེད་པ་ཅི་ཞིག་སྨྲོས། བྱང་ཆུབ་སེམས་དཔས་སྨྲས་པ། རྒྱལ་པོ་ཆེན་པོ་དེ་སྐད་བཀའ་མི་སྩལ་དུ་གསོལ། སྐྱེ་བོའི་བཀའ་མཆིད་དགེ་བ་གྲག་པ་རྣམས་ལྟར་མི་བགྱི་བའང་མ་ལགས་སོ། །ལྷ་གཟིགས་སུ་གསོལ། མི་ཡི་བདག་པོ་གང་ཚེ་དགེ་བ་ཡི། །ཚེས་དང་ལྡན་ཞེས་གྲགས་པར་གྱུར་པ་ལས། །མི་ཡིས་དེ་ལས་ཉམས་པར་མི་བགྱི་ཞིང་། །ངོ་ཚའི་ཕྱིར་ཡང་རབ་ཏུ་འབད་པར་རིགས། །ཡོན་ཏན་ཡོད་ཅེས་གྲགས་ཤིང་རེ་བ་དག །ཇི་ལྟར་གྱུར་ཡང་རུང་སྟེ་གནང་ན་ནི། །གྲགས་པ་དག་ལས་གཏམ་སྙན་འཕེལ་བར་འགྱུར། །གཞན་དུ་བགྱིས་ན་ཁྲོན་པ་སྐམ་པོ་བཞིན། །དོན་བཞིན་མ་ཡིན་ཡོན་ཏན་གྲགས་པ་འཕེལ། །རྣམ་པར་རྟོག་པའི་རླུང་གིས་བསྐྱོད་པ་ལ། མི་རྣམས་གྲགས་པ་ཉམས་པར་གྱུར་ན་ནི། །སླར་ཡང་གྲགས་པར་འགྱུར་བ་རབ་ཏུ་དཀའ། །སྦྲུལ་ནག་ཁྲོས་ནས་གདེངས་ཀ་བརྡེག་འདྲ་བའི། །ཡོངས་སུ་བཟུང་བ་བརྩོད་པའི་རྒྱུར་གྱུར་པ། །སྤང་རིགས་དེ་ནི་སྤོང་བར་བགྱི་པ་ལ། །ལྷ་ཅིག་བདག་ནི་བཟློག་པ་མི་རིགས་སོ། །གུས་པར་མཁྱེན་ནས་འབངས་ལ་བྱམས་པ་ཡིས། །ཁྱོད་ཀྱིས་དེ་ལྟར་བྱ་བ་རིགས་མེད་ཀྱི། །བདག་ནི་སེམས་ཀྱིས་རབ་ཏུ་བྱུང་ལགས་ནས། འདུ་འཛི་ཉོན་མོངས་ཅན་གྱིས་ཅི་ཞིག་བགྱི། དེ་ལྟར་གསོལ་བ་བཏབ་ནས་བདག་ཉིད་ཆེན་པོ་དེ། རྒྱལ་པོ་དེས་གནང་ཏེ། དཀའ་ཐུབ་ཀྱི་ནགས་སུ་འགྲོ་བར་ཆས་སོ། །དེ་ནས་དེའི་མཛའ་བོ་དང་། ཉེ་དུ་དང་། དེ་ལ་བརྟེན་པ་རྣམས་ལྷགས་ནས་མྱ་ངན་གྱི་མིག་མཆི་མས་གང་ཞིང་རྐང་པ་ལ་འཇུས་ཏེ་འགྲོར་མི་སྟེར་བར་གྱུར་པ་ནི། ཁ་ཅིག་གིས་ཐལ་མོ་སྦྱར་ཞིང་གསོལ་བ་འདེབས་ཤིང་དེའི་ལམ་བཀག་ཅིང་འཁོད། ཁ་ཅིག་གིས་ནི་མགུལ་ནས་འཇུས་ཏེ་ཚིག་འཇམ་པོས་བྲིད་ཅིང་ཁྱིམ་ཕྱོགས་སུ་འཁྲིད་པར་བྱེད། །ཁ་ཅིག་གིས་ནི་སྤོབས་པའི་ཚུལ་གྱིས་ཚིག་རྩུབ་པོས་སྤྱི་རྟོལ་མེད་པ་ཤ་སྟག་བྱེད་ཅེས་ཟེར་ཞིང་གཤེ། ཁ་ཅིག་ནི་མཛའ་བོ་དང་། ནང་མི་རྣམས་ལའང་སྙིང་མི་རྗེའམ་ཞེས་ཟེར་ཞིང་འགྲོར་མི་སྟེར། ལ་ལ་ནི་ཁྱིམ་ན་གནས་པའི་དཀའ་ཐུབ་ཉིད་བསོད་ནམས་ཆེ་མོད་ཅེས་ཟེར་ཞིང་རྣར་འོང་བ་དང་། རིགས་པའི་ཚིག་གིས་རྟོགས་པ་སྐྱེད། །གཞན་དག་ནི་དཀའ་ཐུབ་ཀྱི་ནགས་ཚལ་ན་གནས་པ་སྡུག་བསྔལ་ཆེ་བ་དང་། ད་དུང་བྱ་བ་ཁ་ཅིག་མ་ཟིན་པ་ཡོད་པ་སྐད་དུ་གསོལ་བ་འདེབས། ཁ་ཅིག་ནི་ཚེ་ཕྱི་མ་ལ་བསོད་ནམས་ཀྱི་འབྲས་བུ་ཡོད་དམ་མེད་གཏོལ་མེད་ཅེས་ཐེ་ཚོམ་བསྐྱེད་དེ་གཞུང་ལུགས་ཀྱི་ཁྱད་པར་དེ་དང་དེ་དག་སྨོས་ཤིང་སླར་ཅི་ལོག་ཏུ་འབད་པར་གྱུར་ཏོ། །དེ་དེ་ལྟར་རབ་ཏུ་འབྱུང་དུ་མི་སྟེར་བ། ནགས་ཚལ་དུ་འགྲོ་བ་ལ་འགོག་ཅིང་ཐེན་པ་གདོང་མཆི་མས་གང་བའི་མཛའ་བོ་དེ་དག་ལ་བལྟས་ནས་འདི་ལྟར་སེམས་པར་མངོན་ནོ། །མཛའ་བོར་འཐམས་པས་མཛའ་བོ་བག་མེད་ལ། ཕན་པར་གྱུར་ན་རྩུབ་པོའང་སྦྱར་བའི་རིགས། །ཕན་ཞིང་འཇམ་ན་སྨོས་ཀྱང་ཅི་ཞིག་དགོས། དམ་པ་རྣམས་ཀྱི་ཆོས་ཚུལ་དེ་ལྟར་ཡིན། །ནགས་བས་ཁྱིམ་ན་དགའ་བར་འདི་དག་སེམས། །ནགས་ན་གནས་པ་དོགས་ཤིང་འཇིགས་པ་མེད། །ཐ་མལ་གནས་པ་ཇི་ལྟར་མི་སེམས་ཀྱེ། །སྡིག་པས་གོས་པ་བཞིན་དུ་འགོག་པར་བྱེད། །མི་དག་ཤིའམ་ཤི་བར་གྱུར་པའམ། ཆོས་ལས་ཉམས་ན་མི་དགར་འགྱུར་བ་བཞིན། །ནགས་ཚལ་གནས་འདོད་ང་ནི་གསོན་བཞིན་དུ། །ཅི་ཞིག་སེམས་ཤིང་འདི་དག་ངུ་བར་འགྱུར། །ང་དང་བྲལ་བས་དེ་ལྟར་མི་དགའ་ན། །ང་དང་ལྷན་ཅིག་ནགས་ན་ཅི་མི་འཁོད། །གལ་ཏེ་ང་བས་ཁྱིམ་ན་འཁོད་དགའ་ན། །མཆི་མ་ཟད་པར་ངུ་བ་ཅི་ཆེད་ཆེ། །དེ་སྟེ་བདག་གི་མི་ལ་ཆགས་པའི་ཕྱིར། །དཀའ་ཐུབ་བྱེད་དུ་འགྲོ་བར་མི་སྟེར་ན། །དགྲ་དང་དམག་འགྱེད་དེ་དང་དེ་དག་ཏུ། །འགྲོ་བ་ན་ཡང་དེ་དག་ཅིར་མི་བྱེད། །ཕོངས་པར་གྱུར་པའི་ཚེ་ན་མཛའ་བོ་རྣམས། །མཆི་མས་འཇུ་ཞིང་འོང་བའི་མཐུ་ཡང་མཐོང་། །མཛའ་བོའི་རང་བཞིན་རབ་ཏུ་བརྟན་གྱུར་ཀྱང་། །ཕྱི་བཞིན་མི་འབྲང་གཡོ་དང་ཐབས་བྱེད་བཞིན། །སླད་དུ་བཟློག་པའི་ཕྱིར་ཡང་སྐད་འཛེར་ཞིང་། མིག་ནི་མཆི་མས་གང་བཞིན་སྨྲ་བ་དང་། །མཚུངས་པ་ལ་ཡང་བླ་མ་འདྲ་བར་ནི། །མགོ་བོ་བཏུད་དེ་འདི་དག་ཕྱག་འཚལ་བ། །རབ་ཏུ་འབྱུང་བའི་རྗེས་སུ་རབ་འབྱུང་བར། །འདི་དག་བྱམས་ན་དེ་བཞིན་བྱ་བའི་རིགས། །དམ་པའི་སེམས་ནི་ངོ་མཚར་གྱུར་པ་ཡི། །བར་མཁན་སྤྱོད་པ་བཞིན་དུ་མི་འགྱུར་རམ། །ཡོན་ཏན་མེད་ལ་ཕོངས་པར་གྱུར་ཚེ་ཡང་། གྲོགས་པོ་གཉིས་གསུམ་ངེས་པར་ཡོད་པར་འགྱུར། །ཡོན་ཏན་ཡོད་བཞིན་ནགས་སུ་འགྲོ་བ་ན། །གྲོགས་པོ་གཅིག་ཀྱང་མེད་པར་ངོ་མཚར་ཆེ། །གླང་ཆེན་སྨྱོན་པ་གཡུལ་ངོ་བཟློགས་པ་ན། །ང་ཡི་སྔོན་དུ་འགྲོ་བར་འདོད་པ་དག ནགས་སུ་ང་འགྲོ་ཕྱིར་ནི་མི་འགྲོ་བ། །དེ་དག་ཡིན་ནམ་ང་ཡང་དེ་མ་ཡིན། །དེ་ལྟར་བྱམས་པ་མེད་པར་འགྱུར་བའི་རྒྱུ། །ཉེས་པ་བྱས་པ་བདག་ནི་མི་དྲན་ན། །བདག་གི་མཛའ་བོ་འདི་ལྟར་འཁོད་བཞིན་དུ། །འདི་ལྟར་གྱུར་པ་རུང་བར་འོང་ངམ་ཀྱེ། །བདག་ནི་ནགས་སུ་འགྲོ་ཕྱིར་མི་འབྲང་བ། །བདག་ལ་ཡོན་ཏན་མེད་པས་དེ་ལྟར་གྲང་། །ཡོན་ཏན་དག་ལ་རྗེས་སུ་ཆགས་པ་རྣམས། །དེ་ལྟར་འབྲང་བར་ནུས་པ་སུ་ཞིག་ཡོད། གང་དག་ཁྱིམ་གྱི་ཉེས་པ་གསལ་བར་མངོན། །དཀའ་ཐུབ་ནགས་ཚལ་ཡོན་ཏན་མི་མཐོང་བ། །ཤེས་པའི་མིག་ནི་བཙུམས་གྱུར་དེ་དག་ལ། །བདག་གིས་གཞན་དུ་རྟག་ཏུ་ཅི་ཡང་མེད། །ཕྱི་མའི་ཚེ་དང་ཚེ་འདིའི་སྡུག་བསྔལ་རྒྱུ། །འདོད་ལ་དག་ནི་སྤོང་བར་མི་འདོད་པ། །དཀའ་ཐུབ་ནགས་དང་འགལ་བར་བྱེད་པ་དེ། །དེ་རིང་བདག་འདོར་བ་ནི་གཏི་མུག་ཡིན། །བདག་གི་མཛའ་བོ་འདི་རྣམས་གང་གིས་བསླུས། །འཇིག་རྟེན་མ་ལུས་ཞི་བར་མ་གྱུར་བ། །དཀའ་ཐུབ་ནགས་ཚལ་རྙེད་པའི་མཐུ་ཆེན་གྱིས། །ཉེས་པ་དེ་དག་མངོན་དུ་གཞོམ་པར་བྱ། །དེ་ལྟར་ངེས་པའི་བདག་ཉིད་ཅན་གྱིས་ཡོངས་བརྟགས་ནས། །མཛའ་བཤེས་སྤོབས་པ་རྣམས་ཀྱིས་རྣམ་པར་དཔྱོད་པ་དག །འཇམ་ཞིམ་རབ་ཏུ་མཉེན་པར་སྨྲ་བའི་ཚིག་རྣམས་ཀྱིས། །བགས་ཀྱིས་བྲིད་དེ་བོར་ནས་དཀའ་ཐུབ་ནགས་སུ་སོང་། །དེ་ལྟ་བས་ན་ཡོན་ཏན་མེད་པ་ལ་ཡོང་བར་གྲགས་པ་ནི་སྐྱེས་བུ་དགེ་བ་རྣམས་ལ་བསྐུལ་མ་བཏབ་པ་དང་འདྲ་བར་འགྱུར་ཏེ། དེ་ལྟ་བས་ན་ཡོན་ཏན་སྒྲུབ་བ་ལ་འབད་པར་བྱའོ། །འདི་ལྟར་དགེ་སློང་ངམ་ཞེའམ། དགེ་བསྙེན་ནོ་ཞེས་ཡོན་ཏན་དུ་བརྗོད་པར་འགྱུར་ན། དགེ་བ་རྣམས་ཀྱིས་དངོས་པོ་དེ་བསྒྲུབ་པའི་ཕྱིར་བདག་ཡོན་ཏན་གྱིས་བརྒྱན་པར་བྱའོ། དེ་བཞིན་དུ་ཆོས་སྒྲུབ་པའི་གྲོགས་བྱེད་པ་རབ་ཏུ་དཀོན་ནོ་ཞེས་དེ་ལྟར་ཡང་སྦྱར་བར་བྱའོ། །ཚོང་དཔོན་དུ་སྐྱེས་པའི་རབས་ཏེ་ཉི་ཤུ་པའོ།། །།སྡོམ་ལ། བརྒྱ་བྱིན་བྲམ་ཟེ་མྱོས་བྱེད་མ། ལེགས་པར་ཕ་རོལ་ཕྱིན་དང་ཉ། །བྱ་དང་བུམ་པ་ཕྱུག་པོའི་བུ། དཀའ་ཐུབ་ཅན་དང་ཚོང་དཔོན་ནོ། །བཅུ་ཚན་གཉིས་པའོ།། །།ཁྲོ་བ་ཐུལ་ན་དགྲ་ཞི་བར་འགྱུར་གྱི་གཞན་དུ་བྱས་ན་དགྲ་འཕེལ་ལོ། །དེ་ཡང་འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བྲམ་ཟེའི་རིགས་ཆེན་པོ་ཡོན་ཏན་ལ་གོམས་པའི་མཐུས་གྲགས་པ་རྒྱས་པ་འབྱོར་པས་ཡོན་ཏན་ངེས་པ་རྒྱལ་པོ་བཀུར་སྟི་བྱས་པ་འཇིག་རྟེན་པས་ལྷ་བཞིན་དུ་བཀུར་བ་ཞིག་ཏུ་སྐྱེས་པར་གྱུར་ཏེ་ཞེས་གྲག་གོ །དེ་ཡུན་རིང་དུ་གྱུར་ནས་ཆོ་གའི་ལས་སུ་བྱ་བ་རྣམས་ནི་བྱས་པ་དང་། མང་དུ་ཐོས་པའི་ཡོན་ཏན་ལ་གོམས་པར་བྱས་པས་མཁས་པ་རྣམས་ཀྱི་ནང་དུ་མིང་གྲགས་པར་གྱུར་ཏོ། །མཁས་པ་རྣམས་ཀྱི་གྲགས་པ་ནི། མཁས་པ་ཉིད་ཀྱི་ནང་དུ་འཕེལ། །རིན་ཆེན་ཤེས་ལ་རིན་ཆེན་དང་། །གཡུལ་ངོ་དག་ཏུ་དཔའ་བོ་བཞིན། དེ་ནས་བདག་ཉིད་ཆེན་པོ་དེའི་ཚེ་རབས་སྔ་མ་ལ་རབ་ཏུ་བྱུང་བ་ལ་གོམས་ཤིང་ཆོས་ལ་སེམས་པ་གོམས་པར་བྱས་པ་དང་། བློ་དང་ཤེས་རབ་ཤིན་དུ་གསལ་བའི་ཕྱིར་ཁྱིམ་ན་གནས་པ་ལ་དགའ་བར་མ་གྱུར་ཏེ། དེ་འདོད་པ་རྣམས་ལ་འཐབ་མོ་དང་རྩོད་པ་དང་གྲགས་པ་དང་ཁོ ན་དང་མི་མཐུན་པ་མང་བ་དང་། རྒྱལ་པོ་དང་རྐུན་པོ་དང་། ཆུ་དང་། མེ་དང་། དགྲ་དང་། བགོ་སྐལ་ལ་དབང་བ་རྣམས་དང་། ཐུན་མོང་ཡིན་པ་དང་། ཆོག་མི་ཤེས་པར་འགྱུར་བ་དང་། ཉེས་པ་མང་པོའི་གནས་སུ་གྱུར་པའི་ཕྱིར། བདག་ལ་ཕན་པར་འདོད་པ་རྣམས་ཟས་དུག་ཅན་སྤོང་བ་བཞིན་དུ་ཡོངས་སུ་སྤངས་ཏེ་སྐྲ་དང་ཁ་སྤུ་བཟང་པོ་བྲེགས་ཏེ། གོས་ཁ་དོག་བསྒྱུར་བ་ངུར་སྨྲིག་ནི་གྱོན། ཁྱིམ་པའི་ཆ་ལུགས་ནི་བོར་ནས། རབ་ཏུ་བྱུང་བའི་འདུལ་བ་དང་སྡོམ་པའི་དཔལ་ལ་གནས་པར་གྱུར་པ་དང་། དེའི་ཆུང་མ་དེ་ལ་སྙིང་ཉེ་བའི་དབང་དུ་གྱུར་པའང་སྐྲ་བྲེགས་ཏེ། ལུས་ལ་རྒྱན་དང་ལྷབ་ལྷུབ་ནི་མེད་པར་བྱས། རང་བཞིན་གྱི་ཡོན་ཏན་བཟང་པོས་ནི་བརྒྱན། གོས་ངུ་སྨྲིག་ནི་གྱོན་ནས་ངའི་ཕྱི་བཞིན་དུ་རབ་ཏུ་བྱུང་བར་གྱུར་ཏོ། །དེ་ནས་བྱང་ཆུབ་སེམས་དཔའ་དེ་དཀའ་ཐུབ་ཀྱི་ནགས་ཚལ་དུ་འགྲོ་བའི་རྗེས་སུ་འབྲང་བར་ཤེས་ནས། བུད་མེད་སྡུག་མ་མྱོང་བ་དཀའ་ཐུབ་ཀྱི་ནགས་ཚལ་ན་གནས་མི་ནུས་པའི་ཕྱིར་དེ་ལ་སྨྲས་པ། བཟང་མོ་ཁྱེད་ང་ལ་བྱམས་པའི་རང་བཞིན་འདི་བསྟན་ཟིན་གྱིས། ཁྱོད་ངའི་ཕྱི་བཞིན་དུ་འགྲོ་བར་ཆས་པ་འདི་ཐོང་ཞིག །བུད་མེད་རབ་ཏུ་བྱུང་བ་གཞན་དག་གང་ན་འཁོད་པ་དེར་ཁྱོད་ཀྱང་དེ་དག་དང་ལྷན་ཅིག་ཏུ་འདུག་པར་རིགས་སོ། །དགོན་པའི་གནས་ན་འདུག་པ་ནི་རབ་ཏུ་དཀའོ་ལྟོས་ཤིག །དུར་ཁྲོད་དང་ནི་ཁང་སྟོང་རི་བོ་དང་། །ནགས་ཚལ་གཅན་ཟན་ཁྲོ་བོས་གང་བ་ན། །ཉི་མ་གང་དུ་ནུབ་པར་གྱུར་པ་དེར། །དཀའ་ཐུབ་ཅན་རྣམས་གནས་མེད་འཁོད་པར་འགྱུར། །བསམ་གཏན་བྱེད་ཅིང་རྟག་པར་གཅིག་པུར་གནས། །བུད་མེད་དག་ནི་བལྟར་ཡང་མེད་པར་བྱེད། །ཁྱོད་ཀྱི་འབད་པ་འདི་ནི་ཅི་ཞིག་དགོས། །དེ་བས་ཁྱོད་བློ་སླད་དུ་ལྡོག་པར་གྱིས། །དེ་ཡང་དེའི་ཕྱི་བཞིན་དུ་འགྲོ་བར་ཡིད་དམ་བཅས་པས་མིག་མཆི་མས་གང་བཞིན་དུ་ཅུང་ཟད་ཅིག་འདི་སྐད་ཅེས་སླར་སྨྲས་སོ། །ཁྱོད་ཀྱི་ཕྱི་བཞིན་འགྲོ་བ་ལ། བདག་ནི་གལ་ཏེ་ཉོན་མོངས་ན། བདག་སྡུག་ཁྱོད་ཀྱང་མི་དགྱེས་བཞིན། ཅི་ཡི་སླད་དུ་དེ་ལྟར་བགྱིད། །བདག་ནི་ཁྱོད་དང་བྲལ་བཞིན་དུ། །མཆིས་པར་ནུས་པ་མ་ལགས་ཀྱིས། །དེ་ལྟར་བཀའ་དང་འགལ་བ་འདི། །བདག་ལ་བཟོད་པར་མཛད་དུ་གསོལ། །དེ་ལྟར་ལན་གཉིས་ལན་གསུམ་དུ་བསྒོ་ཡང་སླར་ལྡོག་ཏུ་མ་རུང་བ་དང་། དེ་ནས་བྱང་ཆུབ་སེམས་དཔའ་དེ་ལ་ཅང་མ་སྨྲས་པ་དང་བྱ་ངུར་བའི་ཕྱི་བཞིན་དུ་ངུར་བ་མོ་འབྲངས་བ་དང་འདྲ་བར་དེ་ཡང་དེའི་ཕྱི་བཞིན་དུ་འབྲངས་ཏེ། གྲོང་དང་ལྗོངས་རྒྱུ་ཞིང་སོང་སོང་བ་ལས། ཟས་ཀྱི་བྱ་བ་བྱས་ནས། རེ་ཤིག་ན་ནགས་ཚལ་རབ་ཏུ་དབེན་པ་ཉམས་དགའ་བ། ཤིང་ལྗོན་པ་སྣ་ཚོགས་ཀྱིས་བརྒྱན་པ། གྲིབ་མ་སྟུག་པ་ལ་ལ་དག་ན་ཉི་མའི་འོད་ཟེར་ཏིག་ཏིག་བོ་དེ་དག་གིས་མེ་ཏོག་སིལ་མ་བཀྲམ་པ་ལྟར་འདུག་པ། མེ་ཏོག་སྣ་ཚོགས་ཀྱི་ཕྱེ་མས་ཁེབས་པའི་ས་གཞི་གཙང་མ་ཞིག་ཏུ་བསམ་གཏན་གྱི་ཆོ་ག་བྱས་ནས། ཕྱི་དྲོའི་དུས་སུ་ཏིང་ངེ་འཛིན་ལས་ལངས་ཏེ། ཕྱག་དར་ཁྲོད་ཀྱི་ཚེམ་བུ་འདྲུབ་ཅིང་འདུག་གོ །བུད་མེད་རབ་ཏུ་བྱུང་བ་དེ་ཡང་དེ་དང་མི་རིང་བ་ཞིག་ན། རང་གི་ལུས་ཀྱི་གཟི་མདངས་ལྷ་མོ་དང་འདྲ་བར་མཛེས་པས་ཤིང་དྲུང་བརྒྱན་པ་བཞིན་དུ་འདུག་ཅིང་། ཡིད་ལ་བྱ་བའི་མན་ངག་དེས་བསྟན་པའི་ཚུལ་བཞིན་དུ་བསམ་གཏན་བྱེད་ཅིང་འདུག་གོ །དེ་ནས་ཡུལ་དེའི་རྒྱ་པོས་ཕྱོགས་དེ་དང་ཉེ་བའི་ནགས་ཚལ་དཔྱིད་ཀྱི་དུས་ལ་བབ་པའི་ཤིང་ལོ་ལྷག་པར་མཛེས་པ་དང་ནི་ལྡན། །བུང་བ་ཆེ་ཕྲ་མང་པོ་ནི་སྒྲ་དི་རི་རི་ཟེར། །བྱ་ཀོ་ཀི་ལ་མང་པོ་ནི་སྒྲ་སྙན་པ་འབྱིན། །མཚོའི་གནས་རབ་ཏུ་ཉམས་དགའ་བ། མེ་ཏོག་པདྨ་དང་། ཨུཏྤལ་ཁ་བྱེ་བ་ནི་བགོད་པ་བཞིན་དུ་འདུག་པ། མེ་ཏོག་དྲི་ཞིམ་པོ་སྣ་ཚོགས་ཀྱི་བསུང་གིས་བགོས་པའི་བསེར་བུའི་ངད་ཉམས་སུ་བདེ་བ་ལྡང་བ་ཡོད་པ་ན། །མཐར་གྱིས་རྒྱུ་ཞིང་སོང་སོང་བ་ལས་ས་ཕྱོགས་དེར་ཕྱིན་ཏོ། མེ་ཏོག་སྣ་ཚོགས་ཚོམ་བུ་རབ་ཏུ་མཛེས། དཔྱིད་ཀྱི་དཔལ་གྱིས་ཆེད་དུ་བཤམས་པ་བཞིན། །ཀོ་ཀིལ་ཕོ་དང་རྨ་བྱ་སྒྲ་ཡང་འབྱིན། །མཚོ་གནས་བཟང་པོ་མེ་ཏོག་ཆུ་སྐྱེས་ལྡན། །ནེའུ་སིང་སྔོན་པོ་མཛེས་པའི་རྩྭ་འཇམ་ཡོད། །བུང་བ་མྱོས་པའི་སྒྲ་འབྱིན་ནགས་ཚལ་དག །འདོད་པའི་ལྷ་ཡི་རྩེད་མོའི་གནས་གྱུར་འདྲ། །ཡིད་ལ་ལྟ་བར་རབ་ཏུ་འདོད་པར་གྱུར། །དེ་ནས་རྒྱལ་པོ་དེ་དུལ་ཞིང་ཞེ་ས་བསྐྱེད་དེ། །བྱང་ཆུབ་སེམས་དཔའ་ལ་དགའ་བའི་གཏམ་བྱས་ནས། །དེ་དང་ཉེ་བའི་ཕྱོགས་ཅིག་ཏུ་འདུག་གོ །དེས་བུད་མེད་རབ་ཏུ་བྱུང་བ་མཐོང་ན་ཡིད་རབ་ཏུ་འཕྲོག་པར་འགྱུར་པ་དེ་མཐོང་ནས། དེའི་གཟུགས་བཟང་མོ་དེ་ལ་སྙིང་ཆགས་པར་གྱུར་ཏེ། འདི་ནི་འདིའི་ཆུང་མ་ཡིན་ཡང་དག་གོ་སྙམ་ནས། འདོད་པའི་རང་བཞིན་ཅན་ཡིན་པའི་ཕྱིར་དེ་འཕྲོག་པའི་ཐབས་བསམས་སོ། །དཀའ་ཐུབ་ཅན་གྱི་དམོད་པ་མེ་འབར་བའི། །མཐུ་ནི་ཁྲོ་བོའི་མེ་འདྲ་དེས་ཤེས་ནས། ཡིད་ལ་འདོད་པས་བརྟན་པ་གཡེངས་གྱུར་ཀྱང་། །དེ་ལ་འཕྲལ་དུ་བརྙས་ཐབས་མ་བྱས་སོ། །དེས་བསམས་པ། །དེའི་དཀའ་ཐུབ་ཀྱི་མཐུ་ཤེས་པར་བྱས་ལ། ནུས་ན་ནི་དེ་བྱ་བར་རིགས་ཀྱིས་དེ་ལྟར་མ་ཡིན་ན་ནི་མི་རུང་ངོ་སྙམ་ནས། གལ་ཏེ་འདི་དེ་ལ་སེམས་ཆགས་པའི་དབང་དུ་གྱུར་ན་ནི། །དེ་ལ་དཀའ་ཐུབ་ཀྱི་མཐུ་མེད་གོར་མ་ཆག་གོ །དེ་སྟེ་འདོད་ཆགས་དང་བྲལ་བ་ཞིག་ཡིན་ན་ནི་དེ་ལ་མི་ལྟ་བའི་རིགས་སོ། །དེ་བས་ན་དེའི་དཀའ་ཐུབ་ཀྱི་མཐུ་ཆེའམ་ཆུང་བ་བརྟག་གོ་སྙམ་ནས། རྒྱལ་པོ་དེས་དཀའ་ཐུབ་ཀྱི་མཐུ་བརྟག་པའི་ཕྱིར། བྱང་ཆུབ་སེམས་དཔའ་ལ་ཕན་པར་དགའ་བ་བཞིན་དུ་སྨྲས་པ། ཀྱེ་རབ་ཏུ་བྱུང་བ་ཁྱོད་འཇིག་རྟེན་འདི་ན་མི་གཡོན་ཅན་དང་ཐུབ་ཆོད་ཅན་རབ་ཏུ་མང་ན་ནགས་ཚལ་དབེན་པར་ར་མདའ་བཟློག་ཏུའང་མེད་པ་འདི་ལྟ་བུ་ན། ཆུང་མ་འདི་ལྟ་བུ་དང་ལྷན་ཅིག་འཁོད་དུ་རུང་ངམ། ཁྱོད་ཀྱི་ཆུང་མ་འདི་ལ་འགའ་ཞིག་གིས་གཙེས་ན་ནི་ང་ལའང་གཤེ་བར་འགྱུར་རོ་ལྟོས་ཤིག །དབེན་པ་འདི་ནི་དཀའ་ཐུབ་ཆུང་མ་ཁྱོད། །འགའ་ཞིག་ཆོས་དང་བཅས་ཏེ་བརྙས་བྱས་ནས། །ཆུང་མ་འདི་ནི་མངོན་སུམ་ཕྲོགས་གྱུར་ན། །མྱ་ངན་བྱེད་ལས་གཞན་ནི་ཅི་བྱར་ཡོད། །ཁྲོ་བ་བསྐྱེད་ནའང་ཡིད་ནི་འཁྲུག་འགྱུར་ཞིང་། །ཆོས་དང་འགལ་ལ་གྲགས་པའང་མེད་པར་འགྱུར། །དེ་བས་འདི་ནི་གྲོང་དུ་བཞག་པའི་རིགས། །དཀའ་ཐུབ་ཅན་ལ་བུད་མེད་བསྙེན་ཅི་དགོས། །བྱང་ཆུབ་སེམས་དཔས་སྨྲས་པ། །རྒྱལ་པོ་ཆེན་པོ་གསུང་བ་ཡང་མང་ན། །གལ་ཏེ་དེ་ལྟར་གྱུར་ན་བདག་གིས་ཇི་ལྟར་བགྱི་བ་གསན་དུ་གསོལ། །བརྒྱགས་པས་བསྙེམས་སམ་གལ་ཏེ་མ་བརྟགས་པར། །བདག་ལ་གནོད་པ་བྱེད་པ་འདིར་བྱུང་ན། །ས་རྡུལ་སྟུག་པོ་ཆེར་གྱིས་མནན་པ་བཞིན། །བདག་ཉིད་གསོན་བཞིན་དེ་ནི་ཡོང་མི་གཏོང་། །དེ་ནས་རྒྱལ་པོ་དེས་བསམས་པ། །འདི་ནི་ཆུང་མ་འདི་ལ་རབ་ཏུ་ཆགས་པས་དཀའ་ཐུབ་ཀྱི་མཐུའང་མེད་དོ་སྙམ་ནས། སེམས་དཔའ་ཆེན་པོ་དེ་ལ་བརྙས་པར་གྱུར་ཏེ། དེས་གནོད་པ་བྱས་སུའང་མི་དོགས་ལ། །འདོད་པའི་འདོད་ཆགས་ཀྱི་དབང་དུ་གྱུར་པས། བུད་མེད་དེ་མཐོང་བའི་མི་རྣམས་ལ་བསྒོ་བ། ཁྱེད་དེ་ལ་བུད་མེད་རབ་ཏུ་བྱུང་བ་དེ་ཕོ་བྲང་ནང་དུ་ཁྲིད་ཅིག་ཅེས་བསྒོའོ། །བུད་མེད་རབ་ཏུ་བྱུང་བ་དེས་དེ་སྐད་ཟེར་བ་ཐོས་ནས། ནགས་ཚལ་གྱི་དགོ་བ་མོ་གཅན་གཟན་མ་རུངས་པས་གཙེས་པ་བཞིན་དུ་འཇིགས་ཤིང་བག་ཚ་བས་ངོ་འཛུམ་ནི་འགྱུར། མིག་ནི་མཆི་མས་གང་སྐད་ནི་འཛེར་ཞིག་ཕོངས་ནས་སྨྲེ་སྔགས་འདི་སྐད་འདོན་ནོ། །འཇིག་རྟེན་ཕོངས་ཤིང་དགྲ་ཡིས་གཙེས་གྱུར་ན། །རྒྱལ་པོ་དག་ལ་ཕ་བཞིན་སྐྱབས་ཚོལ་ན། །དེ་ཉིད་གང་ལ་མི་རིགས་བྱེད་གྱུར་ན། །དེ་ཡིས་སུ་ལ་ཕན་སྐྱབས་བཙལ་བར་བྱ། །ཀྱེ་མའོ་འཇིག་རྟེན་སྐྱོང་བའང་ཚུལ་ལས་ཉམས། །གང་དག་ཕོངས་པ་ལེགས་པར་མི་སྐྱོང་བ། །འོན་ཏེ་མེད་དམ་ཤི་བར་གྱུར་ཏམ་ཅི། །ཆོས་ཀྱང་གྲགས་པ་ཙམ་དུ་ཟད་པ་ལྟ། །ཇོ་བོ་བཞུགས་ཤིང་ལྷ་ཡིས་ཅི་ཞིག་བྱ། གཞན་ཞིག་ཡིན་ནའང་རྗེས་སུ་བསྲུང་རིགས་ན། །སྡིག་ཅན་རྣམས་ཀྱིས་བདག་ནི་ཁྲིད་བཞིན་དུ། །བདག་ལ་སྐལ་བ་མེད་པས་ཅང་མི་གསུང་། །གང་གི་དམོད་པའི་སེར་བ་བབ་གྱུར་ན། །རི་ཡི་གཟུགས་ཀྱང་མི་སྣང་དྲལ་གྱུར་ན། །བདག་ནི་འདི་ལྟར་གྱུར་ཡང་དེ་མི་སྨྲ། །འོན་ཀྱང་བྱུར་ངན་མ་ནི་ད་ཅུང་གསོན། །བདག་ནི་འདི་ལྟར་རབ་ཏུ་ཕོངས་གྱུར་ཀྱང་། སྙིང་རྗེའི་སྣོད་དུ་མ་གྱུར་སྡིག་རེ་ཆེ། །ཕོངས་ལ་སྙིང་རྗེ་ཅན་གྱིས་བསྐྱབས་བྱ་བ། །འདི་ནི་དཀའ་ཐུབ་ཅན་གྱི་ཚུལ་མིན་ནམ། །བདག་ཉིད་སླད་དུ་བཟློག་ཀྱང་མ་ལོག་པ། །དེ་ཉིད་ད་རུང་ཐུགས་ལ་བཅངས་པ་འདྲ། །ཁྱོད་ནི་མི་དགྱེས་བཞིན་དུ་བདག་མཆིས་པ། །ཀྱེ་མའོ་བདག་དགར་བགྱིད་པ་ག་ལ་སྲིད། དེ་ལྟར་བུད་མེད་རབ་ཏུ་བྱུང་བ་དེ་སྙིང་རྗེ་རྗེ་སྐད་དུ་སྨྲ་ཞིང་སྨྲེ་སྔགས་འདོན་ལ་ངུ་བ་ཙམ་ལ་བརྟེན་པ་རྒྱལ་པོས་བསྒོ་བའི་མི་དེ་རྣམས་ཀྱིས་སེམས་དཔའ་ཆེན་པོ་དེས་མཐོང་བཞིན་དུ། ཤིང་རྟའི་སྟེང་དུ་བཞག་སྟེ་ཕོ་བྲང་གི་ནང་དུ་ཁྲིད་པར་གྱུར་ཏོ། །བྱང་ཆུབ་སེམས་དཔས་ཀྱང་སོ་སོར་བརྟགས་པའི་མཐུས། ཁྲོ་བོའི་སྟོབས་བཅིལ་ཏེ། དེ་བཞིན་དུ་སེམས་འཁྲུག་པ་མེད་ཅིང་རབ་ཏུ་ཞི་བས་ཕྱག་དར་ཁྲོད་ཀྱི་ཚེམ་བུ་འདྲུབ་ཅིང་འདུག་གོ །དེ་ནས་དེ་ལ་རྒྱལ་པོས་སྨྲས་པ། མི་བཟོད་ཁྲོས་པའི་དབང་དུ་གྱུར་པའི་ཚིག །ཁྱོད་ཀྱིས་བསྙེམས་ཤིང་གསང་སྟོད་སྨྲས་ཟིན་ན། །ཉོན་མོངས་མ་དེ་མཐོང་བཞིན་ཕྲོགས་གྱུར་ཀྱང་། །མཐུ་མེད་ཞུམ་ནས་རབ་ཏུ་ཞི་བར་འདུག །དེ་བས་རང་གི་མཐུ་རྩལ་བསྟན་པར་གྱིས། །དཀའ་ཐུབ་གནས་པའི་གཟི་བརྗིད་བསགས་པའང་སྟོན། །བདག་གི་ཚོད་ཀྱང་གཟུང་བ་མ་ཤེས་ནས། ཁས་ཆེས་དོན་མེད་ལྷགས་པ་མ་མཐོང་ངོ་། །བྱང་ཆུབ་སེམས་དཔས་སྨྲས་པ། །རྒྱལ་པོ་ཆེན་པོ་བདག་གི་ཡི་དམ་དུ་བཅས་པ་དེ་ནི་དོན་མ་མཆིས་པ་མ་ལགས་ཀྱིས་མཁྱེན་པར་མཛད་དུ་གསོལ། གང་ཞིག་བདག་ལ་གནོད་པ་བགྱིད་པ་དེ། །གཡོ་བཞིན་དུ་ཡང་བདག་གིས་ཡོངས་མ་བཏང་། །བདག་གིས་མངོན་སུམ་དུ་ཡང་ཞི་བར་བྱས། །དེ་བས་བདག་གིས་ཡི་དམ་བཅས་བཞིན་འགྱུར། །དེ་ནས་བྱང་ཆུབ་སེམས་དཔའི་ཚིག་རབ་ཏུ་བརྟན་པ་དང་། རབ་ཏུ་ཞི་བའི་ཚུལ་གྱིས་སྟོན་པ་དེས། དཀའ་ཐུབ་ཅན་གྱི་ཡོན་ཏན་ཡོད་པར་ཡིད་ཆེས་པར་གྱུར་ནས་བསམས་པ། བྲམ་ཟེ་འདིས་ནི་གཞན་ཞིག་ལ་བསམས་ནས་སྨྲས་པ་ལྟ་ཞིག་ན། བདག་གིས་དེ་མ་ཤེས་ནས་འདི་ལྟ་བུ་མི་བརྟན་པར་བྱས་སོ་སྙམ་སྟེ། རྟོག་པ་སྐྱེས་ནས། བྱང་ཆུབ་སེམས་དཔའ་ལ་སྨྲས་པ། རྣམ་པར་གཡོ་བཞིན་ཁྱོད་ཀྱིས་མ་བཏང་བ། །ཁྱོད་ལ་གནོད་བྱེད་དེ་ནི་སུ་ཞིག་ཡིན། །ཆར་པ་བབ་པས་རྡུལ་ཕྲན་བཀབ་པ་བཞིན། །ཁྱོད་ཀྱི་གང་ཞིག་རབ་ཏུ་ཞི་བར་བྱས། །བྱང་ཆུབ་སེམས་དཔས་སྨྲས་པ། རྒྱལ་པོ་ཆེན་པོ་གསན་དུ་གསོལ། སྐྱེ་ནའང་གང་ཞིག་མི་མངོན་ལ། །མ་སྐྱེས་ན་ནི་དགེ་བར་མངོན། །བདག་ལ་གནོད་པའི་ཁྲོ་བ་དེ། །བདག་གིས་ཤོར་བར་མ་གྱུར་ཏོ། །མི་ཕན་འདོད་པའི་མི་རྣམས་ནི། །གང་ཞིག་སྐྱེས་ན་དགའ་འགྱུར་བ། །དགྲ་རྣམས་དགའ་འགྱུར་ཁྲོ་བོ་དེ། །བདག་གིས་ཤོར་བར་མ་གྱུར་ཏོ། །གང་ཞིག་སྐྱེས་པར་གྱུར་ན་ནི། །དམ་པའི་དོན་ལ་སྤྱོད་མི་འགྱུར། །རྒྱལ་པོ་ལོང་བར་བྱེད་པ་ཡི། །ཁྲོ་བ་དེ་ལ་བདག་མི་གནས། །གང་གིས་ཟིལ་གནོན་དགེ་བ་གཏོང་བར་འགྱུར། དོན་རྣམས་གྲུབ་ཀྱང་ཉམས་པར་འགྱུར་བ་ཡི། །ཁྲོ་བ་མ་རུངས་གདོན་གྱིས་བསྒྱུར་འདྲ་བ། །ཚུལ་མིན་བྱེད་པའི་གདོན་གྱི་ཟིན་པར་འོང་། །རྩུབ་ཤིང་བརྩུབས་པ་ལས་ནི་མེ་བྱུང་ན། །དེ་ཉིད་རབ་ཏུ་ཚིག་པར་གྱུར་འདྲ་བ། ལོག་པར་རྟོགས་ལས་འབར་བར་གྱུར་པ་ཡི། །ཁྲོ་བའང་དེ་བཞིན་བདག་ཉིད་ཕུང་བར་བྱེད། །རབ་ཏུ་འབར་ཞིང་ཚིག་པའི་མེ་འདྲ་བ། །སྙིང་ལ་གདུང་བའི་ཁྲོ་བ་མ་བཅིལ་ན། །ཡང་བར་གྱུར་པས་དེ་ལ་གཏམ་ངན་འབྱུང་། ནང་པར་ནམ་ལངས་ཟླ་བའི་འོད་ཉམས་བཞིན། །གཞན་ལ་གནོད་པ་བྱ་བར་མི་སེམས་པར། །ཁྲོ་བ་ལ་ནི་དགྲ་བཞིན་གང་ལྟ་བ། །དེ་ཡི་གྲགས་པ་ངེས་པར་རྒྱས་པར་འགྱུར། །ཟླ་བ་ཡར་གྱི་འོང་ཟེར་གསལ་བ་བཞིན། ཁྲོ་བ་ལ་ཉེས་དམིགས་ཆེན་པོ་འདི་ལྟ་བུ་གཞན་དག་ཀྱང་ཡོད་དེ། ཁྲོ་བའི་མེ་ཡིས་བཞིན་མདོག་ཉམས་འགྱུར་ན། །རྒྱན་གྱི་བརྒྱན་ཡང་བཟང་པོར་ཡོང་མི་སྣང་། །མལ་སྟན་བཟང་པོ་དག་ལ་ཉལ་གྱུར་ཀྱང་། །ཁྲོ་བའི་ཟུག་རྔུས་སེམས་ནི་སྡུག་བསྔལ་འགྱུར། བདག་ལ་ཕན་པའི་དོན་བསྒྲུབ་བརྗེད་གྱུར་ཏེ། །ཁྲོ་བས་གདུངས་ནས་ལམ་ངན་འགྲོ་བར་བྱེད། །གྲགས་དང་དོན་བསྒྲུབ་པ་ལས་ཉམས་འགྱུར་ཏེ། །ཟླ་བ་མར་གྱི་ངོ་བཞིན་དཔལ་ལས་ཉམས། །མཛའ་བཤེས་དག་གིས་རབ་ཏུ་བཅུགས་གྱུར་ཀྱང་། །ཁྲོ་བས་མི་རིགས་གཡངས་སར་ལྟུང་བར་འགྱུར། །ཕན་དང་གནོད་པར་སེམས་ལས་བློ་ཉམས་ནས། །ཕལ་ཆེར་འགལ་ཞིང་སེམས་ནི་རྨོངས་པར་འགྱུར། ཁྲོ་བས་སྡིག་པའི་ལས་ནི་གོམས་བྱས་པས། །ངན་སོང་དག་ཏུ་ལོར་བརྒྱར་སྡུག་བསྔལ་མྱོང་། གནོད་པ་ཆེན་པོ་བྱས་པས་ཤར་གཉེར་བའི། །དགྲས་ཀྱང་དེ་ལས་ལྷག་པར་ཅི་བྱར་ཡོད། ཁྲོ་བ་འདི་ནི་ནང་གི་དགྲ། བདག་གིས་དེ་ལྟར་ཤེས་ནས་ནི། །དེ་ཡི་མཐུ་ནི་འཕྲོ་བ་དག །སྐྱེས་བུ་སུ་ཞིག་བཟོད་པར་བྱེད། །དེ་བས་བདག་ནི་གསོན་བཞིན་དུ། །ཁྲོ་བ་གཡོས་ཀྱང་མ་ཤོར་ཏོ། །ཕུང་བར་བྱེད་པའི་དགྲ་བོ་དེ། །སུ་ཞིག་ཡལ་བར་འདོར་བར་བྱེད། །དེ་ནས་དེའི་རབ་ཏུ་ཞི་བའི་ཡོན་ཏན་རྨད་དུ་བྱུང་བ་དང་། ཚིག་སྙིང་ལ་བབ་པ་དེས། རྒྱལ་པོ་དེ་ཡིད་རབ་ཏུ་མགུ་བར་གྱུར་ནས་སྨྲས་པ། ཁྱོད་ཀྱིས་སྨྲས་པའི་རིམ་འདི་དང་ཞི་བ་རྗེས་སུ་མཐུན་པ་འདི། །མང་དུ་སྨོས་ཀྱང་ཅི་དགོས་ཏེ། །ཁྱོད་དང་མ་ཕྲད་བརླག་པར་འགྱུར། །དེ་སྐད་ཅེས་བསྟོད་ནས། དྲུང་དུ་བསྙེན་ནས་དེའི་རྐང་པ་གཉིས་ལ་ཕྱག་འཚལ་ཏེ་སྡིགས་པ་བྱས་པའང་བཤགས་སོ། །བུད་མེད་རབ་ཏུ་བྱུང་བ་དེ་ལའང་བཟོད་པར་གསོལ་ནས་སླར་བཏང་ངོ་། །བདག་ཉིད་ཀྱང་བྱང་ཆུབ་སེམས་དཔའི་གཡོག་ཏུ་ཁས་བླངས་སོ། །དེ་ལྟ་བས་ན་ཁྲོ་བ་ཐུལ་བར་གྱུར་ན་དགྲ་ཞི་བར་འགྱུར་གྱིས་གཞན་དུ་བྱས་ན་དགྲ་འཕེལ་ལོ་དེ་བས་ན་ཁྲོ་བ་ཐུལ་བར་བྱ་བ་ལ་འབད་པར་བྱའོ། དེ་ལྟར་འཁོན་དུ་འཛིན་པ་མེད་ན། དགྲ་ཞི་བར་འགྱུར་ལ་དུལ་བར་བྱས་ན་དགྲ་མི་འཕེལ་ལོ། །དེ་བཞིན་དུ་མི་ཁྲོ་བ་ནི་གཉིས་ཀའི་དོན་སྤྱོད་པར་འགྱུར་རོ། །ཞེས་བྱ་བ་ལ་སོགས་པ་བཟོད་པའི་ཕན་ཡོན་འབྱུང་བའི་མདོ་སྡེ་དག་ལའང་བརྗོད་པར་བྱའོ། །ཁྲོ་བའི་ཉེས་དམིགས་ཀྱི་གཏམ་བྱ་བ་དང་། དེ་བཞིན་གཤེགས་པའི་ཆེ་བ་ཉིད་ལའང་བརྗོད་པར་བྱའོ། གཙུག་ཕུད་བྱང་ཆུབ་ཀྱི་སྐྱེས་པའི་རབས་ཏེ་ཉི་ཤུ་གཅིག་པའོ།། །།བམ་པོ་བདུན་པ།། །།དམ་པ་རྣམས་དུད་འགྲོར་ལྷུང་བའི་སྤྱོད་པ་ལའང་སྐྱེས་བུ་དམ་པ་མ་ཡིན་པ་རྣམས་ཀྱིས་རྗེས་སུ་མཐུན་པར་བྱ་བ་ཙམ་ཡང་མི་ནུས་སོ། །དེ་ཡང་འདི་ལྟར་བྱང་ཆུབ་སེམས་དཔའ་ཡིད་བཞིན་གྱི་མཚོ་ཆེན་པོའི་ནང་ན་ངང་པའི་ཁྱུ་ཆེན་པོ་བརྒྱ་སྟོང་ཕྲག་དུ་མ་གྲངས་མང་པོའི་བདག་པོ་ངང་པའི་རྒྱལ་པོ་ཡུལ་འཁོར་བསྲུང་ཞེས་བྱ་བར་གྱུར་ཏོ་ཞེས་གྲག་གོ །དེའི་བློན་པོ་ངང་པའི་སྡེ་དཔོན་རིགས་པ་དང་མི་རིགས་པ་ཡོངས་སུ་ཤེས་པར་བྱ་བ་ལ་མཁས་པ། ཡུན་རིང་པོར་ཡང་དྲན་པའི་མཐུ་དང་ལྡན་པ། རིགས་མཐོན་པོའི་ནང་ནས་གཙོ་བོར་གྱུར་པ། མཁས་པ་དང་། དེས་པ་དང་། དུལ་བས་བརྒྱན་པ། བརྟན་པ་དང་། གཙང་བ་དང་། ཚུལ་ཁྲིམས་དང་། སྤྱོད་ཚུལ་དང་། སྤྱོད་ལམ་ཕུན་སུམ་ཚོགས་པ་དཔལ་ལ་སྡུག་བསྔལ་བཟོད་ཅིང་བག་ཡོད་པ། གཡུལ་ངོར་འགྱེད་པའི་དགྲ་ཐབས་ལ་མཁས་ཤིང་མི་འཇིགས་པ། རྗེ་བོ་ལ་སྙིང་ཉེ་ཞིང་ལེགས་པར་ལྟ་བ། བཞིན་བཟང་ཞེས་བྱ་བ་ཞིག་ཀྱང་ཡོད་པར་གྱུར་ཏེ། དེའི་ཚེ་དེ་ལྟར་གྱུར་པ་དེ་ཡང་གནས་བརྟན་འཕགས་པ་ཀུན་དགའ་བོ་ཡིན་ནོ། །དེ་གཉིས་ཅིག་ལ་ཅིག་བྱམས་ཤིང་མཛའ་བའི་ཡོན་ཏན་གྱི་གཞིས་ཡོན་ཏན་གྱི་མཐུ་རབ་ཏུ་ཆེ་བར་གྱུར་ཏེ། འཇིག་རྟེན་གཉིས་ཀ་ལ་ཕན་པ་འབྱུང་བར་བྱ་བའི་དོན་དུ་ལེགས་པར་འཇོག་པ་ནི། སློབ་དཔོན་དང་སློབ་མའི་གཙོ་བོ་བཞིན། །གཞན་ནི་སློབ་མ་ཕལ་པ་བཞིན། རྣམ་པ་གཅིག་ཏུ་ནི། ཕ་དང་བུ་རབ་ཏུ་ཐུ་བོ་བཞིན། གཞན་ནི་བུ་ཕལ་པ་བཞིན་ནོ། །ལྷ་དང་ཀླུ་དང་གནོད་སྦྱིན་དང་གྲུབ་པ་དང་རིག་སྔགས་འཆང་བ་དཀའ་ཐུབ་ཅན་དེ་མངོན་སུམ་དུ་མཐོང་བ་རྣམས་རབ་ཏུ་ངོ་མཚར་ཆེ་བར་གྱུར་ཏོ། །དེ་གཉིས་ངང་པའི་ཚོགས་རྣམས་འཁོད་བ་དེའི། བདེ་བའི་ལུས་ལྡེག་སྤྱོད་པ་གཅིག་ཏུ་གྱུར། མཁའ་ལ་རྒྱུ་བའི་བྱའི་འདབ་མ་གཉིས་ལུས་ལྡེག་ཕྱིར་ནི་སྤྱོད་པ་གཅིག་པ་བཞིན། དེ་ལྟར་དེ་གཉིས་ཀྱིས་ངང་པའི་ཚོགས་དེ་དག་རྗེས་སུ་བསྐྱངས་བ་ནི། ཆོས་དང་སྲིད་དར་བ་གཉིས་ཀྱིས་མི་རྣམས་རྗེས་སུ་བསྐྱངས་པ་བཞིན་དུ་རབ་ཏུ་དར་བར་གྱུར་ཏོ། །དེས་མཚོ་དེ་ཡང་རབ་ཏུ་མཛེས་པར་གྱུར་ཏོ། །མཚོ་ནང་འདུག་ཅིང་ཚོགས་པ་ཡི། །སྒྲ་སྙན་ཡིད་དུ་འོང་བ་དེ། པདྨ་དཀར་པོ་རྒྱུ་བ་བཞིན། །མཚོ་དེ་རབ་ཏུ་མཛེས་པར་བྱས། །ལ་ལར་ངང་པ་སོ་སོར་གྱེས། །ཁ་ཅིག་ཏུ་ནི་ཕང་ཕུང་ཆས། མཁའ་ལ་སྤྲིན་རྣམས་གྱེས་འཕུངས་པའི། །མཛེས་པའི་དཔལ་ཡང་ཟིལ་གྱིས་ནོན། །དེ་ན་ངང་པའི་བདག་པོ་སེམས་ཅན་ཐམས་ཅད་ལ་ཕན་པར་དགའ་བ་དེ་དང་། བློན་པོ་ངང་པའི་སྡེ་དཔོན་བཞིན་བཟང་དེའི་ཡོན་ཏན་ཁྱད་པར་ཅན་གྱི་མཐུ་ཆེན་པོས་ཡིད་ལ་ཡ་མཚན་ཆེན་པོར་གྱུར་པའི་གྲུབ་པ་དང་། དྲང་སྲོང་དང་རིག་སྔགས་འཆང་དང་ལྷ་མང་པོ་རྣམས་དེ་གཉིས་ཀྱི་གྲགས་པའི་གཞི་ལས་གྱུར་པའི་གཏམ་འབའ་ཞིག་འཛེར་ཞིང་དེ་དང་དེ་དག་ན་འཁོད་དོ། །གསེར་མཆོག་བཙོ་མའི་ཁ་དོག་འདྲ་བའི་མདོག །དཔལ་ལྡན་ལུས་ཅན་ཚིག་འབྲུ་གསལ་བར་སྨྲ། །དུལ་ཞིང་རིགས་པའི་ཆོས་ཀྱི་ཚུལ་ལ་མཁས། །ངང་པའི་ཚུལ་ཅན་འདི་གཉིས་ངེས་པར་གཞན། །ཕྲག་དོག་མེད་པས་ཡོན་ཏན་བསྒྲགས་པ་དང་། །དེ་གཉིས་གྲགས་པ་ཕྱོགས་སུ་རྒྱས་པར་གྱུར། །རྒྱལ་པོ་རྣམས་ཀྱང་དེ་ལ་དད་པ་སྐྱེས། །དམ་པ་ཚོགས་པས་སྐྱེས་དང་འདྲ་བར་འགྱུར། །དེའི་ཚེ་ཡུལ་བཱ་ར་ཎཱ་སིའི་རྒྱལ་པོ་ཚངས་བྱིན་ཞེས་བྱ་བ་ཞིག་ཡོད་དེ། དེས་ངང་པའི་རྒྱལ་པོ་དེ་དང་། ངང་པའི་སྡེ་དཔོན་དེའི་ཡོན་ཏན་ཁྱད་པར་ཅན་གྱི་གཏམ་བློན་པོ་ཡིད་ཆེས་པ་དང་བྲམ་ཟེ་རྒན་པོ་རྣམས་ཀྱི་ཚོགས་པའི་ནང་དུ་གླེང་བསླངས་པ་ལན་དུ་མ་ཞིག་ཐོས་ནས། དེ་གཉིས་ལྟ་འདོད་པར་གྱུར་ཏེ། བློན་པོ་བཀའ་ལ་གཏོགས་པ། གཙུག་ལག་དུ་མ་ལ་གོམས་ཤིང་མཁས་པའི་བློ་དང་ལྡན་པ་རྣམས་ལ་སྨྲས་པ། ཀྱེ་ངང་པ་མཆོག་དེ་གཉིས་ཅི་ནས་ཀྱང་ངའི་སྤྱན་སྔར་བྲིམ་དུ་རུང་བའི་ཐབས་བཟང་པོ་འགའ་ཞིག་ཚོལ་ཅིག །དེ་ནས་བློན་པོ་དེ་དག་རང་རང་གི་བློ་ལ་ཅི་དྲན་པ་དང་། གཞུང་ལུགས་དག་དང་ཡང་སྦྱར་ཏེ། རྒྱལ་པོ་ལ་གསོལ་པ། སེམས་ཅན་རྣམས་ནི་བདེ་བ་འཚལ། བདེ་བར་འགྱུར་བའི་ཡོན་ཏན་མཆོག །དེ་དང་དེ་ནས་འགུགས་པར་བགྱིད། །དེ་བས་དེ་ཐོས་དེ་གཉིས་མཆི། དེ་བས་ན་མཚོ་གང་ན་དེ་གཉིས་མངོན་པར་དགའ་བར་གྱུར་པའི་བཀའ་མཆིད་གདའ་བ་དེ་བས་ཀྱང་ཡོན་ཏན་ཁྱད་པར་དུ་འཕགས་ཤིང་བཟང་པོའི་མཚོ་ཞིག །ཡུལ་འདིར་ཡང་དགོན་པའི་ས་ཕྱོགས་ཞིག་ཏུ་བགྱིད་དུ་རྩལ་ལ། གདུགས་རེ་ཞིང་ཡང་བྱ་ཐམས་ཅད་ལ་མི་འཇིགས་པ་སྦྱིན་པའི་སྒྲ་བསྒྲགས་ཤིང་། ཅི་ནས་ཀྱང་ངོ་མཚར་ཆེར་གྱུར་པའི་བདེ་བའི་ཡོ་བྱད་ཀྱི་ཡོན་ཏན་ཁྱད་པར་ཅན་ཐོས་ནས། དེ་གཉིས་འདིར་མཆི་བར་འགྱུར་བ་དེ་ལྟར་བགྱི་བའི་རིགས་སོ། །ལྷ་གཟིགས་སུ་གསོལ། ལྷ་ཅིག་སེམས་ཅན་ཕལ་ཆེར་ནི། བདེ་བ་རྙེད་པ་ཁྱད་དུ་གསོལ། །ཐོས་ན་དགའ་བའི་བདེ་བ་དག །གུང་ན་འདུག་ཀྱང་ཡིད་འཕྲོག་འགྱུར། །དེ་ནས་རྒྱལ་པོ་དེས་བསམས་པ་དེ་བདེན་ནོ་སྙམ་ནས། རིང་པོ་མ་ལོན་པར་གྲོང་ཁྱེར་གྱི་སྐྱེད་མོས་ཚལ་དང་ཧ་ཅང་ཡང་མི་རིང་བ་ཞིག་ཏུ། ཡིད་བཞིན་གྱི་མཚོའི་ལོངས་སྤྱོད་ཀྱི་ཡོན་ཏན་ལ་འགྲན་དུ་རུང་བ། མེ་ཏོག་པདྨ་དང་། ཨུཏྤ་ལ་དང་། ཀུ་མུད་དང་། པདྨ་དཀར་པོ་དང་། སོའུ་གན་དྷི་ཀ་དང་། པདྨ་དམར་པོ་དང་། ཀུ་མུ་ད་དམར་པོས་ཁེབས་ཤིང་ཆུ་གཙང་མ་མང་པོས་གང་བ། རབ་ཏུ་ཡིད་དུ་འོང་བའི་མཚོ་ཆེན་པོ་ཞིག་བྱེད་དུ་བཅུག་གོ །ལྗོན་ཤིང་མེ་ཏོག་བཟང་ལྡན་ཞིང་། །ལོ་མ་བཟང་པོ་འོད་གསལ་རྣམས། །དེ་ལ་ལྟད་མོ་ལྟར་ལྷགས་བཞིན། །མཚོ་ཡི་མཐའ་མ་ཡོངས་སུ་བསྐོར། །པདྨ་རྣམས་ནི་དགོད་པ་བཞིན། ཆུ་རླབས་འཁྲུགས་པས་གཡོ་བར་འགྱུར། དེ་ལ་ཆགས་པའི་བུང་བ་རྣམས། །གཡོ་ཞིང་འཕུར་བ་མང་པོས་གང་། །ཁ་ཅིག་ན་ནི་ཟླ་འོད་ཀྱིས། །ཁ་བྱེ་ཀུ་མུ་ད་དག་མཛེས། །ཤིང་གི་གྲིབ་མས་རབ་བཅད་ནས། །ཁ་ཅིག་ཟླ་བའི་དུམ་བུ་འདྲ། །པདྨ་ཨུཏྤལ་ཕྱེ་མ་རྣམས། །རླབས་ཀྱི་སོར་མོས་བྲིས་པ་བཞིན། མཚོ་ཡི་འགྲམ་དག་རབ་ཏུ་བརྒྱན། །ཁ་ཅིག་གསེར་ཕྱེའི་རི་མོ་བཞིན། །པདྨ་ཨུཏྤལ་འདབ་མ་དག །གེ་སར་བཅས་པས་དེ་དང་དེར། །མེ་ཏོག་སིལ་མ་བཀྲམ་པ་བཞིན། །རབ་ཏུ་ཉམས་དགའ་རྣམ་པར་མཛེས། །ཆུ་ནི་རབ་གསལ་མི་གཡོ་བས། །ལུས་ཀྱི་ཡོན་ཏན་གསལ་མཛེས་པའི། །ཉ་ཡི་ཚོགས་ནི་མང་པོ་དག །མཁའ་ལ་རྒྱུ་བ་འདྲ་བས་བརྒྱན། །ལ་ལར་མུ་ཏིག་ཕྲེང་ཆང་བཞིན། །གླང་ཆེན་སྣ་ནས་བུས་པ་དང་། །བྲག་ལ་ཕོག་པའི་ཆུ་འཕྲོག་པའི། རླབས་ཀྱི་ཕྲེང་བ་རབ་ཏུ་འཕྲོ། །རིག་འཛིན་ན་ཆུང་ཁྲུས་བྱས་ཤིང་། །གླང་ཆེན་རྒྱལ་བའི་བསུང་དག་དང་། །མེ་ཏོག་རྣམས་ཀྱི་ཕྱེ་མ་ཡིས། །ཁ་ཅིག་ཏུ་ནི་བསུང་བསྒོས་བཞིན། །ཟླ་བའི་ཆུང་མ་སྐར་མ་རྣམས། །སྤྱི་ཡི་གདོང་ལྟ་མེ་ལོང་བཞིན། །བྱ་རྣམས་དགའ་བ་མང་པོས་གང་། །དེ་ཡི་སྒྲ་སྙན་རབ་ཏུ་གྲག །མཚོ་དེ་ལྟ་བུ་བྱ་མང་པོ་ཐམས་ཅད་ཀྱི་བདེ་བའི་ཡོ་བྱད་དགག་པ་མེད་པ་དེ་ལྟ་བུ་བྱེད་དུ་བཅུག་ནས་དེ་དག་ལ་བྱིན་ཏེ། བྱ་རྣམས་ཡིད་ཆེས་པར་བྱ་བའི་ཕྱིར་ཉིན་རེ་ཞིང་ཡང་མི་འཇིགས་པ་སྦྱིན་པའི་སྒྲ་སྒྲོག་ཏུ་བཅུག་གོ །མཚོ་འདི་མེ་ཏོག་པདྨ་དང་། ཨུཏྤལ་འདབ་མས་གང་བའི་ཆུ། །རྒྱ་པོས་བྱ་རྣམས་ཀུན་ལ་བྱིན། །དགའ་ཞིང་མི་འཇིགས་ཡོན་དང་བཅས། དེ་ནས་རེ་ཤིག་ཅིག་སྟོན་གྱི་དུས་ལ་བབ་པའི་ཚེ། སྤྲིན་གྱི་མུན་པ་ཡོལ་བ་ལྟར་སྒྲིབ་པ་ནི་མེད། །སྟོན་གྱི་དུས་ཀྱི་ཡོན་ཏན་བཟང་པོ་ནི་བྱུང་། །ཕྱོགས་ནི་གསལ་བ་ལྟར་སྣང་། མེ་ཏོག་པདྨ་མང་པོ་ཁ་བྱེ་བས་ནི་མཛེས་པར་གྱུར། མཚོའི་ཆུ་རྣམས་ནི་རབ་ཏུ་དྭངས་ཞིང་ཡིད་དུ་འོང་བར་གྱུར། ཟླ་བ་ནི་གཟི་མདངས་ཀྱི་མཆོག་དང་ལྡན་ཞིང་འོད་ཟེར་རབ་ཏུ་འཕེལ་བ་བཞིན་དུ་གྱུར། ས་གཞི་ནི་མེ་ཏོག་རྣམ་པ་མང་པོ་ཕུན་གསུམ་ཚོགས་པས་བརྒྱན་པ་དང་ལྡན་པར་གྱུར། བྱ་ངང་པ་གཞོན་ནུ་མང་པོ་ནི་རྒྱུ་བར་གྱུར་པའི་ཚེ། ཡིན་བཞིན་གྱི་མཚོའི་ནང་ན་ངང་པ་མང་པོ་འཁོད་པ་དེའི་ནང་ནས་ངང་པ་ཤུག་གཉིས་ཤིག་སྟོན་གྱི་དུས་ཉམ་དགའ་བའི་ཚེ། ཡུལ་རྒྱུ་ཞིང་མཐར་གྱིས་དོང་དོང་ལས། རྒྱལ་པོ་དེའི་ཡུལ་དུ་ཕྱིན་ཏོ། དེ་ནའང་བྱ་མང་པོའི་སྒྲ་ནི་འབྱིན། བུང་བ་མང་པོ་ནི་སྒྲ་དི་རི་རི་ཟེར། བསེར་བུ་བསིལ་བ་ལངས་པས། རླབས་ཀྱི་ཕྲེང་བ་འཕྲིགས་པར་བྱས་ཤིང་ཁོ་ར་ཁོར་ཡུག་ཏུ་མེ་ཏོག་པདྨ་དང་ཨུཏྤ་ལའི་དྲི་ཞིམ་པོའི་ངད་ནི་ལྡང་། པདྨ་ཁ་བྱེ་བ་རྣམས་ནི་འབར་བ་བཞིན། མེ་ཏོག་ཀུ་མུ་ད་དཀར་པོ་རྣམས་ནི་དགོད་པ་བཞིན་དུ་འདུག་པའི་མཚོ་དེ་མཐོང་བར་གྱུར་ཏོ། །ངང་པ་ཤུག་གཉིས་པོ་དེ་གཉིས་ཡིད་བཞིན་གྱི་མཚོ་ན་འཁོད་འཁོད་ཀྱང་མཚོ་དེའི་དཔལ་རབ་ཏུ་ཡིད་དུ་འོང་བ་དེ་མཐོང་ནས་ཡ་མཚན་ཆེ་ཞིང་རང་གི་ངང་པའི་ཚོགས་རྣམས་ཀྱང་རྗེས་སུ་དྲན་པར་གྱུར་ཏེ། ཨེ་མའོ་ངང་པའི་ཚོགས་དེ་དག་ཀྱང་འདིར་ལྷགས་ཀྱང་ཅི་མ་རུང་སྙམ་དུ་སེམས་པར་གྱུར་ཏོ། །འཇིག་རྟེན་པ་ནི་ཕལ་ཆེ་རུ་ཕྱི་ཡི་བདེ་བ་མྱོང་ནས་ནི། བྱམས་ཤིང་རྗེས་སུ་ཆགས་པ་ཡིས་མཛའ་བཤེས་ཐོག་མར་དྲན་པར་འགྱུར། དེ་ནས་ངང་པ་ཤུག་གཉིས་པོ་དེ་ན་ཇི་སྲིད་འདོད་པར་འཁོད་འཁོད་ནས། དབྱར་གྱི་དུས་ལ་བབ་པ་དང་། གློག་འགྱུ་བ་ནི་མཚོན་ཆ་འདེབས་པ་འདྲ། སྤྲིན་གྱིས་ཁེབས་པའི་མུན་པ་ནི་ཧ་ཅང་ཡང་མི་གནག །སྤྲིན་གྱི་ཚོགས་མང་པོ་འདུ་བ་ནི། ལྷ་མ་ཡིན་གྱི་དམག་གི་ཚོགས་འདུ་བ་བཞིན། རྨ་བྱའི་མདོང་ཡོངས་སུ་རྒྱས་པ་ནི་མཛེས་པར་གྱུར། རྨ་བྱའི་སྒྲ་ཅོང་ཅོང་བུ་འབྱིན་པ་ནི་དབྱར་གྱི་སྤྲིན་རྣམས་རྒྱལ་བར་གྱུར་པ་བཞིན་དུ་མགུ་བར་བྱེད། རྨ་བྱ་མང་པོ་ནི་གར་སྣ་ཚོགས་བྱེད། བྱ་ཕྲན་མང་པོ་ནི་སྒྲ་སྣ་ཚོགས་འབྱིན་ཅིང་རྣམ་པར་རྒྱུ། མེ་ཏོག་ཀ་དམ་བ་དང་སརྫ་དང་། ཨརྫུ་ན་དང་། ཀེ་ཏ་ཀའི་དྲི་ཞིམ་པོས་བགོས་པའི་བསེར་བུ་བསིལ་བའི་ངད་ལྡང་བ་ནི། ནགས་ཚལ་དབུགས་འབྱིན་པ་བཞིན། བྱ་དཀར་མོའི་ཕྲེང་བ་རྒྱུ་བ་ནི། །སྤྲིན་གྱི་སོའི་ཕྲེང་བ་གཏམས་པ་བཞིན། ངང་པའི་ཚོགས་རྣམས་གུང་དུ་འདོང་འདོང་པས་སྒྲ་ཆེར་འབྱིན་ཅིང་། །འགྲོ་ཆས་བྱེད་པ་བཞིན་དུ་ངང་པ་ཤུགས་གཉིས་པོ་དེ་ཡང་ཡིད་བཞིན་གྱི་མཚོ་དེ་ཉིད་དུ་སླར་དོང་ངོ་། །ངང་པའི་བདག་པོའི་དྲུང་དུ་ལྷགས་ནས་ཀྱང་ཡུལ་དང་ཕྱོགས་རྣམས་ཀྱི་གཏམ་གླེང་བསླང་བའི་ཚེ། མཚོ་དེའི་ཡོན་ཏན་ཁྱད་པར་ཅན་དེ་གླེངས་སོ། །ལྷ་གངས་རིའི་ལྷོ་ཕྱོགས་ན་ཡུལ་བཱ་ར་ཎཱ་སི་ཞེས་བགྱི་བ་ན། རྒྱལ་པོ་ཚངས་སྦྱིན་ཞེས་བགྱི་བ་ཞིག་མཆིས་ཏེ། དེས་མཚོ་ཆེན་པོ་རྨད་དུ་བྱུང་བ་བཟང་བ། ཡོན་ཏན་ཆེ་བ་བརྗོད་ཀྱིས་མི་ལང་བ་ཞིག་བྱ་རྣམས་ལ་རང་དགར་སྤྱོད་ཅིང་བདེ་བའི་ལོངས་སྤྱོད་དུ་བསྩལ་ཏེ། ཉིན་རེ་ཞིང་ཡང་མི་འཇིགས་པ་སྦྱིན་པའི་སྒྲ་ཡང་སྒྲོགས། བྱ་རྣམས་ཀྱང་དེ་ན་རང་གི་ཁྱིམ་ན་མཆིས་པ་བཞིན་དུ། འཇིགས་ཤིང་བག་ཚ་བ་མ་མཆིས་པར་སྤྱོད་ཅིང་མཆིས་སོ། །དེ་བས་ན་ལྷ་ཡང་དགུང་ལོ་སླད་མ་ལ་དེར་གཤེགས་བའི་རིགས་སོ། །དེ་སྐད་ཅེས་ཟེར་བ་ཐོས་ནས། ངང་པ་དེ་དག་ཐམས་ཅད་ཀྱང་དེ་ལྟ་བར་འདོད་པར་གྱུར་ཏོ། །དེ་ནས་བྱང་ཆུབ་སེམས་དཔའ་ངང་པའི་སྡེ་དཔོན་བཞིན་བཟང་ལ། གྲོས་འདི་པའི་ཚིག་དང་ཡི་གེ་གསལ་བར་རྒྱ་ཆེར་བསྟན་ནས། ཇི་ལྟར་བྱ་བའི་རིགས་ཞེས་སྨྲས་སོ། །དེ་ནས་བཞིན་བཟང་གིས་དེ་ལ་ཕྱག་འཚལ་ནས་སྨྲས་པ། ལྷ་དེར་གཤེགས་པ་མི་རིགས་སོ། །དེ་ཅིའི་སླད་དུ་ཞེ་ན། འོ་སྐོལ་གྱི་ལུས་འདི་ནི་ཤ་བཟར་རུང་སྟེ ཆགས་པའི་གནས་ལགས་ཤིང་ཡིད་དུ་འོང་བ་ཤ་སྟག་ལགས་ལ། བདག་ཅག་འདི་ན་ཅིས་ཀྱང་ཕོངས་པ་མ་མཆིས་སོ། །མི་རྣམས་ཀྱི་སྙིང་ཡང་ཚིག་འཇམ་པོ་བཅོས་མ་ཕྱིར་བཞག་ཅན་དུ་སྨྲ་ལ །གནོད་པར་སེམས་པའི་རང་བཞིན་ངན་པ་ནི་མི་མངོན་པར་བགྱིད་ཅིང་ཕལ་ཆེར་སྙིང་རྗེ་ཆུང་ལ་གཡོ་ངན་ལགས་སོ། །རྗེ་ཅིག་གཟིགས་སུ་གསོལ། །ཕལ་ཆེར་བྱ་དང་རི་དྭགས་རྣམས། །སྨྲ་དང་སེམས་པ་མཐུན་པར་བགྱིད། །མི་ཡི་ནང་ན་ཁ་ཅིག་ནི། དེ་ལས་བཟློག་བའི་ཚུལ་ལ་མཁས། །འཇམ་ཞིག་སྙན་པར་ཚིག་སྨྲ་ཡང་། དོན་དང་མཐུན་པ་མ་མཆིས་སོ། །ཚོང་པ་རྣམས་ཀྱང་ཁེ་འཚོལ་ཕྱིར། །བདག་གི་ནོར་ཡང་འགོད་པར་བགྱིད། །སྐྱོན་དང་བཅས་ཤིང་མི་རིགས་པ། །དགོས་པ་མཆིས་ཀྱང་མི་སྨྲ་སྟེ། །དེ་བས་ལྷ་ཅིག་དེ་ཙམ་གྱིས། །ཐུགས་ཆེས་མཛད་པ་མི་རིགས་སོ། །གལ་ཏེ་དེར་མི་གཤེགས་སུ་མི་རུང་ནའང་དེར་གཤེགས་ལ་མཚོ་དེའི་ལོངས་སྤྱོད་བལྟས་ལ་སླར་མྱུར་དུ་གཤེགས་པར་རིགས་ཀྱིས། དེ་ན་ཡུན་རིང་དུ་བཞུགས་པའང་མི་རིགས་ལ། གཏན་དུ་བཞུགས་པར་ཡང་དགོངས་པར་མི་རིགས་སོ། །དེ་ནས་བྱང་ཆུབ་སེམས་དཔའ་སྟོན་གྱི་དུས་ལ་བབ་ཅིང་ཟླ་བ་དང་སྐར་མ། རྒྱུ་སྐར་དྲི་མ་མེད་པས་བརྒྱན་པའི་ཚེ་ངང་པའི་ཚོགས་མང་པོ་ཡུལ་བཱ་ར་ཎཱ་སིའི་མཚོ་ལྟ་བར་འདོད་པའི་རྣམས་ཀྱིས་དེར་འདོང་བའི་ཕྱིར་ཡང་དང་ཡང་དུ་གསོལ་བ་བཏབ་པ་དང་། ངང་པ་དེ་དག་གིས་ངོ་བཟློག་མ་ཕོད་ནས། བཞིན་བཟང་ལ་སོགས་པའི་ངང་པ་མང་པོས་ཡོངས་སུ་བསྐོར་ཏེ། ཟླ་བ་སྟོན་གྱི་དུས་སྤྲིན་གྱིས་བསྐོར་བ་བཞིན་དུ་དེར་སོང་ངོ་། །མཚོ་ཆེན་དེའི་ཉམས་དགའ་དཔལ་མཐོང་ནས། ཡིད་དུ་འོང་དགུ་བཀོད་པ་སྣ་ཚོགས་རྣམས། རབ་ཏུ་དགའ་བར་སེམས་དཔའ་དེ་རྣམས་ཀྱི། །གནས་སུ་རུང་བར་ཡོན་ཏན་མཚུངས་གྱུར་ནས། །མཚོ་དེ་གནས་སྐབས་དེ་དང་དེ་དག་གིས། །ཡིད་བཞིན་མཚོ་བས་གང་དག་ལྷག་གྱུར་པ། དེ་ཕྱིར་དེ་ན་རིང་དུ་གནས་པར་སེམས། ཡིད་བཞིན་མཚོ་ལ་དེ་དག་མི་སེམས་སོ། །དེ་དག་གང་གིས་མི་འཇིགས་པ་སྦྱིན་པའི་སྒྲ་དེ་ཡང་ཐོས་ལ། དེ་ན་བྱ་མང་པོ་རྣམས་ཀྱང་བདེ་བར་འཁོད། མཚོ་དེའི་ལོངས་སྤྱོད་ཀྱིས་སེམས་རབ་ཏུ་དགའ་ཞིང་དེ་ན་སྐྱེད་མོས་ཚལ་དུ་རྩེར་དོང་དོང་བ་བཞིན་དུ་ལོངས་སྤྱོད་རྗེས་སུ་མྱོང་ཞིང་རབ་ཏུ་དགའ་བར་གྱུར་ཏོ། །དེ་ནས་མཚོ་དེ་བསྲུང་བར་བསྐོས་པའི་མི་རྣམས་ཀྱིས་ཀྱང་། ངང་པ་དེ་དག་དེར་ལྷགས་པ་རྒྱལ་པོ་ལ་གདས་པར་གསོལ་བ། ལྷ་སྔོན་ངང་པ་མཆོག་གཉིས་ཤིག་ཡོན་ཏན་དང་གཟུགས་བཀའ་མཆིད་དུ་གདའ་བ། དེ་ཁོ་ན་འདྲ་བའི་ངང་པ་མཆོག་གཉིས་ཤིག་འདབ་མ་གསེར་གྱི་འདབ་མ་ལྟར་མཛེས། གདོང་དང་རྐང་བ་གཉིས་ནི་གསེར་བཙོ་མ་བས་ཀྱང་ལྷག་པར་མདོག་བཟང་ཞིང་མཛེས། ལུས་ཀྱི་ཚད་ནི་ལྷག་པར་ཆེ་ཞིང་ལེགས་པ་དག་ཅིག་ངང་པའི་གཡོག་འཁོར་བརྒྱ་ཕྲག་དུ་མས་བསྐོར་ཏེ། ལྷའི་མཚོ་བརྒྱན་པའི་ཕྱིར་མཆིས་པ་བཞིན་དུ་འདིར་མཆིས་སོ་ཞེས་གསོལ་ཏོ། དེ་ནས་རྒྱལ་པོ་དེས་བྱ་གཤོར་བའི་མི་བྱ་གཤོར་བའི་ལས་ལ་མཁས་པར་གྲགས་ཤིང་གྲུབ་པ་ཞིག་བཙལ་ནས། བྱ་དེ་གཟུང་བའི་ཕྱིར་རིམ་གྲོ་བསྐྱེད་དེ་བཀའ་སྩལ་ཏོ། དེས་ཀྱང་དེ་བཞིན་དུ་བགྱིའོ་ཞེས་རྒྱལ་པོའི་བཀའ་མཉན་ནས། ངང་པ་དེ་གཉིས་གྱི་གནས་དང་སྤྱོད་ཡུལ་ལེགས་པར་བརྟགས་ཏེ། དེ་དང་དེ་དག་ཏུ་རྙི་དམ་པོ་རྣམས་མི་མངོན་པར་བྱས་ཏེ་བཙུགས་སོ། །དེ་ནས་ངང་པ་དེ་དག་ཡིད་བརྟན་ཞིང་མི་རུང་དུ་དོགས་པ་མེད་པས་རབ་ཏུ་དགའ་ནས་ཡིད་གཡེངས་བཞིན་དུ་རྒྱུ་ཞིང་འཁོད་འཁོད་པ་ལས། ངང་པའི་བདག་པོའི་རྐང་པ་གཉིས་རྙིས་ཟིན་པར་གྱུར་ཏོ། །བྲིད་པའི་ཐབས་ནི་མཁས་པ་ཡིས། །ཉེས་སུ་དོགས་པ་མེད་པ་རྣམས། །བག་ཕབ་པ་ནི་ལོག་པར་གྱུར། །བག་མེད་བརླག་པའི་འབྱུང་ཁུངས་ཡིན། དེ་ནས་བྱང་ཆུབ་སེམས་དཔས་བསམས་པ། །གཞན་དག་ལས་ཀྱང་ཁ་ཅིག་འདི་ལྟ་བུའི་ཉམ་ཉེས་པར་གྱུར་ན་མི་རུང་ངོ་སྙམ་ནས། སྒྲ་འབྱིན་པའི་བྱེ་བྲག་གིས། མཚོ་འདི་འཇིགས་པ་དང་བཅས་པ་ཡིན་ནོ་ཞེས་བསྒྲགས་སོ། །དེ་ནས་ངང་པ་དེ་དང་ངང་པའི་བདག་པོ་རྙིས་ཟིན་པས་སྙིང་སྔངས་ནས་འཇིགས་ཤིང་སྐྲག་ལ། བརྟབས་པའི་སྐད་མི་སྙན་པ་ཕྱུང་སྟེ། ཅིག་ལ་ཅིག་མི་ལྟ་བར། དམག་མི་གཡུལ་ངོར་ཕམ་པ་བཞིན་དུ་ཕྱོགས་ཕྱོགས་སུ་འཕུར་ནས་བྱེར་རོ། །ངང་པའི་སྡེ་དཔོན་བཞིན་བཟངས་ནི་ངང་པའི་བདག་པོའི་དྲུང་ནས་མ་གཡོས་སོ། །བྱམས་པའི་བཅིང་པས་ཡིད་ནི་བཅིངས་པ་རྣམས། །རང་གི་སྲོག་དང་བྲལ་བར་མི་སེམས་སོ། །མཛའ་བཤེས་ཉམ་ཉེས་གྱུར་པའི་མྱ་ངན་ནི། །སྲོག་དང་བྲལ་བ་བས་ཀྱང་སྡུག་བསྔལ་ཆེ། དེ་ནས་བྱང་ཆུབ་སེམས་དཔས་བཞིན་བཟང་ལ་སྨྲས་པ། སོང་ཞིག་སོང་ཞིག་བཞིན་བཟང་ཁྱོད། །འདི་ན་འདུག་པ་མི་རིགས་སོ། །ང་ནི་འདི་ལྟར་གྱུར་པ་ལས། །ཁྱོད་ཀྱིས་གྲོགས་བྱར་ག་ལ་ཡོད། །བཞིན་བཟང་གིས་སྨྲས་པ། འདི་ན་མཆིས་པ་འགུམ་པར་ངེས་མ་མཆིས། གུད་དུ་མཆིས་ཀྱང་རྒ་ཤི་མེད་མི་འགྱུར། །བདེ་བའི་ཚེ་ན་རྟག་ཏུ་ཁྱོད་བཀུར་ལ། །ཉམ་ཉེས་ཚེ་ན་འདོར་དུ་ག་ལ་རུང་། །བདག་གི་སྲོག་བཟུང་ཙམ་གྱི་ཕྱིར། །བྱ་ལི་རྒྱལ་པོ་ཁྱོད་བོར་ན། །གཏམ་ངན་ཆར་བཞིན་འབབ་པ་ཡི། །སྐྱབས་ནི་བདག་ལ་ཅི་ཞིག་མཆིས། །རྒྱལ་པོ་ཆེན་པོ་ཉམ་ཉེས་པ། །བོར་ཏེ་མཆིས་ན་ཆོས་མཆིས་སམ། །བྱ་རྒྱལ་ཁྱོད་ནི་ཅིར་གྱུར་བ། །དེ་ལྟར་བདག་ཉིད་གྱུར་ཀྱང་རུང་། །བྱང་ཆུབ་སེམས་དཔས་སྨྲས་པ། །རྙིས་ནི་ཟིན་པར་གྱུར་པ་ལྟ། ཚང་མང་མིན་པ་གང་དུ་འགྲོ། །ཁྱོད་ནི་མ་ཟིན་བདེ་བར་གནས། །ཅི་ཕྱིར་དེ་ལྟར་འགྱུར་བར་འདོད། །དེ་ལྟར་བྱས་ན་ཅིར་འགྱུར་ལྟོས། །གཉིས་ཀ་སྲོག་དང་བྲལ་གྱུར་ན། །གཉེན་བཤེས་ཕྱིན་ན་འཁོད་པ་དང་། །ཁྱོད་དང་ང་ལ་ཅི་ཞིག་ཕན། བདེ་དང་མི་བདེ་མུན་ཁུང་བཞིན། །ཕན་པའི་དོན་ནི་མི་མངོན་པ། །དེ་ལྟར་བུ་ལ་སྲོག་བོར་ན། །ཁྱོད་ཀྱི་དོན་ནི་ཅི་ཞིག་བསྟན། །བཞིན་བཟང་གིས་སྨྲས་པ། །འདབ་ཆགས་རྣམས་ཀྱི་གཙོ་བོ་ཁྱོད། ཆོས་ཀྱི་དོན་ཡང་མི་སེམས་སམ། །ཆོས་དོན་ལེགས་པར་བགྱིས་ན་ནི། །སྲིད་ཀྱི་དོན་མཆོག་ཐོབ་པར་འགྱུར། །བདག་ནི་ཆོས་ཀྱི་དོན་ལ་ལྟས། །ཆོས་ལས་སྲིད་ཀྱང་ཐོབ་པར་འགྱུར། །ཁྱོད་ལ་གློ་བ་ཉེ་བའི་ཕྱིར། །བདག་ནི་གསོན་པར་མི་འཚལ་ལོ། །བྱང་ཆུབ་སེམས་དཔས་སྨྲས་པ། མཛའ་བོ་ཉམ་ཉེས་གྱུར་པ་ལ། །གྲོགས་པོ་གང་དག་ཆོས་དྲན་ཞིང་། །སྲོག་གི་ཕྱིར་ཡང་མི་གཏོང་པ། །དམ་པ་རྣམས་ཀྱི་ཆོས་ཡིན་བདེན། །དེ་བས་ཁྱོད་ཀྱིས་ཆོས་བཞིན་བྱས། །ང་ལ་གུས་པའང་བསྟན་ཟིན་གྱིས། །ངས་ནི་གསོལ་བ་བཏབ་པ་བཞིན། །ང་བདག་འདོད་པ་བཞིན་དུ་སོང་། །དེ་ལྟར་བྱས་ན་རུང་བ་ནི། མཛའ་བཤེས་ང་དང་བྲལ་བ་རྣམས། །བློ་གྲོས་ཕུན་སུམ་ཚོགས་པ་ཁྱེད། །སོང་ན་འབྱོར་པ་མཆོག་ཏུ་འགྱུར། །དེ་ལྟར་དེ་གཉིས་ཅིག་ལ་ཅིག་བྱམས་པའི་ཡོན་ཏན་སྨྲས་པ་ལས། འཆི་བདག་མངོན་དུ་འོངས་པ་བཞིན། །རྔོན་པ་དེ་ཡང་འོངས་པ་མཐོང་། །དེ་ནས་ངང་པའི་མཆོག་དེ་གཉིས་ཀྱིས་རྔོན་པ་དེ་འོངས་བ་མཐོང་བ་དང་ཅང་མི་སྨྲ་བར་འཁོད་དེ། དེས་ཀྱང་ངང་པ་མང་པོ་དེ་དག་བྱེར་ཏེ་མེད་པར་གྱུར་པ་མཐོང་ནས། འདིར་འགའ་ཞིག་ནི་རྙིས་ཟིན་ཡང་དག་གོ་སྙམ་ནས་བློ་ལ་ངེས་པ་བསྐྱེད་དེ་རྙི་བཙུགས་པའི་གནས་རྣམས་སུ་ཉུལ་དུ་སོང་བ་དང་། ངང་པའི་མཆོག་དེ་གཉིས་མཐོང་ངོ་། །དེ་དེའི་གཟུགས་བཟང་པོ་དེས་ཡིད་ལ་ཡ་མཚན་ཆེར་གྱུར་ཏེ། གཉིས་ཀ་རྙིས་ཟིན་ཏོ་སྙམ་ནས། དེར་བཙུགས་པའི་རྙི་གཉིས་སྦུལ་བ་དང་། དེ་ནས་གཅིག་ནི་རྙིས་ཟིན་གཅིག་ནི་རྙིས་མ་ཟིན་བར་བདེ་བར་འདུག་བཞིན་དུ་རིམ་གྲོ་བྱེད་ཅིང་འདུག་པ་མཐོང་ནས། སྙིང་ལ་ཡ་མཚན་ཆེ་བར་གྱུར་ཏེ། བཞིན་བཟང་ལ་ཆེད་དུ་སྨྲས་པ། བྱ་འདི་རྙི་ཡིས་ཟིན་པས་ན། །འཕུར་ཏེ་འགྲོ་བའི་མཐུ་རྩལ་མེད། །ང་ཡང་དྲུང་དུ་འོངས་བཞིན་དུ། །མཁའ་ལ་འཕུར་ཏེ་མི་འགྲོ་འམ། ཁྱོད་ནི་མ་ཟིན་བདེ་བར་འདུག །འདབ་གཤོག་རྫོགས་ཤིང་མཐུ་དང་ལྡན། །ང་ནི་འདི་ལྟར་འོངས་གྱུར་ཀྱང་། །ཅིའི་ཕྱིར་མཁའ་ལ་མྱུར་མི་འགྲོ། །བཞིན་བཟང་གིས་དེ་སྐད་ཟེར་བ་ཐོས་ནས། །ཚིག་འབྲུ་རབ་ཏུ་གསལ་ཞིང་སྤེལ་ལེགས་ལ་རང་བཞིན་གྱིས་ཡིད་དུ་འོང་ཞིང་བརྟན་པའི་ཡོན་ཏན་གྱིས་གཟི་བྱིན་དང་ལྡན་པའི་སྒྲ་ཕྱུང་སྟེ། མིའི་སྐད་དུ་སྨྲས་པ། ནུས་བཞིན་དུ་ནི་མི་འགྲོ་བ། །བྱ་འདི་རྙི་ཡིས་ཟིན་གྱུར་ན། །སྡུག་བསྔལ་ཆེན་པོ་མྱོང་བ་འགྱུར། །དེ་ཕྱིར་ང་ནི་མི་འགྲོའོ། །ཁྱོད་ཀྱིས་འདི་ཡི་རྐང་པ་གཉིས། །རྙི་ཡི་ཞགས་པ་ཆེན་པོས་བཟུང་། བདག་ཀྱང་འདི་ཡི་ཡོན་ཏན་གྱི། །རྙིས་ནི་དེ་བས་དམ་དུ་ཟིན། །དེ་ནས་རྔོན་བ་དེ་རབ་ཏུ་ཡ་མཚན་ཆེར་གྱུར་ཏེ། །བ་སྤུ་ཟིང་ཞེས་བྱེད་པར་གྱུར་ནས་བཞིན་བཟང་ལ་ཡང་སྨྲས་པ། ང་ཡིས་འཇིགས་ནས་ངང་པ་གཞན། །འདི་བོར་ནས་ནི་གུད་དུ་སོང་། །ཁྱོད་ནི་འདི་ལྟར་འདི་མི་གཏོང་། །བྱ་འདི་ཁྱོད་ཀྱི་ཅིར་འོང་གེ །བཞིན་བཟང་གིས་སྨྲས་པ། །ངང་པའི་རྒྱལ་པོ་སྲོག་དང་འདྲ་བའི་གྲོགས། །བདེ་བ་སྦྱིན་པ་དེ་ན་ཉམ་ཉེས་གྱུར། །དེ་བས་བདག་ནི་སྲོག་ནི་ཡལ་གྱུར་ཀྱང་། འདི་ནི་ང་ཡིས་གཏོང་བར་མི་ནུས་སོ། །དེ་ནས་བཞིན་གཟང་གིས་རྔོན་པ་དེ་ཡིད་མགུ་ཞིང་ཡ་མཚན་ཆེར་བྱེད་པར་ཤེས་ནས་སྨྲས་པ། བཟང་པོ་བདག་ཅག་སྨྲས་པ་འདིས། །གལ་ཏེ་བདེ་བ་འབྱུང་འགྱུར་ཞིང་། །དེ་རིང་བདག་ཅག་བཏང་ན་ནི། །ཆོས་དང་ལྡན་པའི་གྲགས་པ་འཐོབ། །རྔོན་པས་སྨྲས་པ། ང་ནི་ཁྱོད་ལ་གནོད་མི་བྱེད། ཁྱོད་ནི་ང་ཡིས་བཟུང་བའང་མེད། །དེ་བས་ཁྱོད་ནི་ཅི་བདེར་སོང་། །གཉེན་དང་ཕྲད་ཅིང་དགའ་བར་གྱིས། །བཞིན་བཟང་གིས་སྨྲས་པ། བདག་གི་སྡུག་བསྔལ་མི་བཞེད་ན། །བདག་གིས་གསོལ་བ་བཞིན་དུ་མཛོད། །གལ་ཏེ་གཅིག་གིས་མཉེས་གྱུར་ན། །འདི་ནི་ཐོང་ལ་བདག་ཟུང་ལ། །བདག་ཅག་མཆུ་དང་ཞེང་ཡང་མཉམ། །ན་ཚོད་ལ་ཡང་རྒན་གཞོན་མེད། འདི་ལྟར་བསླུས་པར་གྱུར་པ་ལ། ཁྱོད་དང་བདག་གཉིས་ཕམ་རྒྱལ་མེད། །བདག་ལ་ཐུགས་ཆེས་མི་འགྱུར་ན། །ཁྱོད་ཀྱིས་བདག་ནི་སྔར་བཟུང་ལ། །བྱ་ཡི་རྒྱལ་པོ་ཕྱི་ནང་ཐོང་། ཁྱོད་ཀྱི་རྙེད་པའང་དེ་བཞིན་ལ། བདག་གིས་གསོལ་བའང་གནང་བར་མཛོད། །ངང་པ་མང་པོ་དགའ་བར་གྱིས། དེ་བས་མཛའ་བའང་དེ་བཞིན་འགྱུར། ཁྱོད་ཀྱིས་བཏང་ན་ཅི་ལྟར་འགྱུར་བ་གཟིགས། །ངང་པ་མང་པོ་གྲགས་པའི་བདག་པོ་དེ། །ནམ་མཁའ་དངས་པའི་ནང་ན་རྣམ་མཛེས་པ། །ལྷ་མིན་རྒྱལ་པོས་ཟླ་བ་བཏང་བ་བཞིན། །དེ་ནས་རྔོན་པ་དེ་སྙིང་སྲ་ཞིང་རྩུབ་པ་ལ་གོམས་ཀྱང་། དེ་རང་གི་སྲོག་ལའང་མི་ལྟ་བར་རྗེ་བོ་ལ་སྙིང་ཉེ་ཞིང་བྱམས་པ་དང་ཆུ་གང་དང་ཁྲེལ་ལྟས་ཆེ་བའི་ཡོན་ཏན་གྱི་གཟི་བྱིན་དང་ལྡན་པ་དང་བརྟན་ཞིང་འཇམ་པོར་སྨྲ་བའི་རྒྱན་གྱིས་བརྒྱན་པའི་ཚིག་དེས། །སེམས་དུལ་བར་གྱུར་ནས་ངོ་མཚར་ཆེ་ཞིང་རབ་ཏུ་གུས་པའི་དབང་གིས་ཐལ་མོ་སྦྱར་ཏེ་བཞིན་བཟང་ལ་སྨྲས་པ། སྐལ་བ་ཆེན་པོ་ལེགས་སོ་ལེགས། རྗེ་ཡི་དོན་དུ་སྲོག་བཏང་བ། ཁྱོད་ཀྱིས་འདིར་ནི་གོང་བསྟན་པ། དེ་ལྟ་བུ་ཡི་ཆོས་བཟང་བ། ལྷའམ་མི་ཡི་ནང་ན་དཀོན། །དེ་བས་ཁྱོད་ཀྱི་རྒྱལ་པོ་དེ། །མགུ་བར་བྱས་ནས་བཏང་བར་བྱའོ། །ཁྱོད་ཀྱི་སྲོག་པས་ཕངས་དེ་ལ། གནོད་པར་བྱེད་པ་སུ་ཞིག་ཡོད། །དེ་སྐད་ཅེས་སྨྲས་ནས། །རྔོན་པ་དེས་རྒྱལ་པོ་དེའི་བཀའ་མཉན་པར་ངང་པའི་རྒྱལ་པོ་སྙིང་རྗེ་ཅན་དེ་ལ་རིམ་གྲོ་བྱས་ཏེ་རྙི་བཀྲོལ་ཏེ་བཏང་ངོ་། །དེ་ནས་ངང་པའི་སྡེ་དཔོན་བཞིན་བཟང་དེ་ངང་པའི་རྒྱལ་པོ་དེ་བཏང་བས་སྙིང་རབ་ཏུ་དགའ་བར་གྱུར་ཏེ། རྔོན་པ་ལ་དགའ་ཞིང་། བྱམས་པའི་ལྟ་བས་བལྟས་ནས་སྨྲས་པ། ངང་པའི་རྒྱལ་པོ་ཁྱོད་ཀྱིས་དེ་བཏང་པས། །བདག་ནི་མཛའ་བོས་ཇི་ལྟར་དགའ་འགྱུར་བར། །བཟང་པོ་ཁྱོད་ཀྱི་གཉེན་དང་ལྷན་ཅིག་ཏུ། །སྟོན་བརྒྱ་མང་པོ་ངག་ཏུ་དགའ་བར་ཤོག །ཁྱོད་ཀྱི་ལས་བྱས་དོན་མེད་མི་འགྱུར་ཕྱིར། །ང་དང་ངང་པ་མང་པོའི་བདག་པོ་གཉིས། །བདེ་བར་བཟུང་ལ་ཁུར་གྱི་ངོར་སྤོས་ཏེ། །ཕོ་བྲང་ནང་དུ་རྒྱལ་པོའི་སྤྱན་སྔར་བྲིམས། །ངང་པའི་རྒྱལ་པོ་གཡོག་དང་བཅས་གཟིགས་ན། །རྒྱལ་པོ་དེ་ནི་ངེས་པར་དགྱེས་པར་འགྱུར། །ཁྱོད་ལ་མགུ་བར་གྱུར་པའི་ནོར་ཆེན་རྣམས། །རེ་ཡང་མི་རེ་བ་དག་སྩོལ་བར་འགྱུར། །དེ་ནས་དེས་དེ་ལྟར་གལ་གྱིས་བཅུས་པ་དང་། རྔོན་པ་དེས་བསམས་པ། འདི་ལྟ་བུའི་ངང་པ་ངོ་མཚར་རྨད་དུ་བྱུང་བ་འདི་གཉིས། རེ་ཤིག་རྒྱལ་པོའི་སྤྱན་སྔར་བྲིམ་མོ་སྙམ་ནས། །ངང་པའི་མཆོག་དེ་གཉིས་ཁུར་གྱི་ངོར་སྔོས་ཏེ། བདེ་ཞིང་མ་བཅིངས་བ་ཁྱེར་ཏེ་སོང་སོང་ནས་རྒྱལ་པོའི་སྤྱན་སྔར་བྲིམས་སོ། །བདག་གིས་ངང་པའི་རྒྱལ་པོ་འདི། །སྡེ་དཔོན་དང་བཅས་འཚལ་ཏེ་མཆིས། །རྨད་དུ་བྱུང་བའི་སྤྱན་གཟིགས་འདི། །རྒྱལ་པོས་སྤྱན་སྔར་བྲིམ་དུ་གསོལ། །དེ་ནས་རྒྱལ་པོ་དེ་ཡ་མཚན་ཆེ་ཞིང་སྙིང་རབ་ཏུ་དགའ་བར་གྱུར་ནས། ངང་པའི་མཆོག་གསེར་གྱི་ཕ་བོང་ལྟར་གཟི་མདངས་དང་ལྡན་པའི་གཟུགས་ཡིད་དུ་འོང་བ། །དེ་གཉིས་ལ་བལྟས་ནས་རྔོན་པ་དེ་ལ་སྨྲས་སོ། །བྱ་འདི་གཉིས་ནི་མ་བཅིངས་ལ། །སྣད་ཅིང་རྨས་པའང་ཡང་མེད་པར། །ཁྱོད་ནི་ས་ལ་འགྲོ་བ་ཡི། །ཇི་ལྟར་ཟིན་པ་ཞིབ་ཏུ་སྨྲོས། །དེ་སྐད་ཅེས་སྨྲས་པ་དང་། རྔོན་པ་དེས་རྒྱལ་པོ་ལ་ཕྱག་བྱས་ནས་སྨྲས་པ། །མཚོ་དང་ལུ་མའི་འགྲམ་དག་ན། །བྱ་རྣམས་རྒྱུ་བའི་ས་ཕྱོགས་སུ། །བྱ་རྙི་རབ་ཏུ་མི་བཟང་པ། བདག་གིས་ཤིན་དུ་མང་པོ་བཙུགས། །དེ་ནས་ངང་པའི་མཆོག་འདི་ནི། བག་ཕབ་དོགས་པ་མེད་བར་རྒྱུ། །རྙི་རྣམས་བཙུགས་པ་དེ་དག་གིས། །རྐང་པ་གཉིས་ནི་ཟིན་པར་གྱུར། །གཅིག་ནི་མ་ཟིན་དེ་ལ་འཁོར། །བདག་ལ་དེ་ཡིས་གསོལ་བ་བཏབ། །ངང་པའི་རྒྱལ་པོའི་སྲོག་གླུད་དུ། །བདག་ཉིད་མཆིད་ཀྱིས་འཚོལ་བར་འགྱུར། །མི་ཡི་སྐད་དུ་ཚིག་སྨྲས་པ། རྣམ་པར་གསལ་ལ་ཚིག་འབྲུ་འཇམ། །བདག་གི་སྲོག་ཀྱང་ཡོངས་བཏང་ཞིང་། །གསོལ་བ་འདེབས་ཀྱང་གཟི་བྱིན་ཆེ། །དེ་བས་འདི་ཚིག་རབ་ཏུ་འཇམ་པ་དང་། རྗེ་ལ་སྙིང་ཉེ་སྤྱོད་ཚུལ་བསྟན་པ་དེས། །བདག་ནི་མགུ་བར་གྱུར་ནས་འདི་ཡི་རྗེ། །བདག་གིས་ཁྲོ་བ་བཏང་ནས་འདི་ཡང་བཏང་། །དེ་ལྟར་བྱ་རྒྱལ་འདི་ནི་བཏང་བ་ཡིས། །དགའ་བར་གྱུར་ནས་སྙན་པ་མང་དུ་སྨྲས། །བདག་གི་སུག་ལས་དོན་མེད་མི་འགྱུར་ཕྱིར། །ཁྱོད་ཀྱི་སྤྱན་སྔར་ཁྲིད་ཅེས་བདག་ལ་མཆི། །དེ་བས་འདི་ནི་བྱའི་གཟུགས་ཅན་ཆོས་དང་ལྡན་པ་གཞན་ཞིག་ལགས། །གང་གིས་བདག་གི་སེམས་ཀྱང་དེ་མ་ཐག་ཏུ་འཇམ་ཟིང་མཉེན་པར་གྱུར། །དེ་བས་བདག་གིས་བྱ་ཡི་རྒྱལ་པོ་རྙི་ལས་བཀྲོལ་ཏེ་བཏང་བ་དང་། །བདག་ལ་དྲིན་བཟོ་ཕྱིར་ནི་རྗེ་ཁོལ་བཅས་ཏེ་ཁྱོད་ཀྱི་སྤྱན་སྔར་མཆིས། །རྒྱལ་པོ་དེས་དེ་སྐད་ཐོས་ནས་རབ་ཏུ་དགའ་ཞིག་ཡིད་ལ་ངོ་མཚར་ཆེར་གྱུར་ཏེ། གསེར་གྱི་སྟན་ཁྲི་རྒྱལ་པོའི་སྟན་དུ་འོས་པ། ཁྲིའི་རྐང་པ་རིན་པོ་ཆེ་སྣ་ཚོགས་ཀྱིས་སྤྲས་པའི་འོད་ཟེར་འཕྲོ་ཞིག་སྡུག་པ། ལྷའི་གདན་རིམ་པ་དུ་མར་བཤམས་ཤིང་བཟང་བ། རྒྱབ་རྟེན་བདེ་ཞིང་ཉམས་དགའ་བས་བརྒྱན་པ། །རྐང་རྟེན་བཙུགས་པ་ཞིག་ངང་པའི་རྒྱལ་པོའི་སྟན་དུ་ཐིང་ཞིག་གཅེས་བཀའ་སྩལ་ཏོ། །བློན་པོ་ཆེན་པོའི་སྟན་དུ་འོས་པ། སྦའི་ཁྲི་ཞིག་ནི་བཞིན་བཟང་གི་སྟན་དུ་ཐིང་ཞིག་ཅེས་བསྒོའོ། །དེ་ནས་བྱང་ཆུབ་སེམས་དཔས་བསམས་པ། ད་ནི་དགའ་བར་འགྱུར་བའི་གཏམ་བྱ་བའི་སྐབས་སུ་བབ་པོ་སྙམ་ནས། །དྲིལ་བུ་ལྟར་སྙན་པའི་སྐད་ཕྱུང་སྟེ། རྒྱལ་པོ་ལ་སྨྲས་པ། གཟི་བྱིན་ཆེ་ཞིང་མདངས་དང་ལྡན་པའི་སྐུ། །བདེ་བའི་གནས་ཁྱོད་ད་ལྟར་ཐུགས་བདེ་འམ། ཁྱོད་ཀྱི་ཆོས་ཀྱི་སྐུ་ལ་རྨ་མེད་དམ། །བཀའ་ལུང་སྙན་པས་རྒྱ་ཆེར་དབུགས་ཕྱུང་ངམ། །ཕན་གདགས་ནན་ཐུར་བགྱི་བའི་བཀའ་ཁྲིམས་ཀྱིས། འབངས་ཀྱི་སྐྱེ་དགུ་བསྲུང་བའི་དབང་སྐུར་ཏམ། །བདག་གི་གྲགས་པའི་གཏམ་སྙན་རྒྱལ་གྱུར་ཏམ། །འབངས་རྣམས་གློ་བ་ཉེ་ཞིང་ཕན་བཏགས་སམ། །བློན་པོ་འཛངས་ཤིང་གློ་བ་ཉེ་བ་རྣམས། །བརྟག་པའི་ཐབས་ཀྱིས་ལེགས་པར་བརྟགས་ལགས་སམ། །འབངས་ལ་སྨན་པ་རྟག་ཏུ་དགོངས་ལགས་སམ། །དེ་དག་མི་མཁྱེན་པར་ནི་མི་བཞུགས་གྲང་། །དཔའ་ཞིང་ཐབས་ལ་མཁས་པའི་བཀའ་ནན་གྱིས། །རྒྱལ་ཕྲན་དེ་དག་བཀའ་ནི་ཉན་ལགས་སམ། །ཐུགས་རྗེ་ཆེན་པོའི་མཛེས་པ་མཆིས་ལགས་སམ། །ཐུགས་ཆེས་བག་མེད་བས་ནི་མིན་ནམ་གྲང་། །ཆོས་དང་བདེ་དང་སྲིད་རྣམས་མཐུན་ལགས་སམ། །ཁྱོད་ཀྱི་སྤྱོད་པ་དམ་པ་དགའ་བ་ཡི། །གྲགས་པ་ཕྱོགས་སུ་རྒྱས་པར་གྱུར་པ་ཡིས། །དགྲ་རྣམས་ཤུགས་འབྱིན་སྨོད་པར་གྱུར་ལགས་སམ། །དེ་ནས་རྒྱལ་པོ་དེ་སེམས་རབ་ཏུ་དང་ཞིང་དབང་པོ་རྣམས་ཀྱང་དང་ལ་གསལ་བར་གྱུར་ནས་དེ་ལ་སླར་སྨྲས་པ། ངང་པ་དེ་རིང་བདག་ཀྱང་བདེ། ཐམས་ཅད་དུ་ཡང་བདེ་བར་འགྱུར། །དམ་པ་དག་དང་ཕྲད་པ་འདི། ཡུན་རིང་བསམ་པ་གྲུབ་པར་གྱུར། །ཁྱོད་ནི་རྙི་ཡིས་ཟིན་པ་ན། །དགའ་བའི་སེམས་ནི་གཡེངས་གྱུར་ནས། །ཁྱེད་ལ་དབྱུག་པས་བརྡེགས་ནས་ནི། །འདི་ཡིས་སྣང་བར་མ་བྱས་སམ། །དེ་ལྟར་རྔོན་པ་འདི་དག་ནི། །བྱ་རྣམས་ཟིན་ཞིང་སྣད་གྱུར་ན། །དགའ་བས་སེམས་ནི་གཡེངས་གྱུར་ནས། །ངན་པ་བདག་ཀྱང་སྤྱོད་པར་འགྱུར། །བྱང་ཆུབ་སེམས་དཔས་སྨྲས་པ། །འདི་ལྟ་བུར་ནི་ཉམ་ཉེས་ཀྱང་། །རྒྱལ་པོ་ཆེན་པོ་བདེ་ཞིང་མཆིས། །འདིས་ཀྱང་བདག་ལ་དགྲ་བཞིན་དུ། །གནོད་པ་ཅི་ཡང་མ་བགྱིས་སོ། །བཞིན་བཟང་འདི་ཡང་མ་ཟིན་པར། །བདག་ལ་བྱམས་པས་ཟིན་བཞིན་འདུག །འཇམ་པོར་སྨྲ་བར་མཐོང་བ་དང་། །ངོ་མཚར་ཡ་མཚན་ཆེ་བར་གྱུར། །འདི་ཡི་ཚིག་ནི་འཇམ་པོ་ཡིས། །དེ་ནས་ཡིད་ནི་མགུ་གྱུར་ནས། །དུལ་ཞིང་རིམ་གྲོ་ཆེར་བསྐྱེད་དེ། །བདག་ནི་འདི་ཡིས་རྙི་ལས་བཀྲོལ། །དེ་བས་འདི་ལྟར་བཞིན་བཟང་གིས། །འདི་ལ་ཕན་ཡོན་གདགས་པ་དང་། །བདེ་བ་ཆེན་པོ་འབྱུང་བའི་ཕྱིར། །བདག་ཅག་གཉིས་ནི་འདིར་མཆིས་སོ། །རྒྱལ་པོས་སྨྲས་པ། བསམ་པ་གཉིས་ནི་འདིར་བྱོན་ཏེ། ཁྱེད་གཉིས་བྱོན་པ་རབ་ཏུ་ལེགས། །ཁྱེད་གཉིས་མཐོང་བར་གྱུར་པས་ན། །བདག་ནི་རབ་ཏུ་དགའ་བར་འགྱུར། །རྔོན་པ་འདིས་ཡང་དེ་རིང་ནི། །དོན་ཆེན་གྲུབ་པར་གཟིགས་སུ་གསོལ། འོ་སྐོལ་གཉིས་ཀ་དགྱེས་བགྱིས་པས། འདི་ནི་མགུ་བར་བགྱི་བར་རིགས། །དེ་སྐད་ཅེས་སྨྲས་ནས། །རྒྱལ་པོ་དེས་རྔོན་པ་དེ་ལ། །ནོར་རབ་ཏུ་མང་ཞིང་རྒྱ་ཆེར་བྱིན་ཏེ་མགུ་བར་བྱས་ནས། །ཡང་ངང་པའི་རྒྱལ་པོ་ལ་སྨྲས་པ། ཁྱེད་གཉིས་ཆེད་དུ་བདག་གི་ཁྱིམ་དུ་བྱོན། །དེ་བས་བདག་ལ་འཛེམ་དོག་མ་མཆིས་པར། །ཅི་དང་ཅི་བཞེད་དེ་དག་བདག་ལ་གསུངས། །བདག་གི་བདོག་པ་ཁྱེད་དང་ཐུན་མོང་ལགས། །མཛའ་བོས་སྤོབས་ཏེ་དོགས་མེད་ཚིག་གསལ་བར། །ལོངས་སྤྱོད་བདོག་ལ་བླངས་ན་མགུ་འགྱུར་བ། །དེ་ལྟ་བུ་ནི་ནོར་གྱིས་མགུ་མི་འགྱུར། །དེ་བས་མཛའ་བོས་སྤོབས་ན་ཕན་ཡོན་ཆེ། །དེ་ནས་རྒྱལ་པོ་དེས་བཞིན་བཟང་སྨྲར་འཇུག་པར་འདོད་ནས་འཛུམ་དམུལ་ཏེ། །བཞིན་བཟང་ལ་བལྟས་ནས་སྨྲས་པ། །སྐྱེ་བོ་གསར་དུ་གཤེ་ཞིང་མ་འདྲིས་པ། །རབ་ཏུ་སྤོབས་ཤིང་བབ་དབབ་མི་རུང་ཀྱང་། །དེས་ཤིང་མཉམ་པར་བཞག་པའི་ཚིག་དག་ནི། ཞེ་སར་བཅས་ཤིང་སྙན་པར་མི་སྨྲ་མིན། །དེ་བས་ཚིག་ཙམ་སྨྲ་བ་ཡིས། །བདག་ནི་སྤོབས་པར་རེ་བ་དང་། །ཕྱི་ཕྱིར་མཛའ་བར་འདོད་པ་ཡིས། །བསམ་པ་དོན་ཡོད་བགྱི་བའི་རིགས། །དེ་སྐད་ཅེས་སྨྲས་པ་དང་། །ངང་པའི་སྡེ་དཔོན་བཞིན་བཟང་གིས། །དེ་ལ་ཚུལ་བཞིན་དུ་ཕྱག་འཚལ་ཏེ་སྨྲས་པ། དབང་ཆེན་འདྲ་བར་ཁྱེད་དང་གཉིས། །དེ་ལྟར་བཀའ་མཆིད་གསུངས་པ་ནི། །རབ་ཏུ་དགྱེས་པའི་ཚུལ་བསྟན་ན། །སུ་ཞིག་ཡིད་ལ་བསམ་མི་རྫོགས། །མི་ཡི་བདག་པོ་བཀའ་མཆིད་གསུང་བཞིན་ལ། །བྱ་ཡི་བདག་པོའང་རབ་ཏུ་དགའ་བཞིན་དུ། །བཀའ་མཆིད་དེ་ལྟའི་ནང་དུ་འབངས་དག་གིས། །སྤྱི་རྟོལ་སྐྱེད་དེ་སྨྲ་བར་ག་ལ་རིགས། །ཡ་རབས་དུལ་བའི་ཚུལ་ནི་དེ་མ་ལགས། །དེ་ལྟར་འཚལ་བཞིན་རབ་ཏུ་ཇི་ལྟར་འཇུག །རྒྱལ་པོ་ཆེན་པོ་དེ་བས་བདག་མི་སྨྲ། །བཟོད་པར་མཛད་པའི་རིགས་ན་བཟོད་པར་གསོལ། །དེ་སྐད་ཅེས་སྨྲས་པ་དང་། རྒྱལ་པོ་དེ་རབ་ཏུ་དགའ་ཞིང་བཞིན་གྱི་མདངས་རབ་ཏུ་ཕྱུང་ནས། །བཞིན་བཟང་ལ་འདི་སྐད་ཅེས་སྨྲས་སོ། །ཁྱོད་ཀྱི་ཡོན་ཏན་གཏམ་སྙན་མི་རྣམས་ཟེར་བའི་རིགས། ངང་པའི་བདག་བོ་དང་ཡང་གྲོགས་བོར་འཐམས་པའི་རིགས། །དུལ་བ་དང་ནི་ཚུལ་ལ་མཁས་པ་འདི་ལྟ་བུ། །རང་གི་སེམས་ནི་མ་སྦྱངས་པ་ལ་ག་ལ་ཡོད། །དེ་བས་བདག་ཅག་མཛའ་བ་འདི། །ཅི་ནས་རྒྱུན་མི་འཆད་པ་དང་། །དེ་བཞིན་བདག་ལ་སྤོབས་པར་གྱིས་ལ། །ཡ་རབས་ཕྲད་པར་ཉམས་མ་གྱུར། །དེ་ནས་བྱང་ཆུབ་སེམས་དཔས་རྒྱལ་པོ་དེ་རབ་ཏུ་མཛའ་བར་འདོད་པ་དང་། །བྱམས་པར་གྱུར་པ་ཤེས་ནས། །དེ་ལ་མགུ་བར་བྱེད་ཅིང་འདི་སྐད་ཅེས་སྨྲས་སོ། །དང་པོ་བཤེས་པར་གྱུར་པ་ནའང་། །བདག་ཉིད་ཆེན་པོའི་ཚུལ་འཛིན་པས། །མཛའ་བོ་དམ་པས་བྱ་བ་གང་། །དེ་ནི་ཁྱོད་ཀྱིས་བདག་ལ་བྱས། །བཀུར་སྟི་བགྱི་བའི་ཆོ་ག་འདིས། །ཁྱོད་ཀྱིས་བདག་ལ་གང་བསྟན་པ། རྒྱལ་པོ་ཆེན་པོ་སུ་ཡི་སེམས། །དྲན་ཞིང་དམིགས་པ་མི་འགྱུར་མཆིས། །དགོས་པ་ལྟ་ཞིག་ཆེད་ཆེ་ཅི་ཞིག་མཆིས། །རྒྱལ་པོ་ཆེན་པོ་ཁྱོད་ལ་བརྟེན་ཅི་ལྟ། །ཁྱོད་ནི་འགྲོན་ལ་དགའ་ཞིང་ཡོན་ཏན་འདོད། །འདི་ལྟར་གྱུར་པ་ངེས་པ་གོམས་པའི་ཡོན། །འབངས་ལ་ཕན་ཕྱིར་རྒྱལ་པོའི་ཚུལ་འཛིན་པ། །དྲང་སྲོང་མཉམ་བཞག་དཀའ་ཐུབ་འབད་པ་བཞིན། །ཁྱོད་ཀྱི་ཡོན་ཏན་རང་གི་ངང་གིས་གནས། །རང་བཞིན་དུལ་བ་ཁྱོད་ལྟ་ལགས་ཀྱང་མོད། །དེ་བས་བསྟོད་པར་འོས་པའི་ཡོན་ཏན་བདེ། །འབྱུང་པོ་ཉེས་པའི་གཅོང་རོང་མི་གཏོང་ངོ་། །ཡོན་ཏན་སྐྱོན་ཀྱི་ཆོས་ཉིད་འདི་ཤེས་ནས། སེམས་ཡོད་སུ་ཞིག་མི་ཕན་ལམ་ངན་འགྲོ། །དཔའ་བས་ཡུལ་འཁོར་ཐོབ་པར་མི་འགྱུར་ལ། །ནོར་དང་རྩོལ་ཕོད་ཐབས་ཀྱིས་དེ་མི་ཐོབ། །ཡོན་ཏན་མེད་ན་ནོར་བགོད་འབང་མི་ཕན། །རྒྱ་པོ་ཡོན་ཏན་ཅན་གྱིས་ཐོབ་པར་འགྱུར། །ལྷ་ཡི་རྒྱལ་པོའི་དཔལ་ཡང་ཡོན་ཏན་ལྟོས། །ཡོན་ཏན་ཡོད་ན་རྒྱུད་ཀྱང་རབ་ཏུ་འཕེལ། གྲགས་པ་རྣམས་ཀྱང་ཡོན་ཏན་ཉིད་ལས་འཕྲོ། །བདག་ཉིད་ཆེ་བའི་མཐུ་ཡང་ཡོན་ཏན་གནས། །ཟླ་བའི་འོད་པས་གསལ་བའི་ཡོན་ཏན་ནི། །དགྲ་བོ་མི་བཟད་གྲགས་པས་སྡང་བ་དང་། ཁོན་སྙིང་ཡོད་ཅིང་ཕྲག་དོག་ཆེ་བ་ཡང་། །ཡིད་ནི་རབ་ཏུ་དང་ཞིང་མགུ་བྱེད་དོ། །རྒྱལ་པོ་དེ་ལྟར་དུལ་ལ་སོགས་པ་ཡི། །ཡོན་ཏན་བཞག་ཞིང་ཆེ་བ་མ་ཉམས་པར། །རྒྱ་ཕྲན་དྲེགས་པ་མཐུ་ཡིས་བཏུལ་ནས་ནི། །ས་འདི་སྐྱོང་ལ་འབངས་ཀྱང་བསླབ་ཏུ་གསོལ །འབངས་ལ་ཕན་གདགས་རྒྱལ་པོའི་དོན་གྱི་མཆོག །རྒྱལ་པོ་ཆོས་ལ་དགའ་བར་གྱུར་ན་ནི། །ཚེ་རབས་གཉིས་ཀར་བདེ་བའི་ལམ་འདི་ཡིན། །རྒྱལ་པོ་སྤྱོད་པ་བཞིན་དུ་འབངས་ཀྱང་སྤྱོད། དེ་བས་ཆོས་བཞིན་ས་ལ་གནས་པར་སློབས། །སུམ་བཅུ་རྩ་གསུམ་ལྷ་ཡང་ཁྱོད་ལ་བསྲུང་། །ཁྱོད་ཀྱི་དྲུང་ན་བདེ་བར་གནས་གྱུར་ཀྱང་། །བདག་གི་གྲོགས་མང་སྡུག་བསྔལ་འབོད་པ་བཞིན། །དེ་ནས་རྒྱལ་པོ་དེ་འཁོར་དང་བཅས་པ་དེའི་ཚིག་དེ་ལ་མངོན་པར་དགའ་བར་གྱུར་ནས། །བཀུར་སྟི་དང་ཚིག་སྙན་པ་སྨྲས་ཏེ། ངང་པའི་བཙོ་བོ་དེ་གཉིས་སླར་བཀྱེའོ། །དེ་ནས་བྱང་ཆུབ་སེམས་དཔའ་སྟོན་གྱི་ནམ་མཁའི་དཀྱིལ་རལ་གྲི་དྲི་མ་མེད་པ་ལྟར་སྔོ་ཞིང་དངས་ལ་མཛེས་པ་ལ་འཕུར་ནས། །བཞིན་བཟང་ཕྱི་བཞིན་དུ་འབྲང་བ་ནི་གཟུགས་བརྙན་དྲུང་ན་འདུག་པ་འདྲ་བར་བྱས་ཏེ། ངང་པའི་ཚོགས་མང་པོ་དེའི་དྲུང་དུ་འོངས་པ་དང་། མཐོང་མ་ཐག་ཏུ་རབ་ཏུ་དགའ་བ་དང་ལྡན་པར་བྱས་སོ། །དུས་དུས་དག་ཏུ་ངང་བའི་རྒྱལ་པོ་དེ། །གཞན་ལ་སྙིང་བརྩེའི་ཕྱིར་ནི་རྒྱལ་པོ་དེའི། །ཆེད་དུ་སོང་ནས་ཆོས་ཀྱང་འཆད་པར་བྱེད། །རྒྱལ་པོ་དེས་ཀྱང་མཆོད་པ་གུས་པར་བྱས། །དེ་ལྟ་བས་ན་དམ་པ་རྣམས་དུད་འགྲོར་ལྷུང་བའི་སྤྱོད་པ་ལའང་སྐྱེས་བུ་དམ་པ་མ་ཡིན་པ་རྣམས་ཀྱིས་རྗེས་སུ་མཐུན་པར་བྱ་བ་ཙམ་ཡང་མི་ནུས་ན། བདེ་འགྲོ་ན་གནས་པ་རྣམས་ལ་ལྟ་སྨོས་ཀྱང་ཅི་དགོས། དེ་ལྟར་ཚིག་སྙན་པ་ནི་གཉིས་ཀ་ལ་ཕན་པར་འབྱུང་བ་ཡིན་ནོ་ཞེས་ཚིག་སྙན་པར་སྨྲ་བའི་ཡོན་ཏན་བསྔགས་པ་ལའང་སྦྱར་བར་བྱའོ། དེ་ལྟར་དགེ་བའི་བཤེས་གཉེན་དང་ལྡན་ན་དོན་བསྒྲུབ་པ་དཀའ་བའང་འགྲུབ་པར་འགྱུར་རོ་ཞེས་དགེ་བའི་བཤེས་གཉེན་གྱི་ཡོན་ཏན་བསྔགས་པ་ལའང་བརྗོད་པར་བྱའོ། །གནས་བརྟན་ཀུན་དགའ་བོའི་སྔོན་གྱི་རིགས་མཐུན་པར་བསྟན་པར་བྱ་བ་ལའང་བརྗོད་པར་བྱ་སྟེ། གནས་བརྟན་འདི་དེ་ལྟར་བྱང་ཆུབ་སེམས་དཔའ་དང་ལྷན་ཅིག་ཏུ་འགྲོགས་འགྲོགས་པ་སྟེ། ཡུན་རིང་པོར་བྱམས་པ་དང་རབ་ཏུ་གུས་པ་འབའ་ཞིག་བྱེད་བྱེད་པ་ཡིན་ནོ་ཞེས་བརྗོད་པར་བྱའོ། །ངང་པར་སྐྱེས་པའི་རབས་ཏེ་ཉི་ཤུ་གཉིས་པའོ།། །།བམ་པོ་བརྒྱད་པ། སྐྱེས་བུ་དམ་པ་རྣམས་ནི་ཕན་གདགས་པ་དྲིན་དུ་གཟོ་བ་དང་། བཟོད་པ་ལ་གོམས་པས་རིམ་གྲོ་མ་བྱས་ཀྱང་སྔོན་ཕན་འདོགས་འདོགས་པ་ལ་སྙིང་བརྩེ་བ་ལྷོད་པར་མི་འགྱུར་རོ། །དེ་ཡང་འདི་ལྟར་བཅོམ་ལྡན་འདས་འདི་སྔོན་བྱང་ཆུབ་སེམས་དཔར་གྱུར་པའི་ཚེ། ཀུན་དུ་རྒྱུ་བྱང་ཆུབ་ཅེས་བྱ་བར་གྱུར་ཏོ་ཞེས་གྲག་གོ །དེ་ཁྱིམ་ན་གནས་བཞིན་དུ་འཇིག་རྟེན་པས་བསྔགས་པའི་རིག་པའི་གནས་རྣམས་ཀྱི་གོ་རིམས་ནི་རྒྱ་ཆེར་ཤེས། རྒྱུ་རྩལ་རྣམ་པ་སྣ་ཚོགས་པ་ནི་མཁས་པར་བྱས། །རབ་ཏུ་བྱུང་ནས་ཀྱང་འཇིག་རྟེན་ལ་ཕན་འདོགས་པར་བརྩོན་པས། ཆོས་ཀྱི་གཙུག་ལག་རྣམས་ལ་ལྷག་པར་ཡང་བློ་ཞན་པར་མ་གྱུར་ཏེ། དེ་དག་ལ་སློབ་དཔོན་གྱི་གོ་འཕང་ཐོབ་པར་གྱུར་ཏོ། །དེ་བསོད་ནམས་དང་ལྡན་ཞིང་ཡོན་ཏན་རྒྱ་ཆེ་བ་དང་། འཇིག་རྟེན་པའི་སྤྱོད་ཚུལ་ལ་མཁས་པ་དང་། ནན་ཏན་ཆེ་བའི་ཡོན་ཏན་དང་ལྡན་པ། གང་དང་གང་དུ་སོང་བ་དེ་དང་དེར་མཁས་པ་རྣམས་དང་མཁས་པ་ལ་དགའ་བ་རྣམས་དང་། རྒྱལ་པོ་རྣམས་དང་། རྒྱལ་པོའི་བློན་པོ་རྣམས་དང་། བྲམ་ཟེ་དང་། ཁྱིམ་བདག་རྣམས་དང་གཞན་མུ་སྟེགས་ཅན་རྣམས་དང་། རབ་ཏུ་བྱུང་བ་རྣམས་ཀྱིས་བཀུར་སྟི་བྱ་ཞིང་དྲན་པར་བྱ་བར་གྱུར་ཏོ། །བསོད་ནམས་གཞི་ལས་འབར་བའི་ཡོན་ཏན་རྣམས། །ནན་ཏན་སྒྲུབ་པའི་བྱིན་གྱིས་དགའ་བར་འགྱུར། །དགྲ་ཡང་རང་གི་གྲགས་པ་བསྲུང་པའི་ཕྱིར། ལྷག་པར་བཀུར་སྟི་བྱེད་པོ་ཉིད་དུ་འགྱུར། །དེ་ནས་བདག་ཉིད་ཆེན་པོ་དེ་འཇིག་རྟེན་ལ་ཕན་གདགས་པའི་ཕྱིར་གྲོང་དང་གྲོང་ཁྱེར་དང་། ལྗོངས་དང་། གྲོང་རྡལ་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་དུ་རྒྱུ་ཞིང་སོང་སོང་བ་ལས། རྒྱལ་པོ་ཞིག་གི་ཡུལ་གྱི་འདབ་ཏུ་ཕྱིན་པར་གྱུར་ཏོ། །དེའི་ཡོན་ཏན་གྱི་མཐུ་རྒྱ་ཆེན་པོ་དེ་རྒྱལ་པོ་དེས་ཐོས་ཤིང་དེ་རྒྱང་རིང་པོ་ནས་འོངས་བར་ཤེས་ནས་ཡིད་རབ་ཏུ་དགའ་སྟེ། རང་གི་སྐྱེད་མོས་ཚལ་ཉམས་དགའ་བའི་ས་ཕྱོགས་ཤིག་ཏུ་དེའི་གནས་བྱེད་དུ་བཅུག །བསུ་བ་ལ་སོགས་པ་བཀུར་སྟི་ཆེར་བྱས་ཏེ། དེ་རང་གི་ཡུལ་དུ་བཞག་ནས་སློབ་དཔོན་ལ་སློབ་མས་བྱ་བ་བཞིན་དུ་རིམ་གྲོ་དང་བཀུར་སྟི་ཚུལ་བཞིན་དུ་བྱས་ཏེ་མཆོད་ཅིང་བཀུར་ཏོ། །ལོངས་སྤྱོད་ཡོན་ཏན་ཕུན་སུམ་ཚོགས། །ཁྱིམ་དུ་རེ་བའི་འགྲོན་འོངས་ན། །ཡོན་ཏན་ཅན་ལ་དགའ་བ་རྣམས། །རབ་ཏུ་དགའ་ཞིང་སྤྲོ་བར་འགྱུར། །བྱང་ཆུབ་སེམས་དཔས་ཀྱང་དེ་ལ་ཆོས་ཀྱི་གཏམ་ཡིད་དུ་འོང་ཞིང་རྣར་སྙན་པ་རྣམས་ཀྱིས་ཕན་པར་འགྱུར་བའི་ལམ་བསྟན་པས། ཉི་མ་རེ་རེ་ཞིང་ཕན་འདོགས་པར་གྱུར་ཏོ། །གུས་པ་མེད་པའང་ཆོས་ལ་དགའ་བ་རྣམས། །གཞན་ལ་སྙིང་བརྩེ་ཕན་པའི་ཚིག་སྨྲ་ན། །ཕན་པར་འདོད་ཅིང་ཡོན་ཏན་དགའ་བ་ཡི། །སྐྱེ་བོ་སྣོད་གཙང་འདྲ་ལ་སྨོས་ཅི་དགོས། དེ་ནས་རྒྱལ་པོ་དེའི་བློན་པོ་དེ་རྣམས་དང་། མཁས་པའི་ཐབས་ཐོབ་པ་རྣམས་འཁོར་ཚོགས་པའི་ནང་དུ་བྱང་ཆུབ་སེམས་དཔའ་ལ་རིམ་གྲོ་ཆེར་བྱས་པ་དང་། ཡོན་ཏན་ཕུན་སུམ་ཚོགས་པ་ལ་ཕྲག་དོག་གི་སེམས་སྐྱེས་ནས་མི་བཟོད་པར་གྱུར་ཏོ། །རང་གི་ཡོན་ཏན་གྲགས་པ་ཁྱད་པར་ཅན། །འགྲོ་བ་མགུ་བར་ནུས་པའི་མཐུ་ཅན་ལ། །ཡོན་ཏན་བཅོས་མས་བཀུར་སྟི་ཐོབ་པ་རྣམས། །ཕྲག་དོག་མེ་ནི་གོར་མ་ཆགས་པར་འབར། །དེ་ལ་གཙུག་ལག་གཏམ་གྱི་མངོན་སུམ་དུ་ཟིལ་གྱིས་མནན་མ་ནུས་ཤིང་། རྒྱལ་པོ་ཆོས་ལ་བརྟེན་པའང་མ་བཟོད་ནས། །ཐབས་དེ་དང་དེ་དག་གིས་རྒྱལ་པོ་བྱང་ཆུབ་སེམས་དཔའ་ལ་མི་དགའ་བར་བྱ་བའི་ཕྱིར་འདི་སྐད་ཅེས་སྨྲས་སོ། །ལྷ་ཀུན་དུ་རྒྱུ་བྱང་ཆུབ་ལ་ཐུགས་ཆེས་པར་མཛད་པར་མི་རིགས་སོ། །གདོན་མི་འཚལ་བར་འདི་ནི་ལྷ་ཡོན་ཏན་ལ་དགྱེས་པ་དང་ཆོས་ལ་ཕྱོགས་པར་འཚལ་ནས་བརླག་པར་བགྱི་བའི་སླད་དུ་གཡོ་དང་བཅས་པའི་ཚིག་འཇམ་པོ་སྨྲ་ཞིང་སྤྱོད་པའི་ཉམས་དྲོད་འཇམ་པོ་སྨྲ་ཞིང་སྤྱོད་པའི་ཉམས་དྲོད་འཛིན་པ་ལགས་ཏེ། ཉི་འོག་གི་རྒྱལ་པོ་འགའ་ཞིག་གིས་བྱ་མ་རྟ་བཏང་བར་གོར་མ་བཀུམ་མོ། །དེ་ལྟར་ཅིའི་མངོན་ཞེ་ན། འདི་ལྟར་ཆོས་ཀྱི་བདག་ཉིད་ཅན་དུ་བགྱིས་ནས་ལྷའི་ཞལ་སྔ་ནས་གཅིག་ཁོ་ནར་ཐུགས་རྗེ་ཆེ་བ་དང་། ངོ་ཚ་མཁྱེན་ཅིང་འཇམ་དེས་ཅན་དུ་བསླབས་ཏེ། སྲིད་དང་འདོད་པ་དང་མི་མཐུན་པ། རྒྱལ་རིགས་ཀྱི་ཆོས་མ་ཡིན་པ། སྙན་དངགས་དང་མི་མཐུན་པ། ཆོས་ལ་བསྐུལ་མ་འདེབས་ཤིང་སྙིང་རྗེ་དང་ལྡན་པར་བགྱི་བ་དོན་དུ་སྒྲུབ་ཅིང་ཆེད་ཆེར་བགྱིས་ནས་ཐབས་ཀྱིས་བག་འབེབས་སོ། །ཉི་འོག་གི་རྒྱལ་པོའི་ཕོ་ཉ་དག་དང་ཡང་བཤེས་ཤིང་འགྲུལ་ལ། འདི་ཉིད་ཀྱང་རྒྱལ་པོའི་གཙུག་ལག་གི་རྒྱུས་ལ་མི་མཁས་པའང་མ་ལགས་ཏེ། དེ་བས་ན་བདག་ཅག་ནི་འདི་ལ་གློ་བ་མི་ཆེས་སོ། །དེ་ནས་རྒྱལ་པོ་དེ་ལ་དབྱེན་གྱི་ཐབས་ཡང་དང་ཡང་དུ་ལན་དུ་མར་ཕན་པར་འདོད་པ་བཞིན་དུ་མི་མང་པོས་སྨྲས་པ་དང་། བྱང་ཆུབ་སེམས་དཔའ་ལ་ཡིད་མི་ཆེས་པར་གྱུར་ཏེ། བྱམས་པ་དང་བཀུར་སྟི་ཆུང་ཞིང་སེམས་སྔོན་དང་མི་འདྲ་བར་གྱུར་ཏོ། །འབྲུག་སྒྲ་དྲག་པོའི་སེར་བ་འདྲ་བ་ཡིས། །དབྱེན་གྱི་སེར་བ་རྡོ་རྗེ་བབ་ན་ནི། །མི་ཙམ་ཚོད་ཀྱི་མཛའ་བ་བརྟན་པ་དག །ཉམས་ཤིང་ཞིག་པར་མི་འགྱུར་སུ་ཞིག་ཡོད། །དེ་ནས་རྒྱལ་པོ་དེ་བྱང་ཆུབ་སེམས་དཔའ་དེ་ལ་བག་མི་འབེབས་ཤིང་། དགའ་དགའ་ལྟར་མི་བྱེད་ལ། བཀུར་སྟི་ཆུང་བར་གྱུར་ནས་སྔོན་བཞིན་དུ་རིམ་གྲོ་མི་བྱེད་པར་གྱུར་ཏོ། །བྱང་ཆུབ་སེམས་དཔའ་ཡང་སེམས་གཙང་བས་རྒྱལ་པོ་རྣམས་ནི་བྱ་བ་མང་པོས་བྲེལ་ཏོ་སྙམ་ནས། །དེ་ལྟར་གྱུར་པ་ཡིད་ལའང་མི་བྱེད་ན། དེའི་འཁོར་ན་འཁོད་པ་རྣམས་གུས་པ་དང་རིམ་གྲོ་བྱེད་པ་ལ་གཡེལ་བར་གྱུར་པ་མཐོང་བ་དང་། རྒྱལ་པོའི་ཐུགས་མི་དགྱེས་པར་གྱུར་པ་ཤེས་ནས་ཀུན་དུ་རྒྱུའི་ཡོ་བྱད་དབྱིག་པ་གསུམ་དང་། རིལ་བ་སྤྱི་བླུགས་ལ་སོགས་པ་ཁྱེར་ཏེ་འགྲོ་བར་ཆས་སོ། །དེ་ལྟར་གྱུར་པ་རྒྱལ་པོ་དེས་ཐོས་ནས། ད་དུང་ཁོན་བྱུང་བ་ཉིད་དུའང་མ་གྱུར་བས་དེས་ཤིང་དུལ་བའི་ཚུལ་བསྟན་ཏེ། དེའི་དྲུང་དུ་སོང་ནས། རྟབ་རྟབ་པོར་གྱུར་པ་འདྲ་བར་བྱས་ཏེ། སླར་བཟློག་པར་འདོད་པ་བཞིན་དུ་སྨྲས་པ། ཅི་ཕྱིར་འདི་ལྟར་ཕྲལ་ལ་བདག་བོར་ཏེ། ཁྱོད་ནི་འགྲོ་བར་ཆས་པ་བཞིན་དུ་སེམས། །ནོངས་པར་དོགས་པ་འགའ་ཞིག་བྱུང་བའི་གཞི། །བདག་གི་ནོངས་པ་ཁྱོད་གྱིས་མཐོང་ངམ་ཅི། །དེ་ནས་བྱང་ཆུབ་སེམས་དཔས་དེ་ལ་སྨྲས་པ། །བདག་ནི་འཕྲལ་ལ་འདི་ལྟར་མི་མཆི་བཞིན། ། བཀུར་སྟི་ཆུང་བ་ཙམ་གྱིས་ཁྲོས་མ་ལགས། །ཁྱོད་ནི་ཆོས་ཀྱི་སྣོད་དུ་མ་གྱུར་ཅིང་། །གཡོ་དང་བཅས་པས་བདག་ནི་འདི་ནས་མཆི། །དེ་ནས་རྒྱལ་པོ་དེའི་ཁྱི་གནང་ཆེན་པོ་ཞིག་ཁྲོས་ཤིང་ཟུགས་ཏེ་སོ་གཙིགས་ནས་དེར་ཟར་འོངས་པ་བསྟན་ནས་ཡང་སྨྲས་པ། རྒྱལ་པོ་ཆེན་པོ་མི་མ་ལགས་པ་འདིས་མཆེ་བཞི་བགྱིས་པ་གཟིགས་སུ་གསོལ། ཁྱི་འདི་སྔོན་ནི་ཁྱོད་ཀྱི་རྗེས་འབྲང་ཞིང་། བདག་ལ་རབ་ཏུ་དགའ་བར་བགྱིད་པ་ལས། །མཛད་སྟངས་གསང་བ་ཤེས་པར་མ་གྱུར་ནས། །ཟུགས་ཤིང་ཟ་བས་ཁྱོད་ཀྱི་དགོངས་པ་བསྟན། །བདག་ལ་མ་གུས་རྩུབ་པ་ཅུང་ཟད་ཅིག །ཁྱོད་ལས་ངེས་པར་འདི་ཡིས་ཐོས་ལགས་གྲང་། དེ་བས་འདིས་ཀྱང་རྗེས་སུ་འབྲངས་པར་གྱུར། །འཁོར་རྣམས་སྤྱོད་པ་ཁྱོད་ནི་དགྱེས་པར་བགྱིད། །དེ་ནས་རྒྱལ་པོ་དེ་རྟགས་ལ་བབ་པ་དང་། ངོ་ཚ་བས་མགོ་སྨད་དེ་འདིའི་བློ་རྣོ་བ་དེས། །སེམས་དུལ་ནས་མི་དགའ་བར་གྱུར་ཏེ་ད་ནི་གཡོ་བྱ་བའི་དུས་ལ་མ་བབ་པོ་སྙམ་ནས། བྱང་ཆུབ་སེམས་དཔའ་ལ་ཕྱག་འཚལ་ཏེ་སྨྲས་པ། ཁྱོད་ལ་གླེངས་ནས་བཀའ་མཆིད་འདི་ལྟ་བུ། །བདག་ཅག་ཚོགས་པའི་ནང་དུ་བགྱི་བ་མེད། །དོགས་པའི་དབང་གིས་བདག་གི་ཡལ་བར་བོར། །དེ་བས་བཟོད་པར་མཛོད་ལ་མ་བཞུད་བཞུགས། །བྱང་ཆུབ་སེམས་དཔས་སྨྲས་པ། བདག་ནི་བཀུར་སྟི་ཆུང་བའི་ཕྱིར་མི་བཟོད་དེ་མཆི་བ་མ་ལགས་ཀྱི། རྒྱལ་པོ་ཆེན་པོ་ང་ནི་མཆིས་པའི་དུས་མ་ལགས་པའི་སླད་དུ་མ་མཆིས་སོ། །ཁྱོད་ཀྱིས་གཟིགས་སུ་གསོལ། བཀུར་སྟི་ཅུང་ཟད་བྲི་བར་གྱུར་པའི་ཚེ། །བདག་རང་ལངས་ཏེ་སོང་བར་མ་གྱུར་ན། །ཕོངས་བཞིན་འདུག་པ་ངན་ཞིང་བྱིས་པའི་ཆོས། །མ་བལྟས་ན་ནི་སླད་ཀྱི་བསྐྲད་པར་འགྱུར། །དེ་བས་ད་ནི་འཆི་བའི་དུས་ལ་བབ། །མི་དགའ་བཞིན་དུ་མཆིས་སུ་ག་ལ་རུང་། །ལན་ཅིག་ཙམ་ཞིག་སྨ་བབ་གྱུར་པ་ཡིས། །སྔོན་ཆད་ཕན་བཏགས་པ་དང་ག་ལ་མཉམ། བྱམས་པའི་རླན་མེད་བརྟེན་དུ་མི་རུང་སྟེ། །ཁྲོན་པ་སྐམ་པོ་ཆུ་འདོད་མི་བརྟན་བཞིན། །དེ་ལ་རབ་ཏུ་བསྒྲིམས་ཏེ་དོན་བསྒྲུབས་ཀྱང་། དེ་དོན་ཆུང་ཞིག་རྙོགས་པ་ཅན་དུ་འགྱུར། །བདེ་བ་འདོད་ཅིང་ཉོན་མོངས་མི་འདོད་པས། །མཚོ་ཆེན་སྟོན་ཀའི་ཆུ་གཙང་འདྲ་བར་ནི། །རབ་ཏུ་དང་བ་ཉིད་ལ་བརྟེན་པའི་རིགས། །ཚུལ་འདི་འཇིག་རྟེན་དག་ན་གསལ་བར་གྲགས། །གུས་པར་བྱེད་ཀྱང་གཞན་དུ་ཕྱོགས་པ་དང་། །གཞན་དུ་ཕྱོགས་ཀྱང་ཞུམ་པས་དེ་ལ་ལྟ། །སྔོན་ཆད་ཕན་བཏགས་དྲིན་དུ་མི་གཟོ་བ། །མི་ཡི་གཟུགས་ཏེ་ཅི་ལགས་གཏོལ་མ་མཆིས། །མ་བརྟེན་པ་དང་རབ་ཏུ་བརྟེན་དྲགས་དང་། །སླང་བ་དྲགས་ན་བྱམས་པ་མེད་པར་འགྱུར། །གནས་པའི་སྐྱོན་ལས་མཛའ་བའི་མཇུག་འདི་ནི། །སྲུང་བར་འཚལ་གྱིས་བདག་ནི་རེ་ཤིག་མཆི། །རྒྱལ་པོས་སྨྲས་པ། ཁྱོད་གལ་ཏེ་མི་འགྲོར་མི་རུང་ཡང་དག་པར་སེམས་ན། ད་རུང་སླར་ཡང་འདིར་བྱོན་ཅིང་བདག་སྤྱན་རས་ཀྱིས་བཙའ་བའི་རིགས་སོ། །ཧ་ཅང་མ་བརྟེན་པ་ལས་ཀྱང་འཁོན་འབྱུང་བར་བགྱི་བ་མི་རིགས་སོ། །བྱང་ཆུབ་སེམས་དཔས་སྨྲས་པ། རྒྱལ་པོ་ཆེན་པོ་འཇིག་རྟེན་ན་གནས་པ་འདི་དག་ནི་བར་ཆད་མང་ལ་གནོད་པ་དང་དགྲ་མང་པོས་གདོན་མི་འཚལ་བར་མཆིའོ་ཞེས་མཆིད་ཀྱིས་འཚལ་དུ་མི་རུང་ངོ་། །གལ་ཏེ་མཆིས་པའི་སྐབས་དང་ལྡན་ན་ཁྱོད་ཀྱི་ཞལ་ལྟའོ་ཞེས་བདག་ཉིད་ཆེན་པོ་དེས་རྒྱལ་པོ་དེ་ཚིག་འཇམ་པོས་དགའ་བར་བྱས་ནས། རྒྱལ་པོ་དེས་གནང་ཞིང་བཀུར་སྟི་བྱས་ནས་དེའི་ཡུལ་ནས་བྱུང་སྟེ་སོང་ངོ་། །དེ་ཁྱིམ་པ་བརྟེན་པ་དེས་སེམས་མི་བདེ་བར་གྱུར་ནས། དགོན་པའི་གནས་གཅིག་གཅིག་ཏུ་གནས་ཏེ། བློ་བསམ་གཏན་ལ་བརྩོན་ཞིང་དེ་ན་གནས་པ་ལས། རིང་པོ་མ་ལོན་པར་བསམ་གཏན་བཞི་དང་། མངོན་པར་ཤེས་པ་ལྔ་ཐོབ་པར་གྱུར་ཏོ། །རབ་ཏུ་ཞི་བའི་བདེ་བའི་རོ་མྱོང་བ་དེ་རྒྱལ་པོ་དེ་ལ་སྙིང་བརྩེ་བའི་དྲན་པ་བྱུང་བར་གྱུར་ནི། རྒྱལ་པོ་དེ་ད་ཙམ་ཇི་ལྟ་བ་ཞིག་ཏུ་འདུག་སྙམ་པ་དང་། དེ་ནས་དེས་འདི་ལྟར་བློན་པོ་དེ་དག་གིས་ལྟ་བ་ངན་པ་གང་ལ་ཆགས་པ་དེ་དག་ལ་བལྟར་བཅུག་པར་མཐོང་ངོ་། །དེ་ལ་བློན་པོ་ལ་ལས་ནི་རྒྱུ་བརྟག་མི་བཟོད་པའི་དཔེ་རྣམས་ཀྱིས་རྒྱུ་མེད་པའི་ལྟ་བ་ལ་དྲངས་སོ། །པདྨའི་སྡོང་བུ་ལོ་མ་ཟེ་བའི་སྙིང་པོ་དང་། ཁ་དོག་དབྱིབས་དང་འཇམ་ལ་སོགས་པའི་རྒྱུ་ནི་གང་། བྱ་ཡི་འདབ་མ་སྣ་ཚོགས་རི་མོ་འདྲི་བ་སུ། འགྲོ་བ་འདི་དག་ངོ་བོ་ཉིད་ཀྱིས་དེ་བཞིན་ངེས། ཁ་ཅིག་ནི་དབང་ཕྱུག་གིས་རང་གི་བློས་སྦྱར་བ་རྒྱུ་ཡིན་པར་སྟོན་ཏེ། འདི་དག་ཐམས་ཅད་རྒྱུ་མེད་འབྱུང་བར་མི་རིགས་ཏེ། འདི་ལ་ཀུན་གྱི་བདག་པོ་མཐའ་ཡས་གཅིག་གཅིག་ཡོད། །སྣ་ཚོགས་འདི་དག་རང་དགར་བྱེད་པ་ངེས་པར་ཡོད། འཇིག་རྟེན་བྱས་ནས་ཕྱིས་ཀྱང་མཉམ་དུ་མེད་པར་བྱེད། ཡང་ལ་ལ་ནི་བདེ་བ་དང་མི་བདེ་བ་འདི་དག་ཐམས་ཅད་སྔོན་གྱི་ལས་ཀྱིས་བྱས་ཀྱི། འབད་པའི་མཐུས་བྱས་པ་ནི་མ་ཡིན་ནོ། །ཞེས་དེ་ལ་དེ་ལྟར་འཛིན་དུ་བཅུག་གོ །དངོས་པོ་མཐའ་ཡས་སོ་སོར་གནས་པ་མང་པོ་རྣམས། གཅིག་པུས་དུས་གཅིག་ཏུ་ནི་ཇི་ལྟར་བྱ་བར་ནུས། བདེ་བ་བྱེད་ལ་མཁས་པའང་སྡུག་བསྔལ་མྱོང་བར་འགྱུར། དེ་བས་འདི་དག་ལ་ཐམས་ཅད་སྔོན་གྱི་ལས་ལས་གྱུར། །གཞན་དག་ནི་ཆད་པར་ལྟ་བའི་གཏམ་གྱི་དེ་འདོད་པའི་ལོངས་སྤྱོད་བྱེད་དུ་གཞུག་པའི་ཕྱིར་སྨྲས་པ། རྣམ་པ་སྣ་ཚོགས་ཁ་དོག་ཡོན་ཏན་ལྡན་པའི་ཤིང་། །ལས་ཀྱིས་བྱས་པ་མ་ཡིན་འོན་ཀྱང་འབྱུང་བར་འགྱུར། ཆུད་གཟན་རྣམས་ཀྱང་སླར་ནི་དེ་བཞིན་སྐྱེས་མི་འགྱུར། །འཇིག་རྟེན་དེ་དང་འདྲ་བར་བདེ་ལ་གཞོལ་བར་མཛོད། །ཁ་ཅིག་ནི་དེ་ལ་རྒྱལ་རིགས་ཀྱི་གཙུག་ལག་ལས་འབྱུང་བ་གཡོ་དང་དགྲ་ཐབས་དང་འབྲེལ་བའི་སྙིང་རྗེ་མེད་ཅིང་སྐྱོན་དང་བཅས་པ་ཆོས་དང་འགལ་བ་ལ་འདི་ནི་རྒྱལ་པོའི་ཆོས་ལགས་སོ་ཞེས་གསོལ་ཏོ། །བརྟེན་པའི་མི་རྣམས་ལ་ནི་གྲིབ་མའི་ལྗོན་ཤིང་བཞིན། །དེ་དག་ཇི་སྲིད་དགོས་པའི་དུས་ལ་མ་བབ་པ། །དེ་སྲིད་བྱས་པ་གཟོ་བས་རང་གི་གྲགས་པ་བསྲུང་། །དགོས་པ་བྱུང་ན་མཆོད་སྦྱིན་ཕྱུགས་བཞིན་དེ་དག་སྤྱད། །དེ་ལྟར་བློན་པོ་དེ་དག་གིས་རྒྱལ་པོ་དེ་ལྟ་བ་ངན་པའི་ལམ་དེ་དང་དེ་དག་ཏུ་དྲངས་པར་གྱུར་ཏོ། །དེ་ནས་བྱང་ཆུབ་སེམས་དཔའ་རྒྱལ་པོ་དེ་སྐྱེ་བོ་སྡིག་པ་ཅན་རྣམས་དང་བརྟེན་ཅིང་བློ་གཞན་གྱི་དྲིང་ལ་འཇོག་པས་ལྟ་བ་ངན་པའི་གཡང་སར་ལྟུང་དུ་ཉེ་བར་རྟོགས་ནས་དེ་ལ་སྙིང་བརྩེ་བར་གྱུར་ཏེ། །དེ་ལ་བཟློག་པའི་ཐབས་བསམས་པ། ཡོན་ཏན་གོམས་པས་དགེ་བ་རྣམས། །ལེགས་པར་བྱས་པ་སེམས་ལ་གནས། །པདྨའི་འདབ་ལས་ཆུ་བོ་བཞིན། ཉེས་པར་བྱས་པ་མི་ཆགས་སོ། །དེ་ནས་བྱང་ཆུབ་སེམས་དཔས་བསམས་པ། ད་ནི་དེའི་དུས་ལ་བབ་པོ་སྙམ་ནས་རང་གི་དཀའ་ཐུབ་ཀྱི་ནགས་སུ་སྤྲེའུ་ཆེན་པོ་ཅིག་མངོན་པར་སྤྲུལ་ནས། །རྫུ་འཕྲུལ་གྱི་མཐུས་དེའི་པགས་པ་བཤུས་ཏེ། གཞན་མི་སྣང་བར་བྱས་ནས་དེ་སྤྲེའུའི་ལྤགས་པ་ཆེན་པོ་སྤྲུལ་པ་དེ་གྱོན་ཏེ། རྒྱལ་པོ་དེའི་ཕོ་བྲང་གི་སྒོར་ཕྱིན་པ་དང་། ཆབ་སྒོ་བས་ཀྱང་སྦྲན་ནས་རྒྱལ་པོའི་འཁོར་ཚོགས་པས་གོ་རིམ་བཞིན་དུ་མི་འཁྲུག་པར་འཁོད་པ། མཐའ་ནི་མཚོན་ཆ་ཐོགས་པ་རྣམས་ཀྱིས་བསྐོར། བློན་པོ་དང་བྲམ་ཟེ་དང་ཕོ་ཉ་དང་ནང་མིའི་གཙོ་བོ་རྣམས་ཀྱིས་ནི་གང་། །སྐྱེ་བོ་རྣམས་ཀྱི་ཆས་ནི་དུལ་ཞིང་བརྟན་ལ་རྒྱ་ཆེ། ཆབ་སྒོ་ཆེན་པོ་ནི་ཆབ་སྒོ་བ་རལ་གྲི་དང་དབྱིག་པ་ཐོགས་པ་རྣམས་ཀྱི་བསྲུངས། མིའི་བདག་པོ་ནི་སེང་གེའི་ཁྲི་ལ་འདུག་པར་འོངས་པ། རྒྱལ་པོ་དེས་ཀྱང་བསུ་བ་ལ་སོགས་པ་དང་། འགྲོན་འོངས་པའི་བཀུར་སྟི་བྱ་བ་དང་། སྙན་པར་སྨྲ་བ་དང་། བསྟན་གདིང་བ་བྱས་ནས། སྤྲེའུའི་ལྤགས་པ་གྱོན་པ་ངོ་མཚར་ཆེར་བཟུང་ནས་དྲིས་པ། འཕགས་པ་ལ་སྤྲེའུའི་ལྤགས་པ་འདི་ཕུལ་བས་བདག་ཉིད་ཕན་པ་ཆེན་པོ་བཏགས་པ་སུ་ཞིག་ལགས། བྱང་ཆུབ་སེམས་དཔས་སྨྲས་པ། རྒྱལ་པོ་ཆེན་པོ་འདི་ནི་བདག་ཉིད་ཀྱིས་རྙེད་ཀྱི་གཞན་སུས་ཀྱང་མ་སྩལ་ཏོ། ས་གཞི་རང་བཞིན་གྱིས་འཁྲང་བ་ལ། རྩྭ་ཀུ་ཤ་དང་རྩྭ་ཙམ་བཏིང་བ་ལ་མཆིས་ཤིང་ཉལ་བས་གདུངས་ན་ཆོས་ཀྱི་ཆོ་ག་བདེ་བླག་ཏུ་བགྱི་བའི་རྔོ་མི་ཐོགས་ལ། སྤྲེའུ་ཆེན་པོ་འདིའང་དཀའ་ཐུབ་ཀྱི་ནགས་ཚལ་ན་མཆིས་པ་བདག་གིས་མཐོང་ནས། དེ་ལ་བདག་གིས་བསམས་པ། བདག་གི་ཆོས་སྤྱོད་པའི་ཡོ་བྱད་སྤྲེའུ་འདིའི་ལྤགས་པ་རྙེད་དོ་སྙམ་མོ། །འདི་ལ་འདུག་གམ་ཉལ་ན་ཆོས་ཀྱང་བསྒྲུབ་ནུས་ལ། རྒྱལ་པོའི་མལ་སྟན་བཟང་པོ་ལ་མ་ཆགས་པར་ཡང་རང་གི་ཆོས་ཀྱི་ཆོ་ག་བསྒྲུབ་ཏུ་རུང་ངོ་སྙམ་ནས་བདག་གིས་དེའི་ལྤགས་པ་འདི་བཅངས་ཏེ། དེ་ཡང་མ་མཆིས་པར་བགྱིས་སོ། །དེ་སྐད་ཟེར་བ་ཐོས་ནས་རྒྱལ་པོ་དེ་དུལ་ཞིང་དེས་པའི་ཚུལ་བཟུང་སྟེ། བྱང་ཆུབ་སེམས་དཔའ་ལ་ཅི་ཡང་སླར་མ་སྨྲས་སོ། །དེ་ངོ་ཚ་བར་གྱུར་ནས་ཅུང་ཞིག་མགོ་སྨད་དེ་འདུག་གོ །དེ་ནས་བློན་པོ་དེ་དག་སྔོན་ཡང་སེམས་དཔའ་ཆེན་པོ་དེ་ལ་སེམས་མི་བཟོད་ཅིང་སྨྲ་བའི་སྐབས་རྙེད་པས་འཛུམ་དམུལ་ཏེ་མདངས་ཕྱུང་ནས་རྒྱལ་པོ་ལ་བལྟས་ནས་བྱང་ཆུབ་སེམས་དཔའ་བསྟན་ཏེ་སྨྲས་པ། ཀྱེ་མའོ་ཁྱོད་ཀྱི་ཆོས་ལ་རྗེས་སུ་དགའ་བའི་བློ་ལ་ལྟོས། ཨེ་མའོ་རྩོལ་ཕོད་པའི་མཐུ་ཆེ་ཞིང་བརྟན་ཀྱང་དཀའ་ཐུབ་ཀྱི་གནས་ན་འདུག་བཞིན་དུ་གཅིག་པུས་དཀའ་ཐུབ་སྤྱོད་པས་ལུས་ཉམས་ཆུང་ཡང་སྤྲེའུ་ཆེན་པོ་འདི་ལྟ་བུ་སོང་བ་ངོ་མཚར་ཆེའོ། །དཀའ་ཐུབ་གྲུབ་པར་གྱུར་ཅིག །དེ་ནས་བྱང་ཆུབ་སེམས་དཔས་མ་ཁྲོས་པར་སྨྲས་པ། ཁྱེད་རང་གི་ལྟ་བ་བཟང་པོ་ལ་མི་ལྟ་བར། འདི་ལྟར་བདག་སྨད་པར་མི་རིགས་སོ་འདིས་ནི་མཁས་པའི་གྲགས་པ་ཕྱིན་པར་མི་འགྱུར་རོ། །ཚེ་དང་ལྡན་པ་དག་དགོངས་སུ་གསོལ། བདག་གི་ལྟ་ལ་གནོད་པའི་ཚིག །གང་གིས་གཞན་ལ་སྨོས་བྱེད་པ། །དེ་ནི་བདག་ལ་གནོད་པ་ཡིས། །གཞན་གྱི་མི་སྙན་སྒྲོགས་པར་བྱེད། དེ་ལྟར་བདག་ཉིད་ཆེན་པོ་དེས། བློན་པོ་དེ་དག་ལ་སྤྱི་སྨྲས་ཏེ། སོ་སོར་སྨྲ་བར་འདོད་ནས་བློན་པོ་རྒྱུ་མེད་པར་སྨྲ་བ་དེ་ལ་སྨྲས་པ། འགྲོ་བ་ངོ་བོ་ཉིད་ཀྱིས་དེ་བཞིན་ཁྱོད་ཟེར་ན། གལ་ཏེ་དེ་ལྟར་བདེན་ན་བདག་ལ་ཅི་ཕྱིར་སྨད། །སྤྲེའུ་དེ་ངོ་བོ་ཉིད་ཀྱིས་ཤི་བར་གྱུར་པ་ལ། །བདག་ལ་ཅི་ཕྱིར་སྡིག་འགྱུར་བསད་དུ་མི་བཟད་དམ། དེ་སྟེ་དེ་བསད་དེ་བདག་ལ་སྡིག་ཏུ་འགྱུར་ན་ནི། །འོ་ན་འདི་ནི་རྒྱུ་ལས་གྱུར་བར་འགྲུབ་པར་འགྱུར། །དེ་བས་རྒྱུ་མེད་སྨྲ་བ་འདི་ནི་དོར་བའི་རིགས། འདི་ནི་དེ་སྐད་སྨྲ་བ་ཁྱོད་ལ་མི་རིགས་འགྱུར། །གལ་ཏེ་པདྨའི་སྡོང་བུ་སྐྱེས་ལ་སོགས་འདྲ་ན། །འོ་ན་རྟག་ཏུ་རྒྱུ་མེད་པར་ཡང་ཅི་མི་འབྱུང་། །ཆུ་ལ་སོགས་དང་ས་བོན་དག་གིས་དེ་བྱས་ངེས། །དེ་དག་ཡོད་ན་སྐྱེ་ལ་མེད་ན་མི་སྐྱེའོ། །གཞན་ཡང་ཚེ་དང་ལྡན་པ་དག་རེ་ཤིག་ལེགས་པར་རྟོགས་ཤིག །གཏན་ཚིགས་བཅས་པར་རྒྱུ་མེད་ཟེར་བ་ནི། །བདག་ཉིད་ཀྱི་ནི་ཁས་འཆེས་སུན་ཕྱུང་ངོ་། །དེ་སྟེ་གཏན་ཚིགས་བསྟན་པར་མི་འདོད་ན། །ཁས་འཆེ་ཙམ་གྱི་འདི་ལ་ཅི་ཞིག་ཕན། །གང་ཞིག་ཁ་ཅིག་ཏུ་ནི་རྒྱུ་རྐྱེན་མ་མཐོང་བས། །དེ་ཉིད་ཀྱི་ནི་ཐམས་ཅད་རྒྱུ་མེད་སྨྲ་ན་ནི། །དེ་དག་རྒྱུ་དང་བཅས་པར་མངོན་དུ་མཐོང་བཞིན་དུ། །དེ་ལ་སྡང་བས་འགལ་བའི་ཚིག་ངན་སྨྲས་པར་འགྱུར། །གལ་ཏེ་གང་ནའང་རྒྱུ་ནི་ཡོད་པར་མ་མཐོང་ན། །དེ་ནི་མེད་ཅེས་ངེས་པར་ཅི་ལྟར་སྨྲ་བར་འགྱུར། །ཉི་མ་ནུབ་ཚེ་ཉི་མའི་དཀྱིལ་འཁོར་དྲི་མེད་བཞིན། །ཡོད་བཞིན་དུ་ཡང་རྒྱུ་རྐྱེན་གཞན་གྱིས་མི་སྣང་མོད། །གཞན་ཡང་ཁྱེད་ཅག་ཡིད་དུ་འོང་བའི་ཡུལ་ནི་བདེ་བ་འདོད་ཕྱིར་བརྟེན། །དེ་དང་འགལ་བ་དག་ནི་རྟེན་པར་ཡོད་མི་འདོད། དེ་ཡི་ཕྱིར་ཡང་རྒྱལ་པོ་དག་ལ་བརྟེན་པར་བྱེད། །རྒྱུ་ཡང་ཡོད་པ་མ་ཡིན་ཞེས་ནི་རྟག་ཏུ་སྨྲ། །གལ་ཏེ་དངོས་རྣམས་དེ་ལྟ་ཡིན། །རྒྱུ་ཡང་ཡོད་པར་མ་མཐོང་ལ། །རྒྱུ་མེད་གྲུབ་ན་སྤྲེའུ་བསད་ལ། །བདག་ལ་སྨད་དུ་ཅི་ཞིག་ཡོད། །དེ་ལྟར་བདག་ཉིད་ཆེན་པོ་དེས། །རྒྱུ་མེད་པར་སྨྲ་བ་དེ་རྒྱུ་གསལ་བ་རྣམས་ཀྱིས་སྤོབས་པ་མེད་པར་བྱས་ནས། དབང་ཕྱུག་རྒྱུར་སྨྲ་བ་དེ་ལ་བོས་ཏེ་སྨྲས་པ། ཚེ་དང་ལྡན་པ་དག་གིས་ཀྱང་བདག་དེ་ལྟར་སྨད་པ་མི་རིགས་སོ། །ཐམས་ཅད་ཀྱི་རྒྱུ་དབང་ཕྱུག་ཡིན་པར་ཁྱོད་འདོད་ན། ལྟོས་ཤིག །གལ་ཏེ་ཐམས་ཅད་དབང་ཕྱུག་བྱེད་ན་ནི། །འོ་ན་སྤྲེའུ་དེ་དེ་ཉིད་ཀྱིས་བསད་པས། ཁྱོད་ནི་བདག་ལ་ཅི་ཕྱིར་སེམས་མི་དགའ། །གཞན་གྱི་ཉེས་པའང་བདག་ལ་ཅི་ཕྱིར་བགོ །སྤྲེའུ་ཆེན་པོ་དཔའ་བོ་དེ་ཤི་བ། །དེ་ཡིས་སྙིང་རྗེ་བལྟས་ཏེ་མ་བསད་ན། །འགྲོ་བའི་རྒྱུ་ནི་དབང་ཕྱུག་ཡིན་ཞེས་སུ། །ཁྱོད་ཅག་ཅི་ཕྱིར་རྒྱ་ཆེན་སྒྲོགས་པར་བྱེད། །ཀྱེ་བཟང་པོ་གཞན་ཡང་ཐམས་ཅད་དབང་ཕྱུག་གིས་བྱས་པར་ལྟ་ན། །དབང་ཕྱུག་ལ་ནི་རེ་བ་ཡིས། །ཅི་ཕྱིར་ཕྱག་ལ་སོགས་པ་འཚལ། ཁྱེད་ཀྱི་དེ་ནི་རང་འབྱུང་སྟེ། །གང་གིས་བྱས་པ་དེའི་ལས་ཡིན། །མཆོད་སྦྱིན་ཁྱོད་ཀྱིས་གང་བྱས་པ། །དེ་ནི་མི་བྱེད་མ་ཡིན་ཏེ། །བདག་ཉིད་འབྱོར་པ་ཐོབ་པའི་ཕྱིར། །གང་བྱེད་དེ་ཉིད་བྱེད་པ་པོ། །སྡིག་པ་ཆེན་པོ་མ་ལུས་པ། །གལ་ཏེ་དབང་ཕྱུག་བྱེད་ན་ནི། །དེ་ལ་གུས་པར་བྱེད་པ་དག །ཡོན་ཏན་ཅི་ཞིག་མཐོང་ནས་བྱེད། །སྡིག་པས་འཇིགས་ནས་དེ་དག་ཀུན། །གལ་ཏེ་དེ་ནི་མི་བྱེད་ན། །ཐམས་ཅད་དབང་ཕྱུག་གིས་བྱས་ཞེས། །དེ་བས་སྨྲ་བ་མི་རིགས་སོ། །དེ་ཡང་དབང་ཕྱུག་འགྱུར་ན་ནི། །ཆས་སམ་གཞན་ལས་འགྱུར་གྲང་ན། །གལ་ཏེ་ཆོས་ལས་འགྱུར་ན་ནི། །དེ་ཡི་སྔ་རོལ་དབང་ཕྱུག་མིན། །གང་དག་གཞན་གྱིས་བྱས་འགྱུར་བ། དེ་ནི་བྲན་དུ་གྱུར་པ་ཉིད། །དབང་ཕྱུག་དེ་ནི་ཅི་ཡི་ཕྱིར། །རྒྱུ་ཡིས་བྱས་པར་མི་འགྱུར་གྱི། །དེ་ལྟར་གྱུར་ཀྱང་གུས་ཤིང་ཆགས་པས་རིགས་པ་དང་མི་རིགས་པ་དོར་ནས། གལ་ལྟེ་འགྲོ་བ་མ་ལུས་པ་ཡི་རྒྱུར། །དབང་ཕྱུག་ཆེན་པོ་ཉིད་ནི་ཁྱོད་འདོད་ན། །དབང་པོས་སྤྲེའུ་རྒྱལ་པོ་བསད་པའི་སྐྱོན། །བདག་ལ་སྐུར་བ་བཏབ་པར་མི་རིགས་སོ། །དེ་ལྟར་བདག་ཉིད་ཆེན་པོ་དེས་དབང་ཕྱུག་རྒྱུ་ཡིན་པར་སྨྲ་བ་དེ་ལ་གཏན་ཚིགས་བཟང་པོ་རྣམས་ཀྱིས་ཤགས་མེད་པར་བྱས་ན། སྔོན་གྱི་ལས་ཀྱིས་བྱས་པར་སྨྲ་བ་དེ་དག་ལ་བོས་ཏེ་སྔོན་དུ་ལྟར་བཅུག་ནས་སྨྲས་པ། ཁྱོད་རྣམས་ཀྱང་བདག་ལ་སྨོད་པ་ལེགས་པ་མ་ཡིན་ནོ། །འདི་དག་ཐམས་ཅད་སྔོན་གྱི་ལས་ཀྱིས་བྱས་སོ་ཞེས་ང་རྒྱལ་སྐྱེས་པ་དེའི་ཕྱིར་ཁྱེད་ལ་སྨྲའོ། །གལ་ཏེ་ཐམས་ཅད་སྔོན་གྱི་ལས་ཀྱིས་བྱས་ན་ནི། །དེ་བས་སྤྲེའུ་འདི་བདག་གིས་བསད་པའི་ཉེས་པ་མེད། །སྔོན་གྱི་ལས་ཀྱིས་དགོན་པའི་མེས་ཚིག་གྱུར་པ་ལ། གང་ཕྱིར་བདག་ལ་སྨད་པའི་སྡིག་པ་ཅི་ཞིག་ཡོད། །དེ་སྟེ་བདག་གིས་སྤྲེའུ་བསད་སྡིག་ཡོད་ན། །བདག་གིས་བསད་ཀྱིས་སྔོན་གྱི་ལས་མ་ཡིན། །གལ་ཏེ་ལས་དང་ལས་ཀྱི་རྒྱུ་འདོད་ན། །དེ་ལྟར་ཡིན་ན་སུ་ཡང་གྲོལ་མི་འགྱུར། །སྡུག་བསྔལ་རྒྱུ་ལའང་གལ་ཏེ་བདེ་བར་འགྱུར། །བདེ་བ་བསྒྲུབ་ལའང་སྡུག་བསྔལ་གནས་པར་འགྱུར། །དེ་ལྟར་འགྱུར་དང་བདེ་དང་སྡུག་བསྔལ་དག །སྔོན་གྱི་ལས་ཀྱིས་བྱས་པ་ངེས་པར་སྔོན། བདེ་དང་སྡུག་བསྔལ་དེ་ལྟར་གྱུར་པའང་མེད། །དེ་བས་སྔོན་གྱི་ལས་ནི་རྒྱུ་མ་ཡིན། །གསར་དུ་བྱས་པའི་ལས་ཀྱང་མེད་པར་འགྱུར། །དེ་མ་གྲུབ་ན་སྔ་མའང་ཇི་ལྟར་གྲུབ། །སྔོན་གྱི་ལས་ཀྱིས་ཀུན་བྱས་ཞེས། འོན་ཀྱང་དེ་ལྟར་སེམས་ན་ནི། །ཅི་ཡི་ཕྱིར་ན་སྤྲེའུ་བསད་པ། །བདག་གིས་བྱས་པར་ཡོངས་སུ་བརྟགས། །དེ་ལྟར་བདག་ཉིད་ཆེན་པོ་དེས་སླར་ལོག་ཏུ་མེད་པའི་གཏན་ཚིགས་རྣམས་ཀྱིས། །དེ་མི་སྨྲ་བའི་དཀའ་ཐུབ་བླངས་པ་བཞིན་དུ་བྱས་ནས། །ཆད་པར་སྨྲ་བ་དེ་ལ་འཛུམ་དམུལ་ཏེ་སྨྲས་པ། ཚེ་དང་ལྡན་པ་དག་ཅིའི་ཕྱིར་བདག་ལ་སྨོད་པ་ལ་འདི་ལྟར་དགའ་བར་འགྱུར། །གལ་ཏེ་ཆད་པར་ལྟ་བ་དེ་ཁོ་ན་ཉིད་ཡིན་པར་སེམས་ན། །འཇིག་རྟེན་ཕ་རོལ་མེད་ན་སུས་ཀྱང་ཅི་ཞིག་སྤང་། སྡིག་དང་དགེ་བ་དག་ལའང་ཅི་ཞིག་འབད་དུ་ཡོད། །མཁས་པ་རྣམས་ཀྱང་རང་དགར་ཅི་བདེར་སྤྱོད་པའི་རིགས། །དེ་ལྟར་གྱུར་ན་སྤྲེའུ་དེ་བསད་ཀྱང་ཉེས་པ་མེད། །འགྲོ་བ་འཕྱ་བ་དག་གིས་འཇིགས་ནས་སུ། །སྡིག་པ་སྤོང་ཞིང་དགེ་ལ་གནས་ན་ནི། །བདག་གི་ཚིག་དང་མི་མཐུན་སྤྱོད་པ་ཡིས། །འགྲོ་བ་འཕྱ་བ་འདིས་ཡང་མེད་མི་འགྱུར། །འཇིག་རྟེན་ཚུལ་ལ་གནས་པར་གྱུར་ན་ནི། །རང་གི་གཞུང་ལུགས་བདེ་བ་མི་འཐོབ་སྟེ། །དེ་བས་སྨྲ་པས་འཁྲུལ་བས་དོན་མེད་འགྱུར། །འདི་ནི་བྱིས་པའི་ནང་ན་ཐ་མ་ཡིན། །གང་ཡང་ཁྱེད་ཀྱི་སྨྲས་པ། །རྣམ་པ་སྣ་ཚོགས་ཁ་དོག་ཡོན་ཏན་ལྡན་པའི་ཤིང་། །ལས་ཀྱི་བྱས་པ་མ་ཡིན་འོན་ཀྱང་འབྱུང་བར་འགྱུར། །ཆུད་གསན་རྣམས་ཀྱང་སླར་ནི་དེ་བཞིན་མི་སྐྱེ་འགྱུར། འཇིག་རྟེན་དེ་དང་འདྲ་བར་རྒྱུ་ནི་གང་ཞིག་ཡིན། དེ་ལྟར་གྱུར་ཀྱང་ཁྱེད་ཅག་ནི། །ཆད་པར་ལྟ་ལ་དགའ་འགྱུར་ན། སྤྲེའུ་འམ་ཡང་ན་མི་ཡང་རུང་། །གསོད་ལ་སྨད་དུ་ཅི་ཞིག་ཡོད། །དེ་ལྟར་སེམས་དཔའ་ཆེན་པོ་དེས་ཆད་པར་སྨྲ་བ་དེ་ལ་ལན་གདབ་པའི་རིམ་པ་ལེགས་ཤིང་གསལ་བས་ཅང་མི་སྨྲ་བར་བྱས་ནས། རྒྱལ་རིགས་ཀྱི་གཞུང་ལུགས་ལ་མཁས་པ་དེ་དག་ལ་བོས་ཏེ་སྨྲས་པ། ཁྱེད་ཅག་བདག་ལ་ཅིའི་ཕྱིར་སྨོད། གལ་ཏེ་སྲིད་གཟུགས་བའི་གཙུག་ལག་ལས་བྱུང་བའི་ཆོ་ག་རིགས་པར་སེམས་ན། །སྲིད་ཕྱིར་དགེ་བའམ་མི་དགེའང་རུང་། ཅི་ཡང་རུང་བ་བྱས་ནས་སུ། །དེ་ནས་བདག་ཉིད་ཐར་ནས་ནི། ནོར་གྱི་ཆོས་རྣམས་བསྒྲུབ་པར་བྱ། །ཞེས་ཟེར་བ་འདིའི་ཕྱིར་ཁྱོད་ལ་སྨྲའོ། །དགོས་པ་དག་ནི་ཕྱུང་བར་གྱུར་པའི་ཚེ། །མཛའ་དང་གཉེན་ལའང་དགེ་ཚུལ་མི་བལྟ་ན། སྤྲེའུ་ཉིད་ལྤགས་པའི་ཕྱིར་ནི་ངས་བསད་ན། །གཙུག་ལག་གཞུང་ལུགས་ཀྱིས་ཀྱང་སྨད་དུ་མེད། །འོན་ཏེ་སྙིང་རྗེ་མེད་ཕྱིར་སྨད་འགྱུར་རམ། །འདི་འདྲའི་ལས་དག་འབྲས་བུ་སྡུག་བསྔལ་མཐོང་། །གཞུང་ལས་སྣང་བ་བཞིན་དུ་མི་བྱེད་པར། །གང་གི་སྒོ་ནས་ཁྱོད་ནི་འདི་ལྟར་བྱེད། །གང་ན་རིགས་པའི་གཞུང་ལྡན་འདི་འདྲ་བ། །འདི་ནི་མི་རིགས་འཁྲུལ་པ་ཅི་འདྲ་གེ །ཨེ་མའོ་ཅི་རྟོལ་ཅན་གྱིས་ཟིལ་མནན་ནས། །གཙུག་ལག་ལམ་གྱི་ཆོས་མིན་ངར་བར་བྱས། །ཁྱེད་ཅག་དགའ་བ་དེ་ནི་ཡོང་མ་མཐོང་། །གཙུག་ལག་ལས་ནི་གསལ་བར་བསྟན་ཅེས་གྲག །གཞུང་ལས་བྱུང་བའི་ཚུལ་གྱི་འགྲོ་བ་ལས། སྤྲེའུ་བསད་པ་ནི་སྨད་པར་མི་རིགས་སོ། །དེ་ནས་འཁོར་གྱི་ནང་ནས་རྒྱལ་བར་གྱུར་པ། སྤོབས་པ་ཆེ་བར་གོམས་པའི་བློན་པོ་དེ་རྣམས་ཀྱང་མངོན་སུམ་དུ་ཟིལ་གྱིས་མནན་ཏེ། རྒྱལ་པོ་འཁོར་དང་བཅས་པ་སེམས་རབ་ཏུ་མགུ་བར་གྱུར་པར་ཤེས་ནས་དེ་དག་སྤྲེའུ་བསད་པ་སྙིང་ལ་གཅགས་པ་མེད་པར་བྱ་བའི་ཕྱིར་རྒྱལ་པོ་ལ་སྨྲས་པ། རྒྱལ་པོ་ཆེན་པོ་བདག་གིས་སྲོག་དང་བཅས་པའི་སྤྲེའུ་བཀུམ་པ་ནི་མ་ལགས་ཀྱི། འདི་ནི་སྤྲུལ་པ་ལགས་ཏེ། བཀའ་མཆིད་ཀྱི་གོ་རིམ་འདི་ལྟ་བུ་གླེང་བསླང་བའི་སླད་དུ་སྤྲེའུ་སྤྲུལ་པའི་ལྤགས་པ་འདི་བདག་གིས་འཚལ་ཏེ། དེ་བས་ན་བདག་ལ་གཞན་དུ་མི་དགོངས་སུ་གསོལ་ཞེས་སྨྲས་ནས། རྫུ་འཕྲུལ་མངོན་པར་འདུ་བྱས་པ་དེ་བཏང་ཏེ། རྒྱལ་པོ་འཁོར་དང་བཅས་པ་སེམས་རབ་ཏུ་མགུ་བར་གྱུར་པར་ཤེས་ནས་སྨྲས་པ། རྒྱུ་ལས་འགྲུབ་པར་མཐོང་བཞིན་ལ། རང་དབང་འཇིག་རྟེན་ཕ་རོལ་ཤེས། །དགེ་བར་ཁས་ལེན་སྙིང་རྗེ་ཅན། །སྲོག་ཆགས་གསོད་པར་སུ་ཞིག་བྱེད། །རྒྱལ་པོ་ཆེན་པོ་གཟིགས་སུ་གསོལ། །རྒྱུ་མེད་སྨྲ་དང་རང་དབང་ལྟ་བ་དང་། ཡོད་པར་མི་ལྟ་རྒྱལ་རིགས་གཞུང་ལུགས་ཅན། །གྲགས་པ་ཅུང་ཟད་ཕྱིར་ནི་གཞུང་བྱེད་པ། །རིགས་པར་སྨྲ་དེ་ཇི་ལྟར་ཁས་བླང་བྱས། །མི་ཡི་བདག་པོ་ལྟ་བ་བཟང་ངམ་ངན། །རིགས་མཐུན་ལས་ནི་སྒྲུབ་པའི་རྒྱུ་དག་གིས། །དེ་དང་དེ་དག་ཁྱོད་ཀྱིས་བརྟགས་ན་ནི། །ཚིག་དང་སྤྱོད་པ་རྣམས་ཀྱིས་ངེས་པར་སྟོན། །དེ་བས་ལྟ་བ་བཟང་པོ་བསྟེན་པའི་རིགས། །ལྟ་བ་ངན་པ་ཕུང་བར་འགྱུར་བས་སྤང་། །སྐྱེ་བོ་ངན་པ་རིང་དུ་སྤངས་ནས་ནི། །དམ་པ་རྣམས་ལ་བརྟེན་ན་འདི་ཤེས་འགྱུར། །མི་སྡོམ་པར་ཡང་སྡོམ་པའི་ཚུལ་འཛིན་པ། །ས་ཡི་སྟེང་ན་དགེ་སློང་སྲིན་པོ་རྣམས། །ལྟ་བ་ངན་པས་སྐྱེ་བོ་བྱིས་པ་རྣམས། །གདུག་པའི་སྦྲུལ་བཞིན་བརླག་པར་བྱེད་ཅིང་རྒྱུ། །རྒྱུ་མེད་སྨྲ་ལ་སོགས་པ་རྩུབ་པོས་བསྒོས། །དེ་ན་ཁྱད་པར་མངོན་པ་ལྕེ་སྦྱང་བཞིན། །དེ་བས་མཁས་པས་དེ་དག་བསྟེན་མི་རིགས། །དེ་དག་དོན་ནི་ནུས་ན་དཔྱད་པའི་རིགས། །སྐྱེ་བ་མི་མཐུན་པ་དག་གྲགས་པ་ཆེར་གྱུར་ཀྱང་། །དགོས་པ་ཡོད་པར་གྱུར་ཀྱང་མཛའ་བར་མི་བྱ་སྟེ། །དགུན་གྱི་དུས་ཀྱི་ཡུལ་ངན་བྱུང་བས་བསྒྲིབས་ན་ནི། །མཚན་མོ་གསལ་བྱེད་ཟླ་བའི་འོད་ཀྱང་མི་གསལ་འགྱུར། །སྐྱེ་བོ་ཡོན་ཏན་སྤོང་བ་དེ་དག་སྤང་བ་དང་། ཡོན་ཏན་སྟོན་ལ་མཁས་པ་རྣམས་ལ་བརྟེན་པ་ཡིས། །འབངས་རྣམས་སྐྱོན་ལ་མི་དགའ་ཡོན་ཏན་དགར་འཇུག་ཅིང་། བདག་གི་གྲགས་པ་རབ་ཏུ་གསལ་ཞིང་རྒྱས་པར་མཛོད། །ཁྱོད་ཀྱིས་ཆོས་སྤྱད་གྱུར་ན་མི་ཡི་འཇིག་རྟེན་ཕལ་ཆེར་ནི། །ལེགས་པར་སྤྱོད་ལ་ཕྱོགས་ཤིང་མཐོ་རིས་ལམ་ལ་གནས་པར་འགྱུར། །ཁྱོད་ཀྱི་བརྩོན་འགྲུས་བསྐྱེད་དེ་འགྲོ་བ་འདི་དག་རྗེས་སུ་སྐྱོངས། དེ་བས་དུལ་བ་བཟང་པོའི་ལམ་དང་ལྡན་པའི་ཆོས་ལ་རྟེན། །ཚུལ་ཁྲིམས་རྣམ་པར་སྤྱོད་ལ་སྦྱིན་པའི་གྲགས་པ་སྤེལ། །ནང་མི་བཞིན་དུ་ཕྱི་མི་ལ་ཡང་བྱམས་པར་གྱིས། །ས་ལ་འཁོད་པ་ཆོས་ཀྱིས་སྐྱོངས་ལ་བག་མེད་སྤོངས། །དེ་ལྟར་བྱས་ན་གྲགས་པ་དང་ནི་མཐོ་རིས་འཐོབ། །ཆུན་པ་རྣམས་དང་ཕྱུགས་ལུག་འཚོ་བ་རྣམས། །མེ་ཏོག་འབྲས་བུ་ལྡན་པའི་ལྗོན་ཤིང་བཞིན། །རྒྱུ་དཔྱ་འབུལ་བའི་འབངས་རྣམས་མ་བསྐྱངས་ན། །སྨན་རྣམས་ཀུན་དང་རྒྱལ་པོ་འབྲལ་བར་འགྱུར། །ཚོང་ཟོང་སྣ་ཚོགས་ཉོ་ཚོང་བགྱིད་པ་ཡི། །ཚོང་པ་རྣམས་དང་ཕོ་བྲང་འཁོར་གྱི་མི། །དེ་བཞིན་ཤོ་གམ་གཅོད་ཅིང་དཔྱ་འབུལ་བ། །རྒྱལ་པོས་མ་བསྐྱངས་དཀོར་གྱིས་བྲེལ་བར་འགྱུར། །སྐྱོན་མེད་གཡུལ་ངོར་རབ་ཏུ་དཔའ་བོ་དང་། །མཚོན་ཆའི་དགྲ་ཐབས་མཁས་པ་དེ་ལྟ་བུ། །རྒྱལ་པོས་ཡལ་བར་བོར་ཞིང་མ་བཀུར་ན། །དགྲ་ལས་རྒྱལ་བའི་དབུ་རྨོག་བཙན་མི་འགྱུར། །དེ་བཞིན་ཚུལ་ལྡན་མཁས་པ་དགེ་བ་དང་། །ཡོན་ཏན་ཆེ་བར་གྲགས་པ་དགེ་བ་རྣམས། །རྒྱལ་པོས་སྨད་ཅིང་ཡལ་བར་བོར་ན་ནི། །མཐོ་རིས་འགྲོ་བའི་སྒོ་དང་འགལ་བར་འགྱུར། །འབྲས་བུ་མ་སྨིན་ཤིང་ལས་གང་འཐོག་པ། ས་བོན་ཆུད་གསན་རོ་ཡང་དེ་མི་མྱོང་། །དེ་བཞིན་རྒྱལ་པོས་ཆོས་མིན་དཔྱ་ཕབ་ན། །ཡུལ་ཡང་ཕུང་ལ་དེས་ཀྱང་ཕན་མི་ཐོགས། །ཇི་ལྟར་ལྗོན་ཤིང་ཡོན་ཏན་ཕུན་སུམ་ཚོགས། འབྲས་བུ་སྨིན་པ་བསྣམས་ཏེ་ཆེར་འབུལ་བ། །རྒྱལ་པོས་བསྲུངས་བའི་ཡུལ་ཡང་དེ་བཞིན་དུ། །ཆོས་དང་སྲིད་དང་བདེ་བ་འབྱོར་བར་བྱེད། །བློན་པོ་འཛངས་དང་གློ་བ་ཉེ་བ་དང་། །གྲོགས་པོ་སྐྱོན་མེད་བདག་གི་ནང་མི་རྣམས། །རིམ་གྲོར་བཅས་པའི་བྱ་དགའ་སྩལ་བ་དང་། །དགའ་བར་སྨྲ་བས་སེམས་ནི་ཆགས་པར་མཛོད། །དེ་བས་ཆོས་ཀྱི་དོན་ནི་ལྷུར་བླངས་ཏེ། །བདེ་བ་ཐོབ་ཕྱིར་འབངས་རྣམས་སེམས་པར་མཛོད། །ཆགས་དང་ཞེ་སྡང་མེད་པའི་ནན་ཏུར་གྱིས། །འབངས་རྣམས་སྐྱོངས་ལ་བདག་གིས་འཇིག་རྟེན་སྲུངས། །དེ་ལྟར་བདག་ཉིད་ཆེན་པོ་དེས་རྒྱལ་པོ་འཁོར་དང་བཅས་པ་དེ་ལྟ་བ་ལས་གྱུར་པའི་ལམ་ངན་པ་དེ་དང་ཕྲལ་ནས། །ཡང་དག་པའི་ལམ་ལ་བཙུད་དེ། དེ་ཉིད་ནས་ནམ་མཁའ་ལ་ལྡིང་བ་དང་། སྐྱེ་བོ་དེ་དག་གིས་ཐལ་མོ་སྦྱར་ཏེ། གུས་པར་ཕྱག་འཚལ་ཞིང་མཆོད་པ་བྱས་ནས། །དགོན་པའི་གནས་དེ་ཉིད་དུ་སླར་སོང་ངོ་། །དེ་ལྟ་བས་ན་སྐྱེས་བུ་དམ་པ་རྣམས་ནི་ཕན་གདགས་པ་དྲིན་དུ་གཟོ་བ་དང་། བཟོད་པ་ལ་གོམས་པས་རིམ་གྲོ་མ་བྱས་ཀྱང་སྔོན་ཆད་ཕན་འདོགས་འདོགས་པ་རྣམས་ལ་སྙིང་བརྩེ་བ་ལྷོད་པར་མི་འགྱུར་རོ། །དེ་ལྟ་བས་ན་རིམ་གྲོ་མ་བྱས་པ་ཙམ་གྱི་སྔོན་ཕན་བཏགས་པ་བརྗོད་པར་བྱ་བ་མི་རིགས་སོ། །དེ་བཞིན་དུ་བཅོམ་ལྡན་འདས་དེ་མངོན་པར་རྫོགས་པར་སངས་མ་རྒྱས་པའི་ཚེ་ནའང་། ཕ་རོལ་གྱི་རྒོལ་བ་རྣམས་ཟིལ་གྱིས་མནན་ནས་སེམས་འདུལ་བར་མཛད་དོ་ཞེས་སངས་རྒྱས་ཀྱི་ཡོན་ཏན་བསྔགས་པ་ལའང་བརྗོད་པར་བྱའོ། །དེ་བཞིན་དུ་ལྟ་བ་ལོག་པ་ལ་རྗེས་སུ་ཆགས་པར་བྱར་མི་རུང་བ་དང་། སྡིག་པའི་གཞིར་འགྱུར་བས་རྟེན་དུ་མི་རུང་བའི་ཕྱིར་ལྟ་བ་ལོག་པ་ལ་སྨད་པ་ལའང་སྦྱར་བར་བྱའོ། །དེ་ལས་བཟློག་ནས་ཡང་དག་པའི་ལྟ་བའི་ཡོན་ཏན་བསྔགས་པ་ལའང་སྦྱར་བར་བྱའོ། །བྱང་ཆུབ་ཆེན་པོར་སྐྱེས་པའི་རབས་ཏེ་ཉི་ཤུ་གསུམ་པའོ།། །།སྐྱེས་བུ་དམ་པ་རྣམས་ནི་གནོད་པར་བྱེད་པ་རྣམས་དགེ་བའི་ཕྱོགས་ལས་ཉམས་ན། ཇི་ལྟར་སེམས་གདུངས་པར་འགྱུར་བ་དེ་ཙམ་དུ་བདག་གི་སྡུག་བསྔལ་གྱིས་སེམས་གདུངས་པར་མི་འགྱུར་རོ། །དེ་ཡང་འདི་ལྟར་བྱང་ཆུབ་སེམས་དཔའ་རེ་ཤིག་ཅིག་གངས་རི་དཔལ་དང་ལྡན་པའི་ངོས་འབྱུང་ཁུངས་ཀྱི་རྫས་རྣམ་པ་སྣ་ཚོགས་ཀྱིས་བརྒྱན་པ། ནགས་ཚལ་སྟུག་པོ་བཟང་པོས་ནི་ཀེའུ་ཤའི་དར་སྔོན་པོས་སྟོད་གཡོགས་བྱས་པ་བཞིན། ཐེལ་སྡིངས་དང་ཤང་ཤོར་དང་། རྣམ་པ་མང་པོ་ཁ་དོག་དང་། དབྱིབས་རྣམ་པ་དུ་མ་དག་ནི་ཆེད་དུ་བཤམས་པ་བཞིན། རི་དྲུང་གི་གད་པ་བང་རིམ་རྣམ་པ་སྣ་ཚོགས་ཀྱིས་ནི་བརྒྱན། འབབ་ཆུ་མང་པོ་དག་ནི་ཁ་དུ་མ་ནས་འབབ་གཅོང་རོང་ཟབ་མོ་གཡང་ཟ་བ་མང་པོ་དག་ནི་ཡོད། བུང་བ་མང་པོའི་སྒྲ་ནི་དི་རི་རི་ཟེར། ཤིང་ལྗོན་པ་མེ་ཏོག་དང་འབྲས་བུ་སྣ་ཚོགས་དང་ལྡན་པ་དག་ནི་བསེར་བུ་བསིལ་བ་ཡིད་དུ་འོང་བ་ལང་ནས་ནི་བསིལ་ཡབ་བྱེད་པ་བཞིན། རིག་སྔགས་འཆང་རྣམས་ཀྱི་རྩེད་མོའི་སར་རུང་བ་ཞིག་ན་སྤྲེའུ་ཆེན་པོ་གཅིག་པུ་རྒྱུ་བ་ཞིག་ཏུ་གྱུར་ཏོ་ཞེས་གྲག་གོ །དེ་དེ་ལྟ་བུའི་གནས་སྐབས་སུ་གྱུར་པའི་ཚེའང་ཆོས་ཀྱི་འདུ་ཤེས་ནི་མ་ཉམས། བྱས་པ་བཟོ་བ་ལ་མ་འཇུངས་པའི་རང་བཞིན་ཅན་རབ་ཏུ་བརྟན་པ་དང་ལྡན་པ་དེ་ལ་རྗེས་སུ་ཆགས་པ་བཞིན་དུ་སྙིང་རྗེས་མ་བཏང་ངོ་། །ནགས་ཚལ་རི་མཆོག་རྒྱ་མཚོར་བཅས་པའི་ས། །དུས་མཐའི་ཆུ་དང་མེ་དང་རླུང་དག་གིས །བརྒྱ་ཕྲག་དུ་མར་རྣམ་པར་ཞིག་པར་འགྱུར། །བྱང་ཆུབ་སེམས་དཔའི་སྙིང་རྗེ་ཡོང་མ་ཉམས། །བདག་ཉིད་ཆེན་པོ་དེ་དཀའ་ཐུབ་ཅན་བཞིན་དུ། །ནགས་ཀྱི་ཤིང་གི་ལོ་མ་དང་འབྲས་བུ་ཙམ་གྱིས་འཚོ་ཞིང་། ཚུལ་དེ་དང་དེ་དག་གིས་སྤྱོད་པའི་སྤྱོད་ཡུལ་དུ་བབ་པའི་སྲོག་ཆགས་རྣམས་ལ་སྙིང་བརྩེ་བར་བྱེད་ཅིང་དགོན་པའི་ས་ཕྱོགས་དེ་ན་གནས་པར་གྱུར་ཏོ། །དེ་ནས་མི་ཞིག་བ་བོར་བ་འཚོལ་བའི་ཕྱིར་ཀུན་དུ་རྒྱུ་ཞིང་སོང་སོང་བ་ལས། ལམ་སྟོར་ཞིང་ཕྱོགས་བསླད་དེ་འཁྱམས་ནས། ས་ཕྱོགས་དེར་འོངས་སོ། །དེ་བཀྲེས་པ་དང་། སྐོམ་པ་དང་། ཚ་བ་དང་ངལ་བས་ལུས་ནི་མྱ། ཡིད་མི་དགའ་བའི་མེས་ནི་ཁོག་པའི་ནང་གདུངས། མྱ་ངན་གྱི་ཁུར་ལྕི་བས་ནོན་པ་བཞིན་དུ། །ཤིང་ཞིག་གི་དྲུང་དུ་འདུག་པ་དང་། ཤིང་ཏིན་དུའི་འབྲས་བུ་སྨིན་ནས་ལྷགས་པ། ཁ་དོག་སེར་པོར་གྱུར་པ་ཅུང་ཟད་ཅིག་མཐོང་ངོ་། །དེས་དེ་དག་མྱངས་ན་བཀྲེས་པས་ཉེན་པས་རབ་ཏུ་ཞིམ་པར་རྟོགས་སོ། །དེ་དག་གང་ལས་བྱུང་བའི་ཤིང་བཙལ་བའི་ཕྱིར་སྤྲོ་བ་སྐྱེས་ནས་ཀུན་དུ་བལྟས་པ་དང་། ཤིང་ཏིན་དུ་ཞིག་གད་པ་གཡང་ཟ་བའི་ཁ་ན་འདུག་པའི་ཡལ་ག་འབྲས་བུ་སྨིན་པའི་ལྕིད་ཀྱིས་དུད་ཅིང་། སེར་པོར་གྱུར་པ་ཞིག་མཐོང་ངོ་། །དེ་འབྲས་བུ་དེ་འདོད་པའི་ཕྱིར་རིའི་གད་པ་གཡང་ཟ་བ་དེ་ལ་འཛེགས་ཏེ། ཤིང་ཏིན་དུའི་ཡལ་ག་འབྲས་བུ་ཅན་གཡང་ས་ལོགས་སུ་དུད་པར་གྱུར་པ་དེ་ལ་འཛེགས་པ་དང་། འབྲས་བུ་འདོད་པའི་ཕྱིར་ཤིང་དེའི་ཐོར་ཏེ་ལ་ཐུགས་པར་ཕྱིན་ཏོ། །དེ་ནས་ལྗོན་པའི་ཤིང་གི་ཡལ་ག་དེ། ལྕི་བའི་ལྕིད་ཀྱི་ནོན་ཅིང་ཕྲ་བ་ཡིས། །སྟ་རེས་ཆེད་དུ་རྩ་ནས་བཅད་པ་བཞིན། །སྒྲ་དང་བཅས་པར་ཆག་ནས་ལྷུང་བར་གྱུར། །དེ་དང་དེ་དག་བཅས་ཏེ་ལྷུང་ནས་རིའི་གཅོང་རོང་ཁོ་ར་ཁོར་ཡུག་བྲག་རིས་བསྐོར་བ་ཁྲོན་པ་དང་འདྲ་བ་ཞིག་ཏུ་ལྷུང་བ་དང་། ཤིང་ལོ་སྟུག་པོ་དང་དེ་ན་ཆུ་གཏིང་ཟབ་མོ་ཞིག་ཀྱང་ཡོད་པས། ལུས་ཀྱི་ཡན་ལག་ལ་ཆག་གྲུགས་སུ་ནི་ཅུང་ཟད་ཀྱང་མ་གྱུར་ཏོ། །དེ་ཆུའི་ནང་དེ་ནས་བྱུང་སྟེ། ཁོ་ར་ཁོར་ཡུག་ཏུ་བསྐོར་ན་གང་ནས་ཀྱང་ཐར་བར་འགྱུར་བའི་ལམ་ཡང་མ་མཐོང་བ་དང་། དེས་བསམས་པ་ཐབས་ཅིའང་མེད་པས། བདག་ནི་དེའུ་རེ་འདི་ཉིད་དུ་འཆིའོ་སྙམ་དུ་གསོན་དུ་རེ་བ་ནི་མེད། མྱ་ངན་གྱིས་གདུངས་བའི་མཆི་མས་ནི་གདོང་གཡོགས་ཡིད་རབ་ཏུ་མི་བདེ་བའི་ཟུག་རྔུས་ནི་བཙུགས། སེམས་སྤ་གོང་ནས་སྨྲེ་སྔགས་དེ་དང་དེ་དག་འདོན་པར་གྱུར་ཏོ། །ནགས་ཁུང་དགོན་པ་བགྲོད་དཀའ་བ། །སྐྱེ་བོ་འགྲུལ་པ་ཡོང་མེད་པ། །འདི་ལྟ་བུར་ནི་བདག་ལྷུང་སྟེ། །གང་དུ་བརྟགས་ཀྱང་འཆི་ལས་མེད། གཉེན་བཤེས་ཀུན་དང་བྲལ་ནས་གཅིག་པུར་ལུས། །ཤ་སྦྲང་མང་པོ་མདུན་མ་འདུ་བའི་ས། །གཅོང་རོང་ཟབ་མོའི་ཁ་ཡི་ནང་དུ་སོང་། རི་དྭགས་འདྲ་བ་བད ག་ལ་སུ་ཞིག་འབྱིན། །སྐྱེད་མོས་ཚལ་དང་ནགས་ཚལ་ལྡིང་ཁང་སྣ་ཚོགས་མཚོ། །ནོར་བུ་རིན་ཆེན་དཀར་བཀྲ་སྤྲིན་མཛེས་འགྲོ་བ་དག །ནག་པོའི་ཕྱོགས་ཀྱི་མུན་ནག་འདྲ་བའི་གཤིན་རྗེ་ཡིས། །ཀྱི་ཧུད་བདག་ལ་དེ་དག་བདག་ལ་སྣང་བ་མེད་པར་བྱེད། །དེ་ལྟར་མི་དེ་སྨྲེ་སྔགས་དེ་དང་དེ་དག་འདོན་ཅིང་། ཆུ་དེ་དང་བདག་དང་ལྷན་ཅིག་ཏུ་ལྷུང་བའི་ཤིང་ཏིན་དུ་ཀའི་འབྲས་བུ་དེས་དེ་འཚོ་ཞིང་རེ་ཤིག་དེ་ན་འདུག་འདུག་པ་ལས། དེ་ནས་སྤྲེའུ་བདག་ཉིད་ཆེན་པོ་དེ་ཟས་ཚོལ་ཞིང་ནགས་དེའི་ནང་ནས་སོང་སོང་བ་དང་། ཤིང་ཏིན་དུའི་ཡལ་གའི་རྩེ་མོ་རླུང་གིས་བསྐྱོད་པས་གཡབས་ཏེ་བོས་པ་བཞིན་དུ་དེར་འོངས་ནས་དེ་གད་པ་དེའི་ཁར་འཛེགས་ཏེ་བལྟས་ན། མི་དེ་ལྟོགས་པས་མིག་རྩ་ངན་ཅིང་བཞིན་མདོག་ནི་ཉམས། ལུས་ནི་རིད་ལ་སྐྱ་བོ་བསེང་བསེང་པོར་གྱུར། དེ་ན་འདྲེ་ལྡོག་ཅིང་རྩོལ་བ་མཐོང་ནས། མི་དེ་ཕོངས་ཤིང་ཉམས་ཐག་པ་ལ་སྤྲེའུ་ཆེན་པོ་དེ་སྙིང་བརྩེ་བར་གྱུར་ཏེ། ཟས་བཙལ་བ་བཏང་ནས་མི་དེ་ལ་ཡུན་རིང་དུ་བརྟགས་ཏེ། མིའི་སྐད་དུ་སྨྲས་པ། མི་ཡིས་ཐར་བ་མ་ཡིན་པའི། གཡང་ས་འདི་ན་འདུག་པ་ཁྱོད། །ཅི་ཕྱིར་འདིར་འོངས་སུ་ཞིག་ཡིན། །དེ་ནི་ལེགས་པར་སྨྲ་བར་རིགས། །དེ་ནས་སྤྲེའུ་ཆེན་པོ་དེ་ལ། །མི་དེ་རབ་ཏུ་ཕོངས་ཏེ་ཕྱག་འཚལ་ནས། ཐལ་མོ་སྦྱར་ཏེ་བལྟ་ཞིང་འདི་སྐད་ཅེས་སྨྲས་སོ། །ལྷ་དཔལ་བདག་ནི་མི་ཞིག་ལགས། །འཁྱམས་ནས་ནགས་ན་རྒྱུ་བ་ལས། །ཤིང་འདིའི་འབྲས་བུ་ཚོལ་ཚོལ་ནས། །འདི་ལྟ་བུ་ཡི་ཉམ་ཉེས་བྱུང་། །དེ་བས་གཉེན་བཤེས་དང་ཡང་བྲལ། ཉམ་ཉེས་ཆེན་པོ་བྱུང་བ་ལ། །སྤྲེའུ་ཚོགས་མང་པོའི་མགོན་པོ་ཁྱོད། བདག་གི་སྐྱབས་ཀྱང་མཛད་དུ་གསོལ། དེ་སྐད་ཅེས་ཟེར་བ་ཐོས་ནས། །སེམས་དཔའ་ཆེན་པོ་དེ་སྙིང་རྗེ་ཆེན་པོ་སྐྱེས་པར་གྱུར་ཏོ། །ཉམ་ཉེས་གྱུར་ཞིང་གཉེན་བཤེས་རྣམས་དང་བྲལ། །ཐལ་མོ་སྦྱར་ནས་དམན་པས་གསོལ་ན་ནི། །དགྲ་བོ་རྣམས་ཀྱང་སྙིང་རྗེ་སྐྱེ་འགྱུར་ན། །སྙིང་རྗེ་ཅན་རྣམས་བརྩེ་བ་གཡོ་བར་འགྱུར། དེ་ནས་བྱང་ཆུབ་སེམས་དཔའ་དེ་ལ་སྙིང་རྗེ་བལྟས་ཏེ། དེ་ལྟ་བུའི་དུས་ན་དཀོན་པའི་ཚིག་འཇམ་པོས་དབུགས་ཕྱུང་པ། གཡང་སར་ལྷུང་བས་བདག་ནི་མཐུ་མེད་ཅེའམ། གཉེན་བཤེས་མེད་སྙམ་མྱ་ངན་མ་བྱེད་ཅིག །ཁྱེད་ལ་གཉེན་གྱི་བྱ་བ་ཅི་ཡོད་པ། ཐམས་ཅད་ངས་བྱ་འཇིགས་པར་མ་གྱུར་ཅིག །དེ་ལྟར་སེམས་དཔའ་ཆེན་པོ་དེས་མི་དེ་དབུགས་ཕྱུང་ནས། དེའི་འོག་ཏུ་དེ་ལ་ཏིན་དུའི་འབྲས་བུ་གཞན་དག་ཅིག་ཀྱང་བྱིན་ཏེ་དེ་དབྱུང་དུ་རུང་བའི་ཐབས་སུ་རྡོ་བ་ལྕིད་མིའི་ཁུར་ཚད་ཙམ་ཞིག་ལ་གོམས་པར་བྱས་སོ། །དེ་ནས་བདག་ཉིད་ཀྱི་མཐུ་སྟོབས་ཉམས་སད་པ་དང་བདག་གིས་འདི་དབྱུང་ངེས་པར་ནུས་སོ་སྙམ་དུ་ངེས་པར་བསམས་ནས། །གཡང་ས་དེའི་ནང་དུ་ཞུགས་ཏེ་སྙིང་རྗེས་བསྐུལ་ནས། མི་དེ་ལ་སྨྲས་པ། ཚུར་ཤོག་ང་ཡི་རྒྱབ་ཏུ་ཞོན། ཁྱོད་ནི་སྟེང་དུ་ཕྱིན་པ་དང་། །རང་གི་ལུས་ལ་སྙིང་པོ་དག །ཕྱིན་གྱི་བར་དུ་ལེགས་པར་འཇུས། མཁས་པ་གཞན་ལ་ཕན་པའི་ཕྱིར། །སྒྲུབ་པར་བྱེད་པ་གང་ཡིན་པ། སྙིང་པོ་མེད་པའི་ལུས་ལས་ནི། །དམ་པས་སྙིང་པོ་བླངས་བར་འདོད། དེས་དེ་ལྟར་བགྱིའོ་ཞེས་མཉན་ནས་ཕྱག་འཚལ་ཏེ་དེ་ལ་ཞོན་ནོ། །དེ་ནས་མི་དེ་མངོན་པར་ཞོན་པ་དེ། །རབ་ཏུ་ལྕི་བའི་ཁུར་གྱིས་ནོན་བཞིན་ཡང་། །སྙིང་སྟོབས་ཆེ་བས་བརྟན་པ་མ་ཉམས་པར། །སྡུག་བསྔལ་ཆེན་པོས་དེ་ནི་སྟེང་དུ་ཕྱིན། །དེ་ནི་ཕྱིན་ནས་རབ་ཏུ་དགའ་བར་གྱུར། །ངལ་ཞིང་ཆད་པས་གོམ་པ་འཁྱོར་ཞིང་འདོར། ཆར་སྤྲིན་སྔོན་པོ་འདྲ་བའི་རྡོ་ལེབ་ལ། །ངལ་བ་སོས་པར་བྱ་ཕྱིར་ཉལ་བར་གྱུར། །དེ་ནས་བྱང་ཆུབ་སེམས་དཔའ་རང་བཞིན་ཡོང་སུ་དག་པ་དང་། །ཕན་བཏགས་པའི་ཕྱིར་མི་དེས་ཉེས་པ་བྱས་སུ་དོགས་པ་མེད་དེ། བག་ཕབ་ནས་དེ་ལ་སྨྲས་པ། ཀུན་ནས་ཐར་པའི་ནགས་ཀྱི་ས་ཕྱོགས་འདིར། གཅན་ཟན་ཁྲོ་བོ་ཐགས་ཐོགས་མེད་པར་འོང་། ལ་ལ་ང་དང་རང་པ་ཡང་། ངལ་བས་གཉིད་ཀྱིས་ལོག་ལ་གསོད་ཀྱང་སྲིད། །ང་ནི་ངལ་ཞིང་ལུས་ཀྱང་རབ་ཏུ་རྨྱ། དེ་བས་ཅུང་ཞིག་ང་ནི་ཉལ་བར་འདོད། དེ་ཕྱིར་ཁྱོད་ནི་ཕྱོགས་སུ་མིག་ལྟོས་ལ། །ང་དང་ཁྱོད་བདག་གཉིས་ཀ་བསྲུང་བར་གྱིས། །དེ་ནས་དུལ་བ་ལྟར་ཚུལ་འཆོལ་པ་ལ་མཁས་པ་དེ་ན་རེ། སླར་ཡང་བདེ་བར་སད་པར་འགྱུར་བའི་སླད་དུ། ཁྱོད་ཅི་བདེ་བར་མནོལ་ཅིག་དང་། ཁྱོད་བསྲུང་བའི་ཕྱིར་བདག་འདི་ལྟར་མཆིས་སོ་ཞེས་དེ་ལ་བསྒོའོ། དེ་ནས་སེམས་དཔའ་ཆེན་པོ་དེ་ངལ་བར་གྱུར་པའི་མཐུས། གཉིད་ཀྱི་དབང་དུ་གྱུར་པ་དང་། མི་དེས་སེམས་ངན་པར་བསམས་པ། རབ་ཏུ་འབད་པས་རྙེད་པའི་རྩ་བ་དང་། །ནགས་ཀྱི་འབྲས་བུ་ཅི་དགར་རྙེད་པས་ཀྱང་། །འདི་ལྟར་ཡོངས་སུ་མྱ་བར་གྱུར་པའི་ལུས། །འཚོ་བ་ཙམ་ཡང་དཀའ་ན་ཇི་ལྟར་བལྟས། །དགོན་པ་འདི་ཡང་ཐར་བར་བྱ་བར་དཀའ། །མཐུ་སྟོབས་མེད་པར་ཇི་ལྟར་ཐར་བར་འགྱུར། དགོན་པ་བགྲོད་དཀའ་འདི་ལས་ཐར་བྱ་ན། འདི་ཡི་ཤ་འདིས་བདག་ན་རྟིས་པར་འགྱུར། །ཕན་པར་བྱས་ཀྱང་བཟར་ནི་རུང་བ་ཉིད། བཟའ་བ་འདི་ཡི་རང་བཞིན་དེ་འདྲ་སྟེ། ཕོངས་པར་གྱུར་ན་ཆོས་འདི་གྲུབ་པ་ཡིན། །དེ་བས་འདི་ནི་ལམ་གྱི་བརྒྱགས་སུ་རུང་། །ཇི་སྲིད་བག་ཕབ་བདེ་བར་གཉིད་ལོག་པ། །དེ་ཡི་བར་དུ་བདག་གིས་བསད་པར་ནུས། །འདི་དང་ཐབ་མོ་སྔོན་དུ་སྐྲད་གྱུར་ན། །སེང་གེ་དག་ཀྱང་ཕམ་དུ་དོགས་པ་སྐྱེ། །དེ་བས་ན་འདི་ནི་བདག་གིས་བཤོལ་བ་མི་རིགས་སོ། །སྙམ་ནས་ངེས་པར་བྱས་ཏེ་བདག་ཉིད་ངན་པ་དེ་ཆགས་པའི་སྐྱོན་གྱིས་བློ་ནི་རྨོངས། བྱས་པའི་དྲིན་གཟོ་ནི་མེད། ཆོས་ཀྱི་འདུ་ཤེས་ནི་ཉམས། སྙིང་རྗེ་དང་དེས་པའི་ངོ་བོ་ཉིད་ནི་རབ་ཏུ་སྤངས། ཉམས་ཆུང་ཡང་མི་དགོས་པ་བྱེད་པ་ལ་རབ་ཏུ་ཆགས་པས་རྡོ་བ་ཆེན་པོ་ཞིག་བཏེག་སྟེ། སྤྲེའུ་ཆེན་པོ་དེའི་མགོ་བོའི་སྟེང་དུ་འཕངས་སོ། །དེ་ནས་དེ་ནི་ཉམས་ཆུང་མི་བརྟན་ཞིང་། དོགས་པ་རབ་ཏུ་ཆེ་བས་རིངས་པ་དེས། །རྡོ་དེས་གཉིད་ལས་སངས་པར་བྱ་བའི་ཕྱིར། །འཕངས་པ་བཞིན་དུ་སྤྲེའུ་དེ་གཉིད་སངས་གྱུར། རྡོ་དེ་རིལ་གྱིས་ཕོག་པར་མ་གྱུར་པས། །དེ་ཡི་མགོ་བོ་ཕྱེད་མར་མ་གྱུར་ཏེ། །མཐའ་མའི་ཟུར་བས་དེ་ལ་རྨ་བྱུང་ནས། །རྡོ་ལེབ་སྟེང་དུ་སེར་བ་བཞིན་དུ་བབ། །རྡོ་བ་འཕངས་པས་མགོ་བོ་མ་ཞོམ་སྟེ། །བྱང་ཆུབ་སེམས་དཔའ་མྱུར་དུ་མཆོངས་ནས་ནི། །བདག་ལ་གསོད་པ་སུ་ཡིན་སྙམ་ནས་བལྟས། །དེ་ཉིད་སྐྱེངས་པ་བཞིན་དུ་འདུག་པ་མཐོང་། །སྐྱེངས་པས་གཟི་ཉམས་སྤོབས་པ་མེད་པར་གྱུར། །མི་དགའ་སྤ་གོང་མདོག་ཀྱང་ཉམས་པར་གྱུར། །སྐྲག་པར་གྱུར་པས་སྐད་འགགས་ཁ་ཡང་བསྐམས། །རྔུལ་གྱིས་གཤེར་ཞིང་ལྟ་ཡང་ཡོང་མ་ནུས། །དེ་ནས་སྤྲེའུ་ཆེན་པོ་དེས་བསམས་པ། །འདི་ཉིད་ཀྱིས་འདི་ལྟར་བྱས་སོ་སྙམ་དུ་བློ་ལ་ངེས་པར་བྱས་ནས། བདག་བསྣད་པའི་སྡུག་བསྔལ་ལ་མི་སེམས་པར། །དེ་བདག་ལ་ཕན་པ་ལའང་མི་ལྟ་བར་མི་བཟད་པའི་ལས་བྱེད་པ་དེས། ཡི་ཆད་ཅིང་སྙིང་རྗེ་སྐྱེས་ནས་ཁྲོ་བ་དང་འཁྲུག་པའི་སྐྱོན་མེད་པར་མིག་མཆི་མས་གང་བཞིན་དུ་མི་དེ་ལ་བལྟས་ཏེ། མྱ་ངན་གྱིས་ནོན་ཏེ་སྨྲས་པ། བཟང་པོ་ཁྱོད་ནི་མིར་གྱུར་ཀྱང་། འདི་འདྲ་བདག་ལ་ཁྱོད་ཀྱིས་བྱས། །བྱ་བ་ཅི་ལྟ་བསམས་ན་ནི། །ཅི་ལྟ་བུར་ཡང་བརྩམས་པར་འགྱུར། །ང་ལ་གནོད་པ་བྱེད་པ་ནི། །གཞན་དག་འོངས་ནའང་ཁྱོད་ཉིད་ཀྱིས། །བརྩོན་འགྲུས་རབ་ཏུ་བསྐྱེད་ནས་སུ། །མཐུ་རྩལ་ཆེན་པོས་བཟློག་པའི་རིགས། །བདག་གིས་དཀའ་བ་སྤྱད་དོ་སྙམ། །ང་ནི་ང་རྒྱལ་སྐྱེས་པར་གྱུར། །ཧ་ཅང་དཀའ་བར་སྤྱོད་ཁྱོད་ཀྱིས། །དེ་ཡང་རིང་དུ་སྤངས་བར་གྱུར། །འཆི་བདག་ཁ་ཡི་ནང་འདྲ་བ། །འཇིག་རྟེན་གཞན་ནས་བླངས་པ་བཞིན། །གཡང་ས་འདི་ནས་ངས་ཕྱུང་ནས། །ཁྱོད་ནི་གཞན་དུ་ལྷུང་བར་གྱུར། སྤྱོད་པ་ངན་པ་ཁྱོད་ཅི་རུང་། །མི་ཤེས་བཞིན་དུ་མི་བཟད་པ། །འགྲོ་བ་བདེ་བ་འདོད་པ་རྣམས། །གང་གིས་སྡུག་བསྔལ་རྣམས་སུ་ལྟུང་། །བདག་ཉིད་ངན་འགྲོ་རྣམས་སུ་ལྷུང་། །ང་ལའང་མྱ་ངན་མེ་ཡིས་གཏོར། །གྲགས་པའི་དཔལ་ནི་མེད་པར་བྱས། །ཡོན་ཏན་དགའ་བ་འགལ་བར་འགྱུར། །ངན་པར་སྨྲ་བའི་གཞིར་ཡང་གྱུར། །ཡིད་ཀྱང་བརྟན་དུ་མི་རུང་ངོ་། །ཁྱོད་ཀྱིས་དེ་ལྟར་བྱས་པ་ཡིས། །དོན་ནི་ཅི་ཞིག་འགྲུབ་པར་འགྱུར། །ཇི་ལྟར་འདི་ཉིད་ང་ཡི་ཡིད་ལ་གནོད་འགྱུར་བ། །དེ་ལྟར་ང་ལ་རྨ་འདི་གནོད་པར་མི་འགྲུར་རོ། །ཁྱོད་ཀྱི་ཕྱིར་ནི་ང་ཡང་སྡིག་པ་ཅན་དུ་གྱུར། །གང་ཕྱིར་འདི་ནི་ངས་ཀྱང་མེད་པར་བྱ་མི་ནུས། །ནགས་ཁུང་སྟུག་པོའི་འཇིགས་པ་མང་པོ་འདི་ནས་ཁྱོད། །གྲོང་འདབ་ལམ་དུ་བསྐྱལ་ཏེ་ཕྱིན་པར་མ་གྱུར་པ། །དེ་ཡི་བར་དུ་ང་ཡི་དྲུང་ནས་སྣང་བཞིན་འདོང་། །བརྟན་དུ་མི་རུང་དོགས་ཀྱང་ལེགས་པར་བསྐྱལ། །ཁྱོད་ནི་གཅིག་པུ་ལུས་ཀྱང་ཉམས་ཆུང་ལ། ལམ་ཡང་མི་ཤེས་ནགས་ན་འཁྱམ་ན་ནི། །འགའ་ཞིག་འོངས་ནས་གནོད་པ་བྱེད་པར་འགྱུར། ཁྱོད་ལ་གནོད་ན་ང་ཡང་དོན་མེད་འགྱུར། །སྤྲེའུ་ཆེན་པོ་དེས་མི་དེ་ལ་དེ་ལྟར་མྱ་ངན་ཆེན་པོ་བྱས་ཏེ་སྤྱོད་ནས་གྲོང་འདབ་ཏུ་ཕྱིན་པར་བྱས་ཏེ་དེའི་ལམ་ཡང་བསྟན་ནས་ཡང་སྨྲས་པ། ནགས་འདབ་ཉམས་དགའ་འདི་ནས་གྲོང་འདབ་ཁྱོད་ཕྱིན་གྱིས། །དགོན་པ་བགྲོད་དཀའི་འཇིགས་པ་བོར་ལ་བདེ་བར་སོང་། །སྡིག་པའི་ལས་ཀྱང་ཡོངས་སུ་སྤང་བར་འབད་པར་གྱིས། །དེ་ཡི་རྣམ་པར་སྨིན་པ་ངེས་པར་སྡུག་བསྔལ་འགྱུར། །དེ་ལྟར་སྤེའུ་ཆེན་པོ་དེས་མི་དེ་ལ་སྙིང་བརྩེ་བས་སློབ་མ་བཞིན་དུ་རྗེས་སུ་གདམས་ནས་སླར་ནགས་ཀྱི་ནང་དུ་སོང་ངོ་། །དེ་ནས་མི་དེ་དེ་ལྟ་བུའི་སྡིག་པའི་ལམ་མི་བཟད་པ་བྱས་པས། །འགྱོད་པའི་མེས་སེམས་གདུངས་ནས། །དེ་མ་ཐག་ཏུ་མཛེའི་ནད་ཆེན་པོས་བཏབ་སྟེ། གཟུགས་ནི་གཞན་དུ་གྱུར། །ལུས་ཀྱི་པགས་པ་ནི་ཤུ་བས་ཁྲོ་བོར་སོང་། །རྨ་ཞིག་པའི་ཆུ་སེར་གྱིས་ནི་ལུས་གཤེར་བར་གྱུར། ལུས་ཀྱི་དྲི་ནི་རབ་ཏུ་མི་ཞིམ་པ་མནམ་པར་གྱུར་ཏོ། །དེ་ཕྱོགས་གང་དང་གང་དུ་སོང་བ་དེ་དང་དེར་རབ་ཏུ་འཇིགས་པར་སྣང་བས། མིའི་གཟུགས་ཡིན་པར་ཡིད་ཆེས་སུ་མི་རུང་བ། སྐད་འཛེར་ཞིང་དམན་པར་སྨྲ་བ་མཐོང་ནས། མི་རྣམས་འདི་ནི་སྡིག་པ་མངོན་སུམ་དུ་འོངས་སོ་སྙམ་ནས། རྡོ་འཕེན་ཅིང་དབྱིག་པ་གདེངས་ཏེ། སྐྲོད་པའི་ཚིག་རྩུབ་པོས་རབ་ཏུ་སྐྲོད་པར་གྱུར་ཏོ། །དེ་ནས་རྒྱལ་པོ་ཞིག་རི་དྭགས་གཤོར་དུ་སོང་བ་ལ། དགོན་པ་ཞིག་ན་ཡི་དྭགས་བཞིན་དུ་འཁྱམས་པ། ཉམས་རབ་ཏུ་ཆུང་ཞིང་གོས་དྲི་མ་ཅན་གོན་པ། པ་ཅར་གྱིས་མདོམས་དཀྲིས་ཏེ། ལྟ་ན་རབ་ཏུ་མི་སྡུག་པ་ཞིག་མཐོང་ནས་སྔངས་ཤིང་ངོ་མཚར་དུ་བཟུང་སྟེ། དྲིས་པ། མཛེ་ཡིས་ལུས་ནི་མི་སྡུག་གྱུར། །ཤུ་བས་ལུས་ཀྱི་པགས་པ་བཀྲ། སྐྱ་སྔོ་ལུས་རིད་རབ་ཏུ་དམན། །སྐྲ་ནི་རྡུལ་གྱིས་གང་བཞིན་གཡེངས། །ཁྱོད་ནི་སུ་ཡིན་ཡི་དྭགས་འདྲེའམ། །སྡིག་གི་གཟུགས་སམ་སྲུལ་པོའམ། །ནད་རྣམས་མང་པོ་ཚོགས་པའམ། །ནད་ཀྱི་ནང་ན་གང་ཞིག་ཡིན། །དེས་དེ་ལ་ཕྱག་འཚལ་ནས་སྐད་དམན་པས་སྨྲས་པ། །རྒྱལ་པོ་ཆེན་པོ་བདག་ནི་མི་ལགས་ཏེ། །མི་མ་ལགས་པའམ་མ་ལགས་སོ། །རྒྱལ་པོས་འོ་ན་ཅིའི་ཕྱིར་འདི་ལྟ་བུར་གྱུར་ཅེས་དྲིས་པ་དང་། །དེ་ལ་བདག་རང་གི་ཉེས་པ་སྤྱད་པ་རྣམས་བསྟན་ཏེ་སྨྲས་པ། །བྱམས་ལ་སྙིང་རིང་བྱས་པ་ཡིས། །མེ་ཏོག་འདི་ནི་རེ་ཤིག་མྱོང་། །དེ་བས་རབ་ཏུ་མི་བཟད་པའི། །འབྲས་བུ་གཞན་ནི་སླད་ཀྱི་མཆི། དེ་བས་བྱམས་ལ་སྙིང་རིང་བ། །དགྲ་བོ་བཞིན་དུ་ལྟ་བའི་རིགས། །རང་བཞིན་བྱམས་པའི་མཛའ་བཤེས་ལ། །རང་བཞིན་བྱམས་པས་ལྟ་བར་མཛོད། །བྱམས་པ་རྣམས་ལ་སྡང་བར་སྤྱོད་པའི་ཚུལ་བཟུང་ན། །ཚེ་འདི་ཉིད་ལ་འདི་འདྲའི་གནས་སྐབས་མྱོང་བར་འགྱུར། །ཆགས་ལ་སོགས་པའི་སྐྱོན་གྱིས་ཡིད་ནི་རྙོག་པ་རྣམས། །བྱམས་ལ་སྙིང་རིང་འགྲོ་བ་གཞན་དུ་འདི་ལས་དཔག །མཛའ་བོ་རྣམས་ལ་སེམས་ཤིང་བྱམས་པས་གྲགས་པ་ཐོབ། ཡིད་བརྟན་རིམ་གྲོ་བྱེད་པའི་བདེ་བའང་དེ་ལས་འཐོབ། །ངན་གྲོགས་བྱེད་པའི་ཡོན་ཏན་འཐོབ་ཅིང་ཡིད་ཀྱང་དགའ། །དགྲ་རྣམས་ཀུན་གྱིས་མི་ཚུགས་མཐོ་རིས་འཐོབ་པར་འགྱུར། །བྱམས་པའི་ཕྱོགས་ལ་ལེགས་ནོངས་ཅི་བགྱིས་པའི། །མཐུ་རྣམས་གྲུབ་པ་རྒྱལ་པོས་མཁྱེན་ནས་སུ། །སྐྱེ་བོ་དམ་པ་འདོད་པའི་ལམ་ལ་བརྟེན། །ལམ་དེར་སོང་ན་འབྱོར་པ་རྗེས་སུ་འབྲངས། །དེ་ལྟ་བས་ན་སྐྱེས་བུ་དམ་པ་རྣམས་ནི་གནོད་པ་བྱེད་པ་རྣམས་དགེ་བའི་ཕྱོགས་ལས་ཉམས་ན། ཇི་ལྟར་སེམས་གདུངས་པར་འགྱུར་བ་དེ་ཙམ་དུ་བདག་གིས་སྡུག་བསྔལ་གྱིས་སེམས་གདུངས་པར་མི་འགྱུར་རོ། །ཞེས་དེ་བཞིན་གཤེགས་པའི་བདག་ཉིད་ཆེ་བ་ལ་བརྗོད་པར་བྱའོ། །རིམ་གྲོ་བསྐྱེད་དེ་དམ་པའི་ཆོས་མཉན་པ་དང་། །བཟོད་པའི་གཏམ་བྱ་བ་དང་། །བྱམས་པ་ལ་སྙིང་ཉེ་བར་བྱ་བ་དང་། སྡིག་པའི་ལས་ཀྱི་ཉེས་དམིགས་བསྟན་པ་ལའང་བརྗོད་པར་བྱའོ། །སྤྲེའུ་ཆེན་པོར་སྐྱེས་པའི་རབས་ཏེ་ཉི་ཤུ་བཞི་པའོ།། །།བམ་པོ་དགུ་པ།། །།སྙིང་རྗེ་ཆེན་པོ་དང་ལྡན་པ་རྣམས་ནི་བདག་ལ་གསོད་པར་བྱེད་པ་རྣམས་ཀྱང་ཉམ་ཉེས་པར་གྱུར་ན། སྙིང་བརྩེ་བར་བྱེད་ཀྱིས་ཡལ་བར་མི་འདོར་རོ། །དེ་ཡང་འདི་ལྟར་བྱང་ཆུབ་སེམས་དཔའ་རེ་ཤིག་ཅིག །འབྲོག་དགོན་པ་མིའི་རྒྱུན་ལུགས་མེད་ཅིང་། །སྒྲ་མི་གྲག་པ། རི་དྭགས་ཀྱི་རིགས་མང་པོ་གནས་པ། ཤིང་གི་རྩ་བ་དང་ལྡུམ་བུ་མང་པོ་རྩ་བ་སྟུག་པོའི་ནི་ལེགས་པར་བརྟགས་ནས་སུ། །སྤ་ཐག་རྩྭ་བཅས་བདག་གི་རྐང་པ་བཅིངས། །རི་བོ་དེ་ལས་སླར་ཡང་འདིར་མཆོངས་ཏེ། །ལྗོན་ཤིང་འདི་ལས་བདག་གི་འཁོར་བསྒྲལ་ཕྱིར། །དེ་ཡི་ནང་ན་ནུབ་པ། འགྲོན་པོ་རྣམས་ཀྱི་ཤིང་རྟ་དང་བཞོན་པའི་རྐང་པའི་ལམ་གྱི་སྲོལ་མ་དོད་པ། འབབ་ཆུ་འབབ་པ་དང་། གྲོང་མཁར་དང་། གད་པ་དག་གིས་ས་གཞིའི་ཕྱོགས་མི་བདེ་བ་ཡོད་པ་ཞིག་ན་རི་དྭགས་ཤ་ར་བྷ་སྟོབས་དང་མགྱོགས་པ་དང་། སེམས་སྟོབས་ཕུན་སུམ་ཚོགས་ཤིང་ལུང་སྲ་བ་དང་ལྡན་པ་ཞིག་ཏུ་གྱུར་ཏོ་ཞེས་གྲག་གོ །དེ་སྙིང་རྗེ་ལ་གོམས་པས་སེམས་ཅན་རྣམས་ལ་གནོད་པ་མི་བྱེད་ཅིང་། རྩ་བ་དང་ལོ་མ་དང་ཆུ་ཙམ་གྱིས་འཚོ་བ། ཆོག་ཤེས་པའི་ཡོན་ཏན་གྱིས་དགོན་པ་ན་གནས་པ་ལ་དགའ་བའི་བློ་དང་ལྡན་པ་ནི་རྣལ་འབྱོར་པ་རབ་ཏུ་དབེན་པ་ལ་དགའ་བ་བཞིན་དུ། འབྲོག་དགོན་པ་དེ་བརྒྱན་ཏེ་གནས་པར་གྱུར་ཏོ། །རི་དྭགས་གཟུགས་ལ་མི་ལྟར་བརྟན་པའི་སེམས། །དཀའ་ཐུབ་ཅན་བཞིན་སྲོག་ཆགས་རྣམས་ལ་བརྩེ། །ནགས་ཚལ་དབེན་པ་དེ་ན་དེ་གནས་པ། རྣལ་འབྱོར་ཅན་བཞིན་རྩི་མཆོག་དག་གིས་མགུ། །དེ་ནས་རེ་ཤིག་ཅིག་ཡུལ་དེ་ལ་དབང་བའི་རྒྱལ་པོ་ཞིག་རྟ་བཟང་པོ་ལ་ནི་ཞོན། ལག་ན་མདའ་གཞུ་ཐོགས་ཏེ། བདག་ཉིད་རི་དྭགས་ལ་འཕོང་རྐྱེན་ནམ་མི་རྐྱེན་སད་པའི་ཕྱིར། ཆགས་པའི་དབང་གིས་རི་དྭགས་སྙེགས་པ་དང་། རྟ་རབ་ཏུ་མགྱོགས་པས་རྟ་དང་གླང་པོ་ཆེ་དང་། ཤིང་རྟ་དང་རྐང་ཐང་གི་ཚོགས་རྣམས་རྒྱང་རིང་པོར་ལུས་བཞིན་དུ་ས་ཕྱོགས་དེར་འོངས་པ་དང་། རྒྱང་རིང་པོ་ནས་སེམས་དཔའ་ཆེན་པོ་དེ་མཐོང་ནས། བསད་པར་བསམས་ཏེ། མདའ་མདེའུ་རྣོན་པོ་ཅན་ཕྱུང་ནས། བདག་ཉིད་ཆེན་པོ་དེ་གང་ན་འདུག་པ་དེ་ལོགས་སུ་རྟ་མགྱོགས་པ་དེ་རྒྱུགས་པ་དང་། དེ་ནས་བྱང་ཆུབ་སེམས་དཔའ་རྒྱལ་པོ་དེ་རྟ་མགྱོགས་པ་དེ་ཞོན་ཏེ་མདའ་གཞུ་ཐོགས་ནས་སྙེགས་པ་མཐོང་བ་དང་། སླར་རྒལ་ནུས་སུ་ཟིན་ཀྱང་གྱ་ཚོམ་དུ་རྒོལ་བ་སྤང་པའི་ཕྱིར། རབ་ཏུ་མགྱོགས་པའི་ཤུགས་ཀྱིས་རྒྱུགས་ཏེ་སོང་ངོ་། །དེ་རྟ་བཟང་པོ་དེས་སྙགས་པ་དང་། ལམ་ཀ་ན་གྲོག་པོ་ཆེན་པོ་ཞིག་ཡོད་པ་ལ། བ་ལང་གི་རྗེས་ལ་བྱ་བ་བཞིན་དུ་མཆོངས་ནས་བྲོས་ཏེ་སོང་ངོ་། །དེ་ནས་རྟ་དེ་རི་དྭགས་ཤ་ར་བྷ་བྲོས་པའི་ལམ་དེ་ཉིད་ནས་རབ་ཏུ་མགྱོགས་པར་སྙེགས་པ་དང་གྲོག་པོ་དེ་ལ་ཐུག་ནས་མཆོང་མ་ནུས་ཏེ་ཐེན་ཏོ། དེ་ནས་རྟ་ཡི་ཐོག་ནས་ནི། །རྒྱལ་པོ་མཚོན་ཆར་བཅས་པ་དེ། གྲོགས་པོ་ཆེན་པོའི་ནང་དུ་ལྷུང་། ལྷ་མིན་དམག་མི་མཚོར་ལྷུང་བཞིན། །དེ་ཡི་མིག་ནི་རི་དྭགས་དེ་ལ་ཡེངས། །གྲོག་པོ་དེ་ཡང་མཐོང་བར་མ་གྱུར་ཅིང་། །ཡིད་བརྟན་སྐྱོན་གྱིས་རྟ་ཡིས་གོང་ནས་གཡོས། །རྟ་མགྱོགས་ཤུགས་ཀྱིས་རྒྱལ་པོ་ལྷུང་བར་གྱུར། །དེ་ནས་བྱང་ཆུབ་སེམས་དཔའ་རྟའི་རྨིག་སྒྲ་མི་གྲག་པ་དང་། །ཅི་རྒྱལ་པོ་དེ་སླར་ལོག་གམ་སྙམ་དུ་རྣམ་པར་རྟོག་པ་སྐྱེས་ཏེ་སླར་བལྟས་པ་དང་། །རྟ་དེ་ཞོན་པ་དེ་མེད་པར་གྲོག་པོའི་ཁ་ན་འདུག་པ་མཐོང་ངོ་། །དེས་བསམས་པ། རྒྱལ་པོ་དེ་གྲོག་པོའི་ནང་དུ་ལྷུང་བ་གོར་མ་ཆག་གོ་སྙམ་མོ། །འདི་ན་ངལ་སོར་རུང་བའི་རྟེན་ནམ། །ཤིང་དྲུང་གི་གྲིབ་མ་སྟུག་པོ་ཅན་ནམ། ཨུཏྤ་ལའི་འདབ་མ་སྔོན་པོ་འདྲ་བའི་མཚོ་ཡང་མེད། །འདི་ལྟ་བུའི་འབྲོག་དགོན་པ་གཅན་ཟན་ཁྲོ་བོ་རྣམས་རྒྱུ་བ་ན། །རྟ་བཞག་སྟེ་ངལ་སོ་ཞིང་འདུག་པའི་གནས་ཀྱང་མེད། །རི་དྭགས་གཤོར་དུའང་མེད། །གབ་ཏུ་རུང་བའི་རྩྭ་སྟུག་པོའང་ཅུང་ཟད་ཀྱང་མེད་དོ། །དེ་བས་ན་རྒྱལ་པོ་དེ་ནི་གདོན་མི་ཟ་བར་གྲོག་པོ་འདིའི་ནང་དུ་ལྟུང་བར་གྱུར་ཏོ་སྙམ་མོ། །བདག་ཉིད་ཆེན་པོ་དེ་དེ་ལྟར་ངེས་པར་གྱུར་ནས། །དེ་བདག་ལ་གསོད་པ་ཡིན་ཡང་དེ་ལ་སྙིང་རྗེ་ཆེན་པོ་སྐྱེས་པར་གྱུར་ཏོ། །དེ་ཉིད་རྒྱན་ཆ་བཟང་པོའི་རྒྱན་རྣམས་དང་། ཕུབ་དང་མཚོན་ཆ་མང་པོས་རྣམ་པར་མཛེས། རྟ་དང་གླང་ཆེན་ཤིང་རྟ་རྐང་ཐང་དང་། སིལ་སྙན་སྣ་ཚོགས་སྒྲ་སྒྲོགས་དཔུང་དག་གིས། །ཕྱི་བཞིན་བསྐྱལ་ཞིང་མཛེས་པའི་གདུགས་ཀྱིས་བསྐྱབས། །གཡར་རྔའི་བསིལ་ཡབ་གཡོབ་པས་མཛེས་པར་བྱས། །སྐྱེ་བོ་མང་པོས་ལྷ་ཡི་དབང་པོ་བཞིན། །མཆོད་པའི་རྒྱལ་སྲིད་བདེ་བ་མྱོང་གྱུར་ནས། །དེ་རིང་ཁོ་ན་གཡང་ས་ཆེན་པོར་ལྷུང་། །ལྷུང་བའི་ཤུགས་ཀྱིས་ཡན་ལག་གྲུགས་པར་གྱུར། །བརྒྱལ་བར་གྱུར་ཏམ་ཡང་ན་མྱ་ངན་བྱེད། །ཀྱེ་མའོ་མཚར་བྱས་ཉོན་མོངས་རང་བཞིན་གྱུར། །སྡུག་བསྔལ་མ་མྱོང་རབ་ཏུ་གཞོན་ཤ་ཅན། །ཡ་རབས་རྣམས་ལ་ཉམ་ཉེས་གནོད་པ་བཞིན། །མ་རབས་རྣམས་ལ་རྨ་རྙིང་སོས་འདྲ་བར། །སྡུག་བསྔལ་རྣམས་ཀྱིས་དེ་ལྟར་གནོད་མི་འགྱུར། །དེ་བས་ན་འདི་དེ་ནས་བདག་རང་ཐར་བར་མི་ནུས་ཏེ། །སྲོག་གི་ལྷག་མ་ཙམ་ཞིག་ལུས་སུ་ཟིན་ཀྱང་འདི་ཡལ་བར་འདོར་བར་མི་རིགས་སོ་སྙམ་ནས། །བདག་ཉིད་ཆེན་པོ་དེ་སྙིང་རྗེས་སེམས་དྲངས་ནས། གཡང་ས་དེའི་འགྲམ་དུ་ཕྱིན་པ་དང་། དེ་དེ་ན་མཐབ་བེར་ནི་རྡུལ་གྱིས་གཡོགས། ཐོད་བཅིངས་པ་ནི་ཞིག །གཡང་ས་ནས་ལྟུང་སྟེ། བསྣད་པའི་ཚོར་བ་མྱོང་བ་ནི་སེམས་ལ་ཁྱབ་པར་གྱུར་ཏེ། །འགྲེ་ཞིང་འདུག་པ་མཐོང་ངོ་། །གྲོག་པོའི་ནང་ན་འགྲེ་ཞིང་འདུག་པ་ཡི། །རྒྱལ་པོ་མཐོང་ནས་མིག་ནི་མཆི་མས་གང་། །སྙིང་རྗེའི་དབང་གིས་དགྲ་ཡི་འདུ་ཤེས་བརྗེད། །དེ་ཡི་སྡུག་བསྔལ་ཐུན་མོང་ཉིད་དུ་གྱུར། སྐྱེ་བོ་དགེ་བའི་རང་བཞིན་སྟོན་བྱེད་ཅིང་། །དབུགས་འབྱིན་གྱུར་པ་འཇམ་ཞིང་གསལ་བའི་ཚིག །ཞེ་སར་བཅས་ཤིང་ཡིད་དུ་འོང་བ་ཡིས། །ཡ་རབས་ཚུལ་བཞིན་དེ་ལ་འདི་སྐད་སྨྲས། །རྒྱལ་པོ་ཆེན་པོ་སྣད་པར་མ་གྱུར་ཏམ། གཡང་ས་ཟབ་མོ་འདིར་ནི་ལྷུང་བ་ཡིས། །ལུས་ལ་ཆག་གྲུགས་བྱུང་བར་མ་གྱུར་ཏམ། །ཁྱོད་ཀྱི་ནད་རྣམས་རྒྱས་པར་མ་གྱུར་ཏམ། །མི་ཡི་རྒྱལ་པོ་བདག་ནི་གཞན་མ་ལགས། །ཁྱོད་ཀྱི་ཡུལ་ན་གནས་པའི་རི་དྭགས་ལགས། །ཁྱོད་ཀྱི་རྩྭ་དང་ཆུ་ཡིས་བདག་ནི་བསྐྱེད། །དེ་བས་བདག་ལ་བག་ནི་དབབ་པའི་རིགས། །གཡང་སར་ལྷུང་བས་མི་དགྱེས་མ་མཛད་ཅིག །ཁྱོད་ནི་འདི་ནས་བདག་གིས་དབྱུང་བར་ནུས། །བདག་ལ་ཐུགས་ཆེས་རུང་བ་དགོངས་ནས་ནི། །དེར་ནི་བདག་མཆིས་མྱུར་དུ་བཀའ་སྩོལ་ཅིག །དེ་ནས་རྒྱལ་པོ་དེ་དེ་སྐད་སྨྲ་བ་རབ་ཏུ་ངོ་མཚར་ཆེ་དེ་ཡ་མཚན་དུ་གྱུར་ཅིང་སེམས་མགུའང་། ངོ་ཚ་བ་སྐྱེས་ཏེ། བདེན་ནམ་རྫུན་སྙམ་ནས་བསམས་པ། དགྲ་ལ་རྒལ་བར་ནུས་བཞིན་དུ། །བདག་ལ་ཇི་ལྟར་སྙིང་རྗེ་སྐྱེས། །བདག་གིས་གནོད་པ་བྱས་པའང་ཤེས། །སྐྱོན་མེད་འདི་ནི་སུ་ཞིག་ཡིན། ཀྱེ་མའོ་འཇམ་ཞིང་རྣོ་བ་ཡི། །ལས་ཀྱི་བདག་ནི་བསྐུལ་བར་གྱུར། །བདག་ཉིད་ཕྱུགས་སམ་རི་དྭགས་ཡིན། །རི་དྭགས་གཟུགས་ཅན་འདི་ནི་གཞན། །དེ་བས་ན་འདིས་བག་ཕབ་སྟེ་སྨྲ་བ་འདི་བཞིན་དུ་བྱ་བའི་རིགས་སོ། །སྙམ་ནས་དེ་ལ་སྨྲས་པ། མཐའ་བེར་སྟུག་པོ་བགོས་པས་ན། །བདག་གི་ལུས་འདི་ཆེར་མ་སྣད། །གཡང་ས་ནས་ནི་ལྷུང་བ་ཡིས། །ཅུང་ཟད་སྣད་པ་བདག་གིས་བཟོད། །ཁྱོད་ལྟར་དགེ་བར་སེམས་པ་ལ། །ནོངས་པར་བགྱིས་པའི་སྡུག་བསྔལ་ཙམ། །གཡང་ས་ནས་ནི་ལྷུང་བ་ཡིས། །སྡུག་བསྔལ་བདག་ལ་ག་ལ་མཆིས། །གཟུགས་ཀྱི་རྐྱེན་གྱིས་རི་དྭགས་ལྟར། །བདག་གིས་ཁྱོད་ནི་མཐོང་བར་གྱུར། །ཁྱོད་ཀྱི་རང་བཞིན་མ་འཚལ་བ། །དེ་ནི་ཐུགས་ལ་མ་བཅང་ཞིག །དེ་ནས་རྒྱལ་པོ་དེའི་ཚིག་དགའ་བ་སྟོན་པ་སྨྲས་པ་དེས་གྲོག་པོ་ནས་དབྱུང་བར་འདོད་པར་ཤ་ར་བྷས་རིག་ནས། རྡོ་བ་མིའི་ལྕིད་ཙམ་དུ་ལྕི་བ་ཞིག་ལ་ཚད་དེ། །དེ་དབྱུང་བར་ནུས་པར་གོམས་པར་བྱས་ནས། །བདག་གི་སྟོབས་ཀྱི་ཉམས་དྲོད་རིག་པ་དང་། རྒྱལ་པོ་དེ་དབྱུང་བར་མཆིས་ཏེ་གྲོག་པོའི་ནང་དུ་ཞུགས་ནས། དེའི་དྲུང་དུ་འོངས་ཏེ་གུས་པར་སྨྲས་པ། བདག་ལ་ཕན་པར་གྱུར་པ་གཟིགས་ནས་ནི། །དགྱེས་ཤིང་དང་བའི་ཞལ་གྱིས་མངོན་ཕྱོགས་པ། །དེ་ཡི་བར་དུ་བདག་ལུས་རེག་པ་འདི། །དགོས་པའི་དབང་གིས་རེ་ཤིག་བཟོད་པར་མཛོད། །རྒྱལ་པོ་ཆེན་པོ་དེ་བས་ན་བདག་གི་རྒྱབ་ཏུ་བཅིབས་ལ། བདག་ལ་ལེགས་པར་འཇུས་ཤིག་ཅེས་པ་དང་། དེས་ཀྱང་དེ་བཞིན་དུ་བགྱིའོ་ཞེས་སྨྲས་ནས་རྟ་ལ་ཞོན་པ་བཞིན་དུ་ཞོན་ནོ། །དེ་ནས་རོ་སྟོད་གྱེན་དུ་མངོན་བསྟོད་ནས། །མི་ཡི་བདག་པོ་ལེགས་པར་ཞོན་པ་དེ། །སྙིང་སྟོབས་ཆེན་པོས་དྲག་པོའི་ཤུགས་ཀྱིས་མཆོངས། །རྟ་བབས་རྒྱན་བཞིན་སྟེང་དུ་བྱུང་བར་གྱུར། །དེ་ནས་རྒྱལ་པོ་རོང་ནས་ཕྱུང་པ་དང་། །དགའ་བར་གྱུར་ནས་རྟ་ཡང་བླངས་ཏེ་བྱིན། །རང་གི་ཁྱིམ་དུ་འགྲོ་བའི་ལམ་བསྟན་ནས། །ནགས་ཚལ་ནང་དུ་འགྲོ་བར་ཆས་པར་གྱུར། དེ་ནས་རྒྱལ་པོ་དེ་བྱས་པ་དྲིན་དུ་གཟོ་བས་དེའི་ཕན་བཏགས་པ་དང་། །དུལ་ཞིང་འཇམ་པ་དེས །སེམས་རབ་ཏུ་མགུ་བར་གྱུར་ནས། །ཤ་ར་བྷ་ལ་མགུལ་ནས་འཁྱུད་དེ་སྨྲས་པ། བདག་གི་སྲོག་ཀྱང་རི་དྭགས་ཁྱོད་མངའ་ན། །བདག་ལ་བདོག་པ་གཞན་ལྟ་སྨོས་ཅི་དགོས། །དེ་བས་བདག་གི་ཁྱིམ་འདི་གཟིགས་པའི་རིགས། །བཞུགས་སུ་གནང་ན་དེ་ན་བཞུགས་པར་གསོལ། །ནགས་ཚལ་རྔོན་པས་གང་ཞིང་འཇིགས་དང་བཅས། །གྲང་དང་ཚ་དང་ཆར་པ་སྡུག་བསྔལ་ཅན། འདི་ལྟ་བུ་ནི་བདག་གིས་ཁྱོད་བོར་ནས། །བདག་ནི་གཅིག་པུ་ཁྱིམ་དུ་འགྲོ་མི་རིགས། །དེ་བས་ན་འོ་སྐོལ་འགྲོགས་ཏེ་བཞུད་ཀྱིས་ཚུར་སྤྱོན་ཅེས་སྨྲས་པ་དང་། དེ་ནས་བྱང་ཆུབ་སེམས་དཔས་དུལ་ཞིང་འཇམ་པའི་ཚིག་གིས་མགུ་བར་བྱས་ནས་དེ་ལ་སླར་སྨྲས་པ། མི་མཆོག་ཡོན་ཏན་དགའ་བ་ཁྱོད་ལྟ་བུ། ཉིད་ལ་ཚུལ་འདི་རབ་ཏུ་རགས་པ་ལགས། གོམས་པར་བྱས་པས་སྐྱེ་བོ་དམ་པ་རྣམས། །ཡོན་ཏན་མང་པོ་རང་གི་ངང་དུ་འགྱུར། །གལ་ཏེ་བདག་ལ་ཕན་གདགས་བཞེད་ན་ནི། །བདག་ཅག་ཁྱིམ་ན་མི་གནས་ནགས་ན་གོམས། །དེ་བས་མི་རྣམས་བདེ་བའང་གཞན་ལགས་ན། །རི་དྭགས་རིགས་དང་མཐུན་པའི་བདེ་བའང་གཞན། །གལ་ཏེ་བདག་ནི་དགའ་བར་ཁྱོད་བཞེད་ན། །དཔའ་བོ་ཁྱོད་ཀྱིས་རྔོན་པའི་ཕྲིན་ལས་ཐོང་། །དུད་འགྲོའི་རང་བཞིན་སེམས་ནི་བླུན་པ་ཅན། །རི་དྭགས་ཉོན་མོངས་རྣམས་ལ་སྙིང་རྗེ་མཛོད། །བདེ་ལ་གནས་དང་སྡུག་བསྔལ་བྲལ་འདོད་པ། །སེམས་ཅན་ཐམས་ཅད་མཚུངས་པར་ཐུགས་ལ་དགོངས། དེ་བས་བདག་ཉིད་མི་འདོད་གང་ཡིན་པ། །གཞན་དག་ལ་ཡང་བགྱི་བར་མི་རིགས་སོ། །གྲགས་པ་མེད་ཅིང་དམ་པས་སྨད་གྱུར་པ། །སྡུག་བསྔལ་སྡིག་ལས་འབྱུང་བར་རིག་ནས་ནི། །དགྲ་ཡི་ཕྱོགས་བཞིན་སྡིག་པ་སྤང་བར་མཛོད། །དེ་ནི་ནང་བཞིན་ཡལ་བར་དོར་མི་རིགས། །གང་ལ་བརྟེན་ནས་དཔལ་གྱི་གནས་གྱུར་པ། འཇིག་རྟེན་བསྔགས་པའི་རྒྱལ་སྲིད་ཐོབ་གྱུར་པའི། །བསོད་ནམས་དེ་ཉིད་རྣམ་པར་འཕེལ་བར་མཛོད། །ཕན་འདོགས་ཕྱོགས་ནི་སྤང་བར་ཡོང་མི་རིགས། །དུས་སུ་རིམ་གྲོ་བྱས་པའི་སྦྱིན་པ་རྒྱ་ཆེན་དང་། །སྐྱེ་བོ་དགེ་དང་མཐུན་པའི་ཚུལ་ཁྲིམས་བརྟན་པ་དང་། །བདག་དང་འདྲ་བར་གཞན་ལ་ཕན་པར་བསྒྲུབ་པའི་བློས། །བདེ་དང་བསྒྲུབ་དང་གྲགས་དང་བསོད་ནམས་སོགས། །དེ་ལྟར་བདག་ཉིད་ཆེན་པོ་དེས་རྒྱལ་པོ་དེ་ལ་ཚེ་འདི་དང་ཚེ་ཕྱི་མའི་དོན་དུ་བྱ་བ་ལ་ཕན་ནི་བཏགས། །རྒྱལ་པོ་དེས་ཀྱང་བསྒོ་བའི་ཚིག་མཉན་ཏེ། རབ་ཏུ་གུས་པར་ལྟ་བ་བཞིན་དུ་ནགས་ཚལ་དེ་ཉིད་ཀྱི་ནང་དུ་ཞུགས་ཏེ་སོང་ངོ་། །དེ་ལྟ་བས་ན་སྙིང་རྗེ་ཆེན་པོ་རྣམས་ནི་བདག་ལ་གནོད་པར་བྱེད་པ་རྣམས་ཀྱང་ཉམ་ཉེས་པར་གྱུར་ན་སྙིང་བརྩེ་བར་བྱེད་ཀྱི་ཡལ་བར་མི་འདོར་རོ། །དེ་བཞིན་དུ་སྙིང་རྗེ་ཆེན་པོའི་ཡོན་ཏན་བསྔགས་པ་ལའང་བརྗོད་པར་བྱའོ། །དེ་བཞིན་གཤེགས་པའི་ཡོན་ཏན་བསྔགས་པ་དང་རིམ་གྲོ་བསྐྱེད་དེ་དམ་པའི་ཆོས་མཉན་པ་དང་ཁོན་མེད་པར་བྱས་ན་དགྲ་ཞི་བར་འགྱུར་བའི་དཔེ་དང་། བཟོད་པའི་གཏམ་བྱ་བ་ལའང་སྦྱར་བར་བྱའོ། །དུད་འགྲོར་གྱུར་པ་རྣམས་ཀྱང་འདི་ལྟར་བདག་གསོད་པ་ལའང་སྙིང་རྗེ་བྱེད་པ་ཡོད་ན། མི་གྱུར་པའམ། རབ་ཏུ་བྱུང་བར་ཁས་འཆེ་བ་ལ་སེམས་ཅན་རྣམས་ལ་སྙིང་རྗེ་མེད་ན་ག་ལ་རུང་ཞེས་སྲོག་ཆགས་རྣམས་ལ་སྙིང་རྗེ་དང་ལྡན་པར་བྱའོ་ཞེས་ཀྱང་བརྗོད་པར་བྱའོ། །རི་དྭགས་ཤ་ར་བྷའི་སྐྱེས་པའི་རབས་ཏེ་ཉི་ཤུ་ལྔ་པའོ།། །།དགེ་བ་ཅན་རྣམས་ནི་གཞན་སྡུག་བསྔལ་བ་ཉིད་ཀྱིས་བདག་སྡུག་བསྔལ་ཏེ་དེ་མི་བཟོད་ཀྱིས། བདག་གི་སྡུག་བསྔལ་མི་བཟོད་པ་ནི་མ་ཡིན་ནོ། །དེ་ཡང་འདི་ལྟར་བྱང་ཆུབ་སེམས་དཔའ་རེ་ཤིག་ཅིག དགོན་པའི་ནགས་ཚལ་ཆེན་པོ་ཤིང་སཱ་ལ་དང་། བ་ཀུ་ལ་དང་། བི་ཡ་ལ་དང་། ཧིན་ཏ་ལ་དང་། མཱུ་ལེ་དྲུམ་ཤིང་དང་། ཏ་མ་ལ་དང་། ན་ག་ཏ་མ་ལ་དང་། བི་དུ་ལ་དང་། ནི་ཙུ་ལ་མང་པོ་དང་། ཤིང་ཤ་པ་དང་ཨ་ཏི་ནི་ཤ་དང་། ཤ་མི་དང་། བ་ལ་ཤ་དང་། ཙ་ཀ་ཤ་དང་། ཀུ་ཤ་དང་། འོད་མ་དང་། སྨིག་མའི་ནགས་ཚལ་སྟུག་པོ་དང་། ཤིང་ཀ་དམ་པ་དང་། སརྫ་དང་། ཨརྫུ་ན་དང་། དྷ་བ་དང་། སེང་ལྡེང་དང་། ཀུ་ཊཱ་ཛ་སྟུག་པོ་ཡོད་པ། ཤིང་ལྗོན་པའི་ལྡུམ་བུ་མང་པོ་འཁྲི་ཤིང་སྣ་ཚོགས་ཀྱིས་དཀྲིས་པ། རི་དྭགས་རུ་རུ་དང་པྲི་ཤི་ཏ་དང་། བྲི་མར་དང་། གཡག་རྒོད་དང་། གླང་པོ་ཆེ་དང་། བ་མེན་དང་། མ་ཧེ་དང་། དགོ་བ་དང་། ནྱང་ཀུ་དང་། ཕག་རྒོད་དང་། སྟག་དང་། གཟིག་དང་། སེང་གེ་དང་། སྤྱང་ཀི་དང་། དོམ་དང་། དྲེད་ལ་སོགས་པ་མང་པོ་རྒྱུ་བ། མིའི་རྒྱུན་ལུགས་མེད་པའི་ས་ཕྱོགས་ཞིག་ན། རི་དྭགས་རུ་རུ་གསེར་བཙོ་མའི་ཁ་དོག་གསལ་བ་འདྲ་བ། སྤུ་རབ་ཏུ་འཇམ་པ། ལུས་ཀྱི་མདོག་རིན་པོ་ཆེ་ཨནྡ་རྙིལ་དང་། མར་གད་དང་། བཻ་ཌཱུརྻའི་ཁ་དོག་འདྲ་བའི་ཚོན་སྣ་ཚོགས་ཀྱི་ཐིག་ལེས་བརྒྱན་པ་མིག་གི་དཀྱུས་རིང་ཞིང་བཀྲག་བཟང་བ། རྭ་དང་རྨིག་པ་ནོར་བུ་རིན་པོ་ཆེ་ལྟར་འཇམ་ཞིང་འོད་དང་ལྡན་པ། གཟུགས་བལྟ་ན་རབ་ཏུ་སྡུག་པ། རིན་པོ་ཆེའི་འབྱུང་གནས་འགྲོ་ཤེས་པ་འདྲ་བ་ཞིག་ཏུ་གྱུར་ཏོ་ཞེས་གྲག་གོ །དེ་ཡང་རང་གི་ལུས་ཆགས་སུ་རུང་བ་དང་། སྐྱེ་བོ་རྣམས་སྙིང་རྗེ་ཆུང་བར་ཤེས་ནས། ནགས་ཚལ་སྟུག་པོ་སྐྱེ་བ་མེད་པ་དག་ན་ཉམས་དགའ་བར་འདུག་གོ །དེ་སེམས་རྣོ་བས་ཕྱོགས་གང་དང་གང་ན་རྔོན་པ་རྣམས་རྒྱུ་བ་དང་། འཁྲུལ་འཁོར་དང་། རྟོད་དང་། རྒྱ་མོ་དང་། རྙི་བཙུགས་པ་དང་། རྙོང་དང་། ཤིང་གི་ཝ་འཛོལ་རྣམས་ལེགས་པར་སྤངས་ནས། རི་དྭགས་མང་པོ་རྗེས་སུ་འབྲངས་བ་རྣམས་ལའང་སློབ་དཔོན་དང་བ་བཞིན་དུ་སློབ་པ། རི་དྭགས་རྣམས་ཀྱི་བདག་པོ་བྱེད་ཅིང་འདུག་གོ །གཟུགས་དང་ཤེས་པ་ཕུན་སུམ་ཚོགས། །བྱ་བ་རྣམས་ལ་མཁས་པས་བརྒྱན། །བདག་ལ་ཕན་འདོགས་སྐྱེ་བོ་ལ། །མཆོད་པ་མི་བྱེད་སུ་ཞིག་ཡོད། །དེ་ནས་རེ་ཤིག་ཅིག་བདག་ཉིད་ཆེན་པོ་དེ་ནགས་ཚལ་སྟུག་པོ་དེ་ན་གནས་བཅས་ཤིང་འདུག་འདུག་པ་ལས། དེ་དང་ཉེ་བ་ཞིག་ན་འབབ་པའི་འབབ་ཆུ་ཆུ་གསར་དུ་བྲུག་པས་རབ་ཏུ་གང་བ། རབ་ཏུ་ཤུགས་དྲག་པོས་མི་ཞིག་ཁྱེར་ནས་ངུ་ཞིང་འབོད་པའི་སྒྲ་ཐོས་པར་གྱུར་ཏོ། །ཆུ་ཆེན་བྲུག་པ་རབ་ཏུ་དྲག་པོ་ཡིས། །ཁྱེར་ནས་མགོན་མེད་གཟིངས་ཀྱང་ཡོད་མ་ཡིན། །བདག་ལྟར་ཕོངས་ཤིང་ཉམས་ཐག་བསྒྲལ་བའི་ཕྱིར། །སྡུག་ལ་བྱམས་པ་མྱུར་དུ་རྒྱུག་སྟེ་ཟུང་། །ད་ནི་བཤོལ་དུ་རུང་བ་མ་ཡིན་ཏེ། །ངལ་ཞིང་དུབ་པས་དཔུང་པའང་བསྒྱུར་མི་ནུས། །ཟུག་ཅིང་འབོག་ཏུ་རུང་བའང་ཅུང་ཟད་མེད། །དེ་བས་རྒྱུགས་ཏེ་འོང་བའི་དུས་ལ་བབ། དེ་ནས་བྱང་ཆུབ་སེམས་དཔའ་དེ་སྙིང་རྗེ་རྗེ་སྐད་དུ་ངུ་ཞིང་འབོད་པའི་སྒྲ་དེས་སྙིང་ལ་བརྡེགས་པ་བཞིན་དུ་གྱུར་ནས་མ་འཇིགས་མ་འཇིགས་ཞེས་ཟེར་བའི་ཚིག །འཇིགས་པ་དང་མི་དགའ་བ་དང་། ངལ་བ་དང་དུབ་པ་སངས་པར་བྱེད་པ། ལོ་བརྒྱར་གོམས་པར་བྱེད་པ། གསལ་བ་གསང་བསྟོད་དེ་སྙིང་རྗེས་གདུངས་ནས། །མིའི་སྐད་དུ་ཕྱུང་སྟེ་ནགས་ཚལ་སྟུག་པོ་དེ་ནས་བྱུང་བ་དང་། ཐག་རིང་པོ་ནས་མི་དེ་ཆུས་ཁྱེར་བ་ཡིད་དུ་འོང་བའི་སྐྱེས་བསྐུར་ཏེ་བཏང་བ་བཞིན་དུ་འོངས་པ་མཐོང་ངོ་། །དེ་ནས་དེ་བསྒྲལ་ཕྱིར་ནི་དེས་བྱས་པ། །བདག་གི་སྲོག་ཡལ་བར་ཡང་མི་སེམས་པ། །དེ་ནི་འབབ་ཆུ་དྲག་པོ་འཇིགས་དེར་ཞུགས། །དགྲ་ཡི་དཔུང་རྣམས་འཇོམས་པའི་དཔའ་བོ་བཞིན། །དེ་ནས་ལུས་ཀྱིས་དེ་ཡི་ལམ་བཀག་སྟེ། །ང་ལ་འཇུས་ཞེས་དེ་ལ་ཚིག་ཏུ་སྨྲས། །སྐྲག་པས་ཉེན་ལ་ངལ་བས་ཡན་ལག་འཁུམས། །དེ་ནི་དེ་ཡི་རྒྱབ་ཏུ་ཞོན་པར་གྱུར། །མི་དེའི་ལྕིད་ཀྱིས་རབ་ཏུ་ནོན་གྱུར་ཅིང་། །འབབ་ཆུ་དྲག་པོའི་ཤུགས་ཀྱི་བདས་གྱུར་ཀྱང་། །དཔའ་སྙིང་བརྟན་ལ་རྩོལ་བ་དྲག་པོ་ཡིས། །ཡིད་དུ་འོང་བའི་འགྲམ་དུ་མ་ཉམས་ཕྱིན། །དེ་ནས་མི་དེ་འགྲམ་དུ་ཕྱིན་པར་བྱས་ནས་ནི། །རབ་ཏུ་དགའ་བས་ངལ་བའི་སྡུག་བསྔལ་མེད་པར་བྱས། །བདག་གི་དྲོད་ཀྱིས་དེ་ཡི་གྲང་བ་མེད་པར་བྱས། །ལམ་ཡང་བསྟན་ནས་དེ་ལ་སོང་ཞེས་སྨྲས་ནས་བཏང་། །དེ་ནས་མི་དེས། དེས་གྲོགས་བྱས་ཤིང་ཕན་བཏགས་པ་དེ་ལྟ་བུ་ཉེ་དུ་དང་གྲོགས་པོ་མཛའ་བོ་སུ་ལའང་མེད་པ། རབ་ཏུ་ངོ་མཚར་ཆེ་བ་དེས། སེམས་ནི་རབ་ཏུ་མགུ་བར་གྱུར། དེའི་གཟུགས་བཟང་པོ་དེས་ཀྱང་ཡ་མཚན་དང་ཞེ་ས་སྐྱེས་པར་གྱུར་ནས་ཕྱག་འཚལ་ཏེ། དེ་ལ་ཚིག་སྙན་པ་དེ་དང་དེ་དག་སྨྲས་པ། ཁྱོད་ཀྱིས་བདག་ལ་བགྱིས་པ་ནི། །གཉེན་བཤེས་བྱིས་པ་ཚུན་ཆད་ནས། །བྱམས་པར་གྱུར་པ་བདག་གིས་ཀྱང་། འདི་ལྟ་བུ་དག་བྱ་མི་ནུས། །བདག་གི་སྲོག་འདི་ཁྱོད་ཀྱི་ལགས། །ཁྱོད་ཀྱི་དོན་དུ་ཅུང་ཟད་ཙམ། །དགོས་པ་བཞིན་དུ་སྦྱང་ན་ནི། །བདག་ལ་རབ་ཏུ་བཀའ་དྲིན་ཆེ། །དེ་བས་ཅི་བགྱི་བཀའ་སྩལ་བས། །བདག་ལ་རྗེས་སུ་བཟུང་བའི་རིགས། །ཁྱོད་ལ་གང་དུ་ཅི་འཚལ་ན། །དེར་ནི་བདག་གིས་སྤྱད་དུ་གསོལ། །དེ་ནས་བྱང་ཆུབ་སེམས་དཔའ་དེ་ལ་མགུ་བར་བྱས་ཏེ་སྨྲས་པ། །སྐྱེ་བོ་དམ་པ་དྲིན་གཟོ་སྨད་མི་ཆེ། དེ་ཡི་ཆོས་ཉིད་རང་བཞིན་གྲུབ་པ་ཡིན། །འགྲོ་བ་རྣམས་ནི་འགྱུར་བ་མང་དུ་མཐོང་། །བྱས་པ་དྲིན་གཟོ་དེང་སང་ཡོན་ཏན་ཆེ། །དེ་བས་ན་ཁྱོད་ལ་གདམས་པ་ནི། ཕན་བཏགས་པ་འདི་རྗེས་སུ་དྲན་པར་བྱ་ན་སེམས་ཅན་འདི་ལྟ་བུ་ཞིག་གིས་བདག་ཆུའི་ནང་ནས་ཕྱུང་ངོ་ཞེས་ཁྱོད་སུ་ལའང་མ་ཟེར་ཅིག །ངའི་ལུས་འདི འང་ཤ་ཟར་རུང་བས་རབ་ཏུ་ཆགས་པར་གྱུར་པ་ཞིག་ཡིན་ལ། མི་རྣམས་ཀྱི་སྙིང་ཡང་འདོད་ཞེན་ཆེ་ལ་བག་མེད་པ་མང་སྟེ། དེ་བས་བདག་གི་ཡོན་ཏན་དང་། དེ་ཡང་ལེགས་པར་བསྲུང་བའི་རིགས། མཛའ་བོ་དག་ལ་སྙིང་རིང་བ། །གང་ནའང་བདེ་བ་ཡོད་མ་ཡིན། །ངེད་ཅག་ནི་རི་དྭགས་ཡིན་པས་མིའི་གཡོ་སྒྱུ་དང་ཕྱི་བཞག་ལ་མ་གོམས་པའི་ཕྱིར་ངས་དེ་སྐད་སྨྲས་པ་ལ་ཁོན་དུ་འཛིན་པའམ། སྙིང་མི་དགའ་བར་མ་སེམས་ཤིག །གཞན་ཡང་། ལོག་པའི་ཚུལ་འཆོས་མཁས་པ་ཡིས། །དེ་ལྟའི་གཡོ་དག་བྱས་པའི་ཕྱིར། །རང་བཞིན་གྱིས་ནི་དུལ་བ་ཡི། །སྐྱེ་བོ་རྣམས་ཀྱང་དོགས་པ་སྐྱེ། །དེ་སྐད་སྨྲས་པའང་ཁྱོད་ལ་ཕན་པར་འདོད་པའི་ཕྱིར་རོ། །དེས་ཀྱང་དེ་བཞིན་དུ་བགྱིའོ་ཞེས་མཉན་ནས་ཕྱག་འཚལ་ཏེ་སེམས་དཔའ་ཆེན་པོ་དེ་ལ་བསྐོར་བ་བྱས་ནས་རང་གི་ཁྱིམ་དུ་སོང་ངོ་། །དེའི་ཚེ་ཡུལ་དེའི་རྒྱལ་པོ་ཞིག་གི་བཙུན་མོ་རྨི་ལམ་རྣོ་བ་ཞིག་ཡོད་དེ། དེ་ཡང་རྨི་ལམ་ངོ་མཚར་ཆེ་བ་གང་དང་གང་རྨིས་པ་དེ་དག་དེ་བཞིན་དུ་འགྱུ་རོ། །དེ་རེ་ཤིག་ཅིག་གཉིད་ཀྱི་ལོག་པ་ལས། ཐོ་རངས་ཀྱི་རྨི་ལམ་དུ་རི་དྭགས་རུ་རུ་ཞིག་རིན་པོ་ཆེ་ཐམས་ཅད་བསོགས་པའི་ཚོགས་བཞིན་དུ། དཔལ་རབ་ཏུ་འབར་བ་སེང་གེའི་ཁྲི་སྟེངས་སུ་འདུག་ཅིང་། རྒྱལ་པོ་དང་བཅས་པའི་འཁོར་གྱིས་ཡོངས་སུ་བསྐོར་ཏེ། ཚིག་གསལ་ཞིང་སྡེབ་ལེགས་པས་ཆོས་འཆད་པ་མཐོང་ངོ་། །དེ་ནས་སེམས་ལ་ངོ་མཚར་ཆེར་བཟུང་བ་ལས། རྒྱལ་པོ་བཞེངས་སུ་གསོལ་བའི་རྔ་སྒྲ་ཐོས་ཏེ། སད་པ་དང་སྤོབས་ཤིང་གནང་བས་སྐབས་ཤིག་ཏུ་རྒྱལ་པོའི་སྤྱན་སྔར་སོང་ངོ་། །ངོ་མཚར་ཆེ་བས་མིག་དགྲད་དཔལ་ལྡན་དེ། །དགའ་བའི་མཁུར་ཚོས་གཡོ་བ་མཛེས་བཞིན་དུ། །རྨི་ལམ་ངོ་མཚར་མཐོང་བ་བཟླས་པ་དེས། །སྐྱེས་འབུལ་བཞིན་དུ་མི་ཡི་བདག་པོ་བལྟས། །རྨི་ལམ་བཟང་པོ་དེ་རྒྱལ་པོ་ལ་གསོལ་ནས་ཞེ་ས་བསྐྱེད་དེ་ཡང་སྨྲས་པ། ལྷ་ཅིག་དེ་བས་རི་དྭགས་བཟང་པོ་དེ། །བརྙེས་པའི་སླད་དུ་ནན་ཏན་བསྐྱེད་དུ་བསོལ། །རི་དྭགས་རིན་ཆེན་དེ་ཡིས་ཕོ་བྲང་ནང་། །མཁའ་ལ་སྐར་མ་བཞིན་དུ་མཛེས་པར་མཛོད། །དེ་ནས་རྒྱལ་པོ་དེ་བཙུན་མོ་དེའི་རྨི་ལམ་རྣོ་བར་ཡིད་ཆེས་པས་དེའི་ཚིག་མཉན་ཏེ། དེ་དགའ་བར་བྱ་བ་དང་། རི་དྭགས་རིན་པོ་ཆེ་དེ་རྙེད་པར་འདོད་པས། རི་དྭགས་དེ་བཙལ་བའི་ཕྱིར་རྔོན་པ་ཐམས་ཅད་ལ་བསྒོ་སྟེ། ཉིན་རེ་ཞིང་ཕོ་བྲང་དམ་པའི་འཁོར་དུ། འདི་སྐད་སྒྲོགས་སུ་བཅུག་གོ །རི་དྭགས་གསེར་གྱི་མདོག་ཅན་རིན་ཆེན་སྣ་ཚོགས་ཀྱིས། །ལུས་བརྒྱན་གྲགས་པ་ཐོས་སམ་གང་གིས་མཐོང་ཡང་རུང་། །དེ་ནི་རབ་ཏུ་སྟོན་པ་རྒྱལ་པོས་ཡུལ་གྲུ་མཆོག །བཅའ་བཅུ་ཙམ་དང་བུད་མེད་སྡུ་གུ་སྦྱིན། །དེ་ནས་མི་དེས་དེ་སྐད་བསྒྲགས་པ་ཡང་དང་ཡང་དུ་ཐོས་ནས། དབུལ་བའི་སྡུག་བསྔལ་བསམས་ན་སེམས་ནི་ཡོངས་སུ་སྐྱོ། །རི་དྭགས་རུ་རུས་ཕན་པ་ཆེན་པོ་བྱས་པའང་དྲན། །བརྐམ་པ་དང་ནི་ཕན་བཏགས་དེས་ཡིད་དྲངས་བ་ན། །སྙིང་ནི་བར་མ་དོར་གྱུར་དེ་དང་དེ་དག་སེམས། ཇི་ལྟར་བྱ་གེ་ཡོན་ཏན་ལ་བལྟའམ། འོན་ཏེ་ནོར་འབྱོར་བ་ལ་བལྟ། ཕན་བཏགས་པ་རྗེས་སུ་བསྐྱང་ངམ། འོན་ཏེ་ཁྱིམ་གྱི་སོ་ནམ་བསྐྱང་། འཇིག་རྟེན་ཕ་རོལ་གྱི་སྲིད་བྱའམ་འོན་ཏེ་འཇིག་རྟེན་འདིའི་སྲིད་བྱ། དམ་པའི་ཚུལ་གཟུང་ངམ་འོན་ཏེ་འདོད་ཆེན་གྱི་ཚུལ་གཟུང་། དཔལ་ཆེ་བ་ཉམས་སུ་མྱོང་བར་བྱ་འམ། འོན་ཏེ་དགེ་བ་རྣམས་དགའ་བའི་ངོ་ཚ་བལྟ། དེ་ལྟར་འཕྲལ་གྱི་དོན་ཆེད་ཆེར་བལྟའམ། འོན་ཏེ་ཡུན་རིང་པོའི་དོན་ཆེད་ཆེར་བལྟ། སྐྱེ་བོ་དམ་པའི་ཕྱོགས་གཟུང་ངམ། འོན་ཏེ་སྐྱེ་བོ་ངན་པའི་ཕྱོགས་གཟུང་སྙམ་པ་ལས། དེ་ནས་འདོད་ཆེན་གྱི་དབྱེན་སྤྱོ་བའི་བློ་ཅན་དེས་འདི་སྙམ་དུ་བསམས་སོ། །ནོར་མང་པོ་རྙེད་དེ་ཕུན་སུམ་ཚོགས་པར་གྱུར་ནས་མཛའ་བཤེས་དང་ནང་མི་དང་འགྲོན་དང་ཕོངས་པ་རྣམས་མགུ་བར་བྱེད་ཅིང་། བདེ་བ་ཉམས་སུ་མྱོང་བར་བྱས་ནས། །འཇིག་རྟེན་ཕ་རོལ་ཡང་བསྒྲུབ་ནུས་སོ་སྙམ་དུ་ངེས་པར་བསམས་ནས། རི་དྭགས་རུ་རུས་ཕན་པ་ཆེན་པོ་བྱས་པ་ནི་བརྗེད་དེ། རྒྱལ་པོའི་དྲུང་དུ་སོང་ནས་སྨྲས་པ། ལྷ་རི་དྭགས་མཆོག་དེ་གང་ན་གནས་པ་དེ་བདག་གིས་འཚལ་ན། །འདི་སུ་ལ་བསྟན་པར་བགྱི་བཀའ་སྩལ་དུ་གསོལ། རྒྱལ་པོ་དེས་དེ་སྐད་ཟེར་བ་ཐོས་པ་དང་། ཡིད་རབ་ཏུ་དགའ་བར་གྱུར་ཏོ། །བཟང་པོ་དེ་ང་ཉིད་ལ་ད་སྟོན་ཅིག །ཅེས་སྨྲས་ནས། རི་དྭགས་གཤོར་དུ་འགྲོ་བའི་ཆ་ལུགས་སུ་ཆས་ཏེ། དམག་གི་ཚོགས་ཆེན་པོས་ཡོངས་སུ་བསྐོར་ནས། ཕོ་བྲང་དམ་པའི་ནང་ནས་བྱུང་སྟེ། མི་དེས་ལམ་དྲངས་ནས་འབབ་ཆུ་དེའི་ངོགས་སུ་སོང་ངོ་། །ནགས་ཚལ་སྟུག་པོ་དེ་ཡང་དམག་གི་དཔུང་ཐམས་ཅད་ཀྱིས་ཡོངས་སུ་བསྐོར་ཏེ། ལག་ན་མདའ་གཞུ་ནི་ཐོགས། ཡིད་ཆེས་པའི་མི་རྣམས་ཀྱིས་ནི་བསྐོར་ནས། རྒྱལ་པོ་དེ་མི་དེ་ཉིད་ཀྱི་ལམ་དྲངས་ཏེ་ནགས་ཚལ་སྟུག་པོ་དེའི་ནང་དུ་ཞུགས་སོ། །དེ་ནས་མི་དེས་རི་དྭགས་རུ་རུ་དེ་བག་ཕབ་ཅིང་འདུག་པ་མཐོང་ནས་རྒྱལ་པོ་ལ་བསྟན་པ། ལྷ་རི་དྭགས་ཀྱི་མཆོག་དེ་ནི་འདི་ལགས་ཏེ། དེ་བས་ན་ནན་ཏན་ཆེར་མཛད་དུ་གསོལ་ཞེས་སྨྲས་སོ། །རི་དྭགས་ལེགས་པར་བསྟན་པའི་ཕྱིར། །དེ་ཡི་ལག་པ་བསྒྲེང་བ་དང་། རལ་གྲི་རྣོན་པོས་བཅད་པ་བཞིན། །ལག་པའི་མཁྲིག་མར་ཆད་དེ་ལྷུང་། །དངོས་པོ་དེ་ལྟ་བུ་དེ་བརྟེན་པ་དང་། བྱ་བའི་ཁྱད་པར་དག་གིས་བསྟངས་ན་ནི། །གཉེན་པོ་ཆུང་ན་རབ་ཏུ་རྒྱས་གྱུར་ནས། །ལས་རྣམས་འབྲས་བུ་འཕྲལ་དུ་སྨིན་པར་འགྱུར། །དེ་ནས་རྒྱལ་པོ་དེ་མི་དེས་བསྟན་པའི་ལམ་ཕྱོགས་སུ་རི་དྭགས་བལྟ་འདོད་པའི་མིག་གིས་བལྟས་པ་དང་། ཆར་སྤྲིན་འདྲ་བའི་ནགས་ཚལ་སྔོན་པོ་ན། །རིན་ཆེན་གཏེར་འདྲ་ལུས་ཀྱི་དཔལ་གྱིས་འབར། །རི་དྭགས་རུ་རུ་ཡོན་ཏན་མཆོག་དེ་མཐོང་། །སྤྲིན་གྱི་ནང་ན་གློག་འགྱུ་མེ་འབར་བཞིན། དེ་ནས་དེའི་གཟུགས་བཟང་པོས་ཡིད་ཕྲོགས་ནས། །རྒྱལ་པོ་དེ་ནི་དེ་གཟུང་འདོད་པ་ཡིས། །གཞུ་བརྡུངས་མདའ་ནི་གྲོང་དུ་བཅུག་ནས་སུ། །དེ་ལ་འཕང་བའི་ཕྱིར་ནི་གཞུ་བཀང་ངོ་། །དེ་ནས་བྱང་ཆུབ་སེམས་དཔས་བསམས་པ། །ཁོ་ར་ཁོར་ཡུག་ན་མི་མང་པོ་ཀུ་ཅོ་འདོན་པ་གྲག་པ་དང་སྦྱར་ན། །བདག་ནི་ཀུན་ནས་བསྐོར་ཟིན་པར་གོར་མ་ཆག་གོ་སྙམ་ནས། རྒྱལ་པོ་བདག་ལ་མདའ་འཕེན་པར་ཆས་པར་ཤེས་ཏེ། ད་ནི་བྲོས་ཀྱང་མི་ཕན་ནོ་སྙམ་ནས་མིའི་སྐད་དུ་ཕྱུང་སྟེ། ཚིག་འབྲུ་གསལ་བས་རྒྱལ་པོ་ལ་སྨྲས་པ། རྒྱལ་པོ་ཆེན་པོ་རེ་ཤིག་གཞེས། མི་མཆོག་བདག་ལ་མ་འཕེན་པར། །རེ་ཤིག་ངོ་མཚར་ཆེན་པོ་ཡིས། །ཐེ་ཚོམ་འདི་ནི་བསལ་དུ་གསོལ། །ནགས་ཚལ་སྟུག་པོ་འདི་ལྟ་བུ། །སྐྱེ་བོའི་རྒྱུན་ལུགས་མེད་པ་ན། རི་དྭགས་འདི་འདྲ་གནས་སམ་ཞེས། ཁྱེད་ལ་སུ་ཡིས་བདག་མཆིས་གསོལ། དེ་ནས་རྒྱལ་པོ་དེ་རི་དྭགས་མིའི་སྐད་དུ་སྒྲ་རབ་ཏུ་ངོ་མཚར་ཆེ་བ་དེས། སེམས་རབ་ཏུ་དུལ་བར་གྱུར་ནས་དེ་ལ་འདི་ལྟ་བུའི་ངོ་མཚར་ཆེན་པོ་བདག་ལ་སྟོན་པ་ནི་འདི་ལགས་སོ་ཞེས་མི་དེ་མདའི་རྩེ་མོས་བསྟན་ཏོ། །དེ་ནས་བྱང་ཆུབ་སེམས་དཔས་མི་དེ་ངོ་ཤེས་ནས་སྨད་པའི་ཕྱིར་སྨྲས་པ། ཀྱི་ཧུད་ཀྱི་ཧུད་ཁྱེད་ལྟ་བུའི་ངན་པ། །ཁྲེལ་མེད་མི་དག་ཕྱུང་བ་བས། །ཆུ་ཡི་ཤུགས་ཀྱིས་ཁྱེར་བ་ཡི། ཤིང་དག་ཕྱུང་ཡང་བླའོ་ཞེས། །གཏམ་དུ་གྲགས་པ་དེ་རེ་བདེན། །དེ་ལྟར་འབད་པ་དེ་ཡི་ལན། །འདི་ལྟ་བུ་ཡིས་ཕན་གདགས་སམ། །བདག་ལ་ཕན་པའང་མ་མཐོང་ན། །ཚུལ་མིན་མཐོང་བར་ག་ལ་འགྱུར། །དེ་ནས་རྒྱལ་པོ་དེ་འདི་ལྟར་སུ་ལ་སྨོད་སྙམ་ནས་ངོ་མཚར་ཆེར་གྱུར་ཏེ། མི་དགའ་བཞིན་དུ་རི་དྭགས་རུ་རུ་དེ་ལ་སྨྲས་པ། དམིགས་ཀྱིས་མ་ཕྱེ་དོན་ཟབ་པ། །སྤྱི་ལ་རྣམ་པར་སྨོད་པ་འདིའི། །བདག་གིས་ཐོས་པར་གྱུར་ནས་ནི། །བདག་གི་ཡིད་ཀྱང་འདར་བ་འདྲ། །དེ་བས་རི་དྭགས་དམ་པ་ཁྱོད། །སུ་ལ་བརྩམས་ཏེ་བཀྱོན་པར་གསུངས། མིའམ་འོན་ཏེ་མི་མ་ཡིན། །བྱའམ་འོན་ཏེ་རི་དྭགས་ལ། །བྱང་ཆུབ་སེམས་དཔས་སྨྲས་པ། རྒྱལ་པོ་འདི་ནི་གཞན་ལ་སྨད་མ་ལགས། །ལས་འདི་སྨད་པར་འོས་པའི་ཕྱིར་སྨྲས་སོ། །འདི་འདྲ་ཕྱིན་ཆད་བྱ་བ་མི་རིགས་སྙམ། །བདག་གིས་བསམས་ནས་དེ་ཕྱིར་དེ་སྐད་སྨྲས། །སྣད་བའི་རྨ་ལ་སུ་ཞིག་ཞིགས་པར་བགྱིད། །འཁྱམས་པ་དག་ལ་སུ་ཞིག་རྩུབ་པོར་སྨྲ། །སྡུག་པའི་བུ་ལའང་ཕན་པར་འདོད་པའི་ཕྱིར། །ནད་ཀྱི་དབང་གིས་སྨན་དཔྱད་བྱེད་པའང་ཡོད། །འབབ་ཆུ་དྲག་པོས་ཁྱེར་ཏེ་སོང་བ་ལས། །སྙིང་རྗེའི་དབང་གིས་བདག་གིས་ཕྱུང་བ་ལ། །དེ་ལས་བདག་ལ་འཇིགས་པ་འདི་འདྲ་བྱུང་། །མ་རབས་བརྟེན་ན་རུང་བ་ག་ལ་འགྱུར། །དེ་ནས་རྒྱལ་པོ་དེས་མི་དེ་ལ་སྡང་མིག་ཏུ་བལྟས་ཏེ་སྤྱོ་བའི་ཚིག་ཏུ་སྨྲས་པ། ཀྭ་ཡེ་ཁྱོད་དེ་ལྟར་ཉམ་ཉེས་པ་ལས། རི་དྭགས་འདིས་ཕྱུང་བ་བདེན་ནམ། དེ་ནས་མི་དེ་དེ་ལ་འཇིགས་ཤིང་སྐྲག་ལ། །རྔུལ་ཤིང་མདོག་ཉམས་ཤིང་ངོ་ཚ་བས་གཅོམ་སྐྱུངས་ཏེ་མད་དོ་ཞེས་སྨྲས་སོ། །དེ་ནས་རྒྱལ་པོ་དེས་ཁྱོད་ལྟ་བུ་ངན་པ་ནི་མེད་མོད་ཞེས་སྤྱོས་ནས་མདའ་གྲོང་དུ་བཅུག་སྟེ་སྨྲས་པ། ཀྭ་ཡེ་ཁྱོད་སྡོད་ཅིག །དེ་ལྟར་འབད་པས་ཕན་པ་ཆེར་བྱས་ཀྱང་། །གང་གི་སེམས་ནི་དུལ་བར་མ་གྱུར་པ། །མཚུངས་པའི་ནང་ན་གཏམ་ངན་རྒྱལ་མཚན་ཐོགས། མི་ངན་དེ་འདྲ་གསོན་ཏེ་ཅི་ཞིག་རུང་། །དེ་སྐད་ཅེས་སྨྲས་ནས་མདའ་གྲོང་དུ་བཅུག་སྟེ། དེ་བསད་པའི་ཕྱིར་གཞུ་བཀང་ངོ་། །དེ་ནས་བྱང་ཆུབ་སེམས་དཔའ་སྙིང་རྗེ་ཆེན་པོས་སྙིང་གདུངས་ཏེ། དེ་དག་གཉིས་ཀྱི་བར་དུ་འདུག་སྟེ་རྒྱལ་པོ་ལ་སྨྲས་པ། རྒྱལ་པོ་ཆེན་པོ་གུམ་ལགས་པ་བཀུམ་སྟེ་ཅི་རུང་། མ་མཛད་མ་མཛད། གང་གི་ཚེ་ན་འདོད་ཆེན་དགྲས་བསྐུལ་ཏེ། སྨད་པའི་གནས་སུ་ཉེ་བར་འདི་སོང་བ། །གྲགས་པ་ཉམས་པས་དེ་ཚེ་བཀུམ་པར་གྱུར། །བསོད་ནམས་ཉམས་པས་སླད་མའི་ཚེའང་བཀུམ། །སྡུག་བསྔལ་བཟོད་པར་དཀའ་བས་ཡིད་གདུངས་ནས། །མི་རྣམས་འདི་ལྟ་བུར་ནི་བརླག་པར་འགྱུར། །འབྲས་བུ་ཕུན་སུམ་ཚོགས་པ་འདོད་པས་བསླུས། །མར་མེའི་འོད་ཀྱི་ཕྱེ་མ་ལེབ་བྲིད་བཞིན། དེ་བས་ཐུགས་རྗེ་མཛོད་ལ་མ་བཀྱོན་པར། །འདི་ཉིད་ཅུང་ཟད་ཅི་དང་ཅི་འཚལ་བ། །དེ་དག་རྩོལ་ལ་ཐུབ་ཆོད་དོན་ཡོད་མཛོད། །བདག་ནི་ཁྱོད་ཀྱི་བཀའ་སྩལ་སྤྱི་བོས་ནོད། །དེ་ནས་རྒྱལ་པོ་ཆེན་པོ་དེ་དེ་ལྟར་གནོད་པར་བྱེད་པ་པོ་ལའང་སྙིང་རྗེ་དང་བཅས་ཤིང་གཡོ་མེད་པར་དེ་ལ་སླར་ཡང་ཕན་འདོགས་པར་བྱེད་པ་དེས་རབ་ཏུ་ངོ་མཚར་ཆེ་བར་གྱུར་ནས་སེམས་དང་བ་བསྐྱེད་ཏེ་གུས་པ་དང་བཅས་པར་བལྟས་ནས། རི་དྭགས་ཀྱི་མཆོག་དེ་ལ་སྨྲས་པ། སྐལ་པ་ཆེན་པོ་ལེགས་སོ་ལེགས། ཕྲལ་དུ་མི་བཟོད་གནོད་བྱེད་ལའང་། །གང་གིས་སྙིང་རྗེ་འདི་འདྲ་བ། །ཁྱོད་ནི་ཡོན་ཏན་ཉིད་ཀྱི་མི། །བདག་ཅག་མི་ཡི་གཟུགས་སུ་བས། །བླུན་པོ་འདི་ལ་ཁྱོད་ཀྱིས་བརྩེ་བར་མཛོད། །སྐྱེས་བུ་མཆོག་དང་བདག་མཇལ་རྒྱུ་ལགས་པ། །འདི་ཉིད་འཚལ་བའི་ནོར་རྣམས་སྩལ་བར་བགྱི། །རྒྱལ་སྲིད་འདི་ལ་ཁྱོད་ནི་ཅི་བདེར་སྤྱོད། །རུ་རུས་སྨྲས་པ། རྒྱལ་པོ་ཆེན་པོ་ཁྱོད་ཀྱི་གནང་བ་འདི་དོན་མཆིས་པར་བགྱི་སྟེ། བདག་གིས་བླངས་ཀྱིས། དེ་བས་ན་ཁྱོད་འདིར་བྱོན་པའི་དགོས་པ་དེ་བདག་གིས་སྦྱར་བར་འཚལ་ན། བཀའ་སྩལ་དུ་གསོལ། དེ་ནས་རྒྱལ་པོ་དེས་རི་དྭགས་རུ་རུ་དེ་ཤིང་རྟ་མཆོག་གི་སྟེང་དུ་བཞག་ནས་བཀུར་སྟི་ཆེན་པོ་བྱས་ཏེ། ཕོ་བྲང་དམ་པའི་ནང་དུ་བཅུག་ནས། མགྲོན་དུ་བྱ་བའི་བཀུར་སྟི་བྱས་ཏེ། སེང་གེའི་ཁྲི་ཆེན་པོ་ལ་བཞག་ནས། བཙུན་མོའི་འཁོར་དང་བློན་པོ་མང་པོས་བསྐོར་ཏེ་དགའ་ཞིང་ཞེ་ས་བསྐྱེད་ནས་ཞི་བར་ལྟ་ཞིང་ཆོས་དྲིས་པ། མི་རྣམས་ཆོས་ལ་བལྟ་བའི་ཕྱིར། །བློ་ནི་རྣམ་པ་མང་དུ་སྐྱེས། །ཁྱོད་ནི་ཆོས་རྣམས་གཏན་ལ་འབེབས། ཇི་ལྟར་ལགས་པ་བཤད་དུ་གསོལ། །དེ་ནས་བྱང་ཆུབ་སེམས་དཔས་རྒྱལ་པོ་འཁོར་དང་བཅས་པ་ལ་ཚིག་འབྲུ་གསལ་ཞིང་སྙན་པ་བཟང་པོས་ཆོས་བཤད་པ། །རྒྱལ་པོ་ཆོས་ནི་མདོར་བཤད་ན། །སེམས་ཅན་རྣམས་ལ་སྙིང་རྗེ་བསྐྱེད། །གསོད་དང་རྐུ་ལ་སོགས་པ་སྤོངས། །རྣམ་པ་གསུམ་དུ་དགྱེས་པར་བྱེད། །རྒྱལ་པོ་ཆེན་པོ་གཟིགས་སུ་གསོལ། །བདག་རང་ཉིད་དམ་ནང་མི་ལ། །བརྩེ་བ་བཞིན་དུ་གཞན་ལའང་བརྩེ། །དེ་ཡི་སེམས་ནི་ཆོས་མིན་ལ། །འཇུག་པའི་མི་དགེ་ག་ལས་འབྱུང་། །སྐྱེས་བོ་སྙིང་རྗེ་མེད་པས་ན། །ངག་ལུས་ཡིད་ཀྱི་སྤྱོད་པ་རྣམས། །ནང་མི་ལ་ཡང་ཕྱི་མི་བཞིན། །མི་རིགས་སྤྱོད་པ་མཆོག་ཏུ་འགྱུར། །དེ་བས་ཆོས་ལ་དད་པ་ཡིས། །སྙིང་རྗེ་གཏང་བར་མི་བྱེད་དེ། །ཆར་འབབ་ལོ་ཏོག་འཕེལ་བ་བཞིན། །དེ་ལས་ཡོན་ཏན་འཕེལ་བར་འགྱུར། །སྙིང་རྗེས་ནོན་པའི་སེམས་ཀྱིས་ནི། །གཞན་ལ་གནོད་པ་བྱེད་མི་འགྱུར། །གཙང་མ་དེ་ལ་ལུས་དང་ངག་ཀྱང་གཞན་དུ་འགྱུར་བ་མེད། །དེ་ལྟར་བྱེད་པ་གཞན་ལ་ཕན་འདོགས་དེ་ནི་དགའ་བས་དར། །སྦྱིན་དང་བཟོད་ལ་སོགས་པའི་ཡོན་ཏན་གྲགས་དང་མཐུན་པ་འཕེལ། །སྙིང་རྗེ་ཅན་ནི་ཉེ་བར་ཞི་བས་གཞན་གྱི་ཡིད་ཀྱང་འབྱུང་། སྙིང་རྗེར་ལྡན་པའི་སྐྱེ་བོ་རྣམས་ཀྱི་གཉེན་བཞིན་ཡིད་བརྟན་འགྱུར། །སྙིག་རྗེའི་དབང་གྱུར་སྙིང་ལ་འཐབ་མོའི་འཁྲུག་པ་ཡོང་མི་འབྱུང་། སྙིང་རྗེའི་ཆུས་བརླན་སེམས་ལ་འཁྲུག་པའི་མེ་འབར་ཡོང་མི་འགྱུར། དེ་བས་མདོར་ན་སྙིང་རྗེ་བརྟན་པའི་མཁས་པ་ཆོས་ལ་བལྟ། །དགེ་བ་དགའ་བའི་ཡོན་ཏན་བརྩེ་ལ་མི་བརྟན་གང་ཞིག་ཡོད། དེ་བས་བདག་དང་བུ་བཞིན་སྐྱེ་བོ་དག་ལ་སྙིང་རྗེ་སྐྱེད། །དམ་པའི་ཚུལ་གྱིས་འགྲོ་བའི་ཡིད་འོང་རྒྱལ་པོའི་ཚུལ་སྟོན་ཅིག །དེ་ནས་རྒྱལ་པོ་དེ་དེའི་ཚིག་ལ་མངོན་པར་དགའ་བར་གྱུར་ནས། ཕོ་བྲང་འཁོར་གྱི་མི་དང་བཅས་པར་ཆོས་ཉམས་སུ་ལེན་པར་གྱུར་ཏོ། །རི་དྭགས་དང་བྱ་ཐམས་ཅད་ལའང་མི་འཇིགས་པ་བྱིན་ནོ། །རི་དྭགས་རུ་རུར་སྐྱེས་པའི་རབས་ཏེ་ཉི་ཤུ་དྲུག་པའོ།། །།དམ་པའི་ཚུལ་གྱི་རྗེས་སུ་འབྲང་བ་རྣམས་ནི་དགྲ་རྣམས་ཀྱི་ཡི་ཀྱང་མགུ་བར་བྱེད་དོ། །དེ་ཡང་འདི་ལྟར་བྱང་ཆུབ་སེམས་དཔའ་རེ་ཤིག་ཅིག་གངས་རི་དཔལ་དང་ལྡན་པའི་ཁྲོད། །སྨན་གྱི་ཁྱད་པར་རོ་དང་མཐུ་དང་རྣམ་པར་སྨིན་པའི་ཡོན་ཏན་རྣམ་པ་མང་པོ་དང་ལྡན་པ་ཡོད་པའི་ས་ཕྱོགས། མེ་ཏོག་དང་། འབྲས་བུ་དང་། ལོ་མ་དང་། འདབ་མ་དང་། ལྡུམ་བུ་རྣམ་པ་སྣ་ཚོགས་ཀྱི་བརྒྱན་པའི་ཤིང་ལྗོན་པ་བརྒྱ་ཕྲག་མང་པོས་གང་བ། འབབ་ཆུ་ཤེལ་སྒོང་ལྟར་དངས་ཤིང་གཙང་བ་འབབ་པ། བྱ་མང་པོའི་སྒྲ་སྙན་པ་གྲག་པ་ཞིག་ན་སྤྲེའུ་མང་པོའི་བདག་པོ་ཞིག་ཏུ་གྱུར་ཏོ་ཞེས་གྲག་གོ །དེ་དེ་ལྟ་བུའི་གནས་སྐབས་སུ་གྱུར་ཀྱང་། གཏོང་བ་དང་སྙིང་རྗེ་ལ་གོམས་པའི་ཕྱིར་གཉེན་པོ་ལ་བརྟེན་པས། མི་དགའ་བར་གྱུར་པ་བཞིན་དུ་ཕྲག་དོག་དང་འཇུངས་པ་དང་ཁྲོ་བ་རྣམས་ཉེར་བར་འོང་བར་མ་གྱུར་ཏོ། །དེ་དེ་ན་ཤིང་ནྱ་གྲོ་དྷ་ཆེན་པོ་ཞིག་ཡོད་པའི་རིའི་རྩེ་མོ་མཐོན་པོ་བཞིན་དུ་ནམ་མཁའ་ལ་རེག་ལ་ཐུག་པ། ནགས་ཚལ་དེའི་བདག་པོ་འདྲ་བ་ལོ་མ་དང་ལྡུམ་བུ་རྒྱས་པས་ཁེབས་པའི་གྲིབ་མ་ནི་སྤྲིན་སྟུག་པོས་གཡོགས་པ་བཞིན་དེའི་འབྲས་བུའི་ཁྱད་པར་རོ་མཆོག་ཏུ་ཞིམ་པ། ཁ་དོག་དང་དྲི་ཞིམ་པོ་ཡིད་དུ་འོང་བ། མཱུ་ལེ་དྲུམ་ཤིང་གི་འབྲས་བུ་བས་ཀྱང་ཆེ་བ་རྣམས་ཀྱི་ལྕིད་ཀྱི་ཡལ་ག་ནོན་པ་ཞིག་གི་དྲུང་ན་གནས་ཤིང་འདུག་གོ །དམ་པ་རྣམས་ནི་དུད་འགྲོར་སྐྱེས་གྱུར་ཀྱང་། དབང་ཐང་ལྷག་མ་བདེ་བའི་གནས་སུ་འགྱུར། །ཕན་གདགས་འབྲེལ་བའི་སྐྱེ་བོ་མཛའ་བཤེས་རྣམས། །བྱེས་ཡུལ་དོང་པའི་ནོར་གྱི་ལྷག་མ་བཞིན། ནགས་ཚལ་གྱི་བདག་པོ་དེའི་ཡལ་ག་གཅིག་གཅིག་དེའི་དྲུང་ནས་འབབ་པའི་ཆུ་ལ་གཞལ་བར་གྱུར་ཏོ། །དེ་ནས་བྱང་ཆུབ་སེམས་དཔའ་ཕྱི་རྗེས་རྒྱང་རིང་དུ་བལྟ་བས་སྤྲེའུ་མང་པོ་དེ་དག་ལ་རྗེས་སུ་གདམས་པ། ཤིང་ནྱ་གྲོ་དྷའི་ཡལ་ག་འདིའི་འབྲས་བུ་རྣམས་ཟད་པར་མ་བྱས་ཀྱི་བར་དུ་ཁྱེད་ཅག་སུའང་ཡལ་ག་གཞན་ལ་འབྲས་བུ་བཏེགས་ཏེ་མ་ཟ་ཞིག་ཅེས་བསྒོ་བ་དང་། དེ་དག་ཀྱང་དེ་བཞིན་དུ་བྱེད་པར་གྱུར་ཏོ། །དེ་ནས་རེ་ཤིག་ཅིག་ཡལ་ག་དེའི་འབྲས་བུ་མ་སྨིན་པ་ཧ་ཅང་མི་ཆེ་བ་གཅིག་གཅིག་གྲོག་མ་རྣམས་ཀྱིས་ཤིང་གི་ལོ་མ་བསྡུས་པས་གཡོགས་པ། སྤྲེའུ་དེ་རྣམས་ཀྱིས་མ་མཐོང་ངོ་། །དེ་མཐར་གྱིས་སྐྱེས་པ་དང་། ཁ་དོག་དང་དྲི་དང་རོ་ཕུན་སུམ་ཚོགས་ཤིང་འཇམ་པོར་གྱུར་ནས་ཡོངས་སུ་སྨིན་པའི་དབང་གིས་རྩ་བ་སྙི་བར་གྱུར་ཏེ། འབབ་ཆུ་དེའི་ནང་དུ་ལྷུང་ནས་བབས་ཆུའི་རྒྱུན་གྱིས་ཁྱེར་ཏེ་སོང་བ་ལས། རྒྱལ་པོ་ཞིག་བཙུན་མོའི་འཁོར་དང་བཅས་ཏེ་ཆུ་དེའི་ནང་ན་རྩེ་བའི་མཐའ་རྒྱ་མོས་བསྐོར་བའི་ངོས་ཤིག་ལ་ཆགས་པར་གྱུར་ཏོ། །ན་ཆུང་ཁྲུས་བྱེད་ཕྲེང་བ་དྲི་ཞིམ་དང་། །ཁྲུས་རྩིས་བགོས་པའི་བསུང་ཞིམ་སོགས་པའི་དྲི། །དེ་ཡི་དྲི་ཞིམ་ཡོན་ཏན་སྣར་མནམ་པ། །ཁྱད་པར་གྱུར་པས་དེ་དག་ཟིལ་གྱིས་མནན། །ན་ཆུང་དེ་དག་དེ་ཡི་དྲི་ཡིས་མྱོས། །སྣ་སྣོམ་དབུགས་ནི་སྲིངས་པས་མིག་ཀྱང་བཙུམས། ངོ་མཚར་ཆེ་ཞིང་དེ་ནས་གཡོ་བར་གྱུར། །ཕྱོགས་རྣམས་ཀུན་དུ་མིག་ཀྱང་རྣམ་པར་བལྟ། །བུད་མེད་དེ་དག་ངོ་མཚར་ཆེ་བའི་མིག་གཡོ་ཞིང་རིག་རིག་པོར་བལྟ་བར་གྱུར་ནས། ཤིང་ནྱ་གྲོ་དྷའི་འབྲས་བུ། མཱུ་ལ་དྲུམ་ཤིང་གི་འབྲས་བུ་སྨིན་པ་བས་ཀྱང་ཆེ་བ་དེ་རྒྱ་མོ་བྲེས་པའི་ངོགས་ལ་ཆགས་ཤིང་འདུག་པ་མཐོང་བ་དང་། འདི་ཅི་ཞིག་ཡིན་སྙམ་ནས། དེ་ལ་མིག་ཆགས་བཞིན་དུ་རྒྱལ་པོ་དང་བཅས་ཏེ་འདུས་ནས་སྡོད་པར་གྱུར་ཏོ། །དེ་ནས་རྒྱལ་པོ་དེས་འབྲས་བུ་དེར་བླངས་ནས་སྨན་པ་ཡིད་ཆེས་པ་རྣམས་ཀྱིས་བརྟགས་ཏེ། བདག་རང་གིས་རོ་མྱངས་སོ། དེ་ནས་རྨད་དུ་བྱུང་བའི་རོས། །རྒྱལ་པོ་ཡ་མཚན་ཆེ་བར་གྱུར། །ཆེད་དུ་སྦྱར་བའི་ཡོན་ཏན་མཆོག །རྨད་དུ་བྱུང་བའི་རོ་མཆོག་བཞིན། །སྔོན་མེད་ཁ་དོག་དྲི་དག་གིས། །དེ་ལ་ཡ་མཚན་ཆེ་བར་གྱུར། །དེ་ཡི་རོ་ལ་ཆགས་པ་ཡིས། །ཡ་མཚན་ཆེ་བས་རྣམ་པར་གྱུར། །དེ་ནས་རྒྱལ་པོ་དེའི་ཁ་ཟས་རོ་ཞིམ་པོ་ཕུན་སུམ་ཚོགས་ཀྱང་། དེའི་རོ་ལ་ཆགས་པའི་དབང་གིས་འདི་སྙམ་དུ་བསམས་སོ། །གང་ཞིག་འབྲས་བུ་འདི་དག་མ་ཟོས་པ། །དེ་ནི་རྒྱལ་སྲིད་འབྲས་བུ་ཅི་ཞིག་ཟོས། །རྒྱལ་སྲིད་བསྒྲུབ་པའི་ཉོན་མོངས་མེད་པར་ཡང་། འདི་འདྲ་ཟ་བ་དེ་ཉིད་རྒྱལ་པོ་ཡིན། །དེ་ནས་དེའི་འབྲས་བུ་དེ་གང་ནས་བྱུང་བ་བཙལ་བར་བསམས་ཏེ། རང་གི་བློས་བརྟགས་པ། གང་ལས་འབྲས་བུ་འདི་ལྟ་བུ་འབྱུང་བའི་ཤིང་ལྗོན་པ་བཟང་པོ་དེ་ནི་འདི་ནས་མི་རིང་བ་ཞིག་ན་ཡོད་ན། འབབ་ཆུའི་འགྲམ་ཞིག་ན་འདུག་གོར་མ་ཆག་གོ །དེ་ལྟར་ཅིས་མངོན་ཞེ་ན། འདི་ལྟར་ཁ་དོག་དང་དྲི་དང་རོའང་མ་ཉམས་ན། རྨ་མེད་ཅིང་མ་སྣད་བ་ལ་བལྟས་ན། ཆུའི་ནང་དུ་ལྷུང་ནས་ཀྱང་རིང་པོ་མ་ལོན་པ་འདྲ་སྟེ། དེ་བས་ན་འདི་གང་ནས་བྱུང་བའི་གནས་ཤེས་པར་ནུས་ཡང་དག་གོ་སྙམ་ནས། དེ་རོ་ལ་ཆགས་པའི་དབང་གིས་ཆུའི་ནང་ན་རྩེ་བ་བཏང་སྟེ་བདག་རང་གི་ཕོ་བྲང་དམ་པ་བསྲུང་བའི་བསྲུངས་མ་ལེགས་པར་བསྒོས་ནས། དམག་དྲང་དུ་རུང་བའི་དཔུང་གི་ཚོགས་མང་པོས་ཡོང་སུ་བསྐོར་ཏེ། འབབ་ཆུ་དེའི་འགྲམ་ཐོག་ཐག་མཐར་གྱིས་ནགས་ཚལ་སྟུག་བོ་གཅན་ཟན་དང་བཅས་པ་ནི་གང་ཞིང་། བདེ་བའི་རོ་རྣམ་པ་སྣ་ཚོགས་ནི་མྱོང་བར་བྱེད། ནགས་ཚལ་གྱི་ཁྱད་པར་མཛེས་ཤིང་ཉམས་དགའ་བའི་ཆེད་དུ་མ་བྱས་པ་གཞན་དང་གཞན་དག་ལ་ནི་ལྟ། རྔ་སྒྲ་དྲག་པོས་ནགས་ཚལ་གྱི་རི་དྭགས་རྣམས་ནི་སྐྲག་པར་བྱེད་ཅིང་། ཤིང་ལྗོན་པ་ནགས་ཚལ་གྱི་བདག་པོ་མི་རྣམས་ཀྱིས་བགྲོད་དཀའ་བ་དེ་དང་ཉེ་བ་ཞིག་ཏུ་ཕྱིན་ཏོ། ཆར་སྤྲིན་ཆུ་ཡི་ལྕིད་ཀྱི་ནོན་པ་འདྲ་བ་དེ། །རི་དང་ཉེ་ཡང་རྩེ་མོ་མཐོན་པོ་འདྲ་བར་སྣང་། །ལྗོན་ཤིང་གཞན་གྱི་རྒྱལ་པོ་བཞིན་དུ་གྱེན་དུ་བལྟ། ནགས་ཚལ་དབང་པོ་དེ་ནི་རྒྱལ་པོས་རིང་ནས་མཐོང་། ཤིང་ཨ་མྲའི་འབྲས་བུ་ས་ཧཱ་ཀ་ར་སྨིན་པའི་དྲི་བས་ཀྱང་ལྷག་པར་དྲི་ཞི མ་པ་ཡིད་དུ་འོང་བའི་ངད་ལྡང་བས་མདུན་ནས་བསུ་བ་བཞིན་དུ་བསུང་ཚོར་བ་དང་འབྲས་བུ་དེའི་ཤིང་ནི་འདི་ཡིན་གོར་མ་ཆག་གོ་སྙམ་ནས་དེའི་དྲུང་འོངས་བ་དང་། སྤྲེའུ་བརྒྱ་ཕྲག་དུ་མ་ཞིག་ཤིང་དེའི་འབྲས་བུ་ཟ་བ་རྣམས་ཀྱི་ཡལ་ག་ཁེབས་པར་གྱུར་པ་མཐོང་ནས། རྒྱལ་པོ་དེ་བདག་འདོད་པའི་དོན་མེད་པར་བྱེད་པའི་སྤྲེའུ་དེ་རྣམས་ལ་སེམས་ཁྲོས་ནས་སྤྲེའུ་ངན་པ་འདི་རྣམས་ཐམས་ཅད་ལ། རྒྱོབ་རྒྱོབ་ཆོམ་ཆོམ་ཁ་ཐོག་ཅེས་ཚིས་རྩུབ་མོ་སྨྲ་ཞིང་རང་གི་མི་རྣམས་ལ་བསྒོའོ། །དེ་ནས་རྒྱལ་པོ་དེའི་མི་རྣམས་ཀྱིས་སྤྲེའུ་བསྐྲད་པའི་སྐད་དྲག་པོ་ཕྱུང་སྟེ། ལག་ན་མདའ་གཞུ་ཐོགས་ནས་འཕེན་པར་ཆས། ཁ་ཅིག་གིས་རྡོ་བ་དང་། དབྱིག་པ་དང་མཚོན་ཆ་གཟས་ཏེ་དགྲའི་མཁར་སྒོ་གནོན་པ་བཞིན་དུ་ཤིང་དེའི་དྲུང་དུ་ལྷགས་པ་དང་། དེ་ནས་བྱང་ཆུབ་སེམས་དཔས་རྒྱལ་པོའི་དཔུང་གི་ཚོགས་མང་པོ་རྒྱ་མཚོའི་རླབས་རླུང་གི་ཤུགས་དྲག་པོས་ཕུལ་བ་འདྲ་བས་ཅ་ཅོའི་སྒྲ་ཆེན་པོ་འབྱིན་པ་མངོན་དུ་ཕྱོགས་ཏེ་ལྷགས་པ། ཤིང་ལྗོན་པའི་མཆོག་དེའི་ཁོ་ར་ཁོར་ཡུག་ནས་མདའ་དང་རྡོ་བ་དང་དབྱིག་པ་འཕེན་པ་ནི་སེར་བ་འབབ་པ་བཞིན་དུ་གྱུར་པ་ནི་མཐོང་། སྤྲེའུ་མང་པོ་རྣམས་ཀྱང་འཇིགས་ཤིང་མི་དགའ་བའི་སྐད་ངན་འབྱིན་པ་ཙམ་ལ་བརྟེན་ཏེ་ངོ་ཟུམ་གནགས་ལ་སྤ་གོང་སྟེ། མིག་གྱེན་དུ་བལྟ་ཞིང་འཁོད་པ་མཐོང་ནས། སེམས་ནི་སྙིང་རྗེ་ཆེན་པོས་ནོན། འཇིགས་ཤིང་སྐྲག་པ་དང་མྱ་ངན་ནི་བཏང་ནས། སྤྲེའུ་མང་པོ་དེ་དག་དབུགས་ཕྱུང་སྟེ། དེ་དག་ཡོངས་སུ་བསྐྱབ་པའི་བློ་བསྐྱེད་ནས། །ཤིང་ཆེན་པོ་དེའི་རྩེ་མོར་འཛེགས་ཏེ། དེ་དང་ཉེ་བ་ན་འདུག་པའི་རི་ཞིག་གི་ཁར་མཆོངས་པར་ཆས་སོ། །རི་དེ་ཡང་མཆོངས་པ་གཅིག་གིས་མཆོངས་ཏེ་ཕྱིན་པའི་ས་མ་ཡིན་ཡང་། སེམས་དཔའ་ཆེན་པོ་དེ་རང་གི་མཐུ་ཁྱད་པར་དུ་འཕགས་པས། བྱ་འཕུར་བ་བཞིན་དུ་དེར་མཆོངས་ཏེ་ཕྱིན་ཏོ། སྤྲེའུ་རྣམས་གཞན་གྱིས་མཆོངས་པ་གཉིས་ཀྱིས་ཀྱང་། །མཆོངས་པར་མི་ནུས་ས་ཁྱོན་ཆེན་པོ་དེ། མཆོངས་པའི་མཐུ་རྩལ་ཅན་དེས་བྱ་འཕུར་བཞིན། མཆོངས་པ་གཅིག་གིས་ལེགས་པར་མཆོངས་བར་གྱུར། །དེ་ནི་སྙིང་རྗེས་རླབ་པར་བསྐྱོད་པ་དང་། དཔའ་བའི་ཤུགས་ཀྱིས་རྩོལ་བ་དྲག་པར་གྱུར། །དེ་ཡི་འབད་པའི་ཁྱད་པར་དྲག་པོ་དེས། །ཡིད་ལ་བསམས་པ་བཞིན་དུ་ཕྱིན་པར་གྱུར། །རི་དེའི་རྩེ་མོ་མཐོན་པོའི་འགྲམ་དུ་ཕྱིན་ནས་ཀྱང་། སྦ་ཐགས་ཁྱོན་དེའི་བར་བས་ཀྱང་རིང་བ་སྨིན་པར་སྐྱེས་ཤིང་རྩ་བ་བརྟན་པ་སྲ་བ་ཞིག་གིས་བདག་གི་རྐང་པ་གཉིས་བཅིངས་ནས། སླར་ཡང་ཤིང་ཆེན་པོ་དེའི་ཁར་མཆོངས་པ་དང་། དེ་གཉིས་ཀྱི་བར་ཐག་རིང་ཞིང་རྐང་པ་གཉིས་བཅིངས་པས་ཟོ་མདོག་མི་བདེ་བའི་ཕྱིར། སེམས་དཔའ་ཆེན་པོ་དེས་ཤིང་ཆེན་པོ་དེའི་ཡལ་གའི་རྩེ་མོ་དེ་དེའུ་རེ་མ་སླེབ་སྟེ་སླེབས་སོ། །དེ་ནས་ཡལ་ག་དེ་ལ་དམ་དུ་འཇུས། །སྦ་ཐག་དེ་ཡང་རབ་ཏུ་བསྒྲིམས་ཏེ་བརྒྱངས། །ཤིང་འདིའི་ཁ་ནས་འདི་ལས་མྱུར་དུ་དེང་། །སྤྲེའུའི་ཚོགས་རྣམས་བདག་གི་སྐད་ཀྱིས་སྦྲན། དེ་ནས་སྤྲེའུ་དེ་དག་འཇིགས་པས་ཉེན་ཅིང་འབྲོས་པའི་ལམ་རྙེད་ནས་རབ་ཏུ་བརྟབས་པའི་འགྲོས་ཀྱིས་དེའི་ལུས་རྫི་བ་ལ་ཚམ་ཚོམ་མེད་པར་སྦ་ཐག་དེ་ལ་བརྒྱུད་དེ་བདེ་བར་དྲོས་ཏེ་དོང་ངོ་། །སྤྲེའུ་ཚོགས་དེ་དག་འཇིགས་པས་ཉེན་པ་ཡི། །རྐང་ལག་རྣམས་ཀྱིས་དེ་ཡི་ལུས་བརྫིས་ནས། བདག་གི་ལུས་ཀྱི་ཤ་དང་བྲལ་གྱུར་ཀྱང་། རབ་ཏུ་བརྟན་པའི་སེམས་དང་ཡོང་མ་བྲལ། །དེ་ལྟ་བུ་རྒྱལ་པོ་དེ་དང་། རྒྱལ་པོའི་མི་དེ་དག་གིས་མཐོང་ནས་རབ་ཏུ་ཡ་མཚན་ཆེ་བར་གྱུར་ཏོ། །འདི་ལྟར་དཔའ་ཞིང་བློ་ཡང་ཕུན་སུམ་ཚོགས། །བདག་ལའང་མི་ལྟ་གཞན་ལ་སྙིང་བརྩེ་བ། ཐོས་པར་གྱུར་ནའང་ངོ་མཚར་ཆེར་གྱུར་ན། །མངོན་སུམ་མཐོང་བ་སྨོས་ཀྱང་ཅི་ཞིག་དགོས། །དེ་ནས་རྒྱལ་པོ་དེས་མི་དེ་དག་ལ་བསྒོ་བ། སྤྲེའུའི་བདག་པོ་འདི་སྤྲེའུ་མང་པོ་འཇིགས་ཏེ་བྲོས་པའི་རྐང་ལག་གིས་བརྫིས་པས་ལུས་སྣད་པ། ཡུན་རིང་དུ་ཟམ་པ་བྱེད་ཅིང་འདུག་འདུག་པས། དུབ་པའི་ཕྱིར་གདོན་མི་ཟ་བར་བདག་རང་ལྡང་མི་ནུས་ཀྱི། དེ་བས་ན་མྱུར་དུ་དེའི་འོག་ཏུ་རས་བརྒྱངས་པ་བཟེད་ལ། སྦ་ཐག་དེ་དང་ཤིང་ནྱ་གྲོ་དྷའི་ཡལ་ག་འདིའང་མདའ་གཉིས་ཀྱིས་དུས་གཅིག་ཏུ་ཆོད་ཅིག་ཅེས་བསྒོའོ། །དེ་ནས་མི་དེ་དག་གིས་ཀྱང་དེ་བཞིན་དུ་བྱས་སོ། །དེ་ནས་དེ་རྒྱལ་པོ་དེས་རས་བརྒྱངས་ཏེ་བཟེད་པ་ལས་ཕབ་ནས། །དེ་ལུས་རྨ་བྱུང་བའི་སྡུག་བསྔལ་གྱིས་བརྒྱལ་བར་གྱུར་ཏོ། །སེམས་མི་དྲན་པ་དེ་ལ་མལ་སྟན་འཇམ་པོ་ཞིག་ལ་བཞག་ནས། རྨ་གསར་པ་སོས་པར་འགྱུར་བའི་སྨན་མར་ལ་སོགས་པས་དེའི་ལུས་ཀྱི་རྨ་བསྐུས་ཏེ་ཅུང་ཟད་དྲག་པར་གྱུར་ཏེ། དབུགས་ཕྱུང་བར་གྱུར་པ་དང་། རྒྱལ་པོ་དེ་ངོ་མཚར་དང་ཡ་མཚན་ཆེ་ཞིང་གུས་པར་གྱུར་ནས། ནད་དྲིས་ཏེ་སྨྲས་པ། སྙིང་རྗེ་བསྐྱེད་དེ་བདག་གི་སྲོག་བོར་ནས་གང་རྣམས་ཕྱིར་ནི་བདག་གིས་ཟམ་པར་བྱས། །ཁྱོད་ཀྱིས་བསྒྲལ་བའི་སྤྲེའུ་ཚོགས་མང་པོ་འདི་ཁྱོད་ཀྱི་ཅིར་འོང་ཁྱོད་ཀྱང་ཁོང་གི་ཅི། །གལ་ཏེ་ངེད་ཀྱིས་འདི་ནི་མཉན་རུང་ན་སྤྲེའུ་རྒྱལ་གཙོ་བོ་དེ་ནི་སྨྲོས་ཤིག །རབ་ཏུ་མཛའ་བའི་རྒྱུ་འབྲེལ་ཆུང་ངུ་དག །དེ་ལྟ་བུ་ནི་ཡིད་ལ་བྱེད་མི་འགྱུར། །དེ་ནས་བྱང་ཆུབ་སེམས་དཔའ་རྒྱལ་པོ་དེ་དེ་ལྟར་གུས་ཤིང་ལེགས་པར་སྨྲ་བའི་ལན །ལེགས་པར་གླན་པའི་ཕྱིར་མི་ངོམ་པའི་ཚུལ་གྱིས་བདག་ཉིད་སུ་ཡིན་པ་ལ་བསྟན་པ། བདག་གི་ངག་གུས་པ་དེ་དག་གིས། །བདག་ལ་རྒྱལ་པོའི་ཁུར་ནི་བསྐུར་བར་གྱུར། །དེ་བས་འདི་དག་བུ་དང་འདྲ་བར་སྡུག །ཁུར་དེ་བསྐུར་བའི་ཕྱིར་ནི་འདི་ལྟར་བགྱིད། །རྒྱལ་པོ་ཆེན་པོ་བདག་དང་འདི་རྣམས་ནི། །ཡུན་རིང་དུས་ནས་འདི་ལྟར་འབྲེལ་བར་གྱུར། །རིགས་གཅིག་སྐྱེས་པས་འདི་ལྟར་མཛའ་གྱུར་ཞིང་། །ལྷན་ཅིག་གནས་པས་གཉེན་དང་འདྲ་བར་གྱུར། །དེ་སྐད་ཟེར་བ་དེ་རྒྱལ་པོས་ཐོས་ནས། །རབ་ཏུ་ཡ་མཚན་ཆེ་བར་གྱུར་ཏེ་ཡང་སྨྲས་པ། །བློན་པོ་ལ་སོགས་རྒྱལ་པོའི་ཕྱིར། །དེ་དག་ཕྱིར་ནི་རྒྱལ་པོ་མིན། །དེ་བས་བདག་གི་བྲན་གྱི་ཕྱིར། །ཅི་ཕྱིར་ཁྱོད་ཀྱི་བདག་ལུས་བོར། །བྱང་ཆུབ་སེམས་དཔས་སྨྲས་པ། །རྒྱལ་པོ་ཆེན་པོ་དེ་ལྟར་བགྱིད་པ་ནི་མེད་ན། རྒྱལ་པོའི་གཞུང་ལུགས་འདི་ལྟ་བུ་ནི་བདག་གིས་གཞུང་ལུགས་ངན་པར་མཐོང་ངོ་། །མ་འདྲིས་པ་ཡང་སྡུག་བསྔལ་མི་བཟོད་པ། ཡལ་བར་དོར་ན་སྡུག་བསྔལ་ཆེར་གྱུར་ན། །སེམས་ནི་རབ་ཏུ་གུས་པའི་སྐྱེ་བོ་རྣམས། །གཉེན་དང་མཛའ་བོར་གྱུར་པ་སྨོས་ཅི་དགོས། །སྤྲེའུ་རྣམས་ཉམ་ཉེས་རབ་ཏུ་ཆེར་བྱུང་ཞིང་། །ཕོངས་ནས་མྱ་ངན་བྱེད་པ་འདི་མཐོང་ནས། །བདག་གི་དོན་སྒྲུབ་སེམས་པར་མི་འགྱུར་བའི། །སྡུག་བསྔལ་ཆེན་པོ་བདག་ལ་བྱུང་བར་གྱུར། །དེ་བས་གཞུ་རྣམས་རབ་ཏུ་བཀང་ནས་སུ། །མདེའུ་རྩེ་རྣོན་པོ་དྲག་ཏུ་འཕེན་པ་ཡིས། །གཞུ་རྒྱུད་འཇིགས་སྒྲ་སེམས་ལ་མ་བསམས་པར། །ཤིང་གི་ཁ་ནས་རི་ཁ་འདིར་མཆོངས་སོ། །བདག་གི་འཁོར་ནི་རབ་ཏུ་སྐྲག་པའི་སེམས། །ངུ་ཞིང་འབོད་པས་བདག་ནི་རབ་བསྐུལ་ནས། །ས་ཁྱོན་ཚད་ནི་ལེགས་པར་བརྟགས་ནས་སུ། །སྤ་ཐག་རྩྭ་བཅས་བདག་གི་རྐང་པ་བཅིངས། །རི་བོ་དེ་ལས་སླར་ཡང་འདིར་མཆོངས་ཏེ། །ལྗོན་ཤིང་འདི་ལས་བདག་གི་འཁོར་བསྒྲལ་ཕྱིར། །དེ་ཡི་ཡལ་ག་ལག་པ་རྐྱང་འདྲ་ལ། །བདག་གི་ལག་པ་གཉིས་ཀྱིས་ཟིན་པར་གྱུར། །སྤ་ཐག་དེ་ནི་རབ་ཏུ་བརྒྱངས་པ་དང་། ལྗོན་ཤིང་དེ་ཡི་ཡལ་གས་བཏུད་པ་ལས། །བདག་གི་ལུས་བརྫིས་ཚམ་ཚོམ་མ་མཆིས་པར། །བདག་ལ་བརྟེན་ནས་འཁོར་རྣམས་བདེ་བར་ཐར། །དེ་ནས་རྒྱལ་པོ་ཆེན་པོ་དེ་སེམས་དཔའ་ཆེན་པོ་དེ་དེ་ལྟ་བུའི་གནས་སྐབས་ནའང་དེ་ལྟར་བྱེད་པ་མཐོང་ནས་རབ་ཏུ་དགའ་བར་གྱུར་ཏེ། རབ་ཏུ་ཡ་མཚན་ཆེ་བར་གྱུར་ནས། །ཡང་འདི་སྐད་ཅེས་སྨྲས་སོ། །བདག་གི་བདེ་བ་ཁྱད་དུ་བསད། །གཞན་ལ་ཉམ་ཉེས་བྱུང་བ་དག །དེ་ལྟར་བདག་ཉིད་ཉམས་སུ་བླངས། །ཁྱོད་ཀྱིས་ཡོན་ཏན་ཅི་ཞིག་ཐོབ། །བྱང་ཆུབ་སེམས་དཔས་སྨྲས་པ། །གང་རྣམས་རྒྱལ་པོ་བདག་གིས་ཡུན་རིང་བྱས། དེ་དག་སྡུག་བསྔལ་བདག་གིས་རྣམ་པར་ཟློག དེ་བས་སེམས་ནི་རབ་ཏུ་དགའ་བར་གྱུར། །བདག་གི་ལུས་ལྟ་སྣད་པར་གྱུར་ཀྱང་རུང་། དྲེགས་པའི་དགྲ་རྣམས་གཡུལ་ངོར་ཕམ་བྱས་ནས། །ལུས་ལ་རྨ་བྱུང་རྒྱན་གྱི་བརྒྱན་པ་བཞིན། །དཔའ་བོ་རྣམས་ནི་དཔའ་བའི་མཚན་གྱིས་མཚོན། །དེ་བཞིན་རྨ་འདི་བདག་གིས་དགའ་བཞིན་བཟོད། རིགས་མཐུན་རྣམས་ཀྱིས་རབ་ཏུ་གུས་བྱས་ནས། གུས་པར་ཕྱག་འཚལ་བཀུར་སྟི་ཆེར་བྱས་པའི། །དབང་ཕྱུག་བདེ་བ་ཐོབ་པར་གྱུར་པ་ཡི། །བུ་ལོན་བདག་གིས་དེ་རིང་ཁོར་བར་གྱུར། །དེ་བས་བདག་ནི་མཛའ་དང་བྲལ་བའམ། །བདེ་བ་མེད་པའི་སྡུག་བསྔལ་མ་མཆིས་ཀྱིས། འདི་ལྟར་བགྱི་བས་བདག་ནི་འགུམ་འགྱུར་བ། །འདི་ནི་དགའ་དང་ཕྲད་པར་གྱུར་པ་བཞིན། སྔོན་དུ་ཕན་གདགས་བུ་ལོན་ཁོར་བས་མགུ། །མྱ་ངན་གདུངས་ཤིང་གྲགས་པ་དྲི་མེད་ཐོབ། །རྒྱལ་པོས་མཆོད་བྱས་འཆི་ལ་འཇིགས་པ་མེད། །དམ་པས་ཕན་གདགས་དྲིན་ཀྱང་དྲན་པར་གྱུར། །ཡོན་ཏན་མཆོག་གནས་ཡོན་ཏན་འདི་དག་ནི། སྡུག་བསྔལ་འདི་མྱོང་བདག་གིས་ཐོབ་པར་གྱུར། །བདག་པོ་སྙིང་རྗེ་མེད་པ་རྟོན་བཅས་ནས། །བདེ་དང་མི་མཐུན་ཕྱོགས་རྣམས་ཐོབ་པར་གྱུར། །ཡོན་ཏན་མེད་ཅིང་གྲགས་པ་མེད་གྱུར་པ། །ཉེས་པ་འབྱུང་བའི་གནས་སུ་གྱུར་པ་རྣམས། །དམྱལ་བའི་མེ་འབར་རབ་ཏུ་འཁྲུགས་པ་ལས། །གཞན་དུ་འགྲོ་བའི་གནས་ནི་ཅི་ཞིག་ཡོད། །དེ་བས་ཁྱོད་ལ་ཡོན་ཏན་སྐྱོན་གྱི་མཐུ། །བདག་གིས་ལེགས་པར་བསྟན་པ་འདི་ལགས་ཀྱིས། །ལྷ་དཔལ་འགྲོ་བའམ་བུད་མེད་རང་བཞིན་ཅན། །དེ་བས་ཆོས་ཀྱིས་རྒྱལ་སྲིད་སྐྱང་བར་མཛོད། །བཞོན་པའི་དཔུང་དང་ལྗོངས་དང་བློན་པོ་དང་། །མགོན་མེད་འབངས་དང་དགེ་སྦྱོང་བྲམ་ཟེ་ལ། རྒྱལ་པོས་ཕ་བཞིན་ཕན་པའི་རྗེས་མཐུན་པར། །ཐམས་ཅད་བདེ་དང་ལྡན་པར་མཛད་པའི་རིགས །དེ་ལྟར་བྱས་ན་ཆོས་སྲིད་གྲགས་པ་འཕེལ། །འདི་དང་གཞན་ལའང་ཁྱོད་ནི་བདེ་བར་འགྱུར། །དེ་བས་ཁྱོད་ནི་འབངས་ལ་ཐུགས་བརྩེ་བས། །རྒྱལ་པོ་དྲང་སྲོང་དཔལ་གྱིས་བརྗིད་པར་མཛོད། །དེ་ལྟར་རྒྱལ་པོ་སློབ་མ་བཞིན་དུ་བསྟན། །རབ་ཏུ་བསྟོད་པའི་ཚིག་གིས་དེ་བསྟན་ནས། །སྣང་བའི་སྡུག་བསྔལ་རབ་ཏུ་ཟིལ་མནན་ཏེ། །ལུས་དེ་བོར་ནས་མཐོ་རིས་སོང་བར་གྱུར། །དེ་ལྟ་བས་ན་དམ་པའི་ཚུལ་གྱི་རྗེས་སུ་འབྲང་བ་རྣམས་ནི། །དགྲ་རྣམས་ཀྱང་མགུ་བར་བྱེད་དོ་ཞེས་འཇིག་རྟེན་པ་རྣམས་མགུ་བར་བྱེད་འདོད་པས་དམ་པ་རྣམས་ཀྱི་ཚུལ་གྱི་རྗེས་སུ་འབྲང་བར་བྱའོ། །བཅོམ་ལྡན་འདས་དེ་གཞན་གྱི་དོན་ཇི་ལྟར་བསྒྲུབ་པ་དེ་ལྟར་སེམས་ཅན་རྣམས་བདག་གི་དོན་ཡང་བསྒྲུབ་མི་ནུས་སོ་ཞེས་དེ་བཞིན་གཤེགས་པའི་ཡོན་ཏན་བསྔགས་པ་ལའང་བརྗོད་པར་བྱའོ། རིམ་གྲོ་བསྐྱེད་དེ་དམ་པའི་ཆོས་མཉན་པ་དང་། སྙིང་རྗེ་ཆེ་བའི་ཡོན་ཏན་བསྔགས་པ་དང་། རྒྱལ་པོས་འབངས་རྣམས་ལ་དེ་ལྟར་སྙིང་རྗེ་དང་ལྡན་པར་བྱའོ་ཞེས་རྒྱལ་པོ་ལ་གདམས་པ་དང་། སྐྱེས་བུ་དམ་པ་རྣམས་ནི་དེ་ལྟ་བུར་ཆུ་གང་ཆེའོ་ཞེས་ཆུ་གང་ཆེ་བའི་གཏམ་བྱ་བ་ལའང་སྦྱར་བར་བྱའོ། །སྤྲེའུའི་རྒྱལ་པོར་སྐྱེས་པའི་རབས་ཏེ་ཉི་ཤུ་བདུན་པའོ།། །།བམ་པོ་བཅུ་པ། །བཟོད་པ་ལ་གོམས་ཤིང་། །སོ་སོར་བརྟགས་ཏེ་མནགས་པའི་ཤས་ཆེ་བ་རྣམས་ནི་མནགས་མི་ཐུབ་ཅེས་བྱ་བ་མེད་དོ། །དེ་ཡང་འདི་ལྟར་བྱང་ཆུབ་སེམས་དཔའ་ཁྱིམ་ན་གནས་པ་ནི་ཉེས་པ་མང་པོའི་སྡུག་བསྔལ་དང་ལྡན་པ། སྲིད་པ་དང་འདོད་པ་ལྷུར་ལེན་པས་ཉེ་བར་མ་ཞི་བ། འདོད་ཆགས་དང་། ཞེ་སྡང་དང་། མི་བཟོད་པ་དང་། འཐབ་པ་དང་། དྲེགས་པ་དང་། ང་རྒྱལ་དང་། སེར་སྣ་ལ་སོགས་པའི་སྐྱོན་རྣམས་ཀྱི་གནས། །ངོ་ཚ་བའི་ཆོས་མེད་པར་བྱེད་པ། འདོད་ཆགས་སྐྱེ་བའི་གནས། བྱ་བ་ངན་པས་བསྐལ་བས། ཆོས་སྤྱད་པའི་གོ་སྐབས་མེད་པར་ཤེས་ལ་རབ་ཏུ་བྱུང་བ་ནི་འདུ་འཛིའི་སྤོང་ཞིང་ཉེས་པ་དེ་ལྟ་བུ་མེད་པའི་བདེ་བ་ཅན་དུ་མཐོང་ནས། ཚུལ་ཁྲིམས་དང་མང་དུ་ཐོས་པ་དང་། རབ་ཏུ་ཞི་བ་དང་དུལ་བ་ཡིད་ལ་ངེས་པར་བྱེད་པའི་དཀའ་ཐུབ་ཅན་ཞིག་ཏུ་གྱུར་ཏོ་ཞེས་གྲག་གོ །དེ་བཟོད་པར་བྱས་པའི་དམ་བཅའ་བ་མ་ཉམས་ཤིང་བཟོད་པའི་བསྔགས་པ་བརྗོད་པར་བྱེད་ལ། དེ་དང་རྗེས་སུ་མཐུན་པའི་ཆོས་གོ་རིམས་བཞིན་དུ་འཆད་པས། བདག་རང་གི་མིང་རུས་ནས་སུ་ཡང་མི་འབོད་པར། བཟོད་པ་སྨྲ་བ་ཞེས་འཇིག་རྟེན་པ་རྣམས་ཀྱིས་ཡང་དག་པའི་བློ་བསྐྱེད་དེ་མིང་དུ་གྲགས་སོ། །དབང་ཕྱུག་རིག་པ་དཀའ་ཐུབ་ཕུན་སུམ་ཚོགས། སྒྱུ་རྩལ་རྣམས་ལ་གོམས་པའི་རྒྱ་ཆེ་བ། །ལུས་དང་ངག་གི་སྤྱོད་པ་མཐུ་རྩལ་ཅན། །མི་རྣམས་མིང་ནི་གཞན་དུ་འདོགས་པར་བྱེད། །དེ་ནི་བཟོད་པའི་ཡོན་ཏན་མཐུ་ཤེས་ནས། །དེ་ཡིས་བདག་གཞན་འཇིག་རྟེན་རབ་ཏུ་བརྒྱན། བཟོད་པའི་གཏམ་ཡང་རྒྱུན་དུ་བྱེད་པར་གྱུར། །དེ་བས་དེ་ནི་བཟོད་པར་སྨྲ་ཞེས་གྲགས། །བཟོད་པ་ཆེན་པོ་རང་གི་ངང་དུ་གྱུར། གཞན་ལ་གནོད་པ་མི་བྱེད་རབ་ཏུ་བརྟན། །དེ་ཡི་དོན་དང་མཐུན་པའི་གཏམ་དག་གིས། །ཐུབ་པ་དེ་ཡི་གྲགས་པ་རྒྱས་པར་གྱུར། །དེ་ནས་བདག་ཉིད་ཆེན་པོ་དེ་ནགས་ཚལ་གྱི་ཕྱོགས་རབ་ཏུ་དབེན་ཞིང་ཉམས་དགའ་བ་མེ་ཏོག་དང་འབྲས་བུ་དུས་ཐམས་ཅད་དུ་རྙེད་པར་སླ་བ། མཚོའི་ཆུ་གཙང་མ། པདྨ་དང་ཨུཏྤ་ལས་བརྒྱན་པ། སྐྱེད་མོས་ཚལ་ཉམས་དགའ་བ་བཞིན་དུ་མཛེས་བ་ཞིག་ཏུ་གནས་བཅས་པས་དཀའ་ཐུབ་ཀྱི་ནགས་ཚལ་བཞིན་དུ་བཀྲ་ཤིས་པར་བྱས་སོ། །དམ་པ་ཡོན་ཏན་མཆོག་ལྡན་པ། གང་ན་གནས་པ་དེ་དག་ཉིད། །བཀྲ་ཤིས་ཡིད་དུ་འོང་བ་དང་། དེ་ཉིད་རྟེན་དང་དཀའ་ཐུབ་ཚལ། དེ་ན་གནས་པའི་ལྷ་རྣམས་ནི་དེ་ལ་དད་པ་སྐྱེས། །སྐྱེ་བ་ལ་ཕན་པར་འདོད་ཅིང་ཡོན་ཏན་ལ་དགའ་བ་རྣམས་ནི་བཀུར་སྟི་བྱེད་ཅིང་འོང་བར་གྱུར། སྐྱེ་བོ་མང་པོ་དེ་རྣམ་ལ་ཆོས་ཀྱི་གཏམ་བཟོད་པ་དང་། ལྡན་པ་རྣར་འོང་ཞིང་སེམས་ལ་འབབ་པ་རྣམས་ཀྱིས་ཕན་བཏགས་སོ། །དེ་ནས་རེ་ཤིག་ཅིག་ཡུལ་དེའི་རྒྱལ་པོ་དཔྱིད་ཀྱི་དུས་ལ་བབ་པས་ཆུའི་ནང་དུ་རྩེར་འགྲོ་འདོད་པར་གྱུར་ཏོ། །སྐྱེད་མོས་ཚལ་གྱི་ཡོན་ཏན་བས་ཀྱང་ལྷག་པའི་གནས་སུ་གྱུར་པའི་ནགས་ཚལ་གྱིས་ས་ཕྱོགས་དེར་བཙུན་མོའི་འཁོར་དང་བཅས་ཏེ་སོང་ངོ་། །དགའ་བའི་ཚལ་ལྟར་ཉམས་དགའ་མཛེས་པའི་ཚལ། །དེ་ཡི་བཙུན་མོའི་འཁོར་གྱིས་གང་བར་གྱུར། །ལོངས་སྤྱོད་ཅན་གྱི་སྤྱོད་ཚུལ་མཛེས་པ་ཡི། །ན་ཆུང་ཆས་པ་རྣམས་ཀྱིས་བརྒྱན་པ་བཞིན། །འཁྲིལ་ཞིང་འཁྱིལ་བས་གཏིབས་པ་ལྡིང་ཁང་བཞིན། །མེ་ཏོག་རྒྱས་པའི་ལྗོན་ཤིང་དགོད་པ་བཞིན། པདྨ་རབ་ཏུ་རྒྱས་པའི་མཚོ་འགྲམ་ན། །བཙུན་མོ་རྣམས་ནི་རབ་ཏུ་དགའ་ཞིང་རྩེ། །མེ་ཏོག་ཕྲེང་དང་ཁྲུས་ཀྱི་བྱུག་སྤོས་ཀྱི། བསུང་ཞིམ་ངད་ཀྱིས་བུང་བ་འདུས་རྣམས་ལ། །བཙུན་མོ་ཁ་ཅིག་ལྟས་མོ་ཆར་ལྟ་བ། །ཡ་མཚན་ཆེར་གྱུར་བསྔགས་ཤིང་འཛུམ་པས་མཛེས། །མེ་ཏོག་རྣ་ཆ་གསར་པ་རབ་ཏུ་མཛེས་པ་དང་། །སྐྲ་ཡི་རྒྱན་དུ་བཏགས་པའི་ཕྲེང་བས་མཛེས་ཡོད་ཀྱང་། །དེ་དག་མེ་ཏོག་འདོད་པས་ཚིམ་པར་མ་གྱུར་པར། །དེ་བཞིན་རྒྱལ་པོའི་བཙུན་མོ་རྩེ་བས་སྙིང་མ་ཚིམ། མེ་ཏོག་ཤིང་ལ་བུད་མེད་མིག་ལྟ་ཞིང་། །གཞལ་མེད་ཁང་ལ་ལྟ་བས་ཆགས་གྱུར་པ། པདྨའི་ཚལ་ནས་བུང་བ་དངར་བ་བཞིན། །རབ་ཏུ་མཛེས་པ་རྒྱལ་པོས་མཐོང་བར་གྱུར། །ཀོ་ཀི་ལ་དག་མྱོས་པའི་སྒྲ་རྣམས་དང་། རྨ་བྱ་གར་བྱེད་བུང་བ་གླུ་ལེན་དང་། ན་ཆུང་ཚིག་སྨྲ་གླུ་ལེན་གར་བྱེད་པས། དེ་དག་དེ་ན་རབ་ཏུ་མཛེས་པར་སྣང་། འབྲུག་སྒྲ་ཟབ་མོ་རྔ་སྒྲ་བརྡུངས་པ་བཞིན། །རྨ་བྱ་མང་པོ་ལྷུང་ལྷུང་སྒྲ་འབྱིན་ཅིང་། །རང་གི་སྒྱུ་རྩལ་ཐབས་ཀྱིས་གར་བྱེད་པ། །རྒྱལ་པོ་དེ་ལ་རྨ་བྱ་གསག་བྱེད་འདྲ། །དེ་དེ་ན་བཙུན་མོའི་འཁོར་དང་བཅས་པར་ནགས་ཚལ་སྐྱེད་མོས་ཚལ་འདྲ་བ་ན་སྤྱོད་པའི་བདེ་བ་ཉམས་སུ་མྱོང་ནས་རྩེ་རྩེ་བས་ཆད་ཅིང་འདོད་པ་ལ་ཆགས་པའི་དབང་གིས་ཤིང་གྲིབ་དཔལ་དང་ལྡན་པ། གཞལ་མེད་ཁང་འདྲ་བའི་དྲུང་དུ་མལ་ཆ་བཟང་པོ་བཏིང་བ་ལ་ཉལ་ཏེ། གཉིད་ཀྱིས་ལོག་པར་གྱུར་ཏོ། །དེ་ནས་བཙུན་མོ་དེ་དག་རྒྱལ་པོ་མནལ་ཏེ་སྐབས་སུ་བབ་པར་ཤེས་ནས། ནགས་ཚལ་མཛེས་པ་ལ་སྙིང་ཆགས་ཤིང་དེ་ལྟ་བས་མ་ངོམས་པས། དགའ་དགའ་ལྟར་ཆས་ཏེ། རྒྱན་རྣམས་སིལ་སིལ་ཟེར་བའི་སྒྲ་དང་འདྲེས་པའི་སྐད་སྙན་པ་འབྱིན་ཅིང་ཀུན་དུ་འཁྱམ་དུ་དོང་ངོ་། །དེ་དག་གདུགས་དང་རྔ་ཡབ་སྟན་ལ་སོགས། གསེར་གྱིས་བརྒྱན་པ་རྣམས་ནི་བྲན་མོས་ཐོགས། །དབང་ཕྱུག་རྟགས་དང་ལྡན་པ་རྗེས་སུ་འབྲང་། །བུད་མེད་རང་བཞིན་འཕྱར་བ་རྣམ་པར་རྒྱུ། །དེ་དག་ལྗོན་ཤིང་བཟང་པོའི་མེ་ཏོག་དང་། །ལོ་མ་སྡུག་གུ་སྙབ་ཏུ་སླེབ་པ་རྣམས། །བྲན་མོས་བཏོགས་ཏེ་འབུལ་གྱི་མི་སླེབས་པར། །ཆགས་པའི་དབང་གིས་བདག་ཅག་ཉིད་ཀྱིས་བཏོགས། །ཤིང་ལོ་གཡོ་བའི་ཤིང་དང་གེལ་པ་རྣམས། །ལམ་དང་ཉེ་བ་མེ་ཏོག་རྒྱས་པ་ཀུན། །མེ་ཏོག་ཕྲེང་བའི་རྒྱན་གྱིས་ཀླུབས་ཟིན་ཀྱང་། །ཆགས་པའི་དབང་གིས་མ་བཏོགས་དེ་མ་དོང་། དེ་ནས་རྒྱལ་པོའི་བཙུན་མོ་དེ་དག་ནགས་ཚལ་ཉམས་དགའ་བ་ལ་སེམས་གཡེངས་བཞིན་དུ། ནགས་ཚལ་དེའི་ནང་ནས་མཐར་གྱི་རྒྱུ་ཞིང་དོང་དོང་བ་ལས། བཟོད་པ་སྨྲ་བའི་དཀའ་ཐུབ་ཀྱི་ནགས་སུ་ཕྱིན་ཏོ། །བུད་མེད་བསྲུང་བའི་ཉུག་རུམ་པ་རྣམས་ཀྱིས་ཐུབ་པ་དེའི་དཀའ་ཐུབ་ཀྱི་མཐུ་ཆེ་བར་ཤེས་བཞིན། བཙུན་མོ་དེ་རྣམས་ཀྱང་རྒྱལ་པོའི་གནང་ཆེན་ཡིན་ལ་བཅོས་དཀའ་བའི་ཕྱིར་དེར་མི་འདོང་བར་བཟློག་མ་ནུས་སོ། །དཀའ་ཐུབ་ཀྱི་གནས་དེ་བྱི་དོར་ལེགས་པར་བྱས་པས་ཉམས་དགའ་ཞིང་ཡིད་དུ་འོང་བས་བཙུན་མོ་དེ་དག་དྲངས་པ་བཞིན་དུ་དེར་ལྷགས་པ་དང་། དེ་ན་ཐུབ་པའི་མཆོག་དེ་རབ་ཏུ་ཞི་ཞིང་དུལ་བར་སྣང་ཡང་། རབ་ཏུ་ཟབ་པས་དཀའ་ཐུབ་ཀྱི་དཔལ་མེ་འབར་བ་བཞིན་དུ་བསྙེན་པར་ནི་དཀའ། བསམ་གཏན་གོམས་པར་བྱས་པས་འདོད་ཆགས་ཀྱི་ཡུལ་བཟང་མོ་ཉེ་བར་གྱུར་ཀྱང་། དབང་པོ་ཐུལ་ཞིང་མ་འཁྲུགས་པས་ནི་མཛེས། ཆོས་མངོན་སུམ་དུ་མཐོང་བ་བཞིན་དུ་བཀྲ་ཤིས་ཤིང་བསོད་ནམས་དང་ནི་ལྡན་པར་ཤིང་དྲུང་དུ་སྟན་བཏིང་བ་ལ་འདུག་པ་མཐོང་བར་གྱུར་ཏོ། །དེ་ནས་རྒྱལ་པོ་དེའི་བཙུན་མོ་དེ་དག་དེའི་དཀའ་ཐུབ་ཀྱི་གཟི་བྱིན་གྱི་སེམས་ཟིལ་གྱིས་ནོན་པས། མཐོང་མ་ཐག་ཏུ་གཡེངས་བ་དང་། འཛེམ་པ་དང་འཕྱར་བ་བཏང་སྟེ། དུལ་ཞིང་གུས་པར་བྱས་ཏེ། དེའི་དྲུང་དུ་ལྷགས་ནས་བསྙེན་བཀུར་བྱས་སོ། །དེས་ཀྱང་དེ་དག་ལ་འདིར་འོངས་པ་ལེགས་སོ་ཞེས་བྱ་བ་ལ་སོགས་པའི་ཚིག་སྙན་པ་བརྗོད་ནས་འགྲོན་འོངས་པ་དགའ་བར་འགྱུར་བའི་རིམ་གྲོ་བྱས་ཏེ། དེ་དག་ལ་ནད་དྲི་བའི་སྐབས་ནས་གླེང་བསླང་སྟེ་ཆོས་ཀྱི་གཏམ་བུད་མེད་ཀྱི་གོ་བར་སླ་བ། དཔེ་དང་བཅས་པ་རྣམས་ཀྱིས་དེ་དག་ལ་མགྲོན་བྱས་སོ། །མི་ཡི་ལུས་སུ་སྐྱེས་པ་མ་སྨད་ཐོབ་པར་གྱུར། །དེ་བཞིན་དབང་པོ་རྣམས་ཀྱང་མ་ཉམས་བློ་དང་ལྡན། །འོན་ཀྱང་འཆི་བདག་དེ་ན་ལེགས་པར་མི་བྱེད་ངེས། །བག་མེད་གྱུར་པ་དེ་དག་ཉིན་རེས་བསླུས་པར་འགྱུར། །རབ་ཏུ་སྦྱིན་དང་ཚུལ་ཁྲིམས་ལ་སོགས་མ་སྦྱངས་ན། །རིགས་དང་གཟུགས་དང་ལང་ཚོ་ཡོན་ཏན་རྣམས་དང་ནི། །སྟོབས་ནི་རབ་ཏུ་ཆེ་ཞིང་ནོར་གྱིས་ཕྱུག་གྱུར་ཀྱང་། །ཕྱི་མའི་ཚེ་ལ་སུ་ཡང་བདེ་བ་ཐོབ་མི་འགྱུར། །རིགས་ལ་སོགས་པ་དམན་ཡང་སྡིག་ལ་མ་ཆགས་ཤིང་། རབ་ཏུ་སྦྱིན་དང་ཚུལ་ཁྲིམས་ལ་སོགས་ཡོན་ཏན་ལྡན། །དབྱར་གྱི་དུས་ན་འབབ་ཆུས་རྒྱ་མཚོ་གང་བ་བཞིན། །ཕྱི་མའི་ཚེ་ལ་ངེས་པར་བདེ་བས་རྒྱས་པར་འགྱུར། །རིགས་དང་གཟུགས་དང་ལུས་ཀྱི་ཡོན་ཏན་རྣམས་ཀྱང་རུང་། །སྟོབས་ནི་རབ་ཏུ་ཆེ་ཞིང་ནོར་གྱིས་ཕྱུག་ཀྱང་རུང་། །ཡོན་ཏན་ཡོད་ན་ཚེ་འདི་ལ་ཡང་རྒྱན་དུ་འགྱུར། །གསེར་གྱི་ཕྲེང་བས་ཕྱུག་པོའི་མཚན་མ་བསྟན་པ་བཞིན། །མེ་ཏོག་རྣམས་ནི་ལྗོན་པའི་ཤིང་གི་རྒྱན་དུ་འགྱུར། །གློག་ཕྲན་འགྱུ་བ་ཆར་སྤྲིན་རྣམས་ཀྱི་རྒྱན་དུ་འགྱུར། །བུང་བ་མྱོས་པ་འདུ་བའི་པདྨ་རྒྱ་མཚོའི་རྒྱན། །ཡོན་ཏན་ཁྱད་པར་འཕགས་པ་ལུས་ཅན་རྣམས་ཀྱི་རྒྱན། །ནད་མེད་ཚེ་རིང་ནོར་དང་རིགས་དང་གཟུགས་རྣམས་ནི། །རབ་དང་འབྲིང་དང་ཐ་མའི་བྱེ་བྲག་སྣ་ཚོགས་པའི། །སྐྱེ་བ་འདི་དག་ངོ་བོ་ཉིད་ལས་གྱུར་མ་ཡིན། །གཞན་གྱིས་སྐྱེད་མིན་ལས་ནི་རྣམ་པ་གསུམ་ལས་གྱུར། །འགྲོ་བའི་ཆོས་ཉིད་འདི་ལྟར་ངེས་པར་གནས་པ་དང་། །སྲོག་ཀྱང་མི་བརྟན་ཤི་དང་ཉེ་བར་ཤེས་ནས་ནི། །དགེ་བའི་ཕྱོགས་ལ་བརྟེན་ནས་སྡིག་པ་སྤང་བར་གྱིས། །གྲགས་པ་བདེ་བ་འཐོབ་པའི་ལམ་ནི་འདི་ཡིན་ནོ། །ཡིད་ལ་ཞེ་སྡང་ཡོད་ན་བདག་དང་གཞན་དག་ལ། །ཕན་པར་འགྱུར་བ་མེ་བཞིན་རབ་ཏུ་སྲེག་པར་བྱེད། །དེ་བས་སྐྱེ་བོ་སྡིག་ལ་འཛེམ་པ་དེ་དག་གིས། །གཉེན་པོ་རྣམས་ལ་བརྟེན་ནས་སྡིག་པ་སྤང་བར་བྱ། །དགོན་པའི་མེ་ན་རབ་ཏུ་འབར་བར་འགྱུར་བ་ཡང་། །ཆུ་ཀླུང་ཆེན་པོ་མཐས་ཀླས་འབབ་དང་ཕྲད་གྱུར་ན། །ཇི་ལྟར་རབ་ཏུ་ཞི་བར་གྱུར་པ་དེ་བཞིན་དུ། །ཡིད་ཀྱི་གདུངས་པའང་བཟོད་ལ་བརྟེན་ན་ཞི་བར་འགྱུར། །དེ་བས་དེ་རྒྱུ་ཟིལ་གྱིས་མནན་པས་བཟོད་པས་སྡིག་པ་སྤོང་། །དེ་ཕྱིར་བྱམས་ལ་བརྟེན་པའི་སྟོབས་ཀྱིས་དགྲ་ཡང་འཕེལ་མི་འགྱུར། །དེ་ལས་དགའ་ཞིང་མཆོད་འོས་བདེ་བའི་སྐལ་དང་ལྡན་པར་འགྱུར། །བསོད་ནམས་བྱས་པའི་ཡོན་གྱིས་ཐ་མར་མཐོ་རིས་འགྲོ་བར་འགྱུར། གཞན་ཡང་ཀྱེ་བཙུན་མོ་དག །བཟོད་པ་ཞེས་བྱ་བ་འདི་ནི། དགེ་བའི་རང་བཞིན་ཅན་དུ་རབ་ཏུ་གྲགས། བསོད་ནམས་གྲགས་པ་དག་ཀྱང་རབ་ཏུ་འཕེལ། །ཆུ་ཡིས་མ་བཀྲུས་པར་ཡང་དག་པར་འགྱུར། །ཡོན་ཏན་དེ་དང་དེ་དག་ཕུན་སུམ་ཚོགས། །གཞན་ལ་གནོད་པ་རྟག་ཏུ་ཡོང་མི་ཤེས། སྙིང་སྟོབས་ཅན་གྱི་ཆོས་ཉིད་ཡིད་དུ་འོང་། །ཡོན་ཏན་མངོན་བསྒྲུབ་བཟོད་པ་མཛེས་པ་དེ། སྙིང་རྗེ་བཀའ་སྩལ་འཇིག་རྟེན་དོན་བྱེད་པའོ། །མཐུ་དང་ལྡན་པ་རྣམས་ཀྱི་རྒྱན་ཡང་ཡིན། །དཀའ་ཐུབ་ཅན་གྱི་སྟོབས་མཆོག་ཕུན་སུམ་ཚོགས། གནོད་སེམས་དགོན་པའི་མེ་ལ་ཆུ་རྒྱུན་འབེབས། གཉིས་ཀའི་ཚེ་ལ་དོན་མེད་ཞི་བར་བྱེད། །དམ་པ་རྣམས་ཀྱི་གོ་ཆ་བཟོད་པ་ཡིན། །སྐྱེ་བོ་ངན་པའི་ཚིག་ངན་མདའ་ཡང་རྡུགས། །ཕལ་ཆེར་ཡོན་ཏན་བསྔགས་པའི་མེ་ཏོག་འགྱུར། །དེ་ནི་གྲགས་པའི་ཡན་ལག་ཅན་དུ་འགྱུར། །ཆོས་ཀྱི་མི་མཐུན་ཕྱོགས་རྣམས་བཟོད་པས་འཇོམས། །རྣམ་པར་ཐར་པའི་བདེ་བ་བཟོད་པས་འཐོབ། །རབ་ཏུ་འབད་ན་བཟོད་པ་ཕན་པར་འགྱུར། །བཟོད་པ་དེ་ནི་མི་བྱེད་སུ་ཞིག་ཡོད། །དེ་ལྟར་བདག་ཉིད་ཆེན་པོ་དེས་བཙུན་མོ་དེ་རྣམས་ལ་ཆོས་ཀྱི་མགྲོན་བྱས་སོ། །དེ་ནས་རྒྱལ་པོ་དེ་གཉིད་ཀྱིས་ལོག་པ་ལས་སད་པ་དང་། འདོད་ཆགས་ཀྱི་ལྷག་མ་ལུས་པས་མིག་ལྕི་བར་གྱུར་ནས་ཆགས་པའི་དབང་གིས་བཙུན་མོ་རྣམས་གར་དོང་ཞེས་གཟིམས་མལ་པ་རྣམས་ལ་སྨིན་མ་བསྒྱུར་ཏེ་དྲིས་སོ། །ལྷ་བཙུན་མོ་དེ་དག་ནི་ནགས་ཚལ་བཟང་པོ་རྣམས་ལྟ་ཞིང་ལོངས་སྤྱོད་བགྱིད་དུ་མཆིས་སོ་ཞེས་གཟིམས་མལ་པ་རྣམས་ཀྱིས་གསོལ་བ་ཐོས་པ་དང་། རྒྱལ་པོ་དེ་བཙུན་མོ་དེ་སྤོབས་པས་བག་ཡངས་སུ་དགོད་ཅིང་སྨྲ་བ་དང་། རྩེ་བ་ལྟ་འདོད་པའི་ཕྱིར་མལ་ནས་ལངས་ཏེ། གདུགས་དང་། རྔ་ཡབ་དང་། བསིལ་ཡབ་དང་། བླ་གོས་དང་། རལ་གྲི་རྣམས་ནི་ན་ཆུང་རྣམས་ཀྱིས་བཟུང་། བཙུན་མོའི་འཁོར་གྱི་ཉུག་རུམ་ལག་ན་སྦ་མཁར་ཐོགས་པ་རྣམས་ཀྱིས་བསྐོར་ཏེ་ནགས་ཚལ་དེའི་ནང་ནས་མཐར་གྱིས་སོང་ངོ་། །དེ་དེ་ན་བུད་མེད་རྣམས་ཉམས་རང་སུ་རྒྱུ་ཞིང་དོང་དོང་བའི་ལམ་མེ་ཏོག་དང་། ལོ་མ་སྣ་ཚོགས་ཀྱིས་གཏོར་བ། སོ་རྩིའི་ཁུ་བའི་ཚོན་གྱི་ཁྲ་བོར་གྱུར་པའི་རྗེས་བཞིན་དུ་སོང་སོང་ནས། དཀའ་ཐུབ་ཀྱི་གནས་དེར་ཕྱིན་ཏོ། །རྒྱལ་པོ་དེས་དྲང་སྲོང་གི་མཆོག་བཟོད་པ་སྨྲ་བ་དེ་བཙུན་མོའི་འཁོར་གྱིས་བསྐོར་ཞིང་འདུག་པ་མཐོང་ནས། སྔོན་གྱི་ཁོན་རྙིང་ཡོད་པ་དང་། འདོད་ཆགས་ཀྱིས་དྲན་པ་ཉམས་པར་གྱུར་པ་དང་། ཕྲག་དོག་གིས་ཟིལ་གྱིས་ནོན་པའི་ཕྱིར་སེམས་རབ་ཏུ་འཁྲུགས་པར་གྱུར་ཏོ། །སོ་སོར་བརྟགས་ཏེ་མནགས་པའི་མཐུ་ཆུང་བས་དུལ་བ་དང་ངེས་པར་སྤྱོད་པ་ནི་ཉམས། འཐབ་མོ་རྒལ་འདོད་པའི་ཤུགས་ཀྱིས་རྔུལ་ནི་བྱུང་། ལུས་འདར་ཞིང་སྨིན་མ་བཅུམ་སྟེ། མིག་རྩ་དམར་པོ་ནི་དགྲད། གཟི་མདངས་བཟང་པོ་ནི་ཉམས། གསེར་གྱི་གདུབ་བུ་དང་སོར་གདུབ་ཀྱིས་བརྒྱན་པའི་ལག་པ་གཉིས་ནི་མཉེས་ཏེ། དྲང་སྲོང་གི་མཆོག་དེ་ལ་སྐུར་པ་འདེབས་པའི་ཚིག་དེ་དང་དེ་དག་ལ་སྨྲས་པ། ངན་པ་དེ། ང་ཡི་གཟི་བྱིན་ཟིལ་མནན་ནས། །ཐུབ་པའི་ཆ་ལུགས་གོ་བགོས་ཏེ། ང་ཡི་བཙུན་མོའི་འཁོར་ལྟ་བ། །ཚུལ་འཆོས་འདི་ནི་སུ་ཞིག་ཡིན། དེ་སྐད་ཟེར་བ་ཉུག་རུམ་རྣམས་ཀྱིས་ཐོས་ནས། བརྟབས་ཤིང་སྐྲག་པའི་ཤུགས་ཀྱིས་རྒྱལ་པོ་ལ་སྨྲས་པ། ལྷ་དེ་ལྟར་མ་མཛད་ཅིག །ཐུབ་པ་འདི་ནི་ཡུན་རིང་པོ་ནས། །བརཏལ་ཞུགས་དང་། སྡོམ་པ་དང་། དཀའ་ཐུབ་བསྒོམས་པའི་བདག་ཉིད་ཅན་ལགས་ཏེ། མིང་ཡང་བཟོད་པ་སྨྲ་བ་ཞེས་བགྱིའོ། རྒྱལ་པོ་དེ་ནང་གི་བསམ་པ་ངན་པས་དེ་དག་གི་ཚིག་ལ་མི་ཉན་པར་སྨྲ་བ། ཨེ་མའོ་ཁྱོད་ཅག་ཅི་ཟེར་བ་ཞིག འཇིག་རྟེན་འདི་དག་ཡུན་རིང་ནས། །འདི་ཡིས་དེ་ལྟར་བསླུས་པར་གྱུར། །ཚུལ་འཆོས་གཡོ་སྒྱུའི་རང་བཞིན་ཅན། །དཀའ་ཐུབ་ཚུལ་བསྟན་འདི་ལྟར་བྱེད། །དེ་འདི་ལྟར་དཀའ་ཐུབ་ཅན་གྱི་ཚུལ་དུ་བསྒྱུར་ནས། །གཡོ་དང་སྒྱུ་བྱེད་པ་ལ་གོམས་པས། ཚུལ་འཆོས་པའི་རང་བཞིན་ཏེ། ངས་བསྟན་པར་བྱའོ་ཞེས་སྨྲས་ནས། གསོལ་ཀ་བའི་ལག་ན་རལ་གྲི་འདུག་པ་བླངས་ཏེ། དྲང་སྲོང་གི་མཆོག་དེ་དགྲ་བཞིན་དུ་ངེས་པར་བསད་པར་བསམས་ནས་སོང་བ་དང་། དེ་ནས་བཙུན་མོ་དེ་དག་ལ་འཁོར་རྣམས་ཀྱིས་རྒྱལ་པོ་གཤེགས་པར་སྦྲན་པ་དང་། རྒྱལ་པོ་ལ་བལྟས་ན་ཁྲོས་པས་ཞི་བའི་མདངས་མེད་པར་མཐོང་ནས། སྙིང་མི་དགའ་བས་རྟབ་རྟབ་པོར་གྱུར་པའི་ཤུགས་ཀྱིས་མིག་རིག་རིག་པོར་ལྟ་ཞིང་ལངས་ཏེ། དྲང་སྲོང་མཆོག་དེ་ལ་ཐལ་མོ་སྦྱར་ཏེ་ཕྱག་བྱས་ནས། སྟོན་ཀའི་པདྨ་ཁ་འབུས་པ་འདྲ་བའི་བཞིན་ཅུང་ཟད་འཛུམ་པར་བྱས་ཏེ། རྒྱལ་པོ་དེའི་དྲུང་དུ་དོང་ངོ་། །དེ་ཡི་ཡིད་ལ་ཁྲོས་པའི་མེ་འབར་བས། བཙུན་མོ་དེ་དག་གི་སྤྱོད་ཚུལ་མཛེས་པ་དང་། དུལ་ཞིང་གུས་པར་འོས་པའི་མཁས་པས་དེས་ཀྱང་དེའི་ཡིད་ཞི་བར་མ་གྱུར་ཏོ། །བཙུན་མོ་དེ་དག་རབ་ཏུ་སྤོབས་ཤིང་བག་ཕེབས་པས། རྒྱལ་པོ་དེ་རབ་ཏུ་ཁྲོས་ཤིང་བཞིན་འགྱུར་ལ་སྤྱོད་པ་ཉམས་ཤིང་རྩུབ་པར་མངོན་ལ། ལག་ན་མཚོན་ཆ་ཐོགས་ཏེ། དྲང་སྲོང་མཆོག་དེ་ལ་སྡང་མིག་ཏུ་ལྟ་བ་མཐོང་ནས་བཅུག་པའི་ཕྱིར་སྨྲས་པ་འདི་ནི་བཅོམ་ལྡན་འདས་བཟོད་པ་སྨྲ་བ་ལགས་ཀྱིས་ལྷ་དེ་ལྟ་བུའི་ཐུབ་ཆོད་ཆེན་པོ་མ་མཛད་ཅིག་ཅེས་བྱས་པ་དང་རྒྱལ་པོ་དེ་སེམས་རབ་ཏུ་སྡུག་པས་འདི་དག་ནི་དེས་རབ་ཏུ་མགུ་བར་བྱས་ཟིན་ཏོ། །སྙམ་ནས་རབ་ཏུ་ཁྲོས་པར་གྱུར་ཏོ། །མི་བཟོད་པའི་ཤུགས་དྲག་པོས། སྨིན་མ་རབ་ཏུ་གཡོ་ཞིང་མིག་ཟུར་གྱིས་ལྟ་བས་བཙུན་མོ་དེ་དག་གི་སྤོབས་པ་དང་འཇམ་པར་སྨྲ་བའི་ཚིག་མི་ཉན་པར། བཙུན་མོའི་འཁོར་དང་བསྲུང་བའི་ཉུག་རུམ་པ་ལ་ཁྲོ་བ་དང་བཅས་པས་ལྟ་ཞིང་མགོ་བསྒྱུར་བས་རྣ་ཆ་དང་། ཅོད་པན་གྱི་ཟར་བུ་གཡོ་བཞིན་དུ་བཙུན་མོ་དེ་དག་ལ་བལྟས་ནས་སྨྲས་པ། འདི་ནི་བཟོད་པ་སྨྲ་ཞེས་ཟེར། དེ་ཡང་ཉམས་སུ་ཡོང་མི་ལེན། །འདི་ལྟར་བུད་མེད་བསྟེན་པ་ཡིས། །སྲེད་པ་འདིས་ནི་བཟོད་མ་གྱུར། །ཚིག་ཏུ་གཞན་སྨྲ་ལུས་ཀྱི་སྤྱོད་པ་གཞན། །བསམ་པ་འདུག་ཅིང་ཡིད་ལ་གཞན་དུ་སེམས། དཀའ་ཐུབ་ནགས་ན་མ་ཞི་འདི་སུ་ཞིག །འབྲིད་པའི་ཚུལ་ཅན་ཕྱི་ཚུལ་འཆོས་ཤིང་འདུག །དེ་ནས་བཙུན་མོ་དེ་དག་རྒྱལ་པོ་དེ་ཁྲོས་ཤིང་རྔམ་པས་སྙིང་རྩུབ་པར་གྱུར་པ་ལ་བཅུགས་མ་ནུས་ཏེ། རྒྱལ་པོ་རབ་ཏུ་གཏུམ་ཞིང་བཅོས་དཀའ་བར་ཡང་ཤེས་ནས། ཡིད་མི་དགའ་ཞིང་མྱ་ངན་གྱིས་ནི་གདུངས། ཉུག་རུམ་རྣམས་ཀྱང་འཇིགས་ཤིང་སྐྲག་པས་འཁྲུགས་པའི་ལག་བརྡས་ནི་བསྐྲད། ངོ་ཚ་བས་མགོ་ནི་སྨད། དྲང་སྲོང་མཆོག་དེའི་མྱ་ངན་བྱེད་ཅིང་དེ་ནས་བྱེར་ཏེ་དོང་ངོ་། །དཀའ་ཐུབ་ཆེན་པོ་དུལ་ལ་ཡོན་ཏན་གྲགས་པ་འདི། །བདག་ཅག་རྣམས་ཀྱི་ཕྱིར་ནི་ཉེས་པ་ཡོད་མེད་པར། །རྒྱལ་པོའི་ཁྲོ་བ་འདི་ནི་མ་ཞི་གྱུར་ནས་སུ། གང་གི་ལམ་དུ་ཞུགས་ནས་ཅི་བྱེད་སུས་ཤེས་ཀྱེ། །རྒྱལ་པོའི་རྒྱལ་སྲིད་གྲགས་པ་ཐོབ་པ་དང་། །ཐུབ་པ་འདི་ལུས་དཀའ་ཐུབ་ལུས་འདི་དང་། །བདག་ཅག་ཡིད་ནི་ཉེས་པ་མེད་འདི་དག །རྒྱལ་པོས་ཅིག་ཅར་བསད་པར་མི་འགྱུར་རམ། དེ་ལྟར་བཙུན་མོ་དེ་དག་མྱ་ངན་བྱེད་པའི་ཤུགས་རིང་པོ་འབྱིན་པ་རྣམས་བྱེར་ཏེ་དོང་བའི་འོག་ཏུ། རྒྱལ་པོ་དེ་དྲང་སྲོང་མཆོག་དེ་ལ་བསྡིགས་ཤིང་ཁྲོ་བའི་ཤུགས་ཀྱིས་རལ་གྲི་ཕྱུང་སྟེ་བདག་རང་འདེབས་སུ་སོང་ངོ་། །སེམས་དཔའ་ཆེན་པོ་དེ་དེ་ལྟར་རྨ་ཕབ་ཀྱང་མ་འགྱུར་ཅིང་བརྟན་པ་མི་ཉམས་ལ། རང་བཞིན་དུ་སྤྱོད་པ་དེ་མཐོང་ནས། རབ་ཏུ་རྔམ་ཞིང་དེ་ལ་སྨྲས་པ། ཨ་ཛི་ན་དང་དབྱིག་པ་ཐོགས། །གཡོ་སྒྱུའི་བརྗིད་བག་འཆོས་པ་འདི། །བདེན་པ་བཞིན་དུ་མཐར་ཕྱིན་ཀྱང་། །ཐུབ་པ་བཞིན་དུ་ང་ལ་བལྟ། དེ་ནས་བྱང་ཆུབ་སེམས་དཔའ་བཟོད་པ་ལ་གོམ་པས་སྨད་ཅིང་བཅོས་པ་དེས་ཀྱང་བརྟན་པ་མ་ཉམས་པར་རྒྱལ་པོ་ཁྲོས་ཤིང་རྔམ་པས་སྤྱོད་པའི་ཚུལ་ནི་མི་སྡུག་པར་གྱུར། དུལ་བར་སྤྱོད་པའི་དཔལ་ནི་ཉམས། བདག་ལ་ཕན་པ་དང་གནོད་པར་འགྱུར་བའི་ལས་ནི་བརྗེད་པར་གྱུར་པ་ལ་ཡ་མཚན་ཆེར་གྱུར་ནས། ཅུང་ཟད་ཅིག་བལྟས་ཏེ། སྙིང་རྗེ་བཞིན་དུ་ཚིག་འཇམ་པོས་གཞབས་ཏེ་འདི་སྐད་དུ་ཅུང་ཟད་ཅིག་སྨྲས་པར་ངེས་སོ། །འདི་ལྟར་སྨད་པ་སྐལ་བ་མེད་པས་གྱུར་པར་ནི། །འགྲོ་བ་དག་ལ་སྲིད་པས་དེ་ཕྱིར་བདག་མི་སེམས། །ཁྱོད་ལ་འོས་པའི་བཀུར་སྟི་བདག་གིས་བྱ་བ་ལས། །ཚིག་ཙམ་གྱིས་ཀྱང་ཅི་རིགས་མ་བྱས་སེམས་ལ་བཅགས། །རྒྱལ་པོ་ཆེན་པོ་གཞན་ཡང་། འགྲོ་བའི་དོན་བྱེད་ཁྱེད་ལྟ་བུ་དག་ནི། དམ་པ་མ་ཡིན་སྤྱོད་པའི་ལམ་འཇུག་པ། །ཐུབ་ཆེད་བྱས་ཏེ་སྤྱོད་པ་མི་རིགས་ཀྱི། རྣམ་པར་བརྟགས་པའི་ལམ་དུ་འཇུག་པའི་རིགས། །ལེགས་པ་དག་ཀྱང་ཅུང་ཟད་མི་རིགས་མཐོང་། །ཁ་ཅིག་ཉེས་ཀྱང་ལེགས་པར་འདྲ་བར་སྣང་། །གཏན་ཚིགས་ཁྱད་པར་ཅན་དག་མ་བརྟགས་བར། །དགོས་པའི་དོན་ཉིད་ཚད་དུ་མི་རྟོགས་སོ། །དགོས་པའི་དོན་ནི་ལེགས་པར་བརྟགས་ནས་སུ། །བསྟན་དག་ལམ་དུ་ལེགས་པར་ཞུགས་ནས་ནི། །ཆོས་དང་སྲིད་དང་བདེ་བའི་དོན་བསྒྲུབས་ན། །དེ་དག་ཉིད་ཀྱི་སྐྱེ་བ་ཉམས་མི་འགྱུར། །དེ་བས་རབ་ཏུ་རྒོད་པའི་བློ་བཏུལ་ནས། གྲགས་པར་འགྱུར་བའི་ལས་ཉིད་བརྩམ་པའི་རིགས། །སྔོན་ཆད་མ་བྱུང་ཉེས་པ་སྤྱད་ན་ནི། །མངོན་པའི་ང་རྒྱལ་ཅན་རྣམས་གཏམ་ངན་འཕེལ། ཁྱོད་ཀྱི་མཐུ་ཡིས་བསྲུངས་པའི་ནགས་ཚལ་ནི། །གཞན་གྱིས་གནོད་པ་བྱས་ནའང་བསྐྱབ་པའི་རིགས། །ཕན་པའི་ཚུལ་མེད་དམ་པས་སྨད་པ་དག །རྒྱལ་པོ་ཆེན་པོ་ཉིད་ཀྱིས་ཇི་ལྟར་སྤྱད། །བསྲུངས་མ་ཉུག་རུམ་བཅས་པར་བུད་མེད་རྣམས། །བདག་གི་གནས་སུ་རང་དགར་ལྷགས་པ་ལ། །བདག་གིས་ནོངས་པ་ཅུང་ཟད་ཅི་ལྟར་བགྱི། །དེ་ལྟར་སྐྱོན་པར་གྱུར་པ་ག་ལ་སྲིད། །དེ་སྟེ་བདག་གིས་ནོངས་པར་གྱུར་ན་ཡང་། །འོན་ཀྱང་རྒྱལ་པོས་བཟོད་ན་མཛེས་པར་གྱུར། །ནུས་པ་དག་ལ་བཟོད་པ་རྒྱན་གྱི་མཆོག །ཡོན་ཏན་རྗེས་སུ་བསྲུང་ལ་མཁས་པར་སྟོན། །བཟོད་པས་བརྒྱན་ན་ཇི་ལྟར་མཛེས་པ་བཞིན། གདོང་ལ་འོད་ཟེར་སྣང་བའི་རྣ་ཆ་དང་། །རིན་ཆེན་སྣ་ཚོགས་འོད་འབར་ཅོད་པན་རྣམས། །དེ་ལྟར་རྒྱན་དུ་མཛེས་པ་མ་ལགས་དགོངས། །རྟག་ཏུ་བརྟེན་དུ་མི་རུང་མི་བཟོད་ཐོང་། །ཕན་པར་འགྱུར་བའི་བཟོད་པ་བསྲུང་བའི་རིགས། །དཀའ་ཐུབ་ཚལ་དུ་རྒྱལ་པོ་འོངས་ན་ནི། དེས་ཤིང་གུས་པའི་ཚུལ་དུ་སྤྱད་པ་རིགས། །ཐུབ་པའི་མཆོག་དེས་དེ་ལྟ་བུའི་ཚིག་འཇམ་པོས་གཏམས་ཀྱང་། རྒྱལ་པོ་དེ་མི་སྲུན་པས་བློ་ཉམས་པའི་ཕྱིར། དེ་ལ་རྣམ་པ་གཞན་དུ་དོགས་ནས་ཡང་སྨྲས་པ། དཀའ་ཐུབ་ཅན་ལྟར་ཁྱོད་ཀྱིས་མ་བཅོས་ལ། རང་གི་སྡོམ་པ་གལ་ཏེ་གནས་ན་ནི། །བཟོད་པའི་མན་ངག་བསྟན་པར་སྙད་བཏགས་ནས། །ཅི་ཕྱིར་ང་ལ་མི་འཇིགས་སྦྱིན་པར་གསོལ། །བྱང་ཆུབ་སེམས་དཔས་སྨྲས་པ། རྒྱལ་པོ་ཆེན་པོ་ཅིའི་ཕྱིར་བདག་འདི་ལྟར་གྱུར་པ་གསན་དུ་གསོལ། བྲམ་ཟེ་ལས་རབ་ཏུ་བྱུང་བ་ཉེས་པ་མེད་པར་རྒྱལ་པོས་བསད་དེ་ཞེས་བདག་གི་སླད་དུ་ཁྱོད་ཀྱི་གྲགས་པ་ཕྱས་བྱ་བར་འགྱུར་དུ་དོགས་སོ། །སེམས་ཅན་རྣམས་ནི་འཆི་འགྱུར་བའི། །ཚུལ་འདི་ངེས་པ་ཉིད་དུ་གནས། །བདག་གི་ཚུལ་ལའང་རྗེས་བལྟས་ན། །བདག་ནི་དེ་བས་ཤིས་མི་འཇིགས། །ཕྱི་ནས་ཆོས་ཀྱི་བདེ་བ་ལ། །དེ་ལྟར་བྱས་ན་གནོད་དུ་དོགས། །བདེ་བ་ཐོབ་ལ་ཕན་པ་ཡི། །བཟོད་པ་དེ་ཕྱིར་ཁྱོད་ལ་སྨྲས། །བཟོད་པ་ཡོན་ཏན་འབྱུང་གནས་ཡིན། །ཉེས་པ་རྣམས་ཀྱང་ཟློག་པར་བྱེད། །རབ་ཏུ་བཟང་པོའི་སྐྱེས་བཞིན་དུ། དགའ་བས་བདག་ནི་བཟོད་པ་སྨྲ། དེ་ནས་རྒྱལ་པོ་དེ་ཚིག་དེ་དག་རབ་ཏུ་བདེན་པར་སྨྲས་ཀྱང་མི་ཉན་པར། །ཐུབ་པ་དེའི་ཚིག་མེ་ཏོག་དང་འདྲ་བ་ལ་ཁྲོས་བཞིན། དྲང་སྲོང་མཆོག་དེ་ལ་སྨྲས་པ། །ཁྱོད་བཟོད་པ་ལ་དགའ་བ་དེ་ད་ངས་བལྟའོ་ཞེས་སྨྲས་ནས། ཐུབ་པ་དེའི་ལག་པ་གཡས་པ་ཅུང་ཟད་བསྒྲེངས་ཏེ་དགག་པའི་ཕྱིར་སོར་མོ་ཕྲ་ཞིང་ཟླུམ་ལ་རིང་བ་བཀྲམ་པ་དང་། རལ་གྲི་རྣོན་པོས་པདྨའི་རྩ་བ་བཅད་པ་བཞིན་དུ་མཁྲིག་མར་བཅད་དོ། །དེ་ཡི་ལག་པའི་མཁྲིག་མར་བཅད་པ་ན། །གཅོད་པ་པོ་ནི་བདེ་བར་གནས་པ་ལས། །ཕྱི་ནས་སྡུག་བསྔལ་མི་བཟད་མྱོང་འགྱུར་པའི། །སྡུག་བསྔལ་ཇི་ལྟར་མི་བཟོད་སྡུག་བསྔལ་བ། །དེ་ལྟར་བདག་གི་སྡུག་བསྔལ་མ་གྱུར་ཏོ། །དེ་ནས་བྱང་ཆུབ་སེམས་དཔས་བསམས་པ། ཨེ་མའོ་མཚར་བྱས་ཀྱིས་མེད། འདི་ད་བདག་ལ་ཕན་པའི་མཚམས་ལས་ནི་འདས། རྗེས་སུ་གདམས་པའི་སྣོད་དུའང་མ་གྱུར་གྱིས་མེད་དོ་སྙམ་ནས་ནད་པ་སྨན་པས་བོར་བ་བཞིན་དུ་དེ་ལ་མྱ་ངན་བྱས་ཏེ་ཅང་མི་ཟེར་བར་འདུག་གོ །དེ་ནས་ཡང་རྒྱལ་པོ་དེས་དེ་ལ་བསྡིགས་ཏེ་སྨྲས་པ། དེ་ལྟར་མཐར་གྱི་བཅད་ན་ནི། །ཁྱོད་ཀྱི་ལུས་ནི་མེད་པར་འགྱུར། །མི་རུངས་པ་ཡི་བློ་རྙེད་པ། །ཚུལ་འཆོས་བརཏལ་ཞུགས་འདི་ཐོང་ཞིག །དེ་ནས་བྱང་ཆུབ་སེམས་དཔས་དེ་རྗེས་སུ་གདམས་སུ་མི་རུང་ཞིང་འདི་ལྟར་ངན་དུ་བྱེད་པར་རིག་ནས་དེ་ལ་ཅིའང་མ་སྨྲས་སོ། །དེ་ནས་རྒྱལ་པོ་དེས་བདག་ཉིད་ཆེན་པོ་དེའི་ལག་པ་ཡ་གཅིག་དང་། དཔུང་པ་གཉིས་དང་། རྣ་བ་དང་། སྣ་དང་རྐང་པ་གཉིས་ཀྱང་དེ་བཞིན་དུ་བཅད་དོ། །དེ་ཡི་ལུས་བཅད་འགྱེལ་བར་གྱུར་ན་ཡང་། །ལུས་ཀྱི་ཁོག་པ་གནས་པའི་མཐའ་ཤེས་ཤིང་། །སྐྱེ་བོ་རྣམས་ལ་བཟོད་པ་གོམས་གྱུར་བས། ཐུབ་པའི་མཆོག་དེ་མ་འཁྲུགས་མྱ་ངན་མེད། ལུས་ནི་བཅད་པར་གྱུར་ཀྱང་དེ་ཡི་སེམས། །དགེ་བའི་ཚུལ་བལྟས་བཟོད་པ་བརྟན་མ་ཉམས། །དགའ་བའི་ཚུལ་གྱིས་སྡུག་བསྔལ་ཡོང་མ་གྱུར། །རྒྱལ་པོའི་ཆོས་ཉམས་མཐོང་ནས་མི་དགར་གྱུར། སོ་སོར་བརྟགས་བཟོད་སྙིང་རྗེ་ཅན། །གཞན་གྱི་སྡུག་བསྔལ་མི་བཟོད་པ། བདག་གི་སྡུག་བསྔལ་ཆེན་པོ་ཡང་། །དེ་ཙམ་དུ་ནི་གནོད་མི་འགྱུར། །རྒྱལ་པོ་དེ་ཡིས་མི་བཟད་ལས་བྱས་པས། །དེ་མ་ཐག་ཏུ་རིམས་ནད་མེ་བཞིན་འབར། །ནགས་ཚལ་ཉེ་བའི་གནས་ནས་མཐར་མ་བྱུང་། །ས་གས་ནང་དུ་དེ་མ་ཐག་ཏུ་སོང་། རྒྱལ་པོ་དེ་ས་གས་པས་འཇིགས་པའི་སྒྲ་བྱུང་བ་མེ་འབར་བ་འཁྲུགས་པ་དེའི་ནང་དུ་སོང་བར་གྱུར་ནས། ཁོ་ར་ཁོར་ཡུག་ཏུ་ཀུ་ཅོ་འདོན་པའི་སྒྲ་ཆེན་པོ་ནི་འབྱིན། རྒྱལ་པོའི་འཁོར་ནི་རབ་ཏུ་འཁྲུགས་པར་གྱུར་པ་དང་། རྒྱལ་པོ་དེའི་བློན་པོ་རྣམས་ཀྱིས་ཐུབ་པ་དེའི་དཀའ་ཐུབ་ཀྱི་མཐུ་ཆེ་བ་དང་། རྒྱལ་པོ་དེ་སའི་འོག་ཏུ་སོང་བའང་དེ་ལས་གྱུར་པར་ཤེས་ནས། རྒྱལ་པོ་དེའི་ཉེས་པས་དྲང་སྲོང་འདིས་ནི་མཁར་དང་ཡུལ་འདི་ཐམས་ཅད་བསྲེག་གོ་སྙམ་ནས། འཇིགས་ཤིང་དོགས་པ་སྐྱེས་ཏེ། དྲང་སྲོང་དེའི་དྲུང་དུ་ལྷགས་ནས་ཕྱག་བྱས་ཏེ། བཟོད་པར་གསོལ་ཞིང་ཐལ་མོ་སྦྱར་ནས་གསོལ་བ་བཏབ་པ། རྒྱལ་པོ་བླུན་ཞིང་རབ་ཏུ་མི་བརྟན་པས། །ཁྱོད་ནི་འདི་ལྟར་མ་རུངས་བགྱིས་པར་གྱུར། །དེ་ནི་ཁྱོད་ཀྱི་དམོད་པའི་མེ་ནང་སོང་། །མཁར་འདི་ཞུགས་ཀྱིས་སྲེག་པར་མི་མཛད་གསོལ། །བུད་མེད་བྱིས་པ་རྒན་པོ་ནད་པ་དམན། །བྲམ་ཟེ་ཉེས་པ་མེད་པ་སྲེག་མི་རིགས། །དེ་བས་རྒྱལ་པོ་འདི་ཡི་ཡུལ་འདི་ཀུན། །ཡོན་ཏན་ཕྱོགས་ཀྱིས་རང་གི་ཕྱོགས་བཞིན་སྲུངས། །དེ་ནས་བྱང་ཆུབ་སེམས་དཔས་དེ་རྣམས་ལ་དབུགས་ཕྱུང་སྟེ་སྨྲས་པ། ཚེ་དང་ལྡན་པ་དག་མ་འཇིགས་ཤིག །བདག་ནི་ནགས་ན་གནས་པ་ལ། །ཉེས་པ་མེད་པར་རལ་གྲི་ཡིས། །ལག་པ་དང་ནི་རྐང་པ་དང་། སྣ་དང་རྣ་བ་བཅད་གྱུར་ཀྱང་། བདག་ལྟ་བུ་ཡིས་ཇི་ལྟར་ན། །དེ་ལ་གནོད་པ་བསལ་བར་བྱ། །རྒྱལ་པོ་དེ་ནི་ཚེ་རིང་གྱུར། །དེ་ལ་སྡིག་ཏུ་མ་གྱུར་ཅིག །འཆི་དང་ན་བའི་སྡུག་བསྔལ་ཅན། །འདོད་ཆགས་ཞེ་སྡང་དབང་དུ་གྱུར། །ཉེས་པར་སྤྱད་པས་ཚིག་པ་ལ། །མྱ་ངན་བྱེད་མོད་ག་ལ་ཁྲོ། །གལ་ཏེ་བཅོས་སུ་རུང་ན་དེ་ཡི་སྡིག །བདག་ལ་རྣམ་པར་སྨིན་པར་གྱུར་ཀྱང་རུང་། །བདེ་བ་ཅན་ལ་སྡུག་བསྔལ་རྗེས་འབྲང་བ། །ཡུན་རིང་མིན་ཡང་མ་བཟོད་མནགས་མི་ནུས། །བདག་ལ་ཕན་པར་མི་ཤེས་རྒྱལ་པོ་དེ། །དེ་ལྟར་ཚིག་ལ་བསྐྱབས་པར་མ་ནུས་པ། །བདག་གིས་མ་ནུས་ངེས་པར་དེ་བོར་ཏེ། །རྒྱལ་པོ་ལ་ནི་ཅི་ཕྱིར་ཁོན་དུ་འཛིན། །རྒྱལ་པོ་གྲོངས་ནའང་འཆི་ལ་སོགས་པ་ཡི། སྡུག་བསྔལ་སྐྱེས་ན་ཀུན་གྱིས་མྱོང་བར་འགྱུར། །དེ་བས་སྐྱེ་ལ་ཁོན་དུ་བཟུང་བའི་རིགས། །དེ་མེད་སྡུག་བསྔལ་ཅི་ཞིག་ཅི་ལས་གྱུར། །ནགས་ན་གནས་ཤིང་རབ་ཏུ་བྱུང་བར་ཤེས། །བཟོད་པ་སྨྲ་བ་རིང་པོ་མི་ཐོགས་འཆི། ཅི་ཕྱིར་མི་བཟོད་སྐབས་ནི་འབྱེད་པར་བྱེད། །དེ་བས་མ་འཇིགས་ཁྱེད་ཅག་བདེ་བར་དེངས། །དེ་ལྟར་ཐུབ་པ་མཆོག་གི་རྗེས་བསྟན་པས། སློབ་མ་ཉིད་དུ་ལེགས་པར་གྱུར་པར་བྱས། །བཟོད་ལ་གནས་པས་བརྟན་པ་མ་ཉམས་པར། །བཟོད་པའི་མཐུ་ཡིས་མཐོ་རིས་སོང་བར་གྱུར། །དེ་ལྟར་ཐུབ་པ་ལས་གླེང་བསླངས་ནས་བཟོད་པའི་ཡོན་ཏན་བསྔགས་པ་ལའང་བརྗོད་པར་བྱའོ། རྒྱལ་པོའི་དཔེས་མི་བརྟན་ཞིང་མི་བཟོད་པའི་སྐྱོན་བསྟན་པ་ལའང་བརྗོད་པར་བྱའོ། དེ་ལྟར་འདོད་པའི་ཉེས་དམིགས་ཀྱི་ཕྱིར་ཉེས་པར་སྤྱད་པས་ངན་སོང་དུ་ལྟུང་བར་འགྱུར་རོ་ཞེས་འདོད་པའི་ཉེས་དམིགས་ཀྱི་གཏམ་བྱ་བ་ལའང་བརྗོད་པར་བྱའོ། །འབྱོར་པ་མི་རྟག་པ་བསྟན་པ་ཡང་བརྗོད་པར་བྱའོ། །བཟོད་པ་སྨྲ་བར་སྐྱེས་པའི་རབས་ཏེ་ཉི་ཤུ་བརྒྱད་པའོ།། །།ལོག་པར་ལྟ་བ་ནི་ཁ་ན་མ་ཐོ་བ་རབ་ཏུ་ཆེ་བའི་ཕྱིར། ལོག་པར་ལྟ་བ་ལ་ཞེན་པ་རྣམས་ལ་དམ་པ་རྣམས་ཀྱིས་ལྷག་པར་རྗེས་སུ་བརྩེ་བར་བྱ་བའི་རིགས་སོ། །དེ་ཡང་འདི་ལྟར་བཅོམ་ལྡན་འདས་འདི་བྱང་ཆུབ་སེམས་དཔར་གྱུར་པའི་ཚེ། བསམ་གཏན་ལ་གོམས་པར་བྱས་པའི་དགེ་བའི་ལས་ཀྱི་རྣམ་པར་སྨིན་པའི་མཐུས་ཚངས་པའི་འཇིག་རྟེན་དུ་སྐྱེས་སོ་ཞེས་གྲག་གོ །དེ་ཚངས་པའི་བདེ་བ་ཆེན་པོ་བསམ་གཏན་གྱི་ཁྱད་པར་གྱིས་ཐོབ་ཀྱང་། ཚེ་རབས་སྔ་མ་ལ་སྙིང་རྗེ་བྱ་བ་ལ་གོམས་པར་བྱས་པས་གཞན་ལ་ཕན་པར་བྱས་པའི་ཡིད་ལ་བྱེད་པ་རྩོལ་བ་མེད་པར་མ་གྱུར་ཏོ། །ཡུལ་གྱི་བདེ་བ་ཙམ་གྱི་ཚོང་ཀྱིས་ཀྱང་། འཇིག་རྟེན་རྣམས་མི་བག་མེད་དབང་དུ་འགྱུར། །དམ་པ་རྣམས་ནི་བསམ་གཏན་བདེ་བས་ཀྱང་། །གཞན་ལ་ཕན་པར་འདོད་པ་ཡོང་མི་ཉམས། དེ་ནས་རེ་ཤིག་ཅིག་བདག་ཉིད་ཆེན་པོ་དེ་འདོད་པའི་ཁམས་སྙིང་རྗེའི་གནས་སུ་གྱུར་པ་སྡུག་བསྔལ་དང་ཡིད་མི་བདེ་བ་རྣམ་པ་སྣ་ཚོགས་བརྒྱ་དང་ལྡན་པ། གནོད་སེམས་དང་འཚེ་བ་མང་བ་ལ་བལྟས་ན། ཡུལ་ལུས་འཕགས་པའི་རྒྱལ་པོ་ཡན་ལག་བྱིན་ཞེས་བྱ་བ། བཤེས་གཉེན་ངན་པ་དང་བརྟེན་པའི་སྐྱོན་དང་། ཡང་དག་མ་ཡིན་པ་ཡིད་ལ་བྱེད་པ་ལ་འདྲིས་པས་ལོག་པར་ལྟ་བ་སྟུག་པོའི་ནང་ན་འཁྱམ་ཞིང་འཇིག་རྟེན་ཕ་རོལ་མེད་པས། དགེ་བ་དང་མི་དགེ་བའི་ལས་ཀྱི་རྣམ་པར་སྨིན་པ་ལྟ་ག་ལ་ཡོད་ཅེས་ཟེར་ཞིང་དེས་དེ་ལྟར་ངེས་པར་བྱས་ནས། ཆོས་སྤྱོད་པའི་སྤྲོ་བ་ནི་མེད། སྦྱིན་པ་དང་ཚུལ་ཁྲིམས་ལ་སོགས་པ་ལེགས་པར་སྤྱོད་བ་ལ་ནི་རྒྱབ་ཀྱིས་ཕྱོགས། ཆོས་སྤྱོད་པ་རྣམས་ལ་ནི་བརྙས་པར་སེམས། ཆོས་ཀྱི་གཙུག་ལག་རྣམས་ལ་ནི་དང་བ་མེད་ཅིང་བློ་རྩུབ། འཇིག་རྟེན་ཕ་རོལ་གྱི་གཏན་ལ་ནི་ཕྱས་སུ་འཛིན། དགེ་སྦྱོང་དང་བྲམ་ཟེ་རྣམས་ལ་ནི་དུལ་བ་དང་བཀུར་སྟི་དང་གུས་པར་བྱ་བ་ལ་ནི་ལྷོད་པར་གྱུར་ཏོ། །འདོད་པའི་བདེ་བ་ལ་གཞོལ་བར་གྱུར་པ་མཐོང་ངོ་། །དགེ་དང་མི་དགེའི་ལས་ལས་འཇིག་རྟེན་ཕ་རོལ་དུ། །བདེ་དང་སྡུག་བསྔལ་འབྱུང་བར་རབ་ཏུ་ངེས་བྱས་ནས། །སྡིག་པ་སྤངས་ཏེ་དགེ་བའི་ལས་ལ་རབ་ཏུ་འབད། དད་པ་མེད་པ་དག་ནི་ཇི་ལྟར་འདོད་པར་སྤྱོད། དེ་ནས་བདག་ཉིད་ཆེན་པོ་ལྷའི་དྲང་སྲོང་དེ་རྒྱལ་པོ་དེ་ལྟ་བ་ངན་པ་ལ་ཞེན་པ་ངན་སོང་དུ་ལྷུང་བར་གྱུར་པ། འཇིག་རྟེན་རྣམས་དོན་མེད་པར་བྱེད་པ་དེས་སྙིང་རྗེ་སྐྱེས་པར་གྱུར་ནས་ཡུལ་གྱི་བདེ་བ་ལས་སེམས་ཆགས་པར་གྱུར་པའི་རྒྱལ་པོ་དེ་གཞལ་མེད་ཁང་གཙང་མ་བཟང་པོ་ཞིག་ན་འདུག་པ་དེའི་མདུན་དུ་ཚངས་པའི་འཇིག་རྟེན་ནས་འོད་འབར་ཞིང་འབབ་ཏེ་འོངས་པར་གྱུར་ཏོ། །དེ་ནས་རྒྱལ་པོ་དེས་དེ་མེའི་ཕུང་པོ་བཞིན་དུ་ནི་འབར། གློག་མང་པོ་འགྱུ་བ་བཞིན་དུ་འོད་གསལ། ཉི་མའི་འོད་ཟེར་མང་པོ་ལྟར་གཟི་བྱིན་ཆེ་ཞིང་མཛེས་པར་མཐོང་ནས། དེའི་གཟི་བྱིན་གྱིས་སེམས་ཟིལ་གྱི་ནོན་ཏེ། རྟབ་རྟ བ་པོར་གྱུར་ནས། དེ་ལ་ཐལ་མོ་སྦྱར་ཏེ་ལངས་ནས་གུས་པར་ལྟ་ཞིང་འདི་སྐད་ཅེས་སྨྲས་སོ། །ཁྱོད་ཀྱི་ཞབས་མཛེས་ཕྱག་དང་པདྨ་གཉིས། །ནམ་མཁའང་ས་བཞིན་ཡོངས་སུ་འཛིན་པར་བགྱིད། །འོད་ཟེར་འབར་བའི་ཉི་མ་བཞིན་དུ་གསལ། བལྟ་ན་མཛེས་པའི་གཟུགས་ཅན་ཁྱོད་སུ་ཞིག །བྱང་ཆུབ་སེམས་དཔས་སྨྲས་པ། མཉམ་པར་བཞག་པའི་སེམས་ཀྱིས་འདོད་ཆགས་ཞེ་སྡང་གཉིས། །དྲགས་པའི་དགྲ་རྣམས་གཡུལ་ངོར་ཕམ་བྱས་བཞིན་དུ་བཅོམ། །གང་དག་ཚངས་པའི་འཇིག་རྟེན་སྐྱེས་པར་གྱུར་པ་ཡི། །ལྷ་ཡི་དྲང་སྲོང་ནང་ནས་གཅིག་ནི་བདག་ལགས་སོ། །ཞེས་དེ་སྐད་ཅེས་སྨྲས་པ་དང་། རྒྱལ་པོ་དེས་གཤེགས་པ་ལེགས་སོ་ཞེས་བྱ་བ་ལ་སོགས་པ་སྨྲས་ཏེ། དེ་ལ་མཆོད་ཡོན་དབུལ་བ་དང་། རྐང་པ་བཀྲུ་བས་བཀུར་སྟི་བྱས་ནས། དེ་ལ་ཡ་མཚན་ཅན་དུ་བལྟས་ཏེ་སྨྲས་པ། འཕགས་པ་ཁྱོད་ཀྱི་རྫུ་འཕྲུལ་གྱི་མཐུ་འདི་ལྟ་བུ་ནི་ངོ་མཚར་ཆེའོ། །ཁང་བཟང་རྩིགས་པ་དག་ལའང་ཐགས་ཐོགས་མེད། །ས་ལ་འགྲོ་བ་བཞིན་དུ་མཁའ་ལའང་འཆག །གློག་གི་འོད་བཞིན་གཟི་བརྗིད་ཕུན་སུམ་ཚོགས། ཁྱོད་ཀྱི་འཕྲུལ་འདི་ཅི་ཡིས་ཐོབ་པ་སྨྲོས། །བྱང་ཆུབ་སེམས་དཔས་སྨྲས་པ། བསམ་གཏན་ཚུལ་ཁྲིམས་དྲི་མ་མེད་པ་དང་། །དབང་པོ་རྣམས་ནི་རབ་ཏུ་བསྡམས་པ་དག །སྲིད་པ་གཞན་ལ་གོམས་པར་བྱས་པ་ཡིས། །དེ་ཡི་འབྲས་བུ་གྲུབ་པ་འདི་འདྲའོ། རྒྱལ་པོས་སྨྲས་པ། འཇིག་རྟེན་ཕ་རོལ་ཡོད་ཅེས་ཟེར་བ་དེ་བདེན་ནམ། ཚངས་པས་སྨྲས་པ། རྒྱལ་པོ་ཆེན་པོ་མེད་དེ་འཇིག་རྟེན་ཕ་རོལ་མཆིས་སོ། །རྒྱལ་པོས་སྨྲས་པ། འཕགས་པ་འདི་བདག་ཅག་གིས་ཇི་ལྟར་ཡིད་ཆེས་པར་བགྱི། བྱང་ཆུབ་སེམས་དཔས་སྨྲས་པ། རྒྱལ་པོ་ཆེན་པོ་འདི་ནི་རབ་ཏུ་གསལ་ཏེ། མངོན་སུམ་ལ་སོགས་པའི་རིག་པའི་ཚད་མས་བཟུང་དུ་རུང་ལ་ཡིད་བཅུགས་པའི་ཚིག་གིས་བརྟན་པ་དང་། བརྟག་པའི་རིམ་པས་ཀྱང་ཡིད་ཆེས་པར་བྱར་རུང་ངོ་། །ཁྱོད་གཟིགས་སུ་གསོལ། ཉི་ཟླ་སྐར་མས་བརྒྱན་པའི་ནམ་མཁའ་དང་། །དུད་འགྲོར་བརྟག་པ་རྣམ་པ་མང་པོ་འདི། །འཇིག་རྟེན་ཕ་རོལ་མངོན་སུམ་བཞིན་དུ་སྣང་། །འདི་ལ་ཐེ་ཚོམ་བློ་ངན་ཁྱོད་མ་སྐྱེད། །བསམ་གཏན་གོམས་བྱས་དྲན་པ་གསལ་བ་ཡིས། །ཚེ་རབས་དྲན་པའང་དེ་དང་དེ་ན་ཡོད། །འཇིག་རྟེན་ཕ་རོལ་དེ་ལས་རྗེས་སུ་དཔོགས། །ང་བདག་ལས་ཀྱང་མངོན་པར་མི་འགྱུར་རམ། །སྔ་མའི་བློ་ལས་ཕྱི་མའི་བློ་གྲུབ་ན། །འཇིག་རྟེན་ཕ་རོལ་ཡོད་པར་དེ་ལས་མངོན། །མངལ་ན་འདུག་པའི་སྔོན་རོལ་བློ་དེ་ནི། །དེ་མ་ཐག་པའི་ཚེ་རབས་སྔ་མའི་བློ། །ཤེས་བྱ་རྟོགས་པར་བྱེད་པ་བློ་ཡིན་ཟེར། །དེ་བས་སྐྱེ་སོགས་བློ་ནི་ཡུལ་ཡོད་གྱུར། །མིག་སོགས་མེད་པས་དེ་ནི་ཚེ་འདི་མིན། །དེ་ཡི་ཡུལ་ནི་འཇིག་རྟེན་ཕ་རོལ་ཡིན། །སྐྱེ་དགུའི་ཚུལ་ཁྲིམས་ལ་སོགས་བྱེ་བྲག་རྣམས། །ཕ་མའི་རང་བཞིན་དག་དང་མི་མཐུན་སྣང་། །གློ་བུར་གྱུར་པར་གང་ཡང་གྲུབ་པ་མེད། །དེ་བས་ཚེ་རབས་གཞན་ལ་གོམས་དེ་ཡིན། །བློ་ཡི་མཐུ་སྟོབས་གསལ་བ་མེད་པ་དང་། །དབང་པོ་རྣམས་ཀྱང་བླུན་པའི་རང་བཞིན་ཅན། །བཙས་མ་ཐག་ཏུ་སུས་ཀྱང་མ་བསྟན་པར། །ནུ་ཞོ་འཐུང་བར་རྩོལ་བར་བྱེད་པ་དང་། །ཁ་ཟས་ཟ་བར་རྩོལ་བ་བྱེད་པ་ཡང་། །སྲིད་པ་གཞན་ལ་གོམས་པར་བྱས་པར་མངོན། །དེ་དང་དེ་ཡི་ལས་ལ་བསླབ་ལེགས་ནས། །གོམས་པར་བྱས་པས་མཁས་པར་འགྱུར་བར་འགྲུབ། །དེ་ལ་འཇིག་རྟེན་ཕ་རོལ་ཡོད་པར་ཡིད་ཆེས་པ་ལ་མ་འདྲིས་པས་ཁྱེད་ཅག་འདི་ལྟར་དོགས་པ་སྐྱེ་ཡང་སྲིད་དེ། པདྨ་རྣམས་ནི་ཁ་འབྱེད་འཛུམ་པ་དག །སྲིད་པ་གཞན་ལ་སྤྱད་པ་གོམས་པས་འབྱུང་། །དེ་ལྟར་མི་འདོད་ནུ་ཞོ་འཐུང་བ་དང་། །ཚེ་རབས་སྔ་མའི་གོམས་ལས་ཅི་ཕྱིར་འདོད། །ཅེས་ཟེར་བའི་དོགས་པ་དེ་ཡང་སྐྱེད་པ་མི་རིགས་སོ། །དུས་ངེས་པ་དང་མ་ངེས་པ་ལས་འགྱུར་བར་སྣང་བ་དང་། འབད་པར་རིགས་པ་དང་། མི་རིགས་པའི་ཕྱིར་ཏེ། པདྨ་ཁ་འབྱེད་འཛུམ་ལ་དུས་ངེས་ཡོད། །ནུ་ཞོ་འཐུང་བར་རྩོལ་ལ་དུས་ངེས་མེད། །པདྨ་མི་རྩོལ་ནུ་ཞོ་འཐུང་བ་རྩོལ། །དེ་བས་པདྨ་ཁ་བྱེ་ཉི་མའི་མཐུ། །དེ་བས་ན་རྒྱལ་པོ་ཆེན་པོ་ལེགས་པར་བརྟགས་ན་འཇིག་རྟེན་ཕ་རོལ་ཡོད་པར་ཡིད་ཆེས་པར་རུང་ངོ་། །དེ་ནས་རྒྱལ་པོ་དེ་ལོག་པར་ལྟ་བ་ལ་བློ་ཞེན་ཅིང་སྡིག་ཆེ་བས། འཇིག་རྟེན་ཕ་རོལ་ཡོད་པར་སྨྲ་བའི་གཏམ་དེ་ཉམས་སུ་མི་བདེ་ནས་སྨྲས་པ། ཀྱེ་དྲང་སྲོང་ཆེན་པོ། འཇིག་རྟེན་ཕ་རོལ་གལ་ཏེ་བྱིས་པ་སྡིགས་ཚུལ་མ་ཡིན་ལ། །འདི་ནི་བདག་གིས་ཡིད་ཆེས་བྱ་བར་གལ་ཏེ་ཁྱོད་སེམས་ན། །འོ་ན་དེའུ་རེ་འདིར་ནི་གསེར་སྲང་ལྔ་བརྒྱ་ང་ལ་བྱིན། །དེ་ཡི་སྐྱིན་པ་སྲིད་པ་གཞན་ལ་གསེར་སྲང་སྟོང་སྦྱིན་ནོ། །དེ་ནས་བྱང་ཆུབ་སེམས་དཔས་དེ་སྤྱི་རྟོལ་ཆེ་བ་ལ་གོམས་ཤིང་འཛེམ་དོག་མེད་ལ། ལོག་པར་ལྟ་བའི་དུག་གི་སྒྲེགས་པ་དང་འདྲ་བ། མི་རིགས་པའི་ཚིག་དེའི་ལན་དུ་རིགས་པའི་ཚུལ་གྱིས་སྨྲས་པ། འདི་ལའང་རེ་ཤིག་ནོར་ནི་འབྱོར་བར་འདོད་པ་ཡིས། །བདག་ནི་ངན་པ་དག་ལ་ནོར་ནི་ཡོང་མི་གཏོང་། །བརྐམ་དང་མི་མཁས་ལེ་ལོ་ཅན་ལའང་ནོར་མི་གཏོང་། །དེ་དག་ལ་ནི་བཏང་ན་དེ་ཉིད་ཟད་པའི་མཐའ། །གང་དག་ངོ་ཚ་ཤེས་པར་མངོན་པ་དང་། །ཆོ་རིགས་བཙུན་ཞིང་ནོར་སྤེལ་མཁས་པ་དང་། །རབ་ཏུ་དབུལ་ཡང་བུ་ལོན་འཇལ་བྱེད་པ། །དེ་ལ་བྱིན་ན་ནོར་ནི་འཕེལ་བར་འགྱུར། །ནོར་བཏང་ཚུལ་ནི་དེ་ལྟར་མཁྱེན་པར་མཛོད། །འཇིག་རྟེན་གཞན་ལ་བུ་ལོན་བཅལ་བྱ་བ། །ལྟ་བ་ངན་པར་སྤྱོད་པ་ཁྱོད་ལ་ནི། །ནོར་རྣམས་བྱིན་ཡང་དོན་ནི་མེད་པར་འགྱུར། །ལྟ་བ་ངན་པའི་སྐྱོན་འགྱུར་མི་བཟད་པའི། །བདག་གི་ལས་ཀྱིས་ཁྱོད་ནི་དམྱལ་བར་ལྷུང་། །སེམས་ཉམས་ནད་ཀྱིས་གདུངས་པར་གྱུར་པ་ལ། །གསེར་སྲང་སྟོང་གི་ཕྱིར་ནི་སུ་ཞིག་བསྐུལ། །དེ་ན་ཉི་ཟླའི་འོད་ཟེར་རྣམས་ཀྱིས་ཀྱང་། །ཕྱོགས་ཀྱི་ན་ཆུང་མུན་གྱིས་གཡོགས་མི་སྣང་། །སྐར་མ་མང་པོས་བརྒྱན་པའི་ནམ་མཁའ་ཡང་། །ཀུ་མུད་རྒྱས་པའི་མཚོ་འདྲ་ཡོང་མི་སྣང་། །མེད་པར་ལྟ་བ་ཚེ་རབས་ཕྱི་མ་ལ། གནས་པ་དེ་ནི་མུན་ནག་རླུང་གྲང་ལྡང་། །དེས་ནི་རུས་པའང་འཇིག་པའི་ནད་སློང་ན། །བདག་ལ་ཕན་འདོད་སུ་ཞིག་དེ་རུ་འཇུག །མུན་ནག་ཐིབས་པོ་དུ་བ་རྐུ་བ་ཡིས། །དམྱལ་བའི་ནང་ན་ཁ་ཅིག་ཡུན་རིང་གནས། རང་གི་པགས་པའི་ཕྲེང་བས་དྲངས་པས་སྣང་། །ཕན་ཚུན་སྔོས་ཏེ་སྣང་བས་འོ་དོད་འབོད། །མེ་མུར་འབར་བ་དམྱལ་བ་གཞན་དག་ན། །ཡང་དང་ཡང་དུ་རྐང་ལག་ཚིག་བཞིན་དུ། །དེ་ལས་ཐར་བར་འདོད་ཕྱིར་ཕྱོགས་སུ་རྒྱུག །མི་དགེ་མ་བྱང་བར་དུ་ཚེ་མི་འདའ། །ལ་ལ་གཤིན་རྗེ་གཤེད་པོ་མ་རུངས་པས། །ཤིང་མཁན་བཞིན་དུ་ཡན་ལག་གཤེག་པ་ནི། །ལྗོན་ཤིང་རློན་པ་དག་ལ་སྐབས་རྙེད་བཞིན། །མཚོན་ཆ་རྣོན་པོས་རབ་ཏུ་བཏུབས་ཤིང་གཤེག །དེ་བཞིན་གཞན་དག་དུམ་བུར་རབ་ཏུ་བཏུབས། །པགས་པ་བཤུས་པའི་སྡུག་བསྔལ་མི་བཟོད་མྱོང་། །ཤ་རྣམས་བཏོགས་པས་ཁ་ཅིག་རུས་པ་ཙམ། །རང་གི་སྡིག་གིས་སྲོག་ནི་ཆད་མ་གྱུར། །ཁ་ཅིག་འབར་བའི་སྲབ་ཀྱིས་ཁ་སྲབས་ནས། །ལྕགས་ཀྱི་ས་གཞི་རབ་ཏུ་འབར་བ་ལ། །གླང་ལྕགས་མེ་ལྟར་འབར་བས་དབང་མེད་བྱས། །རབ་ཏུ་འབར་བའི་ཤིང་རྟ་འདྲེན་ཅིང་འཁོད། །བསྡུས་འཇོམས་རི་ཡིས་ཁ་ཅིག་ལུས་ཀྱང་གཟིར། །དེ་ཡིས་བརྫིས་པས་ཕྱེ་མར་ལྷགས་གྱུར་ཀྱང་། །སྡིག་པའི་ལས་རྣམས་མ་ཟད་བར་དག་ཏུ། སྡུག་བསྔལ་རྒྱུན་ཆགས་ཆེ་ཡང་ཡོང་མི་འཆི། །ལྕགས་གཏུན་རབ་ཏུ་འབར་བའི་ནང་དག་ཏུ། །ལྕགས་ཀྱི་ཇ་གཏུན་རབ་ཏུ་འབར་བ་ཡིས། །ལོ་གྲངས་ལྔ་བརྒྱ་ཆང་བའི་བར་དག་ཏུ། །ཕྱེ་མར་བཏབས་ཀྱང་ད་ཅུང་སྲོག་མི་འདོར། །བྱུ་རུ་བཞིན་དུ་རབ་འབར་ཤིང་དག་གི །ལྕགས་ཀྱི་ཚེར་མ་འབར་ཞིང་རྩུབ་པ་ལས། །གཤིན་རྗེའི་གཤེད་པོ་ཁྲོ་བོས་ཁོ་ན་མེད་པར། །སྟེང་དང་འོག་ཏུ་རབ་ཏུ་དྲངས་ཤིང་འདྲུད། །ལ་ལར་མེ་མདག་ཕུང་པོ་ཆེན་པོ་ནི། །བཙོ་མའི་གསེར་ལྟར་རབ་ཏུ་འབར་བ་ནི། །བདག་གི་ལས་ངན་སྤྱད་པའི་འབྲས་བུ་མྱོང་། །འགྲེ་ལྡོག་ངུ་འབོད་ཙམ་གྱི་མཐུ་ལ་བརྟེན། །ཁ་ཅིག་ས་གཞི་རབ་ཏུ་འབར་བ་ལ། ཕུར་བ་བརྒྱས་ནི་ལྕེ་ཡང་རབ་ཏུ་བརྒྱངས། །མི་བཟད་ནད་ཀྱིས་ལུས་གཟིར་སྒྲ་ཡང་འབྱིན། །དེ་དག་དེ་ཚེ་འཇིག་རྟེན་ཕ་རོལ་ཤེས། །ལྕགས་ཀྱི་ལེབ་མ་འབར་བས་ཁ་ཅིག་དཀྲིས། །གཞན་དག་ལྕགས་ཀྱི་རྫ་ཆེན་ནང་དུ་བསྐོལ། །ལ་ལ་མཚོན་རྣོན་ཆར་འབབ་ལུས་ཀྱང་དམྱལ། །གཅན་ཟན་ཁྲོ་བོས་ཤ་པགས་ཟད་པར་བཏོགས། །ཁ་ཅིག་མེ་འབར་ཚ་བས་གདུངས་གྱུར་ནས། །ཆུ་བོ་རྒལ་དཀའ་རྩུབ་པོའི་ནང་དུ་འཇུག །དེ་ནས་དེ་རྣམས་ཤ་ནི་མྱགས་པར་འགྱུར། །ངན་སྤྱོད་མཐུས་བཟུང་སྲོག་ནི་ཆད་མི་འགྱུར། །གཞན་དག་རབ་ཏུ་ཚ་བས་གདུངས་གྱུར་ནས། །མི་གཙང་རོ་མྱགས་ཁུང་ལ་མཚོ་སྙམ་སྟེ། ཞུགས་ནས་སྡུག་བསྔལ་མཚུངས་མེད་དེ་ན་མྱོང་། །སྲིན་བུ་མང་པོས་ལུས་དང་རུས་པ་ཞིག །ཁ་ཅིག་མེ་ཡི་ནང་ན་ལུས་འབར་ཞིང་། །རབ་ཏུ་ཚ་བའི་སྡུག་བསྔལ་ཡུན་རིང་མྱོང་། མེ་འབར་ནང་ན་ལྕགས་སྲེགས་འདྲ་འགྱུར་ཡང་། །རང་གི་ལས་ཀྱིས་ཐལ་བར་ལྷགས་མི་འགྱུར། །གཞན་དག་སོག་ལེ་འབར་བས་འདྲ་ཞིང་ཁ་ཅིག་སྤུ་གྲི་རྣོན་པོས་བཏུབས། །ལ་ལ་ལྕགས་ཀྱི་ཐོ་བས་མགོ་བཅོམ་མྱ་ངན་གདུངས་ཤིང་འོ་དོད་འབོད། །ཁ་ཅིག་གསལ་ཤིང་ཆེན་པོས་ལུས་བརྒྱངས་དུ་བ་མེད་པའི་མེ་ལ་བསྲེགས། །གཞན་དག་ལྕགས་ཀྱི་ཁུ་བ་མེ་ལྟར་འབར་བ་བླུད་ནས་འཁུན་སྦྲ་འབྱིན། །ལ་ལ་སྣ་ཚོགས་ཁྱི་རྣམས་སྟོབས་ཆེན་གྱིས། །མཆེ་བ་རྣོན་པོའི་སོ་ཡིས་རབ་ཏུ་འབྲང་། །ལུས་ཀྱི་ཤ་རྣམས་བཏོགས་པས་སྲབ་མོར་གྱུར། །དམན་པའི་སྒྲ་འབྱིན་གཅོམ་ཆུང་ངུ་ཞིང་འགྱེལ། །དམྱལ་བ་མི་བཟད་དེ་ལྟ་བུ་ན་མི་བདེ་བ། །བདག་གི་ལས་ཀྱིས་འཕངས་ནས་མྱོང་བ་དེ་ཡི་ཚེ། །མྱ་ངན་རུང་བ་དེ་ཐོས་ནས་ཡིད་མི་དགའ་བར་གྱུར་ཏེ། ལོག་པར་ལྟ་བ་ལ་རྗེས་སུ་ཆགས་པ་ནི་བཏང་། འཇིག་རྟེན་ཕ་རོལ་ཡོད་པར་ཡིད་ཆེས་པར་གྱུར་ནས། དྲང་སྲོང་ཆེན་པོ་དེ་ལ་ཕྱག་འཚལ་ཏེ་སྨྲས་པ། དམྱལ་བའི་སྡུག་བསྔལ་བདག་གིས་ཐོས་ནས་སུ། །བདག་གི་ཡིད་ནི་འཇིགས་པས་རྣམ་པར་བསྲེགས། །དེ་དག་བདག་གིས་ཇི་ལྟར་མྱོང་འགྱུར་སྙམ། །རྣམ་རྟོག་མེ་ཡིས་བདག་ལུས་བསྲེགས་པ་བཞིན། །བདག་གི་སེམས་ནི་ལྟ་ངན་ལྷུང་གྱུར་ཅིང་། །ཡུན་རིང་མ་མཐོང་ངན་པའི་ལམ་དུ་སོང་། །འདི་ལ་དགེ་བའི་གནས་སུ་ཁྱོད་ཀྱིས་མཐོང་། །ཐུབ་པ་ཁྱོད་ནི་བདག་གི་མགོན་དང་སྐྱབས། །བདག་གི་ལྟ་ངན་མུན་པ་ཁྱོད་ཀྱིས་བསལ། །ཉི་མ་ཤར་ནས་མུན་ནག་བསལ་བ་བཞིན། །གང་གིས་བདག་ནི་ངན་འགྲོར་མི་ལྟུང་བ། །དེ་འདྲའི་ལམ་ནི་བདག་ལ་བཤད་དུ་གསོལ། །དེ་ནས་བྱང་ཆུབ་སེམས་དཔས་དེ་ཡིད་དུ་དགའ་བར་གྱུར་ཏེ། ལྟ་བ་དྲང་པོར་གྱུར་ནས། ཆོས་སྒྲུབ་ནུས་པའི་སྣོད་དུ་གྱུར་པར་མཐོང་ནས། །ཕ་བུ་ལ་སྙིང་བརྩེ་བ་དང་སློབ་དཔོན་སློབ་མ་ལ་སྙིང་བརྩེ་བ་བཞིན་དུ་འདི་ལྟར་རྗེས་སུ་བསྟན་ཏོ། སྔོན་གྱི་རྒྱལ་པོ་ཡོན་ཏན་དགའ་བ་རྣམས། །སློབ་མ་མཆོག་ཚུལ་དགེ་སྦྱོང་བྲམ་ཟེ་དང་། འབངས་ལ་ངང་ཚུལ་སྙིང་རྗེ་ལྡན་བསྟན་པ། །གྲགས་ལྡན་དེ་ནི་མཐོ་རིས་འགྲོ་བའི་ལམ། །དེ་བས་ཆོས་མིན་ཐུབ་དཀའ་ཐུབ་བྱེད་ཅིང་། །སེར་སྣ་དོར་དཀའ་རིང་དུ་བོར་ནས་སུ། །ལྷ་དབང་ཕོ་བྲང་གསེར་གྱི་རྟ་བབས་ཅན། །རིན་ཆེན་མཆོག་འབར་དེར་ནི་འབར་ཞིང་སོང་། །ཡང་དག་ལྟ་ལ་ཁྱོད་ཡིད་འདྲིས་པར་གྱིས། །སྐྱེ་བོ་མཆོག་གནས་ལྟ་ལ་བློ་གནས་ཏེ། །བྱིས་པ་དགའ་བྱེད་སྐྱེ་བོའི་ལྟ་བ་སྤོངས། ཆོས་ཉིད་ངེས་པ་གང་དག་བསྟན་ལ་རྟོགས། །ང་ནི་ཁྱོད་ཀྱི་ཡང་དག་ལྟ་དགེ་ཞིང་། །རྒྱལ་པོའི་ཚུལ་གྱིས་འགྲོ་བར་འདོད་པར་གྱིས། །ཡོན་ཏན་མི་དགེའི་སེམས་དེ་མེད་པར་བྱོས། །དེ་ཉིད་ཁྱོད་ཀྱི་གོ་འཕང་ལམ་དུ་འགྱུར། །དེ་བས་ཡོན་ཏན་བསྒྲུབ་པར་དབྱིག་ཏུ་བྱོས། །བདག་དང་གཞན་ལ་ཕན་འདོད་སྙིང་རྗེ་བསྐྱེད། །ཚུལ་ཁྲིམས་བརྟན་ཅིང་དབང་པོ་རབ་ཏུ་སྡོམས། །དེ་ཡིས་ཕྱི་མའི་ཚེ་ལ་ཁྱོད་མི་སྡུག །རང་གི་བསོད་ནམས་རྒྱལ་པོའི་དཔལ་གྱི་གཟི། །མཛའ་བཤེས་རྣམས་ལ་རབ་གསལ་ཡིད་འོང་དཀའ། །གྲགས་པ་སྙན་པའི་འགྲོ་བའི་སྡུག་བསྔལ་བསལ། །བདག་གི་དོན་དང་ལྡན་པ་ཕན་པ་སྤྱོད། །ཁྱོད་འདིར་བཀུར་སྟི་སྦྱིན་པའི་ཤིང་རྟ་བདག རང་ལུས་ཡོན་ཏན་འབྱུང་བའི་ཤིང་རྟ་ཉིད། །མི་རྩུབ་མིག་ལྡན་སྦྱིན་དུལ་འཁོར་ལོ་ཅན། །བསོད་ནམས་འདོད་པའི་ཤིང་རྟའི་མདའ་དང་ལྡན། དབང་པོ་དུལ་རྟ་དྲན་པའི་སྲབ་སྐྱོགས་ཅན། །བློ་གྲོས་ལྕག་ལྡན་ཐོས་པ་རྒྱ་ཆེན་མཚོ། །ངོ་ཚ་ཡོ་བྱད་ངན་གྲོགས་མཛེས་པས་བཅིངས། །བཟོད་པའི་གཉའ་ཤིང་དེས་འགྲོ་བསྟན་པས་བརྟན། །ཚིག་ངན་བསྡམས་པས་མི་སྙན་སྒྲ་མི་འབྱིན། །ཡིད་འོང་ཚིག་ཙམ་སྨྲ་བ་ཟབ་པའི་སྒྲ། བསྡམས་པ་མ་ཞིག་པས་ན་འཚམས་མ་བྱེ། །སྤྱོད་པ་ངན་པའི་གྱ་གྱུ་སྤངས་བས་དྲང་། །ཐེག་པ་འདི་དང་གྲགས་པའི་རུ་མཚོན་དང་། །སྙིང་རྗེས་བསྐྱལ་ཞིང་ཞི་བའི་རྒྱལ་མཚན་མཐོ། །བདག་དང་གཞན་དོན་མ་རྨོངས་གསལ་སྤྱོད་པས། རྒྱལ་པོ་ནམ་ཡང་དམྱལ་བར་ཡོང་མི་ལྟུང་། །དེ་ལྟར་བདག་ཉིད་ཆེན་པོ་དེས་རྒྱལ་པོ་དེའི་ལྟ་བ་ལོག་པའི་མུན་ནག་དེ། ཚིག་གསལ་བའི་ཉི་མ་ཤར་བས་བསལ་ནས་དེ་ལ་བདེ་འགྲོའི་ལམ་ཡང་བསྟན་ཏེ། དེ་ཉིད་དུ་མི་སྣང་བར་གྱུར་ཏོ། །དེ་ནས་རྒྱལ་པོ་དེ་འཇིག་རྟེན་ཕ་རོལ་ཡོད་པའི་དོན་ཡང་དག་པ་ནི་རྟོགས། ཡང་དག་པའི་ལྟ་བའི་སེམས་ནི་རྙེད་ནས། བློན་པོ་དང་ཕོ་བྲང་འཁོར་གྱི་མི་དང་བཅས་པར་སྦྱིན་པ་དང་དུལ་བ་དང་སྡོམ་པ་ལའང་གཞོལ་བར་གྱུར་ཏོ། །དེ་ལྟར་བས་ན་ལོག་པར་ལྟ་བ་ནི་ཁ་ན་མ་ཐོ་བ་རབ་ཏུ་ཆེ་བའི་ཕྱིར། ལོག་པར་ལྟ་བ་ལ་ཞེན་པ་རྣམས་ལ་དམ་པ་རྣམས་ཀྱིས་ལྷག་པར་རྗེས་སུ་བརྩེ་བར་བྱ་བའི་རིགས་སོ། །དེ་བཞིན་དུ་དམ་པའི་ཆོས་ཡོངས་སུ་རྫོགས་པར་མཉན་པ་ནི་དད་པ་ཡོངས་སུ་རྫོགས་པར་བྱེད་པར་འགྱུར་རོ་ཞེས་ཀྱང་སྦྱར་བར་བྱའོ། །དེ་བཞིན་དུ་གཞན་ལ་ཆོས་མཉན་ན་ཡང་དག་པའི་ལྟ་བ་སྐྱེ་བའི་རྐྱེན་དུ་འགྱུར་རོ་ཞེས་ཀྱང་སྦྱར་བར་བྱའོ། །དེ་ལྟར་སྐྱེས་བུ་དམ་པ་རྣམས་ནི་བརྙས་ཐབས་བྱས་ཀྱང་བཟོད་པ་ལ་གོམས་པས། དེ་ལ་ཕན་འདོགས་པའི་མན་ངག་སྟོན་པར་བྱེད་ཀྱི། ཚིག་རྩུབ་པོ་མི་སྨྲའོ། ཞེས་དམ་པ་རྣམས་ཀྱི་ཡོན་ཏན་བསྔགས་པ་དང་། བཟོད་པའི་ཡོན་ཏན་བསྔགས་པ་ལའང་བརྗོད་པར་བྱའོ། །སྐྱོ་ཞིང་ཡིད་འབྱུང་བར་བྱས་ནས་མྱུར་དུ་ལེགས་པའི་ལམ་ལ་ཕྱོགས་པར་འགྱུར་བའི་ཕྱིར་སྐྱོ་ཞིང་ཡིད་འབྱུང་བའི་གཏམ་བྱ་བ་ལའང་བརྗོད་པར་བྱའོ། ཚངས་པའི་སྐྱེས་པའི་རབས་ཏེ་ཉི་ཤུ་དགུ་པའོ།། །།བམ་པོ་བཅུ་གཅིག་པ། །དགེ་བ་རྣམས་ནི་ཕྱིས་གཞན་ལ་ཕན་པར་འགྱུར་ན། །སྡུག་བསྔལ་ཡང་ཁེ་རྙེད་པ་དང་འདྲ་བར་སེམས་སོ། །དེ་ཡང་འདི་ལྟར་བྱང་ཆུབ་སེམས་དཔའ་གླང་པོ་ཆེའི་ནགས་ཚལ་ཤིང་ལྗོན་པ་གཞོན་ནུ་བཟང་པོའི་རྩེ་མོ་མེ་ཏོག་དང་འབྲས་བུ་དང་ཤིང་ལོར་ལྡན་པ་རྣམས་ཀྱིས་དེ་དང་དེ་དག་ཏུ་བརྒྱན་པ་བཞིན་དུ་འདུག་པ། ལྡུམ་བུ་དང་ཤིང་གེལ་པ་དང་། རྩ་རྣམ་པ་སྣ་ཚོགས་ཀྱིས་ཁེབས་པའི་ས་ཕྱོགས་ནི། རིའི་ལྗོངས་རྣམས་ནི་ནགས་ཚལ་ཉམས་དགའ་བ་ལ། སྙིང་ཆགས་ནས་གཞན་དུ་གཡེང་བ་མེད་པར་གནས་བཅས་པ་བཞིན་དུ་ནི་འདུག །ནགས་ན་རྒྱུ་བ་རྣམས་ཀྱི་གནས་སུ་ནི་གྱུར། མཚོ་ཟབ་མོ་རྒྱན་སྣ་ཚོགས་ཀྱི་བརྒྱན་དང་བཅས་པར་བྱས། ཤིང་དང་རྩྭ་དང་ཆུ་མེད་པའི་མྱ་ངམ་དགོན་པ་ཆེན་པོས་ཁོ་ར་ཁོར་ཡུག་ཏུ་བསྐོར་བས། ཡུལ་དང་ལྗོངས་ཐག་རིང་དུ་གྱུར་པ་ཞིག་ན། གླང་པོ་ཆེ་ལུས་ཆེན་པོ་གཅིག་པུ་རྒྱུ་བ་ཞིག་ཏུ་གྱུར་ཏོ་ཞེས་གྲག་གོ །དེ་དེ་ན་ཤིང་ལོ་དང་། པདྨའི་རྩ་བ་དང་། ཆུ་ཙམ་གྱིས་འཚོ་ཞིང་ཆོག་ཤེས་པ་དང་ཞི་བས་དཀའ་ཐུབ་ཅན་བཞིན་དུ་དགའ་བར་གནས་སོ། །དེ་ནས་རེ་ཤིག་ཅིག་སེམས་དཔའ་ཆེན་པོ་དེ་ནགས་ཚལ་དེའི་མཐའ་ནས་རྒྱུ་ཞིང་སོང་སོང་བ་ལས་མྱ་ངན་དགོན་པ་དེ་ན་མིའི་སྒྲ་དག་ཅིག་ཐོས་པར་གྱུར་པ་དང་། དེས་བསམས་པ། འདི་ཅི་ཞིག །ས་ཕྱོགས་འདི་ནས་ཡུལ་དུ་རྒྱུ་བའི་ལམ་ནི་ཅིའང་མེད། མྱ་ངན་དགོན་པ་ཆེན་པོ་འདི་ལྟ་བུ་བརྒལ་ཏེ་རི་དྭགས་གཤོར་བའང་མི་རིགས་ན། ཚེགས་ཆེན་པོ་ཕྱུང་སྟེ་ཤ་ཐང་ཞིང་བདག་ཅག་གླང་པོ་ཆེའི་ཁྱུ་ནས་འཛིན་པ་ལྟ་སྨོས་ཀྱང་ཅི་དགོས་ཏེ་འོང་བ་མི་རིགས་སོ། །གོར་མ་ཆག་བར་འདི་དག་ནི་ཕྱོགས་བསླད་ནས་ལམ་ནོར་བ་དག་ཅིག་ཡིན་ནམ། དེ་དག་གིས་མི་རིགས་པ་དག་ཅིག་བྱས་ནས་རྒྱལ་པོ་ཁྲོས་ནས་སྤྱུགས་པ་དག་ཅིག་ཡིན་པ་འདྲ་སྟེ། འདི་ལྟར་འདི་དག་གཅོམ་ཆུང་ཞིང་། །དགའ་བའི་སྐད་བསང་མཐོན་པོ་ཉམས། །རབ་ཏུ་ཉམས་ཐག་ཕོངས་པའི་སྒྲ། །འབའ་ཞིག་ངུ་བ་བཞིན་དུ་གྲག །དེ་བས་ན་འདི་ནི་ཅི་ཡིན། །རེ་ཤིག་བརྟག་པར་བྱའོ་སྙམ་ནས། །བདག་ཉིད་ཆེན་པོ་དེ་སྙིང་རྗེ་ཆེན་པོས་དྲངས་ནས། །མིའི་སྒྲ་གང་ན་གྲག་པ་དེ་ལོགས་སུ་སོང་སྟེ། །སྨྲེ་སྔགས་འདོན་པའི་ཚིག་དང་། མི་དགའ་ཞིང་མྱ་ངན་བྱེད་པའི་ཚིག་གིས་ངུ་བའི་སྒྲ་ཉན་ཅིང་། །སྙིང་རྗེས་སེམས་བསྐུལ་ནས་སེམས་དཔའ་ཆེན་པོ་དེ། དེར་རིངས་པར་སོང་སྟེ། །ནགས་ཚལ་སྟུག་པོ་དེ་ནས་བྱུང་བ་དང་། ས་ཕྱོགས་དེ་ན་ཤིང་དང་ཚང་ཚིང་མེད་པར་རྒྱང་རིང་པོ་ནས་བལྟས་ན། །མི་བདུན་བརྒྱ་ཙམ་ཞིག་བཀྲེས་པ་དང་། སྐོམ་པ་དང་། ངལ་བས་ཉེན་པ་དག་ཅིག་ནགས་ཚལ་དེ་ལོགས་སུ་འོང་བ་མཐོང་ངོ་། །མི་དེ་དག་གིས་ཀྱང་སེམས་དཔའ་ཆེན་པོ་དེ་གངས་རིའི་རྩེ་མོས་འགྲོ་ཤེས་པའམ། སྟོན་ཀའི་སྤྲིན་ནམ་ན་བུན་གྱི་ཚོགས་རླུང་གིས་བསྐྱོད་པ་བཞིན་དུ་ཚུར་འོང་བ་མཐོང་ངོ་། །མཐོང་ནས་ཀྱང་སྐྲག་ཅིང་མི་དགའ་སྟེ་ད་ནི་བདག་ཅག་བསད་དོ་སྙམ་ནས་ཡིད་སྐྲག་པར་གྱུར་ཀྱང་། བཀྲེས་པ་དང་། སྐོམ་པ་དང་། ངལ་བས་སྒྱིད་ལུག་པའི་ཕྱིར། འབྲོས་པར་རྩོལ་ནི་མ་ནུས་སོ། །དེ་དག་རབ་ཏུ་འཇིགས་གྱུར་ཀྱང་། །བཀྲེས་སྐོམ་ངལ་བས་ཉམས་སྨད་ཅིང་། མི་དགའ་འཇིགས་པས་སྤ་གོང་བས། །བྲོས་པར་རྩོལ་ནི་མ་ནུས་སོ། །དེ་ནས་བྱང་ཆུབ་སེམས་དཔས་དེ་དག་སྐྲག་པར་རིག་ནས། །ང་ལས་ཁྱེད་ལ་འཇིགས་པ་མི་འབྱུང་གིས། །མ་འཇིགས་ཤིག་མ་འཇིགས་ཤིག་ཅེས་གླང་པོ་ཆེའི་སྣ་མདོག་ཅུང་ཟད་དམར་ཞིང་སྣུམ་པ་སྦྲེང་བས་དབུགས་ཕྱུང་སྟེ། དྲུང་དུ་བསྙེན་ནས་སྙིང་རྗེ་བཞིན་དུ་དྲིས་པ། ཁྱོད་ཅག་སུ་ཞིག་ཅི་ཡི་ཕྱིར། །འདི་ལྟར་འགྱུར་ཞིང་འདི་ན་འཁོད། །རྡུལ་དང་ཉི་མའི་འོད་ཟེར་གྱིས། །ཁ་དོག་ཉམས་ཤིང་རིད་པར་གྱུར། །མྱ་ངན་གདུངས་འཕོངས་ཁྱེད་སུ་ཞིག །ཁྱེད་ཅག་གང་ནས་འདིར་ལྷགས་གྱུར། །དེ་ནས་མི་དེ་དག །དེ་མིའི་སྐད་དུ་སྨྲ་ཞིང་། མི་འཇིགས་པ་སྦྱིན་པར་ཁས་ལེན་པས་དགའ་བར་བྱེད་པ་དེས། །སེམས་བརྟན་པར་གྱུར་ཏེ་དེ་ལ་ཕྱག་འཚལ་ཏེ་སྨྲས་པ། གླང་ཆེན་རྒྱལ་པོ་བདག་ཅག་ནི། རྒྱལ་པོ་ཁྲོས་པའི་རླུང་ལངས་པས། །གཉེན་བཤེས་མྱ་ངན་གདུངས་བཞིན་དུ། །འདིར་ནི་བསྐྲད་དེ་བཀྱེ་བ་ལགས། །གཉེན་བཤེས་པས་ཀྱང་ལྷག་གྱུར་པ། །ཁྱོད་ཀྱིས་བདག་ཅག་གཟིགས་པས་ན། །བདག་ཅག་སྐལ་པ་ལྷག་མ་མཆིས། །ལྷ་དཔལ་མངོན་དུ་གྱུར་པར་ངེས། །ཁྱོད་ཀྱི་སྤྱན་སྔར་བབ་པས་ན། །ཕོངས་པ་འདི་ལས་ཐར་བར་འགྱུར། །རྨི་ལམ་དུ་ཡང་ཁྱོད་མཐོང་ན། །ཕོངས་ལས་མི་ཐར་སུ་ཞིག་མཆིས། །དེ་ནས་གླང་པོ་ཆེ་དེས་མི་དེ་རྣམས་ལ་ཁྱེད་ཅག་དུ་ཡོད་ཅེས་སྨྲས་པ་དང་། མི་དེ་རྣམས་ཀྱིས་སྨྲས་པ། །ཡིད་འོང་སྐུ་ལྡན་བདག་ཅག་སྟོང་ཙམ་ཞིག །ས་ཡི་བདག་པོས་འདིར་ནི་སྤྱུགས་པ་ལས། །དེ་ལས་ཕལ་ཆེར་སྡུག་བསྔལ་མང་མྱོང་བས། བཀྲེས་དང་སྐོམ་པས་གདུངས་ནས་གུམ་པར་གྱུར། །གླང་ཆེན་གཙོ་བོ་བདག་ཅག་འདི་ན་ནི། །མི་ཡི་ལྷ་མ་བདུན་བརྒྱ་ཙམ་ཞིག་མཆིས། །འཆི་བདག་ཁ་ཡི་ནང་དུ་མཆིས་པ་ལས། །ཁྱེད་ནི་དབུགས་འབྱིན་ལུས་དང་འདྲ་བར་ཤེས། །དེ་སྐད་ཅེས་ཐོས་ནས་སེམས་དཔའ་ཆེན་པོ་དེ། སྙིང་རྗེ་ལ་གོམས་པས་མྱ་ངན་བྱེད་ཅིང་མཆི་མ་ཕྱུང་སྟེ། དེ་དག་ལ་འདི་སྐད་དུ་སྨྲས་པར་ངེས་སོ། །ཀྱེ་མའོ། ཁྱེད་ཅག་ཉོན་མོངས་མཚར་བྱས་ཀྱིས་མེད་ན། སྙིང་རྗེ་མེད་ཅིང་ཀྱི་ཧུད་འཛེམ་པ་མེད། །རྒྱལ་པོའི་བློ་ནི་ཕྱི་ཚེ་མི་སེམས་ཤིང་། །རྒྱལ་པོའི་དཔལ་ཡང་གློག་ལྟར་མི་བརྟན་པས། །བདག་ལ་ཕན་སེམས་མེད་པས་དབང་པོ་ཕྲོགས། །འཆི་བདག་དེའུ་རེ་འོང་བ་འདིར་མི་སེམས། །སྡིག་པའི་མཐའ་ཡང་རིང་བར་མ་ཐོས་སམ། རྣམ་རྟོག་ཞན་པས་ཚིག་གིས་གདམས་སུ་མེད། །རྒྱལ་པོ་ཉོན་མོངས་རབ་ཏུ་མགོན་མེད་གྱུར། །ནད་ཀྱི་གཞིར་གྱུར་ཆུད་ཟ་བའི། །འདི་ལྟར་ལུས་འདི་གཅིག་པུའི་ཕྱིར། །སེམས་ཅན་རྣམས་ལ་སྙིང་མི་བརྩེ། །ཀྱི་ཧུད་གཏི་མུག་འདི་ཅི་རུང་། །དེ་ནས་གླང་པོ་ཆེའི་བདག་པོ་དེ་མི་དེ་རྣམས་ལ། །སྙིང་རྗེ་ཞིང་བྱམས་པའི་སེམས་ཀྱིས་བསམས་པ། འདི་རྣམས་འདི་ལྟར་བཀྲེས་པ་དང་། སྐོམ་པ་དང་། ངལ་བས་ཉམས་ཐག་པར་ནི་གྱུར། ལུས་ནི་རིད་ཅིང་ཉམས་ཆུང་བས་མྱ་ངམ་དགོན་པ་དཔག་ཚད་དུ་མ་ཡོད་པ། ཆུ་མེད་ཅིང་གྲིབ་མ་མེད་པ། འདི་ལས་ལམ་བརྒྱགས་ཀྱང་མེད་པར་ཇི་ལྟར་ཐར་བར་འགྱུར། །གླང་པོ་ཆེའི་ནགས་ཚལ་ནའང་འདི་དག་ཉིན་གཅིག་ཙམ་ཉོན་མ་མོངས་པར་གནས་སུ་རུང་བའང་ཅིའང་མེད་ན་ཅི་ལྟར་བྱ། ངའི་ཤས་འདི་རྣམས་ཀྱི་ལམ་རྒྱགས་བྱས་ཏེ། ངའི་རྒྱུ་མས་ཀྱང་རྐྱལ་པ་བཞིན་དུ་ཆུ་སྣོད་བྱས་ན་གདོད་མྱ་ངམ་དགོན་པ་འདི་ལས་ཐར་བར་འགྱུར་གྱི། ཐབས་གཞན་ནི་མེད་དོ་སྙམ་ནས། དེ་བས་ནད་མང་བརྒྱ་ཡི་གནས། །ལུས་འདིས་སྡུག་བསྔལ་ཉམས་ཐག་པ། །འདི་རྣམས་ཕོངས་ལས་བསྒྲལ་བའི་ཕྱིར། །གཟིངས་སུ་གྱུར་པར་བདག་གིས་བྱ། །མི་ཡི་ལུས་སུ་སྐྱེས་པ་ཡིས། །མཐོ་རིས་ཐར་པའི་བདེ་བ་འཐོབ། །འདི་དག་དེ་ལྟར་གྱུར་བ་ལ། །ཕན་འདོགས་ནུས་པའང་ཤིན་དུ་དཀོན། །བདག་གི་སྤྱོད་ཡུལ་གནས་སུ་ལྷགས་པར་གྱུར། །འདི་འདྲའི་འགྲོན་ཀྱང་བསོད་ནམས་བྱས་པས་འཐོབ། །གཉེན་དང་བྲལ་བས་ཕོངས་ཤིང་ཉམས་ཐག་གྱུར། །དེ་བས་བདག་གིས་ལྷག་པར་བསྐྱབ་པའི་རིགས། །ལུས་ཞེས་བྱ་བ་འདི་ནི་དོན་མེད་མང་། །ཡུན་རིང་དག་ཏུ་སྡུག་བསྔལ་མང་པོའི་གནས། །རྟག་ཏུ་ན་བས་ཉོན་མོངས་མང་པོའི་གཞི། །གཞན་གྱི་དོན་དུ་ཕན་པ་སྤྱད་པའི་རིགས། །དེ་ནས་དེ་དག་ལས་ཁ་ཅིག་ནི་བཀྲེས་པ་དང་། །སྐོམ་པ་དང་ངལ་བ་དང་ཚ་བའི་སྡུག་བསྔལ་གྱིས་ལུས་ཉམས་ཐག་པ་ལས་ཐལ་མོ་སྦྱར་ཏེ་མིག་མཆི་མས་གང་བཞིན་དུ་ཕྱག་འཚལ་ཞིང་ཕོངས་ནས་ལག་བརྔས་ཆུ་སློང་བ་ན། བདག་ཅག་མགོན་མེད་ཁྱོད་མགོན་ལགས། །ཁྱོད་ནི་བདག་ཅག་སྐྱབས་དང་རྟེན། །སྐལ་བ་ཆེན་པོ་ཅི་རིགས་པར། །བདག་ཅག་རབ་ཏུ་བསྐྱབ་པའི་རིགས། ཞེས་དེ་ལ་ཁ་ཅིག་སྙིང་རྗེ་རྗེ་སྐད་དུ་སྨྲས་སོ། །གཞན་དག་ནི་སེམས་རབ་ཏུ་བརྟན་པས་ཆུ་གང་ན་ཡོད་པའི་ས་ཕྱོགས་དང་། མྱ་ངམ་དགོན་པ་འཕྲོད་དཀའ་བའི་ལམ་འདྲི་སྟེ། མཚོ་ཡི་གནས་སམ་ཆུ་བསིལ་རླུང་ཡང་རུང་། གཡས་ཆབ་སིལ་མ་གང་ན་ཡོད་ཀྱང་རུང་། གྲིབ་ཤིང་ཟླུམ་པོའམ་སོང་མ་སྔོན་པོའང་རུང་། གླང་པོ་ཆེན་པོ་བདག་ཅག་བསྟན་དུ་གསོལ། དགོན་པ་འདི་ལས་གང་དག་ནས། ཐར་བར་ནུས་པར་འགྱུར་བ་དེ། །ཐུགས་ནི་བརྩེ་བར་མཛད་ནས་སུ། །ཕྱོགས་དེ་བསྟན་ན་རབ་ཏུ་མཛེས། །མྱ་ངམ་དགོན་པར་ཡུན་རིང་དུ། །བདག་ཅག་འཁྱམས་ཤིང་མཆིས་པ་ལས། །ཇོ་བོ་ཁྱོད་ཀྱིས་སྒྲལ་བར་གསོལ། །ཞེས་སྨྲས་པ་དང་དེ་ནས་བདག་ཉིད་ཆེན་པོ་དེ་དེ་དག་གིས་སྙིང་རྗེ་རྗེ་སྐད་དུ་གསོལ་བ་བཏབ་པ་དང་། དེ་དག་གིས་སེམས་རབ་ཏུ་བརླན་པར་གྱུར་ནས་མྱ་ངམ་དགོན་པ་དེ་ལས་གང་ནས་ཐར་བར་འགྱུར་བའི་རི་ཞིག་ཡོད་པ་དེ། དེ་དག་ལ་བསྟན་པའི་ཕྱིར་གླང་པོ་ཆེའི་སྣ་སྦྲུལ་ཆེན་པོའི་མགོའི་གདེངས་ཀ་འདྲ་བ་བརྐྱང་སྟེ་སྨྲས་པ། རི་འདིའི་དྲུང་ན་མཚོ་ཆེན་པོ་མེ་ཏོག་པདྨ་དང་། ཨུཏྤ་ལས་བརྒྱན་པ། ཆུ་གཙང་མས་གང་བ་ཞིག་ཡོད་ཀྱིས། དེ་བས་ན་ལམ་འདི་ལ་དེང་ལག །དེར་ཡང་ཚ་བ་དང་། །སྐོམ་པ་ངོམས་ཤིང་ངལ་སོས་པར་གྱིས་ཏེ། དེ་དང་མི་རིང་བ་ཞིག་ན། རི་དེའི་ཁ་ནས་ལྷུང་བའི་གླང་པོ་ཆེའི་རོ་ཅིག་ཀྱང་ཡོད་ཀྱིས། །དེའི་ཤས་ལམ་རྒྱགས་གྱིས་ལ། དེའི་རྒྱུ་མས་རྐྱལ་པ་བཞིན་དུ་ཆུ་སྣོད་བྱས་ལ་ཆུ་ལོང་ལ། ས་ཕྱོགས་འདི་ཉིད་ནས་དེང་ཞིག་དང་། མྱ་ངམ་དགོན་པ་འདི་ལས་ཐར་བར་འགྱུར་ཡིས། ཁྱེད་ལམ་འདི་ན་ཕར་དེང་ཞིག་ཅེས་སྨྲས་ནས། བདག་ཉིད་ཆེན་པོ་དེས་མི་དེ་རྣམས་དབུགས་ཕྱུང་ནས་དེ་ནས་བཀྱེ་སྟེ། ལམ་གཞན་ཞིག་ནས་སོང་སྟེ་རི་དེའི་ཁར་འཛེགས་ཏེ་སྐྱེ་བོ་དེ་རྣམས་བསྒྲལ་བའི་ཕྱིར་དེ་ནས་རང་གི་ལུས་འདོར་བ་ན། སྨོན་ལམ་འདི་ལྟར་བཏབ་པར་ངེས་སོ། །བདག་གིས་འདི་བྱས་བདེ་འགྲོ་ཐོབ་ཕྱིར་མིན། མི་དབང་རྒྱལ་སྲིད་གདུགས་གཅིག་དཔལ་ཕྱིར་མིན། མཐོ་རིས་བདེ་མཆོག་མྱོང་བའི་ཕྱིར་མ་ཡིན། །ཚངས་པའི་དཔལ་དང་ཐར་པའི་བདེ་ཕྱིར་མིན། །མྱ་ངམ་དགོན་པར་འཁྱམས་པའི་སྐྱེ་བོ་འདི། །བདག་གིས་བསྒྲལ་བའི་བསོད་ནམས་ཡོད་ན་ནི། དེ་ཡིས་འཁོར་བའི་དགོན་པར་འཁྱམས་པ་ཡི། །འཇིག་རྟེན་རྣམས་ནི་སྒྲོལ་བར་ནུས་པར་ཤོག །བདག་ཉིད་ཆེན་པོ་དེས་དེ་ལྟར་ངེས་པར་བྱས་ནས། རབ་ཏུ་དགའ་བའི་ཤུགས་ཀྱིས་རང་གི་ལུས་གཡང་ས་ནས་ལྷུང་སྟེ་ཞིག་ནས། འཆི་བའི་སྡུག་བསྔལ་ལ་མི་ལྟ་བར་རི་དེའི་ཁ་ནས་རང་གི་ལུས་ས་ཕྱོགས་དེར་བོར་རོ། །དེ་ནས་དེར་ལྷུང་སྟོན་ཀའི་སྤྲིན་བཞིན་མཛེས་པར་གྱུར། ཟླ་བའི་དཀྱིལ་འཁོར་ནུབ་ཀྱི་རི་ཁར་ནུབ་པ་བཞིན། །ཁྱུང་གི་འདབ་མ་སྐྱོད་པས་རླུང་གིས་སྐྱོད་པ་ཡི། །གངས་རིའི་རྩེ་མོའི་སྟོད་གཡོགས་ལྷུང་བར་འགྱུར་བ་བཞིན། །དེ་ནས་ས་དང་རི་རྣམས་གཡོས་པར་གྱུར། །བདག་པོར་སྙེམས་པའི་བདུད་ཀྱི་སེམས་ཀྱང་འདར། །གནམ་གྲུམ་སྒྲ་བཞིན་ས་ལ་ལྷུང་བར་གྱུར། ནགས་ཚལ་འཁྲི་ཤིང་ལྷ་རྣམས་འདུད་པར་གྱུར། ནགས་ཚལ་དེ་ན་གནས་པའི་ལྷ་རྣམས་ནི། །དེ་ཚེ་ངེས་པར་ཡ་མཚན་སྐྱེས་པར་གྱུར། །རབ་ཏུ་དགའ་ནས་སྤུ་ལངས་ནམ་མཁའ་ལ། ལག་པ་བསྒྲེང་ནས་འཛུམ་མོས་བསྟན་པར་གྱུར། །ཁ་ཅིག་ཙན་དན་ཕྱེ་མས་བསྒོས་པ་ཡི། །མེ་ཏོག་དྲི་ཞིམ་རྣམས་ཀྱིས་རྟག་ཏུ་འཐོར། །ལ་ལ་མ་བཏགས་སྟོད་གཡོགས་གསེར་གྱིས་བརྒྱན། །རྒྱན་རྣམས་ཀྱིས་ནི་དེ་ལ་མཆོད་པ་བྱེད། དེ་བཞིན་གཞན་དག་དང་བས་བསྟོད་པ་དང་། ཐལ་མོ་སྦྱར་བ་པདྨ་ཁ་འབུས་འདྲ། །ཅོད་པན་མཛེས་ལྡན་སྤྱི་བོ་བཏུད་པ་ཡིས། །དེ་ལ་ཕྱག་འཚལ་མཆོད་པ་བྱེད་པར་འགྱུར། །ཁ་ཅིག་མཚོ་རླབས་འཁྲིགས་པར་བྱེད་པའི་རླུང་། །མེ་ཏོག་དྲི་ཞིམ་དད་དང་ལྡན་པ་ཡིས། །དེ་ལ་བསིལ་ཡབ་བྱེད་ཅིང་གཞན་དག་ནི། །སྤྲིན་གྱི་བླ་རེ་སྟུག་པོ་བྲེ་བར་བྱེད། །ལ་ལ་དང་བས་དེ་ལ་མཆོད་པའི་ཕྱིར། ལྷ་ཡི་རྔ་སྒྲས་ནམ་མཁའ་རྒོད་པར་བྱེད། །གཞན་དག་དེར་ནི་ལྗོན་ཤིང་མེ་ཏོག་དང་། འབྲས་བུ་ལོ་མར་ལྡན་པས་བརྒྱན་པར་བྱེད། །ཕྱོགས་རྣམས་སྟོན་ཀའི་མདངས་བཟང་མཛེས་པར་གྱུར། །ཉི་མའི་ཟེར་ཡང་སྔོན་པས་གསལ་བ་འདྲ། །རྒྱ་མཚོ་དེ་ཡང་ལྟད་མོའི་རླབས་སྐྱོད་པས། །དགའ་བས་དེ་ཡི་དྲུང་དུ་འོངས་པ་འདྲ། །དེ་ནས་མི་དེ་དག་མཐར་གྱིས་དོང་དོང་བ་ལས། །མཚོ་དེའི་དྲུང་དུ་ཕྱིན་ནས་དེར་ཚ་བ་དང་སྐོམ་པ་དང་ངལ་བ་ཞི་བར་གྱུར་བ་དང་། བདག་ཉིད་ཆེན་པོ་དེས་ཇི་སྐད་བསྟན་པ་བཞིན་དུ། དེ་དང་མི་རིང་བ་ཞིག་ན་གླང་པོ་ཆེ་ཤི་ནས་རིང་པོ་མ་ལོན་པའི་རོ་ཞིག་འདུག་པ་མཐོང་ངོ་། །དེ་དག་གིས་བསམས་པ། ཀྱེ་མ་གླང་པོ་ཆེ་འདི་ནི་གླང་པོ་ཆེའི་བདག་པོ་དེའང་རེ་འདྲ་བ་ཞིག་གོ །འདི་ནི་གླང་ཆེན་མཆོག་དེའི་སྤུན་ཞིག་གམ། །གཉེན་ཞིག་ཡིན་ནམ་ཡང་ན་བུ་ཡིན་ནོ། །འདི་ལྟར་ཕྱེ་མར་གྱུར་ཡང་འདི་ཡི་གཟུགས། །གངས་རི་དཀར་འདྲ་དེ་དང་འདྲ་བར་སྣང་། །མེ་ཏོག་ཀུ་མུད་སྤུངས་ལྟར་མཛེས། །ཟླ་བའི་འོད་ཟེར་སྤུངས་པ་བཞིན། འདི་ནི་དེ་ཡི་གཟུགས་བརྙན་ཞིག །མེ་ལོང་ནང་ན་འདུག་པ་འདྲ །དེ་ནས་མི་དེ་དག་གི་ནང་ནས་རབ་ཏུ་འཛངས་པ་ཁ་ཅིག་གིས་བརྟགས་ནས་བསམས་པ། འདི་ནི་ཕྱོགས་ཀྱི་གླང་པོ་ཆེའི་གཟུགས་མཆོག་དང་འདྲ་བའི་གླང་པོ་ཆེ་དེ་ཉིད་ཡིན་པ་གོར་མ་ཆག་སྟེ། བདག་ཅག་གཉེན་བཤེས་མེད་པས་ཕོངས་ཤིང་ཉམས་ཐག་པ་རྣམས་བསྒྲལ་བའི་ཕྱིར། རི་འདིའི་ཁ་ནས་ལུས་བོར་བ་སྙམ། གནམ་གྲུམ་སྒྲ་སྐད་གང་གྲག་ཅིང་། །ས་ཡང་གཡོ་བ་བཞིན་གྱུར་པ། །བདག་ཅག་རྣམས་ཀྱིས་ཐོས་པ་དེ། །ངེས་པར་འདི་ཉིད་ལྷུང་བ་ཡིན། །ལུས་འདི་པདྨའི་རྩ་བ་དཀར་པོ་དེ་ཉིད་འདྲ། ཟླ་བའི་འོད་ལྟར་ལུས་ཀྱི་སྤུ་དཀར་ཐིག་ལེ་མཛེས། །སེན་མོ་རུ་སྦལ་དབྱིབས་འདྲ་དཀར་ཞིང་རྐང་ལག་དཀར། །རྒྱབ་གཤུལ་གཞུ་ལྟར་གུག་ཅིང་མཛེས་པ་དེ་ཉིད་ཡིན། །མྱོས་པའི་དབྲེས་ཅན་གདོང་དེ་འདི་ཉིད་ཡིན། ངོ་སྤེལ་ཆེན་པོ་དྲི་ཞིམ་རབ་ཏུ་མཛེས། །མགོ་བཙུགས་མཐོ་མཛེས་ལྕགས་ཀྱུའི་རྨ་ཡང་མེད། །མཇིང་བ་སྟུག་པོ་དེ་ཡང་འདི་ཉིད་ཡིན། །བསྙེམས་པས་གད་པ་སྙོགས་པའི་མཚན་མ་ཅན། །མཆེ་བ་མདོག་དཀར་རི་གཉིས་དེ་ཉིད་ཡིན། །གང་གིས་བདག་ཅག་ལམ་འདི་བསྟན་པ་ཡང་། །སོར་མོ་རིང་བའི་སྣ་ལག་འདི་ཉིད་ཡིན། །ཀྱེ་མའོ་འདི་ནི་ངོ་མཚར་རྨད་དུ་ཆེ། །བདག་ཅག་རྣམས་གྱི་ཆོ་རིགས་ངང་ཚུལ་དང་། དད་པ་ཅི་འདྲའང་སྔོན་ཆད་མ་ཐོས་པར། །སྐལ་ཉམས་ངེད་ལའང་འདི་ལྟར་སེམས་བྱམས་ན། །གཉེན་བཤེས་རྣམས་ལ་འདི་ནི་ཅི་འདྲ་ཞིག །སྐལ་བ་ཆེན་པོ་དེ་ལ་རྣམ་པ་ཐམས་ཅད་དུ་ཕྱག་འཚལ་ལོ། །ཕོངས་ཤིང་ཉམས་ཐག་འཇིགས་ལ་མྱ་ངན་གདུངས། །བདག་ཅག་རྣམས་ལ་འདི་ལྟར་ཕན་འདོགས་པ། །གླང་པོ་ལྟར་སྣང་འདི་ནི་སུ་ཞིག་ཡིན། །ཡ་རབས་སྤྱོད་ཚུལ་ཉམས་པ་གསལ་བར་བྱེད། །སྤྱོད་བཟངས་འདི་འདྲ་གང་དུ་བསླབས་ཞིག་གུ །བླ་མ་གང་ལ་གནས་ནས་བསྙེན་བཀུར་བྱས། །ཡོན་ཏན་མེད་པར་གཟུགས་བཟང་མི་འགྱུར་ཞེས། །སྐྱེ་བོ་སྨྲ་བ་དེ་ནི་འདི་ལས་མངོན། །ཨེ་མའོ་རང་བཞིན་འཕགས་པ་ཕུན་སུམ་ཚོགས། །དོན་བཞིན་བསྒྲུབ་པ་འདི་ཡིས་བསྟན་པར་གྱུར། །འདི་ནི་ཤི་བར་གྱུར་ཡང་བདག་མགུ་བས། །གངས་རི་འདྲ་བའི་ལུས་མཛེས་རྒོད་པ་བཞིན། དེ་བས་ན་ད་ནི་སུ་ཞིག་འདི་ལྟར་གཉེན་བཤེས་བྱམས་པ་བས་ཀྱང་ལྷག་པར་བྱམས་པ་ཕན་འདོགས་འདོགས་པ། བདག་ཅག་ལ་ཕན་པའི་ཕྱིར་རང་གི་སྲོག་གིས་བཙལ་ཏེ། རབ་ཏུ་ལེགས་པར་བྱེད་བྱེད་པ། འདིའི་ཤ་ཟ་སུས་ཕོད་བདག་ཅག་གིས་ནི་འདི་ལ་མཆོད་པར་བྱས་ཏེ། མེར་བསྲེགས་པའི་ཞལ་ཏེ་བྱས་ལ་དྲིན་ལ་ལན་གླན་པར་བྱ་བའི་རིགས་སོ་སྙམ་ནས། མི་དེ་རྣམས་ཉེ་དུ་ཤི་བ་བཞིན་དུ། སེམས་མྱ་ངན་གྱིས་གདུངས་ཏེ་མིག་ནི་མཆི་མས་གང་། སྐད་ནི་འཛེར་བ་ལ་བལྟས་ན། སེམས་བརྟན་པ་ཁ་ཅིག་གིས་དོན་ལ་བརྟགས་ཏེ་སྨྲས་པ། འདི་ལྟར་བྱས་པས་གླང་པོ་ཆེའི་མཆོག་འདི་ལ་བདག་ཅག་གིས་མཆོད་ཅིང་བཀུར་སྟི་བྱས་པར་མི་འགྱུར་གྱི །འདི་ཡི་བསམ་པ་རྫོགས་པར་བྱས་ན་འདི་ལ་བདག་ཅག་གིས་མཆོད་པ་བྱས་པར་འགྱུར་རོ་སྙམ་མོ། །བདག་ཅག་རྣམས་ནི་བསྒྲལ་བའི་ཕྱིར། །སྔོན་ཆད་མ་འདྲིས་གཉེན་འདི་ཡིས། །རབ་ཏུ་ཕངས་པའི་ལུས་བཏང་ནས། །རབ་ཏུ་གཅེས་པའི་འགྲོན་བྱས་པས། །དེ་བས་དེ་ཡི་བསམ་རྫོགས་པར། །བདག་ཅག་རྣམས་ཀྱིས་བྱ་བའི་རིགས། གཞན་དུ་བྱས་ན་འདི་ལྟ་བུར། །འདི་ཡིས་བྱས་པ་དོན་མེད་འགྱུར། །དེ་ཡིས་བྱམས་ཏེ་ཅི་བདོག་པ། །ཐམས་ཅད་འགྲོན་དུ་བྱས་པ་འདི། །བདག་ཅག་རྣམས་ཀྱིས་མ་བླངས་ན། །དེ་ལ་ཅི་ཞིག་བཀུར་སྟི་བྱས། དེ་བས་དེ་ལ་བླ་མ་བཞིན། །ཚིག་ནི་བསྙེན་པར་བྱས་ན་ནི། །བཀུར་སྟི་ཆེན་པོ་བྱ་བའི་རིགས། །བདག་ཅག་རྣམས་ལའང་ཕན་པར་འགྱུར། །སྡུག་བསྔལ་འདི་ལས་ཐར་ནས་ཚོགས་པའམ། །སོ་སོ་ནས་ནི་གླང་པོའི་མཆོག་འདི་ལ། གཉེན་བཤེས་འདས་པ་དག་ལ་མཆོད་པ་བཞིན། །བྱ་བ་ཐམས་ཅད་བདག་ཅག་རྣམས་ཀྱིས་བྱ། །དེ་ནས་མི་དེ་རྣམས་མྱ་ངམ་དགོན་པ་དེ་ནས་ཐར་བར་བྱ་བའི་ཕྱིར། །གླང་པོ་ཆེའི་བདག་པོ་དེའི་བསམ་པའང་དྲན་པར་བྱས་ཏེ། དེའི་ཚིག་མཉན་ནས་སེམས་དཔའ་ཆེན་པོ་དེའི་ཤ་རྣམས་ཀྱང་བླངས། དེའི་རྒྱུ་མ་རྣམས་ཀྱིས་ཀྱང་རྐྱལ་བ་བཞིན་དུ་ཆུ་སྣོད་བྱས་ནས་ཆུའང་བླངས་ཏེ། དེས་བསྟན་པའི་ས་ཕྱོགས་ནས་དོང་སྟེ། མྱ་ངམ་དགོན་པ་དེ་ནས་ཐར་ཏེ་དོང་ངོ་། །དེ་ལྟ་བས་ན་དགེ་བ་རྣམས་ནི་ཕྱིས་གཞན་ལ་ཕན་པར་འགྱུར་ན། སྡུག་བསྔལ་ཡང་ཁེ་རྙེད་པ་དང་འདྲ་བར་སེམས་སོ། །ཞེས་སྐྱེ་བོ་དགེ་བ་རྣམས་ཀྱི་ཡོན་ཏན་བསྔགས་བ་ལའང་བརྗོད་པར་བྱའོ། །དེ་བཞིན་གཤེགས་པའི་ཡོན་ཏན་བསྔགས་པ་དང་རིམ་གྲོ་བསྐྱེད་དེ་དམ་པའི་ཆོས་མཉན་པ་དང་དེ་ལྟར་རང་བཞིན་བཟང་བ་ལ་གོམས་པར་བྱས་ན། ཚེ་རབས་གཞན་ལའང་རྗེས་སུ་འབྲང་བར་འགྱུར་རོ། །ཞེས་རང་བཞིན་བཟང་པོ་བསྒྲུབ་པའི་ཡོན་ཏན་བསྔགས་པ་ལའང་བརྗོད་པར་བྱའོ། །ནོར་གཏོང་བ་ལ་གོམས་པར་བྱས་ན་བདག་གི་ལུས་ལས་ཕངས་བ་མེད་པར་ཡང་ཐགས་ཐོགས་མེད་པར་གཏོང་ཞེས་གཏོང་བ་ལ་གོམས་པའི་ཡོན་ཏན་བསྔགས་པ་ལའང་བརྗོད་པར་བྱའོ། །བཅོམ་ལྡན་འདས་ཡོངས་སུ་མྱ་ངན་ལས་འདས་པ་ན་ལྷའི་མེ་ཏོག་དང་སིལ་སྙན་ལ་སོགས་པས་མཆོད་པའི་ཚེ། །བཅོམ་ལྡན་འདས་ཀྱིས་གང་འདི་སྐད་དུ་ཀུན་དགའ་བོ་དེ་ཙམ་གྱིས་ན་དེ་བཞིན་གཤེགས་པ་ལ་བཀུར་སྟི་བྱས་པར་མི་ཆུད་དོ་ཞེས་གསུངས་པ་དེ་ཡང་འདི་ལྟར་བསྟན་པར་བྱས་ཏེ། དེ་ལྟར་བསམ་པ་རྫོགས་པར་བྱས་ན་མཆོད་པ་བྱས་པར་འགྱུར་གྱི། སྤོས་དང་ཕྲེང་བ་ལ་སོགས་པ་ཕུལ་བས་མཆོད་པ་བྱས་པར་མི་འགྱུར་རོ་ཞེས་བསྟན་པར་བྱའོ། གླང་པོ་ཆེར་སྐྱེས་པའི་རབས་ཏེ་སུམ་བཅུ་པའོ།། །།སྡོམ་ལ། བྱང་ཆུབ་ངང་པ་བྱང་ཆུབ་ཆེ། སྤྲེའུ་དང་རི་དྭགས་ཤ་ར་བྷ། །རུ་རུ་སྤྲེའུ་རྒྱལ་བཟོད་པ་སྨྲ། །ཚངས་པ་གླང་ཆེན་དེ་དག་བཅུ།། །།སྐྱེ་བོ་དམ་པ་རྣམས་དང་ཕྲད་ན་ཇི་ལྟར་ཕྲད་ཀྱང་རུང་སྟེ་ལེགས་པར་འགྱུར་བའི་ཕྱིར་ལེགས་པར་འདོད་པ་རྣམས་ཀྱིས་སྐྱེ་བོ་དམ་པ་ལ་བརྟེན་པར་བྱའོ། །དེ་ཡང་འདི་ལྟར་བཅོམ་ལྡན་འདས་འདི་བྱང་ཆུབ་སེམས་དཔར་གྱུར་པའི་ཚེ་ཀུ་རུའི་རྒྱུད་རབ་ཏུ་གྲགས་པའི་རིགས་དང་ལྡན་པ། ཡོན་ཏན་ཡོངས་སུ་འཛིན་པར་བྱེད་པས་འབངས་རྣམས་ནི་རང་བཞིན་གྱིས་གློ་བ་ཉེ་བ། གཟི་བྱིན་ཆེ་བས་རྒྱལ་ཕྲན་དྲེགས་པ་རྣམས་ནི་ཕྱག་འཚལ་བར་གྱུར་པ། རྒྱལ་པོའི་རིགས་དཔལ་དང་ལྡན་པ་ཞིག་ཏུ་སྐྱེས་པར་གྱུར་ཏོ་ཞེས་གྲག་གོ །ཟླ་བ་དང་འདྲ་བར་མཐོང་ན་དགའ་བ། ཡོན་ཏན་གྱི་འོད་ཟེར་བརྒྱ་དང་ལྡན་པའི་བུ་དེ་ཕ་མས་མིང་ཡང་བུ་ཟླ་བ་ཞེས་བཏགས་སོ། །དེ་ཟླ་བ་ཡར་གྱི་ངོ་བཞིན་དུ་ཉིན་རེ་ཞིང་གཟི་བྱིན་ཇེ་ཆེ་ཇེ་ཆེར་གྱུར་ཏོ། །རིམ་གྱིས་རིག་བྱེད་ཡན་ལག་དང་བཅས་པ། ཉེ་བའི་རིག་བྱེད་དང་བཅས་པ་ལ་ནི་མཁས་པར་གྱུར། །སྒྱུ་རྩལ་མཆོག་དང་བཅས་པའི་སྒྱུ་རྩལ་རྣམས་ཀྱི་གོ་རིམ་ནི་མཐོང་བར་གྱུར། འཇིག་རྟེན་པ་རྣམས་ནི་རབ་ཏུ་དགའ་ཞིང་གུས་པར་བྱེད་པའི་གནས་སུ་གྱུར། ལེགས་པར་ཕན་འདོགས་ཤིང་ཉེ་བར་སྡུད་པ་ལ་མཁས་པ་དང་། གུས་པ་ཇེ་ཆེ་ཇེ་ཆེར་གྱུར་པ་དང་། ཡོངས་སུ་སྐྱོང་བ་ལ་ངེས་པར་བྱེད་པའི་ཕྱིར་འགྲོ་བ་རྣམས་ཀྱི་གཉེན་དང་འདྲ་བར་གྱུར་ཏོ། །ཚུལ་ཁྲིམས་ཐོས་དང་གཏོང་དང་སྙིང་རྗེ་དུལ། །གཟི་བྱིན་བཟོད་དང་བརྟན་དང་ཤེས་རབ་བྱམས། །མ་དྲེགས་ངོ་ཚ་བྱིན་ཆེ་མདངས་ལྡན་གྲགས། །དེས་ལ་ལྡོབ་སྐྱེན་སྟོབས་ཆེན་དག་པ་རྣམས། །ཡོན་ཏན་དེ་དང་དེ་དག་ཡོད་པ་ནི། །ལང་ཚོར་གྱུར་པ་རྒྱན་གྱིས་བརྒྱན་པ་བཞིན། །རྣམ་པར་དག་ཅིང་རྒྱ་ཆེ་ཡིད་འོང་བ། །ཟླ་བའི་འོད་ཟེར་འདྲ་བའི་གནས་སུ་གྱུར། །དེ་ནས་དེས་འབངས་རྣམས་སྐྱོང་ནུས་པ་དང་། །མ་འཇུངས་ཤིང་རང་བཞིན་བཟང་པོའི་ཕྱིར་རྒྱལ་པོས་རྒྱལ་ཚབ་ཀྱི་ལོངས་སྤྱོད་བྱེད་དུ་བཅུག་གོ །རབ་ཏུ་མཁས་པས་ཆོས་ལྡན་ལེགས་སྨྲས་རྣམས། །དེ་ཡི་གནང་ཆེན་བཞིན་དུ་སྡུག་པར་གྱུར། །གང་དག་དེ་ལ་ལེགས་པར་སྨྲ་བ་དེ། །མཆོད་པ་ཁྱད་པར་ཅན་གྱིས་བཀུར་སྟི་བྱེད། །དེ་ནས་བདག་ཉིད་ཆེན་པོ་དེ་རེ་ཤིག་ཅིག་གྲོང་ཁྱེར་དང་ཉེ་བར་སྐྱེད་མོས་ཚལ་དཔྱིད་ཟླའི་དུས་ལ་བབ་པའི་མཐུས་ཤིང་ལོ་རྣམས་ནི་མཛེས་ཤིང་འཇམ་པར་གྱུར། །མེ་ཏོག་སྡུ་གུ་ཁ་འབུས་པ་རྣམས་ནི་དགོད་པ་བཞིན། །ས་གཞི་རྣམས་ནི་ནེའུ་སིང་སྔོན་པོ་གསར་པ་རྣམས་ཀྱིས་རི་མོ་བཀྲམ་པ་བཞིན་དུ་མཛེས་པར་བྱས། །ཆུ་གཙང་མ་རྣམས་ནི་མེ་ཏོག་པདྨ་དང་ཨུཏྤ་ལའི་འདབ་མས་ཁེབས། །བུང་བ་མང་པོ་རྣམས་ནི་དགའ་བའི་སྒྲ་འབྱིན། །བྱ་ཀོ་ཀི་ལ་དང་རྨ་བྱ་མང་པོ་རྣམས་སྒྲ་ནི་ཆེར་འབྱིན། །བསེར་བུ་བསིལ་བ་དྲི་ཞིམ་པོ་ཉམས་སུ་བདེ་བ་དག་ནི་དལ་བུས་ལྡང་། ཡིད་རབ་ཏུ་དགའ་བར་བྱེད་པ་ཞིག་ན་དམག་གི་དཔུང་རབ་ཏུ་མི་མང་བ་ཞིག་གིས་ཡོངས་སུ་བསྐོར་ཏེ་རྩེ་བའི་ཕྱིར་རྒྱུ་ཞིང་སོང་སོང་བ་ལས། སྐྱེད་མོས་ཚལ་གཞན་ཞིག་ཏུ་ཕྱིན་ཏོ། དེ་ནི་ནགས་ཚལ་ཀོ་ཀི་ལ་སྒྲ་འབྱིན་པ། ལྡིང་ཁང་རྒྱན་ཅན་ཡིད་འོང་སྐྱེད་མོས་ཚལ། །ལྗོན་ཤིང་སྣ་ཚོགས་མེ་ཏོག་གཡུར་གྱིས་དུད། །དགའ་བའི་ཚལ་ན་ལྷ་བཞིན་དགའ་བར་སྤྱོད། །བུད་མེད་རྣམས་ནི་གླུ་སྙན་རྔ་སྒྲ་སྙན་དང་འབྲེལ། །འཛུམ་ལ་མཁས་པའི་ཡོན་ཏན་ཡན་ལག་མཛེས་པར་བསྒྱུར་བའི་བར། །བུད་མེད་བཟང་མོ་མཛེས་པར་ཆས་པ་དེ་དག་དང་། སྐྱེད་མོས་ཚལ་བཟང་དེ་ན་དེ་ནི་དགའ་བར་གནས། །དེ་དེ་ན་འདུག་བའི་དྲུང་དུ་བྲམ་ཟེ་ལེགས་པར་སྨྲ་བ་ལ་མཁས་པ་ཞིག་འོངས་ཏེ། ཞེ་ས་དང་ཕྱག་བྱས་ནས། །དེའི་གཟུགས་བཟང་པོ་དེ་ལ་སེམས་ཆགས་བཞིན་དུ་དེ་ན་འདུག་གོ །དེ་ལྟར་སེམས་དཔའ་ཆེན་པོ་དེ་དེ་ན་ལང་འཚོ་ལ་བབ་ཅིང་། བསོད་ནམས་ཕུན་སུམ་ཚོགས་པའི་མཐུ་ལས་བྱུང་བའི་རོལ་མོ་བྱེད་པ་ལ་ལྟ་ཞིང་འདུག་འདུག་པ་ལས། བྲམ་ཟེ་དེ་འོངས་པས་རབ་ཏུ་དགའ་བར་ནི་གྱུར་ན། དེ་ལེགས་པར་སྨྲ་བ་ཐོས་པ་དང་། དེར་འོངས་པའི་དོན་མ་གྲུབ་པར་བློ་བུར་དུ་ཅ་ཅོ་ཆེན་པོ་གླུ་དང་སིལ་སྙན་གྱི་སྒྲའི་བར་ཆད་དུ་གྱུར་པ་རོལ་མོའི་དགའ་བ་ལ་གནོད་པ་བུད་མེད་གཞོན་ནུ་རྣམས་འཇིགས་ཤིང་བག་འཁུམས་པར་བྱེད་པ་ཞིག་བྱུང་བ་ཐོས་ནས་ཉུག་རུམ་ནང་པ་རྣམས་ལ་འདི་ཅི་ཡིན་རྟོགས་ཤིག་ཅེས་ཆེད་ཆེར་བསྒོའོ། དེ་ནས་དེའི་ཆབ་སྒོ་བ་རྣམས་རྟབ་རྟབ་བོར་གྱུར་ནས་འཇིགས་ཤིང་སྐྲག་པས་ངོ་ཟུམ་གནག་སྟེ། མྱུར་དུ་ལྷགས་ནས་གསོལ་བ། ལྷ་སུ་དཱ་སའི་བུ་རྐང་ཁྲ་མི་ཟན་པོ་དེ། མི་མང་པོ་ཟ་ཟ་བ་ལ་གོམས་པས། །གཤིན་རྗེ་མངོན་སུམ་དུ་མཆིས་པ་བཞིན། སྲིན་པོ་བས་ཀྱང་སེམས་རྩུབ་པ། སྟོབས་དང་མཐུ་ལ་སོགས་པ་མི་བས་ལྷག་པ། སྲིན་པོ་བས་ཀྱང་ལྷག་པར་མི་བཟད་པར་འཇིགས་པ། མི་རྣམས་འཇིགས་པར་བགྱིད་པ། ཤིན་དུ་འཇིགས་པའི་གཟུགས་ཅན་བཞིན་དུ་འདིར་མཆིས་ཏེ། དེས་སྐྲག་ནས་ཤིང་རྟ་དང་གླང་པོ་ཆེ་དང་རྟ་དང་རྐང་ཐང་དང་དམག་མི་མང་པོའི་དཔུང་ཡང་བརྟན་པ་ཉམས་ཏེ་བྱེར་བར་གྱུར་ཅིང་མཆིས་ན། ལྷ་དེ་ལས་ཅི་ལེགས་པར་མཛད་ཅིང་བཀའ་བགྲོས་མཛད་པའི་དུས་ལ་བབ་པོ་ཞེས་གསོལ་ཏོ། དེ་ནས་བྱང་ཆུབ་སེམས་དཔས་སུ་དཱ་སའི་བུའི་ངང་ཚུལ་གྱི་སྐྱོན་དང་སྤྱོད་པ་སྔ་ནས་ཤེས་པས། སྙིང་རྗེས་དེ་བསོ་བར་བསམས་ཏེ། དེ་དེའི་ངང་ཚུལ་ངན་པ་ཞི་བར་བྱ་བའི་མཐུ་བདག་ལ་ཡོད་པར་ཤེས་པས། སུ་དཱ་སའི་བུ་འདིར་འོངས་སོ་ཞེས་ཟེར་བ་ཐོས་པས། གཏམ་སྙན་ཐོས་པ་བཞིན་དུ་དགའ་བར་གྱུར་ནས་འདི་སྐད་སྨྲས་པར་ངེས་སོ། །མི་ཤ་འདོད་པས་རྒྱལ་སྲིད་ཉམས་པར་གྱུར། མྱོས་པར་གྱུར་པ་བཞིན་དུ་རང་དབང་མེད། །རང་གི་ཆོས་བཏང་བསོད་ནམས་གྲགས་པ་ཉམས། མྱ་ངན་བྱ་བའི་གནས་སྐབས་གནས་པ་ལ། བདག་གིས་རྒལ་བའི་གོ་སྐབས་ག་ལ་ཡོད། དེ་ལྟ་བུ་ལ་འཇིགས་སུའང་ག་ལ་རུང་། འདི་ནི་འཐབ་མོ་རྒལ་བ་མེད་པར་ཡང་། དེ་ཡི་སྡིག་པ་སྔོན་དུ་གཞོམ་པར་བྱ། །བདག་གིས་སོང་སྟེ་རྗེས་སུ་བཟུང་དགོས་པ། །བདག་གི་དྲུང་དུ་ཁོ་བདག་འོངས་པ་ལ། དེ་བས་བདག་གིས་དེ་ལ་འགྲོན་བྱ་དགོས། དམ་པ་རྣམས་ནི་དེ་ལྟར་འགྲོན་ཡང་བྱེད། །དེ་ནས་དེས་ཕོ་བྲང་ནང་གི་མི་རྣམས་ལ། ཁྱེད་རྣམས་ལས་ཇི་ལྟར་བསྒོ་བ་བཞིན་དུ་ལེགས་པར་གྱིས་ཤིག་ཅེས་བསྒོས་ནས། བཙུན་མོའི་འཁོར་མི་དགའ་ཞིང་ཡིད་བློང་ནས་མིག་ནི་མཆི་མས་གང་། སྐད་འཛེར་ཞིང་སྨྲ་བའི་ཚིག་ནི་འཁྲུལ་བཞིན་དུ། ལམ་འགོག་པ་རྣམས་དབུགས་ཕྱུང་སྟེ། སླར་ལོག་ནས་ཅ་ཅོ་ཆེན་པོ་གང་ན་ཟེར་བ་དེ་ལོགས་སུ་སོང་བ་དང་། སུ་དཱ་སའི་བུ་གོས་དྲི་མ་ཅན་ནི་བསྲིངས་ཏེ་སྐེད་ལ་བཅིངས། མགོ་བོའི་སྐྲ་གཡེངས་ཤིང་རིང་ལ་རྡུལ་གྱིས་གོས་པ་ནི་ཤིང་ཤུན་གྱི་ཐོད་ཀྱིས་བཅིངས། གདོང་ནི་ཁ་སྤུ་རིང་པོ་འཛངས་པས་ངམ་གནག་པར་གྱུར་པ། ཁྲོས་ཤིང་རྔམ་པས་མིག་ནི་དགྲད་ཅིང་འཇིགས་འཇིགས་ལྟར་འདུག་རལ་གྲི་དང་ཕུབ་ནི་ཕྱར་ནས་རྒྱལ་པོའི་དཔུང་བྱེར་བའི་ཕྱི་བཞིན་དུ་སྙེགས་པ་མཐོང་ནས། འཇིགས་པ་དང་ཚམ་ཚོམ་མེད་པར། ཀྭ་ཡེ་བུ་ཟླ་བ་ནི་ང་ཡིན་ཏེ་འདི་ན་འདུག་གིས་མི་ཤ་ཟ་བ་ལ་ཞུགས་པའི་བཀྲེས་ཆོས་ངན་པ་དེས་ཅི་ཞིག་བྱ། སླར་ལོག་ལ་ཚུར་ཤོག །སུ་དཱ་སའི་བུའང་དེ་སྐད་འབོད་པའི་སྒྲ་ཐོས་ནས། སེང་གེ་བཞིན་དུ་བསྙེམས་པ་དང་བཅས་པར་དེ་ནས་སླར་ལོག་པ་དང་། བྱང་ཆུབ་སེམས་དཔའ་གཅིག་པུ་ཕུབ་དང་མཚོན་ཆའང་མེད་པར་རང་བཞིན་གྱིས་ཞི་བར་སྣང་བ་མཐོང་ནས། ངའང་ཁྱོད་ཉིད་འཚོལ་ལོ་ཞེས་སྨྲས་ཏེ། འཛེམ་དོག་དང་ཚམ་ཚོམ་མེད་པར་རྔམ་བཞིན་དུ་དེའི་དྲུང་དུ་རྒྱུགས་ཏེ་འོངས་ནས་ཕྲག་པ་ལ་སྐྱོན་ཏེ་བྲོས་ནས་སོང་ངོ་། །བྱང་ཆུབ་སེམས་དཔས་ཀྱང་། དེའི་སེམས་རྔམ་ཞིང་དྲེགས་པས་གཡེངས་ལ་བློ་རྟབ་རྟབ་པོར་གྱུར་ཅིང་རྒྱལ་པོའི་དཔུང་བྱེར་བས་རབ་ཏུ་དགའ་བར་ཡང་གྱུར་ལ། དོགས་པ་དང་བཅས་པར་ཡང་ཤེས་ནས། ད་ཅུང་འདི་བཅོས་པའི་དུས་ལ་མ་བབ་པོ་སྙམ་ནས་བཏང་སྙོམས་སུ་བཞག་གོ །སུ་དཱ་སའི་བུའང་འདོད་པའི་དོན་གྲུབ་པས། རྙེད་པ་ཆེན་པོ་རྙེད་པ་བཞིན་དུ་ཡིད་རབ་ཏུ་དགའ་ནས། རང་གི་གནས་རྫོང་། མི་རྣམས་བསད་བའི་ཀེང་རུས་མང་པོས་གང་། །ས་གཞི་ཁྲག་གི་ཆར་པས་རྩུབ་རྩུབ་ལྟར། །ལྕེ་སྦྱང་ཁ་དམར་མི་སྙན་སྒྲ་སྒྲོགས་པ། །ཁྲོ་ཚིག་རྩུབ་པོས་རབ་ཏུ་སྐྲོད་པ་བཞིན། །བྱ་རྒོད་ཁྭ་གནས་ལོ་མ་དམར་པོའི་ཤིང་། །རོ་མང་བསྲེགས་པའི་དུ་བས་མདོག་འགྱུར་མང་། །སྲིན་པོ་ཡི་དྭགས་གར་བྱེད་སྒྲ་ངན་འཇིགས། །འགྲོན་པོས་རྒྱང་གིས་མཐོང་ན་མིག་སྒྱུར་བ། །དེ་ལྟ་བུའི་ནང་དུ་སོང་ནས། །དེར་བྱང་ཆུབ་སེམས་དཔའ་བཞག་སྟེ་དེའི་བྱད་གཟུགས་བཟང་པོ་ཕུན་སུམ་ཚོགས་པ་ལ་ཆགས་ནས། མིག་དགྲད་དེ་དེ་ལྟ་ཞིང་ངལ་སོ་ཞིང་འདུག་གོ །དེ་ནས་བྱང་ཆུབ་སེམས་དཔས་བྲམ་ཟེ་ལེགས་པར་སྨྲ་བའི་སྐྱེས་ཁྱེར་ཏེ་འོངས་བས། རིམ་གྲོ་མ་བྱས་པ་སྐྱེད་མོས་ཚལ་དེར་སླར་འོང་དུ་རེ་ཞིང་སྡོད་པར་རྗེས་སུ་དྲན་ནས་བསམས་པ། ཀྱེ་མའོ་མཚར་བྱས་ཀྱིས་མེད། །ལེགས་པར་སྨྲ་བའི་སྐྱེས་འབུལ་བ། །ཉེ་བའི་སེམས་ཀྱིས་རིང་ནས་འོངས། །འདི་ལྟར་བདག་ཁྲིད་ཐོས་ནས་སུ། །བྲམ་ཟེ་དེ་ནི་ཅི་བྱེད་ཅིག །རེ་ཐག་ཆད་པའི་མེ་ཡིས་སེམས་བསྲེགས་ཏེ། །མྱ་ངན་མི་བཟད་ཆེན་པོས་གདུངས་གྱུར་ཏམ། །བདག་གི་མྱ་ངན་བྱེད་ཅིང་ཤུགས་འབྱིན་ཏམ། །རང་གི་སྐལ་བ་ཆུང་ཞེས་སྨོད་ཅིང་འདུག །བྱང་ཆུབ་སེམས་དཔའ་དེ་དེ་སྙམ་དུ་སེམས་ཤིང་བྲམ་ཟེ་དེའི་སྡུག་བསྔལ་གྱིས་སེམས་གདུངས་ནས། སྙིང་རྗེའི་དབང་གིས་མཆི་མ་བྱུང་ངོ་། །དེ་ནས་སུ་དཱ་སའི་བུས། །བྱང་ཆུབ་སེམས་དཔའི་མིག་མཆི་མས་གང་བ་ལ་ལྟས། དགོད་ཅིང་སྨྲས་པ། ཁྱོད་ཅུང་ཞིག་སྡོད་ཅིག །ཡོན་ཏན་མང་པོ་དེ་དག་གིས། ཁྱོད་ནི་རབ་ཏུ་བརྟན་ཞེས་གྲགས། །འོན་ཀྱང་ང་ཡི་དབང་གྱུར་ན། འདི་ལྟར་མཆི་མ་བྱུང་ངམ་ཅི། །ཉམ་ཉེས་བརྟན་པ་དོན་མེད་འགྱུར། །མྱ་ངན་བྱུང་ན་ཐོས་མི་ཕན། །བརྡེགས་ན་གཡོ་བར་མི་འགྱུར་བའི། །སེམས་ཅན་དེ་ནི་གང་ཡང་མེད། །ཅེས་ཟེར་བ་དེ་རེ་བདེན། །ཀྱེ་དེ་བས་ན་དྲང་པོར་སྨྲོས་ཤིག། སྲོག་གམ་སྡུག་པའམ་འོན་ཏེ་བདེ་བ་བསྒྲུབ་པའི་ནོར། །གཉེན་ནམ་མི་ཡི་བདག་པོའི་རྒྱལ་སྲིད་ཀྱང་མྱ་ངན་བྱེད། །བུ་ལ་བྱམས་པའི་ཕ་ནི་དུའམ་བུ་ཡང་རུང་། །དྲན་ནས་ཁྱོད་ཀྱི་མིག་ནི་མཆི་མས་གང་བར་གྱུར། །བྱང་ཆུབ་སེམས་དཔས་སྨྲས་པ་སྲོག་དང་ཕ་མ་བུ་དང་གཉེན་དང་ཆུང་མའི་ཕྱིར་ཡང་མ་ཡིན་ལ། །བདག་གི་མཆི་མ་བྱུང་བ་དེ་ནི་དབང་ཕྱུག་བདེ་བ་དྲན་པས་མིན། །བྲམ་ཟེ་ལེགས་པར་སྨྲ་བ་རེ་བས་འོངས་པས་བདག་ཁྲིད་ཐོས་ནས་ནི། །རེ་ཐག་ཆད་པས་ངེས་པར་དེ་གདུངས་དྲན་ནས་བདག་ནི་མཆི་མ་བྱུང་། དེ་བས་བྲམ་ཟེ་རེ་ཐག་ཆད་པས་སེམས་དཀྲུགས་ཏེ། བཀུར་སྟིའི་ཆུས་བཀྲུས་གསར་པ་བྱས་ནས་དེ་ལས་ཀྱང་། ལེགས་པར་སྨྲས་པའི་བདུད་རྩི་མྱང་བར་བྱས་ནས་སུ། །སླད་དུ་འོང་གི་བར་དུ་བདག་ནི་གཏང་དུ་གསོལ། །བདག་གིས་བྲམ་ཟེའི་དྲིན་ལ་ལན་གླན་པས། །ཁྱོད་ཀྱི་དྲིན་ཡང་དེ་ནས་ལན་གློན་དུ། །འདིར་ནི་འོངས་ནས་ཁྱོད་ཀྱི་མིག་གཉིས་ཀྱི། རབ་ཏུ་དགའ་བའི་སྐབས་ཕྱེད་ལྟར་ཡང་གཞུག །འདི་ནི་འབྲོས་པའི་ཐབས་ཤིག་ཡིན་སྙམ་དུ། །སེམས་ཤིང་ཡིད་ལ་དོགས་པ་མ་སྐྱེད་ཅིག །རྒྱལ་པོ་བདག་ལྟ་བུ་ཡི་ལམ་ཡང་གཞན། སྐྱེ་བོ་གཞན་ཡང་དེ་ལྟ་མིན་པར་སྤྱོད། །སུ་དཱ་སའི་བུས་སྨྲས་པ། དེ་སྐད་ཁྱོད་ནི་རབ་ཏུ་གུས་སྨྲས་ཀྱང་། ཅི་ལྟར་བྱས་ཀྱང་ཡིད་ཆེས་མི་རུང་ངོ་། །འཆི་བདག་ཁ་ནས་ཐར་ཏེ་བདེར་གནས་པ། །སུ་ཞིག་དེར་ནི་སླད་དུ་འོང་བ་ཡོད། །འཆི་བདག་འཇིགས་པ་ཐར་བར་དཀའ་ལས་ཐར། །རང་གི་ཁྱིམ་ན་བདེ་བར་གནས་གྱུར་པ། །གང་ཕྱིར་ཁྱོད་ནི་ང་ཡི་དྲུང་འོངས་པ། དེ་ཡི་རྒྱུ་ནི་ཅི་ཞིག་ཡོད་པ་སྨྲོས། །བྱང་ཆུབ་སེམས་དཔས་སྨྲས་པ། བདག་འདིར་སླར་འོང་བའི་རྒྱུ་ཆེན་པོ་ཞིག་ཡོད་པར་ཡང་ཁྱོད་ཀྱིས་ཡིད་ཆེས་སུ་མི་རུང་བ་ཅི་ཡོད། ངས་སླར་འོང་ཞེས་ཁས་མ་བླངས་སམ། དེ་ལྟར་མི་ངན་པ་དང་མགོ་སྙོམས་ཏེ་དོགས་པ་མ་སྐྱེད་ཅིག །ང་ནི་བུ་ཟླ་བ་ཞེས་བྱ་བ་ཡིན་ནོ། །ཁ་ཅིག་འདོད་པའམ་འཇིགས་པའམ་ཤིར་དོགས་པས། བདེན་པར་སྨྲ་བ་རྩྭ་དང་འདྲ་བར་འདོར། །ཡ་རབས་རྣམས་ནི་བདེན་པ་སྲོག་དང་འདྲ། དེ་བས་རབ་ཏུ་ཕོངས་ཀྱང་དེ་མི་འདོར། །བདེན་པ་མེད་ན་ཚེ་འདིའི་བདེ་བ་ཡང་། སྲོག་ཀྱང་ངན་འགྲོ་དག་ལས་བསྲུང་མི་ནུས། །དགའ་དང་གྲགས་དང་བདེ་བའི་འབྱུང་གནས་གང་། །བདེ་བ་སུ་ཞིག་དེ་ཕྱིར་སྤོང་བར་བྱེད། །གྱ་གྱུའི་ཚུལ་ཞིག་གལ་ཏེ་མཐོང་གྱུར་ཏམ། ལེགས་པར་སྤྱོད་པ་གལ་ཏེ་མ་མཐོང་ངམ། །དེ་ལྟར་བདེན་པར་ཡིད་ཆེས་མི་འགྱུར་བ། །ང་ལ་ཅི་ཞིག་ཁྱོད་མཐོང་དོགས་པ་སྐྱེ། །ཁྱོད་ཀྱི་ང་ནི་གལ་ཏེ་འཇིགས་གྱུར་ཏམ། །བདེ་ལ་ཆགས་སམ་སྙིང་རྗེ་མེད་གྱུར་ན། དཔའ་བར་སེམས་ཤིང་གཏུམ་པོར་སྤྱོད་གྲགས་པ། །ཕུབ་བཟུང་མཚོན་བཟུང་དྲུང་དུ་ང་འོང་ངམ། །ཁྱོད་དང་བཤེས་བར་ང་ཡང་འདོད་པ་ཉིད། །འདི་ནས་བྲམ་ཟེ་དེ་ཡི་དོན་བྱས་ནས། །སླར་ཡང་ང་བདག་ཁྱོད་ཀྱི་གན་དུ་འོང་། །ངེད་ཅག་ལྟ་བུ་རྫུན་གྱི་ཚིག་མི་སྨྲ། །དེ་ནས་སུ་དཱ་སའི་བུ་བྱང་ཆུབ་སེམས་དཔའི་ཚིག་དེ་རང་ལ་བསྟོད་པ་འདྲ་བས་མ་བཟུང་ནས་བསམས་པས། འདི་ནི་བདེན་པར་སྨྲ་བ་ངག་ཆོས་དང་ལྡན་པར་ཡང་ངོམ་ན། །དེ་བས་ན་འདི་རེ་ཤིག་བདེན་པ་ལ་དགའ་བ་དང་ཆོས་ལ་དགའ་བ་དེ་བལྟའོ། །གཞན་ཡང་འདི་མེད་དུ་ཟིན་ཀྱང་རྒྱལ་རིགས་ཀྱི་བུ་བརྒྱ་ཙམ་རང་གི་མཐུས་རྙེད་པ་བདག་ལ་ཡོད་ཀྱིས། ཇི་ལྟར་ཁས་བླངས་པ་བཞིན་དུ་དེ་དག་གིས་འབྱུང་པོའི་མཆོད་སྦྱིན་བྱའོ་སྙམ་ནས་བྱང་ཆུབ་སེམས་དཔའ་ལ་སྨྲས་པ། འོ་ན་སོང་ཞིག་ཁྱོད་བདེན་པར་སྨྲ་བར་ཁས་འཆེས་པ་དང་ཆོས་དང་ལྡན་པར་ཁས་འཆེས་པ་བལྟའོ། །སོང་ལ་བྲམ་ཟེ་དེ་ཅི་དང་ཅི་འདོད་པ་བྱོས་ལ་མྱུར་དུ་སླར་ལོག་ཤོག་ཅིག་དང་། ངའང་ཁྱེད་བསྲེག་པའི་སྟ་གོན་བྱེད་ཅིང་སྡོད་དོ། །དེ་ནས་བྱང་ཆུབ་སེམས་དཔས་དེ་བཞིན་དུ་བྱའོ་ཞེས་དེའི་ཚིག་ཉན་ནས་རང་གི་ཁྱིམ་དུ་སོང་ངོ་། །རང་གི་མི་རྣམས་ཀྱང་རབ་ཏུ་དགའ་བར་གྱུར་ཏོ། །བྲམ་ཟེ་དེའང་བཀུག་སྟེ། །དེ་ལས་ཚིག་སུ་བཅད་པ་བཞི་ཐོས་སོ། །དེ་ཐོས་པས་ལེགས་པར་སྨྲས་པས་ཡིད་མགུ་ནས། །སེམས་དཔའ་ཆེན་པོ་དེས་བྲམ་ཟེ་དེ་ལ་ཡིད་མགུ་བར་བྱ་བ་དང་། ཚིག་སྙན་པ་དང་། བཀུར་སྟི་བྱས་ནས་ཚིགས་སུ་བཅད་པ་གཅིག་ལ་གསེར་སྲང་སྟོང་སྟོང་གི་ཐང་དུ་བརྩིས་ཏེ་ཅི་འདོད་པའི་ནོར་གྱིས་མཆོད་པ་བྱས་སོ། །དེ་ནས་དེའི་ཕས་དེ་ལ་གནས་མ་ཡིན་པར་གོང་ཚབས་ཆེ་བ་དགག་པའི་བསམ་པས། སྐབས་ཤིག་ཏུ་གླེང་བསླངས་ཏེ། ཚིག་འཇམ་པོས་སྨྲས་པ། བུ་ལེགས་པར་སྨྲས་པ་ལ་མཆོད་པའང་རན་པར་བྱས་ན་ལེགས་པར་ཤེས་པར་བྱ་བའི་རིགས་སོ། །ཁྱོད་ཀྱིས་འབངས་མང་པོ་གསོ་དགོས་ལ། རྒྱལ་པོའི་དཔལ་ཡང་ནོར་ཕུན་སུམ་ཚོགས་པ་ལ་ལྟོས་སོ། །དེ་བས་ན་ཁྱོད་ལ་སྨྲའོ། །ལེགས་པར་སྨྲས་པའི་མཆོད་པ་མང་ན་བརྒྱ། །དེ་བས་མང་ན་ནུས་པར་མི་འགྱུར་ཏེ། །སྦྱིན་པ་དྲགས་ན་ནོར་གྱི་དབང་ཕྱུག་གི །ནོར་ཡང་ཇི་སྲིད་ཅིག་ཏུ་ཐུབ་པར་འགྱུར། །ནོར་ཡང་རབ་ཏུ་ལྡན་ན་བསྒྲུབ་པར་ནུས། །དེ་དང་མི་ལྡན་ན་ནི་སྒྲིབ་མི་ནུས། །ནོར་མེད་ན་ནི་རྒྱལ་པོའི་དཔལ་དེ་ཡང་། །དགའ་བར་མི་འགྱུར་སྨད་འཚོངས་བུད་མེད་བཞིན། །བྱང་ཆུབ་སེམས་དཔས་སྨྲས་པ། །ལེགས་པར་སྨྲས་པ་རྣམས་ཀྱི་རིན་ཐང་ཞིག །གལ་ཏེ་ངེས་པར་བཅལ་དུ་རུང་ན་ནི། དེ་ཡི་རིན་དུ་རྒྱལ་སྲིད་ཉིད་ཀྱང་སྦྱིན། །ཁྱོད་ཀྱིས་གྱོད་ཀྱང་སྨྲ་བར་ག་ལ་འགྱུར། གང་ཞིག་ཐོས་ནས་ཡིད་ནི་དད་གྱུར་ནས། །ལེགས་པར་དགའ་ལ་བསྟན་པ་ཉིད་དུ་གྱུར། །ཤེས་རབ་སྐྱེ་ཞིང་གཏི་མུག་མེད་པར་འགྱུར། །རང་གི་ཤས་ཀྱང་དེ་ནི་ཉོ་བའི་རིགས། །ཐོས་པ་གཏི་མུག་མུན་སེལ་སྒྲོན་མེ་ཡིན། རྐུན་པོ་ལ་སོགས་མི་འཁྱེར་ནོར་གྱི་མཆོག །ཀུན་དུ་རྨོངས་པའི་དགྲ་འཇོམས་མཚོན་ཆ་ཡིན། །ཐབས་ཚུལ་མན་ངག་སྟོན་པའི་གྲོགས་ཀྱི་མཆོག །ཕོངས་པར་གྱུར་ཀྱང་མི་འགྱུར་མཛའ་བོ་ཡིན། །གནོད་པ་མེད་པའི་མྱ་ངན་ནད་ཀྱི་སྨན། ཉེས་པ་ཆེན་པོའི་དཔུང་འཇོམས་དཔུང་གི་མཆོག །གྲགས་དང་དཔལ་གྱི་གཏེར་གྱི་མཆོག་ཀྱང་ཡིན། །ཡ་རབས་རྣམས་དང་ཕྲད་ན་སྐྱེས་ཀྱི་མཆོག །ཚོགས་ཀྱི་ནང་ན་མཁས་པ་དགའ་བར་འགྱུར། །ཕས་ཀྱི་རྒོལ་ལ་ཉི་མའི་འོད་དང་འདྲ། །འགྲན་པ་རྣམས་ཀྱི་གྲགས་དང་དྲེགས་པ་སེལ། །མི་རྣམས་བཤེས་ཀྱང་རབ་ཏུ་དགའ་འགྱུར་ནས། །མིག་དང་བཞིན་མདངས་རབ་ཏུ་གསལ་འགྱུར་ཞིང་། །ལག་པའི་སེ་གོལ་མགུ་བྱེད་རྡེབ་པ་ཡིས། །ཁྱད་པར་རབ་ཏུ་ཆེ་བ་རྣམ་པར་སྒྲོགས། །གཏན་ཚིགས་དོན་རྣམས་རབ་ཏུ་གསལ་བར་སྟོན། །གཙུག་ལག་ལུང་རྣམས་སྣ་ཚོགས་སྟོན་དང་མཚུངས། །མཉེན་ཞིང་སྦྱངས་པས་ཡིད་དུ་འོང་བའི་ཕྱིར། །མེ་ཏོག་ཕྲེང་བ་མ་རྙིངས་བཀྲམ་པ་བཞིན། །དུལ་ཞིང་རབ་ཏུ་གསལ་བའི་སྤོབས་པ་སྐྱེད། །གྲགས་པ་ཆེན་པོ་འཕྲལ་དུ་འབྱུང་བར་བྱེད། །སྨྲ་ལྕེ་བདེ་འགྱུར་ཁྱད་པར་ཅན་གྱི་རྒྱུ། །ཐོས་པའི་དཔལ་གོམས་དོན་གསལ་རྟོགས་པར་འགྱུར། །ཐོས་དང་ལྡན་ན་འགལ་བ་མེད་པ་ཡིན། །འཁོར་གསུམ་ལམ་ལ་རབ་ཏུ་གནས་པར་འགྱུར། །ཐོས་པའི་རྗེས་འཇུག་བསྒྲུབ་ལ་སྙིང་པོར་བྱེད། །སྐྱེ་བའི་རྫོང་ལས་ཚེགས་ཆུང་ཐར་བར་འགྱུར། །དེ་ལྟར་ཐོས་པ་ཡོན་ཏན་དུ་མ་ཅན། །ཐོས་པ་བདག་གིས་སྐྱེས་དང་འདྲ་རྙེད་ན། །ནུས་བཞིན་དུ་ནི་ཇི་ལྟར་མཆོད་མི་བགྱི། །ཁྱོད་ཀྱི་བཀའ་ཡང་ཅི་ཕྱིར་བཅག་པར་འགྱུར། །སྐྱོན་གྱི་ལམ་དུ་ཞུགས་པས་དོགས་མེད་པར། །ཡོན་ཏན་ཉམས་པར་འགྱུར་བས་ཐོབ་འགྱུར་བའི། །རྒྱལ་སྲིད་སྤྱོད་པས་བདག་ལ་དགོས་པ་མེད། །དེ་བས་སུ་དཱ་ས་ཡི་བུ་དྲུང་འགྲོ། །དེ་ནས་དེའི་ཕ་དེ་ལ་བྱམས་པས་རྟབ་རྟབ་བོར་གྱུར་ཏེ། ཞེ་ས་བསྐྱེད་ནས་དེ་ལ་སྨྲས་པ། །བུ་ཁྱོད་ཉིད་ལ་ཕན་པའི་ཕྱིར་ངས་དེ་སྐད་སྨྲས་ཀྱི། དེ་ལྟར་མི་དགར་མ་བྱེད་ཅིག །ཁྱོད་ཀྱི་དགྲ་རྣམས་སུ་དཱ་སའི་བུའི་དབང་དུ་འགྲོ་གྲང་། འོན་ཏེ་དེའི་དྲུང་དུ་འགྲོ་བར་ཁྱོད་ཀྱིས་ཁས་བླངས་ཏེ། བདེན་པ་བསྲུང་བའི་ཕྱིར་ཁ་འོག་ཏུ་ལུས་འཁྲུས་པར་བྱ་འདོད་ན། དེ་ཡང་ངས་མི་གནང་ངོ་། །དེ་ཅིའི་ཕྱིར་ཞེ་ན། རང་གི་སྲོག་བསྲུང་བ་དང་། བླ་མའི་དོན་དུ་བརྫུན་བྱས་ཀྱང་སྡིག་ཏུ་མི་འགྱུར་བར་རིག་བྱེད་ལ་མཁས་པ་དག་གིས་བཤད་པའི་ཕྱིར་རོ། །དེ་བས་ན་རྫུན་སྤངས་བ་ལ་འབད་པས་ཁྱོད་ལ་ཅི་ཞིག་བྱ། སྲིད་དང་འདོད་པ་གཉིས་དང་འགལ་བའི་ཆོས་ལ་བརྟེན་པའང་ཐབས་དང་ཚུལ་མ་ཡིན་ལ། སྡུག་བསྔལ་ཡིན་པར་རྒྱལ་པོ་ཐབས་དང་ཚུལ་ལ་མཁས་པ་སྨྲའོ། དེ་བས་ན་ངེད་ཀྱིས་སེམས་གདུངས་པར་འགྱུར་བ་དང་། རང་གི་དོན་ལའང་མི་ལྟ་བ་ཁྱོད་ཀྱི་ངན་དུས་དེ་ཐོང་ཞིག །དེ་སྟེ་གཞུང་ལུགས་ཀྱི་ཆོས་དང་འགལ་བས་གཏམ་ངན་པ་དང་། ཡིད་དམ་བཅས་པ་དང་འགལ་བས་མི་རིགས་སོ་སྙམ་ནས་ཁྱོད་ཀྱི་ཡིད་ལ་མི་འཐད་ནའང་ཁྱོད་ཐར་བར་བྱ་བའི་ཕྱིར་ངའི་དམག་གི་དཔུང་རྟ་དང་གླང་པོ་ཆེ་དང་ཤིང་རྟ་དང་རྐང་ཐང་དུ་ལྡན་པ་སྙིང་ཉེ་བ། དགྲ་ཐབས་ལ་མཁས་ཤིང་དཔའ་བ། གཡུལ་ངོ་དུ་མ་ལས་རྒྱལ་བར་གྱུར་བའི་མི་དང་བཅས་པའི་དཔུང་ཆེན་པོ་འཇིགས་འཇིགས་ལྟར་འདུག་པ་བཤམས་ཟིན་གྱིས། དེ་བས་ན་དེས་ཡོངས་སུ་བསྐོར་ཏེ་སོང་ལ་དེའི་དབང་དུ་གྱུར་པ་ལས་ཐར་བ་དང་གཤིན་རྗེའི་དབང་དུ་གྱུར་བ་ལས་ཀྱང་ཐར་བར་བྱས་ན། ཁས་བླངས་པའང་ཁ་འོག་ཏུ་ལུས་འཁྲུས་པར་ཡང་འགྱུར་ལ། བདག་ཀྱང་བསྲུངས་བར་འགྱུར་རོ། །བྱང་ཆུབ་སེམས་དཔས་སྨྲས་པ། ལྷ་གཞན་དུ་ཁས་བླངས་ལ་གཞན་དུ་བགྱིད་བ་རྔོ་མི་ཐོག་གོ །རྣམ་པ་གཅིག་ཏུ་ན་མྱ་ངན་བགྱིར་རུང་བ་སྡུག་བསྔལ་གྱི་འདམ་དུ་བྱིང་བ་སེམས་ཅན་དམྱལ་བ་པ་ལ་མངོན་དུ་ཕྱོགས་པ། མཛའ་བ་དང་གཉེན་བཤེས་ཀྱིས་སྤངས་པ། མགོན་མ་མཆིས་པ་དེ་ལྟ་བུ་ལ་རྒལ་བའི་ཏོལ་ཀྱང་མ་མཆིས་སོ། །གཞན་ཡང་། མི་ཤ་འཚལ་བས་བདག་ལ་ནི། འདི་ལྟ་བུ་ཡི་ཡངས་བ་བགྱིས། བདག་གི་ཚིག་གིས་ཡིད་ཆེས་ན། དབང་དུ་གྱུར་པ་བཏང་བར་དཀའ། །དེ་ཡི་དྲིན་གྱི་བདག་གིས་ནི། །ལེགས་པར་སྨྲས་པ་འདི་ཡང་ཐོས། །དེ་བས་ལྷག་པར་དྲིན་ཆེ་བས། །དེ་བས་དེ་ནི་རྗེས་སུ་བཟུང་། །ལྷ་འདི་ལ་བདག་བཀུམ་དུ་དོགས་པའང་མི་མཛད་དུ་གསོལ། བདག་འདི་ལྟར་ཁོའི་དྲུང་མཆིས་པ་ལ་འགུམ་པའི་རྔོག་མ་ཐོག །དེ་ལྟར་བདག་ཉིད་ཆེན་པོ་དེ་ཕས་འགྲོར་མི་སྟེར་བ་ལ། ཚིག་འཇམ་པོས་གསོལ་བ་གཏབ་པ་སྤོབས་ཏེ་གསོལ་བ་འདེབས་པའི་མི་རྣམས་དང་། དམག་གི་དཔུང་སྙིང་ཉེ་བ་རྣམས་ནི་སླར་བཟློག་སྟེ། གཅིག་པུ་མི་དགའ་བ་དང་འཇིགས་པ་མེད་པར་བདེན་པ་རྗེས་སུ་བསྲུང་ཞིང་འཇིག་རྟེན་ལ་ཕན་པའི་ཕྱིར། སུ་དཱ་སའི་བུ་སེམས་ཤིང་དེའི་གན་དུ་སོང་ངོ་། །སུ་དཱ་སའི་བུས་སེམས་དཔའ་ཆེན་པོ་དེ་རྒྱང་རིང་པོ་ནས་འོང་བ་མཐོང་ནས། །ཡ་མཚན་ཆེར་བཟུང་སྟེ། །སེམས་རྩུབ་པ་ལ་ཡུན་རིང་པོར་གོམས་པའི་དྲི་མས་ཆེར་གཡོགས་ཀྱང་། རབ་ཏུ་གུས་ཤིང་དང་བར་གྱུར་ནས་འདི་ལྟར་སེམས་པར་མངོན་ནོ། །ཨེ་མའོ་ངོ་མཚར་ཆེ་བས་ཆེ། དེ་བཞིན་རྨད་དུ་བྱུང་བས་རྨད། །རྒྱལ་པོ་འདི་ཡི་སེམས་རླབས་ནི། །ལྷ་དང་མི་ལས་རབ་ཏུ་འཕགས། །འཆི་བདག་མི་བཟད་བདག་ལ་ཡང་། །འཇིགས་སྐྲག་ཅུང་ཟད་ཙམ་ཡང་མེད། །འདི་ལྟར་བདག་རང་འདིར་འོངས་པས། ཨེ་མའོ་བདེན་སྨྲ་བརྟན་ལ་དགེ །འདི་ལྟར་བདེན་པ་བསྲུང་བའི་ཕྱིར། །སྲོག་དང་རྒྱལ་སྲིད་གང་གཏོང་བ། །བདེན་པར་སྨྲ་ཞེས་གྲགས་པ་དེ། །ཐོག་ཏུ་བབ་པར་རྣམ་པར་གྲགས། །དེ་ནས་བྱང་ཆུབ་སེམས་དཔའ་ལ་ཡ་མཚན་ཆེ་ཞིང་རབ་ཏུ་གུས་པར་གྱུར་ལ་སེམས་རབ་ཏུ་དང་བར་གྱུར་པ་དེའི་དྲུང་དུ་འོངས་ཏེ་སྨྲས་པ། ལེགས་པར་སྨྲས་པའི་ནོར་རྙེད་ཕོངས་པའང་མཆོད་པ་བྱས། ཁྱོད་ཀྱི་དྲིན་ལན་ཡིད་ཀྱང་དགའ་བར་འགྱུར། །བདག་ཀྱང་ད་ནི་འདིར་འོངས་ཇི་ལྟར་འདོད་པར་ཟོ། །ཡང་ན་མཆོད་སྦྱིན་ཕྱིར་ནི་ཕྱུགས་ཀྱི་བརཏལ་ཞུགས་བྱིན། །སུ་དཱ་སའི་བུས་སྨྲས་པ། །ང་ཡིས་ཁྱོད་ཟ་བའི་དུས་ནི་ད་ཅུང་ཡོད། །བསྲེག་པའི་གནས་ཀྱང་ད་ཅུང་དུད་པ་འཐུལ། །ཤ་ཡང་དུད་པ་མེད་པར་བསྲེགས་ན་ཞིམ། ལེགས་པར་སྨྲས་པ་དེ་དག་རེ་ཤིག་མཉན། །བྱང་ཆུབ་སེམས་དཔས་སྨྲས་པ། །ཁྱོད་འདི་ལྟར་གྱུར་པ་ལ་ལེགས་པར་སྨྲས་པ་མཉན་པས་ཅི་ཞིག་བྱ། སྐྱེ་དགུ་རྣམས་ལ་སྙིང་རྗེ་མེད་འགྱུར་བས། །ལྟོ་ཡི་ཕྱིར་ནི་གནས་སྐབས་འདི་འདྲ་རྙེད། །ཚིགས་བཅད་འདི་རྣམས་ཆོས་ཉིད་འབའ་ཞིག་སྨྲ། །ཆོས་དང་ཆོས་མིན་དེ་བས་མི་མཐུན་ནོ། །སྲིན་པོ་བས་ཀྱང་སྤྱོད་ཚུལ་ངན། །འཕགས་པའམ་ལམ་ནི་རབ་ཏུ་སྤངས། བདེན་པའང་མེད་ན་ཆོས་ཅི་སྨོས། །ཐོས་པས་ཁྱོད་ལ་ཅི་ཞིག་བྱ། །དེ་ནས་སུ་དཱ་སའི་བུ་སྤྱོས་པ་དེས་མ་དགའ་ནས་སླར་སྨྲས་པ། ཁྱོད་ཅུང་ཞིག་སྡོད་ཅིག །རྒྱལ་པོ་གང་ཞིག་མཚོན་ཆ་གཟས་ནས་རྩེད་མོའི་ཕྱིར། །ནགས་ཚལ་རི་དྭགས་སྡུ་གུ་མ་བསད་ཡོད་པ་སྨྲོས། །དེ་བཞིན་འཚོ་བའི་ཕྱིར་ཡང་གལ་ཏེ་མི་བསད་ན། །དེ་ཡི་ཆོས་འགལ་ཟེར་ལ་རི་དྭགས་བསོད་པ་མིན། །བྱང་ཆུབ་སེམས་དཔས་སྨྲས་པ། གང་དག་རི་དྭགས་འབྲོས་པ་སྙགས་ཤིང་གཞུ་བརྡུངས་པ། །དེ་དག་ཀུན་ཀྱང་ཆོས་ལ་གནས་པ་མ་ཡིན་ཏེ། མི་ཤ་ཟ་བ་དེ་དག་པས་ཀྱང་རབ་ཏུ་སྨད། །མི་རྣམས་རིགས་ཀྱིས་མཐོ་བ་ཡིན་པས་བཟར་མི་རུང་། །དེ་ནས་སུ་དཱ་སའི་བུ་བྱང་ཆུབ་སེམས་པས་ཚིག་རྩུབ་པོས་སྤྱོས་ཀྱང་དེའི་བྱམས་པའི་ཡོན་ཏན་ཡི་མཐུས་ཁྲོ་བའི་རང་བཞིན་ཟིལ་གྱིས་ནོན་ནས། དེའི་ཚིག་རྣར་འོང་བ་བཞིན་དུ་འཛུམ་དམུལ་ནས་སྨྲས་པ། ང་ཡིས་ཁྱོད་བཏང་ཁྱིམ་དུ་ཕྱིན་ནས་ནི། །རྒྱལ་པོའི་ལོངས་སྤྱོད་དགའ་བ་ཐམས་ཅད་མྱོང་། འོན་ཀྱང་ང་ཡི་དྲུང་དུ་ཁྱོད་འོང་བ། །དེ་བས་ཁྱོད་ནི་གཞུང་ལུགས་ཚུལ་མི་མཁས། །བྱང་ཆུབ་སེམས་དཔས་སྨྲས་པ། དེ་ལྟ་མ་ཡིན་ནོ། །ཚུལ་འདི་སྤྱོད་པར་མི་འདོད་པའི་ཕྱིར་ང་ཉིད་གཞུང་ལུགས་ཀྱི་ཚུལ་ལ་མཁས་སོ། །དེ་ལ་སྤྱོད་པར་གྱུར་ན་ནི། །ཆོས་ཀྱི་གཟི་བྱིན་རབ་ཏུ་ཆེ། འཕྲལ་གྱི་བདེ་བ་རབ་གྲུབ་པ། དེ་ལས་མཁས་པ་སུ་ཞིག་ཡོད། གཞན་ཡང་། གཞུང་ལུགས་ཚུལ་སྤྱོད་བརྟན་པ་གང་ཡིན་པ། དེ་དག་ཕལ་ཆེར་ཤི་ནས་ངན་སོང་ལྟུང་། །དེ་བས་གཞུང་ལུགས་ཚུལ་ངན་ལམ་སྤངས་ནས། །བདེན་པའི་ཚིག་བསྲུང་སླར་ནི་འདིར་འོངས་སོ། །རྫུན་སྨྲ་བཏང་ནས་བདེན་པ་ངས་སྨྲས་སྟེ། །དེ་བས་གཞུང་ལུགས་མཁས་པ་ང་ཉིད་ཡིན། །གྲགས་དང་བདེ་བའི་དོན་དང་འགལ་བ་གང་། །དེ་ནི་གཞུང་བཟང་མིན་ཞེས་དེ་མཁས་སྨྲ། །སུ་དཱ་སའི་བུས་སྨྲས་པ། །ཕངས་པའི་སྲོག་དང་ནང་མི་མཆི་མས་འཇུ་བ་དང་། །རྒྱལ་སྲིད་བདེ་བ་ཡིད་དུ་འོང་བ་བོར་ནས་ནི། །བདེན་པའི་ཚིག་ལ་དོན་དུ་འགྱུར་བ་ཅི་མཐོང་ན། །དེ་བསྲུང་ཕྱིར་ནི་འདི་ལྟར་ང་ཡི་དྲུང་དུ་འོངས། །བྱང་ཆུབ་སེམས་དཔས་སྨྲས་པ། །བདེན་པའི་ཡོན་ཏན་ལ་གནས་ན་ཡོན་ཏན་ཁྱད་པར་ཅན་མང་དུ་ཡོད་ཀྱིས། མདོ་ཙམ་ཞིག་ཉོན་ཞིག །ཕྲེང་བ་མཛེས་པའི་རྒྱན་བས་ཁྱད་པར་འཕགས། རོ་རྣམས་ཀུན་ལས་ཞིམ་པས་ཁྱད་པར་འཕགས། དཀའ་ཐུབ་སྤྱོད་དང་མུ་སྟེགས་འགྲོ་བ་ཡིས། །ཉོན་མོངས་མེད་པར་བསོད་ནམས་ཡོན་ཏན་འགྲུབ། །འགྲོ་བ་མཐའ་དག་ཁྱབ་པའི་གྲགས་པ་འཕེལ། །བདེན་པ་འཇིག་རྟེན་གསུམ་ལས་འདའ་བའི་ལམ། །ལྷ་ཡི་གནས་སུ་འཇུག་པའི་སྒོ་ཡང་ཡིན། འཁོར་བའི་རྫོང་ལས་ཐར་བའི་ཟམ་པ་ཡིན། །དེ་ནས་སུ་དཱ་སའི་བུས་དེ་ལ་ལེགས་སོ་རིགས་སོ་ཞེས་བསྟོད་ནས། ཡ་མཚན་དང་བཅས་པར་ལྟ་ཞིང་ཡང་སྨྲས་པ། །མི་རྣམས་གཞན་ནི་ང་ཡི་དབང་གྱུར་ན། །བརྟན་པ་ཉམས་ནས་སྐྲག་ཅིང་སྤ་ཡང་གོང་། ཁྱོད་ནི་དཔའ་བརྟན་དཔལ་གྱི་མ་བཏང་བས། །མི་དབང་ཁྱོད་ནི་འཆི་བའི་འཇིགས་མེད་འདྲ །བྱང་ཆུབ་སེམས་དཔས་སྨྲས་པ། རབ་ཏུ་བསྒྲིམས་ཀྱང་གནས་མི་ནུས། །གང་ལ་བཅོས་སུ་མི་རུང་བ། །འཇིགས་ཤིང་བརྡར་བར་བྱས་པ་ཡིས། །དེ་ལ་ཅི་ཞིག་ཕན་པ་ཡོད། །དེ་ལྟར་འཇིག་རྟེན་ཆོས་ཉིད་ལ་བརྟགས་ན། །མི་རྣམས་སྡིག་པ་བྱས་པས་རྗེས་སུ་འགྱོད་པར་འགྱུར། །དགེ་བའི་ལས་ཀྱང་ལེགས་པར་ཡོང་མ་བྱས། །ཕྱི་མའི་ཚེ་ལ་སྡུག་བསྔལ་འབྱུང་དུ་དོགས། །འཆི་བར་འགྱུར་བའི་འཇིགས་པས་རྨོངས་པར་འགྱུར། །གང་ལ་བདག་གི་ཡིད་ནི་འགྱོད་འགྱུར་བ། །དེ་ཉིད་བདག་གིས་བྱས་པར་ཡོང་མི་དྲན། །དཀར་པོའི་ལས་ཀྱང་རབ་ཏུ་གོམས་པར་བྱས། །ཆོས་ལ་གནས་ན་འཆི་བས་སུ་ཞིག་འཇིགས། །ཕོངས་པ་རྣམས་ནི་སློང་དུ་འོངས་པ་ལ། །མགུ་བར་མ་བྱས་བདག་ནི་ཡོང་མི་དྲན། །དེ་ལྟར་སྦྱིན་པས་མགུ་བ་རྙེད་གྱུར་ལ། །ཆོས་ལ་གནས་ན་འཆི་བས་སུ་ཞིག་འཇིགས། །རིང་དུ་བརྟགས་ཏེ་བསམས་ཀྱང་སྡིག་བྱ་བར། །ཡིད་ལ་བསམས་པ་ཙམ་ཡང་ཡོང་མི་དྲན། །བདག་གིས་དེ་ལྟར་མཐོ་རིས་ལམ་སྦྱངས་ན། །འཆི་བས་ཅི་ཕྱིར་བདག་ནི་འཇིགས་པར་འགྱུར། །བྲམ་ཟེ་རྣམས་དང་གཉེན་དང་མཛའ་བོ་རྟེན་པ་དང་། །གནས་ཀྱི་རྒྱན་འགྱུར་དཀའ་ཐུབ་ཅན་དང་ཕོངས་པ་ལ། །ཅི་རིགས་བྱིན་པས་བདག་གི་ནོར་ཡང་མང་དུ་བཞག །རང་གི་བྱ་བ་ཅི་ཡོད་དེ་ཡང་བདག་གིས་བྱས། །གྲགས་པའི་གཞིར་གྱུར་དཔལ་དང་ལྡན་པ་བརྒྱ་དག་བརྩིགས། །དཀའ་ཐུབ་གནས་དང་འདུན་ས་བཏུང་བའི་གནས་རྣམས་བྱས། །དེ་བྱས་དགའ་བར་གྱུར་པས་འཆི་བས་ང་མི་འཇིགས། །དེ་བས་ང་ནི་མཆོད་སྦྱིན་བྱའམ་ཡང་ན་ཟོ། །དེ་སྐད་སྨྲས་པ་དང་། །སུ་དཱ་སའི་བུས་ཐོས་ནས་དད་པ་སྐྱེས་ཏེ་མིག་ནི་མཆི་མས་གང་། །ལུས་ཀྱི་བ་སྤུ་ནི་ལངས། །སྡིག་པ་ཅན་གྱི་རང་བཞིན་མུན་ནག་ནི་བརྗེད་པར་གྱུར་ནས། །བྱང་ཆུབ་སེམས་དཔའ་ལ་གུས་པར་བལྟས་ཏེ་སྨྲས་པ། སྡིག་པ་ཞི་བར་གྱུར་ཅིག །རྒྱལ་མཆོག་ཁྱོད་ལྟ་བུ་ལ་སུ་ཞིག་ཤེས་བཞིན་དུ། །སྡིག་པ་བྱེད་པ་དེ་ནི་མི་བཟད་དུག་འཐུང་ཞིག །ཡང་ན་མྱུར་བའི་དུག་འཐུང་ལྕགས་བསྲེགས་འབར་བ་ཟོ། །སྙིང་དང་སྤྱི་བོ་ཚལ་པ་བརྒྱར་ཡང་འགས་པར་འགྱུར། །ལེགས་པར་སྨྲས་པ་དེ་དག་ཀྱང་བདག་ལ་ཁྱོད་ཀྱིས་བཤད་དུ་གསོལ། །ཁྱོད་ཀྱིས་ཚིག་སྙན་པའི་མེ་ཏོག་ཆར་བཞིན་དུ་ཕབ་པ་དེས་བདག་གི་སེམས་རབ་ཏུ་དང་བར་གྱུར་པས། ལེགས་པར་སྨྲས་པ་དེ་དག་རབ་ཏུ་ཉན་འཚལ་བར་གྱུར་ཏོ། །ཀྱེ་གཞན་ཡང་། བདག་གི་སྤྱོད་པ་ངན་པའི་གཟུགས། །ཆོས་ཀྱི་མེ་ལོང་གསལ་མཐོང་ནས། །ཡིད་ལ་གདུང་བ་རབ་སྐྱེས་ཏེ། བདག་ནི་ཆོས་ལ་ཕྱོགས་པར་གྱུར། །དེ་ནས་བྱང་ཆུབ་སེམས་དཔས་དེའི་བསམ་པ་སྣོད་དུ་གྱུར་ཅིང་ཆོས་མཉན་པ་ལའང་ཡིད་རབ་ཏུ་འདུན་པར་རིག་ནས་སྨྲས་པ། འོ་ན་ཆོས་འདོད་པས་དེ་དང་རྗེས་སུ་མཐུན་པའི་སྤྱོད་པ་ལ་མཁས་པར་བྱ་སྟེ་ཆོས་མཉན་པའི་རིགས་སོ། །ལྟོས་ཤིག །རབ་ཏུ་དམའ་བའི་སྟན་ལ་འདུག །དུལ་བའི་དཔལ་ནི་རྣམ་པར་སྐྱེད། །དགའ་དང་ལྡན་པའི་མིག་གིས་བལྟ། །ཚིག་གི་བདུད་རྩི་འཐུང་བ་བཞིན། །གུས་པ་སྐྱེད་ཅིང་རྩེ་གཅིག་བཏུད། །རབ་ཏུ་དང་ལ་དྲི་མེད་ཡིད། །ནད་པས་སྨན་པའི་ཚིག་མཉན་བཞིན། །རིམ་གྲོ་བསྐྱེད་དེ་ཆོས་ཉོན་ཅིག །དེ་ནས་སུ་དཱ་སའི་བུས་རྡོ་ལེབ་མཐོན་པོ་ཞིག་གི་སྟེང་དུ་བདག་གི་སྟོད་གཡོགས་བཏིང་སྟེ། དེ་ལ་བྱང་ཆུབ་སེམས་དཔའ་བཞག་ནས། བདག་རང་ཡང་བར་གཞན་གྱིས་མཆོད་པའི་ས་ལ། བྱང་ཆུབ་སེམས་དཔའི་མདུན་དུ་འདུག་སྟེ། དེའི་གདོང་དུ་བལྟས་ནས། སེམས་དཔའ་ཆེན་པོ་དེ་ལ་འཕགས་པ་ད་གསུངས་ཤིག་ཅེས་སྨྲས་སོ། །དེ་ནས་བྱང་ཆུབ་སེམས་དཔས་དབྱར་གྱི་འབྲུག་སྒྲ་སྙན་ཅིང་ཟབ་པ་དང་འདྲ་བའི་ཚིག་གིས། ནགས་ཚལ་དེ་གང་བར་གྱུར་པ་བཞིན་དུ་ཀུན་དུ་ཁྱབ་པར་སྨྲས་པ། །དམ་པ་དག་དང་ལན་ཅིག་ཙམ། །ཇི་ལྟར་འདོད་པར་ཕྲད་ཀྱང་རུང་། འདྲིས་པར་བྱ་བ་མི་དགོས་པར། །རབ་ཏུ་བརྟན་པ་ཉིད་དུ་འགྱུར། །སུ་དཱ་སའི་བུས་དེ་སྐད་ཐོས་ནས། །ལེགས་སོ་ལེགས་སོ་ཞེས་སྨྲས་ཏེ། མགོ་བསྒྱུར་ཏེ་སེ་གོལ་གཏོགས་ནས་མགུ་བ་བྱས་ཏེ། བྱང་ཆུབ་སེམས་དཔའ་ལ་དེ་ནས་ཡང་གསུངས་ཤིག་ཅེས་སྨྲས་སོ། །དེ་ནས་བྱང་ཆུབ་སེམས་དཔས་ཚིགས་སུ་བཅད་པ་གཉིས་པ་སྨྲས་པ། དམ་པ་རྣམས་ནི་སུས་ཀྱང་མི་བསྲང་ངོ་། །དུལ་བའི་ཚུལ་གྱིས་དགེ་བ་བསྟེན་པར་བྱ། །དེ་དང་ཉེ་ན་དེ་ཡི་ཡོན་ཏན་རྡུལ། །ཆེད་དུ་མ་བསྒྲུབས་བར་ཡང་གོས་པར་འགྱུར། །སུ་དཱ་སའི་བུས་སྨྲས་པ། དགེ་བ་རྣམས་ཀྱིས་ལེགས་སྨྲས་པ། །ཁྱོད་ཀྱིས་རྣམ་པ་ཀུན་མཆོད་པ། །ནོར་ཡང་གནས་སུ་སྦྱིན་པར་བཏང་། །འབད་དེ་དོན་བསྒྲུབ་ཐོག་ཏུ་བབ། །དེ་ནས་ཡང་ཅུང་ཞིག་གསུངས་ཤིག །བྱང་ཆུབ་སེམས་དཔས་སྨྲས་པ། །རྒྱལ་པོའི་ཤིང་རྟ་རིན་ཆེན་གསེར་གྱིས་བརྒྱན། །ལུས་ཀྱང་རྒས་པས་མི་སྡུག་བར་ཡང་འགྱུར། །དམ་པ་རྣམས་ཀྱི་ཆོས་ནི་རྒས་མི་འགྱུར། །དགེ་བ་རྣམས་ནི་ཡོན་ཏན་རྗེས་ཆགས་བརྟན། །སུ་དཱ་སའི་བུས་སྨྲས་པ། །ཨེ་མ་འོ་བདག་ནི་བདུད་རྩིའི་ཆར་ཕབ་པས་ངོམས་པར་བགྱིས་པའོ། །དེ་ནས་ཡང་ཅུང་ཞིག་གསུངས་ཤིག །བྱང་ཆུབ་སེམས་དཔས་སྨྲས་པ། །ནམ་མཁའ་དང་ནི་ས་གཞིའི་བར་ཡང་རིང་། །རྒྱ་མཚོའི་ཕ་རོལ་ཚུར་རོལ་འགྲམ་ཡང་རིང་། །ཤར་ནུབ་གཉིས་ཀྱི་རི་བར་དེ་བས་རིང་། །ཕལ་དང་དམ་པའི་ཆོས་ཀྱང་དེ་བས་རིང་། །དེ་ནས་སུ་དཱ་སའི་བུ་ཡ་མཚན་ཆེ་ཞིང་དད་པས་དགའ་ཞིང་གུས་པར་གྱུར་ནས། བྱང་ཆུབ་སེམས་དཔའ་ལ་སྨྲས་པ། ཁྱོད་ཀྱི་ཚིགས་སུ་བཅད་པ་སྙན་པ་དང་། །ཚིག་དང་དོན་ཀྱང་རབ་ཏུ་གསལ་ལ་འཕགས། །དེ་ཐོས་དགར་གྱུར་དེ་ལ་མཆོད་པའི་ཕྱིར། །དམ་པ་བཞི་ཞིག་ཁྱོད་ལ་འབུལ་བར་འཚལ། དེ་བས་ན་ཅི་བཞེད་པ་བདག་ལ་བསླང་དུ་གསོལ། དེ་ནས་དེ་ལ་བྱང་ཆུབ་སེམས་དཔའ་ཡ་མཚན་དུ་གྱུར་ནས་སྨྲས་པ། བདག་ལའང་རང་དབང་མེད་པར་གྱུར་པ་ཁྱོད། །མི་རིགས་བྱེད་ལ་དགའ་བས་ཕམ་པར་གྱུར། །དགེ་བ་སྤྱོད་ལས་རང་བཞིན་ཕྱིན་ཅི་ལོག །ཁྱོད་ཀྱིས་ཇི་ལྟར་གཞན་ལ་དམ་པ་སྦྱིན། །བདག་གིས་དམ་པ་སྦྱིན་ཞེས་གལ་ཏེ་བླངས་གྱུར་ན། །ཁྱོད་ཀྱི་ཡིད་ཀྱང་སྦྱིན་པར་སྤྲོ་མི་འགྱུར། །སྐྱོན་དང་བཅས་པ་ཁྲེལ་ཡོངས་སུ་ཞིག་སྨྲ། དེ་སྐད་རེ་ཤིག་དེ་ལ་མ་སྨྲ་ཞིག །དེ་ནས་སུ་དཱ་སའི་བུ་ཅུང་ཞིག་ངོ་ཚ་བར་གྱུར་ཏེ་མགོ་སྨད་ནས་བྱང་ཆུབ་སེམས་དཔའ་ལ་སྨྲས་པ། ཁྱོད་དེ་ལྟར་བདག་ལ་དོགས་པ་མ་སྐྱེ་ཞིག །བདག་གི་སྲོག་ཀྱང་ཡོངས་བཏང་ནས། དམ་པ་དེ་རྣམས་བདག་འབུལ་གྱི། །རྒྱལ་པོ་ཅི་དང་ཅི་བཞེད་པ། བག་ཕབ་ནས་ནི་དེ་སློངས་ཤིག །བྱང་ཆུབ་སེམས་དཔས་སྨྲས་པ། འོ་ན། བདེན་པའི་བརཏལ་ཞུགས་ལོང་ལ་སེམས་ཅན་གསོད་པ་སྤོངས། །སྐྱེ་བོ་བཙོན་དུ་བཟུང་བ་འདི་རྣམས་མ་ལུས་ཐོང་། དཔའ་བོ་ཁྱོད་ཀྱིས་མི་ཤ་ཟ་བ་རབ་ཏུ་སྤོངས། །དམ་པའི་ནང་ན་མཆོག་གྱུར་འདི་བཞི་བྱིན་པར་གྱིས། །སུ་དཱ་སའི་བུས་སྨྲས་པ། དམ་པ་སྔ་མ་གསུམ་ནི་ཁྱོད་ལ་འབུལ། །དམ་པ་བཞི་པ་གཞན་ཞིག་བླང་དུ་གསོལ། །བདག་ནི་མི་ཤ་ཟ་མིན་མི་ནུས་པར། སྔ་ནས་ཁྱོད་ཉིད་མཁྱེན་པར་མ་གྱུར་ཏམ། །བྱང་ཆུབ་སེམས་དཔས་སྨྲས་པ། ད་ཁྱོད་ཀྱི་དམ་པ་སྦྱིན་པར་ག་ལ་ནུས་ཞེས་ངས་མ་བྱས་སམ། ཨེ་མའོ་དེ་ལྟར་ང་ཟེར་བ་ཁོ་ན་བཞིན་དུ་གྱུར་ཏེ། ཀྱེ་གཞན་ཡང་ཁྱོད་ཉོན་ཅིག །མི་ཤ་ཟ་བ་མ་བཏང་ན། ཇི་ལྟར་བདེན་པར་སྨྲ་བར་འགྱུར། །རྒྱལ་པོ་ཁྱོད་ཀྱིས་སྲོག་ཆགས་རྣམས། །མི་གསོད་པར་ཡང་ག་ལ་ནུས། །བདག་གི་སྲོག་ཀྱང་ཡོང་སྤངས་ནས། །དམ་པ་འདི་རྣམས་སྦྱིན་ནོ་ཞེས། །ཐོག་མར་དེ་སྐད་མ་སྨྲས་སམ། །དེ་བས་འདི་ལྟར་གཞན་དུ་གྱུར། །ཤ་ཡི་ཕྱིར་ནི་མི་བསད་ན། །སྲོག་ཆགས་མི་གསོད་ག་ལ་འགྱུར། །དེ་ལྟར་གྱུར་ན་དམ་པ་གསུམ། །ཁྱོད་ཀྱིས་ཇི་ལྟར་བྱིན་པར་འགྱུར། །སུ་དཱ་སའི་བུས་སྨྲས་པ། གང་གི་ཕྱིར་ནི་རྒྱལ་སྲིད་ཉམས། །ནགས་ཚལ་སྡུག་བསྔལ་བདག་གིས་མྱོང་། །ཆོས་ལས་ཉམས་ཤིང་གཏམ་ངན་ཐོབ། །བདག་གིས་དེ་ནི་ཇི་ལྟར་བཏང་། །བྱང་ཆུབ་སེམས་དཔས་སྨྲས་པ། དེ་བས་ན་ཁྱོད་ཀྱིས་དེ་བཏང་བ་རིགས་མོད། །གང་ཕྱིར་ཁྱོད་ནི་ཆོས་དང་སྲིད། །བདེ་དང་གྲགས་པ་ཉམས་པར་འགྱུར། །ཕུང་བར་གྱུར་པའི་འབྱུང་གནས་དེ། ཇི་ལྟར་བཏང་བར་མི་རིགས་ཀྱི། །ཕྱིས་ནས་འགྱོད་པ་སྐྱེ་བ་དེ། །སྐྱེ་བོ་སེམས་རྒྱ་ཆུང་ངུ་ལ། །སྲིད་པར་འགྱུར་བའི་འོས་ཡིན་ནོ། །དེ་ཡིས་ཁྱོད་ཀྱང་ཟིལ་ནོན་ཏམ། །དེ་བས་ན་ཁྱོད་སྡིག་པའི་རྗེས་སུ་འབྲང་བ་ཐོང་ལ་བདག་ཉིད་ཤེས་པར་བྱ་བའི་ཕྱིར་རིགས་སོ། །ཁྱོད་ཉིད་སུ་དཱ་སའི་བུ་ཉིད་མ་ཡིན་ནམ། སྨན་པ་མཁས་པས་བརྟགས་ཏེ་ལེགས་པར་སྦྱར་བའི་ཤ། །གྲོང་དང་དགོན་པ་སྐམ་གཤེར་ཆུ་དང་ཐང་ལས་སྐྱེས། །དེ་ལྟའི་ཤ་རྣམས་ཡོད་ཀྱིས་དེ་ཡིས་སེམས་མགུ་བྱོས། །མི་ཤ་སྨད་པར་འགྱུར་བ་བཏང་ན་རབ་ཏུ་ལེགས། །རྔ་སྒྲ་སྙན་པ་དབྱར་གྱི་འབྲུག་སྒྲ་བཞིན་དུ་སྒྲོགས། །གླུ་སྒྲ་སྙན་དང་རྒྱལ་སྲིད་བདེ་བ་དེ་དང་དེ། གཉེན་དང་བུ་དང་ནང་མི་ཡིད་དུ་འོང་བ་རྣམས། །བོར་ནས་ནགས་ཚལ་དབེན་པ་འདི་ནི་ཅི་ཞིག་དགའ། །རྒྱལ་པོ་སེམས་ཀྱང་དབང་དུ་འགྲོ་བར་མི་རིགས་ཀྱི། །ཆོས་དང་སྲིད་ལ་མི་གནོད་ལམ་དུ་འཇུག་པའི་རིགས། །རྒྱལ་པོ་གཅིག་པུས་གཡུལ་ངོར་དམག་གི་དཔུང་ལས་རྒྱལ། །སེམས་ཙམ་ཚར་བཅད་ཕྱིར་ནི་སྔར་མ་མ་བྱེད་ཅིག །མི་ཡི་བདག་པོ་འཇིག་རྟེན་ཕྱི་མའང་ལྟ་བའི་རིགས། །དེ་བས་དགའ་ཡང་ཕན་པ་མ་ཡིན་བསྟེན་མི་རིགས། །ལམ་གང་ཡིད་དུ་འོང་ལ་གྲགས་དང་མི་འགལ་བ། །ངེས་ན་མི་དགའ་བ་ཡང་སྨན་བཏུང་བཞིན་དུ་བསྟེན་པའི་རིགས། །དེ་ནས་སུ་དཱ་སའི་བུ་རབ་ཏུ་དང་བར་གྱུར་པས་མིག་ནི་མཆི་མས་གང་། སྐད་འཛེར་བཞིན་དུ་བྱང་ཆུབ་སེམས་དཔའི་དྲུང་དུ་འོངས་ཏེ། རྐང་པ་གཉིས་ལ་འཇུས་ནས་སྨྲས་པ། ཡོན་ཏན་མེ་ཏོག་ཕྱེ་མ་བསོད་ནམས་དྲི་ཞིམ་དང་། ཁྱོད་ཀྱི་གྲགས་པའི་རྒྱུ་ཡིས་འགྲོ་བ་འདི་དག་ཁྱབ། འདི་ལྟར་སྡིག་སྤྱོད་འཆི་བདག་ཕོ་ཉར་བདག་འགྱུར་ལ། ཁྱོད་ལྕར་ཐུགས་རྗེ་ཆེ་བ་གཞན་ནི་སུ་ཞིག་མཆིས། །ཁྱོད་ནི་བདག་གི་སྟོན་པ་བླ་མ་ལྷ་ཉིད་ལགས། །ཁྱོད་ཀྱིས་བསྒོ་བ་འདི་རྣམས་བདག་གིས་སྤྱི་བོས་མཆོད། ད་ནི་ཕྱིན་ཆད་བདག་ནི་མི་ཤ་ཡོང་མི་འཚལ། །བདག་ལ་ཇི་སྐད་བཀའ་སྩལ་དེ་དག་དེ་བཞིན་བགྱི། །མཆོད་སྦྱིན་ཕྱིར་ནི་རྒྱལ་པོའི་བུ་ཕྲོགས་པ། །བདག་གིས་བཙོན་རར་སྩལ་བས་མི་དགའ་ཞིང་། །བཞིན་མདངས་ཉམས་ལ་མྱ་ངན་གདུངས་པའི་ཡིད། །དེ་དག་ཀུན་ཀྱང་བཏང་གིས་ལྷན་ཅིག་བཞུད། །དེ་ནས་བྱང་ཆུབ་སེམས་དཔས་དེ་བཞིན་དུ་བྱའོ་ཞེས། །དེས་སྨྲས་པ་བཞིན་དུ་ཉན་ནས། རྒྱལ་པོའི་བུ་བཙོན་དུ་བཟུང་བ་གང་ན་འཁོད་པ་དེར་སོང་ངོ་། །རྒྱལ་པོའི་བུ་དེ་རྣམས་ཀྱིས་བུ་ཟླ་བ་མཐོང་ནས་བལྟས་སོ། །བདག་ཅག་ནི་ད་ཐར་རོ་སྙམ་ནས་རབ་ཏུ་དགའ་བར་བྱས་ཏེ། །རྒྱལ་བུ་དེ་དག་ཟླ་བ་མཐོང་ནས་ནི། །རབ་ཏུ་འཛུམ་དམུལ་མདངས་གསལ་རྣམ་པར་མཛེས། སྟོན་ཀའི་དུས་ཀྱི་ཟླ་བའི་འོད་ཟེར་གྱིས། །མེ་ཏོག་ཀུ་མུད་ཁ་ཕྱེ་མཚོ་གསལ་བཞིན། །དེ་ནས་བྱང་ཆུབ་སེམས་དཔའ་དེ་དག་གི་དྲུང་དུ་འོངས་ནས་དབུགས་ཕྱུང་ཚིག་སྙན་པས་དགའ་བར་བྱས་ཏེ། རྒྱལ་བུ་དེ་རྣམས་སུ་དཱ་སའི་བུ་ལ་གནོད་པ་མི་བྱེད་པར་མནའ་བསྒགས་ནས་བཙོན་ར་ནས་ཕྱུང་སྟེ་སུ་དཱ་སའི་བུ་དང་རྒྱལ་བུ་དེ་དག་གིས་བསྐྱལ་ཏེ། རང་གི་རྒྱལ་སྲིད་ལ་གནས་ནས། རྒྱལ་བུ་དེ་དག་དང་སུ་དཱ་སའི་བུ་ལ། ཇི་ལྟར་རིགས་པར་རིམ་གྲོ་བྱ་སྟེ། སོ་སོའི་རྒྱལ་སྲིད་ལ་བཀོད་དོ། །དེ་ལྟ་བས་ན་སྐྱེ་བོ་དམ་པ་རྣམས་དང་ཕྲད་ནི་ཇི་ལྟར་བྱས་ཀྱང་རུང་སྟེ། །ལེགས་པ་འགྱུར་བའི་ཕྱིར་ལེགས་པར་འདོད་པ་རྣམས་ཀྱིས་སྐྱེ་བོ་དམ་པ་རྣམས་ལ་བརྟེན་པར་བྱའོ། །སངས་རྒྱས་བཅོས་ལྡན་འདས་རྣམས་ནི་ཚེ་རབས་སྔ་མ་ལའང་མ་འདྲིས་པར་ཡང་བྱམས་ཤིང་ཕན་འདོགས་པ་ཡིན་ནོ། །ཞེས་དེ་བཞིན་གཤེགས་པའི་ཡོན་ཏན་བསྔགས་པ་ལའང་བརྗོད་པར་བྱའོ། །དེ་བཞིན་དུ་དམ་པའི་ཆོས་མཉན་ན་སྐྱོན་མེད་ཅིང་ཡོན་ཏན་དང་ལྡན་པར་འགྱུར་བའི་ཕྱིར་དམ་པའི་ཆོས་མཉན་པའི་ཡོན་ཏན་བསྔགས་པ་ལའང་བརྗོད་པར་བྱའོ། ཆོས་ཐོས་ན་དེ་ལྟར་ཕན་ཡོན་རྣམ་པ་དུ་མ་ཡོད་པའི་ཕྱིར། མང་དུ་ཐོས་པའི་ཡོན་ཏན་བསྔགས་བ་ལའང་བརྗོད་པར་བྱའོ། །བདེན་པའི་ཚིག་བསྲུངས་ན་དེ་ལྟར་སྐྱེ་བོ་དམ་པ་རྣམས་དགའ་ཞིང་བསོད་ནམས་དང་གྲགས་པའི་འབྱུང་གནས་སུ་འགྱུར་བའི་ཕྱིར་བདེན་པའི་ཚིག་བསྲུངས་བའི་ཡོན་ཏན་བསྔགས་པ་ལའང་བརྗོད་པར་བྱའོ། །སྐྱེས་བུ་དམ་པ་རྣམས་ནི་དེ་ལྟར་བདག་གི་སྲོག་དང་བདེ་བ་དང་དབང་ཕྱུག་ལའང་མི་ལྟ་བར་བདེན་པའི་ཚིགས་བསྲུང་ངོ་ཞེས་སྐྱེས་བུ་དམ་པའི་ཡོན་ཏན་བསྔགས་པ་ལའང་བརྗོད་བར་བྱའོ། །སྙིང་རྗེ་ཆེན་པོའི་ཡོན་ཏན་བསྔགས་པ་ལའང་བརྗོད་པར་བྱའོ། །སུ་དཱ་སའི་བུའི་སྐྱེས་པའི་རབས་ཏེ་སུམ་བཅུ་གཅིག་པའོ།། །།བམ་པོ་བཅུ་གཉིས་པ་སྟེ་ཐ་མ། །ཡིད་སྐྱོ་བར་གྱུར་པ་རྣམས་ལ་ནི་རྒྱལ་སྲིད་ཀྱི་དཔལ་ཡང་ལེགས་པའི་ལམ་ལ་སྒྲུབ་པ་དེ་མི་འགྱུར་བའི་ཕྱིར་སྐྱོ་བ་ལ་གོམས་པར་བྱའོ། །དེ་ཡང་འདི་ལྟར་བཅོམ་ལྡན་འདས་འདི་བྱང་ཆུབ་སེམས་དཔར་གྱུར་པའི་ཚེ། འཇིག་རྟེན་ན་ན་བ་དང་། རྒ་བ་དང་། འཆི་བ་དང་། སྡུག་པ་དང་བྲལ་བ་ལ་སོགས་པའི་སྡུག་བསྔལ་མང་པོ་བྱུང་བས་སྡུག་བསྔལ་བ་དང་། མགོན་མེད་པ་དང་། སྐྱབས་མེད་པ་དང་། དཔུང་གཉེན་མེད་པ་དག་མཐོང་ནས། སྙིང་རྗེས་བསྐུལ་སྟེ་དེ་དག་སྐྱབ་པར་སེམས་པ་རབ་ཏུ་དགེ་བའི་རང་བཞིན་ཅན་དེ། འཇིག་རྟེན་མི་མཐུན་པ་དང་། མ་ཤེས་པ་ལའང་ཕན་པ་དང་བདེ་བའི་ཁྱད་པར་དེ་དང་དེ་དག་བསྒྲུབ་ཅིང་རེ་ཤིག་ཅིག་རྒྱལ་པོའི་རིགས་འབངས་གློ་བ་ཉེ་བའི་བདེ་བ་དང་། འཁྲུལ་པ་མེད་པའི་དར་བ་ཕུན་སུམ་ཚོགས་པ་དང་། རྒྱལ་ཕྲན་དྲེགས་པ་རྣམས་ཕྱག་འཚལ་བས། །མངོན་པར་གྲགས་པར་གྱུར་ཅིང་། དབང་ཐང་ཆེ་བ་དུལ་བ་ལ་དགའ་བའི་རིགས་ཞིག་ཏུ་སྐྱེས་པར་གྱུར་ཏོ་ཞེས་གྲག་གོ །དེ་དང་པོ་སྐྱེས་པའི་ཚེ་ནའང་རྒྱལ་པོའི་རིགས་དེ་དང་ཕོ་བྲང་འཁོར་གྱི་མི་རྣམས་ཀྱང་བདེ་བ་དང་། སྡུག་བསྔལ་དང་བྲལ་བ་དེ་དང་མཚུངས་པར་གྱུར་པས་མངོན་པར་མཐོ་ཞིང་དར་བའི་དཔལ་ཆེན་པོ་དང་ལྡན་པར་གྱུར་ཏོ། །བྱིན་པ་ཐོབ་པས་བྲམ་ཟེ་མགུ་ཞིང་གཡེངས། འབངས་རྣམས་དྲེགས་ཤིང་ཆ་ལུགས་བཟང་པོས་ཕྱིར། །རྔ་སྒྲ་མང་པོའི་བྲག་ཆས་རི་ལུང་གང་། །ཀུན་དུ་དགའ་བའི་གར་ནི་རྒྱུན་མི་འཆད། །གླུ་སྒྲ་སྙན་དང་དགོད་སྒྲ་འབྲེལ་མ་འབྱུང་། །ཅིག་ལ་ཅིག་འཇུས་དགའ་བ་རྣམ་པར་འཕེལ། །གཏམ་སྙན་སྐྱེས་པ་བྱ་དགས་མགུ་བའི་མིས། །རྒྱལ་པོའི་མངོན་པར་མཐོ་བའི་ཤིས་པ་བརྗོད། །སྒོ་རྣམས་ཕྱེ་ཞིང་བཙོན་དུ་བཟུང་བ་མེད། སྲང་བ་བཞི་མདོ་རྒྱལ་མཚན་བཙུགས་པས་མཛེས། །མེ་ཏོག་ཕྱེ་མ་ཁུ་བས་ས་བཞི་བརྒྱན། དགའ་སྟོན་བཟང་པོས་གྲོང་ཁྱེར་ཉམས་དགར་གྱུར། །ཁང་བཟང་ཆེན་པོའི་སྟེང་ནས་གསེར་དང་གོས། །རྒྱན་ལ་སོགས་པ་ཆར་བཞིན་ཕབ་པ་ཡིས། །འཇིག་རྟེན་འདི་དག་དཔལ་གྱིས་ཁྱབ་པར་རྩོལ། །གང་གཱ་སྨྱོན་པ་དྲག་ཏུ་འབབ་པ་འདྲ། དེའི་ཚེའང་རྒྱལ་པོ་དེའི་བུ་བཙས་སོ་ཅོག་ནི་ཤི་བར་གྱུར་ཏོ། །དེ་ལྟར་གྱུར་པ་དེ་ཡང་མི་མ་ཡིན་པས་བྱས་པ་ཡིས་པར་བསམས་ནས། བུ་དེ་བསྲུང་བའི་ཕྱིར་བུ་བཙའ་བའི་ཁང་པ་ལྕགས་འབའ་ཞིག་ལས་བྱས་པ་བཟང་པོ་ནོར་བུ་དང་རྒྱན་གསེར་དངུལ་གྱི་རྒྱན་གྱིས་བརྒྱན་པ་ཞིག་ཏུ་བཞག་སྟེ། འབྱུང་པོའི་རིག་སྔགས་ཀྱི་ཆོ་ག་དང་རིག་བྱེད་ལས་བྱུང་བའི་རིམ་པས་བསྲུང་བའི་ཆོ་ག་དང་། བཀྲ་ཤིས་ཀྱི་དཔྱད་བཟང་པོས་བདེ་ལེགས་སུ་ནི་བྱས། །བཙས་པའི་ཆོ་ག་ལ་སོགས་པ་སྦྱང་པའི་ཆོ་ག་དང་། བསྐྱེད་པའི་ཆོ་ག་ཡང་བྱས་སོ། །སེམས་དཔའ་ཆེན་པོ་དེ་ཉིད་ཀྱང་སྙིང་སྟོབས་དང་ལྡན་པ་དང་། བསོད་ནམས་བསགས་པའི་མཐུ་དང་། །བསྲུངས་བ་ལེགས་པར་བྱས་པས། གདོན་རྣམས་ཀྱིས་མ་ཚུགས་སོ། །དེ་རིམས་ཀྱིས་བསྐྱེད་པའི་ཆོ་ག་གོ་རིམས་བཞིན་དུ་བྱས་ནས། སློབ་དཔོན་དང་བླ་མ་མང་དུ་ཐོས་པ་དང་། ཆོ་རིགས་བཙུན་པ་དང་། སྤྱོད་ཚུལ་བཟང་པོ་དང་། མཁས་པར་གྲགས་པ་དང་། བཀུར་སྟི་ཐོབ་པ་དང་། རབ་ཏུ་ཞི་བ་དང་། དུལ་བ་དང་། ཤེས་རབ་ཀྱི་ཡོན་ཏན་དང་ལྡན་པ་རྣམས་ལས། རིག་པའི་གནས་དུ་མ་ནི་ལོབས། ལང་ཚོའི་གཟི་མདངས་ནི་ཉིན་རེ་ཞིང་སྐྱེ་བས། ལུས་ནི་ཡོངས་སུ་རྫོགས་པར་གྱུར། །རང་བཞིན་གྱིས་དུལ་བ་ལ་དགའ་བས་ནང་གི་སྐྱེ་བ་དང་ཡོངས་ཀྱི་སྐྱེ་བོ་རྣམས་ནི་རབ་ཏུ་དགའ་བའི་གནས་སུ་གྱུར་ཏོ། །དམ་པ་རིང་ན་གནས་གྱུར་ཀྱང་། མ་འདྲིས་གཉེན་དུ་མ་འབྲེལ་བའི། །སྐྱེ་བོ་དགའ་བས་རྗེས་འབྲང་བ། །དེ་ཡི་རྒྱུ་ནི་ཡོན་ཏན་དཔལ། །འོད་ཟེར་རབ་ཏུ་གསལ་བ་ཡིས། །གནས་ནི་དགོད་པ་ལྟར་བྱེད་པའི། །སྟོན་ཀའི་ཟླ་བ་དེ་དང་ནི། །འཇིག་རྟེན་རྣམས་དང་ཅི་ཞིག་འབྲེལ། །དེ་ནས་སེམས་དཔའ་ཆེན་པོ་དེ། བསོད་ནམས་ཀྱི་མཐུ་ལས་བྱུང་བའི་བདེ་བ་ཆེན་པོ་ལྷའི་ལོངས་སྤྱོད་དང་འདྲ་བའི་ལོངས་སྤྱོད་ལ་ཉེ་བར་སྤྱོད་ཅིང་། ཕས་ཀྱང་བྱམས་ཤིང་རབ་ཏུ་བཀུར་སྟི་བྱས་ཏེ་ཡིད་བརྟན་ཞིང་བག་ཕེབས་ནས་རིམ་གྲོ་ཆེར་བྱས་པ་ལས། རེ་ཤིག་ཅིག་རང་གི་ཕོ་བྲང་དམ་པ་ནས་མེ་ཏོག་ཀུ་མུ་དའི་ལོངས་སྤྱོད་ཀྱི་དུས་ལ་བབ་སྟེ། རྒྱན་བཟང་པོ་དགའ་དགའ་ལྟར་འདུག་པ་ལ་ལྟར་འགྲོ་བར་ཕས་ཀྱང་གནང་སྟེ། ཤིང་རྟ་བཟང་པོ་གསེར་དང་ནོར་བུ་དང་དངུལ་གྱི་རྒྱན་བཟང་པོ་སྣ་ཚོགས་ཀྱིས་བརྒྱན་པ། བ་དན་དང་རྒྱལ་མཚན་ཁ་དོག་སྣ་ཚོགས་ཅན་རབ་ཏུ་གཡོ་བ་རྣམས་བཙུགས་པ། གསེར་གྱི་འཇིམ་བག་གིས་གཡོགས་པ། རྟ་དུལ་ཞིང་བདེ་བས་དྲངས་པ། ཁ་ལོ་སྒྱུར་བ་བཟོ་ཞིང་དེས་ལ་མཁས་ཤིང་གཙང་ལ་དུལ་ཞིང་བརྟན་པ་དང་ལྡན་པ། གཡོག་འཁོར་ཆ་ལུགས་བཟང་པོ་སྣ་ཚོགས་སུ་ཆས་པས་བསྐོར། །རྔ་སྒྲ་སྙན་པའི་རྔ་བརྡུང་པས་མདུན་དུ་དྲངས་པ་ལ་ཞོན་ཏེ། ཕོ་བྲང་མཆོག་དེ་ནས་རྒྱུ་ཞིང་སོང་སོང་བ་ལས། ཕོ་བྲང་འཁོར་གྱི་མི་རྣམས་རྒྱལ་བུ་དེ་ལ་ལྟ་བས་སེམས་ནི་གཡེངས། ངོ་མཚར་ཆེ་བས་མིག་རིག་རིག་བོར་ནི་ལྟ། བསྟོད་པས་དགའ་བར་བྱེད་ཅིང་ཐལ་མོ་སྦྱར་སྟེ་ཤིས་པ་བརྗོད་པའི་ཚིག་ནི་འདོན། །དགའ་སྟོན་གྱི་དགའ་བའི་ཆས་བཟང་པོ་ལ་ནི་ཞུགས་པ་རྣམས་ཀྱི་མཛེས་པ་མང་པོ་རྣམས་ལ་བརྟགས་ནས། སེམས་དགའ་བར་འགྱུར་བའི་སྐབས་སུ་བབ་ཀྱང་། ཚེ་རབས་སྔ་མ་ལ་སེམས་སྐྱོ་བ་ལ་གོམས་པར་བྱས་པའི་ཕྱིར་དྲན་པ་འདི་ལྟ་བུ་རྙེད་པར་གྱུར་ཏོ། །ཀྱེ་མའོ་འཇིག་རྟེན་ཉོན་མོངས་དག །གནས་པ་མི་བརྟན་མི་དགར་འགྱུར། །ཀུ་མུ་ད་ཡི་དཔལ་འདི་ཡང་། །དྲན་པར་བྱ་བ་ཉིད་དུ་འགྱུར། །འགྲོ་བ་འདི་ལྟ་བུར་ནི་འཁོར་བ་ལ། །སྐྱེ་བོ་འཇིགས་པ་མེད་པ་རེ་མཚར་ཀྱེ། །ལམ་རྣམས་ཐམས་ཅད་འཆི་བདག་ཉིད་ཀྱིས་བཀག །དོགས་པ་མེད་པར་རབ་ཏུ་དགག་ཞིང་སྤྱོད། །ན་དང་རྒ་དང་འཆི་བས་གནོད་བྱེད་དགྲ། །མཐུ་ཆེན་དགའ་ཏུ་མི་ནུས་ཡོད་བཞིན་ལ། །འཇིག་རྟེན་ཕ་རོལ་ཉམ་དང་ངེས་འགྲོ་ན། །སེམས་ཤེས་སུ་ཞིག་འདི་ལ་དགའ་བར་སེམས། །སྤྲིན་ཆེན་གློག་འགྱུར་གསེར་ཕྲེང་འདྲ་བ་དག །རྒྱ་མཚོ་ཆེན་པོ་རྣམས་ཀྱི་སྒྲ་ཡང་ཕྱུང་། །ཆར་ཆེན་འབབ་པའི་རྩོམ་པ་ཆེན་པོ་བྱས། །ཀུན་ནས་འདུས་ཀྱང་དེ་ནས་དེངས་པར་འགྱུར། འབབ་ཆུ་དྲག་པོའི་ཤུགས་ཀྱིས་ཤིང་རྣམས་ཀྱི། །རྩ་བ་འགྲམ་ན་རབ་ཏུ་ཟུག་པ་ཡང་། །རྩ་ནས་བཏོན་ཏེ་སླར་ཡང་ཆུ་དེ་ཉིད། འབྲེང་ཞིང་བྲི་ནས་མྱ་ངན་གདུངས་བ་བཞིན། །རླུང་གི་མཐུས་ཀྱང་རི་ཡི་རྩེ་མོ་བསྙིལ། །སྤྲིན་གྱི་ཚོགས་ཀྱང་དྲག་པོའི་ཤུགས་ཀྱིས་གཏོར། །རྒྱ་མཚོའི་ཆུ་ཡང་རྣམ་པར་དཀྲུགས་ཤིང་གློང་། །དེ་ལྟའི་རླུང་ཡང་རབ་ཏུ་ཞི་བར་འགྱུར། །མེ་ལྕེ་རབ་འབར་མེ་སྟག་འགྲོ་བ་ཡིས། །ནགས་ཚལ་མཛེས་དང་རྩྭ་རྣམས་ཀུན་བསྲེགས་ནས། དེ་འདྲའི་མེ་ཡང་རིམ་གྱིས་ཞི་གྱུར་ནས། །རབ་ཏུ་འབར་ཡང་དེ་ནས་མེད་པར་འགྱུར། །འདུས་པ་གང་ཞིག་འབྲེལ་བར་མ་གྱུར་ཡོད། །དར་བ་གང་ཞིག་རྒུད་པར་མ་གྱུར་ཡོད། །འགྲོ་བའི་རྒྱུད་ནི་རབ་ཏུ་གཡོ་བ་ལ། མ་བརྟགས་པར་ནི་སྐྱེ་བོ་དགའ་བར་འགྱུར། །བདག་ཉིད་ཆེན་པོ་དེ་སེམས་སྐྱོ་བས་དེ་ལྟར་བརྟགས་ནས་རབ་ཏུ་དགའ་བས་གཡེངས་བའི་ཡིད་ནི་སླར་ལོག །ཕོ་བྲང་དམ་པ་རྒྱན་གྱིས་བརྒྱན་པ་དགའ་དགའ་ལྟར་འདུག་པ་དང་། མི་མང་པོ་སྣ་ཚོགས་ཆས་པ་འདུས་པ་རྣམས་ལའང་སེམས་མ་ཆགས་པར་སླར་བཟློག་སྟེ། མཐར་གྱིས་རང་གི་གནས་སུ་ཕྱིན་ནས། བདག་རང་ལ་འདི་ལྟར་རྟོག་གོ །ལོངས་སྤྱོད་ཀྱི་བདེ་བ་ལ་སེམས་རབ་ཏུ་སྐྱོ་བར་གྱུར་ཏེ། མ་ཆགས་ནས་ཆོས་འབའ་ཞིག་སྐྱབས་སུ་རུང་ངོ་སྙམ་ནས་དེ་བསྒྲུབ་པར་ངེས་པར་བསམས་ཏེ། སྐབས་ཤིག་ཏུ་རྒྱལ་པོའི་དྲུང་དུ་སོང་ནས། །དཀའ་ཐུབ་ཀྱི་ནགས་ཚལ་དུ་འགྲོ་བར་ཐལ་མོ་སྦྱར་ཏེ་གསོལ་བ་བཏབ་པ། །རབ་ཏུ་བྱུང་ལ་བརྟེན་ནས་སུ། །བདག་ལ་ཕན་པ་བགྱི་བར་འཚལ། །ཁྱེད་ཀྱིས་ཐུགས་བག་མཛད་ནས་སུ། །གསོལ་བ་དེ་ཡང་གནང་བར་མཛོད། །རྒྱལ་པོ་བུ་ལ་བྱམས་པ་དེས་དེ་སྐད་དུ་ཟེར་བ་ཐོས་ནས། །གླང་པོ་ཆེ་མདའ་དུག་ཅན་གྱིས་ཚབས་ཆེར་ཕོག་པ་དང་། རྒྱ་མཚོ་རབ་ཏུ་ཟབ་པ་རླུང་གིས་གློངས་པ་བཞིན་དུ། །དེ་མྱ་ངན་གྱིས་སེམས་གདུངས་ནས་འཁམས་ཏེ་འདར་བར་གྱུར་ཏོ། །དེ་ནས་རྒྱལ་པོ་དེ་ཡིས་དེ་བཟློག་ཕྱིར། །བྱམས་པས་མཆི་མས་བརྣངས་ཏེ་མགུལ་ནས་འཇུས། །བུ་ཅིག་ཅི་ཕྱིར་འདི་ལྟར་གློ་བུར་དུ། །བདག་ཅག་དོར་བའི་བློ་འདི་སྐྱེས་པར་གྱུར། །བདག་ཉིད་ཕུང་བར་བྱེད་པ་སུ་ཞིག་གིས། །ཁྱོད་ནི་མི་དགར་བྱས་ནས་འཆི་བར་འགྱུར། །སུ་ཡིས་རང་གི་མི་རྣམས་མྱ་ངན་གྱིས། །གདུངས་ནས་མིག་ནི་མཆི་མས་གང་བར་བྱས། །འོན་ཏེ་ང་ལ་ཅུང་ཟད་དོགས་པའམ། འཁྲུག་པར་གྱུར་པ་ཅུང་ཟད་ཐོས་ཀྱང་རུང་། །དེ་དག་སྨྲས་ན་དེ་ལས་ལྡོག་པར་བྱའོ། །དེ་ལྟ་བུ་ནི་བདག་གིས་མ་མཐོང་ངོ་། །བྱང་ཆུབ་སེམས་དཔས་སྨྲས་པ། དེ་ལྟར་རབ་ཏུ་བྱམས་ཁྱོད་ལ། །འཁྲུལ་པ་ལྟ་ཞིག་ག་ལ་འབྱུང་། །བདག་ལ་མི་དགར་བགྱི་བ་ཡང་། །དེ་ལྟར་ནུས་པ་སུ་ཞིག་ཡོད། །འོ་ན་ཅིའི་ཕྱིར་ངེད་དོར་བར་སེམས་ཞེས་མིག་མཆི་མས་གང་བཞིན་དུ་རྒྱལ་པོས་སྨྲས་པ་དང་། དེས་སྨྲས་པ། ཤི་བས་འཇིགས་པའི་ཕྱིར་རོ། །ལྷ་གཟིགས་སུ་གསོལ། །དང་པོ་མངལ་དུ་ཞུགས་པའི་ནུབ་མོ་ནས། །དེ་ནས་བརྩམས་ཏེ་འཇིག་རྟེན་འདི་རྣམས་ནི། །ལམ་དུ་ཞུགས་ནས་གཞན་དུ་མ་གོལ་བར། འཆི་བདག་དྲུང་དུ་དེ་ནི་ཉེ་བར་འགྲོ། །ཐབས་དང་རབ་ཏུ་ལྡན་ཞིང་མཐུ་ཡོད་ཀྱང་། འཆི་དང་རྒ་ལས་སུ་ཡང་ཐར་བ་མེད། །འདི་གཉིས་ཀྱི་ནི་འདི་ཀུན་རབ་ཏུ་གཙེས། །དེ་བས་ཆོས་ཀྱི་དོན་དུ་དགོན་པར་མཆི། །མི་རྟ་གླང་ཆེན་ཤིང་རྟ་མང་པོའི་དམག་ཚོགས་རྣམས། །རྒྱལ་པོའི་དཔུང་དང་ལྡན་པས་ཐགས་ཐོགས་མེད་པར་ཐུབ། །གཤིན་རྗེའི་དགྲ་ནི་གཅིག་པུ་འདུག་ཀྱང་ཡོང་མི་ཐུབ། །དེ་བས་བདག་གི་སེམས་ནི་ཆོས་དོན་བསྒྲུབ་པར་འཚལ། །རྟ་དང་གླང་ཆེན་རྐང་ཐང་ཤིང་རྟས་ཡོངས་བསྲུངས་ན། །རྒྱལ་པོ་རྣམས་ནི་དགྲ་ལས་རབ་ཏུ་ཐར་བར་འགྱུར། །ཤེད་ཅན་ལ་སོགས་དཔུང་དང་བཅས་པའང་དབང་མེད་པར། །རབ་ཏུ་མཐུ་ཆེན་འཆི་བདག་དགྲ་ཡི་དབང་དུ་གྱུར། །གླང་ཆེན་མྱོས་པའི་མཆེ་བས་མཁར་གྱི་རྟ་བབས་དང་། གཡུལ་ངོར་མི་དང་ཤིང་རྟ་གླང་པོ་རྣམས་ཀྱང་བཅོམ། །གང་བ་ཆེན་པོའི་ངོས་དྲལ་རྒྱལ་བར་གྱུར་པ་ཡི། །མཆེ་བ་དེ་ཡིས་གཤིན་རྗེའི་ཁར་སོང་འདེབས་མ་ནུས། །གོ་མཚོན་བཟང་པོ་བགོས་ཤིང་ཕུབ་གཟུར་ནས། །གཡུལ་ངོར་མདའ་ཡང་རྒྱང་གིས་འཕེན་པར་ནུས། དེ་ལྟར་འཕོངས་སྐྱེན་རྣམས་ཀྱང་ཁོན་སྙིང་ཅན། །དགྲ་བོ་གཤིན་རྗེ་ལ་ནི་འཕེན་མི་ནུས། །སེང་གེ་རྣམས་ཀྱང་སེན་མོ་རྣོན་པོས་གླང་ཆེན་གྱི། །གཟི་བརྗིད་ཟིལ་མནན་སྤྱི་བོར་སྡེར་མོས་འདྲད་ཅིང་འབྲང་། །སྒྲ་སྐད་དྲག་པོ་བསྒྲགས་པས་གཞན་གྱི་སེམས་སྐྲག་བྱས། །གཤིན་རྗེ་འོངས་ན་མཐུ་དང་དྲེགས་པ་ཉམས་ནས་ཉལ། །རྒྱལ་པོ་རྣམས་ཀྱང་གཞན་གྱི་ཉེས་བྱས་ན། །ཉེས་དང་རྗེས་སུ་མཐུན་པར་ཆད་པས་གཅོད། །འཆི་བདག་དགྲ་བོས་ཉེས་པ་ཆེར་བྱས་ཀྱང་། །ཆད་པས་བཅད་པའི་ཐབས་ནི་ཡོང་མི་ཤོང་། རྒྱལ་པོ་རྣམས་ནི་འཇལ་དུམ་ལ་སོགས་པའི། །ཐབས་ཀྱིས་ཉེས་པ་བྱས་པ་ཞི་བར་བྱས། །འཆི་བདག་གཏུམ་པོ་དྲེགས་པ་གོམས་བྱས་པ། འཇལ་དུམ་ལ་སོགས་བས་ནི་སྡུམ་མི་ནུས། །སྦྲུལ་ཆེར་ཁྲོས་པའི་རླུང་གི་མཆེ་བ་དུག་ཅན་གྱི། །རྩེ་མོ་འབར་བས་མི་རྣམས་མངོན་དུ་འབིགས། །ཤ་ཆགས་བསད་པའི་ཐབས་ལ་རབ་ཏུ་མཁས་གྱུར་ཀྱང་། འཆི་བདག་འོངས་ན་བཟའ་བར་རྩམ་པ་ཉམས་པར་འགྱུར། །སྦྲུལ་གདུག་ཁྲོས་ནས་འཁྲུགས་པས་ཟིན་པ་ཡང་། །སྨན་པ་རྣམས་ནི་སྨན་དང་སྔགས་ཀྱིས་དུག་ཞི་བྱེད། །གཤིན་རྗེ་འདི་ནི་མྱུར་བའི་དུག་པས་རབ་གདུག་པ། །སྔགས་དང་སྨན་ལ་སོགས་པས་ཐུབ་པར་ཡོང་མི་ནུས། །འདབ་བཟང་ཁྱུང་ཡང་གཤོག་པའི་རླུང་གིས་རྒྱ་མཚོའི་ཆུ། །ཉ་མང་འཕོ་བ་འབྲུག་སྒྲ་དྲག་པོས་དཀྲུགས་པ་ཡང་། །རྣམ་པར་གཏོར་ནས་གདེངས་ཀ་ཕྱར་བའི་སྦྲུལ་རྣམས་འཛིན། །དེ་བཞིན་འཆི་བདག་རབ་ཏུ་གཞོམ་པར་ཡོང་མི་ནུས། སྟག་ཀྱང་ནགས་ཚལ་དག་ན་རི་དྭགས་འབྲོས་པ་རྣམས། །རབ་ཏུ་མགྱོགས་པས་བསྙགས་ནས་སྡེར་མོ་རྡོ་རྗེ་ཡི། །ཐང་ཅིག་བཏབ་པ་ཙམ་གྱིས་བཟུང་ནས་ཁྲག་འཐུང་བ། །འཆི་བདག་འོངས་ན་དེ་ལྟར་བརཏལ་ཕོད་མེད་པར་འགྱུར། །སྟག་གི་ཁ་གདངས་མཆེ་བ་རབ་ཏུ་གཙིགས་པ་ཡིས། །ནང་དུ་སོང་བའི་རི་དྭགས་རྣམས་ཀྱང་ཐར་བ་སྲིད། །གཤིན་རྗེའི་ཁ་གདངས་ན་དང་རྒ་བའི་མཆེ་བ་གཙིགས། །དེ་ཡི་ནང་དུ་སོང་བ་སུ་ཞིག་ཐར་བ་ཡོད། །མི་སྡུག་འཇིགས་ལ་དམ་དུ་འཛིན་པའི་གདོན། གཟི་དང་བཅས་པར་མི་ཡོ་སྲོག་ཀྱང་འཕྲོག །འཆི་བདག་དགྲ་དང་འཐབ་པའི་དུས་དྲན་ན། །རབ་ཏུ་བསྙེམས་པའི་མཐུ་རྩལ་ཉམས་པར་འགྱུར། །མཆོད་འདོད་གནོད་བྱེད་འོངས་པའི་གདོན་རྣམས་ཀྱང་། རིག་སྔགས་གྲུབ་པ་རྣམས་ཀྱི་མཐུ་དག་དང་། དཀའ་ཐུབ་བདེ་ལེགས་སྨན་གྱིས་ཞི་བར་ནུས། །འཆི་བདག་གདོན་ནི་ཟློག་པར་ཡོང་མི་ནུས། །མང་པོ་འདུས་པའི་ནང་ན་སྒྱུ་མ་མཁན། །སྐྱེ་བོ་རྣམས་ཀྱི་མིག་ཀྱང་བསླུ་བར་ནུས། །གཤིན་རྗེ་འདི་ལས་མཚར་གྱིས་མཐུ་ཞིག་ཡོད། །དེ་དག་གིས་ཀྱང་མིག་བསླུ་ཡོང་མ་ནུས། །གསང་སྔགས་གྲུབ་པའི་དཀའ་ཐུབ་མཐུ་ཡིས་དུག་ཞི་ནུས། །སྨན་པ་མཆོག་གིས་མི་ཡི་ནད་ཀྱང་ཞི་བར་ནུས། །དྷན་ནྭ་ན་ཏ་རི་ལ་སོགས་པ་ཡང་མེད་པར་འགྱུར། །དེ་བས་ཆོས་ཕྱིར་བདག་བློ་བས་མཐར་འཆི་བར་མོས། །རིག་སྔགས་འཆང་རྣམས་གསང་སྔགས་མཐུ་སྟོབས་སྣ་ཚོགས་ཀྱིས། །སྔོན་དུ་བྱུང་ནས་བར་བར་སླར་ཡང་མི་སྣང་འགྱུར། །བར་བར་མཁའ་ལ་འགྲོ་ཞིང་བར་བར་ས་འོག་ནུབ། །འཆི་བདག་བྱུང་ནས་མཐུ་སྟོབས་རབ་ཏུ་ཉམས་པར་འགྱུར། །ལྷ་དབང་དྲེགས་པ་རྣམས་ཀྱང་ལྷ་མིན་དམག་གིས་བཟློག །ལྷ་མིན་དྲེགས་པ་རྣམས་ཀྱང་ལྷ་ཡི་དཔུང་གིས་བཟློག །ང་རྒྱལ་བདོ་བའི་བློ་ཅན་དམག་ཚོགས་ཆེན་པོའི་དཔུང་། དེ་དག་ཀུན་སྡོངས་པས་ཀྱང་འཆི་བདག་ཡོང་མི་ཐུབ། །གཤིན་རྗེའི་དགྲ་བོ་བསླང་པར་མི་བཟློག་པ། འདི་འདྲ་རིག་ནས་ཁྱིམ་ན་བདག། མི་དགའ་ཁྲོས་པའམ་བྱམས་པ་མ་མཆིས་ཕྱིར་མ་ལགས། ཆོས་ཀྱི་དོན་དུ་བདག་ནི་ངེས་པར་མཆི། རྒྱལ་པོས་སྨྲས་པ། འོ་ན་དེ་ལྟར་འཆི་བདག་གི་འཇིགས་པ་བཅོས་སུ་མི་རུང་ན། ཆོས་ཡོངས་སུ་བཟུང་སྟེ་ནགས་ཚལ་དུ་སོང་ཡང་ཅི་ལ་ཕན། །ཁྱོད་ཀྱི་གནས་སུ་འཆི་བདག་དགྲ་བོ་མི་འོང་ངམ། དྲང་སྲོང་ཆོས་ལ་གནས་པ་ནགས་སུ་མ་ཤི་འམ། །དེ་ལྟར་ཐམས་ཅད་ན་ཡང་ཆོས་ཀྱིས་དེ་བཞིན་ན། །ཁྱིམ་དག་བོར་ཏེ་ནགས་སུ་སོང་ཡང་ཅི་ལ་ཕན། །བྱང་ཆུབ་སེམས་དཔས་སྨྲས་པ། །ནགས་དང་ཁྱིམ་ན་གནས་ཀྱང་འཆི་བདག་འོང་འགྱུར་ལ། །ཆོས་ལ་གནས་དང་ལོག་པར་སྤྱོད་ལ་མཚུངས་སྤྱོད་དང་། །ཆོས་ཀྱི་བདག་ཉིད་ཅན་རྣམས་མྱ་ངན་གདུངས་མི་འགྱུར། །ཆོས་ཀྱང་ནགས་ཚལ་དག་ན་བདེ་བར་བསྒྲུབ་ཏུ་མཆིས། །ལྷ་གཟིགས་སུ་གསོལ། །བག་མེད་དྲེགས་དང་འདོད་ཆགས་དང་། བརྐམ་དང་ཞེ་སྡང་གཞིར་གྱུར་ཁྱིམ། །དེ་ཡི་གཉེན་པོར་གྱུར་པའི་ཆོས། །སྤྱད་པའི་སྐབས་ལྟ་ག་ལ་མཆིས། །ལས་རྣམས་རྣམ་པ་མང་པོས་རྣམ་པར་གཡེངས། །ཡོངས་སུ་བཟུང་དང་བསྒྲུབ་དང་བསྲུང་བས་བྲེལ། །སེམས་ནི་མ་ཞི་སྡུག་བསྔལ་འབྱུང་བའི་གནས། །ཁྱིམ་པས་ནམ་ཡང་ཞི་བའི་ལམ་མི་འགྲུབ། །ནགས་ན་བྱ་བ་ངན་པ་མང་པོ་བཏང་། །ཡོངས་སུ་བཟུང་བའི་སྡུག་བསྔལ་སྤངས་ལ་གཙང་། །ཞི་བ་འབའ་ཞིག་བྱེད་ཅིང་ཡིད་ཀྱང་མགུ། །བདེ་དང་བསོད་ནམས་གྲགས་པའང་འཐོབ་པར་འགྱུར། །མི་རྣམས་ཆོས་ཀྱི་བསྲུངས་ཀྱི་ནོར་དང་དཔུང་གིས་མིན། །ཆོས་ཀྱིས་བདེ་བ་ཆེན་པོ་འཐོབ་ཀྱིས་འབྱོར་བས་མིན། ཆོས་ཀྱི་བདག་ཉིད་ཅན་ནི་ཤི་ན་དགའ་བར་འགྱུར། །ཆོས་རྣམས་ཆོས་ཀྱིས་བསྲུང་གིས་ནོར་དང་དཔུང་གིས་མིན། །ཆོས་ལ་འབད་པས་ངན་འགྲོའི་འཇིགས་པ་མེད་པར་འགྱུར། །ལས་ཀྱི་ཁྱད་པར་དག་ཀྱང་ཇི་བཞིན་གནས། །དགེ་དང་སྡིག་པའི་མཚན་ཉིད་ཐ་དད་ལ། རྣམ་པར་སྨིན་པས་མི་དགེ་ངན་འགྲོར་ལྟུང་། བསོད་ནམས་བསགས་པས་བདེ་བའི་གནས་སུ་འགྲོ། །དེ་ལྟར་བདག་ཉིད་ཆེན་པོ་དེས་ཕ་ལ་གསོལ་བ་བཏབ་ནས། ཕས་ཀྱང་གནང་སྟེ། རྒྱལ་སྲིད་ཀྱི་དཔལ་ཡང་རྩྭ་དང་འདྲ་བར་བོར་ནས། དཀའ་ཐུབ་ཀྱི་ནགས་ཚལ་ན་གནས་པར་གྱུར་ཏོ། །དེར་ཡང་བསམ་གཏན་རྣམས་དང་ཚད་མེད་པ་རྣམས་བསྒྲུབས་ནས་འཇིག་རྟེན་པ་རྣམས་ཀྱང་དེ་དག་གི་ལམ་ལ་བཀོད་ནས། ཚངས་པའི་འཇིག་རྟེན་དུ་སྐྱེས་པར་གྱུར་ཏོ། །དེ་ལྟ་བས་ན་ཡིད་སྐྱོ་བར་གྱུར་པ་རྣམས་ནི། རྒྱལ་སྲིད་ཀྱི་དཔལ་ཡང་ལེགས་པའི་ལམ་ལ་སྒྲིབ་པར་མི་འགྱུར་བའི་ཕྱིར་སེམས་སྐྱོ་བ་ལ་གོམས་པར་བྱའོ། །འཆི་བའི་འདུ་ཤེས་བསྐྱེད་ན་མྱུར་དུ་སེམས་སྐྱོ་བར་འགྱུར་བའི་ཕྱིར་འཆི་བའི་འདུ་ཤེས་སྐྱེད་པའི་ཡོན་ཏན་བསྔགས་པ་ལའང་བརྗོད་པར་བྱའོ། །འདུ་བྱེད་རྣམས་འདི་ལྟར་མི་རྟག་གོ་ཞེས་དེ་བཞིན་དུ་འཆི་བ་རྗེས་སུ་དྲན་པའི་ཡོན་ཏན་བསྔགས་པ་དང་མི་རྟག་པའི་གཏམ་བྱ་བ་ལའང་སྦྱར་བར་བྱའོ། །འདུས་བྱས་རྣམས་ནི་འདི་ལྟར་དབུགས་མ་ཕྱིན་པའོ་ཞེས་འཇིག་རྟེན་ཐམས་ཅད་ལ་མངོན་པར་མ་ཆགས་པའི་འདུ་ཤེས་བསྐྱེད་པ་དང་། དེ་བཞིན་དུ་འཇིག་རྟེན་འདི་དག་ནི་དཔུང་གཉེན་མེད་ཅིང་གྲོགས་བྱེད་པ་མེད་དོ་ཞེས་ཀྱང་བརྗོད་པར་བྱའོ། དེ་བཞིན་དུ་ནགས་ཚལ་དགོན་པ་ན་ཆོས་བདེ་བར་བསྒྲུབ་ནུས་ཀྱི་ཁྱིམ་ན་དེ་ལྟར་མི་ནུས་སོ། །ཞེས་ཀྱང་སྦྱར་བར་བྱའོ། ལྕགས་ཀྱི་ཁྱིམ་ན་སྐྱེས་པའི་རབས་ཏེ་སུམ་བཅུ་གཉིས་པའོ།། །།བཟོད་པར་བྱ་བ་ཡོད་ན་བཟོད་པ་ཡོད་པར་འགྱུར་གྱི་མེད་ན་མ་ཡིན་ནོ། །དེ་བས་ན་དགེ་བ་རྣམས་ནི་གནོད་པར་བྱེད་པ་ལའང་ཁེ་རྙེད་པ་དང་འདྲ་བར་དགའ་བར་འགྱུར་རོ། །དེ་ཡང་འདི་ལྟར་བྱང་ཆུབ་སེམས་དཔའ་ནགས་ཚལ་དགོན་པ་ཞིག་ན། མ་ཧེ་རྒོད་ཀྱི་ཁྱུ་མཆོག་ལུས་འདམ་རྫབ་ཀྱིས་བསྐུས་པས་རྩུབ་པར་གྱུར་པ། སྤྲིན་གྱི་ཕུང་པོ་ལོགས་ཤིག་ཏུ་ཆད་པ། རྐང་གིས་འགྲོ་ཤེས་པ་འདྲ་བ་ཞིག་ཏུ་གྱུར་ཏོ་ཞེས་གྲག་གོ །དེ་དུད་འགྲོའི་སྐྱེ་གནས་ལ་ཆོས་ཀྱི་འདུ་ཤེས་དཀོན་པ། གཏི་མུག་ཆེ་བའི་གནས་སུ་སྐྱེས་ཀྱང་རྣམ་པར་ཤེས་པ་གསལ་བས་ཆོས་སྤྱོད་པ་ལ་སེམས་མི་བརྩོན་པར་མ་གྱུར་ཏོ། །དེ་ལ་སྙིང་རྗེ་ཡུན་རིང་འདྲིས་པ་བཞིན། །དེ་ནི་སྙིང་རྗེས་ནམ་ཡང་ཡོང་མ་བཏང་། ལས་ཀྱི་དབང་གིས་དེ་ལྟར་དེ་གྱུར་ཏམ། དེ་ཉིད་མཐུ་ཡིས་དེ་ནི་དེ་ལྟར་གྱུར། །དེ་བས་ན་བཅོམ་ལྡན་འདས་ཀྱིས་ཀྱང་འདི་སྐད་དུ། ལས་ཀྱི་རྣམ་པར་སྨིན་པ་བསམ་མི་ཁྱབ། སྙིང་རྗེའི་བདག་ཉིད་ཅན་ཡང་དུད་འགྲོར་སྐྱེ། དེ་ནའང་ཆོས་ཀྱི་འདུ་ཤེས་སྐྱེ་བར་གྱུར། ལས་མེད་ན་ནི་སྐྱེ་བའི་མཚམས་མི་སྦྱོར། །དགེ་བའི་རྣམ་པར་སྨིན་པ་མི་བདེན་མེད། །ཆོས་ཀྱི་འདུ་ཤེས་ཡོད་ཀྱང་ལས་ཀྱི་བག་ཆགས་ཀྱིས། །དེ་དང་དེ་རྟེན་དེ་ལྟ་དེ་ལྟར་འགྱུར། དེ་ནས་སྤྲེའུ་མི་སྲུན་པ་ཞིག་གིས། དེའི་རང་བཞིན་དེས་ཤིང་སྙིང་རྗེ་ཆེ་བས་ཁྲོ་ཞིང་འཁྲུག་པ་མེད་པར་ཡུན་རིང་པོ་ནས་མངོན་པར་གསལ་བར་ཤེས་ནས། དེ་ལ་ནི་འཇིགས་པ་མེད་དོ་སྙམ་ཏེ། སེམས་དཔའ་ཆེན་པོ་དེ་ལ་འཚོ་བའི་རྣམ་པ་དེ་དང་དེ་དག་གིས་དེ་ལ་གནོད་པ་བྱེད་པར་གྱུར་ཏོ། །སྙིང་རྗེ་ཆེ་ཞིང་འཇམ་པ་ལ། སྐྱེ་བོ་མི་སྲུན་བསྙེམས་ཤིང་དྲེགས། །དེ་ལ་འཇིགས་པ་མེད་མཐོང་ནས། །རབ་ཏུ་རྣམ་པར་འགྱུར་བར་བྱེད། །གང་གིས་ཅུང་ཟད་འཇིགས་གྱུར་ན། །རབ་ཏུ་དུལ་བ་བཞིན་བྱས་ཏེ། བསྙེམས་པ་བོར་ནས་དེ་ལ་ནི། དམན་པའི་ཚུལ་གྱིས་སྤྱོད་པར་འགྱུར། སེམས་དཔའ་ཆེན་པོ་དེ་རེ་ཤིག་ཅིག་གཉིད་ཀྱིས་ལོག་ནས་བག་ཕབ་སྟེ་ཉལ་ཞིང་འདུག་པ་ལ། སྤྲེའུ་དེས་དྲག་ཏུ་དུ་བསྐུལ་ནས་གློ་བུར་དུ་སྟེང་དུ་མཆོངས་ཏེ་འོངས་སོ། །བར་བར་ནི་དེ་ལ་ཞོན་ནས་རབ་ཏུ་རྒྱུག་གོ །བར་བར་ནི་དེ་བཀྲེས་ཏེ་ཟར་འགྲོ་བའི་ལམ་བཀག་སྟེ་འདུག་གོ །བར་བར་ནི་ཤིང་གིས་དེའི་རྣ་བ་གཉིས་དཀྲུག་གོ །བར་བར་ནི་དེ་ཆུའི་ནང་དུ་རྐྱལ་དུ་འགྲོ་བ་ལ་མགོ་བོའི་སྟེང་དུ་ཞོན་ཏེ་ལག་པ་གཉིས་ཀྱིས་མིག་གཉིས་བཀབ་བོ། །བར་བར་ནི་དེ་ལ་ཞོན་ཏེ་དབྱིག་པ་ཕྱར་ནས་བརྒྱུགས་ཏེ་གཤིན་རྗེའི་ཚུལ་དུ་འཆོས་སོ། །འོན་ཀྱང་བྱང་ཆུབ་སེམས་དཔའ་ཆེན་པོ་དེ་ནི། །དེས་མ་གྲངས་པའི་ཀྱལ་ཀ་བྱས་པ་དེ་དག་ཐམས་ཅད་ལ་འཁྲུག་པ་དང་། ཁྲོ་བ་དང་མི་དགའ་བ་མེད་པ་ཕན་བཏགས་པ་བཞིན་དུ་བཟོད་པར་གྱུར་ཏོ། །སྡིག་ཅན་རྣམས་ནི་རང་བཞིན་གྱིས། །འདུལ་དང་འགལ་བའི་ལམ་ལ་བརྟེན། །དམ་པ་རྣམས་ནི་གོམས་པའི་ཕྱིར། །དེ་ལ་ཕན་བཏགས་བཞིན་དུ་བཟོད། །དེ་ནས་གནོད་སྦྱིན་གཅིག་གཅིག་དེས་གཙེས་པ་དེ་མི་བཟོད་པ་དང་སེམས་དཔའ་ཆེན་པོ་དེའི་བསམ་པ་བརྟག་པའི་ཕྱིར། མ་ཧེའི་ཁྱུ་མཆོག་དེ་སྤྲེའུ་མི་སྲུན་པ་དེས་ཞོན་ཏེ་སོང་བའི་ལམ་བསྒུགས་ཏེ་སྨྲས་པ། ཀྱེ་ཁྱོད་ཅུང་ཞིག་སྡོད་ཅིག །ཁྱོད་སྤྲེའུ་མི་སྲུན་པོ་འདིས་ཉོས་སམ་འོན་ཏེ་རྒྱན་པོས་ཕམ་མམ། འོན་ཏེ་འདིས་འཇིགས་པ་ཅུང་ཟད་ཅིག་ཡོད་དམ། དེ་སྟེ་བདག་ལ་མཐུ་མེད་པར་ཤེས་སམ། ཅི་ནས་འདིས་དེ་ལྟར་བརྙས་ཤིང་ཞོན། ཀྱེ་འོ་ན། ཁྱོད་ཀྱི་རྭ་རྩེ་རྡོ་རྗེའི་ཤུགས་ཀྱིས་ཀྱང་། རྡོ་རྗེའམ་རི་ཡང་རྡོ་རྗེ་བཞིན་དུ་འཇོམས། བྲག་གི་རྩེ་མོ་འདམ་དུ་བྱིང་བ་བཞིན། །ཁྱོད་ཀྱི་ལུས་ཀྱི་རྐང་ལག་འདི་ཡང་ཁྲོས་ཏེ་འཕྲས་ན་ནི། ཁྱོད་ཀྱི་ལུས་འདི་བྲག་བཞིན་མཁྲེགས་ལ་བརྟན། །མཐུ་སྟོབས་ཕུན་སུམ་ཚོགས་པས་ཀུན་དུ་མཛེས། །རང་བཞིན་གཟི་ཆེ་ལྟ་བ་བརྗིད་པ་ནི། །སེང་གེ་དག་ཀྱང་རབ་ཏུ་སྤ་གོང་འགྱུར། །དེ་བས་འདི་ནི་རྨིག་པས་རྒྱོབ་ལ་ཆོམ། །ཡང་ན་རྭ་རྩྭེས་འདི་ཡི་དྲེགས་པ་སོལ། །མཐུ་མེད་འདྲ་བར་སྤྲེ་ངན་སྡིག་ཅན་འདིས། །རབ་ཏུ་གཙེས་པའི་སྡུག་བསྔལ་བཟོད་པར་བྱེད། །ཡོན་ཏན་ཚུལ་སྤྱོད་བདེ་ཞིང་གསལ་བ་ཡིས། །སྐྱེ་བོ་ངན་པ་བཅོས་སུ་ག་ལ་རུང་། །ཚ་ཞིང་དྲོད་ཆེ་རྩུབ་པས་བསྒྲུབས་པ་ཡིས། །བད་ཀན་ནད་བཞིན་རབ་ཏུ་འཕེལ་བར་འགྱུར། །དེ་ནས་བྱང་ཆུབ་སེམས་དཔས་གནོད་སྦྱིན་དེ་དག་ལ་བལྟས་ཏེ་བཟོད་པའི་ཕྱོགས་བཟུང་སྟེ། ཚིག་འཇམ་པོས་སྨྲས་པ། འདི་ནི་མཐུ་སྟོབས་ཆུང་བ་དང་། །རྟག་ཏུ་མ་གྲངས་སྤྱོད་པའང་ཤེས། །དེ་བས་འདི་ལ་བདག་གིས་ནི། བཟོད་པ་བྱ་བ་མི་རིགས་སམ། མཐུ་ཆེན་བཅོས་སུ་མི་རུང་ལ། །བཟོད་པ་ཅི་ཞིག་བྱར་ཡོད་མོད། །དགེ་བ་དུལ་བའི་ཚུལ་སྤྱོད་པ། །བཟོད་པ་བྱར་ཡང་ཅི་ཞིག་ཡོད། །མཐུ་ཆུང་འཁྲུལ་པ་དག་ལ་ནི། །མཐུ་ཡོད་བཞིན་དུ་བཟོད་ན་རུང་། དེ་ཕྱིར་ཡོན་ཏན་ཉམས་པ་བས། །རབ་ཏུ་བརྙས་པར་གྱུར་ཡང་རུང་། །མཐུ་སྟོབས་ཆུང་བས་བརྙས་ཐབས་བྱས་པ་ལ། །དང་དུ་ལེན་པ་ཡོན་ཏན་རྣམས་ཀྱི་མཆོག །ཡོན་ཏན་དགའ་བས་ཁྱད་དུ་དེ་བསད་ནས། །རང་གི་བརྟན་པ་ཉམས་ཕྱིར་ཅི་ཕྱིར་རྒལ། །བཟོད་པ་རྟག་ཏུ་བདེ་བར་འགྱུར་བ་ཡི། །དུས་ནི་རབ་ཏུ་རྙེད་པར་དགའ་བ་ལ། །གཞན་གྱིས་དེ་ལྟ་བུ་དག་བྱས་གྱུར་ན། །དེ་ལ་འཁྲུག་པར་འགྱུར་བ་སུ་ཞིག་ཡོད། །གང་ཞིག་རང་གི་ཆོས་ཉམས་མི་སེམས་པར། །བདག་གི་སྡིག་སྦྱང་ཕྱིར་ནི་ཞུགས་འདྲ་ལ། །འདི་ལའང་བདག་ནི་བཟོད་པར་མི་བྱ་ན། །དེ་ལས་གཞན་པའི་དྲི་མེད་ཅི་འདྲ་ཞིག །གནོད་སྦྱིན་གྱིས་སྨྲས་པ། དེ་བས་ན་ཁྱོད་ནི་འདིས་གནོད་པ་བྱས་པ་ལས་ནམས་ཀྱང་ཐར་བར་མི་འགྱུར་རོ། །ཡོན་ཏན་རྣམས་ལ་མི་དགའ་ཞིང་། །མི་སྲུན་པ་ནི་མ་བཏུལ་བ། །བཟོད་པ་སྒོམ་པ་མ་བཏང་ན། །སྤ་གོང་ནུས་པ་སུ་ཞིག་ཡོད། །བྱང་ཆུབ་སེམས་དཔས་སྨྲས་པ། གཞན་ལ་གནོད་པ་བྱས་པའི་བདེ་བའམ། །སྡུག་བསྔལ་འབྱུང་བ་དགག་པར་འདོད་པ་ཡི། །རྣམ་པར་སྨིན་པ་བདེ་བ་མི་འགྲུབ་པས། བདེ་བ་འདོད་པས་དེ་ནི་སྒྲུབ་མི་ནུས། །དེ་བས་བདག་གིས་བཟོད་ལ་གནས་ན་ནི། ཐབས་ཀྱིས་བསྒོ་ཡང་གལ་ཏེ་མ་གོ་ན། །བཟོད་པ་ཆུང་བ་གཞན་ངག་ཡོད་པས་ན། དེ་དག་འདི་ནི་ལེགས་པའི་ལམ་ལས་བཟློག །སྐྱེ་བོ་དེ་ལྟ་བུ་ཡིས་བརྙས་བྱས་ན། བདག་ལྟ་བུ་ལའང་དེ་ལྟར་དེ་མི་བྱེད། །ཉེས་དམིགས་མཐོང་ན་དེ་ལྟར་ཕྱིས་མི་བྱེད། འོན་ཀྱང་བདག་ནི་དེ་ལས་ཐར་བར་འགྱུར། དེ་ནས་གནོད་སྦྱིན་དེ་སེམས་རབ་ཏུ་དགའ་ཞིང་ཡ་མཚན་ཆེ་བར་གྱུར་ཏེ། རབ་ཏུ་མགུ་ནས་སེམས་དཔའ་ཆེན་པོ་དེ་ལ་མགོ་བོ་བཏུད་དེ། སེ་གོལ་གཏོག་ནས་ལེགས་སོ་ལེགས་སོ་ཞེས་བྱ་བ་སྨྲས་ཏེ། མགུ་བར་བྱས་ནས་ཚིག་སྙན་པ་དེ་དང་དེ་དག་སྨྲས་སོ། །དུད་འགྲོ་རྣམས་ལ་ཆོས་འདི་ག་ལ་ཡོད། ཡོན་ཏན་དགའ་བ་འདི་འདྲ་ག་ལ་ཡོད། མཚར་གྱི་བསམས་པས་འདི་འདྲའི་ལུས་སུ་གནས། །དཀའ་ཐུབ་ནགས་ན་ཁྱོད་ནི་དཀའ་བ་སྤྱོད། ཅེས་དེ་ལྟར་དེ་ལ་མངོན་པར་བསྟོད་ནས། སྤྲེའུ་མི་སྲུན་པ་དེ་ཡང་དེའི་རྒྱབ་ནས་ཕབ་སྟེ། །དེ་བསྲུང་བར་ཡང་བསྐོས་ནས། དེ་ཉིད་དུ་མི་སྣང་བར་གྱུར་ཏོ། །དེ་ལྟ་བས་ན་བཟོད་པར་བྱ་བ་ཡོད་ན་བཟོད་པ་ཡོད་པར་འགྱུར་གྱི། །མེད་ན་མ་ཡིན་པའི་ཕྱིར། དགེ་བ་རྣམས་ནི་གནོད་པར་བྱེད་པ་ལའང་ཁེ་རྙེད་པ་དང་འདྲ་བར་དགའ་བར་འགྱུར་རོ་ཞེས་བཟོད་པའི་གཏམ་བྱ་བ་ལའང་བརྗོད་པར་བྱའོ། །དུད་འགྲོར་གྱུར་པ་རྣམས་ལའང་དེ་ལྟར་སོ་སོར་བརྟགས་པའི་བཟོད་པའི་མཐུ་ཡོད་ན་མིར་གྱུར་པའམ། རབ་ཏུ་བྱུང་བར་ཁས་འཆེས་པ་ལ་བཟོད་པ་དེ་དང་མི་ལྡན་ན་མཛེས་པར་ག་ལ་འགྱུར་ཞེས་དེ་སྐད་ཀྱང་བརྗོད་པར་བྱའོ། །དེ་བཞིན་གཤེགས་པའི་ཡོན་ཏན་བསྔགས་པ་དང་། རིམ་གྲོ་བསྐྱེད་དེ་ཆོས་མཉན་པ་ལའང་བརྗོད་པར་བྱའོ། །མ་ཧེའི་སྐྱེས་པའི་རབས་ཏེ་སུམ་ཅུ་གསུམ་པའོ།། །།དགེ་བ་དག་ནི་བསྐྲུལ་མ་བཏབ་ཀྱང་མ་གོམས་པའི་ཕྱིར་སྡིག་པ་མི་སྤྱོད་དོ། །དེ་ཡང་འདི་ལྟར་བྱང་ཆུབ་སེམས་དཔའ་ནགས་ཚལ་ཞིག་ན་བྱ་ཤིང་རྟ་མོ་འདབ་གཤོག་སྡུག་གུ་རྣམ་པ་སྣ་ཚོགས་དང་ལྡན་པ་ཞིག་ཏུ་གྱུར་ཅིང་གནས་སོ་ཞེས་གྲག་གོ །སྙིང་རྗེ་ལ་གོམས་པས་དེ་ལྟ་བུའི་གནས་སྐབས་ནའང་བྱ་ཤིང་རྟ་མོའི་འཚོ་བ་སྲོག་ཆགས་གསོད་པའི་སྐྱོན་ཅན་ནི་མི་བྱེད་དོ། །ལྗོན་ཤིང་ལྡུམ་བུའི་མྱུ་གུ་རབ་ཏུ་གསར། །མེ་ཏོག་བསུང་ཞིམ་ཁུ་བས་རབ་བསྒྲུས་པ། །རོ་དང་དྲི་བསྲུང་ཁ་དོག་སྣ་ཚོགས་པའི། །ཤིང་ཏོག་རྣམས་ཀྱི་འཚོ་བ་ཆོག་པར་འཛིན། །ཇི་ལྟར་རིགས་པར་གཞན་ལ་ཆོས་ཀྱང་འཆད། །ཕོངས་པ་རྣམས་ལ་ཅི་ནུས་ཕན་ཡང་འདོགས། །ངན་པ་རྣམས་ཀྱང་མི་རིགས་པ་ལས་བཟློག །གཞན་གྱི་དོན་སྤྱོད་རབ་ཏུ་གསལ་བར་སྟོན། །སེམས་དཔའ་ཆེན་པོ་དེས་ནགས་ཚལ་དེ་ན་འཁོད་པའི་སེམས་ཅན་མང་པོ་རྣམས་ཡོངས་སུ་བསྐྱངས་པས་དེ་དག་སློབ་དཔོན་དང་བཅས་པ་བཞིན། གཉེན་བཤེས་དང་བཅས་པ་བཞིན། སྨན་པ་དང་བཅས་པ་བཞིན། རྒྱལ་པོ་རྗེས་གཤིན་པས་བསྐྱངས་པ་བཞིན་དུ་བདེ་བར་བྱས་སོ། །དེ་ནས་རེ་ཤིག་ཅིག་སེམས་དཔའ་ཆེན་པོ་དེ་སེམས་ཅན་རྣམས་ལ་སྙིང་བརྩེ་བའི་ཕྱིར། ནགས་ཚལ་གྱི་ནང་ནས་རྒྱུ་ཞིང་སོང་སོང་པ་ལས། ནགས་ཚལ་གྱི་ཕྱོགས་ཤིག་ན། སེང་གེ་ཞིག་ནད་དྲག་པོས་བཏབ་སྟེ། མདའ་དུག་ཅན་གྱིས་བཏབ་པ་བཞིན་དུ་འགྲེ་ལྡོག་ཅིང་རལ་པ་རྣམས་ནི་རྡུལ་གྱིས་གོས་ཤིང་དྲི་མ་ཅན་དུ་གྱུར་པ་འཇིངས་པ་ཞིག་མཐོང་ནས། སྙིང་རྗེས་བསྐུལ་ནས་དེའི་དྲུང་དུ་འོངས་ཏེ་དྲིས་པ། རི་དྭགས་ཀྱི་རྒྱལ་པོ་ཁྱོད་ཀྱི་ལུས་རབ་ཏུ་མི་བདེ་བ་འདྲ་ན་འདི་ཅི་ཉེས། །གླང་པོ་དག་ལ་དྲེགས་པས་བརྒལ་དྲགས་སམ། །རབ་ཏུ་མགྱོགས་པས་རི་དྭགས་བསྙགས་དྲགས་སམ། །མཆོངས་བ་དྲགས་པས་འདི་ལྟར་ཁྱོད་སྣད་དམ། །རྔོན་པ་དག་གིས་མདའ་འཕངས་སྣད་གྱུར་ཏམ། བསྟན་དུ་རུང་ན་ཁྱོད་ཀྱིས་འདི་སྨྲོས་ཤིག །འདི་ལ་ཅི་ལྟར་བྱས་ན་རུང་བའང་སྨྲོས། །བདག་གིས་གྲོགས་བྱར་རུང་བའི་མཐུ་ཡོད་ན། བདེ་བར་དེ་སྒྲུབ་ཁྱོད་ཀྱང་སོས་པར་བྱ། །སེང་གེས་སྨྲས་པ། བྱའི་ནང་ནས་མཆོག་ཏུ་གྱུར་པ་ལེགས་སོ། །བདག་འདི་ལྟར་མི་བདེ་བར་གྱུར་པ་ནི་རྩལ་དྲེགས་པ་ལས་བྱུང་བའམ་མ་ལགས། རྔོན་པའི་མདས་ཕོག་སྟེ་སྣད་པའམ་མ་ལགས་ཏེ་རུས་པའི་ཚལ་པ་འདི་འདྲ་བ་ཞིག་གྲེ་བར་ཟུག་སྟེ། ནང་དུ་མིད་དུའང་མི་རུང་། །ཕྱིར་དབྱུང་དུའང་མི་རུང་སྟེ །ཟུག་རྔུས་ཟུག་པ་བཞིན་དུ་བདག་རབ་ཏུ་སྡུག་བསྔལ་ཞིང་མཆིས་ན། །དེ་བས་ན་ད་ཇི་ལྟར་བགྱི་བ་གྲོགས་པོ་དག་གིས་བགྱི་བའི་དུས་ལ་བབ་ཀྱིས། ཇི་ལྟར་མཁྱེན་པར་བདག་བདེ་བར་མཛད་དུ་གསོལ། དེ་ནས་བྱང་ཆུབ་སེམས་དཔའ་སེམས་རྣོ་བས་ཟུག་རྔུ་དབྱུང་བའི་ཐབས་བསམས་ཏེ། དེའི་ཁ་དགག་ཏུ་རུང་བའི་ཤིང་ཅིག་བླངས་ནས། སེང་གེ་དེ་ལ་ཁྱོད་ཀྱིས་ཅི་ནུས་སུ་ཁ་ལེགས་པར་གདོངས་ཤིག་ཅེས་སྨྲས་པ་དང་། དེས་ཀྱང་དེ་བཞིན་དུ་བྱས་སོ། །དེ་ནས་བྱང་ཆུབ་སེམས་དཔས་ཤིང་དེ་དེའི་སོ་བར་དུ་ལེགས་པར་བཅུག་ནས་དེའི་གྲེ་བར་ཞུགས་ཏེ། རུས་པའི་ཚལ་པ་བསེགས་ཀར་ཟུག་པ་དེའི་རྩེ་མོ་གཅིག་མཆུས་བསྐུལ་ཏེ་ལྷོད་བར་བྱས་ནས། རྩེ་མོ་གཅིག་ནས་བཟུང་སྟེ་ཕྱུང་ནས་ཕྱིར་འབྱུང་བའི་ཚེའང་དེའི་ཁ་བཀག་པའི་ཤིང་དེའང་ཕྱུང་སྟེ་བོར་རོ། །ཤེས་རབ་རྣོན་པོ་ཚེ་རབས་བརྒྱར་གོམས་པས། །མ་བསྒོམས་པར་ཡང་ཇི་ལྟར་ངེས་ཕྱུང་བ། །རབ་ཏུ་གོམས་ཤིང་མཁས་པའི་སྨན་པས་ཀྱང་། །རབ་ཏུ་བསྒྲིམས་ཀྱང་ཟུག་རྔུ་དེ་མི་ཕྱིན། །ཟུག་རྔུ་ཕྱུང་ནས་དེ་མ་ཐག་ཏུ་ནི། །དེ་ཡི་སྡུག་བསྔལ་མྱ་ངན་མེད་པར་བྱས། ཟུག་རྔུ་ཕྱུང་ནས་ཇི་ལྟར་དེ་དགའ་བ། །སྐྱེ་བོ་དམ་པ་རྣམས་ནི་ཆོས་ཉིད་ཀྱིས་དེ་ལྟར་ཡིན་ཏེ། སྐྱེ་བོ་དམ་པས་གཞན་གྱི་བདེ་བསྒྲུབས་སམ། །སྡུག་བསྔལ་བཟློག་ནའང་དེ་དང་མཚུངས་པར་ནི། །བདེ་དང་སྡུག་བསྔལ་རབ་ཏུ་མྱོང་བར་འགྱུར། རང་གི་བདེ་བ་གྲུབ་ཀྱང་དེ་ལྟར་མིན། །སེམས་དཔའ་ཆེན་པོ་དེས་དེ་ལྟར་དེའི་སྡུག་བསྔལ་ཞི་བར་བྱས་ནས། །སེམས་རབ་ཏུ་དགའ་བར་གྱུར་ཏེ། སེང་གེ་དེ་ལ་གར་འགྲོ་བར་བརྡ་སྤྲད་ནས། །དེས་ཀྱང་དགའ་བར་བྱས་ཏེ། །གར་དགའ་བར་སོང་ངོ་། །དེ་ནས་རེ་ཤིག་ཅིག་བྱ་ཤིང་རྟ་མོ་དེ་འདབ་གཤོག་སྡུག་གུ་རབ་ཏུ་ཕྱར་ནས་འཕུར་ཏེ་འཁྱམ་དུ་སོང་སོང་བ་ལས། ཁ་ཟས་བཟར་རུང་བ་དེ་ལྟ་བུ་མ་རྙེད་དེ་བྲུ་བ་ཚ་བས་གདུངས་པ་དང་། སེང་གེ་དེ་ཡང་རི་དྭགས་གཞོན་ནུ་སོང་མ་ཐག་པའི་ཤ་ནི་ཟ། ཁ་དང་སྡེར་མོ་དང་། རལ་པའི་རྩེ་མོ་རྣམས་ནི་དེའི་ཁྲག་གིས་སྦགས་པས། སྟོན་ཀའི་སྤྲིན་གྱི་དུམ་བུ་མཚམས་ཀྱི་དུས་ལ་བབ་པའི་མདོག་འདྲ་བར་འདུག་པ་མཐོང་ངོ་། །དེ་ཡིས་ཕན་པ་བྱས་ཀྱང་དེ་ལ་ནི། །བསླང་བའི་ཚིག་འབྲུ་ངན་པ་བརྗོད་མ་ནུས། །འཇིགས་མེད་ཡིན་ཡང་དེ་ཡི་ངོ་ཚ་ནི། །དེ་ཚེ་མི་སྨྲ་བརཏལ་ཞུགས་ལེན་དུ་འཇུག །འོན་ཀྱང་དགོས་པའི་དབང་གིས་ངོ་ཚ་བཏང་། དེ་ཡི་མིག་སྔར་བབ་པར་ཉེ་བར་འོངས། །བདག་ཉིད་ངན་པ་དེས་ནི་དེ་མཐོང་ཡང་། །མགྲོན་བྱའི་ཚིག་ཀྱང་དེ་ལ་ཡོང་མ་བརྗོད། །རྡོ་ལེབ་སྟེང་དུ་ས་བོན་བཏབ་པ་བཞིན། །མེ་མེད་ཐལ་བ་དག་ལ་བསྲེགས་པ་བཞིན། །འབྲས་བུ་སྨིན་པའི་དུས་ན་བྱེ་བྲག་མེད། །ཕན་བཏགས་དྲིན་མེད་བི་དུལ་མེ་ཏོག་བཞིན། །དེ་ནས་བྱང་ཆུབ་སེམས་དཔས་བསམས་པ། འདིས་ནི་བདག་གོར་མ་ཆག་པར་ངོ་མ་ཤེས་སོ་སྙམ་ནས། དོགས་ཤིང་འཛེམ་པ་མེད་པར་དེའི་དྲུང་དུ་འོངས་ནས། འགྲོན་གསར་དུ་འོངས་པའི་ཚུལ་གྱིས་ཤིས་པ་བརྗོད་དེ་སློངས་མོ་བཏབ་བོ། །རི་དྭགས་རྒྱལ་པོ་བདུད་རྩིར་གྱུར། །མཐུ་རྩལ་ཆེན་པོས་རྙེད་པ་ལས། །ཕོངས་པས་བཙལ་བ་ཅུང་ཟད་འཚལ། ཁྱོད་ཀྱི་བསོད་ནམས་གྲགས་པ་འགྲུབ། དེ་ལྟར་ཤིས་པ་བརྗོད་པ་དང་ཚིག་འཇམ་པོས་བསླངས་ཀྱང་སེང་གེ་དེ་ཁྲོ་བོ་དང་སེར་སྣ་ལ་གོམས་པས། ཡ་རབས་ཀྱི་ཚུལ་ནི་མེད། མིག་གཉིས་ཁྲོས་པའི་མེ་འབར་བས། སེར་པོར་གྱུར་པ་བཟློག་ནས་བསྲེག་པ་བཞིན་དུ། བྱང་ཆུབ་སེམས་དཔའ་ལ་བལྟས་ཏེ་སྨྲས་པ། ཀྭ་ཡེ་ཁྱོད་ཅུང་ཞིག་སྡོད་ཅིག །སྙིང་རྗེའི་རླན་བག་གང་མེད་པ། །རི་དྭགས་རྣམ་པར་གཡོ་བ་ཟ། །ང་ཡི་ཁར་ནི་དེ་སོང་ནས། །གསོན་པ་དེ་ཉིད་གནད་ཆེ་མོད། །འོན་ཀྱང་ང་ལ་བརྙས་ཐབས་སུ། །དེ་ལྟར་སློངས་མོ་འདེབས་པ་ནི། སྲོག་གིས་སྐྱོ་བར་ཁྱོད་གྱུར་ཏམ། །འཇིག་རྟེན་ཕ་རོལ་ལྟ་བར་འདོད། །དེ་ནས་བྱང་ཆུབ་སེམས་དཔས་དེའི་ཚིག་རྩུབ་མོས་སླར་བཟློག་པ་དེས། ངོ་ཚར་གྱུར་ཏེ་དེ་ཉིད་ནས་ནམ་མཁའ་ལ་འཕུར་ཏེ་འདབ་མ་བརྡབས་པའི་གཤོག་སྒྲས། ངེད་ཅག་ནི་བྱ་ཡིན་པས་ཅི་བྱར་ཡང་མེད་དོ། །ཞེས་བྱ་བའི་ཚུལ་གྱི་བསྟན་ནས་ལངས་ཏེ་སོང་ངོ་། །དེ་ནས་ནགས་ཚལ་གྱི་ལྷ་ཞིག་དེས་དེ་ལ་བརྙས་ཐབས་བྱས་པས་དེ་མ་བཟོད་པ་དང་། ཇི་ཙམ་དུ་སྤྲོ་སྲིང་བ་བརྟག་པའི་ཕྱིར་སེམས་དཔའ་ཆེན་པོ་དེའི་དྲུང་དུ་འོངས་ཏེ་སྨྲས་པ། ཀྱེ་བྱ་རྣམས་ཀྱི་མཆོག་བདག་ཉིད་ངན་པ་འདི་ལ་ཕན་བཏགས་པའི་སྟེང་དུ། བདག་ལའང་མཐུ་ཡོད་བཞིན་དུ་འདི་ལྟར་བརྙས་ཐབས་བྱས་པ་ཅིའི་ཕྱིར་བཟོད་པ་བྱེད། ཁྲེལ་མེད་པ་དེ་ལ་དེ་ལྟར་བཟོད་པ་བྱས་ཀྱང་ཅི་ཕན། ཁྱོད་ཀྱི་མཆུ་ཡིས་འདིའི་མིག་ཀྱང་དབྱུང་བར་ནུས། །རྣམ་པར་གཡེང་ཞིང་སྟོབས་དང་ལྡན་ཡང་གཞོམ་པར་ནུས། །མཆེ་བའི་བར་ན་འདུག་པའི་ཤ་ཡང་འཕྲོག་ནུས་ན། །ཅི་ཕྱིར་འདི་ཡི་སྟོབས་བསྙམས་དྲེགས་པ་བཟོད་པར་བྱེད། དེ་ནས་བྱང་ཆུབ་སེམས་དཔའ་དེ་ལྟར་བརྙས་པ་བྱས་པའི་ཕྱིར་ལྷ་དེས་བཅུགས་བྱས་ཏེ། རབ་ཏུ་བསྐུལ་ཡང་བདག་ཉིད་ཀྱི་རང་བཞིན་བཟང་པོ་བསྟན་པའི་ཕྱིར་སྨྲས་པ། བདག་ཅག་ལྟ་བུའི་ཚུལ་དེ་ལྟར་མ་ཡིན་གྱིས། དེ་སྐད་མི་ཟེར་ཅིག །ཕོངས་པ་དག་ལ་དགེ་བ་རྣམས། །སྙིང་རྗེས་སྤྱོད་ཀྱིས་ཁེ་ཕྱིར་མིན། །གཞན་གྱིས་ཤེས་སམ་མ་ཤེས་ནའང་། །དེ་ལ་འཁྲུགས་པ་སུ་ཞིག་བྱེད། །གཞན་གྱི་ཕན་བཏགས་དྲིན་མེད་ན། །ཁོ་བདག་རབ་ཏུ་བསླུས་པར་ཟད། །ཕན་པ་བྱས་པའི་ལན་འདོད་ཕྱིར། །སུ་ཞིག་དེ་ལ་ཕན་འདོགས་ཡོད། །ཕན་འདོགས་པ་ནི་བསོད་ནམས་འཐོབ། །ཕྱི་མའི་ཚེ་ཡང་འབྲས་བུ་ཡོད། །ཚེ་འདི་ལ་ཡང་གྲགས་དང་དཔལ། །གདོན་མི་ཟ་བར་འཐོབ་པར་འགྱུར། །དེ་ལྟར་བསོད་ནམས་བྱས་པ་ལ། །ཁོན་དུ་འཛིན་པ་སུ་ཞིག་ཡོད། །དེ་སྟེ་ཕན་གཏགས་ལེན་འདོད་ན། །བུ་ལོན་ཆགས་བྱས་ཕན་མ་བཏགས། །བདག་གིས་ཕན་བཏགས་ཕ་རོལ་དྲིན་མེད་ཅེས། །གང་ཞིག་དེ་ལ་གནོད་པ་བྱེད་པ་ནི། །ཡོན་ཏན་གྲགས་དང་བཅས་པའི་ལུས་བཀྲུས་ནས། གླང་ཆེན་ཚུལ་དུ་སྤྱོད་པར་མི་འགྱུར་རམ། །ཕ་རོལ་ཕོངས་ལ་ཕན་གཏགས་དྲིན་དུ་མི་བཟོ་བ། །ཡོན་ཏན་བྱིན་ཆེན་དཔལ་དང་ལྡན་པར་མི་འགྱུར་མོད། །སེམས་དང་ལྡན་པས་སུ་ཞིག་ཕྱིན་ཆད་ཕན་འདོགས་བྱེད། །བདག་གིས་དྲེགས་པ་མེད་པར་ཕྱིན་ཆད་རྩོལ་དུ་ཟད། །འདི་ལ་བདག་གིས་ཇི་ལྟར་བྱས་ན་རུང་བ་སྙམ། །གང་ལ་དགེ་བའི་ཚུལ་སྤྱོད་ཀྱང་། །གྲོགས་པོའི་ཆོས་ཚུལ་མི་སྣང་ན། །མ་ཁྲོས་རྔམ་པར་མ་གྱུར་པར། །དེ་བས་བགས་ཀྱིས་གུད་དུ་འགྲོ། དེ་ནས་ལྷ་དེ་ལ་ལེགས་པར་སྨྲས་པ་དེས་ཡིད་མགུ་ནས་ལེགས་སོ་ལེགས་སོ་ཞེས་ཡང་དང་ཡང་དུ་བསྔགས་ཏེ། ཚིག་སྙན་པ་དེ་དང་དེ་དག་སྨྲས་པ། ཐོར་ཚུགས་ཤིང་ཤུན་གོས་ནི་མེད་པར་ཡང་། །ཁྱོད་ནི་དྲང་སྲོང་མི་མངོན་དཀའ་ཐུབ་ཅན། ཆ་ལུགས་ཙམ་གྱིས་ཐུབ་པར་འགྲུབ་མི་འགྱུར། །ཡོན་ཏན་དང་ལྡན་ཡང་དག་ཐུབ་པ་ཡིན། །དེ་སྐད་ཅེས་སྨྲས་ནས་མངོན་པར་དགའ་བར་གྱུར་ཏེ། དེ་ལ་མཆོད་པ་བྱས་ནས་དེ་ཉིད་དུ་མི་སྣང་བར་གྱུར་ཏོ། །དེ་ལྟ་བས་ན་དགེ་བ་དག་ནི་བསྐུལ་མ་བཏབ་ཀྱང་མ་གོམས་པའི་ཕྱིར་སྡིག་པ་མི་སྤྱོད་དོ། །ཞེས་སྐྱེ་བོ་དམ་པ་རྣམས་ཀྱི་ཡོན་ཏན་བསྔགས་པ་ལའང་བརྗོད་པར་བྱའོ། དེ་ལྟར་བཟོད་པ་གོམས་པར་བྱས་ན་དགྲ་མང་བར་མི་འགྱུར་ཞིང་ཁ་ན་མ་ཐོ་བའང་མང་བར་མི་འགྱུར་བ་དང་། སྐྱེ་བོ་མང་པོ་དགའ་ཞིང་ཡིད་དུ་འོང་བར་འགྱུར་བའི་ཕྱིར། བཟོད་པའི་གཏམ་བྱ་བ་ལའང་སྦྱར་བར་བྱའོ། །དེ་ལྟར་སོ་སོར་བརྟག་པ་མང་དུ་བྱས་ན་མཁས་པ་རྣམས་རང་གི་ཡོན་ཏན་བཟང་པོ་རྗེས་སུ་བསྲུངས་བར་འགྱུར་བའི་ཕྱིར་སོ་སོར་བརྟགས་པའི་ཡོན་ཏན་བསྔགས་པ་ལའང་བརྗོད་པར་བྱའོ། དེ་བཞིན་གཤེགས་པའི་བདག་ཉིད་ཆེ་བ་དང་། དེ་ལྟར་རང་བཞིན་བཟང་པོ་ལ་གོམས་པར་བྱས་ན་དུད་འགྲོར་གྱུར་ཀྱང་མེད་པར་མི་འགྱུར་རོ། །ཞེས་རང་བཞིན་བཟང་པོ་ལ་གོམས་པར་བྱ་བའི་ཡོན་ཏན་བསྔགས་པ་ལའང་བརྗོད་པར་བྱའོ། །བྱ་ཤིང་རྟ་མོའི་སྐྱེས་པའི་རབས་ཏེ་སུམ་བཅུ་བཞི་པའོ།། །།སྐྱེས་པའི་རབས་ཀྱི་རྒྱུད་སློབ་དཔོན་དཔའ་བོས་མཛད་པ་རྫོགས་སོ།། །།ཤོ་ལོ་ཀ་སུམ་སྟོང་ཕྱེད་དང་བཞི་སྟེ་བམ་པོ་བཅུ་གཉིས་པ་ལགས་སོ།། །།རྒྱ་གར་གྱི་མཁན་པོ་བིཏྱཱ་ཀ་ར་སིང་ཧ་དང་། ཞུ་ཆེན་གྱི་ལོ་ཙ་བན་དེ་མཉྫྱུ་ཤྲིས་བསྒྱུར་ཏེ་ཞུས་ནས་གཏན་ལ་ཕབ་པའོ།། །།ཤུབྷཾ།།