ཡང་ཟབ་ཡེ་ཤེས་འཁོར་ལོ

From Rangjung Yeshe Wiki Texts
Revision as of 21:16, 21 November 2026 by Eric (talk | contribs) (Longchenpa Project: Tibetan in the wiki's TibetanMachineUni font; «…» notes in small print (22 November 2026))
(diff) ← Older revision | Latest revision (diff) | Newer revision → (diff)

LONGCHENPA-PECIN-10-THA-015
Jump to navigation Jump to search

གནད་གསུམ་ཆོས་ཉིད་ཀྱི་འཁོར་ལོ klong chen rab 'byams kyi gsung 'bum (pe cin 2009)· Volume 10(THA) རྟེན་གཞི་ལུས་ཀྱི་གེགས་སེལ་བདུད་རྩིའི་ལྗོན་ཤིང

Title ཡང་ཟབ་ཡེ་ཤེས་འཁོར་ལོ
Wylie yang zab ye shes 'khor lo


Author Longchenpa ཀློང་ཆེན་རབ་འབྱམས་པ་དྲི་མེད་འོད་ཟེར།
Location klong chen rab 'byams kyi gsung 'bum (pe cin 2009), volume 10(THA), text 15, pages 161–167 (BDRC scan pages)
Section snying thig ya bzhi › bla ma yang tig


Tibetan text E-text from the typeset Pe cin edition (input 2020 on rywikitexts), cleaned 21 November 2026; not proofread against the print.
BDRC MW1KG4884, outline 1.4.2.17
Citation Klong chen rab 'byams pa. yang zab ye shes 'khor lo. In Kun mkhyen klong chen rab 'byams kyi gsung 'bum, vol. 10, pp. 161–167. Pe cin: Krung go'i bod rig pa dpe skrun khang, 2009. BDRC MW1KG4884.
Notes Title from the first line of the e-text; text boundaries and page numbers from the BDRC outline of MW1KG4884.
[edit]

༄༅། །ཡང་ཟབ་ཡེ་ཤེས་འཁོར་ལོ་བཞུགས་སོ། །

«དངོས་གྲུབ་ཀུན་འབྱུང་བླ་མ་ལ། །དང་པོ་ཉིད་དུ་ཕྱག་་འཚལ་ཏེ། །སྐལ་ལྡན་དོན་དུ་ཉམས་ལེན་གནད། །ཡང་ཟབ་ཡེ་ཤེས་་འཁོར་ལོ་བྲི། །གསང་བ་སྙིང་གི་རྣལ་འབྱོར་པས་མངོན་སུམ་ཉམས་སུ་ལེན་པའི་གྲོགས་སུ་ཉིན་མཚན་ཕྲུགས་གཅིག་ལ་ཇི་ལྟར་བསྒོམ་པའི་ཚུལ་གཉིས་སུ་འདུས་ཏེ། ཉིན་པར་སྣང་བ་རྒྱས་འདེབས་པ་དང༌། མཚན་མོ་་ཡེ་ཤེས་གནད་དུ་བསྣུན་པའོ། །དང་པོ་ལ་གསུམ་ལས། གཞི་ལྟ་བ་ཡེ་གྲོལ་ཆེན་པོ་ནི། ཕྱི་སྣང་བ། ནང་རིག་པ། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་སྣང་ཆ་ནས་རྨི་ལམ་སྒྱུ་མའི་རོལ་པར་ཤར་ཡང༌། སྟོང་ཆ་ནས་ཡོད་མེད་སྤྲོས་པའི་མཐའ་ཐམས་ཅད་དང་བྲལ་བས་ནམ་མཁའ་ལྟ་བུ། ཡིན་མིན་ཡོད་མེད་ཕྱོགས་རིས་བཟང་ངན་བླང་དོར་འཁོར་འདས་ལ་སོགས་པ་གང་གི་ངོ་བོར་ཡང་མ་གྲུབ་པས་བཅིངས་གྲོལ་མེད་པའི་གནས་ལུགས་ཏེ། མེད་དུ་ཡེ་ནས་གྲོལ་བ་ཞེས་བྱ་བར་ཐག་བཅད་ནས་གང་སྣང་གང་ཤར་ལ་བློའི་འཛིན་པ་མ་ཞུགས་པར་མཉམ་ཉིད་མཐའ་བྲལ་ཆེན་པོའི་ངང་ལ་བློ་གཞག་པ་ནི། ཆོས་ཉིད་ཡེ་གྲོལ་གྱི་དགོངས་པ་ཞེས་བྱའོ། །དེ་ལྟར་སྐྱོང་དུས་གཤིས་མཐའ་གྲོལ་ཀློང་ཡངས་ཆེན་པོ་ལ། མཐར་འཛིན་གྱི་ཞེན་པས་ནམ་མཁའ་གུད་དུ་མི་གཅད་གང་ཤར་རིག་པའི་ཆོ་འཕྲུལ་ཡེ་གྲོལ་མཉམ་ཉིད་ཆེན་པོ་ལ། བླང་དོར་གྱི་ཞེན་པས་སྐྱོན་ཡོན་གྱི་འཁྲིས་མི་གདགས། ཕྱོགས་ཡན་ནམ་མཁའ་ལྟ་བུའི་དགོངས་པ་ལ་ཐུན་མཚམས་ཀྱི་རིས་མེད་ཀྱང་གཉིས་འཛིན་དབྱིངས་སུ་མ་ནུབ་ཀྱི་བར་དུ་ཡེངས་མེད་སྤྲོས་པ་དང་བྲལ་བའི་རིག་པ་ཆུ་བོའི་གཞུང་བཞིན་དུ་བསྐྱང་བ་དང་གསུམ་ནི་ལྟ་བའི་དམ་ཚིག་གོ ། ལམ་སྒོམ་པ་ཡོངས་གྲོལ་ཆེན་པོ་ལ་གཉིས་ལས། མཉམ་གཞག་ཏུ་ཆོས་ཉིད་ནམ་མཁའ་ལྟ་བུའི་ངང་ལ་བློ་གཞག་པ་ནི། གང་སྣང་གང་ཤར་གྱི་དུས་ན། ཐ་མལ་གྱི་ཤེས་པ་རང་སོར་གློད་ལ། འཁོར་འདས་ཀྱི་ཆོས་གང་ལའང་བློ་མ་ཞུགས་པའི་བཏང་སྙོམས་ཆེན་པོ། ཆེད་དུ་རྩོལ་བས་མ་སྒྲིམས། རྒྱ་ཡན་ཕྱལ་པ་ཡན་པར་མ་ཤོར། རིག་ལ་རྟོག་པར་མ་འགྱུས། ངང་དྭངས་སིང་བག་དང་བཅས་པའི་ངང་ལ་བློ་གནས་པ་ནི། ངོ་བོ་ཀ་དག་གི་དགོངས་པ་ཞེས་བྱའོ། །དེའི་ཚེ་ཆོས་ཉིད་དབྱིངས་ལས་མི་གཡོ་བས་རྣམ་རྟོག་གི་དབའ་རླབས་མི་རྙོག» «།ངང་དྭངས་དྲི་མ་མེད་པས་བྱིང་རྒོད་ཀྱི་ར་བར་མི་གཞུག» །«བློ་བྲལ་བྱ་རྩོལ་ལས་འདས་པས་བདེ་གསལ་ཉམས་ལ་མི་ཞེན་པ་དང་གསུམ་ནི་བསྒོམ་པའི་དམ་ཚིག་གོ །དེ་ནས་ལངས་ཏེ་ཐུན་མཚམས་ཀྱིས་རྗེས་ཐོབ་ཏུ་ཆོས་ཅན་བདེན་མེད་ཀྱི་དོན་ལ་བློ་སྦྱང་བ་ནི། འདི་ལྟར་སྣང་བའི་ཆོས་ཐམས་ཅད་རྨི་ལམ་དང༌། སྒྱུ་མ་དང༌། སྨིག་རྒྱུ་དང༌། མིག་ཡོར་དང༌། སྒྲ་བརྙན་དང༌། ཆུ་ཟླ་དང༌། སྦྲུལ་པ་དང༌། དྲི་ཟའི་གྲོང་ཁྱེར་ཙམ་དུ་ཤེས་པས། སྐད་ཅིག་ཀྱང་བདེན་པར་མ་གྲུབ་པའི་ངང་དུ་མ་ཡེངས་པར་རྩལ་སྦྱངས་ཞིང༌། ཆགས་སྡང་དང༌། དགག་སྒྲུབ་དང༌། རི་དོགས་ལ་སོགས་པའི་གཉིས་སུ་འཛིན་པའི་བློ་ཐམས་ཅད་གཉིས་མེད་ཡོངས་གྲོལ་ཆེན་པོར་བསྒོམ་པ་ནི། ལྷུན་གྲུབ་རང་གསལ་གྱི་དགོངས་པ་ཞེས་བྱའོ། །དེའི་ཚེ་གཤིས་ལ་གཉིས་་སུ་མེད་པས། སྣང་རིག་ཐ་དད་དུ་མི་བལྟ། དོན་ལ་ངོ་བོ་མེད་པས་ཕྱོགས་ཞེན་རིས་ཅན་དུ་མི་འཛིན། རང་བཞིན་མཐའ་ལས་འདས་པས་རྐྱེན་སྣང་བླང་དོར་དུ་མི་བྱ་བ་དང་གསུམ་ནི་དམ་ཚིག་གོ །ལམ་གྱི་ཚེ་མཉམ་གཞག་ནི་སྒོམ་པ་ཡིན་ལ། རྗེས་ཐོབ་ནི་སྤྱོད་པ་ཡིན་པས། རང་གསལ་་འཛིན་མེད་ཆེན་པོར་ཤེས་པར་བྱའོ། ། འབྲས་བུ་རང་རིག་རང་གྲོལ་ཆེན་པོ་ནི། ཇི་ལྟར་སྣང་ཡང་ངོ་བོ་ལ་མ་གྲོལ་བ་མེད་པས། བློས་ཕར་མ་གཟུང༌། གང་ལྟར་རིག་ཀྱང་རྟོག་པ་ལ་ངོས་གཟུང་མེད་པས། རང་གྲོལ་འཛིན་པས་མི་བསླད་དེ་བློས་ཚུར་མི་མཐུད། སྣང་རིག་རང་གྲོལ་དུ་ཤར་བས་ཡིན་མིན་གྱིས་རྩིས་གདབ་མེད་པའི་ངང་ལས་སོ་མར་གློད་པ་ནི། མཉམ་རྫོགས་ལྷུན་གྲུབ་ཆེན་པོའི་དགོངས་པ་ཞེས་བྱའོ། །དེའི་ཚེ་ཡེ་གྲོལ་དུ་འདུག་པས་བསྐྱར་ནས་གྲོལ་རྒྱུ་མེད་པར་ངོ་ཤེས། རང་གྲོལ་དུ་འདུག་པས་གང་ཤར་སྤོ་བླག་མི་དགོས་པར་ཡིད་ཆེས། ཡོངས་གྲོལ་དུ་འདུག་པས་རྗེས་བསྙགས་གཉེན་པོ་མི་དགོས་པར་ཐག་ཆོད། ཅེར་གྲོལ་དུ་འདུག་པས་དུས་མཉམ་སྔ་ཕྱི་མེད་པར་གདེང་འཆོས་པ་དང་བཞི་ནི་དམ་ཚིག་གོ །དེ་ལྟར་གཞི་ལམ་འབྲས་བུ་གསུམ་ལ་དམ་ཚིག་ཆེན་པོ་བཅུ་གསུམ་གྱིས་བསྲུང་བ་ནི། ཉིན་དུས་སྣང་བ་རྒྱས་འདེབས་པ་ཞེས་བྱའོ། ། དོན་གཉིས་པ་མཚན་མོ་ཡེ་ཤེས་གནད་དུ་བསྣུན་པ་ལ་གསུམ་ལས། སྲོད་ལ་དབང་པོ་གནད་དུ་བསྡུ་བ་ནི། དྲང་སྲོང་གི་ལུས་གནད་བཅས་ཏེ། རླུང་རོ་གསུམ་ཕྱིར་བུས་ལ། འཇམ་རླུང་དལ་གྱིས་ནང་དུ་གཟུང་ཞིང༌། འོག་རླུང་འཐེན་ཏེ་སྟེང་རླུང་གནན། རྩ་ཨ་ཝ་དྷཱུ་ཏི་མདའ་སྨྱུག་ཙམ་དཀར་སྔོ། གསང་བ་ནས་སྤྱི་བོར་སླེབས་པའི་ནང༌། ལྟེ་བའི་ཐད་དུ་པདྨ་འདབ་བཞིའི་དབུས་སུ་ཨ་ཐུང་དམར་པོ་རེག་བྱ་ཚ་བ་ལས་མེ་འབར་བ་ཡར་སོང༌། སྤྱི་གཙུག་གི་ཧཾཿདཀར་པོ་ཐུར་དུ་ལྟ་བ་ལ་རིག་པས་ཐིག་ལེ་དཀར་དམར་གྱི་རྒྱུན་བབས། ཨ་ལ་ཕོག་མེ་ཡི་གསོས་བྱས་ཆེར་འབར་བས་ལས་དང་བག་ཆགས་ བསྲེག །བདེ་བ་རྒྱས་པ་ལ་སེམས་བཟུང་ཞིང་བསྒོམས་པས་དྲོད་དང་ཡེ་ཤེས་སྐྱེ་བར་་འགྱུར་རོ། །ནམ་ཕྱེད་ཤེས་བྱ་བུམ་པར་དྲིལ་བ་ནི། གཡས་ཕབ་ལ་ཉལ་ཏེ། དབུ་མ་གསལ་གདབ་པའི་ནང་ཐམས་ཅད་ཨ་དཀར་པོ་དོང་ཙེ་བརྩེགས་པ་ལྟར་གང་ཞིང༌། ཁྱད་པར་དུ་སྙིང་གཉིད་པདྨ་དམར་པོ་འདབ་མ་བཞི་པ་ཁ་ཅུང་ཟད་བྱེ་བ་གཅིག་བསམ་པའི་ཨ་ལ་ཨ་གཞན་རྣམས་རིམ་གྱི་ཐིམ་པར་བསམས་ལ། སྙིང་གར་རླུང་ཁ་སྦྱར་ནས་གཟུང་ཞིང༌། གསལ་སྟོང་དུ་ས་ལེར་བསྒོམ་ནས། གཉིད་དུ་འགྲོ་ཁར་སྙིང་གི་པད་འདབ་ཟླུམ་པའི་ནང་དུ། ཨ་དེ་དཀར་ལ་འོད་འབར་བ་བུམ་ནང་གི་མར་མེ་ལྟར་གསལ་བ་ལ་སེམས་གཏད་ནས་ཉལ་བས་གཉིད་འོད་གསལ་དུ་འཆར་རོ། །དེ་ནས་གཉིད་སད་དུས་རྨི་ལམ་མེད་པར་གསལ་སྟོང་དུ་སེང་ངེ་འདུག་ན། ཉམས་དེ་མ་ཤོར་བར་འཕྲོ་མཐུད་ལ་བསྒོམ་མོ། །རྨིས་ན་རྨི་ལམ་དང་རྣམ་རྟོག་ཐམས་ཅད་སྙིང་ནང་གི་ཨ་ལ་བསྡུ་ཞིང༌། གོང་ལྟར་བསྒོམས་པས་འོད་གསལ་དུ་འཆར་རོ། ། དེའང་གཉིད་དུ་སོང་ལ། ཉེ་འཁོར་གྱི་གཟུགས་མཐོང༌། སྒྲ་ཐོས། དྲི་ཚོར། རོ་མྱོང༌། རེག་བྱ་ཚོར། གཏམ་གྱི་་དོན་རིག་ལ་རྟོག་པ་མི་སྐྱེ། གཉིད་སད་རྒྱུ་འབྱུང་བ་ཡིན་ནོ། །དེ་ལྟ་བུའི་ངང་ལ་གོམས་པས་དུས་ཐམས་ཅད་དུ་ཆོས་ཐམས་ཅད་རྫོགས་པ་ཆེན་པོ་གཉིས་སུ་མེད་པའི་དོན་ལས་མི་གཡོ་བ་ཡིན་ ནོ། །དེས་ནི་གཉིད་གསལ་་སྟོང་དུ་འཆར་བས་འོད་གསལ་མངོན་དུ་བྱེད་ པའོ། །ཐོ་རངས་རིག་པ་རང་གསལ་ལ་གཞག་པ་ནི། དེ་ནས་ཐོ་རངས་ལངས་ཏེ་སེང་གེའི་འདུག་སྟངས་ཀྱིས་ཧ་ཞེས་དབུགས་རིང་བ་གསུམ་ཕྱིར་བུས་ལ་གཟུང་ཞིང༌། སྙིང་ཀའི་ཨ་དེ་ཚངས་བུག་ནས་ཐོན་ཏེ། སྤྱི་བོ་ནས་གཞུ་གང་ཙམ་གྱི་ནམ་མཁའ་ལ་ལིང་ངེར་འདུག་པ་ལ་རིག་པ་གཏད་ནས་མ་ཡེངས་པར་བསྒོམ་ཞིང་རླུང་ཕྱིར་གཟུང་བའི་ངང་ལ་གནས་པས། གང་ལའང་མི་རྟོག་པའི་ཏིང་ངེ་འཛིན་སྐྱེའོ། །དེ་ནས་མིག་དང་ཤེས་པ་ཇེ་དམར་གྱུར་ཏེ། མིག་ཕྱེད་བཙུམ་དུ་སྨད་ལ་བལྟ་ཞིང༌། ཤེས་པའི་ཨ་དེ་སྙིང་ཀར་བསྡུས་པ་རྒོད་པ་ ཞིའོ། །ཡང་བྱིང་བ་སྙམ་བྱེད་ན་སྔ་མ་བཞིན་བསྟོད་ལ་བསྒོམས་པས་བྱིང་རྒོད་མེད་པའི་ཡེ་ཤེས་ངང་གིས་མི་རྟོག་ཆུ་བོའི་རྒྱུན་བཞིན་འཆར་བ་ཡིན་ནོ། །དེ་ལྟར་མཚན་མོའི་ཐུན་གསུམ་རིམ་པ་ལྟར་བསྒོམས་པས། བདེ་བ་དང༌། གསལ་བ་་དང༌། རྣམ་པར་མི་རྟོག་པའི་ཡེ་ཤེས་ཏིང་ངེ་འཛིན་དམ་པས་བརྒྱན་པ་ཐུགས་རྡོ་རྗེའི་ངོ་བོ་ལམ་དུ་འཆར་བ་ནི། སྐུ་གསུམ་འདུ་འབྲལ་མེད་པའི་དགོངས་པའོ། །དེ་ཉིད་གོང་ནས་གོང་དུ་གོམས་པ་ལས། ལམ་དང་འབྲས་བུའི་ཡོན་ཏན་སྤྱན་དང་མངོན་པར་ཤེས་པ་ལ་སོགས་པ་མངོན་པར་གྲུབ་ཅིང་སྣང་བ་བཞིའི་ཡེ་ཤེས་མཐར་ཕྱིན་ནས་ཀུན་ཏུ་བཟང་པོ་དང་དབྱེ་བ་མེད་པའི་ས་ལ་མི་གནས་པའི་མྱ་ངན་ལས་འདས་པ་ཐོབ་པར་འགྱུར་རོ། །དེ་ལྟར་ཉིན་མཚན་དུ་བསྒོམས་པ་ཐམས་ཅད་ཀྱི་སྐབས་སུའང༌། དལ་འབྱོར་རྙེད་པར་དཀའ་བས་དལ་བ་ཆུད་མི་གསོན་པར་བརྩོན་པ་དང༌། ཚེ་མི་རྟག་པར་ཤེས་པས་སྒྲུབ་པ་ལ་ལོང་ཡོད་མི་བྱེད་པ་དང༌། འཁོར་བ་སྡུག་བསྔལ་དུ་ཤེས་པས་སྲིད་པ་ལ་མངོན་པར་སྐྱོ་བ་དང༌། ཆོས་ཐམས་ཅད་ངོ་བོ་ཉིད་མེད་པས་གང་ལའང་བདེན་ཞེན་མེད་པ་དང༌། མྱ་ངན་ལས་འདས་པ་མཆོག་ཏུ་བདེ་བས་ཞི་བའི་བྱང་ཆུབ་བསྒྲུབ་པ་དང༌། གསང་སྔགས་ཐབས་ཀྱིས་འགྲུབ་པས་སྣ་ཚོགས་ལམ་ལ་བསླབ་པ་དང༌། ཐེག་ཆེན་སྙིང་རྗེ་ལ་རག་ལས་པས་གཞན་དོན་སེམས་བསྐྱེད་དང་ལྡན་པ་དང༌། བྱིན་རླབས་མོས་གུས་ལ་རག་ལས་པས་བླ་མ་སངས་རྒྱས་སུ་མཐོང་བ་དང༌། ཐམས་ཅད་རང་སེམས་ལ་ཐུག་པས་དག་སྣང་ཕྱོགས་མེད་ལ་སྦྱང་བ་དང༌། འཁོར་བ་འཁྲུལ་རྟོག་ལས་བྱུང་བས་གཟུང་འཛིན་གྱི་རྩ་བ་གཅད་པ་དང༌། བདེ་སྡུག་སྔོན་ལས་ལས་བྱུང་བས་དགེ་སྡིག་བླང་དོར་དུ་བྱ་བ་དང༌། འཁོར་འདས་རིག་པ་ལས་ཤར་བས་རིག་པ་རང་གནད་དུ་ངོ་ཤེས་པར་བྱ་བ་་སྟེ། གནད་རྣམ་པ་བཅུ་གཉིས་ཀྱིས་རང་གི་རྒྱུད་འདུལ་བ་ནི། ཡང་གནད་གལ་པོ་ཆེའི་གདམས་པ་ཡིན་པས་སྙིང་ནས་བསམ་པར་བྱའོ། །དེ་ལྟར་ཡང་ཟབ་མངོན་སུམ་སྙིང་པོའི་དོན། །སྒོམ་པའི་གྲོགས་སུ་འདི་ཀུན་གཅེས་པས་ན། །རིན་ཆེན་གསེར་ལ་གཡུ་ཡིས་ཕྲ་བཀོད་བཞིན། ། གནད་ལ་གནད་གཅེས་ལེགས་པར་སྨྲས་པ་ཡི། །རིག་འཛིན་གོང་མ་རྣམས་ཀྱིས་གསུངས་པའི་དོན། །ཟབ་མོ་དག་ལས་བཏུས་ཏེ་བཀོད་པ་ནི། །ཕྱི་རབས་སྐལ་ལྡན་སྙིང་གི་བུ་རྣམས་དང༌། །ཕྲད་ནས་བརྩོན་པས་བྱང་ཆུབ་སྒྲུབ་པར་ཤོག» «།བདག་བློ་གཅིག་པུར་ཞི་བའི་ནགས་དགའ་ཡང༌། །སྨོན་ལམ་ཆོས་དཀར་ལས་ཀྱིས་ཉིད་འབྲེལ་བས། །དད་ལྡན་མི་ལྡན་འདྲེས་མའི་འགྲོ་རྣམས་ཀྱི། །དོན་ཞེས་ཚིག་གི་ཕན་པ་ཉུང་ཟད་གྱུར། །དེང་སང་དུས་འདིར་བདག་འདྲས་འབད་ཀྱང་ནི། །གཞན་དོན་ཉིད་འགྱུར་དག་པའང་མི་འགྱུར་ན། །རང་དོན་ཞི་བའི་ཏིང་འཛིན་ཉམས་པའི་རྒྱུ། །འདི་འདྲས་ཅི་བྱ་སྙིང་པོ་འདུག་གམ་སོམས། །ཚེ་འདིར་མ་ཆགས་འདོད་ཞེན་ཅུང་ཟད་མེད། །ལུས་ངག་བརྩོན་པ་གཞན་ཕན་བསྔོས་ན་ཡང༌། །ཕྲག་་དོག་ཚིག་རྩུབ་སྡིག་པའི་རྐྱེན་གྱུར་ཅིང༌། ། མི་དགའི་དབང་གྱུར་འགྲོ་ལ་ཕན་ཐོགས་སམ། །རང་གི་ནུས་པ་ཆོས་སྲིད་དགེ་བ་དེས། །འདི་ཕྱིར་ཕན་པའི་ལམ་ལ་འགོད་བྱས་ཀྱང༌། །ཅུང་ཟད་རྐྱེན་གྱིས་དགྲར་གྱུར་སློབ་མ་གང༌། །ཡི་ཆད་གནས་སུ་འགྱུར་པའང་སྙིང་ནས་སོམས། ། འགའ་ལས་ཐོས་པ་འགའ་ལ་བསྒྲག་གྱུར་དང༌། །འགའ་ལ་ཟང་ཟིང་འགའ་ལ་ཆོས་སྦྱིན་དང༌། །འགའ་ལ་དོན་མཐུན་འགའ་ལ་གྲོས་ཆེན་འདེབས། །འགའ་ལས་བླངས་པ་འགའ་ལ་སྦྱིན་རྣམས་ཀྱང༌། །སྙིང་པོ་མེད་ལ་རང་དོན་བསླུ་བའི་རྒྱུ། །བྱིས་པའི་སྤྱོད་པ་འདྲ་ཞིང་བཞད་གད་གནས། །དོན་ཆུང་ལས་ལ་མི་ཚེ་ཟད་ཉིན་མཆིས། །དེ་བས་མྱུར་བར་དབེན་པའི་ནགས་་འདབས་སོང། །དནི་སྙིང་ནས་ཡི་ཆད་མཆི་མ་ཤོར། །གྲོགས་དང་སློབ་མ་བཤེས་འདྲའི་འཇིག་རྟེན་ཆོས། །རྟག་མི་ཐུབ་ཅིང་གནོད་པའི་ཚོགས་རབ་འཕེལ། །འབྲལ་ཡང་མི་དགའ་མེད་པའི་དོན་ལ་སོམས། །དེ་བས་གཞན་ལ་ཕན་པ་ཅི་ཞིག་ཡོད། །རང་གི་དོན་བསྒྲུབ་ནགས་རིའི་ཁྲོད་སོང་་སྟེ། །ཉིན་མཚན་འོད་གསལ་ངང་ལས་མི་གཡོ་ཞིང༌། །གདོད་མའི་ས་ལ་གཏན་སྲིད་ཟིན་པར་ཤོག །གསང་བ་སྙིང་ཏིག་གི་གདམས་པ་ཡང་ཟབ་ཡེ་ཤེས་འཁོར་ལོ་ཞེས་བྱ་བ། ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་གངས་རི་ཐོད་དཀར་གྱི་མགུལ་ཨོ་རྒྱན་རྫོང་ཞེས་བྱ་བའི་རི་ངོགས་སུ་བཀོད་པ་ཡོངས་སུ་རྫོགས་སོ། །དཔལ་སྔགས་ཀྱི་བདག་མོས་སྲུངས་ཤིག» «།དམ་ཉམས་ལོག་ལྟ་ཅན་གྱི་ལག་ཏུ་མ་ཤོར་ ཞིག །དགེའོ། །དགེའོ། །དགེའོ།། །།

[edit]

This page is a cleaned copy of the following rywikitexts page, which stay unchanged:

Cleaning (21 November 2026): removed 1 running heads, 3 Word page fields. The «» marks are kept in the text: they enclose the small-print notes of the print, which are shown in small print with the marks hidden.

Part of the Longchenpa Collected Works (about this project).