ཌཱཀྐིའི་ལུས་དཀྱིལ་ཆེན་མོ

From Rangjung Yeshe Wiki Texts
Revision as of 21:16, 21 November 2026 by Eric (talk | contribs) (Longchenpa Project: Tibetan in the wiki's TibetanMachineUni font; «…» notes in small print (22 November 2026))
(diff) ← Older revision | Latest revision (diff) | Newer revision → (diff)

LONGCHENPA-PECIN-06-CHA-019
Jump to navigation Jump to search

ཌཱཀྐི་དྲིལ་སྒྲུབ་གསང་བ་སྙིང་གི་དུམ་བུ klong chen rab 'byams kyi gsung 'bum (pe cin 2009)· Volume 6(CHA) པདྨ་ལས་འབྲེལ་རྩལ་གྱི་སྐྱེས་རབས་དང་༔ ལུང་བསྟན

Title ཌཱཀྐིའི་ལུས་དཀྱིལ་ཆེན་མོ
Wylie DAk+ki'i lus dkyil chen mo


Author Longchenpa ཀློང་ཆེན་རབ་འབྱམས་པ་དྲི་མེད་འོད་ཟེར།
Location klong chen rab 'byams kyi gsung 'bum (pe cin 2009), volume 6(CHA), text 19, pages 139–149 (BDRC scan pages)
Section snying thig ya bzhi › mkha' 'gro snying thig


Tibetan text E-text from the typeset Pe cin edition (input 2020 on rywikitexts), cleaned 21 November 2026; not proofread against the print.
BDRC MW1KG4884, outline 1.2.2.21
Citation Klong chen rab 'byams pa. DAk+ki'i lus dkyil chen mo. In Kun mkhyen klong chen rab 'byams kyi gsung 'bum, vol. 6, pp. 139–149. Pe cin: Krung go'i bod rig pa dpe skrun khang, 2009. BDRC MW1KG4884.
Notes Title from the first line of the e-text; text boundaries and page numbers from the BDRC outline of MW1KG4884.
[edit]

༄༅། །ཌཱཀྐིའི་ལུས་དཀྱིལ་ཆེན་མོ་བཞུགས་སོ་ཨང་༔ ཨོ་རྒྱན་སྐད་དུ༔ བོད་སྐད་དུ༔ མཁའ་འགྲོ་གསང་བ་སྙིང་གི་སྒྲུབ་པ༔ རིགས་ཀྱི་ཌཱཀྐི་ལྔ་ལ་ཕྱག་འཚལ་ལོ༔ རྣལ་འབྱོར་འཁོར་བ་བློས་བཏང་བ༔ རི་ཁྲོད་དགོན་པ་འགྲིམ་ནུས་པ་ཞིག་གིས༔ ཡང་གསང་མཁའ་འགྲོ་སྙིང་ཐིག་བསྒོམ་ཞིང་༔ མཁའ་འགྲོ་ལུས་དང་གྲིབ་མ་བཞིན་དུ་འགྲོགས་པར་འདོད་པས༔ མཁའ་འགྲོ་མ་ཐོད་རྒལ་དུ་བསྒྲུབ་པར་བྱ་སྟེ༔ དེ་ལ་གསུམ་སྟེ་རྣལ་འབྱོར་བཞི་ལྡན་གྱི་སྒོ་ནས་ཉམས་སུ་བླང་ངོ་༔ དེ་ལ་དང་པོ་ལྷའི་རྣལ་འབྱོར་དང་གཅིག༔ སྔགས་ཀྱི་རྣལ་འབྱོར་དང་གཉིས༔ རྫོགས་རིམ་གྱི་རྣལ་འབྱོར་དང་གསུམ༔ ལས་མཐའི་རྣལ་འབྱོར་དང་བཞིའོ༔ རྒྱ་རྒྱ་རྒྱ༔ དེ་ལ་དང་པོ་ལྷའི་རྣལ་འབྱོར་བསྒོམས་པ་ལ་གསུམ་སྟེ༔ དང་པོ་དེ་བཞིན་ཉིད་ཀྱི་ཏིང་ངེ་འཛིན་ནི༔ ཆོས་ཐམས་ཅད་སྟོང་པ་ཉིད་དུ་བསྒོམ༔ དེ་ནས་ཀུན་ཏུ་སྣང་བའི་ཏིང་ངེ་འཛིན་ནི༔ སེམས་ཅན་ཐམས་ཅད་ལ་ཁྱབ་པའི་ཚད་མེད་པ་བཞི་བསྒོམ༔ དེ་ནས་རྒྱུའི་ཏིང་ངེ་འཛིན་ནི༔ བསྐྱེད་པ་རྐྱེན་གྱི་སྔགས་ཀྱིས་སྐུ་གསལ་གདབ་པ་ནི༔ ངག་ཏུ་ཨོཾ་ཨཱཿཧཱུྃ༔ ཧྲཱི་མ་ཧ་རི་ནི་ས༔ ར་ཙ་ཧྲཱི་ཡ༔ ཞེས་བརྗོད་པས༔ བདག་རྡོ་རྗེ་ཕག་མོར་བསྒོམ་སྟེ༔ སྐུ་མདོག་དམར་མོ་ཞལ་གཅིག་ཕྱག་གཉིས་མ༔ ཁྲོ་ཞལ་དམར་མོ་སྤྱན་གསུམ་མ་གཡས་ན་གྲི་གུག་བསྣམས་པ༔ གཡོན་ན་ཐོད་པ་ཁྲག་གིས་བཀང་བ་བསྣམས་པ༔ ཁ་ཊྭཱཾ་མཆན་ཁུང་གཡོན་ན་བཅུག་ནས་འཛིན་ཞིང་དབུ་སྐྲ་ཐུར་ལ་འཕྱང་བ༔ མེ་ལོང་དྲིལ་བུའི་སྒྲ་འཁྲོལ་བ༔ ཞབས་གཡོན་བརྐྱང་གཡས་བསྐུམ་པ༔ རུས་པའི་རྒྱན་གྱིས་བརྒྱན་པ་མེ་རི་འབར་བའི་ཀློང་ན་རོའི་གདན་ལ་ཕྱེད་སྐྱིལ་དུ་བཞུགས་པར་བསྒོམ༔ དེ་ལྟར་བསྒོམས་པའི་སྤྱི་གཙུག་ཀླད་པ་དུང་ཁང་གི་གཞལ་ཡས་ཁང་༔ རྩེ་མོ་རྣམ་པར་བཀོད་པ༔ རྩ་འདབ་སུམ་བརྒྱ་དྲུག་ཅུའི་ལྟེ་བའི་རྩ་མདུད་ཀྱི་དབུས་ན་འབྱུང་བ་ཆུའི་དངས་མ༔ ཕ་མའི་རྒྱུའི་ཐིག་ལེ་དཀར་པོ་ལ༔ ཡེ་ཤེས་ཀྱི་རང་འོད་ཁ་དོག་ལྔ་ལྡན་དུ་གསལ་བ་ཡི་གེ་ཧ་དང་རིའི་ངོ་བོར་གནས་ཏེ་རྡོ་རྗེ་མཁའ་འགྲོ་ཡབ་ཡུམ་དངོས་ཡིན་པས་དེར་གསལ་གདབ་པ་ནི༔ སྐུ་མདོག་དཀར་མོ་ཞལ་གཅིག་ཕྱག་གཉིས་མ༔ གཡས་པ་རྡོ་རྗེ་རྩེ་ལྔ་བསྣམས་པ༔ གཡོན་པ་ཀ་པཱ་ལ་བསྣམས་པ༔ རོའི་གདན་ལ་ཡབ་ཡུམ་གཉིས་སུ་མེད་པར་འཁྲིལ་བ༔ ཕྱག་མཚན་མཐུན་པ་གསལ་གདབ༔ རྩ་འདབ་སུམ་བརྒྱ་དྲུག་ཅུ་ལ་མཁའ་འགྲོ་ཡབ་ཡུམ་སུམ་བརྒྱ་དྲུག་ཅུ༔ སྐུ་མདོག་ཕྱག་མཚན་གཙོ་བོ་ཡབ་ཡུམ་དང་མཐུན་པ༔ ཡབ་ཡུམ་འཁྲིལ་སྦྱོར་དུ་བདེ་བའི་ངང་ལ་བཞུགས་པ་གསལ་གདབ༔ དེ་ཡང་ཡེ་ཤེས་ལྔའི་རྩལ་གྱི་རྣམ་པ་ཁྲོ་བོ་དང་ཁྲོ་མོའི་རང་བཞིན་དུ་བཞུགས་པ༔ དེ་ཡང་གདོད་མ་ནས་ཡེ་ཤེས་ཀྱི་རང་རྩལ་འབྱུང་བཞིའི་དངས་མ་ཡི་གེ་དང་སྐུ་རུ་རང་བྱུང་དུ་ལྷུན་གྱིས་གྲུབ་ཅིང་༔ དམ་ཚིག་དང་ཡེ་ཤེས་གཉིས་སུ་མེད་པས་འདིར་གསལ་གདབ་པའོ༔ མགྲིན་པར་རོ་འདུས་རྩ་འདབ་བཅུ་དྲུག་གི་ལྟེ་བའི་རྩ་མདུད་དུ་འབྱུང་བཞིའི་དྭངས་མ་ཕ་མའི་ཁུ་ཁྲག་ལ་ཡི་གེ་རི་དང་ཙ་རྣམས་སེར་པོ་ལ་ཡེ་ཤེས་ཀྱི་ཁ་དོག་ལྔ་ལྡན་དུ་གནས་ཏེ༔ རཏྣ་ཌཱཀྐི་ཡབ་ཡུམ་དངོས་ཡིན་པས་དེར་གསལ་གདབ་པ་ནི༔ ཡབ་ཡུམ་གཉིས་ཀའི་ཕྱག་གཡས་ན་རིན་ཆེན་འབར་བ་བསྣམས་པ༔ གཡོན་ཐོད་པ་བསྣམས་པ༔ ཞབས་གཡས་བརྐྱང་གཡོན་བསྐུམ་པ༔ རཏྣའི་གདན་ལ་འཁྲིལ་སྦྱོར་དུ་གསལ་གདབ༔ རྩ་འདབ་བཅུ་དྲུག་ལ་ཡབ་ཡུམ་གཉིས་འདྲ་བའི་འཁོར་གསལ་གདབ༔ དེ་ཡང་དམ་ཚིག་དང་ཡེ་ཤེས་གཉིས་སུ་མེད་པའོ༔ སྙིང་ཁ་ན་དྲན་པ་རྣམ་པར་བཀོད་པ་རྩ་འདབ་སུམ་ཅུ་རྩ་གཉིས་ཀྱི་ལྟེ་བ་ལ་ཙིཏྟ་རིན་ཆེན་ཟུར་བརྒྱད་ཀྱི་ནང་ན་ཡེ་ཤེས་ཀྱི་དངས་མ་རྒྱུ་བའི་ཐིག་ལེ་སྣང་ལ་རང་བཞིན་མེད་པ་མཐིང་ཁ་ལ་ཡེ་ཤེས་ཀྱི་རང་འོད་ཁ་དོག་ལྔ་ལྡན་དངས་པ༔ ཡི་གེ་མ་དང་ཧཱུྃ་གི་རང་བཞིན་དུ་གནས་ཏེ༔ སངས་རྒྱས་མཁའ་འགྲོ་ཡབ་ཡུམ་དངོས་ཡིན་པས་དེར་གསལ་གདབ་པ་ནི་ཀུན་ཏུ་བཟང་མོ་ཡབ་ཡུམ་སྐུ་མདོག་མཐིང་ནག་ཞལ་གཅིག་ཕྱག་གཉིས་པ༔ ཕྱག་མཚན་མེད་པ་ཡབ་ཡུམ་འཁྲིལ་སྦྱོར་དུ་བཞུགས་པ༔ རུས་པའི་རྒྱན་དྲུག་དང་ལྡན་པ་ཞབས་བརྐྱང་བསྐུམ་ཉི་ཟླའི་གདན་ལ་བཞུགས་པ་གསལ་གདབ༔ རྩ་འདབ་སུམ་ཅུ་རྩ་གཉིས་ལ་གཙོ་བོ་ཡབ་ཡུམ་དང་འདྲ་བའི་འཁོར་གསལ་གདབ༔ དེ་ཡང་དམ་ཚིག་དང་ཡེ་ཤེས་གཉིས་སུ་མེད་པའོ༔ ལྟེ་བ་ན་སྐྱེད་བྱེད་དྲུག་ཅུ་རྩ་བཞིའི་རྩ་འདབ་ཀྱི་དབུས་ཀྱི་ལྟེ་བ་ན༔ འབྱུང་བཞིའི་དངས་མ་ཕ་མའི་རྒྱུའི་ཐིག་ལེ་ཁ་དོག་དམར་པོ་ལ༔ ཡེ་ཤེས་ཀྱི་རང་འོད་ཁ་དོག་ལྔ་ལྡན་དུ་གསལ་བ་ཡི་གེ་ནི་དང་ཧྲཱིའི་ངོ་བོར་གནས་པ༔ པད་མ་མཁའ་འགྲོ་ཡབ་ཡུམ་དངོས་ཡིན་ཏེ་དེར་གསལ་གདབ་པ་ནི་པད་མ་མཁའ་འགྲོ་ཡབ་ཡུམ་དམར་པོ༔ ཕྱག་གཡས་གཉིས་ན་པད་མ་བསྣམས་པ༔ གཡོན་གཉིས་ན་ཐོད་ཁྲག་བསྣམས་པ༔ ཞབས་གཡས་བརྐྱང་གཡོན་བསྐུམ་པད་མའི་གདན་ལ་བཞུགས་པ་གསལ་གདབ༔ དེ་ཡང་དམ་ཚིག་དང་ཡེ་ཤེས་གཉིས་སུ་མེད་པའོ༔ འཁོར་གཙོ་བོ་ཡབ་ཡུམ་དང་འདྲ་བ་རྩ་འདབ་ཀྱི་གྲངས་དང་མཉམ་པ་གསལ་གདབ་བོ༔ གསང་གནས་བདེ་བ་མྱོང་བྱེད་རྣམ་པར་བཀོད་པའི་རྩ་གདབ་ཉི་ཤུ་རྩ་བརྒྱད་ཀྱི་ལྟེ་བའི་རྩ་མདུད་ལ༔ འབྱུང་བཞིའི་དངས་མ་ཕ་མའི་ཁུ་ཁྲག་ཁ་དོག་ལྗང་གུ་ལ་ཡེ་ཤེས་ཀྱི་རང་འོད་ཁ་དོག་ལྔ་ལྡན་དུ་གསལ་བ༔ ཡི་གེ་ས་དང་ཡའི་ངོ་བོར་གནས་པ་དེ་ལས་ཀྱི་མཁའ་འགྲོ་ཡབ་ཡུམ་དངོས་ཡིན་ཏེ༔ དེར་གསལ་གདབ་པ་ནི་ལས་ཀྱི་མཁའ་འགྲོ་ཡབ་ཡུམ་སྐུ་མདོག་ལྗང་ཁུ་ཕྱག་གཡས་རལ་གྲི་གཡོན་ཐོད་པ་བསྣམས་པ་ཞབས་གཡས་བརྐྱང་གཡོན་བསྐུམ་པ༔ རྡོ་རྗེ་རྒྱ་གྲམ་གྱི་གདན་ལ་ཡབ་ཡུམ་འཁྲིལ་སྦྱོར་དུ་གསལ་གདབ་བོ༔ རྩ་འདབ་ཉི་ཤུ་རྩ་བརྒྱད་ལ་གཙོ་བོ་ཡབ་ཡུམ་འདྲ་བའི་འཁོར་གསལ་གདབ༔ དེ་ཡང་དམ་ཚིག་དང་ཡེ་ཤེས་གཉིས་སུ་མེད་པའོ༔ དེ་ནི་གྲངས་ཅན་གྱི་རྩ་ལས་རང་བྱུང་གི་ལྷ་ལྔ༔ བཞི་བརྒྱ་དང་བདུན་ཅུ་རྩ་ལྔ་གནས་པ་གསལ་གདབ་པའོ༔ གྲངས་མེད་ནི་སྤྱི་བོའི་གཙུག་ནས་རྐང་པའི་མཐིལ་ཡན་ཆད་ལ་རྩ་གྲངས་ལས་འདས་པའི་ནང་ན་མཁའ་འགྲོ་ཡབ་ཡུམ་གྲངས་ལས་འདས་པ་ཏིལ་གྱི་གོང་བུ་ཁ་ཕྱེ་བ་ཙམ་གནས་པ་ཡིན་པས་དེ་ཡང་གསལ་གདབ་བོ༔ ལྷའི་དེ་ཁོ་ན་ཉིད་ཀྱི་དོན་ཡང་རང་ལུས་རྡོ་རྗེ་ཕག་མོར་བསྒོམ་པ་ནི༔ ཕྱི་ལྟར་ན་ཡུམ་ཆེན་མོ་ཤེས་རབ་ཀྱི་ཕ་རོལ་དུ་ཕྱིན་མ་ཡིན་ལ༔ ནང་ལྟར་ན་རྡོ་རྗེ་ཕག་མོ་ཡིན༔ གསང་བ་ལྟར་ན་ཡུམ་ཨེ་ཀ་ཙ་ཏི་ཡིན་ནོ༔ སྙིང་ཁའི་ཡུམ་ཀུན་ཏུ་བཟང་མོ་ཡང་ཕྱི་ལྟར་ན་འབྱུང་བ་ནམ་མཁའི་ངོ་བོ་ཡིན༔ ནང་ལྟར་ན་ཀུན་ཏུ་བཟང་མོ༔ གསང་བ་ལྟར་ན་ཆོས་ཀྱི་དབྱིངས་ཀྱི་ཡེ་ཤེས་སོ༔ མཁའ་འགྲོ་མ་བཞི་ཡང་ཕྱི་ལྟར་ན་འབྱུང་བཞི༔ ནང་ལྟར་ན་ལྷ་མོ་བཞི༔ གསང་བ་ལྟར་ན་ཡི་གེ་བཞིའི་ངོ་བོ་ཡིན་ནོ༔ རྡོ་རྗེ་ཕག་མོའི་ཡབ་རྟ་མགྲིན་བསྐྱེད་པ་ཡང་ཕྱི་ལྟར་ན་པདྨ་གར་གྱི་དབང་ཕྱུག༔ ནང་ལྟར་ན་རྟ་མགྲིན༔ གསང་བ་ལྟར་ན་ཡི་གེ་ཧྲཱིཿའི་ངོ་བོ་ཡིན་ནོ༔ དཔའ་བོ་བཞི་ཡང་༔ ཕྱི་ལྟར་ན་ཉོན་མོངས་པ་བཞི༔ ནང་ལྟར་ན་དཔའ་བོ་གིང་བཞི༔ གསང་བ་ལྟར་ན་ཡི་གེ་བཞིའི་ངོ་བོ་ཡིན་ནོ༔ རང་གི་ལུས་ཡབ་ཡུམ་གཉིས་སུ་མེད་པར་ཐབས་དང་ཤེས་རབ་ཀྱི་རང་བཞིན་དུ་གནས་པའོ༔ སྔགས་ཀྱི་དེ་ཁོ་ན་ཉིད་ཀྱང་འཁོར་ལོ་ལྔའི་རྩའི་དབུས་སུ་བསྐྱེད་པའི་མཁའ་འགྲོ་ཡབ་ཡུམ་དེ་དག་གི་སྙིང་གི་དཀྱིལ་ན་རང་རང་གི་ས་བོན་རྣམས་གསལ་བ་ལས་འཁོར་ལོ་བཀོད་པའི་འཕྲིན་ལས་འོག་ཏུ་གསལ་ལོ༔ གཉིས་པ་སྔགས་ཀྱི་རྣལ་འབྱོར་ནི༔ རང་གི་སྙིང་གི་དཀྱིལ་གྱི་སངས་རྒྱས་མཁའ་འགྲོ་ཡབ་ཡུམ་གྱི་སྙིང་ཁར་པདྨ་འདབ་བཞིའི་དཀྱིལ་དུ༔ ཡབ་ཡུམ་གཉིས་ཀྱི་ས་བོན་ལ་ཧ་རི་ནི་ས་ར་ཙ་ཧྲཱིཿཡ་བརྒྱད་ཀྱིས་སོ་སོར་བསྐོར་བར་བསམས་ལ༔ དེ་དག་རྣམས་ཆོས་སྐོར་དུ་སྒ་ར་ར་འཁོར་བར་བསམས་ལ༔ ཧ་རི་ནི་ས༔ ར་ཙ་ཧྲཱིཿཡཿཙིཏྟ་ཧྲིང་ཧྲིང་ཛ་ཛ༔ ཞེས་བཟླས༔ མཁའ་འགྲོ་ཡབ་ཡུམ་རྣམས་ཀྱང་རང་རང་གི་སྙིང་པོའི་རི་རི་བཟླས་པར་བསམ༔ དེ་ཡང་སྙིང་མི་འཁོར་བར་ཡིག་འབྲུ་རྣམས་འཁོར་བར་བསམ༔ སྙིང་འཁོར་བར་བསམ་ན་སྨྱོ་བའི་ཉེན་ཡོད་དོ༔ དེ་ལྟར་ཞག་བདུན་བཟླས་པས༔ དཔའ་བོ་དང་མཁའ་འགྲོས་དངོས་སུ་བྱིན་གྱིས་རློབ་པར་འགྱུར་ཏེ༔ རྟགས་ནི༔ རང་གི་ཤེས་པ་འགྱུར་བ་དང་༔ འཕར་བ་དང༔ ལྡེག་པ་དང་༔ འཁྲབ་པ་དང་༔ གླུ་ལེན་པ་དང་༔ གར་བྱེད་པ་ལ་སོགས་པ་འབྱུང་ངོ་༔ སེམས་བདེ་བར་ཤར་ནས་འཁྲབ་སྙིང་འདོད་པ་དང་འཁྲབ་པ་དངོས་འབྱུང་ངོ་༔ དེ་ནས་ཏིང་ངེ་འཛིན་གྱི་ཐུན་འཇོག་ཙ་ན༔ འཁོར་འཕྲོ་བཅད་པས་ཉམས་བདེ་ལྷན་གྱིས་འགྲོའོ༔ གསུམ་པ་རྫོགས་རིམ་གྱི་རྣལ་འབྱོར་ནི༔ མཁའ་འགྲོ་ལྔ་པོ་དེ་ཡང་ཕྱི་ལྟར་ན་སྐུ་ལྔ༔ ནང་ལྟར་ན་མཁའ་འགྲོ་ཡབ་ཡུམ་ལྔ༔ གསང་བ་ལྟར་ན་ཡི་གེ་ལྔ༔ རྫོགས་རིམ་གྱི་དེ་ཁོ་ན་ཉིད་ཀྱི་དོན་ཡང་ཕྱི་ལྟར་ན་སངས་རྒྱས་མཁའ་འགྲོ་ཡབ་ཡུམ་ཆོས་ཀྱི་སྐུ༔ རྡོ་རྗེ་མཁའ་འགྲོ་ཡབ་ཡུམ་ལོངས་སྐུ༔ རིན་ཆེན་མཁའ་འགྲོ་ཡབ་ཡུམ་སྤྲུལ་སྐུ༔ པད་མ་མཁའ་འགྲོ་ཡབ་ཡུམ་ངོ་བོ་ཉིད་ཀྱི་སྐུ༔ ལས་ཀྱི་མཁའ་འགྲོ་ཡབ་ཡུམ་མངོན་པར་བྱང་ཆུབ་པའི་སྐུའོ༔ ནང་ལྟར་ན་སངས་རྒྱས་མཁའ་འགྲོ་ཡབ་ཡུམ་གཏི་མུག་རྣམ་པ་དག་པ༔ རྡོ་རྗེ་མཁའ་འགྲོ་ཡབ་ཡུམ་ཞེ་སྡང་རྣམ་པར་དག་པ༔ རིན་ཆེན་མཁའ་འགྲོ་ཡབ་ཡུམ་ང་རྒྱལ་རྣམ་པར་དག་པ༔ པདྨ་མཁའ་འགྲོ་ཡབ་ཡུམ་འདོད་ཆགས་རྣམ་པར་དག་པ༔ ལས་ཀྱི་མཁའ་འགྲོ་ཡབ་ཡུམ་ཕྲག་དོག་རྣམ་པར་དག་པའོ༔ གསང་བ་ལྟར་ན་ཡེ་ཤེས་ལྔ་ནི༔ སངས་རྒྱས་མཁའ་འགྲོ་ཡབ་ཡུམ་ཆོས་ཀྱི་དབྱིངས་ཀྱི་ཡེ་ཤེས༔ རྡོ་རྗེ་མཁའ་འགྲོ་ཡབ་ཡུམ་མེ་ལོང་ལྟ་བུའི་ཡེ་ཤེས༔ རིན་ཆེན་མཁའ་འགྲོ་ཡབ་ཡུམ་མཉམ་པ་ཉིད་ཀྱི་ཡེ་ཤེས༔ པད་མ་མཁའ་འགྲོ་ཡབ་ཡུམ་སོ་སོར་རྟོགས་པའི་ཡེ་ཤེས༔ ལས་ཀྱི་ཌཱཀྐི་ཡབ་ཡུམ་བྱ་བ་གྲུབ་པའི་ཡེ་ཤེས་སོ༔ དེ་ལྟར་མཁའ་འགྲོ་ཡབ་ཡུམ་ལྔ་བསྒོམས་ནས་ཡིག་འབྲུ་ལྔ་བཟླས་པས༔ མཁའ་འགྲོ་ཡབ་ཡུམ་རྣམས་ཞལ་མངོན་སུམ་དུ་མཐོང་༔ སྐུ་ལྔ་ལྷུན་གྱིས་གྲུབ༔ དུག་ལྔ་གནས་སུ་དག༔ ཡེ་ཤེས་ལྔ་རང་བཞིན་གྱིས་འཆར༔ འགྲོ་བ་རང་བཞིན་གྱིས་སྐྱེ་རྒྱུད་འཆད༔ སྐྱེ་ཤི་ལ་ཉམ་མི་ང་བར་འབྱུང་སྟེ༔ ལྟ་བ་སངས་རྒྱས་མཁའ་འགྲོ་ཡབ་ཡུམ་ཡིན་ཏེ༔ ཅི་ཡང་མ་གྲུབ་རང་བཞིན་ཡིན༔ བསྒོམ་པ་རྡོ་རྗེ་མཁའ་འགྲོ་ཡབ་ཡུམ་ཡིན་ཏེ༔ མི་འགྱུར་མི་ཤིགས་སྒོམ་དང་བྲལ༔ སྤྱོད་པ་རིན་ཆེན་མཁའ་འགྲོ་ཡབ་ཡུམ་ཡིན་ཏེ༔ ཀུན་དང་མཐུན་པར་རང་བྱུང་རང་ཤར༔ འབྲས་བུ་པདྨ་མཁའ་འགྲོ་ཡབ་ཡུམ་ཡིན་ཏེ༔ འཁོར་བ་མ་སྤངས་རང་སར་གྲོལ༔ དམ་ཚིག་ལས་ཀྱི་མཁའ་འགྲོ་ཡབ་ཡུམ་ཡིན་ཏེ༔ འགྲོ་དོན་ཐབས་མཁས་ཕྲིན་ལས་མཛད༔ དེ་ལྟར་ཕྱི་ནང་གསང་བའི་ཚུལ་དུ་ཉམས་སུ་བླང་ངོ་༔ ལས་མཐའི་རྣལ་འབྱོར་ནི༔ རྟོགས་པ་ཁྱད་པར་ཅན་རྒྱུད་ལ་སྐྱེར་མ་བཏུབ་ན༔ རྡོ་རྗེ་མཁའ་འགྲོ་ཡབ་ཡུམ་དབང་དུ་མ་འདུས་པ་ཡིན་པས༔ སྤྱི་གཙུག་ཏུ་རྩ་མདུད་ཀྱི་ཡི་གེ་ལས་རྡོ་རྗེ་མཁའ་འགྲོ་ཡབ་ཡུམ་གསལ་གདབ་སྟེ༔ ཡབ་ཡུམ་གཉིས་ཀྱི་ཐུགས་ཁར་རང་རང་གི་ས་བོན་བསམ༔ འཁོར་ལོ་རྩིབས་བཞི་དང་པདྨ་འདབ་མ་བཞིའི་དབུས་སུ་བསམ༔ དེ་ལ་བཛྲ་ཌཱཀྐི་ནི་ཧཱུྃ་ཛ༔ ཞེས་པ་དང་༔ བཛྲ་དཔའ་བོ་ཧཱུཾ་ཛ༔ ཞེས་པ་གཉིས་ཀྱིས་སོ་སོར་བསྐོར་བ་གཡས་སྐོར་གཡོན་སྐོར་དྲག་ཏུ་འཁོར་བར་བསམས་ལ༔ ཧ་རི་ནི་ས༔ ར་ཙ་ཧྲཱི་ཡ༔ བཛྲ་ཌཱཀྐི་ནི་ཧཱུཾ་ཛ༔ བཛྲ་དཔའ་བོ་ཧཱུཾ་ཛ༔ ཙིཏྟ་ཧྲིང་ཧྲིང་ཛ་ཛ༔ ཞེས་བཟླས༔ བདུད་རྩི་ལྔ་ལ་ལོངས་སྤྱོད་གཅེར་བུ་བྱ༔ སྨྱོན་སྤྱོད་བྱའོ༔ སྣང་བ་དཀྲུག་གོ༔ དེ་ལྟར་བྱས་པས་དབང་དུ་འདུས་ཏེ༔ རྟོགས་པ་ཁྱད་པར་ཅན་རྒྱུད་ལ་སྐྱེ༔ དེས་ལྟ་བ་ཕྱོགས་མེད་དུ་གྲོལ་འགྲོའོ༔ ཟས་ནོར་དང་བསོད་ནམས་འཕེལ་དུ་མ་བཏུབ་ན༔ རིན་ཆེན་མཁའ་འགྲོ་ཡབ་ཡུམ་དབང་དུ་མ་འདུས་པ་ཡིན་པས༔ མགྲིན་པའི་རྩ་མདུད་རིན་ཆེན་མཁའ་འགྲོ་གྱི་ཐུགས་འཁོར་ལོ་གོང་དུ་འདྲ་བའི་དབུས་སུ་ཡབ་ཡུམ་གྱི་ས་བོན་ལ༔ རཏྣ་ཌཱཀྐི་ནི་ཧཱུཾ་ཛ༔ རཏྣ་དཔའ་བོ་ཧཱུྃ་ཛ༔ ཙིཏྟ་ཧྲིང་ཧྲིང་ཛ་ཛ༔ ཞེས་བཟླས་ཤིང་༔ མེ་ཚོགས་དང་༔ གོས་ཚོགས་བྱ༔ གཏོར་ཚོགས་བྱ༔ ཆགས་ཞེན་བཅད༔ དེས་དབང་དུ་འདུས་ཏེ་བསོད་ནམས་ཁྱད་པར་ཅན་སྐྱེ༔ ཟས་ནོར་གཏེར་རྡོལ་བ་བཞིན་འབུལ་དུ་འོང་ངོ་༔ ལུས་ལ་དྲོད་མི་སྐྱེ༔ བུད་མེད་མི་འདུ་ན༔ པདྨ་མཁའ་འགྲོ་མ་དབང་དུ་མ་འདུས་པ་ཡིན་པས༔ ལྟེ་བར་རྩ་མདུད་ཀྱི་ནང་དུ༔ པད་མ་མཁའ་འགྲོ་ཡབ་ཡུམ་གྱི་སྙིང་ཁར༔ པདྨ་དང་འཁོར་ལོའི་དབུས་སུ་སྲོག་སྙིང་ལ༔ པདྨ་ཌཱཀྐི་ནི་ཧཱུྃ་ཛ༔ པདྨ་དཔའ་བོ་ཧཱུཾ་ཛ༔ ཙིཏྟ་ཧྲིང་ཧྲིང་ཛ་ཛ༔ ཞེས་བཟླས༔ དཀའ་ཐུབ་བྱ༔ གཏུམ་མོ་སྦར༔ གོས་གདབ༔ རི་ཁྲོད་འགྲིམ༔ བདུད་རྩི་ཟའོ༔ དེས་ལུས་ལ་དྲོད་སྐྱེ༔ བུད་མེད་ཀུན་གྱི་ཡིད་འཕྲོག་སྣང་བའི་དངོས་པོ་ཅི་ལ་ཡང་ཆགས་ཞེན་མི་སྐྱེའོ༔ རྟེན་འབྲེལ་སྣ་ཚོགས་འཆར་དུ་མ་བཏུབ་ན་ལས་ཀྱི་མཁའ་འགྲོ་དབང་དུ་མ་འདུས་པ་ཡིན་པས༔ གསང་གནས་མཁའ་འགྲོ་གསལ་གདབ༔ དེའི་ཐུགས་ཀར་རང་རང་གི་ས་བོན་ལ༔ ཀརྨ་ཌཱཀྐི་ནི་ཧཱུཾ་ཛ༔ ཀརྨ་དཔའ་བོ་ཧཱུཾ་ཛ༔ ཙིཏྟ་ཧྲིང་ཧྲིང་ཛ་ཛ༔ ཞེས་པས་སོ་སོར་བསྐོར་བར་བསམས་ལ་དེ་གཉིས་མྱུར་དུ་འཁོར་བར་བསམ་ཞིང་༔ ཧ་རི་ནི་ས༔ ར་ཙ་ཧྲཱི་ཡ༔ ཀརྨ་ཌཱཀྐི་ནི་ཧཱུཾ་ཛ༔ ཀརྨ་དཔའ་བོ་ཧཱུཾ་ཛ༔ ཙིཏྟ་ཧྲིང་ཧྲིང་ཛ་ཛ༔ ཞེས་བཟླས་ཤིང་༔ རིག་པ་གཅུན༔ དཀའ་ཐུབ་བྱ༔ སྣང་བ་དཀྲུག༔ རི་ཁྲོད་འགྲིམ༔ མཐོལ་བཤགས་བྱ༔ རྟེན་འབྲེལ་བརྩི༔ དེས་རིག་པ་དངས་ཤིང་རྟེན་འབྲེལ་སྣ་ཚོགས་འཆར་བ༔ ཡིད་ལ་ཅི་བསམ་འགྲུབ༔ དགྲ་བགེགས་ཐུལ་ལོ༔ སྣང་བ་དབང་དུ་མ་འདུས་ཤིང་འདུ་བ་གང་ཡང་མེད་ན༔ འཇིག་རྟེན་མཁའ་འགྲོ་དབང་དུ་མ་འདུས་པ་ཡིན་པས་རི་ཁྲོད་འགྲིམ༔ ཟས་ཚོགས་བྱ༔ སྐྲ་སེན་བྲེག༔ སྣོད་ཚོགས་བྱ༔ ལྕགས་གདབ༔ ཞེ་འདོད་མེད་པའི་སྒོ་ནས་ཅི་བྱུང་ཡང་མི་བསྡུ་བར་ཕཊ་ཀྱིས་གདབ་བོ༔ མེ་ཚོགས་བྱ༔ ཕྱེ་མར་དང་༔ རཏྣ་བསྲེག༔ ཧ་རི་ནི་ས༔ འགུལ་འགུལ་མ་མ་ཧྲིང་ཧྲིང་༔ མ་མ་ཁ་ཤི༔ མི་སྙིང་སྒུལ་སྒུལ༔ མི་འགྲམ་ཆོག་ཆོག༔ ཧྲིང་ཧྲིང་༔ སྡུས་སྡུས༔ མ་མ་ཁ་ཤི་བ་མ་སྭཱ་ཧཱ༔ མི་ནོར་ཟས་གསུམ་དབང་དུ་སྡུས་སྡུས༔ ཞེས་བཟླས་པས༔ ཁྲོམ་འདུ༔ མི་འདུ༔ ཟས་འདུ༔ ནོར་འདུ༔ དེ་ལྟར་བསྒོམ་བཟླས་བྱས་ན་ཤེས་པ་བཞི་འབྱུང་ངོ་༔ སྡུག་བསྔལ་ཆོས་ཉིད་དུ་ཤེས༔ རྐྱེན་ངན་དངོས་གྲུབ་ཏུ་ཤེས༔ བར་ཆད་དགེ་བསྐུལ་དུ་ཤེས༔ བདུད་ལྷ་རུ་ཤེས་པ་འབྱུང་ངོ་༔ ཡང་ལྟ་སྒོམ་སྤྱོད་པ་གསུམ་འབྱུང་ངོ་༔ རྟོགས་པ་ནང་ནས་ཉམས་སུ་མྱོང་བའི་ལྟ་བ༔ རིག་པ་ཁོང་ནས་ཤར་བའི་སྒོམ་པ༔ རྐྱེན་ངན་དང་བར་ཆད་གྲོགས་སུ་ཆོད་པའི་སྤྱོད་པ་གསུམ་འབྱུང་ངོ་༔ དེ་ལ་མི་གཏོང་བ་བཞི་ཤེས་དགོས༔ གཞི་མྱོང་བ་ཡུལ་ཐོག་ཏུ་མི་གཏོང་༔ དབང་པོ་ཁ་ཡན་ཏུ་མོ་གཏོང༔ ཡིད་དཔྱོད་ལྟོ་ཕྱིར་མི་གཏོང་༔ འབྱུང་བའི་ལུས་ལ་ཆེས་ཆེར་མི་བཟུང་ངོ་༔ མི་ཕོད་པ་བརྫི་བ་བཞི་ལམ་དུ་ཁྱེར་ཏེ༔ ཕྱི་ཡུལ་གྱི་མི་ཕོད་པ་བརྫི༔ནང་ལུས་ཀྱི་མི་ཕོད་པ་ བརྫི༔ གསང་བ་དུག་ལྔ་མི་ཕོད་པ་བརྫི༔དེ་ཁོ་ན་ཉིད་བུ་ནོར་གྱི་མི་ཕོད་ པ་བརྫི༔ དེ་ལྟར་ཉམས་སུ་བླངས་པས་འཁྲི་བ་ཆོད་པ་བཞི་འབྱུང་སྟེ༔ ཕྱི་ཡུལ་ལ་འཁྲི་བ་ཆོད༔ ནང་ལུས་ཀྱི་འཁྲི་བ་ཆོད༔ གསང་བ་དུག་ལྔའི་འཁྲི་བ་ཆོད༔ དེ་ཁོ་ན་ཉིད་དུ་སེམས་ཀྱི་འཁྲི་བ་ཆོད་པར་འགྱུར་རོ༔ རྐྱེན་ངོས་བཟུང་བ་ནི༔ ཆོས་དང་མི་མཐུན་པ་ངོས་བཟུང་ལ་མཚང་ཡུལ་ནས་འདོན༔ རིག་པ་ལ་དྲི་མ་མི་གནས་པར་བཞག་གོ༔ རང་རིག་བླ་མར་ཤེས་ནས་རྟོགས་པ་ནང་ནས་འཆར་རོ༔ རིག་པ་ཕྱོགས་མེད་དུ་གྲོལ་ནས་སྣང་བ་དབང་དུ་འདུའོ༔ རང་ཉིད་ཕག་མོར་གསལ་གདབ༔ རྩ་མདུད་ལྔར་མཁའ་འགྲོ་ཡབ་ཡུམ་བཅུ་གསལ་གདབ༔ ཙཀྲ་བཅུ་བསྐོར་ཞིང་མི་སྡོད་པ་གསུམ་ལམ་དུ་ཁྱེར༔ ལུས་མི་སྡོད་སྒུལ་བསྐྱོད་བྱ༔ ངག་མི་སྡོད་ཧ་རི་ནི་ས་བཟླ༔ ཡིད་མི་སྡོད་ཏིང་ངེ་འཛིན་གསལ་གདབ༔ དེ་ལ་རྟགས་ནི་འདུ་བ་གསུམ་འབྱུང་སྟེ༔ འཁོར་དང་བུད་མེད་ཟས་ནོར་འདུ༔ མཁའ་འགྲོ་དང་ཆོས་སྐྱོང་འདྲ༔ སྔགས་བཙུན་དང་སྐྱེ་བོ་འདུ༔ རྒྱལ་དམངས་དང་ཁྲོམ་འདུ༔ འབར་བ་གསུམ་འབྱུང་སྟེ༔ ལུས་ལ་བདེ་བ་འབར་ནས་ན་ཚ་ཞི༔ ངག་ལ་ནུས་པ་འབར་ནས་འདྲེ་གདོན་ཞི༔ སེམས་ལ་རྟོགས་པ་འབར་ནས་ཉོན་མོངས་པ་ཆོས་ཉིད་དུ་འཆར་རོ༔ རྟགས་གསུམ་འཆར་ཏེ༔ ལུས་བྱིན་གྱིས་བརླབས་པའི་རྟགས་གར་དང་ལྡེག་པའོ༔ ངག་བྱིན་གྱིས་བརླབས་པའི་རྟགས་ཅི་སྨྲས་ཆོས་སུ་འོང་༔ ཡིད་བྱིན་གྱིས་བརླབས་པའི་རྟགས་ཆོས་ཉིད་ལ་བརྟན་པ་ཐོབ་པའོ༔ དྲོད་བཞི་འབྱུང་སྟེ༔ ཕྱིའི་དྲོད་ལུས་ཡོད་དུ་མི་ཚོར་བ་དང་༔ ནང་གི་དྲོད་དབུགས་ཕྱི་ནང་འགྱུ་བ་མི་ཚོར་བ་དང་༔ གསང་བའི་དྲོད་ལུས་ཤིང་བལ་ལྟར་ཡང་བའོ༔ ཚུད་པ་རྣམ་པ་གསུམ་འབྱུང་སྟེ༔ གདམས་ངག་ལ་རང་བྱན་ཚུད༔ ཉམས་མྱོང་ལ་མཇལ་ཀ་ཚུད༔ སེམས་ལ་སྡུག་བསྲན་ཚུད་པའོ༔ མངོན་ཤེས་གསུམ་འབྱུང་སྟེ༔ ཁྱད་པར་གྱི་མངོན་ཤེས་སེམས་ཆོས་སྐུར་ཤེས་པ་དང་༔ ཐུན་མོང་གི་མངོན་ཤེས་ལེགས་ཉེས་ཅི་ཡོང་ཤེས་པ་དང་༔ གསང་བའི་མངོན་ཤེས་ཡི་དམ་ལྷའི་ཞལ་མཐོང་གསུང་ཐོས་པའོ༔ ཐོབ་པ་གསུམ་འབྱུང་སྟེ༔ ཆོས་སྐུ་སྐྱེ་བ་མེད་པ་ཐོབ༔ ལོངས་སྐུ་འགགས་པ་མེད་པ་ཐོབ༔ སྤྲུལ་སྐུ་གང་ལ་གང་འདུལ་ཐོབ་བོ༔ དེ་ལྟར་ཉམས་སུ་བླངས་ན༔ འཁྲི་བ་བཙན་ཐབས་སུ་ཆོད༔ འཇིག་རྟེན་པའི་མི་དང་བློ་མི་མཐུན༔ རི་ཁྲོད་ལ་འགྲོ་སྙིང་འདོད༔ མཁའ་འགྲོ་ཡབ་ཡུམ་རྣམས་ཀྱིས་ལུས་དང་གྲིབ་མ་བཞིན་དུ་འགྲོགས༔ ལུང་སྟོན༔ ཆོས་འཆད༔ ལེགས་ཉེས་ཐམས་ཅད་སྨྲ་བར་འགྱུར་རོ༔ ཟབ་རྒྱ༔ གཏད་རྒྱ༔ མཁའ་འགྲོ་མའི་རྒྱ༔ རྒྱ་རྒྱ་རྒྱ༔

[edit]

This page is a cleaned copy of the following rywikitexts page, which stay unchanged:

Cleaning (21 November 2026): removed 1 running heads, 3 Word page fields. The «» marks are kept in the text: they enclose the small-print notes of the print, which are shown in small print with the marks hidden.

Part of the Longchenpa Collected Works (about this project).