དབང་གི་རྒྱབ་ཡིག

From Rangjung Yeshe Wiki Texts
Revision as of 21:16, 21 November 2026 by Eric (talk | contribs) (Longchenpa Project: Tibetan in the wiki's TibetanMachineUni font; «…» notes in small print (22 November 2026))
(diff) ← Older revision | Latest revision (diff) | Newer revision → (diff)

LONGCHENPA-PECIN-05-CA-022
Jump to navigation Jump to search

ཌཱཀྐིའི་ཚོགས་མཆོད klong chen rab 'byams kyi gsung 'bum (pe cin 2009)· Volume 5(CA) དབང་གི་ཐོ་ཡིག

Title དབང་གི་རྒྱབ་ཡིག
Wylie dbang gi rgyab yig


Author Longchenpa ཀློང་ཆེན་རབ་འབྱམས་པ་དྲི་མེད་འོད་ཟེར།
Location klong chen rab 'byams kyi gsung 'bum (pe cin 2009), volume 5(CA), text 22, pages 228–231 (BDRC scan pages)
Section snying thig ya bzhi › mkha' 'gro snying thig


Tibetan text E-text from the typeset Pe cin edition (input 2020 on rywikitexts), cleaned 21 November 2026; not proofread against the print.
BDRC MW1KG4884, outline 1.2.1.24
Citation Klong chen rab 'byams pa. dbang gi rgyab yig. In Kun mkhyen klong chen rab 'byams kyi gsung 'bum, vol. 5, pp. 228–231. Pe cin: Krung go'i bod rig pa dpe skrun khang, 2009. BDRC MW1KG4884.
Notes Title from the first line of the e-text; text boundaries and page numbers from the BDRC outline of MW1KG4884.
[edit]

༄༅། །དབང་གི་རྒྱབ་ཡིག་བཞུགས་སོ༔ ཨོ་རྒྱན་པདྨ་བདག་འདྲ་ཡིས༔ དབང་གི་རྒྱབ་ཡིག་བསྟན་པར་བྱ༔ དེ་ལ་བདག་ཉིད་སྐད་ཅིག་དྲན་རྫོགས་སུ་དཔལ་རྟ་མགྲིན་སྐུ་མདོག་དམར་པོ་ཞལ་གཅིག་ཕྱག་གཉིས་པ༔ གཡས་གྲི་གུག་གཡོན་ཐོད་ཁྲག་བསྣམས་པ༔ གཅེར་བུ་རུས་པའི་རྒྱན་ལྡན་གཅིག་བསྐྱེད༔ དེར་བསྐྱེད་པའི་སྤྱི་བོར་ཡི་གེ་ར་ལས་བཛྲ་དཔའ་བོ༔ མགྲིན་པར་ཙ་ལས་རཏྣ་དཔའ་བོ༔ སྙིང་ཁར་ཧྲཱིཿལས་པདྨ་དཔའ་བོ༔ ལྟེ་བར་ས་ལས་ལས་ཀྱི་དཔའ་བོ༔ ཕྱག་མཚན་གཙོ་བོ་དང་མཐུན་པར་བསྐྱེད་དོ༔ བདག་དེ་ལྟར་བསྐྱེད་པའི་པང་དུ་ཡུམ་རྡོ་རྗེ་ཕག་མོ༔ སྐུ་མདོག་དམར་མོ་གཅེར་བུ་རུས་པའི་རྒྱན་དྲུག་གསོལ་བ༔ ཕྱག་གཡོན་གྲི་གུག་བསྣམས་པས་ཡབ་ཀྱི་མགུལ་ནས་འཁྱུད་པ༔ གཡོན་ན་ཐོད་པ་བདུད་རྩིས་གང་བ་ཐོགས་པ༔ འཁྲིལ་ཞིང་སྦྱོར་བ་ཞལ་གདངས་ལྗགས་སྤྲད་དེ་དགྱེས་པའི་འཛུམ་མདངས་ཅན༔ མཛེས་ཤིང་ཡིད་དུ་འོང་བ་གཅིག་ཏུ་རང་དང་ཡབ་ཡུམ་གཉིས་ཀ་བསྐྱེད་དོ༔ དེ་ལྟར་བསྐྱེད་པའི་ཡུམ་གྱི་སྤྱི་བོར༔ ཧ་ལས་རྡོ་རྗེ་ཌཱཀྐི་བསྐྱེད༔ མགྲིན་པར་རི་ལས་རིན་ཆེན་ཌཱཀྐི་བསྐྱེད༔ སྙིང་ཁར་ནི་ལས་པདྨ་ཌཱཀྐི་བསྐྱེད༔ ལྟེ་བར་ས་ལས་ལས་ཀྱི་ཌཱཀྐི་བསྐྱེད༔ ཕྱག་མཚན་ཡབ་དང་མཐུན༔ སྐུ་མདོག་ཕྱོགས་དང་མཐུན་ལ་མཛེས་ཤིང་ཡིད་དུ་འོང་བ་གཅིག་དང་ཡབ་ཡུམ་གཉིས་ཀ་བཅུ་དྲུག་ལོན་པའི་ལང་ཚོ་ལྟ་བུར་བསྐྱེད་དོ༔ དེ་ལྟར་བསྐྱེད་པའི་སྤྱི་བོར་ཉི་ཟླ་པདྨའི་གདན་ལ༔ ཨོ་རྒྱན་པདྨ་བདག་ཉིད་སྐུ་མཐིང་ནག་རྡོ་རྗེ་སེམས་དཔའི་ཆ་ལུགས་སུ་ཡུམ་དང་ཞལ་སྦྱོར་བ་གཅིག་ཏུ་བསྐྱེད་དོ༔ བདག་གིས་སེམས་ཅན་ཐམས་ཅད་ཀྱི་དོན་དུ༔ བདེ་སྟོང་ལྷན་ཅིག་སྐྱེས་པའི་ཡེ་ཤེས་རྟོགས་པར་བྱ་སྙམ་པ་བྱས་ལ༔ དེ་ནས་ཡུམ་དང་འཁྲིལ་ཏེ༔ ཡབ་ཀྱི་གསང་བའི་ཧཱུཾ་ལས༔ རྡོ་རྗེ་བསྐྱེད་པའི་ནང་དུ་ཕཊ་སེར་པོས་བུ་ག་དགག་གོ༔ མུ་དྲ་ཡུམ་དུ་བསྐྱེད་པའི་བྷ་ག་པཾ་ལས་པདྨ་འདབ་བཞིའི་དབུས་སུ་ཕཊ་སྔོན་པོས་བུ་ག་དགག་གོ༔ དེ་ནས་རྡོ་རྗེ་པདྨ་སྦྱར་ཏེ༔ གོང་གི་བསྐྱེད་པའི་ལྷ་ཐམས་ཅད་དང་༔ བླ་མ་ཡབ་ཡུམ་ཡང་སྦྱོར་བ་མཛད་པར་བསྒོམ༔ རྩ་ཁམས་ཐམས་ཅད་དུ་དཔའ་བོ་ཌཱཀྐི་གྲངས་ལས་འདས་པ་ཐམས་ཅད་སྦྱོར་བ་བྱེད་པར་བསམ༔ དེ་ནས་འོ་དང་དམ་དུ་འཁྱུད་པའི་འཁྲུལ་འཁོར་གྱིས་དལ་བུས་བསྐྱོད༔ བདེ་བ་སྐྱེས་པ་ལྟར་གོང་གི་ལྷ་ཡབ་ཡུམ་ཡང་བདེ་བས་དགྱེས་ཤིང་བསྐྱོད་པས༔ སྦྱོར་མཚམས་ནས་དངས་མ་བབས་པས་རང་ལུས་བདེ་བས་རྒྱས་ཤིང་ལུས་སེམས་བདེ་བའི་དངས་མས་ལྟེམ་གྱིས་ཁེངས་པར་བསྒོམ༔ བདེ་བ་རྫོགས་ནས་མི་ཟིན་པས་འགོ་གཡོ་བ་ནས་བཟུང་༔ བསྐྱོད་ཀྱིན་མི་བཟུང་༔ བསྐྱོད་འཕྲོ་བཅད་ལ་བཟུང་༔ ལས་དང་པོ་པས༔ ལུས་བདེ་མེར་བྱུང་བ་དང་༔ གཅན་གཟན་ལྟ་བུའི་སྣོམ་གྱིས་རླུང་གཉིས་ནང་དུ་འཐེན༔ གླིང་བཞི་རི་རབ་ངོས་སུ་བསྡུ༔ «སྦྲུ»ལ་ཚང་བྲག་ལ་སྦྱར༔ འབྲོང་ཟེ་ཁ་གཟེང་བསྟོད༔ ལྷོ་སྤྲིན་དབྱིངས་ལ་སྒྲིལ༔ བདེ་ཆེན་འཁོར་ལོར་བླ་མ་ཡབ་ཡུམ་གྱི་བདེ་བ་ལ་སེམས་གཏད༔ སྟེང་འོག་གི་རླུང་བསྡམ་སྟེ༔ བདེ་བ་ལ་སེམས་མེ་རེ་བཞག༔ དེ་ནས་བདེ་བ་ཆུང་དུ་སོང་བ་དང་༔ ཡང་བསྐྱོད་ཅིང་དེ་ཀ་བཞིན་གཟུང་བས༔ སྤྱི་བོ་ནས་དངས་མ་གཡོས་པས་བདེ་མེ་རེ་བ་དེ་དགའ་བའི་ཡེ་ཤེས༔ དེས་རྣམ་རྟོག་རབ་རིབ་རྣམས་སྤང་༔ དངས་མ་སྙིང་ཁར་སླེབ་པས་མཆོག་དགའི་ཡེ་ཤེས༔ དེས་བདག་ཏུ་འཛིན་པའི་རྟོག་པ་སྤང་༔ དངས་མ་ལྟེ་བར་སླེབ་སྟེ༔ བདེ་བ་རྒྱས་པས་དགའ་བྲལ་གྱི་ཡེ་ཤེས༔ དེར་ཕྱག་རྒྱར་འཛིན་པའི་རྟོག་པ་སྤང་༔ དངས་མ་གསང་བར་སླེབ་པས༔ ལུས་ངག་ཡིད་གསུམ་བདེ་ལ་རྟོག་པ་མེད་པར་འབྱུང་བས༔ ལྷན་ཅིག་སྐྱེས་པའི་དགའ་བའི་ཡེ་ཤེས་དེས་དགའ་བ་གསུམ་དུ་འཛིན་པའི་རྟོག་པ་ཐམས་ཅད་སྤང་སྟེ༔ བདེ་བ་སྟོང་པ་གསལ་བ་ངོས་བཟུང་མེད་པའི་ཉམས་སྐྱེ་བས༔ དེ་ངོས་བཟུང་ལ་དུས་ཐམས་ཅད་དུ་ཉམས་བསྐྱངས་པས་བདེ་སྟོང་རྟོགས་པ་མངོན་དུ་འགྱུར་རོ༔ སྙིང་རུས་«ཀྱིས»་དངས་མ་མི་སྤང་པའི་དམ་བཅའ་བརྟན་པོ་བཟུངས་ལ་དགའ་བཞིའི་ཡེ་ཤེས་ངོས་མ་ཟིན་ཚེ་བསྐྱོད་དོ༔ དེ་ནས་ཟིན་པ་དྲང་བ་ནི༔ གསང་བ་བུ་གའི་རྡོ་རྗེ་སྔོན་པོ་དེ་དངས་མ་དང་འདྲེས་ནས༔ དངས་མ་ཧཱུྃ་ནི་རྣམ་པར་སྐར་མདའ་བཞིན་དུ་ལྟེ་བ་དབུ་མ་ན་ཡར་རྒྱང་གིས་བྱུང་བ་དང་དུས་མཉམ་དུ༔ ངག་ཏུ་ཧི་ཧིག་ཅེས་སྒྲ་དང་བཅས་པ་དྲག་པོ་བདུན་བར་མ་ཆད་པས་དྲང་བར་བྱའོ༔ སྤྱི་བོ་དང་༔ མགྲིན་པ་དང་༔ སྙིང་ཁ་དང་༔ ལྟེ་བར་ཆིར་གྱིས་སོང་བར་བསམ་ཞིང་༔ དེ་ལྟ་བུ་ལན་གསུམ་བྱའོ༔ དེ་ནས་རྩ་ལ་དགྲམ་ཞིང་རླུང་དང་བསྲེ་བ་ནི༔ ཕྱག་རྒྱ་མ་དང་བྲལ་ལ་རང་ཁྱིའི་འདུག་སྟངས་ཀྱིས་མིང་མེད་ཀྱི་རྩར་མཐེབ་ཆེན་བཙུགས་ཏེ༔ ཁུ་ཚུར་བཅང་སྟེ་ས་ལ་བཙུགས་ལ་ངག་ཏུ་ཧི་ཧིག་ཅེས་གཡས་ནས༔ ལན་གསུམ་དུ་དྲག་ཏུ་འཐེན་ལ༔ རླུང་བཟུང་སྟེ་གཡས་སུ་ལན་གསུམ་སྤྲུག༔ གཡོན་དུ་ཡང་དེ་བཞིན་དུ་བྱ༔ རླུང་བཟུང་སྟེ་ལུས་སྤྲུག་པ་ཤར་ཤར་བ་ལན་གསུམ་བྱ༔ དེ་ནས་ཀློད་ལ་བཞག་གོ༔ དེ་ནས་དགེ་བའི་རྩ་བ་བྱང་ཆུབ་ཏུ་བསྔོ་བར་བྱའོ༔ ལས་དང་པོ་པས་གལ་ཏེ་མ་འདྲོངས་ན༔ རྟགས་ནི་རྡོ་རྗེའི་རྩ་བར་ཆུ་བྲོ་བ་སྙམ་བྱེད་པ་འོང་བས༔ ཡང་ཡང་སྦྱོར་བས་དྲངས་ཤིང་དགྲམ༔ དེས་ཀྱང་མ་འདྲོངས་ན་ལས་རྒྱའམ༔ ལག་གི་འདུ་བྱེད་ཀྱིས་བཏང་ངོ༔ དེས་མ་བཏང་ན་ནད་དུ་འགྲོའོ༔ དེ་ནས་ཕྱིས་མི་འདྲོངས་མི་སྲིད་དོ༔ འདྲོངས་ཤིང་དགྲམ་ཀྱང་བུད་མེད་བུ་མི་ཡོང་བའི་དུས་སུ་དུམ་རེ་མ་བཏང་ན༔ ཕྱིས་རྡོ་རྗེ་ལས་སུ་རུང་དུ་མི་བཏུབ་པས་བཏང་ངོ་༔ གཏོང་བའི་དུས་སུ་ཡང་པདྨའི་ནང་དུ་ཡི་དམ་ཀྱི་ལྷ་ཚོགས་བསྐྱེད་པ་ལ་མཆོད་པར་བསམ་མོ༔ དངས་མའི་ལྷག་མ་བག་ཙམ་ཞིག་བཟུང་ལ་རང་གིས་མྱོང་ངོ་༔ དེས་བྱང་སེམས་སྤངས་པའི་ལྟུང་བ་མི་ཕོག་པ་ཡིན་ནོ༔ དང་པོ་བདེ་བ་འགོ་མ་སྐྱེས་པ་དང་༔ དེ་ལ་གོམས་པ་དང་༔ རྡོ་རྗེའི་རྩ་བ་ནས་བཟུང་༔ དེ་ལ་གོམས་ནས་རྡོ་རྗེའི་སྐེད་པ་ནས་བཟུང་༔ དེ་ལ་གོམས་ནས་བྷ་ག་རང་ནས་དྲོངས་པར་ཐེ་ཚོམ་མེད་དོ༔ སྙིང་རུས་དང་ལྡན་པའི་«སྐྱ»ེས་བུས་མི་འདྲོང་མི་སྲིད་དོ༔ ཆགས་ཆེན་ལམ་དུ་འཇུག་པ་ཡི༔ དབང་བཞི་གནད་ཀྱི་གདམས་པ་འདི༔ མ་འོངས་ལས་ཅན་དོན་དུ་ནི༔ ཨོ་རྒྱན་པདྨ་བདག་འདྲས་བཀོད༔ ཐུགས་ཀྱི་སྲས་དང་འཕྲད་པར་ཤོག༔ དབང་གི་རྒྱབ་ཡིག་གསང་བའི་དུམ་བུར་བཀོད་པའོ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཨྠིྀ༔ ༔རྫོགས་སོ༔ དགེའོ༔ ༔

[edit]

This page is a cleaned copy of the following rywikitexts page, which stay unchanged:

Cleaning (21 November 2026): removed 1 running heads, 3 Word page fields. The «» marks are kept in the text: they enclose the small-print notes of the print, which are shown in small print with the marks hidden.

Part of the Longchenpa Collected Works (about this project).