གཅོད་ཡུལ་ལས་བར་དོ་འོད་གསལ་སྒོ་འབྱེད་ཅེས་བྱ་བ

From Rangjung Yeshe Wiki Texts
Revision as of 07:00, 21 November 2026 by Eric (talk | contribs) (Longchenpa Project: generated page (21 November 2026))
(diff) ← Older revision | Latest revision (diff) | Newer revision → (diff)

LONGCHENPA-PECIN-26-LA-008
Jump to navigation Jump to search

ཟབ་དོན་གཅོད་ཡུལ་ལས། འཕོ་བ་ཐར་པའི་སྒོ་འབྱེད་ཅེས་བྱ་བ klong chen rab 'byams kyi gsung 'bum (pe cin 2009)· Volume 26(LA) གེགས་སེལ་རྟེན་འབྲེལ་སྒོ་འབྱེད་ཅེས་བྱ་བ

Title གཅོད་ཡུལ་ལས་བར་དོ་འོད་གསལ་སྒོ་འབྱེད་ཅེས་བྱ་བ
Wylie gcod yul las bar do 'od gsal sgo 'byed ces bya ba
Catalogue title bar do 'od zer sgo 'byed (BDRC outline)
Author Longchenpa ཀློང་ཆེན་རབ་འབྱམས་པ་དྲི་མེད་འོད་ཟེར།
Location klong chen rab 'byams kyi gsung 'bum (pe cin 2009), volume 26(LA), text 8, pages 72–75 (BDRC scan pages)
Section klong chen rab 'byams pa dri med 'od zer gyi gsung thor bu › gcod kyi skor


Tibetan text E-text from the typeset Pe cin edition (input 2020 on rywikitexts), cleaned 21 November 2026; not proofread against the print.
BDRC MW1KG4884, outline 6.10.1.11
Citation Klong chen rab 'byams pa. bar do 'od zer sgo 'byed. In Kun mkhyen klong chen rab 'byams kyi gsung 'bum, vol. 26, pp. 72–75. Pe cin: Krung go'i bod rig pa dpe skrun khang, 2009. BDRC MW1KG4884.
Notes Title from the first line of the e-text; text boundaries and page numbers from the BDRC outline of MW1KG4884.
[edit]

༄༅། །གཅོད་ཡུལ་ལས་བར་དོ་འོད་གསལ་སྒོ་འབྱེད་ཅེས་བྱ་བ་བཞུགས་སོ། །

«བར་དོ་འོད་གསལ་སྒོ་འབྱེད་ནི། ཕྲ་རགས་ཐིམས་རྗེས་འོད་གསལ་འཆར་བས་བར་དོ་ཡིན། ཞེས་བྱ་བ་ནི་འཆི་བའི་དུས་སུ་སྲིད་པའི་བར་དོ་ལ་གཅད་པར་བྱ་སྟེ། དེ་ལ་གསུམ། འཆི་ཚུལ་གྱི་རིམ་པ་དང༌། འོད་གསལ་འཆར་བའི་དུས་དང༌། བར་དོར་འཁྱམས་པའི་དུས་དང་ཚུལ། དང་པོ་ནི་ཐིམ་ཚུལ་བཞི་ཡིས་ཐིམ་སྟེ། ཕྱི་དབུགས་ཟད། སྣང་མཆེད་ཐོབ་གསུམ་ཐིམས། ནང་དབུགས་ཆད། ཨ་ཧཾ་འཕྲད་པ་གྱེས་པས་ཟག་བཅས་ཀྱི་བདེ་བ་ཡལ། རྩ་ཁམས་ཡིག་འབྲུ་ཐམས་ཅད་འཁྲུགས་པས་རིག་པ་བརྒྱལ་འགྲོ་བས་ཏེ། དཔེར་ན་ཆུ་རྙོགས་པས་ཆུ་ནང་ཤར་བའི་ཉི་ཟླ་ཡལ་ནས་མི་གསལ་བ་བཞིན་དུ། ཞག་གསུམ་མམ་བཞི་ལྔ་ལ་སོགས་པ་ཅི་རིགས་སུ་བརྒྱལ་འགྲོ། འོད་གསལ་བའི་དུས་ནི། བརྒྱལ་སངས་པའི་རྗེས། ཆུ་དྭངས་པས་ཉི་ཟླ་ཤར་བ་བཞིན་དུ། འོད་གསལ་འཆར་བ་སྟེ། འོད་གསལ་གྱི་ངོ་བོ་ནི། བར་དོའི་དུས་ཕྱག་རྒྱ་ཆེན་པོའི་སྒོམ་སྐྱེ་བ་ཡིན་ཏེ། སྣང་སྟོང་ཟུང་འཇུག །བདེ་སྟོང་དབྱེར་མེད། གསལ་སྟོང་འཛིན་མེད་ཀྱི་དོན་རྒྱུད་ལ་འཆར་བ་ཡིན་ཏེ། དེ་ཁོ་ནའི་ངང་དུ་ཙེན་ནེ་བཞག་པས། སྔར་ནས་ཉམས་ལེན་ཡོད་པའི་གང་ཟག་དེ། སྔར་འདྲིས་ཀྱི་མི་དང་འཕྲད་པ་བཞིན་དུ། དེའི་དུས་སུ་རང་ངོ་ཤེས། རང་དབང་ཐོབ། རང་ས་ཟིན། གཉིས་མེད་ཆོས་ཀྱི་སྐུའི་ངོ་བོར་སངས་རྒྱས་སོ། །» «སྔར་ནས་བསྐྱེད་རིམ་བསྒོམས་པ་ལ་བརྟེན་ནས་ལོངས་སྤྱོད་རྫོགས་པའི་སྐུ་ཐོབ། བྱམས་སྙིང་རྗེ་བསྒོམས་པས་སྤྲུལ་པའི་སྐུ་འབྱུང་སྟེ། སྐུ་གསུམ་ཕྲིན་ལས་དང་བཅས་པ་དེའི་དུས་སུ་ཐོབ་བོ། །གལ་ཏེ་སྔར་གྱི་སྦྱངས་པ་ཆུང་བས། བར་དོ་དང་པོ་ལ་སངས་རྒྱས་མ་ནུས་ན། གཉིས་པ་ལ་མངལ་སྒོ་དགག་པར་བྱ་སྟེ། དེ་ལ་དགག་ཐབས་གསུམ་སྟེ། ལྷ་དང་བླ་མ་བསྒོམས་པས་མངལ་སྒོ་དགག་པ་དང༌། ཆགས་སྡང་རྩད་བཅད་ལ་མངལ་སྒོ་དགག་པ་དང༌། ལས་ཀྱི་རླུང་དམར་ལ་མི་སྐྲག་མི་དངངས་ནས་མངལ་སྒོ་དགག་པའོ། །དང་པོ་ནི་མངལ་དུ་འཇུག་པའི་རྒྱུ། རང་གི་རྒྱུད་ལ་ཆགས་སྡང་ཡོད། རྐྱེན་ཕོ་མོ་ཕན་ཚུན་ཆགས་པ་སྤྱོད་པ་ལ་བརྟེན་ནས། མིག་སེར་སྐྱེས་པས་འབྲས་བུ་མོ་ལ་ཆགས་ཤིང༌། ཕོ་ལ་སྡང་བས་བུར་སྐྱེ་ལ། ཕོ་ལ་ཆགས་ཤིང་མོ་ལ་སྡང་ན་མོར་སྐྱེ་བས་ཆགས་པ་སྤྱོད་པ་མཐོང་ཡང༌། གསང་དབང་བསྐུར་བའི་བླ་མ་ཡབ་ཡུམ་དུ་བསྒོམས་ལ་ཆགས་སྡང་སྤང་ངོ༌། །ཆགས་སྡང་རྩད་བཅད་ལ་མངལ་སྒོ་དགག་པ་ནི། ཕྱི་རུ་ཆགས་པ་སྤྱོད་པ་མཐོང་བའི་ཚེ་ནང་དུ་ཆགས་སྡང་སྐྱེ་བས་ཆགས་མཁན་ཆགས་པའི་ངོ་བོ་དེ་ག་ན་འདུག །ཅི་འདྲར་འདུག་བལྟས་པས། ཆགས་པའི་ངོ་བོ་དེ་ཆགས་པ་མེད་པའི་ངང་ལ་བཞག་གོ ། ཆགས་མཁན་སྟོང་ཉིད་དུ་ཤེས་ན། ཆགས་སྡང་རང་གྲོལ་ཏུ་སོང་ནས། མངལ་སྒོ་དགག་པའོ། །ལས་ཀྱི་རླུང་དམར་ལ་མི་སྐྲག་པར་བྱས་ལ་མངལ་སྒོ་དགག་པ་ནི། མངལ་དུ་འཇུག་པའི་བག་ཆགས་ཀྱི་ལུས། རྐྱེན་ལས་ཀྱི་རླུང་དམར། ངོ་བོ་རླུང་དང་བུ་ཡུག་དྲག་ཆར་དང་སེར་བ་དང༌། མེ་འབར་བ་དང༌། ཤྭ་ལོག་དང་རི་གཟར་གྱི་རྦབ་དང་གླང་པོ་ཆེ་སྨྱོན་པ། དམག་དང་རྒྱལ་པོ་འབྱུང་སྙམ་པར་བྱེད་པ་དང༌། དེས་སྐྲག་སྟེ་བྲོས་ནས། གནས་ཁང་ཏུ་ཡིབ་ཏུ་ཕྱིན་སྙམ་བྱེད་པ་ལ་བརྟེན་ནས་མངལ་དུ་ཚུད། དེ་ལ་ལས་ཀྱི་རླུང་དམར་བཅུས་བདས་པའི་དུས་ན། སྔར་གྱི་ལུས་ནི་སྤངས། ཕྱིས་ལུས་ནི་མ་བླངས་ད་ལྟར་གྱི་ལུས་འདི་བག་ཆགས་ཡིད་ཀྱི་ལུས་ཡིན་པས། འདི་ལུས་སུ་སྣང་བ་ཙུག་འདུག་ཀྱང་བདེན་པར་གྲུབ་པ་མེད་པས། འདིར་མེ་དང་ཆུ་ལ་སོགས་པས་གནོད་མི་ནུས། ནང་ན་ལུས་དངོས་པོར་གྲུབ་པ་མེད་ལ། ཕྱི་ནས་ལས་ཀྱི་རླུང་བཅུ་བདེན་པར་གྲུབ་པར་མེད་པར། འདི་ཀ་ལ་གཅོད་བྱ་དགོས་པ་ཡིན་སྙམ་པར་བྱ། བརྟགས་ཚན་བསྐྱེད་ནས་བསྡད་པས། དེ་ཐམས་ཅད་བདེན་པར་གྲུབ་པ་མེད། སེམས་ཀྱི་ཚུལ་ཡིན་པས། རང་ཡལ་ཏུ་འགྲོའོ། ། བར་དོར་འཁྱམས་པའི་ཚུལ་ནི། ཐ་མལ་པའི་བར་དོ་དང༌། རྣལ་འབྱོར་པའི་བར་དོ་གཉིས་ལས། དང་པོ་ནི། ཡུན་རིང་ཤོས་ཞག་བཞི་བཅུ་ཞེ་དགུའི་བར་ལ། བག་ཆགས་ཡིད་ཀྱི་ལུས་མཚན་ཉིད་དྲུག་དང་ལྡན་པར་བཟུང་ནས་བདེ་སྡུག་སྣ་ཚོགས་ལ་སྤྱོད་པའོ། །རྣལ་འབྱོར་པའི་བར་དོ་ནི། གདམས་ངག་ཡོད་པས་མངལ་ཁ་བཟང་པོར་འདམས་པར་བྱ་སྟེ། སྔར་གྱི་རླུང་བཅུ་པོ་གང་ཡང་རུང་བས་བདས་པའི་ཚེ། ཡིབ་ས་སོ་སོར་འདམས་པ་གལ་ཆེ་སྟེ། དེ་ཡང་ངམ་ཕུག་དང༌། གཅོང་རོང་དང༌། གཡང་ས་དང༌། གཏིང་རིང་དུ་ཡིབ་པ་སྙམ་བྱེད་ན། ཁྱི་དང་ཕག་ལ་སོགས་པ་དུད་འགྲོའི་མངལ་དུ་སྐྱེའོ། །རྩ་དང་སྤང་དང་ལོ་མའི་སྤྱིལ་པོར་ཡིབ་ན་མི་ལུས་ཐོབ་ཀྱང་ལུས་ངན་དུ་སྐྱེའོ། ། ཁང་བཟང་དང༌། སྤང་ཁང་དང༌། རྟེན་གྱི་དྲུང་དུ་ཡིབ་སྙམ་བྱེད་ན། རྒྱལ་རིགས། རྗེ་རིགས། བྲམ་ཟེའི་རིགས་སུ་སྐྱེའོ། །གཙུག་ལག་ཁང་དང༌། ལྷ་ཁང་དང༌། རྟེན་གྱི་དྲུང་དུ་ཡིབ་སྙམ་བྱེད་ན། དགེ་བའི་བཤེས་གཉེན་དང༌། ཆོས་མཛད་དང༌། ཆོས་དང་ལྡན་པའི་རིགས་ཀྱི་མངལ་དུ་སྐྱེའོ། །དེ་རྣམས་འདམས་པར་བྱའོ། །ཉིན་མོ་སྒྱུ་ལུས་མ་འབྱོངས་ཤིང༌། མཚན་མོ་རྨི་ལམ་མ་འབྱོངས་ན། བར་དོར་འོད་གསལ་མི་འབྱོངས་པས། དང་པོ་རང་དུ་འཕོ་བར་བྱའོ་གསུངས། རྫོགས་སོ།། དགེའོ། བཀྲ་ཤིས།

[edit]

This page is a cleaned copy of the following rywikitexts page, which stay unchanged:

Cleaning (21 November 2026): removed 1 running heads, 3 Word page fields. The «» marks are kept: in this e-text they enclose the small-print notes of the print.

Part of the Longchenpa Collected Works (about this project).