ཡིད་བཞིན་མཛོད་ཀྱི་དོན་ཁྲིད་ཟབ་དོན་རྡོ་རྗེ་སྙིང་པོ་ཞེས་བྱ་བ

From Rangjung Yeshe Wiki Texts
Revision as of 07:00, 21 November 2026 by Eric (talk | contribs) (Longchenpa Project: generated page (21 November 2026))
(diff) ← Older revision | Latest revision (diff) | Newer revision → (diff)

LONGCHENPA-PECIN-14-PHA-002
Jump to navigation Jump to search

ཐེག་པ་ཆེན་པོའི་མན་ངག་གི་བསྟན་བཅོས་ཡིད་བཞིན་རིན་པོ་ཆེའི་མཛོད་ཀྱི་འགྲེལ་པ་པདྨ་དཀར་པོ་ཞེས་བྱ་བའི་སྨད་ཆ klong chen rab 'byams kyi gsung 'bum (pe cin 2009)· Volume 14(PHA) གནས་ལུགས་རིན་པོ་ཆེའི་མཛོད་ཅེས་བྱ་བ

Title ཡིད་བཞིན་མཛོད་ཀྱི་དོན་ཁྲིད་ཟབ་དོན་རྡོ་རྗེ་སྙིང་པོ་ཞེས་བྱ་བ
Wylie yid bzhin mdzod kyi don khrid zab don rdo rje snying po zhes bya ba
Catalogue title yid bzhin mdzod kyi don khrid rdo rje'i snying po (BDRC outline)
Author Longchenpa ཀློང་ཆེན་རབ་འབྱམས་པ་དྲི་མེད་འོད་ཟེར།
Location klong chen rab 'byams kyi gsung 'bum (pe cin 2009), volume 14(PHA), text 2, pages 341–364 (BDRC scan pages)
Section klong chen mdzod bdun › yid bzhin mdzod dang gnas lugs mdzod


Tibetan text E-text from the typeset Pe cin edition (input 2020 on rywikitexts), cleaned 21 November 2026; not proofread against the print.
BDRC MW1KG4884, outline 2.1.2.4
Same work in ཡིད་བཞིན་མཛོད་ཀྱི་དོན་ཁྲིད་རྡོ་རྗེའི་སྙིང་པོ (sde dge), ཡིད་བཞིན་མཛོད་ཀྱི་དོན་ཁྲིད་ཟབ་དོན་རྡོ་རྗེ་སྙིང་པོ་ཞེས་བྱ་བ (Karma Lekshey Ling e-text)
Citation Klong chen rab 'byams pa. yid bzhin mdzod kyi don khrid rdo rje'i snying po. In Kun mkhyen klong chen rab 'byams kyi gsung 'bum, vol. 14, pp. 341–364. Pe cin: Krung go'i bod rig pa dpe skrun khang, 2009. BDRC MW1KG4884.
Notes Title from the first line of the e-text; text boundaries and page numbers from the BDRC outline of MW1KG4884.
[edit]

༄༅། །ཡིད་བཞིན་མཛོད་ཀྱི་དོན་ཁྲིད་ཟབ་དོན་རྡོ་རྗེ་« »« »སྙིང་པོ་ཞེས་བྱ་བ་བཞུགས།«དངོས་གྲུབ་རྩ་བ་དཔལ་ལྡན་བླ་མ་དང༌། །ཧེ་རུ་ཀ་དཔལ་ཞབས་ལ་ཕྱག་འཚལ་ཏེ། །གསང་སྔགས་ཀུན་གྱི་མཐར་ཐུག་སྙིང་པོའི་དོན། །ཉམས་ལེན་གནད་རྣམས་དྲིལ་ནས་འདིར་བརྗོད་བྱ། །ཟབ་དོན་རྡོ་རྗེ་སྙིང་པོའི་དོན་ཁྲིད་འདི་ལ་གསུམ་སྟེ། སྔོན་འགྲོ་རྒྱུད་སྦྱང་བ། དངོས་གཞི་ཉམས་སུ་བླང་བ། རྗེས་ཀྱི་གེགས་བསལ་བའོ། །དང་པོ་ལ་གསུམ་ལས། བྱིན་རླབས་བླ་མའི་རིམ་པ་བསྒོམ་པར་བྱ་སྟེ། དཀྱིལ་འཁོར་ཐམས་ཅད་ཀྱི་རྩ་བ་དང༌། ཐར་ལམ་ཐམས་ཅད་ཀྱི་དེད་དཔོན་ཡིན་པའི་ཕྱིར་ཏེ། རྡོ་རྗེ་གུར་ལས། གང་ཕྱིར་རྡོ་རྗེ་སེམས་ཞེས་བྱ། ། སློབ་དཔོན་གཟུགས་ནི་དེ་བཞིན་འཛིན། །ཅེས་པ་དང༌། རྣལ་འབྱོར་མ་ལས་བླ་མ་མཁས་ཤིང་དམ་ཚིག་ལྡན། །བརྩེ་དང་བསམ་གཏན་བྱིན་རླབས་ཅན། །དམན་སྤངས་ཐར་པའི་ལམ་ལ་འདྲེན། །འདི་ནི་རྡོ་རྗེ་འཛིན་པ་དངོས། །སྤྱི་གཙུག་འཁོར་ལོའི་རྒྱན་དུ་བསྒོམ། །ཞེས་གསུངས་པས། དང་པོ་སྟན་བདེ་བ་ལ་འདུག་སྟེ། སྐྱབས་སུ་འགྲོ་བ་དང་བྱང་ཆུབ་ཏུ་སེམས་བསྐྱེད་ནས། སྐད་ཅིག་གིས་སྟོང་པ་ཉིད་དུ་བསམས་པའི་ངང་ལས་རང་གི་སྤྱི་བོར་པདྨ་དང་ཉི་ཟླ་སེང་གེས་བཏེགས་པའི་ཁྲི་གནམ་འཕང་དང་རྒྱར་ཡངས་པ། དར་ཟ་འོག་གི་སྟན་གྲངས་མེད་པས་བརྒྱན་པའི་དབུས་སུ། རང་གི་རྩ་བའི་བླ་མ་དེ་གཅེར་བུ་རུས་པའི་རྒྱན་དྲུག་དང་ལྡན་པ། སྐུ་མདོག་མཐིང་ག་སྤྱན་གསུམ་པ་བཞད་པའི་ཞལ་རྒྱས་པ། ཞབས་སྐྱིལ་ཀྲུང༌། ཕྱག་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། ཡུམ་རྡོ་རྗེ་ཕག་མོ་དམར་མོ་གྲི་གུག་དང་ཐོད་པ་འཛིན་པས་ཡབ་ལ་འཁྱུད་པ། ཡབ་ཀྱི་ཐུགས་ཀར་པདྨ་ཉི་ཟླའི་དབུས་ན་ཧཱུྃ་སྔོན་པོ།ཡུམ་ལ་ཧྲཱིཿདམར་པོས་མཚན་པའོ། །དེ་ནས། ན་མོ་གུ་རུ་བྷྱཿས་མཱ་ཛ། ཞེས་ལན་གསུམ་བརྗོད་པས། རྩ་བ་དང་བརྒྱུད་པར་བཅས་པའི་བླ་མ་དམ་པ་རྣམས་ནམ་མཁར་བྱོན། ཡང་རང་གི་ཆོས་འབྲེལ་ཡོད་པའི་བླ་མ་ཐམས་ཅད་ཀྱང་བྱོན་པ་ལ་ཡིད་ཀྱིས་མཆོད་མ་ཐག་སྤྱི་བོའི་དེ་དང་གཉིས་སུ་མེད་པར་འདྲེས་པས་བླ་མ་ཀུན་འདུས་རྡོ་རྗེ་འཆང་གཅིག་ཏུ་གྱུར་པར་མོས་པ་བྱའོ། །དེ་ནས། ན་མོ་བུདྡྷཱ་ཡ། དྷརྨཱ་ཡ། སཾ་གྷཱ་ཡ་ལན་གསུམ་བརྗོད་པས། ཕྱོགས་བཅུའི་སངས་རྒྱས་སྲས་དང་བཅས་པ་ནམ་མཁའི་དབྱིངས་ཁྱབ་པར་བྱོན་ཏེ་བླ་མ་དེའི་སྟེང་དང་མཐའ་བསྐོར་ཐམས་ཅད་དུ་བཞུགས། མཁའ་འགྲོ་དམ་ཅན་རྒྱ་མཚོ་རྣམས་ཀྱང་བཞུགས་པར་མོས་པ་བྱའོ། །དེ་ནས་དངོས་དང་ཡིད་ཀྱིས་ཕྱི་ནང་གི་མཆོད་པས་མཆོད་ལ། ཡིད་ཀྱིས་ཕྱག་འཚལ་བ་དང༌། སྡིག་པ་བཤགས་པ་དང༌། གསོལ་བ་གདབ་པ་རྣམས་བྱ་སྟེ། དཀོན་མཆོག་གསུམ་གྱི་ངོ་བོ་ཉིད། །དཔལ་ལྡན་ཡོན་ཏན་རྫོགས་པའི་གཙོ། །བླ་མ་རྣམས་དང་ཡི་དམ་ ལྷ། །མཁའ་འགྲོ་རྒྱ་མཚོའི་ཚོགས་ལ་འདུད། །ཕྱི་ནང་གསང་བ་དེ་ཁོ་ན། །དགྱེས་མཉམ་བྱང་ཆུབ་སེམས་ཀྱིས་མཆོད། །ལས་དང་ཉོན་མོངས་སྒྲིབ་ཀུན་དང༌། །རྩ་བ་ཡན་ལག་ཉམས་ཆགས་བཤགས། །མཆོག་དང་ཐུན་མོང་དངོས་གྲུབ་ སྩོལ། །ཀུན་གྱིས་བྱང་ཆུབ་འགྲུབ་པར་ཤོག» «།ཅེས་བརྗོད་པས་དེ་ཐམས་ཅད་ཀྱི་སྐུ་གསུང་ཐུགས་ལས་འོད་ཟེར་བྱུང༌། བདག་དང་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། སྦྱོར་མཚམས་ལས་བདུད་རྩི་བབས་པས་རང་གི་སྤྱི་གཙུག་ནས་རྐང་མཐིལ་གྱི་བར་དུ་ཁེངས་ནས་བདེ་གསལ་མི་རྟོག་པའི་ཉམས་སྤྲོས་བྲལ་ལྷན་ཅིག་སྐྱེས་པའི་དོན་རྒྱུད་ལ་སྐྱེས་པར་བསམས་ལ། ཡུན་རིང་དུ་མཉམ་པར་གཞག་ གོ །རྗེས་ལ་དེ་དག་རང་གི་སྙིང་ནང་དུ་བྱོན་ནས་བཞུགས་པར་བསྒོམས་ལ། སྒྱུ་མའི་ངང་ལས་བསྔོ་བ་བྱའོ། །དེས་ནི་མྱུར་དུ་དངོས་གྲུབ་ཐོབ་ཅིང་ཏིང་ངེ་འཛིན་རྒྱུད་ལ་སྐྱེའོ། །རང་ལ་ཅི་ཡོད་པས་བླ་མ་མཉེས་པར་བྱའོ། །དེས་ནི་གནས་སྐབས་མཐར་ཐུག་གི་འདོད་པ་ཐམས་ཅད་འགྲུབ་སྟེ། རིགས་ལྔ་བདེ་མཆོག་འབྱུང་བའི་རྒྱུད་ལས། མཆོད་པ་ཐམས་ཅད་ཡོངས་སྤངས་ནས། །བླ་མའི་མཆོད་པ་ཡང་དག་བརྩམས། །དེ་མཉེས་པ་ལས་ཀུན་མཁྱེན་པའི། །ཡེ་ཤེས་མཆོག་ནི་ཐོབ་པར་འགྱུར། །སློབ་དཔོན་གྱིས་ནི་སྡིག་པ་འཕྲོག» «།སློབ་དཔོན་གྱིས་ནི་འཇིགས་པ་སེལ། །སློབ་དཔོན་གྱིས་ནི་སྡུག་བསྔལ་གྱི། །རྒྱ་མཚོ་ཆེ་ལས་ཕ་རོལ་སྒྲོལ། །ཅེས་སོ། །གཉིས་པ་དད་བརྩོན་ངེས་འབྱུང་གི་རིམ་པ་ལ་དྲུག་ལས། དང་པོ་དལ་འབྱོར་རྙེད་དཀའ་བསམ་པ་ནི། སེམས་ཅན་ཙམ་གྱི་ལུས་ལ་བལྟས་ཏེ་རྙེད་དཀའ་བ། དེ་བས་ཆོས་ལ་སྤྱོད་པའི་ལུས་རྙེད་དཀའ་བ།» «ཆོས་མ་བྱས་ན་སྟོང་ལོག་ཏུ་འགྱུར་བས་དལ་བ་ཆུད་མི་གསོན་པར་བསྒོམ་པར་བྱའོ། །གཉིས་པ་ཚེ་མི་རྟག་པ་བསམ་པ་ནི། ཕྱི་སྣང་བ་འགྱུར་བ། ནང་ཕུང་པོ་འགྱུར་བ། ཉིན་མཚན་སྐད་ཅིག་འགྱུར་བ། ཡུལ་མི་ཁྱིམ་མཚེས་ཤི་བ་ལ་བསམས་ལ་རང་ལ་སྦྱར་བར་བྱའོ། ། གསུམ་པ་དད་པ་བསམ་པ་ནི། དཀོན་མཆོག་གསུམ་དང་བླ་མ་དང་ཆོས་དང་ཆོས་མཛད་རྣམས་ཀྱི་ཡོན་ཏན་བསམ་ལ་དད་པ་བསྐྱེད་པར་བྱའོ། །བཞི་པ་ལས་རྒྱུ་འབྲས་བསམ་པ་ནི། ད་ལྟའི་བདེ་སྡུག་དགེ་སྡིག་ལས་གྱུར་པ་ལ་སོགས་པ་བསམས་ལ། དགེ་བ་བཅུ་སྒྲུབ། མི་དགེ་བ་བཅུ་འདོར། སྡིག་པ་བཤགས་པའི་ཆོ་ག་ཡི་གེ་བརྒྱ་པ་བཟླས་པའི་ལུང་དབོག་པར་བྱའོ། །ལྔ་པ་འཁོར་བའི་ཉེས་དམིགས་བསམ་པ་ནི། ད་ལྟའི་མིའི་སྡུག་བསྔལ་གྱིས་མཚོན་པ་རིགས་དྲུག་གི་སྡུག་བསྔལ་བསམས་ལ་ཅིས་ཀྱང་འཁོར་བ་འདི་ལས་ཐར་པར་བྱའོ་སྙམ་པའི་བློ་གཏིང་ནས་བསྐྱེད་པར་བྱའོ། །དྲུག་པ་ཐེག་པ་ཆེན་པོ་བྱང་ཆུབ་སེམས་ཀྱིས་བློ་སྦྱོང་བ་ནི། ཆོས་ཀུན་ལ་བྱང་ཆུབ་ཀྱི་སེམས་མཆོག་ཏུ་གསུངས་པས།བདག་གིས་རང་གཞན་གྱི་དོན་གཉིས་བསྒྲུབ་པར་བྱ། དེའི་ཆེད་དུ་བྱང་ཆུབ་དུ་སེམས་བསྐྱེད་སྙམ་དུ་བསམས་ལ་དེའི་ཉིན་པར་བྱང་ཆུབ་ཏུ་སེམས་བསྐྱེད་པར་བྱའོ། །དེ་དག་ལ་དམིགས་ཐུན་རེ་རེའོ། །གསུམ་པ་སྲོག་རྩོལ་ལུས་ཀྱི་སྔོན་འགྲོ་ནི། ཉིན་འགར་ལུས་སྦྱོང་ཉི་ཤུ་པ་ལ་བསླབ་པར་ བྱའོ། །དེས་ནི་ཁམས་དང་རླུང་གནད་དུ་ཆུན་ནས་ཡེ་ཤེས་མ་སྐྱེས་པ་སྐྱེ། སྐྱེས་པ་གོང་དུ་འཕེལ་བའི་དགོས་པ་ཡོད་དོ། །བཅའ་ལུགས་ནི་འོག་ནས་འབྱུང་ ངོ། །དོན་གཉིས་པ་དངོས་གཞི་ཉམས་སུ་ལེན་པ་ལ་ལྔ་སྟེ། སྲོག་གི་རྣལ་འབྱོར། རྩོལ་བའི་རྣལ་འབྱོར། འོད་གསལ་ཕྱག་རྒྱ་ཆེན་པོའི་རྣལ་འབྱོར། འཕོ་བའི་རྣལ་འབྱོར། བར་དོའི་རྣལ་འབྱོར་རོ། །དང་པོ་ལ་གསུམ་ལས། སྔོན་དུ་དམིགས་པ་ལ་བསླབ་པ་ནི། ལུས་སྐྱིལ་ཀྲུང་གི་པུས་མོ་གཉིས་ཐལ་མོས་བཀབ་ལ་མཇིང་པ་དགྱེ་བར་བྱས་ཏེ། རླུང་རོ་གསུམ་ཕྱིར་བུས་ལ། དེ་ནས་དལ་བུས་བཟུང་སྟེ། རླུང་གནད་ལ་ཕར་ལ་མདའ་ལྟར་འཕང་པ། ཚུར་ལ་གཞུ་ལྟར་དགུ་བ། ནང་དུ་རྫིང་ལྟར་བསྐྱིལ་བ་གསུམ་མོ། །དམིགས་པའི་གནད་དབུས་སུ་དབུ་མ་མཐིང་སྐྱའི། གཡས་རོ་མ་དཀར། གཡོན་རྐྱང་མ་དམར། འཁོར་ལོ་བཞིའི་བདེ་ཆེན་དཀར། ལོངས་སྤྱོད་དམར། སྙིང་ག་མཐིང༌། ལྟེ་བ་དམར་བའི་དབུས་ན། བཾ། ལཾ། ཨེ། རཾ་རྣམས་སོ་སོའི་ཁ་དོག་བཞིན་བསམས་ལ། རོ་རྐྱང་གི་ཡར་སྣ་སྣ་བུག་གཉིས་ནས་རླུང་ཞུགས་པ། མར་སྣ་སྤུ་ནག་གུའི་ཐད་ནས་དབུ་མའི་ནང་དུ་འཇུག་པ་ལས་རླུང་ཞུགས་ཏེ། དབུ་མའི་དབུས་དང་འཁོར་ལོ་བཞི་ཁེངས། དེའང་དབུ་མར་རླུང་ཁ་དོག་ལྔ་ལྡན་འཇའ་ཚོན་འདྲ་བས་གང༌། འཁོར་ལོ་བཞི་དེ་དག་གི་ཁ་དོག་སོ་སོས་གང་བར་སྒོམ། བསྐྱིལ་དུས་ཡིན་ཇེ་རིང་བྱ། འཕང་དུས་ལྷག་གཟུང༌། དགུག་དུས་རབ་ཏུ་དལ་བར་བྱའོ། །འདིར་དུས་བཞི་འབྱུང་བའི་རླུང་བཤད་ཀྱང་འདི་ལས་ཟབ་པ་མེད་དོ། །གནད་འདིས་སྔོན་དུ་མ་སྦྱངས་ན། རླུང་གེགས་ཡོང་བས་འདི་ལ་འབྱོང་བར་བྱའོ། །ཚད་ནི་ད་ལྟའི་རླུང་གཅིག་ནས་བཅུའི་བར་ཁུག་པ་གཅིག་གིས་འདའ་ནུས་པའོ། །དེ་ནས་གཉིས་པ་དངོས་གཞི་དབང་དུ་བསྡུ་བ་ལ། ལུས་གནད་སྐྱིལ་ཀྲུང་བཅའ། ལག་པ་འཁྱུད་པའི་ཚུལ་ལས་ཐལ་མོ་པུས་མོ་ལའོ། །དམིགས་གནད་ཅི་ཡང་ཡིད་ལ་མི་བྱེད་པའོ། །རླུང་གནད་རང་དབང་མེད་པར་དགག་པ་སྟེ། འོག་སྒོ་ཤིན་ཏུ་གློད་ལ་གསང་གནས་སུ་བུམ་པ་ཅན་དུ་གཟུང་ངོ༌། །གནས་དེར་སྟེང་རླུང་དྲག་ཏུ་མནན། ཕོ་བ་འདིར་བྱའོ། །རང་བཞིན་དུ་བུམ་པ་ཅན་ནི་གང་འཛིན་ས་དེ་ཉིད་དུ་རླུང་དེས་གང་བར་བྱེད་པ་ལ་ཟེར་རོ། །དེ་ནས་རླུང་ཟིན་པའི་རྟགས་སུ། གཞན་གྱི་ཉི་ཤུ་རྩ་བཞིའི་རིང་དབུགས་གཅིག་ལས་མི་རྒྱུ་ཞིང༌། སེམས་ཏིང་ངེ་འཛིན་མི་རྟོག་པ་རང་ལུགས་སུ་སྐྱེ་བའོ། །དེ་ནས་མཉམ་གནས་ཀྱི་རླུང་དབང་དུ་བྱ་བ་ནི། འོག་སྒོ་བསྡམས་ལ་ལྟེ་བར་བུམ་པ་ཅན་དུ་བཟུང་ལ་ལན་གསུམ་བྱས་ན། དབུགས་ཉིས་བརྒྱ་ལྔ་བཅུ་རྩ་བརྒྱད་ཀྱི་རིང་གཅིག་ལས་མི་རྒྱུའོ། །དེ་ལྟར་སྒོམ་དུས་གཡས་རླུང་དབུ་མར་ཚུད་པའི་རྟགས་སུ་མདུན་གྱི་ནམ་མཁར་དུ་བ་ལྟ་བུ་དང༌། སྤྲིན་ལྟ་བུ་ལང་ལོང་དུ་འབྱུང་ངོ༌། །ས་དང་ཆུ་དང་མེ་དང་རླུང་གི་རླུང་རྣམས་དབུ་མར་ཚུད་པའི་རྟགས་སུ། སྨིག་རྒྱུ་དང༌། སྲིན་བུ་མེ་ཁྱེར་དང༌། མར་མེ་དང༌། འོད་ཀྱི་སྣང་བ་སྣ་ཚོགས་འབྱུང་ངོ༌། །ནམ་མཁའི་རླུང་ནི་མི་རྟོག་པའི་ཡེ་ཤེས་དངས་གསལ་ཕྱེད་དུས་ཚུད་ལ། ཕྱིར་སྣང་ཐིག་ལེ་ཕྲ་མོ་དང་འོད་མཐིང་གར་སྣང་བའོ། །རླུང་འཛིན་དུས་རགས་རླུང་གཡས་ནས་བཟུང་ན་རྟོག་པ་འགག་པར་«༼༡༽«མྱུར་རོ། །འཇམ་རླུང་གཡོན་ནས་བཟུང་ན་བདེ་བ་ཤས་ཆེའོ། །མ་ནིང་གི་རླུང་མཉམ་དུས་བཟུང་ན་འོད་གསལ་ཟིན་པར་སླ་བ་ལས། སྐབས་འདིར་གཡས་ནས་རྒྱུ་དུས་གཟུང་ངོ༌། །འཕགས་སྐོར་རིམ་ལྔ་ལས། རླུང་ཞེས་བྱ་བས་ལས་ཀུན་བྱེད། །འདི་ནི་རྣམ་ཤེས་བཞོན་པ་སྟེ། །ལྔ་ཡི་བདག་ཉིད་བཅུ་ཡང་ཡིན། །ཅེས་སོ། །སྲོག་རླུང༌། ཁྱབ་བྱེད། མེ་མཉམ། གྱེན་རྒྱུ། ཐུར་སེལ། མིག» «རྣ་བ། སྣ། ལྕེ། ལུས་ཀྱི་དབང་པོ་ལ་རྒྱུ་བའི་རླུང་སྟེ་བཅུའོ།། གསུམ་པ་རྗེས་མཉམ་གནས་མ་ནིང་གི་རླུང་གིས་བོགས་དབྱུང་བ་ནི། ལུས་གནད་སྐྱིལ་ཀྲུང༌། ལག་པ་མཉམ་གཞགམིག་ཧར་པོར་ཐད་དྲང་དུ་བལྟས་ལ། སེམས་གནད་གང་ཡང་ཡིད་ལ་མི་བྱེད་པས། རླུང་གནད་ཕྱིར་འགྲོ་དུས་རབ་ཏུ་དལ་བས་ཡུན་ཇི་ཙམ་བསྲིང་ཐུབ་ཏུ་བཟུང་ལ་གཞག» «ནང་དུའང་ཡུན་རིང་བས་འོང་དུ་གཞུག» «ནང་དུ་གནས་དུས་ཡིན་བསྲིངས་ལ་བཞག» «དེ་དག་གི་དུས་སུ་རྩོལ་བས་བཙན་ཐབས་མ་ཡིན་པས་ཆ་ལ་རང་བབས་ཀྱི་ཁོག་ནས་དལ་ལ་ཡུན་བསྲིངས་པས་རྣམ་པར་མི་རྟོག་པའི་ངང་ལ་རྒྱུན་དུ་གནས་པ་དང༌། རླུང་དྲག་པོ་འདུས་པའི་གེགས་སེལ་བ་དང༌། ཟས་སྐོམ་ཡིད་ལ་མི་འདོད་པ་ལ་སོགས་པ་འབྱུང་ངོ༌། །འདི་ནི་ཤིན་ཏུ་ཟབ་པས་ཉམས་སུ་ལེན་པ་ལ་བརྩོན་པར་བྱའོ། །དོན་གཉིས་པ་རྩོལ་བའི་རྣལ་འབྱོར་ལ་གསུམ་སྟེ། སྔོན་དུ་གཏུམ་མོ། དངོས་གཞི་རྣལ་འབྱོར།རྗེས་འོད་གསལ་གྱི་ངང་དུ་ལ་འདའ་བའོ། །དང་པོ་ནི། ལུས་གནད་སྐྱིལ་ཀྲུང༌།དམིགས་གནད་དབུ་མའི་ནང་ལྟེ་བའི་ཐད་དུ་ཨ་ཐུང༌། ངོ་བོ་མེ། རྣམ་པ་ཨ། རེག་བྱ་ཤིན་ཏུ་ཚ་བ་ནས་ཙམ་ལས་མེ་འབར་བས་སྤྱི་བོའི་ཧཾ་ཞུ་བའི་དངས་མས་མེའི་གསོས་བྱས། ཆེར་འབར་བས་འཁོར་ལོ་བཞི་ཁྱབ་པར་མེའི་དྲོད་སྤྲོས་པའི་ངང་ལ་བཞག་པས་ཁྲག་དང་ཁམས་དྲོས་ཏེ་བདེ་བ་སྐྱེ་ བའོ། །ལུས་ལ་གོས་མི་དགོས་པ་དང༌། གང་བལྟས་དྲོ་བར་སྣང་བ་འཆར་ རོ། །དངོས་གཞི་ནི། རྩ་གསུམ་འཁོར་ལོ་བཞི་གསལ་བའི་རོ་རྐྱང་ནས་དངས་མ་དཀར་དམར་དབུ་མར་ཞུགས་པས་དར་ཅིག་བདེ་བ་ལ། མར་སྣའི་ཨ་ལ་དངས་མ་དམར་པོ་འདུས། ཡར་སྣའི་ཧཾ་ལ་དཀར་པོ་འདུས་པ་སྙིང་གར་འདྲེས་ཏེ། གོང་བུ་གཅིག་ཏུ་གྱུར་པ་ལས། སླར་ཡང་འཁོར་ལོ་བཞིར་དེ་ལས་བབས་པའི་དངས་མ་འདྲེས་པས་ཁྱབ་པར་སྒོམ་ཞིང༌། བདེ་བ་ཉིད་ཀྱི་ངང་ལ་བཞག་གོ» «།སྐབས་སུ་ཡས་བརྟན་རིམ་པས་འབབ་པ་དང༌། མས་བརྟན་བཟློག་པ་དང༌། རྩ་རྣམས་སུ་དགྲམ་པའང་བྱའོ། །འདིས་ནི་བདེ་བ་མི་བཟོད་པ་»«སྐྱེ་བའོ། །«༼༡༽«རྗེས་ནི་སྙིང་གར་ཨ་ཧཾ་གཅིག་ཏུ་འདྲེས་པ་ལ་ཡང་བསྡུས་ཏེ། ཨེ་མཐིང་གར་གྱུར་ལ། དེ་ཡང་ཇེ་ཕྲར་གྱུར་ནས་ཡིད་ལ་མི་བྱེད་པའི་ངང་ལ་གཞག་གོ» «།འདིའི་ཚེ་ཐིག་ལེ་རྩའི་ནང་དུ་སྦ་བ། རྣམ་རྟོག་ཆོས་ཉིད་ཀྱི་ངང་དུ་སྦ་བ། བདེ་བ་འོད་གསལ་གྱི་ངང་དུ་སྦ་བ། འོད་གསལ་འཛིན་མེད་ཀྱི་ངང་དུ་སྦ་བ་ཞེས་བྱ་བ་ཡིན་ནོ། །ཐིག་ལེའི་བདེ་བ་ཇི་ལྟར་ཉམས་སུ་ལེན་ཡང་གནད་འདི་གཅེས་སོ། །འདི་མེད་ན་ཐར་ལམ་བྱང་ཆུབ་ལ་རེག་དུས་མེད་དོ། །དེས་ན་གང་ཡང་བྱ་རྩོལ་མེད་པ་འོད་གསལ་གྱི་ངང་ལས་མི་འདའ་བར་བསླབ་བོ། །ཐབས་ལམ་གཞན་ལས་ཡུམ་གྱི་བདེ་བ་ལ་བརྟེན་ཏེ་ཐིག་ལེ་དབབ་པ་ཡས་བརྟན་གྱི་དགའ་བ་བཞི་དང༌། རྡོ་རྗེའི་བུམ་པར་བཟུང་ཞིང་བསྐྱིལ་བ་དང༌། ཡུམ་གྱིས་དྲང་བ་དང༌། དེ་གཉིས་བསྲེས་ཏེ་གཅིག་ཏུ་གྱུར་པ་གྱེན་དུ་བཟློག་པ་མས་བརྟན་གྱི་དགའ་བ་བཞི་དང༌། རྩ་རྣམས་སུ་དགྲམ་པ་དང༌། ཡེ་ཤེས་ཆེན་པོར་ལ་འདའ་བ་རྣམས་ཀྱང་ཐབས་འདིར་འདུས་པ་ལས། ཐ་མ་འོད་གསལ་དུ་སྒོམ་པ་ནི་འདི་ཆེས་ཟབ་པ་ཡིན་ནོ། །དོན་གསུམ་པ་འོད་གསལ་ཕྱག་རྒྱ་ཆེན་པོའི་རྣལ་འབྱོར་ནི། སྲོག་རྩོལ་གཉིས་ཀྱི་ཐབས་ལས་སྐྱེས་པ་སྟེ། སྲོག་གི་དུས་སུ་སེམས་གསལ་ལ་མི་རྟོག་གམ། རྩོལ་བའི་དུས་སུ་བདེ་ལ་མི་རྟོག་པ་གང་ཡིན་ཡང་འདྲ་སྟེ། དེ་དུས་ཀྱི་རིག་པ་བདེ་བ། གསལ་བ། མི་རྟོག་པ་ནི་ཉམས་ཡིན་ལ། ངོ་བོ་སྟོང་པ། གསལ་བ། གང་དུ་ཡང་མ་གྲུབ་པ། རང་བྱུང་བཅོས་བསླད་མེད་པ། དང་སང་ངེ༌། ཡང་ཕྱལ་ལེ། གསལ་སང་ངེ༌། བདེ་ལ་རྟོག་པ་མེད་པ། གསལ་ལ་ངོས་གཟུང་མེད་པ། རིག་པ་རྗེས་མཐུད་མེད་པ། ཡུལ་ལ་མ་ཡེངས། སེམས་སུ་མི་འཛིན། བསྒོམ་བྱ་སྒོམ་བྱེད་ཀྱི་ཆོས་ལས་འདས་པ་དེ་ངོས་བཟུང་ལ་མ་ཡེངས་པར་རྟག་ཏུ་བསྒོམ་ མོ། །དོ་ཧ་ལས། ཆུ་དང་མར་མེ་རང་གསལ་གཅིག་པུར་ཞོག» «།ཅེས་པ་དང༌། ཏོག་རྩེ་པས། བསྒོམ་བྱ་སྒོམ་བྱེད་ལས་གྲོལ་བ། །ཡིད་ལ་མེད་དོ་ཕྱག་རྒྱ་ཆེ། ། ཞེས་པ་དང༌། བིརྺ་བས། སེམས་ཀྱིས་བསྒོམས་པ་སྒོམ་པ་མིན། །མི་སྒོམ་པ་ཡང་སྒོམ་པ་མིན། བསྒོམ་དང་མི་སྒོམ་ལས་འདས་པ། །ཡིད་ལ་མེད་དོ་ཕྱག་རྒྱ་ཆེ། ། ཞེས་པ་དང༌། རྣམ་ངེས་ལས། ཐམས་ཅད་ལས་ནི་སེམས་བསྡུས་ནས། །ནང་གི་བདག་ཉིད་གཡོ་མེད་པར། །གནས་ནའང་མིག་གིས་གཟུགས་དག་ནི། །མཐོང་བའི་བློ་དེ་དབང་སྐྱེས་ཡིན། །ཅེས་པ་དང༌། ཡེ་ཤེས་སྣང་བ་རྒྱན་ལས། ཀུན་ཏུ་རྟོག་པས་མ་བརྟགས་ན། །རབ་ཏུ་མི་གནས་པ་ཡི་ཡིད། །དྲན་པ་མེད་ཅིང་ཡིད་བྱེད་མེད། །དམིགས་པ་མེད་ལ་ཕྱག་འཚལ་འདུད། །ཅེས་པ་དང༌། ཡུམ་ལས། རབ་འབྱོར་ཤེས་རབ་ཀྱི་ཕ་རོལ་ཏུ་ཕྱིན་པ་ནི་དྲན་པ་མེད་ཅིང་ཡིད་ལ་བྱར་མེད་པའི་ཕྱིར་ནམ་མཁའ་ལྟ་བུའོ་ཞེས་པ་དང༌། སྡུད་པ་ལས། གནས་མེད་གནས་ཡིན་འདི་ནི་རྒྱལ་བས་གནས་པར་གསུངས། །ནམ་མཁའ་གང་ལ་གནས་ཡིན་དོན་འདི་ཤེས་པར་གྱིས། །ཞེས་སོ། །དེ་ལྟ་བུ་དེ་སྒོམ་དུས་རྒྱ་ཆེར་སྣང་བའི་རི་རྩེ་ལ་སོགས་པར་སོང་ནས་ཀྱང་བསྒོམས་ལ། སེམས་རྩེ་གཅིག་ཏུ་མི་སྡུད་པར་རྒྱ་བསྐྱེད་དེ་ལྟ་སྟངས་གློད་པའི་ངང་ནས་ཡངས་པ་ཁྲོལ་ལེར་བསྒོམ་པ་ཡིན་ནོ། །དེ་ལྟར་བསྒོམས་པ་ལས་བདེ་གསལ་མི་རྟོག་པ་ལ་སོགས་པའི་དྲོད་རྟགས་འབྱུང་སྟེ། མདོ་ལས། བསམ་དུ་མེད་པའི་ཆོས་ཉིད་ལ། །བསམ་དུ་མེད་པའི་བློ་བཞག་ན། ། བསམ་དུ་མེད་པའི་ཉམས་མྱོང་འབྱུང༌། །ཞེས་པ་དང༌། སྒྱུ་འཕྲུལ་ལས། ཡོངས་སུ་བསྒོམ་བྱ་བླ་མེད་པ། །གོམས་པས་དྲོད་ནི་དཔག་ཏུ་མེད། །ཅེས་པ་དང༌། རྣམ་འགྲེལ་ལས། གང་གིས་ཤིན་ཏུ་བསྒོམས་གྱུར་པའི། །སྒོམ་པ་ཡོངས་སུ་རྫོགས་པ་ན། །དེ་གསལ་མི་རྟོག་བློ་འབྲས་བུ། །ཞེས་སོ། །དེ་ཡང་དང་པོ་སེམས་གནས་པའི་རྟགས་སུ་བྱ་བ་རྣམས་ལ་འཇུག་སྙིང་མི་འདོད་པར་སྔར་བས་ལེ་ལོ་ཆེར་སོང་བས་ལུས་སེམས་ལ་ལྷོད་ཆགས་པ་འོང༌། སྤྱོད་ལམ་ཡང་མ་བཅོས་སྨྱོན་པ་འདྲ་བ་འབྱུང༌། ཚེ་འདི་ལ་དགོས་མེད་སྐྱེ། ལུས་ལ་ནད་མེད་ཅིང་ཟོ་མདོག་བདེ་ཁ་ཟས་ལ་སྲེད་པ་ཆུང་བས་མ་ཟོས་ཀྱང་མདངས་བཀྲག་རྒྱས། གཉིད་འོད་གསལ་དུ་ཐིམ་པས་རྨི་ལམ་གྱི་འཁྲུལ་སྣང་འགགས། མངོན་ཤེས་ཕྲ་མོ་ཐོབ་པས་རང་གཞན་གྱི་ལེགས་ཉེས་ཤེས། གང་ལའང་བདེན་ཞེན་མེད་པས་འཇིག་རྟེན་ཆོས་བརྒྱད་ཞིག་པའོ། །ཡང་ཏིང་ངེ་འཛིན་སྐྱེས་པ་བརྟན་པའི་དྲོད་རྟགས་བཅུ་གསུམ་ལས། ཕྱིའི་དྲུག་ནི། སེམས་ཀྱིས་བལྟས་དུས་ཡེ་མེད་པ་སྙམ་པ་དང༌། བདེ་འབོལ་ལེ་བ་དང༌། གསལ་ལྷག་གེ་བ་དང༌། སྟོང་སང་ངེ་བ་དང༌། དགའ་ཞིང་གཅིག་དགོད་འཆོར་བ་དང༌། མཐའ་དབུས་བྲལ་བ་ནམ་མཁའ་དང་དབྱེར་མེད་སོང་བ་སྙམ་བྱེད་པའོ། །ནང་གི་དྲོད་རྟགས་གསུམ་ནི། ལུས་མེད་པ་སྙམ་བྱེད་པ་དང༌། སེམས་མེད་པ་སྙམ་བྱེད་པ་དང༌།དབུགས་ཕྱི་ནང་དུ་རྒྱུ་བ་མི་ཚོར་བའོ། །གསང་བའི་དྲོད་རྟགས་བཞི་ནི། ལུས་ཤིང་བལ་ལྟར་ཡང་ཕྱད་ཕྱད་པ་དང༌། ལུས་ནམ་མཁའ་ལ་འཕགས་པ་སྙམ་བྱེད་པ་དང༌། ཉི་མ་ཤར་བ་སྙམ་བྱེད་པ་དང༌། ཟླ་བ་ཤར་བ་སྙམ་བྱེད་པའོ། །དེ་ཡང་ཕྱིའི་རྟགས་དྲུག་ལ་ཞེན་ན་འདོད་ཁམས་སུ་གོལ། ནང་གི་རྟགས་གསུམ་ལ་ཞེན་ན་གཟུགས་ཁམས་སུ་གོལ། གསང་བའི་རྟགས་བཞི་ལ་ཞེན་ན་གཟུགས་མེད་མུ་བཞིར་གོལ་ཏེ། ལྟ་བས་ཐག་མ་ཆོད་པར་སྟོང་སང་ངེ་བ་ཙམ་དུ་ཞེན་ནས་བསྒོམས་ན་ནམ་མཁའ་མཐའ་ཡས་སུ་གོལ། སྣང་སེམས་ཐམས་ཅད་རང་སེམས་ཙམ་དུ་ཤེས་ནས་སེམས་གསལ་བར་བསྒོམས་ན་རྣམ་ཤེས་མཐའ་ཡས་སུ་གོལ། སྣང་བ་ལ་བློས་མ་རེག་པའི་སྟོང་པར་བསྒོམས་ན་ཅི་ཡང་མེད་པའི་སྐྱེ་མཆེད་དུ་གོལ། སྣང་བ་བློས་མ་རེག་པར་ཡོད་མེད་གཉིས་ཀ་མ་ཡིན་པ་ཙམ་དུ་བསྒོམས་ན་སྲིད་རྩེར་གོལ་ལོ། །ཅི་ཡང་མེད་པར་རྟོག་པ་འགགས་པའི་ངང་དུ་བསྒོམས་ན་འདུ་ཤེས་མེད་པའི་ལྷ་ཚེ་རིང་པོར་གོལ་ལོ། །གོལ་བ་ཐམས་ཅད་ཏིང་ངེ་འཛིན་དེ་དག་གི་ཉམས་རེ་བྱུང་བ་ལ་ཞེན་ནས་མཆོག་ཏུ་བཟུང་བས་བརྟུལ་ཞུགས་མཆོག་འཛིན་གྱི་ལྟ་བར་སོང་སྟེ་གོལ་བ་ཡིན་ནོ། །དེས་ན་གང་ལ་རང་ཞེན་འཛིན་མེད་པས་བསྒོམ་པ་གཅེས་སོ། །དོ་ཧ་ལས། གང་ལ་ཞེན་པ་ཡོད་ན་དེ་ཡང་ཐོངས། །རྟོགས་པར་གྱུར་ན་ཐམས་ཅད་དེ་ཡིན་ཏེ། །དེ་ལས་གཞན་ཞིག་སུས་ཀྱང་ཤེས་མི་འགྱུར། །ཅེས་སོ། །དེ་ལྟར་གོམས་པ་ལས་དོན་དམ་པའི་བདེན་པ་རྟོགས་ནས་མྱུར་དུ་ཆོས་ཀྱི་སྐུ་འགྲུབ་ལ། སྔོན་འགྲོར་བླ་མའི་རྣལ་འབྱོར་ལ་སོགས་པས་བསོད་ནམས་ཀྱི་ཚོགས་ཀུན་རྫོབ་པའི་རྣམ་པ་རྫོགས་ནས་གཟུགས་སྐུ་འགྲུབ་པས་ན་ལམ་འདི་ཆོས་ཟབ་ལ་གོལ་ས་མེད་དེ། རིན་ཆེན་ཕྲེང་བ་ལས། སངས་རྒྱས་རྣམས་ཀྱི་གཟུགས་སྐུ་འདིར། །བསོད་ནམས་ཚོགས་ལས་བྱུང་བ་སྟེ། །ཆོས་ཀྱི་སྐུ་ནི་མདོར་བསྡུས་ན། །རྒྱལ་པོ་ཡེ་ཤེས་ཚོགས་ལས་ བྱུང༌། །ཞེས་པ་དང༌། ཐོད་གླུ་ལས། སྟོང་ཉིད་རྒྱུ་ལ་གོམས་པ་ཡིས། །ཆོས་ཀྱི་སྐུ་ཡི་རྩེ་མོར་བྱུང༌། །བསོད་ནམས་བསགས་པའི་རྣམ་སྨིན་གྱིས། །ལོངས་སྤྱོད་རྫོགས་པའི་རྩེ་མོར་བྱུང༌། །སྨོན་ལམ་བཏབ་པའི་རྣམ་སྨིན་གྱིས། །སྤྲུལ་པའི་སྐུ་ཡི་རྩེ་མོར་བྱུང༌། །ཞེས་སོ། །དེ་ལྟར་འོད་གསལ་ཕྱག་རྒྱ་ཆེན་པོའི་རྣལ་འབྱོར་ནི་རྣལ་འབྱོར་རྣམས་ཀྱི་ནང་ནས་མཆོག་ཡིན་པས་སྒོམ་པ་ལ་བརྩོན་པར་བྱའོ། །བཞི་པ་འཕོ་བའི་རྣལ་འབྱོར་ལ་གསུམ་སྟེ། སྔོན་དུ་སྦྱང་བ་དང༌། འཆི་ལྟས་བརྟག་པ་དང༌། དུས་སུ་འཕོ་བའོ། །དང་པོ་ནི། བླ་མའི་རྣལ་འབྱོར་བསྒོམས་ནས་སྐྱིལ་ཀྲུང་གིས་འདུག་སྟེ། རྩ་དབུ་མ་མདའ་སྨྱུག་ཙམ་གྱི་ནང་ན་གསེར་གྱི་རྡོ་རྗེ་རྩེ་ལྔ་པ་ནས་ཙམ་ཞིག་སྒལ་ཚིགས་ཉི་ཤུ་རྩ་གཅིག་གི་རིམ་པ་ལྟར་གྱེན་དུ་འཕར་བས་ཚངས་བུག་བརྟོལ་བར་བསམས་ལ། ཀ་ཧིག་ཉི་ཤུ་རྩ་གཅིག་ནས་བཞི་བཅུའི་བར་དབུགས་ཐེབ་རེ་རེ་ལ་རྒྱངས་རྒྱངས་གདོན་ནོ། །ཉི་མ་གཅིག་གམ་གསུམ་མམ་བདུན་ན་ཚངས་བུག་ཏུ་ཚ་ཞིང༌། འཕང་ལོ་ཙམ་གྱི་ཤ་འཕར་བའི་དབུས་ན་བུག་པ་འཇག་མ་ཚུགས་པ་དངོས་སུ་འབྱུང་ངོ༌། །དེས་ནི་འཕོ་བའི་ལམ་བྱང་ནས་ནམ་འཕོ་ཡང་ཚེགས་མེད་པ་ཡིན་ནོ། །གཉིས་པ་འཆི་ལྟས་བརྟག་པ་ནི། ནམ་མཁའ་ལ་ཚེའི་གཟུགས་མེད་པ་དང༌། ཉིན་ཕྱེད་མཚན་ཕྱེད་ན་རླུང་གཡས་སུ་རྒྱུ་བ་དང༌། ཐིག་ལེ་ནག་པོར་འབབ་པ་དང༌།བཤང་གཅི་དུས་གཅིག་ལ་འབྱུང་བ་དང༌། རྣ་བའི་སྒྲ་མེད་པ་དང༌། མིག་གི་འོད་མེད་པ་དང༌། གཅི་བ་གཉིས་སུ་གྱེས་པ་དང༌། སྣ་གོང་དུ་རྡུལ་ཆགས་པ་དང༌། ལག་པ་སྨིན་མཚམས་སུ་བསྒྲེངས་པའི་རྒྱུན་ཆད་པ་དང༌། རྨི་ལམ་དུ་བོང་བུ་ཞོན་ནས་ལྷོར་འགྲོ་འཕྲོ་ལ་གཉིད་སད་པ་ལ་སོགས་པའོ། །དེ་ཡང་རྒྱས་པའམ་འཕོ་བའི་དུས་སུ་རླུང་གཡས་ནས་རྒྱུ་བ་དང༌། ཚེ་གཟུགས་མེད་པ་དང༌། མིག་གི་འོད་མེད་པ་ལ་སོགས་པ་རྟགས་མང་དུ་འཛོམ་ན་ངེས་པར་འཆི་ལ། གཞན་རེ་རེ་ཙམ་གློ་བུར་དུ་འོང་བས་ངེས་པ་མེད་དོ། །ནག་པོ་ཞབས་ཀྱི་འཆི་བསླུ་ལས། དང་པོ་གསུམ་དང་གཉིས་པ་གསུམ། །དེ་བཞིན་ཐ་མའི་བར་དག་གསུམ། །ཚན་རེ་གསུམ་རྫོགས་ཐམས་ཅན་རྫོགས། །དེ་ནི་ཉེ་བར་འཆི་བའི་ལྟས། །ཐད་ཀར་གསུམ་བྱུང་བསླུ་རུ་མེད། །ཚན་གསུམ་རྫོགས་ན་བསླུ་རུ་མེད། །ཐམས་ཅད་རྫོགས་ན་བསླུ་རུ་མེད། །བསག་དང་འཆོས་པས་བསླུ་བ་ཡིན། །ཅེས་སོ། །འདི་ནི་རླུང་གཡས་གཡོན་མཉམ་རྒྱུ་གསུམ་ལ་བརྟག་པ་སྟེ། ཉི་ཟླའི་རླུང་སྒྲ་གཅན་གྱིས་གཟུང་བ་ལ་སོགས་པའི་དུས་སུའོ། ། བསླུ་བའི་ཆོ་ག་ནི། རྩ་བའི་བླ་མ་ལ་འཁོར་གསུམ་ཡོངས་དག་དང༌། ཚོགས་བརྒྱ་རྩ་དང༌། དཀྱིལ་འཁོར་གྱི་མཆོད་པ་ལོ་གྲངས་དང༌། མདོ་བཀླག་པ་དང༌། མཆོད་རྟེན་གསོ་བ་དང༌། གྲུ་ཟམ་འཆོས་པ་དང༌། དགེ་འདུན་གྱི་སྟོན་མོ་བྱ་བ་དང༌། དམ་ཚིག་བསྲུང་བ་དང༌། སྟོང་པ་ཉིད་བསྒོམ་པ་དང༌། བཅུད་ཀྱིས་ལེན་པ་དང༌། ཚེ་བསྒྲུབ་པ་ལ་སོགས་པ་བྱའོ། །དེ་ནས་སྔར་གྱི་ལྟས་ལོག་ནས། དང་པོ་སྐྱོན་མེད་དུས་ལྟར་སོང་ན་བསླུས་པ་ཡིན་ནོ། །གསུམ་པ་དུས་སུ་འཕོ་བ་ནི། ཐབས་གང་གིས་ཀྱང་འཆི་ལྟས་མ་འགྱུར་ན་འཕོ་བ་ཡིན་ཏེ། ཡོ་བྱད་ཐམས་ཅད་སྤང་དག་བྱས་ལ་དབེན་པའི་སར་མཆོད་གཏོར་ཡོད་ན་བཤམས། མེད་ན་ཡིད་ཀྱིས་བླ་མ་དཀོན་མཆོག་དང་མཁའ་འགྲོ་ཆོས་སྐྱོང་མཆོད་ལ། ཚེ་འདི་ལ་མ་ཆགས་པའི་བསམ་པ་བྱ་སྟེ། འདའ་ཀ་ཡེ་ཤེས་ལས་བཤད་པ་ལྟར། དངོས་པོ་ཅི་ལ་ཡང་མ་ཆགས་པའི་འདུ་ཤེས་དང༌། སྙིང་རྗེ་ཆེན་པོའི་འདུ་ཤེས་དང༌། ཆོས་ཐམས་ཅད་སྟོང་ཞིང་བདག་མེད་པའི་འདུ་ཤེས་དང༌། མི་དམིགས་ཤིང་འོད་གསལ་བའི་འདུ་ཤེས་ལ་སོགས་པ་བཅུ་བསྒོམ་པའི་མཐར། འཆི་བ་རྨི་ལམ་སྒྱུ་མ། ངེས་པའི་དོན་ལ་འཆི་རྒྱུ་མེད་པ། རིག་པ་རང་གི་ངོ་བོ་ལ་བལྟ་བ་རྣམས་ཀྱིས་ཉམ་ང་དང་བག་ཚ་མེད་པར་བྱས་ཏེ། སེང་གེའི་ཉལ་ལུགས་སམ། སྐྱིལ་ཀྲུང་གིས་འདུག་སྟེ། མདུན་གྱི་ནམ་མཁར་བླ་མ་དང་ཡི་དམ་དཀྱིལ་འཁོར་གྱི་ལྷ་ཚོགས་བསམས་ལ། རང་གི་རྩ་དབུ་མའི་ནང་སྙིང་ག་ན་རང་གི་རིག་པ་འོད་ལྔའི་གོང་བུ་དབུས་སུ་ཧཱུྃ་མཐིང་གས་མཚན་པ་ཞིག་སྔར་གྱི་རྡོ་རྗེ་དེས་མདའ་འཕངས་པ་ལྟར་བསྐྱོད་པ་བླ་མའི་ཐུགས་ཀར་ཐིམ་ནས་ཇེ་མཐོ་ཇེ་མཐོ་ལས། མཐར་ཡིད་ལ་མི་བྱེད་པ་ཕྱག་རྒྱ་ཆེན་པོའི་ངང་དུ་འཕོ་བར་བྱའོ། །དེ་ལྟ་བུ་རླུང་ཀ་ཧིག་དང་བསྡོངས་པ་བདུན་གྱིས་མི་འཕོ་མི་སྲིད་དོ། །བཙན་ཐབས་སུ་འཕོ་ན། དམིགས་པ་དེ་དང་རྩེ་ཆུང་གནོན་པ་ལྷན་ཅིག་བྱས་པས་ངེས་པར་འགྲུབ་བོ། །རྡོ་རྗེ་གདན་བཞི་ལས། བུ་ག་དགུ་ཡི་སྟེང་ཕྱོགས་ནས། །ཕྲལ་དུ་ཡིད་ཀྱིས་འཕོ་བྱེད་ན། །ཉིན་བཞིན་བྲམ་ཟེ་གསོད་པ་དང༌། །མཚམས་མེད་ལྔ་ནི་བྱེད་པ་དང༌། །ཆོམ་རྐུན་ལས་ཀྱི་ལོངས་སྤྱོད་པ། །འདི་ཡི་ལམ་གྱིས་གྲོལ་འགྱུར་ ཏེ། །སྡིག་པས་གོས་པར་མི་འགྱུར་རོ། །ཞེས་སོ། །དོན་ལྔ་པ་བར་དོའི་རྣལ་འབྱོར་ལ་གསུམ་སྟེ། བར་དོ་སྦྱང་བ། ངོས་གཟུང་བ། ལས་ཀྱི་འཕྲོ་མཐུད་ པའོ། །དང་པོ་ནི།ད་ལྟ་བར་དོ་ཡིན་པའི་འདུ་ཤེས་དང་མ་བྲལ་བས་འོད་གསལ་ངོས་བཟུང་ལ། ཉིན་མོ་དང་མཚན་མོ་བསྒོམ་པར་བྱའོ། །ཉིན་མོ་ནི་སྟན་ལ་འདུག་ནས་བླ་མའི་རྣལ་འབྱོར་བསྒོམས་ཏེ། བར་དོ་འབྱོངས་པར་གསོལ་བ་བཏབ་ནས་སྣང་བ་འདི་བར་དོའི་སྣང་བ། འགྲོ་བ་ཐམས་ཅད་བར་དོའི་སྐྱེ་འགྲོ། ཟས་ཟ་བ་དང་འགྲོ་འཆག་ཉལ་འདུག་བར་དོའི་སྣང་བ། དྲན་རིག་བར་དོའི་ཤེས་པར་ངོས་བཟུང་ལ་མ་ཤི་བའི་འདུ་ཤེས་སྐད་ཅིག་ཀྱང་མི་བྱ་བར། ང་ཤི་འདུག» «བར་དོ་ན་འདུག་སྙམ་ནས། སྔར་ངོ་སྤྲད་པ་བཞིན་འོད་གསལ་ཕྱག་རྒྱ་ཆེན་པོ་བསྒོམ་མོ། །སྔར་གྱི་རིག་པ་དང་བར་དོའི་རིག་པ་གཉིས་གཅིག་ཡིན་པས་འབྱུང་བ་སྡུད་པ་ཙམ་མིན་པ་ཁྱད་མེད་པའི་ཕྱིར་ད་ལྟ་གོམས་པས་བར་དོར་ངོས་ཟིན་པ་ཡིན་ནོ། །དེ་ལྟར་གོམས་པས་རྨི་ལམ་གཉིད་གུང་དུའང་དེ་བྱུང་ན་བར་དོར་ཕན་ཐོགས་པ་ཡིན་ནོ། །མཚན་མོ་ནི་རྨི་ལམ་འདུན་པའི་གནད་ཀྱིས་སྦྱང་བར་བྱ་སྟེ། ཉལ་ཁར་བླ་མའི་རྣལ་འབྱོར་བསྒོམས་ལ། རྨི་ལམ་འབྱོངས་པར་གསོལ་བ་བཏབ་བོ། །གཟུང་བ། སྦྱང་བ། བར་དོའི་འོད་གསལ་དུ་བསྒོམ་པ་གསུམ་ལས། དང་པོ་རྨི་ལམ་གཟུང་བ་ནི། དུས་ཀྱི་གནད་སྲོད། ལུས་གནད་སེང་གེའི་ཉལ་ལུགས་དམིགས་པའི་གནད་དང་པོ་སྨིག་ཕྲག་ཏུ་སེམས་གཟུང༌། གཉིད་དུ་འགྲོ་ཁར་མགྲིན་པ་ན་པདྨ་དམར་པོ་འདབ་བཞིའི་ལྟེ་བར་ཨ་དམར་པོ་ནས་ཙམ་ལ་ཤེས་པ་གཏད་ཅིང༌། རྨི་ལམ་ལ་རྨི་ལམ་དུ་ཤེས་ནས་ཟིན་པར་བྱ་སྙམ་དུ་བསམས་ལ་ཉལ་ལོ། །སད་རེས་ལ་དེ་ལྟར་དྲན་པར་བྱས་པས་རྨི་ལམ་ཟིན་ ནོ། །མ་ཟིན་ན་བླ་མ་ལ་གསོལ་བ་གདབ། བསོད་ནམས་ཀྱི་ཚོགས་བསག» «ཉིན་དུས་ཀྱི་འདུན་པ་དྲག་པོ་བྱའོ། །དེས་ཟིན་ངེས་ཏེ། དང་པོ་རྦབ་ཏུ་ཤོར་བ་སོགས་སྔངས་བ་རྩུབ་མོ་ཞིག་གིས་རྐྱེན་བྱས་ནས་ཟིན་ནོ། །ཟིན་དུས་ལྷའི་སྐུ་དང་ཡུལ་སྣ་ཚོགས་དང༌། རྫུ་འཕྲུལ་དུ་མར་སྤྲུལ་པ་དང༌། གཅིག་གཅིག་ཏུ་བསྒྱུར་བ་ལ་སོགས་པ་བྱའོ། །སྦྱང་བ་ནི། རྨི་ལམ་གྱི་སྣང་བ་དེ་ཉིད་བདེན་མེད་སྒྱུ་མར་རྩལ་སྦྱང་ཞིང༌། ཆུ་དང་མེ་ལ་སོགས་པ་ལ་རྨི་ལམ་གྱི་མེ་ཆུས་སུ་ལ་གནོད། སྒྱུ་མ་ཡིན། རྨི་ལམ་ཡིན་སྙམ་དུ་སྐད་ཅིག་སྐད་ཅིག་ལ་བདེན་མེད་ཞེན་མེད་དུ་བྱེད་པའོ། །བར་དོའི་འོད་གསལ་ལ་བསྒོམ་པ་ནི། རྨི་ལམ་དེ་ཉིད་བར་དོ་ཡིན་པར་ཐག་བཅད་ལ། བདེན་མེད་ཞེན་མེད་ཀྱི་རྩལ་སྦྱངས་རྗེས་ངོ་སྤྲད་པའི་འོད་གསལ་གྱི་ངང་ལ་བསྒོམ་པའོ། །དེ་ལྟར་བྱས་པས་ཉིན་མཚན་ཁྱད་མེད་པར་བར་དོའི་སྣང་བ་དང་འོད་གསལ་དུ་འབྱོངས་པ་ཡིན་ནོ། །གཉིས་པ་བར་དོ་ངོས་གཟུང་བ་ནི། འཆི་བའི་«༼༡༽«ཚེ། ས་ཆུ་ལ་ཐིམ་པས་ལུས་ལྕི། ཆུ་མེ་ལ་ཐིམ་པས་ཁ་སྣའི་ཆུ་སྐམ། མེ་རླུང་ལ་ཐིམ་པས་དྲོད་སྡུད།རླུང་རྣམ་ཤེས་ལ་ཐིམ་པས་ཕྱི་དབུགས་བརྩེགས་མ་ལས་རྒྱུ་བ་ཆད། རྣམ་ཤེས་ནམ་མཁར་ཐིམ་དུས་གྱེན་རྒྱུ་ཐུར་སེལ་གྱི་རླུང་གཉིས་ཀྱི་དབུ་མའི་ཡར་སྣ་མར་སྣ་གཉིས་ནས་སྙིང་གར་ཨ་ཧཾ་ཕྲད་དེ་དར་ཅིག་བརྒྱལ། ནམ་མཁའ་འོད་གསལ་ལ་ཞུགས་དུས་ཡེ་ཤེས་བཞི་ལས་དང་པོ་སྣང་བའི་ཡེ་ཤེས་སྐད་ཅིག་མ་འཆར་ཏེ། སྔར་ཐིག་ལེ་རྩོལ་བས་སྒོམ་པའི་འོད་གསལ་ཟིན་པ་ལས། དེ་ལས་བརྒྱ་འགྱུར་གྱིས་བདེ་ལ་གསལ་བ། འདོད་ཆགས་ཀྱི་རྟོག་པ་མེད་པ་སྐད་ཅིག་མ་ག» «ཅིག་འཆར་བ་ངོས་བཟུང་ལ་བསྒོམ་མོ། །དེ་ནས་སྣང་བ་མཆེད་པ་ལ་ཐིམ་པས་སྔོན་བས་ཀྱང་གསལ་བའི་ཡེ་ཤེས་མཆེད་པ་ཞེས་བྱ་བ་སྐད་ཅིག་གཉིས་སུ་འཆར་རོ། །དེ་ནི་སྔར་སྲོག་ལ་གོམས་པ་དེ་དང་གཅིག་ཀྱང༌། འདིར་གསལ་ལ་མི་རྟོག་པ་བརྒྱ་སྟོང་གིས་ལྷག་པས་ཞེ་སྡང་གི་རྟོག་པ་ཞི་སྟེ། འོད་གསལ་དེ་ཉིད་ངོས་བཟུང་ལ་བསྒོམ་མོ། །དེ་ནས་མཆེད་པ་ཐོབ་པ་ལ་ཐིམ་པས་མི་རྟོག་པའི་ཡེ་ཤེས་སྔར་ཡིད་ལ་མི་བྱེད་པ་སྒོམ་པ་དེ་ཡིན་ཡང༌། དེ་བས་བྱེ་བ་འགྱུར་གྱི་མི་རྟོག་ལ་གསལ་བདེ་སྤྲོས་པ་མེད་པ་སྐད་ཅིག་གསུམ་འབྱུང་བ་དེ་ངོས་བཟུང་ལ་བསྒོམ་མོ། །དེས་ནི་གཏི་མུག་གི་རྟོག་པ་ཞི་བའི་དུས་སོ། །ཐོབ་པ་ཉེ་བར་ཐོབ་པའི་ཡེ་ཤེས་ལ་ཐིམ་དུས་ན། སྔོན་བས་ལྷག་པའི་བདེ་གསལ་སྤྲོས་བྲལ་རང་བྱུང་གི་ཡེ་ཤེས་སྐད་ཅིག་བཞི་འབྱུང་སྟེ། ཉོན་མོངས་པ་ཕྲ་བ་དང་རགས་པ་ཀུན་སྤྲིན་ནམ་མཁར་ཞི་བ་ལྟར་དབྱིངས་སུ་དར་ཅིག་ནུབ་ནས། སྔོན་འོད་གསལ་ཕྱག་རྒྱ་ཆེན་པོ་དུས་ཐམས་ཅད་ལ་རང་བཞིན་རྣམ་དག་ཆེན་པོར་ངོ་སྤྲད་པ་དེ་འདིར་ཤར་སྙམ་དུ་ངོ་ཤེས་པར་བྱས་ལ། དེའི་ངང་དུ་སྒོམ་པའི་སྐད་ཅིག་ལ་སངས་རྒྱས་ཐོབ་སྟེ། མཚན་བརྗོད་ལས། སྐད་ཅིག་གཅིག་གིས་བྱེ་བྲག་ཕྱེད། །སྐད་ཅིག་གཅིག་གིས་རྫོགས་སངས་རྒྱས། །ཞེས་སོ། །དེ་དག་གི་ཚེ་འབྱུང་བ་ལྔའི་རླུང་དབྱིངས་སུ་དག་པ་འོད་གསལ་ལྷན་ཅིག་སྐྱེས་པས་བདག་བྱས་པའི་སྣང་བའང༌། དུ་བ་ལ་སོགས་པའི་རྟགས་བཅུ་རྫོགས་པར་འཆར་ཏེ། འདིར་སྤྲོས་པས་ཆོག་གོ» «།གསུམ་པ་ལས་ཀྱི་འཕྲོ་མཐུད་པ་ནི། དེར་ངོས་མ་ཟིན་པ་རྣམས་ལ། དེ་ནས་རྣམ་ཤེས་ལུས་ཀྱི་ཕྱིར་ཐོན་ནས་སྲིད་པའི་བར་དོ་རྨི་ལམ་ལྟ་བུ་བདེ་སྡུག་སྣ་ཚོགས་པ་ཅན། དབང་པོ་ཚང་བ། རྫུ་འཕྲུལ་ཡོད་པ། གང་དུའང་འགྲོ་ཞིང་གཅིག་ཏུ་མི་ཚུགས་པ་ཀུན་ཏུ་འཕྱོ་ཞིང་ལུས་དང་འདུག་ས་ཚོལ་ལོ། ། དེའི་དུས་སུ་བར་དོ་ངོས་ཟིན་ནས། ཕྱོགས་བཅུའི་ཞིང་དག་པ་ཡིད་ལ་བྱས་ཏེ་འཕོ་བ་ལྟར་རྣམ་ཤེས་དེར་ཞུགས་པས་ཁ་ཅིག་རྫུས་ཏེ་སྐྱེའོ། །སྒྱུ་མ་ལྟ་བུའི་བསྐྱེད་རྫོགས་བསྒོམས་པས་ཁ་ཅིག་གྲོལ་ལོ། །ཕ་མའི་མངལ་དག་པ་མི་ལུས་རིན་པོ་ཆེ་སྦྱོར་བར་བྱེད་པ། མའི་མངལ་དུ་པདྨ་ལ་ཨོཾ་ཨཱཿཧཱུྃ་ངམ་ལྷའི་སྐུ་བསམས་པ་ལ་རྣམ་ཤེས་ཞུགས་ནས་མི་ལུས་རིན་པོ་ཆེ་ཐོབ་ནས་གསང་སྔགས་ཀྱི་ཆོས་དང་ཕྲད་དེ་སྐྱེ་བ་དེ་ཉིད་དམ། བར་དོར་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་བོ། །འཇམ་དཔལ་ཞལ་ལུང་ལས། གཟུགས་བཅས་ཕུང་པོ་རང་ལུས་ནི། ། ཚེ་འདི་ཉིད་ལ་མ་གྲུབ་ཀྱང༌། །ཡིད་ནི་རྡོ་རྗེའི་སྐུར་གྲུབ་ནས། །བར་དོར་ཡང་དག་འགྲུབ་པར་འགྱུར། །ཅེས་སོ། །དོན་གསུམ་པ་རྗེས་གེགས་སེལ་བ་ལ་གསུམ་སྟེ། སྤྱོད་ལམ་རྒྱུན་གྱི་རིམ་པས་གེགས་རྣམས་མི་འབྱུང་བར་བྱ་བ། ཏིང་ངེ་འཛིན་བརྟན་པའི་གེགས་བྱིང་རྒོད་བསལ་བ། སྲོག་རྩོལ་ལོག་པའི་གེགས་སོ་སོར་བཅོས་པའོ། །དང་པོ་ནི་ཐུན་མགོར་ལྷ་དང་བླ་མའི་རྣལ་འབྱོར་བསྒོམ་པ་དང༌། ལུས་སྦྱོང་ལ་བསླབ་པས་ནད་གདོན་གྱི་གེགས་མི་འབྱུང་བ་ཡིན་ནོ། །ལུས་སྦྱོང་ནི། རྣམ་པ་ཉི་ཤུར་འདུས་པའི་དང་པོ་ནི་སྐྱིལ་ཀྲུང་བཅས་ཏེ་ལག་པ་འཁྱུད་པའི་ཚུལ་ལོ། །དེས་ཡན་ལག་གི་ནད་སེལ་ལོ། །གཉིས་པ་ནི་བསྐུ་མཉེའི་ཚུལ་དུ་འཕུར་རོ། །དེས་ལུས་ལ་དྲོད་སྐྱེའོ། ། གསུམ་པ་ནི་སོར་མོ་བསྣོལ་ལ་བྲང་ལ་གཏད་དེ་ཕྱིར་འཐེན་པས་བྲང་གི་ནད་སེལ་ལོ། །བཞི་པ་ནི་དཔུང་པ་གཅུས་ལ་ལག་པ་གཡས་དང་གཡོན་དུ་སྤྲུགས་པས་དཔུང་པའི་ནད་སེལ་ལོ། །ལྔ་པ་ནི་ལག་པ་གཉིས་བྲང་ནས་ཁུ་ཚུར་བཅས་པ་ཕྱིར་འཕངས་པས། ཤ་པགས་ཆུ་སེར་གྱི་ནད་སེལ་ལོ། །དྲུག་པ་ནི། ལག་པ་གཉིས་དཔུང་པ་གཉིས་ལ་བསྣོལ་ནས་བསྡམས་ཏེ་ལུས་ཀུན་གཅུད་པས་རྐེད་པའི་ནད་སེལ་ལོ། །བདུན་པ་ནི་རྐང་པ་གཉིས་བརྐྱངས་པའི་བྲང་བ་གཉིས་ནས་ལག་པ་གཉིས་ཀྱིས་འཐེན་པས་ཆུ་རྒྱུས་ཀྱི་ནད་སེལ་ལོ། །བརྒྱད་པ་ནི་ལག་པ་གཡས་གཡོན་གཞུ་འགེངས་པ་ལྟར་བྱས་པས་ལག་པའི་ཚིགས་དང་སོག་ཕྲག་གི་ནད་སེལ་ལོ། །དགུ་པ་ནི་ལག་པའི་ཁུ་ཚུར་གཉིས་མདུན་རི་འཕུལ་བའི་ཚུལ་དུ་བྱས་པས་རོ་སྟོད་ཀྱི་ཤ་རྒྱས་པ་དང་ལག་པའི་སྦེ་ཤའི་ནད་སེལ་ལོ། །བཅུ་པ་ནི་ལུས་རྒྱབ་དང་མདུན་དུ་དགུག་པས་མཁལ་ནད་མཚེར་ནད་སེལ་ལོ། །བཅུ་གཅིག་པ་ནི་ལག་པའི་མཐེའུ་ཆུང་གཉིས་ལུ་གུ་རྒྱུད་དུ་སྦྲེལ་ཏེ་མཛུབ་མོ་གཉིས་ཀྱིས་སྤྱི་གཙུག་དྲང་པོར་བཞག་པས་རྩིབས་ལོག་ཀྱི་ནད་སེལ་ལོ། །བཅུ་གཉིས་པ་ནི་ལྟེ་བ་ནང་དུ་འཐེན་པས་མ་ཞུ་བ་དང་ཕོ་བའི་ནད་སེལ་ལོ། །བཅུ་གསུམ་པ་ནི་རྐང་ལག་བཞི་ས་ལ་བཙུགས་ལ་མགོ་ཅོག་ཅོག་བྱས་པས་ཡན་ལག་དང་ཉིང་ལག་གི་ནད་སེལ་ལོ། །བཅུ་བཞི་པ་ནི་རྐང་ལག་བཞི་ས་ལ་བཙུགས་ལ་གཡས་དང་གཡོན་དུ་བལྟས་པས་རྩེའུ་ཆུང་གི་ནད་སེལ་ལོ། །བཅོ་ལྔ་པ་ནི་ཁ་སྦུབ་རྐང་པ་བརྐྱང་ལག་མཐིལ་ས་ལ་བཙུགས་ཏེ་གྲུ་མོ་བྲང་ལ་བཏད་པས་སྟོད་ཀྱི་ཕྱི་ནང་གི་ནད་སེལ་ལོ། །བཅུ་དྲུག་པ་ནི་མགོ་ཅོག་གཡས་དང་གཡོན་དུ་བསྐོར་བས་སྐེ་དང་མཇིང་པའི་ནད་སེལ་ལོ། །བཅུ་བདུན་པ་ནི་ལག་པ་གཉིས་བསྣོལ་ལ་སྤྱི་བོར་བཞག་པས་རོ་སྟོད་ཀྱི་ནད་སེལ་ལོ། །བཅོ་བརྒྱད་པ་ནི་པུས་མོ་གནམ་དུ་རེང་ངེ་གན་རྐྱལ་དུ་ཉལ་བའི་སྤྱི་བོར་ཐལ་མོ་ཐད་དྲང་དུ་སྦྱར་བས་རྐང་པའི་ཚིགས་དང་ལག་པའི་ནད་སེལ་ལོ། །བཅུ་དགུ་པ་ནི་རྐང་པ་གཉིས་རེ་མོས་སུ་ལག་པའི་གྲུ་མོའི་ཁུང་«༼༡༽«དུ་བླངས་ཏེ་བརྐྱང་བསྐུམ་བསྐུམ་བྱུག་པས་རྐང་པའི་ཉྭ་ཤའི་ནད་སེལ་ལོ། །ཉི་ཤུ་པ་ནི་རྐང་པ་གཉིས་ཀྱི་མགོ་པུས་མོ་གཉིས་ཀྱི་སྟེང་དུ་རེས་མོས་སུ་བཞག་ཅིང་ཡ་གཅིག་ས་ལ་བཙུགས་ཐལ་མོ་སྦྱར་བས་སྟོད་སྨད་ཐམས་ཅད་ཀྱི་ནད་སེལ་ལོ། །གཉིས་པ་བྱིང་རྒོད་བསལ་བ་ནི། སྤྱོད་ལམ། ཁ་ཟས། རླུང༌། དམིགས་གནད་བཞིས་བསྟན་པ་ལས་སྤྱོད་ལམ་ནི་ཐུན་སྟོད་ལ་བྱིང་ན་སྟན་མཐོན་པོ་ལ་བསྡད། རི་དང་ནམ་མཁའི་མཚམས་སུ་བལྟ། ཁུ་ཚུར་དཔྲལ་བར་བཅིངས་ལ་མིག་བགྲད་དོ། །རྒོད་ན་དམའ་སར་ཨོལ་ཀོས་བྲང་ནོན་པར་བྱས་པའི་མགོ་ཐོག་ཏུ་ཞྭ་གྱོན་པའམ། ཤིང་ལེབ་ཀྱི་བུག་པ་ལ་སེམས་གཏད་དོ། །ཐུན་སྨད་ལ་བྱིང་རྒོད་བྱུང་ན་ཁམས་ཀྱི་སྐྱོན་ཡིན་པས་ཐུན་ཆུང་ལ་གྲངས་མང་བའམ། སྐབས་སུ་དར་རེ་བསྒོམ་པར་བྱའོ། །ཁ་ཟས་ཀྱིས་བྱིང་ན་བཅུད་ཅན་སྤང་ཞིང་བསིལ་བ་བསྟེན་ནོ། །རྒོད་ན་ཆང་ཕུལ་རེ་ལ་སོགས་པ་ཁམས་དང་སྦྱར་ནས་འཐུང་ཞིང༌། གོམ་པ་ལྔ་བཅུ་ཙམ་དུ་འཆག་ཅིང་བསྒོམ་མོ། །རླུང་གིས་བྱིང་ན་འོག་སྒོ་བསྡམས་ལ་ལྟེ་བར་བུམ་པ་ཅན་ཡང་ཡང་བྱའོ། །རྒོད་ན་གཟུང་ཞིང་རང་ཉིད་ལྷར་བསྒོམས་པའི་སྙིང་གའི་ས་བོན་ལས་བརྟན་གཡོ་ཐམས་ཅད་ལ་འོད་ཟེར་ཕོག་པས་འོད་དུ་ཞུ་བ་ཐམས་ཅད་བདག་ལ་བསྡུ་སྟེ། འདོད་ཁམས་ལུས་ཀྱི་སྨད། གཟུགས་ཁམས་བར། གཟུགས་མེད་སྟོད་ལ་བསྡུ་བའོ། །བདག་ཉིད་སྙིང་གའི་ས་བོན་ལ་བསྡུ། དེ་ཇེ་ཆུང་ཇེ་ཕྲ་ལས་མཐར་སྟོང་པའི་ངང་ལ་གཞག་གོ» «།དམིགས་གནད་ནི། སྤྱི་གཙུག་བདེ་ཆེན་འཁོར་ལོར་སེམས་བཟུང་བས་བྱིང་བ་སེལ་ ལོ། །རྐང་མཐིལ་ལམ་སྤྲུལ་པའི་འཁོར་ལོར་སེམས་བཟུང་བས་རྒོད་པ་སེལ་ ལོ། །ཡང་རྒོད་པ་དེ་ཉིད་གྲངས་བྱ་ཞིང་སེམས་དེའི་ངོ་བོ་ལ་བལྟས་པས་ ཞིའོ། །གསུམ་པ་སྲོག་རྩོལ་གྱི་གེགས་སེལ་ལ། རླུང་ཁོག་པར་སེམས་དང་ལྷན་ཅིག་མི་རྟ་ལྟར་གནས་པ་དེ་ཉིད་ཀྱི་རླུང་ལོག་པས་ནད་ཟུག་དྲག་ཏུ་འབྱུང་ལ། ཁམས་སྣུམ་དང་སེམས་མར་མེ་ལྟ་བུ་འདྲེས་པའི་ཁམས་ལོག་པས་ཟུག་བདེ་མི་བདེ་འདྲེས་མར་འབྱུང་ངོ༌། །རྩ་ཟུག་ནི། ཕྲེང་འདར་ལ་སོགས་པ་དྲག་ལ་རྒྱུན་ཐུང་བ་ཁད་པ་ལྟ་བུའོ། །སེམས་གནས་དུས་ཁམས་ལ་བརྟེན། འཕྲོ་དུས་རླུང་ལ་ཞོན་པའི་ཕྱིར། དེ་གཉིས་ལས་སུ་རུང་ན་སེམས་ལས་སུ་རུང་བའི་གནད་དེ་ཡིན་ནོ། །དེ་ལ་ཁམས་ཀྱི་བཅོས་ཐབས་ནི། ལུས་སྦྱངས་ཀྱིས་དགྲམ་པ་དང༌། ཆང་དང་མི་ཞུན་དང༌། བདུད་རྩི་གཉིས་ཀྱི་ཁྲུས་དང༌། བྱུག་པས་ཟུག་རང་ཞིར་འགྲོ་ཞིང་གང་ཡང་ཡིད་ལ་མི་བྱེད་པ་ཉིད་ཁམས་དངས་མ་སྙོམས་པའི་མཆོག་ཡིན་ཏེ། སེམས་གནས་པ་ཉིད་ཀྱི་སྐྱོན་རྩེ་གཅིག་ཏུ་དམིགས་རྟེན་གཅིག་ལ་གཟུང་བ་ལ་སོགས་པས་འབྱུང་ལ། དེ་ཡིད་ལ་མི་བྱེད་པས་བསལ་བའི་ཕྱིར་རོ། །རླུང་བཅོས་པས་ཀྱང་ཞི་བར་ངེས་པ་ཡིན་ནོ། །རླུང་བཅོས་པ་ལ་གསུམ་སྟེ། རྩ་བའི་རླུང་ལྔའི་བཅོས་ཐབས་དང༌། ཡན་ལག་གི་རླུང་ལྔའི་བཅོས་ཐབས་དང༌། སྤྱིའི་ལོག་གནོན་ནོ། །དང་པོ་ལྔའི་སྲོག་འཛིན་པའི་རླུང་ཟིན་ན། སྙིང་འཆུ་ཞིང་རོ་སྟོད་དང་སྙིང་ག་གཟེར་བ་འོང་ངོ༌། །རེངས་ན་སྙིང་རླུང་དང་སྨྱོ་འབོག་ཏུ་འགྲོ་བས་བཅོས་ཐབས་ནི་བསྐུ་མཉེ་བྱ། ལུས་ཀྱི་སྙིང་ག་ཆུའི་རྦ་ལ་བཟེད། སེམས་རྡོ་རྗེ་ནོར་བུར་གཏད། ཧ་དྲག་པོ་གདོན། མེ་མཉམ་ལོག་པར་ཟིན་ན་ཕོ་བ་དང་མཁལ་སྐེད་ན་ཞིང་གཟེར་ན་ཀུང་ཀུང་བ་འབྱུང་ངོ༌། །རེངས་ན་ཕོ་གཟེར་དང་དམུ་ཆུར་འགྲོ་བས་བཅོས་ཐབས་ནི་ཆང་གི་ཕྲུན་སར་གདབ་ཅིང་དུགས་བྱ། སྐྱིགས་བུ་འདོན། ཤེས་པ་མགྲིན་པར་གཏད་ལ་བསྒོམ་མོ། །ཐུར་སེལ་གྱི་རླུང་ཟིན་ན་དཔྱི་མིག་ན། རྐང་པ་འཁྲིལ་ཞིང་རོ་སྨད་བཤལ་ནས་ན། དྲི་ཆེན་སྐམ་པོའམ། ཡང་ན་བཤལ་དུ་འབྱུང༌། རེངས་ན་དྲི་ཆེན་གྱི་སྒོ་བསྡམས་པས་བཅོས་ཐབས་ནི་བཤང་གཅིའི་བར་དུ་མཉེ། ཤེས་པས་རླུང་ཚངས་བུག་ཏུ་དྲངས་ལ་བཤང་སྒོར་ཕྱིར་ལ་རྒྱངས་ཀྱིས་འཕང་ངོ༌། །གྱེན་རྒྱུའི་རླུང་ཟིན་ན་མགྲིན་པ་སྐྲང༌། མཇིང་པའམ་རྩེ་ཆུང་ན། རེངས་ན་ལྐོག་འབྲས་སུ་འགྱུར་རོ། །བཅོས་ཐབས་ནི་གྱེན་དུ་མི་དྲང་བར་ཐུར་དུ་མནན་ནོ། །ཁྱབ་བྱེད་ཟིན་ན་མགོ་བོ་ན། ཡན་ལག་ཚིགས་ཁོལ་ཞིང་བེར་བ་འོང་ངོ༌། །རེངས་ན་འཁུམས་ཏེ་»«སྐྲང་བར་«༼༡༽«འགྲོའོ། །བཅོས་ཐབས་ནི་བསྐུ་མཉེ་དང་མཆོང་རྒྱུག་བྱ། ལུས་སྟོང་པར་བསྒོམ་མོ། །ཡན་ལག་གི་རླུང་ལྔའི་བཅོས་ཐབས་ནི། མིག་ཏུ་རྒྱུ་བའི་རླུང་ཟིན་ན་མིག་ན། རེངས་ན་ལོང་ངོ༌། །བཅོས་ཐབས་ནི་བསིལ་སྨན་གྱི་ཆུ་ལྕག་བརྡེག་གོ །དེས་དམར་ཚག་སེལ་ལོ། །སྐྱ་བོ་མི་གསལ་བ་ལ་རྐང་ལག་གི་མཐིལ་བཞིར་བྱུག་པ་བྱ། མིག་ཡོན་པོར་བསམ་ མོ། །རྣ་བའི་རླུང་ཟིན་ན་གཟེར་ཞིང་ན། འུར་སྒྲ་འོང༌། རེངས་ན་འོན་ནོ། །བཅོས་ཐབས་ནི་རྣ་བ་མིན་པའི་ངོས་བཀབ་སྟེ་རླུང་མནན་ལ་ན་ས་ངོས་ལ་གདོན་ནོ། ། སྣའི་རླུང་ཟིན་ན་སྣ་རུས་དང་གདོང་པ་ན། སྣ་ཞོམ། དྲི་མི་ཚོར། དབུགས་ཁ་ནས་ཕལ་ཆེར་འགྲོའོ། །བཅོས་ཐབས་ནི་རླུང་འཐེན་ནས་དྲག་པོར་བཏང༌། ལྒའམ། གཡེར་མའམ། སུག་ཕྱེས་སྦྲིད་པ་དབྱུང་ངོ༌། །ལྕེར་རྒྱུ་བའི་རླུང་ཟིན་ན་ལྕེ་དང༌། ལྕེ་ཆུང་དང༌། རྙིལ་སྐྲང༌། སོ་ན། ཁ་འཐམ། ལྕེ་ཆུང་འབབ། ལྕེ་བསྒྱུར་ལྡོག་དཀའོ། །རེངས་ན་ལྐུགས་པར་འགྲོའོ། །བཅོས་ཐབས་ནི་རླུང་སིང་སྒྲ་དང་བཅས་ཏེ་ནང་དུ་དྲག་པོར་འཐེན་ལ། མི་ཐུབ་དུས་ཁ་ནས་ཕར་སིང་སྒྲ་དང་བཅས་པ་དྲག་ཏུ་འཕང་ངོ༌། །ལུས་ཀྱི་པགས་པར་རྒྱུ་བའི་རླུང་ཟིན་ན་ལུས་ཀྱི་པགས་པ་ཀུན་འཁོལ་ཞིང་ན་བེར་བ་ལྡང་ཞིང་ཚའོ། །ཟ་ཕྲུག་དང༌། ཤུ་བ་དང་མཛེར་འགྱུར། པགས་པ་འགོག་གོ» «།བཅོས་ཐབས་ནི་རླུང་དྲག་ཏུ་རྔུབས་ལ་རྐང་པའི་སོར་མོར་བསྡུས་ཏེ་ལག་པ་གཡབ་ཅིང་བྲོ་བརྡུང་ངོ༌། །ཤེས་པས་རླུང་རྣམས་བ་སྤུའི་བུ་ག་ནས་ཐོན་པར་བསམ་མོ། །སྤྱིའི་ལོག་གནོན་ནི། ལུས་ཚ་ན་སྤྱི་བོའི་ཧཾ་ལས་ཐིག་ལེ་དྷཱུ་ཏཱི་ན་མར་གྲང་སིབ་སིབ་བབས་པར་བསམ། གྲང་ཤས་ཆེས་ན་ལྟེ་བའི་མེ་ཟུར་གསུམ་ལས་འབར་བས་ལུས་ཁེངས་པར་བསམ། འོག་སྒོ་ན་ཡར་ཡཾ་ལས་རླུང་གི་དཀྱིལ་འཁོར་གཡོ་བར་བསམ་མོ། །བྱིང་ན་ཤེས་པ་ལུས་ཀྱི་ཕྱིར་གདོན། རྒོད་ན་ནང་དུ་ཐིག་ལེ་ལ་ཤེས་པ་གཏད། འགགས་ན་སྲིན་པོའི་སྒོ་ཕྱེ་ལ་སྟེང་རླུང་མནན། འཁྱམས་ན་ཚངས་བུག་ཕྱེ་ལ་ན་བུན་གནམ་དུ་འཕང༌། གཟེར་ན་དེའི་སྟེང་དུ་ལཾ་ལས་སའི་དཀྱིལ་འཁོར་གྲུ་བཞིའི་ཟུར་བཞིར་རྡོ་རྗེ་བསམ་མོ། །ཡང་ཁམས་ལོག་སྟེ་མཐོང་སྣང་དམར་པོའམ་སེར་པོར་སོང་ན་མཁྲིས་པ་ཡིན་པས་གྲིབ་མར་བསྡད། ཆུ་རླུང་གྲང་མོས་ལུས་ཁེངས་པར་བསམས་ལ་རླུང་གཟུང་ ངོ༌། །སྐྱུག་ན་བད་ཀན་ཏེ་ལུས་སྦྱང་བྱ། རླུང་གི་རླུང་ལྗང་གུས་ལུས་གཏོར་བར་བསམ་ཞིང་དྲག་རླུང་གཟུང་ངོ༌། །འདར་ཞིང་སྐྱུག་ལ་མགོ་འཁོར་ན་རླུང་སྟེ་རླུང་གསེང་བརྡུང༌། མེ་རླུང་གིས་ཧཾ་ཞུ་བས་ལུས་ཁེངས། རྐང་མཐིལ་དུ་སེམས་གཏད་དོ། །ཡང་ན་ལོག་ནོན་ལྔ་སྟེ་འཁོར་ལོ་ལྟར་བསྐོར་བ། དྲུ་བུ་ལྟར་འདྲིལ་བ། བུ་ག་མང་པོའི་སྦྱོར་བ། སྟེང་འོག་གི་འཁོར་ལོ་མེད་པ་ལ་བསླབ་པ། རབ་ཏུ་དམའ་བའི་སྦྱོར་བ་ལ་བསླབ་པའོ། །དང་པོ་ནི་ལུས་ཁེངས་པ་སྙམ་ཞིང་ན་ཚ་བེར་བ་དག་བྱུང་ན་ལྟེ་བའི་གནས་སུ་འཁོར་ལོ་རྩིབས་བརྒྱད་པ་བསམས་ལ་གཡས་སུ་བསྐོར་བར་བསྒོམ། དེས་མ་བདེ་ན་གཡོན་དུ་འཁོར་བར་བསྒོམ་མོ། །དེ་ལྟར་འཁོར་བས་ལུས་དང་འཁོར་ལོ་ཇེ་ཆེར་སོང་བས་ནམ་མཁའ་གང་བར་བསྒོམ།རྗེས་ལ་ནང་སྟོང་པ་དང་ཕྱི་སྟོང་པའི་ནམ་མཁའ་གཉིས་བར་མེད་གཅིག་ཏུ་འདྲེས་ཏེ་ལུས་དང་འཁོར་ལོ་མི་དམིགས་པར་བསམ་མོ། །གཉིས་པ་ནི་སྙིང་ལ་སོགས་པ་ཀོལ་ཙེར་ན་བ་ལ། གང་ན་སར་བུ་ག་གཅིག་བསམས་པ་ན་ཕར་དབུགས་ཕྱིར་སོང་བར་བསམ་ཞིང་རླུང་དྲག་པོ་འཕང༌། ཡེ་ཤེས་ཀྱི་རླུང་རྟ་རྔ་ཙམ་གཅིག་ནང་ནས་ཕྱིར་དྲུ་བུ་ལྟར་སོང་ནས་ནམ་མཁའི་མཐར་བསམ་དེ་ནས་རིམ་གྱིས་བུག་པ་དང་དྲུ་བུ་གཉིས་ཀ་ཇེ་ཆེར་སོང་སྟེ་བུག་པ་སྐར་ཁུང་དང༌། མཐོངས་ཁུང་ཙམ་དང༌།དྲུ་བུ་སྐུད་པ་དང༌། ཐག་པ་ཙམ་དུ་ཕྱིར་འདྲིལ་བར་བསམ་མོ། །གསུམ་པ་ནི་ལུས་ཐམས་ཅད་ཁྱབ་པར་ན་ན་ལུས་ཐམས་ཅད་ལྕགས་སྲེག་གི་མིག་ལྟར་བུ་ག་མང་པོ་ཡོད་པར་བསམས་ལ། དེ་ཐམས་ཅད་ན་ཕར་རླུང་དང་ནད་དོན་པར་བསམ་ཞིང་རླུང་དྲག་ཏུ་འཕང་ངོ༌། །བཞི་པ་ནི་ལུས་སྟོད་ན་ན་སྐེད་པ་ཡན་ཆད། མགྲིན་པ་མན་ཆད་སྟོང་པར་བསམས་ལ། དེ་ན་ཕར་ལ་རླུང་སྔོ་བུན་བུན་སོང་བར་བསམ་མོ། །གལ་ཏེ་ཐུར་དུ་འཁྲུ་ན་འོག་རླུང་དྲག་ཏུ་བསྡམས་པས་ཆད་དོ། །ལྔ་པ་ནི་རླུང་གི་བརྒྱལ་འབོག་དང་མཆོང་རྒྱུག་བྱུང་ན་རང་གི་འོག་ཏུ་དོང་ཟབ་ཤིན་ཏུ་རིང་བ་བསྒོམས་པ་ན་མར་ལ་རང་གི་ལུས་ཏིབ་ཏིབ་བྱིང་བའམ། སའི་འོག་ཏུ་བྱིང་བར་བསམ་མོ། །རླུང་ཤ་ལྤགས་མཚམས་སུ་ཞུགས་ན་སྐྱ་རྦབ་ལ་འགྲོ། ཕྱིས་མཛེར་འགྲོ་བས་དེ་བཅོས་པ་ནི་དྲི་ཆུས་བཀྲུ། ཆང་དྲོན་མོས་བཀྲུ། མར་ནག་གམ་ལོ་མར་རྙིང་པས་བསྐུ་མཉེ་ལན་མང་དུ་ བྱའོ། །དེས་སེལ་ངེས་སོ། །བཅོས་ཐབས་འདི་དག་ནི་ཉམས་སུ་མྱོང་བའི་གནད་ཤིན་ཏུ་ཟབ་པས་གསང་ཞིང་གཅེས་སྤྲས་ཀྱིས་ཉམས་སུ་བླང་བར་བྱའོ། །དེ་ལྟར་ཉམས་སུ་བླངས་པས་གནས་སྐབས་སུ་ཏིང་ངེ་འཛིན་དང༌། སྤྱན་དང༌། མངོན་ཤེས་དང༌། རྫུ་འཕྲུལ་དང༌། གྲུབ་པ་བརྒྱད་ལ་སོགས་པ་འགྲུབ་ལ་མཐར་ཐུག་བྱང་ཆུབ་འགྲུབ་པ་ཡིན་ནོ། །དེ་ལྟར་ཡང་ཟབ་སྙིང་པོའི་གནད་རྣམས་ཀུན། །ཕྱི་རབས་དོན་དུ་གསལ་བར་བཀོད་པ་ལས། །བྱུང་བའི་དགེ་བ་གངས་རི་ལྟར་དཀར་དེས། །འགྲོ་ཀུན་ཚེ་འདིར་བདེ་ཆེན་མཁའ་སྤྱོད་ཤོག» «།«ཡིད་བཞིན་མཛོད་ཀྱི་དོན་ཁྲིད་ཟབ་དོན་རྡོ་རྗེ་སྙིང་པོ་ཞེས་བྱ་བ། ཐེག་པ་མཆོག་གི་རྣལ་འབྱོར་པ་དྲི་མེད་འོད་ཟེར་གྱིས་གྲ་རི་མེ་ཏོག་བརྩེགས་པའི་འདབས་སུ་བཀོད་པ་རྫོགས་སོ།། །།དགེའོ།། དགེའོ།། དགེའོ།། མངྒ་ལཾ། «ཡིད་བཞིན་མཛོད་ཀྱི་དོན་ཁྲིད་ཟབ་དོན་རྡོ་རྗེ་སྙིང་པོ།

[edit]

This page is a cleaned copy of the following rywikitexts page, which stay unchanged:

Cleaning (21 November 2026): removed 1 running heads, 3 Word page fields, 2 private-use characters. The «» marks are kept: in this e-text they enclose the small-print notes of the print.

Part of the Longchenpa Collected Works (about this project).