བདེ་གཤེགས་རིགས་ལྔའི་ཕྱི་སྒྲུབ

From Rangjung Yeshe Wiki Texts
Revision as of 07:00, 21 November 2026 by Eric (talk | contribs) (Longchenpa Project: generated page (21 November 2026))
(diff) ← Older revision | Latest revision (diff) | Newer revision → (diff)

LONGCHENPA-PECIN-05-CA-008
Jump to navigation Jump to search

བཏགས་གྲོལ་དོན་ཁྲིད klong chen rab 'byams kyi gsung 'bum (pe cin 2009)· Volume 5(CA) སྨིན་བྱེད་དོན་གསལ་སྒྲོན་མེ་ཞེས་བྱ་བ་སྤྲོས་བཅས་བུམ་པའི་དབང

Title བདེ་གཤེགས་རིགས་ལྔའི་ཕྱི་སྒྲུབ
Wylie bde gshegs rigs lnga'i phyi sgrub
Catalogue title bde gshegs rigs lnga sgrub thabs (BDRC outline)
Author Longchenpa ཀློང་ཆེན་རབ་འབྱམས་པ་དྲི་མེད་འོད་ཟེར།
Location klong chen rab 'byams kyi gsung 'bum (pe cin 2009), volume 5(CA), text 8, pages 97–100 (BDRC scan pages)
Section snying thig ya bzhi › mkha' 'gro snying thig


Tibetan text E-text from the typeset Pe cin edition (input 2020 on rywikitexts), cleaned 21 November 2026; not proofread against the print.
BDRC MW1KG4884, outline 1.2.1.10
Citation Klong chen rab 'byams pa. bde gshegs rigs lnga sgrub thabs. In Kun mkhyen klong chen rab 'byams kyi gsung 'bum, vol. 5, pp. 97–100. Pe cin: Krung go'i bod rig pa dpe skrun khang, 2009. BDRC MW1KG4884.
Notes Title from the first line of the e-text; text boundaries and page numbers from the BDRC outline of MW1KG4884.
[edit]

༄༅། །བདེ་གཤེགས་རིགས་ལྔའི་ཕྱི་སྒྲུབ་བཞུགས་སོ༔

«རིགས་ལྔ་བདེ་བར་གཤེགས་ལ་ཕྱག་འཚལ་ལོ༔ རིགས་ལྔའི་ཕྱིའི་སྒྲུབ་ཐབས་བསྟན་པར་བྱ་སྟེ༔ ཀློང་གསལ་ལས༔ ལུས་ཀྱིས་ཁྱབ་ཚད་ཐམས་ཅད་ལ༔ ཕུང་པོ་ལྔ་ནི་རིགས་ལྔ་དངོས༔ ཁམས་ལྔ་ཡུམ་ལྔ་ཉིད་དུ་གནས༔ ཞེས་པས༔ རང་གི་ལུས་སེམས་འདི་རྒྱལ་བ་རིགས་ལྔའི་ངོ་བོར་ཡེ་ནས་གནས་ཀྱང་༔ སེམས་མ་རིག་འཁྲུལ་བའི་དབང་གིས་རིགས་དྲུག་ཏུ་འཁོར་ཞིང་འཁྱམས༔ དེ་ལས་གྲོལ་བར་བྱེད་པ་ལ་རིགས་ལྔ་ཡབ་ཡུམ་གྱི་སྒྲུབ་ཐབས་བཤད་དེ༔ འདི་ལ་ཡང་གསུམ་སྟེ༔ རྣལ་འབྱོར་རྣམ་པ་གསུམ་གྱི་སྒོ་ནས་བསྒྲུབ་པར་བྱ་སྟེ༔ དེ་ལ་ལྷའི་རྣལ་འབྱོར་དང༔ སྔགས་ཀྱི་རྣལ་འབྱོར་དང༔ རྫོགས་རིམ་གྱི་རྣལ་འབྱོར་རོ༔ དང་པོ་ལྷའི་རྣལ་འབྱོར་བསྐྱེད་པ་ནི༔ སྐད་ཅིག་གིས་རང་ཐ་མལ་གྱི་སྤྱི་གཙུག་ཏུ་ཨཿདཀར་པོ་གཅིག་བསྒོམ༔ དེ་ལས་འོད་འཕྲོས་རང་གི་ལུས་འོད་དུ་ཞུ་བར་བསམ༔ འོད་ཟེར་ཕྱིར་འཕྲོས་ཕྱི་སྣོད་ཀྱི་འཇིག་རྟེན་ཡང་འོད་དུ་ཞུ་བར་བསམ༔ ཨོཾ་ཨཱཿཧཱུྃ་མཧཱ་ཤུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ༔ ཞེས་བརྗོད་པས་ཐམས་ཅད་སྟོང་པ་ཉིད་དུ་བསམ༔ དྷརྨ་དྷརྟུ་སྭ་བྷཱ་ཝ་ཨཏྨ་ཀོ྅ཧཾ༔ ཞེས་བརྗོད་པས་ཀུན་ལ་ཁྱབ་པའི་ཚད་མེད་པའི་སྙིང་རྗེ་ཆེན་པོ་བསྒོམ༔ དེ་ནས་བཛྲ་ཙིཏྟ་ཧཱུྃ་ཞེས་པས་རང་གི་སེམས་ཉིད་ཡི་གེ་ཧཱུྃ་ཞིག་ཏུ་གྱུར༔ ཧཱུྃ་དེ་ལས་ཨེ་འཕྲོས་པས་ཐམས་ཅད་ནམ་མཁའ་སྟོང་པར་གྱུར༔ ཧཱུྃ་ལས་ཡཾ་འཕྲོས་པས་རླུང་གི་དཀྱིལ་འཁོར་དུ་གྱུར༔ ཧཱུྃ་ལས་བཾ་འཕྲོས་པས་ཡེ་ཤེས་ཀྱི་རྒྱ་མཚོར་གྱུར༔ ཧཱུྃ་ལས་ལཾ་འཕྲོས་པས་རཏྣའི་ས་གཞིར་གྱུར༔ ཧཱུྃ་ལས་བྷྲུཾ་འཕྲོས་པས་རཏྣའི་གཞལ་ཡས་ཁང་དུ་བསམ༔ བྷྲུཾ་བྷི་ཤ་གྷི་ཤུདྡྷེ་ཛྙཱ་ན་ཙཀྲ་བྷྲུཾ༔ ཞེས་བརྗོད་པས་གཞལ་ཡས་ཁང་གི་ནང་དུ་དབུས་སུ་སེངྒེའི་ཁྲི༔ ཤར་དུ་གླང་པོ་ཆེའི་ཁྲི༔ ལྷོར་རྟའི་ཁྲི༔ ནུབ་ཏུ་རྨ་བྱའི་ཁྲི༔ བྱང་དུ་ཤང་ཤང་གི་ཁྲི་བསྐྱེད་ལ་དེའི་སྟེང་དུ་ཉི་ཟླ་པདྨའི་གདན་ལྔ་བསྐྱེད་ལ་དེ་དག་གི་དབུས་ཀྱི་ལྟེ་བ་ལ་ཨཱོཾ༔ ཤར་དུ་ཧཱུཾ༔ ལྷོར་ཏྲཱཾ༔ ནུབ་ཏུ་ཧྲཱི༔ བྱང་དུ་ཨཱ་བསམ༔ ས་བོན་དེ་རྣམས་ལས་འོད་་འཕྲོས་པས༔ འཕགས་པ་ཐམས་ཅད་ལ་མཆོད་པ་ཕུལ༔ སེམས་ཅན་གྱི་སྡིག་སྒྲིབ་སྦྱངས༔ འོད་ཚུར་འདུས་པས་ཕྱག་མཚན་ལ་ས་བོན་གྱིས་མཚན་པར་བསྒོམ༔ ཡང་ཡུམ་གྱི་ས་བོན་ཨེ༔ བཾ་ལཾ་རཾ་ཡཾ་དེ་ལས་འཕྲོས་འདུས་པ་ལས་མཚམས་བཞིར་ཡུམ་བཞི༔ དབུས་སུ་ཡུམ་གཙོ་བོ་དང་གཉིས་སུ་མེད་པར་བསྐྱེད་དོ༔ ཡུམ་བཞིའི་ཐུགས་ཀ་ནས་ཛཿཧཱུཾ་བཾ་ཧོཿབཞི་ལས་འོད་་འཕྲོས་པས་ཕྱོགས་བཞིར་སྒོ་མ་བཞི་བསྐྱེད་དོ༔ ཇི་ལྟར་བསྐྱེད་པ་ནི༔ ཞལ་གཅིག་ཕྱག་གཉིས་སེམས་དཔའི་སྐྱིལ་མོ་ཀྲུང་དུ་བཞུགས་པ༔ རྒྱན་་ཐམས་ཅད་ཀྱི་བརྒྱན་པ་ལོངས་སྤྱོད་རྫོགས་པའི་ཆ་ལུགས་སུ་བསྐྱེད་དོ༔ ཡུམ་གྱི་སྐུ་མདོག་དང་ཕྱག་མཚན་དབང་ཆོག་ལྟར་བསྐྱེད་དོ༔ སྒོ་མ་བཞི་ཡང་དབང་ཆོག་ལྟར་བསྐྱེད་དོ༔ ལྷ་དེ་དག་ཐམས་ཅད་ཀྱི་སྤྱི་བོར་ཨོཾ་དཀར་པོ༔ མགྲིན་པར་ཨཱཿདམར་པོ༔ སྙིང་ཁར་ཧཱུཾ་མཐིང་ཁ་བསྒོམ་མོ༔ དེ་ནས་ཨོཾ་བཛྲ་རཀྵ་རཀྵ་ཧཱུཾ༔ ཞེས་བརྗོད་པས་སྤྱི་བོར་སྣ་ཚོགས་རྡོ་རྗེ་རྒྱ་གྲམ་ལས་རྡོ་རྗེའི་དྲ་བས་ལུས་ཐམས་ཅད་གཏམས་པར་བསམ༔ དེ་ནས་སྙིང་ཁའི་རང་གི་ས་བོན་ལས་འོད་འཕྲོས་པས་རང་རང་གི་ཕྱོགས་ནས་ཡེ་ཤེས་སེམས་དཔའ་རང་རང་གི་ཚུལ་དུ་སྤྱན་དྲངས་ལ་ཡི་གེ་བཞིས་བསྟིམ༔ དེ་ནས་ཡབ་ཡུམ་རང་གི་ཐུགས་ཀར་ཉི་ཟླའི་སྟེང་དུ་རང་རང་གི་ས་བོན་ལས་རང་རང་གི་སྙིང་པོས་མཚན་པར་བསམ་ཏེ་བཟླས་པ་བྱས་པས༔ དེ་དག་ལས་་འོད་དཔག་ཏུ་མེད་པ་འཕྲོས་པས་བདག་གཞན་གྱི་སྡིག་སྒྲིབ་ཐམས་ཅད་སང་སང་དག་པར་བསམ་ཞིང་བཟླས་པ་བྱའོ། །དེ་ཡན་ཆད་ནི་བསྐྱེད་པ་ལྷའི་རྣལ་འབྱོར་རོ༔ ༈ ད་གཉིས་པ་སྔགས་ཀྱི་རྣལ་འབྱོར་ནི༔ ཨཱོཾ་ཛྷི་ན་ཛྷི་ག༔ ལཾ་དེ་ཤྭ་ར་ཏེ་སྟྭཾ༔ ཧཱུྃ་བཛྲ་དྷྲིག༔ མུཾ་ད་དུ་ཤྭ་རི་སྟྭཾ༔ སྭཱ་རཏྣ་དྷྲིག༔ མཾ་མོ་ཧ་ར་ཏི་སྟྭཾ༔ ཨཾ་ཨ་རོ་ལི་ཀ༔ བྱཾ་རཱ་ག་ར་ཏི་སྟཱཾ༔ ཧཱ་པྲ་ཛྙཱ་དྷྲིག༔ ཏཱཾ་བཛྲ་ར་ཏི་སྟཱཾ༔ ཛཿཧཱུཾ་བཾ་ཧོ་སི་ཏི་ཧཱུཾ༔ ཞེས་ཡབ་ཡུམ་འཁོར་བཞི་དང་བཅས་པའི་སྙིང་པོ་འདི་ནུས་ཚད་བཟླས་སོ༔ དེ་ནི་བཟླས་པ་སྔགས་ཀྱི་རྣལ་འབྱོར་རོ༔ གསུམ་པ་རྫོགས་རིམ་གྱི་རྣལ་འབྱོར་ནི༔ ལྷ་་ཐམས་ཅད་ས་བོན་ལ་བསྡུ༔ ས་བོན་མི་དམིགས་པར་ན་བུན་ཡལ་བ་ལྟར་གྱུར་ནས་སྟོང་པའི་ངང་ལ་བཞག་གོ༔ དེ་ནི་རྫོགས་རིམ་གྱི་རྣལ་འབྱོར་རོ༔ དེ་ལྟར་ཡི་དམ་བཅས་ན་ལུས་ལ་བདེ་བ་འབྱུང་༔ ངག་ལ་ནུས་པ་འབྱུང་༔ སེམས་ལ་རྟོགས་པ་འཆར༔ ལུས་ངག་ཡིད་གསུམ་གྱི་སྒྲིབ་པ་འདག༔ དུག་ལྔ་གནས་སུ་དག༔ དུག་གསུམ་རང་སར་གྲོལ༔ ཡེ་ཤེས་ལྔ་རང་བཞིན་གྱིས་འཆར༔ རབ་ཚེ་གཅིག་ལ་སངས་རྒྱ༔ འབྲིང་བར་དོ་ལ་སངས་རྒྱ༔ ཐ་མ་སྤྲུལ་སྐུའི་ཞིང་ཁམས་སུ་སངས་རྒྱའོ༔ རིགས་ལྔ་ཕྱི་ལྟར་སྒྲུབ་པ་ལས་ཅན་ཅིག་དང་འཕྲད་པར་ཤོག༔ ས་མ་ཡ༔ རྒྱ་རྒྱ་རྒྱ༔ ཨྠིྀ༔ དགེའོ༔«༄༅། །རིགས་ལྔ་ནང་གི་སྒྲུབ་པ་བཞུགས་སོ༔

«རིགས་ལྔ་ཀུན་ཏུ་བཟང་ལ་ཕྱག་འཚལ་ལོ༔ རིགས་ལྔ་ནང་ལྟར་སྒྲུབ་པ་ནི༔ ཀློང་གསལ་ལས༔ སྟོང་གསལ་རིག་པ་ཡེ་ཤེས་ལྔ༔ ཐབས་ཤེས་ཟུང་འཇུག་རང་རིག་དངོས༔ ཞེས་པས༔ རང་རིག་མི་འགྱུར་བ་ནི་རྣམ་པར་སྣང་མཛད༔ ཀུན་ཏུ་བཟང་པོ་རིག་རྩལ་མ་འགགས་པ་ནི་རིགས་བཞི་ཡབ་ཡུམ་སྒོ་མ་བཞིར་ཤར་རོ༔ དེས་ན་ལོགས་ནས་བསྒྲུབ་ཏུ་མེད་དེ་རང་ལ་རང་གསལ་བཏབ་པས་ཆོག་པས་ཕྱིར༔ སྐད་ཅིག་དྲན་རྫོགས་སུ་བསྐྱེད་པར་བྱ་སྟེ༔ རང་ཉིད་ཀུན་བཟང་ཡབ་ཡུམ་ནི༔ མཐིང་ནག་ཞལ་གཅིག་ཕྱག་གཉིས་པ༔ ཀུན་བཟང་མོ་དང་གཉིས་མེད་འཁྲིལ༔ ཕྱག་མཚན་རྡོ་རྗེ་དྲིལ་བུ་འཛིན༔ སྐྱིལ་ཀྲུང་རིན་ཆེན་རྒྱན་གྱིས་བརྒྱན༔ ལོངས་སྐུ་མཚན་དཔེ་ལྡན་པར་བསྐྱེད༔ སྤྱི་བོ་རྡོ་རྗེ་སེམས་དཔའ་དང་༔ མགྲིན་པར་རིན་ཆེན་འབྱུང་ལྡན་དང་༔ སྙིང་ཁར་སྣང་བ་མཐའ་ཡས་ཉིད༔ ལྟེ་བར་དོན་ཡོད་གྲུབ་པ་བསྐྱེད༔ ཡན་ལག་བཞི་ལ་སྒོ་མ་བཞི༔ ཀུན་ཀྱང་ཡབ་ཡུམ་འཁྲིལ་སྦྱོར་ལ༔ སྐུ་མདོག་རིགས་ཀྱི་ཁ་དོག་འཛིན༔ དམ་ཚིག་ཡེ་ཤེས་གཉིས་མེད་པར༔ སྐད་ཅིག་ཙམ་ལ་བསྐྱེད་ནས་ཀྱང་༔ གསང་བའི་སྙིང་པོ་འདི་ཉིད་བཟླས༔ ཨོཾ་ཨཱཿཧཱུཾ༔ ཨོཾ་ཨཱཿཧཱུཾ་ཏྲཱཾ་ཧྲཱིཿཨཱཿ སི་ཏི་ཕ་ལ་ཧཱུཾ་ཛ༔ སྐུ་ནི་སྣང་ལ་རང་བཞིན་མེད༔ སྒྱུ་མ་ལྟ་བུར་ཤེས་བྱས་ལ༔ སྔགས་ནི་གྲགས་སྟོང་བཟླས་པར་བྱ༔ རྫོགས་རིམས་དབྱེར་མེད་ངང་ལ་བཞག༔ དེ་ལྟར་བསྒྲུབས་པའི་ཡོན་ཏན་ཡང་༔ ཚེ་འདིར་ཡོན་ཏན་ཀུན་འབྱུང་ཞིང་༔ ཕྲིན་ལས་རྣམ་བཞིས་འགྲོ་དོན་བྱེད༔ སྐུ་ལྔ་ཡེ་ཤེས་མངོན་དུ་འགྱུར༔ སྐྱེ་བ་འདི་ལ་རྫོགས་སངས་རྒྱའོ༔ རིགས་ལྔ་ནང་ལྟར་སྒྲུབ་པ་ནི༔ ལས་ཅན་ཅིག་དང་འཕྲད་པར་ཤོག༔ ས་མ་ཡ༔ རྒྱ་རྒྱ་རྒྱ༔ ཁ་ཐཾ༔ ཨྠིྀ༔ དགེའོ༔» ༔

[edit]

This page is a cleaned copy of the following rywikitexts page, which stay unchanged:

Cleaning (21 November 2026): removed 1 running heads, 3 Word page fields, 1 embedded-object codes. The «» marks are kept: in this e-text they enclose the small-print notes of the print.

Part of the Longchenpa Collected Works (about this project).