Ngb-pt-0532-vol-06-text
Front
Body
ཐོག་མའི་སངས་རྒྱས་འོད་དཔག་ཏུ་མེད་པ་ལ་ཕྱག་འཚལ་ལོ། །རྒྱུད་ཐམས་ཅད་ཀྱི་སྙིང་པོ། ལུང་ཐམས་ཅད་ཀྱི་རྩ་བ། མན་ངག་ཐམས་ཅད་ཀྱི་ཉིང་ཁུ། གསང་བ་བས་ཀྱང་ཆེས་གསང་བ། ཀུན་ཏུ་བཟང་པོ་མ་འཁྲུལ་པའི་དགོངས་པ། གཞི་འདུག་ཚུལ་འཁོར་བ་དོང་སྤྲུགས་སུ་སྟོན་པ། རྒྱུད་ཉི་ཤུ་རྩ་ལྔའི་རྩ་བ། མན་ངག་སུམ་བརྒྱ་རྩ་གཉིས་ཀྱི་རྩ་བ། ཕྱི་ནང་གསང་བ་གསུམ་གྱི་ཡང་ཞུན། ཐིག་ལེ་འདུས་པ་སངས་རྒྱས་འོད་དཔག་ཏུ་མེད་པ་དང་། འོད་གྲུངས་དང་། མར་མེ་མཛད་གསུམ་ཀྱི་དགོངས་པ་གཅིག་ཏུ་བསྟན་པ། སངས་རྒྱས་ཐམས་ཅད་ཀྱི་དགོངས་པ་བསྡུས་པ། ཐིག་ལེ་འདུས་པའི་རྒྱུད་ཅེས་བྱ་བ། འཁོར་བརྒྱ་ཐེག་ཏུ་བསྟན་པའི་ཕྱིར། སྒྲུབ་པ་མ་ཧྭ་ཡོ་ག་ལ་ངོ་སྤྲད་པ་དང་། ལུང་ཨ་ནུ་ཡོ་ག་ལ་ངོ་སྤྲད་པ་དང། མན་ངག་ཨ་ཏི་ཡོ་ག་ལ་ངོ་སྤྲད་པ་དང་། ཡང་དག་པའི་མན་ངག་ཐིག་ལེ་འདུས་པ་མ་བུ་ལ་ངོ་སྤྲད་པ་དང་། རྩ་དང་། རླུད་དང་། ཐིག་ལེ་ལ་ངོ་སྤྲད་པ་དང་། བརྡའི་ངོ་སྤྲད་པ་དང་། འཁྲུལ་གཞིའི་ངོ་སྤྲད་པ་དང་། གནས་པའི་ངོ་སྤྲད་པ་དང་། ལྡོག་པའི་ངོ་སྤྲད་པ་དང་། ལྡོག་པ་རང་གི་མཚན་ཉིད་གནས་ལུགས་ལ་ངོ་སྤྲད་པའི་ངོ་སྤྲད་པའོ། །རྩ་བ་མདོར་བསྡུས་པའི་ལེའུ་སྟེ་དང་པོའོ།། །།ཐོག་མ་མེད་པའི་དུས་ཉིད་ན། །གནས་མེད་ངོ་བོ་ཉིད་ཀྱི་གནས། །སྟོན་པ་ལྷུན་གྲུབ་འབར་བ་སྟེ། །འཁོར་རྣམས་རང་གདངས་ཆེན་པོ་ལ། །བསྟན་པ་རང་ཤར་ཆེན་པོ་ཡིན། །ཞེས་གསུངས་སོ། །ངོ་བོ་རང་བཞིན་ཐུགས་རྗེ་གསུམ་དུ་གནས། །ངོ་བོ་སྟོན་པ་འོད་མི་འགྱུར་བ་ཞེས་བྱ། རང་གསལ་བརྡལ་ཁྱབ་འདུས་མ་བྱས་སུ་གནས་སོ། །ཐུགས་རྗེའི་སྟོན་པ་མར་མེ་མཛད་ཅེས་བྱ་བ། འགག་མེད་བརྡལ་ཁྱབ་འདུས་མ་བྱས་སུ་གནས་སོ། །རང་བཞིན་གྱིས་སྟོན་པ་འོད་སྲུངས་ཞེས་བྱ། གཉིས་མེད་བརྡལ་ཁྱབ་འདུས་མ་བྱས་སུ་གནས་སོ། །གཞི་གཏན་ལ་དབབ་པའི་ལེའུ་སྟེ་གཉིས་པོའོ།། །།སྟོན་པ་གསུམ་ལ་སྲས་རྣམ་པ་གསུམ་འཁྲུངས་པ་ཡ་ཆ། ལྷུན་གྲུབ་རླུང་ཆེན་མ་འགགས་པས་རིག་པ་རང་གསལ་ཆེན་པོར་བསྐྱོད། སྟོང་པ་རང་དངས་འོད་དུ་བཟུང་སྲས་གསུམ་དུས་མེད་རྟག་ཏུ་འཐབ་པ་ཡ་ཆ། འབྱེད་པ་མེད་པའི་ཆོས་སྐུ་ལ་སྐུ་གསུམ་སྣང་བ་གསུམ་དུ་ཤར། སྐུ་གསུམ་རང་བཞིན་འདུག་ཚུལ་གཅིག་པ་ལ་དུག་གསུམ་དབང་གི་འཁོར་བ་ཡ་ཆ། སྲས་གསུམ་འགག་པ་མེད་པ་ལས། རང་གདངས་ཡུལ་ལ་སྟོད་ཤ་བྱེད་པ་ཡ་ཆ། བརྡའི་ངོ་སྤྲོད་ཀྱི་ལེའུ་སྟེ་གསུམ་པའོ།། །།སྒྲུབ་པ་མ་ཧྭ་ཡོ་གའི་ངོ་སྤྲད་པ་ནི། སྣང་ལ་རག་བཞིན་མེད་པའི་སྐུ་མེ་ལོང་ལོགས་ལ་ངོ་སྤྲད། ཡུལ་གསལ་ལ་མ་འདྲེས་པས་ནམ་མཁའི་འཇའ་ཚོན་ལ་ངོ་སྤྲད། གཉིས་སུ་མེད་པ་ཆུའི་ཟླ་བ་ལ་ངོ་སྤྲད། མ་ཧྭ་ཡོ་གའི་ངོ་སྤྲོད་གསུམ་པོ་འདིས་ནི་མ་བསྒྲུབས་པར་སངས་རྒྱས་པར་བསྟན་པའོ། །ལུང་་ནུ་ཡོ་གའི་ངོ་སྤྲད་པ་བསྟན་པ་ནི། འཛིན་པའི་རིག་པ་ནི་ཀུན་ཏུ་བཟང་པོ། ཡུལ་རང་གདངས་ནི་ཀུན་ཏུ་བཟང་མོ། གཉིས་སུ་མེད་པ་ནི་བདེ་བ་འགག་མེད་དུ་ངོ་སྤྲད་པ་རྩོལ་བ་མེད་པར་སངས་རྒྱས་པར་བསྟན་པའོ། །མ་ཧྭ་དང་ཨ་ནུ་ངོ་སྤྲད་པའི་ལེའུ་སྟེ་བཞི་པའོ།། །།མན་ངག་རྫོགས་ཆེན་ཁ་འབྱམ་ལ་ངོ་སྤྲད་པ་ནི། རང་བཞིན་ལྷུན་གྱིས་གྲུབ་པའི་སྐུ། བརྡལ་ཁྱབ་ཆེན་པོ་ལ་སྒོམ་དང་མ་སྒོམ་གཉིས་སུ་མེད་ཡེ་ཤེས་སངསརྒྱས་ཆེན་པོར་བསྟན་ནོ། །མན་ངག་ཨ་ཏི་ཡོ་ག་ཁ་འབྱམ་གྱི་ངོ་སྤྲད་པའོ། །ཡང་དག་པའི་ངོ་སྤྲད་པའི་ཐིག་ལེ་འདུས་པའི་ངོ་སྤྲད་པ་ནི་གསུམ་སྟེ། ཕྱི་སྣང་བ་ཐམས་ཅད་རང་བཞིན་འོད་གསལ་བ་ཞེས་བྱ་བ་གཞིའི་རང་གདངས་སུ་ངོ་སྤྲད་པས་སྒྲུབ་པ་མ་ཧྭ་ཡོ་གའི་རྩོལ་སྒྲུབ་དང་བྲལ་བར་བསྟན་ནོ། །རིག་པ་སྣ་ཚོགས་སུ་མི་འགག་པ་ཡེ་ཤེས་ཀྱི་རྩལ་ལས་མ་འདས་པར་ངོ་སྤྲད་པས་ལུང་ཨ་ནུའི་རྩོལ་སྒྲུབ་དང་བྲལ་བར་བསྟན་ནོ། །ཕྱི་ནང་སྣོད་བཅུད་ཐམས་ཅད་ཞཁྲུལ་བའི་དུས་སུ་ཡེ་ཤེས་ཀྱི་བཙལ་དུ་སྣང་ལ་གྲོལ་བའི་དུས་ན་བཙལ་དུ་སྣང་བ་ངོས་ཟིན་ལ། འཆི་ཁའི་དུས་སུ་ཡེ་ཤེས་ཁོང་གསལ་དུ་སངས་རྒྱས་པར་བསྟན་པའོ། །འབྲས་བུ་བར་དོར་ཐོབ་ཏུ་མེད་པར་བསྟན་པས་ཐམས་ཅད་རང་གྲོལ་རང་སངས་རང་ཤར་གཉིས་འཛིན་ལས་འདས་ཏེ། དེའི་ཚེ་དེའི་དུས་ན་རང་གྲོལ་བའི་སངས་རྒྱས་ཀྱི་དགོངས་པ་འདུས་པ་ཞེས་བྱའོ། །ཡང་དག་པའི་མན་ངག་ཐིག་ལེ་འདུས་པའི་ངོ་སྤྲད་བསྟན་པའི་ལེའུ་སྟེ་ལྔ་པའོ།། །།རྩ་དང་རླུད་ལ་ངོ་སྤྲད་པ་ནི། སེམས་ཅན་དྲན་ཞིང་ཙིཀྟའི་དཀྱིལ། །ཆོས་གསུམ་འོད་ཀྱི་ངོ་བོར་ཤད། །བསྐལ་པ་བར་མ་ལ་སངས་རྒྱས་འོད་སྲུངས་ཀྱིས་ཐོག་མའི་སངས་རྒྱས་འོད་མི་འགྱུར་བའི་ཞལ་མ་ཚོལ་བ་ཡ་ཆ རྩལ་ཡང་ཕྱི་ནང་གསུམ་དུ་འདུས་སྟེ། ཕྱི་ཆོས་ཉིད་རང་བྱུང་རང་གདངས་ཆེན་པོའི་རྩ་དང་། ནང་རིག་པ་སྟོང་པའི་རྩ་དང་། གསང་བ་ཐིག་ལེ་རྟེན་པའི་རྩའོ། །རྒྱས་པའི་རྩ་ནི་ཉི་ཁྲི་ཆིག་སྟོང་ཡང་། །བསྡུས་པས་ངོ་སྤྲོད་གསུམ་དུ་འདུས། །རླུད་ལ་ཡང་ཕྱི་ནང་གསང་བ་གསུམ། །ཕྱི་རླུད་ཐམས་ཅད་ནང་རླུད་སྣང་བ་ཡིན། །ནང་རླུད་ཡེ་ཤེས་རླུད་གི་རྩལ། །གསང་བའི་རླུད་ཆེན་ངོས་ཟིན་ན། །འཁོར་བ་དོང་ནས་སྤྲུགས་པ་ཡིན། །ཐིག་ལེ་ལ་ཡང་ཕྱི་ནང་གསང་བ་གསུམ། །ཕྱི་ཡི་ཐིག་ལེ་རང་བྱུང་ཡེ་ཤེས་ཡིན། །ནང་གི་ཐིག་ལེ་རིག་པའི་ཡེ་ཤེས་ཡིན། །གསང་བའི་ཐིག་ལེ་ཆོས་སྐུ་མཁའ་ཁྱབ་དྭངས་པ་ཡིན། །ཡང་གསང་ཐིག་ལེ་ཡེ་ཤེས་ཁོང་གསལ་ཡིན། །གནད་དུ་འཛིན་པ་རིག་པའི་ཡེ་ཤེས་ཡིན། །གཉིས་མེད་ལྷངས་ཀྱིས་རྟོགས་པ་ཡེ་ཤེས་རླུད་དུ་ཤེས། །གཟུང་འཛིན་གཉིས་སུ་སྤྱོད་པ་མ་རིག་རླུད་དུ་ཤེས། །རྩ་རླུད་ཐིག་ལེ་ལ་ངོ་སྤྲད་པའི་མཚན་མ་ལམ་བའི་རྩོལ་སྒྲུབ་ལ་མི་རྟེན་པའི་ལེའུ་སྟེ་དྲུག་པའོ།། །།སྟོན་པ་གསུམ་འཁོར་བར་དུས་གཅིག་ལ་འཁྱམས་པ་ཡ་མཚན་ཆེ། འབྱེད་པ་མེད་པ་གཏི་མུག་རང་བཞིན་གྱི་སྟོན་པ། འགག་པ་མེད་པའི་ཞེ་སྡང་ངོ་བོ་ཉིད་ཀྱི་སྟོན་པ། རང་སྣང་ཆེན་པོའི་རྩལ་མི་འགག་པ་འོད་ཆགས་ཐུགས་རྗེའི་སྟོན་པ། རྩལ་འགག་པ་མེད་པ་དུག་ལྔ་ཐུགས་རྗེའི་རོལ་པ་མ་འགགས་པ་འགྲོ་དྲུག །རག་བཞིན་ཆོས་སྐུ། ངོ་བོ་ལོངས་སྐུ། ཐུགས་རྗེ་སྤྲུལ་སྐུ། སྐུ་གསུམ་འཁོར་བར་འ་ས་ཀྱང་སྙིང་པོ་ལ་འགྱུར་བ་མེད། འགྱུར་བ་མེད་པར་གནས་པའོ། །གནས་ལུགས་ལ་ངོ་སྤྲད་པའི་ལེའུ་སྟེ་བདུན་པའོ།། །།བསྐལ་པ་ཐ་མ་ལ་སྲས་གསུམ་གྱིས་འཐབས་པས་སྐད་ཅིག་མ་ལ་འཁོར་བ་ཐམས་ཅད་དུས་གཅིག་ཏུ་སྲོག་བཅད་ནས་མེ་ཆེན་གྱིས་བསྲེགས། རླུད་ཆེན་གྱིས་ཕྱགས་པ་དེ་ཡ་ཆ། ཡེ་ཤེས་ཆེན་པོའི་སྤྱན་གཉིས་འཛིན་མེད་པར་རང་གསལ། ཆོས་ཀྱི་སྤྱན་བར་དོ་མེད་པར་རང་གདངས། ཐབས་དང་ཤེས་རབ་ཀྱི་སྤྱན་ཅིར་སྣང་ཅིང་འཛིན་ཡེ་ཤེས། མབསྒྲུབས་མ་བཙལ་ཡིན་པའི་སྤྱན་གསལ་ལོ། །སྤྱན་གསུམ་ལ་སྐུ་གསུམ་ངོ་སྤྲད་པ་ནི། ཡེ་ཤེས་ཀྱི་སྤྱན་ཆོས་སྐུར་ངོ་སྤྲད། ཆོས་ཉིད་ཀྱི་སྤྱན་ལོངས་སྐུར་ངོ་སྤྲད། ཐབས་དང་ཤེས་རབ་ཀྱི་སྤྱན་སྤྲུལ་སྐུར་ངོ་སྤྲད། ངོ་སྤྲད་པ་མན་ངག་གི་རྒྱུད་ཀྱི་འདུག་ཚུལ་ནི། ངོ་བོ་རང་བཞིན་ཐུགས་རྗེ་གསུམ་ལས་མ་འདས། སྤྱན་གསུམ་རང་ལ་གནས་པ་ནི་ཡེ་ཤེས་ཀྱི་སྤྱན་ནི་རིག་པའི་ཡེ་ཤེས་ལྷངས་ཀྱིས་རྟོགས་པའོ། །ཆོས་ཀྱི་སྤྱན་ནི་སྒྲོ་འདོགས་གཅོད་པའོ། །ཐབས་དང་ཤེས་རབ་ཀྱི་སྤྱན་ནི་ཐམས་ཅད་རང་གི་འདུག་ཚུལ་ལས་མ་འདས་བར་ཤེས་པའོ། །སྤྱན་གསུམ་ཁོང་དུ་ཆུད་པས་ཐེག་པ་རིམ་པ་བརྒྱད་ཀྱི་རྩོལ་སྒྲུབ་ཀྱི་ཆོས་དང་མུ་སྟེགས་རྟག་ཆད་དང་། རྫོགས་ཆེན་ཁ་འབྱམ་བཞི་ལ་དགོངས་པ་ལས་ཀྱི་དབང་མི་བཙན་ཟེར་བ་ལས་ཤན་ཕྱེ་སྟེ། ཆོས་སྐུ་མཁའ་ཁྱབ་དྭངས་པ་སྤྱན་གསུམ་འདུག་ཚུལ་གཅིག་ཏུ་བསྟན་པས་གྲོལ་བ་མཐར་ཕྱིན་པའོ། །ལྡོག་པའི་ངོ་སྤྲད་པའི་ལེའུ་སྟེ་བརྒྱད་པའོ།། །།ལོག་པ་རང་གི་མཚན་ཉིད་ནི། འདས་པ་གསུམ་དུ་ངོ་སྤྲད་པ་སྟེ། སྐུ་ལས་འདས་པའི་ཡེ་ཤེས་ཁོང་གསུམ། ཡུལ་ལས་འདས་པའི་ཆོས་སྐུ་མཁའ་ཁྱབ་དྭངས་པ། གཉིས་མེད་ལས་འདས་པའི་རིན་པོ་ཆེ་མན་ཤེལ་དྭངས་པའི་མཆོད་རྟེན་ལྟ་བུ། སྟོན་པ་གསུམ་གྱི་འཁོར་བར་འཁྱམས་པ་ཚོར་ནས་ཆོས་སྐུ་བཙལ་བར་བསམ་རྡུགས་ཀྱི་ལྷ་ཁང་དུ་སླེབ་ནས་འགྲོ་ས་མ་རྙེད་པ་དེ་ཡ་ཆ། ཐོག་མའི་སྟོན་པ་འོད་མི་འགྱུར་བས་གཅུང་པོ་གཉིས་ལ་བོས་པ། ཀྱེ་ཀྱེ་གྲོགས་པོ་བསམ་རྡུགས་ཀྱི་ལྷ་ཁང་དུ་སླེབ་པས་འགྲོ་ས་མེད་པ་ཡ་ཆ། ཆོས་སྐུ་མཁའ་ཁྱབ་དྭངས་པས་བཙལ་བ་ཡ་ཆཆོས་སྐུ་བསྒྲུབས་པསའབྲས་བུ་སྟོར་བ་ཡ་ཆ། རྩོལ་སྒྲུབ་མང་པོ་བྱས་པས་དྲི་མས་གཏུམས་པ་དེ་ཡ་ཆ། དེ་སྐད་ཅེས་གསུངས་པས། སྟོན་པ་འོད་སྲུངས་ཀྱི་ཞལ་ནས། རང་རིག་པ་རང་ལ་ཤར་བས་ཆོས་ལས་འདས་པ་ཡ་ཆ། ཡེ་ཤེས་ཁོང་གསལ་རྟོགས་པས་བསམ་དུ་མེད་པ་ཡ་ཆ། ཆོས་སྐུ་མཁའ་ཁྱབ་དྭངས་པར་ཆས་ཡིན་པས་བཙལ་དུ་མེད་པ་ཡ་ཆ། བསྒྲུབས་པས་མ་རྙེད་རང་ལ་ཡོད་པ་ཡ་ཆ། ཡེ་ཤེས་རང་གྲོལ་དུ་ཤར་ནས་སྟོན་པ་གསུམ་དུས་གཅིག་ལ་རྩོལ་སྒྲུབ་པ་མ་རྟེན་པར་སངས་རྒྱས་པ་ནི་ཡ་ཆ་གསུང་ངོ་། །སྟོན་པ་མར་མེ་མཛད་ཀྱི་ཞལ་ནས། ང་ནི་མཐའ་གཉིས་ཟད་པ་སྟེ་འབྱུང་བ་འོད་དུ་སྣང་བ་ནི་རང་གི་གདངས་ཡིན་པས།ཉོན་མོངས་བག་ཆགས་ལས་ཀྱི་སྒྲིབ་པའི་མཐའ་ཟད་པ་དེ་ཡ་ཆ། འཛིན་པ་ཡེ་ཤེས་ཁོང་གསལ་ཆེན་པོའི་རྩལ་དུ་ཤེས་པས། ཤེས་བྱའི་སྒྲིབ་པ་ལས་ཀྱི་མཐའ་ཟད་པ་དེ་ཡ་ཆ། ཆོས་སྐུ་མཁའ་ཁྱབ་དྭངས་པ་རང་ཆས་ཡིན། ལས་ཀྱི་སྒྲིབ་པ་མཐའ་ཟད་པ་ཡ་ཆ། ཕུང་པོ་བོར་བས་དུས་ཀྱི་མཐའ་ཟད་པ་ཡ་ཆ། བར་དོ་མེད་པར་ཡེ་ཤེས་ཁོང་གསལ་དུ་ཐིམ་པས། ལས་ཀྱི་མཐའ་ཟད་པ་ཡ་ཆ་གསུངས་སོ། །སྟོན་པ་གསུམ་གྱི་དགོངས་པ་མདོར་བསྡུས་པའི་ལེའུ་སྟེ་དགུ་པའོ།། །།རྩ་བ་ཐམས་ཅད་རང་བྱུང་ལ་འདུས་པས་རྩོལ་སྒྲུབ་ལས་འདས་པ་བསྟན་པ་ཡིན། ཡེ་ཤེས་ཁོང་གསལ་དུ་རྟོགས་པས་མཚན་མ་ཆོས་ལ་འདས་པ་ཡིན། ཆོས་སྐུ་མཁའ་ཁྱབ་ཏུ་འདུས་པས་འབྲས་བུ་མ་བསྒྲུབས་པར་སངས་རྒྱས་པར་བསྟན་པའོ། །ཕྱིའི་སྣང་བ་ལྷ་དང་ལྷ་མོ། བུམ་པ་བསྐྱེད་པའི་རིམ་པ་རང་སྣང་ཐོགས་མེད་དུ་ངོ་སྤྲད་པས། ཕྱིའི་དབང་ཐམས་ཅད་དུས་གཅིག་ཏུ་ཐོབ་པ་ཡིན། ནང་རིག་པ་ཁོང་གསལ་དུ་ཤེས་པས་ཐབས་དང་ཤེས་རབ་ཀྱི་སྤྱན་གསལ་བས། ཐབས་དང་ཤེས་རབ་ཀྱི་དབང་སྐད་ཅིག་མ་ལ་ཐོབ་པ་ཡིན། གསང་བ་ཕྱི་ནང་མེད་པར་ཆོས་སྐུ་མཁའ་ཁྱབ་ཏུ་རྟོགས་པས། གསང་བ་ཡེ་ཤེས་ཀྱི་དབང་སྐད་ཅིག་མ་ལ་ཐོབ་པ་ཡིན། དེ་རྣམས་བླ་མས་བསྟན་ན་མི་གོ་མི་སྲིད་པར་བསྟན་པས་ཚིག་དབང་རིན་པོ་ཆེའི་དབང་དུས་གཅིག་ལ་ཐོབ་པ་ཡིན་ནོ། །དབང་བསྐུར་བའི་ལེའུ་སྟེ་བཅུ་པའོ།། །།རང་བྱུང་ཡེ་ཤེས་ཆེན་པོ་ལ། །རང་གདངས་སྣ་ཚོགས་རིགས་ལྔ་སྣང་། །སྣང་བ་ཡིན་པར་ཐག་ཆོད་པས། །ལྷ་ཡི་བསྐྱེད་རིམ་སྐད་ཅིག་གིས་རྫོགས། །མ་བྲིས་དཀྱིལ་འཁོར་རང་སྣང་བས། །དཀྱིལ་འཁོར་གཞལ་ཡས་ཁང་སྒོམ་པ་སྐད་ཅིག་ཙམ་ལ་རྫོགས། །རྫོགས་པའི་ངང་ལ་མི་འདའ་བས། །དམ་ཚིག་ཐམས་ཅད་དུས་གཅིག་བསྲུངས། །ཡེ་ཤེས་ཁོང་གསལ་མི་འགྱུར་དྲན། །སྔགས་ཀྱི་འཛབ་འདྲེན་དུས་གཅིག་ཐོན། །དེ་ཡི་དོན་ལ་ཡེ་གནས་གསལ། །བསྲུང་མཚམས་ཐམས་ཅད་དུས་གཅིག་བསྲུངས་པ་ཡིན། །ལྷ་རྣམས་བསྐྱེད་དང་དཀྱིལ་འཁོར་སྒོམ་པ་དང་། །དམ་ཚིག་བསྲུང་དང་སྔགས་ཀྱི་འཕྲོ་འདུ་དང་། །བསྲུང་བ་མཚམས་ཀྱི་འཁོར་ལོ་བསྟན་པའི་ལེའུ་སྟེ་བཅུ་གཅིག་པའོ།། །།སྟོན་པ་གསུམ་གྱི་རྫ་མཁན་གྱི་བུ་མོ་ཐམས་ཅད་སྲོག་གཅད་ནས་གཅིག་པུ་རབ་ཏུ་ཆེ་བའི་ལྷའི་གམ་དུ་བསྐྱལ་བ་དེ་ཡ་ཆ། སྲོག་གཅད་པ་དང་བདུད་གཅད་པའོ། །ཀུན་ཏུ་བཟང་པོ་ལ་བདུད་ཞུགས་པའི་དུས་སུ། འཁྲུལ་སྣང་ལོངས་སྐུར་འ་ས་པ་ཚོར་ནས། སྟོན་པ་འོད་སྲུངས་དང་བསྒྲོས་པས་མི་ཐུབ་པར་གཟིགས་ནས་རང་སྲོག་རང་གིས་གཅད། རང་བདུད་རང་གིས་བཅད་ནས་མཁའ་ཁྱབ་དངས་པའི་དུར་སར་ང་ཕུང་པོ་ལྷག་མ་མེད་པར་མྱ་ངན་འདས་ཕྱི་འོང་མ་ནུས་པ་ཡ་ཆ། དེ་ནས་དཔལ་རྡོ་རྗེ་སེམས་དཔའ་ཞེས་བྱ་བ་དང་། སངས་རྒྱ་འོད་གྲུངས་མཇལ་ནས་བསྒྲོས་པས་ཁོང་གཉིས་གྲོགས་པོ་བྱས་པས་སྟོན་པའི་ས་བཟུང་ནས་འཁོར་རིགས་ལྔ་ལ་ཆོས་སྟོན་པ་ཡ་ཆ། དེ་ནས་སློབ་དཔོན་དགའ་རབ་རྡོ་རྗེ་ཞེས་བྱ་བ་རྡོ་རྗེ་སེམས་དཔའི་སྤྲུལ་པ་ཁྱེའུ་སྣང་བ་དམ་པ་ཞེས་བྱ་བས། སྟོན་པ་འོད་སྲུངས་ཞེས་བྱ་བ་དེ་བར་དུ་ངོ་མ་ཤེས་ནས་ལྟ་སྒོམ་ཞེཞེས་སྤྱད་པས་འགྲོ་དྲུག་ཏུ་འཁྱམས་པ་ཡ་ཆ། དེ་ནས་སྟོན་པ་དགའ་རབ་རྡོ་རྗེས་ཀུན་ཏུ་བཟང་པོའི་ལུང་བསྟན་ཐོབ་ནས། སྟོན་པ་འོད་སྲུངས་དང་མར་མེ་མཛད་གཉིས་ཀྱི་ཞལ་གཟིགས་ནས་སྟོན་པ་གཉིས་ལ་མ་ཆགས་པར་སྤྱད་ཀྱིས་སོང་བ་ཡ་མཚན་ཆེ། སངས་རྒྱས་ཐམས་ཅད་ཀྱི་དགོངས་པ་འདུས་པ། ཐིག་ལེ་འདུས་པ་མན་ངག་གི་རྒྱུད། སྟོན་པ་གསུམ་དྲུག་གི་བདར་ཤ་བཅད་པ། ཁམས་གསུམ་སེམས་ཅན་ལ་ངོ་སྤྲོད་བྱས་པས་ལྟ་སྒོམ་ལ་རག་མ་ལུས་པ་སྐུ་གསུམ་བཀོག་བཞེངས་འཁོར་བ་དོང་སྤྲུགས། མངལ་ཁ་རྒྱས་འདེབས། བརྡ་ཆོས་ཡང་དག་པ་ཟང་བཅས་ཕུང་པོ་ལ་སྐུ་གསུམ་ངོ་སྤྲོད་ནས་འཇོག་པ། བར་མ་དོ་མེད་པར་སངས་རྒྱས་ཁོང་གསལ་དུ་སངས་རྒྱ་བ་འབྲས་བུ་དུས་ཟད་པས་ཐོབ་པ། ལས་ཀྱི་མཐའ་ཟད་པས་སངས་རྒྱ་བ། ཐམས་ཅད་དུ་ངོ་སྤྲོད་དུ་བསྟན་པ། གཞི་དང་། འཁྲུལ་ཚུལ། གནས་ཚུལ། ལྡོག་ཚུལ། ལོག་པ་རང་གི་མཚན་ཉིད་བསྟན་པ། ཐིག་ལེ་འདུས་པའི་རྒྱུད་རྫོགས་སོ།། །།རྒྱ་གར་སྐད་དུ། ཏི་ལ་གུ་རྒྱ་ནཱ་མ་ཏནྟྲ་བོ་དྷི་ས་ཏྭ་ཙཀྟ་ཏནྟྲ་ནཱ་མ། བོད་སྐད་དུ། ཐིག་ལེ་གསང་བ་ཡང་གཏེར་ཞེས་བྱ་བའི་རྒྱུད། བྱང་ཆུབ་སེམས་དཔའ་སྤྱན་གྱི་རྒྱུད་ཅེས་བྱ་བ། དཔལ་ཀུན་ཏུ་བཟང་