ཡི་དམ་ཡིད་བཞིན་ནོར་བུ

From Rangjung Yeshe Wiki Texts
Revision as of 07:00, 21 November 2026 by Eric (talk | contribs) (Longchenpa Project: generated page (21 November 2026))
(diff) ← Older revision | Latest revision (diff) | Newer revision → (diff)

LONGCHENPA-PECIN-10-THA-021
Jump to navigation Jump to search

བླ་མ་ཡིད་བཞིན་ནོར་བུ klong chen rab 'byams kyi gsung 'bum (pe cin 2009)· Volume 10(THA) མཁའ་འགྲོ་ཡིད་བཞིན་ནོར་བུ

Title ཡི་དམ་ཡིད་བཞིན་ནོར་བུ
Wylie yi dam yid bzhin nor bu


Author Longchenpa ཀློང་ཆེན་རབ་འབྱམས་པ་དྲི་མེད་འོད་ཟེར།
Location klong chen rab 'byams kyi gsung 'bum (pe cin 2009), volume 10(THA), text 21, pages 184–186 (BDRC scan pages)
Section snying thig ya bzhi › bla ma yang tig


Tibetan text E-text from the typeset Pe cin edition (input 2020 on rywikitexts), cleaned 21 November 2026; not proofread against the print.
BDRC MW1KG4884, outline 1.4.2.22
Citation Klong chen rab 'byams pa. yi dam yid bzhin nor bu. In Kun mkhyen klong chen rab 'byams kyi gsung 'bum, vol. 10, pp. 184–186. Pe cin: Krung go'i bod rig pa dpe skrun khang, 2009. BDRC MW1KG4884.
Notes Title from the first line of the e-text; text boundaries and page numbers from the BDRC outline of MW1KG4884.
[edit]

༄༅། །ཡི་དམ་ཡིད་བཞིན་ནོར་བུ་བཞུགས་སོ། །

«དངོས་གྲུབ་མཆོག་སྩོལ་ཡི་དམ་ལ། །དང་པོ་ཉིད་དུ་ཕྱག་འཚལ་ཏེ། ། དོན་གཉིས་ལྷུན་གྱིས་གྲུབ་པའི་ཕྱིར། །ཡི་དམ་ཡིད་བཞིན་ནོར་བུ་བྲི། །དང་པོ་དབེན་ཞིང་ཡིད་དུ་འོང་བའི་གནས་སུ་ཐོ་རངས་ཀྱི་ཆ་ལ་ལངས་ཏེ། སྐྱིལ་མོ་ཀྲུང་གིས་འདུག་ནས། རླུང་གསུམ་ཕྱིར་བུས་ཏེ། དལ་བུས་བཟུང་རྗེས་སྐྱབས་སུ་འགྲོ་བ་དང་སེམས་བསྐྱེད་ལ། ཨཱོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཤུདྡྷོ྅་ཧཾ། གིས་སྟོང་པར་བསམ་པའི་ངང་ལས། པཾ་ལས་པདྨ་དམར་པོ་གཅིག་གི་སྟེང་དུ་རཾ་ལས་ཉི་མ་འོད་འབར་བའི་དབུས་སུ། རང་ཉིད་འོད་དཔག་མེད་དམར་པོ་རྡོ་རྗེའི་སྐྱིལ་ཀྲུང་ཅན། ཕྱག་གཉིས་མཉམ་གཞག་གི་སྟེང་ན་ཚེའི་བུམ་པ་བདུད་རྩིས་བཀང་བ་བསྣམས་པ། དར་དམར་སེར་གྱི་ཤམ་ཐབས་ཅན། རིན་པོ་ཆེའི་དབུ་བརྒྱན་ལ་སོགས་པས་བརྒྱན་ཞིང༌། འོད་འཕྲོ་བའི་སྙིང་གར་པདྨ་འདབ་བཞིའི་དབུས་སུ་ཉི་མ་ལ་ཧྲཱིཿདམར་པོ་འོད་འཕྲོ་བའི་འོད་ཀྱིས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང༌། ཉི་ཟླ་ལ་སོགས་པའི་ཚེ་དང༌། བསོད་ནམས་དང༌། གཟི་བརྗིད་ཐམས་ཅད་བསྡུས་ནས་རང་གི་ལུས་ཁེངས་པར་བསམ་པའི་སྤྱི་བོར་བདེ་ཆེན་འཁོར་ལོ་ན་པདྨ་ཉི་ཟླའི་དབུས་སུ། ཀུན་བཟང་ཡབ་ཡུམ་ཞལ་སྦྱོར་མཉམ་གཞག་མཛད་པའི་སྦྱོར་མཚམས་སུ་ཧྲཱིཿའི་འོད་ཕོག་པས་བྱང་སེམས་ཚེའི་བདུད་རྩི་དཀར་དམར་འདྲེས་པའི་རྒྱུན་ན་ར་ར་བྱུང་ནས། རྐང་མཐིལ་ནས་སྤྱི་བོའི་བར་དུ་ཁེངས། ཧྲཱིཿལ་ཕོག་པས་བདེ་བ་ཆེན་པོར་ཕྲི་ལི་ལི་སོང་བར་བསམ་ཏེ། འོག་རླུང་ཅུང་ཟད་འཐེན། སྟེང་རླུང་མནན་ཏེ། སྙིང་ཀར་ཁ་སྦྱར་ལ་གཟུང་ཞིང༌། མ་ཡེངས་པར་སྒོམ་པ་རྒྱུན་རིང་དུ་བྱས་ནས་བཟླས་པ་བྱེད་ན་རླུང་དང་བསྟུན་ལ། ལྕེ་རྩེ་ཡ་རྐན་ལ་བཟློག» །«སོ་དང་མཆུ་བག་ཙམ་མ་རེག་པས་འོག་རླུང་འཐེན་ནས་ཧྲཱིཿཧྲཱིཿཞེས་རིང་དུ་བརྗོད་པས། ལུས་སེམས་བདེ་ཕྲི་ལི་ལི་མ་བྱུང་གི་བར་དུ་བརྒྱའམ་སྟོང་བཟླས་པའི་འོད་ཟེར་གྱིས། ཕྱོགས་བཅུའི་སངས་རྒྱས་ལ་སོགས་པའི་འཆི་མེད་ཚེའི་བདུད་རྩི་བསྡུས་ཏེ། ཆར་བཞིན་བྱུང་བ་སྙིང་ཀའི་ཧྲཱིཿལ་ཐིམ་པར་བསམ་ལ་བཟླས་པ་བྱའོ། །འཕྲོ་གཅོད་དུས་ཧྲཱིཿལས་འོད་འཕྲོས་པས། སྣོད་བཅུད་ཀྱི་འཇིག་རྟེན་ཐམས་ཅད་དམར་ལམ་གྱིས་འོད་དུ་ཞུ་ནས། སྙིང་ཀའི་ཧྲཱིཿལ་ཐིམ་པས་ཚེ་མི་འགྱུར་བའི་དངོས་གྲུབ་ཐོབ། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཉན་རང་ལ་སོགས་པ་ཐམས་ཅད་འོད་དུ་ཞུ་ནས་ཧྲཱིཿལ་ཐིམ་པས། རྡོ་རྗེ་ལྟ་བུའི་ཚེར་འགྱུར་བར་བསམས་ལ་རླུང་བཟུང་ནས་ཧྲཱིཿལ་མ་ཡེངས་པར་གཏད་ལ་དར་ཅིག་བསྒོམ་པའི་རྗེས་ལ། སེམས་ཅན་ཐམས་ཅད་ཀྱི་དོན་དུ་བསྔོ་བ་བྱ་སྟེ། མཆིལ་མ་ཁོང་དུ་མིད་པར་བྱའོ། །དེ་ལྟར་རྩ་བའི་སྒྲུབ་པ་ཞག་ཉི་ཤུ་རྩ་གཅིག་བྱས་ནས། ཕྱིས་ཐུན་མ་ཆག་ཙམ་རེ་བྱས་པས། དུས་མ་ཡིན་པར་འཆི་བ་ཐམས་ཅད་ལས་གྲོལ་ནས་ཚེ་རིང་ཞིང་ནད་མེད་པར་འགྱུར་རོ། །རྨི་ལམ་དུ་ལོ་ཏོག་ལེགས་པ་དང༌། བཙས་མ་བརྡབ་དང༌། འབྲུའི་ཕུང་པོ་དང༌། ཉི་ཟླ་ཤར་བ་དང༌། ཕ་རོལ་བའི་རིགས་མང་པོ་འདུ་བ་དང༌། དངོས་པོ་ལ་གྲངས་འཇལ་བ་རྨི་དུས་འགྲུབ་པ་ཡིན་ནོ། །ཚེ་ཟད་པ་ལས་ཀྱང་ལོ་བདུན་བདུན་གྱིས་ཕྱིར་འཕེལ་བར་བྱེད་དོ། །ཞག་བདུན་བསྒྲུབ་ན་ལོ་གཅིག་གི་བར་དུ་འཆི་བ་བཟློག་གོ །ཞག་བཅུ་བཞིས་ལོ་གཉིས་དང༌། ཉེར་གཅིག་གིས་ལོ་གསུམ་ལ་སོགས་པ་ཚེ་འཕེལ་པར་བྱེད་དོ། །འདི་ནི་ཞལ་ནས་བརྒྱུད་པ་ཡང་གསང་གནད་ཀྱི་མན་ངག་ཡི་གེར་བཀོད་པས། ཆིག་བརྒྱུད་གཅིག་ལས་སྤེལ་བར་མི་བྱའོ། །ཤིན་ཏུ་ཟབ་པའི་ཡང་གནད་གསང་བ་དམ་པའོ། །དེ་ལྟར་འཆི་མེད་ཚེ་ཡི་བསྒྲུབ་ཐབས་ཤིག» «།ཡི་གེར་བཀོད་པའི་དགེ་བས་འགྲོ་བ་ཀུན། །ཚེ་དཔག་མེད་པའི་གོ་འཕང་རབ་ཐོབ་ནས། །རྡོ་རྗེའི་ཚེ་ལྡན་དོན་གཉིས་ལྷུན་གྲུབ་ཤོག» «།ཡི་དམ་གྱི་ཚེ་སྒྲུབ་ཡིད་བཞིན་ནོར་བུ་ཞེས་བྱ་བ། ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་བཀོད་པ་རྫོགས་སོ། །དགེའོ། །དགེའོ། །དགེའོ།། །།

[edit]

This page is a cleaned copy of the following rywikitexts page, which stay unchanged:

Cleaning (21 November 2026): removed 1 running heads, 3 Word page fields. The «» marks are kept: in this e-text they enclose the small-print notes of the print.

Part of the Longchenpa Collected Works (about this project).