འཇིག་རྟེན་གསུམ་དབང་དུ་བྱེད་པའི་འཇིག་རྟེན་དབང་ཕྱུག་གི་སྒྲུབ་ཐབས། །
རྒྱ་གར་སྐད་དུ། ཏྲཻ་ལོཀྱ་བ་ཤྱཾ་ཀ་ར་ལོ་ཀེ་ཤྭ་ར་སཱ་དྷ་ནཾ། བོད་སྐད་དུ། འཇིག་རྟེན་གསུམ་དབང་དུ་བྱེད་པའི་འཇིག་རྟེན་དབང་ཕྱུག་གི་སྒྲུབ་ཐབས།
དང་པོར་རེ་ཞིག་ཡིད་དང་རྗེས་སུ་མཐུན་པའི་གནས་སུ་ཐང་ཀ་དགྲམ་པར་བྱའོ། །དེའི་མདུན་དུ་སའི་དཀྱིལ་འཁོར་གྱི་དབུས་སུ་གུར་གུམ་གྱིས་ཟླ་བའི་དཀྱིལ་འཁོར་བྱ་སྟེ། རྡོ་རྗེའི་རི་མོ་ཧཱུྃ། ཞེས་བྱ་བའི་སྔགས་ཀྱིས་སོ། །དེའི་རྗེས་ལ་ཛཿཧཱུྃ་བཾ་པདྨ་ལ་བཞུགས་སུ་གསོལ་ཧོཿ ཞེས་བྱ་བའི་སྔགས་ཀྱིས་སྤྱན་དྲངས་ལ་མཎྜལ་གྱི་དབུས་སུ་འཇིག་རྟེན་གསུམ་དབང་དུ་མཛད་པའི་རྗེ་བཙུན་འཇིག་རྟེན་དབང་ཕྱུག་མཆོད་པ་བྱ་བའོ། །སྔགས་འདི་དག་གིས་བྱ་བ་ཡིན་ཏེ། ཨོཾ་འཇིག་རྟེན་གསུམ་དབང་དུ་མཛད་པའི་རྡོ་རྗེ་མེ་ཏོག་ཧཱུྃ་བཞེས་སུ་གསོལ་སྭཱ་ཧཱ། དེ་ནས་ཨོཾ་རྡོ་རྗེ་ཐུབ་པ་མུཿ ཞེས་བྱ་བས་གཤེགས་སུ་གསོལ་ལ། རང་གི་སྙིང་གར་ཡི་གེ་ཨོཾ་དམར་པོ་རྣམ་པར་བསམས་ལ་དེ་ཡོངས་སུ་གྱུར་པ་ལས་ཉི་མའོ། །དེའི་སྟེང་དུ་ཡི་གེ་ཧྲཱིཿདམར་པོའོ། །དེའི་འོད་ཟེར་གྱིས་དེ་བཞིན་གཤེགས་པ་སྣང་བ་མཐའ་ཡས་ལེགས་པར་སྤྱན་དྲངས་ལ་ཡང་དག་པར་མཆོད་དེ། སྡིག་པ་བཤགས་པ་ལ་སོགས་པ་བྱས་ཤིང་འཇིག་རྟེན་གསུམ་དབང་དུ་བྱ་བའི་ཐབས་རྣམས་ཀྱང་འོད་ཀྱིས་རང་གི་ས་བོན་ལ་ལེགས་པར་འཇུག་པར་བྱ་སྟེ། དེ་དག་ཡོངས་སུ་གྱུར་པ་ལས་སྐད་ཅིག་གིས་སྐུ་ཐམས་ཅད་དམར་པོ་ཆེན་པོས་དམར་བར་གྱུར་པའི་འཇིག་རྟེན་དབང་ཕྱུག་ཞལ་གཅིག་པ་ཕྱག་གཉིས་པ་སྤྱན་གསུམ་པ་རལ་པ་དང་དབུ་རྒྱན་དང་ལྡན་པ། རྡོ་རྗེས་མཚོན་པའི་ཞགས་པ་དང་ལྕགས་ཀྱུ་ཕྱག་ན་བསྣམས་པས་གསུམ་པོ་ལུག་གཉིས་ཀྱི་ཞགས་པས་བཅིང་བའི་སྟེང་ན། པདྨ་དམར་པོ་ལ་རྡོ་རྗེ་སྐྱིལ་མོ་ཀྲུང་གིས་བཞུགས་ཤིང་ལྷ་རྫས་ཀྱི་རྒྱན་དང་ན་བཟས་རྣམ་པར་བརྒྱན་པར་བདག་ཉིད་བསམས་ལ། རྫུ་འཕྲུལ་སྣ་ཚོགས་དང་ལྡན་པའི་སངས་རྒྱས་དང་བྱང་ཆུབ་སེམས་དཔའ་རྣམས་དང་། རྡོ་རྗེ་རྣལ་འབྱོར་མ་དང་ལྷ་རྣམས་ཀྱིས་ཀྱང་དབང་སྐུར་བར་བྱེད་པར་རྣམ་པར་བསམས་ཏེ། མགོ་བོ་ལ་སྣང་བ་མཐའ་ཡས་བསྒོམ་པར་བྱའོ། །དེ་ནས་སྙིང་གའི་ཉི་མ་ལ་ཧྲཱིཿཧཱུྃ་ཡཾ་ཞེས་བྱ་བ་བཟླས་པས་སྔགས་ཡི་གེ་གསུམ་པོ་འདི་བསྒོམས་ལ། ཨོཾ་སྟོང་པ་ཉིད་ཀྱི་ཡེ་ཤེས་རྡོ་རྗེའི་རང་བཞིན་གྱི་བདག་ཉིད་ནི་ང་ཡིན་ནོ། །ཆོས་ཐམས་ཅད་རྡོ་རྗེའི་བདག་ཉིད་ཀྱི་རྡོ་རྗེའི་བདག་ཉིད་ནི་ང་ཡིན་ནོ་ཞེས་བྱ་བ་རྡོ་རྗེའི་བདག་ཉིད་ཀྱི་སྔགས་གཉིས་བརྗོད་པར་བྱ་བའོ། །དེ་ལྟར་གོམས་པར་བྱས་པ་ལ་གཡོ་བ་འབར་བ་ལ་སོགས་པའི་ཡོན་ཏན་འབྱུང་བར་འགྱུར་རོ། །དེའི་རྗེས་ལ། ཨོཾ་ཧྲཱིཿཨཱཿཧཱུྃ་འཕྲོག་མ་གནོད་སྦྱིན་གྱི་དབང་ཕྱུག་མ་སྭཱ་ཧཱ། ཞེས་བྱ་བ་འདིས་ཆང་བུ་སྦྱིན་ནོ། །ཨོཾ་ཨཾ་ཀོཾ་ཧྲཱིཾ་དཔའ་བོ་དང་དཔའ་མོའི་དབང་ཕྱུག་མའི་ཚོགས་འཁོར་དང་བཅས་པ་མ་ལུས་པ་རྣམས་ཨ་ཨ་ཨ་བ་ཏ་ར་ཨ་བ་ཏ་ར་ཕྱོགས་བཅུ་ནས་གཤེགས་སུ་གསོལ་བ་ཡང་། འཇིག་རྟེན་སྐྱོང་བ་རྣམས་ཀྱིས་ཀྱང་གཏོར་མ་འདི་གྲྀཧྞ་གྲྀཧྞ་ཧཱུྃ་སྭཱ་ཧཱ། ཞེས་བྱ་བས་གཏོར་མ་བཏང་ལ། ལྷའི་རྣལ་འབྱོར་གྱིས་རྣམ་པར་རྒྱུ་བར་བྱ་བ་ཡིན་ནོ། །ཨོ་ཌྱན་ནས་འབྱུང་བའི་རིམ་པ་འཇིག་རྟེན་གསུམ་དབང་དུ་བྱེད་པའི་འཇིག་རྟེན་དབང་ཕྱུག་གི་སྒྲུབ་ཐབས། ས་ར་ཧའི་ཞལ་ནས་མཛད་པ་རྫོགས་སོ།། །།ཨ་བྷ་ཡའི་ཞབས་དྲུང་ནས་པ་ཚབ་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། །།