ཕྱག་རྒྱ་ཆེན་པོ་འཆི་ཀ་མའི་མན་ངག་བཞུགས་སོ། །
ཕྱག་རྒྱ་ཆེན་པོ་འཆི་ཀ་མའི་མན་ངག་བཞུགས་སོ།།
རྒྱ་གར་སྐད་དུ། མ་ཧཱ་མུ་དྲ་མཱ་ར་ཛ་ལ་ཨུ་པ་དེ་ཤ །བོད་སྐད་དུ། ཕྱག་རྒྱ་ཆེན་པོ་འཆི་ཀ་མའི་མན་ངག །བདུད་ཀྱི་སྟོབས་རབ་ཏུ་འཇོམས་པ་ལ་ཕྱག་འཚལ་ལོ། །འབྱུང་བ་འདུས་དང་གྲང་དང་འཕེན་སྟོབས་ཀྱིས། །སྐྱེ་དང་གནས་དང་འཆི་བའི་དུས་བྱེད་འགྱུར། །ཆུ་བུར་གཅིག་གི་འབྱུང་འཇུག་ཚོད་ཙམ་ལ། །ཡུན་དུ་སྡོད་སྙམ་སྙེམས་བྱེད་ཆགས་སྡང་སྐྱེ། །ཡུན་དུ་སྡོད་དང་མི་སྡོད་གཉིས་ཡོད་དོ། །ལུས་ཀྱི་འཁྲུལ་འཁོར་སྐད་ཅིག་ཚོད་ཙམ་ཡིན། །སེམས་ཉིད་རྟག་ཅན་གཡུང་དྲུང་གཏན་གྱི་ཡུལ། །ལུས་ཀྱི་རྣམ་འཕྲུལ་རང་བཞིན་རང་གིས་ཞིག །སེམས་ཉིད་རྟག་ཅན་ཕྱག་རྒྱ་ཆེན་པོ་གཏན་ཡུལ་སླེབ། །བདག་པོ་ཤི་བའི་ཁང་སྟོང་ཇི་བཞིན་དུ། །ཕྱི་སྟོང་ནང་སྟོང་བར་སྟོང་ངོ་བོ་མཉམ། །ཁང་སྟོང་ཞིག་པས་སྟོང་པ་དབྱེར་མི་ཕྱེད། །ལུས་ཀྱི་རྣམ་འཕྲུལ་ཁང་སྟོང་ཇི་བཞིན་ཏེ། །དྲན་མེད་བདག་པོ་རང་ཞིག་རང་གིས་དག །ཕྱི་སྟོང་ནང་སྟོང་བར་སྟོང་ངོ་བོ་མཉམ། །བློ་དང་ཡིད་ནི་ནམ་མཁའི་རང་བཞིན་འགྱུར། །སྤྲུལ་པ་བྱེ་བ་ཕྲག་བརྒྱ་འབྱུང་བར་འགྱུར། །ལུས་འདི་བོར་བས་ཆོག་པར་མ་དགོངས་ཏེ། །ཇི་ལྟར་དུག་སྦྲུལ་ཁ་རླངས་འཁྱུགས་པས་ཀྱང་། །སྦྲུལ་དུ་མཐོང་སྙམ་སྐད་ངན་ཆེར་འདོན་ན། །དྲན་པ་ཁ་རླངས་ལུས་ཀྱི་རྣམ་འཕྲུལ་ཡིན། །རྨོངས་པས་མི་ཤེས་དེ་ལ་ལུས་ཞེས་རྟོག །དུག་སྦྲུལ་རྐེ་བཅད་ལྟ་བུའི་ལུས་ཀྱི་རོ། །འདི་ལ་བདག་པོ་འདུག་པར་ངས་མ་མཐོང་། །རོ་ལ་རོ་ཞེས་གང་ཞིག་ཁོ་བོ་སྨྲ། །ཚིགས་སུ་བཅད་པ་ཉི་ཤུ་རྩ་ལྔ་པ་ས་ར་ཧའི་གདམས་པ་རྫོགས་སོ།།