འོད་གསལ་སྙིང་པོ

From Rangjung Yeshe Wiki Texts
Revision as of 21:16, 21 November 2026 by Eric (talk | contribs) (Longchenpa Project: Tibetan in the wiki's TibetanMachineUni font; «…» notes in small print (22 November 2026))
(diff) ← Older revision | Latest revision (diff) | Newer revision → (diff)

LONGCHENPA-PECIN-11-DA-022
Jump to navigation Jump to search

ཟབ་མོ་བཅུད་བསྡུས klong chen rab 'byams kyi gsung 'bum (pe cin 2009)· Volume 11(DA) སྙིང་པོ་དོན་བསྡུས་ཞེས་བྱ་བ

Title འོད་གསལ་སྙིང་པོ
Wylie 'od gsal snying po


Author Longchenpa ཀློང་ཆེན་རབ་འབྱམས་པ་དྲི་མེད་འོད་ཟེར།
Location klong chen rab 'byams kyi gsung 'bum (pe cin 2009), volume 11(DA), text 22, pages 220–221 (BDRC scan pages)
Section snying thig ya bzhi › zab mo yang tig


Tibetan text E-text from the typeset Pe cin edition (input 2020 on rywikitexts), cleaned 21 November 2026; not proofread against the print.
BDRC MW1KG4884, outline 1.5.1.24
Citation Klong chen rab 'byams pa. 'od gsal snying po. In Kun mkhyen klong chen rab 'byams kyi gsung 'bum, vol. 11, pp. 220–221. Pe cin: Krung go'i bod rig pa dpe skrun khang, 2009. BDRC MW1KG4884.
Notes Title from the first line of the e-text; text boundaries and page numbers from the BDRC outline of MW1KG4884.
[edit]

༄༅། །འོད་གསལ་སྙིང་པོ་བཞུགས་སོ། ། འོད་གསལ་སྙིང་པོ་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ཆོས་སྐུ་བྱང་ཆུབ་སྤྲཽས་དང་བྲལ་བའི་ཀློང༌། །ཡེ་ནས་ལྷུན་གྲུབ་མངོན་པར་འདུས་མ་བྱས། །གདོད་མའི་མགོན་པོ་འོད་མི་འགྱུར་བ་ལ། །རླུང་རིག་རྣམ་པར་དག་པས་ཕྱག་འཚལ་ལོ། །གཞི་ལས་གདངས་ཤར་ལམ་དུ་མངོན་སྣང་བ། །མི་འགྱུར་མཉམ་པའི་གཟེར་ཆེན་བཏབ་པ་ཡིས། །གདོད་མའི་དབྱིངས་སུ་ཟད་བའི་སར་ཕྱིན་པ། །ཇི་ལྟར་བདག་གིས་རྟོགས་བཞིན་བཤད་ཀྱིས་ཉོན། །ཉི་ཟླས་བརྒྱན་པའི་རིན་ཆེན་ཁང་པ་ན། །འོད་གསལ་རྡོ་རྗེ་སྙིང་པོ་མཆོག་བཞུགས་པས།། ངོ་བོ་རང་བཞིན་ཐུགས་རྗེ་གསུམ་ཉིད་དེ། །སྟོང་གསལ་རིག་པའི་སྙིང་པོར་ལྷུན་གྱིས་གྲུབ། །གདངས་གསུམ་ངང་ལས་རིག་པའི་གནས་ཚུལ་ནི། །ངོ་བོ་སྐུར་གནས་ཆོས་སྐུ་སྟོང་པའི་གདངས། །དྲན་བསམ་སྤྲོས་དང་བྲལ་བའི་ཚེ་ན་མངོན།། རང་བཞིན་འོད་གནས་ལྷུན་གྲུབ་གཏིང་གསལ་གདངས། །དབྱིངས་སྣང་ཁ་དོག་ཕྱིར་གསལ་ཚེ་ན་མངོན། ། ཐུགས་རྗེ་རིག་གནས་འཆར་ཚུལ་མ་འགགས་གདངས། །ཤར་གྲོལ་རིས་མེད་རང་ཡལ་ཚེ་ན་མངོན། །ཕྱི་གསལ་དེ་བཞིན་ཉིད་དུ་འང་དེ་བཞིན་ཏེ། །རྩ་རྣམས་ནང་ན་གདངས་གསུམ་རང་སྣང་བས། །ནང་གི་ཤེས་པ་སྟོང་དང་གསལ་དང་འགྱུ། །རང་བཞིན་ངང་དུ་བལྟས་ཚེ་མངོན་པ་ཡིན།། དེ་ཉིད་དོན་ལ་ཇི་ལྟ་བསྒོམས་པ་ཡང༌། །ལྟ་སྟངས་གཟིགས་སྟངས་རླུང་སེམས་དལ་བ་ཡིས། །མི་གཡོ་གསུམ་ལྡན་རླུང་རིག་མཁའ་ལ་གཏད། །རང་ལ་སྣང་བ་འོད་ཀྱི་ར་བ་ན། །རིག་གདངས་རྒྱལ་པོ་རྡོ་རྗེ་ལུ་གུ་རྒྱུད། །འགུལ་འཕྲིགས་མེད་པར་བཙོན་དུ་བཟུང་བར་བྱ། །དེ་ཚེ་རང་རིག་གདངས་གསུམ་རང་གསལ་བཞུགས། །ངོ་བོའི་གདངས་ལ་སྟོང་གསལ་དམིགས་འཛིན་མེད། །རང་བཞིན་རང་གདངས་དབྱིངས་རིགས་རང་ངོར་གསལ། །ཐུགས་རྗེའི་རིག་གདངས་ཤར་གྲོལ་གཉེན་པོ་ཞིག །རང་ཡལ་རྗེས་མེད་ངང་ལ་གནས་པ་ཡིན། ། གདངས་གསུམ་དུ«ས»་གཅིག་རྟེན་འབྲེལ་མཐུན་པའི་ཚེ། །རང་བྱུང་འོད་གསལ་དགོངས་ཀློངཡངས་པ་ཡིན། །ཕྱི་རུ་སྣང་བའི་རང་གདངས་སྣང་བའི་ཚེ། །ནང་དུ་རིག་པ་ཀ་དག་ཆོས་ཟད་ཀློང༌། །དྲན་རྟོག་ཡིད་ལ་བྱེད་པའི་ཆོས་མེད་པར། །མཁའ་བཞིན་མི་རྟོག་རྒྱལ་བའི་དགོངས་པར་གནས། །རླུང་སེམས་རང་དག་སྣང་བ་འཛིན་མེད་གསལ། །འདི་ནི་ཐོད་རྒལ་སྙིང་པོའི་མན་ངག་ཡིན། ། དགེ་བས་འགྲོ་ཀུན་འོད་ལུས་དག་པར་ཤོག །འོད་གསལ་སྙྀང་པོ་ཞེས་བྱ་བ། ། ཐེག་པ་རྒྱལ་པོའི་རྣལ་འབྱོར་པ། སྣ་ཚོགས་རང་གྲོལ་གྱིས་གངས་རི་ཐོད་དཀར་གྱི་མགུལ་དུ་སྦྱར་བ་རྫོགས་སོ།། །།དགེའོ། །དགེའོ། །དགེའོ།། །།ཟབ་མོ་ཡང་ཏིག«འོད་གསལ་སྙིང་པོ།

[edit]

This page is a cleaned copy of the following rywikitexts page, which stay unchanged:

Cleaning (21 November 2026): removed 1 running heads, 3 Word page fields. The «» marks are kept in the text: they enclose the small-print notes of the print, which are shown in small print with the marks hidden.

Part of the Longchenpa Collected Works (about this project).