འཆི་བསླུ་དྲན་པའི་མེ་ལོང

From Rangjung Yeshe Wiki Texts
Revision as of 21:16, 21 November 2026 by Eric (talk | contribs) (Longchenpa Project: Tibetan in the wiki's TibetanMachineUni font; «…» notes in small print (22 November 2026))
(diff) ← Older revision | Latest revision (diff) | Newer revision → (diff)

LONGCHENPA-PECIN-10-THA-028
Jump to navigation Jump to search

འཆི་ལྟས་དྲན་པའི་མེ་ལོང klong chen rab 'byams kyi gsung 'bum (pe cin 2009)· Volume 10(THA) སྙན་བརྒྱུད་ཆུང་ངུ་ཡེ་ཤེས་རང་སྣང

Title འཆི་བསླུ་དྲན་པའི་མེ་ལོང
Wylie 'chi bslu dran pa'i me long


Author Longchenpa ཀློང་ཆེན་རབ་འབྱམས་པ་དྲི་མེད་འོད་ཟེར།
Location klong chen rab 'byams kyi gsung 'bum (pe cin 2009), volume 10(THA), text 28, pages 214–219 (BDRC scan pages)
Section snying thig ya bzhi › bla ma yang tig


Tibetan text E-text from the typeset Pe cin edition (input 2020 on rywikitexts), cleaned 21 November 2026; not proofread against the print.
BDRC MW1KG4884, outline 1.4.2.29
Citation Klong chen rab 'byams pa. 'chi bslu dran pa'i me long. In Kun mkhyen klong chen rab 'byams kyi gsung 'bum, vol. 10, pp. 214–219. Pe cin: Krung go'i bod rig pa dpe skrun khang, 2009. BDRC MW1KG4884.
Notes Title from the first line of the e-text; text boundaries and page numbers from the BDRC outline of MW1KG4884.
[edit]

༄༅། །འཆི་བསླུ་དྲན་པའི་མེ་ལོང་བཞུགས་སོ། །ཐབས་ལ་མཁས་པའི་ཐུགས་རྗེ་ཅན། །དེ་ལ་དང་པོར་བདག་དད་པས། ། བཏུད་དེ་དལ་འབྱོར་གནས་པའི་ཐབས། །འཆི་བསླུ་དྲན་པའི་མེ་ལོང་བྲི། དེ་ལ་གཉིས་ཏེ། སྤྱིར་བསླུ་བ་དང༌། བྱེ་བྲག་ཏུ་བསླུ་བའོ། །དང་པོ་ནི། རྩ་བའི་བླ་མ་ལ་ཚོགས་དང་མཆོད་པ་ལ་སོགས་པ་བྱ་བ་དང༌། ཚོགས་གཉིས་ཀྱི་ལས་ལ་འབད་པ་དང༌། བསྐྱེད་རྫོགས་ཀྱི་ལམ་བསྒོམ་པ་དང༌། རྟེན་འབྲེལ་དུ་མ་ལ་བསླབ་པའོ། ། རྟེན་འབྲེལ་ནི་ཤོག་བུ་ལ་འཁོར་ལོ་རྩིབས་བཞི་མུ་ཁྱུད་དང་བཅས་པ་ལྔའི་ལྟེ་བ་ལ། རཾཿཡཾཿཁཾཿལཾཿཨེཿ རྩིབས་ལའང་སོ་སོའི་ཡིག་འབྲུ་དེ་དག་དང༌། མུ་ཁྱུད་ལ་ཨཱ་ལི་ཀཱ་ལི་བྲིས་ཏེ། འབྱུང་བ་ལྔའི་ཚོན་དུ་ཁ་བསྒྱུར་ལ་འབྱུང་བ་ལྔའི་ལྷར་བསྐྱེད་ནས་མཆོད་པ་ཕུལ་ཏེ། རྟེན་འབྲེལ་སྙིང་པོས་རབ་ཏུ་གནས་པ་ལ། བཀྲ་ཤིས་བརྗོད་ནས་ཁམ་ཕོར་ཁ་སྦྱར་ལྔར་བཅུག་ལ་བལ་ཚོན་སྣ་ལྔས་དཀྲིས། ས་སྣ་དང༌། ཆུ་སྣ་དང༌། མེ་སྣ་དང༌། ཤིང་སྣ་དང་རྟ་གླང་ལ་སོགས་པ་སེམས་ཅན་རིག་མི་མཐུན་པའི་ཁ་སྣ་ལ་བསྒྲེས་པའི་ངར་ཟན་ལ་མི་གཟུགས་ཁྲུ་གང་པ་བྱས་པའི་མིག་ཏུ་རཾ། རྣ་བར་ཡཾ། སྣ་ལ་ཁཾ། ལྕེ་ལ་ལཾ། སྙིང་གར་ཨེ་བྲིས་ཏེ་བཅུག་ཅིང༌། གླུད་དམར་པོ་དང༌། སེར་པོ་དང༌། དཀར་པོ་དང༌། ནག་པོ་དང༌། ལྗང་ཁུ་དང༌། ཁྲ་བོ་བྱས་ཏེ། གྲལ་ཐབས་སུ་བཀོད་པའི་བར་དུ། འབྲུ་སྣ་དང་རིན་པོ་ཆེ་སྣ་ཚོགས་གདབ་ཅིང༌། ནམ་མཁའ་དང༌། རྒྱང་བུ་བལ་ཚོན་སྣ་ལྔ་དང༌། ལྟས་ངན་གྱི་བྱ་སྤུས་བརྒྱན་པའི་མི་གཟུགས་དང༌། གླུད་རྣམས་ལ་གཟུག་ཅིང༌། རང་གི་དྲི་ཆུ་དང༌། སྐྲ་སེན་དང༌། སྣབས་ལུད་དང༌། གོས་དུམ་རྣམས་ཀྱང་གླུད་ཀྱི་གསེབ་ཏུ་གཏད་ཞིང༌། ཕུ་དུང་དམ་མཐུ་བས་གོས་སུ་བྱའོ། །གླུད་རྣམས་ཀྱི་མདུན་དུ་ཆངས་བུ་རེ་དང་མཐེབ་སྐྱུར་རེ་དང་གཏོར་མ་ཁ་དོག་དང་མཐུན་པ་རེ་བཤམས་ཏེ། སྟག་པ་དང་གླང་མའི་ཁྲམ་ཤིང་ལ་རང་གི་ལོ་གྲངས་ཀྱི་ཉག་བྲྀས་པ་ཐམས་ཅད་ཀྱི་དཔུང་པ་གཡོན་དུ་བཙུགས་ནས་གཞག་གོ །དེ་ནས་ཡས་སྟག་བཤམས་པ་རྣམས་རཾ་ཡཾ་ཁཾ་གིས་སྟོང་པར་བསམ་ཏེ། ཨཱོཾ་ཨཱཿཧཱུཾ་གིས་འདོད་པའི་ཡོན་ཏན་ལྔར་དམིགས་ལ། འབྱུང་བའི་ལྷ་དང་བགེགས་རིགས་སྟོང་ཕྲག་བརྒྱད་ཅུ་དང༌། འཆི་བདག་གཤེན་རྗེ་ལན་ཆགས་ཀྱི་མགྲོན་དང་བཅས་པ་རྣམས་བསམས་ཏེ། དེ་རྣམས་ལ་ཕུལ་ནས་ཚིག་འདི་ལན་བདུན་བརྗོད་དོ། ཁྱེར་ཅིག་ཁྱེར་ཅིག་སྟོབས་ལྡན་རྣམས། །སྲེད་དང་ཆགས་དང་ཞེན་པ་དང༌། །དྲན་དང་གཟུངདང་བསམ་དང་རེག །གློད་དང་ཞི་དང་གྲོལ་བར་མཛོད། །ཅེས་པའི་རྗེས་ལ། སྣོད་གཅིག་དུ་དྲིལ་ཏེ་ཆུ་བོའི་གཞུང་ལ་བསྐྱལ་བས་ལོ་གསུམ་གྱི་བར་དུ་འབྱུང་བ་འཁྲུགས་ནས་དུས་མ་ཡིན་པར་འཆི་བ་དང༌། གདོན་གྱིས་དུས་མ་ཡིན་པར་འཆི་བ་ཐམས་ཅད་གྲོལ་བར་བྱེད་དོ། །གཉིས་པ་བྱེ་བྲག་ཏུ་བཟློག་པའི་ཐབས་ལ་བླ་མའམ། གྲོགས་དམ་ཚིག་གཙང་བས་བྱ་སྟེ། སེན་མོའི་བཀྲག་མེད་ན་དབང་པོ་ལྔ་ལ་འབྱུང་བ་ལྔའི་ས་བོན་བསམ་ཞིང༌། རང་གིས་ཀྱང་ཀ་ཀ་དང་ཀི་ཀི་ལ་སོགས་པ་དབྱངས་དང་གསལ་བྱེད་ཐམས་ཅད་ལ་རྫོགས་པར་བརྗོད་ནས། དགེ་སློང་བདུན་ལ་སྟོན་མོ་བྱའོ། །མིག་གི་སྤྲིས་ཡལ་ན་ཚ་ཚ་ལོ་གྲངས་བཏབ་ནས་རྟེན་འབྲེལ་སྙིང་པོས་རབ་གནས་བྱས་ཏེ། ཆུ་བོའི་གཞུང་ལ་གཤེགས་ཤིང་མིག་ཏུ་ཧ་དཀར་པོ་བསྒོམ་ཞིང་བཟླས་སོ། །ལྟག་སྐྲ་ལངས་ན་ནས་སྲན་མ་བྲ་བོ་གང་རུང་ལ་ངར་ཟན་བྱས་པའི་གསེབ་ཏུ་རང་གི་དྲི་མ་བསྒྲེས་ནས་གླུད་ཁྲུ་གང་བྱས་པའི་སྙིང་གར་ལུང་ཐང་གི་རྡོག་པོ་རང་གི་ལོ་གྲངས་གཞུག་ཅིང་སྐྲ་བྲེགས་ནས་དེའི་སྐྲ་དང༌། སེན་མོས་དེའི་སེན་མོ་དང༌། ཁྲག་གིས་དེ་ལ་བྱུགས་ཏེ། རང་གི་གོས་དུམ་གྱིས་གྲིལ་ལ་རང་གི་གནས་ནས་གོམས་པ་བརྒྱ་ཉི་ཤུ་བར་དོང་གྲུ་གསུམ་བྲུས་པའི་ནང་དུ་བཅུག་ལ། རཾ་ལོ་གྲངས་བརྗོད་ནས། བདུད་ནག་པོ་ཁྱོད་འདི་ཁྱེར་ཅིག་གལ་ཆེའོ། ། གལ་ཆེའོ། །ཞེས་བརྗོད་ནས་དྲི་ཆེན་བཏང་བ་ལ་སས་བྱིབས་ཏེ། ཕྱི་མིག་གིས་མི་བལྟ་བར་བྲོས་སོ། །རྐང་པའི་ལོང་བུའི་རྟགས་ལ། ཉི་མ་གྲིབ་སོ་ཆགས་དུས་ནུབ་ཏུ་ཁ་བལྟས་ཏེ་གཅེར་བུར་འཕོངས་སུ་ཁྱི་འཇུག་བཙུགས་ཏེ་སྒུར་ལ། མདུན་དུ་དྲི་ཆེན་བཏང་བ་ལ་ཁམས་རེ་ཟ་ཞིང༌། ཁྱི་སྐད་ཐེངས་གསུམ་བརྗོད་དོ། །སོ་དྲེག་ཆགས་ན་རའི་ལྤགས་པ་གོན་ནས་ཤར་དུ་བལྟས་ཏེ་རའི་འདུག་སྟངས་ཀྱིས་ཉི་མ་རྩེ་ཤར་ལ་རའི་སྐད་ལན་གསུམ་གདོན་ནོ། །སྣ་ཞོམ་ན་ཆུ་སྣ་དགུའི་ཁྲུས་བྱས་ཏེ་སྣའི་རྩེ་ལ་ཨའམ་ཧཱུཾ་དཀར་པོ་བསམས་ཏེ་ཉེར་གཅིག་བརྗོད་དོ། །ཡན་ལག་རྐྱང་ན། རྡོ་རྗེ་རྣམ་འཇོམས་ཀྱི་ཆུས་བཀྲུ་ཞིང༌། རྒྱ་སྐེགས་ཀྱིས་འབྱུང་བ་ལྔའི་འཁོར་ལོ་བྲི་ཞིང་གདགས་སོ། །མིག་འབྲུ་ཚུགས་སུ་སྟན། མིག་ཏུ་ཧ་དཀར་པོ་བསམ་ཞིང་བཟླས་ལ། དགེ་འདུན་དང་བྱིས་པ་ལོ་གྲངས་ལ་སྟོན་མོ་བྱའོ། །འགྲམ་པ་ཤོང་ན། ཚ་ཚ་དང༌། ཆུ་གཏོར་དང༌། སྦྱིན་སྲེག་དང༌། བ་དན་ལྗང་གུ་ཕྱར་བ་དང༌། ཨེ་དང་ཨ་ལོ་གྲངས་བཟླས་སོ། །དབུགས་རྒོད་ན་བུ་རམ་ལ་ཡཾ་བཟླས་ཤིང་བཟའ་སྟེ། འགྲམ་པའི་སྟེང་དུ་ཨ་དཀར་པོ་བསམ་ཞིང་བཟླས་སོ། །སྣ་ཡོ་ན། སྣ་རྩེར་ཧཱུཾ་དཀར་པོ་བསམ་ཞིང་རླུང་དར་གཅིག་གཟུང་ངོ༌། །མཆི་མ་འཛག་ན་མ་གྱིས་སོ། །སོ་འཐམས་ན་ཨ་ལི་དང་ཤྭར་གྱིས་སོ། །ལྕེའི་ཐིག་ལེ་ལ་ཨ་ལི་དང་ཧཱུཾ་གིས་སོ། །རྣ་བ་འབྱར་ན་ཡུམ་གྱིས་སོ། །ལྷེན་སྣ་ཞོམ་ན་ཨོཾ་དང་ཡཾ་གིས་སོ། །རྩ་གཉིད་ལོག་མེད་ན་ཧྲཱིཿདང་ཧཱུཾ་གིས་སོ། །དེ་ལྟར་ཡི་གེ་རང་རང་གི་གནས་སུ་བསྒོམ་ཞིང་བཟླས་པའང་ལོ་གྲངས་ཙམ་དུ་བྱའོ། །ཚེ་གཟུགས་ཀྱི་ལག་ཆ་མེད་ན། བླ་མ་ལ་ཚོགས་བརྒྱ་རྩ་བརྒྱད་བྱའོ། །ལག་པ་གཡས་པ་མེད་ན་འབྲུ་སྣ་ལ་ངར་རླུད་སེང་གེའི་མགོ་ཅན་ཁ་གདངས་པའི་སྤྱི་བོར་བྱ་སྤུ་ལོ་གྲངས་བཙུགས་ཏེ་བྱང་ཕྱོགས་ཀྱི་ལམ་སྲོང་དུ་སྐྱལ་ལོ། །ལག་པ་གཡོན་མེད་ན་སྲེ་མོའི་རླིད་བུར་སྟག་དང་ཕག་དང་ཁྱིའི་མཆེ་བ་དང༌། ལུས་ལ་བསྒྲེས་པའི་ངར་གླུད་བཅུག་སྟེ་ཆུ་ལ་དོར་རོ། །རྐང་པ་གཡས་མེད་ན་ནུབ་ཏུ་ནམ་སྲོས་དུས་ཤུག་པའི་མེ་ལོ་གྲངས་གཏང་ངོ༌། །རྐང་པ་གཡོན་མེད་ན་ངར་གླུད་ཁྲུ་གང་བའི་སྙིང་ཀར་སྟག་པར་ལོ་གྲངས་ཀྱི་ཉག་བཏབ་པ་བཙུག་ལ་ལྷ་ཁང་དུ་ཐོ་རངས་བསྐྱལ་ལོ། །མགོ་བོའི་གཡས་མེད་ན་ཕུང་ཤུལ་གྱི་ས་སྣ་དགུ་དང་ཤིང་ནག་པོའི་འབྲས་བུ་སྦྱར་བས་གའུ་བྱས་པའི་ནང་དུ་རང་གི་སྐྲ་སེན་ལ་སོགས་པ་དང༌། །གླང་མའི་བྱང་བུ་བཅུ་གཉིས་ལ་གནམ་ལོའི་རྒྱལ་པོ་སྟག་འདི་ཁྱཻར་ཅིག་ལ་སོགས་པ་ལོ་བཅུ་གཉིས་ཀྱི་མིང་དང་ཚེར་མ་བཅུག་སྟེ་ནམ་ཕྱེད་དུར་ཁྲོད་དུ་བསྐྱལ་ལོ། །མགོ་བོའི་གཡོན་མེད་ན། འབྲུ་སྣ་ཉི་ཤུ་རྩ་ལྔས་ངར་གླུད་བྱས་ཏེ་སྙིང་གར་མི་རྟ་ཁྱི་གསུམ་གྱི་རུས་པ་བཅུག་སྟེ་གོས་དུམ་གྱིས་གྲིལ་ལ་ཚེས་བཅུ་གཅིག་གི་ནམ་སྲོས་དུས་ལྷོ་ངོས་སུ་གོམ་པ་བརྒྱད་ཅུའི་ས་དོང་དུ་བཅུག་ནས་སྦས་ཏེ་རང་གི་མིང་ནས་ལན་གསུམ་བོས་ལ་ངུ་བའི་ཚུལ་བྱའོ། །སྐེ་ཡན་ཆད་མེད་ན། ཤར་ལྷོར་ཚེར་མའི་ཧོམ་ལོ་གྲངས་ལ་མེ་སྦར་ཞིང་རཾ་ལོ་གྲངས་བཟླས་སོ། །སྐེད་པ་ཡན་ཆད་མེད་ན་ཤོག་བུ་སོར་བཞིའི་དབུས་སུ་རང་གི་ལོ་དང་གནམ་ལོའི་མིང་ལཾ་དང་བཅས་པ་བྲིས་པའི། ཤར་དུ་ཡཾ། ལྷོར་རཾ། ནུབ་ཏུ་ཨེ། བྱང་དུ་ཁཾ་བྲིས་པ་རང་གི་སྣ་ལ་བཏགས་ཏེ། གཅེར་བུར་སྐྲ་བརྫེས་ནམ་གུང་ལ་ཕྱོགས་བཞིར་རྒྱུག་ཅིང༌། ཁ་ལ་ཁྱོད་ཁྱེར། ཝ་ལ་གཟིགས་ལྟ་ཞེས་པ་ལ་སོགས་འབྲེལ་མེད་མང་པོ་བརྗོད་ལ་ཤོག་བུ་དེ་དུར་ཁྲོད་དུ་སྦའོ། །རོ་སྟོད་མེད་ན་མེ་ལ་ལོ་བཅུ་གཉིས་ཀྱི་མིང་བསྲེག་གོ །སྨད་མེད་ན་དུར་ཁྲོད་དུ་སོང་ལ་རུས་པ་སྣ་ཚོགས་ཀྱི་དུད་པ་གཏང་ངོ༌། །ལུས་དེའི་གཡས་པ་མེད་ན་ཚ་ཚ་དང་གཙུག་ཏོར་ལོ་གྲངས་སོ། །གཡོན་མེད་ན་གཟུངས་གྲྭ་ལྔ་ལོ་གྲངས་སུ་གདོན་ ནོ། །གནམ་སའི་འབྲེལ་ཐག་ཆད་ན། གསུང་རབ་བཀླག་ཅིང༌། དགེ་བ་ལ་འབད་དོ། །མི་བབས་ན་དཀྱིལ་འཁོར་གྱི་ཆོ་ག་ལོ་གྲངས་བྱའོ། །ལྗོན་ཤིང་ཆག་ན་སྨན་སྦྱོར་དང་རླུང་སྒོམ་མོ། །སྤྲིས་ཡལ་ན་ཁམ་ས་ལ། ལོ་བཅུ་གཉིས་ཀྱི་གཟུགས་བྱས་ཏེ། ཚ་ཚ་རེ། གླུད་རེ། སྟག་པའི་ཧོམ་རེ་དང་མཉམ་དུ་ཉི་མ་དམར་ཐག་ཆད་པ་ལ་བྱང་ཤར་གྱི་དུར་ཁྲོད་དུ་བསྐྱལ་ལོ། །ནག་པོ་ཧྲལ་ཧྲོལ་ལ། ལྕགས་སམ་ཟངས་ཀྱི་ཕྱེ་མ་དང་འབྲུ་སྣ་བསྲེས་ལ་ཕྱོགས་བཞིར་གཏོར་རོ། །དམར་པོའི་ཐིག་ལེ་ལ་ངར་གླུད་ལོ་གྲངས་ལ་གཟུག་མོ་བྱི་བཙུགས་ཏེ། ཤར་གྱི་ལམ་རྒྱ་གྲམ་དུ་རུས་པ་སྣ་ཚོགས་དང་བསྲེས་ལ་བསྐྱལ་ལོ། །དུ་བ་ཆད་ན་རྟ་ཐོད་ལ་འབྱུང་བ་ལྔའི་ས་བོན་བྲིས་ལ། ཉི་མ་མདུང་གང་དུས་སུ་ནུབ་ཏུ་བསྐྱལ་ཞིང༌། རྟ་སྐད་མང་པོ་འདོན་ནོ། །རྣ་བའི་སྒྲ་ཆད་ན། སྙིང་དུ་ཡཾ་བསམ་ཞིང༌། མིག་གྱེན་དུ་ལྡོག་དུས། གཞན་གྱིས་གཟུང་ཆུའི་བུམ་པས་སྤྱི་བོ་ནས་ཁྲུས་བྱའོ། །སྒྲ་ཤཱ་ཤཱ་ལ་ཟས་སྣའི་གཏོར་མ་ལོ་གྲངས་བཅུ་གཉིས་ཀྱི་མིང་དང་བཅས་པ། སྡོང་པོ་རྐང་གཅིག་གི་རྩར་བསྐྱལ་ལོ། །ཤིང་ལོ་ལངས་ན་ཚོགས་དང་གཏོར་མ་ལ་འབད་དོ། །ནང་གི་འཆི་ལྟས་ལ་ནི། རླུང་བུམ་པ་ཅན་བསྒོམ་ཞིང་དགེ་བ་གྲུབ་ཚད་བྱའོ། །གསང་བའི་འཆི་ལྟས་ལ། དགེ་སྦྱོར་སྔར་བས་སུམ་ལྡབ་དང༌། སྲོག་འདོན་དང༌། འཆི་བསླུ་དང༌། ཚ་ཚ་དང༌། ཚེ་སྒྲུབ་ལ་སོགས་པ་ལོ་གྲངས་སམ། དེ་ལས་ལྷག་པར་བྱས་པས་བཟློག་པ་ཡིན་ནོ། །དེ་ལྟར་ཡང་ཟབ་གནད་ཀྱི་གདམས་པ་ལས། ། གསལ་བར་བཀོད་པའི་དགེ་བས་འགྲོ་བ་ཀུན། །ཕྱམ་གཅིག་བདེ་ཆེན་ཐར་པའི་ལམ་ཞུགས་ཏེ། །འཆི་བདག་བདུད་ལས་རྣམ་པར་རྒྱལ་གྱུར་ཅིག །འཆི་བསླུ་དྲན་པའི་མེ་ལོང་ཞེས་བྱ་བ། ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་གངས་རི་ཐོད་དཀར་གྱི་མགུལ་དུ་ཕྱི་རབས་ཀྱི་དོན་ལ་བསམས་ཏེ་ལེགས་པར་བཀོད་པ་རྫོགས་སོ། །དགེའོ། །དགེའོ། །དགེའོ།། །།

[edit]

This page is a cleaned copy of the following rywikitexts page, which stay unchanged:

Cleaning (21 November 2026): removed 1 running heads, 3 Word page fields. The «» marks are kept in the text: they enclose the small-print notes of the print, which are shown in small print with the marks hidden.

Part of the Longchenpa Collected Works (about this project).