རྟགས་ཡིག་དང་ཚད་ཀྱི་ཡི་གེ

From Rangjung Yeshe Wiki Texts
Revision as of 21:16, 21 November 2026 by Eric (talk | contribs) (Longchenpa Project: Tibetan in the wiki's TibetanMachineUni font; «…» notes in small print (22 November 2026))
(diff) ← Older revision | Latest revision (diff) | Newer revision → (diff)

LONGCHENPA-PECIN-06-CHA-017
Jump to navigation Jump to search

སྙིང་ཐིག་གི་བདུད་རྩི་ཕྱག་མཆོད klong chen rab 'byams kyi gsung 'bum (pe cin 2009)· Volume 6(CHA) ཌཱཀྐི་དྲིལ་སྒྲུབ་གསང་བ་སྙིང་གི་དུམ་བུ

Title རྟགས་ཡིག་དང་ཚད་ཀྱི་ཡི་གེ
Wylie rtags yig dang tshad kyi yi ge


Author Longchenpa ཀློང་ཆེན་རབ་འབྱམས་པ་དྲི་མེད་འོད་ཟེར།
Location klong chen rab 'byams kyi gsung 'bum (pe cin 2009), volume 6(CHA), text 17, pages 122–126 (BDRC scan pages)
Section snying thig ya bzhi › mkha' 'gro snying thig


Tibetan text E-text from the typeset Pe cin edition (input 2020 on rywikitexts), cleaned 21 November 2026; not proofread against the print.
BDRC MW1KG4884, outline 1.2.2.19
Citation Klong chen rab 'byams pa. rtags yig dang tshad kyi yi ge. In Kun mkhyen klong chen rab 'byams kyi gsung 'bum, vol. 6, pp. 122–126. Pe cin: Krung go'i bod rig pa dpe skrun khang, 2009. BDRC MW1KG4884.
Notes Title from the first line of the e-text; text boundaries and page numbers from the BDRC outline of MW1KG4884.
[edit]

༄༅། །རྟགས་ཡིག་དང་ཚད་ཀྱི་ཡི་གེ་བཞུགས་སོ༔ མི་འགྱུར་དོན་གྱི་ལྷ་ལ་ཕྱག་འཚལ་ལོ༔ བདག་འདྲ་པདྨ་འབྱུང་གནས་ཀྱིས༔ སྙིང་ཐིག་བཀའ་གསང་ངེས་པ་རྒྱ་ཆེན་ལས༔ ཉམས་བླངས་རྟགས་ཀྱི་རིམ་པ་དཔག་མེད་ཀྱང་༔ ཅུང་ཟད་མདོར་བསྡུས་ཁྲིད་ཀྱི་རྟགས་ཡིག་བྲི༔ མ་འོངས་ལས་ཅན་ཅིག་དང་འཕྲད་པར་ཤོག༔ ས་མ་ཡ༔ རྒྱ་རྒྱ་རྒྱ༔ དང་པོ་ལུས་འཁོར་འདས་རུ་ཤན་འབྱེད་པའི་སྤྱོད་པ་ལ་བསླབས་པས༔ ཕྱེད་པའི་རྟགས་འདི་ལྟར་འབྱུང་སྟེ༔ ལུས་ལ་ཆགས་ཞེན་མེད་པ་དང་༔ བཀྲེས་སྐོམ་མེད་པ་དང་༔ དེ་ལྟ་བུའི་ཉམས་སྐྱེས་འདུག་ན༔ ལུས་འཁོར་བ་དང་རུ་ཤན་ཕྱེད་པའི་རྟགས་ཡིན་ནོ༔ དེ་ལྟར་མ་བྱུང་གི་བར་དུ་བསྐྱར་རོ༔ ཨྠིྀ༔ དེ་ནས་ངག་འཁོར་འདས་རུ་ཤན་ཕྱེད་པའི་རྟགས་ནི༔ བླ་མའི་གདམས་ངག་ལ་གོ་བ་སྐྱེས་ནས་ཆེད་དུ་མ་བཟུང་བར་རང་གྲོལ་དུ་ཡོང་བ་ཡིན་ནོ༔ དེ་ལྟར་བྱུང་ན་ངག་འཁོར་འདས་རུ་ཤན་ཕྱེད་པའི་རྟགས་ཡིན་ནོ༔ དེ་ལྟར་མ་བྱུང་གི་བར་དུ་བསྐྱར་རོ༔ ཨྠིྀ༔ དེ་ནས་ཡིད་འཁོར་འདས་རུ་ཤན་ཕྱེད་པའི་རྟགས་ནི༔ སེམས་གསལ་བ་དང་༔ དངས་པ་དང་༔ འཁྲུལ་པ་མེད་པ་དང་༔ བྲོད་པ་སྐྱེ་བ་དང་༔ ཉམས་འབར་ཞིང་བདེ་བ་ལ་སོགས་པ་འབྱུང་ངོ་༔ དེ་ལྟར་བྱུང་ན་ཡིད་འཁོར་འདས་རུ་ཤན་ཕྱེད་པའི་རྟགས་ཡིན་ནོ༔ དེ་ལྟར་མ་བྱུང་གི་བར་དུ་བསྐྱར་རོ༔ ཨྠིྀ༔ དེ་ནས་ཕྱི་སྣང་བ་ལ་རྒྱས་ཐེབས་པའི་རྟགས་ནི༔ སྣང་བ་ཐམས་ཅད་བན་བུན་དུ་འགྲོ་བ་བྱུང་ན་རྒྱས་ཐེབས་པའི་རྟགས་ཡིན་ནོ༔ དེ་ལྟར་མ་བྱུང་གི་བར་དུ་བསྐྱར་རོ༔ ཨྠིྀ༔ དེ་ནས་ནང་ཕུང་པོ་ལ་རྒྱས་བཏབ་པས་ཐེབས་པའི་རྟགས་ནི༔ ལུས་ཀྱི་ནང་མི་བདེ་སྙམ་བྱེད་པ་དང་༔ ནང་ན་ཧཱུྃ་མེར་རེ་རོང་ངེ་ཡོད་པ་སྙམ་བྱེད་པ་བྱུང་ན་ནང་ཕུང་པོ་ལ་རྒྱས་ཐེབས་པའི་རྟགས་ཡིན༔ དེ་ལྟར་མ་བྱུང་གི་བར་དུ་བསྐྱར་རོ༔ ཨྠིྀ༔ དེ་ནས་ཕྱི་སྣང་བ་ལ་རྩལ་སྦྱངས་པས་འབྱོངས་པའི་རྟགས་ནི༔ ཕྱིའི་སྣང་བ་ཐམས་ཅད་སེང་སེང་པོ་དང་༔ ཁྲོལ་ཁྲོལ་བ་འབྱུང་ངོ་༔ དེ་ལྟར་བྱུང་ན་འབྱོངས་པའི་རྟགས་སོ༔ དེ་ལྟར་མ་བྱུང་གི་བར་དུ་བསྐྱར་རོ༔ ཨྠིྀ༔ དེ་ནས་ནང་ཕུང་པོ་ལ་རྩལ་སྦྱངས་པས་འབྱོངས་པའི་རྟགས་ནི༔ ལུས་ཀྱི་ཤ་ཁོལ་ཚེར་འཕར་ཞིང་ཁྲལ་མ་ཁྲོལ་དུ་སོང་བ་དག་འབྱུང་ངོ་༔ དེ་ལྟར་བྱུང་ན་ནང་ཕུང་པོ་ལ་རྩལ་འབྱོངས་པའི་རྟགས་སོ༔ དེ་ལྟར་མ་བྱུང་གི་བར་དུ་བསྐྱར་རོ༔ ཨྠིྀ༔ དེ་ནས་གཉེན་བཙལ་འབྱོངས་པའི་རྟགས་ནི༔ ལུས་སྒྱིད་ལུག་ནས་མྱལ་མ་མྱོལ་དུ་འབྱུང་ངོ་༔ དེ་ལྟར་བྱུང་ན་འབྱོངས་པའི་རྟགས་སོ༔ དེ་ལྟར་མ་བྱུང་གི་བར་དུ་བསྐྱར་རོ༔ ཨྠིྀ༔ དེ་ནས་ལམ་དུ་གཞུག་པ་འབྱོངས་པའི་རྟགས་སུ་ཤེས་པ་བདེ་ལམ་པ་དང་འབོལ་ཤིག་པ་འབྱུང་ངོ་༔ དེ་བྱུང་ན་འབྱོངས་པའི་རྟགས་སོ༔ དེ་ལྟར་མ་བྱུང་གི་བར་དུ་བསྐྱར་རོ༔ ཨྠིྀ༔ དེ་ནས་ལུས་ཀྱིས་རྡོ་རྗེ་སྐྱིལ་ཀྲུང་འབྱོངས་པའི་རྟགས་སུ་ལུས་ཀྱི་ཤ་རྣམས་ན་བ་དང་༔ ཤག་ཤིག་ཏུ་སོང་བ་སྙམ་བྱེད་པ་འབྱུང་ངོ་༔ དེ་ལྟར་བྱུང་ན་འབྱོངས་པའི་རྟགས་སོ༔ དེ་ལྟར་མ་བྱུང་གི་བར་དུ་བསྐྱར་རོ༔ ཨྠིྀ༔ དེ་ནས་སེམས་ཀྱི་བྱུང་ས་བརྟགས་པས་འབྱོངས་པའི་རྟགས་ནི་སེམས་བྱུང་ས་མེད་པ་ཅིག་ཏུ་ཤེས་པ་བྱུང་ན་འབྱོངས་པའི་རྟགས་སོ༔ དེ་ལྟར་མ་བྱུང་གི་བར་དུ་བསྐྱར་རོ༔ ཨྠིྀ༔ དེ་ནས་སེམས་ཀྱི་གནས་ས་ལ་བརྟགས་པས་འབྱོངས་པའི་རྟགས་ནི༔ སེམས་འདི་གང་དུའང་གནས་ས་མེད་པར་ཤེས་བྱུང་ན་འབྱོངས་པའི་རྟགས་སོ༔ དེ་ལྟར་མ་བྱུང་གི་བར་དུ་བསྐྱར་རོ༔ ཨྠིྀ༔ དེ་ནས་སེམས་ཀྱི་འགྲོ་ས་ལ་བརྟགས་པས་སེམས་འདི་ལ་འགྲོ་ས་དང་བྲལ་བ་ཞིག་བྱུང་ན་འབྱོངས་པའི་རྟགས་སོ༔ དེ་ལྟར་མ་བྱུང་གི་བར་དུ་བསྐྱར་རོ༔ ཨྠིྀ༔ དེ་ནས་ནང་གི་ལུས་ངག་ཡིད་གསུམ་འཁོར་འདས་རུ་ཤན་ཕྱེད་པའི་རྟགས་ནི༔ ལུས་ངག་ཡིད་གསུམ་ལ་ཐ་མལ་གྱི་ཞེན་པ་འགགས་ན་རུ་ཤན་ཕྱེད་པའི་རྟགས་སོ༔ དེ་ལྟར་མ་བྱུང་གི་བར་དུ་བསྐྱར་རོ༔ ཨྠིྀ༔ དེ་ནས་ལུས་ངག་ཡིད་གསུམ་རྣལ་དུ་ཕེབས་པའི་རྟགས་ནི༔ ལུས་རྣལ་དུ་ཕེབས་པའི་རྟགས་སུ་མི་འགུལ་བར་སྡོད་པ་དང་༔ ངག་རྣལ་དུ་ཕེབས་པའི་རྟགས་སྨྲ་མི་འདོད་པ་དང་༔ ཡིད་རྣལ་དུ་ཕེབས་པས་འཇིག་རྟེན་གྱི་བྱ་བ་ལ་ཡིད་མི་འཇུག་པ་འབྱུང་ངོ་༔ དེ་ལྟར་མ་བྱུང་བར་དུ་བསྐྱར་རོ༔ ཨྠིྀ༔ དེ་ནས་ལུས་ངག་ཡིད་གསུམ་སོར་ཆུད་པའི་རྟགས་ནི༔ ལུས་ངག་ཡིད་གསུམ་དགེ་སྦྱོར་ལས་འབྲལ་མི་ཕོད་པ་འབྱུང་ངོ་༔ དེ་ལྟར་མ་བྱུང་གི་བར་དུ་བསྐྱར་རོ༔ ཨྠིྀ༔ དེ་ནས་ལུས་ངག་ཡིད་གསུམ་གྱི་བྱ་བ་ཐེངས་པའི་རྟགས་ནི༔ ལུས་ངག་ཡིད་གསུམ་བྱ་བ་གང་ལ་ཡང་འཇུག་སྙིང་མི་འདོད་པ་འབྱུང་ངོ་༔ དེ་ལྟར་མ་བྱུང་བར་དུ་བསྐྱར་རོ༔ ཨྠིྀ༔ དེ་ནས་ལུས་ངག་ཡིད་གསུམ་གྱི་གནད་གཟིར་བ་འབྱོངས་པའི་རྟགས་ནི༔ ལུས་ཀྱི་བཞུགས་སྟངས་ལ་མི་བདེ་བ་མེད་པ་དང་༔ ངག་ལྐུགས་པ་ལྟར་འགྲོ་བ་དང་༔ སེམས་གཏད་པའི་འབེན་ལ་རྟག་ཏུ་གནས་པ་བྱུང་ན་འབྱོངས་པའི་རྟགས་སོ༔ དེ་ལྟར་མ་བྱུང་གི་བར་དུ་བསྐྱར་རོ༔ ཨྠིྀ༔ དེ་ནས་གནད་རྣམ་པ་བཞི་འབྱོངས་པའི་རྟགས་ནི༔ དང་པོ་སྒོའི་གནད་འབྱོངས་པའི་རྟགས་སུ་ནི་མིག་ཡུལ་ལ་ཇི་ཙམ་གཏད་ཀྱང་ཚུགས་སོ༔ ཡུལ་གྱི་གནད་འབྱོངས་པའི་རྟགས་སུ་ཡུལ་ལ་གཏད་པ་ཙམ་གྱིས་ཡེ་ཤེས་འཆར་རོ༔ རླུང་གི་གནད་འབྱོངས་པའི་རྟགས་སུ་དབྱིངས་རིག་གཡོ་འགུལ་མེད་པར་སྡོད་པའོ༔ རིག་པའི་གནད་འབྱོངས་པའི་རྟགས་ནི༔ ལུ་གུ་རྒྱུད་འགུལ་འཕྲིག་མེད་པར་སྡོད་པའོ༔ དེ་མ་བྱུང་བར་དུ་བསྐྱར་རོ༔ ཨྠིྀ༔ དེ་མན་ཆད་ཀྱི་སྣང་བ་བཞིའི་རྟགས་ནི༔ ཁྲིད་ཀྱི་ཏི་ཀ་ན་གསལ་ལོ༔ ཉམས་སུ་ལོན་པའི་རྟགས་ཡིག་ཟུར་ཙམ་བཀོད་པ་རྫོགས་སོ༔ ཡེ་ཤེས་མཚོ་རྒྱལ་ཐུགས་ལ་ཆོངས༔ ལས་འཕྲོ་ཅན་དང་འཕྲད་པར་ཤོག༔ རྒྱ་རྒྱ་རྒྱ༔ ཨྠིྀ༔ ༄༅། །རིགས་ཀྱི་ཌཱཀྐི་ལྔ་ལ་ཕྱག་འཚལ་ལོ༔ སྙིང་ཐིག་གསང་བ་བླ་མེད་ལས༔ ཉམས་སུ་ལེན་པའི་གང་ཟག་གི༔ ཚད་ཀྱི་ཡི་གེ་ཅུང་ཟད་བྲི༔ ལས་ཅན་ཅིག་དང་འཕྲད་པར་ཤོག༔ ས་མ་ཡ༔ རྒྱ་རྒྱ་རྒྱ༔ དེ་ལ་དང་པོ་ལུས་ངག་ཡིད་གསུམ་འཁོར་འདས་རུ་ཤན་ཕྱེད་པའི་རྟགས་ནི༔ དེའི་རྟགས་རྣམས་རྫོགས་ནས་ཕྱི་མར་འདི་དང་འཕྲད་ནས་སངས་རྒྱ་བ་ལ་ཐེ་ཚོམ་མེད་དོ༔ ཨྠིྀ༔ ལུས་ངག་ཡིད་གསུམ་གནད་དུ་གཅུན་པའི་ཚད་ནི༔ འདི་ཡི་རྟགས་རྫོགས་ནས་རང་བཞིན་སྤྲུལ་སྐུའི་ཞིང་ཁམས་སུ་དབུགས་ཕྱུང་ནས་ལོ་ལྔ་བརྒྱ་ན་བར་དོ་མེད་པར་སངས་རྒྱ་བ་ཡིན་ནོ༔ ཨྠིྀ༔ ཉམས་གོང་འཕེལ་གྱི་ཚད་ནི༔ དེའི་རྟགས་རྫོགས་ནས་བར་དོ་དང་པོ་ལ་སངས་རྒྱ་བ་ཡིན་ནོ༔ ཨྠིྀ༔ དེ་ནས་རིག་པ་ཚད་ཕེབས་ཀྱི་སྣང་བའི་རྟགས་ནི༔ དེའི་རྟགས་རྫོགས་ནས་བར་དོ་མེད་པར་སངས་རྒྱའོ༔ ཨྠིྀ༔ དེ་ནས་ཆོས་ཉིད་ཟད་པའི་ཚད་ནི༔ དེའི་རྟགས་རྫོགས་ནས་ཕུང་པོ་ལྷག་མེད་དུ་སངས་རྒྱ་བ་ཡིན་ནོ༔ ཕྱིའི་ཚད་གདིང་བཞིའི་རྣལ་འབྱོར་རོ༔ ཨྠིྀ༔ དེ་ནས་ཕྱིའི་རྟགས་རྣམས་བཤད་དེ༔ འོད་ཚད་ལ་ཕེབས་པའི་རྟགས་སུ་འདས་པའི་དུས་སུ་འོད་འབྱུང་༔ ཐིག་ལེ་ཚད་ལ་ཕེབས་པའི་རྟགས་སུ༔ འདས་པའི་དུས་སུ་སྐུ་གདུང་རིང་བསྲེལ་འབྱུང་ངོ་༔ རླུང་ཚད་ལ་ཕེབས་པའི་རྟགས་སུ་འདས་པའི་དུས་སུ་སྒྲ་འབྱུང་ངོ་༔ དབྱིངས་ཚད་ལ་ཕེབས་པའི་རྟགས་སུ་འདས་པའི་དུས་སུ་ས་གཡོ་བ་འབྱུང་ངོ་༔ ཞིང་ཁམས་ཚད་ལ་ཕེབས་པའི་རྟགས་སུ་འདས་པའི་དུས་སུ་འཇའ་ཚོན་འབྱུང་ངོ་༔ སྐུ་ཚད་ལ་ཕེབས་པའི་རྟགས་སུ་སྐུ་འབྱུང་བ་ཡིན་ནོ༔ དེ་རྣམས་ཕྱིའི་རྟགས་སོ༔ ཉམས་སུ་ལེན་པ་རྣམས་ཀྱི་ཆེད་དུ་ཚད་ཀྱི་ཡི་གེ་ཟུར་ཙམ་བཀོད་པ་འདི་གང་ཟག་ལས་ཅན་ཅིག་དང་འཕྲད་པར་ཤོག༔ ས་མ་ཡ༔ ཨྠིྀ༔ རྫོགས་སོ༔ ༔

[edit]

This page is a cleaned copy of the following rywikitexts page, which stay unchanged:

Cleaning (21 November 2026): removed 1 running heads, 3 Word page fields. The «» marks are kept in the text: they enclose the small-print notes of the print, which are shown in small print with the marks hidden.

Part of the Longchenpa Collected Works (about this project).