ཚད་མ་མདོ་དང་སྡེ་བདུན་གྱི་དོན་གཏན་ལ་ཕབ་པའི་བསྟན་བཅོས་་་།

{{{1}}}

༄༅། །ཚད་མ་མདོ་དང་སྡེ་བདུན་གྱི་དོན་གཏན་ལ་ཕབ་པའི་བསྟན་བཅོས་རྗེ་བཙུན་འཇམ་པའི་དབྱངས་ཀྱི་དགོངས་རྒྱན་བཞུགས་སོ། །

རྗེ་བཙུན་བླ་མ་དམ་པའི་ཞབས་ལ་ཕྱག་འཚལ་ལོ། །ཕན་བཞེད་སྟོན་པའི་ཆུ་ཀླུང་མ་ལུས་པས། །ཚད་མར་བསྐྲུན་པའི་བདེ་གཤེགས་གངས་ཅན་མཚོ། །གདུང་བ་ཀུན་ལས་སྐྱོབ་པའི་འཇམ་པའི་དཔལ། །རབ་དཀར་རྒྱལ་བའི་སྤྱི་གཞིས་བདེ་ལེགས་མཛོད། །གཞན་དོན་ཁུར་གྱིས་རྔུལ་བའི་ཆུ་གཏེར་དུ། །ཚད་གཞུང་དྲི་བཟང་རྫོགས་པར་སྤྲོས་པ་ན། །ཕྱོགས་ཀྱི་གླང་ཆེན་ཕྱོགས་བཅུའི་འཇིག་རྟེན་དུ། །ཉི་བཞིན་བསྔགས་པའི་འོད་ཟེར་འབུམ་ཕྲག་འཛིན། །ཆོས་ཀྱིས་ཕས་རྒོལ་ཚར་བཅད་པའི། །རྒྱལ་རྔ་ལན་བརྒྱར་བརྡུངས་བ་དེའི། །གྲགས་པའི་ཆ་ནི་ད་ལྟ་ཡང་། །ཀུན་གྱི་རྣ་བས་བཅུད་དུ་ལེན། །ཤིང་རྟ་ཆེན་པོ་དེ་གཉིས་ཀྱིས། །སྲོལ་བཏོད་ལམ་ནས་མ་འཁྱོགས་པར། །རྣམ་དཔྱོད་གོམ་པ་འདོར་བྱེད་པ། །ཡོངས་ལའང་ཐབས་ཅིག་ཕྱག་འཚལ་ལོ། །ཀུན་གྱིས་ཀུན་རྨོངས་ལ་སྡང་བས། །འཇམ་མགོན་དྲིན་གྱིས་དྲིན་ཁོངས་ནས། །འཆད་ཚུལ་སྔོན་མེད་ཉི་མར་ཉི། །ངོ་མཚར་འོད་ཀྱི་པ་ཏྲ་འདོན། །འདིར་བཅོམ་ལྡན་འདས་འཇམ་དཔལ་གཞོན་ནུར་གྱུར་པས་མངོན་སུམ་དུ་རྗེས་སུ་བཟུང་བའི་སློབ་དཔོན་ཆེན་པོ་ཕྱོགས་ཀྱི་གླང་པོ་རང་དང་གཞན་གྱི་གྲུབ་པའི་མཐའ་རྒྱ་མཚོའི་ཕ་རོལ་ཏུ་བྱོན་པ་དེས་མཛད་པའི་ཚད་མའི་མདོ། རྟོག་གེ་པ་ཐམས་ཅད་ཀྱི་གཙུག་གི་ནོར་བུ་དཔལ་ཆོས་ཀྱི་གྲགས་པས་རབ་ཏུ་བྱེད་པ་སྡེ་བདུན་གྱིས་གསལ་བར་མཛད་པ་གསུང་རབ་ཀུན་ལ་ལྟ་བའི་མིག་གཅིག་པུ་རྣམ་པར་བཤད་པ་ལ། དོན་དམ་པའི་ཚད་མ་ལུས་དང་། ཀུན་ཏུ་ཐ་སྙད་པའི་ཚད་མ་ཡན་ལག་ཏུ་བསྟན་པ་གཉིས་ལས། དང་པོ་ལ། ཚད་མའི་མཚན་ཉིད་བཞག་ནས་བཅོམ་ལྡན་འདས་དེར་གྱུར་པ་བསྟན། ཕན་བཞེད་ནས་ལུགས་འབྱུང་སྐྱོབ་པ་ནས་ལུགས་བཟློག་གིས་དེ་རྒྱས་པར་བསྟན་པ་གཉིས་ལས། དང་པོ་ནི། རྒྱན་མཛད་པས། དང་པོར་བཅོམ་ལྡན་འདས་རྒྱུ་དང་འབྲས་བུ་ཕུན་སུམ་ཚོགས་པས་ཚད་མ་ཡང་དག་པ་ཉིད་དུ་བསྟོད་པ་མངོན་པར་བརྗོད་པ་ནི་བསྟན་བཅོས་ཀྱི་དོན་ཡིན་པའི་ཕྱིར་ཏེ། ཞེས་པས་སྔ་མ་ལུས་ཡིན་པར་དང་། རྣམ་པར་ངེས་པར། ཕན་པ་དང་མི་ཕན་པ་ཐོབ་པ་དང་སྤོང་བ་ནི་ངེས་པར་ཡང་དག་པའི་ཤེས་པ་སྔོན་དུ་འགྲོ་བ་ཅན་ཡིན་པས་ན་དེ་མི་མཁས་པ་རྣམས་ལ་བསྟན་པའི་དོན་དུ་འདི་ཙམ་མོ་ཞེས་པས་ཕྱི་མ་ཡན་ལག་ཏུ་བཞག་གོ །དེ་ལ་རྒྱུ་ཕུན་སུམ་ཚོགས་པ་ནི་སྙིང་རྗེ་དང་ཐབས། དེ་ལ་སྙིང་རྗེ་ནི། འགྲོ་ལ་ཕན་བཞེད་པ། ཞེས་པས་དང་། ཐབས་གོམས་པར་བྱ་བ་ནི། སྟོན་པ་ཞེས་པས་སོ། །འབྲས་བུ་ཕུན་སུམ་ཚོགས་པ་ནི་གཉིས་ཏེ། རང་དང་གཞན་གྱི་དོན་ཕུན་སུམ་ཚོགས་པའོ། །དང་པོ་ནི། བདེ་གཤེགས་དང་། ཕྱི་མ་སྐྱོབ་ལ། ཞེས་པས་བསྟན་ལ། བདེ་བར་གཤེགས་པ་ཡང་། རབ་ཏུ་མཛེས་པར་དང་། ཕྱིར་མི་ལྡོག་པ་དང་། ལྷག་མ་མེད་པའི་དོན་དུ་གཤེགས་པ་གསུམ་གྱིས་སོ། །དེ་ལྟ་བུའི་བཅོམ་ལྡན་འདས་དེ་ཚད་མར་གྱུར་པ་ཡིན་པས་དེ་ལ་ཕྱག་འཚལ་ལོ། །ཞེས་སོ། །འདིའི་ཚད་མར་གྱུར་པ་ཞེས་པས། ཚུ་རོལ་མཛེས་པ་བ་ལ་སོགས་པ་དང་། ཕན་བཞེད། ཅེས་པས། སེམས་པས་སྟོང་པའི་རིག་བྱེད་དང་། སྡོང་རིས་ལ་སོགས་པ་དང་། གྲངས་ཅན་གྱི་རྣལ་འབྱོར་པ་དང་། ཡང་དེ་དང་སྟོན་པས་དབང་ཕྱུག་དང་དང་པོའི་སྐྱེས་བུ་ལ་སོགས་པ། བདེ་གཤེགས་ཀྱི་ཉན་ཐོས། ལམ་སྟོན་པའི་མཚན་ཉིད་སྐྱོབ་པས་རང་སངས་རྒྱས་རྣམས་ཚད་མ་ཡིན་པ་བཀག་ཅེས་ཛ་མ་རིས་སོ། །ནས་ཚད་མ་བསྒྲུབ་ཕྱིར། ཞེས་པ་དགོས་འབྲེལ་དང་། ལྷག་མ་རྐང་པ་ཕྱེད་དང་གཉིས་ཀྱིས་རང་གི་གཞུང་ལུགས་བཏུས་པའི་རང་བཞིན་དུ་བསྟན་ནོ། །དེ་ལ་ཁ་ཅིག ཚད་མར་གྱུར་པའི་བཅོམ་ལྡན་འདས་ཅིའི་ཕྱིར་སྒྲུབ་པར་བྱེད། འདི་ལྟར་རིག་པར་བྱེད་དམ། དེ་ལས་སྐྱེས་པའི་ཤེས་པ་ལ་གནོད་པ་དང་བྲལ་བའི་ཕྱིར་ཚད་མ་ཡིན་ཏེ། མངོན་སུམ་དང་རྗེས་སུ་དཔག་པ་བཞིན་ནོ། །དེ་ལ་གནོད་པ་མེད་པའི་ཤེས་པ་ནི་ཚད་མའོ། །ཞེས་འདོད་པ་དགག་པར་བཞེད་ནས། ཚད་མ་བསླུ་མེད་ཅན་ཤེས་པ། །ཞེས་བསླུ་བ་མེད་པ་ཅན་གྱི་ཤེས་པ་མཚན་ཉིད་དང་། ཀུན་ཏུ་ཐ་སྙད་པའི་ཚད་མ་མཚོན་བྱར་བཤད་དོ། །དེའི་ཟུར་གྱིས་བསླུ་བ་མེད་པ་ཡང་གང་གིས་ཡིན་ཞེ་ན། དོན་བྱེད་ནུས་པར་གནས་པ་ནི། མི་བསླུ་དོན་བྱེད་ནུས་པའི་དངོས་པོ་རབ་ཏུ་བསྟན་པ་ཐོབ་པར་བྱེད་པ་ལ་བརྗོད་ལ། དེ་ཡང་འཇུག་པར་བྱེད་པ་ལ་དང་། དེ་ཡང་འཇུག་པའི་ཡུལ་རབ་ཏུ་སྟོན་པར་བྱེད་པ་ལ་བརྗོད་པ་ཡིན་ལ། གང་གི་ཚེ་འདིས་འཇུག་པའི་ཡུལ་རབ་ཏུ་བསྟན་པ་དེའི་ཚེ། སྐྱེས་བུ་རབ་ཏུ་འཇུག་ཅིང་དེ་ལས་དོན་ཐོབ་པའི་ཕྱིར་ཚད་མའི་བྱ་བ་ཡོངས་སུ་རྫོགས་པ་ཡིན་ཏེ། རྣམ་ངེས་ལས། འདི་དག་གི་དོན་ཡོངས་སུ་དཔྱད་ནས་འཇུག་པ་ན་དོན་བྱ་བ་ལ་བསླུ་བ་མེད་པའི་ཕྱིར་རོ། །ཞེས་དང་། ཆོས་མཆོག་གིས། ཚད་མ་འཇུག་ཡུལ་ངེས་པའི་ཐོབ་པ་སྒྲུབ་པར་བྱེད་པ་ཡིན་པར་བརྗོད། ཐོབ་པ་འཇུག་པ་སྔོན་འགྲོ་ཅན་དེ་འཇུག་པའི་གཞི་ནི་ཤེས་པ་ཡིན། ཡུལ་རབ་སྟོན་པས་གཙོ་བོ་ཡིན་ཕྱིར་ངེས་འབྱེད་འཇུག་པར་བྱེད། དེ་ཕྱིར་ངེས་པའི་ཐ་དད་དངོས་ངེས་དེ་ཡིན་དེ་ཡང་ཐོབ་པར་ནུས། ཞེས་སོ། །དེ་བས་ན་ཤེས་པས་གཞལ་བ་གང་ཐོབ་པར་བྱེད་པ་ལ་བསླུ་བ་མེད་པའི་ཕྱིར། དེ་ཐོབ་པའི་ཡན་ལག་ཏུ་གྱུར་པའི་འཇལ་བར་བྱེད་པ་ཉིད་ལ་ཚད་མ་ཞེས་བཞག་གོ །ཇི་ལྟར་འདོད་པ་དེ་ལྟ་བུའི་ངོ་བོའི་མི་བསླུ་བ་ནི་ཡུལ་གྱི་ཆོས་དང་། དེའི་དེ་ལྟ་བུར་གྱུར་པ་རྟོག་པ་ན་ཤེས་པའི་མི་བསླུ་བ་ནི་ཡུལ་ཅན་གྱི་ཆོས་ཡིན་པས་ཕྱི་མ་ཉིད་ཚད་མར་འཇོག་པའི་ཕྱིར་ཤེས་པ་སྨོས་སོ། །ཚད་མ་ཞེས་པའི་སྒྲས་རྣམ་གྲངས་སུ་མ་རྟོག་པའི་ཡུལ་ཅན་ཞེས་སམ། མ་གཟུང་བ་འཛིན་པ་ཞེས་པ་བསྟན་ཏེ། སྔོན་གྱི་ཤེས་པ་གཞན་གྱིས་ངེས་པར་མ་རྟོགས་པ་དེ་འཛིན་པ་ནི་མ་གཟུང་བ་འཛིན་པའོ། །དེ་ཡང་ཛེ་ཏཱ་རིས། བསླུ་བ་མེད་པ་ཅན་སྨོས་པས་ནི། སླུ་བར་བྱེད་པའི་སྨིག་རྒྱུ་ལ་ཆུར་འཛིན་པ་ལ་སོགས་པ་བསལ་ལོ། །ཤེས་པ་སྨོས་པས་ནི། ཤེས་པ་མ་ཡིན་པ་དབང་པོ་ལ་སོགས་པ་བསལ་ལོ། །མ་གཟུང་བ་འཛིན་པ་སྨོས་པས་ནི། གཟུང་བར་འཛིན་པའི་དྲན་པ་བསལ་ལོ། །ཞེས་གསུངས་སོ། །གལ་ཏེ་དོན་བྱེད་པ་མེད་པ་ལ་མི་བསླུ་བ་མེད་པ་དེའི་ཚེ། སྒྲའི་ཤེས་པ་དང་ཁྲ་བོ་མཐོང་བ་ནི་ཚད་མར་མི་འགྱུར་ཏེ། ཐ་དད་པའི་དོན་བྱེད་པ་མེད་པའི་ཕྱིར་མཚན་ཉིད་མ་ཁྱབ་པའི་སྐྱོན་ཡོད་དོ་སྙམ་ན། སྒྲ་ལས་བྱུང་བ་ཡང་། མངོན་པར་འདོད་པ་སྟོན་ཕྱིར་རོ། །སྒྲའི་ཡུལ་ཅན་གྱི་ཤེས་པ་ནི་སྒྲ་ལས་བྱུང་བ་ཡིན་ལ། ཡང་གི་སྒྲས་ནི་ཁྲ་བོ་ལ་སོགས་པ་མཐོང་བ་ཡང་གཟུང་ངོ་། །དེས་སྒྲའི་ཤེས་པ་ནི་ཐ་མི་དད་པའི་དོན་བྱེད་པ་དང་ཕྲད་པར་བྱེད་པས་ཚད་མ་སྟེ། འདི་ལྟར་དབྱངས་ཐོས་པ་ཉིད་དོན་བྱེད་པར་འདོད་པའོ། །ཁྲ་བོ་ལ་སོགས་པ་མཐོང་བ་ཡང་ཁོང་དུ་ཆུད་པའི་དོན་བྱེད་དོ། །དོན་བྱེད་པར་གནས་པ་ཁྱད་པར་མེད་པར་གཟུང་བས་ནི་བསླུ་བ་མེད་པ་ཞེས་བསྟན་པ་ཡིན་ནོ། །ཐོས་པའི་བློ་ནི་ཚད་མ་མིན། །ཅིག་ཤོས་དང་ནི་འབྲེལ་མེད་ཕྱིར། །ཞེས་གཞན་སྡེ་འདོད་པ་དེ་བསལ་བའི་ཕྱིར། སྨྲ་བ་པོ་ཡི་བྱེད་པའི་ཡུལ། །སོགས་ཀྱིས་སྐྱེས་བུས་མ་བྱས་པའི་སྒྲ་ནི་མ་ཡིན་ནོ། །སྐྱེས་བུས་བྱས་པ་ལ་སྨྲ་བ་པོའི་བྱེད་པ་ནི་བརྗོད་འདོད་ཡིན་ལ། དེའི་ཡུལ་གྱི་དོན་གང་ཉན་པ་པོའི་བློ་ལ་གསལ་བ་དེ་ཉིད་ལ་སྒྲ་ཚད་མ་ཡིན་ཏེ། སྒྲའི་བྱེད་པ་ནི་དེ་ཉིད་ལ་ཡིན་ནོ། །དོན་གྱི་དེ་ཉིད་རྒྱུ་ཅན་མིན། །སྨྲ་བ་པོ་ཐམས་ཅད་རིག་པ་མ་ཡིན་ན་སྒྲ་འཆད་པ་པོའི་བྱེད་པའི་ཡུལ་ཉིད་ལ་ཚད་མ་ཡིན་གྱི། དོན་གྱི་དེ་ཁོ་ན་ཉིད་ཀྱི་རྒྱུ་ཅན་ནི་མ་ཡིན་ནོ་ཞེས་མཚན་ཉིད་སྐྱོན་མེད་པར་བསྟན་ནས། གཟུང་བ་འཛིན་ཕྱིར་ཀུན་རྫོབ་ནི། །མི་འདོད། དེ་ལྟར་བཤད་པ་ནི་ཀུན་རྫོབ་སྟེ། དོན་དམ་པའི་ཚད་མ་ལ་ལྟས་ནས་ཚད་མར་མི་འདོད་དེ། གཟུང་བ་འཛིན་པའི་ཕྱིར་རོ། །དེ་གཟུང་བ་འཛིན་པ་ཡིན་པར་རྒྱན་ལས། ཀུན་རྫོབ་པའི་ཤེས་པ་ནི་མ་ཤེས་པའི་དོན་གསལ་བར་བྱེད་པ་མ་ཡིན་ནོ། །དེས་ནི་མ་ཤེས་པའི་དོན་འགར་ཡང་གསལ་བ་མ་ཡིན་ཏེ། སོ་སོར་གཟུང་བའི་གཟུགས་ལ་སོགས་པ་ཉིད་རྣམ་པར་རྟོག་པའི་ཕྱིར་རོ། །ཞེས་དང་། དོན་དམ་པ་ལ་བལྟོས་ཏེ་འཁྲུལ་པ་ཡིན་པར། དེར་དོན་དམ་པར་ཐམས་ཅད་མཁྱེན་པའི་ཡེ་ཤེས་ཉིད་ཚད་མ་ཡིན་གྱི། གཞན་ནི་མ་ཡིན་ནོ་ཞེས་བྱ་བ་ནི་དོན་དམ་པའོ། །གཞན་ནི་ཚད་མ་ཉིད་མིན་ཏེ། ཤེས་བྱ་ཁྱབ་པ་མེད་པའི་ཕྱིར། མ་ཁྱབ་པས་ནི་འབྲས་བུ་ལ་སོགས་པའི་འབྲེལ་བ་འཛིན་པ་མ་ཡིན། རྒྱུ་དང་འབྲས་བུའི་དངོས་པོ་འདས་པ་དང་མ་འོངས་པ་དང་ད་ལྟར་བྱུང་བའི་དུས་དང་ཡུལ་ཁྱད་པར་ལྷན་ཅིག་སྤྱོད་པའི་རང་བཞིན་ཐམས་ཅད་མཁྱེན་པ་མ་ཡིན་པའི་ཡུལ་མ་ཡིན་ཏེ། མངོན་སུམ་ནི་ད་ལྟར་ཉེ་བ་ཙམ་འཛིན་པའི་ཕྱིར་དང་། རྗེས་སུ་དཔག་པར་ཡང་དེར་མི་འཇུག་པའི་ཕྱིར་རོ། །ཞེས་དང་། ཆོས་མཆོག་གིས་འཐད་ལྡན་དུ། གལ་ཏེ་ཐམས་ཅད་མཁྱེན་པའི་མཁྱེན་པ་ལ་བལྟོས་ནས་ཤེས་པ་འདི་ཐམས་ཅད་བསླུ་བ་ཡིན་ལ། དེ་ལྟར་ཡང་འཁོར་བ་འདི་ན་ཐར་པའི་སྔ་རོལ་དུ་བྱུང་བའི་སྐྱེས་བོས་བྱས་པའི་ཐ་སྙད་གང་ཡིན་པ་དེ་ལ་མི་བསླུ་བ་དེ་ལ་བལྟོས་ནས་ཚད་མ་ཡིན་གྱི་ཞེས་གསུངས་ལ། བློ་ནི་ཚད་མ་ཉིད། བླང་དང་དོར་བྱའི་དངོས་པོ་ནི། །འཇུག་ལ་དེ་གཙོ་ཡིན་ཕྱིར་དང་། །ཐ་སྙད་དུ་བློ་གཉིས་པོ་ནི་བླང་བ་དང་དོར་བའི་ཡུལ་ཉེ་བར་སྟོན་པས་ན་དེ་གཉིས་སྐྱེས་བུའི་དོན་གྱི་གཙོ་བོ་ཡིན་པས་ཚད་མར་བཞག་གོ །བླང་བ་དང་དོར་བར་བྱ་བ་ནི་འགོག་བདེན་དང་སྡུག་བསྔལ་བདེན་པ། དེའི་དངོས་པོ་ནི་དེ་ཐོབ་བྱེད་ཀྱི་ཐབས་ཏེ། རྒྱུ་ཀུན་འབྱུང་དང་ལམ་གྱི་བདེན་པའོ། །དེ་ལྟར་ཚད་མ་ལ་དོན་དང་ཐ་སྙད་གཉིས་སུ་འབྱེད་པ་དགོས་པ་ཅིའི་ཕྱིར་ཡིན་ཞེ་ན། ཡུལ་རྣམ་ཅན་ནི་ཐ་དད་པས། བློ་ཡི་རྟོག་པ་ཐ་དད་ཕྱིར། །འདི་ཡང་གྲུབ་པའི་མཐའ་ལས། དངོས་ཀུན་ཡང་དག་རྫུན་པ་མཐོང་བ་ཡིས། །དངོས་རྙེད་ངོ་བོ་གཉིས་ནི་འཛིན་པར་འགྱུར། །ཡང་དག་མཐོང་ཡུལ་གང་སྟེ་དེ་ཉིད་དེ། །མཐོང་བ་རྫུན་པ་ཀུན་རྫོབ་བདེན་པར་གསུངས། །ཞེས་གསུངས་པའི་ཡུལ་གཉིས་དང་ཡུལ་ཅན་གཉིས་སོ། །དེ་ཡོད་ན་འདི་ཡོད་ཕྱིར་རོ། །ཀུན་ཏུ་ཐ་སྙད་པའི་ཚད་མ་ཐབས། དོན་དམ་པའི་ཚད་མ་ཐབས་བྱུང་ཡིན་པར་སྟོན་པའི་ཕྱིར་གསུངས་སོ། །དེ་ཡང་འཐད་ལྡན་དུ། བསམ་པ་ནི་འདི་ཡིན་ཏེ། དོན་དམ་པའི་ཚད་མ་ཡང་རྒྱུ་མེད་པར་ནི་མ་ཡིན་ལ། རྒྱུ་ཡང་གོམས་པ་ལས་གཞན་མ་ཡིན་ནོ། །གོམས་པའི་ཡུལ་ཡང་ཀུན་ཏུ་ཐ་སྙད་པའི་ཚད་མས་དཔྱད་པའི་དོན་ཡིན་པའི་ཕྱིར། ཀུན་ཏུ་ཐ་སྙད་པའི་ཚད་མ་དེ་ཡང་དག་པར་རྟོགས་པ་ནི་དོན་དམ་པའི་ཤེས་པའི་རྒྱུར་འགྱུར་རོ། །དེས་ན་དེའི་ཡུལ་ཅན་གྱི་འབད་པ་ནི་དོན་དམ་པའི་ཡུལ་ཅན་ཉིད་ཡིན་ནོ། །ཞེས་པས་སོ། །རང་ལས་རང་གི་ངོ་བོ་རྟོགས། ཐ་སྙད་ལས་ནི་ཚད་མ་ཉིད་དོན་དམ་པའི་ཚད་མ་ནི་གཞན་གྱི་རྐྱེན་གྱིས་རྟོགས་པར་བྱ་བ་མ་ཡིན་ཏེ། སོ་སོ་རང་རིག་པའི་ཡེ་ཤེས་ཀྱི་སྤྱོད་ཡུལ་ཡིན་པས་སོ། །དེ་ཡང་། དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་འདོད། །ཅེས་སོ། །ཀུན་ཏུ་ཐ་སྙད་པའི་ཚད་མ་ནི་ཐ་སྙད་ཀྱི་ཡུལ་དཔྱད་ནས་དོན་ཐོབ་པར་བྱེད་པས་ཐ་སྙད་དུ་ཚད་མར་བཞག་པ་ཡིན་ནོ། །དེ་ལྟར་ཡང་ཛ་མ་རིས་རྒྱན་གྱི་འགྲེལ་བཤད་དུ། སྔར་གྱི་རང་ལས་རང་གི་ངོ་བོ་རྟོགས་ཞེས་པས་དོན་དམ་པའི་ཚད་མ་བསྟན་ནས། ཐ་སྙད་ལས་ནི་ཚད་མ་ཉིད། །ཅེས་ཐ་སྙད་པའི་ཚད་མ་སྟོན་པས་ན། དོན་དམ་པར་ཇི་སྐད་བཤད་པ་རང་རིག་པ་གཅིག་ཉིད་ཚད་མ་ཡིན་གྱི་ཡུལ་གཞན་དང་ལྡན་པ་ནི་མ་ཡིན་ནོ། །ཞེས་གསུངས་སོ། །ཡང་དེར་དེ་ལྟར་རང་རིག་པ་ཉིད་དོན་དམ་པའི་ཚད་མ་ཡིན་ལ། གཞན་ནི་ཀུན་རྫོབ་པ་ཉིད་ཡིན་པ་དེ་ལྟ་ན་ཡང་ཀུན་རྫོབ་ལ་བརྟེན་ནས་མཚན་ཉིད་རྒྱས་པར་བསྟན་ཅིང་། འཁོར་བ་དང་མྱ་ངན་ལས་འདས་པའི་རྣམ་པར་གཞག་པ་ཡང་ཆ་ཙམ་བསྟན་པ་ཡིན་ནོ། །གང་དག་ཚད་མ་དང་། ཅིག་ཤོས་ཀྱི་རྣམ་པར་གཞག་པ་དེ་ཁོ་ན་ཉིད་ཡིན་པར་སེམས་ཞིང་། ཐ་སྙད་ལས་ནི་ཞེས་བྱ་བ་ཡང་ཕྱིས་ཀྱི་དོན་བྱེད་པའི་ཤེས་པས་སོ། །ཞེས་འཆད་པར་བྱེད་པ་དེ་དག་ལ་རིགས་པ་དང་འགལ་བ་ནི་རེ་ཞིག་བསྟན་པ་ཡིན་ནོ། །ཞེས་དང་། ཡང་དེར། གྲུབ་པའི་མཐའ་སྨྲ་བས་ནི། སངས་རྒྱས་རྣམས་ཀྱི་ཆོས་བསྟན་པ། །བདེན་པ་གཉིས་ལ་ཡང་དག་བསྟན། །ཞེས་པའི་བསམ་པ་ལ་བལྟོས་ནས། ཐ་སྙད་ལས་ནི་ཚད་མ་ཉིད། །ཅེས་ཀྱང་གསུངས་སོ། །དེ་ལྟ་བུའི་ཚད་མ་རྣམ་པ་གཉིས་རྣམ་ངེས་སུ་ཡང་། གཞན་བག་ཆགས་བསྟན་པའི་ཕྱིར་འཁོར་བ་ཇི་སྲིད་པར་མི་འབྲལ་བར་རྗེས་སུ་འབྲེལ་བ་ནི་ཐ་སྙད་ལ་མི་བསླུ་བ་ལ་བལྟོས་ནས་འདིར་ཚད་མ་ཡིན་ནོ། །འདིར་ནི་ཀུན་ཏུ་ཐ་སྙད་པའི་ཚད་མའི་རང་བཞིན་བརྗོད་པ་ཡིན་ཏེ། འདི་ལ་ཡང་ཕ་རོལ་རྨོངས་པ་འཇིག་རྟེན་བསླུ་བར་བྱེད་པའི་ཕྱིར་རོ། །བསམ་པ་ལས་བྱུང་བ་ཉིད་ཀྱི་ཤེས་རབ་གོམས་པར་བྱས་པས་རྣམ་པར་འཁྲུལ་པས་དབེན་ཞིང་དྲི་མ་མེད་ལ་ལྡོག་པ་མེད་པ་དོན་དམ་པའི་ཚད་མ་མངོན་དུ་བྱེད་དོ། །དེ་ཡང་ཆ་ཙམ་ཞིག་བསྟན་པ་ཡིན་ནོ། །ཞེས་པས་སོ། །འོ་ན་ཐ་སྙད་ལས་ཚད་མའི་རང་བཞིན་རྟོགས་པ་ཡིན་ན། ཚད་མའི་མཚན་ཉིད་ཀྱི་བསྟན་བཅོས་བསྟན་པ་དོན་མེད་དོ་ཞེ་ན། ཐ་སྙད་པ་དག་ནི་ཐ་སྙད་ལ་ཡང་ལོག་པར་རྟོག་པས་རྨོངས་པ་དེ་བཟློག་པའི་ཕྱིར་བསྟན་བཅོས་བཤད་དེ། དེ་ཡང་རྒྱན་ལས། བསྟན་བཅོས་རྨོངས་པ་ཟློག་བྱེད་ཡིན། །སྔ་མ་ཕྱི་མའི་མི་དྲན་པ། །བསྟན་བཅོས་དེ་ཡིས་ཟློག་པར་བྱེད། །དེ་ཉིད་ཀྱི་ཕྱིར་ཐམས་ཅད་མཁྱེན་པས་གསུངས་པའི་བསྟན་བཅོས་ཀྱིས་རྨོངས་པ་ཟློག་པར་བྱེད་ཀྱི་གཞན་གྱིས་ནི་མ་ཡིན་ནོ། །ཞེས་རྣམ་པ་ཐམས་ཅད་མཁྱེན་པའི་བཀའ་ཉིད་ཚད་མ་ཡིན་པའི་ཕྱིར། ཞེས་གསུངས་སོ། །མདོར་ཡིད་ཆེས་ཚིག་ནི་མི་བསླུ་བ། ཞེས་དང་། ཉིད་ཀྱི་རྣམ་བཤད་ལས་ཀྱང་། ཡང་ན་རྣམ་པ་གཞན་གྱིས་ཉེས་པ་ཟད་པའི་ཚིག་མི་བསླུ་བ་ཡིན་པའི་ཕྱིར་རྗེས་སུ་དཔག་པ་ཉིད་དུ་བརྗོད་པར་བྱ་སྟེ། བླང་དང་དོར་བྱའི་དེ་ཉིད་ནི། །ཞེས་གསུངས་པས། སངས་རྒྱས་ཀྱི་གསུང་དང་། དེའི་ལུང་ཐམས་ཅད་ཚད་མ་ཡིན་པར་བསྒྲུབས་སོ། །མ་ཤེས་དོན་གྱི་གསལ་བྱེད་ཀྱང་། །འདི་ལ་རྒྱན་དུ། འདིས་མ་ཤེས་པའི་དོན་གསལ་བར་བྱེད་པས་ན་གསལ་བྱེད་དེ། མ་ཤེས་པའི་དོན་གསལ་བར་བྱེད་པའི་ཤེས་པ་ཚད་མ་ཡིན་ནོ། །ཀུན་རྫོབ་པའི་ཤེས་པ་ནི་མ་ཤེས་པའི་དོན་གསལ་བར་བྱེད་པ་མ་ཡིན་ནོ། །ཞེས་དང་། མ་ཤེས་པའི་དོན་སྨོས་པས་ནི་གཟུང་བ་འཛིན་པའི་ཤེས་པ་སྤོང་བར་ནུས་ཀྱི་མི་བསླུ་སྨོས་པས་ནི་མ་ཡིན་ཏེ། མི་བསླུ་བ་ཡིན་ཡང་ཀུན་རྫོབ་ཏུ་ཡོད་པ་དོན་དུ་མ་གྲུབ་པའི་ཕྱིར་རོ། །འོ་ན་ཇི་ལྟར་ན་དོན་ཉིད་རྟོགས་ཞེ་ན། ངེས་པར་རྟོགས་པ་ལས་སོ། །ཞེས་རྟོགས་པར་བྱའོ། །ཡང་ན་འདིར་དོན་གྱི་སྒྲས་ནི་དོན་དམ་པ་བརྗོད་པ་ཡིན་ཏེ། མ་ཤེས་དོན་གྱིས་གསལ་བྱེད་ཅེས་བྱ་བ་ནི། དོན་དམ་པ་གསལ་བྱེད་ཅེས་བྱ་བའི་དོན་ཏོ། །དོན་དམ་པར་གཉིས་སུ་མེད་པའི་རང་བཞིན་ཉིད་ཡིན་པས་དེ་གསལ་བར་བྱེད་པ་ཉིད་ཚད་མ་ཡིན་ནོ། །དེ་ལྟར་ཡང་རང་ལས་རང་གི་ངོ་བོ་རྟོགས། ཞེས་བསྟན་པ་ཡིན་ནོ། །ཐ་སྙད་ལས་ནི་ཚད་མ་ཉིད། །ཅེས་ཀྱང་བཤད་དོ། །དེ་ལས་འདི་ནི་དོན་དམ་པའི་ཚད་མའི་མཚན་ཉིད་ཡིན་ལ། སྔ་མ་ནི་ཐ་སྙད་པ་ཡིན་ནོ། །ཞེས་གསུངས། མ་ཤེས་པའི་དོན་གསལ་བྱེད་ནི་དོན་དམ་པའི་ཚད་མའི་མཚན་ཉིད་དོ། །གལ་ཏེ་མ་གཟུང་བའི་དོན་གསལ་བར་བྱེད་པས་ཚད་མ་ཡིན་ན་སྤྱིའི་དོན་ཡང་དང་པོར་བྱུང་བ་རང་གི་མཚན་ཉིད་ཤེས་པས་མ་ཤེས་པ། དེའི་འོག་ཏུ་བྱུང་བས་གསལ་བ་ཡིན་ལ། དེ་བཞིན་དུ་འབྲེལ་པ་ལ་སོགས་པ་ལ་ཡང་ཤེས་པའི་ཕྱིར་དེ་ཡང་ཚད་མར་ཐལ་བར་འགྱུར་རོ་ཞེ་ན། རང་གི་ངོ་བོ་རྟོགས་འོག་ཏུ། །སྤྱི་ཡི་རྣམ་པར་ཤེས་པ་ཐོབ། །སྤྱི་ནི་དོན་བྱེད་ཅུང་ཟད་ཀྱང་མི་ནུས་ཏེ། རང་གི་མཚན་ཉིད་རྟོགས་པའི་འོག་ཏུ་དེའི་མཐུ་ལས་སྐྱེས་པ་རྣམ་པར་རྟོག་པ་ཅན་གྱི་རྣམ་པར་ཤེས་པའི་གཟུང་བྱ་ཡིན་པས། དཔེར་ན་སྔོན་པོ་མཐོང་ནས་སྔོན་པོའོ་སྙམ་པའི་རྣམ་པར་ཤེས་པ་ལ་སྣང་བ་བཞིན་ཏེ། སྔོན་པོ་རང་གི་མཚན་ཉིད་ལྟ་བུས་བསྒྲུབས་པར་བྱ་བའི་དོན་བྱ་བ་བྱེད་པ་ཡིན་ལ། དེ་ཡང་དེའི་བདག་ཉིད་དུ་མངོན་སུམ་གྱིས་མཐོང་བ་ཁོ་ན་ཉིད་ཡིན་ནོ། །དེས་རང་གིས་མཚན་ཉིད་གཟུང་བའི་འོག་ཏུ་འབྱུང་བ་སྔོན་པོ་རྣམ་པར་རྟོག་པའི་ཡུལ་གྱིས་ནི་སྔོན་པོའི་དོན་བསྒྲུབ་པར་བྱ་བའི་དོན་བྱ་བ་སྒྲུབ་པར་མི་བྱེད་དེ། དེ་ལྟ་བས་ན་དོན་མ་རྟོགས་པའི་ཡུལ་ཅན་ཚད་མ་ཡིན་ཞེས་བྱ་བ་ཡང་། རང་གི་མཚན་ཉིད་མི་ཤེས་པ། །ཤེས་པ་གང་ཡིན་ཞེས་དགོངས་ཕྱིར། །ཞེས་ཁྱད་པར་དུ་བྱས་སོ། །རང་གི་མཚན་ཉིད་རྟོགས་ནས་དེའི་མཐུ་ལས་སྐྱེས་པ་ཅན་རྣམ་པར་རྟོག་པ་དེ་དང་མཐུན་པར་བྱེད་པ་ནི། བྱ་བའི་སྒོ་ནས་དེའི་ཡུལ་ཅན་ཡིན་པའི་ཕྱིར་དྲན་པ་ཁོ་ན་ཡིན་གྱི་ཚད་མ་ནི་མ་ཡིན་ཏེ། དངོས་པོའི་ངོ་བོ་མ་རྟོགས་པ་རྟོག་པ་མེད་པའི་ཕྱིར་རོ། །ཚད་མ་རྣམ་པར་བཞག་པ་ནི་དངོས་པོ་ལ་བརྟེན་པ་ཅན་ཉིད་ཡིན་པའི་ཕྱིར་རོ། །འདི་ནི་ཀུན་ཏུ་ཐ་སྙད་པའི་ཚེ་མ་རྟོགས་པའི་ཡུལ་ཅན་ཞེས་སྒྲས་བཤད་པས་དེའི་དོགས་གཅོད་དུ་འགྱུར་བ་ཡིན་ནོ། །དོན་དམ་པ་ལ་ནི་གཟུང་བ་དང་འཛིན་པ་དང་བྲལ་བས་རང་རིག་པ་ཉིད་ཡིན་ཏེ། རང་གི་མཚན་ཉིད་དཔྱད་ཕྱིར་རོ། །རང་གི་མཚན་ཉིད་དཔྱད་ན་གཟུང་བ་དང་འཛིན་པའི་དངོས་པོ་ཐམས་ཅད་ཉམས་པར་འགྱུར་བས་གཉིས་སུ་མེད་པའོ་ཞེས་ངེས་པར་འགྱུར་བས་སོ། །དེ་ལྡན་བཅོམ་ལྡན་ཚད་མ་ཉིད། །ཀུན་རྫོབ་དང་དོན་དམ་པའི་ཚད་མའི་མཚན་ཉིད་རྣམ་པར་གཞག་པའི་མཚན་ཉིད་ཕྱི་མ་དེ་དང་ལྡན་པས་སམ། སྔ་མ་དང་འདྲ་བས་ཀྱང་བཅོམ་ལྡན་འདས་ཚད་མར་བཞག་གོ །འདི་ལ་ལྷ་དབང་བློས། ཚད་མར་གྱུར་པ་ཞེས་བྱ་བ་ནི་ཚད་མ་འཁྲུངས་པས་སོ། །ཚད་མ་དང་འདྲ་བས་ཚད་མ་སྟེ་བཅོམ་ལྡན་འདས་སོ། །ཞེས་གསུངས་པ་ལ་འཁྲུལ་ནས། བཅོམ་ལྡན་འདས་སྐྱེས་བུ་ཚད་མ་ཡིན་གྱིས་ཚད་མ་ནི་མ་ཡིན་ནོ་སྙམ་ནས་ཕལ་ཆེར་མུན་པར་ཚུད་དོ། སྨྲ་བ་ཆེན་པོ་དེ་དེ་ལྟར་བཞེད་པ་མ་ཡིན་པར། དེའི་འགྲེལ་པའི་བཤད་སྦྱར་དུ་ཤཱཀྱ་བློས། གལ་ཏེ་བསྒོམས་པའི་སྟོབས་ལས་གྲུབ་པ་དྲི་མ་མེད་པ་རྣམ་པར་མི་རྟོག་པ་འཁྲུལ་པ་མེད་པ་ཡེ་ཤེས་ཀྱི་བདག་ཉིད་ཅན་ཡིན་པའི་ཕྱིར། བཅོམ་ལྡན་འདས་ནི་ཇི་སྐད་དུ་བཤད་པའི་ཚད་མའི་རང་བཞིན་ཅན་དུ་བཞུགས་པ་ཉིད་ཡིན་ན་ཉེ་བར་བཏགས་པ་ལ་བརྟེན་པས་ཅི་ཞིག་བྱ་ཞེ་ན། འདི་ལ་སྐྱོན་ཡོད་པ་མ་ཡིན་ཏེ་རྟོག་པ་དང་བཅས་པའི་ཤེས་པའི་གནས་སྐབས་ལ་དགོངས་ནས་བརྗོད་པའི་ཕྱིར་རོ་ཞེས་བྱ་བ་ནི་གཞན་དག་གི་ཡིན་ནོ། །འདིར་གལ་ཏེ་བཅོམ་ལྡན་འདས་ནི་ཇི་སྐད་དུ་བཤད་པའི་ཚད་མའི་བདག་ཉིད་ཅན་ཡིན་ན། དེ་ལྟ་ན་ཡང་དེ་ལྟར་རབ་ཏུ་གྲགས་པ་ཡིན་ནོ། །དེ་བས་ཀུན་ཏུ་ཐ་སྙད་དུ་བྱེད་པའི་ཚད་མས་དཔེར་མཛད་པ་ཡིན་ནོ། །ཞེས་བྱ་བ་ནི་རིགས་པ་ཡིན་ནོ། །ཞེས་གསུངས་ལ། རྣམ་འགྲེལ་དེ་ཉིད་དུ་ཡང་། གང་ཕྱིར་བཅོམ་ལྡན་འདས་ཚད་མ་ཉིད་དུ་བཞུགས་པ་དང་དེའི་སྒྲུབ་པར་བྱེད་པ་ཉིད་འཆད་པར་འགྱུར་རོ། །དེའི་སྒྲུབ་པར་བྱེད་པ་ནན་ཏན་དུ་བྱས་པ་ལས་ཚད་མ་ཉིད་ཡོད་པར་འགྱུར་བ་དེའི་ཕྱིར་བཅོམ་ལྡན་འདས་ནི་ཚད་མ་ཉིད་ཡིན་པར་རིགས་སོ། །ཞེས་དང་། མ་སྐྱེས་པ་ནི་བཟློག་དོན་དུ། །གྱུར་པ་ཉིད་གསུངས་དེ་ཡི་ཕྱིར། །སྒྲུབ་བྱེད་ལ་བལྟོས་ཚད་ཡིན་རིགས། །ཞེས་པས་ཀྱང་ངོ་། །རྒྱན་དུ་ཡང་། དེ་བཞིན་གཤེགས་པ་བཅོམ་ལྡན་འདས་ནི་དེ་དང་ལྡན་པས་སོ། །བཅོམ་ལྡན་འདས་ནི་མངོན་སུམ་གྱི་རང་བཞིན་ཚད་མ་ཡིན་ཏེ། ཞེས་དང་། ཡང་འདི་ནི་ཚད་མའི་ཡུལ་ལ་བདེན་པ་གསུང་པ་ཉིད་ཀྱི་ཚད་མ་ཡིན་ནོ། །ཞེས་དང་། ཡང་ན་དོན་དམ་པར་དེ་ལྡན་ཏེ་བཅོམ་ལྡན་འདས་གཉིས་སུ་མེད་པའི་ཚད་མ་ཡིན་གྱི་དོན་ཐམས་ཅད་ཤེས་པ་ནི་མ་ཡིན་ནོ། །དོན་ཐམས་ཅད་ཡོངས་སུ་ཤེས་པ་ནི་འཇིག་རྟེན་གྱི་ཐ་སྙད་ཡིན་པས་ཀུན་རྫོབ་པ་ཉིད་དོ། །དེ་སྐད་དུ་ཡང་། གཉིས་མེད་ཐེག་པ་དམ་པ་ཡིན་ཞེས་བཤད་དོ། །ཞེས་སོ། །རྣམ་བཤད་མཛད་པ་གཞན་ནི་དེ་གཉིས་ཀྱི་ལུགས་ཟློས་པར་འདུག་གོ །གཞན་དག་འདི་ནི་སངས་རྒྱས་སུ་བྱེད་པའི་ཆོས་ཞེས་རྣམ་པ་ཐམས་ཅད་མཁྱེན་པའི་ཡེ་ཤེས། འདི་རྟོགས་པས་འདི་སངས་རྒྱས་པ་སངས་རྒྱས་འཕགས་པ་ཞེས་ཐ་དད་པར་གཟུང་བའི་སྐྱོན་དེས། དོན་དམ་པའི་ཚད་མ་དང་ཚད་མར་འཁྲུངས་པ་མི་གཅིག་པར་སེམས་སོ། །དེ་ནི་གདུལ་བྱའི་བློས་ཕར་གཞལ་བ་ཡིན་ལ། དོན་དུ་ཐམས་ཅད་མཁྱེན་པའི་ཡེ་ཤེས་ཉིད་མཐོང་བ་པོའི་དབང་གིས་སྐུ་གསུམ་དུ་ཕྱེ་བ་ཡིན་ལ། བཅོམ་ལྡན་འདས་ནི་དེ་དག་ལ་བསྙད་པ་ཡིན་པས་སོ། །སྐུ་གསུམ་ཡང་རྣམ་འགྲེལ་མཛད་པས་སྡེ་བདུན་གྱི་མཆོད་བརྗོད་དུ། རྟོག་པའི་དྲ་བ་རྣམ་བསལ་ཞིང་། །ཟབ་ཅིང་རྒྱ་ཆེའི་སྐུ་མངའ་བ། །ཞེས་གསུངས་པ་སྟེ། ཤཱཀྱ་བློའི་འགྲེལ་པར་བཅོམ་ལྡན་འདས་གང་ལ་རྟོག་པའི་དྲྭ་བ་རྣམ་པར་གསལ་བ་དང་། ཉན་ཐོས་དང་རང་སངས་རྒྱས་ལ་སོགས་པའི་ཡུལ་མ་ཡིན་པའི་ཕྱིར་ཟབ་པ་དང་། ཤེས་བྱ་མཐའ་དག་དང་སེམས་ཅན་གྱི་དོན་མཐའ་དག་ལ་ཁྱབ་པའི་ཕྱིར་རྒྱ་ཆེ་བའི་སྐུ་གསུམ་པོ་ངོ་བོ་ཉིད་དང་། ལོངས་སྤྱོད་རྫོགས་པ་དང་། སྤྲུལ་པ་ཞེས་བྱ་བ་ཡོད་པ་དེ་ནི་རྟོག་པའི་དྲ་བ་རྣམ་པར་བསལ་ཞིང་། ཟབ་ཅིང་རྒྱ་ཆེའི་སྐུ་མངའ་བ་ཡིན་ནོ། །ཞེས་སོ། །ཀུན་ཏུ་བཟང་པོའི་འོད་ཟེར་དག །ཀུན་ནས་འཕྲོ་ལ་ཞེས་པས་ནི་མཛད་པ་སྟེ། དོན་རྗེ་བཙུན་མ་ཕམ་པས། ཆོས་སྐུ་མཛད་པ་དང་བཅས་པ། ཞེས་གསུངས་པ་ཉིད་དེ། སྐུ་བཞིར་ཕྱེ་ཡང་རིགས་པས་ཟབ་པ་ལས་གཉིས་དང་། རྒྱ་ཆེ་བ་ལ་གཉིས་སོ་ཞེས་ཤེས་པར་བྱའོ། །བཅོམ་ལྡན་འདས་རྒྱུ་ལས་འཁྲུངས་པར་བསྟན་ནས། དབང་ཕྱུག་རྟག་པ་རང་བྱུང་གི་ཚད་མ་གཙོ་བོར་དགག་པའི་ཕྱིར། ཚད་མ་རྟག་པ་ཉིད་ཡོད་མིན། །སོགས་ནས། མ་ཡིན་ཁྱད་པར་མེད་ཕྱིར་རོ། །ཞེས་པའི་བར་འཕྲོས་དང་བཅས་པ་གསུངས་སོ། །གཉིས་པ་ནི། འགྲོ་ལ་ཕན་བཞེད་པ་བཤད་པ། གལ་ཏེ་དབང་ཕྱུག་ཡོངས་སུ་ཤེས་པ་ལ་སོགས་པའི་རྒྱུར་ཤེས་པར་བྱེད་པའམ། སྐྱེད་པར་བྱེད་པ་མེད་ན། འོ་ན་ནི་དེ་གཞན་ལ་ཡང་མི་འགྱུར་ཏེ། ཚད་མ་ལྐོག་གྱུར་དོན་ཤེས་ཡིན། །དེ་སྒྲུབ་བྱེད་ཀྱང་མེད་པའི་ཕྱིར། ནན་ཏན་བྱེད་པ་ཡོད་མ་ཡིན། །ཞེས་ནི་ཁ་ཅིག་རབ་ཏུ་བརྗོད། །འདིས་རེ་ཞིག་ཐམས་ཅད་མཁྱེན་པ་མ་ཡིན་པ་ཉིད་ཐམས་ཅད་མཁྱེན་པར་འགྱུར་བ་གང་ཡིན་པ་དེའི་ལྐོག་ཏུ་གྱུར་པའི་དོན་ཤེས་པ་རྒྱུ་ཅི་ཡོད། གལ་ཏེ་གང་བསྒྲུབས་པས་ཐམས་ཅད་རིགས་པར་འགྱུར་བ་དེ་འདྲ་བའི་རྒྱུ་ནི་འགའ་ཡང་རྟོགས་པ་མེད་དོ། །ཞེས་སྨྲ་བ་བཟློག་པའི་ཕྱིར། མི་ཤེས་སྟོན་པར་བྱེད་པ་ལ། །ནས། ཚུར་ཤོག་བྱ་རྒོད་བརྟེན་པར་གྱིས། །ཞེས་པའི་བར་གྱིས་སྐྱེས་བུའི་དོན་གྱིས་གཙོ་བོར་རིགས་པར་མཛད་པ་ཉིད་ཡིན་པར་བསྟན་ནས། ཚད་མ་དེའི་སྒྲུབ་བྱེད་གང་ལས་ཡིན་ཞེ་ན། སྒྲུབ་བྱེད་ཐུགས་རྗེ། ཡིད་སྙིང་རྗེ་དང་ལྡན་པར་གྱུར་ན། གཞན་སྡུག་བསྔལ་ཐམས་ཅད་དང་བྲལ་བར་བྱེད་པའི་ཐབས་འཚོལ་ཏེ། རྒྱན་ལས། ཕ་རོལ་སྡུག་བསྔལ་དེ་བཞིན་དུ། །སྡུག་བསྔལ་རྒྱུ་དང་བྲལ་འདོད་གང་། །དེ་བརྩེ་ངེས་ན་དེ་ལྡན་པ། །དེ་ཡི་ཐབས་ནི་བསྒྲུབ་པར་འདོད། །ཅེས་སོ། །རབ་ཀྱི་མཐར་ཕྱིན་པའི་སྙིང་རྗེ་དེ་ཉིད་གང་ལས་སྐྱེ་བར་འགྱུར་ན་དེའི་ཕྱིར། གོམས་ལས་ཏེ། སྐྱེ་ཞིང་སྐྱེ་བ་ཐམས་ཅད་དུ། །སྙིང་རྗེ་དེ་ཉིད་གོམས་པས་སོ། །འདིས་དགེ་བའི་བཤེས་གཉེན་གྱིས་ཡོངས་སུ་ཟིན་པའམ། རང་ཉིད་ཀྱིས་ཉམས་སུ་མྱོང་བ་ཆེན་པོས་སེམས་ཅན་རྣམས་ལ་སྙིང་སྙོམས་པའི་ས་གཞི་བརྡལ་ནས། རབ་ཏུ་དགའ་བས་རྨོས་པར་བྱམས་པས་རབ་ཏུ་བརླན་པའི་སྙིང་རྗེ་ཆེན་པོའི་ས་བོན་བཏབ་པས་འགྲོ་བ་ཐམས་ཅད་ལ་ཕན་འདོགས་པར་བཞེད་པ། བྱང་ཆུབ་ཀྱི་སེམས་སྟོང་པ་སྙིང་རྗེའི་སྙིང་པོ་ཅན་གྱི་མྱུ་གུ་སྐྱེའོ་ཞེས་བསྟན་ནོ། །བློ་ནི་ལུས་ལ་བརྟེན་པའི་ཕྱིར། །གོམས་པས་གྲུབ་པ་མེད་ཅེ་ན། བློ་ནི་ལུས་འདི་ལ་བརྟེན་པའི་ཕྱིར་ལུས་ཞིག་ན་འཇིག་པར་འགྱུར་ལ། ལུས་གཞན་དང་འབྲེལ་བ་ཡང་མེད་དོ། །དེས་ན་སྐྱེ་བ་གཞན་ཉིད་མེད་པའི་ཕྱིར་སྐྱེ་བ་གཞན་དུ་གོམས་པས་བསགས་པར་མི་འགྲུབ་བོ་ཞེ་ན། མ་ཡིན་རྟེན་ནི་བཀག་ཕྱིར་རོ། །ནས། དེ་འདྲའི་སྒྲུབ་བྱེད་ལྷག་ལྡན་ཡོད། །ཅེས་པའི་བར་གྱིས་སེམས་ཀྱི་རྒྱུན་ཐོག་མ་མེད་པར་གྱུར་པ་ཡིན་པས། སྐྱེ་བ་དང་འཆི་བའི་རྒྱུན་རྗེས་སུ་འབྲེལ་བར་གྲུབ་པའི་ཕྱིར་གོམས་པ་གྲུབ་པས་གོམས་པ་ལས་བྱུང་བའི་ཡོན་ཏན་མཐའ་དག་གི་སྐབས་ཡོད་ལ། ཐམས་ཅད་མཁྱེན་པ་ཉིད་དམ་གཞན་གྱི་ཡོན་ཏན་སྲིད་པ་ཉིད་དོ། །ཞེས་འཇིག་རྟེན་ཕ་རོལ་བསྒྲུབས་ནས་གོམས་པས་ཁྱད་པར་འགྱུར་ན་ཡང་། མཆོངས་དང་ཆུ་ཡི་དྲོད་བཞིན་དུ། །རང་བཞིན་ལས་འདས་མིན་ཞེ་ན། །སྐྱེ་ཞིང་སྐྱེ་བར་གོམས་པ་ཡོད་དུ་ཆུག་ཀྱང་དེ་རབ་ཀྱི་ཕུལ་དུ་བྱུང་བར་མི་འགྱུར་ཏེ། སོ་སོར་ངེས་པའི་ཁྱད་པར་མཐོང་བའི་ཕྱིར་མཆོངས་པ་དང་ཆུ་བསྐོལ་བ་བཞིན་ནོ་ཞེ་ན། བྱས་ཏེ་གལ་ཏེ་སླར་ཡང་ནི། ནས། ཆགས་བྲལ་དང་ནི་ཡིད་ལོག་བཞིན། །ཞེས་པའི་བར་གྱིས་རབ་ཀྱི་ཕུལ་ཏུ་གྱུར་པ་བསྒྲུབས་ནས། སྟོན་པ་བཤད་པར་བྱ་བའི་ཕྱིར། བརྩེ་ལྡན་སྡུག་བསྔལ་གཞོམ་པའི་ཕྱིར། །ཐབས་རྣམས་ལ་ནི་མངོན་སྦྱོར་མཛད། །བརྩེ་བ་དང་ལྡན་པས་བདག་གཞན་གྱི་སྡུག་བསྔལ་འདྲལ་བར་བྱ་བའི་ཕྱིར་འབད་པར་བྱ་བ་འོས་ཏེ། རང་སྡུག་བསྔལ་དང་མ་བྲལ་བར་གཞན་གྱི་སྡུག་བསྔལ་བཟློག་པར་མི་ནུས་པའི་ཕྱིར་རོ། །དེས་ན་རང་གི་སྡུག་བསྔལ་བྲལ་བ་དང་། ཤེས་བྱ་ཐམས་ཅད་མངོན་དུ་བྱེད་པའི་ཕྱིར་ཐབས་ལ་མངོན་པར་སྦྱོར་བར་བྱེད་དོ། །ཐབས་བྱུང་དེ་རྒྱུ་ལྐོག་གྱུར་པས། །དེ་འཆད་པ་ནི་དཀའ་བ་ཡིན། །མཐོ་རིས་དང་ཐར་པའི་རྒྱུ་འབྲས་བུ་མངོན་དུ་བྱས་པ་མེད་པ་གང་ཡིན་པ་དེས་ནི་གཞན་དག་ལ་བསྟན་པར་དཀའ་བ་ཡིན་ཏེ། དེ་ལ་དེའི་ནུས་པ་ཡོད་པ་མ་ཡིན་ནོ། །གལ་ཏེ་བདེན་པ་རྣམས་རྗེས་སུ་དཔག་པས་ཡོངས་སུ་དཔྱད་ན། འཕགས་པའི་བདེན་པ་བཞི་བསྟན་པ་སྲིད་པ་དེ་ལྟ་ན་ཡང་ཐམས་ཅད་ཀྱི་ཚེ་ནི་མ་ཡིན་ཏེ། རང་གི་འདོད་པ་དང་དམྱལ་བ་ལ་སོགས་པར་སྐྱེ་བའི་དུས་ན་མེད་པའི་ཕྱིར་རོ། །འཇིག་རྟེན་གྱི་ཁམས་འོད་ཟེར་ཅན་ལ་སོགས་པར་སྤྱོད་པ་ལས་དང་འབྲས་བུ་སོ་སོར་ངེས་པར་སྟོན་པ་ཡང་མི་སྲིད་པ་ཉིད་དོ། །དེ་བས་ན་ཐམས་ཅད་མངོན་དུ་བྱ་བ་ཉིད་དོ། །འདིའི་ཐབས་ཉི་ཚེ་བ་ཙམ་གྱིས་མ་ཡིན་པ་དང་། ཀུན་ཤེས་པར་བྱེད་པ་ཆོས་རབ་ཏུ་འབྱེད་པའི་ཤེས་རབ་བསྟན་ཏོ། །ལུང་དང་རིགས་པས་རྣམ་དཔྱོད་པ། །སྡུག་བསྔལ་ཉིད་ཀྱི་ཁྱད་པར་གྱིས། །སྡུག་བསྔལ་རྒྱུ་དང་དེ་མི་རྟག །ལ་སོགས་རང་བཞིན་རྟོགས་པར་མཛད། །རྗེས་སུ་དཔག་པའི་སྤྱོད་ཡུལ་མ་ཡིན་པ་ལྔ་ནི་དབང་པོ་ལས་འདས་པའི་དོན་ཤེས་པའི་རྒྱུ་ལུང་ཡིན་ནོ། །རིགས་པ་ནི་རྗེས་སུ་དཔག་པའོ། །དང་པོར་ལུང་རྟོག་པ་ཡིན་ལ། དེ་ནས་ནི་དོན་ངེས་པའི་འབྲས་བུ་ཅན་རིག་པ་ལ་འཇུག་པ་ཡིན་ནོ། །ལུང་ཙམ་ལས་ནི་ངེས་པ་མ་ཡིན་ཏེ། བརྗོད་པར་འདོད་པ་ཙམ་གྱིས་འཇུག་པའི་ཕྱིར་དང་དོན་དང་འབྲེལ་པ་མེད་པའི་ཕྱིར་རོ། །དེས་ན་དོན་དེ་རིགས་པས་བསྟན་པར་བྱས་ནས་སྒོམ་པར་བྱེད་པ་མངོན་དུ་བྱེད་པར་འགྱུར་རོ། །དེ་ལ་རེ་ཞིག་སྡུག་བསྔལ་གྱི་རྒྱུ་ཉིད་དང་པོར་རྟོགས་སྟེ། རྒྱུ་བཟློག་པའི་སྒོ་ནས་འབྲས་བུ་བཟློག་པར་བྱས་པའི་ཕྱིར་རོ། །སྡུག་བསྔལ་སོགས་ལ་རྟོགས་ཚུལ་ཡང་། ཉན་རང་ནི། དམིགས་པ་མི་རྟག་ལ་སོགས་པ། །བདེན་པའི་རྟེན་ཅན། ཞེས་སོགས་མངོན་རྟོགས་རྒྱན་དུ་གསུངས་ལ། འདི་ནི་དེ་ལས་བཟློག་སྟེ་སྡུག་བསྔལ་གྱི་རྒྱུ་རྟོགས་པ་ཡང་དེའི་མི་རྟག་པ་ཉིད་ལ་སོགས་པའི་རང་བཞིན་རྟོགས་ཏེ། དེ་བརྟགས་པས་བཟློག་པར་རུང་བ་ཉིད་དུ་རྟོགས་པའི་ཕྱིར་རོ། །བཟློག་པར་རུང་བ་ཉིད་དུ་མ་རྟོགས་པར་བཟློག་པའི་ཕྱིར་བརྩོན་པ་ཉིད་དུ་མི་འགྱུར་རོ། །རྒྱུ་མེད་པ་ཉིད་དམ་རྟག་པ་ཉིད་ཡིན་ན་ནི་བཟློག་པར་ནུས་པ་མ་ཡིན་པ་དེའི་ཕྱིར་སྡུག་བསྔལ་གྱི་མི་རྟག་པ་ལ་སོགས་པའི་ཁྱད་པར་ཉིད་ཀྱིས་དེའི་རྒྱུ་མི་རྟག་པ་ཉིད་དུ་རྟག་པར་མཛད་དེ། གང་ཕྱིར་དེ་ལྟར་རྒྱུ་གནས་ན། །འབྲས་བཟློག་གཟིགས་པ་མེད་ཕྱིར་རོ། །དེ་རྒྱུ་གཞོམ་ཕྱིར་དེ་ཡིས་ནི། །མི་མཐུན་ཕྱོགས་ལ་རྟག་པར་མཛད། །སྡུག་བསྔལ་གྱི་རྒྱུ་གཞོམ་པའི་ཕྱིར་སྡུག་བསྔལ་གྱི་རྒྱུ་དེའི་མི་མཐུན་ཕྱོགས་གཉེན་པོ་གང་ཡིན་པ་དེ་བརྟག་པར་བྱེད་དོ། །མི་མཐུན་ཕྱོགས་ཉེ་བ་མེད་ན་དེ་བཟློག་པ་མ་ཡིན་པས་སོ། །རྒྱུ་ཡི་ངོ་བོ་བརྟག་པའི་ཕྱིར། །དེ་མི་མཐུན་ཕྱོགས་ཀྱང་ངེས་འགྱུར། །བདག་དང་བདག་གིར་འཛིན་བྱས་པ། །འདུས་བྱས་སྤྱོད་ཡུལ་ཅན་ཆགས་ནི། རྒྱུ་ཡིན་དེ་ཡི་གནོད་བྱེད་ནི། །བདག་མེད་མཐོང་བས་འགལ་བ་ཡིན། །སྡུག་བསྔལ་གྱི་རྒྱུ་ནི་བདག་དང་བདག་གིར་མངོན་པར་ཞེན་པས་བྱས་པའི་ཆགས་པ་ཡིན་ལ། བདག་དང་བདག་གིར་མངོན་པར་ཞེན་པ་ཡང་འཇིག་ཚོགས་ལ་ལྟ་བ་ཡིན་པས་དེ་བས་ན་སྡུག་བསྔལ་གྱི་རྒྱུ་ནི་འདུས་བྱས་ཏེ་ཟག་པ་དང་བཅས་པའི་དངོས་པོ། དེའི་སྤྱོད་ཡུལ་ཅན་འཇིགས་ཚོགས་ལ་ལྟ་བ་ཡིན་ནོ། །སྡུག་བསྔལ་གྱི་རྒྱུ་གྱུར་པའི་འཇིགས་ཚོགས་ཀྱི་ལྟ་བ་ལ་གནོད་པར་བྱེད་པ་བདག་མེད་མཐོང་བ་ཡིན་ཏེ་འགལ་བའི་ཕྱིར་རོ། །དེ་དང་རྣམ་པ་འགལ་བའི་ཆོས་ནི་དེ་ལ་གནོད་པར་བྱེད་པ་ཡིན་ཏེ། རླུང་ཡང་བ་དང་སྣུམ་པ་ལ་སོགས་པ་བཞིན་ནོ། །དེ་བས་ན་བདག་མེད་པ་མངོན་དུ་བྱས་པ་ལས་མི་རྟག་པའི་རྒྱུ་འཇིག་ཚོགས་ལ་ལྟ་བ་འཇིག་པར་འགྱུར་ཏེ། དེ་ལོག་ན་སྡུག་བསྔལ་ཐམས་ཅད་བཟློག་པར་འགྱུར་བ་ཡིན་ནོ། །རྣམ་པ་དུ་མར་ཐབས་མང་པོ། །ཡུན་རིང་དུས་སུ་གོམས་པ་ལས། །དེ་ལ་སྐྱོན་དང་ཡོན་ཏན་དག །རབ་ཏུ་གསལ་བ་ཉིད་དུ་འགྱུར། །བདག་མེད་པ་མཐོང་བ་ལས། འདོད་ཆགས་ལ་སོགས་པ་ཡོངས་སུ་འཁྲུག་པའི་རྒྱུ་མཐའ་དག་དང་བྲལ་བའི་ཕྱིར་རྟོགས་པ་རྒྱས་ཏེ་ཐབས་རྣམ་པ་མང་པོ་བྱང་ཆུབ་ཀྱི་སྤྱོད་པ་རྒྱ་མཚོ་བསྐལ་པ་གྲངས་མེད་གསུམ་ལ་སོགས་པ་ཡུན་རིང་པོ་གོམས་པར་བྱས་པ་ལས། སྐྱོན་ཉོན་མོངས་པ་དང་ཤེས་བྱའི་སྒྲིབ་པ་ཐམས་ཅད་དང་དེའི་གཉེན་པོ་མཐོང་བ་དང་སྒོམ་པའི་ལམ་ཐམས་ཅད་རབ་ཏུ་གསལ་བ། དེས་ན་ཐུགས་ཀྱང་གསལ་བའི་ཕྱིར། རྒྱུ་ཡི་བག་ཆགས་སྤངས་པ་ཡིན། ཐུབ་ཆེན་གཞན་དོན་འཇུག་ཅན་གྱི། །བསེ་རུ་ལ་སོགས་ཁྱད་འདི་ཡིན། །དེ་དོན་ཕྱིར་ན་ཐབས་གོམས་པ། །དེ་ཉིད་སྟོན་པ་ཡིན་པར་བརྗོད། །ཐུགས་གསལ་བ་ཉིད་ཀྱིས་བག་ཆགས་ཐམས་ཅད་སྤོང་བར་བྱེད་ལ། སྤངས་པ་ལས་ཉན་ཐོས་དང་རང་སངས་རྒྱས་ལས་ཆེས་ཕུལ་དུ་ཕྱིན་པའི་བཅོམ་ལྡན་འདས་བརྙེས་པ་ཡིན་ནོ། །གྲུབ་ལས་དང་པོ་འབྱུང་བའི་ཕྱིར། །གཉིས་པོ་འདི་ནི་རྒྱུ་རུ་བཤད། །དེ་བས་ཕན་པར་བཞེད་པ་དང་། །ཐབས་སྟོན་པ་ཞེས་བྱ་བ་གཉིས་པོ་གྲུབ་པས། དང་པོ་ཚད་མར་གྱུར་པ་དེ་འབྱུང་བའི་ཕྱིར་འདི་གཉིས་རྒྱུ་ཕུན་སུམ་ཚོགས་པར་བཞག་གོ །ད་ནི་བདེ་བར་གཤེགས་པ་བཤད་པ། རྒྱུ་སྤངས་ཡོན་ཏན་གསུམ་བདེ་གཤེགས། །ཉིད་ཡིན། སྡུག་བསྔལ་གྱི་རྒྱུ་བདག་དང་བདག་གིར་འཛིན་པས་བྱས་པའི་ཞེན་པ་དེ་སྤངས་པའི་ཡོན་ཏན་གསུམ་སྟེ། ལེགས་པར་གཤེགས་པའམ། མཛེས་པར་གཤེགས་པ། གཟུགས་བཟང་པོ་བཞིན། སླར་མི་ལྡོག་པའམ་ཕྱིར་མི་ལྡོག་པར་གཤེགས་པ་རིམས་ནད་ལེགས་པར་བྱང་བ་བཞིན། མ་ལུས་པར་གཤེགས་པའམ་ལྷག་མ་མེད་པར་གཤེགས་པ་བུམ་པ་ལེགས་པ་གང་བ་བཞིན་ནོ། །དེ་ལས་དང་པོ། སྡུག་བསྔལ་རྟེན་མིན་ཕྱིར། ལེགས་ཡིན་དེ་ནི་བདག་མེད་པ། །མཐོང་བའམ་སྦྱོར་བ་ལས་ཡིན་ནོ། །བདག་དང་བདག་གིར་འཛིན་པ་སྤངས་པས་ནི་སྡུག་བསྔལ་གྱི་རྟེན་མ་ཡིན་པའི་ཕྱིར་ལེགས་པར་གཤེགས་པ་ཞེས་བྱའོ། །སྤངས་པ་དེ་ཉིད་གང་ལས་འབྱུང་ཞེ་ན། གང་ཟག་དང་ཆོས་ཀྱི་བདག་མེད་པས་གསར་དུ་མཐོང་བ་ལས་མཐོང་བས་སྤངས་བར་བྱ་བའི་ཉོན་མོངས་པ་ཐམས་ཅད་སྤོང་ངོ་། །སྦྱོར་བ་ནི་གོམས་པ་སྟེ་བདག་མེད་མཐོང་བ་གོམས་པས་སྒོམས་པས་སྤང་བར་བྱ་བའི་ཉོན་མོངས་པ་ཐམས་ཅད་ཟློག་པར་བྱེད་དོ། །གཉིས་པ། སྐྱེ་དང་སྐྱོན་ནི་ཀུན་འབྱུང་དག །སླར་ཡང་བཟློག་ཅེས་བཤད་པ་ཡིན། །བདག་ལྟའི་ས་བོན་སྤངས་པའི་ཕྱིར། །སླར་མི་གཤེགས་པ་ཉིད་ཡིན་ནོ། །སྐྱོན་རྣམས་དང་སྐྱེ་བ་ཀུན་འབྱུང་བ་ནི་སླར་བཟློག་པ་ཞེས་བྱ་ལ། སྐྱོན་མེད་པའི་གནས་སྐབས་དང་། ཕྱིར་མི་སྐྱེ་བ་ནི་སླར་མི་ལྡོག་པ་ཞེས་བྱ་ཏེ། བདག་ཏུ་ལྟ་བའི་ས་བོན་དེ་དྲུང་ནས་ཕྱུང་བས་ཉོན་མོངས་པ་མི་སྐྱེ་ལ། ཉོན་མོངས་པ་མེད་པས་སྐྱེ་བ་སླར་མི་ལེན་པའི་ཕྱིར་སླར་མི་ལྡོག་པ་ཡིན་ནོ། །ཇི་སྟེ་བདག་མེད་པ་མཐོང་བས་བདག་ཏུ་འཛིན་པ་ཇི་ལྟར་ལྡོག་པར་འགྱུར། རྣམ་པ་ཐ་དད་པས་འཇུག་པའི་ཕྱིར་ཡིན་ན་ནི། དེ་ལྟ་ན་བདག་ཏུ་ལྟ་བ་ཡང་བདག་མེད་པ་ལས་ལྡོག་པ་ཡིན་པའི་ཕྱིར། དེས་ལྡོག་པར་བྱེད་པར་འགྱུར་རོ། །དེ་ལོག་ན་ནི་སྐྱོན་དང་སྐྱེ་བ་ཀུན་འབྱུང་བར་འགྱུར་བའི་ཕྱིར་སླར་ལྡོག་པར་འགྱུར་རོ་སྙམ་སེམས་ནས། བདེན་ཐ་དད་ཉིད་ཀྱི། བདག་མེད་མཐོང་བ་དེ་ནི་བདེན་པར་འགྱུར་བ་ཉིད་དང་ཐ་དད་པ་དང་། ངོ་བོ་ཉིད་ཀྱིས་སླར་མི་ལྡོག་པ་ཡིན་གྱི་བདག་ཏུ་ལྟ་བ་ནི་བདག་མེད་པ་ལས་ཕྱིན་ཅི་ལོག་ཡིན་པ་དེ་ལྟ་ན་ཡང་བདེན་པ་མ་ཡིན་པའི་ཕྱིར་ཟློག་པར་བྱེད་པ་མ་ཡིན་ཏེ་བདག་མེད་པའི་ཕྱིར་རོ། །གསུམ་པ། ལུས་ངག་སེམས་ཀྱི་གནས་ངན་ལེན། །ཉོན་མོངས་མེད་དང་ནད་མེད་དང་། །ལམ་བཤད་མི་གསལ་ཉིད་ལུས་ཡིན། །གོམས་ཕྱིར་མ་ལུས་སྤངས་པ་ཉིད། །མ་ལུས་པ་ཞེས་བྱ་བ་སླར་ལྡོག་པ་མེད་པ་ལས་གཞན་ཅི་ཞིག་ཡིན་ཞེ་ན། ལུས་ངག་དང་སེམས་ཀྱི་གནས་ངན་ལེན་ཉོན་མོངས་པ་མེད་པ་ཅན་འཁོར་བའི་སྡུག་བསྔལ་སྤངས་པས་ནད་མེད་པ་དང་། དེའི་རྒྱུ་སྤངས་པ་སྐྱོན་མེད་པ་དག་གོ །ཉོན་མོངས་པ་མེད་པའི་ལུས་ཀྱི་གནས་ངན་ལེན་ནི། དགྲ་བཅོམ་པར་གྱུར་ཀྱང་གོམས་པའི་དབང་གིས་མཆོང་ཞིང་འགྲོ་བ་ལ་སོགས་པ་འབྱུང་བ་ཡིན་ནོ། །ངག་གི་གནས་ངན་ལེན་ནི་ང་རྒྱལ་མེད་ཀྱང་བརྙས་པར་སྨྲ་བ་ལ་སོགས་པ་བརྗོད་པའོ། །ཡིད་ཀྱི་གནས་ངན་ལེན་ནི། ཐམས་ཅད་མི་ཤེས་པ་སྟེ་འདི་གསུམ་ལུས་པའོ། །ལམ་བཤད་པ་ལ་མི་གསལ་བ་ཡང་ལུས་པ་སྟེ། ཡུན་རིང་པོར་གོམས་པར་མ་བྱས་པའི་ཕྱིར་བློ་གསལ་བ་མེད་ན་ཚིག་ལ་མཁས་པར་མི་འགྱུར་རོ། །གལ་ཏེ་བདག་མེད་མཐོང་བས་མ་ལུས་པ་སྤོང་བ་མ་ཡིན་ན། ལུས་པ་དེ་གང་གིས་སྤོང་བར་འགྱུར་ཞེ་ན། སྔར་གོམས་པ་ལས་བག་ཆགས་མ་ལུས་པ་སྤོང་ངོ་ཞེས་བརྗོད་པ་ཉིད་དོ། །ཁ་ཅིག་སྨྲ་སོགས་ཕྱིར་ན་སྐྱོན། །ཟད་མིན་ཞེས་ཟེར། སྨྲ་བ་ལ་སོགས་པའི་ཕྱིར་འདོད་ཆགས་ལ་སོགས་པའི་སྐྱོན་རྣམས་ཟད་པར་མི་འགྱུར་ཏེ་ཞེས་ཟེར་ལ། འདི་ལྡོག་པ། ཐེ་ཚོམ་ཟ་བ་དེ་ཕྱིར་འཁྲུལ། །འདི་ལྟར་སྨྲ་བ་ལ་སོགས་པ་ཡང་ཡོད་ལ། སྐྱོན་ཡང་ཟད་པར་འགྱུར་བས་འདི་ལ་འགལ་བ་ཅི་ཡོད། དེ་ཉིད་ཀྱི་ཕྱིར་བཟློག་པ་ལ་ཐེ་ཚོམ་ཟ་བས་གཏན་ཚིགས་འཁྲུལ་བས་སོ། །རྟག་ཉིད་ཕྱིར་རམ་ཐབས་མེད་ཕྱིར། །ཡང་ན་ཐབས་ནི་མི་ཤེས་ཕྱིར། །སྐྱོན་རྣམས་མི་ཟད་པ་ཉིད་ཅེས། །བྱ་བར་ཡོངས་སུ་རྟོག་གྲང་ན། །སྐྱོན་དེ་དག་རྟག་པར་གྱུར་ན་དེའི་ཚེ་སྐྱོན་རྣམས་ཟད་པ་མི་སྲིད་དེ་རྟག་པའི་ཕྱིར། རྟག་པ་ལས་བོགས་དབྱུང་བར་མི་ནུས་སོ། །འོན་ཏེ་ཟད་པའི་ཐབས་མེད་པའམ་ཐབས་མི་ཤེས་པ་དེ་ལྟ་ན་ཡང་སྐྱོན་རྣམས་མི་ཟད་པ་ཉིད་ཅེས་རྟོག་གྲང་ན། རྒྱུ་ཡོད་ཕྱིར་དང་རྒྱུ་ཡིས་ནི། །གཉེན་པོ་གོམས་པས་ཟད་ཕྱིར་དང་། །རྒྱུ་ཡི་རང་བཞིན་ཤེས་པ་ཡིས། །དེ་ཤེས་པའང་གྲུབ་པ་ཡིན། །དེ་ལ་སྐྱོན་རྣམས་རྟག་པ་ཉིད་མ་ཡིན་ཏེ། རྒྱུ་དང་ལྡན་པ་ཅན་ཡིན་པའི་ཕྱིར་དང་། སྐྱོན་ཟད་པའི་ཐབས་མེད་པ་ཡང་མ་ཡིན་ཏེ། བདག་མེད་མཐོང་བ་ཟད་པའི་ཐབས་ཡིན་པའི་ཕྱིར་དང་། རྒྱུའི་རང་བཞིན་བདག་དང་བདག་གི་བའི་རྣམ་པ་ཅན་གྱི་ཤེས་པ་ཡོད་ན་དེའི་གཉེན་པོའི་ཤེས་པ་ཡང་གྲུབ་པ་ཡིན་ཏེ། གང་ལས་ཕྱིན་ཅི་ལོག་ཏུ་གྱུར་པ་དེའི་གཉེན་པོ་སྟེ། དཔེར་ན་རླུང་ལ་ཏིལ་མར་བཞིན་དུ་བདག་འཛིན་ལས་ལོག་པ་བདག་མེད་མཐོང་བ་ཡིན་ནོ། །སྐྱོབ་པ་བཤད་པ། སྐྱོབ་པ་ཉིད་གཟིགས་ལམ་གསུང་བ། །འབྲས་མེད་ཕྱིར་ན་རྫུན་མི་གསུང་། །ཐུགས་བརྩེ་ལྡན་ཕྱིར་བཅོམ་ཀུན་ཡང་། །གཞན་གྱི་དོན་དུ་སྦྱོར་ཕྱིར་རོ། །དེ་ཕྱིར་ཚད་ཡིན། ཉིད་ཀྱི་གཟིགས་པ་ཐུན་མོང་མ་ཡིན་པའི་ཐར་པའི་ལམ་གསུང་བ་ནི་སྐྱོབ་པ་ཡིན་ནོ། །འདི་ནི་རྫུན་མི་གསུང་སྟེ་འབྲས་བུ་མེད་པའི་ཕྱིར་རོ། །འདིས་ཕྱིན་ཅི་ལོག་གསུང་བ་སྤངས་པ་ཡིན་ནོ། །དེ་ལྟར་འགའ་ཞིག་ཏུ་གསུང་ན་དེ་ཡང་ཐུགས་རྗེ་དང་ལྡན་པའི་ཕྱིར་དང་། སྔོན་གྱི་འཕེན་པས་གཞན་གྱི་དོན་དུ་གསུང་པ་སྟེ། འདུལ་བྱ་དེ་དག་ཉིད་ཀྱིས་བརྙེས་པའི་གོ་འཕང་དེ་ལ་སྦྱོར་བའི་ཕྱིར་རོ། །དེ་བས་ན་བཅོམ་ལྡན་འདས་ཚད་མ་ཡིན་གྱི། མུ་སྟེགས་བྱེད་ཀྱི་སྟོན་པ་དག་ནི་བདག་མེད་པ་མ་མཐོང་ཞིང་རིག་པ་མེད་པ་ཡིན་པའི་ཕྱིར་དེ་དག་ཚད་མ་མ་ཡིན་ཞེས་བསྟན་ཏོ། །དེ་དག་གིས་ཐེག་པ་ཆེན་པོ་ཐུན་མོང་མ་ཡིན་པའི་ལམ་གྱི་རིམ་པ་ཚད་མ་ཡིན་གྱི། མུ་སྟེགས་བྱེད་ཀྱི་སྟོན་པ་དག་ནི་བདག་མེད་པ་མ་མཐོང་ཞིང་རིག་པ་མེད་པ་ཡིན་པའི་ཕྱིར་དེ་དག་ཚད་མ་མ་ཡིན་ཞེས་བསྟན་ཏོ། །དེ་དག་གིས་ཐེག་པ་ཆེན་པོ་ཐུན་མོངས་མ་ཡིན་པའི་ལམ་གྱི་རིམ་པ་ཚང་ལ་མ་ནོར་པ་བསྟན་པ་ཡིན་ཏེ། འགྲོ་ལ་ཕན་པར་བཞེད་པས། བྱང་ཆུབ་ཏུ་སེམས་བསྐྱེད་པ་བསྟན་ཏེ། དེ་ནི་འཇུག་པའི་སྤྱོད་པ་ཞེས་བྱའོ། །སྟོན་པས་བདེན་པ་གཉིས་ཟུང་དུ་འབྲེལ་བའི་ལམ་ཐབས་བསྟན་ཏེ། སྒྲུབ་པའི་སྤྱོད་པ་ཞེས་བྱའོ། །བདེ་གཤེགས་དང་སྐྱོབ་པས་འབྲས་བུ་རང་གཞན་གྱི་དོན་ཕུན་སུམ་ཚོགས་པ་བསྟན་ཏེ། གྲུབ་པའི་སྤྱོད་པ་ཞེས་བྱའོ། །རྣམ་པ་གསུམ་པོ་དེ་དག་ནི་བྱང་ཆུབ་ཆེན་པོའི་ལམ་ཐམས་ཅད་ཀྱི་སྡོམ་ཡིན་ནོ། །བསམ་པ་བྱང་ཆུབ་ཏུ་སེམས་བསྐྱེད་པ་དེ་ཉིད་ཤེས་རབ་དང་སྙིང་རྗེའི་བདག་ཉིད་ཡིན་པས། སྦྱོར་བའི་དུས་སུ་སྙིང་རྗེས་ནི་སྦྱིན་སོགས་སྒྲུབ་པར་བྱེད་པས་བསོད་ནམས་ཀྱི་ཚོགས་གསོག་པ་དང་། ཤེས་རབ་ཀྱིས་དག་པར་བྱེད་པས་ཡེ་ཤེས་ཀྱི་ཚོགས་རྫོགས་ཏེ་འབྲས་དུས་སུ་ཤེས་རབ་ཀྱིས་མངོན་པར་བྱང་ཆུབ་པ་རང་དོན་ཕུན་སུམ་ཚོགས་པ་བཟུང་། སྙིང་རྗེས་གཞན་དོན་ཕུན་སུམ་ཚོགས་པ་བཟུང་ནས་ཆོས་ཀྱི་འཁོར་ལོ་བསྐོར་ཅིང་ནམ་མཁའ་ཇི་སྲིད་པར་འཕྲིན་ལས་མཛད་པ་ཡིན་ནོ། །ལུགས་ལས་འབྱུང་བ་བཤད་ཟིན་ནོ། །ལུགས་ལས་བཟློག་སྟེ་བཤད་པའི་ཕྱིར། །ཡང་ན་སྐྱོབ། བདེན་པ་བཞི་ནི་སྟོན་མཛད་པའི། །ལས་དང་འབྲས་བུ་འབྲེལ་བའི་འཕགས་པའི་བདེན་པ་བཞི་སྟོན་པར་མཛད་པས་སྐྱོབ་པའོ། །འཕགས་པའི་བདེན་པ་བཞི་གང་ཞེ་ན། སྡུག་བསྔལ་འཕགས་པའི་བདེན་པ་དང་། ཀུན་འབྱུང་དང་། འགོག་པ་དང་། ལམ་འཕགས་པའི་བདེན་པའོ། །གཞན་སྡེ་ན་རེ། འདོད་ཆགས་ནི་མངོན་པར་འདོད་པའི་བུད་མེད་མཆོག་ལ་འཁྱུད་པའི་རྒྱུ་ཡིན་པས་བདེ་བའི་རྒྱུ་ཉིད་དང་། ཞེ་སྡང་ཡང་དགྲ་འཇོམས་པའི་རྒྱུ་ཡིན་པས་བདེ་བའི་རྒྱུ་ཉིད་དང་གཏི་མུག་ཀྱང་འཇིག་ཚོགས་ལ་ལྟ་བའི་མཚན་ཉིད་ཅན་བདག་ཏུ་འཛིན་པ་དང་། བདག་ཏུ་ང་རྒྱལ་བ་དང་། དྲེགས་པ་དང་། རྒྱགས་པའི་ཆ་ཡིན་པའི་ཕྱིར་བདེ་བའི་རྒྱུ་ཡིན་ལ་དེ་ལྟ་བས་ན། བདེ་བ་ཡིན་ནོ། །འདོད་ཆགས་དང་ཞེ་སྡང་ལ་སོགས་པ་གཞིར་གྱུར་པའི་ཕྱིར་ལུས་ལ་སོགས་པ་ཡང་བདེ་བ་ཉིད་ཡིན་པའི་ཕྱིར་སྡུག་བསྔལ་ཞེས་བྱ་བ་མེད་དོ། །གལ་ཏེ་སྐོམ་པ་ལ་སོགས་པ་སྡུག་བསྔལ་ཡིན་ན་ཡང་རབ་ཏུ་ཚིམ་པར་བྱེད་པའི་རྒྱུར་ཆེ་བའི་ཕྱིར་སྡུག་བསྔལ་གྱི་བདེན་པ་ཞེས་བྱ་བ་ཡོད་པ་མ་ཡིན་ནོ། །དེ་བས་ན་བཅོམ་ལྡན་འདས་ཀྱིས་བསྟན་པ་མི་བདེན་པ་ཉིད་ཡིན་པས་སྐྱོབ་པ་མ་ཡིན་ནོ་ཞེས་སྨྲའོ། །དེ་དགག་པའི་ཕྱིར། སྡུག་བསྔལ་འཁོར་བ་ཅན་ཕུང་པོ། །ནས། ཐམས་ཅད་ཀུན་ཚེ་སྐྱེ་བར་འགྱུར། །ཞེས་པའི་བར་གྱིས། དེས་ན་འདོད་ཆགས་ལ་སོགས་པའི་འབྲས་བུ་འདོད་ཆགས་ལ་སོགས་པ་གོམས་པ་ལས་འབྱུང་ཞིང་གོམས་པ་དེ་ཡང་འདོད་ཆགས་གཞན་གོམས་པ་ལས་སྐྱེ་བའི་ཕྱིར་བདེ་བ་ལ་སོགས་པ་ཐོག་མ་མེད་པའི་བག་ཆགས་ལས་སྐྱེས་པ་དེ་དོན་དམ་པར་ནི་མ་ཡིན་ནོ། །དེའི་ཕྱིར་དངོས་སུ་ན་ཐམས་ཅད་སྡུག་བསྔལ་ཁོ་ན་ཡིན་ནོ། །ཞེས་བསྟན་པ་ཡིན་ནོ། །སྡུག་བསྔལ་གྱི་བདེན་པ་དེ་ཡང་རྟག་པ་དགག་པའི་ཕྱིར་མི་རྟག་པ། བདེ་བ་དགག་པ་ལ་སྡུག་བསྔལ་བདག་གི་བར་དགག་པ་ལ་སྟོང་པ། བདག་དགག་པ་ལ་བདག་མེད་བཤད་པའི་དང་པོ། དེ་ནི་རེས་འགའ་དམིགས་པའི་ཕྱིར། །མི་རྟག སྡུག་བསྔལ་དེ་དུས་རེས་འགའ་དམིགས་པའི་ཕྱིར་མི་རྟག་པའོ། །རྟག་པ་ནི་གཏན་དུ་ལྟར་རུང་བའི་ངོ་བོ་ཡིན་པས་རེས་འགའ་དམིགས་པར་རིགས་པ་མ་ཡིན་ཏེ། ལྟར་རུང་བ་དང་མི་རུང་བའི་ངོ་བོ་དག་ཕན་ཚུན་སྤངས་ཏེ་གནས་པའི་ཕྱིར་འགལ་བར་འགྱུར་བའི་ཕྱིར་རོ། །གཉིས་པ། ཉེས་པའི་རྟེན་ཕྱིར་དང་། རྒྱུ་དབང་ཕྱིར་ཡང་སྡུག་བསྔལ་ཡིན། འདོད་ཆགས་ལ་སོགས་པ་ཉེས་པ་ཐམས་ཅད་ཀྱི་རྟེན་ཡིན་པའི་ཕྱིར་དང་། རྒྱུ་དང་འབྲེལ་བའི་ཕྱིར་དང་། གཞན་གྱི་དབང་དུ་གྱུར་པའི་ཕྱིར་སྡུག་བསྔལ་བའོ། །ཡང་གི་སྒྲས་ནི་གོམས་པ་ཙམ་ལ་བརྟེན་པ་ཡང་བརྗོད་དོ། །གསུམ་པ། བདག་མིན་བྱིན་གྱིས་བརླབ་པའང་མིན། །རྒྱུ་མིན་བྱིན་གྱིས་རློབ་པ་མིན། །བདག་གི་རང་བཞིན་མ་ཡིན་ལ་བདག་གིས་བྱིན་གྱིས་བརླབ་པའང་མ་ཡིན་ཏེ། རྒྱུ་མ་ཡིན་པ་ནི་བྱིན་གྱིས་རློབ་པར་བྱེད་པ་ཉིད་མ་ཡིན་པའི་ཕྱིར་རོ། །བཞི་པ། རྟག་པའང་ཇི་ལྟར་སྐྱེད་བྱེད་ཡིན། །དེ་ཕྱིར་གཅིག་ལ་དུ་མ་ནི། །དུས་ཐ་དད་པར་སྐྱེ་མི་འགྱུར། །གལ་ཏེ་ཕུང་པོ་རྣམས་བདག་གི་རང་བཞིན་ཡིན་ན་རྟག་པ་ཉིད་དུ་འགྱུར་རོ། །རྟག་པ་ནི་སྐྱེད་པར་བྱེད་པ་མ་ཡིན་ལ། སྐྱེད་བྱེད་མ་ཡིན་པ་ནི་དངོས་པོ་མ་ཡིན་ཏེ་དམིགས་པར་མི་ནུས་པའི་ཕྱིར་རོ། །དེའི་ཕྱིར་རྟག་པ་ཉིད་ཀྱི་གཅིག་ལས་ཤེས་པ་དུས་ཐ་དད་པ་དུ་མ་བསྐྱེད་པ་མ་ཡིན་ནོ། །བདག་གིས་བྱིན་གྱིས་བརླབ་པ་ཅན་དུ་དམིགས་པ་ཡང་མ་ཡིན་ནོ། །ཕུང་བོ་རྣམས་ཀྱི་རང་བཞིན་དམིགས་པ་གང་ཡིན་པ་དེ་ནི་མི་བརྟན་པ་ཉིད་དོ། །འོ་ན་བདག་གིས་བྱིན་གྱིས་མ་བརླབས་པའི་མིག་ལ་སོགས་པས་ཇི་ལྟར་ཤེས་པ་སྐྱེད་པར་བྱེད། དེས་ན་འབྲས་བུ་ཤེས་པ་གཞན་དུ་མི་མཐུན་པའི་ཕྱིར་བདག་བྱེད་པ་པོར་དཔག་གོ་ཞེ་ན། རྒྱུ་གཞན་དག་ནི་ཚོགས་ན་ཡང་། །འབྲས་བུ་སྐྱེ་བ་མེད་པའི་ཕྱིར། །རྒྱུ་གཞན་རྗེས་སུ་དཔོག་གྱུར་ན། །དེ་ནི་རྟག་པ་ལ་ཡོད་མིན། །གལ་ཏེ་མིག་ལས་གཞན་ཚོགས་ཀྱང་མིག་གི་རྣམ་པར་ཤེས་པ་མི་སྐྱེ་ལ་མིག་གི་རྣམ་པར་ཤེས་པ་ཡང་སྐྱེ་བ་ཡིན་པས་ན་རྒྱུ་གཞན་རྗེས་སུ་དཔག་པར་བྱ་སྟེ། གང་ཞིག་མེད་པར་འབྲས་བུ་མི་བསྐྱེད་པས་མཚུངས་པ་དེ་མ་ཐག་པའི་རྐྱེན་གྱིས་བྱིན་གྱིས་བརླབས་པའི་མིག་ལ་སོགས་པ་ཙམ་ལ་ཤེས་པ་སྐྱེ་བའི་ཕྱིར་རོ། །གང་གི་དེ་མེད་པས་མེད་པར་རྟོགས་པར་འགྱུར་པ་དེ་ནི་རྟག་པ་དང་ཁྱབ་པ་རྣམས་ལ་ནམ་ཡང་མེད་པ་ཡིན་ནོ། །རྗེས་སུ་འགྲོ་བ་ཙམ་གྱིས་སྐྱེད་པར་བྱེད་པ་ཡིན་ན་ནི། ནམ་མཁའ་ལ་སོགས་པ་ཐམས་ཅད་བྱིན་གྱིས་རློབ་པར་འགྱུར་རོ། །དེ་བས་ན་ཡོད་པ་ཙམ་གྱི་བདག་རྒྱུར་འགྱུར་བ་མ་ཡིན་ནོ། །རེས་འགའ་བ་ཉིད་ཡིན་པས་ན། སྡུག་བསྔལ་འདི་རྒྱུ་བཅས་ཉིད་གྲུབ། །རྒྱུ་མེད་གཞན་ལ་མི་ལྟོས་ཕྱིར། །རྟག་ཏུ་ཡོད་པའམ་མེད་པར་འགྱུར། །སྡུག་བསྔལ་འདི་ནི་རེས་འགའ་བྱུང་བ་ཉིད་ཀྱི་རྒྱུ་དང་བཅས་པར་གྲུབ་བོ། །གལ་ཏེ་རྒྱུ་མེད་པར་གཞན་ལ་བལྟོས་པ་མེད་པའི་ཕྱིར། དེ་རྟག་ཏུ་ཡོད་པའམ་མེད་པར་འགྱུར་རོ་ཞེས་སྡུག་བསྔལ་རྒྱུ་ལས་བྱུང་བར་བསྟན་ནོ། རྒྱུ་དེ་གང་ཞེ་ན། ཀུན་འབྱུང་འཕགས་པའི་བདེན་པའོ། །དེ་ཡང་རྒྱུ་མེད་པར་དགག་པ་ལ་རྒྱུ། རྒྱུ་གཅིག་ཡིན་པ་དགག་པ་ལ་ཀུན་འབྱུང་། ནུས་པ་མེད་པ་དགག་པ་ལ་རབ་ཏུ་སྐྱེ་བ། གཙོ་བོ་དགག་པ་ལ་རྐྱེན་གྱིས་རྣམ་པ་བཞིས་བཤད་པའི་དང་པོ། ཇི་ལྟར་ཚེར་མ་ལ་སོགས་ཀྱི། །རྣོ་བ་ཉིད་སོགས་རྒྱུ་མེད་པ། །དེ་ལྟར་འདི་དག་རྒྱུ་མེད་འགྱུར། །ཞེས་རྒྱུ་མེད་པར་སྨྲ་བ་རྣམས་ཟེར་རོ། །དེ་དག་ངོ་བོ་ཉིད་ཀྱི་འབྱུང་བ་ཆེན་པོའི་རང་བཞིན་ཡོད་དོ། །འབྱུང་བའི་ཁྱད་པར་ཉིད་དུས་དང་། །ཡུལ་དང་གནས་སྐབས་དང་ལྡན་པར་སྐྱེའོ། །དེ་ལ་ཁྱད་པར་རྣམས་རྒྱུ་མེད་པར་སྣང་ངོ་། །ཞེས་འདོད་པ་དེ་དགག་པའི་ཕྱིར། གང་ཡོད་ཉིད་ན་གང་སྐྱེ་བ་འམ། །གང་འགྱུར་ན་ཡང་རྣམ་འགྱུར་པ། །དེ་ནི་དེ་རྒྱུར་རབ་ཏུ་བརྗོད། །དེ་ནི་དེ་རྣམས་ལ་ཡང་ཡོད། །ཁྱད་པར་ཉིད་སྐྱེད་པར་བྱེད་པ་ཡིན་ན་དེ་དག་གི་རྒྱུ་མེད་པ་མ་ཡིན་ནོ། །དཔེར་ན་རྒྱ་ཤུག་གི་ཚེར་མའི་རྣོ་བ་དང་འཁྱོག་པ་ནི་རྒྱ་ཤུག་གི་ས་བོན་མེད་པར་ཡོད་པ་མ་ཡིན་ནོ། །དེའི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པའི་ཕྱིར་དེའི་འབྲས་བུ་ཡིན་པས་རྒྱུ་མེད་པ་མ་ཡིན་ནོ། །གང་ཡོད་པ་ཉིད་ན་གང་སྐྱེ་བ་དེ་དེའི་རྒྱུ་ཡིན་ན། རེག་པ་ཡང་མཐོང་བའི་རྒྱུ་ཡིན་པར་ཐལ་ཏེ་རེག་པ་མེད་པར་མེད་པའི་ཕྱིར་རོ་ཞེ་ན། རེག་པ་གཟུགས་རྒྱུ་ཉིད་ཡིན་ཕྱིར་མཐོང་བ་ལ་ནི་རྒྱུ་མཚན་ཡིན། །རེག་པ་མེད་པར་གཟུགས་ཉིད་མི་འབྱུང་ལ་གཟུགས་མེད་ན་མཐོང་བ་མི་འབྱུང་བས། རེག་པ་ཡོད་པ་ནི་མཐོང་བ་ཡོད་པའི་རྒྱུ་མཚན་ཙམ་ཡིན་གྱིས། རྣམ་པ་འདི་ལྟ་བུས་དེ་གཉིས་རྒྱུ་འབྲས་སུ་མི་འགྱུར་ལ། གལ་ཏེ་གཟུགས་ཉེ་བར་བསྟན་ནས་རེག་པ་མེད་ན་མཐོང་བ་མེད་པར་བསྟན་པ་ཡིན་ན་འགྱུར་རོ། །གཉིས་པ། རྟག་རྣམས་བཀག་ཕྱིར། རྒྱུ་རྟག་པ་གཅིག་པུ་བཀག་པས་ཀུན་འབྱུང་གི་རྣམ་པ་གྲུབ་བོ། །གསུམ་པ་དབང་ཕྱུག་ལ། །སོགས་པ་ལས་ཀྱང་སྲིད་ལེན་ཏེ། །ནུས་མེད་ཕྱིར་རོ། །རྟག་པའི་ཕྱིར་དབང་ཕྱུག་ལ་སོགས་པ་ལས་སྡུག་བསྔལ་འབྱུང་བ་མི་སྲིད་དེ། རིམ་པ་དང་ཅིག་ཅར་དག་གིས་དོན་བྱེད་ནུས་པ་མ་ཡིན་པས་སོ། །དེ་ཡི་ཕྱིར། སྲིད་འདོད་རྒྱུ་ཡིན་གང་གི་ཕྱིར། །མི་རྣམས་ཡུལ་གྱི་ཁྱད་པར་ནི། ཡོངས་འཛིན་དེ་ཐོབ་བསམ་པས་བྱས། །རྒྱུ་གཞན་ནམ་ལས་གཞན་ནམ་ལུས་སམ་མ་རིག་པ་ནི་རབ་ཏུ་སྐྱེ་བ་མ་ཡིན་ལ། ནུས་རྒྱུ་ཞེས་བྱ་བའི་མིང་གཞན་དང་ལྡན་པའི་སྲེད་པ་རབ་ཏུ་སྐྱེ་བ་ཡིན་པ་མཐོང་སྟེ། ཇི་ལྟར་མཐོང་ཞེ་ན་ལེན་པའི་ཕྱིར་ཏེ། ལེན་པ་ནི་མི་རྣམས་ཀྱི་ཡུལ་གྱི་ཁྱད་པར་ཡོངས་སུ་འཛིན་པའམ། ཀུན་ཏུ་འཛིན་པ་ཞེས་བྱ་བ་དེ་ཐོབ་པར་སྲེད་པས་བྱས་པའི་ཕྱིར་རོ། །ཡོངས་སུ་འཛིན་པ་དེ་ཡང་སྐྱེ་བ་རྗེས་སུ་འབྲེལ་བ་ཡིན་ནོ། །དེ་ནི་སྲིད་འདོད་གང་ཕྱིར་ཡང་། །སྲོག་ཆགས་བདེ་སྡུག་ཐོབ་པ་དང་། །འདོར་འདོད་འཇུག་པ་དེ་དག་གི །འདོད་དང་འཇིག་སྲེད་ཡིན་པར་འདོད། །སྲེད་པ་ཡང་རྣམ་པ་གསུམ་སྟེ། འདོད་པའི་སྲེད་པ་དང་། སྲིད་པའི་སྲེད་པ་དང་། འཇིག་པའི་སྲེད་པའོ། །གང་ཞིག་གནས་ལ་སོགས་པ་ལ་སྲེད་པ་དེ་ནི་སྲིད་པའི་སྲེད་པ་སྟེ། སྲིད་པའི་འདོད་པའོ། །བདེ་བ་དོན་དུ་གཉེར་བའི་རྣམ་པ་གང་ཡིན་པ་དེ་ནི་འདོད་པའི་སྲེད་པའོ། །སྡུག་བསྔལ་དང་བྲལ་བར་འདོད་པ་ནི་འཇིག་པའི་སྲེད་པའོ། །བཞི་པ། བདག་ཏུ་ཆགས་པའི་རྒྱུ་ཉིད་ལས། །བདེ་མིན་བདེ་བར་འདུ་ཤེས་པ། །ཀུན་ལ་རབ་ཏུ་འཇུག་གྱུར་པ། །དེ་ཕྱིར་སྲེད་པ་སྲིད་རྟེན་ཡིན། །ངར་འཛིན་པའི་གཞི་ཡིན་པའི་ཕྱིར་གཅིག་ཏུ་སྒྲོ་བཏགས་པའི་སེམས་ནི་བདག་གོ །དེ་ལ་ཆགས་པ་གང་ཡིན་པ་དེ་ནི་ཐམས་ཅད་ལ་རབ་ཏུ་འཇུག་པའི་རྒྱུ་ཡིན་ཏེ། གནས་དང་ལོངས་སྤྱོད་ལ་སོགས་པ་དོན་དམ་པར་བདེ་བ་དང་བྲལ་བས་ན་བདེ་བ་མ་ཡིན་པ་ལ་ཕྱིན་ཅི་ལོག་བཞིས་ཉམས་པ་དག་འཇུག་པའི་ཕྱིར་རོ། །དེ་ཕྱིར་སྲེད་པ་ནི་སྲིད་པའི་རྟེན་ཡིན་ནོ། །དེ་ཉིད་ཀྱི་ཕྱིར་སྲིད་པ་ནི་འཇུག་པ་ལ་ལྷན་ཅིག་བྱེད་པ་ཡིན་པའི་ཕྱིར་རྐྱེན་ཙམ་གྱིས་ཉེ་བར་ལེན་པ་ཉིད་ནི་མ་ཡིན་ཏེ། དེ་ལ་ཉེ་བར་ལེན་པ་ནི་སེམས་ཡིན་ནོ། །དེའི་རྐྱེན་གྱིས་རེས་འགའ་སྲེད་པ་ཡིན་ལ། རེས་འགའ་ནི་སྙིང་རྗེ་ཡིན་ནོ། །འདིས་རྐྱེན་ཉིད་ཅེས་པའི་རྣམ་པ་བཤད་པ་ཡིན་ནོ། །ཆགས་བྲལ་སྐྱེ་བ་མ་མཐོང་ཕྱིར། །ནས། དེ་ཡོད་ན་འདི་ཡོད་ཕྱིར་རོ། །ཞེས་པའི་བར་གྱིས་ལུས་དང་འདོད་ཆགས་ཕན་ཚུན་རྒྱུར་བཤད་པ་དགག་པ་འཕྲོས་པ་དང་བཅས་པ་དེ་རྒྱས་པར་གཏན་ལ་ཕབ་བོ། །འགོག་པའི་བདེན་པ་ནི་གཞན་སྡེས་འགོག་པ་ཉིད་མེད་དོ་ཞེས་འདོད་པ་འགག་པ་ལ། འགོག་པ་དང་། གྲོལ་བ་རྣམས་ཀྱང་འདོད་ཆགས་ལ་སོགས་པ་དང་ལྡན་པར་ཁས་ལེན་པ་དགག་པ་ལ་ཞི་བ་དང་། དེ་ལས་ཀྱང་མཆོག་ཏུ་གྱུར་པའི་ཐར་པ་ཡོད་པར་སྨྲ་བ་དགག་པ་ལ་གྱ་ནོམས་པ་དང་། ཐར་པ་ཡང་སླར་ཐར་པ་མ་ཡིན་པར་འགྱུར་རོ་ཞེས་འདོད་པ་དགག་པ་ལ་ངེས་པར་འབྱུང་བ་སྟེ་རྣམ་པ་བཞི། དང་པོ། དེ་ནི་གཏན་དུ་བ་མ་ཡིན་ཏེ། རྒྱུ་ལ་གེགས་སོགས་སྲིད་ཕྱིར་རོ། །འཁོར་ཕྱིར་ཐར་པ་མེད་ཅེ་ན། །མ་ཡིན་འདོད་དང་མ་གྲུབ་ཕྱིར། །སྡུག་བསྔལ་དེ་གཏན་དུ་བར་ཡོད་པ་མ་ཡིན་ཏེ། སྡུག་བསྔལ་གྱི་རྒྱུ་ལ་གེགས་བྱེད་པ་ལ་སོགས་པ་སྲིད་པའི་ཕྱིར་རོ། །སོགས་པའི་སྒྲས་རྒྱུ་མ་ཚང་བ་ལ་སོགས་པའོ། །སྡུག་བསྔལ་གྱི་རྒྱུ་དང་བྲལ་ན་སྡུག་བསྔལ་ཉིད་ཀྱང་བཟློག་པར་འགྱུར་བའི་ཕྱིར་འགོག་པ་སྲིད་པ་ཡིན་ནོ། །འཁོར་བ་ཡིན་པའི་ཕྱིར་ཐར་པ་མ་ཡིན་པ་ནི་འདོད་པའི་ཕྱིར་དང་། འཁོར་བའི་ཕྱིར་ཞེས་པའི་གཏན་ཚིགས་མ་གྲུབ་པ་སྟེ། རྒྱན་ལས། ཐར་པ་ནི་འགའ་ཡང་ཡོད་པ་མ་ཡིན་ནོ། །གང་ཞིག་བཅིངས་པ་དེ་ནི་ཐར་པ་ཡོད་པ་མ་ཡིན་ཏེ། དེའི་རང་བཞིན་ཡིན་པའི་ཕྱིར་ཐར་པ་ཡང་བཅིངས་པ་མེད་དེ། དེ་ནི་རྟག་ཏུ་ཐར་པའི་རང་བཞིན་ཡིན་པའི་ཕྱིར་རོ། །འོན་ཀྱང་སེམས་ཀྱི་རྒྱུན་མ་དག་པར་གྱུར་པ་ཚོགས་པའི་ཁྱད་པར་ལས་དག་པའི་ཆ་གཞན་བསྐྱེད་པ་འབའ་ཞིག་གོ །དེ་ལ་ཕྱི་མ་དག་པའི་ཆ་ནི་འཁོར་བ་ཉིད་དུ་མ་གྲུབ་བོ། །དོན་དམ་པར་ནི་འཁོར་བ་པོ་འགའ་ཡང་ཡོད་པ་མ་ཡིན་ཏེ། སྐད་ཅིག་རྣམས་འཁོར་བ་མ་ཡིན་པའི་ཕྱིར་དང་། རྒྱུན་ཀྱང་དོན་དམ་པར་མེད་པའི་ཕྱིར་དེས་ན་འཁོར་བའི་ཕྱིར། ཞེས་བྱ་བའི་གཏན་ཚིགས་མ་གྲུབ་བོ། །ཞེས་སོ། །གང་ལ་ཐར་པ་ཡོད་པའི་ཐར་པ་པོ་ཡང་མེད་དོ་ཞེ་ན། ཇི་སྲིད་བདག་ཆགས་མ་བཅོམ་ཞིང་། །དེ་ནི་ཡོངས་སུ་གདུང་གྱུར་པ། །དེ་སྲིད་སྡུག་བསྔལ་སྒྲོ་བཏགས་ནས། །རང་བཞིན་དུ་ནི་གནས་པ་མེད། །གྲོལ་བ་པོ་ནི་མེད་ན་ཡང་། །ལོག་པ་སྒྲོ་བཏགས་གཞོམ་ཕྱིར་བརྩོན། །བདག་གི་བ་ལ་ཆགས་པ་ལོག་པར་མ་གྱུར་པ་དེ་སྲིད་འཁོར་བར་ཡོངས་སུ་གདུང་བར་འགྱུར་ལ། སྡུག་བསྔལ་ཉིད་དུ་སྒྲོ་བཏགས་ནས་རྣལ་དུ་གནས་པ་མ་ཡིན་ནོ། །བདག་གི་བའི་ངོ་བོ་ཉིད་གྲོལ་བ་པོ་མེད་ཀྱང་། ལོག་པར་སྒྲོ་བཏགས་པ་གཞོམ་པའི་ཕྱིར་བརྩོན་པ་འབྱུང་ངོ་། །ཐག་པ་སྦྲུལ་དུ་སྒྲོ་བཏགས་པའི་ཚེ། དེའི་བློ་ངོར་ཐག་པ་རྣལ་དུ་གནས་པ་མེད་ལ། ཕྱིས་སྦྲུལ་འཛིན་གྱི་བློ་བསལ་བ་ལ་བརྩོན་པས་ཐག་པ་རང་གི་ཁྱད་པར་མཐོང་བར་འགྱུར་རོ། །དེ་སྦྲུལ་དུ་མ་གྱུར་བས་སྦྲུལ་ཉིད་ལས་གྲོལ་བ་མེད་ཀྱང་སྦྲུལ་འཛིན་དུ་སྒྲོ་བཏགས་པ་དེ་ཞིག་པས་གྲོལ་བ་ཞེས་བྱའོ། །གཉིས་པ། དེ་ཁོ་ན་ཉིད་མཐོང་བ་ལ་ལོག་པར་སྒྲོ་འདོགས་པ་མེད་པའི་ཕྱིར་འདོད་ཆགས་བྲལ་བའི་གནས་པ་ནི། །བརྩེ་བའམ་ཡང་ན་ལས་ཀྱི་ཡིན། །འདོད་ཆགས་དང་བྲལ་བ་འཁོར་བའི་མུར་གནས་པ་ནི་བརྩེ་བའམ་ཡང་ན་ལས་ཀྱིས་ཡིན། གལ་ཏེ་ལས་ཀྱིས་གནས་པ་ཡིན་ན་འཇིག་རྟེན་གཞན་དུ་བྱས་པའི་ལས་ཡོད་པའི་ཕྱིར་འཇིག་རྟེན་ཕ་རོལ་དང་མཚམས་སྦྱོར་བར་འགྱུར་བ་མ་ཡིན་ནམ། འོན་ཏེ་ལས་དེས་ནུས་པ་མེད་ན་ནི་འདོད་ཆགས་དང་བྲལ་བའི་གནས་པ་དེ་མེད་པར་འགྱུར་རོ། །སྙིང་རྗེས་ཡིན་ན། དེ་ནི་སེམས་ཅན་གྱི་སྡུག་བསྔལ་འབྲལ་བར་འདོད་པ་མ་ཡིན་ནམ། སེམས་ཅན་མེད་པའི་ཕྱིར་སེམས་ཅན་དུ་འཛིན་པ་འཁྲུལ་བར་འགྱུར་ན་དེ་འདོད་ཆགས་དང་བྲལ་བ་རྣམས་ལ་ཇི་ལྟར་ཡོད། སེམས་ཅན་དུ་འཛིན་པ་ཡོད་ན་ནི་བདག་མེད་པ་མཐོང་བར་མི་འགྱུར་རོ་ཞེ་ན། དང་པོའི་ལན། འཕངས་ལ་བཟློག་མེད་འདོད་ཕྱིར་རོ། །སྲིད་པའི་སྲེད་ལས་རྣམས་བརྒལ་བའི། །ལས་གཞན་འཕེན་ནུས་མ་ཡིན་ཏེ། ལྷན་ཅིག་བྱེད་པ་ཟད་ཕྱིར་རོ། །སྔོན་ལས་ཀྱིས་འཕངས་པ་ནི་རྩོལ་བ་མེད་པར་བཟློག་པར་ནུས་པ་མ་ཡིན་ནོ། །རྩོལ་བ་ཡང་འདོད་ཆགས་དང་བྲལ་བས་སྤོང་བར་འགྱུར་ཏེ། བཏང་སྙོམས་པ་ཉིད་ཀྱིས་དེ་ནི་འགའ་ལ་ཡང་རེ་བ་མི་འཆའ་བའི་ཕྱིར་རོ། །རེ་བ་མེད་པ་དེ་ཉིད་ཀྱི་ཕྱིར་སྐྱེ་བ་གཞན་གྲུབ་པ་མ་ཡིན་ཏེ། ལྷན་ཅིག་བྱེད་པ་སྲེད་པའི་མཚན་ཉིད་ཟད་པའི་ཕྱིར་རོ། །གཉིས་པའི་ལན། སྡུག་བསྔལ་ཤེས་ལ་འགལ་མེད་པ། །འདུ་བྱེད་སྔ་མ་འཇུག་པ་ཅན། །དངོས་ཆོས་བརྩེ་བ་སྐྱེ་བ་སྟེ། སེམས་ཅན་རྗེས་འབྲེལ་ཅན་ཡིན་ནོ། །གང་གི་ཚེ་སྡུག་བསྔལ་གསུམ་དང་ལྡན་པ་མཐའ་དག་སྡུག་བསྔལ་བའོ་ཞེས་མངོན་དུ་བྱས་པ་དེའི་ཚེ། ཀུན་འབྱུང་གི་མཚན་ཉིད་སྲིད་པ་དང་འབྲལ་བར་འགྱུར་རོ། །ཀུན་འབྱུང་སྤངས་པ་ལ་ནི་འདོད་ཆགས་ལ་སོགས་པ་མེད་པའི་ཕྱིར་སེམས་ཅན་གྱི་ཚོགས་མཐའ་དག་དང་འགལ་བ་མེད་པ་མཉམ་པ་ཉིད་དོ། །དེས་ན་སྡུག་བསྔལ་མཐོང་བ་དངོས་པོ་པ་ལ་བརྟེན་པ་ཉིད་ཀྱིས་བརྩེ་བ་ཆེན་པོ་སྐྱེ་བ་ཡིན་གྱི། དེའི་གནས་སྐབས་ན་སེམས་ཅན་དུ་འཛིན་པ་དང་འབྲེལ་བ་ནི་མེད་དོ། །དེ་ལྟར་གྱུར་པའི་སེམས་ཅན་དུ་འཛིན་པ་སྤངས་པའི་བསམ་པ་གང་ཡིན་པ་དེ་ནི་བརྩེ་བ་ཡིན་ལ། དེ་ཡང་བདག་ཏུ་ལྟ་བ་སྤངས་བ་ཁོ་ནའི་ཡིན་གྱི་གཞན་གྱི་ནི་མ་ཡིན་ནོ། །བདག་ཏུ་ལྟ་བ་མ་སྤངས་བ་ནི་ཇི་ལྟར་གཞན་དག་དེ་སྤངས་བའི་དོན་དུ་འབད་པར་འགྱུར། གལ་ཏེ་འདོད་ཆགས་དང་བརྩེ་བ་ལ་ཁྱད་པར་ཅི་ཡོད། དེས་ན་བརྩེ་བ་དང་ལྡན་པ་ནི་གདོན་མི་ཟ་བར་འདོད་ཆགས་དང་ལྡན་ནོ་ཞེ་ན། འདི་ནི་ཁྱད་པར་ཏེ། འདི་བདག་མིན་པའི་ཆོས་ལ་ནི། བདག་གཞན་སྒྲོ་འདོགས་པ་ལས་ཆགས། །སྡུག་བསྔལ་རྒྱུན་རིག་ཙམ་ལས་ནི། །བརྩེ་བ་སྐྱེ་བར་འགྱུར་བ་ཡིན། །དེ་གཉིས་རྒྱུ་ཐ་དད་པ་དང་། ཡུལ་ཐ་དད་པ་ཡིན་པའི་ཕྱིར་རོ། །འདི་ལྟར་མ་འོངས་པ་མེད་པ་སྒྲོ་བཏགས་ནས་བདག་ཉིད་མ་འོངས་པའི་བདེ་བ་དང་ཕྲད་པར་སྨོན་པའི་དབང་དུ་བྱས་པའི་འདོད་ཆགས་ནི་དེ་ལས་འཇུག་པ་ཡིན་ལ། ཡུལ་ཡང་དེའི་བདག་ཉིད་མ་ཡིན་པ་ལ་བདག་ཉིད་དུ་མཐོང་བར་འགྱུར་བ་ཡིན་ཏེ། ཕྱིན་ཅི་ལོག་རྣམ་པར་བགོས་པའི་ཡིད་ཆགས་པར་འགྱུར་གྱིས་གཞན་ནི་མ་ཡིན་ནོ། །བརྩེ་བ་ནི་སྡུག་བསྔལ་གྱི་རྒྱུན་ཙམ་མངོན་དུ་བྱས་པ་ཉིད་ལས་ལོག་པར་མངོན་པར་བྲལ་བའི་དོན་དུ་འཇུག་པ་ཡིན་ནོ། །བརྩེ་བ་འདོད་ཆགས་ཀྱི་ངོ་བོ་ཉིད་དུ་མ་གྱུར་མོད་ཞེ་སྡང་གི་རང་བཞིན་དུ་ནི་འགྱུར་ཏེ། མི་གཙང་བ་ལ་སོགས་པ་མཐོང་བ་ལས་རྒྱབ་ཀྱིས་ཕྱོགས་པར་འགྱུར་བས་སོ་ཞེ་ན། གཏི་མུག་ཉེས་པའི་རྩ་བ་སྟེ། །དེ་ཡང་སེམས་ཅན་འཛིན་པ་ཡིན། །དེ་མེད་ཉེས་རྒྱུ་ལས་ཁྲོ་ཡིན། །དེས་ན་བརྩེ་བ་ཉེས་མེད་འདོད། །གལ་ཏེ་བདག་ལ་འཚེ་བ་མཐོང་ན་ཞེ་སྡང་སྐྱེ་མོད། བདག་གང་ཡང་མེད་ཀྱི། འོན་ཀྱང་ཡོད་པ་མ་ཡིན་ཡང་བདག་ཏུ་འཛིན་པ་འབའ་ཞིག་ཡོད་པ་དེ་ཉིད་གཏི་མུག་སྟེ་འདོད་ཆགས་ལ་སོགས་པའི་རྒྱུའོ། །དེ་ཡང་སེམས་ཅན་ཡོད་པར་འཛིན་པ་ལས་ཡིན་ལ། དེ་མེད་པས་ན་ཁྲོ་བའི་རྒྱུ་མེད་ལ། དེའི་ཕྱིར་བརྩེ་བ་ནི་སྐྱོན་ཐམས་ཅད་དང་བྲལ་བ་ཡིན་ནོ། །གྲོགས་མེད་མ་ཡིན་མངོན་འདུ་བྱེད། །ཟད་ནས་གཞན་མཚམས་མི་སྦྱོར་ཕྱིར། །འདུ་བྱེད་ནུས་པ་མ་ཟད་ན། །གལ་ཏེ་གནས་པ་ཉེས་མེད་ཉིད། །སྐྱེ་བ་སྔ་མའི་ཉིང་མཚམས་སྦྱོར་བ་སྔོན་གྱི་ལས་ཀྱིས་བྱས་པའི་འདུ་བྱེད་ཟད་ན་སྐྱེ་བ་གཞན་དང་མཚམས་མི་སྦྱོར་བས་མི་གྲོལ་བ་མ་ཡིན་ནོ། །གལ་ཏེ་ནུས་པ་ཟད་པར་མི་འགྱུར་བར་སྔར་བྱས་པའི་ལས་ཀྱི་འདུ་བྱེད་ཡོད་པ་གང་ཡིན་པ་དེ་དག་གི་སྡིག་པ་དང་བྲལ་ནས་ཇི་སྲིད་འཁོར་བའི་མཐར་ཐུག་བར་དུ་གནས་པ་ལ་ཉེས་པ་མེད་དོ། །འོ་ན་འདོད་ཆགས་དང་བྲལ་བ་དུས་ཅུང་ཟད་གནས་ལ་འཁོར་བའི་མུར་ཅི་སྟེ་མི་གནས་པ་ཡིན་ཞེ་ན། སྙིང་རྗེ་དམན་པ་ཉིད་ཕྱིར་ཡང་། །གནས་པའི་འབད་རྩོལ་ཆེན་པོ་མེད། །གང་དག་བརྩེ་བ་ཆེན་པོ་པ། །གཞན་གྱི་དོན་ནི་བཞུགས་པ་ཡིན། །སྔར་གྱི་འདུ་བྱེད་ཟད་པ་དང་། །སྙིང་རྗེ་དམན་པས་གནས་པའི་འབད་རྩོལ་ཆེན་པོ་མེད་པས་རྟག་ཏུ་གནས་པ་མ་ཡིན་ནོ། །སུ་ཞེ་ན་ཉན་རང་གི་བྱང་ཆུབ་པའོ། །གང་དག་དུས་ཡུན་རིང་པོ་གོམས་པར་བྱས་པའི་སྙིང་རྗེ་ཆེན་པོ་ཅན་དེ་དག་སེམས་ཅན་ལ་ཕན་པའི་ངོར་འཁོར་བ་མ་སྟོངས་བར་དུ་གནས་པར་འགྱུར་རོ། །གལ་ཏེ་འཇིག་ཚོགས་ལྟ་བྲལ་ཕྱིར། །ནས། བདེ་བ་འདོད་པས་མངོན་རྒྱུག་མིན། །ཞེས་པའི་བར་གྱིས་མཐོང་ལམ་དུ་འཇིག་ཚོགས་ལ་ལྟ་བ་ལས་གཞི་མེད་པའི་ཉོན་མོངས་པ་ཡིན་པའི་ཕྱིར་མངོན་པར་འདུ་བྱེད་པ་ལས་འབྱུང་བ་ཙམ་སྤངས་པ་དང་། ལྷན་ཅིག་སྐྱེས་པའི་འཇིག་ཚོགས་སུ་ལྟ་བ་ནི་ཐོག་མ་མེད་པ་ནས་གོམས་པས་བརྟན་པ་ཡིན་པའི་ཕྱིར་སྒོམ་པའི་ལམ་གྱིས་སྤོང་བར་བཤད་ནས། སེམས་ཅན་དུ་ལྟ་བ་ལྷན་ཅིག་སྐྱེས་པ་ཡོད་པའི་ཕྱིར་མཐོང་ལམ་དུ་འཁོར་བ་མེད་པ་མ་ཡིན་པ་དང་། ཕྱི་མར་དེ་སྤངས་པས་འཁོར་བ་ཡོད་པ་མ་ཡིན་པར་བཞག་གོ །གསུམ་པ། བདག་ཡོད་ན་བཅིངས་པ་དེ་ཉིད་གྲོལ་བས་ཐར་ལ། དེས་ན་བདག་ཡོངས་སུ་དགའ་བའི་ཁྱད་པར་ལས་བདག་དེ་ཉིད་མ་རིག་པ་དང་བྲལ་ནས་དགའ་བའི་ངོ་བོ་ཉིད་ནི་གྱ་ནོམས་པའི་ཐར་པའོ། །བདག་མེད་ན་འཁོར་བའང་སྟོང་ཉིད་གྲོལ་བ་ཡང་གཞན་ཁོ་ན་སྟེ། གང་གྲོལ་བའི་ཚེ་ཡོངས་སུ་དགའ་བར་སུ་ཞིག་དགའ་བར་འགྱུར། བདག་ཏུ་འཛིན་པ་ཡོད་ན་སྐྱོན་དང་བཅས་པར་མི་འགྱུར་ཞིང་ཐར་པར་རུང་ངོ་ཞེ་ན། སྡུག་བསྔལ་སྐྱེ་བའི་རྒྱུ་ཉིད་ནི། །ནས། སྤོངས་ལ་དེ་ནི་རྟག་པར་སྨྲོས། །ཞེས་པའི་བར་གྱིས་རང་སྡུག་བསྔལ་བ་སྐྱེད་པར་བྱེད་པའི་རྒྱུ་ཉིད་འཆིང་བ་ཡིན་ན། དེའི་ཚེ་སྡུག་བསྔལ་གྱི་རྒྱུ་བདག་ཡོད་པས་རྟག་ཏུ་བཅིངས་པ་ཉིད་དུ་འགྱུར་རོ། །ལྷན་ཅིག་བྱེད་པའི་གྲོགས་ལ་བལྟོས་ནས་ཀྱང་རྟག་པས་འབྲས་བུ་སྐྱེད་པར་བྱེད་པ་བཀག་པ་ཡིན་ནོ། །སྡུག་བསྔལ་མེད་པ་སྐྱེད་པར་བྱེད་ཅིང་སྡུག་བསྔལ་དང་བྲལ་བར་གནས་པ་ལ་དགའ་བའི་ངོ་བོ་ཉིད་དུ་གནས་པ་ནི་ཐར་པ་སྟེ། དེ་ལྟ་བུ་རྟག་པ་ལ་ཡོད་པ་མ་ཡིན་ཏེ་ཡོད་ན་དེའི་རྒྱུ་བདག་ཡོད་པས་རྟག་ཏུ་ཐར་པ་ཉིད་དུ་འགྲོའོ། །བདག་ནི་རྟག་པ་མ་ཡིན་ཏེ་འདས་མ་ཐག་པའི་སྐྱོན་ཡོད་པའི་ཕྱིར་རོ། །མི་རྟག་པར་ཡང་བརྗོད་དུ་མེད་དེ། རྟོག་པ་སྔོན་དུ་མི་གཏོང་བའི་སྐྱོན་ཡོད་པའི་ཕྱིར་རོ། །དེ་བས་ན་འགའ་ཞིག་གི་ཡང་རྒྱུ་མ་ཡིན་ཏེ་རྒྱུ་ཉིད་ལ་མི་རྟག་པས་ཁྱབ་པར་བཤད་པས་སོ། །དེ་བས་ཁྱབ་བྱེད་མི་རྟག་པ་མེད་ན་དོན་བྱེད་པ་མེད་པའི་ཕྱིར་བརྗོད་པར་བྱ་བ་མེད་ན་བཅིངས་པ་དང་ཐར་པ་མི་རུང་ངོ་། །ཡང་གི་སྒྲས་རྟག་པ་གཅིག་པུའི་སྐྱེས་བུར་མ་ཟད་གཉིས་ཀའི་ངོ་བོ་ཅན་གྱི་སྐྱེས་བུ་ཡིན་པར་འདོད་ཀྱང་དེ་ལྟ་བུའི་སྐྱོན་དུ་འགྱུར་བ་སྟེ། རྟག་པ་འཇིག་པ་འགལ་བས་སོ་ཞེས་གཞན་གྱིས་བརྟགས་པའི་ཐར་པ་བཀག་ནས་འགོག་པའི་བདེན་པ་གྱ་ནོམས་པ་བསྟན་ནོ། །འགོག་པའི་རྣམ་པ་བཞི་པ་ནི་ལམ་གྱི་ཞར་ལ་བསྟན་ནོ། །ལམ་གྱི་བདེན་པ་ཡང་། ལམ་ཉིད་མེད་དོ་ཞེས་དགག་པ་ལ་ལམ་དང་། ལམ་འདི་ནི་ཚད་མ་དང་ལྡན་པ་མ་ཡིན་ནོ་ཞེས་སྨྲ་བ་དགག་པ་ལ་རིགས་པ་དང་། གྲོལ་བའི་རྒྱུ་མེད་དོ་ཞེས་དགག་པ་ལ་མངོན་དུ་བྱེད་པའི་ལམ་འགོག་པའི་རྒྱུར་བཤད་པ་སྒྲུབ་པ་དང་། དེ་ལས་གཞན་པའི་ལམ་བདག་ཏུ་ལྟ་བ་ཡིན་ནོ་ཞེས་པ་དགག་པ་ལ་ངེས་པར་འབྱིན་པ་སྟེ་རྣམ་པ་བཞིས་བཤད་པའི་དང་པོ། །བཤད་ཟིན་ལམ་དེ་གོམས་པ་ལས། །གནས་གྱུར་གལ་ཏེ་གནས་གྱུར་ཀྱང་། །ལམ་བཞིན་སྐྱོན་ནི་འབྱུང་ཞེ་ན། །མ་ཡིན་ནུས་པ་མེད་ཕྱིར་རོ། །སྔར་བཤད་པའི་ལམ་དེ་གོམས་པ་ལས་གནས་གྱུར་པ་སེམས་ཀྱི་རྒྱུན་ནམ་ཀུན་གཞི་ཡོངས་སུ་དག་པར་སོང་བའོ་བདག་དང་བདག་གིར་འཛིན་པ་དང་མི་མཐུན་པ་མེད་པ་དེའི་བདག་ཉིད་དུ་གྱུར་པ་ན་ཉེས་པ་མཐའ་དག་དང་བྲལ་བར་འགྱུར་རོ། །འོ་ན་ཇི་ལྟར་ཉེས་པ་དང་ལྡན་པ་ཡོན་ཏན་དང་ལྡན་པར་འགྱུར་བ་དེ་བཞིན་དུ་ཡོན་ཏན་དང་ལྡན་པ་ཡང་སྐྱོན་དང་ལྡན་པར་འགྱུར་བའི་ཕྱིར་ངེས་པར་འབྱུང་བ་མེད་དོ་ཞེ་ན། མ་ཡིན་ཏེ་ཉེས་པ་རྣམས་ཡོན་ཏན་ཡོད་པས་བཅོམ་པའི་ཕྱིར་བཟློག་པར་ཇི་ལྟར་མི་འགྱུར་ཞེ་ན། ཡོན་ཏན་རྣམས་ནི་དངོས་པོའི་རང་བཞིན་ཡིན་པའི་ཕྱིར་དང་། ཉེས་པ་རྣམས་ནི་དེ་ལས་བཟློག་པར་ནུས་པ་མེད་པའི་ཕྱིར་རོ། །དེ་ཅིའི་ཕྱིར་ཞེ་ན། རྣམ་ཤེས་ཡུལ་འཛིན། སོགས་ཚིགས་སུ་བཅད་པས་སྲོག་ཆགས་རྣམས་ལམ་ལ་འཇུག་པར་བྱེད་པ་རྣམ་ཤེས་ཀྱིས་ཡིན་ལ། །དེའི་ཆོས་ཀྱི་ངོ་བོ་ཉིད་ནི་ཡུལ་འཛིན་པའོ། །དེ་བས་ཡུལ་ཉམས་སུ་མྱོང་ན་རྣམ་ཤེས་སུ་འགྱུར་ལ། མ་མྱོང་ན་ནི་མ་ཡིན་ནོ། །ཡུལ་ཡང་དེས་ཇི་ལྟར་ཡོད་པ་བཞིན་འཛིན་ལ། ཡུལ་དེ་ཡང་ཡོད་པར་གྱུར་པའི་བདག་ཉིད་ཀྱིས་རྣམ་ཤེས་སྐྱེད་པར་བྱེད་དོ། །དེའི་ཕྱིར་མི་རྟག་པ་དང་བདག་མེད་སོགས་ཀྱིས་ངོ་བོ་ཉིད་ཅན་ནི་ཡུལ། རྣམ་པར་ཤེས་པ་ནི་དེ་འཛིན་པ་ཉིད་དོ། །རང་བཞིན་འདི་ཡིན། སོགས་ཚིགས་སུ་བཅད་པས་བདག་མེད་པ་ལ་སོགས་པས་དེའི་རང་བཞིན་ཉིད་དེ། འདི་ལས་སེམས་དེ་འཁྲུལ་བར་བྱེད་པའི་རྒྱུ་གཞན་བྱུང་ན་གོལ་བར་འགྱུར་ཞིང་། འཁྲུལ་པ་སླར་བཟློག་པ་ཡང་རྐྱེན་གཅིག་ལ་བལྟོས་པས་མི་བརྟན་པ་སྟེ་རྩ་བ་མེད་པས་ཐག་པ་ལ་སྦྲུལ་གྱི་བློ་བཞིན་དུ་མྱུར་བར་བཟློག་གོ །དེ་བས་ན་སེམས་ཀྱི་རང་བཞིན་རྣམ་པར་དག་པ་ཡིན་པས་འོད་གསལ་བ་ཡིན་ལ། རྟག་པས་སྟོང་པའི་ཕྱིར་དྲི་མ་རྣམས་ནི་གློ་བུར་བ་ཡིན་ནོ། །དེའི་ཕྱིར་སྔར་ཡང་། སོགས་ཚིགས་སུ་བཅད་པ་ཕྱེད་དང་གཉིས་ཀྱིས་སྔར་ཐོས་པ་དང་བསམ་པའི་དུས་སུ་དེ་ཁོ་ན་ཉིད་མཐོང་བ་ལ་གེགས་བྱེད་པའི་ནུས་པ་མེད་ན། ཕྱིས་ལམ་དུ་མངོན་དུ་བྱེད་པའི་ཚེ་སེམས་ཀྱི་རྒྱུད་ལམ་གྱི་ངོ་བོ་ཉིད་དུ་གྱུར་ན་ཉེས་པ་རྣམས་སྐྱེ་བའི་ནུས་པ་ལྟ་ག་ལ་ཡོད། དད་པ་དམན་པ་ལ་སོགས་པའི་དགྲ་བཅོམ་ལ་སྐྱོན་སྐྱེ་བའི་ནུས་པ་ཅུང་ཟད་ཡོད་ན་ཡང་། དེ་ལ་གནོད་པ་ཅན་བསྐྱེད་ནུས་པ་ཅན་གྱི་རྒྱུད་ལ་དེ་དག་ཡུན་དུ་གནས་པའི་ནུས་པ་མེད་དེ་ས་གཞི་རློན་པ་ལ་མེ་བཞིན་ནོ། །ལམ་གྱི་ཡོན་ཏན་ནི་འཚེ་བ་མེད་པ་ཅན་ཡིན་ལ། འཚེ་བ་མེད་པ་ཡང་ཡང་དག་པའི་དོན་གྱི་རང་བཞིན་ཡིན་པས་ཕྱིན་ཅི་ལོག་གི་སྐྱོན་གྱིས་འབད་དུ་ཟིན་ཀྱང་ལམ་ལ་གནོད་པ་ནི་མ་ཡིན་ཏེ། དངོས་པོ་མ་ལུས་པའི་ངོ་བོ་ཉིད་ཡོངས་སུ་འཇལ་བར་ནུས་པ་ཅན་གྱི་བློ་ནི་དེའི་ཕྱོགས་འཛིན་ཡིན་པའི་ཕྱིར་རོ། །ལམ་གྱི་རྣམ་པ་གཉིས་པ། འདོད་ཆགས་དང་ཞེ་སྡང་ཕན་ཚུན་གནོད་པར་མཐོང་བ་བཞིན་བདག་དང་བདག་མེད་པ་ཡང་མ་ཡིན་ནམ། དེ་བས་ན་ལམ་གྱི་ཉོན་མོངས་པ་དང་བྲལ་བ་ཐོབ་པར་བྱེད་པ་མི་རིགས་སོ་ཞེ་ན། བདག་འཛིན་རྒྱུ་གཅིག སོགས་ཚིགས་སུ་བཅད་པ་གཉིས་ཀྱིས་འདོད་ཆགས་དང་ཞེ་སྡང་དག་བདག་ཏུ་འཛིན་པའི་རྒྱུ་གཅིག་པ་ཅན་ཡིན་ལ། དེ་གཉིས་རྒྱུ་དང་འབྲས་བུའི་དངོས་པོ་ཡིན་པའི་ཕྱིར་ཕན་ཚུན་ཐ་དད་ཀྱང་གཅིག་ལ་གཅིག་གིས་གནོད་པར་མི་བྱེད་དོ། །བདག་མེད་པ་མཐོང་བ་ནི་ཐམས་ཅད་དུ་འཛིན་པ་དང་འགལ་བའི་ཕྱིར་འགོག་པ་ཐོབ་པར་བྱེད་པ་ཡིན་ལ། བྱམས་པ་ལ་སོགས་པ་ཞེ་སྡང་གི་གཉེན་པོར་དམ་པའི་ཆོས་ནས་གསུངས་པ་མ་ཡིན་ནམ། དེའི་ཕྱིར་བདག་མེད་པ་མཐོང་བ་ཁོ་ན་ལམ་དུ་རིག་པ་མ་ཡིན་ནོ་ཞེ་ན། བྱམས་སོགས་རྨོངས་དང་འགལ་བ་མེད། །སོགས་ཚིགས་སུ་བཅད་པས། ཞེ་སྡང་གི་གཉེན་པོར་བྱམས་པ། འདོད་ཆགས་ཀྱི་གཉེན་པོར་མི་སྡུག་པ། འཚེ་བའི་གཉེན་པོར་སྙིང་རྗེ། ཕྲག་དོག་གི་གཉེན་པོར་དགའ་བ། ཐམས་ཅད་ཀྱི་གཉེན་པོར་བཏང་སྙོམས་ཡིན་ཡང་དེ་དག་ཤིན་ཏུ་ཉེས་པ་རྣམས་ཚར་གཅོད་པ་མ་ཡིན་ཏེ། གཏི་མུག་དང་འགལ་བ་མེད་པའི་ཕྱིར་རོ། །ཉེས་པ་ཐམས་ཅད་གཏི་མུག་གི་རྩ་བ་ཅན། གཏི་མུག་དེ་ཡང་འཇིག་ལྟ་ཡིན་ནོ། །འོ་ན་དགྲ་བཅོམ་པའི་མི་ཤེས་པ་ཡང་གཏི་མུག་དང་འཇིག་ལྟར་འགྱུར་རམ་ཞེ་ན། དེ་གཏི་མུག་ལས་གྲོལ་ཞིང་འཇིག་ལྟ་དང་བྲལ་བ་ཡིན་ནོ། །དེའི་ཕྱིར་མ་རིག་པ་ནི། རིག་པའི་མི་མཐུན་ཕྱོགས་ཕྱིར་དང་། །སེམས་བྱུང་ཉིད་ཀྱི་དམིགས་པའི་ཕྱིར། །ལོག་པར་དམིགས་ཉིད་མ་རིག་པར། །གསུངས་ཕྱིར་གཞན་ནི་རིགས་མ་ཡིན། །ཤེས་རབ་ཀྱི་རྣམ་པ་ལས་ཕྱིན་ཅི་ལོག་ཏུ་རྟོག་པའི་ངོ་བོ་ཉིད། རྟེན་དང་དམིགས་པ་དང་རྣམ་པ་དང་། །རྫས་དང་དུས་རྣམས་དང་མཚུངས་པར་ལྡན་པ་དེ་མ་རིག་པའོ། །འགལ་བ་གང་ཡིན་འདིར་བཤད་བྱ། སྟོང་ཉིད་ལྟ་དང་དེ་འགལ་ཕྱིར། །དེའི་རང་བཞིན་ཉེས་ཀུན་དང་། །འགལ་བར་རབ་ཏུ་གྲུབ་པ་ཡིན། །བདག་ཏུ་འཛིན་པའི་རྒྱུ་ཅན་ཉོན་མོངས་པ་དང་། སྟོང་པ་ཉིད་མཐོང་བ་འགལ་བར་གྲུབ་པ་ཡིན་ནོ། །དེ་བས་གཏི་མུག་འགགས་ན་འཁོར་བ་མ་ལུས་པ་འགག་པའི་ཕྱིར་ངེས་པར་འབྱུང་བ་རིགས་པར་བཤད་དོ། །ཟད་མིན་སྲོག་ཆགས་ཆོས་ཉིད་ཕྱིར། །གཟུགས་སོགས་བཞིན་མིན་མ་གྲུབ་ཕྱིར། །འདོད་ཆགས་སོགས་སྲོག་ཆགས་ཀྱི་ངོ་བོ་ཉིད་ཀྱི་ཆོས་ཡིན་པའི་ཕྱིར་ཟད་པ་མ་ཡིན་ནོ་སྙམ་ན། སྲོག་ཆགས་ཀྱི་ཆོས་ཉིད་དུ་དེ་ཉིད་མ་གྲུབ་པའི་ཕྱིར་དང་། སྲོག་ཆགས་འགའ་ཞིག་ཀྱང་ཡོད་པ་མ་ཡིན་ཏེ། འོན་ཀྱང་སྐད་ཅིག་མ་བརྒྱུད་མའོ། །གཉེན་པོ་མི་སྡུག་པ་སོགས་དང་འབྲེལ་བ་དེ་དག་སྤོང་བར་མཐོང་བ་དེའི་ཕྱིར་མི་ཟད་པ་མ་ཡིན་ནོ། །འདིས་འགོག་པ་རིགས་པར་བསྟན་ནོ། །ཉེས་པ་རྣམ་པར་འགགས་པ་ནི། །སྲ་བཞིན་སླར་ཡང་སྐྱེ་མེད་དེ། །དེ་དག་ཉིད་གྱིས་འབྲེལ་མེད་དང་། །ཐལ་བ་བཞིན་དུ་མ་ངེས་ཕྱིར། །ལམ་མངོན་དུ་བྱེད་པ་དང་འགལ་བ་ཅན་གྱི་ཉེས་པ་རྣམས་གསེར་གྱི་སྲ་བ་བཞིན་དུ་སླར་སྐྱེ་བ་མ་ཡིན་ཏེ། བདག་མེད་པ་མཐོང་བའི་ལམ་ལ་གོམས་པ་མི་འཇིག་པའི་ཕྱིར་རོ། །གཉེན་པོ་ཡོད་པར་གྱུར་ན་ཉེས་པ་འབྱུང་བ་ཡང་མ་ཡིན་ནོ། །འདི་ལྟར་མེའི་སྟོབས་ཀྱིས་ཐལ་བར་གྱུར་པ་སླར་ཤིང་དུ་བཟློག་པ་མེད་པ་བཞིན་གྱིས་ཡང་མ་ངེས་པ་ཡིན་ནོ། །དེས་ནི་ལམ་གྱི་ཉོན་མོངས་པ་ལ་ལོག་པ་སླར་སྐྱེ་བ་མ་ཡིན་པར་རིག་པ་བསྟན་པ་ཡིན་པས་རིག་པ་ཞེས་བྱའོ། །ལམ་གྱི་རྣམ་པ་གསུམ་པ་བཤད་པ། གང་ཞིག་བདག་མཐོང་དེ་ལ་ནི། །ང་ཞེས་རྟག་ཏུ་ཞེན་པར་འགྱུར། །ཞེན་པས་བདེ་ལ་སྲེད་འགྱུར་ཏེ། །སྲིད་པས་སྐྱོན་རྣམས་སྐྱེད་པར་བྱེད། །ཡོན་ཏན་མཐོང་བས་ཡོངས་སྲེད་པ། །ང་ཡི་ཞེས་དེའི་སྒྲུབ་བྱེད་ལེན། །དེས་ན་བདག་ལ་མངོན་ཆགས་པ། །དེ་སྲིད་དེ་ནི་འཁོར་བར་འགྱུར། །ཇི་ལྟར་བདག་མཐོང་བ་ཡིན་ཞེ་ན་ཕུང་སོགས་རྣམས་ལ་བརྟེན་ནས་སོ། །ཇི་ལྟར་ཕུང་པོར་འཛིན་པ་ཡོད་པ་དེ་སྲིད་ངར་འཛིན་ཡོད་ལ། དེ་ཡོད་ན་ལས་མངོན་པར་འདུ་བྱེད་པ་ཡོད་འཁོར་བར་འགྱུར་བས་ན་ཆོས་ཀྱི་བདག་ལ་གནོད་པ་མ་བྱས་པར་གང་ཟག་གི་བདག་མེད་པ་རྟོགས་པར་མི་འགྱུར་རོ། །དེའི་ཕྱིར་བདག་མེད་གཉིས་གཏན་ལ་འབེབས་པའི་ཕྱིར། །བདག་ཡོད་ན་ནི་གཞན་དུ་ཤེས། བདག་གཞན་ཆ་ལས་འཛིན་དང་སྡང་། །འདི་དག་དང་ནི་ཡོངས་འབྲེལ་ལས། །ཉེས་པ་ཐམས་ཅད་འབྱུང་བར་འགྱུར། །བདག་ཏུ་འཛིན་པ་ཡོད་ན་ནི་གཞན་གྱི་བློ་སྐྱེ་སྟེ། བདག་དང་གཞན་གྱི་ཆ་ལས་ཆགས་པ་དང་སྡང་བ་ལེན་ནོ། །ཆགས་སྡང་དེ་གཉིས་དང་འབྲེལ་བས་རྩ་བ་དང་ཉེ་བའི་ཉོན་མོངས་པ་ཐམས་ཅད་འབྱུང་བར་འགྱུར་ཞིང་། དེ་ལས་དགེ་བའམ་མི་དགེ་བའི་ལས་ཀྱིས་འདུ་བྱེད་ཅིང་དེའི་དབང་གིས་འཇིག་རྟེན་སྣ་ཚོགས་པ་འདི་གྲུབ་པར་འགྱུར་རོ། །ངེས་པར་བདག་ལ་ཆགས་པ་ནི། །བདག་གི་ལ་ཆགས་མི་འབྲལ་ཞིང་། །ངེས་མེད་བདག་ལ་ཆགས་པ་དང་། །བྲལ་བའི་རྒྱུ་ཡང་ཡོད་མ་ཡིན། །གལ་ཏེ་ཆགས་པ་སྐྱོན་བཅས་ན། །དེ་ལས་ཅིར་འགྱུར་དེ་སྤོང་འགྱུར། །བདག་ལ་ཆགས་པ་དེ་བདག་གི་བའི་ཡང་ཆགས་པར་འགྱུར་རོ། །བདག་ལ་སྐྱོན་མེད་པར་གྱུར་ན་ཆགས་པ་དང་བྲལ་བའི་རྒྱུ་ནི་ཡོད་པ་མ་ཡིན་ནོ། །དེ་བས་ན་བདག་དང་བདག་གིར་ཆགས་པ་ནི་སྐྱོན་ཐམས་ཅད་དང་བཅས་པའོ། །ཆགས་པ་སྐྱོན་ཅན་དེ་ལས་ཅིར་འགྱུར། དེ་སྐྱོན་ཅན་ཡིན་པའི་ཕྱིར་སྤོང་བར་རིགས་སོ། །འདི་ཡུལ་སུན་དབྱུང་མེད་པར་ནི། །དེ་སྤོང་བར་ནི་ནུས་མ་ཡིན། །ཡུལ་གྱི་སྐྱོན་མ་རྟོགས་པར་ཆགས་པ་སྤོང་མི་ནུས་པའི་ཕྱིར་དེ་སུན་དབྱུང་བར་བྱའོ། །འདི་ནི་གྲུབ་པའི་མཐའ་ལས། ཤེས་བྱ་མེད་ན་ཤེས་པ་བསལ་བ་ནི། །བདེ་བླག་རྙེད་ཅེས་སངས་རྒྱས་རྣམས་ཀྱིས་གསུངས། །ཤེས་བྱ་མེད་ན་ཤེས་པ་བཀག་གྲུབ་པས། །དང་པོར་ཤེས་བྱ་དགག་པར་མཛད་པ་ཡིན། །ཞེས་དང་། གཟུང་བ་མེད་ན་དེ་འཛིན་མེད། །ཅེས་པས་དེ་རྒྱས་པར་གཏན་ལ་འབེབས་པ་ནི། ཡོན་ཏན་སྐྱོན་དང་རྗེས་འབྲེལ་བའི། །ནས། དེ་ལོག་ན་ནི་རང་ཉིད་ཀྱི། །རང་བཞིན་ཉིད་ལ་སླར་བརྟེན་འགྱུར། །ཞེས་པའི་བར་གྱིས་སོ། །བླང་དང་དོར་བྱ་སྤངས་པའི་ཕྱིར། །ཐམས་ཅད་ལ་ནི་མཉམ་སྙོམས་ཅན། །ཙན་དན་སྟེའུ་མཚུངས་པ་ལ། །ཆགས་བྲལ་ཞེས་ནི་བརྗོད་པ་ཡིན། །བླང་དང་དོར་བྱར་བྱ་བའི་དངོས་པོ་དག་ལ་གོ་རིམ་བཞིན་དུ་ལེན་པ་དང་སྤོང་བ་གང་ཡིན་པ་བཅོམ་པས། ཆོས་ཉིད་ཙམ་ཞིག་མངོན་དུ་བྱས་པའི་ཕྱིར་ཆོས་ཐམས་ཅད་ལ་མཉམ་པ་ཉིད་ཐོབ་པ་དེ་ནི་འདོད་ཆགས་དང་བྲལ་བར་བརྗོད་དེ། སྟེའུས་བཞོགས་པ་ལ་ཡང་ཙན་དན་གྱིས་བྱུག་པ་ལྟ་བུར་སེམས་པའོ། །ལམ་གྱི་རྣམ་པ་བཞི་པ་བཤད་པ། འདུ་བྱེད་སྡུག་བསྔལ་ལ་དགོངས་ནས། །སྡུག་བསྔལ་བསྒོམ་པར་གསུངས་པ་ཡིན། །ངེད་ཀྱི་དེ་ཡང་རྐྱེན་ལས་སྐྱེས། །དེ་ནི་བདག་མེད་ལྟ་རྟེན་ཡིན། །སྟོང་ཉིད་ལྟ་བས་གྲོལ་བར་འགྱུར། །སྒོམ་པ་ལྷག་མ་དེ་དོན་ཡིན། །དེ་ཕྱིར་མི་རྟག་ལས་སྡུག་བསྔལ། །སྡུག་བསྔལ་ལས་ནི་བདག་མེད་གསུངས། །སྡུག་བསྔལ་བསྒོམ་པ་འདོད་ཆགས་དང་བྲལ་བའི་རྒྱུ་མ་ཡིན་ན་ནི་བཅོམ་ལྡན་འདས་ཀྱིས་ཅིའི་ཕྱིར་བསྒོམ་པར་གསུངས་ཞེ་ན། སྡུག་བསྔལ་གྱི་སྡུག་བསྔལ་ལ་བརྟེན་ནས་སྡུག་བསྔལ་བསྒོམ་པར་གསུངས་པ་མ་ཡིན་གྱི། འོན་ཀྱང་འདུ་བྱེད་ཀྱི་སྡུག་བསྔལ་ཉིད་རྒྱུ་དང་འབྲེལ་བར་དགོངས་ནས་སྡུག་བསྔལ་བསྒོམ་པར་གསུངས་ཏེ། འདུ་བྱེད་ཀྱི་སྡུག་བསྔལ་དེ་ཡང་རྒྱུ་དང་རྐྱེན་ལ་རག་ལས་པ་དོན་དམ་པར་བདག་མེད་པར་ལྟ་བ་ལ་བརྟེན་པ་ཅན་ཡིན་ཏེ། གང་ཞིག་རྐྱེན་ལས་སྐྱེས་པ་དེ་མ་སྐྱེས། །དེ་ལ་སྐྱེ་བའི་རང་བཞིན་ཡོད་མ་ཡིན། །རྐྱེན་ལ་རག་ལས་གང་དེ་སྟོང་པ་ཉིད། །ཅེས་གསུངས་ལ། དེ་བས་ན་གང་ཟག་དང་ཆོས་སྟོང་པ་ཉིད་དུ་ལྟ་བས་གྲོལ་བ་ཉིད་དུ་འགྱུར་བས་སྡུག་བསྔལ་ལ་སོགས་པ་བསྒོམ་པ་ལྷག་མ་བདག་མེད་པར་ལྟ་བ་དེའི་དོན་ཅན་ཡིན་ནོ། །བཅོམ་ལྡན་འདས་ཀྱིས་ཆོས་བསྟན་པ་ཐམས་ཅད་བདག་མེད་པར་ལྟ་བའི་རྩ་བ་ཅན་ཡིན་ནོ། །དེ་བས་བཅོམ་ལྡན་འདས་ཀྱི་མི་རྟག་པ་ལ་སྡུག་བསྔལ། སྡུག་བསྔལ་ལས་ཀྱང་བདག་མེད་པ་ཉིད་དུ་འགྱུར་བར་གསུངས་སོ། །དེ་ཆགས་བྲལ་མིན་དང་སྲེད་ལྡན་དང་། །ནས། བདེ་བ་ལས་ཀྱང་འདོད་མི་འགྱུར། །ཞེས་པའི་བར་གྱིས་རྒྱས་པར་བཤད་དོ། །དེ་ལྟར་བདེན་པ་བཞི་གསུངས་པས། །སྐྱོབ་པ་ཡིན་པ་གྲུབ་པ་དེ་ལས་བདེ་བར་གཤེགས་པ་ངེས་པ་ཡིན་ཏེ། སྐྱོབ་ལས་དེ་ཉིད་དང་བརྟན་དང་། །མ་ལུས་ཁྱད་པར་མཁྱེན་པར་གྲུབ། །གཤེགས་པ་རྟོགས་པའི་དོན་ཕྱིར་ཏེ། །དེ་ཕྱིར་ཕྱི་རོལ་པ་དང་སློབ། །མི་སློབ་ལས་ལྷག བརྟན་པ་དང་མ་ལུས་པའི་ཁྱད་པར་མཁྱེན་པ་སྟེ། རབ་ཏུ་མཛེས་པར་མཁྱེན་པ་ནི་དེ་ཁོ་ན་ཉིད་མཁྱེན་པའོ། །སླར་མི་ལྡོག་པར་མཁྱེན་པ་ནི་བརྟན་པར་མཁྱེན་པའོ། །ཁྱད་པར་མ་ལུས་པར་མཁྱེན་པ་ནི་རྣམ་པ་ཐམས་ཅད་མཁྱེན་པ་ཉིད་མཁྱེན་པ་སྟེ་ལྷག་མ་མ་ལུས་པར་མཁྱེན་པའོ། །རྟོགས་པའི་དོན་གྱིས་བརྡའི་སྐད་ཀྱིས་དབྱིངས་ལས་གཤེགས་པར་བཞེད་དོ། །དང་པོས་ནི་མུ་སྟེགས་གཉིས་པས་སློབ་པ། གསུམ་པ་ཉན་རང་དགྲ་བཅོམ་པ་རྣམས་ལས་ལྷག་པར་རོ། །དེའི་ཕྱིར་གཞན་དོན་མཁྱེན་སྦྱོར་དེ་སྟོན་པ། །དེ་ལས་བརྩེ་ཡིན། བདེ་བར་གཤེགས་པའི་ཕྱིར་གཞན་གྱི་དོན་མཁྱེན་ནས་དེ་ལ་སྦྱོར་བའི་ཕྱིར། རྟོགས་པ་དང་བརྟན་པ་དེ་ལས་ཀྱང་བརྩེ་བ་ཕན་བཞེད་རྟོགས་པ་ཡིན་ནོ། །གཞན་དོན་ངོར། དོན་གྲུབ་མཛད་པ་མི་འདོར་ཕྱིར། །བརྩེ་བས་ལེགས་དང་ཡེ་ཤེས་ལས། བདེན་པ་གསུང་མཛད་སྒྲུབ་བྱེད་བཅས། །དེ་གསུང་པར་ཡང་མངོན་སྦྱོར་ལྡན། །གང་ཕྱིར་དེས་ན་ཚད་མ་ཉིད། །བཅོམ་ལྡན་འདས་གཞན་གྱི་དོན་གྱི་ངོར་སྲིད་པ་ཇི་སྲིད་བརྩེ་བ་ལས་གཞན་གྱི་དོན་ཐམས་ཅད་གྲུབ་པ་མི་འདོར་བའི་ཕྱིར་དང་། གཞན་ཡང་བརྩེ་བ་དང་ལྡན་པས་ལེགས་པར་སྟོན་པར་མཛད་པའི་ཕྱིར་དང་། ཡེ་ཤེས་ལས་བདེན་པ་ཡང་དག་པར་རྟོགས་པར་མཛད་པའི་ཕྱིར་དང་། དེ་སྐད་གསུངས་པ་ལ་འདུལ་བྱ་མངོན་པར་སྦྱོར་བ་དང་ལྡན་པ་སྟེ་རྒྱུ་བཞི་པོ་འདིའི་ཕྱིར་ཡང་བཅོམ་ལྡན་འདས་ཚད་མ་ཡིན་ནོ། །ལུགས་བཟློག་ཏུ་བཤད་པ་འདི་ཡང་ཐུན་མོང་བའི་ལམ་སྟོན་ཏེ། བདེན་པ་བཞི་ཐེག་པ་གསུམ་ཀ་ལ་ཉམས་ལེན་དུ་གྲགས་པའི་ཕྱིར་རོ། །དེ་ལྟའི་དངོས་དོན་བསྟོད་པ་ནི། །དེ་ཡི་བསྟན་པ་ཉིད་ལས་ནི། །ཚད་མའི་དེ་ཉིད་གྲུབ་དོན་ཏེ། དེ་ལྟ་བུའི་དངོས་པོ་སྟོན་པས་བཅོམ་ལྡན་འདས་བསྟོད་པ་ནི་བཅོམ་ལྡན་འདས་ཀྱི་བསྟན་པ་ཉིད་ལ་འདིར་ཚད་མ་གང་བཞག་པ་དེ་གྲུབ་བོ་ཞེས་བསྟན་པའི་དོན་དུའོ། །མཐར་ཐུག་པའི་མངོན་སུམ་བསྟན་དུ་ཆུག ཐ་སྙད་པའི་མངོན་སུམ་གང་གིས་བསྟན་ཞེ་ན། ཆོས་མངོན་པ་ལས་ཀྱང་། མིག་གི་རྣམ་པར་ཤེས་པ་དང་ལྡན་པས་སྔོན་པོ་ཤེས་ཀྱི་སྔོན་པོའོ་སྙམ་དུ་ནི་མ་ཡིན་ནོ་ཞེས་བྱ་བ་དང་། དོན་ལ་དོན་དུ་ཤེས་ཀྱི། དོན་ལ་ཆོས་སུ་འདུ་ཤེས་པ་ནི་མ་ཡིན་ནོ་ཞེས་གསུངས་ཏེ། སྔོན་པོ་ཤེས་པ་དང་དོན་ལ་དོན་དུ་འདུ་ཤེས་ཀྱི་ཞེས་བྱ་བ་འདི་གཉིས་ཀྱིས་ནི་ཡུལ་ཕྱིན་ཅི་མ་ལོག་པ་བསྟན་པའི་ཕྱིར་མ་འཁྲུལ་པ་བཤད་པ་ཡིན་ནོ། །སྔོན་པོའོ་སྙམ་དུ་ནི་མ་ཡིན་ནོ་ཞེས་བྱ་བ་དང་། ཆོས་སུ་འདུ་ཤེས་པ་ནི་མ་ཡིན་ནོ་ཞེས་བྱ་བ་འདི་གཉིས་ཀྱིས་ནི་མིང་དང་འབྲེལ་བའི་དོན་འཛིན་པ་སྤངས་བའི་ཕྱིར་རྟོག་པ་དང་བྲལ་བ་ཉིད་བཤད་པ་ཡིན་ཏེ། དེ་ཉིད་ལས་མིག་ལ་སོགས་པའི་རྣམ་པར་ཤེས་པ་ངེས་པར་རྟོག་པ་དང་། རྗེས་སུ་དྲན་པའི་རྣམ་པར་རྟོག་པས་རྣམ་པར་མི་རྟོག་པ་ཉིད་དུ་ཡང་བརྗོད་ལ། མིག་ལ་སོགས་པ་རྣམ་པར་ཤེས་པའི་ཚོགས་གཟུགས་ལ་སོགས་པའི་སྐྱེ་མཆེད་ཀྱི་རང་གི་མཚན་ཉིད་ཀྱི་ཡུལ་ཅན་ཡིན་པར་ཡང་བསྟན་ཏོ། །རྗེས་སུ་དཔག་པ་མ་བཟློག་ཕྱིར། །ཅུང་ཟད་སྐྱེ་བའི་བདག་ཉིད་ཅན། །གང་དེ་ཐམས་ཅད་འགག་ཆོས་ཅན། །ཞེས་སོགས་རྣམ་པ་དུ་མ་ནི། །བརྡ་ཡི་སྦྱོར་བའང་མཐོང་ཕྱིར་རོ། །རྗེས་སུ་དཔག་པ་མ་བཟློག་སྟེ་བསྟན་ནོ་ཞེས་པའོ། །ཇི་ལྟར་བསྟན་ཞེ་ན། དགེ་སློང་དག་ཀུན་འབྱུང་བའི་ཆོས་ཅན་གང་ཡིན་ཡང་རུང་བ་དེ་ཐམས་ཅད་ནི་འགོག་པའི་ཆོས་ཅན་ཡིན་ནོ་ཞེས་པ་སྟེ། དེ་ཡང་། མེད་ན་མི་འབྱུང་མཚན་ཉིད་ཅན། །རྟགས་ནི་རྗེས་དཔག་རྟེན་ཡིན་ནོ། །བསྒྲུབ་བྱས་གཏན་ཚིགས་ཁྱབ་པ་ནི། །བསྟན་ཕྱིར་དེ་ཡང་གསལ་བར་བཤད། །བསྒྲུབ་པར་བྱ་བས་གཏན་ཚིགས་ལ་ཁྱབ་པར་སྟོན་པར་མཛད་པས་རྟགས་དང་དེའི་སྦྱོར་བ་དང་བསྒྲུབ་བྱ་ལ་སོགས་པ་གསལ་བར་བསྟན་ནོ། །རྟགས་དེ་ཡང་། རང་བཞིན་དང་། འབྲས་བུ་དང་། མ་དམིགས་པ་གསུམ་ཡིན་པས་དེ་གསུམ་ཀ་བསྟན་ཏེ། དེ་ལ། དགེ་སློང་དག་ཀུན་འབྱུང་བའི་ཆོས་ཅན་གང་ཅི་ཡང་རུང་བ་ཞེས་བྱ་བ་འདིས་ནི་རང་བཞིན་གྱི་གཏན་ཚིགས་བཤད་དོ། །དུ་བ་ལས་ནི་མེར་ཤེས་ཏེ། །ཆུ་སྐྱར་ལས་ནི་ཆུ་བཞིན་ནོ། །བྱང་ཆུབ་སེམས་དཔའ་བློ་ལྡན་གྱི། །རིགས་ནི་མཚན་མ་དག་ལས་ཤེས། །ཞེས་བྱ་བ་འདིས་འབྲས་བུའི་རྟགས་སྟོན་ནོ། །དགེ་སློང་དག་གང་ཟག་གིས་གང་ཟག་གིས་ཚོད་མ་འཛིན་ཅིག གང་ཟག་ལ་ཚད་ཀྱང་མ་འཛིན་ཅིག དགེ་སློང་དག་གང་ཟག་གིས་གང་ཟག་ལ་ཚོད་འཛིན་པ་ནི་ཉམས་པར་འགྱུར་ཏེ། གང་ཟག་གི་ཚོད་ནི་ངའམ་ང་འདྲ་བ་ཡོད་པ་གང་ཡིན་པས་བཟུང་བར་བྱའོ། །ཞེས་གསུངས་པ་འདིས་ངོ་བོ་ཉིད་ཀྱིས་སྐལ་བའི་དོན་དག་ལ་མི་དམིགས་པ་ཙམ་ཚད་མ་ཉིད་ཡིན་པ་སྤོང་བར་མཛད་པས་དམིགས་པའི་རིག་བྱར་གྱུར་པ་མི་དམིགས་པ་ཁོ་ན་ཚད་མ་ཡིན་གྱི་གཞན་ནི་མ་ཡིན་ནོ་ཞེས་བསྟན་པར་འགྱུར་བས་མ་དམིགས་པའི་གཏན་ཚིགས་བཤད་དོ། །ཞེས་དེ་ལྟར་མདོ་དང་སྦྱར་བ་ཀ་མ་ལ་ཤཱི་ལས་སོ། །དེ་ལྟ་བས་ཚད་མ་གྲུབ་པའི་ལེའུའི་རྣམ་པར་གཞག་པ་གྲུབ་བོ། །བཅོམ་ལྡན་འདས་དེ་བླ་མ་ཚད་མ་དང་། །དེ་གསུང་གདམས་ངག་ཚད་མ་ལུང་རིགས་ཀྱིས། །གཏན་ཕབ་བདག་མེད་མཐོང་བ་ཉམས་མྱོང་བ། །ཚད་མར་རྗེ་བཙུན་གསུང་བཞིན་འདིར་ཡང་ངོ་། །ཀུན་རྨོངས་ཆང་གིས་མྱོས་པའི་གོམས་ཤུགས་ཀྱིས། །ལེགས་བཤད་ཁང་བཟང་ཚུལ་མིན་བགྱིད་བྲེལ་བའི། །སྨྲ་ངན་གླང་པོའི་སྡེ་སྙིང་ཁར་འབྱིན་ལ། །རིག་གཞུང་སེངྒའི་སྒྲ་ཆེན་འདི་བསྒྲགས་སོ།། །། གཉིས་པ་ཀུན་ཏུ་ཐ་སྙད་པའི་ཚད་མ་ཡན་ལག་ཏུ་བསྟན་པ་ལ། མུ་སྟེགས་བྱེད་ཀྱི་འདོད་པ་ལོག་པ་དང་། རང་གི་ལུགས་ཇི་ལྟ་བ་ཡིན་པར་བསྟན་པ་གཉིས་ལས། དང་པོ་ནི། ལོག་པར་རྟོག་པ་ནི་རྣམ་པ་བཞི་སྟེ། གྲངས་དང་། རང་གི་ངོ་བོ་དང་། ཡུལ་དང་། འབྲས་བུ་ལ་ལོག་པར་རྟོག་པའོ། །དང་པོ་ཕུར་བུ་པ་དང་རྒྱང་འཕེན་རྣམས་ནི་མངོན་སུམ་གཅིག་པུ་ཚད་མ་ཡིན་གྱི་གཞན་ནི་མ་ཡིན་ནོ་ཞེས་ཟེར་རོ། །བརྡ་སྤྲོད་པ་རྣམས་ནི་ཚད་མ་གཉིས་ཏེ་མངོན་སུམ་དང་སྒྲ་ལས་བྱུང་བའོ་ཞེས་སོ། །སེར་སྐྱ་དང་གྲངས་ཅན་རྣམས། མངོན་སུམ་དང་རྗེས་དཔག་དང་སྒྲ་ལས་བྱུང་བ་སྟེ་གསུམ་མོ་ཞེས་འདོད། རིག་པ་ཅན་པ་དག མངོན་རྗེས་དཔེ་དང་སྒྲ་བྱུང་སྟེ་ཚད་མ་བཞིའོ་ཞེས་སོ། །རྒྱལ་དཔོག་པ་རྣམས་ནི། མངོན་རྗེས་དཔེ་དང་སྒྲ་བྱུང་། དོན་གྱི་གོ་བ་དང་། དངོས་པོ་མེད་པ་སྟེ་ཚད་མ་དྲུག་གོ་ཞེས་སོ། །ཉི་མ་པ་ཡང་དོན་གྱི་གོ་བ་ཚད་མར་འདོད་དོ། །གཞོན་ནུ་མ་རྣམས་ནི་དངོས་པོ་ཡང་ངོ་། །ཙ་ར་ཀ་པ་ལ་སོགས་པ་ནི། རིགས་པ་དང་། མི་དམིགས་པ་དང་། སྲིད་པ་དང་། ཞེས་གྲགས་པ་དང་། སྙམ་དུ་སེམས་པ་ཞེས་བྱ་བ་ཚད་མ་གཞན་དག་ཀྱང་ཡོད་དོ། །ཞེས་ཟེར་རོ། །ངོ་བོ་ལ་ལོག་པར་རྟོག་པ་ནི། རིག་པ་ཅན་པ་མངོན་སུམ་ཐམས་ཅད་ངེས་པའི་བདག་ཉིད་ཡིན་པའི་ཕྱིར་རྣམ་པར་རྟོག་པ་དང་བཅས་པ་ཉིད་དོ། །ཞེས་སོ། །དེ་བཞིན་དུ་གཞན་དག་ནི་དུང་ལ་སེར་པོར་ཤེས་པ་སོགས་འཁྲུལ་པ་ཡང་ངོ་། །བྱེ་བྲག་པ་ལ་སོགས་པ་ནི། རྣམ་པར་ཤེས་པའི་ངོ་བོ་མ་ཡིན་པ་དེ་ཉིད་དེ་དབང་པོ་དང་དོན་འབྲེལ་བ་ཡིན་པར་དང་། ཁ་ཅིག་ནི་བདག་དང་ཡིད་འབྲེལ་བའི་ངོ་བོ་ཁོ་ན་ཡིན་པར་དང་། གཞན་དག་མངོན་སུམ་རྣ་བ་ལ་སོགས་པའི་དབང་པོ་འཇུག་པའི་ངོ་བོ་ཁོ་ན་ཡིན་པར་དང་། དེ་བཞིན་དུ་རྣ་བ་མ་ཕུག་པ་ལ་སོགས་པ་ནི་ཡིད་ཀྱི་མངོན་སུམ་ཚད་མར་རིག་པ་མ་ཡིན་ཏེ་སྔར་མངོན་སུམ་གྱིས་བཟུང་བ་ལས་ཡུལ་གཞན་པ་མ་ཡིན་ན་ནི་དེ་གཟུང་ཟིན་འཛིན་པའི་ཕྱིར་ཚད་མ་མ་ཡིན་པ་ཁོ་ནའོ། །ཡུལ་དོན་གཞན་ཉིད་ཡིན་ན་ནི་འདི་རང་དབང་དུ་འཇུག་པའི་ཕྱིར་དང་། དོན་ཐམས་ཅད་ཡུལ་ཡིན་པའི་ཕྱིར་འགའ་ཡང་ལོག་པ་ལ་སོགས་པའི་དངོས་པོར་མི་འགྱུར་རོ། །ཞེས་ཟེར་རོ། །རྒྱལ་དཔོག་པ་རྣམས། སྐྱེས་བུ་ཐམས་ཅད་ནི་འདོད་ཆགས་ལ་སོགས་པ་དང་། མ་རིག་པས་འཁྲུལ་པ་ཡིན་ཏེ། འགྲོ་བ་འདི་ལྟ་བུ་མ་ཡིན་པ་འགའ་ཡང་མེད་པས་ཐམས་ཅད་ལ་དབང་པོས་མི་བསོད་པའི་དོན་མཐོང་བའི་ཐབས་མེད་པའི་ཕྱིར་ལ། མངོན་སུམ་ལ་སོགས་པས་གྲུབ་པའི་རྣལ་འབྱོར་པ་དག་ཀྱང་མེད་དེ། དེའི་ཕྱིར་དབང་པོས་བསོད་པའི་དོན་མཐོང་བ་མི་སྲིད་པས་རྣམ་པར་ཤེས་པ་ཁོ་ནའོ། །ཞེས་ཟེར་རོ། །ཡུལ་ལ་ལོག་པར་རྟོག་པ་ནི། རིག་པ་ཅན་པ་སོགས་ན་རེ། སྤྱིའི་དངོས་པོར་གྱུར་པ་ཡང་ཡོད་པའི་ཕྱིར་ལ། དེ་ཡང་མངོན་སུམ་གྱིས་དཔྱད་པར་བྱ་བ་ཡིན་པའི་ཕྱིར་ཏེ། མངོན་སུམ་ནི་སྤྱིའི་མཚན་ཉིད་ཀྱི་ཡུལ་ཅན་ཡང་ཡིན་ནོ། །དེ་བཞིན་དུ་བདག་ལ་སོགས་པ་རང་གི་མཚན་ཉིད་ཀྱི་ངོ་བོ་ཡང་རྗེས་སུ་དཔག་པའི་ཚད་མས་ཡོངས་སུ་དཔྱད་པར་བྱ་བ་ཉིད་ཡིན་པའི་ཕྱིར་རྗེས་སུ་དཔག་པ་ཡང་དེའི་ཡུལ་ཅན་གྱི་ཚད་མ་ཡིན་པར་རིགས་སོ། །ཞེས་ཟེར། དེང་སང་གི་བོད་ཀྱི་རིག་པ་སྨྲ་བ་ཕལ་ཆེར་འདིའི་རྗེས་སུ་འབྲང་ངོ་། །འབྲས་བུ་ལ་ལོག་པར་རྟོག་པ་ནི། རྒྱལ་དཔོག་པ་ལ་སོགས་པ་ན་རེ། འཇིག་རྟེན་ན་བསྒྲུབ་པར་བྱ་བ་དང་། སྒྲུབ་པ་དག་ནི་ཕན་ཚུན་ཐ་དད་པའི་བདག་ཉིད་དུ་གྲགས་པའི་ཕྱིར། འབྲས་བུ་ནི་ཚད་མ་ལས་དོན་གཞན་དུ་གྱུར་པ་ཁོ་ན་ཡིན་པར་རིགས་ཏེ། དགྲ་སྟ་ཉིད་ཆད་པ་ནི་མ་ཡིན་ནོ། །དེ་ལྟ་བས་ན། དེ་ཁོ་ན་ཉིད་འདི་ནི་རྣམ་པ་བཞིར་ཡོངས་སུ་རྫོགས་པ་ཡིན་ཏེ། འདི་ལྟ་སྟེ། འཇལ་བར་བྱེད་པ་དང་། གཞལ་བྱ་དང་། ཚད་མ་དང་། རྟོགས་པའོ། །འདི་ལ་འཇལ་བར་བྱེད་པ་ནི་སྐྱེས་བུ་ཡིན་ནོ། །གཞལ་བྱ་ནི་གཟུགས་ལ་སོགས་པ་ཡུལ་ཡིན་ནོ། །ཚད་མ་ནི་དབང་པོ་ལ་སོགས་པ་ཡིན་ནོ། །རྟོགས་པ་ནི་དོན་ཡོངས་སུ་ཆོད་པ་ཡིན་ནོ། །གང་གི་ཚེ་ཤེས་པ་ཁོ་ན་ཚད་མ་ཡིན་པ་དེའི་ཚེ་ཡང་ཤེས་པ་ཕྱི་མ་ནི་ཚད་མའི་འབྲས་བུ་ཡིན་ལ་སྔ་མ་སྔ་མ་ནི་ཚད་མ་ཡིན་ཏེ་སྤྱི་ལ་སོགས་པའི་ཁྱད་པར་གྱིས་ཤེས་པ་གང་ཡིན་པ་དེ་ནི་ཚད་མ་ཡིན་ནོ། །རྫས་ལ་སོགས་པའི་ཁྱད་པར་ཅན་གྱི་ཤེས་པ་གང་ཡིན་པ་དེ་ནི་འབྲས་བུ་ཡིན་ནོ། །ཞེས་མངོན་སུམ་ལ་ལོག་པར་རྟོག་པ་མང་པོ་བྱུང་ངོ་ཞེས་ཀ་མ་ལ་ཤཱི་ལས་སོ། །གཉིས་པ་རང་གི་ལུགས་ཇི་ལྟ་བ་ཡིན་པར་བསྟན་པ་ལ། ཚད་མའི་རབ་དབྱེ་གཞལ་བྱ་ལ་བལྟོས་པས་དེ་གཏན་ལ་ཕབ། གཞལ་བྱ་འཇལ་བ་ཚད་མ་གཉིས་ཡིན་པས་དེ་ཞིབ་མོར་བསྟན་པ་གཉིས་ལས། དང་པོ་ནི། འཐད་ལྡན་དུ། ཡུལ་ལ་བལྟོས་ནས་ཀྱང་ཚད་མའམ་ཚད་མ་མ་ཡིན་པའི་ཕྱིར་ཡུལ་ལ་བལྟོས་པ་ཁོ་ནས་དེ་དབྱེ་བར་བྱ་བ་ཡིན་ནོ། དེའི་ཕྱིར་ཚད་མའི་དབྱེ་བའི་རྒྱུ་མཚན་ནི་ཡུལ་གྱི་དབྱེ་བ་ཙམ་ཡིན་པའི་ཕྱིར་ཞེས་གསུངས་པས། མངོན་སུམ་དང་ནི་རྗེས་སུ་དཔག །ཚད་མའོ། །དབང་པོ་ལ་བརྟེན་པའི་དོན་གྱི་མངོན་སུམ་ཞེས་བྱའོ། །དབང་པོ་ལ་བརྟེན་པ་ཡང་སྒྲ་བཤད་པའི་རྒྱུ་མཚན་གྱིས་ཡིན་གྱི་འཇུག་པའི་རྒྱུ་མཚན་གྱིས་ནི་མ་ཡིན་ནོ། །དབང་པོ་ནི་མིག་ལ་སོགས་དབང་པོ་ལྔའོ། །དེ་ལ་བརྟེན་པར་གྱུར་པས་བརྟེན་པའོ། །དབང་པོ་ལ་བརྟེན་པ་འདིས་ནི་དོན་གཅིག་ལ་འདུས་པ་དང་། དོན་མངོན་སུམ་བྱེད་པ་ཉིད་མཚོན་པ་ཡིན་ཏེ། དེ་ཉིད་སྒྲ་འཇུག་པའི་རྒྱུ་མཚན་ཡིན་ནོ། །དེ་བས་ན་གང་ཅུང་ཟད་ཙམ་གྱིས་ཀྱང་རུང་དོན་མངོན་སུམ་དུ་བྱེད་པའི་ཤེས་པ་དེ་ནི་མངོན་སུམ་མོ་ཞེས་བྱའོ། །ཅི་སྟེ་དབང་པོ་ལ་བརྟེན་པ་ཁོ་ན་འཇུག་པའི་རྒྱུ་མཚན་ཡིན་ན་དབང་པོའི་ཤེས་པ་འབའ་ཞིག་མངོན་སུམ་ཡིན་པར་སྨྲས་ཀྱི། ཡིད་ལ་སོགས་པ་ནི་མ་ཡིན་པར་འགྱུར་རོ། །ཞེ་ན། འགྲོ་བས་བ་ལང་ཞེས་བ་ལང་གི་སྒྲ་འགྲོ་བའི་བྱ་བ་ལ་བཤད་པ་ཡིན་མོད་ཀྱང་། འགྲོ་བའི་བྱ་བས་ཉེ་བར་མཚོན་པ་དོན་གཅིག་པ་ལ་འདུས་པ་བ་ལང་ཉིད་རྒྱུ་མཚན་དུ་བྱེད་ལ། དེ་ལྟ་ན་འགྲོ་ཡང་རུང་མི་འགྲོ་ཡང་རུང་བའི་བ་ལང་ལ་བ་ལང་གི་སྒྲར་གྲུབ་པ་བཞིན་ཡིན་ནོ། །འདིས་དཔོག་པས་ན་དཔག་པ་སྟེ། བྱེད་པ་བསྒྲུབ་པའི་དཔག་པའི་སྒྲས་ནི་འདྲ་བའི་མཚན་ཉིད་ཚད་མ་བསྟན་ཏོ། །རྟགས་བཟུང་ཞིང་འབྲེལ་བ་དྲན་པའི་རྗེས་ལ་དཔོག་པས་ནི་རྗེས་སུ་དཔག་པ་སྟེ། ཕྱོགས་ཀྱི་ཆོས་བཟུང་ནས་བསྒྲུབ་པར་བྱ་བ་དང་། སྒྲུབ་པར་བྱེད་པ་འབྲེལ་པ་དྲན་པ་ན་རྗེས་སུ་དཔག་པ་འཇུག་པ་ནི་དུས་ཕྱིས་བྱུང་བ་ཞེས་བྱའོ། །དང་ཞེས་པའི་སྒྲས་ནི་མངོན་རྗེས་རྒྱུ་མཚུངས་པར་སྡུད་པའི་ཕྱིར་ཏེ། ཅི་ལྟར་དོན་མེད་ན་མི་འབྱུང་བའི་ཕྱིར་དོན་དང་ཕྲད་པར་བྱེད་པས་མངོན་སུམ་ཚད་མ་ཡིན་པ་བཞིན་དུ་རྗེས་སུ་དཔག་པ་ཡང་དོན་མེད་ན་མི་འབྱུང་བའི་ཕྱིར་རོ། །དེས་ན་དེ་གཉིས་ཡོངས་སུ་དཔྱད་པའི་དོན་དང་ཕྲད་པར་བྱེད་པས་ཚད་མ་ཡིན་ནོ། །ཞེས་སོ། །མཚན་ཉིད་གཉིས་གཞལ་བྱ། དེའི་རང་འགྲེལ་དུ། རང་དང་སྤྱིའི་མཚན་ཉིད་དག་ལས་གཞན་པའི་མཚན་ཉིད་གཞལ་བར་བྱ་བ་གཞན་ནི་མེད་དོ། །ཞེས་སོ། །མངོན་སུམ་གྱི་གཞལ་བྱ་ནི་རང་མཚན་དང་། རྗེས་སུ་དཔག་པའི་གཞལ་བྱ་ནི་སྤྱི་མཚན་ནོ། །གཞལ་བྱ་གཉིས་ལ་རང་གི་མཚན་ཉིད་ཅེས་དང་སྤྱིའི་མཚན་ཉིད་ཅེས་བྱ་བའི་རྒྱུ་མཚན་ཡང་། རྒྱན་ལས། གང་གི་ཚེ་ཤེས་པ་བསྐྱེད་པ་ལ་དངོས་སུ་ནུས་པ་ཉིད་དུ་རྟོགས་པ་དེའི་ཚེ་ནི་འདི་རང་གི་ངོ་བོས་མཚོན་པའི་ཕྱིར་རང་གི་མཚན་ཉིད་ཡིན་ལ། གང་གི་ཚེ་དེ་ཉིད་བརྒྱུད་པས་ནུས་པ་ཉིད་དུ་རྟོགས་པ་དེའི་ཚེ་ནི་སྤྱིའི་ངོ་བོར་མཚོན་པའི་ཕྱིར་སྤྱིའི་མཚན་ཉིད་ཡིན་ནོ། །ཞེས་གསུངས་སོ། །དེའི་ཕྱིར། གཞལ་བྱ་གཉིས་ཕྱིར་ཚད་མ་གཉིས། །ཞེས་ཁ་ཚོན་བཅད་དོ། །རྣམ་ངེས་ལས་ཀྱང་། ཚད་མ་ཡིན་ན་འདི་གཉིས་ཁོ་ནར་འདུས་པའི་ཕྱིར་ཚད་མ་རྣམ་གཉིས་ཁོ་ན་སྟེ། ཞེས་གསུངས་ལ། ཀ་མ་ལ་ཤཱི་ལས། འདི་ནི་བཅོམ་ལྡན་འདས་ཀྱང་བཞེད་པ་ཁོ་ན་སྟེ། ཇི་སྐད་དུ། དགེ་སློང་དག་གམ་མཁས་རྣམས་ཀྱིས། །བསྲེགས་བཅད་བརྡར་བའི་གསེར་བཞིན་དུ། །ཡོངས་སུ་བརྟགས་ནས་ང་ཡི་བཀའ། །བླང་བར་བྱ་ཡིས་གུས་ཕྱིར་མིན། །ཞེས་གསུངས་པ་ལྟ་བུའོ། །འདི་ལ་མངོན་སུམ་དང་རྗེས་སུ་དཔག་པའི་མཚན་ཉིད་རྣམ་པ་གཉིས་ཁོ་ན་ཞལ་གྱིས་བཞེས་ལ། དཔེ་ལ་སོགས་པ་ཡོངས་སུ་བརྟག་པར་ཞལ་གྱིས་མི་བཞེས་པའི་ཕྱིར་རོ། །མངོན་སུམ་གྱི་དཔེ་ནི་བསྲེགས་པ་དང་ཆོས་མཐུན་པར་བསྟན་པའི་ཕྱིར་རོ། །རྗེས་སུ་དཔག་པ་ནི་བརྡར་བ་དང་ཆོས་མཐུན་པར་བསྟན་པའི་ཕྱིར་རོ། །ཕན་ཚུན་མི་འགལ་བ་ནི། བཅད་པ་དང་ཆོས་མཐུན་པར་ཡོངས་སུ་བརྟག་པར་གསུངས་ཏེ། དེ་ཡང་རྗེས་སུ་དཔག་པ་ཁོ་ན་ཡིན་ནོ། །འདི་ལྟར་དོན་ནི་རྣམ་པ་གསུམ་ཡིན་ཏེ། མངོན་སུམ་དང་། ལྐོག་ཏུ་གྱུར་པ་དང་། ཤིན་ཏུ་ལྐོག་ཏུ་གྱུར་པའོ། །དེ་ལ་བཀའི་དོན། མངོན་སུམ་ལ་ནི་བསྲེག་པས་གསེར་བཞིན་དུ་མངོན་སུམ་གྱིས་བརྟག་པ་ཡིན་ནོ། །དོན་ལྐོག་ཏུ་གྱུར་པ་ལ་ནི་བརྡར་བ་བཞིན་དུ་རྗེས་སུ་དཔག་པས་བརྟག་པ་ཡིན་ནོ། །དེ་ཉིད་གྱི་དོན་ཤིན་ཏུ་ལྐོག་ཏུ་གྱུར་པ་ནི་བཅད་པས་གསེར་བཞིན་དུ་ཕན་ཚུན་མི་འགལ་བའི་སྒོ་ནས་བརྟག་པ་ཡིན་ཏེ། དེ་ལྟར་ཡོངས་སུ་དག་པའི་ལུང་ལ་ནི་ཡུལ་ལྐོག་ཏུ་གྱུར་ཀྱང་རྟོག་པ་དང་ལྡན་པ་ཚད་མ་ཡིན་པར་ཡིད་ཆེས་པ་རྣམས་འཇུག་པའི་ཕྱིར་རོ། །ཞེས་གསུངས་སོ། དེ་བས་ན་གཞལ་བྱའི་རང་བཞིན་ཡོངས་སུ་བཅད་པའི་དངོས་པོ་ཐོབ་རུང་དུ་བྱེད་པས་ཚད་མར་བརྗོད་ལ། གཞལ་བྱ་ཡང་ཚད་མའི་ཡུལ་ཡིན་པའི་ཕྱིར་རོ། །ཚད་མ་ཡིན་ན་ཡུལ་དང་ལྡན་པས་ཁྱབ་བོ། །གང་ཡུལ་དང་ལྡན་པ་མ་ཡིན་ན་དེ་ནི་ཚད་མ་མ་ཡིན་ཏེ། དཔེར་ན་ནམ་མཁའི་ཨུཏྤལ་བཞིན་ནོ། །མངོན་སུམ་དང་རྗེས་སུ་དཔག་པ་དག་ལས་གཞན་པའི་ཤེས་པ་ཡང་ཡུལ་དང་ལྡན་པ་མ་ཡིན་ནོ། །ཞེས་བྱ་བར་རྟོགས་སོ། །གཞལ་བྱ་གཉིས་ཀྱི་མཚན་ཉིད་འཇོག་པར་བཞེད་ནས། དོན་བྱེད་ནུས་དང་མི་ནུས་ཕྱིར། །དོན་བྱེད་ནུས་པའི་ཆོས་རང་མཚན་གྱི་མཚན་ཉིད་དོན་དུ་གཉེར་བར་བྱ་བས་ན་དོན་ཏེ། དོར་བར་བྱ་བ་དང་བླང་བར་བྱ་བའོ། །དོན་བྱ་བ་བྱེད་པ་ནི་འགྲུབ་པའོ། །དེ་ལ་ནུས་པའི་མཐུའོ། །དོན་བྱེད་མི་ནུས་པའི་ཆོས་སྤྱི་མཚན་གྱི་མཚན་ཉིད་དོ། །མཚན་ཉིད་དེ་གཉིས་ཀྱང་ལྷ་དབང་བློས། ཇི་སྐད་དུ་བཤད་པའི་ནུས་པ་དང་ནུས་པ་མེད་པ་ཕན་ཚུན་སྤངས་ཏེ་གནས་པའི་མཚན་ཉིད་ཅན་ཞེས་གསུངས་པ་ཉིད་དོ། །འོ་ན་སྔར་སྤྱིའི་མཚན་ཉིད་དེ་ལ་བརྒྱུད་པའི་དོན་བྱེད་ནུས་པ་ཡོད་པར་བཤད་པ་དང་འགལ་ལོ་སྙམ་ན། དེ་ནི་མ་ཡིན་ཏེ། འདིར་དོན་བྱེད་ནུས་པ་དང་མི་ནུས་པ་དངོས་སུ་ཡིན་པས་བརྒྱུད་པས་ནུས་པ་དེ་ཉིད་ཐ་སྙད་དུ་ནུས་པ་ཡིན་པས་ནུས་པ་མེད་པ་ཡིན། དེ་ལྟར་རྒྱན་དུ། མ་ཡིན་པར་འཇུག་པས་བརྒྱུད་པས་ནུས་པ་ཉིད་ནུས་པ་མེད་པ་ཡིན་གྱི། གཏན་ནུས་པ་མེད་པ་ནི་མ་ཡིན་ནོ། །ཞེས་སོ། །སྐྲ་ཤད་ལ་སོགས་དོན་མིན་ཏེ། །དོན་དུ་མོས་པ་མེད་ཕྱིར་རོ། །རབ་རིབ་ཅན་གྱིས་དམིགས་པ་སྐྲ་ཤད་ལ་སོགས་པ་དང་། སྒྲ་ལ་སོགས་པ་དམིགས་པ་ནི་དོན་མེད་པ་ཉིད་དེ་དངོས་སམ་བརྒྱུད་པས་ཀྱང་མི་ནུས་པའི་ཕྱིར་རོ། །དོན་དུ་མོས་པ་མེད་པ་ཡང་གནོད་པར་བྱེད་པའི་ཚད་མ་འཇུག་པའི་ཕྱིར་རོ། །འདྲ་དང་མི་འདྲ་ཉིད་ཕྱིར་དང་། །གང་ཞིག་རྣམ་པ་ཅི་ཞིག་ལྟར་འདྲ་བའི་ངོ་བོར་རྟོགས་པ་ནི་སྤྱི་མཚན་དང་། དེ་ལས་བཟློག་པ་རང་མཚན་ནོ། །སྒྲའི་ཡུལ་དང་ཡུལ་མིན་ཕྱིར། །སྒྲའི་ཡུལ་ནི་སྤྱི་མཚན། སྒྲའི་ཡུལ་མ་ཡིན་པ་རང་མཚན། རྒྱུ་མཚན་གཞན་ནི་ཡོད་པ་ན། །བློ་ནི་ཡོད་དང་མེད་ཕྱིར་རོ། །ཡུལ་ལས་རྒྱ་མཚན་གཞན་ཏེ་ཡུལ་མེད་པར་ཡིད་ལ་བྱེད་པ་དང་དེ་དང་རྗེས་སུ་མཐུན་པ་དང་། བརྡ་འཛིན་པ་དེ་དག་ཡོད་ན་ཡུལ་ལ་བློ་ཡོད་པའི་ཡུལ་དེ་ནི་སྤྱི་མཚན། འདིའི་ཡུལ་ཞེས་པ་ཡང་སྐྱེས་བུ་ཐ་སྙད་འདོགས་པ་པོའི་ཞེན་ངོར་ཡུལ་དང་འདྲ་བས་ཡུལ་ཞེས་བརྗོད་དོ། །ཡུལ་མེད་པར་རྒྱུ་མཚན་དེ་དག་ཡོད་ཀྱང་ཡུལ་མེད་པས་བློ་མེད་པ་དེ་ནི་རང་མཚན། དོན་དམ་དོན་བྱེད་ནུས་པ་གང་། །དེ་འདིར་དོན་དམ་ཡོད་པ་ཡིན། །གཞན་ནི་ཀུན་རྫོབ་ཡོད་པ་སྟེ། དེ་དག་རང་སྤྱིའི་མཚན་ཉིད་བཤད། །དོན་བྱ་བ་བྱེད་ནུས་པ་གང་ཡིན་པ་དེ་རང་གི་མཚན་ཉིད་ཡིན་པའི་ཕྱིར། །དེ་ཉིད་ནི་དོན་དམ་པ་སྟེ་མ་བཅོས་པའི་རང་བཞིན་གྱིས་དངོས་པོར་ཡོད་པའོ། །གང་ཞིག་དོན་བྱེད་མི་ནུས་པ་དེ་ནི་གཞན་ཏེ་ཀུན་རྫོབ་བཏགས་ནས་ཡོད་པ་ཞེས་བརྗོད་དོ། །དོན་དམ་པ་དང་ཀུན་རྫོབ་ཏུ་ཡོད་པ་དེ་དག་རིམ་པ་བཞིན་རང་གི་མཚན་ཉིད་དང་སྤྱིའི་མཚན་ཉིད་དུ་བཤད་དོ། །ཡང་རྣམ་ངེས་ལས། དོན་ནི་རྣམ་པ་གཉིས་ཉིད་དེ། །མངོན་སུམ་དང་ལྐོག་ཏུ་གྱུར་པའོ། །འཐད་ལྡན་དུ། མངོན་སུམ་ནི་དེར་སྣང་བ་ཉིད་ཀྱིས་རྟོགས་པར་འགྱུར་གྱིས་རྣམ་པ་གཞན་ནི་མ་ཡིན་པ་དེ་ཡང་མངོན་སུམ་གྱི་ཚད་མ་ཡིན་ནོ། །ལྐོག་ཏུ་གྱུར་པ་ཡང་རྟགས་དང་རྗེས་སུ་འགྲོ་བའི་ཚུལ་གྱིས་རྟོགས་པར་འགྱུར་ཏེ། བརྟགས་པ་མི་བཟློག་པའི་རྣམ་པ་ནི་ཐེ་ཚོམ་ཉིད་ཡིན་པས་དེའི་ཡུལ་ཡང་ཐོབ་པར་མི་ནུས་ཏེ། གཉི་གའི་བདག་ཉིད་ཀྱང་མེད་པའི་ཕྱིར་ཞེས་བཤད་ཟིན་ཏོ། །རྗེས་སུ་འགྲོ་བའི་ཚུལ་དུ་རྟོགས་པ་ཡང་རྗེས་སུ་དཔག་པ་ཡིན་ནོ། །ཞེས་གསུངས་ལ། གཞལ་བྱ་མངོན་སུམ་པ་དེ་གང་ཞེ་ན། རྣམ་ངེས་སུ། དེ་ལ་གང་ཞིག་ཤེས་པའི་སྣང་བའི་བདག་ཉིད་ཀྱི་རྗེས་སུ་འགྲོ་བ་དང་ལྡོག་པའི་རྗེས་སུ་མཐུན་པར་བྱེད་པ་དེ་ནི་མངོན་སུམ་སྟེ། དེ་ནི་ཐུན་མོང་མ་ཡིན་པའི་དངོས་པོའི་རང་བཞིན་ཏེ་རང་གི་མཚན་ཉིད་དོ། །ཞེས་དེ་ནི་དོན་གང་ཉེ་བ་དང་མི་ཉེ་བ་དག་ལས་སྣང་བ་གསལ་བ་དང་མི་གསལ་བར་བྱེད་པ་སྟེ་མངོན་སུམ་ཉིད་དུ་རྣམ་པར་གནས་པ་ཡིན་པས་མངོན་སུམ་ཞེས་སམ། མངོན་དུ་གྱུར་པའོ། །དེའི་རང་བཞིན་དང་བྲལ་བ་གཞན་ནི་ལྐོག་ཏུ་གྱུར་པ་ཡིན་ཏེ། ལྐོག་གྱུར་ཞེས་པའི་སྒྲ་དོན་བྱ་བ་མེད་པའི་ཕྱིར་མངོན་སུམ་དུ་གྱུར་པ་སྤངས་ལ། མཐོང་བ་ལས་གཞན་ཡོད་པ་བཞིན་ཡིན་པར་སྟོན་པའོ། །མངོན་སུམ་དང་ལྐོག་ཏུ་གྱུར་པའི་གཞལ་བྱ་འདི་ཉིད་ཀྱང་རྟོགས་པ་པོ་གཅིག་ལ་བལྟོས་པའི་ཕྱིར་འཆོལ་བ་མེད་པར་ཕན་ཚུན་སྤངས་ཏེ་གནས་སོ། །ཀུན་ཏུ་ཐ་སྙད་པའི་ཚད་མ་གཏན་ལ་འབེབས་པའི་སྐབས་སུ། སློབ་དཔོན་དང་པོར་མདོ་སྡེ་པ་དང་། ཕྱིས་རྣལ་འབྱོར་སྤྱོད་པ་ཞལ་གྱིས་བཞེས་ཏེ་སྤྲོས་པ་རིམ་གྱིས་བཟློག་པར་བྱ་བའི་ཕྱིར་རོ། །དེ་ལས་དང་པོར་མདོ་སྡེ་པའི་དབང་དུ་བྱས་པའི་སྐབས་སོ་ཞེས་ཤེས་པར་བྱའོ། །དངོས་པོ་དོན་བྱ་བ་བྱེད་ནུས་པ་ཅུང་ཟད་ཀྱང་སྣང་བ་མེད་ན་ཇི་ལྟར་དོན་བྱེད་ནུས་པ་དངོས་པོའི་མཚན་ཉིད་ཡིན་ཏེ། འདི་ལྟར་རྟག་པ་ནི་མ་ཡིན། མི་རྟག་པ་ནི་མ་ཡིན། ཡུལ་གྱིས་མ་ཡིན། ཤེས་པ་ཡང་མ་ཡིན་ན་དོན་བྱེད་ནུས་པ་དང་དོན་བྱ་བ་བྱེད་ནུས་པ་ནི་མེད་དོ། །དེ་ཡང་མངོན་སུམ་གྱིས་སམ་རྗེས་སུ་དཔག་པས་ཤེས་པ་མ་ཡིན་པས། གལ་ཏེ་ཐམས་ཅད་ནུས་མེད་ན། །ཞེས་ཟེར་རོ། །དེ་ལ། ས་བོན་སོགས་ནི་མྱུག་སོགས་ལ། །ནས། གྲངས་སོགས་བློ་ནི་བཤད་པ་ཡིན། །ཞེས་པའི་བར་གྱིས་དང་། དོན་བྱེད་མི་ནུས་པ་སྤྱིའི་མཚན་ཉིད་ཡིན་ན། སྐྲ་ཤད་ལ་སོགས་པ་རབ་རིབ་ཅན་གྱི་མཐོང་བ་ཡང་དེར་ཐལ་ལོ་ཞེ་ན། སྐྲ་ཤད་ལ་སོགས་སྤྱི་མིན་ཏེ། །ནས། དེ་བཟློག་པ་ལ་བརྟེན་ཕྱིར་རོ། །ཞེས་པའི་བར་གྱིས་མཚན་ཉིད་གཉིས་སྐྱོན་མེད་པར་གཏན་ལ་ཕབ་ནས། སྤྱི་མཚན་དོན་དམ་པ་མ་ཡིན་པར་བསྒྲུབ་པ་ལ་རིག་པ་བརྒྱད་བཤད་པའི་དང་པོ་སྒྲའི་དངོས་ཀྱི་བརྗོད་བྱ་ཡིན་པས་སྤྱི་དོན་དམ་པ་མ་ཡིན་པར་བསྒྲུབས་པ་ལ། བརྗོད་བྱ་ཉིད་ཕྱིར་དེ་དངོས་མིན། །ནས། ཐ་དད་སྣང་བློ་གང་ལས་ཡིན་ཞེས་པའི་བར་གྱིས་སོ། །གཉིས་པ་དེ་ཉིད་དང་གཞན་དུ་བརྗོད་དུ་མེད་པས་བསྒྲུབ་པ་ལ། རིགས་ལྡན་རིགས་མིན་གང་གི་ཕྱིར། །ནས། ཉན་པ་སྐྱེ་བོས་བྱས་པ་ཡིན། །ཞེས་པའི་བར་གྱིས་སོ། །གསུམ་པ་མེད་པར་འཛིན་པ་དང་སྣང་ཚུལ་མཚུངས་པས་བསྒྲུབ་པ་ལ། ཞིག་ལ་སྒྲ་ལས་བློ་ཇི་འདྲ། །ནས། སྔར་ནི་རྣམ་པར་བཟློག་ཟིན་ཏོ། །ཞེས་པའི་བར་གྱིས་སོ། །བཞི་པ། སྤྱི་ཉིད་ཡིན་པས་བསྒྲུབ་པ་ནི། །ཕན་ཚུན་ཁྱད་པར་ཅན་རྣམས་ནི། །ནས། རྗེས་འབྲེལ་ཕྱིར་ན་བརྟག་ཉིད་མིན། །ཞེས་པའི་བར་གྱིས་སོ། །ལྔ་པ་རིགས་རྣམས་འབྲས་བུ་མ་ཡིན་པའི་རྟགས་ཀྱིས་བསྒྲུབ་པ་ནི། རིགས་རྣམས་འབྲས་བུ་མིན་ཕྱིར་ན། །མ་འབྲེལ་བ་དང་དངོས་མེད་འགྱུར། །ཞེས་པས་སོ། །དྲུག་པ་བརྡ་དྲན་ཤེས་པའི་གཟུང་ཡུལ་མིན་པས་བསྒྲུབ་པ་ནི། དངོས་པོའི་སྟོབས་ཀྱིས་སྐྱེས་པ་ཡིས། །ཤེས་པ་གང་དེ་བརྡ་དག་ལ། །བལྟོས་པ་མ་ཡིན། ནས། རིགས་ཀྱང་རྗེས་སུ་འགྲོ་བ་ཡིན། །ཞེས་པའི་བར་གྱིས་སོ། །བདུན་པ། བློ་ལ་རྐྱང་པར་མི་སྣང་བ་ལས་བསྒྲུབ་པ་ནི། རྣམ་པ་འགགས་ཀྱང་རྣམ་ཤེས་ལ། །ནས། ངོ་བོ་ལས་གཞན་སྣང་བ་མེད། །ཅེས་པའི་བར་གྱིས་སོ། །བརྒྱད་པ། དོན་བྱེད་ནུས་པས་སྟོང་པའི་རྟགས་ཀྱིས་བསྒྲུབ་པ་ནི། དེ་ཕྱིར་དེ་ནི་ཤེས་ཙམ་གྱིས། །དོན་བྱེད་པར་ཡང་མི་རུང་ངོ་། །དེ་མི་རུང་ཕྱིར་རང་བཞིན་མེད། །དེ་ནི་དངོས་མེད་མཚན་ཉིད་ཡིན། ཞེས་པས་སོ། །འོ་ན་དོན་བྱེད་ནུས་པ་རང་མཚན་ཡིན་པར་བསྒྲུབ་པ་ལ། ཇི་སྐད་བཤད་ལས་བཟློག་གང་ཡིན། །དེ་ནི་རང་གི་མཚན་ཉིད་འདོད། །ཅེས་སོ། །སྤྱི་མཚན་གྱི་དབྱེ་བ་སྟོན་པའི་ཕྱིར། དངོས་དང་དངོས་མེད་གཉིས་ཀ་ལ། །བརྟེན་ཕྱིར་སྤྱི་དེའང་རྣམ་པ་གསུམ། །སྤྱི་ཆ་མེད་གཅིག་ཡིན་པ་དགག་པའི་ཕྱིར། དངོས་པོ་ལ་བརྟེན་པའི་སྤྱི་དང་། དངོས་པོ་མེད་པ་ལ་བརྟེན་པའི་སྤྱི་དང་། གཉིས་ཀ་ལ་བརྟེན་པའི་སྤྱི་གསུམ། དང་པོ་དེ་གཟུང་དོན་དངོས་པོ་རང་མཚན་དང་འབྲེལ་བ་དགག་པའི་ཕྱིར། གལ་ཏེ་དངོས་བརྟེན་མེད་ཅེ་ན། །ནས། དེ་ཤེས་ཡིན་ཕྱིར་ཉེས་འདི་མེད། །ཅེས་པའི་བར་རོ། །འཇུག་ཡུལ་གྱི་གཞལ་བྱ་རང་མཚན་གཅིག་པུར་བསྟན་པའི་ཕྱིར། རང་གི་མཚན་ཉིད་གཅིག་གཞལ་བྱ། །ཡོད་མེད་ཉིད་དུ་དཔྱོད་རྣམས་ཀྱི། །དོན་བྱ་དེ་ལས་གྲུབ་ཕྱིར་རོ། །དངོས་པོ་ལ་ནི་ཐུན་མོང་མ་ཡིན་པའི་དེ་ཁོ་ན་ཉིད་དང་སྤྱི་ཡང་ཡོད་ལ། ཐུན་མོང་མ་ཡིན་པ་གང་ཡིན་པ་དེ་ནི་མངོན་སུམ་གྱིས་གཟུང་བར་བྱ་བ་ཡིན་ནོ། །ཚད་མའི་ཡུལ་ནི་རྣམ་པ་གཉིས་ཏེ། གང་ཞིག་རྣམ་པ་བསྐྱེད་པས་ཏེ་གཟུང་བར་བྱ་བ་དང་། གང་ཞིག་ཞེན་པར་བྱ་བ་སྟེ་ཐོབ་པར་བྱའོ། །འདི་ལྟར་མངོན་སུམ་གྱིས་གཟུང་བར་བྱ་བ་ནི་སྐད་ཅིག་མ་གཅིག་ཡིན་ལ། མངོན་སུམ་གྱི་སྟོབས་ཀྱིས་སྐྱེད་པའི་ངེས་པར་ཞེན་པར་བྱ་བ་ནི་རྒྱུན་ཉིད་ཡིན་ནོ། །མངོན་སུམ་གྱིས་ཐོབ་པར་བྱ་བ་ཡང་རྒྱུན་ཉིད་ཡིན་ཏེ། སྐད་ཅིག་མ་གཅིག་གིས་ཐོབ་པར་མི་ནུས་པའི་ཕྱིར་རོ། །དེ་བཞིན་དུ་རྗེས་དཔག་པ་ཡང་རང་གི་སྣང་བ་དོན་མེད་པ་ལ་དོན་དུ་ཞེན་པས་འཇུག་པའི་ཕྱིར་དོན་མེད་པས་འཛིན་པ་ཡིན་ནོ། །དེ་ཡང་སྒྲོ་བཏགས་པའི་དོན་འཛིན་པ་ན་རང་གི་མཚན་ཉིད་དུ་འཛིན་ཏེ། དེས་ན་རྗེས་སུ་དཔག་པ་འདིའི་འཇུག་པའི་ཡུལ་ཞེན་པར་བྱ་བ་རང་གི་མཚན་ཉིད་ཡིན་ལ་གཟུང་བར་བྱ་བ་ནི་དོན་མེད་པ་ཡིན་ནོ། །དེ་བས་འདིར་ཚད་མའི་འཇུག་པའི་ཡུལ་ནི་རང་གི་མཚན་ཉིད་ཡིན་པར་བསྟན་ནོ། །དེ་ལྟ་བས་ན་གཟུང་ཡུལ་ལ་བལྟོས་ནས། དེ་ནི་རང་གཞན་ངོ་བོ་ཡིས། །རྟོགས་ཕྱིར་གཞལ་བྱ་གཉིས་སུ་བཞེད། །ཅེས་སོ། །དེ་ཡང་ཡུལ་ལ་འཇུག་ཡུལ་དང་གཟུང་ཡུལ་ལས་གཞན་མ་མཆིས་སོ། །ངེས་ན་སྤྱིའི་ཚུལ་གྱིས་རྟོགས་པའི་རྗེས་དཔག་སྟེ། ཇི་བཞིན་མངོན་ཞེན་མིན་པའི་ཕྱིར། གཉིས་པ་འཁྲུལ་པ་ཡིན་པར་བཞེད། །དེའི་དངོས་ཀྱི་འཛིན་སྟངས་འཁྲུལ་པ་ཡིན་པ་བཞེད་དེ། ཇི་བཞིན་མིན་པ་རང་ལ་སྣང་བ་དེ་རང་མཚན་དུ་མངོན་པར་ཞེན་པའི་བློ་ཡིན་པའི་ཕྱིར་རོ། །གལ་ཏེ་གཞན་གྱི་ངོ་བོས་ནི། །རྟོགས་ན་འཁྲུལ་པ་ཚད་མ་མིན། །གཞན་གྱི་ངོ་བོ་དེ་སྤྱིའི་ཚུལ་གྱིས་རྟོགས་སོ། །དེས་ན། རྗེས་དཔག་འཇུག་ཡུལ་ལ་ཚད་མ་མ་ཡིན་པར་ཐལ་ཏེ་འཁྲུལ་པ་ཡིན་པའི་ཕྱིར་རོ་ཞེས་རྒོལ་ན། བསམ་པ་ལ་ནི་བསླུ་མེད་ཕྱིར། །འཁྲུལ་པ་ཡིན་ཡང་ཚད་མ་ཉིད། །རྗེས་དཔག་རང་གི་གཟུང་ཡུལ་ལ་འཁྲུལ་པ་ཡིན་ཡང་འཇུག་ཡུལ་ལ་ཚད་མ་ཡིན་ཏེ། བསམ་པ་མངོན་པར་འདོད་པའི་དོན་ལ་བསླུ་བ་མེད་པའི་ཕྱིར་རོ། །རྣམ་གཞན་གྱིས་ཀྱང་རྟོགས་པ་མཐོང་། །ནས། ཚད་མ་ཉིད་དུ་རྣམ་པར་བཞག །ཅེས་པའི་བར་གྱིས་ནོར་བུའི་འོད་སྒོའི་སེང་ནས་ཤར་བ་དང་། སྒྲོན་མའི་འོད་ནོར་བུར་འཁྲུལ་པའི་བློ་གཉིས་ཀ་ནོར་བུར་འཛིན་པ་མ་ཡིན་པས་ལོག་པའི་ཤེས་པར་ཁྱད་པར་མེད་ཀྱང་ནོར་བུ་དང་ཕྲད་པར་བྱེད་པ་ལ་ཁྱད་ཡོད་པ་ལྟར་ཇི་བཞིན་པའི་དོན་ཅན་མ་ཡིན་པས་འཁྲུལ་པར་མཉམ་ཡང་། རྗེས་སུ་དཔག་པ་དང་དེར་སྣང་བ་དེ་དག་དོན་བྱེད་པ་ལ་ཁྱད་པར་ཡོད་དེ། རྗེས་དཔག་ནི་ཚུལ་གསུམ་གྱི་རྟགས་ཀྱི་སྟོབས་ལས་སྐྱེས་པ་རྒྱུད་ནས་འབྲེལ་བའི་ཕྱིར་ཕྲད་པར་བྱེད་ལ། དེར་སྣང་བ་ནི་འབྲེལ་བ་དང་བྲལ་བའི་ཕྱིར་ཕྲད་པར་བྱེད་པ་མ་ཡིན་ནོ། །དེ་བས་དོན་བྱེད་པའི་ངོར་རྗེས་དཔག་ཚད་མ་ཡིན་ནོ། །དེར་སྣང་སྟེ་རྗེས་དཔག་དེའི་མི་མཐུན་ཕྱོགས་ཀྱི་སྒྲོ་འདོགས་པའི་མཚན་ཉིད་ཅན་དག་ཚད་མ་མ་ཡིན་ནོ། །གཞལ་བྱ་གཉིས་སུ་ངེས་པ་ལ་ལས་འཕྲོས་ནས། གང་ལ་དོན་གྱི་ནུས་པ་ལ། །ནས། གཞལ་བྱ་གཉིས་ནི་མཐོང་བའི་ཕྱིར། །ཞེས་པའི་བར་གྱིས་མངོན་ལྐོག་གི་རྣམ་བཞག་བཤད་དོ། །གཞལ་བྱ་གཉིས་ལས་གྲངས་ཉུང་བ་དང་མང་བ་དགག་པའི་ཕྱིར། གསུམ་གཅིག་གྲངས་ནི་བསལ་པ་ཡིན། །མེད་པ་གཞལ་བྱ་མ་ཡིན་ཕྱིར། །གཅིག་ཉིད་ཅེ་ན། འཇུག་ཡུལ་གྱི་གཞལ་བྱ་ལ་གཅིག་ཏུ་འདོད་ན། ཁོ་བོའང་འདོད་ལ་དངོས་མེད་གཞལ་བྱར་རྒྱང་འཕེན་ཁྱོད་མི་འདོད་པ་དང་། རྗེས་དཔག་མེད་པ་དེ་གཉིས་ཀ་མི་འཐད་དོ་ཞེས་སྟོན་པ་ལ། །མེད་པའང་ངེས་ཕྱིར་གཞལ་བྱ་ནི། །ནས། དེ་ཕྱིར་དེ་ལ་རྗེས་དཔག་ཉིད། །ཅེས་པའི་བར་གྱིས་སོ། །ཁ་དེ་དེ་ལ་རབ་སྦྱོར་ཕྱིར། །ཚད་མ་གཞན་ནི་ཡོད་མིན་ནོ། །ཡང་ཡང་ཤེས་པའང་མ་ཡིན་ཏེ། །ཐུག་པ་མེད་འགྱུར་དྲན་སོགས་བཞིན། །ཞེས་པའི་ཕྱོགས་སྔ་མ། གཞལ་བྱ་དེས་ན་ཁ་དོག་ནི། ནས། གཞལ་བྱ་གཞན་ནི་ཡོད་ཕྱིར་རོ། །ཞེས་པའི་བར་གྱི་ལན། སྐྱོན་འདི་ཐལ་བར་མ་འགྱུར་ཏེ། །ཁ་དོག་སྤྱི་ལ་སྦྱོར་ཕྱིར་རོ། །ནས་དྲན་མིན་མ་ཡིན་འཁྲུལ་ཕྱིར་རོ། །ཞེས་པའི་བར་གྱིས་མངོན་རྗེས་གཉིས་ལས་གྲངས་མང་བའི་ལོག་རྟོག་བསལ་ལོ། །གཉིས་པ་གཞལ་བྱ་འཇལ་བ་ཚད་མ་ཡིན་པས་དེ་ཞིབ་མོར་བསྟན་པ་ལ། རང་མཚན་གཞལ་བྱར་བྱེད་པ་མངོན་སུམ་གྱི་ཚད་མ་དང་། སྤྱི་མཚན་གཞལ་བྱར་བྱེད་པ་རྗེས་དཔག་གི་ཚད་མ་བསྟན་པ་གཉིས་ལས། དང་པོ་ལ། མངོན་སུམ་གྱི་མཚན་ཉིད་དང་རབ་དབྱེ། འབྲས་བུ་ཚད་འབྲས་ཀྱི་རྣམ་གཞག་བསྟན་པ་གཉིས་ལས། དང་པོ་ནི། མདོར། མིང་དང་རིགས་སོགས་སྦྱོར་བ་ཡི། །རྟོག་པ་དང་བྲལ་མངོན་སུམ་མོ། །འདི་རང་འགྲེལ་ལས། འདོད་རྒྱལ་བའི་སྒྲ་རྣམས་ལ་མིང་གི་ཁྱད་པར་དུ་བྱས་ནས་དོན་བྱེད་པར་བྱེད་དེ། ལྷས་བྱིན་ཞེས་བྱ་བ་དང་། རིགས་ཀྱི་སྒྲ་རྣམས་ལ་རིགས་ཀྱི་སྟེ་བ་གླང་ཞེས་བྱ་བ་དང་། ཡོན་ཏན་གྱི་སྒྲ་རྣམས་ལ་ཡོན་ཏན་གྱིས་ཏེ་དཀར་པོ་ཞེས་བྱ་བ་དང་། བྱ་བའི་སྒྲ་རྣམས་ལ་བྱ་བའི་སྒོ་ནས་འཚེད་པར་བྱེད་པ་དང་། རྫས་ཀྱི་སྒྲ་རྣམས་ལ་རྫས་ཀྱི་སྒོ་ནས་ཏེ་དབྱུག་པ་ཅན་རྭ་ཅན་བྱ་བ་ལྟ་བུའོ། །འདི་ལ་ཁ་ཅིག་ན་རེ། འབྲེལ་པས་ཀྱང་ཁྱད་པར་དུ་བྱས་པའི་སྒྲ་ཡིན་ནོ་ཞེས་ཟེར་རོ། །གཞན་དག་ནི་དོན་གྱིས་སྟོང་པའི་སྒྲ་འབའ་ཞིག་གི་དོན་རྣམས་ཁྱད་པར་དུ་བྱས་ཤིང་བརྗོད་དོ་ཞེས་འདོད་དོ། །གང་ལ་རྟོག་པ་དེ་དག་མེད་པ་དེ་མངོན་སུམ་མོ་ཞེས་སོ། །རྣམ་ངེས་སུ། མངོན་སུམ་རྟོགས་བྲལ་མ་འཁྲུལ་བ། །ཞེས་གསུངས་པས། རྟོག་པ་དང་བྲལ་ཞིང་མ་འཁྲུལ་བའི་རིག་པ་མངོན་སུམ་གྱི་མཚན་ཉིད་ཡིན་ནོ། །རྟོག་པ་ནི་སྒྲ་དང་འདྲེར་རུང་བའི་ཤེས་པའོ། །འདྲེ་བ་ནི་འབྲེལ་པ་ལ་བྱའོ། །རུང་བ་སྨོས་པ་ནི། སྒྲ་དོན་གྱི་རྟོག་པ་མ་ཚང་བའི་བྱིས་པ་རྣམས་དང་དུད་འགྲོ་རྣམས་ཀྱི་ཡང་རྟོག་པ་ཡོངས་སུ་གཟུང་བ་ཡིན་ནོ། །དེ་དག་གི་དེ་ནམ་ཡང་སྒྲས་སྦྱར་བའི་དོན་གྱིས་མི་འཛིན་ཏེ་སྒྲ་དང་འདྲེར་རུང་བ་ནི་འཛིན་པ་ཉིད་དོ། །སྒྲ་དང་འདྲེར་རུང་བས་ནི་སྒྲ་སྤྱི་དང་སྒྲ་དང་འདྲེར་རུང་བར་ཤེས་པས་དོན་སྤྱིའོ། །དེའི་ཕྱིར་གཉིས་ཀ་འདིས་གཟུང་ངོ་། །མ་འཁྲུལ་བ་ནི། རབ་རིབ་དང་། མྱུར་དུ་བསྐོར་བ་དང་། གྲུར་ཞུགས་པ་དང་། འཁྲུགས་པ་ལ་སོགས་པས་འཁྲུལ་པར་མ་སྐྱེད་པའི་ཤེས་པའོ། །དེ་དག་ཀྱང་རིམ་པ་བཞིན་འཁྲུལ་པའི་རྒྱུ་དབང་པོ་ལ་ཡོད་པ་དང་། ཡུལ་ལ་ཡོད་པ་དང་། ཕྱི་རོལ་ལ་ཡོད་པ་དང་། ནང་ལ་ཡོད་པ་དེ་ཐམས་ཅད་ཀྱིས་དབང་པོ་ཉིད་སྦྱར་བར་བྱེད་དེ། དབང་པོ་མ་བསྒྱུར་བར་དབང་པོ་འཁྲུལ་པ་མི་རིག་པའི་ཕྱིར་རོ། །རབ་རིབ་ཀྱི་གནོད་པས་ནི་ཟླ་བ་གཅིག་ལ་ཟླ་གཉིས་སུ་མཐོང་བ་ལྟ་བུ། མྱུར་དུ་བསྐོར་བ་ནི་མགལ་མེ་ལ་འཁོར་ལོའི་བློ་འབྱུང་བ་ལྟ་བུ། གྲུར་ཞུགས་པས་ནི་འགྲམ་གྱི་ཤིང་འགྲོ་བ་མཐོང་བ་ལྟ་བུ། རླུང་མཁྲིས་བད་ཀན་ལ་སོགས་འཁྲུགས་པས་ནི་ཀ་བ་ལ་སོགས་པ་ལ་འབར་བ་ལ་སོགས་པར་མཐོང་བ་ལྟ་བུ་འབྱུང་བས་སོ། །སོགས་པས་དེ་འདྲ་བའི་རིག་པ་ཅན་ཐམས་ཅད་སྡུད་དོ། །མངོན་སུམ་རྟོག་དང་བྲལ་བར་ནི་མངོན་སུམ་ཉིད་ཀྱིས་འགྲུབ་པར་འགྱུར། འདི་རྣམ་ངེས་སུ། དབང་པོའི་བློ་རྟོག་པ་དང་བྲལ་བར་སྒྲུབ་པར་བྱེད་པ་ནི་མངོན་སུམ་ཉིད་དེ། ཞེས་གསུངས་ལ། ཇི་ལྟར་དེས་འགྲུབ་ཅེ་ན། ཀུན་གྱི་རྣམ་རྟོག་མིང་རྟེན་ཅན། །སོ་སོ་རང་གི་རིག་བྱ་ཡིན་རྣམ་ངེས་སུ། རྣམ་པར་རྟོག་པ་རྣམས་ནི་སོ་སོར་རྟོག་པས་བཟློག་པར་ནུས་པ་ཡིན་ནོ། །ཞེས་པས། རྣམ་པར་རྟོག་པ་དེ་དག་སོ་སོར་རང་གི་རིག་པས་རིག་པར་བྱས་པའི་ཚེ་དེའི་དངོས་པོ་བཏང་ནས་སྟོང་པར་འགྱུར་ལ། དེའི་ཤུལ་ན་ལུས་པའི་ཤེས་པ་དེ་ནི་མངོན་སུམ་ཡིན་པས་དེ་རྟོག་བྲལ་དུ་གྲུབ་བོ། །རྟོག་པ་དང་བྲལ་བ་དེ་དང་མ་འཁྲུལ་པ་གོ་གཅིག་ན་བལྟོས་པས་བསྒྲུབས་པས། འདིས་མངོན་སུམ་གྱི་མཚན་ཉིད་རིལ་པོ་བསྟན་ནོ་ཞེས་ངེས་པར་བྱའོ། །ཚུལ་གང་གིས་སོ་སོ་རང་གི་རིག་པ་ཞེ་ན། ཐམས་ཅད་ལས་ནི་སེམས་བསྡུས་ནས། ནང་གི་བདག་ཉིད་གཡོ་མེད་པར། གནས་ནའང་མིག་གི་གཟུགས་དག་ནི། །མཐོང་བའི་བློ་དེ་དབང་སྐྱེས་ཡིན། །ཐམས་ཅད་ལས་སེམས་བསྡུས་པ་ནང་གི་བདག་ཉིད་གཡོ་བ་མེད་པ་ལ་གནས་པའོ། །དེའི་ཚེ་མིག་ལ་སོགས་པའི་རྣམ་ཤེས་སྐྱེ་ཡི་འདུག་ལ། འདུག་པ་དེས་ཀྱང་ངོ་། །སླར་ཡང་ཅུང་ཟད་རྣམ་རྟོག་ན། ཁོ་བོའི་རྣམ་རྟོག་འདི་འདྲར་གྱུར། །ཅེས་རིག་སྔར་བཤད་གནས་སྐབས་ཀྱི། །དབང་པོའི་རྟོག་པ་ལ་མེད་དོ། །འདི་རྣམ་ངེས་སུ། ཡང་དེའི་སེམས་བསྡུས་པ་ལས་ལངས་ཏེ་ཅུང་ཟད་རྣམ་པར་རྟོག་པ་ན། ཁོ་བོའི་རྣམ་པར་རྟོག་པ་འདི་དང་འདི་འདྲ་གྱུར་ཏོ་ཞེས་རང་གི་སེམས་ཀྱི་རྒྱུན་སྡོམ་པར་བྱེད་དོ། །དེའི་ཕྱིར་རྣམ་པར་རྟོག་པ་འདི་དག་མངོན་སུམ་ཡིན་ན་རྟོག་པ་བསྡུས་པའི་མཐོང་བ་ལ་ཇི་ལྟར་རྟོག་པར་མི་འགྱུར། དེས་ན་མཐོང་བའི་བདག་ཉིད་འདི་རྟོག་པ་དང་མ་འདྲེས་པ་ནི་མངོན་སུམ་ཡིན་པའམ། མཐོང་བ་ལ་སྣང་བའི་བདག་ཉིད་རྣམ་པར་རྟོག་པ་མི་སྣང་བས་ནི་དབང་པོའི་ཤེས་པ་ལས་རྣམ་པར་རྟོག་པའི་རྟོག་པ་སྤངས་པ་ཡིན་ནོ། །ཞེས་སོ། །འདིར་དབང་པོའི་བློ་ཞེས་འབྱུང་བ་དབང་པོའི་མངོན་སུམ་ཁོ་ནར་རྟོག་པ་ནོང་པ་སྟེ། མངོན་སུམ་གྱི་སྒྲ་བཤད་འཇུག་མ་གོ་བར་ཟད་པས་སོ། །དེ་ཡང་མདོའི་རང་འགྲེལ་དུ། ཅི་སྟེ་གང་གི་ཕྱིར་གཉིས་ལ་བརྟེན་ནས་སྐྱེས་པའི་རྣམ་པར་ཤེས་པ་ལ་དབང་པོ་ལ་བརྟེན་པ་ཞེས་བརྗོད་ཀྱི། ཡུལ་ལ་བརྟེན་པ་ཅི་ནས་མ་ཡིན་ཞེ་ན། ཐུན་མོང་མ་ཡིན་རྒྱུ་ཡི་ཕྱིར། །དེ་ཡི་ཐ་སྙད་དབང་པོས་བྱས། །ཡུལ་གཟུགས་ལ་སོགས་པས་ནི་མ་ཡིན་ནོ། །འདི་ལྟར། ཡུལ་ནི་རྒྱུ་གཞན་གྱིས་དང་། ཡིད་ཀྱི་རྣམ་པར་ཤེས་པ་དང་ཐུན་མོང་བ་ཡིན་ནོ། །ཐུན་མོང་མ་ཡིན་པ་ལས་ཐ་སྙད་བྱེད་པ་ཡང་མཐོང་སྟེ། དཔེར་ན་རྔའི་སྒྲ་དང་ནས་ཀྱི་མྱུ་གུ་བཞིན་ནོ། །དེ་ལྟ་བས་ན་མངོན་སུམ་རྟོག་པ་དང་བྲལ་བ་འཐད་པ་ཡིན་ནོ། །ཞེས་པས་སོ། མངོན་སུམ་རྟོག་བྲལ་དུ་བསྒྲུབས་པའི་འོག་ཏུ་རྣམ་པར་དབྱེ་བ་བཤད་པ་ནི་བཞི་སྟེ། དབང་པོའི་མངོན་སུམ་དང་། ཡིད་དང་། རང་རིག་དང་། རྣལ་འབྱོར་མངོན་སུམ་མོ། །བྱེ་སྨྲ་དབང་པོ་ཉིད་མཐོང་བ་པོར་འདོད་པ་བསལ་བའི་ཕྱིར་དང་པོ་དང་། མུ་སྟེགས་བྱེད་འགའ་ཞིག་ཡིད་ཀྱི་དབང་པོ་ལ་སྐྱོན་འདོགས་པ་དེ་བསལ་བའི་ཕྱིར་གཉིས་པ་དང་། རང་སྡེ་དང་གཞན་སྡེ་ཁ་ཅིག་རང་གི་རང་རིག་མི་འདོད་པ་དེ་བསལ་བའི་ཕྱིར་གསུམ་པ་དང་། ཕས་རྒོལ་འགའ་ཞིག་རྣལ་འབྱོར་པ་དང་དེའི་མངོན་སུམ་མི་འདོད་པ་དེ་བསལ་བའི་ཕྱིར་བཞི་པ་བཤད་དོ། །དེ་ལས་དང་པོ་ནི། མདོར། བསྟན་མིན་ངོ་བོ་དབང་པོའི་ཡུལ། །ཞེས་པ། དེ་ལས་སྤྱི་གཞན་ཐ་དད་པ། །ཡོད་མིན་ཐ་དད་བློ་མེད་ཕྱིར། །དེ་ཕྱིར་དབང་པོ་ལས་སྐྱེས་བློ། །ཐམས་ཅད་ཁྱད་པར་ཡུལ་ཅན་ཡིན། །འདི་ཡང་རྣམ་ངེས་སུ། དེ་ལ་སྤྱི་མི་སྣང་བའི་ཕྱིར་དང་། གསལ་བ་རྣམས་ཀྱི་རྗེས་སུ་མི་འགྲོ་བའི་ཕྱིར་དབང་པོའི་བློ་ནི་བརྗོད་དུ་མེད་པའི་དབང་པོའི་རང་བཞིན་ཁྱད་པར་ཅན་ཉིད་མངོན་སུམ་དུ་བྱེད་པ་ཡིན་ནོ། །ཞེས་སོ། །འདིར་མདོ་སྡེ་པས་གཟུང་འཛིན་མངོན་སུམ་གྱིས་དོན་རྣམ་པས་བར་དུ་བཅད་པ་ཞིག་གཟུང་བར་འདོད་དོ། །དེ་ཡང་མིག་དང་རྣ་བ་དང་སྣ་དང་ལྕེ་དང་ལུས་ཀྱི་རྣམ་པར་ཤེས་པ་དག་གནོད་པ་མེད་པའི་དབང་པོ་ལ་བརྟེན་པའི་ཤེས་པ་ཡིན་པས་དབང་པོའི་མངོན་སུམ་དུ་བཞག་གོ །ཁྱད་པར་ཅན་རྣམས་སྒྲ་དག་ནི། །ནས། རང་ཉིད་ཤེས་པར་ཐལ་ཕྱིར་རོ། །ཞེས་པའི་བར་གྱིས་དབང་ཤེས་དེས་སྒྲའི་བརྗོད་བྱ་འཛིན་པ་བཀག་ནས་ཞར་ལ། རྟོག་བཅས་རྟོག་པ་མེད་པའི་ཡིད། །ནས། དེ་མཐོང་མཚམས་སྦྱོར་ལས་མ་ཡིན། །ཞེས་པའི་བར་གྱིས་རིག་པ་ཅན་པ་མཐོང་རྟོག་གཅིག་ཏུ་འདོད་པ་བཀག་གོ །ལ་ལར་དབང་སྐྱེས་ལ་སོགས་ཕྱིར། །ནས། འདིས་ནི་མྱོང་སོགས་བཤད་པ་ཡིན། །ཞེས་པའི་བར་གྱིས་སྲིད་པའི་བདག་པོ་སོགས་ཀྱིས་བློ་རྟོག་མེད་དུ་འདོད་པ་བཀག་གོ །ཁྱད་པར་དང་ནི་ཁྱད་པར་གཞི། །ནས། བཟློག་པ་ལ་ནི་སྒྲ་སྦྱོར་ཕྱིར། །འདིས་བྱེ་བྲག་པ་ལ་སོགས་པ་དབང་ཤེས་དེ་རིགས་སོགས་རྫས་ལ་སྦྱར་ནས་འཛིན་པར་འདོད་པ་དང་། ཁ་ཅིག་རིགས་ཀྱང་སྒྲ་དོན་དུ་འདོད་པ་དང་། ཁ་ཅིག་རྫས་ཀྱང་སྒྲ་དོན་དུ་འདོད་པ་དང་། ཁ་ཅིག་གཉིས་ཀ་དེར་འདོད་པ་ཀུན་དགག་གོ །བརྡ་དྲན་པ་ཡི་རྒྱུ་ཅན་གྱིས། །ནས། བརྟེན་ནས་མིག་བློ་སྐྱེ་བར་འགྱུར། །ཞེས་པའི་བར་གྱིས་བརྡ་སྤྲོད་པ་སོགས་དབང་ཤེས་ཀྱི་མིང་དོན་སྦྱར་ནས་འཛིན་པར་འདོད་པ་དགག་གོ །གལ་ཏེ་མངོན་སུམ་ཤེས་བསྐྱེད་ལ། །ནས། ལོག་པའི་ཕྱིར་ན་བཟློག་པར་འགྱུར། ཞེས་པའི་བར་གྱིས། མདོར། ཐུན་མོང་མ་ཡིན་རྒྱུ་ཡི་ཕྱིར། དེ་ཡི་ཐ་སྙད་དབང་པོས་བྱས། ཞེས་འགྲེལ་པས་དབང་ཤེས་རྟོག་བྲལ་ལ་ལུང་འགལ་སྤངས་སོ། །བསགས་པ་དག་ནི་ཚོགས་པ་ཡིན། ཞེས་ཚིགས་སུ་བཅད་པ་གཅིག་གིས། མདོར། དེ་དོན་དུ་མས་བསྐྱེད་པའི་ཕྱིར། །རང་དོན་སྤྱི་ཡི་སྤྱོད་ཡུལ་ཅན། །ཞེས་གསུངས་པ་ལ་རྩོད་པ་བཀོད་ནས་ལན་ལ། དོན་གཞན་དང་ནི་མངོན་འགྲེལ་ཕྱིར། །སྤྱི་ཡིད་སྤྱོད་ཡུལ་ཅན་དུ་བཤད། །ཅེས་པའི་བར་གྱིས་ལུང་དོན་བཤད། །གལ་ཏེ་སྐྱེ་མཆེད་གཅིག་ཡིན་ན། །ཅིག་ཅར་དུ་མ་འཛིན་མ་ཡིན། །ཞེས་དེ་ལས་འཕྲོས་པའི་རྩོད་པའོ། །དེ་དགག་པ་ལ་ཐལ་བ་ལྔ་ཡོད་པའི་དང་པོ། ཏིལ་སོགས་ཐ་དད་ལ་ཇི་ལྟར། །ནས། འདི་ནི་རིམ་མིན་ཐལ་བར་འགྱུར། །ཞེས་པའི་བར་གྱིས་ཏིལ་ལ་སོགས་པ་གཅིག་ཅར་འཛིན་པ་མེད་པར་ཐལ་བས་དང་། ཕྱེ་མ་ལེབ་ཁྲ་ལ་སོགས་གཟུགས། དུ་མའང་ཅིག་ཅར་སྣང་བར་འགྱུར། །ཞེས་པས་ཁྲ་བོ་ཅིག་ཅར་འཛིན་པ་མེད་པར་ཐལ་བ་འཕངས་པ་ལ། གལ་ཏེ་སྣ་ཚོགས་དེ་གཅིག་ན། །ཞེས་ལན་བཀོད་པ། དེ་དགག་པ་ལ། ཐ་དད་བཞག་འདི་གང་གིས་འགྲུབ། །ནས། རྟོག་པ་མེད་པར་གྲུབ་པ་ཡིན། །ཞེས་པའི་བར་གྱིས་སྣ་ཚོགས་ཡིན་པས་གཅིག་ཉིད་ཡིན་པ་བཀག་པས། ཡང་། སྣ་ཚོགས་སྣང་ཅན་དོན་རྣམས་ལ། །གལ་ཏེ་གཅིག་ཉིད་མི་རིགས་ན། །རེ་ཞིག་གཅིག་པུའི་བློ་དེ་ཉིད། །སྣ་ཚོགས་སུ་ནི་ཇི་ལྟར་སྣང་། །ཞེས་བརྒལ་བ་ལ། དཔྱད་ན་སྣང་བ་དོན་དུ་མེད་པས་ཁྱབ་པ་མེད་ལན། རྣམ་པ་དེ་རྣམས་ལྷན་ཅིག་དམིགས་པས་བརྟགས་ལ་ཁྱད་པར་ཡོད་པའི་ལན་གཉིས་འདེབས་པར་བཞེད་པའི་བྱ། དང་པོ་ལ་ཡང་གཅིག་དང་དུ་མས་སྟོང་པས་ཕྱི་དོན་བདེན་པ་མེད་པར་དང་། གཟུང་འཛིན་བདེན་པས་སྟོང་པའི་འཐད་པ་དང་། ཕྱི་དོན་གསུངས་པ་ལྟ་བུའི་ལུང་འགལ་སྤངས་པ་གསུམ་དུ་གནས་པའི་དང་པོ། ཇི་ལྟ་ཇི་ལྟར་དོན་བསམས་པ། །དེ་ལྟ་དེ་ལྟར་རྣམ་བྲལ་ཞེས། །མཁས་པ་རྣམས་ཀྱིས་གང་གསུངས་པ། །དེ་ནི་དངོས་སྟོབས་འོང་པའང་ཡིན། རྒྱན་དུ། བློ་རྣམས་གཅིག་པ་མ་ཡིན་ཞིང་། །དུ་མ་ཉིད་དུ་འཐད་མ་ཡིན། །གཅིག་ན་སྣ་ཚོགས་མེད་འགྱུར་ཏེ། །དུ་མ་ཉིད་ན་འདི་ཆེས་གསལ། །དེ་ཕྱིར་དངོས་པོ་རྣམས་ཇི་ལྟ་ཇི་ལྟར་རྣམ་པར་བསམ་པ་དེ་ལྟ་དེ་ལྟར་རྣམ་པ་ཞིག་པར་འགྱུར་པའི་ཕྱིར་འདི་ལ་ཅི་ཞིག་བྱར་ཡོད། དེའི་ཕྱིར་རྣམ་པར་ཤེས་པ་ནི་རྣམ་པར་ཤེས་པས་སྟོང་ངོ་། །ཞེས་གསུངས་ན་ཆོས་ཐམས་ཅད་ནི་སྟོང་པ་ཉིད་དོ་ཞེས་བྱ་བར་རིགས་སོ། །དེ་རྒྱས་པར་སྟོན་པའི་ཕྱིར། གཅིག་ལ་སྣ་ཚོགས་དེ་ཅིར་འགྱུར། །ནས། མང་པོ་ལ་ཡང་ཡོད་མ་ཡིན། །ཞེས་པའི་བར་གྱིས་སོ། །གཟུང་འཛིན་བདེན་པས་སྟོང་པའི་འཐད་པ་སྟོན་པའི་ཕྱིར། །ལོངས་སྤྱོད་ནང་ཡིན་ཕྱི་རོལ་ལྟར། །གནས་པ་འདི་ནི་ཆ་གཞན་མིན། །ཐ་དད་མེད་ཅན་ཤེས་པ་ཡིས། །ཐ་དད་སྣང་བ་བསླད་པ་ཉིད། །རྒྱན་དུ། དེས་ན་མྱོང་བ་ལ་རིག་པ་གཅིག་ཉིད་ཡིན་ཏེ། དེས་ན་ཐ་དད་པ་མེད་པའི་ཤེས་པ་ལ་ཐ་དད་པར་སྣང་བ་ནི་བསླད་པ་ཡིན་པས་ན། ཤེས་པ་ཡང་རང་གི་ངོ་བོར་རྟོགས་པས་མེད་པ་ཁོ་ན་མ་ཡིན་པའི་ཕྱིར་སྟོང་པ་ཉིད་འབའ་ཞིག་ལུས་པར་འགྱུར་རོ། །འདི་ལྟར། དེ་ལ་གཅིག་ནི་མེད་པས་ཀྱང་། །གཉིས་ཀའང་ཉམས་པར་འགྱུར་བ་ཡིན། །དེ་ཕྱིར་གཉིས་སྟོང་གང་ཡིན་པ། །དེ་ནི་དེའང་དེ་ཉིད་ཡིན། །ཞེས་གསུངས་པའི་ཕྱིར། འདིས་ནི་རྣམ་རྫུན་པའི་སྟོང་པ་ཉིད་བསྟན་པར་སེམས་སོ། །དེ་ཡང་། གཅིག་གཟུང་བ་མེད་པས་ཅིག་ཤོས་འཛིན་པའང་ཉམས་པས་ན་མ་བརྟགས་ཉམས་དགའ་བ་ཙམ་གྱིས་གཞན་དབང་སྟེ། གཟུང་འཛིན་ཀུན་བརྟགས་པའི་མཚན་ཉིད་ཅན་གཉིས་ཀྱིས་བཏང་བས། གཞན་དབང་གི་དངོས་པོ་ཞིག་སྟེ་ཤུལ་དུ་སྟོང་པ་ཉིད་ཡོངས་སུ་གྲུབ་པ་གཅིག་པུ་ལས་པ་དེ་ནི་ཆོས་ཐམས་ཅད་ཀྱི་དེ་ཁོ་ན་ཉིད་ཡིན་ནོ་ཞེས་པའོ། །འདི་ཡང་བྱམས་པས། ཡོད་པས་མེད་པས་ཡོད་པས་ན། །དེ་ཕྱིར་དབུ་མའི་ལམ་ཡིན་ནོ། །ཞེས་གསུངས་ལ། དེ་དབུ་མར་ཕྱོགས་ཀྱི་གླང་པོ་ཡང་བཞེད་དོ་ཞེས་ཁ་ཅིག་གོ །རྒྱན་ལས། དབུ་མ་པ་དང་རྣལ་འབྱོར་སྤྱོད་པ་དང་། ཕྱི་རོལ་གྱི་དོན་ཡོད་པར་སྨྲ་བའི་ལུགས་ཀྱི་སྟོང་པ་ཉིད་ཀྱི་དོན་སྟོན་པར་བྱེད་དོ། །གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཞེས་བྱ་བ་ལ་སོགས་པ་ནི་དངོས་པོ་རྣམས་ཀྱི་རྣམ་གཞག་ཡིན་ལ། དངོས་རྣམས་ཐ་དད་གནས་པ་ནི། །དེ་ཐ་དད་པ་བརྟེན་པ་ཡིན། །དེ་ནི་བསླད་པ་ཉིད་ཡིན་ན། །དེ་དག་ཐ་དད་ཀྱང་བསླད་འགྱུར། །གཟུང་དང་འཛིན་པའི་རྣམ་པ་ལས། །མཚན་ཉིད་གཞན་ནི་ཡོད་མ་ཡིན། །དེས་ན་མཚན་ཉིད་སྟོང་པའི་ཕྱིར། །རང་བཞིན་མེད་པ་རབ་ཏུ་བཤད། །ཕུང་པོ་ལ་སོགས་བྱེ་བྲག་གིས། །མཚན་ཉིད་ཐམས་ཅད་བྱེད་པ་ཡི། །ཁྱད་པར་ཅན་དེའང་དེ་ཉིད་མིན། །དེས་ཀྱང་དེ་དག་མཚན་ཉིད་བྲལ། །ཞེས་གསུངས་ལ། ཚིགས་སུ་བཅད་པ་གསུམ་ལུགས་གསུམ་ལ་རིམ་པ་བཞིན་ཉི་མ་སྦས་པས་སྦྱར་རོ། །ཇི་ལྟར་རྣམ་རྫུན་པ་འདོད་པ་དེ་ཡང་སྐྱོན་དང་བཅས་ཏེ། མ་རིག་གིས་བསླད་བདག་ཉིད་ཅན། །ཇི་ལྟའི་རང་རྐྱེན་ལ་བལྟོས་ནས། །རྣམ་རིག་དེ་ནི་མིན་རྣམ་པ། །སྐྱེ་འགྱུར་རབ་རིབ་ལ་སོགས་བཞིན། །ཕ་རོལ་མཐོང་མིན་ཐམས་ཅད་ཀྱིས། །དེ་ཉིད་དེ་ནི་རིག་མ་ཡིན། །གཟུང་དང་འཛིན་པའི་བསླད་པ་དག །མེད་ན་དེ་ནི་མེད་ཕྱིར་རོ། །ཞེས་གཟུང་བ་དང་འཛིན་པ་དག་མེད་ན་དེས་བཏང་བའི་སྟོང་ཉིད་ཀྱང་ཡོད་པ་མ་ཡིན་ཏེ། དེ་ནི་འདི་ལ་བལྟོས་ཏེ་སྟོང་པ་ཉིད་ཅེས་ཁྱོད་རང་འདོགས་པའི་ཕྱིར་དང་། གལ་ཏེ་གཉིས་ཀྱིས་བཏང་བའི་གཉིས་མེད་པ་ཡོད་ན་གཉིས་ཀྱང་ཡོད་པར་འགྱུར་ཏེ། ནོར་མེད་ཅེས་པ་ཡང་འགའ་ཞིག་ནོར་ཅན་དུ་གྲུབ་པ་ལས་ཡིན་པ་བཞིན་ནོ། །འདི་ནི་དབུ་མ་པའི་སྟེ། དེ་ནི་ཆོས་ཐམས་ཅད་རྟེན་ཅིང་འབྲེལ་བར་འབྱུང་བར་གཞན་ལ་གོ་བར་བྱེད་པ་ཡིན་པས་སོ། །ཕྱི་དོན་འདོད་པས་ཕྱི་མ་ནི་གཟུགས་ལ་སོགས་པ་དཔྱད་ན་གཟུགས་རུང་དུ་བྱེད་པ་ལ་སོགས་པ་དེ་ནི་དེ་ཉིད་མ་ཡིན་ཏེ། དབུ་བ་རྡོས་པ་ལྟ་བུ་ལ་སོགས་པ་ཡིན་པའི་ཕྱིར་སྟོང་པའོ་ཞེས་འདོད་པའོ། །དེ་ལྟར་ཡིན་ན་ཕྱི་དོན་ཡོད་པར་གསུངས་པ་དང་འགལ་ལོ་སྙམ་ན། དེ་ལྟར་གསུངས་པ་ལྟ་བུ་དང་མི་འགལ་བར་སྟོན་པའི་ཕྱིར། དེས་དེ་ཉིད་དོན་བཏང་སྙོམས་ཅན། །གླང་ཆེན་གཟིགས་སྟངས་ཉིད་མཛད་ནས། །འཇིག་རྟེན་ཐུགས་ནི་འབའ་ཞིག་གིས། །ཕྱི་རོལ་སྤྱོད་ལ་འཇུག་པར་མཛད། །ཕྱི་རོལ་ཏུ་གྲུབ་པའི་དོན་ཡོད་ནས་བཅོམ་ལྡན་འདས་གསུང་བར་མི་མཛད་ཀྱི་ཕྱི་རོལ་ལ་མངོན་པར་ཞེན་པ་ལ་ཕྱི་རོལ་སུན་ཕྱིན་ན་གུས་པ་སྟོང་བ་དེ་དག་དྲང་བའི་ཕྱིར་རེ་ཞིག་དོན་དམ་པ་བཏང་སྙོམས་སུ་བཞག་ནས། གླང་པོ་ཆེ་རང་གི་ཚོགས་ལས་ངན་པར་མི་འདོར་བ་ལྟ་བུའི་གཟིགས་པས་འཇིག་རྟེན་དྲང་བའི་ཐུགས་རྗེ་འབའ་ཞིག་གིས་ཕྱི་རོལ་དག་ཀྱང་ཡོད་པར་བསྟན་ལ། བསྟན་པ་དེས་དེ་དག་དངོས་པོ་ལ་མངོན་པར་ཞེན་པ་ལྷོད་པར་འགྱུར་བ་འདི་གྱུར་པ་ན་དེ་ཡང་བཟློག་སྟེ་སེམས་ཙམ་ལ་སོགས་པ་སྟོན་པར་མཛད་དོ། །ཡང་རྣམ་པ་དེ་རྣམས་ལྷན་ཅིག་དམིགས་པས་རྟགས་ལ་ཁྱད་པར་ཡོད་པར་སྟོན་པའི་ལན་འདེབས་པར་བཞེད་ནས། ཤེས་པ་སྔོ་སོགས་སྣ་ཚོགས་པ། །ནས། སྣ་ཚོགས་གཅིག་པའི་ངོ་བོར་འགྱུར། །ཞེས་པའི་བར་གྱིས་ཤེས་པའི་སྣ་ཚོགས་དབྱེར་མེད་དུ་བསྟན། རས་སོགས་གཟུགས་ནི་གཅིག་ཡིན་ན། །ནས། ཐ་དད་པ་མེད་གཞན་མཐོང་མེད། །ཅེས་པའི་བར་གྱིས་དེའི་འཐད་པ་བསྟན། གལ་ཏེ་དབང་སོགས་ལ་སོགས་བཞིན། །ཞེས་པའི་ཚིགས་སུ་བཅད་པ་གཉིས་ཀྱིས་རྫས་གཅིག་མེད་ཀྱང་ཡུལ་དུ་འཐད་པ་བསྒྲུབས་སོ། །དེ་དག་གིས་ཁྲ་བོ་ཅིག་ཅར་འཛིན་པ་མེད་པར་ཐལ་བ་འཕྲོས་དོན་དང་བཅས་པ་བསྟན་ནས། ཇི་ལྟར་རང་གི་ཡན་ལག་བཅས། །ནས། དེ་ཉིད་ཀྱིས་ཏེ་དེ་འཛིན་འགྱུར། །ཞེས་པའི་བར་གྱིས་ནོག་སོགས་ཅིག་ཅར་འཛིན་པ་མེད་པར་ཐལ་བ་བསྟན་ནོ། །རང་གི་དངོས་པོ་གཞན་དག་ལས། །ཞེས་ཚིགས་བཅད་གཉིས་ཀྱིས་སྣ་ཚོགས་གཞན་དུ་ཤེས་པ་མེད་པར་ཐལ་བ་བསྟན་ནོ། །སྒྲ་སོགས་དུ་མ་ཉིད་ཀྱི་ཕྱིར། །ཞེས་ཚིགས་བཅད་གཅིག་གིས་ཅིག་ཅར་དུ་མ་འཛིན་པ་གྲུབ་པར་བསྟན་ནོ། །ཆོས་ཅན་ཐམས་ཅད་ལས་ལྡོག་པ། །སོགས་ཚིགས་བཅད་གཉིས་ཀྱིས་དབང་ཤེས་རྟོག་བྲལ་ལ་རིག་པ་དང་འགལ་བ་སྤངས་སོ། །གལ་ཏེ་དཀར་སོགས་ཡོད་གྱུར་ཀྱང་། །ནས། བྱེད་པ་ཡིན་ཞེས་བརྗོད་ཟིན་ཏོ། །ཞེས་པའི་བར་གྱིས་དབང་ཤེས་རྟོག་བྲལ་གྱིས་སྤྱི་འཛིན་པ་སྤངས་སོ། །རབ་དབྱེ་གཉིས་པ་ཡིད་ཀྱི་མངོན་སུམ་ནི། མདོར། ཡིད་ཀྱང་དོན་དང་ཆགས་ལ་སོགས། །ཞེས་གསུངས་ལ་དེ་ཉིད་རྣམ་ངེས་དང་རིགས་ཐིག་ཏུ། རང་གི་ཡུལ་གྱི་དེ་མ་ཐག་པ་ཡུལ་ལྷན་ཅིག་བྱེད་པ་ཅན་དབང་པོའི་ཤེས་པ་མཚུངས་པ་དེ་མ་ཐག་པའི་རྐྱེན་གྱིས་བསྐྱེད་པ་ཡིད་ཀྱི་རྣམ་པར་ཤེས་པ། ཞེས་གསུངས་པའི་རང་གི་ཡུལ་ཞེས་བྱ་བ་ནི་རང་གི་དམིགས་པ་ཞེས་བྱ་བའི་དོན་ནོ། །དེའི་དེ་མ་ཐག་པ་ནི་འདི་ལ་བར་མེད་པས་དེ་མ་ཐག་པའོ། །ཡུལ་ལྷན་ཅིག་བྱེད་པ་ཅན་དབང་པོའི་ཤེས་པ། ལྷན་ཅིག་བྱེད་པ་ཡང་རྣམ་པ་གཉིས་ཏེ། ཕན་ཚུན་ཕན་པ་བྱེད་པ་དང་། །བྱ་བ་གཅིག་ལ་བྱེད་པའོ། །དེ་ལས་འདིར་ནི་སྐད་ཅིག་གི་དངོས་པོ་ལ་ཁྱད་པར་བསྒྲུབ་པ་མི་འཐད་པའི་ཕྱིར་བྱ་བ་གཅིག་ལ་བྱེད་པ་གཉིས་ཀྱིས་ལྷན་ཅིག་བྱེད་པ་གཟུང་སྟེ། ཡུལ་དང་རྣམ་ཤེས་གཉིས་པོ་དེ་ཡིད་ཀྱི་རྣམ་ཤེས་གཅིག་ལ་བྱེད་པས་གཉིས་ཀ་ལྷན་ཅིག་བྱེད་པ་ཡིན་ནོ། །མཚུངས་པ་དེ་མ་ཐག་པའི་རྐྱེན་ཞེས་པ་འདི་ནི་ཤེས་པ་ཉིད་ཀྱིས་མཚུངས་པ་ཡང་ཡིན་ལ། བར་མ་ཆོད་པས་དེ་མ་ཐག་པ་ཡིན་ནོ། །དེ་ཡང་ཡིན་རྒྱུ་ཉིད་ཀྱི་རྐྱེན་ཡང་ཡིན་པས་དེ་མ་ཐག་པའི་རྐྱེན་དེས་བསྐྱེད་དོ། །འདིས་ནི་རྒྱུད་ཅིག་ཏུ་གཏོགས་པ་ཁོ་ནའི་དབང་པོའི་ཤེས་པ་དང་། ཡིད་ཀྱི་རྣམ་པར་ཤེས་པ་གཉིས་སྐྱེད་པར་བྱེད་པ་དང་། བསྐྱེད་པར་བྱ་བའི་དངོས་པོར་གྱུར་པས་ན་ཡིད་ཀྱི་རྣམ་པར་ཤེས་པ་ཡིད་མངོན་དུ་བཞག་པ་ཡིན་ནོ། །དེས་རྣལ་འབྱོར་པའི་ཤེས་པ་རྒྱུད་གཞན་གྱི་རྗེས་སུ་འབྲངས་པ་ཡང་བསལ་ལོ། །གང་གི་ཚེ་དབང་པོའི་རྣམ་པར་ཤེས་པའི་ཡུལ་ལས་ཡིད་ཀྱི་རྣམ་པར་ཤེས་པ་ཡུལ་གཞན་མ་ཡིན་པ་དེའི་ཚེ་གཟུང་ཟིན་པ་འཛིན་པས་ཚད་མར་མི་རུང་བའི་སྐྱོན་ཡོད་དོ་ཞེས་བྱ་བ་བསལ་ལོ། །དབང་པོའི་རྣམ་པར་ཤེས་པའི་ཡུལ་གྱི་ཉེ་བར་ལེན་པ་ལས་བྱུང་བའི་སྐད་ཅིག་མ་འཛིན་པ་དེའི་ཚེ་དབང་པོའི་ཤེས་པས་གཟུང་བ་མ་ཡིན་པའི་ཡུལ་གཞན་འཛིན་པའི་ཕྱིར། ལོང་བ་དང་འོན་པ་ལ་སོགས་པ་མེད་པའི་སྐྱོན་དུ་ཐལ་བར་འགྱུར་བ་ཡང་བསལ་ལོ། །དབང་པོའི་རྣམ་པར་ཤེས་པའི་ཡུལ་གྱི་ཉེ་བར་ལེན་པ་ལས་བྱུང་བའི་སྐད་ཅིག་མ་འཛིན་པ་ཞེས་པ་ཡང་། དབང་པོའི་རྣམ་པར་ཤེས་པའི་ཡུལ་གྱི་རྒྱུད་དུ་གཏོགས་པའི་སྐད་ཅིག་ལས་སྐད་ཅིག་ཕྱི་མ་གཟུང་བ་ཡིན་ནོ། །ཡིད་ཀྱི་རྣམ་པར་ཤེས་པ་དེ་ཡང་མིག་གི་བྱེད་པ་འདས་པའི་ཚེ་མངོན་སུམ་དུ་འདོད་ལ། མིག་གི་བྱེད་པ་དང་ལྡན་པའི་ཚེ་ནི་གཟུགས་ཤེས་པ་གང་ཡིན་པ་དེ་ཐམས་ཅད་མིག་ལ་བརྟེན་པ་ཁོ་ན་ཡིན་ཏེ། དེ་ལྟ་མ་ཡིན་ན་ནི་རྣམ་པར་ཤེས་པ་གང་ཡང་མིག་ལ་བརྟེན་པར་མི་འགྱུར་རོ། །ཕྱོགས་སྔ་མ་མུ་སྟེགས་རྣ་བ་མ་ཕུག་པས་ཡིད་མངོན་དེས་དབང་ཤེས་ཀྱིས་གཟུང་ཟིན་ཞིག་འཛིན་ནམ་དེས་མ་གཟུང་བ་འཛིན། སྔར་མྱོང་བ་ནི་འཛིན་པ་ན། །ཡིད་ནི་ཚད་མ་ཉིད་མ་ཡིན། །ཏེ་དྲན་པ་དང་འདོད་པ་ལ་སོགས་པ་བཞིན་ནོ་ཞེ་ན། མ་མཐོང་འཛིན་ན་ལོང་བ་ལ། །ནས། དེ་ལ་བལྟོས་པ་འགལ་ཕྱིར་རོ། །ཞེས་པའི་བར་གྱིས་དེ་བཀག་ནས། ཡིད་མངོན་དེའི་ངོ་བོ་བཞག་པ་ནི། དེའི་ཕྱིར་དབང་པོའི་རྣམ་པར་ཤེས། །དེ་མ་ཐག་རྐྱེན་ལས་བྱུང་ཅན། །ཡིད་ནི་ཡུལ་གཞན་ཉིད་འཛིན་བྱེད། །དེ་ཕྱིར་ལོང་བས་མཐོང་བ་མིན། །དབང་ཤེས་ཀྱི་གཟུང་བའི་ཡུལ་གྱི་བར་མ་ཆད་པའི་དམིགས་པ་དང་། དབང་ཤེས་ལྷན་ཅིག་བྱེད་པའི་མཚུངས་པ་དེ་མ་ཐག་རྐྱེན་དུ་བྱས་པས་བསྐྱེད་པའི་ཤེས་པ་ཡིད་མངོན་ནོ། །རང་དོན་རྗེས་འགྲོའི་དོན་བལྟོས་ཅན། །ནས། བཞག་དང་གཟུང་ཞེས་བརྗོད་པ་ཡིན། །ཞེས་པའི་བར་གྱིས་མཚན་ཉིད་དེ་ལ་བྱེ་བྲག་ཏུ་སྨྲ་བ་སོགས་འགལ་བ་བརྗོད་པ་སྤངས་སོ། །རབ་དབྱེ་གསུམ་པ་རང་རིག་མངོན་སུམ་ནི། མདོར། རང་རིག་རྟོག་པ་མེད་པ་ཡིན། །ཞེས་དང་། རྟོག་པའང་རང་རིག་ཉིད་དུ་འདོད། །དོན་ལ་མ་ཡིན་དེ་རྟོག་ཕྱིར། །ཞེས་དང་། རིགས་ཐིག་ཏུ། སེམས་དང་སེམས་ལས་བྱུང་བ་ཐམས་ཅད་ཀྱི་རང་རིག་པ་དང་། ཞེས་གསུངས་ལ། སེམས་སེམས་བྱུང་ཐམས་ཅད་སྨོས་པས་བདེ་སོགས་འབའ་ཞིག་རང་རིག་གོ་སྙམ་པ་སེལ་ལོ། །སེམས་ནི་དོན་ཙམ་འཛིན་པའོ། །སེམས་ལས་བྱུང་བ་ནི་བདེ་བ་སོགས་ཀྱི་ཁྱད་པར་འཛིན་པའོ། །བདེ་སོགས་བདག་ཉིད་གཞན་མི་བརྟེན། །བརྡ་བྱེད་པར་ནི་ནུས་མ་ཡིན། །བདེ་སོགས་སྨོས་པས་ནི་ཉམས་སུ་མྱོང་བ་གསལ་བར་བསྟན་པའི་དོན་ནོ། །བདག་ཉིད་གཞན་མི་བརྟེན། །ཞེས་པ་སེམས་དང་སེམས་ལས་བྱུང་བ་ཐམས་ཅད་ནི་འོད་གསལ་བའི་རང་བཞིན་ཅན་ཡིན་པས་རང་གི་ངོ་བོ་རྟོགས་པར་བྱེད་པ་ཤེས་པ་གཞན་ལ་མི་བལྟོས་ཏེ། དཔེར་ན་མར་མེ་ནི་རབ་ཏུ་གསལ་བའི་རང་བཞིན་ཅན་ཡིན་པས་རང་གི་ངོ་བོར་རབ་ཏུ་གསལ་བར་བྱེད་པ་ལ་མར་མེ་གཞན་མི་དགོས་པ་བཞིན་ནོ། །བརྡ་བྱེད་པར་མི་ནུས་པ་ནི། རང་རིག་རྟོག་པ་མེད་པར་གྲུབ་པ་ཉིད་ཀྱི་དོན་དུ་བཀོད་པ་ཡིན་ནོ། །དེ་བས་ན་ཤེས་པའི་རང་མྱོང་རང་རིག་མངོན་སུམ་མོ། །དེ་ཕྱིར་དེ་དག་རང་རིག་ནི། །བརྗོད་དང་རྗེས་འབྲེལ་ཅན་མ་ཡིན། །དེ་དག་གི་རང་རིག་པ་བརྗོད་པ་དང་རྗེས་སུ་འབྲེལ་བ་ཅན་མ་ཡིན་ཏེ། བརྡ་བྱེད་པར་མི་ནུས་པའི་ཕྱིར་རོ། །འདི་ཡང་འཐད་ལྡན་དུ། བརྗོད་པ་མེད་པར་བསྒྲུབ་པར་བྱ་བ་ལ་བརྡ་མི་ནུས་པ་གཏན་ཚིགས་སུ་འགོད་པ་ཡིན་ལ། ཞེས་པའོ། །གཞན་ཡང་རིག་བྱེད་མིན་དེ་དག །སོགས་ཚིགས་སུ་བཅད་པ་གཅིག་གིས། བྱེ་བྲག་པ་དང་རིག་པ་ཅན་པ་བདེ་སོགས་བདག་གི་ཡོན་ཏན་དུ་འདོད་ནས་སྨྲའོ། །དེ་དང་དེ་མིན་རང་བཞིན་ཅན། །ཐ་དད་རྣམ་གཞག་གྲུབ་པ་ཡིན། །ཞེས་པའི་བར་གྱིས་དེ་བཀག་གོ །རབ་དབྱེ་བཞི་པ་རྣལ་འབྱོར་མངོན་སུམ་ནི། མདོར། རྣལ་འབྱོར་རྣམས་ཀྱི་བླ་མས་བསྟན། །མ་འདྲེས་པ་ཡི་དོན་ཙམ་མཐོང་། །དང་། རིགས་ཐིག་ཏུ། ཡང་དག་པའི་དོན་བསྒོམས་པའི་རབ་ཀྱི་མཐའ་ལས་བྱུང་བ་རྣལ་འབྱོར་པའི་ཤེས་པའོ། །ཞེས་གསུངས་པ། ཆོས་མཆོག་གིས། རྣལ་འབྱོར་མངོན་སུམ་བཤད་པའི་ཕྱིར་སྨྲས་པ་ཡང་དག་པའི་དོན་ནི་བདེན་པའོ། །བདེན་པ་ཡང་ཚད་མས་མཐོང་བ་སྟེ། ཅི་ལྟར་འཕགས་པའི་བདེན་པ་བཞི་ལྟ་བུའོ། །ཡང་དག་པའི་དོན་བསྒོམ་པ་ནི་ཡང་ནས་ཡང་དུ་སེམས་བླན་པའོ། །སྒོམ་པའི་རབ་ནི་བསྒོམ་པར་བྱ་བའི་དོན་སྣང་བའི་ཤེས་པ་གསལ་བར་སྣང་བ་རྩོམ་པའོ། །རབ་ཀྱི་མཐའ་ནི་གང་གི་ཚེ་གསལ་བར་སྣང་བ་ཅུང་ཟད་མ་རྫོགས་པ་ཡིན་ཏེ། འདི་ལྟར་ཇི་སྲིད་དུ་གསལ་བར་སྣང་བ་ཉིད་མ་རྫོགས་པ་དེ་སྲིད་དུ་ནི་དེ་ཁྱད་པར་དུ་འགྲོ་བ་ཡིན་ལ་གང་གི་ཚེ་རྫོགས་པ་དེའི་ཚེ་ནི་ཁྱད་པར་དུ་འགྲོ་བ་མེད་དོ། །དེ་བས་ན་རྫོགས་པའི་གནས་སྐབས་ལས། སྔ་རོལ་གྱི་གནས་སྐབས་ཀྱིས་གསལ་བར་སྣང་བ་ནི། རབ་ཀྱི་མཐའ་ཞེས་བྱའོ། །མཐའ་དེ་ལས་བྱུང་བ་གང་ཡིན་པ་ཉེ་བར་གནས་པ་བཞིན་དུ་བསྒོམ་པར་བྱ་བའི་དོན་གྱིས་རྣམ་པར་ཤིན་ཏུ་གསལ་བར་འཛིན་པའི་ཤེས་པ་ནི་རྣལ་འབྱོར་བ་རྣམས་ཀྱི་མངོན་སུམ་ཡིན་ནོ། །དེ་བས་ན་འདིར་གསལ་བའི་རྣམ་པ་རྩོམ་པའི་གནས་སྐབས་ནི་བསྒོམ་པའི་རབ་ཡིན་ལ། གང་གི་ཚེ་ལྷང་ཚེར་གྱིས་བར་དུ་ཆོད་པ་བཞིན་དུ་བསྒོམ་པར་བྱ་བའི་དོན་མཐོང་བ་དེ་ནི་རབ་ཀྱི་མཐའི་གནས་སྐབས་ཡིན་ཞིང་། ལག་མཐིལ་དུ་ཤེལ་སྒོང་བཞག་པ་བཞིན་དུ་བསྒོམ་པའི་དོན་མཐོང་བ་གང་ཡིན་པ་དེ་ནི་རྣལ་འབྱོར་པའི་མངོན་སུམ་ཡིན་ནོ། །དེ་ནི་གསལ་བར་སྣང་བ་ཡིན་ལ་གསལ་བར་སྣང་བ་ཉིད་ཀྱི་ཕྱིར་ཡང་རྣམ་པར་མི་རྟོག་པ་ཡིན་ནོ། །ཞེས་སོ། །རྣལ་འབྱོར་པ་རྣམས་ཀྱི་བླ་མས་བསྟན་པའི་མ་འདྲེས་པའི་དོན་ཡང་དེའོ། །རྣལ་འབྱོར་པ་དེ་ཡང་སངས་རྒྱས་ལས་གཞན་པའི་འཕགས་པ་གསུམ་ལ་བྱ་དགོས་ཏེ། སྨྲ་བ་ཆེན་པོ་དུལ་བའི་ལྷས། །དེའི་རབ་ནི་ཡང་དག་པའི་དོན་བསྒོམ་པའི་རབ་སྟེ། དྲན་པ་ཉེ་བར་བཞག་པ་དང་། དྲོ་བར་གྱུར་པ་དང་། རྩེ་མོ་དང་བཟོད་པའི་གནས་སྐབས་སོ། །དེའི་མཐའ་ནི་ཡང་དག་པའི་དོན་བསྒོམ་པའི་རབ་ཀྱི་མཐའ་སྟེ། མཐའ་ནི་ཆོས་ཀྱི་མཆོག་རྣམས་སོ། །དེ་ལས་སྐྱེས་པ་ནི་ཡང་དག་པའི་དོན་བསྒོམ་པའི་རབ་ཀྱི་མཐའ་ལས་བྱུང་བ་དེ་གང་ལ་ཡོད་པ་དེ་དག་གི་རྣལ་འབྱོར་པ་རྣམས་སོ། །ཞེས་པས་སོ། །སངས་རྒྱས་ནི་འདིར་མི་འདུ་སྟེ། འདི་ཀུན་ཏུ་ཐ་སྙད་པའི་ཚད་མའི་རབ་དབྱེ་འཆད་པའི་སྐབས་ཡིན་པས་སོ། །རྣལ་འབྱོར་གྱི་རྒྱུས་བསམ་གཏན་པ་རྣམས་ཀྱི་ཤེས་པ་འདས་པ་དང་། མ་འོངས་པ་དང་། ཐག་རིང་བ་དང་། བར་དུ་ཆོད་པ་དང་། ཕྲ་མོའི་མངོན་སུམ་མ་ནོར་པར་སེམས་པ་ཐམས་ཅད་ཀྱང་འདིར་བསྡུའོ། །རྣམ་པར་རྟོག་པ་ནི་བརྡའི་ཚེ་མཐོང་བར་ཉིད་དུ་དངོས་པོ་འཛིན་པས་སྒྲ་དང་འདིར་རུང་བ་འཛིན་པ་ཡིན་ལ། བརྡའི་ཚེ་ན་མཐོང་བ་ཡང་བརྡའི་ཚེ་ན་སྐྱེས་པའི་ཤེས་པའི་ཡུལ་ཉིད་ཡིན་ནོ། །ཇི་ལྟར། སྔོན་གྱི་ཤེས་པ་ཞིག་པ་ནི། །ད་ལྟར་མེད་དེ་དེ་བཞིན་དུ། །སྔོན་གྱི་ཤེས་པ་ཞིག་པའི་ཡུལ་གྱི་དངོས་པོ་ཡང་ད་ལྟར་ཡོད་པ་མ་ཡིན་ནོ། །དེས་ན་མེད་པའི་རང་བཞིན་ཅན་གྱི་དངོས་པོ་འཛིན་པས་ཉེ་བ་མ་ཡིན་པས་འཛིན་པའི་ཕྱིར་རྣམ་པར་རྟོག་པ་ནི་མི་གསལ་བར་སྣང་བ་ཡིན་ནོ། །དེའི་ཕྱིར། རྣལ་འབྱོར་ཤེས་པ་སྔར་བཤད་པ། །དེ་དག་གིས་དེ་སྒོམ་བྱུང་ཡིན། །རྟོག་པའི་དྲ་བ་རྣམ་གསལ་བས། །གསལ་བ་ཉིད་དུ་སྣང་བ་ཡིན། །ཞེས་གསུངས་སོ། །སྔར་ཞེས་པ་ལེའུ་གཉིས་པ་དང་དབང་མངོན་གྱི་སྐབས་སུ་སྟོང་པ་ཉིད་བཤད་པར་སྙེག་གོ །སྒོམ་པ་གོམས་པ་ལས་གསལ་སྣང་འབྱུང་བ་དཔེས་བསྟན་པ་བཞེད་ནས། འདོད་འཇིགས་མྱ་ངན་གྱིས་བརླམས་དང་། །ཞེས་པའི་ཚིགས་སུ་བཅད་པའོ། །རྣམ་པར་རྟོག་པ་རྗེས་འབྲེལ་ནི། །དོན་གསལ་སྣང་བ་ཅན་མ་ཡིན། །ཞེས་ཚིགས་བཅད་གཅིག་གིས་རྟོག་པ་ལ་ཡུལ་གསལ་བར་སྣང་བ་མེད་པར་བཤད་པ་དང་། མི་གཙང་ཟད་པར་ས་ལ་སོགས། །ཞེས་ཚིགས་བཅད་གཉིས་ཀྱིས་མི་བདེན་པའི་དོན་བསྒོམ་པས་རྟོག་མེད་གསལ་སྣང་འབྱུང་བ་སངས་རྒྱས་པའི་གྲུབ་མཐའ་ལ་ཡོད་པར་བསྟན། དེ་ལ་སྔར་བཤད་དངོས་པོ་བཞིན། །སོགས་རྐང་པ་གཅིག་ལྷག་པའི་ཚིགས་བཅད་གཉིས་ཀྱིས་མཇུག་བསྡུ་བསྟན་ནོ། །ཞར་ལ་མངོན་སུམ་ལྟར་སྣང་བཤད་པར་བྱ་སྟེ། མདོར། འཁྲུལ་དང་ཀུན་རྫོབ་ཤེས་པ་དང་། །རྗེས་དཔག་རྗེས་སུ་དཔག་ལས་བྱུང་། །དྲན་དང་མངོན་འདོད་ཅེས་བྱ་བ། །མངོན་སུམ་ལྟར་སྣང་རབ་རིབ་བཅས། །ཞེས་པའི་འཁྲུལ་པ་ནི་སྨིག་རྒྱུ་ལ་ཆུར་འཛིན་པ་སོགས། ཀུན་རྫོབ་ཤེས་པ་ནི་སྤྱི་འཛིན་སོགས། རྗེས་དཔག་ནི་ཚུལ་གསུམ་པའི་རྟགས་འཛིན་སེམས། རྗེས་དཔག་ལས་བྱུང་བ་ནི་རྟགས་ཅན་རྗེས་དཔག་ཉིད་དོ། །སྔར་མཐོང་བ་དྲན་པ་དང་། ཟས་སོགས་མངོན་པར་འདོད་པའི་འདོད་པ་སྟེ་རྟོག་པ་དྲུག རྟོག་མེད་འཁྲུལ་ཤེས་དང་བདུན། དེ་རྣམས། མངོན་སུམ་ལྟར་སྣང་རྣམ་པ་བཞིན། །རྟོག་པའི་ཤེས་པ་རྣམ་གསུམ་དང་། །རྟེན་བསླད་པ་ལས་བྱུང་བ་ཅན། །རྟོག་པ་མེད་པ་གཅིག་ཡིན་ནོ། །རྟོག་པའི་ཤེས་པ་བརྡ་རྟེན་ཅན། །དང་། དོན་གཞན་ལ་སྒྲོ་འདོགས་པ་དང་། ལྐོག་ཏུ་གྱུར་པའི་དོན་ཅན་རྣམ་པ་གསུམ་དང་། རྟོག་པ་མེད་པའི་འཁྲུལ་ཤེས་བསླད་པ་མངོན་སུམ་ལྟར་སྣང་གཅིག་སྟེ་བཞིར་འདུ་སྟེ། ཀུན་རྫོབ་པའི་ཤེས་པ་བརྡ་རྟེན་ཅན། འཁྲུལ་ཤེས་དང་རྗེས་དཔག་ཅེས་བསྟན་པ་སྒྲོ་འདོགས། ལྷག་མ་ལྐོག་ཏུ་གྱུར་པའི་དོན་ཅན་ནོ། །དབང་སྐྱེས་མིན་པར་གྲུབ་དོན་དུ། །ནས། མངོན་སུམ་ལས་ནི་ཡོངས་ཉམས་འགྱུར། །ཞེས་པའི་བར་གྱིས་རྟོག་པ་མངོན་སུམ་ལྟར་སྣང་བཤད། འདིར་ནི་བཞི་པ་དམིགས་བསལ་ཏེ། །ནས། མངོན་སུམ་ལྟར་སྣང་གཉིས་སུ་བཤད། །ཅེས་པའི་བར་གྱིས་རྟོག་མེད་མངོན་སུམ་ལྟར་སྣང་བཤད་དོ། །གཉིས་པ་འབྲས་བུ་ཚད་འབྲས་ཀྱི་རྣམ་པར་གཞག་པ་ལ། ཚད་འབྲས་རྣམ་པར་གཞག་འཇོག་ཏུ་བསྒྲུབས་ནས་དོན་རིག་གི་ཚད་འབྲས་བསྟན། རང་རིག་གི་ཚད་འབྲས་རྣམ་པར་གཞག་ནས་གཉི་གའི་སྒྲུབ་བྱེད་རྒྱས་པར་བསྟན་པ་གཉིས་ལས། དང་པོ་ནི། མདོར། བྱ་དང་བཅས་པར་རྟོག་པའི་ཕྱིར། །ཚད་མའི་འབྲས་བུ་ཉིད་དུ་འདོད། །ཚད་མ་ཉིད་དུ་འདོགས་པ་སྟེ། །བྱ་བ་མེད་པའང་མ་ཡིན་ནོ། །དེ་ནི་རྣམ་ངེས་སུ། ཚད་མ་འདིའི་འབྲས་བུ་གང་ཡིན། གཞལ་བྱ་རྟོགས་པའོ། །དེ་ནི་ཤེས་པ་ཡིན་ལ། དེ་ཡང་ཤེས་པ་ཡིན་པའི་ཕྱིར་རོ། །དེ་ནི་ཚད་མ་གང་ཞིག་ཡིན། །གང་ལ་བར་ཆད་མེད་པར་གཞལ་བྱ་རྟོགས་པ་འདིའི་དེ་ཉིད་གྲུབ་པའོ། །ཞེས་དང་། བྱ་བ་སྒྲུབ་པར་བྱེད་ཅེས་ཏེ། ལས་ཀུན་གྱིས་ནི་སྒྲུབ་བྱེད་དག །ཐམས་ཅད་མ་ཡིན། གང་གི་ཕྱིར་བསྒྲུབ་པར་བྱ་བ་སྒྲུབ་པར་བྱེད་པ་ཡིན་པའི་ཕྱིར། ཐམས་ཅད་བྱ་བ་ཐམས་ཅད་ཀྱིས་སྒྲུབ་པར་བྱེད་པ་ནི་མ་ཡིན་ནོ། །འོ་ན་གང་ཡིན་ཞེ་ན། གང་ལས་འབྲས། །གང་ཡིན་དེ་ནི་དེ་སྒྲུབ་བྱེད། །གང་ལས་གང་འགྲུབ་པ་དེའོ། །དེ་ལ་ཉམས་མྱོང་ཙམ་དུ་ནི། །འདྲ་བའི་བདག་ཅན་ཤེས་པ་ནི། །གང་གི་ལས་ནི་སོ་སོ་ལ། རྣམ་འབྱེད་དེ་དག་འགྱུར་བ་ཡིན། །ཉམས་སུ་མྱོང་བ་ཙམ་དུ་ལས་ཐམས་ཅད་ལ་འདྲ་བའི་བདག་ཉིད་ཀྱི་ཤེས་པ་ནི། གང་གི་འདི་ནི་འདིའོ་ཞེས་ལས་སོ་སོ་ལ་རྣམ་པར་འབྱེད་པ་དེའི་བདག་ཉིད་དུ་འགྱུར་བ་ཡིན་ནོ། །བདག་ཉིད་འགྱུར་མིན་རྒྱུ་དག་ལ། །ཐ་དད་ཡོད་ཀྱང་ཐ་དད་ཀྱི། །ལས་ལ་ཐ་དད་མེད་པ་འདི། །ཐ་དད་པར་ནི་ངེས་བྱེད་མིན། །དེའི་བདག་ཉིད་མ་ཡིན་པ་དབང་པོ་དང་དོན་དང་ཕྲད་པ་ལ་སོགས་པ་རྒྱུ་རྣམས་ཀྱི་བྱེ་བྲག་ཡོད་དུ་ཟིན་ཀྱང་། ལས་ཀྱི་བྱེ་བྲག་ལ་བདག་ཉིད་ཐ་དད་པ་མེད་པའི་ཤེས་པ་བྱེ་བྲག་ཏུ་ངེས་པའི་བྱེད་པ་པོ་མ་ཡིན་ཏེ། བྱེད་པ་དེ་ཉིད་ནི་བསྒྲུབ་པར་བྱ་བའི་རྒྱུ་མཚན་ཅན་ཡིན་པའི་ཕྱིར་རོ། །དེ་ཁྱད་པར་མེད་ན་དེའི་ཁྱད་པར་ཡང་མི་འགྲུབ་བོ། །ཡོད་ཀྱང་དེའི་ཡན་ལག་མིན་པ་དེའི་བྱེད་པ་མ་ཡིན་པའི་ཕྱིར་རོ། །དེ་ཕྱིར་འདི་དག་ཐ་དད་པ། །གང་ལས་འདི་འདིའི་རྟོགས་པ་ཞེས། །བྱེད་པ་ཡི་ནི་ལས་ངེས་ཏེ། །དེ་ཡི་སྒྲུབ་བྱེད་ཅན་དུ་འགྱུར། །དེའི་ཕྱིར་འདིའི་བདག་ཉིད་ཀྱི་བྱེ་བྲག་གང་ལས་འདིའི་རྟོགས་པ་འདི་ཡིན་ནོ་ཞེས་འདིའི་ལས་ལ་ངེས་པ་འདིར་འགྱུར་བ་དེ་ནི་སྒྲུབ་པར་བྱེད་པའོ། །ཤེས་པ་དོན་དང་འབྲེལ་བ་འདི་དོན་དང་འདྲ་བ་ལས་གཞན་ལ་ནི་སྲིད་པ་མ་ཡིན་ནོ། །རྣམ་འགས་ཤེས་པའི་རང་བཞིན་གྱིས། །ཐ་དད་པར་ནི་བྱེད་ན་ཡང་། །འདི་ནི་དོན་དང་འབྲེལ་བྱེད་པ། དོན་གྱི་ངོ་བོ་ལས་གཞན་མིན། །དབང་པོ་ལ་སོགས་པ་གསལ་པ་དང་མི་གསལ་བ་ཉིད་ལ་སོགས་པའི་རང་གི་བྱེ་བྲག་གི་བྱེ་བྲག་ཏུ་བྱེད་པ་པོ་ཡང་དེ་ལྟར་དོན་དང་འབྲེལ་བར་བྱེད་པ་ནི་མ་ཡིན་ཏེ་དེ་ལ་ཉེ་བའི་རྒྱུ་མེད་པའི་ཕྱིར་རོ། །དོན་གྱིས་བྱས་པའི་ཉམས་སུ་མྱོང་བའི་བྱེ་བྲག་གང་ལས་རྟོགས་པ་འདིར་འགྱུར་བ་ཡིན་ནོ། །དེ་ཕྱིར་གཞལ་བྱ་རྟོགས་པ་ཡི། །སྒྲུབ་བྱེད་གཞལ་བྱའི་རང་བཞིན་ཉིད། །ཅེས་ལེགས་པར་གྲུབ་བོ། །འདིས་དབང་པོ་དང་ཕྲད་པ་དང་། དོན་ལ་ལྟ་བ་དང་། ཁྱད་པར་གྱི་ཞེས་པ་ཡང་སྤངས་པ་ཡིན་ནོ། །དེ་ཉིད་རིགས་ཐིགས་སུ། མངོན་སུམ་གྱི་ཤེས་པ་དེ་ཡི་ཚད་མའི་འབྲས་བུ་སྟེ། དོན་རྟོགས་པའི་ངོ་བོ་ཁོ་ན་ཡིན་པའི་ཕྱིར་རོ། །དོན་དང་འདྲ་བ་ཉིད་དེའི་ཚད་མ་སྟེ་དེའི་དབང་གིས་དེ་རྟོགས་པར་གྲུབ་པའི་ཕྱིར་རོ། །ཞེས་སོ། །གཟུང་བར་བྱ་བ་འཛིན་པ་ན། །ཤེས་པ་འདིའི་གདོན་མི་ཟ་བར་གང་བྱས་ན་དོན་དང་ཕྲད་པར་འགྱུར་བ་ཕྲད་པར་བྱེད་པའི་ལས་སུ་བྱ་བ་འགའ་ཞིག་ཡོད་པ་ཡིན་ལ་དེ་ལས་གང་རྗེས་སུ་བསྒྲུབས་པས་ཤེས་པ་དེ་དང་ཕྲད་པར་བྱེད་པའི་སྒྲུབ་བྱེད་དེ་ཚད་མ་ཡིན་ལ། ཕྲད་པར་གྱུར་པ་ནི་འབྲས་བུའོ། །ཚད་མ་དེ་ཡང་དོན་དང་འདྲ་བ་ཡིན་ཏེ། རྣམ་པར་ཤེས་པ་ཡུལ་གང་ལས་སྐྱེས་པ་ནི་ཡུལ་དེ་དང་འདྲ་བ་ཡིན་ནོ། །ཇི་ལྟར་སྔོན་པོའི་དོན་ལས་སྐྱེས་པ་སྔོན་པོ་དང་འདྲ་བ་བཞིན་ནོ། །འདྲ་བ་དེ་ཡང་རྣམ་པ་དང་སྣང་བ་ཞེས་བྱའོ། །འདྲ་བའི་མཐུས་དོན་རྟོགས་པ་ཁོང་དུ་ཆུད་པ་དེ་འགྲུབ་སྟེ། འགྲུབ་པའི་གཏན་ཚིགས་དེའི་ཕྱིར་ཏེ་མངོན་སུམ་གྱི་ཤེས་པ་དོན་རྟོགས་པའི་ངོ་བོ་ནི་འདྲ་བའི་དབང་གིས་འགྲུབ་པ་ཡིན་ཏེ། རྟོགས་པ་ཡིན་ནོ་ཞེས་བྱ་བའི་ཐ་ཚིག་གོ །གང་གི་ཕྱིར་རྣམ་པར་ཤེས་པ་སྔོན་པོ་སྣང་བ་དེའི་ཕྱིར་སྔོན་པོར་རྟོགས་པར་ངེས་པ་ཡིན་ནོ། །མིག་ལ་སོགས་པ་གང་དག་ལས་ཤེས་པ་སྐྱེས་པ་དེའི་དབང་གིས་ནི་ཤེས་པ་དེ་སྔོན་པོ་མྱོང་བ་ཡིན་པར་བཞག་པར་ནུས་ཀྱི་དེས་སྔོན་པོ་རིག་པར་རྣམ་པར་གཞག་གོ །གང་གིས་དངོས་པོ་གཅིག་ལ་འགལ་བར་འགྱུར་བ། འདིར་བསྐྱེད་བྱ་སྐྱེད་བྱེད་ཀྱི་རྒྱུ་མཚན་གྱིས་ནི་བསྒྲུབ་པར་བྱ་བ་དང་སྒྲུབ་པར་བྱེད་པའི་དངོས་པོ་ནི་མ་ཡིན་གྱི། འོན་ཀྱང་རྣམ་པར་གཞག་པ་དང་རྣམ་པར་འཇོག་པ་ཡིན་པས་སོ། །དེ་བས་ན་དངོས་པོ་གཅིག་ལ་ངོ་བོ་འགས་ནི་ཚད་མ་ཡིན་ལ། ངོ་བོ་འགས་ནི་ཚད་མའི་འབྲས་བུ་ཡིན་པ་འགལ་བ་མེད་དོ། །འདི་ལྟར་ཤེས་པ་དེའི་འདྲ་བ་ནི་རྣམ་པར་འཇོག་པའི་རྒྱུ་ཡིན་ལ། རྣམ་པར་གཞག་པར་བྱ་བ་ནི་དངོས་པོ་མྱོང་བའི་ངོ་བོ་ཡིན་ནོ། །རྣམ་པར་གཞག་པ་དང་རྣམ་པར་འཇོག་པའི་ངོ་བོ་ཡང་ཤེས་པ་གཅིག་ལ་ཇི་ལྟར་རུང་ཞེ་ན། བཤད་པ། གང་གི་ཕྱིར་རྣམ་པར་ཤེས་པ་དེ་ནི་འདྲ་བ་ཉམས་སུ་མྱོང་ནས་ངེས་པར་བྱེད་པའི་ཤེས་པས་དངོས་པོ་འཛིན་པར་འཇོག་སྟེ། དེ་བས་ན་མྱོང་བར་གྱུར་པའི་འདྲ་བ་ནི་རྣམ་པར་འཇོག་པའི་རྒྱུ་ཡིན་ལ། ངེས་པར་བྱེད་པའི་ཤེས་པས་ཤེས་པ་དེ་ལ་སྔོན་པོ་མྱོང་བར་རྣམ་པར་གཞག་པར་བྱ་བ་ཡིན་ནོ། །དེ་བས་ན་ཤེས་པའི་མི་འདྲ་བ་ལས་བཟློག་ནས་འདྲ་བ་ནི་རྣམ་པར་འཇོག་པའི་རྒྱུའོ། །སྔོན་པོ་མ་རྟོགས་པ་ལས་བཟློག་སྟེ་རྟོགས་པའི་ངོ་བོ་ཉིད་ནི་རྣམ་པར་བཞག་པ་ཡིན་ནོ། །རྣམ་པར་འཇོག་པར་བྱེད་པ་ནི་མངོན་སུམ་གྱི་སྟོབས་ལས་བྱུང་བའི་རྣམ་པར་རྟོག་པའི་ཤེས་པ་ཡིན་གྱི། མངོན་སུམ་ཉིད་ནི་རྣམ་པར་མི་རྟོག་པ་ཡིན་པའི་ཕྱིར་བདག་ཉིད་སྔོན་པོར་རྟོགས་པར་རྣམ་པར་འཇོག་མི་ནུས་སོ། །ངེས་པར་བྱེད་པའི་ཤེས་པས་རྣམ་པར་མ་གཞག་པ་ནི། སྔོན་པོ་རྟོགས་པའི་ངོ་བོའི་ཤེས་པ་ཡོད་དུ་ཟིན་ཀྱང་མེད་པ་དང་འདྲ་བ་ཁོ་ན་ཡིན་ནོ། །དེ་བས་ངེས་པར་བྱེད་པའི་ཤེས་པས་རྣམ་པར་ཤེས་པ་སྔོན་པོ་རྟོགས་པའི་ངོ་བོར་རྣམ་པར་གཞག་ན་ནི་སྔོན་པོ་རྟོགས་པའི་བདག་ཉིད་དུ་ཡོད་པར་འགྱུར་རོ། །དེ་བས་ན་ཞེན་པར་བྱེད་པ་ཉིད་མངོན་སུམ་གྱི་ཚད་མ་ཡིན་ནོ། །ཞེན་པར་མ་བྱས་པར་རྣམ་པར་ཤེས་པ་སྔོན་པོ་རྟོགས་པའི་བདག་ཉིད་དུ་རྣམ་པར་གཞག་པ་མེད་དོ། །ཡང་དེ་ལྟ་ཡིན་དུ་ཆུག་ན་ཡང་ཚད་མའི་འབྲས་བུ་དོན་རྟོགས་པའི་ངོ་བོ་ཉིད་མ་གྲུབ་པ་ཡིན་ཏེ། སྒྲུབ་པར་བྱེད་པ་དམ་པ་མེད་པའི་ཕྱིར་ཤེས་པ་ཚད་མ་ཉིད་དུ་མི་འགྱུར་ཞེ་ན། ཞེན་པ་བསྐྱེད་པས་འདྲ་བའི་དབང་གིས་ཤེས་པ་སྔོན་པོ་རྟོགས་པའི་ངོ་བོར་རྣམ་པར་གཞག་ན་ནི་འདྲ་བ་རྣམ་པར་འཇོག་པའི་རྒྱུ་ཡིན་པའི་ཕྱིར་ཚད་མར་གྲུབ་པ་ཡིན་ནོ། །ཡང་དེ་ལྟ་ན་མངོན་སུམ་ཞེན་པ་དང་བཅས་པ་ཉིད་ཚད་མ་ཡིན་གྱི་ཉི་ཚེ་བ་ནི་མ་ཡིན་ནོ་ཞེ་ན། དེ་མ་ཡིན་ཏེ་གང་གི་ཕྱིར་མངོན་སུམ་གྱི་སྟོབས་ཀྱིས་བྱུང་བའི་ཞེན་པས་ནི་དོན་མཐོང་བར་ཞེན་པར་བྱེད་ཀྱི། རྟོགས་པར་བྱེད་པ་ཉིད་དུ་ནི་མ་ཡིན་ནོ། །མཐོང་བ་ཡང་དོན་མངོན་སུམ་དུ་བྱེད་པ་ཞེས་བྱ་བ་མངོན་སུམ་གྱི་བྱེད་པ་ཡིན་ནོ། །རྣམ་པར་རྟོག་པའི་བྱེད་པ་ནི་རྟོག་པ་ཡིན་ཏེ། འདི་ལྟར་དོན་ལྐོག་ཏུ་གྱུར་པ་ལ་རྣམ་པར་རྟོག་པ་ན་བདག་ནི་རྟོག་པར་བྱེད་ཀྱི་མཐོང་བས་ནི་མ་ཡིན་ནོ། དེ་བས་ན་རྟོག་པའི་བདག་ཉིད་རྣམ་པར་རྟོག་པའི་བྱེད་པ་ཡིན་པར་ནི་མྱོང་བ་ཉིད་ལས་ངེས་པ་ཡིན་ནོ། །དེས་ན་རང་གི་བྱེད་པ་བཏང་སྟེ་མངོན་སུམ་གྱི་བྱེད་པ་སྟོན་པར་བྱེད་པས་དོན་གང་ལ་མངོན་སུམ་སྔོན་དུ་སོང་བའི་ཞེན་པ་ཡོད་པ་དེ་མངོན་སུམ་ཁོ་ན་ཚད་མ་ཡིན་ནོ། །དེ་བས་ཕྱི་དོན་ཡོད་པར་འདོད་པས། དོན་ནི་གཞལ་བྱ། གཟུང་བའི་རྣམ་པ་ཚད་མ། དོན་རིག་པ་འབྲས་བུའོ་ཞེས་འཇོག་གོ །སྒྲུབ་བྱེད་གཞན་ཡིན་ན། དེ་ནི། །ནས། འཇིག་རྟེན་རྒྱུ་གཟུགས་འཛིན་ཞེས་བརྗོད། །ཀྱི་བར་ཚད་འབྲས་ཤེས་པ་གཅིག་ཡིན་པར་རྣམ་པར་གཞག་འཇོག་གིས་བསྒྲུབས་ནས། དེ་ཕྱིར་མཐོང་དང་དབང་འབྲེལ་དང་། །ནས། མེད་ན་དེ་ཡང་གཞན་མེད་ཕྱིར། །ཞེས་པའི་བར་གྱིས་ཚད་འབྲས་དོན་གཞན་ཡིན་པ་བཀག །གལ་ཏེ་བྱ་བྱེད་གཅིག་ཡིན་ན། །ནས། སྒྲོ་འདོགས་པས་ནི་འཇུག་ཕྱིར་རོ། །ཞེས་པའི་བར་གྱིས་བདག་ཉིད་གཅིག་ཡིན་པ་ལ་གནོད་པ་སྤངས་སོ། །གཉིས་པ་ཕྱི་དོན་བཀག་ནས་རང་རིག་གི་ཚད་འབྲས་བཞག་པ་དང་། གཟུང་འཛིན་འགོག་པ་འཕྲོས་པ་དང་བཅས་པ་གཉིས་ལས། དང་པོ་ནི། དོན་རིག་གང་ཡིན། ཕྱི་དོན་འདོད་པ་ཁྱོད་ཀྱི་ཚད་མའི་འབྲས་བུར་བཞག་པའི་དོན་རིག་པ་དེ་གང་ཡིན། སོ་སོར་རིག མངོན་སུམ་གང་ཡིན་འདི་ཉིད་དོ། །མངོན་སུམ་དུ་གྱུར་པའི་རིག་པ་འདི་ཉིད་དོ། །དེ་ནི་གང་གི་དོན་རིག་ཡིན་མྱོང་བ་ཡོད་པ་འདི་དོན་དེ་ཡོད་པ་གང་གིས་སྐྱེས་པ་དང་འདྲ་བ་དག་གིས་སོ། །འཁྲུལ་པ་ཡིན། ནས། མཚན་ཉིད་ལ་ནི་བརྩད་བྱ་མིན། །ཞེས་པའི་བར་གྱིས་ཡུལ་གྱི་མཚན་ཉིད་བཀག་པའི་ཕྱིར་འགའ་ཞིག་ཀྱང་ཉམས་སུ་མྱོང་བ་མ་ཡིན་པ་འདི་ཡང་འགའ་ཞིག་གི་མ་ཡིན་ཏེ། དེ་ལ་ཡང་གཟུང་བ་དང་འཛིན་པའི་མཚན་ཉིད་མེད་པའི་ཕྱིར་རོ། །དེའི་ཕྱིར་ཉམས་སུ་མྱོང་བ་ནི་བློའི་བདག་ཉིད་ཁོ་ན་ཡིན་ནོ། །དེ་ཡང་གཞན་འགའ་ཞིག་གིས་ནི་མ་ཡིན་ནོ། །ཁྱོད་ཀྱི་མངོན་སུམ་སོ་སོར་རིག་པར་བྱ་བ་ཉིད་ཀྱང་དེའི་བདག་ཉིད་ཁོ་ནའོ། །དེའི་བདག་ཉིད་ཡིན་པའི་ཕྱིར་རང་རིག་རབ་ཏུ་གསལ་བའོ། །དེ་ཡང་རང་གི་ངོ་བོ་ཉིད་ཉམས་སུ་མྱོང་བ་ཉིད་ཡིན་པས། དེ་ན་གཞན་རིག་མེད་པའི་ཕྱིར། །རང་རིག་འབྲས་བུ་ཡིན་པར་འདོད། །གང་དག་གི་བློ་ཉིད་གཟུང་བ་དང་འཛིན་པའི་རྣམ་པ་ཉེ་བར་སྟོན་པ་སྐྱེ་བ་དེ་དག་ལ་ནི་རིག་པར་བྱ་བ་གཞན་མེད་པའི་ཕྱིར་རང་རིག་འབྲས་བུ་ཡིན་ཏེ། དོན་རྟོགས་པ་དེའི་ངོ་བོ་ཡིན་པའི་ཕྱིར་རོ། །གང་གི་ཕྱིར་གལ་ཏེ་ཉམས་སུ་མྱོང་བ་དེ་འདོད་པའི་རྣམ་པའམ་མི་འདོད་པའི་རྣམ་པར་འགྱུར་ན་འདོད་པ་དང་མི་འདོད་པའི་ཡུལ་སོ་སོར་རིག་པར་འགྱུར་བ་ཡིན་ནོ། །འདི་ལ་འཐད་ལྡན་དུ། གཟུང་བའི་རྣམ་པ་ནི་ཕྱི་རོལ་ལ་ཚད་མ་ཡིན་ཏེ། དེ་ཉིད་ནི་ཇི་ལྟར་རིག་པ་དེ་ལྟར་དོན་རིག་པར་འགྱུར་བ་ཡིན་ནོ། །ཕྱི་རོལ་གྱི་དོན་རིག་པ་ནི་གཞན་ལ་གཟུང་བའི་རྣམ་པར་རིག་པ་ཡང་གཞན་ཉིད་མ་ཡིན་ཏེ། ཕྱི་རོལ་གྱི་རིག་པའི་དོན་ནི་རང་རིག་པའི་ངོ་བོས་མཐོང་བ་མ་ཡིན་པའི་ཕྱིར་རོ། །དེའི་ཕྱིར་བདག་རིག་པ་དོན་རིག་པ་སྟོན་པའི་གཟུང་བའི་རྣམ་པ་དེ་ཉིད་དོན་ལ་ཚད་མ་ཡིན་ལ། རང་རིག་པ་ཡིན་ཡང་དོན་རིག་པའི་རང་བཞིན་དུ་ལྷག་པར་ཞེན་པ་ན་ཞེན་པའི་འབྲས་བུ་དོན་རིག་པར་བརྗོད་པ་ཡིན་ནོ། །དེས་ན་ཚད་མ་དང་འབྲས་ཡུལ་ཐ་མི་དད་དོ། །ཞེས་སོ། །དེས་ན་རྣམ་རིག་པའི་ལུགས་ལ་ཕྱི་དོན་ཡོད་ནས་སྣང་བ་མ་ཡིན་གྱི། འོན་ཀྱང་ཉམས་སུ་མྱོང་བའི་དབང་གིས་སྔོན་པོ་ལ་སོགས་པ་གཟུང་བའི་རྣམ་པ། བདེ་བ་ལ་སོགས་པ་འཛིན་པའི་རྣམ་པས་རབ་ཏུ་སྣང་ངོ་། །དེ་བས་ན་རྣམ་བདེན་པས་ཚད་འབྲས་འཇོག་པ་ན། ཇི་ལྟར་སྣང་བཞིན་པའི་གཟུང་བའི་རྣམ་པ་ནི་གཞལ་བྱ། འཛིན་པའི་རྣམ་པ་ནི་ཚད་མ། སིམ་པ་ལ་སོགས་པའི་རང་བཞིན་དུ་མྱོང་བ་ནི་འབྲས་བུ་དེའི་དབང་གིས་རྣམ་པར་གཞག་གོ །འདི་ནི་དོན་རིག་གིའོ། །བདག་ཉིད་གཞལ་བྱ། འཛིན་པ་ཚད་མ། བདག་ཉིད་རིག་པ་འབྲས་བུ་ཞེས་རང་རིག་ཚད་འབྲས་སུ་འདོད་དོ། །ཕྱི་རོལ་ཡོད་པར་འདོད་པས་ཀྱང་རང་རིག་གི་འདོད་དགོས་པས་དེ་འགོད་ན། །དོན་ནི་གཞལ་བྱ། གཟུང་བའི་རྣམ་པ་ཚད་མ། རང་རིག་པ་འབྲས་བུ། དེ་བས་ན་ལུགས་གཉི་གར་ཚད་འབྲས་གཉིས་གཉིས་སོ། །ཕྱི་མ་འཐད་པར་ཡང་རྣམ་ངེས་སུ། ཕྱི་རོལ་གྱི་དོན་ཡོད་ཀྱང་རང་རིག་པ་ཇི་ལྟ་བ་བཞིན་དོན་འགྲུབ་པའི་ཕྱིར་དེ་ཉིད་འབྲས་བུར་རིགས་སོ་ཞེས། ཕྱི་དོན་ཤེས་པ་ལས་ལོགས་སུ་གྲུབ་པར་འདོད་པས་དོན་སྨྲའི་ཐ་སྙད་བྱས་ཀྱི། ཤེས་པ་ཉིད་གཟུགས་སོགས་དོན་དུ་སྣང་བ་ཕྱིའི་སྐྱེ་མཆེད་དུ་འཆད་དགོས་པའི་ཕྱིར་ཕྱི་དང་། དོན་ཙམ་ཁས་བླངས་ན་རྣམ་བདེན་པའི་ལུགས་ལས་གོལ་ལོ་སྙམ་པ་དང་། དབང་ཡིད་ཀྱི་མངོན་སུམ་མི་འདོད་དོ་ཞེས་མི་སྨྲའོ། །འཐད་ལྡན་དུ། དེ་ཡང་དོན་རིག་པའི་རང་བཞིན་དུ་ཞེན་ན་དོན་རིག་པར་འགྱུར་བ་ཡིན་ཏེ། རིག་པ་དེ་ཕྱི་རོལ་གྱི་ཡུལ་ཅན་དུ་ངེས་པ་ཉིད་ཡིན་ཀྱང་རང་རིག་པ་ཉིད་ཀྱི་རྗེས་སུ་འགྲོ་བ་ཡིན་ནོ། །ཞེས་པས་སོ། །གལ་ཏེ་ཕྱི་རོལ་མྱོང་གྱུར་ནས། །ནས། ཕྱི་རོལ་དོན་བལྟོས་མ་ཡིན་ནོ། །ཞེས་པའི་བར་གྱིས་གཟུང་འཛིན་བདེན་གྲུབ་པ་བཀག དེ་ཕྱིར་གཅིག་ལ་ཚུལ་གཉིས་ཡོད། ཅེས་པའི་ཚིགས་སུ་བཅད་པ་གཅིག་གིས་ཕྱི་དོན་མེད་པས་ཚུལ་གཉིས་སུ་གྲུབ་པར་བསྟན། གང་ཚེ་རྣམ་རིག་རྒྱུ་ཡི་ཡུལ། །ནས། ཇི་ལྟར་རྗེས་སུ་སྣང་བཞིན་བྱས། །ཞེས་པའི་བར་གྱིས་འབྲས་རྟོགས་གཉིས་ལ་འཐད་པས་བསྒྲུབས་སོ། །གཉིས་གཅིག་གིས་ཕྱི་དོན་མེད་པས་ཚུལ་གཉིས་སུ་གྲུབ་པར་བསྟན། གང་ཚེ་རྣམ་རིག་རྒྱུ་ཡི་ཡུལ། །ནས། ཇི་ལྟར་རྗེས་སུ་སྣང་བཞིན་བྱས། །ཞེས་པའི་བར་གྱིས་འབྲས་རྟོགས་གཉིས་ལ་འཐད་པས་བསྒྲུབས་སོ། །གཉིས་པ་ལ། རྣམ་རྫུན་པའི་རིགས་པའི་གཙོ་བོ་དང་། རྣམ་གྲངས་ལྷན་ཅིག་དམིགས་ངེས་འཕྲོས་དོན་དང་བཅས་པ་བཤད་པ་གཉིས་ལས། དང་པོ་ནི། དེ་ལྟ་མིན་ན་སྣ་ཚོགས་ཀྱི། །ནས། ཐ་དད་མེད་པ་ངེས་པར་འགྱུར། །ཞེས་པའི་བར་གྱིས། རྣམ་བདེན་པའི་འདོད་པ་བཀག་ནས། གང་ཕྱིར་དངོས་པོ་རྣམ་དཔྱད་ན། །དེ་ཉིད་དུ་ན་དེ་དངོས་མེད། །གང་གི་ཕྱིར་ན་དེ་དག་ལ། །གཅིག་དང་དུ་མའི་རང་བཞིན་མེད། །དེའི་ཕྱིར་སྣང་བའི་དངོས་པོ་གཅིག་དང་དུ་མའི་བདག་ཉིད་གང་གིས་རྣམ་པར་དཔྱད་ན། རྣམ་པ་ཞིག་ནས་དེའི་རང་བཞིན་ནི་དེ་ཁོ་ནར་ཡོད་པ་ཡིན་ནོ་ཞེས་བྱ་བ་ནི་འོས་པ་ཡིན་ནོ། །ཇི་ལྟར་འོས་ཞེ་ན། ཕྱི་རོལ་གྱི་དོན་མེད་པའི་ཕྱིར་རྣམ་པར་ཤེས་པ་གཅིག་ཉིད་ཁོ་ན་བས་འདི་གཅིག་པུ་ཉིད་དུ་སྣང་བར་རིག་པ་ཡིན་ན། དུ་མར་སྣང་བ་དེའི་ཕྱིར་འདི་ནི་གཅིག་གི་རང་བཞིན་མ་ཡིན་ནོ། །དེའི་ཕྱིར་སྣང་བ་འདི་ནི་གཅིག་མ་ཡིན་ལ་དུ་མ་ཡང་མ་ཡིན་ཏེ། གཟུང་འཛིན་གྱི་རྣམ་པ་དངོས་མ་ཡིན་པའི་ཕྱིར་རོ་ཞེས་རྣམ་རྫུན་པའི་རྩོད་པ་དང་། དེ་བདག་མིན་ལ་དེ་བདག་ཏུ། །ནས། བལྟོས་མེད་རབ་རིབ་ལ་སོགས་བཞིན། །ཞེས་པའི་བར་གྱིས་བདེན་པ་མེད་ན་འཁྲུལ་པའང་མེད་ཅེས་པའི་རྣམ་རྫུན་པའི་རྩོད་ལན་བསྟན། དེ་ལ་བློ་ནི་ཡོངས་གཅོད་པ། །ཞེས་པའི་ཚིགས་བཅད་ཀྱིས་འཛིན་རྣམས་ཚད་མར་རིགས་པ་དང་། དཔེར་ན་འདོད་ཆགས་སོགས་མྱོང་ནས། །ནས། གཞལ་བྱ་རང་རིག་འབྲས་བུ་ཡིན། །ཞེས་པའི་བར་གྱིས་ཕྱི་དོན་མེད་ཀྱང་ཚད་འབྲས་གཞལ་གསུམ་འཐད་པ་དང་། བདག་ལ་འཛིན་པའི་རྣམ་པར་ཤེས། །ཞེས་པའི་ཚིགས་བཅད་ཀྱིས་རང་རིག་ཚད་མར་བཤད་པའི་འགལ་བ་སྤངས་སོ། །ཡུལ་རྣམས་ལས་ནི་བྱུང་བ་ཡིན། །ནས། ཤེས་པ་ཕྱི་མ་ཕྱི་མ་མིན། །ཞེས་པའི་བར་གྱིས་བློ་ཚུལ་གཉིས་པ་འཐད་པར་བསྟན་ནོ། །འདི་ནི་རྣམ་པ་བདེན་པ་བདག་གིས་སོ། །གཉིས་པ་ལ། ལྷན་ཅིག་དམིགས་ངེས་དང་བློ་ཚུལ་གཉིས་དང་རང་རིག་རྒྱས་པར་བསྒྲུབ་པ་གཉིས་ལས། དང་པོ་ནི། ངེས་པར་བློ་དང་ལྷན་ཅིག་ཏུ། །གཅིག་ཅར་དུ་ནི་མྱོང་འགྱུར་བའི། །ཡུལ་ནི་འདི་ལས་གཞན་ཉིད་དུ། །རྣམ་གང་གིས་ནི་འགྲུབ་པར་འགྱུར། །རྣམ་ཤེས་འཁྲུལ་པས་ཟླ་བ་གཉིས། །མེད་པར་ཐ་དད་མཐོང་བ་བཞིན། །རྣམ་ངེས་སུ། ལྷན་ཅིག་དམིགས་པ་ངེས་པའི་ཕྱིར། །སྔོ་དང་དེ་བློ་གཞན་མ་ཡིན། །གང་གི་ཕྱིར་ཐ་དད་པར་སྣང་བ་ཡིན་ཀྱང་། སྔོན་པོ་ནི་ཉམས་སུ་མྱོང་བ་ལས་དོན་གཞན་པའི་རང་བཞིན་ཉིད་མ་ཡིན་ཏེ། དེ་དག་ལྷན་ཅིག་དམིགས་པ་ངེས་པའི་ཕྱིར་ཟླ་བ་གཉིས་ལ་སོགས་པ་བཞིན་ནོ། །འདི་ནི་རྣམ་རྫུན་པས་བཤད་པ་ཡིན་ཏེ། འཐད་ལྡན་དུ། རྣམ་པ་མེད་པའི་ཕྱོགས་ལ་འཐད་པ་གཞན་ཡང་ཡོད་པས་དེ་ཉིད་བསྟན་པའི་དོན་དུ་གཞན་ཡང་ཞེས་བྱ་བ་སྡུད་པ་གསུངས་ཏེ། ལྷན་ཅིག་ཅེས་བྱ་བ་ནི་ལྷན་ཅིག་ཏུ་དམིགས་པ་དེ་ངེས་པ་དེའི་ཕྱིར་རོ། །ཞེས་སོ། །ལྷན་ཅིག་དམིགས་ངེས་ཀྱི་རྣམ་གཞག་མདོ་སྡེ་པ་རྣམས་བདེན་རྫུན་ཐམས་ཅད་ལ་གྲགས་པ་ལས། འདི་མཐའ་མ་ཁོ་ནའི་ཡིན་པ་ནི་འདིས་ཏེ། སྔོན་པོ་དང་དེ་འཛིན་པའི་བློ་གཅིག་པར་བསྒྲུབ་པ་ནི་མ་ཡིན་ཏེ། ཐ་དད་ཡིན་པ་དགག་པའི་ཕྱིར་ཡིན་ནོ་ཞེས་སྟོན་པས་སོ། །འདིའི་དོན་འཐད་ལྡན་དུ། ཤེས་བྱ་དམིགས་པ་ནི་ཤེས་པ་དམིགས་པའི་བདག་ཉིད་ཅན་ཡིན་ཞིང་གཞན་དུ་ནི་མ་ཡིན་ལ། ཤེས་པ་དམིགས་པ་ཡང་ཤེས་བྱ་དམིགས་པའི་བདག་ཉིད་ཡིན་ནོ་ཞེས་གཞན་དུ་གྱུར་པ་ཉིད་བཟློག་པ་ཡིན་ནོ། །ཞེས་གཟུང་བ་མེད་ན་དེ་འཛིན་མེད་པ་འཕང་པའི་རིག་པའི་རྣམ་གྲངས་གཞན་པའོ་ཞེས་ཤེས་པར་བྱའོ། །མེད་པར་ཐ་དད་མཐོང་བ་བཞིན། །ནས། བཟློག་པར་རབ་ཏུ་དཀའ་བ་ཡིན། །ཞེས་པའི་བར་གྱིས་དེ་ལེགས་པར་བསྒྲུབས་སོ། །རྒྱུ་གཞན་དག་ནི་ཡོད་ན་ཡང་། ནས། ལྷན་ཅིག་མྱོང་བའི་ངེས་པས་འགྲུབ། །ཅེས་པའི་བར་གྱིས་ལྷན་ཅིག་དམིགས་པ་ཐ་དད་མི་འགྱུར་བའི་ལན་བསྟན། དབང་པོའི་ཁྱད་པར་གྱིས་གསལ་དང་། །ནས། ཐ་དད་པར་ནི་དམིགས་པ་ཡིན། །ཞེས་པའི་བར་གྱིས་མདོ་སྡེ་པས་དབང་པོའི་ཁྱད་པར་གསུམ་ལས་བློ་ཚུལ་གཉིས་བསྒྲུབ་པ་ཡིན་ནོ། །མར་མེ་ལ་སོགས་དཀྱིལ་འཁོར་ནི། །ནས། གཉིས་ཀ་དག་ཀྱང་རྒྱུ་མ་ཡིན། །ཞེས་པའི་བར་གྱིས་མར་མེ་བཞིན་དཀྱིལ་འཁོར་གྱི་རྣམ་པར་སྣང་བས་ཚུལ་གཉིས་བསྒྲུབས་པ་ཡིན་ནོ། །ཉེ་རིང་ལ་སོགས་ཁྱད་པར་གྱི། །ནས། ལྷག་མ་བློ་ངན་ལུགས་ངན་ཡིན། །ཞེས་པའི་བར་གྱིས་ཉེ་རིང་གི་ཁྱད་པར་ལས་ཚུལ་གཉིས་བསྒྲུབས་སོ། །ཤེས་པ་སྒྲ་དང་མར་མེ་རྣམས། །ནས། རྣམ་འབྱེད་བློ་ལ་ཚེ་སོགས་བཞིན། །ཞེས་པའི་བར་གྱིས་གཟུང་ཡུལ་འགགས་ཀྱང་སྣང་བ་ཡོད་པར་བསྟན་ནོ། །དེ་ལྟར། ཚུལ་གཉིས་སྒྲུབ་པར་བྱེད་པས་ཀྱང་། །རང་རིག་ཕལ་ཆེར་གྲུབ་པ་ཡིན། །ཞེས་པས་ཚུལ་གཉིས་གྲུབ་པས་རང་རིག་གྲུབ་མོད། ད་དུང་རིག་པས་རྒྱས་པར་བསྒྲུབ་པར་བཞེད་ནས། རང་གི་ངོ་བོར་གྱུར་སྣང་བ། །ནས། མྱོང་ལ་མེད་པའང་ཅི་ཡི་ཕྱིར། །ཞེས་པའི་བར་གྱིས་རྣམ་པར་ཤེས་པ་ཡིན་པས་རང་བཞིན་གྲུབ་པར་བསྟན། །གཞན་ཡང་དཀར་སོགས་མཐོང་བ་ནས། །ནས། དོན་མི་གསལ་བ་ཉིད་དུ་འགྱུར། །ཞེས་པའི་བར་གྱིས་དཀར་སོགས་གསལ་བར་དཔྱད་ནས་རང་རིག་བསྒྲུབས་སོ། །བདག་རིགས་མེད་པའི་ཕྱོགས་དག་ལ། །ནས། བརྗོད་དང་གཡོ་འགུལ་སོགས་མཐོང་ནས། །གཞན་སེམས་རྗེས་དཔག་མི་འགྱུར་ཏེ། །བདག་ལ་འབྲེལ་བ་མཐོང་མེད་ཕྱིར། །ཞེས་པའི་བར་གྱིས་རང་བློ་མངོན་གྱུར་མིན་པ་བཀག་པས་རང་རིག་གྲུབ་ཅིང་། ཚིགས་བཅད་མཐའ་མ་གསུམ་ལས་འཕྲོས་ནས་རྒྱུད་གཞན་གྲུབ་པ་མཛད་དེ། རང་ལུས་བློ་སྔོན་འགྲོ་བ་ཡི། །བྱ་བ་མཐོང་ནས་གཞན་ལ་དེ། །འཛིན་ཕྱིར་གལ་ཏེ་བློ་ཤེས་འགྱུར། །སེམས་ཙམ་ལ་ཡང་ཚུལ་འདི་མཚུངས། །ཞེས་པ་ལ་སོགས་པས་སོ། །ཡིད་ཀྱི་བློ་ལ་དོན་གྱིས་བརྟགས། །ཞེས་པ་ནས། བསལ་ན་འགྲོ་འདི་གསལ་བར་འགྱུར། །ཞེས་པའི་བར་གྱིས་ཤེས་པ་ཕྱི་མས་མྱོང་ཚུལ་དཔྱད་ན་རང་རིག་བསྒྲུབ་པ་རྣམས་བསྟན་ནོ། །ཕྱོགས་གླང་གྲགས་པའི་གཞུང་ལུགས་རྒྱ་མཚོའི་ཀློང་། །ལུགས་ངན་རྟ་གདོང་གིས་འཁོར་ཟད་དོགས་ནས། །མདོ་དང་སྡེ་བདུན་རིགས་པའི་ཕྱོགས་ཀུན་གྱི། །འཐད་པའི་ཆུ་བོ་ཐམས་ཅད་འདིར་ཕབ་བོ།། །། གཉིས་པ་སྤྱི་མཚན་གཞལ་བྱར་བྱེད་པ་རྗེས་དཔག་ཚད་མ་བཤད་པ་ལ། རབ་དབྱེ་བསྟན་ནས་མཚན་ཉིད་འཇོག་པའི་འཐད་པ། རབ་དབྱེ་རྒྱས་པར་བསྟན་པ་གཉིས་ལས། དང་པོ་ནི། མདོར། རྗེས་དཔག་རྣམ་གཉིས། རང་དོན་རྗེས་དཔག་དང་གཞན་དོན་རྗེས་དཔག་གོ །འཐད་ལྡན་དུ། འདི་རང་གི་ཆེད་དུ་ཡིན་པས་རང་གི་དོན་ཡིན་ལ་གཞན་གྱི་ཆེད་དུ་ཡིན་པས་གཞན་གྱི་དོན་ཏེ། རང་ལ་དགོས་པ་དང་གཞན་ལ་དགོས་པའོ། །ཞེས་པས། རྗེས་སུ་དཔག་པ་གང་རྒྱུར་གྱུར་པས་རང་གི་རྟོགས་པར་འགྱུར་བ། དེས་ན་རྗེས་སུ་དཔག་པ་ནི་བྱེད་པ་ཡིན་ལ། ཁོང་དུ་ཆུད་པའི་རང་བཞིན་འབྲས་བུའི་གནས་སྐབས་ནི་རྟོགས་པའོ། །དེ་ནི་ཚུལ་གསུམ་པའི་རྟགས་ལས་སྐྱེས་པའི་ཤེས་པ་རང་གི་རྒྱུད་ལ་སྐྱེས་པ་ལ་བྱ་ལ། དེ་དོན་ཉིད་ཡིན་པས་རང་དོན་རྗེས་དཔག་ཅེས་བྱའོ། །དེ་ཙམ་གྱིས་རང་རྒྱུད་ཅེས་ཀྱང་རྟོགས་སོ། །གང་ཞིག་གང་གི་དབང་དུ་བྱས་ནས་འཇུག་པ་དེ་ནི་དེའི་དོན་ཡིན་ལ། སྒྲ་ནི་གཞན་གྱི་དབང་དུ་བྱས་ནས་སྦྱོར་བ་ཡིན་གྱི། བདག་གི་ཆེད་དུ་ནི་མ་ཡིན་པས་སྒྲ་གཞན་གྱི་དོན་དུ་ངེས་པ་ཡིན་ནོ། །དེས་སྦྱོར་བ་པོ་མངོན་པར་འདོད་པའི་དོན་ལ་གཞན་སྦྱོར་བ་དེ་ནི་རྗེས་དཔག་སྟེ་དེའི་ཕྱིར་གཞན་དོན་རྗེས་དཔག་ཅེས་བྱའོ། །དེ་བས་འདི་གཉིས་ལས་བརྒྱུད་པས་ཡུལ་ཁྱད་པར་མེད་པ་ཡིན་ཡང་། དངོས་ཀྱི་འདི་དག་གི་བྱ་བ་ལ་ཁྱད་པར་ཡོད་དོ། །ཁྱད་པར་གང་ཞེ་ན། ཚུལ་གསུམ་པའི་རྟགས་བརྗོད་པའི་བརྗོད་བྱ་རང་གི་དོན་གྱི་རྗེས་སུ་དཔག་པ་ཞེས་བྱ་བ་ནི། རྟགས་ཅན་བསྒྲུབ་པར་བྱ་བའི་དོན་རྟོགས་པར་བྱེད་པ་ཡིན་ལ། བསྒྲུབ་པར་བྱ་བའི་དོན་དེའི་གོ་བར་བྱ་བའི་དོན་ནི་ཚུལ་གསུམ་པའི་རྟགས་བརྗོད་པར་གྲགས་པའི་སྒྲས་ཡིན་ནོ། །གཞན་དོན་རྗེས་དཔག་ནི་འབྲེལ་པ་ཤེས་ཤིང་དྲན་པའི་རྟགས་ཆོས་ཅན་ལ་མཐོང་བ་དང་ལྡན་པའི་རྟོགས་པ་པོ་དེ་ལ་འབྲེལ་བའི་ཡུལ་གྱི་བསྒྲུབ་བྱ་སྟེ། རྟགས་དེ་གང་དུ་མཐོང་བ་དེ་ཉིད་དུ་གོ་བར་བྱེད་པ་ཡིན་གྱིས། གཞན་དུ་ནི་མ་ཡིན་ནོ། །དེ་བས་ན་རང་དོན་རྗེས་དཔག་ཤེས་པ་དང་། །གཞན་དོན་རྗེས་དཔག་སྒྲའི་དེ་ཉིད་དུ་བཞག་གོ །དེ་ལྟར་ཡང་། བསྒྲུབ་ནུས་པ་དང་སུན་འབྱིན་ནུས། །ལྟར་སྣང་བཅས་པ་གཞན་གོ་བྱེད། །མངོན་སུམ་དང་ནི་རྗེས་སུ་དཔག །ལྟར་སྣང་བཅས་པ་བདག་རིག་བྱེད། །ཅེས་གསུངས་སོ། །དེ་ལྟར་དབྱེ་བ་ལས་དེ་གཉིས་གསལ་བར་ངེས་ལ། དེ་ལས་སོ་སོའི་མཚན་ཉིད་བཞག་པར་ནུས་ཀྱི་བཟློག་ན་མ་ཡིན་པས་རབ་དབྱེ་དང་པོར་གསུངས་སོ། །མངོན་སུམ་བཞིན་དེ་གཉིས་ཐུན་མོང་བའི་མཚན་ཉིད་ཡོད་དམ་ཞེ་ན། མེད་དེ་རང་བཞིན་ཤིན་ཏུ་ཐ་དད་པའི་ཕྱིར་རོ། །གཉིས་པ་ལ། རང་གི་དོན་གྱི་རྗེས་སུ་དཔག་པ་དང་། གཞན་གྱི་དོན་གྱི་རྗེས་སུ་དཔག་པ་བཤད་པ་གཉིས་ལས། དང་པོ་ལ། མུ་སྟེགས་ཀྱིས་ལོག་པར་བཤད་ཚུལ། དེ་དགག་པ་ལ་རང་གི་ལུགས་རྣམ་པར་བཞག་པ་གཉིས་ལས། དང་པོ་ནི། རང་འགྲེལ་ལས། དོན་དང་དོན་མ་ཡིན་པ་རྣམ་པར་འབྱེད་པ་ནི་རྗེས་སུ་དཔག་པ་ལ་བརྟེན་པ་ཅན་ཡིན་ལ། དེ་ལ་ཡང་ལོག་པར་རྟོག་པས་དེ་རྣམ་པར་གཞག་པའི་ཕྱིར་བཤད་པ། ཞེས་གསུངས་པའི་དེ་ལ་ལོག་པར་རྟོག་པ་ནི། བརྡ་སྤྲོད་པ་རྣམས་ན་རེ། རྗེས་སུ་དཔག་པ་ཚད་མ་མ་ཡིན་ཏེ་འཁྲུལ་པ་སྲིད་པའི་ཕྱིར་རོ། །ཞེས་དང་། གཅེར་བུ་བ་སྣོད་ཀྱི་རྗེ་ན་རེ། གཞན་དུ་མི་འཐད་པའི་ངོ་བོ་གཅིག་པུ་གཏན་ཚིགས་ཀྱི་དོན་རྟོགས་པར་བྱེད་པ་ཉིད་ཀྱི་ཡན་ལག་ཡིན་གྱི། ཕྱོགས་ཀྱི་ཆོས་ལ་སོགས་པའི་ཚུལ་གསུམ་པའི་མཚན་ཉིད་ནི་མ་ཡིན་ནོ། །འདི་ལྟར། སྔོ་བསངས་ཡིན་ཏེ། དེའི་བུ་ཡིན་པའི་ཕྱིར། དེའི་བུ་སྣང་བ་བཞིན་ནོ། །ཞེས་བྱ་བའི་གཏན་ཚིགས་འདི་ལ་ཚུལ་གསུམ་པ་ཡོད་ཀྱང་གཞན་དུ་མི་འཐད་པ་ཉིད་ཀྱི་ཡན་ལག་མེད་པའི་ཕྱིར་རྟོགས་པར་བྱེད་པ་ཉིད་མ་ཡིན་ནོ། །ཚུལ་གསུམ་པ་མེད་ཀྱང་གཞན་དུ་མི་འཐད་པ་དང་ལྡན་པ་ཙམ་ཁོ་ནས་གཏན་ཚིགས་རྟོགས་པར་བྱེད་པ་ཡིན་པ་ཡང་མཐོང་སྟེ། འདི་ལྟ་སྟེ། དངོས་པོ་དང་དངོས་པོ་མེད་པ་ཐམས་ཅད་ནི་ཇི་ལྟར་ཡོད་པར་བདག་ཉིད་དག་ཡིན་ཏེ། ཇི་ལྟར་ཡང་དམིགས་པར་བྱ་བ་ཡིན་པའི་ཕྱིར་ཞེས་བྱ་བ་ལྟ་བུའོ། །འདི་ལ་ནི་ཆོས་མཐུན་པ་དང་མི་མཐུན་པའི་དཔེ་དག་མེད་དེ། དངོས་པོ་ཐམས་ཅད་ཀྱི་ཚོགས་དངོས་པོ་དང་དངོས་པོ་མེད་པ་ཕྱོགས་སུ་བྱས་པའི་ཕྱིར་རོ། །དེ་དག་ལས་མ་གཏོགས་པ་གཞན་མེད་པའི་ཕྱིར་གང་ཞིག་དཔེ་ཉིད་ཡིན་པར་འགྱུར། །ཕྱོགས་ཀྱི་ཆོས་ཀྱང་གཞན་དུ་མི་འཐད་པ་ཉིད་ཁོ་ནའི་ཁོངས་སུ་འདུས་པའི་ཕྱིར་རོ། །དེ་ལྟར་ན། རྟགས་ནི་ཚུལ་གཅིག་པ་ཁོ་ན་ཡིན་པར་རིགས་ཀྱི་ཚུལ་གསུམ་པ་ཉིད་ནི་མ་ཡིན་པར་རིགས་སོ། །ཞེས་དང་། རིག་པ་ཅན་པ་ལ་སོགས་པ་ནི། ཕྱོགས་ཀྱི་ཆོས་ཉིད་དང་། མཐུན་པའི་ཕྱོགས་ལ་ཡོད་པ་ཉིད་དང་། མི་མཐུན་པའི་ཕྱོགས་ལ་མེད་པ་ཉིད་དང་། བརྗོད་པར་འདོད་པའི་གྲངས་གཅིག་པ་ཉིད་དང་། ཤེས་པ་ཉིད་ཅེས་བྱ་བ་དྲུག་པོ་ཁོ་ནའོ་ཞེས་དང་། གྲངས་ཅན་པ་ན་རེ། རྗེས་སུ་དཔག་པ་ནི་འབྲེལ་བ་གཅིག་ཉིད་ལས་ལྷག་མ་གྲུབ་པ་ཡིན་ནོ། །ལྷག་མ་གྲུབ་པ་ནི་འདིར་ཉེ་བར་བསྟན་པའི་སྒོ་ནས་རྟགས་ཤེས་པ་ཁོ་ན་ཡིན་ཏེ། རྗེས་སུ་དཔག་པར་འདོད་ཀྱི་རྗེས་སུ་དཔག་པར་ཤེས་པར་བྱ་བ་ནི་མ་ཡིན་ནོ། །ཞེས་དང་། ཕྱིར་རྒོལ་བ་དེ་ཐམས་ཅད་ནི་རྗེས་དཔག་གི་འབྲས་བུ་ཚད་མ་ལས་དོན་གཞན་ཁོ་ན་ཡིན་པར་འདོད་དོ། །བྱེ་བྲག་པ་ལ་སོགས་པ་ནི་ཡང་དག་པར་མ་གྲུབ་པར་གཏན་ཚིགས་སུ་ཉེ་བར་རྟོགས་པར་བྱེད་དེ། དེ་ལྟར་བདག་ནི་ཐམས་ཅད་ན་ཡོད་པ་ཡིན་ཏེ། ཐམས་ཅད་ན་ཡོད་པ་ཡོན་ཏན་དམིགས་པའི་ཕྱིར་རོ་ཞེས་བྱ་བ་ལ་སོགས་པས་སོ། །རྒྱལ་དཔོག་པ་ལ་སོགས་པ་མི་མཐུན་པའི་ཕྱོགས་ལ་ཡོད་པ་ཡང་གཏན་ཚིགས་སུ་ཉེ་བར་སྟོན་ཏེ། འདི་ལྟར། སྒྲ་ནི་རྟག་པ་སྟེ་གཞལ་བྱ་ཡིན་པའི་ཕྱིར་རོ། །ཞེས་དང་། དེ་བཞིན་དུ་བརྗོད་པར་འདོད་པའི་སྐྱེས་བུ་འགའ་ཞིག་ཐམས་ཅད་མཁྱེན་པ་མ་ཡིན་ཏེ། གཞལ་བྱ་དང་ཤེས་པར་བྱ་བ་དང་དངོས་པོ་དང་ཡོད་པའི་ཕྱིར་ཞེས་བྱ་བ་ལ་སོགས་པས་སོ། །གྲངས་ཅན་པ་ལ་སོགས་མིག་ལ་སོགས་པ་ནི་གཞན་གྱི་དོན་ཡིན་ཏེ། བསགས་པ་ཡིན་པའི་ཕྱིར། མལ་ཆ་དང་སྟན་ལ་སོགས་པའི་ཡན་ལག་བཞིན་ནོ། ཞེས་འགལ་བ་ཡང་མི་འགལ་བ་བཞིན་དུ་རྟོག་པ་དང་། རང་གི་ཕྱོགས་བསྒྲུབ་པའི་ཕྱིར་མི་མཐུན་པའི་ཕྱོགས་གཅིག་ལ་ཡོད་པ་གཏན་ཚིགས་སུ་རྟོགས་པར་བྱེད་དེ། འདི་ལྟར། སྒྲ་ནི་རྟག་པ་སྟེ་རྩལ་མ་ཐག་ཏུ་བྱུང་བའི་ཕྱིར་རོ། །ཞེས་སོགས་དང་། རྗེས་སུ་དཔག་པར་བྱ་བ་ནི་ཆོས་དང་ཆོས་ཅན་གྱི་ཡིན་པའི་ཕྱིར་དེ་མ་གྲུབ་ན་དེ་ལ་རྟག་ཏུ་མ་གྲུབ་པ་ཁོ་ནའོ། །འོན་ཏེ་གྲུབ་ན་ནི་བསྒྲུབ་པར་བྱ་བ་ནི་སྔ་ནས་གྲུབ་པའི་ཕྱིར་རྟགས་ཀྱི་རྗེས་སུ་འབྲངས་པ་དོན་མེད་དོ་ཞེས་ཁ་ཅིག་ཀླན་ཀར་བྱེད་པ་དང་། གྲངས་ཅན་སོགས་བསྒྲུབ་པར་བྱ་བའི་ཆོས་དང་མི་འདྲ་བ་ཡང་ཕྱོགས་དང་མཐུན་པ་ཉིད་དུ་རྟོགས་པར་བྱེད་དེ། འདི་ལྟར་མལ་ཆ་དང་སྟན་ལ་སོགས་པའི་ཡན་ལག་བཞིན་ནོ། །ཞེས་བྱ་བ་སོགས་ཀྱིས་དང་། རིག་པ་ཅན་པ་ལ་སོགས་པ་གང་དག་མེད་པའི་ངོ་བོ་མི་མཐུན་པའི་ཕྱོགས་ཡིན་པར་མི་འདོད་དོ། །མེད་པའི་ངོ་བོ་ལས་འགལ་ཡང་བཟློག་པར་མི་རུང་བའི་ཕྱིར་རོ། །དེ་ཕྱིར་འདུས་མ་བྱས་མེད་པར་སྨྲ་བ་བྱས་པའི་ཕྱིར་མི་རྟག་གོ་ཞེས་སྒྲུབ་པར་བྱེད་པ་གཏན་ཚིགས་མ་ངེས་པ་ཡིན་ནོ། །ཞེས་ཟེར་བ་དང་། ཁ་ཅིག་རྗེས་དཔག་གི་རབ་དབྱེ་དང་། ངོ་བོ་གཞན་དུ་རྟོག་སྟེ། འདི་ལྟར་རིག་པ་ཅན་པ་ན་རེ། དེ་སྔོན་དུ་འགྲོ་བའི་རྗེས་སུ་དཔག་པ་ནི་རྣམ་པ་གསུམ་སྟེ། སྔ་མ་དང་ལྡན་པ་དང་། ལྷག་མ་དང་ལྡན་པ་དང་། སྤྱིར་མཐོང་བའི་རྗེས་སུ་དཔག་པས་སོ། །ཞེས་དང་། བྱེ་བྲག་པ་རྣམས། རྟགས་ལས་བྱུང་བ་ནི་འདིའི་འདི་ཞེས་བྱ་བ་སྟེ་འབྲས་བུ་དང་། རྒྱུ་དང་འབྲེལ་པ་དང་། དོན་གཅིག་ལ་ལྡན་པ་དང་འགལ་བའོ། །ཞེས་དང་། སེར་སྐྱ་པ་ལ་སོགས་པ་ན་རེ། རྗེས་སུ་དཔག་པ་རྣམ་པ་གཉིས་ཏེ་སྤྱིར་མཐོང་བ་དང་། ཁྱད་པར་དུ་མཐོང་བའོ་ཞེས་དང་། རྒྱལ་དཔོག་པ་ལ་སོགས་པ་ནི། ཐམས་ཅད་མཁྱེན་པ་ལ་སོགས་པ་དམིགས་པའི་རིགས་བྱར་མ་གྱུར་པ་ཡང་དམིགས་པ་ལོག་པ་ཙམ་གྱི་སྒོ་ནས་འགོག་པར་བྱེད་པ་དང་བརྡ་སྤྲོད་པ་ལ་སོགས་པ་ནི། མེ་མ་ཡིན་པ་བརྒྱ་བྱིན་གྱི་སྤྱི་བོ་ལ་སོགས་པ་ལས་ཀྱང་དུ་བ་འབྱུང་བ་མཐོང་ནས་མེ་ལ་སོགས་བསྒྲུབ་པར་བྱ་བ་ལ་དུ་བ་ལ་སོགས་པའི་འབྲས་བུའི་རྟགས་འཁྲུལ་པར་སྨྲ་བ་དང་། གྲངས་ཅན་པ་རྣམས་དངོས་པོ་རྣམས་ཀྱི་འབྲེལ་པ་རྣམ་པ་བདུན་བརྗོད་དེ། བདག་དང་བདག་གིར་འབྲེལ་པ་ནི་ལྷས་བྱིན་དང་རྟ་ལྟ་བུའོ། །རང་བཞིན་དང་རྒྱུར་འབྲེལ་ནི་འཇིམ་པ་དང་བུམ་པ་ལྟ་བུའོ། །རྒྱུ་དང་རྒྱུ་ཅན་དུ་འབྲེལ་པ་ནི་རྫ་མཁན་དང་བུམ་པ་ལྟ་བུ། རྒྱུ་དང་འབྲས་བུར་འབྲེལ་པ་ནི་ས་བོན་དང་མྱུ་གུ་ལྟ་བུ། ཕ་དང་བུར་འབྲེལ་བ་ནི་ཡལ་ག་དང་ཤིང་ལྗོན་པ་ལྟ་བུ། ལྷན་ཅིག་བྱེད་པའི་འབྲེལ་བ་ནི་ངུར་པ་ཁྱོ་ཤུག་ལྟ་བུ། དགྲ་ཟླའི་འབྲེལ་པ་ནི་བྱ་རོག་དང་འུག་པ་ལྟ་བུ་ཞེས་ཟེར་བ་དང་རིག་པ་ཅན་པ་ལ་སོགས་པ་ནི་རྣམ་པ་ལྔར་འདོད་དེ། འབྱོར་པའི་མཚན་ཉིད་ཀྱིས་འབྲེལ་བ་ནི་དུ་བ་དང་མེ་ལྟ་བུ། ལྡན་པའི་མཚན་ཉིད་ཀྱིས་འབྲེལ་བ་ནི་དེ་ཉིད་དང་གཟུགས་ལྟ་བུ། འཕྲོད་པ་འདུ་བའི་མཚན་ཉིད་ཀྱིས་འབྲེལ་བ་ནི་དེ་ཉིད་དང་གཟུགས་དང་ལྡན་པ་ལྟ་བུ། འདུ་བའི་ལྡན་པའི་མཚན་ཉིད་ཀྱིས་འབྲེལ་བ་ནི་དཔེར་ན་དེ་ཉིད་དང་བུམ་པ་ལ་ཡོད་པའི་གཟུགས་ལ་སོགས་པའོ། །ལྡན་པའི་འཕྲོད་པའི་འདུ་བའི་མཚན་ཉིད་ཀྱིས་འབྲེལ་བ་ནི། དཔེར་ན་མེ་དེ་ཉིད་དང་དུ་བ་ལ་ཡོད་པའི་གཟུགས་ལ་སོགས་པ་དང་ལྡན་པ་ཉིད་དུ་ལྟ་བུའོ། །དེ་དག་གི་གཞུང་ལུགས་ནི་འབྲེལ་བ་དེ་དག་ཁོ་ནས་འབྲེལ་བའི་གཏན་ཚིགས་རྟོགས་པར་བྱེད་པ་ཡིན་ནོ། །སྤྱོད་པ་རྣམས་ནི་ཐམས་ཅད་མཁྱེན་པ་ལ་སོགས་པ་མི་དམིགས་པའི་ཕྱིར། མ་འོངས་པའི་དུས་ན་ཡང་དེའི་སྒོ་ནས་དེ་མེད་པར་ཤེས་ཏེ་ཞེས་དང་། རྒྱལ་དཔོག་པ་ལ་སོགས་པ། གང་དག་རང་གི་དམིགས་པ་ལ་སོགས་པ་རྒྱུ་མ་ཡིན་པ་དང་། ཁྱབ་པར་བྱེད་པ་མ་ཡིན་པ་དང་། འབྲས་བུ་མ་ཡིན་པ་བཀག་པ་དང་། ཚིགས་ལ་སོགས་པ་མངོན་སུམ་དང་། རྒྱུད་པས་ཀྱང་མི་འགལ་བ་བསྒྲུབ་པའི་སྒོ་ནས་ཐམས་ཅད་མཁྱེན་པ་ལ་སོགས་པ་འགོག་པར་བྱེད་པ་སྟེ། དེ་དག་ཀྱང་ཛི་ནི་མི་ཏྲས། རྗེས་སུ་དཔག་པའི་མཚན་ཉིད་ནི། །གྲངས་དང་ཡུལ་དང་རྒྱུ་འབྲས་དང་། །ཚུལ་དགུ་རྟགས་གསུམ་སྦྱོར་བ་དང་། །མི་དམིགས་པ་དང་བཅུ་བཞི་སྟེ། །སྤྱི་དང་དུས་དང་སྦྱོར་བའོ། །མདོར་ན་ཉི་ཤུ་དགུ་རུ་འདོད། །རྗེས་དཔག་མཚན་ཉིད་དྲུག་ཏུ་འདོད། །དེ་ཡི་གཉེན་པོ་རབ་ཏུ་བསྟན། །ཞེས་གསུངས་སོ། །གཉིས་པ་ལ། མཚན་ཉིད་དང་དབྱེ་བ་བཤད་པས་མདོར་བསྟན། རིགས་པའི་རྣམ་གྲངས་དུ་མས་རྒྱས་པར་བསྟན་པ་གཉིས་ལས། དང་པོ་ནི། མདོར། རང་དོན་ནི། ཚུལ་གསུམ་རྟགས་ལས་དོན་མཐོང་ཡིན། །རྣམ་ངེས་སུ། ཚུལ་གསུམ་པའི་རྟགས་ལས་རྗེས་སུ་དཔག་པར་བྱ་བ་རྟོགས་པ་གང་ཡིན་པ་དེ་ནི་རང་གི་དོན་གྱི་རྗེས་སུ་དཔག་པ་ཡིན་ཏེ། ཞེས་སམ། རིགས་ཐིགས་སུ། རང་གི་དོན་གྱི་རྗེས་སུ་དཔག་པར་བྱ་བ་ནི་ཚུལ་གསུམ་པའི་རྟགས་ལས་ཤེས་པ་གང་ཡིན་པའོ། །ཞེས་པའི་ཚུལ་གསུམ་པའི་རྟགས་ལས་སྐྱེས་ཤིང་རྗེས་སུ་དཔག་པར་བྱ་བ་དམིགས་པའི་ཤེས་པ་ནི་རང་དོན་རྗེས་དཔག་གི་མཚན་ཉིད་དོ་ཞེས་ཤེས་པར་བྱ་བའི་ཕྱིར་རོ། །འདིའི་དོགས་དཔྱོད། འཐད་ལྡན་དུ། རང་དོན་གྱི་རྗེས་སུ་དཔག་པ་ནི་ཚུལ་གསུམ་པ་གང་ལ་ཡོད་པ་ནི་ཚུལ་གསུམ་པའི་རྟགས་ཏེ། དེ་ལ་ལྐོག་ཏུ་གྱུར་པའི་དོན་མཐོང་བ་ནི་ཤེས་པ་སྟེ་ངེས་པ་ཡིན་ནོ། །གལ་ཏེ་ཚུལ་གསུམ་པའི་རྟགས་ལས་རང་བདག་ཉིད་ལ་ཡང་ཤེས་པ་སྐྱེ་བ་མ་ཡིན་ནམ། མདོ་ལས། ལྐོག་ཏུ་གྱུར་པའི་དོན་ནི་སྨོས་པ་མ་བྱས་ཏེ། དེས་ན་ཚུལ་གསུམ་པའི་རྟགས་སྨོས་པ་ཉིད་ཀྱིས་མཐོང་བ་རྗེས་སུ་དཔག་པར་ཐལ་བར་ཅིའི་ཕྱིར་མི་འགྱུར་ཞེ་ན། སྨྲས་པ། རྟགས་ནི་གོ་བར་བྱེད་པ་ཡིན་ལ། གོ་བར་བྱེད་པ་ཡང་སྒྲུབ་པར་བྱེད་པ་དང་འབྲེལ་ཤེས་ཤིང་དྲན་པ་ཡིན་ཏེ། དེ་ཉིད་ཀྱི་ཕྱིར་དྲན་པས་བར་དུ་ཆོད་པའི་རྟགས་ཀྱི་དོན་གོ་བར་བྱེད་པར་འདོད་པ་ཡིན་ཏེ། བསྒྲུབ་བྱ་མེད་ན་མི་འབྱུང་བ་དྲན་པས་བར་ཆོད་པའི་ཕྱིར་རོ། །དེའི་རང་གི་ཡུལ་གྱི་མཐོང་བ་སྐྱེས་པའི་དུས་ན་རྟགས་ཉིད་དངོས་པོ་ཉིད་ཡིན་ཏེ། ད་དུང་དུ་ཡང་རྟགས་སུ་གྲུབ་པ་ནི་མ་ཡིན་ནོ། །འབྲེལ་པ་མཐོང་ཞིང་དྲན་པ་སྐྱེས་པའི་ཤེས་པ་གང་ཡིན་པ་དེ་ནི་ཤུགས་ཀྱིས་རྟགས་ཀྱི་ཤེས་པ་ལས་གཞན་ཉིད་དུ་གྱུར་པ་ལྐོག་ཏུ་གྱུར་པའི་ཡུལ་ཅན་དུ་གནས་སོ། །ཤུགས་ཀྱིས་ཐོབ་པ་དེ་ཉིད་སྟོན་པ་ནི། རྗེས་སུ་དཔག་པར་བྱ་བ་ཤེས་པ་དེ་ནི་རང་གི་དོན་གྱི་རྗེས་སུ་དཔག་པ་ཡིན་ནོ། །ཞེས་བྱ་བ་ཡིན་ཏེ་ཞེས་པས་སོ། །དེའི་འབྲས་བུ་རྣམ་པར་གཞག་པ་ནི་མངོན་སུམ་བཞིན་ནོ། །ཞེས་རྣམ་པར་ངེས་པར་གསུངས་པས། མངོན་སུམ་ལ་ཤེས་པ་དེ་ཉིད་ཚད་མ་དང་འབྲས་བུར་བཤད་པ་བཞིན། འདིར་ཡང་དོན་གཏན་ལ་འབེབས་པའི་རང་བཞིན་ཅན་ཡིན་པའི་ཕྱིར་རྗེས་དཔག་ཉིད་འབྲས་བུ་དང་། རྗེས་སུ་དཔག་པ་དོན་དང་འདྲ་བར་སྐྱེས་པ་ཉིད་ཚད་མ་སྟེ་དེའི་དབང་གིས་དོན་གཏན་ལ་འབེབས་པ་གྲུབ་པའི་ཕྱིར་རོ། །ཡུལ་གྱི་ལོག་པར་རྟོག་པ་སྔར་བསལ་ཟིན་ཏོ། །ཤེས་པ་དེ་རྟགས་ཡང་དག་ལ་རག་ལུས་པ་ཉིད་ཀྱི་ཕྱིར་དེའི་མཚན་ཉིད་སྟོན་པར་བཞེད་ནས། ཕྱོགས་ཆོས་དེ་ཆས་ཁྱབ་པ་ཡི། །གཏན་ཚིགས། འདིས་ཚུལ་གསུམ་པ་ཅན་གྱི་གཏན་ཚིགས། གཏན་ཚིགས་ཡང་དག་གི་མཚན་ཉིད་དུ་བཞག་གོ །རྟགས་ཞེས་པའི་སྒྲ་ནི་གོ་བར་བྱེད་པའོ། །ཚུལ་གསུམ་གང་ཞེ་ན། མདོར། རྗེས་དཔག་བྱ་དང་དེ་མཚུངས་ལ། །ཡོད་དང་མེད་ལ་མེད་པའོ། །ཞེས་པས། རིགས་ཐིགས་སུ། རྗེས་སུ་དཔག་པར་བྱ་བ་ལ་ཡོད་པ་ཉིད་དང་། མཐུན་པའི་ཕྱོགས་ཉིད་ལ་ཡོད་པ་དང་། མི་མཐུན་པའི་ཕྱོགས་ལ་མེད་པ་ཉིད་དུ་ངེས་པའོ། །རྗེས་སུ་དཔག་པར་བྱ་བ་ནི་འདིར་ཤེས་པར་འདོད་པའི་བྱེ་བྲག་དང་ལྡན་པའི་ཆོས་ཅན་ནོ། །མཐུན་པའི་ཕྱོགས་ནི་བསྒྲུབ་པར་བྱ་བའི་ཆོས་ཀྱི་སྤྱི་དང་དོན་མཐུན་པ་ཡིན་ནོ། །མི་མཐུན་པའི་ཕྱོགས་ནི། མཐུན་པའི་ཕྱོགས་མ་ཡིན་པ་སྟེ། དེ་ལས་གཞན་པ་དང་། དེ་དང་འགལ་བ་དང་། དེ་མེད་པའོ་ཞེས་གསུངས་པའི་དང་པོ། གཏན་ཚིགས་ཐིགས་པར། ཕྱོགས་ནི་ཆོས་ཅན་ཏེ་ཡན་ལག་ལ་སྤྱི་ཉེ་བར་བཏགས་པའི་ཕྱིར་རོ། །གལ་ཏེ་དགོས་པ་མེད་པའི་ཕྱིར་ཉེ་བར་གདགས་པར་མི་བྱའོ་ཞེ་ན། མ་ཡིན་ཏེ་ཉེ་བར་བཏགས་པ་ནི་ཆོས་ཅན་གྱི་ཆོས་ཐམས་ཅད་དགག་པའི་ཕྱིར་ཏེ། དེ་ལྟར་ན་མིག་གིས་གཟུང་བར་བྱ་བ་ཡིན་པའི་ཕྱིར་ཞེས་བྱ་བ་ལ་སོགས་པ་སྤངས་སོ། །ཞེས་གལ་ཏེ་ཕྱོགས་ཀྱི་ཆོས་ཉིད་ཡིན་ན་དེའི་ཁྱད་པར་ལ་བལྟོས་པ་གཞན་དུ་མི་འཇུག་གོ་ཅེ་ན། མ་ཡིན་ཏེ་རྣམ་པར་དཔྱད་པ་བྱེ་བྲག་ཏུ་བྱས་པའི་ཕྱིར་དཔེར་ན་ནག་པ་གཞུ་ཐོགས་སོ་ཞེས་བྱ་བ་ལྟ་བུ་ཡིན་གྱི། དཔེར་ན་སྲིད་སྒྲུབ་གཞུ་ཐོགས་པ་ལྟ་བུ་ཞེས་གཞན་དང་འབྲེལ་བ་རྣམ་པར་དཔྱད་པ་ནི་མ་ཡིན་ནོ། །ཞེས་གསུངས་པ་དེའི་དོན། འཆད་པར་འགྱུར་བའི་མཚན་ཉིད་རྗེས་སུ་དཔག་པར་བྱ་བ་དེ་ལ་རྟགས་ཡོད་པ་ཉིད་དུ་ངེས་པ་ནི་ཚུལ་དང་པོ་དེའི་ཟུར་གྱིས་ཡོད་པའི་སྒྲས་ནི་མིག་གིས་གཟུང་བར་བྱ་བ་ཡིན་པའི་ཕྱིར་ཞེས་བྱ་བ་ལ་སོགས་མ་གྲུབ་པ་བསལ་བ་ཡིན་ནོ། །ཉིད་ཀྱི་སྒྲས་ཇི་ལྟར་ལྗོན་ཤིང་སྲོག་དང་བཅས་པ་ཡིན་ཏེ་ཉལ་བའི་ཕྱིར་རོ་ཞེས་ཕྱོགས་གཅིག་ལ་མ་གྲུབ་པ་བསལ་བ་ཡིན་ནོ། །ཡོད་པའི་དེ་མ་ཐག་ཏུ་ཉིད་སྨོས་པ་ནི་ཐུན་མོང་མ་ཡིན་པའི་ཆོས་བསལ་བ་ཡིན་ཏེ། གཞན་རྗེས་སུ་དཔག་པར་བྱ་བ་ཉིད་ལ་ཡོད་པ་ཞེས་བྱས་ན་མཉན་པར་བྱ་བ་ཁོ་ན་གཏན་ཚིགས་ཡིན་པར་འགྱུར་རོ། །འདིར་ངེས་པའི་སྒྲ་མ་སྨོས་ཀྱང་མཐའ་མར་བཤད་པས་གོང་མ་གཉིས་ལ་ཡང་མཚུངས་པར་རྟོགས་སླ་བས་སོ། །ངེས་པ་ཞེས་སྦྱར་བས་ཐེ་ཚོམ་ཟ་བའི་མ་གྲུབ་པ་ཐམས་ཅད་བསལ་བ་ཡིན་ནོ། །ཕྱོགས་སམ་རྗེས་སུ་དཔག་པར་བྱ་བའི་སྒྲ་རྣམ་པ་གསུམ་ལ་འཇུག་སྟེ། གཏན་ཚིགས་ཀྱི་མཚན་ཉིད་གཏན་ལ་འབེབས་པའི་སྐབས་འདིར་ཆོས་ཅན་ལ་དང་། གཞན་བསྒྲུབ་པར་བྱ་བ་ཁོང་དུ་ཆུད་པར་བྱ་བའི་ཚེ་ནི་ཆོས་དང་ཆོས་ཅན་གྱི་སྤྱི་ལ་དང་། ཁྱབ་པ་ངེས་པར་བྱེད་པའི་ཚེ་ནི་ཆོས་ལ་སྟེ་བར་མ་དངོས་དང་ཐོག་མཐའ་གཉིས་ལ་བཏགས་པས་འཇུག་པའོ། །ཐོག་མ་འདིའི་སྐབས་སུ་སྤྱི་ནི་ཕྱོགས་མ་ཡིན་ཏེ་དེ་ལྟ་བུའི་སྤྱི་ལ་རྟགས་མ་གྲུབ་པའི་ཕྱིར་དང་། གྲུབ་ན་ཡང་རྟགས་ཡིན་ཏེ་བསྒྲུབ་པར་བྱ་བ་མེད་པའི་ཕྱིར་རོ། །ཆོས་ཙམ་ཡང་འདིར་ཕྱོགས་མ་ཡིན་ཏེ་རྗེས་སུ་འགྲོ་བ་དང་ལྡོག་པའི་སྒོ་ནས་དེ་ལྟ་བུའི་ཆོས་ཙམ་ལ་ཡོད་པ་གདོད་འཆད་པར་འགྱུར་བའི་ཕྱིར་རོ། །དེ་བས་ན་ཆོས་ཅན་ཁོ་ན་ལ་ཕྱོགས་སམ་རྗེས་སུ་དཔག་པར་བྱ་བ་ཞེས་ཁྱད་པར་དུ་བྱས་པ་ཡིན་ནོ། །དཔེར་ན་ནག་པ་འཕོང་སྐྱེན་པར་འཇིག་རྟེན་ན་མ་གྲགས་པས་དེ་འཕོང་མི་སྐྱེན་པར་རྟོག་པ་རྣམ་པར་བཅད་པའི་དོན་དུ་གཞུ་ཐོགས་སོ་ཞེས་འཕོང་སྐྱེན་པ་བསྒྲུབ་པའི་ཕྱིར་སྨྲ་བས་མ་འབྲེལ་བ་བཅད་ལ། སྲིད་སྒྲུབ་འཕོང་སྐྱེན་པར་གྲགས་པས་དེ་གཞུ་ཐོགས་སོ་ཞེས་འཕོང་སྐྱེན་པ་སྐྱེས་བུ་གཞན་དང་ཐུན་མོང་དུ་རྟོག་པ་རྣམ་པར་བཅད་པས་འབྲེལ་བ་རྣམ་པར་བཅད་པར་སོང་བ་བཞིན། འདིར་ཡང་ཆོས་ཅན་ལ་ཕྱོགས་ཞེས་བཏགས་པས་དེ་ཕྱོགས་སུ་བསྒྲུབ་པ་ཡིན་པའི་ཕྱིར་མི་ལྡན་པ་རྣམ་གཅོད་དུ་སོང་ངོ་། །རྒྱུ་དེས་ཆོས་ཅན་ཆོས་ཀྱི་ཁྱད་པར་དུ་འགྱུར་རོ། །དེས་ན་ཆོས་ཅན་ཆོས་ཀྱི་ཁྱད་པར་གྱིས་ཆོས་དཔེ་ལ་རྗེས་སུ་འགྲོ་བ་མེད་པའི་སྐྱོན་ཡང་མེད་དེ། དེས་སྔ་མ་ཁྱད་པར་དང་ཕྱི་མ་ཁྱད་པར་ཅན་གྱི་དངོས་པོར་འགྱུར་བས་དེ་ལ་རྗེས་སུ་འགྲོ་བ་མེད་པའི་སྐྱོན་སྤངས་པ་ཡིན་ནོ། །གཉིས་པ་ཆོས་ཅན་ཆོས་ཀྱི་སྤྱིའི་ཕྱོགས་གཅིག་ཆོས་ལ་ཁྱབ་པའི་དུས་ན་ཉེ་བར་བརྟགས་ནས་བསྒྲུབ་བྱར་བརྗོད་པ་ནི་འབྲེལ་བ་རྣམ་པར་གཅོད་པས་ཕྱོགས་བསྒྲུབ་པར་བྱ་བའི་ཕྱིར་ཡིན་ནོ། །དེས་སྤྱིའི་ཕྱོགས་གཅིག་དང་ཆོས་ཙམ་ཁྱད་པར་མེད་པ་བསྒྲུབ་བྱར་བརྗོད་པ་ཡིན་ནོ་ཞེས་གང་སྨྲས་པ་དེ་བསལ་བ་ཡིན་ཏེ། ཆོས་དང་ཆོས་ཅན་བསྡུས་པ་ལས་འདིར་ལྡན་པ་རྣམ་གཅོད་གཞན་མེད་པའི་ཕྱིར་རོ། །དེ་བས་སྤྱིའི་ཕྱོགས་གཅིག་གིས་མི་ལྡན་པ་རྣམ་པར་བཅད་པའི་ཁྱད་པར་ཅན་མ་ཡིན། ཁྱད་པར་དང་བྲལ་བ་ཉིད་དུ་གྱུར་པ་ཁྱབ་པའི་དུས་སུ་བསྒྲུབ་བྱ་ཉེ་བར་བརྗོད་པ་ཡིན་ལ། སྤྱི་ཡང་དེ་ཉིད་ཡིན་པས་བསྒྲུབ་པར་བྱ་བའི་ཆོས་ཀྱི་སྤྱིས་ཕྱོགས་དང་མཚུངས་པ་ནི་མཐུན་པའི་ཕྱོགས་ཡིན་ནོ། །མཐུན་པ་ནི་མཚུངས་པའོ། །བསྒྲུབ་པར་བྱ་བ་ཡང་འདི་མ་གྲུབ་པ་ཡིན་པའི་ཕྱིར་དང་ཆོས་ནི་གཞན་ལ་བརྟེན་པའི་ཕྱིར་བསྒྲུབ་པར་བྱ་བའི་ཆོས་སོ། །བྱེ་བྲག་བསྒྲུབ་པར་བྱ་བ་མ་ཡིན་གྱི་སྤྱི་བསྒྲུབ་བྱར་བསྟན་པས་ན་མཐུན་ཕྱོགས་དེ་ཉིད་ལ་ཡོད་པ་ཉིད་དུ་ངེས་པ་ནི་ཚུལ་གཉིས་པ་ཡིན་ནོ། །འདིར་ཡང་ཡོད་སྒྲས་འགལ་བ་བསལ་ཏེ་དེ་མཐུན་ཕྱོགས་ལ་མེད་པས་སོ། །ཉིད་སྨོས་པས་ཐུན་མོང་གི་མ་ངེས་པ་རྣམས་བསལ་ཏེ། དེ་ནི་མཐུན་ཕྱོགས་ཁོ་ན་ལ་ཡོད་པ་མ་ཡིན་གྱི། འོ་ན་ཅི་ཞེ་ན་གཉི་ག་ལ་ཡང་ཡོད་པས་སོ། །མཐུན་ཕྱོགས་ཉིད་ལ་ཞེས་ངེས་པར་གཟུང་བ་སྔར་སྨོས་ན་ནི་ཡོད་པ་ཡིན་ཡང་མཐུན་པའི་ཕྱོགས་ལ་མ་ཁྱབ་པ་རྩོལ་བ་ལས་བྱུང་བ་དག་ཀྱང་གཏན་ཚིགས་ཉིད་དུ་བསྟན་པ་ཡིན་ནོ། །ཕྱིས་ངེས་གཟུང་བྱས་ན་དོན་འདིར་འགྱུར་ཏེ་གང་ཞིག་མཐུན་ཕྱོགས་ལ་ཡོད་པ་ཉིད་དེ་གཏན་ཚིགས་ཡིན་ནོ་ཞེས་བྱ་བར་སོང་བས་རྩོལ་བ་ལས་བྱུང་བ་གཏན་ཚིགས་མ་ཡིན་པར་འགྱུར་རོ། །ངེས་པ་ཞེས་པས་སྨྲ་བའི་ཕྱིར་འགའ་ཞིག་ཐམས་ཅད་མཁྱེན་པ་ཡིན་ནོ། །ཞེས་རྗེས་སུ་འགྲོ་བ་ལ་ཐེ་ཚོམ་ཟ་བའི་མ་ངེས་པ་ཉིད་བསལ་ལོ། །མི་མཐུན་པའི་ཕྱོགས་འཆད་པར་འགྱུར་བའི་མཚན་ཉིད་དེ་ལ་མེད་པ་ཉིད་དུ་ངེས་པ་ནི་རྟགས་ཚུལ་གསུམ་པ་སྟེ། དེ་ཡང་རྣམ་ངེས་སུ། དེ་བཀག་པ་ཙམ་ནི་མི་མཐུན་པའི་ཕྱོགས་མ་ཡིན་ནོ། །འོ་ན་ཅི་ཞེ་ན་བཟློག་པའི་མེད་པ་དང་མ་ཡིན་པ་ཐམས་ཅད་དེ། མི་མཐུན་པའི་ཕྱོགས་ཀྱི་མཚན་ཉིད་ནི་དེ་ཉིད་མ་ཡིན་པའི་ཕྱིར་ཞེས་དེའི་ཕྱོགས་ལས་གཞན་པ་དང་། དེ་དང་འགལ་བ་ནི་ཇི་སྲིད་དུ་ཕྱོགས་ཀྱི་ངོ་བོ་མེད་པ་མི་ཤེས་པ་དེ་སྲིད་དུ་ངེས་པར་མི་ནུས་ལ། དེ་བས་ནི་མེད་པ་ནི་དངོས་སུ་མཐུན་པའི་ཕྱོགས་མེད་པའི་ངོ་བོ་རྟོགས་པ་ཡིན་ལ་གཞན་པ་དང་འགལ་བ་གཉིས་ཤུགས་ཀྱིས་སོ། །མེད་སྒྲས་འགལ་བ་བསལ་ཏེ་འགལ་བ་ནི་མི་མཐུན་ཕྱོགས་ལ་ཡོད་པ་ཡིན་ན། ཉིད་ཀྱིས་མི་མཐུན་པའི་ཕྱོགས་གཅིག་ལ་ཐུན་མོང་དུ་ཡོད་པ་བསལ་བ་ཡིན་ཏེ། རྩོལ་བྱུང་དུ་བསྒྲུབ་པ་ལ་མི་རྟག་པ་ཉིད་ལྟ་བུའོ། །མེད་པའི་སྒྲའི་སྔ་རོལ་ཏུ་ཉིད་ཅེས་བྱས་ན། མི་མཐུན་པའི་ཕྱོགས་ལ་མེད་པ་གང་ཡིན་པ་དེ་གཏན་ཚིགས་ལ་རྩོལ་བ་ལས་བྱུང་བ་གཏན་ཚིགས་ཡིན་པ་སྤངས་པར་འགྱུར་བས་སོ། །ངེས་པས་མི་མཐུན་ཕྱོགས་ལས་བཟློག་པ་ལ་ཐེ་ཚོམ་ཟ་བ་བསལ་ལོ། །ཅི་མཐུན་ཕྱོགས་ལ་ཡོད་པ་ཞེས་སྨོས་པས་མི་མཐུན་ཕྱོགས་ལ་མེད་པ་ཉིད་དོ་ཞེས་ཁོང་དུ་ཆུད་པ་མ་ཡིན་ནམ་ཅིའི་ཕྱིར་གཉི་ག་བཟུང་ཞེ་ན་རྗེས་སུ་འགྲོ་བའམ་ལྡོག་པ་ངེས་པ་དང་ལྡན་པ་ཁོ་ན་རབ་ཏུ་སྦྱར་བར་བྱ་ཡི་གཞན་ལ་ནི་མ་ཡིན་ནོ་ཞེས་བསྟན་པའི་ཕྱིར་རོ། །གཏན་ཚིགས་ཐིགས་པར། དེའི་ཆ་ནི་དཔེའི་ཆོས་སོ། །དེ་ལ་ཁྱབ་པར་བྱེད་པ་ཡོད་པ་ཁོ་ནའམ་ཡང་ན་དེ་ཁོ་ན་ལ་ཁྱབ་པར་བྱ་བ་ཡོད་པས་འདིས་རྗེས་སུ་འགྲོ་བའམ་བཟློག་པ་དང་། ཕྱོགས་ཀྱི་ཆོས་རང་གི་ཚད་མ་ཇི་ལྟ་བ་དག་གི་ངེས་པ་བཤད་པ་ཡིན་ནོ། །དབྱེ་བ་སྟོན་པའི་ཕྱིར་དེ་ནི་རྣམ་གསུམ་ཉིད། ཚུལ་གསུམ་པའི་རྟགས་དེ་ཡང་། འབྲས་རང་མ་དམིགས་པའི་གཏན་ཚིགས་གསུམ་ཡོད་པ་བསྒྲུབ་པར་བྱ་བ་ལ་གཉིས་དང་དགག་པ་བསྒྲུབ་པར་བྱ་བ་གཅིག་གོ །དེ་གསུམ་ཡང་། མེད་ན་མེད་འབྱུང་ངེས་ཕྱིར་རོ། །གཏན་ཚིགས་ལྟར་སྣང་དེ་ལས་གཞན། །གཏན་ཚིགས་ཐམས་ཅད་ལ་བསྒྲུབ་པར་བྱ་བའི་ཆོས་མེད་ན་ཁྱབ་པ་མི་འགྲུབ་པའི་ཕྱིར་རམ། ཡང་ན་ཁྱབ་པར་བྱེད་པ་མེད་ན་ལོག་ན་ལྡོག་པ་མེད་པའི་ཕྱིར་རོ། རྗེས་སུ་འགྲོ་བ་དང་ལྡོག་པ་ངེས་པ་དག་གིས་ནི། དེའི་ཆས་ཁྱབ་པ་ངེས་པ་ཡིན་ནོ། །ཞེས་སོ། །ངེས་པ་ཡང་གང་ཡིན་ཞེ་ན། དེ་ཉིད་དུ། དེ་ལ་བསྒྲུབ་པར་བྱ་བའི་ཆོས་ཅན་ལ་ཕྱོགས་ཀྱི་ཆོས་མངོན་སུམ་མམ་རྗེས་སུ་དཔག་པའི་སྒོ་ནས་རབ་ཏུ་གྲུབ་པ་ནི་ངེས་པ་སྟེ། ཞེས་པས་དེའོ། །ཚད་མ་རྣམ་པ་གཉིས་ཀྱི་ཇི་ལྟར་གྲུབ་པ་ཡང་དེ་ཉིད་དུ། དཔེར་ན་ཕྱོགས་ན་དུ་བའམ། སྒྲ་ལས་བྱས་པ་ཉིད་ལྟ་བུའི་དུ་བ་དང་བཅས་པའི་ཕྱོགས་དོན་གཞན་གྱིས་དབེན་པའི་ངོ་བོ་ཅན་ཐུན་མོང་མ་ཡིན་པའི་བདག་ཉིད་དུ་མངོན་སུམ་གྱིས་མཐོང་བ་ལ། ཇི་ལྟར་མཐོང་བ་ཐ་དད་པའི་ཡུལ་ཅན་དྲན་པ་རྟགས་ཤེས་པ་སྐྱེའོ། །དེ་ལས་དང་པོའི་ཡུལ་ཐུན་མོང་མ་ཡིན་པ་མཐོང་བ་གང་ཡིན་པ་ཁོ་ན་ཚད་མ་ཡིན་ནོ། །དེ་དེ་ལྟར་མཐོང་ནས་མངོན་སུམ་གྱི་སྟོབས་ཀྱིས་དེ་གང་དང་གང་གིས་ཐུན་མོང་མ་ཡིན་པ་དེའི་ཐུན་མོང་མ་ཡིན་པ་ཉིད་ལས་ཐ་དད་པར་བརྗོད་པ་དེ་མ་ཡིན་པ་ལས་ལོག་པའི་ཡུལ་ཅན་གྱི་དྲན་པ་སྐྱེས་པ་ནི། ཇི་ལྟར་ཡོངས་སུ་མཐོང་བའི་རྣམ་པ་འཛིན་པའི་ཕྱིར་ཚད་མ་མ་ཡིན་ཏེ། སྔར་ཐུན་མོང་མ་ཡིན་པ་མཐོང་ནས་ཐུན་མོང་མ་ཡིན་པའོ་ཞེས་མངོན་པར་བརྗོད་པས་ནི། སྔོན་མ་རྟོགས་པའི་དོན་རྟོགས་པ་མེད་པའི་ཕྱིར་དོན་བྱེད་པ་བསྒྲུབ་པ་མཐོང་བ་ཟིན་པའི་ཕྱིར་རྣམ་པར་རྟོག་པས་ནི་རྗེས་སུ་དཔག་པ་བཞིན་དུ་དེ་བསྒྲུབ་པའི་རང་གི་ངོ་བོ་མ་མཐོང་བ་ཡང་རྟོག་པ་མེད་པའི་ཕྱིར་རོ། །ཞེས་སོ། །གཉིས་པ་རིག་པའི་རྣམ་གྲངས་དུ་མས་རྒྱས་པར་བཤད་པ་ལ། དེ་ནི་རྣམ་པ་གསུམ་ཉིད། ཅེས་བྱ་བའི་རྒྱས་བཤད། མེད་ན་མི་འབྱུང་ངེས་ཕྱིར་རོ། །ཞེས་པའི་རྒྱས་བཤད་གཉིས་ལས། དང་པོ་ནི། རྒྱུ་ལ་རང་བཞིན་ཇི་སྙེད་ཅིག །མེད་ན་མི་འབྱུང་འབྲས་བུ་ནི། །གཏན་ཚིགས། རྒྱུ་ལ་རང་བཞིན་ཇི་སྙེད་ཅིག་ཡོད་པ་ལས་གང་མེད་ན་དེ་མི་འབྱུང་བ་དེའི་འབྲས་བུ་ནི་རྟགས་ཡང་དག་ཏུ་འགྱུར་ཏེ། དེ་ལ་དེ་འབྲས་བུར་ངེས་པས་སོ། །འདིས་ནི་དངོས་པོ་ལ་བསྐྱེད་བྱ་སྐྱེད་བྱེད་ཀྱི་དངོས་པོ་ཡོད་དོ་ཞེས་དེ་ཙམ་གྱིས་ནི་གོ་བྱ་གོ་བྱེད་ཀྱི་དངོས་པོ་མ་ཡིན་ནོ། །འོ་ན་ཅི་ཞེ་ན། བསྐྱེད་བྱ་སྐྱེད་བྱེད་ཀྱི་དངོས་པོར་ངེས་པ་ནི་གོ་བྱ་གོ་བྱེད་ཀྱི་རྒྱུ་མཚན་ཡིན་ནོ། །རྒྱུ་ལ་མེད་པའི་ཁྱད་པར་རྣམས་གོ་བར་བྱ་བ་ཉིད་དུ་བསྒྲུབས་ནས་འབྲས་བུ་ལ་ཡོད་པའི་སྤྱི་ཡང་གོ་བར་བྱེད་པ་ཉིད་དུ་བསྟན་པའི་ཕྱིར། རྣམ་ངེས་སུ། གལ་ཏེ་ཆ་ཤས་ཀྱིས་བསྐྱེད་པར་བྱ་བ་དང་སྐྱེད་པར་བྱེད་པ་ཉིད་དུ་ཐལ་བར་འགྱུར་རོ། །ཞེ་ན་མ་ཡིན་ཏེ། དེ་བསྐྱེད་པར་བྱ་བའི་ཁྱད་པར་དང་། རྟགས་ཀྱི་བྱེ་བྲག་གི་ཁྱད་པར་ཅན་གྱི་སྤྱི་རྣམས་གཟུང་ན་འདོད་པའི་ཕྱིར་རོ། །སྤྱི་ཁྱད་པར་དུ་མ་བྱས་པ་བརྗོད་པར་འདོད་ན་ནི་འཁྲུལ་པའི་ཕྱིར་མི་འདོད་དོ། །ཞེས་གསུངས་སོ། །འདིས་རྟོགས་པ་པོ་ཐམས་ཅད་ཀྱང་མཐོང་བའི་དངོས་པོ་ལ་སྤྱིའི་རྣམ་པར་རྟོག་པར་འགྱུར་ལ། ཁྱད་པར་ངེས་པ་ནི་ཕྱིས་འགྱུར་རོ། །དེ་ལ་ཉེ་བར་གཟུང་བའི་སྤྱི་གང་ཡིན་པ་དེ་ནི་མ་སྤངས་པ་ཉིད་དོ། །དེའི་ཕྱིར་རྟོགས་པ་པོའི་ཞེན་པའི་ངོར་ཁྱད་པར་གྱིས་ཟིན་པའི་སྤྱི་གོ་བར་བྱེད་ལ་ཁྱད་པར་བསྒྲུབ་པའི་ཕྱིར་ནི་མ་ཡིན་ནོ། །རྒྱུ་འབྲས་ཀྱི་དངོས་པོ་ངེས་པ་ཡང་། གང་ལ་དོན་འདི་ནི་སྐྱེ་བཞིན་པའི་རང་བཞིན་ཡིན་ལ། འདི་ནི་སྐྱེས་ཟིན་པའོ། །ཞེས་རྣམ་པར་འབྱེད་པའི་ནུས་པར་ཡོད་པ་དེའི་དབང་དུ་བྱས་པའི་ཕྱིར་རོ། །ཚུལ་གསུམ་པ་ཅན་གྱི་འབྲས་རྟགས། འབྲས་རྟགས་ཡང་དག་གི་མཚན་ཉིད། མཚན་གཞི་ནི། དུ་བ་ཡོད་པའི་ཕྱིར་དེ་ན་མེ་ཡོད་དོ་ཞེས་པ་ལྟ་བུ། རྣམ་ངེས་སུ། འབྲས་བུ་ཡང་རང་བཞིན་འབྲེལ་བ་ཡིན་ཏེ་དེའི་རང་བཞིན་དེ་ལས་གྱུར་པའི་ཕྱིར་རོ། །ཞེས་སོ། །རང་བཞིན་ཡོད་ཙམ་དང་། །འབྲེལ་བ་ཅན་གྱི་ངོ་བོ་ཡང་། །ཡོད་ཙམ་ཞེས་པ་ནི། འབྲས་བུའི་རྟགས་བཞིན་གཞན་ལ་རག་ལས་པ་བཅད་ནས། བསྒྲུབ་བྱ་ཡོད་པ་ཙམ་དང་རྗེས་སུ་འབྲེལ་བ་ཉིད་ཀྱིས་བདག་ཉིད་ཡང་རང་བཞིན་གོ་བར་བྱེད་པས་རང་བཞིན་གྱི་རྟགས་སོ། །དོན་རྟགས་ཆོས་རང་བཞིན་གཅིག་ཅེས་པའོ། །རྟགས་དེ་ཡང་རྣམ་ངེས་སུ། རང་བཞིན་དེ་ཡང་གལ་ཏེ་རང་གིས་བསྒྲུབ་པར་བྱ་བའི་ཆོས་ཀྱིས་ཁྱབ་པ་ཚད་མས་ངེས་ན་ནི་དེའི་ཚེ་གོ་བར་བྱེད་པ་ཡིན་ནོ། །ཞེས་སོ། །ཆོས་མཆོག་གིས། འོ་ན་བསྒྲུབ་པར་བྱ་བའི་རང་བཞིན་སྒྲུབ་པར་བྱེད་པ་ཡིན་ནོ། །བསྒྲུབ་པར་བྱ་བ་དང་སྒྲུབ་པར་བྱེད་པ་ཐ་མི་དད་པའི་ཕྱིར་དམ་བཅས་པའི་དོན་གྱིས་ཕྱོགས་གཅིག་གཏན་ཚིགས་སུ་འགྱུར་རོ་ཞེ་ན། དངོས་སུ་ན་ཞེས་བྱ་བ་སྨོས་ཏེ་དེ་གཉིས་དོན་དམ་པར་ན་ཡོད་པའི་ཚུལ་གྱིས་ཐ་དད་པ་མ་ཡིན་ནོ། །རྣམ་པར་རྟོག་པ་སྒྲོ་བཏགས་པའི་ངོ་བོ་ལ་བལྟོས་ནས་ནི་བསྒྲུབ་པར་བྱ་བ་དང་། སྒྲུབ་པར་བྱེད་པ་ཐ་དད་པ་ཡིན་ཏེ། ངེས་པ་ལ་བལྟོས་པ་ཉིད་གོ་བར་བྱེད་པའི་དངོས་པོ་ཡིན་པའི་ཕྱིར་རོ་ཞེས་གསུངས་པ་བཞིན་ནོ། །གང་དུ་རང་བཞིན་གྱི་སྒྲའམ་ཡོད་པའི་སྒྲས་རང་གི་ངོ་བོ་ཉེ་བར་བཀོད་པ་དེ་ཉིད་རང་བཞིན་གྱི་གཏན་ཚིགས་སུ་འགྱུར་བ་ནི་མ་ཡིན་གྱི། ཁྱད་པར་དང་འབྲེལ་བའི་དོན་བརྗོད་པའི་སྒྲས་བསྒྲུབ་བྱ་ལས་ཐ་དད་མེད་པའི་སྒྲུབ་པར་བྱེད་པའི་ཆོས་གང་ཅི་བཀོད་པ་དེ་ཐམས་ཅད་རང་བཞིན་ཉིད་དོ། །རང་བཞིན་དེ་ཡང་གཏན་ཚིགས་དེ་དང་བསྒྲུབ་བྱའི་ཆོས་ལ་ཁྱབ་པའི་རྗེས་སུ་འགྲོ་བ་ཚད་མས་ངེས་པ་ཡིན་པ་དེ་ལྟ་ན་དེ་གོ་བར་བྱེད་པ་ཡིན་ནོ། །ཁྱབ་པར་བྱ་བ་ཉིད་དུ་ངེས་པའི་ཁྱབ་པར་བྱ་བ་ནི་གོ་བར་བྱ་བའོ། །རིམ་པ་བཞིན་རྗེས་སུ་བྱེད་པ་པོ་དང་རྗེས་སུ་བྱེད་པ་ཡིན་ལ། ངེས་པ་དེ་དག་ཉིད་ལྡོག་པར་བྱེད་པ་དང་ལྡོག་པར་བྱ་བ་ཡང་ཡིན་ནོ། །ཚུལ་གསུམ་པ་ཅན་གྱི་རང་བཞིན་རྟགས། རང་བཞིན་གྱི་རྟགས་ཡང་དག་གི་མཚན་ཉིད། མཚན་གཞི། ཤིང་ཤ་པ་ཡིན་པའི་ཕྱིར་འདི་ནི་ཤིང་ངོ་ཞེས་པ་ལྟ་བུའོ། །ཤིང་ཤ་པ་ནི་ཨ་ཀ་རུའོ། །དེའི་དབྱེ་བ་ཡང་འདི་ཉིད་དུ། རང་བཞིན་ཁྱད་པར་བྱེ་བྲག་ལ། །བལྟོས་པའམ་འོན་ཏེ་འབའ་ཞིག་པ། །ཞེས་དང་། རྣམ་ངེས་སུ། ཁྱད་པར་བལྟོས་དང་དག་པ་སྟེ། །ཞེས་པ་ཁྱད་པར་གཞན་ལ་བལྟོས་པ་དང་དག་པའམ་འབའ་ཞིག་པ། རང་བཞིན་དུ་གྱུར་པའི་ཆོས་ཀྱི་བྱེ་བྲག་ལ་བལྟོས་པ་གསུམ་བཤད་དོ། །མཚན་གཞི་རིམ་པ་བཞིན། དཔེར་ན་འཇིག་པ་མི་རྟག་པར་སྒྲུབ་པ་ལ་བྱས་པ་བཀོད་པ་དང་། དོན་དམ་པར་ཡོད་པ་དང་སྐྱེ་བ་རྟགས་སུ་བཀོད་པ་ལྟ་བུ། སྔ་མ་ནི་རང་གི་ངོ་བོ་ཡོད་པ་ནི། རྒྱུ་དང་རྐྱེན་དག་གི་བྱེད་པ་ལ་བལྟོས་པས་ན། བྱས་པར་བརྗོད་པ་ཡིན་པའི་ཕྱིར་དེ་ཁྱད་པར་གཞན་ལ་བལྟོས་པ་ཞེས་བྱའོ། བར་མ་ཡོད་པའི་སྒྲས་ནི་དོན་བྱེད་པ་ཉིད་བརྗོད་ཀྱིས་གཞན་མ་བརྗོད་པས་དག་པ་ཞེས་བྱའོ། །ཕྱི་མས་ནི། ལྡོག་པ་ལ་བལྟོས་ནས་དངོས་པོ་དང་སྐྱེ་བ་ཐ་དད་པ་ལྟ་བུར་བཏགས་པ་ཡིན་ལ། སྐྱེ་བ་དེ་དང་འབྲེལ་བའི་ཕྱིར་རྟགས་སུ་བཀོད་ལ། འབྲེལ་བ་དེ་ཡང་དེ་དངོས་པོའི་རང་བཞིན་ཉིད་ཡིན་པ་བཞག་པའི་ཕྱིར་དེ་ཉིད་སྟོན་པ་ནི། རང་བཞིན་དུ་གྱུར་པའི་ཆོས་གང་ཡིན་པ་དེ་ཡོངས་སུ་གཟུང་བས། བདག་ཉིད་དམ་རང་བཞིན་དུ་གྱུར་པའི་ཆོས་ལ་བལྟོས་པ་ཞེས་བྱའོ། །རྣམ་ངེས་ལས། ཕྱོགས་འདིས་གཞན་དུ་ཡང་རང་བཞིན་གྱི་གཏན་ཚིགས་ཀྱི་དབྱེ་བ་བལྟ་བར་བྱའོ། །ཞེས་གསུངས་པ། རྣམ་པར་དབྱེ་བ་གཞན་ཡོད་པར་ཡང་བསྟན་ནོ། །སྔ་མ་དེ་ཡང་དགྲ་ལས་རྣམ་པར་རྒྱལ་བའི་ཞབས་ཀྱིས། བྱེ་བྲག་ཐ་དད་པ་ཡང་བྱེ་བྲག་ཁོངས་སུ་འདུས་པའམ། བྱེ་བྲག་དང་ལྡན་པའམ། བྱེ་བྲག་རྟོགས་པར་བྱ་བ་ཡང་རུང་ངོ་ཞེས། བྱེ་བྲག་དང་ཁྱད་པར་དོན་གཅིག་པ་ཁྱད་པར་གཞན་ལ་བལྟོས་པ་ཡང་ཞེས་བྱ་བའི་དོན་ནོ། །སེམས་པ་མི་རྟག་པར་བསྒྲུབ་པ་ལ་བྱས་པ་དང་། སྒྲ་བྱས་པར་བསྒྲུབ་པ་ལ་རྐྱེན་གྱིས་དབྱེ་བས་ཕྱེ་བ་དང་། རྡུལ་ཕྲ་རབ་མི་རྟག་པར་བསྒྲུབ་པ་ལ་བྱས་པ་བཀོད་པ་ལྟ་བུའོ། །དང་པོ་རང་བཞིན་བརྗོད་པ་ཡང་གཞན་གྱི་བདག་ཉིད་ཁྱད་པར་དུ་འདྲེན་པའི་ཕྱིར་དང་། རྐྱེན་གྱིས་དབྱེ་བས་སྒྲའི་ཐ་དད་པ་ཁྱད་པར་དུ་བརྗོད་པ་རབ་ཏུ་ལྡན་པ་ཉིད་ཀྱི་ཕྱིར་དང་། རྒྱུ་རྣམས་ཀྱི་ཞེས་ཁྱད་པར་གཟུང་བ་མེད་ན་ཡང་དེ་ཉིད་དུ་གོ་བར་བྱ་བ་ཉིད་ཀྱིས་སོ། །འབྲས་རང་གཉིས་ཀ་སྦྱོར་བའི་དབང་གིས་ཆོས་མཐུན་པ་དང་མི་མཐུན་པ་གཉིས་སུ་དབྱེར་རུང་ལ། དེའི་ཚེ་སྦྱོར་བའི་བྱེ་བྲག་མ་གཏོགས་པར་དེ་གཉིས་ལ་དོན་ལ་ཁྱད་པར་ཅི་ཡང་མེད་དོ། །དེ་མཐོང་བ་ལས་རང་ཉིད་རྟོགས་པ་ན་ཡང་དེ་ལྟར་འགྱུར་བའི་ཕྱིར། རང་གི་དོན་གྱི་རྗེས་སུ་དཔག་པ་ལ་ཡང་དབྱེ་བ་བསྟན་ནོ། །ཚད་མ་རྣམས་ནི་མི་འཇུག་པ། མེད་ལ་མི་འཇུག་འབྲས་བུ་ཅན་གང་ལ་དམིགས་པ་མེད་པས་དེ་ལ་ཚད་མ་རྣམས་མི་འཇུག་པ་མི་སྣང་བ་མ་དམིགས་པའོ། །དེ་ནི་རང་རང་ལྡོག་པའི་རྒྱུ་མེད་པས་ཡོད་པའི་ཐ་སྙད་བཀག་པའི་འབྲས་བུ་ཅན་ཡིན་ཏེ། དམིགས་པ་ཡོད་ན་ཤེས་པ་ཡོད་ཅིང་དེ་ལས་ཐ་སྙད་འཇུག་ལ་འདི་ནི་ཉིད་ལས་བཟློག་པས་སོ། །གཏན་ཚིགས་བྱེ་བྲག་ལ་བལྟོས་ནས། །འགའ་ཞིག་མེད་ཅེས་འབྲས་བུ་ཅན། །གཏན་ཚིགས་ནི་སྣང་རུང་མི་དམིགས་པའོ། །དེའི་བྱེ་བྲག་ནི་དེ་སྔ་མ་ལས་ཁྱད་པར་ཞེས་པའི་དོན་ནོ། །ཇི་ལྟ་བུ་སྙམ་ན། རང་དང་ལྡོག་པའི་རྒྱུ་ཡོད་པས་འགའ་ཞིག་གི་ཐ་སྙད་དགག་པའི་འབྲས་བུ་ཅན་ཡིན་ཏེ། དམིགས་པའི་རིག་བྱར་གྱུར་པ་ལས་འགའ་ཞིག་མི་དམིགས་པའི་ཕྱིར་རོ། །རང་འགྲེལ་དུ། དེ་ལ་དང་པོ་ནི་ཡོད་པའི་ཐ་སྙད་དགག་པར་དགོངས་པའི་ཕྱིར་ཚད་མར་བཤད་ཀྱི། ལྡོག་པ་མཐོང་བ་སོགས་ལ་ཉེ་བར་སྦྱོར་བའི་ཕྱིར་མ་ཡིན་ཏེ་ཐེ་ཚོམ་ཡོད་པའི་ཕྱིར་རོ། །གཉིས་པ་ནི། དེ་ལ་ཚད་མ་ཡིན་ཏེ། ངེས་པའི་འབྲས་བུ་ཅན་ཡིན་པའི་ཕྱིར་རོ་ཞེས་གསུངས་ལ། དམིགས་པའི་རིག་བྱར་གྱུར་པ་ནི། དམིགས་པའི་རྐྱེན་གཞན་ཚང་བ་ཉིད་དང་། རང་ཁྱད་པར་ཅན་ཏེ་རང་བཞིན་གང་ཡོད་ལ་དམིགས་པའི་རྐྱེན་གཞན་དག་ཀྱང་ཡོད་ན་མངོན་སུམ་ཁོ་ནར་འགྱུར་རོ། །ཞེས་པའི་དོན་ནོ། །དེ་ལ་དང་པོ་ནི་དགག་པ་དང་། ཕྱི་མ་ནི་མེད་པའི་ཐ་སྙད་བསྒྲུབ་པའོ། །དེ་ལྟར་བཤད་པའི་གཏན་ཚིགས་གསུམ་ལས། དང་པོ་གཉིས་དངོས་པོ་བསྒྲུབ་པ་དང་། ཕྱི་མ་དགག་པའི་གཏན་ཚིགས་ཏེ་གཉིས་སུའང་འདུའོ། །ཚུལ་གསུམ་པ་ཅན་གྱི་མ་དམིགས་པའི་རྟགས། མ་དམིགས་པའི་གཏན་ཚིགས་ཡང་དག་གི་མཚན་ཉིད། མཚན་གཞི་ནི། ཕྱོགས་ཀྱི་སྲོལ་འགའ་ཞིག་ན་བུམ་པ་མེད་དེ། དམིགས་པའི་རིག་བྱར་གྱུར་པ་ལས་མ་དམིགས་པའི་ཕྱིར་རོ་ཞེས་པ་ལྟ་བུ། དབྱེ་བ་ནི། འགལ་དང་འབྲས་བུ་དག་གྲུབ་དང་། །རྒྱུ་དང་ངོ་བོ་ལྟར་རུང་བའི། །བདག་ཉིད་དག་ནི་མ་གྲུབ་པ། །མེད་དོན་ཅན་མི་དམིགས་རྣམ་བཞི། །རྒྱུ། ཁྱབ་བྱེད། རང་བཞིན། འབྲས་བུ་མ་དམིགས་པ་བཞི། དེ་དང་འགལ་བ་ཡི་ནི་རྒྱུ། །ནས། དུས་ལ་སོགས་ལ་ལྟོས་པར་འདོད། །ཅེས་པའི་བར་གྱིས་སྦྱོར་བའི་སྒོ་ནས་སླར་མང་པོར་བཞག་གོ །གང་ཞེ་ན། རང་བཞིན་མ་དམིགས་པ་ནི། དཔེར་ན་འདི་ན་དུ་བ་མེད་དེ། དམིགས་པའི་རིག་བྱར་གྱུར་པ་ལས་མ་དམིགས་པའི་ཕྱིར། ཞེས་བྱ་བ་ལྟ་བུ་སྟེ། དགག་བྱ་ནི་དུ་བའོ། །དེའི་རང་བཞིན་གང་ཡིན་པ་དེ་འདི་ན་མི་དམིགས་པའོ། །འབྲས་བུ་མི་དམིགས་པ་ནི། དཔེར་ན་འདི་ན་དུ་བའི་རྒྱུ་ནུས་པ་ཐོགས་པ་མེད་པ་དག་མེད་དེ། དུ་བ་མེད་པའི་ཕྱིར་ཞེས་བྱ་བ་ལྟ་བུ་སྟེ། དགག་བྱ་དུ་བའི་རྒྱུ་རྣམས་ཀྱི་འབྲས་བུ་ནི་དུ་བ་སྟེ་འདི་ན་དེ་མི་དམིགས་པའོ། །རྒྱུ་མི་དམིགས་པ་ནི། དཔེར་ན་འདི་ན་དུ་བ་མེད་དེ། མེ་མེད་པའི་ཕྱིར་ཞེས་བྱ་བ་ལྟ་བུ་སྟེ། དགག་བྱ་དུ་བའི་རྒྱུ་མེའོ། །དེ་འདི་ན་མི་དམིགས་པའོ། །ཁྱད་པར་བྱེད་པ་མི་དམིགས་པ་ནི། དཔེར་ན་ཤིང་ཨ་ཀ་རུ་མེད་དེ། ཤིང་མེད་པའི་ཕྱིར་ཞེས་བྱ་བ་ལྟ་བུ་སྟེ། དགག་བྱ་ཨ་ཀ་རུའི་ཁྱད་པར་བྱེད་པ་ནི་ཤིང་ངོ་། །འདི་ན་དེ་མ་དམིགས་པའོ། །རང་བཞིན་འགལ་བ་དམིགས་པ་ནི། དཔེར་ན་འདི་ན་གྲང་རེག་མེད་དེ། མེ་ཡོད་པའི་ཕྱིར་ཞེས་བྱ་བ་ལྟ་བུ་སྟེ། དགག་བྱ་གྲང་རེག་གི་རང་བཞིན་གང་ཡིན་པ་དེ་ནི་མེ་དང་འགལ་བའོ། །འདི་ན་དེ་མི་དམིགས་པའོ། །འབྲས་བུ་འགལ་བ་དམིགས་པ་ནི། དཔེར་ན་འདི་ན་གྲང་རེག་གི་རྒྱུ་ནུས་པ་ཐོག་པ་མེད་པ་དག་མེད་དེ། མེ་ཡོད་པའི་ཕྱིར་ཞེས་བྱ་བ་ལྟ་བུ་སྟེ། དགག་བྱ་གྲང་རེག་གི་རྒྱུ་རྣམས་ཀྱི་འབྲས་བུ་ནི་གྲང་རེག་གོ །དེ་དང་འགལ་བ་ནི་མེའོ། །འདི་ན་དེ་དམིགས་པའོ། །རྒྱུ་འགལ་བ་དམིགས་པ་ནི། དཔེར་ན་འདི་ཡི་སྤུ་ཟིང་ཞེས་བྱེད་པ་ལ་སོགས་པའི་ཁྱད་པར་མེད་དེ། མེ་དང་ཉེ་བའི་ཁྱད་པར་ཉིད་ཀྱི་ཕྱིར་རོ་ཞེས་བྱ་བ་ལྟ་བུ་སྟེ། དགག་བྱ་སྤུ་ཟིང་ཞེས་བྱེད་པ་ལ་སོགས་པའི་ཁྱད་པར་དག་གི་རྒྱུ་ནི་གྲང་རེག་གོ །དེ་དང་འགལ་བ་ནི་མེའི་ཁྱད་པར་རོ། །འདི་ནི་དེ་དམིགས་པའོ། །ཁྱབ་བྱེད་འགལ་བ་དམིགས་པ་ནི། དཔེར་ན་འདི་ན་བ་མོའི་རེག་པ་མེད་དེ་མེ་ཡོད་པའི་ཕྱིར་ཞེས་བྱ་བ་ལྟ་བུ་སྟེ། དགག་བྱ་བ་མོའི་རེག་པ་ཁྱབ་བྱེད་ནི་གྲང་བའོ། །དེ་དང་འགལ་བ་ནི་མེའོ། །འདི་ན་དེ་དམིགས་པའོ། །རང་བཞིན་འགལ་བའི་འབྲས་བུ་དམིགས་པ་ནི། དཔེར་ན་འདི་ན་གྲང་རེག་གི་རྒྱུ་ནུས་པ་ཐོགས་མེད་དག་མེད་དེ། དུ་བ་ཡོད་པའི་ཕྱིར་རོ་ཞེས་བྱ་བ་ལྟ་བུ་སྟེ། དགག་བྱ་གྲང་རེག་གི་རྒྱུ་རྣམས་ཀྱི་འབྲས་བུ་ནི་གྲང་རེག་གོ །དེ་དང་འགལ་བ་ནི་མེའོ། །དེའི་འབྲས་བུ་ནི་དུ་བའོ། །འདི་ན་དེ་དམིགས་པའོ། འབྲས་བུ་འགལ་བའི་འབྲས་བུ་དམིགས་པ་ནི། དཔེར་ན་འདི་ན་གྲང་རེག་གི་རྒྱུ་ནུས་པ་ཐོགས་མེད་དག་མེད་དེ། དུ་བ་ཡོད་པའི་ཕྱིར་ཞེས་བྱ་བ་ལྟ་བུ་སྟེ། དགག་བྱ་གྲང་རེག་གི་རྒྱུ་རྣམས་ཀྱི་འབྲས་བུ་ནི་གྲང་རེག་གོ །དེ་དང་འགལ་བ་ནི་མེའོ། །དེའི་འབྲས་བུ་ནི་དུ་བའོ། །འདི་ན་དེ་དམིགས་པའོ། །རྒྱུ་དང་འགལ་བའི་འབྲས་བུ་དམིགས་པ་ནི། དཔེར་ན་ས་ཕྱོགས་འདི་ན་སྤུ་ཟིང་ཞེས་པ་ལ་སོགས་པ་བྱེ་བྲག་དང་ལྡན་པའི་སྐྱེས་བུ་ཡོད་པ་ཅན་མ་ཡིན་ཏེ། དུ་བ་ཡོད་པའི་ཕྱིར་རོ་ཞེས་བྱ་བ་ལྟ་བུ་སྟེ། དགག་བྱ་སྤུ་ཟིང་ཞེས་བྱེད་པ་ལ་སོགས་པའི་བྱེ་བྲག་དང་ལྡན་པའི་སྐྱེས་བུ་ཡོད་པ་ཅན་གྱིས་ཕྱོགས་ནི་གྲང་རེག་གོ །དེ་དང་འགལ་བ་ནི་མེའོ། །དེའི་འབྲས་བུ་ནི་དུ་བའོ། །དེ་འདི་ན་དམིགས་པའོ། །ཁྱབ་བྱེད་འགལ་བའི་འབྲས་བུ་དམིགས་པ་ནི། དཔེར་ན་འདི་ན་བ་མོའི་རེག་པ་མེད་དེ། དུ་བ་ཡོད་པའི་ཕྱིར་རོ་ཞེས་བྱ་བ་ལྟ་བུ་སྟེ། དགག་བྱ་བ་མོའི་རེག་པའི་ཁྱབ་བྱེད་ནི་གྲང་རེག་གོ །དེ་དང་འགལ་བ་ནི་མེའོ། །དེའི་འབྲས་བུ་ནི་དུ་བའོ། །འདི་ན་དེ་དམིགས་པའོ། །རང་བཞིན་འགལ་བས་ཁྱབ་བྱ་དམིགས་པ་ནི། དཔེར་ན་འདི་ན་མེ་མེད་དེ། བ་མོའི་རེག་པ་ཡོད་པའི་ཕྱིར་རོ། །ཞེས་བྱ་བ་ལྟ་བུ་སྟེ། དགག་བྱ་མེའི་རང་བཞིན་གང་ཡིན་པ་དེ་དང་འགལ་བ་ནི་གྲང་རེག་གོ །དེས་ཁྱབ་པ་ནི་བ་མོའི་རེག་པའོ། །འདི་ན་དེ་དམིགས་པའོ། །འབྲས་བུ་འགལ་བས་ཁྱབ་པར་དམིགས་པ་ནི། དཔེར་ན་འདི་ན་མེའི་རྒྱུ་ནུས་པ་ཐོགས་མེད་དག་མེད་དེ། བ་མོའི་རེག་པ་ཡོད་པའི་ཕྱིར་རོ་ཞེས་བྱ་བ་ལྟ་བུ་སྟེ། དགག་བྱ་མེ་རྒྱུ་རྣམས་ཀྱི་འབྲས་བུ་ནི་མེའོ། །དེ་དང་འགལ་བ་ནི་གྲང་རེག་གོ །དེས་ཁྱབ་པ་ནི་བ་མོའི་རེག་པའོ། །འདི་ན་དེ་དམིགས་པའོ། །རྒྱུ་འགལ་བས་ཁྱབ་བྱ་དམིགས་པ་ནི། དཔེར་ན་འདི་ན་དུ་བ་མེད་དེ། བ་མོའི་རེག་པ་ཡོད་པའི་ཕྱིར་རོ་ཞེས་པ་ལྟ་བུ་སྟེ། དགག་བྱ་དུ་བའི་རྒྱུ་གང་ཡིན་པ་མེའོ། །དེ་དང་འགལ་བ་ནི་གྲང་རེག་གོ །དེས་ཁྱབ་བྱ་ནི་བ་མོའི་རེག་པའོ། །དེ་འདི་ན་དམིགས་པའོ། །ཁྱབ་བྱེད་འགལ་བས་ཁྱབ་པ་དམིགས་པ་ནི། དཔེར་ན་འདི་རྟག་པ་མ་ཡིན་ཏེ། ནམ་ཞིག་ན་བྱ་བ་བྱེད་པ་ཉིད་ཀྱི་ཕྱིར་རོ། །དགག་བྱ་རྟག་པའི་ཁྱད་པར་དུ་འཕགས་པར་འགྱུར་བ་མེད་པ་ཉིད་ནི་ཁྱད་པར་བྱེད་པའོ། །དེ་དང་འགལ་བ་ནི་ཁྱད་པར་དུ་འཕགས་པ་དང་བཅས་པ་ཉིད་དོ། །དེས་ཁྱབ་པ་ནི་ནམ་ཞིག་ན་བྱ་བ་ཉིད་དོ། །འདི་ལ་དེ་དམིགས་པའོ། །འབྲས་བུ་མི་དམིགས་པ་ལ་སོགས་པ་མ་དམིགས་པའི་སྦྱོར་བ་འདི་དག་ཐམས་ཅད་ཀྱང་རང་བཞིན་མ་དམིགས་པ་ཉིད་དུ་འདུ་བར་འགྱུར་རོ། །རྒྱུ་ཚོགས་པ་ལས་འབྲས་སྐྱེ་བ། སོགས་ཚིགས་སུ་བཅད་པ་གཅིག་གིས། རྒྱུ་ཚོགས་པས་འབྲས་བུ་རྗེས་སུ་དཔོག་པར་བྱེད་པ་རྒྱུ་ཆོས་རྗེས་དཔོག་གི་མིང་ཅན་དེ་གཏན་ཚིགས་རྣམ་པ་གསུམ་ལས་གར་འདུ་ཞེ་ན། ཚོགས་པ་ཙམ་དང་འབྲེལ་བས་རང་བཞིན་དུའོ། །གང་གི་ཕྱིར་ཚོགས་པ་ལས་འབྲས་བུ་ཁོ་ན་རྗེས་སུ་དཔོག་པར་མི་ནུས་ཅེ་ན། ཚོགས་པའི་འབྲས་ནུས་པ་རྣམས། །ཞེས་པའི་ཚིགས་བཅད་ཀྱིས་རྒྱུའི་རྫས་ཚོགས་པ་ཁོ་ན་འབྲས་བུ་སྐྱེད་པར་བྱེད་པ་མ་ཡིན་གྱི། འབྲས་བུ་སྐྱེ་བ་ཚོགས་པའི་ནུས་པ་ཕྱི་མའི་འགྱུར་བ་ལ་བལྟོས་ལ། ནུས་པ་སྐྱེ་བ་ཡང་རང་གི་རིགས་སྔ་མ་ཙམ་གྱི་རྒྱུ་ཅན་ཉིད་ཡིན་པའི་ཕྱིར་དང་། བར་འདིར་གེགས་བྱེད་པ་སྲིད་པའི་ཕྱིར་འབྲས་བུ་རྗེས་སུ་དཔོག་པ་མ་ཡིན་ནོ། །འོ་ན་རྒྱུ་དང་འབྲས་བུར་མ་གྱུར་པ་གཞན་རོ་ལ་སོགས་པའི་གཟུགས་ལ་སོགས་པ་གང་ཡིན་ཞེ་ན། ཚོགས་པ་གཅིག་ལ་རག་ལས་པའི། ཞེས་པའི་ཚིགས་བཅད་ཀྱིས་རོའི་རྒྱུ་དེ་ལྟ་བུ་ནི་གཟུགས་ཀྱི་ཉེ་བར་ལེན་པའི་རྒྱུ་ནུས་པ་ཞུགས་པ་ཅན་གྱི་ལྷན་ཅིག་བྱེད་པའི་རྐྱེན་ཡིན་ཞིང་རོ་སྐྱེད་པར་བྱེད་དེ། མེས་བུད་ཤིང་འགྱུར་པའི་ཁྱད་པར་གྱི་ཉེ་བར་ལེན་པའི་རྒྱུའི་ལྷན་ཅིག་བྱེད་པའི་རྐྱེན་ཡིན་ཞིང་དུ་བ་བསྐྱེད་པ་དང་འདྲའོ། །དེ་ཡང་། དེ་ལྟར་འདས་དུས་གཅིག་རྣམས་རྟོགས། །སོགས་ཀྱིས་མ་འོངས་པ་རྣམས་ནི་མ་ཡིན་ཏེ་འཁྲུལ་པའི་ཕྱིར་རོ། །དེ་ལྟ་བས་ན། དེ་ནི་འབྲས་བུའི་རྟགས་ལས་སྐྱེས། །དེས་འབྲས་བུའི་རྟགས་ལ་མེད་ན་མི་འབྱུང་པ་སྨོས་ཀྱིས། རྒྱུ་མ་ཚང་བར་འབྲས་བུ་རྗེས་སུ་དཔག་པ་ནི་ལྷག་ལྡན་ནོ། །རྒྱུ་མ་ཚོགས་པས་འབྲས་བུ་ནི། །ནས། དེ་ལ་ལྷག་མ་ལྡན་ཞེས་བརྗོད། །ཅེས་པའི་བར་གྱིས་སོ། །གཉིས་པ། མེད་ན་མི་འབྱུང་ངེས་ཕྱིར་རོ། །ཞེས་པ་རྒྱས་པར་བཤད་པ་ལ། ཚུལ་གསུམ་གྱི་ངེས་པ་བསྟན་ནས་གཞན་སེལ་བཤད། རྟགས་ཀྱི་དོགས་གཅོད་འཕྲོས་དོན་རྒྱས་པར་བཤད་པ་གཉིས་ལས། དང་པོ་ལ། རྟགས་ཀྱི་འབྲེལ་པའི་རྣམ་གཞག་ཉིད་དང་། དེ་ལས་འཕྲོས་པ་གཞན་སེལ་གྱི་རྣམ་གཞག་གཉིས་ལས། དང་པོ་ནི། གཏན་ཚིགས་ཀྱི་ནི་ཚུལ་གསུམ་ལའང་། །དེ་ཡི་མ་གྲུབ་བཟློག་དོན་དང་། །འཁྲུལ་པ་ཅན་གྱིས་གཉེན་པོར་ནི། །ངེས་པ་བརྗོད་པར་མཛད་པ་ཡིན། །སློབ་དཔོན་ཕྱོགས་ཀྱི་གླང་པོས། གཏན་ཚིགས་ཡང་དག་གི་ཚུལ་གསུམ་ལ་ངེས་པ་བརྗོད་པར་མཛད་དོ། །དགོས་པ་གང་གི་ཕྱིར་ན་མ་གྲུབ་པ་དང་། བཟློག་དོན་དེ་འགལ་བ་དང་། མ་ངེས་པའི་གཏན་ཚིགས་འཁྲུལ་པ་ཅན་རྣམས་རྟགས་ཡང་དག་ཏུ་འདོད་པའི་གཉེན་པོར་རོ། །ངེས་པ་ཞེས་པ་ཡང་འབྲེལ་བ་མེད་པར་ནི་རྗེས་སུ་འགྲོ་བ་དང་ལྡོག་པའི་ངེས་པ་མེད་པ་དེས་ན། འབྲེལ་བ་དེ་སྟོན་པར་མཛད་པ་ནི། ཕྱོགས་ཆོས་ཀྱི་ཚུལ་ངེས་པ། རྗེས་འགྲོའི་ཚུལ་ངེས་པ་ལྡོག་པའི་ཚུལ་ངེས་པ་ཞེས་གསུངས་པ་ཉིད་ཀྱིས་སོ། །རང་འགྲེལ་དུ། དེ་ལ་རྗེས་སུ་འགྲོ་བ་ངེས་པ་ནི་འགལ་བ་དང་། དེའི་ཕྱོགས་དང་མཐུན་པ་རྣམས་བསལ་ལོ། །ལྡོག་པས་ནི་མ་ངེས་པ་དང་ཕྱོགས་དང་མཐུན་པ་ལྷག་མ་ལྡན་པ་ལ་སོགས་པའོ། །གཉིས་ཀ་ལ་ཞེས་བྱ་བ་ནི་གཅིག་ལ་གྲུབ་པ་དགག་པ་ཡིན་ནོ། །རབ་ཏུ་གྲུབ་པ་ཞེས་སྨོས་པ་ནི། མཐུན་པའི་ཕྱོགས་དང་མི་མཐུན་པའི་ཕྱོགས་དག་ལ་ལྷག་མ་དང་ལྡན་པ་དང་། ཐུན་མོང་མ་ཡིན་པའི་ཐེ་ཚོམ་ཟ་བ་དག་ཀྱང་ངོ་། ཞེས་གསུངས་པའི་གཉིས་ཀ་ལ་རབ་ཏུ་གྲུབ་པ་ཞེས་ཕྱོགས་ཆོས་ཀྱི་ཚུལ་ངེས་པ་བསྟན་ཏེ། དེ་ནི་ཚུལ་གཞན་གཉིས་ཀྱི་སྤྱི་ཡིན་པས་སོ། །རང་བཞིན་འབྲེལ་བ་ཡོད་པ་དོན་གྱིས་དོན་གོ་བར་བྱེད་དེ། དེ་དང་མ་འབྲེལ་ན་མི་འཁྲུལ་བར་ངེས་པ་མེད་པའི་ཕྱིར་རོ། བསྒྲུབ་པར་བྱ་བའི་དོན་ལ་རྟགས་འབྲེལ་བ་དེ་ཡང་དངོས་སུ་ན་བསྒྲུབ་པར་བྱ་བའི་དོན་གྱི་རང་བཞིན་ཡིན་པའི་ཕྱིར་དང་། བསྒྲུབ་པར་བྱ་བའི་དོན་ལས་བྱུང་བའི་ཕྱིར་ཏེ། དེའི་རང་བཞིན་མ་ཡིན་པ་དང་། དེ་ལས་བྱུང་བ་མ་ཡིན་པ་ནི་དེ་དང་འབྲེལ་བ་མེད་པའི་ཕྱིར་རོ། དེའི་བདག་ཉིད་དང་དེ་ལས་བྱུང་བ་དེ་གཉིས་ཀྱང་རང་བཞིན་དང་འབྲས་བུ་ཁོ་ན་ཡིན་ཏེ། དེ་གཉིས་ཁོ་ནས་དངོས་པོ་གྲུབ་བོ། །དགག་པ་བསྒྲུབ་པ་ཡང་མི་དམིགས་པ་ཇི་སྐད་སྨོས་པ་ཁོ་ནས་འགྱུར་ཏེ། དངོས་པོ་ཡོད་ན་ནི་དེ་མི་སྲིད་པའི་ཕྱིར་རོ། ཕྱི་མ་འདིས་དངོས་སུ་འབྲེལ་བ་མ་བསྟན་ལ་བཟློག་པས་བསྟན་ནོ། །སློབ་དཔོན་དབང་ཕྱུག་སྡེས། རྟགས་ཆོས་འབྲེལ་བ་མེད་པར་མི་མཐུན་ཕྱོགས་ལ་འགལ་བ་མ་མཐོང་བ་ཙམ་གྱིས་ལྡོག་པ་གྲུབ་པ་སློབ་དཔོན་གྱི་དགོངས་པར་འཆད་པ་ལས། ཆོས་མི་མཐུན་སྦྱོར་བ་སྨོས་པ་དོན་མེད་དུ་ཐལ་བར་སྟོན་པ། འཁྲུལ་པ་ཅན་གྱི་གཉེན་པོར་ནི། སོགས་ཚིགས་བཅད་གཉིས་ཀྱིས་སོ། །ལྷག་ལྡན་འཁྲུལ་པ་ཅན་མ་ཡིན་པར་ཐལ་བ། གལ་ཏེ་མ་མཐོང་བས་ལྡོག་འགྱུར། ཅི་སྟེ་ལྷག་ལྡན་འཁྲུལ་ཅན་ཡིན། ལྡོག་པ་ཅན་སྲོག་སོགས་ཡན་ལག་ཏུ་ཐལ་བ། ལྡོག་པ་ཅན་ཡང་གཏན་ཚིགས་འགྱུར། མ་གྲུབ་བར་སྦྱར་བ་མི་རིགས་པར་ཐལ་བ། མ་གྲུབ་སྦྱར་བ་བརྗོད་བྱ་མིན། །ཁྱད་པར་མཉན་བྱས་གཉིས་ཀ་གཅོད་པར་ཐལ་བ། ཁྱད་པར་རྣམ་པར་གཅོད་པ་ཡི། །ཚིགས་བཅད་ཕྱེད་དང་གཉིས་ཀྱིས་སོ། །རེག་པ་འགོག་པ་རིག་པར་ཐལ་བ། མ་མཐོང་ཕྱིར་རེག་མཐོང་བ་ལ། །ནས། མི་ལྡན་འཁྲུལ་པ་མེད་པ་ཅན། །ཞེས་པ་སྟེ་མདོའི་ལུང་དང་འགལ་བར་བསྟན་པ་དྲུག་གོ །གཞན་སྡེ་དགག་པ་ལ། ཡུལ་ལ་སོགས་པའི་ཁྱད་པར་ལས། །ནས། གཏན་ཚིགས་མེད་བསྒྲུབ་ཡིན་ནམ་ཅི། །ཞེས་པའི་བར་གྱིས་སོ། །རྟགས་གསུམ་འབྲེལ་པ་ལ་བལྟོས་པ་སྤྱིར་བསྟན་པ། རང་བཞིན་ལ་ཡང་མེད་མི་འབྱུང་། །ནས། འབྲས་བུ་ན་ཡང་ག་ལ་ངེས། །འབྲས་རྟགས་མི་འཁྲུལ་བའི་སྒྲུབ་བྱེད། མེ་ཡི་འབྲས་བུ་དུ་བ་སྟེ། །ནས། བསྒྲུབ་པ་རབ་ཏུ་འཇུག་པ་ཡིན། །གྱི་བར་རོ། །རང་བཞིན་རྟགས་མི་འཁྲུལ་པའི་སྒྲུབ་བྱེད། རང་བཞིན་ལ་ཡང་མེད་མི་འབྱུང་། །ནས། མེད་འབྱུང་ཐ་དད་མེད་ཕྱིར་རོ། །གཉིས་པ་དེ་ལས་འཕྲོས་པ་གཞན་སེལ་གྱི་རྣམ་གཞག་ལ། སེལ་བས་འཇུག་པར་བསྒྲུབ་པའི་གཞི། སེལ་བ་འཇུག་པར་བསྒྲུབ་པར་རྒྱས་པར་བསྟན་པ་གཉིས་ལས། དང་པོ་ནི། རང་བཞིན་གྱི་འབྲེལ་པ་བཤད་པ་དེར་བྱས། མི་རྟག་རང་བཞིན་གཅིག་ཏུ་བསྟན་པས་འོ་ན་བྱས་པས་མི་རྟག་པ་བསྒྲུབ་པ་མ་གྲུབ་པའི་གཏན་ཚིགས་སུ་ཐལ་ཏེ། ཆོས་རྟགས་ཐ་དད་མེད་པའི་ཕྱིར་རོ་ཞེ་ན། མ་ཡིན་ཏེ། རང་འགྲེལ་དུ། དངོས་པོ་འདི་དག་གི་རིགས་མི་མཐུན་པར་འདོད་པ་དང་། གཞན་ལས་ལོག་པ་ཡིན་ཏེ་རང་གི་ངོ་བོས་ངོ་བོ་གཅིག་པའི་ཕྱིར་རོ། །གང་དང་གང་ལས་ཐ་དད་པ་དེའི་དབྱེ་བ་ཤེས་པར་བྱ་བའི་ཕྱིར་ཐ་སྙད་དུ་བྱས་པའི་སྒྲ་དག་གིས་དེ་དང་དེ་ལས་ཐ་དད་པ་རྒྱུར་བྱས་ནས་ངོ་བོ་ཉིད་ཐ་མི་དད་ཀྱང་། ཆོས་དུ་མ་ཤེས་པར་བྱེད་དོ་ཞེས། ངོ་བོའི་ཆ་ནས་ཐ་མི་དད་ཀྱང་། སེལ་ངོར་ལྡོག་པ་ཐ་དད་པ་དུ་མ་སྟོན་པ་ཡིན་ནོ། །ཞེས་འཆད་པར་བཞེད་ནས། གང་ཕྱིར་དངོས་ཀུན་རང་བཞིན་གྱིས། །རང་རང་ངོ་བོ་ལ་གནས་ཕྱིར། །མཐུན་དངོས་གཞན་གྱི་དངོས་དག་ལ། །ལྡོག་པ་ལ་ནི་བརྟེན་པ་ཅན། །གང་ཕྱིར་དངོས་ཀུན་ཏེ། འགའ་ཞིག་ནི་མ་ཡིན་ནོ། །མཐུན་དངོས་ནི་རིགས་མཐུན་པའོ། །གཞན་གྱི་དངོས་ནི་རིགས་མི་མཐུན་པ་སྟེ། དེ་དག་ལས་རང་བཞིན་གྱིས་ཏེ། བརྟགས་པ་མ་ཡིན་པའི་རང་གི་མཚན་ཉིད་ཀྱིས། ལྡོག་པ་ལ་ནི་བརྟེན་པ་ཅན། ཞེས་འབྲེལ་ལོ། །ཅིའི་ཕྱིར་དེ་དག་བཟློག་ཅེ་ན། རང་རང་ངོ་བོ་ལ་གནས་པའི་རྒྱུའི་ཕྱིར་རོ། །དངོས་པོ་ཐམས་ཅད་རང་གི་ངོ་བོ་ཉིད་ལ་གནས་པ་ཡིན་གྱི་ཕན་ཚུན་འདྲེ་བ་མ་ཡིན་པ་དེའི་ཕྱིར་ན་ངོ་བོ་ཉིད་ཀྱིས་མ་འབྲེལ་པས་རིགས་མཐུན་པ་དང་མི་མཐུན་པ་ལས་བཟློག་པ་ཡིན་ནོ། །འདི་ལས་འཕྲོས་ནས་གཞན་དབང་ཁོ་ནར་འབྲེལ་བ་ནི། གྲུབ་ན་གཞན་དབང་ཅི་ཞིག་ཡོད། །དེ་ཕྱིར་དངོས་པོ་ཐམས་ཅད་ཀྱི། །འབྲེལ་པ་ཡང་དག་ཉིད་དུ་མེད། །ཅེས་སོགས་འབྲེལ་པ་བརྟག་པ་གསུངས་སོ། །གཉིས་པ་ནི། དེ་བས་ན། མངོན་སུམ་གྱིས་རང་གི་མཚན་ཉིད་དང་ཐ་མི་དད་པར་འཛིན་ལ། རྣམ་པར་རྟོག་པས་ནི་སྒྲོ་བཏགས་ཀྱི་རང་བཞིན་གྱིས་འཛིན་པས་ཐ་དད་པ་ལྟ་བུར་སྟོན་པ་ཡིན་ནོ། །ལྡོག་མཚམས་གཅིག་གི་རྒྱུ་མཚན་ཅན། །ལྡན་པར་སྒྲོ་བཏགས་པའི་རང་བཞིན་གྱིས་བར་དུ་བཅད་པའི་རང་གི་མཚན་ཉིད་དེ་རྟོགས་པ་ན་ལྡོག་མཚམས་གཞན་ལྡོག་པ་ནི་ངེས་པར་མི་འགྱུར་ཏེ། གང་ཞིག་ངེས་པས་མ་ངེས་པ་དེ་ནི་ངེས་པའི་ཡུལ་མ་ཡིན་ནོ། །དེ་ན་མངོན་སུམ་ནི་དེའི་རྣམ་པ་ཅན་ཡིན་པས་རང་བཞིན་ཐམས་ཅད་འཛིན་ལ། རྣམ་པར་རྟོག་པ་ནི་སྒྲོ་བཏགས་ཀྱི་རྗེས་སུ་འབྲང་ནས་རང་གི་མཚན་ཉིད་ངེས་པ་ཡིན་ཡང་ལྡོག་པ་གཅིག་གི་ཡུལ་གྱི་རང་བཞིན་དུ་ཞེན་པ་ཡིན་ནོ། །དེས་ན་གོ་བར་བྱ་བ་དང་། གོ་བར་བྱེད་པའི་དངོས་པོ་གང་ཡིན་པ་དེ་དག་ནི་དེའི་བདག་ཉིད་དུ་འགྱུར་བ་ཡིན་ཏེ། སྒྲོ་བཏགས་པའི་རང་བཞིན་གྱིས་ཆོས་པ་དག་ངེས་པ་ཡིན་པའི་ཕྱིར་རོ། །སྒྲོ་བཏགས་དང་འབྲེལ་བའི་ཐ་དད་པ་ངེས་པ་རང་གི་མཚན་ཉིད་ཀྱི་ཡུལ་གསལ་བར་བྱེད་པ་ན་བསྒྲུབ་པར་བྱ་བ་དང་། སྒྲུབ་པར་བྱེད་པ་རང་གི་མཚན་ཉིད་དུ་གྱུར་པ་དག་ཀྱང་ཐ་དད་པར་སྟོན་པར་བྱེད་དོ། །དེ་བས་ན་སྒྲོ་བཏགས་དེ་ལ་ཐ་དད་པར་སྒྲོ་བཏགས་པ་ན་རང་གི་མཚན་ཉིད་ཀྱང་སྒྲོ་བཏགས་པ་དང་འདྲ་བར་འགྱུར་རོ། །དེས་ན་སྒྲོ་བཏགས་ཀྱི་རང་བཞིན་གྱིས་རྗེས་སུ་རྟོགས་པས་ན་ཐ་དད་པ་བཞེད་པ་ཡིན་ནོ། །གོ་བར་བྱ་བ་དང་གོ་བར་བྱེད་པའི་དངོས་པོ་ཡང་ཞེན་པར་བྱས་པའི་དངོས་པོ་ཐ་དད་པའི་རྒྱུ་མཚན་གྱིས་ཡིན་ཏེ་དེས་ན་དེ་ནི་བདག་ཉིད་ཡིན་ནོ། །དེའི་བདག་ཉིད་ཀྱི་འབྲེལ་བའི་རང་བཞིན་འདི་ཡང་རང་བཞིན་གྱི་གཏན་ཚིགས་སུ་བརྗོད་དོ། །གང་གི་འབྲས་བུ་ཡང་རང་བཞིན་འབྲེལ་བར་གྱུར་པ་དེ་སྟོན་པར་བྱེད་པ་འབྲས་བུས་ཡང་དེ་ལས་བྱུང་བ་ཡིན་ལ། དེའི་ཕྱིར་འབྲས་བུ་ཡང་དེར་རང་བཞིན་འབྲེལ་བ་ཡིན་ནོ། །དེ་བས་ན་སྒྲོ་བཏགས་ཀྱི་གཞན་ལྡོག་པ་དངོས་སུ་ཡིན་ལ། ཕྱི་རོལ་གྱི་གཞན་ལྡོག་པ་ནི་ཤུགས་ཀྱིས་འཛིན་པ་ཡིན་ནོ། །མེད་པར་དགག་པའི་གཞན་སེལ་དོན་གྱི་ཤུགས་ཀྱི་རྣམ་པར་རྟོག་པའི་ཡུལ་དུ་གྱུར་པ་དེ་ཉེ་བར་གཟུང་ནས་ནི། ལྡོག་པ་ངོ་བོ་ཉིད་མེད་ཕྱིར། །གནས་དང་མི་གནས་རྟོག་པ་མེད། །ཅེས་བཤད་ལ། སྒྲོ་བཏགས་པའི་གཞན་སེལ་བ་དངོས་སུ་རྣམ་པར་རྟོག་པའི་དོན་ཉེ་བར་གཟུང་ནས་ནི། སྤྱི་ཡི་བློ་ཡང་བསླད་པ་ཡིན། །དེ་ཕྱིར་སུན་དབྱུང་བ་ཡང་མེད། །ཅེས་གསུངས་སོ། །དེ་བས་ན་རྣམ་པར་རྟོག་པ་ནི་གཞན་སེལ་བའི་ཡུལ་ཅན་ཡིན་ནོ། །སྒྲ་ངེས་པར་སྦྱོར་བའི་དུས་ན་ནི་ངེས་པའི་རྣམ་པར་རྟོག་པའི་དོན་བརྗོད་པར་བྱ་བ་ཉིད་དུ་སྦྱར་བར་བྱ་སྟེ། གཞན་དུ་ངེས་པའི་དོན་བརྗོད་པ་ཉིད་དུ་མི་འགྱུར་རོ། །དེས་ན་རྣམ་པར་རྟོག་པའི་ཡུལ་གྱི་དོན་བརྗོད་པར་བྱ་བ་ཉིད་ཀྱིས་ན་ངེས་པའི་རང་བཞིན་ཡིན་པའི་ཕྱིར་གཞན་སེལ་བ་སྒྲ་རྣམས་ཀྱི་བརྗོད་བྱ་ཡིན་ལ། གཞན་སེལ་བ་གཞན་དང་ནམ་བྲལ་བ་ན་སྒྲ་འཇུག་པ་ཡིན་ནོ། །དེའི་ཕྱིར་ཐ་སྙད་ཀྱི་ཡུལ་སྒྲོ་བཏགས་པའི་རང་བཞིན་ཡིན་ནོ། །རྣམ་པར་རྟོག་པ་ནི་རང་གི་སྣང་བ་དོན་མེད་དུ་སྟོན་པར་བྱེད་པ་ཡིན་ནོ། །དེ་སྒྲ་དང་འདྲེས་པ་ཡང་སྒྲའི་བྱ་བ་ལས་སྐྱེས་པའི་བློའི་སྣང་བ་གང་ཡིན་པའོ། །ཕྱི་རོལ་གྱི་དོན་ཡང་དེས་བྱས་པས་ཕྱི་རོལ་དང་སྒྲོ་བཏགས་པ་རང་བཞིན་མ་ཡིན་པས་དེ་སྟོང་ངོ་། །དེའི་ཚེ་དེའི་དངོས་པོ་མེད་དེ། སྒྲ་ལས་བྱུང་བའི་ཐ་སྙད་ནི་མེད་པ་ལ་འཇུག་པར་མི་ནུས་ཏེ། གང་གི་ཕྱིར་གཞན་མེད་པ་ནི་དེ་ལ་ཡོད་པ་དང་མེད་པའི་ཐ་སྙད་བྱ་བ་ཡིན་ལ། དངོས་པོ་མེད་པ་དེ་ཉིད་ཡོད་པ་དང་མེད་པར་ཐ་སྙད་མི་ནུས་སོ། །གང་རྣམ་པར་དབྱེ་བའི་མཐའ་ཅན་གྱི་ཚིགས་གི་བརྗོད་པར་བྱ་བ་དངོས་པོ་མེད་པ་བཏགས་པའམ་བརྗོད་པར་ནུས་པར་འགྱུར་བ་རྣམ་པར་དབྱེ་བ་ཐམས་ཅད་ནི་བྱེད་པ་པོ་བརྗོད་པར་འདོད་པའི་རྒྱུ་མཚན་ཅན་ཉིད་དོ། །རྣམ་དབྱེ་དང་པོ་ཡང་བྱེད་པ་པོའི་ནུས་པ་ཁོངས་སུ་འདུས་པ་ཅན་ཡིན་ལ། དྲུག་པའམ་ཡུལ་ཡང་ལྷག་མ་བྱ་བ་དང་བྱེད་པ་སྔོན་དུ་འགྲོ་བ་ཅན་ཉིད་དོ། །དེ་ན་ནུས་པ་དང་བྲལ་བའི་ཕྱིར་གནས་བཞི་ལ་སོགས་པའི་ནུས་པ་དང་འབྲེལ་བ་མེད་པས་དངོས་པོ་མེད་པ་འདི་ལ་བསྒྲུབ་པ་དང་དགག་པའི་ཐ་སྙད་བྱ་བར་མི་ནུས་པའི་ཕྱིར་མི་སྨྲ་བ་ཉིད་ཐོབ་པར་འགྱུར་རོ། །དེ་ཡང་། ཐ་དད་དངོས་རྣམས་ལ་བརྟེན་ནས། །དོན་གཅིག་ཏུ་ནི་སྣང་བའི་བློ། །གང་གི་རང་གི་ངོ་བོ་ཡིས། །གཞན་གྱི་ངོ་བོ་སྒྲིབ་བྱེད་པ། །སྒྲིབ་བྱེད་དེ་དག་ཐ་དད་ཀྱང་། །ཐ་དད་པ་ཉིད་སྒྲིབ་པ་ཡིས། །དངོས་རྣམས་ངོ་བོ་འགའ་ཞིག་གིས། ཐ་དད་མིན་པ་ལྟ་བུར་སྣང་། །དེ་ལ་བསམ་པའི་དབང་གིས་ན། །སྤྱི་ཡོད་པ་ནི་རབ་ཏུ་བསྒྲགས། །དེ་ཡི་ཇི་ལྟར་ཀུན་བརྟགས་པ། དེ་ནི་དམ་པའི་དོན་དུ་མེད། །ཅེས་གསུངས་པས་སོ། །ཉིད་ཀྱི་རྣམ་བཤད་དུ། །ད་ནི་ཀུན་རྫོབ་འདིས་རང་གི་ངོ་བོས་གཞན་གྱི་ངོ་བོ་བསྒྲིབ་པའི་ཕྱིར་རོ། །དེ་དག་ནི་དེས་ཐ་དད་པར་བསྒྲིབས་པས་བདག་ཉིད་ཀྱི་ཐ་དད་ཀྱང་ངོ་བོ་འགའ་ཞིག་གིས་ཐ་མི་དད་པ་བཞིན་དུ་སྣང་ངོ་། །ཞེས་གསུངས་སོ། །དེ་ཕྱིར་གང་དང་གང་ལ་དོན། །ནས། རྐྱེན་ཡོད་དེ་ནི་རྟོགས་པར་འགྱུར། །ཞེས་པའི་བར་གྱིས། སྒྲ་རྟོག་སེལ་བས་འཇུག་ཅིང་བསྒྲུབ་པས་མི་འཇུག་པའི་རྒྱུ་མཚན། དེ་ལའང་གཞན་ལས་ལོག་པ་དང་། །ནས། བྱ་བ་འདི་ལ་རྒྱུ་ཅི་ཡོད། །ཅེས་པའི་བར་གྱིས་ལོག་རྟོག་གི་ཚུལ་དང་དེ་བཞིན་སྒྲ་རྟོག་གི་འཇུག་ཚུལ་རྒྱས་པར་བསྟན། ཐ་དད་དངོས་རྣམས་ལ་བརྟེན་ནས། །ནས། བསྟན་པས་ཕན་འདོགས་མེད་ཕྱིར་ཡང་། །གི་བར་གྱིས་སྤྱི་འཛིན་ནི་གཟུང་ཡུལ་ལ་སྤྱིར་བཞག་ཅིང་རྟོག་པའི་སྐྱེ་ཚུལ་བསྟན། རང་བཞིན་དེ་འཛིན་རྣམ་རྟོག་བློའི། །ནས། སྤྱི་ཉིད་དུ་ནི་འཇུག་ཕྱིར་རོ། །ཞེས་པའི་བར་གྱིས་གསལ་བའི་སྤྱི་རང་བཞིན་ནམ་སྣང་ཙམ་ཡིན་པས་བརྟགས་ནས་མི་འཐད་པར་བསྟན། སྒྲ་རྣམས་ཀྱི་ནི་བརྡ་རྟགས་སྟོན། །ནས། འབྲས་བུ་དུ་མ་བརྟེན་གཅིག་འགྱུར་ཞེས་པའི་བར་གྱིས་རང་མཚན་ལ་མི་སྦྱོར་ཞིང་གཞན་སེལ་ལ་སྦྱོར་བ་རྩོད་སྤང་དང་བཅས་པ་བཤད། རྣམ་གཅོད་གཅིག་གཅིག་རྟོག་པ་ན། །ནས། ཐལ་འགྱུར་ཉེས་པ་དེ་དག་མེད། །ཅེས་པའི་བར་གྱིས་ལྡོག་པའི་གཞན་སེལ་དང་སྤྱི་བརྗོད་པའི་སྐྱོན་ཕྱེ་སྟེ་བསྟན། དེ་ཡི་འབྲས་བུ་ཡོངས་བརྟེན་ཕྱིར། །ནས། རྣམ་གཅོད་བརྗོད་པར་བྱེད་པ་དྲུག །ཅེས་པའི་བར་གྱིས་དུ་མ་ལ་སྒྲ་གཅིག་འཇུག་པའི་རྒྱུ་མཚན་དེའི་རྩོད་སྤང་མེད་པའི་སྒྲ་རྟོག་སེལ་བ་ལ་འཇུག་པ་རྣམས་བསྟན་ནོ། །གཉིས་པ་རྟགས་ཀྱི་དོགས་གཅོད་འཕྲོས་དོན་རྒྱས་པར་བཤད་པ་ནི། རང་བཞིན་ཁྱད་པར་བྱེ་བྲག་ལ། །ནས། རྗེས་སུ་འགྲོ་བ་ཉམས་པ་མེད། །ཅེས་པའི་བར་གྱིས་རང་བཞིན་རྟགས་ཀྱི་དབྱེ་བ་དང་ཡོད་པ་ཙམ་གྱིས་རྗེས་སུ་འགྲོ་བ་མི་འགྲུབ་པ་བསྟན། མ་གྲུབ་པ་ལ་ཡོད་ཆོས་མེད། །ཅེས་པའི་ཚིགས་བཅད་ཀྱིས་གཏན་ཚིགས་ལྟར་སྣང་རྒྱས་པར་བཤད། དེ་ནས། རིགས་པ་སྨྲ་བས་གསུངས་པ་ཡིན། །ཞེས་པའི་བར་འདིས་ནི་རྗེས་སུ་འགྲོ་བ་དང་། ལྡོག་པ་གཅིག་ངེས་པས་ཅིག་ཤོས་ངེས་པ་མི་རྟག་པ་བསྒྲུབ་པ་དང་མི་དམིགས་པ་སོགས་ཀྱི་དོགས་གཅོད་བསྟན། སྒྲ་རྣམས་དངོས་དང་ལྷན་ཅིག་ཏུ། །ནས། ལེའུ་རྫོགས་པའི་བར་གྱིས་སྟོན་པའི་ལུང་ཚད་མར་དང་། རིག་བྱེད་པ་ལ་སོགས་པ་ཚད་མིན་དུ་བསྒྲུབ་སྟེ་ལེའུ་གཉིས་པའི། སྨྲ་བ་པོ་ཡི་བྱེད་པའི་ཡུལ། །རྒྱས་པར་བཤད་དོ། །ཞར་ལ་གཏན་ཚིགས་ལྟར་སྣང་བ་སྟོན་པར་བྱ་སྟེ། མ་གྲུབ་པ་ལ་ཡོད་ཆོས་མེད། །གཉིས་ག་ལ་བརྟེན་འཁྲུལ་པ་ཅན། །མེད་པའི་ཆོས་ནི་འགལ་ཡིན་ན། །ཡོད་དེ་ཇི་ལྟར་བསྒྲུབ་བྱར་འགྱུར། །ཞེས་པ་འདི། གཏན་ཚིགས་ལྟར་སྣང་དེ་ལས་གཞན་ཞེས་པའི་རྒྱས་བཤད་ཡིན་ལ། དེའི་དོན་རྟགས་གསུམ་གྱི་སེལ་བ་དེ་གང་ཡིན་ཞེ་ན། མ་གྲུབ་པ་དང་། འགལ་བ་དང་། མ་ངེས་པའོ། །དེ་ལ་ཕྱོགས་ལ་མ་གྲུབ་པའི་ཕྱིར་མ་གྲུབ་པ་ཞེས་བྱ་བ་དང་། ཕྱོགས་དང་མཐུན་པའི་ཕྱོགས་ལ་ནི་མེད་པ། མི་མཐུན་པའི་ཕྱོགས་ལ་ཡོད་པ་དེ་ནི་འགལ་བ་ཞེས་བྱ་སྟེ། གྲུབ་པར་བྱ་བ་ལས་ཕྱིན་ཅི་ལོག་བསྒྲུབ་པའི་ཕྱིར་རོ། །མཐུན་པའི་ཕྱོགས་དང་མི་མཐུན་པའི་ཕྱོགས་གཉིས་ཀ་ལ་ཡོད་པའམ་མེད་པ་ཐེ་ཚོམ་ཟ་བའམ་འབྲེལ་བ་མ་གྲུབ་པའི་གཏན་ཚིགས་དེ་ནི་མ་ངེས་པ་སྟེ། རྒོལ་བ་དང་ཕྱིར་རྒོལ་བས་བསྒྲུབ་པར་འདོད་པ་ངེས་པ་མི་བསྒྲུབ་པའི་ཕྱིར་རོ། །དང་པོ་མ་གྲུབ་པ་ལ། སྒྲ་མི་རྟག་པ་ཉིད་དུ་བསྒྲུབ་པར་བྱ་བ་ལ་གཏན་ཚིགས་མིག་གིས་གཟུང་བའི་ཕྱིར་ཞེས་པ་ནི་རྒོལ་བ་དང་ཕྱིར་རྒོལ་བ་དག་ལ་མ་གྲུབ་པ་ལྟ་བུའོ། །ཤིང་སེམས་དང་ལྡན་པར་བསྒྲུབ་པར་བྱེད་པ་ལ་ཤུན་ལྤགས་ཐམས་ཅད་བཤུས་ན་འཆི་བའི་ཕྱིར། །ཞེས་པའི་གཏན་ཚིགས་འདི་ཕྱིར་རྒོལ་བ་སངས་རྒྱས་པ་ལ་མ་གྲུབ་པས་ཕྱིར་རྒོལ་བ་ལ་མ་གྲུབ་པ་ཞེས་བྱ་སྟེ། སེམས་ལ་སོགས་པ་འགག་པ་ལས་ཤི་བར་སངས་རྒྱས་པ་འདོད་པའི་ཕྱིར་རོ། །བདེ་བ་ལ་སོགས་པས་སེམས་མེད་པ་བསྒྲུབ་པར་བྱ་བ་ལ་སྐྱེ་བ་དང་ལྡན་པའི་ཕྱིར་ཞེས་པའི་གཏན་ཚིགས་ནི་གྲངས་ཅན་པ་རྒོལ་བ་བདག་ཉིད་ལ་མ་གྲུབ་པས་རྒོལ་བ་ལ་མ་གྲུབ་པ་ཞེས་བྱའོ། །བྱེ་བྲག་པས་ཕྱིར་རྒོལ་བ་སངས་རྒྱས་པས་ལས་ལ་སོགས་པའི་ཆོས་ཅན་བྱ་བ་ཡིན་ནོ་ཞེས་བསྒྲུབ་པར་བྱ་བ་ལ། སྐད་ཅིག་རེ་རེ་འདྲ་བ་གཞན་དང་གཞན་འབྱུང་ངོ་ཞེས་བྱ་བ་ནི་རྒོལ་བ་བདག་ཉིད་ལ་མ་གྲུབ་པ་ཡིན་ཏེ། སྐྱེ་བ་གྲུབ་ཀྱང་སྐད་ཅིག་རེ་རེ་འདྲ་བ་གཞན་དང་གཞན་འབྱུང་ངོ་ཞེས་པ་ནི་དེ་ཉིད་ལ་མ་གྲུབ་པའོ། །དཔེར་ན་ཤིང་རྣམས་ནི་སེམས་དང་ལྡན་པ་ཡིན་ཏེ། གཉིད་ལོག་པའི་ཕྱིར་རོ། །ཞེས་པའི་གཏན་ཚིགས་ནི་ཕྱོགས་ཀྱི་གོས་ཅན་རྒོལ་བ་བདག་ཉིད་ལ་ཕྱོགས་ཀྱི་གཅིག་ལ་མ་གྲུབ་པ་སྟེ། ཤིང་ཐམས་ཅད་མཚན་མོ་ལོ་མ་འཁུམས་པ་ལ་བརྟེན་པ་མ་ཡིན་ནོ། །དེ་བཞིན་ས་ལ་སོགས་པའི་ཆོས་ཅན་བློ་དང་ལྡན་པ་ལས་སྐྱེས་པ་ཡིན་ནོ་ཞེས་བསྒྲུབ་པར་བྱ་བ་ལ་འབྲས་བུ་ཡིན་པའི་ཕྱིར་ཞེས་པའི་གཏན་ཚིགས་ནི་ཕྱིར་རྒོལ་སངས་རྒྱས་པ་ལ་མ་གྲུབ་སྟེ། མངོན་སུམ་དང་མི་དམིགས་པ་རྒྱུ་དང་འབྲས་བུའི་འབྲེལ་བ་བསྒྲུབ་པའི་ངོ་བོས་ས་ལ་སོགས་པ་ལ་མ་གྲུབ་པའི་ཕྱིར་རོ། །གལ་ཏེ་གནས་དང་བཟའ་བ་ལ་སོགས་པ་གྲུབ་བོ་ཞེས་ཟེར་ན། དེའི་ཚེ་ཕྱོགས་ཀྱི་ཕྱོགས་གཅིག་གཉིས་ཀ་ལ་མ་གྲུབ་བོ། །ཐེ་ཚོམ་ཟ་བའི་མ་གྲུབ་པ་ནི། དཔེར་ན་གལ་ཏེ་འདི་དུ་བ་ཡིན་འདི་ན་མེ་ཡོད་དེ་ཞེས་བསྒྲུབ་པར་བྱ་བ་ལ་གཏན་ཚིགས་ཉིད་མ་ངེས་པའི་ཕྱིར་རོ། །ཆོས་ཅན་ཐེ་ཚོམ་ཟོས་པས་མ་གྲུབ་པ་ནི། དཔེར་ན་རི་སུལ་དུ་མ་འདི་དག་ལས་རི་སུལ་འགའ་ཞིག་ན་རྨ་བྱ་ཡོད་དེ་ཞེས་བསྒྲུབ་པར་བྱ་བ་ལ་རྨ་བྱའི་སྒྲ་གྲགས་པའི་ཕྱིར་རོ་ཞེས་པའི་གཏན་ཚིགས་ལྟ་བུའོ། །ཆོས་ཅན་མ་གྲུབ་པ་ཡང་མ་གྲུབ་པ་ཡིན་ཏེ། དཔེར་ན་ཆོས་ཅན་བདག་ཐམས་ཅད་དུ་ཁྱབ་པར་བསྒྲུབ་པར་བྱ་བ་ལ། ཡོན་ཏན་ཐམས་ཅད་ནི་དམིགས་པའི་ཕྱིར་རོ། །ཞེས་པའི་གཏན་ཚིགས་ལྟ་བུའོ། །འདི་དག་ནི་མ་གྲུབ་པ་ཞེས་བྱ་བའི་གཏན་ཚིགས་ལྟར་སྣང་བའོ། །འགལ་བའི་གཏན་ཚིགས་ལྟར་སྣང་བ་ཅི་འདྲ་བ་ཞིག་ཅེ་ན། དཔེར་ན་ཆོས་ཅན་སྒྲ་རྟག་སྟེ་ཞེས་པ་ནི་བསྒྲུབ་པར་བྱ་བའི་ཆོས་སོ། །བྱས་པའི་ཕྱིར་ནམ་མཁའ་ལ་སོགས་པ་བཞིན་ནོ། །ཞེས་བྱ་བའི་གཏན་ཚིགས་འདི་ནི་བུམ་པ་ལ་སོགས་པའི་མི་མཐུན་པའི་ཕྱོགས་ཉིད་ལ་ཡོད་ལ། མཐུན་པའི་ཕྱོགས་ལ་ནི་མིན་པ་ལྟ་བུའོ། །དེ་བཞིན་དུ་ཆོས་ཅན་སྒྲ་རྟག་སྟེ་ཞེས་བསྒྲུབ་པར་བྱ་བ་ལ་རྩོལ་མ་ཐག་ཏུ་བྱུང་བ་ཡིན་པའི་ཕྱིར་ཞེས་བྱ་བའི་གཏན་ཚིགས་ནི་མཐུན་པའི་ཕྱོགས་ནམ་མཁའ་ལ་སོགས་པ་ལ་མེད་ཕྱོགས་གཅིག་བུམ་པ་ལ་སོགས་པ་ལ་ནི་ཡོད་ལ། གློག་ལ་སོགས་པ་ལ་ནི་མེད་པ་ལྟ་བུའོ། །འཆད་པར་འགྱུར་བའི་གཏན་ཚིགས་འདི་ཉིད་ནི་ཆོས་ཀྱི་རང་གི་ངོ་བོ་ཕྱིན་ཅི་ལོག་ཏུ་བསྒྲུབ་པ་དང་། ཆོས་ཅན་རང་གི་ངོ་བོ་ཕྱིན་ཅི་ལོག་ཏུ་བསྒྲུབ་པས་རྣམ་པ་གཉིས་ཡིན་ཏེ། དཔེར་ན་ཆོས་ཅན་མིག་ལ་སོགས་པ་འདི་དག་གཞན་གྱི་དོན་བྱེད་པ་ཡིན་ཏེ་ཞེས་བྱ་བ་ནི་བསྒྲུབ་པར་བྱ་བའི་ཆོས་སོ་བསགས་པ་ཡིན་པའི་ཕྱིར་ཞེས་བྱ་བ་ནི་གཏན་ཚིགས་སོ། །ཁྲི་དང་སྟན་ལ་སོགས་པ་བཞིན་ནོ། །ཞེས་བྱ་བ་ནི་མཐུན་པའི་ཕྱོགས་བསྟན་པའོ། །འདི་ལྟར་གཏན་ཚིགས་འདིས་མིག་ལ་སོགས་པ་གཞན་གྱི་དོན་དུ་སྒྲུབ་པར་བྱེད་ལ། དེ་བཞིན་དུ་བསགས་པ་ཉིད་གཞན་གྱི་ཕྱིར་སྒྲུབ་པར་བྱེད་དོ། །ཁྲི་དང་སྟན་ལ་སོགས་པ་ལྷས་བྱིན་ལ་སོགས་པ་གཞན་གྱི་དོན་བྱེད་པར་མཐོང་བའི་ཕྱིར་རོ། །ཆོས་ཅན་གྱི་རང་གི་ངོ་བོ་ཕྱིན་ཅི་ལོག་ཏུ་བསྒྲུབ་པ་ནི། དཔེར་ན་ཆོས་ཅན་ལ་སོགས་པ་ནི་བློ་དང་ལྡན་པའི་རྒྱུད་ལས་སྐྱེས་པ་ཡིན་ཏེ་ཞེས་བྱ་བར་བསྒྲུབ་པར་བྱ་ལ་རྟེན་དང་བཅས་པའི་ཕྱིར་ཞེས་བྱ་བ་ནི་གཏན་ཚིགས་སོ། །བུམ་པ་ལ་སོགས་པ་བཞིན་ནོ་ཞེས་བྱ་བས་ནི་མཐུན་ཕྱོགས་བསྟན་ནོ། །འདི་ལྟར་གཏན་ཚིགས་འདིས་ནི་བློ་དང་ལྡན་པའི་རྒྱུ་ལས་སྐྱེས་པ་ཉིད་སྒྲུབ་པར་བྱེད་པ་ཡིན་ལ། དེ་བཞིན་དུ་བློ་དང་ལྡན་པའི་བྱེད་པའི་བརྟེན་པ་དང་བཅས་པ་ཡང་སྒྲུབ་པར་བྱེད་དོ། །ཆོས་ཅན་གྱི་ཁྱད་པར་ཕྱིན་ཅི་ལོག་ཏུ་བསྒྲུབ་པ་ནི། དཔེར་ན་བྱེ་བྲག་པས་སྤྱོད་པ་ལ་ཆོས་ཅན་བདག་འདི་སེམས་དང་ལྡན་པ་ཡིན་ནོ་ཞེས་བསྒྲུབ་པར་བྱ་བ་ལ། སེམས་ཀྱིས་བྱིན་གྱིས་བརླབ་པའི་ཕྱིར་ཞེས་བྱ་བའི་གཏན་ཚིགས་ནི། བདག་སེམས་མེད་པ་ལ་ཇི་ལྟར་སེམས་དང་ལྡན་པར་བསྒྲུབ་པར་བྱེད་པ་དེ་བཞིན་དུ། གཏན་ཚིགས་འདིས་མི་རྟག་པ་ཡང་སྒྲུབ་པར་བྱེད་དེ། རྣམ་པར་ཤེས་པ་ནི་མི་རྟག་པའི་ཕྱིར་རོ། །ལྔ་པོ་དེ་དག་གིས་ནི་འགལ་པའི་གཏན་ཚིགས་ལྟར་སྣང་བ་བསྟན་ཏོ། །མ་ངེས་པའི་གཏན་ཚིགས་ལྟར་སྣང་བ་ཡང་ཅི་འདྲ་བ་ཞིག་ཅེ་ན། སྨྲས་པ། དཔེར་ན་སྒྲ་རྟག་པ་ལ་སོགས་པའི་ཆོས་བསྒྲུབ་པར་བྱ་བ་ལ་གཞལ་བྱ་ཡིན་པའི་ཕྱིར་ཞེས་པའི་གཏན་ཚིགས་ནི། མཐུན་པའི་ཕྱོགས་དང་མི་མཐུན་པའི་ཕྱོགས་ཐམས་ཅད་ལ་འཇུག་པའི་ཐུན་མོང་གི་མ་ངེས་པ་ཞེས་བྱའོ། །དེ་བཞིན་དུ་སྒྲ་རྟག་པར་བསྒྲུབ་པར་བྱ་བ་ལ་ཉན་པར་བྱ་བ་ཡིན་པའི་ཕྱིར་ཞེས་བྱ་བའི་གཏན་ཚིགས་ནི་མཐུན་པའི་ཕྱོགས་དང་མི་མཐུན་པའི་ཕྱོགས་ལ་མི་འཇུག་པའི་ཕྱིར་ཐུན་མོང་མ་ཡིན་པའི་མ་ངེས་པ་ཡིན་ནོ། །དེ་བཞིན་དུ་སྒྲ་རྩོལ་མ་ཐག་ཏུ་བྱུང་བ་མ་ཡིན་པ་ཉིད་དུ་བསྒྲུབ་པར་བྱ་བ་ལ་མི་རྟག་པའི་ཕྱིར་ཞེས་བྱ་བའི་གཏན་ཚིགས་ནི། མཐུན་པའི་ཕྱོགས་ཀྱི་ཕྱོགས་གཅིག་ལ་འཇུག་ལ། མི་མཐུན་པའི་ཕྱོགས་ལ་ཁྱད་པར་འཇུག་པའི་མ་ངེས་པ་ཡིན་ཏེ། རྩལ་མ་ཐག་ཏུ་བྱུང་བ་མ་ཡིན་པའི་སྒྲའི་མཐུན་པའི་ཕྱོགས་ནི་གློག་དང་། ནམ་མཁའ་ལ་སོགས་པ་སྟེ། དེ་ལ་མཐུན་པའི་ཕྱོགས་གཅིག་གློག་ལ་སོགས་པ་ལ་ནི་མི་རྟག་པ་འཇུག་ལ། ནམ་མཁའ་ལ་སོགས་པ་ལ་ནི་མ་ཡིན་ནོ། །མི་མཐུན་པའི་ཕྱོགས་རྩལ་མ་ཐག་བྱུང་བ་ལ་སོགས་ཐམས་ཅད་ཡིན་ཏེ། དེ་ཐམས་ཅད་ལ་འཇུག་པ་ཡིན་ནོ། །དེ་བཞིན་སྒྲ་ནི་རྩལ་མ་ཐག་བྱུང་བ་ཉིད་ཡིན་ཏེ་ཞེས་བསྒྲུབ་པར་བྱ་བ་ལ་མི་རྟག་པའི་ཕྱིར་ཞེས་བྱ་བའི་གཏན་ཚིགས་ནི། བུམ་པ་ལ་སོགས་པ་ཐམས་ཅད་ལ་ནི་རྩལ་མ་ཐག་ཏུ་བྱུང་བ་མ་ཡིན་པ། མི་མཐུན་པའི་ཕྱོགས་ཡང་གློག་དང་ནམ་མཁའ་ལ་སོགས་པ་དེ་ལས་ཕྱོགས་གཅིག་གློག་ལ་སོགས་པ་ལ་ནི་འཇུག་ལ། ནམ་མཁའ་ལ་སོགས་པ་ལ་ནི་མ་ཡིན་པས། དེའི་ཕྱིར་འདི་མི་མཐུན་པའི་ཕྱོགས་གཅིག་ལ་འཇུག་ལ། མཐུན་པའི་ཕྱོགས་ལ་ཁྱབ་པའི་མ་ངེས་པའི་གཏན་ཚིགས་ཡིན་ནོ། །ཕྱོགས་གཉིས་ཀའི་ཕྱོགས་གཅིག་ལ་འཇུག་པའི་མ་ངེས་པ་ནི། དཔེར་ན་ཆོས་ཅན་སྒྲ་རྟག་པ་རེ་བསྒྲུབ་པར་བྱ་བ་ལ། ལུས་ཅན་མ་ཡིན་པའི་ཕྱིར་རམ་རེག་བྱ་མིན་པའི་ཕྱིར་ཞེས་བྱ་བའི་གཏན་ཚིགས་ནི། མཐུན་པའི་ཕྱོགས་རྡུལ་ཕྲ་རབ་དང་ནམ་མཁའ་ལ་སོགས་པ་དེ་ལ་མཐུན་པའི་ཕྱོགས་གཅིག་ནམ་མཁའ་ལུས་ཅན་མ་ཡིན་པ་ལ་འཇུག་ལ། རྡུལ་ཕྲ་རབ་ལ་ནི་མ་ཡིན་ཏེ། རྡུལ་ཕྲ་རབ་རྣམས་ལུས་ཅན་ཡིན་པའི་ཕྱིར་རོ། །བུམ་པ་དང་བདེ་བ་ལ་སོགས་པ་མི་རྟག་པ་མི་མཐུན་པའི་ཕྱོགས་གཅིག་བདེ་བ་ལ་སོགས་པ་ལ་འཇུག་ལ་བུམ་པ་ལ་སོགས་པར་མ་ཡིན་པ་ལྟ་བུའོ། །དེ་བཞིན་དུ་མི་མཐུན་པའི་ཕྱོགས་ལ་ནི་ཐེ་ཚོམ་ཟ་ལ། མཐུན་པའི་ཕྱོགས་ལ་ཁྱབ་པའི་མ་ངེས་པའི་གཏན་ཚིགས་ནི། དཔེར་ན་སེར་སྐྱ་ལ་སོགས་པའི་ཆོས་ཅན་ཐམས་ཅད་མཁྱེན་པ་མ་ཡིན་ཏེ། སྨྲ་བའི་ཕྱིར་ཞེས་བྱ་བའི་གཏན་ཚིགས་ནི། ལམ་པོ་ཆེའི་སྐྱེས་བུ་ལ་སོགས་དང་མཐུན་པའི་ཕྱོགས་ལ་ནི་ཡོད་ལ། མི་མཐུན་པའི་ཕྱོགས་ཐམས་ཅད་མཁྱེན་པ་ལ་ནི་ཐེ་ཚོམ་ཟ་སྟེ། ཐམས་ཅད་མཁྱེན་པ་ནི་དབང་པོ་ལས་འདས་པའི་ཕྱིར་སྨྲ་བ་ཡོད་དམ་མེད་པ་ཐེ་ཚོམ་ཟ་བ་ཡིན་ནོ། །དེ་བཞིན་དུ་མཐུན་པའི་ཕྱོགས་ལ་འཇུག་པ་ནི་ཐེ་ཚོམ་ཟ་ལ། མི་མཐུན་པའི་ཕྱོགས་ལ་ཁྱབ་པའི་མ་ངེས་པའི་གཏན་ཚིགས་ནི། དཔེར་ན་ཁྱུ་མཆོག་དང་འཕེལ་བ་ལ་སོགས་པའི་ཆོས་ཅན་ཐམས་ཅད་མཁྱེན་པ་ཡིན་ནོ་ཞེས་བསྒྲུབ་པར་བྱ་བ་ལ། བསྟན་བཅོས་འབའ་ཞིག་བྱེད་པའི་ཕྱིར་ཞེས་བྱ་བ་ལ་གཏན་ཚིགས་ནི། མཐུན་པའི་ཕྱོགས་ཐམས་ཅད་མཁྱེན་པ་ལ་ནི་ཐེ་ཚོམ་ཟ་སྟེ། ཐམས་ཅད་མཁྱེན་པ་ནི་དབང་པོ་ལས་ཤིན་ཏུ་འདས་པའི་ཕྱིར་རོ། །བསྟན་བཅོས་འབའ་ཞིག་བྱེད་པ་ལ་ཐེ་ཚོམ་ཟ་བ་ཡིན་ནོ། །མི་མཐུན་པའི་ཕྱོགས་ས་ར་ཧ་རེ་དང་མ་ཧ་རེ་ལ་སོགས་པ་ཐམས་ཅད་མཁྱེན་པ་མ་ཡིན་པ་ལ་ཡོད་པ་ལྟ་བུའོ། །རྗེས་སུ་འགྲོ་བ་དང་ལྡོག་པ་ལ་ཐེ་ཚོམ་ཟ་བའི་མ་ངེས་པའི་གཏན་ཚིགས་ནི། དཔེར་ན་གསོན་པོའི་ལུས་ནི་བདག་དང་བཅས་པ་ཡིན་ཏེ་སྲོག་ལ་སོགས་པ་དང་ལྡན་པའི་ཕྱིར་རོ། །ཞེས་བྱ་བའི་གཏན་ཚིགས་ནི་གསོན་པའི་ལུས་དང་འབྲེལ་བ་ཅན་སྲོག་ལ་སོགས་པ་བདག་དང་བཅས་པའམ། བདག་མེད་པ་ལ་འཇུག་པའམ་ལྡོག་པ་མ་ངེས་པ་ཡིན་ཏེ། དེ་བས་ན་རྗེས་སུ་འགྲོ་བ་འབའ་ཞིག་པའི་གཏན་ཚིགས་ཡིན་ཏེ་དཔེ་མེད་པ་ཡིན་པའི་ཕྱིར་རོ། །དེ་བཞིན་དུ་གཉིས་པ་ཡང་ལྡོག་པ་འབའ་ཞིག་ཡིན་ཏེ། གསོན་པོའི་ལུས་འདི་ནི་བདག་མེད་པ་མ་ཡིན་ཏེ་སྲོག་ལ་སོགས་པ་མེད་པར་ཐལ་བར་འགྱུར་བའི་ཕྱིར་རོ། །ཞེས་བྱ་བ་ལྟ་བུའོ། །དཔེ་མེད་པ་ཉིད་ཀྱི་ཕྱིར་རྗེས་སུ་འགྲོ་བ་ངེས་པ་མེད་པ་དང་། ལྡོག་པ་ཡང་ངེས་པ་མེད་པ་འདི་ནི་ཐེ་ཚོམ་ཟ་བའི་གཏན་ཚིགས་སོ། །འདི་དག་ནི་མ་ངེས་པའི་གཏན་ཚིགས་ལྟར་སྣང་བ་ཞེས་བསྟན་ཏོ། །ངག་དབང་སྨྲ་བའི་ཟླ་བ་ལས་འཛག་ནས། ཕྱོགས་གླང་གྲགས་པའི་ཐུགས་ཀ་བརླན་པའི་དཔྱིད། །པད་རྫིང་ཀུན་ད་དཀར་པོས་མྱོང་བའི་བསུང་། །ཀུན་དགར་བྱེད་འདྲ་དྲི་བཟང་གཞན་ལ་མིན། །གཉིས་པ་གཞན་གྱི་དོན་གྱི་རྗེས་སུ་དཔག་པ་བཤད་པ་ལ། གཞན་སྡེ་མུ་སྟེགས་པའི་འདོད་པ་འགོད་དེ་དགག་པའི་ཕྱིར་རང་ལུགས་ལེགས་པར་བཤད་པ་གཉིས་ལས། དང་པོ་ནི། གྲངས་ཅན་རང་གི་མཐོང་བ་མ་ཡིན་པ་ཡང་གཞན་གྱི་མཐོང་བ་སྒྲུབ་བྱེད་དུ་འདོད་པ་དང་། རྒོལ་བ་མི་འདོད་ཀྱང་བླ་སྟེ་བསྟན་བཅོས་བྱེད་པའི་འདོད་པ་ཐམས་ཅད་བསྒྲུབ་པར་བྱ་བ་ཁོ་ན་ཡིན་ནོ། །ཞེས་དང་། ཚིག་ཏུ་སྨྲས་པ་ཁོ་ན་སྒྲུབ་བྱེད་ཡིན་གྱི་མ་སྨྲས་པ་ལ་མ་ཡིན་ནོ། །ཞེས་དང་། རྒོལ་བ་ཕྱིར་རྒོལ་གཉིས་ཀ་ལ་མ་གྲུབ་པ་སྒྲུབ་བྱེད་དུ་འདོད་པ་དང་། པེ་ལུ་ཀ་ན་རེ། སྤྱི་ནི་ཐམས་ཅད་ལ་ཡོད་པ་ཡིན་ཏེ། བསལ་བ་དང་དེ་དག་གི་སྟོང་པའི་ཡུལ་ཐམས་ཅད་ན་ཡོད་པའི་ཕྱིར་རོ། །ཞེས་དང་། པེ་ཐ་ར་ན་རེ། དེ་ནི་བསལ་བ་ཐམས་ཅད་ན་ཡོད་པ་ཡིན་གྱི་བར་གྱི་ཡུལ་ན་ཡོད་པ་ནི་མ་ཡིན་ནོ། །ཞེས་དང་། རིག་པ་ཅན་པ་ན་རེ། དམ་བཅའ་བ་དང་གཏན་ཚིགས་འགལ་བ་ནི་དམ་བཅའ་བ་དང་འགལ་བའོ་ཞེས་བྱ་བ་ནི་དམ་བཅའ་བའི་སྐྱོན་ཡིན་ཏེ། དཔེར་ན་སྒྲ་རྟག་སྟེ། ཐམས་ཅད་མི་རྟག་པའི་ཕྱིར་རོ། །ཞེས་ཟེར་རོ། །སྔར་རྟགས་ལྟར་སྣང་བ་བཤད་པ་དག་དང་། རིག་པ་ཅན་པ་ལ་སོགས་པ་རྟོག་གེ་པ་ཕལ་མོ། གཞན་གྱི་རྗེས་སུ་དཔག་པ་ནི་ཚིག་ཡན་ལག་ལྔ་པ་ཡིན་ཏེ། ཡན་ལག་ལྔ་ནི། དམ་བཅའ་བ་དང་། གཏན་ཚིགས་དང་། དཔེ་དང་། ཉེ་བར་སྦྱར་བ་དང་། མཇུག་བསྡུ་བ་རྣམས་སོ། །ཞེས་འགའ་ཞིག་འདི་ལྟར་ཆོས་མཐུན་པ་དང་མི་མཐུན་པ་དང་ལྡན་པའི་ཚིགས་སྦྱོར་བ་གང་ཡིན་པ་འདི་ཙམ་ཞིག་ཚུལ་ཡིན་ནོ། །དེ་ལྟ་མ་ཡིན་ན་ཆོས་མཐུན་པ་ཙམ་ཞིག་སྦྱར་བས་ཀྱང་ཇི་ལྟར་ཆོས་མི་མཐུན་པ་རྟོགས་པར་འགྱུར། ཆོས་མི་མཐུན་པ་ཙམ་ཞིག་སྦྱར་ན་ཡང་ཆོས་མཐུན་པ་རྟོགས་པར་ག་ལ་འགྱུར། དེ་ལྟ་བས་ན་གཉིས་ཀ་རྟོགས་པར་བྱ་བའི་ཕྱིར་གཉིས་ཀ་བརྗོད་པར་བྱེད་དགོས་སོ། །ཞེས་བྱ་བར་རྟོགས་ཞེས་དང་། སེར་སྐྱ་པ་རྣམས་ནི་གཞན་རྟོགས་པའི་དོན་གྱིས་རྗེས་སུ་དཔག་པ་ནི་བསལ་ཏེ་འོང་བ་དང་ལྡན་པའི་ཁྱད་པར་གྱི་རྣམ་པ་གཉིས་སོ། །དེ་ལ་ལྡན་པ་ནི་དམ་བཅའ་བ་ལ་སོགས་པའི་ཁྱད་པར་གྱིས་ངག་གི་རང་བཞིན་ལྔའི་ཕྱོགས་སོ། །དེ་དག་ཀྱང་གཞལ་བྱ་དང་འབྲེལ་བ་ཉིད་ཀྱིས་ལྡན་པ་དང་། བསལ་ཏེ་འོངས་པའི་སྦྱོང་བ་དག་རྣམ་པར་བཅད་པར་བྱ་སྟེ། ཡན་ལག་ཐམས་ཅད་ཀྱིས་ཡིན་གྱི་གཏན་ཚིགས་ཁོ་ནས་ནི་མ་ཡིན་ཏེ། ལྡན་པ་དང་བསལ་ཏེ་འོངས་པར་འདུས་པའི་ཕྱིར་རོ་དེ་ལ་རེ་ཞིག་བསྒྲུབ་བྱ་ནི། གཙོ་བོ་ཡོད་པ་ཡིན་ཏེ། ཁྱད་པར་རྣམས་ལ་རྗེས་སུ་འགྲོ་བ་མཐོང་བའི་ཕྱིར་རོ། །ཞེས་དང་། རིག་པ་ཅན་པ་རྣམས་དམ་བཅའ་བ་ནི་བསྒྲུབ་པར་བྱ་བ་བསྟན་པ་ཡིན་ནོ། །ཞེས་དང་། བསྒྲུབ་བྱ་དང་ཆོས་མཐུན་པ་ལས་དེའི་ཆོས་རྟོགས་པའི་དཔེ་ནི་དཔེ་ཡིན་ལ། དེ་བཟློག་པ་ལས་བཟློག་པའོ། །ཞེས་དང་། བྱེ་བྲག་པ་རྣམས་གཉི་ག་ལ་རབ་ཏུ་གྲུབ་པ་ནི་དཔེའོ། །རིག་པ་ཅན་པ་རྣམས་ནི་དེ་ལ་ཆོས་དང་མཐུན་པ་ལས་བསྒྲུབ་བྱ་སྒྲུབ་པར་བྱེད་པ་ནི་གཏན་ཚིགས་སོ། །ཞེས་དང་། བྱེ་བྲག་པ་རྣམས་གལ་ཏེ་དེའི་སྒྲ་བསྒྲུབ་བྱ་བརྗོད་པ་དང་འབྲེལ་བར་བྱེད་ན་བསྒྲུབ་བྱ་དེ་ཁོ་ན་བསྒྲུབ་བྱ་དེ་དང་ལྡན་པར་འགྱུར་ལ། དེ་ཡང་ཆོས་དང་ཆོས་ཅན་དུ་འགྱུར་བ་ཡིན་ནོ། །ཞེས་དང་། བརྡ་སྤྲོད་པ་རྣམས་སྒྲ་བཟང་པོ་ཁོ་ནར་འདོད་ནས་དངོས་པོ་ཐམས་ཅད་སྒྲ་ཐམས་ཅད་ཀྱི་བརྗོད་པར་བྱ་བ་ཉིད་དུ་རུང་བར་འདོད་པ་ཙམ་གྱི་རྗེས་སུ་བྱེད་པ་སྐྱེ་བོ་གནག་རྫི་མོ་ཡན་ཆད་ལ་གྲགས་པར་འདོད་པ་དང་། འཇིག་རྟེན་རྒྱང་འཕེན་པ་རྣམས་ནི་རང་གི་བརྗོད་པར་འདོད་པའི་ལྐོག་ཏུ་གྱུར་པ་ཚིག་གི་རྟགས་དེ་མེད་ན་མི་འབྱུང་བའི་སྒོ་ནས་རྗེས་སུ་དཔོག་པར་བྱེད་ཀྱང་། རྗེས་སུ་དཔོག་པ་ཚད་མ་མིན་ནོ། །ཞེས་པ་རང་ཚིག་དང་འགལ་བར་སྨྲ་བ་སོགས་ལོག་པར་རྟོག་པ་མང་ངོ་། །གཉིས་པ་ལ། བསྒྲུབ་པ་དང་སུན་འབྱིན་གྱི་རྣམ་གཞག བསྒྲུབ་བྱ་དང་སྒྲུབ་བྱེད་ཀྱི་རྣམ་གཞག་གཉིས་ལས། དང་པོ་ལ། །མཐོང་བ་རབ་གསལ་བཤད་ནས་ཐལ་འགྱུར་བསྟན། དོན་རབ་གསལ་བཤད་ནས་ཕྱོགས་ཚིག་སྒྲུབ་བྱེད་དང་། མི་འཐད་པ་ལ་སོགས་པ་བསྟན་པ་གཉིས་ལས། དང་པོ་ནི། གཞན་དོན་རྗེས་སུ་དཔག་པ་ནི། །རང་གི་མཐོང་དོན་རབ་གསལ་བྱེད། །དེའི་རང་འགྲེལ་དུ། ཇི་ལྟར་རང་ལ་ཚུལ་གསུམ་པའི་རྟགས་ལས་རྟགས་ཅན་གྱི་ཤེས་པ་སྐྱེས་པ་དེ་ལྟར། གཞན་ལ་ཚུལ་གསུམ་པའི་རྟགས་ལས་རྟགས་ཅན་གྱི་ཤེས་པ་བསྐྱེད་པར་འདོད་ནས་ཚུལ་གསུམ་པའི་རྟགས་བརྗོད་པ་ནི། གཞན་གྱི་དོན་གྱི་རྗེས་སུ་དཔག་པ་སྟེ་རྒྱུ་ལ་འབྲས་བུ་བཏགས་པའི་ཕྱིར་རོ། །ཞེས་བསྒྲུབ་ངག་གི་ནི་གཞན་ལ་རྗེས་སུ་དཔག་པའི་ཤེས་པ་བསྐྱེད་པར་འདོད་པ་ཡིན་ལ། དེ་ཡང་ཚུལ་གསུམ་པའི་རྟགས་བསྟན་པ་ལས་ཡིན་ཞིང་། དེ་ཡང་དག་གི་རྣམ་པར་རིག་བྱེད་ཀྱི་ཚིག་ཏུ་སྦྱར་བ་འདིའི་སྒོ་ནས་སོ། །ཚིག་ཀྱང་ཚུལ་གསུམ་པའི་རྟགས་སྟོན་པར་བྱེད་པ་ཡིན་ལ། དེས་རྒྱུད་ནས་ལྐོག་ཏུ་གྱུར་པའི་དོན་ཤེས་པའི་ཕྱིར་གྱི་སྒྲ་གང་ཞིག་ཚུལ་གསུམ་སྟོན་པར་བྱེད་པ་དེ་ཉིད་ནི་རྗེས་སུ་དཔག་པའོ། །ཞེས་འབྲས་བུའི་མིང་རྒྱུ་ལ་བཏགས་ནས་གསུངས་སོ། །དེ་བརྗོད་པ་ལ་ཚུལ་གསུམ་པའི་རྟགས་ལས་དྲན་པ་སྐྱེ། དྲན་པ་ལས་རྗེས་སུ་དཔག་པ་སྐྱེ་བ་གཞན་ཡིད་ཆེས་པ་དེ་ནི་གསལ་བ་དང་། དེ་ཡང་བརྗོད་པ་ཁྱད་པར་དུ་འཕགས་པ་བརྗོད་པས་ཡིན་པའི་ཕྱིར་རབ་ཀྱི་ཚིག་སྨོས་སོ། །གཞན་ཡིད་ཆེས་པ་ཡང་ཚད་མས་རྟོགས་པ་ལ་ཡིན་ཏེ། གལ་ཏེ་རྗེས་སུ་དཔག་པར་བྱ་བ་དེ་ཡང་ཚད་མས་རྟོགས་ན་ནི་དེའི་ཚེ་རྩོད་པ་མེད་པ་ཉིད་ཡིན་པས། རྗེས་སུ་དཔག་པའི་མིང་རྒྱུ་ལ་གདགས་པ་ཡང་རིག་པ་ཡིན་ནོ། །འོ་ན་ཚུལ་གསུམ་པའི་རྟགས་སྟོན་པའི་ཚིགས་རྗེས་སུ་དཔག་པའོ་ཞེས་བརྗོད་པས་ཆོག་མོད། རང་གི་མཐོང་བ་དང་དོན་སྨོས་པའི་དགོས་པ་ཅི་ཡིན་ཞེ་ན། དགོས་པ་ནི། ལུང་ལས། གཞན་གྱི་མཐོང་བ་སྒྲུབ་བྱེད་མིན། །དོན་མེད་ལས་ཀྱང་འགྲུབ་པ་མིན། །ཞེས་གསུངས་པ་ཤེས་པའི་ཕྱིར་དང་། དང་པོས་ནི། གཞན་ལ་བསྟན་པར་བྱ་ཉིད་ཕྱིར། །བདག་མཐོང་མིན་ཡང་གཞན་དག་གི །མཐོང་བ་སྒྲུབ་བྱེད་ཅེས་ཁ་ཅིག །གྲངས་ཅན་གཞན་གྱིས་རྟོགས་པར་བྱ་བ་ཡིན་པའི་ཕྱིར། རང་གི་མཐོང་བ་མ་ཡིན་ཡང་གཞན་གྱིས་མཐོང་བ་སྒྲུབ་པར་བྱེད་པ་ཡིན་ཏེ། དཔེར་ན་བློ་དང་བདེ་བ་ལ་སོགས་པ་ནི་སེམས་པ་མེད་པ་ཡིན་ཏེ། སྐྱེ་བ་ཅན་ནམ་མི་རྟག་པ་ཡིན་པའི་ཕྱིར་གཟུགས་ལ་སོགས་པ་བཞིན་ནོ་ཞེས་བྱ་བ་ལྟ་བུའོ། །དེ་སྤང་ཕྱིར་བདག་མཐོང་བའི་ཚིག་ཅེས་སྨོས་སོ། །དེ་ཡང་ལུང་ལས། སངས་རྒྱས་ཉིད་ཀྱིས་རྟོགས་ཀྱི་གྲངས་ཅན་པ་དག་ལུང་དེ་ཁས་མི་ལེན་པས་སོ། །ཞེ་ན། ཡོངས་བརྟགས་ཡོངས་སུ་ལེན་པའི་ཕྱིར། །རྗེས་སུ་དཔག་པའི་ཡུལ་ལ་ཚིག །ཚད་མ་ཉིད་དུ་འདོད་མ་ཡིན། །དེར་ནི་རྗེས་དཔག་འཇུག་མི་འགྱུར། །ལུང་ཡང་བརྟགས་ནས་ཁས་ལེན་པ་ཡིན་ལ། གང་ལ་རྗེས་སུ་དཔག་པ་འཇུག་པའི་ཡུལ་ཚུལ་གསུམ་པ་ཅན་གྱི་རྟགས་དང་། དེས་རྟོགས་པར་བྱ་བའི་དོན་དེ་ལ་ལུང་ཚིག་ཚད་མ་མ་ཡིན་ནོ། །དེ་མ་ཡིན་པས་དེ་ལ་དེ་རྗེས་སུ་དཔག་པ་འཇུག་པ་མི་འགྱུར་རོ། །ལུང་ལ་གནོད་ཕྱིར་གཞན་ལ་ནི། །སོགས་ཀྱི་ལུང་ལ་གནོད་པར་བྱ་བའི་ཕྱིར་གཞན་ལ་སྒྲུབ་པར་བྱེད་པ་བརྗོད་པའི་ཕྱིར་དེའི་ཚེ་ཚད་མ་མ་ཡིན་ལ་དེས་གྲུབ་པ་ནི་གྲུབ་པ་མ་ཡིན་པའི་ཕྱིར་དེ་ལས་གྲུབ་པར་ཇི་ལྟར་འགྱུར། །གལ་ཏེ་ལུང་དེ་ལྡན་ལ་གྲུབ། །ཅེ་ན་གང་གི་ལུང་གང་ཡིན། །ཚད་མས་གནོད་པར་གྱུར་པ་ཡིན། །སོགས་ཀྱིས་ཚད་མས་གནོད་པ་ལུང་ཉིད་དུ་ཇི་ལྟར་འགྱུར། ལུང་དེ་ཉིད་ཀྱིས་དེ་དང་འགལ་བར་ཁས་ལེན་པར་ཡང་ཇི་ལྟར་འགྱུར། དེ་ཁས་བླངས་ན་ཡང་སྤངས་པའི་ཡན་ལག་ལུང་ཚད་མ་མ་ཡིན་པས་ནི། རྟོགས་པར་མི་རུང་བའི་ཕྱིར་རོ། །རང་རྟོགས་གང་ལས་བྱུང་གྱུར་པའི། །སྒྲུབ་བྱེད་དེ་ནི་ཅིས་མ་བརྗོད། །རིགས་པ་གང་གིས་ལུང་འཛིན་པ། །དེ་ནི་འདིས་ཀྱང་ཅིས་མི་འཛིན། །འདིའི་དོན་རྣམ་ངེས་སུ། དེ་ཁས་བླངས་པས་ལུང་ཡིན་ལ། དེ་ལས་སྒྲུབ་པར་བྱེད་པའི་ཆོས་ཡིན་ཞིང་། དེ་ལས་དངོས་པོ་འཇོག་པའི་ཕྱིར་ན་དངོས་པོ་ལེགས་པར་གནས་པ་ཡིན་ནོ། །ཞེས་ལུང་ཁས་ལེན་པ་ཡང་རྒྱུ་མཚན་འདི་ལྟ་བུས་ཡིན་ནོ། །ཕལ་ཆེར་འདིའི་ལུང་གྲངས་ཅན་གྱི་ཡིན་པར་འདོད་པ་མི་འཐད་དོ། །རིགས་པས་འཐོབ་པ་ནི་གདོན་མི་ཟ་བར་ཁས་བླངས་དགོས་པས་གཉིས་ཀ་ལ་གྲུབ་པའི་སྒྲུབ་པར་བྱེད་པར་ཡང་འགྱུར་རོ། །དེ་བས་ན་སྒྲུབ་པར་བྱེད་པ་གཞན་གྱིས་ཉེ་བར་འགོད་ཅེས་པའི་ངལ་བས་ཅི་བྱ། དོན་འདི་ནི་རྣལ་འབྱོར་པས་རྟོག་པར་བྱ་བ་ཡིན་ཏེ། དེས་ན་གཞན་ནི་སྒྲུབ་པར་བྱེད་པ་རྣམས་ཇི་ལྟར་རུང་བས་རྟོགས་པར་བྱ་བ་ཡིན་ནོ། །ཞེ་ན། སྔར་ནི་སྒྲུབ་བྱེད་གང་དག་གི །སོགས་ཀྱིས་ཐ་མལ་པར་གྱུར་པ་ལས་ཕྱིས་ཐབས་རྗེས་སུ་བསྒྲུབས་པས་རྣལ་འབྱོར་པ་ཉིད་དུ་གྱུར་བ་ཡིན་ནོ། །སྒྲུབ་པར་བྱེད་པ་གང་གིས་དེ་སྒྲུབ་པར་བྱེད་པའི་ཐབས་རྟོགས་པ་དང་། ཐབས་དེ་རྗེས་སུ་བསྒྲུབ་པ་ལས་དབང་པོ་འབྱུང་ངོ་། །དབང་པོ་ཡང་དོན་དེ་རྟོགས་པའི་རང་བཞིན་གྱི་མངོན་སུམ་ཉིད་དབང་པོའམ། ཡང་ན་དེ་འདྲ་བ་རྟོགས་པའི་སྒྲུབ་པར་བྱེད་པའི་དབང་པོ་ཉིད་ལ་བརྗོད་དོ། །སྒྲུབ་པར་བྱེད་པ་དེ་དག་ནི་ཐབས་སུ་གྱུར་པའི་དོན་གྱི་དབང་པོ་དེ་སྒྲུབ་པར་བྱེད་པའི་ནུས་པའམ་མཐུ་ཞེས་པ་ནི། རྣལ་འབྱོར་པས་རྟོགས་པའི་དོན་ཁས་ལེན་པ་ལ་ནུས་པ་ཉིད་དོ། །གང་ཡང་འབྲེལ་བ་རྣམ་ཆད་ཅན། །སོགས་ཀྱི་གང་རྣམ་པ་ཐམས་ཅད་དུ་རྗེས་སུ་འབྲེལ་བ་མེད་པས་སྤྱིས་ཀྱང་ཡུལ་དུ་བྱ་བར་མི་ནུས་པ་དེ་ལྟ་བུའི་དངོས་པོ་དག་ལ་ནི་བསྒྲུབ་བྱ་དང་སྒྲུབ་བྱེད་ཀྱི་དབང་དུ་བྱས་པའི་སྤྱོད་པ་འགའ་ཡང་མེད་དོ། །འོན་ཏེ་ཇི་སྲིད་མ་རྟོགས་པ་དེ་སྲིད་དུ་སྒྲུབ་བྱེད་ལྟར་སྣང་བ་མི་ཤེས། དེས་ན་དེའི་བསམ་པས་སྒྲུབ་པར་བྱེད་པ་ཉིད་དོ། །ཞེ་ན། ནམ་ཤེས་པ་དེའི་ཚེ་འདི་སྒྲུབ་བྱེད་མ་ཡིན་པར་འགྱུར་བས་འདི་ལ་ཅི་སྐྱོན་ཞེ་ན། སྐྱེས་བུའི་བསམ་པའི་དབང་གིས་ནི། །དེ་ཉིད་དེ་ཉིད་མིན་འཇོག་ན། །གཏན་ཚིགས་དེར་སྣང་མེད་འགྱུར་ཏེ། །སྐྱེས་བུའི་འདོད་པ་ཙམ་གྱིས་གཏན་ཚིགས་དེར་སྣང་བ་དག་གི་དེ་ཉིད་རྣམ་པར་འཇོག་ན་ནི། གཏན་ཚིགས་ལྟར་སྣང་བའི་རྣམ་གཞག་མེད་པར་འགྱུར་ཏེ། དེ་ནི་དངོས་རྟེན་མིན་ཕྱིར་རོ། །མ་བརྟགས་པའི་ལུང་ལས་ནི་དངོས་པོ་ངེས་པ་མ་ཡིན་ནོ། །ཤེས་པ་ཙམ་གྱིས་དངོས་པོ་འགྲུབ་པའང་མ་ཡིན་ཏེ། དོན་ཡོད་ཤེས་ལ་བལྟོས་བཅས་ཡིན། །ནས། མི་རིགས། ཞེས་པའི་བར་གྱིས་དོན་ཡོད་པ་ཉིད་གཞན་སྒྲུབ་པར་བྱེད་པ་ཡིན་གྱི་མེད་པ་ནི་མ་ཡིན་ཏེ་མེད་པ་ལས་གྲུབ་པ་ཞེས་བྱ་བ་ནི་རྒྱུ་མེད་པ་ཅན་ཡིན་ནོ། །གལ་ཏེ་ཡོད་ཀྱང་དངོས་པོར་གྱུར་པའི་རྟགས་མེད་པར་དེ་རྟོགས་ཀྱང་དེའི་ཚེ་དེ་རྟོགས་པར་ལྟར་སྣང་བ་ཉིད་དོ། །ཡིད་ཆེས་པ་མེད་པའི་ཕྱིར་རོ། །སྒྲུབ་བྱེད་ཀྱང་འབྲས་རང་མ་དམིགས་པའི་རྟགས་ལས་གཞན་མེད་དོ། །དངོས་པོ་ལ་གྲུབ་པའི་མཚན་ཉིད་མེད་ན་ཅི་ལྟར་བདག་ཉིད་ལ་གྲུབ་པར་འགྱུར། གཞན་གྱིས་ནི་ཕ་རོལ་ལ་ཡང་རྟོགས་པར་མི་རིགས་སོ། །དེའི་ཕྱིར་གཞན་གྱིས་ཁས་བླངས་པ་ཙམ་གྱིས་ནི་མཁས་པ་རྣམས་ལ་སྒྲུབ་པར་བྱེད་པ་སྦྱོར་བ་མི་རིགས་སོ། །ཞེས་གྲུབ་བོ། །འོན་ཏེ་ཇི་ལྟར་ཁྱོད་དང་སྔོན་གྱི་སློབ་དཔོན་རྣམས་ཀྱིས་གཞན་ལ་གྲུབ་པའི་སྒྲུབ་པར་བྱེད་པས་གྲུབ་བྱ་འགྲུབ་པར་འདོད་ཅེ་ན། ངེད་ཀྱི་དེ་ནི་ཐལ་བར་འགྱུར་བ་ཡིན་གྱི་སྒྲུབ་བྱེད་མ་ཡིན་ནོ། །ཐལ་འགྱུར་དེ་ཡང་མུ་སྟེགས་བྱེད་དག་གི་འདོད་པ་ནི། མདོར། དམ་བཅའ་གཏན་ཚིགས་སྒོ་ནས་ནི། །གང་ཞིག་མི་འདོད་ཐལ་བའི་ཕྱིར། །གཏན་ཚིགས་དང་དམ་བཅའི་སྒོ་ནས་ཁས་བླངས་པ་ཡོད་ན་ཐལ་བ་འགྲུབ་པའི་ཕྱིར་རོ། །དཔེར་ན་སྒྲ་ནི་རྟག་པ་མ་ཡིན་ཏེ། ལས་ལ་སོགས་པ་དེར་ཐལ་བའི་ཕྱིར། ཞེས་འགོད་པ་བཀག་ནས། སློབ་དཔོན་རང་ཉིད། ཐལ་འགྱུར་ཆོས་ཅན་མ་ཡིན་ཕྱིར། །སྔོན་དུ་ཁས་བླངས་ཡོད་ན་ནི། །རྟགས་དང་དམ་བཅའ་གཞན་དག་ལ། །སྐྱོན་བརྗོད་སུན་འབྱིན་ཤེས་པར་བྱ། །ཞེས་གསུངས། གཞན་གྱིས་བཏགས་པ་ཡི། །ཐལ་བ་བསྒྲུབ་པ་གཉིས་འབྲེལ་ཕྱིར། །གཅིག་མེད་ན་གཞན་དགག་ཕྱིར་ཡིན། །འདི་རྣམ་ངེས་སུ་གཞན་གྱི་ཀུན་བརྟགས་པས་ཐལ་བར་གྲུབ་པ། དཔེར་ན། དུ་མ་ལ་ཡོད་པའི་གཅིག་པུ་ནི་ཡུལ་ལ་སོགས་པའི་ཁྱད་པར་ཅན་གཞན་དང་ལྡན་པ་མ་ཡིན་ཏེ། ཡུལ་དང་དུས་དང་གནས་སྐབས་ཀྱི་ཁྱད་པར་ངེས་པའི་གསལ་བ་གཅིག་དང་འདྲེས་པས་རྣམ་པར་མ་དཔྱད་པའི་རང་བཞིན་གཞན་གྱིས་སྟོང་པའི་ཕྱིར་ཏེ། དེ་ལྟ་བུའི་རང་བཞིན་ནི་ཡུལ་ལ་སོགས་པའི་ཐ་དད་པ་ཅན་དང་ལྡན་པར་འགལ་བའི་ཕྱིར་རོ། །ཞེས་བྱ་བ་ལྟ་བུ་གང་ཡིན་པ་དེ་ནི། ཆོས་གཅིག་ཁས་བླངས་པར་བསྟན་པའི་ཕྱིར་ཡིན་ཏེ། དེ་ཁས་མི་ལེན་ན་ནི་གཉི་ཀ་བཟློག་པར་འགྱུར་རོ། །རྣམ་པར་དབྱེ་བར་བྱར་མི་ནུས་པའི་ཕྱིར་ཏེ་གཞན་དུ་དངོས་སུ་འབྲེལ་བའི་ཕྱིར་རོ། །ཞེས་དང་། ཡང་། གཏན་ཚིགས་མེད་ཀྱང་འདི་ནི་རྩ་བའི་གཏན་ཚིགས་ཀྱིས་ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོ་སྒྲུབ་པར་བྱེད་པའི་རྣམ་པ་ཡིན་གྱི། ཟློག་པས་སྒྲུབ་པར་བྱེད་པ་ནི་མ་ཡིན་ཏེ་གཏན་ཚིགས་ལ་ཚད་མ་མེད་པའི་ཕྱིར་རོ། །ཞེས་གསུངས། འདིའི་དོན་ལྷ་དབང་བློས། འདི་ལྟར་གཞན་གྱིས་བརྟགས་པ་ཡི། །སྒྲུབ་པར་བྱེད་པས་ཐལ་བ་གང་ཡིན་པ་འདིས་བརྗོད་པ་འདི་གཏན་ཚིགས་ངེས་པར་བསྒྲུབ་པར་བྱས་ནས་དེ་དོན་འགའ་ཞིག་བསྒྲུབ་པ་ནི་མ་ཡིན་ནོ། །འོ་ན་ཅི་ཡིན་ཞེ་ན་གཉིས་འབྲེལ་ཕྱིར་གཅིག་མེད་ན་གཞན་དགག་ཕྱིར་སྐབས་འགའ་ཞིག་ཏུ་བསྒྲུབ་པར་བྱ་བ་དང་། སྒྲུབ་པར་བྱེད་པའི་ཆོས་འབྲེལ་པ་ཅན་དུ་འགྱུར་བ་དེ་དག་སྒྲུབ་པར་བྱེད་པའི་ཆོས་ལ་འབྲེལ་བ་ཡོད་ན་དེ་དང་འབྲེལ་བ་ཅན་གྱི་སྒྲུབ་པར་བྱེད་པའི་ཆོས་ཀྱང་ཡོད་པ་ཡིན་ནོ། །ཅི་སྟེ་བསྒྲུབ་པར་བྱ་བ་མི་འདོད་པ་དེའི་ཚེ་སྒྲུབ་པར་བྱེད་པའི་ཆོས་ཀྱང་མ་ཡིན་ནོ་ཞེས་བྱ་བའི་དོན་ཏེ་ཞེས་གསུངས་པ་ཉིད་ཐལ་བར་བསྒྲུབ་པ་ལ་ནི་ཁྱད་པར་བྱ་བའི་ཆོས་གཞན་གྱིས་འདོད་པར་མཐོང་ནས་མི་འདོད་ཀྱང་ཁྱབ་པར་བྱེད་པའི་ཆོས་གྲུབ་པར་ཐལ་བ་བརྗོད་པ་ཡིན་ཏེ། ཁྱབ་པར་བྱ་བ་ཁྱབ་པར་བྱེད་པ་མེད་པར་མི་འབྱུང་བའི་ཕྱིར་རོ། །དཔེར་ན་སྤྱི་ལ་སོགས་པ་དུ་མ་ལ་ཡོད་པར་འདོད་པ་ན། མི་འདོད་ཀྱང་དུ་མ་ཉིད་དུ་ཐལ་བའམ། བདག་ལ་སོགས་པ་ཡོད་པ་ཉིད་ཡིན་ན་སྐད་ཅིག་མ་ཉིད་དུ་ཐལ་བ་བཞིན་ནོ། །ཆོས་ཅན་མ་གྲུབ་པའི་ཕྱིར་དུ་མ་ལ་ཡོད་པ་ལ་སོགས་པ་ཁྱབ་པར་བྱ་བའི་ཆོས་མ་གྲུབ་པ་དེས་ན་ཁྱབ་པར་བྱེད་པའི་ཆོས་སུ་ཐལ་བར་གང་ལས་འགྱུར་ཚད་མ་མེད་པར་ནི་བརྗོད་པར་མི་འཐད་དོ། །ཞེ་ན། འདིར་ཁྱབ་པར་བྱེད་པ་མེད་པའི་ཕྱིར་ཁྱབ་པར་བྱ་བ་མེད་པར་བརྗོད་པར་འདོད་པ་ཡིན་ནོ། །ཁྱབ་པར་བྱེད་པ་མེད་པ་དེ་ནི་སྤྱི་ལ་སོགས་པ་མེད་པ་ལ་ཡང་གྲུབ་པ་ཉིད་དོ། །དེ་བས་ན་མངོན་པར་འདོད་པ་གོ་བར་བྱེད་པ་ཡིན་པའི་ཕྱིར་དེ་ཉིད་འདིར་རྩ་བའི་གཏན་ཚིགས་སུ་བརྗོད་པ་ཡིན་གྱི་གཞན་གྱིས་སྤྱི་ལ་སོགས་པ་གྲུབ་པར་བྱ་བའི་ཕྱིར་ཉེ་བར་བཀོད་པ་གང་ཡིན་པ་དེ་ནི་རྩ་བའི་གཏན་ཚིགས་མ་ཡིན་ནོ། །འཐད་ལྡན་དུ། རྩ་བ་ནི་རྩོམ་པར་འགྱུར་བ་དང་རྩོམ་པའི་རྒྱུ་མཚན་ཏེ། གང་གི་དོན་དུ་ཐལ་བར་བྱེད་པ་ནི་རྩ་བ་ཡིན་ནོ། །ཐལ་བར་བྱེད་པ་ནི་གདོན་མི་ཟ་བར་འགའ་ཞིག་ངེས་པར་བྱེད་འདོད་པ་ཡིན་ནོ། །ངེས་པའི་རྒྱུ་མཚན་ཡང་གཏན་ཚིགས་གྲུབ་པ་ཡིན་པའི་ཕྱིར་རོ། །གང་ཞིག་དེ་གྲུབ་པ་དེའི་གཏན་ཚིགས་གང་ཡིན་པ་དེའི་ཁྱབ་པར་བྱེད་པའི་དངོས་པོ་སྒྲུབ་པར་བྱེད་པའི་བྱེ་བྲག་ཡིན་ནོ། །གང་ཞིག་དུ་མ་ལ་ཡོད་པ་དུ་མ་ཉིད་དོ། །ཞེས་ཁྱབ་པར་རབ་ཏུ་སྟོན་པ་ཙམ་ཡིན་ཡང་། གནོད་པར་བྱེད་པའི་ཚད་མ་འཕེན་པར་བྱེད་པའི་ཕྱིར་སྒྲུབ་པར་བྱེད་པ་ཡིན་ནོ། །ཐལ་བར་འགྱུར་བའི་སྒོ་ནས་ཀྱང་གནོད་པར་བྱེད་པའི་ཚད་མ་ནི་འཕེན་པ་ཡིན་པ་དེས་ན་འདི་ནི་སྒྲུབ་པར་བྱེད་པ་རྣམ་པ་གཞན་ཡིན་ནོ། །ཞེས་པས། འདིས་དིང་སང་སྒྲུབ་བྱེད་འཕེན་པའི་ཐལ་འགྱུར་ཞེས་བྱ་བ་ཡིན་ལ། གཞན་པའི་ཐལ་འགྱུར་དང་དབྱེ་བ་ནི་མདོ་དང་སྡེ་བདུན་མཛད་པ་གཉིས་ཀྱི་གཞུང་དང་འཕགས་པའི་ཡུལ་གྱི་འགྲེལ་པར་མ་བྱུང་བོད་ཁོ་ནའི་རྣམ་གཞག་གོ །གཉིས་པ་ནི་དོན་སྨོས་པ་ནི་དགོས་པ་རྣམ་པ་གཉིས་ཏེ། གང་ལས་དོན་གྲུབ་པ་མེད་པའི་ཕྱིར་སྒྲ་དང་རྟོག་པ་ཙམ་གྱིས་སྦྱར་བའི་བདག་ཉིད་ཅན་གཏན་ཚིགས་མ་ཡིན་པར་སྟོན་པ། དོན་སྨོས་དེ་ནི་སྒྲ་དག་དང་། །རྟོག་པས་སྒྲོ་བཏགས་བདག་ཉིད་ཅན། །རྟགས་ཉིད་མིན་པ་བསྒྲུབ་དོན་དུ། །རང་གི་མཐོང་བའི་དོན་ལ་དོན་གྲུབ་པར་བྱེད་པ་ཚུལ་གསུམ་པ་ཅན་གྱི་རྟགས་ཉིད་ཡིན་ལ། དེ་སྟོན་པ། དོན་ལས་དོན་ནི་གྲུབ་ཕྱིར་རོ། །ཞེས་བྱ་བས་སོ། །དེ་ལྟར་ཡང་རྣམ་ངེས་སུ་དོན་མེད་པ་རྟོག་པས་སྒྲོ་བཏགས་པ་ཡང་རྟགས་མ་ཡིན་ཏེ། དཔེར་ན། སྒྲ་ནི་རྟག་པའམ་མི་རྟག་པ་ཡིན་ཏེ། ཕྱོགས་དང་མཐུན་པའི་ཕྱོགས་དག་ལས་གང་ཡང་རུང་བ་ཡིན་པའི་ཕྱིར་རོ། །ཞེས་བྱ་བ་ལ་སོགས་པ་ལྟ་བུའོ། །སྒྲོ་བཏགས་ཀྱི་རྟགས་ལས་དོན་མི་འགྲུབ་པ་དེ་ཡང་། རྟོག་དང་ལུང་དག་བྱེད་པ་པོའི། །སོགས་ཀྱིས་བསྒྲུབས་སོ། །རང་གི་མཐོང་བ་ཚུལ་གསུམ་པའི་རྟགས་གཞན་ལ་རབ་ཏུ་གསལ་བར་སྟོན་པའི་ཚིག་སྦྱོར། སྒྲུབ་ངག་ཡང་དག་གི་མཚན་ཉིད། འདི་ནི་གཞན་གྱི་ཆེད་ཁོ་ནར་བཞག་པས་རང་དོན་སྒྲུབ་ངག་ནི་མི་སྲིད་ལ། སྦྱོར་བའི་བྱེ་བྲག་གིས་རྣམ་པ་གཉིས་སུ་དབྱེ་སྟེ། ཆོས་མཐུན་སྦྱོར་དང་མི་མཐུན་སྦྱོར་རོ། །སྦྱོར་བ་ཞེས་བྱ་བ་ནི་སྒྲའི་བྱེ་བྲག་གིས་སོ། །དེ་སྦྱར་བ་ནི་དོན་བརྗོད་པའོ། །དེའི་ཕྱིར་སྦྱོར་བ་ཞེས་བྱའོ། །དཔེའི་ཆོས་ཅན་དང་ལྷན་ཅིག་བསྒྲུབ་པར་བྱ་བའི་ཆོས་འདྲ་བར་གཏན་ཚིགས་ཀྱིས་བྱས་པ་ནི་ཆོས་མཐུན་པའོ། །དེ་གཉིས་མི་འདྲ་བ་གཏན་ཚིགས་ཀྱིས་བྱས་པ་ནི་ཆོས་མི་མཐུན་པའོ། །དེ་བས་ན་སྒྲུབ་པར་བྱེད་པའི་ངག་ལ་བརྗོད་པར་བྱ་བ་ཆོས་མཐུན་པ་ཉིད་ཡོད་པ་དེ་ཉིད་ནི་ཆོས་མཐུན་སྦྱོར་གྱི་སྒྲུབ་ངག་ཅེས་བྱ་སྟེ། རང་བཞིན་ལ་དཔེར་བརྗོད་ན། བྱས་ན་མི་རྟག་པས་ཁྱབ། དཔེར་ན་བུམ་པ་བཞིན། སྒྲ་ཡང་བྱས་སོ། །ཞེས་བྱ་བ་འདིས་སྒྲུབ་ཆོས་མི་རྟག་པ་དང་། དཔེ་བུམ་པ་དང་། ཆོས་ཅན་སྒྲ་བྱས་པར་མཚུངས་པ་ཉིད་ཀྱིས་སོ། །སྒྲུབ་པར་བྱེད་པའི་ངག་ལ་བརྗོད་པར་བྱ་བ་པོས་མི་མཐུན་པ་ཡོད་པ་དེ་ཉིད་ནི་ཆོས་མི་མཐུན་སྦྱོར་གྱིས་སྒྲུབ་ངག་ཅེས་བྱ་སྟེ། དཔེར་ན། རྟག་ན་མ་བྱས་པས་ཁྱབ། དཔེར་ན་ནམ་མཁའ་བཞིན། སྒྲ་ནི་བྱས་པ་ཡིན་ནོ་ཞེས་པ་ལྟ་བུ། འདིས་མ་བྱས་པ་སྒྲུབ་ཆོས་དང་། ཆོས་ཅན་སྒྲ་དང་། དཔེ་ནམ་མཁའ་བརྗོད་པར་བྱ་བ་མི་མཐུན་པས་སོ། །གང་ན་དུ་བ་ཡོད་ན་མེ་ཡོད་པས་ཁྱབ། དཔེར་ན་ཚང་བང་བཞིན། འདི་ན་ཡང་དུ་བ་ཡོད་པའི་ཕྱིར་རོ། །དཔེའི་ཆོས་ཚད་མ། བསྒྲུབ་པར་བྱ་བའི་ཆོས་ཅན་ཕྱོགས་ཀྱི་བྱེ་བྲག་གི་དུ་བ། གཏན་ཚིགས་ཀྱིས་མཐུན་པ་ཉིད་དུ་བྱས་པ་འབྲས་རྟགས་ཀྱི་མཐུན་སྦྱོར། གང་ཡོད་ལ་དམིགས་པའི་རིག་བྱར་གྱུར་པ་གང་མ་དམིགས་པ་ཡིན་ན་མེད་པའི་ཐ་སྙད་ཀྱི་ཡུལ་ཡིན་པས་ཁྱབ། དཔེར་ན་སྔོ་སོགས་ཀྱི་བྱེ་བྲག་བཞིན། འདི་ན་ཡང་དམིགས་པའི་རིག་བྱར་གྱུར་པའི་བུམ་པ་མི་དམིགས་སོ། །མི་དམིགས་པའི་ཆོས་མཐུན་སྦྱོར་ཡིན་ནོ། །འབྲས་རྟགས་ཀྱི་ཆོས་མི་མཐུན་སྦྱོར་བ་ནི། གང་མེ་མེད་ན་དུ་བ་མེད་པས་ཁྱབ། དཔེར་ན་རྒྱ་མཚོ་ཆེན་པོ་བཞིན། །འདི་ན་ཡང་དུ་བ་ཡོད་པའོ། །འདི་ལ་ཡང་དཔེའི་ཆོས་ཅན་རྒྱ་མཚོ་ཆེན་པོ་དང་། བསྒྲུབ་པར་བྱ་བའི་ཆོས་ཅན་ཕྱོགས་ཀྱི་ཁྱད་པར་གྱི་དུ་བ་ཞེས་བྱ་བ་གཏན་ཚིགས་ཀྱི་མི་མཐུན་པ་ཉིད་དུ་བརྗོད་པའོ། །མི་དམིགས་པའི་ཆོས་མི་མཐུན་པའི་སྦྱོར་བ་ནི། གང་དམིགས་པའི་རིག་བྱར་གྱུར་པ་དེ་ཡིན་ན་དམིགས་པས་ཁྱབ། དཔེར་ན་སྔོ་སོགས་ཀྱི་བྱེ་བྲག་བཞིན་འདི་ན་དམིགས་པའི་མཚན་ཉིད་ཐོབ་པ་བུམ་པ་མི་དམིགས་སོ། །འདི་ལ་ཡང་དཔེའི་ཆོས་དང་བསྒྲུབ་པར་བྱ་བའི་ཆོས་ཅན་ས་ཕྱོགས་ཀྱི་དམིགས་པའི་མཚན་ཉིད་ཐོབ་པ། གཏན་ཚིགས་ཀྱིས་ཆོས་མི་མཐུན་པ་ཉིད་ཅན་དུ་བྱས་པའོ། །དེའི་ནང་གསེས་ཀྱི་རྣམས་ནི་རིགས་བསྒྲེས་ཏེ་ཤེས་པར་བྱའོ། །ཆོས་མཐུན་པ་ཉིད་ཅན་གྱི་ངག་གི་རྗེས་སུ་འགྲོ་བ་དང་ཕྱོགས་ཀྱི་ཆོས་དག་དངོས་སུ་བརྗོད་ཀྱི་ལྡོག་པ་ནི་མ་ཡིན་ནོ། །ཆོས་མི་མཐུན་པ་ཉིད་ཀྱིས་ཀྱང་ལྡོག་པ་དང་ཕྱོགས་ཀྱི་ཆོས་དག་དངོས་སུ་བརྗོད་ཀྱི་རྗེས་འགྲོ་ནི་མ་ཡིན་ནོ། །ཆོས་མཆོག་གིས། ཆོས་མི་མཐུན་པའི་སྦྱོར་བ་ནི་ཐམས་ཅད་དུ་སྒྲུབ་པར་བྱེད་པ་མེད་པ་ལ་བསྒྲུབ་པར་བྱ་བ་མེད་པར་ངེས་པ་བསྟན་པར་བྱ་བ་ཡིན་ནོ། །ཞེས་རིགས་པ་ཡིན་ནོ། །ཞེས་སོ། །གཞན་དག སྒྲ་ནི་མི་རྟག་སྟེ་བྱས་པའི་ཕྱིར་གང་བྱས་པ་དེ་ཐམས་ཅད་ནི་མི་རྟག་སྟེ། དཔེར་ན་བུམ་པ་བཞིན། སྒྲ་ཡང་བྱས་པ་ཡིན་ནོ། །དེ་བས་ན་མི་རྟག་གོ་ཞེས་པ་ལྟ་བུ། སྒྲ་ནི་མི་རྟག་སྟེ་ཞེས་པ་དམ་བཅའ། བྱས་པའི་ཕྱིར་གཏན་ཚིགས་གང་བྱས་པ་དེ་ཐམས་ཅད་མི་རྟག་སྟེ། དཔེར་ན་བུམ་པ་བཞིན་ནོ། །ཞེས་པ་དཔེ། དེ་བཞིན་དུ་སྒྲ་ཡང་བྱས་སོ་ཞེས་འགོད་པ་ཉེ་བར་སྦྱོར་བ། དེ་བས་ན་མི་རྟག་པ་ཡིན་ནོ། །ཞེས་པ་མཇུག་སྡུད་དོ། །དཔེ་ལ་རྟོགས་པའི་ནུས་པ་ཅན་གྱི་གཏན་ཚིགས་ཆོས་ཅན་ལ་ཉེ་བར་སྦྱོར་བ་ནི་ཉེ་བར་སྦྱོར་བའོ། །དམ་བཅའ་བ་ཡང་ཟོས་སུ་བྱེད་པ་ནི་མཇུག་སྡུད་པའོ་ཞེས་མ་བཀོད་ན་ཡན་ལག་མ་ཚང་བར་འདོད་དོ། །དེ་མི་འཐད་པས། རང་ལུགས་རྗེས་སུ་འགྲོ་བ་དང་ལྡོག་པ་ཕྱོགས་ཀྱི་ཆོས་ཞེས་བྱ་བ་གསུམ་པོ་ཉིད་ཀྱིས་བསྒྲུབ་པར་བྱ་བའི་དོན་འགྲུབ་བོ། །དཔེ་ལ་བསྒྲུབ་པར་བྱ་བས་སྒྲུབ་པར་བྱེད་པ་ཁྱབ་པར་བསྟན་པ་ནི་རྗེས་སུ་འགྲོ་བ་དང་། མི་མཐུན་པའི་ཕྱོགས་ལ་ཡང་དཔེ་ལ་བསྒྲུབ་པར་བྱ་བ་ལོག་པས་སྒྲུབ་པར་བྱེད་པ་ནི་བཟློག་པ་དང་། སྒྲ་ཡང་བྱས་པ་ཞེས་པ་ལྟ་བུ་ཕྱོགས་ཀྱི་ཆོས་ཏེ། མདོར། འདིར་ནི་ཕྱོགས་ཆོས་བསྟན་པ་ནི། །གནས་ཡིན་ལྷག་མའི་ཚུལ་གཉིས་ནི། །དཔེ་ཡིས་རབ་ཏུ་རྟོགས་པར་བྱེད། །ཅེས་པའི་འགྲེལ་པར། རྟོག་གེའི་བསྟན་བཅོས་རྣམས་སུ་སྦྱོར་བ་ལ་གཏན་ཚིགས་ཞེས་བྱ་བས་ཕྱོགས་ཀྱི་ཆོས་ཙམ་ཉིད་བསྟན་པ་ཡིན་ཏེ། དཔེར་ན་བྱས་པའི་ཕྱིར་ཞེས་བྱ་བ་འདིར་སྒྲའི་ཞེས་བྱ་བ་རྟོགས་པ་ཡིན་ནོ་ཞེས་གསུང་། བསྒྲུབ་བྱའི་ཆོས་རྟགས་དེ་ལ་འབྲེལ་པས་དེ་ཡོད་ན་ཅིག་ཤོས་ཡོད། དེ་མེད་ན་ཅིག་ཤོས་མེད་པ་གོ་ནུས་པས་རྗེས་འགྲོ་བསྟན་ན་ལྡོག་པ་ཤུགས་ཀྱི་གོ་ནུས། དེ་མེད་ན་ཅིག་ཤོས་མེད་དེ་ཡོད་ན་ཅིག་ཤོས་ཡོད་པ་གོ་བས་ལྡོག་པ་བསྟན་པའི་ཤུགས་ཀྱིས་རྗེས་འགྲོ་གོ་ནུས་པས། གཞན་ལ་སྟོན་པའི་ཚེ་གང་ཡང་རུང་བ་གཅིག་གིས་ཆོག་གོ །དེ་ལྟ་བུའི་སྦྱོར་བའི་ཚུལ་གཉིས་ལས་གཅིག་དངོས་སུ་བརྗོད་ཅིག་ཤོས་ཤུགས་ཀྱིས་འཕངས་པ་ཙམ་ཡིན་པས་ཡན་ལག་གཉིས་ལྡན་ནོ། །དམ་བཅའ་བ་དང་མཇུག་སྡུད་རྣམ་པ་ཐམས་ཅད་དུ་མ་ཡིན་ནོ། །དེ་ལྟར་ཡང་། བསྟན་པར་བྱ་བ་ཚུལ་གསུམ་པའི་རྟགས་སྟོན་པའི་ཚིག་སྦྱོར་ཐ་དད་ཀྱང་དོན་ལ་རྟོགས་བྱ་གཅིག་ཉིད་དེ། དཔེར་ན་ལྷས་བྱིན་ཚོན་པོ་ཉིན་པར་ཟས་མི་ཟའོ། །ཞེས་སྨྲས་པ་དང་། ལྷས་བྱིན་ཆེན་པོ་མཚན་མོ་ཟས་ཟའོ་ཞེས་པའི་ངག་གཉིས་བརྗོད་པར་བྱེད་པ་ཐ་དད་དུ་ཟིན་ཀྱང་། རྟོགས་པར་བྱ་བ་གཅིག་ཁོ་ན་ཡིན་པ་བཞིན་ནོ། །དེ་ལྟར་རྟགས་སྦྱོར་དང་སྒྲུབ་ངག་སྦྱོར་ཚུལ་གྱི་ཁྱད་པར་ཡང་། རང་འགྲེལ་དུ། གང་དག་ལ་དེའི་ངོ་བོ་དང་རྒྱུའི་དངོས་པོ་དག་རབ་ཏུ་སྒྲུབ་པའི་མཁས་པ་རྣམས་ལ་ནི་གཏན་ཚིགས་འབའ་ཞིག་བརྗོད་པར་ཟད་གང་གི་དོན་དུ་དཔེ་བརྗོད་པའི་དོན་དེ་ཁོ་ན་གྲུབ་པ་ཡིན་པས་དེའི་ཚེ་བརྗོད་པས་ཅི་ཞིག་བྱ་ཞེས་དང་། དཔེ་ལ་དེ་ཡི་ངོ་བོ་དང་། །རྒྱུ་དངོས་དེ་དག་མི་ཤེས་ལ། །སྟོན་ཏེ། དཔེ་ལ་བསྒྲུབ་པར་བྱ་བའི་ཆོས་ནི་དེའི་ངོ་བོར་དེ་ཙམ་དང་འབྲེལ་བས་དེའི་རང་གི་ངོ་བོ་ཉིད་ཀྱིས་སྟོན་ཏེ། བྱས་པའི་ངོ་བོ་ཉིད་སྐྱེད་པར་བྱེད་པ་གང་ཡིན་པ་དེ་ནི་མི་རྟག་པའི་ངོ་བོ་ཉིད་ཡིན་ན། སྐྱེད་པར་བྱེད་དོ། །ཞེས་ཚད་མེད་པས་རབ་ཏུ་སྟོན་ནོ། །ཞེས་པ་ལ་སོགས་པ་གསུངས་པས། རང་དོན་དུ། སྒྲ་ཆོས་ཅན། མི་རྟག་པ་སྟེ། བྱས་པའི་ཕྱིར་ཞེས་པ་ལྟ་བུ་གཞན་དོན་དུ་འགོད་པའི་ཚུལ་རྩོད་རིགས་སུ། འདི་ལྟར་གང་ཡོད་པའམ་བྱས་པ་དེ་ཐམས་ཅད་མི་རྟག་སྟེ། དཔེར་ན་བུམ་པ་ལ་སོགས་པ་ལྟ་བུའོ། །སྒྲ་ཡང་ཡོད་པའམ་བྱས་པ་ལ་སོགས་པ་ལྟ་བུའོ། །འདི་ལ་ཡང་གོ་རིམ་ངེས་པ་འགའ་ཡང་ཡོད་པ་མ་ཡིན་ཏེ། འདོད་པའི་དོན་བསྒྲུབ་པར་གཉི་ག་ལ་བྱེ་བྲག་མེད་པའི་ཕྱིར་རོ། །ཆོས་ཅན་ལ་དང་པོར་ཡོད་པ་ཉིད་རབ་ཏུ་བསྒྲུབ་ནས། ཕྱིས་ཀྱང་ཁྱབ་པར་རབ་ཏུ་བསྒྲུབ་པ་ཉིད་ནི། དཔེར་ན་སྒྲ་ནི་ཡོད་པའམ་བྱས་པ་ཡིན་ལ་དེ་ལྟ་བུ་གང་ཡིན་པ་དེ་ཐམས་ཅད་ནི་མི་རྟག་པ་ཡིན་ཏེ། དཔེར་ན་བུམ་པ་ལ་སོགས་པ་ལྟ་བུའོ། །ཞེས་གསུངས་པ་བཞིན་ནོ། །འདི་ལ་རྩོད་པའི་རྣམ་གཞག་ཤེས་དགོས་པས་དེ་བཤད་པ། རྒོལ་བ་དང་། ཕྱིར་རྒོལ་བ་དང་། །དཔང་པོ་རྒོལ་བ་ནི་སྔར་རྒོལ་ཏེ་རྩོད་པའི་འདུན་སར་བསྒྲུབ་པའི་ཡན་ལག་བརྗོད་པར་ཁས་ལེན་པའི་གང་ཟག་གོ །ཕྱིར་རྒོལ་བ་ནི་རྩོད་པའི་འདུན་སར་སྔར་རྒོལ་གྱི་བསྒྲུབ་པའི་ཡན་ལག་ལ་སུན་འབྱིན་བརྗོད་པར་ཁས་ལེན་པའི་གང་ཟག་གོ །དབང་པོ་ནི་རྩོད་པའི་འདུན་སར་རྒོལ་ཕྱིར་རྒོལ་རྒྱལ་ཕམ་ཤན་འབྱེད་པར་ཁས་བླངས་པའི་གང་ཟག་སྟེ། འདི་ལ་རྗེས་སུ་བརྗོད་པ་དང་ཚར་གཅོད་པ་གཉིས་སོ། །རྒོལ་བ་ཡང་དག་ཏུ་འགྲོ་མི་འགྲོ། སྔར་རྒོལ་རིགས་པས་འཐད་པ་ཁོ་ནས་བསྒྲུབ་པའི་ཡན་ལག་བརྗོད་པ་ཡང་དག བཟློག་པ་ལྟར་སྣང་། བསྒྲུབ་པ་ལྟར་སྣང་སུན་འབྱིན་ཡང་དག་པས་སུན་འབྱིན་པ་ཕྱིར་རྒོལ་ཡང་དག བཟློག་ན་རྒོལ་བ་དེ་ལྟར་སྣང་། དཔང་པོ་ཡང་རྗེས་སུ་བརྗོད་པར་ཁས་བླང་ནས་རྒྱལ་ཕམ་རིགས་པ་བཞིན་དུ་འབྱེད་ནུས་པ་དང་། ཕམ་ཀྱང་ཁས་མི་ལེན་པ་ཚར་གཅོད་པའོ། །བཟློག་པ་ལྟར་སྣང་། དམ་བཅའ་ཡང་བསྒྲུབ་པའི་ངག་འགོད་ཚུལ་གཉིས་གང་རུང་བཀོད་ནས་དེ་ལ་ཕ་རོལ་རྩོད་ན་དེས་དེའི་ཚེར་མ་དེ་འབྱིན་ནུས་པ་ཞིག་དགོས་པ་དེ་མ་ནུས་ན་ཡང་ལྟག་ཆོད་དམ་ཕམ་པའི་གནས་ཡིན་པར་འགྱུར་རོ་ཞེས་པའི་དོན་ཏེ། ཚེར་མ་ཇི་ལྟར་འབྱིན་པ་ཡང་ཁྱབ་པའི་ཡིན་གྱིས་རྟགས་ལ་འབྱིན་མི་དགོས་ཏེ། རྩོད་རིགས་སུ་འདིར་ཁྱབ་པ་སྒྲུབ་པར་བྱེད་པ་ནི་བསྒྲུབ་པར་བྱ་བ་བཟློག་པ་ལ་གནོད་པ་ཅན་གྱི་ཚད་མ་ཉེ་བར་བསྟན་པ་སྟེ། གལ་ཏེ་ཡོད་པའམ་བྱས་པ་ཐམས་ཅད་སྐད་ཅིག་མ་རེ་རེ་ལ་འཇིག་པར་མ་གྱུར་ན། སྐད་ཅིག་མ་མ་ཡིན་པ་ནི་རིམ་དང་ཅིག་ཅར་དོན་བྱེད་པ་མི་རིགས་པའི་ཕྱིར་རོ། །ཡོད་པ་ཉིད་ཀྱི་མཚན་ཉིད་ནི་དོན་བྱེད་ནུས་པ་ཡིན་ལ་དེ་ལས་ལོག་པའི་ཕྱིར་མེད་པ་ཁོ་ནར་འགྱུར་ཏེ། ནུས་པ་ཉེ་བར་བརྗོད་པ་ཐམས་ཅད་དང་བྲལ་བའི་མཚན་ཉིད་ནི་ཉེ་བར་བརྗོད་པ་མེད་དོ། །ཞེས་འབྱིན་ཚུལ་དངོས་དང་། དེ་ལྟར་ན་རང་བཞིན་གྱི་གཏན་ཚིགས་ཀྱིས་སྦྱོར་བ་དག་གི་བསྒྲུབ་པའི་ཡན་ལག་བསྒྲུབ་པ་ཡིན་གྱིས། དེ་ལ་བསྒྲུབས་པ་མེད་པ་ནི་སྒྲུབ་པའི་ཡན་ལག་མི་སྨྲ་བའི་རྒོལ་བ་དེ་ནི་ཕམ་པའི་གནས་ཡིན་ཏེ། རྩོད་པའི་དོན་རབ་ཏུ་མ་བསྒྲུབས་པ་ཉིད་ཀྱི་ཕྱིར་རོ། །དངོས་པོ་ལ་ནུས་པའི་གཏན་ཚིགས་ཁས་ལེན་དུ་ཟིན་ཀྱང་ནུས་པ་རབ་ཏུ་མ་བསྟན་པའི་ཕྱིར་རོ། །འབྲས་བུའི་གཏན་ཚིགས་ཀྱང་བསྒྲུབ་པའི་ཡན་ལག་ཏུ་བསྒྲུབ་པ་ནི་འབྲས་བུའི་རྟགས་རྒྱུ་བསྒྲུབ་པའི་ཕྱིར། ཉེ་བར་བླངས་པ་གང་ཡིན་པ་དེ་དག་ལྷན་ཅིག་ཉེ་བར་འབྲས་བུའི་དངོས་པོ་ནི། དཔེར་ན་འདི་ཡོད་ན་འདི་ཡོད་པར་འགྱུར་ལ། དེ་ལས་གཞན་པའི་ནུས་པ་རྒྱུ་དག་ཡོད་དུ་ཟིན་ཀྱང་དེ་མེད་ན་མེད་པར་འགྱུར་བ་ལྟ་བུའོ། །དངོས་པོ་དང་དངོས་པོ་མེད་པ་དག་སྒྲུབ་པར་བྱེད་པའི་ཚད་མ་དག་གི་རབ་ཏུ་བསྒྲུབས་ཏེ། དེ་ལྟ་ན་ནི་འདི་འབྲས་བུ་ཉིད་ཐེ་ཚོམ་མེད་པར་བསྒྲུབས་པར་འགྱུར་རོ། །ཞེས་འབྲས་སྦྱོར་གྱི་ཚེར་མ་འབྱིན་ཚུལ་དང་། མི་དམིགས་པ་ཡང་རྟོགས་པ་པོས་དམིགས་པའི་རིག་བྱར་གྱུར་པའི་དོན་མི་དམིགས་པ་ནི་སྒྲུབ་པར་བྱེད་པར་བསྒྲུབ་པ་ཡིན་ནོ། །དེ་འདྲ་བ་ཁོ་ན་མི་དམིགས་པ་ལས་ནི་མེད་པའི་ཐ་སྙད་འགྲུབ་པ་ཡིན་གྱི། དམིགས་པའི་རིག་བྱར་མ་གྱུར་པ་རྟོགས་པ་པོའི་དམིགས་པ་ལ་སོགས་པས་མི་འགྲུབ་པའི་ཕྱིར་རོ། །དེ་ལ་དམིགས་པའི་རིག་བྱར་གྱུར་པའི་དོན་ནི། རང་བཞིན་ཁྱད་པར་ཅན་དང་རྒྱུ་གཞན་ཚོགས་པ་ཡང་ངོ་། །རང་བཞིན་ཁྱད་པར་ཅན་ནི་གང་སྐལ་བ་རྣམ་པ་གསུམ་གྱིས་མ་བསྐལ་བ། བདག་ཉིད་ཀྱི་ངོ་བོ་མ་ཡིན་པའི་སྣང་བ་དང་བྲལ་བ་སྒྲུབ་པ་པོའི་མངོན་སུམ་དང་སྣང་བའི་ངོ་བོ་དང་འདྲ་བ་ཡོད་པ་དམིགས་པའི་རྒྱུར་གྱུར་པ། གཞན་དག་དེ་ལྟར་མ་དམིགས་པ་ནི་མེད་པའི་ཐ་སྙད་ཀྱི་ཡུལ་ཡིན་ནོ། །ཞེས་སོགས་ཀྱིས་མ་དམིགས་པའི་རྟགས་སྦྱོར་གྱིས་ཚེར་མ་འབྱིན་པར་གསུངས་སོ། །ཡང་དེ་ཉིད་དུ། རང་གི་རྟོགས་པའི་དོན་གཞན་དག་ལ་ཞེས་བྱ་བ་ཚུལ་གསུམ་པའི་ཚིག་གི་ཚོགས་ནི་སྒྲུབ་པར་བྱེད་པའོ། །དེའི་ཡན་ལག་ཕྱོགས་ཀྱི་ཆོས་ལ་སོགས་པའི་ཚིག་ལས་དེ་གཅིག་མ་བརྗོད་ན་ཡང་སྒྲུབ་པར་བྱེད་པའི་ཡན་ལག་མ་བརྗོད་པ་ཡིན་ལ། དེ་ཡང་རྒོལ་བ་ཚར་གཅོད་པའི་གནས་ཡིན་ཏེ་ཞེས་པས་ཕྱོགས་ཆོས་རྐྱང་བ་ལ་སོགས་པའི་བསྒྲུབ་ངག་ནི་ལྟར་སྣང་དུ་ཤེས་པར་བྱའོ། །དེ་ལ་སོགས་པའི་ཚར་གཅད་པའི་གནས་ཡིན་མིན་རྒྱས་པར་བཤད་དོ། །དཔེ་ལྟར་སྣང་བ་ནི། སྒྲ་ནི་མི་རྟག་སྟེ་ལུས་ཅན་ཡིན་པའི་ཕྱིར་ལས་གཞན་ནོ། །ཞེས་བྱ་བ་བསྒྲུབ་པར་བྱ་བ་མི་ཚང་བ་ཡིན་ཏེ་ལས་ནི་མི་རྟག་པའི་ཕྱིར་རོ། །སྒྲ་ནི་རྟག་སྟེ་ལུས་ཅན་མ་ཡིན་པའི་ཕྱིར་རྡུལ་ཕྲ་རབ་བཞིན་ནོ། །ཞེས་བྱ་བ་ནི་བསྒྲུབ་པར་བྱ་བ་མ་ཚང་བ་ཡིན་ཏེ། རྡུལ་ཕྲ་རབ་ནི་ལུས་ཅན་མ་ཡིན་པའི་ཕྱིར་རོ། །སྒྲ་རྟག་སྟེ་ལུས་ཅན་མ་ཡིན་པའི་ཕྱིར་བུམ་པ་བཞིན་ནོ་ཞེས་བྱ་བ་བསྒྲུབ་པར་བྱེད་པ་གཉིས་ཀ་མ་ཚང་བ་ཡིན་ནོ། །ཞེས་བྱ་བ་ལྟ་བུ་ཆོས་མཐུན་པའི་དཔེ་ལྟར་སྣང་བ་སྟེ་དེ་ལ་སོགས་པ་བཅོ་བརྒྱད་རྩོད་རིགས་སུ་གསུངས་པ་དག་གོ །རྩོད་པའི་དུས་སུ་ཕྱོགས་དང་། གཏན་ཚིགས་དང་། དཔེ་ལྟར་སྣང་བ་དེ་དག་ཉིད་ཀྱིས་རྒོལ་བས་སྒྲུབ་པར་བྱེད་ན། སྒྲུབ་པ་ལྟར་སྣང་བར་འགྱུར་བ་ཡིན་ནོ། །དེ་ལ་ཕྱིར་རྒོལ་བས་སུན་འབྱིན་པ་ཉིད་ཉེ་བར་བཀོད་ན་དེ་སུན་འབྱིན་པ་ནུས་པས་སུན་འབྱིན་ཡང་དག་པར་འགྱུར་བ་ཡིན་ཏེ། ཕྱོགས་སྔ་མ་རྒོལ་བའི་མངོན་པར་འདོད་པའི་དོན་འགྲུབ་པ་ལ་གེགས་བྱེད་པའི་ཕྱིར་རོ། །སྒྲུབ་པར་བྱེད་པ་མ་ཚང་བར་བརྗོད་པ་ཉིད་སུན་འབྱིན་པར་བྱ་བ་ཡིན་ནོ། །ཞེས་ཤེས་ནུས་པས་སྒྲུབ་པར་བྱེད་པ་བཞིན་དུ་སུན་འབྱིན་པའི་མཚན་ཉིད་རྣམ་པར་ཕྱེ་སྟེ་ལོགས་ཤིག་ཏུ་མ་བསྟན་ནོ། །ཕྱོགས་སྔ་མའི་རྒོལ་བར་ཡང་དག་པ་མ་ཡིན་པའི་སྐྱོན་བརྗོད་པ་དེ་སུན་འབྱིན་པ་ལྟར་སྣང་བ་ཡིན་ཏེ་ལྟག་ཆོད་ཅེས་བྱའོ། །ཡང་དག་པ་མ་ཡིན་པའི་སྐྱོན་བརྗོད་པ་ནི་ཕྱིན་ཅི་ལོག་གི་ལན་ཏེ། ལྟག་ཆོད་ཡིན་ནོ་ཞེས་བསྟན་ཏེ། དཔེར་ན་ཕྱོགས་སྐྱོན་མེད་པ་ལ་ཕྱོགས་ཀྱི་སྐྱོན་བརྗོད་པ་དང་གཏན་ཚིགས་སྐྱོན་མེད་པ་ལ་གཏན་ཚིགས་ཀྱི་སྐྱོན་བརྗོད་པ་དང་། དཔེ་སྐྱོན་མེད་པ་ལ་དཔེའི་སྐྱོན་བརྗོད་པ་སོགས་ནི་སུན་འབྱིན་པ་ལྟར་སྣང་བ་ཞེས་བྱ་བར་རིགས་པའི་ཕྱིར་རོ། །དེ་དག་ཀྱང་རྩོད་རིགས་ལས། སྒྲུབ་པའི་ཡན་ལག་མི་བརྗོད་ཅིང་། །སྐྱོན་མི་བརྗོད་པ་གཉིས་པོ་དག །ཚར་བཅད་པ་ཡི་གནས་ཡིན་གྱི། །གཞན་ནི་མི་རིགས་ཕྱིར་མི་འདོད། །སྒྲུབ་པ་ནི་འདོད་པའི་དོན་པོའོ། །དེའི་སྒྲུབ་པར་བྱེད་པ་ནི་ཡན་ལག་གོ །དེ་བརྗོད་པ་ནི་སྒྲུབ་པའི་ཡན་ལག་བརྗོད་པའོ། །དེ་མི་བརྗོད་པའི་རྒོལ་བ་ནི་ཚར་བཅད་པའི་གནས་ཡིན་ནོ། །དེ་ཁས་བླངས་ནས་རྒོལ་བ་སྤོབས་པ་མེད་པས་མི་སྨྲ་བར་འདུག་པའི་ཕྱིར་རམ། སྒྲུབ་པའི་ཡན་ལག་ལ་བསྒྲུབ་པ་མེད་པའི་ཕྱིར་རོ། །ཞེས་སོ། །གཞན་ཡང་རྣམ་ངེས་ལས། །གཞན་གྱི་དོན་གྱི་རྗེས་སུ་དཔག་པ་ནི་ཚིག་གི་སྐྱོན་གཙོ་བོར་བྱེད་པ་ཡིན་གྱི་དོན་གྱིས་ནི་མ་ཡིན་ནོ། །ཞེས་ཚིག་གི་སྦྱོར་བ་སྐྱོན་མེད་པ་དགོས་སོ། །དོན་གྱི་དོན་རྟོགས་ཕྱིར་དོན་ལ། །ཕྱོགས་དང་གཏན་ཚིགས་བརྗོད་ནུས་མེད། །དེས་ན་དེ་དག་རང་ཉིད་ལ། །སྒྲུབ་པར་བྱེད་པ་གནས་མ་ཡིན། །དོན་གྱིས་དོན་གོ་བར་བྱེད་དེ་འཁྲུལ་པ་མེད་པའི་ཕྱིར་རོ། །འདིའི་དོན་དང་པོ་ཚུལ་གསུམ་པའི་རྟགས་ཡིན་ལ། ཕྱི་མ་རྗེས་དཔག་གོ །བརྗོད་པ་ནི་མ་ཡིན་ཏེ་འབྲེལ་བ་ངེས་པ་མེད་པའི་ཕྱིར་རོ། དེས་ན་ཕྱོགས་དང་གཏན་ཚིགས་རང་ཉིད་ཀྱི་དོན་རྗེས་དཔག་འགྲུབ་པའི་ཕྱིར་ནི་སྒྲུབ་པར་བྱེད་པ་མ་ཡིན་ནོ། །ཕྱོགས་ཚིག་ནི་སྨྲ་བ་པོའི་བསམ་པ་སྟོན་པར་བྱེད་པ་ལ་ཚད་མ་ཡིན་ཀྱང་དོན་ལ་ཐེ་ཚོམ་ཟ་བར་མཐོང་གི་ངེས་པ་ནི་མ་ཡིན་པའི་ཕྱིར་དངོས་སུ་སྒྲུབ་པར་བྱེད་པ་མ་ཡིན་ནོ་ཞེ་ན། ཕྱོགས་ཀྱི་ཚིག་དེ་སྨྲ་བ་པོའི། །སོགས་ཀྱིས་སོ། །དེས་ནི་བརྒྱུད་པས་ཀྱང་མ་ཡིན་ལ། རྟགས་ཚིག་གི་ནི་བརྒྱུད་པས་ཡིན་ཏེ། རང་ཉིད་ལ་ནུས་པ་མེད་ཀྱང་རྗོད་པར་བྱེད་པ་ཡིན་པའི་ཕྱིར་ཉེ་བར་བརྟགས་ནས་སྒྲུབ་པར་བྱེད་པར་འདོད་པ་ཡིན་ནོ། །ཞེས་བསྒྲུབ་པར་བྱ་བ་བརྗོད་པ་ཡི། །སོགས་ཀྱིས་སོ། །དེ་ལས་རྟགས་ཚིག་འཇུག་པའི་ཕྱིར་དེ་ཡང་ནུས་པ་ཉིད་དང་། ཐེ་ཚོམ་ལས་ཤེས་པར་འདོད་པས་སྐབས་ལ་འཇུག་པའི་ཕྱིར་སྙམ་ན། མི་མཐུན་པའི་ཚིག་ཙམ་ལས་ཀྱང་ཐེ་ཚོམ་ཟ་བ་ལ་གཉེན་པོ་རྟགས་ཚིག་འཇུག་པ་སྲིད་པའི་ཕྱིར་དེ་ཡང་དེ་དང་མཚུངས་པར་སྒྲུབ་པར་བྱེད་པར་འགྱུར་བས་ཐུག་མེད་དུ་ཐལ་ལོ་ཞེས། གལ་ཏེ་དེ་ལ་ནུས་ཡོད་ན། །སོགས་ཀྱིས་སོ། །དེའི་ཕྱིར་ནང་གི་ཡན་ལག་གི་དོན་གྲུབ་པའི་ནུས་པ་ཚུལ་གསུམ་ཉིད་ལ་གནས་པ་ཡིན་ལ། དེ་ལ་དྲན་པ་འཇོག་པར་བྱེད་པ་ནི་དེའི་ཚིག་ལ་གནས་པའི་ཕྱིར་དེ་ཉིད་སྒྲུབ་པར་བྱེད་པ་ཡིན་ནོ་ཞེས། ནང་གི་ཡན་ལག་ནུས་པ་ནི། །སོགས་ཀྱིས་སོ། །ཡུལ་མ་བསྟན་ན་གཏན་ཚིགས་འཇུག་པ་མི་སྲིད་པས་ཡུལ་བསྟན་པ་ཉིད་ཀྱིས་ནུས་པ་ཡིན་ནོ་ཞེས། གལ་ཏེ་ཡུལ་བསྟན་མེད་པར་ནི། །ནས། ཅེ་ན་ཞེས་པའི་བར་གྱིས་འདི་ལ་ཐེ་ཚོམ་ལ་སོགས་པ་དག་ཀྱང་རྒྱུ་ཉིད་དུ་བརྗོད་ཟིན་ཏོ། །ཁྱབ་པ་སྔོན་དུ་འགྲོ་བ་ཅན་གྱི་སྦྱོར་བ་ལ་ཡུལ་ཉེ་བར་བསྟན་པའི་དོན་གྱི་དམ་བཅའ་མེད་ཀྱང་། གང་ཅུང་ཟད་བྱས་པ་དེ་ཐམས་ཅད་ནི་མི་རྟག་པ་ཡིན་ལ། སྒྲ་ཡང་བྱས་པ་ཡིན་ནོ་ཞེས་བརྗོད་པས་ཀྱང་སྒྲ་མི་རྟག་པའོ་ཞེས་དོན་གྱིས་གོ་བ་ཉིད་དོ། །དེ་ཉིད་ཀྱི་ཕྱིར་དམ་བཅའ་བ་ཞེས་སྒྲུབ་ངག་གི་ཡན་ལག་ཏུ་གདོན་མི་ཟ་བར་བསྟན་པར་བྱ་བ་མ་ཡིན་ནོ། །འདི་ནི་ཡན་ལག་ལྔ་ལྡན་དུ་འགོད་པར་སྐྱོན་བརྗོད་པ། ཁྱབ་སྔོན་ཅན་ལ་དེ་མེད་ཀྱང་། །སོགས་ཀྱིས་སོ། །དེས་ན་ཕྱོགས་ནི་མ་བརྗོད་ཀྱང་གྲུབ་པ་ལ་གེགས་མེད་ཀྱང་། ཚུལ་གསུམ་པོ་ལས་གང་ཡང་རུང་བ་གཅིག་མ་སྨྲས་ན་སྒྲུབ་པ་མ་ཚང་པའི་སྐྱོན་དུ་འགྱུར་རོ་ཞེས། ཕྱོགས་བསྟན་པ་ནི་མེད་ན་ཡང་། །སོགས་ཀྱིས་སོ། །འདིས་ཀྱང་ཡན་ལག་ལྔ་པ་ལ་སྐྱོན་དུ་བྱས་སོ། །གཉིས་པ་བསྒྲུབ་བྱ་སྒྲུབ་བྱེད་ཀྱི་རྣམ་གཞག་བཤད་པ་ལ། གང་རྗེས་སུ་དཔག་བྱ་བསྒྲུབ་བྱའི་རྣམ་གཞག གང་གིས་རྗེས་སུ་དཔོག་པ་སྒྲུབ་བྱེད་ཀྱི་རྣམ་གཞག་གཉིས་ལས། དང་པོ་ནི། འོ་ན་དམ་བཅའ་བ་ངེས་པར་བསྟན་པར་བྱ་བ་མ་ཡིན་ན་ཕྱོགས་ཀྱི་མཚན་ཉིད་བཤད་ནས་ཅི་བྱ་བསྒྲུབ་པར་བྱ་བའི་དོན་ནི་གཏན་ཚིགས་ཀྱི་ནུས་པས་གོ་བར་བྱ་བ་ཉིད་ཡིན་པས་དེ་ཉིད་ཕྱོགས་ཡིན་ནམ་ཅི། གང་ཡིན་ཡང་རུང་སྟེ་ཇི་ལྟར་རྟོགས་པ་དེ་ལྟར་འགྱུར་རོ་ཞེ་ན། དེ་ནི་བདེན་ཏེ། བསྒྲུབ་བརྗོད་རྟོགས་པའི་དོན་ཅན་ཉིད། །ཡིན་ཡང་བསྒྲུབ་བྱ་དང་བསྒྲུབ་བྱ་མ་ཡིན་པ་ལ་ལོག་པར་རྟོག་པ་མང་བ་དེ་བསལ་བའི་ཕྱིར་མཚན་ཉིད་བསྟན་པ་ཡིན་ནོ། །དེ་ཡང་མདོར། དེ་ལ་དཔག་བྱ་བསྟན་པ་ནི། །གཏན་ཚིགས་དོན་གྱི་ཡུལ་དུ་འདོད། །རང་གི་ངོ་བོ་ཉིད་དང་བསྟན། །རང་དང་འདོད་གྱུར་མི་བསལ་བ། །ཞེས་དང་། རྣམ་ངེས་སུ། ངོ་བོ་ཁོ་ན་བསྟན་བྱ་བ། །རང་ཉིད་འདོད་དང་མ་བསལ་བ། །ཞེས་དང་རིགས་ཐིགས་སུ། རང་གི་ངོ་བོ་ཁོ་ན་དང་། །བདག་ཉིད་དང་། འདོད་པ་དང་། མ་བསལ་བས་བསྟན་པར་བྱ་བ་ནི་ཕྱོགས་སོ་ཞེས་གསུངས་སོ། །རྣམ་བཅད་ལ་རང་གི་ངོ་བོས་ནི་གྲུབ་པ་དང་། ཁོ་ནས་ནི་མ་གྲུབ་ཀྱང་གྲུབ་བྱེད་ཉིད་དུ་འདོད་པ་དང་། བདག་ཉིད་ཀྱིས་དེའི་ཚེ་རྒོལ་བ་བདག་ཉིད་ཀྱིས་བསྒྲུབ་པར་མི་འདོད་པ་དང་། འདོད་པས་ནི་སྨྲས་པ་ཙམ་དང་། མ་བསལ་བས་ནི་བསལ་བ་རྣམས་རྣམ་པར་གཅོད་པ་ཡིན་ནོ། །གྲུབ་པ་དཔེར་ན། སྒྲ་ནི་སྙན་པར་བྱ་བའི་ཞེས་པ་ལྟ་བུ་དང་། མ་གྲུབ་ཀྱང་སྒྲུབ་པར་བྱེད་པ་ཉིད་དུ་འདོད་པ། དཔེར་ན་མ་གྲུབ་པའི་གཏན་ཚིགས་དང་དཔེ་ལྟར་སྣང་བ་དེ་དག་གོ །ཡོངས་གཅོད་ལ་མ་གྲུབ་པ་དང་། མ་གྲུབ་པ་སྒྲུབ་བྱེད་མ་ཡིན་པ་དང་སྐབས་དོན་བརྗོད་པ་དང་། དེ་ཡང་རྒོལ་བ་རང་ཉིད་ཀྱིས་ཁས་བླངས་པ་ཞེས་པ་གྲུབ་སྟེ། ངོ་བོ་ཚིག་ཕྲད་བདག་ཉིད་འདོད། །ཚིག་གི་དེ་ཡི་མཚན་ཉིད་བཞི། །མ་གྲུབ་སྒྲུབ་བྱེད་མིན་དོན་བརྗོད། །རྒོལ་བས་ཁས་བླངས་པ་གཟུང་ངོ་། །ཞེས་སོ། །རང་གི་ངོ་བོ་ཞེས་བྱ་བ་ནི་བསྒྲུབ་པར་བྱ་བ་ཁོ་ན་འདོད་པའོ། །རང་གི་ངོ་བོ་ཁོ་ན་ཞེས་བྱ་བ་ནི་བསྒྲུབ་པར་བྱ་བ་ཁོ་ནར་འདོད་པ་ཡིན་གྱི། སྒྲུབ་པ་ཉིད་གང་ཡང་རུང་བ་མ་ཡིན་ཏེ། དཔེར་ན་སྒྲ་མི་རྟག་པ་ཉིད་དུ་བསྒྲུབ་པར་བྱ་བ་ལ་གཏན་ཚིགས་མིག་གིས་གཟུང་བ་ཉིད་ནི་སྒྲ་ལ་མ་གྲུབ་པའི་ཕྱིར་བསྒྲུབ་པ་བྱ་བ་ཡིན་ན། དེ་འདིར་ནི་སྒྲུབ་པ་ཁོ་ནས་བརྗོད་པའི་ཕྱིར་བསྒྲུབ་པར་བྱ་བ་ཉིད་ཁོ་ནར་མི་འདོད་དོ། །བདག་ཉིད་ཅེས་བྱ་བ་ནི་དེའི་ཚེ་རྒོལ་བས་བསྒྲུབ་པར་སྨྲས་པ་གང་ཡིན་པའོ། །དེས་ན་གལ་ཏེ་བསྟན་བཅོས་འགའ་ཞིག་ལ་བརྟེན་ནས་བསྒྲུབ་པར་སྨྲས་ན་ཡང་བསྟན་བཅོས་དེ་བྱེད་པས། ཆོས་ཅན་དེ་ལ་ཆོས་མང་ཞིག་ཁས་ལེན་དུ་ཟིན་ཀྱང་དེའི་ཚེ། རྒོལ་བ་དེས་ཆོས་གང་བསྒྲུབ་པར་འདོད་པ་དེ་ཉིད་བསྒྲུབ་པར་བྱ་བ་ཡིན་གྱི། ཅིག་ཤོས་ནི་མ་ཡིན་ཞེས་བསྟན་པར་འགྱུར་རོ། །འདོད་པ་ཞེས་བྱ་བ་ནི་དོན་གང་ལ་རྩོད་པ་སྒྲུབ་པར་བཀོད་པ་དེ་གྲུབ་པར་འདོད་པའོ། །དེ་ནི་ཚིག་ཏུ་མ་སྨྲས་ཀྱང་བསྒྲུབ་པར་བྱ་བ་ཡིན་ཏེ། དེ་ནི་རྩོད་པའི་གཞི་ཡིན་པའི་ཕྱིར་རོ། །དཔེར་ན་འདུས་པ་ཡིན་པའི་ཕྱིར་མིག་ལ་སོགས་པ་ནི་གཞན་གྱི་དོན་བྱེད་དེ། མལ་ཆ་དང་སྟན་ལ་སོགས་པའི་ཡན་ལག་བཞིན་ནོ། །ཞེས་བྱ་བ་ལྟ་བུའོ། །འདིར་བདག་གི་དོན་ཞེས་མ་བརྗོད་ཀྱང་བདག་དོན་ཉིད་དུ་བསྒྲུབ་པར་བྱ་བ་ཡིན་ཏེ། དེས་ན་སྨྲ་བ་ཙམ་ཁོ་ན་ནི་བསྒྲུབ་པར་བྱ་བ་མ་ཡིན་ནོ་ཞེས་བསྟན་པར་འགྱུར་རོ། །མ་བསལ་བ་ཞེས་བྱ་བ་ནི་མཚན་ཉིད་དེ་དག་དང་ལྡན་དུ་ཟིན་ཀྱང་བསྒྲུབ་པར་འདོད་པའི་དོན་མངོན་སུམ་དང་། རྗེས་སུ་དཔག་པ་དང་། གྲགས་པ་དང་། རང་གི་ཚིག་རྣམས་ཀྱིས་སེལ་བ་གང་ཡིན་པ་དེ་ནི་ཕྱོགས་མ་ཡིན་ནོ། །ཞེས་བསྟན་པའི་ཕྱིར་ཏེ། དེ་ལ་མངོན་སུམ་གྱིས་བསལ་བ་ནི། དཔེར་ན་སྒྲ་ནི་སྙན་དུ་མི་རུང་ངོ་ཞེས་བྱ་བ་ལྟ་བུའོ། །རྗེས་སུ་དཔག་པས་བསལ་བ་ནི། །དཔེར་ན་བུམ་པ་ནི་རྟག་པའོ་ཞེས་པ་ལྟ་བུའོ། །གྲགས་པས་བསལ་བ་ནི། དཔེར་ན་རི་བོང་ཅན་ཟླ་བ་མ་ཡིན་ནོ་ཞེས་པ་ལྟ་བུའོ། །རང་ཚིག་གིས་བསལ་བ་ནི། དཔེར་ན་རྗེས་དཔག་ནི་ཚད་མ་མ་ཡིན་ནོ་ཞེས་པ་ལྟ་བུའོ། །དེ་ཡང་མ་གྲུབ་པ་ཁོ་ན་བསྒྲུབ་པར་བྱ་བ་ཡིན་པས། རང་གི་ངོ་བོའི་དོན་དེ་ལ་ཁོ་ན་ཞེས་པ་གསལ་བར་བྱེད་པའི་ཚིག་གི་ཕྲད་ཡིན་ནོ། །ཚིག་གཞན་གྱིས་བརྗོད་པར་བྱ་བའི་དོན་གྱིས་གསལ་བར་བྱེད་པ་ཡིན་པས། འདིར་ཡང་ངོ་བོའི་དོན་ལ་ངོས་གཟུང་དུ་འགྱུར་བས་ངོ་བོ་ཁོ་ན་ཞེས་བརྗོད་དོན་ཐ་མི་དད་པ་དང་། རང་ཉིད་ཅེས་པའི་ཚིག་ཕྲད་ཀྱི་སྒྲ་ནི་བདག་ཉིད་ཀྱི་ཞེས་དྲུག་པའི་དོན་དང་། བདག་ཉིད་ཀྱིས་ཞེས་གསུམ་པའི་དོན་དུ་འཇུག་པ་ལས་ཕྱི་མ་ཡིན་པའི་ཕྱིར། དེ་ཡང་འབྲེལ་བ་ཅན་གྱི་སྒྲ་ཡིན་ལ་དེ་དང་ཉེ་བ་ཡང་རྒོལ་བ་ཡིན་པས་དེའི་ཕྱིར་རྒོལ་བ་གང་གིས་བདག་ཉིད་གསུམ་པའི་དོན་དུ་བརྗོད་པ་དེ་ཉིད་རྒོལ་བས་ཞེས་དང་། རྒོལ་བ་ཡང་དུ་མ་ཡོད་པས་རང་ཉིད་ཀྱི་སྒྲས་ཁྱད་པར་དུ་བྱེད་པ་སྟེ། རྩོད་པའི་ཚེ་བསྒྲུབ་པའི་ཡན་ལག་བརྗོད་མཁན་དེ་ཡིན་ནོ། །རྩོད་པའི་ཚེ་ན་རྒོལ་བ་འདིས་བསྒྲུབ་པར་བྱ་བ་ཉིད་དུ་རང་འདོད་པའི་ཆོས་གང་ཡིན་པ་དེ་ཁོ་ན་བསྒྲུབ་པར་བྱ་བ་ཡིན་གྱི་ཆོས་ཅིག་ཤོས་ནི་མ་ཡིན་པས་དེ་གཉིས་ཀྱང་ཐ་དད་མེད་པ་དང་། ཚིག་འདིའི་འབྲས་བུ་རྒོལ་བས་མི་འདོད་པའི་ཆོས་བསྒྲུབ་པར་བྱ་བ་ཉིད་དུ་བཀག་པ་ཡིན་ལ། འདི་ཉིད་རྩོད་པའི་གཞིར་བཞག་གོ །དེ་ལྟར་ཁས་བླངས་པ་དེ་སྒྲ་སྦྱོར་བ་ཡང་དངོས་པོ་མེད་ན་མི་འབྱུང་བ་ཉིད་དུ་ཁས་བླངས་པ་སྔོན་དུ་འགྲོ་བ་ཅན་ཡིན་པས། སྦྱོར་བའི་ངག་དེ་སྒྲ་ལས་བྱུང་བའི་ཤེས་པ་དོན་ཡོད་པ་ཉིད་དུ་འདོད་པར་སྟོན་པས་ཚད་མས་མ་བསལ་བ་སྟེ་བསྡུས་ནས་གསུམ་དུ་བསྟན་ནོ། །རིགས་ཐིགས་སུ། དེ་ཉིད་ཀྱི་ངོ་བོ་དང་རྒོལ་བས་འདོད་པ་དང་། འདོད་པ་མ་གསལ་བ་ནི་ཕྱོགས་ཡིན་ཏེ། དེ་ལྟར་ན་ཕྱོགས་ཀྱི་མཚན་ཉིད་ཁ་ན་མ་ཐོ་བ་མེད་པའོ། ཞེས་སོ། །དེ་བས་ན་ཚིག་ཅེས་པ་མ་བསལ་བ་ཉིད་བཤད་པ་མ་གོ་བར་མཚན་ཉིད་ཀྱི་ཟུར་ལྔ་ཀ་འདིར་མ་བསྟན་ཞེས་པ་ལོག་རྟོག་སྟེ། རྣམ་ངེས་སུ། འདིར་རང་གི་ངོ་བོ་དང་། ཚིག་ཕྲད་དང་། འདོད་པ་དང་། རང་ཉིད་ཀྱི་ཚིག་བཞིས་ཞེས་གསུངས་པས་སོ། །དེ་བས་ན་འདིར་ངོ་བོ་ཚིག་ཕྲད་བདག་ཉིད་འདོད། ཚིག་གི ཞེས་མཚན་ཉིད་ཀྱི་ཟུར་ལྔ་ཀ་བསྟན་ཀྱང་། རང་ཉིད་ལོགས་སུ་མ་བྱས་པར། རང་ཉིད་ཀྱི་འདོད་པ། རང་ཉིད་ཀྱིས་ཁས་བླངས་པའི་ཚིག་ཅེས་དེ་གཉིས་ཀྱི་ཐོག་མར་སྦྱར་ནས་དེ་ཡི་མཚན་ཉིད་བཞི་ཞེས་བཤད་དོ། །བསྒྲུབ་པར་བྱ་བ་ཡིན་པ་རྒོལ་བས་འདོད་པ་ཚད་མས་མ་བསལ་བ་གསུམ་ལྡན་དེ་ཉིད། བསྒྲུབ་བྱ་ཡང་དག་གི་མཚན་ཉིད་དུ་འགྱུར་རོ། །དེ་ལྟར་གསུམ་དུ་བཞག་པའི་ཟུར་དང་པོ་རྒྱས་པར་བཤད་པ་ལ། མ་བརྗོད་ན་ཡང་འདོད་པས་ཁྱབ། །བདག་གི་དོན་བཞིན་བསྒྲུབ་བྱར་འདོད། །ནས། དེར་ནི་འདོད་ལ་གནོད་བྱེད་ཡིན། །ཞེས་པའི་བར་གྱིས་འདོད་ཡུལ་བསྒྲུབ་བྱ་ཡིན་པར་བསྟན། གལ་ཏེ་གང་ལ་རྩོད་པ་ཡིན། །ཚིགས་སུ་བཅད་པས་དེ་བསྒྲུབ་བྱ་མ་ཡིན་པ་ལ་གནོན་བྱེད་བརྗོད། འདིས་ནི་གཉིས་བཅས་སྦྱོར་བ་ལ། །ནས། །རྗེས་འགྲོ་མེད་པའི་སྐྱོན་ལྡན་མིན། །ཞེས་པའི་བར་གྱིས་དེ་ཡིས་གཉིས་བཅས་སྦྱོར་བ་ཁེགས་པར་བསྟན། འདིས་ནི་ཆོས་ཅན་ཆོས་དག་གིས། །ནས། འདིར་ཆོས་འབའ་ཞིག་བསྒྲུབ་བྱ་ཡིན། །ཞེས་པའི་བར་གྱིས་དེའི་ཚོགས་པ་གཞན་གསལ་བཀག་པར་བསྟན་ནོ། །བར་པ་རྒྱས་པར་འཆད་བཞེད་ནས། །ཆོས་ཅན་སྤྱི་ལ་བསྟན་བཅོས་དག །ཆོས་རྣམས་དུ་མ་རྣམ་གཞག་ཀྱང་། །བདག་ཉིད་འདོད་པ་བསྒྲུབ་བྱ་ཞེས། །བདག་ཉིད་ཀྱི་ནི་སྒྲ་སྨོས་སོ། །དེས་རང་ཉིད་འདོད་པ་བསྒྲུབ་བྱར་བསྟན་ནས། གལ་ཏེ་བསྟན་བཅོས་ཁས་བླངས་ཕྱིར། །ནས། ཕྱོགས་དང་གཏན་ཚིགས་སྐྱོན་མེད་ཉིད། །ཅེས་པའི་བར་གྱིས་དེ་རྣམ་བཅད་དང་ཡོངས་གཅོད་ཀྱི་སྒོ་ནས་རྒྱས་པར་བསྟན་ནོ། །ཐ་མ་མ་བསལ་བ་སྟོན་པར་བཞེད་ནས། ཁས་བླངས་དེ་ཡང་ཚད་མ་ནི། །ངག་གིས་བཀག་མེད་ཡིན་པར་འདོད། །ཁས་བླངས་པ་དེ་ཚད་མ་རྣམ་པ་བཞིས་མ་བསལ་བར་འདོད་དེ། རིག་པ་གང་གིས་ཞེ་ན། གཏན་ཚིགས་ཐེ་ཚོམ་ལ་བརྗོད་ཕྱིར། །བསལ་བ་གཏན་ཚིགས་བརྟེན་མ་ཡིན། །གང་ལ་ཐེ་ཚོམ་སྐྱེ་བའི་ནུས་པ་ཡོད་པ་དེ་གཏན་ཚིགས་ཀྱི་ཡུལ་ཡིན་ཏེ། སྒྲུབ་པ་དང་གནོད་པར་བྱེད་པའི་ཚད་མ་དག་གིས་རང་གི་ངོ་བོ་དང་དེ་ལས་བཟློག་པ་དག་ཏུ་ངེས་པ་ལ་ནི་མ་ཡིན་པས་བསལ་བ་ནི་གཏན་ཚིགས་བརྗོད་པ་མ་ཡིན་ལ། ཕྱོགས་འདི་ནི་གཏན་ཚིགས་ཀྱི་བྱེད་པའི་ཡུལ་ཡིན་པའི་ཕྱིར་རོ། །རྗེས་སུ་དཔག་པའི་དབྱེ་བ་ཡིས། །གནོད་པ་དེ་ཡང་རྣམ་བཞིར་བཤད། །གལ་ཏེ་ཚད་མས་བསལ་བ་ཕྱོགས་མ་ཡིན་ན་ཇི་ལྟར་རྣམ་པ་བཞིར་བཤད་ཅེ་ན། རྗེས་དཔག་ལ་དངོས་པོ་སྟོབས་ཞུགས་ཀྱི་རྗེས་དཔག་དང་། །གྲགས་པ་དང་ཡིད་ཆེས་ཀྱི་རྗེས་དཔག་གསུམ་མངོན་སུམ་དང་བཞིས་བསལ་བ་ཞེས་བྱ་བའི་དོན་ནོ། །ཡིད་ཆེས་པའི་ཚིག་གི་འབྲས་བུའི་རྟགས་དང་། འགྲོ་བ་ལ་གྲགས་པ་འཇིག་རྟེན་གྱི་ལུགས་རྣམ་པར་བཞག་པ་ནི་རང་བཞིན་ཡིན་པས། དེ་ལ་ཁས་བླངས་འབྲས་རྟགས་ཏེ། །འགྲོ་ལ་གྲགས་པ་རང་བཞིན་རྟགས། །འདི་ལ་འཐད་ལྡན་དུ། གྲགས་པ་ཞེས་བྱ་བ་རྣམ་པར་རྟོག་པ་ལ་གནས་པ་ཉིད་ཀྱིས་དོན་གྱི་རང་བཞིན་ཡིན་ནོ། །ཞེས་གཏན་ལ་འབེབས་པར་འགྱུར་རོ། །གང་གི་ཚེ་ཚིག་འབྲུའི་རྟགས་སུ་གྱུར་པ་ཡིད་ཆེས་པ་དེ་གང་ཡིན་ཞེ་ན། བདག་གམ་གཞན་ནི་ཡིད་ཆེས་པ་ཡིན་ཏེ། ཇི་ལྟ་བུའི་ཁྱད་པར་ཅན་ཞིག་ཅེ་ན། གང་ལ་དོན་ཇི་ལྟ་བ་བཞིན་ཏེ་ཇི་ལྟར་གནས་པ་བདེན་པའི་དོན་མཐོང་བ་ཡོད་པ་དེའི་སྒོ་ནས་ངག་འཇུག་པ་སྟེ་ཞེས་པའོ། །ཡང་དག་ངེས་ལྡན་བརྗོད་འདོད་པ། །ནས། གཟུང་བར་བྱ་ཕྱིར་དཔྱོད་འཇུག་འགྱུར། །ཞེས་པའི་བར་གྱིས་ཡིད་ཆེས་ཀྱི་བསལ་བ་བཤད། སྐྱེས་བུ་འདོད་དང་རྗེས་འབྲེལ་བ། །ནས། མངོན་སུམ་རྗེས་དཔག་གནོད་ལ་མིན། །ཞེས་པའི་བར་གྱིས་གྲགས་པས་བསལ་བ་རྒྱས་པར་བཤད། མངོན་སུམ་གྱིས་གནོད་འདི་ལ་ཡང་ནས། སྙན་བྱས་དབང་པོའི་སྤྱོད་ཡུལ་བཤད། །ཅེས་པའི་བར་གྱིས་མངོན་སུམ་གྱི་བསལ་བ་བཤད། །ཀུན་ཏུ་རྒོལ་བ་བདག་ཉིད་གྱི། །ནས། རྟེན་སོགས་མ་འགྲུབ་ཕྱོགས་སྐྱོན་མིན། །ཞེས་པས་རྗེས་དཔག་གི་བསལ་བ་བསྟན་ནས། དེ་དག་གི་དཔེར་བརྗོད་པ་ཆ་ཙམ་མ་བསྟན་ན་བདེ་ལག་ཏུ་རྟོགས་པ་ཡང་རིགས་པ་མིན་ན། དེ་ལ་འདིར་རྒྱུ་ཅི་ཡོད་མི་ཤེས་སོ་ཞེ་ན། འདིས་གྲུབ་ཡན་ལག་གྱུར་པ་ཡི། །ཆོས་ཅན་ཆོས་ཀྱི་ཁྱད་པར་དང་། །ཆོས་ཅན་རང་གི་ངོ་བོ་ལ། །གནོད་པ་དག་ནི་བསྟན་པ་ཡིན། །ཆོས་ཀྱི་ངོ་བོ་བཟློག་པ་སྟོན་པ་ལྷུར་ལེན་པའི་དཔེ་འདིས་རང་གི་ངོ་བོ་དང་ཁྱད་པར་ཐམས་ཅད་ཀྱི་དཔེ་བསྟན་པ་ཡིན་ནོ། །ཇི་ལྟར་གཞན་གྱིས་གཞན་བསྟན་ཞེ་ན། བསྒྲུབ་བྱ་ཉིད་དུ་ཁྱད་པར་མེད་པའི་ཕྱིར་རོ། །དེ་ལ་དོན་ནི་བསྟན་པ་ཡི། །ནས། གྲུབ་ན་སྒྲུབ་པ་གྲུབ་པ་ཉིད། །ཅེས་པའི་བར་གྱིས་བྱེ་བྲག་པས་ཡན་ལག་ཅན་ཡན་ལག་ལས་རྫས་གཞན་ཆོས་གསུམ་ལྡན་ཞིག་བསྒྲུབ་པར་འདོད་ནས། ཡན་ལག་ཅན་ཆོས་ཅན། ཡན་ལག་ལས་གཞན་དུ་ཡོད་དེ། མངོན་སུམ་གྱི་མཐོང་ཐོས་སོགས་སྒྲིབ་པར་བྱེད་པས་སོ། །ཞེས་འདོད་པ་ལ། ཡན་ལག་ཅན་ནི་ཡན་ལག་ལས་གཞན་མ་ཡིན་པར་ཐལ། སྲང་དམའ་བ་ལས་ཁྱད་པར་འཛིན་པ་མེད་པའི་ཕྱིར་རོ། །ཡན་ལག་རྣམས་ནི་ཡན་ལག་ཅན་ལས་གཞན་མ་ཡིན་ཏེ། མངོན་སུམ་མ་ཡིན་པ་ཉིད་དུ་ཐལ་བའི་ཕྱིར། རྫས་ནི་ཡོད་པ་མ་ཡིན་ཏེ། ཡོན་ཏན་དང་རྫས་དང་རྫས་དག་རྫས་མ་ཡིན་པར་ཐལ་བའི་ཕྱིར། ཞེས་བྱ་བས་འགོག་པ་འདི་དཔེར་བརྗོད་དོ། །དེ་ཆོས་ཅན་རང་གི་ངོ་བོ་བརྗོད་པས་སེལ་བས་ནི་ཕྱི་མའི་དང་། ཆོས་ཅན་དང་ཆོས་ཀྱི་ཁྱད་པར་སེལ་བས་ནི་དང་པོའི་དཔེར་བརྗོད་པ་གཉིས་བསྟན་ནོ། །གལ་ཏེ་འདི་ལྕི་འོག་འགྲོར་འགྱུར། །ནས། དམ་བཅའི་དོན་དུ་འཐད་མ་ཡིན། །ཞེས་པའི་བར་གྱི་དེ་ཉིད་དང་དཔེར་བརྗོད་གཞན་ཡང་རྒྱས་པར་བསྟན་ནོ་གཉིས་པ་གང་གིས་དཔོག་པ་སྒྲུབ་བྱེད་ཀྱི་རྣམ་གཞག་ནི། གཏན་ཚིགས་རབ་ཏུ་དབྱེ་བའི་དོན། །བདེ་བར་གཟུང་བ་བསྒྲུབ་བྱའི་ཕྱིར། །ཕྱོགས་ཆོས་རབ་ཏུ་དབྱེ་བ་ཡིས། །མདོར་བསྡུས་པ་ནི་གསུངས་པ་ཡིན། །སློབ་དཔོན་ཕྱོགས་ཀྱི་གླང་པོས་གཏན་ཚིགས་ཀྱི་རབ་དབྱེ་རྣམ་པ་དགུར་བཤད་པ་དེ་ནི། བསྒྲུབ་བྱ་བསྒྲུབ་པ་དང་དེ་མ་ཡིན་པ་བདེ་བླག་ཏུ་རྟོགས་པའི་ཕྱིར་ཡིན་ནོ། །མདོར། གཞལ་བྱ་བྱས་དང་མི་རྟག་དང་། །བྱས་དང་སྙན་བྱ་རྩོལ་བས་བྱུང་། །མི་རྟག་རྩོལ་བྱུང་རེག་བྱ་མིན། །ཞེས་རྟགས་དང་། དེ་དགུ་རྟག་པ་ལ་སོགས་པའོ། །ཞེས་པ་གསལ་བ་སྟེ་ཕྱོགས་ཀྱི་ཆོས་དགུ་པོ་འདི་དག་དཔེ་ལ་སྦྱང་བར་བྱ་བ་ནི། གཞལ་བྱ་ཡིན་པའི་ཕྱིར་སྒྲ་རྟག་གོ །བྱས་པའི་ཕྱིར་མི་རྟག་གོ །མི་རྟག་པའི་ཕྱིར་རྩོལ་བ་ལས་བྱུང་བའོ། །བྱས་པའི་ཕྱིར་རྟག་གོ །མཉན་བྱ་ཡིན་པའི་ཕྱིར་རྟག་གོ །རྩོལ་བ་ལས་བྱུང་བའི་ཕྱིར་རྟག་གོ །མི་རྟག་པའི་ཕྱིར་རྩོལ་བ་ལས་བྱུང་བ་མ་ཡིན་ནོ། །རྩོལ་བ་ལས་བྱུང་བའི་ཕྱིར་མི་རྟག་གོ །རེག་བྱ་མ་ཡིན་པའི་ཕྱིར་རྟག་གོ །དེ་དག་ལས་གང་རྟགས་ཡང་དག་ཡིན་ཞེ་ན། དེར་གང་མཐུན་ཕྱོགས་ལ་ཡོད་དང་། རྣམ་གཉིས་ལ་མེད་དེ་མེད་པ། དེར་རྟག་མཐུན་ཕྱོགས་ལ་ཡོད་མི་མཐུན་ཕྱོགས་ལ་མེད་པ་དེ་ཡང་། མཐུན་ཕྱོགས་ལ་ཁྱབ་བྱེད་དུ་འཇུག་པ་དང་རྣམ་པ་གཉིས་སུ་འཇུག་པའི་རིམ་པ་བཞིན། དང་པོ་ཐ་མའི་བར་དག་གོ །དེ་ལས་བཟློག་པ་ནི་འགལ་བ། ཕྱིན་ཅི་ལོག་ཏུ་བསྒྲུབ་པའི་ཕྱིར་འགལ་བ་ནི་རྣམ་པ་གཉིས་ཏེ། མི་མཐུན་ཕྱོགས་ལ་ཡོད་ལ་མཐུན་ཕྱོགས་ལ་མེད་པ་དང་། མི་མཐུན་པའི་ཕྱོགས་གཅིག་ལ་ཡོད་པ་བར་གྱི་ཐོག་མཐའ་གཉིས་སོ། །འདི་ལ་འགལ་བ་གཞན་ཡང་ཡོད་དོ་ཞེས་ངེས་པར་ཕྱེད་པ་ལ། རྣམ་ངེས་སུ། རྩོལ་བྱུང་གི་ཚབ་ཏུ། གསོན་པོའི་ལུས་ནི་བདག་དང་བཅས་པ་ཡིན་ཏེ། སྲོག་ལ་སོགས་པ་དང་ལྡན་པའི་ཕྱིར་རོ། །ཞེས་རྣམ་གྲངས་སུ་བཀོད་དོ། །གཞན་རྣམས་མ་ངེས་པའོ། །ལྷག་མ་ལྔ་ལས་གཏན་ཚིགས་དང་འགལ་བ་གར་ཡང་མ་ངེས་པས་ཐེ་ཚོམ་གྱི་རྒྱུ་ཡིན་ནོ། །མདོར། གྲངས་གཅིག་ཉིད། འདིར་ཡང་མཐུན་ཕྱོགས་མི་མཐུན་ཕྱོགས་གཉི་ག་ལ་ཡོད་པ་དང་། མི་མཐུན་ཕྱོགས་གཅིག་དང་མཐུན་ཕྱོགས་ཀུན་ལ་དང་། མཐུན་ཕྱོགས་གཅིག་དང་གཉི་ག་ལ་མི་མཐུན་ཕྱོགས་ཀུན་དང་གཉི་གའི་ཕྱོགས་གཅིག་དང་མེད་པའོ་ཞེས་རིགས་པ་ཡིན་ནོ། །དང་པོའི་ཐོག་མཐའ། མཐའ་མའི་ཐོག་མཐའ་བཞི་ཐུན་མོང་བའི་མ་ངེས་པ། བར་གྱི་བར་ནི་ཐུན་མོང་མ་ཡིན་པའི་མ་ངེས་པའོ། །མཐུན་ཕྱོགས་ལ་ཁྱབ་བྱེད་དུ་འཇུག་པ་དང་རྣམ་གཉིས་སུ་འཇུག་པའི་གོ་དོན། རྟགས་བསྒྲུབ་བྱའི་ཆོས་མཐའ་དག་ལ་ཁྱབ་ཅིང་། རིགས་མི་མཐུན་པ་ཐམས་ཅད་ལས་ལོག་པ་དང་། རྟགས་བསྒྲུབ་བྱའི་ཆོས་ཀྱི་རིགས་འགའ་ཞིག་ལ་ཁྱབ་ཅིང་། རིགས་མི་མཐུན་པ་འགའ་ཞིག་ལས་ལོག་པ་ཙམ་སྟེ། མདོ་རང་འགྲེལ་དུ། གང་ལ་མེད་པ་དེ་རྣམ་གཅོད། །དོན་ནི་འབའ་ཞིག་རབ་བསྒྲུབ་བྱེད། །གཅིག་ནི་གཞན་ལ་གཉིས་སུ་འཇུག །གཉི་ག་ལ་བརྟན་པ་ནི་གང་ལ་མེད་པ་དེ་རྣམ་པར་བཅད་པའི་སྒོ་ནས་བསྒྲུབ་པར་བྱ་བའི་རིགས་མཐའ་དག་གམ། མཐའ་དག་མ་ཡིན་པ་ལ་འཇུག་པ་ན་དོན་ཇི་ལྟ་བ་ཤེས་པར་བྱེད་པའི་གཏན་ཚིགས་སུ་བརྗོད་པ་ཡིན་ཏེ། དཔེར་ན་མི་རྟག་པ་ཉིད་ལ་བྱས་པ་ཉིད་དང་། རྩོལ་བ་ལས་བྱུང་བ་ལྟ་བུའོ། །ཞེས་གསུངས་སོ། །རྒྱུ་ཅིའི་ཕྱིར་ཕྱོགས་ཆོས་རྣམ་པ་དགུར་ཕྱེ་ཞེ་ན། རང་བཞིན་འབྲས་བུ་བསྒྲུབ་དོན་དུ། །གཏན་ཚིགས་གཉིས་དང་བཟློག་པ་གཉིས། །རྩོད་ཕྱིར་ཁྱད་པར་སྤྱི་དག་དང་། །ལྷག་མ་ཟློག་པའི་སྒྲུབ་བྱེད་ཡིན། །རྣམ་ངེས་སུ། རང་བཞིན་དང་འབྲས་བུ་དག་ཁོ་ན་བདག་ཉིད་འབྲེལ་བའི་ཕྱིར་གོ་བར་བྱེད་པ་དང་། ཟློག་པ་ཕྱིན་ཅི་ལོག་ཏུ་བྱེད་པ་ཡིན་ནོ། །ཞེས་བསྟན་པའི་ཕྱིར། མི་རྟག་སྟེ་བྱས་པའི་ཕྱིར་དང་། རྩལ་མ་ཐག་ཏུ་བྱུང་བའི་ཕྱིར་རོ། །ཞེས་བྱ་བའི་གཏན་ཚིགས་གཉིས་དང་། རྟག་སྟེ་བྱས་པའི་ཕྱིར་དང་། རྩོལ་མ་ཐག་ཏུ་བྱུང་བའི་ཕྱིར་ཞེས་བྱ་བའི་འགལ་བ་གཉིས་བསྟན་ཏོ། །རང་བཞིན་ལ་གཞན་ནི་མཐུན་པའི་ཕྱོགས་ཐམས་ཅད་ལ་ཡོད་པ་མི་སྲིད་དེ་རྒྱུ་ནི་འབྲས་བུ་ལ་འཁྲུལ་པའི་ཕྱིར་རོ། །དེའི་ཕྱིར་འབྲས་བུ་ནི་མཐུན་པའི་ཕྱོགས་ལ་རྣམ་པ་གཉིས་སུ་འཇུག་པ་ཡིན་ནོ། །མི་རྟག་པ་ཡིན་པ་ཙམ་གྱིས་ནི་ཐམས་ཅད་འབྲས་བུ་རྩལ་མ་ཐག་ཏུ་འབྱུང་བ་ཅན་གྱི་ཤེས་པ་རྩོལ་བ་མ་ཡིན་ཏེ། དེས་ན་དེ་ནི་མཐུན་པའི་ཕྱོགས་ལ་རྣམ་པ་གཉིས་སུ་གནས་སོ། །རྩོལ་མ་ཐག་ཏུ་འབྱུང་བའི་ཤེས་པར་སྒྲ་མི་རྟག་པའི་འབྲས་བུ་ཡིན་ནོ་ཞེས་བྱ་བ་འདི་ཅི་ལྟར་རྟོགས་ཞེ་ན། ཞེས། འདིས་རྩོལ་བྱུང་སྒྲ་མི་རྟག་པར་བསྒྲུབ་པའི་འབྲས་བུའི་རྟགས་སུ་བཤད་པ་ལ་རྩོད་པ་བཀོད་ནས། མི་རྟག་པ་དང་རྩོལ་བྱུང་རྒྱུ་འབྲས་སུ་གྲུབ་པ་ལ། རྩོལ་བྱུང་གི་ཤེས་པ་མི་རྟག་པའི་འབྲས་བུར་བཤད་པའི་རིགས་པས་གཏན་ལ་ཕབ་བོ། །ཁྱད་པར་ཞེས་པས་ཁྱད་པར་བལྟོས་པ། སྤྱི་ཞེས་པས་འབྲས་བུའི་སྤྱི་ཙམ་བརྗོད་པ་དེའོ། །དེའི་ཕྱིར་འབྲས་རྟགས་ལ་དབྱེ་བ་བརྗོད་ན། སྤྱི་ཁྱད་པར་དུ་བྱས་ནས་བརྗོད་པའི་འབྲས་རྟགས། རང་བཞིན་གྱི་ཕྱོགས་གཅིག་ལ་བརྟེན་པའི་འབྲས་རྟགས། ཡིད་ཆེས་པའི་རྟགས་གསུམ་དུ་འཐད་པ་ཡིན་ལ། གཞན་ནི་མདོ་དང་སྡེ་བདུན་གྱི་གཞུང་རྩ་འགྲེལ་རྣམས་སུ་མི་སྣང་ངོ་། །ཡང་རྣམ་ངེས་སུ། འབྲས་བུའི་གཏན་ཚིགས་ཀྱི་དཔེར་བརྗོད་པ་འདིས། ཕྱོགས་གཅིག་ལ་བརྟེན་པའི་རང་བཞིན་ཡང་བཤད་པར་རིགས་པར་བྱའོ། །དེས་འདིར་འབྲས་བུའི་རྟགས་ཀྱི་ནི། །རང་བཞིན་ཕྱོགས་གཅིག་བརྟེན་པའང་བཤད། །འོ་ན་མ་དམིགས་པའི་རྟགས་ཀྱི་དཔེར་བརྗོད་འདིར་མི་བཤད་པ་ཅི་ཡིན་ཞེ་ན། དེ་ལས་འགའ་ཞིག་རང་བཞིན་གྱི་འབྲེལ་བ་དང་། འགའ་ཞིག་རྒྱུ་འབྲས་ཀྱི་འབྲེལ་བ་ཉིད་དུ་གྲུབ་པས་རྒྱུ་འབྲས་རང་གཉིས་ཀྱི་ཞར་གྱིས་ཤེས་པ་ཡིན་ནོ། །ཞེས་སྟོན་པ་ལ། ཇི་ལྟར་མཐོང་དང་མ་མཐོང་ལས། །རྒྱུ་དང་འབྲས་ཉིད་སྒྲུབ་པ་བཞིན། །དེ་གཉིས་ལས་ནི་འབྲས་སོགས་སྒྲ། །ཐ་སྙད་དོན་དུ་བཀོད་པ་ཡིན། རྒྱུ་ལས་འབྲས་བུ་རབ་གྲུབ་པ། །འདི་ནི་རང་བཞིན་ནང་འདུས་ཕྱིར། །གཏན་ཚིགས་རབ་དབྱེར་བཤད་པ་ལས། །ཐ་དད་པ་ནི་དཔེ་མ་བརྗོད། །ཞེས་གསུངས་པས་སོ། །དེ་ལྟར་གཏན་ཚིགས་རབ་ཏུ་དབྱེ་བའི་དོན། །ནས། ལྡོག་པ་ཉིད་ནི་ངེས་པ་ཉིད། །ཅེས་པའི་བར་གྱིས་རྟགས་ཀྱི་སྤྱི་ཙམ་བསྟན། ཁྱད་པར་རྒྱས་པར་བཤད་པའི་ཕྱིར། །མེད་ན་མི་འབྱུང་ཡིན་པར་བརྗོད། །ནས། གཞན་དུ་གོ་བར་བྱེད་པར་འགྱུར། །ཞེས་པའི་བར་གྱིས་འབྲེལ་བ་མེད་པ་བ་རྗེས་སུ་འགྲོ་ལྡོག་གང་ཡང་མེད་པས་སྲོག་སོགས་ལྡོག་པ་ཅན་མ་ཡིན་པར་བསྟན། གལ་ཏེ་བདག་ནི་ལྡོག་པ་ཡི། །ནས། །གཞན་དུ་རྟོག་ན་ཐུག་པ་མེད། །ཅེས་པའི་བར་གྱིས་བདག་མེད་ན་སྲོག་མེད་པ་ཉིད་དུ་ཐལ་བས་སྲོག་སོགས་ལྡོག་པ་ཅན་དུ་བསྒྲུབ་པ་དགག འཁྲུལ་པ་ཉིད་ཀྱི་སྙན་བྱ་དང་། །ནས། མཁྲེགས་པ་མཚོན་གྱིས་མི་ཆོད་བཞིན། །ཞེས་པའི་བར་གྱིས་ལྡོག་ཁྱབ་འཁྲུལ་པ་ཅན་དུ་སྙན་སོགས་མཚུངས་པས་སྲོག་ལྡོག་པ་གཅིག་པུ་ཅན་མ་ཡིན་པར་བསྟན། ཡོད་པ་འགལ་བ་མ་མཐོང་ན། །ནས། གཞུང་ཡོངས་སུ་རྫོགས་པའི་བར་གྱིས་དགག་ཆོས་སྒྲུབ་ཆོས་དང་འགལ་འབྲེལ་གང་ཡང་མེད་པས་སྲོག་སོགས་ལྡོག་པ་ཅན་མ་ཡིན་པ་དང་། སྙན་བྱ་ལྡོག་པ་མེད་པའི་དཔེར་སྨོས་པ་སོགས་རྒྱས་པར་བཤད་དོ། །དེ་ལྟར་བཤད་པ་ཐམས་ཅད་ཀྱི་དོན་བསྒྲིལ་ན། སེམས་ཅན་ཐམས་ཅད་ལ་སྙིང་སྙོམས་ཤིང་རབ་ཏུ་དགའ་བས་བྱམས་པ་དང་སྙིང་རྗེ་ཆེན་པོ་བླ་ན་མེད་པའི་སེམས་བསྐྱེད་ཅིང་། དགེ་བའི་བཤེས་གཉེན་ཚད་མ་ལ་གཞུང་ལུགས་ཆེན་པོ་འདི་ལྟ་བུའི་གདམ་ངག་ཉན་ཏེ། བྱང་ཆུབ་ཀྱི་སྤྱོད་པ་རླབས་པོ་ཆེ་ལ་ཞུགས་ནས་ཤིན་ཏུ་ལྐོག་ཏུ་གྱུར་པའི་ཡུལ་ལ་ལུང་ཚད་མ་དང་། ལྐོག་ཏུ་གྱུར་པའི་དོན་ལ་རྗེས་སུ་དཔག་པ་རང་དོན་གྱི་ལེའུར་བསྟན་པ་བཞིན། ཐོས་པའི་ཤེས་རབ་ཀྱིས་ངེས་ཤིང་ངེས་པར་རྟོགས་པའི་རིགས་པའི་རལ་གྲི་མངོན་སུམ་གྱི་ལེའུ་ནས་བྱུང་བ་བཞིན། སེམས་པ་དང་སྒོམ་པའི་བརྡར་ལ་བརྡར་བས་ཕུལ་དུ་བྱུང་བས་འབྲས་བུར་གྱུར་པའི་ཉེ་བར་ལེན་པའི་ཕུང་པོ་ལྔ་ནི་སྡུག་བསྔལ་བའོ། །དེ་དག་ཉིད་སྲེད་པ་དང་ལྷན་ཅིག་ཏུ་རྒྱུར་གྱུར་པ་ནི་ཀུན་འབྱུང་ངོ་། །ངེས་པར་ལེགས་པའི་རང་བཞིན་དུ་གྱུར་པའི་སེམས་ནི་འགོག་པའོ། །རང་བཞིན་དེ་ཉིད་ཐོབ་པའི་རྒྱུར་གྱུར་པ་བདག་མེད་པ་ལ་སོགས་པའི་རྣམ་པ་ཅན་གྱི་སེམས་ཀྱི་ཁྱད་པར་ནི་ལམ་མོ། །ཞེས་འཕགས་པའི་བདེན་པ་བཞི་མཐོང་བ་ཐབས་དང་བཅས་པ་ཡུལ་དང་བཅས་པ་རྣམ་པ་དང་བཅས་པ་ཁོང་དུ་ཆུད་པའི་ཤེས་རབ་ཀྱི་རྣོ་བས་འཇིག་ཚོགས་ལ་ལྟ་བའི་གཞི་དང་བག་ཆགས་ཐམས་ཅད་རྩད་བཅད་དེ་འཁྲུལ་པ་མེད་པ་དྲི་མ་མེད་པ་བཟློག་པ་མེད་པའི་ཚད་མ་བཅོམ་ལྡན་འདས་སུ་གྲུབ་པར་གྱུར་ན་ཆོས་ཀྱི་འཁོར་ལོ་བསྐོར་བ་སོགས་གཞན་གྱི་དོན་སྲིད་པ་ཇི་སྲིད་པར་མཛད་པ་བཞིན་སློབ་པ་ལམ་གྱི་དུས་སུ། བདག་གིས་མཐོང་བའི་དོན་གཞན་ལ་བསྟན་པར་བྱ་བའི་བསྒྲུབ་པའི་ཡན་ལག་བཀོད་ཅིང་། དེ་དག་ཕྱིན་ཅི་ལོག་གི་ལོག་པར་རྟོག་པ་སུན་འབྱིན་གྱིས་སུན་ཕྱུང་སྟེ་ཕན་པ་དང་བདེ་བ་ཐམས་ཅད་ཀྱི་གཏེར་ཆེན་པོ་སྦྱིན་པར་བྱའོ། །དེ་བས་ན་འདི་དབུ་མའི་གཞུང་ལུགས་སུ་གྲུབ་པས་ལོ་ཙཱ་ཆེན་པོ་རྔོག་གིས། ལྟ་ངན་ཀུན་སེལ་གཉིས་སུ་མེད་པ་ཡི། །དོན་དམ་རྣམ་དཔྱོད་ལྷུར་ལེན་བསྟན་བཅོས་འདི། །ཞེས་གསུངས་སོ། །སྔ་མ་སྔ་མར་ཡང་ཡང་སྦྱངས་པའི་སེམས་རྒྱུད་བཻཌཱུརྻ་གཙང་མའི་གཞི། །ཇི་ལྟ་ཇི་ལྟར་དེ་དེ་རིག་གནས་ལྔ་ཡི་གཞུང་ལུགས་ཐམས་ཅད་ཀྱི། །མཚར་བ་མཚར་བར་རང་རང་བརྙན་པོ་བཀོད་པ་ཤིན་ཏུ་གསལ་འཛིན་པ། །འདི་འདྲ་འདི་འདྲར་གང་གང་སྩལ་ཡང་བདག་བློའི་ཁང་བཟང་དེ་མིན་སུ། །ཨེ་མ་གཞུང་ལུགས་ཆུ་གཏེར་འདིའི། །ཐ་སྙད་མཆིང་བུས་ཕལ་ཆེར་ཚིམས། །ངེས་དོན་རྒྱ་མཚོའི་གདེངས་ཀའི་སྤྱིའི། །ཀུན་དགའ་དཔལ་དེ་བདག་ཁོ་ནས། །ལེགས་བཤད་རྒྱལ་མཚན་ཡོངས་ཀྱི་རྩེར། །འདི་འཐོན་བདག་གིས་འབད་པའི་མཐུ། །ཐུབ་བསྟན་ཉན་འཛིན་སྒོམ་པའི་ནོར། །མ་ལུས་ཆར་དུ་འབབ་ཕྱིར་རོ། །ཡིད་ཀྱི་རྨོངས་པ་སེལ་བའི་དཔལ། །འདི་འདྲ་སྔར་བྱུང་ཉི་མ་ལའང་། །མིན་སྙམ་འཇམ་དབྱངས་དགྱེས་པའི་ཞལ། །སྣང་བ་མཆོག་གི་འཛུམ་དམུལ་ཏེ། །དེ་ལྟར་ཚད་མ་མདོ་དང་སྡེ་བདུན་མ་ལུས་པའི་དོན་གཏན་ལ་ཕབ་པའི་བསྟན་བཅོས། རྗེ་བཙུན་འཇམ་པའི་དབྱངས་ཀྱི་དགོངས་རྒྱན་ཞེས་བྱ་བ་དཔལ་འབྲུག་པ་པད་མ་དཀར་པོ་ཕྱོགས་ཐམས་ཅད་ལས་རྣམ་པར་རྒྱལ་བའི་སྡེས་ཕོ་བྲང་རྩེ་ཆེན་དུ་ཆོ་འཕྲུལ་ཆེན་པོའི་དུས་ཀྱི་ཟླ་བའི་ཉིན་ཞག་བཅུ་གཉིས་ལ་གྲུབ་པར་སྦྱར་བའི་ཡི་གེ་པ་ནི་བསྟན་པ་རྒྱལ་མཚན་གྱིས་བགྱིས་པ་བསྟན་པ་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག། །།མངྒ་ལཾ།། །།