LONGCHENPA-PECIN-25-RA-012: Difference between revisions

From Rangjung Yeshe Wiki Texts
LONGCHENPA-PECIN-25-RA-012
Jump to navigation Jump to search
Longchenpa Project: generated page (21 November 2026)
 
Longchenpa Project: Theg mchog mdzod e-text (converted from a legacy font encoding); vowel signs kept with their letter at note boundaries (22 November 2026)
 
(One intermediate revision by the same user not shown)
Line 26: Line 26:
}}
}}
= Tibetan Text =
= Tibetan Text =
<div class="TibUni18" lang="bo" style="line-height:2.1;">
<div class="TibetanMachineUni16 lcp-etext" lang="bo">
༄༅། །འཕགས་པ་འཇམ་དཔལ་གྱི་སྒྲུབ་ཐབས་ཡིད་བཞིན་ནོར་བུ་ཞེས་བྱ་བ་བཞུགས་སོ། །
༄༅། །འཕགས་པ་འཇམ་དཔལ་གྱི་སྒྲུབ་ཐབས་ཡིད་བཞིན་ནོར་བུ་ཞེས་བྱ་བ་བཞུགས་སོ། །


« འཕགས་པ་འཇམ་དཔལ་གྱི་སྒྲུབ་ཐབས་ཡིད་བཞིན་ནོར་བུ་ཞེས་བྱ་བ། བླ་མ་དང་འཇམ་པའི་དབྱངས་ལ་ཕྱག་འཚལ་ལོ། །ཤིན་ཏུ་རྣམ་དག་པདྨོའི་མདངས་འདྲ་ཀུན་མཁྱེན་སྦྲང་རྩིའི་སྙིང་པོ་ཅན། །གཞན་ཕན་ཐུགས་རྗེའི་འདབ་སྟོང་རབ་རྒྱས་གྲགས་པའི་དྲི་བསུང་མ་སྨད་པ། །འཇམ་པའི་དབྱངས་ཞེས་ཕྱོགས་བཅུར་རབ་གྲགས་སངས་རྒྱས་ཀུན་གྱིས་བསྔགས་པའི་མགོན། ། བློ་གྲོས་བདེ་འབྱུང་གཙུག་གིས་མཛེས་བྱས་ངག་གི་དབངཔོའི་ཞབས་ལ་ འདུད། །སྔོན་ཆད་བླ་མ་རྣམས་ཀྱི་སྙན་ནས་སྙན། །གཅིག་ནས་གཅིག་བརྒྱུད་ཡི་གེར་མ་བཀོད་ཅིང༌། །ཀུན་ལ་མ་གྲགས་ཟབ་མོའི་གནད་རྣམས་དང༌། ། གཞུང་དུ་བཀོད་པ་རྣམས་ནས་འདིར་བརྗོད་བྱ། །ལོ་རྒྱུས་རྗེས་གནང་སྒྲུབ་པ་དང༌། །སྤོགས་དང་ཁ་བསྒྱུར་སྦྱིན་སྲེག་དང༌། །ལས་ཚོགས་དང་ནི་རྣམ་བདུན་གྱིས། །འཇམ་དཔལ་སྒྲུབ་པའི་རིམ་པ་བཤད། ། དེ་ལ་ཡིད་ཆེས་པའི་ཡན་ལག་ཏུ་བླ་མ་བརྒྱུད་བའི་ལོ་རྒྱུས་ནི། སངས་རྒྱས་མྱ་ངན་ལས་འདས་ནས་ལོ་ཉིས་སྟོང་ལྡ་བརྒྱ་ན། མ་ག་དྷའི་གྲོང་ཁྱེར་དང་ཉེ་བའི་གཙུག་ལག་ཁང་ཞིག་ན་རྒན་པོ་ལོ་དགུ་བཅུ་རྩ་དགུ་་ལོན་པ་ཞིག་ཕྱི་མ་ལ་བག་ཆགས་བཞག་པའི་ཕྱིར་པཎྜི་ཏ་སུ་མ་ཏི་ཀཱ»ི«རྟི་ལ་ཡི་གེ་སློབ་ཅིང་འདུག་གོ །དེའི་ཚེ་ཡུལ་དེ་རྒྱལ་པོ་འཁོར་དང་བཅས་པ་དེས་བར་འོངས་བས་དེ་མཐོང་ནས་རྒན་པོ་དེ་ལ་སྨྲས་པ། ཀྱེ་རྒན་པོ་ཁྱོད་ནི་བྱིས་པའི་རང་བཞིན་དུ་གྱུར་ཏམ། འདི་ལྟར་གཟོད་ཡི་གེ་དག་ལ་སློབ་པ་བརྩོན། ཅེས་མ་རངས་བཞིན་དུ་སྨྲ་བ་ཐོས་ནས། དེ་ཡིད་རབ་ཏུ་མི་དགའ་བས་ད་ནི་ཡི་གེ་སློབ་པ་བཏང་སྟེ་སྒྲུབ་པ་ཞིག་བྱའོ་སྙམ་ནས། སློབ་དཔོན་ལ་བསླབ་མི་དགོས་པར་རིག་པའི་གནས་ལོབ་པའི་གདམས་ངག་ཡོད་དམ་ཞུས་པས། སློབ་དཔོན་གྱིས་འཕགས་པ་འཇམ་དཔལ་གྱི་སྒྲུབ་ཐབས་འདི་གནང་ནས། ཞག་གསུམ་བསྒྲུབས་པའི་ཕྱི་མ་ལ་རལ་གྲི་དྲངས་ནས་འཕགས་པ་འཇམ་དཔལ་དོ་ནུབ་ཞལ་མི་སྟོན་ན་རང་ཉིད་ཀྱི་རྐེ་བཅད་ལ་འཆི་བར་བྱའོ་ཞེས་དམ་བཅས་ཏེ་བསྒྲུབས་པས། ནམ་ལངས་སུ་འཇམ་པའི་དབྱངས་ཞལ་མངོན་སུམ་དུ་བསྟན་ནས་བྱིན་གྱིས་བརླབས་པས་རྒན་པོ་དེ་ཉིད་བྱིས་པ་ལོ་བརྒྱད་ལོན་པ་ལྟར་གྱུར་ནས་སྡེ་སྣོད་གསུམ་དང་རིག་པའི་གནས་ཐམས་ཅད་ལ་མཁས་པར་གྱུར་ཏེ། སློབ་དཔོན་ཆེན་པོ་མཉྫུ་ཤྲཱི་ཞེས་བྱ་བར་གྲགས་སོ། །དེས་རྗེ་བཙུན་དམ་པ་རྒྱ་གར་ལ་གནང༌། དེ་ནས་རིམ་པ་བཞིན་དུ་དམ་པ་ཀུན་དགའ། སྨོན་ལམ་འབར། ཤེས་རབ་སེང་གེར་ཆོས་ཀྱི་བླ་མ། ཀུ་མཱ་རཀཱིརྟི། ཀུ་མཱ་ར་བློ་གྲོས། བླ་བྲང་པ་ཆོས་དཔལ་རྒྱལ་མཚན། སྙན་ངག་མཁན་ངག་གི་དབང་པོ། རི་ཁྲོད་སེང་གེའོ། །ལོ་རྒྱུས་ཀྱི་ལེའུ་སྟེ་དང་པོའོ།། །། དེ་ལྟར་བླ་མ་དམ་པ་རྣམས་ལས་བརྒྱུད་པའི་རྗེ་བཙུན་འཇམ་པའི་དབྱངས་སྒྲུབ་པ་ལ་དང་པོ་རྗེས་སུ་གནང་བ་ཐོབ་དགོས་པས་དེའི་རིམ་པ་ནི། གནས་དབེན་པར་འཇམ་དཔལ་སྨྲ་བའི་སེང་གེའི་རྟེན་མཆོད་པ་དང་བཅས་པ་བཤམས་ལ། སློབ་དཔོན་ཉིད་འཇམ་དཔལ་དུ་མོས་པའི་ཕྲག་པ་གཡོན་དུ་དབྱངས་ཅན་མ། སྟེང་གི་ནམ་མཁའ་ལ་བླ་མ་དང་སངས་རྒྱས་དང་བྱང་ཆུབ་སེམས་དཔའི་ཚོགས་བཞུགས་པར་བསམས་ལ། ཡན་ལག་བདུན་པ་བྱས་ཏེ་གཏོར་མ་འབུལ། དེ་ནས་སློབ་མ་རྣམས་ཀྱིས་སློབ་དཔོན་ཉིད་འཇམ་དཔལ་དངོས་སུ་བསམ་པ་ལ་སངས་རྒྱས་དང་བྱང་ཆུབ་སེམས་དཔས་བསྐོར་བར་མོས་པ་བྱས་ཏེ། ཡན་ལག་བདུན་པ་དང༌། ཁྱད་པར་དུ་ལུས་དབུལ་བའི་མཆོད་པ་ཕུལ་ནས། ཆོས་ཐམས་ཅད་སྟོང་པའི་ངང་ལས་སློབ་མ་རྣམས་འཇམ་དཔལ་དུ་བསྐྱེད་པའི་ཕྲག་པར་དབྱངས་ཅན་མ། ཐུགས་ཀར་པདྨ་དང་ཟླ་བའི་སྟེང་ན་ཙ་ཀྲ་དམར་པོ་རྩིབས་བཞི་པའི་ལྟེ་བ་ལ་རལ་གྲི་སོར་བཞིའི་ཆང་ཟུང་ལ་དྷཱིཿདང་རྩེ་མོ་ལ་ཧྲཱིཿས་མཚན་པའི་མཐའ་སྐོར་དུ་རྩ་བའི་སྔགས་ཀྱིས་བསྐོར་བ་ལ་སོགས་པ་སྒྲུབ་ཐབས་བཞིན་བསམས་ལ་ཡེ་ཤེས་པ་བཅུག་སྟེ། སློབ་དཔོན་གྱི་ཕྲག་པའི་དབྱངས་ཅན་མ་དང༌། ཐུགས་ཀའི་ཙཀྲ་རལ་གྲི་དང་བཅས་པ་ལ་འོད་ཟེར་བྱུང་བ་སློབ་མའི་ཕྲག་པའི་དབྱངས་ཅན་མ་དང་སྙིང་གའི་འཁོར་ལོ་རལ་གྲི་དང་བཅས་པ་ལ་ཐིམ་པར་བསམ་པའི་འོད་ཀྱིས་བསྐུལ་བས། མདུན་གྱི་ནམ་མཁར་སངས་རྒྱས་དང་བྱང་ཆུབ་སེམས་དཔའི་ཐུགས་ཀ་ནས་ཀྱང་འོད་བྱུང་ནས་སློབ་མ་ལ་ཐིམ་པར་བསམ་ཞིང༌། སློབ་དཔོན་གྱི་ཕྲེང་བ་བཟུང་སྟེ་སྔགས་ཀྱི་རྗེས་ཟློས་ལན་གསུམ་བྱས་པས། སློབ་མ་དག་འཇམ་དཔལ་དངོས་སུ་གྱུར་པའི་འོད་ཟེར་གྱིས་ཐམས་ཅད་ཀྱི་བློ་ཡི་མུན་པ་ཐམས་ཅད་བསལ། འཕགས་པ་མཆོད། ཚུལ་འདུས་ཤེས་རབ་དང་སྤོབས་པའི་དངོས་གྲུབ་ཀྱི་བདུད་རྩིའི་ཆུས་ལུས་ཐམས་ཅད་གང་ཐུགས་ཀའི་འཁོར་ལོར་དམིགས་པ་འཛིན་དུ་བཅུག་ལ་དར་ཅིག་མཉམ་པར་བཞག་ལ། དགེ་བ་བསྔོ། བཀྲ་ཤིས་བརྗོད། མེ་ཏོག་གཏོར་རོ། །རྗེས་གནང་གི་ལེའུ་སྟེ་གཉིས་པའོ།། །། དེ་ལྟར་རྗེས་སུ་གནང་བ་ཐོབ་ནས་སྒྲུབ་པ་ལ་འཇུག་པར་བྱ་སྟེ། དེ་ཡང་སྔོན་དུ་རྫས་བསག་ཅིང་སྐྱབས་འགྲོ་སེམས་བསྐྱེད་བྱ་བ་དང༌། དངོས་གཞི་ལྷ་བསྒོམ་ཞིང་སྔགས་བཟླ་བ། རྗེས་རྫོགས་རིམ་བསྒོམ་ཞི་བསྔོ་བ་བྱ་བ་དང་གསུམ་ལས། དང་པོ་ལ་གཉིས་ཏེ། རྫས་བསག་ཅིང་རྟེན་དགྲམ་པ་དང༌། སྐྱབས་འགྲོ་སེམས་བསྐྱེད་བྱ་བའོ། །དང་པོ་ནི། སྤང་རྒྱན་དཀར་པོ། གླ་རྩི། མཚལ་དཀར། ཡུང་བ། ཙན་དན་དམར་པོ། ཨ་ག་རུ་ནག་པོ། སྤང་སྤོས། དབང་པོ་ལག་པ་སྡེར་མོ་ལྔ་པ། ཤུ་དག་དཀར་པོ། ཨ་རུ་ཤ་ཆེན། ཤིང་མངར། རྒྱ་སྐྱེགས་རྣམས་ཞིབ་པར་བཏགས་ལ། སྦྲང་དཀར་དང་བ་དམར་མོའི་འོ་མས་རིལ་བུ་བརྒྱ་རྩ་བརྒྱད་བྱས་ལ། དར་རམ་ཤོག་བུ་སེར་པོ་ལ་པདྨ་དམར་པོ་འདབ་བརྒྱད་མུ་ཁྱུད་རིམ་པ་གསུམ་དང་ལྡན་པའི་ལྟེ་བར་རལ་གྲིའི་ཆང་ཟུང་ལ་ཧྲཱིཿརྩེ་མོར་དྷྲཱིཿ འདབ་མ་རྣམས་ཀྱི་དབུས་སུ་རྩ་བའི་སྔགས། རྩེ་མོ་ལ་ཧྲཱིཿ མུ་ཁྱུད་ནང་མ་ལ་ཨཱ་ལི། བར་མ་ལ་ཀཱ་ལི། ཕྱི་མ་རྟེན་འབྲེལ་སྙིང་པོ་རྣམས་སྤེལ་ཚིག་དང་བཅས་པ་བྲིས་པར་བླུགས་ལ། དར་རམ་ཤོག་བུ་ལ་འཁོར་ལོ་རྩིབས་ཆེན་བརྒྱད་མུ་ཁྱུད་གསུམ་དང་ལྡན་པའི་ལྟེ་བར་རལ་གྲིའི་ཆང་ཟུང་ལ་དྷྲཱིཿ རྩེ་མོ་ལ་ཧྲཱིཿ རྩིབས་རྣམས་ཀྱི་དབུས་སུ་་རྩ་སྔགས། རྩེ་མོར་དྷྲཱིཿ མུ་ཁྱུད་གསུམ་པ་ལ་ཨཱ་ལི། ཀཱ་ལི། རྟེན་འབྲེལ་སྙིང་པོ་རྣམས་སྤེལ་ཚིག་དང་བཅས་པ་བྲིས་པས་བཀབ་ལ། གནས་དབེན་པར་མཎྜལ་པདྨ་སེར་པོ་འདབ་བརྒྱད་ཀྱི་དབུས་སུ་མེ་ཏོག་བཀྲམ་པའི་དབུས་སུ་ལྷུ་བཟེད་དམ་རིན་པོ་ཆེའི་སྣོད་འབྲུས་བཀང་་བའི་ཁར་རིལ་བུ་འཁོར་ལོ་དང་བཅས་པ་བཞག །འཇམ་དབྱངས་ཀྱི་རྟེན་དགྲམ། མཆོད་པ་བཤམ། རྟེན་གྱི་མདུན་དུ་ལྷུ་བཟེད་འོང་བར་བྱ། དེ་ནི་རྟེན་བཤམ་པའོ། །འདིར་གཞུང་གཅིག་ནས་འཁོར་ལོ་བྲི་བ་ནི་འདི་ལྟར་བཞེད་དོ། །དར་རམ་རས་ལ་འཁོར་ལོ་རྩིབས་བཞི་པའི་ལྟེ་བར་རང་གི་སྤེལ་ཚིག །ཤར་གྱི་རྩིབས་ལ་ཧྲཱིཿ ལྷོར་སི། ནུབ་ཏུ་བཻ། བྱང་དུ་བྷཻ་རྣམས་བྲིས་པའི་དབུས་སུ་རིལ་བུ་བླུགས་ནས། ཡང་པདྨ་འདབ་བརྒྱད་མུ་ཁྱུད་གསུམ་པའི་ལྟེ་བར་རལ་གྲིའི་ཆང་ཟུང་ལ་དྷྲཱིཿ རྩེ་མོར་ཧྲཱིཿ བར་དུ་རྩ་སྔགས། པད་འདབ་བརྒྱད་ཀྱི་རྩེ་མོར་ཧྲཱིཿ རྩ་བར་དྷཱིཿ དབུས་སུ་རྩ་བའི་སྔགས། མུ་ཁྱུད་གསུམ་ལ། ཨཱ་ལི། ཀཱ་ལི། རྟེན་འབྲེལ་སྙིང་པོ་རྣམས་བྲིས་པས་སྟེང་ནས་དགབ། དེའི་སྟེང་དུ་དར་དམར་པོའི་གདུགས་ཕུབ་ལ་སྔ་མ་བཞིན་དུ་བྱ་གསུངས་སོ། །དེ་ལྟར་འཁོར་ལོ་གང་བྲིས་ཀྱང་སྟེང་འཁོར་གྱི་ཡིག་མགོ་ཕྱིར་བསྟན་ལ་གཡས་སྐོར་དུ་བྲི་ཞིང༌། འོག་འཁོར་གྱི་ཡིག་མགོ་ཕྱིར་བསྟན་ལ་གཡོན་སྐོར་དུ་བྲི་བའི་སྣག་ཚ་མཚལ་རྒྱ་སྐྱིགས་གི་ཝཾ་གསུམ་ལ་བྱའོ། ། འཁོར་ལོའི་མན་ངག་གོ །དེ་ནས་ཟླ་བ་དང་ཉི་མ་ཡར་འཕེལ་གྱི་ཚེས་གཅིག་གམ་བརྒྱད་དམ་བཅོ་ལྔ་ནས་སྒྲུབ་པའི་མགོ་བརྩམ་པར་བྱ་སྟེ། ཐོ་རངས་སྔ་བར་མལ་ནས་ལངས་ཏེ་ནམ་མཁའི་དབྱིངས་སུ་དབྱངས་ཅན་མ་ལ་བཀྲ་ཤིས་ཀྱི་ལྷ་མོ་དཔག་ཏུ་མེད་པས་བསྐོར་བ་རྣམས་ཀྱིས་རྡོ་རྗེའི་གླུ་དང་བཀྲ་ཤིས་པའི་ཚིགས་སུ་བཅད་པ་དང༌། ཨོཾ་ཧྲཱིཿདྷཱིཿལ་སོགས་པའི་རིག་པ་བརྗོད་པས་བསྐུལ་བར་བསམས་ལ་ལངས་ཏེ། ཁྲུས་དང་གཙང་སྦྲ་སྔོན་དུ་སོང་ནས། སྟན་བདེ་བ་ལ་ཤར་དུ་ཕྱོགས་པས་འདུག་སྟེ། སྐྱབས་སུ་འགྲོ་བ། ཚད་མེད་པ་བཞི་སྒོམ་པ་དང༌། བྱང་ཆུབ་ཏུ་སེམས་བསྐྱེད་ནས། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་གིས་ཆོས་ཐམས་ཅད་སྟོང་པ་ཉིད་དུ་བསམ། སྟོང་པའི་ངང་ལས་བྷྲུཾ་ཞེས་བརྗོད་པས་ཕྱི་སྣོད་ཀྱི་འཇིག་རྟེན་ཐམས་ཅད་ཞིང་ཁམས་རྣམ་པར་དག་པ་བདེ་བ་ཅན་བཞིན་དུ་གྱུར་པའི་དབུས་ཀྱི་ནམ་མཁའ་ལ། སྃ་ལས་སེང་གེ་སྔོན་པོ་ལངས་པའི་སྟེང་དུ། པྃ་ལས་སྣ་ཚོགས་པདྨའི་སྟེང་དུ་ཨ་ལས་ཟླ་བའི་དཀྱིལ་འཁོར། །དེའི་སྟེང་དུ་རྃ་ལས་ཉི་མའི་སྟེང་དུ་རང་གི་སེམས་ཉིད་ཡི་གེ་དྷཱིཿདམར་པོ་ཚེག་དྲག་དང་བཅས་པ་ལས་འོད་ཟེར་དམར་པོ་ཕྱོགས་བཅུར་འཕྲོས་པས་འཕགས་པ་མཆོད། སེམས་ཅན་གྱི་དོན་བྱས། སླར་འདུས་དྷཱིཿལ་ཐིམ་པས་རང་ཉིད་འཇམ་དཔལ་སྨྲ་བའི་སེང་གེ་སྐུ་མདོག་དམར་པོ་ཞལ་གཅིག་ཕྱག་གཉིས་ཐུགས་ཀར་ཆོས་འཆད་ཀྱི་ཕྱག་རྒྱའི་བར་ནས་ཨུཏྤ་ལའི་རྩ་བ་འཛིན་པས་སྙན་དྲུང་དུ་འདབ་མ་ཁ་བྱེ་བའི་གཡས་གཡོན་གྱི་སྟེང་དུ་རལ་གྲི་དང་པུ་སྟི་བསྣམས་པ། ཞབས་གཉིས་སྐྱིལ་ཀྲུང་ཕྱེད་པའམ་རྡོ་རྗེ་སྐྱིལ་ཀྲུང་གིས་བཞུགས་པའི་སྐུ་སྨད་ལ་དར་སྣ་ཚོགས་ཀྱི་ན་བཟའ་དང་སྐུ་སྟོད་ལ་ལྷའི་གོས་པཉྩ་ལི་ཀས་གཡོགས་ཤིང༌། ཞལ་འཛུམ་པའི་ཐོར་ཚུགས་ཀྱི་རྩེ་མོར་ནོར་བུའི་རིན་པོ་ཆེས་བརྒྱན་པ། པདྨ་དང་ནོར་བུ་དང་ཨུཏྤ་ལའི་ཆུན་པོ་སྤེལ་བའི་ཐོད་ཀྱི་བར་ན་རིན་པོ་ཆེ་དང་ཟུར་ཕུད་ལྔ་རབ་ཏུ་གསལ་བའི་སྙན་གོང་ཨུཏྤལ་ལ་ཁ་བྱེ་ཞིང༌། སྙན་ཤལ་ནོར་བུ་འཕྱང་བས་མཛེས་པ། རིན་པོ་ཆེ་དང་མེ་ཏོག་སྣ་ཚོགས་པའི་དབུ་རྒྱན། མགུལ་རྒྱན། སྙན་ཆ། དོ་ཤལ། གདུ་བུའི་སིལ་ཁྲོལ་སྣ་ཚོགས་པས་བརྒྱན་པ། གཞོན་ནུ་ལོ་བརྒྱད་ལོན་པའི་ངང་ཚུལ་ཅན་འོད་ཟེར་དམར་པོར་རབ་ཏུ་འཕྲོ་ཞིང་ཟླ་བའི་རྒྱལ་ཡོལ་ཅན་ཤིན་ཏུ་མཛེས་པ་གཅིག་ཏུ་བསམ་པའི་ཐུགས་ཀར་པདྨ་དང་ཟླ་བའི་དབུས་སུ་བྷྲུྃ་ཡོངས་སུ་གྱུར་པ་ལས་འཁོར་ལོ་རྩིབས་བཞི་བའི་དབུས་སུ་རལ་གྲི་སོར་བཞི་པའི་ཆད་ཟུང་ལ་དྷཱིཿ རྩེ་མོ་ལ་ཧྲཱིཿ བར་གྱི་སྦལ་ལ་མཱུྃ། རྩིབས་ཀྱི་དབུས་སུ་རྩ་བའི་སྔགས་རྣམས་མར་མེའི་ཕྲེང་བ་བསྒྲིགས་པ་ལྟར་འོད་གསལ་བས་ཡིད་ཀྱི་མུན་པ་མ་ལུས་དག་པར་བྱེད་པར་བསམ། འདིར་བླ་མ་ཁ་ཅིག །རལ་གྲི་ཆང་ཟུང་གི་དྷཱིཿདང་རྩེ་མོའི་ཧྲཱིཿའི་བར་གྱི་སྦལ་རྩ་སྔགས། རྩིབས་ཀྱི་རྩེ་མོར་ཧྲཱིཿ རྩ་བར་ཧྲཱིཿ བར་དུ་རྩ་སྔགས་འགོད་པའང་བཞེད་ལ། ཁ་ཅིག་རལ་་གྲི་ལ་ས་བོན་གཉིས་བཀོད་ནས། རྩིབས་ལ་དྷཱིཿརེ་རེ་སྒོམ་པ་ཡང་ཕྱག་བཞེས་སུུ་མཛད་དོ། ། གང་ལྟར་སྒོམ་ཡང་དམིགས་པ་མ་གསལ་བར་དུ་གཅེས་སོ། །དེ་ནས་ཐུགས་ཀའི་རལ་གྲི་ལས་འོད་འཕྲོས་པས། །མདུན་གྱི་ལྷུང་བཟེད་ཀྱི་ནང་དུ་པདྨ་དང་ཟླ་བའི་སྟེང་དུ་རིལ་བུ་དེ་རྣམས་འོད་དུ་ཞུ་བ་ལས་ཧྲཱིཿསྔོན་པོ་འོད་འཕྲོ་བ་གཅིག་ཏུ་གྱུར་པའི་འོད་ཀྱིས་དོན་གཉིས་བྱས། ཚུར་འདུས་ཡོངས་སུ་གྱུར་པ་ལས་ལྷ་མོ་དབྱངས་ཅན་མ་སྔོན་མོ་འཛུམ་ཁྲོ་རབ་ཏུ་བརྗིད་པ། ཞལ་གཅིག་ཕྱག་གཉིས་ཕྱག་མཚན་དང་བཞུགས་ཚུལ་ཡབ་དང་མཐུན་པ། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། འོད་ཟེར་སྔོན་པོ་འཕྲོ་ཞིང་གཞོན་ནུ་མ་ལོ་བརྒྱད་ལོན་པ་ལྟ་བུའི་ཐུགས་ཀར། པདྨ་དང་ཟླ་བའི་སྟེང་དུ་པདྨ་འདབ་མ་བཞི་དང་ལྡན་པའི་དབུས་སུ་རལ་གྲིའི་ཆང་ཟུང་ལ་ཧྲཱིཿདང་རྩེ་མོར་དྷྲཱིཿ བར་གྱི་སྦལ་ལ་མཱུྃཿ འདབ་མ་རྣམས་ལ་རྩ་བའི་སྔགས་རྣམས་གཡོན་་སྐོར་དུ་ཡབ་ཀྱི་འཁོར་ལོ་པས་སོར་བཅུ་ཆས་དམའ་བ་ཁ་སྦྱར་གྱི་ཚོད་དུ་ཡོད་པའི་དཔངས་མཐོ་དམན་དུ་བསམ། འདིར་ཡང་སྔ་མ་བཞིན་བླ་མ་དེ་དག་སྔགས་ཀྱི་འགྲེས་ཡབ་ཀྱིས་མཚོན་པར་བཞེད་དོ། །དེ་ལྟར་བསྒོམས་པའི་ཐུགས་ཀ་ནས་ཡིག་འབྲུ་ལས་འཕྲོས་པའི་འོད་ཟེར་གྱིས་རང་བཞིན་གྱི་གནས་དང་རི་བོའི་རྩེ་ལྔ་ནས་ཡབ་ཡུམ་ཇི་ལྟར་བསྒོམ་པ་དེ་འདྲ་བའི་ཡེ་ཤེས་པ་གཉིས་པ་སངས་རྒྱས་དང་བྱང་ཆུབ་སེམས་དཔས་བསྐོར་བ་སྤྱན་དྲངས་ལ་མཆོད་དོ། །ཡབ་ལ་ཡབ་ཡུམ་ལ་ཡུམ་སངས་རྒྱས་དང་བྱང་ཆུབ་སེམས་དཔའི་ཚོགས་དང་བཅས་པ་གཉིས་སུ་མེད་པར་ཐིམ་པར་བསམ་ལ། ཐུགས་ཀའི་འཁོར་ལོ་ལས་འོད་བྱུང་བས་ལུས་ངག་ཡིད་གསུམ་གྱི་ནད་གདོན་སྡིག་སྒྲིབ་མི་ཤེས་པའི་མུན་པ་ཐམས་ཅད་བསལ་ནས་ཡེ་ཤེས་ཀྱི་སྣང་བ་རྒྱས་པ་བསམས་ལ། རྩེ་གཅིག་ཏུ་མ་ཡེངས་པས་ཡིག་འབྲུ་རལ་གྲི་དང་བཅས་པ་ལ་སེམས་མཉམ་བར་བཞག་གོ ། འདིའི་དུས་ན་ལུས་དྲང་པོར་འདུག་ལ་སྟེང་རླུང་མནན། འོག་རླུ་བསྡམ། མིག་སྣ་རྩེར་གཏད། སེམས་ཡིག་འབྲུ་ལ་བཟུང་ལ། མིག་མ་འགུལ་བས་རླུང་དལ་བུས་ཐུབ་ཐང་དུ་ནང་དུ་བཟུང་བ་དང༌། ཕྱིར་འཕང་བ་དང་དབང་དུ་གནས་པར་བྱ་བ་ནི་མན་ངག་དམ་པའོ། །དེ་ལྟར་སྒོམ་པས་སྐྱོན་བཟླས་པ་དང་སྤྲོ་བསྡུའི་རྣལ་འབྱོར་ལ་སེམས་བཟུང་བ་ནི། དེ་ལྟར་འཇམ་དཔལ་ཡབ་ཡུམ་ལ་སངས་རྒྱས་དང་བྱང་ཆུབ་སེམས་དཔའ་ས་གཞི་དང་བར་སྣང་གང་བས་བསྐོར་བར་བསམ་པ་རྣམས་ཀྱི་སྐུའི་འོད་ཀྱིས་རང་གཞན་གྱི་མི་ཤེས་པའི་མུན་པ་ཐམས་ཅད་བསལ། ཡེ་ཤེས་སྣང་བ་ཆེན་པོ་རྒྱས་བར་བསམ་ཞིང༌། འཇམ་དཔལ་ཐུགས་ཀའི་དྷཱིཿལས་སྔགས་ཀྱི་ཕྲེང་བ་རྣམས་མར་མེ་ལས་མར་མེ་ཆད་པ་ལྟར་འོད་ཀྱི་ཚུལ་དུ་ཡིག་འབྲུ་རྣམས་སྣ་བུག་གཡས་སུ་ཐོན། ཡུམ་གྱི་གཡོན་དུ་ཞུགས་ཐུགས་ཀའི་ཧྲཱིཿལས་གྲོལ་བའི་ཚུལ་དུ་སྣ་བུག་གཡས་ནས་ཐོན། འཇམ་དཔལ་གྱི་གཡོན་དུ་ཞུགས་ཏེ་འགལ་མེ་ལྟར་འཁོར་བ་དང་ མཉམ་བདག་གི་ཐུགས་ཀའི་སྔགས་ལས་འོད་ཟེར་ཕར་བྱུང་བ་དང་ལྷ་མོའི་ ཐུགས་ཀ་ནས་ཚུར་བྱུང་བ་གཉིས་ལྕགས་ཀྱུ་བཞིན་དུ་སྦྲིལ་ནས་འཁོར་བར་བསམ་པའི་སྔགས་ཕྲེང་དང་འོད་ཟེར་ཕྲེང་བར་འཁོར་བའི་ཕྲེང་བ་ལས་འོད་ཟེར་དཔག་ཏུ་མེད་པ་ཕྱིར་འཕྲོས་པའི་འོད་ཀྱིས་སངས་རྒྱས་དང་བྱང་ཆུབ་སེམས་དཔའ་དང༌། ཉི་མ་དང༌། ཟླ་བ་དང༌། གཟའ་དང༌།སྐར་མ་དང༌། རྩི་ཤི་ནགས་ཚལ་ལ་སོགས་པའི་འོད་གཟི་བརྗིད་ཚེ་བསོད་ནམས་ཤེས་རབ་ཐམས་ཅད་ཚུར་བསྡུ་ཐུགས་ཀའི་རལ་གྲི་སྔགས་དང་བཅས་པ་ལ་ཐིམ་པས་བདག་ཉིད་ཤེས་རབ་ཕུན་སུམ་ཚོགས་པར་གྱུར། ཡང་ཕྱིར་འཕྲོས་པའི་འོད་ཀྱིས་སྣོད་ཀྱི་འཇིག་རྟེན་ལ་ཕོབ །རིན་པོ་ཆེའི་གཞལ་ཡས་ཁང་དང་ཞིང་ཁམས་དག་པར་བསམ། ཡང་འོད་འཕྲོས་བཅུད་ཀྱི་སེམས་ཅན་ལ་ཕོག་པས་སེམས་ཅན་ཐམས་ཅད་འཇམ་དཔལ་གྱི་སྐུ་དང༌། སྒྲ་སྐད་ཐམས་ཅད་སྔགས་ཀྱི་རྒྱལ་པོ་ཉི་ཤུ་རྩ་གཅིག་པོའི་རང་སྒྲར་བསམས་ལ། ཡིད་འོང་འཕྲོས་ནུས་པ་ཐམས་ཅད་བཀུག །རང་གི་སྤྱི་བོར་ཐིམ་ཞིང་ཡེ་ཤེས་ཀྱི་སྣང་བ་རྒྱས་པར་བསམས་ལ། རྩ་བའི་སྔགས་ཅི་འགྲུབ་བཟླས་པ་བྱའོ། །དེ་ནས་རྫོགས་པའི་རིམ་པ་ལ་སེམས་བཟུང་བ་ལ། མཚན་མ་དང་བཅས་པ་དང༌། མཚན་མ་མེད་པ་གཉིས་ལས། མཚན་མ་དང་བཅས་པ་ནི། དེའི་རྗེས་ལ་མཚན་མོ་ཉལ་བའམ། འཕྲོ་གཅོད་པའི་ཚེ་གང་རུང་གི་ངང་ལ་བཞག་པར་གསུངས་ཀྱང་ཕྱག་ལེན་ལ་འདི་ལྟར་མཛད་དོ། །དེ་ཡང་སྔ་དྲོ་དང་ཕྱི་དྲོ་གུང་གི་ཐུན་རྣམས་ལ་བསྐྱེད་རིམ་བཟླས་བརྗོད་དང་བཅས་པ་ཟིན་པའི་རྗེས་ལ། རང་གི་ལྟེ་བའི་དབུས་སུ་ཟླ་བའི་དཀྱིལ་འཁོར་གྱི་སྟེང་དུ་ཐིག་ལེ་དམར་པོ་མར་མེ་འབར་བ་ལྟ་བུ་ཞིག་བསམ་པའི་འོད་ཀྱིས་སྤྱི་གཙུག་གི་ཧྃ་དཀར་པོ་མགོ་ཐུར་དུ་ལྟ་བ་ལ་ཕོག་པས་བདུད་རྩིའི་རྒྱུན་བབས་ལྟེ་བའི་མེ་ལ་ཕོག་པས་ཐིག་ལེ་དེ་ཇེ་གསལ་དུ་གྱུར་པ་ནི། དཔེར་ན་མར་མེ་ཟད་སྣུམ་ཐིགས་བབས་པ་བཞིན་གྱུར་བས་ལུས་ངག་ཡིད་གསུམ་གྱི་མུན་པ་ཐམས་ཅད་བསལ། ཡེ་ཤེས་ཀྱི་བདུད་རྩིས་ཁེངས་པར་བསམས་ལ། དེ་ནས་ཡང་རང་གི་སྙིང་གའི་འཁོར་ལོ་འོད་དུ་གྱུར་པ་སྙིང་གི་ཁོང་སེང་དུ་མར་མེ་འབར་བ་ལྟ་བུའི་འོད་ཀྱིས་དབུས་དང་ཕྱོགས་མཚམས་བརྒྱད་དུ་བུག་པ་གཏོད་པ་ལས་འོད་འཕྲོས་པས་སྤྱི་པའི་ཧྃ་ལ་ཕོག་བས་བདུད་རྩིའི་རྒྱུན་བབས། བུག་པ་དགུ་ནས་མར་བྱུང་བས་སྙིང་གི་ནང་ཐམས་ཅད་ཁེངས་པར་བསམས་ལ། བདེ་གསལ་མི་རྟོག་པའི་ངང་ལ་བཞག་གོ །གཉིས་པ་ནི། སྲོད་ཀྱི་ཐུན་གྱི་རྗེས་ལ། ཐུགས་ཀའི་རལ་རིའི་དྷཱིཿལས་འོད་འཕྲོས་པས་ཕྱི་སྣོད་ཀྱི་འཇིག་རྟེན་ལ་ཕོག་འོད་དུ་ཞུ་ནང་བཅུད་ཀྱི་སེམས་ཅན་ལ་ཐིམ། དེ་ཡང་འོད་དུ་ཞུ་ནས་མདུན་གྱི་དབྱངས་ཅན་མར་ཐིམ། དེ་ཡང་འོད་དུ་ཞུ་ནས་འཇམ་དཔལ་གྱི་ཐུགས་ཀར་ཐིམ། དེ་ཡང་རིམ་གྱིས་སྐུ་སྟོད་སྨད་ཐུགས་ཀའི་འཁོར་ལོ། དེ་རལ་རི། དེ་ཧྲཱིཿ དེ་དྷཱིཿ དྷཱིཿ འོད་དུ་ཞུ་ནས་ཐིག་ལེ་དམར་པོ་ཅིག་ཏུ་གྱུར་པ་ལ་དལ་ཅིག་སེམས་གཏད། དེ་ནས་ཐིག་ལེ་ལས་ཐིག་ལེ་སྔོན་པོ་གཅིག་ཆད་པས་གཉིས་སུ་གྱུར་པ་ལ་སེམས་གཏད། དེ་ནས་དེ་གཉིས་ཅུང་ཟད་འགུལ་བར་བསམས་ལ་རྩ་བའི་སྔགས་བརྗོད་མ་ཐག་ཐིག་ལེ་དེ་གཉིས་རྡོ་འཕངས་པ་ལྟར་ནམ་མཁར་ལར་ཐལ་མར་ཐལ་ཕར་ཐལ་ཚུར་ཐལ་སོང་ནས་ནམ་མཁའ་དང་སེམས་ཅན་གྱིས་གར་ཁྱབ་ཏུ་སོང་བར་བསམས་ལ། རྩ་བའི་སྔགས་ཅི་འགྲུབ་བརྗོད་ལ། ཉལ་བའི་དུས་སུ་ཐིག་ལེ་དེ་གཉིས་གཅིག་ཏུ་གྱུར། དེ་ཡང་འོད་དུ་ཞུ་ནས་ནམ་མཁའ་ལ་ཐིམ་པས་སྣང་བ་ཐམས་ཅད་དམར་ལམ་གྱིས་སོང་བར་བསམས་ལ་གང་དུ་ཡང་མི་རྟོག་པའི་ངང་ཕྱམ་གྱིས་ཉལ་ལོ། །བསྡུས་ནས་བཞག་པ་ནི། ཡབ་ཡུམ་གང་རུང་གི་ཐུགས་ཀའི་ས་བོན་ལ་དམིགས་ལ་རྩ་བའི་སྔགས་བཟླས་པས་ཆོས་ཐམས་ཅད་བརྗོད་དུ་མེད་པའི་ངང་དུ་ཕྱམ་གྱིས་གྱུར་པར་བསམས་ལ་ཉལ་ལོ། །དེ་དག་གི་མཐར་དགེ་བ་མི་དམིགས་པའི་ངང་ནས་བླ་ན་མེད་པའི་བྱང་ཆུབ་ཏུ་བསྡོའོ། །དེ་ལྟར་གྲངས་ཀྱིས་བསྙེན་པ་འབུལ་ཕྲག་བདུན། དུས་ཀྱི་བསྙེན་པ་ཞག་ཉི་ཤུ་རྩ་གཅིག ། མཚན་མའི་བསྙེན་པ་འགྲུབ་པའོ་རྟགས་མ་བྱུང་གི་བར་དུ་བྱའོ། །དེ་ལྟར་བྱས་པས་བསྙེན་པ་འགྲུབ་པའི་རྟགས་གསུམ་ལས། རབ་མངོན་སུམ་དུ་འོང་བ་ནི། ལྷུང་བཟེད་ཀྱི་རིལ་བུ་རྒྱལ་པོ་བཞིར་མཐོང་བ་དང༌། དབྱངས་ཅན་མར་མཐོང་བ་དང༌། ཉི་མ་ཟླ་བར་མཐོང་བ་དང༌། འོད་དང་དུ་བར་མཐོང་བའོ། །འགྲང་ལ་ཉམས་སྣང་དུ་དེ་དག་འབྱུང་བའོ། །ཐ་མ་ལ་རྨི་ལམ་དུ་འོད་ཆེན་པོ་དང༌། དུ་བ་དང༌། རྡ་དང༌། དུང་དང༌། རོལ་མོའི་སྒྲ་དང༌། མེ་ཏོག་འཛུགས་པ་དང༌། འབྲུ་བ་དང༌། ཞིང་རྨོ་བ་དང༌། སྣག་ཚ་འཐུང་བ་དང༌། གླུ་གར་བྱེད་བ་དང༌། ཡི་གེ་འབྲི་ཀློག་དང༌། ཉི་ཟླ་ཤར་བ་ལ་སོགས་པའོ། །དེ་དག་གང་བྱུང་ཡང་སྔར་བཤད་པའི་ཡོན་ཏན་དེ་དག་འབྱུང་ཞིང་གྲུབ་པའི་རྟགས་ཡིན་ནོ། །འདི་ལྟར་སྒྲུབ་པའི་ཚེ་རྫུན་དང༌། ཤ་ཆང་དང༌། སྒོག་ཙོང་དང༌། སྡོ་ངད་དང༌། འཁོན་དང༌། ཞེ་སྡང་དང༌། སྡིག་གྲོགས་དང༌། མྱ་ངན་དྲག་པོ་བྱེད་པའི་སར་འགྲོ་བ་དང་བྱེད་པ་དང༌། སྨྲེ་སྔགས་ལ་སོགས་པ་སེམས་ལ་གནོད་པ་སྟེ། ལུས་སེམས་མི་གཙང་བ་དེ་དག་སྤངས་ལ་གཙང་སྦྲ་ཁོ་ན་གལ་ཆེའོ། །སྒྲུབ་པའི་ལེའུ་སྟེག་གསུམ་པའོ།། །། དེ་ལྟར་དུ་བསྒྲུབས་ཀྱང་རྟགས་མ་བྱུང་ན། དོན་བཞི་པ་སྤོབས་པའི་ཆོ་ག་ནི། རང་ཉིད་དབྱངས་ཅན་མ་བསྒོམ་ཞིང་མདུན་དུ་འཇམ་དཔལ་བསྒོམས་ཏེ་རང་གི་སྣང་བུག་གཡོན་ནས་མདུན་གྱི་གཡས་སུ་ཞུགས་ཏེ་འཁོར་བར་བསམ་ཞིང༌། འོད་ཀྱི་ཕྲེང་བ་ཡང་སྔ་མ་ལས་ལྡོག་པའི་ཚུལ་དུ་བྱས་ལ། ཨོཾ་དྷཱིཿཧྲཱིཿམ་མེ་དཱི་པ་མཉྫུ་ཤྲཱི་མཱུྃ་ཧྲཱིཿཔྲཛྙཱ་བརྡྷ་ནི་དྷཱིཿཧྲཱིཿསྭཱཧཱ། ཞེས་བཟླས་ཏེ་སྤྲོ་བསྡུ་སྔ་མ་བཞིན་བྱས་ལ། འཁོར་ལོའི་ཡི་གེ་དང་རལ་གྲི་ཐུར་དུ་འཕྱང་བ་ལ་སེམས་བཟུང་བ་བཟླས་པས་སྔར་གྱི་རྟགས་མི་འབྱུང་མི་སྲིད་དོ། །རྟགས་བྱུང་བ་དང་སྔ་མ་བཞིན་བསྒོམ་མོ། །སྤོགས་པའི་ལེའུ་་སྟེ་བཞི་པའོ།། །། དེ་ལྟར་སྒོམ་ཞིང་སྒྲུབ་པའི་དུས་སུ་རང་ཇི་ལྟར་འདོད་པའི་དངོས་གྲུབ་འགྲུབ་པའི་ཁ་བསྒྱུར་ནི། བསྐྱེད་རྫོགས་རྣམས་སྒོམ་ཚུལ་སྔ་མ་བཞིན་བྱས་ཏེ། སྔགས་དང་འོད་ཟེར་གྱི་ཕྲེང་བའི་འོད་ཀྱིས་འཆད་བ་དང༌། རྩོད་པ་དང༌། རྩོམ་པ་ལ་སོགས་པའི་ཤེས་རབ་གང་འདོད་ཀྱང་དེའི་དངོས་གྲུབ་སངས་རྒྱས་དང་བྱང་ཆུབ་སེམས་དཔའ་ཉན་རང་ལ་སོགས་པའི་ཤེས་རབ་དེ་ཉིད་བསྡུས་ནས་རང་གི་ལུས་ཁེངས་ཏེ་གང་འདོད་པའི་ཤེས་རབ་དང་ལྡན་པར་བསམ། དེ་བཞིན་དུ་དབང་དུ་བྱ་བ་ཕ་རོལ་གྱི་སེམས་དང༌། ངག་བརྐུ་བ་དང་འཕྲོག་པ་ལ་སོགས་པ་འཆད་པར་འགྱུར་བ་དེ་དག་དེ་བཞིན་དུ་ཐོབ་པར་བསམས་ལ་བྱས་པས་དེ་ཁོ་ན་བཞིན་དུ་འགྲུབ་པའོ། །ཁ་སྒྱུར་གྱི་ལེའུ་སྟེ་ལྔ་པའོ།། །། དེ་ལྟར་ཇི་ལྟར་འདོད་པའི་དངོས་གྲུབ་ཀྱི་རྟགས་དང་ལྡན་པས་དེའི་སྤྱིན་སྲེག་བྱས་ལ་དངོས་གྲུབ་མྱུར་དུ་འགྲུབ་ཅིང་བརྟན་པར་བྱ་བ་ནི། གནས་དེ་ཉིད་དུ་མཎྜལ་པདྨ་འདབ་བརྒྱད་བྲིས་པའི་སྟེང་དུ་ཤིང་བརྩེགས་ལ། གཡས་སུ་བསྲེས་རྫས། ཡམ་ཤིང་སོར་བརྒྱད་པ། མེ་ཏོག །བདུག་སྤོས། མར་མེ། དྲི་ཆབ། བཤོས་གཙང༌། ནས། གྲོ། འབྲས། མར་ཁུ་དཱུ་རྦ། ཀུ་ཤ་བཞག ། གཡོན་དུ་མཆོད་པ་ལྔ་གཏོར་མ་དང་བཅས་བཞག་ནས། ཐབ་ཀྱི་ནང་དུ་མེ་སྦར་ལ་འཇམ་དཔལ་ཡབ་ཡུམ་བསྐྱེད་ལ་ཡེ་ཤེས་པ་བཞུག །རིན་ཆེན་འབྱུང་ལྡན་གྱིས་དབུར་བརྒྱན། ཕྱག་དང་མཆོད་པ་མདོར་བསྡུས་བྱས་ལ། བསྲེག་རྫས་རྣམས་ཨོཾ་ཨཱཿཧཱུྃ་གསུམ་གྱིས་བདུད་རྩིར་བསམས་ལ་རྩ་བའི་སྔགས་སམ། ཨོཾ་ཧྲཱིཿདྷཱིཿམཱུྃཿསྭཱཧཱ། བདག་གི་པྲཛྙཱ་པུཥྟིཾ་ཀུ་རུ་སྭཱཧཱ། ཞེས་པས་རེ་རེ་བཞིན་དབུལ། འབུལ་བ་རྣམས་རྫོགས་པ་དང་གཏོར་མ་བཏད་ལ། བསྟོད་པ་བྱས་ཏེ་འདོད་པའི་དོན་ལ་གསོལ་བ་བཏབ་ནས། ཡེ་ཤེས་པ་གཤེགས་པ་ནི། ཨོཾ། ཁྱེད་ཀྱིས་སེམས་ཅན་དོན་ཀུན་མཛོད། །རྗེས་སུ་མཐུན་པའི་དངོས་གྲུབ་ སྩོལ། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་འབྱོན་པར་མཛད་དུ་གསོལ། །ཞེས་བརྗོད། དམ་ཚིག་པ་བདག་ལ་བསྡུས་ནས་ལས་ཀྱི་རྗེས་མི་མངོན་པར་བྱ་ཞིང༌། ཐལ་བ་རི་རྩེ་འམ་ཆུ་ཀླུང་ཆེན་པོར་དོར་བས་ཤེས་རབ་ཆེན་པོ་འཕེལ་ཞིང་རྒྱས་པར་འགྱུར་རོ། །སྦྱིན་སྲེག་གི་གྲངས་ནི་སྟོང་ཕྲག་བདུན་ནོ། །སྦྱིན་སྲེག་གི་ལེའུ་སྟེ་དྲུག་པའོ།། །། དེ་ནས་ལས་ཚོགས་ཀྱི་རིམ་པ་ལ། རིལ་བུ་བཟའ་བ། ཚེ་དང་འབྱོར་པ་སྤེལ་བ། གཏོར་མ། དབང་དུ་བསྡུ་པ། ངག་བསྡུ་བ། མངོན་ཤེས་སྒྲུབ་པ། རིག་པ་འཛིན་པ། ཞལ་ལ་བལྟ་བ་དང་བརྒྱད་ལས། དང་པོ་ནི། དེ་ལྟར་བསྒྲུབས་པའི་རྟགས་རྣམས་རྫོགས་ཤིང་སྦྱིན་སྲེག་བྱས་པའི་རྗེས་ལ། མདུན་གྱི་རིལ་བུ་རྣམས་བཟའ་བའི་ལས་ཚོགས་ནི། སྒྲུབ་པ་དང་སྦྱིན་སྲེག་ཐོན་པའི་ནངས་པར་མདུན་གྱི་དབྱངས་ཅན་མ་ལ་སངས་རྒྱས་དང་བྱང་ཆུབ་སེམས་དཔའ་བསྐོར་བ་རྣམས་འོད་དུ་ཞུ་ནས་རིལ་བུའི་རང་བཞིན་དུ་བསམ་པ་ལས་འོད་འཕྲོས་པས་ཕྱོགས་བཅུའི་ཚེ་དང་དཔལ་འབྱོར་དང༌། གཟི་བརྗིད་དང༌། ཁྱད་པར་དུ་གང་འདོད་པའི་དངོས་གྲུབ་ཤེས་རབ་དག་བསྡུས་ནས་དེ་ལ་ཐིམ་པས་ཚེ་དང་བཀྲག་དང་གཟི་བརྗིད་རྒྱས་པར་འདོད་ན། རིལ་བུ་རྣམས་ཡེ་ཤེས་ཀྱི་བདུད་རྩི་ཁ་དོག་ལྔ་དང་ལྡན་པར་བསམས་ལ། འཁོར་ལོས་དྲིལ་ལ་མགུལ་དུ་བཅངས་ནས་ཞག་ཉི་ཤུ་རྩ་གཅིག་གི་ཉི་མ་རྩེ་ཤར་བ་རིལ་བུ་དེ་རྣམས་ཀྱི་ནང་ནས་རིལ་བུ་ལྔ་ལྔ་བདུད་རྩི་བསམས་ཏེ། རང་ཉིད་འཇམ་དཔལ་དུ་མོས་པས་ཁོང་དུ་མིད་པས་ཚེ་དང་བཀྲག་དང་གཟི་བརྗིད་རྒྱས་པར་བསམས་ལ། ལྷག་མ་བརྒྱད་སྒྲུབ་པའི་དངོས་གྲུབ་ཀྱི་རྟེན་དུ་ལུས་དང་མི་འབྲལ་བར་བཅང་ངོ༌། །དེ་བཞིན་དུ་འཆད་པ་ལ་དཔལ་བེའུ་དང༌། རྩོད་པ་་ལ་རལ་གྲི་དང༌། རྩོམ་པ་ལ་པདྨ་དཀར་པོ་དང༌། གྲགས་པ་ཕུན་སུམ་ཚོགས་པ་ལ་དུང་དང༌། འབྱོར་པ་རྒྱས་པར་འདོད་པ་ལ་ཡིད་བཞིན་ནོར་བུ་དང༌། འགྲོ་བ་དབང་དུ་བསྡུ་བ་ལ་ལི་ཁྲི་དང༌། བསམ་པ་ཐམས་ཅད་འགྲུབ་པར་འདོད་པ་ལ་བུམ་པ་བཟང་པོར་བསམས་ལ་བཟའོ། །དེས་ནི་ཇི་ལྟར་འདོད་པའི་དོན་ཡིད་བཞིན་དུ་འགྲུབ་པར་འགྱུར་ རོ། །དེ་རྣམས་ལྷག་མ་བརྒྱད་ནི་རྟེན་དུ་བྱས་ཏེ་བཅངས་ལ། ཕྱིས་སྒྲུབ་པ་བྱེད་ནའང་དེའི་གསེབ་ཏུ་བཏགས་པས་ཉིས་འགྱུར་གྱིས་འགྲུབ་ཐག་ཉེ་ཞིང་བྱིན་པ་ཆེ་བ་ཡིན་ནོ། རིལ་བུ་བཟའ་བའི་ལས་ཚོགས་སོ། ། གཉིས་པ་ཚེ་དང་འབྱོར་བ་སྤེལ་བ་ནི། གོང་གི་རིལ་བུ་དེ་རྣམས་སྒྲུབ་དུས་ནས་ཚེ་དང་འབྱོར་པ་ཐམས་ཅད་བསྡུས་ཏེ་རིལ་བུར་ཐིམ་པར་བསམས་ལ། ཞག་ཉེར་གཅིག་ཏུ་བསྒྲུབས་ནས་ཁྱད་པར་རིལ་བུ་རྣམས་སེར་པོས་ཁ་བསྒྱུར་ཞིང༌། ལྷ་ཡབ་ཡུམ་གཉིས་ཀའང་སེར་པོ་བསམས་ནས་བསྒྲུབས་ཐོན་པ་དང་རིལ་བུ་སྔ་མ་བཞིན་ཟོས་ན་ཚེ་ཉི་ཟླ་དང་མཉམ་ཞིང་འབྱོར་པ་རྒྱལ་པོ་དང་འདྲ་བར་འགྱུར་རོ། །ཚེ་དང་འབྱོར་པ་སྤེལ་པའི་ལས་ཚོགས་སོ། ། གསུམ་པ་གཏོར་མ་ནི། གོང་གི་སྒྲུབ་པའི་ཐུན་མཚམས་དང་དུས་རྒྱུན་དུ་མ་ཆགས་པར་ཕྱག་ལེན་དུ་མཛད་བདེའི་མན་ངག་ནི། རིན་པོ་ཆེ་ལ་སོགས་པའི་སྣོད་གཙང་མར་དཀར་གསུམ་མངར་གསུམ་དྲི་བཟང་སྨན་འབྲུ་ལ་སོགས་པ་བླུགས་ཏེ། སྭ་བྷཱ་ཝས་སྟོང་པར་བསམས་པའི་ངང་ལས། བྷྲཱུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་ཨཱཿཧཱུྃ་གསུམ་ཡོངས་སུ་གྱུར་པ་ལས་བདུད་རྩིའི་རྒྱ་མཚོ་ནམ་མཁའ་དང་མཉམ་པའི་ནང་དུ་གང་ལ་ཅི་དགོས་པའི་ཡོ་བྱད་ལྷ་དང་མིའི་ཕུན་སུམ་ཚོགས་པ་ཐམས་ཅད་བསམས་ལ། ཨོཾ་ཨཱཿཧཱུྃ་གསུམ་གྱིས་བྱིན་གྱིས་བརླབས་ཏེ། མདུན་གྱི་ནམ་མཁར་པདྨའི་འདབ་མ་མཐོང་དམན་སུམ་རིམ་དུ་ཡོད་པའི་སྟེང་གི་ནམ་མཁར་ལ་བླ་མ། དབུས་ཀྱི་ལྟེ་བར་ཡི་དམ། འདབ་མ་བརྒྱད་པའི་དང་པོ་ལ་སངས་རྒྱས། བར་པ་ལ་བྱང་ཆུབ་སེམས་དཔའ། ཐ་མ་ལ་སྲུང་མ་དམ་ཚིག་ཅན་དང་འགྲོ་བ་རིགས་དྲུག་སྲིད་པ་བར་མ་དོའི་སེམས་ཅན་སྐྱེ་བ་བཞི་རང་བཅས་པ་རྣམས་བསམས་ལ། རང་གི་སྙིང་ག་ནས་བྷཱིཿལས་འོད་འཕྲོས་པས་དེ་ཁོ་ན་འདྲ་བའི་ཡེ་ཤེས་པ་བྱོན་ནས་དེ་རྣམས་ལ་སོ་སོར་ཐིམ་པས་བསམས་ལ། རྩ་སྔགས་ཀྱི་མཐར་ཨི་དཾ་གྲྀ་ཧྞ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི་བཏགས་ལ་ལྔའམ་བདུན་གྱིས་ཕུལ་བས། དེ་དག་གི་ཞལ་ནས་ལྗགས་རྡོ་རྗེའི་སྦུ་གུ་ཅན་ལས་འོད་བྱུང་གཏོར་མ་ལ་གསོལ་ཞིང་ཉེ་བར་མཁོ་བའི་དངོས་པོ་བསྣམས་པར་བསམས་ལ། བསྟོད་པས་བསྟོད་ནས་མཉེས་པ་ལ་བཟང་པོ་པར་གསོལ་ཏེ། ཡེ་ཤེས་པ་དང་འཇིག་རྟེན་པའི་འཁོར་རྣམས་གཤེགས་པར་བསམ་ཞིང༌། འཇིག་རྟེན་ལས་འདས་པའི་དམ་ཚིག་པ་རྣམས་རང་ལ་བསྡུས་ལ་མི་དམིགས་པའི་ངང་ལ་དར་ཅིག་བཞག་ནས་བསྔོ་བ་བྱ། དེས་ནི་དངོས་གྲུབ་ཉེ་ཞིང་བར་ཆད་ཀྱིས་མི་ཚུགས་པ་ཡིན་ནོ། །གཏོར་མའི་ལས་ཚོགས་སོ། ། བཞི་པ་དབང་དུ་བྱ་བ་ལ། འགྲོ་བ་ཕལ་པ་དབང་བསྡུ་བ་དང༌། མཆོག་དབང་དུ་བསྡུ་བའོ། །དང་པོ་ལ་གཉིས་ལས། འགྲོ་བ་སྤྱི་དབང་དུ་བྱ་བ་ནི། སྔར་གྱི་རྫས་བཅུ་གཉིས་ཀྱི་སྟེང་དུ་ལི་ཁྲི་དང༌། སེང་ལྡེང་སིནྡྷཱུ་ར་རྣམས་སྦྱར་ལ་རྒྱ་སྐྱེགས་ཀྱིས་ཁབ་བསྒྱུར་ལ། སྔར་གྱི་འཁོར་ལོ་ལ་འགྲོ་བ་ཐམས་ཅད་དབང་དུ་སྡུས་ཤིག་གི་སྤེལ་ཚིག་བྲིས་པར་བསྡུས་ལ། ལྷ་རྣམས་དམར་པོར་གསལ་བཏབ་ནས་སྔ་མ་བཞིན་སྒྲུབ་ཅིང་ཁྱད་པར་དུ་མདུན་གྱི་རིལ་བུ་དབྱངས་ཅན་མ་དམར་མོར་བསམ་པའི་ཐུགས་ཀའི་རལ་གྲི་དང་ཧྲཱིཿལས་འོད་ཟེར་འཕྲོས་པས། ལྷ་དང་ཀླུ་དང་གནོད་སྦྱིན་དང་དྲི་ཟ་དང་སྣོད་བཅུད་ཐམས་ཅད་ལ་ཕོག །འོད་དུ་ཞུ་རིལ་བུ་ལ་ཐིམ་པར་བསམ་ཞིང༌། ཨོཾ་ཧྲཱིཿདྷཱིཿམ་མེ་དཱི་པ་མཛྙུ་ཤྲཱི་མཱུཾཿཧྲཱིཿཤྲཱི་སེང་ཧོ་ཥཿམུ་པ་ཏ་མཉྫུ་ཤྲཱི་ལོ་ཀ་སརྦ་པ་ཤཾ་ཀུ་རུ་སྭཱཧཱ། ཞེས་ཁྲི་ཕྲག་གཅིག་ཏུ་བཟླས་པས་རིལ་བུ་ལས་འོད་དང༌། རླངས་པ་དང༌། མེ་ཏོག་གི་ཆར་བྱུང་ན་འགྲུབ་པ་རབ། རྨི་ལམ་དུ་བྱུང་ན་འབྲིང༌། ཐ་མ་ཡང་ཕ་རོལ་སྙིང་ལ་དུང་དུང་པ་བྱུང་ན་རིལ་བུ་འཁོར་ལོས་དྲི་བ་སྔ་མ་བཞིན་མགུལ་དུ་བཏགས་ཏེ་ཕུད་ཁ་ཅིག་བཟའ། ཁ་ཅིག་བཅད། གཞན་རྣམས་རྒྱལ་པོའི་ཕོ་བྲང་ངམ། །གླིང་ངམ༌། ལམ་གྱི་བཞི་མདོའམ། ཚོང་དུས་སམ། མདོར་ན་མི་མང་པོ་འདུ་བའི་སར་བ་དམར་སེར་གྱི་ལྕི་བ་དང་བསྲེས་ལ་དུད་པ་བཏང་ན་དེ་ཐམས་ཅད་དབང་དུ་འགྱུར་རོ། ། གཉིས་པ་བྱེ་བྲག་སྐྱེས་པ་བུད་མེད་དབང་དུ་བྱ་བ་ལ། སྔར་གྱི་རྫས་རྣམས་ཀྱི་སྟེང་དུ་པདྨ་རཀྟ་དང་གི་ཝཾ་བསྲེས་ལ་རིལ་བུ་དམར་པོ་བྱ། འཁོར་ལོ་ལ་ཡང་དེ་དང་མཐུན་པར་བྲིས་ལ་རིལ་བུ་དྲིལ་ནས་མདུན་དུ་བཞག་ལ། རང་ཉིད་འཇམ་དཔལ་དང་དབྱངས་ཅན་མར་བསྐྱེད་པ་གཉིས་ལས། ཕོ་དབང་དུ་བྱེད་ན་རང་ཉིད་དབྱངས་ཅན། མདུན་གྱི་རིལ་བུ་འཇམ་དཔལ་དུ་བསྐྱེད་ལ་ཡེ་ཤེས་པ་བཅུག་པའི་འོད་ཟེར་གྱིས་བསྒྲུབ་བྱའི་རྣམ་ཤེས་བཀུག་ནས་རིལ་བུར་བསམ་ཞིང༌། མོ་དབང་དུ་བྱེད་ན་དེ་ལས་ལྡོག་པས་བསྒྲུབ་བྱ་མོའི་རྣམ་ཤེས་རང་དང་མདུན་གྱི་ལྷའི་འོད་ཟེར་གྱིས་བཀུག་པ་བདག་ལ་ཆགས་བཞིན་དུ་རིལ་བུ་ལ་ཐིམ་པར་བསམས་ལ། རྩ་སྔགས་ཀྱི་སྤེལ་ཚིག་ཏུ་ཆེ་གེ་བ་ཤཾ་ཀུ་རུ་ཧོཿབཏགས་བཟླས་ཏེ་རྟགས་བྱུང་བ་དང་སྔ་མ་བཞིན་རང་བཟའ་ཞིང་བཅང༌། ཕ་རོལ་པོ་དེ་ཉིད་ཀྱི་གོས་སམ་བཟའ་བཏུང་ལ་བྱུགས་ཏེ་བྱིན་ན་གང་དབང་དུ་བྱ་བ་དེ་འགྲུབ་པར་འགྱུར་རོ། །དེ་བཞིན་དུ་འབངས་ལ་ཚབ་གསུམ། སྐྱེས་པ་ལ་གུར་གུམ། བུད་མེད་ལ་ཟླ་བའི་ཁུ་བ། མི་ཕལ་པ་ལ་སེར་ལྡེང་སྦྱར་ལ་བསྒྲུབ་ན་ཇི་ལྟར་འདོད་པ་དེ་དབང་དུ་འགྱུར་རོ། ། གཉིས་པ་མཆོག་དབང་དུ་བསྡུ་བ་ནི། སྔར་གྱི་རྫས་བཅུ་གཉིས་པོའི་སྟེང་དུ། རྒྱལ་པོ་ལ་ལྕགས་ཕྱེ། བཙུན་མོ་ལ་གི་ཝཾ། བློན་པོ་ལ་མགྲོན་བུ། དགེ་བའི་བཤེས་གཉེན་ལ་རིན་པོ་ཆེ། སྨན་པ་ལ་ཨ་རུ་ར་མ་ཆུ་སྙུང་བཏང་ལ་སྔ་མ་བཞིན་སོ་སོའི་མིང་སྤེལ་ཏེ་བསྒྲུབས་པའི་རིལ་བུ་དེ་དག་ལ་བྱུང་པའམ། བཟའ་བཏུང་དུ་སྦྱར་བ་འམ། དུད་པ་བཏང་ཞིང༌། རང་གི་དཔྲལ་བར་ཐིག་ལེ་བྱས་ལ་བསྒྲུབ་བྱ་ལ་བལྟས་ན་དེ་ཉིད་དབང་དུ་འགྱུར་རོ། །དབང་དུ་བསྡུ་བའི་ལས་ཚོགས་སོ། ། ལྔ་པ་ངག་བསྡུ་བ་ནི། པཎྜི་ཏའམ། དགེ་བའི་བཤེས་སམ་སྔགས་པ་ནུས་པ་ཅན་ནམ། རིགས་ཀྱི་གཙོ་བོ་དྲན་པ་ཅན་ནམ། བསྒྲུབ་བྱ་ཤེས་རབ་ཅན་ནམ། ཤགས་སམ། རྩོད་པ་དྲག་པོས་རྒོལ་བ་རྣམས་ལ་བྱ་སྟེ། དེ་ཡང་ངག་རྐུ་བ་དང་འཕྲོག་པ་གཉིས་ལས། པཎྜི་ཏའམ་དགེ་བའི་བཤེས་གཉེན་ལ་སོགས་པ་ཡུལ་མཆོག་རྣམས་ཀྱི་ངག་བརྐུ་བར་བྱ་སྟེ། དེ་ཡང་བསྒྲུབ་བྱ་དེའི་ལྕེ་ཡི་སྟེང་ན་པདྨ་དམར་པོ་འདབ་མ་བརྒྱད་པ་ཁ་ཐུར་དུ་ལྟ་བ་དང༌། སྙིང་གི་ནང་དུ་པདྨ་དམར་པོ་འདབ་མ་བརྒྱད་པ་ཁ་གྱེན་དུ་བསྟན་པ་གཉིས་ཁ་སྦྱོར་གྱི་ནང་དུ། ཁོ་ཡི་རྣམ་པར་ཤེས་པ་དང་ཤེས་རབ་ཀྱི་ངོ་བོ་ཨཱ་ལི་དམར་པོ་དང་ཀཱ་ལི་དཀར་པོས་མེར་གྱིས་ཁེངས་པ་ལ། རང་གི་སྙིང་ཀའི་དྷཱིཿལས་འོད་འཕྲོས་པས་ཕྱོགས་བཅུའི་སངས་རྒྱས་ལ་སོགས་པའི་ཤེས་རབ་ཐམས་ཅད་བསྡུས་ནས་དེ་ལ་ཐིམ་པས་བསྒྲུབ་བྱ་དེ་ཤེས་རབ་དང་ལྡན་པར་བསམ། དེ་ནས་རང་གི་སྙིང་གའི་དྷཱིཿལས་རྣམ་ཤེས་ཀྱི་བུང་བ་དམར་པོ་གྲངས་མེད་པ་འཕྲོས་ནས་བསྒྲུབ་བྱའི་ཁོང་པར་སོང་ནས་ཨཱ་ལི་ཀཱ་ལི་རྣམས་སོ་སོ་ཁྱེར་ནས་རང་གི་སྙིང་ཁ་དང་ལྕེ་ཡི་སྟེང་དུ་ཐིམ་པར་བསམ་ཞིང༌། རྩ་སྔགས་ཀྱི་མཐར་ཆེ་གེ་མོའི་ངག་བྷི་ཤི་ཀུ་རུ་ཧོཿཞེས་བརྒྱ་རྩ་བརྒྱད་ལ་སོགས་པ་བཟླས་ལ། ཁོ་ཡི་སྙིང་དང་ལྕེའི་པདྨ་རང་གི་སྙིང་དང་ལྕེ་ཡི་པདྨ་ལ་ཐིམ་པས། རང་གི་སྙིང་ཀར་འཇམ་དཔལ་དང་ལྕེ་སྟེང་དུ་དབྱངས་ཅན་མའི་འཁོར་ལོ་གསལ་བཏབ་ལ་སྔགས་བཟླས་པས། ཁོ་ཡི་དྲན་པ་དང་ཤེས་རབ་ཉམས་ནས་རང་ལ་རྒྱས་པར་འགྱུར་རོ། །ངག་འཕྲོག་པ་ནི། གཙོ་བོའི་རྩོད་བ་དང་ཤག་འགྲན་པའི་ཟླ་ལ་སོགས་པ་རང་བས་ཡུལ་དམན་པ་རྣམས་ལ་བྱ་སྟེ། དེ་ཡང་བསྒྲུབ་བྱ་དེ་ཡི་ལུས་ཀྱི་ནང་ན་རྩ་ཨ་ཝ་དྷཱུ་ཏི་རྒྱུ་མ་ཕུས་བཏབ་པ་དྲང་པོར་གྱེན་དུ་ལངས་པ་ལྟ་བུའི་མར་སྣ་གསང་གནས་དང་ཡར་སྣ་སྨིན་མཚམས་ལ་ཐུག་པའི་ནང་དུ་ཤེས་རབ་ཀྱི་ངོ་བོ་ཁོ་ཡི་རྣམ་ཤེས་ཨ་དཀར་པོས་ཐག་གིས་གང་བའི་སྨིན་མཚམས་སུ་བུག་པ་གྲུ་གསུམ་ལ་རྩ་དེའི་ཁ་བསྟན་ནས་ཨ་རྣམས་དཀར་ཉུག་ཉུག་ཡོད་པར་བསམ། དེ་ནས་རང་གི་ཐུགས་ཀའི་དྷཱིཿལས་འོད་དམར་པོ་འཕྲོས་པས་ཁོ་ཡི་སྨིན་མཚམས་ཀྱི་བུག་པའི་ཨ་རྣམས་ལ་ཕོག །ཨ་རྣམས་རིམ་པས་ཚུར་དྲངས་ཏེ་རང་གི་ཁོང་པར་ཐིམ་པས་འཕྲལ་ལ་ཤེས་རབ་ཀྱིས་གང་ཞིང༌། ཁོ་ཡི་ཤེས་རབ་འཕྲལ་ལ་ཟད་དེ་སྟོང་སངས་སོང་བར་བསམ་ཞིང་སྔར་གྱི་སྔགས་བཟླས་ཏེ། མཐར་ཁོ་ཡི་ལུས་སྟོང་པར་སོང༌། རང་གི་ལུས་གང་ནས་ཤེས་རབ་རྒྱས་པར་བསམས་ལ། ཁོ་ཡི་དྲན་པ་ཉམས་ཤིང་རང་གི་དྲན་པ་སྔོན་ལས་ཁྱད་པར་དུ་འཕགསཔ་ཐོབ་པར་འགྱུར་རོ། །སླར་ཡང་བླ་མ་དམ་པ་ལས་བརྒྱུདཔའི་གདམས་པ་ནི། བསྒྲུབ་བྱ་ཕ་རོལ་པོ་ཤེས་རབ་དང་ལྡན་པ་རྣམས་ཀྱི་སྙིང་གར་པདྨའི་སྡོང་པོ་འདབ་མ་རྒྱས་པའི་སྟེང་དུ་རྣམ་ཤེས་ཀྱི་ངོ་བོ་ཨཱ་ལི་ཀཱ་ལི་རེ་བསམས་ལ། རང་གི་སྙིང་ཀར་འཇམ་དཔལ་གྱི་རལ་གྲིའི་དྷཱིཿལས་རྣམ་ཤེས་ཀྱི་བུང་བ་མང་པོ་འཕྲོས་པས་ཁོ་ཡི་ཁོང་པར་ཞུགས་ནས་ཡི་གེ་རྣམས་བསྡུས་ཏེ་རང་གི་ཁོང་པར་ཐིམ། ཡང་བུང་བ་རྣམས་ཁོ་ཡི་ཁོག་པར་སོང་བས་པདྨ་རྣམས་ཀྱི་བཅུད་དང་བཀྲག་དང་གཟི་མདངས་ཐམས་ཅད་འཇིབས། རང་གི་ཁོང་པའི་དྷཱིཿལ་ཐིམ་པས་ཤེས་རབ་དང་བཀྲག་མདངས་གཟི་བརྗིད་རྒྱས། ཡང་དེ་བཞིན་དུ་ཡང་ནས་ཡང་དུ་བསམ་པའི་མཐར་ཁོ་ཡི་ཁོང་པའི་པད་སྡོད་རྙིངས་ཤིང་ནུས་པ་མེད་ལ། རང་གི་སྙིང་གའི་དྷཱིཿདང་འཁོར་ལོའི་བཀྲག་མདངས་རྒྱས་ཤིང་ནུས་པ་དང་ལྡན་པར་བསམས་ནས་སྔགས་བཟླས་ན་གཞན་གྱི་ཤེས་རབ་དང་གཟི་བརྗིད་ཚེ་དང་བསོད་ནམས་ཐམས་ཅད་རང་ལ་འཕོ་བར་འགྱུར་རོ། །འདི་ནི་ཤིན་ཏུ་གསང་བའི་མན་ངག་ཕྱི་རབས་ཀྱི་དོན་དུ་ཡི་གེར་བཀོད་པའོ། །དབང་དུ་བྱ་བའི་ཁྱད་པར་ལས་ཤེས་རབ་རྒྱས་པར་བྱེད་པ་སྟེ། ངག་བསྡུ་བའི་ལས་ཚོགས་སོ། ། དྲུག་པ་མངོན་ཤེས་སྒྲུབ་པ་ནི། ལྷུང་བཟེད་ཀྱི་འཁོར་ལོའི་ནང་དུ་སྔར་གྱི་སྨན་རྣམས་ཀྱི་སྟེང་དུ་མུ་ཏིག་དམར་པོ་དང་ཀ་ར་སྦྱར་བའི་རིལ་བུ་བྱས་ལ། འཇམ་དཔལ་དང་དབྱངས་ཅན་མའི་སྒོམ་རིམ་སྔར་བཞིན་བྱེད་ཅིང༌། ཨོཾ་ཧྲཱིཿདྷཱིཿ མ་མེ་དཱི་པ་མཉྫུ་ཤྲཱི་མཱུྃཿཧྲཱིཿཔྲཛྙཱ་ཏུ་ནི་ཧྲཱིཿ ཝཱ་ཀཱི་ཤྭ་རི་མཱུྃ་ཞེས་ཁྲི་ཕྲག་གཅིག་བཟླས་ལ། ཕྱིས་ཉི་ཟླ་གཟས་འཛིན་པའི་ཚེ་དེ་བཞིན་དུ་བསྒྲུབས་ཏེ་ཟོས་ན་མངོན་པར་ཤེས་པ་དྲུག་ཁྲི་དང་ལྡན་པར་འགྱུར་རོ། །འདིར་གཞུང་ཁ་ཅིག་ལས་མུ་ཏིག་དམར་པོ། ཨ་ག་རུ་ནག་པོ། སྤང་སྤོས། ཀ་ར་རྣམས་བ་དམར་སྐྱའི་འོ་མས་རིལ་བུ་བྱས་ཏེ་སྔ་མ་བཞི་སྒོམ་བཟླས་བྱས་ནས། ཉི་ཟླ་གཟའ་ཟིན་པའི་ཉིན་པར་རིལ་བུ་ཟོས་ན་མངོན་པར་ཤེས་པ་འགྲུབ་པར་འགྱུར་རོ། ། ཞེས་བཀོད་པ་རང་སྣང་ངོ༌། །མངོན་པར་ཤེས་པ་སྒྲུབ་པའི་ལས་ཚོགས་སོ། ། བདུན་པ་རིག་པ་སྒྲུབ་པ་ནི། སྔར་བཤད་པའི་རིམ་པས་སྒྲུབ་ཅིང༌། ན་མོ་མཉྫུ་ཤྲཱི་ཀུ་མཱ་ར་བྷཱུ་ཏཱ་ཡ། ཏདྱ་ཐཱ། ཨོཾ་ཨ་ར་ཛེ་བི་ར་ཛ»ེ«། ཤུདྷེ་ཤུདྡྷེ། བི་ཤུདྡྷེ་བི་ཤུདྡྷེ། ཤོ་དྷ་ནི་ཤོ་དྷ་ནི། བི་ཤོ་དྷ་ནི་བི་ཤོ་དྷ་ནི། ཨ་མ་ལེ། བི་མ་ལེ། ཛ་ཡ་བ་ཏི། རུ་རུ་ཙ་ལེ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སྭཱཧཱ། འབུམ་ཕྲག་གཅིག་བཟླས་ན་མཁས་པར་འགྱུར་རོ། །གཉིས་བཟླས་ན་རིག་པ་འཛིན་པར་འགྱུར་རོ། ། གསུམ་བཟླས་ན་འཇམ་དཔལ་གྱི་ཞལ་མཐོང་བར་འགྱུར་རོ། །བཅངས་པ་ཙམ་གྱིས་སྐྱེ་བ་དྲན་པར་འགྱུར་རོ། །གལ་ཏེ་འཚམས་མེད་པ་ལ་སྤྱོད་པ་ཡིན་ཡང་དེ་ལྟར་སྦྱོར་བ་ཉིད་གུས་པས་བསྒྲུབ་ན་དེ་དག་གི་མཐའ་བདག་གིས་རྫོགས་པར་བགྱིའོ། །གལ་ཏེ་དེ་ལྟར་མ་བགྱིས་ན་བདག་གིས་སངས་རྒྱས་བཅོམ་ལྡན་འདས་རྣམས་བསླུས་པར་འགྱུར་རོ། །ཞེས་ཞལ་གྱིས་བཞེས་ཤིང་ཡི་དམ་དུ་མཛད་པའོ། །ཁ་ཅིག་ནི་བཟླས་པ་ཙམ་གྱིས་འགྲུབ་ཅེས་འདོད་ ཀྱང༌། བདག་གི་ལམ་ནི་སྒྲུབ་པ་དང་འབྲེལ་དགོས་ཞེས་བཞེད་དོ། །གཞན་ཡང་སྔར་གྱི་རྫས་བཅུ་གཉིས་པོའི་སྟེང་དུ་རྟའི་མགྲིན་པའི་ཤ་བཏང་ནས་སྔར་བཞིན་བསྒྲུབ་ན་རྐང་མགྱོགས་འགྲུབ་པར་འགྱུར་རོ། །འུག་པ་མཐིལ་རིལ་གྱི་མིག་འབྲས་བཏང་ནས་འོག་གི་གཏོར་མཐོང་བ་དང་མིག་རྣོ་བར་འགྱུར་རོ། ། ཕུག་རོན་བྱ་རྒོད་འདབ་ཆགས་ཀྱི་མཁྲིས་པ་བཏང་ན་མངོན་ཤེས་འགྲུབ་པར་འགྱུར་རོ། །སྔགས་ཀྱི་ཤམ་བུ་ནི་ཇི་ལྟར་འདོད་པ་དེ་ཉིད་སྤེལ་ལོ། །རིག་པ་སྒྲུབ་པའི་ལས་ཚོགས་སོ། །འཇམ་དཔལ་གྱི་ཞལ་ལྟ་བ་ནི། སྔར་གྱི་རྫས་རྣམས་ཀྱི་སྟེང་དུ་ག་བུར་དང་གི་ཝཾ་བསྲེག་པའི་རིལ་བུ་བྱས་ལ་སྔ་མ་བཞིན་བསྒོམ་ཞིང༌། ཨོཾ་ཧྲཱིཿདྷཱིཿམ་མེ་དཱི་པཾ་མཉྫུ་ཤྲཱི་མཱུྃཿཧྲཱིཿཔྲ་ཛྙཱ་བརྡྷ་ནི་ཧྲཱིཿདྷཱིཿསྭཱ»་«ཧཱ། ན་མོ་མཉྫུ་ཤྲཱི་སིདྷ་ནི་ཡ་མཱནྟ་ཀ་ནི་ཧཱུྃ་ཕཊ། ཅེས་ཁྲི་ཕྲག་གཅིག་བཟླསཔའི་རིལ་བུ་ཆུ་གཙང་མ་དང་བསྲེས་ལ་རང་འཇམ་དཔལ་དུ་བསམ་པའི་ལག་མཐིལ་དུ་བླུགས་ཏེ་སྔགས་བརྒྱ་རྩ་བརྒྱད་བཟླས་ཏེ་མིག་ལ་བྱུག་ན་འཇམ་དཔལ་མཐོང་བར་འགྱུར་རོ། །གཞུང་ཁ་ཅིག་ལས་ག་བུར་གྱི་ཝཾ་བསྲེས་པའི་ཆུ་ལག་མཐིལ་གཡོན་དུ་བླུགས་ལ། རང་འཇམ་དཔལ་དུ་མོས་པས་སྔགས་བཟླས་ཏེ་མིག་ལ་བྱུགས་པས་ཞལ་མཐོང་བར་འགྱུར་རོ་ཞེས་བཀོད་པར་སྣང་ངོ༌། །བདག་གི་བླ་མས་ནི་སྔ་མ་བཞིན་མཛད་པས་ཞལ་མཐོང་བ་ཉིད་ཡིན་ནོ། །ཞལ་ལྟ་བུའི་ལས་ཚོགས་སོ། །ལས་ཚོགས་ཀྱི་ལེའུ་སྟེ་བདུན་པའོ།། །། དེ་ལྟར་རྗེ་བཙུན་འཇམ་པའི་དཔལ་ནི་ལེགས་པར་སྒྲུབ་པའི་བསོད་ནམས་གང༌། །སྟོན་མཁའ་ཡིད་མཁའི་དྲི་མ་མེད་ལ་མཚན་དཔེའི་འོད་རབ་གསལ་བའི་སྐུ། »།«མཛད་པའི་ཟེར་བས་རྣམ་རོལ་རབ་བརྟན་གདུལ་བྱའི་འཇིག་རྟེན་འགེངས་པ་ཡིས། །མ་ལུས་བདེ་འབྱུང་གེ་སར་འཛུམ་པས་འགྲོ་བའི་བསམ་པ་འགྲུབ་པར་ཤོག །ཚུལ་འདི་གངས་རིའི་ཁྲོད་ཀྱི་སྙན་ངག་མཁན། །དཔལ་ལྡན་ཚུལ་ཁྲིམས་བློ་གྲོས་བཟང་པོ་ཡིས། །བློ་གྲོས་དོན་གཉེར་ཀུན་གྱི་གཙུག་རྒྱན་དུ། །བསམ་ཡས་ལྷུན་གྱིས་གྲུབ་པའི་གནས་སུ་སྦྱར། »།«འཕགས་པ་འཇམ་དཔལ་གྱི་སྒྲུབ་ཐབས་ཡིད་བཞིན་ནོར་བུ་ཞེས་བྱ་བ། མང་དུ་ཐོས་པའི་སྙན་ངག་མཁན་བསམ་ཡས་པ་ངག་གི་དབང་པོས་གཞུང་དང་གདམས་པ་དང་རང་གིས་ཉམས་སུ་བླངས་པ་རྣམས་ཕྱོགས་གཅིག་ཏུ་བཀོད་པ་རྫོགས་སོ།། །། མདྒ་ལཾ།།
<span class="lcp-note"><span class="lcp-mark">«</span> འཕགས་པ་འཇམ་དཔལ་གྱི་སྒྲུབ་ཐབས་ཡིད་བཞིན་ནོར་བུ་ཞེས་བྱ་བ། བླ་མ་དང་འཇམ་པའི་དབྱངས་ལ་ཕྱག་འཚལ་ལོ། །ཤིན་ཏུ་རྣམ་དག་པདྨོའི་མདངས་འདྲ་ཀུན་མཁྱེན་སྦྲང་རྩིའི་སྙིང་པོ་ཅན། །གཞན་ཕན་ཐུགས་རྗེའི་འདབ་སྟོང་རབ་རྒྱས་གྲགས་པའི་དྲི་བསུང་མ་སྨད་པ། །འཇམ་པའི་དབྱངས་ཞེས་ཕྱོགས་བཅུར་རབ་གྲགས་སངས་རྒྱས་ཀུན་གྱིས་བསྔགས་པའི་མགོན། ། བློ་གྲོས་བདེ་འབྱུང་གཙུག་གིས་མཛེས་བྱས་ངག་གི་དབངཔོའི་ཞབས་ལ་ འདུད། །སྔོན་ཆད་བླ་མ་རྣམས་ཀྱི་སྙན་ནས་སྙན། །གཅིག་ནས་གཅིག་བརྒྱུད་ཡི་གེར་མ་བཀོད་ཅིང༌། །ཀུན་ལ་མ་གྲགས་ཟབ་མོའི་གནད་རྣམས་དང༌། ། གཞུང་དུ་བཀོད་པ་རྣམས་ནས་འདིར་བརྗོད་བྱ། །ལོ་རྒྱུས་རྗེས་གནང་སྒྲུབ་པ་དང༌། །སྤོགས་དང་ཁ་བསྒྱུར་སྦྱིན་སྲེག་དང༌། །ལས་ཚོགས་དང་ནི་རྣམ་བདུན་གྱིས། །འཇམ་དཔལ་སྒྲུབ་པའི་རིམ་པ་བཤད། ། དེ་ལ་ཡིད་ཆེས་པའི་ཡན་ལག་ཏུ་བླ་མ་བརྒྱུད་བའི་ལོ་རྒྱུས་ནི། སངས་རྒྱས་མྱ་ངན་ལས་འདས་ནས་ལོ་ཉིས་སྟོང་ལྡ་བརྒྱ་ན། མ་ག་དྷའི་གྲོང་ཁྱེར་དང་ཉེ་བའི་གཙུག་ལག་ཁང་ཞིག་ན་རྒན་པོ་ལོ་དགུ་བཅུ་རྩ་དགུ་་ལོན་པ་ཞིག་ཕྱི་མ་ལ་བག་ཆགས་བཞག་པའི་ཕྱིར་པཎྜི་ཏ་སུ་མ་ཏི་ཀཱི<span class="lcp-mark">»</span></span><span class="lcp-note"><span class="lcp-mark">«</span>རྟི་ལ་ཡི་གེ་སློབ་ཅིང་འདུག་གོ །དེའི་ཚེ་ཡུལ་དེ་རྒྱལ་པོ་འཁོར་དང་བཅས་པ་དེས་བར་འོངས་བས་དེ་མཐོང་ནས་རྒན་པོ་དེ་ལ་སྨྲས་པ། ཀྱེ་རྒན་པོ་ཁྱོད་ནི་བྱིས་པའི་རང་བཞིན་དུ་གྱུར་ཏམ། འདི་ལྟར་གཟོད་ཡི་གེ་དག་ལ་སློབ་པ་བརྩོན། ཅེས་མ་རངས་བཞིན་དུ་སྨྲ་བ་ཐོས་ནས། དེ་ཡིད་རབ་ཏུ་མི་དགའ་བས་ད་ནི་ཡི་གེ་སློབ་པ་བཏང་སྟེ་སྒྲུབ་པ་ཞིག་བྱའོ་སྙམ་ནས། སློབ་དཔོན་ལ་བསླབ་མི་དགོས་པར་རིག་པའི་གནས་ལོབ་པའི་གདམས་ངག་ཡོད་དམ་ཞུས་པས། སློབ་དཔོན་གྱིས་འཕགས་པ་འཇམ་དཔལ་གྱི་སྒྲུབ་ཐབས་འདི་གནང་ནས། ཞག་གསུམ་བསྒྲུབས་པའི་ཕྱི་མ་ལ་རལ་གྲི་དྲངས་ནས་འཕགས་པ་འཇམ་དཔལ་དོ་ནུབ་ཞལ་མི་སྟོན་ན་རང་ཉིད་ཀྱི་རྐེ་བཅད་ལ་འཆི་བར་བྱའོ་ཞེས་དམ་བཅས་ཏེ་བསྒྲུབས་པས། ནམ་ལངས་སུ་འཇམ་པའི་དབྱངས་ཞལ་མངོན་སུམ་དུ་བསྟན་ནས་བྱིན་གྱིས་བརླབས་པས་རྒན་པོ་དེ་ཉིད་བྱིས་པ་ལོ་བརྒྱད་ལོན་པ་ལྟར་གྱུར་ནས་སྡེ་སྣོད་གསུམ་དང་རིག་པའི་གནས་ཐམས་ཅད་ལ་མཁས་པར་གྱུར་ཏེ། སློབ་དཔོན་ཆེན་པོ་མཉྫུ་ཤྲཱི་ཞེས་བྱ་བར་གྲགས་སོ། །དེས་རྗེ་བཙུན་དམ་པ་རྒྱ་གར་ལ་གནང༌། དེ་ནས་རིམ་པ་བཞིན་དུ་དམ་པ་ཀུན་དགའ། སྨོན་ལམ་འབར། ཤེས་རབ་སེང་གེར་ཆོས་ཀྱི་བླ་མ། ཀུ་མཱ་རཀཱིརྟི། ཀུ་མཱ་ར་བློ་གྲོས། བླ་བྲང་པ་ཆོས་དཔལ་རྒྱལ་མཚན། སྙན་ངག་མཁན་ངག་གི་དབང་པོ། རི་ཁྲོད་སེང་གེའོ། །ལོ་རྒྱུས་ཀྱི་ལེའུ་སྟེ་དང་པོའོ།། །། དེ་ལྟར་བླ་མ་དམ་པ་རྣམས་ལས་བརྒྱུད་པའི་རྗེ་བཙུན་འཇམ་པའི་དབྱངས་སྒྲུབ་པ་ལ་དང་པོ་རྗེས་སུ་གནང་བ་ཐོབ་དགོས་པས་དེའི་རིམ་པ་ནི། གནས་དབེན་པར་འཇམ་དཔལ་སྨྲ་བའི་སེང་གེའི་རྟེན་མཆོད་པ་དང་བཅས་པ་བཤམས་ལ། སློབ་དཔོན་ཉིད་འཇམ་དཔལ་དུ་མོས་པའི་ཕྲག་པ་གཡོན་དུ་དབྱངས་ཅན་མ། སྟེང་གི་ནམ་མཁའ་ལ་བླ་མ་དང་སངས་རྒྱས་དང་བྱང་ཆུབ་སེམས་དཔའི་ཚོགས་བཞུགས་པར་བསམས་ལ། ཡན་ལག་བདུན་པ་བྱས་ཏེ་གཏོར་མ་འབུལ། དེ་ནས་སློབ་མ་རྣམས་ཀྱིས་སློབ་དཔོན་ཉིད་འཇམ་དཔལ་དངོས་སུ་བསམ་པ་ལ་སངས་རྒྱས་དང་བྱང་ཆུབ་སེམས་དཔས་བསྐོར་བར་མོས་པ་བྱས་ཏེ། ཡན་ལག་བདུན་པ་དང༌། ཁྱད་པར་དུ་ལུས་དབུལ་བའི་མཆོད་པ་ཕུལ་ནས། ཆོས་ཐམས་ཅད་སྟོང་པའི་ངང་ལས་སློབ་མ་རྣམས་འཇམ་དཔལ་དུ་བསྐྱེད་པའི་ཕྲག་པར་དབྱངས་ཅན་མ། ཐུགས་ཀར་པདྨ་དང་ཟླ་བའི་སྟེང་ན་ཙ་ཀྲ་དམར་པོ་རྩིབས་བཞི་པའི་ལྟེ་བ་ལ་རལ་གྲི་སོར་བཞིའི་ཆང་ཟུང་ལ་དྷཱིཿདང་རྩེ་མོ་ལ་ཧྲཱིཿས་མཚན་པའི་མཐའ་སྐོར་དུ་རྩ་བའི་སྔགས་ཀྱིས་བསྐོར་བ་ལ་སོགས་པ་སྒྲུབ་ཐབས་བཞིན་བསམས་ལ་ཡེ་ཤེས་པ་བཅུག་སྟེ། སློབ་དཔོན་གྱི་ཕྲག་པའི་དབྱངས་ཅན་མ་དང༌། ཐུགས་ཀའི་ཙཀྲ་རལ་གྲི་དང་བཅས་པ་ལ་འོད་ཟེར་བྱུང་བ་སློབ་མའི་ཕྲག་པའི་དབྱངས་ཅན་མ་དང་སྙིང་གའི་འཁོར་ལོ་རལ་གྲི་དང་བཅས་པ་ལ་ཐིམ་པར་བསམ་པའི་འོད་ཀྱིས་བསྐུལ་བས། མདུན་གྱི་ནམ་མཁར་སངས་རྒྱས་དང་བྱང་ཆུབ་སེམས་དཔའི་ཐུགས་ཀ་ནས་ཀྱང་འོད་བྱུང་ནས་སློབ་མ་ལ་ཐིམ་པར་བསམ་ཞིང༌། སློབ་དཔོན་གྱི་ཕྲེང་བ་བཟུང་སྟེ་སྔགས་ཀྱི་རྗེས་ཟློས་ལན་གསུམ་བྱས་པས། སློབ་མ་དག་འཇམ་དཔལ་དངོས་སུ་གྱུར་པའི་འོད་ཟེར་གྱིས་ཐམས་ཅད་ཀྱི་བློ་ཡི་མུན་པ་ཐམས་ཅད་བསལ། འཕགས་པ་མཆོད། ཚུལ་འདུས་ཤེས་རབ་དང་སྤོབས་པའི་དངོས་གྲུབ་ཀྱི་བདུད་རྩིའི་ཆུས་ལུས་ཐམས་ཅད་གང་ཐུགས་ཀའི་འཁོར་ལོར་དམིགས་པ་འཛིན་དུ་བཅུག་ལ་དར་ཅིག་མཉམ་པར་བཞག་ལ། དགེ་བ་བསྔོ། བཀྲ་ཤིས་བརྗོད། མེ་ཏོག་གཏོར་རོ། །རྗེས་གནང་གི་ལེའུ་སྟེ་གཉིས་པའོ།། །། དེ་ལྟར་རྗེས་སུ་གནང་བ་ཐོབ་ནས་སྒྲུབ་པ་ལ་འཇུག་པར་བྱ་སྟེ། དེ་ཡང་སྔོན་དུ་རྫས་བསག་ཅིང་སྐྱབས་འགྲོ་སེམས་བསྐྱེད་བྱ་བ་དང༌། དངོས་གཞི་ལྷ་བསྒོམ་ཞིང་སྔགས་བཟླ་བ། རྗེས་རྫོགས་རིམ་བསྒོམ་ཞི་བསྔོ་བ་བྱ་བ་དང་གསུམ་ལས། དང་པོ་ལ་གཉིས་ཏེ། རྫས་བསག་ཅིང་རྟེན་དགྲམ་པ་དང༌། སྐྱབས་འགྲོ་སེམས་བསྐྱེད་བྱ་བའོ། །དང་པོ་ནི། སྤང་རྒྱན་དཀར་པོ། གླ་རྩི། མཚལ་དཀར། ཡུང་བ། ཙན་དན་དམར་པོ། ཨ་ག་རུ་ནག་པོ། སྤང་སྤོས། དབང་པོ་ལག་པ་སྡེར་མོ་ལྔ་པ། ཤུ་དག་དཀར་པོ། ཨ་རུ་ཤ་ཆེན། ཤིང་མངར། རྒྱ་སྐྱེགས་རྣམས་ཞིབ་པར་བཏགས་ལ། སྦྲང་དཀར་དང་བ་དམར་མོའི་འོ་མས་རིལ་བུ་བརྒྱ་རྩ་བརྒྱད་བྱས་ལ། དར་རམ་ཤོག་བུ་སེར་པོ་ལ་པདྨ་དམར་པོ་འདབ་བརྒྱད་མུ་ཁྱུད་རིམ་པ་གསུམ་དང་ལྡན་པའི་ལྟེ་བར་རལ་གྲིའི་ཆང་ཟུང་ལ་ཧྲཱིཿརྩེ་མོར་དྷྲཱིཿ འདབ་མ་རྣམས་ཀྱི་དབུས་སུ་རྩ་བའི་སྔགས། རྩེ་མོ་ལ་ཧྲཱིཿ མུ་ཁྱུད་ནང་མ་ལ་ཨཱ་ལི། བར་མ་ལ་ཀཱ་ལི། ཕྱི་མ་རྟེན་འབྲེལ་སྙིང་པོ་རྣམས་སྤེལ་ཚིག་དང་བཅས་པ་བྲིས་པར་བླུགས་ལ། དར་རམ་ཤོག་བུ་ལ་འཁོར་ལོ་རྩིབས་ཆེན་བརྒྱད་མུ་ཁྱུད་གསུམ་དང་ལྡན་པའི་ལྟེ་བར་རལ་གྲིའི་ཆང་ཟུང་ལ་དྷྲཱིཿ རྩེ་མོ་ལ་ཧྲཱིཿ རྩིབས་རྣམས་ཀྱི་དབུས་སུ་་རྩ་སྔགས། རྩེ་མོར་དྷྲཱིཿ མུ་ཁྱུད་གསུམ་པ་ལ་ཨཱ་ལི། ཀཱ་ལི། རྟེན་འབྲེལ་སྙིང་པོ་རྣམས་སྤེལ་ཚིག་དང་བཅས་པ་བྲིས་པས་བཀབ་ལ། གནས་དབེན་པར་མཎྜལ་པདྨ་སེར་པོ་འདབ་བརྒྱད་ཀྱི་དབུས་སུ་མེ་ཏོག་བཀྲམ་པའི་དབུས་སུ་ལྷུ་བཟེད་དམ་རིན་པོ་ཆེའི་སྣོད་འབྲུས་བཀང་་བའི་ཁར་རིལ་བུ་འཁོར་ལོ་དང་བཅས་པ་བཞག །འཇམ་དབྱངས་ཀྱི་རྟེན་དགྲམ། མཆོད་པ་བཤམ། རྟེན་གྱི་མདུན་དུ་ལྷུ་བཟེད་འོང་བར་བྱ། དེ་ནི་རྟེན་བཤམ་པའོ། །འདིར་གཞུང་གཅིག་ནས་འཁོར་ལོ་བྲི་བ་ནི་འདི་ལྟར་བཞེད་དོ། །དར་རམ་རས་ལ་འཁོར་ལོ་རྩིབས་བཞི་པའི་ལྟེ་བར་རང་གི་སྤེལ་ཚིག །ཤར་གྱི་རྩིབས་ལ་ཧྲཱིཿ ལྷོར་སི། ནུབ་ཏུ་བཻ། བྱང་དུ་བྷཻ་རྣམས་བྲིས་པའི་དབུས་སུ་རིལ་བུ་བླུགས་ནས། ཡང་པདྨ་འདབ་བརྒྱད་མུ་ཁྱུད་གསུམ་པའི་ལྟེ་བར་རལ་གྲིའི་ཆང་ཟུང་ལ་དྷྲཱིཿ རྩེ་མོར་ཧྲཱིཿ བར་དུ་རྩ་སྔགས། པད་འདབ་བརྒྱད་ཀྱི་རྩེ་མོར་ཧྲཱིཿ རྩ་བར་དྷཱིཿ དབུས་སུ་རྩ་བའི་སྔགས། མུ་ཁྱུད་གསུམ་ལ། ཨཱ་ལི། ཀཱ་ལི། རྟེན་འབྲེལ་སྙིང་པོ་རྣམས་བྲིས་པས་སྟེང་ནས་དགབ། དེའི་སྟེང་དུ་དར་དམར་པོའི་གདུགས་ཕུབ་ལ་སྔ་མ་བཞིན་དུ་བྱ་གསུངས་སོ། །དེ་ལྟར་འཁོར་ལོ་གང་བྲིས་ཀྱང་སྟེང་འཁོར་གྱི་ཡིག་མགོ་ཕྱིར་བསྟན་ལ་གཡས་སྐོར་དུ་བྲི་ཞིང༌། འོག་འཁོར་གྱི་ཡིག་མགོ་ཕྱིར་བསྟན་ལ་གཡོན་སྐོར་དུ་བྲི་བའི་སྣག་ཚ་མཚལ་རྒྱ་སྐྱིགས་གི་ཝཾ་གསུམ་ལ་བྱའོ། ། འཁོར་ལོའི་མན་ངག་གོ །དེ་ནས་ཟླ་བ་དང་ཉི་མ་ཡར་འཕེལ་གྱི་ཚེས་གཅིག་གམ་བརྒྱད་དམ་བཅོ་ལྔ་ནས་སྒྲུབ་པའི་མགོ་བརྩམ་པར་བྱ་སྟེ། ཐོ་རངས་སྔ་བར་མལ་ནས་ལངས་ཏེ་ནམ་མཁའི་དབྱིངས་སུ་དབྱངས་ཅན་མ་ལ་བཀྲ་ཤིས་ཀྱི་ལྷ་མོ་དཔག་ཏུ་མེད་པས་བསྐོར་བ་རྣམས་ཀྱིས་རྡོ་རྗེའི་གླུ་དང་བཀྲ་ཤིས་པའི་ཚིགས་སུ་བཅད་པ་དང༌། ཨོཾ་ཧྲཱིཿདྷཱིཿལ་སོགས་པའི་རིག་པ་བརྗོད་པས་བསྐུལ་བར་བསམས་ལ་ལངས་ཏེ། ཁྲུས་དང་གཙང་སྦྲ་སྔོན་དུ་སོང་ནས། སྟན་བདེ་བ་ལ་ཤར་དུ་ཕྱོགས་པས་འདུག་སྟེ། སྐྱབས་སུ་འགྲོ་བ། ཚད་མེད་པ་བཞི་སྒོམ་པ་དང༌། བྱང་ཆུབ་ཏུ་སེམས་བསྐྱེད་ནས། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་གིས་ཆོས་ཐམས་ཅད་སྟོང་པ་ཉིད་དུ་བསམ། སྟོང་པའི་ངང་ལས་བྷྲུཾ་ཞེས་བརྗོད་པས་ཕྱི་སྣོད་ཀྱི་འཇིག་རྟེན་ཐམས་ཅད་ཞིང་ཁམས་རྣམ་པར་དག་པ་བདེ་བ་ཅན་བཞིན་དུ་གྱུར་པའི་དབུས་ཀྱི་ནམ་མཁའ་ལ། སྃ་ལས་སེང་གེ་སྔོན་པོ་ལངས་པའི་སྟེང་དུ། པྃ་ལས་སྣ་ཚོགས་པདྨའི་སྟེང་དུ་ཨ་ལས་ཟླ་བའི་དཀྱིལ་འཁོར། །དེའི་སྟེང་དུ་རྃ་ལས་ཉི་མའི་སྟེང་དུ་རང་གི་སེམས་ཉིད་ཡི་གེ་དྷཱིཿདམར་པོ་ཚེག་དྲག་དང་བཅས་པ་ལས་འོད་ཟེར་དམར་པོ་ཕྱོགས་བཅུར་འཕྲོས་པས་འཕགས་པ་མཆོད། སེམས་ཅན་གྱི་དོན་བྱས། སླར་འདུས་དྷཱིཿལ་ཐིམ་པས་རང་ཉིད་འཇམ་དཔལ་སྨྲ་བའི་སེང་གེ་སྐུ་མདོག་དམར་པོ་ཞལ་གཅིག་ཕྱག་གཉིས་ཐུགས་ཀར་ཆོས་འཆད་ཀྱི་ཕྱག་རྒྱའི་བར་ནས་ཨུཏྤ་ལའི་རྩ་བ་འཛིན་པས་སྙན་དྲུང་དུ་འདབ་མ་ཁ་བྱེ་བའི་གཡས་གཡོན་གྱི་སྟེང་དུ་རལ་གྲི་དང་པུ་སྟི་བསྣམས་པ། ཞབས་གཉིས་སྐྱིལ་ཀྲུང་ཕྱེད་པའམ་རྡོ་རྗེ་སྐྱིལ་ཀྲུང་གིས་བཞུགས་པའི་སྐུ་སྨད་ལ་དར་སྣ་ཚོགས་ཀྱི་ན་བཟའ་དང་སྐུ་སྟོད་ལ་ལྷའི་གོས་པཉྩ་ལི་ཀས་གཡོགས་ཤིང༌། ཞལ་འཛུམ་པའི་ཐོར་ཚུགས་ཀྱི་རྩེ་མོར་ནོར་བུའི་རིན་པོ་ཆེས་བརྒྱན་པ། པདྨ་དང་ནོར་བུ་དང་ཨུཏྤ་ལའི་ཆུན་པོ་སྤེལ་བའི་ཐོད་ཀྱི་བར་ན་རིན་པོ་ཆེ་དང་ཟུར་ཕུད་ལྔ་རབ་ཏུ་གསལ་བའི་སྙན་གོང་ཨུཏྤལ་ལ་ཁ་བྱེ་ཞིང༌། སྙན་ཤལ་ནོར་བུ་འཕྱང་བས་མཛེས་པ། རིན་པོ་ཆེ་དང་མེ་ཏོག་སྣ་ཚོགས་པའི་དབུ་རྒྱན། མགུལ་རྒྱན། སྙན་ཆ། དོ་ཤལ། གདུ་བུའི་སིལ་ཁྲོལ་སྣ་ཚོགས་པས་བརྒྱན་པ། གཞོན་ནུ་ལོ་བརྒྱད་ལོན་པའི་ངང་ཚུལ་ཅན་འོད་ཟེར་དམར་པོར་རབ་ཏུ་འཕྲོ་ཞིང་ཟླ་བའི་རྒྱལ་ཡོལ་ཅན་ཤིན་ཏུ་མཛེས་པ་གཅིག་ཏུ་བསམ་པའི་ཐུགས་ཀར་པདྨ་དང་ཟླ་བའི་དབུས་སུ་བྷྲུྃ་ཡོངས་སུ་གྱུར་པ་ལས་འཁོར་ལོ་རྩིབས་བཞི་བའི་དབུས་སུ་རལ་གྲི་སོར་བཞི་པའི་ཆད་ཟུང་ལ་དྷཱིཿ རྩེ་མོ་ལ་ཧྲཱིཿ བར་གྱི་སྦལ་ལ་མཱུྃ། རྩིབས་ཀྱི་དབུས་སུ་རྩ་བའི་སྔགས་རྣམས་མར་མེའི་ཕྲེང་བ་བསྒྲིགས་པ་ལྟར་འོད་གསལ་བས་ཡིད་ཀྱི་མུན་པ་མ་ལུས་དག་པར་བྱེད་པར་བསམ། འདིར་བླ་མ་ཁ་ཅིག །རལ་གྲི་ཆང་ཟུང་གི་དྷཱིཿདང་རྩེ་མོའི་ཧྲཱིཿའི་བར་གྱི་སྦལ་རྩ་སྔགས། རྩིབས་ཀྱི་རྩེ་མོར་ཧྲཱིཿ རྩ་བར་ཧྲཱིཿ བར་དུ་རྩ་སྔགས་འགོད་པའང་བཞེད་ལ། ཁ་ཅིག་རལ་་གྲི་ལ་ས་བོན་གཉིས་བཀོད་ནས། རྩིབས་ལ་དྷཱིཿརེ་རེ་སྒོམ་པ་ཡང་ཕྱག་བཞེས་སུུ་མཛད་དོ། ། གང་ལྟར་སྒོམ་ཡང་དམིགས་པ་མ་གསལ་བར་དུ་གཅེས་སོ། །དེ་ནས་ཐུགས་ཀའི་རལ་གྲི་ལས་འོད་འཕྲོས་པས། །མདུན་གྱི་ལྷུང་བཟེད་ཀྱི་ནང་དུ་པདྨ་དང་ཟླ་བའི་སྟེང་དུ་རིལ་བུ་དེ་རྣམས་འོད་དུ་ཞུ་བ་ལས་ཧྲཱིཿསྔོན་པོ་འོད་འཕྲོ་བ་གཅིག་ཏུ་གྱུར་པའི་འོད་ཀྱིས་དོན་གཉིས་བྱས། ཚུར་འདུས་ཡོངས་སུ་གྱུར་པ་ལས་ལྷ་མོ་དབྱངས་ཅན་མ་སྔོན་མོ་འཛུམ་ཁྲོ་རབ་ཏུ་བརྗིད་པ། ཞལ་གཅིག་ཕྱག་གཉིས་ཕྱག་མཚན་དང་བཞུགས་ཚུལ་ཡབ་དང་མཐུན་པ། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། འོད་ཟེར་སྔོན་པོ་འཕྲོ་ཞིང་གཞོན་ནུ་མ་ལོ་བརྒྱད་ལོན་པ་ལྟ་བུའི་ཐུགས་ཀར། པདྨ་དང་ཟླ་བའི་སྟེང་དུ་པདྨ་འདབ་མ་བཞི་དང་ལྡན་པའི་དབུས་སུ་རལ་གྲིའི་ཆང་ཟུང་ལ་ཧྲཱིཿདང་རྩེ་མོར་དྷྲཱིཿ བར་གྱི་སྦལ་ལ་མཱུྃཿ འདབ་མ་རྣམས་ལ་རྩ་བའི་སྔགས་རྣམས་གཡོན་་སྐོར་དུ་ཡབ་ཀྱི་འཁོར་ལོ་པས་སོར་བཅུ་ཆས་དམའ་བ་ཁ་སྦྱར་གྱི་ཚོད་དུ་ཡོད་པའི་དཔངས་མཐོ་དམན་དུ་བསམ། འདིར་ཡང་སྔ་མ་བཞིན་བླ་མ་དེ་དག་སྔགས་ཀྱི་འགྲེས་ཡབ་ཀྱིས་མཚོན་པར་བཞེད་དོ། །དེ་ལྟར་བསྒོམས་པའི་ཐུགས་ཀ་ནས་ཡིག་འབྲུ་ལས་འཕྲོས་པའི་འོད་ཟེར་གྱིས་རང་བཞིན་གྱི་གནས་དང་རི་བོའི་རྩེ་ལྔ་ནས་ཡབ་ཡུམ་ཇི་ལྟར་བསྒོམ་པ་དེ་འདྲ་བའི་ཡེ་ཤེས་པ་གཉིས་པ་སངས་རྒྱས་དང་བྱང་ཆུབ་སེམས་དཔས་བསྐོར་བ་སྤྱན་དྲངས་ལ་མཆོད་དོ། །ཡབ་ལ་ཡབ་ཡུམ་ལ་ཡུམ་སངས་རྒྱས་དང་བྱང་ཆུབ་སེམས་དཔའི་ཚོགས་དང་བཅས་པ་གཉིས་སུ་མེད་པར་ཐིམ་པར་བསམ་ལ། ཐུགས་ཀའི་འཁོར་ལོ་ལས་འོད་བྱུང་བས་ལུས་ངག་ཡིད་གསུམ་གྱི་ནད་གདོན་སྡིག་སྒྲིབ་མི་ཤེས་པའི་མུན་པ་ཐམས་ཅད་བསལ་ནས་ཡེ་ཤེས་ཀྱི་སྣང་བ་རྒྱས་པ་བསམས་ལ། རྩེ་གཅིག་ཏུ་མ་ཡེངས་པས་ཡིག་འབྲུ་རལ་གྲི་དང་བཅས་པ་ལ་སེམས་མཉམ་བར་བཞག་གོ ། འདིའི་དུས་ན་ལུས་དྲང་པོར་འདུག་ལ་སྟེང་རླུང་མནན། འོག་རླུ་བསྡམ། མིག་སྣ་རྩེར་གཏད། སེམས་ཡིག་འབྲུ་ལ་བཟུང་ལ། མིག་མ་འགུལ་བས་རླུང་དལ་བུས་ཐུབ་ཐང་དུ་ནང་དུ་བཟུང་བ་དང༌། ཕྱིར་འཕང་བ་དང་དབང་དུ་གནས་པར་བྱ་བ་ནི་མན་ངག་དམ་པའོ། །དེ་ལྟར་སྒོམ་པས་སྐྱོན་བཟླས་པ་དང་སྤྲོ་བསྡུའི་རྣལ་འབྱོར་ལ་སེམས་བཟུང་བ་ནི། དེ་ལྟར་འཇམ་དཔལ་ཡབ་ཡུམ་ལ་སངས་རྒྱས་དང་བྱང་ཆུབ་སེམས་དཔའ་ས་གཞི་དང་བར་སྣང་གང་བས་བསྐོར་བར་བསམ་པ་རྣམས་ཀྱི་སྐུའི་འོད་ཀྱིས་རང་གཞན་གྱི་མི་ཤེས་པའི་མུན་པ་ཐམས་ཅད་བསལ། ཡེ་ཤེས་སྣང་བ་ཆེན་པོ་རྒྱས་བར་བསམ་ཞིང༌། འཇམ་དཔལ་ཐུགས་ཀའི་དྷཱིཿལས་སྔགས་ཀྱི་ཕྲེང་བ་རྣམས་མར་མེ་ལས་མར་མེ་ཆད་པ་ལྟར་འོད་ཀྱི་ཚུལ་དུ་ཡིག་འབྲུ་རྣམས་སྣ་བུག་གཡས་སུ་ཐོན། ཡུམ་གྱི་གཡོན་དུ་ཞུགས་ཐུགས་ཀའི་ཧྲཱིཿལས་གྲོལ་བའི་ཚུལ་དུ་སྣ་བུག་གཡས་ནས་ཐོན། འཇམ་དཔལ་གྱི་གཡོན་དུ་ཞུགས་ཏེ་འགལ་མེ་ལྟར་འཁོར་བ་དང་ མཉམ་བདག་གི་ཐུགས་ཀའི་སྔགས་ལས་འོད་ཟེར་ཕར་བྱུང་བ་དང་ལྷ་མོའི་ ཐུགས་ཀ་ནས་ཚུར་བྱུང་བ་གཉིས་ལྕགས་ཀྱུ་བཞིན་དུ་སྦྲིལ་ནས་འཁོར་བར་བསམ་པའི་སྔགས་ཕྲེང་དང་འོད་ཟེར་ཕྲེང་བར་འཁོར་བའི་ཕྲེང་བ་ལས་འོད་ཟེར་དཔག་ཏུ་མེད་པ་ཕྱིར་འཕྲོས་པའི་འོད་ཀྱིས་སངས་རྒྱས་དང་བྱང་ཆུབ་སེམས་དཔའ་དང༌། ཉི་མ་དང༌། ཟླ་བ་དང༌། གཟའ་དང༌།སྐར་མ་དང༌། རྩི་ཤི་ནགས་ཚལ་ལ་སོགས་པའི་འོད་གཟི་བརྗིད་ཚེ་བསོད་ནམས་ཤེས་རབ་ཐམས་ཅད་ཚུར་བསྡུ་ཐུགས་ཀའི་རལ་གྲི་སྔགས་དང་བཅས་པ་ལ་ཐིམ་པས་བདག་ཉིད་ཤེས་རབ་ཕུན་སུམ་ཚོགས་པར་གྱུར། ཡང་ཕྱིར་འཕྲོས་པའི་འོད་ཀྱིས་སྣོད་ཀྱི་འཇིག་རྟེན་ལ་ཕོབ །རིན་པོ་ཆེའི་གཞལ་ཡས་ཁང་དང་ཞིང་ཁམས་དག་པར་བསམ། ཡང་འོད་འཕྲོས་བཅུད་ཀྱི་སེམས་ཅན་ལ་ཕོག་པས་སེམས་ཅན་ཐམས་ཅད་འཇམ་དཔལ་གྱི་སྐུ་དང༌། སྒྲ་སྐད་ཐམས་ཅད་སྔགས་ཀྱི་རྒྱལ་པོ་ཉི་ཤུ་རྩ་གཅིག་པོའི་རང་སྒྲར་བསམས་ལ། ཡིད་འོང་འཕྲོས་ནུས་པ་ཐམས་ཅད་བཀུག །རང་གི་སྤྱི་བོར་ཐིམ་ཞིང་ཡེ་ཤེས་ཀྱི་སྣང་བ་རྒྱས་པར་བསམས་ལ། རྩ་བའི་སྔགས་ཅི་འགྲུབ་བཟླས་པ་བྱའོ། །དེ་ནས་རྫོགས་པའི་རིམ་པ་ལ་སེམས་བཟུང་བ་ལ། མཚན་མ་དང་བཅས་པ་དང༌། མཚན་མ་མེད་པ་གཉིས་ལས། མཚན་མ་དང་བཅས་པ་ནི། དེའི་རྗེས་ལ་མཚན་མོ་ཉལ་བའམ། འཕྲོ་གཅོད་པའི་ཚེ་གང་རུང་གི་ངང་ལ་བཞག་པར་གསུངས་ཀྱང་ཕྱག་ལེན་ལ་འདི་ལྟར་མཛད་དོ། །དེ་ཡང་སྔ་དྲོ་དང་ཕྱི་དྲོ་གུང་གི་ཐུན་རྣམས་ལ་བསྐྱེད་རིམ་བཟླས་བརྗོད་དང་བཅས་པ་ཟིན་པའི་རྗེས་ལ། རང་གི་ལྟེ་བའི་དབུས་སུ་ཟླ་བའི་དཀྱིལ་འཁོར་གྱི་སྟེང་དུ་ཐིག་ལེ་དམར་པོ་མར་མེ་འབར་བ་ལྟ་བུ་ཞིག་བསམ་པའི་འོད་ཀྱིས་སྤྱི་གཙུག་གི་ཧྃ་དཀར་པོ་མགོ་ཐུར་དུ་ལྟ་བ་ལ་ཕོག་པས་བདུད་རྩིའི་རྒྱུན་བབས་ལྟེ་བའི་མེ་ལ་ཕོག་པས་ཐིག་ལེ་དེ་ཇེ་གསལ་དུ་གྱུར་པ་ནི། དཔེར་ན་མར་མེ་ཟད་སྣུམ་ཐིགས་བབས་པ་བཞིན་གྱུར་བས་ལུས་ངག་ཡིད་གསུམ་གྱི་མུན་པ་ཐམས་ཅད་བསལ། ཡེ་ཤེས་ཀྱི་བདུད་རྩིས་ཁེངས་པར་བསམས་ལ། དེ་ནས་ཡང་རང་གི་སྙིང་གའི་འཁོར་ལོ་འོད་དུ་གྱུར་པ་སྙིང་གི་ཁོང་སེང་དུ་མར་མེ་འབར་བ་ལྟ་བུའི་འོད་ཀྱིས་དབུས་དང་ཕྱོགས་མཚམས་བརྒྱད་དུ་བུག་པ་གཏོད་པ་ལས་འོད་འཕྲོས་པས་སྤྱི་པའི་ཧྃ་ལ་ཕོག་བས་བདུད་རྩིའི་རྒྱུན་བབས། བུག་པ་དགུ་ནས་མར་བྱུང་བས་སྙིང་གི་ནང་ཐམས་ཅད་ཁེངས་པར་བསམས་ལ། བདེ་གསལ་མི་རྟོག་པའི་ངང་ལ་བཞག་གོ །གཉིས་པ་ནི། སྲོད་ཀྱི་ཐུན་གྱི་རྗེས་ལ། ཐུགས་ཀའི་རལ་རིའི་དྷཱིཿལས་འོད་འཕྲོས་པས་ཕྱི་སྣོད་ཀྱི་འཇིག་རྟེན་ལ་ཕོག་འོད་དུ་ཞུ་ནང་བཅུད་ཀྱི་སེམས་ཅན་ལ་ཐིམ། དེ་ཡང་འོད་དུ་ཞུ་ནས་མདུན་གྱི་དབྱངས་ཅན་མར་ཐིམ། དེ་ཡང་འོད་དུ་ཞུ་ནས་འཇམ་དཔལ་གྱི་ཐུགས་ཀར་ཐིམ། དེ་ཡང་རིམ་གྱིས་སྐུ་སྟོད་སྨད་ཐུགས་ཀའི་འཁོར་ལོ། དེ་རལ་རི། དེ་ཧྲཱིཿ དེ་དྷཱིཿ དྷཱིཿ འོད་དུ་ཞུ་ནས་ཐིག་ལེ་དམར་པོ་ཅིག་ཏུ་གྱུར་པ་ལ་དལ་ཅིག་སེམས་གཏད། དེ་ནས་ཐིག་ལེ་ལས་ཐིག་ལེ་སྔོན་པོ་གཅིག་ཆད་པས་གཉིས་སུ་གྱུར་པ་ལ་སེམས་གཏད། དེ་ནས་དེ་གཉིས་ཅུང་ཟད་འགུལ་བར་བསམས་ལ་རྩ་བའི་སྔགས་བརྗོད་མ་ཐག་ཐིག་ལེ་དེ་གཉིས་རྡོ་འཕངས་པ་ལྟར་ནམ་མཁར་ལར་ཐལ་མར་ཐལ་ཕར་ཐལ་ཚུར་ཐལ་སོང་ནས་ནམ་མཁའ་དང་སེམས་ཅན་གྱིས་གར་ཁྱབ་ཏུ་སོང་བར་བསམས་ལ། རྩ་བའི་སྔགས་ཅི་འགྲུབ་བརྗོད་ལ། ཉལ་བའི་དུས་སུ་ཐིག་ལེ་དེ་གཉིས་གཅིག་ཏུ་གྱུར། དེ་ཡང་འོད་དུ་ཞུ་ནས་ནམ་མཁའ་ལ་ཐིམ་པས་སྣང་བ་ཐམས་ཅད་དམར་ལམ་གྱིས་སོང་བར་བསམས་ལ་གང་དུ་ཡང་མི་རྟོག་པའི་ངང་ཕྱམ་གྱིས་ཉལ་ལོ། །བསྡུས་ནས་བཞག་པ་ནི། ཡབ་ཡུམ་གང་རུང་གི་ཐུགས་ཀའི་ས་བོན་ལ་དམིགས་ལ་རྩ་བའི་སྔགས་བཟླས་པས་ཆོས་ཐམས་ཅད་བརྗོད་དུ་མེད་པའི་ངང་དུ་ཕྱམ་གྱིས་གྱུར་པར་བསམས་ལ་ཉལ་ལོ། །དེ་དག་གི་མཐར་དགེ་བ་མི་དམིགས་པའི་ངང་ནས་བླ་ན་མེད་པའི་བྱང་ཆུབ་ཏུ་བསྡོའོ། །དེ་ལྟར་གྲངས་ཀྱིས་བསྙེན་པ་འབུལ་ཕྲག་བདུན། དུས་ཀྱི་བསྙེན་པ་ཞག་ཉི་ཤུ་རྩ་གཅིག ། མཚན་མའི་བསྙེན་པ་འགྲུབ་པའོ་རྟགས་མ་བྱུང་གི་བར་དུ་བྱའོ། །དེ་ལྟར་བྱས་པས་བསྙེན་པ་འགྲུབ་པའི་རྟགས་གསུམ་ལས། རབ་མངོན་སུམ་དུ་འོང་བ་ནི། ལྷུང་བཟེད་ཀྱི་རིལ་བུ་རྒྱལ་པོ་བཞིར་མཐོང་བ་དང༌། དབྱངས་ཅན་མར་མཐོང་བ་དང༌། ཉི་མ་ཟླ་བར་མཐོང་བ་དང༌། འོད་དང་དུ་བར་མཐོང་བའོ། །འགྲང་ལ་ཉམས་སྣང་དུ་དེ་དག་འབྱུང་བའོ། །ཐ་མ་ལ་རྨི་ལམ་དུ་འོད་ཆེན་པོ་དང༌། དུ་བ་དང༌། རྡ་དང༌། དུང་དང༌། རོལ་མོའི་སྒྲ་དང༌། མེ་ཏོག་འཛུགས་པ་དང༌། འབྲུ་བ་དང༌། ཞིང་རྨོ་བ་དང༌། སྣག་ཚ་འཐུང་བ་དང༌། གླུ་གར་བྱེད་བ་དང༌། ཡི་གེ་འབྲི་ཀློག་དང༌། ཉི་ཟླ་ཤར་བ་ལ་སོགས་པའོ། །དེ་དག་གང་བྱུང་ཡང་སྔར་བཤད་པའི་ཡོན་ཏན་དེ་དག་འབྱུང་ཞིང་གྲུབ་པའི་རྟགས་ཡིན་ནོ། །འདི་ལྟར་སྒྲུབ་པའི་ཚེ་རྫུན་དང༌། ཤ་ཆང་དང༌། སྒོག་ཙོང་དང༌། སྡོ་ངད་དང༌། འཁོན་དང༌། ཞེ་སྡང་དང༌། སྡིག་གྲོགས་དང༌། མྱ་ངན་དྲག་པོ་བྱེད་པའི་སར་འགྲོ་བ་དང་བྱེད་པ་དང༌། སྨྲེ་སྔགས་ལ་སོགས་པ་སེམས་ལ་གནོད་པ་སྟེ། ལུས་སེམས་མི་གཙང་བ་དེ་དག་སྤངས་ལ་གཙང་སྦྲ་ཁོ་ན་གལ་ཆེའོ། །སྒྲུབ་པའི་ལེའུ་སྟེག་གསུམ་པའོ།། །། དེ་ལྟར་དུ་བསྒྲུབས་ཀྱང་རྟགས་མ་བྱུང་ན། དོན་བཞི་པ་སྤོབས་པའི་ཆོ་ག་ནི། རང་ཉིད་དབྱངས་ཅན་མ་བསྒོམ་ཞིང་མདུན་དུ་འཇམ་དཔལ་བསྒོམས་ཏེ་རང་གི་སྣང་བུག་གཡོན་ནས་མདུན་གྱི་གཡས་སུ་ཞུགས་ཏེ་འཁོར་བར་བསམ་ཞིང༌། འོད་ཀྱི་ཕྲེང་བ་ཡང་སྔ་མ་ལས་ལྡོག་པའི་ཚུལ་དུ་བྱས་ལ། ཨོཾ་དྷཱིཿཧྲཱིཿམ་མེ་དཱི་པ་མཉྫུ་ཤྲཱི་མཱུྃ་ཧྲཱིཿཔྲཛྙཱ་བརྡྷ་ནི་དྷཱིཿཧྲཱིཿསྭཱཧཱ། ཞེས་བཟླས་ཏེ་སྤྲོ་བསྡུ་སྔ་མ་བཞིན་བྱས་ལ། འཁོར་ལོའི་ཡི་གེ་དང་རལ་གྲི་ཐུར་དུ་འཕྱང་བ་ལ་སེམས་བཟུང་བ་བཟླས་པས་སྔར་གྱི་རྟགས་མི་འབྱུང་མི་སྲིད་དོ། །རྟགས་བྱུང་བ་དང་སྔ་མ་བཞིན་བསྒོམ་མོ། །སྤོགས་པའི་ལེའུ་་སྟེ་བཞི་པའོ།། །། དེ་ལྟར་སྒོམ་ཞིང་སྒྲུབ་པའི་དུས་སུ་རང་ཇི་ལྟར་འདོད་པའི་དངོས་གྲུབ་འགྲུབ་པའི་ཁ་བསྒྱུར་ནི། བསྐྱེད་རྫོགས་རྣམས་སྒོམ་ཚུལ་སྔ་མ་བཞིན་བྱས་ཏེ། སྔགས་དང་འོད་ཟེར་གྱི་ཕྲེང་བའི་འོད་ཀྱིས་འཆད་བ་དང༌། རྩོད་པ་དང༌། རྩོམ་པ་ལ་སོགས་པའི་ཤེས་རབ་གང་འདོད་ཀྱང་དེའི་དངོས་གྲུབ་སངས་རྒྱས་དང་བྱང་ཆུབ་སེམས་དཔའ་ཉན་རང་ལ་སོགས་པའི་ཤེས་རབ་དེ་ཉིད་བསྡུས་ནས་རང་གི་ལུས་ཁེངས་ཏེ་གང་འདོད་པའི་ཤེས་རབ་དང་ལྡན་པར་བསམ། དེ་བཞིན་དུ་དབང་དུ་བྱ་བ་ཕ་རོལ་གྱི་སེམས་དང༌། ངག་བརྐུ་བ་དང་འཕྲོག་པ་ལ་སོགས་པ་འཆད་པར་འགྱུར་བ་དེ་དག་དེ་བཞིན་དུ་ཐོབ་པར་བསམས་ལ་བྱས་པས་དེ་ཁོ་ན་བཞིན་དུ་འགྲུབ་པའོ། །ཁ་སྒྱུར་གྱི་ལེའུ་སྟེ་ལྔ་པའོ།། །། དེ་ལྟར་ཇི་ལྟར་འདོད་པའི་དངོས་གྲུབ་ཀྱི་རྟགས་དང་ལྡན་པས་དེའི་སྤྱིན་སྲེག་བྱས་ལ་དངོས་གྲུབ་མྱུར་དུ་འགྲུབ་ཅིང་བརྟན་པར་བྱ་བ་ནི། གནས་དེ་ཉིད་དུ་མཎྜལ་པདྨ་འདབ་བརྒྱད་བྲིས་པའི་སྟེང་དུ་ཤིང་བརྩེགས་ལ། གཡས་སུ་བསྲེས་རྫས། ཡམ་ཤིང་སོར་བརྒྱད་པ། མེ་ཏོག །བདུག་སྤོས། མར་མེ། དྲི་ཆབ། བཤོས་གཙང༌། ནས། གྲོ། འབྲས། མར་ཁུ་དཱུ་རྦ། ཀུ་ཤ་བཞག ། གཡོན་དུ་མཆོད་པ་ལྔ་གཏོར་མ་དང་བཅས་བཞག་ནས། ཐབ་ཀྱི་ནང་དུ་མེ་སྦར་ལ་འཇམ་དཔལ་ཡབ་ཡུམ་བསྐྱེད་ལ་ཡེ་ཤེས་པ་བཞུག །རིན་ཆེན་འབྱུང་ལྡན་གྱིས་དབུར་བརྒྱན། ཕྱག་དང་མཆོད་པ་མདོར་བསྡུས་བྱས་ལ། བསྲེག་རྫས་རྣམས་ཨོཾ་ཨཱཿཧཱུྃ་གསུམ་གྱིས་བདུད་རྩིར་བསམས་ལ་རྩ་བའི་སྔགས་སམ། ཨོཾ་ཧྲཱིཿདྷཱིཿམཱུྃཿསྭཱཧཱ། བདག་གི་པྲཛྙཱ་པུཥྟིཾ་ཀུ་རུ་སྭཱཧཱ། ཞེས་པས་རེ་རེ་བཞིན་དབུལ། འབུལ་བ་རྣམས་རྫོགས་པ་དང་གཏོར་མ་བཏད་ལ། བསྟོད་པ་བྱས་ཏེ་འདོད་པའི་དོན་ལ་གསོལ་བ་བཏབ་ནས། ཡེ་ཤེས་པ་གཤེགས་པ་ནི། ཨོཾ། ཁྱེད་ཀྱིས་སེམས་ཅན་དོན་ཀུན་མཛོད། །རྗེས་སུ་མཐུན་པའི་དངོས་གྲུབ་ སྩོལ། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་འབྱོན་པར་མཛད་དུ་གསོལ། །ཞེས་བརྗོད། དམ་ཚིག་པ་བདག་ལ་བསྡུས་ནས་ལས་ཀྱི་རྗེས་མི་མངོན་པར་བྱ་ཞིང༌། ཐལ་བ་རི་རྩེ་འམ་ཆུ་ཀླུང་ཆེན་པོར་དོར་བས་ཤེས་རབ་ཆེན་པོ་འཕེལ་ཞིང་རྒྱས་པར་འགྱུར་རོ། །སྦྱིན་སྲེག་གི་གྲངས་ནི་སྟོང་ཕྲག་བདུན་ནོ། །སྦྱིན་སྲེག་གི་ལེའུ་སྟེ་དྲུག་པའོ།། །། དེ་ནས་ལས་ཚོགས་ཀྱི་རིམ་པ་ལ། རིལ་བུ་བཟའ་བ། ཚེ་དང་འབྱོར་པ་སྤེལ་བ། གཏོར་མ། དབང་དུ་བསྡུ་པ། ངག་བསྡུ་བ། མངོན་ཤེས་སྒྲུབ་པ། རིག་པ་འཛིན་པ། ཞལ་ལ་བལྟ་བ་དང་བརྒྱད་ལས། དང་པོ་ནི། དེ་ལྟར་བསྒྲུབས་པའི་རྟགས་རྣམས་རྫོགས་ཤིང་སྦྱིན་སྲེག་བྱས་པའི་རྗེས་ལ། མདུན་གྱི་རིལ་བུ་རྣམས་བཟའ་བའི་ལས་ཚོགས་ནི། སྒྲུབ་པ་དང་སྦྱིན་སྲེག་ཐོན་པའི་ནངས་པར་མདུན་གྱི་དབྱངས་ཅན་མ་ལ་སངས་རྒྱས་དང་བྱང་ཆུབ་སེམས་དཔའ་བསྐོར་བ་རྣམས་འོད་དུ་ཞུ་ནས་རིལ་བུའི་རང་བཞིན་དུ་བསམ་པ་ལས་འོད་འཕྲོས་པས་ཕྱོགས་བཅུའི་ཚེ་དང་དཔལ་འབྱོར་དང༌། གཟི་བརྗིད་དང༌། ཁྱད་པར་དུ་གང་འདོད་པའི་དངོས་གྲུབ་ཤེས་རབ་དག་བསྡུས་ནས་དེ་ལ་ཐིམ་པས་ཚེ་དང་བཀྲག་དང་གཟི་བརྗིད་རྒྱས་པར་འདོད་ན། རིལ་བུ་རྣམས་ཡེ་ཤེས་ཀྱི་བདུད་རྩི་ཁ་དོག་ལྔ་དང་ལྡན་པར་བསམས་ལ། འཁོར་ལོས་དྲིལ་ལ་མགུལ་དུ་བཅངས་ནས་ཞག་ཉི་ཤུ་རྩ་གཅིག་གི་ཉི་མ་རྩེ་ཤར་བ་རིལ་བུ་དེ་རྣམས་ཀྱི་ནང་ནས་རིལ་བུ་ལྔ་ལྔ་བདུད་རྩི་བསམས་ཏེ། རང་ཉིད་འཇམ་དཔལ་དུ་མོས་པས་ཁོང་དུ་མིད་པས་ཚེ་དང་བཀྲག་དང་གཟི་བརྗིད་རྒྱས་པར་བསམས་ལ། ལྷག་མ་བརྒྱད་སྒྲུབ་པའི་དངོས་གྲུབ་ཀྱི་རྟེན་དུ་ལུས་དང་མི་འབྲལ་བར་བཅང་ངོ༌། །དེ་བཞིན་དུ་འཆད་པ་ལ་དཔལ་བེའུ་དང༌། རྩོད་པ་་ལ་རལ་གྲི་དང༌། རྩོམ་པ་ལ་པདྨ་དཀར་པོ་དང༌། གྲགས་པ་ཕུན་སུམ་ཚོགས་པ་ལ་དུང་དང༌། འབྱོར་པ་རྒྱས་པར་འདོད་པ་ལ་ཡིད་བཞིན་ནོར་བུ་དང༌། འགྲོ་བ་དབང་དུ་བསྡུ་བ་ལ་ལི་ཁྲི་དང༌། བསམ་པ་ཐམས་ཅད་འགྲུབ་པར་འདོད་པ་ལ་བུམ་པ་བཟང་པོར་བསམས་ལ་བཟའོ། །དེས་ནི་ཇི་ལྟར་འདོད་པའི་དོན་ཡིད་བཞིན་དུ་འགྲུབ་པར་འགྱུར་ རོ། །དེ་རྣམས་ལྷག་མ་བརྒྱད་ནི་རྟེན་དུ་བྱས་ཏེ་བཅངས་ལ། ཕྱིས་སྒྲུབ་པ་བྱེད་ནའང་དེའི་གསེབ་ཏུ་བཏགས་པས་ཉིས་འགྱུར་གྱིས་འགྲུབ་ཐག་ཉེ་ཞིང་བྱིན་པ་ཆེ་བ་ཡིན་ནོ། རིལ་བུ་བཟའ་བའི་ལས་ཚོགས་སོ། ། གཉིས་པ་ཚེ་དང་འབྱོར་བ་སྤེལ་བ་ནི། གོང་གི་རིལ་བུ་དེ་རྣམས་སྒྲུབ་དུས་ནས་ཚེ་དང་འབྱོར་པ་ཐམས་ཅད་བསྡུས་ཏེ་རིལ་བུར་ཐིམ་པར་བསམས་ལ། ཞག་ཉེར་གཅིག་ཏུ་བསྒྲུབས་ནས་ཁྱད་པར་རིལ་བུ་རྣམས་སེར་པོས་ཁ་བསྒྱུར་ཞིང༌། ལྷ་ཡབ་ཡུམ་གཉིས་ཀའང་སེར་པོ་བསམས་ནས་བསྒྲུབས་ཐོན་པ་དང་རིལ་བུ་སྔ་མ་བཞིན་ཟོས་ན་ཚེ་ཉི་ཟླ་དང་མཉམ་ཞིང་འབྱོར་པ་རྒྱལ་པོ་དང་འདྲ་བར་འགྱུར་རོ། །ཚེ་དང་འབྱོར་པ་སྤེལ་པའི་ལས་ཚོགས་སོ། ། གསུམ་པ་གཏོར་མ་ནི། གོང་གི་སྒྲུབ་པའི་ཐུན་མཚམས་དང་དུས་རྒྱུན་དུ་མ་ཆགས་པར་ཕྱག་ལེན་དུ་མཛད་བདེའི་མན་ངག་ནི། རིན་པོ་ཆེ་ལ་སོགས་པའི་སྣོད་གཙང་མར་དཀར་གསུམ་མངར་གསུམ་དྲི་བཟང་སྨན་འབྲུ་ལ་སོགས་པ་བླུགས་ཏེ། སྭ་བྷཱ་ཝས་སྟོང་པར་བསམས་པའི་ངང་ལས། བྷྲཱུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་ཨཱཿཧཱུྃ་གསུམ་ཡོངས་སུ་གྱུར་པ་ལས་བདུད་རྩིའི་རྒྱ་མཚོ་ནམ་མཁའ་དང་མཉམ་པའི་ནང་དུ་གང་ལ་ཅི་དགོས་པའི་ཡོ་བྱད་ལྷ་དང་མིའི་ཕུན་སུམ་ཚོགས་པ་ཐམས་ཅད་བསམས་ལ། ཨོཾ་ཨཱཿཧཱུྃ་གསུམ་གྱིས་བྱིན་གྱིས་བརླབས་ཏེ། མདུན་གྱི་ནམ་མཁར་པདྨའི་འདབ་མ་མཐོང་དམན་སུམ་རིམ་དུ་ཡོད་པའི་སྟེང་གི་ནམ་མཁར་ལ་བླ་མ། དབུས་ཀྱི་ལྟེ་བར་ཡི་དམ། འདབ་མ་བརྒྱད་པའི་དང་པོ་ལ་སངས་རྒྱས། བར་པ་ལ་བྱང་ཆུབ་སེམས་དཔའ། ཐ་མ་ལ་སྲུང་མ་དམ་ཚིག་ཅན་དང་འགྲོ་བ་རིགས་དྲུག་སྲིད་པ་བར་མ་དོའི་སེམས་ཅན་སྐྱེ་བ་བཞི་རང་བཅས་པ་རྣམས་བསམས་ལ། རང་གི་སྙིང་ག་ནས་བྷཱིཿལས་འོད་འཕྲོས་པས་དེ་ཁོ་ན་འདྲ་བའི་ཡེ་ཤེས་པ་བྱོན་ནས་དེ་རྣམས་ལ་སོ་སོར་ཐིམ་པས་བསམས་ལ། རྩ་སྔགས་ཀྱི་མཐར་ཨི་དཾ་གྲྀ་ཧྞ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི་བཏགས་ལ་ལྔའམ་བདུན་གྱིས་ཕུལ་བས། དེ་དག་གི་ཞལ་ནས་ལྗགས་རྡོ་རྗེའི་སྦུ་གུ་ཅན་ལས་འོད་བྱུང་གཏོར་མ་ལ་གསོལ་ཞིང་ཉེ་བར་མཁོ་བའི་དངོས་པོ་བསྣམས་པར་བསམས་ལ། བསྟོད་པས་བསྟོད་ནས་མཉེས་པ་ལ་བཟང་པོ་པར་གསོལ་ཏེ། ཡེ་ཤེས་པ་དང་འཇིག་རྟེན་པའི་འཁོར་རྣམས་གཤེགས་པར་བསམ་ཞིང༌། འཇིག་རྟེན་ལས་འདས་པའི་དམ་ཚིག་པ་རྣམས་རང་ལ་བསྡུས་ལ་མི་དམིགས་པའི་ངང་ལ་དར་ཅིག་བཞག་ནས་བསྔོ་བ་བྱ། དེས་ནི་དངོས་གྲུབ་ཉེ་ཞིང་བར་ཆད་ཀྱིས་མི་ཚུགས་པ་ཡིན་ནོ། །གཏོར་མའི་ལས་ཚོགས་སོ། ། བཞི་པ་དབང་དུ་བྱ་བ་ལ། འགྲོ་བ་ཕལ་པ་དབང་བསྡུ་བ་དང༌། མཆོག་དབང་དུ་བསྡུ་བའོ། །དང་པོ་ལ་གཉིས་ལས། འགྲོ་བ་སྤྱི་དབང་དུ་བྱ་བ་ནི། སྔར་གྱི་རྫས་བཅུ་གཉིས་ཀྱི་སྟེང་དུ་ལི་ཁྲི་དང༌། སེང་ལྡེང་སིནྡྷཱུ་ར་རྣམས་སྦྱར་ལ་རྒྱ་སྐྱེགས་ཀྱིས་ཁབ་བསྒྱུར་ལ། སྔར་གྱི་འཁོར་ལོ་ལ་འགྲོ་བ་ཐམས་ཅད་དབང་དུ་སྡུས་ཤིག་གི་སྤེལ་ཚིག་བྲིས་པར་བསྡུས་ལ། ལྷ་རྣམས་དམར་པོར་གསལ་བཏབ་ནས་སྔ་མ་བཞིན་སྒྲུབ་ཅིང་ཁྱད་པར་དུ་མདུན་གྱི་རིལ་བུ་དབྱངས་ཅན་མ་དམར་མོར་བསམ་པའི་ཐུགས་ཀའི་རལ་གྲི་དང་ཧྲཱིཿལས་འོད་ཟེར་འཕྲོས་པས། ལྷ་དང་ཀླུ་དང་གནོད་སྦྱིན་དང་དྲི་ཟ་དང་སྣོད་བཅུད་ཐམས་ཅད་ལ་ཕོག །འོད་དུ་ཞུ་རིལ་བུ་ལ་ཐིམ་པར་བསམ་ཞིང༌། ཨོཾ་ཧྲཱིཿདྷཱིཿམ་མེ་དཱི་པ་མཛྙུ་ཤྲཱི་མཱུཾཿཧྲཱིཿཤྲཱི་སེང་ཧོ་ཥཿམུ་པ་ཏ་མཉྫུ་ཤྲཱི་ལོ་ཀ་སརྦ་པ་ཤཾ་ཀུ་རུ་སྭཱཧཱ། ཞེས་ཁྲི་ཕྲག་གཅིག་ཏུ་བཟླས་པས་རིལ་བུ་ལས་འོད་དང༌། རླངས་པ་དང༌། མེ་ཏོག་གི་ཆར་བྱུང་ན་འགྲུབ་པ་རབ། རྨི་ལམ་དུ་བྱུང་ན་འབྲིང༌། ཐ་མ་ཡང་ཕ་རོལ་སྙིང་ལ་དུང་དུང་པ་བྱུང་ན་རིལ་བུ་འཁོར་ལོས་དྲི་བ་སྔ་མ་བཞིན་མགུལ་དུ་བཏགས་ཏེ་ཕུད་ཁ་ཅིག་བཟའ། ཁ་ཅིག་བཅད། གཞན་རྣམས་རྒྱལ་པོའི་ཕོ་བྲང་ངམ། །གླིང་ངམ༌། ལམ་གྱི་བཞི་མདོའམ། ཚོང་དུས་སམ། མདོར་ན་མི་མང་པོ་འདུ་བའི་སར་བ་དམར་སེར་གྱི་ལྕི་བ་དང་བསྲེས་ལ་དུད་པ་བཏང་ན་དེ་ཐམས་ཅད་དབང་དུ་འགྱུར་རོ། ། གཉིས་པ་བྱེ་བྲག་སྐྱེས་པ་བུད་མེད་དབང་དུ་བྱ་བ་ལ། སྔར་གྱི་རྫས་རྣམས་ཀྱི་སྟེང་དུ་པདྨ་རཀྟ་དང་གི་ཝཾ་བསྲེས་ལ་རིལ་བུ་དམར་པོ་བྱ། འཁོར་ལོ་ལ་ཡང་དེ་དང་མཐུན་པར་བྲིས་ལ་རིལ་བུ་དྲིལ་ནས་མདུན་དུ་བཞག་ལ། རང་ཉིད་འཇམ་དཔལ་དང་དབྱངས་ཅན་མར་བསྐྱེད་པ་གཉིས་ལས། ཕོ་དབང་དུ་བྱེད་ན་རང་ཉིད་དབྱངས་ཅན། མདུན་གྱི་རིལ་བུ་འཇམ་དཔལ་དུ་བསྐྱེད་ལ་ཡེ་ཤེས་པ་བཅུག་པའི་འོད་ཟེར་གྱིས་བསྒྲུབ་བྱའི་རྣམ་ཤེས་བཀུག་ནས་རིལ་བུར་བསམ་ཞིང༌། མོ་དབང་དུ་བྱེད་ན་དེ་ལས་ལྡོག་པས་བསྒྲུབ་བྱ་མོའི་རྣམ་ཤེས་རང་དང་མདུན་གྱི་ལྷའི་འོད་ཟེར་གྱིས་བཀུག་པ་བདག་ལ་ཆགས་བཞིན་དུ་རིལ་བུ་ལ་ཐིམ་པར་བསམས་ལ། རྩ་སྔགས་ཀྱི་སྤེལ་ཚིག་ཏུ་ཆེ་གེ་བ་ཤཾ་ཀུ་རུ་ཧོཿབཏགས་བཟླས་ཏེ་རྟགས་བྱུང་བ་དང་སྔ་མ་བཞིན་རང་བཟའ་ཞིང་བཅང༌། ཕ་རོལ་པོ་དེ་ཉིད་ཀྱི་གོས་སམ་བཟའ་བཏུང་ལ་བྱུགས་ཏེ་བྱིན་ན་གང་དབང་དུ་བྱ་བ་དེ་འགྲུབ་པར་འགྱུར་རོ། །དེ་བཞིན་དུ་འབངས་ལ་ཚབ་གསུམ། སྐྱེས་པ་ལ་གུར་གུམ། བུད་མེད་ལ་ཟླ་བའི་ཁུ་བ། མི་ཕལ་པ་ལ་སེར་ལྡེང་སྦྱར་ལ་བསྒྲུབ་ན་ཇི་ལྟར་འདོད་པ་དེ་དབང་དུ་འགྱུར་རོ། ། གཉིས་པ་མཆོག་དབང་དུ་བསྡུ་བ་ནི། སྔར་གྱི་རྫས་བཅུ་གཉིས་པོའི་སྟེང་དུ། རྒྱལ་པོ་ལ་ལྕགས་ཕྱེ། བཙུན་མོ་ལ་གི་ཝཾ། བློན་པོ་ལ་མགྲོན་བུ། དགེ་བའི་བཤེས་གཉེན་ལ་རིན་པོ་ཆེ། སྨན་པ་ལ་ཨ་རུ་ར་མ་ཆུ་སྙུང་བཏང་ལ་སྔ་མ་བཞིན་སོ་སོའི་མིང་སྤེལ་ཏེ་བསྒྲུབས་པའི་རིལ་བུ་དེ་དག་ལ་བྱུང་པའམ། བཟའ་བཏུང་དུ་སྦྱར་བ་འམ། དུད་པ་བཏང་ཞིང༌། རང་གི་དཔྲལ་བར་ཐིག་ལེ་བྱས་ལ་བསྒྲུབ་བྱ་ལ་བལྟས་ན་དེ་ཉིད་དབང་དུ་འགྱུར་རོ། །དབང་དུ་བསྡུ་བའི་ལས་ཚོགས་སོ། ། ལྔ་པ་ངག་བསྡུ་བ་ནི། པཎྜི་ཏའམ། དགེ་བའི་བཤེས་སམ་སྔགས་པ་ནུས་པ་ཅན་ནམ། རིགས་ཀྱི་གཙོ་བོ་དྲན་པ་ཅན་ནམ། བསྒྲུབ་བྱ་ཤེས་རབ་ཅན་ནམ། ཤགས་སམ། རྩོད་པ་དྲག་པོས་རྒོལ་བ་རྣམས་ལ་བྱ་སྟེ། དེ་ཡང་ངག་རྐུ་བ་དང་འཕྲོག་པ་གཉིས་ལས། པཎྜི་ཏའམ་དགེ་བའི་བཤེས་གཉེན་ལ་སོགས་པ་ཡུལ་མཆོག་རྣམས་ཀྱི་ངག་བརྐུ་བར་བྱ་སྟེ། དེ་ཡང་བསྒྲུབ་བྱ་དེའི་ལྕེ་ཡི་སྟེང་ན་པདྨ་དམར་པོ་འདབ་མ་བརྒྱད་པ་ཁ་ཐུར་དུ་ལྟ་བ་དང༌། སྙིང་གི་ནང་དུ་པདྨ་དམར་པོ་འདབ་མ་བརྒྱད་པ་ཁ་གྱེན་དུ་བསྟན་པ་གཉིས་ཁ་སྦྱོར་གྱི་ནང་དུ། ཁོ་ཡི་རྣམ་པར་ཤེས་པ་དང་ཤེས་རབ་ཀྱི་ངོ་བོ་ཨཱ་ལི་དམར་པོ་དང་ཀཱ་ལི་དཀར་པོས་མེར་གྱིས་ཁེངས་པ་ལ། རང་གི་སྙིང་ཀའི་དྷཱིཿལས་འོད་འཕྲོས་པས་ཕྱོགས་བཅུའི་སངས་རྒྱས་ལ་སོགས་པའི་ཤེས་རབ་ཐམས་ཅད་བསྡུས་ནས་དེ་ལ་ཐིམ་པས་བསྒྲུབ་བྱ་དེ་ཤེས་རབ་དང་ལྡན་པར་བསམ། དེ་ནས་རང་གི་སྙིང་གའི་དྷཱིཿལས་རྣམ་ཤེས་ཀྱི་བུང་བ་དམར་པོ་གྲངས་མེད་པ་འཕྲོས་ནས་བསྒྲུབ་བྱའི་ཁོང་པར་སོང་ནས་ཨཱ་ལི་ཀཱ་ལི་རྣམས་སོ་སོ་ཁྱེར་ནས་རང་གི་སྙིང་ཁ་དང་ལྕེ་ཡི་སྟེང་དུ་ཐིམ་པར་བསམ་ཞིང༌། རྩ་སྔགས་ཀྱི་མཐར་ཆེ་གེ་མོའི་ངག་བྷི་ཤི་ཀུ་རུ་ཧོཿཞེས་བརྒྱ་རྩ་བརྒྱད་ལ་སོགས་པ་བཟླས་ལ། ཁོ་ཡི་སྙིང་དང་ལྕེའི་པདྨ་རང་གི་སྙིང་དང་ལྕེ་ཡི་པདྨ་ལ་ཐིམ་པས། རང་གི་སྙིང་ཀར་འཇམ་དཔལ་དང་ལྕེ་སྟེང་དུ་དབྱངས་ཅན་མའི་འཁོར་ལོ་གསལ་བཏབ་ལ་སྔགས་བཟླས་པས། ཁོ་ཡི་དྲན་པ་དང་ཤེས་རབ་ཉམས་ནས་རང་ལ་རྒྱས་པར་འགྱུར་རོ། །ངག་འཕྲོག་པ་ནི། གཙོ་བོའི་རྩོད་བ་དང་ཤག་འགྲན་པའི་ཟླ་ལ་སོགས་པ་རང་བས་ཡུལ་དམན་པ་རྣམས་ལ་བྱ་སྟེ། དེ་ཡང་བསྒྲུབ་བྱ་དེ་ཡི་ལུས་ཀྱི་ནང་ན་རྩ་ཨ་ཝ་དྷཱུ་ཏི་རྒྱུ་མ་ཕུས་བཏབ་པ་དྲང་པོར་གྱེན་དུ་ལངས་པ་ལྟ་བུའི་མར་སྣ་གསང་གནས་དང་ཡར་སྣ་སྨིན་མཚམས་ལ་ཐུག་པའི་ནང་དུ་ཤེས་རབ་ཀྱི་ངོ་བོ་ཁོ་ཡི་རྣམ་ཤེས་ཨ་དཀར་པོས་ཐག་གིས་གང་བའི་སྨིན་མཚམས་སུ་བུག་པ་གྲུ་གསུམ་ལ་རྩ་དེའི་ཁ་བསྟན་ནས་ཨ་རྣམས་དཀར་ཉུག་ཉུག་ཡོད་པར་བསམ། དེ་ནས་རང་གི་ཐུགས་ཀའི་དྷཱིཿལས་འོད་དམར་པོ་འཕྲོས་པས་ཁོ་ཡི་སྨིན་མཚམས་ཀྱི་བུག་པའི་ཨ་རྣམས་ལ་ཕོག །ཨ་རྣམས་རིམ་པས་ཚུར་དྲངས་ཏེ་རང་གི་ཁོང་པར་ཐིམ་པས་འཕྲལ་ལ་ཤེས་རབ་ཀྱིས་གང་ཞིང༌། ཁོ་ཡི་ཤེས་རབ་འཕྲལ་ལ་ཟད་དེ་སྟོང་སངས་སོང་བར་བསམ་ཞིང་སྔར་གྱི་སྔགས་བཟླས་ཏེ། མཐར་ཁོ་ཡི་ལུས་སྟོང་པར་སོང༌། རང་གི་ལུས་གང་ནས་ཤེས་རབ་རྒྱས་པར་བསམས་ལ། ཁོ་ཡི་དྲན་པ་ཉམས་ཤིང་རང་གི་དྲན་པ་སྔོན་ལས་ཁྱད་པར་དུ་འཕགསཔ་ཐོབ་པར་འགྱུར་རོ། །སླར་ཡང་བླ་མ་དམ་པ་ལས་བརྒྱུདཔའི་གདམས་པ་ནི། བསྒྲུབ་བྱ་ཕ་རོལ་པོ་ཤེས་རབ་དང་ལྡན་པ་རྣམས་ཀྱི་སྙིང་གར་པདྨའི་སྡོང་པོ་འདབ་མ་རྒྱས་པའི་སྟེང་དུ་རྣམ་ཤེས་ཀྱི་ངོ་བོ་ཨཱ་ལི་ཀཱ་ལི་རེ་བསམས་ལ། རང་གི་སྙིང་ཀར་འཇམ་དཔལ་གྱི་རལ་གྲིའི་དྷཱིཿལས་རྣམ་ཤེས་ཀྱི་བུང་བ་མང་པོ་འཕྲོས་པས་ཁོ་ཡི་ཁོང་པར་ཞུགས་ནས་ཡི་གེ་རྣམས་བསྡུས་ཏེ་རང་གི་ཁོང་པར་ཐིམ། ཡང་བུང་བ་རྣམས་ཁོ་ཡི་ཁོག་པར་སོང་བས་པདྨ་རྣམས་ཀྱི་བཅུད་དང་བཀྲག་དང་གཟི་མདངས་ཐམས་ཅད་འཇིབས། རང་གི་ཁོང་པའི་དྷཱིཿལ་ཐིམ་པས་ཤེས་རབ་དང་བཀྲག་མདངས་གཟི་བརྗིད་རྒྱས། ཡང་དེ་བཞིན་དུ་ཡང་ནས་ཡང་དུ་བསམ་པའི་མཐར་ཁོ་ཡི་ཁོང་པའི་པད་སྡོད་རྙིངས་ཤིང་ནུས་པ་མེད་ལ། རང་གི་སྙིང་གའི་དྷཱིཿདང་འཁོར་ལོའི་བཀྲག་མདངས་རྒྱས་ཤིང་ནུས་པ་དང་ལྡན་པར་བསམས་ནས་སྔགས་བཟླས་ན་གཞན་གྱི་ཤེས་རབ་དང་གཟི་བརྗིད་ཚེ་དང་བསོད་ནམས་ཐམས་ཅད་རང་ལ་འཕོ་བར་འགྱུར་རོ། །འདི་ནི་ཤིན་ཏུ་གསང་བའི་མན་ངག་ཕྱི་རབས་ཀྱི་དོན་དུ་ཡི་གེར་བཀོད་པའོ། །དབང་དུ་བྱ་བའི་ཁྱད་པར་ལས་ཤེས་རབ་རྒྱས་པར་བྱེད་པ་སྟེ། ངག་བསྡུ་བའི་ལས་ཚོགས་སོ། ། དྲུག་པ་མངོན་ཤེས་སྒྲུབ་པ་ནི། ལྷུང་བཟེད་ཀྱི་འཁོར་ལོའི་ནང་དུ་སྔར་གྱི་སྨན་རྣམས་ཀྱི་སྟེང་དུ་མུ་ཏིག་དམར་པོ་དང་ཀ་ར་སྦྱར་བའི་རིལ་བུ་བྱས་ལ། འཇམ་དཔལ་དང་དབྱངས་ཅན་མའི་སྒོམ་རིམ་སྔར་བཞིན་བྱེད་ཅིང༌། ཨོཾ་ཧྲཱིཿདྷཱིཿ མ་མེ་དཱི་པ་མཉྫུ་ཤྲཱི་མཱུྃཿཧྲཱིཿཔྲཛྙཱ་ཏུ་ནི་ཧྲཱིཿ ཝཱ་ཀཱི་ཤྭ་རི་མཱུྃ་ཞེས་ཁྲི་ཕྲག་གཅིག་བཟླས་ལ། ཕྱིས་ཉི་ཟླ་གཟས་འཛིན་པའི་ཚེ་དེ་བཞིན་དུ་བསྒྲུབས་ཏེ་ཟོས་ན་མངོན་པར་ཤེས་པ་དྲུག་ཁྲི་དང་ལྡན་པར་འགྱུར་རོ། །འདིར་གཞུང་ཁ་ཅིག་ལས་མུ་ཏིག་དམར་པོ། ཨ་ག་རུ་ནག་པོ། སྤང་སྤོས། ཀ་ར་རྣམས་བ་དམར་སྐྱའི་འོ་མས་རིལ་བུ་བྱས་ཏེ་སྔ་མ་བཞི་སྒོམ་བཟླས་བྱས་ནས། ཉི་ཟླ་གཟའ་ཟིན་པའི་ཉིན་པར་རིལ་བུ་ཟོས་ན་མངོན་པར་ཤེས་པ་འགྲུབ་པར་འགྱུར་རོ། ། ཞེས་བཀོད་པ་རང་སྣང་ངོ༌། །མངོན་པར་ཤེས་པ་སྒྲུབ་པའི་ལས་ཚོགས་སོ། ། བདུན་པ་རིག་པ་སྒྲུབ་པ་ནི། སྔར་བཤད་པའི་རིམ་པས་སྒྲུབ་ཅིང༌། ན་མོ་མཉྫུ་ཤྲཱི་ཀུ་མཱ་ར་བྷཱུ་ཏཱ་ཡ། ཏདྱ་ཐཱ། ཨོཾ་ཨ་ར་ཛེ་བི་ར་ཛེ<span class="lcp-mark">»</span></span><span class="lcp-note"><span class="lcp-mark">«</span>། ཤུདྷེ་ཤུདྡྷེ། བི་ཤུདྡྷེ་བི་ཤུདྡྷེ། ཤོ་དྷ་ནི་ཤོ་དྷ་ནི། བི་ཤོ་དྷ་ནི་བི་ཤོ་དྷ་ནི། ཨ་མ་ལེ། བི་མ་ལེ། ཛ་ཡ་བ་ཏི། རུ་རུ་ཙ་ལེ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སྭཱཧཱ། འབུམ་ཕྲག་གཅིག་བཟླས་ན་མཁས་པར་འགྱུར་རོ། །གཉིས་བཟླས་ན་རིག་པ་འཛིན་པར་འགྱུར་རོ། ། གསུམ་བཟླས་ན་འཇམ་དཔལ་གྱི་ཞལ་མཐོང་བར་འགྱུར་རོ། །བཅངས་པ་ཙམ་གྱིས་སྐྱེ་བ་དྲན་པར་འགྱུར་རོ། །གལ་ཏེ་འཚམས་མེད་པ་ལ་སྤྱོད་པ་ཡིན་ཡང་དེ་ལྟར་སྦྱོར་བ་ཉིད་གུས་པས་བསྒྲུབ་ན་དེ་དག་གི་མཐའ་བདག་གིས་རྫོགས་པར་བགྱིའོ། །གལ་ཏེ་དེ་ལྟར་མ་བགྱིས་ན་བདག་གིས་སངས་རྒྱས་བཅོམ་ལྡན་འདས་རྣམས་བསླུས་པར་འགྱུར་རོ། །ཞེས་ཞལ་གྱིས་བཞེས་ཤིང་ཡི་དམ་དུ་མཛད་པའོ། །ཁ་ཅིག་ནི་བཟླས་པ་ཙམ་གྱིས་འགྲུབ་ཅེས་འདོད་ ཀྱང༌། བདག་གི་ལམ་ནི་སྒྲུབ་པ་དང་འབྲེལ་དགོས་ཞེས་བཞེད་དོ། །གཞན་ཡང་སྔར་གྱི་རྫས་བཅུ་གཉིས་པོའི་སྟེང་དུ་རྟའི་མགྲིན་པའི་ཤ་བཏང་ནས་སྔར་བཞིན་བསྒྲུབ་ན་རྐང་མགྱོགས་འགྲུབ་པར་འགྱུར་རོ། །འུག་པ་མཐིལ་རིལ་གྱི་མིག་འབྲས་བཏང་ནས་འོག་གི་གཏོར་མཐོང་བ་དང་མིག་རྣོ་བར་འགྱུར་རོ། ། ཕུག་རོན་བྱ་རྒོད་འདབ་ཆགས་ཀྱི་མཁྲིས་པ་བཏང་ན་མངོན་ཤེས་འགྲུབ་པར་འགྱུར་རོ། །སྔགས་ཀྱི་ཤམ་བུ་ནི་ཇི་ལྟར་འདོད་པ་དེ་ཉིད་སྤེལ་ལོ། །རིག་པ་སྒྲུབ་པའི་ལས་ཚོགས་སོ། །འཇམ་དཔལ་གྱི་ཞལ་ལྟ་བ་ནི། སྔར་གྱི་རྫས་རྣམས་ཀྱི་སྟེང་དུ་ག་བུར་དང་གི་ཝཾ་བསྲེག་པའི་རིལ་བུ་བྱས་ལ་སྔ་མ་བཞིན་བསྒོམ་ཞིང༌། ཨོཾ་ཧྲཱིཿདྷཱིཿམ་མེ་དཱི་པཾ་མཉྫུ་ཤྲཱི་མཱུྃཿཧྲཱིཿཔྲ་ཛྙཱ་བརྡྷ་ནི་ཧྲཱིཿདྷཱིཿསྭཱ<span class="lcp-mark">»</span></span>་<span class="lcp-note"><span class="lcp-mark">«</span>ཧཱ། ན་མོ་མཉྫུ་ཤྲཱི་སིདྷ་ནི་ཡ་མཱནྟ་ཀ་ནི་ཧཱུྃ་ཕཊ། ཅེས་ཁྲི་ཕྲག་གཅིག་བཟླསཔའི་རིལ་བུ་ཆུ་གཙང་མ་དང་བསྲེས་ལ་རང་འཇམ་དཔལ་དུ་བསམ་པའི་ལག་མཐིལ་དུ་བླུགས་ཏེ་སྔགས་བརྒྱ་རྩ་བརྒྱད་བཟླས་ཏེ་མིག་ལ་བྱུག་ན་འཇམ་དཔལ་མཐོང་བར་འགྱུར་རོ། །གཞུང་ཁ་ཅིག་ལས་ག་བུར་གྱི་ཝཾ་བསྲེས་པའི་ཆུ་ལག་མཐིལ་གཡོན་དུ་བླུགས་ལ། རང་འཇམ་དཔལ་དུ་མོས་པས་སྔགས་བཟླས་ཏེ་མིག་ལ་བྱུགས་པས་ཞལ་མཐོང་བར་འགྱུར་རོ་ཞེས་བཀོད་པར་སྣང་ངོ༌། །བདག་གི་བླ་མས་ནི་སྔ་མ་བཞིན་མཛད་པས་ཞལ་མཐོང་བ་ཉིད་ཡིན་ནོ། །ཞལ་ལྟ་བུའི་ལས་ཚོགས་སོ། །ལས་ཚོགས་ཀྱི་ལེའུ་སྟེ་བདུན་པའོ།། །། དེ་ལྟར་རྗེ་བཙུན་འཇམ་པའི་དཔལ་ནི་ལེགས་པར་སྒྲུབ་པའི་བསོད་ནམས་གང༌། །སྟོན་མཁའ་ཡིད་མཁའི་དྲི་མ་མེད་ལ་མཚན་དཔེའི་འོད་རབ་གསལ་བའི་སྐུ། <span class="lcp-mark">»</span></span>།<span class="lcp-note"><span class="lcp-mark">«</span>མཛད་པའི་ཟེར་བས་རྣམ་རོལ་རབ་བརྟན་གདུལ་བྱའི་འཇིག་རྟེན་འགེངས་པ་ཡིས། །མ་ལུས་བདེ་འབྱུང་གེ་སར་འཛུམ་པས་འགྲོ་བའི་བསམ་པ་འགྲུབ་པར་ཤོག །ཚུལ་འདི་གངས་རིའི་ཁྲོད་ཀྱི་སྙན་ངག་མཁན། །དཔལ་ལྡན་ཚུལ་ཁྲིམས་བློ་གྲོས་བཟང་པོ་ཡིས། །བློ་གྲོས་དོན་གཉེར་ཀུན་གྱི་གཙུག་རྒྱན་དུ། །བསམ་ཡས་ལྷུན་གྱིས་གྲུབ་པའི་གནས་སུ་སྦྱར། <span class="lcp-mark">»</span></span>།<span class="lcp-mark">«</span>འཕགས་པ་འཇམ་དཔལ་གྱི་སྒྲུབ་ཐབས་ཡིད་བཞིན་ནོར་བུ་ཞེས་བྱ་བ། མང་དུ་ཐོས་པའི་སྙན་ངག་མཁན་བསམ་ཡས་པ་ངག་གི་དབང་པོས་གཞུང་དང་གདམས་པ་དང་རང་གིས་ཉམས་སུ་བླངས་པ་རྣམས་ཕྱོགས་གཅིག་ཏུ་བཀོད་པ་རྫོགས་སོ།། །། མདྒ་ལཾ།།
</div>
</div>
= Source =
= Source =
This page is a cleaned copy of the following rywikitexts page, which stay unchanged:
This page is a cleaned copy of the following rywikitexts page, which stay unchanged:
* [[Klong chen rab byams gsung 'bum/volume 025 558]] (revision 11028, 2020-03-22)
* [[Klong chen rab byams gsung 'bum/volume 025 558]] (revision 11028, 2020-03-22)
Cleaning (21 November 2026): removed 1 running heads, 3 Word page fields. The «» marks are kept: in this e-text they enclose the small-print notes of the print.
Cleaning (21 November 2026): removed 1 running heads, 3 Word page fields. The «» marks are kept in the text: they enclose the small-print notes of the print, which are shown in small print with the marks hidden.


Part of the [[Longchenpa Collected Works]] ([[Longchenpa Collected Works/About|about this project]]).
Part of the [[Longchenpa Collected Works]] ([[Longchenpa Collected Works/About|about this project]]).
<headertabs/>
<headertabs/>



Latest revision as of 21:59, 21 November 2026

རྒྱལ་བ་ཞི་ཁྲོའི་སྒྲུབ་དཀྱིལ་རིན་པོ་ཆེའི་གཏེར་མཛོད་ཅེས་བྱ་བ klong chen rab 'byams kyi gsung 'bum (pe cin 2009)· Volume 25(RA) འཕགས་མ་དབྱངས་ཅན་མའི་སྒྲུབ་ཐབས་འོད་ཀྱི་དྲྭ་བ་ཞེས་བྱ་བ

Title འཕགས་པ་འཇམ་དཔལ་གྱི་སྒྲུབ་ཐབས་ཡིད་བཞིན་ནོར་བུ་ཞེས་བྱ་བ
Wylie 'phags pa 'jam dpal gyi sgrub thabs yid bzhin nor bu zhes bya ba
Catalogue title 'phags pa 'jam dpal gyi sgrub thabs (BDRC outline)
Author Longchenpa ཀློང་ཆེན་རབ་འབྱམས་པ་དྲི་མེད་འོད་ཟེར།
Location klong chen rab 'byams kyi gsung 'bum (pe cin 2009), volume 25(RA), text 12, pages 412–433 (BDRC scan pages)
Section klong chen rab 'byams pa dri med 'od zer gyi gsung thor bu › sgrub thabs sna tshogs kyi skor


Tibetan text E-text from the typeset Pe cin edition (input 2020 on rywikitexts), cleaned 21 November 2026; not proofread against the print.
BDRC MW1KG4884, outline 6.08.1.2
Citation Klong chen rab 'byams pa. 'phags pa 'jam dpal gyi sgrub thabs. In Kun mkhyen klong chen rab 'byams kyi gsung 'bum, vol. 25, pp. 412–433. Pe cin: Krung go'i bod rig pa dpe skrun khang, 2009. BDRC MW1KG4884.
Notes Title from the first line of the e-text; text boundaries and page numbers from the BDRC outline of MW1KG4884.
[edit]

༄༅། །འཕགས་པ་འཇམ་དཔལ་གྱི་སྒྲུབ་ཐབས་ཡིད་བཞིན་ནོར་བུ་ཞེས་བྱ་བ་བཞུགས་སོ། །

« འཕགས་པ་འཇམ་དཔལ་གྱི་སྒྲུབ་ཐབས་ཡིད་བཞིན་ནོར་བུ་ཞེས་བྱ་བ། བླ་མ་དང་འཇམ་པའི་དབྱངས་ལ་ཕྱག་འཚལ་ལོ། །ཤིན་ཏུ་རྣམ་དག་པདྨོའི་མདངས་འདྲ་ཀུན་མཁྱེན་སྦྲང་རྩིའི་སྙིང་པོ་ཅན། །གཞན་ཕན་ཐུགས་རྗེའི་འདབ་སྟོང་རབ་རྒྱས་གྲགས་པའི་དྲི་བསུང་མ་སྨད་པ། །འཇམ་པའི་དབྱངས་ཞེས་ཕྱོགས་བཅུར་རབ་གྲགས་སངས་རྒྱས་ཀུན་གྱིས་བསྔགས་པའི་མགོན། ། བློ་གྲོས་བདེ་འབྱུང་གཙུག་གིས་མཛེས་བྱས་ངག་གི་དབངཔོའི་ཞབས་ལ་ འདུད། །སྔོན་ཆད་བླ་མ་རྣམས་ཀྱི་སྙན་ནས་སྙན། །གཅིག་ནས་གཅིག་བརྒྱུད་ཡི་གེར་མ་བཀོད་ཅིང༌། །ཀུན་ལ་མ་གྲགས་ཟབ་མོའི་གནད་རྣམས་དང༌། ། གཞུང་དུ་བཀོད་པ་རྣམས་ནས་འདིར་བརྗོད་བྱ། །ལོ་རྒྱུས་རྗེས་གནང་སྒྲུབ་པ་དང༌། །སྤོགས་དང་ཁ་བསྒྱུར་སྦྱིན་སྲེག་དང༌། །ལས་ཚོགས་དང་ནི་རྣམ་བདུན་གྱིས། །འཇམ་དཔལ་སྒྲུབ་པའི་རིམ་པ་བཤད། ། དེ་ལ་ཡིད་ཆེས་པའི་ཡན་ལག་ཏུ་བླ་མ་བརྒྱུད་བའི་ལོ་རྒྱུས་ནི། སངས་རྒྱས་མྱ་ངན་ལས་འདས་ནས་ལོ་ཉིས་སྟོང་ལྡ་བརྒྱ་ན། མ་ག་དྷའི་གྲོང་ཁྱེར་དང་ཉེ་བའི་གཙུག་ལག་ཁང་ཞིག་ན་རྒན་པོ་ལོ་དགུ་བཅུ་རྩ་དགུ་་ལོན་པ་ཞིག་ཕྱི་མ་ལ་བག་ཆགས་བཞག་པའི་ཕྱིར་པཎྜི་ཏ་སུ་མ་ཏི་ཀཱི»«རྟི་ལ་ཡི་གེ་སློབ་ཅིང་འདུག་གོ །དེའི་ཚེ་ཡུལ་དེ་རྒྱལ་པོ་འཁོར་དང་བཅས་པ་དེས་བར་འོངས་བས་དེ་མཐོང་ནས་རྒན་པོ་དེ་ལ་སྨྲས་པ། ཀྱེ་རྒན་པོ་ཁྱོད་ནི་བྱིས་པའི་རང་བཞིན་དུ་གྱུར་ཏམ། འདི་ལྟར་གཟོད་ཡི་གེ་དག་ལ་སློབ་པ་བརྩོན། ཅེས་མ་རངས་བཞིན་དུ་སྨྲ་བ་ཐོས་ནས། དེ་ཡིད་རབ་ཏུ་མི་དགའ་བས་ད་ནི་ཡི་གེ་སློབ་པ་བཏང་སྟེ་སྒྲུབ་པ་ཞིག་བྱའོ་སྙམ་ནས། སློབ་དཔོན་ལ་བསླབ་མི་དགོས་པར་རིག་པའི་གནས་ལོབ་པའི་གདམས་ངག་ཡོད་དམ་ཞུས་པས། སློབ་དཔོན་གྱིས་འཕགས་པ་འཇམ་དཔལ་གྱི་སྒྲུབ་ཐབས་འདི་གནང་ནས། ཞག་གསུམ་བསྒྲུབས་པའི་ཕྱི་མ་ལ་རལ་གྲི་དྲངས་ནས་འཕགས་པ་འཇམ་དཔལ་དོ་ནུབ་ཞལ་མི་སྟོན་ན་རང་ཉིད་ཀྱི་རྐེ་བཅད་ལ་འཆི་བར་བྱའོ་ཞེས་དམ་བཅས་ཏེ་བསྒྲུབས་པས། ནམ་ལངས་སུ་འཇམ་པའི་དབྱངས་ཞལ་མངོན་སུམ་དུ་བསྟན་ནས་བྱིན་གྱིས་བརླབས་པས་རྒན་པོ་དེ་ཉིད་བྱིས་པ་ལོ་བརྒྱད་ལོན་པ་ལྟར་གྱུར་ནས་སྡེ་སྣོད་གསུམ་དང་རིག་པའི་གནས་ཐམས་ཅད་ལ་མཁས་པར་གྱུར་ཏེ། སློབ་དཔོན་ཆེན་པོ་མཉྫུ་ཤྲཱི་ཞེས་བྱ་བར་གྲགས་སོ། །དེས་རྗེ་བཙུན་དམ་པ་རྒྱ་གར་ལ་གནང༌། དེ་ནས་རིམ་པ་བཞིན་དུ་དམ་པ་ཀུན་དགའ། སྨོན་ལམ་འབར། ཤེས་རབ་སེང་གེར་ཆོས་ཀྱི་བླ་མ། ཀུ་མཱ་རཀཱིརྟི། ཀུ་མཱ་ར་བློ་གྲོས། བླ་བྲང་པ་ཆོས་དཔལ་རྒྱལ་མཚན། སྙན་ངག་མཁན་ངག་གི་དབང་པོ། རི་ཁྲོད་སེང་གེའོ། །ལོ་རྒྱུས་ཀྱི་ལེའུ་སྟེ་དང་པོའོ།། །། དེ་ལྟར་བླ་མ་དམ་པ་རྣམས་ལས་བརྒྱུད་པའི་རྗེ་བཙུན་འཇམ་པའི་དབྱངས་སྒྲུབ་པ་ལ་དང་པོ་རྗེས་སུ་གནང་བ་ཐོབ་དགོས་པས་དེའི་རིམ་པ་ནི། གནས་དབེན་པར་འཇམ་དཔལ་སྨྲ་བའི་སེང་གེའི་རྟེན་མཆོད་པ་དང་བཅས་པ་བཤམས་ལ། སློབ་དཔོན་ཉིད་འཇམ་དཔལ་དུ་མོས་པའི་ཕྲག་པ་གཡོན་དུ་དབྱངས་ཅན་མ། སྟེང་གི་ནམ་མཁའ་ལ་བླ་མ་དང་སངས་རྒྱས་དང་བྱང་ཆུབ་སེམས་དཔའི་ཚོགས་བཞུགས་པར་བསམས་ལ། ཡན་ལག་བདུན་པ་བྱས་ཏེ་གཏོར་མ་འབུལ། དེ་ནས་སློབ་མ་རྣམས་ཀྱིས་སློབ་དཔོན་ཉིད་འཇམ་དཔལ་དངོས་སུ་བསམ་པ་ལ་སངས་རྒྱས་དང་བྱང་ཆུབ་སེམས་དཔས་བསྐོར་བར་མོས་པ་བྱས་ཏེ། ཡན་ལག་བདུན་པ་དང༌། ཁྱད་པར་དུ་ལུས་དབུལ་བའི་མཆོད་པ་ཕུལ་ནས། ཆོས་ཐམས་ཅད་སྟོང་པའི་ངང་ལས་སློབ་མ་རྣམས་འཇམ་དཔལ་དུ་བསྐྱེད་པའི་ཕྲག་པར་དབྱངས་ཅན་མ། ཐུགས་ཀར་པདྨ་དང་ཟླ་བའི་སྟེང་ན་ཙ་ཀྲ་དམར་པོ་རྩིབས་བཞི་པའི་ལྟེ་བ་ལ་རལ་གྲི་སོར་བཞིའི་ཆང་ཟུང་ལ་དྷཱིཿདང་རྩེ་མོ་ལ་ཧྲཱིཿས་མཚན་པའི་མཐའ་སྐོར་དུ་རྩ་བའི་སྔགས་ཀྱིས་བསྐོར་བ་ལ་སོགས་པ་སྒྲུབ་ཐབས་བཞིན་བསམས་ལ་ཡེ་ཤེས་པ་བཅུག་སྟེ། སློབ་དཔོན་གྱི་ཕྲག་པའི་དབྱངས་ཅན་མ་དང༌། ཐུགས་ཀའི་ཙཀྲ་རལ་གྲི་དང་བཅས་པ་ལ་འོད་ཟེར་བྱུང་བ་སློབ་མའི་ཕྲག་པའི་དབྱངས་ཅན་མ་དང་སྙིང་གའི་འཁོར་ལོ་རལ་གྲི་དང་བཅས་པ་ལ་ཐིམ་པར་བསམ་པའི་འོད་ཀྱིས་བསྐུལ་བས། མདུན་གྱི་ནམ་མཁར་སངས་རྒྱས་དང་བྱང་ཆུབ་སེམས་དཔའི་ཐུགས་ཀ་ནས་ཀྱང་འོད་བྱུང་ནས་སློབ་མ་ལ་ཐིམ་པར་བསམ་ཞིང༌། སློབ་དཔོན་གྱི་ཕྲེང་བ་བཟུང་སྟེ་སྔགས་ཀྱི་རྗེས་ཟློས་ལན་གསུམ་བྱས་པས། སློབ་མ་དག་འཇམ་དཔལ་དངོས་སུ་གྱུར་པའི་འོད་ཟེར་གྱིས་ཐམས་ཅད་ཀྱི་བློ་ཡི་མུན་པ་ཐམས་ཅད་བསལ། འཕགས་པ་མཆོད། ཚུལ་འདུས་ཤེས་རབ་དང་སྤོབས་པའི་དངོས་གྲུབ་ཀྱི་བདུད་རྩིའི་ཆུས་ལུས་ཐམས་ཅད་གང་ཐུགས་ཀའི་འཁོར་ལོར་དམིགས་པ་འཛིན་དུ་བཅུག་ལ་དར་ཅིག་མཉམ་པར་བཞག་ལ། དགེ་བ་བསྔོ། བཀྲ་ཤིས་བརྗོད། མེ་ཏོག་གཏོར་རོ། །རྗེས་གནང་གི་ལེའུ་སྟེ་གཉིས་པའོ།། །། དེ་ལྟར་རྗེས་སུ་གནང་བ་ཐོབ་ནས་སྒྲུབ་པ་ལ་འཇུག་པར་བྱ་སྟེ། དེ་ཡང་སྔོན་དུ་རྫས་བསག་ཅིང་སྐྱབས་འགྲོ་སེམས་བསྐྱེད་བྱ་བ་དང༌། དངོས་གཞི་ལྷ་བསྒོམ་ཞིང་སྔགས་བཟླ་བ། རྗེས་རྫོགས་རིམ་བསྒོམ་ཞི་བསྔོ་བ་བྱ་བ་དང་གསུམ་ལས། དང་པོ་ལ་གཉིས་ཏེ། རྫས་བསག་ཅིང་རྟེན་དགྲམ་པ་དང༌། སྐྱབས་འགྲོ་སེམས་བསྐྱེད་བྱ་བའོ། །དང་པོ་ནི། སྤང་རྒྱན་དཀར་པོ། གླ་རྩི། མཚལ་དཀར། ཡུང་བ། ཙན་དན་དམར་པོ། ཨ་ག་རུ་ནག་པོ། སྤང་སྤོས། དབང་པོ་ལག་པ་སྡེར་མོ་ལྔ་པ། ཤུ་དག་དཀར་པོ། ཨ་རུ་ཤ་ཆེན། ཤིང་མངར། རྒྱ་སྐྱེགས་རྣམས་ཞིབ་པར་བཏགས་ལ། སྦྲང་དཀར་དང་བ་དམར་མོའི་འོ་མས་རིལ་བུ་བརྒྱ་རྩ་བརྒྱད་བྱས་ལ། དར་རམ་ཤོག་བུ་སེར་པོ་ལ་པདྨ་དམར་པོ་འདབ་བརྒྱད་མུ་ཁྱུད་རིམ་པ་གསུམ་དང་ལྡན་པའི་ལྟེ་བར་རལ་གྲིའི་ཆང་ཟུང་ལ་ཧྲཱིཿརྩེ་མོར་དྷྲཱིཿ འདབ་མ་རྣམས་ཀྱི་དབུས་སུ་རྩ་བའི་སྔགས། རྩེ་མོ་ལ་ཧྲཱིཿ མུ་ཁྱུད་ནང་མ་ལ་ཨཱ་ལི། བར་མ་ལ་ཀཱ་ལི། ཕྱི་མ་རྟེན་འབྲེལ་སྙིང་པོ་རྣམས་སྤེལ་ཚིག་དང་བཅས་པ་བྲིས་པར་བླུགས་ལ། དར་རམ་ཤོག་བུ་ལ་འཁོར་ལོ་རྩིབས་ཆེན་བརྒྱད་མུ་ཁྱུད་གསུམ་དང་ལྡན་པའི་ལྟེ་བར་རལ་གྲིའི་ཆང་ཟུང་ལ་དྷྲཱིཿ རྩེ་མོ་ལ་ཧྲཱིཿ རྩིབས་རྣམས་ཀྱི་དབུས་སུ་་རྩ་སྔགས། རྩེ་མོར་དྷྲཱིཿ མུ་ཁྱུད་གསུམ་པ་ལ་ཨཱ་ལི། ཀཱ་ལི། རྟེན་འབྲེལ་སྙིང་པོ་རྣམས་སྤེལ་ཚིག་དང་བཅས་པ་བྲིས་པས་བཀབ་ལ། གནས་དབེན་པར་མཎྜལ་པདྨ་སེར་པོ་འདབ་བརྒྱད་ཀྱི་དབུས་སུ་མེ་ཏོག་བཀྲམ་པའི་དབུས་སུ་ལྷུ་བཟེད་དམ་རིན་པོ་ཆེའི་སྣོད་འབྲུས་བཀང་་བའི་ཁར་རིལ་བུ་འཁོར་ལོ་དང་བཅས་པ་བཞག །འཇམ་དབྱངས་ཀྱི་རྟེན་དགྲམ། མཆོད་པ་བཤམ། རྟེན་གྱི་མདུན་དུ་ལྷུ་བཟེད་འོང་བར་བྱ། དེ་ནི་རྟེན་བཤམ་པའོ། །འདིར་གཞུང་གཅིག་ནས་འཁོར་ལོ་བྲི་བ་ནི་འདི་ལྟར་བཞེད་དོ། །དར་རམ་རས་ལ་འཁོར་ལོ་རྩིབས་བཞི་པའི་ལྟེ་བར་རང་གི་སྤེལ་ཚིག །ཤར་གྱི་རྩིབས་ལ་ཧྲཱིཿ ལྷོར་སི། ནུབ་ཏུ་བཻ། བྱང་དུ་བྷཻ་རྣམས་བྲིས་པའི་དབུས་སུ་རིལ་བུ་བླུགས་ནས། ཡང་པདྨ་འདབ་བརྒྱད་མུ་ཁྱུད་གསུམ་པའི་ལྟེ་བར་རལ་གྲིའི་ཆང་ཟུང་ལ་དྷྲཱིཿ རྩེ་མོར་ཧྲཱིཿ བར་དུ་རྩ་སྔགས། པད་འདབ་བརྒྱད་ཀྱི་རྩེ་མོར་ཧྲཱིཿ རྩ་བར་དྷཱིཿ དབུས་སུ་རྩ་བའི་སྔགས། མུ་ཁྱུད་གསུམ་ལ། ཨཱ་ལི། ཀཱ་ལི། རྟེན་འབྲེལ་སྙིང་པོ་རྣམས་བྲིས་པས་སྟེང་ནས་དགབ། དེའི་སྟེང་དུ་དར་དམར་པོའི་གདུགས་ཕུབ་ལ་སྔ་མ་བཞིན་དུ་བྱ་གསུངས་སོ། །དེ་ལྟར་འཁོར་ལོ་གང་བྲིས་ཀྱང་སྟེང་འཁོར་གྱི་ཡིག་མགོ་ཕྱིར་བསྟན་ལ་གཡས་སྐོར་དུ་བྲི་ཞིང༌། འོག་འཁོར་གྱི་ཡིག་མགོ་ཕྱིར་བསྟན་ལ་གཡོན་སྐོར་དུ་བྲི་བའི་སྣག་ཚ་མཚལ་རྒྱ་སྐྱིགས་གི་ཝཾ་གསུམ་ལ་བྱའོ། ། འཁོར་ལོའི་མན་ངག་གོ །དེ་ནས་ཟླ་བ་དང་ཉི་མ་ཡར་འཕེལ་གྱི་ཚེས་གཅིག་གམ་བརྒྱད་དམ་བཅོ་ལྔ་ནས་སྒྲུབ་པའི་མགོ་བརྩམ་པར་བྱ་སྟེ། ཐོ་རངས་སྔ་བར་མལ་ནས་ལངས་ཏེ་ནམ་མཁའི་དབྱིངས་སུ་དབྱངས་ཅན་མ་ལ་བཀྲ་ཤིས་ཀྱི་ལྷ་མོ་དཔག་ཏུ་མེད་པས་བསྐོར་བ་རྣམས་ཀྱིས་རྡོ་རྗེའི་གླུ་དང་བཀྲ་ཤིས་པའི་ཚིགས་སུ་བཅད་པ་དང༌། ཨོཾ་ཧྲཱིཿདྷཱིཿལ་སོགས་པའི་རིག་པ་བརྗོད་པས་བསྐུལ་བར་བསམས་ལ་ལངས་ཏེ། ཁྲུས་དང་གཙང་སྦྲ་སྔོན་དུ་སོང་ནས། སྟན་བདེ་བ་ལ་ཤར་དུ་ཕྱོགས་པས་འདུག་སྟེ། སྐྱབས་སུ་འགྲོ་བ། ཚད་མེད་པ་བཞི་སྒོམ་པ་དང༌། བྱང་ཆུབ་ཏུ་སེམས་བསྐྱེད་ནས། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་གིས་ཆོས་ཐམས་ཅད་སྟོང་པ་ཉིད་དུ་བསམ། སྟོང་པའི་ངང་ལས་བྷྲུཾ་ཞེས་བརྗོད་པས་ཕྱི་སྣོད་ཀྱི་འཇིག་རྟེན་ཐམས་ཅད་ཞིང་ཁམས་རྣམ་པར་དག་པ་བདེ་བ་ཅན་བཞིན་དུ་གྱུར་པའི་དབུས་ཀྱི་ནམ་མཁའ་ལ། སྃ་ལས་སེང་གེ་སྔོན་པོ་ལངས་པའི་སྟེང་དུ། པྃ་ལས་སྣ་ཚོགས་པདྨའི་སྟེང་དུ་ཨ་ལས་ཟླ་བའི་དཀྱིལ་འཁོར། །དེའི་སྟེང་དུ་རྃ་ལས་ཉི་མའི་སྟེང་དུ་རང་གི་སེམས་ཉིད་ཡི་གེ་དྷཱིཿདམར་པོ་ཚེག་དྲག་དང་བཅས་པ་ལས་འོད་ཟེར་དམར་པོ་ཕྱོགས་བཅུར་འཕྲོས་པས་འཕགས་པ་མཆོད། སེམས་ཅན་གྱི་དོན་བྱས། སླར་འདུས་དྷཱིཿལ་ཐིམ་པས་རང་ཉིད་འཇམ་དཔལ་སྨྲ་བའི་སེང་གེ་སྐུ་མདོག་དམར་པོ་ཞལ་གཅིག་ཕྱག་གཉིས་ཐུགས་ཀར་ཆོས་འཆད་ཀྱི་ཕྱག་རྒྱའི་བར་ནས་ཨུཏྤ་ལའི་རྩ་བ་འཛིན་པས་སྙན་དྲུང་དུ་འདབ་མ་ཁ་བྱེ་བའི་གཡས་གཡོན་གྱི་སྟེང་དུ་རལ་གྲི་དང་པུ་སྟི་བསྣམས་པ། ཞབས་གཉིས་སྐྱིལ་ཀྲུང་ཕྱེད་པའམ་རྡོ་རྗེ་སྐྱིལ་ཀྲུང་གིས་བཞུགས་པའི་སྐུ་སྨད་ལ་དར་སྣ་ཚོགས་ཀྱི་ན་བཟའ་དང་སྐུ་སྟོད་ལ་ལྷའི་གོས་པཉྩ་ལི་ཀས་གཡོགས་ཤིང༌། ཞལ་འཛུམ་པའི་ཐོར་ཚུགས་ཀྱི་རྩེ་མོར་ནོར་བུའི་རིན་པོ་ཆེས་བརྒྱན་པ། པདྨ་དང་ནོར་བུ་དང་ཨུཏྤ་ལའི་ཆུན་པོ་སྤེལ་བའི་ཐོད་ཀྱི་བར་ན་རིན་པོ་ཆེ་དང་ཟུར་ཕུད་ལྔ་རབ་ཏུ་གསལ་བའི་སྙན་གོང་ཨུཏྤལ་ལ་ཁ་བྱེ་ཞིང༌། སྙན་ཤལ་ནོར་བུ་འཕྱང་བས་མཛེས་པ། རིན་པོ་ཆེ་དང་མེ་ཏོག་སྣ་ཚོགས་པའི་དབུ་རྒྱན། མགུལ་རྒྱན། སྙན་ཆ། དོ་ཤལ། གདུ་བུའི་སིལ་ཁྲོལ་སྣ་ཚོགས་པས་བརྒྱན་པ། གཞོན་ནུ་ལོ་བརྒྱད་ལོན་པའི་ངང་ཚུལ་ཅན་འོད་ཟེར་དམར་པོར་རབ་ཏུ་འཕྲོ་ཞིང་ཟླ་བའི་རྒྱལ་ཡོལ་ཅན་ཤིན་ཏུ་མཛེས་པ་གཅིག་ཏུ་བསམ་པའི་ཐུགས་ཀར་པདྨ་དང་ཟླ་བའི་དབུས་སུ་བྷྲུྃ་ཡོངས་སུ་གྱུར་པ་ལས་འཁོར་ལོ་རྩིབས་བཞི་བའི་དབུས་སུ་རལ་གྲི་སོར་བཞི་པའི་ཆད་ཟུང་ལ་དྷཱིཿ རྩེ་མོ་ལ་ཧྲཱིཿ བར་གྱི་སྦལ་ལ་མཱུྃ། རྩིབས་ཀྱི་དབུས་སུ་རྩ་བའི་སྔགས་རྣམས་མར་མེའི་ཕྲེང་བ་བསྒྲིགས་པ་ལྟར་འོད་གསལ་བས་ཡིད་ཀྱི་མུན་པ་མ་ལུས་དག་པར་བྱེད་པར་བསམ། འདིར་བླ་མ་ཁ་ཅིག །རལ་གྲི་ཆང་ཟུང་གི་དྷཱིཿདང་རྩེ་མོའི་ཧྲཱིཿའི་བར་གྱི་སྦལ་རྩ་སྔགས། རྩིབས་ཀྱི་རྩེ་མོར་ཧྲཱིཿ རྩ་བར་ཧྲཱིཿ བར་དུ་རྩ་སྔགས་འགོད་པའང་བཞེད་ལ། ཁ་ཅིག་རལ་་གྲི་ལ་ས་བོན་གཉིས་བཀོད་ནས། རྩིབས་ལ་དྷཱིཿརེ་རེ་སྒོམ་པ་ཡང་ཕྱག་བཞེས་སུུ་མཛད་དོ། ། གང་ལྟར་སྒོམ་ཡང་དམིགས་པ་མ་གསལ་བར་དུ་གཅེས་སོ། །དེ་ནས་ཐུགས་ཀའི་རལ་གྲི་ལས་འོད་འཕྲོས་པས། །མདུན་གྱི་ལྷུང་བཟེད་ཀྱི་ནང་དུ་པདྨ་དང་ཟླ་བའི་སྟེང་དུ་རིལ་བུ་དེ་རྣམས་འོད་དུ་ཞུ་བ་ལས་ཧྲཱིཿསྔོན་པོ་འོད་འཕྲོ་བ་གཅིག་ཏུ་གྱུར་པའི་འོད་ཀྱིས་དོན་གཉིས་བྱས། ཚུར་འདུས་ཡོངས་སུ་གྱུར་པ་ལས་ལྷ་མོ་དབྱངས་ཅན་མ་སྔོན་མོ་འཛུམ་ཁྲོ་རབ་ཏུ་བརྗིད་པ། ཞལ་གཅིག་ཕྱག་གཉིས་ཕྱག་མཚན་དང་བཞུགས་ཚུལ་ཡབ་དང་མཐུན་པ། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། འོད་ཟེར་སྔོན་པོ་འཕྲོ་ཞིང་གཞོན་ནུ་མ་ལོ་བརྒྱད་ལོན་པ་ལྟ་བུའི་ཐུགས་ཀར། པདྨ་དང་ཟླ་བའི་སྟེང་དུ་པདྨ་འདབ་མ་བཞི་དང་ལྡན་པའི་དབུས་སུ་རལ་གྲིའི་ཆང་ཟུང་ལ་ཧྲཱིཿདང་རྩེ་མོར་དྷྲཱིཿ བར་གྱི་སྦལ་ལ་མཱུྃཿ འདབ་མ་རྣམས་ལ་རྩ་བའི་སྔགས་རྣམས་གཡོན་་སྐོར་དུ་ཡབ་ཀྱི་འཁོར་ལོ་པས་སོར་བཅུ་ཆས་དམའ་བ་ཁ་སྦྱར་གྱི་ཚོད་དུ་ཡོད་པའི་དཔངས་མཐོ་དམན་དུ་བསམ། འདིར་ཡང་སྔ་མ་བཞིན་བླ་མ་དེ་དག་སྔགས་ཀྱི་འགྲེས་ཡབ་ཀྱིས་མཚོན་པར་བཞེད་དོ། །དེ་ལྟར་བསྒོམས་པའི་ཐུགས་ཀ་ནས་ཡིག་འབྲུ་ལས་འཕྲོས་པའི་འོད་ཟེར་གྱིས་རང་བཞིན་གྱི་གནས་དང་རི་བོའི་རྩེ་ལྔ་ནས་ཡབ་ཡུམ་ཇི་ལྟར་བསྒོམ་པ་དེ་འདྲ་བའི་ཡེ་ཤེས་པ་གཉིས་པ་སངས་རྒྱས་དང་བྱང་ཆུབ་སེམས་དཔས་བསྐོར་བ་སྤྱན་དྲངས་ལ་མཆོད་དོ། །ཡབ་ལ་ཡབ་ཡུམ་ལ་ཡུམ་སངས་རྒྱས་དང་བྱང་ཆུབ་སེམས་དཔའི་ཚོགས་དང་བཅས་པ་གཉིས་སུ་མེད་པར་ཐིམ་པར་བསམ་ལ། ཐུགས་ཀའི་འཁོར་ལོ་ལས་འོད་བྱུང་བས་ལུས་ངག་ཡིད་གསུམ་གྱི་ནད་གདོན་སྡིག་སྒྲིབ་མི་ཤེས་པའི་མུན་པ་ཐམས་ཅད་བསལ་ནས་ཡེ་ཤེས་ཀྱི་སྣང་བ་རྒྱས་པ་བསམས་ལ། རྩེ་གཅིག་ཏུ་མ་ཡེངས་པས་ཡིག་འབྲུ་རལ་གྲི་དང་བཅས་པ་ལ་སེམས་མཉམ་བར་བཞག་གོ ། འདིའི་དུས་ན་ལུས་དྲང་པོར་འདུག་ལ་སྟེང་རླུང་མནན། འོག་རླུ་བསྡམ། མིག་སྣ་རྩེར་གཏད། སེམས་ཡིག་འབྲུ་ལ་བཟུང་ལ། མིག་མ་འགུལ་བས་རླུང་དལ་བུས་ཐུབ་ཐང་དུ་ནང་དུ་བཟུང་བ་དང༌། ཕྱིར་འཕང་བ་དང་དབང་དུ་གནས་པར་བྱ་བ་ནི་མན་ངག་དམ་པའོ། །དེ་ལྟར་སྒོམ་པས་སྐྱོན་བཟླས་པ་དང་སྤྲོ་བསྡུའི་རྣལ་འབྱོར་ལ་སེམས་བཟུང་བ་ནི། དེ་ལྟར་འཇམ་དཔལ་ཡབ་ཡུམ་ལ་སངས་རྒྱས་དང་བྱང་ཆུབ་སེམས་དཔའ་ས་གཞི་དང་བར་སྣང་གང་བས་བསྐོར་བར་བསམ་པ་རྣམས་ཀྱི་སྐུའི་འོད་ཀྱིས་རང་གཞན་གྱི་མི་ཤེས་པའི་མུན་པ་ཐམས་ཅད་བསལ། ཡེ་ཤེས་སྣང་བ་ཆེན་པོ་རྒྱས་བར་བསམ་ཞིང༌། འཇམ་དཔལ་ཐུགས་ཀའི་དྷཱིཿལས་སྔགས་ཀྱི་ཕྲེང་བ་རྣམས་མར་མེ་ལས་མར་མེ་ཆད་པ་ལྟར་འོད་ཀྱི་ཚུལ་དུ་ཡིག་འབྲུ་རྣམས་སྣ་བུག་གཡས་སུ་ཐོན། ཡུམ་གྱི་གཡོན་དུ་ཞུགས་ཐུགས་ཀའི་ཧྲཱིཿལས་གྲོལ་བའི་ཚུལ་དུ་སྣ་བུག་གཡས་ནས་ཐོན། འཇམ་དཔལ་གྱི་གཡོན་དུ་ཞུགས་ཏེ་འགལ་མེ་ལྟར་འཁོར་བ་དང་ མཉམ་བདག་གི་ཐུགས་ཀའི་སྔགས་ལས་འོད་ཟེར་ཕར་བྱུང་བ་དང་ལྷ་མོའི་ ཐུགས་ཀ་ནས་ཚུར་བྱུང་བ་གཉིས་ལྕགས་ཀྱུ་བཞིན་དུ་སྦྲིལ་ནས་འཁོར་བར་བསམ་པའི་སྔགས་ཕྲེང་དང་འོད་ཟེར་ཕྲེང་བར་འཁོར་བའི་ཕྲེང་བ་ལས་འོད་ཟེར་དཔག་ཏུ་མེད་པ་ཕྱིར་འཕྲོས་པའི་འོད་ཀྱིས་སངས་རྒྱས་དང་བྱང་ཆུབ་སེམས་དཔའ་དང༌། ཉི་མ་དང༌། ཟླ་བ་དང༌། གཟའ་དང༌།སྐར་མ་དང༌། རྩི་ཤི་ནགས་ཚལ་ལ་སོགས་པའི་འོད་གཟི་བརྗིད་ཚེ་བསོད་ནམས་ཤེས་རབ་ཐམས་ཅད་ཚུར་བསྡུ་ཐུགས་ཀའི་རལ་གྲི་སྔགས་དང་བཅས་པ་ལ་ཐིམ་པས་བདག་ཉིད་ཤེས་རབ་ཕུན་སུམ་ཚོགས་པར་གྱུར། ཡང་ཕྱིར་འཕྲོས་པའི་འོད་ཀྱིས་སྣོད་ཀྱི་འཇིག་རྟེན་ལ་ཕོབ །རིན་པོ་ཆེའི་གཞལ་ཡས་ཁང་དང་ཞིང་ཁམས་དག་པར་བསམ། ཡང་འོད་འཕྲོས་བཅུད་ཀྱི་སེམས་ཅན་ལ་ཕོག་པས་སེམས་ཅན་ཐམས་ཅད་འཇམ་དཔལ་གྱི་སྐུ་དང༌། སྒྲ་སྐད་ཐམས་ཅད་སྔགས་ཀྱི་རྒྱལ་པོ་ཉི་ཤུ་རྩ་གཅིག་པོའི་རང་སྒྲར་བསམས་ལ། ཡིད་འོང་འཕྲོས་ནུས་པ་ཐམས་ཅད་བཀུག །རང་གི་སྤྱི་བོར་ཐིམ་ཞིང་ཡེ་ཤེས་ཀྱི་སྣང་བ་རྒྱས་པར་བསམས་ལ། རྩ་བའི་སྔགས་ཅི་འགྲུབ་བཟླས་པ་བྱའོ། །དེ་ནས་རྫོགས་པའི་རིམ་པ་ལ་སེམས་བཟུང་བ་ལ། མཚན་མ་དང་བཅས་པ་དང༌། མཚན་མ་མེད་པ་གཉིས་ལས། མཚན་མ་དང་བཅས་པ་ནི། དེའི་རྗེས་ལ་མཚན་མོ་ཉལ་བའམ། འཕྲོ་གཅོད་པའི་ཚེ་གང་རུང་གི་ངང་ལ་བཞག་པར་གསུངས་ཀྱང་ཕྱག་ལེན་ལ་འདི་ལྟར་མཛད་དོ། །དེ་ཡང་སྔ་དྲོ་དང་ཕྱི་དྲོ་གུང་གི་ཐུན་རྣམས་ལ་བསྐྱེད་རིམ་བཟླས་བརྗོད་དང་བཅས་པ་ཟིན་པའི་རྗེས་ལ། རང་གི་ལྟེ་བའི་དབུས་སུ་ཟླ་བའི་དཀྱིལ་འཁོར་གྱི་སྟེང་དུ་ཐིག་ལེ་དམར་པོ་མར་མེ་འབར་བ་ལྟ་བུ་ཞིག་བསམ་པའི་འོད་ཀྱིས་སྤྱི་གཙུག་གི་ཧྃ་དཀར་པོ་མགོ་ཐུར་དུ་ལྟ་བ་ལ་ཕོག་པས་བདུད་རྩིའི་རྒྱུན་བབས་ལྟེ་བའི་མེ་ལ་ཕོག་པས་ཐིག་ལེ་དེ་ཇེ་གསལ་དུ་གྱུར་པ་ནི། དཔེར་ན་མར་མེ་ཟད་སྣུམ་ཐིགས་བབས་པ་བཞིན་གྱུར་བས་ལུས་ངག་ཡིད་གསུམ་གྱི་མུན་པ་ཐམས་ཅད་བསལ། ཡེ་ཤེས་ཀྱི་བདུད་རྩིས་ཁེངས་པར་བསམས་ལ། དེ་ནས་ཡང་རང་གི་སྙིང་གའི་འཁོར་ལོ་འོད་དུ་གྱུར་པ་སྙིང་གི་ཁོང་སེང་དུ་མར་མེ་འབར་བ་ལྟ་བུའི་འོད་ཀྱིས་དབུས་དང་ཕྱོགས་མཚམས་བརྒྱད་དུ་བུག་པ་གཏོད་པ་ལས་འོད་འཕྲོས་པས་སྤྱི་པའི་ཧྃ་ལ་ཕོག་བས་བདུད་རྩིའི་རྒྱུན་བབས། བུག་པ་དགུ་ནས་མར་བྱུང་བས་སྙིང་གི་ནང་ཐམས་ཅད་ཁེངས་པར་བསམས་ལ། བདེ་གསལ་མི་རྟོག་པའི་ངང་ལ་བཞག་གོ །གཉིས་པ་ནི། སྲོད་ཀྱི་ཐུན་གྱི་རྗེས་ལ། ཐུགས་ཀའི་རལ་རིའི་དྷཱིཿལས་འོད་འཕྲོས་པས་ཕྱི་སྣོད་ཀྱི་འཇིག་རྟེན་ལ་ཕོག་འོད་དུ་ཞུ་ནང་བཅུད་ཀྱི་སེམས་ཅན་ལ་ཐིམ། དེ་ཡང་འོད་དུ་ཞུ་ནས་མདུན་གྱི་དབྱངས་ཅན་མར་ཐིམ། དེ་ཡང་འོད་དུ་ཞུ་ནས་འཇམ་དཔལ་གྱི་ཐུགས་ཀར་ཐིམ། དེ་ཡང་རིམ་གྱིས་སྐུ་སྟོད་སྨད་ཐུགས་ཀའི་འཁོར་ལོ། དེ་རལ་རི། དེ་ཧྲཱིཿ དེ་དྷཱིཿ དྷཱིཿ འོད་དུ་ཞུ་ནས་ཐིག་ལེ་དམར་པོ་ཅིག་ཏུ་གྱུར་པ་ལ་དལ་ཅིག་སེམས་གཏད། དེ་ནས་ཐིག་ལེ་ལས་ཐིག་ལེ་སྔོན་པོ་གཅིག་ཆད་པས་གཉིས་སུ་གྱུར་པ་ལ་སེམས་གཏད། དེ་ནས་དེ་གཉིས་ཅུང་ཟད་འགུལ་བར་བསམས་ལ་རྩ་བའི་སྔགས་བརྗོད་མ་ཐག་ཐིག་ལེ་དེ་གཉིས་རྡོ་འཕངས་པ་ལྟར་ནམ་མཁར་ལར་ཐལ་མར་ཐལ་ཕར་ཐལ་ཚུར་ཐལ་སོང་ནས་ནམ་མཁའ་དང་སེམས་ཅན་གྱིས་གར་ཁྱབ་ཏུ་སོང་བར་བསམས་ལ། རྩ་བའི་སྔགས་ཅི་འགྲུབ་བརྗོད་ལ། ཉལ་བའི་དུས་སུ་ཐིག་ལེ་དེ་གཉིས་གཅིག་ཏུ་གྱུར། དེ་ཡང་འོད་དུ་ཞུ་ནས་ནམ་མཁའ་ལ་ཐིམ་པས་སྣང་བ་ཐམས་ཅད་དམར་ལམ་གྱིས་སོང་བར་བསམས་ལ་གང་དུ་ཡང་མི་རྟོག་པའི་ངང་ཕྱམ་གྱིས་ཉལ་ལོ། །བསྡུས་ནས་བཞག་པ་ནི། ཡབ་ཡུམ་གང་རུང་གི་ཐུགས་ཀའི་ས་བོན་ལ་དམིགས་ལ་རྩ་བའི་སྔགས་བཟླས་པས་ཆོས་ཐམས་ཅད་བརྗོད་དུ་མེད་པའི་ངང་དུ་ཕྱམ་གྱིས་གྱུར་པར་བསམས་ལ་ཉལ་ལོ། །དེ་དག་གི་མཐར་དགེ་བ་མི་དམིགས་པའི་ངང་ནས་བླ་ན་མེད་པའི་བྱང་ཆུབ་ཏུ་བསྡོའོ། །དེ་ལྟར་གྲངས་ཀྱིས་བསྙེན་པ་འབུལ་ཕྲག་བདུན། དུས་ཀྱི་བསྙེན་པ་ཞག་ཉི་ཤུ་རྩ་གཅིག ། མཚན་མའི་བསྙེན་པ་འགྲུབ་པའོ་རྟགས་མ་བྱུང་གི་བར་དུ་བྱའོ། །དེ་ལྟར་བྱས་པས་བསྙེན་པ་འགྲུབ་པའི་རྟགས་གསུམ་ལས། རབ་མངོན་སུམ་དུ་འོང་བ་ནི། ལྷུང་བཟེད་ཀྱི་རིལ་བུ་རྒྱལ་པོ་བཞིར་མཐོང་བ་དང༌། དབྱངས་ཅན་མར་མཐོང་བ་དང༌། ཉི་མ་ཟླ་བར་མཐོང་བ་དང༌། འོད་དང་དུ་བར་མཐོང་བའོ། །འགྲང་ལ་ཉམས་སྣང་དུ་དེ་དག་འབྱུང་བའོ། །ཐ་མ་ལ་རྨི་ལམ་དུ་འོད་ཆེན་པོ་དང༌། དུ་བ་དང༌། རྡ་དང༌། དུང་དང༌། རོལ་མོའི་སྒྲ་དང༌། མེ་ཏོག་འཛུགས་པ་དང༌། འབྲུ་བ་དང༌། ཞིང་རྨོ་བ་དང༌། སྣག་ཚ་འཐུང་བ་དང༌། གླུ་གར་བྱེད་བ་དང༌། ཡི་གེ་འབྲི་ཀློག་དང༌། ཉི་ཟླ་ཤར་བ་ལ་སོགས་པའོ། །དེ་དག་གང་བྱུང་ཡང་སྔར་བཤད་པའི་ཡོན་ཏན་དེ་དག་འབྱུང་ཞིང་གྲུབ་པའི་རྟགས་ཡིན་ནོ། །འདི་ལྟར་སྒྲུབ་པའི་ཚེ་རྫུན་དང༌། ཤ་ཆང་དང༌། སྒོག་ཙོང་དང༌། སྡོ་ངད་དང༌། འཁོན་དང༌། ཞེ་སྡང་དང༌། སྡིག་གྲོགས་དང༌། མྱ་ངན་དྲག་པོ་བྱེད་པའི་སར་འགྲོ་བ་དང་བྱེད་པ་དང༌། སྨྲེ་སྔགས་ལ་སོགས་པ་སེམས་ལ་གནོད་པ་སྟེ། ལུས་སེམས་མི་གཙང་བ་དེ་དག་སྤངས་ལ་གཙང་སྦྲ་ཁོ་ན་གལ་ཆེའོ། །སྒྲུབ་པའི་ལེའུ་སྟེག་གསུམ་པའོ།། །། དེ་ལྟར་དུ་བསྒྲུབས་ཀྱང་རྟགས་མ་བྱུང་ན། དོན་བཞི་པ་སྤོབས་པའི་ཆོ་ག་ནི། རང་ཉིད་དབྱངས་ཅན་མ་བསྒོམ་ཞིང་མདུན་དུ་འཇམ་དཔལ་བསྒོམས་ཏེ་རང་གི་སྣང་བུག་གཡོན་ནས་མདུན་གྱི་གཡས་སུ་ཞུགས་ཏེ་འཁོར་བར་བསམ་ཞིང༌། འོད་ཀྱི་ཕྲེང་བ་ཡང་སྔ་མ་ལས་ལྡོག་པའི་ཚུལ་དུ་བྱས་ལ། ཨོཾ་དྷཱིཿཧྲཱིཿམ་མེ་དཱི་པ་མཉྫུ་ཤྲཱི་མཱུྃ་ཧྲཱིཿཔྲཛྙཱ་བརྡྷ་ནི་དྷཱིཿཧྲཱིཿསྭཱཧཱ། ཞེས་བཟླས་ཏེ་སྤྲོ་བསྡུ་སྔ་མ་བཞིན་བྱས་ལ། འཁོར་ལོའི་ཡི་གེ་དང་རལ་གྲི་ཐུར་དུ་འཕྱང་བ་ལ་སེམས་བཟུང་བ་བཟླས་པས་སྔར་གྱི་རྟགས་མི་འབྱུང་མི་སྲིད་དོ། །རྟགས་བྱུང་བ་དང་སྔ་མ་བཞིན་བསྒོམ་མོ། །སྤོགས་པའི་ལེའུ་་སྟེ་བཞི་པའོ།། །། དེ་ལྟར་སྒོམ་ཞིང་སྒྲུབ་པའི་དུས་སུ་རང་ཇི་ལྟར་འདོད་པའི་དངོས་གྲུབ་འགྲུབ་པའི་ཁ་བསྒྱུར་ནི། བསྐྱེད་རྫོགས་རྣམས་སྒོམ་ཚུལ་སྔ་མ་བཞིན་བྱས་ཏེ། སྔགས་དང་འོད་ཟེར་གྱི་ཕྲེང་བའི་འོད་ཀྱིས་འཆད་བ་དང༌། རྩོད་པ་དང༌། རྩོམ་པ་ལ་སོགས་པའི་ཤེས་རབ་གང་འདོད་ཀྱང་དེའི་དངོས་གྲུབ་སངས་རྒྱས་དང་བྱང་ཆུབ་སེམས་དཔའ་ཉན་རང་ལ་སོགས་པའི་ཤེས་རབ་དེ་ཉིད་བསྡུས་ནས་རང་གི་ལུས་ཁེངས་ཏེ་གང་འདོད་པའི་ཤེས་རབ་དང་ལྡན་པར་བསམ། དེ་བཞིན་དུ་དབང་དུ་བྱ་བ་ཕ་རོལ་གྱི་སེམས་དང༌། ངག་བརྐུ་བ་དང་འཕྲོག་པ་ལ་སོགས་པ་འཆད་པར་འགྱུར་བ་དེ་དག་དེ་བཞིན་དུ་ཐོབ་པར་བསམས་ལ་བྱས་པས་དེ་ཁོ་ན་བཞིན་དུ་འགྲུབ་པའོ། །ཁ་སྒྱུར་གྱི་ལེའུ་སྟེ་ལྔ་པའོ།། །། དེ་ལྟར་ཇི་ལྟར་འདོད་པའི་དངོས་གྲུབ་ཀྱི་རྟགས་དང་ལྡན་པས་དེའི་སྤྱིན་སྲེག་བྱས་ལ་དངོས་གྲུབ་མྱུར་དུ་འགྲུབ་ཅིང་བརྟན་པར་བྱ་བ་ནི། གནས་དེ་ཉིད་དུ་མཎྜལ་པདྨ་འདབ་བརྒྱད་བྲིས་པའི་སྟེང་དུ་ཤིང་བརྩེགས་ལ། གཡས་སུ་བསྲེས་རྫས། ཡམ་ཤིང་སོར་བརྒྱད་པ། མེ་ཏོག །བདུག་སྤོས། མར་མེ། དྲི་ཆབ། བཤོས་གཙང༌། ནས། གྲོ། འབྲས། མར་ཁུ་དཱུ་རྦ། ཀུ་ཤ་བཞག ། གཡོན་དུ་མཆོད་པ་ལྔ་གཏོར་མ་དང་བཅས་བཞག་ནས། ཐབ་ཀྱི་ནང་དུ་མེ་སྦར་ལ་འཇམ་དཔལ་ཡབ་ཡུམ་བསྐྱེད་ལ་ཡེ་ཤེས་པ་བཞུག །རིན་ཆེན་འབྱུང་ལྡན་གྱིས་དབུར་བརྒྱན། ཕྱག་དང་མཆོད་པ་མདོར་བསྡུས་བྱས་ལ། བསྲེག་རྫས་རྣམས་ཨོཾ་ཨཱཿཧཱུྃ་གསུམ་གྱིས་བདུད་རྩིར་བསམས་ལ་རྩ་བའི་སྔགས་སམ། ཨོཾ་ཧྲཱིཿདྷཱིཿམཱུྃཿསྭཱཧཱ། བདག་གི་པྲཛྙཱ་པུཥྟིཾ་ཀུ་རུ་སྭཱཧཱ། ཞེས་པས་རེ་རེ་བཞིན་དབུལ། འབུལ་བ་རྣམས་རྫོགས་པ་དང་གཏོར་མ་བཏད་ལ། བསྟོད་པ་བྱས་ཏེ་འདོད་པའི་དོན་ལ་གསོལ་བ་བཏབ་ནས། ཡེ་ཤེས་པ་གཤེགས་པ་ནི། ཨོཾ། ཁྱེད་ཀྱིས་སེམས་ཅན་དོན་ཀུན་མཛོད། །རྗེས་སུ་མཐུན་པའི་དངོས་གྲུབ་ སྩོལ། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་འབྱོན་པར་མཛད་དུ་གསོལ། །ཞེས་བརྗོད། དམ་ཚིག་པ་བདག་ལ་བསྡུས་ནས་ལས་ཀྱི་རྗེས་མི་མངོན་པར་བྱ་ཞིང༌། ཐལ་བ་རི་རྩེ་འམ་ཆུ་ཀླུང་ཆེན་པོར་དོར་བས་ཤེས་རབ་ཆེན་པོ་འཕེལ་ཞིང་རྒྱས་པར་འགྱུར་རོ། །སྦྱིན་སྲེག་གི་གྲངས་ནི་སྟོང་ཕྲག་བདུན་ནོ། །སྦྱིན་སྲེག་གི་ལེའུ་སྟེ་དྲུག་པའོ།། །། དེ་ནས་ལས་ཚོགས་ཀྱི་རིམ་པ་ལ། རིལ་བུ་བཟའ་བ། ཚེ་དང་འབྱོར་པ་སྤེལ་བ། གཏོར་མ། དབང་དུ་བསྡུ་པ། ངག་བསྡུ་བ། མངོན་ཤེས་སྒྲུབ་པ། རིག་པ་འཛིན་པ། ཞལ་ལ་བལྟ་བ་དང་བརྒྱད་ལས། དང་པོ་ནི། དེ་ལྟར་བསྒྲུབས་པའི་རྟགས་རྣམས་རྫོགས་ཤིང་སྦྱིན་སྲེག་བྱས་པའི་རྗེས་ལ། མདུན་གྱི་རིལ་བུ་རྣམས་བཟའ་བའི་ལས་ཚོགས་ནི། སྒྲུབ་པ་དང་སྦྱིན་སྲེག་ཐོན་པའི་ནངས་པར་མདུན་གྱི་དབྱངས་ཅན་མ་ལ་སངས་རྒྱས་དང་བྱང་ཆུབ་སེམས་དཔའ་བསྐོར་བ་རྣམས་འོད་དུ་ཞུ་ནས་རིལ་བུའི་རང་བཞིན་དུ་བསམ་པ་ལས་འོད་འཕྲོས་པས་ཕྱོགས་བཅུའི་ཚེ་དང་དཔལ་འབྱོར་དང༌། གཟི་བརྗིད་དང༌། ཁྱད་པར་དུ་གང་འདོད་པའི་དངོས་གྲུབ་ཤེས་རབ་དག་བསྡུས་ནས་དེ་ལ་ཐིམ་པས་ཚེ་དང་བཀྲག་དང་གཟི་བརྗིད་རྒྱས་པར་འདོད་ན། རིལ་བུ་རྣམས་ཡེ་ཤེས་ཀྱི་བདུད་རྩི་ཁ་དོག་ལྔ་དང་ལྡན་པར་བསམས་ལ། འཁོར་ལོས་དྲིལ་ལ་མགུལ་དུ་བཅངས་ནས་ཞག་ཉི་ཤུ་རྩ་གཅིག་གི་ཉི་མ་རྩེ་ཤར་བ་རིལ་བུ་དེ་རྣམས་ཀྱི་ནང་ནས་རིལ་བུ་ལྔ་ལྔ་བདུད་རྩི་བསམས་ཏེ། རང་ཉིད་འཇམ་དཔལ་དུ་མོས་པས་ཁོང་དུ་མིད་པས་ཚེ་དང་བཀྲག་དང་གཟི་བརྗིད་རྒྱས་པར་བསམས་ལ། ལྷག་མ་བརྒྱད་སྒྲུབ་པའི་དངོས་གྲུབ་ཀྱི་རྟེན་དུ་ལུས་དང་མི་འབྲལ་བར་བཅང་ངོ༌། །དེ་བཞིན་དུ་འཆད་པ་ལ་དཔལ་བེའུ་དང༌། རྩོད་པ་་ལ་རལ་གྲི་དང༌། རྩོམ་པ་ལ་པདྨ་དཀར་པོ་དང༌། གྲགས་པ་ཕུན་སུམ་ཚོགས་པ་ལ་དུང་དང༌། འབྱོར་པ་རྒྱས་པར་འདོད་པ་ལ་ཡིད་བཞིན་ནོར་བུ་དང༌། འགྲོ་བ་དབང་དུ་བསྡུ་བ་ལ་ལི་ཁྲི་དང༌། བསམ་པ་ཐམས་ཅད་འགྲུབ་པར་འདོད་པ་ལ་བུམ་པ་བཟང་པོར་བསམས་ལ་བཟའོ། །དེས་ནི་ཇི་ལྟར་འདོད་པའི་དོན་ཡིད་བཞིན་དུ་འགྲུབ་པར་འགྱུར་ རོ། །དེ་རྣམས་ལྷག་མ་བརྒྱད་ནི་རྟེན་དུ་བྱས་ཏེ་བཅངས་ལ། ཕྱིས་སྒྲུབ་པ་བྱེད་ནའང་དེའི་གསེབ་ཏུ་བཏགས་པས་ཉིས་འགྱུར་གྱིས་འགྲུབ་ཐག་ཉེ་ཞིང་བྱིན་པ་ཆེ་བ་ཡིན་ནོ། རིལ་བུ་བཟའ་བའི་ལས་ཚོགས་སོ། ། གཉིས་པ་ཚེ་དང་འབྱོར་བ་སྤེལ་བ་ནི། གོང་གི་རིལ་བུ་དེ་རྣམས་སྒྲུབ་དུས་ནས་ཚེ་དང་འབྱོར་པ་ཐམས་ཅད་བསྡུས་ཏེ་རིལ་བུར་ཐིམ་པར་བསམས་ལ། ཞག་ཉེར་གཅིག་ཏུ་བསྒྲུབས་ནས་ཁྱད་པར་རིལ་བུ་རྣམས་སེར་པོས་ཁ་བསྒྱུར་ཞིང༌། ལྷ་ཡབ་ཡུམ་གཉིས་ཀའང་སེར་པོ་བསམས་ནས་བསྒྲུབས་ཐོན་པ་དང་རིལ་བུ་སྔ་མ་བཞིན་ཟོས་ན་ཚེ་ཉི་ཟླ་དང་མཉམ་ཞིང་འབྱོར་པ་རྒྱལ་པོ་དང་འདྲ་བར་འགྱུར་རོ། །ཚེ་དང་འབྱོར་པ་སྤེལ་པའི་ལས་ཚོགས་སོ། ། གསུམ་པ་གཏོར་མ་ནི། གོང་གི་སྒྲུབ་པའི་ཐུན་མཚམས་དང་དུས་རྒྱུན་དུ་མ་ཆགས་པར་ཕྱག་ལེན་དུ་མཛད་བདེའི་མན་ངག་ནི། རིན་པོ་ཆེ་ལ་སོགས་པའི་སྣོད་གཙང་མར་དཀར་གསུམ་མངར་གསུམ་དྲི་བཟང་སྨན་འབྲུ་ལ་སོགས་པ་བླུགས་ཏེ། སྭ་བྷཱ་ཝས་སྟོང་པར་བསམས་པའི་ངང་ལས། བྷྲཱུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་ཨཱཿཧཱུྃ་གསུམ་ཡོངས་སུ་གྱུར་པ་ལས་བདུད་རྩིའི་རྒྱ་མཚོ་ནམ་མཁའ་དང་མཉམ་པའི་ནང་དུ་གང་ལ་ཅི་དགོས་པའི་ཡོ་བྱད་ལྷ་དང་མིའི་ཕུན་སུམ་ཚོགས་པ་ཐམས་ཅད་བསམས་ལ། ཨོཾ་ཨཱཿཧཱུྃ་གསུམ་གྱིས་བྱིན་གྱིས་བརླབས་ཏེ། མདུན་གྱི་ནམ་མཁར་པདྨའི་འདབ་མ་མཐོང་དམན་སུམ་རིམ་དུ་ཡོད་པའི་སྟེང་གི་ནམ་མཁར་ལ་བླ་མ། དབུས་ཀྱི་ལྟེ་བར་ཡི་དམ། འདབ་མ་བརྒྱད་པའི་དང་པོ་ལ་སངས་རྒྱས། བར་པ་ལ་བྱང་ཆུབ་སེམས་དཔའ། ཐ་མ་ལ་སྲུང་མ་དམ་ཚིག་ཅན་དང་འགྲོ་བ་རིགས་དྲུག་སྲིད་པ་བར་མ་དོའི་སེམས་ཅན་སྐྱེ་བ་བཞི་རང་བཅས་པ་རྣམས་བསམས་ལ། རང་གི་སྙིང་ག་ནས་བྷཱིཿལས་འོད་འཕྲོས་པས་དེ་ཁོ་ན་འདྲ་བའི་ཡེ་ཤེས་པ་བྱོན་ནས་དེ་རྣམས་ལ་སོ་སོར་ཐིམ་པས་བསམས་ལ། རྩ་སྔགས་ཀྱི་མཐར་ཨི་དཾ་གྲྀ་ཧྞ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི་བཏགས་ལ་ལྔའམ་བདུན་གྱིས་ཕུལ་བས། དེ་དག་གི་ཞལ་ནས་ལྗགས་རྡོ་རྗེའི་སྦུ་གུ་ཅན་ལས་འོད་བྱུང་གཏོར་མ་ལ་གསོལ་ཞིང་ཉེ་བར་མཁོ་བའི་དངོས་པོ་བསྣམས་པར་བསམས་ལ། བསྟོད་པས་བསྟོད་ནས་མཉེས་པ་ལ་བཟང་པོ་པར་གསོལ་ཏེ། ཡེ་ཤེས་པ་དང་འཇིག་རྟེན་པའི་འཁོར་རྣམས་གཤེགས་པར་བསམ་ཞིང༌། འཇིག་རྟེན་ལས་འདས་པའི་དམ་ཚིག་པ་རྣམས་རང་ལ་བསྡུས་ལ་མི་དམིགས་པའི་ངང་ལ་དར་ཅིག་བཞག་ནས་བསྔོ་བ་བྱ། དེས་ནི་དངོས་གྲུབ་ཉེ་ཞིང་བར་ཆད་ཀྱིས་མི་ཚུགས་པ་ཡིན་ནོ། །གཏོར་མའི་ལས་ཚོགས་སོ། ། བཞི་པ་དབང་དུ་བྱ་བ་ལ། འགྲོ་བ་ཕལ་པ་དབང་བསྡུ་བ་དང༌། མཆོག་དབང་དུ་བསྡུ་བའོ། །དང་པོ་ལ་གཉིས་ལས། འགྲོ་བ་སྤྱི་དབང་དུ་བྱ་བ་ནི། སྔར་གྱི་རྫས་བཅུ་གཉིས་ཀྱི་སྟེང་དུ་ལི་ཁྲི་དང༌། སེང་ལྡེང་སིནྡྷཱུ་ར་རྣམས་སྦྱར་ལ་རྒྱ་སྐྱེགས་ཀྱིས་ཁབ་བསྒྱུར་ལ། སྔར་གྱི་འཁོར་ལོ་ལ་འགྲོ་བ་ཐམས་ཅད་དབང་དུ་སྡུས་ཤིག་གི་སྤེལ་ཚིག་བྲིས་པར་བསྡུས་ལ། ལྷ་རྣམས་དམར་པོར་གསལ་བཏབ་ནས་སྔ་མ་བཞིན་སྒྲུབ་ཅིང་ཁྱད་པར་དུ་མདུན་གྱི་རིལ་བུ་དབྱངས་ཅན་མ་དམར་མོར་བསམ་པའི་ཐུགས་ཀའི་རལ་གྲི་དང་ཧྲཱིཿལས་འོད་ཟེར་འཕྲོས་པས། ལྷ་དང་ཀླུ་དང་གནོད་སྦྱིན་དང་དྲི་ཟ་དང་སྣོད་བཅུད་ཐམས་ཅད་ལ་ཕོག །འོད་དུ་ཞུ་རིལ་བུ་ལ་ཐིམ་པར་བསམ་ཞིང༌། ཨོཾ་ཧྲཱིཿདྷཱིཿམ་མེ་དཱི་པ་མཛྙུ་ཤྲཱི་མཱུཾཿཧྲཱིཿཤྲཱི་སེང་ཧོ་ཥཿམུ་པ་ཏ་མཉྫུ་ཤྲཱི་ལོ་ཀ་སརྦ་པ་ཤཾ་ཀུ་རུ་སྭཱཧཱ། ཞེས་ཁྲི་ཕྲག་གཅིག་ཏུ་བཟླས་པས་རིལ་བུ་ལས་འོད་དང༌། རླངས་པ་དང༌། མེ་ཏོག་གི་ཆར་བྱུང་ན་འགྲུབ་པ་རབ། རྨི་ལམ་དུ་བྱུང་ན་འབྲིང༌། ཐ་མ་ཡང་ཕ་རོལ་སྙིང་ལ་དུང་དུང་པ་བྱུང་ན་རིལ་བུ་འཁོར་ལོས་དྲི་བ་སྔ་མ་བཞིན་མགུལ་དུ་བཏགས་ཏེ་ཕུད་ཁ་ཅིག་བཟའ། ཁ་ཅིག་བཅད། གཞན་རྣམས་རྒྱལ་པོའི་ཕོ་བྲང་ངམ། །གླིང་ངམ༌། ལམ་གྱི་བཞི་མདོའམ། ཚོང་དུས་སམ། མདོར་ན་མི་མང་པོ་འདུ་བའི་སར་བ་དམར་སེར་གྱི་ལྕི་བ་དང་བསྲེས་ལ་དུད་པ་བཏང་ན་དེ་ཐམས་ཅད་དབང་དུ་འགྱུར་རོ། ། གཉིས་པ་བྱེ་བྲག་སྐྱེས་པ་བུད་མེད་དབང་དུ་བྱ་བ་ལ། སྔར་གྱི་རྫས་རྣམས་ཀྱི་སྟེང་དུ་པདྨ་རཀྟ་དང་གི་ཝཾ་བསྲེས་ལ་རིལ་བུ་དམར་པོ་བྱ། འཁོར་ལོ་ལ་ཡང་དེ་དང་མཐུན་པར་བྲིས་ལ་རིལ་བུ་དྲིལ་ནས་མདུན་དུ་བཞག་ལ། རང་ཉིད་འཇམ་དཔལ་དང་དབྱངས་ཅན་མར་བསྐྱེད་པ་གཉིས་ལས། ཕོ་དབང་དུ་བྱེད་ན་རང་ཉིད་དབྱངས་ཅན། མདུན་གྱི་རིལ་བུ་འཇམ་དཔལ་དུ་བསྐྱེད་ལ་ཡེ་ཤེས་པ་བཅུག་པའི་འོད་ཟེར་གྱིས་བསྒྲུབ་བྱའི་རྣམ་ཤེས་བཀུག་ནས་རིལ་བུར་བསམ་ཞིང༌། མོ་དབང་དུ་བྱེད་ན་དེ་ལས་ལྡོག་པས་བསྒྲུབ་བྱ་མོའི་རྣམ་ཤེས་རང་དང་མདུན་གྱི་ལྷའི་འོད་ཟེར་གྱིས་བཀུག་པ་བདག་ལ་ཆགས་བཞིན་དུ་རིལ་བུ་ལ་ཐིམ་པར་བསམས་ལ། རྩ་སྔགས་ཀྱི་སྤེལ་ཚིག་ཏུ་ཆེ་གེ་བ་ཤཾ་ཀུ་རུ་ཧོཿབཏགས་བཟླས་ཏེ་རྟགས་བྱུང་བ་དང་སྔ་མ་བཞིན་རང་བཟའ་ཞིང་བཅང༌། ཕ་རོལ་པོ་དེ་ཉིད་ཀྱི་གོས་སམ་བཟའ་བཏུང་ལ་བྱུགས་ཏེ་བྱིན་ན་གང་དབང་དུ་བྱ་བ་དེ་འགྲུབ་པར་འགྱུར་རོ། །དེ་བཞིན་དུ་འབངས་ལ་ཚབ་གསུམ། སྐྱེས་པ་ལ་གུར་གུམ། བུད་མེད་ལ་ཟླ་བའི་ཁུ་བ། མི་ཕལ་པ་ལ་སེར་ལྡེང་སྦྱར་ལ་བསྒྲུབ་ན་ཇི་ལྟར་འདོད་པ་དེ་དབང་དུ་འགྱུར་རོ། ། གཉིས་པ་མཆོག་དབང་དུ་བསྡུ་བ་ནི། སྔར་གྱི་རྫས་བཅུ་གཉིས་པོའི་སྟེང་དུ། རྒྱལ་པོ་ལ་ལྕགས་ཕྱེ། བཙུན་མོ་ལ་གི་ཝཾ། བློན་པོ་ལ་མགྲོན་བུ། དགེ་བའི་བཤེས་གཉེན་ལ་རིན་པོ་ཆེ། སྨན་པ་ལ་ཨ་རུ་ར་མ་ཆུ་སྙུང་བཏང་ལ་སྔ་མ་བཞིན་སོ་སོའི་མིང་སྤེལ་ཏེ་བསྒྲུབས་པའི་རིལ་བུ་དེ་དག་ལ་བྱུང་པའམ། བཟའ་བཏུང་དུ་སྦྱར་བ་འམ། དུད་པ་བཏང་ཞིང༌། རང་གི་དཔྲལ་བར་ཐིག་ལེ་བྱས་ལ་བསྒྲུབ་བྱ་ལ་བལྟས་ན་དེ་ཉིད་དབང་དུ་འགྱུར་རོ། །དབང་དུ་བསྡུ་བའི་ལས་ཚོགས་སོ། ། ལྔ་པ་ངག་བསྡུ་བ་ནི། པཎྜི་ཏའམ། དགེ་བའི་བཤེས་སམ་སྔགས་པ་ནུས་པ་ཅན་ནམ། རིགས་ཀྱི་གཙོ་བོ་དྲན་པ་ཅན་ནམ། བསྒྲུབ་བྱ་ཤེས་རབ་ཅན་ནམ། ཤགས་སམ། རྩོད་པ་དྲག་པོས་རྒོལ་བ་རྣམས་ལ་བྱ་སྟེ། དེ་ཡང་ངག་རྐུ་བ་དང་འཕྲོག་པ་གཉིས་ལས། པཎྜི་ཏའམ་དགེ་བའི་བཤེས་གཉེན་ལ་སོགས་པ་ཡུལ་མཆོག་རྣམས་ཀྱི་ངག་བརྐུ་བར་བྱ་སྟེ། དེ་ཡང་བསྒྲུབ་བྱ་དེའི་ལྕེ་ཡི་སྟེང་ན་པདྨ་དམར་པོ་འདབ་མ་བརྒྱད་པ་ཁ་ཐུར་དུ་ལྟ་བ་དང༌། སྙིང་གི་ནང་དུ་པདྨ་དམར་པོ་འདབ་མ་བརྒྱད་པ་ཁ་གྱེན་དུ་བསྟན་པ་གཉིས་ཁ་སྦྱོར་གྱི་ནང་དུ། ཁོ་ཡི་རྣམ་པར་ཤེས་པ་དང་ཤེས་རབ་ཀྱི་ངོ་བོ་ཨཱ་ལི་དམར་པོ་དང་ཀཱ་ལི་དཀར་པོས་མེར་གྱིས་ཁེངས་པ་ལ། རང་གི་སྙིང་ཀའི་དྷཱིཿལས་འོད་འཕྲོས་པས་ཕྱོགས་བཅུའི་སངས་རྒྱས་ལ་སོགས་པའི་ཤེས་རབ་ཐམས་ཅད་བསྡུས་ནས་དེ་ལ་ཐིམ་པས་བསྒྲུབ་བྱ་དེ་ཤེས་རབ་དང་ལྡན་པར་བསམ། དེ་ནས་རང་གི་སྙིང་གའི་དྷཱིཿལས་རྣམ་ཤེས་ཀྱི་བུང་བ་དམར་པོ་གྲངས་མེད་པ་འཕྲོས་ནས་བསྒྲུབ་བྱའི་ཁོང་པར་སོང་ནས་ཨཱ་ལི་ཀཱ་ལི་རྣམས་སོ་སོ་ཁྱེར་ནས་རང་གི་སྙིང་ཁ་དང་ལྕེ་ཡི་སྟེང་དུ་ཐིམ་པར་བསམ་ཞིང༌། རྩ་སྔགས་ཀྱི་མཐར་ཆེ་གེ་མོའི་ངག་བྷི་ཤི་ཀུ་རུ་ཧོཿཞེས་བརྒྱ་རྩ་བརྒྱད་ལ་སོགས་པ་བཟླས་ལ། ཁོ་ཡི་སྙིང་དང་ལྕེའི་པདྨ་རང་གི་སྙིང་དང་ལྕེ་ཡི་པདྨ་ལ་ཐིམ་པས། རང་གི་སྙིང་ཀར་འཇམ་དཔལ་དང་ལྕེ་སྟེང་དུ་དབྱངས་ཅན་མའི་འཁོར་ལོ་གསལ་བཏབ་ལ་སྔགས་བཟླས་པས། ཁོ་ཡི་དྲན་པ་དང་ཤེས་རབ་ཉམས་ནས་རང་ལ་རྒྱས་པར་འགྱུར་རོ། །ངག་འཕྲོག་པ་ནི། གཙོ་བོའི་རྩོད་བ་དང་ཤག་འགྲན་པའི་ཟླ་ལ་སོགས་པ་རང་བས་ཡུལ་དམན་པ་རྣམས་ལ་བྱ་སྟེ། དེ་ཡང་བསྒྲུབ་བྱ་དེ་ཡི་ལུས་ཀྱི་ནང་ན་རྩ་ཨ་ཝ་དྷཱུ་ཏི་རྒྱུ་མ་ཕུས་བཏབ་པ་དྲང་པོར་གྱེན་དུ་ལངས་པ་ལྟ་བུའི་མར་སྣ་གསང་གནས་དང་ཡར་སྣ་སྨིན་མཚམས་ལ་ཐུག་པའི་ནང་དུ་ཤེས་རབ་ཀྱི་ངོ་བོ་ཁོ་ཡི་རྣམ་ཤེས་ཨ་དཀར་པོས་ཐག་གིས་གང་བའི་སྨིན་མཚམས་སུ་བུག་པ་གྲུ་གསུམ་ལ་རྩ་དེའི་ཁ་བསྟན་ནས་ཨ་རྣམས་དཀར་ཉུག་ཉུག་ཡོད་པར་བསམ། དེ་ནས་རང་གི་ཐུགས་ཀའི་དྷཱིཿལས་འོད་དམར་པོ་འཕྲོས་པས་ཁོ་ཡི་སྨིན་མཚམས་ཀྱི་བུག་པའི་ཨ་རྣམས་ལ་ཕོག །ཨ་རྣམས་རིམ་པས་ཚུར་དྲངས་ཏེ་རང་གི་ཁོང་པར་ཐིམ་པས་འཕྲལ་ལ་ཤེས་རབ་ཀྱིས་གང་ཞིང༌། ཁོ་ཡི་ཤེས་རབ་འཕྲལ་ལ་ཟད་དེ་སྟོང་སངས་སོང་བར་བསམ་ཞིང་སྔར་གྱི་སྔགས་བཟླས་ཏེ། མཐར་ཁོ་ཡི་ལུས་སྟོང་པར་སོང༌། རང་གི་ལུས་གང་ནས་ཤེས་རབ་རྒྱས་པར་བསམས་ལ། ཁོ་ཡི་དྲན་པ་ཉམས་ཤིང་རང་གི་དྲན་པ་སྔོན་ལས་ཁྱད་པར་དུ་འཕགསཔ་ཐོབ་པར་འགྱུར་རོ། །སླར་ཡང་བླ་མ་དམ་པ་ལས་བརྒྱུདཔའི་གདམས་པ་ནི། བསྒྲུབ་བྱ་ཕ་རོལ་པོ་ཤེས་རབ་དང་ལྡན་པ་རྣམས་ཀྱི་སྙིང་གར་པདྨའི་སྡོང་པོ་འདབ་མ་རྒྱས་པའི་སྟེང་དུ་རྣམ་ཤེས་ཀྱི་ངོ་བོ་ཨཱ་ལི་ཀཱ་ལི་རེ་བསམས་ལ། རང་གི་སྙིང་ཀར་འཇམ་དཔལ་གྱི་རལ་གྲིའི་དྷཱིཿལས་རྣམ་ཤེས་ཀྱི་བུང་བ་མང་པོ་འཕྲོས་པས་ཁོ་ཡི་ཁོང་པར་ཞུགས་ནས་ཡི་གེ་རྣམས་བསྡུས་ཏེ་རང་གི་ཁོང་པར་ཐིམ། ཡང་བུང་བ་རྣམས་ཁོ་ཡི་ཁོག་པར་སོང་བས་པདྨ་རྣམས་ཀྱི་བཅུད་དང་བཀྲག་དང་གཟི་མདངས་ཐམས་ཅད་འཇིབས། རང་གི་ཁོང་པའི་དྷཱིཿལ་ཐིམ་པས་ཤེས་རབ་དང་བཀྲག་མདངས་གཟི་བརྗིད་རྒྱས། ཡང་དེ་བཞིན་དུ་ཡང་ནས་ཡང་དུ་བསམ་པའི་མཐར་ཁོ་ཡི་ཁོང་པའི་པད་སྡོད་རྙིངས་ཤིང་ནུས་པ་མེད་ལ། རང་གི་སྙིང་གའི་དྷཱིཿདང་འཁོར་ལོའི་བཀྲག་མདངས་རྒྱས་ཤིང་ནུས་པ་དང་ལྡན་པར་བསམས་ནས་སྔགས་བཟླས་ན་གཞན་གྱི་ཤེས་རབ་དང་གཟི་བརྗིད་ཚེ་དང་བསོད་ནམས་ཐམས་ཅད་རང་ལ་འཕོ་བར་འགྱུར་རོ། །འདི་ནི་ཤིན་ཏུ་གསང་བའི་མན་ངག་ཕྱི་རབས་ཀྱི་དོན་དུ་ཡི་གེར་བཀོད་པའོ། །དབང་དུ་བྱ་བའི་ཁྱད་པར་ལས་ཤེས་རབ་རྒྱས་པར་བྱེད་པ་སྟེ། ངག་བསྡུ་བའི་ལས་ཚོགས་སོ། ། དྲུག་པ་མངོན་ཤེས་སྒྲུབ་པ་ནི། ལྷུང་བཟེད་ཀྱི་འཁོར་ལོའི་ནང་དུ་སྔར་གྱི་སྨན་རྣམས་ཀྱི་སྟེང་དུ་མུ་ཏིག་དམར་པོ་དང་ཀ་ར་སྦྱར་བའི་རིལ་བུ་བྱས་ལ། འཇམ་དཔལ་དང་དབྱངས་ཅན་མའི་སྒོམ་རིམ་སྔར་བཞིན་བྱེད་ཅིང༌། ཨོཾ་ཧྲཱིཿདྷཱིཿ མ་མེ་དཱི་པ་མཉྫུ་ཤྲཱི་མཱུྃཿཧྲཱིཿཔྲཛྙཱ་ཏུ་ནི་ཧྲཱིཿ ཝཱ་ཀཱི་ཤྭ་རི་མཱུྃ་ཞེས་ཁྲི་ཕྲག་གཅིག་བཟླས་ལ། ཕྱིས་ཉི་ཟླ་གཟས་འཛིན་པའི་ཚེ་དེ་བཞིན་དུ་བསྒྲུབས་ཏེ་ཟོས་ན་མངོན་པར་ཤེས་པ་དྲུག་ཁྲི་དང་ལྡན་པར་འགྱུར་རོ། །འདིར་གཞུང་ཁ་ཅིག་ལས་མུ་ཏིག་དམར་པོ། ཨ་ག་རུ་ནག་པོ། སྤང་སྤོས། ཀ་ར་རྣམས་བ་དམར་སྐྱའི་འོ་མས་རིལ་བུ་བྱས་ཏེ་སྔ་མ་བཞི་སྒོམ་བཟླས་བྱས་ནས། ཉི་ཟླ་གཟའ་ཟིན་པའི་ཉིན་པར་རིལ་བུ་ཟོས་ན་མངོན་པར་ཤེས་པ་འགྲུབ་པར་འགྱུར་རོ། ། ཞེས་བཀོད་པ་རང་སྣང་ངོ༌། །མངོན་པར་ཤེས་པ་སྒྲུབ་པའི་ལས་ཚོགས་སོ། ། བདུན་པ་རིག་པ་སྒྲུབ་པ་ནི། སྔར་བཤད་པའི་རིམ་པས་སྒྲུབ་ཅིང༌། ན་མོ་མཉྫུ་ཤྲཱི་ཀུ་མཱ་ར་བྷཱུ་ཏཱ་ཡ། ཏདྱ་ཐཱ། ཨོཾ་ཨ་ར་ཛེ་བི་ར་ཛེ»«། ཤུདྷེ་ཤུདྡྷེ། བི་ཤུདྡྷེ་བི་ཤུདྡྷེ། ཤོ་དྷ་ནི་ཤོ་དྷ་ནི། བི་ཤོ་དྷ་ནི་བི་ཤོ་དྷ་ནི། ཨ་མ་ལེ། བི་མ་ལེ། ཛ་ཡ་བ་ཏི། རུ་རུ་ཙ་ལེ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སྭཱཧཱ། འབུམ་ཕྲག་གཅིག་བཟླས་ན་མཁས་པར་འགྱུར་རོ། །གཉིས་བཟླས་ན་རིག་པ་འཛིན་པར་འགྱུར་རོ། ། གསུམ་བཟླས་ན་འཇམ་དཔལ་གྱི་ཞལ་མཐོང་བར་འགྱུར་རོ། །བཅངས་པ་ཙམ་གྱིས་སྐྱེ་བ་དྲན་པར་འགྱུར་རོ། །གལ་ཏེ་འཚམས་མེད་པ་ལ་སྤྱོད་པ་ཡིན་ཡང་དེ་ལྟར་སྦྱོར་བ་ཉིད་གུས་པས་བསྒྲུབ་ན་དེ་དག་གི་མཐའ་བདག་གིས་རྫོགས་པར་བགྱིའོ། །གལ་ཏེ་དེ་ལྟར་མ་བགྱིས་ན་བདག་གིས་སངས་རྒྱས་བཅོམ་ལྡན་འདས་རྣམས་བསླུས་པར་འགྱུར་རོ། །ཞེས་ཞལ་གྱིས་བཞེས་ཤིང་ཡི་དམ་དུ་མཛད་པའོ། །ཁ་ཅིག་ནི་བཟླས་པ་ཙམ་གྱིས་འགྲུབ་ཅེས་འདོད་ ཀྱང༌། བདག་གི་ལམ་ནི་སྒྲུབ་པ་དང་འབྲེལ་དགོས་ཞེས་བཞེད་དོ། །གཞན་ཡང་སྔར་གྱི་རྫས་བཅུ་གཉིས་པོའི་སྟེང་དུ་རྟའི་མགྲིན་པའི་ཤ་བཏང་ནས་སྔར་བཞིན་བསྒྲུབ་ན་རྐང་མགྱོགས་འགྲུབ་པར་འགྱུར་རོ། །འུག་པ་མཐིལ་རིལ་གྱི་མིག་འབྲས་བཏང་ནས་འོག་གི་གཏོར་མཐོང་བ་དང་མིག་རྣོ་བར་འགྱུར་རོ། ། ཕུག་རོན་བྱ་རྒོད་འདབ་ཆགས་ཀྱི་མཁྲིས་པ་བཏང་ན་མངོན་ཤེས་འགྲུབ་པར་འགྱུར་རོ། །སྔགས་ཀྱི་ཤམ་བུ་ནི་ཇི་ལྟར་འདོད་པ་དེ་ཉིད་སྤེལ་ལོ། །རིག་པ་སྒྲུབ་པའི་ལས་ཚོགས་སོ། །འཇམ་དཔལ་གྱི་ཞལ་ལྟ་བ་ནི། སྔར་གྱི་རྫས་རྣམས་ཀྱི་སྟེང་དུ་ག་བུར་དང་གི་ཝཾ་བསྲེག་པའི་རིལ་བུ་བྱས་ལ་སྔ་མ་བཞིན་བསྒོམ་ཞིང༌། ཨོཾ་ཧྲཱིཿདྷཱིཿམ་མེ་དཱི་པཾ་མཉྫུ་ཤྲཱི་མཱུྃཿཧྲཱིཿཔྲ་ཛྙཱ་བརྡྷ་ནི་ཧྲཱིཿདྷཱིཿསྭཱ»་«ཧཱ། ན་མོ་མཉྫུ་ཤྲཱི་སིདྷ་ནི་ཡ་མཱནྟ་ཀ་ནི་ཧཱུྃ་ཕཊ། ཅེས་ཁྲི་ཕྲག་གཅིག་བཟླསཔའི་རིལ་བུ་ཆུ་གཙང་མ་དང་བསྲེས་ལ་རང་འཇམ་དཔལ་དུ་བསམ་པའི་ལག་མཐིལ་དུ་བླུགས་ཏེ་སྔགས་བརྒྱ་རྩ་བརྒྱད་བཟླས་ཏེ་མིག་ལ་བྱུག་ན་འཇམ་དཔལ་མཐོང་བར་འགྱུར་རོ། །གཞུང་ཁ་ཅིག་ལས་ག་བུར་གྱི་ཝཾ་བསྲེས་པའི་ཆུ་ལག་མཐིལ་གཡོན་དུ་བླུགས་ལ། རང་འཇམ་དཔལ་དུ་མོས་པས་སྔགས་བཟླས་ཏེ་མིག་ལ་བྱུགས་པས་ཞལ་མཐོང་བར་འགྱུར་རོ་ཞེས་བཀོད་པར་སྣང་ངོ༌། །བདག་གི་བླ་མས་ནི་སྔ་མ་བཞིན་མཛད་པས་ཞལ་མཐོང་བ་ཉིད་ཡིན་ནོ། །ཞལ་ལྟ་བུའི་ལས་ཚོགས་སོ། །ལས་ཚོགས་ཀྱི་ལེའུ་སྟེ་བདུན་པའོ།། །། དེ་ལྟར་རྗེ་བཙུན་འཇམ་པའི་དཔལ་ནི་ལེགས་པར་སྒྲུབ་པའི་བསོད་ནམས་གང༌། །སྟོན་མཁའ་ཡིད་མཁའི་དྲི་མ་མེད་ལ་མཚན་དཔེའི་འོད་རབ་གསལ་བའི་སྐུ། »།«མཛད་པའི་ཟེར་བས་རྣམ་རོལ་རབ་བརྟན་གདུལ་བྱའི་འཇིག་རྟེན་འགེངས་པ་ཡིས། །མ་ལུས་བདེ་འབྱུང་གེ་སར་འཛུམ་པས་འགྲོ་བའི་བསམ་པ་འགྲུབ་པར་ཤོག །ཚུལ་འདི་གངས་རིའི་ཁྲོད་ཀྱི་སྙན་ངག་མཁན། །དཔལ་ལྡན་ཚུལ་ཁྲིམས་བློ་གྲོས་བཟང་པོ་ཡིས། །བློ་གྲོས་དོན་གཉེར་ཀུན་གྱི་གཙུག་རྒྱན་དུ། །བསམ་ཡས་ལྷུན་གྱིས་གྲུབ་པའི་གནས་སུ་སྦྱར། »།«འཕགས་པ་འཇམ་དཔལ་གྱི་སྒྲུབ་ཐབས་ཡིད་བཞིན་ནོར་བུ་ཞེས་བྱ་བ། མང་དུ་ཐོས་པའི་སྙན་ངག་མཁན་བསམ་ཡས་པ་ངག་གི་དབང་པོས་གཞུང་དང་གདམས་པ་དང་རང་གིས་ཉམས་སུ་བླངས་པ་རྣམས་ཕྱོགས་གཅིག་ཏུ་བཀོད་པ་རྫོགས་སོ།། །། མདྒ་ལཾ།།

[edit]

This page is a cleaned copy of the following rywikitexts page, which stay unchanged:

Cleaning (21 November 2026): removed 1 running heads, 3 Word page fields. The «» marks are kept in the text: they enclose the small-print notes of the print, which are shown in small print with the marks hidden.

Part of the Longchenpa Collected Works (about this project).