LONGCHENPA-PECIN-24-YA-021: Difference between revisions

From Rangjung Yeshe Wiki Texts
LONGCHENPA-PECIN-24-YA-021
Jump to navigation Jump to search
Longchenpa Project: generated page (21 November 2026)
 
Longchenpa Project: Tibetan in the wiki's TibetanMachineUni font; «…» notes in small print (22 November 2026)
 
Line 25: Line 25:
}}
}}
= Tibetan Text =
= Tibetan Text =
<div class="TibUni18" lang="bo" style="line-height:2.1;">
<div class="TibetanMachineUni16 lcp-etext" lang="bo">
༈ དུས་ལ་མངོན་པར་སྐྱོ་བའི་རབས་བི་ཛ་ཧ་རཾ། «ཨོཾ་སྭ་སྟི་སིདྡྷཾ། དུས་ལ་མངོན་པར་སྐྱོ་བའི་རབས་ཞེས་བྱ་བ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །གང་གིས་ཐོག་མར་བྱང་ཆུབ་ཐུགས་བསྐྱེད་ནས། །གྲངས་མེད་བསྐལ་པར་བརྩོན་པའི་གོ་བགོས་ཏེ།།མངོན་པར་བྱང་ཆུབ་མཛད་པ་བསམ་མི་ཁྱབ། །ཟས་གཙང་སྲས་སུ་གྱུར་ལ་གུས་ཕྱག་འཚལ། །གསུང་རབ་ཆུ་གཏེར་ཡོན་ཏན་གངས་ཆེན་མཚོ། །རྒྱལ་བ་རྒྱལ་སྲས་ཡིད་བཞིན་འབྱུང་བའི་གནས། །ཕན་བདེའི་དུས་རླབས་སྲིད་ཞིའི་དབྱིངས་ཁྱབ་པ། །དམ་ཆོས་རྒྱ་མཚོ་ཡུན་རིང་གནས་གྱུར་ཅིག །བསླབ་གསུམ་ཡོན་ཏན་རིན་ཆེན་ས་གཞི་ལ། །དགེ་ཚོགས་རྣམ་འཕེལ་འགྲོ་ཀུན་བསོད་ནམས་ཞིང༌། །རང་གཞན་དོན་གཉིས་འབྱོར་བའི་གཞིར་གྱུར་པ། །འཕགས་པའི་དགེ་འདུན་དད་བརྒྱའི་གཙུག་གིས་མཆོད། །ཞི་བ་ཆོས་བཟང་ཕན་བདེ་འབྱུང་བའི་གནས། །ཐུབ་པའི་བསྟན་པ་ནུབ་རིའི་རྩེར་ལྷུང་ཞིང༌། །བཤེས་གཉེན་དམ་པ་ཕལ་ཆེར་འདས་པའི་དུས། །ལྔ་བརྒྱ་ཐ་མར་གྱུར་ལ་སྐྱོ་བས་ཉོན། །འཛམ་བུ་གླིང་ལས་ཁྱད་པར་གངས་རིའི་ཡུལ། །དེང་སང་དུས་ངན་མི་རྣམས་མི་སྲུན་ཞིང༌། །» «བཅོས་མའི་ཆ་ལུགས་དག་ཀྱང་གྲངས་མང་ལ། །ཡང་དག་ཚུལ་བཞིན་སྤྱོད་པའི་སྐྱེ་བོ་ཉུང༌། །ཡུལ་རྣམས་ཕལ་ཆེར་ཁྲིམས་ཀྱིས་མི་འཚོ་ལ། །མི་རིགས་རང་གར་སྤྱོད་ཅིང་བདེན་རྫུན་འཆོལ། །ཡོན་ཏན་སྐྱོན་དུ་མཐོང་བ་འུག་པའི་མིག །གངས་རིའི་ཁྲོད་ལས་གཞན་པ་སུ་ཞིག་ཀྱེ། །ཕྱོགས་འདིར་གནའ་དུས་བཟང་པོ་ནུབ་གྱུར་ཅིང༌། །ད་དུས་ངན་པའི་སྙིགས་མ་ལྔ་བདོ་བས། །ཡུལ་ལུགས་འགྱུར་ཞིང་ཆ་ལུགས་སྣ་ཚོགས་བྱེད། །བསམ་སྤྱོད་མི་དགེ་སྡིག་སྤྱོད་འབའ་ཞིག་འཕེལ། །དེ་དག་དབང་གིས་ཕྱི་རོལ་དུས་ཚིགས་དང༌། །ནང་གི་བདེ་སྡུག་འགྱུར་བས་སྡུག་བསྔལ་ཞིང༌། །སྔོན་དུས་བཟང་པོའི་རྗེས་སུ་མཐུན་མ་གྱུར། །ད་ནི་རང་བཞིན་སྐྱོ་བའི་ཚུལ་ལ་ཉོན། །སྔོན་དུས་ཡུལ་རྣམས་དར་ཞིང་རྒྱས་ན་ཡང༌། །ད་དུས་གྲོང་རྣམས་ཕལ་ཆེར་འབྲོག་སྟོང་འདྲ། །སྐྱེ་བོ་ཉུང་ཞིང་ཟས་གོས་འབྱོར་པ་ཆུང༌། །» «དབུལ་འཕོངས་འཚེ་བ་མང་པོས་སེམས་འདི་སྐྱོ། །སྔོན་དུས་བཟང་ལ་ཆར་ཆུ་སྙོམས་ན་ཡང༌། །ད་དུས་ངན་པས་དཔྱིད་འཁྱགས་དབྱར་སྐམ་ལ། །སྟོན་འཁྲུག་དགུན་འཇུངས་སད་སེར་མུ་གེས་ཉེན། །མི་རྣམས་སེར་སྣ་འཕེལ་བས་སེམས་འདི་སྐྱོ། །སྔོན་དུས་ཡུལ་རྣམས་ཁྲིམས་ཀྱིས་སྐྱོང་ན་ཡང༌། །ད་དུས་ཁྲིམས་མེད་ངན་པ་རྒྱལ་བའི་དུས། །མི་བདེན་ཁ་འཛིན་བདེན་ལ་ཆད་པ་གཅོད། །དོན་མེད་ཁྲལ་ཆུས་མནར་ལ་སེམས་འདི་སྐྱོ། །སྔོན་དུས་ཡུལ་རྣམས་འཇམ་ཞིང་བདེ་ན་ཡང༌། །ད་དུས་རྩུབ་བས་ལམ་འཕྲང་ཆོམ་པོ་མང༌། །འགྲིམ་འགྲུལ་མི་བདེ་མང་བས་ཉུང་བ་འཇོམས། །ཕན་ཚུན་མི་མཐུན་རྩོད་པས་སེམས་འདི་སྐྱོ། །སྔོན་དུས་ཕྱོགས་རྣམས་འཇམ་བདེར་གནས་ན་ཡང༌། །ད་དུས་དམག་དང་འཁྲུག་ལོང་སྣ་ཚོགས་རྒྱས། །ཀུན་གྱི་སྙིང་དུ་འབྱུང་པོའི་གདོན་ཞུགས་པས། །བདེ་བའི་གོ་སྐབས་མེད་པས་སེམས་འདི་སྐྱོ། །སྔོན་དུས་གཞུང་བཟང་ངོ་ཚ་ཆེ་ན་ཡང༌། །ད་དུས་ཁྲེལ་ཆུང་ཀུན་སྤྱོད་བསྐལ་པ་ངན། །ཕན་ཚུན་རིགས་འཆོལ་གཉེན་ལ་གདུང་སེམས་ཆུང༌། །གཞུང་ངན་ཕྱི་ཐག་ཐུང་བས་སེམས་འདི་སྐྱོ། །སྔོན་དུས་མཐུན་ལ་ནང་རིགས་གཤིམ་ན་ཡང༌།» «།ད་དུས་མི་མཐུན་དབྱེན་བཅུག་གཏམ་སྣ་མང༌།» «།» «གཅིག་གིས་གཅིག་བསླུ་ཕན་ཚུན་ཉེས་ན་དགའ། །ཕྲག་དོག་ཟུག་རྔུ་ཆེ་བས་སེམས་འདི་སྐྱོ། །སྔོན་དུས་ཁོང་ཡངས་ལྷོད་ཆ་ཆེ་ན་ཡང༌། །ད་དུས་གྲིམ་པས་ཅུང་ཟད་ཙམ་གྱི་ཕྱིར། །ཕ་དང་བུར་འཐབ་དཔོན་སློབ་མཛའ་བཤེས་འབྲལ། །རང་བཞིན་ཀུན་སྤྱོད་ངན་པས་སེམས་འདི་སྐྱོ། །སྔོན་དུས་ངོ་ཚ་ཁྲེལ་འཛེམ་ཆེ་ན་» «ཡང༌། །ད་དུས་ཟས་ནོར་ཅུང་ཟད་ཙམ་གྱི་ཕྱིར། །སྡིག་དང་གཏམ་ངན་ཁྱད་དུ་བསད་ནས་སྒྲུབ།།བཟང་པོའི་སྤྱོད་དང་བྲལ་བས་སེམས་འདི་སྐྱོ། །སྔོན་དུས་རང་བཞིན་ཆད་ལ་བཙན་ན་ཡང༌། །ད་དུས་མི་རྣམས་ཁས་བླངས་དོན་སྟབས་» «གཅོག །རྫུན་དང་སྤྲུལ་པ་ངན་གཡོ་སྣ་ཚོགས་བྱེད། །བློ་གཏད་མེད་པ་མཐོང་ནས་སེམས་འདི་སྐྱོ།།སྔོན་དུས་གཤིས་བཟང་རང་བཞིན་བརྟན་ན་ཡང༌། །ད་དུས་རྒྱུད་འཚུབས་ཁོང་ཁྲོ་འཁོན་ངན་འབེབས། །རང་ཚུགས་མི་ཐུབ་ཟུངས་མེད་ཁ་གསག་ཅན།» «།མཐོ་འགྲོགས་གསར་ངས་ཆེ་བས་སེམས་འདི་སྐྱོ། །སྔོན་དུས་སྤྱི་ཚིས་བཟང་སེམས་ཆེ་ན་ཡང༌། །ད་དུས་ཕྱོགས་ཆར་རང་འདོད་གཙོ་བོར་» «སྒྲུབ། །ཁ་ཡངས་གཏིང་དོག་ངན་ལ་མི་ཚེ་བསྐྱལ། །བཟང་སེམས་མེད་པ་མཐོང་ནས་སེམས་འདི་སྐྱོ། །སྔོན་དུས་དོན་རྣམས་རིགས་པས་སྒྲུབ་ན་ཡང༌། །ད་དུས་འཕྲལ་ཕུགས་རྒྱུ་མཚན་མི་གཞིག་པར། །གང་དྲན་བྱེད་སྐྱེན་ཕྱིས་ནས་འགྱོད་པ་ཅན། །ལམ་དུ་མི་འགྲོ་སྒྲུབ་པས་སེམས་འདི་སྐྱོ། །སྔོན་དུས་བྱ་བ་གང་ལའང་གྲོས་སུ་བསྡུར། །ད་དུས་ཚོད་མེད་རང་བཟོ་རང་གར་བྱེད། །འཕྲལ་ཕུགས་མི་བརྟན་ཆབ་སྲིད་ཉམས་པའི་རྒྱུ། །རང་གཞན་གནོད་པ་མཐོང་ནས་སེམས་འདི་» «སྐྱོ། །སྔོན་དུས་གང་ལའང་ཕན་གནོད་གཞིག་ན་ཡང༌། །ད་དུས་མི་རྣམས་སྤྱང་ཀིས་ལུག་མཐོང་ལྟར། །གཞན་ལ་གནོད་ཀྱང་རང་དོན་འབའ་ཞིག་སྒྲུབ། །བཟང་པོའི་ཚུལ་དང་འགལ་བས་སེམས་འདི་སྐྱོ། །སྔོན་དུས་ཤ་ཚ་གྲོས་འདེབས་ཉན་ན་ཡང༌། །ད་དུས་བདེན་པའི་གཏམ་ལ་ཉན་མཁན་མེད། །ངོར་བསྟོད་དབྱེན་བཅུག་རྣ་བའི་བདུད་རྩི་བཞིན། །དམ་པའི་ལམ་དང་འགལ་བས་སེམས་འདི་སྐྱོ། །སྔོན་དུས་ཕ་མ་རྒན་རབས་བཀུར་ན་ཡང༌། །ད་དུས་རྒན་རབས་བཀུར་སྟི་སྲི་ཞུ་» «མེད། །གྲལ་ཡང་མཐར་འཇོག་ཟས་གོས་ལྷག་རོལ་སྟེར། །ངོ་ཚའི་གནས་སུ་བྱེད་པས་སེམས་འདི་སྐྱོ། །སྔོན་དུས་བཟང་དྲིན་བྱས་པ་གཟོ་ན་ཡང༌། །ད་དུས་མི་རྣམས་བཟང་ལན་ངན་གྱིས་འཇལ། །ཕན་ཆེར་བཏགས་ནས་གནོད་པ་ཆེར་སྐྱེལ་པ། །འགྲོགས་སུ་མི་རུང་མཐོང་ནས་སེམས་འདི་སྐྱོ། །སྔོན་དུས་གང་ལའང་རང་བཞིན་བརྟགས་ན་ཡང༌། །ད་དུས་མི་རྣམས་འབར་རྒྱུག་ཕྱོགས་གཏམ་ཅན། །» «བཟང་ངན་མི་དཔྱོད་གྲགས་པའི་རྗེས་སུ་འབྲང༌། །སྒྲོ་སྐུར་སྨྲ་བསྟོད་མང་བས་སེམས་འདི་སྐྱོ། །དེ་དག་ལ་སོགས་ཉེས་པ་ཚད་མེད་པ། །དུས་ངན་སྐྱེ་བོ་རྣམས་ཀྱི་རང་བཞིན་ཏེ། །ཆ་ཙམ་བརྗོད་པས་ཕྱོགས་ཙམ་མཐོང་བར་ཟད། །རྒྱས་པར་བསྐལ་བའི་བར་དུ་བརྗོད་མི་ལང༌། །དེ་དག་མཐོང་ནས་དད་ལྡན་སྐྱེ་བོ་རྣམས། །» «དབེན་པའི་གནས་སུ་དམ་ཆོས་སྒྲུབ་པར་རིགས། །དུས་ལ་མངོན་པར་སྐྱོ་བའི་རབས་ལས། ཐ་མལ་བའི་གནས་ལ་སྐྱོ་བར་བསྟན་པ་སྟེ་རབས་དང་པོའོ།། །།དེ་ལྟར་འཇིག་རྟེན་བསམ་སྤྱོད་སྐྱེ་བོ་ཀུན། །རང་བཞིན་བླུན་པས་བདེན་དུ་ཆུག་ན་ཡང༌། །ཐར་པར་ཞུགས་པ་ཆོས་དོན་གཉེར་བ་རྣམས། ། བསྟན་པ་སྙིགས་མའི་སྐྱོ་བ་བཤད་ཀྱིས་ཉོན། །ལྷར་བཅས་འགྲོ་བའི་ཕན་བདེ་འབྱུང་བའི་གནས། །བསྟན་པ་འཇིག་རྟེན་མིག་འདི་ཟུམ་དུ་ཉེ། །བཤེས་གཉེན་ཐར་པའི་ལམ་མཁན་ཕལ་ཆེར་འདས། །བྱང་ཆུབ་ལྗོན་ཤིང་རྙིང་བས་སེམས་འདི་སྐྱོ། །» «སྔོན་གྱི་རྒྱལ་བས་བྱང་ཆུབ་བརྙེས་པའི་གནས། །རྡོ་རྗེ་གདན་སོགས་འཕགས་པའི་ཡུལ་རྣམས་སྟོང༌། །སྡིག་སྤྱོད་སོག་པོ་རྣམས་ཀྱིས་མཐའ་བསྐོར་ཞིང༌། །ཉམ་ངའི་གནས་སུ་གྱུར་ལ་སེམས་འདི་སྐྱོ། །ཕྱོགས་རྣམས་གང་ནའང་དགེ་བའི་བཤེས་ཉུང་ཞིང༌། །ཆོས་བཞིན་སྤྱོད་པའི་སྐྱེ་བོ་རབ་དཀོན་ལ། །སྡེ་དགོན་རྣམས་ཀྱང་ཁྱིམ་པའི་གྲོང་འདབ་བཞིན། །ཆོས་མིན་བྱ་བྱེད་མང་བས་སེམས་འདི་» «སྐྱོ། །རང་ཉིད་མཁན་སློབ་གནས་སུ་ཁས་འཆེ་ཡང༌། །ཆོས་ཀྱི་ཉམས་ལེན་ཤེས་བྱེད་གཉིས་དང་བྲལ། །ཁྱིམ་ཆུང་སྤངས་པའི་ཁྱིམ་ཆེན་འདུ་འཛི་ཅན། །འཁྲུལ་སྣང་བདེན་པར་འཛིན་ལ་སེམས་འདི་སྐྱོ། །རང་ཉིད་མཆོག་ཏུ་བཙུན་པར་ཁས་འཆེ་ཡང༌། །ཕྲ་མོ་བསྲུང་ལ་ཆེན་པོ་ཁྱད་དུ་གསོད། །ཡོ་བྱད་སོགས་བྲུན་ཚེ་འདི་འབའ་ཞིག་པ། །ཐར་ལམ་ངེས་འབྱུང་བྲལ་ལ་སེམས་འདི་སྐྱོ། །རང་ཉིད་བཟང་པོའི་གནས་སུ་ཁས་འཆེ་ཡང༌། །ཕྱི་ནང་འཛོལ་ལ་ཆོས་བརྒྱད་གཙོ་བོར་འཛིན། །» «གཞན་ལ་སྡང་ཞིང་རང་རྒྱུད་མ་དུལ་བས། །ཀོ་ལོང་ཟུར་མགོ་རགས་ལ་སེམས་འདི་སྐྱོ། །རང་ཉིད་རབ་ཏུ་བྱུང་བར་ཁས་འཆེ་ཡང༌། །ཐོས་བསམ་མི་གཉེར་ཡོ་བྱད་གང་བཟང་འགྲན། །བླང་དོར་མི་ཤེས་བསླབ་གསུམ་ནོར་གྱིས་དབེན། །ཉོན་མོངས་དུག་ལྔ་འཁྲུགས་པས་སེམས་འདི་སྐྱོ། །རང་ཉིད་ཆོས་ལ་ཞུགས་པར་ཁས་འཆེ་ཡང༌། །དགེ་སྡིག་མི་འཛེམ་འཁྲུལ་པའི་བྱ་བས་གཡེངས། །དད་མེད་ཤེས་རབ་ཆུང་ལ་དྲན་པ་གསལ། །ཆོས་མེད་སྟོང་པར་འགྲོ་བས་སེམས་འདི་སྐྱོ། །རང་ཉིད་བསྟན་ལ་ཞུགས་པར་ཁས་འཆེ་ཡང༌། །ཁྲིམས་མེད་རྟགས་ཙམ་འཛིན་ལ་འདོད་ཡོན་གཉེར། །རབ་ཏུ་བྱུང་ཡང་ཆོས་ཀྱིས་མ་གོས་པའི། །རྫིང་བུའི་ངང་མོ་འདྲ་ལ་སེམས་འདི་སྐྱོ། །རང་ཉིད་བསོད་ནམས་གསོག་པར་ཁས་འཆེ་ཡང༌། །» «ཕྱོགས་ཆའི་སྦྱིན་པ་ལོ་འདོད་རློམ་སེམས་ཅན། །སྡིག་དང་འདྲེས་པ་ཁ་ལན་རེ་བཅས་གཞི། །ངས་བྱས་ཡུས་ཀྱིས་བརྣངས་ལ་སེམས་འདི་སྐྱོ། །རང་ཉིད་འབྱོར་ལྡན་ཕྱུག་པོར་ཁས་འཆེ་ཡང༌། །སེར་སྣས་བཅིངས་ཏེ་གཏོང་སེམས་རྡུལ་ཙམ་ མེད། །རང་ཡང་མི་སྤྱོད་གཞན་ལའང་མི་སྦྱིན་པ། །འཆི་དུས་སྡིག་སྤྱོད་ཅན་གྱུར་སེམས་འདི་སྐྱོ། །རང་ཉིད་སྡེ་དགོན་ཆོས་ལྡན་ཁས་འཆེ་ཡང༌། །ཆོས་མིན་བྱ་བྱེད་ཁྱིམ་པའི་གྲོང་རྡལ་བཞིན། །རྣམ་གཡེང་འདུ་འཛི་སྡུག་བསྔལ་རྒྱུན་མི་འཆད། །» «ཆགས་སྡང་འཐབ་རྩོད་མང་བས་སེམས་འདི་སྐྱོ། །དེ་དག་ལ་སོགས་ཉེས་པའི་ཚོགས་མང་པོ། །བསྐལ་པར་བརྗོད་ཀྱང་ཀུན་ཏུ་ཟད་མི་ཤེས། །འདི་འདྲའི་ཚུལ་ལ་མངོན་པར་སྐྱོ་བ་ཡིས། །དབེན་པའི་གནས་སུ་དམ་ཆོས་སྒྲུབ་པར་རིགས། །» «དུས་ལ་མངོན་པར་སྐྱོ་བའི་རབས་ལས། ཕལ་པའི་གནས་ལ་མངོན་པར་སྐྱོ་བར་བསྟན་པ་སྟེ་རབས་གཉིས་པའོ།། །།དེ་ལྟར་ཕལ་རྣམས་ཉེས་པའི་སྐྱོན་མང་པོ། །ཐོས་བསམ་ཚུལ་ལ་བློ་མིག་མ་སྦྱངས་པས། །མི་ཤེས་སྐྱོན་གྱུར་གང་དེ་བདེན་མོད་ཀྱི། །ཤེས་བཞིན་ཁྱད་དུ་གསོད་ལ་སྐྱོ་བས་ཉོན། །རང་ཉིད་བླང་དོར་ཤེས་པར་རློམ་ན་ཡང༌། །རྒྱུ་འབྲས་མི་འཛེམ་འདོད་ཡོན་རང་དགར་སྤྱོད། །ཐབས་ཀྱིས་གཞན་བསླུ་དུག་ལྔ་སུ་བས་རགས། །ཉོན་མོངས་འདོད་སྲེད་ཆེ་བས་སེམས་འདི་སྐྱོ། །རང་ཉིད་གཞན་ལ་འཆད་པར་ཁས་འཆེ་ཡང༌། །རང་རྒྱུད་མ་དུལ་གཞན་རྒྱུད་ཐབས་ཀྱིས་བསྲེག» «།» «གཟུ་བོར་མི་གནས་གཞན་ལ་འཕྱར་ཀ་གཏོང༌། །ཆོས་དང་རང་རྒྱུད་འཛོལ་བས་སེམས་འདི་སྐྱོ།» «།རང་ཉིད་དམ་ཆོས་མཁས་པར་ཁས་འཆེ་ཡང༌།» «།» «བྱམས་དང་སྙིང་རྗེས་རང་རྒྱུད་མ་བརླན་ཞིང༌། །གཞན་ལ་ཕྲག་དོག་འཐབ་རྩོད་འཁྲུག་ལོང་སྐྱེ། །ཀུན་གྱི་གཟིང་རྩར་གྱུར་ལ་སེམས་འདི་སྐྱོ། །རང་ཉིད་སྡེ་སྣོད་འཛིན་པར་རློམ་ན་ཡང༌། །རང་གཞན་གྲུབ་མཐའི་གཞུང་ལུགས་མི་ཤེས་ཤིང༌།།མང་དུ་མ་ཐོས་ཕྱོགས་རེའི་བློ་མིག་ཅན། །རློམ་པས་ཁེངས་པ་མཐོང་ནས་སེམས་འདི་སྐྱོ། །རང་ཉིད་དམ་ཆོས་ཤེས་པར་རློམ་ན་ཡང༌། །ཚིག་ཙམ་ཤེས་པས་ང་རྒྱལ་རི་བོ་བཞིན། །རང་རྒྱུད་ཆོས་དང་ལུང་པ་སོ་སོ་བ། །ནེ་ཙོའི་འདོན་པ་འདྲ་བས་སེམས་འདི་སྐྱོ། །རང་ཉིད་བཤེས་གཉེན་དམ་པར་རློམ་ན་ཡང༌། །ཀུན་ལ་ཁྱད་གསོད་ཉེ་བར་མ་ཞི་བ། །དོན་ལ་རྨོངས་པའི་མཁས་པ་ཡ་མཚན་ཅན། །ཆོས་མེད་དྲེད་པོར་གྱུར་ལ་སེམས་འདི་སྐྱོ། །དིང་སང་བསྟན་པ་ལུང་གིས་འཛིན་ན་ཡང༌། །སྔོན་གྱི་གཞུང་ལུགས་བཟང་པོ་ཕལ་ཆེར་ནུབ། །རང་བཟོའི་གྲུབ་མཐའ་ངན་པ་གཙོར་བྱས་ནས། །འཆད་རྩོད་རྩོམ་པའི་ཚུལ་ལ་སེམས་འདི་སྐྱོ། །རང་ཉིད་དམ་ཆོས་འཆད་པར་རློམ་ན་ཡང༌། །དང་པོར་བླ་མ་གུས་པས་མ་བསྟེན་» «ཞིང༌། །བར་དུ་ཚིག་དོན་བརྩོན་པས་མ་སྦྱངས་ལ། །ཐ་མར་འཆད་དུས་མུན་ཁུང་འཛུབ་བཙུགས་བཞིན། །རང་བཞིན་མ་གོ་འཆད་ལ་སེམས་འདི་སྐྱོ། །རང་ཉིད་གཞུང་ལུགས་རྩོད་པར་རློམ་ན་ཡང༌། །རང་གཞན་གྲུབ་མཐའི་སྐྱོན་གེགས་མི་ཤེས་པར། །ལོག་རྟོག་ཉིང་འཁྲུལ་ལེགས་པའི་གཞུང་ལུགས་ནུབ། །རྟོག་གེ་རྣམ་པར་འཁྱམས་ལ་སེམས་འདི་སྐྱོ། །རང་ཉིད་བསྟན་བཅོས་རྩོམ་པར་རློམ་ན་» «ཡང༌། །རྩོམ་གཞིའི་གནས་ལས་འདྲ་མིན་གོང་འོག་རྣམས། །ནོར་བས་གཞུང་ལུགས་སྔ་མ་ནུབ་པ་ལས། ཁུངས་མེད་གྲགས་པ་འདོད་ལ་སེམས་འདི་སྐྱོ། །» «རང་ཉིད་ཀུན་ལ་མཁས་པར་གྲགས་ན་ཡང༌། །རིམ་གསུམ་འཁོར་ལོའི་དགོངས་དོན་ལེན་མི་ཤེས། །ཚིག་ཚོགས་ཆེ་ཡང་སྒྲུང་དང་ལྡེའུ་བཞིན། །གསུང་རབ་གནས་ལ་རྨོངས་པས་སེམས་འདི་སྐྱོ། །ཚེ་གང་ཐོས་བསམ་དོན་ལ་སྦྱངས་ན་» «ཡང༌། །དོན་དམ་ངེས་པའི་དབྱིངས་ལ་བློ་མ་ཕྱོགས། །སྟོང་ཆད་ནམ་མཁའ་འདྲ་བའི་ངེས་དོན་སྟོན། །ཟབ་མོའི་གནས་ལ་རྨོངས་པས་སེམས་འདི་སྐྱོ། །དེ་དག་ལ་སོགས་ཉེས་པའི་ཚོགས་མང་པོ། །མཐའ་ཡས་རྒྱ་ཆེན་ནམ་མཁའི་དབྱིངས་རུམ་བཞིན། །འདི་དག་བསམས་ནས་ཞི་བའི་ནགས་ཁྲོད་དུ། །སྙིང་པོའི་དོན་གྱི་དེ་ཉིད་སྒོམ་པར་རིགས། །དུས་ལ་མངོན་པར་སྐྱོ་བའི་རབས་ལས། ཐ་སྙད་སྤྱོད་པའི་གནས་ལ་སྐྱོ་བར་བསྟན་པ་སྟེ་རབས་གསུམ་པའོ།། །།དེ་ལྟར་ཐ་སྙད་སྤྱོད་པའི་སྐྱེ་བོ་ཀུན། །ཤེས་བྱ་ཚིག་ཕྱིར་ཤོར་བའི་སྐྱོན་བདེན་གྱི། །ཚུལ་བཞིན་སྙིང་པོའི་དོན་ལ་ཞུགས་རྣམས་ཀྱི། །རང་བཞིན་སྐྱོ་བ་གང་དེ་བཤད་ཀྱིས་ཉོན། །ཀུན་ལས་འཕགས་པའི་བཀའ་སྲོལ་མཆོག་ཡིན་» «ཞེས། །གཙང་སྒྲ་བདག་འཛིན་མངོན་པའི་ང་རྒྱལ་ཅན། །མ་ནོར་ལམ་དུ་ཞུགས་པར་འདོད་རྣམས་ཀྱང༌། །བདག་ལྟ་མཆོག་ཏུ་འཛིན་པས་སེམས་འདི་སྐྱོ། །རང་ཉིད་སྙིང་པོའི་དམ་ཆོས་ཁས་ལེན་ཅིང༌། །སྔགས་སོགས་གཞན་ལ་སྨོད་པས་ཆོས་སྤོང་བ། །བློ་ཆུང་ལོག་པར་ལྟ་བ་བྲམ་ཟེའི་རིགས། །འདུ་ཤེས་ཕྱིན་ཅི་ལོག་ལ་སེམས་འདི་སྐྱོ། །ལུས་ངག་སྤྱོད་པ་གཙང་བར་འདོད་ན་ཡང༌། །སེམས་གཙང་མི་ཤེས་ཐོས་བསམ་ནོར་དང་བྲལ། །ཚུལ་འཆོས་སྤྱོད་པས་ཉིན་མཚན་འདའ་བྱེད་པ། །ཡོན་ཏན་འབྱོར་པ་སྤངས་པས་སེམས་འདི་སྐྱོ། །མི་རྟོག་ཡེ་ཤེས་དངོས་སུ་བལྟར་ཡོད་ཀྱང༌། །ད་རེས་དུས་མིན་སྨོན་ལམ་ཕྱི་དུས་འདེབས། །བྱ་བྱེད་སྤྲོས་པས་གནས་ལུགས་རྟོགས་སུ་རེ། །དངོས་པོ་མཚན་མར་ཞེན་པས་སེམས་འདི་» «སྐྱོ། །རང་བཞིན་དག་པའི་ཆོས་ལ་བདག་མེད་ཀྱང༌། །ཕྱོགས་རིས་བདག་ཏུ་ཞེན་པས་གཞན་ལ་སྡང༌། །སྤྱོད་པར་བལྟ་བ་ཁྱད་དུ་གསོད་པ་ཅན། །ཐར་ལམ་བྱང་ཆུབ་རིང་ལ་སེམས་འདི་སྐྱོ། །མི་རྟག་ཚིག་ཏུ་འཆད་ཀྱང་རྟག་པར་འཛིན། །ཚད་མེད་སྙིང་རྗེ་བརྗོད་ཀྱང་རྒྱུད་མ་དུལ། །ཐམས་ཅད་བདེན་མེད་ཟེར་ཡང་དངོས་པོར་ཞེན། །འདོད་ཡོན་འདུ་འཛི་གཉེར་ལ་སེམས་འདི་སྐྱོ། །གསང་མཆོག་རྡོ་རྗེ་འཛིན་པར་འདོད་ན་ཡང༌། །བསྙེན་སྒྲུབ་མི་བརྩོན་བསྐྱེད་རྫོགས་ཐུན་ལ་» «གཡེལ། །གསང་སྒོ་འཆོལ་བས་དམ་ཚིག་ཞིག་རལ་ཅན། །ཀུན་སྤྱོད་མཆོག་ཏུ་རྩིང་བས་སེམས་འདི་སྐྱོ། །དབང་རྣམས་མ་རྫོགས་རྒྱུད་དོན་མི་ཤེས་ལ། །བཟླས་བརྗོད་མ་ཚང་བསྙེན་སྒྲུབ་མ་ཐེམས་བཞིན། །དབང་བསྐུར་རབ་གནས་གྲོང་ཆོག་རྙེད་ཚོལ་ཅན། །གསང་སྔགས་ཁྲོམ་དུ་སྒྲོགས་པས་སེམས་འདི་སྐྱོ། །བགེགས་ཕྲན་འབྱུང་པོ་བསྒྲུབས་པས་སྐྱེ་བོ་སྡུད། །དྲག་སྔགས་སྙིང་རྗེ་མེད་པར་ཞེ་སྡང་འཕེལ། །ཤེས་བྱའི་གནས་ལ་རྨོངས་པས་ཐར་ལམ་རིང༌། །བྱང་ཆུབ་ལམ་བཟང་སྟོར་བས་སེམས་འདི་སྐྱོ། །བསམ་གཏན་སྒོམ་པར་འདོད་པའི་ཚོགས་རྣམས་ཀྱང༌། །ལུང་རིགས་མི་ཤེས་ཐོས་བསམ་སྐྱོན་དུ་བལྟ། །ཆོས་བརྒྱད་མ་བྲལ་རང་ཕྱོགས་བདག་ལྟས་ཁེངས། །ནོར་བའི་ལམ་ལ་བརྩོན་པས་སེམས་འདི་སྐྱོ། །མདོ་རྒྱུད་མ་འབྲེལ་ཆོས་ལུགས་ཡ་མཚན་ཅན། །འཁྲུལ་སྣང་འོད་གསལ་འཁྲུལ་རྟོག་ཆོས་ཉིད་ཅེས། །ལོག་རྟོག་གྲུབ་མཐས་རྨོངས་པ་ངོ་མཚར་བསྐྱེད། །འདྲེན་པའི་གཟུགས་བརྙན་མཐོང་ནས་སེམས་འདི་སྐྱོ། །ཐམས་ཅད་སྟོང་པ་ཅང་མེད་ནམ་མཁའ་བཞིན། །རྒྱུ་འབྲས་གཉིས་མེད་ད་ལྟ་རྫོགས་སངས་རྒྱས། །ས་ལམ་ཡོན་ཏན་དྲང་དོན་བསླུ་བྲིད་ཅེས། །ཆད་ལྟའི་ཆོས་རྣམས་སྟོན་པས་སེམས་འདི་སྐྱོ། །» «དོན་དམ་འོད་གསལ་ངོ་བོ་མི་ཤེས་པས། །ཕྱང་ཆད་སྟོང་པ་སེམས་ཀྱི་གནས་ལུགས་ཞེས། །སྲིད་རྩེའི་ལམ་གྱིས་ཐར་པ་ཐོབ་ཏུ་རེ། །མདོ་རྒྱུད་དོན་ལ་རྨོངས་པས་སེམས་འདི་སྐྱོ། །སེམས་ཉིད་མ་རྟོགས་མཐའ་བྲལ་མི་ཤེས་པར། །དྲན་རྟོག་གང་ཤར་ཆོས་སྐུ་ཟང་མ་ཞེས། །སེམས་དང་སེམས་བྱུང་ཕྲེང་པ་འདྲེན་བྱེད་» «པ། །དྲན་རྟོག་བདག་ཏུ་འཛིན་ལ་སེམས་འདི་སྐྱོ། །རིག་པ་མཐའ་གྲོལ་རྟེན་མེད་མ་ཤེས་པར། །རླུང་སེམས་ཉམས་ལ་གནས་ལུགས་དོན་དུ་ཞེན། །ཆགས་སྲེད་འཛིན་པས་ཉོན་མོངས་ཕྱི་ཕྱིར་འཕེལ། །ལམ་གོལ་དམན་པར་ཞུགས་ལ་སེམས་འདི་སྐྱོ། །ལེགས་ཉེས་མི་དཔྱོད་རང་གའི་ལམ་དུ་ཞུགས། །གཟུ་བོར་མི་གནས་ཕྲག་དོག་མེ་ཡིས་གདུངས། །འབྲེལ་ཚད་རང་བཞིན་རྨོངས་པར་དགོད་པ་སྟེ། །» «གཏི་མུག་མུན་རུམ་གྱུར་ལ་སེམས་འདི་སྐྱོ། །མདོར་ན་དིང་སང་གངས་རིའི་ར་བ་འདིར། །མཁས་བླུན་མི་ཕྱེད་སླར་ལ་རྨོངས་པ་གཙོ། །བླུན་པོའི་རྨོངས་ཟིལ་ཟས་གོས་ཆེ་ཁྱད་ཅན། །སྒྲུབ་པའི་བྱིན་རླབས་ངོ་མཚར་ཁྱད་དུ་འཛིན། །བཅོས་མའི་ཆོས་ལ་ཐར་པའི་ལམ་རེ་ཞིང༌། །མདོ་རྒྱུད་བསྟན་བཅོས་བཅོས་པའི་དོན་ཞེས་འདོར། །འདིས་ནི་དམ་ཆོས་པདྨ་ཟུམ་པ་འདྲ། །བསྟན་པའི་ཉི་མ་ནུབ་ལ་སེམས་འདི་སྐྱོ། །དེ་དག་ལ་སོགས་ཚད་མེད་ཉེས་པའི་ཚོགས། །རྒྱ་མཚོའི་ཆུ་རྡུལ་ཇི་བཞིན་བསམ་མི་ཁྱབ། །འདི་དག་སྤངས་ནས་ཞི་བའི་ནགས་ཁྲོད་དུ། །ཟབ་དོན་སྙིང་པོའི་དེ་ཉིད་སྒྲུབ་པར་རིགས། །དུས་ལ་མངོན་པར་སྐྱོ་བའི་རབས་ལས། སྒྲུབ་པར་ཆས་པའི་གནས་ལ་སྐྱོ་བར་བསྟན་པ་སྟེ་རབས་བཞི་པའོ།། །།དེ་ལྟར་རང་བཞིན་སྐྱོ་བའི་ཚུལ་རྣམས་ཀུན། །ཕལ་ཆེར་རྨོངས་པས་བདེན་དུ་ཆུག་ན་ཡང༌། །ཤེས་བཞིན་ཕྲག་དོག་དོན་མེད་སྒྲོ་སྐུར་ཅན། །ངེས་འབྱུང་སྐྱོ་ཤས་སྐྱེ་བའི་ཚུལ་ལ་ཉོན། །ཐོག་མར་བསྟན་ཞུགས་བསླབ་གཞི་ལེགས་བཅས་ཏེ། །བར་དུ་ཐོས་བསམ་ཕྱོགས་མེད་དོན་ལ་སྦྱངས། །ཐ་མར་ཟབ་དོན་སྙིང་པོ་བསྒོམས་རྗེས་སུ། །གཞན་དོན་ཟོག་པོར་མཐོང་བས་སེམས་འདི་སྐྱོ། །» «སྔོན་ཆད་མཐོང་དང་མ་མཐོང་མི་རྣམས་དང༌། །གཞན་གྱི་ལམ་མཁན་འདྲེན་པའི་བཤེས་གཉེན་ཡང༌། །གཟུ་བོར་མི་གནས་ཕྲག་དོག་རླུང་གིས་བསྐྱོད། །ཆགས་སྡང་མེ་དཔུང་འབར་ལ་སེམས་འདི་སྐྱོ། །རང་གཞན་ཀུན་གྱིས་དམ་པར་འཛིན་ན་ཡང༌། །གཞན་ལ་གཤེ་སྐུར་བསམ་སྤྱོད་ངན་པ་སྟོན། །ཚད་མེད་བཞི་ལ་བློ་ཁ་མ་ཕྱོགས་པར། །ཆོས་པའི་གཟུགས་བརྙན་མཐོང་ནས་སེམས་འདི་སྐྱོ། །ཡང་དག་མ་ནོར་ཇི་བཞིན་སྟོན་བྱེད་པས། །ཤེས་བྱའི་གནས་རྣམས་ལེགས་པར་འདོམས་ན་ཡང༌། །ཤེས་རབ་ཆེ་བ་བླ་མའི་སྐྱོན་ཡིན་ཞེས། །མི་རིགས་མུན་པས་སྨྲ་ལ་སེམས་འདི་སྐྱོ། །འཇིག་རྟེན་འདི་ན་མ་ལུས་འགྲོ་ཀུན་ལ། །འབྱོར་བདེ་སྡུག་བསྔལ་མཐོ་དམན་ཅི་ཡོད་ཀུན། །རང་རང་ལས་ཀྱིས་བསགས་པར་མི་ཤེས་» «པར། །ཕྲག་དོག་ཟུག་རྔུ་བྱེད་ལ་སེམས་འདི་སྐྱོ། །ཉེའམ་རིང་བའི་གནས་ན་འདུག་ཀྱང་རུང༌། །གཞན་བདེ་མི་བཟོད་ཆགས་སྡང་འབར་བའི་མེས། །ཡོངས་སུ་གདུངས་ཤིང་གནོད་པ་མངོན་པར་སྒྲུབ། །ཉོན་མོངས་ལོག་པར་ལྟ་བས་སེམས་འདི་སྐྱོ། །རྨི་ལམ་ན་ཡང་དྲན་པར་མ་མྱོང་ན། །དངོས་སུ་ལྟ་ཞིག་རྡུལ་ཙམ་ཉེས་མེད་ལ། །སྒྲོ་སྐུར་སྣ་ཚོགས་མངོན་པར་གཤེ་བ་ཅན། །ཆགས་སྡང་དྲག་པོས་གཟིར་ལ་སེམས་འདི་སྐྱོ། །རང་ཉིད་བཟང་པོའི་གནས་སུ་ཁས་འཆེ་ཞིང༌། །སྣང་བ་སེམས་སུ་གྲུབ་པར་འདོད་ན་ཡང༌། །གཞན་ལ་ཕྲག་དོག་ཕན་ཚུན་ནང་འགལ་ཅན། །ཆོས་པའི་གཟུགས་བརྙན་རྣམས་ལ་སེམས་འདི་སྐྱོ། །དེ་དག་ལ་སོགས་ཉེས་པ་བརྗོད་མི་ལང༌། །མཐའ་ཡས་གྲངས་མང་མཚན་མོའི་གཟའ་སྐར་» «བཞིན། །འདི་དག་སྤངས་ནས་ཞི་བའི་ནགས་ཁྲོད་དུ། །གཅིག་པུར་ཞི་བ་སྒྲུབ་ན་མི་ལེགས་སམ། །དེང་སང་དུས་ངན་སྐྱེ་བོ་བཟོད་དཀའ་བས། །གཞན་དོན་དགེ་ལ་བསྐུལ་བ་སྒྲུབ་པར་དཀའ། །སྡིག་པའི་མིག་རྐྱེན་བྱེད་རྣམས་རབ་སྤངས་ ཏེ། །གཅིག་པུར་དབེན་པར་དམ་ཆོས་སྒྲུབ་པར་རིགས། །དུས་ལ་མངོན་པར་སྐྱོ་བའི་རབས་ལས། གྲོགས་ཀྱི་བཤེས་གཉེན་རྣམས་ལ་སྐྱོ་བར་བསྟན་པ་སྟེ་རབས་ལྔ་པའོ།། །།དེ་དག་རང་གི་འདོད་པ་སྒྲུབ་པ་དང༌། །གཞན་ཕྱོགས་བཀག་པས་སེམས་བདེ་རྙེད་གྱུར་ཅིང༌། །ཕྲག་དོག་གོམས་པས་བདེན་དུ་ཆུག་ན་ཡང༌། །རང་ཕྱོགས་འཁོར་གྱིས་ལོག་སྒྲུབ་སྐྱོ་བས་ཉོན། །ལྷག་བསམ་སྙིང་པོའི་བྱང་ཆུབ་སེམས་བསྐྱེད་ནས། །ཉེ་རིང་མེད་པའི་གདུལ་བྱ་སྣ་ཚོགས་ལ། །ཟོལ་མེད་ཕན་པ་སྒྲུབ་ཀྱང་མགུ་དུས་མེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དང་པོ་ལྷར་མཐོང་གསར་ངས་ལྷག་པར་ཆེ། །བར་དུ་མིར་མཐོང་དཔོན་སློབ་འགྲོགས་ཤེས་ཙམ། །ཕྱི་མར་དགྲར་མཐོང་གནོད་པ་སྣ་ཚོགས་སྐྱེལ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཀུན་ཏུ་ཆོས་ཀྱི་དྲིན་ནི་མཐའ་ཡས་ཤིང༌། །ལེགས་འདོམས་དུས་སུ་ཕན་པས་བསྐྱངས་བྱས་ཀྱང༌། ། ལྷག་པར་སེམས་དཀྲུགས་ཉེ་འཁོར་སུན་རྣམསའབྱིན། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་ཤེས་མེད་ལ་ཁ་ཏས་མི་ཆུན་ཞིང༌། །ཕྲག་དོག་ཚིག་རྩུབ་འཐབ་རྩོད་འབའ་ཞིག་བྱེད། །རང་སྐྱོན་མི་སེམས་ཅི་བྱས་སྡང་བར་མཐོང༌། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་རྨོངས་བློ་གྲོས་ཆུང་ཞིང་དགའ་དཀའ་ལ། །ལེགས་ཀུན་ཉེས་པ་གཅིག་གིས་འགོག་པར་བྱེད། །སྐྱོན་མང་ཡོན་ཏན་མེད་ལ་ཉེས་ཀུན་» «གཞི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །འཕྲལ་གང་ཞི་ལ་ཕུགས་ན་མ་རུངས་པ། །ཁ་ལ་བཟང་ཆེ་ལག་ལེན་ངན་པ་བྱེད། །ཆོས་དང་རྒྱུད་འཛོལ་གཡོ་སྒྱུ་ཁྲམ་པའི་རིགས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཉོན་མོངས་འདོད་སྲེད་ཆེ་ཞིང་གཉེན་པོ་མེད། །རང་བཞིན་ཀུན་སྤྱོད་ངན་པ་ཁ་ཁྱེར་མཐོ། །» «གཞན་གྱི་མཚང་འབྲུ་རང་སྐྱོན་མི་སྤོང་བ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ལེགས་ཉེས་ཤེས་ཀྱང་ཉེས་ལ་ནན་གྱིས་འཇུག །སྤང་བླང་ཤེས་ཀྱང་རྒྱུ་འབྲས་ཁྱད་དུ་གསོད། །དབང་པོ་རྣོ་ཡང་གཟུ་བོར་མི་གནས་པ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རྐྱེན་ཁར་ཡང་ལ་འགྲོགས་ཁྱེར་མི་མཁས་ཤིང༌། །གཞན་ལས་བྱེད་སྐྱེན་བསྒྱུར་ཁ་ཤིན་ཏུ་ཡང༌། །ཟུང་མེད་ཕྱོགས་མི་ཐུབ་ལ་གཞུང་ངན་པ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་ལ་དགོས་ན་ཁ་གསག་ངོ་བསྟོད་མཁས། །གཞན་ལ་དགོས་ན་ཐབས་ཀྱིས་ཕྱིར་ཕྱིར་ འབྱོལ། །བྱ་བྱེད་གང་ལའང་གཡོ་ཟོལ་ཕུལ་དུ་ཕྱིན། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དོན་མེད་འབྲེལ་ལ་དགའ་ཞིང་གསར་ངས་ཆེ། །ཐམས་ཅད་ཀུན་ཏུ་ཁྱབ་ཅིང་བྱ་བྱེད་མཐོ། །འཇམ་འཇམ་འདྲ་ལ་ཕྱི་ནང་ཟེར་མཆུ་མང༌། །» «དུས་ངན་འཁོར་ལ་བསམ་ཞིང་སྐྱོ་བ་འཕེལ། །གཞན་སྣང་བསྒྱུར་མཁས་བཟང་བཟང་འདྲ་ན་ཡང༌། །འཇམ་པོས་ཕུག་པར་སྐྱོ་སྔོགས་ཕྲ་མ་བྱེད། །ཕྱི་ནང་འཛོལ་ཡང་ཇོ་བཟང་མ་ཞིག་པ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་གི་རང་མཐོང་གཞན་ལ་ཕྲག་དོག་བྱེད། །དཔོན་དད་ཆུང་ལ་དྲིན་ཆུང་འདྲེན་ལ་དགའ། །ལག་དྲིན་ཁས་གསོད་ང་བདེན་ཡུས་ཀྱིས་བརྣངས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །འདོད་པ་ཆུང་ལ་ཚིག་གིས་བསྟོད་ན་ཡང༌། །ཕོངས་པར་གྱུར་ལ་ནན་གྱིས་བརྙས་པ་བྱེད། །ངོས་སུ་བསྟོད་ལ་ལྐོག་ཏུ་གཤེ་སྐུར་འདེབས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་གི་བྱ་བྱེད་འདུན་མ་མི་ཤེས་པར། །གཞན་ལ་གྲོས་འདེབས་ཁ་ཏ་ཡས་ཀྱིས་འབུབས། །ཕྲ་མ་སྔ་བཙན་ཕྱོགས་གཏམ་བདེན་པར་འཛིན། ། དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཡུན་རིང་འགྲོགས་ཤིང་ཆོས་ཀྱིས་འབྲེལ་ན་ཡང༌། །གཡོན་ཅན་སྡིག་པའི་གྲོགས་ཀྱི་ཕྱོགས་བཟུང་ནས།།འདི་ཕྱིའི་ཉེས་དམིགས་མི་སེམས་དམ་ཉམས་བྱེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཆོས་ཀྱིས་འབྲེལ་ཞིང་ཅི་འགྲུབ་ཕན་བཏགས་ཀྱང༌། །ལྐོག་ནས་གནོད་སྐྱེལ་འཕྱར་ཀ་རྟག་ཏུ་གཏོང༌། །» «དངོས་སུ་ཕྱེ་གཏོར་ཟུངས་མེད་ཁ་ཞེ་ཅན། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །འགྲོ་བར་ཆས་ན་བཟང་པོའི་ཚིག་གིས་འཆིང༌། །བསྡད་པར་གྱུར་ན་ངན་པའི་གནོད་འཚེས་སྐྲོད། །ཟེར་སྤྱོད་འགལ་ལ་རང་བཞིན་མ་ངེས་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །བསྡད་པའི་ཚེ་ན་འགྲོ་བའི་བློ་སྣ་ འདོན། །ཕྱིན་པར་གྱུར་ན་བསྡད་པས་ལེགས་ཞེས་ཟེར། །ཅི་ཟེར་འདི་ཟེར་རང་བཞིན་ཆ་མེད་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། ། གཞན་དུ་འགྲོ་ན་དེ་ལ་ཤོལ་འདེབས་བྱེད། །སྡོད་རྩིས་བྱས་ན་བྱ་བྱེད་མང་ཞེས་ཟེར། །» «འཐད་འོས་བསྒྲུབས་ཀྱང་དེ་ལ་ཞད་རེ་འདོགས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཆོས་གཙོར་བཞག་ནས་བྱང་ལམ་སྒྲུབ་ན་ཡང༌། །འཇིག་རྟེན་མ་ཤེས་བྱ་བྱེད་ནོར་ཞེས་ཟེར། །ཅུང་ཟད་བསྟུན་ན་མཐུན་འཇུག་ཆེ་ཞེས་སྨྲ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཅུང་ཟད་བཟུང་ན་ཆགས་ཞེན་ཆེ་ཞེས་སྨྲ། །བཏང་བར་གྱུར་ན་མ་ཤེས་རྩིང་ཞེས་སྒྲོགས། །གང་ལྟར་བྱས་ཀྱང་ཡིན་པའི་སྐབས་མེད་པས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཕན་ཚུན་སྙོམས་པར་ལེགས་པར་བསྐྱང་བྱས་ཀྱང༌། །ལན་གཅིག་རྐྱེན་གྱིས་ཐམས་ཅད་ཆུ་རུ་འབོ། །བཟང་པོའི་དྲིན་ལན་ཐམས་ཅད་ཉེས་ཀྱིས་འཇལ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། ། མཉམ་གཉིས་ཞལ་ལྕེ་སྙོམས་པར་ཕྱེས་ན་ཡང༌། །» «གཞན་ཕྱོགས་ཕུལ་ནས་རྟག་ཏུ་འཁང་ར་རྡུང༌། །ཕམ་བློ་བླངས་ཀྱང་ཕན་དུས་མེད་པ་ཡི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་གི་ལེ་ལན་སྐྱོན་ལ་མི་རྟོག་པར། །གཞན་གྱི་ཚིག་ལ་ཀོ་ལོང་ཟུར་མགོ་སྡོམ། །ཁོང་ཁྲོ་ཚིག་རྩུབ་ལུགས་དང་མི་མཐུན་པ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །བྱས་ན་དགའ་བ་ཅུང་ཟད་མི་བྱེད་པར། །བཞག་ན་དགའ་ཡི་ངན་སྤྱོད་སྣ་ཚོགས་བྱེད། །» «རང་གིས་མ་ལན་གཏམ་ངན་ལུང་པ་འགེངས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་སྐྱོན་མི་རྟོག་གཞན་སྐྱོན་འབའ་ཞིག་གླེང༌། །གཅིག་སོང་རྗེས་ལ་དེ་ལ་འཕྱར་ཀ་གཏོང༌། །མི་སྙན་ཟེར་མཆུ་ངོ་དགའི་སྐྱེལ་བསུ་བྱེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །གང་དུ་གནས་ཀྱང་གཏམ་ངན་གཟེང་རྩའི་གཞི། །མང་པོའི་ནང་དུ་འཐབ་རྩོད་འཁྲུག་ལོང་སྐྱེད། །གཅིག་པུར་བསྡད་ཀྱང་ཁོང་གཏུམ་མི་འཆམ་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཡ་རབས་དམ་པའི་སྤྱོད་དང་མི་ལྡན་ཞིང༌། །མ་རབས་སྨྱོན་སྤྱོད་ཐོ་ཅོ་སྐྱུར་འགོང་ཅན། །གཞན་སེམས་དཀྲུགས་ལ་དུག་ལྔ་སུ་བས་རགས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་ལ་མི་བཟོད་གཞན་ལ་ཕོད་ཁམས་ཆེ། །འགྱུར་ལྡོག་མང་ཞིང་མི་བརྟན་ཁམས་འདུས་ཆེ། །འགྲོ་ན་མཆོང་ཞིང་ལབ་ན་ཀུ་ཅོ་» «ཆེ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཕར་ལ་བསླབ་ན་ཚུར་ལ་དེ་བས་ཐུ། །རང་དཔེ་མི་ལེན་གཞན་ལ་རྩོལ་ཕོད་ཆེ། །གླང་པོ་གཅིག་ཚུགས་བཞག་པས་མཆོག་ཅེས་ཟེར། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་བཞིན་བླུན་ལ་འདོད་སྣ་སུ་བས་ཆེ། །ཟེར་མཆུ་མང་ལ་ཀོ་ལོང་གཞན་བས་» «དམ། །བྱས་པ་མེད་པར་རེ་བ་གཞན་ལས་ཆེ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དུས་སྐབས་མི་ཤེས་བབ་ཅོལ་གཏམ་སྣ་མང༌། །ཚིག་ཚོགས་ཆེ་ལ་སྤྱི་བརྟོལ་མཚུངས་པ་མེད། །བརྗོད་པ་མི་གཟོ་ཡིད་དང་མི་མཐུན་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་བཞིན་གྱོང་ལ་འགྲོགས་པ་མི་བདེ་» «ཞིང༌། །མཆོག་ཏུ་མགུ་དཀའ་འཁང་པ་ཤིན་ཏུ་སྐྱེན། །སྤྱོད་ལམ་མི་གཟོབ་རང་ག་ཆིག་ཚུགས་པ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དད་མེད་ཀུན་ཏུ་འཁྲུག་ཅིང་འགྲོགས་མི་བདེ། །སྒོ་གསུམ་མ་གུས་རྟག་ཏུ་སུན་རྣམས་འབྱིན། །» «ངོར་འཐབ་ལྐོག་སྨྲ་དོན་མེད་འཕྱར་ཀ་གཏོང༌། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་འཁྲུག་གཞན་སྨོད་དུག་ལྔ་སུ་བས་རགས། །ཁོང་ཁྲོ་འཁོན་ངན་ཕྲག་དོག་གདུག་རྩུབ་ཅན། །ཕར་ཟེར་ཚུར་ཟེར་ཕྱི་ནང་གཟིང་རྩ་བྱེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །བསླབ་ན་ཚུར་འཐབ་མི་ཉན་གཅུ་གྱོང་ཆེ། །རྒྱུ་འབྲས་མི་འཛེམ་རྫུན་དང་དབྱེན་ལ་དགའ། །སྨྲ་མཆུ་མང་ཞིང་མི་སྙན་སྐྱེལ་བསུ་བྱེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །གཅིག་ལ་བཤད་ན་གཅིག་ཏུ་མི་དགའ་ཞིང༌། །གཅིག་ལ་བྱིན་ན་གཅིག་ལ་ཕྲོགས་པ་ཙམ། །སྤྱི་སྙོམས་བསྐྱངས་ཀྱང་ཕྱོགས་འཕུལ་འཕྱར་ཀ་གཏོང༌། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །སུ་དང་འགྲོགས་ཀྱང་དེ་དང་མི་འཆམ་ཞིང༌། །སྐྱོན་རྣམས་རྟོག་ཅིང་མི་སྙན་འབའ་ཞིག་བརྗོད། །ཐམས་ཅད་དགྲར་ལེན་མཐུན་པ་གཅིག་མེད་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །གོ་བར་གྱུར་ཀྱང་རྫུན་དང་གཡོ་སྒྱུ་བྱེད། །འགྲོགས་ཚད་བསླུ་ཞིང་མི་ཚེ་ངན་ལ་སྐྱེལ། །སྟོང་ཟོབ་ཕྱི་ཕྱིར་ཕོ་བཟོ་ཕུན་སུམ་ཚོགས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཟ་ན་རང་ལ་བྱེད་ན་གཞན་གྱི་ཕྱོགས། །སྐྱིད་ན་གྲོགས་པོ་སྟོང་གྱོད་ཁ་འཕྱོར་ཅན། །» «གེགས་ཤིག་བྱུང་ན་བཙལ་གྱིས་མི་རྙེད་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཆོས་དང་ཟང་ཟིང་ལེགས་པ་བྱུང་བའི་ཚེ། །འཁོར་ཚོགས་མ་ངེས་གྲལ་རིང་ཆེ་ན་ཡང༌། །དགོས་པའི་དུས་ན་ཉུང་ལ་མི་སྟོངས་པ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །བཤེས་མེད་གློ་བུར་ལྷགས་དང་ཕོངས་རྣམས་ལ། །» «ཅུང་ཟད་མཐོང་བས་ཕན་པ་སྒྲུབ་ན་ཡང༌། །ཕྲག་དོག་དབང་གིས་གསར་ངས་ཆེ་ཞེས་སྒྲོག །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རྟག་ཏུ་བཟང་སེམས་ཕན་པ་ཅི་བྱས་ཀྱང༌། །བསྐྱངས་ཀྱིས་མི་ལང་ལྷ་ཁང་རྙིང་པ་བཞིན། །ཉིན་འབར་མཚན་འབར་ལ་ལས་སྲོད་ཐུབ་གཏོང༌། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ལེགས་པའི་ཁ་ཏས་ཟོལ་མའི་ཕྱེ་གཏོར་འགམ། །ཕུགས་ཀྱི་ཤ་ཙས་འཕྲལ་གྱི་བློ་བྲིད་དགའ། །ཟབ་མོའི་ཆོས་ལས་ཡོ་བྱད་དྲིན་གཟོ་ཆེ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཁ་རོག་བསྡད་ན་ཞལ་ཏ་ཞུ་ཞེས་ཟེར། །» «ཕན་པར་བསླབ་ན་བཀའ་བཀྱོན་གནང་བར་གོ །ཤ་ཚ་གྲོས་འདེབས་མཆོག་ཏུ་སྡང་བས་མཐོང༌། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཕན་འདོགས་ཞུགས་ན་སྤྲོས་ལ་དགའ་ཞེས་ཟེར། །གཅིག་པུར་འདུག་ན་གདུལ་བྱ་སྐྱོང་དགོས་ ཟེར། །ཇི་ལྟར་བསམས་ཀྱང་དེ་ལ་ཞད་རེ་འདོགས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །བཤད་པའི་ཚེ་ན་སྒོམ་པ་ལེགས་ཞེས་ཟེར། །སྒོམ་པའི་ཚེ་ན་ཡང་ཡང་ཤོད་ཅེས་ཟེར། །ལེགས་པར་བཤད་ན་ཉན་ཡང་མི་ནུས་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །མདོ་རྒྱུད་བསྟན་བཅོས་ལུང་རིགས་མན་ངག་གཞུང༌། །ཆོས་དང་ཆོས་མིན་ཕྱེ་ནས་བཤད་པ་ན། །སྡང་བར་མཐོང་ནས་སླར་ལ་ལོག་པར་ལྟ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དབང་པོའི་ཚོད་ལ་གང་ཕན་ཆོས་བཤད་ཀྱང༌། །དེ་ཉིད་མི་སྒྲུབ་གཞན་ལ་ཡར་བལྟས་ནས། །ཟབ་ཟབ་མོ་ཞིག་ཉན་རྗེས་གོ་རྟོགས་མེད། ། དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཇི་ཙམ་བཤད་ཀྱང་གོ་བའི་དུས་མེད་ལ། །ལག་ཁྲིད་བསླབ་ཀྱང་ཅུང་ཟད་ཤེས་དུས་མེད། །གཅིག་ལ་ཨ་འཐས་དྲག་ཏུ་མི་འགྲོ་བ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་གིས་མ་ཐོས་གོང་དུ་བཤད་ན་དགའ། །» «ཐོས་རྗེས་གཞན་ལ་ཕྲག་དོག་གཞིར་བཞག་ནས། །ཡང་ཡང་བཤད་དྲགས་བསྒོམ་ན་ལེགས་ཞེས་ཟེར། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དོན་གཉེར་ཆོས་དེ་ཐོབ་པར་མ་གྱུར་ཚེ། །ཟོལ་མའི་དམ་བཅའ་ངོ་སྲུང་སུ་བས་» «མཁས། །འདོད་དོན་གྲུབ་ནས་གར་འགྲོ་ལ་དོར་པ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཟབ་མོའི་ཁྲིད་ལ་ཞུགས་པའི་མི་རྣམས་ཀྱང༌། །བསྡད་ལོང་མེད་པར་ཆོས་རྣམས་རྫོགས་སུ་རེ། །ཀུན་ཏུ་འཁྱམས་ཤིང་ཆོས་མཐུན་སྔ་བསགས་ཞུ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་ཉིད་དམ་ཆོས་གཞུང་བཞིན་མི་སྒྲུབ་པར། །ཟབ་མོའི་ཆོས་རྣམས་དུས་གཅིག་ཐོབ་ཏུ་རེ། །ཆོས་ལ་བརྩེགས་ཞེས་སླར་ལ་འཕྱར་ཀ་གཏོང༌། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཟབ་མོའི་ཆོས་ལ་གསང་བ་མི་ཐུབ་ཅིང༌། །ཐོས་པའི་མོད་ལ་གསང་བ་གཞན་ལ་སྒྲོགས། །བསླབ་ན་ཁོང་ཁྲོ་འཁོན་ངན་ཚིག་རྩུབ་འབྱིན། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཇི་ཙམ་ཐོས་བཞིན་རང་རྒྱུད་གྱོང་དུ་འགྲོ། །» «ཅུང་ཟད་ཤེས་ཏེ་གཉེན་པོར་མ་སོང་ཞིང༌། །གཞན་ལ་ཁྱད་གསོད་ཚིག་རྩུབ་དུག་མདའ་འཕེན། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །སྙིང་པོའི་དོན་ལ་ཅུང་ཟད་མི་སྒྲུབ་པར། །འཁོར་ལ་ཕར་བརྡལ་གཞན་ལ་བཤད་པར་རིངས། །» «ཆོས་བརྒྱད་དོན་གཉེར་ཚེ་འདིའི་མཛེས་ཆོས་ཙམ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཡིན་མིན་བཤད་ཀྱང་བདག་ལྟ་མཆོག་ཏུ་འཛིན། །ཇི་ཙམ་བཤད་ཀྱང་དོན་ལ་སྐྱེད་མེད་པའི། །དབང་པོ་གསལ་ཡང་རྨོངས་པ་གཅིག་ཚུགས་མཁན། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཆོས་ལ་འདུས་ཀྱང་ཆོས་མིན་འབའ་ཞིག་བྱེད། །ཕན་ཚུན་ཚོགས་ཀྱང་ལོང་གཏམ་འབའ་ཞིག་གླེང༌། །» «དབེན་པར་གནས་ཀྱང་རྣམ་གཡེང་འབའ་ཞིག་བྱེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །གཅིག་པུར་འདུག་ནས་སྒྲུབ་པར་ཁས་འཆེ་ཡང༌། །སོས་དལ་རེས་འགའ་གཉིད་དང་སྙོམ་ལས་ཅན། །རང་རྫུན་རང་ལ་གཏོང་བས་ཉིན་མཚན་འདའ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །སྒྲུབ་ལ་མི་བརྩོན་ཀུན་ཏུ་འཁྱམས་ལ་དགའ། །དར་རེ་གཞི་ལ་ཅུང་ཟད་བསྡད་ན་ཡང༌། །རང་གནས་མི་ཚུགས་གཞན་གྱི་གནས་རྣམས་ཉུལ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ནང་དུ་མཚམས་བཅད་ཐང་གི་གང་ལ་ཟ། །ཀུན་ཏུ་འཁྱམས་ཀྱང་སྒྲུབ་ཚུགས་མ་ཞིག་པ། །དམ་བཅའི་ཁྲལ་འཇལ་ས་མཐའི་མི་ངན་འདྲ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །བླ་མ་མཆོག་ལས་ཉེ་འབྲེལ་གཅེས་པར་འཛིན། །མཆེད་གྲོགས་མཆོག་ལས་སྡིག་པའི་གྲོགས་པོ་འདམས། །དམ་ཆོས་མཆོག་ལས་ནོར་རྫས་སྙིང་པོར་བྱེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཇི་ཙམ་བསྟན་ཀྱང་དོན་དུ་མི་གཉེར་བ། །ལེགས་པར་བཤད་ཀྱང་ཅུང་ཟད་མི་ཉན་པ། །སྙིང་པོའི་དོན་ལ་ནམ་ཡང་མི་སྒྲུབ་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དེ་དག་ལ་སོགས་འཁོར་གྱི་ཉེས་པ་ཀུན། །ཇི་ཙམ་བརྗོད་ཀྱང་ཟད་པའི་དུས་མེད་ལ། །མེ་ཡི་འོབས་བཞིན་བཟོད་པའི་བླག་མེད་པས། །གཅིག་པུར་དབེན་པར་སྒྲུབ་པའི་དུས་ལ་བབས། །ཇི་ལྟར་བསྐྱངས་ཀྱང་མགུ་བར་མི་ནུས་ལ། །གང་ལྟར་བསྟན་ཀྱང་ཕན་པའི་གོ་སྐབས་ཆུང༌། །འདི་ལྟར་བཟོད་ཀྱང་སྙིང་པོ་ཅི་འདུག་ཀྱེ། །དེ་ལྟར་བསམས་ནས་མྱུར་དུ་འགྲོ་བར་» «རིགས། །རང་ལའང་མི་ཕན་གཞན་ལའང་མི་ཕན་པའི། །འཇིག་རྟེན་གཟུགས་བརྙན་འདི་འདྲ་རྣམ་བཤིག་ནས། །གཅིག་པུར་ཞི་བ་དབེན་པའི་ནགས་ཁྲོད་» «དུ། །ཟབ་མོའི་དོན་གྱི་དེ་ཉིད་སྒྲུབ་པར་རིགས། །ད་རེས་ཚེ་འདིར་སྲིད་མཚོ་མ་བརྒལ་ན། །གཏན་དུ་འཁོར་བའི་གནས་ལས་ཐར་ཐབས་མེད། །དེ་བས་གཅིག་པུར་དབེན་པའི་ནགས་ཁྲོད་དུ། །ཚེ་གང་ཞི་བའི་ཏིང་འཛིན་སྒྲུབ་པར་རིགས། །» «དུས་ལ་མངོན་པར་སྐྱོ་བའི་རབས་ལས། འཁོར་བའི་གནས་ལ་སྐྱོ་བར་བསྟན་པ་སྟེ་རབས་དྲུག་པའོ།། །།དེ་ལྟར་སྣ་ཚོགས་མངོན་པར་སྐྱོ་བ་ཅན། །རང་གཞན་ལས་ངན་བསགས་པའི་འཁྲུལ་སྣང་སྟེ། །གང་དུ་བསམས་ཀྱང་སྙིང་པོ་འགའ་མེད་པས། །སེམས་ཤིག་ཡོད་ན་འདི་ལ་སྐྱོ་བར་རིགས། །སྔོན་དུས་བསྐལ་པ་བཟང་པོ་ནུབ་གྱུར་ཅིང༌། །ད་དུས་ངན་པའི་རང་བཞིན་འདི་ཤར་བས། ། ཕྱོགས་དུས་གང་ནའང་བདེ་བའི་གོ་སྐབས་མེད། །ཀུན་ཏུ་འཁྲུག་ཅིང་ནད་དང་མུ་གེས་ཉེན། །སྣ་ཚོགས་སྡུག་བསྔལ་མང་ལྡན་འདི་དག་ལས། །ཤེས་ལྡན་རྣམས་ཀྱིས་ཐར་པ་སྒྲུབ་པར་རིགས། །མདོར་ན་དིང་སང་ལྔ་བརྒྱ་ཐ་མ་འདིར། །དུས་ངན་འཁོར་དང་འཇིག་རྟེན་སྣང་བ་དང༌། །གདུལ་དཀའི་སེམས་ཅན་སྣ་ཚོགས་སྐྱོ་བ་ཅན། །ཡིད་ཆད་མཆི་མ་འཁྲུག་པའི་ཚུལ་ལ་སོམས། །ཕྱི་རུ་བསམས་ཀྱང་སྣང་བའི་ཡུལ་ལ་སྐྱོ། །» «ཡུལ་རྣམས་མི་རྟག་རྨི་ལམ་སྒྱུ་མའི་ཚུལ། །ནང་དུ་བསམས་ཀྱང་འཛིན་པའི་སེམས་ལ་སྐྱོ། །སེམས་འདི་མི་སྲུན་དགེ་གང་བརྩོན་པར་དཀའ། །བར་དུ་བསམས་ཀྱང་སྣ་ཚོགས་རྐྱེན་ལ་སྐྱོ། །ཚེ་སྲོག་མི་རྟག་རྩྭ་ཁའི་ཟིལ་པ་འདྲ། །གང་དུ་བསམས་ཀྱང་སྐྱོ་བའི་རང་བཞིན་ཏེ། །སྐྱེས་པ་ཤི་ཞིང་འདུས་པ་རྣམས་ཀྱང་འབྲལ། །བསགས་པ་འཛད་ཅིང་འབྱོར་པ་མཐའ་རྒུད་པས། །འཁོར་བའི་གནས་ལས་ད་རེས་འདའ་བར་མཛོད། །མི་ཐེག་ཁུར་དང་མི་ལྕོགས་བྱ་བ་དང༌། །དུས་ངན་དཔོན་དང་ཤུལ་ཁའི་མགྲོན་འགྱེད་དང༌། །དུས་ལ་མ་བབ་གཞན་དོན་བྱེད་པ་རྣམས། །བཟང་སེམས་ཡོད་ཀྱང་ཕན་པ་འགྲུབ་པར་དཀའ། །དེ་བས་གཅིག་པུར་ཞི་བའི་ནགས་ཁྲོད་དུ། །སྙིང་པོའི་དེ་ཉིད་སྒོམ་པའི་དུས་ལ་བབས། །ནགས་ནི་སྔཽན་གྱི་རྒྱལ་བ་རྣམས་ཀྱིས་བསྔགས། །མི་སྲུན་མེད་ཅིང་འཚེ་བ་ཀུན་དང་བྲལ། ། བྱ་དང་རི་དྭགས་འགྲོགས་ན་བདེ་བས་གང༌། །སྨན་ཤིང་མེ་ཏོག་ལྗོན་པའི་ཚོགས་མང་ཞིང༌། །ཕུག་དང་བྲག་རིའི་ཁང་བཟང་རྒྱ་ཆེར་ལྡན། །ཆུ་གཙང་དལ་འབབ་ངང་མོས་བརྟེན་པ་དེར། །གེ་སར་དཔུང་བསྐྱེད་འཛུམ་པའི་མདངས་གསལ་ཞིང༌། །དུས་རླུང་སེར་བུ་བདེ་བའི་ངད་དང་ལྡན། །ཙནྡན་བསིལ་བའི་ཁ་ཡི་དབུགས་བསྐྱོད་པའི། །དྲི་ཞིམ་སྤོས་བསུངས་ངད་པའི་རང་བཞིན་དང༌། །རྣམ་བཀྲ་ཡལ་གའི་ལག་རྩེད་དུད་པ་ཡིས། །གདུང་སྐྱོབ་བསིལ་གྲིབ་བྱེད་ལ་འགྲན་པ་བཞིན། །རྐང་དྲུག་ཚོགས་རྣམས་སྙན་པའི་གླུ་ལེན་ཅིང༌། །གདངས་སྙན་བྱ་ཚོགས་མང་པོ་གར་བྱེད་པ། །ལྷ་ཡུལ་དབང་པོའི་དགའ་ཚལ་སོན་པའི་གནས། །» «མཐོ་རིས་བུ་མོ་དགའ་བས་རྩེ་བ་བཞིན། །ཉོན་མོངས་གདུང་སེལ་ངང་གིས་ཆོས་འཕེལ་བ། །དུས་བཞིར་མི་རྟག་སྐྱོ་བའི་རང་བཞིན་དང༌། །ཏིང་འཛིན་ཞི་བ་ཡོན་ཏན་མཆོག་ཚོགས་ཅན། །དག་པའི་ཞིང་གི་ནགས་ཚལ་དམ་པ་བཞིན། །དེ་འདྲའི་གནས་ནི་ཐར་པའི་སྐྱེད་མོས་ཚལ། ། དབེན་ཞིང་ཉམས་དགའ་རིག་པ་འཛིན་པ་དེར། །བདག་བློ་ཞི་བའི་ཏིང་འཛིན་མཐར་ཕྱིན་ནས། །སྲོག་དང་བཅས་པའི་ལུས་འདི་གཡོ་བར་ཤོག །དུས་ལ་མངོན་པར་སྐྱོ་བའི་རབས་འདི་ནི། །རྣམ་གྲོལ་ཡོན་ཏན་མཆོག་གི་རྗེས་འགྲོ་བ། །ཐར་ལམ་བྱང་ཆུབ་སྙིང་པོར་ཞུགས་པ་དེས། །སྙིང་ནས་ནགས་སུ་འགྲོ་སླད་སྨྲས་པ་ཡིན། །དགེ་བ་དེ་ཡིས་བདག་དང་འགྲོ་བ་» «ཀུན། །ཉོན་མོངས་འཁོར་བའི་གྲོང་ལས་ཡིད་བྱུང་ནས། །ཞི་བ་རབ་བཟང་ཐར་པའི་སྐྱེད་ཚལ་དུ། །ཐམས་ཅད་ཕྱམ་གཅིག་སངས་རྒྱས་འགྲུབ་པར་ཤོག །ཚུལ་འདི་བློ་གྲོས་རྫིང་བུ་བཟང་པོའི་ནང༌། །དད་བརྒྱའི་པདྨོ་ངེས་འབྱུང་འདབ་སྟོང་ཅན། །ཏིང་འཛིན་སྦྲང་རྩིའི་སྙིང་པོ་འཛིན་པས་སྦྱར། །དད་ལྡན་རྐང་དྲུག་ཚོགས་རྣམས་དགའ་བར་མཛོད། །དུས་ལ་མངོན་པར་སྐྱོ་བའི་རབས་ཞེས་བྱ་བ། བདེ་བར་གཤེགས་པའི་གསུང་རབ་ལས་མང་དུ་ཐོས་པའི་ནོར་གྱིས་ཕྱུག་ཅིང༌། ཟབ་མོའི་དེ་ཁོ་ན་ཉིད་ཀྱི་དོན་ལ་ཡང་དག་འཇོག་གི་བསམ་གཏན་པ་ཀུན་མཁྱེན་ངག་གི་དབང་པོས། གངས་རི་ཐོད་དཀར་གྱི་མགུལ། འོད་ཟེར་སྤྲིན་གྱི་སྐྱེད་མོས་ཚལ་གྱི་ནང༌། ཀུན་ཏུ་བཟང་པོའི་ཁང་བཟང་དམ་པ། ཟླ་བ་ཆུ་ཤེལ་གྱིས་འཚེར་བའི་གནས་སུ་སྦྱར་བ་འདི་རེ་ཞིག་རྫོགས་སོ།། །།ཕྱོགས་དུས་ཀུན་ཏུ་བཀྲ་ཤིས་དང་བདེ་ལེགས་ཀྱི་ཆར་བསྐལ་པ་རྫོགས་ལྡན་གྱི་དུས་ཉེ་བར་གནས་པ་བཞིན་དུ་འབབ་པས་བསམ་རྒུའི་རེ་བ་མཐའ་དག་འགྲུབ་པར་གྱུར་ཅིག །མངྒ་ལཾ།
༈ དུས་ལ་མངོན་པར་སྐྱོ་བའི་རབས་བི་ཛ་ཧ་རཾ། <span class="lcp-note"><span class="lcp-mark">«</span>ཨོཾ་སྭ་སྟི་སིདྡྷཾ། དུས་ལ་མངོན་པར་སྐྱོ་བའི་རབས་ཞེས་བྱ་བ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །གང་གིས་ཐོག་མར་བྱང་ཆུབ་ཐུགས་བསྐྱེད་ནས། །གྲངས་མེད་བསྐལ་པར་བརྩོན་པའི་གོ་བགོས་ཏེ།།མངོན་པར་བྱང་ཆུབ་མཛད་པ་བསམ་མི་ཁྱབ། །ཟས་གཙང་སྲས་སུ་གྱུར་ལ་གུས་ཕྱག་འཚལ། །གསུང་རབ་ཆུ་གཏེར་ཡོན་ཏན་གངས་ཆེན་མཚོ། །རྒྱལ་བ་རྒྱལ་སྲས་ཡིད་བཞིན་འབྱུང་བའི་གནས། །ཕན་བདེའི་དུས་རླབས་སྲིད་ཞིའི་དབྱིངས་ཁྱབ་པ། །དམ་ཆོས་རྒྱ་མཚོ་ཡུན་རིང་གནས་གྱུར་ཅིག །བསླབ་གསུམ་ཡོན་ཏན་རིན་ཆེན་ས་གཞི་ལ། །དགེ་ཚོགས་རྣམ་འཕེལ་འགྲོ་ཀུན་བསོད་ནམས་ཞིང༌། །རང་གཞན་དོན་གཉིས་འབྱོར་བའི་གཞིར་གྱུར་པ། །འཕགས་པའི་དགེ་འདུན་དད་བརྒྱའི་གཙུག་གིས་མཆོད། །ཞི་བ་ཆོས་བཟང་ཕན་བདེ་འབྱུང་བའི་གནས། །ཐུབ་པའི་བསྟན་པ་ནུབ་རིའི་རྩེར་ལྷུང་ཞིང༌། །བཤེས་གཉེན་དམ་པ་ཕལ་ཆེར་འདས་པའི་དུས། །ལྔ་བརྒྱ་ཐ་མར་གྱུར་ལ་སྐྱོ་བས་ཉོན། །འཛམ་བུ་གླིང་ལས་ཁྱད་པར་གངས་རིའི་ཡུལ། །དེང་སང་དུས་ངན་མི་རྣམས་མི་སྲུན་ཞིང༌། །<span class="lcp-mark">»</span></span> <span class="lcp-note"><span class="lcp-mark">«</span>བཅོས་མའི་ཆ་ལུགས་དག་ཀྱང་གྲངས་མང་ལ། །ཡང་དག་ཚུལ་བཞིན་སྤྱོད་པའི་སྐྱེ་བོ་ཉུང༌། །ཡུལ་རྣམས་ཕལ་ཆེར་ཁྲིམས་ཀྱིས་མི་འཚོ་ལ། །མི་རིགས་རང་གར་སྤྱོད་ཅིང་བདེན་རྫུན་འཆོལ། །ཡོན་ཏན་སྐྱོན་དུ་མཐོང་བ་འུག་པའི་མིག །གངས་རིའི་ཁྲོད་ལས་གཞན་པ་སུ་ཞིག་ཀྱེ། །ཕྱོགས་འདིར་གནའ་དུས་བཟང་པོ་ནུབ་གྱུར་ཅིང༌། །ད་དུས་ངན་པའི་སྙིགས་མ་ལྔ་བདོ་བས། །ཡུལ་ལུགས་འགྱུར་ཞིང་ཆ་ལུགས་སྣ་ཚོགས་བྱེད། །བསམ་སྤྱོད་མི་དགེ་སྡིག་སྤྱོད་འབའ་ཞིག་འཕེལ། །དེ་དག་དབང་གིས་ཕྱི་རོལ་དུས་ཚིགས་དང༌། །ནང་གི་བདེ་སྡུག་འགྱུར་བས་སྡུག་བསྔལ་ཞིང༌། །སྔོན་དུས་བཟང་པོའི་རྗེས་སུ་མཐུན་མ་གྱུར། །ད་ནི་རང་བཞིན་སྐྱོ་བའི་ཚུལ་ལ་ཉོན། །སྔོན་དུས་ཡུལ་རྣམས་དར་ཞིང་རྒྱས་ན་ཡང༌། །ད་དུས་གྲོང་རྣམས་ཕལ་ཆེར་འབྲོག་སྟོང་འདྲ། །སྐྱེ་བོ་ཉུང་ཞིང་ཟས་གོས་འབྱོར་པ་ཆུང༌། །<span class="lcp-mark">»</span></span> <span class="lcp-note"><span class="lcp-mark">«</span>དབུལ་འཕོངས་འཚེ་བ་མང་པོས་སེམས་འདི་སྐྱོ། །སྔོན་དུས་བཟང་ལ་ཆར་ཆུ་སྙོམས་ན་ཡང༌། །ད་དུས་ངན་པས་དཔྱིད་འཁྱགས་དབྱར་སྐམ་ལ། །སྟོན་འཁྲུག་དགུན་འཇུངས་སད་སེར་མུ་གེས་ཉེན། །མི་རྣམས་སེར་སྣ་འཕེལ་བས་སེམས་འདི་སྐྱོ། །སྔོན་དུས་ཡུལ་རྣམས་ཁྲིམས་ཀྱིས་སྐྱོང་ན་ཡང༌། །ད་དུས་ཁྲིམས་མེད་ངན་པ་རྒྱལ་བའི་དུས། །མི་བདེན་ཁ་འཛིན་བདེན་ལ་ཆད་པ་གཅོད། །དོན་མེད་ཁྲལ་ཆུས་མནར་ལ་སེམས་འདི་སྐྱོ། །སྔོན་དུས་ཡུལ་རྣམས་འཇམ་ཞིང་བདེ་ན་ཡང༌། །ད་དུས་རྩུབ་བས་ལམ་འཕྲང་ཆོམ་པོ་མང༌། །འགྲིམ་འགྲུལ་མི་བདེ་མང་བས་ཉུང་བ་འཇོམས། །ཕན་ཚུན་མི་མཐུན་རྩོད་པས་སེམས་འདི་སྐྱོ། །སྔོན་དུས་ཕྱོགས་རྣམས་འཇམ་བདེར་གནས་ན་ཡང༌། །ད་དུས་དམག་དང་འཁྲུག་ལོང་སྣ་ཚོགས་རྒྱས། །ཀུན་གྱི་སྙིང་དུ་འབྱུང་པོའི་གདོན་ཞུགས་པས། །བདེ་བའི་གོ་སྐབས་མེད་པས་སེམས་འདི་སྐྱོ། །སྔོན་དུས་གཞུང་བཟང་ངོ་ཚ་ཆེ་ན་ཡང༌། །ད་དུས་ཁྲེལ་ཆུང་ཀུན་སྤྱོད་བསྐལ་པ་ངན། །ཕན་ཚུན་རིགས་འཆོལ་གཉེན་ལ་གདུང་སེམས་ཆུང༌། །གཞུང་ངན་ཕྱི་ཐག་ཐུང་བས་སེམས་འདི་སྐྱོ། །སྔོན་དུས་མཐུན་ལ་ནང་རིགས་གཤིམ་ན་ཡང༌།<span class="lcp-mark">»</span></span> <span class="lcp-note"><span class="lcp-mark">«</span>།ད་དུས་མི་མཐུན་དབྱེན་བཅུག་གཏམ་སྣ་མང༌།<span class="lcp-mark">»</span></span> <span class="lcp-note"><span class="lcp-mark">«</span>།<span class="lcp-mark">»</span></span> <span class="lcp-note"><span class="lcp-mark">«</span>གཅིག་གིས་གཅིག་བསླུ་ཕན་ཚུན་ཉེས་ན་དགའ། །ཕྲག་དོག་ཟུག་རྔུ་ཆེ་བས་སེམས་འདི་སྐྱོ། །སྔོན་དུས་ཁོང་ཡངས་ལྷོད་ཆ་ཆེ་ན་ཡང༌། །ད་དུས་གྲིམ་པས་ཅུང་ཟད་ཙམ་གྱི་ཕྱིར། །ཕ་དང་བུར་འཐབ་དཔོན་སློབ་མཛའ་བཤེས་འབྲལ། །རང་བཞིན་ཀུན་སྤྱོད་ངན་པས་སེམས་འདི་སྐྱོ། །སྔོན་དུས་ངོ་ཚ་ཁྲེལ་འཛེམ་ཆེ་ན་<span class="lcp-mark">»</span></span> <span class="lcp-note"><span class="lcp-mark">«</span>ཡང༌། །ད་དུས་ཟས་ནོར་ཅུང་ཟད་ཙམ་གྱི་ཕྱིར། །སྡིག་དང་གཏམ་ངན་ཁྱད་དུ་བསད་ནས་སྒྲུབ།།བཟང་པོའི་སྤྱོད་དང་བྲལ་བས་སེམས་འདི་སྐྱོ། །སྔོན་དུས་རང་བཞིན་ཆད་ལ་བཙན་ན་ཡང༌། །ད་དུས་མི་རྣམས་ཁས་བླངས་དོན་སྟབས་<span class="lcp-mark">»</span></span> <span class="lcp-note"><span class="lcp-mark">«</span>གཅོག །རྫུན་དང་སྤྲུལ་པ་ངན་གཡོ་སྣ་ཚོགས་བྱེད། །བློ་གཏད་མེད་པ་མཐོང་ནས་སེམས་འདི་སྐྱོ།།སྔོན་དུས་གཤིས་བཟང་རང་བཞིན་བརྟན་ན་ཡང༌། །ད་དུས་རྒྱུད་འཚུབས་ཁོང་ཁྲོ་འཁོན་ངན་འབེབས། །རང་ཚུགས་མི་ཐུབ་ཟུངས་མེད་ཁ་གསག་ཅན།<span class="lcp-mark">»</span></span> <span class="lcp-note"><span class="lcp-mark">«</span>།མཐོ་འགྲོགས་གསར་ངས་ཆེ་བས་སེམས་འདི་སྐྱོ། །སྔོན་དུས་སྤྱི་ཚིས་བཟང་སེམས་ཆེ་ན་ཡང༌། །ད་དུས་ཕྱོགས་ཆར་རང་འདོད་གཙོ་བོར་<span class="lcp-mark">»</span></span> <span class="lcp-note"><span class="lcp-mark">«</span>སྒྲུབ། །ཁ་ཡངས་གཏིང་དོག་ངན་ལ་མི་ཚེ་བསྐྱལ། །བཟང་སེམས་མེད་པ་མཐོང་ནས་སེམས་འདི་སྐྱོ། །སྔོན་དུས་དོན་རྣམས་རིགས་པས་སྒྲུབ་ན་ཡང༌། །ད་དུས་འཕྲལ་ཕུགས་རྒྱུ་མཚན་མི་གཞིག་པར། །གང་དྲན་བྱེད་སྐྱེན་ཕྱིས་ནས་འགྱོད་པ་ཅན། །ལམ་དུ་མི་འགྲོ་སྒྲུབ་པས་སེམས་འདི་སྐྱོ། །སྔོན་དུས་བྱ་བ་གང་ལའང་གྲོས་སུ་བསྡུར། །ད་དུས་ཚོད་མེད་རང་བཟོ་རང་གར་བྱེད། །འཕྲལ་ཕུགས་མི་བརྟན་ཆབ་སྲིད་ཉམས་པའི་རྒྱུ། །རང་གཞན་གནོད་པ་མཐོང་ནས་སེམས་འདི་<span class="lcp-mark">»</span></span> <span class="lcp-note"><span class="lcp-mark">«</span>སྐྱོ། །སྔོན་དུས་གང་ལའང་ཕན་གནོད་གཞིག་ན་ཡང༌། །ད་དུས་མི་རྣམས་སྤྱང་ཀིས་ལུག་མཐོང་ལྟར། །གཞན་ལ་གནོད་ཀྱང་རང་དོན་འབའ་ཞིག་སྒྲུབ། །བཟང་པོའི་ཚུལ་དང་འགལ་བས་སེམས་འདི་སྐྱོ། །སྔོན་དུས་ཤ་ཚ་གྲོས་འདེབས་ཉན་ན་ཡང༌། །ད་དུས་བདེན་པའི་གཏམ་ལ་ཉན་མཁན་མེད། །ངོར་བསྟོད་དབྱེན་བཅུག་རྣ་བའི་བདུད་རྩི་བཞིན། །དམ་པའི་ལམ་དང་འགལ་བས་སེམས་འདི་སྐྱོ། །སྔོན་དུས་ཕ་མ་རྒན་རབས་བཀུར་ན་ཡང༌། །ད་དུས་རྒན་རབས་བཀུར་སྟི་སྲི་ཞུ་<span class="lcp-mark">»</span></span> <span class="lcp-note"><span class="lcp-mark">«</span>མེད། །གྲལ་ཡང་མཐར་འཇོག་ཟས་གོས་ལྷག་རོལ་སྟེར། །ངོ་ཚའི་གནས་སུ་བྱེད་པས་སེམས་འདི་སྐྱོ། །སྔོན་དུས་བཟང་དྲིན་བྱས་པ་གཟོ་ན་ཡང༌། །ད་དུས་མི་རྣམས་བཟང་ལན་ངན་གྱིས་འཇལ། །ཕན་ཆེར་བཏགས་ནས་གནོད་པ་ཆེར་སྐྱེལ་པ། །འགྲོགས་སུ་མི་རུང་མཐོང་ནས་སེམས་འདི་སྐྱོ། །སྔོན་དུས་གང་ལའང་རང་བཞིན་བརྟགས་ན་ཡང༌། །ད་དུས་མི་རྣམས་འབར་རྒྱུག་ཕྱོགས་གཏམ་ཅན། །<span class="lcp-mark">»</span></span> <span class="lcp-note"><span class="lcp-mark">«</span>བཟང་ངན་མི་དཔྱོད་གྲགས་པའི་རྗེས་སུ་འབྲང༌། །སྒྲོ་སྐུར་སྨྲ་བསྟོད་མང་བས་སེམས་འདི་སྐྱོ། །དེ་དག་ལ་སོགས་ཉེས་པ་ཚད་མེད་པ། །དུས་ངན་སྐྱེ་བོ་རྣམས་ཀྱི་རང་བཞིན་ཏེ། །ཆ་ཙམ་བརྗོད་པས་ཕྱོགས་ཙམ་མཐོང་བར་ཟད། །རྒྱས་པར་བསྐལ་བའི་བར་དུ་བརྗོད་མི་ལང༌། །དེ་དག་མཐོང་ནས་དད་ལྡན་སྐྱེ་བོ་རྣམས། །<span class="lcp-mark">»</span></span> <span class="lcp-note"><span class="lcp-mark">«</span>དབེན་པའི་གནས་སུ་དམ་ཆོས་སྒྲུབ་པར་རིགས། །དུས་ལ་མངོན་པར་སྐྱོ་བའི་རབས་ལས། ཐ་མལ་བའི་གནས་ལ་སྐྱོ་བར་བསྟན་པ་སྟེ་རབས་དང་པོའོ།། །།དེ་ལྟར་འཇིག་རྟེན་བསམ་སྤྱོད་སྐྱེ་བོ་ཀུན། །རང་བཞིན་བླུན་པས་བདེན་དུ་ཆུག་ན་ཡང༌། །ཐར་པར་ཞུགས་པ་ཆོས་དོན་གཉེར་བ་རྣམས། ། བསྟན་པ་སྙིགས་མའི་སྐྱོ་བ་བཤད་ཀྱིས་ཉོན། །ལྷར་བཅས་འགྲོ་བའི་ཕན་བདེ་འབྱུང་བའི་གནས། །བསྟན་པ་འཇིག་རྟེན་མིག་འདི་ཟུམ་དུ་ཉེ། །བཤེས་གཉེན་ཐར་པའི་ལམ་མཁན་ཕལ་ཆེར་འདས། །བྱང་ཆུབ་ལྗོན་ཤིང་རྙིང་བས་སེམས་འདི་སྐྱོ། །<span class="lcp-mark">»</span></span> <span class="lcp-note"><span class="lcp-mark">«</span>སྔོན་གྱི་རྒྱལ་བས་བྱང་ཆུབ་བརྙེས་པའི་གནས། །རྡོ་རྗེ་གདན་སོགས་འཕགས་པའི་ཡུལ་རྣམས་སྟོང༌། །སྡིག་སྤྱོད་སོག་པོ་རྣམས་ཀྱིས་མཐའ་བསྐོར་ཞིང༌། །ཉམ་ངའི་གནས་སུ་གྱུར་ལ་སེམས་འདི་སྐྱོ། །ཕྱོགས་རྣམས་གང་ནའང་དགེ་བའི་བཤེས་ཉུང་ཞིང༌། །ཆོས་བཞིན་སྤྱོད་པའི་སྐྱེ་བོ་རབ་དཀོན་ལ། །སྡེ་དགོན་རྣམས་ཀྱང་ཁྱིམ་པའི་གྲོང་འདབ་བཞིན། །ཆོས་མིན་བྱ་བྱེད་མང་བས་སེམས་འདི་<span class="lcp-mark">»</span></span> <span class="lcp-note"><span class="lcp-mark">«</span>སྐྱོ། །རང་ཉིད་མཁན་སློབ་གནས་སུ་ཁས་འཆེ་ཡང༌། །ཆོས་ཀྱི་ཉམས་ལེན་ཤེས་བྱེད་གཉིས་དང་བྲལ། །ཁྱིམ་ཆུང་སྤངས་པའི་ཁྱིམ་ཆེན་འདུ་འཛི་ཅན། །འཁྲུལ་སྣང་བདེན་པར་འཛིན་ལ་སེམས་འདི་སྐྱོ། །རང་ཉིད་མཆོག་ཏུ་བཙུན་པར་ཁས་འཆེ་ཡང༌། །ཕྲ་མོ་བསྲུང་ལ་ཆེན་པོ་ཁྱད་དུ་གསོད། །ཡོ་བྱད་སོགས་བྲུན་ཚེ་འདི་འབའ་ཞིག་པ། །ཐར་ལམ་ངེས་འབྱུང་བྲལ་ལ་སེམས་འདི་སྐྱོ། །རང་ཉིད་བཟང་པོའི་གནས་སུ་ཁས་འཆེ་ཡང༌། །ཕྱི་ནང་འཛོལ་ལ་ཆོས་བརྒྱད་གཙོ་བོར་འཛིན། །<span class="lcp-mark">»</span></span> <span class="lcp-note"><span class="lcp-mark">«</span>གཞན་ལ་སྡང་ཞིང་རང་རྒྱུད་མ་དུལ་བས། །ཀོ་ལོང་ཟུར་མགོ་རགས་ལ་སེམས་འདི་སྐྱོ། །རང་ཉིད་རབ་ཏུ་བྱུང་བར་ཁས་འཆེ་ཡང༌། །ཐོས་བསམ་མི་གཉེར་ཡོ་བྱད་གང་བཟང་འགྲན། །བླང་དོར་མི་ཤེས་བསླབ་གསུམ་ནོར་གྱིས་དབེན། །ཉོན་མོངས་དུག་ལྔ་འཁྲུགས་པས་སེམས་འདི་སྐྱོ། །རང་ཉིད་ཆོས་ལ་ཞུགས་པར་ཁས་འཆེ་ཡང༌། །དགེ་སྡིག་མི་འཛེམ་འཁྲུལ་པའི་བྱ་བས་གཡེངས། །དད་མེད་ཤེས་རབ་ཆུང་ལ་དྲན་པ་གསལ། །ཆོས་མེད་སྟོང་པར་འགྲོ་བས་སེམས་འདི་སྐྱོ། །རང་ཉིད་བསྟན་ལ་ཞུགས་པར་ཁས་འཆེ་ཡང༌། །ཁྲིམས་མེད་རྟགས་ཙམ་འཛིན་ལ་འདོད་ཡོན་གཉེར། །རབ་ཏུ་བྱུང་ཡང་ཆོས་ཀྱིས་མ་གོས་པའི། །རྫིང་བུའི་ངང་མོ་འདྲ་ལ་སེམས་འདི་སྐྱོ། །རང་ཉིད་བསོད་ནམས་གསོག་པར་ཁས་འཆེ་ཡང༌། །<span class="lcp-mark">»</span></span> <span class="lcp-note"><span class="lcp-mark">«</span>ཕྱོགས་ཆའི་སྦྱིན་པ་ལོ་འདོད་རློམ་སེམས་ཅན། །སྡིག་དང་འདྲེས་པ་ཁ་ལན་རེ་བཅས་གཞི། །ངས་བྱས་ཡུས་ཀྱིས་བརྣངས་ལ་སེམས་འདི་སྐྱོ། །རང་ཉིད་འབྱོར་ལྡན་ཕྱུག་པོར་ཁས་འཆེ་ཡང༌། །སེར་སྣས་བཅིངས་ཏེ་གཏོང་སེམས་རྡུལ་ཙམ་ མེད། །རང་ཡང་མི་སྤྱོད་གཞན་ལའང་མི་སྦྱིན་པ། །འཆི་དུས་སྡིག་སྤྱོད་ཅན་གྱུར་སེམས་འདི་སྐྱོ། །རང་ཉིད་སྡེ་དགོན་ཆོས་ལྡན་ཁས་འཆེ་ཡང༌། །ཆོས་མིན་བྱ་བྱེད་ཁྱིམ་པའི་གྲོང་རྡལ་བཞིན། །རྣམ་གཡེང་འདུ་འཛི་སྡུག་བསྔལ་རྒྱུན་མི་འཆད། །<span class="lcp-mark">»</span></span> <span class="lcp-note"><span class="lcp-mark">«</span>ཆགས་སྡང་འཐབ་རྩོད་མང་བས་སེམས་འདི་སྐྱོ། །དེ་དག་ལ་སོགས་ཉེས་པའི་ཚོགས་མང་པོ། །བསྐལ་པར་བརྗོད་ཀྱང་ཀུན་ཏུ་ཟད་མི་ཤེས། །འདི་འདྲའི་ཚུལ་ལ་མངོན་པར་སྐྱོ་བ་ཡིས། །དབེན་པའི་གནས་སུ་དམ་ཆོས་སྒྲུབ་པར་རིགས། །<span class="lcp-mark">»</span></span> <span class="lcp-note"><span class="lcp-mark">«</span>དུས་ལ་མངོན་པར་སྐྱོ་བའི་རབས་ལས། ཕལ་པའི་གནས་ལ་མངོན་པར་སྐྱོ་བར་བསྟན་པ་སྟེ་རབས་གཉིས་པའོ།། །།དེ་ལྟར་ཕལ་རྣམས་ཉེས་པའི་སྐྱོན་མང་པོ། །ཐོས་བསམ་ཚུལ་ལ་བློ་མིག་མ་སྦྱངས་པས། །མི་ཤེས་སྐྱོན་གྱུར་གང་དེ་བདེན་མོད་ཀྱི། །ཤེས་བཞིན་ཁྱད་དུ་གསོད་ལ་སྐྱོ་བས་ཉོན། །རང་ཉིད་བླང་དོར་ཤེས་པར་རློམ་ན་ཡང༌། །རྒྱུ་འབྲས་མི་འཛེམ་འདོད་ཡོན་རང་དགར་སྤྱོད། །ཐབས་ཀྱིས་གཞན་བསླུ་དུག་ལྔ་སུ་བས་རགས། །ཉོན་མོངས་འདོད་སྲེད་ཆེ་བས་སེམས་འདི་སྐྱོ། །རང་ཉིད་གཞན་ལ་འཆད་པར་ཁས་འཆེ་ཡང༌། །རང་རྒྱུད་མ་དུལ་གཞན་རྒྱུད་ཐབས་ཀྱིས་བསྲེག<span class="lcp-mark">»</span></span> <span class="lcp-note"><span class="lcp-mark">«</span>།<span class="lcp-mark">»</span></span> <span class="lcp-note"><span class="lcp-mark">«</span>གཟུ་བོར་མི་གནས་གཞན་ལ་འཕྱར་ཀ་གཏོང༌། །ཆོས་དང་རང་རྒྱུད་འཛོལ་བས་སེམས་འདི་སྐྱོ།<span class="lcp-mark">»</span></span> <span class="lcp-note"><span class="lcp-mark">«</span>།རང་ཉིད་དམ་ཆོས་མཁས་པར་ཁས་འཆེ་ཡང༌།<span class="lcp-mark">»</span></span> <span class="lcp-note"><span class="lcp-mark">«</span>།<span class="lcp-mark">»</span></span> <span class="lcp-note"><span class="lcp-mark">«</span>བྱམས་དང་སྙིང་རྗེས་རང་རྒྱུད་མ་བརླན་ཞིང༌། །གཞན་ལ་ཕྲག་དོག་འཐབ་རྩོད་འཁྲུག་ལོང་སྐྱེ། །ཀུན་གྱི་གཟིང་རྩར་གྱུར་ལ་སེམས་འདི་སྐྱོ། །རང་ཉིད་སྡེ་སྣོད་འཛིན་པར་རློམ་ན་ཡང༌། །རང་གཞན་གྲུབ་མཐའི་གཞུང་ལུགས་མི་ཤེས་ཤིང༌།།མང་དུ་མ་ཐོས་ཕྱོགས་རེའི་བློ་མིག་ཅན། །རློམ་པས་ཁེངས་པ་མཐོང་ནས་སེམས་འདི་སྐྱོ། །རང་ཉིད་དམ་ཆོས་ཤེས་པར་རློམ་ན་ཡང༌། །ཚིག་ཙམ་ཤེས་པས་ང་རྒྱལ་རི་བོ་བཞིན། །རང་རྒྱུད་ཆོས་དང་ལུང་པ་སོ་སོ་བ། །ནེ་ཙོའི་འདོན་པ་འདྲ་བས་སེམས་འདི་སྐྱོ། །རང་ཉིད་བཤེས་གཉེན་དམ་པར་རློམ་ན་ཡང༌། །ཀུན་ལ་ཁྱད་གསོད་ཉེ་བར་མ་ཞི་བ། །དོན་ལ་རྨོངས་པའི་མཁས་པ་ཡ་མཚན་ཅན། །ཆོས་མེད་དྲེད་པོར་གྱུར་ལ་སེམས་འདི་སྐྱོ། །དིང་སང་བསྟན་པ་ལུང་གིས་འཛིན་ན་ཡང༌། །སྔོན་གྱི་གཞུང་ལུགས་བཟང་པོ་ཕལ་ཆེར་ནུབ། །རང་བཟོའི་གྲུབ་མཐའ་ངན་པ་གཙོར་བྱས་ནས། །འཆད་རྩོད་རྩོམ་པའི་ཚུལ་ལ་སེམས་འདི་སྐྱོ། །རང་ཉིད་དམ་ཆོས་འཆད་པར་རློམ་ན་ཡང༌། །དང་པོར་བླ་མ་གུས་པས་མ་བསྟེན་<span class="lcp-mark">»</span></span> <span class="lcp-note"><span class="lcp-mark">«</span>ཞིང༌། །བར་དུ་ཚིག་དོན་བརྩོན་པས་མ་སྦྱངས་ལ། །ཐ་མར་འཆད་དུས་མུན་ཁུང་འཛུབ་བཙུགས་བཞིན། །རང་བཞིན་མ་གོ་འཆད་ལ་སེམས་འདི་སྐྱོ། །རང་ཉིད་གཞུང་ལུགས་རྩོད་པར་རློམ་ན་ཡང༌། །རང་གཞན་གྲུབ་མཐའི་སྐྱོན་གེགས་མི་ཤེས་པར། །ལོག་རྟོག་ཉིང་འཁྲུལ་ལེགས་པའི་གཞུང་ལུགས་ནུབ། །རྟོག་གེ་རྣམ་པར་འཁྱམས་ལ་སེམས་འདི་སྐྱོ། །རང་ཉིད་བསྟན་བཅོས་རྩོམ་པར་རློམ་ན་<span class="lcp-mark">»</span></span> <span class="lcp-note"><span class="lcp-mark">«</span>ཡང༌། །རྩོམ་གཞིའི་གནས་ལས་འདྲ་མིན་གོང་འོག་རྣམས། །ནོར་བས་གཞུང་ལུགས་སྔ་མ་ནུབ་པ་ལས། ཁུངས་མེད་གྲགས་པ་འདོད་ལ་སེམས་འདི་སྐྱོ། །<span class="lcp-mark">»</span></span> <span class="lcp-note"><span class="lcp-mark">«</span>རང་ཉིད་ཀུན་ལ་མཁས་པར་གྲགས་ན་ཡང༌། །རིམ་གསུམ་འཁོར་ལོའི་དགོངས་དོན་ལེན་མི་ཤེས། །ཚིག་ཚོགས་ཆེ་ཡང་སྒྲུང་དང་ལྡེའུ་བཞིན། །གསུང་རབ་གནས་ལ་རྨོངས་པས་སེམས་འདི་སྐྱོ། །ཚེ་གང་ཐོས་བསམ་དོན་ལ་སྦྱངས་ན་<span class="lcp-mark">»</span></span> <span class="lcp-note"><span class="lcp-mark">«</span>ཡང༌། །དོན་དམ་ངེས་པའི་དབྱིངས་ལ་བློ་མ་ཕྱོགས། །སྟོང་ཆད་ནམ་མཁའ་འདྲ་བའི་ངེས་དོན་སྟོན། །ཟབ་མོའི་གནས་ལ་རྨོངས་པས་སེམས་འདི་སྐྱོ། །དེ་དག་ལ་སོགས་ཉེས་པའི་ཚོགས་མང་པོ། །མཐའ་ཡས་རྒྱ་ཆེན་ནམ་མཁའི་དབྱིངས་རུམ་བཞིན། །འདི་དག་བསམས་ནས་ཞི་བའི་ནགས་ཁྲོད་དུ། །སྙིང་པོའི་དོན་གྱི་དེ་ཉིད་སྒོམ་པར་རིགས། །དུས་ལ་མངོན་པར་སྐྱོ་བའི་རབས་ལས། ཐ་སྙད་སྤྱོད་པའི་གནས་ལ་སྐྱོ་བར་བསྟན་པ་སྟེ་རབས་གསུམ་པའོ།། །།དེ་ལྟར་ཐ་སྙད་སྤྱོད་པའི་སྐྱེ་བོ་ཀུན། །ཤེས་བྱ་ཚིག་ཕྱིར་ཤོར་བའི་སྐྱོན་བདེན་གྱི། །ཚུལ་བཞིན་སྙིང་པོའི་དོན་ལ་ཞུགས་རྣམས་ཀྱི། །རང་བཞིན་སྐྱོ་བ་གང་དེ་བཤད་ཀྱིས་ཉོན། །ཀུན་ལས་འཕགས་པའི་བཀའ་སྲོལ་མཆོག་ཡིན་<span class="lcp-mark">»</span></span> <span class="lcp-note"><span class="lcp-mark">«</span>ཞེས། །གཙང་སྒྲ་བདག་འཛིན་མངོན་པའི་ང་རྒྱལ་ཅན། །མ་ནོར་ལམ་དུ་ཞུགས་པར་འདོད་རྣམས་ཀྱང༌། །བདག་ལྟ་མཆོག་ཏུ་འཛིན་པས་སེམས་འདི་སྐྱོ། །རང་ཉིད་སྙིང་པོའི་དམ་ཆོས་ཁས་ལེན་ཅིང༌། །སྔགས་སོགས་གཞན་ལ་སྨོད་པས་ཆོས་སྤོང་བ། །བློ་ཆུང་ལོག་པར་ལྟ་བ་བྲམ་ཟེའི་རིགས། །འདུ་ཤེས་ཕྱིན་ཅི་ལོག་ལ་སེམས་འདི་སྐྱོ། །ལུས་ངག་སྤྱོད་པ་གཙང་བར་འདོད་ན་ཡང༌། །སེམས་གཙང་མི་ཤེས་ཐོས་བསམ་ནོར་དང་བྲལ། །ཚུལ་འཆོས་སྤྱོད་པས་ཉིན་མཚན་འདའ་བྱེད་པ། །ཡོན་ཏན་འབྱོར་པ་སྤངས་པས་སེམས་འདི་སྐྱོ། །མི་རྟོག་ཡེ་ཤེས་དངོས་སུ་བལྟར་ཡོད་ཀྱང༌། །ད་རེས་དུས་མིན་སྨོན་ལམ་ཕྱི་དུས་འདེབས། །བྱ་བྱེད་སྤྲོས་པས་གནས་ལུགས་རྟོགས་སུ་རེ། །དངོས་པོ་མཚན་མར་ཞེན་པས་སེམས་འདི་<span class="lcp-mark">»</span></span> <span class="lcp-note"><span class="lcp-mark">«</span>སྐྱོ། །རང་བཞིན་དག་པའི་ཆོས་ལ་བདག་མེད་ཀྱང༌། །ཕྱོགས་རིས་བདག་ཏུ་ཞེན་པས་གཞན་ལ་སྡང༌། །སྤྱོད་པར་བལྟ་བ་ཁྱད་དུ་གསོད་པ་ཅན། །ཐར་ལམ་བྱང་ཆུབ་རིང་ལ་སེམས་འདི་སྐྱོ། །མི་རྟག་ཚིག་ཏུ་འཆད་ཀྱང་རྟག་པར་འཛིན། །ཚད་མེད་སྙིང་རྗེ་བརྗོད་ཀྱང་རྒྱུད་མ་དུལ། །ཐམས་ཅད་བདེན་མེད་ཟེར་ཡང་དངོས་པོར་ཞེན། །འདོད་ཡོན་འདུ་འཛི་གཉེར་ལ་སེམས་འདི་སྐྱོ། །གསང་མཆོག་རྡོ་རྗེ་འཛིན་པར་འདོད་ན་ཡང༌། །བསྙེན་སྒྲུབ་མི་བརྩོན་བསྐྱེད་རྫོགས་ཐུན་ལ་<span class="lcp-mark">»</span></span> <span class="lcp-note"><span class="lcp-mark">«</span>གཡེལ། །གསང་སྒོ་འཆོལ་བས་དམ་ཚིག་ཞིག་རལ་ཅན། །ཀུན་སྤྱོད་མཆོག་ཏུ་རྩིང་བས་སེམས་འདི་སྐྱོ། །དབང་རྣམས་མ་རྫོགས་རྒྱུད་དོན་མི་ཤེས་ལ། །བཟླས་བརྗོད་མ་ཚང་བསྙེན་སྒྲུབ་མ་ཐེམས་བཞིན། །དབང་བསྐུར་རབ་གནས་གྲོང་ཆོག་རྙེད་ཚོལ་ཅན། །གསང་སྔགས་ཁྲོམ་དུ་སྒྲོགས་པས་སེམས་འདི་སྐྱོ། །བགེགས་ཕྲན་འབྱུང་པོ་བསྒྲུབས་པས་སྐྱེ་བོ་སྡུད། །དྲག་སྔགས་སྙིང་རྗེ་མེད་པར་ཞེ་སྡང་འཕེལ། །ཤེས་བྱའི་གནས་ལ་རྨོངས་པས་ཐར་ལམ་རིང༌། །བྱང་ཆུབ་ལམ་བཟང་སྟོར་བས་སེམས་འདི་སྐྱོ། །བསམ་གཏན་སྒོམ་པར་འདོད་པའི་ཚོགས་རྣམས་ཀྱང༌། །ལུང་རིགས་མི་ཤེས་ཐོས་བསམ་སྐྱོན་དུ་བལྟ། །ཆོས་བརྒྱད་མ་བྲལ་རང་ཕྱོགས་བདག་ལྟས་ཁེངས། །ནོར་བའི་ལམ་ལ་བརྩོན་པས་སེམས་འདི་སྐྱོ། །མདོ་རྒྱུད་མ་འབྲེལ་ཆོས་ལུགས་ཡ་མཚན་ཅན། །འཁྲུལ་སྣང་འོད་གསལ་འཁྲུལ་རྟོག་ཆོས་ཉིད་ཅེས། །ལོག་རྟོག་གྲུབ་མཐས་རྨོངས་པ་ངོ་མཚར་བསྐྱེད། །འདྲེན་པའི་གཟུགས་བརྙན་མཐོང་ནས་སེམས་འདི་སྐྱོ། །ཐམས་ཅད་སྟོང་པ་ཅང་མེད་ནམ་མཁའ་བཞིན། །རྒྱུ་འབྲས་གཉིས་མེད་ད་ལྟ་རྫོགས་སངས་རྒྱས། །ས་ལམ་ཡོན་ཏན་དྲང་དོན་བསླུ་བྲིད་ཅེས། །ཆད་ལྟའི་ཆོས་རྣམས་སྟོན་པས་སེམས་འདི་སྐྱོ། །<span class="lcp-mark">»</span></span> <span class="lcp-note"><span class="lcp-mark">«</span>དོན་དམ་འོད་གསལ་ངོ་བོ་མི་ཤེས་པས། །ཕྱང་ཆད་སྟོང་པ་སེམས་ཀྱི་གནས་ལུགས་ཞེས། །སྲིད་རྩེའི་ལམ་གྱིས་ཐར་པ་ཐོབ་ཏུ་རེ། །མདོ་རྒྱུད་དོན་ལ་རྨོངས་པས་སེམས་འདི་སྐྱོ། །སེམས་ཉིད་མ་རྟོགས་མཐའ་བྲལ་མི་ཤེས་པར། །དྲན་རྟོག་གང་ཤར་ཆོས་སྐུ་ཟང་མ་ཞེས། །སེམས་དང་སེམས་བྱུང་ཕྲེང་པ་འདྲེན་བྱེད་<span class="lcp-mark">»</span></span> <span class="lcp-note"><span class="lcp-mark">«</span>པ། །དྲན་རྟོག་བདག་ཏུ་འཛིན་ལ་སེམས་འདི་སྐྱོ། །རིག་པ་མཐའ་གྲོལ་རྟེན་མེད་མ་ཤེས་པར། །རླུང་སེམས་ཉམས་ལ་གནས་ལུགས་དོན་དུ་ཞེན། །ཆགས་སྲེད་འཛིན་པས་ཉོན་མོངས་ཕྱི་ཕྱིར་འཕེལ། །ལམ་གོལ་དམན་པར་ཞུགས་ལ་སེམས་འདི་སྐྱོ། །ལེགས་ཉེས་མི་དཔྱོད་རང་གའི་ལམ་དུ་ཞུགས། །གཟུ་བོར་མི་གནས་ཕྲག་དོག་མེ་ཡིས་གདུངས། །འབྲེལ་ཚད་རང་བཞིན་རྨོངས་པར་དགོད་པ་སྟེ། །<span class="lcp-mark">»</span></span> <span class="lcp-note"><span class="lcp-mark">«</span>གཏི་མུག་མུན་རུམ་གྱུར་ལ་སེམས་འདི་སྐྱོ། །མདོར་ན་དིང་སང་གངས་རིའི་ར་བ་འདིར། །མཁས་བླུན་མི་ཕྱེད་སླར་ལ་རྨོངས་པ་གཙོ། །བླུན་པོའི་རྨོངས་ཟིལ་ཟས་གོས་ཆེ་ཁྱད་ཅན། །སྒྲུབ་པའི་བྱིན་རླབས་ངོ་མཚར་ཁྱད་དུ་འཛིན། །བཅོས་མའི་ཆོས་ལ་ཐར་པའི་ལམ་རེ་ཞིང༌། །མདོ་རྒྱུད་བསྟན་བཅོས་བཅོས་པའི་དོན་ཞེས་འདོར། །འདིས་ནི་དམ་ཆོས་པདྨ་ཟུམ་པ་འདྲ། །བསྟན་པའི་ཉི་མ་ནུབ་ལ་སེམས་འདི་སྐྱོ། །དེ་དག་ལ་སོགས་ཚད་མེད་ཉེས་པའི་ཚོགས། །རྒྱ་མཚོའི་ཆུ་རྡུལ་ཇི་བཞིན་བསམ་མི་ཁྱབ། །འདི་དག་སྤངས་ནས་ཞི་བའི་ནགས་ཁྲོད་དུ། །ཟབ་དོན་སྙིང་པོའི་དེ་ཉིད་སྒྲུབ་པར་རིགས། །དུས་ལ་མངོན་པར་སྐྱོ་བའི་རབས་ལས། སྒྲུབ་པར་ཆས་པའི་གནས་ལ་སྐྱོ་བར་བསྟན་པ་སྟེ་རབས་བཞི་པའོ།། །།དེ་ལྟར་རང་བཞིན་སྐྱོ་བའི་ཚུལ་རྣམས་ཀུན། །ཕལ་ཆེར་རྨོངས་པས་བདེན་དུ་ཆུག་ན་ཡང༌། །ཤེས་བཞིན་ཕྲག་དོག་དོན་མེད་སྒྲོ་སྐུར་ཅན། །ངེས་འབྱུང་སྐྱོ་ཤས་སྐྱེ་བའི་ཚུལ་ལ་ཉོན། །ཐོག་མར་བསྟན་ཞུགས་བསླབ་གཞི་ལེགས་བཅས་ཏེ། །བར་དུ་ཐོས་བསམ་ཕྱོགས་མེད་དོན་ལ་སྦྱངས། །ཐ་མར་ཟབ་དོན་སྙིང་པོ་བསྒོམས་རྗེས་སུ། །གཞན་དོན་ཟོག་པོར་མཐོང་བས་སེམས་འདི་སྐྱོ། །<span class="lcp-mark">»</span></span> <span class="lcp-note"><span class="lcp-mark">«</span>སྔོན་ཆད་མཐོང་དང་མ་མཐོང་མི་རྣམས་དང༌། །གཞན་གྱི་ལམ་མཁན་འདྲེན་པའི་བཤེས་གཉེན་ཡང༌། །གཟུ་བོར་མི་གནས་ཕྲག་དོག་རླུང་གིས་བསྐྱོད། །ཆགས་སྡང་མེ་དཔུང་འབར་ལ་སེམས་འདི་སྐྱོ། །རང་གཞན་ཀུན་གྱིས་དམ་པར་འཛིན་ན་ཡང༌། །གཞན་ལ་གཤེ་སྐུར་བསམ་སྤྱོད་ངན་པ་སྟོན། །ཚད་མེད་བཞི་ལ་བློ་ཁ་མ་ཕྱོགས་པར། །ཆོས་པའི་གཟུགས་བརྙན་མཐོང་ནས་སེམས་འདི་སྐྱོ། །ཡང་དག་མ་ནོར་ཇི་བཞིན་སྟོན་བྱེད་པས། །ཤེས་བྱའི་གནས་རྣམས་ལེགས་པར་འདོམས་ན་ཡང༌། །ཤེས་རབ་ཆེ་བ་བླ་མའི་སྐྱོན་ཡིན་ཞེས། །མི་རིགས་མུན་པས་སྨྲ་ལ་སེམས་འདི་སྐྱོ། །འཇིག་རྟེན་འདི་ན་མ་ལུས་འགྲོ་ཀུན་ལ། །འབྱོར་བདེ་སྡུག་བསྔལ་མཐོ་དམན་ཅི་ཡོད་ཀུན། །རང་རང་ལས་ཀྱིས་བསགས་པར་མི་ཤེས་<span class="lcp-mark">»</span></span> <span class="lcp-note"><span class="lcp-mark">«</span>པར། །ཕྲག་དོག་ཟུག་རྔུ་བྱེད་ལ་སེམས་འདི་སྐྱོ། །ཉེའམ་རིང་བའི་གནས་ན་འདུག་ཀྱང་རུང༌། །གཞན་བདེ་མི་བཟོད་ཆགས་སྡང་འབར་བའི་མེས། །ཡོངས་སུ་གདུངས་ཤིང་གནོད་པ་མངོན་པར་སྒྲུབ། །ཉོན་མོངས་ལོག་པར་ལྟ་བས་སེམས་འདི་སྐྱོ། །རྨི་ལམ་ན་ཡང་དྲན་པར་མ་མྱོང་ན། །དངོས་སུ་ལྟ་ཞིག་རྡུལ་ཙམ་ཉེས་མེད་ལ། །སྒྲོ་སྐུར་སྣ་ཚོགས་མངོན་པར་གཤེ་བ་ཅན། །ཆགས་སྡང་དྲག་པོས་གཟིར་ལ་སེམས་འདི་སྐྱོ། །རང་ཉིད་བཟང་པོའི་གནས་སུ་ཁས་འཆེ་ཞིང༌། །སྣང་བ་སེམས་སུ་གྲུབ་པར་འདོད་ན་ཡང༌། །གཞན་ལ་ཕྲག་དོག་ཕན་ཚུན་ནང་འགལ་ཅན། །ཆོས་པའི་གཟུགས་བརྙན་རྣམས་ལ་སེམས་འདི་སྐྱོ། །དེ་དག་ལ་སོགས་ཉེས་པ་བརྗོད་མི་ལང༌། །མཐའ་ཡས་གྲངས་མང་མཚན་མོའི་གཟའ་སྐར་<span class="lcp-mark">»</span></span> <span class="lcp-note"><span class="lcp-mark">«</span>བཞིན། །འདི་དག་སྤངས་ནས་ཞི་བའི་ནགས་ཁྲོད་དུ། །གཅིག་པུར་ཞི་བ་སྒྲུབ་ན་མི་ལེགས་སམ། །དེང་སང་དུས་ངན་སྐྱེ་བོ་བཟོད་དཀའ་བས། །གཞན་དོན་དགེ་ལ་བསྐུལ་བ་སྒྲུབ་པར་དཀའ། །སྡིག་པའི་མིག་རྐྱེན་བྱེད་རྣམས་རབ་སྤངས་ ཏེ། །གཅིག་པུར་དབེན་པར་དམ་ཆོས་སྒྲུབ་པར་རིགས། །དུས་ལ་མངོན་པར་སྐྱོ་བའི་རབས་ལས། གྲོགས་ཀྱི་བཤེས་གཉེན་རྣམས་ལ་སྐྱོ་བར་བསྟན་པ་སྟེ་རབས་ལྔ་པའོ།། །།དེ་དག་རང་གི་འདོད་པ་སྒྲུབ་པ་དང༌། །གཞན་ཕྱོགས་བཀག་པས་སེམས་བདེ་རྙེད་གྱུར་ཅིང༌། །ཕྲག་དོག་གོམས་པས་བདེན་དུ་ཆུག་ན་ཡང༌། །རང་ཕྱོགས་འཁོར་གྱིས་ལོག་སྒྲུབ་སྐྱོ་བས་ཉོན། །ལྷག་བསམ་སྙིང་པོའི་བྱང་ཆུབ་སེམས་བསྐྱེད་ནས། །ཉེ་རིང་མེད་པའི་གདུལ་བྱ་སྣ་ཚོགས་ལ། །ཟོལ་མེད་ཕན་པ་སྒྲུབ་ཀྱང་མགུ་དུས་མེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དང་པོ་ལྷར་མཐོང་གསར་ངས་ལྷག་པར་ཆེ། །བར་དུ་མིར་མཐོང་དཔོན་སློབ་འགྲོགས་ཤེས་ཙམ། །ཕྱི་མར་དགྲར་མཐོང་གནོད་པ་སྣ་ཚོགས་སྐྱེལ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཀུན་ཏུ་ཆོས་ཀྱི་དྲིན་ནི་མཐའ་ཡས་ཤིང༌། །ལེགས་འདོམས་དུས་སུ་ཕན་པས་བསྐྱངས་བྱས་ཀྱང༌། ། ལྷག་པར་སེམས་དཀྲུགས་ཉེ་འཁོར་སུན་རྣམསའབྱིན། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་ཤེས་མེད་ལ་ཁ་ཏས་མི་ཆུན་ཞིང༌། །ཕྲག་དོག་ཚིག་རྩུབ་འཐབ་རྩོད་འབའ་ཞིག་བྱེད། །རང་སྐྱོན་མི་སེམས་ཅི་བྱས་སྡང་བར་མཐོང༌། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་རྨོངས་བློ་གྲོས་ཆུང་ཞིང་དགའ་དཀའ་ལ། །ལེགས་ཀུན་ཉེས་པ་གཅིག་གིས་འགོག་པར་བྱེད། །སྐྱོན་མང་ཡོན་ཏན་མེད་ལ་ཉེས་ཀུན་<span class="lcp-mark">»</span></span> <span class="lcp-note"><span class="lcp-mark">«</span>གཞི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །འཕྲལ་གང་ཞི་ལ་ཕུགས་ན་མ་རུངས་པ། །ཁ་ལ་བཟང་ཆེ་ལག་ལེན་ངན་པ་བྱེད། །ཆོས་དང་རྒྱུད་འཛོལ་གཡོ་སྒྱུ་ཁྲམ་པའི་རིགས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཉོན་མོངས་འདོད་སྲེད་ཆེ་ཞིང་གཉེན་པོ་མེད། །རང་བཞིན་ཀུན་སྤྱོད་ངན་པ་ཁ་ཁྱེར་མཐོ། །<span class="lcp-mark">»</span></span> <span class="lcp-note"><span class="lcp-mark">«</span>གཞན་གྱི་མཚང་འབྲུ་རང་སྐྱོན་མི་སྤོང་བ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ལེགས་ཉེས་ཤེས་ཀྱང་ཉེས་ལ་ནན་གྱིས་འཇུག །སྤང་བླང་ཤེས་ཀྱང་རྒྱུ་འབྲས་ཁྱད་དུ་གསོད། །དབང་པོ་རྣོ་ཡང་གཟུ་བོར་མི་གནས་པ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རྐྱེན་ཁར་ཡང་ལ་འགྲོགས་ཁྱེར་མི་མཁས་ཤིང༌། །གཞན་ལས་བྱེད་སྐྱེན་བསྒྱུར་ཁ་ཤིན་ཏུ་ཡང༌། །ཟུང་མེད་ཕྱོགས་མི་ཐུབ་ལ་གཞུང་ངན་པ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་ལ་དགོས་ན་ཁ་གསག་ངོ་བསྟོད་མཁས། །གཞན་ལ་དགོས་ན་ཐབས་ཀྱིས་ཕྱིར་ཕྱིར་ འབྱོལ། །བྱ་བྱེད་གང་ལའང་གཡོ་ཟོལ་ཕུལ་དུ་ཕྱིན། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དོན་མེད་འབྲེལ་ལ་དགའ་ཞིང་གསར་ངས་ཆེ། །ཐམས་ཅད་ཀུན་ཏུ་ཁྱབ་ཅིང་བྱ་བྱེད་མཐོ། །འཇམ་འཇམ་འདྲ་ལ་ཕྱི་ནང་ཟེར་མཆུ་མང༌། །<span class="lcp-mark">»</span></span> <span class="lcp-note"><span class="lcp-mark">«</span>དུས་ངན་འཁོར་ལ་བསམ་ཞིང་སྐྱོ་བ་འཕེལ། །གཞན་སྣང་བསྒྱུར་མཁས་བཟང་བཟང་འདྲ་ན་ཡང༌། །འཇམ་པོས་ཕུག་པར་སྐྱོ་སྔོགས་ཕྲ་མ་བྱེད། །ཕྱི་ནང་འཛོལ་ཡང་ཇོ་བཟང་མ་ཞིག་པ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་གི་རང་མཐོང་གཞན་ལ་ཕྲག་དོག་བྱེད། །དཔོན་དད་ཆུང་ལ་དྲིན་ཆུང་འདྲེན་ལ་དགའ། །ལག་དྲིན་ཁས་གསོད་ང་བདེན་ཡུས་ཀྱིས་བརྣངས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །འདོད་པ་ཆུང་ལ་ཚིག་གིས་བསྟོད་ན་ཡང༌། །ཕོངས་པར་གྱུར་ལ་ནན་གྱིས་བརྙས་པ་བྱེད། །ངོས་སུ་བསྟོད་ལ་ལྐོག་ཏུ་གཤེ་སྐུར་འདེབས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་གི་བྱ་བྱེད་འདུན་མ་མི་ཤེས་པར། །གཞན་ལ་གྲོས་འདེབས་ཁ་ཏ་ཡས་ཀྱིས་འབུབས། །ཕྲ་མ་སྔ་བཙན་ཕྱོགས་གཏམ་བདེན་པར་འཛིན། ། དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཡུན་རིང་འགྲོགས་ཤིང་ཆོས་ཀྱིས་འབྲེལ་ན་ཡང༌། །གཡོན་ཅན་སྡིག་པའི་གྲོགས་ཀྱི་ཕྱོགས་བཟུང་ནས།།འདི་ཕྱིའི་ཉེས་དམིགས་མི་སེམས་དམ་ཉམས་བྱེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཆོས་ཀྱིས་འབྲེལ་ཞིང་ཅི་འགྲུབ་ཕན་བཏགས་ཀྱང༌། །ལྐོག་ནས་གནོད་སྐྱེལ་འཕྱར་ཀ་རྟག་ཏུ་གཏོང༌། །<span class="lcp-mark">»</span></span> <span class="lcp-note"><span class="lcp-mark">«</span>དངོས་སུ་ཕྱེ་གཏོར་ཟུངས་མེད་ཁ་ཞེ་ཅན། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །འགྲོ་བར་ཆས་ན་བཟང་པོའི་ཚིག་གིས་འཆིང༌། །བསྡད་པར་གྱུར་ན་ངན་པའི་གནོད་འཚེས་སྐྲོད། །ཟེར་སྤྱོད་འགལ་ལ་རང་བཞིན་མ་ངེས་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །བསྡད་པའི་ཚེ་ན་འགྲོ་བའི་བློ་སྣ་ འདོན། །ཕྱིན་པར་གྱུར་ན་བསྡད་པས་ལེགས་ཞེས་ཟེར། །ཅི་ཟེར་འདི་ཟེར་རང་བཞིན་ཆ་མེད་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། ། གཞན་དུ་འགྲོ་ན་དེ་ལ་ཤོལ་འདེབས་བྱེད། །སྡོད་རྩིས་བྱས་ན་བྱ་བྱེད་མང་ཞེས་ཟེར། །<span class="lcp-mark">»</span></span> <span class="lcp-note"><span class="lcp-mark">«</span>འཐད་འོས་བསྒྲུབས་ཀྱང་དེ་ལ་ཞད་རེ་འདོགས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཆོས་གཙོར་བཞག་ནས་བྱང་ལམ་སྒྲུབ་ན་ཡང༌། །འཇིག་རྟེན་མ་ཤེས་བྱ་བྱེད་ནོར་ཞེས་ཟེར། །ཅུང་ཟད་བསྟུན་ན་མཐུན་འཇུག་ཆེ་ཞེས་སྨྲ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཅུང་ཟད་བཟུང་ན་ཆགས་ཞེན་ཆེ་ཞེས་སྨྲ། །བཏང་བར་གྱུར་ན་མ་ཤེས་རྩིང་ཞེས་སྒྲོགས། །གང་ལྟར་བྱས་ཀྱང་ཡིན་པའི་སྐབས་མེད་པས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཕན་ཚུན་སྙོམས་པར་ལེགས་པར་བསྐྱང་བྱས་ཀྱང༌། །ལན་གཅིག་རྐྱེན་གྱིས་ཐམས་ཅད་ཆུ་རུ་འབོ། །བཟང་པོའི་དྲིན་ལན་ཐམས་ཅད་ཉེས་ཀྱིས་འཇལ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། ། མཉམ་གཉིས་ཞལ་ལྕེ་སྙོམས་པར་ཕྱེས་ན་ཡང༌། །<span class="lcp-mark">»</span></span> <span class="lcp-note"><span class="lcp-mark">«</span>གཞན་ཕྱོགས་ཕུལ་ནས་རྟག་ཏུ་འཁང་ར་རྡུང༌། །ཕམ་བློ་བླངས་ཀྱང་ཕན་དུས་མེད་པ་ཡི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་གི་ལེ་ལན་སྐྱོན་ལ་མི་རྟོག་པར། །གཞན་གྱི་ཚིག་ལ་ཀོ་ལོང་ཟུར་མགོ་སྡོམ། །ཁོང་ཁྲོ་ཚིག་རྩུབ་ལུགས་དང་མི་མཐུན་པ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །བྱས་ན་དགའ་བ་ཅུང་ཟད་མི་བྱེད་པར། །བཞག་ན་དགའ་ཡི་ངན་སྤྱོད་སྣ་ཚོགས་བྱེད། །<span class="lcp-mark">»</span></span> <span class="lcp-note"><span class="lcp-mark">«</span>རང་གིས་མ་ལན་གཏམ་ངན་ལུང་པ་འགེངས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་སྐྱོན་མི་རྟོག་གཞན་སྐྱོན་འབའ་ཞིག་གླེང༌། །གཅིག་སོང་རྗེས་ལ་དེ་ལ་འཕྱར་ཀ་གཏོང༌། །མི་སྙན་ཟེར་མཆུ་ངོ་དགའི་སྐྱེལ་བསུ་བྱེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །གང་དུ་གནས་ཀྱང་གཏམ་ངན་གཟེང་རྩའི་གཞི། །མང་པོའི་ནང་དུ་འཐབ་རྩོད་འཁྲུག་ལོང་སྐྱེད། །གཅིག་པུར་བསྡད་ཀྱང་ཁོང་གཏུམ་མི་འཆམ་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཡ་རབས་དམ་པའི་སྤྱོད་དང་མི་ལྡན་ཞིང༌། །མ་རབས་སྨྱོན་སྤྱོད་ཐོ་ཅོ་སྐྱུར་འགོང་ཅན། །གཞན་སེམས་དཀྲུགས་ལ་དུག་ལྔ་སུ་བས་རགས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་ལ་མི་བཟོད་གཞན་ལ་ཕོད་ཁམས་ཆེ། །འགྱུར་ལྡོག་མང་ཞིང་མི་བརྟན་ཁམས་འདུས་ཆེ། །འགྲོ་ན་མཆོང་ཞིང་ལབ་ན་ཀུ་ཅོ་<span class="lcp-mark">»</span></span> <span class="lcp-note"><span class="lcp-mark">«</span>ཆེ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཕར་ལ་བསླབ་ན་ཚུར་ལ་དེ་བས་ཐུ། །རང་དཔེ་མི་ལེན་གཞན་ལ་རྩོལ་ཕོད་ཆེ། །གླང་པོ་གཅིག་ཚུགས་བཞག་པས་མཆོག་ཅེས་ཟེར། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་བཞིན་བླུན་ལ་འདོད་སྣ་སུ་བས་ཆེ། །ཟེར་མཆུ་མང་ལ་ཀོ་ལོང་གཞན་བས་<span class="lcp-mark">»</span></span> <span class="lcp-note"><span class="lcp-mark">«</span>དམ། །བྱས་པ་མེད་པར་རེ་བ་གཞན་ལས་ཆེ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དུས་སྐབས་མི་ཤེས་བབ་ཅོལ་གཏམ་སྣ་མང༌། །ཚིག་ཚོགས་ཆེ་ལ་སྤྱི་བརྟོལ་མཚུངས་པ་མེད། །བརྗོད་པ་མི་གཟོ་ཡིད་དང་མི་མཐུན་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་བཞིན་གྱོང་ལ་འགྲོགས་པ་མི་བདེ་<span class="lcp-mark">»</span></span> <span class="lcp-note"><span class="lcp-mark">«</span>ཞིང༌། །མཆོག་ཏུ་མགུ་དཀའ་འཁང་པ་ཤིན་ཏུ་སྐྱེན། །སྤྱོད་ལམ་མི་གཟོབ་རང་ག་ཆིག་ཚུགས་པ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དད་མེད་ཀུན་ཏུ་འཁྲུག་ཅིང་འགྲོགས་མི་བདེ། །སྒོ་གསུམ་མ་གུས་རྟག་ཏུ་སུན་རྣམས་འབྱིན། །<span class="lcp-mark">»</span></span> <span class="lcp-note"><span class="lcp-mark">«</span>ངོར་འཐབ་ལྐོག་སྨྲ་དོན་མེད་འཕྱར་ཀ་གཏོང༌། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་འཁྲུག་གཞན་སྨོད་དུག་ལྔ་སུ་བས་རགས། །ཁོང་ཁྲོ་འཁོན་ངན་ཕྲག་དོག་གདུག་རྩུབ་ཅན། །ཕར་ཟེར་ཚུར་ཟེར་ཕྱི་ནང་གཟིང་རྩ་བྱེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །བསླབ་ན་ཚུར་འཐབ་མི་ཉན་གཅུ་གྱོང་ཆེ། །རྒྱུ་འབྲས་མི་འཛེམ་རྫུན་དང་དབྱེན་ལ་དགའ། །སྨྲ་མཆུ་མང་ཞིང་མི་སྙན་སྐྱེལ་བསུ་བྱེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །གཅིག་ལ་བཤད་ན་གཅིག་ཏུ་མི་དགའ་ཞིང༌། །གཅིག་ལ་བྱིན་ན་གཅིག་ལ་ཕྲོགས་པ་ཙམ། །སྤྱི་སྙོམས་བསྐྱངས་ཀྱང་ཕྱོགས་འཕུལ་འཕྱར་ཀ་གཏོང༌། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །སུ་དང་འགྲོགས་ཀྱང་དེ་དང་མི་འཆམ་ཞིང༌། །སྐྱོན་རྣམས་རྟོག་ཅིང་མི་སྙན་འབའ་ཞིག་བརྗོད། །ཐམས་ཅད་དགྲར་ལེན་མཐུན་པ་གཅིག་མེད་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །གོ་བར་གྱུར་ཀྱང་རྫུན་དང་གཡོ་སྒྱུ་བྱེད། །འགྲོགས་ཚད་བསླུ་ཞིང་མི་ཚེ་ངན་ལ་སྐྱེལ། །སྟོང་ཟོབ་ཕྱི་ཕྱིར་ཕོ་བཟོ་ཕུན་སུམ་ཚོགས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཟ་ན་རང་ལ་བྱེད་ན་གཞན་གྱི་ཕྱོགས། །སྐྱིད་ན་གྲོགས་པོ་སྟོང་གྱོད་ཁ་འཕྱོར་ཅན། །<span class="lcp-mark">»</span></span> <span class="lcp-note"><span class="lcp-mark">«</span>གེགས་ཤིག་བྱུང་ན་བཙལ་གྱིས་མི་རྙེད་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཆོས་དང་ཟང་ཟིང་ལེགས་པ་བྱུང་བའི་ཚེ། །འཁོར་ཚོགས་མ་ངེས་གྲལ་རིང་ཆེ་ན་ཡང༌། །དགོས་པའི་དུས་ན་ཉུང་ལ་མི་སྟོངས་པ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །བཤེས་མེད་གློ་བུར་ལྷགས་དང་ཕོངས་རྣམས་ལ། །<span class="lcp-mark">»</span></span> <span class="lcp-note"><span class="lcp-mark">«</span>ཅུང་ཟད་མཐོང་བས་ཕན་པ་སྒྲུབ་ན་ཡང༌། །ཕྲག་དོག་དབང་གིས་གསར་ངས་ཆེ་ཞེས་སྒྲོག །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རྟག་ཏུ་བཟང་སེམས་ཕན་པ་ཅི་བྱས་ཀྱང༌། །བསྐྱངས་ཀྱིས་མི་ལང་ལྷ་ཁང་རྙིང་པ་བཞིན། །ཉིན་འབར་མཚན་འབར་ལ་ལས་སྲོད་ཐུབ་གཏོང༌། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ལེགས་པའི་ཁ་ཏས་ཟོལ་མའི་ཕྱེ་གཏོར་འགམ། །ཕུགས་ཀྱི་ཤ་ཙས་འཕྲལ་གྱི་བློ་བྲིད་དགའ། །ཟབ་མོའི་ཆོས་ལས་ཡོ་བྱད་དྲིན་གཟོ་ཆེ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཁ་རོག་བསྡད་ན་ཞལ་ཏ་ཞུ་ཞེས་ཟེར། །<span class="lcp-mark">»</span></span> <span class="lcp-note"><span class="lcp-mark">«</span>ཕན་པར་བསླབ་ན་བཀའ་བཀྱོན་གནང་བར་གོ །ཤ་ཚ་གྲོས་འདེབས་མཆོག་ཏུ་སྡང་བས་མཐོང༌། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཕན་འདོགས་ཞུགས་ན་སྤྲོས་ལ་དགའ་ཞེས་ཟེར། །གཅིག་པུར་འདུག་ན་གདུལ་བྱ་སྐྱོང་དགོས་ ཟེར། །ཇི་ལྟར་བསམས་ཀྱང་དེ་ལ་ཞད་རེ་འདོགས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །བཤད་པའི་ཚེ་ན་སྒོམ་པ་ལེགས་ཞེས་ཟེར། །སྒོམ་པའི་ཚེ་ན་ཡང་ཡང་ཤོད་ཅེས་ཟེར། །ལེགས་པར་བཤད་ན་ཉན་ཡང་མི་ནུས་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །མདོ་རྒྱུད་བསྟན་བཅོས་ལུང་རིགས་མན་ངག་གཞུང༌། །ཆོས་དང་ཆོས་མིན་ཕྱེ་ནས་བཤད་པ་ན། །སྡང་བར་མཐོང་ནས་སླར་ལ་ལོག་པར་ལྟ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དབང་པོའི་ཚོད་ལ་གང་ཕན་ཆོས་བཤད་ཀྱང༌། །དེ་ཉིད་མི་སྒྲུབ་གཞན་ལ་ཡར་བལྟས་ནས། །ཟབ་ཟབ་མོ་ཞིག་ཉན་རྗེས་གོ་རྟོགས་མེད། ། དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཇི་ཙམ་བཤད་ཀྱང་གོ་བའི་དུས་མེད་ལ། །ལག་ཁྲིད་བསླབ་ཀྱང་ཅུང་ཟད་ཤེས་དུས་མེད། །གཅིག་ལ་ཨ་འཐས་དྲག་ཏུ་མི་འགྲོ་བ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་གིས་མ་ཐོས་གོང་དུ་བཤད་ན་དགའ། །<span class="lcp-mark">»</span></span> <span class="lcp-note"><span class="lcp-mark">«</span>ཐོས་རྗེས་གཞན་ལ་ཕྲག་དོག་གཞིར་བཞག་ནས། །ཡང་ཡང་བཤད་དྲགས་བསྒོམ་ན་ལེགས་ཞེས་ཟེར། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དོན་གཉེར་ཆོས་དེ་ཐོབ་པར་མ་གྱུར་ཚེ། །ཟོལ་མའི་དམ་བཅའ་ངོ་སྲུང་སུ་བས་<span class="lcp-mark">»</span></span> <span class="lcp-note"><span class="lcp-mark">«</span>མཁས། །འདོད་དོན་གྲུབ་ནས་གར་འགྲོ་ལ་དོར་པ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཟབ་མོའི་ཁྲིད་ལ་ཞུགས་པའི་མི་རྣམས་ཀྱང༌། །བསྡད་ལོང་མེད་པར་ཆོས་རྣམས་རྫོགས་སུ་རེ། །ཀུན་ཏུ་འཁྱམས་ཤིང་ཆོས་མཐུན་སྔ་བསགས་ཞུ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་ཉིད་དམ་ཆོས་གཞུང་བཞིན་མི་སྒྲུབ་པར། །ཟབ་མོའི་ཆོས་རྣམས་དུས་གཅིག་ཐོབ་ཏུ་རེ། །ཆོས་ལ་བརྩེགས་ཞེས་སླར་ལ་འཕྱར་ཀ་གཏོང༌། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཟབ་མོའི་ཆོས་ལ་གསང་བ་མི་ཐུབ་ཅིང༌། །ཐོས་པའི་མོད་ལ་གསང་བ་གཞན་ལ་སྒྲོགས། །བསླབ་ན་ཁོང་ཁྲོ་འཁོན་ངན་ཚིག་རྩུབ་འབྱིན། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཇི་ཙམ་ཐོས་བཞིན་རང་རྒྱུད་གྱོང་དུ་འགྲོ། །<span class="lcp-mark">»</span></span> <span class="lcp-note"><span class="lcp-mark">«</span>ཅུང་ཟད་ཤེས་ཏེ་གཉེན་པོར་མ་སོང་ཞིང༌། །གཞན་ལ་ཁྱད་གསོད་ཚིག་རྩུབ་དུག་མདའ་འཕེན། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །སྙིང་པོའི་དོན་ལ་ཅུང་ཟད་མི་སྒྲུབ་པར། །འཁོར་ལ་ཕར་བརྡལ་གཞན་ལ་བཤད་པར་རིངས། །<span class="lcp-mark">»</span></span> <span class="lcp-note"><span class="lcp-mark">«</span>ཆོས་བརྒྱད་དོན་གཉེར་ཚེ་འདིའི་མཛེས་ཆོས་ཙམ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཡིན་མིན་བཤད་ཀྱང་བདག་ལྟ་མཆོག་ཏུ་འཛིན། །ཇི་ཙམ་བཤད་ཀྱང་དོན་ལ་སྐྱེད་མེད་པའི། །དབང་པོ་གསལ་ཡང་རྨོངས་པ་གཅིག་ཚུགས་མཁན། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཆོས་ལ་འདུས་ཀྱང་ཆོས་མིན་འབའ་ཞིག་བྱེད། །ཕན་ཚུན་ཚོགས་ཀྱང་ལོང་གཏམ་འབའ་ཞིག་གླེང༌། །<span class="lcp-mark">»</span></span> <span class="lcp-note"><span class="lcp-mark">«</span>དབེན་པར་གནས་ཀྱང་རྣམ་གཡེང་འབའ་ཞིག་བྱེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །གཅིག་པུར་འདུག་ནས་སྒྲུབ་པར་ཁས་འཆེ་ཡང༌། །སོས་དལ་རེས་འགའ་གཉིད་དང་སྙོམ་ལས་ཅན། །རང་རྫུན་རང་ལ་གཏོང་བས་ཉིན་མཚན་འདའ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །སྒྲུབ་ལ་མི་བརྩོན་ཀུན་ཏུ་འཁྱམས་ལ་དགའ། །དར་རེ་གཞི་ལ་ཅུང་ཟད་བསྡད་ན་ཡང༌། །རང་གནས་མི་ཚུགས་གཞན་གྱི་གནས་རྣམས་ཉུལ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ནང་དུ་མཚམས་བཅད་ཐང་གི་གང་ལ་ཟ། །ཀུན་ཏུ་འཁྱམས་ཀྱང་སྒྲུབ་ཚུགས་མ་ཞིག་པ། །དམ་བཅའི་ཁྲལ་འཇལ་ས་མཐའི་མི་ངན་འདྲ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །བླ་མ་མཆོག་ལས་ཉེ་འབྲེལ་གཅེས་པར་འཛིན། །མཆེད་གྲོགས་མཆོག་ལས་སྡིག་པའི་གྲོགས་པོ་འདམས། །དམ་ཆོས་མཆོག་ལས་ནོར་རྫས་སྙིང་པོར་བྱེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཇི་ཙམ་བསྟན་ཀྱང་དོན་དུ་མི་གཉེར་བ། །ལེགས་པར་བཤད་ཀྱང་ཅུང་ཟད་མི་ཉན་པ། །སྙིང་པོའི་དོན་ལ་ནམ་ཡང་མི་སྒྲུབ་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དེ་དག་ལ་སོགས་འཁོར་གྱི་ཉེས་པ་ཀུན། །ཇི་ཙམ་བརྗོད་ཀྱང་ཟད་པའི་དུས་མེད་ལ། །མེ་ཡི་འོབས་བཞིན་བཟོད་པའི་བླག་མེད་པས། །གཅིག་པུར་དབེན་པར་སྒྲུབ་པའི་དུས་ལ་བབས། །ཇི་ལྟར་བསྐྱངས་ཀྱང་མགུ་བར་མི་ནུས་ལ། །གང་ལྟར་བསྟན་ཀྱང་ཕན་པའི་གོ་སྐབས་ཆུང༌། །འདི་ལྟར་བཟོད་ཀྱང་སྙིང་པོ་ཅི་འདུག་ཀྱེ། །དེ་ལྟར་བསམས་ནས་མྱུར་དུ་འགྲོ་བར་<span class="lcp-mark">»</span></span> <span class="lcp-note"><span class="lcp-mark">«</span>རིགས། །རང་ལའང་མི་ཕན་གཞན་ལའང་མི་ཕན་པའི། །འཇིག་རྟེན་གཟུགས་བརྙན་འདི་འདྲ་རྣམ་བཤིག་ནས། །གཅིག་པུར་ཞི་བ་དབེན་པའི་ནགས་ཁྲོད་<span class="lcp-mark">»</span></span> <span class="lcp-note"><span class="lcp-mark">«</span>དུ། །ཟབ་མོའི་དོན་གྱི་དེ་ཉིད་སྒྲུབ་པར་རིགས། །ད་རེས་ཚེ་འདིར་སྲིད་མཚོ་མ་བརྒལ་ན། །གཏན་དུ་འཁོར་བའི་གནས་ལས་ཐར་ཐབས་མེད། །དེ་བས་གཅིག་པུར་དབེན་པའི་ནགས་ཁྲོད་དུ། །ཚེ་གང་ཞི་བའི་ཏིང་འཛིན་སྒྲུབ་པར་རིགས། །<span class="lcp-mark">»</span></span> <span class="lcp-note"><span class="lcp-mark">«</span>དུས་ལ་མངོན་པར་སྐྱོ་བའི་རབས་ལས། འཁོར་བའི་གནས་ལ་སྐྱོ་བར་བསྟན་པ་སྟེ་རབས་དྲུག་པའོ།། །།དེ་ལྟར་སྣ་ཚོགས་མངོན་པར་སྐྱོ་བ་ཅན། །རང་གཞན་ལས་ངན་བསགས་པའི་འཁྲུལ་སྣང་སྟེ། །གང་དུ་བསམས་ཀྱང་སྙིང་པོ་འགའ་མེད་པས། །སེམས་ཤིག་ཡོད་ན་འདི་ལ་སྐྱོ་བར་རིགས། །སྔོན་དུས་བསྐལ་པ་བཟང་པོ་ནུབ་གྱུར་ཅིང༌། །ད་དུས་ངན་པའི་རང་བཞིན་འདི་ཤར་བས། ། ཕྱོགས་དུས་གང་ནའང་བདེ་བའི་གོ་སྐབས་མེད། །ཀུན་ཏུ་འཁྲུག་ཅིང་ནད་དང་མུ་གེས་ཉེན། །སྣ་ཚོགས་སྡུག་བསྔལ་མང་ལྡན་འདི་དག་ལས། །ཤེས་ལྡན་རྣམས་ཀྱིས་ཐར་པ་སྒྲུབ་པར་རིགས། །མདོར་ན་དིང་སང་ལྔ་བརྒྱ་ཐ་མ་འདིར། །དུས་ངན་འཁོར་དང་འཇིག་རྟེན་སྣང་བ་དང༌། །གདུལ་དཀའི་སེམས་ཅན་སྣ་ཚོགས་སྐྱོ་བ་ཅན། །ཡིད་ཆད་མཆི་མ་འཁྲུག་པའི་ཚུལ་ལ་སོམས། །ཕྱི་རུ་བསམས་ཀྱང་སྣང་བའི་ཡུལ་ལ་སྐྱོ། །<span class="lcp-mark">»</span></span> <span class="lcp-note"><span class="lcp-mark">«</span>ཡུལ་རྣམས་མི་རྟག་རྨི་ལམ་སྒྱུ་མའི་ཚུལ། །ནང་དུ་བསམས་ཀྱང་འཛིན་པའི་སེམས་ལ་སྐྱོ། །སེམས་འདི་མི་སྲུན་དགེ་གང་བརྩོན་པར་དཀའ། །བར་དུ་བསམས་ཀྱང་སྣ་ཚོགས་རྐྱེན་ལ་སྐྱོ། །ཚེ་སྲོག་མི་རྟག་རྩྭ་ཁའི་ཟིལ་པ་འདྲ། །གང་དུ་བསམས་ཀྱང་སྐྱོ་བའི་རང་བཞིན་ཏེ། །སྐྱེས་པ་ཤི་ཞིང་འདུས་པ་རྣམས་ཀྱང་འབྲལ། །བསགས་པ་འཛད་ཅིང་འབྱོར་པ་མཐའ་རྒུད་པས། །འཁོར་བའི་གནས་ལས་ད་རེས་འདའ་བར་མཛོད། །མི་ཐེག་ཁུར་དང་མི་ལྕོགས་བྱ་བ་དང༌། །དུས་ངན་དཔོན་དང་ཤུལ་ཁའི་མགྲོན་འགྱེད་དང༌། །དུས་ལ་མ་བབ་གཞན་དོན་བྱེད་པ་རྣམས། །བཟང་སེམས་ཡོད་ཀྱང་ཕན་པ་འགྲུབ་པར་དཀའ། །དེ་བས་གཅིག་པུར་ཞི་བའི་ནགས་ཁྲོད་དུ། །སྙིང་པོའི་དེ་ཉིད་སྒོམ་པའི་དུས་ལ་བབས། །ནགས་ནི་སྔཽན་གྱི་རྒྱལ་བ་རྣམས་ཀྱིས་བསྔགས། །མི་སྲུན་མེད་ཅིང་འཚེ་བ་ཀུན་དང་བྲལ། ། བྱ་དང་རི་དྭགས་འགྲོགས་ན་བདེ་བས་གང༌། །སྨན་ཤིང་མེ་ཏོག་ལྗོན་པའི་ཚོགས་མང་ཞིང༌། །ཕུག་དང་བྲག་རིའི་ཁང་བཟང་རྒྱ་ཆེར་ལྡན། །ཆུ་གཙང་དལ་འབབ་ངང་མོས་བརྟེན་པ་དེར། །གེ་སར་དཔུང་བསྐྱེད་འཛུམ་པའི་མདངས་གསལ་ཞིང༌། །དུས་རླུང་སེར་བུ་བདེ་བའི་ངད་དང་ལྡན། །ཙནྡན་བསིལ་བའི་ཁ་ཡི་དབུགས་བསྐྱོད་པའི། །དྲི་ཞིམ་སྤོས་བསུངས་ངད་པའི་རང་བཞིན་དང༌། །རྣམ་བཀྲ་ཡལ་གའི་ལག་རྩེད་དུད་པ་ཡིས། །གདུང་སྐྱོབ་བསིལ་གྲིབ་བྱེད་ལ་འགྲན་པ་བཞིན། །རྐང་དྲུག་ཚོགས་རྣམས་སྙན་པའི་གླུ་ལེན་ཅིང༌། །གདངས་སྙན་བྱ་ཚོགས་མང་པོ་གར་བྱེད་པ། །ལྷ་ཡུལ་དབང་པོའི་དགའ་ཚལ་སོན་པའི་གནས། །<span class="lcp-mark">»</span></span> <span class="lcp-note"><span class="lcp-mark">«</span>མཐོ་རིས་བུ་མོ་དགའ་བས་རྩེ་བ་བཞིན། །ཉོན་མོངས་གདུང་སེལ་ངང་གིས་ཆོས་འཕེལ་བ། །དུས་བཞིར་མི་རྟག་སྐྱོ་བའི་རང་བཞིན་དང༌། །ཏིང་འཛིན་ཞི་བ་ཡོན་ཏན་མཆོག་ཚོགས་ཅན། །དག་པའི་ཞིང་གི་ནགས་ཚལ་དམ་པ་བཞིན། །དེ་འདྲའི་གནས་ནི་ཐར་པའི་སྐྱེད་མོས་ཚལ། ། དབེན་ཞིང་ཉམས་དགའ་རིག་པ་འཛིན་པ་དེར། །བདག་བློ་ཞི་བའི་ཏིང་འཛིན་མཐར་ཕྱིན་ནས། །སྲོག་དང་བཅས་པའི་ལུས་འདི་གཡོ་བར་ཤོག །དུས་ལ་མངོན་པར་སྐྱོ་བའི་རབས་འདི་ནི། །རྣམ་གྲོལ་ཡོན་ཏན་མཆོག་གི་རྗེས་འགྲོ་བ། །ཐར་ལམ་བྱང་ཆུབ་སྙིང་པོར་ཞུགས་པ་དེས། །སྙིང་ནས་ནགས་སུ་འགྲོ་སླད་སྨྲས་པ་ཡིན། །དགེ་བ་དེ་ཡིས་བདག་དང་འགྲོ་བ་<span class="lcp-mark">»</span></span> <span class="lcp-mark">«</span>ཀུན། །ཉོན་མོངས་འཁོར་བའི་གྲོང་ལས་ཡིད་བྱུང་ནས། །ཞི་བ་རབ་བཟང་ཐར་པའི་སྐྱེད་ཚལ་དུ། །ཐམས་ཅད་ཕྱམ་གཅིག་སངས་རྒྱས་འགྲུབ་པར་ཤོག །ཚུལ་འདི་བློ་གྲོས་རྫིང་བུ་བཟང་པོའི་ནང༌། །དད་བརྒྱའི་པདྨོ་ངེས་འབྱུང་འདབ་སྟོང་ཅན། །ཏིང་འཛིན་སྦྲང་རྩིའི་སྙིང་པོ་འཛིན་པས་སྦྱར། །དད་ལྡན་རྐང་དྲུག་ཚོགས་རྣམས་དགའ་བར་མཛོད། །དུས་ལ་མངོན་པར་སྐྱོ་བའི་རབས་ཞེས་བྱ་བ། བདེ་བར་གཤེགས་པའི་གསུང་རབ་ལས་མང་དུ་ཐོས་པའི་ནོར་གྱིས་ཕྱུག་ཅིང༌། ཟབ་མོའི་དེ་ཁོ་ན་ཉིད་ཀྱི་དོན་ལ་ཡང་དག་འཇོག་གི་བསམ་གཏན་པ་ཀུན་མཁྱེན་ངག་གི་དབང་པོས། གངས་རི་ཐོད་དཀར་གྱི་མགུལ། འོད་ཟེར་སྤྲིན་གྱི་སྐྱེད་མོས་ཚལ་གྱི་ནང༌། ཀུན་ཏུ་བཟང་པོའི་ཁང་བཟང་དམ་པ། ཟླ་བ་ཆུ་ཤེལ་གྱིས་འཚེར་བའི་གནས་སུ་སྦྱར་བ་འདི་རེ་ཞིག་རྫོགས་སོ།། །།ཕྱོགས་དུས་ཀུན་ཏུ་བཀྲ་ཤིས་དང་བདེ་ལེགས་ཀྱི་ཆར་བསྐལ་པ་རྫོགས་ལྡན་གྱི་དུས་ཉེ་བར་གནས་པ་བཞིན་དུ་འབབ་པས་བསམ་རྒུའི་རེ་བ་མཐའ་དག་འགྲུབ་པར་གྱུར་ཅིག །མངྒ་ལཾ།
</div>
</div>
= Source =
= Source =
This page is a cleaned copy of the following rywikitexts page, which stay unchanged:
This page is a cleaned copy of the following rywikitexts page, which stay unchanged:
* [[Klong chen rab byams gsung 'bum/volume 024 532]] (revision 11002, 2020-03-22)
* [[Klong chen rab byams gsung 'bum/volume 024 532]] (revision 11002, 2020-03-22)
Cleaning (21 November 2026): removed 1 running heads, 3 Word page fields. The «» marks are kept: in this e-text they enclose the small-print notes of the print.
Cleaning (21 November 2026): removed 1 running heads, 3 Word page fields. The «» marks are kept in the text: they enclose the small-print notes of the print, which are shown in small print with the marks hidden.


Part of the [[Longchenpa Collected Works]] ([[Longchenpa Collected Works/About|about this project]]).
Part of the [[Longchenpa Collected Works]] ([[Longchenpa Collected Works/About|about this project]]).
<headertabs/>
<headertabs/>



Latest revision as of 21:16, 21 November 2026

རྐྱེན་ལ་ཁམས་འདུས་པ་ཀ་ཁ་སུམ་ཅུ་ཞེས་བྱ་བ klong chen rab 'byams kyi gsung 'bum (pe cin 2009)· Volume 24(YA) རང་ལ་གྲོས་སུ་གདམས་པ་རྡོ་རྗེའི་མགུར

Title དུས་ལ་མངོན་པར་སྐྱོ་བའི་རབས་བི་ཛ་ཧ་རཾ
Wylie dus la mngon par skyo ba'i rabs bi dza ha raM


Author Longchenpa ཀློང་ཆེན་རབ་འབྱམས་པ་དྲི་མེད་འོད་ཟེར།
Location klong chen rab 'byams kyi gsung 'bum (pe cin 2009), volume 24(YA), text 21, pages 342–364 (BDRC scan pages)
Section klong chen rab 'byams pa dri med 'od zer gyi gsung thor bu › zhal gdams dang dris lan skor


Tibetan text E-text from the typeset Pe cin edition (input 2020 on rywikitexts), cleaned 21 November 2026; not proofread against the print.
BDRC MW1KG4884, outline 6.04.1.04
Citation Klong chen rab 'byams pa. dus la mngon par skyo ba'i rabs bi dza ha raM. In Kun mkhyen klong chen rab 'byams kyi gsung 'bum, vol. 24, pp. 342–364. Pe cin: Krung go'i bod rig pa dpe skrun khang, 2009. BDRC MW1KG4884.
Notes Title from the BDRC outline; text boundaries and page numbers from the BDRC outline of MW1KG4884.
[edit]

༈ དུས་ལ་མངོན་པར་སྐྱོ་བའི་རབས་བི་ཛ་ཧ་རཾ། «ཨོཾ་སྭ་སྟི་སིདྡྷཾ། དུས་ལ་མངོན་པར་སྐྱོ་བའི་རབས་ཞེས་བྱ་བ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །གང་གིས་ཐོག་མར་བྱང་ཆུབ་ཐུགས་བསྐྱེད་ནས། །གྲངས་མེད་བསྐལ་པར་བརྩོན་པའི་གོ་བགོས་ཏེ།།མངོན་པར་བྱང་ཆུབ་མཛད་པ་བསམ་མི་ཁྱབ། །ཟས་གཙང་སྲས་སུ་གྱུར་ལ་གུས་ཕྱག་འཚལ། །གསུང་རབ་ཆུ་གཏེར་ཡོན་ཏན་གངས་ཆེན་མཚོ། །རྒྱལ་བ་རྒྱལ་སྲས་ཡིད་བཞིན་འབྱུང་བའི་གནས། །ཕན་བདེའི་དུས་རླབས་སྲིད་ཞིའི་དབྱིངས་ཁྱབ་པ། །དམ་ཆོས་རྒྱ་མཚོ་ཡུན་རིང་གནས་གྱུར་ཅིག །བསླབ་གསུམ་ཡོན་ཏན་རིན་ཆེན་ས་གཞི་ལ། །དགེ་ཚོགས་རྣམ་འཕེལ་འགྲོ་ཀུན་བསོད་ནམས་ཞིང༌། །རང་གཞན་དོན་གཉིས་འབྱོར་བའི་གཞིར་གྱུར་པ། །འཕགས་པའི་དགེ་འདུན་དད་བརྒྱའི་གཙུག་གིས་མཆོད། །ཞི་བ་ཆོས་བཟང་ཕན་བདེ་འབྱུང་བའི་གནས། །ཐུབ་པའི་བསྟན་པ་ནུབ་རིའི་རྩེར་ལྷུང་ཞིང༌། །བཤེས་གཉེན་དམ་པ་ཕལ་ཆེར་འདས་པའི་དུས། །ལྔ་བརྒྱ་ཐ་མར་གྱུར་ལ་སྐྱོ་བས་ཉོན། །འཛམ་བུ་གླིང་ལས་ཁྱད་པར་གངས་རིའི་ཡུལ། །དེང་སང་དུས་ངན་མི་རྣམས་མི་སྲུན་ཞིང༌། །» «བཅོས་མའི་ཆ་ལུགས་དག་ཀྱང་གྲངས་མང་ལ། །ཡང་དག་ཚུལ་བཞིན་སྤྱོད་པའི་སྐྱེ་བོ་ཉུང༌། །ཡུལ་རྣམས་ཕལ་ཆེར་ཁྲིམས་ཀྱིས་མི་འཚོ་ལ། །མི་རིགས་རང་གར་སྤྱོད་ཅིང་བདེན་རྫུན་འཆོལ། །ཡོན་ཏན་སྐྱོན་དུ་མཐོང་བ་འུག་པའི་མིག །གངས་རིའི་ཁྲོད་ལས་གཞན་པ་སུ་ཞིག་ཀྱེ། །ཕྱོགས་འདིར་གནའ་དུས་བཟང་པོ་ནུབ་གྱུར་ཅིང༌། །ད་དུས་ངན་པའི་སྙིགས་མ་ལྔ་བདོ་བས། །ཡུལ་ལུགས་འགྱུར་ཞིང་ཆ་ལུགས་སྣ་ཚོགས་བྱེད། །བསམ་སྤྱོད་མི་དགེ་སྡིག་སྤྱོད་འབའ་ཞིག་འཕེལ། །དེ་དག་དབང་གིས་ཕྱི་རོལ་དུས་ཚིགས་དང༌། །ནང་གི་བདེ་སྡུག་འགྱུར་བས་སྡུག་བསྔལ་ཞིང༌། །སྔོན་དུས་བཟང་པོའི་རྗེས་སུ་མཐུན་མ་གྱུར། །ད་ནི་རང་བཞིན་སྐྱོ་བའི་ཚུལ་ལ་ཉོན། །སྔོན་དུས་ཡུལ་རྣམས་དར་ཞིང་རྒྱས་ན་ཡང༌། །ད་དུས་གྲོང་རྣམས་ཕལ་ཆེར་འབྲོག་སྟོང་འདྲ། །སྐྱེ་བོ་ཉུང་ཞིང་ཟས་གོས་འབྱོར་པ་ཆུང༌། །» «དབུལ་འཕོངས་འཚེ་བ་མང་པོས་སེམས་འདི་སྐྱོ། །སྔོན་དུས་བཟང་ལ་ཆར་ཆུ་སྙོམས་ན་ཡང༌། །ད་དུས་ངན་པས་དཔྱིད་འཁྱགས་དབྱར་སྐམ་ལ། །སྟོན་འཁྲུག་དགུན་འཇུངས་སད་སེར་མུ་གེས་ཉེན། །མི་རྣམས་སེར་སྣ་འཕེལ་བས་སེམས་འདི་སྐྱོ། །སྔོན་དུས་ཡུལ་རྣམས་ཁྲིམས་ཀྱིས་སྐྱོང་ན་ཡང༌། །ད་དུས་ཁྲིམས་མེད་ངན་པ་རྒྱལ་བའི་དུས། །མི་བདེན་ཁ་འཛིན་བདེན་ལ་ཆད་པ་གཅོད། །དོན་མེད་ཁྲལ་ཆུས་མནར་ལ་སེམས་འདི་སྐྱོ། །སྔོན་དུས་ཡུལ་རྣམས་འཇམ་ཞིང་བདེ་ན་ཡང༌། །ད་དུས་རྩུབ་བས་ལམ་འཕྲང་ཆོམ་པོ་མང༌། །འགྲིམ་འགྲུལ་མི་བདེ་མང་བས་ཉུང་བ་འཇོམས། །ཕན་ཚུན་མི་མཐུན་རྩོད་པས་སེམས་འདི་སྐྱོ། །སྔོན་དུས་ཕྱོགས་རྣམས་འཇམ་བདེར་གནས་ན་ཡང༌། །ད་དུས་དམག་དང་འཁྲུག་ལོང་སྣ་ཚོགས་རྒྱས། །ཀུན་གྱི་སྙིང་དུ་འབྱུང་པོའི་གདོན་ཞུགས་པས། །བདེ་བའི་གོ་སྐབས་མེད་པས་སེམས་འདི་སྐྱོ། །སྔོན་དུས་གཞུང་བཟང་ངོ་ཚ་ཆེ་ན་ཡང༌། །ད་དུས་ཁྲེལ་ཆུང་ཀུན་སྤྱོད་བསྐལ་པ་ངན། །ཕན་ཚུན་རིགས་འཆོལ་གཉེན་ལ་གདུང་སེམས་ཆུང༌། །གཞུང་ངན་ཕྱི་ཐག་ཐུང་བས་སེམས་འདི་སྐྱོ། །སྔོན་དུས་མཐུན་ལ་ནང་རིགས་གཤིམ་ན་ཡང༌།» «།ད་དུས་མི་མཐུན་དབྱེན་བཅུག་གཏམ་སྣ་མང༌།» «།» «གཅིག་གིས་གཅིག་བསླུ་ཕན་ཚུན་ཉེས་ན་དགའ། །ཕྲག་དོག་ཟུག་རྔུ་ཆེ་བས་སེམས་འདི་སྐྱོ། །སྔོན་དུས་ཁོང་ཡངས་ལྷོད་ཆ་ཆེ་ན་ཡང༌། །ད་དུས་གྲིམ་པས་ཅུང་ཟད་ཙམ་གྱི་ཕྱིར། །ཕ་དང་བུར་འཐབ་དཔོན་སློབ་མཛའ་བཤེས་འབྲལ། །རང་བཞིན་ཀུན་སྤྱོད་ངན་པས་སེམས་འདི་སྐྱོ། །སྔོན་དུས་ངོ་ཚ་ཁྲེལ་འཛེམ་ཆེ་ན་» «ཡང༌། །ད་དུས་ཟས་ནོར་ཅུང་ཟད་ཙམ་གྱི་ཕྱིར། །སྡིག་དང་གཏམ་ངན་ཁྱད་དུ་བསད་ནས་སྒྲུབ།།བཟང་པོའི་སྤྱོད་དང་བྲལ་བས་སེམས་འདི་སྐྱོ། །སྔོན་དུས་རང་བཞིན་ཆད་ལ་བཙན་ན་ཡང༌། །ད་དུས་མི་རྣམས་ཁས་བླངས་དོན་སྟབས་» «གཅོག །རྫུན་དང་སྤྲུལ་པ་ངན་གཡོ་སྣ་ཚོགས་བྱེད། །བློ་གཏད་མེད་པ་མཐོང་ནས་སེམས་འདི་སྐྱོ།།སྔོན་དུས་གཤིས་བཟང་རང་བཞིན་བརྟན་ན་ཡང༌། །ད་དུས་རྒྱུད་འཚུབས་ཁོང་ཁྲོ་འཁོན་ངན་འབེབས། །རང་ཚུགས་མི་ཐུབ་ཟུངས་མེད་ཁ་གསག་ཅན།» «།མཐོ་འགྲོགས་གསར་ངས་ཆེ་བས་སེམས་འདི་སྐྱོ། །སྔོན་དུས་སྤྱི་ཚིས་བཟང་སེམས་ཆེ་ན་ཡང༌། །ད་དུས་ཕྱོགས་ཆར་རང་འདོད་གཙོ་བོར་» «སྒྲུབ། །ཁ་ཡངས་གཏིང་དོག་ངན་ལ་མི་ཚེ་བསྐྱལ། །བཟང་སེམས་མེད་པ་མཐོང་ནས་སེམས་འདི་སྐྱོ། །སྔོན་དུས་དོན་རྣམས་རིགས་པས་སྒྲུབ་ན་ཡང༌། །ད་དུས་འཕྲལ་ཕུགས་རྒྱུ་མཚན་མི་གཞིག་པར། །གང་དྲན་བྱེད་སྐྱེན་ཕྱིས་ནས་འགྱོད་པ་ཅན། །ལམ་དུ་མི་འགྲོ་སྒྲུབ་པས་སེམས་འདི་སྐྱོ། །སྔོན་དུས་བྱ་བ་གང་ལའང་གྲོས་སུ་བསྡུར། །ད་དུས་ཚོད་མེད་རང་བཟོ་རང་གར་བྱེད། །འཕྲལ་ཕུགས་མི་བརྟན་ཆབ་སྲིད་ཉམས་པའི་རྒྱུ། །རང་གཞན་གནོད་པ་མཐོང་ནས་སེམས་འདི་» «སྐྱོ། །སྔོན་དུས་གང་ལའང་ཕན་གནོད་གཞིག་ན་ཡང༌། །ད་དུས་མི་རྣམས་སྤྱང་ཀིས་ལུག་མཐོང་ལྟར། །གཞན་ལ་གནོད་ཀྱང་རང་དོན་འབའ་ཞིག་སྒྲུབ། །བཟང་པོའི་ཚུལ་དང་འགལ་བས་སེམས་འདི་སྐྱོ། །སྔོན་དུས་ཤ་ཚ་གྲོས་འདེབས་ཉན་ན་ཡང༌། །ད་དུས་བདེན་པའི་གཏམ་ལ་ཉན་མཁན་མེད། །ངོར་བསྟོད་དབྱེན་བཅུག་རྣ་བའི་བདུད་རྩི་བཞིན། །དམ་པའི་ལམ་དང་འགལ་བས་སེམས་འདི་སྐྱོ། །སྔོན་དུས་ཕ་མ་རྒན་རབས་བཀུར་ན་ཡང༌། །ད་དུས་རྒན་རབས་བཀུར་སྟི་སྲི་ཞུ་» «མེད། །གྲལ་ཡང་མཐར་འཇོག་ཟས་གོས་ལྷག་རོལ་སྟེར། །ངོ་ཚའི་གནས་སུ་བྱེད་པས་སེམས་འདི་སྐྱོ། །སྔོན་དུས་བཟང་དྲིན་བྱས་པ་གཟོ་ན་ཡང༌། །ད་དུས་མི་རྣམས་བཟང་ལན་ངན་གྱིས་འཇལ། །ཕན་ཆེར་བཏགས་ནས་གནོད་པ་ཆེར་སྐྱེལ་པ། །འགྲོགས་སུ་མི་རུང་མཐོང་ནས་སེམས་འདི་སྐྱོ། །སྔོན་དུས་གང་ལའང་རང་བཞིན་བརྟགས་ན་ཡང༌། །ད་དུས་མི་རྣམས་འབར་རྒྱུག་ཕྱོགས་གཏམ་ཅན། །» «བཟང་ངན་མི་དཔྱོད་གྲགས་པའི་རྗེས་སུ་འབྲང༌། །སྒྲོ་སྐུར་སྨྲ་བསྟོད་མང་བས་སེམས་འདི་སྐྱོ། །དེ་དག་ལ་སོགས་ཉེས་པ་ཚད་མེད་པ། །དུས་ངན་སྐྱེ་བོ་རྣམས་ཀྱི་རང་བཞིན་ཏེ། །ཆ་ཙམ་བརྗོད་པས་ཕྱོགས་ཙམ་མཐོང་བར་ཟད། །རྒྱས་པར་བསྐལ་བའི་བར་དུ་བརྗོད་མི་ལང༌། །དེ་དག་མཐོང་ནས་དད་ལྡན་སྐྱེ་བོ་རྣམས། །» «དབེན་པའི་གནས་སུ་དམ་ཆོས་སྒྲུབ་པར་རིགས། །དུས་ལ་མངོན་པར་སྐྱོ་བའི་རབས་ལས། ཐ་མལ་བའི་གནས་ལ་སྐྱོ་བར་བསྟན་པ་སྟེ་རབས་དང་པོའོ།། །།དེ་ལྟར་འཇིག་རྟེན་བསམ་སྤྱོད་སྐྱེ་བོ་ཀུན། །རང་བཞིན་བླུན་པས་བདེན་དུ་ཆུག་ན་ཡང༌། །ཐར་པར་ཞུགས་པ་ཆོས་དོན་གཉེར་བ་རྣམས། ། བསྟན་པ་སྙིགས་མའི་སྐྱོ་བ་བཤད་ཀྱིས་ཉོན། །ལྷར་བཅས་འགྲོ་བའི་ཕན་བདེ་འབྱུང་བའི་གནས། །བསྟན་པ་འཇིག་རྟེན་མིག་འདི་ཟུམ་དུ་ཉེ། །བཤེས་གཉེན་ཐར་པའི་ལམ་མཁན་ཕལ་ཆེར་འདས། །བྱང་ཆུབ་ལྗོན་ཤིང་རྙིང་བས་སེམས་འདི་སྐྱོ། །» «སྔོན་གྱི་རྒྱལ་བས་བྱང་ཆུབ་བརྙེས་པའི་གནས། །རྡོ་རྗེ་གདན་སོགས་འཕགས་པའི་ཡུལ་རྣམས་སྟོང༌། །སྡིག་སྤྱོད་སོག་པོ་རྣམས་ཀྱིས་མཐའ་བསྐོར་ཞིང༌། །ཉམ་ངའི་གནས་སུ་གྱུར་ལ་སེམས་འདི་སྐྱོ། །ཕྱོགས་རྣམས་གང་ནའང་དགེ་བའི་བཤེས་ཉུང་ཞིང༌། །ཆོས་བཞིན་སྤྱོད་པའི་སྐྱེ་བོ་རབ་དཀོན་ལ། །སྡེ་དགོན་རྣམས་ཀྱང་ཁྱིམ་པའི་གྲོང་འདབ་བཞིན། །ཆོས་མིན་བྱ་བྱེད་མང་བས་སེམས་འདི་» «སྐྱོ། །རང་ཉིད་མཁན་སློབ་གནས་སུ་ཁས་འཆེ་ཡང༌། །ཆོས་ཀྱི་ཉམས་ལེན་ཤེས་བྱེད་གཉིས་དང་བྲལ། །ཁྱིམ་ཆུང་སྤངས་པའི་ཁྱིམ་ཆེན་འདུ་འཛི་ཅན། །འཁྲུལ་སྣང་བདེན་པར་འཛིན་ལ་སེམས་འདི་སྐྱོ། །རང་ཉིད་མཆོག་ཏུ་བཙུན་པར་ཁས་འཆེ་ཡང༌། །ཕྲ་མོ་བསྲུང་ལ་ཆེན་པོ་ཁྱད་དུ་གསོད། །ཡོ་བྱད་སོགས་བྲུན་ཚེ་འདི་འབའ་ཞིག་པ། །ཐར་ལམ་ངེས་འབྱུང་བྲལ་ལ་སེམས་འདི་སྐྱོ། །རང་ཉིད་བཟང་པོའི་གནས་སུ་ཁས་འཆེ་ཡང༌། །ཕྱི་ནང་འཛོལ་ལ་ཆོས་བརྒྱད་གཙོ་བོར་འཛིན། །» «གཞན་ལ་སྡང་ཞིང་རང་རྒྱུད་མ་དུལ་བས། །ཀོ་ལོང་ཟུར་མགོ་རགས་ལ་སེམས་འདི་སྐྱོ། །རང་ཉིད་རབ་ཏུ་བྱུང་བར་ཁས་འཆེ་ཡང༌། །ཐོས་བསམ་མི་གཉེར་ཡོ་བྱད་གང་བཟང་འགྲན། །བླང་དོར་མི་ཤེས་བསླབ་གསུམ་ནོར་གྱིས་དབེན། །ཉོན་མོངས་དུག་ལྔ་འཁྲུགས་པས་སེམས་འདི་སྐྱོ། །རང་ཉིད་ཆོས་ལ་ཞུགས་པར་ཁས་འཆེ་ཡང༌། །དགེ་སྡིག་མི་འཛེམ་འཁྲུལ་པའི་བྱ་བས་གཡེངས། །དད་མེད་ཤེས་རབ་ཆུང་ལ་དྲན་པ་གསལ། །ཆོས་མེད་སྟོང་པར་འགྲོ་བས་སེམས་འདི་སྐྱོ། །རང་ཉིད་བསྟན་ལ་ཞུགས་པར་ཁས་འཆེ་ཡང༌། །ཁྲིམས་མེད་རྟགས་ཙམ་འཛིན་ལ་འདོད་ཡོན་གཉེར། །རབ་ཏུ་བྱུང་ཡང་ཆོས་ཀྱིས་མ་གོས་པའི། །རྫིང་བུའི་ངང་མོ་འདྲ་ལ་སེམས་འདི་སྐྱོ། །རང་ཉིད་བསོད་ནམས་གསོག་པར་ཁས་འཆེ་ཡང༌། །» «ཕྱོགས་ཆའི་སྦྱིན་པ་ལོ་འདོད་རློམ་སེམས་ཅན། །སྡིག་དང་འདྲེས་པ་ཁ་ལན་རེ་བཅས་གཞི། །ངས་བྱས་ཡུས་ཀྱིས་བརྣངས་ལ་སེམས་འདི་སྐྱོ། །རང་ཉིད་འབྱོར་ལྡན་ཕྱུག་པོར་ཁས་འཆེ་ཡང༌། །སེར་སྣས་བཅིངས་ཏེ་གཏོང་སེམས་རྡུལ་ཙམ་ མེད། །རང་ཡང་མི་སྤྱོད་གཞན་ལའང་མི་སྦྱིན་པ། །འཆི་དུས་སྡིག་སྤྱོད་ཅན་གྱུར་སེམས་འདི་སྐྱོ། །རང་ཉིད་སྡེ་དགོན་ཆོས་ལྡན་ཁས་འཆེ་ཡང༌། །ཆོས་མིན་བྱ་བྱེད་ཁྱིམ་པའི་གྲོང་རྡལ་བཞིན། །རྣམ་གཡེང་འདུ་འཛི་སྡུག་བསྔལ་རྒྱུན་མི་འཆད། །» «ཆགས་སྡང་འཐབ་རྩོད་མང་བས་སེམས་འདི་སྐྱོ། །དེ་དག་ལ་སོགས་ཉེས་པའི་ཚོགས་མང་པོ། །བསྐལ་པར་བརྗོད་ཀྱང་ཀུན་ཏུ་ཟད་མི་ཤེས། །འདི་འདྲའི་ཚུལ་ལ་མངོན་པར་སྐྱོ་བ་ཡིས། །དབེན་པའི་གནས་སུ་དམ་ཆོས་སྒྲུབ་པར་རིགས། །» «དུས་ལ་མངོན་པར་སྐྱོ་བའི་རབས་ལས། ཕལ་པའི་གནས་ལ་མངོན་པར་སྐྱོ་བར་བསྟན་པ་སྟེ་རབས་གཉིས་པའོ།། །།དེ་ལྟར་ཕལ་རྣམས་ཉེས་པའི་སྐྱོན་མང་པོ། །ཐོས་བསམ་ཚུལ་ལ་བློ་མིག་མ་སྦྱངས་པས། །མི་ཤེས་སྐྱོན་གྱུར་གང་དེ་བདེན་མོད་ཀྱི། །ཤེས་བཞིན་ཁྱད་དུ་གསོད་ལ་སྐྱོ་བས་ཉོན། །རང་ཉིད་བླང་དོར་ཤེས་པར་རློམ་ན་ཡང༌། །རྒྱུ་འབྲས་མི་འཛེམ་འདོད་ཡོན་རང་དགར་སྤྱོད། །ཐབས་ཀྱིས་གཞན་བསླུ་དུག་ལྔ་སུ་བས་རགས། །ཉོན་མོངས་འདོད་སྲེད་ཆེ་བས་སེམས་འདི་སྐྱོ། །རང་ཉིད་གཞན་ལ་འཆད་པར་ཁས་འཆེ་ཡང༌། །རང་རྒྱུད་མ་དུལ་གཞན་རྒྱུད་ཐབས་ཀྱིས་བསྲེག» «།» «གཟུ་བོར་མི་གནས་གཞན་ལ་འཕྱར་ཀ་གཏོང༌། །ཆོས་དང་རང་རྒྱུད་འཛོལ་བས་སེམས་འདི་སྐྱོ།» «།རང་ཉིད་དམ་ཆོས་མཁས་པར་ཁས་འཆེ་ཡང༌།» «།» «བྱམས་དང་སྙིང་རྗེས་རང་རྒྱུད་མ་བརླན་ཞིང༌། །གཞན་ལ་ཕྲག་དོག་འཐབ་རྩོད་འཁྲུག་ལོང་སྐྱེ། །ཀུན་གྱི་གཟིང་རྩར་གྱུར་ལ་སེམས་འདི་སྐྱོ། །རང་ཉིད་སྡེ་སྣོད་འཛིན་པར་རློམ་ན་ཡང༌། །རང་གཞན་གྲུབ་མཐའི་གཞུང་ལུགས་མི་ཤེས་ཤིང༌།།མང་དུ་མ་ཐོས་ཕྱོགས་རེའི་བློ་མིག་ཅན། །རློམ་པས་ཁེངས་པ་མཐོང་ནས་སེམས་འདི་སྐྱོ། །རང་ཉིད་དམ་ཆོས་ཤེས་པར་རློམ་ན་ཡང༌། །ཚིག་ཙམ་ཤེས་པས་ང་རྒྱལ་རི་བོ་བཞིན། །རང་རྒྱུད་ཆོས་དང་ལུང་པ་སོ་སོ་བ། །ནེ་ཙོའི་འདོན་པ་འདྲ་བས་སེམས་འདི་སྐྱོ། །རང་ཉིད་བཤེས་གཉེན་དམ་པར་རློམ་ན་ཡང༌། །ཀུན་ལ་ཁྱད་གསོད་ཉེ་བར་མ་ཞི་བ། །དོན་ལ་རྨོངས་པའི་མཁས་པ་ཡ་མཚན་ཅན། །ཆོས་མེད་དྲེད་པོར་གྱུར་ལ་སེམས་འདི་སྐྱོ། །དིང་སང་བསྟན་པ་ལུང་གིས་འཛིན་ན་ཡང༌། །སྔོན་གྱི་གཞུང་ལུགས་བཟང་པོ་ཕལ་ཆེར་ནུབ། །རང་བཟོའི་གྲུབ་མཐའ་ངན་པ་གཙོར་བྱས་ནས། །འཆད་རྩོད་རྩོམ་པའི་ཚུལ་ལ་སེམས་འདི་སྐྱོ། །རང་ཉིད་དམ་ཆོས་འཆད་པར་རློམ་ན་ཡང༌། །དང་པོར་བླ་མ་གུས་པས་མ་བསྟེན་» «ཞིང༌། །བར་དུ་ཚིག་དོན་བརྩོན་པས་མ་སྦྱངས་ལ། །ཐ་མར་འཆད་དུས་མུན་ཁུང་འཛུབ་བཙུགས་བཞིན། །རང་བཞིན་མ་གོ་འཆད་ལ་སེམས་འདི་སྐྱོ། །རང་ཉིད་གཞུང་ལུགས་རྩོད་པར་རློམ་ན་ཡང༌། །རང་གཞན་གྲུབ་མཐའི་སྐྱོན་གེགས་མི་ཤེས་པར། །ལོག་རྟོག་ཉིང་འཁྲུལ་ལེགས་པའི་གཞུང་ལུགས་ནུབ། །རྟོག་གེ་རྣམ་པར་འཁྱམས་ལ་སེམས་འདི་སྐྱོ། །རང་ཉིད་བསྟན་བཅོས་རྩོམ་པར་རློམ་ན་» «ཡང༌། །རྩོམ་གཞིའི་གནས་ལས་འདྲ་མིན་གོང་འོག་རྣམས། །ནོར་བས་གཞུང་ལུགས་སྔ་མ་ནུབ་པ་ལས། ཁུངས་མེད་གྲགས་པ་འདོད་ལ་སེམས་འདི་སྐྱོ། །» «རང་ཉིད་ཀུན་ལ་མཁས་པར་གྲགས་ན་ཡང༌། །རིམ་གསུམ་འཁོར་ལོའི་དགོངས་དོན་ལེན་མི་ཤེས། །ཚིག་ཚོགས་ཆེ་ཡང་སྒྲུང་དང་ལྡེའུ་བཞིན། །གསུང་རབ་གནས་ལ་རྨོངས་པས་སེམས་འདི་སྐྱོ། །ཚེ་གང་ཐོས་བསམ་དོན་ལ་སྦྱངས་ན་» «ཡང༌། །དོན་དམ་ངེས་པའི་དབྱིངས་ལ་བློ་མ་ཕྱོགས། །སྟོང་ཆད་ནམ་མཁའ་འདྲ་བའི་ངེས་དོན་སྟོན། །ཟབ་མོའི་གནས་ལ་རྨོངས་པས་སེམས་འདི་སྐྱོ། །དེ་དག་ལ་སོགས་ཉེས་པའི་ཚོགས་མང་པོ། །མཐའ་ཡས་རྒྱ་ཆེན་ནམ་མཁའི་དབྱིངས་རུམ་བཞིན། །འདི་དག་བསམས་ནས་ཞི་བའི་ནགས་ཁྲོད་དུ། །སྙིང་པོའི་དོན་གྱི་དེ་ཉིད་སྒོམ་པར་རིགས། །དུས་ལ་མངོན་པར་སྐྱོ་བའི་རབས་ལས། ཐ་སྙད་སྤྱོད་པའི་གནས་ལ་སྐྱོ་བར་བསྟན་པ་སྟེ་རབས་གསུམ་པའོ།། །།དེ་ལྟར་ཐ་སྙད་སྤྱོད་པའི་སྐྱེ་བོ་ཀུན། །ཤེས་བྱ་ཚིག་ཕྱིར་ཤོར་བའི་སྐྱོན་བདེན་གྱི། །ཚུལ་བཞིན་སྙིང་པོའི་དོན་ལ་ཞུགས་རྣམས་ཀྱི། །རང་བཞིན་སྐྱོ་བ་གང་དེ་བཤད་ཀྱིས་ཉོན། །ཀུན་ལས་འཕགས་པའི་བཀའ་སྲོལ་མཆོག་ཡིན་» «ཞེས། །གཙང་སྒྲ་བདག་འཛིན་མངོན་པའི་ང་རྒྱལ་ཅན། །མ་ནོར་ལམ་དུ་ཞུགས་པར་འདོད་རྣམས་ཀྱང༌། །བདག་ལྟ་མཆོག་ཏུ་འཛིན་པས་སེམས་འདི་སྐྱོ། །རང་ཉིད་སྙིང་པོའི་དམ་ཆོས་ཁས་ལེན་ཅིང༌། །སྔགས་སོགས་གཞན་ལ་སྨོད་པས་ཆོས་སྤོང་བ། །བློ་ཆུང་ལོག་པར་ལྟ་བ་བྲམ་ཟེའི་རིགས། །འདུ་ཤེས་ཕྱིན་ཅི་ལོག་ལ་སེམས་འདི་སྐྱོ། །ལུས་ངག་སྤྱོད་པ་གཙང་བར་འདོད་ན་ཡང༌། །སེམས་གཙང་མི་ཤེས་ཐོས་བསམ་ནོར་དང་བྲལ། །ཚུལ་འཆོས་སྤྱོད་པས་ཉིན་མཚན་འདའ་བྱེད་པ། །ཡོན་ཏན་འབྱོར་པ་སྤངས་པས་སེམས་འདི་སྐྱོ། །མི་རྟོག་ཡེ་ཤེས་དངོས་སུ་བལྟར་ཡོད་ཀྱང༌། །ད་རེས་དུས་མིན་སྨོན་ལམ་ཕྱི་དུས་འདེབས། །བྱ་བྱེད་སྤྲོས་པས་གནས་ལུགས་རྟོགས་སུ་རེ། །དངོས་པོ་མཚན་མར་ཞེན་པས་སེམས་འདི་» «སྐྱོ། །རང་བཞིན་དག་པའི་ཆོས་ལ་བདག་མེད་ཀྱང༌། །ཕྱོགས་རིས་བདག་ཏུ་ཞེན་པས་གཞན་ལ་སྡང༌། །སྤྱོད་པར་བལྟ་བ་ཁྱད་དུ་གསོད་པ་ཅན། །ཐར་ལམ་བྱང་ཆུབ་རིང་ལ་སེམས་འདི་སྐྱོ། །མི་རྟག་ཚིག་ཏུ་འཆད་ཀྱང་རྟག་པར་འཛིན། །ཚད་མེད་སྙིང་རྗེ་བརྗོད་ཀྱང་རྒྱུད་མ་དུལ། །ཐམས་ཅད་བདེན་མེད་ཟེར་ཡང་དངོས་པོར་ཞེན། །འདོད་ཡོན་འདུ་འཛི་གཉེར་ལ་སེམས་འདི་སྐྱོ། །གསང་མཆོག་རྡོ་རྗེ་འཛིན་པར་འདོད་ན་ཡང༌། །བསྙེན་སྒྲུབ་མི་བརྩོན་བསྐྱེད་རྫོགས་ཐུན་ལ་» «གཡེལ། །གསང་སྒོ་འཆོལ་བས་དམ་ཚིག་ཞིག་རལ་ཅན། །ཀུན་སྤྱོད་མཆོག་ཏུ་རྩིང་བས་སེམས་འདི་སྐྱོ། །དབང་རྣམས་མ་རྫོགས་རྒྱུད་དོན་མི་ཤེས་ལ། །བཟླས་བརྗོད་མ་ཚང་བསྙེན་སྒྲུབ་མ་ཐེམས་བཞིན། །དབང་བསྐུར་རབ་གནས་གྲོང་ཆོག་རྙེད་ཚོལ་ཅན། །གསང་སྔགས་ཁྲོམ་དུ་སྒྲོགས་པས་སེམས་འདི་སྐྱོ། །བགེགས་ཕྲན་འབྱུང་པོ་བསྒྲུབས་པས་སྐྱེ་བོ་སྡུད། །དྲག་སྔགས་སྙིང་རྗེ་མེད་པར་ཞེ་སྡང་འཕེལ། །ཤེས་བྱའི་གནས་ལ་རྨོངས་པས་ཐར་ལམ་རིང༌། །བྱང་ཆུབ་ལམ་བཟང་སྟོར་བས་སེམས་འདི་སྐྱོ། །བསམ་གཏན་སྒོམ་པར་འདོད་པའི་ཚོགས་རྣམས་ཀྱང༌། །ལུང་རིགས་མི་ཤེས་ཐོས་བསམ་སྐྱོན་དུ་བལྟ། །ཆོས་བརྒྱད་མ་བྲལ་རང་ཕྱོགས་བདག་ལྟས་ཁེངས། །ནོར་བའི་ལམ་ལ་བརྩོན་པས་སེམས་འདི་སྐྱོ། །མདོ་རྒྱུད་མ་འབྲེལ་ཆོས་ལུགས་ཡ་མཚན་ཅན། །འཁྲུལ་སྣང་འོད་གསལ་འཁྲུལ་རྟོག་ཆོས་ཉིད་ཅེས། །ལོག་རྟོག་གྲུབ་མཐས་རྨོངས་པ་ངོ་མཚར་བསྐྱེད། །འདྲེན་པའི་གཟུགས་བརྙན་མཐོང་ནས་སེམས་འདི་སྐྱོ། །ཐམས་ཅད་སྟོང་པ་ཅང་མེད་ནམ་མཁའ་བཞིན། །རྒྱུ་འབྲས་གཉིས་མེད་ད་ལྟ་རྫོགས་སངས་རྒྱས། །ས་ལམ་ཡོན་ཏན་དྲང་དོན་བསླུ་བྲིད་ཅེས། །ཆད་ལྟའི་ཆོས་རྣམས་སྟོན་པས་སེམས་འདི་སྐྱོ། །» «དོན་དམ་འོད་གསལ་ངོ་བོ་མི་ཤེས་པས། །ཕྱང་ཆད་སྟོང་པ་སེམས་ཀྱི་གནས་ལུགས་ཞེས། །སྲིད་རྩེའི་ལམ་གྱིས་ཐར་པ་ཐོབ་ཏུ་རེ། །མདོ་རྒྱུད་དོན་ལ་རྨོངས་པས་སེམས་འདི་སྐྱོ། །སེམས་ཉིད་མ་རྟོགས་མཐའ་བྲལ་མི་ཤེས་པར། །དྲན་རྟོག་གང་ཤར་ཆོས་སྐུ་ཟང་མ་ཞེས། །སེམས་དང་སེམས་བྱུང་ཕྲེང་པ་འདྲེན་བྱེད་» «པ། །དྲན་རྟོག་བདག་ཏུ་འཛིན་ལ་སེམས་འདི་སྐྱོ། །རིག་པ་མཐའ་གྲོལ་རྟེན་མེད་མ་ཤེས་པར། །རླུང་སེམས་ཉམས་ལ་གནས་ལུགས་དོན་དུ་ཞེན། །ཆགས་སྲེད་འཛིན་པས་ཉོན་མོངས་ཕྱི་ཕྱིར་འཕེལ། །ལམ་གོལ་དམན་པར་ཞུགས་ལ་སེམས་འདི་སྐྱོ། །ལེགས་ཉེས་མི་དཔྱོད་རང་གའི་ལམ་དུ་ཞུགས། །གཟུ་བོར་མི་གནས་ཕྲག་དོག་མེ་ཡིས་གདུངས། །འབྲེལ་ཚད་རང་བཞིན་རྨོངས་པར་དགོད་པ་སྟེ། །» «གཏི་མུག་མུན་རུམ་གྱུར་ལ་སེམས་འདི་སྐྱོ། །མདོར་ན་དིང་སང་གངས་རིའི་ར་བ་འདིར། །མཁས་བླུན་མི་ཕྱེད་སླར་ལ་རྨོངས་པ་གཙོ། །བླུན་པོའི་རྨོངས་ཟིལ་ཟས་གོས་ཆེ་ཁྱད་ཅན། །སྒྲུབ་པའི་བྱིན་རླབས་ངོ་མཚར་ཁྱད་དུ་འཛིན། །བཅོས་མའི་ཆོས་ལ་ཐར་པའི་ལམ་རེ་ཞིང༌། །མདོ་རྒྱུད་བསྟན་བཅོས་བཅོས་པའི་དོན་ཞེས་འདོར། །འདིས་ནི་དམ་ཆོས་པདྨ་ཟུམ་པ་འདྲ། །བསྟན་པའི་ཉི་མ་ནུབ་ལ་སེམས་འདི་སྐྱོ། །དེ་དག་ལ་སོགས་ཚད་མེད་ཉེས་པའི་ཚོགས། །རྒྱ་མཚོའི་ཆུ་རྡུལ་ཇི་བཞིན་བསམ་མི་ཁྱབ། །འདི་དག་སྤངས་ནས་ཞི་བའི་ནགས་ཁྲོད་དུ། །ཟབ་དོན་སྙིང་པོའི་དེ་ཉིད་སྒྲུབ་པར་རིགས། །དུས་ལ་མངོན་པར་སྐྱོ་བའི་རབས་ལས། སྒྲུབ་པར་ཆས་པའི་གནས་ལ་སྐྱོ་བར་བསྟན་པ་སྟེ་རབས་བཞི་པའོ།། །།དེ་ལྟར་རང་བཞིན་སྐྱོ་བའི་ཚུལ་རྣམས་ཀུན། །ཕལ་ཆེར་རྨོངས་པས་བདེན་དུ་ཆུག་ན་ཡང༌། །ཤེས་བཞིན་ཕྲག་དོག་དོན་མེད་སྒྲོ་སྐུར་ཅན། །ངེས་འབྱུང་སྐྱོ་ཤས་སྐྱེ་བའི་ཚུལ་ལ་ཉོན། །ཐོག་མར་བསྟན་ཞུགས་བསླབ་གཞི་ལེགས་བཅས་ཏེ། །བར་དུ་ཐོས་བསམ་ཕྱོགས་མེད་དོན་ལ་སྦྱངས། །ཐ་མར་ཟབ་དོན་སྙིང་པོ་བསྒོམས་རྗེས་སུ། །གཞན་དོན་ཟོག་པོར་མཐོང་བས་སེམས་འདི་སྐྱོ། །» «སྔོན་ཆད་མཐོང་དང་མ་མཐོང་མི་རྣམས་དང༌། །གཞན་གྱི་ལམ་མཁན་འདྲེན་པའི་བཤེས་གཉེན་ཡང༌། །གཟུ་བོར་མི་གནས་ཕྲག་དོག་རླུང་གིས་བསྐྱོད། །ཆགས་སྡང་མེ་དཔུང་འབར་ལ་སེམས་འདི་སྐྱོ། །རང་གཞན་ཀུན་གྱིས་དམ་པར་འཛིན་ན་ཡང༌། །གཞན་ལ་གཤེ་སྐུར་བསམ་སྤྱོད་ངན་པ་སྟོན། །ཚད་མེད་བཞི་ལ་བློ་ཁ་མ་ཕྱོགས་པར། །ཆོས་པའི་གཟུགས་བརྙན་མཐོང་ནས་སེམས་འདི་སྐྱོ། །ཡང་དག་མ་ནོར་ཇི་བཞིན་སྟོན་བྱེད་པས། །ཤེས་བྱའི་གནས་རྣམས་ལེགས་པར་འདོམས་ན་ཡང༌། །ཤེས་རབ་ཆེ་བ་བླ་མའི་སྐྱོན་ཡིན་ཞེས། །མི་རིགས་མུན་པས་སྨྲ་ལ་སེམས་འདི་སྐྱོ། །འཇིག་རྟེན་འདི་ན་མ་ལུས་འགྲོ་ཀུན་ལ། །འབྱོར་བདེ་སྡུག་བསྔལ་མཐོ་དམན་ཅི་ཡོད་ཀུན། །རང་རང་ལས་ཀྱིས་བསགས་པར་མི་ཤེས་» «པར། །ཕྲག་དོག་ཟུག་རྔུ་བྱེད་ལ་སེམས་འདི་སྐྱོ། །ཉེའམ་རིང་བའི་གནས་ན་འདུག་ཀྱང་རུང༌། །གཞན་བདེ་མི་བཟོད་ཆགས་སྡང་འབར་བའི་མེས། །ཡོངས་སུ་གདུངས་ཤིང་གནོད་པ་མངོན་པར་སྒྲུབ། །ཉོན་མོངས་ལོག་པར་ལྟ་བས་སེམས་འདི་སྐྱོ། །རྨི་ལམ་ན་ཡང་དྲན་པར་མ་མྱོང་ན། །དངོས་སུ་ལྟ་ཞིག་རྡུལ་ཙམ་ཉེས་མེད་ལ། །སྒྲོ་སྐུར་སྣ་ཚོགས་མངོན་པར་གཤེ་བ་ཅན། །ཆགས་སྡང་དྲག་པོས་གཟིར་ལ་སེམས་འདི་སྐྱོ། །རང་ཉིད་བཟང་པོའི་གནས་སུ་ཁས་འཆེ་ཞིང༌། །སྣང་བ་སེམས་སུ་གྲུབ་པར་འདོད་ན་ཡང༌། །གཞན་ལ་ཕྲག་དོག་ཕན་ཚུན་ནང་འགལ་ཅན། །ཆོས་པའི་གཟུགས་བརྙན་རྣམས་ལ་སེམས་འདི་སྐྱོ། །དེ་དག་ལ་སོགས་ཉེས་པ་བརྗོད་མི་ལང༌། །མཐའ་ཡས་གྲངས་མང་མཚན་མོའི་གཟའ་སྐར་» «བཞིན། །འདི་དག་སྤངས་ནས་ཞི་བའི་ནགས་ཁྲོད་དུ། །གཅིག་པུར་ཞི་བ་སྒྲུབ་ན་མི་ལེགས་སམ། །དེང་སང་དུས་ངན་སྐྱེ་བོ་བཟོད་དཀའ་བས། །གཞན་དོན་དགེ་ལ་བསྐུལ་བ་སྒྲུབ་པར་དཀའ། །སྡིག་པའི་མིག་རྐྱེན་བྱེད་རྣམས་རབ་སྤངས་ ཏེ། །གཅིག་པུར་དབེན་པར་དམ་ཆོས་སྒྲུབ་པར་རིགས། །དུས་ལ་མངོན་པར་སྐྱོ་བའི་རབས་ལས། གྲོགས་ཀྱི་བཤེས་གཉེན་རྣམས་ལ་སྐྱོ་བར་བསྟན་པ་སྟེ་རབས་ལྔ་པའོ།། །།དེ་དག་རང་གི་འདོད་པ་སྒྲུབ་པ་དང༌། །གཞན་ཕྱོགས་བཀག་པས་སེམས་བདེ་རྙེད་གྱུར་ཅིང༌། །ཕྲག་དོག་གོམས་པས་བདེན་དུ་ཆུག་ན་ཡང༌། །རང་ཕྱོགས་འཁོར་གྱིས་ལོག་སྒྲུབ་སྐྱོ་བས་ཉོན། །ལྷག་བསམ་སྙིང་པོའི་བྱང་ཆུབ་སེམས་བསྐྱེད་ནས། །ཉེ་རིང་མེད་པའི་གདུལ་བྱ་སྣ་ཚོགས་ལ། །ཟོལ་མེད་ཕན་པ་སྒྲུབ་ཀྱང་མགུ་དུས་མེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དང་པོ་ལྷར་མཐོང་གསར་ངས་ལྷག་པར་ཆེ། །བར་དུ་མིར་མཐོང་དཔོན་སློབ་འགྲོགས་ཤེས་ཙམ། །ཕྱི་མར་དགྲར་མཐོང་གནོད་པ་སྣ་ཚོགས་སྐྱེལ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཀུན་ཏུ་ཆོས་ཀྱི་དྲིན་ནི་མཐའ་ཡས་ཤིང༌། །ལེགས་འདོམས་དུས་སུ་ཕན་པས་བསྐྱངས་བྱས་ཀྱང༌། ། ལྷག་པར་སེམས་དཀྲུགས་ཉེ་འཁོར་སུན་རྣམསའབྱིན། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་ཤེས་མེད་ལ་ཁ་ཏས་མི་ཆུན་ཞིང༌། །ཕྲག་དོག་ཚིག་རྩུབ་འཐབ་རྩོད་འབའ་ཞིག་བྱེད། །རང་སྐྱོན་མི་སེམས་ཅི་བྱས་སྡང་བར་མཐོང༌། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་རྨོངས་བློ་གྲོས་ཆུང་ཞིང་དགའ་དཀའ་ལ། །ལེགས་ཀུན་ཉེས་པ་གཅིག་གིས་འགོག་པར་བྱེད། །སྐྱོན་མང་ཡོན་ཏན་མེད་ལ་ཉེས་ཀུན་» «གཞི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །འཕྲལ་གང་ཞི་ལ་ཕུགས་ན་མ་རུངས་པ། །ཁ་ལ་བཟང་ཆེ་ལག་ལེན་ངན་པ་བྱེད། །ཆོས་དང་རྒྱུད་འཛོལ་གཡོ་སྒྱུ་ཁྲམ་པའི་རིགས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཉོན་མོངས་འདོད་སྲེད་ཆེ་ཞིང་གཉེན་པོ་མེད། །རང་བཞིན་ཀུན་སྤྱོད་ངན་པ་ཁ་ཁྱེར་མཐོ། །» «གཞན་གྱི་མཚང་འབྲུ་རང་སྐྱོན་མི་སྤོང་བ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ལེགས་ཉེས་ཤེས་ཀྱང་ཉེས་ལ་ནན་གྱིས་འཇུག །སྤང་བླང་ཤེས་ཀྱང་རྒྱུ་འབྲས་ཁྱད་དུ་གསོད། །དབང་པོ་རྣོ་ཡང་གཟུ་བོར་མི་གནས་པ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རྐྱེན་ཁར་ཡང་ལ་འགྲོགས་ཁྱེར་མི་མཁས་ཤིང༌། །གཞན་ལས་བྱེད་སྐྱེན་བསྒྱུར་ཁ་ཤིན་ཏུ་ཡང༌། །ཟུང་མེད་ཕྱོགས་མི་ཐུབ་ལ་གཞུང་ངན་པ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་ལ་དགོས་ན་ཁ་གསག་ངོ་བསྟོད་མཁས། །གཞན་ལ་དགོས་ན་ཐབས་ཀྱིས་ཕྱིར་ཕྱིར་ འབྱོལ། །བྱ་བྱེད་གང་ལའང་གཡོ་ཟོལ་ཕུལ་དུ་ཕྱིན། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དོན་མེད་འབྲེལ་ལ་དགའ་ཞིང་གསར་ངས་ཆེ། །ཐམས་ཅད་ཀུན་ཏུ་ཁྱབ་ཅིང་བྱ་བྱེད་མཐོ། །འཇམ་འཇམ་འདྲ་ལ་ཕྱི་ནང་ཟེར་མཆུ་མང༌། །» «དུས་ངན་འཁོར་ལ་བསམ་ཞིང་སྐྱོ་བ་འཕེལ། །གཞན་སྣང་བསྒྱུར་མཁས་བཟང་བཟང་འདྲ་ན་ཡང༌། །འཇམ་པོས་ཕུག་པར་སྐྱོ་སྔོགས་ཕྲ་མ་བྱེད། །ཕྱི་ནང་འཛོལ་ཡང་ཇོ་བཟང་མ་ཞིག་པ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་གི་རང་མཐོང་གཞན་ལ་ཕྲག་དོག་བྱེད། །དཔོན་དད་ཆུང་ལ་དྲིན་ཆུང་འདྲེན་ལ་དགའ། །ལག་དྲིན་ཁས་གསོད་ང་བདེན་ཡུས་ཀྱིས་བརྣངས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །འདོད་པ་ཆུང་ལ་ཚིག་གིས་བསྟོད་ན་ཡང༌། །ཕོངས་པར་གྱུར་ལ་ནན་གྱིས་བརྙས་པ་བྱེད། །ངོས་སུ་བསྟོད་ལ་ལྐོག་ཏུ་གཤེ་སྐུར་འདེབས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་གི་བྱ་བྱེད་འདུན་མ་མི་ཤེས་པར། །གཞན་ལ་གྲོས་འདེབས་ཁ་ཏ་ཡས་ཀྱིས་འབུབས། །ཕྲ་མ་སྔ་བཙན་ཕྱོགས་གཏམ་བདེན་པར་འཛིན། ། དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཡུན་རིང་འགྲོགས་ཤིང་ཆོས་ཀྱིས་འབྲེལ་ན་ཡང༌། །གཡོན་ཅན་སྡིག་པའི་གྲོགས་ཀྱི་ཕྱོགས་བཟུང་ནས།།འདི་ཕྱིའི་ཉེས་དམིགས་མི་སེམས་དམ་ཉམས་བྱེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཆོས་ཀྱིས་འབྲེལ་ཞིང་ཅི་འགྲུབ་ཕན་བཏགས་ཀྱང༌། །ལྐོག་ནས་གནོད་སྐྱེལ་འཕྱར་ཀ་རྟག་ཏུ་གཏོང༌། །» «དངོས་སུ་ཕྱེ་གཏོར་ཟུངས་མེད་ཁ་ཞེ་ཅན། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །འགྲོ་བར་ཆས་ན་བཟང་པོའི་ཚིག་གིས་འཆིང༌། །བསྡད་པར་གྱུར་ན་ངན་པའི་གནོད་འཚེས་སྐྲོད། །ཟེར་སྤྱོད་འགལ་ལ་རང་བཞིན་མ་ངེས་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །བསྡད་པའི་ཚེ་ན་འགྲོ་བའི་བློ་སྣ་ འདོན། །ཕྱིན་པར་གྱུར་ན་བསྡད་པས་ལེགས་ཞེས་ཟེར། །ཅི་ཟེར་འདི་ཟེར་རང་བཞིན་ཆ་མེད་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། ། གཞན་དུ་འགྲོ་ན་དེ་ལ་ཤོལ་འདེབས་བྱེད། །སྡོད་རྩིས་བྱས་ན་བྱ་བྱེད་མང་ཞེས་ཟེར། །» «འཐད་འོས་བསྒྲུབས་ཀྱང་དེ་ལ་ཞད་རེ་འདོགས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཆོས་གཙོར་བཞག་ནས་བྱང་ལམ་སྒྲུབ་ན་ཡང༌། །འཇིག་རྟེན་མ་ཤེས་བྱ་བྱེད་ནོར་ཞེས་ཟེར། །ཅུང་ཟད་བསྟུན་ན་མཐུན་འཇུག་ཆེ་ཞེས་སྨྲ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཅུང་ཟད་བཟུང་ན་ཆགས་ཞེན་ཆེ་ཞེས་སྨྲ། །བཏང་བར་གྱུར་ན་མ་ཤེས་རྩིང་ཞེས་སྒྲོགས། །གང་ལྟར་བྱས་ཀྱང་ཡིན་པའི་སྐབས་མེད་པས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཕན་ཚུན་སྙོམས་པར་ལེགས་པར་བསྐྱང་བྱས་ཀྱང༌། །ལན་གཅིག་རྐྱེན་གྱིས་ཐམས་ཅད་ཆུ་རུ་འབོ། །བཟང་པོའི་དྲིན་ལན་ཐམས་ཅད་ཉེས་ཀྱིས་འཇལ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། ། མཉམ་གཉིས་ཞལ་ལྕེ་སྙོམས་པར་ཕྱེས་ན་ཡང༌། །» «གཞན་ཕྱོགས་ཕུལ་ནས་རྟག་ཏུ་འཁང་ར་རྡུང༌། །ཕམ་བློ་བླངས་ཀྱང་ཕན་དུས་མེད་པ་ཡི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་གི་ལེ་ལན་སྐྱོན་ལ་མི་རྟོག་པར། །གཞན་གྱི་ཚིག་ལ་ཀོ་ལོང་ཟུར་མགོ་སྡོམ། །ཁོང་ཁྲོ་ཚིག་རྩུབ་ལུགས་དང་མི་མཐུན་པ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །བྱས་ན་དགའ་བ་ཅུང་ཟད་མི་བྱེད་པར། །བཞག་ན་དགའ་ཡི་ངན་སྤྱོད་སྣ་ཚོགས་བྱེད། །» «རང་གིས་མ་ལན་གཏམ་ངན་ལུང་པ་འགེངས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་སྐྱོན་མི་རྟོག་གཞན་སྐྱོན་འབའ་ཞིག་གླེང༌། །གཅིག་སོང་རྗེས་ལ་དེ་ལ་འཕྱར་ཀ་གཏོང༌། །མི་སྙན་ཟེར་མཆུ་ངོ་དགའི་སྐྱེལ་བསུ་བྱེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །གང་དུ་གནས་ཀྱང་གཏམ་ངན་གཟེང་རྩའི་གཞི། །མང་པོའི་ནང་དུ་འཐབ་རྩོད་འཁྲུག་ལོང་སྐྱེད། །གཅིག་པུར་བསྡད་ཀྱང་ཁོང་གཏུམ་མི་འཆམ་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཡ་རབས་དམ་པའི་སྤྱོད་དང་མི་ལྡན་ཞིང༌། །མ་རབས་སྨྱོན་སྤྱོད་ཐོ་ཅོ་སྐྱུར་འགོང་ཅན། །གཞན་སེམས་དཀྲུགས་ལ་དུག་ལྔ་སུ་བས་རགས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་ལ་མི་བཟོད་གཞན་ལ་ཕོད་ཁམས་ཆེ། །འགྱུར་ལྡོག་མང་ཞིང་མི་བརྟན་ཁམས་འདུས་ཆེ། །འགྲོ་ན་མཆོང་ཞིང་ལབ་ན་ཀུ་ཅོ་» «ཆེ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཕར་ལ་བསླབ་ན་ཚུར་ལ་དེ་བས་ཐུ། །རང་དཔེ་མི་ལེན་གཞན་ལ་རྩོལ་ཕོད་ཆེ། །གླང་པོ་གཅིག་ཚུགས་བཞག་པས་མཆོག་ཅེས་ཟེར། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་བཞིན་བླུན་ལ་འདོད་སྣ་སུ་བས་ཆེ། །ཟེར་མཆུ་མང་ལ་ཀོ་ལོང་གཞན་བས་» «དམ། །བྱས་པ་མེད་པར་རེ་བ་གཞན་ལས་ཆེ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དུས་སྐབས་མི་ཤེས་བབ་ཅོལ་གཏམ་སྣ་མང༌། །ཚིག་ཚོགས་ཆེ་ལ་སྤྱི་བརྟོལ་མཚུངས་པ་མེད། །བརྗོད་པ་མི་གཟོ་ཡིད་དང་མི་མཐུན་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་བཞིན་གྱོང་ལ་འགྲོགས་པ་མི་བདེ་» «ཞིང༌། །མཆོག་ཏུ་མགུ་དཀའ་འཁང་པ་ཤིན་ཏུ་སྐྱེན། །སྤྱོད་ལམ་མི་གཟོབ་རང་ག་ཆིག་ཚུགས་པ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དད་མེད་ཀུན་ཏུ་འཁྲུག་ཅིང་འགྲོགས་མི་བདེ། །སྒོ་གསུམ་མ་གུས་རྟག་ཏུ་སུན་རྣམས་འབྱིན། །» «ངོར་འཐབ་ལྐོག་སྨྲ་དོན་མེད་འཕྱར་ཀ་གཏོང༌། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་འཁྲུག་གཞན་སྨོད་དུག་ལྔ་སུ་བས་རགས། །ཁོང་ཁྲོ་འཁོན་ངན་ཕྲག་དོག་གདུག་རྩུབ་ཅན། །ཕར་ཟེར་ཚུར་ཟེར་ཕྱི་ནང་གཟིང་རྩ་བྱེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །བསླབ་ན་ཚུར་འཐབ་མི་ཉན་གཅུ་གྱོང་ཆེ། །རྒྱུ་འབྲས་མི་འཛེམ་རྫུན་དང་དབྱེན་ལ་དགའ། །སྨྲ་མཆུ་མང་ཞིང་མི་སྙན་སྐྱེལ་བསུ་བྱེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །གཅིག་ལ་བཤད་ན་གཅིག་ཏུ་མི་དགའ་ཞིང༌། །གཅིག་ལ་བྱིན་ན་གཅིག་ལ་ཕྲོགས་པ་ཙམ། །སྤྱི་སྙོམས་བསྐྱངས་ཀྱང་ཕྱོགས་འཕུལ་འཕྱར་ཀ་གཏོང༌། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །སུ་དང་འགྲོགས་ཀྱང་དེ་དང་མི་འཆམ་ཞིང༌། །སྐྱོན་རྣམས་རྟོག་ཅིང་མི་སྙན་འབའ་ཞིག་བརྗོད། །ཐམས་ཅད་དགྲར་ལེན་མཐུན་པ་གཅིག་མེད་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །གོ་བར་གྱུར་ཀྱང་རྫུན་དང་གཡོ་སྒྱུ་བྱེད། །འགྲོགས་ཚད་བསླུ་ཞིང་མི་ཚེ་ངན་ལ་སྐྱེལ། །སྟོང་ཟོབ་ཕྱི་ཕྱིར་ཕོ་བཟོ་ཕུན་སུམ་ཚོགས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཟ་ན་རང་ལ་བྱེད་ན་གཞན་གྱི་ཕྱོགས། །སྐྱིད་ན་གྲོགས་པོ་སྟོང་གྱོད་ཁ་འཕྱོར་ཅན། །» «གེགས་ཤིག་བྱུང་ན་བཙལ་གྱིས་མི་རྙེད་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཆོས་དང་ཟང་ཟིང་ལེགས་པ་བྱུང་བའི་ཚེ། །འཁོར་ཚོགས་མ་ངེས་གྲལ་རིང་ཆེ་ན་ཡང༌། །དགོས་པའི་དུས་ན་ཉུང་ལ་མི་སྟོངས་པ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །བཤེས་མེད་གློ་བུར་ལྷགས་དང་ཕོངས་རྣམས་ལ། །» «ཅུང་ཟད་མཐོང་བས་ཕན་པ་སྒྲུབ་ན་ཡང༌། །ཕྲག་དོག་དབང་གིས་གསར་ངས་ཆེ་ཞེས་སྒྲོག །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རྟག་ཏུ་བཟང་སེམས་ཕན་པ་ཅི་བྱས་ཀྱང༌། །བསྐྱངས་ཀྱིས་མི་ལང་ལྷ་ཁང་རྙིང་པ་བཞིན། །ཉིན་འབར་མཚན་འབར་ལ་ལས་སྲོད་ཐུབ་གཏོང༌། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ལེགས་པའི་ཁ་ཏས་ཟོལ་མའི་ཕྱེ་གཏོར་འགམ། །ཕུགས་ཀྱི་ཤ་ཙས་འཕྲལ་གྱི་བློ་བྲིད་དགའ། །ཟབ་མོའི་ཆོས་ལས་ཡོ་བྱད་དྲིན་གཟོ་ཆེ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཁ་རོག་བསྡད་ན་ཞལ་ཏ་ཞུ་ཞེས་ཟེར། །» «ཕན་པར་བསླབ་ན་བཀའ་བཀྱོན་གནང་བར་གོ །ཤ་ཚ་གྲོས་འདེབས་མཆོག་ཏུ་སྡང་བས་མཐོང༌། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཕན་འདོགས་ཞུགས་ན་སྤྲོས་ལ་དགའ་ཞེས་ཟེར། །གཅིག་པུར་འདུག་ན་གདུལ་བྱ་སྐྱོང་དགོས་ ཟེར། །ཇི་ལྟར་བསམས་ཀྱང་དེ་ལ་ཞད་རེ་འདོགས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །བཤད་པའི་ཚེ་ན་སྒོམ་པ་ལེགས་ཞེས་ཟེར། །སྒོམ་པའི་ཚེ་ན་ཡང་ཡང་ཤོད་ཅེས་ཟེར། །ལེགས་པར་བཤད་ན་ཉན་ཡང་མི་ནུས་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །མདོ་རྒྱུད་བསྟན་བཅོས་ལུང་རིགས་མན་ངག་གཞུང༌། །ཆོས་དང་ཆོས་མིན་ཕྱེ་ནས་བཤད་པ་ན། །སྡང་བར་མཐོང་ནས་སླར་ལ་ལོག་པར་ལྟ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དབང་པོའི་ཚོད་ལ་གང་ཕན་ཆོས་བཤད་ཀྱང༌། །དེ་ཉིད་མི་སྒྲུབ་གཞན་ལ་ཡར་བལྟས་ནས། །ཟབ་ཟབ་མོ་ཞིག་ཉན་རྗེས་གོ་རྟོགས་མེད། ། དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཇི་ཙམ་བཤད་ཀྱང་གོ་བའི་དུས་མེད་ལ། །ལག་ཁྲིད་བསླབ་ཀྱང་ཅུང་ཟད་ཤེས་དུས་མེད། །གཅིག་ལ་ཨ་འཐས་དྲག་ཏུ་མི་འགྲོ་བ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་གིས་མ་ཐོས་གོང་དུ་བཤད་ན་དགའ། །» «ཐོས་རྗེས་གཞན་ལ་ཕྲག་དོག་གཞིར་བཞག་ནས། །ཡང་ཡང་བཤད་དྲགས་བསྒོམ་ན་ལེགས་ཞེས་ཟེར། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དོན་གཉེར་ཆོས་དེ་ཐོབ་པར་མ་གྱུར་ཚེ། །ཟོལ་མའི་དམ་བཅའ་ངོ་སྲུང་སུ་བས་» «མཁས། །འདོད་དོན་གྲུབ་ནས་གར་འགྲོ་ལ་དོར་པ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཟབ་མོའི་ཁྲིད་ལ་ཞུགས་པའི་མི་རྣམས་ཀྱང༌། །བསྡད་ལོང་མེད་པར་ཆོས་རྣམས་རྫོགས་སུ་རེ། །ཀུན་ཏུ་འཁྱམས་ཤིང་ཆོས་མཐུན་སྔ་བསགས་ཞུ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་ཉིད་དམ་ཆོས་གཞུང་བཞིན་མི་སྒྲུབ་པར། །ཟབ་མོའི་ཆོས་རྣམས་དུས་གཅིག་ཐོབ་ཏུ་རེ། །ཆོས་ལ་བརྩེགས་ཞེས་སླར་ལ་འཕྱར་ཀ་གཏོང༌། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཟབ་མོའི་ཆོས་ལ་གསང་བ་མི་ཐུབ་ཅིང༌། །ཐོས་པའི་མོད་ལ་གསང་བ་གཞན་ལ་སྒྲོགས། །བསླབ་ན་ཁོང་ཁྲོ་འཁོན་ངན་ཚིག་རྩུབ་འབྱིན། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཇི་ཙམ་ཐོས་བཞིན་རང་རྒྱུད་གྱོང་དུ་འགྲོ། །» «ཅུང་ཟད་ཤེས་ཏེ་གཉེན་པོར་མ་སོང་ཞིང༌། །གཞན་ལ་ཁྱད་གསོད་ཚིག་རྩུབ་དུག་མདའ་འཕེན། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །སྙིང་པོའི་དོན་ལ་ཅུང་ཟད་མི་སྒྲུབ་པར། །འཁོར་ལ་ཕར་བརྡལ་གཞན་ལ་བཤད་པར་རིངས། །» «ཆོས་བརྒྱད་དོན་གཉེར་ཚེ་འདིའི་མཛེས་ཆོས་ཙམ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཡིན་མིན་བཤད་ཀྱང་བདག་ལྟ་མཆོག་ཏུ་འཛིན། །ཇི་ཙམ་བཤད་ཀྱང་དོན་ལ་སྐྱེད་མེད་པའི། །དབང་པོ་གསལ་ཡང་རྨོངས་པ་གཅིག་ཚུགས་མཁན། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཆོས་ལ་འདུས་ཀྱང་ཆོས་མིན་འབའ་ཞིག་བྱེད། །ཕན་ཚུན་ཚོགས་ཀྱང་ལོང་གཏམ་འབའ་ཞིག་གླེང༌། །» «དབེན་པར་གནས་ཀྱང་རྣམ་གཡེང་འབའ་ཞིག་བྱེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །གཅིག་པུར་འདུག་ནས་སྒྲུབ་པར་ཁས་འཆེ་ཡང༌། །སོས་དལ་རེས་འགའ་གཉིད་དང་སྙོམ་ལས་ཅན། །རང་རྫུན་རང་ལ་གཏོང་བས་ཉིན་མཚན་འདའ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །སྒྲུབ་ལ་མི་བརྩོན་ཀུན་ཏུ་འཁྱམས་ལ་དགའ། །དར་རེ་གཞི་ལ་ཅུང་ཟད་བསྡད་ན་ཡང༌། །རང་གནས་མི་ཚུགས་གཞན་གྱི་གནས་རྣམས་ཉུལ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ནང་དུ་མཚམས་བཅད་ཐང་གི་གང་ལ་ཟ། །ཀུན་ཏུ་འཁྱམས་ཀྱང་སྒྲུབ་ཚུགས་མ་ཞིག་པ། །དམ་བཅའི་ཁྲལ་འཇལ་ས་མཐའི་མི་ངན་འདྲ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །བླ་མ་མཆོག་ལས་ཉེ་འབྲེལ་གཅེས་པར་འཛིན། །མཆེད་གྲོགས་མཆོག་ལས་སྡིག་པའི་གྲོགས་པོ་འདམས། །དམ་ཆོས་མཆོག་ལས་ནོར་རྫས་སྙིང་པོར་བྱེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཇི་ཙམ་བསྟན་ཀྱང་དོན་དུ་མི་གཉེར་བ། །ལེགས་པར་བཤད་ཀྱང་ཅུང་ཟད་མི་ཉན་པ། །སྙིང་པོའི་དོན་ལ་ནམ་ཡང་མི་སྒྲུབ་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དེ་དག་ལ་སོགས་འཁོར་གྱི་ཉེས་པ་ཀུན། །ཇི་ཙམ་བརྗོད་ཀྱང་ཟད་པའི་དུས་མེད་ལ། །མེ་ཡི་འོབས་བཞིན་བཟོད་པའི་བླག་མེད་པས། །གཅིག་པུར་དབེན་པར་སྒྲུབ་པའི་དུས་ལ་བབས། །ཇི་ལྟར་བསྐྱངས་ཀྱང་མགུ་བར་མི་ནུས་ལ། །གང་ལྟར་བསྟན་ཀྱང་ཕན་པའི་གོ་སྐབས་ཆུང༌། །འདི་ལྟར་བཟོད་ཀྱང་སྙིང་པོ་ཅི་འདུག་ཀྱེ། །དེ་ལྟར་བསམས་ནས་མྱུར་དུ་འགྲོ་བར་» «རིགས། །རང་ལའང་མི་ཕན་གཞན་ལའང་མི་ཕན་པའི། །འཇིག་རྟེན་གཟུགས་བརྙན་འདི་འདྲ་རྣམ་བཤིག་ནས། །གཅིག་པུར་ཞི་བ་དབེན་པའི་ནགས་ཁྲོད་» «དུ། །ཟབ་མོའི་དོན་གྱི་དེ་ཉིད་སྒྲུབ་པར་རིགས། །ད་རེས་ཚེ་འདིར་སྲིད་མཚོ་མ་བརྒལ་ན། །གཏན་དུ་འཁོར་བའི་གནས་ལས་ཐར་ཐབས་མེད། །དེ་བས་གཅིག་པུར་དབེན་པའི་ནགས་ཁྲོད་དུ། །ཚེ་གང་ཞི་བའི་ཏིང་འཛིན་སྒྲུབ་པར་རིགས། །» «དུས་ལ་མངོན་པར་སྐྱོ་བའི་རབས་ལས། འཁོར་བའི་གནས་ལ་སྐྱོ་བར་བསྟན་པ་སྟེ་རབས་དྲུག་པའོ།། །།དེ་ལྟར་སྣ་ཚོགས་མངོན་པར་སྐྱོ་བ་ཅན། །རང་གཞན་ལས་ངན་བསགས་པའི་འཁྲུལ་སྣང་སྟེ། །གང་དུ་བསམས་ཀྱང་སྙིང་པོ་འགའ་མེད་པས། །སེམས་ཤིག་ཡོད་ན་འདི་ལ་སྐྱོ་བར་རིགས། །སྔོན་དུས་བསྐལ་པ་བཟང་པོ་ནུབ་གྱུར་ཅིང༌། །ད་དུས་ངན་པའི་རང་བཞིན་འདི་ཤར་བས། ། ཕྱོགས་དུས་གང་ནའང་བདེ་བའི་གོ་སྐབས་མེད། །ཀུན་ཏུ་འཁྲུག་ཅིང་ནད་དང་མུ་གེས་ཉེན། །སྣ་ཚོགས་སྡུག་བསྔལ་མང་ལྡན་འདི་དག་ལས། །ཤེས་ལྡན་རྣམས་ཀྱིས་ཐར་པ་སྒྲུབ་པར་རིགས། །མདོར་ན་དིང་སང་ལྔ་བརྒྱ་ཐ་མ་འདིར། །དུས་ངན་འཁོར་དང་འཇིག་རྟེན་སྣང་བ་དང༌། །གདུལ་དཀའི་སེམས་ཅན་སྣ་ཚོགས་སྐྱོ་བ་ཅན། །ཡིད་ཆད་མཆི་མ་འཁྲུག་པའི་ཚུལ་ལ་སོམས། །ཕྱི་རུ་བསམས་ཀྱང་སྣང་བའི་ཡུལ་ལ་སྐྱོ། །» «ཡུལ་རྣམས་མི་རྟག་རྨི་ལམ་སྒྱུ་མའི་ཚུལ། །ནང་དུ་བསམས་ཀྱང་འཛིན་པའི་སེམས་ལ་སྐྱོ། །སེམས་འདི་མི་སྲུན་དགེ་གང་བརྩོན་པར་དཀའ། །བར་དུ་བསམས་ཀྱང་སྣ་ཚོགས་རྐྱེན་ལ་སྐྱོ། །ཚེ་སྲོག་མི་རྟག་རྩྭ་ཁའི་ཟིལ་པ་འདྲ། །གང་དུ་བསམས་ཀྱང་སྐྱོ་བའི་རང་བཞིན་ཏེ། །སྐྱེས་པ་ཤི་ཞིང་འདུས་པ་རྣམས་ཀྱང་འབྲལ། །བསགས་པ་འཛད་ཅིང་འབྱོར་པ་མཐའ་རྒུད་པས། །འཁོར་བའི་གནས་ལས་ད་རེས་འདའ་བར་མཛོད། །མི་ཐེག་ཁུར་དང་མི་ལྕོགས་བྱ་བ་དང༌། །དུས་ངན་དཔོན་དང་ཤུལ་ཁའི་མགྲོན་འགྱེད་དང༌། །དུས་ལ་མ་བབ་གཞན་དོན་བྱེད་པ་རྣམས། །བཟང་སེམས་ཡོད་ཀྱང་ཕན་པ་འགྲུབ་པར་དཀའ། །དེ་བས་གཅིག་པུར་ཞི་བའི་ནགས་ཁྲོད་དུ། །སྙིང་པོའི་དེ་ཉིད་སྒོམ་པའི་དུས་ལ་བབས། །ནགས་ནི་སྔཽན་གྱི་རྒྱལ་བ་རྣམས་ཀྱིས་བསྔགས། །མི་སྲུན་མེད་ཅིང་འཚེ་བ་ཀུན་དང་བྲལ། ། བྱ་དང་རི་དྭགས་འགྲོགས་ན་བདེ་བས་གང༌། །སྨན་ཤིང་མེ་ཏོག་ལྗོན་པའི་ཚོགས་མང་ཞིང༌། །ཕུག་དང་བྲག་རིའི་ཁང་བཟང་རྒྱ་ཆེར་ལྡན། །ཆུ་གཙང་དལ་འབབ་ངང་མོས་བརྟེན་པ་དེར། །གེ་སར་དཔུང་བསྐྱེད་འཛུམ་པའི་མདངས་གསལ་ཞིང༌། །དུས་རླུང་སེར་བུ་བདེ་བའི་ངད་དང་ལྡན། །ཙནྡན་བསིལ་བའི་ཁ་ཡི་དབུགས་བསྐྱོད་པའི། །དྲི་ཞིམ་སྤོས་བསུངས་ངད་པའི་རང་བཞིན་དང༌། །རྣམ་བཀྲ་ཡལ་གའི་ལག་རྩེད་དུད་པ་ཡིས། །གདུང་སྐྱོབ་བསིལ་གྲིབ་བྱེད་ལ་འགྲན་པ་བཞིན། །རྐང་དྲུག་ཚོགས་རྣམས་སྙན་པའི་གླུ་ལེན་ཅིང༌། །གདངས་སྙན་བྱ་ཚོགས་མང་པོ་གར་བྱེད་པ། །ལྷ་ཡུལ་དབང་པོའི་དགའ་ཚལ་སོན་པའི་གནས། །» «མཐོ་རིས་བུ་མོ་དགའ་བས་རྩེ་བ་བཞིན། །ཉོན་མོངས་གདུང་སེལ་ངང་གིས་ཆོས་འཕེལ་བ། །དུས་བཞིར་མི་རྟག་སྐྱོ་བའི་རང་བཞིན་དང༌། །ཏིང་འཛིན་ཞི་བ་ཡོན་ཏན་མཆོག་ཚོགས་ཅན། །དག་པའི་ཞིང་གི་ནགས་ཚལ་དམ་པ་བཞིན། །དེ་འདྲའི་གནས་ནི་ཐར་པའི་སྐྱེད་མོས་ཚལ། ། དབེན་ཞིང་ཉམས་དགའ་རིག་པ་འཛིན་པ་དེར། །བདག་བློ་ཞི་བའི་ཏིང་འཛིན་མཐར་ཕྱིན་ནས། །སྲོག་དང་བཅས་པའི་ལུས་འདི་གཡོ་བར་ཤོག །དུས་ལ་མངོན་པར་སྐྱོ་བའི་རབས་འདི་ནི། །རྣམ་གྲོལ་ཡོན་ཏན་མཆོག་གི་རྗེས་འགྲོ་བ། །ཐར་ལམ་བྱང་ཆུབ་སྙིང་པོར་ཞུགས་པ་དེས། །སྙིང་ནས་ནགས་སུ་འགྲོ་སླད་སྨྲས་པ་ཡིན། །དགེ་བ་དེ་ཡིས་བདག་དང་འགྲོ་བ་» «ཀུན། །ཉོན་མོངས་འཁོར་བའི་གྲོང་ལས་ཡིད་བྱུང་ནས། །ཞི་བ་རབ་བཟང་ཐར་པའི་སྐྱེད་ཚལ་དུ། །ཐམས་ཅད་ཕྱམ་གཅིག་སངས་རྒྱས་འགྲུབ་པར་ཤོག །ཚུལ་འདི་བློ་གྲོས་རྫིང་བུ་བཟང་པོའི་ནང༌། །དད་བརྒྱའི་པདྨོ་ངེས་འབྱུང་འདབ་སྟོང་ཅན། །ཏིང་འཛིན་སྦྲང་རྩིའི་སྙིང་པོ་འཛིན་པས་སྦྱར། །དད་ལྡན་རྐང་དྲུག་ཚོགས་རྣམས་དགའ་བར་མཛོད། །དུས་ལ་མངོན་པར་སྐྱོ་བའི་རབས་ཞེས་བྱ་བ། བདེ་བར་གཤེགས་པའི་གསུང་རབ་ལས་མང་དུ་ཐོས་པའི་ནོར་གྱིས་ཕྱུག་ཅིང༌། ཟབ་མོའི་དེ་ཁོ་ན་ཉིད་ཀྱི་དོན་ལ་ཡང་དག་འཇོག་གི་བསམ་གཏན་པ་ཀུན་མཁྱེན་ངག་གི་དབང་པོས། གངས་རི་ཐོད་དཀར་གྱི་མགུལ། འོད་ཟེར་སྤྲིན་གྱི་སྐྱེད་མོས་ཚལ་གྱི་ནང༌། ཀུན་ཏུ་བཟང་པོའི་ཁང་བཟང་དམ་པ། ཟླ་བ་ཆུ་ཤེལ་གྱིས་འཚེར་བའི་གནས་སུ་སྦྱར་བ་འདི་རེ་ཞིག་རྫོགས་སོ།། །།ཕྱོགས་དུས་ཀུན་ཏུ་བཀྲ་ཤིས་དང་བདེ་ལེགས་ཀྱི་ཆར་བསྐལ་པ་རྫོགས་ལྡན་གྱི་དུས་ཉེ་བར་གནས་པ་བཞིན་དུ་འབབ་པས་བསམ་རྒུའི་རེ་བ་མཐའ་དག་འགྲུབ་པར་གྱུར་ཅིག །མངྒ་ལཾ།

[edit]

This page is a cleaned copy of the following rywikitexts page, which stay unchanged:

Cleaning (21 November 2026): removed 1 running heads, 3 Word page fields. The «» marks are kept in the text: they enclose the small-print notes of the print, which are shown in small print with the marks hidden.

Part of the Longchenpa Collected Works (about this project).