ངན་ཚོང་རས་པའི་རྣམ་པར་ཐར་པ་བཞུགས།

{{{1}}}

༄༅། །ངན་ཚོང་རས་པའི་རྣམ་པར་ཐར་པའོ། །

༄༅། །ན་མོ་གུ་རུ། རྗེ་བཙུན་ངན་ཚོངས་རས་པའི་རྣམ་ཐར་ལ། དང་པོ་ཡབ་དེ་གསངས་སྔགས་རྙིང་པ་མཁན་གཅིག་ཡིན་པ་ལ། ཁོང་རང་གིས་མངའ་རིས་སྟོད་དུ་སློབ་གཉེར་ལ་ཕྱིན་པས། ཚད་མ་དང་སྤྱོད་ཕྱོགས་དང་། མདོ་འགྲེལ་མང་དུ་གསན་ཏེ། ཤེས་རབ་ཡང་ཆེ་བར་བྱུང་སྟེ། ལེགས་པར་བསླབས་ནས། ལོ་ཉི་ཤུ་རྩ་གསུམ་དུ་གཤེགས་སུན་དུ་བྱེད་པ་ལ། ཡབ་ཡུམ་འདས་ནས་དེར་གཤེགས་སུན་ཆགས་ནས་དཔེ་ཀུན་གུང་ཐང་གི་ལྷ་ཁང་གཅིག་ཏུ་ཕུལ་ནས། སྐྱོ་བ་སྐྱེས་ནས་རྗེ་བཙུན་མི་ལ་བྲག་དམར་ལིང་བ་ན་བཞུགས་པ་ལ་གདམས་ངག་ཞུས་པས། སྣོད་ལྡན་དུ་གཟིགས་ནས་རྗེ་བཙུན་མའི་བརྡའི་བྱིན་རླབས་དང་། དཔལ་བདེ་མཆོག་འཁོར་ལོའི་བརྡའ་དབང་བཞི་རྫོགས་པར་བསྐུར་ནས། ཡང་སྙིང་བདེ་མཆོག་སྙན་རྒྱུད་རྣམས་གནང་། ཁྱད་པར་དུ་ལུས་མེད་དྷ་ཀི་མའི་ཆོས་བསྐོར་དགུ་པོ་ལྔ་དར་ཀར་གྱི་ཡོལ་བའི་ནང་ནས་གསུངས་པ། བཞི་པོ་ཕྱིས་རས་ཆུང་བས་ཕྱིས་རྒྱ་གར་ནས་བྱུང་ནས་ལུས་མེད་ཀྱི་ཆོས་སྐོར་བཞི་པོ་དེ། བསྲེ་བའི་གདམས་པ་ཁྱད་པར་ཅན་དེ་རྣམས་ཆེ་བ་མ་བྱས་པར་ཞུས་སྐད་དོ། །དེ་ལྟར་མཛད་ནས། རྗེ་མི་ལ་ཆེན་པོ་ལ་བརྟེན་ཡུན་རིང་ཤིང་གདམས་པ་ཁྱད་པར་ཅན་དུ་འཕགས་པ་མངའ་བའོ། །དེར་རྗེ་ངན་ཚོང་རས་པས་རྗེ་བཙུན་མི་ལ་ལ་ཞུས། རྗེ་བཙུན་ཡིས་ཉམས་སུ་བླངས་པ་ལ། གཏུམ་མོ་ལ་ཉམས་ཀྱི་བྱེ་བྲག་དང་ཡོན་ཏན་ཅི་ལྟ་བུ་བྱུང་དྲིས་པ་ལ། བརྟེན་ནས་ཉམས་ཀྱི་གཏུམ་མོ་དྲིན་ལན་བཅོར་མ་དང་། མ་རིགས་གསལ་བྱེད་གནད་ཀྱི་གཟེར་བུ་གཉིས་གསུངས་སོ། །དེ་ནས་རྗེ་ངན་ཚོང་རས་པས་ཡང་སྙན་རྒྱུད་ལ་ཡི་གེར་བཀོད་དོ། །དེའི་སློབ་མ་ཁམ་པ་ངོ་ཁྲོ་ཙང་བཞེད་ལགས་སྐད་པ་གཅིག་བྱུང་བས། ཡང་ཟིན་རིས་བྱས་གསུངས། དེ་ལ་ཁོ་བོའི་སློབ་མ་ལ་སྟོད་པ་ལ་བ་ཅན་ཀྱིས་ཞུས་ཏེ་མདོར་ན་རྗེ་བཙུན་མི་ལའི་བུ་ཆེན་བརྒྱད་ཀྱི་ཆེ་ཤོས་ཡིན་པའོ། །དེ་ལ་ཐུགས་ཀྱི་སྲས་བཞི་ལ། གུང་ཐང་གི་མཉན་ཆུང་རས་པ། ལྕིམ་ལུང་གི་ངན་ཚོང་རས་པ། མདོ་བཀྲའི་སེ་བ་རས་པ། དྷ་མོའི་འབྲི་སྒོམ་རས་པའོ། དེ་དང་ཉེ་བའི་སྲས་བརྒྱད་ལ། ཞུགས་ཡས་རས་པ་ཞི་བ་འོད། རས་པ་སངས་རྒྱས་སྐྱབས། རས་པ་ཙས་ཕུ་བ། རས་པ་རྡོ་རྗེ་དབང་། གཉེན་སྒོམ་རས་པ། རོང་ཆུང་རས་པ། མཁར་ཆུང་རས་པ། གླན་སྒོམ་རས་པ་དང་བརྒྱད་དོ། དེ་རྣམས་ནི་རྗེ་བཙུན་མི་ལའི་སྐུ་ཚེ་སྟོད་ཀྱི་སློབ་མའོ། །སྐུ་ཚེ་སྨད་ལ། ཐུགས་ལས་འཁྲུངས་པའི་སྲས་བཞི་སྟེ། ལི་གོང་བྱེ་རུ་བ། འོར་སྟོན་དགེ་འདུན། དམ་པ་བརྒྱག་ཕུ་བ། མཉམ་མེད་རིན་པོ་ཆེ་དང་བཞི་སྟེ། རྗེ་ངན་ཚོང་རས་པས་དགུང་ལོ་བརྒྱད་ཅུ་གྱ་གཉིས་བཞེངས་ནས་འདས་ཏེ། སློབ་མ་ཡང་མང་དུ་བསྙིན་བར་མཛད་གསུང་ངོ་། །བདག་གི་བླ་མ་ལ་སྟོད་པའི་སྐུ་སྐྱེ་བ་དིང་རིར་སྐུ་འཁྲུངས་ནས། ཆུང་རྒྱུན་ནས་ཆོས་ལ་དད་པ་གཅིག་བྱུང་སྟེ། གདུང་རུས་པ་ནི་གླན་ཡིན་གསུངས། དེ་ནས་ལོ་བཅུ་གསུམ་ལོན་ཙམ་ན། ཕ་དེ་ཤི་ནས་མ་དེས་གླང་སྐོར་དུ་ཡིག་རྩིས་སློབ་ཏུ་བཅུགས། དེ་ལས་ལོ་བཅུ་དགུ་ལོན་ཙམ་མ་དེ་ཡང་ཤི། ཉེ་བ་གཞན་གཤའ་མ་མེད། དེ་ནས་ད་ནི་ཆོས་གཅིག་བྱ་དགོས་འཇིག་རྟེན་འདིས་དགོས་པ་མེད་སྙམས་པ་སེམས་ལ་བྱུང་ནས། རྒྱལ་ཁམས་སུ་བླ་མ་གཅིག་ཚོལ་དགོས་སྙམས་ནས་ཕྱིན་བས་ཁོང་ལ་ལ་ན་རེ། རྗེ་བཙུན་མི་ལའི་ཐུགས་ཟིན་ཆེ་ཤོས་ངན་ཚོང་རས་པ་བྱ་བ་དེ་ད་ལྟ་བལ་པོ་རྫོང་གསེབ་ན་བཞུགས་ཟེར་བ་ཐོས་ནས་ཕྱིན་བས། རྗེ་རས་པ་ཆེན་པོ་དེས་ཐུགས་ལ་བཏགས་ནས། འཕྲལ་གྱི་ལྟོ་གོས་དང་ཆོས་དང་གསུམ་ཀ་གནངས་ནས། ལོ་ལྔ་བརྟེན་བའི་བར་དུ་བདེ་མཆོག་སྙན་རྒྱུད་ཀྱི་གདམས་པ་རྣམས་དབང་བྱིན་རླབས་དང་བཅས་པ་རྣམས་ཐུགས་ལ་བཏགས་ནས་གནངས། རྩང་རོང་ངོས་པ་གཅིག་ཞུ་ཤིང་འདུག་པ་ལ། བསྲེ་བའི་སྐོར་དང་། ལུས་མེད་མཁའ་འགྲོའི་གདམས་པ་དང་། དེ་རྣམས་དེ་གཤའ་མ་མི་གནང་བར་འདུག །དེ་ནས་རྗེ་བཙུན་དེ་འདས་པའི་དུས་སུ་ཡང་། གདུང་བཞུས་པས་རྣལ་འབྱོར་མའི་སྐུ་བྱོན། ནམ་མཁའ་འཇའ་དང་འོད་ཀྱིས་གང་། མཁའ་འགྲོ་མའི་སྒྲ་སྙན་ཀྱི་བསུ་བ་བྱུང་། དེ་ལ་སོགས་པའི་རྟགས་མང་པོ་བྱུང་ནས། ཁོ་བོའི་སེམས་ཀྱི་སྤྲོས་པ་གཅད་དེ། བླ་མ་དེ་ལ་སངས་རྒྱས་རང་ལས་གཞན་གྱི་འདུ་ཤེས་སྐད་ཅིག་ཙམ་ཡང་མ་བྱུང་གསུངས། ངའི་བླ་མ་དེ་སངས་རྒྱས་དངོས་ཡིན་པར་འདུག་གསུངས་ཏེ། ཕྱི་མ་ངན་བུ་ཅི་ཙུག་བགྱི་ཞུས་པས། བུ་སྣང་བ་སེམས་ཀྱི་ཆོ་འཕྲུལ་ཡིན་པས་མ་ཆགས་ཤིག །རྣམ་རྟོག་ཡེ་ཤེས་བདེ་ཆེན་ཡིན་པས་སྤང་དུ་མེད། །འཁོར་འདས་སེམས་ཀྱི་སྣང་བ་ཡིན་པས་ལོགས་ན་མེད། །ཅི་སྣང་ཕྱག་རྒྱ་ཆེན་པོ་ཡིན་པས་བསྒྲུབ་ཏུ་མེད། །ཅེས་གསུངས་ནས་གཤགས་སོ། །དེས་ནས་ངས་ཀྱང་བསྒྲུབ་པ་རང་བབ་ཞིག་བྱས་ཏེ། རི་ཁྲོད་དང་གངས་ཁྲོད་འབའ་ཞིག་འགྲིམས། དགུན་ཕལ་ཆེར་ཡང་བལ་པོ་རྫོང་གསེབ་ཏུ་བསྡད། དང་པོ་རས་མང་དུ་གྱོན། དེ་ནས་ཕྱིས་ད་རས་དེ་མངོན་མཚན་ཆེ་བར་འདུག་པས། རེ་བའི་གོས་ཀྱང་བག་རེ་གྱོན་པ་ཡིན། ང་ལ་འཇིག་རྟེན་པའི་སྣང་བ་འདི་ཡི་ཟང་ཟིང་གིས་དགོས་པ་མེད་དེ། རང་དགེ་སྦྱོར་ཅི་འཕེལ་བྱས། རྗེ་བཙུན་ངན་ཚོང་རས་པ་འདས་ནས། ཕྱི་དེ་ལོ་དེ་ལ་ཁོང་འདས་པའི་ཟླ་བ་དེར་སོང་ཙམ་ན། སྙིང་མ་དགའ་བ་གཅིག་བྱུང་ནས། བླ་མ་ལ་ཏིང་འཛིན་གྱི་པུ་ཙ་གཅིག་ཕུལ་ནས་གསོལ་བ་བཏབས་པས། བླ་མ་རྨི་ལམ་དུ་བྱོན་ནས་རྡོ་རྗེའི་མགུར་འདི་གསུངས། རྗེ་བླ་མའི་སྐུ་ལ་ཕྱག་འཚལ་སྐྱབས་སུ་མཆི། །མ་མཁའ་འགྲོའི་ཚོགས་ཀྱི་བྱིན་གྱིས་རློབས། །བདག་རྟོག་མེད་ཀྱི་རྣལ་འབྱོར་རས་པ་ལ། །བུ་སྙིང་སྟོབས་ཅན་དེ་གསོལ་འདེབས་པ། །སེམས་གདུང་བ་གཅོད་པའི་གླུ་འདི་ཉོན། ཁྱོད་འཇིག་རྟེན་གྱི་བྱ་བ་བློས་ཐོང་ལ། །རྩེ་ཅིག་སེམས་ཀྱིས་བསྒྲུབ་པ་གྱིས། །མ་མཁའ་འགྲོ་རྣམས་ཀྱིས་བར་ཆོད་སེལ། །རྣམ་རྟོག་གི་བདུད་ཚོགས་འབྲོས་པར་འགྱུར། གནས་རི་ཁྲོད་མཐོ་བ་འགྲིམ་ཙམ་ན། ཡིད་སྐྱོ་བའི་རླུང་གིས་བསྐྱོད་གྱུར་ཀྱང་། །བླ་མ་ལ་གསོལ་བ་རྒྱུན་དུ་ཐོབ། །བྱིན་རླབས་ཀུན་ཤུགས་ལས་འབྱུང་བར་འགྱུར། །མཚོ་བའི་མཐུན་རྐྱེན་ཉུང་བ་ན། །བདུད་རྩི་རྟོགས་མེད་ཀྱི་བཅུད་ལེན་གྱིས། །བརྒྱག་ཆུ་ལ་གྱིས་ཅིག་བརྩོན་འགྲུས་ཅན། །མཁའ་འགྲོ་རྣམས་ཀྱི་འཚོ་བ་སྦྱོར། །རིག་པ་བདེ་གསལ་དུ་ཤར་ཙམ་ན། །ཉམས་བཟང་ངན་ལ་མ་ཞེན་རྣལ་འབྱོར་པ། །རང་བྱུང་གི་ཡེ་ཤེས་ཆེན་པོ་ལ། །རང་གཞན་ཀྱི་དོན་རྣམས་རྫོགས་པར་འགྱུར། །དེ་གོའམ་རྟོགས་སམ་སྐྱེས་བུ་ཁྱོད། །སེམས་སྤྲོས་པ་ཆོད་ལ་ཉམས་མྱོང་སྐྱོང་། །ཞེས་གསུངས་པས། དུས་དེར་སྣང་བ་འདི་ལོགས་སུ་གྲུབ་པ་མི་འདུག །རང་གི་སེམས་འདི་གདོད་མ་ནས་སྐྱེ་བ་མེད་པའི་རང་བཞིན་ཅན་དུ་འདུག །གང་ལ་ཡང་བརྩོན་འགྲུས་དང་རེ་དོགས་བྱ་རྒྱུ་མེད། ད་རང་གི་སེམས་འདི་ཡེ་ནས་སངས་རྒྱས་གཅིག་རང་དུ་འདུག་སྙམས་པ་དང་། གཉིད་སད་ཙམ་ན། སྔར་མ་ཤར་བའི་རྟོགས་པ་ཁྱད་པར་ཅན་གཅིག་གཏིང་ནས་གོ་ནས་འདུག་སྟེ། བློ་དང་བྲལ་བའི་ལྟ་བ་གང་གིས་ཀྱང་མ་རེགས། མ་དམིགས། རྟོགས་པ་གཅིག་གོ་ནས་འདུག་སྟེ། དུས་དེ་ནས་ཏིང་ངེ་འཛིན་ཀྱི་རོ་ལ་ཆགས་པ་དེ་ཡལ། རིགས་པ་རང་དངོས་སུ་སོང་ནས་འདུག་གསུང་ངོ་། །དེ་ནས་དེ་བཀའ་བཞིན་བླ་མ་ལ་གསོལ་བ་བཏབས་ཤིང་རི་ཁྲོད་འགྲིམས། འཁོར་དང་ཟང་ཟིང་ལ་དགོས་པ་མེད་པས་མ་བསྐྱངས། ཆོས་གཅིག་པུ་འདི་ལས་མེད། བླ་མ་ཡང་གཅིག་པུ་དེ་རང་། སྣོད་ལྡན་གྱི་གང་ཟག་བྱུང་ན་གདམས་ངག་འདི་གཅིག་ལ་སྦྱིན་སྙམ་པ་ཡིན་ཏེ། ཁྱོད་ལ་སྦྱིན་པ་འདི་ཡིན། སྔར་ངས་བྱིན་པ་མེད། ད་རུང་དུ་ཡང་གཞན་སྦྱིན་སྙམ་པ་མེད། ད་རེས་ཁྱེད་དང་ཕྲད་པ་དེ་དགའ་བ་གཅིག་བྱུང་ན་ནི་ཙ་རི་ཙ་ཀོང་དེ་ལྟར་ཕྱིན་ནས་ཚུར་ལོག་པ་དེ་དོན་ཆེ། ཁྱེད་ཀྱི་འགྲོ་བ་སེམས་ཅན་ལ་ཕན་ཐོགས་པ་གཅིག་འོང་བར་འདུག་པས། ད་སྙན་རྒྱུད་འདི་བཀའ་རྒྱ་ཁྲོལ་བ་ཡིན་ཏེ། དེ་སྐད་གསུངས་ནས་བླ་མ་དགུང་ལོ་བདུན་ཅུ་དོན་བརྒྱད་ལོན་པ་དང་། རིན་ཆེན་གླིང་པ་དང་འཕན་ཡུལ་རྒྱལ་དུ་མཇལ་ཙ་ན། ཡང་སྐུ་ལུས་ཤིན་ཏུ་བཟང་བར་འདུག་པ་དང་། ད་རུང་ལོ་གཅིག་གཉིས་ཐུབ་རེ་གསུངས་ནས། གདམས་པ་རྣམས་ཞག་བདུན་གྱི་བར་ལ། ཙར་ཀྱི་ཚར་བར་གནང་བའོ། །གསང་བ་རིན་པོ་ཆེ་རྒྱས་བསྡུས་གཉིས་ཀྱི་སྐོར། རྒྱའི་སྡོམ་བུ་བ་བདག་གིས་གདམས་ངག་འདི་དང་ཕྲད་ལུགས་ནི། དང་པོ་ནས་འདི་ལ་མོས་པ་གཅིག་ཡོད་པ་ལ། མཁས་པར་ཤེས་པ་མ་བྱུང་། དེ་ནས་སློབ་དཔོན་རིན་ཆེན་གླིང་པ་ལ་ཞུས་པས་མ་གནང་ནས། ཁོང་གི་སློབ་མ་ཁྱུང་ཚང་བའི་ལུགས་ཤེས་པ་གཅིག་ལ་ཞུས་དེ་ལ་སྐོར་དྲུག་ཏུ་བཅས་པ་རྒྱ་ཆེ་བར་འདུག །དེའི་ལུས་མེད་ཀྱི་ཆོས་ཞུས་ཙམ་ན། རྨི་ལམ་གྱི་ལྟས་ཁྱད་པར་ཅན་བྱུང། དེ་ནས་སྙལ་དུ་ཕྱིན་དུས་སུ། ཙང་དུ་འགྲོ་ཙམ་ན། རྨི་ལམ་དུ་རྗེ་མི་ལ་རས་པ་དཔོན་སློབ་གསུམ་དང་མཇལ་ནས། ནམ་མཁའ་ན་མར་ལ་གར་ཐབས་དང་བཅས་ནས། །འདི་སྐད་གསུངས། ཀྱེ་རྟོགས་པར་གྱིས་གཅིག་རྣལ་འབྱོར་པ། །བརྗོད་དུ་མེད་པའི་རང་བཞིན་ལ། །སྤྲོས་པའི་ཚིགས་དང་ཡི་གེའི་རྒྱན། །དོན་སྙན་རྒྱུད་བརྡ་ཡི་དགོངས་པ་དེ། །རྗེ་བླ་མའི་དྲིན་གྱིས་རྟོགས་པར་འགྱུར། །ཞེས་གསུངས་ནས། མི་སྣང་བར་གྱུར་ཏོ། །དེ་ནས་རྗེ་གུང་ཐང་བའི་ཆགས་ཕྱིར་ཕྱིན་ནས་རྗེ་དང་དམ་པ་དི་རིང་མཇལ་བའི་མདང་གི་རྨི་ལམ་ན། ལྷོ་ཕྱོགས་དཔལ་གྱི་རི་ལ་རྗེ་རི་ཁྲོད་དབང་ཕྱུག་ནམ་མཁའ་ལ་བཞུགས་པ་མཐོང་ནས་གསོལ་བ་བཏབས་པ། ནམ་མཁའ་ལ་གཟིགས་དང་གཅིག་མཛད། ཕྱག་ཡུག་ཡུག་མཛད་ནས། ཁོ་རང་ནམ་མཁའ་ལ་ཞི་ནས་སྤྲིན་དངས་པ་བཞིན་སོང་ནས་ང་སྙམ་ནས། དེ་རྣམས་བརྡ་རུ་འདུག དོན་སྐྱེ་མེད་ནམ་མཁའ་ལྟ་བུར་ཤེས་པར་གྱིས་གཅིག་པའི་བརྡར་གོ །དེ་ནས་བླ་མ་དང་མཇལ་བས། ཁྱོད་ལ་ཁ་ཟིན་ཞག་བདུན་གྱི་ནུབ་མོ་དེ་ཅི་འདྲ་བ་གཅིག་བྱུང་གསུངས་པས། མོས་པ་ཁྱད་པར་ཅན་སྐྱེས། རི་ཁྲོད་པའི་བརྡ་དང་ཕྱི་ལུས་མེད་དྷ་ཀི་མའི་ཆོས་དགུ་པོའི་བརྡར་འདུག །ངས་ཀྱང་བླ་མ་དེ་ལ་སངས་རྒྱས་ཀྱི་འདུ་ཤེས་སྐྱེས། བླ་མ་དེ་ལ་དད་གུས་བྱེད་གསོལ་བ་འདེབས་པ་ཡིན། ཁོ་རང་གི་མཚན་དྲིས་པས། གསང་མཚན་འདོད་ཆགས་རྡོ་རྗེ་ཡིན་གསུངས། མ་བཤད་གཅིག་གསུངས་ཏེ་གྲགས་པ་ནི། ལ་བ་པ་ཞེས་གྲགས་སོ། །དེ་ལྟར་བརྒྱུད་པའི་བླ་མ་དང་། བདག་རང་དང་དོན་གྲོལ་བྱེད་ལས་བསྟན་པར་བྱ། །ལྡོམ་བུ་པའི་བན་དྷེ་ཡོན་ཏན་བཟང་པོས། བླ་མའི་ཡོན་ཏན་ཅི་སྐད་གསུངས་པ་ལྟར་ཡི་གེར་བཀོད་པའོ།། ཱ།། །།