Sems nyid ngal gso - Part three

རྫོགས་པ་ཆེན་པོ་སེམས་ཉིད་ངལ་གསོ་ཞེས་བྱ་བ་བཞུགས་སོ།

།དེ་ལྟར་མི་རྟག་ཁམས་གསུམ་འཁོར་བའི་ཆོས།
།རྣམ་པར་འགྱུར་བས་ཤིན་ཏུ་སྡུག་བསྔལ་ཏེ།
།སྡུག་བསྔལ་འགྱུར་དང་འདུ་བྱེད་ཉིད་གསུམ་གྱིས།
།གྲོང་ཁྱེར་དྲུག་གི་འགྲོ་ཀུན་ཉམ་རེ་ཐག
།ཇི་ལྟར་མེ་ནང་གཅན་གཟན་མི་རྒོད་ཁྲོད།
།རྒྱལ་པོའི་བཙོན་རར་ཆུད་པའི་འགྲོ་བ་ལྟར།
།སྡུག་བསྔལ་སྔ་ཕྱི་བརྒྱུད་མས་མནར་བཞིན་དུ།
།ད་དུང་ཐར་པའི་སྐབས་མེད་སྐྱོ་བ་འཕེལ།
།བདེ་ཐོབ་སྡུག་བསྔལ་བྲལ་འདོད་བློ་ཡོད་ཀྱང།
།སྡུག་བསྔལ་རྒྱུ་འབྲས་ཉིད་ལ་མངོན་པར་རྒྱུག།

།མར་མེའི་འོད་ལ་ཕྱེ་མ་ལེབ་བཞིན་དུ།
།འདོད་པའི་ཡུལ་ལ་ཆགས་སྲེད་འཛིན་པས་བསླུས།
།དེ་བཞིན་རི་དབ༹གས་བུང་བ་ཉ་དང་གླང།
།སྒྲ་དང་དྲི་རོ་རེག་གིས་སླུ་བ་ལྟར
།འདོད་པའི་ཡུལ་ལྔ་དག་གིས་འགྲོ་བ་བསླུས།
།ནམ་ཡང་བདེ་མེད་སྡུག་བསྔལ་གྱུར་ལ་ལྟོས།
།ལྷ་དང་ལྷ་མིན་དམྱལ་བ་ཡི་དབ༹གས་མི།
།བྱོལ་སོང་རིགས་དྲུག་ཟོ་ཆུན་རྒྱུད་མོ་བཞིན།
།གཅིག་ནས་གཅིག་བརྒྱུད་སྡུག་བསྔལ་ཕ་མཐའ་ཡས།
།ཚེ་རབས་བགྲངས་ཚེ་སེམས་ཅན་རེ་རེས་ཀྱང།

།མཛའ་བཤེས་དགྲ་དང་བར་མའི་ཁུར་ཁྱེར་ནས།
།བདེ་སྡུག་ཕན་གནོད་སྦྱིན་པ་གྲངས་མཐའ་ཡས།
།ཕ་ཉིད་མར་གྱུར་མ་ཉིད་སྲིང་མོ་ཉིད།
།དེ་ཉིད་བུར་གྱུར་ངེས་པ་མ་མཆིས་ཤིང།
།མཛའ་བོ་དགྲར་གྱུར་པ་ཡང་ཐུག་པ་མེད།
།འདི་ལྟར་འཇིག་རྟེན་སྔ་ཕྱིའི་ལས་བསམས་ན།
།སྐྱོ་བ་བས་ཀྱང་ཤིན་ཏུ་སྐྱོ་བ་འཕེལ།
།རང་ཉིད་གྲོག་སྦུར་གྱུར་པའི་ལུས་རྣམས་ཀུན།
།གཅིག་ཏུ་བསྡོམས་ཏེ་ཕུང་པོར་བྱར་ཡོད་ན།
།ལྷུན་པོ་རིན་ཆེན་བཞི་པས་ཆེས་མཐོ་ཞིང།

།དུས་པའི་མཆི་མ་རྒྱ་མཚོ་བཞི་པས་ལྷག
།སེམས་དམྱལ་ཡི་དབ༹གས་གྱུར་ཚེ་འཐུངས་གྱུར་པའི།
།ཟངས་ཞུན་རྣག་ཁྲག་མི་གཙང་ཁུ་བ་རྣམས།
།ཕྱོགས་མཐའ་གཏུགས་པའི་ཆུ་ཀླུང་ཆར་མི་ཕོད།
།དེ་བཞིན་གཞན་རྣམས་དཔག་ཡས་ནམ་མཁའ་འདྲ།
།འདོད་ཕྱིར་མགོ་དང་ཡན་ལག་བཅད་པའི་གྲངས།
།འཇིག་རྟེན་རྡུལ་ཕྲན་སྙེད་ཀྱིས་ཆར་མི་ཕོད།
།བྱོལ་སོང་གྲུལ་བུམ་གནོད་སྦྱིན་ལྟོ་འཕྱེ་སོགས།
།འགྲོ་བའི་ཁམས་གྱུར་བདེ་སྡུག་གྲངས་མེད་མྱོང།
།ཚངས་དང་བརྒྱ་བྱིན་བསམ་གཏན་གཟུགས་མེད་དང།

།ས་གཞི་རིན་ཆེན་བདུན་གྱིས་ལེགས་སྐྱོང་བའི།
།མི་དབང་དཔལ་སྡེ་ཕུན་ཚོགས་དེ་ཐོབ་ཀྱང།
།ངན་འགྲོར་ལྟུང་བས་ཆེས་ཆེར་སྡུག་བསྔལ་ལོ།
།ཚེ་འདིར་འབྱོར་པ་མཐའ་ཡས་ཉམས་དགའ་བ།
།མཐོན་པོའི་རང་བཞིན་ཅན་རྣམས་ཚོ་འཕོས་ནས།
།དབུལ་བས་ཉམ་ཐག་ཡང་བྲན་ཉིད་གྱུར་པ།
།རྨི་ལམ་འབྱོར་པ་གཉིད་སད་མེད་པ་བཞིན།
།བདེ་སྡུག་མི་རྟག་འགྱུར་བའི་སྡུག་བསྔལ་ནི།
།ཤིན་ཏུ་བསམས་ན་ཆེས་ཆེར་སྐྱོ་བ་འཕེལ།
།དེ་བས་གྲོང་ཁྱེར་གསུམ་གྱི་སེམས་ཅན་རྣམས།

།འཁོར་བའི་བདེ་ལ་ཆགས་མེད་བྱང་ཆུབ་བསྒྲུབ།
།ལུས་ངག་ཡིད་གསུམ་འདོད་གཟུགས་གཟུགས་མེད་དེ།
།སྣང་དང་ཕྱེད་སྣང་མི་སྣང་གྲོང་ཁྱེར་ནི།
།སྡུག་བསྔལ་འགྱུར་དང་འདུ་བྱེད་གསུམ་གྱིས་གདུངས།
།སེམས་དང་ཡིད་དང་རྣམ་ཤེས་མཆེད་པ་ཡིས།
།ཡུལ་རྣམས་བདེ་སྡུག་འཁྲུལ་འཁོར་རྒྱུན་མི་འཆད།
།ཀུན་གཞིའི་རྣམ་ཤེས་ཡིད་དང་སྒོ་ལྔའི་ཤེས།
།རིམ་བཞིན་མཆེད་པ་མཆེད་པའི་རིམ་པ་ཡིན།
།དེ་ལས་སྲིད་པའི་སྡུག་བསྔལ་རྒྱུ་འབྲས་འབྱུང།
།རྩ་བ་མ་རིག་གཟུང་འཛིན་འཁྲུལ་པ་ཅན།

།ཡུལ་དང་དོན་དང་སེམས་སུ་བག་ཆགས་པས།
།ང་དང་ང་ཡིར་འཛིན་པས་འཁོར་བ་གྲུབ།
།སེམས་ཉིད་འགྱུར་མེད་ཡོངས་གྲུབ་ཆོས་སྐུ་ཡང།
།མ་རིག་འཛིན་པས་ཀུན་བརྟགས་གོམས་པ་ཡིས།
།མ་དག་གཞན་དབང་ལྟར་སྣང་འཁྲུལ་པ་ཅན།
།ཡུལ་དོན་བདག་གཞན་གཉིས་སྣང་གཉིས་སུ་གཟུང།
།དེ་ལས་སྡུག་བསྔལ་དཔག་མེད་ལྷུག་གྱིས་གྲུབ།
།ནམ་ཞིག་འགྱུར་མེད་སེམས་ཉིད་དོན་རྟོགས་ནས།

།ཕྱིན་ཅི་མ་ལོག་ཡོངས་གྲུབ་ལམ་བསྒོམས་པས།
།དག་པ་གཞན་དབང་ཞིང་དུ་ལེགས་སོན་ཏེ།
།སྲིད་པའི་གྲོང་ལས་ངལ་གསོ་བྱེད་པར་འགྱུར།
།ཨེ་མ་བརྟག་དཀའ་འཁོར་བའི་ཕ་མཐའ་ཡས།
།སྲིད་ལམ་དུབ་པ་དག་གི་སྡུག་བསྔལ་ནི།
།གང་དུ་སྐྱེས་ཀྱང་བདེ་ལ་འགའ་མེད་དེ།
།མི་དགེས་བསྐྱེད་པའི་འབྲས་བུ་མི་བཟད་པ།
།རང་སྣང་ལོག་པས་རྨི་ལམ་ནང་བཞིན་དུ།
།འགྲོ་དྲུག་སོ་སོར་མྱོང་བའི་རང་བཞིན་ནོ།

།མེད་སྣང་འཁྲུལ་པས་སྡུག་བསྔལ་དཔག་ཏུ་མེད།
།རེ་ཞིག་མདོར་བསྡུས་ལུང་བཞིན་བཤད་ཀྱིས་ཉོན།
།ཡང་སོས་ལྕགས་ཀྱི་མདག་མེ་འབར་བའི་སྟེང།
།ཕན་ཚུན་འདུས་ནས་མཚོན་གྱིས་སྲོག་དང་འབྲལ།
།ཡང་སོས་སྒྲ་ཡིས་སྔར་བཞིན་སྡུག་བསྔལ་བ།
།ལས་ཟད་བར་དུ་དེ་ལྟར་མྱོང་འཚལ་ལོ།
།ཚེ་ཚད་མི་ཡི་ལོ་གྲངས་ལྔ་བཅུ་ལ།
།རྒྱལ་ཆེན་རིགས་བཞིའི་ལྷ་ཡི་ཉིན་ཞག་གཅིག
།དེ་ཉིད་སུམ་ཅུ་ཟླ་བ་བཅུ་གཉིས་ལོ།
།ལྔ་བརྒྱས་ཡང་སོས་ཞག་གཅིག་གོང་འཕེལ་བས།

།རང་ལོ་ལྔ་བརྒྱར་སྡུག་བསྔལ་བརྣག་དགོས་སོ།
།དེ་ཉིད་རབ་ཏུ་དབྱེ་བའི་གྲངས་བཤད་པ།
།མི་ལོ་བྱེ་བ་ཕྲག་འབུམ་དྲུག་ཁྲི་དང།
།སྟོང་ཕྲག་གཉིས་སུ་ངེས་པར་མདོ་ལས་གསུངས།
།ཐིག་ནག་འབར་བའི་སོག་ལེས་གཤགས་བཞིན་འབྱར།
།འབྱར་བཞིན་གཤོག་པས་ཤིན་ཏུ་སྡུག་བསྔལ་བ།
།མི་ཡི་ལོ་བརྒྱ་རྩ་གསུམ་ཞག་གཅིག་སྟེ།
།དེ་ཡི་ལོ་སྟོང་ཐིག་ནག་ཞག་གཅིག་ལ།
།རང་ལོ་སྟོང་ཐུབ་མི་ལོ་བྱེ་བ་ཕྲག
།ས་ཡ་ཉིས་འབུམ་དགུ་ཁྲི་དྲུག་སྟོང་རྩ།

།བཅུ་གཉིས་བར་དུ་ཐུབ་པར་སྟོན་པས་གསུངས།
།བསྡུས་འཇོམས་བྲག་རི་རྟ་དང་རྔ་མོ་དང།
།སྟག་དང་སེང་གེ་ལ་སོགས་འདྲ་བའི་བར།
།རྡུལ་ཕྲན་བཞིན་འཇོམས་གྱེས་པས་སྔར་བཞིན་འཚོ།
།ལྕགས་ཀྱི་ལྗོངས་སུ་ཐོ་བས་རྡུལ་བཞིན་འཐག་
།རབ་ཏུ་བཙིར་བས་ཁྲག་གི་རྒྱུན་འབབ་པ།
།མི་ལོ་ཉིས་བརྒྱ་འཐབ་བྲལ་ཞག་གཅིག་སྟེ།
།མཚེ་མའི་ཉིས་སྟོང་བསྡུས་འཇོམས་ཉིན་ཞག་གཅིག
།རང་ལོ་སྟོང་ཕྲག་གཉིས་སུ་སྡུག་བསྔལ་ལོ།
།དེ་ཡང་མི་ལོ་བྱེ་བ་ཕྲག་སུམ་འབུམ།

།དྲུག་ཁྲི་བརྒྱད་སྟོང་རྩ་གཅིག་ཐུབ་པར་གསུངས།
།དུ་འབོད་འབར་བའི་མེས་འཚིག་འོ་དོད་འབོད།
།ལྕགས་ཞུན་བསྐོལ་བར་འཚེད་པས་སྡུག་བསྔལ་བ།
།མི་ལོ་བཞི་བརྒྱ་དགའ་ལྡན་ཉིན་ཞག་གཅིག་
།དེ་ཡི་བཞི་སྟོང་དུ་འབོད་ཞག་གཅིག་སྟེ།
།རང་ལོ་བཞི་སྟོང་བར་དུ་སྡུག་བསྔལ་བ།
།མི་ལོ་བྱེ་བ་ཕྲག་ས་ཡ་གཉིས་དང།
།བྱེ་བ་ཕྲག་དགུ་འབུམ་བཞི་ཁྲི་སྟོང་དང།

།བྱེ་བ་བདུན་ཕྲག་བར་དུ་ཐུབ་པའོ།
།འབོད་སྒྲོགས་ཆེན་པོ་ལྕགས་ཁྱིམ་འབར་བ་རུ།
།འབར་བའི་མེས་བསྲེགས་གཤིན་རྗེས་འཚོག་པར་བགྱིད།
།མི་ལོ་བརྒྱད་བརྒྱ་འཕྲུལ་དགའི་ཞག་གཅིག་སྟེ།
།དེ་ལོ་བརྒྱད་སྟོང་དུ་འབོད་ཚེའི་ཞག་གཅིག
།རང་ལོ་བརྒྱད་སྟོང་ཉིད་དུ་སྡུག་བསྔལ་བ།
།མི་ལོ་བྱེ་བ་ཕྲག་ས་ཡ་གསུམ་དང།
།བྱེ་བ་ཕྲག་ལྔ་འབུམ་ལྔ་ཁྲི་ཉིས་སྟོང།

།དྲུག་ཅུ་རྩ་དྲུག་བར་དུ་ཐུབ་པ་ཡིན།
།ཚབ་ལྕགས་ཁང་ནང་ཞུགས་མདུང་ཐུང་གིས།
།ཀླད་པ་འགེམས་ཤིང་ཐོ་བས་རབ་ཏུ་བརྡུང།
།འབར་བའི་མེ་ལྕེས་ཕྱི་ནང་ཀུན་ཏུ་བསྲེག་
།མིའི་ལོ་སྟོང་དང་དྲུག་བརྒྱ་གཞན་འཕྲུལ་ཞག
།དེ་ཡི་ལོ་ཁྲི་དྲུག་སྟོང་ཚ་བའི་ཞག་
།རང་ལོ་ཁྲི་དང་སྡུག་སྟོང་པར་ཐུབ་པ།
།མི་ལོ་བྱེ་བ་ཕྲག་ས་ཡ་བརྒྱད་དང།
།བཞི་འབུམ་དང་ནི་བྱེ་བ་ཁྲག་ཁྲིག་ཕྲག་

།དྲུག་སྟོང་ལྔ་བརྒྱ་སུམ་ཅུ་སྙེད་མཆིས་སོ།
།རབ་ཏུ་ཚ་བ་ལྕགས་ཁྱིམ་ཉིས་རིམ་ནང།
།འབར་བའི་མེ་དང་མདུང་རྩེ་གསུམ་པས་བསྣུན།
།སྤྱི་བོ་ཕྲག་པ་གཉིས་ཕྱུང་ལེབ་མས་དཀྲིས།
།ཟངས་ཆེན་ཁོལ་མར་འཚེད་པས་སྡུག་བསྔལ་བ།
།ཚེ་ཚད་བར་གྱིས་བསྐལ་པ་ཕྱེད་ཐུབ་སྟེ།
།མི་ལོའི་གྲངས་ཀྱིས་གཞལ་བའི་ཡུལ་ལས་འདས།
།འཇིག་རྟེན་ཆགས་གནས་འཇིག་སྟོངས་བསྐལ་ཆུང་བཞི།
།བར་བསྐལ་གཅིག་སྟེ་བརྒྱད་ཅུ་བསྐལ་ཆེན་ནོ།
།མནར་མེད་ལྕགས་ཁང་མེ་ལྕེ་འབར་བའི་ནང།

།སེམས་དམྱལ་ཀུ་ཅོ་སྨྲེ་སྔགས་འདོན་པ་ལས།
།མེ་དང་སེམས་ཅན་སོ་སོར་མཐོང་བ་མེད།
།མར་མེ་འབར་བ་སྙིང་པོ་ལ་ཞེན་བཞིན།
།སྲོག་གི་ཟུངས་ཙམ་མེ་ནང་དབུས་གནས་པ།
།བར་བསྐལ་གནས་པའི་ཡུན་གཅིག་བརྣག་དགོས་ཏེ།
།དེ་ལས་ཆེ་བའི་སྡུག་བསྔལ་གཞན་མེད་པས།
།མནར་མེད་བསྟིར་མེད་ཅེས་སུ་བཤད་པ་ཡིན།
།གོང་དུ་སྨོས་པའི་དམྱལ་བ་དེ་དག་ཀྱང།
།རིམ་བཞིན་མེ་ལྕེ་བདུན་འགྱུར་གྱིས་ཚ་ལ།
།འོག་མར་སྔ་མའི་སྡུག་བསྔལ་ལྷག་དང་བཅས།

།ཇི་སྲིད་ལས་མ་ཟད་པར་སྡུག་བསྔལ་མྱོང།
།ཉི་ཚེ་རི་དང་ལྗོན་ཤིང་ནམ་མཁའ་དང།
།བྲག་བར་མེ་ཆུ་ངེས་མེད་གནས་རྣམས་སུ།
།ཉུང་ངུར་གནས་དང་འདུས་དང་གཅིག་པུར་གནས།
།དེར་ནི་སྡུག་བསྔལ་གང་རུང་རེ་རེས་གདུངས།
།དེ་ཕྱིར་ཉི་ཚེ་བ་ཞེས་བཤད་པ་ཡིན།
།གཞན་དག་ཚེ་དང་ཁ་ཅིག་འདུས་པ་ཉུང།
།དེ་ཡིས་ཉི་ཚེར་འདོད་པ་འཁྲུལ་པ་སྟེ།
།བྲག་བར་སྡིག་གཟུགས་ཚེ་ཡང་རིང་ཡོད་ལ།
།ཉི་ཚེར་གདུགས་ཚོད་འདུས་པའི་ཉན་ཐོས་གཟུགས།

།ལྔ་བརྒྱ་ཕན་ཚུན་མཚོན་གྱིས་འདེབས་པར་གསུངས།
།ཉེ་འཁོར་མནར་མེད་ཁང་པའི་ཕྱི་རོལ་བཞིར།
།མེ་མར་མུར་དང་རོ་མྱགས་མཚོན་ཆའི་ཐང།
།ཆུ་བོ་རབ་མེད་བཞི་བཞི་བཅུ་དྲུག་གོ
།མནར་མེད་སྒོ་བྱེ་སྙམ་ལས་ཕྱིར་འཐོན་པས།
།འོབས་བཟང་གྲིབ་མ་མཐོང་ནས་ཕྱིན་མ་ཐག
།མདག་མེ་འབར་བ་པུས་མོ་ནུབ་བརྒལ་བས།
།ཤ་ཀུན་ཚིག་ནས་རུས་པ་ཀཱུནདའི་མདོག
།ཡང་སོས་སྔར་བཞིན་ཤིན་ཏུ་སྡུག་བསྔལ་ལོ།
།ཡང་ནི་བསིལ་བའི་འདམ་མཐོང་ཞུགས་མ་ཐག

།རོ་མྱགས་རོལ་དྲི་ང་བའི་འདམ་བྱིང་ནས།
།ལྕགས་ཟངས་གསེར་གྱི་མཆུ་ཅན་སྲིན་བུས་འབིགས།
།སླར་ཡང་ཐང་ཉམས་དགའ་མཐོང་ཕྱིན་མ་ཐག
།སྤུ་གྲི་འབར་བས་དུམ་བུར་གཏུབས་ཤིང་འཚོ།
།ནགས་འདབ་ཡིད་འོང་གང་དུ་ཕྱིན་པ་ལས།
།རལ་གྲིའི་ནགས་ཚལ་ལས་རླུང་འཁྲུག་པས་བཅོམ།
།དེ་འདས་རི་བོ་རབ་ཏུ་ཉམས་དགའི་རྩེར།
།སྔོན་གྱི་ཡུལ་འབོད་མཐོང་སྟེ་ཕྱིན་པ་ལས།
།ལྕགས་ཀྱི་ཐུར་མ་རྣོན་པོས་ཤ་ཁྲག་གཟགས།

།སྟེང་དུ་སོན་ཚེ་བྱ་རྒོད་ཀླད་པ་འགེམས།
།སླར་ཡང་རི་ཡི་དྲུང་ནས་འབོད་པ་སྙམ།
།འཐུར་དུ་བབས་པས་ཐུར་མས་གྱེན་དུ་གཟགས།
།ཐང་མཚམས་སྐྱེས་པ་བུད་མེད་མཆེ་རྣོན་ཅན།
།འབར་བས་འཁྱུད་དེ་ཤིན་ཏུ་སྡུག་བསྔལ་ཞིང།
།ཁྱི་དང་ཅེ་སྦྱང་མང་པོས་ཟ་བར་བགྱིད།
།ཡང་ནི་བསིལ་བའི་ཆུ་ཀླུང་འབའ་མཐོང་ནས།
།དགའ་བས་སོང་སྟེ་རབ་ཏུ་འབོག་མ་ཐག
།ཐལ་ཚན་རྐེད་ནུབ་ཤ་རུས་ཚིག་གྱུར་ཅིང།
།འགྲམ་གཉིས་གཤིན་རྗེའི་སྐྱེས་བུས་བསྲུང་བར་མཐོང།

།དེར་ནི་ལོ་སྟོང་མང་པོར་སྡུག་བསྔལ་ལོ།
།དེ་ལྟའི་དམྱལ་བར་སུ་ཞིག་འཇིགས་མི་བྱེད།
།སྲིད་ན་དེ་འདྲའི་སྡུག་བསྔལ་དཔག་ཏུ་མེད།
།རང་བཞིན་ཤེས་ནས་འདའ་བའི་ཐབས་འཚལ་ལོ།
།གྲང་བས་ཉམ་ཐག་པ་ཡང་རྣམ་པ་བརྒྱད།
།གངས་སོགས་ཤིན་ཏུ་གྲང་བའི་གནས་དག་ཏུ།
།མུན་ནག་བུ་ཡུག་འཚུབས་པས་སྦྲེབས་པའི་ལུས།
།ཆུ་བུར་ཅན་དང་ཆུ་བུར་རྡོལ་བ་ཅན།
།གྲང་བས་སོ་འཐམས་སྨྲེ་སྔགས་ཨ་ཆུ་ཟེར།
།ཀྱི་ཧུད་ཨཱུཏཔ་ལ་ལྟར་གས་པདམ་དང།

།པདམ་ཆེ་ལྟར་གས་པའི་རྨ་ནང་དུ།
།སྲོག་ཆགས་མཆུ་རྣོན་འབར་བས་ཟ་བ་ནི།
།ཇི་སྲིད་ལས་མཐའ་གཏུགས་ཚེ་གཡོ་བར་འགྱུར།
།ཚེ་ཡི་ཚད་ནི་ཀོ་ས་ལ་ཡི་ཁལ།
།བཅུ་ཚད་ཉི་ཤུ་ཤོང་བའི་ཏིལ་རྫང་ནས།
།ལོ་བརྒྱར་ཏིལ་གཅིག་ཕྱུང་བས་ཟད་གྱུར་པ།
།ཆུ་བུར་ཅན་ཚོ་ལྷག་མ་ཉི་ཤུར་འགྱུར།
།སེམས་ལྡན་དག་གིས་སེམས་དམྱལ་འཇིག་རྟེན་ལས།
།རབ་ཏུ་རྒྱལ་ཕྱིར་བརྩོན་པའི་སྟོབས་སྐྱེད་ཅིག
།ཡི་དབ༹གས་བྱིངས་མཁར་རྒྱུ་བའི་བྱིངས་གནས་པ།

།ལུས་ཆེ་རྐང་ལག་ཕྲ་ཞིང་ལྟོ་བ་ཡངས།
།མགྲིན་པ་ཕྲ་ཞིང་ཁབ་ཀྱི་མིག་ཙམ་ཁ།
།ཟས་སྐོམ་མི་རྙེད་བཀྲེས་སྐོམ་འབར་བས་གདུངས།
།སྨན་ཤིང་མེ་ཏོག་ལ་སོགས་མཐོང་བས་བསྐམས།
།ཕྱི་རོལ་ཡིད་དུ་མི་འོང་ངན་སྐྱུགས་ཟ།
།ཟས་སྐོམ་མཐོང་ཡང་བསྲུང་བར་སྣང་བ་དང།
།ནང་གི་སྒྲིབ་པས་ལྟོ་བར་མེ་འབར་ཞིང།
།ཁ་ནས་མེ་ལྕེ་དུད་པར་བཅས་པ་འཐུལ།
།སྤྱི་མཐུན་སྒྲིབ་པས་དབུལ་ཕོངས་འཇིགས་སྔངས་འཚེ།
།ཉམ་ངའི་གནས་ས་མགོན་མེད་སྡུག་བསྔལ་ཉེན།

།མཁའ་ལ་རྒྱུ་བའི་ཡི་དབ༹གས་འདྲེ་རྣམས་དང།
།གནོད་སྦྱིན་སྲིན་པོ་བཙན་དང་རྒྱལ་པོ་སོགས།
།ལས་ཀྱི་རྫུ་འཕྲུལ་ཐོགས་མེད་ཀུན་ཏུ་རྒྱུ།
།གནོད་པ་སྣ་ཚོགས་མངོན་པར་བསྒྲུབ་པ་སྟེ།
།ནད་གཏོང་མདངས་འཕྲོག་ཚེ་ལ་བར་དུ་གཅོད།
།ཚེ་ཚད་མི་ཡི་ཟླ་བར་ཉིན་ཞག་གཅིག
།རང་ལོ་ལྔ་བརྒྱ་མི་ལོ་ཁྲི་ལྔ་སྟོང།
།གཤིན་རྗེའི་འཇིག་རྟེན་དག་ཏུ་སྡུག་བསྔལ་ལོ།
།དེ་ལྟའི་རང་བཞིན་སྐྱོ་བའི་ཚུལ་མཐོང་ནས།
།དོན་མཐུན་སྐྱེ་བོས་ཐར་པ་བསྒྲུབ་པའི་ཕྱིར།

།སྲིད་པ་དགའ་བའི་བློ་གྲོས་རྒྱང་བསྲིངས་ཏེ།
།ངེས་པར་ཞི་བ་དམ་པའི་ཆོས་བསྒྲུབ་བོ།
།དུད་འགྲོ་བྱིངས་གནས་ཆུ་གཏེར་བཞི་ཡི་ཁྱོན།
།གཅིག་གིས་གཅིག་ཟ་སྡུག་བསྔལ་དཔག་ཏུ་མེད།
།གླིང་བར་མུན་ནག་རྒྱ་མཚོར་ནགས་པ་ཡང།
།ཚ་གྲང་བཀྲེས་སྐོམ་གཅིག་ཟའི་འཚེ་བས་འཇིགས།
།ཁ་འཐོར་མི་ཡུལ་བྱ་དང་རི་དབ༹གས་སོགས།
།རྔོན་པས་གཙེ་ཞིང་རང་རང་གནོད་པས་ཉེན།
།རྟ་གླང་རྔ་མོ་ར་དང་བོང་བུ་སོགས།
།བཀོལ་སྤྱད་རྡེག་འཚོག་སྡུག་བསྔལ་མཐའ་ཡས་ཤིང།
།ཤ་དང་པགས་པ་རུས་པའི་ཕྱིར་འཆི་བས།
།རང་བཞིན་སྡུག་བསྔལ་ཕ་མཐའ་མི་མངོན་ཞིང།

།ཀླུ་རྣམས་ཉིན་མཚན་ཕྱེད་མའི་བདེ་སྡུག་དང།
།སྔ་དྲོ་ཕྱི་དྲོ་འགྱུར་བའི་བདེ་སྡུག་དང།
།ཁ་ཅིག་གནས་སུ་ཕྱེ་ཚན་ཆར་འབབ་ལ།
།ལ་ལ་གཅིག་པུར་གྲོགས་བྲལ་ཕོངས་པས་ཉེན།
།ཕལ་ཆེར་རྨོངས་དང་མཁའ་ལྡིང་འཇིགས་ལ་སོགས།
།སྡུག་བསྔལ་རྣམ་པ་སྣ་ཚོགས་དུ་མ་ལྡན།
།ཚེ་ཡང་མ་ངེས་ཁ་ཅིག་ཉིན་རེ་ལ།
།འཇོག་པོ་ལ་སོགས་བསྐལ་པར་གནས་པའང་གསུངས།
།འདི་དག་བསམས་ནས་བྱོལ་སོང་འཇིག་རྟེན་ལས།
།ཐར་འདོད་རྣམས་ཀྱིས་ཕན་བདེ་བསྒྲུབ་པའི་ཕྱིར།

།མངོན་མཐོ་ངེས་ལེགས་ལམ་བཟང་སྲོལ་བཏོད་ལ།
།ཉིན་མཚན་བརྩོན་པས་དགེ་ལ་གཞོལ་བར་མཛོད།
།མི་རྣམས་ཡང་བདེ་བའི་སྐབས་མེད་དེ།
།མྱ་ངན་ཡིད་མི་བདེ་དང་འཁྲུག་ལ་སོགས།
།གཅིག་མ་སངས་པར་གཅིག་གིས་སྡུག་བསྔལ་དང།
།ཟས་སོགས་དུག་འདྲེས་ཟོས་པས་འགྱུར་བ་དང།
།ཟས་གོས་སྤྱོད་ལམ་ཉེས་པས་ནད་སོགས་སུ།
།ཕྱི་མའི་སྡུག་བསྔལ་འདུ་བྱེད་མཚོན་པ་སྟེ།
།སྡུག་བསྔལ་ཉིད་གསུམ་དག་དང་དེ་བཞིན་དུ།
།སྐྱེ་རྒ་ན་འཆི་མི་སྡུག་ཕྲད་པ་དང།

།སྡུག་བྲལ་འདོད་པས་ཕོངས་དང་ཉེ་བར་ལེན།
།རྣམ་པ་བརྒྱད་ཀྱི་སྡུག་བསྔལ་ཚད་མེད་དེ།
།མ་རིག་རྣམ་ཤེས་རླུང་སེམས་ཐིག་ལེར་འདུས།
།མེར་ནུར་ལྟར་མཁྲང་གོར་ཉ་རུས་སྦལ་འདྲ།
།རིམ་བཞིན་བདུན་ཕྲག་བདུན་དུ་ཆགས་པའི་ལུས།
།མ་ཡི་ངལ་དུབ་བཀྲེས་སྐོམ་ཚ་གྲང་སོགས།
།ཅུང་ཟད་ཙམ་ལའང་སྡུག་བསྔལ་དཔག་ཏུ་མེད།
།མུན་ནག་དོག་ཅིང་ཉམ་ང་དྲི་མི་ཞིམ།
།འཁུམས་པའི་སྡུག་བསྔལ་མི་བཟད་བརྣག་དགོས་སོ།
།བདུན་ཕྲག་བདུན་ནས་ཉི་ཤུ་རྩ་དྲུག་པར།

།དབང་པོ་ཡན་ལག་བ་སྤུ་ལ་སོགས་འགྲུབ།
།བདུན་ཕྲག་སུམ་ཅུ་རྩ་དྲུག་པར་སྙེད་དུ།
།ལུས་ཟུངས་བརྟས་དང་ཆེར་བསྐྱེད་གཡོ་བར་བྱེད།
།དེ་ནས་རུས་པའི་འཁྲུལ་འཁོར་བཙིར་བའི་བར།
།ལས་ཀྱི་རླུང་གིས་མགོ་མཇུག་སློག་པས་བཙའ།
།འཆི་བས་ཉེན་པའི་སྡུག་བསྔལ་བསྡུས་འཇོམས་འདྲ།
།བཙས་ནས་རེག་པས་པགས་པ་བཤུས་པ་བཞིན།
།ཁྲུས་བྱ་ཤ་བུར་སྤུ་གྲིས་རེག་དང་མཚུངས།
།རྒས་པའི་སྡུག་བསྔལ་ཤིན་ཏུ་བཟོད་དཀའ་བ།
།ལང་ཚོ་ཉམས་པས་ཀུན་གྱི་ཡིད་མི་འོང།

།སྟོད་རྨད་མི་ཐེག་འཁོར་བ་ལ་བརྟེན་ཅིང།
།ལུས་ཀྱི་དྲོད་ཉམས་ཟས་ཀྱང་འཇུ་བར་དཀའ།
།མཐུ་སྟོབས་ཉམས་པས་འགྲོ་འདུག་བསྒུལ་བསྐྱོད་དཀའ།
།འདོད་སར་མི་ཕྱིན་ལྷུ་ཚིགས་རྣམ་པར་འགྱུར།
།དབང་པོ་ཉམས་པས་མིག་འགྲིབ་གཟུགས་མི་མཐོང།
།སྒྲ་སྐད་མི་ཐོས་དྲི་རོ་རེག་མི་ཚོར།
།དྲན་པ་མི་གསལ་གཏི་མུག་གཉིད་དུ་བྱིང།
།ཡུལ་གྱི་ལོངས་སྤྱོད་ཉམས་པས་ཡོན་ཏན་ཆུང།
།ཟས་སོགས་ཞིམ་པོའང་དེ་ལས་ལོག་པར་སྣང།
།ཚེ་ཉམས་འཆི་བས་འཇིགས་དང་འདུ་ཤེས་འཁྲུག

།བྱིས་བཞིན་བཟོད་སྟོབས་ཆུང་ལ་བསྲན་མི་བཟོད།
།སྣུམ་ཟད་མར་མེ་ཇི་བཞིན་མྱུར་དུ་འགྲོ།
།ན་བའི་སྡུག་བསྔལ་ཤིན་ཏུ་བཟོད་དཀའ་བ།
།ལུས་ཀྱི་རང་བཞིན་འགྱུར་དང་ཡིད་མི་བདེ།
།ཡུལ་གྱི་ལོངས་སྤྱོད་ཡིད་དུ་མི་འོང་ཞིང།
།སྲོག་དང་བྲལ་བར་དོགས་པས་མྱ་ངན་སྐྱེ།
།སྡུག་བསྔལ་མི་བཟོད་སྨྲེ་སྔགས་འབྱིན་པར་བྱེད།
།འཆི་བའི་སྡུག་བསྔལ་ཤིན་ཏུ་ཆེན་པོ་ཡང།
།ཟས་གོས་གཏམ་དང་མལ་གྱི་ཐ་མར་ཉལ།
།སྲོག་ལུས་འཁོར་གཡོག་གཉེན་འདུན་ལོངས་སྤྱོད་འདོར།

།གཅིག་པུ་ས་ཚུགས་མེད་པར་འགྲོ་བས་འཇིགས།
།མི་སྡུག་པ་དང་ཕྲད་པའི་སྡུག་བསྔལ་ཡང།
།ཡིད་དུ་མི་འོང་གནོད་འཚེའི་འཇིགས་པས་ཉེན།
།བྱམས་ཤིང་སྡུག་པའི་ཡུལ་དང་བྲལ་བ་ཡང།
།མྱ་ངན་སྨྲེ་སྔགས་ཡིད་མི་བདེའི་གཞི།
།ཡོན་ཏན་རྗེས་དྲན་འདོད་པས་གདུང་བར་བྱེད།
།འདོད་པ་རྣམས་ཀྱིས་ཕོངས་པའི་སྡུག་བསྔལ་ནི།
།དོན་མ་གྲུབ་པས་སེམས་ཀྱི་ཟུག་རྔུ་ལྡང།
།དབུལ་བས་ཉམ་ཐག་བཀྲེས་སྐོམ་ཡི་དབ༹གས་འདྲ།
།གཟུགས་ཚོར་འདུ་ཤེས་འདུ་བྱེད་རྣམ་ཤེས་ཏེ།

།ཉེ་བར་ལེན་པའི་ཕུང་པོ་ལྔ་པོ་ཡང།
།ཟག་བཅས་ཉིད་ཕྱིར་སྡུག་བསྔལ་ཀུན་གྱི་གནས།
།རྟེན་དང་སྣོད་དང་འབྱུང་ཁུངས་ལགས་པར་གསུངས།
།དེ་ལྟར་མི་ཡི་འཇིག་རྟེན་མཐའ་དག་ནའང།
།སྡུག་བསྔལ་རྒྱུ་འབྲས་ཉིད་ཕྱིར་བདེ་བ་མེད།
།དེ་ལས་ཐར་ཕྱིར་ལེགས་པའི་ཆོས་བསམས་ཏེ།
།འཁོར་བའི་གནས་ལས་ཐར་པའི་ཐབས་འཚལ་ལོ།
།ལྷ་མིན་རྣམས་ལའང་བདེ་བའི་སྐབས་མེད་དེ།
།དོན་མེད་འཐབ་རྩོད་འཁྲུག་ཅིང་ཞེ་སྡང་ལ།

།ལྷ་ཡི་དཔལ་ལ་མི་བཟོད་ཕྲག་དོག་ལྡན།
།གཡུལ་ངོར་སྡུག་བསྔལ་བརྒྱ་ཕྲག་བརྟེན་འཚལ་ལོ།
།དེ་བས་དགེ་ལེགས་ཞི་བའི་འགྲོ་བ་དག
།མྱུར་བ་ཉིད་དུ་ཐར་པའི་ཆོས་མཛོད་ཅིག
།འདོད་ལྷའི་གནས་ནའང་སྡུག་བསྔལ་ཚད་མེད་དེ།
།བག་མེད་འདོད་པས་མྱོས་དང་འཆི་འཕོ་ལྟུང།
།མེ་ཏོག་རྙིང་དང་སྟན་ལ་ཉམས་མི་དགའ།
།གྲོགས་ཀྱིས་སྤོང་དང་ཕྱི་མའི་གནས་ལ་འཇིགས།
།ཚོར་བ་མི་བཟད་ལྷ་ཡི་ཞགས་བདུན་འབྱུང།
།ཚངས་རིས་ལ་སོགས་གཟུགས་ཁམས་བསམ་གཏན་ལྷ།

།སྔ་མའི་ལས་ཟད་སྲིད་པ་འོག་མར་ལྟུང།
།འགྱུར་བའི་སྡུག་བསྔལ་མཐོང་ནས་སྡུག་བསྔལ་ལ།
།གཟུགས་མེད་ཞི་གནས་ལས་ཟད་ཚུལ་མཐོང་ནས།
།སྲིད་པ་ཕྱི་མར་འདུ་བྱེད་སྡུག་བསྔལ་ལྡན།
།མཐོ་རིས་ཐོབ་ཀྱང་ཡིད་བརྟན་མི་རུང་བས།
།སྐལ་བཟང་རྣམས་ཀྱིས་ཐར་པ་བསྒྲུབ་པར་བྱ།
།འཁོར་བའི་བདེ་ལ་ཆགས་པའི་འགྲོ་བ་ཀུན།
།མེ་ཡི་འོབས་སུ་སྲེད་པས་གདུང་བར་ཟད།
།འདི་ལྟར་ཐར་པ་རང་ལ་རག་ལས་ཤིང།
།ཐར་པའི་ཐབས་ནི་ལྷ་མིའི་སྟོན་པས་གསུངས།

།གཞན་གྱིས་གློ་བུར་འབྱིན་པའི་སྐབས་མེད་དེ།
།གཉིད་མྱོས་རྨི་ལམ་ལུས་ཀྱང་དགག་མེད་བཞིན།
།གལ་ཏེ་ནུས་ན་བདེ་གཤེགས་སྲས་བཅས་ཀྱི།
།ཐུགས་རྗེའི་ཟེར་གྱིས་འཁོར་བ་སྟོངས་ཟིན་ངེས།
།དེ་བས་རང་ཉིད་བརྩོན་པའི་གོ་བགོས་ཏེ།
།ཐར་ལམ་འཛེག་ལ་བརྩོན་པའི་དུས་ལ་བབ།
།གྲངས་མེད་འདས་པའི་སངས་རྒྱས་དེ་དག་གིས།
།གསོ་པའི་སྤྱོད་ཡུལ་མ་གྱུར་བདག་ལྟ་བུ།
།སྡིག་པའི་རང་བཞིན་སྲིད་ལམ་དགོན་པར་འཁྱམས།
།སྔར་བཞིན་བརྩོན་པ་མེད་ན་ཡོད་དང་ཡང།

།འགྲོ་དྲུག་གནས་སུ་སྡུག་བསྔལ་བྱེད་འདི་སོམས།
།འཁོར་བའི་སྡུག་བསྔལ་མཁའ་ལྟར་མཐའ་ཡས་ཤིང།
།མེ་ལྟར་མི་བཟད་ཡུལ་ལྟར་སྣ་ཚོགས་ལ།
།བཟོད་པའི་སེམས་ཁྱོད་གནས་མིན་སྨད་པའི་གནས།
།ངོ་ཚ་མི་ཤེས་ཁྲེལ་བག་བྲལ་བ་ལ།
།ཐུགས་རྗེའི་གོ་སྐབས་འཇུག་པར་ག་ལ་འགྱུར།
།ཐབས་མཁས་མཛད་པའི་ཕྲིན་ལས་དེ་ཡང་ནི།
།གདུལ་བྱའི་ལས་རྐྱེན་དག་ལས་འབྱུང་བར་གསུངས།
།དེ་བས་རང་གི་ཉེས་ཀུན་ཤེས་བྱས་ཏེ།
།འཁོར་བའི་སྡུག་བསྔལ་སྙིང་ནས་དྲན་བྱས་ལ།

།བདག་དང་འགྲོ་ཀུན་སྲིད་ལས་ཐར་བྱའི་ཕྱིར།
།ཞི་བའི་ལམ་ལ་ཡང་དག་འཛེག་པར་གྱིས།
།ད་ལྟའི་སྡུག་བསྔལ་ཅུང་ཟད་མི་བཟོད་ན།
།སྲིད་པའི་སྡུག་བསྔལ་མི་བཟད་ཇི་ལྟར་བཟོད།
།དེ་ལྟར་བཤད་ཀྱང་ཅུང་ཟད་མི་སྐྱོ་པ།
།བདག་སྙིང་ལྕགས་ཀྱི་གར་བུ་ཆེན་པོའམ།
།རྡོ་ཡི་ཁམས་བཞིན་སེམས་པ་མེད་པར་མངོན།
།འཁོར་བ་མི་བཟད་སྡུག་བསྔལ་ཅན་ཕུང་པོ།
།ཉོན་མོངས་ཉེ་བའི་ཉོན་མོངས་ཀུན་ཉོན་མོངས།
།རྣམ་པ་སྣ་ཚོགས་དུ་མའི་འབྱུང་ཁུངས་ལ།

།སེམས་ཤེས་སུ་ཞིག་སྲིད་པ་འཕེལ་བར་བྱེད།
།དེ་བས་མྱུར་དུ་སྲིད་ལས་རྒྱལ་བར་མཛོད།
།དེ་ལྟར་བདེ་འབྱུང་ཆོས་ཀྱི་དགའ་སྟོན་གྱིས།
།གྲོང་ཁྱེར་གསུམ་གྱི་འགྲོ་བ་ཇི་སྙེད་ཀུན།
།བདེ་དགའི་ཤས་འཚོ་སྣ་ཚོགས་སྡུག་བསྔལ་གྱིས།
།དུབ་པའི་སེམས་ཉིད་དི་རིང་ངལ་སོས་ཤིག
།རྫོགས་པ་ཆེན་པོ་སེམས་ཉིད་ངལ་གསོ་ལས།
།འཁོར་བ་སྡུག་བསྔལ་གྱི་ལེའུ་སྟེ་གསུམ་པའོ།