LONGCHENPA-PECIN-10-THA-016: Difference between revisions
LONGCHENPA-PECIN-10-THA-016
Longchenpa Project: generated page (21 November 2026) |
Longchenpa Project: Tibetan in the wiki's TibetanMachineUni font; «…» notes in small print (22 November 2026) |
||
| Line 25: | Line 25: | ||
}} | }} | ||
= Tibetan Text = | = Tibetan Text = | ||
<div class=" | <div class="TibetanMachineUni16 lcp-etext" lang="bo"> | ||
༄༅། །རྟེན་གཞི་ལུས་ཀྱི་གེགས་སེལ་བདུད་རྩིའི་<span class="lcp-mark">« »</span>ལྗོན་ཤིང་བཞུགས་སོ། ། | |||
<span class="lcp-note"><span class="lcp-mark">«</span>ཐུགས་རྗེའི་སྤྲིན་མཚོས་ཉེས་བརྒྱའི་ནད་སེལ་བ། །སྨན་པ་སྔོན་མེད་དེ་ལ་ཕྱག་འཚལ་ཏེ། །རྟེན་གཞིའི་ལུས་ལ་འབྱུང་བཞི་འདུ་བའི་ནད། །གང་དེའི་གེགས་སེལ་བདུད་རྩིའི་ལྗོན་ཤིང་བྲི། །དེ་ཡང་གདོད་མའི་ངང་ལས་མ་རིག་པས་འཁྲུལ་དུས་ངོ་བོ་དུག་གསུམ་གྱིས་རྒྱུ་བྱས། རྐྱེན་འབྱུང་བ་བཞི་འདུས་པ་ལས་རླུང་མཁྲིས་བད་ཀན་གསུམ་དུ་བྱུང་སྟེ། སོ་སོའི་རྩལ་མ་སྙོམས་པ་ལས་ནད་དུ་གྱུར་པ་རྣམས་ཀྱང༌། བསྡུ་ན་ཚ་གྲང་གཉིས་སུ་འདུས་པས། དེའི་གཉེན་པོར་ལུས་ཀྱི་སྟོད་སྨད་གར་ན་ཡང༌། ཚ་བའི་ནད་ལ་བསིལ་བའི་དམིགས་པ་དང༌། གྲང་བའི་ནད་ལ་དྲོ་བའི་དམིགས་པས་གདོན་པར་བྱ་སྟེ། ལུས་ལ་རྩ། རྩ་ལ་རླུང་དང་ཁྲག་དང་ཁམས་གནས་ཤིང༌། དེའི་ནང་ན་ཡི་གེ་གནས་ཏེ། ལུས་དང་རླུང་གི་གནད་བསྟུན་ནས་ཡི་གེ་བརྗོད་པས། རྩ་ནང་གི་ཡི་གེ་གསལ་བས་ནད་ཐོན་པར་འགྱུར་བའི་ཕྱིར། གནད་དེ་ལྟ་བུས་གདོན་པར་བྱའོ། །དེ་ལ་སྔོན་འགྲོ་བླ་མའི་རྣལ་འབྱོར་ན་སར་བསྒོམ་པའི་སྐུ་ལས་བདུད་རྩིའི་རྒྱུན་བབས་པས་ནད་དེ་སངས་སངས་དག་པར་བསམ་ལ། གསོལ་བ་སྙིང་ནས་གདབ་བོ། །དངོས་གཞི་ལ་གཉིས་ལས། སྐུ་གསུང་ཐུགས་ཀྱི་ཡི་གེ་གསུམ་གྱིས་སྤྱིར་ནད་བསལ་བ་ནི། སྤྱི་བོ་ནད་ཡ་རྐན་ཡན་ཆད་གང་ན་ཡང་ཨཱོཾ་གྱིས་བྱ་སྟེ། ཚད་པའི་ནད་དམ་བད་མཁྲིས་ན་བའི་སར། ཨཱོཾ་དཀར་བསིལ་ལས་བདུད་རྩིའི་རྒྱུན་བབས་པས། ཚད་ནད་ཐམས་ཅད་མེ་ལ་ཆུ་བཏབ་པ་ལྟར་ཞི་བ་དང༌། ཚད་ནད་ཨཱོཾ་ལ་འདུས་ཏེ་ཁོལ་བུར་སྐར་ཁུང་ནས་བྱེའུ་འཕུར་བ་ལྟར་དོན་པར་བསམས་ལ། ཨཱོཾ་ཧ་ཞེས་དྲག་པོ་བརྗོད་ནས། རླུང་ཕྱིར་འཕངས་ཤིང་ནང་དུ་མི་གཟུང་ངོ༌། །གྲང་བ་དང་རླུང་ཡིན་ན་ཨཱོཾ་དམར་པོ་ལས་བདུད་རྩི་མེ་ལྟ་བུ་བབས་པས་ནད་བསྲེགས་པར་བསམས་ལ། ཨཱོཾ་ཧཱུྃ་ཞེས་རིང་པོས་རླུང་ཚུར་རྔུབ་སྟེ་གནན་ཞིང༌། ཕར་འགྲོ་དུས་ནད་རྣམས་སངས་སངས་སོང་བར་བསམས་པས་ཞི་བར་བྱེད་དོ། །མགྲིན་པའི་མ་རྐན་ནས་ནུ་མའི་གོང་ཡན་ཆད་ལ་ཨཱཿདང༌། སྙིང་ཀ་མན་ཆད་ཐམས་ཅད་ལ་ཧཱུྃ་གིས་བྱ་བ་དང༌། དམིགས་པ་དང་གནད་ཐམས་ཅད་འདྲ་བས་ཐོན་ནོ། །ཡི་གེ་སོ་སོས་བྱ་བ་ནི། མགོ་ན་བ་ལས་སྣ་མང་པོའི་དུགས་བྱ་ཞིང༌། གྷ་དབུགས་ཀྱིས་ཐུབ་ཐང་བཟླས་ཏེ། ཕྱིར་གདོན་པ་དང༌། ནང་དུ་རླུང་བསྐྱིལ་བ་ནི་གོང་དང་འདྲའོ། །རྨའི་ནད་ལ་དང་པོ་ཁྲག་གཅད་པ་ནི། ཨཱོཾ་སུ་ཏྲ་ཕཊ་ཅེས་བདུན་བཏབ་པས་ཆོད་པ་དང༌། རླུང་སེམས་ནམ་མཁར་གཏད་དེ་དྲི་ཆུའི་དྭངས་མ་དྲོད་མ་ཡལ་བ། ས་སྦྱིན་པོ་བསྲེས་ཏེ་བྱུགས་ལ། གྷ་དཀར་སེར་བསམ་ནས། བདུད་རྩི་བབས་པས་སོས་པར་བསམས་ལ། གྷ་མང་དུ་འདོན་ཞིང་སྐབས་སུ་དྲི་ཆུས་བཀྲུས་པས་ འཚོའོ། །རོ་སྟོད་ན་བ་ལ་ལུས་འདར་བཤད་དུ་བྱེད་ཅིང༌། ཧ་དྲག་པོ་བརྗོད་པའམ། ཡཾ་མང་དུ་བཟླས་ཤིང་རྒྱུ་མ་གྱེན་ལ་འུབ་ཀྱིས་དྲངས་ཏེ། རླུང་དང་བསྲེས་པས་ཕན་ནོ། །རྐང་པ་ན་བ་ལ་ཡན་ལག་འགལ་མེ་ལྟར་བསྐོར་ཞིང་ཕུ་བརྗོད་དོ། །མིག་ན་བ་ལ་དྷ་དང༌། རྣ་བ་ལ་མཾ་དང༌། སྣ་ལ་ཛ་དང༌། ལྕེ་ལ་ཊཱཾ་དང༌། ལུས་ཀྱི་དབང་པོ་ལ་ཤའོ། ཁོལ་བུར་ཟེར་བ་དང༌། ཕོ་ལོག་དང༌། སྐྲན་བྱུང་བ་ལ་རླུང་སེམས་ལྟེ་བར་གཏད་ལ་རཾ་བརྗོད་དོ། །ཕོ་བ་འཁྲིལ་བའམ་འབྱམས་པ་ལ་ལག་པ་མཉེ་ཞིང་ཀྵ་བརྗོད་པའོ། །གློ་མཆིན་ན་བ་དང༌། ཡི་ག་འཆུས་པ་དང༌། གློ་ལྡང་བ་རྣམས་ལ་ཀ་གདོན་ཞིང་རླུང་ཕྱིར་འཕངས་སོ། ། སྙིང་རླུང་དང༌། སྨྱོ་ནད་དང༌། བརྒྱལ་འབོག་ཅན་ལ་ཁུ་ཚུར་སྙིང་ཀར་བརྡུང་པ་དང༌། རླུང་ཕྱིར་འཕངས་པ་དང༌། བྷ་དྲག་པོ་བརྗོད་པ་གསུམ་དུས་གཅིག་ཏུ་བྱས་པའི་མཐར་རླུང་ནང་དུ་གཟུང་ངོ༌། །མཁལ་མ་འཁྲས་པ་དང༌། ཡན་ལག་བཤལ་བ་དང༌། གཞོག་མི་བདེ་བ་དང༌། རྩ་སྦྲིད་པ་དང༌། མཁྲིས་པའི་ནད་རྣམས་ལ། ཆུའི་འགྲམ་དུ་ཕཊ་བརྗོད་ཅིང༌། ནད་རྣམས་ཕཊ་ལ་འདུས་པ་ཆུའི་དཀྱིལ་དུ་སོང་བར་བསམ་ཞིང༌། ཁ་སྣ་ཆུ་ངོས་ལ་གཏད་དོ། །སྐབས་སུ་ཚ་དང་ས་སྣའི་དུགས་བྱའོ། །རྐང་པ་ཁོལ་བུར་ན་བ་དང༌། ཚིགས་ལ་ཆུ་སར་ཁོལ་བུར་ཞུགས་ཏེ་ན་བ་དང༌། སྒུར་བ་དང༌། ཞ་འཁུམས་ཐམས་ཅད་ལ་ལག་པ་གཡས་གཡོན་རལ་གྲི་བསྐོར་བའི་ཚུལ་དུ་བྱ་སྟེ། ཨེ་དྲག་ཏུ་བརྗོད་པའོ། ། སྐྲངས་པ་དང༌། ཤ་རོ་དང༌། ལྷོག་འབྲས་དང༌། སྦྲུལ་དང་སྡིག་པ་ལ་སོགས་པས་ཟིན་ན་དྲི་ཆེན་བྱུགས་ཏེ། རླུང་འཕངས་ལ་ཨཱུ་རིང་པོ་བརྗོད་པའོ། །ཆུ་དང་དྲི་མ་འགགས་ན། སྒལ་ཚིགས་ཁུར་ཚུར་ཀྱིས་བརྡུང་ཞིང་མཉེས་ཏེ་བཾ་བརྗོད་པའོ། །སྐད་འགགས་ན་རླུང་གྱེན་ལ་དྲངས་ཏེ་ཨཱི་བརྗོད་དོ། །དེ་ཐམས་ཅད་ཀྱི་ཚེ་ཚ་གྲང་གི་ནད་གང་ཡིན་ངོས་བཟུང་ལ། རླུང་དང་ཡི་གེའི་ཁ་དོག་དང་རེག་བྱ་སྔ་མ་ལྟར་ཤེས་པར་བྱ་སྟེ་གདོན་པ་ཡིན་ནོ། །དེ་ལྟ་བུའི་ཐབས་ཀྱང་ལན་བདུན་ནམ། ཉེར་གཅིག་གམ། ལོ་གྲངས་སམ། བརྒྱ་རྩ་བརྒྱད་དུ་བྱས་པས། མི་ཐོན་མི་སྲིད་པས་ན་འབད་པས་བྱ་བ་གལ་ཆེའོ། །ལན་རེ་ཙམ་གྱིས་ནི་མི་འགྲུབ་པས་ཤིན་ཏུ་མང་བར་བྱའོ། །གཞན་ཡང་བདེ་ཆེན་འཁོར་ལོར་ཨཱོཾ། ལོངས་སྤྱོད་འཁོར་ལོར་ཨཱཿ<span class="lcp-mark">»</span></span> <span class="lcp-note"><span class="lcp-mark">«</span>ཆོས་ཀྱི་འཁོར་ལོར་ཧཱུཾ། སྤྲུལ་པའི་འཁོར་ལོར་སྭཱ། བདེ་སྐྱོང་འཁོར་ལོར་ཧཱ་བསམས་ཏེ། ཚ་གྲང་གྱི་བྱེ་བྲག་ཤེས་པས། སྔ་མ་ལྟར་ལས་ཕྱི་ནང་གི་ནད་ལ་རླུང་དང་ཡི་གེ་བརྗོད་ནའང་སེལ་ལོ། །ཡང་གཞོགས་གཡས་ཐམས་ཅད་ལ་སྤྱི་བོ་ནས་རྐང་པ་གཡས་ཀྱི་མཐེ་བོང་གི་བར་དུ་ཚོན་རེ་བཅལ་བར། ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་དྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ་རྣམས་བསམ་ཞིང༌། གཡོན་ལ་འཁྱིད་རེའི་སར། ཨ་ཨཱ། ཨི་ཨཱི། ཨུཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ རྣམས་བསམ་སྟེ་སྔ་མ་ལྟར་འཁྱིད་གང་རེའི་ས་ཚོད་རྩིས་པ་དེའི་ཕྱི་ནང་གི་ནད་བྱུང་སར། སྔ་མ་བཞིན་བྱས་པས་ནད་ཐམས་ཅད་ལས་གྲོལ་བར་ངེས་པ་ཡིན་ནོ། །དེ་ལྟར་ནད་འདོན་གནད་ཀྱི་གདམས་པ་འདི། དུམ་དུམ་ཁྲིགས་དང་དུས་བཞི་མཉམ་སྦྱོང་སོགས། །ཟབ་མོའི་དོན་བསྡུས་ཉམས་སུ་བླང་བའི་གནད། ། གཅིག་ཏུ་དྲིལ་ནས་ལེགས་པར་བཀོད་པ་ཡིན། །བདག་གིས་གནད་འདི་མྱོང་བས་ཡིད་ཆེས་ཤིང༌། །གཞན་ལ་བསྟན་པས་ནད་ལས་རྣམ་པར་གྲོལ། །དེ་ཕྱིར་ཟབ་མོའི་གནད་འདི་གཅེས་པས་ན། །མངོན་སུམ་སྒོམ་པའི་གྲོགས་སུ་བཅང་བར་གྱིས། །དགེ་བ་དེ་ཡིས་མ་ལུས་འགྲོ་བ་ཀུན། །ནད་ཆེན་སྲིད་པའི་ཉོན་མོངས་ལས་གྲོལ་ཏེ། །བདུད་རྩིའི་བདག་པོ་དྲང་སྲོང་སྲིད་མེད་བུ། །རྒྱལ་བའི་གོ་འཕང་མཐའ་ཡས་ཐོབ་པར་ཤོག<span class="lcp-mark">»</span></span> <span class="lcp-mark">«</span>།གསང་བ་སྙིང་ཏིག་གི་གནད་ལས་རྟེན་གཞི་ལུས་ཀྱི་གེགས་སེལ་བདུད་རྩི་ལྗོན་ཤིང་ཞེས་བྱ་བ། ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་བཀོད་པ་རྫོགས་སོ།། །། | |||
</div> | </div> | ||
= Source = | = Source = | ||
This page is a cleaned copy of the following rywikitexts page, which stay unchanged: | This page is a cleaned copy of the following rywikitexts page, which stay unchanged: | ||
* [[Klong chen rab byams gsung 'bum/volume 010 300]] (revision 10685, 2020-03-22) | * [[Klong chen rab byams gsung 'bum/volume 010 300]] (revision 10685, 2020-03-22) | ||
Cleaning (21 November 2026): removed 1 running heads, 3 Word page fields. The «» marks are kept | Cleaning (21 November 2026): removed 1 running heads, 3 Word page fields. The «» marks are kept in the text: they enclose the small-print notes of the print, which are shown in small print with the marks hidden. | ||
Part of the [[Longchenpa Collected Works]] ([[Longchenpa Collected Works/About|about this project]]). | Part of the [[Longchenpa Collected Works]] ([[Longchenpa Collected Works/About|about this project]]). | ||
<headertabs/> | <headertabs/> | ||
Latest revision as of 21:16, 21 November 2026
ཡང་ཟབ་ཡེ་ཤེས་འཁོར་ལོ klong chen rab 'byams kyi gsung 'bum (pe cin 2009)· Volume 10(THA) རྟེན་པ་སྒོའི་གེགས་སེལ་སྒྲོན་མ་སྣང་བྱེད
| Title | རྟེན་གཞི་ལུས་ཀྱི་གེགས་སེལ་བདུད་རྩིའི་ལྗོན་ཤིང |
|---|---|
| Wylie | rten gzhi lus kyi gegs sel bdud rtsi'i ljon shing
|
| Author | Longchenpa ཀློང་ཆེན་རབ་འབྱམས་པ་དྲི་མེད་འོད་ཟེར། |
| Location | klong chen rab 'byams kyi gsung 'bum (pe cin 2009), volume 10(THA), text 16, pages 168–171 (BDRC scan pages) |
| Section | snying thig ya bzhi › bla ma yang tig
|
| Tibetan text | E-text from the typeset Pe cin edition (input 2020 on rywikitexts), cleaned 21 November 2026; not proofread against the print. |
| BDRC | MW1KG4884, outline 1.4.2.18 |
| Citation | Klong chen rab 'byams pa. rten gzhi lus kyi gegs sel bdud rtsi'i ljon shing. In Kun mkhyen klong chen rab 'byams kyi gsung 'bum, vol. 10, pp. 168–171. Pe cin: Krung go'i bod rig pa dpe skrun khang, 2009. BDRC MW1KG4884. |
| Notes | Title from the first line of the e-text; text boundaries and page numbers from the BDRC outline of MW1KG4884. |