Sems nyid ngal gso - Part five
རྫོགས་པ་ཆེན་པོ་སེམས་ཉིད་ངལ་གསོ་ཞེས་བྱ་བ་བཞུགས་སོ།
།དེ་ལྟར་ལས་འབྲས་མ་ནོར་ལེགས་པའི་ལམ།
།དམ་པ་རྣམས་ལ་ཉེ་བར་བརྟེན་ལས་འབྱུང།
།དུས་གསུམ་རྒྱལ་བ་སྲས་བཅས་ཉན་རང་ཚོགས།
།བྱང་ཆུབ་གསུམ་བརྙེས་དགེ་བའི་བཤེས་ལས་བྱུང།
།སྲིད་ན་མངོན་མཐོ་བདེ་བའི་ཤས་ཐོབ་པ།
།དེ་ཡང་དམ་པ་དག་ལ་བརྟེན་ནས་འབྱུང།
།དེ་ཕྱིར་སྐྱེ་བོ་དམ་པ་བསྟེན་པར་བྱ།
།ཇི་ལྟར་ཙནདན་ཤིང་ལ་འཁྲི་ཤིང་དང།
།མི་གཙང་འདམ་དུ་བརྟེན་པའི་ཀུ་ཤ་ལྟར།
།དམ་པ་བསྟེན་པས་རང་ཉིད་དམ་པར་འགྱུར་
།ངན་པ་བསྟེན་པས་རང་ཉིད་ངན་པར་འགྱུར།
།དེ་ཕྱིར་སྐྱེ་བོ་དམ་པ་བསྟེན་པ་དང།
།སྡིག་པའི་བཤེས་གཉེན་སྤངས་ལ་ནན་ཏན་བྱ།
།དམ་པ་དེ་ཡང་ཆོས་ཚུལ་དེ་ཞེ་ན།
།འཇིག་རྟེན་འདྲེས་ཕྱིར་ཀུན་དང་ཆ་མཐུན་ལ།
།འཇིག་རྟེན་འདས་ཕྱིར་ཀུན་དང་ཆ་མི་མཐུན།
།སྒོ་གསུམ་སྤྱོད་པ་ཀུན་ལས་ཁྱད་པར་འཕགས།
།ཞི་སྐུ་ཀུན་སྤྱོད་གཙང་ཞིང་སྐྱོན་མེད་ལ།
།ཐེ་ཚོམ་གཅོད་མཁས་གསུང་སྙན་དྲི་མ་མེད།
།ཐུགས་ནི་ཟབ་ཞི་ཀུན་མཁྱེན་ཡེ་ཤེས་མཛོད།
།ཡོན་ཏན་མཐའ་ཡས་ཐོས་དང་སྙིང་རྗེ་ཆེ།
།ཤེས་རབ་རྒྱ་ཆེ་དགོངས་སྤྱོད་ནམ་མཁའ་འདྲ།
།ཕྲིན་ལས་ཚད་མེད་འབྲེལ་ཚད་དོན་དང་ལྡན།
།བྱམས་ལྡན་སྐྱོང་ལ་སྤངས་ཤིང་རྟག་ཏུ་བརྩོན།
།འགྲོ་བའི་ཁ་ལོ་གྱེན་དུ་བསྒྱུར་ལ་བརྟེན།
།ཁྱད་པར་གསང་སྔགས་བླ་མའི་མཚན་ཉིད་ནི།
།དབང་དང་སྡོམ་པ་དམ་ཚིག་གཙང་ལྡན་ཞིང་།
།རྒྱུད་དོན་མན་ངག་རྒྱ་མཚོའི་ཕ་རོལ་ཕྱིན།
།བསྙེན་སྒྲུབ་ལས་སྦྱོར་འཕྲིན་ལས་མངའ་བརྙེས་ཤིང།
།ལྟ་སྒོམ་སྤྱོད་འབྲས་ཉམས་རྟོགས་དྲོད་ཚད་ཐོབ།
།བརྩེ་ཆེན་ཐབས་མཁས་གདུལ་བྱ་སྨིན་གྲོལ་འགོད།
།བརྒྱུད་པའི་བྱིན་རླབས་སྤྲིན་ཕུང་མ་ཡལ་བ།
།དེ་འདྲའི་མཁས་གྲུབ་དཔལ་ལྡན་བླ་མ་བསྟེན།
།གང་གི་ཡོན་ཏན་ཤིན་ཏུ་མཐའ་ཡས་ཏེ།
།འགྲོ་བའི་གཉེན་གྱུར་ཕྱོགས་ཙམ་རབ་བསྔགས་ན།
།སྲིད་མཚོ་སྒྲོལ་བས་གྲུ་ཆེན་གཉེན་པ་སྟེ།
།ལམ་ཞུགས་རྣམས་ཀྱི་དེད་དཔོན་བླ་ན་མེད།
།རྒུད་པ་སེལ་པས་ཡིད་བཞིན་ནོར་བུ་སྟེ།
།ལས་དང་ཉོན་མོངས་མེ་འཇིལ་བདུད་རྩིའི་ཆུ།
།ཆོས་ཆར་བསིལ་བས་ཆར་སྤྲིན་བཟང་པོ་སྟེ།
།འགྲོ་ཀུན་དགའ་བསྐྱེད་ལྷ་ཡི་རྔ་བོ་ཆེ།
།དུག་གསུམ་ནད་སེལ་སྨན་པའི་རྒྱལ་པོ་སྟེ།
།མ་རིག་མུན་སེལ་སྒྲོན་མེ་འོད་པོ་ཆེ།
།སྐྱེ་དགུའི་བདེ་འབྱུང་དཔག་བསམ་ཤིང་ཆེན་ཏེ།
།འདོད་དགུ་ལྷུག་གྲུབ་རིན་ཆེན་བུམ་པ་བཟང།
།བྱམས་ཆེན་ཉི་མ་འོད་ཟེར་དཔག་མེད་དེ།
།གདུང་སེལ་ཟླ་བ་ཕན་བདེའི་འོད་དཀར་ཅན།
།དགོངས་ཀློང་ཡངས་པས་དྲི་མེད་མཁའ་འདྲ་ལ།
།ཏིང་འཛིན་འོད་གསལ་གཟའ་སྐོར་ལྷུན་གྲུབ་འདྲ།
།མཁྱེན་བརྩེའི་རང་བཞིན་དཔག་མེད་མཚོ་འདྲ་ཞིང།
།ཐུགས་རྗེའི་རླབས་ཆེན་གཡོ་བས་ཆུ་ཀླུང་འདྲ།
།རྣམ་གཡེང་མི་བསྐྱོད་གངས་རིའི་དཔལ་འདྲ་ཞིང།
།མཆོག་ཏུ་མི་གཡོ་རི་རྒྱལ་ལྷུན་པོ་འདྲ།
།སྲིད་གནས་མི་གོས་འདམ་སྐྱེས་པད་འདྲ་ཞིང།
།ཀུན་ལ་ཐུགས་སྙོམས་བྱམས་སྡུག་ཕ་མ་འདྲ།
།ཡོན་ཏན་མཐའ་ཡས་རིན་ཆེན་གཏེར་འདྲ་ཞིང།
།འཇིག་རྟེན་འདྲེན་པས་རྒྱལ་བའི་དབང་པོ་འདར།
།དེ་འདྲའི་བླ་མ་དཔལ་ལྡན་ཆོས་ཀྱི་རྗེ།
།གང་ན་བཞུགས་རྣམས་སངས་རྒྱས་ཀུན་དང་མཉམ།
།མཐོང་ཐོས་དྲན་རེག་འཁོར་བ་ཕྱིར་བསྙིལ་ཞིང།
།རླབས་ཆེན་ཕྲིན་ལས་ཁུར་ཆེན་དཔག་ཏུ་མེད།
།ས་ཆེན་འགྲོ་བ་ཀུན་གྱི་རྟེན་བཞིན་ནོ།
།དཀོན་མཆོག་བཞི་པ་བླ་མ་སངས་རྒྱས་ཏེ།
།དཀྱིལ་འཁོར་དབང་ཕྱུག་ཧེ་རུ་ཀ་དཔལ་ཉིད།
།སྙིགས་དུས་འགྲོ་བ་གདུལ་ཀའི་དོན་མཛད་པས།
།གདུལ་བྱའི་ངོར་ནི་སངས་རྒྱས་ཀུན་པས་ལྷག།
།དངོས་གྲུབ་རྩ་བ་རྡོ་རྗེ་སློབ་དཔོན་ལ།
།སྒོག་སུམ་ཟོལ་མེད་གཙང་མའི་སྤྱི་བོས་བསྟེན།
།དེ་དག་གིས་ནི་ངན་འགྲོའི་ལམ་འགོག་ཅིང།
།བདེ་འགྲོའི་སྐས་འཛུགས་འདི་ཕྱིར་ཕན་བདེ་མཛད།
།ཡང་དག་དོན་སྟོན་སེམས་རྒྱུད་བྱིན་གྱིས་རློབས།
།ཚེ་འདིར་སྨིན་གྲོལ་ལམ་ལ་འགོད་པས་ན།
།རྟག་བརྟན་འཕོ་འགྱུར་མེད་པའི་དད་པ་ཡིས།
།དུས་རྣམས་ཀུན་ཏུ་སྐྱོ་ངལ་མེད་པར་བསྟེན།
།ཇི་ལྟར་ནད་པས་སྨན་པའི་རྒྱལ་པོ་དང།
།དམངས་ཀྱི་རྒྱལ་པོ་འགྲོན་པོས་སྐྱེལ་མ་དང།
།ཚོང་པས་དེད་དཔོན་གྲུ་པས་གཉེན་པ་ལྟར།
།ཉོན་མོངས་ཞི་ཕྱིར་ཉེས་ཀུན་གནོད་བྲལ་ཕྱིར།
།སྐྱེ་ཤིས་འཇིགས་ཕྱིར་དོན་གཉིས་ལྷུན་གྲུབ་ཕྱིར།
།སྲིད་མཚོ་བརྒལ་ཕྱིར་བླ་མ་བསྟེན་པར་བྱ།
།བླ་མ་སྨན་པ་གདམས་ངག་སྨན་དང་ནི།
།རང་ལ་ནད་པའི་འདུ་ཤེས་ཉེར་གཞག་སྟེ།
།ནན་ཏན་བརྩོན་པ་སྨན་ཉིད་བསྟེན་ཚུལ་དང།
།ཞི་བདེ་ནད་ལས་གྲོལ་བའི་འབྲས་ཐོབ་བཞིན།
།བསྟེན་ཚུལ་གཞན་རྣམས་ཚུལ་དེས་དཔག་བྱས་ལ།
།དག་པའི་འདུ་ཤེས་བཞི་ཡིས་བསྟེན་པར་བྱ།
།གཞན་དུ་སྐལ་ངན་སློབ་མ་ཉེས་ཀུན་གཞི།
།དད་དང་ངོ་ཚ་ཁྲེལ་མེད་སྙིང་རྗེ་ཆུང།
།རིགས་དང་རང་བཞིན་ཀུན་སྤྱོད་སྐལ་པ་ངན།
།སེམས་དང་ལས་དང་ཉོན་མོངས་དུག་ལྔ་རགས།
།ཆོས་དང་ཆོས་མིན་དགེ་སྡིག་བསླབ་པ་འཆལ།
།སྡོམ་དང་དམ་ཚིག་མི་བསྲུང་གཉེན་པོ་མེད།
།རབ་རྨོངས་བློ་གྲོས་ཆུང་ཞི་དགང་དཀའ་བ།
།ཁྲོ་དང་ཚིག་རྩུབ་འཕེལ་བ་དེ་དག་གིས་
།བླ་མ་རི་དབ༹གས་ཆོས་ལ་གླ་རྩི་དང།
།རང་ལ་རྔོན་པ་ནན་ཏན་མདའ་འཕེན་དང།
།ཆོས་གྲུབ་འབྲས་བུ་གཞན་དུ་འཚོང་བའི་ཚུལ།
།འདུ་ཤེས་ལོག་པ་ལྔ་ཡིས་བསྟེན་པ་ནི།
།དམ་ཚིག་མེད་པས་འདི་ཕྱིར་སྡུག་བསྔལ་འཐོབ།
།ལ་ལས་ཐོག་མར་མ་བརྟགས་པ་བཅོལ་འཇུག
།གསར་ངས་ཡོན་ཏན་བརྗོད་ཅིང་ཕྱི་ནས་སྨོད།
།ཁ་ཅིག་འདྲེས་མས་ངོ་ལྐོག་ངན་གཡོའི་ཚུལ།
།ཟུར་གྱིས་བླ་མ་ཉེ་འཁོར་སུན་འབྱིན་པ།
།དེ་དག་གིས་ནི་འབྲས་བུ་མནར་མེད་ཉིད།
།སྐལ་བཟང་སློབ་མ་དད་དང་ཤེས་རབ་ཆེ།
།བརྩོན་འགྲུས་བག་ཡོད་དྲན་དང་ཤེས་བཞིན་ལྡན།
།བཀའ་ལས་མི་འདའ་སྡོམ་དང་དམ་ཚིག་བསྲུང།
།སྒོ་གསུམ་དུལ་ཞིང་སྙིང་རྗེ་ཕན་སེམས་ཆེ།
།ཁོང་ཡངས་སྤྲོ་རིང་གཏོང་ཕོད་དག་སྣང་ཆེ།
།བརྟན་ཞིང་མོས་གུས་ཆེ་བ་དེ་དག་གིས།
།རྟག་ཏུ་བླ་མའི་ཡོན་ཏན་དྲན་བྱ་ཞིང།
།སྐྱོན་ལ་མི་རྟོག་མཐོང་ཡང་ཡོན་ཏན་བསམ།
།རང་སྣང་ཡིན་ངེས་ཁོང་ལ་མི་མངའ་ཞེས།
།སྙིང་ནས་བསམ་ཞིང་བཤགས་བསྡམ་གཉེན་པོ་བསྟེན།
།བླ་མ་མི་མཉེས་ཆ་དང་བཅས་སྤང་ཞིང།
།ཇི་ལྟར་མཉེས་པའི་ཐབས་ལ་འབད་པར་བྱ།
།བླ་མས་བཀའ་སྩལ་ནམ་ཡང་མི་བཅག་ཅིང།
།བླ་མའི་ཉེ་འཁོར་སྡུག་པའང་བླ་མ་བཞིན།
།བླ་མའི་འཁོར་གཡོག་སློབ་མར་མི་བསྡུ་ཞིང།
།ཆོས་བཤད་དབང་བསྐུར་ལ་སོགས་ཞུས་ཏེ་བྱ།
།བླ་མའི་སྤྱན་སྔར་ལུས་ངག་ཡིད་བསྡམ་ཞིང།
།རྐང་པ་བརྐྱང་དང་སྐྱིལ་ཀྲུང་རྒྱབ་མི་བསྟན།
།ངོ་འཛུམ་མི་གནག་ཁྲོ་གཉེར་བསྟན་མི་བྱ།
།བབ་ཅོལ་མི་སྨྲ་བརྫུན་ཚིག་ཕྲ་མ་དང།
།གཞན་གྱི་སྐྱོན་བརྗོད་མི་སྙན་རྩུབ་མོའི་ཚིག
།མ་བརྟགས་འབྲེལ་པ་མེད་རྣམས་སྨྲ་མི་བྱ།
།བླ་མའི་རྫས་ལ་བརྣབ་སེམས་མི་བྱ་ཞིང།
།སྡེར་བཅས་གནོད་སེམས་ཆ་དང་བཅས་ཀུན་བསྡམ།
།བླ་མའི་མཛད་སྤྱོད་སྣ་ཚོགས་ཆོ་འཕྲུལ་ལ།
།ཁ་ཞེ་འོལ་པས་འཁྲུལ་བར་མི་བརྟག་ཅིང།
།འདི་ནི་མི་རིགས་ཁོང་རང་མཛད་མོད་སྙམ།
།ཅུང་ཟད་འགལ་འདུ་ཉེས་སྐྱོན་ལོག་ལྟ་དོར།
།གལ་ཏེ་བླ་མ་སྡང་བར་མངོན་ན་ཡང།
།རང་སྐྱོན་ཡོད་ངེས་བརྟགས་ལ་བཤགས་བསྡམ་བྱ།
།སྤྱི་གཙུག་བསྒོམས་ལ་གསོལ་བ་དྲག་པོ་གདབ།
།དེ་ཡིས་མཉེས་ཤིང་དངོས་གྲུབ་མྱུར་དུ་འཐོབ།
།བླ་མ་མཐོང་ཚེ་ལྡང་ངང་ཕྱག་འཚལ་ཞིང།
།བཞུགས་ཚེ་སྟན་སོགས་མཁོ་བའི་ཡོ་དབུལ།
།སྙན་པར་སྨྲ་བས་བསྟོད་ཅིང་ཐལ་མོ་སྦྱོར།
།བཞུད་ཚེ་ལྡང་དང་ཞབས་འབྲིང་བསྙེན་བཀུར་བྱ།
།རྟག་ཏུ་དྲན་དང་ཤེས་བཞིན་བག་ཡོད་ཅིང།
།གུས་དང་འཇིགས་བཅས་ཞུམ་པས་གནས་པར་བྱ།
།ཨཇི་ལྟར་བག་མ་གསར་པའི་ཚུལ་བཞིན་དུ།
།སྒོ་གསུམ་ཞི་བས་བླ་མའི་དྲུང་འདུག་གིས།
།འཕྱར་ཞིང་གཡེང་ལ་རྒོད་བག་བྱ་བ་མིན།
།ཕྱོགས་རིས་མ་ཡིན་ཁེ་དང་གྲགས་པས་མིན།
།གཡོ་སྒྱུས་མ་ཡིན་དེ་བཞིན་ཚུལ་འཆོས་མིན།
།ངོ་ལྐོག་མ་ཡིན་ཉེ་རིང་ཆགས་སྡང་མིན།
།རང་ལ་འབྱོར་པ་ཡོད་ན་བླ་མ་མཆོད།
།ལུས་ངག་ཞབས་ཏོག་བསྙེན་བཀུར་སྲི་ཞི་དང།
།ཚེ་འདི་བློ་བཏང་བསྒྲུབ་པས་མཉེས་པར་བྱ།
།གཞན་གྱིས་མི་སྙན་བརྗོད་ནའང་དེ་བཟློག་ཅིང།
།ནུས་པ་མེད་ན་སླར་ཡང་ཡོན་ཏན་བསམ།
།རྣ་བ་དག་བཅིང་སྙིང་རྗེས་ཕན་པ་བསྒྲུབ།
།དེ་ལ་མི་བརྟེན་བག་ཕེབས་སྨྲ་བ་མིན།
།དེས་ནི་ཚེ་རབས་ཀུན་ཏུ་ཕན་པ་འགྲུབ།
།དམ་པ་རྣམས་དང་ཕྲད་ཅིང་ཆོས་རབ་ཐོས།
།ས་དང་ལམ་དང་གཟུངས་དང་ཏིང་ངེ་འཛིན།
།སྣ་ཚོགས་ཡོན་ཏན་འབྱོར་པས་ཡོངས་གང་ཞིང།
།འགྲོ་ལ་ཞི་བདེའི་དགའ་སྟེན་འགྱེད་པ་ཡིན།
།དེ་ལྟར་དམ་པ་རྣམས་ལ་ལེགས་བརྟེན་པས།
།སྡིག་པའི་བཤེས་གཉེན་ངན་པའང་ཀུན་ཏུ་སྤང།
།དེ་ཡང་སྔར་བཤད་ཡོན་ཏན་མི་ལྡན་ཞིང།
།ལོག་པའི་སྐྱོན་མང་སྡོམ་དང་དམ་ཚིག་འཆལ།
།བྱམས་དང་སྙིང་རྗེ་ཤེས་རབ་ཐོས་པ་ཆུང།
།ལེ་ལོ་སྙོམ་ལས་མི་ཤེས་ང་རྒྱལ་ཆེ།
།ཀོ་ལོང་གདུག་རྩུབ་ཉོན་མོངས་དུག་ལྔ་རགས།
།ཚེ་འདི་དོན་གཉེར་ཕྱི་མ་རྒྱང་རིང་འཕང།
།ཆོས་ལྟར་སྟོན་ཡང་ཆོས་མིན་ཟོག་པོའི་རིགས།
།མི་གཙང་ཕུང་པོ་ལྟ་བུའི་བླ་མ་ནི།
།གདུལ་བྱའི་བུང་བ་མང་ཡང་རིང་དུ་སྤང།
།དད་ལྡན་ལོག་ལམ་ངན་འགྲོར་འཁྲིད་པས་ན།
།ཐར་ལམ་འདོད་པས་ནམ་ཡང་བསྟེན་མི་བྱ།
།སྡིག་པའི་གྲོགས་པོ་དེ་ཡང་སྤང་བྱ་སྟེ།
།ཇི་ཙམ་འགྲོགས་པ་དེ་ཙམ་སྡིག་པ་འཕེལ།
།དགེ་བ་འགྲིབ་ཅིང་ཉོན་མོངས་ཆར་བཞིན་འབབ།
།བདེ་འགྲོ་འགོག་ཅིང་ངན་འགྲོའི་འབབ་སྟེགས་ཏེ།
།དམ་པ་སྨོད་ཅིང་དཀར་པོའི་ཆོས་ལ་སྡང།
།ངན་པ་བསྟོད་ཅིང་ནག་པོའི་ཆོས་ལ་བསྟེན།
།སྐལ་མཉམ་མི་དགེ་སྤྱོད་རྣམས་བསྔགས་པ་སྟེ།
།རྟག་ཏུ་ལོང་ལམ་ངན་འགྲོར་འཁྲིད་པས་ན།
།བློ་མིག་ལྡན་པས་རིང་དུ་སྤང་བར་བྱ།
།སྡིག་པའི་བཤེས་གཉེན་གྲོགས་བཅས་སྤངས་པ་ཡིས།
།འདི་ཕྱིར་བདེ་ཞིང་ལེགས་པའི་ཡོན་ཏན་འགྲུབ།
།རྟག་ཏུ་དགེ་འཕེལ་ཐར་ལམ་ཟབ་མོ་ཟིན།
།སྐྱེ་བོ་ངན་པ་ནམ་ཡང་མི་མཐོང་ཞིང།
།བདེ་གཤེགས་སྲས་ཀྱིས་བསྐོར་བའི་མགོན་པོ་ཡིས།
།བདག་དང་དགོངས་ཤིང་བྱིན་གྱིས་རློབ་པར་མཐོང།
།བདེ་བར་ཚེ་ཡི་དུས་བྱེད་མཐོ་རིས་འགྲོ།
།དེ་སོགས་བསམ་གྱིས་མི་ཁྱབ་ཡོན་ཏན་ལྡན།
།དགེ་བའི་གྲོགས་པོ་དམ་པ་རྟག་ཏུ་བསྟེན།
།དེ་དག་གིས་ནི་དགེ་བའི་ལས་འཕེལ་ཞིང།
།སྡིག་དང་ཉོན་མོངས་འགྲིབ་ལ་ཉེས་པ་འགོག
།སྲིད་ལས་མཐར་འབྱིན་མངོན་མཐོ་ངེས་ལེགས་འགྲུབ།
།ཚེ་འདིར་བདེ་ཞིང་ཕྱི་མ་འབྲས་དང་བཅས།
།རྟག་ཏུ་དོན་ཡོད་ལྷ་མིའི་འདྲེན་པར་འགྱུར།
།དགེ་བའི་བཤེས་དང་དགེ་གྲོགས་བསྟེན་པ་ཡིས།
།དགེ་ཚོགས་འཕེལ་ཞིང་འབྲས་བུ་བདེ་བ་འཐོབ།
།སྲིད་ན་མི་འཇིགས་ཕན་བདེ་དཔག་མེད་ཅིང།
།འགྲོ་བའི་དོན་གཉིས་འབྱོར་པ་མཐའ་ཡས་འགྲུབ།
།འདི་ནི་རྣམ་འདྲེན་རྒྱལ་བའི་སྤྲུལ་པ་སྟེ།
།སྙིགས་མའི་དུས་སུ་དེ་ལྟར་སྣང་བ་ཡིན།
།དེ་བས་ཇི་སྲིད་བྱང་ཆུབ་སྙིང་པོའི་བར།
།སྐྱེ་བོ་དམ་པ་རྣམས་ལ་བརྟེན་པར་བྱ།
།དེ་ཡིས་དག་སྣང་ཕྱོགས་མེད་འཆར་བ་དང།
།བྱམས་དང་སྙིང་རྗེ་བྱང་ཆུབ་སེམས་འབྱོངས་ཤིང།
།ཉམས་དང་རྟོགས་པ་རང་བཞིན་གོང་དུ་འཕེལ།
།གཞན་དོན་དཔག་མེད་ཅི་བསམ་ཆོས་བཞིན་འགྲུབ།
།ཇི་ལྟར་བསྒོམ་ཞིང་གསོལ་བ་གདབ་པ་ནི།
།རྒྱུན་དུ་ཚོགས་བསག་སྒྲིབ་པ་སྦྱོང་བ་ལ།
།ཉིན་མོ་སྤྱི་གཙུག་མཚན་མོ་སྙིང་ནང་དུ།
།རྩ་བའི་བླ་མ་གང་མོས་ཡི་དམ་དང།
།མཁའ་འགྲོ་གཉིས་མེད་མཚན་དཔེས་བརྒྱན་པའི་མཐར།
།བརྒྱུད་པའི་བླ་མ་དཔའ་བོ་མཁའ་འགྲོས་བསྐོར།
།ཡིད་ཀྱིས་མཆོད་ཅིང་འདོད་དོན་གསོལ་བ་གདབ།
།མཚན་དེ་རྒྱ་སྐད་ཐོག་མར་ཨའལཾ་སྦྱིན་ཞིང།
།ཐ་མར་ཨའ༔ཧའུཾ་གང་འདོད་ཤམ་བུར་གདགས།
།ནད་གདོན་སྡིག་རིབ་ཞི་བར་འདོད་པ་ཡིས།
།ཐམས་ཅད་དཀར་པོ་འོད་ཟེར་རབ་འཕྲོས་པས།
།མི་མཐུན་ཕྱོགས་ཞི་དངོས་གྲུབ་ཐོབ་པར་བསམ།
།ཚེ་དཔལ་འབྱོར་སོགས་རྒྱས་པའི་ལས་འདོད་པས།
།སེར་པོ་འདོད་དགུའི་ཆར་པ་འབེབས་པར་བསམ།
།དབང་དང་དགུག་པ་ལ་སོགས་དབང་རྣམས་ལ།
།ཐམས་ཅད་དམར་པོ་འོད་ཟེར་ལྕགས་ཀྱུའི་ཚུལ།
།བགེགས་དང་གདོན་སོགས་ཚར་གཅོད་མངོན་སྤྱོད་ལ།
།ཐམས་ཅད་མཐིང་ནག་འོད་ཟེར་མཚོན་ཆ་འཕྲོ།
།མེ་དཔུང་རྩིབས་སྟོང་འཁོར་ལོས་འཇོམས་པར་བསམ།
།སྔགས་བཟླས་སྟོང་གསུམ་གཡོ་འགུལ་ལྡེག་ཅིང་འཕར།
།ལས་རྣམས་གྲུབ་ཅིང་ལྷག་པའི་བསྐྱེད་རིམ་བསྒོམ།
།རྗེས་རྣམས་རིམ་བསྡུ་མི་དམིགས་སྟོང་པའི་ངང།
།དར་ཅིག་གློད་ལ་དགེ་བ་བྱང་ཆུབ་བསྔོ།
།སོ་སོའི་ལས་དང་རྗེས་མཐུན་རྟགས་རྣམས་འབྱུང།
།འདི་ནི་ཟབ་ལམ་བདེ་ཆེན་རྒྱ་མཚོ་ཡིན།
།ཁྱད་པར་ནད་གདོན་བར་ཆད་འཆི་བསླུའི་ཚེ།
།མདུན་གྱི་ནམ་མཁའ་པད་སྡོང་སེང་གེའི་ཁྲི།
།མི་འཇིགས་ཡངས་པ་ཅན་སྟེང་བླ་མ་དང།
།སངས་རྒྱས་དབྱེར་མེད་འཛུམ་མདངས་ལྡན་པ་ལ།
།བརྒྱུད་པའི་བླ་མ་བྱང་སེམས་མཁའ་འགྲོས་བསྐོར།
།འོག་ཏུ་རིགས་དྲུག་ལན་ཆགས་སྙིང་རྗེའི་མགྲོན།
།དུས་གསུམ་ཕ་མ་འཁོར་བའི་སེམས་ཅན་བསམ།
།རང་སེམས་སྤྱི་གཙུག་ཧའུཾ་འཐོན་དཔའ་བོའི་སྐུ།
།ཆུ་གྲི་ཐོད་པ་ཐོགས་པའི་རྣམ་པ་ཡིས།
།ལུས་ཀྱི་ཐོད་པ་སྨིན་མཚམས་མཛོད་སྤུར་བཅད།
།ཐོད་པའི་སྒྱེད་པུ་གསུམ་སྟེང་བཞག་པའི་ནང།
།ལུས་ཀྱི་ཤ་ཁྲག་རུས་པས་ཁེངས་པ་ལ།
།བདུད་རྩིའི་ཆར་བབ་འོག་ནས་མེ་འབར་བས།
།ཐོད་པ་སྟོང་གསུམ་དང་མཉམ་བདུད་རྩིས་ཁེངས།
།རང་སེམས་དཔའ་བོ་གྲངས་མེད་སྤྲུལ་པ་ཡིས།
།ཐོད་པས་ཐམས་ཅད་དུས་མཉམ་བདུད་རྩི་བཀྱེ།
།ཞི་བའི་མགྲོན་མཉེས་ཚོགས་རྫོགས་དངོས་གྲུབ་ཐོབ།
།སྲིད་པའི་མགྲོན་མཉེས་ཐོག་མེད་ལན་ཆགས་འཁོར།
།ཁྱད་པར་གང་གནད་གདོན་མཉེས་བར་ཆད་ཞི།
།ཐམས་ཅད་མཉེས་པའི་འོད་ཟེར་བདག་ལ་ཕོག
།ནད་ཞི་གདོན་ཞི་བར་ཆད་རང་སར་ཞི།
།འཆི་བ་སླུས་ཤིང་དངོས་གྲུབ་ཐོབ་པར་བསམ།
།རྗེས་ལ་ཐམས་ཅད་མི་དམིགས་སེམས་ཀྱི་ངང།
།སེམས་ཉིད་མི་དམིགས་ཆོས་དབྱིངས་མཉམ་པར་གཞག
།སྒྱུ་མའི་རང་བཞིན་དག་པས་བསྔོ་བ་བྱ།
།འདིས་ནི་མི་མཐུན་རྐྱེན་རྣམས་ཞི་བ་དང།
།ཚོགས་ཆེན་རབ་རྫོགས་སྒྲིབ་ཀུན་བྲལ་བ་སྟེ།
།བྱིན་རླབས་ཚད་མེད་རྟོགས་པ་རྒྱུད་ལ་སྐྱེ།
།བདག་འཛིན་མེད་ཅིང་ངེས་འབྱུང་བློ་སྣ་ཐུང།
།བསམ་པ་འགྲུབ་ཅིང་སྣང་སྲིད་བླ་མར་འཆར།
།གནད་གཅོད་མེད་ཅིང་འཆི་ཀའི་འོད་གསལ་འགྲུབ།
།བར་དོར་གྲོལ་ཞིང་དོན་གཉིས་ཕུན་སུམ་ཚོགས།
།དེ་ཕྱིར་བླ་མ་བསྒྲུབ་ལ་ནན་ཏན་བྱ།
།གང་གིས་བསྐྱེད་རིམ་བསྐལ་པར་བསྒོམས་པས་ཀྱང།
།བླ་མ་སྐད་ཅིག་དྲན་པ་མཆོག་ཏུ་གསུངས།
།དཔལ་ལྡན་འབྱོར་པ་དམ་པའི་གཞིར་གྱུར་པ།
།ཡོན་ཏན་ཡོངས་གང་ཕན་བདེའི་སྤྲིན་ཚོགས་ཅན།
།ས་གསུམ་བདུད་རྩི་དམ་པའི་ཆར་འདོད་པས།
།ཐུགས་རྗེའི་ངང་ཅན་རྣམས་ལ་བརྟེན་པར་བྱ།
།ཐོག་མེད་དུས་ནས་ཉེ་བར་གོམས་པ་ཡི།
།ཡིད་མཁའི་ཉོན་མོངས་གདུང་བཞི་བྱའི་ཕྱིར།
།ནོར་བཟང་རྟག་ཏུ་ངུ་བཞིན་ཆོས་ཚོལ་བས།
།སྐྱོ་ངལ་སྤངས་ལ་དགེ་བའི་བཤེས་གཉེན་བསྟེན།
།དེ་ལྟར་དོན་སྤྱོད་དབང་པོའི་རྒྱུད་སྟོང་ལྡན།
།སྐལ་བཟང་རྣ་བའི་བདུད་རྩིར་ལྷུང་བ་ལས།
།ཉེས་གྱུར་ལོག་པའི་ལམ་ལ་བརྟེན་པ་ཡིས།
།དུབ་པའི་སེམས་ཉིད་དི་རིང་ངལ་སོས་ཤིག
།རྫོགས་པ་ཆེན་པོ་སེམས་ཉིད་ངལ་གསོ་ལས།
།དགེ་བའི་བཤེས་གཉེན་བསྟེན་པའི་ལེའུ་སྟེ་ལྔ་པའོ།