Ngb-pt-0809-vol-09-text
Front
Body
རྒྱ་གར་སྐད་དུ། ནཱ་ག་མ་ཙ་ཤ༷་ནཱ་མ་ཏན་ཏྲ། བོད་སྐད་དུ། སྲིད་པའི་ཀླུ་མོ་དབང་བྱེད་མའི་རྒྱུད། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །དེ་ནས་དཔལ་ཕྱག་ན་རྡོ་རྗེས། རྡོ་རྗེ་གདན་གྱི་ལྷོ་ཕྱོགས་ཤིང་ས་ལ་གྱད་སྟོབས་ཅན་དུ། སྤྲུལ་པའི་སངས་རྒྱས་ཤཱཀྱ་ཐུབ་ཀྱིས་དབང་བསྐུར་ཏེ། རྡོ་རྗེ་གསོར་བས་ཐམས་ཅད་བྲེད་ཅིང་བརྒྱལ་ཏེ། དེའི་དུས་སུ་དཔལ་རྡོ་རྗེ་གཏུམ་པོ་ལ། དབང་བྱེད་མ་བདུན་གྱིས་སྲོག་གི་སྙིང་པོ་ཕུལ་བ་ནི། །ཏྲག་རག་མོ་ཛ། ཨེ་ཀ་མ་ཛ། ང་བ་ཤ་མ་ཛ། ཧབ་ཤ་མ་ཛ། དུན་ཏིང་མ་ཛ། དབུ་དགུ་མ་ཛ། མ་མ་དུན་ཛ་ཛ། ཞེས་མཚོ་སྨན་རྒྱལ་མོ་དང་། ཨེ་ཀ་ཛ་ཞི་དང་། དབང་བྱེད་རྒྱལ་མོ་དང་། ཧབ་ཤ་བསྲེ་གདོང་མ་དང་། ཀླུ་མོ་དུརྙིང་མ་དང་། དཀར་མོ་དབུ་དགུ་མ་དང་། མ་མོ་དབང་བྱེད་རྒྱལ་མོ་བདུན་གྱིས་སྲོག་སྙིང་ཕུལ་ལོ། །དེ་ནས་རྡོ་རྗེ་ག་་པོས་བཀའ་སྩལ་པ། ངའི་འཁོར་རྣམ་བཞི་ལ་ཀླུ་གནོད་པ་བྱེད་པའི་གདོང་ཟླ་མ་བྱེད་པར། བསྟན་པ་ལ་གནོད་པ་སྒྲོལ་ཅིག་ཅེས་བཀའ་སྩལ་པས། དབང་བྱེད་མ་རྣམས་ཀྱིས་གསོལ་པ། བདག་ཅག་ནི་ཀླུ་རིགས་བཞི་དང་། ས་བདག་རྣམས་ཀྱི་རྒྱབ་རྟེན་ལགས་ཏེ། གསང་བའི་བདག་པོས་རིགས་སྔགས་སྒྲགས་པས། ས་བདག་ཀླུ་ལ་གནོད་པ་སྐྱལ་བ་དང་། བདག་ཅག་སྒྲོན་དུ་འོང་བས། བདག་ཅག་རྣམས་ཀྱི་ནད་ནི་སྙིང་ནད་འབར་བ་ཞེས་བྱ་བ་གཏོང་བ་ཡིན་ཏེ། འགྲོ་བ་མི་ལ་བཟླས་པ་བྱེད་འཕྲོ་ལ་ཁང་པ་འགུལ་བ་སྙམ་བྱེད་པ་འབྱུང་། །དེས་རྐྱེན་བྱས་ནས་སྙིང་ནད་འབར་བ་ཞེས་བྱ་བ། ཅི་བྱའི་རྟོལ་མེད་པ་ཁ་ཟས་འགག་པ་འཆོད་པ་དང་འགྲོས་པ་སྙམ་བྱུང་ན་འཆི་བར་བྱེད་དོ། །དེ་ལ་རིག་སྔགས་བཟླས་ཏེ་དྲག་པོ་བྱས་ན། བདག་གི་བཀའ་སྩལ་མཚོ་སྨན་རྒྱ་མཚོ་ལ་གནས་པ་རྣམས་ལ་ཕོག་ནས་གདོན་སྟོང་ཕྲག་བརྒྱ་བཅུ་ལྡང་ངོ་། །ནད་པ་ལ་འཁོར་གསུམ་ཡོངས་དག་བྱས་ན་ནད་དེ་ལ་ཕན། དེ་མ་ཡིན་ཅིས་ཀྱང་མི་ཕན་ལ། །ནད་འགྱུར་ནས་འཆི་བས། བདག་ཅག་ལ་གསང་བའི་བདག་པོས། ལུག་ཆུ་ཁའི་གཟུགས་དང་། ལུག་ནག་མོའི་གཟུགས་དང་། ལུག་སྨུ་གུའི་གཟུགས་དང་། ལུག་དམར་མོའི་གཟུགས་དང་། ལུག་སྔོ་སྐྱའི་གཟུགས་དང་། ལུག་དཀར་མོའི་གཟུགས་དང་། ལུག་ནག་མོ་སྤྱི་དཀར་གྱི་གཟུགས་དང་། ངར་བུ་བདུན་དང་། གཏོར་མ་བདུན་ལ་རྩིས་སྨན་བཙལ་ལ། ཀླུ་མོ་ལ་བདེ་བ་སྦྱིན་པའི་གཟུངས་ཉི་ཤུ་རྩ་གཅིག་བཟླས་ཏེ་གླུད་དུ་བྱིན་ལ། ཁྱོད་ཀྱིས་ཀླུའི་གདུག་པའི་ནད་སོལ་ཅིག་ཅེས་བྱས་ན་དེ་མ་ཐག་ཏུ་གྲོལ་བར་འགྱུར་རོ། །ཞེན་ཆེ་ན་མཚོ་སྨན་གྱི་མདོས་ཀྱང་བཏང་བར་བྱའོ། །ཞེས་སྨྲས་སོ། །གསང་བའི་བདག་པོ་རིགས་འཛིན་པས་གལ་ཏེ་བསྟན་པ་ལ་གནོད་པ་སྒྲོལ་བར་འདོད་ན། གྲོ་ག་ལ་དགྲའི་གཟུགས་བྲིས་ཏེ། སྙིང་ཁར་དགྲ་དུ་ཡོད་ཀྱི་མིང་རུས་བྲིས་ལ། དབྱེས་དང་ཕྲ་མས་བརྒྱན་ཏེ། ལིང་གའི་མཐའ་མར་ཏྲག་རག་མོ་ཆེ་གེ་མོ་མྱ་ར་ཡ་ཛ། ཨེ་ཀ་མོ་མྱ་ར་ཡ་ཛ། ཝ་ཤ༷་མུ་ར་ཡ་ཛ། ཧབ་ཤ་མ་མྱ་ར་ཡ་ཛ། དུརྙིང་མུ་ར་ཡ་ཛ། དབུ་ལེ་མ་མུ་ར་ཡ་ཛ། མ་མ་དུ་ ན་ཆེ་གེ་མོ་མུ་ར་ཡ་ཛ་ཛ་མྱོས་ལོང་སྨྱོ་ཡ་སྨྱོ་ཡ།རྦད་རྦད་བཱ་ར་ཡ་སོད་ཅེས་མཐའ་མ་བསྐོར་ལ། དེ་ཡང་དཀར་གསུམ་མངར་གསུམ་དང་མཚལ་ཙོག་ལས་བྲིས་ཏེ། ཀླུ་སྨན་དང་སྦྲགས་ནས། ཀླུ་གདུག་པ་ཅན་གནས་པའི་ཆུ་མིག་ཏུ་ལ་ཅའི་རིལ་བུ་ཆུང་པ་བྱས་ལ།ཤ་བའི་རས་ཕུག་ལ་དེ་རུ་སྩལ་ན་ཀླུ་དེས་དབང་བྱེད་མ་བདག་ཅག་རྣམས་སྦྲན་ནས་མྱུར་དུ་སྒྲོལ་བར་བྱེད་དོ། །དབྱེས་ནི་མི་འདི་ནི་ཀླུ་ལ་གནོད་པ་ཙམ་པར་བརྡའོ། །དབང་བྱེད་མ་ལ་དོ་བདོ་བར་བརྡའོ་ཞེས་བྲིས་ལ་གཏད་དོ། །དེ་དུས་སུ་རང་བསྲུང་བ་ནི། རྨ་བྱའི་སྒྲོ། རུས་སྦལ། གཟུངས་མོ་བྱི་དུར་རྟེན་འབྲེལ་གསེར་གྱིས་བྲིས་ལ། ཁྲོམ་འབྲུ་བཞི་པ་དངུལ་གྱིས་བྲིས་པ་བཅང་ངོ་། །དེས་བསྟན་པ་ལ་གནོད་པ་མྱུར་དུ་བརླག་པར་འགྱུར་རོ། །ཞེས་སྨྲས་པ་དང་། དཔལ་ཕྱག་ན་རྡོ་རྗེས་དབང་བྱེད་མ་རྣམས་ལ་ཤིན་ཏུ་ལེགས་སོ་གསང་ངོ་ཞེས་ལེགས་པར་བྱིན་ནས། རྒྱ་མཚོར་མི་སྣང་བར་གྱུར་ཏོ། །དབང་བྱེད་མ་བདུན་གྱི་རྒྱུད་ཅེས་བྱ་བ་རྫོགས་སོ།། །།བ་སུ་དྷ་རས་ཡང་དབང་གཏེར་ལའོ། །རྒྱ་རྒྱ་རྒྱ།། །།