Ngb-pt-0745-vol-08-text
Front[edit]
Body[edit]
པའོ། །གསང་ངོ་།། །། རྒྱ་གར་སྐད་དུ། བོདྷི་ཙིསྟ་ཀི་ལ་ཡ་ཨུ་ཏི་ཡོ་ག་བི་ཏོ་ཏ་མ་ལ་མ་ཧྭ་རྭ་ཛ་ཏན་ཏྲ། བོད་སྐད་དུ། བྱང་ཆུབ་སེམས་ཀྱི་ཕུར་པ་རྫོགས་པ་ཆེན་པོ་ཐེག་པའི་ཡང་ཞུན་རྒྱུད་ཀྱི་རྒྱལ་པོ་ཆེན་པོ། བཅོམ་ལྡན་འདས་བྱང་ཆུབ་སེམས་ཀྱི་ཕུར་པ་ལ་ཕྱག་འཚལ་ལོ། །འདི་སྐད་བདག་གི་ཐོས་པའི་དུས་གཅིག་ན། ཆོས་ཉིད་སྤྲོས་པ་མེད་པ་དང་ཀུན་འབྱུང་ཡེ་ཤེས་ཆེན་པོ་སྟེ། གཉིས་མེད་གསང་བའི་འོག་མིན་གནས་མཆོག་དམ་པ་ན། བཅོམ་ལྡན་འདས་ཚིག་དང་། དོན་དང་། ལས་དང་། འབྲས་བུ་ཡང་དག་པར་སྟོན་པའི་མཆོག །བརྗོད་མེད་མི་གནས་སྐུ་མི་མངའ། །སྒྲ་ལས་འདས་པ་དོན་གྱི་གསུང་། །བསམ་བྲལ་ཡེ་ཤེས་ཐུགས་ཀྱི་ངང་། །ཐུགས་རྗེ་ཡོན་ཏན་རྒྱ་མཚོ་ཀུན་ལ་ཁྱབ། །མ་འདྲེས་ཡོངས་རྫོགས་འཕྲིན་ལས་མཆོག །ཕྱོགས་རིས་དབྱིབས་གནས་ཞིང་ཁམས་ཏེ། །བཞུགས་པ་མེད་པའི་ཚུལ་གྱིས་བཞུགས་པའོ། །བཏགས་པའི་མིང་དང་ཡེ་ཤེས་རོལ་པ་དང་། །བྱིན་བརླབས་སྤྲུལ་པའི་འཁོར་དང་ལྡན། །བསྐོར་བ་མེད་པའི་ཚུལ་གྱིས་བསྐོར། །ཚིག་དོན་བརྗོད་རྙོགས་པ་སྐད་ཅིག་མ་ལས་དངོས་པོར་འབྱུང་བར་བ་་བམ་ཞེ་ན། བཀའ་སྩལ་པ། སེམས་ལས་འདོད་ཆགས་ཞེ་སྡང་དང་། །ང་རྒྱལ་ཕྲག་དོག་སྡུག་བསྔལ་འབྱུང་། །གཏི་མུག་དག་ཀྱང་དེ་བཞིན་ཏེ། །འདི་ལས་ཁམས་གསུམ་ཐམས་ཅད་དང་། །སྐྱེས་པ་བུད་མེད་མ་ནིང་འབྱུང་། །འདི་ལས་འདོད་དང་གཟིར་བ་འབྱུང་། །ཉོན་མོངས་གདུང་འདོད་ཆགས་པ་འབྱུང་། །རི་དང་སྐྱེ་བོ་དེ་བཞིན་དུ། །ནམ་མཁའ་དང་ནི་རླུད་དང་དང་། །སྲེག་པ་མེ་ནི་རབ་ཏུ་འབྱུང་། །འདི་ལས་ས་དང་ཆུ་དག་ནི། །རྡོ་དང་ས་བོན་མྱུ་གུ་འབྱུང་། །དེ་བཞིན་གློག་དང་སྐར་མ་དང་། །ཉི་མ་ཟླ་བ་སྤྲིན་རྣམས་འབྱུང་། །དེ་བཞིན་སྤྱོད་དང་མི་སྤྱོད་ཀུན། །ཐམས་ཅད་ཐམས་ཅད་འབྱུང་བར་འགྱུར། །ཞེས་པ་དང་། གསོལ་པ།བྱང་ཆུབ་སེམས་ཀྱི་ཕུར་པ་ལས་འབྱུང་བའི་ཆོས་འདི་དག་ཐམས་ཅད་ཅི་ཞིག་ལགས་ཞེ་ན། བཀའ་སྩལ་པ། ཆོས་རྣམས་ཐམས་ཅད་སེམས་ལས་འབྱུང་། །སེམས་ཀྱིས་བསྟན་པའི་ལུས་ལ་ཉོན། །ཕྱོགས་བཅུའི་སངས་རྒྱས་ང་ཡི་སེམས། །ཕྱི་ནང་སྣོད་བཅུད་ང་ཡི་སེམས། །ཕྱོགས་སུ་སྣང་བ་ང་ཡི་སེམས མཐོ་རིས་ངན་སོང་ང་ཡི་སེམས། །སེམས་ཀྱི་སངས་རྒྱས་ཕུར་པ་ལ། །སྤྲུལ་པ་ཕྱོགས་བཅུ་སངས་རྒྱས་ཉན། །ཞེས་པའོ། །གསོལ་བ། བྱང་ཆུབ་སེམས་ཀྱི་ཕུར་པ་དེ་འཁྲུལ་པའི་དངོས་པོ་སྣ་ཚོགས་པ་འདི་གང་སྤྱོད་ཡུལ་ལགས་ཤེ་ན། བཀའ་སྩལ་པ། འབྱུང་བ་ལྔ་དང་ཡུམ་ལྔ་དབང་པོར་བཅས། །སྐྱེ་རྒས་ན་འཆི་ལ་སོགས་སྡུག་བསྔལ་ཚོགས། །དབྱིབས་དང་ཁ་དོག་མཚན་མ་ཇི་སྙེད་པ། །འདི་དག་འཁྲུལ་བའི་སེམས་ཅན་ཡུལ་ཡིན་ཏེ། །བདེན་པ་མཐོང་བའི་ངོ་ལ་འདི་མི་སྣང་། །སྣང་བ་འདི་ཀུན་གྱིས་ནི་ཚད་མ་མཐོང་བ་མ་ཡིན་ཏེ། །སྣང་བ་མེད་བཞིན་ཐོག་མ་མེད་པའི་དུས་ནས་རྟོགས་པས་བརྟགས་པ་ཡི། །གཟུང་འཛིནབག་ཆགས་རྟས་པའི་དབང་ཡིན་ཏེ། འཁྲུལ་ཏེ་འདི་ལ་གདགས་སུ་ཟད་ཀྱི་ཡང་། །སེམས་ཉིད་མ་འཁྲུལ་བར་ཡང་བདེན་པའི་ཕྱིར། །སྐད་ཅིག་གཅིག་ལ་སྣང་མྱོང་ངོ་། །གསོལ་པ། བྱང་ཆུབ་སེམས་ཀྱི་ཕུར་པ་དེ་འཁྲུལ་བའི་ཡུལ་དུ་སྣང་བའི་དངོས་པོ་འདི་དག་ཅི་ལ་གནས་པ་ལགས་ཤེ་ན། བཀའ་སྩལ་པ། བདག་དང་བདག་གཞན་རྣམས་དང་ནི། །ལོག་པར་རྟོགས་པ་ཙམ་ཉིད་ལས། །ཕྲ་ཞིང་ཟག་པ་ཡོད་མ་ཡིན། །ལོག་རྟོག་ཉིད་ལ་ཉིད་སྤྱོད་དེ། །གཞན་དུ་གསོལ་བ་ཅི་ཡང་མེད། །ཅེས་པའོ། །གསོལ་བ། བྱང་ཆུབ་སེམས་ཀྱི་ཕུར་པ་དེ་ཚུལ་ཇི་ལྟར་གནས་ཤེ་ན། བཀའ་སྩལ་པ། དེ་ཕྱིར་སེམས་ཀྱི་སྐད་ཅིག་དང་པོ་དེ་ལ་ལུས་དང་ཆོས་ཀུན་གནས་། །དེ་བས་ཞེན་ཕྱིར་ཕྱི་མ་ཡང་དེས་དེ་ལ་སྣང་། །རང་སེམས་རྒྱུན་ལས་འཕགས་པ་སྐྱེ་བའི་ཆོས་ནི་གཞན་ན་ཡོད་མ་ཡིན། །རྒྱུ་དྲུག་རིགས་ལས་དེ་ལ་སྣ་ཚོགས་དེ་དག་རང་གི་ཏིང་ངེ་འཛིན་ཏེ། །གསོལ་པ། བྱང་ཆུབ་སེམས་ཀྱི་ཕུར་པ་དེ་དངོས་པོ་སྣ་ཚོགས་པར་སྣང་བ་འདི་དག་ཚད་མ་ལགས་སམ་མ་ལགས་ཤེ་ན།བཀའ་སྩལ་པ། སྐྱེ་བོ་ཀུན་གྱི་སེམས་དང་དངོས་སྣང་ཕྱི་ནང་གྲགས་པའི་ཆོས་འདི་ནི། །འཛིན་པ་དྲུག་གིས་ཇི་ལྟར་མཐོང་ཞིང་བརྟགས་པས་དེ་ལྟ་མ་ཡིན་་བྲུལ། །རང་གི་རྟོགས་པས་མྱོས་པ་དེ་ཉིད་གཟུང་བ་བདེན་གྱུར་ན། །དེ་དག་དངོས་པོ་མེད་རྟོགས་དགྲ་བཅོམ་འདྲ་བར་གྲོལ་བར་འགྱུར་བར་རིགས། གཞན་དུ་སྐྱེ་མཆེད་བསྒོམས་ནས་རིག་པ་དེ་དག་ཚད་མར་འགྱུར་ན་ནི། དེ་ཉིད་ཚད་མར་གྱུར་པས་འཕགས་པའི་ལམ་དེ་སུ་ལ་རྒས་མི་འགྱུར། །ལམ་དེ་རྣམ་གྲོལ་ལམ་དེ་བསྟན་ཅིང་དབང་པོའི་ཤེས་པས་མི་ཐར་ཏེ། །སྡུག་བསྔལ་འགའ་ཡང་མི་འཇིལ་རྣམ་རིག་ཅེས་ཏེ་ཉོན་མོངས་འབྱུང་བའི་གནས། །དེ་ཕྱིར་སྐྱེ་བས་མཐོང་བ་དེ་དག་འཁྲུལ་པ་ཡིན་པར་མངོན་ཞིང་རྒྱལ་བས་གསུངས་པའོ། །གསོལ་བ། བྱང་ཆུབ་སེམས་ཀྱི་ཕུར་པ་དེས་འཁོར་བའི་སྡུག་བསྔལ་བཟློག་པར་འདོད་པའི་ཕྱིར་རྣལ་འབྱོར་ལས་གང་ལ་བརྟེན་པར་བྱ་ཞེ་ན། བཀའ་སྩལ་པ། འཁོར་བའི་སྡུག་བསྔལ་སེལ་འདོད་ན། །མན་ངག་ལྡན་པའི་སློབ་དཔོན་ཚོལ། །དེ་ནས་འཁོར་བ་རྩད་ནས་འདོན། །དེ་ལྟར་རྟག་ཏུ་གུས་པར་གྱིས། །ཞེས་གསུངས་སོ། །གསོལ་པ། བྱང་ཆུབ་སེམས་ཀྱི་ཕུར་པའི་དོན་བསྟན་པའི་སློབ་དཔོན་ཇི་ལྟ་བུ་བརྟེན་པར་བགྱི་ཞེ་ན། བཀའ་སྩལ་པ། སློབ་དཔོན་ཚད་མར་མི་ལྡན་སྤྲེའུ་འདྲ་བའི་ལུས། །བསྟེན་ཀྱང་ལམ་ནོར་རྟོག་པས་ཟིན་ཏ་རེ། །དེ་བས་གསེར་ལ་ནག་ཚུལ་གཏོང་བའི་སློབ་དཔོ་རིན་ཆེན་ཏེ། །རིན་ཐང་དཔག་ཏུ་མེད་པའི་རིན་གྱིས་བསླུ་བར་བྱའོ། །གསོལ་བ། བྱང་ཆུབ་སེམས་ཀྱི་ཕུར་པའི་དོན་སྟོན་པའི་སློབ་དཔོན་བརྟེན་པའི་ཡོན་ཏན་ཅི་ཞེ་ན། བཀའ་སྩལ་པ། བླ་མེད་བྱང་སེམས་ཕུར་པ་སྟོན་པའོ། །ཡོན་ཏན་མི་ཟད་སྦྱིན་པ་ཡིན། །བྱང་ཆུབ་ལམ་ཆེན་འདྲེན་མཛད་པ། །འཁོར་བའི་ལམ་རྣམས་སྟོངས་པར་བྱེད། །མ་རིག་མུན་སེལ་སྒྲོན་མ་ཡིན །ལོང་པ་རྣམས་ཀྱི་དམིགས་བུ་མཁན། །དེ་ལ་རྟག་ཏུ་མཆོད་བྱས་ན། །སངས་རྒྱས་བྱང་ཆུབ་ཐག་མི་རིང་། །ཞེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་པ་དེའི་དོན་སྟོན་པའི་སློབ་དཔོན་དེ་ལ་ཐབས་ཇི་ལྟ་བུས་མཉེས་པར་བགྱི་ཞེ་ན། བཀའ་སྩལ་པ། སློབ་དཔོན་ལ་སྨོད་པ་ནི། དཔེར་ན་མུན་ཁུང་སྒྲོན་བསད་ན། །མཐོང་བའི་དོན་མི་རྙེདཔབཞིན། །སྡུགབསྔལ་ནམ་ཉག་ཡུན་རིངས་སུ། །བསྐལ་པ་མང་པོར་མྱོང་བར་འགྱུར། །དེ་བས་རྟག་ཏུ་གུས་པར་བགྱི། །ཡུལ་ལ་དབང་པའི་རྒྱལ་པོ་བས། །ཤིན་ཏུ་གཙོ་བོར་བླང་བར་བྱ། །དྲིན་ཆགས་བསྐྱེད་པའི་ཕ་མ་བས། ་ན་ཏུ་གདུང་ཞིང་བརྩེ་བར་བྱ། །བརྣག་པའི་ནོར་ལ་འཕངས་མེད་ཅིང་། །གུས་དང་བཅས་པའི་བརྩེ་གདུང་གིས། །མན་ངག་ཐོབ་ཕྱིར་དབུལ་བར་བྱ། །གསོལ་བ། བྱང་ཆུབ་སེམས་ཀྱི་ཕུར་པ་དེའི་གོ་བའི་ཕྱིར་མང་དུ་ཐོས་པའི་ཤེས་རབ་གཅེས་སམ་མི་གཅེས་ཞེ་ན། བཀའ་སྩལ་པ། ཇི་ལྟར་ཅང་ཤེས་ཀྱི་ལིང་དག །སྡོམ་བྱེད་སྒྲོག་གིས་བཅིངས་འགྱུར་བ། །བཀྲོལ་ནས་བདེ་རླག་བཏང་གྱུར་ན། །ཅི་ཡང་ཐོགས་མེད་འགྲོ་བ་ལྟར། །སེམས་ཀྱི་དབང་པོ་ཅང་ཤེས་འདི། །མི་ཤེས་བཅིངས་པས་བཅིངས་འགྱུར་ན། །རྣམ་གྲོལ་ཐོས་པའི་སྒོ་མོ་ཡིས། ཁྲེས་རྒྱུད་ཀུན་འགྲོལ་ཐོགས་མེད་འགྲོ། །འདི་ནི་མི་ཤེས་རྒྱུད་འགྲོལ་བའི། །བཅིངས་པར་འགྱུར་བ་དགྲོལ་བ་སྟེ། ཁུད་རྣམས་དགྲོལ་བའི་བརླབ་པ་མྲ །གོམས་པར་བྱེད་པ་རབ་ཏུ་གཅེས། །ཞེས་གསུངས་སོ། །གསོལ་པ། བྱང་ཆུབ་སེམས་ཀྱི་ཕུར་པའི་མན་ངག་ཡིད་ཀྱང་མང་དུ་ཐོས་པ་གཅེས་ལགས་སམ་ཞེ་ན། བཀའ་སྩལ་པ། རང་གི་སེམས་ཀྱི་རྩ་བ་མ་ཆོད་ན། །ཇི་ལྟ་སྨྲས་ཀྱང་དོན་མེད་གཡེང་བའི་རྒྱུ། །ཉན་པ་མང་པོ་འདུ་འཛི་བསྐྱེད་པ་ཡིན། །དགེ་བའི་ཆོས་སྤྱོད་རྣམ་གྲོལ་ཐོབ་པར་དཀའ། །དེ་བས་དོན་འདི་ཡོངས་སུ་གོམས་པར་གྱིས། །སྡེ་སྣོད་རྣམ་གྲངས་ཆོས་ལ་བློ་འབྱོངས་ཀྱང་། །ངེས་པའི་གཏན་ཚིགས་གཅིག་ཏུ་མ་ཤེས་ན། །དོན་མེད་སྐྲུངས་པའི་ཚིག་དེས་སུས་ཀྱང་གོ་མི་འགྱུར། །གདེང་ལྡན་བློ་ལ་མན་ངག་མ་བཞག་ན། །མུ་མེད་སླབ་ཅོལ་དོན་མེད་སྨྲ་བ་བོན་པོ་བཞིན། །ཇི་ལྟར་བརྗོད་ཀྱང་དོན་མེད་གཡེང་བའི་རྒྱུ། །ཞེས་གསུངས་སོ། །གསོལ་བ། དེ་ལྟ་བུའི་བྱང་ཆུབ་སེམས་ཀྱི་ཕུར་པའི་མན་ངག་སྟོན་པ་ལ། །དཔེ་འམ་ཚད་མ་ཞིག་འཚལ་ལམ་མི་འཚལ་ཞེ་ན། བཀའ་སྩལ་པ། གསང་སྔགས་རྒྱ་མཚོ་ཆེན་པོ་འདི། །དཔེ་དང་ཚད་མའི་གཏན་ཚིག་དང་། །རྗེས་སུ་དཔག་པའི་ཤེས་རབ་ཀྱིས། །རྟོགས་པར་གྱུར་པ་མ་ཡིན་ནོ། །མངོན་སུམ་ལ་སོགས་རྒྱུའི་དངོས་པོ་འཇིག་ཅིང་གྲུབ་པའི་མཐའ་སྤྱོད་པའི། །དེ་ཉིད་རྟོགས་པའི་རྒྱུ་འབྲས་སྤྱོད་ཡུལ་ཚད་མར་བཞག་ནས་བློ་ཡིསའཇིག་བྱེད་དེ། །རྟོག་མཐའ་མེད་ཕྱིར་སྤྱོད་མཐའ་མེད། །དེ་ཡི་སྙིང་པོ་མེད་ན་ཚད་མ་གང་། །དེ་ཕྱིར་འཇིག་རྟེན་བརྟགས་པའི་ཐ་སྙད་རྟོགས་པ་རྣལ་འབྱོར་ལམ་འདིར་མི་དགོངས་སོ། ཞེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་པའི་ཚད་མ་གང་ལགས། །བཀའ་སྩལ་པ། དེ་བས་གསང་སྔགས་བདག་ཉིད་ཆེ། །དངོས་གྲུབ་རླབས་ཆེན་འབར་བ་ཅན། །བསམ་ཡས་གཏིང་ནི་དཔག་དཀའ་འོ། །ལུང་དང་མན་ངག་ཐོབ་པར་འགྱུར། །སྟོན་པས་ངེས་པའི་ལུང་དང་ནི། །བླ་མ་རྣམས་ཀྱི་མན་ངག་དེ་ནི་དོན་འདིར་བལྟ། །ཚད་མ་གསུམ་དང་ལྡན་བློས་རྣམ་པར་རྟོགས་པ་རྗེས་བཅད་པ། ལུང་དང་མན་ངང་གི་ཚིག་ཙམ་ལ་རྟེན་པ་ཡང་མ་ཡིན། རང་གི་བློ་ཡིས་མངོན་སུམ་དུ་ཡིད་ཆེས་པའོ། །ཞེས་གསུངས་སོ། །གསོལ་བ། །དེ་ལྟར་ཚད་མ་གསུམ་པོ་དེས་བྱང་ཆུབ་སེམས་ཀྱི་ཕུར་པ་དོན་ཇི་ལྟར་རྟོགས་པར་བགྱི་ཞེ་ན། བཀའ་སྩལ་པ། ངེས་དང་ཉམས་ལྡན་གཉིས་རྟེན་ལ། །རང་གི་ངོ་བོ་ཤེས་པར་བྱ། །གདུལ་བྱ་ཇི་སྙེད་པའི་དོན་དུ་ཡང་། །བཀའ་རབ་འབྱམས་ཀྱི་བསྟན་པ་བསམ་གྱིས་མི་ཁྱབ་པ་གཅིག་གསུངས་ཀྱང་། དོན་བྱང་ཆུབ་སེམས་ཀྱི་ཕུར་པར་ལྷུན་གྱིས་གྲུབ་པའོ། ཁམས་གསུམ་གནས་པའི་སེམས་ཅན་ལ། །བྱང་ཆུབ་སེམས་ནི་མ་ཡིན་པའི། །ཕན་པའི་སྨན་ནི་གཞན་མེད་དེ། །བྱང་ཆུབ་སེམས་ཀྱི་ཕུར་པའི་དོན་རྟོགས་ནི། །འཁོར་བའི་ཆོས་ནི་རྒྱུན་མེད་དེ། །མྱུར་དུ་བྱང་ཆུབ་ཀུན་གྱིས་ཐོབ། །མི་སྐྱེ་མི་འགག་བདེ་ལ་གནས། །ཞེས་གསུངས་སོ། །གསོལ་བ། འཁོར་བའི་ཆོས་ཐམས་ཅད་བྱང་ཆུབ་སེམས་ཀྱི་ཕུར་བུར་དག་གོ་མཉམ་མོ་ཞེས་བགྱི་བའི་དོན་ཇི་ལྟ་བུ་ལགས་ཞེ་ན། བཀའ་སྩལ་པ། སྣོད་བཅུད་རྒྱུ་རྣམས་དག་རྟོགས་ཤིང་། །མཉམ་ཉིད་ལྷག་པའི་མཉམ་ཉིད་ཀྱིས། །དཀྱིལ་འཁོར་བྱང་སེམས་ཕུར་པའི་ཞིང་དུ་དག །མཉམ་པ་ལ་ཡང་རྣམ་བཞི་སྟེ། །དོན་དམ་པར་སྐྱེ་བ་མེད་པར་མཉམ་པ་དང་། ཀུན་རྫོབ་སྒྱུ་མའི་མཚན་ཉིད་དུ་མཉམ་པ་དང་། ཕྱིའི་ཡུལ་དེ་བཞིན་གཤེགས་པ་ལྔར་མཉམ་པ་དང་། ནང་གི་སེམས་ཡེ་ཤེས་ལྔར་མཉམ་པའོ། །འབྱུང་བ་ཆེན་པོ་སོ་སོར་མ་བྱས་མ་བཅོས་པ་ལས་སྒྲ་སྐད་སྣ་ཚོགས་པར་ཐ་དད་པར་འབྱུང་བ་ནི། བྱང་ཆུབ་སེམས་ཀྱི་ཕུར་པ་ཉིད་དོ། །འདི་དག་ནི་བདག་ཉིད་ལས་བྱུང་བས་གང་གི་ངོ་བོར་ཡང་མ་གྱུར་ཆོས་ཀྱི་སྐུ་སྟེ། བྱང་ཆུབ་སེམས་ཀྱི་ཕུར་པ་ང་ཉིད་དོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་དག་ནི་ངའི་སྐུའོ། །ངའི་གསུང་ངོ་། །ངའི་ཐུགས་སོ། །ངའི་ཡོན་ཏན་ནོ། །ངའི་འཕྲིན་ལས་སོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ནི། སངས་རྒྱས་ཀྱི་ས་མཐར་ཕྱིན་པ་རྫོགས་པ་ཆེན་པོ་ཉིད་དོ། །ཐམས་ཅད་སྐུ་གསུང་ཐུགས་ལས་མ་གཏོགས་པ་འཁོར་བ་དང་ཉོན་མོངས་པའི་མིང་ཡང་མེད་དོ། །སངས་རྒྱས་འབྱུང་བ་ལས་མ་གཏོགས་པ་སེམས་ཅན་དུ་སྐྱེ་བའི་རྒྱུ་ཅི་ཡང་མེད་དོ། །སྐུ་སྣང་བ་ལས་མ་གཏོགས་པ་སེམས་ཅན་དང་ཆེན་པོ་ལྔ་ཡེ་ནས་མེད་དོ། །སངས་རྒྱས་ཀྱི་བདེ་བ་ཆེན་པོ་ལས་མ་གཏོགས་པ་སེམས་ཅན་དང་སྡུག་བསྔལ་གྱི་ཆོས་ཡེ་ནས་མེད་དོ། །ཞེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་པ་དེ་ཡང་དག་པར་ཡབ་དང་། ཡུམ་དང་། སྐུ་གསུང་ཐུགས་ཡོན་ཏན་འཕྲིན་ལས་སུ་ཡོད་པ་ལགས་སམ་ཞེ་ན། བཀའ་སྩལ་པ། ཐམས་ཅད་མ་སྐྱེས་ཟག་པ་མེད། །ཁམས་ཀྱང་མེད་ཅིང་འབྱུང་བ་མེད། །བྱང་ཆུབ་མེད་ཅིང་མངོན་རྟོགས་མེད། །མཚན་མེད་མི་འགྱུར་ནམ་མཁའ་བཞིན། །གཉིས་མེད་གཉིས་སུ་མེད་མིན་ཞི། །བྱང་ཆུབ་སེམས་འདི་རྒྱས་པའི་ཕྱིར། ཐུགས་ཉིད་སྐུ་ཡི་དཀྱིལ་འཁོར་ལ། །དབྱིངས་ཉིད་སྐུ་ཡི་དཀྱིལ་འཁོར་ཏེ། །ཡོན་ཏན་འཕྲིན་ལས་དབྱེར་མེད་དེ་བཞིན་ལྷུན་གྱིས་གྲུབ། །ཅེས་གསུངས་སོ། །གསོལ་པ། དངོས་པོ་ཐམས་ཅད་ཀྱི་མཐའ་བྱང་ཆུབ་སེམས་ཀྱི་ཕུར་པ་སྐྱེས་པ་དེ། ཚུལ་ཇི་ལྟར་འཚལ་བར་བགྱི་ཞེ་ན། བཀའ་སྩལ་པ། དཔེར་ན་རྡོ་རྗེའི་རང་བཞིན་དག །སྲ་ཞིང་མཁྲེགས་པའི་དངོས་པོ་ཡང་། །བརྟགས་ཏེ་དུ་མར་བྱས་ནས་ནི། །རླུང་གི་མཐུ་ཡིས་གཏོར་བྱས་ན། །དེ་ལ་དངོས་པོ་ག་ལ་ཡོད། །དཔེར་ན་མེ་ཡི་རང་བཞིན་དག །ཚ་ཞིང་དངོས་པོ་ཀུན་བསྲེགས་ཤིང་། །འབར་འཕྲོ་སྣང་གསལ་མཆེད་བྱེད་པ། །ཆུ་ཡི་མཐུ་ཡིས་རླག་བྱས་ན། །དེ་ལ་རང་བཞིན་ག་ལ་ཡོད། །དཔེར་ན་རྫས་ཀྱི་དངོས་པོ་ཡང་། །མེ་ཡི་མཐུ་ཡིས་བསྲེགས་གྱུར་ན། །དེ་ལ་རང་བཞིན་ག་ལ་ཡོད། ཁྲེས་པས་ཟིན་པའི་ཤེས་པ་རྣམས། །གཟུགས་དང་འདྲ་བ་སྣ་ཚོགས་ཀྱང་། །དབང་པོ་ལ་སོགས་མཛེས་གྱུར་ཀྱང་། །ཕུང་པོ་མི་རྟག་ཤི་འཔོས་ནས། །དངོས་པོ་ཐམས་ཅད་ཞིག་འགྱུར་ཏེ། །ཞིག་དང་རྡུལ་ལ་སོགས་པ་དང་། །རུས་པ་དག་ཀྱང་རླག་འགྱུར་ཏེ། །ཐ་མ་ཅིར་ཡང་སྣང་མི་འགྱུར། །རི་བོ་ཆེན་པོ་ལ་སོགས་པ། །དངོས་པོ་བརྟན་གཡོ་འཇིག་རྟེན་རྣམས། །བསྐལ་པ་གསུམ་གྱིས་རླག་བྱས་ན། །དེ་ལརངབཞིནགལཡོད། །དེས་ན་དངོས་པོའི་ཆོས་རྣམས་ཀུན། །དངོས་པོ་རྟག་པ་མ་ཡིན་པས། །ཆོས་རྣམས་རང་བཞིན་མེད་པར་ཤེས། །དབང་པོ་བརྟན་གཡོ་སྣང་བ་ཀུན། །ཡུལ་རྣམས་ཡོད་པ་མ་ཡིན་ཏེ། །ཀུན་གཞི་རྣམ་པར་ཤེས་པ་ཉིད། །དངོས་པོ་སྣ་ཚོགས་པར་སྣང་སྟེ། །སྣང་བའི་དངོས་པོ་རྣམས་བཤིག་ན། །གཞིགས་ན་ནམ་མཁའི་ངང་དུ་ཞི། །ནམ་མཁའ་དེ་ཉིད་ལྔས་གཞིག་ན། །མཚན་མ་མེད་པའི་དབྱིངས་སུ་ཐིམ། །འཇིག་རྟེན་བརྟན་གཡོ་ལ་སོགས་པ། །སྣང་བ་ཉིད་ན་ངོ་བོ་མེད། །དེ་ཉིད་བྱང་སེམས་ཕུར་པ་ཆོས་སྐུ་ཆེན་པོ་ཡིན། །ཞེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་པ་དེ་ཡང་དག་པར་སྒྱུ་མ་ཙམ་དུ་ཡང་མ་མཆིས་སམ་ཞེ་ན།བཀའ་སྩལ་པ། དེ་ལྟ་དངོས་པོའི་མཚན་མ་ཀུན་བརྟགས་ན། །རང་བཞིན་སྒྱུ་མ་མེད་འགྱུར་ཕྱིར། །ཡོད་ལས་ལྟོས་པ་མེད་དེ་མེད་པའི་མེད་པ་མེད། །མཐའ་རྣམས་མེད་ཕྱིར་དབུས་མེད་དབུས་ལའང་གནས་པར་མི་བྱེད་དོ། །མ་སྤངས་མ་བསྒྲུབས་ནམ་མཁའི་ངང་དུ་གནས། །ཁམས་གསུམ་བརྟགས་ན་འཁོར་བ་མྱ་ངན་མེད། །ཕྱོགས་ཆར་དབྱེ་ན་བདེ་གཤེགས་སྙིང་པོ་ཡིན། །ཞེས་གསུངས་སོ། །གསོལ་པ། བྱང་ཆུབ་སེམས་ཀྱི་ཕུར་པ་དེ་སྒྱུ་མ་ཙམ་དུ་ཡོད་པ་དེ་ཞིན་གཤེགས་པ་ཡིན་བགྱི་བ་དེ་ཇི་ལྟ་བུ་ལགས་ཤེ་ན། བཀའ་སྩལ་པ། ཡང་དག་ཉིད་ན་གནས་བཅས་ན། །ཕྱི་ནང་སྣོད་བཅུད་རྣམས་པར་དག །རགས་པར་སྣང་བ་དེ་བཞིན་གཤེགས། །སྒྱུ་མར་འཛིན་པ་ཡུམ་གྱི་དབྱིངས། །གཟུགས་ཀྱི་མཚན་ཉིད་དངོས་པོ་མེད། །གཅིག་ལའང་ལྔར་གཞིག་པ་དང་། །ཐམས་ཅད་ནམ་མཁའི་ངང་དུ་གནས། །ནམ་མཁའ་དེ་ནི་ཆོས་ཀྱི་དབྱིངས། །ཞེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་པ་དེ་ཐམས་ཅད་སྟོང་པ་ཁོ་ནར་ཤེས་ནས་ཡང་དག་པའི་དོན་ལགས་སམ་ཞེ་ན། བཀའ་སྩལ་པ། མདོ་སྡེ་དང་བསྟན་བཅོས་བཀྲི་དྲང་གི་དོན་གྱིས་ནི་ཐམས་ཅད་སྟོང་བར་བཤད། དེ་བས་མེད་པར་བཤད། །དེ་བས་ཀྱང་སྟོང་པ་བདག་མེད་པར་བཤད་དེ། སྟོང་པ་ཉིད་ལ་བལྟ་ཉེས་ན། ཁེས་རབ་ཆུང་ལྡན་ཕུང་པར་འགྱུར། །ཇི་ལྟར་སྦྲུལ་ལ་བཟུང་ཉེས་དང་། །རིག་སྔགས་ལོག་པར་བསྒྲུབས་པ་བཞིན། །རྒྱལ་བ་རྣམས་ཀྱི་སྟོང་ཉིད་ནི། །ལྟ་ཀུན་ངེས་པར་འབྱིན་པ་སྟེ། །གང་ཟག་སྟོང་པ་ཉིད་ལྟ་བ། །དེ་ནི་སོར་མི་རུང་ཞེས་གསུངས། །སྣ་ཚོགས་སྣང་ཞིང་མེད་པར་གང་སྨྲ་བ། །མེད་པར་མཐོང་བས་མུ་སྟེགས་འཆལ་བའི་ལམ། །ཞེས་བྱའོ། །གསོལ་བ། བྱང་ཆུབ་སེམས་ཀྱི་ཕུར་པ་ཆོས་རྣམས་ཐམས་ཅད་སྟོ་ང་པ་ཉིད་དུ་བསྟན་པ་ཅི་འཚལ་ཞེ་ན། བཀའ་སྩལ་པ། སྐྱེ་བ་མེད་ཅེས་བསྟན་པ་ཡང་། །དངོས་པོ་འཛིན་པ་བཟློག་ཕྱིར་ཏེ། །སྒྱུ་མ་ཡེ་ནས་སྐྱེ་མེད་ལ། །སྐྱེ་མེད་ཉིད་ཀྱིས་སྒྲོ་མི་གདགས། །ནམ་མཁའ་འདི་ནི་མེད་དོ་ཞེས། །བླུན་པོ་གང་ཞིག་རྟོག་པར་བྱེད། །མཁས་པས་སྔོན་ནས་ཡོང་མི་འཛིན། །ཞེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་པ་སྟོང་པ་ཉིད་ཅེས་བྱ་བ་འདི་ཇི་ལྷ་བུ་འཚལ་བར་བགྱི་ཞེ་ན། བཀའ་སྩལ་པ། ང་མེད་ཕྱོགས་དང་བྲལ་བར་ཡོངས་ལ་བསྟན་དུ་མེད། །མེད་པའི་ས་མཚམས་བཅད་པར་ཡོང་མི་བསྟན། །མེད་པར་བསྟན་པ་ཡོད་པའི་ངོ་བོ་ཡིན། །ཡོད་མེད་གཉིས་སུ་བསྟན་པ་ཤིན་ཏུ་དཀའ། །གཟུགས་རྣམས་སྣ་ཚོགས་མཚན་མ་ཅིར་སྣང་བ། །དོན་དམ་ཉིད་དུ་ཡོད་པ་མ་ཡིན་པས། །གང་ལ་འདི་འདྲ་ཞེས་ནི་བརྟག་པ་མེད། །ཅེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་པ་དེ་ཅི་ཞིག་གིས་མེད་པར་འགྱུར་བ་ལགས་ཞེ་ན། །བཀའ་སྩལ་པ། ཆོས་ཀྱི་དབྱིངས་ཉིད་ཆོས་ཀྱི་སྐུ། །མི་རྟོག་ཡེ་ཤེས་ཡིན་ཞེས་བཤད། །རང་བྱུང་ཡེ་ཤེས་རང་བཞིན་སྣང་། །གང་ཞིག་སྟོང་བའི་ངང་ཡོད་ཅེས། །མེད་པའི་རང་བཞིན་རྟོག་པ་སྟེ། །རི་བོང་རྭ་དང་མོ་ཤམ་བུ། །ཚིག་ཙམ་གདགས་སུ་རུང་མོད་ཀྱིས། །ཐམས་ཅད་མིང་ཙམ་སྟོང་ཉིད་མེད། །ཐམས་ཅད་སྟོང་པ་ཞེས་པ་སྟེ། །ས་རྡོ་དྲན་མེད་མ་ཡིན་པས། །རྟོག་མེད་རང་བཞིན་འདི་གསལ་བ། །ཇི་ལྟར་སྣང་བ་ཐམས་ཅད་ཀུན། །གདོས་པ་ཅན་གྱི་ཆོས་མེད་དེ། ཤེས་པ་འབའ་ཞིག་ཁོ་ནའོ། །རང་བཞིན་ཆ་ཕྲ་གང་འཛིན་པ། །འཛིན་པ་དེ་ལ་ཆོས་མེད་དོ། །ཆོས་མེད་འབྲས་བུ་དེ་ལ་མེད། །ཆོས་ཀྱི་འབྲས་བུ་གང་ཡིན་པ། །རིག་པའི་དོན་ནི་འདི་རྣམས་སོ། །སྔོན་དང་ཕྱི་མར་མ་གྱུར་ཅིང་། ཕྱོགས་དང་རིས་སུ་མ་ཕྱེ་བར། །འཛིན་ཆགས་འཛིན་པའི་རྟོགས་སྤངས་ན། །དེ་ནི་ཆོས་ཉིད་ཅེས་བྱའོ། །ཞེས་གསུངས་སོ། །གསོལ་པ། བྱང་ཆུབ་སེམས་ཀྱི་ཕུར་པ་དེ་ཀུན་རྫོབ་ཏུ་ཐམས་ཅད་སྒྱུ་མ་ལྟ་བུའོ་ཞེས་བགྱི་བའི་ཚུལ་ཇི་ལྟར་འཚལ་བར་བགྱི་ཞེ་ན། བཀའ་སྩལ་པ། ཀུན་རྫོབ་སྒྱུ་མར་མཉམ་པ་ནི། །འདུས་བྱས་དངོས་པོ་སྣ་ཚོགས་ཀུན། །སྒྱུ་མའི་ཚུལ་དུ་ཐམས་ཅད་སྣང་། །འཕྲལ་སྣང་བྱ་བ་ཀུན་ཀྱང་བྱེད། །རྟག་པ་ཀུན་གྱི་ཚད་མར་སྣང་། །འདི་དག་ཐམས་ཅད་གཟུགས་བརྙན་དེ། །བྱ་བྱེད་སྣང་ཞིང་དངོས་པོ་མེད། །ཆུ་ཟླའི་ཚུལ་དུ་ཐམས་ཅད་གནས། །ཐམས་ཅད་སྣང་ལ་རང་བཞིན་མེད། །ཐམས་ཅད་མ་ལུས་ཆོས་སོ་ཅོག །སྙིང་པོ་ཡོད་པ་མ་ཡིན་ཏེ། །སྒྱུ་མ་མིག་ཡོར་སྤྲུལ་པ་དང་། །སྨིག་རྒྱུ་འཇའ་ཚོན་ཆུ་ཟླའི་ཚུལ། །དེ་ལྟར་གང་གིས་རྟོགས་པ་སྟེ། །དེ་ཉིད་སངས་རྒྱས་ཡིན་པར་བཤད། །ཅེས་གསུངས་སོ། །གསོལ་པ། བྱང་ཆུབ་སེམས་ཀྱི་ཕུར་པ་དེ་བདེན་པ་གཉིས་དབྱེར་མེད་དོ་ཞེས་བགྱི་བ་དེ་ལྟ་བུ་ལགས་ཞེ་ན། བཀའ་སྩལ་པ། དོན་དམ་པོ་དང་ཀུན་རྫོབ་བྱེར་མེད་པར་མཉམ་པ་ནི། ཆོས་རྣམས་མ་ལུས་ཐམས་ཅད་ཀུན། །གཞི་རྩ་མེད་ལས་ཐམས་ཅད་འབྱུང་། །ཡོད་དང་མེད་པ་གཉིས་ཀ་མེད། །དོན་དམ་ཀུན་རྫོབ་དབྱེར་མེད་དེ། །འདུས་མ་བྱས་ཉིད་འདུས་བྱས་སྣང་། །སྣང་བ་ཉིད་ན་དངོས་མེད་དེ། །དངོས་མེད་དེཉིདསྣཚོགསསྣང། །དེ་ཉིད་སྒྱུ་མ་མིག་ཡོར་ཚུལ། །བདེན་པ་གཉིས་མེད་སེམས་པར་ཟད། །ཅེས་གསུངས་སོ། །གསོལ་པ། བྱང་ཆུབ་སེམས་ཀྱི་ཕུར་པ་དེ་བདེན་པ་གཉིས་སུ་བརྟགས་པ་ཅི་འཚལ་ཞེ་ན། བཀའ་སྩལ་པ། གང་ཟག་སྒྱུ་མ་བཀྲི་དོན་བདེན་གཉིས་མེད། །བག་ཆགས་སྟོང་སེམས་དེ་དག་གཡེང་བ་ཆེ། །རང་བཞིན་དུས་གཅིག་སྟོང་ལས་ན། །སེམས་དང་བག་ཆགས་གཅིག་པར་གསུངས། ཁྲེས་ཙམ་ཡིན་པ་བདག་ཉིད་ལས། ཐིག་ལེའི་ཆེན་པོར་རྒྱལ་བས་བཤད། །ཅེས་གསུངས་སོ། །གསོལ་པ། བྱང་ཆུབ་སེམས་ཀྱི་ཕུར་པ་དེ་བདེན་པ་གཉིས་དབྱེར་མེད་པའི་བྱང་ཆུབ་སེམས་ཀྱི་ཕུར་པ་དེ་ཉིད་ཇི་ལྟ་བུ་ལགས་ཞེ་ན། བཀའ་སྩལ་པ། ཡོད་དེ་དངོས་པོ་མ་ཡིན་ཏེ། །ཆུ་ཟླ་བཞིན་དུ་རང་བཞིན་མེད། །མེད་དེ་ཆད་པ་ཡོད་མ་ཡིན། །ནམ་མཁའི་དབྱིངས་ལྟར་ཅིང་ཡང་སྣང་། །གཅིག་སྟེ་རྣམ་པ་མ་ཡིན་ཏེ། །དོན་དམ་གཅིག་ཏུ་ཐམས་ཅད་འདུས། །གཉིས་མེད་ཕྱལ་བ་མ་ཡིན་ཏེ། །ཡོངས་ལ་ཁྱབ་པས་བརྡལ་བའི་སྐུ། །གང་ལྟར་བསྟན་ཀྱང་གང་ཡང་མེད། །མེད་པ་མ་ཡིན་དྲན་བཞིན་ཚོལ། །ཆད་པར་མ་སོང་རིག་ཅིང་རྟོགས། །རྟག་པར་མ་སོང་རིག་ཅིང་རྟོགས། །རྟག་པར་མ་སོང་དངོས་པོ་མེད། །གཉིས་སུ་མ་སོང་རྟོག་པ་མེད། །གཅིག་ཏུ་མ་སོང་ཀུན་ལ་ཁྱབ། །དང་པོ་སྐྱེ་བའི་རྒྱུ་མེད་ལ། །ཐ་མ་འཆི་ཞིང་འཕོ་བ་མེད། །ད་ལྟར་དངོས་པོའི་རྫས་མེད་པས། །རྟག་པར་ཆགས་ཞིང་གཟུང་དུ་དངོས་པོའམ། མ་ལུས་བའི་ཆོས་གཅིག་ཀྱང་མེད་དེ། སྐུ་གསུང་ཐུགས་སུ་ལྷུན་གྱིས་གྲུབ་པར་ཕབ་པས་ཐེག་པ། དེའི་རྡོ་རྗེའི་ཐེག་པའི་ཆོས་ཞེས་བྱའོ། །གསོལ་བ། བྱང་ཆུབ་སེམས་ཀྱི་ཕུར་པ་དེ་ཆོས་ཉིད་ཚིག་ལས་འདས་པ་གསུངས་པ་ཅིའི་ཕྱིར་ལགས་ཞེ་ན། བཀའ་སྩལ་པ། སེམས་ཀྱི་རང་བཞིན་བཙལ་བས་མི་རྙེད་ན། །གཞན་ལ་འདི་འདྲ་ཞེས་ནི་བསྟན་དུ་མེད། །མཆོག་ཏུ་གསང་བའི་ཆོས་ཉིད་ནི། །རྣ་དབང་གཞན་ལས་ཐོས་མི་འགྱུར། །དེ་བཞིན་ལྕེ་ཡི་དབང་པོས་ཀྱང་། །དེ་ཁ་བརྗོད་དུ་རྡུལ་ཙམ་མེད། །སྐྱེ་བ་མེད་པའི་ཆོས་རྣམས་ནི། །མ་སྐྱེས་པས་ནི་སྙིང་པོར་བཞེད། །སྙིང་པོའི་དོན་དུ་གང་འགྱུར་བ། །ཚིག་ཏུ་སྨྲ་བ་ལེགས་མ་ཡིན།་།སྤྲོས་པ་ཉིད་ན་གོལ་བ་ཞེས། །རྒྱལ་བ་རྣམས་ཀྱིས་ཡང་དག་བཤད། །དེ་བས་རྡོ་རྗེ་རྒྱལ་པོ་ཉིད། །བཀའ་མི་གསོལ་བར་དགོངས་པའོ། །ཕྲ་ཞིང་ཤེས་དཀའ་དྲང་སྲོང་ཆེན་པོའི་ལམ་ནི་མི་རྟོག་རྟོགས་ལས་འདས། །མི་གནས་དམིགས་པའི་ཡུལ་མེད་བསམ་པ་ཀུན་དང་བྲལ། །ཚིག་གིས་མ་ཕེབས་དབྱིབས་དང་ཁ་དོག་དབང་པོའི་སྤྱོད་ཡུལ་མིན། །བསྟན་ཅིང་བརྟག་པར་དཀའ་ལ་བརྗོད་དུ་རྡུལ་ཙམ་མེད། །དུས་གསུམ་སངས་རྒྱས་ཐམས་ཅད་ཀྱིས། །འགྲོ་བ་མི་ཤེས་དྲང་དོན་དུ། །ཆོས་ཀྱི་འཁོར་ལོ་ཡོངས་བསྐོར་ཏེ། །ཐེག་པའི་བྱེ་བྲག་བསམ་ཡས་པ། །འགྲོ་བའི་དོན་ལ་ཅི་གསུངས་ཀྱང་། །སེམས་ཀྱི་རང་བཞིན་འདས་པ་ཡི། །རང་བཞིན་མེད་ལས་ཡོད་པ་དྲན། ཁྲེས་རབ་ཆེན་པོས་རྟོགས་པའི་རྟགས། །མཁའ་ལྟར་མཉམ་པ་ཉིད་ལ་གནས། ཁྲེས་རབ་ཆེན་པོས་ཁྱབ་པའི་རྟགས། །མི་གཡོ་མཉམ་བཞག་འདུས་མ་བྱས། ཁྲེས་རབ་ཆེན་པོས་གྲུབ་པའི་རྟགས། །མ་ཆགས་ཐབས་ཀྱིས་ཀུན་ལ་སྤྱོད། །རྟོགས་པ་ཆེན་པོའི་ཆེན་པོ་ལ། །མ་རྟོགས་སྦྱོར་བའི་ལས་བྱེད་ན། །ཆེ་བའི་ཡོན་ཏན་ཡོད་མ་ཡིན། །ཞེས་གསུངས་སོ། །གསོལ་པ། བྱང་ཆུབ་སེམས་ཀྱི་ཕུར་པའི་དོན་རྟོགས་པ་དེའི་སྐབས་གང་དུ་དགོས་པ་ལགས་ཞེ་ན། བཀའ་སྩལ་པ། མཁས་པ་མི་གཙོ་རྟོགས་པ་གཙོ། །མཁས་པ་མི་ཚིག་ཐན་པ་ཡིན། །རྟོགས་ལ་ཆོས་ཉིད་རླུད་ལ་འབྱོ། །བསྒྲུབ་པ་བས་ཀྱང་རྟོགས་པར་རིགས། །རྟོགས་པ་དེ་རུ་མ་གྱུར་ན། །བསྒྲུབ་པ་རྟོག་པའི་རྒྱུན་ལ་བསྒྲུབ། །སྒོམ་པ་མཚན་མའི་ངངལ་སྒོམ། །རྩོལ་བ་ཉོན་མོངས་ཞེན་པས་རྩོལ། །ཞེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་པའི་རྟོགས་པ་དེའི་སྤྱོད་ཡུལ་དང་ཡོན་ཏན་ཇི་ལྟ་བུ་ལགས། བཀའ་སྩལ་པ། དག་པས་བརྟགས་ན་ཀུན་ཀྱང་ལགས། །རྟོགས་པས་བསམ་ན་གང་ཡང་འགྲུབ། །ཐམས་ཅད་དག་ཅོས་བྱ་བ་ཡང་། །དངོས་པོ་གསལ་དག་མ་ཡིན་ཏེ། །སྣང་སྤྱོད་ཉིད་ན་རྣམ་པར་དག །ཅེས་གསུང་སོ། །གསོལ་པ། བྱང་ཆུབ་སེམས་ཀྱི་ཕུར་པ་དེའི་ངང་དུ་ཐམས་ཅད་དག་པའི་ཚུལ་ཇི་ལྟར་ལགས་ཞེ་ན།བཀའ་སྩལ་པ། འདི་ལྟར་སྣང་བ་ཐམས་ཅད་ལ། །མངོན་སུམ་ཚད་མས་རྟགས་མཐོང་ཡང་། །སྣང་བ་ཉིད་ན་དངོས་པོ་མེད། །དེ་བཞིན་ཉིད་དུ་ཡང་དག་རྟོགས། །མཐོང་ན་མཐོང་དུ་ཟད་དེ་རྣམ་དག་དབྱིངས་སུ་མཐོང་། །ཐོས་ནས་ཐོས་སུ་ཟད་དེ་མན་ངང་ངེས་པ་ཐོས། །ཚོར་ན་ཚོར་དུ་ཟད་དེ་རྩ་བ་མེད་པར་ཚོར། །མྱོང་ན་མྱོང་དུ་ཟད་དེ་བཅོས་པ་མེད་པར་མྱོང་། །རེག་ན་རེག་ཏུ་ཟད་དེ་འགྱུར་བ་མེད་པར་རེག །ཆོས་ན་ཆོས་སུ་ཟད་དེ་རྣམ་དག་དབྱིངས་སུ་ཆོས། །སྔགས་ཀྱི་ཡོངས་སུ་ཟིན་པའི་ནད། །ཀུན་ལ་གནོད་པར་བྱེད་མི་ནུས། །ཐབས་དང་ཤེས་རབ་རྟོགས་པ་ཡིས། །དུག་གསུམ་སྡུག་བསྔལ་གནོད་མི་འགྱུར། །ཐབས་ལ་མཁས་པས་མ་ཟིན་ན། །ལམ་གྱི་དགེ་སྤྱད་སྟེགས་བཅས་ཀྱང་། །མཐོ་རིས་དང་ནི་མི་རུ་སྐྱེ། །སྐྱེ་ཤི་མེད་དཔའི་ས་མི་ཐོབ། །ཐབས་མཁས་སྙིང་རྗེས་ཟིན་པས་ནི། །མཚམས་མེད་སེམས་ཅན་མ་ལུས་ཀུན། །བྱང་ཆུབ་སྙིང་རྗེས་བསད་ན་ཡང་། །བསོད་ནམས་དཔག་ཏུ་མེད་པ་ཐོབ། །ཡེ་ཤེས་རྟོགས་པའི་ཁྱད་པར་ལས། །སྤྱོད་ལམ་རྣམ་བའི་ཅི་སྤྱད་ཀྱང་། །འཆི་བར་མི་འགྱུར་རྣམ་གྲོལ་རྫོགས། །ལྟ་བས་མཐོང་ལ་རྟོགས་པ་མེད། །ཡེ་ནས་ལྷུན་གྲུབ་ཉམ་མི་ང་། །དེ་ལ་གོལ་ས་ག་ལ་ཡོད། །ཅེས་གསུངས་སོ། །གསོལ་པ། བྱང་ཆུབ་སེམས་ཀྱི་ཕུར་པ་དེ་རྟོགས་པས་སྒྲིབ་པ་ཇི་ལྟར་དག་པ་ལགས་ཞེ་ན། བཀའ་སྩལ་པ། དེ་ལྟར་ཤེས་པའི་མཐུ་ཡིས་ནི། །བག་ཆགས་མུན་པ་ཀུན་གསལ་ཏེ། །ཇི་ལྟར་རླུད་གིས་རྡུལ་ཆགས་ལྟར། །སྐད་ཅིག་ཙམ་གྱིས་ཏིང་འཛིན་གྱིས། །སྒྲིབ་པའི་ཕུང་པོ་ཕྱགས་པར་འགྱུར། །ཇི་ལྟར་མར་མེས་མུན་བསལ་ན། །མུན་ཉིད་སྣང་བར་འགྱུར་བ་བཞིན། །སྐད་ཅིག་མ་ཡི་དོན་རིག་པར། །སྔོན་ནས་བསགས་པའི་མུན་པ་སེལ། །རྨད་བྱུང་བྱང་ཆུབ་སེམས་བསྒོམས་པས། །འགྲོ་བ་མྱུར་དུ་བྱང་ཆུབ་སྟེ། །མ་སྐྱེས་བྱང་ཆུབ་རྨད་བྱུང་བ། །ཉོན་མོངས་ལས་ཀྱིས་གོས་མི་འགྱུར། །བྱང་ཆུབ་སེམས་ནི་སྤུ་གྲིའི་སོ། །ཏིལ་མར་ངར་བཏབ་རལ་གྲི་བཞིན། །བྱང་ཆུབ་སེམས་ནི་ཡོངས་ཀྱི་ལམ། །སྐྱོན་གྱིས་མ་གོས་པདྨ་བཞིན། །ཅིབྱསཉེསཔའི་སྐྱོན་མ་གོས། །བསྐལ་བ་འབར་བའི་མེ་བཞིན་དུ། །སྡུག་བསྔལ་སྡིག་པ་ཅི་སྤྱད་ཀྱང་། །རྣམ་གྲོལ་བླ་མེད་སངས་རྒྱས་འགྲུབ། །ཅེས་གསུངས་སོ། །གསོལ་པ། བྱང་ཆུབ་སེམས་ཀྱི་ཕུར་པའི་དོན། །ཐུགས་སུ་ཆུད་པའི་རྣལ་འབྱོར་པས། །སྟོད་པ་ཇི་ལྟར་བསླབ་པར་བགྱི། །ཞེ་ན། བཀའ་སྩལ་པ། སྣང་སྲིད་མཚན་མའི་རྫས་རྣམས་ཀུན། །མ་རིག་རྨོངས་པའི་བློ་རྣམས་ཀྱིས། །སྤྱོད་པ་ཉིད་དུ་སྣང་བ་དེ། །ཐབས་ལ་མཁས་པའི་རྣལ་འབྱོར་པས། །རངབཞིནམེདཔརའདྲིས་པར་སྤྱོད། །སེམས་ཉིད་ཅིར་ཡང་མི་སྣང་ཕྱིར། །སྤྱོད་པ་ཅིར་ཡང་མི་སྤྱད་དེ། །གཙང་སྨེ་ཕྱོགས་རིས་སྤྱོད་པ་དང་། །ཆེ་ཆུང་ཆགས་སྡང་བླང་དོར་སོགས། །ཅི་ལའང་བྱེ་བྲག་མི་བྱ་སྟེ། །བདག་སྨོད་གཞན་རྐྱེན་ལ་སོགས་པ། །ཐེག་ཆེན་རྣལ་འབྱོར་ག་ལ་ཡིན། །སེམས་ཅན་དམྱལ་བའི་ཆོས་ཀྱང་མི་འགལ་ཏེ། །ཉན་ཐོས་ལ་སོགས་ཅིས་ཅི་དགོས། །ཐམས་ཅད་མཉམ་ཉིད་ངང་དུ་སྤྱད། །བདག་ཉིད་མི་རྟོགས་ཉམས་རྙེད་ཀྱང་། །འགྲོ་དོན་དགེ་ཆོས་རྫོགས་བྱེད་པ། །ཡོན་ཏན་མ་ལུས་སྦེད་ཤེས་ཏེ། །མདོར་ན་སྤྲུལ་སྐུའི་སངས་རྒྱས་བཞིན། །ཆོས་རྣམས་སྟོང་པ་ཉིད་དུ་རབ་རྟོགས་ཀྱང་། །ལས་ཀྱི་རྣམ་སྨིན་ཡོད་ཅེས་བྱས། །བསམ་དུ་མེད་པའི་ཆོས་ཉིད་ལ་ལོངས་སྤྱོད། །འདུས་བྱས་དག་པ་རྒྱུན་མི་འཆད། །ཅེས་གསུངས་སོ། །གསོལ་པ། བྱང་ཆུབ་སེམས་ཀྱི་ཕུར་བའི་དོན་སྤྱོད་པ་དེ་ལྟར་སྤྱད་ན། དངོས་པོའི་ཆོས་ལ་ཞེན་པར་མི་འགྱུར་རམ་ཞེ་ན། བཀའ་སྩལ་པ། རྣལ་འབྱོར་ཆེན་པོའི་སྤྱོད་པ་ནི། །ཐམས་ཅད་ཀུན་ལ་དབྱེར་མེད་སྤྱོད། །བདེ་བའི་རོ་མཆོག་མྱོང་འགྱུར་ཏེ། །དེ་ལ་སུ་ཞིག་ཆགས་པར་བྱེད། །སྤྱོད་བཞིན་མ་ཆགས་ཡེ་ཤེས་ཡིན། །བདེ་བའི་མཆོག་ཉིད་བསོད་ནམས་ཚོགས། །དེ་ལྟ་བུ་ཡི་ངང་དུ་སྤྱོད། །ཅེས་གསུངས་སོ། །གསོལ་པ། བྱང་ཆུབ་སེམས་ཀྱི་ཕུར་པའི་དོན་སྤྱོད་པའི་ཞབྲུལ་པ་ཇི་ལྟ་བུ་ལགས་ཞེ་ན། བཀའ་སྩལ་པ། རྡོ་རྗེ་ཐེག་མཆོག་ཁས་འཆེས་ལ། །མཉམ་པའི་དོན་ཉིད་མི་ཤེས་པར། །གསང་སྔགས་དམ་ཚིག་མཉམ་ཟེར་ཞིང་། །ཐུགས་ཐུབ་དག་ཏུ་སྤྱད་བྱས་པས། །དམྱལ་ཁམས་དག་ཏུ་བརྒྱུད་པར་འགྱུར། །བདེ་དང་སྡུག་བསྔལ་རྫོགས་པས་ན། །བདག་རྒྱལ་གཞན་འཕམ་ཅི་ཡི་ཕྱིར། །བཟང་དང་ངན་པ་འཁྲུལ་བ་ན། །འདོད་པས་མཆོག་གང་གིས་བསྟན། །མཉམ་ཉིད་ཆེ་ཆུང་མེད་པ་ལ། །བདག་བསྟོད་གཞན་སྨོད་སུ་ཞིག་སྨྲ། །ཆོས་ཉིད་སྤོང་ལེན་མེད་པ་ལ། །བླང་དང་དོར་བ་གང་གིས་བརྗོད། །བྱང་སེམས་ཕུར་པའི་ཁས་འཆེས་ནས། །མ་རུངས་ལོག་པར་སྤྱོད་བྱེད་ཅིང་། །རང་ཤེས་རས་ཆོད་བྱེད་པ་ནི། །མུ་སྟེགས་ལྟ་ངན་ཆད་པ་ཡིན། །ཅི་ཡི་ཕྱིར་ན་འབྲས་བུ་མེད། །ལྟ་བུ་ཆེ་བར་ཁས་བླངས་ནས། །བདག་ཉིད་ཆེ་ལ་གཞན་ལ་ཆུང་། །རང་ལ་མི་བཟོད་གཞན་ལ་ཕོད། །མུ་སྟེགས་རྟག་པར་བལྟ་བ་ཡིན། །ང་ནི་སངས་རྒྱས་ཡིན་པས་ན། །གཞན་ནི་ང་ཡི་གོང་ན་མེད། །དེ་ཕྱིར་བལྟ་བ་གཏིང་ཐུག་པའི། །རྒྱལ་བའི་སྲས་འབྲས་རྣལ་འབྱོར་པས། །ལམ་བསྟན་སྐྱོན་སེལ་མཁས་པ་ལ། ཁ་ཅིག་དྲེགས་པའི་ཕྲག་དོག་གིས། ཁྲོ་སྟོན་ཐབས་ཀྱིས་སྨོད་པར་བྱེད། །དེ་ནི་འཁོར་བའི་གཏིང་རྡོ་སྟེ། །ནམ་ཡང་ཐར་པའི་ཁར་མི་འབྱུང་། །དགེ་བའི་ཕྱོགས་དང་སྡིག་ལ་སོགས། །ཐ་སྙད་ཙམ་ཡང་ཡོད་མ་ཡིན། །རྣལ་གྲོལ་རྣམ་པར་བཅིངས་པ་ཡི། །གཉིས་པོ་དེ་ཡོད་གདོད་ནས་མེད། །གང་གིས་དེ་ལྟར་མ་རིག་པ། །དོན་མེད་སྒྲ་ཕྱིར་དེ་འབྲེངས་ནས། །དགེ་བའི་ཆོས་ནི་རྣམ་སྤངས་ནས། །དེ་ནི་འཐོམས་ནས་དམྱལ་བར་འགྲོ །གསང་སྔགས་དབང་ཕྱུག་གོ་འཕང་ཆེན་པོ་འདིར། །ཕྱི་ནང་གསང་བའི་དོན་དང་མི་ལྡན་པར། །ལ་ལ་མཁས་འདོད་དྲེགས་པའི་ང་རྒྱལ་ཅན། །རང་གི་ལྟ་བ་ཡང་རབ་ཐོབ་འདོད་དེ། །གཏི་མུག་དབང་གིས་བག་ཟོན་མ་ཆགས་པར། །དྲན་འདོད་ཡས་བཞག་བཙན་ཐབས་དྲེགས་པ་ཡིས། །བདག་ལས་གཞན་མེད་དཔེ་ཟླས་འཕགས་འདོད་པ། །གཞན་ལ་བརྙས་འདོད་བདག་ཉིད་ལྷར་བསྒོམས་ཀྱང་། །མཉམ་པའི་རྒྱལ་པོ་ཆེ་ལས་འགལ་བའི་ཕྱིར། །ལྟ་སྤྱོད་ཡ་ཆབ་བདུད་ཀྱི་ལས་སུ་འགྱུར། །མཐོ་དམན་རློམ་སེམས་དབང་སྒྱུར་མཉམ་པའི་ཐུགས། །ཞེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་པའི་དོན་དང་ལྡན་པའི་རྣལ་འབྱོར་པས་ལས་ཀྱི་མཐའ་གང་ལགས་ཞེ་ན། བཀའ་སྩལ་པ།དཔེར་ན་ཞིང་པས་ལོར་བཏབ་པའི། །ཐ་མ་སྔ་རྩ་མ་བྱས་ན། །འབྲས་བུ་ཐ་ཡ་ཁྱེར་བ་བཞིན། །རྣལ་འབྱོར་ལྟ་སྤྱོད་དམ་ཚིག་དབང་། །ཉན་བསམ་ལས་ཀྱི་མཐའ་མ་སྲ །མི་སྒོམ་པ་ཡང་དེ་བཞིན་ནོ། །ཞེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་པ་དེ་ཤེས་རབ་རྣམ་པ་གསུམ་གལ་ཆེ་བ་ཅིའི་ཕྱིར་ལགས་ཞེ་ན། བཀའ་སྩལ་པ། རང་གསང་ཐབས་ཀྱི་འབྲས་བུ་ནི། །མ་བསྟན་པ་རུ་ཤེས་མི་སྲིད། །ཡང་དག་དོན་གྱི་ངོ་བོ་ནི། །མ་བསམ་བར་དུ་རྟོགས་མི་སྲིད། །ཡང་དག་ངེས་པའི་འབྲས་བུ་འདི། །མ་བསྒོམས་བར་དུ་འགྲུབ་མི་སྲིད། །བསྒོམས་ན་འབྲས་བུ་ཐག་མི་རིང་། །དགོས་པ་དམ་པ་ཀུན་འདུས་ལ། །འཇུག་པའི་གཙོར་ནི་བསམ་གཏན་ཏེ། །འཁོར་ལོ་དབང་བསྐུར་ཇི་བཞིན་དུ། །ཆོས་ཀུན་དབང་བསྐུར་བསམ་གཏན་ཡིན། །གལ་ཏེ་བསམ་གཏན་འདི་མེད་ན། །རྒྱ་མཚོ་འཇིངས་ཀྱི་ཕ་བོང་ལྟར། །དཔག་ཏུ་མེད་པའི་སྒོ་སྤྱོད་ཀྱང་། །དོན་མེད་སྙིང་པོ་སྐམས་པ་ཡིན། །བསྒྲུབ་པའི་གཙོར་ནི་ཏིང་འཛིན་པས། །ཏིང་འཛིན་འདི་ཡིས་བྱེད་པར་འགྱུར། །མུན་ལས་སྣང་བྱུང་དེ་བཞིན་དུ། །འགྱུར་བ་གསེར་འཀྱུར་སྨནགྱི་ཚུལ། །རྫོགས་པའི་དབང་སྒྱུར་ཏིང་འཛིན་ཡིན། །ཞེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་པའི་དོན་བསྒོམས་པའི་རྣལ་འབྱོར་བའི་གནས་ཇི་ལྟ་བར་ལགས་ཞེ་ན། བཀའ་སྩལ་པ། རྣམ་པར་མི་རྟོགས་དོན་ཚོལ་ན། །གཅིག་པུ་དབེན་པའི་ས་བཟུང་སྟེ། །བར་ཆད་རྣམ་གསུམ་མེད་པའི་གནས། །རྙེད་ནས་གཅིག་པུར་གནས་བར་བྱའོ། །དེ་ཉིད་ཉམས་སུ་ལེན་འདོད་པས། །གཅིག་པུ་སེང་གེ་བཞིན་དུ་གནས། །གཡེང་བའི་ཡུལ་རྣམས་ཐག་བཅད་དེ། །འབྲེལ་ཡུལ་དཔག་ཚད་དུ་མས་བཤུགས། །དེ་ནས་སེམས་ཀྱི་མེ་ལོང་བལྟའོ། །ཞེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་པ་བསྒོམ་འདོད་པའི་རྣལ་འབྱོར་པས་སྔོན་དུ་འགྲོ་བའི་ལས་ནི་ཇི་ལྟར་བྱས་ལ་འཇུག་ཅེ་ན། བཀའ་སྩལ་པ། ཟབ་དོན་འཇུག་པའི་སྔོན་ལོགས་སུ། །ཐེ་ཚོམ་གཡེངས་མ་ཐག་བཅད་དེ། །སྡིག་བཤགས་བྱང་ཆུབ་སེམས་བསྐྱེད་ནས། །རྣལ་འབྱོར་ཚོགས་ཀྱི་བསོད་ནམས་དཔུང་། །ཕྱིས་ནས་འགྱོད་པ་མེད་པར་བྱ། །རྣམ་པར་མི་རྟོག་སྒོམ་འདོད་ན། །ངེས་དང་ཉམས་ལྡན་གནས་བསྟེན་པ། །རང་གི་ངོ་བོ་ཤེས་པར་བྱ། །ཞེས་གསུངས་སོ། །གསོལ་པ། བྱང་ཆུབ་སེམས་ཀྱི་ཕུར་པ་དེ་དོན་དམ་པར་བསྒོམ་དུ་མེད་ཅེས་བྱ་བའི་དོན་དེ་ཇི་ལྟར་ལགས་ཞེ་ན། བཀའ་སྩལ་པ། འཁོར་བ་རྣམས་ནི་ཀུན་ཏུ་བཟང་པོའི་སྐུ་སྟེ་མཚན་མེད་ནམ་མཁའི་ཀློང་། །གང་ཡང་བསྒོམ་པར་བྱ་བ་རྫོགས་པ་ཆེན་པོའི་འདི་ལ་ཅི་ཡང་མེད། །མི་བསྒོམ་བསྒོམ་དུ་རྡུལ་ཡང་མེད་དེ་ཅི་ཞིག་བསྒོམ། །བསྒོམ་པར་འདོད་པ་རྣམས་ཀྱིས་འདི་ཡི་དོན་མི་རྟོགས་ཏེ་ཀློང་ལས་ཉམས། །དྲང་སྲོང་སྒོམ་འདོད་པས་ནི་ཡུལ་ལ་དཔྱད་མི་བྱ། །སྒོམ་མེད་ཡུལ་ལམ་དམིགས་པར་བྱེད་པ་ནི། །དེ་ནི་སྨིག་རྒྱུ་ཆུ་རྙེག་འདྲ། །སེམས་དཔའ་ཆེན་པོ་ཐམས་ཅད་བསྒོམ་པའི་མཆོག །ངོ་བོ་ཉིད་དུ་དམིགས་སུ་མེད། །ང་ཡི་ལུགས་སུ་སྦྱོར་བ་ལས། །བྱང་ཆུབ་མེད་ཅིང་བསྒོམ་པ་མེད། །ཅེས་གསུངས་སོ། །གསོལ་པ། བྱང་ཆུབ་སེམས་ཀྱི་ཕུར་པ་དེ་ལམ་བསྒོམས་ནས་རྡོ་རྗེ་ལྟ་བུར་མི་འགྱུར་རམ་ཞེ་ན། བཀའ་སྩལ་པ། བསམ་གྱིས་མི་ཁྱབ་མི་ཤེས་པར། །བསམ་མེད་ངང་དུ་གང་འཇོག་པ བུས་པ་དེ་ནི་བླུན་པ་སྟེ། །མུན་པའི་སྐྱེ་མཆེད་ཉིད་དུ་འགྱུར། །བསམ་གྱིས་མི་ཁྱབ་དོན་ཤེས་ན། །བསམ་མེད་ངང་དུ་གང་འཇོག་པ། །དེ་ནི་ཐམས་ཅད་མཁྱེན་པ་ཉིད། །ཡོན་ཏན་དཔག་ཏུ་མེད་པ་འབྱུང་། །ཞེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་པཆོས་ཉིད་ལ་བསྒོམ་དུ་ཡོད་པ་ལ། རྣལ་འབྱོར་པས་མི་སྒོམ་པ་ཅི་ཞིག་ལགས་ཞེ་ན། །བཀའ་སྩལ་པ། ཆོས་ཉིད་བསམ་དུ་མེད་པ་ནམ་མཁའ་ཆེ། །ནམ་མཁའི་བསམ་པ་དེ་དག་ཀུན་དང་བྲལ། །ནམ་མཁའི་དམིགས་པར་ཡང་ནི་དམིགས་སུ་མེད། །སེམས་དང་ཆོས་ནི་ཅི་ཡང་མ་ཡིན་པས། །བསྒོམ་པའི་ཚེ་ན་ཅི་ཡང་མི་བསྒོམ་མོ། །ཞེས་གསུངས་སོ། །གསོལ་པ། བྱང་ཆུབ་སེམས་ཀྱི་ཕུར་པ་དེ་བསྒོམས་ན་སྐྱོན་ཅི་མཆིས་ཞེ་ན། བཀའ་སྩལ་པ། མ་བཅོས་བྱང་ཆུབ་དེ་བཞིན་ཉིད། །བསྒོམ་དུ་མེད་པའི་ཆོས་ཉིད་ལ། །བསྒོམ་པ་དམིགས་སུ་མེད་པ་སྟེ། །ཏིང་འཛིན་ཞེས་ནི་གདགས་སུ་མེད། །བསྒོམས་ཀྱང་རྙེད་པ་མ་ཡིན་ལ། །དེ་བཞིན་མ་བཅོས་སྟོརབ་མེད། །བསྒོམ་ཆོས་སྣ་ཚོགས་ཅིར་སྣང་བ། །བསྒོམས་ན་དེ་ཡི་ངང་མི་གནས། །དེ་བས་བྱིས་པའི་སྤྱོད་ཡུལ་ཡིན། །བརྟགས་ན་མེད་ལ་བཞག་ན་ལེགས་པ་འབྱུང་། །བསྒོམས་ན་མཚན་དང་དཔེ་བཞིན་དེ་ལ་རྟོག་པ་སྐྱེ། །དམིགས་པའི་ཡུལ་མེད་གནས་པར་བརྟག་པར་དཀའ། །ཞེས་གསུངས་སོ། །གསོལ་པ། །བྱང་ཆུབ་སེམས་ཀྱི་ཕུར་པ་དེ་ནི་མི་བསྒོམ་པར་བཞག་པ་ལགས་སམ་ཞེ་ན། བཀའ་སྩལ་པ། བསྒོམ་པའི་ཡུལ་མེད་དེ་ལ་བསྒོམ་པའི་གནས། །བསྒོམ་ཆགས་བདེ་བ་བདག་འཛིན་སྡུག་བསྔལ་ཡིན། །བསྒོམ་པའི་གནས་མེད་དག་ཏུ་རབ་རྟོགས་ན། །བསྒོམས་ཀྱང་སྐྱོན་མེད་ཆོས་དབྱིངས་ནམ་མཁའ་འདྲ། །ཞེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་པ་དེ་བསྒོམས་ཀྱང་སྐྱོན་མེད་པ་ལགས་ན་བསྒོམ་པ་ཉིད་ནི་ཚུལ་ཇི་ལྟར་བསྒོམ་ཞེ་ན། བཀའ་སྩལ་པ། མ་སྐྱེས་པ་ཡི་ཆོས་རྣམས་ལ། །ངོ་བོ་མེད་དེ་བསྒོམ་པ་མེད། །ནམ་མཁའི་ཚུལ་དུ་རབ་འབྱོར་བས། །དངོས་གྲུབ་ཀུན་ཏུ་རབ་ཏུ་གྲགས། །ཞེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་པ་དེ་ལས་དང་པོའི་རྣ་འབྱོར་པས་བློས་ཇི་ལྟར་བཞགཅེ་ན། བཀའ་སྩལ་པ་སེམས་ཀྱི་སྐད་ཅིག་དྲན་པ་ལ། །ཡིད་ཀྱི་དམིགས་པ་རྒྱུན་ཆད་ནས། །བྱུང་ཚོར་ཆད་པའི་མཐའ་སྤངས་ཏེ། །ཆོས་རྣམས་ནམ་མཁའ་ལྟ་བུ་ནི། །བརྗོད་མེད་རྒྱུན་གྱི་ཆད་པར་དམིགས། །དོན་ནི་ཕྱིན་ཅི་མ་ལོར་པར། །བརྗོད་མེད་ཏིང་འཛིན་བསྒོམ་པའི་མཆོག །ཡང་དག་དོན་གྱི་རང་བཞིན་འདི། །ཅི་ཡང་མི་ལེན་མི་གནས་ཤིང་། །ཅི་ཡང་མི་ཐོས་ཐོས་པ་མེད། །ཅི་ཡང་མི་བྱེད་བྱེད་དང་བྲལ། །ཅི་ཡང་སྣང་བ་མེད་པ་སྟེ། །དེ་ནི་སྣང་བའི་དམ་པ་ཡིན། །བསམ་དུ་མེད་པའི་ཆོས་ཉིད་འདི། །བསམ་དུ་མེད་པར་དེ་བཞིན་བཞག །རང་བཞིན་མེད་པའི་ཆོས་ཉིད་ལ། །སེམསཀྱིགྱིནདསྐདཅིགམ། །མི་གཡོ་རྒྱུན་དུ་དྲན་པར་བྱ། །ཞེས་གསུངས་སོ། །གསོལ་བ། །བྱང་ཆུབ་སེམས་ཀྱི་ཕུར་པ་དེ་ཐམས་ཅད་དུ་དམིགས་ཤིང་དྲན་པར་བྱ་བ་ལེགས་སམ་ཞེ་ན། བཀའ་སྩལ་པ། བསྒོམ་པར་བྱ་བ་བསྒོམ་པ་མིན། །གསལ་བྱ་དམིགས་སུ་མེད་པ་སྟེ། །དེ་ལྟར་སེམས་ཀྱིས་གང་བསྒོམས་པ། །དོན་ལ་སེམས་བསྒོམ་ཏིང་འཛིན་མཆོག །ཅེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་པ་དེ་ཅིའི་ཕྱིར་མི་བསམ་པར་གནས་པར་བགྱི་ཞེ་ན། བཀའ་སྩལ་པ། སྣང་བ་མེད་པའི་རང་བཞིན་ལ། ཁྲེས་བློ་ཡོད་པའི་སེམས་མི་འགྱུར། །མཉམ་ཉིད་སྟོན་པའི་དོན་འདི་ལ། །དོན་ལྡན་སྟོང་པའི་སྒྲོ་མི་འདོགས། །མ་བཅོས་རང་བཞིན་ཞི་བ་ཡི། །མཚན་མའི་རྟོག་བྲལ་ཤེས་ལྡན་པས། །མེད་དོ་ཙམ་དུའང་མི་དམིགས་ན། །བྱུང་ཚོར་འཛིན་པར་ག་ལ་འགྱུར། །ཐམས་ཅད་མི་གནས་བྱང་ཆུབ་སེམས། །བཙལ་ནས་གྲུབ་པ་མ་ཡིན་ཡང་། །སྒྱུ་མ་སངས་ནས་འཁྲུལ་བ་བཞིན། །སྤྲོས་བྲལ་ཡེ་ཤེས་སྙིང་པོ་གནས། །བསྒོམ་དང་བསྒོམ་པར་བྱ་བ་གཉིས་མེད་ན། །དོན་དམ་ངང་ལ་བདེ་བར་གནས་པ་ནི། །བྱང་ཆུབ་སེམས་བསྒོམ་ཞེས་ཀྱང་དེ་ལ་བྱ། །ཞེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་པ་དེ་བློའི་ཡུལ་མེད་པར་བློ་ལ་གནས་པ་དེ་ཅིའི་ཕྱིར་ལགས་ཞེ་ན། བཀའ་སྩལ་པ། རྡོ་རྗེ་འདུས་པ་ཆེན་པོ། བྱང་ཆུབ་སྙིང་པོར་བཞུགས་པའི་ཚེ། སྟོང་པའི་ཆོས་ལ་སྟོང་པའི་ཡུལ་མེད་དེ་ནི་མི་གནས་སོ། །བྱང་ཆུབ་སེམས་བྱང་ཆུབ་བསྒྲུབ་པའི་རྒྱུ་མེད་དེ་ནི་མི་གནས་སོ། །འགྲོ་ལ་སེམས་རྒྱུད་གཉིས་མི་འཆང་། །ཞེས་པ་ནི་དེ་ལ་མ་སྐྱེས་མིང་མི་དམིགས། །དེ་ལས་གཞན་པའི་སེམས་མེད་ཕྱིར། །བཅོས་ཤིང་གནས་པ་གང་ཞིག་ཡོད། །ཇི་ལྟར་ནམ་མཁའ་མཁན་མ་ཡི། །དེ་ཕྱིར་ནམ་མཁའ་དེ་ཉིད་བསྒོམ་པར་མི་འགྱུར་ཞིང་། །ངོ་བོ་ཉིད་ཀྱིས་མ་སྐྱེས་སེམས་ཀྱི་ནི། །མ་སྐྱེས་དེ་ཉིད་བསྒོམ་པར་ག་ལ་འགྱུར། །མི་མཐུན་པ་དང་མཉམ་པོ་དབྱེར་མེད་དོན། །གང་གིས་ཤེས་ནས་རྩོལ་བ་ཀུན་སྤངས་ཏེ། །བཏང་སྙོམས་ཆེན་པོར་མ་བཅོས་ངང་བཞག་ན། །ཐ་སྙད་ཙམ་དུ་སྒོམ་ཞེས་དེ་ལ་བརྗོད། །ཅེས་གསུངས་སོ། །གསོལ་པ། བྱང་ཆུབ་སེམས་ཀྱི་ཕུར་པ་དེ་བསྒོམ་པའི་དུས་ན་ཏིང་ངེ་འཛིན་གྱི་སྐྱོན་དག་ཇི་ལྟར་འཚལ་བར་བགྱི་ཞེ་ན། བཀའ་སྩལ་པ། དྲན་འབྱུང་རྗེས་སུ་འབྲངས་ནས་ནི། །འཁོར་བའི་གནས་སུ་འཁོར་བར་འཀྱུར། །དྲན་འབྱུང་གཡོ་བ་ཅི་བཀག་པ། །དེ་ནི་འགོག་པ་ཉིད་དུ་འགྱུར། །དྲན་འབྱུང་མེད་པར་བླུན་པར་ན། །མུ་སྟེགས་ཅན་ནམ་མུན་པར་འགྱུར། །འདི་ཞེས་སེམས་སུ་གཅིག་བཟུང་ན། །མཚན་མ་རྟོག་པའི་རི་བོ་ཡིན། །སྔ་ཕྱི་མེད་པས་ཕྱ་ཆད་ན། །མེད་དེ་ཆད་པའི་མུན་ཅན་ཡིན། །གཞི་ཡི་དོན་ལས་ཡུད་ཙམ་ཞིག །ཅི་གཡོ་སྐྱེ་འགག་འབྱུང་བ་དེ། །དེ་ལས་དྲན་པ་མང་འཕེལ་ཞིང་། །ལམ་འཚལ་བ་ཡི་གྲངས་བྱུང་ན། །ལམ་གྱི་རྣམ་གྲངས་འཕེལ་འགྱུར་གྱི། །ཆོས་ཉིད་ལམ་དུ་ག་ལ་འགྱུར། །ལྷུང་བར་གྱུར་པའི་སྐྱོན་ཆེན་ནི། །མཚན་མའི་གཡེང་བ་རྣམ་དྲུག་ཡིན། །རངབཞིནཡུལལ་གཡེང་བ་དང་། །ནད་དང་མཚན་མའི་གཡེང་བ་དང་། །ཡིད་ལ་བྱེད་དང་གནས་ངན་ལེན། །འདི་དག་རབ་ཏུ་གསལ་བྱས་ན། །དོན་ལ་མཉམ་པར་བཞག་པའི་ཚེ། །མཉམ་པའི་དོན་ལ་སྒྲིབ་པའི་སྐྱོན། །རྣམ་པ་ལྔ་འབྱུང་འདི་ལྟ་སྟེ། །བྱུང་ཚོར་དབང་གིས་གཡེང་བ་དང་། །བྱིང་རྨུགས་དབང་གིས་ཐིབས་པ་དང་། །འཛིན་ཆགས་དབང་གིས་འགོག་པ་དང་། །ཐེར་ཟུག་དབང་གིས་དྲུག་པ་དང་། །ཕྱལ་བའི་དབང་གིས་མེད་པ་དང་། །འདི་ནི་མཉམ་ཉིད་སྐྱོན་ཡིན་ནོ། །ཏིང་འཛིན་བདེ་བའི་རོལ་ཆགས་གནས་པ། །ཡོད་མེད་རྒྱུ་དང་ལམ་ལྟ་ཆོས་ཉིད་ཡིན། །དེ་བས་ཆགས་པའི་གནས་ལ་ཏིང་འཛིན་ན། །ཞི་བས་ས་སྟེངས་མྱ་ངན་དེ་མི་འདའ། །སེམས་ནི་ཅི་ལའང་མི་གནས་དང་། །ཅི་ལའང་མི་དམིགས་ཤེས་བྱ་བ། །སེམས་ལ་གནས་དམིགས་སྐྱོན་སེལ་བ། །སེམས་འཛིན་ཕྲ་མོ་དེ་ལ་ཡོད། །སྨིག་སྒྱུ་བཞིན་དུ་སེམས་མེད་ན། །མི་གནས་མི་དམིགས་བྱེད་པ་གང་། །ནམ་མཁའི་རང་བཞིན་མ་ཤེས་ན། །བསྒོམ་པ་དོན་དང་ལྡན་མི་ཡིན། །ཇི་ཙམ་རྟོག་མེད་ཟབ་མོ་ཞིག །བློ་ཡི་ཡུལ་དུ་སྣང་ཞེ་ན། །མི་རྟོག་ཟབ་མོའི་ཉམས་མྱོང་བ། མྱོང་བ་ཡིན་ཕྱིར་དེ་ཉིད་མིན། །ཞེས་གསུངས་སོ། །གསོལ་པ། བྱང་ཆུབ་སེམས་ཀྱི་ཕུར་པ་དེ་ལྟར་ཤེས་ནས་བསྒོམ་པ་ལ། ཐེག་པ་འོག་མའི་རྩལ་སྒྲུབ་སྤྱོད་མི་དགོས་པ་ཇི་ལྟར་འཚལ་བ་ལགས་ཞེ་ན། དཀའ་སྩལ་པ། སངས་རྒྱས་ཀུན་གྱི་བྱང་ཆུབ་སེམས། །བླ་ན་མེད་པ་འབྱུང་འགྱུར་བ། །རྒྱལ་བས་གསུངས་པའི་ཡེ་ཤེས་གང་། །དེ་ནི་དཀྱིལ་འཁོར་སྙིང་པོར་གསུངས། །དེར་གཞོལ་དེ་ནི་མཆོད་པའི་སྤྲིན། །གློང་དུ་གནས་པ་སྒྲུབ་ཐབས་སོ ངང་ ས་མི་ལྡོག་དངོས་གྲུབ་པས། །དོན་དུ་ཀུན་གྲུབ་ཕྱག་རྒྱར་རྫོགས། །ཅི་ལ་མ་ཆགས་སྤྱིན་པ་སྟེ། །ངེས་པས་མི་གཏིང་དད་པའོ། །ཆོས་ཉིད་ལས་མ་འདས་པས་དམ་ཚིག་གོ །མན་ངག་དང་འབྲེལ་བས་གཟུངས་སོ། །དེ་བཞིན་ཉིད་ལས་མི་གཡོ་བས་ཏིང་ངེ་འཛིན། གཉིས་སུ་མེད་པས་ལྟ་བ། ཡིན་པའི་དོན་མ་སྤྲོས་པས་འཕྲིན་ལས། བདེན་པ་མཉེས་པས་སྔགས་དང་ཕྱག་རྒྱ། སྣང་སྲིད་ཡེ་འབྱམ་དབང་གི་མཆོག །འགྱུར་མེད་རྟོག་པ་བྱིན་རླབས་ཏེ། །ཆོས་ཉིད་གསལ་བ་མཆོད་པ་དང་། །རྟོགས་པས་སྒྲོལ་བའི་འཕྲིན་ལས་ཡིན། །གོམས་པས་སྦྱོར་བའི་འཕྲིན་ལས་ཡིན། །གསལ་བའི་ཏིང་འཛིན་འཕྲིན་ལས་ཡིན། །ཕེབས་པས་མཆོད་པའི་འཕྲིན་ལས་ཡིན། །གསང་ཐུབ་བཀའ་ཡི་འཕྲིན་ལས་ཡིན། འཕྲིན་ལས་རྫོགས་ཤེས་དེ་ལ་བྱ། །ཀུན་གཞི་བཟང་པོའི་རིག་པ་ལ། །རྒྱུད་ལྟར་དགྲོལ་ཞིང་ལུང་ལྟར་བསྐྱེད། །དོན་དམ་མན་ངག་གཞུང་ལྟར་བསྒོམ། །སྒྲུབ་ཐབས་ཚང་ཞེས་དེ་ལ་དེ་སྐད་བྱ། །ཞེས་གསུངས་སོ། །གསོལ་པ། བྱང་ཆུབ་སེམས་ཀྱི་ཕུར་པ་གོང་མ་ལྷར་བསྒོམས་པའི་དུས་སུ་མཚན་མ་ཕྲ་མོ་ལྡན་པ་ཀུན་སྐྱོན་ལགས་སམ་ཞེ་ན། བཀའ་སྩལ་པ།འདུ་བྱེད་མེད་པ་མཁའ་འདྲ་བས། །འདུ་བྱེད་ལས་བྱུང་བསམ་གཏན་སྐྱོན། །བརྟག་ཏུ་མེད་པའི་ཆོས་ཉིད་ནི། །རྟོག་པ་ཅན་གྱིས་མི་རྟོགས་ཏེ། །གང་ཞིག་དེ་དོན་མི་རྟོགས་པར། །གཡེང་བར་ལྟུང་བ་ཅི་ཆ་ཡོད། །ཆོས་ཉིད་ཙམ་དུ་མི་སྐྱོན་ན། །སྒྱུ་མ་ཕྲ་རགས་སྨོས་ཅི་དགོས། །བསམ་དང་བྲལ་བ་ཡེ་ཤེས་པས། །མཐའ་ཀུན་ཡིད་ལ་མི་བྱའོ། །ཞེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་པ་བསྒོམ་པ་ལ་དེ་ལྟར་སྐྱོན་ལགས་ན། ལྡང་བ་རྣམས་དགག་ལགས་སམ་ཞེ་ན། བཀའ་སྩལ་པ། ལྡང་མི་ལྡང་ཆེད་དུ་མི་སྤོང་སེམས་རྟེན་ཅི་འཆང་མངོན་དུ་མིན། །འཇམ་པ་མ་ཡིན་རྡུལ་ཙམ་གཡོ་བ་དེ་ཉིད་ཡིན་ཏེ་དེར་མི་གནས། །བསྒོམ་པའི་ས་མི་རྙེད་ཅིང་བསྒོམས་པས་རྙེད་མ་འགྱུར་བ་སྟེ། །སེམས་ཀྱི་སྤྱོད་ཡུལ་ཤེས་པ་དེ་ལ་དེ་དག་ཆོས་རྣམས་ཀྱི་མཚན་ཉིད་ཡིན། །རྣམ་འབྲས་གང་ལའང་མཆོག་དང་ཐ་མ་མེད་པར་ལམ་མཆོག་འདི་བསྒོམ་མོ། །འདུ་བྱེད་མ་སྐྱེས་ཆོས་ཀུན་འབྱུང་མེད་ཤིན་ཏུ་ཆོས་རྣམས་མྱ་ངན་འདས། །དངོས་མེད་དེ་ཚེ་ཀུན་ཀྱང་ཆོས་ཀྱི་དབྱིངས་ཤེས་དགྲ་བཅོམ་རབ་འབྱོར་ཡིན། །རྣམ་པར་རྟོག་པའི་མཚན་མ་ཅི་བྱུང་ཡང་། །རྟོག་པ་དེ་ཉིད་ཆོས་ཉིད་ཡིན་ཤེས་ན །ཆོས་ཀྱི་དབྱིངས་ཉིད་གཞན་དུ་བསྒོམ་མི་དགོས། །དེ་ལ་གཉེན་པོས་བཅོས་ཤིང་དཔག་ཏུ་མེད། །ཐེ་ཚོམ་ལྡང་ངོ་ཅོག་ནི་ཆོས་ཀྱི་དབྱིངས་ཡིན་པས། །ལྷག་པར་ཐེ་ཚོམ་དོན་དག་ལ། །སོ་སོར་ཐ་དད་མི་བྱེད་པས། །ས་ཡི་རིམ་པར་མི་ལྟུང་ཞིང་། །རིམ་གྱིས་སྦྱང་ཞིང་འཕར་བ་མེད། །གང་ཞིག་གསལ་ཞིང་དམིགས་ཡོད་ན། །དེ་ཉིད་ངེས་པར་གཡེང་བ་ཡིན། །ཅི་ཡང་ཡིད་ལ་མི་བྱེད་པས། །གསིལ་བར་ལྷུང་བ་ཅི་ཞིག་ལྟུང་། །བསམ་མེད་བསྒོམ་པ་མ་ནོར་ན། །ཆོས་སྐུ་བྱང་ཆུབ་ཐེ་ཚོམ་མེད། །ཅེས་གསུངས་སོ། །གསོལ་པ། །བྱང་ཆུབ་སེམས་ཀྱི་ཕུར་པ་བསྒོམ་པའི་ཚེ་དམིགས་པ་བཅུག་ཀྱང་ཆོས་ཉིད་གསལ་ན་སྐྱོན་ཅི་མཆིས་ཞེ་ན། བཀའ་སྩལ་པ། གཞན་མ་དམན་པའི་སྒོ་ནས་ནི། །དམིགས་པ་འཛིན་པ་མེད་པའི་ཆོས་ཉིད་ལ། །དམིགས་པའི་རྟོག་པ་ཡོད་པས་ནོར། །ཐེར་ཚེར་དམིགས་ཀྱི་ནམ་མཁའ་ལ། །ཕྲ་རབ་ཐེན་ཐག་འཛུད་པ་ལྟར། །བྱིས་པ་ལས་གང་བྱེད་པ་སྟེ། ཁྲེས་ཅམ་དག་གིས་བྱ་མ་རུང་། །བྱང་ཆུབ་དེ་ཡང་མི་དམིགས་ཏེ། །མི་གནས་ཤེས་ནི་གང་བརྗོད་ཅིང་། །གནས་དང་དམིགས་པའི་གནས་འཛིན་པ། །གཟུང་འཛིན་ཞེ་ནི་དེ་ལ་བྱ། །དམིགས་པའི་ཡིད་ལ་ཅི་གསལ་བ། ཁྲེས་པའི་ཡུལ་དུ་འཇུག་འགྱུར་བས། །དེ་དག་མ་རབས་ཏིང་ངེ་འཛིན། །དེས་ན་དམིགས་མེད་རྒྱལ་བས་གསུངས། །ཞེས་བྱའོ། །གསོལ་བ། བྱང་ཆུབ་སེམས་ཀྱི་ཕུར་པ་བསྒོམ་པས་གྲུབ་པའི་རྟགས་ཇི་ལྟ་བུ་འབྱུང་བ་ལགས་ཞེ་ན། བཀའ་སྩལ་པ། དེ་ལྟར་དོན་ལ་མཉམ་བཞག་ན། །རྟགས་ཀྱི་ཚོར་བ་འདི་ལྟར་འབྱུང་། །དྲོད་དང་རྟགས་དང་ཆོ་འཕྲུལ་དང་། །རྣམ་ཤེས་དང་ནི་ཡེ་ཤེས་དང་། །དྲོད་ནི་གཡོ་དང་ཐོབ་པ་དང་། །རྟགས་ནི་མྱོང་དང་བརྟན་པ་དང་། །ཆོ་འཕྲུལ་འབྱུང་དང་རྫོགས་པ་དང་། །རིག་པ་ཕྲ་མོ་ཡན་ཆད་གསལ། །དེ་ནི་དོན་རྣམས་རྫོགས་པ་ཡིན། །དྲོད་གསུམ་ཉམས་སུ་ལོན་པ་དང་། །རྣམ་གཉིས་རྟགས་ཀྱང་འབྱུང་བར་འགྱུར། །ཆེད་དུ་རྩོལ་བ་མི་བྱེད་ཀྱི། །མི་ཞབྲུགས་མཉམ་པ་ཉིད་ཤེས་དང་། །གང་ལ་ཆགས་དང་ཡུལ་གྱིས་མྱོས། །སྐྲག་མེད་དེ་ནི་མི་འབྲལ་མི་གནས་ཤིང་། །མི་འཕྲོག་མཉམ་ཤེས་བཞི་པོ་ཕྱོགས་དང་ཕ་རོལ་ཕྱིན་རྣམས་དེར་ཤེས། །ཞེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་པ་བསྒོམ་པ་དེ་ཀློང་དུ་ཚུལ་ཇི་ལྟར་འགྱུར་ཞེ་ན། བཀའ་སྩལ་པ། དེ་ལྟར་ཡུན་རིངས་འདུག་གནས་དང་། །སེམས་ནི་མི་འགྱུར་རྡོ་རྗེ་དང་། །བཟོད་ཅིག་སྡུག་བསྔལ་བྱང་ཆུབ་སེམས། །བྱང་ཆུབ་མཆོག་གི་སྙིང་པོ་ནི། །མཚན་མས་བཙལ་བ་མ་ཡིན་ཏེ། །དག་པ་རྣམ་གསུམ་མ་ནོར་ཅིང་། །རང་གི་རྒྱལ་པོ་གོམས་པ་ཡིས། །བྱང་ཆུབ་མཆོག་འདི་རྙེད་པར་འགྱུར། །བསྒྲུབ་པར་བྱ་བ་་ང་ཡིན་དེ་ལ་ནི། །བཙལ་བ་ཡང་ནས་ཡང་དུ་མཉམ་བཞག་སྟེ། །གོམས་པ་ཀློང་དུ་གྱུར་ཅིང་ཁད་ཀྱིས་ནི། །རྩོལ་བ་མེད་པར་ལྷུན་གྱིས་གྲུབ་བར་འགྱུར། །ཞེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་པ་དེ་སྙིང་རྗེ་ཆེན་པོ་ཞེས་བགྱི་བར་ཇི་ལྟར་འབྱུང་ཞེ་ན། བཀའ་སྩལ་པ། ཐབས་ཀྱི་རྩ་བར་སྙིང་རྗེ་མ་ཤར་ན། །འཕྲལ་དུ་ཕྱོགས་ཆས་ཡོངས་ལ་ཁྱབ་མི་འགྱུར། །བདལ་བ་ཆེན་པོའི་བློ་ཡིས་སྤྱིར་ཁྱབ་ན། །ཀུན་ཏུ་སྣང་གི་ཏིང་འཛིན་མ་བསྒོམས་གསལ། །ཐུགས་རྗེ་འབྱུང་བའི་གནས་ནི་ཉོན་མོངས་ལྔ། །ཉོན་མོངས་དེ་ཉིད་ཡང་དག་ཡིན་རྟོགས་ན། །དོན་དམ་རྒྱུ་ལ་འབྲས་བུ་ཡིན་རྟོགས་ན། །སངས་རྒྱས་སེམས་ཅན་འབྲས་བུ་ཡིན་རྟོགས་མཉམ། །ཐུགས་རྗེ་ཆེན་པོ་སྐྱེ་ཞེས་དེ་ལ་བྱ། །ཆོས་དབྱིངས་མཐའ་དབུས་མེད་པ་ལ། །སྐྱེ་འགག་མེད་པའི་བློ་བདལ་བས། །སྤྲོས་པ་མེད་པར་རྟོགས་པ་ཡི། །ཁྱབ་པ་སྦྱི་ཡི་ཐུགས་རྗེ་ཆེ། །ཐུགས་རྗེ་ཆེན་པོ་ཅིར་མི་མཛད། །ཅེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་པ་བསྒོམ་པའི་དུས་ན། ཐུགས་རྗེ་ཆེན་པོ་ཐབས་ཀྱི་སྤྱོད་པའི་འགྲོ་དོན་བྱའོ་ཞེས་གསུངས་པ་དེ་དོན་ཇི་ལྟར་ལགས་ཞེ་ན། བཀའ་སྩལ་པ། དེ་ལྟར་དེ་བཞིན་ཆོས་ཀྱི་དབྱིངས་རིག་ནས། །མ་རིག་རྣམས་ལ་སྙིང་རྗེ་ཆེན་པོ་བསྐྱེད། །སྙིང་རྗེ་སྐྱེས་ནས་སྒྱུ་མའི་ཏིང་འཛིན་གྱིས། །འགྲོ་དོན་ཐབས་ཀྱི་སྤྱོད་པ་སྣ་ཚོགས་སྟོན། །རྩ་བ་བྱང་ཆུབ་སེམས་ཉིད་རྟོགས། །ཐབས་ཀྱི་ཕ་རོལ་ཕྱིན་པ་སྤྱོད། །སྙིང་རྗེས་ཆུད་མ་ཟོས་བར་ཟུང་། །ཞེས་གསུངས་སོ། །གསོལ་པ། བྱང་ཆུབ་སེམས་ཀྱི་ཕུར་པ་དེ་མཚན་མའི་གཟུང་འཛིན་དུ་མི་འགྱུར་ལགས་སམ་ཞེ་ན། བཀའ་སྩལ་པ། ཐབས་ཀྱི་སྤྱོད་པས་གདུལ་བྱ་ཀུན་གདུལ་ཀྱང་། །སྒྱུ་མའི་བློ་ལྡན་རློམ་སེམས་རྡུལ་ཙམ་མེད། །མ་སྐྱེས་སེམས་ལ་སེམསཅནམེད་པའི་ཕྱིར། །ངོ་བོ་ཉིདཀྱི་ཆོས་ཀུན་ང་རྒྱལ་འཆང། །ཆོས་ཀུན་སྒྱུམརམངོན་སུམ་སྣང་བའི་ཕྱིར། །ཏིང་འཛིན་སྒྱུམས་ཏིང་འཛིན་དེ་ལྟར་སྟོན། །ཞེས་གསུངས་སོ། །གསོལ་པ། བྱང་ཆུབ་སེམསཀྱི་ཕུར་པ་དེ་ཐབས་དང་ཤེས་རབའབྲེལ་བས་བདེན་པ་མཐོང་ཞེས་བགྱི་བ་ཇི་ལྟར་ལགསཞེ་ན། བཀའ་སྩལ་པ། དེ་ལྟར་སེམས་ཀྱི་སེམས་མཐོང་། །ཡེ་ཤེས་ཀྱིས་ཆོས་ཉིད་མཐོང། །དུས་ཀུནཏུ་ནི་སྐྱེ་འགག་མེད། །སྔོནནསམཐོང་བའིདོན་མཐོང་འགྱུར། །དེ་ཡང་དངོས་པོ་མི་མཐོངབའི། །ཐམས་ཅད་རང་བཞིན་མེད་པཅིག །བློལ་འདས་པཁོ་ནརཟད། །དེ་ལྟབུ་ཡིདོན་མཐོང་ན། །མཚན་མར་མཐོང་བ་ཅི་ཡང་མེད། །སྒྱུ་མ་ཙམ་དུ་ཚུལ་ཤེས་ན། །ནམ་མཁའ་མཉམ་པའི་དོན་སྣང་འགྱུར། །ཁ་ཅིག་དང་ནི་དེ་དོན་ལ། །སྣང་བ་ཞེས་ནི་ཅི་ཕྱིར་གདགས། །མེད་པའི་དོནདང་འགལ་ལོ་ཞེས། །ཐེ་ཚོམ་ཟ་འགྱུར་དེ་དག་ལ། །མཐོང་བམེད་པའི་དོན་དེ་ཉིད། །ཡིད་ཀྱིངོ་ལ་སྣང་འགྱུར་ན། །སྣང་ཞེས་དེ་ཕྱིར་བརྗོད་པར་བྱ། །དེ་བས་འཁྲུལ་བམ་ཟད་པར། །ནམ་མཁའ་མཐོང་བ་མེད་པ་དེ། །དེ་ཉིད་ཡིད་ལ་སྣང་འགྱུར་ཡང་། །གཟུགས་ལ་སྣང་བར་གྱུར་མ་ཡིན། །སེམས་ཉིད་བདེན་པས་མ་མཐོང་ན། །ཡིད་ལ་མཚན་ཉིད་དོན་གསལ་ཡང་། །མཚན་མ་འཁྲུལ་པ་རྒྱུ་བ་གཉིས། །འདྲེན་མར་རྒྱུ་བ་འབྲས་བུ་མེད། །དེ་ཉིད་བདེན་པར་མཐོང་འགྱུར་ན། །དེ་ནས་དེ་མ་ཐག་ཏུ་ཡང་། །ཡིད་ཀྱིས་རྒྱུ་བ་རྒྱུན་བཅད་ནས། །སྔར་འཁྲུལ་མཚན་མའི་ཆོས་བྲལ་ཏེ། དེས་ནི་བདེན་པ་མཐོང་བ་ཡིན། །ཞེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་པ་དེའི་བདེན་པ་མཐོང་བའི་དྲོད་ཚད་ཅི་གཟུང་བ་ལགས་ཞེ་ན། བཀའ་སྩལ་པ། ངེས་དོན་མཐོང་བའི་ཉམས་དྲོད་ནི། །མན་ངག་ལུང་གི་བརྒྱན་ཆ་སྟེ། །ངེས་པར་དྲོད་གསུམ་མྱོང་བར་འགྱུར། །དེ་དག་ཐོག་ཏུ་ཕེབས་པའི་དྲོད། །དྲོད་ཆེན་རྟག་ཏུ་བསྟན་པ་ཡིན། །དེ་ཡིས་ཞར་ལ་འབྱུང་བའི་ཕྱིར། །འཁོར་བའི་ཁམས་སུ་སྙིང་རྗེ་ཡི། །བྱང་ཆུབ་སེམས་ཀྱང་སྐྱེ་བར་འགྱུར། །མཚན་མ་རྟོགས་པའི་ཆོས་རྣམས་ལ། །ཡིད་མ་ཆེས་པའི་འདུ་ཤེས་སྐྱེས། །ཆོས་རྣམས་འདི་ལྟར་ཡིན་པ་ལ། །ལོག་པར་འཁྲུལ་པ་ངོ་མཚར་ཞེས། །ཡ་ཆར་སྤྱོད་པའི་འདུ་ཤེས་འབྱུང་། །འདི་དོན་མ་ཤེས་འགྲོ་བ་རྣམས། །རྩོལ་སྒྲུབ་དཀའ་བའི་ཐབས་ཆེན་གྱིས། །ཡང་དག་དོན་འཚོལ་ལམ་དེ་རིང་། །བསགས་པའི་འབྲས་བུ་ཡོད་གྱུར་ཀྱང་། །གཟུགས་ལ་སྣང་བར་དོན་དེ་མཐོང་བར་ཡོངས་མ་ནུས། །དེ་ལྟར་ཤེས་པའི་ཉམས་དྲོད་ནི། །སྐལ་དང་ལྡན་པའི་སྐྱེས་བུ་གང་། ཁུད་འགྲོས་ཚིག་གིས་མ་བཀྲོལ་བར། །སེམས་ལས་ཆོས་འབྱུང་འབུམ་ཕྲག་ཡས། །སྨྲ་བའི་སྒོ་མོ་ཐམས་ཅད་གསལ། །དོན་ལ་ངེས་པའི་གཏན་ཚིག་དག །ཚིགཏུམཚོན་ཏེ་འབྱིན་པར་ནུས། །དེ་ནི་རྩོ་ས་སྐུ་མཉམ་ཉིད་དང་། །དབྱེར་མེད་གཉིས་སུ་མེད་པ་ཡིན། །བསྟན་པའི་གཟུགས་སུ་གཟུགས་བརྙན་དང་། །དེ་ནི་མཚུངས་པ་མ་ཡིན་ནོ། །ཞི་ལུས་མཐར་འགོག་རྐྱེན་གཉིས་དང་། །དེ་ནི་མཚུངས་པ་མ་ཡིན་ནོ། །ས་ལ་སློབ་པའི་སེམས་དཔའ་དང་། །དེ་ཡང་མི་མཚུངས་རྒྱལ་བས་གསུངས། །རིགས་འཛིན་དྲང་སྲོང་དོན་སྤྱོད་དང་། །ལུས་འདྲ་སེམས་ནི་ཡོང་མི་མཚུངས། །ཞེས་གསུངས་སོ། །གསོལ་པ། བྱང་ཆུབ་སེམས་ཀྱི་ཕུར་བའི་དོན་སྤྱོད་པའི་རྣལ་འབྱོར་པ་དེ་ལ་བར་ཆད་ཀྱི་བདུད་ཀྱི་སྤྱོད་ཡུལ་རྣམས་འབྱུང་བ་ཇི་ལྟ་བུ་ལགས་ཞེ་ན། བཀའ་སྩལ་པ། རྣལ་འབྱོར་བདུད་ཀྱི་སྤྱོད་ཡུལ་ནི། །དམ་པར་མདུན་མཐོང་དམ་པར་སྨྲ། །སྤྲུལ་པ་གྲངས་མེད་འགྱེད་མཐོང་དང་། །དམ་པས་གསུང་ཀུན་གསལ་མཐོང་དང་། །དུས་ཀུན་ཤེས་གསལ་མཐོང་བ་དང་། ཁུད་དྲུག་ལམ་གནས་ཀུན་སྣང་དང་། །དེ་ལ་གདུང་བའི་ཤུགས་ཕྱུང་དང་། །ཀུན་གང་གསལ་བར་མཐོང་བ་དང་། །ཅི་ལ་ཐོགས་མེད་འགྲོ་བ་དང་། །མཁའ་ལ་བྱ་བཞིན་འགྲོ་འདུག་དང་། །སངས་རྒྱས་ཕྱག་རྒྱ་ལུང་སྟོན་དང་། །ཀུན་གྱི་སྐད་དུ་ཆོས་སྟོན་དང་། །དངོས་པོ་བརྟན་གཡོ་བསྟི་གནས་མཐོང་ ཐམས་ཅད་མཉམ་པར་བཀོད་པ་དང་། །དེ་ཉིདརངབཞིནགསལསྣངདང་། །ལས་སུ་རུང་བ་ཐོགས་མེད་དང་། །དམ་པས་དོན་ལ་བསྔོས་པ་དང་། །ཏིང་འཛིན་གཙོ་བོས་མཆོད་པ་དང་། །རང་བཞིན་༄༅། ཁྲེས་ན་དམ་པའིཐབས། །གང་གིས་མི་ཤེས་ལོག་པའི་བདུད་ཅེས་བྱ། །ཆགས་སྡང་དྲག་པོའི་ཡུལ་དང་ནི། །མི་མ་ཡིན་པའི་གཟུགས་སུ་སྣང་བ་དང་། །མཁའ་ལ་སྣ་ཚོགས་གཟུགས་སུ་མཐོང་བ་དང་། །དེ་དག་བདུད་ཀྱི་སྤྱོད་ཡུལ་ལོ། །ཞེས་གསུངས་སོ། །གསོལ་པ། བྱང་ཆུབ་སེམས་ཀྱི་ཕུར་པར་སྤྱོད་པའི་ཚེ། གོང་གི་སྤྱོད་ཡུལ་དེ་དག་ཇི་ལྟར་ཤེས་པར་བགྱི་བ་ལགས་ཞེ་ན། བཀའ་སྩལ་པ། སེམས་དང་སྣང་བའི་མཚན་མ་དང་། །ང་བདག་གཉིས་པའི་མཐའ་མེད་པས། །སྣང་བ་ཐམས་ཅད་ཡོན་ཏན་མིན། །དེ་བས་དགའ་བྲོད་འདུ་ཤེས་མེད། །ཡོན་ཏན་སྙེམས་པའི་ང་རྒྱལ་གྱིས། །དྲེགས་ཁེངས་མཐོ་དམན་སེམས་བསྐྱེད་ན། །ངེས་པར་བདེན་པ་མ་མཐོང་བ། །དེ་བས་བདུད་ཀྱི་སྤྱོད་ཡུལ་གསུངས། །དེ་བས་སྒྱུ་མ་རབ་ཤེས་ནས། །རློམ་སེམས་བྲལ་བས་སངས་རྒྱས་ཡིན། །དེ་བཞིན་གཤེགས་པའི་སྤྱོད་ཡུལ་མཐོང་ཡང་མ་ཆགས་པ་དང་། སྲིད་པ་གསུམ་ས་ལེ་མཐོང་ཡང་རིག་པའི་གནས་སུ་མི་འཇིགས་པ་དང་། དུས་གསུམ་གྱི་ཚེ་གསུམ་དྲན་ཡང་ཆོས་ཉིད་ལས་མ་གཡོས་པའོ། །ཞེས་སོ། །གསོལ་པ། བྱང་ཆུབ་སེམས་ཀྱི་ཕུར་པ་གོངམ་ལྟར་བསྒོམས་པས་འབྲས་བུ་ཇི་ལྟར་ཐོབ་པ་ལགས་ཞེ་ན། བཀའ་སྩལ་པ། དམིགས་མེད་ཏིང་འཛིན་རྟོགས་གྱུར་ན། །ཆོས་སྐུ་རྟོགས་ཞེས་དེ་ལ་བྱ། །མི་ཟད་རྒྱན་གྱི་འཁོར་ལོ་ཡང་། །སྒྱུ་མའི་སྤྱོད་ཡུལ་དཔག་ཏུ་མེད། །ཅེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་པ་དེའི་འབྲས་བུ་ཐོབ་པ་ཞིག་ལགས་སམ་ཞེ་ན། བཀའ་སྩལ་པ། ནམ་མཁའ་བཞིན་ཏེ་མཐའ་མཉམ་ཞིང་། །གཞན་ལ་ལྟོས་འགྱུར་ཆོས་མ་ཡིན། །མཚུངས་པ་མེད་པའི་ཡེ་ཤེས་ཀྱིས། །རངགི་མཐུ་ཡིས་རིག་པ་ལས། །ཆོས་ནི་གཞན་ནས་འབྱུང་མི་འགྱུར། །རང་རིག་སྐྱེས་བུ་དམ་པ་ལ། །བླ་མའི་སངས་རྒྱས་དེ་ལ་གནས། །དོན་དམ་བཅོས་ལྡན་བཞག་པ་ལ། །ཡོན་ཏན་འབྲས་བུ་རང་བཞིན་ཚང་། །བཀའ་གསང་ཐབས་ཀྱི་འབྲས་བུ་ནི། །རེ་མེད་དོན་དམ་ང་ལ་ཡོད། །ཀྱེ། རྣལ་འབྱོར་གང་དུ་དོན་གཅིག་ཉན། །མ་ཡེངས་དོན་ལ་བློ་འཇོག་དང་། །སྣང་མེད་འབྲས་བུ་ལག་ཆང་མ། །མི་འབྱུང་མི་འཇུག་བདག་མེད་སྙིང་རྗེའི་དེ་ཡིས་ནི། །གཞན་གྱི་ནོར་མེད་མ་འོངས་ཡེ་ནས་གནས་པ་ཡིན། །བྱང་ཆུབ་སྙིང་པོར་དག་འཇུག་པས། །ཐོབ་པ་མེད་པས་སྤངས་པ་མེད། །ང་ངས་རྒྱས་རྣམས་ཀྱི་བྱང་ཆུབ་ནི། །ཐ་སྙད་ཡིན་ཏེ་དོན་དམ་མིན། །ཞེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་པའི་འབྲས་བུ་ཐོབ་པ་བགྱི་བ་ཉིད་ཇི་ལྟ་བུ་ལགས་ཞེ་ན། བཀའ་སྩལ་པ། བདག་ཉིད་ཆོས་སྐུ་སྙིང་པོ་བྱང་ཆུབ་པས། །གཞན་ནས་བཙལ་ཞིང་ཐོབ་པ་མ་ཡིན་ཡང་། རྨི་ལམ་སད་ནས་གཟུགས་དང་བྲལབབཞིན། །སྒྲིབསྤངས་བྱང་ཆུབ་ཐོབ་ཅེས་རྒྱལ་བས་གསུངས། །རྟོགས་པའི་འདུ་ཤེས་ཟད་གྱུར་ན། །ལྷུན་གྲུབ་ཡེ་གསལ་རང་ལས་འཆར། །དེ་ལ་རྒྱུ་དང་འབྲས་བུ་མེད། །དེ་ཕྱིར་ཡེ་ཤེས་སྤྲོས་བྲལ་ཡིན། །ཞེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་པའི་དེ་ལ་རྒྱུ་འབྲས་དབྱེར་མེད་པ་ཞེས་བགྱི་བ་ཇི་ལྟ་བུ་ལགས་ཞེ་ན། བཀའ་སྩལ་པ། རྒྱུ་འབྲས་ཡེ་ནས་དབྱེར་མེད་སྔ་ཕྱི་མ་ཡིན། །འབྲས་བུ་ལམ་དུ་གྱུར་ན་དུས་གཅིག་མཉམ་པར་སྦྱོར། །བྱང་ཆུབ་སེམས་ཀྱི་ཕུར་པའི་དོན་གོང་མ་དེ་ཇི་ལྟར་དབྱེར་མེད་ཅེ་ན།བཀའ་སྩལ་པ། འབྲས་བུ་རྣམ་པར་དག་པ་ནི། །འཇིག་རྟེན་བརྟན་གཡོ་ལ་སོགས་པ། །སྣང་བ་ཉིད་ན་ངོ་བོ་ཉིད་མེད། །ཆོས་ཉིད་ཆོས་སྐུ་ཆེན་པོ་ཡིན། །སྐུ་དང་རྒྱན་དང་འཁོར་ལོ་ནི། །ལུང་ཆེན་བཟང་མོའི་ནང་ན་གསལ། །དངོས་གྲུབ་མཆོག་གི་སྙིང་པོ་དང་། །དང་པོའི་དོན་རྟོགས་མཐར་མི་གཏོང་། །ཆུ་སྲིན་ཕྱག་རྒྱ་ཇི་བཞིན་ནོ། །སྤྱོད་ཡུལ་ཀུན་ཏུ་ཚད་དཔག་མེད། །ཅེས་གསུངས་སོ། །གསོལ་བ། བཅུ་བཞི་པ་ཡི་གསང་སྔགས་དོན། །བྱང་ཆུབ་སེམས་ཀྱི་ཕུར་པ་ཡི། །ངེས་པར་བཟླས་པའི་ཉམས་བླངས་པ། །ལྔ་གསུམ་དང་པོའི་ཡི་གེ་ཡི། ཁྲེས་རབ་ཐབས་ཀྱི་ཕུར་པ་གང་། །གཉིས་མེད་ཐེག་ཆེན་ཕུར་བུ་གཅིག །ཐམས་ཅད་བགེགས་ཀྱི་དོན་ཅི་ལགས། །དེ་དག་བསྡུས་པ་གང་དུ་བསྒྲལ། །བཀའ་སྩལ་པ། དང་པོ་དགོན་པར་གནས་པའི་ཕྱིར། །ལྔ་དྲུག་སེམས་ཅན་རང་བྱུང་བ། །གཅིག་མང་ལྔ་བཤད་གང་ཡིན་དང་། །རྡོརྗེསྐུམཆོགལྷུན་རྫོགས་ཉིད། །དུས་གསུམ་རྒྱལ་བའི་ཡབ་ཆེན་པོ། །སངས་རྒྱས་ཐམས་ཅད་འདུས་པའི་སྲས། །རང་ལས་གཞན་ན་ཡོད་མིན་པ། །མཐའ་བྲལ་བ་ཡང་ཡོད་མ་ཡིན། །འདི་ལྟར་ཡིན་ཞེས་ང་ ་སྨྲ། ། ་སྒྲས་ཤེས་རབ་མཆོག་གི་དབྱིངས། །ཆོས་ཅན་མཚན་མ་ཀུན་ལ་ཐེབས། །དེ་དག་སྤྲོས་དང་བྲལ་མ་བྲལ། །ཕྱོགས་བཅུ་ཐུག་པ་ག་ལ་ཡོད། །བསམ་པའི་དབྱིངས་ལས་ཡུལ་མེད་པར། །རིག་པ་རང་ཤར་ཐབས་ཀྱི་མཆོག །སྤྱོད་ཡུལ་དག་པས་བཟང་པོ་ནི། །ལ་སྒྲས་མཚོན་པའི་ཐེག་ཆེན་པོ། །ཡ་སྒྲས་མཚོན་པས་དབྱིངས་ལ་ཐེབས། །གཉིས་མེད་ཕུར་བུ་མཐར་ཕྱིན་ནོ། །ཡེ་ཤེས་སྤྲོས་བྲལ་ཕུར་བའི་མཆོག །འཐོབ་དབང་ཀུན་གྱི་མཆོག་ཡིན་ཏེ། །གཟའ་གཏད་མེད་པར་ཐག་ཆོད་ན། །རེ་བཞིན་དོགས་པ་ག་ལ་ཡོད། །དེ་རྗེས་མངོན་དུ་གང་བྱེད་པ། །དགོན་པ་གཉིས་པོ་རྣམ་བྲལ་བའི། །དགོན་པ་མཆོག་ལ་གནས་པ་སྟེ། །རེ་དོགས་མེད་པར་རང་བཞིན་འདུག །དབྱིངས་ཉིད་རང་སྣང་རྒྱ་ཆེ་ལ། །འདུག་ན་མཚོན་དང་རླབས་ཚུལ་ལས། །དང་པོ་སྔགས་སུ་དོན་ཉིད་སྣང་། །ཕྱོགས་ནས་ལྡང་པ་ག་ལ་ཡོད། །དེ་ཚེ་དྲུག་གིས་མཚོན་བསྒྲིབས་པ། །རྩ་བ་རང་བཞིན་རྐྱེན་བླང་སྟེ། །ཉམས་མྱོང་ཆེད་བྱེད་ཤུགས་སྣང་བགེགས། །ཐམས་ཅད་གསུམ་ལ་ཇི་ལྟར་བསྒྲིབ། །ཟིན་ནས་ཉམ་ང་དང་པོ་ལ། །འབྱུང་ཚེ་བཅོམ་པའི་ཡི་གེ་གཅིག །དབང་སྟེ་རྟོགས་པས་དབང་གྱུར་ན། །བྱིང་རྨུགས་ལྷག་མཐོང་རྒོད་ཞི་ནས། །ཐ་དད་ཟུང་འབྲེལ་རང་བཞིན་ལས། །སྒྲིབ་རྩལ་རྩོལ་བ་ག་ལ་ཡོད། །ཐུགས་ཀྱི་ཡི་གེ་རང་གནས་ན། །ཉམས་ལྔའི་དྲོད་རྟགས་རང་བྱུང་བས། །འཁོར་བའི་རྒྱ་མཚོ་ལས་སྒྲོལ་བ། །ཡི་གེ་འབྲུ་དགུ་དྲང་བའི་དོན་ཡིན་ཏེ། །མིང་ཙམ་གཞན་ལ་རྟེན་འདྲ་ཡང། །མངོན་སུམ་སྨིན་པ་རང་ཉིད་ཡིན། །གསོལ་བ། བྱང་ཆུབ་སེམས་ཀྱི་ཕུར་པ་དེ། །གདབ་པའི་གནས་ནི་གང་ལྟར་ལགས། །བཀའ་སྩལ་པ། བྱང་ཆུབ་སེམས་ཀྱི་ཕུར་པ་དེ། །གཞན་དུ་འདེབས་པའི་གནས་མེད་དེ། །དངོས་པོ་ཕྱིན་ཅི་ལོག་ལ་གདབ། །གཟུང་འཛིན་འཁྲུལ་པའི་ཆོས་ལ་གདབ། །ཐབས་ཀྱི་ཕུར་བུ་ཤེས་རབ་ངང་དུ་གདབ། །ཡེ་ཤེས་ཕུར་པ་དབྱིངས་ལ་གདབ། །དངོས་པོ་ཀུན་བྲལ་ཕུར་བུ་ཡིས། །རང་རིག་བྱང་ཆུབ་སེམས་ལ་གདབ། །དེ་ལྟར་རྟོགས་ན་ཐེབས་པ་ཡིན། །གསོལ་བ། བྱང་ཆུབ་སེམས་ཀྱི་ཕུར་པ་དེ། །དེ་ལྟར་ཐེབས་པའི་འབྲས་བུ་གང་། །བཀའ་སྩལ་པ། དངོས་པོ་ཆོས་ཉིད་ཆེན་པོར་སྣང་བར་འགྱུར། །གཟུང་འཛིན་འཁྲུལ་སྣང་རང་བཞིན་དག །ཐབས་དང་ཤེས་རབ་གཉིས་སུ་མེད། །དབྱིངས་ལ་བཏབ་པས་དོན་རྣམས་རྟོགས། །སེམས་ལ་གདབ་པས་རིག་པ་ཤར། །མྱ་ངན་འདས་པའི་དབྱིངས་སུ་གདབ། །དེ་ཡི་དོན་གྱིས་ཐེབས་གྱུར་ན། །འཁོར་བ་ཉིད་ན་མྱ་ངན་འདས། །དམྱལ་བའི་གནས་ཉིད་བླ་མེད་གནས། །སྡུག་བསྔལ་ཉིད་ན་བྱང་ཆུབ་ལམ། །རྣམ་རྟོག་ཉིད་ན་ཡེ་ཤེས་སྐྱེས། །མ་ལུས་ཕུར་པས་ཐེབས་ཤེས་བྱའོ། །གསོལ་བ། བྱང་ཆུབ་སེམས་ཀྱི་ཕུར་པ་དེ་ངོ་བོ་ཇི་ལྟ་བུ་ལགས། བཀའ་སྩལ་པ། ཕུར་པ་བླ་མ་ཆེན་པོ་ཡིན། །ཕུར་པ་རྒྱུད་ཀྱི་རྒྱལ་པོ་ཡིན། །ཕུར་པ་ལུང་གི་བླ་མ་ཡིན། །ཕུར་པ་མན་ངག་ངེས་པ་ཡིན། །ལྷངས་ཀྱི་རྟོགས་ན་ལྟ་བའི་ཕུར་པ་ཡིན། །མངོན་དུ་གྱུར་པ་དཀྱིལ་འཁོར་ཕུར་པ་ཡིན། །ཉམས་སུ་ལོན་པས་ཏིང་འཛིན་ཕུར་པ་ཡིན། །གནས་སུ་སོན་པས་མཆོད་པའི་ཕུར་པ་ཡིན། །གདེང་དུ་གྱུར་བས་དབང་མཆོག་ཕུར་པ་ཡིན། །ཐུགས་རྗེས་ཟིན་པས་དམ་ཚིག་ཕུར་པ་ཡིན། །ལྷུན་གྱིས་གྲུབ་པས་འཕྲིན་ལས་ཕུར་པ་ཡིན། །བྱ་བྲལ་རྫོགས་པས་སྤྱོད་པའི་ཕུར་པ་ཡིན། །ལྷངས་ཀྱིས་རྟོགས་པས་སྒྲོལ་བའི་ཕུར་པ་ཡིན། །ཐམས་ཅད་བྱང་ཆུབ་སེམས་ཀྱི་ཕུར་པར་ལྷུན་གྱིས་གྲུབ་པར་གྱུར་ཏོ། །གསོལ་བ། དེ་ལྟར་བྱང་ཆུབ་སེམས་ཀྱི་ཕུར་པ་ལས་སུ་རུང་བའི་དུས་ན་ནི་འཁོར་བའི་ཆོས་འདི་དག་མཐའ་གང་དུ་བཅིང་ཞེ་ན། །བཀའ་སྩལ་པ། །འཇིག་རྟེན་འདི་ན་བརྟན་གཡོ་ཅི་ཡོད་པ། །མིང་དང་ཐ་དད་འཛིན་པ་དག །སོ་སོའི་མཚན་ཉིད་གཞིག་བྱས་ན། །རང་བཞིན་མེད་དེ་ཡང་དག་སེམས་ཀྱི་ཕུར་པ་ཉིད། །ཡེ་ཤེས་སྤྲོས་བྲལ་ཆེན་པོ་སྟེ། །ཐམས་ཅད་སངས་རྒྱས་ཞིང་དུ་སྦྱོར། །མ་བཅོས་མ་བྱས་ངང་གིས་སེམས་ཉིད་ཕུར་པར་གསལ། །འཁོར་བ་མྱང་འདས་གཉིས་མེད་དེ། །གུད་ན་ཡོད་པ་མ་ཡིན་ཏེ། །འཁོར་བ་ཡོངས་སུ་ཤེས་པ་ཉིད། །དེ་ཉིད་མྱ་ངན་འདས་པའི་མཐའ། །ཞེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་པ་འབྲས་བུ་ལྷུན་གྱིས་གྲུབ་པའོ། །ཞེས་བྱ་བ་ཇི་ལྟར་འགྲུབ་པར་འགྱུར་བ་ལགས་ཞེ་ན། བཀའ་སྩལ་པ། སྟོང་དང་མི་སྟོང་བྱང་སེམས་ཕུར་པ་ལ འབྲས་བུ་དཔག་མེད་ཡེ་གནས་པ། །སུས་ཀྱང་མ་བྱས་་བྱས་པ་མེད། །དེ་བས་གསང་མཆོག་ལུས་སྤྱོད་པའི། །བསོད་ནམས་མཆོག་ལྡན་གཟུགས་ཀྱི་སྐུ། །རྣམ་སྨིན་ཚུལ་གྱིས་གྲུབ་པའི་ལྷ། །བཙལ་ནས་ཐོབ་པར་མི་བྱེད་དེ། ཁུའི་དུས་ན་བྱང་སེམས་ཕུར་པ་འབྲས་བུཁྱི་མཆོག །གཞན་ནས་བཙལ་ནས་རྙེད་པར་མི་འགྱུར་ཏེ། །བྱང་ཆུབ་ཕུར་པ་ཀུན་ལ་ཁྱབ་གནས་པ། །བྱང་སེམས་ཕུར་པ་སྤྲོས་བྲལ་བཅོམ་ལྡན་འདས། །རྩོལ་བས་བཙལ་དུ་མེད་དེ་སྙིང་པོའི་དོན། །ཇི་བཞིན་པ་ཞེས་མི་རྟོག་ན། །གཟུགས་སྐུ་ཕུར་པས་རྩོལ་བའི་ནད་སྤངས་ཏེ། །ལྷུན་གྱིས་གནས་པས་བྱང་སེམས་ཕུར་པའི་མཆོག །ཅེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་བུ་ཐམས་ཅད་མྱ་ངན་ལས་འདས་ཞེས་བྱ་བ་ཇི་ལྟར་གསལ་ཞེ་ན།བཀའ་སྩལ་པ། མྱ་ངན་འདས་པའི་བྱང་སེམས་ཕུར་པའི་མཆོག་ནི། ཆོས་ཉིད་ཕྱོགས་བཅུར་བརྡལ་བ་དང་། །རིག་པ་མཐའ་དབུས་མེད་པ་དང་། ཀུན་གཞི་བཟང་ངན་མེད་པ་དང་། ཤེས་པ་ཕྱོགས་རིས་མེད་པ་དང་། །མྱ་ངན་འདས་པའི་དགོངས་པ་ཀུན། །མི་གཡོ་སེམས་ལ་རིག་པའི་ཕུར་པ་ཤར། །སངས་རྒྱས་སེམས་ནི་མྱ་ངན་འདས། །ཡུལ་ནི་ཆོས་སུ་མྱ་ངན་འདས། །རྟག་པ་ཡེ་ཤེས་མྱ་ངན་འདས། །སྣོད་བཅུད་ཆོས་སྐུར་མྱ་ངན་འདས། །སེམས་ཅན་སངས་རྒྱས་མྱ་ངན་འདས། །ཀུན་རྫོབ་དོན་དམ་མྱ་ངན་འདས། །མྱ་ངན་འདས་པའི་དོན་རྟོགས་ན། །འཁོར་བ་ངན་སོང་མིང་ཡང་མེད། །ཅེང་་གསུངས་སོ། །གསོལ་པ། ཐམས་ཅད་བྱང་ཆུབ་སེམས་ཀྱི་ཕུར་པར་མྱ་ངན་འདས་ཏེ་གཟུགས་ཀྱི་སྐུ་རུ་བྱུང་ནས་འགྲོ་བའི་དོན་མཛད་པ་ཚད་མ་ལགས་སམ་མ་ལགས་ཞེ་ན། བཀའ་སྩལ་པ། སངས་རྒྱས་པས་ཀྱང་སངས་རྒྱས་མིང་ཡང་མེད། །སངས་རྒྱས་སྟོན་པས་མིང་དུ་བཏགས་པས་ནོར། །སེམས་ཉིད་ཆོས་པས་སེམས་ཉིད་སྐུ་མི་མངའ། །སྒྲ་ལས་འདས་པས་སྒྲ་ཉིད་ཡེ་ཤེས་ཏེ། །ཞི་བ་འདི་གང་ལ་གདོད་ནས་ལྷུན་གྱིས་གྲུབ། །མཚན་མ་འཇིལ་བའི་སྐུ་མེད་རགས་པས་ན། །བྱང་ཆུབ་སེམས་ཀྱི་ཕུར་པ་ལ། །བཟའ་བའི་ཡུལ་མེད་བཙལ་བའི་དངོས་པོ་སྟོང་། །ཞེས་གསུངས་སོ། །གསོལ་པ། བྱང་ཆུབ་སེམས་ཀྱི་ཕུར་པ་ལ། །སྐུ་ཞེས་གང་ལ་གདགས་ཞེ་ན། བཀའ་སྩལ་པ། སྐུ་ཡི་དཀྱིལ་འཁོར་ཡང་དག་པ། །ཆོས་ཉིད་བྱང་ཆུབ་སེམས་ལ་ཡོད། །གསུང་གི་དཀྱིལ་འཁོར་ཡང་དག་པ། །ཆོས་ཉིད་བྱང་ཆུབ་སེམས་ལ་ཡོད། །ཐུགས་ཀྱི་དཀྱིལ་འཁོར་ཡང་དག་ང་། །ཆོས་ཉིད་བྱང་ཆུབ་སེམས་ལ་ཡོད། །བྱང་ཆུབ་སེམས་ཀྱི་ཕུར་པ་ལ། །ཡོན་ཏན་འཕྲིན་ལས་དེ་བཞིན་པས། །ཞིང་ཁམས་དག་ཏུ་སྐུ་རུ་སྣང་། །ཞེས་གསུངས་སོ། །གསོལ་བ། བྱང་ཆུབ་སེསམ་ཀྱི་ཕུར་པ་གཟུགས་ཀྱི་སྐུར་བསྟན་ནས་ཞིང་ཁམས་འདུལ་བ་ཇི་ལྟ་བུ་ལགས་ཞེ་ན། བཀའ་སྩལ་པ། བདེ་གཤེགས་བྱང་ཆུབ་མེད་ཕྱིར་དེ། །རྫུ་འཕྲུལ་སྒྲ་འདྲ་འཁྲུལ་ལ་སྣང་། །ཇི་སྲིད་མཚན་མ་ཡོད་ཀྱི་བར། །དེ་བཞིན་སངས་རྒྱས་སྐུ་ཡང་ཡོད། །ཇི་སྲིད་མཚན་མ་མེད་ན་ནི། །དེ་བཞིན་སངས་རྒྱས་སྐུ་ཡང་མེད། །ཇི་སྲིད་རྣམ་གྲངས་ཡོད་ཀྱི་བར། །དེ་བཞིན་ལྷ་ཡི་གྲངས་ཀྱང་ཡོད། །ཇི་སྲིད་རྣམ་གྲངས་མེད་ན་ནི། །དེ་བཞིན་ལྷ་ཡི་གྲངས་ཀྱང་མེད། །མ་རིག་འཁྲུལ་བའི་སྒོ་ཙམ་དུ། །གྲངས་ལ་རྟགས་ཀྱི་མཚན་པ་ཟད། །དོན་དམ་བཅོས་པ་མེད་པ་ལ། །བྱང་སེམས་ཕུར་པའི་སྐུ་གཅིག་བསྡུས་པ་ལ། །རིས་དང་རྟགས་སུ་ག་ལ་བསྟན། །ཞེས་གསུངས་སོ། །གསོལ་པ། བྱང་ཆུབ་སེམས་ཀྱི་མཐར་ཕྱིན་པའི་དུས་ན་ཇི་ལྟ་ཕུར་པ་བུ་ཞིག་གནས་པ་ལགས་ཞེ་ན། བཀའ་སྩལ་པ། འདི་ལྟར་དུས་གསུམ་རྣམ་པ་ཐམས་ཅད་དུ་བྱང་ཆུབ་སེམས་ཀྱི་ཕུར་པ་ཉིད་ལས་མ་ཡེངས་པ་ནི་ཆོས་ཀྱི་སྐུའོ། །སྟོབས་སུ་གྱུར་ནས་འཇིག་རྟེནརངབཞིནམེད། །ཅེས་གསུངས་སོ། །གསོལ་པ། བྱང་ཆུབ་སེམས་ཀྱི་ཕུར་པ་དེ་སྟོང་ཞིང་ཕྱལཆདཔགཅིགལགསསམ་ཞེ་ན། བཀའ་སྩལ་པ། གཟུང་འཛིན་བྲལ་བའི་ཡེ་ཤེས་ནི། །དེ་བཞིན་གཤེགས་པ་ཀུན་གྱི་གནས། །མཐར་ཕྱིན་སྣང་བ་མེད་པའི་ཀློང་། །མུ་མཐའ་མེད་པའི་ཆོས་དབྱིངས་ལ། །སྒྲིབ་སྤངས་ཡེ་ཤེས་ཀློང་བརྡལ་བས། །ཡོན་ཏན་དཔག་མེད་ལྷུན་གྱིས་གྲུབ། །དུས་གསུམ་འགྱུར་མེད་སྣང་བའོ། །ཞེས་གསུངས་སོ། །གསོལ་བ། བྱང་ཆུབ་སེམས་ཀྱི་ཕུར་པར་ཐམས་ཅད་སངས་རྒྱས་ན་སེམས་ཅན་ཡེ་མི་གཟིགས་ལགས་སམ་ཞེ་ན། བཀའ་སྩལ་པ། བསྐལ་པ་སྔོན་གྱི་སྨོན་ལམ་དང་། །ཀུན་མཁྱེན་ཡེ་ཤེས་ཆེ་བས་ནི། །འགྲོ་དྲུག་དུས་གནས་སྡུག་བསྔལ་ཡང་། །རྨི་ལམ་ཚུལ་དུ་མེད་པར་སྣང་། །ཡིན་བཞིན་ནོར་ལྟར་རྟོག་མེད་པས། །སྣ་གསུམ་འཕྲིན་ལས་ལྷུན་གྱིས་གྲུབ། །ལོག་པར་རྟོགས་བརྟགས་རྣམ་དག་ཅིང་། །ཡེ་ཤེས་དབྱིངས་ལས་མི་གཞན་ཕྱིར། །ཐུགས་རྗེ་ཆེན་པོས་འབྲེལ་བར་ནི། །འགྲོ་དྲུག་དུས་གནས་མ་ལུས་སྣང་། །ཞེས་གསུངས་སོ། །བྱང་ཆུབ་སེམས་ཀྱི་ཕུང་པ་རྫོགས་པ་ཆེན་པོའི་ཐེག་པའི་ཡང་ཞུན་རྒྱུན་ཀྱི་རྒྱལ་པོ་ལས། །བྱང་ཆུབ་སེམས་ཀྱི་ཕུར་པའི་དོན་སྟོན་པ་དང་སྡུད་པ་པོའི་ཞུས་ལན་བསྟན་པ་སྟེ་གསུམ་པའོ།། །།དེ་ལྟར་བྱང་ཆུབ་སེམས་ཀྱི་ཕུར་པའི་དོན་སྟོན་པ་དང་། སྡུད་པ་པོས་ཞུས་ལན་དུ་བསྟན་ན། བྱང་ཆུབ་སེམས་ཀྱི་རྡོ་རྗེའི་ཕྱག་མངོན་པར་མཛད་དེ། སེམས་ཉིད་མ་ཆགས་པའི་མཆོད་པས་མཆོད་དེ་འདི་སྐད་བསྟོད་དོ། །བྱང་སེམས་ཕུར་པའི་མཛད་ནི་མིག་གི་སྒྲོན་མར་སྣང་། །བཀའ་ལུང་བདུད་རྩི་ཡང་དག་སྟོན་བྱེད་པ། །སྤྱི་དང་རང་གི་མཚན་ཉིད་ཆོས་རྣམས་གནས་པ་སྟེ། །སེམས་ལས་བྱུང་བའི་ཆོས་རྣམས་རྒྱུ་འབྲས་ཆོས་རྣམས་འཁོར། །སེམས་ཉིད་ཆོས་དབྱིངས་ཐམས་ཅད་འདུས་པར་སྡུད་པས་ཨེ་མའོ་ངོ་མཚར་ཆེའོ། །ཞེས་བསྟོད་པ་མེད་པའི་ཚུལ་གྱིས་བསྟོད་དོ། །བཅོམ་ལྡན་འདས་བྱང་ཆུབ་སེམས་ཀྱི་ཕུར་པས་བཀའ་སྩལ་པ། བྱང་སེམས་ཕུར་པའི་ཡིད་བཞིན་རིན་པོ་ཆེ། །ཐེག་པའི་ནང་ན་ཡང་ཞུན་བླ་ན་མེད། །ཚིགས་ཆུང་བགྲོད་སླ་རྫོགས་པ་ཆེ། །ཚིག་དོན་ལམ་རྒྱུད་ངེས་པའི་དོན། །ཁྱོད་ལ་གཏད་ཀྱི་མི་ནུབ་གྱུར་ཏ་རེ། །ཞེས་གདམས་སོ། །བཅོམ་ལྡན་འདས་སྡུད་པ་པོ་རྡོ་རྗེ་འདུས་པ་འདི་སྐད་ཅེས་ཁས་བླངས་སོ། །དོན་དམ་བྱང་ཆུབ་སེམས་ཀྱི་ཕུར་པ་གཏེར་ཆེན་འདི། །བདག་ལ་སོགས་པའི་འཁོར་རྣམས་ཀྱིས། །ཕྱི་རབས་རྣལ་འབྱོར་དོན་འདོད་ཅིང། །མི་ནུབ་སེམས་ཀྱི་ཕུར་པ་གདབ་པར་བྱ། །བྱང་ཆུབ་སེམས་ཀྱི་ཕུར་པའི་ཆོས་ཀྱི་སྲོག་ཤིང་མངོན་པར་གཟུགས། །བྱང་ཆུབ་སེམས་ཀྱི་ཕུར་པའི་ཆོས་ཀྱི་འཁོར་ལོ་རྒྱུན་དུ་བསྐོར། །བྱང་ཆུབ་སེམས་ཀྱི་ཕུར་པའི་ཆོས་ཀྱི་དུང་ཡོངས་སུ་འབུད། །བྱང་ཆུབ་སེམས་ཀྱི་ཕུར་པའི་ཆར་རྒྱུན་དུ་དབབ། །ཅེས་ཁས་བླངས་ཤིང་དམ་བཅས་སོ། །འཇིག་རྟེན་ཆོས་ཀྱིས་འབྲེལ་བའི་གཏམ་ཉན་པའི་འཁོར་རྣམས་ཀྱིས་དེ་ལྟ་བུའི་ངེས་པའི་དོན་ཚིག་ཏུ་གསུངས་པས། ཆོས་ཉིད་ལ་ཡེ་ཤེས་ཀྱི་རྩལ་མངའ་སྟེ། གཉིས་སུ་མེད་པའི་བྱང་ཆུབ་སེམས་ཀྱི་ཕུར་པའི་དོན་ཐུགས་སུ་ཆུད་པར་གྱུར་ཏོ། །བྱང་ཆུབ་སེམས་ཀྱི་ཕུར་པ་རྫོགས་པ་ཆེན་པོའི་ཐེག་པའི་ཡང་ཞུན་རྒྱུད་ཀྱི་རྒྱལ་པོ་ལས། བྱང་ཆུབ་སེམས་ཀྱི་ཕུར་པ་ཡོངས་སུ་གཏད་པའི་ལེའུ་སྟེ་བཞི་པའོ།། །།དེ་ལྟར་བདེ་གཤེགས་བཀའ་ཡི་རྒྱུད་པ་དེ། །ལྷ་གནས་གསུམ་དུ་རིགས་འཛིན་རིགས་པ་བརྒྱུད། །ལྷ་སྲས་ཁྲི་སྲོང་དོན་གྱི་ཕྱིར། །སློབ་དཔོན་པདྨས་བསྣམས་ནས་གཤེགས། །གང་ཟག་སྙན་ཁུངས་རིམ་པས་བརྒྱུད། །སློབ་དཔོན་རྙོ་ནས་སྣུམས་ཆུང་ཡང་དབང་གཏོར་ལ་བཤད། །བྱང་ཆུབ་སེམ༷ས་ཀྱི་ཕུར་པ་དོན་རྟོགས་ནས། །ཚོམ་བུའི་གཟུགས་ལ་མ་ཆགས་པར། །བྱང་ཆུབ་ལམ་ལ་སྨིན་པར་འགྱུར། །རྫོག་སོ།། །། རྒྱ་གར་སྐད་དུ། བཛྲཀི་ལ་ཡ་ཁ༷་ཤུད་དི་ཕྲོ་མ་ཧྭ་ཏན་ཏྲ། བོད་སྐད་དུ།རྡོ་རྗེ་ཕུར་པ་ཆུ་་བྱག་དབབ་པའི་རྒྱུད་ཆེན་པོ། བཅོམ་ལྡན་འད་འཇིག་བྱེད་