Ngb-pt-0675-vol-07-text
Front
Body
རྒྱ་གར་སྐདདུ། ཨརུམསྣྲུཤིཡམརྭཛམ་རུ་ཙེ་ཙིསྟ་ཏརྙ། བོད་སྐད་དུ། འཕགས་པ་འཇམ་དཔལ་གཤིན་རྗེའི་རྒྱལ་པོ་མེ་རུ་ཙེ་ཐུགས་ཀྱི་རྒྱུད། བཅོམ་ལྡན་འདས་འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་བཤད་པའི་དུས་གཅིག་ན། ཨུ་རྒྱན་གྱི་ཡུལ་རྒྱ་མཚོ་ཆེན་པོ་ལ་བརྟེན་པ། རྫུ་འཕྲུལ་ཅན་གྱིས་བགྲོད་པ་ལས་གཞན་གྱིས་བགྲོད་པར་དཀའ་བའི་ཡུལ་ན། གླགས་ཤིའི་ལུང་བྱ་བ་མྲ བྲག་ཕུག་ཁོང་སེང་ཅན་ཞེས་བྱ་བ་ན། བཅོམ་ལྡན་འདས་པདྨ་ཧེ་རུ་ཀ་བྱ་བའི་སྤྲུལ་པ། པདྨ་ས༷་བྷ་བ་རྡོ་རྗེ་ཐོད་འཕྲེང་རྩལ་ཞེས་བྱ་བ། སྐུ་ཚེ་ཡི་རིགས་འཛིན་སྙེས་པ། འགྲོ་བ་ཡོངས་ཀྱི་དཔལ་མགོན་དུ་གྱུར་པ། བདུད་དང་སྲིན་པོ་མ་ཏྲ༷་བཞིན་སྒྲོལ། མ་མོ་མཁའ་གྲོ་དང་གིང་ཐམས་ཅད་ཀྱིས་ནུབ་རེ་ལ་བསྐོར་བ་ལན་གསུམ་གསུམ་བྱེད་ཅིང་། སྲོག་གི་སྙིང་པོ་འབུལ་བ། བརྒྱ་བྱིན་དང་། གཤིན་རྗེ་དང་། སྲིན་པོ་དང་།ཤ་ཟ་དང་། མ་མོ་དང་། ལྟོ་འཔྱེ་དང་། གྲུལ་བུམ་དང་།དྲི་ཟ་དང་། མིའམ་ཅི་དང་། རྣམ་ཐོས་ཀྱི་བུ་དང་། ལྷ་མ་ཡིན་དང་། ནམ་མཁའ་ལྡིང་དང་། འབྱུང་པོ་དང་། གདོན་ཕལ་པ་རྣམས་ཀྱང་སྐོར་བར་བྱེད། ཕྱག་འཚལ། མཆོད་པ་འབུལ་ལོ། ཤ་ཟ་ལྕེ་སྤྱང་གི་ཚོགས་ཐམས་ཅད་ཀྱང་འདུར་ཞིང་ཕྱག་འཚལ་བའི་གནས་དེ་ན། སློབ་དཔོན་ཉིད་དགོངས་པ་མཛད་ཅིང་སྤྱིན་པ་གཏོང་ཞིང་བཞུགས་སོ། །གཞན་ཡང་ཉིད་ལ་འཁོར་ནི། ཕྱི་ཡི་བསྟན་པ་འཛིན་པ་དང་། ནང་གི་བསྟན་པ་སྐྱོང་བ་དང་། གསང་བའི་བསྟན་པ་སྲུང་བས་བསྐོར་ནས་བཞུགས་སོ། །དེ་ཡི་ཚེ་ན་བདག་གིས་བསམ་པ། །རང་གི་ཆེད་དུ་མི་བསལ་ཞིང་། །དམ་ཚིག་བསྲུང་ཞིང་བསྐྱབ་པའི་ཕྱིར། །པདྨ་ཉིད་ལ་ཞུ་བ་བརྩམ། །བླ་མའི་བླ་མ་དགོངས་སུ་གསོལ། །རྡོ་རྗེ་སློབ་དཔོན་དགོངས་སུ་གསོལ། །བདག་ནི་རོ་ལངས་བདེ་བ་སྩལ། །བསྟན་པ་འདི་བཟླས་བསོད་ནམས་ཚོགས་ཟད་དེ། །དུས་ངན་ཐ་མར་གྱུར་ཏེ་བསྟན་འཇིག་སེར་ཆགས་འཚེ། ཁྲ་ཟ་གདོང་དམར་གདུལ་དཀའ་དཀོན་མཆོག་སྐུ་ལ་བསྔོ། །དེ་ཚེ་དེ་འདུལ་མན་ངག་ཐབས་བསྟན་ཞུ་བར་གསོལ། །སློབ་དཔོན་ཉིད་ཀྱི་བཀའ་སྩལ་བུ་ལ་ནི། །རང་དོན་མ་ཡིན་དམ་ཆོས་བསྲུང་དོན་དུ། །བསྟན་པ་འཇིག་པའི་ཤ་ཟ་གདུལ་དཀའ་བ། །དེ་གདུལ་མན་ངག་ཞུ་བ་ཞུས་པ་ལེགས། །གང་འདོད་སྦྱིན་གྱིས་བསྟན་པ་བསྲུང་བར་བྱོས། །སློབ་དཔོན་རོ་ལངས་གསང་བས་ཞུ་གསོལ་པ། །མན་ངག་གཤིན་རྗེ་དམར་པོའི་ཡང་སྙིང་ཞུ། །འདི་ཡི་ངེས་ཚིག་སྒྲུབ་ཐབས་ལས་རིམ་ཞུ། །བླ་མའི་ཐུགས་རྗེས་བདག་ལ་གཟུང་དུ་གསོལ། །སློབ་དཔོན་ཉིད་ཀྱིས་བཀའ་སྩལ་བུ་ལ་ནི། །ངེས་ཚིག་ཡ་མ་རྭ་ཛ་བཛྲ་ཡསྒ་མ་རུ་ཙེ། །སྲོག་དང་ཐོད་ཆེན་ཝ་ཐོད་གསུམ་ལ་སྒྲུབ། །གསོ་གསོད་ལ་སོགས་ལས་རྣམས་སྣ་ཚོགས་འགྲུབ། །ཅེས་བཀའ་སྩལ་ཏོ། །ལུང་དེ་ལ་བརྟེན་ཏེ་དཔལ་རོ་ལངས་བདེ་བས་མཛད་དོ། །གླེང་གཞིའི་ལེའུ་སྟེ་དང་པོའོ།། །།ཤི་ཡ་མ་རྭ་ཛ་ཧ་ལ། ཟུར་ཐར་བྱེད། གཤེད་གཤེད་བུ་རལ་པ་ཅན། དྲེགས་པ་ཅན་ཐམས་ཅད་ཀྱི་གཤེད་མ་སྟེ། བསྟན་པ་བསྲུང་བའི་ལྷ་ལ་ཕྱག་འཚལ་ལོ། །གཤིན་རྗེའི་རྒྱལ་པོ་སྲོག་དབུགས་བདག་པོ་སྟེ། །ཀུན་གྱི་བདུད་ཡིན་སྐྱེ་འགྲོ་ཀུན་ལ་གནས། །ལྷོ་ཡི་ཕྱོགས་ནས་ཁམས་གསུམ་ཁྲམ་ལ་འདེབས། །ང་རྒྱལ་དབང་གིས་སྐུར་འགྱུར་དམར་ལ་གདང་། །དྲེགས་པ་ཅན་གྱི་ང་རྒྱལ་འཇོམས་མཛད་ཕྱིར། །རླུད་གིས་བསྐྱོད་ཅིང་མེ་ཡི་འཁོར་ལོས་བསྲེག །འབར་བའི་མཆེ་གཙིགས་དུག་གསུམ་ཞལ་དུ་རྡུག །རྨོངས་འཁྲུལ་དངོས་ལྟ་སྙིང་གི་ཁྲག་ཆེན་ལྡག །དབུ་སྐྲ་རལ་པའི་ཕོ་ཉ་མང་པོ་ཀུན། །གདུག་པའི་ཚུལ་གྱིས་དཀོན་མཆོག་དགྲ་ལ་གཏོང་། །སྐུ་ཡི་མེ་དཔུང་འབར་བས་སྣང་སྲིད་ཁ་དོག་གསལ། ཁྲངས་ནས་བསྐལ་པའི་རླུ་་ཚུབ་འཇིག་རྟེན་འཁྲུག །སྐྱེ་འགྲོའི་ཚེ་དང་སྲོག་པ་དབང་སྒྱུར་ཞིང་། །ཀུན་གཞི་གཏན་དུ་ཕུང་མཛད་ང་ལ་འདུད། །ཟད་པའི་དུས་ན་བསྐལ་པའི་མེ་ལྟར་འབར། །བགེགས་དཔུང་བསྲེག་པར་མཛད་ལ་ཕྱག་འཚལ་ལོ། །དགྲ་དཔུང་འཇོམས་པར་མཛད་ལ་ཕྱག་འཚལ་ལོ། །དངོས་གྲུབ་སྟེར་བར་མཛད་ལ་ཕྱག་འཚལ་ལོ། །དེ་ཡི་སྒྲུབ་ཐབས་དམ་པ་ཡང་སྙིང་འདི། །དབེན་ཞིང་ཉམས་དགའ་བཀྲ་ཤིས་ཡིད་འོང་དུ། ཁུབ་པའི་ཉི་མ་ཤིས་དང་གཟའ་སྐར་བཟང་། །དེ་འཇུག་ཕྱི་བཤགས་ནང་བཤགས་སྲོག་འདོན་བྱ། །བཟོ་བོ་མཁས་པ་སྤྱན་དྲང་སྤྱིན་མེད་ཚོན། །འཇམ་དཔལ་གཤིན་རྗེའི་སྐུ་བྲི་ཟིན་པ་དང་། །རབ་གནས་ཆོ་ག་རྒྱལ་སྐར་དག་ལ་བྱ། །མཆོད་པ་རྣམ་ལྔ་གཏོར་མ་ཕུན་སུམ་ཚོགས། །བདག་ཉིད་འདུག་ལ་བཟླས་པ་བརྩམ་པར་བྱ། །བསྙེན་པའི་སྙིང་པོ་ཨོ་དང་གྲྭཧྭའི་མཐར། །མ་རུ་ཙེ་ཏེ་པ་ན་པ་ཏ་ཡེ། །དགུ་པྲ་བཅུ་གཉིས་འཕྲེང་བར་ལྡན། །བདག་ཐུགས་ཡེ་ཤེས་སེམས་དཔའི་ཐུགས་ཁའི་ཧཱུཾ༷། །ཡི་གེ་བཅུ་གཉིས་སྔགས་ཀྱི་འཕྲེང་བས་བསྐོར། །འཕྲེང་བས་ལྷ་རྣམས་ཐུགས་དམ་བསྐུལ་ཞིང་མཆོད། །བསྡུས་པས་བདག་ཉིད་འཇམ་དཔལ་དམར་པོ་འགྲུབ། །དེ་འདྲའི་ཚུལ་གྱིས་དྲུག་འབུམ་གྲངས་ལ་བསྐྱལ། །བཟླས་པ་རྫོགས་དང་དངོས་གྲུབ་བླང་བར་བྱ། །དེ་ནི་བསྙེན་པ་བྱ་བའི་ལེའུ་སྟེ་གཉིས་པའོ།། །།དེ་ནས་སྔགས་པ་དཔའ་སེམས་ལྡན་པ་ཡིས། །གནམ་ལྕགས་མ་ལ་ཡ་ཡི་རྩེར་ཕྱིན་ལ། །མཎྜལ་ཁྲག་གིས་ཆག་ཆག་གདབ་པར་བྱ། །དེ་དབུས་བཞག་སྟེ་མདུན་དུ་བེ་ཤིང་ལ། །རྡོ་རྗེ་བེ་ཅོན་རྒྱལ་པོ་བྱས་ལ་གཞག །བཅུ་གཉིས་གསང་སྔགས་སུམ་འབུམ་གྲངས་ལ་བསྐྱལ། །བར་བར་སྐབས་སུ་བེ་ཅོན་དབང་བསྐུར་བསྔགས། །ཨོ་དང་ཕཊ་ཀྱིས་ཐོག་མ་རྟེན་བྱས་ལ། །བསྐུར་བའི་སྙིང་པོ་བེ་བ་ས་ཏ་ཡེ། །ཨ་མུ་ཁ༷་ཧཱུཾ༷་ཡ་མ་ཏེ་བཅུ་གཉིས་པ། །རྨེ་ཁྲག་དག་གིས་བྱུག་ཅིང་བརྒྱ་བརྒྱ་བཟླས། །བཟླས་པ་རྫོགས་དང་དངོས་གྲུབ་མཎྜལ་བསྡུ། །ཉེ་བའི་བསྙེན་པའི་ལེའུ་སྟེ་གསུམ་པའོ།། །།དེ་ནས་སྔགས་པ་དཔའ་སེམས་ལྡན་པ་ཡིས། །དུར་ཁྲོད་གནས་མལ་ལྷ་ཁང་སྙིང་པ་སྲ །སྔགས་པ་མདའ་འཕེན་ཟླ་བ་མར་ངོ་ལ། །གྲུབ་བའི་ཉི་མ་བདུད་ཀྱི་ཉི་མ་ལ། །འཇིག་རྟེན་ལྷ་འདྲེ་རྣམས་ལ་དཔང་བཙུགས་ཏེ། །དུར་ཁྲོད་ས་ལ་མཎྜལ་མདའ་གང་བྱ། །ཆག་གང་སྤངས་ཏེ་ཁྲག་གིས་དམར་པོ་བྱུག །བ་སུ་ཐིག་གདབ་འཁོར་ལོ་རྩིབས་བཞི་པ། །མཐའ་མ་རྡོ་རྗེ་ར་བས་བསྐོར་ཏེ་བྲི། །དབུས་སུ་གཏིང་བྲུས་ཝ་ཡི་ཐོད་པ་ལ། །ཨོ་དང་ཧཱུཾ༷་དང་ཛ་དང་མ་བྲིས་ལ། །ནང་དུ་རཀྟ་དུག་རྫས་མིང་རུས་གཞུག །ས་ཡིས་གཡོགས་ཏེ་གྲུ་གསུམ་ཟླ་གམ་གསུམ། །གྲུ་ཆད་མ་རྭ་ཛ་བྲི་ཤོད་རྡེའུ་སྐྲུང་། །ལྕགས་རི་སྒོ་དང་ལྡན་པ་བྲི་བར་བྱ། །དབུས་ཀྱི་ལྟེ་བ་མཐིང་ནག་གྲུ་གསུམ་དུ། །བདག་ཉིད་གཤིན་རྗེ་དམར་པོའི་ཕོ་བྲང་གདབ། །རྩིབས་བཞིའི་སྟེང་དུ་དམར་པོ་མཆེད་བཞི་སྒོམ། །རྩིབས་ཆེན་བཞི་ལ་བཛྲ་མ་བཞི་སྟེ། །གྲུ་ཆད་བཞི་ལ་བདུད་དང་གིང་རྣམས་སྒོམ། །དབུས་སུ་བསེ་ཕོར་མཚན་ལྡན་ནང་དུ་ནི། །མི་སྙིང་ཁྱི་ར་དམར་ཁྲའི་ཤ་དང་ཁྲག ཁྲར་དུ་བདུད་རྩི་བརྙ་ཤ་དངཁྲག །གཤིནརྗེའིསྲོག་ཟིན་རླབ་མཚོ་ཡིན་པར་སྒོམ། །ལྷོར་ནི་དུག་ཤིང་ཧོམ་སྟེ་ལྕགས་ཀྱི་སྤྱང་མོར་སྒོམ། །ནུབ་ཏུ་སྤྲུལ་པའི་ཁྲོ་བོ་སྐྲུངས་ཕུར་སྒོམ། །བྱང་དུ་དུག་གཏོར་རབས་ཆད་བརྙ་གང་། །དུག་གི་ཕུར་བ་ནག་པོ་ཨ་ནི་ཕཊ། ཁ་ཁ་ཧུ་ལུའི་རླུད་གཤོག་གཡས་གཡོན་གཉིས། །རྩང་གཉིས་ཁ་ལ་ལིང་ག་མགོ་ཐུར་བསྟན། །བྱང་ཤར་འབྲུབ་ཁུང་ཁྲུ་གང་ཐར་དུ་བརྐོ། །རྒྱ་མདུད་མེད་པའི་ཕུར་པ་ནག་པོ་བདུན། ཁྲུ་ལ་སྦུངས་ཏེ་ཧ་སྟེ་རྩེ་ལྔ་དང་། །གཤོག་རུས་དག་བཤོས་གསུམ་ཡང་རིམ་པ་བཞིན། །དཔལ་གཏོར་ལྷོ་ནུབ་གྲུ་ལ་ཤར་ལྷོར་མཉུ་ཤི། །ལྷོ་སྒོར་ཡ་མ་རྭ་ཇོའི་བྷ་ལིང་བཞག །བཟླས་པ་ཐུན་གསུམ་གཅད་དེ་བྱ་བ་ཡང་། །དང་པོའི་བཅུ་གཉིས་འབུམ་གཅིག་བཟླས་པ་བྱ། །དེ་ནས་བྱེ་བ་ཐིམ་པས་སྒྲུབ་པ་རྫོགས། །དེ་བར་དུག་གི་བསྙེན་པ་མཐར་ཕྱུང་ལ། །ལྷ་ལྔ་དབྲལ་ཞིང་དགུག་པ་དྲག་ཏུ་བྱ། །ཁུགས་པར་གྱུར་དང་དྲག་པོའི་འཕྲིན་ལས་བརྩམ། །མི་སྨྲ་རོ་ཚས་རས་བླང་ཁྲག་ཏུ་སྤང་། །དུག་སྦྱར་ཁུ་བས་བཀྲ་ཞིང་མདངས་ཕྱུང་ལ། །ཕུར་བཞིའི་ཁ་ལ་བརྒྱངས་ཏེ་བསྐམ་པར་བྱ། །མ་ཏོལ་དུམ་བུ་ཐང་ཁྲོམ་ཁ་ཐོག་དང་། །དུག་རྣམས་རང་གི་སྲིན་ལག་ཁྲག་སྦྱར་ནས། །གནག་ཙ་སྦྱར་ཏེ་བྱ་རོག་འུག་པའི་སྒྲོས། །འཁོར་ལོ་རིམ་པ་གསུམ་དང་ལྡན་པར་བྲི། །དབུས་སུ་གྲུ་གསུམ་བསྣོལ་ཏེ་བཞི་པ་ལ། །ཨོ་མ་རུ་ཙེ་ཞེས་བྲི་བར་བྱ། །རྩེ་མཚན་བཞི་པ་ཏ་ཡེ་གྲྭཧྭ་ཞེས། །བྲིས་བས་ཡི་གེ་བཅུ་གཉིས་དགོད་པ་ཟིན། །རིམ་པ་གསུམ་པ་རྩིབས་བརྒྱད་ལ། །ཨོསམཡམཉུཤིམུཏྲ། ཡམན་ཏ་ཀ །ཨ་ཀྲོ་ཏེ་ཀ །ཀྭ་ལ་རུ་པ། བཛྲ་ཏ་ཀྲོ་ཏ་ཀ །དགྲ་བོའི་ཅིསྟི་ལ་རྦད། ཐུ༷་རི་ལི་ལི་སྨྱོ། ས་སྟོང་རིང་དང་རུས་བཅུག་ལ། །དབང་ལ་འགུགས་པའི་ཛ་ཞེས་བྲི། །དེ་ནས་ཝ་ཐོད་ཡར་ཕྱུང་གྲུ་གསུམ་སྦག །འཁོར་ལོའི་སྟེང་དུ་ཝ་ཐོད་གཞག་པར་བྱ། །སྙིང་པོ་བོད་རྦད་གསད་དེ་ལས་སྔགས་བཟླས། །ཡི་གེ་བཅུ་གཉིས་བོད་པའི་སྙིག་པོ་ཡིན། །སུམ་ཅུ་སོ་བཞི་གསད་པའི་ལས་སྔགས་སོ། །འདི་ནི་སྒྲོལ་གིང་རྟག་ཏུ་རྦད་པའི་སྔགས། །སྟོང་སྟོང་ཉིན་མཚན་གུང་ལ་བཟླས་པར་བྱ། །གཏུམ་པོ་ཡ༷་ཡ༷།སྒྲོལ་གིང་ཡ༷། མ་རུ་ཙེ་ལས་ལ་ཡ༷་ཡ༷། ཙ་ལ་ཧུར། དབུགས་ལ་ཐུམ། སྲོག་ལ་ཡ། དུ་ན་ཛ། དུ་ལིང་། ཀྲིད་དེ་ཀྲད་དེ། ཛ་ཛ། བར་བར་དབང་གཟུགས་ཆོ་ངེས་་གདབ། ཁེས་པའི་ཕོ་ཉས་མངག་ཅིག་དགུག །གཟུགས་དང་ལིང་ག་ཉིད་ལ་གདབ། །འབྲུབ་ཁུང་དུ་ནི་བརྡེག་པའི་སྔགས། །ཨོ་ཏྲི་ལིང་ཤན་ཏྲི་དུ། དྲི་ཟ་ཡསྒ །རྦད་བུ་ཕྱེ་མ་ཁ་དྷར། རུ་རུ་པྲ་པྲ་དུ༷་དུ༷་ཤིག་ཤིག །དགྲ་བོ་མྱ་ར་ཡ། ར་བསྒྲལ་གཡང་གཞི་མགོ་ལྤགས་བཤུས། །མིང་རུས་ཙིསྟ་པགས་པའི་སྟེང་། །གྲ་སོ་ཕུར་པ་བེ་ཅོན་ལ། །སྔགས་འདི་བཟླས་ལ་བརྡེག་པར་དབུལ། །རྣལ་མ་རྣལ་ཏེ་གསོད་ལ་རྔམ། གཤོས་ལ་མེར། པྲིས་ལ་ཆུ༷། ཐུ་བིས་ཐུ། ལྕགས་ཀྱི་སྒྲ།དགྲ་བོ་ནི་མྱ་ར་ཡ། དེ་ནས་ལིང་ག་ཚོ་གསུམ་དུ། གཅིག་ནི་ལྷོའི་ལྷ་མོ་ལ་བསྲེག ཁྲར་གྱི་དམ་རྫས་མཆོད་པར་དབུལ། །ཏྲག་རསྒ་རུ་ལུ་རུ་ལུ་སྨྱོ། རག་མོ་ཏེ་ཀུ་མ་ཛ་ཛ། རག་མོ་ཙ་ཙ་ཁ་ལ་མ་ཧི་སྨྱོ། མ་རུ་ལུ་རུ་ལུ་འཁོར་ལོ་ཟླ་གམ་ལ། །པ་ཤང་ཀུ་རུ་ཐམས་ཅད་དབང་དུ་འགྱུར། །མྱ་ར་ཡ་སྟེ་གོང་ནས་འབྱུང་བ་བཞིན། །སེར་བ་དབབ་ན་ཀེ་ཏ་བཟླས། །གཅད་པར་འདོད་ན་ཧཱུཾ༷་ཕཊ་བཟླས། །ནད་པ་གསོ་ན་མེ་དཔུང་འབར་བ་སྒོམ། །དེ་ཡིས་གསང་སྔགས་བཟླས་ཏེ་བསྲུང་བར་བྱ། །ལྟས་ངན་ཆོ་འཕྲུལ་གཏོང་བར་བྱ་བ་ཡང་། །མོན་མོ་ཁ་ཀྲའི་ཡང་སྙིང་གདགས་ཤིང་གདབ། །མི་རྒོད་བཅིང་ན་པ་ཤ་མའི་མོ་སྔགས། །རེངས་པར་བྱ་ན་བདུད་དཔུང་ནག་པོའི་སྔགས། །རྫས་དང་མན་ངག་ཅན་གྱིས་མཚམས་སུ་སྦྱར། །ལས་རྣམ་པར་ཆེ་བའི་ལེའུ་སྟེ་དྲུག་པའོ།། །།གཤིན་རྗེ་དམར་པོའི་དཔེ་བྱད། ལས་ཀྱི་ཐོ་རྩ་བ་དམར་པོ། རོ་ལངས་བདེ་བས་ཡི་གེར་བཀོད། འཕགས་པ་འཇམ་དཔལ་གཤིན་རྗེའི་རྒྱལ་པོ་མ་རུ་ཅེའི་ཐུགས་རྒྱུད་རྫོགས་སོ།། །།