Ngb-pt-0668-vol-07-text
Front
Body
རྒྱ་གར་སྐད་དུ། བཛྲ་ནི་རྟི་མ་ར་ན་ཤ་ཏྲ༷་པ༷་ཧོ་ཀུ་པེ་ར་ལོ་ཧི་ག་ཏན་ཏྲ། བོད་སྐད་དུ། རྡོ་རྗེ་སྲིན་པོ་བསེ་ཡི་སྐྱེས་བུ་གནོད་སྤྱིན་དམར་པོའི་རྒྱུད། བཅོམ་ལྡན་འདས་ཕྱག་ན་རྡོ་རྗེ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། རི་རབ་རྩུབ་འགྱུར་གྱི་ཚལ། གནོད་སྤྱིན་གདོང་། སྲིན་པོ་མེ་ལྟར་འབར་བའི་ཁང་པ། རོ་མང་པོ་ཡོད་པ། རུལ་ཁྲོ་ཞིང་གདུག་པ་ཅན་རྒྱུ་བ། སྟེང་དང་འོག་འཁོར་ལོ་དང་། པདྨ་ལ་བྱས་པའི་བར་ན། བསྟོ་འབར་བའི་གཞལ་ཡས་ཁང་ན་ཁྲག་དང་ཞག་གི་འབབ་ཆུ་འབབ་ཅིང་། རྦ་ཀློང་འཁྱིལ་བའི་དུར་ཁྲོད་ཆེན་པོའི་གནས་དེ་ན། བཅོམ་ལྡན་འདས་རིག་སྔགས་དང་གསང་སྔགས་ཀྱི་བདག་པོ། དཔལ་ཕྱག་ན་རྡོ་རྗེ་ག་་པོ་ཆེན་པོ་སྐུ་ལ་བསྐལ་པའི་མེ་ལྟར་འབར་བ། མཐུ་སྟོབས་ཆེ་བ། བདུད་ཐམས་ཅད་འདུལ་བ། དཔའ་བ། འཇིག་རྟེན་གསུམ་ལས་རྣམ་པར་རྒྱལ་བ། འཇིགས་སུ་རུང་བ། འོད་དཔག་ཏུ་མེད་པ། གཟི་བརྗིད་ཆེ་བ། ལས་ཀྱི་ལྷ་ཁྲོ་བོ་ཆེན་པོའི་ཆ་བྱད་དུ་བཞུགས་སོ། །དེའི་འཁོར་ནི་རྡོ་རྗེ་ལས་དང་། གཤིན་རྗེ་དང་། སྲིན་པོ་དང་། ཤ་ཟ་དང་། མ་མོ་དང་། ལྷ་དང་། མི་དང་། ལྷ་མ་ཡིན་དང་།སྐྱེས་བུ་ཆེན་པོ་དང་། དར་མ་དང་། མཁའ་འགྲོ་དང་། གིང་དང་། བྱད་མ་དང་། ནད་གཏོར་མ་དང་། གནོད་སྦྱིན་ཕོ་མོ་དང་། མཁའ་ལྡིང་དང་། དྲི་ཟ་དང་། མིའམ་ཅི་དང་། ཤ་ཟ་དང་། གདུག་པ་ཅན་མང་པོ་བསམ་གྱིས་མི་ཁྱབ་པ་མང་པོས་བསྐོར་ཏེ་བཞུགས་སོ། །དེའི་ཚེ་དེའི་དུས་ན་འདུས་པའི་འཁོར་དེ་དག་གི་ནང་ནས་རྡོ་རྗེ་ལས་སྟན་ལས་ལངས་ཏེ། བླ་གོས་ཕྲག་པ་ལ་གཟར་ནས་བསྐོར་བ་ལན་བདུན་བྱས་ནས། ལྷའི་མེ་ཏོག་མན་དྷ་བ་ར་མང་པོ་དང་། རྒྱན་དང་ལོངས་སྤྱོད་བསམ་གྱི་ཁྱབ་པ་མང་པོས་མཆོད་ནས། མཐུ་སྟོབས་ཀྱི་བདག་པོ་ལ་འདི་སྐད་ཅེས་གསོལ་བ་བཏབ་བོ། །ཀྱེ་ཀྱེ་གསང་མཆོག་རྡོ་རྗེ་འཛིན། །བཅོམ་ལྡན་མགོན་པོ་གསང་བའི་བདག །སྟོབས་པོ་ཆེ་ལ་དྲག་ཤུལ་ཆེ། །ཐུགས་རྗེ་ཆེ་ལ་ཐབས་མཁས་ཁྱོད། །མ་འོངས་སེམས་ཅན་སྐལ་ལྡན་གྱིས། །རྡོ་རྗེ་སྲིན་པོ་སྒྲུབ་པའི་ཐབས། །དེང་འདིར་སྟོན་པས་གནང་བར་མཛོད། །དེ་སྐད་གསོལ་པ་དང་། མཐུ་སྟོབས་ཀྱི་བདག་པོ་གདན་ལ་བཞེངས་ཏེ། རྡོ་རྗེ་ལས་ལ་འདི་སྐད་ཅེས་བཀའ་སྩལ་ཏོ། །ཀྱེ་མ་ཧོ་མ་འོངས་སེམས་ཅན་རྣམས། །རྡོ་རྗེ་སྲིན་པོ་སྒྲུབ་བའི་ཐབས། །བདག་གཞན་དོན་ལ་ཐོགས་མེད་པ། །ངས་བཤད་ཁྱེད་ཀྱིས་ཡིད་ལ་ཟུང་། །ཞེས་བཀའ་སྩལ་པ་དང་། འཁོར་དེ་དག་ཤིན་ཏུ་དགའ་བ་སྐྱེས་ཏེ། ཡང་མཆོད་པ་རྒྱ་ཆེན་པོས་མཆོད་དེ། །མཐུ་སྟོབས་ཀྱི་བདག་པོ་ལ། རྡོ་རྗེ་ལས་ཀྱིས་འདི་སྐད་ཅེས་གསོལ་ཏོ། །རིག་སྔགས་རྒྱལ་པོ་དགེ་བ་ཅན། །གདུལ་དཀའ་མཐའ་དག་འདུལ་བ་པོ། །དེ་ལྟར་འདོད་ཁམས་འདི་ཉིད་ན། །རྡོ་རྗེ་སྲིན་པོ་དྲེགས་པ་ཅན། །ལུས་ཀྱང་ཁྲོ་ལ་ངག་ཀྱང་ག་། །གདུག་པའི་སེམས་ཅན་ཕུང་བ་ཅན། །མདོག་དམར་སྲོག་ལ་རབ་ཏུ་དགའ། ཁྲ་ཁྲག་དམར་ལ་རབ་ཏུ་དང་། །མཐུ་ཆེན་མ་མོ་འཁོལ་བ་འདི། །དང་པོའི་རྒྱུ་ནི་ཇི་ལྟར་བུ། །འདི་དག་འདུལ་བའི་ཐབས་ནི་གང་། །དཔའ་བོ་ཆེན་པོས་བཀའ་སྩོལ་བདག་ཉན་འཚལ། །དེ་སྐད་ཅེས་གསོལ་པ་དང་། མཐུ་སྟོབས་ཀྱི་བདག་པོས་བཀའ་སྩལ་པ། རྡོ་རྗེ་ལས་ལ་སོགས་པའི་འཁོར་འདུས་པ་ཁྱེད་རྣམས་ཀྱིས་རྡོ་རྗེ་སྲིན་པོའི་རྒྱུད་ཞུ་བ་ཞུས་པ་ལེགས་སོ། །ཁྱེད་ཀྱིས་ཡིད་ལ་ཟུང་ཞིག །ངས་རྣམ་པར་ཕྱེ་བ་བཤད་པར་བྱའོ། །སྔོན་འདོད་པའི་ཁམས་འདི་ན་སྨད་འཚོང་མ་ཅིག་ལ་བུ་གཅིག་སྐྱེས་སོ། །བུའི་ཐོག་ལ་མ་ཤི་བར་གྱུར་ཏོ། །རོ་དེ་དུར་ཁྲོད་ཨུདྨལ་ལར་སྐྱེལ་ལོ། །བུ་ཡང་གསོ་བ་མེད་དེ་དེར་བསྐྱལ་བ་ལ། བུས་མའི་ནུ་ཞོ་ཁྲག་ཏུ་འཇིབས་སོ། །ཁྲག་ཟད་ནས་ཤ་ཟོས། དེ་ནས་རྣམ་པར་ཤེས་པ་རངས་གྱུར་ཏེ། དུར་ཁྲོད་དེར་བྱུང་བའི་རོ་རངས་ཟོས་པ་ལས། ལྷ་དང་ལྷ་མ་ཡིན་གཉིས་གཡུལ་འགྱེད་པའི་སར། ལྷ་མ་ཡིན་གྱི་རྒྱལ་པོ་ཧེ་ར་ན་ཀེའུ་ཤུ་བྱ་བ་གཡུལ་དུ་བསད་པའི་རོ་ཡང་ཟོས། །དེའི་ལག་ཆ་མདུང་རྩེ་གསུམ་པ་དང་། བསེའི་མདའ་གཞུ་ཁོའི་ལག་ཆ་བྱས་ཏེ། མི་ཤ་ནི་ཟོས། མི་ཁྲག་ནི་འཐུངས། མི་ལྤགས་ནི་གོན་ཏེ་དངོས་སུ་སྲིན་པོར་སྐྱེས་སོ། ཁྲ་ཆེན་ཟོས་པའི་ནུས་མཐུས་ནམ་མཁའ་ལ་ཕུར་བ་དང་། ས་གཞི་འོད་ཀྱིས་འགེངས་པའི་ནུས་མཐུ་དང་བྱིན་རླབས་ཆེར་བྱུང་། ལག་ཆ་ཁ་ཊ༷་ཁ་ཐོགས་ཤིང་། ར་ཧ་ལེ་ར་ཧ་ལེ་ཟེར་ཞིང་ལས་སུ་སྲོགགཅོད། དུར་ཁྲོད་ན་གནས་པའི་མ་མོ་དང་མཁའ་འགྲོ་མ་ཐམས་ཅད་དབང་དུ་བསྡུས། སྲོག་གི་སྙིང་པོ།རོ་ཏ་མ་ཏསྨ་རར་ཏ་མ་མ་རསྒ་རུ་ལུ་རུ་སྨྱོ། ཞེས་བྱ་བ་རང་རང་གི་སྙིང་པོ་ཕུལ། གདུག་པ་ཅན་ཕོ་རིགས་ཐམས་ཅད་དབང་དུ་བསྡུས། སོ་སོར་སྲོག་གི་སྙིང་པོ་ཕུལ་ཞིང་དབང་དུ་བསྡུས། འཇིག་རྟེན་པ་ཐམས་ཅད་གཏནབྲན་དུ་བྱས་ཏེ། སྐྱེ་བརྣམ་བཞིའི་སེམས་ཅན་ཡེ་ཟད་པ་ལས། བྱང་ཕྱོགས་ཀྱི་རི་མལ་ཡའི་རྩེར་ཕྱིན་ཏེ་ཁམས་གསུམ་བྱར་བྱས་སོ། །གནོད་སྤྱིན་ཐམས་ཅད་དམག་ལ་བསྡུས་པ་ལས་ཀུན་འདུས་པར་འགྱུར་པདང་། གནོད་སྤྱིན་གྱི་དམག་དཔོན་བྱས་ཏེ། འཁོར་དུ་མ་དངལྡན་པས་ཉིན་བཞིན་དུ་ནི་སྲིད་པ་གསུམ་གྱི་དབུགས་ལེན། མཚན་བཞིན་དུ་དེ་ན་འདུས་ཤིང་གདུག་པའི་ང་རོ་ཧ་ཧུ་ཧ་ཧུ་དང་། ཀང་ཀེང་ཀེང་ཀེང་དང་། མ་མ་རསྒ་དང་། རུ་རུ་རོ་རུ་དང་། རུ་ལུ་རུ་ལུ་དང་། སྨྱོ་སྨྱོ་དང་། ཧ་ལ་ཧ་ལ་དང་། ར་ཧ་ལེ་ལ་སོགས་པའི་སྒྲ་སྒྲོགས་ཤིང་། ཤ་ཟ་ཁྲག་འཐུང་བ་ལས། ཁམས་གསུམ་གྱི་སེམས་ཅན་ཐམས་ཅད་མཐོང་བ་ཙམ་གྱིས་བརྒྱལ་པ་དང་། སྲོག་དངབྲལ་བ་དང་། དངངས་པ་ལས། རྒྱལ་བ་རིགས་སྔའི་སྤྱན་གྱིས་མ་བཟོད་ནས་བཀའ་བགྲོས་པ་ལས། ཐུགས་རྗེའི་བདག་པོ་དཔལ་ཧེ་རུ་ཀས་དེ་གདུལ་བར་དགོངས་ནས། འབར་བའི་ལག་ཆ་ཁ་ཊ༷་ཁ་ཅིག་བརྒྱབ་པ་ལས། མྱོས་ཤིང་བརྒྱལ་བར་གྱུར་ཏོ། །དེ་བསྒྲལ་བར་དགོངས་པ་ལས། རྡོ་རྗེ་སྲིན་པོ་དེ་མ་ཐག་ཏུ་སླར་དྲན་པ་རྙེད་པར་གྱུར་ཏེ་ཞུས་པ་ལས། དུས་གསུམ་རྒྱལ་བའི་གདུང་སྟེ་ཐུགས་ཀྱི་ཐུགས། །དབྱིངས་ལས་འགྱུར་བ་མེད་པ་མཐིང་བའི་སྐུ། །དྲེགས་པ་འདུལ་མཛད་ཁ་ཊ༷་མཚོན་ཆ་བསྣམས། །ཚད་མེད་བཞི་ལྡན་ཁྲོ་རྒྱལ་ཧེ་རུ་ཀ །ཐུགས་རྗེའི་བདག་པོ་དམ་ཚིག་ཆེན་པོ་ལ། །བདག་ཅག་འཁོར་བཅས་དུས་གསུམ་སྲོག་སྙིང་འབུལ། །ཡ་མ་རྭ་ཛ་ནི་ར་ཏི་ནི་ཧྲོ་ཏ་ནི། རྭ་ཛ་ཏྲི་ཏྲི། རོ་ཏ་མ་ཏ་སྨ་ར་ར་ཏ། རུ་ལུ་རུ་ལུ་མང་བ་རི་མེས་མེས། འདི་འདུལ་ཁྲོ་རྒྱལ་ཐུགས་མཆོག་ཧེ་རུ་ཀ །སྐུ་ཡི་ཚམ་རྔམ་སླར་ལ་བཏུལ་པ་དང་། །ཐུགས་རྗེ་ཆེན་པོས་བདག་ལ་དབང་བསྐུར་ཞིང་། །ལས་དང་བྱ་བ་བཀའ་ཉན་བརྐོ་རུ་གསོལ། །ཅེས་གསོལ་པ་དང་། དཔལ་ཧེ་རུ་ཀ་ཐུགས་རྗེ་ཆེ་ལ་ཐབས་མཁས་པ་དེས། །དེ་མ་ཐག་ཏུ་དགོངས་པ་སེམས་ཅན་ཐམས་ཅད་དབུགས་དབྱུང་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བཀའ་སྩལ་པ། འདུས་ཤིང་འཁོར་དང་བཅས་པ་རྣམས། །སྣང་སྲིད་ཐམས་ཅད་མཉམ་པ་ཆེན་པོའི་ངང་། །སྤྱོད་པ་ཐམས་ཅད་ཀུན་བཟང་རོལ་པ་ལས། །དེ་ལྟར་མ་ཤེས་གཟུང་འཛིན་དབང་གིས་འཁོར། །སྲོག་གཅད་སྡུག་བསྔལ་འདི་དང་མ་བྲལ་བས། །སྡུག་བསྔལ་རྒྱ་མཚོའི་མཐའ་ལས་ཐར་པ་མེད། །དེ་བས་གསང་བའི་དོན་ལ་ཞུགས་པ་ལེགས། །ང་ཡིས་བསྐུར་གྱིས་དམ་ཚིག་འདའ་མ་བྱེད། །ཅེས་གསུངས་ཏེ། མ་ཧྭ་རཀྟ་མཎྜལ་ཅེས། ཁྲག་གི་རྒྱ་མཚོ་མཐའ་དང་དབུས་མེད་པའི་སྟེངས། རིན་པོ་ཆེ་གསེར་གྱི་གུར་གྱི་ནང་དུ་དུར་ཁྲོད་ཀྱི་བདག་པོ་མ་ཏང་ཀ་རུ་ཏྲ་དེ་བཞག་སྟེ། དམ་ལས་འགྱུར་གྱི་དགོས་པའི་ཕྱིར། དབུལ་གསེར་གྱི་མཆོད་རྟེན་བཞག །ཡེ་ཤེས་ལྔར་དུག་ལྔ་བསྒྱུར་བའི་ཕྱིར། དབུ་ལ་རིགས་ལྔའི་སངས་རྒྱས་དབང་བསྐུར། ལུས་ངག་ཡིད་གསུམ་བསྒྱུར་བའི་ཕྱིར། སྐུ་གསུང་ཐུགས་ལ་རྡོ་རྗེ་རྣམ་པ་གསུམ་གྱིས་དབང་བསྐུར། ཁམས་གསུམ་གྱི་སྒྲོལ་གིང་བུད་མ་བཅས་ནས། རྟགས་ཀྱི་ཕྱག་རྒྱ་སྤུ་གྲི་འབར་བ་བྱིན། གདུག་པ་ཅན་དབང་དུ་བསྡུ་བའི་ཕྱིར། བསེ་ཡི་སྐྱེས་བུ་བཞི་འཁོར་དུ་གཏད་ནས་དབང་བསྐུར། རུ་དྲ་སྡེ་གསུམ་བསྒྲལ་བའི་ཕྱིར། གིང་ཆེན་བཅོ་བརྒྱད་འཁོར་དུ་གཏད་པའི་དབང་བསྐུར། །སྣང་སྲིད་དབང་དུ་བསྡུ་བའི་ཕྱིར། མཁའ་འགྲོ་འབུམ་འཁོར་དུ་གཏད་ཅིང་དབང་བསྐུར། སྲིད་པ་གསུམ་དུ་ལས་ལེགས་ཉེས་ལྟངས་འབྱེད་ཅིང་དམ་ཚིག་རྗེས་བཅད་པའི་ཕྱིར། མ་མོ་འབུམ་གྱི་དབང་བསྐུར་ཞིང་། མ་མོ་དང་མཁའ་འགྲོ་མ་ཀུན་གྱི་གཙོ་བོར་མངའ་གསོལ་ལོ། །དེའི་ཚེ་ན་འཇིག་རྟེན་འདི་རྣམ་པ་དྲུག་ཏུ་གཡོས་སོ། །དཔལ་ཧེ་རུ་ཀས་རྡོ་རྗེ་སྲིད་པོའི་མིང་ཡང་ཡབ་ཀྱིས་སྐུ་མཆོག་མོར་ཞེས་བྱ་བར་བཏགས་ཏེ། དཀོན་མཆོག་བསྟན་པ་བསྲུང་པར་ལས་གཉེར་གཏད་དོ། །དེའི་ཚེ་རྡོ་རྗེ་སྲིན་པོས་རང་སྲོག་གི་སྙིང་པོ་ཕུལ་བ། ནི་ཏོ་ཏ་ནི། ནི་ཏོ་ཏ་ནི། ཧུ་རུ་ཧུ་རུ་ཧཱུཾ༷་ཕཊ། ཅེས་ཕུལ་བས། དཀོན་མཆོག་གི་བསྟན་པ་བསྲུང་ཞིང་རྣལ་འབྱོར་པའི་ལས་བྱ་བར་ཁས་བླངས་དམ་དུ་བཅས་སོ། །དེའི་ཚེ་རྡོ་རྗེ་ལས་ཀྱིས་གསོལ་པ། ཀྱེ་ཀྱེ་བཅོམ་ལྡན་མཐུ་སྟོབས་བདག །རྡོ་རྗེ་སྲིན་པོ་དྲེགས་པ་ཅན། །ཁྲོ་ཞིང་ག་་པའི་ང་རོ་ཅན། །ལས་ཀུན་རྣམ་པར་འབྱེད་པ་འདི། །དུས་གསུམ་དག་ཏུ་བྱུང་ངམ་ད་ལྟ་གནས། །དཔའ་བོ་ཆེན་པོས་བཀའ་སྩོལ་བདག་ཉན་འཚལ། །དེ་སྐད་ཅེས་གསོལ་པ་དང་། དཔལ་ཕྱག་ན་རྡོ་རྗེས་བཀའ་སྩལ་པ། རྡོ་རྗེ་ལས་ཉོན་ཅིག །ད་ལྟར་གྱི་རྡོ་རྗེ་སྲིན་པོ་འདི་ནི། སྔོན་སངས་རྒྱས་མར་མེ་མཛད་ཀྱི་བསྟན་པ་ལ་འཕགས་པ་འཇམ་དཔལ་གྱི་སྤྱན་ལམ་དུ། སངས་རྒྱས་ཀྱི་བསྟན་པ་བསྲུང་བར་ཞལ་གྱིས་མཆེས་ཞིང་། འཇིག་རྟེན་གྱི་ཁམས་སུ་རྒྱུ་བའི་དུས་སུ་གཤིན་རྗེ་དམར་པོ་སྲོག་གི་བདག་པོ་བྱ་བར་གྲགས་ཏེ། དུས་དེར་ཡང་སྲོག་མང་པོ་གཅད་པ་དང་། འཁོར་མང་པོ་བསྡུས་ཤིང་དབང་བྱས་པས། དྲེགས་པ་ཅན་དུ་གྱུར་པ་ཡིན་པ་ལས། འཕགས་པ་འཇམ་དཔལ་གྱིས་དབང་དུ་བསྡུས་ཤིང་ལས་ཀྱི་ལྷར་དབང་བསྐུར་བ་ཡིན་ནོ། །ཕྱིས་བསྟན་པ་བསྲུང་བར་དམ་བཅས་སོ། །དུས་འདི་ནི་ཤཱཀྱ་ཐུབ་པའི་དུས་ཏེ། སྔོན་དམ་བཅས་པ་དང་སྲོག་དབུགས་ལ་དབང་བྱས་པའི་དབང་གིས། ད་ལྟ་རྡོ་རྗེ་སྲིན་པོར་སྐྱེས་ཏེ།དེ་ཡང་ཁམས་གསུམ་དུ་སྦྱོར་སྒྲོལ་བྱེད་པ་འདི་ཡང་། སྔོན་དེ་བཞིན་དུ་བསྐོས་པ་ལས་ཀྱི་འཕྲོ་བླངས་པའོ། །ཕྱིས་རྒྱལ་བ་བྱམས་པའི་བསྟན་པ་ཡང་། རོལ་པ་ཆེན་པོའི་སྲོག་གི་རྒྱལ་བ་བྱ་བར་སྤྲུལ་ཏེ་འགྲོ་བའི་དོན་བྱེད་དོ། །རྡོ་རྗེ་སྲིན་པོའི་རྒྱུད་ལས། གླེང་གཞིའི་ལེའུ་སྟེ་དང་པའོ།། །།དེ་ནས་དཔལ་ཕྱག་ན་རྡོ་རྗེ་ལ། རྡོ་རྗེ་ལས་ཀྱིས་འདི་སྐད་ཅེས་གསོལ་ཏོ། །ཧཱུཾ༷་མཛད་ཧཱུཾ༷་སྟེ་ཙཎྜརོ་ཥ་ན། མི་མཐུན་འཇོམས་པའི་ཐུགས་རྗེ་དྲག་ཤུལ་ཅན། །རྡོ་རྗེ་སྲིན་པོ་ཞེས་བྱ་བའི། །གནས་དང་དཀྱིལ་འཁོར་སྐུ་རྟེན་དང་། །རྫས་དང་ཏང་འཛིན་གསང་སྔགས་དང་། །དམ་ཚིག་ཕྱག་རྒྱ་རྟགས་དག་དང་། །ལས་ཀྱི་རིམ་པ་བདག་ཉན་འཚལ། །ཅེས་གསོལ་པ་དང་། ཕྱག་ན་རྡོ་རྗེས་བཀའ་སྩལ་པ། །རྡོ་རྗེ་སྲིན་པོ་ཞེས་བྱ་བ། །འདི་སྒྲུབ་རྣལ་འབྱོར་ཕྱི་རབས་པས། །རྟག་ཏུ་དམ་ཚིག་ལ་གནས་པར། །དད་དང་སྙིང་རྗེ་ཆེར་བྱས་ཏེ། །བདག་ཉིད་ཕུན་སུམ་ཚོགས་བྱས་ཏེ། །བྲག་དམར་སྟམས་པའི་དཀྱིལ་དག་ཏུ། །བསྙེན་པ་བྱས་ཤིང་སྡིག་པ་བཤགས། །རི་བོ་འདུས་པའི་རྩེར་ཕྱིན་ལ། །ཉེ་བསྙེན་ཐེ་ཚོམ་མེད་པར་སྒྲུབས། །དུར་ཁྲོད་ཆེན་པོའི་དབུས་ཕྱིན་ལ། །ལམ་ལ་སྒྲུབ་པ་གང་འདོད་སྦྱར། །གནས་གསུམ་གང་ཡང་རུང་བ་དེར། །རྣལ་འབྱོར་དབང་ཕྱུག་ཆེན་པོ་དེ། །ས་ཆོག་བྱས་ཏེ་ཚ་མེས་ཅན་གཅད་ནས། །དུར་ཁྲོད་ཕྱོགས་ནས་ས་བཙལ་ལ། །དཀྱིལ་འཁོར་རུ་དྲའི་མདའ་གང་ལ། །དཔངས་སུ་ཆག་གང་ཡོད་པར་བྱ། །རྩེ་མོ་ལྷོ་རུ་བསྟན་པ་ཡི། །བྱི་དོར་ལེགས་པར་བརྩེགས་པ་དང་། །བ་སུ་ཏ་ཡི་སྲད་པུ་ཡི། ཁུ་གསུམ་བར་ཁྱམས་གསུམ་དང་ལྡན། །དབུས་སུ་དམར་ལ་ནི་ལྗང་བྲི། །དེ་ཕྱིར་རྡོ་རྗེ་ལེགས་པ་དྲུག །སེར་ལ་ཐལ་ཆེན་དག་གིས་ཕྲི། །དེ་དམར་དག་ལ་ཧཱུཾ༷་ཏྲི་འབར། །སྒྲུབ་བྱའི་མིང་རུས་བར་དུ་གཞུག །བཅོ་བརྒྱད་གྲུ་གསུམ་དགོད་པར་བྱ། །དེ་ཕྱིར་གནག་ལ་བྲི་བ་ནི། །མཁའ་འགྲོ་རྩ་བའི་ཡི་གེའམ། །མ་དང་སྨྱོ་ཡིས་བསྐོར་ཏེ་བྲི། །བྱང་ཤར་དགུག་པའི་མཎྜལ་ཏེ། ཁུ་གསུམ་མངལ་ཁྲག་དམར་པོར་བྱུག །པདྨའི་སྟེང་དུ་བྱ་བར་བཤད། །དབུས་ཀྱི་ཟུར་ལས་མཚན་པ་ནི། །ལྕགས་ཀྱུ་ཞགས་པས་འདེབས་པར་བྲི། །ནུབ་དང་དབྱེ་བའི་མཎྜལ་ཏེ། །འཁོར་ལོ་རྩིབས་བཞི་ཁྲག་གིས་བྱུག །དབུས་ཀྱི་ཟུར་ལ་མཚན་པ་ནི། ཁ་ཁ་ཧུ་ལུའི་གཟུགས་གཉིས་བྲི། །ལྷོ་རུ་གསད་པའི་མཎྜལ་ཏེ། ཁུ་གསུམ་ནག་པོ་རྩང་གིས་བསྐོར། །དབུས་ཀྱི་ཟུར་ལས་མཚན་པ་ནི། ཁ་ཊ༷་མདའ་གཞུ་བརྒྱན་པ་བྲི། །རྡོ་རྗེ་སྲིན་པོའི་རྒྱུད་ལས། གནས་ཀྱི་དཀྱིལ་འཁོར་གྱི་ལེའུ་སྟེ་གཉིས་པའོ།། །།དེ་ནས་ཡང་དག་བཤད་བྱ་སྟེ། །དཀྱིལ་འཁོར་ཆེན་པོའི་དེ་དབུས་སུ། །སྔགས་པ་རུ་དྲ་དངོས་འབྱུང་བའི། །གཡས་པའི་ལག་ཏུ་དུག་བླུག་ལ། །སྐུ་མཆོག་ཇི་བཞིན་བསམ་ལ་དགོད། །ལྕགས་ཕུར་བཅོ་བརྒྱད་དུག་བླུག་ལ། །སྒྲོལ་གིང་བཅོ་བརྒྱད་བསྒོམས་ཏེ་དགོད། །དུག་ཤིང་རྩ་དམར་རྩ་གཅིག་ནི། །མ་མོ་མཁའ་འགྲོར་བསྒོམས་ཏེ་དགོད། །དངོས་གཞི་ལྔ་ལས་གཞི་བླངས་པའི། །འབྱོར་པའི་རྫས་ལ་གཏོར་མ་བྱ། །སྤྲིན་ཆེན་དག་གི་ཞལ་ཁབ་ཅན། །དཔལ་ཆེན་ཚོགས་ལ་དྲངས་བར་བྱ། །ས་བདག་རྒྱལ་པོའི་ཅིསྟི་དང་། །ཕོ་སྙིང་རྣམ་པ་སྣ་ཚོགས་དང་། །རྣེར་དྲི་མོ་ཡི་ནུ་མ་དང་། ཁྲ་ཁྲག་རུས་པའི་འབྱོར་ཚོགས་ལ། །ཆང་གིས་སྦྱར་བའི་གཏོར་མ་ལ། །ཞིང་ལྤགས་དག་གི་ཞལ་ཁབ་ཅན། །དབུས་ཀྱི་ལྷ་ཟུར་དྲང་པོ་ལ། །སྐུ་མདོག་དམར་ལ་དྲང་བར་བྱ། །ཁྲག་ཆེན་དག་གི་ཨརྒ་ཡང་། །ནུབ་བྱང་གྲུ་ཟུར་དྲང་པོར་བཞག །བདུད་རྩི་ཞལ་བུ་ཚེས་རྒྱན་ལ། །བྱང་ཤར་གྲུ་ནི་དྲང་པོར་བཞག །ལྷ་ཤོས་ཁྲ་བོ་ཆག་གང་བ། །བསེ་ཕོར་དམར་ཏུ་སྤངས་ཕུད་བཅས། །ཚོགས་ཀྱི་སྤྱན་གཟིགས་སྣ་ཚོགས་དང་། །དུས་བཞི་དག་ཏུ་དབུལ་བར་བྱ། །སྙིང་སྣ་ཆང་སྣ་ཁྲག་སྦྱར་བ། །བཅོ་བརྒྱད་ཚོགས་ལ་དྲང་བར་བྱ། །གནམ་ལྕགས་མི་གསད་མཚོན་ལས་བྱས་པ་ཡིས། །སྤུ་གྲི་སོར་བརྒྱད་བཅོ་བརྒྱད་དང་། ཁ་ཊ༷་ཁ་ནི་རྩ་གསུམ་རབ་ཏུ་བྱ། །བསེ་ཡི་མདའ་གཞུ་དུག་གིས་བྱུགས་པ་རྣམས། །ལྷོ་ཡི་ཟུར་དང་བཅོ་བརྒྱད་གྲལ་ལ་བཞག །རྡོ་རྗེ་ལྕགས་ཀྱུ་ཞགས་པ་ཡི། །ལིང་གར་བཅས་ཏེ་བྱང་ཤར་སྟེང་དུ་གཞག །ཞབས་མ་ཀྱི་ལུད་མི་རྭ་དང་ནི། །ཚིལ་ཆེན་རྣེལ་དྲིའི་གཞོབ་སྟེ་རྣམ་པ་ལྔ། །བྱ་རོག་འུག་པ་ལྷ་དང་ནི། །མིང་རུས་བྲིས་ལ་ལིང་གར་བཅས་ཏེ་ནུབ་བྱང་སྟེང་དུ་ཡོ། །རྡོ་རྗེ་སྲིན་པོའི་རྒྱུད་ལས། རྫས་བསག་ཅིང་དོད་པའི་ལེའུ་སྟེ་གསུམ་པའོ།། །།དེ་ནས་ཡང་དག་བཤད་བྱ་སྟེ། །མིག་གི་རྟེན་གྱི་གཟུགས་བརྙན་ནི། །ཞིང་ལྤགས་དག་གམ་རོ་རས་ལ། །དམར་པོ་དབུ་གསུམ་ཕྱག་བཞི་པ། །རྒྱན་རྫོགས་པར་ནི་མཁས་པས་བྲི། །སྤྱན་དབྱེ་ལ་སོགས་ལྔ་ཕུལ་ནས། །མཎྜལ་དབུས་སུ་བཞུགས་སུ་གསོལ། །ཐུགས་དམ་བསྐང་བའི་རྟེན་དག་ན། །འདབ་ཆགས་མཚལ་བུ་མཚན་ལྡན་ལ། །གཤོག་པ་གཡས་ལ་དགྲ་མིང་གདགས། །གཤོག་པ་གཡོན་ལ་སྲོག་སྙིང་གདགས། །གསང་བའི་རྟེན་དུ་གཟུང་བར་བྱ། །བཟླས་བརྗོད་བྱ་བའི་རྟེན་དག་ན། །རུ་དྲའི་ལག་ཐུར་གཡས་པ་ལ། །རྟག་ཏུ་མི་རྗོད་གཟུང་ལ་གདགས། །རྡོ་རྗེ་སྲིན་པོའི་རྒྱུད་ལས། སྐུ་རྟེན་བཅའ་བའི་ལེའུ་སྟེ་བཞི་པའོ།། །།དེ་ནས་ཡང་དག་བཤད་བྱ་སྟེ། །དང་པོ་ལས་ཅན་རྣལ་འབྱོར་པས། །ཕྱི་ནང་གསང་བའི་མཚམས་བཅད་ནས། །སྙིང་ཁར་ས་བོན་ལས་བྱུང་བའི། །ཡི་དམ་ལྷ་ཚོགས་སྤྱན་དྲངས་ཏེ། །དབང་པོ་གསུམ་གྱི་དང་བས་བཤགས། །དེ་རྟིང་ཏིང་འཛིན་འདི་ལྷ་བུ། །ཆོས་རྣམས་སེམས་ཀྱི་རང་བཞིན་དེ། །སེམས་ཉིད་གདོད་ནས་མ་སྐྱེས་བས། །ཅི་ལ་མི་རྟོག་དེ་བཞིན་ཉིད། །དམིགས་སུ་མེད་པས་མཉམ་པ་ཉིད། །མཉམ་ཉིད་དང་ལས་མཉམ་པའི་ཡེ་ཤེས་སྐྱེས། །ཡེ་ཤེས་ཉིད་ལས་སྙིང་རྗེ་བྱང་ཆུབ་སེམས། །བྱང་ཆུབ་སེམས་ཉིད་ཆུ་ཟླའི་དཀྱིལ་འཁོར་བཞིན། །སྣང་བ་རང་བཞིན་མེད་པས་གཟུང་བར་བྱ། །གཉིས་མེད་བྱང་ཆུབ་སེམས་ཀྱི་རང་བཞིན་ནི། །སེམས་ཀྱི་རང་བཞིན་ཡེ་གེ་ཧཱུཾ༷་དུ་གྱུར། །འོད་ཀྱི་འཕྲོ་འདུས་རྡོ་རྗེ་ཕྱག་རྒྱར་གསལ། །དེ་ཉིད་འཕྲོ་འདུས་དཔལ་ཆེན་ཁྲག་མཐུང་རྫོགས། །ཤི་ཧེ་རུ་ཀ་ཧཱུཾ༷་ཧཱུཾ༷་ཧཱུཾ༷་ཧཱུཾ༷་ཕཊ། ཞལ་གསུམ་ཕྱག་དྲུག་ཞབས་བཞིར་བགྲད། །གཡས་དཀར་གཡོན་དམར་དབུས་མཐིང་ཞལ། །རྡོ་རྗེ་ཁ་ཏྭ༷་ཞིང་དབྱུག་གཡས། །གཡོན་དྲིལ་དུང་དམར་རྒྱུ་ཞགས་བསྣམས། །དུར་ཁྲོད་རྫས་ཀུན་ཕུན་སུམ་ཚོགས། །ཐུགས་ཁར་ཉི་སྟེངས་ཧཱུཾ༷་ཞེས་སྒོམ། །འབར་དང་སྤྲོ་དང་རྡུལ་འདུས་པས། །རུ་དྲའི་སྙེན་པོར་གཡལ་བར་སྒོམ། །སྤྱན་དྲངས་ཕྱག་བཞུགས་མཆོད་ཕུལ་ནས། །བསྙེན་པ་སྟོང་སྟོང་རྟག་ཏུ་དབུལ། །དེ་རྟིང་ཏིང་འཛིན་འདི་ལྟ་བུ། །བདག་གི་ཐུགས་ལས་སྤྲོ་བ་ནི། །ཡི་གེ་དམར་ལ་འོད་འཕྲོས་ཏེ། །སྟེང་ཕྱོགས་གསེར་གྱི་གུར་ཕུབ་ནས། །ར་དམར་ཁྲག་གི་རྦ་ཀློང་སྟེ། །ཉི་ཟླ་པདྨའི་གདན་སྟེངས་སུ། །ཀུན་གཞི་རྣམ་ཤེས་ལྗང་ཁུ་དྲི། །འོད་འཕྲོས་དཔའ་བོའི་ཐུགས་དམ་བསྐུལ། །སླར་འདུས་དྲི་ལ་ཐིམ་གྱུར་པས། །བདག་དང་གཉིས་མེད་སྐུ་མཆོག་ནི། །དབུ་གསུམ་ཕྱག་བཞི་ཞབས་གཉིས་པ། །གཡས་སེར་གཡོན་སྔོ་ལེ་བརྒན་དབུས། །དབུ་ལ་གསེར་གྱི་ཅོད་པན་ཏེ། །རིགས་ལྔའི་སངས་རྒྱས་དབུ་ལ་རྫོགས། །སྤུ་གྲི་བསྟོ་གཡས་ན་བསྣམས། །ཙིསྟ་ཞིང་ཆེན་གཡོན་ན་བསྣམས། །བྱེ་རུའི་མཆེ་བ་འབར་གཙིགས་ཤིང་། །དབང་པོ་ལྔ་ལ་མེ་འབར་ཞིང་། །ཞིང་ཆེན་རློན་པའི་ན་བཟའ་ལ། །སྟག་ལྤགས་རློན་པའི་ཤམ་ཐབས་ཅན། །རྟ་རོ་འབུམ་ནི་གཅལ་དུ་བཀྲམ། །མི་རོ་འབུམ་གྱི་ཁྲི་སྟེངས་ན། །ཞབས་གཉིས་གྱད་ཀྱི་དོར་སྟབས་བཞུགས། །གཡོན་ན་ཡུམ་སྐྱེད་ཨེ་ཀ་ཛ་ཏི་མ། །སྐུ་མདོག་མཐིང་ནག་རལ་པ་ཅན། །སྐྲུ་གྲི་གཡས་ལ་དགྲ་བགེགས་གཡོན། །དབང་པོ་ལྔ་ལ་མེ་འབར་ཞིང་། །འཁོར་ནི་ནག་པོ་འབུམ་གྱིས་བསྐོར། །ཞིང་ཆེན་གདན་ལ་བཞུགས་བསམ་ལ། །མཁའ་འགྲོ་བརྒྱད་དང་བཅས་པ་སྒོམ། །ཉི་ཤུ་རྩ་བརྒྱད་འཁོར་གྱིས་བསྐོར། །བདུད་དང་གིང་ཚོགས་འབུམ་དང་བཅས། །རིག་འཛིན་གདོན་ནི་འབུམ་དང་བཅས། །དེ་ལྟར་ཏིང་འཛིན་རྫོགས་པར་བྱ། །རྡོ་རྗེ་སྲིན་པོ་སྒྲུབ་པའི་ཕྱིར། །ཏིང་ངེ་འཛིན་གྱི་དཀྱིལ་འཁོར་ལ། །རྟག་ཏུ་མི་འབྲལ་བཟླས་བ་ཙམ། །རྡོ་རྗེ་སྲིན་པོའི་རྒྱུད་ལས། ཏིང་ངེ་འཛིན་གྱི་དཀྱིལ་འཁོར་གྱི་ལེའུ་སྟེ་ལྔ་པའོ།། །།དེ་ནས་ཡང་དག་བཤད་བྱས་ཏེ། །གསང་སྔགས་དོན་རྣམས་བཤད་པར་བྱ། །ཨོ་བཛྲ་ཤི་ཧེ་རུ་ཀ་ཧཱུཾ༷་ཕཊ། བདག་ཉིད་སྐུ་སྐྱེད་པའོ། །ས་མ་ཡ་མཎྜལ་མ་དྷི་ཨ་གད་ཛ་ཡ། ཨ་གད་ཛུ་ཨ་ཧཱུཾ༷་ཛ། སྤྱན་དྲངས་པའི་སྔགས་སོ། །སྲད་བུ་ཨ་ཏིགི། ཨ་ལ་ལ་ཏི་སྟ་བཛྲ་བྲུ༷། བཞུགས་སུ་གསོལ་བའི་སྔགས་སོ། །མུ་ཧྭ་མ༷་ས་ཁུ་ཧི།མ་ཧྭ་རཀྟ་ཁུ་ཧི། མ་ཧྭ་ཙིསྟ་ཁུ་ཧི། མ་ཧྭ་བ་སུ་ཏ་ཁུ་ཧི། མ་ཧྭ་གོ་རོ་ཙ་ན་ཁུ་ཧི། ཁ་ཁ་ཁུ་ཧི་ཁུ་ཧི། མཆོད་པའི་སྔགས་སོ། །སརྦ་པ྅་ཨ་མྲི་ཏ་ཁ་ཁ་ཐ། བདུད་རྩིས་མཆོད་པའི་སྔགས་སོ། །ཨི་དམ་བ་ལིང་གྲི་ན་ཁ་ར༷། ཏ་ཀི་ནི་ཁུ་ཧི། གཏོར་མ་འབུལ་བའི་སྔགས་སོ། །ཡན་ལག་གི་སྔགས་འདི་ནི་ཚུལ་འོག་དང་འདྲའོ། །ཨོ་ཤི་ཧེ་རུ་ཀ་ཧ་ཧ་རུ་ལུ་རུ་ལུ་ཧཱུཾ༷་ཕཊ། ཟླས་པར་བྱ་བའི་སྙིང་པོའོ། །ཧཱུཾ༷་ཧཱུཾ༷་ཧཱུཾ༷་ཧཱུཾ༷། སྤྲོ་དང་བསྡུ་བ་ལས་ཀྱིས་ལྷ་དང་མ་རུངས་པ་དབང་དུ་བྱ་བའོ། །བསྙེན་པོ་སྒྲུབ་པའི་གསང་སྔགས་ནི། །ཡི་གེ་བཅུ་གསུམ་ནུས་ཐང་གིས། །བཟླས་བརྗོད་འཕྲོ་འདུ་རྒྱུན་མི་གཅད། །རིགས་ལྔའི་ངོ་བོ་དེ་འོག་ཏུ། །དཔལ་ཆེན་ཁྲག་འཐུང་སྙིང་པོའི་ཡི་གེ་བཞི། །གསལ་བར་གྱུར་པས་ཡི་གེ་གཉིས། །ཀེའུ་སིང་སྙིང་པོའི་ཡི་གེ་བཞི། །དབང་སྡུས་མཐའ་རྟེན་བསྲེས་པ་གདགས། །བར་བར་ཏིང་འཛིན་གསལ་བྱ་བ། །གནས་དང་འོད་འཕྲོ་སྤྲུལ་པ་གདོན། །སླར་བསྡུས་ཡི་གེ་བཞི་པ་བྱ། །ཨོ་ནི་ཧྲོ་ཏ་ནི་ནི་ཏོ་ཏ་ནི། འདི་སྐུ་བསྐྱེད་པའི་སྙིང་པོའོ། །སྤྱན་དྲངས་ལ་སོགས་གོང་དང་འདྲ། ཁུ་རུ་ཧུ་རུ་བཟླས་པའི་སྙིང་པོའོ། །གྲྭཧྭ་ཞེས་པ་མཐའ་རྟེན་ལ། །ལས་རྣམས་གང་ཡང་གྲུབ་པའི་སྔགས། །ནི་ཏོ་ཏ་ནི་གཉིས་བརྗོད་པས། །དབུ་མནན་ཧུ་རུ་གཉིས་བརྗོད་མཐར། །སྲུཧྭ་མཐའ་རྟེན་བཅོ་ལྔ་པ། །བཀྲ་ཤིས་ཕྱག་འཚལ་དང་པོར་བཞག །སྲོག་སྙིང་དྲག་ཏུ་བརྗོད་པ་ཡིས། །སྣང་སྲིད་སྒྲོལ་བའི་མཐུ་དང་ལྡན། །བཀྲ་ཤིས་བཞི་ཚུགས་མཐའ་བཞག་པས། །ཞི་རྒྱས་བདེ་བ་ཕུན་སུམ་ཚོགས། །ལས་རྣམས་ཐམས་ཅད་སྒྲུབ་པའི་ཕྱིར། །བྱེ་བ་བཟླས་པས་འགྲུབ་བར་འགྱུར། ཤེན་ཏུ་དྲག་པོར་སྒྲུབ་འདོད་ན། །བཀྲ་ཤིས་ཕྱག་འཚལ་དང་པོར་བཞག །ནི་ཏོ་ཏ་ནི་གཉིས་བརྗོད་དེ། ཁུ་རུ་གཉིས་ནི་མཐར་སྦྱར་བ། །དབུག་འདྲེན་པ་ཡི་མཐར་གཞུག་པ། །འབར་བ་ཕྱེད་དང་གཉིས་པ་གཞག །རྩ་བའི་གསང་སྔགས་ཟབ་མོ་སྟེ། །ཡི་གེ་བཅོ་ལྔའི་འཕྲེང་བ་འདི། །རྣལ་འབྱོར་རྣམས་ཀྱིས་ཉམས་སུ་བླངས། །བྱེ་བ་བཟླས་ན་མངོན་དུ་འགྱུར། །གལ་ཏེ་མངོན་དུ་མ་གྱུར་ན། །བཟླས་པ་བྱེ་བ་དུང་ཕྱུར་གནས། །སྦས་པའི་གསང་སྔགས་བཤད་བྱ་སྟེ། །ཡི་གེ་རྩ་དྲུག་གདོན་པར་བྱ །ར་ཧ་ལེ་ར་ཧ་ལེ། སྣང་སྲིད་བསྒྲལ་བའི་ང་རོ་སྟེ། །རུ་དྲ་རུ་དྲ་དངོས་བྱུང་བས། །རྦུད་རྦུད་ཁ་ཊ༷་མཚོན་གྱིས་ག་ས། །རྦ་ན་རྦ་ནའི་མཆོང་ཚུལ་གྱིས། །ཚལ་པ་ཚལ་པ་མགོ་ལུས་གཤོག །ཧ་ལ་ཧ་ལ་འཇིག་པ་དེས། །ཧཱུཾ༷་ཧཱུཾ༷་རྡུབ་ཅིང་ཞལ་དུ་རྡུབ། །དབང་དུ་འདུས་པར་ཐེ་ཚོམ་མེད། །འབུམ་གཅིག་བཟླས་པས་ལས་རྣམས་བྱེད། །སྒྲུབ་པའི་གསང་སྔགས་ཟབ་མོ་སྟེ། །རྣལ་འབྱོར་རྣམས་ཀྱིས་ཉམས་སུ་བླངས། །གད་ལ་བྱ་བ་ཤི་བར་རིགས། །གལ་ཏེ་ཤི་བར་མ་གྱུར་ན། །ཐེམ་ལས་བསྟེན་པའི་སྦས་པ་བཟླས། །དབང་དུ་བསྡུ་ཕྱིར་ཧཱུཾ༷་གཉིས་བརྗོད། །ཧ་ལ་གཉིས་བརྗོད་འཇིགས་བྱེད་བསྐྱེད། །རབ་ཏུ་བསྐུལ་ཕྱིར་ཚལ་པ་གཉིས། །མནན་ཕབ་པར་ཡང་བསྐུལ་བའི་ཕྱིར། །རྦ་ན་གཉིས་བརྗོད་གསང་བའི་གིང་། །ར་ར་ལེ་ནི་གཉིས་་བརྗོད་པས། །ལས་ཀྱི་གིང་ནི་བསྐུལ་བའི་སྔགས། །སྔགས་ཟོར་གདུག་པའི་སྲིན་པོའི་སྔགས། །གང་ལ་ཐེབས་པར་ཐེ་ཚོམ་མེད། ཁུ།བ་པར་མ་གྱུར་ལས་འགོར་ན། །གསང་སྔགས་ཐེབས་ལས་ཟློག་པ་བསྟན། །ལེ་ཧ་ར་ཏྲ་རུ་རྦད་ན་རྦ་པ་ཚལ་ལ་ཧ་ཧཱུཾ༷།ཡི་གེ་བཅུ་གསུམ་སྙིང་པོ་འདིས། །བཟླས་པ་འཐེམས་ན་ཐེ་ཚོམ་མེད། །རྩ་བ་སྦས་པའི་གསང་སྔགས་ཟླས། །ལས་ཀྱི་གསང་སྔགས་བསྟན་པར་བྱ། །དུ་ན་དུ་ན་མྲག་པ་ཤང་ཧ་ལ་ཧ་ལ། ཙ་ལ་ཙ་ལ པ་ཙ་པ་ཙཧེམ་ཧིམ། རྦད་ན་རྦད་ན། རྦད་པུ་ལིང་། རྦད་པུ་ལིང་མེ་ཤ་ཡ། མེ་ཤ་ཡ་མྱ་ར་ཡ་མྱ་ར་ཡ། གདུག་པ་ཅན་གྱི་གསང་སྔགས་སོ། །ནི་ཏོ་ཏ་ནི་ཏོ་ཏ་ནི། ཀི་ལི་ཀི་ལ་ཡ། ཧུ་རུ་ཧུ་རུ་ཧཱུཾ༷་ཕཊ། ཕུར་བསྒྲུབ་པ་དང་གདབ་པའི་སྔགས་སོ། །ནི་ཏོ་ཏ་ནི། ནི་ཏོ་ཏ་ནི། ད་ཧ་ད་ཧ། པ་ཙ་པ་ཙ། ཧུ་རུ་ཧུ་སྲ བ་རྨི་ཀུ་རུ་ཀུ་རུ་ཧཱུཾ༷་ཕཊ། སྤྱིན་སྲེག་གི་སྔགས་སོ། །ནི་ཏོ་ཏ་ནི། ནི་ཏོ་ཏ་ནི། བདུད་བདག་སྙིང་ས་མ་ཡ་ཕྱེ། དམ་ཚིག་སྲོག་བདག་ས་མ་ཡ་ཕྱེ། སྙིང་ས་མ་ཡ་ཕྱེ། བཟློག་ཕྱེ། དབྱེ་བའི་སྔགས་སོ། །ནི་ཧྲོ་ཏ་ནི་ནི་ཏོ་ཏ་ནི། ནི་ཨུ་ཀཁོ་ཨ་ཧཱུཾ༷་ཛ་ཛ། དགུག་པའི་སྔགས་སོ། །ནི་ཏོ་ཏ་ནི་ནི་ཏོ་ཏ་ནི། ཁ་ཊ༷་ཁ་ནི་ཏྲི་ཤུ་ལ་ཧཱུཾ༷་ཕཊ། ཁ་ཊ༷་ཁ་སྒྲུབ་པ་དང་གདབ་པའི་སྙིང་པོ༷འོ། །ནི་ཏོ་ཏ་ནི་ནི་ཧྲོ་ཏ་ནི། གིང་ཀ་ར། གིང་ཀ་ར། རྦད་ན་གཟེར་སྙིང་ན་གཟེར། ཤཱ་ར་ཡ་ཕཊ་ཕཊ། ས་མ་ཡ་མུགས། མདའ་སྒྲུབ་པ་དང་འཕངས་པའི་སྔགས་སོ། །ནི་ཏོ་ཏ་ནི་ནི་ཏོ་ཏ་ནི། ཧུ་རུ་ཧུ་རུ་ཧཱུཾ༷་ཕཊ།རསྒ་ཕྲོ། ཀརྨ་རཀྟ་སི། ཀརྨ་རཀྟ་སི། ཀླུ་ལ་ཀླུ་ལ། མུ་ཏྲ་པ་ཏྲ། ཀུ་རུ་ཀུ་རུ་སྨྱོ། ཏྲི་ལིང་ཤང་ཀ་དུ་དྲི་ཟ་ཡསྒ་རྦད་པུ་ཕྱེ་མ་འདར། རུ་སྲ བྲ་བྲ། དུམ་དུམ། ཤིག་ཤིག །དགྲ་བགེགས་མ་ར་ཡ། ཙ་ཙ་ར་ཛ་རྦད། ཐུན་ཐམས་ཅད་སྒྲུབ་པའི་སྔགས་སོ། །ནི་ཧྲོ་ཏ་ནི་ནི་ཏོ་ཏ་ནི། གིང་ཀ་ར་མུ་ཏྲ་ཀ་ལ་ཨ་སྟི་ཁེ྅་ཨ། དབང་བསྐུར་བའི་སྔགས་སོ། །རྡོ་རྗེ་སྲིན་པོའི་རྒྱུད་ལས། གསང་སྔགས་ཀྱི་ལེའུ་སྟེ་དྲུག་པའོ།། །།དེ་ནས་ཡང་དག་བཤད་བྱ་སྟེ། །དམ་ཚིག་དག་གི་རྩ་བ་ཡང་། །སྒྲུབ་པ་ཆེན་པོའི་དུས་ན་ཡང་། །ལྟ་བ་བས་ཀྱང་སྤྱོད་པ་སྔགས། །མ་གཏད་མི་མནན་གཏོར་མ་སྦྱིན། །རིགས་འཛིན་གདོན་ལ་མི་རྨད་དེ། །དུར་ཁྲོད་གནས་སུ་ཉལ་བ་དང་། །རོ་རྣམས་མཐོང་ན་དགའ་བ་བསྐྱེད། །ལོངས་སྤྱོད་མི་ཤ་ཁྲག་ལ་རོལ། །བུད་མེད་རྣམས་ལ་སྨད་མི་བྱ། །རི་བོའི་རྩེ་ནས་བྱ་ར་བྱ། །རྩེ་གསུམ་མདུང་གི་ལག་ཆ་ཐོགས། །རྡོ་རྗེ་སྲིན་པོའི་རྒྱུད་ལས། དམ་ཚིག་གི་ལེའུ་སྟེ་བདུན་པའོ།། །།དེ་ནས་ཡང་དག་བཤད་བྱ་བ། །བདག་ཉིད་ལུས་ནི་གཅེར་བུར་བྱུང་། །ཁྲག་གིས་ངོ་བྱུགས་སྐྲ་བཅིངས་ཤིང་། །གོམ་པ་གྲག་མཎྜལ་བསྐོར། །ལག་པ་གར་བྱ་ཐལ་མོ་གདབ། །དྲག་པོར་གྱུར་པོའི་དུས་དག་ཏུ། །མིང་གི་མི་བྱར་མི་རུང་ངོ་། །མཐེའུ་ཆུང་ལྕགས་སྒྲོག་ལུ་གུ་རྒྱུད། །གུང་སྲིན་མཐེ་བོང་རྩེ་སྤྲད་དེ། །མི་སྐྲའི་ཞགས་བས་བཟུང་བ་དང་། །དྲིལ་བུ་བཟུང་བ་ལ་སོགས་བྱ། །མཛུབ་སྲིན་ལྕགས་ཀྱུའི་ཚུལ་བཀུ་ནས། །ཕྱོགས་བཅུ་དག་ཏུ་བསྟན་པ་ནི། །དགུག་པའི་དུས་སུ་བྱ་བར་ཤིས། །ལག་གཉིས་ཕུར་བུ་དྲིལ་བྱས་ཤིང་། །གཡོན་པས་གཟུང་ཞིང་གཡས་པ་གདབ། །གདབ་པའི་ཚུལ་དུ་བྱ་བར་ཤིས། །གཡོན་པས་གཟུགས་བཟུང་གཡས་པས་ནི། །སྐྲུ་གྲི་ཐོགས་ལ་ག་་པར་བྱ། །བསྲེག་པའི་དུས་སུ་བྱ་བར་ཤིས། །སྔགས་པ་ཁྲོང་་པས་བདུད་ཀྱི་ཆས། །ལུས་ལ་བསེ་ཡི་ཁྲག་གོན་ཏེ། །གཡོན་པ་ཁ་ཊ༷་རྩེ་གསུམ་ཕྱར། །གཡས་ཀྱིས་མདའ་དང་ཐོད་པ་ཐོགས། །གདབ་དང་འཕང་དང་བརྡེག་པ་གསུམ། །མྱུར་བ་མྱུར་བར་དྲག་ཏུ་བྱ། །བརྡེག་འཕང་དུས་སུ་བྱ་བར་ཤིས། །རྡོ་རྗེ་སྲིན་པོའི་རྒྱུད་ལས།ཕྱག་རྒྱའི་ལེའུ་སྟེ་བརྒྱད་པའོ།། །།དེ་ནས་ཡང་དག་བཤད་བྱ་སྟེ། །བཟླས་པ་བྱེ་བ་ཚང་གྱུར་ན། །འོད་དང་སྒྲ་དང་དྲི་ཞིམ་དང་། །མངོན་དུ་སྣང་བའི་གཟུགས་དག་དང་། །གནོད་སྦྱིན་སྐད་འབྱིན་ལྟས་ངན་སྐད། །དེ་གཟུགས་འཁོར་དང་བཅས་རྣམས་ཁོལ། །མེ་འབར་མེ་རྟག་ཁང་པ་འཚེག །མངོན་དུ་སྣང་བའི་ཆོ་འཕྲུལ་སྟོན། །གལ་ཏེ་མངོན་དུ་མ་གྱུར་ཡང་། །རྨི་ལམ་དག་ཏུ་སྣང་བ་ཡང་། །རབ་ཏུ་བྱུང་དང་ཨ་ཙ་ར། །བན་དེ་དག་གམ་ལྷ་སྲས་བཟང་། །ཞང་བློན་སྐྱེས་པ་མང་པོའམ། །དེ་རྣམས་ལམ་ན་རྫས་ཐོགས་བཟང་། །རྫས་རྣམས་མེད་ན་འབྲིང་དུ་བསྟན། །ཅིང་ཡང་མ་མཐོང་ཐ་མའོ། །དཔའ་བོ་གྲུབ་པའི་གྲུབ་རྟགས་ནི། །སྡས་པ་ངོ་འབྱིན་ཆེ་བ་དང་། །ཡུལ་གྲུ་མང་པོ་འཇིག་པ་དང་། །བུ་ཚ་ཕོ་བརྒྱུད་འཕེལ་བ་དང་། །རྫས་རྣམས་ཐམས་ཅད་འདུ་བ་དང་། །ངག་གི་བདེན་པས་འགྲོ་འདུལ་ཞིང་། །རྟག་ཏུ་མི་རྣམས་ཀུན་ལས་འཕགས། །ཕྱི་མར་གྲགས་པའི་རྒྱལ་མཚན་ཐོབ། །དེ་སོགས་ཡོན་ཏན་བརྗོད་མི་ལང་། །རྡོ་རྗེ་སྲིན་པོའི་རྒྱུད་ལས། རྟགས་བསྟན་པའི་ལེའུ་སྟེ་དགུ་པའོ།། །།དེ་ནས་རྡོ་རྗེ་ལས་ཀྱིས། མཐུ་སྟོབས་ཀྱི་བདག་པོ་ལ་འདི་སྐད་ཅེས་གསོལ་བ་བཏབ་བོ། །ཀྱེ། མཐུ་སྟོབས་བདག་པོ་ཐུགས་རྗེའི་བདག །དངོས་གྲུབ་ཚོགས་ལས་མངའ་མཉེས་པ། །མ་འོངས་རྣལ་འབྱོར་ཕྱི་རབས་ཀྱིས། །ལས་ཀྱི་རིམ་པ་སྒྲུབ་པའི་ཕྱིར། །བདག་གིས་ཡོངས་སུ་ཞུ་ལགས་ཀྱིས། །དེང་འདིར་སྟོན་པས་གནང་བར་མཛོད། །དེ་ལ་མ་མོའི་ལས་བྱ་ན། །བདུད་ནི་མ་ཏྲང་རུ་དྲ་ཡི། །གཟུགས་ཀྱི་མཎྜལ་དེ་སྟེངས་སུ། །རོ་ཏ་མ་ཏ་སྨྲ་རར་ཏ། །ཡི་གེ་བརྒྱད་པོ་དགོད་པར་བྱ། །གླང་བཀལ་བ་དང་མཛོ་མོ་དང་། །ཀེའུ་ཚེ་དང་ནི་རྨ་ཤིང་དང་། །སེང་ལྡེང་དང་ནི་སྐྱེར་ལྡེང་དང་། །སྐྱེར་པ་དང་ནི་གྲ་མ་དང་། །ཕུར་བུ་སོ་བརྒྱད་དགོད་པར་བྱ། །སྙིང་སྣ་ཚོགས་པའི་གཏོར་མ་གཉིས། །དཔལ་དང་མ་མོའི་རིམ་པས་དང་། །སྙིང་ཐུན་ཁྲག་ཐུན་ར་ཡི་ཟོར། །མདའ་རྡོ་དུག་དང་ཉུངས་ཐལ་རྣམས། །རིམ་པས་མཁས་པས་དགོད་པར་བྱ། །བདན་ཉིད་སྲིན་པོ་རུ་རུ་སྟེ། །སྐུ་མཆོག་ཆ་ལུགས་ཇི་བཞིན་ལས། །ཡིད་ཀྱི་རྣམ་ཤེས་རྒྱུས་པ་ལས། །ཟ་བྱེད་འཇིགས་པའི་སྲིན་མོ་བརྒྱད། །རྩ་བའི་ཡི་གེ་བཀོད་པ་ལས། །རྫོགས་པར་གསལ་ནས་བསྙེན་པ་ཙམ། །རོ་ནི་ལ་མ་ཀེ་རི་སྟེ། །ལག་པ་གཡས་ནས་བསྐྱེད་པར་བྱ། །མ་མ་རསྒ་སྦྱོ་ཞེས་པས། །ཀུན་ཀྱང་མཐའ་རྟེན་མན་ངག་ཡིན། །ཏ་ནི་ཁ་ན་ཏ་རི་ཤ་སྟེ། །གོང་བཞིན་སྦྱར་ནས་ལག་པ་གཡོན། །མ་ནི་རུ་པ་ནི་མཆན་ཁུང་གཡས། །ཏ་ནི་པྲ་ཙན་མཆན་བུང་གཡོན། །སྨྲ་ནི་ཙརྙ་རསྒ་རྐང་པ་གཡས། །ར་ན་སྤྲ་བ་བ་ཏི་རྐང་པ་གཡོན། །ར་ནི་མ་ཧྭ་ན་ས་མགོ་ལ་སྟེ། །་་ནི་བྱི་ར་མ་ཏི་གསང་བར་རོ། །ཐུན་དང་ཕུང་པ་ལ་སོགས་རྣམས། །སྐུ་དང་ཕྱག་མཚན་དུ་བསྒོམས་ནས། །དྲིལ་ཏེ་རུ་ལུ་རུ་ལུ་ཞེས། །བཅུ་ཡི་འཕྲེང་བར་བསྙེན་པ་བྱ། །བཟླས་པ་རྫོགས་ནས་ཟོར་བསྐུལ་བ། །མ་ཧྭ་རུ་ལུ་མ་ཧྭ་མ་རཀྟ་མ་མ་སྨྱོ། ཡི་གེ་བཅུ་དགུའི་འཕྲེང་བ་དྲིལ། །གཡས་བསྐོར་གཡོན་དུ་གསད་དུས་སུ། །དུག་སྔགས་རསྒ་ཕོད་ཕོད་ཅེས། །ཡི་གེ་ལྔ་པ་བཟླས་པར་བྱ། །དྲིལ་ཏེ་འཕང་པའི་དུས་དག་ཏུ། །མ་མ་སརྦ་ཤ་ཏྲུ༷་བཱ་ར་ཡ་ཐུན་ཡ། བཅུ་གཉིས་བརྗོད་དེ་སོ་སོར་འཕང། །བཅུ་དགུ་བརྗོད་དེ་སོ་སོར་འཕང་། །རྡོ་རྗེ་སྲིན་མོའི་རྒྱུད་ལས། ཟ་བྱེད་སྲིན་མོའི་གདུག་སྔགས་ཀྱི་ལེའུ་སྟེ་བཅུ་པའོ།། །།དེ་ནས་ཡང་དག་བཤད་བྱ་བ། །ཞི་བར་གྱུར་པའི་ལས་དག་ནི། །གྲུབ་པ་ཐོབ་པའི་རྣལ་འབྱོར་དེས། །ཐབ་ཁུང་ཟླུམ་པོ་རྡོ་རྗེའི་ར། །ཁྲུ་གང་གཏིང་དུ་བྲུས་པ་དེར། །འོ་མ་ཡོད་པའི་ཤིང་རྣམས་རྩིག །གུ་གུལ་དཀར་དང་འོ་མ་དང་། །མར་དང་འབྲས་ཆན་ལ་སོགས་དང་། །ཞི་བའི་རྫས་སུ་གང་ཤིས་པ། །ནི་ཏོ་ཏ་ནི་གཉིས་འོག་ཏུ། ཁྲན་ཏིང་ཀུ་རུ་ཞེས་པ་དང་། ་་་རུ་གཉིས་བརྗོད་སྭཧྭ་ཞེས། །ཨོ་གྱིས་དབུས་མནན་ཁྲི་གཅིག་བསྲེག ཁེན་ཏུ་ཞི་བར་གྱུར་པ་བཤད། །རྒྱས་པར་གྱུར་པའི་ལས་དག་ནི། །ཐབ་ཁུང་གྲུ་བཞི་རྡོ་རྗེ་གྲྭ། །སྐྱེར་བ་ཚེར་མ་མེད་པ་གཙེར། །གུར་ཀུམ་ལྷི་ཝང་དུད་པ་ལ། །པྲཁོ་ཀུ་རུ་གོང་བཞིན་སྦྱར། །བཀྲ་ཤིས་རྫས་ཀྱང་དབུལ་བར་བྱ། ཁེན་ཏུ་རྒྱས་པར་འགྱུར་བར་བཤད། །དབང་དུ་གྱུར་པའི་ལས་དག་ནི། །ཐབ་ཁུང་ཟླ་གམ་ལྕགས་ཀྱུས་བསྐོར། །སེང་ལྡེང་གླང་བཀལ་ཐབ་ཁུང་རྩིག །ཙན་དན་སྨུག་དང་ལྕོང་ཞུན་དང་། །མར་ནག་ཉ་ཤ་སྦྲང་རྒོད་ལ། །པ་ཤང་ཀུ་རུ་གོང་བཞིན་སྦྱར། ཁེན་ཏུ་དབང་དུ་འགྱུར་བར་བཤད། །དྲག་པོར་འགྱུར་བའི་ལས་དག་ནི། །ཐབ་ཁུང་གྲུ་གསུམ་མཚོན་གྱིས་བསྐོར། ཁེ་ཤིང་དང་ནི་ཚེར་མ་ཅན། །གྲུ་གསུམ་ལེགས་བརྩིགས་དུག་བྱུགས་ལ། །ལྕགས་ཕྱེ་ཟངས་ཕྱེ་རྡོ་ཕྱེ་ལ། །ཚ་བའི་མར་དང་ཤ་ཆེན་དང་། །ལིང་གི་ཏལ་ནག་ལ་སོགས་བསག །ར༷་ལས་མེ་ལྷའི་ཐུགས་ཁ་སྲ །སྐུ་མཆོག་འཁོར་བཅས་ཞལ་དུ་ནི། །གོང་གི་གསང་སྔགས་དྲག་པོས་བསྲེག །མྱུར་དུ་དྲག་པོ་འགྲུབ་པར་འགྱུར། །རྡོ་རྗེ་སྲིན་པོའི་རྒྱུད་ལས། འཕྲིན་ལས་རྣམ་བཞིའི་ལེའུ་སྟེ་བཅུ་གཅིག་པའོ།། །།དེ་ནས་ཡང་དག་བཤད་བྱ་སྟེ། །དགུག་པར་བྱ་བའི་ལས་དག་ནི། །ནམ་གྱི་ཕར་ཕྱེད་ཚུར་ཕྱེད་ལ། །དབང་ལྡན་ཕྱོགས་ནས་བརྩམ་བྱ་སྟེ། །སྐྲ་ཡང་གིང་སྐྲ་གྱེན་དུ་བརྫེས། །ལིང་ག་ཤི་སྐྲའི་ཐག་པས་འཐེན། །ཞལ་ཟས་ཚོགས་པས་གཡབ་ཅིང་བོད། །གཡས་པ་ལྕགས་ཀྱུས་བཟུང་ནས་ནི། །ཡི་གེ་བཅུ་དྲུག་ནུས་ཐང་གིས། །བཟླས་ཏེ་བླ་དགུག་ཕོ་ཉ་མངག །དམ་ཉམས་དགུག་པའི་མུ་དྲ་བཅའ། །ཡབ་ཀྱི་སྐུ་མཆོག་དམར་པོ་ནི། །དབུ་གསུམ་ཕྱག་བཞི་ཆ་བྱད་ཅན། །དབུ་ནི་གིང་སྐྲ་གྱེན་དུ་བརྫེས། །གསེར་གྱི་ཅོད་པན་པུ་རུ་མྲ །གཡས་ན་གསེར་གྱི་ལན་ཕྲན་ཅན། །གཡོན་པ་གཡུ་ཡི་ལན་ཕྲན་ཅན།ཁམས་གསུམ་དབང་སྡུད་ཞལ་གསུམ་པོ། །རྟག་པར་རཀྟའི་རྒྱ་མཚོ་མདུན་ན་འཁྱིལ། །མི་རོ་རྟ་རོལ་ཁྲི་སྟེངས་ན། །བརྗིད་པའི་ཚུལ་གྱིས་བརྐྱང་བསྐུམ་བཞུགས། །སྐུ་ལ་མི་ལྤགས་རློན་པ་གསོལ། །མཁའ་འགྲོ་འབུམ་གྱི་དབུས་ན་བཞུགས། །སྲིད་པའི་མ་མོ་ལས་ལ་གཏོང་། །གཡས་ཀྱི་དང་པོ་སྤུ་གྲི་བསྣམས། །གློ་སྙིང་གཏུབ་པའི་དུས་ལ་བབ། །འོག་མ་ན་ནི་ལྕགས་ཀྱུ་བསྣམས། །དམ་ཉམས་དགྲ་བོའི་སྙིང་ནས་དྲོངས། །གཡོན་གྱི་དང་པོ་ཙིསྟ་བསྣམས། །དགྲ་སྙིང་དབྱུང་བའི་དུས་ལ་བབ། །འོག་མ་ན་ནི་ཞགས་པ་བསྣམས། །དམ་ཉམས་དགྲ་ལ་ཞགས་པས་ཐོབ། །གང་ཞིག་སྤང་བར་བྱེད་པ་རྣམས། །ནམ་ནི་ཕར་ཕྱེད་ཚུར་ཕྱེད་ལ། །མང་བ་སྤར་གྱིས་ཐོབ་ལས་ཤོག ་་་བ་མཛུབ་ཀྱིས་ཚུགས་ལ་ཤོག །བདག་ཉིད་ཁྲོས་ལས་འོ་འདོད་བོད། །ངུ་བའི་སྒྲ་ཡིས་ལིང་ག་དྲངས། །རྡོ་རྗེ་སྲིན་པོའི་རྒྱུད་ལས། དགུག་པའི་ལེའུ་སྟེ་བཅུ་གཉིས་པའོ།། །།དེ་ནས་ཡང་དག་བཤད་བྱ་སྟེ། །དབྱེ་བར་གྱུར་པའི་ལས་དག་ནི། །བྱ་རོག་འུག་པའི་གུང་རུ་ལ། །དགྲ་བོའི་ལྷ་དང་མིང་བྱང་གདགས། །ལིང་ག་བྱ་རོག་འུག་པའི་བར། །གུ་གུལ་སྦྱར་མའི་དུད་པ་བདུག །རླུང་ལྷའི་ཕྱོགས་ནས་བརྩམས་བྱ་སྟེ། །ཡི་གེ་སོ་གཉིས་དྲག་སྔགས་དང་། །མ་མ་རུ་དྲ་ནཱ་ར་ཡ་ཕྱེ་ཕཊ། དེ་བཟླས་བསྐུལ་ཚིག་འདི་ཡང་བསྐུལ། །གོང་བཞིན་བསྐུལ་ནས་འདི་ཡང་གདགས། །འོག་མ་དང་ནི་འཕྲ་མེན་མ། ཁུ་ལུ་མུ་ཀ་མཐུ་མོ་ཆེ། །སེར་ནག་ཆེན་མོ་དུ་ཁྲོད་མ། །ཐུགས་ནི་མི་དམིགས་ཡེ་ཤེས་སྤྱན། །ལག་ན་དགྲ་སྟ་ཐོད་པ་ཐོགས། །ཁྱོད་ཀྱི་ཐུགས་དམ་དུས་ལ་བབ། །ཕྲག་པ་གཡས་པའི་ཕོ་ལྷ་ཁྲོལ། །འོག་མ་ནས་ནི་འཕྲ་མེན་མ། ཁ་ཁ་མུ་ཁ་མཐུ་མོ་ཆེ། །མཐིང་ནག་ཆེན་མོ་བྱ་རོག་མགོ །རྟོགས་བྱེད་ཟས་སུ་ཤ་ཟ་ཞིང་། །ཁྱིམ་ཕྱིར་འཁོར་ཞིང་ཤ་ཟ་ཞིང་། །ནག་མོ་ཆེན་མོ་མིག་འབྲུ་མ། །ལག་པ་ལྕགས་ཀྱུ་ཐོད་པ་ཐོགས། །ཁྱོད་ཀྱི་ཐུགས་དམ་དུས་ལ་བབ། །ཕྲག་པ་གཡོན་པའི་མོ་ལྷ་ཁྲོལ། །གུ་གུལ་སྦྱར་མའི་རྫས་མཆོག་འདིས། །དཀྱིལ་འཁོར་ཆེན་པོའི་གཟི་བྱིན་བསྐྱེད། །དམ་ཉམས་འགོ་བའི་ལྷ་དང་ཁྲོལ། །རྡོ་རྗེ་སྲིན་པོའི་རྒྱུད་ལས། །དབྱེ་བའི་ལེའུ་སྟེ་བཅུ་གསུམ་པའོ།། །།དེ་ནས་ཡང་དག་བཤད་བྱ་སྟེ། །གསང་བར་གྱུར་པའི་ལས་དག་ནི། །སྐྱེས་པ་གྲི་རུ་ཤི་བའི་རྩིབས་མའམ། །ར་ཡི་གཞུང་ངམ་གང་རུང་ལ། །བསེ་ཞོའི་དུག་དང་རྩིབས་དུག་གདན། །ལྕགས་ཀྱི་མདའ་འམ་ལྷོ་སྨྱུག་ལ། །ལྷས་ངན་སྒྲོས་བསྐྱོན་སྐྱེར་པའི་མདེལྭ །མཎྜལ་བཀོད་ལ་ལས་ལ་བརྩམ། །བླ་དགུག་གཟུགས་ལ་ཐེབས་པ་དང་། །མདེའུ་ལ་འདིས་བསྐུལ་འཕང་ངམ་འདྲེག །གཡས་འོག་བསེ་མདའ་དམར་པོ་ནི། །སྐྱེས་ཆེན་རྫོགས་བདག་གིང་ཀ་ར། །མཁའ་འགྲོ་འཕྲ་མེན་སྒྲོ་ཡིས་སྒྲོན། །སྲོག་བདག་ཡམ་ཤུད་མདེ་འུས་བརྒྱན། །སྲོག་གཅོད་གིང་དུ་དབང་བསྐུར་གྱིས། །གཡོན་འོག་ན་ནི་བསྲེ་ཡི་གཞུ། །ཡར་ལྟས་ཁྲོ་ཆེན་གིང་ཀ་ར། །མར་ལྷས་ཁྲོ་མོ་དབུགས་ལེན་མ། །ཚངས་པ་ཡབ་ཡུམ་བྱང་ཆུབ་སེམས། །རུ་དྲའི་རྒྱུད་སྒྲེངས་ཁམས་གསུམ་རྩེར། །དམ་ཉམས་དགྲ་བོའི་སྙིང་རུམ་དང་། །བསེ་མདའ་དམར་པོ་ཧ་ལ་ལ། །སྲོག་དབུགས་ཁྲོལ་ཅིག་གིང་ཀ་ར། །བརྡེག་གམ་འཕང་ངམ་གསད་པར་བྱ། །གཡས་འོག་ཁ་ཊ༷་འབར་བ་ཡིས། །གདུག་པ་མ་ལུས་རྡུལ་དུ་ལྷོགས། །གཡོན་འོག་མཆོག་ཕུར་འཇིགས་པར་སྒྲིལ། །སྙིང་གི་དཀྱིལ་དུ་ཀི་ལ་ཡ། །གཟུགས་ལ་ཕུར་ཐུན་ཁ་ཊ༷་བསྲེག །དྲག་སྔགས་བཅུ་དགུ་དབབ་པར་བྱ། །རྡོ་རྗེ་སྲིན་པོའི་རྒྱུད་ལས། གསད་པའི་ལེའུ་སྟེ་བཅུ་བཞི་པའོ།། །།དེ་ནས་ཡང་དག་བཤད་བྱ་བ། །ཡུངས་ཀར་རྒྱལ་པོའི་ལས་དག་ནི། །བརྙ་དུམ་བུ་གཅིག་པ་སྲ །དངོས་གཞི་ལྔ་ཡིས་བཀང་བྱས་ལ། ་་ས་ཀར་རྩལ་ལ་ཞིང་དཀྱིལ་དུ། །བཅུག་སྟེ་དྲི་ཆུས་བྲན་པར་བྱ། །ཡུངས་ཀར་ཧཱུཾ༷་དྲི་ཧྲི་ལས། །གསང་བའི་སྔགས་ཀྱིས་བསྐྱེད་པར་བྱ། །ཨོ་བཛྲ་ཏི་ཀི་ནི་གག་ན་གྲྭཧྭ། ཟླ་བ་ཉ་སྟོང་དུས་དྲུག་ཏུ། །གིང་ཆེན་སྤྱན་དྲང་བསྟིམ་བྱས་ལ། །མཆོད་དང་བཟླས་པ་ཁྲི་ཁྲི་བྱ། །སྟོང་ལ་དྲག་སྔགས་གདོན་པ་ཡིན། །ཡི་གེ་ཞེ་གཅིག་འཕྲེང་པ་དྲང་། །སྨིན་དེ་གྲུབ་པར་གྱུར་པ་དང་། །བརྙ་ཕུང་ལ་དཀྱིལ་འཁོར་གྱི་དབུས་སུ། །བཞག་ལ་དྲག་སྔགས་བསྒྲུབ་པར་བྱ། །དེ་ནས་བསྲེག་གམ་འཕང་བར་བྱ། །རྡོ་རྗེ་སྲིན་པོའི་རྒྱུད་ལས། ཡུངས་ཀར་གྱིས་བསད་པའི་ལེའུ་སྟེ་བཅོ་ལྔ་པའོ།། །།དེ་ནས་ཡང་དག་བཤད་བྱ་སྟེ། །ཐུན་དུ་བྱ་བའི་ལས་དག་ནི། །རབས་ཆད་མོན་ཐོད་མུ་སུ་ར། །ནང་དུ་གྱིང་ཆེན་ཐུན་རྫས་སུ། །ཁྲགདུགམཚོནམ་བརྡེག་རྫས་ལ། །སྔགས་འདི་བཟླས་ལ་བསྒྲུབ་པར་བྱ། །ཏྲི་ཀུ་རུ་རག་ཁམ། ཏ་ཤ་རུ་དྲ་མྱ་རྭ་ཡ་ཐུན་ཡ། རུ་དྲ་མྱ་ར་ཡ་ཐུན་ཡ། རསྒ་རྨར་ད་ཡ་ཐུན་ཡ། དེ་རྫོགས་པ་དང་སྔགས་རིངས་དགུག་པའི་ཞབས་ལ། ཏྲི་ལིང་བཏགས་ཏེ་བསྲེག་གམ་འཕང་། །གཡས་འོག་མཆོག་ཆེན་ཕུར་པ་བསྒྲིལ། །གཡོན་འོག་ཐོད་པ་མུ་ཟུ་ར། །འདུ་བ་རྣམ་བཞིའི་ནད་བཅོལ་ལ། །སྡང་བའི་དགྲ་ལ་ཁྲག་ཐུན་ཕོབ། །རྡོ་རྗེ་སྲིན་པོའི་རྒྱུད་ལས། ཐུན་སྒྲུབ་པ་དང་འཕངས་པའི་ལེའུ་སྟེ་བཅུ་དྲུག་པའོ།། །།དེ་ནས་ཡང་དག་བཤད་བྱ་བ། །སློབ་མ་དག་ལ་དབང་བྱས་ཏེ། །ནུབ་ཏུ་རཀྟའི་ཆག་ཆག་གདབ། །མི་རོ་རྟ་རོའི་བསྣོལ་ཏེ་བྲི། །དེ་ནས་སློབ་མས་ཞུ་བ་བྱ། །བླ་མ་གིང་ལ་ཆང་ཡང་དྲང་། །རྡོ་རྗེ་བླ་མ་ལུང་བསྟན་དེས་ཀྱང་ནི། །ཁྱོད་ལ་ཅི་ཡོད་ཡོན་ཡང་དྲི། །དེས་ཀྱང་རང་སྲོག་རྫས་དབུལ་བྱ། །བླ་མས་སློབ་བུ་དཀྱིལ་འཁོར་གཞུག །མཎྜལ་ལྷ་ཡིས་དེ་ཉིད་བསྟན། །མཎྜལ་སྟེང་དུ་བཞག་ནས་ནི། །བཀྲ་ཤིས་ཐོད་པས་དབང་བསྐུར་བ། །དེ་བཞིན་ལྔ་པའི་དབུ་བརྒྱན་དང་། །གསེར་གྱི་ཅོད་པན་སྐྲུ་གྲི་དང་། །གིང་ཆེན་བཅོ་བརྒྱད་ཕྱི་དབང་བསྐུར། །དེ་ནས་གཟུངས་མ་ཁྲོ་གཉེར་མ། །མ་མོ་རོ་ག་མ་ཕབ་ནས། །སྐུ་གསུང་ཐུགས་ལ་མ་མོ་གསུམ། །བྱིན་རླབས་སྦྱོར་ལ་བརྩམ་བྱས་ལ། །ཉི་ཟླས་སློབ་མ་ནང་དབང་བསྐུར། །གཟུང་མ་དེ་ནི་ལག་ཏུ་གཏད། །གསང་བ་དབང་བསྐུར་མ་མོ་གིང་། །ཐམས་ཅད་ཀྱིས་ནི་དབང་བསྐུར་རོ། །གསང་བའི་སྔགས་ནིགོངབཞིནནོ། །རྡོརྗེསྲིནཔོའི་རྒྱུད་ལས། དབང་གི་ལེའུ་སྟེ་བཅུ་བདུན་པའོ།། །།དེ་ནས་ཡང་དག་བཤད་བྱ་སྟེ། །གིང་ཆེན་སྒྲུབ་དང་བསྐང་དུས་སུ། །ལྷ་བཤོས་ཁྲ་བོ་ཆག་གང་ལ། །ཕྱོགས་བཞིར་གླིང་ནི་བཅོ་བརྒྱད་དེ། །གླིང་དུ་སྤྱན་གཟིགས་མར་མེ་བཏང་། །ལ་གོར་ཕུད་དང་བཅས་པ་དེས། །བསྐྱང་ཏེ་མཆོད་པའི་ཆོ་ག་བྱ། །གསད་པར་གྱུར་པའི་དུས་དག་ཏུ། ཁུ་གསུམ་བཅོ་བརྒྱད་ཁྲག་བྱུགས་བརྒྱན། །སྦྱིན་སྲེག་ཟོར་དང་མནན་པ་གསུམ། །རིམ་པས་མཁས་པས་དོན་ཤེས་བྱ། །རྡོ་རྗེ་སྲིན་པོའི་རྒྱུད་ལས། སྒྲུབ་པ་དང་གསད་པའི་ལེའུ་སྟེ་བརྒྱད་པའོ།། །།དེ་ནས་ཡང་དག་བཤད་བྱ་སྟེ། །ཀླུ་ལ་གཏད་པའི་ལས་བྱ་ན། ་༑ག་བུ་ལ་ནི་སྦལ་པའི་གཟུགས། །རྒྱབ་ནག་ལྟོ་སེར་བྱས་ནས་སུ། །ལྟོ་བར་དགྲ་བོའི་མིང་རུས་བྲི། །བཅུག་གམ་བྲིས་ནས་བསྙེན་པའི་སྔགས། །ཨོ་པདྨ་ནི་ཧཱུཾ༷་ཛ། བྱེ་བ་ལ་སོགས་གདོན་པར་བྱ། །རྟགས་རྣམས་བྱུང་བར་གྱུར་པ་དང་། །གླང་དམར་རྭ་བཅུག་ཀླུ་གནས་པར། །སྔོན་དམར་བཅིངས་ལ་སྔགས་འདི་བཟླས། །ཨོ་ནཱ་ག་རྭ་ཛ་བ་སུ་ཀྲི་ཛ། ཞེས། དགུག་པའི་སླད་དུ་གོང་མིང་སྦྱར། །རིགས་བཞིན་ཀླུ་ཡི་མིང་ནས་བོད། །བོད་ལ་གཏད་པའི་བསམ་པ་བྱ། །རྭའམ་ཁ་རུ་གང་ཤེས་གཏད། །རྡོ་རྗེ་སྲིན་པོའི་རྒྱུད་ལས། ཀླུ་ལ་གཏད་པའི་ལེའུ་སྟེ་བཅུ་དགུ་པའོ།། །།དེ་ནས་ཡང་དག་བཤད་བྱ་སྟེ། །མནན་པར་གྱུར་བའི་ལས་དག་ནི། །མཛོ་དྲེའུ་མ་ནུ་གཤེད་ཀྱི་ཐོད། །དེ་རུ་གཟས་པའི་གཟུགས་བཅུག་ལ། །སྲང་དང་ལམ་གྱི་བཞི་མདོར་མནན། །དམ་སྲི་བོས་ལ་གཏད་པར་བྱ། །རིའུ་རུལ་སྙིང་པའི་ནང་དུ་མནན། །འགོང་པོ་རྒྱལ་པོའི་འཁོར་ལ་གཏད། །བྲག་དང་ཆུ་འཐབ་ས་རུ་མནན། །བྲག་སྲིན་ཆུ་སྲིན་བོས་ཡ་གཏད། །དུར་ཁྲོད་ཆེན་པོའི་དཀྱིལ་དུ་མནན། །མ་མོ་འཁོར་བཅས་བོས་ལ་གཏད། །མཆོད་རྟེན་འོག་གམ་ཆོས་དཀོར་དབུས། །རྒྱལ་པོའི་དཀོར་སྲུངས་བོས་ལ་གཏད། །ཆུ་མིག་སྐུག་པ་བྲ་མའི་གླིང་། །ཀླུ་སྲིན་གདུག་པ་བོས་ལ་གཏད། །གྲོག་པོ་ཕུགས་རྡུགས་འཇིགས་པ་སྲ །གནོད་སྦྱིན་འཁོར་དང་བཅས་ལ་གཏད། །གནས་ཁང་སྟོང་པའི་མཎྜལ་འོག །ཁྲོ་བོ་བཅུ་ཡིས་གཟིར་ཏེ་མནན། །དེ་དག་གང་དང་གང་དུ་ཡང་། །སྐུ་མཆོག་གསང་སྔགས་འདི་ཡིས་མནན། །ཨོ་ནི་ཏོ་ཏ་ནི་ཏོ་ཏ་ཡ། ཧུ་རུ་ཧུ་བ་ཡན་ཤ་ནི་པྲ་ས་ན་པྲ་ས་ནི། ཏྲ་སེ་ཏྲ་ས་ཡ། བུ་གུ་ཏྲི། ཏ་ཏི་སྨྱོ་ཏི། ར་ཏྲ་ར་ཏྲ། ཤ་ཏ་ཤ་ད་ནེ་སྲུཧྭ། ཞལ་གཅིག་བསམ་གཏན་དྲན་བྱས་ལ། །སྦ་བར་གྱུར་པའི་དུས་དག་ཏུ། །ཧེ་དེ་བ་རུ་དྲ་རུ་དྲ་མ་ར་ཡ། མོ་ཧ་ར་ཙ་མྱ་ར་ཡ། ལ༷་ལ༷་སྟ་པ་ནན། རྡོ་རྗེ་སྲིན་པོའི་རྒྱུད་ལས། མནན་པའི་ལེའུ་སྟེ་ཉི་ཤུ་པའོ།། །།དེ་ནས་རྡོ་རྗེ་ལས་ལ་སོགས་པའི་འཁོར་འདུས་པ་དེ་རྣམས་རྗེས་སུ་ཡི་རངས་ཏེ། ཞལ་ནས་གསུངས་པ་ལ་མངོན་པར་བསྟོད་དོ། །དེ་ནས་དཔལ་ཕྱག་ན་རྡོ་རྗེས་བཀའ་སྩལ་པ། ངས་ནི་རྡོ་རྗེ་སྲིན་པོའི་རྒྱུད་ཆེན་པོ་དངོས་གྲུབ་དམ་པ་བཤད་ཟིན་ནོ། །ཁྱེད་ལ་གཏད་དོ། །ཁྱེད་ཀྱིས་ཟུང་ཞིག །ཅེས་བཀའ་སྩལ་པ་དང་། རྡོ་རྗེ་ལས་ཀྱིས་སྤྱི་བོར་བླངས་སོ། །རྡོ་རྗེ་སྲིན་པོའི་རྒྱུད་ལས། གཏད་པའི་ལེའུ་སྟེ་ཉེར་གཅིག་པའོ།། །།རྡོ་རྗེ་སྲིན་པོའི་རྩ་བའི་རྒྱུད་རྫོགས་སོ།། །།ཨོ་རྒྱན་གྱི་མཁན་པོ་པདྨ་འབྱུང་གནས་རྡོ་རྗེ་ཐོད་འཕྲེང་རྩལ་གྱིས། ཆོས་འཁོར་དབུས་སུ་གཤེགས་ནས་བྱོན་པའི་དུས་སུ། ལོ་ཙ་བ་ཙནྟྲ་ཀུ་ཏྲས་ཆོས་འཁོར་ལྷ་སའི་གཙུག་ལག་ཁང་དུ་བསྒྱུར་བ་རྫོགས་སོ།། །། རྒྱ་གར་སྐད་དུ། མཉུ་ཤི་ཡ་མ་ར་གམ་རྭ་ཙཀྲ་ཏན་ཏྲ་ནཱ་ཤཱ། བོད་སྐད་དུ། འཇམ་དཔལ་གཤིན་རྗེ་དམར་པོ་ཤན་པ་སྲོག་གི་འཁོར་ལོའི་རྒྱུད་ཅེས་བྱ་བ། བཅོམ་ལྡན་