Ngb-pt-0562-vol-06-text
Front
Body
མཁན་ཁྲག་ཏུ་སྐྱུགས་ལ་དམྱལ་བར་ལྟུང་ངོ་།། །། རྒྱ་གར་སྐད་དུ། གུ་གྱེ་ད་པ་ཏི་ཏནྟྲ་ནཱ་མ །བོད་སྐད་དུ། གསང་བ་ཡང་ཁོལ་གྱི་རྒྱུད་ཅེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །མ་བྱུང་མ་སྐྱེས་སྔོན་རོལ་ན། །ཐོག་མའི་སངས་རྒྱས་འོད་མི་འགྱུར། །ཀུན་གྱི་འབྱུང་གནས་ཆེན་པོར་བཞུགས། །གསང་བ་ཡང་ཁོལ་ལས། །སངས་རྒྱས་སེམས་ཅན་གྱི་སྣང་བཞི་བསྟན་པའི་ལེའུ་སྟེ་དང་པོའོ།། །།བར་དུ་འཁྲུལ་པའི་རྐྱེན་བཞིས་འཁྲུལ། །ཐ་མ་སངས་རྒྱས་སེམས་ཅན་གཉིས། །ངོ་བོ་གཅིག་ལས་གཉིས་སུ་སྣང་། །གསང་བ་ཡང་ཁོལ་ལས །སངས་རྒྱས་སེམས་ཅན་རྒྱབ་གྱེས་ཚུལ་བསྟན་པའི་ལེའུ་སྟེ་གཉིས་པའོ།། །།དེ་ཡང་གྲོལ་བའི་ཐབས་གསུངས་པ། །སྦུབས་གསུམ་དག་ཏུ་བསྡུས་ཏེ་བསྟན། །བག་ཆགས་སྦུབས་དང་ཡེ་ཤེས་སྤུབས། །རིན་ཆེན་སྤུབས་དང་རྣམ་པ་གསུམ། །སྤུབས་གསུམ་དག་ལ་སྤྱན་ཀྱང་གསུམ། །ཡུལ་གསུམ་དགྲོལ་བའི་དགོངས་པ་གསུམ། །གསང་བ་ཡང་ཁོལ་ལས། །སྤུབས་གསུམ་མདོར་བསྟན་པའི་ལེའུ་སྟེ་གསུམ་པའོ།། །།ད་ལྟ་བག་ཆགས་སྤུབས་གནས་ཏེ། །ཙིསྟ་རིན་ཆེན་གཞལ་ཡས་ན། །རིག་པ་རྟོག་མེད་ཆོས་ཀྱི་སྐུ། །དེ་ཡི་འོད་ལས་ལོངས་སྐུ་སྟེ། །སྐུ་ནི་མཚན་དང་དཔེ་བྱད་དུ། །འོད་ལྔའི་ཀློང་ན་རྫོགས་པར་བཞུགས། །རྟགས་ཀྱི་ཡེ་ཤེས་སྤྲུལ་སྐུ་སྟེ། །དེ་ཡི་ཐུགས་རྗེའི་རྩལ་སྣང་བའོ། །དོན་གྱི་ཡེ་ཤེས་ལྔ་རུ་གནས། །དཔེ་དོན་རྟགས་ཀྱིས་གཏན་ལ་དབབ། །ཆོས་ལ་དབང་སྒྱུར་ཤེས་རབ་སྤྱན། །ཞབྲུལ་སྣང་དུ་མ་ཡུལ་དུ་སྣང་། །བློ་ལས་གྲོལ་བའི་དགོངས་པ་སྟེ། །སྒྲོ་འདོགས་གཅོད་པའི་དུས་ཡིན་ནོ། །མ་འདྲེས་ཡོངས་སུ་རྫོགས་པ་དང་། །གསལ་ལ་རྟོགས་པ་མེད་པ་དང་། །མཚན་མ་ཟིལ་གྱིས་ནོན་པའོ། །གསང་བ་ཡང་ཁོལ་ལས། །བག་ཆགས་ཀྱི་སྦུབས་གཏན་ལ་དབབ་པ་དང་བཅས་པའི་ལེའི་སྟེ་བཞི་པའོ།། །།བར་དུ་ཡེ་ཤེས་སྐུ་ཡིན་ཏེ། །འཇུག་དང་སྣང་དང་གྲོལ་རབ་འབྲིང་། །ཐ་མ་མཐར་ཕྱིན་གསུམ་ཞེས་བྱ། །ལྔ་ལྡན་རྫོགས་ལྡན་དགོངས་པ་སྟེ། །བཞི་བཅུ་རྩ་གཉིས་ལྷུན་རྫོགས་པས། །བྱ་བ་གྲུབ་པའི་ཡེ་ཤེས་ལྡན། །སངས་རྒྱས་ཆེ་བ་མཐར་རྫོགས་ནས། །མཚན་དཔེ་མངོན་ཤེས་དྲུག་དང་ལྡན། །རྣམ་རྟོག་མི་མངའ་ཅིར་ཡང་སལ་ལེ་མཁྱེན། །ཞལ་སྦྱོར་བར་ནས་འོད་འཕྲོ་བ། །ཡི་གེ་དྲུག་པ་རྡོ་རྗེའི་སྒྲ། །འོད་ཟེར་དཀར་དམར་འཁྱིལ་བ་ནི། །རིན་པོ་ཆེ་ཡི་སྲད་བུ་འམ།།གཞའ་ཚོན་ལྟ་བུ་འཁྲིལ་ཏེ་འཕྲོ། །ལས་དག་ལྷུམས་བཞུགས་སྤྲུལ་སྐུར་འགྱུར། །སྒྲ་འགྱུར་ཆོས་ཀྱི་འཁོར་ལོ་ཡིས། །ངན་སོང་ཞིང་དུ་ཡང་དག་སྒྲོལ། །ཡུལ་དུ་བཞི་བཅུ་རྩ་གཉིས་འགྲུབ། །སྤྱན་ནི་གོང་གི་མངོན་ཤེས་དྲུག །ལས་ལ་དབང་སྒྱུར་རྫུ་འཕྲུལ་ཅན། །འཁོར་བའི་མཐའ་ལ་གྲོལ་ཏེ་གནས། །གཉིས་སྣང་མ་འགགས་གཟུང་འཛིན་བྲལ། །གསང་བ་ཡང་ཁོལ་ལས །ཡེ་ཤེས་སྒ་མའི་སྦུབས་བསྟན་པའི་ལེའུ་སྟེ་ལྔ་པའོ།། །།ཐ་མ་རིན་ཆེན་སྦུབས་བསྟན་ཏེ། །དང་པོ་ཡེ་ཤེས་རླུང་སྟོབས་ཀྱིས། །གཙོ་བོ་མཉམ་ཉིད་དོན་ལ་སྦྱོར། །རིན་ཆེན་སྦུབས་སུ་ཤུགས་ཀྱིས་སྐྱོད། །འདེགས་བྱེད་སྟོབསཉྭ་ ཀྱོ་མཁའ་ལ་དཀྱིལ། །བསྟན་མ་སྟོབས་ཀྱི་མི་གཡོ་སྟེ། །འཁོར་རྣམས་གཙོ་བོ་དག་ལ་ཐིམ། །གཙོ་བོ་ལྔ་རྣི་རིག་པའི་ཀློང་། །རིན་ཆེན་སྦུབས་ན་བསྟན་པར་གནས། །འོད་འབར་སྐུ་ལྔ་སྤྲུལ་སྐུ་སྟེ། །སྤྱན་གསུམ་འོད་འབར་ལོངས་སྤྱོད་རྫོགས། །ཆོས་སྐུ་རང་གསལ་རྡོ་རྗེའི་ལུས། །རིག་པ་རང་ས་ཟིན་པའོ། །འབྱེད་མེད་གསལ་ཡེ་ཤེས་སྤྱ། །རང་སྣང་དག་པ་གནས་པའི་ཡུལ། །མཐའ་གྲོལ་ཆོས་ལས་འདས་པས་ནི། །རིན་ཆེན་སྦུབས་ཀྱི་མཚན་ཉིད་དོ། །དུམ་བུ་བཅུ་གཉིས་ཞེས་སུ་གྲགས། །གསང་བ་ཡང་ཁོལ་ལས། །རིན་པོ་ཆེ་གསང་བའི་སྦུབས་བསྟན་པའི་ལེའུ་སྟེ་དྲུག་པའོ།། །།དེ་དག་མཚོན་པའི་བླ་དགས་ཏེ། །སྦུབས་གསུམ་སྐུ་གསུམ་རང་ལ་གནས། །སྲིད་པ་གསུམ་ནི་བདེ་བའི་གཞལ་ཡས་ཁང་། །ཡུམ་གྱི་བྷ་ག་བདེ་ཀློང་གཅིག་ཏུ་འཁྱིལ། །སྣ་ཚོགས་ངོ་བོས་སྟོང་སྟེ་རང་བཞིན་རྣམ་པར་དག །བྱ་རྩོལ་མི་མངའ་སྐུ་གསུམ་རང་ལ་རྫོགས། །རྫོགས་པའི་དོན་ལ་བཙལ་དུ་ཡེ་ནས་མེད། །རྟོགས་པའི་དོན་ལ་སྒོམ་དུ་ཡེ་ནས་མེད། །གསང་བ་ཡང་ཁོལ་ལས། སྦུབས་གསུམ་གྱི་ལ་བཟླ་བ་བསྟན་པའི་ལེའུ་སྟེ་བདུན་པའོ།། །།ཀུན་ཏུ་བཟང་པོའི་ཐུགས་ནས་བརྒྱུད་པ་འདི། །སྐལ་བ་བཟང་པོ་རྣམས་ཀྱི་ཐུགས་ལ་ཞོག །སྐལ་མེད་སྣོད་ངན་རྣམས་ལ་འདི་མི་བསྟན། །བསྐལ་པ་དུམ་བུའི་རྒྱུད་གསང་བ་ཡང་ཁོ་ལ་རྫོགས་སོ།། །། ༄༅། རྒྱ་གར་སྐད་དུ། །གྱུ་ཡ་སྤྲུ་རྩ་ཏནྟྲ་ཨ་ཏ་ཡོ་ག་ཡོ་ག་ལྷུ་ཡ་སརྦ་རི་ཀ་ཏན་ཏྲ་རྭ་ཙ་ན་མ། །བོད་སྐད་དུ། གསང་བ་རྒྱ་མཚོའི་རྒྱུད་དམ་པའི་དམ་པ།