Ngb-pt-0466-vol-05-text
Front
Body
རྒྱ་གར་སྐད་དུ། མ་ཧྭ་ས་མ་ཡ་རྭ་ཙ་སརྦ་ཀ་ཏ་ཏནྟྲ། བོད་སྐད་དུ། དམ་ཚིག་ཆེན་པོའི་རྒྱལ་པོ་དམ་ཚིག་བཀོད་བའི་རྒྱུད། དཔལ་འདའ་བ་མེད་པའི་ཀུན་ཏུ་བཟང་པོ་ལ་ཕྱག་འཚལ་ལོ། །དེ་ནས་བཅོམ་ལྡན་དགྱེས་ཆེན་ལ། །རྡོ་རྗེ་སེམས་དཔས་འདི་སྐད་གསོལ། །རྣལ་འབྱོར་ཀུན་གྱི་རྩ་བ་མཆོག །དམ་ཚིག་ས་གཞི་བསྟན་པ་ལས། །ངེས་པར་གསུངས་པ་ཁྱད་པར་ཆེ། །ཧོ། ཨེ་མ་ཧོ་རབ་ཏུ་བློ་ལྡན་གྱིས། ངེས་པའི་ལུང་དུ་བསྟན་པ་ནི། །སྔ་རབས་འདས་པའི་སངས་རྒྱས་ཀྱང་། །དམ་ཚིག་འདི་ལ་བརྟེན་ཏེ་བྱུང་། །ད་ལྟར་བཞུགས་པའི་སངས་རྒྱས་ཀྱང་། །དམ་ཚིག་འདི་ལ་རབ་ཏུ་གནས། །སླད་ཀྱིས་འབྱོན་པའི་སངས་རྒྱས་ཀྱང་། །དམ་ཚིག་འདི་ལ་རབ་ཏུ་བསྒྲུབ། །དེ་ཕྱིར་ཀྱེ་ཀྱེ་བཅོམ་ལྡན་འདས། །དམ་ཚིག་རྩ་བ་བཤད་དུ་གསོལ། །དེ་སྐད་གསོལ་བའི་ཚིག་གསན་ནས། །མངོན་རྫོགས་རྒྱལ་པོས་བཀའ་སྩལ་པ། །རྡོ་རྗེ་སེམས་དཔའ་སེམས་དཔའ་ཆེ། །ལེགས་འོས་བུ་ལ་བསྟན་པར་བྱ། །དམ་ཚིག་རྩ་བ་འདི་དག་རྣམས། །ལེགས་པར་ཡིད་ཀྱིས་མཉན་པར་གྱིས། །འདི་ཡང་སྐུ་གསུང་ཐུགས་སུ་བསྟན། །སྐུ་ཡི་དམ་ཚིག་མ་གཡོས་པ། །གསུང་གི་དམ་ཚིག་མ་ཡེངས་བ། །ཐུགས་ཀྱི་དམ་ཚིག་མ་འགྱུར་བ། །སྐུ་ཡི་དམ་ཚིག་ཕ་མ་དང་། །ལུས་སྲོག་བསྐྱེད་དང་འཇིག་རྟེན་སྟོན། །མ་རིག་དབང་པོ་སྒོ་འདྲེན་པ། །མཁན་པོ་སློབ་དཔོན་རྡོ་རྗེ་མཆེད། །མན་ངག་རྒྱུད་ལུང་ངེས་དོན་སྟོན། །དུས་གསུམ་མི་འབྲལ་དམ་པའི་གྲོགས། །རྒྱལ་ཐེབ་ཀརྨ་ལས་ཀྱི་གིང་། །ལས་དང་བསྐོས་ང་མིག་མཐར་འབྱིན་པའི། །ངེས་པའི་རྣམ་གྲངས་འདི་དག་ལ། །ངན་སེམས་དབྱེ་སེམས་མི་བྱ་སྟེ། །ཀྱེའུ་ཆུ་རྒྱུ་དང་བརྙས་པ་དག །བྲེ་མོ་གཏམ་དུའང་ཟུར་མི་བྱའོ། །ཉམས་པ་ཕུང་བའི་རྒྱུ་ཡིན་པས། །ངག་གིས་དེ་ལྟར་བྱ་བ་མིན། །ལུས་ཀྱིས་བྱ་བའི་རིམ་པ་ཡང་། །བརྡེག་དང་བསྣུན་དང་བསད་པ་དང་། །གླང་པོ་ལུས་ཀྱིས་འགལ་བ་རྣམས། །དངོས་ཀྱི་བྱ་བ་ཅི་སྨོས་ཀྱིས། །རྩེད་མོའི་ལས་སུའང་བྱ་བ་མིན། །ཡིད་ཀྱི་བསྲུང་བའི་རིམ་པ་ཡང་། །བརྙས་དང་སྐུ་དང་ཕྲག་དོག་རྣམས། །སེ་གོལ་ཡུན་དུའང་བྱ་བ་དང་། །ཅུང་ཟད་ཡུན་དུ་བསམ་པ་མིན། །ཆོས་ཉིད་དབྱེ་བསྲིང་མེད་པ་དང་། །བྱང་ཆུབ་སེམས་སུ་གཅིག་པས་ན། །ཐམས་ཅད་ཀུན་ཏུ་བསྲུང་བ་དང་། །ཡུན་དུ་འདི་ལས་འདའ་མི་བྱའོ། །དེས་ནི་ཐར་པ་ཆེན་པོ་ཐོབ། །ཀུན་ཏུ་བཟང་པོར་གདོན་མི་ཟའོ། །གང་ཞིག་འདི་དག་མི་བསྲུང་ཞིང་། །ཉམས་པར་བྱེད་པ་གང་ཡིན་པ། །ས་བོན་མེ་ཡིས་ཚིག་པ་བཞིན། །འབྲས་བུ་མེད་ཅིང་ཉམས་པར་འགྱུར། །གསུང་གི་དམ་ཚིག་ཆོས་ཉིད་དང་། །སྔགས་དང་ཕྱག་རྒྱ་ལ་སོགས་པ། །རྒྱུན་མི་གཅད་པར་བཟླས་པ་སྟེ། །རབ་ཀྱིས་ཆུ་བོའིརྒྱུནབཞིནདུ། །མིདྲགམི་བུམ་མི་ཞན་པར། །དུས་གསུམ་དུ་ནི་རྒྱུན་མེད་པར། །མ་ཡེངས་པ་ཡི་ངག་གིས་བཟླས། །འབྲིང་གིས་དུས་བཞི་གནམ་སྟོང་དང་། །ཁྱད་པར་ཉ་དང་ཚེས་བརྒྱད་རྣམས། །དུས་ལ་བབ་པར་རྒྱུན་མེད་བཟླས། །ཐ་མས་ཞག་གྲངས་བདུན་རྣམས་སམ། །ཁྲི་འབུམ་བརྒྱ་སྟོང་གར་ནུས་ང་ར། ་ཐ་ར་ཉི་ཤུ་རྩ་གཅིག་གམ། །ཡང་ན་བདུན་གྱི་བར་རྣམས་སུ། །དེ་ཚེ་གཡེང་བས་བར་མི་གཅད། །དེ་ཡང་ལུས་ངག་ཡིད་གསུམ་གྱིས། །དེ་ཚེ་བར་ཆད་མེད་པར་བཟླས། །དེ་རྣམས་མ་ཉམས་གཙོར་གཟུང་ན། །སངས་རྒྱས་བྱང་ཆུབ་གདོན་མི་ཟ། །འདི་རྣམས་ཉམས་ན་དོན་མེད་པས། །དེ་ནི་ཕྱལ་བ་མྱ་ངན་སྣོན། །དངོས་གྲུབ་འབྲས་བུ་ཡོངས་མི་འགྲུབ། །ཐུགས་ཀྱི་དམ་ཚིག་སྡེ་སྣོད་དང་། །ཀུན་བཟང་བཀའ་དང་ངེས་པའི་དོན། །གསང་བ་ཆེན་པོ་བཅུ་པོ་དང་། །མན་ངག་ཆེན་པོ་གཞན་ལ་མི་སྤེལ་བ། །དེ་ཡང་ངག་ལུས་སེམས་རྣམས་ཏེ། །ལུས་ཀྱི་སྐྱོད་པ་བརླང་གསང་ཞིང་། །ངག་གིས་རྡོ་རྗེ་ལྕེ་ཡོད་ཀྱང་། །བརྗོད་པ་དག་ཏུ་བྱ་བ་མིན། །དབང་བསྐུར་གནས་པ་གང་ཐོབ་ནས། །སྣོད་དང་ལྡན་པའི་སྐྱེས་བུ་ལ། །ཐབས་ཀྱིས་སྨྲ་བར་གང་བྱེད་པ། །དེ་ནི་བསྲུང་བའི་རིམ་པ་སྟེ། །དངོས་གྲུབ་འབྲས་བུ་ཆུད་མི་ཟ། །འདི་དག་ཉམས་ན་བཀའ་འཆལ་ཞིང་། །སངས་རྒྱས་བྱང་ཆུབ་སྣོད་མིན་པས། །དེ་ཚེ་འབྲས་བུ་མི་འཐོབ་བོ། །དམ་ཚིག་ཐམས་ཅད་ཀྱི་རྒྱལ་པོ་ས་མ་ཡ་བཀོད་པའི་རྒྱུད་ལས། དམ་ཚིག་གསུམ་གྱི་རྩ་བ་བསྟན་པའི་ལེའུ་སྟེ་དང་པོའོ།། །།རྡོ་རྗེ་སེམས་དཔའ་གཞན་ཡང་དེ་བསྲུང་བའི་རིམ་པ་ནི། གྲངས་མེད་བརྗོད་ཀྱིས་མི་ལང་བ་འདི་ཡིད་ལ་ཟུང་ཞིག །སྐུའི་དམ་ཚིག་བསྲུང་བ་ཡང་ཡི་དམ་གྱི་ལྷ་དང་། རྡོརྗེ་སློབ་དཔོན་དང་། དུས་གསུམ་གྱི་ཕ་མ་དང།མཆེད་དང་ལྕམ་དྲལ་དང་། གསང་བའི་དོན་སྦྱོད་པ་མཐའ་དག་ལ་བསྲུང་བ་སྟེ། དེ་ལ་ཡི་དམ་གྱི་ལྷ་ལ་བསྲུང་བ་ནི། ཡི་དམ་གྱི་ལྷ་དང་པོར་བསྒོམ་པར་ནོད་ནས་རབ་ཀྱིས་ཉིན་དང་མཚན་མེད་པར་ཡི་དམ་གྱི་ལྷའི་ཏིང་ངེ་འཛིན་དུ་གནས་ཤིང་། སྔགས་བརྗོད་ཅིང་དམ་བཅས་པ་ལས་མི་འདའ་བར་བྱ་བ་དང་། འབྲིང་གིས་ཉིན་མཚན་ཐུན་དུ་དེ་བཞིན་དུ་བྱ་བ་དང་། ཐ་མས་ཀྱང་ལོ་དང་ཟླ་བ་ལ་དམ་བཅས་པ་ལས་མི་འདའ་བར་བྱ་བ་དང་། ཐ་ན་ཡང་མིང་ཙམ་ཡང་ཡིད་ལ་མི་བརྗེད་པརབྱ་བ་དང་། ཕྱི་དང་ནང་གི་མཆོད་པས་དུས་ཐམས་ཅད་དུ་ཅི་ནུས་སུ་མཆོད་པར་བྱ་བ་དང་། ཐ་ན་ནང་ནུབ་ཀྱི་འཚོ་བའི་ཡོ་བྱད་ཅི་ཡོད་པས་ཀྱང་མཆོད་པ་དང་། ཉེས་བྱས་དང་ཉམས་ཆག་ཡོད་ན་ཡང་ཡིད་དམ་གྱི་ལྷ་དེ་མདུན་དུ་ཟླ་བའི་དཀྱིལ་འཁོར་གྱི་སྟེང་དུ་བཞུགས་སུ་གསོལ་ལ་འགལ་འཁྲུལ་མི་འཆབ་པར་བཤགས་པ་དང་། སྐུ་གསུང་ཐུགས་ཀྱི་དངོས་གྲུབ་ཡིད་ལ་ཇི་ལྟར་འདོད་པརནོད་པར་བྱའོ། །དེ་བཞིན་དུ་རྡོ་རྗེ་སློབ་དཔོན་རྣམ་པ་ལྔ་དང་མཁྱེན་པ་ཅན་མཐའ་དག་དང་། ཐ་ན་ཚིག་གི་ལེའུ་གསུམ་སྟོན་པ་ཡན་ཆད་ལ་རྣལ་འབྱོར་པའི་ལོངས་སྤྱོད་ཅི་ཡོད་པས་མཆོད་ཅིང་དབུལ་བ་ཅི་སྨོས་ཀྱིས། ཐ་ན་ལུས་ཀྱི་ཕྱག་གསུམ་དང་། ཡིད་ཀྱི་གདུང་གསུམ་དང་། ངག་གི་ཚིག་གསུམ་དུ་བཅསཔས་དུས་ཐམསཅད་དུ་དབུལ་བ་དང་། མཚན་ནས་བརྗོད་ཅིང་མཆོད་པ་དང་། བཀའ་ལས་མི་འདའབརབྱ་ཞིང་ངེས་པའི་དོན་ཟབ་མོ་ཞུ་བར་བྱའོ། །དུས་གསུམ་ཀྱི་ཕ་མ་ནི་ལུས་ལས་བཅད་ནས་འཇིག་རྟེན་གསལ་བར་སྟོན་པའི་དྲིན་ཅན་ཡིན་ཏེ། ཕ་མ་རྣམ་པ་ལྔར་བསྟན་པ་ཀུན་ལ་ཡང་དངོས་སུ་ཡོད་པ་ལ་བཀུར་བ་དང་། འདས་ཤིང་མེད་པ་ལ་སྨོན་ལམསྣཚོགས་གདབ་པ་དང་། ཡིད་ཀྱིས་མཆོད་པས་མཆོད་པ་སྔ་མ་བཞིན་ནོ། །མཆེད་ལྕམ་དྲལ་ལྔ་ལ་ཡང་གོང་མ་བཞིན་ལས་ཁྱད་པར་བརྩེཞིང་གདུང་བས་གཞི་བཟུང་། མི་འབྲལ་ཞིང་ལོག་པའི་ལམ་བཀག་ཅིང་། ལེགས་པ་ལ་གདབ་པ་དང་། དགེ་བ་ལ་བསྐུལ་ཞིང་མི་འབྲལ་བའི་སྨོན་ལམ་རྒྱས་པ་དང་། མཆོདཔ་ཁྱད་པར་གོང་་མ་བཞིན་ནོ། །དེ་རྣམས་མཆོད་པ་ཡང་སྤྱིར་སངས་རྒྱས་ཐམས་ཅདལ་མཆོད་པ་ཅི་ཕུལཀྱང་། དང་པོ་ཉེ་བར་ལེན་པའི་ལྷ་བཞི་མ་མཆོད་ན། ཕྱོགས་བཅུ་དུས་གསུམ་གྱི་སངས་རྒྱས་གང་ལ་ཕུལ་ཡང་མཉེས་པར་མི་འགྱུར་ཞིང་། བཞེསཔར་མི་འགྱུར་ཏེ། དེ་ཅིའི་ཕྱིར་ཞེ་ན། ཉེ་བར་ལེན་པའི་ལྷབཞིའི་གོང་ན་སངས་རྒྱས་གཞན་མེད་ཅིང་། སངས་རྒྱས་ཐམས་ཅད་ཉེ་བར་ལེན་པའི་ལྷ་བཞི་ལ་བརྟེན་ནས་སངས་རྒྱས་ཏེ། དེ་ཡང་གང་ཞེ་ན། བསོད་ནམས་ཉེ་བར་ལེན་པའི་ལྷ་འཕགས་པ་དཀོན་མཆོག་གསུམ་དང་། དངོས་གྲུབ་ཉེ་བར་ལེན་པའི་ལྷ་ཡི་དམ་གྱི་ལྷ་དང་། ཡང་དག་པའི་འབྲས་བུ་ཉེ་བར་ལེན་པའི་ལྷ་རྡོ་རྗེ་སློབ་དཔོན་དང་། མཆེད་ལྕམ་དྲལ་དང་། ལུས་ཉེ་བར་ལེན་པའི་ལྷ་དུས་གསུམ་གྱི་ཕ་མའོ། །དེ་ཅིའི་ཕྱིར་ལྷ་ཞེས་བྱ་ཞེ་ན། ཐམས་ཅད་དུ་ལེགས་པ་སྦྱིན་པ་ལ་ནི་ལྷ་ཞེས་བྱ་ལ། བར་དུ་གཅོད་པ་ཐམས་ཅད་བདུད་ཀྱི་རང་བཞིན་པས། འདི་ནི་ལྷ་ཡི་ཡང་ལྷ་སྟེ།གཉན་ཞིང་བྱིན་ཆེ་བ་ལས་སངས་རྒྱས་ཐམས་ཅད་ཀྱིས་ངང་ལ་འདི་མཆོད་པར་བསྔགས་ཏེ། བདག་གིས་ངང་ལ་མཆོད་པར་བྱ་སྟེ། དོན་དེ་བཞིན་དུ་དམ་ཚིག་ལས་མི་འདའ་བར་བྱས་ན་རྩ་བའི་དམ་ཚིག་མ་ཉམས་ན་དམ་ཚིག་ཐམས་ཅད་ཀྱང་མི་ཉམས་ལ། ཉམས་ན་ཡང་དེ་བཞིན་དང་དུ་བླངས་ན་སྐོང་ངེས་ཏེ། ཀུན་ཏུ་བཟང་པོ་དབྱེ་བ་མེད་པའི་སར་གྱུར་པ། གཞན་རྟོགས་ཤིང་བསྒྲུབས་པར་མ་གྲུབ་ཀྱང་། སངས་རྒྱས་ཐམས་ཅད་ཀྱི་བདག་ཉིད་པའོ། ཞེས་ཀུན་ཏུ་བཟང་པོས་གསུངས་སོ། །གསང་བའི་དོན་སྤྱོད་པ་མཐའ་དག་ནི། འཇིག་རྟེན་གྱི་ཁམས་གང་ན་སྔགས་ཀྱི་དོན་སྤྱོད་པ་མཐའ་དག་དམ་ཚིག་གཉེན་པོ་ལ་གཅིག་ཏུ་གནས་ཤིང་།གང་ཉམས་ན་ཡང་དེ་སྐོངས་པར་གྱུར་ཅིག་བར་སྤྱིར་སྨོན་ལམ་འདེབས་པ་དང་། དང་པོ་འཇུག་པའི་སྒོ་དང་། བར་དུ་སྒྲུབ་པའི་ཐབས་དང་། ཐ་མ་གྲུབ་པའི་འབྲས་བུ་ཐམས་ཅད་གཅིག་པས། ཐམས་ཅད་ལ་བདག་ཉིད་ཀྱི་བུ་དངའདྲ་བར་ཉེས་ན་བཅོས་པ་དང་། ལེགས་པའི་ལམ་བསྟན་པ་དང་། གསང་བའི་དོན་ཟབ་པར་སྤྱོད་ཅིང་བར་ཆད་མེད་པར་གྲུབ་ཅིང་མཐར་ཕྱིན་པར་གྱུར་ཅིག་པར་སྨོན་ལམ་གདབ་པ་དང་། ཀུན་ལ་ཉམས་ན་མི་རུང་ཞིང་ཕུང་བར་འགྱུར་བ་དང་། ཉེས་ལེགསཀྱི་སྐྱོན་ཡོན་དང་གདམས་ངག་ལེགས་པར་བསྟན་པ་ལ་སོགས་པ་འདི་ལས་འབྱུང་བ་བཞིན་མ་ནོར་བར་བྱེད་པ་ནི། སྐུའི་དམ་ཚིག་བསྲུང་བའི་རིམ་པ་སྟེརྡོ་རྗེ་སེམས་དཔའ་ཡང་དག་པའོ། །གསུང་གི་དམ་ཚིག་བསྲུང་བའི་རིམ་པ་ཡང་། སྐྱེས་བུ་བརྩོན་པ་རབ་དང་ལྡན་པས་སྒོམ་སྒྲུབ་ཀྱི་འཕྲིན་ལས་ཐམས་ཅད་ལ་བརྩོན་པ་མགོ་ལ་མེ་ཤོར་བ་བཞིན་བྱ་བ་དང་། ཡུན་བསྲིང་བ་ཆུ་བོ་ཆེན་པོའི་རྒྱུན་བཞིན་དུ་ངལ་དུབ་དང་སྐྱོ་ངལ་མེད་པར་བྱ་བ་དང། དེ་ཡང་ལུང་ངག་ཡིད་ཀྱིས་སྐྱེས་བུ་དར་མའི་གཞུ་བརྡུངས་བ་བཞིན་བཏང་ངེ་འབད་ནས་བསྲུང་བའི་རིམ་པའོ། །དེ་ཡང་ངག་གིས་བསྲུང་བར་བྱ་བ་སྟེ། མི་ཉམས་པ་རྣམ་གསུམ་ལ། ལྷ་ཆོས་དང་། མི་ཆོས་དང་། བཀའ་ཆོས་དང་གསུམ་མོ། །ལྷ་ཆོས་ནི་སྔགས་དང་། ཕྱག་རྒྱ་དང་། འཕྲིན་ལས་ཀྱི་གོ་རིམས་དང་། ཏིང་ངེ་འཛིན་རྣམས་དང་པོར་རྡོ་རྗེསློབ་དཔོན་ཁུངས་ཅན་མ་ཡིན་པརགར་སོང་སོང་དུ་རས་ཆོད་དང་། བཀའ་རྐུན་དང་། སྒྱུ་ཐབས་དང་། དད་པ་མེད་པའི་ནན་ཆེ་བ་དང་། དབང་མ་ཐོབ་པར་གཞན་ལ་སྤྲོ་བ་དང་། དོན་མ་ཕྱིན་པར་ང་མཁས་ལ་སོགས་པ་བཀའ་དང་འགལ་ཞིང་བདག་ཉིད་ལ་གནོད་ཅིང་འཕུང་བར་བྱ་བ་མ་ཡིན་ནོ། །མི་ཆོས་ཀྱིས་བསྲུངས་པ་ནི། བཀའ་གསང་གཅིག་ཏུ་སྤྱོད་ཅིང་མཐུན་པ་ལྟ་ཅི་སྨོས་ཀྱི། སངས་རྒྱས་ཀྱི་བསྟན་པ་ལ་གནས་པའི་རྒྱུ་འབྲས་ཀྱི་ཐེག་པ་ལ་ཞུགས་པ་ཐམས་ཅད་ལ། མཐུན་པ་ལ་དབྱེན་མི་བསྐྱལ་ལ། མི་མཐུན་པ་ལ་རིས་མི་གཟུང་། རྩོད་པ་ཅན་ལ་ཟུར་མི་གསོ། འགལ་བ་རྣམས་ལ་བྱམས་པ་མི་སྒོམ། དགོངས་པ་ཅན་ལ་དཔྱས་མི་གདགས། དགེ་བ་ཅན་ལ་ཐུགས་མི་དཀྲུག་ཉེས་པར་སྤྱོད་པ་ལ་ལེགས་པར་མི་བརྗོད། གཞུང་ངན་པ་ལ་མི་ཆོས་ལྷ་ཆོས་ཀྱི་བྲོ་དམ་པ་གདབ །གཞན་གྱིས་མ་སྨྲས་ཤིང་ཉེས་པ་མེད་པ་ལ་ཉེས་སམ་སྨྲས་ཞེས་མི་བརྫོད་པའོ། །བཀའ་ཆོས་ཆོས་ཀྱིས་བསྲུང་བ་ནི། གསང་བའི་ལས་དང་། གསང་བའི་ཚིག་དང་། གསང་བའི་སྤྱོད་པ་ངག་གིས་གཞན་ལ་མི་སྨྲ་བ་དང་། སློབ་དཔོན་དང་མཆེད་ཀྱིས་གཉེར་དུ་གཏད་པ་གཞན་ལ་མི་སྨྲ་བ་དང་། དང་པོར་སློབ་དཔོན་གྱིས་ཇི་ལྟར་དམ་ཕོག་པ་ལས་མི་འགལ་བར་བྱ་བ་དང་། ལུང་པ་གཅིག་པའི་ཕྱོགས་རྣམས་ཀྱིས་གཅིག་སྤྲང་གཅིག་གིས་བྱས་ལ་མ་ཉམས་པར་བྱ་བ་དང་། ཉེས་པ་དང་འགལའཁྲུལ་།རནགསངཞིང་མི་བཅབ་པར་གནོང་འགྱོད་དང་ཆས་པས་ཉེས་པ་བཅོས་ཤིང་ཉམ་པ་བསྐང་པ་དང་། ངག་གིས་ཅི་སྨྲ་ཡང་ཆོས་དང་མཐུན་པར་སྨྲ་བ་ལས་མ་རྟོགས་པར་འགལ་བ་ཅན་དུ་མི་སྨྲ་བ་དང་། དེ་བཞིན་གཤེགས་པའི་བཀའ་མཐའ་དག་ལས་འབྱུང་བ་ལ་མི་ཉམས་པར་སྨྲ་བ་ནི། ཡང་དག་པར་རྫོགས་པའི་སངས་རྒྱས་ཀྱི་ཚིག་གི་དོན་ལས་མ་གོལ་བའོ། །ཐུགས་ཀྱི་དམ་ཚིག་བསྲུང་བའི་རིམ་པ་ཡང་གསང་བའི་དོན་མཐའ་དག་ལས་མི་ཉམས་པ་ཡང་ཡིན་ན། ཁྱད་པར་དུ་གསང་བའི་སྤྱོད་པ་གླང་པོ་ཐམས་ཅད་དམ་མེད་པ་དང་། མ་འདྲེས་པ་ལྟ་ཅི་སྨོས་ཀྱི། འདྲེས་པ་རྣམས་ལ་ཡང་ནན་ཏན་དང་ཆས་པར་བྱ་བ་དང་། དེ་བཞིན་དུ་རྫས་དང་། ལག་ཆ་དང་། དཀྱིལ་འཁོར་ལ་སོགས་པ་ཡང་དེ་དང་འཐུན་པར་བྱ་བ་དང་། ཟབ་མོ་དང་། ཏནྟྲའི་དོན་རྣམས་སྒྲུན་དུ་རེ་ཞིང་གཅམ་ལ་འཕྱར་བས།ཉན་ཐོས་དང་ལྟ་བ་དམན་ཞིང་སྣོད་མ་ཡིན་པ་རྣམས་ལ་མིང་ཙམ་ཡང་ཆ་མེད་པར་བྱ་རྒྱུ་ལ། སྨྲ་ཞིང་སྟོན་ཅིང་ཆ་རེ་རེ་ནས་ངོམས་པར་བྱེད་པ་རྣམས་ནི་བཀའ་ཆད་ཀྱི་གནས་ཡིན་པས་མ་གཏོགས། ལོ་དང་ཟླ་བས་སྣོད་བཅུད་བརྟགས་ནས་སྟོན་པར་བྱེད་པ་ནི། བསྲུང་བའི་རིམ་པའོ། །འཕྱར་པོས་གསང་མི་ཐུབ་པས་བརྟེན་ཞིང་ངེས་འབྱུང་ཆེ་བའི་འཁོར་བཙལ་བ་དང་། ལེ་ལོས་མཐར་མི་ཕྱིན་པས་བརྩོན་འགྲུས་ཀྱིས་གཞི་གཟུང་བ་དང་། མཚན་མ་ངན་པས་ཉམས་པར་འགྱུར་བས་རང་བཞིན་བཟང་པོ་ལས་ཟླ་བཙལ་བ་དང་། ཀུན་གྱི་ཐུན་མོངས་མ་ཡིན་པས་རིགས་རྒྱུད་བཟང་བ་ལས་གྲོགས་བསྡུ་བ་དང་། ཐུགས་རྗེའི་རྒྱུན་ཐག་རིང་བས་ངང་རིང་ཞིང་དད་པ་ཆེ་བར་བྱ་བ་དང་། སེམས་ཅན་དར་སྐད་ཐུང་བས་བཀའ་མི་སུན་པར་བྱ་བའི་དོན་དགྲོལ་བ་དང་། དམ་ལས་ཟློག་པ་འབྱུང་བས་ཐབས་གླང་པོ་མི་བསྟན་པ་དང་། ཚུལ་སྙོམས་ཞིང་ཉམས་གྲོད་ལེན་པ་འབྱུང་སྲིད་པས་བཀའ་བཙལ་ལེགས་པར་བྱ་བ་དང་། རས་ཆོད་དང་གཟུ་ལུམས་ཅན་གྱི་དོན་དུ་གསང་སྔགས་མཉེན་ཞིང་ཉེན་ཆེ་བར་བསྟན་པ་ནི། ཐུགས་ཀྱི་དམ་ཚིག་བསྲུང་བའི་རིམ་པའོ། །གཞན་ཡང་སེམས་དཔའ་ཆེན་པོ་སྐུ་གསུང་ཐུགས་ཀྱི་དམ་ཚིག་ལ་གྲངས་བརྗོད་ཀྱིས་མི་ལང་ཡང་། སྤྱིར་སྐུའི་དམ་ཚིག་ལུས་ཀྱིས་མི་ཉམས་པར་བྱ། གསུང་གི་དམ་ཚིག་ངག་གིས་མི་ཉམས་པར་བརྗོད། ཐུགས་ཀྱི་དམ་ཚིག་སེམས་ཀྱིས་མི་བརྗེད་པར་གཟུང་བ་ནི། བསྲུང་བའི་རིམ་པའོ། །དམ་ཚིག་ཐམས་ཅད་ཀྱི་རྒྱལ་པོ་དམ་ཚིག་བཀོད་པའི་རྒྱུད་ལས། སྐུ་གསུང་ཐུགས་ཀྱི་རྩ་བ་བསྲུང་པའི་རིམ་པའི་ལེའུ་སྟེ་གཉིས་པའོ།། །།རྡོ་རྗེ་སེམས་དཔའ་གཞན་ཡང་དམ་ཚིག་འདི་དག་ཉམས་པའི་སྔ་རྟགས་ནི། སྐུའི་དམ་ཚིག་ཉམས་པའི་སྔ་རྟགས་ནི། འཇིག་རྟེན་གྱི་ཁམས་འདིར་ཡང་མཛེ་དང་། ཤུ་བ་དང་། འབྲུམ་བུ་ལ་སོགས་པ་ནད་ངན་རྣམ་པ་སྣ་ཚོགས་བྱུང་ནས། སྐྱེ་བོ་ཡོངས་ཀྱིས་སྤངས་པ་དང་། ཉེ་དྲུང་ལ་སོགས་པ་རྣམས་དང་འགྲོགས་ཤིང་རྩེ་བའི་དབང་མེད་དེ། མི་ཡོངས་ཀྱིས་སྨད་པར་འགྱུར། དེའི་ཚེ་དུས་མ་ཡིན་པར་འཆི་ཞིང་། ཤི་ནས་ཀྱང་སེམས་ཅན་དམྱལ་བ་ཞེས་བྱ་བའི་ནང་ནས་ཀྱང་། གཏིང་ཁུང་རྡོ་རྗེ་དམྱལ་བ་ཞེས་བྱ་བ་ཤིན་ཏུ་དམྱལ་བ་གང་གིས་ཀྱང་དེ་ལ་ནི་སྡུག་བསྔལ་སྡོ་བར་དཀའ་ལ། དེ་ལ་ནི་ཚེའི་ཚད་ཀྱང་མེད་དེ་ཐམས་ཅད་དུ་འཐོན་མི་སྲིད་པའི་ཕྱིར་རོ། །རྡོ་རྗེ་སེམས་དཔའ་གསུང་གི་དམ་ཚིག་ཉམས་པའི་སྔ་རྟགས་ནི། འཇིག་རྟེན་གྱི་ཁམས་འདིར་ཡང་། བགེགས་སྟོང་ཕྲག་བརྒྱད་ཅུས་གླགས་འཚོལ་བ་དང་། ནད་བཞི་བརྒྱ་རྩ་བཞིས་སྐབས་འཚོལ་བ་དང་། ཡེ་འགྲོགས་སུམ་བརྒྱ་དྲུག་ཅུས་བར་དུ་གཅོད་པ་དང་། ལྐུགས་ཤིང་དབང་པོ་རྨོངས་པ་ལ་སོགས་པའི་ནད་སྣ་ཚོགས་བྱུང་ནས། གསང་བའི་བཀའ་ནུབ་པ་དང་། གང་ཟག་རྣལ་འབྱོར་པ་སྤྱིད་ལུག་ནས། དེའི་ཚེ་བར་ཆོད་ཀྱི་བགེགས་ཀྱིས་གློ་བུར་དུ་འཆི་ཞིང་། ཤི་ནས་ཀྱང་དམྱལ་བ་དེའི་གནས་སུ་ཡང་གོང་མ་བཞིན་དུ་སྐྱེ་བར་འགྱུར་རོ། །རྡོ་རྗེ་སེམས་དཔའ་ཐུགས་ཀྱི་དམ་ཚིག་ཉམས་པའི་སྔ་རྟགས་ནི། འཇིག་རྟེན་གྱི་ཁམས་འདིར་ཡང་མཐུ་དང་རྫུ་འཕྲུལ་ཆུང་ཞིང་། སྨྱོ་བ་དང་། འབོག་པ་དང་། བརླམ་པ་དང་། འཆལ་ཞིང་ཉམས་པ་དང་། དབང་པོ་མི་གསལ་ཞིང་མིག་ལོང་པ་དང་། རྣ་བ་འོན་པ་དང་། ལྐུགས་པ་ལ་སོགས་པ་བྱུང་ནས། མི་ནག་མང་པོས་འཕྱས་པ་དང་། མུ་སྟེགས་དང་ལོག་པའི་ཕྱོགས་ཀྱིས་ཡ་ཀ་འདོགས་པ་དང་། ཉན་ཐོས་ལ་སོགས་པ་ཐེག་པ་འོག་མ་སྐུར་བ་འདེབས་ཤིང་། བཀའ་འདི་དག་སུན་བྱུང་བར་གྱུར་ནས། དེའི་ཚེ་འཕྲལ་དུ་འཆི་ཞིང་། ཤི་ནས་ཀྱང་ཡང་སེམས་ཅན་དམྱལ་བ་ལ་སོགས་པ་དེ་རྣམས་སུ་སྐྱེའོ། །དེ་རྣམས་སུ་སྐྱེས་པའི་ཚེ། དེ་ལ་ཚེའི་ཚད་མེད་པས། འཛམ་བུ་གླིང་འདི་དག་འཕོ་ཞིང་འཇིག་ན། གླིང་གཞན་ན་རྡོ་རྗེ་དམྱལ་བ་ཡོད་པ་དེར་ཡུན་ཅུང་ཟད་ཙམ་ཡང་མ་ལོན་པར་ཕྱིན་པར་འགྱུར་རོ། །དེ་བཞིན་དུ་བསྐལ་པ་ཐེར་འབུམ་དུ་ལས་ཀྱི་དབང་གིས་འཁོར་རོ། །དེས་ནི་ན་བ་དང་ཚ་བའི་སྨྲེང་འདོན་པར་མི་ནུས་ཏེ། ཤིན་ཏུ་འགྱོད་པ་དྲག་པོ་སྐྱེས་ན་བསྐལ་པར་རེ་ལ་ན་ཚའི་སྒྲ་ཕོག་རེ་ཅིག་འབྱིན་པར་ནུས་སོ། །དམ་ཚིག་ཐམས་ཅད་ཀྱི་རྒྱལ་པོ་ས་མ་ཡ་བཀོད་པའི་རྒྱུད་ལས། རྩ་བའི་དམ་ཚིག་ཉམས་པའི་སྔ་རྟགས་བསྟན་པའི་ལེའུ་སྟེ་གསུམ་པའོ།། །།རྡོ་རྗེ་སེམས་དཔའ་གཞན་ཡང་ཡན་ལག་གི་དམ་ཚིག་བསྲུང་བ་འདི་ཡིད་ལ་ཟུང་ཞིག །སྤྱད་པར་བྱ་བའི་དམ་ཚིག་ལྔ་དང་། མི་སྤང་བའི་དམ་ཚིག་ལྔ་དང་། དང་དུ་བླང་བའི་དམ་ཚིག་ལྔ་དང་། ཤེས་པར་བྱ་བའི་དམ་ཚིག་ལྔ་དང་། གྲུབ་པར་བྱ་བའི་དམ་ཚིག་ལྔ་ལ་སོགས་པའི་ས་མ་ཡ་འབུམ་སྡེའི་བསྲུང་བའི་རིམ་པ་ནི། ཇི་སྙེད་དུ་བརྗོད་ཀྱང་བརྗོད་པའི་མཐའ་ལས་འདས་ཏེ། ཆུ་ཐམས་ཅད་ཀྱི་ཐིགས་པ་ནས་བགྲང་བར་ནུས་ཀྱིས། དམ་ཚིག་གི་གྲངས་འདི་དག་བརྗོད་པར་དཀའ་སྟེ། བསྐལ་བ་དཔག་ཏུ་མེད་པར་བསྟན་ཀྱང་མཐའ་མེད་དེ། དེ་དག་ལས་རྣལ་འབྱོར་སྐལ་པ་དང་ལྡན་པ་རྣམས་ཀྱིས་ངེས་པར་བསྲུང་བ་ནི་འདི་དག་གོ །རྣལ་འབྱོར་སྔགས་ཀྱི་སྤྱོད་པ་དག །ཆོས་མ་མཐོང་བ་ཅི་སྨོས་ཀྱི། །དམ་མ་འདྲེས་པ་རྣམས་ལ་ཡང་ ཟུར་ཡང་བསྟན་པར་མི་བྱ་ཞིང་། དངོས་སུ་བསྟན་པ་ཅི་སྨོས་ཀྱི། །ཚིག་གི་ཟུར་དུའང་གླེང་མི་བྱའོ། །བདག་ཅག་རྣམས་ནི་འདི་ལྟར་སྤྱོད། །དེ་བཞིན་སྨྲ་བར་གང་བྱེད་པ། །དེ་ནི་ཉམས་པས་དམྱལ་བར་སྐྱེ། །གསང་སྔགས་ཆོས་ཀྱི་ཚིག་རྣམས་ཀྱང་། །སྐྱེ་བོ་བྱིས་པ་ལ་སོགས་དང་། །དེ་བཞིན་དམ་མེད་ཐམས་ཅད་ལ། །བཤད་པར་བྱ་བ་ཅི་སྨོས་ཀྱི། །ཚིག་འགའ་འང་ཐོས་པར་ཡོང་མི་བྱ། །རྫས་དང་ལག་ཆ་ལ་སོགས་དང་། །ཕུད་དང་གཏོར་མ་ཚོགས་རྣམས་དང་། །ཕུར་པ་མེ་མར་སྣོད་ལ་སོགས། །དེ་དག་མཐོང་བར་མི་བྱའོ། །རྔ་དང་དྲིལ་བུ་ལ་སོགས་སྒྲ། །སྐྱེ་བོས་ཐོས་པར་ཡོང་མི་བྱ། །གང་ཞིག་ཉན་ཅིང་ལྟ་འདོད་པ། །རྡུལ་ཆགས་སྐྱེས་བུས་དེ་བསྐྲད་དོ། །གཞན་ཡང་ཡན་ལག་གི་དམ་ཚིག་ནི། །གོང་མའི་རྩ་བ་ཉིད་ལས་འདི་དག་འབྱུང་བའི་ཕྱིར་ཡན་ལག་སྟེ། དེ་ཡང་སྤྱད་པར་བྱ་བ་ལྔ་ནི། གཟུངས་མ་མཚན་དང་ལྡན་པ་ལ་ཐམས་ཅད་སྐྱེ་བའི་རྒྱུ་ཡེ་ནས་ཆེན་པོ་ཡིན་པའི་ཕྱིར། རྟོགས་པ་དང་ལྡན་པས་དངོས་གྲུབ་ཀྱི་རྒྱུ་དང་རྐྱེན་དུ་སྤྱོད་པ་ནི་སྦྱོར་བའི་དམ་ཚིག་གོ །འདི་དག་སྐྱོན་དུ་བལྟས་ནས་སྤོང་བ་དང་། གསང་མེད་བར་འཆལ་བ་སྤྱོད་པ་ནི་ཉམས་པའོ། །ཞིང་བཅུ་ཐུགས་རྗེས་བཟུང་ནས། གནས་དག་པར་ཏིང་ངེ་འཛིན་གྱིས་སྤོར་བ་ནི་སྒྲོལ་བའི་དམ་ཚིག་གོ །དེ་མ་ཡིན་པར་སྲོག་ལ་མི་འཛེམ་པ་དང་། སྙིང་རྗེ་དང་བྲལ་བ་ནི་ཉམས་པའོ། །གསང་བའི་དོན་དྲང་པོར་སྨྲ་བ་མ་ཡིན་ཞིང་། ཕན་པའི་ཆོས་སུ་འགྱུར་བའི་བརྫུན་སྨྲ་བའི་ནི་དམ་ཚིག་གོ །གནས་སྐབས་མེད་པར་རང་རྒྱལ་དང་གཞན་ལ་གནོད་པར་སྨྲ་བ་ནི་ཉམས་པའོ། །སྡིག་ཅན་རྣམས་ཁ་འཐུན་པར་ལོག་པའི་ལམ་དུ་ཁྲིད་པ་དང་ཐེག་པ་ཆེན་པོ་ལས་དམའ་བའི་རིགས་སུ་ཁྲིད་པ་དང་། གསང་སྔགས་ལ་སྨྲ་འདོད་པ་རྣམས་འབྱེད་པར་བྱེད་པ་ཕྲ་མ་བའི་དམ་ཚིག་གོ །མཐུན་པ་དང་། མཛའ་གཉེན་དང་། མཁན་འཁོན་མེད་པ་འབྱེད་པ་ནི་འཕྲ་མའི་དམ་ཚིག་ཉམས་པའོ། །བཀའ་ལས་འགལ་ཞིང་མཆེད་ལས་ལུབུས་པ་དང་། སློབ་དཔོན་དང་། མཆེད་དང་། གཉེན་དང་། འཁོར་དང་། འདུལ་བའི་དུས་ལ་བབ་པ་རྣམས་ལོག་ཅིང་འགལ་བ་བྱེད་པ་ལ་ཞི་བ་དང་དེས་དད་པས་མ་འདུལ་ན་ངག་བརླང་པོས་འཆོས་པ་དམ་ཚིག་གོ །འགལ་བ་མེད་པ་དང་ཐུབ་ཚད་ལ་ངག་བརླང་པོར་སྨྲ་བ་ནི་ཉམས་པའོ། །མི་སྤང་བ་ལྔ་ལ། འདོད་ཆགས་ཆོས་ཉིད་ཏིང་ངེ་འཛིན་ལ་ཆགས་པ་དམ་པའོ། །འདོད་པ་དངོས་ལ་ཆགས་པ་ཉམས་པའོ། །ཞེ་སྡང་ལོག་པ་དང་གོལ་བ་ལ་སྡང་བ་དམ་པའོ། །མཉེས་པ་དང་ཐུབ་པ་ལ་སྡང་བ་ཉམས་པའོ། །གཏི་མུག་ཕྱོགས་རིས་མེད་ཅིང་ཅི་ལ་ཡང་མི་རྟོག་པ་དམ་པའོ། །བསྟན་པ་ཉན་མི་ཤེས་པར་དགེ་སྡིག་ལ་འཛེན་པ་མེད་པར་ཉམས་པའོ། །ང་རྒྱལ་བདུད་ཀྱིས་བསླུ་བས་མི་ཚུགས་ཤིང་རྡོ་རྗེ་ཐེག་པ་སྲན་འཛུགས་པ་དམ་པའོ། །བདེན་པ་མེད་པར་ལོག་པའི་ཕྱོགས་ལ་ང་ཆེ་བ་ཉམས་པའོ། །ཕྲག་དོགས་ཆོས་ཉིད་ལ་གལ་མི་འཛུགས་ཤིང་། ཡང་དག་པ་ལ་འཛིན་རྟོག་མིང་ཡང་མེད་པར་གནས་པ་དམ་ཚིག་གོ །གཞན་ཉེས་པ་མེད་པ་དང་། གྲོགས་མཆེད་ལ་ཕྲག་དོགས་པ་ཉམས་པའོ། །དང་དུ་བླང་བ་ལྔ་ལ།དམ་རྫས་ལྔ་པོ་ཆོས་ཉིད་ལ་རྟོག་པ་མེད་པ་དང་། རང་བཞིན་གྱིས་གྲུབ་པའི་མཐུ་ཡོད་པ་དང་། ཡེ་ནས་བདུད་རྩི་ཡིན་པ་དང་། སྐྱོན་ཡོན་ཏན་དང་། དུག་བདུད་རྩི་ཡིན་པ་དང་། དེ་ཉིད་དངོས་གྲུབ་ཆེན་པོའི་རྒྱུ་དང་རྐྱེན་ཡིན་པས་གསང་སྔགས་སྒྲུབ་པའི་ཐབས་དམ་པ་སྤྱོད་པ་དམ་ཚིག་གོ །རྟོགས་པ་དང་ཏིང་ངེ་འཛིན་དུ་མི་ལྡན་ཞིང་། གསང་བ་མེད་པར་བྱོལ་སོང་བཞིན་དུ་བབ་ཆོལ་དུ་སྤྱོད་པ་ནི་ཉམས་པའོ། ཁྲེས་པར་བྱ་བ་ལྔ་ལ། ཕུང་པོ་ལྔ་དང་། འབྱུང་བ་ལྔ་དང་། ཡུལ་དང་། དབང་པོ་དང་། རྣམ་པར་ཤེས་པ་དང་། ཕྱིན་ཅི་ལོག་བཞི་དང་། འཇིག་རྟེན་དྲུག་དང་། ཡུལ་དང་། རིག་པ་ཐམས་ཅད་ཡ་ནས་རྡོ་རྗེ་དབྱིངས་ཀྱི་དཀྱིལ་འཁོར་ཡིན་པར་ཤེས་པ་དང་། ཕྱིན་ཅི་ལོག་ལྔ་སྐུ་ལྔར་ཤེས་པ་དང་། ཕོ་མོ་ཡབ་ཡུམ་ཐབས་དང་ཤེས་རབ་ཏུ་ཤེས་པ་དང་། ལུས་ངག་ཡིད་གསུམ་སྐུ་གསུང་ཐུགས་སུ་ཤེས་པ་དང་། ཕྱི་ནང་སྣོད་བཅུད་ཆོས་ཀྱི་སྐུར་ཤེས་པ་ནི་དམ་ཚིག་གོ །འདི་དག་རང་རྒྱུད་དང་། །ཕྱོགས་རིས་དང་། འཛིན་རྟོག་གིས་དངོས་པོར་སྤྱོད་པ་ནི་ཉམས་པའོ། །བསྒྲུབ་པར་བྱ་བ་ལྔ་ནི། ཤེས་པར་ལྔ་པོ་དེ་ཉིད་ཤེས་པའི་སར་མི་གཞག་གྲུབ་པ་བྱ་དགོས་པས། སྔགས་དང་། ཕྱག་རྒྱ་དང་། ཏིང་ངེ་འཛིན་ལས་སུ་བྱ་བས་སྐྲ་ལ་མེ་ཤོར་བ་བཞིན་དུ་ལུས་ངག་ཡིད་གསུམ་གྱི་སྒོ་ནས་ཐག་བཅད་དེ། རྩོལ་ཞིང་རྩོམ་ལ་སྒྲུབ་པ་ནི་དམ་ཚིག་གོ །དེ་ལ་སྙོམས་ལས་དང་།ལེ་ལོ་དང་། ཕྱི་བཤོལ་དང་། ལོང་ཡོད་དང་། ཆང་དབང་དང་། གཉིད་དབང་དང་། རྐྱེན་དབང་དུ་གཏོང་བ་ཉམས་པའོ། །དམ་ཚིག་ཐམས་ཅད་ཀྱི་རྒྱལ་པོ་ས་མ་ཡ་བཀོད་པའི་རྒྱུད་ལས། ཡན་ལག་གི་དམ་ཚིག་བསྲུང་བའི་ལེའུ་སྟེ་བཞི་པའོ།། །།རྡོ་རྗེ་སེམས་དཔའ་ཆེན་པོ་ཡན་ལག་གི་དམ་ཚིག་བསྲུང་བའི་རིམ་པ་ནི་སྤྱད་པར་བྱ་བའི་དམ་ཚིག་ལྔ་ནི། འདུལ་བའི་དུས་ལ་གར་བབ་པར་རིམ་པར་ཤེས་པར་བསྲུང་། མི་སྤང་བ་ལྔ་ནི་ཉིན་དང་མཚན་མེད་པར་བསྲུང་། དང་དུ་བླང་བ་ལྔ་ནི་དུས་བཞི་དང་དུས་དྲུག་ཏུ་བསྲུང་། ཤེས་པར་བྱ་བ་ལྔ་ནི་ཐོག་མ་ཉིད་ནས་བསྲུང་། ཐ་མ་ལྔའི་གྲུབ་པར་བྱ་བ་ནི། འཇུག་ཏུ་དུས་དང་རྒྱུན་མེད་པར་བསྲུང་བའོ། །དེ་ཡང་ལུས་ངག་ཡིད་གསུམ་གྱི་ཐག་བཅད་དེ་བསྲུང་བའོ། །དམ་ཚིག་ཐམས་ཅད་ཀྱི་རྒྱལ་པོ་ས་མ་ཡ་བཀོད་པའི་རྒྱུད་ལས། ཡན་ལག་གི་དམ་ཚིག་བསྲུང་བའི་རིམ་པའི་ལེའུ་སྟེ་ལྔ་པའོ།། །།རྡོ་རྗེ་སེམས་དཔའ་ཡན་ལག་གི་དམ་ཚིག་འདི་དག་དུས་འདི་ཡི་ཚེ་ན་མ་རྟོགས་པ་རྣམས་ཉམས་ལ། རྟོགས་པ་རྣམས་ཡང་དག་པའི་དོན་ལས་མི་ཉམས་པར་འགྱུར་ལ། རྡོ་རྗེ་སེམས་དཔའ་དུས་ནམ་ཞིག་གི་ཚེ་ན་ཡན་ལག་གི་དམ་ཚིག་འདི་དག་རྣལ་འབྱོར་པ་ཡེ་ཉམས་ཆེན་པོར་འགྱུར་ཏེ། རྒྱལ་པོ་ཆོས་ཉིད་ལ་མི་ཕྱོགས་ཤིང་བསོད་ནམས་ཀྱི་སྐལ་བ་ཆུང་བ་དང་། དམངས་དང་སྐྱེ་བོ་འཕྲལ་གྱི་འདུ་བྱེད་ཀྱིས་ཕུགས་རིང་བར་ལྟ་མི་ཤེས་ཤིང་། བསོད་ནམས་ཟད་པས་སྔགས་ལ་ཉམས་སོད་པ་དང། རྣལ་འབྱོར་བ་ལ་འཕྱ་ཞིང་སྐུར་བ་དང་། སྲོག་ལ་མི་ལྟ་བར་སྡིག་སྨིན་པའི་སྐྱེ་བོ་གསོད་ཅིང་འཕྲོག་པ་མང་བ་དང་། གང་ཟག་རྣལ་འབྱོར་གྱི་སྔགས་ཆེ་བའི་ཁྱད་པར་ཙམ་ལ་བརྟེན་ནས་ཁེ་གྲགས་དང་ཕྲལ་གྱི་འདོད་པ་ཚོལ་བའི་ཕྱིར། སྐྱེ་བོ་འཁྲུལ་པ་རྣམས་བསྡིགས་ཤིང་སྤ་བཀོང་པའི་ཕྱིར། རྣལ་འབྱོར་གྱི་རྫས་དང་ལག་ཆ་གསང་བའི་རྒྱུ་རྣམས་མངོན་དུ་བསྟན་ཏེ་ཕྱུང་། གསང་སྔགས་ཀྱི་དོན་སྤྱོད་པ་རྣམས་ཀྱིས་ཀྱང་གསང་བར་མ་བྱས་ཤིང་ཀུན་ལ་ཆ་ཡོད་བྱས་པ་དང་། སྔགས་ཀྱི་ཡང་དག་པ་མ་རིག་པར་སྐྱེ་བོ་མ་རིག་པ་དྲང་པར་འདོད་པས། ཚོམ་བུ་ལ་སོགས་པ་སྔགས་ཀྱི་སྤྱོད་པ་བསྟན་ཅིང་བསྡུས་ནས། དེ་དག་ལ་ཡང་དག་པས་ངེས་པའི་དོན་མ་བསྟན་པར་སྤྱོད་པ་རྩིང་པོ་དང་། འཕྲལ་གྱི་དྲག་ཤུལ་དང་། སྲིན་པོ་ཐོ་ཅོ་ལ་སོགས་པ་བྱས་པས། གྲུབ་པའི་འབྲས་བུ་ལོག་པར་གོལ་ཏེ། དེ་ཉིད་གསང་སྔགས་ཀྱི་རྒྱུས་མཁན་ཆེན་པོར་བྱས་ཏེ། གསང་སྒོ་འཆོལ་བ་དང་། དབྱེ་གསལ་མེད་པ་དང་། ཀུན་གྱི་དཔྱ་སླ་བར་སོང་བ་དང་། ཀུན་ལ་ཆ་ཡོད་པས་སྨོད་ཅིང་སྐུར་པ་འདེབས་པ་དང་། ཡང་དག་པ་མཉམ་པ་ཉིད་མི་ཤེས་པའི་གང་ཟག་པ་ཕལ་པ་རྣམས་རང་ཆེ་བར་འབྱིན་པར་འདོད་པ་དང་། གཞན་ཐབས་ཀྱིས་སྨད་པའི་ཕྱིར། མིང་འདོགས་ཤིང་མཚང་ཚིག་ལ་སོགས་པ་རྣམས་སྨྲ་བར་བྱེད་བ་དང་། རང་གི་རིག་པ་ནང་ནས་མ་ཤར་བས། བདག་ཉིད་ཀྱིས་བསྒྲུབ་པར་འདོད་པའི་ཕྱིར། དམ་ཚིག་གཅིག་པའི་གྲོགས་པ་དང་འཐབ་ཅིང་། སྐྱེ་བོ་ལ་སོགས་པའི་ལས་ལོག་པར་བྱེད་པ་དང་། ཕྱི་ནང་གི་དབང་རྣམས་ལྟ་ཅི་སྨོས་ཀྱི། རྣལ་འབྱོར་གྱི་ཁ་དབང་ཡང་མ་ཐོབ་པར། གསང་སྔགས་ཀྱི་སློབ་དཔོན་བྱེད་པ་དང་། སོ་སོའི་རིས་སུ་འཛིན་ཅིང་སྔགས་ཀྱི་ཁས་བླངས་ཆག་ཉམས་ཆེན་པོར་གྱུར་པས། དེ་དག་གནས་སུ་མི་སྐོངས་ཏེ། ཡན་ལག་གི་དམ་ཚིག་ཉམས་པས། དེའི་སྐྱོན་ནི་སྔགས་ཀྱི་བྱིན་ཉམས་པས། སྔགས་མཐུ་བྱིན་ཆུང་བ་དང་། རྣལ་འབྱོར་གྱི་སྤྱོད་པ་ཉམས་པས་དུས་སུ་མི་འགྲུབ་པ་དང་། མཆོད་པའི་གཞུང་མ་སྟོབས་པས་དངོས་གྲུབ་མི་འཐོབ་པ་དང་། ཏིང་ངེ་འཛིན་བྱིང་རྨུགས་དང་། ཛ་གད་ཀྱི་དབང་དང་། །ལེ་ལོ་དང་གཉིད་དབང་གིས་བར་ཆོད་དང་བདུད་ཀྱི་དབང་དུ་འགྱུར་ཏེ། སྔགས་པ་ཚེ་ཐུང་ཞིང་ནད་མང་བ་དང་། སྔགས་པ་ཉམས་པ་ཤ་སྟག་མང་བས་མ་མོ་དང་མཁའ་འགྲོ་དམ་ཚིག་གི་བྱ་ར་ལ་སོགས་པ་རབ་ཏུ་ཁྲོས་པའི་དབང་གིས། འཇིག་རྟེན་གྱི་ཁམས་འདིར་ཡང་རིམས་ནད་ལ་སོགས་པ་སྣ་ཚོགས་པ་བཏང་སྟེ། མཛ་དང་། ཤུ་བ་དང་། འབྲུམ་བུ་ལ་སོགས་པ་དང་། རིམས་ཉིན་གཅིག་པ་དང་། ཉིན་གཉིས་པ་ལ་སོགས་པ་དང་། རྟག་པའི་རིམས་དང་། རླུད་མཁྲིས་དང་། བད་ཀན་དང་། འདུས་པ་ལས་གྱུར་པའི་གླད་བག་དང་། འཁྲུ་བག་དང་།ཚ་བའི་རིམས་ལ་སོགས་པའི་ནད་རྣམ་པ་སྣ་ཚོགས་པ་དང་། མུ་གེ་ལ་སོགས་པ་སྤེལ་ཞིང་། དེའི་ཚེ་སེམས་ཅན་རྣམས་དུས་མ་ཡིན་བར་འཆི་ཞིང་གློ་བུར་དུ་འཆི་བ་དང་། ཐེག་པ་འོག་མ་རྣམས་སྔགས་ལ་འཇུག་ཅིང་དེ་ཉིད་ཀྱི་རྣམ་སྨིན་གྱིས། དེའི་ཚེ་སྐྱེ་བོ་སྡིག་པོ་ཆེ་རྣམས། སྡིག་སྨིན་པར་སོགས་པའི་རྣམ་སྨིན་གྱིས། དེ་ཉིད་ཚེ་རིང་ཞིང་སྲོག་སྲ་བར་འོང་བ་དང་། སྔགས་ཀྱི་སྤྱོད་པ་དར་བར་སྤྱོད་ཅིང་དོན་ལ་གོལ་བ་དང་། གསང་བའི་རྒྱུད་རྣམས་མངོན་དུ་ཡོངས་སུ་དར་བས། དུས་ཀྱི་ཉམས་པ་ཆེན་པོར་གྱུར་པས། དུས་བརྩི་བ་ལས་ལོག་པ་དང་། འབྲས་བུ་ཡང་དམྱལ་ཁམས་བཅུ་དྲུག་ལ་སོགས་པར་ཁ་བརྒྱུད་པ་དང་། དེ་ལ་ཡང་ཚེ་ཚད་དག་སྡུག་བསྔལ་ལ་སོགས་པ་གྲངས་བསམ་གྱིས་མི་ཁྱབ་པར་གནས་པ་དང་། དེ་ལས་ཐར་ནས་ཀྱང་ཡི་དྭགས་མགོ་གཅིག་ལ་ལུས་བརྒྱ་ལ་སོགས་པའི་སྡུག་བསྔལ་སྣ་ཚོགས་པའི་ཁ་བརྒྱུད་ཅིང་གནས་པ་དང་། དེ་དག་ལས་ཐར་ནས་ ཀྱང་སྲིན་པོ་འབར་བ་ཧ་ས་ཏ་ལ་མགོ་དང་ཡན་ལག་མང་པོ་ལ་སོགས་ པའི་སྡུག་བསྔལ་ཁ་བརྒྱུད་པར་གྱུར་ཏོ། །དེ་སྐད་ཅེས་བཀའ་སྩལ་པ་དང་ ། རྡོ་རྗེ་སེམས་དཔའ་ཤིན་ཏུ་འཇིགས་ཤིང་སྐྲག་ནས་བརྒྱལ་ཏེ། ཁ་བུབ་ཏུ་འགྱེལ་ཏོ། །དམ་ཚིག་ཐམས་ཅད་ཀྱི་རྒྱལ་པོ་ས་མ་ཡ་བཀོད་པའི་རྒྱུད་ལས། ཡན་ལག་གི་དམ་ཚིག་ཉམས་པའི་སྐྱོན་བསྟན་པའི་ལེའུ་སྟེ་དྲུག་པའོ།།།།དེ་ནས་བཅོམ་ལྡན་འདས་ཡིད་ཀུན་ཏུ་བཟང་པོས། རྡོ་རྗེ་སེམས་དཔའ་བརྒྱལ་བ་བསླང་བའི་ཕྱིར། འདི་སྐད་ཅེས་བྱ་བའི་གླུ་བླངས་སོ། །ཨ་ཧོ་སྣ་ཚོགས་རང་བཞིན་ཅིར་ཡང་འབྱུང་བའི་གཞི། །བྱ་བ་མེད་ལས་ཡོངས་སུ་རྣམ་པར་གྲོལ་བ་ཡི། །མ་ཆགས་སྐྱེ་མཆེད་སེམས་སུ་ཡོངས་སུ་དག །བརྗོད་མེད་ངང་ལ་རྣམ་རྟོག་མཚན་མ་སྤངས། །རང་བཞིན་ཡོངས་ཀྱིས་ཞི་བའི་ཆོས་ཉིད་ལ། །འཛིན་རྟོག་མེད་པའི་བྱང་ཆུབ་ཡང་སྐྱེ་བས། །ཉམས་པ་མེད་ཅིང་དོན་དང་ལྡན་པའི་ངང་ ཡངས་པར་རྟོགས་ན་འཁོར་བའི་གཅོང་རོང་བདེ། །ཉམས་པར་རིག་པས་སྤྱི་ཁྱབ་ཡོངས་ལ་སྣུམས། །ཐུགས་རྗེ་འབྱུང་བས་དོན་དམ་ཡུམ་གྱི་དབྱིངས། །ཡོངས་ལ་ཁྱབ་པས་བྱང་ཆུབ་ཡབ་ཀྱི་ངང་། །གཉིས་མེད་འབྲེལ་བས་མངོན་སུམ་སངས་རྒྱས་པས། །བསྲུང་བའི་རིམ་པ་འདི་རྟོགས་བདེ་བའི་ཀློང་། །གང་ཞིག་འཁྲུལ་པ་ཡོངས་སུ་ཐར་པའི་ཕྱིར། །བྱང་ཆུབ་ཉིད་དེ་འཁྲུལ་བ་མེད་པར་བྱའོ་ཧ། །དེ་སྐདཅེས་གླུ་བླངས་པས། རྡོརྗེ་སེམས་དཔའ་བརྒྱལ་བ་སངས་ནས། བཅོམ་ལྡན་འདས་ལ་ཕྱི་ནང་གི་མཆོད་པས་མཆོད་ཅིང་མཉེས་པར་བྱས་ནས། ཞབས་ལ་ཕྱགའཚལ་ཏེ་འདི་སྐདཅེས་གསོལ་ཏོ། །ཀྱེཀྱེཤིནཏུབཅོམ་ལྡན་འདས། ཤིན་ཏུ་ཐུགས་རྗེ་ཆེན་པོ་དང་ལྡནཔ། ཤིནཏུ་ཐབས་རྒྱམཚོ་མངའ་བ། ཤིན་ཏུ་འགྲོ་བ་འདྲེན་པའི་བླ་མར་གྱུར་པས། འདི་དག་ཉམས་པ་ལས་སླར་གསོ་བའི་ཐབསནི་ཅིམངའ། གསོསནསྐོངས་པར་འགྱུར་རམ་མིའགྱུར། བདེབར་གཤེགས་པ་ལུང་བསྟན་དུ་གསོལ། དེ་སྐད་ཅེས་གསོལ་བ་དང་། བཅོམ་ལྡན་འདས་ཀྱི་བཀའ་སྩལ་པ། རྡོ་རྗེ་སེམས་དཔའ་འདིདག་ཤིན་ཏུ་གསོབའིཐབསམངའ་སྟེ། དཔེར་ན་མརམེ་དང་འདྲའོ། ཁེཞིང་ཉམས་ཀྱང་གསོ་བའི་ཐབས་མངའ་འོ། །གསེར་སྐྱོགསདངུལ་སྐྱོགསཞོམ་པ་དང་འདྲ་སྟེ། ཞོམ་ཡང་བསྲང་བའི་ཐབས་མངའ་འོ། །དེ་སྐད་ཅེས་བཀའསྩལ་པ་དང་། རྡོ་རྗེསེམས་དཔའཤིན་ཏུདགའ་ཞིང་དང་བསྐྱེས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཨེ་མ་ཨ་ལ་ལ། ཤིན་ཏུ་ངོ་མཚར་དང་ལྡན་པའིབཅོམ་ལྡན་འདས་ཀྱིས། དམ་ཚིག་ཉམས་པའི་རྒྱུ་འདི་རྣམས་སླརགསོ་བའི་ཐབསམངའབ་ནི་ཤིན་ཏུངོ་མཚར་ཆེ་སྟེ། སྐུའི་དམ་ཚིག་འདི་དག་ཉམས་ན། སླར་གསོ་ཞིང་བསྐང་བའི་ཆོ་ག་གང་ལགས་པ་དང་། གསུངགི་དམ་ཚིགའདི་དག་ཉམས་ན། སླརགསོ་ཞིང་བསྐང་བའི་ཆོ་ག་གང་ལགས་པ་དང་། ཐུགས་ཀྱི་དམ་ཚིག་འདི་དག་ཉམས་ན། སླར་གསོ་ཞིང་བསྐང་བའི་ཆོ་ག་གང་ལགས་པ་དང་། ཡན་ལག་གི་དམ་ཚིག་ལ་སོགས་པ་འདི་དག་ཉམས་ན།སླར་གསོ་ཞིང་བསྐང་བའི་ཆོ་ག་གང་ལགས་པ་དེ་། བཅོམ་ལྡན་འདས་ཀྱིས་ལུང་བསྟན་དུ་གསོལ། བདེ་བར་གཤེགས་པས་ལུང་བསྟན་དུ་གསོལ། དེ་སྐད་ཅེས་གསོལ་པ་དང་། བཅོན་ལྡན་འདས་ཀྱིས་བཀའ་སྩལ་པ། སེམས་དཔའ་ཆེན་པོ་སྐུའི་དམ་ཚིག་ཉམས་ན། སླར་གསོ་བའི་ཆོ་ག་འདི་ཡིད་ལ་ཟུང་ཞིག །རྡོ་རྗེ་སློབ་དཔོན་ཕ་མ་དང་། །དེ་བཞིན་མཆེད་ལ་སོགས་པ་ལ། །སྐུ་ཡི་དམ་ཚིག་ཉམས་པ་དེ། །འགྱོད་པ་དྲག་པོ་བསྐྱེད་བྱས་ལ། །དེ་དག་རྣམས་ཀྱི་སྤྱན་སྔ་མྲ །ཟང་ཟིང་ནོར་དང་ཡོ་བྱད་རྣམས། །ཇི་ལྟར་མཉེས་པར་ཕུལ་ནས་ནི། །ཚིག་ཏུ་འདི་སྐད་སྨྲ་བར་བྱ། །མ་རིག་འཁྲུལ་པ་ནོར་བ་ཡིས། །ཉེས་པའི་ཉོན་མོངས་བདག་ལས་བྱུང་། །བདུད་ཀྱིས་བསླུས་སམ་བདུད་ཀྱིས་བསྣུན། །བགེགས་ཀྱིས་བསླུས་སམ་ངན་དུ་སྨྲས། །ནོར་བར་འཁྲུལ་ལམ་ལོག་པར་བསམས། །ཕྲག་དོགས་ག་་ཁྲོ་དག་ལ་སོགས། །ཉེས་པའི་འགལ་བ་ཅི་མཆིས་པ། །མ་ལུས་ཉམས་པ་མཐོལ་ཞིང་བཤགས། །རྡོ་རྗེ་སློབ་དཔོན་དཔལ་དང་ལྡན། །འཕགས་པའི་སྐུ་དང་ཐ་མི་དད། །སྐུ་གསུང་ཐུགས་ཀྱི་རྡོ་རྗེ་བདག །བདེ་གཤེགས་རྣམས་ཀྱི་གསུང་རབ་ལུང། །རྣམ་པར་རྒྱལ་བའི་མན་ངག་མངའ། །ཞལ་ནས་གསུངས་པའི་རྒྱལ་བའི་བཀའ། །ལུས་ངག་ཡིད་ཐུབ་གནས་རབ་ཁྱོད། །བསྙེན་བཀུར་གཞུང་བཞིན་རྗོ་མ་ཐོགས། །ངན་སེམས་གཡས་སེམས་དག་ལ་སོགས། །སྡོམས་པའི་དམ་ཚིག་གང་ཉམས་པ། །མ་ལུས་པ་ཡང་མཐོལ་ཞིང་བཤགས། །ཡུན་གྱི་སྒྲིབ་པར་མི་འགྱུར་ཞིང་། །ཚངས་པ་འཕྲལ་དུ་སྩལ་དུ་གསོལ། །སྐུ་ལ་བསྡོས་དང་ཐུགས་ཐུབ་སྤྱད། །མ་རིག་ཀ་མ་ལི་ལ་བརླམས། །ངན་དུ་བརྗོད་དང་ལོག་པར་སྨྲས། །སྐུ་ལ་སྨད་ཅིང་ཐུགས་ལ་འགོམས། །བཀའ་རྐུན་ལུང་མེད་ཡོངས་སུ་བསླད། །ཉམས་པའི་ཆད་པས་མི་དགུམ་ཞིང་། །ཚངས་པ་དུས་འདིར་སྩལ་དུ་གསོལ། །ཐམས་ཅད་རྡོ་རྗེ་མཆེད་ལྕམ་དྲལ། །མཐུན་པར་སྤྱོད་པའི་རྣལ་འབྱོར་པའི། །བདེར་གཤེགས་སློབ་མར་ལུང་མནོས་པས། །མཉམ་དང་མི་མཉམ་དོན་གཅིག་ལ། །ལེགས་ནོངས་རྣམ་པར་དབྱེར་མེད་ཀྱང་། །རྣམ་པར་འབད་པའི་སྒོ་ཙམ་དུ། །གཞུང་ལས་འགལ་བ་ཅི་མཆིས་དང་། །ཐུགས་དམ་ཡིད་འགལ་ཅི་མཆིས་པ། །རྣམ་པར་དག་པའི་བསམ་པས་མཐོལ། །དོན་གྱིས་མི་གནས་ཚིག་འདིས་བཤགས། །རབ་བཞིན་མེད་པ་བཟོད་པར་གསོལ། །འཛིན་པ་མེད་པར་ཚངས་པར་གསོལ། །དཔེར་ན་ཁྲུས་ཀྱི་ཡོན་ཆབ་ལྟར། །ལུས་ཀྱི་དྲི་མ་སེལབབཞིན། །ཉམསཔའི་དྲི་མ་སེལ་བར་མཛོད། །དེ་ལྟར་བཤགས་པ་བྱེད་ན་ཡང་། །སློབ་དཔོན་ལ་སོགས་མཆེད་རྣམས་ཀྱིས། །གང་ཞིག་ནོངས་པ་དྲན་པ་དང་། རྗེས་སུ་འགྱོད་པ་སྐྱེས་ནས་སུ། །སླན་ཆད་སྡོམ་པ་འཚལ་བ་ལ ཚངས་པ་འཕྲལ་དུ་སྩལ་བར་བྱ། །དེ་ལ་ཚངས་པ་མ་སྩལ་ན། །གཉིས་ཀ་རྡོ་རྗེ་དམྱལ་བར་སྐྱེ། །དེ་ལ་སྡུག་བསྔལ་བཟོད་གླགས་མེད། །དེ་བས་ཚངས་པ་སྩལ་བར་བྱ། །དེ་ལྟར་ཚངས་པ་ཐོབ་ནས་ཀྱང་། །བཤགས་པ་འདོད་པ་གང་ཡིན་པས། །ཞབས་ལ་སྤྱི་བོར་བླང་བར་བྱ། །སླན་ཆད་མི་གཉིས་གཅིག་པར་བྱ། །གལ་ཏེ་ཉམས་པ་མ་བསྐངས་པར། །བླ་མ་སློབ་དཔོན་མཆེད་ལྕམ་དྲལ། རྐྱེན་གྱིས་གྲོངས་ཆད་གྱུར་པ་ན། །དེ་ཡི་སློབ་དཔོན་བཞུགས་པ་ལ། །གོང་མ་བཞིན་དུ་བཤགས་པར་བྱ། །དེ་ཡི་སློབ་དཔོན་མི་བཞུགས་ན། །དེ་དང་མཉམ་པ་བརྒྱད་རྣམས་ལ། །དེ་ཚེ་གོང་མ་བཞིན་དུ་བཤགས། །དེ་ཡང་རྙེད་པར་མ་གྱུར་ན། །སྤྱིན་སྲེག་མེ་ཐབ་རབ་བརྩིགས་ནས། །དེ་དང་མཉམ་པ་གསུམ་བཀུག་ལ། །མཆོད་རྫས་སྣ་ཚོགས་བཤམ་པར་བྱ། །གསུམ་པོ་དེ་ཡང་དབང་པོར་གཞག །བླ་མ་ལ་སོགས་མཆེད་རྣམས་ཀྱིས། གསང་མཚན་ལ་སོགས་སྤྱན་དྲངས་ཏེ། །སྦྱིན་སྲེག་མཆོད་པ་ཚུལ་བཞིན་བྱ། །དཀྱིལ་འཁོར་ལྷ་ལའང་ཚུལ་བཞིན་བྱ། །གཞུག་ལ་བཤགས་པའི་ཆོ་ག་གདགས། །དེ་ཚེ་ཟིན་པར་གྱུར་པའི་ཚེ། །གོང་དུ་སྨོས་པའི་ཡོན་རྣམས་ཀྱང་། །དབང་པོ་གསུམ་ལ་དབུལ་བར་བྱའོ། །དེས་ཀྱང་ཡོངས་སུ་བསྒྲགས་པ་གཏང་། །དེ་བཞིན་ལན་གྲངས་བདུན་དུ་བྱ། །དེ་ལྟར་བྱས་ན་སྐོངས་པར་འགྱུར། །མཆེད་ལ་སོགས་ལའང་དེ་བཞིན་ནོ། །དམ་ཚིག་ཉམས་པར་ངས་མ་བསྟན། །ཉམས་ན་གཞག་པར་ངས་མ་བསྟན། །བགྲུང་བར་བྱ་བ་ངས་བཤད་དོ། །ཉམས་ན་བསྐང་བར་ངས་བཤད་དོ། །དེ་ནི་སྐུ་ཡི་དམ་ཚིག་གོ །དམ་ཚིག་བཀོད་པའི་རྒྱུད་ལས། སྐུའི་དམ་ཚིག་ཉམས་པ་བསྐང་བའི་ལེའུ་སྟེ་བདུན་པའོ།། །།གསུང་གི་དམ་ཚིག་བསྐང་བ་ཡང་། ཁུད་ཆེན་དག་གིས་མི་སྐོངས་ཏེ། །ལུང་ཆེན་དག་གི་ནང་དུ་བསྐང་། །དེ་ཡང་གསོ་བར་བྱ་བ་ཡི། །ཆོ་ག་ཡང་དག་འདི་ཉོན་ཅིག །སྔགས་དང་ཕྱག་རྒྱ་རྒྱུན་བཅད་ནས། །དུས་དང་ཚེས་གྲངས་དག་ལ་སོགས། །དེ་ཚེ་ཉམས་པར་གྱུར་པ་ལ། །ལུང་ཆེན་ཐོབ་པའི་སློབ་དཔོན་གྱིས། །ངེས་པར་དེ་ཡི་དྲུང་སོང་ལ། །འབྱོར་བའི་ལོངས་སྤྱོད་སྣ་ཚོགས་དང་། །ནོར་དང་ཟང་ཟིང་ཕུལ་ནས་ཀྱང་། །འདི་སྐད་ཅེས་ནི་གསོལ་བ་བཏབ། །ངེས་པའི་ལུང་བྱིན་མན་ངག་ཅན། །དོན་དང་མཐུན་པའི་སྐྱེས་བུ་ཁྱོད། །ལྕགས་ཆག་མགར་བས་བརྡུངས་པ་བཞིན། །ཆག་ཉམས་བསྐང་བའི་རིམ་པ་རྣམས། །ངེས་པར་ལུང་དུ་བསྟན་དུ་གསོལ། །དེ་སྐད་གསོལ་བ་བཏབ་ནས་ཀྱང་། །དེ་ནས་སློབ་དཔོན་བློ་ལྡན་གྱིས། །ལན་དུ་འདི་སྐད་གླེང་བར་བྱ། །ལེགས་འོས་བུ་མཆོག་སློབ་མ་ཁྱོད། །ངེས་པར་བསྟན་པའི་ལུང་དག་ལས། །གང་ཞིག་འགལ་བ་བཤགས་སྤྲོ་ན། །རྣ་བའི་དབང་པོ་ཚུར་ཉོན་ལ། །ངེས་པར་འདི་དག་ཟིན་པར་གྱིས། །ཞེས་བརྗོད་དོ། །དེ་ལ་རིགས་ཀྱི་བུ་མ་ཡེངས་པའི་བཟླས་བརྗོད་ཡིད་ལ་དུས་དང་རྒྱུན་མེད་པར་བཟླས་པར་བཟླས་པ་མ་རྟོགས་ནས། རྒྱུད་ཀྱི་ཁ་བརྒྱུད་ནས་ངེས་པའི་དོན་མི་ཤེས་པས་འགྲུབ་བའི་དོན་མི་ཤེས་པར། འགྲུབ་པར་ཁས་བླངས་པ་དེ་ཉམས་པ་ཆེན་བོའི་རྒྱུར་འགྱུར་ཏེ། དེ་དག་སེམས་ཅན་གྱི་རང་དབང་གིས་མི་འགྲུབ་ཅིང་། དམ་ཟོས་ཤིང་འགལ་བའི་རྒྱུ་ཤིན་ཏུ་མང་བས། རྣལ་འབྱོར་གྱི་སྤྱོད་པ་འདི་དག་སུན་འབྱུང་ཞིང་། གང་ཞིག་ཤིན་ཏུ་སྤྱིད་ལུག་པ་མང་བ་ལ། དང་ལ་ཆོས་འདི་དག་བཤད་པར་བྱ་བ་ཡིན་པ་ལས། སློབ་དཔོན་ལུང་མེད་ཅིང་མན་ངག་ལ་མི་མཁས་པ་དང་། རྣལ་འབྱོར་པའི་ལྟ་བ་ཆུང་ཞིང་སེམས་ཅན་གྱི་ལས་དམན་པས། དེ་དག་གཞུང་དུ་མ་སྙེམས་པས། དོན་ཆེད་འདི་ལྟར་ཡིད་ལ་ཟུངས་ཤིག །ལུས་ཀྱི་སྒུལ་སྐྱོད་ནི་ཕྱག་རྒྱ་ཆེན་པོའི་རང་བཞིན་ཡིན་པས། ངག་གི་གླེང་བརྗོད་ནི་བཟླས་པར་བྱ་བའི་སྙིང་པོ་ཡིན་ལ། སེམས་དྲན་རྟོག་ཐམས་ཅད་ཐུགས་རྗེ་ཏིང་ངེ་འཛིན་གྱི་རང་བཞིན་ཡིན་པའོ། །དེ་ཅིའི་ཕྱིར་ཞེ་ན། དཔེར་ན་བརླན་ཉིད་ཆུའི་རང་བཞིན་ཡིན་པ་ལས། ལོགས་ནས་བརླན་མི་འབྱུང་བ་བཞིན་དུ། ཕྱག་རྒྱ་ཉིད་ལུས་ཀྱི་རང་བཞིན་ཡིན་པ་ལས །ལོགས་ན་ཕྱག་རྒྱ་ཞེས་བྱ་བ་མེད་དེ། ལུས་ལས་གཞན་དུ་མི་འདའ་བས་དམ་ཚིག་གི་ཕྱག་རྒྱ་དང་། ཡན་ལག་གི་སྒུལ་སྐྱོད་གང་ཡང་མཐར་ཕྱིན་པ་ལས་ཀྱི་ཕྱག་རྒྱ་དང་། དེ་ལ་འཛིན་པ་དང་ཐོག་ཆགས་མེད་པས་བདེ་བ་ཆོས་ཀྱི་ཕྱག་རྒྱ་དང་། དེ་ལ་དུས་གསུམ་དུ་འདུ་འབྲལ་མེད་པས་སྐུ་ཕྱག་རྒྱ་ཆེན་པོ་སྟེ། དེ་ལྟར་རིག་པའི་དུས་ན། མུང་་་བྱ་ག་རྒྱའི་དཀྱིལ་འཁོར་ལ། སྐུ་གསུང་ཐུགས་བཀོད་པ་མི་ཟད་པར་གནས་པས་འདི་ལ་ཡང་འདའ་བ་ཡང་མེད། ཉམས་པ་ཡང་མེད། ཡེངས་པ་ཡང་མེད། བཙལ་བ་ཡང་མེད་པས། དེ་ལ་འདི་སྐད་ཅེས་བྱ་སྟེ། མ་རིག་འགྲོ་བའི་སེམས་ཅན་ཀུན། །སངས་རྒྱས་ཕྱག་རྒྱའི་དཀྱིལ་འཁོར་ལ། །ངེས་པར་གྲོལ་བར་རབ་བཤད་མཛད། །མ་རིག་སེམས་ཅན་དྲང་དོན་དུ། །ཕྱག་རྒྱ་རྣམས་སུ་བཤད་པ་ཡང་། །ལོག་པར་ལྷ་བ་བསྒྱུར་བའི་ཕྱིར། །ལས་ཀྱི་དབང་དུ་འབབ་པ་ཙམ། །དོན་ལ་ངེས་པ་འདི་རྟོགས་ན། །མ་བཅོས་ཀློང་དུ་ལྷན་ནེ་བའོ། །དེ་ལ་ངག་གི་གླེང་བརྗོད་བཟླས་པ་བྱ་བ་ཡིན་པ་ནི། དཔེར་ན་སྒྲ་དང་སྒྲ་བརྙན་འདྲ་སྟེ། སྒྲ་ཡང་ཐོས་པ་ར་བྱེད་པ་ལ། ཐོས་པར་བྱེད་པ་ཡང་སྒྲ་བརྙན་དོན་ཡིན་ལ། དེ་བཞིན་དུ་ངག་གིས་གླེངས་པ་དང་བརྗོད་པ་ཡང་སྔགས་ཀྱི་བཟླས་བརྗོད་ཡིན་ལ། སྔགས་ཀྱི་བཟླས་བརྗོད་ཀྱང་ངག་གི་གླེང་བརྗོད་ཡིན་ཏེ། ཆོས་ཐམས་ཅད་ནི་ཚིག་ཡིན། ཚིག་ཐམས་ཅད་ནི་ཡི་གེ །ཡི་གེ་ཐམས་ཅད་སྙིང་པོ། སྙིང་པོ་ཐམས་ཅད་ནི་མི་བརྗེད་པའི་གཟུངས། མི་བརྗེད་པའི་དོན་ཆོས་ཉིད་དེ། དུས་ཐམས་ཅད་དུ་སོ་འདི་ལས་མི་ཉམས་པར་རིག་ཅིང་གནས་པར་རྟོགས་པའི་དུས་ན། སྙིང་པོ་བཟླས་བརྗོད་ཟུར་ཕྱིན་པ་ཡིན་པ་ལས། འདི་ལས་འདའ་བ་མེད། ཡེངས་པ་མེད། བཙལ་བ་ཡང་མེད། སྒྲུབ་པ་ཡང་མེད་པས། དེ་ལ་འདི་སྐད་ཅེས་གསུངས་སོ། །བཟླས་བརྗོད་བསྙེན་པའི་སྙིང་པོ་རྣམས། །མ་བཟླས་དོན་གྱིས་ཚང་བ་ནི། །དོན་ནི་མ་ན་ངག་འདི་ཡིན་ཏེ། །སྙིང་པོ་སྔགས་ཀྱི་དོན་རིག་པས། །ཅི་བཟླས་སྔགས་ཀྱི་སྙིང་པོ་མཆོག །དུས་གསུམ་བར་ཆད་མེད་པ་ཡི། །བཟླས་བརྗོད་ཀློང་དུ་གནས་པ་ལ། །འཛིན་རྟོག་བར་ཆད་ཡོད་མེད་དོ། །བདེར་གཤེགས་གསུང་གི་ངོ་བོ་ལ། །སངས་རྒྱས་བྱང་ཆུབ་སེམས་དཔའ་ཉན། །བསྐལ་པའི་ཆུ་བོའི་རྒྱུན་བཞིན་དུ། །སྙིང་པོ་བར་ཆད་མེད་པའོ། །དེ་ལ་སེམས་ཀྱི་དྲན་རྟོག་ཐུགས་ཏིང་ངེ་འཛིན་ཡིན་པ་ནི། དཔེར་ན་མར་མེའི་འོད་དང་འདྲ་སྟེ། མར་མེ་ཉིད་ཀྱང་འོད་ལ། འོད་ཉིད་ཀྱང་མར་མེའི་བྱིན་རླབས་ཏེ། ཡང་དག་པའི་སེམས་ཀྱི་དྲན་རྟོག་ཐམས་ཅད་ཐུགས་ཏིང་ངེ་འཛིན་ཡིན་ལ། ཐུགས་ཏིང་ངེ་འཛིན་ཡང་སེམས་ཀྱི་དྲན་རྟོག་ཉིད་དུ་སྣང་སྟེ། །དྲན་པ་ཐམས་ཅད་ཤེས་པ། ཤེས་པ་ཐམས་ཅད་རྩོལ་བ། རྩོལ་བ་ཐམས་ཅད་ཐབས་ལ་མཁས་པ ཐབས་ལ་མཁས་པ་ཐམས་ཅད་རང་རིག་པའི་ཡེ་ཤེས་ཏེ། ཡེ་ཤེས་རང་སྣང་བ་ལས་མ་གཏོགས་པ། རྟོག་པ་རང་རྒྱུད་ཀྱིས་མེད་ལ། ཐབས་རང་སྣང་བ་ལས་མ་གཏོགས་པ། ཉོན་མོངས་པ་རང་རྒྱུད་ཀྱིས་མེད་དེ།སེམས་ཅན་གྱི་དམིགས་པའི་ཕྱོགས་ཆ་ལས་འདས་ཤིང་། ཉེ་བར་ལེན་པའི་སེམས་གཞན་དུ་མི་འཀྱུར་བས། རང་འབྱུང་གི་ཡེ་ཤེས་ཆེན་པོ་ཞེས་ཀྱང་བྱ་ལ། དེ་རྣམ་པར་དག་པ་འདུས་མ་བྱས་ཆོས་སྐུ་ཆེན་པོ་དང་ལྡན་པས། འདི་ལྟར་རིག་པའི་སྐྱེས་བུ་ཆེན་པོས་འདའ་བ་ཡང་མེད། ཡེངས་པ་ཡང་མེད། འགྱུར་བ་ཡང་མེད་པས། དེ་ལ་འདི་སྐད་ཅེས་གསུངས་སོ། །ཐུགས་ཀྱི་བརྣག་པ་གང་ཡིན་པ། །ངེས་པ་འདི་ལས་རྒྱ་ཆེར་བཤད། །དུས་གསུམ་འགྱུར་བ་མེད་པ་ཡི། །རང་བྱུང་རིག་པའི་རྒྱལ་པོའི་འོས། །གང་ལྟར་བསམ་པ་འདོད་དགུར་བདེ། །ཡོངས་ལ་ཁྱབ་པས་བརྡལ་བའི་སྐུ། །དངོས་པོར་མི་ཆགས་མ་ཆགས་གློང་། །རང་བཞིན་མཚན་མ་ཀུན་སྤངས་ཏེ། །ཡང་སོ་ཆེ་འོ་སེམས་ཆེན་པོ། །སྐྱེས་བུ་དམ་པ་ཉིད་ཡིན་པས། །བཅོས་པ་མེད་པའི་སྙིང་པོ་ལ། །བརྗེད་པ་མེད་པས་ལྷ་ཞེས་བྱ། །མ་ཡེངས་པ་ཡི་དགོངས་པ་ཡིས། །ཉམས་པ་ལ་བཟླ་དགོངས་པར་ལྡན། །ཐམས་ཅད་ཀུན་ཏུ་མི་འགྱུར་བའོ། །དམ་ཚིག་བཀོད་པའི་རྒྱུད་ལས། དམ་ཚིག་ཉམས་པ་བསྐང་བའི་ལེའུ་སྟེ་བརྒྱད་པའོ།། །།སེམས་དཔའ་ཆེན་པོ་ཐུགས་ཀྱི་དམ་ཚིག་བསྐང་བ་ཡང་། །རྒྱུད་ལུང་དག་གིས་མི་བསྐོངས་ཏེ། །མན་ངག་དག་གིས་ནང་དུ་བསྐང་། །དེ་ཡང་གསོ་བར་བྱ་བ་ཡི། །ཆོ་ག་ཡང་དག་འདི་ཉོན་ཅིག །གསང་བའི་མན་ངག་ཆེན་པོ་རྣམས། །དམ་ཚིག་ཉམས་དང་མེད་པ་དང་། །དམ་ལས་ལོག་དང་མ་འདྲེས་པ། །འཕྱར་ལ་གཅམ་པའི་གང་ཟག་དང་། །ཐེག་པ་དམན་པ་ལ་སོགས་པ། །ཚིག་ཏུ་བརྗོད་ཅིང་བསྟན་པ་དང་། །ཡ་ག་ལོག་པ་དག་ལ་སོགས། །དེ་ཚེ་ཉམས་པར་གྱུར་པ་ལ། །སྡུག་བསྔལ་གཞན་གྱིས་མི་འབྱོངས་ཏེ། །མན་ངག་ཅན་གྱི་སློབ་དཔོན་ལ། །ངེས་པར་དེ་ཡི་དྲུང་སོང་ལ། །འབྱོར་པ་ལོངས་སྤྱོད་སྣ་ཚོགས་དང་། །རིན་ཆེན་གསེར་ལ་སོགས་པ་ཡི། །ཡོན་མཆོག་དག་ཀྱང་དབུལ་བར་བྱ། །དེ་ནས་སློབ་དཔོན་ཆེན་པོ་ལ། །འདི་སྐད་གསོལ་བ་གདབ་པར་བྱ། །མཁས་པའི་བློ་ལྡན་མན་ངག་ཅན། །ངེས་པའི་རྩལ་འཆང་སྐྱེས་བུའི་མཐུ། །རིག་པའི་རྩལ་འཆང་རྫུ་འཕྲུལ་ཅན། །ཡངས་པའིཆོས་ཉིད་ནམ་མཁའ་འདྲ། །ཁྱབ་པའི་ཐུགས་རྗེ་ཉི་མ་བཞིན། །རྣལ་འབྱོར་ཡོངས་ཁྱབ་སྣུམ་པའི་མཆོག །འགྲོ་ལ་ཕན་པའི་གཙོ་ཅན་གྱིས། །ལོག་པའི་གོལ་སར་མི་གཏང་ཞིང་། །བྱང་ཆུབ་ཉིད་དུ་དྲན་པ་དང་། །ཉམས་པའི་དྲི་མ་བསལ་བའི་ཕྱིར། །སངས་རྒྱས་རྣམས་ཀྱིས་དགབ་ཏུ་གསོལ། །ཐུགས་རྗེ་ཆར་གྱིས་བཀྲུ་བར་མཛོད། །མན་ངག་ངེས་པ་བསྟན་དུ་གསོལ། །དེ་སྐད་གསོལ་བ་གདབ་པར་བྱ། །དེ་ནས་སྟོན་པ་སློབ་དཔོན་གྱིས། །ལན་དུ་འདི་སྐད་བརྗོད་པར་བྱ། །འགྱོད་པ་སྐྱེས་པ་བུ་མཆོག་ཁྱོད། །ཚུལབཞིནབཤགསཕྱིར་ལེགས་པར་འོངས། །དེ་ནི་མན་ངག་སྣོད་དང་ལྡན། །ངེས་པར་ལུང་ནི་བསྟན་པར་བྱའོ། །ཡིད་དང་རྣ་བའི་དབང་པོ་ལ ངེས་པར་འདི་ནི་བཅང་བར་གྱིས། །ཞེས་བརྗོད་ལ། དེ་ལ་རིགས་ཀྱི་བུ་ཐུགས་ཀྱི་དམ་ཚིག་གསང་བའི་མན་ངག་གཞན་ལ་སྤེལ་བ་ནི། དམ་ཉམས་པ་དང་། མ་འདྲེས་པ་དང་མེད་པ་ལ་སོགས་པ་ལ་སྤེལ་ཏེ། ཟང་ཟིང་དང་ནོར་འདོད་ཀྱི་དབང་དུ་བཏང་ན་ཉམས་པའི་རྒྱུ་ཡིན་པ་དེ་ནི། མན་ངག་ཆེན་པོའི་གཞུང་གིས་ཐུགས་ཀྱི་དམ་ཚིག་ཉམས་པ་མེད་པ་ཞེས་བྱ་སྟེ། ནམ་མཁའ་ལ་ཡངས་དོག་མེད་པ་བཞིན། བློ་ཆོས་ཉིད་དུ་གྱུར་པ་ལ་འཛིན་རྟོག་གི་བག་ཆགས་སྤངས་པས། གང་ཞིག་སྨྲས་ཤིང་བརྗོད་ན་ཡང་། སྣོད་དང་མི་ལྡན་པ་མེད་པར་ཤེས་པར་བྱས་ལ། བསྲུང་དུ་མེད་པའི་ངོ་བོ། རང་བཞིན་གྱི་རྣལ་འབྱོར་པས། ཆོས་ཉིད་ལས་ཚིགས་དང་ཡི་གེར་གླེང་བ་ལས་འདས་ཤིང་། འདི་འདྲ་ཞེས་བསྟན་པར་སུས་ཀྱང་མི་ནུས་པས། སྨྲས་ན་ཡང་སྨྲས་པའི་ངོ་བོ་མེད་ཅིང་ཡང་དག་པའི་ས་ལ་གླེང་བརྗོད་དང་བྲལ་བས་ཉམས་པ་མེད་ལ། འདི་ལྟར་རིག་པའི་སྐྱེས་བུས་ཉམས་པར་མི་འགྱུར་ཞིང་། ཉམས་ན་ཡང་འཁོར་ལོ་སྒྱུར་བའི་རྒྱལ་སྲིད་ལྟར། ནང་ཉམས་ན་ནུབ་སོར་ཆུད་ལ། ནུབ་ཉམས་ན་ནང་སོར་ཆུད་དེ། རྫ་མཁན་འཇིམ་རློན་དང་ཕྲད་པ་དང་འདྲ་ལ། དེ་ལྟར་བསྟན་ཅིང་བཤད་ན་གང་ལ་ཡང་འཛིན་པ་མེད་པས། ཡང་དག་པ་ལ་ཉམས་པའི་རྒྱུ་མེད་པས། དོན་ཆེན་འདི་ལྟར་རིག་པའི་སྐྱེས་བུས་སྐོངས་ཀྱི། ཕལ་གྱིས་སྐོངས་པར་མི་འགྱུར་རོ། །དེ་ལ་འདི་སྐད་ཅེས་གསུངས་ཏེ། ཡ་རབས་གསང་བའི་མན་ངག་འདི། །མ་རབས་ཕལ་གྱི་སྤྱོད་ཡུལ་མིན། །ཀུན་གྱིས་རྟོགས་པར་མི་འགྱུར་ཏེ། །རྒྱ་མཚོའི་གཏིང་ལྟར་རྟོགས་པ་མེད། །ནམ་མཁའི་མཐའ་ལྟར་ཐུག་པ་མེད། །སྤོང་ལེན་མེད་པར་རིག་པ་ཡིས། །ཡོངས་ལ་ཁྱབ་བདེ་བཤད་པའི་ཕྱིར། །མ་རབས་བུས་པས་མི་རྟོགས་ཏེ། །གང་ཞིག་ཚིག་ཙམ་ཟློས་པ་ལས། །མན་ངག་ཡོད་ཅེས་ཡོངས་མི་བྱ། །གདེང་ཆེན་ལྡན་པའི་སྐྱེས་བུ་དང་། །བཀའ་དང་འཐུན་ལས་མ་གཏོགས་པ། །རས་ཆོད་བཤད་པས་ཡོངས་མི་འགྲུབ། །ཐེག་པ་སྔགས་ཀྱི་འབྲས་བུ་ནི། །སྤེལ་ཞིང་བཤད་པས་མི་འགྲུབ་སྟེ། །ཡིད་ལ་བརྣགས་ཤིང་བཅངས་པས་ན། །མན་ངག་སྙིང་པོ་དེ་ལ་ཡོད། །རང་གི་སེམས་ཉིད་མ་རྟོགས་ན། །བསྟན་ཅིང་བཤད་ཀྱང་ཐན་པར་ཟད། །དུས་གསུམ་འཕོ་འགྱུར་མེད་པ་ཡི། །བྱང་ཆུབ་ཉིད་ལ་གཡོས་པ་མེད། །ཁམས་གསུམ་འཁྲུགས་ཀྱང་སྟོང་པ་མེད། །སྲིད་གསུམ་འཁྲུགས་ཀྱང་གཡོས་པ་མེད། །བསམ་མེད་ཆོས་ནི་ནམ་མཁའ་འདྲ། །བརྗོད་མེད་སེམས་ནི་མཚན་ཉིད་མེད། །མིང་དང་ཚིག་ལས་འདས་པ་ཡི། །སངས་རྒྱས་ཉིད་ཀྱིས་བརྗོད་པར་དཀའ། །སེམས་དཔའ་ཆེན་པོ་འདི་ལྟ་བུའི་མན་ངག་ནོས་ཤིང་ཁོང་དུ་ཆུད་པར་གྱིས་ཤིག །ཐུགས་ཀྱི་དམ་ཚིག་སྐོངས་པའོ། །འདི་ལྟ་བུ་ལ་ཡེངས་པ་མེད་པར་གྱིས་ཤིག །ཐུགས་ཀྱི་དམ་ཚིག་མི་ཉམས་པའོ། །འདིའི་དོན་ལ་འགྱུར་བ་མེད་པར་གྱིས་ཤིག །ཐུགས་ཀྱི་དམ་ཚིག་མི་འདའ་བའོ། །དམ་ཚིག་ཐམས་ཅད་ཀྱི་རྒྱལ་པོ་ས་མ་ཡ་བཀོད་པའི་རྒྱུད་ལས། ཐུགས་ཀྱི་དམ་ཚིག་ཉམས་པ་བསྐང་བའི་ལེའུ་སྟེ་དགུ་བའོ།། །།སེམས་དཔའ་ཆེན་པོ་ཡན་ལག་གི་དམ་ཚིག་བསྐང་བ་ཡང་། རྩ་བའི་དམ་ཚིག་བསྐང་བ་ས་དང་ཡན་ལག་ཀྱང་ཤུགས་ཀྱིས་སྐོངས་ལ། དེ་ལས་རྩ་བ་མ་ཉམས་པར་ཡན་ལག་ཉམས་ན་ཡང་གོང་མ་གོང་མ་ལྟར་བསྐངས་པས་ཡན་ལག་ཀྱང་སྐོངས་པར་འགྱུར་རོ། །སེམས་དཔའ་ཆེན་པོ་དེ་ནི་དཔེར་ན་ཤིང་ཏ་ལའི་རྩ་བ་མ་ཕྱུང་ན་ཡན་ལག་ཉམས་ཀྱང་ཤུགས་ཀྱིས་སྐྱེ་བ་བཞིན། རྩ་བ་མ་ཉམས་ན་ཡན་ལག་ཀྱང་ཤུགས་ཀྱིས་སྐོང་བར་འགྱུར་ལ། གལ་ཏེ་ཉམས་པར་ཚོར་ན་ཡང་སྦྱད་པར་བྱ་བའི་དམ་ཚིག་ཉམས་ན་དཀྱིལ་འཁོར་གཅིག་པའི་འཕྲིན་ལས་ཀྱིས་བསྐང་། །མི་སྤང་བའི་དམ་ཚིག་ཉམས་ན་དཀྱིལ་འཁོར་ཆེན་པོ་གཉིས་པའི་དམ་ཚིག་གིས་བསྐང་། གཉིས་ཀ་ཉམས་ན་སྒྲོལ་སྦྱོར་གྱི་མཆོད་པ་བརྒྱ་རྩ་བརྒྱད་ཀྱིས་བསྐང་། དང་དུ་བླངས་བ་ཉམས་ན་བདུད་རྩི་སྨན་གྱིས་བསྒྲུབ་པས་བསྐང་། ཤེས་པར་བྱ་བ་ཉམས་ན་གསུང་དབང་གི་འཕྲིན་ལས་ཀྱིས་བསྐང་། བསྒྲུབ་པར་བྱ་བའི་དམ་ཚིག་ཉམས་ན་ཐུགས་རྡོ་རྗེ་རིགས་ཀྱི་དམ་ཚིག་གིས་བསྐང་། ཀུན་ཀ་ཉམས་ན་སྐུ་གསུང་ཐུགས་ཡོན་ཏན་འཕྲིན་ལས་ཀྱི་སྒྲུབ་པ་རྫོགས་པས་བསྐང་ངོ་། །དམ་ཚིག་ཐམས་ཅད་ཀྱི་རྒྱལ་པོ་ས་མ་ཡ་བཀོད་པའི་རྒྱུད་ལས། ཡན་ལག་གི་དམ་ཚིག་ཉམས་པ་བསྐང་བའི་ལེའུ་སྟེ་བཅུ་པའོ།། །།དེ་སྐད་ཅེས་བཀའ་སྩལ་པ་དང་། རྡོ་རྗེ་སེམས་དཔས་ཡང་འདི་སྐད་ཅེས་གསོལ་ཏོ། །ཨེ་མའོ་ངོ་མཚར་རབ་འབྱམས་ཀྱིས། །སྐང་སོ་ཆོ་ག་ཁྱད་པར་ཆེ། །དམ་ཚིག་འདི་དག་བསྲུངས་པ་ཡི། །ཡོན་ཏན་འབྲས་བུ་གང་ཡིན་པ། །བཅོམ་ལྡན་འདས་ཀྱིས་བསྟན་དུ་གསོལ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། སེམས་དཔའ་ཆེན་པོ་དམ་ཚིག་འདི་དག་བསྲུངས་པའི་ཕན་ཡོན་དང་འབྲས་བུ་ནི་ཡང་དག་པ་ཉིད་དུ་བཤད་པར་བྱའོ། །དམ་ཚིག་ནི་འདེགས་པའི་ས་གཞི་དང་འདྲའོ། །དམ་ཚིག་ནི་འཇིག་པའི་མཁར་དང་འདྲའོ། །དམ་ཚིག་ནི་རྣོ་བའི་མཚོན་དང་འདྲའོ། །དམ་ཚིག་ནི་སྐྱེད་པར་བྱེད་པའི་ཕ་མ་དང་འདྲའོ། །དམ་ཚིག་ནི་གྲུབ་པར་པྱད་པའི་ཤིང་ཐོག་དང་འདྲའོ། །དམ་ཚིག་ནི་མི་འབྲལ་བ་ལུས་དང་གྲིབ་མ་དང་འདྲའོ། །དམ་ཚིག་ནི་མ་ཡེངས་ན་སྒོམ་པ་ཡིན་ནོ། །དམ་ཚིག་ནི་མ་བརྗེད་ན་ཆོས་ཉིད་ཡིན་ནོ། །དམ་ཚིག་ནི་རྗེས་སུ་དྲན་ན་བཟླས་བརྗོད་ཡིན་ནོ། །སེམས་དཔའ་ཆེན་པོ་སྐུའི་དམ་ཚིག་མ་ཉམས་པར་བསྲུངས་བའི་ཡོན་ཏན་ནི། ལུས་མཚན་དང་དཔེ་བྱད་ཀྱིས་བརྒྱན་པ་དང་། ནད་ཉུང་བ་དང་། གཞོན་ཞིང་ལང་ཚོ་དར་ལ་བབ་པ་དང་། ཡན་ལག་ལ་ལྷག་ཆད་མེད་པ་དང་། དབང་པོ་ཉམས་པ་མེད་པ་དང་། ཚེ་རིང་བ་དང་། ལོངས་སྤྱོད་འཕེལ་བ་དང་། འབྱོར་བ་འཕེལ་བ་དང་། འཁོར་མ་མོ་དང་མཁའ་འགྲོ་མ་བཀའ་བཞིན་ཉན་པ་དང་། སྲིད་པ་གསུམ་ལ་དབང་སྒྱུར་བ་དང་།མཐུ་དང་རྫུ་འཕྲུལ་ཡང་གཞན་གྱིས་དཔག་གི་མི་ལང་བ་དང་། མན་ངག་ལུང་གི་དོན་རྟོགས་པར་འགྱུར་བ་དང་། རིགས་འཛིན་རྣམ་གསུམ་གྱི་དངོས་གྲུབ་འཐོབ་པ་དང་། ཀུན་ཏུ་བཟང་པོ་དང་སྐལ་བ་མཉམ་པར་འགྱུར་རོ། །སེམས་དཔའ་ཆེན་པོ་གསུང་གི་དམ་ཚིག་མ་ཉམས་པར་བསྲུངས་བའི་ཡོན་ཏན་ནི། ལྷ་ཉེ་བ་དང་། རིགས་བརྒྱུད་འཕེལ་བ་དང་། དུས་སུ་འགྲུབ་པ་དང་། བཀའ་ཉན་པ་དང་། དབང་དུ་འདུ་བ་དང་། ཁ་ལོ་སྒྱུར་བ་དང་། ལེགས་པ་འཕེལ་བ་དང་། སྐྱོན་གྱིས་མི་གོས་པ་དང་། ཆོས་ཉིད་ཀྱི་དོན་དང་མི་འགལ་བ་དང་། མྱ་ངན་ལས་འདས་པའི་སྐུ་ཐོབ་པ་དང་། ཀུན་ཏུ་བཟང་པོ་དང་སྤྱོད་པ་མཉམ་པར་འགྱུར་རོ། །སེམས་དཔའ་ཆེན་པོ་ཐུགས་ཀྱི་དམ་ཚིག་མ་ཉམས་པར་བསྲུངས་བའི་ཡོན་ཏན་ནི། དོན་དང་མཐུན་པ་དང་། སྐྱོ་དུབ་མེད་པ་དང་། མན་ངག་གི་སྣོད་དུ་འགྱུར་བ་དང་། དངོས་གྲུབ་ཐོབ་པ་དང་། རྟོག་པ་མེད་པ་དང་། དགོངས་པ་ཟབ་པ་དང་། ཐུགས་རྒྱ་ཆེ་བ་དང་། དོན་ལ་མཁས་པ་དང་། གཞུང་ལས་མི་འགལ་བ་དང་། ཀུན་ཏུ་བཟང་པོ་དང་རྟོག་པ་མཉམ་པར་འགྱུར་རོ། །ས་མ་ཡ་བཀོད་པ་ལས། སྐུ་གསུང་ཐུགས་ཀྱི་དམ་ཚིག་བསྲུང་བའི་ཡོན་ཏན་གྱི་ལེའུ་སྟེ་བཅུ་གཅིག་པའོ།། །།སེམས་དཔའ་ཆེན་པོ་ཡན་ལག་གི་དམ་ཚིག་མ་ཉམས་པར་བསྲུངས་པའི་ཡོན་ཏན་ནི། དངོས་གྲུབ་ཆེན་པོ་རྣམ་གསུམ་ཐོབ་པ་དང་།བདུད་རྣམ་བཞི་ཚར་གཅོད་པ་དང་། རྡོ་རྗེ་ཐེག་པའི་བཀའ་བཙན་ཞིང་མི་འགྱུར་བ་དང་། སྔགས་ཆེ་བའི་ཡོན་ཏན་ནུབ་པའི་དུས་མེད་པ་དང་། ལྷུན་གྱིས་གྲུབ་པའི་འཕྲིན་ལས་ཅི་ལ་ཡང་ཐོགས་པ་མེད་པ་དང་།ཁྱད་པར་གྱི་འབྲས་བུ་མཐར་རྒྱས་པ་དང་། གཉིས་སུ་མེད་པའི་དོན་ལ་ཡུན་དུ་མི་འགྱུར་བ་དང་། བླ་ན་མེད་པའི་ས་ལ་བདེ་བ་ཆེན་པོར་ལོངས་སྤྱོད་པ་དང་། གྲངས་དང་ཚོམ་བུ་བསམ་གྱིས་མི་ཁྱབ་པ་ཐམས་ཅད་ལྕང་ལོ་ཅན་གྱིས་ཕོ་བྲང་དུ་གྲངས་དང་ཚོམ་བུ་བསམ་གྱིས་མི་ཁྱབ་པར་ཕུང་པོ་མི་གནས་པའི་མྱ་ངན་ལས་འདས་པར་མངོན་པར་རྫོགས་པར་སངས་རྒྱས་པ་དང་། འཁོར་གྱི་མཁའ་འགྲོ་མ་ཐམས་ཅད་སྤྲིན་ཕུང་བཞིན་དུ་གཏིབས་ནས་ཅི་བསྒོ་བ་ཉན་པ་ལ་སོགས་པའི་ཡོན་ཏན་བསྐལ་པ་བརྒྱར་བརྗོད་ཀྱང་རྫོགས་པའི་མཐའ་མེད་དོ། །དམ་ཚིག་བཀོད་པའི་རྒྱུ་ལས། ཡན་ལག་གི་དམ་ཚིག་བསྲུང་བའི་ཡོན་ཏན་གྱི་ལེའུ་སྟེ་བཅུ་གཉིས་པའོ།། །།སྤྱིའི་དམ་ཚིག་ཉི་ཤུ་རྩ་བརྒྱད་ལ་སུམ་བརྒྱ་དྲུག་ཅུར་སྦྱར་ཏེ། ལྟ་བའི་དམ་ཚིག་བརྒྱ་ཉི་ཤུ་དང་། སྤྱོད་པའི་དམ་ཚིག་བརྒྱ་ཉི་ཤུ་དང་། བསྲུང་བའི་དམ་ཚིག་བརྒྱ་ཉི་ཤུ་སྟེ། དེ་ལྟར་སུམ་བརྒྱ་དྲུག་ཅུའོ། །དེ་ལ་ལྟ་བའི་དམ་ཚིག་བརྒྱ་ཉི་ཤུ་ནི། ཆོས་ཐམས་ཅད་ཀྱི་རྩ་བ་ཀུན་གཞི་བྱང་ཆུབ་ཀྱི་སེམས་སུ་འདུས་པར་ལྟ་ཞིང་མི་འདའ་བ་དང་། དེ་བཞིན་དུ་སངས་རྒྱས་ཐམས་ཅད་ཀྱང་རང་གི་སེམས་ཡིན་པརལྟབ་དང། སེམས་ཡེ་ནས་སངས་རྒྱས་པར་ལྟ་བ་དང་། ཡུལ་ཆོས་ཉིད་དུ་ལྟ་བ་དང་། །དབང་པོ་ཡེ་ཤེས་སུ་ལྟ་བ་དང་། །དེ་ཡང་གཉིས་སུ་མེད་པའི་བྱང་ཆུབ་ཀྱི་སེམས་བདེ་བ་ཆེན་པོར་ལྟ་བ་དང་། སེམས་ཅན་ཉིད་ཡང་དག་པའི་སངས་རྒྱས་སུ་ལྷ་བ་དང་། འཁོར་བ་ཉིད་མྱ་ངན་ལས་འདས་པར་ལྟ་བ་དང་། སྡུག་བསྔལ་ཐམས་ཅད་བྱང་ཆུབ་དམ་པར་ལྟ་བ་དང་། ཉོན་མོངས་པ་ཐམས་ཅད་ལམ་གྱི་དམ་པར་ལྟ་བ་དང་། མ་ནོར་བའི་ཆོས་ཉིད་དང་། མ་ཡེངས་པའི་ཏིང་ངེ་འཛིན་དང་། མ་བཅོས་པའི་དོན་དང་། མ་བརྗེད་པའི་ཕྱག་རྒྱ་དང་། མ་བསླད་པའི་ཡེ་ཤེས་དང་། མི་དམིགས་པའི་ཏིང་ངེ་འཛིན་དང་། མ་སྐྱེལ་པའི་ཀློང་དང་། མི་འདའ་བའིདམ་པ་དང་། མི་འགྱུར་བའི་གཡུང་དྲུང་དང་། མི་གཏོང་པའི་རིག་པས་མི་འབྲལ་བའི་གཟུངས་སུ་ལྟ་ཞིང་། དམ་ཚིག་ལས་མི་འདའ་བ་ནི། ལྟ་བའི་དམ་ཚིག་གི་རྩ་བའོ། །དེ་ལ་ཆོས་ཐམས་ཅད་ཀྱི་རྩ་བ་ཀུན་གཞི་བྱང་ཆུབ་ཀྱི་སེམས་སུ་འདུས་པར་ལྟ་ཞིང་། དམ་ཚིག་ལས་མི་འདའ་བ་ལ་ཡང་ལྔ་སྟེ། དེའི་དོན་སྟོན་པའི་རྡོ་རྗེ་སློབ་དཔོན་བཙལ་བ་དང་། །བཀའ་ལས་འབྱུང་བའི་ལུང་མ་ཉན་པ་དང་། མན་ངག་ཏུ་སེམས་ལ་སྒོམ་པ་དང་། ཡེ་ནས་དེ་ལྟར་ཡིན་པར་ཡིད་ཆེས་པར་བྱ་བ་དང་། དང་དུ་བླང་ཞིང་མི་འདའ་བའི་བར་དུ་དོན་རྣམ་པ་ལྔ་ལྔས་བསྟན་ཅིང་ཡིད་ཆེས་པར་བྱ་བ་ནི། ལྟ་བའི་དམ་ཚིག་བརྒྱ་ཉི་ཤུའི་ཡན་ལག་གོ །དམ་ཚིག་བཀོད་པའི་རྒྱུད་ལས། ལྟ་བའི་དམ་ཚིག་བརྒྱ་ཉི་ཤུའི་ལེའུ་སྟེ་བཅུ་གསུམ་པའོ།། །།སེམས་དཔའ་ཆེན་པོ་དེ་ལ་སྤྱོད་པའི་དམ་ཚིག་བརྒྱ་ཉི་ཤུ་ནི། དབྱིངས་དང་ཡེ་ཤེས་གཉིས་སུ་མེད་པ་ཆོས་ཀྱི་སྐུར་སྤྱོད་ཅིང་། དམ་ཚིག་ལས་མི་འདའ་བ་དང་། ཐབས་དང་ཤེས་རབ་གཉིས་སུ་མེད་པའི་བྱང་ཆུབ་སེམས་སུ་སྤྱོད་ཅིང་། དམ་ཚིག་ལས་མི་འདའ་བ་དང་། ཡབ་དང་ཡུམ་ཡང་གཉིས་སུ་མེད་པའི་བདེ་བ་ཆེན་པོར་སྤྱོད་ཅིང་། དམ་ཚིག་ལས་མི་འདའ་བ་དང་། དེ་བཞིན་དུ་ཕྱི་དང་ནང་ཡང་ཕྱོགས་རིས་མེད་པར་ཆོས་ཉིད་དུ་བདེ་བ་བརྡལ་བར་སྤྱོད་པ་དང་། མཐའ་དང་དབུས་ཀྱང་ཡེ་ཤེས་ཆེན་པོར་ཁོང་དུ་སྙོམས་པར་སྦྱོད་པ་དང་། ཆེ་བ་དང་ཆུང་བ་ཡང་མཉམ་པ་ཉིད་ཀྱི་ཀློང་དུ་སྤྱོད་པ་དང་། སངས་རྒྱས་དང་སེམས་ཅན་ཡང་ཐིག་ལེ་ཆེན་པོར་ལྷུན་གྱིས་གྲུབ་པར་སྤྱོད་པ་དང་། མཐོན་པོ་དང་དམའ་མོ་ཡང་སྟེང་འོག་མེད་པར་ལྷུན་གྱིས་གྲུབ་པར་སྤྱོད་པ་དང་། བཟང་པོ་དང་ངན་པ་ཡང་སྤོང་ལེན་མེད་པའི་མཛད་སྤྱོད་དུ་རོལ་པ་དང་། བདེ་བ་དང་སྡུག་བསྔལ་ཡང་གཉིས་སུ་མེད་པའི་འཕྲིན་ལས་སུ་མཛད་པ་དང་། འཁོར་བ་དང་མྱ་ངན་ལས་འདས་པ་ཡང་མི་དམིགས་པའི་ཏིང་ངེ་འཛིན་དུ་སྒོམ་པ་དང་། རྒྱུ་དང་འབྲས་བུ་ཐམས་ཅད་མི་འགྱུར་བའི་གཡུང་དྲུང་དུ་སྤྱོད་པ་དང་། ཕུང་པོ་དང་། ཁམས་དང་། སྐྱེ་མཆེད་ཐམས་ཅད་ལྷ་དང་ལྷ་མོའི་དཀྱིལ་འཁོར་གཉིས་སུ་མེད་པར་སྤྱོད་པ་དང་། ཡུལ་དང་དབང་པོ་ཐབས་དང་ཤེས་རབ་ཏུ་སྦྱོད་པ་དང་། འདོད་བའི་ཡོན་ཏན་ཐམས་ཅད་ཆོས་ཉིད་རྣམ་པར་དག་པའི་རྒྱན་དུ་སྤྱོད་པ་དང་། ཉོན་མོངས་པ་ལྔ་དུག་ལྔ་ཡེ་ཤེསལྔའི་རང་བཞིན་དུ་སྦྱོད་པ་དང་། ཕྱིན་ཅི་ལོག་ལྔ་སྐུ་ལྔ་མཐར་ཕྱིན་པར་སྤྱོད་པ་དང་། མི་གཙང་བའི་དམ་རྫས་ལྔ་བདུད་རྩི་ཆེན་པོ་ལྔའི་རང་བཞིན་དུ་སྤྱོད་པ་དང་། འཛིན་རྟོག་གི་སྐྱོན་ཐམས་ཅད་ཀུན་ཏུ་བཟང་པོའི་འཛིན་སྤྱོད་དུ་རོལ་ཅིང་སྤྱོད་པས། དམ་ཚིག་ལས་མི་འདའ་བའོ། །དེ་ལ་དབྱིངས་དང་ཡེ་ཤེས་གཉིས་སུ་མེད་པ་ཆོས་ཀྱི་སྐུར་རྟོགས་པར་བྱ་ཞིང་དམ་ཚིག་ལས་མི་འདའ་བར་བྱ་བ་ལ་ཡང་དོན་རྣམ་པ་ལྔ་སྟེ། རྟོགས་པར་བྱ་བའི་ཐབས་དང་། བསྒོམ་པར་བྱ་བའི་ཡུལ་དང་། བསྒྲུབ་པར་བྱ་བའི་འཕྲིན་ལས་དང་། མཐར་ཕྱིན་པའི་འབྲས་བུ་དང་། བསྟན་ཅིང་གཞག་པར་བྱ་བའི་སྣོད་དང་ལྔའོ། །དེ་བཞིན་དུ་འཛིན་རྟོག་གི་སྐྱོན་ཐམས་ཅད་ཀུན་ཏུ་བཟང་པོའི་མཛད་སྤྱོད་དུ་རོལ་ཅིང་སྤྱོད་པའི་དམ་ཚིག་གི་བར་དུ་རྟོགས་པ་དང་། སྒོམ་པ་དང་། བསྒྲུབ་པ་དང་། མཐར་ཕྱིན་པ་ལྔ་ལྔར་ཤེས་པར་བྱའོ། །ས་མ་ཡ་བཀོད་པའི་རྒྱུད་ལས། སྤྱོད་པའི་དམ་ཚིག་བརྒྱ་ཉི་ཤུའི་ལེའུ་སྟེ་བཅུ་བཞི་པའོ།། །།སེམས་དཔའ་ཆེན་པོ་དེ་ལ་བསྲུང་བའི་དམ་ཚིག་གི་བརྒྱ་ཉི་ཤུ་ནི། ལྟ་བ་ཟབ་མོ་ཐམས་ཅད་ཤེས་རབ་ཆུང་བ་དང། ཐེག་པ་དམན་པ་ལ་བསྲུངས་ལ་དམ་ཚིག་ལས་མི་འདའ་བར་བྱ་བ་དང་། སྤྱོད་པ་གླང་པོ་ཐམས་ཅད་ཡ་ཁ་དང་རྟོག་པ་ཅན་ལ་བསྲུངས་ལ་དམ་ཚིག་ལས་མི་འདའ་བར་བྱ་བ་དང་། དེ་བཞིན་དུ་གསང་བའི་འཕྲིན་ལས་གཟུ་ལུམས་དང་རས་ཆོད་ཅན་ལ་བསྲུང་བ་དང་། གསང་བའི་དོན་བཀའ་རྐུན་དང་རྒྱབ་ཉན་བྱེད་པ་ལ་བསྲུང་བ་དང་། གསང་བའི་མན་ངག་དད་པ་ཆུང་ཞིང་གསང་མེད་པ་ལ་བསྲུང་བ་དང་། ངེས་པའི་དོན་འཕྱར་པོ་དང་འཕྱོན་མ་ལ་མི་འབྱུང་བ་དང་། དངོས་གྲུབ་ཀྱི་རྐྱེན་ཁ་སླ་དང་ཚོད་ཡོད་པ་ལ་བསྲུང་བ་དང་། བརྩོན་པོའི་འཕྲིན་ལས་ལེ་ལོ་དང་ལོང་ཡོད་ཅན་ལ་མི་གཏད་པ་དང་། མཚན་མ་དང་གྲུབ་རྟགས་རང་བསྟོད་རང་ཆེ་ངག་ཏུ་མི་སྨྲ་བར་བསྲུང་བ་དང་། གྲོགས་དང་མཆེད་དམ་ཚིག་ཉམས་ཤིང་མཚན་ངན་པ་ལ་མི་བཙལ་བ་དང་།བཀའ་གསང་སྦེད་ཤེས་པ་དང་། མན་ངག་འཚོལ་མཁས་པ་དང་། དོན་ལ་ནན་གཏན་ཆེ་བ་དང་། དམ་ཕོག་པ་མི་བརྗེད་པ་དང་། གདུང་སེམས་མི་གཏོང་བ་དང་། གཉེར་གཏད་པ་གྲིམས་པ་དང་། འཁོར་ལ་སྣོད་རྟོགས་པ་དང་། བཀའ་ལ་ལྟ་ལོག་དང་སྒྲོ་སྐུར་མེད་པ་དང་། ཕྱོགས་ལ་ངན་སེམས་དང་གདུག་སེམས་མེད་པ་དང་།ཡོངས་ལ་སྤྲོ་རིང་ཞིང་དང་ཆེ་བར་བསྲུང་ཞིང་དམ་ཚིག་ལས་མི་འདའ་བའོ། །དེ་ལྟར་ལྟ་བ་ཟབ་མོ་ཐམས་ཅད་ཤེས་རབ་ཞན་པ་དང་ཐེག་པ་དམན་པ་ལ་བསྲུང་བ་ལ་ཡང་ལྔ་སྟེ། །ལུས་ཀྱིས་བསྲུང་བ་མི་འབྱུང་བ་དང་། ངག་གིས་བསྲུང་བ་མི་སྨྲ་བ་དང་། །ཡིད་ཀྱིས་བསྲུང་བ་བརྣག་པ་དང་། །ཐབས་ཀྱིས་བསྲུང་བ་རྟག་པ་དང་། །སྤྱོད་པས་བསྲུང་བ་གཟབ་པའོ། །དེ་བཞིན་དུ་ཡོངས་ལ་སྤྲོ་རིང་ཞིང་དང་ཆེ་བར་བསྲུང་བའི་དམ་ཚིག་གི་བར་དུ་ལུས་དང་། ངག་དང་། ཡིད་ཐབས་དང་སྤྱོད་པ་ལྔ་ལྔར་རིག་པར་བྱའོ། །དམ་ཚིག་ཐམས་ཅད་ཀྱི་རྒྱལ་པོ་ས་མ་ཡ་བཀོད་པའི་རྒྱུད་ལས། །བསྲུང་བའི་དམ་ཚིག་བརྒྱ་ཉི་ཤུ་དང་སུམ་བརྒྱ་དྲུག་ཅུའི་ལེའུ་སྟེ་བཅོ་ལྔ་པའོ།། །།སེམས་དཔའ་ཆེན་པོ་དམ་ཚིག་སུམ་བརྒྱ་དྲུག་ཅུ་ལ། ལས་སུ་བྱ་བའི་དམ་ཚིག་གསུམ་སྟེ། །སྦྱོར་སྒྲོལ་སྨན་དང་གསུམ་མོ། །དེ་ལ་རྩ་བ་བཅོ་ལྔར་སྤྲོས་ཏེ། །སྦྱོར་བའི་ལུང་དྲུག །སྒྲོལ་བའི་གནས་བཞི། བཅུད་རྩི་སྨན་ལྔའོ། །རྩ་བ་བཅོ་ལྔ་ལས་སུམ་བརྒྱ་དྲུག་ཅུར་སྤྲོས་པ་ནི། མི་སྤང་པ་བརྒྱ་ཉི་ཤུ་དང་། དང་དུ་བླང་བ་བརྒྱ་ཉི་ཤུ་དང་། །སྤྱད་པར་བྱ་བ་བརྒྱ་ཉི་ཤུ་སྟེ། །དེ་ལྷར་སུམ་བརྒྱ་དྲུག་ཅུའོ། །དེ་ཡང་མི་སྤང་བ་བརྒྱ་ཉི་ཤུ་ལ། སྦྱོར་བའི་གཟུངས་མ་ཁྲུ་ཚད་དང་ལྡན་པ་བཞིན་བཟངས་མ་ལོ་བཅུ་གཉིས་ལོན་པ་དང་། །ལོ་བཅུ་དྲུག་ལོན་པ་དང་། ལོ་ཉི་ཤུ་རྩ་ལྔ་ལོན་པ་དང་། ལོ་སུམ་ཅུ་རྩ་གཅིག་ལོན་པས་གཞི་གཟུང་སྟེ། མོ་རིགས་ཕལ་ཡན་ཆད་ཟིན་ཟིན་ཀུན་ཡང་བགྲངས་པ་བརྒྱ་ཉི་ཤུ་ལ་སྦྱོར་བ་ཚུལ་བཞིན་བྱས་པའི་ཡོན་ཏན་ནི། འགྲོ་བ་མཐའ་དག་དབང་དུ་འགྱུར་ཞིང་། དངོས་གྲུབ་གྲངས་ཀྱང་དེ་བཞིན་ཐོབ་ནས། ཡེ་ཤེས་ལྔའི་རིགས་འཛིན་དུ་སྐྱེའོ། །དང་དུ་བླང་བའི་དམ་ཚིག་བརྒྱ་ཉི་ཤུ་ནི་སྨན་བདུད་རྩི་ལ་བྱས་ཏེ། གཙོ་བོ་ལྔ་དང་། འབྲས་བུ་ལྔ་དང་། དབང་པོ་ལྔ་དང་། སྨན་སྣ་ཚོགས་པའི་ར་ས་ཡ་ན་རྩ་བ་དང་ཡན་ལག་ཏུ་བཅས་པ་བརྒྱ་ཉི་ཤུ་ལ་སོགས་ཏེ་སྦྱར་ཞིང་དང་དུ་བླངས་པའི་ཡོན་ཏན་ནི། བདུད་བཞི་འཇོམས་ཤིང་དུག་ལྔ་སེལ་ཏེ། གཏན་མི་འཆི་བའི་སྨན་གྱིས་རིགས་འཛིན་ཐོབ་ནས། སྐུ་ལྔ་ལྷུན་གྱིས་འགྲུབ་བོ། །སྤྱད་པར་བྱ་བའི་དམ་ཚིག་བརྒྱ་ཉི་ཤུ་ནི་བསྒྲལ་བར་བྱ་བ་སྟེ། འབྲས་བུ་ཆེན་པོ་ལྔ་དང་། ཞིང་བཅུ་ལ་སོགས་ཏེ། བརྒྱ་ཉི་ཤུ་བསྒྲལ་བར་བྱས་ནས་དེའི་ཡོན་ཏན་ནི་དམ་ཚིག་དང་། སྡོམ་པ་དང་། ཚུལ་ཁྲིམས་ཉམས་པ་ཐམས་ཅད་སྐོངས་ནས། དམ་ཚིག་ཉམས་པ་ལས་མ་གཏོགས་པ་གཞན་གྱི་སྡིག་ཅི་བྱས་ཀྱང་བག་ཆགས་ཀྱིས་མི་གོས་སོ། །སེམས་དཔའ་ཆེན་པོ་གཞན་ཡང་ཡན་ལག་གི་དམ་ཚིག་མ་ཉམས་པར་བསྲུང་ན་དཀྱེས་པ་བསྐོངས་པ་དང་། མཉེས་པ་འབུལ་བ་དང་། དངོས་གྲུབ་སྩོལ་བ་དང་། འཕྲིན་ལས་མཐར་ཕྱིན་པ་དང་། སེམས་ཅན་ཀྱི་དོན་ཡིད་བཞིན་དུ་འགྲུབ་པ་དང་། འོག་མིན་གྱི་གནས་སུ་མི་གཉིས་པར་གཅིག་པའོ། །དམ་ཚིག་ཐམས་ཅད་ཀྱི་རྒྱལ་པོ་ས་མ་ཡ་བཀོད་པའི་རྒྱུད་ལས། དམ་ཚིག་སུམ་བརྒྱ་དྲུག་ཅུ་བསྐང་བའི་འཕྲིན་ལས་ཀྱི་ལེའུ་སྟེ་བཅུ་དྲུག་པའོ།། །།དེ་ནས་རྡོ་རྗེ་སེམས་དཔས་ཡང་འདི་སྐད་ཅེས་གསོལ་ཏོ། །ཀྱེ་མ་ཡན་ལག་གི་དམ་ཚིག་སུམ་བརྒྱ་དྲུག་ཅུ་བསྲུངས་པའི་ཕན་ཡོན་དང་། མ་བསྲུངས་པའི་སྐྱོན་ཅི་ལགས། བཀའ་སྩལ་པ། སེམས་དཔའ་ཆེན་པོ་དམ་ཚིག་སུམ་བརྒྱ་དྲུག་ཅུ་བསྲུངས་པའི་ཡོན་ཏན་ནི།བདག་གི་དགོངས་པ་དང་། གཞན་གྱིས་འབྱོར་བ་ཀུན་འགྲུབ་པ་སྟེ། ས་རྡོ་དང་། རྩི་ཤིང་དང། རི་བྲག་ལ་ཐོགས་པ་མེད་པ་དང་། ཆུ་ལ་མི་འབྱིང་ཞིང་མཁའ་ལ་བྱ་བཞིན་དུ་འཕྱོ་བ་དང་། རྫུ་འཕྲུལ་རྣམ་པ་སྣ་ཚོགས་ཀྱིས་འགྲོ་བའི་དོན་བྱེད་པ་དང་། བདུད་དང་བར་དུ་གཅོད་པ་ལ་སོགས་པ་རྡུལ་ཕྲ་མོ་བཞིན་དུ་བརླག་པ་དང་། ཡིད་ལ་བསམ་པ་ཐམས་ཅད་འགྲུབ་པ་དང་། ཐམས་ཅད་དུ་ལེགས་པ་སྦྱིན་ཞིང་བཀྲ་ཤིས་པ་་དང་།མི་དང་མི་མ་ཡིན་པ་ལ་སོགས་པ་རྣམས་ཀྱིས་ཡིད་བཞིན་གྱི་ནོར་བུ་དང་འདྲ་བར་བཀུར་བ་དང་། མཁའ་འགྲོ་དང་ཤ་ཟ་ལ་སོགས་པ་ཐམས་ཅད་ལུས་ཀྱི་རྗེ་བོ་བཞིན་དུ་བྱེད་པ་དང་། གནས་པ་གང་ན་བ་དེར་རྡོ་རྗེ་ཐེག་པ་དར་ཞིང་རྒྱས་པ་དང་། འཁོར་དང་སྡེར་བཅས་པ་རིམ་གྱིས་གྲུབ་པ་ཐོབ་ནས། ཐམས་ཅད་དད་ཅིང་འདུན་པའི་ཞིང་དུ་གྱུར་པ་དང་། དེ་བཞིན་གཤེགས་པ་ཐམས་ཅད་ཀྱི་ཐུགས་སུ་བྱོན་ཞིང་སྤྱན་དུ་མཛེས་པའི་རང་བཞིན་ཅན་དུ་གྱུར་པས་ཡོན་ཏན་བགྲང་བ་ལས་འདས་པའོ། །ས་མ་ཡ་བཀོད་པའི་རྒྱུད་ལས། ཡན་ལག་གི་དམ་ཚིག་སུམ་བརྒྱ་དྲུག་ཅུ་བསྲུངས་པའི་ཕན་ཡོན་གྱི་ལེའུ་སྟེ་བཅུ་བདུན་པའོ།། །།སེམས་དཔའ་ཆེན་པོ་སུམ་བརྒྱ་དྲུག་ཅུ་མ་བསྲུངས་པའི་སྐྱོན་ནི། དཔེར་ན་སྲོག་མེད་པའི་གཟུགས་བརྙན་གྱིས་སྲོག་གི་བྱ་བ་མེད་པ་བཞིན་དམ་ཚིག་མེད་ཅིང་མ་བསྲུངས་པས་བླ་ན་མེད་པའི་བྱང་ཆུབ་ཀྱི་བར་དུ་མི་ནུས་པ་སྟེ། འབད་པ་ལ་དོན་མེད་ཅིང་བསྒྲུབས་པ་ལ་འབྲས་བུ་མི་འབྱུང་བ་དང་། བསམ་པ་མི་འགྲུབ་ཅིང་བཙལ་བ་སྐྱོན་དུ་འགྱུར་བ་དང་། བྱས་པ་ཐམས་ཅད་ཆུད་ཟོས་ཤིང་ཡིད་ལ་མི་འདོད་པ་འཕེལ་ཞིང་རགས་པ་དང་། མི་སྙན་པའི་གྲགས་པ་དང་། མི་སྐྱིད་པའི་སྡུག་བསྔལ་གྱི་མཚོ་རྡོལ་བ་དང་། བཀའ་ཆད་ཀྱི་གནས་དང་། བཀའ་འབབ་ཀྱི་ཆད་པས་ཀྱང་ཡེ་ཤེས་ཀྱི་ལྷ་རྣམས་གཏན་དུ་འཕངས་ཤིང་། དམ་ཅན་རྣམས་ཀྱང་གཤེད་མར་འགྱུར་བ་དང་། འཕྲལ་གྱི་ཡེ་འགྲོག་གིས་སྲོག་གི་བར་ཆད་དུ་འགྱུར་བ་ལ་སོགས་པ་ཉེས་པ་བརྗོད་ཀྱིས་མི་ལང་སྟེ། ཡི་དྭགས་ཀྱི་གདོན་བརྒྱད་ཁྲི་བཞི་སྟོང་གིས་ཉེན་པར་གྱུར་ནས། མནར་མེད་པའི་དམྱལ་བ་ཡན་ཆད་ལ་ཐུག་པའོ། །ས་མ་ཡ་བཀོད་པའི་རྒྱུད་ལས། སུམ་བརྒྱ་དྲུག་ཅུ་མ་བསྲུངས་བའི་སྐྱོན་གྱི་ལེའུ་སྟེ་བཅོ་བརྒྱད་པའོ།། །།དེ་སྐད་ཅེས་བཀའ་སྩལ་པ་དང་།བཅོམ་ལྡན་འདས་ལ། རྡོ་རྗེ་སེམས་དཔས་འདི་སྐད་ཅེས་གསོལ་ཏེ། །ཀྱེ་མ་ཡོན་ཏན་དཔག་མེད་པ། སངས་རྒྱས་མཛད་པ་ཁྱད་པར་ཆེའོ། ཁུབ་པའི་ཡོན་ཏན་བསམ་མི་ཁྱབ། །ངེས་པའི་དགོངས་པ་ཕལ་ཆེ་ལས། །རྣལ་འབྱོར་རྣམས་ལ་ཐུགས་རྗེ་ཆེ། །འདྲེན་པ་ཁྱོད་ལ་ཕྱག་འཚལ་བསྟོད། །གཞན་ཡང་དམ་ཚིག་རྩ་བ་རྣམས། །བཅོམ་ལྡན་འདས་ཀྱིས་བཤད་དུ་གསོལ། །ཀུན་བཟང་ལྷ་ཡིས་བཀའ་སྩལ་པ། །ཉོན་ཅིག་སེམས་དཔའ་ཆེན་པོ་ཁྱོད། །དམ་ཚིག་རྩ་བ་ཡང་དག་ནི། །ལྟ་བ་འདི་ལ་རབ་ཏུ་འདུས། །མི་འདའ་བ་ཡི་དམ་ཚིག་ལ། །གཡོས་པ་མེད་པའི་ཆོས་ཉིད་ཀྱིས། །ཡོངས་ལ་བདེ་ཁྱབ་འཇིག་རྟེན་སྤངས། །གཉིས་མེད་སེམས་ནི་ཐབས་ཀྱི་སྐུ། །སངས་རྒྱས་ཡེ་ཤེས་དེ་ལས་མེད། །དེ་རྟོགས་སྐྱེས་བུ་ཆེན་པོ་ཡིས། །ལྟ་བའི་དམ་ཚིག་རྟོགས་གེས་བཤད། །ས་མ་ཡ་བཀོད་པའི་རྒྱུད་ལས།ལྟ་བས་ལ་བཟླ་བའི་ལེའུ་སྟེ་བཅུ་དགུ་པའོ།། །།དེ་ནས་རྡོ་རྗེ་སེམས་དཔས་འདི་སྐད་ཅེས་གསོལ་ཏོ། །བཅོམ་ལྡན་འདས་དམ་ཚིག་གི་གཏོར་མ་ལ་རྣམ་གྲངས་དུར་བསྟན་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། དམ་ཚིག་གི་གཏོར་མ་ལ་རྣམ་པ་གསུམ་སྟེ། གཏོར་མའི་ལྟ་བ་དང་། གཏོར་མའི་སྤྱོད་པ་དང་། གཏོར་མའི་འཕྲིན་ལས་སོ། །དེ་ལ་གཏོར་མའི་ལྟ་བ་ནི། སྣང་སྲིད་གཏོར་མར་ལྟ་བའོ། །གཏོར་མའི་སྤྱོད་པ་ནི། ཐབས་དང་ཤེས་རབ་ཏུ་སྤྱོད་པའོ། །གཏོར་མའི་འཕྲིན་ལས་ནི། དུས་གསུམ་སྐུ་གསུམ་ཐུགས་སུ་སངས་རྒྱས་པའི་འཕྲིན་ལས་སོ། །དེ་ལ་ཡང་རྣམ་པ་གསུམ་སྟེ། ཆོས་ཉིད་དབྱིངས་ཀྱི་གཏོར་མ་དང་། ཡེ་ཤེས་རོལ་པའི་གཏོར་མ་དང་། ཐུགས་རྗེ་སྤྲུལ་པའི་གཏོར་མའོ། །དེ་ལ་འདི་སྐད་ཅེས་གསུངས་ཏེ། ཁྱད་པར་དཔལ་གྱི་གཏོར་མ་སྐུགས་ན་ཉལ། ཁྲ་ཁྲག་དམར་གྱི་གཏོར་མ་འབེན་དུ་འཆའ། །སྤྲུལ་པའི་མཆོད་གཏོར་འཇིག་རྟེན་ཁྱད་པར་གཏོར། །ཡོངས་སུ་ཁྱབ་པའི་གཏོར་མ་ཆེན་པོ་ཡིས། །ཀུན་ལ་ཁྱབ་པས་ཡེ་ཤེས་དབྱིངས་སུ་འདུས། །འདུས་མ་བྱས་པའི་གཏོར་མ་ཆེན་པོ་ལ། །འཛིན་རྟོག་མེད་པའི་སེམས་ཀྱིས་བཀྲོལ་བ་ཡི། །རང་བཞིན་མེད་པའི་གཏོར་མ་ཆེན་པོ་འདི། །ཡོངས་སུ་གཏོར་བས་འགྲོ་བའི་དོན་རྫོགས་ནས། །རྣམ་རྟོག་འཛིན་པའི་ཉོན་མོངས་ཀུན་བཀྲོལ་ཏེ། །བླ་མེད་བྱང་ཆུབ་ལམ་ལ་དགོད་བར་མཛོད། །དམ་ཚིག་བཀོད་པའི་རྒྱུད་ལས།གཏོར་མ་དམ་ཚིག་གི་ལེའུ་སྟེ་ཉི་ཤུ་ཐམ་པའོ།། །།དེ་ནས་ཡང་རྡོ་རྗེ་སེམས་དཔས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཡབ་གཅིག་ལགས་འདི་ལྟར་ཡོན་ཏན་ཆེ་བ། འདི་ལྟར་མཐུ་ཆེ་བ། འདི་ལྟར་ཐབས་ཆེ་བ། འདི་ལྟར་ཉན་ཆེ་བ། འདི་ལྟར་རབ་ཏུ་ཟབ་པའི་རྒྱུད་འདིའི་ཕན་ཡོན་གང་ལགས། བཅོམ་ལྡན་འདས་ཀྱིས་བཀའ་སྩལ་པ། སེམས་དཔའ་ཆེན་པོ་ཕྱོགས་བཅུ་སངས་རྒྱས་ཐམས་ཅད་ཀྱི་ཐུགས་ཀྱི་ཡང་ཐུགས། གཟིགས་པར་བྱ་བའི་སྤྱན་དུ་ཡང་གྱུར་པའི་རྒྱུད་འདི་ནི་ཤིན་ཏུ་ཕན་ཡོན་ཆེ་སྟེ། རྒྱུད་འདི་ཤེས་ཤིང་རྟོགས་པ་ལྟ་ཅི་སྨོས་ཀྱི། ཐ་ན་ཚིག་འབྲུ་འགའ་ཙམ་ཡང་ཡིད་ལ་བྱེད་ན་ཡང་། དེ་དུས་ཐམས་ཅད་དུ་དམ་ཚིག་ཉམས་པར་མི་འགྱུར་ཞིང་། ཉམས་ན་ཡང་སྐོངས་བར་འགྱུར་ལ། སྐངས་ན་ཡང་སྐོངས་བར་འཀྱུར་ངེས་ལ། དེ་ནི་འཇིག་རྟེན་གྱི་ཁམས་འདིར་ཡང་མཐུ་དང་། རྫུ་འཕྲུལ་དང་། དངོས་གྲུབ་ལ་སོགས་པ་གང་གིས་ཀྱང་བསྐྱད་དུ་མེད་པར་འགྱུར་ལ། འཇིག་རྟེན་ཕ་རོལ་ཏུ་ཡང་ཀུན་ཏུ་བཟང་པོའི་དགོངས་པ་དང་སྐལ་བ་མཉམ་པར་འགྱུར་རོ། །སེམས་དཔའ་ཆེན་པོ་རྒྱུད་འདི་མིང་ཙམ་འཛིན་པར་བྱེད་ན་ཡང་། དེ་ངན་འགྲོར་འགྲོ་བར་མི་འཀྱུར། ལྟ་བ་ཕྱིན་ཅི་ལོག་ཏུ་མི་འགྱུར། དམ་ཚིག་ཉམས་པར་མི་འགྱུར། དེ་བཞིན་གཤེགས་པའི་དོན་དང་ལྡན་ཞིང་བདེ་བ་མཆོག་དང་ལྡན་པར་འགྱུར་རོ། །སེམས་དཔའ་ཆེན་པོ་རྒྱུད་འདི་འཛིན་པ་འམ། འཆང་བ་འམ། ཀློག་པ་འམ། ཡི་གེར་འདྲི་བ་འམ། མིང་ཉན་པར་བྱེད་ན། དེ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་མཆོད་ཅིང་བཀུར་སྟིར་བྱེད་པ་དང་། འཁོར་མ་མོ་དང་མཁའ་འགྲོ་མ་ལ་སོགས་པ་རྣམས་ཀྱང་། ཅི་བསྒོ་བ་རྣམས་བྲན་བཞིན་སྙིང་ཉེ་བཞིན་ཉན་པ་དང་། ཚེ་དང་འབྱོར་བའི་ལོངས་སྤྱོད་དང་ལྡན་པ་དང་། འཇིག་རྟེན་ཕྱི་མར་ཡང་ཀུན་ཏུ་བཟང་པོ་དང་མཉམ་ཞིང་དབྱེར་མེད་པར་འགྱུར་རོ། །སེམས་དཔའ་ཆེན་པོ་གང་ཟག་ལ་ལ་མནར་མེད་པར་ལྟུང་བར་ངེས་པ་ལ་ཡང་། །རྒྱུད་འདི་ཐོས་པར་བྱས་ན། བླ་ན་མེད་པའི་དོན་དང་ལྡན་པར་འགྱུར་རོ། །སེམས་དཔའ་ཆེན་པོ་གང་ཟག་ལ་ལ་དམ་ཉམས་ནས་རྡོ་རྗེ་དམྱལ་བར་ལྟུང་བ་ཡང། རྒྱུད་འདི་ཡི་ཚིག་འགའ་རྣ་བར་ཐོས་ན་ཡང་། དེའི་དམ་ཚིག་ཉམས་པ་དེ་སྐོངས་ནས། རྣལ་འབྱོར་བདེ་བའི་དོན་དང་ལྡན་པར་འགྱུར་རོ། །སེམས་དཔའ་ཆེན་པོ་དེ་ལྟ་བུའི་རྒྱུད་འདི་ནི་ཤིན་ཏུ་དཀོན་ཞིང་མི་འབྱུང་བ་སྟེ། དེ་ཅིའི་ཕྱིར་ཞེ་ན། རྒྱུད་འདི་ཕྱོགས་བཅུའི་དུས་གསུམ་གྱིས་དེ་བཞིན་གཤེགས་པས་ཀྱང་མ་གསུངས། གསུངས་བར་མི་འགྱུར། ངས་ཀྱང་མ་བཤད། བཤད་པར་མི་འགྱུར། སངས་རྒྱས་རྣམས་ཀྱང་མི་གསུང་བར་འགྱུར་བའི་ཕྱིར་ཡང་དཀོན་ནོ། །སེམས་དཔའ་ཆེན་པོ་རྒྱུད་འདི་ནི་གང་ན་ཡང་མི་བཞུགས། གང་ན་ཡང་མི་སྟོན། སྟོན་པར་མི་འགྱུར།བཞུགས་པར་མི་འགྱུར་བའི་ཕྱིར་དཀོན་ནོ། སེམས་དཔའ་ཆེན་པོ་རྒྱུད་འདི་ནི་གང་ཟག་གི་བློ་ལ་མི་སྣང་། སྣང་བར་མི་འགྱུར་བའི་ཕྱིར་དཀོན་ནོ། །དེ་སྐད་ཅེས་བཀའ་སྩལ་པ་དང་། རྡོ་རྗེ་སེམས་དཔས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཨེ་མཧོ་ངོ་མཚར་ཆེའོ། ཁུད་འདི་ཚིག་ཏུ་མི་གནས་པ་དེ་སེམས་ཅན་སྐལ་བ་ཆུང་བ་ལགས་སམ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་བ། སེམས་དཔའ་ཆེན་པོ་རྒྱུདའདི་ནི་ཚིག་དང་ཡི་གེར་འདྲི་བ་ལས་འདས་པས། དུས་ཀྱི་ཐ་མ་ལ་འབྱུང་ཡངསྲིད། མི་འབྱུང་ཡང་སྲིད་པས། འབྱུང་ན་གང་ཟག་གཅིག་ལ་འབྱུང་ལ། དེ་གང་དང་ཡང་མ་བྲལ་བའོ། །དོལསྐུརཔའདེབས་པ་དག་འབྱུང་བའི་ཕྱིར་ཡང་དཀོན་ནོ། །དམ་ཉམས་ཤིང་མ་རུངས་བའི་ཕྱིར་དཀོན་ནོ། །འདི་དག་མཐོས་ཤིང་མི་ཤེས་པས། ཕྲག་དོགས་དང་། སྐུར་པ་དང་། ང་རྒྱལ་དང་། སྨོད་པས་ཀྱངདཀོནནོ། །རྒྱུདའདི་བཤད་ཅིང་བསྟན་པ་མིན་པས་ཀྱང་དཀོན་ནོ། །འདི་ནི་དད་པ་དང་། རང་བཞིན་ཟབ་པ་དང་། གྲོན་ཚེགས་ལ་མི་ལྟ་བ་དང་། སྣོད་དང་ལྡན་པལ་བྱུང་བསཀྱངདཀོན་ནོ། ཁུད་འདི་རྣལ་འབྱོར་གྲུབ་པ་གཅིག་གི་སེམས་ལ་འབྱུངབས་ཀྱང་དཀོན་ནོ། །ས་མ་ཡ་བཀོད་པ་ལས། རྒྱུད་ཀྱི་ཕན་ཡོན་གྱི་ལེའུ་སྟེ་ཉི་ཤུ་རྩ་གཅིག་པའོ།། །།དེ་ནས་རྡོ་རྗེ་སེམས་དཔས་འདི་སྐད་ཅེས་གསོལ་ཏོ། །དམ་ཚིག་ཆེན་པོ་གསང་བའི་རྒྱུདཇི་ལྟར་བཙལ་བར་བགྱི། སྤྱད་ལེགས་པའི་ཡོན་ཏན་དང་། མ་ལེགས་པའི་སྐྱོན་ཇི་ལྟར་བྱུང་། ཀུན་གྱི་རྒྱལ་པོས་བཀའ་སྩལ་པ། སེམས་དཔའ་ཆེན་པོ་གསང་བའི་ཆོས་ཐམས་ཅད་ཀྱི་དམ་ཚིག་ནི།དཔེར་ན་རྒྱལ་པོ་ཆེན་པོའི་བཀའ་ཁྲིམསགསང་ཞིང་དམ་པར་བློན་པོ་རིག་པ་ཅན་གྱིས་བཙལ་ན། ཐུགས་དགོངས་དང་བསམ་དགོངས་ཐམས་ཅད་མཐར་ཕྱིན་ཏེ་རྒྱལ་ཁམས་བདེཞིངསྐྱིད་པར་འགྱུར་ལ། དེ་བློནཔོ་ད་དར་གྱིས་རྒྱལ་ཁྲིམས་སྤྱད་མ་ལེགས་ན་ཐམས་ཅད་ཀྱང་ཕུང་ནས་སྡུག་ཅིང་བསྔལ་བ་བཞིན། གསང་བ་འདི་དག་ཐམས་ཅད་ལས་འཕྲོ་དང་སྐལ་བར་ལྡན་ཞིང་སྣོད་དུ་གྱུར་པའིརྡོ་རྗེ་སློབ་དཔོན་དང་། སློབ་མརབཅས་པས་གསང་བའི་དོན་སྦ་ཞིང་སྤྱད་ལེགས་པར་བྱ་དགོས་ཏེ། གསང་བ་ཐམས་ཅད་ལ་གཉན་ཞིང་བཀུར་བ་ལྷ་དང་ཀླུའི་སྤྱི་གཙུག་གི་ནོར་བུ་རིནཔོ་ཆེ་དང་འདྲ་བར་བྱ་བ་དང་། འཕངསཤིང་བརྩེབ་མིག་གི་འབྲས་བུ་ལྟ་བུར་བྱ་བ་དང་། མི་འབྲལ་བ་ལུས་དང་གྲིབ་མ་འདྲ་བར་བྱ་བ་དང་། གསང་ཞིངསྦ་བ་སྙིང་སྒོར་འབྱིན་པ་དང་འདྲ་བར་བྱ་བ་དང་། ཉམས་སུ་བླང་བ་མགོ་ལ་མེ་མཆེད་པ་ལྟར་བྱབ་དང་། སྤྱོད་པ་གཟབཔ་ཚུལ་ཤིས་པའི་བཙུན་མོ་ལྟར་བྱ་བ་དང་། མི་འབྲལ་ཞིང་སྲུང་བ་སྲོག་རྩ་དང་སྙིང་རྩ་འདྲ་བར་བྱ་བ་དང་། སྦ་ཞིག་གསང་བ་ཕོ་མོའི་མཚན་མ་དང་འདྲ་བར་བྱ་བ་དང་། ནན་ཏན་དང་གདམས་པ་ཡུནགྱི་གཏེརབཞིན་དུ་བྱ་བ་དང་། བཀའ་ལས་འབྱུང་བའི་གདམ་ངག་མན་ངག་བཞིན་དུ་མཉན་པར་སེམས་ལ་བཅངས་ན། གསང་སྔགས་ཀྱི་རྒྱུ་གསེར་དང་འདྲ་བ་དགོས་པའི་དོན་ཡིད་ལ་ཇི་ལྟར་འདོད་པར་སྤྱད་དུ་ཡོད་བ་དང་། གསང་བའི་འབྲསབུཞིངགཤིནཔའིལོཏོག་བཞིན་དུ་འཕེལ་བ་དང་། གསང་བའི་ནུས་མཐུ་ནོར་བུ་རིན་པོ་ཆེ་དང་འདྲ་བར་འབྱུང་བ་དང་། ལོག་པའི་ཕྱོགས་མཐའ་དག་གཏར་མཚན་ལརྩེ་སྦུར་རེག་པ་འདྲ་བར་འགྱུར་བ་དང། བར་དུ་གཅོད་པ་ཐམས་ཅད་མེའི་ཕུང་པོ་ལ་སྤྲང་བུ་བརླག་པ་འདྲ་བར་འགྱུར་བ་དང་། ངན་སོང་འཁོར་བའི་སྡུག་བསྔལ་ཐམས་ཅད་མུན་རུམ་དུ་ཉི་མ་ཤར་བ་དང་འདྲབ་་འགྱུར་བ་དང་། འཛིན་རྟོག་ཐམས་ཅད་རྡུལ་ཕྱིས་པ་དང་འདྲ་བར་འགྱུར་བ་དང་། ཕྱིན་ཅི་ལོག་ཐམས་ཅད་ཀྱང་འབྲས་ཀྱི་གླུ་མ་ཡོ་ལེགས་པ་འདྲ་བར་འགྱུར་བ་དང་། ཡིད་ལ་བསྒོམས་པ་ཐམས་ཅད་སྨོན་ལམ་གྱི་རྒྱལ་པོའི་ཞིང་ཁམས་བཞིན་དུ་འགྱུར་བས། གསང་བའི་དམ་ཚིག་སྤྱད་ལེགས་པའི་བྱིན་རླབས་སོ། །ས་མ་ཡ་བཀོད་པ་ལས། གསང་བའི་དམ་ཚིག་མ་ནོར་བར་སྤྱད་པའི་ཡོན་ཏན་གྱི་ལེའུ་སྟེ་ཉི་ཤུ་རྩ་གཉིས་པའོ།། །།སེམས་དཔའ་ཆེན་པོ་དུས་ཐ་མ་ལ་གསང་བའི་དམ་ཚིག་འདི་དག་འཆོ་ཞིང་སྤེལ་མི་ཤེས་ཏེ། སྔོན་གྱི་རྣལ་འབྱོར་པ་ཚུལ་དང་ལྡན་པས་སྣོད་བརྟགས་ཤིང་སྟོན་ལ། སྣོད་དང་མི་ལྡན་པ་ལ་མི་སྟོན་ཅིང་། གསང་བའི་སྒྲོལ་ན་ཕྱག་རྒྱ་མུ་ཏི་ཧོས་བཏབ་ནས་སྦས་པ་རྣམས་འདོད་པས་རྒྱལ་བའི་སྔགས་པས། ཨོ་རྒྱན་དང་། བལ་པོ་དང་། ཁ་ཆེ་ལ་སོགས་པར་གསང་སྔགས་ཀྱི་དོན་ཟབ་མོ་འཚོང་ཞིང་སྤྲོ་བར་བྱེད་དོ། །གཞན་ཡང་བོད་ལ་སོགས་པ་གདོལ་པའི་ཤས་ཆེ་བ་རྣམས་སུ་ཡང་གསེར་ཕྱེ་ལ་སོགས་པས་འདོད་པའི་དབང་གིས་འཕྲོས་པས། དེ་དག་ལ་ཤས་ཆེར་གསང་ཐུབ་ཅིང་སྤྱད་ལེགས་པ་འགའ་ཚུལ་འགྲུབ་ཅིང་མཐར་ཕྱིན་པ་ཡང་འབྱུང་ན། ཕལ་དུ་གསང་པ་མེད་པ་བཀའ་ལྷོད་པའི་སྔགས་པ་ཕལ་འཇིག་རྟེན་པའི་གྲགས་པ་འདོད་པས་སྣོད་མི་འདམ་པར་སྣང་དགུ་ཐམས་ཅད་ལ་མང་བར་འཆད་པ་དང་།སྒྲོགས་ཤིང་འཚོང་ན་ཚུལ་བཞིན་དུ་མི་སྤྱོད་པ་མང་བ་དང་། གསང་བ་འཆལ་བས་དེའི་སྐྱོན་ནི། གསང་བ་ཐམས་ཅད་ལ་མཐུ་དང་བྱིན་མེད་པར་འཀྱུར་རོ། །བཀའ་བཞིན་མི་བྱེད་པས་མཐོ་རིས་ཀྱི་འབྲས་བུ་ཐོབ་པ་ཉུང་ཞིང་། ངན་སོང་འགྲུབ་པ་མང་བར་འགྱུར་རོ། །སྣོད་དང་དུས་དང་མཚམས་མེད་པར་སྒྲུབ་ཐབས་དང་འཕྲིན་ལས་ཆོལ་པར་སྤྱད་པའི་སྐྱོན་ནི། སྤྱས་དང་ཡ་ཁར་གྱུར་པས། ཆོས་ལ་རྩོད་པ་མང་ཞིང་རིས་མི་མཐུན་པ་དང་། སྡིག་པས་ཕོག་པའི་དྲི་མས་མིག་གི་དབང་པོ་ལ་སོགས་པ་ཉམས་པ་དང་། དྲག་པོའི་ལས་ཚར་མ་ཆོད་པས། །སྐུ་ལ་བབ་ཅིང་སྲོག་བརྟོད་པ་མང་བར་འགྱུར་རོ། །དེ་བཞིན་དུ་སྒྲོལ་སྦྱོར་གྱི་ལས་ལྟ་བ་དང་། ཏིང་ངེ་འཛིན་གྱིས་མ་ཟིན་པ་ཡང་དེ་བཞིན་ནོ། །དུས་ཐ་མའི་སློབ་དཔོན་ཕྲག་དོག་ཅན་གྱི་གྲོགས་པོ་ཡོན་ཏན་ཅན་ལ་ཐོས་ཀྱིས་དོགས་པ་དང་། སློབ་མ་བདག་གི་བཀའ་ལས་གཞན་གེགས་ལ་གནོད་པ་བྱེད་པ་བྱུང་ན་སྐྱོན་ནི་འཁྲུག་པའི་སྐབས་དང་། མི་མཐུན་པའི་རིས་དང་། ཤེས་རབ་མི་སྐྱེ་ཞིང་ཚོགས་གཅོག་པའི་སྒྲིབ་པ་ཤིན་ཏུ་ཡང་ཆེའོ། །དུས་ཐ་མའི་ཆད་པ་པོས་སྒྲ་དང་གྲགས་པ་འདོད་པའི་ཕྱིར་གྲངས་མང་བར་བརྒྱར་ཡང་རྡོ་རྗེ་ཐེག་པའི་སྤྱོད་པའི་སྐལ་བ་དང་མི་ལྡན་པ་དང་། གསང་སྔགས་གཉན་པའི་བཀའ་ཆད་ནི་དུས་མ་ཡིན་པར་འཆི་བ་དང་། མི་ནད་དང་ཕྱུགས་ནད་ཀྱི་རྣམ་པ་འབྱུང་བ་དང་། གནས་ནས་འབྱིན་པ་དང་། ཆར་དུས་སུ་མི་འབབ་ཅིང་ལོ་ཉེས་དང་མུ་གེའི་རྣམ་པས་ཉོན་མོངས་པ་དང་། དགྲ་མང་ཞིང་འཇིག་རྟེན་ཕྱི་མར་ཡང་དམྱལ་བ་ཁོག་འཇོམས་ཀྱི་གནས་སུ་བསྐལ་པ་བརྒྱར་སྐྱེ་བར་འགྱུར་རོ། །གསང་བའི་དམ་ཚིག་ཉམས་པས་གཅིག་འོག་ཏུ་གཅིག་མི་ཆུད་པས། སྦྱོད་པ་ཡང་ཉམས་པའི་རྒྱུ་སྟེ། མི་མཐུན་ཞིང་ཁོག་གནག་པས་མི་བདེ་བ་འབྱུང་ཞིང་བྱམས་པའི་འབྲས་བུ་མེད་པར་འགྱུར་རོ། །ས་མ་ཡ་བཀོད་པའི་རྒྱུད་ལས། གསང་བའི་དམ་ཚིག་སྤྱད་ཉེས་པའི་སྐྱོན་ནི་བསྟན་པའི་ལེའུ་སྟེ་ཉི་ཤུ་རྩ་གསུམ་པའོ།། །།སེམས་དཔའ་ཆེན་པོ་གསང་བའི་དམ་ཚིག་རྩ་བ་ནི། གཏེར་དུ་རྩ་བ་རིན་པོ་ཆེའི་སྒྲོམ་བུ་རྩ་བ་དང་། སེམས་ལ་རྩ་བ་ཡིད་ལ་བརྣག་པ་དང་། འཁོར་ལོ་རྩ་བ་སྣོད་དང་ལྡན་པ་ལས་མ་གཏོགས་པ་ཀུན་གྱི་ཐུན་མོང་མ་ཡིན་ཏེ། དེའི་ཕྱིར་འདི་སྐད་ཅེས་གསུངས་ཏེ། གསང་བའི་དམ་ཚིག་ཆེན་པོ་འདི། །དམ་པར་སྤྱད་ལས་མ་གཏོགསཔ། སྣངདགུ་ཕལ་གྱི་ཐུན་མོང་མིན། །བློ་ཞེན་ཐོས་ན་སྐྲག་པར་འགྱུར། །རིན་པོ་ཆེ་དང་གསེར་གྱི་རྒྱུན། །འཁོར་ལོས་སྒྱུར་བའི་རྒྱལ་པོ་ལས། །མགོ་ནག་ཀུན་གྱིས་མི་ཐོབ་ཅིང་། །ཀླ་ཀློ་ཀུན་གྱི་ཐུན་མོང་མིན། །དེ་བཞིན་གསང་བའི་གསང་ཆེན་འདི། །རྣལ་འབྱོར་ངང་ཚུལ་བཟང་བ་དང་། འབྱོར་བའི་ལོངས་སྤྱོད་ཅི་སྨོས་ཀྱི། །ལུས་དང་སྲོག་ལའང་མ་ཆགས་པས། །གང་ན་དམ་པ་འདི་ཡོད་པར། །སྤུ་གྲི་སོར་ཡང་རྒལ་བ་དང་། །མེ་མར་མུར་གྱི་འོབས་འབོགས་ན། །དེ་ནི་འདི་ཡི་གཞག་པའི་སྣོད། །བཀའ་ལས་འབྱུང་བཞིན་ཅིག་མི་བྱེད། །གསང་བའི་དོན་ངེས་གཡོ་སྒྱུས་འཚོལ། འདོད་དང་བཀུར་སྟི་ཆགས་པས་འཆིངས། །དེ་འདྲ་ཐ་ཞལ་སྤྱོད་ཡུལ་མིན། །ལོང་བས་དྲོ་ཡང་ཉི་མི་མཐོང་། །བླུན་པོ་ལུང་དུ་མ་བསྟན་པས། །ཇི་ལྟར་སྦྱད་ཀྱང་བདེན་མི་མཐོང་། །འདས་པས་བརླག་ཅིང་འབྲས་བུ་མེད། །སྨན་པས་སྨན་ངོ་མི་ཤེས་ཤིང་། །ནད་ཀྱིས་ངོས་ནས་མ་ཟིན་པར། །ནོར་བར་བཏང་བས་དུག་ཏུ་འགྱུར། །ཕན་པར་མ་སོང་སྡིག་བཞིན་དུ། །སློབ་དཔོན་སྣོད་ལ་མི་རྟོག་ཅིང་། །སློབ་མ་དམ་ཚིག་མི་འཛིན་པ། ཉེས་འགྱུར་ཉམས་པ་བརྗོད་པ་ལས་འདས། །གཉིས་ཀ་འཕུང་བྱེད་བརླག་པར་འགྱུར། །དེ་བས་གསང་ཆེན་དམ་པ་འདི། །ཆུ་སྲིན་དགུ་པོའི་ཁ་ནང་འདུ། །ནོར་བུ་རིན་ཆེན་འཆང་བ་བཞིན། །གཞན་ལ་བསྟན་པར་བྱ་བ་མིན། །དོན་དུ་གསང་བ་འདི་འཚོལ་ཞིང་། །ཡིད་ལ་བརྣགས་ཤིང་འཆང་བྱེད་པ། །དུས་གསུམ་རྒྱལ་བའི་སྲས་ཡིན་པས། །སངས་རྒྱས་ཀུན་གྱི་གདུང་འཛིན་ནོ། །གསང་ཐུབ་པ་ནི་དངོས་གྲུབ་ཡིན། །བརྗེད་པ་མེད་པ་ལྷ་ཞེས་བྱ། །མ་ཡེངས་ཡིད་ཀྱི་དགོངས་པ་ཡིན། །དོན་ལས་མི་འདའ་དམ་ཞེས་བྱ། །ཀུན་ཏུ་བཟང་པོའི་དམ་པ་ལ། །མི་འབྲས་ལུས་དང་གྲིབ་མ་བཞིན། །མི་གཏོང་བ་ནི་ཆུ་སྲིན་ལྟར། །ཕྱག་རྒྱ་བཟླས་བརྗོད་ཆུ་རྒྱུན་བཞིན། །བདེན་པར་གནས་ཤིང་དྲང་པོར་སྤྱོད། །བསྟན་པ་བཞིན་དུ་བཀའ་ཉན་ཅིང་། །ངེས་བའི་དོན་ལས་མི་འདའ་བ། །ད་ལྟར་ཉིད་ནས་སངས་རྒྱས་ཉིད། །བསྒྲུབས་ཤིང་བཙལ་ཀྱང་དཔག་ཏུ་མེད། །མ་བཙལ་ན་ཡང་སྐྱོན་མེད་དེ། །གསེར་བཞིན་ཡེ་ནས་དག་པ་ལ། །དེ་ལ་བཅོས་ཤིང་སྨོན་དུ་མེད། །ས་མ་ཡ་བཀོད་པ་ལས། གསང་བའི་དམ་ཚིག་རྩ་བའི་ལེའུ་སྟེ་ཉི་ཤུ་རྩ་བཞི་པའོ།། །།སེམས་དཔའ་ཆེན་པོ་རྡོ་རྗེ་སློབ་དཔོན་ལ་བཀའ་བཅག་དགོངས་པ་ནི། བདུད་དང་བར་དུ་གཅོད་པ་སློབ་དཔོན་གྱི་ཆ་བྱད་དུ་བྱུང་ན། བརྡུང་ཞིང་དགར་བ་བྱས་ཀྱང་དམ་ཚིག་ལས་མ་གཏོགས་སོ། །རྡོ་རྗེ་སློབ་དཔོན་སྨྱོས་པ་དང་། ཆང་དབང་དང་།གདོན་དབང་དུ་བྱེད་པ་ཡང་བཀའ་བཅག་པ་མི་འགལ་བ་དང་། སློབ་དཔོན་ལེགས་པའི་ལམ་ལ་དགོངས་ཤིང་དགེ་བའི་གགས་བྱེད་པ་དང་། སྡིག་པའི་ལས་ལ་བསྐུལ་བ་དང་། རྦོད་པའི་ལས་བྱེད་ན་བཀའ་བཅག་པ་འབྱུང་ངོ་། །བཀའ་བདེན་པ་མི་སྟོན་ཅིང་། མུ་སྟེགས་དང་ལོག་པའི་ཕྱོགས་སྟོན་པར་བྱེད་ན་ཡང་སྤང་བར་བྱའོ། །མཆེད་དང་ལྕམ་དྲལ་ཡང་དཀར་པོའི་ཕྱོགས་ལ་སྨོད་ཅིང་ནག་པོའི་ཕྱོགས་ལ་བསྟོད་པ་དང་།དད་པ་ཅན་གྱི་ཚོགས་གཅོག་ཅིང་། དགེ་བ་ཅན་གྱི་ཐུགས་དཀྲུག་པ་དང་། བཀའ་ལས་འགལ་ཞིང་མཆེད་ལ་འཁུ་ན་ངག་གཅག་གོ །དམ་ཚིག་དང་བརྩེ་གདུང་མེད་ཅིང་། སྡིག་ལ་མི་འཛེམ་པ་དང་། ཆོས་ལ་མི་དད་ཅིང་དགེ་བ་ལ་མི་གུས་པ་དང་། ཡོ་བྱད་ལ་བསོག་འཇོག་བྱེད་ཅིང་ཕུད་ལ་ཁྱེར་རྔམ་ཆེ་ན་སྤང་ངོ་། །གཟུངས་དང་། དེ་བྱི་དང་། གྲོགས་ཀྱང་དེ་བཞིན་ནོ། །དེ་ལས་གཞན་དུ་སློབ་དཔོན་གྱི་བཀའ་མི་གཅག་པ་དང་།ཅི་གསུངས་བ་ཉན་པ་དང་། མཆེད་ལྕམ་ལ་སོགས་པ་ཡང་དེ་བཞིན་ནོ། །བཟང་པོའི་ལས་ནི་བདེན་པའི་ཆོས་ཡིན་ལ། སྡིག་པའི་ལས་དམ་ལ་མི་གནས་པ་མིན་པས། སངས་རྒྱས་ཐམས་ཅད་ཀྱི་དམ་པར་དམ་གཅིག་ཡིན་པས། དམ་ཚིག་ཡིད་ལ་འཛིན་པ་ནི་སངས་རྒྱས་ཐམས་ཅད་འཛིན་པ་ཡིན་པས། གཞན་གྱི་རྩོལ་བ་ཅིའང་མ་བྱས་ཀྱང་སངས་རྒྱས་པས་མ་ཉམས་གཙོར་གཟུང་ཞིང་ཉམས་པ་སྤང་བར་ཀུན་ཏུ་བཟང་པོ་ངས་གསུངས་སོ། །ས་མ་ཡ་བཀོད་པ་ལས། འགལ་བ་བཅོས་ཤིང་སྤང་བའི་ལེའུ་སྟེ་ཉི་ཤུ་རྩ་ལྔ་པའོ།། །།གཞན་ཡང་སེམས་དཔའ་ཆེན་པོ་དམ་ཚིག་གི་དོན་མི་ལེན་པར་གསང་བའི་དོན་སྤྱོད་པ་ནི། ནམ་མཁའ་ལ་ཁང་བུ་བརྩིག་པ་དང་། རྡོ་རྗེ་བྲག་ལ་ས་བོན་འདེབས་པ་འདྲ་སྟེ། ཅི་བྱས་ཀྱང་འབྲས་བུ་མེད་ཅིང་ཚི་ཆད་པར་འགྱུར་བས། འདི་སྐད་ཅེས་གསུངས་ཏེ། སྔ་རབ་འདས་པའི་སངས་རྒྱས་ཀྱང་། །དམ་ཚིག་འདི་རྟོགས་མངོན་སངས་རྒྱས། །ད་ལྟར་བྱུང་བའི་སངས་རྒྱས་ཀྱང་། །དམ་ཚིག་འདི་སྲུངས་མངོན་སངས་རྒྱས། །སླད་ཀྱིས་འབྱོན་པའི་སངས་རྒྱས་ཀྱང་། །དམ་ཚིག་འདི་སྤྱོད་དེ་བཞིན་རྒྱས། །དམ་པའི་དོན་དེ་སངས་རྒྱས་ཡིན། །གཞན་དུ་རྣལ་འབྱོར་མ་ཚོལ་ཅིག །ལྟ་སྤྱོད་སྒྲུབ་ཐབས་འཕྲིན་ལས་ཀྱང་། །དམ་ཚིག་ཡོད་ན་དེ་དག་ངེས། །གལ་ཏེ་དམ་ཚིག་འདི་མེད་ན། །བྱས་ཀྱང་ཕན་མེད་སྡུག་བསྔལ་ཆེ། །སྐྲུར་བས་སྲིན་བལ་ལམ་དྲངས་དང་། །གླང་ཆེན་རྫབ་ཏུ་ཆུད་པ་བཞིན། །བཙལ་ཀྱང་ཕན་མེད་ངལ་ཆད་པས། །དམ་མེད་དེ་ཡང་དེ་དང་མཚུངས། །ཟང་ཟིང་ནོར་དང་ལོངས་སྤྱོད་ལ། །འབྱོར་བས་ཆེ་ཕྲ་ཁས་བླངས་ནས། །སངས་རྒྱས་རྣམས་དང་བླ་མ་དང་། །དེ་བཞིན་མཆེད་ལ་སོགས་པ་ལ། །དང་པོར་དད་པས་ཁས་བླངས་ནས། །དབུལ་བར་དམ་བཅས་འདས་ན་ནི། །སངས་རྒྱས་སྐུ་བསླུས་ཞེས་བྱ་སྟེ། །བརྫུན་པར་ལྷ་མི་ཡིད་ཆེས་པས། །དངོས་གྲུབ་འབྲས་བུ་ཅི་བཙལ་ཀྱང་། །འདི་དང་ཕྱི་མར་ཐོབ་མི་འགྱུར། །གལ་ཏེ་སྔོན་གྱི་ལས་བསྙེགས་ཀྱིས། །དུས་འདིར་ཅུང་ཟད་བདེར་གྱུར་ཀྱང་། །ཕྱི་མ་ལ་ནི་འགྲུབ་མི་འགྱུར། །ངན་སོང་དམྱལ་བའི་གནས་སྐྱེས་ནས། །སྡུག་བསྔལ་ཉམ་ཐག་གྱུར་པ་ལ། །མགོན་སྐྱབས་སུས་ཀྱང་ནུས་མི་འགྱུར། །རྣལ་འབྱོར་འཐབ་རྩོད་སྐྱེས་པ་ལ། །གཅིག་ལན་གཅིག་གིས་བྱེད་པ་ནི། །བེའུ་སྦྲེལ་གཡང་དུ་ལྷུང་བ་བཞིན། །གཉིས་ཀ་དམྱལ་བར་ལྟུང་བར་འགྱུར། །གང་ཞིག་བསྲིངས་པ་དེ་རྒྱལ་བས། །གཉིས་ཀས་བསྲིངས་ན་རྒྱལ་བར་ངེས། །རྩོད་པས་རྒྱལ་བ་འཕེལ་མ་ཡིན། །གང་གིས་ཕམ་བླངས་རྒྱལ་བར་འགྱུར། །ངོ།ན་མེད་སློབ་དཔོན་སློབ་མ་མཆེད། །ལོང་བས་ལོང་བ་ཁྲིད་པ་བཞིན། །ངམ་གྲོག་གཡང་སར་ཀུན་ལྷུང་ལྟར། །མི་བདེ་ངན་སོང་ གསུམ་དུ་སྐྱེ། །དེ་ལ་དམ་པ་འདི་ཐོས་ནས། །ཇི་ལྟར་མུན་པར་སྒྲོན་བཏེག་བཞིན། །དེ་མ་ཐག་ཏུ་གསལ་གྱུར་ནས། །བྱང་ཆུབ་འཚང་རྒྱ་གདོན་མི་ཟ། །དམ་ཚིག་ཆེན་པོའི་ལྟ་བ་ལ། །ལྟ་སྤྱོད་དམའ་བའི་འགལ་འཇུགས་པ། །བྱ་འཕུར་རྗེས་སུ་ཁྱི་སྙེགས་བཞིན། །རང་ཉིད་ཚི་ཆད་སྒྲིབ་པར་ལྷུང་། །མན་ངག་ལུང་དང་ལྡན་པ་ལ། །དོན་གྱི་བཀུར་སྟི་མི་བྱེད་ཅིང་། །ཐབས་ཀྱིས་སྨོད་ཅིང་དོན་འགྲུབ་པ། །ཉེས་འགྱུར་ཉམས་པ་བརྗོད་མི་ལང་། །སློབ་དཔོན་ངེས་པ་ཅན་རྣམས་ཀྱིས། །གསང་བ་ངེས་པར་དམ་ཕོག་པ། །དེ་མ་ཐག་ཏུ་གྲགས་ཤིང་སྟོན། །དེ་ཡི་མཚན་ཉིད་དེ་དང་མཚུངས། །སློབ་དཔོན་བཀའ་ལྟར་མི་བྱེད་ཅིང་། །སློབ་མ་བསྟན་པ་མི་ཉན་པ། །གསང་བ་དོན་ལ་ཅི་བསྒྲུབས་ཀྱང་། །སྒྲུང་དང་འདྲ་སྟེ་ཕན་མེད་འགྱུར། །ཞེས་ཆེད་དུ་བརྗོད་དོ། །དམ་ཚིག་ཐམས་ཅད་ཀྱི་རྒྱལ་པོ་ས་མ་ཡ་བཀོད་པའི་རྒྱུད་ལས། གསང་དོན་སྤྱད་ཉེས་པའི་སྐྱོན་བསྟན་པའི་ལེའུ་སྟེ་ཉི་ཤུ་རྩ་དྲུག་པའོ།། །།སེམས་དཔའ་ཆེན་པོ་དམ་ཚིག་གསང་བའི་དོན་སྤྱོད་ཤེས་པའི་ཡིད་བཞིན་གྱི་ནོར་བུ་རིན་པོ་ཆེ་བས་དཀོན་ཞིང་རིན་ཆེ་བ་དེ་སྒྲོམས་སུ་བཅུག་ནས། བཀུར་བ་དང་མཆོད་པ་བྱས་ན། ཅི་འདོད་པའི་དགའ་བ་བསྐྱེད་པ་བཞིན། ཐབས་ལ་མཁས་པའི་རྣལ་འབྱོར་ཆེན་པོས་འདི་དག་སེམས་ལ་བཅངས་ཤིང་སྤྱད་ལེགས་པར་བྱས་ན། འཇིག་རྟེན་གྱི་ཁམས་འདིར་དགོས་པ་ཐམས་ཅད་ལྷུན་གྱིས་གྲུབ་པར་འགྱུར་བ་ལྟ་ཅི་སྨོས་ཀྱི། འཇིག་རྟེན་ཕྱི་མའི་དངོས་གྲུབ་ཐམས་ཅད་ཀྱང་ད་ལྟར་ཉིད་དུ་འགྲུབ་པར་འགྱུར་ཏེ། རྒྱལ་བ་ཐམས་ཅད་ཀྱི་གདུང་འཚོབ་ཅིང་། སངས་རྒྱས་ཐམས་ཅད་ཀྱི་སྲས་སུ་གྱུར་ནས། འཁོར་གྱི་མ་མོ་དང་། མཁའ་འགྲོ་མ་དང་། དམ་བཅས་པ་ཐམས་ཅད་ཀྱིས་ཅི་བསྒོ་བ་ཐམས་ཅད་ཉན་ཞིང་ཞབས་སྤྱི་གཙུག་གིས་ལེན་ཏེ། གསང་བ་ཐམས་ཅད་བྱིན་དང་ལྡན་པར་འགྱུར་བས་འདི་སྐད་ཅེས་གསུངས་སོ། །རྣལ་འབྱོར་བརྩོན་པ་རབ་ལྡན་པས། །ཕྱོགས་བཅུ་དུས་གསུམ་སངས་རྒྱས་གྲངས། །རྡུལ་གཅིག་རྡུལ་སྙེད་སངས་རྒྱས་ཀྱི། །མཚན་ནས་བརྗོད་ཅིང་ཕྱག་འཚལ་ཞིང་། །སྟོང་གསུམ་སྟོང་གི་འཇིག་རྟེན་ཁམས། །རིན་ཆེན་སེལ་མས་བཀང་ནས་ཀྱང་། །ཉིན་མཚན་དུས་དྲུག་ལ་སོགས་པར། །རྒྱལ་བ་རྣམས་ལ་མཆོད་པ་བས། །དེ་བས་དམ་ཚིག་ཚུལ་ཤེས་པས། །ལྷ་དང་སློབ་དཔོན་མཆེད་ལྕམ་ལ། །དད་པ་བརྩེ་གདུང་མི་ཕྱེད་པས། །སྨན་གྱི་མཆོད་པ་འདི་ཕུལ་ཚེ། །མཐའ་ཡས་སེམས་ཅན་ཐམས་ཅད་ལ། ཁྲ་ཁྲག་འཕངས་མེད་བཏང་བ་བས། །དེ་བས་ལྷ་སློབ་མཆེད་ལྕམ་ལ། །ཟ་མ་རེ་མཆོད་ཆེར་བསྔགས་སོ། །དེ་བཞིན་ལུས་དང་ལོངས་སྤྱོད་དང་། །ཅི་ཡོད་ཕུལ་བ་ཅི་སྨོས་ཀྱི། །སྐབས་ཀྱི་རྩེ་གདུང་མ་ཤོར་ན། །དེ་ཡི་ཡོན་ཏན་བརྗོད་ལས་འདས། །དེ་བཞིན་དམ་ཚིག་ཆེ་འདོད་ན། །བརྩེ་གདུང་གུས་ན་ཆེ་བར་འགྱུར། །དད་མེད་སེར་སྣས་ཆུང་འགྱུར་ཏེ། །འདས་སྐྱོན་ལྷ་ཡང་བརླག་པར་འགྱུར། །ལུས་ཀྱི་དྲེ་མ་བཀྲུས་པས་དག །སྡིག་པའི་དྲི་མ་བཤགས་པས་འབྱང་། །འཛིན་རྟོག་སྡུག་བསྔལ་བསྒོམས་པས་སེལ། །དམ་ཉམས་སྒྲིབ་པ་ན་ར་ཀན། །སེམས་ནི་ཡི་དམ་ལྷ་ལ་དམིགས། །ཅི་ཡིད་སློབ་དཔོན་ཉིད་ལ་ཕུལ། །ལྷག་མས་ཕྱེད་དང་དེ་ཕྱེད་རྣམས། །མཆེད་ལ་མཆོད་ན་བདེ་ཤམ་འབར། །ཆགས་དང་སེར་སྣ་སྡུག་བསྔལ་ནད། །མ་ཆགས་སྦྱོར་བྱེད་བདུད་རྩི་སྨན། །མི་ཉན་ཚོད་ཡོད་ཉམས་པའི་རྒྱུ། །བཀའ་དམ་དོན་ཉན་དམ་ཚིག་གོ །འདོད་པའི་ལོངས་སྤྱོད་ཐམས་ཅད་ལ། །བདག་ལ་འབུལ་བར་བྱེད་པ་ཡང་། །སློབ་དཔོན་མཆེད་ལ་ཕུལ་ཅིག་གོ །དེས་ནི་མི་ཉམས་ཉམས་ཀྱང་སྐོངས། །ཟང་ཟིང་ལོངས་སྤྱོད་དད་པའི་ཚོགས། །གཞན་ལ་འབུལ་བར་བྱེད་པ་ལ། །བདག་ལ་ཕུལ་གཅིག་ལེན་བྱེད་ན། །བགྲུངས་ཀྱང་ཉམས་ཏེ་སྐོངས་མི་འགྱུར། །གསང་བ་ཉམས་པའི་གང་ཟག་ནི། །ཀླུ་ཡི་གདུག་པའི་ཁ་རླངས་བཞིན། །གང་དུ་སླེབས་པར་ཕུང་བྱེད་པས། །མི་བདེན་དེ་དག་སྤང་བར་བྱ། །གསང་ཐུབ་བརྟེན་པའི་མན་ངག་ཅན། །གཏེར་སྦས་ཐབས་ཀྱིས་ཕྱུང་བ་བཞིན། །གང་དང་ཕྲད་པ་འཚེངས་འགྱུར་བས། །རིན་ཐང་མེད་པར་བསླུ་བར་འོས། །གསང་མེད་སློབ་དཔོན་བྱེད་པ་དང་། །སྣོད་མེད་སློབ་མ་བྱེད་པ་ནི། །འོ་ཁམ་བཞིན་དུ་གཉིས་ཀ་འཕུང་། །དུས་མེད་སྲོག་ཟད་དམྱལ་བར་ལྟུང་། །གསང་བ་དམ་པའི་སློབ་དཔོན་དང་། །སྣོད་དང་ལྡན་པའི་སློབ་མ་ནི། །ཇི་ལྟར་གསེར་དང་རིན་ཆེན་བཞིན། །ཡོན་ཏན་ཟད་མེད་ཕྱི་ཕྱིར་འཕེལ། །གཞུང་དང་མཐུན་པར་མི་བྱེད་ཅིང་། །བདེན་པ་སེམས་ལ་མི་འཇོག་པར། །གང་ཞིག་གསང་སྔགས་སྤྱོད་པ་ནི། །ས་བོན་བརྗོས་པ་དེ་བཞིན་ནོ། །ཞེས་གསང་བ་དམ་པ་གསུངས་སོ། །ས་མ་ཡ་བཀོད་པའི་རྒྱུད་ལས། གསང་བ་དམ་པར་བསྟན་པའི་ལེའུ་སྟེ་ཉི་ཤུ་རྩ་བདུན་པའོ།། །།སེམས་དཔའ་ཆེན་པོ་གཞན་ཡང་། སྔགས་ཀྱི་དམ་ཚིག་མ་ནོར་བར་བཟླས། ཏིང་ངེ་འཛིན་གྱི་དམ་ཚིག་མ་ཡེངས་པར་བསྒོམ། གསང་བའི་དམ་ཚིག་མ་ཉམས་པར་བགྲུང་། །འཕྲིན་ལས་ཀྱི་དམ་ཚིག་མ་ཆགས་པར་བཙལ། གསང་བའི་དམ་ཚིག་མ་བརྗེད་པར་བསྲུངས་ན། གསང་སྔགས་ཡིན་ནོ། །དམ་ཚིག་ཡིན་ནོ། །བདུད་རྩི་ཡིན་ནོ། །སངས་རྒྱས་ཡིན་ནོ། །གསང་བར་བྱས་ན་མཉན་ནོ། །གཉན་པར་བྱས་ན་བྱིན་ཆེའོ། །བྱིན་ཆེ་བས་གདོན་མི་ཟ་བའི་སངས་རྒྱས་ཡིན་ནོ། །སེམས་དཔའ་ཆེན་པོ་སྔགས་ཀྱི་དམ་ཚིག་ནོར་བར་བཟླས་ན། རང་བཞིན་འགྲུབ་བའི་མཐུ་བྱིན་མི་འབྱུང་ངོ་། །ཏིང་ངེ་འཛིན་གྱི་དམ་ཚིག་འདུ་བྱེད་ལ་ཡེངས་པ་དང་། བྱིང་རྨུགས་དང་འདྲེས་ན། རང་རིག་གི་ཡེ་ཤེས་ཆེན་པོ་མི་འཆར་རོ། །སྤྱོད་པའི་དམ་ཚིག་ཉམས་ན། རྡོ་རྗེ་དམྱལ་བ་ཡ་ང་བའི་གནས་ན་ལྷ་བསོད་ནམས་ཀྱིས་རྒྱལ་བའི་ཚེ་ཚད་པས་ཀྱང་གསུམ་གྱིས་རིང་བར་སྐྱེ་བར་འགྱུར་རོ། །གསང་བའི་དམ་ཚིག་བརྗེད་དེ། གསང་ཆུ་ཚགས་སུ་འཛགས་ན། དམྱལ་བ་བསྡུས་འཇོམས་དང་ལྕེ་ལ་ཞིང་རྨོད་པའི་གནས་སུ་བསྐལ་པ་དཔག་གིས་མི་ལང་བར་སྐྱེ་བར་འགྱུར་རོ། །འདི་དག་ཉམས་ན་བདུད་ཡིན་ནོ། །དུག་བླུད་པ་ཡིན་ནོ། །དམྱལ་བ་ཡིན་ནོ། །མུ་སྟེགས་འཆལ་པ་སངས་རྒྱས་ཐམས་ཅད་ཀྱི་བཀའ་ལས་འགལ་བས། དམྱལ་བ་དང་ངན་སོང་གསུམ་གྱི་གཞི་མ་ཡིན་ནོ། །ས་མ་ཡ་བཀོད་པ་ལས། དམ་ཚིག་གི་དངོས་གཞི་བསྟན་བའི་ལེའུ་སྟེ་ཉི་ཤུ་རྩ་བརྒྱད་པའོ།། །།སེམས་དཔའ་ཆེན་པོ་ཆོས་ཐམས་ཅད་དངོས་པོ་དང་རང་བཞིན་མེད་པར་ཤེས་ན་དམ་མི་ཉམས་སོ། །དེ་ཅིའི་ཕྱིར་ཞེ་ན། འཛིན་པ་དང་ཆགས་པ་མེད་པས་མི་ཉམས་སོ། །དེ་བས་ཀྱང་ཆོས་ཐམས་ཅད་གཉིས་སུ་མེད་ཅིང་མཉམ་པ་ཉིད་དུ་ཤེས་ན་དམ་ཚིག་ལ་ཉམས་པ་མེད་དོ། །དེ་ཅིའི་ཕྱིར་ཞེ་ན། རྣམ་རྟོག་གི་ཕྱོགས་རིས་མིང་ཡང་མེད་པས་ཉམས་པའི་དུས་མེད་དོ། །དེ་བས་ཀྱང་༄༅ ཆོས་ཐམས་ཅད་སྐྱེ་འཆི་མེད་ཅིང་འཕོ་འགྱུར་མེད་པར་རྟོགས་ན་དམ་ཚིག་ཉམས་ན་ཡང་སྐོངས་སོ། །དེ་ཅིའི་ཕྱིར་ཞེ་ན། ཆོས་ཀྱི་སྐུར་གྱུར་པས་སྐྱོན་མིང་ཡང་མེད་པར་དག་པའོ། །དེ་བས་ཀྱང་ཆོས་ཐམས་ཅད་བྱང་ཆུབ་ཀྱི་སེམས་ཡིན་པར་རྟོགས་ན་དམ་ཚིག་བསྲུང་དུ་ཡང་མེད་དོ། །དེ་ཅིའི་ཕྱིར་ཞེ་ན། ཡེ་ནས་སངས་རྒྱས་པ་ལ་འཁོར་བའི་རྒྱུ་བཙལ་གྱིས་མི་རྙེད་པའོ། །དེའི་དོན་ཀྱང་རང་གི་སེམས་ལ་གསང་ཞིང་བཅངས་ན། དམ་ཚིག་ཐམས་ཅད་ཀྱི་རང་བཞིན་དུ་ཆོས་ཐམས་ཅད་ཀྱང་སངས་རྒྱས་པའོ། །དེ་ཅིའི་ཕྱིར་ཞེ་ན། གསང་པ་ལ་ཉེན་དང་འགལ་བ་མེད། ཐུབ་པ་སངས་རྒྱས་ཐམས་ཅད་ཀྱི་དགོངས་པ་མཐར་ཕྱིན་པའོ། །དེ་ལྟ་བུའི་དོན་འདི་ཀུན་ཏུ་བཟང་པོའི་ཐུགས་ཕྱུང་བ་ཡིན་ཀྱང་གཅམ་བུ་དང་། འཕྱར་པོ་དང་། གསང་མེད་ཅིང་སྣོད་དང་མི་ལྡན་པ་ལ་སྤེལ་ནདེ་ཉིད་ཕུང་ཞིང་བརླག་པ་ལྟ་ཅི་སྨོས། གཞན་གར་སྤྲོས་པར་ཕུང་ཞིང་བརླག་པར་འགྱུར་ཏེ། དེ་ཅིའི་ཕྱིར་ཞེ་ན། གཅམ་བུ་ལ་ངེས་དོན་ཟབ་མོ་བྱིན་ན་དང་པོར་ངོམ། བར་དུ་འདི་ཡིན་ཅེས་སྟོན། ཐ་མར་ནན་པོ་ཆེའི་ངོ་མི་ཟློག་པས། གསང་ཆུ་ཚགས་སུ་འཕེལ་བ་ནིསྐྱོན་དང་བཅས་པ་ཤིན་ཏུ་ཡང་ཆེ་སྟེ། བཀུར་གནས་ཀྱི་རིམ་པ་ཤོར། གསང་བའི་ངེས་དོན་འ་ས། དམ་ཚིག་གི་གཞུང་ལུགས་མེད། འབད་པའི་འབྲས་བུ་སྟོར་ཏེ་འགྲོ་བས་འདི་ནི་ཉམས་ཚབས་ཀྱང་ཆེ། སྡིག་ཀྱང་གཞན་དང་མི་མཉམ། བསྐང་ཚད་ལས་ཀྱང་འདས་པས། བདེན་པའི་དོན་ཐམས་ཅད་ལ་འབྲས་བུ་མེད་དེ། འབྲས་བུ་ཟབ་མོ་ཐམས་ཅད་འཇུག་ཏུ་སྤྱང་པོ་དང་ནོར་བུ་ཆུང་གི་ལག་ཏུ་སྤེལ་ཏེ། སྐྱོན་ཅན་དང་ནོར་བུ་ཆུང་ཐམས་ཅད་ངོམ་ཞིང་སྟོན་ཅིང་འཚོང་། གསང་གསང་དོན་ཅན་རྣམས་འཆའ་ཞིང་སྤྱིད་ལུག་པའི་སྐྱོན་ནི་ཀུན་ཏུ་བཟང་པོ་ངས་ཀྱང་བརྗོད་པའི་མཐའ་མེད་དེ། དམ་ཚིག་ཆེན་པོ་ལ་གཏོགས་སོ། །འཕྱར་པོ་ལ་གསང་བའི་དོནཟབ་མོ་འཕེལ་ན། འཕྱར་བའི་དབང་གིས་རང་གི་སེམས་ལ་མི་འཇོག་ཅིང་བློ་ལ་འདུག་པའི་ཡུལ་མེད་པས། སུ་སྣང་བ་ལ་དོན་འདི་ལྟ་བུ་ཡོད་པ་བཟང་ངམ་ངན། །སངས་རྒྱས་ཀྱི་ཞལ་ནས་གསུངས་པ་ལགས་སམ་མ་ལགས་ཞེས། ཉན་ཐོས་དང་ཐེག་པ་དམན་པའི་རིགས་ཐམས་ཅད་ལ་སྟོན་པ་དང་། གསང་སྦེད་མི་ཤེས་པས་གསང་བརྐུས་པ་དང་། གསང་ཉམས་པས་གསང་བ་ལ་རྨ་འདོད་ཅིང་ཡང་བ་དང་།འཕྱས་ཆེན་པོ་འདོགས་པ་དང་། ཆོས་འདི་དག་ནི་སངས་རྒྱས་ཀྱིས་མ་གསུངས་ངེས་ཏེ། གང་ཟག་སྒྲུན་དུ་རེ་བ་དང་ལེགས་སུ་རེ་བའི་མི་ཚིག་ཡིན་ཏེ། ཅུང་ཡང་སྒྲེས་གྲགས་པ་དང་། ཁམ་ཆེ་བ་དང་། བདེ་བ་ཆེན་པོའི་དོན་ཉེ་གྲགས་པས་སངས་རྒྱས་ཀྱི་བཀའ་མིན་ཅེས་བྱ་བ་ལ་སོགས་པ་དཔྱས་ཤིང་སྐུར་བ་བསམ་གྱིས་མི་ཁྱབ་པ་འདེབས། ལ་ལ་ཚོལ་བར་འདོད་ན་ཡང་ཐབས་ཀྱིས་དཔྱས་ཤིང་དོན་གྱིས་ཚོལ་བ་ཡང་མང་བས་དེ་དག་ལྷག་པར་ཡང་ཉམས་ཏེ། སྔགས་འབྲས་བུའི་ཆོས་ཉན་ཐོས་དང་ཐེག་པ་དམན་པ་ལྟ་ཅི་སྨོས་ཀྱི། སྔགས་ཡོ་ག་ཕྱི་པམན་ཆདབསྟན་ན་ཡང་ལྟུང་བ་གོལ་བའི་སྒྲིབ་པ་ཆེ་ལ། དེར་ཡང་མ་ཟད་ནང་པ་རྣམ་པ་གསུམ་དང་། སྐུ་གསུམ་ཐུགས་ལ་སོགས་པའི་སྒྲུབ་པའི་སྒོ་སོ་སོ་ཡང་འདྲེར་མི་སྣང་ན། འཕྱར་པོས་དེ་རྣམས་ལ་བསྟན་པ་ལྟ་ཅི་སྨོས་ཏེ། ཤིན་ཏུ་ཡང་ཉམས་པ་ཚབས་ཆེ་སྟེ། དེ་ཅིའི་ཕྱིར་ཞེ་ན།རྫོགས་ཆེན་བླ་ན་མེད་པ་ཀུན་ཏུ་བཟང་པོ་ཉག་གཅིག་གི་དགོངས་སྤྱོད་འདི་ས་བཅུའི་བྱང་ཆུབ་སེམསདཔས་ཀྱང་དར་གྱི་ལ་བ་ཙམ་གྱིས་བསྒྲིབས་པས་མི་རྟོགས་ན། ཐེག་པའོག་མ་པ་དང་། ཉན་ཐོས་ལ་སོགསཔས་སྨོས་ཀྱང་ཅི་དགོས་ཏེ། དོན་གྱི་ཕྱོགས་གཅིག་ཙམ་ཡང་མི་རྟོགས། མ་རྟོགས་པས་བཀའ་ལ་སྨོད། །སྨད་པས་བཀའ་འདི་ལ་སྨད་ན་བཀའ་ཐམས་ཅད་ལ་སྨད་པ་བས། འདི་ཉམས་ཏེ་བསྐལ་པ་བརྒྱར་མནར་མེད་པའི་དམྱལ་བར་སྐྱེ་ཞིང་། དམྱལ་བ་གཞན་བསྐལ་པས་འཇིག་ཀྱང་། རྡོ་རྗེ་དམྱལ་བ་ཅིས་ཀྱང་མི་ཤིགས་པའི་གནས་འགྱོད་པ་དྲན་པར་འགྱུར་ཏེ། དེའི་སྡིག་ཀྱངབརྗོད་པ་ལས་འདས་ཏེ། བཀའ་འདི་དག་གིས་དོན་ནན་ལ་བོར་བ་དང་། ཡིན་མིན་གྱི་སྟང་བཅད་པ་མ་ཡིན་ཏེ། བཀའ་འདི་སངས་རྒྱས་ཐམས་ཅད་ཀྱི་ཐུགས་ཡེ་ཤེས་ཉིད་ཀུན་ཏུ་བཟང་པོ་རང་བྱུང་བ་ཡིན་པས། འདི་ནི་ལྷག་པར་ཉམས་ཤིང་མ་རུངཔར་དམ་ཚིག་ཆེན་པོ་ལ་གཏོགས་སོ། །གསང་མེད་པ་ནི་མུ་སྟེགས་འཆལ་པ་པོ་ལྟར་སྣང་དགུ་དང་། གྲོང་དང་། གྲོང་དུ་སྟོན་པ་དང་། ཕྱི་ནང་གི་དབང་དང་སློབ་དཔོན་གྱི་བཀའ་རྟགས་ཅི་སྨོས་ཀྱི། མིང་ཙམ་འབྱིན་ང་།འི་དབང་ཡང་མ་ཐོབ་པར་གཞན་ལ་འབྱིན་པར་བྱིན་པར་བྱེད་པ་ནི། ཉམས་ཤིང་འགལ་བ་གོང་མ་བས་ཀྱང་ཆེ་བ་མིན་རེ་དམ་ཚིག་ཆེན་པོ་ལ་གཏོགས་སོ། །སྣོད་མ་ཡིན་པ་ནི་ཇི་ལྟར་བསྟན་ཀྱང་སེམས་ཀྱི་དོན་མི་གོ་བར་སླར་སྐུར་བ་འདེབས་པ་བཀའ་འདི་ལས་འབྱུང་བ་ལྟར་ཚིག་གཅིག་ཀྱང་མི་བྱེད་པ་དང་། ཅི་ཉམས་བྱས་ཤིང་གཞན་ལ་ཚོགས་འདྲེ་ཞིང་སྒྲིབ་པ་སྐུད་པར་བྱེད་པ་རྣམས་ལ་དོན་འདི་དག་སྟོན་ཅིང་སྤྲོ་བ་ནི།དཔོན་དང་གཡོག་མེད་པར་གཉིས་ཀའི་དམ་ཚིག་ཉམས་ཏེ་འབྲས་བུ་གཏན་བརླག་པར་དམ་ཚིག་ཆེན་པོ་ལ་གཏོགས་སོ། །གལ་ཏེ་དམ་ཚིག་ཉམས་པར་ཚོར་ནས་འགྱོད། སླན་ཆད་སྡོམས་ན་མཁས་པ་བཤགས་སུ་བཏུབ་ལ། ཉམས་པར་ཡིད་ཆེས་ཤིང་སྣོད་མ་ཡིན་པ་ལ་སྤྲོ་བ་ནི་བསྐང་ཚད་ལས་འདས་སོ། །དམ་ཚིག་ཆེན་པོ་ཐམས་ཅད་ཀྱི་རྒྱལ་པོ་ས་མ་ཡ་བཀོད་པའི་རྒྱུད་ལས། ཀུན་ཏུ་བཟང་པོ་ཐུགས་ཀྱི་གདམས་ངག་གི་ལེའུ་སྟེ་ཉི་ཤུ་རྩ་དགུ་པའོ།། །།དེའི་ཕྱིར་སེམས་དཔའ་ཆེན་པོ་དམ་ཚིག་ཅེས་པ་ནི། སངས་རྒྱས་ཐམས་ཅད་ཀྱི་འབྱུང་གནས། ལྟ་བ་ཐམས་ཅད་ཀྱི་ལ་བསྡུ་བ། སྒྲུབ་པ་ཐམས་ཅད་ཀྱི་ཕུལ། འཕྲིན་ལས་ཐམས་ཅད་མཐར་ཕྱིན་པ། མན་ངག་ཐམས་ཅད་ཀྱི་ཉིང་ཁུ། དགོངས་པ་ཐམས་ཅད་ལྷུན་གྱིས་གྲུབ་པ། དུས་གསུམ་གྱི་སངས་རྒྱས་ཐམས་ཅད་ཀྱི་སྙིང། རྣལ་འབྱོར་པ་ཐམས་ཅད་ཀྱི་སྲོག །ཕྱི་ནང་མཁའ་འགྲོ་དབང་ཕྱུག་གི་ཡང་སྲོག །སྲོག་འདི་ལས་གང་འདས་ན། ཆོས་ཀྱི་སྐུ་ཡང་འཇིག་པར་འགྱུར་ན། གཞན་སྨོས་ཀྱང་ཅི་དགོས་ཏེ། ན་ར་ག་ཏེ་ཧ་ར་ཧན་ནོ། །གང་མ་ཉམས་ཤིང་མ་འདས་པ་དཔལ་གྱི་དཔལ་ལོ། །གང་དོན་དུ་གཉེར་བ་བྱང་ཆུབ་ཀྱི་སེམས་བདེ་བ་ཆེན་པོར་ལྷུན་གྱིས་གྲུབ་པའོ། །གང་དམ་ཚིག་རྒྱབ་ཏུ་འདོར་བ་དུས་ཐམས་ཅད་དུ་འབྲས་བུ་གཏན་མེད་ཅིང་ཡང་གཏིང་ཆེན་པོ་རྟག་པའོ། །དམ་ཚིག་ཆེན་པོ་འདི་ནི་སངས་རྒྱས་ཐམས་ཅད་ཀྱི་ཐུགས་དམ་ཡིན་ནོ། །མ་མོ་དང་མཁའ་འགྲོའི་དམ་ཚིག་ཡིན་ནོ། །རྣལ་འབྱོར་ཐམས་ཅད་ཀྱི་དབྱར་དམ་ཡིན་ནོ། །སངས་རྒྱས་ཀྱི་དབུ་སྒྱུང་ངམ་པ་ཚོགས་འཁོར་གྱི་བྲོ། རྣལ་འབྱོར་གྱི་མནའ། མཐའ་ཡས་པའི་སེམས་ཅན་གྱི་སྲོག་ཏུ་གསུངས་པས། སངས་རྒྱས་ཀྱི་སངས་རྒྱས་དབང་དུ་བཞུགས་པས་ཡེ་ཤེས་སེམས་དཔའོ། །གཤེད་མའི་གཤེད་མར་དཔང་དུ་བཞུགས་པས། བཛྲ་ཡཀྟའོ། །སྲོག་གི་ཡང་སྲོག་དབང་ཡིན་པས་ཙིསྟ་ས་མ་ཡའོ། །དམ་ཚིག་དམ་པ་མ་ཉམས་ན་རྩོལ་སྒྲུབ་དང་འཕྲིན་ལས་ཀྱི་སྒོ་ཅི་ཡང་མ་བྱས་ཀྱང་། འདི་ལྷར་སྣང་བའི་ཆོས་ཐམས་ཅད་ཀྱང་ཆོས་ཉིད་མ་སྐྱེས་པའི་ཀློང་ལས་དངོས་པོ་མཚན་མར་རྡུལ་ཆ་ཙམ་ཡང་མི་འདའ་བར་འགྱུར། ཕུང་པོ་དང་། ཁམས་དང་། སྐྱེ་མཆེད་དང། རྣམ་པར་ཤེས་པ་ཐམས་ཅད་ལྷའི་དཀྱིལ་འཁོར་ལ་ང་དང་། བདག་དང་། ཕྱོགས་དང་། རིས་སུ་རྡུལ་ཙམ་ཅོག་ཀྱང་མི་འདའ་བར་འགྱུར། ཙིསྟ་ལྷ་ཡེ་ཤེས་སེམས་དཔའ་སྐུ་མཚོན་གང་བའི་དཀྱིལ་འཁོར་དུ་སྐྱེ་འཆི་དང་འཕོ་འགྱུར་མེད་པར་མི་འདའ་བར་འགྱུར། སྲོག་དང་རྩ་དབུགས་བཛྲ་ཡཀྟའི་སྐུར་བར་དུ་གཅོད་པའི་གཉེན་པོ་ཅིས་ཀྱང་མི་ཚུགས་པའི་སངས་རྒྱས་ལས་མི་འདའ་བར་འགྱུར། བྱང་ཆུབ་ཀྱི་སེམས་ཡེ་ཀུན་ཏུ་བཟང་པོ་བདེ་བ་ཆེན་པོར་སངས་རྒྱས་ཏེ། འཁོར་བ་དང་ངན་སོང་གི་མིང་ཡང་མེད་ཅིང་། བཟང་ངན་ཆེ་ཆུང་སྤོང་ལེན་དུ་མི་འདའ་བར་འགྱུར། ཁམས་གསུམ་འཁོར་བའི་ཆོས་ཐམས་ཅད་ཡེ་རྒྱ་ཆེན་པོས་བཏབ་སྟེ་མི་འདའ་བར་འགྱུར། དེ་ལྟར་དམ་པ་འདི་ལ་མི་མཐུན་པ་དང་། ལོག་པ་བཙལ་ཀྱང་མི་འདའ་བར་འགྱུར། དེ་ལྟ་བུའི་དམ་པའི་ནང་འདི་རྩོལ་ཞིང་སྒྲུབ་ན་ཡང་མི་སྐྱོན་ཏེ། ཅི་བཙལ་ཅི་བསྒྲུབས་པ་ཐ་ན་ཆུང་ངུའི་རྡུལ་ཙམ་ཡང་ཆུད་མི་ཟ་བར་སངས་རྒྱས་ཀྱི་དགོངས་སྤྱོད་བསམ་གྱིས་མི་ཁྱབ་པར་འཕེལ་བ་ནི། རྡུལ་གྱི་རྡུལ་ཆ་ཙམ་གཅིག་ལ་ཡང་བརྒྱ་བྱིན་ལྷའི་དབང་པོའི་ལོངས་སྤྱོད་ཀྱིས་བརྒྱ་དང་། སྟོང་དང་། ཁྲི་དང་། འབུམ་གྱི་ཆར་ཡང་ཉེ་བ་མ་ཡིན་ཏེ། བརྗོད་པ་ལས་འདས་པའི་བསོད་ནམས་ཆེན་པོ་ལས་མི་འདའ་བས། ཐ་ན་དོན་བྱ་བ་ཡང་སེ་གོལ་ཡུད་ཙམ་གྱི་དོན་བྱས་ཀྱང་འཁོར་བ་ཐམས་ཅད་དུས་གཅིག་ཏུ་སྟོངས་ཤིང་། ཐམས་ཅད་སངས་རྒྱས་པའི་མཐུ་ནི། ཕྱོགས་བཅུ་དུས་གསུམ་གྱི་སངས་རྒྱས་རྡུལ་གཅིག་སྟེང་ན་རྡུལ་སྙེད་བཞུགས་པའི་སངས་རྒྱས་ཀྱིས་ཀྱང་། བཅུ་དང་བརྒྱའི་ཆར་ཡང་ཉེ་ཞིང་འདའ་བ་མ་ཡིན་པར་འགྱུར་རོ། །དེ་བཞིན་དུ་དམ་ཚིག་ཆེན་པོ་དེའི་རང་བཞིན་དུ་གྱུར་པའི་ཆོས་ཐམས་ཅད་ནི། ཡིད་ལ་ཇི་ལྟ་བ་འདོད་པར་དབང་སྒྱུར་བ་ཙམ་མ་ཡིན། ཡིད་ཀྱིས་མི་དམིགས་ཀྱང་འདོད་དགུ་ཡོན་ཏན་གྱི་རྒྱལ་པོ་ཆེན་པོར་རང་འབྱུང་བ་ནི་དཔེ་འམ། ཆ་འམ། གྲངས་སུ་ཀུན་ཏུ་བཟང་པོ་ངེས་ཀྱང་ཉེ་བ་མ་ཡིན་ཏེ། ཡོངས་སུ་འདའ་བ་མེད་པའི་གློང་ལ་ཡ་མཚན་གྱི་ཆོ་འཕྲུལ་ཇི་ལྟ་བུར་ཡང་འབྱུང་བའི་ཚིག་དང་ཡི་གེ་བརྗོད་པ་ལས་འདས་སོ། །སེམས་དཔའ་ཆེན་པོ་དམ་ཚིག་ཆེན་པོ་འདི་མ་བསྲུངས་སམ་ཉམས་ཏེ་འདས་ན། དགེ་བ་ཅི་བྱས་ཀྱང་སྡུག་བསྔལ་དུ་འགྱུར་བ་དང་། བསྒོམས་ཤིང་བསྒྲུབས་ཀྱང་བདུད་དུ་འབབས་ཏེ། དཔེར་ན་སྲོག་རྩ་ཉམས་ན་ཕུང་པོ་ལ་སྨན་ཅི་བཏང་ཡང་བདེ་བ་མི་འབྱུང་བ་བཞིན་ནོ། །དེ་བཞིན་དུ་དམ་ཚིག་གཉན་པོ་རྣལ་འབྱོར་པ་བདུད་ཀྱིས་བསླུས་པ་རྣམས་མི་བསྲུང་ཞིང་ཉམས་པར་བྱས་ན་གཞན་སྒོམ་སྒྲུབ་དང་། རྩོལ་བའི་སྒོ་རི་རབ་ཙམ་བྱས་པས། དམ་པ་གཉན་པོའི་རྟེན་མེད་པས་ཆོས་ཉིད་མ་སྐྱེས་པར་བསྒོམས་ཀྱང་ཆོས་ཉིད་ལས་འདས་པས་ཕྱི་ཡུལ་གྱི་དངོས་པོ་དམྱལ་བའི་ཟངས་ཁང་ན། རྡོ་རྗེ་ཐོ་ག་་ཁ་འཁྲིག་མོ་དང་། མཚོན་དཔལ་རྣོན་པོའི་དུལ་དཔལ་དང་། བསྐལ་པ་མེ་འབར་བའི་ཚ་བའི་གཅོང་རོང་ཐར་བའི་དུས་མེད་པའི་གནས་སུ་འགྱུར། ཕུང་པོ་དང་། ཁམས་དང་། སྐྱེ་མཆེད་དང་། རྣམ་པར་ཤེས་པ་ལྷའི་དཀྱིལ་འཁོར་དུ་བསྒོམས་ཀྱང་ཉམས་ཤིང་འདས་པས་དམྱལ་ཁམས་བཅོ་བརྒྱད་ཀྱི་གནས་སུ་གྱུར་ནས། དེ་ན་ལས་ཀྱི་དབང་གིས་ཟོ་ཆུའི་ཁྱུད་མོ་ལྟར་འཁོར་ཞིང་སྦྱོང་བར་འགྱུར། དམ་ལས་འདས་པས་ཡེ་ཤེས་སེམས་དཔའ་བསྒོམས་པ་ལྕགས་ཀྱི་སྡིག་པ་གཟེ་མོ་ཁབ་རྒྱུད་པའི་ཁོང་དུ་ཆུད་ནས་ཟངས་ལྕགས་ཁྲོ་ཆུ་སྐོལ་ཞིང་ཉམས་པ་དེའི་ལུས་ལ་བསྐལ་བ་མེ་འབར་བས་སྲེག །དམ་ཚིག་སྤང་པོ་བསླུས་པས་བཛྲ་ཡཀྟ་དམྱལ་བའི་དེད་དཔོན་ཆེན་པོས་བར་བར་དུ་དེ་ནས་དམ་ཉམས་པ་ཕྱུང་ནས་རྡོ་རྗེའི་ཐོ་བ་དང་གཏུན་འཁྲིག་མོའི་ནང་དུ་སྐད་ཅིག་ཙམ་ཡང་མི་འགྱུར་བར་རྡུང་ཞིང་འཐག །དེའི་སེམས་ཉམས་ཤིང་ལོག་བས་བསྲེགས་ཀྱང་ཚ་བའི་སྡུག་བསྔལ་ཚབས་ཅི་ཆེར་མྱོང་བ་ལས་མེད་ཅིང་སྟོངས་པར་མི་འགྱུར། རྡོ་རྗེ་ཐོ་ག་་དུ་བརྡུངས་ཀྱང་ན་བའི་སྡུག་བསྔལ་ཉམས་སུ་མྱོང་བ་ལས་མེད་ཅིང་བརླག་པར་མ་སོང་བས་འདེ་བ་ངལ་སོས་པའི་ཡུན་སེ་གོལ་ཙམ་ཡང་མི་མྱོང་། སྡུག་བསྔལ་དུ་མར་མི་བཟོད་པ་ལས་བསྐལ་པ་བརྒྱས་ཀྱང་མི་ཐར། ཕྱོགས་མཚམས་བླ་འོག་དང་ཕན་ཚུན་ཐམས་ཅད་ན་ཡང་དེ་འདྲ་བའི་དམྱལ་བ་ལ་ཐུག་པ་མེད་པ་བརྒྱ་བསམ་གྱིས་མི་ཁྱབ་པར་འགྱུར། ཉམས་ཤིང་འདས་པ་ལ་མ་བཙལ་མ་བསྒྲུབས་ན་དེ་བས་ཀྱང་ཐུ་སྟེ། མཚམས་མེད་པ་ལྔ་དང་། ཉེ་བ་ལྔ་དང་། ཁ་ན་མ་ཐོ་བ་སྡོམ་པ་དང་། དམྱལ་བ་དེ་ལྟ་བུའི་སྡུག་བརླབས་བརྒྱ་དང་། ཁྲི་དང་། འབུམ་གྱི་ཆར་ཡང་ཉེ་བ་མ་ཡིན་པར་སྐྱེ་བར་འགྱུར། དམ་ཚིག་ཉམས་པའི་དམྱལ་བ་དེའི་མཐུ་དང་སྲན་ལ་སངས་རྒྱས་ཐམས་ཅད་པས་བཏུལ་ཀྱང་ཐ་ན་རྡུལ་གྱི་འབུམ་ཆ་ཙམ་ཡང་དོན་མི་ནུས་ཏེ། དེ་བཞིན་དུ་ལོག་བའི་མཐུས་བརྟས་པའི་སྡུག་བསྔལ་གྱི་ཉེན་ཆད་ཀུན་ཏུ་བཟང་པོ་ངས་ཀྱང་ཚིག་དང་ཡི་གེར་བརྗོད་པ་ལས་འདས་པའོ། །དེའི་ཕྱིར་དམ་ཚིག་འདི་གཉན་ཞིང་མཐུ་ཆེ་བ་ནི། སངས་རྒྱས་ཐམས་ཅད་ཀྱི་ཀུན་ཏུ་བཟང་པོ་ངས་ཀྱང་འདའ་མི་ཕོད་དེ། འདས་ན་སྐད་ཅིག་ཙམ་གྱིས་བརླག་པར་འགྱུར་རོ། །ས་མ་ཡ་བཀོད་པའི་རྒྱུད་ལས། དམ་ཚིག་སྲོག་གི་ཉིས་ལེགས་ཀྱི་ལེའུ་སྟེ་སུམ་ཅུ་ཐམ་པའོ།། །།དེ་ནས་རྡོ་རྗེ་སེམས་དཔས་རྟོགས་བཞིན་དུ་འདི་སྐད་ཅེས་གསོལ་ཏོ། །བཛྲ་ཡཀྟ་ཞེས་བྱ་བའི་སངས་རྒྱས་གང་ལགས། བཀའ་སྩལ་པ། སེམས་དཔའ་ཆེན་པོ་སངས་རྒྱས་ཐམས་ཅད་ཀྱི་སྐུ་བསྡུས་པ་ཆོས་ཀྱི་སྐུ། གསུང་བསྡུས་པ་ཚིག་དང་ཡི་གེ་མེད་པའོ། །ཐུགས་བསྡུས་པ་རྣམ་རྟོག་ལས་འདས་པའོ། །སངས་རྒྱས་ཐམས་ཅད་ཀྱི་སྲོག་བསྡུས་པ་བཛྲ་ཡཀྟའོ། །སངས་རྒྱས་དེས་སྔོན་གྱི་སྨོན་ལམ་ཡང་དམ་ཚིག་ལྷར་གྲུབ་པར་བཏབ། སངས་རྒྱས་ཐམས་ཅད་ཀྱིས་ཀྱང་སངས་རྒྱས་ཐམས་ཅད་ཀྱི་མཐུ་ཅི་མངའ་རྡོ་རྗེ་གནོད་སྦྱིན་གྲུབ་ཅིང་སྨིན་པར་སྨོན་ལམ་བཏབ་ཅིང་དབང་བསྐུར་བས་དེ་བཞིན་དམ་ཚིག་གི་དབང་པོ་ཆེན་པོར་གྱུར་ཏེ། རྣལ་འབྱོར་པ་གང་སྲོག་ཡོད་ན་དམ་ཚིག་ཡོད། དམ་ཚིག་སྲོག་དང་འདྲ་བར་བསྲུང་ངོ། །དམ་ཚིག་བསྲུངས་དང་གཞན་བྱས་ཀྱང་ལེགས། གཞན་ཅི་ཡང་མ་བྱས་ཀྱང་བཛྲ་ཡཀྟ་དམ་ལས་མི་འདའ་བ་ལ་དབང་བསྐུར་བྱིན་གྱིས་བརླབ་བོ། །ཏིང་འཛིན་གྱི་ནུས་མཐུ་སྐྱེད། ཡིད་ལ་འདོད་པའི་སྨོན་པ་དུས་གཅིག་ཏུ་རྩོལ་བས་སངས་རྒྱས་འདི་ཡི་མཐུ་དང་། རྫུ་འཕྲུལ་དང་། ཐུགས་རྗེ་སངས་རྒྱས་ཐམས་ཅད་པ་དང་། དེའི་བདག་ཉིད་ཀུན་ཏུ་བཟང་པོས་ཀྱང་རྡུལ་གྱི་རྡུལ་ཆ་ཙམ་ཡང་ཉེ་བ་མེད་དོ། །གང་ཞིག་བཀའ་དང་འགལ་ཞིང་ལོག་བའི་ཕྱོགས་མཐའ་དག་གདུལ་ཞིང་ཚར་བཅད་ན་ཡང་རིག་པའི་རྒྱལ་པོ་ཁྲོ་བོ་ཐམས་ཅད་པས། འདི་ཡི་མཚན་གཅིག་རྡོ་རྗེ་མེ་དབལ་སྙིང་འཕྲོག་ཅེས་བྱ་བ་བརྗོད་ཙམ་ཉིད་ཆེས་སླའོ། །དམ་ལས་འདས་ཤིང་ཉམས་པ་ལ་སངས་རྒྱས་འདི་ཡི་མཐུས་ཀྱང་མི་ཚུགས་ན། གཞན་གྱིས་ལྟ་ཅི་སྨོས། གང་ཞིག་འགལ་བ་དང་ལན་མ་ལན་གྱི་དབང་དུ་ཡང་འདི་ཡི་སྙིང་པོ་བཛྲ་ཡཀྟ་ཨི་དན་ན་ར་ཀན། ཞེས་བརྗོད་ན་ངེས་ལེགས་ཀྱི་གཤགས་འབྱེད་པ། སངས་རྒྱས་ཐམས་ཅད་པས་ཀྱང་ལྷག་གོ །གང་ཞིག་ཉམས་ན་བཤགས་པར་འདོད་ན། ཡང་སངས་རྒྱས་འདི་ལ་བསྐང་ངོ་། །གང་ཞིག་མ་ཉམས་པར་བསྲུངས་ན་ཡང་དངོས་གྲུབ་འདིས་སྩོལ་ལོ། །ཆོས་དང་སངས་རྒྱས་ཐམས་ཅད་དམ་ཚིག་གོ །དམ་ཚིག་བཛྲ་ཡཀྟའོ། །བཛྲ་ཡཀྟ་རྣལ་འབྱོར་པ་དང་འཁོར་གྱི་དབང་ཕྱུག་ཐམས་ཅད་ཀྱི་སྲོག་གོ །སྲོག་ཉམས་ན་འཆི་ཞིང་བརླག །མ་ཉམས་ན་མི་འཆི་ཞིང་རྒྱས་པ་བཞིན། དམ་ཚིག་ཉམས་ན་སྲ་བ་ཆེན་པོའི་དམྱལ་བར་གཏན་བརླག་གོ །མ་ཉམས་ན་སངས་རྒྱས་ཐམས་ཅད་ཀྱི་བདག་ཉིད་ཡང་དག་པའོ། །དེ་ལྟ་བུའི་དོན་ཐམས་ཅད་རྒྱུད་ཀྱི་རྒྱལ་པོ་འདིར་འབྱུང་ཞིང་། སངས་རྒྱས་ཐམས་ཅད་དང་དམ་ཚིག་གི་ལྷའི་ཐུགས་ཉིད་འདིར་འབྱུང་ཞིང་། །སངས་རྒྱས་ཐམས་ཅད་དང་དམ་ཚིག་གི་ལྷའི་ཐུགས་ཉིད་འདིར་འབྱུང་བས། །བཀའ་ཐམས་ཅད་ཀྱང་འདི་ལས་འཕྲོས་ཤིང་འདིར་འདུས་ལ། །དགོངས་པ་ཐམས་ཅད་ཀྱང་འདི་ལས་འབྱུང་ཞིང་འདིར་སྒྲུབ་པས། ཉམས་པ་ཡང་མེད་ལ་ཉམས་ན་འདིས་སྐོངས་པས། སེམས་ཀྱི་ཆོས་ཉིད་ལ་དོན་འདི་ཁོ་ནས་ཆོག་པར་དམ་ཚིག་ལ་གཏོགས་སོ། །དམ་ཚིག་དམ་པ་འདི་ལ་དང་བ་མ་སྐྱེས་ན་ཅི་བྱས་ཀྱང་ལྟུང་བའི་གནས་སུ་སྐྱེ་བ་དམ་པ་ལ་གཏོགས་སོ། །དམ་ཚིག་ཡོད་ན་སངས་རྒྱས་དང་། ཆོས་དང་། གྲུབ་པའི་འབྲས་བུ་ཐམས་ཅད་ཀྱང་ཡོད་དོ། །འདི་མེད་ན་དགེ་བ་ཅི་བྱས་ཀྱང་ཆད་པའི་མུར་ལྷུང་ནས་མེད་ཅིང་བརླག་གོ །ཕྱི་ནང་གི་བཀའཐམས་ཅདཀྱངའདི་ལཐུགགོ །ཆོས་ཀྱི་སྒོ་མོ་བརྗོད་ཀྱིས་མི་ལང་པ་ཡང་འདིར་འདུསཔས། རྒྱུད་འདི་ཐོས་པ་དང་། འཛིན་པ་དང་། རྟོགས་ནས་མི་འདའ་བ་ཀུནཏུབཟང་པོ་ངཉིདཡི་་་ནོ། །དམཚིག་ཆེན་པོ་འདིསྐྱོན་ཐམས་ཅདསེལ་བའིབདུད་རྩི་གང་དུ་ཐོས་ཤིང་གྲགས་པ་ནཉམས་པ་ཐམས་ཅད་དུས་གཅིག་ཏུ་བསྐོངས་པས། མ་རིགལྡོངས་པའི་དམིགས་བུ་ཞེས་བྱ་སྟེ། འདི་ཡི་དོན་བསྐལ་པ་ཇི་སྙེད་དུ་བརྗོད་པ་ལས་འདས་སོ། །དམ་ཚིག་ཐམསཅད་ཀྱིརྒྱལ་པོ་ས་མ་ཡ་བཀོད་པའི་རྒྱུད་ལས། ཡོངས་སུ་གྲུབཔའི་ལེའུ་སྟེ་སུམ་ཅུ་རྩ་གཅིག་པའོ།། །།དེ་སྐད་ཅེས་བཀའ་སྩལ་པ་ཙམ་གྱིས། མཐའ་ཡས་པའི་སེམསཅན་ཐམས་ཅད་ཀྱི་ཉམས་པ་ཡངདུས་གཅིག་ཏུ་སྐོངས་སོ། །དེ་དག་ཐམས་ཅདཀྱང་རང་བཞིན་གྱིས་མི་འདའ་བ་དང་། རང་བཞིན་གྱིས་མི་ཉམས་པ་དང་། རང་བཞིན་གྱིས་དག་པ་དང་། རངབཞིན་གྱིས་ཞི་བ་དང་། །རང་བཞིན་གྱིས་དེས་པ་དང་། །རང་བཞིནགྱིས་གྱནོམ་པ་དང་། །རང་བཞིན་གྱིས་ཆོས་ཤེས་པ་དང་། །རང་བཞིན་གྱིས་ཕྱོགས་མེད་པ་དང་། །རང་བཞིན་གྱིས་མཉམ་པར་འགྱུར་རོ། །དེའི་ཚེ་མིདམིགས་པའི་སྟོབས་དང་། མི་དམིགས་པའི་ཤེས་རབ་དང། མི་དམིགས་པའིབཏང་སྙོམསདང་། མི་དམིགས་པའི་རིག་པ་རང་གསལ་ཏེ། ཕྱིའི་ཡུལ་ཐམས་ཅད་མ་སྐྱེས་པའི་ཆོས་ཉིད་ལསའདའ་བ་མེད་པའི་དམ་ཚིག་ཏུ་གྱུར་ཏོ། །ནང་གི་དབང་པོ་ཐམས་ཅད་རང་སྣང་བའི་ཡེ་ཤེས་ཆེན་པོ་ལས་འདའ་བ་མེད་པའི་དམ་ཚིག་ཏུ་གྱུར་ཏོ། །དབྱིངས་དང་ཡེ་ཤེས་གཉིས་སུ་མེད་པ་ཆོས་ཀྱ་སྐུ་ལས་འདའ་བ་མེད་པའི་དམ་ཚིག་ཏུ་གྱུར་ཏོ། །རྒྱུད་འདི་ཐོས་པའི་རྣམ་པར་ཤེས་པའི་སེམས་ཅན་ཐམས་ཅད་རྡོ་རྗེ་སེམས་དཔའི་རང་བཞིན་དུ་གྱུར་ནས། འདའ་བ་མེད་པའི་དམ་ཚིག་ཏུ་གྱུར་ཏོ། །རྒྱུད་འདི་ཐོས་པའི་ཀུན་གཞི་ཀུན་ཏུ་བཟང་མོར་གྱུར་ནས། འདའ་བ་མེད་པའི་དམ་ཚིག་ཏུ་གྱུར་ཏོ། །རྒྱུད་འདི་ཐོས་པའི་རང་འབྱུང་ཡེ་ཤེས་སུ་གྱུར་ནས། །འདའ་མེད་པའི་དམ་ཚིག་ཏུ་གྱུར་ཏོ། །རྡོ་རྗེ་སེམས་དཔའ་དང་། ཀུན་ཏུ་བཟང་པོ་དང་། ཡིད་རང་འབྱུང་གི་ཡེ་ཤེས་ཀྱང་གཉིས་སུ་མེད་པའི་བཙལ་བའི་ཐིག་ལེར་གྱུར་ནས། འདའ་བ་མེད་པའི་དམ་ཚིག་ཏུ་གྱུར་ཏོ། །དམ་ཚིག་ཐམས་ཅད་ཀྱི་རྒྱལ་པོ་ས་མ་ཡ་བཀོད་པའི་རྒྱུད་ལས། མི་འདའ་བའི་དམ་ཚིག་ཏུ་མཐར་ཕྱིན་པའི་ལེའུ་སྟེ་སུམ་ཅུ་རྩ་གཉིས་པའོ།། །།དེ་ནས་སྟོན་པ་ཀུན་ཏུ་བཟང་པོས། དམ་ཚིག་ཆེན་པོ་བདེན་པའི་བཀའ་འདི་སངས་རྒྱས་ཐམས་ཅད་ལ་བསྒོ་བ། ཀྱེ་ཀྱེ་ཕྱོགས་བཅུའི་སངས་རྒྱས་ཐམས་ཅད་མང་ཞིང་དམ་པར་གྱུར་པས་གསུངས་པའི་ཚིག་གང་ཞེ་ན། འདི་ལྟ་སྟེ། བུརྙ་ས་མ་ཡ་ཙི་ཏ། འདས་ན་ནཱ་ར་ཀན། ཏ་ཐུ་ག་ཏ་ཙི་ཏ་ས་མ་ཡ། འདས་ན་ནཱ་ར་ཀན། དྷརྨ་དྷ་ཏུ་སྭ་བྷ་བ་ཙི་ཏ་ས་མ་ཡ། འདས་ན་ནཱ་ར་ཀན། བཛྲ་འསྙོ་རུ་ཙི་ཏ་ས་མ་ཡ། འདས་ན་ནཱ་ར་ཀན། ཏིཁྱི་ཙི་ཏ་ཤི་ལ་ས་མ་ཡ། འདས་ན་ནཱ་ར་ཀན། བག་ཙི་ཏ་ས་མ་ཡ། འདས་ན་ནཱ་ར་ཀན། རག་ཤ་རུ་ཏྲི་ཙི་ཏ་ས་མ་ཡ། འདས་ན་ནཱ་ར་ཀན། མ་ཧྭ་དེ་བ་ཙི་ཏ་ས་མ་ཡ། འདས་ན་ནཱ་ར་ཀན། མ་མ་ཙི་ཏ་ས་མ་ཡ། འདས་ན་ནཱ་ར་ཀན། ཨེ་ཨ་ར་ལི་ཙི་ཏ་ས་མ་ཡ། འདས་ན་ནཱ་ར་ཀན། ཨང་འགུ །གིང་ག་ར། མ་བཱ༷། མྱ༷་ལྭ༷། ཙི་ཏ་ས་མ་ཡ། འདས་ན་ནཱ་ར་ཀན། དེ་བ་ནཱ་ག །ཡཀྟ།ཨ་སུ་ར། མ་ནི། པྲེ་ཏ་ཀ ཏིར་ཡ་ཀ ན་ར་ཀ དམ་ཚིག་ཆེན་པོའི་བདེན་པ་ལས་འདས་ན་ནཱ་ར་ཀན། ཞེས་གསུངས་པ་ཙམ་གྱིས་མུ་དང་མཐའ་མེད་པའི་འཇིག་རྟེན་གྱི་ཁམས་གྲངས་བརྗོད་པ་ལས་འདས་པ་དང་།སངས་རྒྱས་ཀྱི་ཞིང་ཁམས་བསམ་གྱིས་མི་ཁྱབ་ཅིང་གཞལ་དུ་མེད་པ་ཐམས་ཅད་ན་རྡུལ་གཅིག་གི་སྟེང་ན་རྡུལ་སྙེད་ཀྱི་སངས་རྒྱས་བཞུགས་པ་ཐམས་ཅད་ཀྱང་། ཐུགས་དམ་གྱི་དབང་གིས་ཆ་སྙེམས་ཤིང་འདར་ནས། ཤིན་ཏུ་གདུང་བའི་ཐུགས་ངན་ཚད་མེད་པ་སྐྱེས་ཏེ། ཐུགས་འཁྲུགས་ནས་སྡུག་བསྔལ་ཚད་མེད་པ་སྐྱེས་སོ། །འཁོར་གྱི་བྱང་ཆུབ་སེམས་དཔའ་ཐམས་ཅད་ཀྱང་ཧག་སྐྲག་ནས་ལུས་དང་ཡན་ལག་སྟོང་དུ་གས་ཤིང་བརླག་ནས་ཞིག་པར་གྱུར་ཏོ། །བདུད་དང་། སྲིན་པོ་དང་། འཁོར་གྱི་མ་མོ་དང་། མཁའ་འགྲོ་དང་། ལྷ་དང་། ཀླུ་དང་། གནོད་སྦྱིན་དང་། བགེགས་ཀྱི་རིགས་ལ་སོགས་པའི་སེམས་ཅན་ཇི་སྙེད་ཐམས་ཅད་དུས་ཀྱི་ཐ་མ་ལ་བསྐལ་པ་མེས་ཚིག་ལ་བཞིན། རྡུལ་གྱི་རྡུལ་ཆ་ཙམ་ཡང་མེད་པར་བྱས་ནས། དམ་ཚིག་ཉམས་པའི་སྡུག་བསྔལ་རྣམ་པ་སྣ་ཚོགས་པ་ཉམས་སུ་མྱོང་ངོ་། །དེ་ལྟར་སྣང་ཙམ་ན་ཡང་ཀུན་ཏུ་བཟངས་པོ་སེམས་ཀྱི་ཆོས་ཉིད་ལ་ཇི་ལྟ་བུར་གྲུབ་པ་མེད་དོ། །དེ་ནས་སྟོན་པ་ཐུགས་རྗེ་ཏ་ལས། བཛྲ་ཡག་ཤ་ཀྲོ་ཏ་ཛ། ཞེས་མ་བརྗོད་པའི་སྒྲ་ཙམ་ལས། ཁྲོ་བོ་རྡོ་རྗེ་གནོད་སྤྱིན་བྱུང་སྟེ། རྡོ་རྗེ་གནོད་སྤྱིན་གྱིས་མ་བརྗོད་པའི་གསུང་གཅིག་ལས། མ་ཧྭ་སུ་ཁ་ཙི་ཏ་ས་མ་ཡ། སིརྙི་ས་མ་ཡ་གྲྭ་ཧྭ། ཞེས་པས་སངས་རྒྱས་ཐམས་ཅད་དམ་ཚིག་གི་བདེན་པ་ཆེན་པོའི་མཆོད་པས་མཉེས་ནས། ཆོས་ཀྱི་སྐུ་འཕོ་འགྱུར་མེད་པའི་ངང་དུ་དབྱེར་མེད་པར་གྱུར་ནས་ཐུགས་ངན་སངས། འཁོར་གྱི་བྱང་ཆུབ་སེམས་དཔའ་ཐམས་ཅད་འགྲོ་བའི་སྡུག་བསྔལ་གྱིས་བསྙེངས་ཏེ་བརྒྱལ་བ་ལས་བསླངས་ནས། སངས་རྒྱས་ཀྱིས་གསུམ་ལྷུན་གྱིས་གྲུབ་ནས་གཉིས་སུ་མེད་པར་གྱུར། འཁོར་དང་སེམས་ཅན་ཐམས་ཅད་ཀྱང་དྲན་པ་རྙེད་ཅིང་དམ་ཚིག་རྗེས་སུ་དྲན་པར་བྱས་ནས་འདི་གསུངས་སོ། །དམ་ཚིག་ཆེན་པོའི་བདེན་པ་འདི། །སྔོན་གྱི་སྟོན་པའི་ཐུགས་ལ་བཞུགས། ད་ལྟ་ང་ཡི་སྙིང་ལ་གནས། །གཏན་དུ་སེམས་ཅན་ཀུན་གྱི་སྲོག །མི་འདའ་ཚུལ་བཞིན་གང་སྤྱོད་པ། །སངས་རྒྱས་རྣམས་ཀྱི་མཛད་སྤྱོད་ཡིན། །ཉམས་དང་ལོག་པར་གང་བྱེད་པ། །དངོས་པོའི་ཆོས་ཅན་དེ་ཡིན་པས། །བདུད་ཀྱི་སྤྱོད་ཡུལ་ཉམས་པའི་རྒྱུ། །ཐར་པའི་དུས་མེད་འོ་དོད་འབོད། །བཙོ་བསྲེག་གཤགས་ག་་ཐར་དུས་མེད། །དེ་ལ་སངས་རྒྱས་མགོན་མིནུས། ་བཛྲ་ཀྲོ་ཏ་ས་མ་ཡ་ཨ། ཞེས་པས་སེམས་ཅན་འཁོར་བའ་མཐའ་ལས་ཐར་པའི་དུས་མེད་པ། དམ་ཚིག་ཆེན་པོའི་བདེན་པས་སྐྱབསབཏོན་ཏེ། ཕྱིས་མི་འདའ་ཞིང་ངེས་པའི་བཀའ་ལ་གནས་པས། ཐམས་ཅད་ཡེནས་སངས་རྒྱསཔའི་རང་བཞིན་དུ་དབྱེ་བ་མེད་པར་གྱུར་ཏོ། །སམ་ཡ་བཀོད་པ་ལས། དམ་ཚིག་ཆེན་པོའི་བདེན་པའི་ལེའུ་སྟེ་སུམ་ཅུ་རྩ་གསུམ་པའོ།། །།དེ་ནས་སངས་རྒྱས་ཐམས་ཅད་དང་། ཀུན་ཏུ་བཟང་པོ་ཡང་དབྱེར་མེད་པར་གྱུརནས་གསུང་མཐུན་པར་བཀའ་སྩལ་པ།སེམས་དཔའ་ཆེན་པོ། སངས་རྒྱས་ཐམས་ཅད་ཀྱི་བཀའཡང་དག་པའི་བདེནཔདང་། བཛྲ་ཡཀྟའི་མཐུ་སྟོབས་ཀྱིསརྣལ་འབྱོར་པ་གང་དམ་ཚིགཉམས་ནས་འགྱོད་པར་སེམསཔ་རྣམསནི་སྐོངསབརའགྱུརརོ། །དམ་ཚིག་མེདཔརྣམས་ནི་ཡོད་པར་འགྱུར་རོ། །མི་དྲན་པ་རྣམས་དྲན་པར་འགྱུར་རོ། །མི་བསྲུང་བ་རྣམས་བསྲུང་བར་འགྱུར་རོ། །བསྲུངས་པ་རྣམས་ཀུན་ཏུབཟང་པོཉིད་དུ་སངས་རྒྱས་པ་ཡིནནོ། །དེ་ལྷར་དམ་ཚིགགིམཐུསྟོབསའདི་ནི་བདེན་ཞིངངེས་ཏེ་སངས་རྒྱས་པམེད་རེ་སྐན། དམ་ཚིག་གི་བདེན་པ་དེམེད་པར་གསང་སྔགས་གསངབའིསྒོརཞུགས་ཤིང་སྤྱོདཔ་ནི། རྡོརྗེ་དམྱལ་བར་འགྲོ་བ་མིནརེསྐནཞེས་པདང་། རྡོ་རྗེ་སེམས་དཔས་གསོལ་པ། སངས་རྒྱས་ཀྱི་བཀའ་བདེན་པ་ཡང་དག་པ་དམ་ཚིག་ཡིན་པས། བདེན་པ་འདིས་གང་ལ་དོན་བྱེད་པར་ནུས། ཀུན་ཏུ་བཟང་པོས་བཀའ་སྩལ་པ། དམ་ཚིག་ཆེན་པོ་འདིས་ཀུན་ལ་དོན་ནུས་ཀྱང་། གསང་བའི་སྒོར་ཞུགས་ནས་གསང་བའི་དོན་བཞིན་དུ་མི་སྤྱོད་པ་རྣམས་མ་གཏོགས་སོ། །དེ་བཞིན་དུ་གསང་བའི་ངེས་དོན་དུ་དྲོད་དང་རང་དགར་སྨྲ་བ་དང་། གསང་མེད་ཅིང་གསང་འཆལ་པར་གཏོང་བ་དང་། གསང་ཞེས་བྱ་བའི་དོན་དེ་ཡིད་ལ་མི་འཛིན་ཅིང་། །བརྫུན་ནམ་ཇི་ལྟར་མི་འཛིན་པ་དང་། ལྟ་བ་ཆེ་སྐད་ཁུངས་འདོན་ཅིང་། ལྟ་བའི་དོན་དང་མི་མཐུན་པའི་སྤྱོད་པ་ཆ་ལོག་པར་སྤྱོད་པ། ཁ་ནས་སྨྲ་བ་དང་ཡིད་ལ་འཛིན་ཅིང་སྤྱོད་པ་མི་མཐུན་པ་དང་། གསང་བའི་བཀའ་རྐུན་གསུམ་དམ་ཚིག་གི་བཀའ་རྐུན་རྩ་བའི་དམ་ཚིག་ཙམ་ཡང་མི་འཆར་བར་དམ་པའི་དོན་གར་སོང་སོང་དུས་གྱེར་བ་དང་། དབང་གི་བཀའ་རྐུན་ཕྱི་ནང་གི་དབང་ལྟ་ཅི་སྨོས་ཀྱི། རྣལ་འབྱོར་གྱི་ཁ་དབང་ཙམ་ཡང་མ་ནོས་པར་གསང་བའི་བཀའ་གབ་སྦས་མ་རྟོགས་པར། དཔེ་རྐུན་དང་། འོག་བྲུས་དང་། ཐབས་དང་། སྒྱུ་རྩལ་ནས་སྟོན་ཞིང་འཚོང་བར་བྱེད་པ་དང་། སློབ་དཔོན་གྱི་བཀའ་རྐུན་སློབ་དཔོན་ལ་མཉེས་པར་མ་བྱས་ཤིང་། བཀའ་དྲིན་མ་ནོས་པར་མ་ཟད། ངེས་པ་འདི་འཆང་བའི་སློབ་དཔོན་དང་། དོན་གྱི་མི་མཐུན་པ་ཐོས་ཀྱི་དོགས་པ་དང་། དམ་པར་དགའ་བ་དང་། གལ་ཏེ་བདག་ཉིད་འདོད་ན་ཡང་ཆེས་ཆུང་ཏུ་དོགས་པ་དང་། སློབ་དཔོན་དེའི་ཞལ་ཉི་ཟེར་ཙམ་ཡང་མ་མཐོང་བར་དེའི་དོན་ཐམས་ཅད་ང་ལ་ཡོད་ལ། དེ་ལས་ལྷག་པ་ཡང་ང་ལ་ཡོད་ཅེས་ཟེར། གང་ལ་སློབ་དཔོན་དེ་མི་མཐོང་བ་དང་། མི་སློབ་པའི་སར་གསང་བ་གབ་སྦས་མ་ཕྱིན་པ་ལ་རིགས་པས་གདེང་མ་ཆུད་པར་དཔེ་ཚོངས་དང་། རབ་རིབ་དང་། ལྷག་ཆད་ནོར་དང་གསུམ་སྨྲ་ཞིང་སྤྲོ་བ་ནི། ཉམས་པའི་ནང་ན་ཡང་ཉམས་པ་ཆེན་པོ་སྟེ། དེས་ནི་རིམས་ནད་རླུད་བ་དང་འདྲ་བར། གསང་སྔགས་གཏིང་མ་རུངས་པར་གྱུར་ཏེ། དེའི་དུས་སུ་གསང་བ་ཀུན་ལ་འཇུག་ཅིང་སྤྱོད་ཀྱང་། གསང་བའི་བཀའ་དང་།བྱིན་རླབས་དང་། གྲུབ་པའི་འབྲས་བུ་མིང་ཡང་མེད་པར་འགྱུར་རོ། །དེ་དག་གི་འབྲས་བུ་ཡང་མནར་མེད་པ་ཆེན་པོར་འགྱུར་ཏེ། གསང་བ་འདི་དག་གི་ཉམས་ནི་སྤྱད་ཉེས་པས་རྡོ་རྗེ་ཐེག་པ་སྤྱོད་པ་བརྫུན་བརྫུན་འདྲ་བར་འགྱུར་རོ། །འདི་དག་ནི་མ་རྟོགས་ཏེ་སངས་རྒྱས་ཀྱི་ཐུགས་རྗེ་ཅིས་ཀྱང་མི་འགྱུར་རོ། །དེ་ཅིའི་ཕྱིར་ཞེ་ན། དེ་ནི་ལྟ་བ་དམ་ཚིག་སྤྱོད་པ་ཅིའི་སྒོ་ནས་ཀྱང་ཀུན་ཏུ་བཟང་པོ་འདིའི་དོན་གང་དང་གང་མི་ལྡན་པས། འཛིན་རྟོག་གི་ཆོས་གཉིས་སྐྱེས་ནས། དངོས་པོ་སྐྱོན་དུ་གོལ་བ་ཤ་སྟག་གོ །དེ་དག་དམ་ཚིག་ཡིན་རེ་སྐན། དམ་ཚིག་ཐམས་ཅད་ཀྱི་རྒྱལ་པོ་ས་མ་ཡ་བཀོད་པ་ལས། ཀུན་ཏུ་བཟང་པོ་དབུ་སྟུང་གི་ལེའུ་སྟེ་སུམ་ཅུ་རྩ་བཞི་པའོ།། །།དམ་ཚིག་ཐམས་ཅད་ཀྱི་རྒྱལ་པོ་ས་མ་ཡ་བཀོད་པའི་རྒྱུད་རྫོགས་སོ།། །། རྒྱ་གར་སྐད་དུ། སན་ཏི་མ་ཧྭ་དམུ་རི་ནཱ་མ་ཏནྟྲ་གུ་རྒྱ། བོད་སྐད་དུ།