Ngb-pt-0449-vol-05-text
Front[edit]
Body[edit]
རྒྱ་གར་སྐད་དུ། བོ་དྷི་ཙིསྟ་བིན་དྷ་པྲ་བྷ་ནི་ཏན་ཏྲ་ནཱ་མ། བོད་སྐད་དུ། བྱང་ཆུབ་ཀྱི་སེམས་ཀུན་འདུས་འོད་ཀྱི་རྒྱུད་ཅེས་བྱ་བ། སེམས་ཉིད་རྫོགས་པ་ཆེན་པོ་ལ་ཕྱག་འཚལ་ལོ། །དེ་ནས་སངས་རྒྱས་ཐམས་ཅད་རབ་ཏུ་བརྒྱལ། དངངས་པ་དང་། །སྐྲག་པར་གྱུར་ཏེ་ཅང་མི་སྨྲ་བར་འཁོད་དོ། །དེ་ནས་དེ་བཞིན་གཤེགས་པ་ཐུགས་རྗེ་ཡེ་ཤེས་ཀུན་ཏུ་ཁྱབ་པ་ཞེས་བྱ་བའི་འོད་ཀྱི་འཕྲེང་བ་རྣམ་པར་སྣང་མཛད་དེ་རབ་ཏུ་བསྐུལ་བར་གྱུར་ཏོ། །དེ་ནས་སངས་རྒྱས་ཐམས་ཅད་ཀྱིས་མགྲིན་གཅིག་ཏུ་འདི་སྐད་ཅེས་གསོལ་ཏོ། །ཨེ་མ་ཧོ་སངས་རྒྱས་ཀུན་ཀྱི་ཐུགས། །རབ་ཏུ་གསང་ཞིང་དྲི་མ་མེད། །འདི་དག་ཐེ་ཙོམ་སྐྱེ་བའི་རྒྱུ། །གསང་སྔགས་ལྟ་སྤྱོད་ངོ་མཚར་ཆེ། །ཞེས་གསོལ་ཏོ། །དེ་ནས་བཅོམ་ལྡན་འདས་དཔལ་ཀུན་ཏུ་བཟང་པོ་དེ་བཞིན་གཤེགས་པ་ཀུན་གྱིརངབཞིནདེས། གསང་སྔགས་ཀྱི་ཆེ་བ་བསྟན་པའི་ཕྱིར་འདི་སྐད་ཅེས་གསུངས་སོ། །རབ་ཏུ་མི་གནས་གསང་བའི་ལུང་། །དབྱེར་མེད་གསང་བའི་དོན་རྟོགས་པས། །དགེ་སྡིག་བླང་དོར་དབྱེར་མེད་པས། །སྡིག་པ་སྤྱད་པས་དམ་པའི་མཆོག །ཐེག་ཆེན་གསང་བར་ཞུགས་པ་ཡིས མཚམས་མེད་ལྔ་པོ་རྫོགས་བྱེད་ཅིང་། །རྣལ་འབྱོར་གནས་ལ་བཀུར་བ་དང་། །དམ་རྫས་ཟས་སུ་སྤྱོད་པ་དང་། །ལྷ་ཁང་མདོ་སྡེ་བསྲེག་པ་དང་། །ཡེ་ཤེས་རྣམ་གྲོལ་རྫོགས་པའི་ཀློང་། །ཐེག་པ་འདི་ལ་གནས་པ་ཡིས། །དེ་མ་ཐག་པར་གྲུབ་པར་འགྱུར། །ཞེས་གསུངས་པ་དང་། །སངས་རྒྱས་ཐམས་ཅད་བརྒྱལ་བར་གྱུར་ཏོ། །དེ་ནས་དེ་མ་ཐག་རྒྱལ་བས་བྱིན་གྱིས་བརླབས་ཏེ། །གསང་བ་ཤིན་ཏུ་རྣལ་འབྱོར་དྲི་མ་མེད་པ་ཐུགས་སུ་ཆུད་དེ། དྲན་པ་སླར་རྙེད་ནས་ངོ་མཚར་ཞིང་ཞུས་པའི་ཚུལ་གྱིས་འདི་སྐད་ཅེས་གསོལ་ཏོ། །ཨེ་མ་ཧོ་སངས་རྒྱས་ཐམས་ཅད་ཀྱི། །མི་འབྱེད་བླང་དོར་མེད་པའི་ཐུགས། །ཐེག་པའི་སྙིང་པོ་རྟོགས་དཀའ་བ། །གཉིས་མེད་གོམས་པའི་སྟོབས་ཀྱིས་གྲུབ། །དེ་ཉིད་ཀུན་གྱི་ཡུལ་མིན་ཏེ། །ཐུགས་རྗེ་དགོངས་པས་རིག་པ་བསྟན། །ལས་དང་བག་ཆགས་མི་དགོས་པས། །གང་ཡང་འགག་པ་མེད་པར་སྤྱོད། །ཅེས་གསོལ་ཏོ། །དེ་ནསདེབཞིན གཤེགསཔ ཐམས་ཅད་ཀྱིརངབཞིན དེས། །དེདག་ལ་འདི་སྐད་ཅེས་གསུངས་སོ། །རྫོགས་པ་ཀུན་འདུས་འོད་ཀྱི་རྒྱུད། །སྔ་མ་དག་ཏུ་མ་གསུངས་པའི། །ཕྱི་མ་ཟབ་མོ་བསྡུས་པའི་རྒྱུད། །འདི་ཡི་རང་བཞིན་རྟོགས་པར་དཀའ། །འོན་ཀྱང་ཁྱེད་རྣམས་གྲོལ་བའི་ཕྱིར། །སྙིང་པོའི་རྣལ་འབྱོར་བཤད་པར་བྱ། །ཐོག་མ་མེད་པའི་དུས་ཀྱི་དབྱིངས། །ཆོས་རྣམས་ཀུན་གྱི་གནས་ཡིན་པས། །ཀུན་འབྱུང་དངོས་པོ་ཡོངས་ཀྱི་ལམ། །དུས་གསུམ་རྫོགས་པའི་ངོ་བོར་གནས། །གསང་བ་ཀུན་འདུས་སེམས་ཀྱི་ལུང་། །གདོད་ནས་དག་པས་ནམ་མཁའི་ཀློང་། །སྒྲོ་སྐུར་དག་པས་ཆོས་ཀྱི་དབྱིངས། །གདོད་ནས་ཀུན་གྱི་ངོ་བོ་བཤད། །ཆོས་སྐུ་གཉིས་མེད་རྫོགས་པའི་ཀློང་། །དགོངས་པའི་ཀློང་ལ་ཕྱོགས་རིས་མེད། ཁྱབ་པ་ཆེན་པོ་ནམ་མཁའི་འོད། །བརྡལ་ཁྱབ་མཁའ་ལྟར་མུ་མཐའ་མེད། །འདུ་འབྲལ་མེད་པ་དྲན་པས་བསྟན། །རྒྱུ་རྐྱེན་མ་ཚངས་ཀུན་བྲལ་བས། །སྐྱེ་འཇིག་མེད་པར་འདུས་མ་བྱས། །གདོད་ནས་རིག་པ་གཉིས་མེད་པས། །སྣ་ཚོགས་རང་བཞིན་ཀུན་ཏུ་བཟང་། །ཐིག་ལེ་ཆེན་པོར་ཡེ་བསྟན་པས། །གང་ལྟར་སྣང་ཡང་ཆོས་ཀྱི་དབྱིངས། །མ་བསགས་ལྷུན་གྲུབ་ངོ་བོའི་ཕྱིར། །ཅིར་ཡང་སྣང་ལ་དངོས་བཞི་མེད། །རང་བཞིན་གང་དུའང་མ་ངེས་ཏེ། །བརྟག་ཅིང་སྤྱད་པ་ཀུན་ལས་འདས། །བརྡལ་ཁྱབ་ཆེན་པོ་ཀུན་ཆུབ་པས། །རྣམ་པ་ཐ་དད་ཡུལ་ལས་འདས། །མཐའ་དང་དབུས་སུ་མི་འབྱེད་པས། །གོལ་དང་སྒྲིབ་པའི་ཆོས་མི་གནས། །ཕྱག་རྒྱ་ཆེན་པོར་ཡེ་གནས་པས། །སྒོམ་དང་མི་སྒོམ་ཡུལ་ལས་འདས། །རིག་པའི་འཁོར་ལོ་རབ་བསྐོར་བས། །མཐའ་མེད་བར་ནི་རབ་ཏུ་འཁྱིལ། །གདོད་ནས་ལྷུན་གྱིས་གྲུབ་པ་ལ། །རྒྱུ་རྐྱེན་རྩོལ་ལ་རག་མ་ལུས། །བདེ་ཆེན་རོལ་པས་བདག་གནས་པས། །མཚན་མའི་བདེ་ལ་རྟེན་མི་འཆའ། །སྐུ་གསུམ་མཚན་མར་ལོ་བརྟགས་པས། །མཚན་མའི་འབྲས་ལ་རག་མ་ལུས། །གཅིག་དང་ཐ་དད་བཅོས་སུ་མེད། །ཐེག་ཆེན་སེམས་ཉིད་རྫོགས་པ་ལ། །མ་བཅོས་ཐབས་ཀྱིས་དེར་བཞག་ན། །བསམ་དང་བསམ་བྱ་ཀུན་བྲལ་ནས། །རྣམ་གྲོལ་རྫོགས་པའི་ས་ལ་སྦྱོར། །སྟོང་པའི་མཐའ་ལ་ཞེན་པ་དང་། །བདེ་བའི་འདོད་ལ་ཆགས་པ་དང་། །བཏང་སྙོམས་དོན་ལ་གང་ཞེན་པ། །ལོག་པའི་གྲོང་ཁྱེར་ཆེན་པོ་ཡིན། །གང་ཡང་ཞེན་པ་མེད་པ་ནི། །གང་ཡང་བྱང་ཆུབ་སྙིང་པོའི་ལམ། །བར་ཆད་མེད་པའི་ཐམས་ཆེན་ནི། །སེམས་ཉིད་རྫོགས་པའི་ལམ་ཡིན་ནོ། །རང་སེམས་བྱང་ཆུབ་སྙིང་པོ་ལས། །གཞན་མེད་ཐིག་ལེར་གཅིག་པའི་ཕྱིར། །གཉིས་མེད་གསང་བའི་རང་བཞིན་དག ཁྱབ་པ་ཆེན་པོའི་ཚུལ་དུ་བཞུགས། །ཀུན་འདུས་རིག་པ་སེམས་ཀྱི་གཏེར། །མ་བཙལ་ཐབས་ཀྱིས་གྲུབ་པ་ཡིན། །དབང་བསྐུར་ཡེ་ཤེས་རྒྱལ་པོ་ལ། །མ་ཆགས་ཐབས་ཀྱི་སྦྱོར་བ་ཡིས། །གང་ལྟར་གནས་པ་དེ་ལྟར་གནས། །མ་བཅོས་རང་གཞག་ཐབས་ཀྱིས་གོ །ཕྱག་རྒྱ་ཆེན་པོར་ཀུན་གནས་པས། །བསྐྱེད་ཅིང་སྒོམ་ལ་རག་མ་ལུས། །བརྗོད་བྲལ་སྙིང་པོ་མཐར་ཕྱིན་པས། །སྔགས་དང་ཁ་ཏོན་བྱ་ལས་འདས། །དུས་གསུམ་མི་འགྱུར་བསྟན་པའི་ཕྱིར། །ཆ་ཤས་དབེན་པའི་ངོ་བོས་སྟོང་། །སྐུ་མཆོག་འོད་དཔག་མེད་པའི་ཀློང་། །མཚན་དང་དཔེ་བྱད་ཆ་ལས་འདས། །མཚན་མའི་སྒྲོ་སྐུར་ཀུན་ཞི་ཡང་། །ཡེ་ཤེས་འབར་བའི་འོད་ཀྱིས་མཛེས། །རྒྱལ་པོ་ཐབས་ཀྱིས་མཛེས་པ་ལྟར། །མ་བྱས་ཐབས་ཀྱིས་དོན་རྣམས་རྫོགས། །ཞེས་གསུངས་སོ། །ཀུན་འདུས་འོད་ཀྱི་ཏན་ཏྲ་ལས། །སྒྲོ་སྐུར་མེད་པའི་ལེའུ་སྟེ་དང་པོའོ།། །།དེ་ནས་དེ་བཞིན་གཤེགས་པ་ཀུན་ཏུ་བཟང་པོས། ཁོ་ན་ཉིད་ཀྱི་ཏིང་ངེ་འཛིན་ལ་སྙོམས་པར་ཞུགས་པས། ལྟ་དགོངས་མཐར་ཕྱིན་གྱི་དོན་འདི་གསུངས་སོ། །ཆོས་ཀུན་གདོད་ནས་མཚན་ཉིད་མེད། །ཡེ་ཤེས་ནམ་མཁའི་རྒྱལ་པོ་ལས། །བདེ་ཆེན་གསལ་བའི་ཉི་ཤར་བས། །རྣམ་པར་རྟོག་པའི་སྒྲོ་སྐུར་གཅོད། །ཡེ་ཤེས་འཁོར་ལོ་འོད་པོ་ཆེ། །ཕྱོགས་མེད་ཀུན་ལ་གསལ་བར་འཆར། །རིག་པའི་རྒྱལ་པོ་ཀུན་འདུས་པས། །བདེ་སྡུག་རྟོག་པའི་མཐའ་ལས་འདས། །ཞེན་པའི་འདུ་ཤེས་ཀུན་བྲལ་བས། །བསམ་གྱིས་མི་ཁྱབ་ཆོས་ཀྱི་དབྱིངས། །སངས་རྒྱས་སེམས་ཅན་གཉིས་མེད་པས། །བསྒྲུབ་ཅིང་སྒྲིབ་པ་གསལ་དུ་མེད། །མ་ལུས་སྒྲོ་སྐུར་ཀུན་ཞི་བས། །ཆོས་ཀུན་ཡེ་ཤེས་དགོངས་པའི་ཀློང་། །སྣང་སྲིད་བླ་མའི་ཕྱག་རྒྱ་བས། །མ་བརྗོད་ངོ་བོས་ཆོས་ཚུར་སྟོན། །སྐྱེ་མེད་ཕྱག་རྒྱ་ཀུན་ཐེབས་པས། །འདུས་བྱས་མཚན་མ་མེད་པའི་ལམ། །བདག་ཉིད་ངང་ལས་མ་༄༅ ཡེངས་པས། །ཇི་ལྟར་མཛད་ཀྱང་གཡོ་བ་མེད། །བཙལ་ཞིང་སྤྱད་པའི་ཆོས་མེད་པས། །སྤྱོད་ལམ་མ་བཅོས་དེ་བཞིན་ཉིད། །ཕྲ་ཞིང་ཤེས་པར་དཀའ་བའི་ཕྱིར། །བརྟག་ཅིང་ཉན་པའི་ཡུལ་ལསའདས། །དམ་པའི་དགོངས་པས་ཀུན་གསལ་བས། །ཉེས་པའི་སྐྱོན་གྱིས་གོས་པ་མེད། །སྐུ་གསུམ་རྫོགས་པའི་ཀློང་བརྡལ་བས། །འགྲོ་དོན་སྙིང་རྗེ་བྱ་དང་བྲལ། །དུས་གསུམ་ཆོས་ཉིད་སྙིང་པོ་ལ། །ཐུན་དང་བཅོས་ཚད་ཁར་མ་ལུས། །རིག་པའི་ཡེ་ཤེས་ལྷུན་རྫོགས་ལ། །དྲོད་དང་རྟགས་ལ་རྟེན་མི་འཚལ། །མ་བཞག་རང་གསལ་མི་གཡོ་བས། །ལྟ་ཞིང་སྒོམ་དུའང་ཡོད་མ་ཡིན། །ཡེ་ཤེས་སྲོག་གིས་ཀུན་ཟིན་པས། །སྐྱེ་ཤི་ཐ་སྙད་ཡུལ་ལས་འདས། །ཐེག་ཆེན་སྙིང་པོའི་ལམ་རྟོགས་པས། །བརྒྱུད་པའི་ལམ་ལ་འཇུག་མི་བྱེད། །མ་བྱས་དོན་ཀུན་ལྷུན་རྫོགས་པས། །སྒོ་གསུམ་བཙལ་བའི་འདུ་ཤེས་བཅད། །ཏིང་འཛིན་རིག་པའི་འཁོར་ལོ་ལ། །སྒྲོ་སྐུར་མཚན་མའི་ཆོས་མི་གནས། །མི་བསྐྱོད་བདེ་ཆེན་རྒྱལ་པོ་ལ། །གང་ལྟར་གནས་ཀྱང་ཉམ་མི་ང་། །དངོས་པོ་ཕྱི་ནང་ཆོས་ཀུན་ནི། །གདོད་ནས་དྲི་མེད་དག་པ་ལ། །དེ་ཡང་དངོས་གྲུབ་མ་ཡིན་པས། །གང་ལྟར་མ་བཅོས་ཡིན་པར་དབྱེ། །བྱས་ཀྱང་སྒྲིབ་པར་མི་འགྱུར་ལ། །མ་བྱས་གོལ་བར་མི་འགྱུར་གྱིས། །རྡོ་རྗེ་སྙིང་པོ་བསྟན་པ་ཅན། །ངེས་པའི་དོན་ལས་མ་ཡེངས་ན། །ཆོས་ཉིད་དོན་ལས་མ་འདས་པས། །གང་ཡང་མ་བཅོས་གཞག་པར་བྱ། །མཐོང་དང་མ་ངེས་བར་མཚམས་སུ། །བདེ་བ་ཆེན་པོའི་དོན་འཆར་ཞིང་། །འབད་རྩོལ་མེད་པར་ལྷུན་གྱིས་གྲུབ། །གང་དགར་བཞག་ཀྱང་གཡོ་མི་འགྱུར། །ལྟ་དགོངས་དབྱེར་མེད་གང་རྟོགས་པས། །དུས་གཅིག་རྣམ་གྲོལ་ལྷུན་གྲུབ་པའོ། །ཞེས་གསུངས་སོ། །ཀུན་འདུས་འོད་ཀྱི་ཏན་ཏྲ་ལས། ལྟ་དགོངས་དབྱེ་བའི་ལེའུ་སྟེ་གཉིས་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཀུན་ཏུ་བཟང་པོ་རང་བྱུང་ཡེ་ཤེས་བསྟན་པའི་ཏིང་ངེ་འཛིན་ལ་སྙོམས་པར་ཞུགས་ནས། འདི་སྐད་ཅེས་གསུངས་སོ། །ཆོས་རྣམ་མ་ལུས་ཇི་སྙེད་པ། །རྒྱུ་ལ་མི་ལྟོས་སྙིང་པོའི་སྙིང་། །རྐྱེན་ལ་མི་ལྟོས་འབྲས་བུའི་འབྲས། །གསང་བའི་གསང་བ་མཁའ་ལྟར་དག །ཐེག་པའི་སྙིང་པོ་རྫོགས་པའི་ལུང་། །མ་ལུས་གཅིག་དང་ཐ་དད་མེད། །ཡེ་ཤེས་མཁའ་དྲ་ཁྱབ་པའི་ཀློང་། །བསྟན་པའི་རྩ་བ་ཆོས་ཀྱི་དབྱིངས། །དུར་ཁྲོད་བདལ་བའི་སྙིང་པོ་མཆོག །ཡུལ་སེམས་བྲལ་བའི་རང་བཞིན་གྱིས། །དེ་བཞིན་ཉིད་དེ་སྒྲོ་སྐུར་མེད། །ཐེག་ཆེན་སེམས་ཉིད་མཁའ་ལྟར་དག །མ་འདྲེས་གསལ་བར་སྣང་བའི་ཕྱིར། །ལྷུན་གྲུབ་རོལ་པ་ཅིར་ཡང་སྣང་། །སྙིང་པོ་གཅིག་ཏུ་ཀུན་རྫོགས་པས། །རྫོགས་ཁྱབ་བརྡལ་བ་ཆོས་ཀྱི་སྐུ། །རྒྱུ་དང་རྐྱེན་ལས་མི་ལྷོས་པས། །མི་འཇིག་རྡོ་རྗེ་འགྱུར་བ་མེད། །མ་བསྒྲིབས་གསལ་བར་ཀུན་མཁྱེན་པས། །ཡེ་ཤེས་ཀུན་གསལ་མཆོག་གི་༄༅ །ངང་། །ཐམས་ཅད་སེམས་སུ་ལྷུན་གྲུབ་པས། །སངས་རྒྱས་སེམས་ཅན་གཉིས་སུ་མེད། །མ་བཅོས་བསམ་སྤྱོད་ཀུན་བྲལ་བས། །ཆོས་ཉིད་སེམས་ཉིད་གཉིས་སུ་མེད། །བདེ་ཆེན་རིགས་པར་འོད་གསལ་བས། །བཏང་སྙོམས་སྟོང་པ་རྣམ་པར་བཅད། །རིག་པ་འཁོར་ལོ་གཏེར་གྱི་མཆོག །མ་བསྐོར་ཞི་བ་དབྱིངས་སུ་འཁྱིལ། །འཁོར་ལོ་འོད་འབར་སྙིང་པོ་ཅན། །མཚན་དང་དཔེ་བྱད་ཀུན་ལས་འདས། །ཆེ་བའི་ཆེ་མཆོག་ཆོས་ཀྱི་སྐུ། །དུས་གསུམ་འདུ་འབྲལ་མེད་པར་གནས། །རྫོགས་པ་ཀུན་འབྱུང་ལམ་གྱི་ཕུགས། །ཞེན་པ་དུས་གཅིག་བཅད་པའི་ཕྱིར། །མངོན་སུམ་རྫོགས་པའི་རང་ལ་གནས། །ངེས་པ་རྙེད་པ་དེ་མ་ཐག །འབྱུང་མེད་ཡེ་ཤེས་མཁའ་ལྟར་དག །སྙིང་པོ་རྫོགས་ལམ་བར་ཆད་མེད། །གང་ཡང་དམ་པར་མི་ལེན་པས། །དམན་པས་གཞན་དུ་དོར་བ་མེད། །ཡེ་ཤེས་ལྔ་རྫོགས་སྙིང་པོ་ཉིད། །མ་འདྲེས་དབྱིངས་ལ་རྫོགས་པས་བརྒྱན། །ཟབ་མོ་ཀུན་འདུས་སེམས་ཀྱི་གཏེར། །རྡོ་རྗེ་བླ་མའི་ལུང་ཐོབ་ཅིང་ ངེས་པའི་བློ་དང་ལྡན་པས་ན། །དབུལ་པོ་གཏེར་དང་ཕྲད་པ་ལྟར། །མཐོང་བ་ཙམ་གྱིས་ཆོག་པ་ཡིན། །ངེས་པའི་བློ་དང་ལྡན་མེད་ཅིང་། །ཐེག་ཆེན་རྫོགས་པའི་རིགས་མིན་ན། །ལོང་བ་གཏེར་དང་ཕྲད་པ་ལྟར། །བསྟན་ཀྱང་ཤེས་པར་ག་ལ་འགྱུར། །མི་སྐྱེ་མི་འགག་སྙིང་པོ་ལ། །རང་བྱུང་ཡེ་ཤེས་གསལ་བས་གནས། །ཡིདབཞིནནོརབུའི་སྙིང་པོ་ལྟར། །འཕེལ་དང་འགྲིབ་པ་ག་ལ་ཡིན། །ཞེས་གསུངས་སོ། །ཀུན་འདུས་འོད་ཀྱི་ཏན་ཏྲ་ལས། རང་བྱུང་ཡེ་ཤེས་བསྟན་པའི་ལེའུ་སྟེ་གསུམ་པའོ།། །།དེ་ནས་དེ་བཞིན་གཤེགས་པ་ཀུན་ཏུ་བཟང་པོས། །དོན་གྱི་སྙིང་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། འདི་སྐད་ཅེས་གསུངས་སོ། །ཐོག་མཐའ་མེད་པའི་ངོ་བོ་ནི། །ཀུན་ཏུ་བཟང་པོའི་འཁོར་ལོ་སྟེ། །དུས་གསུམ་སྟོང་པར་གནས་པའི་ཕྱིར། །སྟོང་དང་མི་སྟོང་ཡུལ་ལས་འདས། །སངས་རྒྱས་སེམས་ཅན་དབྱེར་མེད་དེ། །དེ་བཞིན་ཉིད་དུ་གཅིག་པའི་མཚན། །ཐེག་པ་མཁའ་འདྲ་ལྟོ་བོ་ཆེ། །སྟོང་པ་ཉིད་དུའང་མི་གནས་པས། །སྐུ་གསུམ་མཚན་མར་རྟགས་པའི་ལམ། །ཐོབ་པར་བྱ་བའི་ཡུལ་མེད་པས། །གང་ཡང་མི་བྱེད་སྙིང་པོར་རྫོགས། །མ་ལུས་ཀུན་དང་དབྱེར་མེད་པས། །གསལ་དང་སྒྲུབ་པ་ག་ལ་ཡོད། །འཁོར་དང་མྱ་ངན་འདས་པ་མེད། །མཐའ་དབུས་རྟོགས་པའི་རྒྱུན་ལས་འདས། །དྲི་མེད་མཁའ་ལྟར་རབ་ཞི་བས། །རང་བྱུང་འདུ་ཤེས་ཀུན་དང་བྲལ། །ཐིག་ལེ་ཆེན་པོ་རྒྱས་ཐེབས་པས། །ཆ་ཤས་མེད་དེ་སྙིང་པོར་མཚུངས། །ལྷུན་གྲུབ་རིག་པ་ཀུན་རྫོགས་པས། །སྒྲུབ་ཅིང་རྩོལ་བ་བྱ་མི་དགོས། །གདོད་ནས་དག་པའིརངབཞིནཔས། །སྒྲིབ་བྱང་གཉེན་པོ་བརྟེན་དང་བྲལ། །སྙིང་པོར་ཐམས་ཅད་རྟོགས་པའི་ཕྱིར། །ཚད་མར་གཏན་ལ་དབབ་མི་དགོས། །རིན་ཆེན་འོད་ལྟར་ལྷུན་རྫོགས་པས། །ཚོགས་བསགས་དངོས་གྲུབ་བླང་དུ་མེད། །ཡེ་ཤེས་རང་བྱུང་དྲི་མེད་པས། །དགེ་སྡིག་མཚན་མ་སེལ་མི་བྱེད། །བདེ་ཆེན་ཀློང་ལ་ཀུན་གནས་པས། །རྩོལ་བའི་བདེ་ལ་རག་མ་ལུས། །སྙིང་པོ་བར་ཆེ་མི་གནས་པས། །སྒོམ་ཞིང་དམིགས་དང་བྲལ་བར་གནས། །དུས་གསུམ་ཐེག་པའི་སྙིང་པོ་ལས། །མ་ཡེངས་དགོངས་པར་གནས་པ་ཡིན། །དུས་གསུམ་རྒྱལ་བ་རྣམས་ཀྱིས་ཀྱང་། །འདི་མེད་རྒྱལ་བ་འབྱུང་མི་སྲིད། །ཐེག་པའི་སྙིང་པོར་ཀུན་རྫོགས་པས། །ལམ་གཅིག་བསྒྲོད་པས་ཐམས་ཅད་རྫོགས། །མ་བཅོས་དགོངས་པའི་དོན་རྟོགས་ན། །ལུང་སོགས་ཚད་མ་རྣམས་མི་དགོས། །མ་བཅིངས་བཅིངས་པར་མཐོང་བས་ན། །མཚོན་པས་བཅིངས་པ་དུས་གཅིག་གཅད། །དབང་པོ་ཡེ་ཤེས་གསལ་བ་ཡི། །བདེ་མཆོག་རོ་མྱོང་ངོ་མཚར་ཆེ། །བསྟན་པའི་སྙིང་པོ་མ་རྟོགས་ན། །བཙལ་བས་ནམ་མཁའི་མཐའ་འཚོལ་འདྲ། །ཡེ་ཤེས་འཁོར་ལོ་རང་དབང་ན། །མཚན་མའི་དབང་ཐོབ་ཐིག་ལེའི་རྒྱུ། །བག་ཆགས་དག་པའི་མེ་ལོང་ལ། །རྣམ་གྲོལ་དབང་པོ་རང་བཞིན་གསལ། །ཅིར་སྣང་ཡེ་ཤེས་དག་པ་ལ། །བལྟས་ཤིང་རིག་པ་མངོན་པར་འཆར། །མཁའ་ལ་འོད་ཀྱིས་བརྡལ་བ་ལྟར། །ཕྱོགས་མེད་རྒྱས་པར་གསལ་བ་བྱ། །སྙིང་པོ་ཀུན་འདུས་འཁོར་ལོ་ཅན། །མ་ལུས་རྫོགས་པ་ཆེན་པོར་གནས། །ཞེས་གསུངས་སོ། །ཀུན་འདུས་འོད་ཀྱིས་ཏན་ཏྲ་ལས། །སྙིང་པོ་རྫོགས་པའི་ལེའུ་སྟེ་བཞི་པའོ།། །།དེ་ནས་དེ་བཞིན་གཤེགས་པ་ཀུན་ཏུ་བཟང་པོས་དགོངས་པ་དེ་ཁོ་ན་ཉིད་བསྟན་པའི་ཏིང་ངེ་འཛིན་ལ་སྙོམས་པར་ཞུགས་ནས། འདི་སྐད་ཅེས་གསུངས་སོ། །སྣང་སྲིད་ཕྱི་ནང་སྣོད་བཅུད་ཀུན། །རང་བྱུང་ཐིག་ལེར་རྒྱས་ཐེབས་པས། །ཡེ་ཤེས་ཆེན་པོའི་ཀློང་དུ་འཁྱིལ། །ཐིམ་འགྱུར་གསལ་ཡང་མི་མངོན་པའོ། །རྙོག་པའི་རྒྱུ་བཞི་བྲལ་གྱུར་ན། །དེ་མེད་འབྲས་བུ་མི་འབྱུང་བས། །མི་དམིགས་སྙིང་པོ་རྫོགས་པའི་ལམ མ་བཅོས་བཞི་བཞག་སྙིང་པོར་གནས། །ཡེ་ཤེས་འོད་ཀྱིས་ཀུན་ཁྱབ་པས། །ཐམས་ཅད་རང་བྱུང་ཉི་མར་གསལ། །མཁའ་ལ་ཐུགས་རྗེ་ཇི་བཞིན་དུ། །ཡེ་ཤེས་ཚད་མེད་དེ་བཞིན་ཏེ། །སྒྲོ་འདོགས་སྐུར་འདེབས་ཀུན་བཅད་པས། །དེ་བཞིན་ཉིད་དུ་རྣམ་པར་བདལ། །སྙིང་པོའི་སྙིང་པོ་རྫོགས་པའི་ལམ། །བར་ཆད་མེད་པར་གསལ་གྱུར་ན། །ཕྱི་ནང་སྣོད་བཅུད་མ་ལུས་པ། །སྐྱེས་བུ་མིག་ནད་བྲལ་བ་ཡིས། །འཁྲུལ་པའི་བག་ཆགས་སད་པ་ལྟར། །ཡེ་ཤེས་གཞན་ལས་མི་འབྱུང་ངོ་། །གང་ཞིག་འདི་ལྟར་རྟོགས་གྱུར་ན། །འཇིགས་པའི་སྐལ་བའི་རྫས་བཞིན་དུ། །ཐམས་ཅད་སྟོབས་འགྱུར་མ་ཡིན་པ། །ཉེས་སྟོབས་བག་ཆགས་མི་གནས་སོ། །ཐམས་ཅད་ཡེ་ཤེས་རྒྱས་བཏབ་པས། །མ་ལུས་ཀུན་དང་གཉིས་མེད་པ། །དམ་པ་འགའ་ཡིས་རྟོག་པ་ལས། །དམན་པས་དེ་ལྟར་མི་རྟོགས་སོ། །རང་བྱུང་སྙིང་པོ་གཉིས་མེད་པ། །ཐོགས་མེད་རིག་པ་ཤར་བ་བཞིན། །གདོད་ནས་བདེ་ཆེན་རྒྱལ་པོ་ལ། །མ་བཅོས་རིག་པ་ཡན་དུ་ཁྱེ། །ལྷུན་གྲུབ་ཕྱོགས་བྲལ་ཆེན་པོ་ལ། །ཞེན་པའི་འདུ་ཤེས་བྲལ་བ་ཡིས། །ཡེ་ཤེས་གསལ་བས་མདངས་ཕྱུང་ནས། །རིག་པའི་སྙིང་པོ་དུས་གཅིག་འཇུག །སྤྲོས་མེད་ལྷུན་རྫོགས་སྙིང་པོའི་ཀློང་། །ནམ་མཁའ་ཡངས་བའི་སྙིང་པོ་ལྟར། །མ་འདྲེས་ཡོངས་རྫོགས་སྙིང་པོ་ལ། །རིག་པ་གློང་བ་ཙམ་ལ་གནས། །ཡེ་ཤེས་ཀློང་ཆེན་ཀུན་གནས་པས། །རྨོངས་པའི་འཁོར་བའི་འདམ་ལས་གྲོལ། །མཚན་ཉིད་འདི་ཞེས་རྟག་པར་དཀའ། །མ་རིག་ཡེ་ཤེས་འོད་གསལ་བས། །སྒྲིབ་བྱང་ཡེ་ཤེས་བསྐྱེད་དུ་མེད། །སྒྲིབ་དང་རྙོག་པ་ཀུན་དག་པས། །གཉེན་པོས་བཅོས་ཤིང་དགག་ཏུ་མེད། །གསང་བའི་ཐིག་ལེ་རང་བཞིན་དག །མ་ཙལ་རང་དགར་གནས་མོད་ཀྱང་། །གང་ཡང་མ་ཡིན་མི་གནས་པས། །ཕྱོགས་ཀྱི་རྐྱེན་གྱིས་མི་གོས་སོ། །ཇི་ལྟར་རྫུན་པས་དུ་མ་དག །བདེན་ཚིག་གཅིག་གིས་སེལ་བ་ལྟར། །དོན་དང་འབྲེལ་བའི་ཚིག་གཅིག་གིས། །བརྟགས་པའི་གྲོང་ཁྱེར་བཅས་བཅོམ་པའོ། །ཇི་ལྟར་ཐ་དད་དུ་མའི་གཟུགས། །མི་འགག་རོ་མྱོང་གཅིག་པ་ལྟར། །རྣམ་པའི་ཁྱད་པར་མ་བཀག་པར། །བདེ་ཆེན་གསང་བ་རྫོགས་པར་གསལ། །དོན་གྱི་ཁྱད་པར་རྒྱ་ཆེན་ལས། །གཅིག་གིས་དེ་དོན་རྟོགས་པ་ལྟར། །རིག་པ་རྫོགས་པའི་ཁྱད་པར་གྱིས། །གཅིག་དོན་རྟོགས་པས་ཀུན་དོན་རྟོགས། །འཇིག་པའི་དུས་ཀྱི་མེ་བཞིན་དུ། །ཡེ་ཤེས་རྟོགས་པའི་ཁྱད་པར་ལ། །ཇི་ལྟར་སྣང་བའི་ཆོས་རྣམས་ཀུན། །ཡེ་ཤེས་སྟོངས་སུ་གྱུར་པ་ཡིན། །ཡེ་ཤེས་མ་གྱུར་མེད་པས་ན། །སྒྲིབ་པའི་ཁྱད་པར་གཅིག་མི་གནས། །གང་ཞིག་རྟོགས་པའི་སྟོབས་མེད་ན། །གང་ལྟར་སྤྱད་ཀྱང་བརྟགས་པ་ཀུན། །ལོང་བ་མིག་བྲལ་ལམ་ཞུགས་ལྷར། །གང་ལྟར་སྤྱད་པ་གཡང་སར་འགྱུར། །དངོས་འདི་གཅིག་ལས་མ་གཡོས་ཀྱང་། །ཕན་གནོད་ནུས་པའི་ཁྱད་པར་གྱིས། །སྨན་གྱི་རྒྱལ་པོ་ག་བུར་ལྟར། །བཅིངས་དང་གྲོལ་བར་སྣང་བ་ཡིན། །རྫོགས་ཆེན་ཐེག་པའི་སྙིང་པོ་འདི། །རང་བྱུང་ཐིག་ལེ་རྫོགས་པའི་ལུང་། །བསམ་གྱིས་མི་ཁྱབ་ཆོས་རྣམས་ཀུན། །བསམ་མེད་ཡོངས་སུ་རྫོགས་པར་བརྟག །རྣམ་པའི་ཁྱད་པར་གང་དག་ལས། །མ་བཙལ་དེ་དང་མཉམ་པར་སྐྱེ། །བཙལ་ནས་ཁྱད་པར་གང་དག་ཀུན། །བཅིངས་བའི་མདུད་པར་སྣང་བ་ཡིན། །མ་བཅོས་སེམས་ཉིད་རྫོགས་པའི་ལམ། །དེ་ཉིད་རྫོགས་ལ་གནས་པར་བྱ། །རྟེན་དང་བགྲོད་དང་རིམ་པར་འབྱུང་། །འཇིག་རྟེན་ལོག་པའི་ལས་ལ་བསླད། །བྱ་བྲལ་རྫོགས་པའི་ལམ་ལས་གྲོལ། །བསྐྱེད་པ་མཚན་མའི་ལམ་ལ་གནས། །འཇིག་རྟེན་རྩོལ་བའི་ལམ་པ་ཡིས རང་སེམས་རྫོགས་པ་མཐོང་མི་འགྱུར། །ཞེས་གསུངས་སོ། །ཀུན་འདུས་འོད་ཀྱི་ཏན་ཏྲ་ལས། རིག་པ་དབྱེར་མེད་པར་བསྟན་པའི་ལེའུ་སྟེ་ལྔ་པའོ།། །།དེ་ནས་དེ་བཞིན་གཤེགས་པ་ཀུན་ཏུ་བཟང་པོས། ཡེ་ཤེས་སྒྲོ་སྐུར་མེད་པའི་ཏིང་ངེ་འཛིན་ལ་སྙོམས་པར་ཞུགས་ནས། །འིད་སྐད་ཅེས་གསུངས་སོ། །རིག་པའི་རྒྱལ་པོ་བསྟན་པའི་བདག །བསྟན་པའི་ཐེག་པ་ཡོངས་ཀྱི་ཀློང་། །བསྟན་པའི་རྩ་བ་ཀློང་དགུའི་གཏེར། །གཅིག་ལ་རྫོགས་ཏེ་ཐ་དད་མེད། །སྙིང་པོའི་སྙིང་པོ་རྫོགས་པ་འདི། ཁྱད་པར་གནས་པ་བསྟན་པས་གསལ། །ཐེག་པའི་ཁྱད་པར་ཅི་བསྟན་པ། །འདུལ་ཐབས་དྲང་བའི་ཁྱད་པར་ཉིད། །ཀུན་ལ་མཐུན་པར་སྣང་མོད་ཀྱང་། །མདོ་དོན་ཡེ་ཤེས་རྫོགས་པ་གཅིག །སངས་རྒྱས་ཀུན་གྱི་གཏེར་གྱི་དབྱིག །རིན་ཆེན་ཕུང་པོ་ཕྱོགས་མེད་ཀློང་། །བཙལ་བསྒྲུབ་མེད་དེ་གདོད་ནས་རྫོགས། །ཡོན་ཏན་ཆེན་པོ་དཔག་མི་རིག །དུས་གསུམ་སངས་རྒྱས་ཡོན་ཏན་ཀུན། །སྙིང་པོ་གཅིག་ལ་རྫོགས་པར་བལྟ། །དེ་ནི་གསང་བའི་ཐབས་དག་གིས། །ཚིག་གི་དོན་གྱིས་མཚོན་པར་བྱ། ་།ད་དང་ཁྱད་པར་མངོན་སུམ་མ་ལུས་པ། །ལྷུན་གྲུབ་རྟོགས་ལ་ཁྱད་པར་མེད་པར་གནས། །མ་རྟོགས་སྐལ་མེད་དོན་ལ་བཞུགས་པའི་ཕྱིར། །དེ་དག་བསྟན་པས་ཐ་མ་ཐོབ་པ་ཡིན། །རང་བྱུང་བརྡལ་བ་ཆེན་པོ་ཁྱབ་གནས་པ། །སྐལ་མེད་དམན་པས་རྟོགས་པར་ག་ལ་འགྱུར། །སྙིང་པོ་འོད་འབར་ཀུན་ལ་ཁྱབ་གནས་ཀྱང་། །དམིགས་པ་མེད་ལ་མི་སྣངདེབཞིནནོ། །འོནཀྱངབླུན་པོའི་འཁྲུལ་པ་གསལ་བ་ལྟར། །སྐད་ཅིག་མ་ལ་དོན་ཀུན་རྫོགས་པ་ཡིན། །ལྷུན་གྱིས་གྲུབ་པས་རང་ཉིད་དོན་བྱར་མེད། །གཅིག་ཏུ་གནས་པས་གཞན་དོན་བྱ་དང་བྲལ། །ཇི་བཞིན་བཞག་པས་ཡེངས་མེད་ངང་དུ་སྣང་། །འཁྲུལ་དང་མ་འཁྲུལ་ཁྱད་པར་གྱིས། །ཟླ་སྤྲུལ་དུང་ལ་ཞེན་བཞིན་ནོ། །བྱ་བྲལ་རྫོགས་པའི་ཐིག་ལེ་ལ། །རང་གཞག་པ་ཡི་གཏན་ཚིགས་ཀྱིས། །རང་བྱུང་སེམས་ཉིད་རྫོགས་པའི་ལུང་། །དེ་མ་ཐག་པར་ཡོངས་སུ་ཤེས། །མ་བཅོས་ཀུན་འདུས་ཐུགས་ཀྱི་རྒྱུད། །གསང་བའི་ཞི་བ་ཟབ་མོའི་ལམ། །ཇི་བཞིན་མ་བཙལ་བཞག་པ་ཡིས། །རྒྱུ་བ་མ་ལུས་དུས་གཅིག་གཅད། །བྱིས་པ་མ་རབས་འདུ་ཤེས་ཀྱིས། །རྫོགས་པའི་ཀློང་ལ་ཅིར་ཤར་ཡང་། །ཡེ་ཤེས་རྟོགས་པའི་ཁྱད་པར་འཕགས། །ཡེ་ཤེས་སྲོག་གསུམ་འཁོར་ལོ་བསྐོར། །ཐིག་ལེ་ཆེན་པོ་གདོད་ནས་གནས། །ནམ་མཁའི་མཁའ་ལ་ལོངས་སྤྱོད་པས། །བདེ་དང་སྡུག་བསྔལ་བླང་དོར་མེད། །ཅེས་གསུངས་སོ། །ཀུན་འདུས་འོད་ཀྱི་ཏན་ཏྲ་ལས། སེམས་ཀྱི་རང་བཞིན་བསྟན་པའི་ལེའུ་སྟེ་དྲུག་པའོ།། །།དེ་ནས་དེ་བཞིན་གཤེགས་པ་ཀུན་ཏུ་བཟང་པོས། །འཁྲུལ་བ་ངོས་བཟུང་བ་ཞེས་བྱ་བ་འདི་གསུངས་སོ། །སངས་རྒྱས་སེམས་ཅན་གཉིས་མེད་ལ། །མ་རྟོགས་འཛིན་པའི་ཁྱད་པར་གྱིས། །གཅིག་ལ་རྐྱེན་དང་ཕྲད་པ་ཡིས། །ནུས་པའི་ཁྱད་པར་སོ་སོར་སྣང་། །རྨོངས་འཁྲུལ་རྐྱེན་གྱི་ཁྱད་པར་གྱིས། །སྣང་བ་གཅིག་ལ་གཉིས་པར་མཐོང་། །ཐ་དད་གདོད་ནས་མི་གནས་པས། །དེ་དག་ཙམ་གྱིས་གྲོལ་བ་ཡིན། །སྣང་བའི་ཕྱོགས་མེད་ཀུན་ཁྱབ་ཕྱོགས་མེད་ཀྱང་། །ལྡོངས་ལ་མུན་པའི་ཚོགས་སུ་སྣང་། །བསྒྲུབས་པས་གྲུབ་པར་མ་གྱུར་ཀྱང་། །མཐོང་བས་མུན་པ་བསལ་མི་དགོས། །རྒྱལ་བུ་ལོང་བའི་མཚན་དཔེ་ལྟར། །འགྲོ་ཀུན་ཡེ་ཤེས་ངོ་བོར་གནས། །གཞན་ལ་རྙེད་པར་མི་འགྱུར་ཏེ། །མཐོང་བ་ཙམ་ལ་རག་ལས་པའོ། །ཇི་ལྟར་གཅིག་གིས་གཅིག་བཙལ་བས། །ཕྲད་ཀྱང་མ་ཤེས་ཀུན་ཏུ་སྟོར། །བདེན་པའི་ཚིག་གིས་འཀྲོལ་འགྱུར་བས། །མ་ཤེས་དེ་ཉིད་བསྟན་པར་ཟད། །བདེན་པའི་ངག་དེ་མ་ཐོབ་པས། །གང་ལྟར་བཙལ་ཞིང་ལམ་བཀྲོལ་ཀྱང་། །བསྐལ་བ་བྱེ་ཕྲག་བརྒྱད་བཅུ་མྲ །དེ་དག་ཤེས་རྟོགས་མི་འཀྱུར་རོ། །བདེན་པའི་ངག་དང་ཕྲད་པའི་ཚེ། །གང་ཕྲད་དུས་དེ་དེར་ངེས་འགྱུར། །ཇི་ལྟར་སྣང་བའི་སྦྱོར་བ་ཡིས། །ཤིན་ཏུ་སྒྲིབས་ལ་ཡུན་རིང་བའི། །མུན་པ་འཐིབས་པོ་མ་ལུས་པ། །སྐད་ཅིག་ཙམ་ལ་འཇོམས་པར་བྱེད། །གང་དུ་ཤེས་པ་མུན་པའི་ཚོགས། །དེ་མ་ཐག་པ་རྣམ་པར་བཅད། །བཞི་གཅིག་སྟོབས་ཀྱིས་འཕགས་པའི་ཕྱིར། །སྤྱོད་པའི་འཁོར་ལོ་རྒྱུན་མི་བཅད། །མ་ལུས་ཡེ་ཤེས་འོད་གསལ་ལ། །བླང་དོར་དམིགས་འཛིན་ཀུན་ལས་འདས། །མཚན་མའི་སྒྲོ་སྐུར་ཀུན་ཞི་བས། །རང་གཞག་ཡེ་ཤེས་བསམ་མི་ཁྱབ། །ཡེ་ཤེས་འོད་ཀྱིས་ཀུན་ཁྱབ་པས། །གསལ་དང་མི་གསལ་ཆོས་མི་གནས། །ཀུན་འབྱུང་སྙིང་པོ་ཞི་བའི་ལམ། །ཡེ་ཤེས་འཁོར་ལོ་རྒྱུན་མི་འཆད། །གནས་སྐབས་ཁྱད་པར་མ་འདྲེས་ཀྱང་། །ཡེ་ཤེས་ཆེན་པོ་གཅིག་ཏུ་འཁྱིལ། །ཀུན་འདུས་འོད་ཀྱི་དཀྱིལ་འཁོར་ལ། །མ་ལུས་རྫོགས་པའི་ཚུལ་དུ་གནས། །ཆུ་ཡི་ཁྱད་པར་བསམ་ཡས་བ། །མ་འདྲེས་ལྷུན་གྱིས་རྫོགས་པ་ལྟར། །གཉིས་མེད་གསལ་བ་བསམ་མི་ཁྱབ། །དེ་བཞིན་ཉིད་ཀྱང་དེ་ལྟའོ། །རིན་ཆེན་སེམས་ལ་དབྱེར་མེད་ཀྱང་། །ཡོན་ཏན་ཁྱད་པར་བསམ་མི་ཁྱབ། །གང་དག་ཉིད་ལ་དབྱེར་མེད་ཀྱང་། །ཡོན་ཏན་ཁྱད་པར་སྣང་བ་ལྟར། །ལྷུན་གྲུབ་ཉིད་ལས་མི་གཡོ་ཡང་། །རྣམ་པ་ལྷུན་གྲུབ་ཕྱོགས་རིས་མེད། །རྟེན་མེད་མཁའ་མཉམ་ཡེ་ཤེས་ལ། །རྟེན་བཅས་སྐྱེ་འགག་ནོར་བའི་ལམ། །དུས་གཅིག་རྫོགས་པའི་ཡེ་ཤེས་ལ། །རིམ་སྐྱེ་རྟག་འདོད་ནོར་བའི་ལམ། །རྫོགས་ཆེན་ཕྲ་མེན་རྣལ་འབྱོར་པས། །རྣམ་གྲོལ་འབྲས་བུ་གང་ལ་ཐོབ། །ཀུན་འབྱུང་ཐེག་པའི་སྙིང་པོ་ལ། །མཁའ་ལྟར་གནས་པས་དགག་ཏུ་འང་མེད། །ལྷུན་གྱིས་གྲུབ་པས་སྒྲུབ་ཏུའང་མེད། །མ་ཡེངས་གནས་པས་སྒོམ་དུའང་མེད། །བདག་ཡིན་ཉེས་པས་བགྲོད་དུའང་མེད། །མཁའ་ལྟར་དག་པའི་རང་བཞིན་ལ། །ཡེ་ཤེས་གསལ་བ་མཛེས་པས་བརྒྱན། །གཉིས་མེད་བདེ་ཆེན་ལྷུན་གྱིས་གྲུབ། །རྒྱ་གསུམ་འདེབས་པས་འགྱུར་མི་སྲིད། །ཅེས་གསུངས་སོ། །ཀུན་འདུས་འོད་ཀྱི་ཏན་ཏྲ་ལས། འཁྲུལ་པ་དང་མ་འཁྲུལ་པའི་ཁྱད་པར་གྱི་ལེའུ་སྟེ་བདུན་པའོ།། །།དེ་ནས་དེ་བཞིན་གཤེགས་པ་ཀུན་ཏུ་བཟང་པོས་དབྱེར་མེད་པའི་ཏིང་ངེ་འཛིན་ལ་སྙོམས་པར་ཞུགས་ནས། །ཆེད་དུ་འདི་སྐད་ཅེས་གསུངས་སོ། །ཐམས་ཅད་རྣམ་དག་ཆོས་ཀྱི་དབྱིངས། །རྙོག་བྲལ་ཡེ་ཤེས་བདེ་ཆེན་ལ། །གཉིས་འཛིན་ལོག་པའི་སྟོབས་ཀྱིས་བསྒྱུར། །རྣམ་རྟོག་འཁོར་བའི་གཡང་སར་ལྷུང་། །མི་གཡོ་དང་པོའི་རང་བཞིན་ལ། །རྐྱེན་གྱིས་བརླབས་སྣང་ཇི་བཞིན་ནོ། །རིན་ཆེན་དག་པའི་རང་བཞིན་ལ། །གང་དག་ཕྲད་པར་དེར་གྱུར་ཀྱང་། །དེ་དག་ཡིན་པས་སྣང་འགྱུར་ཏེ། །མིན་པས་གང་གི་ངོ་བོ་མིན། །དེ་བཞིན་མ་བཅོས་ལྷུན་གྲུབ་པ། །ཡོན་ཏན་ལྷུན་གྲུབ་རྫོགས་པའོ། །རྫོགས་པ་ཆེན་པོར་འགལ་འགྱུར་བས། །ཕྱིན་ཆད་མ་བཙལ་རང་དགར་གནས། །བྱ་དང་མི་བྱ་མེད་པས་ན། །བླང་དོར་མ་ལུས་འཁོར་བའི་ལམ། །ཞེས་གསུངས་སོ། །ཀུན་འདུས་འོད་ཀྱི་ཏན་ཏྲ་ལས། དེ་ཁོ་ན་ཉིད་སྙིང་པོའི་ལེའུ་སྟེ་བརྒྱད་པའོ།། །།དེ་ནས་བཅོམ་ལྡན་འདས་དཔལ་ཀུན་ཏུ་བཟང་པོས། །ལྷུན་གྱིས་གྲུབ་པའི་ཏིང་ངེ་འཛིན་ལ་སྙོམས་པར་ཞུགས་ནས། །འདི་སྐད་ཅེས་གསུངས་སོ། །གདོད་ནས་རྫོགས་པའི་སྙིང་པོ་ལ། །འབད་རྩོལ་ཞེན་པ་མི་གནས་ཀྱང་། །ལྷུན་གྲུབ་བསམ་མི་ཁྱབ་སྦྱོར་བས། །བདག་གཞན་དོན་ཀུན་སྐད་ཅིག་རྫོགས། །མ་བཅོས་ཇི་བཞིན་ཕྲ་བ་ཡིས། །རྟོགས་སྤྱོད་འདུ་ཤེས་ཕྱོགས་དང་བྲལ། ཁྱབ་པ་ཆེན་པོ་མཁའ་ལྟར་དག །དེ་བཞིན་ཉིད་དེ་ཆོས་ཀྱི་སྐུ། །ལོངས་སྤྱོད་ནམ་མཁའི་མཐར་ཐུག་སྟེ། །ཇི་སྙེད་པ་ཡི་རྣམ་པར་དག །བདེ་ཆེན་ཡེ་ཤེས་རོ་མྱོང་བས། །ལོངས་སྤྱོད་རྫོགས་པ་ཆེན་པོ་ཉིད། ཁྱབ་པ་ནམ་མཁའི་མཐར་ཐུག་པས། །སྤྲུལ་བ་ཆེན་པོ་རྒྱུན་མི་འཆད། །མ་ལུས་སྤྲུལ་པར་རྒྱུད་འཆང་བ། །གཞན་པ་ཅུང་ཟད་ཡོད་མ་ཡིན། །འདི་དག་སེམས་ཉིད་རྫོགས་པ་ལ། །གདུལ་བྱ་བསམ་པའི་ཁྱད་པར་དུ། །རྒྱ་མཚོ་རླབས་དང་རིན་ཆེན་ལྟར། །སྐལ་ལྡན་རྣམས་ཀྱིས་ཤེས་པར་བྱ། །ཐམས་ཅད་ལྷུན་གྲུབ་ཆོས་དབྱིངས་པས། །ཐུགས་རྗེ་ཡུལ་ཡོད་མ་ཡིན་ཀྱང་། །གདུལ་བྱའི་དུས་ན་རིན་ཆེན་ལྟར། །མ་ལུས་ཀུན་ལ་སྣང་བ་ཡིན། །སྒྲ་སྐད་ཆེ་ཆུང་མ་ལུས་བ། །ཡེ་ཤེས་རྫོགས་པའི་གསུང་གིས་ནི། ཁྱབ་པ་ཆེན་པོར་བྱིན་བརླབས་ཀྱིས། །བསྟན་པའི་ཆོས་ཉིད་སྟོན་པ་ཡིན། །མཁྱེན་པའི་ཡེ་ཤེས་སྐད་ཅིག་ལ། །མ་རྫོགས་ཁྱད་པར་མི་གནས་པས། །ཇི་ལྟ་བ་ལས་མ་གཡོས་ཀྱང་། །ཇི་སྙེད་མ་བཀག་རྫོགས་པར་མཁྱེན། །བྱ་བྲལ་རྫོགས་པའི་འཕྲིན་ལས་ཀྱིས། །མ་ལུས་མཛད་པ་ཕྱོགས་རིས་མེད། །ཐམས་ཅད་མཛད་པར་གནས་གྱུར་པས། །ཡེ་ནས་རྫོགས་པའི་མཛད་པ་ཡིན། །མ་ལུས་ལྷུན་གྲུབ་ཆོས་ཀྱི་དབྱིངས། །དབྱེ་བའི་ཁྱད་པར་ཡོད་མིན་ཡང་། །ཉི་མའི་འོད་དང་སྙིང་པོ་ལྟར། །རང་གཞག་ཙམ་ལ་རྫོགས་པ་ཡིན། །འདུས་བྱས་མ་ཡིན་རྡོ་རྗེ་ཡིན། །རང་བྱུང་ཉིད་པས་རྒྱུ་རྐྱེན་བྲལ། །རིམ་པ་མེད་པས་དུས་གཅིག་རྫོགས། །ལྷུན་གྱིས་གྲུབ་པས་གཞན་མི་རྩོལ། །ཇི་ལྟར་འོད་ཀྱི་གཞལ་ཡས་ལ། །དུས་གསུམ་གསལ་བར་འཆར་བའམ། །རིན་ཆེན་སྤྱིན་གྱི་སྙིང་པོ་ལས། །དྲག་པོ་རླུད་གི་སྒྲས་མཚོན་ནས། །བདུད་རྩི་ཆར་བའི་སྙིང་པོའི་མཐུས། །མ་ལུས་བསམ་པ་རྫོགས་པར་གནས། །སྙིང་པོ་རྫོགས་པའི་རང་བཞིན་ལས། །མོས་པའི་ཁྱད་པར་སྣང་བ་དང་། །ཕྱོགས་མེད་རང་གིས་བྱིན་བརླབས་ཀྱིས། །ཇི་ལྟར་འདོད་པ་སོར་སོར་སྣང་། །ཞེས་གསུངས་སོ། །ཀུན་འདུས་འོད་ཀྱི་ཏན་ཏྲ་ལས།ལྷུན་གྱི་གྲུབ་པའི་ལེའུ་སྟེ་དགུ་པའོ།། །།དེ་ནས་དེ་བཞིན་གཤེགས་པ་ཐམས་ཅད་ཀྱི་རང་བཞིན་དེས། །འཁོར་གྱི་ཚོགས་ལ་འདི་སྐད་ཅེས་བཀའ་སྒྲགས་བར་མཛད་དོ། །དེ་བཞིན་གཤེགས་པ་ཐམས་ཅད་ཀྱི། །ཡེ་ཤེས་སྙིང་པོ་ཐུགས་ཀྱི་རྒྱུད། །མ་བཅོས་ཇི་བཞིན་ཐམས་ཅད་ཀྱི། །ཉོན་མོངས་ཞེན་པའི་འཕྲེང་ཐག་ཆོད། །མུན་པའི་དྲི་མ་ཀུན་གསལ་ནས། །མཁའ་ལྟར་དག་པ་དུས་གཅིག་སྣང་། །རིག་པའི་སྙིང་པོ་ཀུན་འདུས་འོད། །ཕྱོགས་མཚམས་མེད་པར་རྒྱས་པར་གནས། །གསང་བ་ཕྱི་མའི་མན་ངག་སྟེ། །རྫོགས་ཆེན་རྩ་བ་ཡང་སྙིང་འདི། །དུས་གསུམ་སངས་རྒྱས་ཐམས་ཅད་ཀྱི། །གསང་མཛོད་ཐུགས་ཀྱི་རྒྱ་མཚོ་ཡིན། །རྣམ་གྲོལ་འབྲས་བུ་རྫོགས་འདོད་པས། །ཐམས་ཅད་ལ་ནི་མེ་ལོང་བཞིན། །བལྟས་ཀྱང་གཟུངས་བརྙན་མི་སྣང་ངོ་། །བསྟན་པ་རྒྱ་མཚོ་ཐུགས་ཀྱི་མཛོད། །སྐལ་ལྡན་རིག་པ་འགའ་ཙམ་ལ། །འཕྲུལ་ཚིག་བརྡ་ཡིས་བསྟན་པ་སྣང་། །འོན་ཀྱང་རིན་ཆེན་བསྟན་པ་ལྟར། །རྟོགས་པ་ཙམ་གྱིས་ཆོག་པ་ཡིན། །ཡང་གསང་ཐུགས་ཀྱི་ཉི་མ་འདི། །གྲགས་པའི་ཆོས་བརྒྱད་མ་ཆགས་ཤིང་། །རྙེད་དང་བཀུར་སྟི་དེ་བཞིན་པས། །རིན་ཆེན་དབྱིག་དང་ལུས་སྲོག་དག །འཕངས་མེད་གསེར་གྱི་རང་བཞིན་ལྟར། །བླ་མ་དམ་པ་སྲོག་འཛིན་ཅིང་། །ཏིང་འཛིན་ཤེས་རབ་རྩལ་རྫོགས་པས། །བླ་མ་རིན་ཆེན་དབྱིག་ལྟར་བཀུར། །མན་ངག་སྙིང་ལྟར་འཚོ་བ་དང་། །མཆེད་ལ་གུས་སེམས་དད་པར་ལྡན། །རིན་ཆེན་འཕྲུལ་གྱི་ཐབས་ལྡན་ན། །ཟང་ཟིང་སེར་སྣས་བཅིངས་པ་མེད། །འདི་ལ་གསང་བ་གཏེར་དུ་གཏད། །འདི་དག་རང་བཞིན་མི་ལྡན་པར། །གཡོ་རྒྱུས་མན་ངག་འདོད་པ་དག །བསྐལ་པ་བྱེ་བ་ཕྲག་བརྒྱར་ཡང་། །ཐུགས་ཀྱི་གཏེར་ཆེན་སྤྲོ་མི་བྱ། །ཞེས་གསུངས་སོ། །ཀུན་འདུས་འོད་ཀྱི་ཏན་ཏྲ་ལས། གསང་བའི་གཏེར་གཏད་པའི་ལེའུ་སྟེ་བཅུ་པའོ།། །།བྱང་ཆུབ་ཀྱི་སེམས་ཀུན་འདུས་འོད་ཀྱི་ཏན་ཏྲ་རྫོགས་སོ།། །།རྒྱ་གར་སྐད་དུ། ཙྭ་ན་པྲ་བྷ་རཏྣ་ཏན་ཏྲ་ནཱ་མ། བོད་སྐད་དུ། ཡེ་ཤེས་རིན་ཆེན་འོད་ཀྱི་རྒྱུད་ཅེས་བྱ་བ། །ཡེ་ཤེས་རིན་པོ་ཆེ་གང་ཡིན་པ་དེ་ལ་ཕྱག་འཚལ་