Ngb-pt-0348-vol-04-text
Front
Body
བྱེད་པ་རྫོག་སོ།། །། རྒྱ་གར་སྐད་དུ། ཀི་་ཡ་དྷ་ཤ་དྭ་ཡ་ཏསྨོམ་ཧྭ་ཡུ་ན།བོད་སྐད་དུ། ཕུར་བུ་བབྱུགཉི་འབྱུང་བའི་རྒྱུད་ཆེན་པོ་བསྟན་པའོ། །བམོལྡན་འད་འཇིག་བྱེད་ཆེན་པོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། །བཅོམ་ལྡན་འདས་ཁྲོ་བོ་འཇིགས་བྱེད་ཀྱི་རྒྱལ་པོ། །བཛྲ་ཀི་ལ་ཡ་དྲག་པོ་མཐིང་ནག་འབར་བའི་གནས་ན་བཞུགས་ནས། །གདུག་པ་ཅན་ཐམས་ཅད་འདུལ་བ། དྲེགས་པ་ཅན་ཐམས་ཅད་ཚར་བཅད་པའི་ཕྱིར། རབ་ཏུ་དྲག་པོ་མི་གཡོ་བའི་ཏིང་ངེ་འཛིན་ལ་སྙོམས་པར་ཞུགས་ནས། ཉིད་ཀྱིས་བྱིན་རླབ་ལས། །ཀརྨ་ཧེ་རུ་ཀ་ཞེས་བརྗོད་པས། །ཁྲོ་བོ་ཀརྨ་ཧེ་རུ་ཀ །སྐུ་ལྗང་ནག་ཤིན་ཏུ་མི་བཟད་པ་བཏོན་ནས། །བཅོམ་ལྡན་འདས་བཛྲ་ཀི་ཀ་ལ་ཡ་ལ་འདི་སྐད་ཅེས་གསོལ་ཏོ། །ཀྱེ་ཀྱེ་བཅོམ་ལྡན་འདས། ཆོས་ཐམས་ཅད་ཞི་བའི་ཏིང་ངེ་འཛིན་གྱིས་མི་འདུལ་ན། ཐུགས་རྗེ་གང་གིས་འདུལ་བའི་དུས་ལ་བབ་པར་ཤེས་པ་ལགས། གང་གིས་འདུལ་བའི་དུས་ལ་བབ་པར་གཟིགས་པ་ལགས། །ཁྲོ་བོ་ཆེན་པོས་ལུང་བསྟན་དུ་གསོལ། །བདེ་བར་གཤེགས་པ་ལུང་བསྟན་དུ་གསོལ། །ཐབས་མཁས་པའི་བདག་ཉིད་ཅན། དེའི་དུས་ལ་བབ་པ་ལགས་སོ། །ཕྲིན་ལ་ཀྱི་མངའ་བདག་ཅེས་གསོལ་པ་དང་། དཔལ་བཛྲཀི་ལ་ཡ་ས་ཨེ་ཧྲེ་ཧོ་ཤ་ཧུ༷་ཞེས་བརྗོད་པས། ནམ་མཁའི་གཏོས་ཀྱི་ཕྱོགས་རིས་མེད་པ། །ཆོས་ཉིད་བདེ་བའི་རོ་བདལ་བ་བསྐྱེད་དོ། །ཡ༷་ཀརྨ་རསྒ་ཧུ༷་ཞེས་བརྗོད་པས། རྡོ་རྗེ་རླུད་ནག་འཅོས་མས་དབང་དུ་བསྡུས་ཤིང་བྱིན་གྱིས་བརླབ་ནས་རྒྱས་བཏབ་པས། ཕྲིན་ལས་ཐོགས་པ་མེད་པའི་དོན་མཛད། མ་ཧྭ་རཀྟ་ཛ་ལ་མཎྜལ་ཞེས་བརྗོད་པས། ཁྲག་གི་རྒྱ་མཚོ་གཏིང་དཔག་མེད་པས། སྡུག་བསྔལ་དབང་དུ་བསྡུས་ནས། འབྲས་བུ་གཅིག་གི་རང་བཞིན་དུ་ཤར་བར་མཛད། ཀེང་ནི་རི་ཛ་ལ་མཎྜལ་ཞེས་བརྗོད་པས་འཁོར་བ་གནས་སུ་དག་པ་དང་། ཆོ་འཕྲུལ་མངོན་པར་འདུ་མཛད་པའི་ཕྱིར། ཀེང་རུས་གྱི་རི་རབ་ཏུ་གྱུར། བྷན་དྷ་ཙྭ་ན་ཙཀྲ་ཛ་ལ་མཎྜལ་ཞེས་བརྗོད་པས། བྷན་དྷའི་གཞལ་ཡས་ཁང་གྲུ་གསུམ་མཐིང་ནག་རབ་ཏུ་འབར་བ་གཅིག་ཏུ་གྱུར། དེ་ནས་ཁྲོ་བོ་ཀརྨ་ཧེ་རུ་ཀས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཨེ་མ་ཧོ། བཅོམ་ལྡན་འདས་ཐུགས་རྗེ་དཔྱང་ཐག་ཆད་ཅིང་ངན་སོང་འཁོར་བར་སྐྱེས་ངེས་པ་ལ། འདི་ལྟར་རྫུ་འཕྲུལ་བསྟན་པ་ངོ་མཚར་ཆེའོ། །འདི་ལྟ་བུའི་ངོ་མཚར་བསྟན་པ་ངོ་མཚར་ཆེའོ། །འདིའི་རྗེས་སུ་སྒྲུབ་པའི་རྣལ་འབྱོར་པས། །གནས་ནི་གང་དང་གང་དུ་བསྟན། དམིགས་པ་ནི་གང་དང་གང་ལ་བགྱི། རྣལ་འབྱོར་རྒྱུ་དང་ལྡན་པར་བྱ། །ཕུར་པའི་རྒྱུ་ནི་གང་དང་གང་ལགས། ཕུར་པ་བསྒོམ་པ་ཅི་ལྟར་སྒོམ། བྱིན་གྱིས་བརླབ་པ་ཅི་ལྟར་རླབ། བརྡེག་པའི་དུས་ཚོད་གང་ལ་བབ་པ་ལགས། དམ་ཚིག་གང་དུ་བསྟན་པ་ལགས། ལྟ་བ་ཅི་ལ་དམིགས་པ་ལགས། ཡོ་བྱད་དང་རྫས་གང་འཚལ། རྟགས་དུ་ནས་འབྱུང་། འདི་བརྩམ་པའི་དགོས་ཆེད་དང་། ཡོན་ཏན་ཅི་ཐོབ། བཅོམ་ལྡན་འདས་ཀྱིས་བཤད་ཅིང་ལུང་བསྟན་དུ་གསོལ། ཀི་ལ་ཡ་ཡིས་བཀའ་སྩལ་པ། །ཉོན་ཅིག་ཀརྨ་ཧེ་རུ་ཀ །ཕུར་པ་བསྒྲུབ་པའི་གནས་རྣམས་ནི། །ཡང་དག་དོན་དུ་བཤད་པར་བྱ། །དང་པོར་གཞུང་དང་ལྡན་བྱ་ནས། །དུར་ཁྲོད་གནས་དང་ཤིང་གཅིག་དྲུང་། །རྒྱ་གྲམ་ལམ་དུ་བྱ་བ་དང་། །འབྱུང་པོ་མང་པོ་གང་ཡོད་སར། །དྲག་པོའི་ལས་འདི་བྱ་བར་གྱིས། །ལས་ལ་ཕན་འདོགས་ཡོད་པ་དང་། །གྲིམས་འབྱིན་ཤུགས་ཀྱི་ཏིང་འཛིན་ལེགས། །དེ་ལ་ཐབས་དང་རྟགས་མེད་ན། །བདག་གི་གཟུགས་ཕུང་རླག་པ་དང་། །ཚེ་དང་སྲོག་གི་བར་ཆད་འོང་། །ནགས་ཚལ་ཆེན་པོའི་ནང་ན་བ། །དེར་ནི་ལེགས་བར་དཔྱད་པ་ཡིས། །ཀླུ་ཡི་མིག་དང་འབྱུང་པོའི་སྲང་། །ས་ཡི་བགེགས་དང་མ་རུངས་པ། །ཚ་སྒོ་དམྱལ་བའི་རྒྱུ་མེད་པར། །ལས་ཀྱི་བྱ་བ་གཞུང་བརྩམས་ནས། །བཀྲ་ཤིས་དོན་གྱི་གནས་ཡིན་པས། །སྒྲུབ་ཡུན་རིང་ན་བཀྲ་ཤིས སོ། །མེཏོག གླིངདངརིན ཆེན རི། །དཔག་བསམ་ཤིང་དང་སྐད་སྙན་བྱ། །འབྲུསྣ ཚོགས དངགནམ་ས་ལེགས། །དབྱིབས་ལེགས་ལུང་པ་རན་པར་ནི། །བཀྲ་ཤིས་གཞུང་བསྲང་ཡུན་རིང་བས། །གནས་ཀྱི་དམ་པ་ཡིན་ཞེས་བཤད། །དྲག་པོའི་ལས་སུ་བྱ་བ་ལ། །དང་པོར་ཕུར་པ་སྒྲུབ་པའི་གནས། །ནགས་རི་ཚེར་མ་ཅན་གྱི་ཤིང་། །གཅན་གཟན་གདུག་པ་སྣ་ཚོགས་ཡོད། །གནམ་ནི་གྲི་འདྲ་རལ་གྲིའི་ཤུལ། །ས་ནི་གྲུ་གསུམ་མེ་དཔུང་འབར། །ལོགས་ལ་དུར་ཁྲོད་གླིང་ཡོད་པ། །མཁས་པས་བརྟགས་ཏེ་བཙལ་བྱས་ན། །དེ་ནི་ཕུར་པའི་སྒྲུབ་གནས་ཡིན། །ཚེར་མ་ཅན་གྱི་ཤིང་དག་དང་། །དུག་ཤིང་གདུག་པ་ཡོད་པ་དང་། །བྲག་ལ་ར་རོད་མང་བ་དང་། །གྲོག་པོ་མང་པོ་གཏིང་ཟབས་དང་། །སྟག་གི་སོ་འདྲ་སྦྲུལ་གྱི་ལྕེ། །སྡིག་པའི་རྭ་འདྲ་ཆུ་སྲིན་ཁ། །བན་གླང་སྣང་འཐབ་བྲག་ཆུའི་བར། །རྐང་གཅིག་ཤིང་དང་མ་རུངས་པ། །སྔོན་ཆད་ལྷ་མི་ཕུང་ས་དག །གཡུལ་བཀྱེ་བ་དང་མཚོན་འཐབ་དང་། །བསད་བཅད་པ་དང་མ་རུངས་དུས། །སྲིན་པོ་བསྒྲལ་བའི་བཅས་གཞི་དང་། །སྲོག་ཆགས་བསྒྲལ་བའི་ཁྲག་རྗེས་དང་། །གཡུལ་ངོ་བགོས་པའི་ས་མཁར་རྙིང་། །མང་པོར་བསད་ཅིང་ཕུང་བའི་ས། བྲག་ནི་སྲིན་མོ་ངུས་པ་འདྲ། །རི་ནི་ཐལ་ཕུང་བསྙིལ་བ་འདྲ། །ལུང་པ་མེ་ཡིས་བསྲེགས་འདྲ་བ། ཁྲེང་རྩི་རྐང་ཐང་བྲོས་འདྲ་བ། །སྒང་དེའུ་མི་རོ་སྦས་འདྲ་བ། །འདི་ནི་བརྡེག་ཅིང་བསྒྲལ་གནས་ཡིན། །སེམས་ལ་ཆོས་ཉིད་མི་གསལ་ཞིང་། །ཉམས་དང་ཏིང་འཛིན་གཡེལ་བས་ནི། །གནས་འདི་དག་ཏུ་ཡོངས་མི་བྱ། །ནམ་ཕུགས་རྣལ་འབྱོར་དག་ལ་འགྱོད། །དེ་བས་གཞུད་དང་མཐུན་པ་ཡི། །བཀྲ་ཤིས་པ་ཡི་གནས་དག་ཏུ། །ཡུན་རིངས་བསྲིངས་ན་གནས་རྟོལ་མེད། །དམ་ཚིག་མ་ཉམས་ངེས་ཐུབ་དང་། །ཏིང་འཛིན་བརྟན་པའི་བློ་ཆེན་གྱིས། །གནས་ནི་དེ་དང་དེ་དག་ཏུ། །ཆོ་གའི་ལས་ནི་བརྩམས་བྱས་ན། །ངེས་པར་གྲུབ་ན་གདོན་རྗོལ་མེད། །དེ་ལྟར་བུ་ཡི་ས་རྙེད་ན། །དང་པོར་བྱིན་བརླབས་མཚམས་བཅད་ནས། །མ་རུངས་ཡོད་ན་གཏོར་མ་སྦྱིན། །དེ་བས་ཞག་གྲངས་འདི་ཙམ་མམ། །དྲག་པོའི་ལས་འདི་མ་འགྲུབ་པར། །གནས་འདིར་རྣལ་འབྱོར་བདག་གནས་པས། །གཏོར་མ་བྱིན་པ་འདི་ལོང་བ། །མ་འགྲུབ་བར་དུ་གཞན་དུ་དེངས། །དེ་སྐད་བྱས་ལ་གཏོར་མ་སྦྱིན། །བསྒོ་བའི་ཚིག་རྣམས་བསྒོ་བར་བྱ། །དེ་ནས་དཀྱིལ་འཁོར་གཞུང་བཞིན་བརྩིགས། །དམ་རྫས་ཆག་ཆག་གཞུང་བཞིན་གདབ། །ཁ་དོག་ཚོན་རྣམས་དགྱེ་བྱས་ནས། །དབུས་སུ་དྲག་པོ་གྲུ་གསུམ་བྲི། །མཐའ་མ་མཚོན་གྱི་འཁོར་ལོ་ལ། །ཁྲོ་བོ་རྣམས་ཀྱང་རིམ་བཞིན་དགོད། །དེ་བཞིན་བརྒྱད་དང་བརྒྱད་དུ་བསྟན། །བཞི་པོ་དག་ཏུ་གང་བསྟན་དང་། །ཉི་ཤུ་རྩ་བརྒྱད་ལ་སོགས་པ། །མཁས་པས་གཞུང་བཞིན་དགོད་པར་བྱ། །གཞན་ཡང་ཕུར་པའི་རྫས་དགོད་པ། །འོག་ནས་འབྱུང་བས་ཤེས་པར་བྱ། །དེ་ཕྱི་མཚན་དང་ལྡན་པ་དང་། །ཞག་གྲངས་ཚང་བའི་སྒྲུབ་རྫས་བཞི། །ཡོབྱདཚོགསཔརམཆོགཏུབྱ། །གནས་རྣམས་འདི་དག་ཡོན་ཏན་ནི། །མྱུར་བ་འགྲུབ་དང་ཤུགས་འབྱིན་དང་། ངན་པའི་ལས་ཀྱིས་ངན་པ་འགྲུབ། །དོན་ལ་ཐེ་ཚོམ་མེད་པར་ནི། །ངན་པའི་གནས་སུ་འགྲུབ་པར་བཤད། །བཀྲ་ཤིས་བཟང་པོའི་གནས་སུ་ནི། །ཡུན་རིང་བསྲིང་ན་ཕུང་འཚེངས་མེད། །དོན་ལ་དེས་ཀྱང་འགྲུབ་པར་བཤད། །བཟང་ངན་གནས་ཀྱི་ཆ་དབྱེ་བ། །བདག་གི་རྟོགས་པའི་ཚད་དང་སྦྱར། །རྟོགས་པ་ཆུང་ན་བཟང་པོ་བདམ། །ཏིང་འཛིན་ཟབ་ན་ངན་པ་བདམ། །མྱུར་བར་ཐོགས་པ་མེད་པར་ནི། །གང་ལ་དམིགས་པ་འགྲུབ་ཅེས་བཤད། །འདི་ནི་ཕུར་པ་གནས་བསྟན་པའི་ལེའུ་དང་པོའོ།། །།བསྒྲལ་བའི་དམིག་རྣམ་བསྟན་པ་ནི། །ཀུན་ལ་བྱ་བ་གཞུང་ལ་མེད། །ཉམས་པར་གྱུར་པ་བདུན་ཡོད་དེ། །སྲོག་ལས་ཉམས་དང་དམ་ལས་ཉམས། །བཀའ་ལས་ཉམས་དང་དོན་ལས་ཉམས། །ལས་ཀྱི་ཉམས་དང་མཚན་མས་ཉམས། །འདོད་པ་འཀྱུར་བས་ཉམས་པ་ནི། །འདི་ལ་ཉམས་པ་ཞེས་བྱ་སྟེ། །དེ་དག་སོ་སོའི་མཚན་ཉིད་ནི། །སྲོག་ལས་ཉམས་པའི་མཚན་ཉིད་ནི། །ཕ་དང་མ་དང་མཁན་པོ་གསོད། །སློབ་མ་གསོད་དང་ནང་དམེ་ཅན། །འདི་ནི་ནམ་ཡང་ལྷུང་བས་ན། །བསྒྲལ་བའི་དམིགས་ནི་འདི་ཡིན་ནོ། །དམ་ལས་ཉམས་པའི་མཚན་ཉིད་ནི། །རྡོ་རྗེ་སློབ་དཔོན་བཀའ་བསླུ་དང་། །ངན་སེམས་འཕྱ་སེམས་བྱེད་པ་དང་། །སྔགས་དང་ཕྱག་རྒྱ་རྒྱུན་གཅོད་དང་། །གསང་བའི་མན་ངག་གཞན་ལ་སྤེལ། །འདི་ནི་ཉམས་པ་ཆེན་པོ་སྟེ། །འདི་ནི་བསྒྲལ་བའི་དམིགས་གཅིག་ཡིན། །བཀའ་ལས་ཉམས་པའི་མཚན་ཉིད་ནི། །དམ་ལ་བཏགས་ན་རྐུ་མཚང་འབྲུ། །སྒྲུབ་ལ་སྦྲན་ན་ཡ་ག་འདོགས། །མན་ངག་བསྟན་ན་སྐུར་པ་འདེབས། །བདེན་པར་བསྟན་ན་ལོག་པར་ཁྲིད། །དོན་རྟགས་བསྟན་ན་གོལ་བར་འཛིན། །འདི་ནི་ཉམས་པའི་དམ་པ་སྟེ། །འདི་ལ་བསྒྲལ་བ་ལྷུར་ཡང་བརྩམ། །འདི་དག་བསྒྲལ་བའི་ཕྲིན་ལས་ནི། །གཞུང་ཀུན་ལས་ནི་གསལ་བར་འབྱུང་། །དོན་ལས་ཉམས་པའི་མཚན་ཉིད་ནི། །བྱ་རུ་མི་རུང་སྣ་ཚོགས་བྱེད། །རྫས་དང་ལག་ཆ་མངོན་དུ་འཛིན། །ཏན་གན་སྦྱོར་སྒྲོལ་དངོས་པོར་སྤྱོད། །ལྟ་བའི་ཏིང་འཛིན་རྒྱབ་ཏུ་བོར། །སྤྱོད་པ་དཔའ་བརླངས་དང་དུ་ལེན། །ཁྲོ་ག་་ང་རྒྱལ་རང་གར་གཏོང་། །དོན་གྱི་མནངག་ལོག་པར་གོ །ཕ་རོལ་ལོག་པར་འདྲེན་པའི་ཆོས། །ཕྱིན་ཅི་ལོག་གི་དོན་ལ་མཁས། །བཀའ་གཞུང་བོར་ལ་རྫོབ་པ་ཆེ། །ལོག་པར་སྤྱོད་པ་མཐའ་དག་ཡོད། །འདི་ནི་རྭ་ཏྲ་དངོས་ཡིན་ཏེ། །མངོན་སྤྱོད་བསྒྲལ་ཀྱང་མི་སྐྱོན་ནོ། །ལས་ཀྱིས་ཉམས་པའི་མཚན་ཉིད་ནི། །བདག་དང་སྐྱེ་གནས་མི་གཅིག་པར། །བསྒྲལ་བའི་ལས་ཀྱི་གློར་འོངས་ནས། །སྔོན་ཆད་མཁན་འཁོན་ཡོངས་མེད་པར། །གླགས་ལ་བབ་པར་དྲན་ནས་ཀྱང་། །ཞི་བ་དྲང་པོས་མི་ཉན་པར། །ཉེས་མེད་གཞན་ལ་འཛུགས་པ་དང་། །དཔུང་པ་སྙོགས་ལ་ཀླན་ཀ་ཚོལ། །ཁ་ལྕེ་རྒོད་ཅིང་བཞིན་མདོག་བཟློག །བརྒལ་ས་མེད་ཅིང་བདག་ལ་རྒོལ། །ཕྲོག་མི་དགོས་པར་དག་ལ་ཕྲོག །བདག་གིས་ཉེ་པར་མ་དྲན་ཞིང་། །བདག་གི་བརྒལ་བར་མ་བསམ་ཀྱང་། །ལས་ཀྱི་བདག་ལ་གནད་འཛུག་ཤིང་། །བདག་ལ་མཐུ་དང་རྩལ་འདེད་པ། །ལས་ཀྱིས་ཉམས་པ་འདི་ཡིན་ནོ། །གཞན་ཡང་ལས་ཀྱིས་ཉམས་པ་ནི། །གལ་མི་ཆེ་བར་ཀླན་ཀ་ཚོལ། །ཕན་རྒྱུ་མེད་པར་བདག་ལ་འཚེ། །འོང་རྒྱུ་མེད་པར་བསྒྲུབས་སར་འོང་། །ལས་ཀྱི་ཉམས་པའི་རྟགས་ཡིན་པས། །འདི་ནི་ནམ་ཡང་བསྒྲལ་དགོས་པས། །ལས་ཀྱི་འཁོར་བས་སྡིག་མེད་བཤད། །མཚན་མས་ཉམས་པའི་མཚན་ཉིད་ནི། །ཆོས་ལ་ཕྱོགས་ཆར་བཟུང་བ་ཉམས། །ལྟ་བ་སྒོས་ཁུར་བཅས་པས་ཉམས། །དམ་ཅན་ཡོངས་ལ་ཐུགས་དཀྲུག་ཅིང་། །རང་བཞིན་མེད་པའི་ཆོས་བཤད་ཀྱང་། །མཚན་མ་ཅན་གྱི་ཆོས་བཟུང་ནས། །ལྷ་སྲིན་བྲན་དུ་ངས་འཁོལ་ལོ། །མཐུ་འགྲན་བྱེད་པ་སུ་ཞིག་ཡོད། །ང་ཡི་ཉམས་སུ་དཔལ་ཆེན་བྱུང་། །ང་ནི་ཁྲོ་བོའི་རྒྱལ་པོ་ཡིན། །གཞན་ལ་ཁྲོ་ཞིང་འཚེ་ལ་སོགས། །འདི་ནི་མཚན་མས་ཉམས་པ་སྟེ། །བསྒྲལ་བ་བྱས་ཀྱང་དམ་མི་ཉམས། །འདོད་པར་གྱུར་པ་ཉམས་པ་ནི། །དེ་ཡི་མཚན་ཉིད་བཤད་བྱ་བ། །ཉན་པ་གོ་རྟོགས་གསལ་མེད་པར། །ལ་ལརམཐུཆེནབཙནའདོད་པས། །ལས་ཀྱི་དོན་དུ་མཚན་མ་སྤྱོད། །སྡིག་པའི་ཕྱག་རྒྱར་མི་མགོ་ཐོགས། །རལ་པ་བསིག་ཅིང་སོ་གཙིགས་བྱེད། །དམར་གྱི་གཏོར་མ་གློ་ལ་ཐོགས། །ཞིང་གི་པགས་པ་ཕྲག་ལ་བཀལ། །སྒྲོ་བ་ནག་པོ་ཤ་དང་ཚིལ། །སྣོད་བཀང་ཁུར་ཞིང་ལོག་ཆོས་སྤྱོད། །སྤྱོད་པའི་དོན་ཀུན་གཞུང་བོར་ནས། །བྱ་བ་མི་འཚམ་སྣ་ཚོགས་བྱེད། །ངོ་དང་གདོང་པ་ཁྲག་གིས་བྱུགས། །ཚུལ་འགལ་དམ་འདྲལ་སྣ་ཚོགས་བྱེད། །ཐོ་ཅོར་སྤྱོད་ཅིང་དམ་མི་བསྲུང་། །སྤྱོད་པ་བརླང་པོས་བཀའ་གཞུད་སྨད། །སངས་རྒྱས་ཀུན་གྱི་ཞབས་འདྲེན་བྱས། །རྣལ་འབྱོར་སྔགས་པའི་རྐང་ནས་དྲངས། །དཔལ་ཆེན་འབར་བ་ཐུགས་ཁྲལ་བསྐྱེད། །མ་མོ་མཁའ་འགྲོ་གཟན་ཚོགས་བཀྲམ། །རྣལ་འབྱོར་ཡོངས་ལ་དམེ་ཚོགས་བྱས། །གཞན་ཡང་མཚན་ཉིད་གང་ཡིན་པ། །འདོད་པས་ཉམས་པའི་མཚན་ཉིད་ནི། །འདོད་ཆགས་ནོར་གྱིས་བསླུས་པ་དང་། ཁྲེ་བར་ཤེས་ཀྱང་འདོད་པས་བརྒྱལ། །ཕུང་བར་ཤེས་ཀྱང་སྔགས་འཆང་འཇོམས། །དུག་ཏུ་སྣང་ཡང་ལྷོ་རུ་ཟ། །གཉན་པ་ཡིན་ཀྱང་ཐབས་ཀྱིས་སྨོད། །བཙུན་པ་ཡིན་ཀྱང་ངམས་པར་ཤོམ། །ཐོབ་ཏུ་འདོད་ན་གསང་སྔགས་རྐུ། །བཟའ་རུ་ཡོད་ན་རྣལ་འབྱོར་ཟ། །ཟས་སུ་སྒྲུབ་པའི་ལོངས་སྦྱོད་རྐུ། །ནོར་དུ་གཞུང་སྤྱོད་རྣལ་འབྱོར་འཇོམས། །འདི་དག་འདོད་པས་ཉམས་པ་སྟེ། །འདི་དག་བསྒྲལ་ན་རྣལ་འབྱོར་བཙུན། །བ་་ཞིང་ཚར་བཅད་བསྟན་པ་གཉན། །མེད་ཅིང་སྟོངས་ན་བར་ཆད་ཉུང་། །འདི་དག་བསྒྲལ་བར་མ་བྱས་ན། །མཐོ་རིས་འགྲིབས་ལ་དམྱལ་ཁམས་འཕེལ། །རྣལ་འབྱོར་དམ་ཅན་སྤྱིད་ལུགས་ནས། །ཐེག་པ་ཆེན་པོའི་ཆོས་སྒོ་འགག །འདི་དག་བསྒྲལ་བར་བྱ་ན་ནི། །རྣལ་འབྱོར་བསྒྲུབ་ལ་བར་ཆད་མེད། །ཐེག་པ་ཆེན་པོའི་མཐུ་ངར་བས། །ལེགས་པའི་ཡོན་ཏན་བརྗོད་ལས་འདས། །ཐབས་ཀྱི་ཐ་མའི་ཐ་མ་ནི། །ཏིང་ངེ་འཛིན་གྱི་རྩལ་ཆུང་ན། །འདི་དག་བསྒྲལ་བར་བྱས་ན་ནི། །དམྱལ་བའི་གནས་སུ་ཡུན་ཐུང་འགྱུར། །འདི་ནི་བསྒྲལ་བ་དམིགས་བསྟན་ལེའུ་གཉིས་པའོ།། །།རྣལ་འབྱོར་གང་དག་གིས་བྱ་བ། །འདི་དག་ཉིད་དུ་བཤད་པ་སྟེ། །དང་པོ་ཤེས་རབ་རྣམ་གསུམ་གྱིས། །གཏན་ཚིག་དོན་ལ་ཡིད་ཆེས་ནས། །དེ་ནས་ངེ་པར་དབང་ཐོབ་སྟེ། །སྙིང་རྗེའི་སེམས་དང་ལྡན་པ་ཡིས། །ཁམས་གསུམ་འཁོར་བ་གཟུང་བར་བྱ། །དོན་འདི་དག་དང་མི་ལྡན་ཞིང་། །ངེས་པའི་ལུང་རྣམས་མ་ཐོབ་དང་། །མཁས་ལ་སྒྲོ་སྐུར་འདོགས་པ་དང་། །གསང་སྔགས་ཐེག་ཆེན་སྐུར་འདེབས་དང་། །རང་ཤེས་སྤྱད་ཚིག་ཚུལ་གནས་དང་། །དམ་ཚིག་ཉམས་པར་གྱུར་པ་དང་། །དོན་མེད་ཕྱལ་བར་གཏོང་བ་རྣམས། །འདི་ནི་རྣལ་འབྱོར་མ་ཡིན་ཏེ། །ལོག་པའི་ལམ་དུ་ཤེས་པར་བྱ། །དེ་ཡིས་སྤྱད་ཀྱང་ཡོང་མི་གྲུབ། །སླར་ལ་རང་སེམས་རླག་པ་དང་། །འབྲས་བུ་མནར་མེད་དམྱལ་བར་སྐྱེ། །འདི་དག་རྩོམ་པའི་རྣལ་འབྱོར་པས། །རིགས་ཀྱི་རྣལ་འབྱོར་གྲལ་དུ་སྨོས། །ཐེག་པ་བསམ་ཡས་སེམས་ལ་གསལ། །བལྟ་བ་ཕྱོགས་མེད་གདེང་དུ་འཇོག །བསྒོམ་པ་མ་ཡེངས་གསེར་ཕུར་འདེབས། །དམ་ཚིག་ཉན་ཐོས་ཁྲིམས་བཞིན་བསྲུང་། ཁུ་དང་སྒྲུབ་ཐབས་མཐའ་དག་འཆང་། །ཕྱོགས་སུ་འཇིག་རྟེན་མཁས་པ་བརྟེན། །རྫས་དང་ལག་ཆ་རྟགས་སུ་འཆང་། །དོན་དང་མན་ངག་གཞུང་དུ་བསྒྲུབ། །ཚུལ་ལྡན་ངང་ཚུལ་བཟང་ལ་ཤིས། །སྦྱོར་སྒྲོལ་མཆོད་པ་རྒྱུན་ཆད་མེད། །ཕུང་པོ་ལྷ་དང་གཉིས་མེད་མཆོད། །སེམས་ནི་ཆོས་ཉིད་ངང་ལ་གནས། །རྣལ་འབྱོར་རྟགས་ལྡན་དམ་པ་དེས། །ལས་སུ་བྱ་བ་ཀུན་རྫོགས་ནས། །འཛབ་བཟླས་གྲངས་མེད་རྒྱུན་འདོན་པས། །སྔགས་དང་ཕྱག་རྒྱ་མཐུ་ཕྱིན་ཆེ། །ལས་དང་བྱ་བ་གདོན་མི་ཟ། །ངེས་པར་བརྩམས་པས་དགོས་པ་འགྲུབ། །དམར་གྱི་གཏོར་མ་གཞུང་བསྲང་ཞིང་། །ཅིབ་གྱི་བཀའ་ཉན་འཁོལ་མཁས་པས། །དགར་ཞིང་དགུག་པ་བྱ་བར་ཤིས། །དྲག་ཤུལ་ཐབས་ཀྱི་ཕོ་ཉ་ནི། །རྫུའཕྲུལ་ཤུགས་ལས་ཐབས་ཀྱིས་འགྱེད། །རྣམ་རྟོག་མཚན་མ་ལས་ཀྱིས་འགྲུབ། །དེ་དག་བྱས་ན་ཆུད་མི་ཟ། ཁྲེས་པའི་ནང་ན་དམ་པ་ནི། ཁུད་ལ་བློ་ཞེན་སྒྲུབ་ལ་ཞུགས། །ཡི་དམ་ལྷ་ལ་རྟགས་གནས་ན། །དེ་ལ་བར་ཆད་ཡོངས་མི་འབྱུང་། །གལ་ཏེ་འབྱུང་བར་གྱུར་ན་ཡང་། །དེ་ལ་རེག་པ་ཙམ་གྱིས་འགྲུབ། །གཞན་གྱི་ལས་འདི་བརྩམ་པ་ཡི། །རྣལ་འབྱོར་པ་ནི་གང་ཡིན་ན། །ཕྲིན་ལས་བྱེ་བྲག་ཕྱེད་པ་དང་། །རྣམ་རྟོག་མཚན་མ་སྤངས་པ་དང་། །གཙང་སྨེ་མེད་པར་སྤྱོད་པ་དང་། །བླང་དོར་མེད་པར་སྒྲུབ་པ་ཡིས། །གང་ལ་དམིགས་པ་འགྲུབ་པར་བྱེད། །ཕུན་སུམ་ཚོགས་པ་གསུམ་ལྡན་ཞིང་། །དུས་ཚོད་གྲངས་སུ་བསྟན་པ་ཤེས། །ཉ་དང་ཤི་ཀ་ཚེས་བརྒྱད་ལ། །དྲག་པོའི་ལ་ལ་རབ་བརྩོན་པས། །ལས་སུ་བྱ་བ་དེ་བྱས་ཏེ། །མ་མོ་མཁའ་འགྲོ་བཀའ་ཉན་ཚོགས། །དེ་ཡིས་བཀོལ་ན་བྲན་བཞིན་ཉན། །དེ་ཡིས་བཀོལ་ན་བུ་བཞིན་སྒྲུབ། །དེ་ཡིས་བྱ་བ་ཆུད་མ་ཟོས། །ཚེ་དང་ལོངས་སྤྱོད་འབྱོར་པ་དང་། །ལེགས་པ་ཀུན་རྫོགས་དངོས་གྲུབ་སྟེར། །དེ་ཡིས་ཡིད་ལ་བསམས་པ་བཞིན། །ཅི་འདོད་རང་ལ་འབྱུང་བར་འགྱུར། །གཞན་ཡང་འཇིག་རྟེན་བསམ་པ་དག །ཕན་པ་དང་ནི་གནོད་པ་གཉིས། །གཞན་ལ་ཕན་ཅིང་སྒྲུབ་འདོད་ན། །སད་དང་སེར་བ་བཅད་པ་དང་། །ཆར་ཆུ་དུས་སུ་ཕེབས་པ་དང་། །མི་ནད་ཕྱུགས་ནད་ཆད་ལ་སོགས། །དེ་ཡི་གཏན་ཚིགས་འདི་ལ་གནས། །གཞན་ལ་གནོད་པའི་རྒྱུ་བཙལ་ན། །དབྱར་སྟོན་གཉིས་ལ་གནོད་བྱ་བ། །སད་དང་སེར་གཏོང་གཏན་ཚིགས་དང་། ཁྲ་དང་ཆུ་དང་ཐོག་བཏིང་བ། །དབྱར་དགུན་མི་ནད་རིམས་གཏོང་བ། །བུ་ཚ་རབས་ཆད་ཚེ་ཐུང་བ། །དེ་ཡི་གཏན་ཚིག་འདི་ན་ཡོད། །དེ་ལྟར་གཏན་ཚིགས་སུས་ཤེས་པ། །རྣལ་འབྱོར་དོན་དང་ལྡན་པ་སྟེ། །འདི་ནི་བརྩམ་པར་བྱ་བར་གསུངས། །རྣལ་འབྱོར་ཅི་ལྡན་བརྩམ་པའི་ལེའུ་གསུམ་པའོ།། །།ཀི་ལ་ཡ་ཡི་རྒྱུད་རྣམས་ནི། །གང་དང་གང་ལ་བྱ་བ་དང་། །དོན་དང་གཏན་ཚིགས་འདིར་ཞིབ་སྟེ། །མཆོག་ཏུ་བསྔགས་པ་འདི་ལས་འབྱུང་། །ལྕགས་སམ་ཟངས་སམ་གང་རྙེད་པ། །དྲག་པོའི་ལྕགས་ཀྱི་ཕུར་པ་ལ། །གྲི་ལྕགས་མདེའུ་རྙིང་རྟགས་ཕྱིན་དང་། །གནམ་ལྕགས་ཐོག་གི་ལྕགས་དག་དང་། །གཅོད་དང་རྣོ་དང་སྲ་ལ་སོགས། །ལྕགས་སྣ་ལྔ་པོ་དག་ལས་ནི། །ཁྲོ་རྒྱལ་གནས་པའི་རྒྱ་མདུད་དང་། །གཞལ་ཡས་ཁང་གི་རྟགས་སུ་བྱ། །ལོགས་བརྒྱད་ཁྲོ་མོ་བརྒྱད་པོ་ལ། །བར་གྱི་རྒྱ་མདུད་བརྩེག་པ་ལ། །ཐབས་དང་ཤེས་རབ་དབྱེར་མེད་དོ། །གཞལ་ཡས་ཁང་རང་བརྩེག་མར་གནས། །རྩེ་མོ་ཟུར་གསུམ་འཇོམས་པའི་ཚུལ། །དྲག་པོ་རྐྱེན་གྱིས་ཡང་དག་བཤད། །དབང་ལ་ཟངས་ཀྱི་ཕུར་པ་དང་། །རྒྱས་པ་གསེར་ལ་སོགས་པ་དང་། །ཞི་བ་ཙསྡོན་དཀར་པོ་དག །རྩེ་མོ་དབྱིབས་ནི་སོ་སོར་འབར། །བྱ་བའི་ཚད་རྣམས་མཐུན་པར་བཤད་། །གཞན་ཡང་ཚེར་མ་ཅན་གྱི་ཤིང་། །རབ་ཏུ་མི་སྲུན་གནས་དག་ནས། །གང་དག་སྐྱེད་པ་གང་ཡིན་དང་། །དུག་དང་གཅན་གཟན་གདུག་པ་དང་། །རབ་ཏུ་ག་་པའི་གནས་དག་ནས། །སྐྱེས་པའི་ཤིང་མཆོག་ཚེར་མ་ཅན། །སྐྱེར་པ་དང་ནི་སིང་ལྡིང་དང་། །གང་དག་སྐྱེར་ལྡིང་མཛོ་མོ་ཤིང་། །རྩ་བའི་ལོགས་སུ་རྒྱ་མདུད་བྱ། །རྩེ་མོའི་ལོགས་སུ་ཟུར་གསུམ་བྱ། །དབྱིབས་དང་ཁ་དོག་གོང་དང་མཐུན། །གཞན་ཡང་གདུག་པའི་ཚེར་མ་ཅན། །གོང་མ་དེ་དག་མ་འབྱོར་ན། །གང་རྙེད་པ་ལ་བྱ་བར་བཤད། །གཞུང་དང་མཐུན་པ་རྙེད་ན་ལེགས། །དེ་དག་གང་ཡང་མ་རྙེད་ན། །ཏིང་ངེ་འཛིན་གྱིས་དཀྱིལ་འཁོར་ལྷ། །ཡིད་ལ་དྲན་ཞིང་གསལ་བསྒོམ་ནས། །སྔགས་དང་བྱ་བ་མ་ནོར་ན། །དེས་ཀྱང་བྱ་བར་གཞུང་ལས་བཤད། །དེ་དག་རིང་ཐུང་ཚད་བསྟན་པ། །སོར་བཞི་པ་དང་སོར་བརྒྱད་པ། །བཅུ་གཉིས་དག་ཏུ་བཤད་པ་སྟེ། །དེ་ལས་ཐུང་བར་མ་གསུངས་ཤིང་། །དེ་ལས་རིང་བར་ཡང་མ་བསྟན། །སོར་བཞི་འབྱུང་བ་བཞི་ཡི་ཚད། །སོར་བརྒྱད་རྣམ་ཤེས་བརྒྱད་ཀྱི་ཚད། །བཅུ་གཉིས་སྐྱེ་མཆེད་བཅུ་གཉིས་ཏེ། །རྟགས་དང་སྦྱར་ཏེ་དེ་རྣམས་བསྟན། །རྟགས་ཕྱིན་པ་ཡི་ལྕགས་རྣམས་ཀྱིས། །དེ་ཡི་ཡོན་ཏན་བཤད་པ་ནི། །དཔེར་ན་ནགས་ཀྱི་སྡོང་པོ་ལ། །སྔོན་ཆད་བཅད་པའི་སྟུ་རེ་དག །དེ་དག་ཡོད་པར་གྱུར་ན་ནི། །ཆོད་མི་ཆོད་ཀྱི་ཐེ་ཚོམ་མེད། །དེ་དག་སྔོན་ཆད་མ་བཅད་པས། །ཆོད་དམ་མི་ཆོད་ཡོངས་མ་ངེས། །དེ་བཞིན་རྒྱུ་ཡང་དེ་དང་འདྲ། །མདོར་ན་རྣལ་འབྱོར་རྩལ་མཆོག་གཅེས། །རེ་ཞིག་དེ་ཡང་སྐྱོན་མེད་དེ། །ཡོན་ཏན་ཡོད་པར་འདི་ལས་བསྟན། །ནག་པོའི་ཤིང་གི་དུག་ཅན་ལས། །ཕུར་པ་བྱས་པའི་ཕན་ཡོན་ནི། །ནག་པོ་གཞན་གྱིས་མི་ཚུགས་ལ། །དུག་གིས་ཕ་རོལ་གསོད་པར་བྱེད། །ཚེར་མ་ཅན་གྱི་ཤིང་རྣམས་ནི། །སྐྱེར་པས་ཚེ་དང་ལོངས་སྤྱོད་འཕེལ། །མཛོ་མོས་དབང་དུ་བྱ་བ་འགྲུབ། །གཞན་ཡང་ཁ་དོག་ རིགས་སུ་སྦྱར། །མདོརནབདེགཤེགསསབོན་གྱིས། །བྱིན་གྱིས་བརླབ་པ་གཅེས་བར་བཤད། །དེ་བས་ཀྱང་ནི་དམ་ཚིག་གཙོ། །རྣལ་བྱོར་རྣམས་ལ་དམ་པར་བསྔགས། །དང་པོར་གཞུང་ལས་བསྟན་པ་བཞིན། །དེ་དག་མ་ནོར་བཤམ་པར་བྱ། །ཚོགས་པས་ཐེ་ཚོམ་མེད་ཅེས་བྱ། །བཤམས་པས་བྱ་བ་ཆུད་མི་ཟོས། །ཀུན་གྱི་རྒྱུ་ནི་བྱང་ཆུབ་སེམས། །བྱང་ཆུབ་སེམས་ནི་བསྔགས་པ་སྟེ། ཁུ་ནི་རྒྱལ་པོར་རང་ཤར་བའོ། །གཞན་ཡང་ཕུར་པའི་རྒྱུ་བསྟན་པ། །ཟངས་ལྕགས་་བར་བ་གང་ཡོད་པར། །དེ་ཡང་དོད་ཅིང་ལེགས་པར་བྱ། །མ་དོད་པ་ཡི་སྐྱོན་རྣམས་ནི། །གང་དགར་བྱས་ན་ཚུལ་ལས་ཉམས། །སྟམ་ཅོལ་བྱས་ན་བཀའ་ལས་འགལ། །རྙེད་བཙན་བྱས་ན་བྱིན་རླབ་ཆུང་། །ཡོད་བཙན་བྱས་ན་སྒོམ་མི་བདེ། །ངན་དགུར་བཤམས་ན་རྟོག་པར་འགྱུར། །ལེགས་པར་བྱས་ན་ཡི་རང་ཞིང་། །ཚོགས་པར་བསགས་ན་གཞུང་དང་མཐུན། །དད་པར་བྱས་ན་དང་བ་སྐྱེ། །བཀའ་བཞིན་བྱས་ན་བྱིན་རླབས་ཡོད། །མདོར་ན་རྟོགས་པ་གཙོ་བོ་ཡིན། །རྟོགས་པའི་དོན་ལ་མཐར་ཕྱིན་ན། །རྣམ་རྟོག་ལས་འདི་ཡོངས་མི་དགོས། །མ་རྟོགས་པ་ལ་འདི་དགོས་པས། །ལོག་པའི་ཕྱོགས་རྣམས་འདུལ་སླད་དུ། །འདི་ལ་རྒྱུ་བཤམ་འབྱུང་བ་ཡིན། །མི་རྟོག་པ་ལ་རྟོག་མི་དགོས། །རྣམ་པར་རྟོག་ལ་ཁྲོ་འདུལ་བཟང་། །ཉོན་མོངས་པ་ལ་གཉེན་པོ་འཇེབས། །རྟོག་པ་བསལ་བར་བཤམ་པ་གཅེས། །གཞན་ལ་ཚུགས་ན་གྲངས་མང་ཟློས། །རྟགས་ཕྱིན་འདོད་ན་ཡུན་དུ་བསྲིང་། །དོན་ལ་རུབ་ན་མ་ཡེངས་ཀྱིས། །རིངས་པར་འདོད་ན་བརྩོན་འགྲུ་སྐྱེད། །དོན་འདི་ཡིད་ལ་བཞག་ནས་ཀྱང་། །སྔགས་པས་དེ་ལ་ནན་ཏན་སྐྱེད། །འདི་ནི་ཕུར་པའི་རྒྱུ་བསྟན་པའི་ལེའུ་སྟེ་བཞི་པའོ།། །།ཕུར་པ་ཇི་ལྟར་བསྒོམ་པ་ཡི། །དོན་འདི་ཡང་དག་བསྟན་པ་ནི། །ངེས་པ་ཉིད་དུ་བཤད་བྱ་སྟེ། །བྱིན་གྱིས་བརླབ་པས་ཐབས་ལ་ནི། །ངེས་པར་རྣམ་པ་ལྔ་ཡོད་དེ། །གཉིས་སུ་མེད་པར་བྱིན་བརླབ་དང་། །ཁྲོ་བོ་ཆེན་པོར་བྱིན་བརླབ་དང་། ཤེན་ཏུ་བརྗིད་ཆེ་བྱིན་བརླབ་དང་། །ཕུར་པ་རྫས་སུ་བྱིན་བརླབ་དང་། །མཐུ་དཔུང་ཆེ་བར་བྱིན་བརླབ་པའོ། །ཨོ་བཛྲ་ཀི་ལི་ཀི་ལ་ཡ་ཀི་ལ་ཡ། ཧུ༷་ཧུ༷་ཧ་ཧེ་ཕཊ། ཛ༷༷སྨྱོ་རུ་ལུ་མུ་ར་ཡ་ཕཊ། དེ་ལ་ལག་པ་གཏིང་སྦྱར་ནས། །སོར་བཅུའི་བར་དུ་ཕུར་པ་བཅུག །བཅུ་ཡིས་བྱིན་བརླབ་ཚུལ་བཞིན་བྱ། །ཧུ༷་ཧུ༷་ཀི་ལ་ཡ་སརྦ་བི་ནཱ་ཡ་ཀ་སརྦ་ཏ་ཐུ་ག་ཏ་ཧ་ཧི་ཁུ་ཧི་ཧུ༷་ཕཊ། །དེ་ནས་བྱིན་གྱིས་བརླབ་པར་བྱ། །ལྕགས་སམ་ཤིང་ངམ་གང་ཡིན་པ། །ཁྱི་ཁྲག་ར་ཁྲག་གིས་བྱུགས་ལ། །དུག་དང་མ་རུངས་པས་ཀྱང་བྱུག །ཧུ༷་དང་ཛ༷༷་དང་ཕཊ་ལ་སོགས། །སྤྲོ་བསྡུ་ཚུལ་བཞིན་བྱས་ནས་ཀྱང་། །བྱིན་བརླབ་བསམ་རྒྱུད་ངེས་པ་བཞག །ཡང་ན་བྱིན་བརླབ་ངེས་པ་ནི། །དབུ་ཡི་རྒྱ་མདུད་ཆོས་ཀྱི་སྐུ། །བར་གྱི་རྒྱ་མདུད་ལོངས་སྤྱོད་རྫོགས། །རྩེ་མོ་སྤྲུལ་པའི་སྐུ་ཡིན་ཏེ། །ཁྲོ་རྒྱལདཔལཆེན་ཡབ་ཡུམ་དང་། །འཁོར་གྱི་དཀྱིལ་འཁོར་གསལ་བཀོད་དང་། །ཕོ་ཉ་ཡང་སྤྲུལ་ལ་སོགས་པ། །ཅི་བགྱི་ལ་སོགས་རིམ་བཞིན་སྤྲོ། །འབར་འཐུང་སྔགས་ཀྱི་རྒྱལ་པོ་ཡིས ངེས་པར་ལེགས་པའི་ཕུར་པ་ལ། །ཡང་དག་བརྟན་པས་བྱིན་གྱིས་བརླབས། །རྣལ་འབྱོར་སྔགས་ཀྱི་བློ་ལྡན་པས། །དམ་པའི་དོན་དུ་གཞུང་བསྲང་ནས། །དྲག་པོས་བཟླས་ལ་ཡིད་རྩོམ་བྱ། །ངེས་པར་སྙིང་པོ་འབྲུ་བཀོད་དེ། །ཆོ་ག་གསུམ་གྱི་སྦྱོར་བ་ཡིས། །ཙ་ན་ཀ་ཙམ་དགོད་པར་བྱ། །རིམ་པས་འཕྲོ་བ་མང་པོ་ཡིས། །སྟོང་གསུམ་འཇིག་རྟེན་ཕུར་པས་བརླབ། །མཐའ་ཡས་སེམས་ཅན་ལ་སོགས་པ། །བསྒྲལ་བའི་དངོས་པོ་གང་ཡིན་པ་། །ར༷་ཡ༷་ཁ༷་གིས་བསྲེགས་སྦྱངས་ནས། །རྣམ་ཤེས་སྙིང་གི་དཀྱིལ་འཁོར་དུ། །བྱང་ཆུབ་སེམས་ཀྱི་རྩེ་གཏད་དེ། །དཀར་ནག་མཚམས་སུ་བརྒྱབ་ནས་ཀྱང་། །དགེ་སྡིག་ལས་ཀྱི་གཤག་ཕྱེ་སྟེ། །རྣམ་པར་རྟོག་པའི་སྡིག་སྦྱངས་ནས། །མཎྜལ་འོད་ཀྱི་འདུལ་སྦྱོང་གིས། །དུག་གསུམ་རིམ་པར་བཅོམ་ནས་ཀྱང་། །ཧ་ཏ་ཁ་ཡིས་བརྔམ་པ་བྱས། །གསེར་ཞུན་བཞིན་དུ་སེམས་གནས་པ། །འཕྲོ་བའི་དགོངས་པས་བཏེགས་ནུས་ཀྱང་། །གཉིས་མེད་ཡུམ་གྱི་མཁའ་ལ་བསྟིམ། །ངེས་པར་རིམ་གྱིས་སྲས་བྱས་ལ། །ཨོ་ཨུ༷༷ཧུ༷་གིས་བྱིན་བརླབས་ཏེ། །སྐུ་གསུང་ཐུགས་སུ་གསལ་བྱས་ནས། །ཕྱིར་ཡང་ངན་སོང་སྒོ་གསུམ་བཅད། །རྣམ་རྟོག་བསྒྲལ་བའི་ཞིང་བཅུར་བརླགས། །བསྒྲལ་བ་དབྱིངས་དང་ཡེ་ཤེས་ཏེ། །དོན་དུ་ཐབས་དང་ཤེས་རབ་ལ། །ཆོས་ཀྱི་སྐུ་ཡི་བྱིན་རླབས་ཀྱིས། །རྣམ་པར་དག་པའི་ངང་དུ་བསྒོམ། །འདི་ནིཕུར་པ་བསྒོམ་པའི་ལེའུ་ལྔ་པའོ།། །།བྱིན་གྱིས་བརླབ་པ་བསྟན་པ་ནི། །རྒྱ་མདུད་རྩ་བའི་ལོགས་སུ་ནི། །ཆོས་ཀྱི་སྐུ་ཡི་ཁྲོ་བོར་བརླབ། །ལོགས་བརྒྱད་ཁྲོ་མོ་བརྒྱད་ཡིན་ཏེ། །བར་ཀྱི་རྒྱ་མདུད་ལོངས་སྤྱོད་རྫོགས། །རྩེ་མོ་སྤྲུལ་པའི་སྐུར་བརླབ་སྟེ། །དོན་དུ་མངའ་གསོལ་འདི་སྐད་དོ། །ཧུ༷་བཞི་གསལ་འཕྲོ་ཧྭ༷་ལས་བཞི་ཚོགས་བརྒྱད། །དབུ་ལ་རྒྱ་མདུད་བསྟན་པས་ཁྲོ་རྒྱལ་བཅུ། །རྩིབས་ལ་ལོགས་བརྒྱད་པ་བསྟན་པས་ཁྲོ་མོ་བརྒྱད། །རྩེ་མོ་ཟུར་གསུམ་བསྟན་པས་སྐུ་གསུང་ཐུགས། །ཁོང་སྟོང་བྱང་ཆུབ་སེམས་ཀྱི་ཐིག་ལེ་ལས། །ཁྲོ་རྒྱལ་འདས་པའི་སྲས་མཆོག་ཀི་ལ་ཡ། །ཡོན་ཏན་རྫོགས་པའི་སྐུ་ལ་ཕྱག་འཚལ་ལོ། །མ་གཡོས་ཆོས་མཆོག་སྐུ་གསུང་ཐུགས་ཀྱི་བདག །སྡུག་བསྔལ་ལོག་པར་འ་ས་པའི་སེམས་ཅན་རྣམས། ཐུགས་རྗེས་བྱེ་བྲག་དབྱིངས་སུ་སྒྲོལ་མཛད་པ། །ཐབས་ཀྱིས་བསྒྲལ་བའི་སྐལ་དང་མི་ལྡན་ཡང་། ཤུགས་ཀྱི་བསྒྲལ་བའི་ཕྲིན་ལས་མཛད་དུ་གསོལ། །ཨོ་བཛྲ་བྷ་བྷ་སྙ་ཏ་ཡ། །སརྦ་བཱ་པ༷་ཀི་ལ་ཡ་དྷ་རོ། ཨུ་ཙྭ་བཱ་ཡ་ཏི། །ཀྭ་ཡ་ལྷུཀ་ཙིཏི་ཧུ༷་ཧུ༷་ཕཊ་ཕཊ། །བྱིན་རླབས་མཚམས་བཅད་དྲག་པོ་ཡིས། །དབང་བསྡུས་ཡོངས་སུ་སྤང་བར་བྱ། །ཐབས་ལ་མཁས་པའི་བྱིན་རླབས་ཀྱིས། །ཡོངས་ཀྱིས་བསྡུ་ཞིང་གཟིར་བ་དང་། །ཐབས་ཀྱི་དབང་དུ་བྱ་བའི་ཕྱིར། །འབར་བའི་ཐུགས་རྗེས་མཚམས་བཅད་དོ། །འདི་ནི་ཕུར་བུ་བྱིན་རླབས་ལེའུ་དྲུག་པའོ།། །།བརྡེག་པའི་དུས་ཚོད་བསྟན་པ་ནི། །གནམ་སྟོང་དང་ནི་ཚེས་བརྒྱད་ལ། །བཅོ་ལྔ་ཉི་ཤུ་གཉིས་ལ་བྱ། །མིག་དམར་ཕུར་བུ་གཟའ་རྣམས་ཀུན། །བརྡེག་པའི་དུས་ལ་འབབ་པར་ཤེས། །དང་པོ་དཀྱིལ་འཁོར་གཞུང་བཙུགས་ཏེ། །བསྙེན་བསྒྲུབ་ཆོ་ག་ཚང་བྱས་ནས། །འཛབ་གྲང་བསྙེན་པ་འབུམ་དུ་གདོན། །བཟླས་བརྗོད་ཉིན་མཚན་བར་མི་གཅད། །རྟགས་དང་མཚན་མ་ཕྱིན་པ་དང་། །བརྡེག་པའི་དུས་ལ་བབ་པར་ཤེས། །ནམ་གྱི་གུང་དང་ཉི་མ་དྲོས། །དེ་ལ་བརྡེག་པའི་རབ་ཏུ་ཤིས། །དུར་ཁྲོད་ཆེན་པོ་གང་ན་བར། །བསྒྲལ་བ་ལ་སོགས་ཚུལ་བཞིན་བྱ། །རྒྱ་གྲམ་ལམ་གྱི་གང་ན་བར། །བརྡེག་པ་ལ་སོགས་ཚུལ་བཞིན་བྱ། །འདི་དག་བརྡེག་པའི་དུས་ཚོད་ཀྱང་། །སྲོད་ལ་ཞུགས་པས་ཐོ་རངས་ཁ། །འདི་དག་བརྡེག་པར་ཡོང་མི་བྱ། །འདི་དག་བརྡེག་པར་བྱ་བ་ནི། །ཡུན་ནི་ལོ་དང་ཟླ་ཙམ་ནི། །གྲངས་ནི་བྱེ་བ་འབུམ་དུ་བཟླས། །མཆོད་པ་དུས་དྲུག་རྒྱུན་མི་གཅོད། །ཆོ་ག་བཟླས་བརྗོད་ཚང་བྱས་ནས། །དབང་པོ་མངོན་པར་ཁུག་ན་རབ། །ཐ་ན་མིག་རྣོན་ལ་སོགས་པས། །དེར་ནི་ངེས་པར་འོང་བ་ཡིན། །བྱ་བ་ལ་སོགས་མཚན་མ་ལ། །བརྡེག་པའི་དུས་ཚོད་ཡིན་པར་ནི། །རྣལ་འབྱོར་པས་ནི་ཤེས་པར་བྱ། །གཞན་ཡང་བརྡེག་པའི་དུས་ཚོད་ནི། །དང་པོར་བསྒྲུབ་པ་ཁས་བླངས་པ། །མ་ཐོན་བར་དུ་དུས་ཚོད་མིན། །ཚང་ནས་བརྡེག་པའི་དུས་ཚོད་ནི། །བླ་དགུག་པ་ཡི་ཕོ་ཉ་ལ། །འདི་དག་བཏང་ནས་བརྡེག་བྱ་སྟེ། །ཧུ༷། །དཔལ་གྱི་ཕོ་ཉ་ལས་མཁན་མོ། །དམར་དཀར་ཡངམོ་དུང་གི་མཆེ་བ་ཅན། །མཁའ་ལ་འབྱུང་བའི་མཛོད་བསྐྱིལ་མ། །ལག་ན་སེམས་ཅན་སྲོག་གཅོད་མ། །ཞལ་ནི་སེམས་ཅན་ཡོངས་སུ་གསོལ། །བསྐལ་པའི་ཐོག་ཐོག་ཆར་བར་འབེབས། །བསྐལ་པ་བརྒྱད་ཀྱི་ཕ་རོལ་ན། །དམ་ཉམས་དགྲ་བོའི་བླ་འདྲེན་མ། །དགྲ་བོའི་བླ་ལ་ནན་མ་ཆུང་། །ནག་མོ་ལྕགས་ཀྱི་ལན་ཚར་ཅན། །ཁྱུང་གི་ཁ་ཐོགས་གཡས་པ་ན། །བྷསྟོ་གྲི་ཐོགས་གསོད་ལ་རྔམས ཚངས་པ་བསྐྱིལ་བའི་ཆ་ལུགས་ཅན། །མི་སྡུག་མགོ་ལ་གཅེར་བུའི་ལུས། །བསྐལ་པ་བརྒྱད་ནས་བླ་ཚོལ་ཚོལ། །དཔག་ཚད་བརྒྱད་ནས་སྲོག་འགུགས་འགུགས། །དགྲ་བོའི་བླ་དང་སྲོག་ལ་ཡ། །དམར་མོ་ཆེན་མོ་མེ་འགྲོ་མ། །གདུག་པ་འདུལ་བ་གང་བ་ལས། །གསོད་ལ་རྔམས་པ་ལས་ལ་བཙོན། །མཆེ་གཙིགས་གཡང་གཞི་གོས་སུ་གྱོན། །རབ་ཏུ་མི་སྲུན་བླ་འགུགས་པ། །དམ་ཉམས་དགྲ་ལ་ས་མ་ཡ། །ལྗང་ནག་བསྤྱིངས་པའི་ཐོད་གདེངས་ཅན། །སེར་མོ་རལ་ཅན་འབུམ་གྱིས་བསྐོར། །སྔོན་ནས་དགྲ་བོའི་བླ་འགུགས་མ། །གང་ལ་བྱ་བ་གྲུབ་པར་བྱོས། །ནམ་མཁའི་ལྷ་མོ་ཕུར་པའི་ལྷ། །ལག་བརྒྱ་གཟུགས་ཀྱི་ཕུར་པ་འདྲིལ། །སྤྱན་བརྒྱ་ཁྲག་གིས་མཆི་མ་འཛག །ཞལ་བརྒྱ་གདུག་པའི་སྔགས་ཟོར་ཟློ། །ཚེམས་ཀྱིས་སྐྱེ་ཤི་རྩད་ཀྱང་ཆོད། །ཕུར་པའི་ལས་མཁན་ཆེན་མོ་ལ། །རབ་ཏུ་མི་སྲུན་ལས་ལ་བརྩོན། །གང་ལ་བྱ་བ་གྲུབ་པར་བྱོས། །གཞན་ཡང་ཕོ་ཉ་གྲངས་མེད་ཀུན། །དེ་དག་ལས་ལ་གཏང་བར་བྱ། །དེ་དག་མངོན་པར་ཁུགས་པ་དང་། །ཏིང་འཛིན་རབ་འབྲིང་གསུམ་དུ་བྱ། རབ་ཀྱིས་མངོན་དུ་ཁུག་པར་བྱ། །འབྲིང་གིས་ལདྷི་འགུལ་བར་བྱས། །ཐ་མས་ཉམས་དང་རྟགས་ཙམ་འོང་། །གཟོད་ཅིག་བརྡེག་པའི་དུས་ཚོད་ཡིན། །དེ་རྣམས་མེད་པར་དུས་ཚོད་མིན། །ཆོ་ག་ཚང་བར་གྱུར་ན་ནི། །བརྡེག་པའི་དུས་ཚོད་ཡིན་པར་ནི། །དུས་ལ་བབ་པར་ཤེས་པར་བྱ། འདི་ནི་བརྡེག་པའི་དུས་ཚོད་ལེའུ་བདུན་པའོ།། །།དམ་ཚིག་གང་ཡིན་བསྟན་པ་ནི། །གཞི་ནི་དམ་ཚིག་གཙོ་བོ་སྟེ། །དམ་ཚིག་མ་ཉམས་གཞུད་ཚུགས་ན། །འདི་དག་འགྲུབ་པར་འགྱུར་བར་བཤད། །ཉམས་པ་འགྱུར་པས་མི་འགྲུབ་སྟེ། །སླར་ལ་རང་ཉིད་རླག་པར་འགྱུར། །སྐུ་ཡི་དམ་ཚིག་འདའ་དཀའ་བའི། གསུང་གི་དམ་ཚིག་བར་མི་གཅད། །ཐུགས་ཀྱི་དམ་ཚིག་གསང་ཐུབ་པས། །ལས་ནི་བརྩམས་ནས་འགྲུབ་ཅེས་ནི། །དཔའ་བོ་ཁྲོ་བོས་ཡང་དག་བཤད། །དམ་ཚིག་དག་པ་འདི་ཡིས་ནི། །རྒྱལ་བ་མཉེས་ཏེ་དངོས་གྲུབ་ཐོབ། །བཀའབཞིན སྤྱོད ལ གཞུང་བཞིན་བསྒྲུབ། །ངེས་པའི་དམ་ཚིག་དམ་པ་ཡིན། །ངེས་པའི་དམ་ཚིག་བསྟན་པར་ནི། །ཡང་དག་རྒྱལ་པོས་ཡང་དག་གསུངས། །འདི་ནི་དམ་ཚིག་བསྟན་པའི་ལེའུ་བརྒྱད་པའོ།། །།ལྟ་བ་ཅི་ལ་དམིགས་པ་ནི། །ཡང་དག་ཉིད་དུ་བསྟན་བྱ་སྟེ། །ལྟ་བའི་རྒྱལ་པོ་ངེས་པའི་དབྱིངས། གཟོད་ནས་མ་སྐྱེས་སེམས་ཀྱི་དབྱིངས། །རྣམ་པར་དག་པ་ཡུམ་གྱི་ཚུལ། །མ་སྐྱེས་མི་འགག་ཐབས་ཀྱི་སྐུ། །རིགས་པའི་རྒྱལ་པོ་རང་བྱུང་བས། །ཐམས་ཅད་མ་ལུས་དབང་དུ་སྡུད། །ཐབས་ཀྱི་རྒྱལ་པོར་བདག་གནས་པས། །འགྲོ་ཀུན་བླ་ན་མེད་པར་སྒྲོལ། །ཆོས་ཀྱི་རྩ་བ་སེམས་ཡིན་པས། །བརྟག་པའི་དོན་དུ་རང་སེམས་བཟང་། རང་གི་སེམས་ཀྱི་དོན་རྟོགས་ཤིང་། །མཉམ་པའི་རྒྱལ་པོ་ཀློང་གྱུར་ན། །ཞལ་ནས་གསུངས་པ་ཐམས་ཅད་དང་། །ཚིག་ཏུ་བརྗོད་པ་བསྙེན་པ་ལ། །ཐུགས་ལ་དགོངས་པ་ཏིང་འཛིན་ཏེ། །ཕྱག་གིས་བསྒྱུར་བ་ཕྱག་རྒྱ་སྟེ། །ཕུར་པའི་ཕྱག་རྒྱ་ལྔ་རུ་བཤད། །ཕུར་པ་དམ་ཚིག་ཕྱག་རྒྱ་ནི། །ལག་པ་གཉིས་ཀྱི་རྟིང་སྦྱར་ནས། །གུང་མོ་རྩེ་སྤྲད་དྲག་ཏུ་གཟིར། །དེ་ནི་ཕུར་བུའི་དམ་ཚིག་རྒྱ། །ཆང་བས་སོར་བརྒྱད་རིམ་པས་བཟུང་། །གུང་མོ་རྩེ་མོ་མན་ཆད་ལ། །ཕུག་པ་བརྡེག་པའི་ཕྱག་རྒྱ་ཡིན། །ལག་པ་གཉིས་ནི་ཐལ་སྦྱར་ནས། །གུང་མོ་རྩེ་སྤྲད་མཐེའུ་ཆུང་བརྒྱད། །སྲིན་ལག་འཛུབ་མོ་རྒྱབ་བསྣོལ་ཏེ། །མཐེབོངགཤིབསཏེརབ་ཏུ་དྲིལ། །འདི་ནི་ཕུར་པ་དྲིལ་བའི་རྒྱ། །ལག་པ་གཉིས་ཀྱི་རྟིང་སྤྲད་ནས། །སོར་བཅུ་ཁྲོ་བཅུར་བྱིན་རླབས་ཏེ། །སྲས་མཆོག་དཀྱིལ་དུ་གཞག་ནས་ནི། །བྱིན་གྱིས་བརླབ་པ་བྱས་ན་ནི། །ཕུར་པ་བྱིན་གྱིས་བརླབས་པའི་རྒྱ། །མཐེབ་མཛུབ་གཉིས་ཀྱི་བར་དུ་ནི། །ཕུར་པ་བཅུག་ལ་ཡར་འཕངས་པས བབས་པས་བརྡེག་པའི་གཟུགས་ལ་བསྐུལ། །འདི་ནི་ཕུར་པ་བསྐུལ་བའི་རྒྱའོ། །དོན་དུ་ཕྱག་རྒྱ་ལ་སོགས་པ། །ཡང་དག་རྟོགས་ན་ཀུན་ཡང་རྒྱ། །མ་རྟོགས་མཚན་མས་རྟོག་པའི་ཞིང་། རྟོག་པའི་རྒྱུ་ཉིད་ཆོས་ཉིད་ལ། འཁོར་བའི་རྒྱུ་ཉིད་བྱང་ཆུབ་སྟེ། །བསད་པ་འབའ་ཞིག་ལས་སུ་རུང་། །རྣམ་རྟོག་སེམས་ཅན་ཀུན་བསད་ན། །དམ་པའི་བདེ་གཤེགས་ཀུན་མཉེས་ཏེ། །ངེས་པར་ལེགས་པའི་དགོངས་པ་འཕེལ། །སངས་རྒྱས་བཀའ་ལས་དེ་ལྟར་འབྱུང་། །དམ་པ་སེམས་ཀྱི་རང་བཞིན་པའོ། །ལྟ་བ་འདི་ལ་དམིགས་པས་བྱ། འདི་ནི་ལྟ་བ་དམིགས་པའི་ལེའུ་དགུ་པའོ།། །།ཡོ་བྱད་རྫས་རྣམས་བསྟན་པ་ནི། །སྦྱང་དུག་ལ་སོགས་དུག་རྣམས་ཀྱི། །དྲག་པོས་བསྒྲལ་ཕྱིར་བསད་པར་འབྱུང་། །ཁྱད་པར་ལ་སོགས་གཏོར་མ་ནི། །མཁའ་འགྲོ་སྐུལ་ཕྱིར་དགོད་པར་འབྱུང་། །ཟངས་ལྕགས་མཆོག་ཏུ་ཚེར་མ་ཅན། དྲག་པོས་གདུལ་ཕྱིརགོངབཞིནབཤམ། །རྐང་རྗེས་ས་དང་དྲི་མ་རྣམས། །ངེས་པར་ཡོད་ན་བཟང་བར་བསྟན། །གཞན་ཡང་ཕུར་པའི་རྫས་རྣམས་ཀུན། །གོང་ནས་འབྱུང་བ་དེ་ཤེས་བྱ། །འདི་ནི་ཡོ་བྱད་རྫས་ཀྱི་ལེའུ་བཅུ་པའོ།། །།རྟགས་ཀྱི་ཞགས་གྲངས་བསྟན་པ་ནི། །ཁྱད་པར་བསྙེན་པ་གཞུད་བཙུགས་ཏེ། བཀའ་ཡི་སྒྲུབ་པ་ཚུལ་བཞིན་དུ། །གཞུད་ལས་འབྱུང་བ་དེ་བྱས་ན། །རབ་ཀྱིས་ཟླ་བ་གཅིག་གིས་འགྲུབ། །རྟགས་ནི་ཞག་བདུན་ཉིད་ཀྱིས་འགྲུབ། །འབྲིང་པོས་ལོ་གཅིག་བྱས་ན་འགྲུབ། །རྟགས་ནི་ཟླ་བ་ཕྱེད་ན་ཕྱིན། །ཐ་མས་ལོ་གསུམ་ཚུན་ཆད་ཀྱིས། །འགྲུབ་པར་འགྱུར་ཏེ་གདོན་མི་ཟ། །རྟགས་ནི་ལོ་དུས་དག་ན་འགྱུར། །ཡན་ལག་བསྐུམས་པའི་ནད་ལ་སོགས། །རྟགས་རྣམས་ཀུན་ནི་ཚུལ་བཞིན་འབྱུང་། །འདི་ནི་ཕུར་པ་རྟགས་བསྟན་པའི་ལེའུ་བཅུ་གཅིག་པའོ།། །།འདི་བརྩམས་དགོས་ཆེད་ཡོན་ཏན་ནི། །སེམས་ཅན་གང་ཟག་ཕལ་པ་དག །རས་ཆོད་བྱེད་པའི་ཚུལ་ལས་ཉམས། །བཀའ་འགལ་བྱེད་ཅིང་དཀྱིལ་འཁོར་འདྲལ། །མ་ཉེས་འཇོམས་ཤིང་སྐུར་པ་འདེབས། །དེ་ལ་འདི་བརྩམས་དགོས་ཆེད་ཡོད། །དོན་འདི་མ་ནོར་གང་སྤྱོད་པ། །ཀི་ལ་ཡ་ཡི་ཡོན་ཏན་ནི། །ཚེ་རིང་ནད་ཀྱང་མེད་པ་དང་། །དཔལ་དང་འབྱོར་པ་འཕེལ་བ་དང་། །གདོན་དང་འབྱུང་པོ་ཐུལ་བ་དང་། །ལྷ་སྲིན་མཐུ་ཆེན་ཀུན་འཁོལ་དང་། །དྲེགས་པ་དབང་ཕྱུག་བཀའ་ཉན་དང་། ཅི་བགྱི་ལ་སོགས་བྲན་བཞིན་འཁོར། །འཇིག་རྟེན་འདིར་ཡང་ཀུན་བསམ་འགྲུབ། །གཞན་ཡང་ཡོན་ཏན་བརྗོད་མི་ལང་། །འཇིག་རྟེན་ཕ་རོལ་དག་ཏུ་ཡང་། །བསྒྲལ་བ་དག་ཀྱང་མཐོ་རིས་ཐོབ། །བདག་ཀྱང་བྱང་ཆུབ་གཉིས་སུ་མེད། །བསམ་པ་འབྱོར་པའི་ཤེས་རབ་ལགས། །ཆོས་ཀྱི་སྐུ་དང་དབྱེར་མེད་ན། །ངན་སོང་གསུམ་པོ་སྒོ་བཀག་ནས། །ཐར་པ་བདེ་བའི་གནས་ཀྱང་འདྲེན། །སྡིག་ཅན་བསད་ན་ལས་ངན་བཅད། །དམ་ཉམས་བསྒྲལ་ན་བཀའ་གཞུང་བརྟན། །ཕྱོགས་སྤྱོད་ཡིན་ནམ་ལོག་བསྒྲལ་ན་དཀྱིལ་འཁོར་བརྟན། །སྐུ་དགྲ་བསྒྲལ་ན་བར་ཆད་ཆུང་། །དེ་ནས་ཡོན་ཏན་ཐོབ་པ་ཡིན། །དེས་ན་ལེགས་པ་ཀུན་འཕེལ་ཏེ། །འབྲས་བུ་ངེས་པར་ཆུད་མི་ཟ། །བླ་མེད་གོ་འཕང་ཐབས་ཀྱང་ཆེ། །ཁྲོ་བོའི་རྒྱལ་པོ་ཐབས་མཁས་པས། །བསྒྲལ་བས་ལས་རྣམས་བྱང་བར་འགྱུར། །དཔའ་བོ་ཆེན་པོས་ཡང་དག་བཤད། །འདི་དག་ཡོན་ཏན་བསྟན་པ་ནི། །རིག་འཛིན་རྣམ་གསུམ་འདི་ལས་འགྲུབ། །དཔལ་ལྡན་དད་པའི་འབྱོར་པས་འགྲུབ། །ལེགས་པའི་ལས་རྣམས་ཀུན་རྫོགས་ཏེ། །གཞན་ཡང་འདོད་པའི་ཡོན་ཏན་རྣམས། །ཡིད་ལ་དམིགས་པ་བཞིན་དུ་འགྲུབ། །འདི་ནི་བརྩམས་པའི་དགོས་ཆེད་དང་། ཡོན་ཏན་ཅི་འཐོབ་བསྟན་པའི་ལེའུ་བཅུ་གཉིས་པའོ།། །།དེ་སྐད་ཅེས་བཅོམ་ལྡན་འདས་དཔལ་ཀི་ལ་ཡས་བཀའ་བསྩལ་ནས། དེ་ནས་ཀརྨ་ཧེ་རུ་ཀས། །ཕྱི་ནང་གསང་བའི་མཆོད་པས་མཆོད་ནས། ཉིད་ཀྱི་སྐུ་ལ་མི་སྣང་བའི་ཚུལ་གྱིས་ཐིམ་པར་གྱུར་ཏོ། ཕུར་པ་བཅུ་གཉིས་འབྱུང་བའི་རྒྱུད་ཆེན་པོ་གསུམ་ཙམ་འགྱུར་བ་རྫོགས་སོ།། །། རྒྱ་གར་སྐད་དུ། བཛྲ་ཀི་ལ་ཡ་དི་དཤ་ཏནྟྲ། བོད་སྐད་དུ། །རྡོརྗེ་ཕུར་པ་བཅུ་གཉིས་ཀྱི་རྒྱུད། རིགས་ལྔའི་བདེ