Ngb-pt-0143-vol-02-text
Front
Body
བསྒྱུར་ཅིང་གཏན་ལ་ཕབ། ཕྱིས་སྐད་གསར་བཅད་ཀྱིས་ཀྱང་བཅོས་སོ།། །། རྒྱ་གར་སྐད་དུ། རཏྣ་ཙཀྲ་ཀུ་ཊ་ཏནྟྲ་ནཱ་མ། བོད་སྐད་དུ། རིན་པོ་ཆེ་འཁོར་ལོ་བརྩེགས་པའི་རྒྱུད་ཅེས་བྱ་བ། བཅོམ་ལྡན་འདས་བདེ་ཆེན་བརྡལ་བའི་ཕོ་བྲང་རིག་པ་ཟང་ཐལ་གྱི་གཞལ་ཡས་ཁང་ན་བཞུགས་པའི་སྐུ་བདེ་བ་ཆེན་པོས་ཉིད་ལ་ཉིད་ཀྱི་གཟིགས་ནས་སྣང་བ་ཟག་པ་དང་བྲལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཞུགས་མ་ཐག་ཏུ་རང་སྣང་དག་པའིབདེབརགཤེགསཔརྣམས་དང་སྟོང་གསུམ་མི་མཇེད་ཀྱི་འཇིག་རྟེན་གྱི་ཁམས་མཐའ་ཡས་མུ་མེད་པ་མ་ལུས་པ་དང་། བདག་ཉིད་རང་སྣང་གི་འཁོར་ཐམས་ཅད་དབྱེར་མེད་དེ། བདག་ཉིད་ཀྱི་མཚན་ཉིད་ལས་བྱུང་ཞིང་དེ་དག་ཐམས་ཅད་རང་ཉིད་ཡིན་པ་དང་། རང་གི་ཆོ་འཕྲུལ་ལས་བྱུང་བའི་འཁོར་རོལཔའི་མཚན་ཉིདདོན་ཐུགས་སུ་ཆུད་པའི་ཚུལ་དེ་ཡང་རང་གི་ཆོས་ཉིད་དུ་ཤེས་པར་བྱ་བའི་ཕྱིར་རང་གི་ངོ་བོ་ལ་གཟིགས་ཏེ། གསངབ་ཡེ་ཤེས་ཀྱི་མཐོངས་བསལ་ཏེ། མ་རིག་པའི་ལྕིབས་ཕྱུང་ནས་རིག་པའི་ཡེ་ཤེས་ཀྱི་བདེ་བ་ཆེན་པོའི་དོན་ལ་གསལ་བར་ཕྱུང་སྟེ།འཁོར་བ་དང་མྱ་ངན་ལས་འདས་པའི་དོན་ཅི་ལྟར་ཡིན་པ་དང་། སྣོད་བཅུད་འཛིན་པའི་དོན་ཇི་ལྟ་བ་ཡིན་པ་མཚན་ཉིད་ཐདད་ཀྱང་རང་གི་རྒྱན་དུ་སྣང་བར་བྱསནས། རང་གི་ངོ་བོ་དང་རང་་བཞིན་དང་། རང་གི་སྤྱོད་ཡུལ་འཇིག་རྟེན་གྱི་ཁམས་མཐའ་ཡས་མུ་མེད་པ་ཐམས་ཅད་རང་གི་མཚན་ཉིད་དབྱེར་མི་ཕྱེད་པའི་ལྷུན་གྱིས་གྲུབ་པའི་ཆོས་ཉིད་ཡིན་པ་དང་། དེ་ཉིད་ཀྱི་ཤརལུགས་ལས་བདེ་བར་གཤེགསཔའི་སྐུ་དང་ཡེ་ཤེས་ཀྱི་སྣང་བ་རྣམ་པར་དག་པ་འབྱུང་བ་དང་། དེ་ཉིད་ཅི་ལྟར་ཡང་སྤྲུལ་ཞིང་སྐུ་གསུང་ཐུགས་ཡེ་ཤེས་ལྔའིརང་བཞིན་ཅིར་ཡང་སྟོནཅིང་། ཆོསཉིད་དོནལ་གཡོ་བམེད་པར་གྱུར་པ་དང་། མ་ངེས་པའི་འཇའ་ཚོན་ལྟར་ཅིར་ཡང་གསལ་བདེ་བའི་དུས་ན་ཡང་བྱང་ཆུབ་སེམས་རིག་པ་དབྱེར་མེད་རང་གི་ངོབོར་འདུག་ཏེ་གཞན་དུ་མ་མཐོང་བའོ། །དེ་ནས་ཉིདཀྱི་རང་བཞིན་ལསངོ་བོཉིད་ཀྱིས་འདིསྐདཅེས་གསོལ་ཏོ། །ལྷུན་གྱིས་གྲུབ་གཞི་ཡེ་ཤེས་དོན། །རང་སྣང་གཞིར་ཤེས་ཡེ་སངས་རྒྱས། །མཚན་ཉིད་སོ་སོར་སྟོན་པར་མཛད། །ཉིད་ཀྱི་ཐུགས་ཏེ་ཡེ་སངས་རྒྱས། །གང་གིས་སངས་རྒྱས་མ་རིག་པ། །རང་གི་སེམས་ཉིད་རང་གིས་བསྒྲིབ། །སྒྲིབ་གཡོག་མཐོང་ན་སྒྲིབ་པ་དག །བདག་གིས་སྔོན་ཆད་སྒྲིབ་གཡོགས་མཐོང་། །མཐོང་མེད་མཐོང་ལས་འདས་དང་བྲལ། །རིག་པ་འགྱུར་མེད་ཡེ་སངས་རྒྱས། །ཡང་དག་ཉིད་དུ་ང་ཡིས་མཐོང་། །དེ་མ་ཐག་ཏུ་བདེ་དོན་རྟོགས། །རྟོག་པས་རིན་ཆེན་ཉིད་ལས་འདུས། །ཐུགས་ཀྱི་གཏེར་མཛོད་གཏེང་དུ་བཀླུབས། །རྣལ་འབྱོར་ཆེན་པོ་གང་དག་གིས། །རྟོགས་པར་ནུས་པ་བྱུང་གྱུར་ན། །ཐུགས་ཀྱི་ཉི་ཟེར་སྤྲོ་ཞིང་བསྡུ། །ཀུན་གྱིས་རང་རིག་རྟོགས་གྱུར་ནས། །ཀུན་ཀྱང་གཅིག་སྟེ་ལྷུན་གྲུབ་སྟེ། །སྙད་ཉིད་ནའང་གཞན་མ་གྲུབ། །མ་གྲུབ་དོན་དེ་རྟོགས་པར་དཀའ། །ཀུན་གྱི་སྤྱོད་ཡུལ་མ་ཡིན་ཏེ། །ཀུན་བཟང་དགོངས་པ་གཏིང་མཐའ་མེད། །རིག་པའི་རྡོ་རྗེ་བཤིག་པར་དཀའ། །ཐམས་ཅད་མཁྱེན་པའི་ཡེ་ཤེས་ནི། །དམིགས་གཏད་མེད་ཅིང་མཉམ་པའི་ངང་། །དེ་ནས་གཡོ་བར་མ་གྱུར་ན། །ཀུན་བཟང་དགོངས་པ་དེ་ཁོ་ནའོ། །བདེ་བ་ཆེན་པོ་ཟག་པ་མེད། །མ་སྤངས་རང་གྲོལ་དོན་གྱི་གཏེར། །གང་ཡང་སྤང་དུ་མེད་ན་བདེ། །སྤང་བླང་མེད་པའི་དོན་རྟོགས་ན །རིག་པ་འགྱུར་མེད་རྒྱས་བཏབ་ནས། །རྒྱ་ལས་མི་འདའ་གཡོ་མེད་ན། །མཚན་ཉིད་ཐ་དད་དོན་དུ་གཅིག །བྱང་ཆུབ་སེམས་ཀྱི་མཚན་ཉིད་ནི། །སེམས་ཅན་ཀུན་གྱི་མཚན་ཉིད་དེ། །ཡེ་ནས་འཛིན་པའི་དྲི་མ་དག །བདེ་ཆེན་ཀློང་དུ་ཡེ་ནས་གྲོལ། །ཟག་པ་མེད་ཅིང་རང་བཞིན་སྟོང་། །བདེ་ཆེན་སྤྲོས་བྲལ་ཟག་མེད་ལ། །དག་པའི་སེམས་མེད་མ་དག་མེད། །འདི་འདྲ་མེད་ཅིང་རྟོག་པ་མེད། །ཞིང་ཁམས་དག་ཀྱང་ཡོད་མ་ཡིན། །མེད་ཙམ་ཉིད་ནས་སྣ་ཚོགས་འབྱུང་། །མཚན་ཉིད་མི་འགྱུར་གཡོ་བ་མེད། །གཉིས་མིན་གཉིས་ནི་ཐ་སྙད་བྲལ། །མི་གཉིས་པ་ཉིད་གཉིས་མེད་སྤྱན། །ལྷུན་གྲུབ་མ་འགགས་ཀུན་ཏུ་གསལ། །ཨེ་མ་ཧོ་བདེ་བ་ཆེན་པོའི་རང་བཞིན་ནི། །ཡང་དག་པར་ནི་ཀུན་བཟང་གི། །སྐུ་གསུང་ཐུགས་ལས་གཡོ་བ་མེད། །སེམས་ཅན་གྱི་ལུས་ངག་ཡིད་གསུམ། ཁྱད་རྡུལ་ཙམ་ཡང་མེད་ཅིང་འདྲ། །རང་སྣང་མཚན་ཉིད་ཐ་དད་འདུག་པའོ། །འདུག་ཙམ་ཉིད་ནས་རང་གི་ཆོ་འཕྲུལ་ཏེ། །ཆོ་འཕྲུལ་ཆེན་པོར་རང་ཤར་བས། །མཐའ་ལ་མི་གནས་པ་ཞེས་བྱའོ། །མཐའ་ཐམས་ཅད་རབ་ཏུ་འདུས་པ་ཞེས་བྱའོ། །འདུ་འཕྲོ་སེམས་སུ་ཤར་བའོ། །མཐའ་ཡས་གཅིག་ཏུ་སྣང་བ་འོ། །གཅིག་ཏུ་ཀུན་ཏུ་ཤར་བའོ། །གཞི་འཛིན་པ་ཡི་རིག་པའོ། །བཀག་པས་མི་ཁེག་པ་ཡི་ཡེ་ཤེས་ལ། །བསླད་པས་མི་བསླད་པ་ཡི་ཆོས་སྐུའོ། །ཐམས་ཅད་མཁྱེན་པའི་སྤྲུལ་སྐུ་ལ། །མཉམཔ ཆེནཔོའིའབྲསབུའོ། །དངོས་པོ་མཚན་མ་མེད་པའི་ཆོས་ཉིད་ལ། །དམིགས་གཏད་གང་༄༅ ལའང་བཅར་མེད་པའོ། །བསྟན་མེད་ལུང་བྲལ་ཆོས་ཉིད་ནི། །རང་བཞིན་མ་བཅོས་པ་ཡི་འདུ་འཕྲོ་སྟེ། །རང་ལས་བྱུང་བའི་ཆོ་འཕྲུལ་མི་འགག་པ། །བདེན་རྫུན་ཤར་བའི་སྣང་བ་དང་། །ཐམས་ཅད་བདེན་རྫུན་མེད་པ་ཡི། །བྱང་སེམས་ཀུན་ཏུ་བཟང་པོའོ། །ཉག་གཅིག་གི་ཆོས་ཉིད་དོ། །ཞེས་ཉིད་ལ་ཉིད་ཀྱིས་གསུངས་པའོ། །རིན་པོ་ཆེ་འཁོར་ལོ་བརྩེགས་པའི་རྒྱུད་ལས། གླེང་གཞི་གྲུབ་ཚུལ་དང་བཅས་པའི་ལེའུ་སྟེ་དང་པོའོ།། །།དེ་ནས་ཡང་ཉིད་ཀྱི་རང་བཞིན་བདེ་བ་ཆེན་པོའི་དོན་ལ་ཉིད་ཀྱིས་ཞུས་པར། ཨེ་མ་ཧོ་གང་འདོད་པ་དང་བཅས་པ་ལ་ནི། མཐའ་རང་གིས་མ་བསྒྲིབས་ཤིང་མ་གྲུབ་པའི་དོན་ཅི་ལྟར་ཡིན་ཞེ་ན། བདག་མཐའ་མེད་པའི་ཆོས་ཉིད་ལ། །གཡོ་བ་མེད་པར་གང་གནས་པ། །མ་སྐྱེས་པ་ཡི་ཆོས་ཉིད་ཡིན། །དངོས་པོ་སྒྱུ་མ་ལྟར་ཤེས་ན། །དངོས་མེད་དོན་ཉིད་རང་སར་གོལ། །ཀུན་ཏུ་བཟང་པོའི་དགོངས་པ་ནི། །མཚན་མ་གང་ཡང་བྲི་ཐོབ་མེད། །སེམས་ཀྱི་རང་བཞིན་ནམ་མཁའ་འདྲ། །ཐམས་ཅད་འབྱུང་བཞི་རིན་པོ་ཆེ། །དངོས་སུ་མི་སྣང་ཕྱོགས་དང་བྲལ། །ཕྱོགས་བྲལ་དོན་ལ་ཕྱོགས་སུ་བྱུང་། །མ་སྐྱེས་པ་ཡི་ཆོས་ཉིད་ལ། །ཕྱོགས་ཀྱི་ཐ་སྙད་གང་ལ་འདོགས། །རྟེན་དང་བྲལ་ཕྱིར་གདགས་གཞི་མེད། །ནམ་མཁའི་སྣང་བ་གཏིང་ཕྱིན་ན། །གསེར་གྱི་རེ་ཐག་རྟོད་ཕུར་གྲོལ། །འབྱུངབརླུད་ཆེན་མཁའ་ལ་དངས། །འོད་གསལ་ཆེན་པོ་ཟུང་དུ་འཇུག །རྒྱ་ཆེན་འོད་གསལ་ཡང་པ་བདེ། །དངོས་པོའི་མཚན་ཉིད་རྣམ་པར་དག །སྒྱུ་མའི་གཟུགས་སུ་རྨི་ལམ་ཉིད། །རྟོག་པ་མེད་ལ་བན་བུན་ཙམ། །དེ་ཉིད་མི་རྟོག་དགོངས་པ་སྟེ། །རང་གསལ་ཤེས་པའི་ཆོས་སྐུ་ནི། །རང་གསལ་ཡིན་ཕྱིར་རྩོལ་བྱེད་བྲལ། །སྣང་བ་ཁ་ཡིད་ཁོག་སྟོང་ལ། །རྣམཤེས་བུནནེ་ལིང་ངེར་བཞག །གང་ལ་བཞག་པ་རང་ན་བདེ། །བདེ་བར་ཤེས་ན་མི་བདེ་མེད། ་ས་ཤིང་རྩོལ་ན་སྡུག་བསྔལ་ཡིན། །ཞེས་གསུངས་སོ། །རིན་པོ་ཆེ་འཁོར་ལོ་བརྩེགས་པའི་རྒྱུད་ལས། ཉིད་ཀྱི་དགོངས་པ་རྣམ་པར་དག་པའི་ལེའུ་སྟེ་གཉིས་པའོ།། །།དེ་ནས་ཡང་ཉིད་ཀྱི་རང་བཞིན་གྱིས་ཉིད་ཀྱི་ངོ་བོ་ལ་རང་བཞིནགྱིས་ཆེ་བའི་དོན་བསྟན་པའི་ཕྱིར། ཨེ་མ་ཧོ་ངོ་བོ་ཉིད་བདེ་ཆེན་པོ། འབྱུང་བ་ནམ་མཁའི་སྣང་བ་ལ་ཡེ་ཤེས་ཀྱི་འོད་ཆེན་པོ་ཤར་ཞིང་རྩི་ཤིང་ནགས་ཚལ་དུ་འཁྲུངས་པ་དང་། སྐྱེ་འགྲོ་གཟུགས་སུ་སྣང་བ་ཐམས་ཅད་རང་བཞིན་ཀུན་ཏུ་བཟང་པོའི་རྩལ་དུ་རང་ཤར་བ་ཡིན་ཏེ་འདུས་ཀྱང་རང་རིག་པ་ཁོ་ནའི་ཚུལ་དུ་འདུས་སོ། །སྣང་བ་རྒྱ་ཡན་ལ་སེམས་ཀྱི་མེ་ལོང་རང་གསལ་ཡང་སེམས་ཉིད་རིན་པོ་ཆེའི་སྒྲོན་མ་རང་གསལ་བས་རང་ལ་ངོ་བོ་ཉིད་ཀྱི་རྒྱུར་རྫོགས་ཤིང་ཡེ་ཤེས་ཀྱི་སྣང་བར་ལྷག་གེ་འདུག་པའོ། །སེམས་ཉིད་རིན་པོ་ཆེ་ལྟ་བུའི་དོན་རྟོགས་ན་མེ་ལོང་གསལ་བ་ལ་བྱི་དོར་བྱས་ཏེ་གཡའ་དག་པའི་རང་བཞིན་དུ་སྣང་བ་ལྟར་རང་བཞིན་གྱིས་རྣམ་པར་དག་པ་ལ་སྣངབ་ཀུན་མཁྱེན་དུ་རང་ཤར་བས་ཐམས་ཅད་མཁྱེན་པའི་ཡེ་ཤེས་ཁོ་ནའོ། །འཁོར་འདས་ཐམས་ཅད་ཀྱི་རང་བཞིནཆོས་ཉིད་ཀུནཏུ་བཟང་པོ་ཡིསཁྲོག་བརླག་མེད་ཅིང་དབྱིངས་སྟོར་བས་འཁོར་འདས་ཀྱི་སྟོར་སར་མི་འགྱུར་བའི་དབྱིངས་ཞེས་བྱའོ། །སྟོར་ཙམ་ཉིད་ན་ཡངསངས་རྒྱསཀྱི་ཞིང་དངསེམས་ཅན་གྱི་ལུས་ངག་ཡིད་གསུམ་སྐུ་གསུང་ཐུགས་དང་བཅས་པར་དེ་ནས་བྱུང་བ་མིཟད་པའི་མཛོད་ཆེན་པོཞེས་དེ་ལ་བྱའོ། །ཆོས་ཉིད་ཐལ་བྱུང་དཀྱིལ་འཁོར་དུ་མངོན་དུ་བྱུང་བའི་རིག་པ་མ་བཙལབར་ཤར་ཏེ་ཐམསཅད་མཁྱེན་པའི་སྤྲུལཔརརོལ་ཞིངམཛདཔཐམས་ཅད་མི་འགོགཅིངསྐུ་གསུང་ཐུགསཀྱིརོལ་པ་ཇི་ཙམ་དུ་ཤར་བ་ཉིད་ནིལུས་ངག་ཡིད་གསུམ་གྱི་སྤྱོད་པལས་མ་གཡོས་པའོ། །སངས་རྒྱས་སེམས་ཅན་གཉིས་སུབརྗོད་ཀྱང་བདག་ཉིདཆོས་སྐུ་ཉག་གཅིགལ་དབྱེར་མེད་དོ། །དེ་ཉིད་ཀུན་ཏུཤེས་པ་རང་གསལ་ལོ། །མི་གསལ་བ་གཅིག་བྱུང་ནཡང་མི་གསལ་བརབརྟགས་པ་ཉིད་ཀྱང་རང་གསལལོ། །ངོབོ་ཉིདབདེ་བ་ཆེན་པོར་རང་གསལ་ཉིད་དུ་རངགནས་པས། མ་གསལངོ་བོགངཡང་མེད། །འོད་ཟེརཉི་ཆེནའབརབལྟར། །རིག་པའི་འོད་ཟེར་ཀུན་ཏུ་ཁྱབ། །དེ་ཉིད་བྱང་ཆུབ་སེམས་ཆེན་པོ། །དོན་ལྡན་རྣལའབྱོར་ཆེན་པོ་བས། །ངོ་བོ་ཉིད་ལ་ཡང་མི་གནས་ཏེ། །ཐམས་ཅད་ཐམས་ཅད་དབྱེར་མེད་སེམས། །སེམས་ཀྱི་མཐའ་ལ་སེམས་མི་གནས། །ཞེས་གསུངས་སོ། །རིན་པོ་ཆེ་འཁོར་ལོ་བརྩེགས་པའི་རྒྱུད་ལས། རང་བཞིན་གྱི་ལེའུ་སྟེ་གསུམ་པའོ།། །།ཉིད་ཀྱི་རང་བཞིན་གྱིས་ཁྱད་པར་ཆེན་པོ་གསུངས་པ། ཨེ་མ་ཧོ་ངོ་བོ་བདེ་བ་ཆེན་པོ་སྣང་དང་མི་སྣང་ཆོས་རྣམས་ཐམས་ཅད་རང་གསལ་ཉིད་དུ་མངོན་བྱུང་བས། ཞབྲུལ་རྟོག་གི་གཏིང་ཕྱིན་ཏེ་ཀུན་བརྟགས་ཀྱི་ལུབྲུལ་པ་ཡེ་ནས་མེད་དོ། །དེ་ཕྱིར་མ་ནོར་བའི་ཆོས་ཉིད་ནི། རང་གསལ་གང་ལ་ཡང་མ་ལྟོས་པ་ཉིད་ཡིན་ནོ། །དེ་ཉིད་ཐམས་ཅད་དུ་རང་སྤྲུལ་པས་སྤྲུལ་པའི་སྐུ་ཞེས་ཀྱང་བྱ་ལ། རང་ལ་རང་སྣང་དག་པར་ལོངས་སྤྱོད་པས་ལོངས་སྤྱོད་རྫོགས་པའི་སྐུའོ། །དེའི་དུས་སུ་སྣང་གཞི་གང་དུ་ཡང་འགོག་པ་མེད་པས་མི་གཡོ་བ་ཆོས་ཀྱི་སྐུའོ། །འགྱུར་མེད་ཀྱི་ཤེས་པ་ལ་སྙིང་པོ་མེད་པ་ནི། རྟོག་མཐའ་དང་བྲལ་བ་སྟེ་རང་བྱུང་གི་ཡེ་ཤེས་སོ། །རྣམ་པར་ཤེས་པ་རླུ་་ལ་རྒྱུ་བའི་དུས་ན་རླུང་འཕོ་བ་མེད་པ་ནི། རྒྱུན་མི་འཆད་པའི་བསམ་གཏན་ནོ། །འབྱུང་བ་མེད་པའི་སྔོན་རོལ་དུ་རང་བྱུང་གི་གདངས་ཤར་བ་ནི། གསང་བ་འགག་མེད་ཀྱི་ནམ་མཁའ་ལ། ཁོ་ན་རིག་པ་མ་འགགས་པར་ཤར་བའོ། །ཆགས་སྡང་གང་ལ་ཡང་མ་ཆགས་པའི་དུས་ཉིད་ན་དུག་ལྔ་ཡེ་ཤེས་ཀྱི་ལམ་དུ་བྱུང་བ་ནི། ད་ལྟ་ཉིད་དུ་ཆགས་སྡང་རྒྱུད་ལ་རང་ཆས་སུ་སྣང་བ་ཡིན་ནོ། །འཁོར་འདས་གང་དུ་ཡང་མི་སྣང་བའི་དུས་ཉིད་ན་ཡང་ཆོས་ཉིད་གཞིར་གྲུབ་པས། །ཆོས་སྐུ་རང་ཆས་སུ་གསལ་བའོ། །གསལ་བའི་ངང་ལ་བསྟན་ནུས་ན། །འཁོར་བའི་གཏིང་ནས་བཟློག་པ་སྟེ། །དེ་ཉིད་བྱང་བ་དང་བཅས་ཤིང་། །རླུད་འབའ་ཞིག་གིས་བསྐྱེད་པ་ནི། །འཁོར་བར་འགྲོ་བའི་འདྲེ་མ་ལྷ་སྟེ། རླུད་འབྱུང་ལྡོག་གིས་འཁོར་བའི་ལམ་འདྲེན་ཅིང་ཡེ་ཤེས་ཀྱི་མེ་གསོད་པའོ། །དེ་ཕྱིར་བཏང་སྙོམས་མི་བསྒྲིམ། བྱུང་ཚོར་གློད་ལ་བཞག་གོ། །རིན་པོ་ཆེ་འཁོར་ལོ་བརྩེགས་པའི་རྒྱུད་ལས། རང་བཞིན་ཁྱད་པར་གྱི་ལེའུ་སྟེ་བཞི་པའོ།། །།དེ་ནས་ཡང་ཉིད་ཀྱི་རང་བཞིན་གྱིས་ངོ་བོ་བདེ་བ་ཆེན་པོ་ལ་བཀའ་སྩལ་པ། གཞི་འཛིན་ཅིང་རྩལ་འཆར་བའི་བྱང་ཆུབ་སེམས་ནི། འཁོར་འདས་གང་ཡང་རྒྱ་མ་ཆད་ལ་གང་གིས་ཀྱང་གཏན་ལ་ཕེབས་པ་དཀའ་སྟེ། དེ་ཅིའི་ཕྱིར་ཞེ་ན། དངོས་པོར་མ་གྲུབ་ཅིང་སྣ་ཚོགས་སུ་འབྱུང་བས་རྒྱུ་རྐྱེན་དང་བྲལ་ཏེ་སྙིང་པོ་མེད་པའོ། །དེ་ཡང་ནི་རང་གི་རིག་པའོ། །སྔོན་རོལ་དུ་རིག་པའི་ཡེ་ཤེས་སུ་མཁྱེན་ཟིན་ཏེ། །དོན་མ་རིག་པའི་གནས་སྐབས་ཙམ་གྱིས་ཀྱང་བར་མ་ཆད་དེ། རིག་པ་ཐོད་རྒལ་དུ་སངས་རྒྱས་ཟིན་པའོ། །དུག་རྣམ་པ་ལྔར་སྣང་ཡང་མ་འཁྲུལ་པའི་ཡང་ཁོང་དུ་ཡེ་ཤེས་ཀྱི་རང་བཞིན་དུ་གསལ་བས་དུག་ལྔ་མ་སྤངས་པར་རང་དག་ཟིན་པའོ། །ད་ལྟ་འཁྲུལ་པ་ལྟར་སྣང་བ་ཡང་ངོ་ཤེས་ཤིང་རྟོགས་པས་གྲོལ་བ་ཡང་སྔར་གྱི་རང་སའོ། །སྣང་བ་དང་མི་སྣང་བའི་ཆོས་ཐམས་ཅད་ཀྱང་རིག་པའི་ཀློང་ཆེན་པོར་ཕེབས་ན། མཉམ་པ་ཉིད་རང་རིག་པའི་ཀློང་ལམ་ཆེན་པོ་ལས་མ་བྱུང་བའི་ཆོས་ནི་གང་ཡང་མེད་པ་ལ། སེམས་ཀྱི་སྣང་ཚུལ་བསམ་གྱིས་མི་ཁྱབ་པ་ཡང་རིག་པ་ཉིད་ཀྱི་རྩལ་ལས་བྱུང་ཞིང་གཞན་མེད་དེ། བདེ་བར་གཤེགས་པའི་རིགས་ཐམས་ཅད་དང་། རིགས་ལྔར་གྱུར་པའི་སངས་རྒྱས་དང་། ཡབ་ཡུམ་སྲས་དང་བཅས་པའི་འཁོར་ཕུན་སུམ་ཚོགས་པ་ཡང་ རང་གི་རིག་པའི་རྩལ་དང་དེ་རུ་བྱུང་བ་ལས་གཞན་མེད་དོ། །རྒྱུ་རྐྱེན་ནུས་པའི་མཐུ་རུ་སྣང་བ་ཉིད་ཀྱང་། བྱང་ཆུབ་སེམས་ཀྱི་ཆོ་འཕྲུལ་ཡིན་ཏེ། སྣང་བ་ཐམས་ཅད་རང་གི་རིག་པ་བྱང་ཆུབ་ཀྱི་སེམས། ཡུལ་སེམས་དབྱེར་མེད་པར་ཐམས་ཅད་མཉམ་པ་ཉིད་ཀྱི་རང་བཞིན་དུ་གྱུར་པ། རིག་པ་རང་གི་ངོ་བོ་བརྗོད་པ་དང་བྲལ་བའི་མཐུས་གསང་བ་རྣམ་གསུམ་གྱི་དཀྱིལ་འཁོར་དུ་གྱུར་པ་ཐམས་ཅད་མི་འགལ་བར་རང་ལས་བྱུང་བ། ཡེ་ཤེས་ཀྱི་སྣང་བ་དང་། ཡུལ་གྱི་སྣང་གཞི་དང་། མངོན་པར་ཤེས་པའི་རྫུ་འཕྲུལ་ནམ་མཁའ་རི་བྲག་གཡང་ས་གང་ལ་ཡང་ཐོགས་པ་མེད་པར་འགྲོ་བ་དང་། སྤྲུལ་པ་སྣ་ཚོགས་ཇི་ལྟར་འཚམས་པ་བཞིན་དུ་སྤྲུལ་ནུས་པ་དང་། གསུང་དབྱངས་ཡན་ལག་དྲུག་ཅུའི་སྒོ་ནས་བསྟན་པ་རྒྱ་མཚོ་སྒྲོགས་པ་དང་། ཁམས་མང་ཞིང་རྒྱ་ཆེ་བའི་སྟོང་གསུམ་ཐམས་ཅད་ཀྱང་ཕྱོགས་མེད་རིག་པའི་ཡེ་ཤེས་རང་ཤར་བའོ། །སྣང་ཞིང་སྲིད་པས་བསྡུས་པའི་ཆོས་ཐམས་ཅད་རིག་པ་རང་བྱུང་གི་ཡེ་ཤེས་ཀྱི་མཐུ་ལས་གྱུར་པའོ། །རིག་པ་འགྱུར་མེད་ཀྱི་ཤེས་པ་རླུད་གི་རྟས་བསྐྱོད་ཅིང་སྣང་བ་ནི། གང་དུ་ཡང་འཆར་ཏེ་ཅི་སྲིད་འཁོར་བའི་ཆོས་དང་མྱ་ངན་ལས་འདས་པའི་ཞིང་དུ་ཡང་འཆར་དུ་རུང་བ་ནི་རྩལ་ཉིད་དོ། །རིག་པ་ཉིད་ཆོས་ཐམས་ཅད་ལ་དབྱེ་བསལ་མེད་པ་ནི། ཡོངས་སུ་རྫོགས་པའི་ཆོས་ཉིད་དོ། །རང་བཞིན་གཅིག་ལས་མ་གཡོས་པར་རང་སྣང་ཅིར་ཡང་འགྱུར་བ་ནི་སངས་རྒྱས་ཉིད་ཀྱི་སྤྲུལ་པའོ། །རིག་པ་ཉིད་ཅིར་ཡང་འཆར་བ་མི་འགག་པ་ལ་སྐྱེ་བ་མེད་པའི་རྒྱས་ཐེག་པ་ནི་མི་སྐྱེ་བ་ལམ་འགགས་པའོ། །སྣ་ཚོགས་སུ་སྣང་ཡང་རིག་པའི་ཆོ་འཕྲུལ་ལས་བྱང་ཆུབ་སེམས་ནི་གཞན་དུ་སྐྱེ་བའི་ས་མེད་དོ། །སྣང་བ་ཐམས་ཅད་ཡེ་སངས་རྒྱས་པ་ཡང་རིག་པ་རང་གི་སྟོབས་ཀྱིས་ཤར་བའོ། །ལྷུན་གྱིས་གྲུབ་པའི་ཆོས་ཉིད་ལ་ནི། སྣང་རྟགས་གང་དུ་ཡང་མ་ཕྱེ་བར་གསལ་ལ་དབྱེར་མེད་པའོ། །ཆོས་ཉིད་བདེ་བ་ཆེན་པོ་བསམ་རྟོག་དང་བྲལ་བར་ཅིར་ཡང་སྣང་བ་ནི། རིག་པ་བྱང་ཆུབ་ཀྱི་སེམས་གཟུང་དུ་མེད་པའི་ཆོས་ཉིད་དོ། །དེ་ཉིད་བདེ་བ་ཆེན་པོའི་དོན་དུ་ཉམས་སུ་མྱོང་ཞིང་གསང་བ་བླ་ན་མེད་པར་གྲུབ་པ་ནི་ཡེ་སངས་རྒྱས་པ་ཞེས་བྱའོ། །རིན་པོ་ཆེ་འཁོར་ལོ་བརྩེགས་པའི་རྒྱུད་ལས། ཁྱད་པར་ཆེན་པོའི་ལེའུ་སྟེ་ལྔ་པའོ།། །།དེ་ནས་ཡང་ཉིད་ཀྱི་རང་བཞིན་གྱིས་དོན་གསང་བར་གསུངས་པ།ཨེ་མ་ཧོ། །ངོ་བོ་བདེ་བ་ཆེན་པོ་རྫོགས་པ་ཆེན་པོའི་རྣལ་འབྱོར་པས་ནི་རྩོལ་བ་ཐམས་ཅད་མ་སྤངས་རང་སར་དག་ཅིང་དོན་ཐམས་ཅད་རང་ལ་འདུས་པར་ཤེས་པར་བྱའོ། །གཞན་གང་དུ་ཡང་སེམས་བསྐྱེད་ཅིང་འཇུག་པར་བྱེད་པ་ནི་ཉིད་ལས་གཞན་དུ་རིང་པར་ཤེས་པར་བྱའོ། །རྒྱུད་ཀྱི་དམ་པ་ནི་སེམས་ཀྱི་དངོས་པོ་གཞི་རིག་པ་རང་ལ་བརྟེན་ནས་དོན་ཐམས་ཅད་སྡུད་པའོ། །དངོས་གྲུབ་ཐམས་ཅད་ཀྱང་རིག་པ་རང་གི་བསླབ་ལས་བྱུང་བའོ། །སངས་རྒྱས་ཐམས་ཅད་བསྐྱེད་ཅིང་བགེགས་དང་རྟོག་པ་ཐམས་ཅད་རང་གིས་རང་གཞོམ་པའོ། །མཆོག་དང་མཆོག་མ་ཡིན་པའི་འདོད་པ་ཐམས་ཅད་ནོར་བུ་རིན་པོ་ཆེ་རང་རིག་པ་ལས་འཕེལ་བའོ། །ཡོན་ཏན་མ་ལུས་པའི་ཚོགས་ཐམས་ཅད་གསང་བ་མཆོག་གི་རང་བཞིན་ནོ། །འཇིག་རྟེན་དང་འཇིག་རྟེན་ལས་འདས་པའི་བདག་ཉིད་ནི་ཆོས་ཐམས་ཅད་མི་ཕྱེད་པའི་རང་བཞིན་ཅན་ནོ། །རིག་པ་བྱང་ཆུབ་ཀྱི་སེམས་ནི་སྔོན་གྱི་རྒྱལ་བ་ཀུན་གྱིས་མྱེས་ཆེན་པོ་ཡང་ཡིན། ད་ལྟ་ཉིད་ཀྱི་སྐུ་གསུང་ཐུགས་ཀྱི་བདག་ཉིད་ཀྱང་ཡིན་ཏེ་མི་ཟད་པའི་འཁོར་ལོ་ཐམས་ཅད་རང་ལ་བསྐོར་བའོ། །དེ་ཉིད་ཀྱང་རང་སྣང་གཞན་དུ་མི་གནས་པ་ནི་སྣང་བ་རྒྱ་ཡན་ཆེན་པོ་ཞེས་བྱ་སྟེ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཐུགས་རིག་པའི་གའུ་ནས་འོད་གསལ་ཆགས་པ་མེད་པར་རང་སྣང་ཞིང་ཆགས་པ་མེད་པར་འདུག་པའོ། །དྲན་པ་དང་རིག་པ་ཅིར་གསལ་ཐམས་ཅད་མ་བཀོད་བཞིན་རིག་པ་རྒྱ་ཡན་པའོ། །རིག་པ་ལྷུན་གྱིས་གྲུབ་པའི་ཆོས་ཉིད་ལ་ནི་གང་དུ་བསམས་ཤིང་བརྟགས་པ་ལས་འདས་པའོ། །དེ་ཡང་ཉིད་ཀྱི་སྤྱོད་ཡུལ་ནི། དེ་ཉིད་མུ་སྟེགས་ནས་གསང་ཆེན་མན་ཆད་དུ་རང་ཤར་བའོ། །གསང་བ་ཆེན་པོ་སྒྲ་སྐད་དུ་ཇི་སྙེད་པར་སྒྲོགས་པ་ཡང་གསང་བ་ཆེན་པོའི་ལམ་ཡིན་ཏེ་གང་དུ་ཡང་རང་པས་གཞན་དུ་ཐོས་སུ་མེད་པ་ཉིད་དོ། །རང་གི་རིག་པ་གསང་བ་ཉིད་ཆོས་ཀྱི་སྐུར་ངོ་སྙོམས་པ་ནི་ཀུན་གྱིས་མ་རིག་པའོ། །སེམས་ཉིད་ཀུན་ལ་ཁྱབ་ཅིང་ཆོས་སྐུ་རང་གསལ་བ་ནམ་མཁའ་དང་ཉི་མ་ལྟ་བུའོ། །ལྷུན་གྱིས་གྲུབ་པའི་ཆོས་ཉིད་ལ་རང་བྱུང་ཡེ་ཤེས་ཀྱི་སྐུ་ལྔར་རྫོགས་པ་ནི། རིག་པ་ཉིད་ཀྱི་སྣང་གཞི་མི་འགོག་པའོ། །སྣང་སྲིད་འབྱུང་ལྔར་ཤར་བ་ཡང་རང་བྱུང་ཡེ་ཤེས་ཆེན་པོའི་ཡོན་ཏན་ནོ། །འབྱུང་བ་ཐམས་ཅད་ཀྱི་སྙིང་པོའམ་བཅུད་དུ་གྱུར་པ་ནི་སེམས་ཉིད་དག་པ་ཆེན་པོའི་དགོངས་པ་ཉིད་དོ། །སྙིང་པོ་དེ་ཉིད་ཤིན་ཏུ་བཙལ་དཀའ་བའི་དོན་ཡིན་ཏེ་གཞན་ལས་མི་རྙེད་པའོ། །གང་ཞིག་དང་དུ་བླང་ཞེས་ཀྱང་འབྱུང་སྟེ་རང་ཉིད་ཡིན་པས་སོ། །སྐྱེ་གནས་རྣམ་པ་བཞིའི་ཡུལ་དང་རྒྱུད་ལྔའི་འཁོར་བའི་སེམས་ཅན་ཐམས་ཅད་ཀྱང་འཛིན་པ་རང་གི་རླུད་ལོག་པ་ལ་སྣང་བའོ། །འཛིན་པའི་དྲི་མ་ཉིད་དྲི་མ་ཉིད་ཀྱིས་ཀར་དག་པའོ། །འཇིག་རྟེན་གྱི་ཁམས་ཡང་དག་པར་རྫོགས་པའི་སངས་རྒྱས་འདས་པ་དང་མ་བྱུང་བ་དང་། ད་ལྟ་བཞུགས་པ་ཐམས་ཅད་རིག་པའི་རྩལ་ལས་མ་བྱུང་བའི་ཆོས་སྐད་ཅིག་ཙམ་ཡང་མེད་པས། རིག་པ་གཅིག་པུར་འདུས་པ་ནི་ཉི་མའི་ཟེར་བཞིན་ནོ། །དེ་ཉིད་ཀྱང་ཆོས་ཀྱི་སྐུ་བདེ་བ་ཆེན་པོའི་ངང་ལས་འདའ་བར་མི་བྱེད་ཅིང་ཐབས་ཀྱི་ཆོ་འཕྲུལ་ཅིར་ཡང་སྟོན་པའོ། །སྟོང་པ་ཉིད་ན་ཡང་གཅིག་ལ་ཀུན་འདུས་པའོ། །དགོངས་པ་རང་བཞིན་གྱི་ཀློང་ནས་མི་བསྐྱོད་པའི་རླབས་རང་གསལ་བའི་ཏིང་ངེ་འཛིན་ཉིད་དོ། །རིན་པོ་ཆེ་འཁོར་ལོ་བརྩེགས་པའི་རྒྱུད་ལས། དོན་གསང་བར་བསྟན་པའི་ལེའུ་སྟེ་དྲུག་པའོ།། །།དེ་ནས་ཡང་ཉིད་ཀྱི་རང་བཞིན་གྱིས་གསང་བ་སྐྱོན་དང་བྲལ་བའི་དོན་གསུངས་པ། ཨེ་མ་ཧོ། །ངོ་བོ་བདེ་བ་ཆེན་པོ་དུག་ལྔ་ལ་སྤྱོད་པའི་གང་ཟག་ལ་ནི་བཅས་བཅོས་གང་ཡང་བྱར་མེད་དེ། འདམ་གྱི་མུན་ཁུང་ན་པདྨའི་མེ་ཏོག་རང་འབར་བ་ལ་ནི་བཟོ་ཡིས་བཅོས་སུ་མེད་པའོ། །གསལ་བྱེད་ཀྱི་ཉི་མ་ཤར་བ་ལས་འཇའ་ཚོན་གྱི་འོད་བཀྲ་བ་ལ་ནི་སུས་ཀྱང་བསལ་དུ་མེད་པའོ། །དུག་ལྔའི་སྙིང་པོ་ལ་ཡེ་ཤེས་ཀྱི་མར་མེ་གསལ་བ་ནི་ང་རང་ཉིད་ཀྱིས་ཀྱང་བསལ་དུ་མེད་པའོ། །ལྷུན་གྱིས་གྲུབ་པའི་ཆོས་ཉིད་མི་འདོད་པའི་འདོད་ཆགས་ཆེན་པོ་རང་ཤར་ནས་རྟོག་པའི་མཚན་མ་ཞེས་སྟོང་པའོ། །མཚན་རྟོག་དབྱེར་མེད་པར་ཆོས་ཉིད་ཀྱི་ཀློང་ན་ཉལ་བ་ནི་མི་འབྱེད་པའི་གཏི་མུག་ཆེན་པོ་དེའོ། །དེ་ལས་གཞན་གྱི་སྤྲོས་པ་བཅད་པ་ནི་གཞན་ན་མེད་པའི་ང་རྒྱལ་ཏེ། རང་ལས་གཞན་དུ་རྟོག་པའི་བླུན་པོས་བལྟ་བ་ལ་ཕྲག་དོག་པ་ནི་གང་གིས་ཀྱང་སྤང་དུ་མེད་པའོ། །དུག་ལྔ་ལམ་དུ་ཁྱེར་བ་ནི། འབྲས་བུ་ཆིག་ཆོད་ཀྱི་ས་པ་སྟེ་ཡེ་ཤེས་ཆེན་པོའི་རང་བཞིན་དུ་ཁྱབ་གདལ་བའོ། །ཡེ་ཤེས་ཆེན་པོའི་ཀློང་ནི་ཐམས་ཅད་ཀྱི་འབྱུང་གནས་སམ་འབྱུང་གཞི་སྟེ་རྒྱུ་རྐྱེན་འབྲས་བུ་གང་ཡང་མ་འགགས་པའི་སའོ ཐར་པའི་ལམ་ནི་ཐམས་ཅད་ནས་ཐམས་ཅད་དུ་འབྱུང་གཞི་མ་འགགས་པ་ཐམས་ཅད་ལ་བྱའོ། །ཨེ་མ་ཧོ་བདེ་བ་ཆེན་པོ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་འབྱུང་གཞི་ནི་རིག་པ་མི་འགག་པ་སྟེ། །དུས་དེར་བྱང་ཆུབ་ཀྱི་སེམས་སྐྱེས་སོ་ཅོག་ཇི་སྲིད་འཁོར་བའི་ཆོས་སུ་སྣང་བ་ཡང་དེ་ཉིད་དོ། །ཕུང་པོ་དང་སྐྱེ་མཆེད་རྣམ་པར་དག་པའི་བྱང་ཆུབ་སེམས་དཔའ་དང་། ནམ་མཁའ་དང་མཁའ་དག་པའི་རྒྱལ་བ་ཐམས་ཅད་ཀྱང་རིག་པ་རང་གི་མཐོང་སྣང་རྣམ་པར་ཤར་བའོ། །ས་དང་ལམ་ཐ་དད་པར་བགྲང་བ་ནི་བློ་ཆུང་བའི་གང་ཟག་སྟེ་ནམ་མཁའ་ལ་སྟེགས་ཚོལ་བ་དང་འདྲའོ། །རྐྱེན་འགྱུར་ལས་ཀྱི་དབང་གིས་སོ་སོར་སྣང་བ་ནི་ནམ་མཁའི་ཟླ་བ་དང་འདྲའོ། །ཡན་ལག་གང་ཡང་མེད་པར་སྣ་ཚོགས་སུ་འགྲོ་བ་ནི་རླུད་ཡིད་ཀྱི་ཤུགས་ཅན་ནོ། །རྟོགས་པའི་བློ་དང་ལྡན་པ་ནི་སངས་རྒྱས་ཉིད་ཀྱི་དགོངས་པའོ། །འདོད་པའི་ལོངས་སྤྱོད་ཐམས་ཅད་ཀྱང་རང་གི་རྒྱན་དུ་ཤར་ནས་རང་ལ་རང་རོལ་པའོ། །ཆགས་པ་དང་བྲལ་བའི་བདེ་བ་ནི། ཡིད་མི་དམིགས་པའི་ཡིད་ལ་གནས་པ་ནི་ཤེས་རབ་དམ་པའོ། །སེམས་བརྟགས་པར་དཀའ་ཞིང་ཆ་ཕྲ་ལ་ཟག་པ་མེད་པ་ནི་བདེ་བ་ཆེན་པོའོ། །རང་གི་སེམས་དྲི་མ་དང་བྲལ་ཞིང་ཀ་དག་གི་ཡེ་ཤེས་ལ་ནི་ཀུན་མཁྱེན་གྱི་སངས་རྒྱས་དང་སེམས་ཅན་གྱི་ཐུགས་སེམས་ལ་དབྱེར་མེད་དོ། །འདི་ལས་མ་བྱུང་བའི་སངས་རྒྱས་དང་སེམས་ཅན་གང་ཡང་མེད་དོ། །ཨེ་མ་ཧོ་ངོ་བོ་བདེ་བ་ཆེན་པོ་ཡང་དག་པར་རྫོགས་པའི་སངས་རྒྱས་ནི་འདི་བཞིན་ཤེས་པར་བྱ་སྟེ་སྣང་བ་མི་དམིགས་པའི་ལུས་ཀུན་ཏུ་སྤྲུལ་པ་སྟེ་སྐུ་རང་ལ་བཞུགས་ཤིང་གསུང་སྨྲ་བརྗོད་མེད་པའི་ཟེར་ལ་རོལ་ཅིང་ཐུགས་མི་འགྱུར་བདེ་བའི་དབྱིངས་ནི་རྒྱ་ཁྱོན་མེད་པར་ནམ་མཁའ་དང་འདྲ་བའི་སྐུ་གསུང་ཐུགས་སོ། །དེ་ཅི་ལྟ་བར་རང་བཞིན་ཤེས་པ་ཁ་ཡན་ནམ་མཁའ་དང་མཉམ་པར་རང་བཞག་ན་དེ་ཁོ་ན་ཉིད་ཉམས་སུ་མྱོང་བ་ཡིན་ནོ། །རིས་སུ་མ་ཕྱེ་བར་བཞག་ན་ཡང་དེ་ཁོ་ནའོ། །དོན་དང་ལྡན་པའི་རྣལ་འབྱོར་ལ་ནི་གང་གིས་ཀྱང་མི་འགོག་པའོ། །རང་སྣང་གི་གདངས་ནམ་མཁའ་ལ་ཤར་བ་ནི་གཡོ་བ་དང་ཡིད་ཀྱི་རང་བཞིན་ནོ། །འབྱུང་བ་ལྔ་སོ་སོར་མ་འདྲེས་པ་ནི། དངས་མ་ཆེན་པོ་ལྔའི་རང་བཞིན་ཏེ། ཡེ་ཤེས་ལྔའི་རང་བཞིན་ནོ། །ཡང་དག་པར་རྫོགས་པའི་སངས་རྒྱས་ཀྱི་མི་གནས་པའི་སྐུའི་འོད་ཀྱིས་ཀུན་ལ་ཁྱབ་པ་ནི་ནམ་མཁའི་དངོས་སུ་གསལ་བ་ནི་དེ་ཁོ་ནའོ། །རང་གི་སེམས་ཉིད་ཅི་ལྟར་སྣང་བ་ནི་ནམ་མཁའ་ཁོ་ན་བཞིན་ནོ། །ནམ་མཁའི་ཆོ་འཕྲུལ་ལ་ཅི་ལྟར་ཤར་བ་ཡང་། སེམས་ཉིད་མི་འགག་པའི་ཆོ་འཕྲུལ་དབྱེར་མི་ཕྱེད་པའོ། །བར་སྣང་ཡངས་པའི་རང་བཞིན་ཡང་སེམས་ཉིད་གང་དུ་ཡང་གོ་ཕྱེད་པའོ། །གསུང་སྨྲ་བརྗོད་དང་བྲལ་བའི་རང་བཞིན་ལས་མཚན་མ་མི་འགག་པའི་ཡེ་ཤེས་རོལ་པའོ། །བར་སྣང་ལ་འཇའ་ཚོན་གྱི་རི་མོ་སོ་སོར་གསལ་བ་ཡང་སྐུ་དང་ཡེ་ཤེས་མི་འགག་པའི་རྣམ་འཕྲུལ་ཤར་བའོ། །བདེ་བར་གཤེགས་པའི་སྐུ་གསུང་ཐུགས་ཀྱི་རང་བཞིན་ནི་སེམས་ཅན་གྱི་ལུས་ངག་ཡིད་གསུམ་ཉིད་ལ་ཡིན་དེ་ཉིད་ནི་མཁའ་དང་གོ་མཉམ་པར་འདུག་པའོ། །ཡང་དག་པར་རྫོགས་པའི་སངས་རྒྱས་ཀྱི་སྐུ་ནི་རང་གི་ཤེས་རིག་ཡུལ་དུ་འབྱོར་བ་ལས་བྱུང་བའོ། །འབྱུང་བ་དང་འབྱུང་བ་ལས་བསྐྱེད་པའི་སྐུ་གསུང་ཐུགས་རྣམ་པར་དག་པ་ཐམས་ཅད་དང་རྒྱུད་ལྔ་འཁོར་ཞིང་སེམས་ཅན་ཐམས་ཅད་ཀྱང་ཤེས་རིག་ཡུལ་དུ་སྣང་བ་ལས་བྱུང་བའོ། །སྟོང་གསུམ་མི་མཇེད་མ་ལུས་པ་ཐམས་ཅད་ཀྱང་སྐུ་གསུང་ཐུགས་ཀྱི་རང་བཞིན་ཅིར་ཡང་སྟོན་ཅིང་འཇིག་རྟེན་དང་འཇིག་རྟེན་ལས་འདས་པའི་ཆོས་ཐམས་ཅད་ལ་མངའ་མཛད་ཅིང་ཉིད་ལ་ཉིད་ཀྱིས་ལོངས་སྤྱོད་རྟག་ཏུ་མཛད་པའོ། །མཛད་ཙམ་ཉིད་ན་ཡང་པདྨའིམེཏོགབཞིནནོ། །རིནཔོཆེའཁོར་ལོ་བརྩེགས་པའི་རྒྱུད་ལས། གསང་བ་སྐྱོན་དང་བྲལ་བའི་ལེའུ་སྟེ་བདུན་པའོ།། །།དེ་ནས་ཡང་ཉིད་ཀྱི་ཉིད་རང་བཞིན་གྱིས་ཉིད་ཀྱི་ངོ་བོ་ལས་རིག་པའི་ཡེ་ཤེས་ཀྱི་དོན་བསྟན་པ། ཨེ་མ་ཧོ་ངོ་བོ་བདེ་བ་ཆེན་པོ་རང་རིག་པའི་ཡེ་ཤེས་རང་ལ་ཤར་བ་ལ་ནི་འཛིན་པའི་རླུ་་ལོག་པ་ཞེས་བྱ་སྟེ། གཟུང་འཛིན་དག་པའི་སྐུ་གསུང་ཐུགས་ཞེས་ཀྱང་བྱ་སྟེ། ཡང་དག་པར་རྫོགས་པའི་སངས་རྒྱས་ཀྱི་ཐུགས་མི་རྟོག་པའི་ཡེ་ཤེས་ཀྱི་ཤེས་པ་རང་གསལ་དེ་ཁོ་ནའོ། །རྣམ་པར་གྲོལ་བའི་ཕུང་པོ་ལ་སྐྱེ་བ་མེད་པའི་ཆོས་ཉིད་ཀྱི་ཡེ་ཤེས་སོ། །གཟུང་འཛིན་རྣམ་པར་དག་པའི་ཆོས་ཉིད་དོ། །དེ་ལ་རིག་པ་རླུད་གི་སྙིང་པོ་ཅན་རླུད་ཀུན་ཏུ་འཔྱོ་བའི་ཡིད་ཅན་ནོ། །འཁོར་བ་ཀུན་འདུས་ཀྱི་བདག་ཉིད་ཡོད་པ་དང་སྣོད་བཅུད་ཀུན་གྱི་བདག་ཉིད་དུ་གྱུར་པའོ། །དེ་ཉིད་སྙིང་པོ་རང་ས་ཟིན་པ་ནི། རིག་པ་ཁོང་སྟོང་སྟེ་གར་ཡང་འཇུག་པའི་རྒྱུ་མེད་དེ་ལྷུན་གྱིས་གྲུབ་པའི་རིག་པ་ཞེས་བྱའོ། །ཀུན་གཞི་སྟོང་པས་ཡེ་ཤེས་སུ་གནས་གྱུར་པ་ཞེས་བྱའོ། །སྙིང་པོ་མེད་པའི་ཡེ་ཤེས་ལ་ཆོས་སྐུ་རང་གསལ་ཞེས་བྱའོ། །མེད་པའི་ངང་ལ་སྐུ་དང་ཡེ་ཤེས་སྣ་ཚོགས་ཅིར་ཡང་འབྱུང་བས་ཀུན་ཏུ་ཁྱབ་པ་ཞེས་བྱའོ། །ཨེ་མ་ཧོ་བདེ་བ་ཆེན་པོ་དུས་གསུམ་གྱིབདེབརགཤེགསཔཐམས་ཅད་དང་སྐྱེ་འགྲོ་གཟུགས་སུ་སྣང་བ་ཐམས་ཅད་ནི་ཤེས་པ་ཆོས་སྐུ་རང་གསལ་བ་ལས་མ་བྱུང་བ་གཅིག་ཀྱང་མེད་དེ། དེ་ཕྱིར་རིག་པའི་ཡེ་ཤེས་སུ་མ་གྱུར་པ་གང་ཡང་མེད་པ་ནི་ཀུན་ཏུ་བཟང་པོའི་དགོངས་པ་མེ་ཀློང་ཆེན་པོ་ཞེས་བྱའོ། །ཀུན་ཏུ་སྣང་བར་མཛད་པས། རྣམ་པར་སྣང་མཛད་ཅེས་བྱའོ། །རྣམ་པར་སྣང་མཛད་ཀྱི་ཡེ་ཤེས་ཆེན་པོ་ནི་ཅིར་ཡང་སྤྲུལ་ཞིང་གང་དུ་ཡང་འགྱུར་པས་ཀུན་ཏུ་འགྱུར་བའི་རིག་པའོ། །ཡེ་ཤེས་ལྔ་ལས་གྱུར་པའི་ཆོས་ཉིད་ལ་སྐུ་འགག་པ་མེད་པར་རོལ་པ་ལ་རང་བཞིན་འགྱུར་བ་མེད་པ་ནི། རྟག་པ་ཆེན་པོར་བཞུགས་པའི་ཆོས་ཉིད་དོ། །དབྱིངས་མི་འགྱུར་བ་ལ་ཐུགས་རྗེའི་རོལ་པ་ནི་ཅིར་ཡང་སྣང་བའོ། །སྣང་ཙམ་ན་ཡང་དེའི་རང་བཞིན་ངེས་པ་མེད་པའོ། །རོལ་པ་ཆེན་པོའི་ཆོས་ཉིད་ལ་མཛད་པ་ནི་ཅིར་སྣང་ཡང་སྐུའི་ཆོ་འཕྲུལ་དུ་སྟོན་ལ་མ་ངེས་པའི་ཆོ་འཕྲུལ་ཅིར་ཡང་སྟོན་ནོ། །རོལ་པ་ཆེན་པོའི་ཆོ་འཕྲུལ་གྱི་སྐུ་ཅིར་ཡང་སྣང་བ་ལ་ལོངས་སྤྱོད་ཅིང་རྟག་པར་བཞུགས་པ་ནི་སྤྱོད་ཡུལ་ཐམས་ཅད་དུ་རང་ཤར་བའོ། །འཇིག་རྟེན་པས་བསྡུས་པའི་ཆོས་ཐམས་ཅད་དེ་བཞིན་གཤེགས་པའི་དགོངས་སྤྱོད་རྒྱ་ཆེ་བའི་ཞིང་ངོ་། །སེམས་ལས་མ་བྱུང་བའི་ཆོས་ནི་རྡུལ་ཙམ་ཡང་མེད་དོ། །སྐུ་གསུང་ཐུགས་ཀྱི་སྙིང་པོ་རིག་པ་བྱང་ཆུབ་ཀྱི་སེམས་སོ སེམས་ཅིར་ཡང་སྣང་བའོ། །སྣང་བ་ཉིད་ན་འགོག་པ་མེད་པའོ། །སེམས་ཅིར་ཡང་བསྟན་པའོ། །བསྟན་ཙམ་ཉིད་ན་ཐེར་ཟུག་པ་གང་ཡང་མེད་པའོ། །སེམས་ཟད་མི་ཤེས་པར་བསྟན་པའོ། །བསྟན་ཙམ་ཉིད་ན་ཟད་པའི་རྒྱུ་མེད་པའོ། །ཐེག་པའི་རིམ་པར་བགྲང་བའོ། །དེའི་དོན་བསྟན་པ་ཡང་རིམ་པ་བཞིན་དུ་བསྟན་པའོ། །རིག་པ་ནམ་མཁའ་ལ་ཟད་མི་ཤེས་པར་རོལ་པའི་ཆོ་འཕྲུལ་ནི་རིག་པ་རླུང་ལ་རྒྱུ་བའི་ཆོ་འབྲུལ་ལོ། །དོན་དུ་གང་དུ་ཡང་ཕྱིན་པ་མེད་ཅིང་གང་དུ་ཡང་སོང་བ་མེད་དེ་འདས་པའི་ཡུལ་དུ་ལྟུང་བའི་ས་ནི་རིག་མ་རིག་ངོ་བོ་གཅིག་ལ་རྐྱེན་གཉིས་སོ། །རྐྱེན་གྱུར་ལས་ཀྱང་ཐུགས་རྗེའི་དབང་གིས་ཡུལ་དང་ཡུལ་ཅན་སོགས་ཀྱི་རྐྱེན་གྱིས་མི་ཕྱེ་ཡང་རིག་པའི་ཡེ་ཤེསལ་ལས་དང་ལས་ལས་བྱུང་བ་རང་ཡང་མེད་དེ་རྒྱུ་རྐྱེནལས་ལས་མ་བྱུང་བའི་ཤེས་པ་ཆོས་སྐུ་རང་གསལ་དུ་གདོད་ནས་གནས་པའོ། །དེ་ལས་ཡེངས་པའམ་བརྗེད་པའི་ཚུལ་གྱིས་ནི་འཁོར་བར་འཁྱམས་པ་ཡིན་པ་ལ་དྲན་པའམ་རིག་པའི་ངོ་ཤེས་པའི་ཚུལ་གྱིས་ནི་མྱ་ངན་ལས་འདས་པའོ། །དེ་ཡང་གསལ་བྱེད་ཀྱི་རླུང་དང་སྒྲིབ་བྱེད་ཀྱི་རླུད་རྒྱུ་བ་ཕྲ་མོ་ལས་འགྱུར་བྱེད་ཀྱི་རླུ་་དང་ཤེས་བྱེད་ཀྱི་རླུང་རྒྱུ་བ་སྦོམ་པོར་བྱུང་སྟེ། དེ་ལས་ཞི་བྱེད་ཀྱི་རླུང་དང་རྩུབ་བསྣོལ་གྱི་རླུང་ཆ་རགས་པར་བྱུང་བས་འཁོར་འདས་གྱི་དམིགས་ཕྱེ་སྟེ་རྐྱེན་ནི་རིག་མ་རིག་ཁོ་ནའོ། །རིག་པའི་ཡེ་ཤེས་ཇི་ལྟ་བ་ཐམས་ཅད་མཁྱེན་པ་དང་ཇི་སྙེད་པ་ཀུན་མཁྱེན་པ་ནི་མྱ་ངན་ལས་འདས་པའི་ཡེ་ཤེས་སོ། །ལྷན་ཅིག་སྐྱེས་པ་དང་ཀུན་ཏུ་བརྟགས་པའི་མ་རིག་པ་ནི་དུག་ལྔ་འཁོར་བའི་རྐྱེན་གྱི་རྒྱུའོ། །རྐྱེན་གྱིས་རྐྱེན་བྱས་འབྲས་བུ་སྡུག་བསྔལ་དུ་བྱུང་བ་ནི། ཤིང་རྟའི་འཕང་ལོའམ། ཟོ་ཆུའི་ཁྱུད་མོ་ལྟར་འཁོར་བའོ། །ཨེ་མ་ཧོ་བདེ་བ་ཆེན་པོ་དེས་ན་འཁོར་འདས་ནི་ངོ་བོ་གཅིག་ལ་རྐྱེན་གཉིས་ཁོ་ནའོ། །རང་བཞིན་གཅིག་ལ་སྣང་བ་གཉིས་ཁོ་ནའོ། །མཚན་ཉིད་གཅིག་ལ་ཡུལ་གཉིས་ཁོ་ནའོ། །གཅིག་ཏུ་ཤེས་ན་ཡེ་ཤེས་དེ་ཁོ་ནའོ། །བྱུང་ས་ཤེས་ན་ཕུ་ཐག་ཆོད་པ་ཁོ་ནའོ། །ཕུ་ཐག་ཆོད་ན་འགྲོ་ས་མེད་པའོ། །འགྲོ་ས་མེད་ན་གཡང་ས་བྲལ་བའོ། །གཡང་ས་མེད་ན་འཕོ་འགྱུར་མེད་པའོ། །དེ་ལྟར་ཤེས་ན་རྟག་ཆད་བྲལ་བའོ། །བྲལ་བར་ཤེས་ན་མ་བྲལ་མེད་པའོ། །མ་བྲལ་བ་ཉིད་ན་བྲལ་བ་མེད་པའོ། །བྲལ་དང་མ་བྲལ་ཀུན་ཏུ་ཁྱད་མེད་པའོ། །ཨེ་མ་ཧོ་བདེ་བ་ཆེན་པོ་མི་གནས་པའི་ཆོས་ཉིད་ལ། གཉིས་སུ་འཛིན་པའི་སྒྲོས་མི་གདགས། །འདུ་འབྲལ་མེད་པའི་ཡེ་ཤེས་ལ། །མཁྱེན་དང་མི་མཁྱེན་བསྙད་མི་འདུག །རང་བྱུང་ཡེ་ཤེས་རིག་པ་ལ། །འཁོར་འདས་གཉིས་སུ་བརྟགས་པས་ནོར། །རང་སེམས་ངོ་བོ་ཉིད་ཀྱི་དབྱིངས། །གཟུང་དུ་མེད་པས་ཆུ་ཟླ་འདྲ། །སྣང་ལ་ཞེན་རྟོག་མེད་པས་བདེ། །སྡུག་བསྔལ་བདེ་བ་ཆེན་པོ་ལ། །རྐྱེན་གྱི་ཁྱད་པར་ཉིད་དུ་འགྱུར། །ཞེས་གསུངས་སོ། །རིན་པོ་ཆེ་འཁོར་ལོ་བརྩེགས་པའི་རྒྱུད་ལས།རིག་པ་ཡེ་ཤེས་ཀྱི་ལེའུ་སྟེ་བརྒྱད་པའོ།། །།དེ་ནས་ཡང་ཉིད་ཀྱི་རང་བཞིན་གྱིས་ཉིད་ཀྱི་ངོ་བོ་ལ་གདམས་པའི་དོན་བསྟན་པ། ཨེ་མ་ཧོ་བདེ་བ་ཆེན་པོ་ཆོས་ཐམས་ཅད་རིག་པའི་རྩལ་ལས་མ་བྱུང་བ་ནི་གང་ཡང་མེད་དེ་ནམ་མཁའ་ལ་ཉི་མ་ཤར་བ་དང་འདྲ་སྟེ་འདིར་གསལ་འདིར་མི་གསལ་མེད་པའོ། །དེ་བཞིན་དུ་ལུང་དང་མན་ངག་བལྟ་བསྒོམ་རྣམ་པ་གཉིས་ཀྱི་ཐག་བཅད་ནས་ཐམས་ཅད་དུ་བྱང་ཆུབ་ཀྱི་སེམས་བདེ་བརྡལ་བའི་དོན་དུ་ཁྱབ་གདལ་བའོ། །ཆོས་ཐམས་ཅད་དབྱིངས་མི་འགྱུར་བའི་ཀློང་ན་གབ་པ་དེ་མན་ངག་དང་དགོངས་པ་རྣམ་པར་དག་པས་རང་ལུགས་ཆེན་པོའི་དོན་མངོན་དུ་ཕྱུང་བ་ནི། འཁོར་ལོས་སྒྱུར་བའི་རྒྱལ་པོ་དམུས་ལོང་མིག་པྱེ་བ་བཞིན་ཏེ། སེམས་ཅན་གྱི་ཤེས་པ་ཉིད་མ་བསླད་པའི་ཆོས་ཉིད་དུ་རྟོགས་པ་འཆར་བའོ། །རིག་པ་གང་ལ་ཡང་མ་ཆགས་པར་རང་བྱུང་ཡེ་ཤེས་སུ་ཐོལ་བྱུང་བ་ནི་ངོ་བོ་གཞི་ལ་རིག་པ་ཉིད་ཅིར་ཡང་མི་གནས་པ་ལ། ལམ་ཅན་གྱི་ཆོས་གང་ལ་ཆགས་པ་མེད་དེ་གླང་པོ་ཆེ་སྨྱོན་པ་བཏགས་ན་འཕྲོས་ཤིང་བཏང་ན་འདུག་པ་དང་འདྲ་སྟེ། རིག་པ་བྱང་ཆུབ་ཀྱི་སེམས་བསྡུས་ན་འགྲོ། ཡན་པར་བཏང་ན་རང་ལྡོག་པ་སྟེ་རང་བྱུང་རང་ཤར་མི་འགག་པའོ། །རིག་པ་ཅིར་སྣང་ཡང་གང་ཡང་མི་སྤང་ཐུག་ཕྲད་པ་ནི། རིག་པའི་གཞི་རང་སར་གྲོལ་བ་ལ་རྐྱེན་ཐམས་ཅད་སྐུལ་མར་ཤེས་ན་མེ་འབར་བ་ལ་ཤིང་བསྣན་པ་ལྟ་བུའོ། །ངོ་ཤེས་པའི་མི་དང་འཕྲད་པས་ཐེ་ཚོམ་མི་ཟ་བ་བཞིན་དུ་དྲན་པ་དང་རིག་པ་ཅི་འགྱུས་པ་ཐམས་ཅད་ཡེ་ཤེས་ཟང་ཐལ་ཆོས་ཉིད་ཐུག་ཕྲད་དགག་བསྒྲུབ་མེད་པའི་རིག་པ་ལ་བཏང་གཞག་མེད་པར་ཅོག་གིས་གཞག་པ་ནི། གཞི་གང་ལའང་མ་ཞེན་རང་གསལ་བར་སྣང་བ་ལ་དེ་ཆེད་དུ་བྱེད་པའི་རྩོལ་བ་མ་ཞུགས་ཏེ། རྒྱ་མཚོ་དངས་པའི་ནང་ན་སྣང་སྲིད་གསལ་བ་དང་འདྲ་སྟེ་དྲན་པ་དང་རིག་པ་མ་བཀོད་བཞིན་དུཅིར་ཡང་གསལ་བ་ལ་མིང་འདི་ཞེས་གདགས་སུ་མེད་པའོ། །རིག་པ་ནམ་མཁའི་བྱ་ལམ་དང་འདྲ་བ་ལ་བཙལ་བས་རྗེས་མེད་པ་ནི། བཙལ་བར་བྱ་བའི་ཡུལ་རང་གི་སེམས་ཉིད་ཡིན་ལ་རྩོལ་བར་བྱེད་པའི་སྒོ་སེམས་ཉིད་གཞན་ལ་བརྟེན་པ་ལྟར་བྱསནས། བཙལ་བས་རྗེས་མེད་པ་ནི་ཁྱི་རྐུན་གྱིསཁང་སྟོང་བཙལནས་བཟའ་རྒྱུ་ཅང་མི་རྙེད་པ་བཞིན་རང་གི་སེམས་ཤེས་པ་ཁ་ནང་དུ་ལྡོག་ནས་བཙལ་བས་ཅིར་ཡང་མ་མཐོང་ལ་མིང་གར་ཡང་མཐོགས་ཏེ་གདགསགཞིདང་བྲལབའོ། །རག་པདངོས་མཚོན་དང་བྲལ་ལགང་དུ་ཡང་དམིགས་པ་རྗེས་མེད་པ་ནི་དམིགས་པའི་ཡུལ་མཚན་བཅས་དང་མཚན་མེདལ་ནི་དམིགས་པར་བྱེད་པའི་ཐབས་ཤེས་པ་གཏད་པས་དྲན་པའི་རྗེསམེད་པ་ནི་གང་ཡང་རུང་བ་ལ་དགག་གཞིདང་བྲལ་བ་མིག་འབྲུ་ཚུགས་སུ་ཏ་རེ་བལྟས་པས་ཐོག་མར་མཐོང་ལ་ཐ་མར་མི་གསལ་བ་སྟེ། མིག་ནད་ཅན་གྱི་རྒྱངམིག་ལྟ་བུ་སྟེ་དམིགས་གཏད་གང་ཡང་མེད་པའོ། །སེམས་ཉིདའདི་ཁོ་ན་ཅིལྟར་ཡང་བསྒྱུར་དུ་བཏུབ་པ་ནི། རྟོད་ཕུར་དུ་གཟུང་བར་བྱ་བའི་རྟེན་དམིགས་བཅས་ལ་འཛིན་པར་བྱེད་པའི་ཐབས་ཤེས་པ་གཏད་པས་མི་འཕྲོ་བ་ནི་ཁྱི་སར་གདུང་ལ་བཏགས་པས་འགྲོ་མི་ཤེས་པ་བཞིན། མཚན་བཅས་དང་མཚན་མེད་ལ་སེམས་བཟུང་བས་གང་དུ་ཡང་མི་འགྱུ་བ་སྟེ་ཤེས་པ་བཙོན་དུ་བཟུང་བས་ཐིག་ལེ་འཁྱིལ་བའི་དོན་ལ་རོ་སྙོམས་པའོ། །ཨེ་མ་ཧོ་ངོ་བོ་བདེ་བ་ཆེན་པོ་ལ་གདེང་ལྔ་དོན་ཐོག་གཅིག་ཏུ་དྲིལ་བ་ནི། རིག་པའི་རྩལ་གྱིས་ནི་ཅིར་སྣང་སེམས་ཉིད་རང་སྣང་བར་གདེང་གིས་ཟིན་པ་དང་ཐུག་ཕྲད་ཀྱིས་ནི་སྣང་སྲིད་གྲག་ཚད་ཐམས་ཅད་ཆོས་ཉིད་དུ་རང་ཤར་བའི་གདེང་གིས་ཟིན་པ་དང་། གབ་པ་མངོན་དུ་ཕྱུང་བས་ནི་ཆོས་སྐུ་རང་ཤར་བའི་གདེང་གིས་ཟིན་པ་དང་ཡེ་ཤེས་ཟང་ཐལ་གྱི་རིག་པ་ནི་ཤར་ཡང་ངོས་བཟུང་མེད་པར་གདེང་གིས་ཟིན་པ་དང་། ལྷུན་གྲུབ་ཅོག་བཞག་གིས་ནི་ངོས་བཟུང་རང་སར་གྲོལ་བར་གདེང་གིས་ཟིན་པ་སྟེ། དོན་ཀུན་ཏུ་བཟང་པོའི་དགོངས་པ་ཆོས་སྐུ་རང་གསལ་གྱི་འབྲས་བུར་རང་གྲོལ་བའོ། །ཨེ་མ་ཧོ་ངོ་བོ་བདེ་བ་ཆེན་པོ་ཚོལ་བ་རྗེས་མེད་ཀྱིས་གང་དུ་ཡང་མ་རྙེད་པ་དངོས་པོ་མེད་པའི་གདེང་ངོ་། །དམིགས་པ་རྗེས་མེད་ཀྱིས་གང་དུ་ཡང་མ་དྲན་པ་འཛིན་པ་དང་བྲལ་བའི་གདེང་སྟེ། རྟོད་ཕུར་གྱིས་གང་ཡང་རུང་བ་ལ་ཟིན་པ་ནི། ཉམས་མྱོང་ཡིད་ཆེས་པའི་གདེང་ཡིན་ཏེ་གདེང་གསུམ་དབྱེར་མེད་པ་ནི་ཀུན་ཏུ་བཟང་པོའི་དགོངས་པ་སྟེ། གདེང་ལྔ་དོན་གྱི་ཐོག་ལས་གང་དུ་ཡང་མ་གཡོས་པའོ། །དགོས་ཆེད་དམིགས་པ་སྦྱོར་སོ་དང་། ཡིད་ཆེས་དང་། ཐག་ཆོད་དང་། ལ་བཟླ་དང་། ཤན་འབྱེད་རང་གྲོལ་དོན་ལ་སྦྱོར་བ་ནི་འཁོར་ལོ་གཏིང་གི་གནད་ལ་བརྡེག་པའོ། །རིན་པོ་ཆེ་འཁོར་ལོ་བརྩེགས་པའི་རྒྱུད་ལས། གདམས་པའི་ལེའུ་སྟེ་དགུ་པའོ།། །།དེ་ནས་ཉིད་ཀྱི་རང་བཞིན་གྱིས་ཉིད་ཀྱི་ངོ་བོ་ལ་སེམས་ཉིད་ཡེ་ཤེས་སུ་འཆར་བའི་དོན་བསྟན་པ། སྣང་ཞིང་སྲིད་པའི་ཆོས་སུ་ཤར་བ་ཀུན་ཐམས་ཅད་རང་གི་ཡེ་ཤེས་ཀྱི་འབྱུང་འཇུག་ལ་འདུས་སོ། །འབྱུང་བ་ནི་སྣང་སྲིད་ལ་འཇུག་པ་ནི་ཐམས་ཅད་སེམས་ཀྱི་རང་བཞིན་ནོ། །སེམས་ཀྱི་སྟོབས་ལས་སངས་རྒྱས་ཀྱི་ཞིང་དུ་མ་བསྐྱེད་ནུས་སོ། །སྐུ་མི་ཟད་པ་རྒྱན་གྱི་འཁོར་ལོ་དང་། གསུང་མི་ཟད་པ་རྒྱན་གྱི་འཁོར་ལོ་དང་། ཐུགས་མི་ཟད་པརྒྱན་གྱི་འཁོར་ལོའི་མཛོད་ཆེན་པོའིརིག་པལ་ཟད་མི་ཤེས་སོ། །རིག་པ་ནི་ནོར་བུ་བརྩེགས་པའི་ཁང་བཟངས་ནས་ངེས་པའི་དོན་དང་། དོན་མ་ཡིན་པ་ཐམས་ཅད་མ་བཙལ་བར་བྱུང་བའོ། །ཀུན་ལ་ཁྱབ་པས་ནམ་མཁའ་ལྟ་བུ་རིས་མེད་པ་ལས་དངོས་པོ་ཐམས་ཅད་སྒྱུ་མའི་གཟུགས་བརྙན་བཞིན་གསལ་ལ་ངེས་པ་མེད་པའོ། །ཕྱི་ནངམེད་པའིགཞལ་ཡས་ཁང་ཀུན་ཏུ་ཡངས་ཤིང་རྒྱ་ཆེ་བ་ནི། ཡེ་ཤེས་རང་སྣང་གི་ཡུལ་སྣང་བ་དག་པའི་ཞིང་རྡུལ་སྙེད་སངས་རྒྱས་ཀྱི་གཟུགས་བརྙན་དུ་བྱུང་བ་ཡང་རང་སྣང་དག་པའི་སྐུའི་དཀྱིལ་འཁོར་རོ། །འདོད་ཡོན་རིས་མེད་དུ་ཤར་བ་མ་སྤངས་པ་ནི་གསང་སྔགས་ཐབས་ཀྱིས་ཟིན་པས་ཉེ་ལམ་དུ་འདུག་པའོ། །མ་དག་པའི་སྐྱོན་དང་བཅས་པའི་དམན་པ་ཐམས་ཅད་ཀྱང་རང་གི་ལམ་ལ་དགོངས་ཏེ་དོར་བར་མི་བྱའོ། །བླང་དོར་མེད་པ་ཉིད་ཆོས་རྣམས་ཀྱི་ནང་ནས་མཆོག་དང་ཕུལ་དུ་བྱུང་བའོ། །བྱང་ཆུབ་སེམས་ཀྱི་རང་བཞིན་ནི་ཡོངས་སུ་རྒྱ་ཆེ་བའོ། །ནམ་མཁའ་བཞིན་དུ་ཚད་གཟུང་དུ་མེད་དོ། །དབྱིབས་བརྟགས་པས་མི་རྟོགས་སོ། །ཁ་དོག་གསལ་བར་མི་མཐོང་སྟེ། །དོན་དཔག་པས་མི་དཔོག་གོ། །ཐམས་ཅད་ཀྱི་དངོས་གཞི་ཡིན་པས་མཚོན་བརྗོད་ཀྱིས་འདི་ཁོ་ནར་བརྗོད་པར་མི་ནུས་ཏེ་བརྗོད་པ་ཐམས་ཅད་རང་ལ་རང་སྨྲས་པའོ། །སྨྲ་བརྗོད་མེད་པ་ཉིད་ལས་མཚོན་ཚུལ་གྱི་སྒོ་མི་འགག་པ་ནི་ཐམས་ཅད་ཀྱི་དངོས་པོའོ། །སངས་རྒྱས་ཐམས་ཅད་ཀྱི་མཐར་ཐུག་ཡེ་ཤེས་ཀྱང་བྱང་ཆུབ་ཀྱི་སེམས་ཀྱི་གསང་བ་དམ་པའོ། །ཐུགས་ཅིར་ཡང་སྤྲུལ་པའི་ཆོ་འཕྲུལ་གྱིས་ངོ་བོ་ཉིད་ལ་ཆོས་ཀྱི་འཁོརལོ་བསྐོར་བའོ། །འཁྲུལ་པར་སྣང་བ་ཡང་གཡེངས་པའི་ཚུལ་གྱིས་འཁོར་ལ་འཁོར་བ་ཉིད་ཀྱང་ཆོས་ཉིད་ལ་འཁོར་ཞིང་ཡེ་ཤེས་ལ་གནས་པའོ། །ཡང་དག་པར་རྫོགས་པའི་སངས་རྒྱས་ཀྱི་སྐུ་གསུང་ཐུགས་ཀྱང་སེམས་ཀྱི་ཆོ་འཕྲུལ་དུ་རང་ཤར་བ་ལས་མ་རྟོགས་པའི་ལས་དང་ཉོན་མོངས་པ་རང་རྒྱུད་པའི་མིང་ཡང་གདོད་ནས་མེད་དོ། །སེམས་ཅན་སྐྱེ་འགུལ་ཅི་འཁྲུངས་ཡང་སངས་རྒྱས་ཉིད་ཀྱི་སྲས་ཡིན་པས་སེམས་ཅན་བྱ་བའི་མིང་གི་གདགས་གཞི་ཡིན་ནོ། །ཐམས་ཅད་ཆོས་ཀྱི་སྐུ་དང་རང་བྱུང་ཡེ་ཤེས་འབའ་ཞིག་ལ་མ་དག་པའི་སྒོ་བཙལ་དུ་གང་ནས་ཀྱང་མི་རྙེད་པའོ། །ཟག་པ་མེད་པའི་བདེ་བ་ཆེན་པོའི་རོ་ཡང་ཀུན་ལ་སེམས་ཉིད་དུ་ཡོད་པའོ། །མྱང་བ་དང་མ་མྱངས་པའི་ཁྱད་པར་ཀྱང་སེམས་ཉིད་རང་རིག་གིས་ཕྱེ་བའོ། །འཁོར་བ་དང་སྡུག་བསྔལ་ཡིན་པར་ཤེས་པས་མི་ལེན་མི་སྤང་་བའོ། །དེ་ཉིད་བཀྲུས་པས་ཀྱང་མི་འདག་ལ་སྤངས་ཀྱང་མི་སྤོང་སྟེ་ནམ་མཁའ་ཉིད་དོ། །རྩེ་གཅིག་སངས་རྒྱས་ཀྱིས་ཕུན་སུམ་ཚོགས་པ་ཡང་དབྱེ་བ་མེད་པའི་ས་འདི་ཉིད་དོ། །སེམས་ཉིད་ཀྱི་ཆ་ལུགས་ནི་ཅིར་ཡང་སྟོན་ཅིང་ཆ་ལུགས་ཐམས་ཅད་པ་སྟེ་སྣ་ཚོགས་ནོར་བུ་རིན་པོ་ཆེ་ལྟ་བུའོ། །སེམས་ཅན་ཐམས་ཅད་ཀྱི་སེམས་ཉིད་ཁོ་ན་སངས་རྒྱས་ཀྱི་ཐུགས་དང་དབྱེར་མེད་དོ། །དེ་ཉིད་གནས་གང་དུའང་གནས་པ་ལ་ཆགས་གང་དུའང་མ་ཆགས་པའོ། །དབྱིབས་དང་ཁ་དོག་གང་དུ་ཡང་མི་གནས་ཤིང་ཅིར་ཡང་སྟོན་པ་ནི་ནོར་བུ་ཆུ་དངས་དངོས་ལྟ་བུ་སྟེ། རིན་པོ་ཆེ་ཉིད་ལྟར་སྣང་ཡང་རིན་པོ་ཆེ་ཁོ་ན་སྟེ། །སེམས་ཉིད་གང་དུ་ཤར་ཡང་གཅིག་པོ་ཁོ་ན་ཀུན་འཆར་བའོ། །ཨེ་མ་ཧོ་བདེ་བ་ཆེན་པོ། ཤར་ནུབ་མེད་པའི་ཉི་མ་ལ། །རང་བྱུང་ཡེ་ཤེས་འོད་དུ་འབར། །རང་འོད་རང་ལ་བསྒྲིབ་སྟེ་མཆིའོ། །དག་པར་ལྷོས་ཤིག་བདེ་བ་ཆེ། །མཐོང་བ་མེད་ན་རྣམ་པར་གྲོལ། །མཐོང་རྒྱུ་བྱུང་ན་ཡ་མཚན་ཆེ། །མཐོང་མེད་མཐོང་ན་མཐོང་བ་ཡིན། །བགྲོད་དང་བྲལ་ཕྱིར་གང་ཡང་མིན། །ཞེས་གསུངས་སོ། །རིན་པོ་ཆེ་འཁོར་ལོ་བརྩེགས་པའི་རྒྱུད་ལས། སེམས་ཉིད་ཡེ་ཤེས་སུ་ཤར་བར་བསྟན་པའི་ལེའུ་སྟེ་བཅུ་པའོ།། །།དེ་ནས་ཡང་ཉིད་ཀྱི་རང་བཞིན་གྱིས་ཉིད་ཀྱི་ངོ་བོ་ལ་སྣང་བ་མི་འགོག་པའི་དོན་བསྟན་པ། ཨེ་མ་ཧོ་ངོ་བོ་བདེ་བ་ཆེན་པོ་ཆོས་ཐམས་ཅད་ཡང་དག་པར་རྫོགས་པའི་སངས་རྒྱས་ཀུན་ཏུ་བཟང་པོའི་ཐུགས་ལས་བྱུང་ཞིང་ཐུགས་ཀྱི་སྒྲོན་མ་རིན་པོ་ཆེའི་བྱུང་ཁུངས་སོ། །ཐུགས་ཡེ་ཤེས་ཀྱི་རང་བཞིན་མི་ཟད་པའི་མཛོད་དོ། །སྟོང་གསུམ་གྱི་སྟོང་འཇིག་རྟེན་གྱི་ཁམས་མཐའ་ཡས་མུ་མེད་པ་ཟད་མཐའི་ཡུལ་དང་བྲལ་བའོ། །སྟོང་གསུམ་མི་མཇེད་ཀྱི་ཁམས་ཐམས་ཅད་སྟོངས་པའི་དུས་མེད་པ་ཡང་ཀུན་ཏུ་བཟང་པོའི་སེམས་ཉིད་འཕོ་འགྱུར་དང་བྲལ་བའོ། །རིན་པོ་ཆེ་ཙིརྟི་བརྩེགས་པའི་གའུ་ནས་ཕྱི་ནང་སྣོད་བཅུད་ཀྱི་ཆོས་ཐམས་ཅད་དངས་མ་ཆེན་པོའི་རང་བཞིན་དུ་གསལ་བའོ། །དེ་ཉིད་ཀྱི་རང་བཞིན་ནི་ཀུན་ལ་གསལ་བར་འབྱུང་བ་ནི། མངོན་སུམ་དུ་གསལ་བ་འདི་གའོ། །ཡང་དག་པར་རྫོགས་པའི་སངས་རྒྱས་ཀྱི་སྐུ་དང་གསུང་དང་ཐུགས་ཉིད་ལ་མ་གཏོགས་པར་སྲིད་པ་གསུམ་གྱི་ཆོས་གཞན་ནི་མེད་དོ། །འགྲོ་བ་རྣམས་ཀྱི་དོན་སོ་སོར་ཅི་ལྟ་བར་གསལ་བར་གོ་བ་ནི། དེ་བཞིན་གཤེགས་པ་རྣམས་ཀྱི་ཡེ་ཤེས་སོ། །གསུང་མི་ཟད་པ་ལས་སྣང་བ་ནི་སྒྲ་སྐད་ཅི་ལྟར་ཡང་གྲགས་པ་དང་ཚིག་དང་ཚིག་མིན་མང་པོ་རྣམས་ལ་གསུང་མི་ཟད་པའི་ཡན་ལག་གིས་ཁྱབ་ཅིང་གསུང་དུ་མ་གྱུར་པ་དང་དབྱངས་མ་ཡིན་པ་གཅིག་ཀྱང་མེད་དོ། །སྣ་ཚོགས་སུ་གསལ་ཡང་གཉིས་སུ་མེད་པའི་ཡེ་ཤེས་གཅིག་ཁོ་ནའོ། །གཅིག་པུ་རང་ཁོ་ན་ལས་མི་གཡོ་བར་གསལ་བ་ནི་མི་དམིགས་པའི་བསམ་གཏན་ནོ། །སེམས་ཉིད་མི་གཡོ་བ་ནི་གཡོ་བའི་ཡུལ་མེད་པས་སོ། །ཡུལ་མེད་ལ་ཡུལ་སྣང་དུ་སྣང་བ་ནི། བྱང་ཆུབ་ཀྱི་སེམས་སྤྱོད་ཡུལ་དང་བྲལ་་བའོ། །རིས་མེད་པའོ། །ཁྱབ་གདལ་བའོ། །གཟུང་འཛིན་དང་བྲལ་བའོ། །རྣམ་རྟོག་དང་ཀུན་བརྟགས་ཀྱིས་མ་བསླད་པའི་ཆོས་ཉིད་ནི་སེམས་ཉིད་དག་པའོ། །རྟོག་པའི་མཚན་མ་ཐམས་ཅད་སྤངས་ཤིང་མ་འདྲེས་པ་ལ་ཀུན་ཏུ་དབྱེར་མེད་པར་ས་ལེར་གསལ་བ་ནི་དགོངས་པ་ཡངས་དོག་མེད་པའི་ཀླུང་ངོ་། །གཟུགས་ལ་སོགས་པ་སྣ་ཚོགས་སུ་སྣང་བ་ཐམས་ཅད་ནི་སེམས་ཉིད་མི་འགག་པའི་ཡེ་ཤེས་ཤར་བ་སྟེ་རང་བྱུང་ཡེ་ཤེས་ལ་ནི་སྣ་ཚོགས་སུ་ཤར་ཡང་དབྲི་བསྣན་མེད་པའོ། །ཡེ་ཤེས་གཟུགས་ཅན་མ་ཡིན་པ་ནི་དངོས་པོ་ངོ་བོ་ཉིད་ཀྱིས་སྟོང་པས་རྒྱུ་རྐྱེན་མེད་པའོ། །ངོ་བོ་ཉིད་འདི་ཞེས་བྱ་བའི་མཐའ་ལས་འདས་པས་གང་གི་ངོ་བོར་ཡང་མ་གྲུབ་པ་སྟེ། ཡང་དག་པར་རྫོགས་པའི་སངས་རྒྱས་ཉག་གཅིག་གི་སྐུ་རུ་གནས་པས་བཅོས་སུ་མེད་པ་མཐའ་ཐམས་ཅད་དང་བྲལ་བ་ཀུན་ལ་ཁྱབ་ཅིང་ཡེ་ནས་བརྡལ་བ་མཚོན་ཅིང་བརྗོད་ལས་འདས་པ་འཛིན་རྟོག་རྣམ་པ་གཉིས་དང་བྲལ་ཞིང་ངོ་བོ་ཉིད་ཀྱིས་རྣམ་པར་དག་པའི་དོན་གྱི་མཆོག་གོ། །རིན་པོ་ཆེ་འཁོར་ལོ་བརྩེགས་པའི་རྒྱུད་ལས། སྣང་བ་མི་འགོག་པའི་ལེའུ་སྟེ་བཅུ་གཅིག་པའོ།། །།དེ་ནས་ཉིད་ཀྱི་རང་བཞིན་གྱིས་ཉིད་ཀྱི་ངོ་བོ་ལ་ཐིག་ལེའི་དོན་མན་ངག་གཅོད་པའི་དོན་བསྟན་པ། །གཞི་གཅིག་ཐིག་ལེ་ཆེན་པོ་ལ། །མཐོང་སྣང་བསམ་གྱིས་མི་ཁྱབ་ཀྱང་། ལོག་པར་མཐོང་བ་དང་།ཕྱོགས་སུ་མཐོང་བ་དང་། མ་རྟོགས་པ་དང་། ཡང་དག་པའི་སྣང་བའོ། །ལྷུན་གྱིས་གྲུབ་པ་དང་ཕྱོགས་གཅིག་པ་རྣམས་ནི་ཕྱོགས་ཆས་འདོད་པའི་བློ་ཙམ་མོ། །གཞིའི་ངོ་བོ་དོན་བདག་ཉིད་ལྷུན་གྱིས་གྲུབ་པ་ངེས་པ་མེད་ཅིང་གཉིས་སུ་མེད་ཅིང་རང་གྲོལ་བ་ནི་དོན་གཏན་ལ་ཕབས་པའོ། །གཞི་ལམ་འབྲས་བུ་སེམས་གནས་པ། གཡོ་བར་སྨོན་པ། འཇུག་པར་སྨོན་པ། བྱང་ཆུབ་སེམས་ཀྱི་དོན་ལ་སྦྱོར་བའོ། །མ་སྐྱེས་པ་དང་། མི་འགག་པ་དང་། མི་མཉམ་པ་དང་། རང་གྲོལ་བ་ནི་རང་བཞིན་དང་། རོལ་པ་དང་། མཚན་ཉིད་ཀྱིས་དངོས་སུ་གྲོལ་བའོ། །གོལ་བར་བྱ་བའི་གཞི་དང་། གོལ་བ་རང་གི་རྐྱེན་གྱིས་དང་། འདོད་པ་གོང་འོག་ཏུ་སུན་འབྱིན་པ་དང་། རང་བྱུང་ཡེ་ཤེས་སུ་ལ་བཟླ་བ་ནི་དོན་གྱི་གཟེར་གདབ་པའོ། །སྣང་ཞིང་སྲིད་པས་བསྡུས་པའི་ཆོས་ཐམས་ཅད་ནི། སངས་རྒྱས་ཀྱི་ངོ་བོ་ཉིདདེདེབཞིནཉིདཀྱིསྙིངཔོ་ཡིན་ནོ། །སྣང་ཞིང་སྲིད་པས་བསྡུས་པ་ཕྱི་ནང་གཉིས་སུ་མེད་པ་ཐམས་ཅད་ལ་གདོད་མ་ནས་སངས་རྒྱས་ཉིད་དུ་ཤེས་པ་ན་གོལ་མ་གོལ་གཉིས་སུ་མེད་དེ་གཡང་ས་ཆོས་ཉིད་དུ་གྲོལ་བའོ། །ཆོས་ཉིད་རྒྱུ་རྐྱེན་ལས་མ་བྱུང་བའི་དོན་ནི་སྐྱེ་ཤི་དང་བྲལ་ལོ། །དེ་ཉིད་ལ་རྩོལ་སེམས་དང་རྣམ་པར་རྟོག་པའི་མཚན་མས་ནི་གང་དུ་ཡང་བསླད་དུ་མེད་པའོ། །འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་སེམས་ཉིད་རང་བྱུང་གི་ཡེ་ཤེས་ལ་ཅི་ལྟ་བར་རྫོགས་པ་ནི་སེམས་ཉིད་འཁོར་འདས་གཉིས་ལ་ཆེ་བའི་དོན་ཡིན་ནོ། །ཆོས་ཐམས་ཅད་ཐིག་ལེ་བྱང་ཆུབ་ཀྱི་སེམས་ལ་སྡུད་པ་ནི། སེམས་ཉིད་ཀྱི་ངོ་བོས་ཀུན་ལ་ཁྱབ་པར་གནས་པའོ། །ཁྱབ་བཞིན་ཏུ་གཞན་དུ་སྤྲོས་པ་གང་ཡང་མེད་པའོ། །རང་གི་བྱང་ཆུབ་ཀྱི་སེམས་མ་བཅོས་པའི་རང་བཞིན་ནི་དོན་གྱི་རྣལ་འབྱོར་ཆེན་པོ་ཞེས་བྱའོ། །སེམས་ཀྱི་རྩོལ་བསྒྲུབ་ལས་འདས་པ་ནི། གནད་དུ་སྐྱེལ་བའི་རིག་པ་ཞེས་བྱའོ། །འགགས་དང་མ་འགགས་ལ་རག་ལས་པ་ལས་ཀུན་གྱི་སྦྱོད་ཡུལ་མ་ཡིན་ནོ། །རིག་པ་ཕྱི་ནང་མེད་པར་འོད་གསལ་བ་ནི། ཀུན་གཞི་འཕྲུལ་གྱི་མེ་ལོང་ཞེས་བྱའོ། །སེམས་ཉིད་གང་གི་མཐའ་ལ་ཡང་གནས་པ་མེད་ཅིང་འགྱུར་བ་མེད་པ་ནི་རང་བྱུང་གི་ཡེ་ཤེས་མི་བསྐྱོད་པའི་དབྱིངས་ཆེན་པོ་ཞེས་བྱའོ། །བགྲོད་ཅིང་ལམ་ལ་བཙལ་ཀྱང་རང་བཞིན་གྱི་དོན་ལས་གོང་དུ་ཡང་འདའ་བ་མེད་པ་བདེ་བ་ཆེན་པོར་ཤེས་ན་གོལ་ས་དང་སྒྲིབ་པར་མི་འགྱུར་རོ། །ཀྱེ་ངོ་བོ་ཉིད་ཀྱིས་སྟོང་པ་ཆེན་པོ་རོལ་པ་སྐྱེ་བའི་ཆོ་འཕྲུལ་སྣ་ཚོགས་སུ་སྣང་བ་བདེ་ཙམ་ན་གབ་པ་མངོན་དུ་ཕྱུང་བའི་ཡེ་ཤེས་ཟང་ཐལ་དུ་ཐུག་ཕྲད་པའོ། །དེ་ཉིད་ཆོས་ཐམས་ཅད་སེམས་ཉིད་དུ་མ་འགགས་པ་ལ་མ་ཞེན་ན་སྣང་བ་རང་སར་བཞག་པའོ། །ཡང་དག་པར་རྫོགས་པའི་སངས་རྒྱས་སྔོན་འདས་པ་ཐམས་ཅད་ཀྱི་གཤེགས་ཤུལ་ཀྱང་བྱང་ཆུབ་ཀྱི་སེམས་རང་གི་ཡེ་ཤེས་སོ། །ད་ལྟར་བཞུགས་པའི་སངས་རྒྱས་དང་། འགྲོ་བ་རིགས་དྲུག་གི་སེམས་ཅན་ཐམས་ཅད་ཀྱང་ཆོས་སྐུ་རང་གསལ་གྱི་དབྱིངས་ནས་ལོངས་སྒྲོད་ལ། མ་བྱོན་པའི་རྒྱལ་བ་དང་འགྲོ་བ་ཐམས་ཅད་ཀྱི་ལམ་དུ་ཡང་རིག་པའི་རླུད་སྒོ་ཆེན་པོ་ཉིད་བདེ་བའོ། །ཞེས་གསུངས་སོ། །རིན་པོ་ཆེ་འཁོར་ལོ་བརྩེགས་པའི་རྒྱུད་ལས། ཐིག་ལེའི་དོན་མན་ངག་གིས་གཅོད་པའེ་ལེའུ་སྟེ་བཅུ་གཉིས་པའོ།། །།དེ་ནས་ཉིད་ཀྱི་རང་བཞིན་གྱིས་ངོ་བོ་ཉིད་ལས་དབྱེར་མི་ཕྱེད་པའི་འཁོར་ལ་རྒྱུད་གཏད་པ་འདི་གསུངས་སོ། །ཨེ་མ་ཧོ་འདུས་པའི་ཚོགས་ཆེན་པོ་རང་རང་གི་རང་བཞིན་བསྟན་པའི་རྒྱུད་ཆེན་པོ་འདི་ཟུང་ཞིག །བྱང་ཆུབ་ཀྱི་སེམས་འཁོར་ལོ་བརྩེགས་པ་འདི་ཉིད་དུ་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་དང་། །སྟོན་པའི་རང་བཞིན་ཀུན་ཏུ་བཟང་པོ་དང་། ངོ་བོ་རྡོ་རྗེ་སེམས་དཔའ་ལས། བསྟན་པ་ཆོས་ཉིད་བྱང་ཆུབ་སེམས་སུ་བསྟན་པ་ཡིན་པའི་ཕྱིར་འཁོར་དུ་གཏོགས་པ་རྣམས་ཀྱིས་ངའི་བསྟན་པའི་རྒྱུད་འདི་ནི་མ་བཏང་བར་ཟུང་ཞིག །ཆོས་ཐམས་ཅད་ཀྱི་སྙིང་པོ་ཡིན་ནོ། །བསྟན་པ་ཐམས་ཅད་ཀྱི་རྒྱལ་པོ་ཡིན་ནོ། །གསུང་རབ་ཐམས་ཅད་ཀྱི་ཉིང་ཁུ་ཡིན་