Ngb-pt-0137-vol-02-text
Front
Body
འདིརཐིགལེརྒྱམ་གན་པལཅག་པའིརྒྱུདདང། །བངམཛོད་ཝལགྱིལྡེམིགལེའུམེད་པ་ལཛུད། རྒྱ་གར་སྐད་དུ། བོ་དྷི་ཙིརྟི་ཨུ་པ་དེ་ཤ་རཏྣ་མུ་ལྭ། ཕེ་ཊ་ཀ་ཀོ་ཥ་ཀུསྨྱི་ཀྭ་ནཱ་མ། བོད་སྐད་དུ། བྱང་ཆུབ་སེམས་ཀྱི་མན་ངག་རིན་པོ་ཆེའི་ཕྲེང་བ་བང་མརྫོད་འཕྲུལ་གྱི་ལྡེ་མིག་ཅེས་བྱ་བ། བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། འོག་མིན་གྱི་གནས།ཆོས་ཀྱི་དབྱིངས་ཀྱི་ཕོ་བྲང་། མཁའ་ཀློང་ཡངས་པའི་གནས། རྒྱ་ཡོངས་སུ་མ་ཆད་པ་ན། བཅོམ་ལྡན་་འདས་གསང་བའི་བདག་པོ་དེས། འཁོར་སངས་རྒྱས་དང་སེམས་ཅན་ཡི་དགས་དང་། འདྲེ་སྲིན་ལ་སོགས་པ་འབྱེད་པ་མེད་པའི་འཁོར་གྱིས་བསྐོར་ཏེ། བྱང་ཆུབ་ཀྱི་སེམས་རྣམ་པར་འགྲེལ་ཅིང་། དུས་གསུམདུཅིབཞིནཔརབཞུགས་སོ། །དེ་ནས་སེམས་དཔའ་རྡོ་རྗེ་ལ་སོགས་པ་འདུས་པའི་འཁོར་ཚོགས་རྣམས། དང་བའི་སེམས་ཀྱིས་ལུས་བཏུད་དེ། དགའ་བའི་མདངས་ཕྱུང་ནས། བཅོམ་ལྡན་འདས་ཀྱི་དྲུང་དུ་ཅང་མི་སྨྲ་བར་འཁོད་དོ། །གསང་བའི་བདག་པོས་འཁོད་པ་མཁྱེན་ནས། ཀྱེ་སེམས་དཔའ་ཆེན་པོ་ཉོན་ཅིག །ཁྱོད་ལ་སོགས་པའི་འཁོར་རྣམས་ཀྱིས། །དད་པའི་སེམས་ཀྱིས་ལུས་བ་་དེ། །དགའ་བའི་མདངས་ཀྱིས་འཁོད་པ་དེ། །འདོད་པའི་དོན་ནི་སྒོ་སོལ་ཅིག །ཅེས་གསུངས་སོ། །དེ་ནས་སེམས་དཔའ་རྡོ་རྗེ་འཁོར་གྱི་ནང་ནས་ལངས་ནས། གསང་བའི་བདག་པོ་ལ་འདི་སྐད་ཅེས་གསོལ་ཏོ། །ཀྱེ་ཀྱེ་གསང་བའི་བདག་པོ་ལགས། །ཆོས་ཉིད་བྱང་ཆུབ་སེམས་ཀྱི་དོན། །བདག་ཅག་རྣམས་ལ་བསྟན་དུ་གསོལ། །ཞེས་གསོལ་ཏོ། །གསང་བའི་བདག་པོས་གསུངས་པ། ཀྱེ་སེམས་དཔའ་ཆེན་པོ་ཉོན་ཅིག །ཆོས་ཉིད་དོན་གྱི་ངོ་བོ་དེ། །ཚིག་དང་ཡི་གེ་ལས་འདས་ཤིང་། །བརྗོད་པས་ཐོག་ཏུ་མི་ཕེབ་སྟེ། །རང་གི་ངོ་བོ་བརྗོད་མེད་ཀྱང་། །མཐུན་པའི་ཚིག་གིས་མ་མཚོན་ན། །དོན་གྱི་ངོ་བོ་རྟོགས་མི་འགྱུར། །ཆོས་རྣམས་ཐམས་ཅད་བརྡར་བསྟན་གྱིས། །ཡིད་ཀྱི་དབང་པོ་རྣ་བར་ཆུག །རྣ་བའི་དབང་པོས་སྒྲ་ལ་ཉོན། །དཔེར་ན་མེ་ཉིད་འདོད་པས་ཀྱང་། །མེ་འདོད་ཚིག་ཏུ་མ་བརྗོད་ན། །མེ་དང་འཕྲད་པ་ཤིན་ཏུ་དཀའ། །མེ་འདོད་ཚིག་ཏུ་བརྫོད་པས་ན། །མེ་དང་འཕྲད་པར་ཐེ་ཚོམ་མེད། །དེ་བཞིན་ཆོས་ཉིད་རྟོགས་འདོད་པས། །རངབཞིནམེདཔའིཆོས་ཉིད་ལ། །རང་བཞིན་མེད་པས་མཚོན་ཏེ་བསྟན། །བརྗོད་མེད་པ་ཡི་ཆོས་ཉིད་དེ། །བརྗོད་མེད་ཚིག་གིས་མཚོན་ཏེ་བསྟན། །དམིགས་སུ་མེད་པའི་ཆོས་ཉིད་དེ། །དམིགས་མེད་ཚིག་གིས་མཚོན་ཏེ་བསྟན། །ནམ་མཁའ་ལྟ་བུའི་ཆོས་ཉིད་དེ། །ནམ་མཁའི་དཔེ་ཡིས་མཚོན་ཏེ་བསྟན། །ཞེས་གསུངས་སོ། །བང་མཇོད་འཕྲུལ་གྱི་ལྡེ་མིག་ལས། གླེང་གཞི་དང་གླེང་བསླང་བའི་ལེའུ་སྟེ་དང་པོའོ།། །།དེ་ནས་སེམས་དཔའ་རྡོ་རྗེས་འདི་སྐད་ཅེས་གསོལ་ཏོ། །ཀྱེ་ཀྱེ་གསང་བའི་བདག་པོ་ལགས། །ཆོས་ཉིད་རང་གི་ངོ་བོ་དེ། །མ་བཤད་གོ་བར་མི་འགྱུར་ཏེ། །དེ་ཡི་བཤད་ལུགས་ཅི་ལྟར་ལགས། །གསང་བའི་བདག་པོས་བསྟན་དུ་གསོལ། །གསང་བའི་བདག་པོས་གསུངས་པ། །ཀྱེ་སེམས་དཔའ་ཆེན་པོ་ཉོན་ཅིག །མན་ངག་དོན་གྱི་བཤད་ལུགས་ནི། །དོན་གྱི་བཤད་ལུགས་ལྔ་ཡིས་བཤད། །ལོ་རྒྱུས་དོན་གྱིས་བཤད་ལུགས་དང་། །རྩ་བའི་དོན་གྱིས་བཤད་ལུགས་དང་། །ཡོ་གའི་དོན་གྱིས་བཤད་ལུགས་དང་། །དགོས་ཆེད་དོན་གྱིས་བཤད་ལུགས་དང་། །ཚིག་གི་དོན་དང་ལྔ་ཡིས་བཤད། །ཅེས་གསུངས་སོ། །ཡང་ཞུས་པ། ཀྱེ་ཀྱེ་གསང་བའི་བདག་པོ་ལགས། །གཏན་ཚིགས་དོན་གྱི་བཤད་ལུགས་ལྔས། །མ་བཤད་སྐྱོན་ནི་ཅི་ལྟར་ལགས། །བཤད་པའི་ཡོན་ཏན་ཅི་ལྟར་ལགས། །གསང་བའི་བདག་པོས་བསྟན་དུ་གསོལ། །ཞེས་ཞུས་སོ། །གསང་བའི་བདག་པོས་གསུངས་པ། །ཀྱེ་སེམས་དཔའ་ཆེན་པོ་ཉོན་ཅིག །ལོ་རྒྱུས་དོན་གྱིས་མ་བཤད་ན། །ཡིད་མི་ཆེས་པའི་སྐྱོན་དུ་འགྱུར། །རྩ་བའི་དོན་གྱིས་མ་བཤད་ན། །ཆོས་རྣམས་སེམས་སུ་མི་འདུ་བས། །མཐའ་ཡས་པ་ཡི་སྐྱོན་དུ་འགྱུར། །ཡོ་གའི་དོན་གྱིས་མ་བཤད་ན། །ཐེག་པའི་ཤན་ཐང་མི་ཕྱེད་པས། །ཁྱད་མི་ཕྱེད་པའི་སྐྱོན་དུ་འགྱུར། །དགོས་ཆེད་དོན་གྱིས་མ་བཤད་ན། །རྩོལ་བསྒྲུབ་བྱ་བཙལ་མ་བྱས་པར། །སངས་རྒྱས་ས་ལ་དོན་མེད་འགྱུར། །ཚིག་གི་དོན་གྱིས་མ་བཤད་ན། །ཚིག་དང་དོན་དུ་མི་བསྡེབ་པས། །འབྲུ་མི་ཆོམ་པའི་སྐྱོན་དུ་འགྱུར། །དེ་བཟློག་བཤད་པའི་ཡོན་ཏན་ཡིན། །ཞེས་གསུངས་སོ། །ཡང་ཞུས་པ། ཀྱེ་ཀྱེ་གསང་བའི་བདག་པོ་ལགས། །ལོ་རྒྱུས་དོན་གྱིས་ཅི་ལྟར་བཤད། །གསང་བའི་བདག་པོས་བསྟན་དུ་གསོལ། །གསང་བའི་བདག་པོས་གསུངས་པ། །སེམས་དཔའ་ཆེན་པོ་ཉོན་ཅིག །ལོ་རྒྱུས་དོན་གྱིས་བཤད་པ་ལ། །ཆོས་ཀྱི་སྐུ་ཡི་བཤད་ལུགས་ནི། །ངེས་པའི་དོན་ལ་དགོངས་ནས་སུ། །མི་རྟོག་ཐུགས་ཀྱི་སྒོ་ནས་ནི། །བྱིན་གྱི་རླབས་ཀྱིས་བཤད་པ་ཡིན། །དེ་ཡང་ཅི་ལྟར་བཤད་ཅེ་ན། །ཀུན་ཏུ་བཟང་པོས་ཆོས་ཀྱི་དབྱིངས་ནས་བཤད། རྡོ་རྗེ་སེམས་དཔས་ནམ་མཁའི་དཀྱིལ་ནས་མཉན། །རྡོ་རྗེ་སེམས་དཔས་ནམ་མཁའི་དཀྱིལ་ནས་བཤད། །དགའ་རབ་རྡོ་རྗེས་རི་རབ་རྩེ་ནས་མཉན། །དགའ་རབ་རྡོ་རྗེས་རི་རབ་རྩེ་ནས་བཤད། །འཇམ་དཔལ་བཤེས་གཉེན་རི་རབ་སྐེད་ནས་མཉན། །འཇམ་དཔལ་བཤེས་གཉེན་རི་རབ་སྐེད་ནས་བཤད། །དགའ་བོ་འཇོག་པོས་རྒྱ་མཚོའི་གཏིང་ནས་མཉན། །མཉན་ནས་ཐོས་པ་མ་ཡིན་ཏེ། །བྱིན་གྱི་རླབས་ཀྱིས་གོ་བར་ཟད། །བྱིན་གྱི་རླབས་ཀྱིས་བཤད་ཅེས་དེ་ལ་བྱ། །ལོངས་སྤྱོད་རྫོགས་པའི་བཤད་ལུགས་ནི། །རང་གི་ངོ་བོས་བཤད་པ་སྟེ། །ལྡེམ་དགོངས་དོན་ལ་དགོངས་ནས་ནི། །མཚན་དང་ལྡན་པ་སྐུའི་སྒོ་ནས། །དེ་བཞིན་གསུང་མཆོག་མི་སྨྲ་ཡང་། །སྐུ་ཡིས་ཆོས་རྣམས་འཇལ་བར་སྟོན། །འབྱུང་ཆེན་བརྒྱན་པའི་སྐུ་ལྔས་ཀྱང་། །ཚིག་དང་ཡི་གེར་མི་སྨྲ་སྟེ། །རང་གི་ངོ་བོས་ཆོས་སྟོན་པ། །བདག་ཏུ་མི་རྟོག་གཞན་མི་རྟོག །རང་སྣང་ངོ་བོས་ཆོས་སྟོན་ཏོ། །སྤྲུལ་པའི་སྐུ་ཡིས་བཤད་ལུགས་ནི། །རིགས་བྱེད་གསུང་གི་སྒོ་ནས་ནི། །བཀྲི་བའི་དོན་ལ་དགོངས་ནས་ནི། །ཚིག་དང་ཡི་གེར་བསྡེབས་ཏེ་བཤད། །དེ་ཡང་ཅི་ལྟར་བཤད་ཅེ་ན། །ཁྱུང་ཆེན་ནམ་མཁར་ལྡིང་བའི་བློས། །དོན་གྱི་སྦྱི་ཁོག་ཕུབ་སྟེ་བཤད། །སྟག་མོའི་མཆོང་སྟབས་ལྟ་བུའི་བློས། །དོན་གྱི་ས་བཅད་བྱས་ཏེ་བཤད་དྲིམེདགྱིས། །རུས་སྦལ་ནུར་འགྲོས་ལྟ་བུའི་བློས། །ཡི་གེའི་འབྲུ་ནི་ཆོམས་པར་བཤད། །ནམ་མཁའ་ཀློང་ཡངས་ལྟ་བུའི་བློས། །བྱང་ཆུབ་སེམས་ཀྱི་ཆོས་ཉིད་དེ། །བརྡལ་ཁྱབ་ཆེན་པོའི་ངོ་བོར་བཤད། །རྒྱ་མཚོ་གཏིང་ཟབ་ལྟ་བུའི་བློས། །བྱང་ཆུབ་སེམས་ཀྱི་ཆོས་ཉིད་དེ། །ཟབ་ཅིང་གཏིང་དཔག་དཀའ་བར་བཤད། །སེང་གེའི་གདངས་སྐད་ལྟ་བུའི་བློས། །ཐེག་དམན་ཟིལ་གྱིས་མནན་ཏེ་བཤད། །མུ་ཏིག་བསྟར་བརྒྱུས་ལྟ་བུའི་བློས། །མན་ངག་ཁྲིགས་སུ་བསྡེབས་ནས་བཤད། །གནའུ་བྲག་འཛེགས་ལྟ་བུའི་བློས། །མི་འཚམས་པ་ནི་འཚམ་པར་བཤད། །རིག་པ་དགོངསམཆོགསྡེབཔདྲུགཏུཡང སྒུམ་ཐུན་ལྟ་བུའི་བློས། །བསྒོམ་པའི་དམིགས་ནི་བཙལ་ཏེ་བཤད། །རྒྱལ་པོའི་བང་མཛོད་ལྟ་བུའི་བློས། །དགོས་དགུ་རང་ལ་ཚང་བར་བཤད། །ངང་མོ་གཞིབ་འགྲོས་ལྟ་བུའི་བློས། །སྔ་ཕྱིའི་ཚིག་གི་དོན་འགྲེལ་བཤད། །ཕོ་རོག་སོ་རྟོག་ལྟ་བུའི་བློས། །གོལ་སྒྲིབ་གདར་ཤ་བཅད་ནས་བཤད། །སྐྲུ་གྲི་སོ་འདེབས་ལྟ་བུའི་བློས། །ཐེག་པའི་ཤན་ཐང་ཕྱེས་ཏེ་བཤད། །གླང་ཆེན་ཆུར་འཇུག་ལྟ་བུའི་བློས། །སྤྱོད་པ་བླང་དོར་མེད་པར་བཤད། །མི་སྐྱོལ་བར་ཡང་མི་བཤད་ཅིང་། །ཐལ་དྲགས་པར་ཡང་བཤད་མི་བྱ། །ཞེས་གསུངས་སོ། །ཡང་གསོལ་པ། སྟོན་པའི་འཆད་སྟངས་དེ་ལྟར་ན། །ཉན་པའི་དབང་དུ་ཇི་ལྟར་བྱ། །གསང་བའི་བདག་པོས་བསྟན་དུ་གསོལ། །གསང་བའི་བདག་པོས་གསུངས་པ། །སེམས་དཔའ་ཆེན་པོ་ཉོན་ཅིག །དབང་པོ་ཡང་རབ་གྱུར་པ་ཡི། ་ས་རབ་ཅན་ལ་འཆད་ཙམ་ན། །རྒྱུད་དང་ལུང་དང་མན་ངག་གསུམ། །དོན་གྱི་སྤྱི་ཁོག་ཕུབ་སྟེ་བཤད། །ཆོས་ཉིད་ཉམས་སུ་ལེན་པ་ཡི། །རྣལ་འབྱོར་པ་ལ་འཆད་ཙམ་ན། །ལྟ་བསྒོམ་སྤྱོད་པ་འབྲས་བུ་བཞི། །རང་རང་མཚན་ཉིད་ངོས་བཟུང་ནས། །རྒྱལ་བའི་ལུང་དང་ངོ་སྤྲད་དེ། །བྱང་ཆུབ་སེམས་དང་དོན་སྦྱར་ནས། །དགོངས་པ་མཆོག་བསྡེབ་དག་ཏུ་བཤད། །ཐུན་མོང་ཚོགས་ལ་བཤད་ཙམ་ན། །དཀྱུས་འགྲོས་བསྲང་ཞིང་ཚིག་འབྲུ་གཉེར། །ཁྱད་པར་སློབ་མར་ཁྲིད་ཙམ་ན། །མན་ངག་གནང་བསྡེབ་ཁྲིགས་སུ་བཤད། །ཅེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། བྱང་ཆུབ་སེམས་བཤད་པའི་ལེའུ་སྟེ་གཉིས་པའོ།། །།དེ་ནས་སེམས་དཔའ་རྡོ་རྗེས་ཡང་གསོལ་པ། ཀྱེ་གསང་བའི་བདག་པོ་ལགས། །རང་སེམས་བླ་མར་སྣང་བའི་དོན། །དེ་དོན་བདག་ལ་བསྟན་དུ་གསོལ། །གསང་བའི་བདག་པོས་གསུངས་པ། །རང་སེམས་བླ་མར་སྣང་བ་ལ། །དེ་ལ་རྣམ་པ་གསུམ་ཡོད་དེ། །སེམས་ཉིད་རྒྱུ་ཡི་བླ་མ་དང་། །འབྲས་བུ་སེམས་ཀྱི་བླ་མ་དང་། །རང་སྣང་ཆོས་ཀྱི་བླ་མའོ། །སེམས་ཉིད་རྒྱུ་ཡི་བླ་མ་ནི། །རྟོག་གེ་སྒམ་པོ་རིགས་ཆད་པ། །ལོག་སྲེད་ཅན་ནི་མ་ཡིན་ཏེ། །རྟོག་པ་ཡེ་ཤེས་བློ་དམན་གྱི། །འཁོར་འདས་གཉིས་ལ་བརྟགས་བྱས་པས། །བདེ་དང་སྡུག་བསྔལ་གཉིས་སུ་མཐོང་། །བསྡེ་སྡུག་གཉིས་ལ་བརྟགས་བྱས་པས། །དགེ་སྡིག་གཉིས་ལས་བྱུང་བར་དྲན །དྲན་པའི་སེམས་ཀྱིས་དད་པ་བསྐུལ། །དད་པའི་སེམས་ཀྱིས་བརྩོན་འགྲུས་བསྐུལ། །བརྩོན་འགྲུས་ཆེན་པོའི་བླ་མ་དེས། ཁྲེས་རབ་རྣམ་གསུམ་བློ་བྱས་ཏེ། །ཏིང་འཛིན་དོན་ལ་ནན་ཏན་བསྒོམ། །ཏིང་འཛིན་མཐུ་བརྟས་ཡེ་ཤེས་རྒྱས། །ཡེ་ཤེས་མངོན་གྱུར་ཆོས་ཀྱི་སྐུ། །དེ་ལས་ གཟུགས་སྐུ་རྣམ་པ་གཉིས། །ཉི་ཟླའི་འོད་དང་གཟུགས་བརྙན་བཞིན། །ཐོགས་པ་མེད་པར་ཤུགས་ཀྱི་འབྱུང་། །བསྟན་པ་ཐེག་པ་དགུར་བཀོད་ནས། །གང་འཐད་ཡུལ་ལ་འདེབས་སུ་གཞུག །འབྲས་བུ་སེམས་ཀྱི་བླ་མ་ནི། ཁྲེས་པ་སོ་མ་མ་བཅོས་པ། །འབྲས་བུ་རང་སྣང་སྐུ་གསུམ་ཚུལ། །རང་བཞིན་ཆོས་ཀྱི་སྐུ་རུ་སྣང་། །ངོ་བོ་ལོངས་སྤྱོད་རྫོགས་སྐུར་སྣང་། །ཐུགས་རྗེ་སྤྲུལ་པའི་སྐུ་རུ་སྣང་། །སེམས་རྒྱུད་གཅིག་གི་ངོ་བོ་ལ། །སྟོན་པ་སྐུ་གསུམ་རང་བཞིན་གནས། །རང་སྣང་ཆོས་ཀྱི་བླ་མ་ནི། །འབྱུང་ཆེན་ལྔ་ཡི་བླ་མ་དང་། །འདོད་ཡོན་ལྔ་སོགས་བླ་མ་ཡིས། །ཚིག་དང་ཡི་གེས་མི་སྟོན་པར། །རང་གི་ངོ་བོས་ཆོས་སྟོན་པ། །བདག་གཞན་གཉིས་སུ་མི་རྟོག་པ། །རང་སྣང་ངོ་བོས་ཆོས་སྟོན་ཏོ། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། རང་སེམས་སྟོན་པར་བྱུང་བའི་ལེའུ་སྟེ་གསུམ་པའོ།། །།དེ་ནས་སེམས་དཔའ་རྡོ་རྗེས་ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །སྦས་པ་གབ་པའི་དོན་ཅི་ལགས། །གསང་བའི་བདག་པོས་བསྟན་དུ་གསོལ། །གསང་བའི་བདག་པོས་གསུངས་པ། །ཀྱེ་ཀྱེ་སེམས་དཔའ་ཆེནཔོཉོནཅིག །ཆོས་ཅན་མཚན་མ་རྒྱ་མཚོའི་ཀློང་དཀྱིལ་ན། །ཆོས་ཉིད་གསེར་གྱི་ཉ་མོ་གབ་ནས་བག་ལ་ཉལ། །ཀུན་རྫོབ་སྒྱུ་མ་རྒྱ་མཚོའི་ཀློང་དཀྱིལ་ན། །དོན་དམ་གསེར་གྱི་ཉ་མོ་གབ་ནས་བག་ལ་ཉལ། །འཁོར་བ་རྒྱ་མཚོ་སེམས་ཀྱི་ཀློང་དཀྱིལ་ན། །སངས་རྒྱས་གསེར་གྱི་ཉ་མོ་གབ་ནས་བག་ལ་ཉལ། །འགྲོ་དྲུག་སྡུག་བསྔལ་རྒྱ་མཚོའི་ཀློང་དཀྱིལ་ན། །བདེ་ཆེན་གསེར་གྱི་ཉ་མོ་གབ་ནས་བག་ལ་ཉལ། །མ་རིག་འཁྲུལ་པའི་རྒྱ་མཚོའི་ཀློང་དཀྱིལ་ན། །ཡེ་ཤེས་གསེར་གྱི་ཉ་མོ་གབ་ནས་བག་ལ་ཉལ། །རྒྱལ་བའི་མདོ་རྒྱུད་རྒྱ་མཚོའི་ཀློང་དཀྱིལ་ན། །དགོངས་པ་གསེར་གྱི་ཉ་མོ་གབ་ནས་བག་ལ་ཉལ། །རྡོ་རྗེ་སློབ་དཔོན་ཐུགས་ཀྱི་ཀློང་དཀྱིལ་ན། །གདམས་ངག་གསེར་གྱི་ཉ་མོ་གབ་ནས་བག་ལ་ཉལ། །ཞེས་གསུངས་སོ། །བང་མཛོད་འབྲུལ་གྱི་ལྡེའུ་མིག་ལས། གསེར་གྱི་ཉ་མོ་གབ་ནས་བག་ལ་ཉལ་བའི་ལེའུ་སྟེ་བཞི་པའོ།། །།དེ་ནས་སེམས་དཔའ་རྡོ་རྗེ་དེས། གསང་བའི་བདག་པོ་ལ་འདི་སྐད་ཅེས་གསོལ་ཏོ། །ཀྱེ་ཀྱེ་གསང་བའི་བདག་པོ་ལགས། །གབ་པ་ངོས་བཟུང་ཅི་ལྟར་བཟུང་། །གསང་བའི་བདག་པོས་བསྟན་དུ་གསོལ། །གསང་བའི་བདག་པོས་བསྟན་པ། །ཆོས་ཅན་མཚན་མར་སྣང་བ་ལ། །ཆོས་ཉིད་ངོ་བོ་གབ་པ་ནི། །དཔེར་ན་འཇའ་ཚོན་ཆུ་ཟླ་འདྲ། །ཀུན་རྫོབ་སྒྱུ་མའི་བདེ་བ་ལ། །དོན་དམ་བདེ་བ་གབ་པ་ནི། །དཔེར་ན་རྨི་ལམ་གཟུགས་དང་འདྲ། །ཁམས་གསུམ་འཁོར་བའི་སེམས་ཅན་ལ། །དུས་གསུམ་སངས་རྒྱས་གབ་པ་ནི། །དཔེར་ན་མར་དང་འོ་མ་འདྲ། །ཁམས་གསུམ་འཁོར་བའི་སྡུག་བསྔལ་ལ། །བདེ་བ་ཆེན་པོ་གབ་པ་ནི། །དཔེར་ན་དུག་དང་དུག་སྨན་འདྲ། །མ་རིག་པ་ཡི་འཁྲུལ་རྟོག་ལ། །རང་བྱུང་ཡེ་ཤེས་གབ་པ་ནི། །རིན་ཆེན་འདམ་གྱིས་གཡོགས་པ་འདྲ། །རྒྱལ་བས་གསུངས་པའི་མདོ་རྒྱུད་ལ། །དགོངས་པ་ཟབ་མོ་གབ་པ་ནི། །དཔེར་ན་མེ་ཤེལ་ཆུ་ཤེལ་འདྲ། །བླ་མ་རྡོ་རྗེའི་ཐུགས་མཛོད་ལ། །གདམས་ངག་ཟབ་མོ་གབ་པ་ནི། །བུམ་པའི་ནང་གི་མར་མེ་འདྲ། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། གབ་པ་ངོས་བཟུང་བའི་ལེའུ་སྟེ་ལྔ་པའོ།། །།དེ་ནས་སེམས་དཔའ་རྡོ་རྗེས་ཡང་གསོལ་པ། །ཀྱེ་ཀྱེ་གསང་བའི་བདག་པོ་ལགས། །རྩ་བའི་དོན་ནི་ཅི་ལྟར་བཤད། །གསང་བའི་བདག་པོས་བསྟན་དུ་གསོལ། །གསང་བའི་བདག་པོས་གསུངས་པ། །བྱང་ཆུབ་སེམས་ཀྱི་ཆོས་ཉིད་དེ། །ཡོད་ནི་གཅིག་ལས་མེད་པ་ལ། །བྱུང་ནི་སྣང་སྲིད་ཀུན་ཏུ་བྱུང་། །ཁྱབ་ནི་སྣོད་བཅུད་ཀུན་ལ་ཁྱབ། །བསྟན་ནི་ཐེག་པ་དགུ་རུ་བསྟན། །འདུས་ནི་བྱང་ཆུབ་སེམས་སུ་འདུས། །ཡིན་ནི་ཆོས་ཀྱི་སྐུ་ཡིན་ཏེ། །བསྟན་དུ་མེད་པས་དངོས་པོ་མེད། །གཟུང་དུ་མེད་པའི་ཡུལ་ལས་འདས། །མཚོན་དུ་མཚུངས་པ་གང་ཡང་མེད། །ཅེས་སོ། །བང་མཛོད་འཕྲུལ་གྱི་ལྡེའུ་མིག་ལས།རྩ་བ་དོན་གྱི་བཤད་ལུགས་ཀྱི་ལེའུ་སྟེ་དྲུག་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །ཡོ་གའི་དོན་ནི་ཅི་ལྟར་བཤད། །རྣལ་འབྱོར་བཞི་ཡི་བྱེ་བྲག་ཅི། །གསང་བའི་བདག་པོས་བསྟན་དུ་གསོལ། །གསུངས་པ། སེམས་དཔའ་ཆེན་པོ་ཉོན་ཅིག །ཡུལ་དང་དབང་པོ་རྣམ་པར་མི་རྟོག་སེམས། །དེ་ནི་སེམས་དཔའི་རྣལ་འབྱོར་ཡིན། །བྱང་ཆུབ་ཡན་ལག་ཆོ་འཕྲུལ་འབྱིན་པ་ནི། །དེ་ནི་རྣལ་འབྱོར་ཆེན་པོ་ཡིན། །ཕྱག་རྒྱ་བཞི་དང་ལྡན་པ་ནི། །དེ་ནི་ཡོངས་སུ་རྣལ་འབྱོར་ཡིན། །ཡེ་ཤེས་དམ་ཚིག་རང་བཞིན་མེད་བལྷ་བ། །དེ་ནི་ཤིན་ཏུ་རྣལ་འབྱོར་ཡིན། །ཞེས་གསུངས་སོ། །ཡང་གསུངས་པ།རང་རྒྱུད་དག་པའི་ཡེ་ཤེས་དེ་ནི་སེམས་དཔའི་རྣལ་འབྱོར་ཡིན། །ཏིང་འཛིན་རྣམ་གསུམ་རིམ་གྱིས་སུས་བསྒོམ་པ། །དེ་ནི་རྣལ་འབྱོར་ཆེན་པོ་ཡིན། །བསྙེན་བསྒྲུབ་བཞི་ཡི་འཕྲོ་འདུ་རྫོགས་བྱེད་པ། །དེ་ནི་ཡོངས་སུ་རྣལ་འབྱོར་ཡིན། །སརྦ་བདག་ཉིད་ཆེན་པོར་བལྟ་བ་ནི། །དེ་ནི་ཤིན་ཏུ་རྣལ་འབྱོར་ཡིན། །ཞེས་གསུངས་སོ། །ཡང་གསུངས་པ། ཏིང་འཛིན་རྣམ་གསུམ་རིམ་གྱིས་མི་བསྒོམ་པར། །རང་རྒྱུད་དག་པས་ཡེ་ཤེས་བལྟ་བྱེད་པ། །དེ་ནི་སེམས་དཔའི་རྣལ་འབྱོར་ཡིན། །ཡབ་ཡུམ་ཐབས་དང་ཤེས་རབ་མི་བསྒོམ་པར། །སྙིང་པོ་ཙམ་གྱིས་དཀྱིལ་འཁོར་རྫོགས་བྱེད་པ། །དེ་ནི་རྣལ་འབྱོར་ཆེན་པོ་ཡིན། །རྒྱུ་དབྱིངས་འབྲས་བུ་ཡེ་ཤེས་ལྷ་བྱེད་པ། །དེ་ནི་ཡོངས་སུ་རྣལ་འབྱོར་ཡིན། །དབྱིངས་དང་ཡེ་ཤེས་གཉིས་མེད་པ། །དེ་ནི་ཤིན་ཏུ་རྣལ་འབྱོར་ཡིན། །ཞེས་གསུངས་སོ། །ཡང་གསུངས་པ། །བླང་དོར་མེད་པའི་བྱང་ཆུབ་སེམས། །དེ་ནི་སེམས་དཔའི་རྣལ་འབྱོར་ཡིན། །རྩོལ་བསྒྲུབ་འདས་པའི་བྱང་ཆུབ་སེམས། །དེ་ནི་རྣལ་འབྱོར་ཆེན་པོ་ཡིན། ཁུ་འབྲས་འདས་པའི་བྱང་ཆུབ་སེམས། །དེ་ནི་ཡོངས་སུ་རྣལ་འབྱོར་ཡིན། །སྒྲོ་སྐུར་འདས་པའི་བྱང་ཆུབ་སེམས། །དེ་ནི་ཤིན་ཏུ་རྣལ་འབྱོར་ཡིན། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། ཡོ་གའི་དོན་གྱི་བཤད་ལུགས་ལས། རྣལ་འབྱོར་རྣམ་བཞིའི་བྱེ་བྲག་བསྟན་པའི་ལེའུ་སྟེ་བདུན་པའོ།། །།ཡང་གསོལ་པ། །ཀྱེ་ཀྱེ་གསང་བའི་བདག་པོ་ལགས། །དངོས་དང་བསམ་གྱི་བྱེ་བྲག་ཅི། །གསང་བའི་བདག་པོས་བསྟན་དུ་གསོལ། །གསང་བའི་བདག་པོས་གསུངས་པ། ཀྱེ་ཀྱེ་སེམས་དཔའ་ཆེན་པོ་ཉོན་ཅིག །བརྟགས་པ་ཐམས་ཅད་བློ་ཡིས་བརྟགས། །བཟུང་བ་ཐམས་ཅད་བློ་ཡིས་བཟུང་། །ཕྱེ་བ་ཐམས་ཅད་བློ་ཡིས་ཕྱེ། །བརྗོད་པ་ཐམས་ཅད་བློ་ཡིས་བརྗོད། །སྣང་བ་ཐམས་ཅད་བློ་ལ་སྣང་། །གྲུབ་པ་ཐམས་ཅད་བློ་ལས་གྲུབ། །སྐུ་དང་ཡེ་ཤེས་དོན་དམ་བདེན། །བསམ་དབང་ཕྱོགས་ན་གྲགས་པ་ལས། །དངོས་དབང་ཕྱོགས་ན་དེ་མི་གྲག །ཅི་སྣང་ཅི་སྲིད་ཐམས་ཅད་ཀུན། །བསམ་དབང་འཁྲུལ་པའི་ངོས་ལ་སྣང་། །སངས་རྒྱས་སྐུ་དང་ཡེ་ཤེས་དང་། །སེམས་ཅན་ལུས་དང་བག་ཆགས་ནི། །འཁྲུལ་པ་རང་གི་ངོ་བོ་ཡིན། །དེ་བརྟགས་བློ་ལ་སྣང་བ་ནི། །འཁྲུལ་པ་འཁྲུལ་ནས་འཁྲུལ་པའི་ཡུལ་དུ་སྣང་། །ཐོ་མི་ཐག་སྦྲུལ་སྨིག་རྒྱུ་ཆུར། །ལོག་པའི་ཀུན་རྫོབ་གསུམ་འཁྲུལ་ཡིན། །དེ་བཟློག་པ་ནི་དངོས་ཀྱི་དབང་། །ཡིན་མིན་ཐ་སྙད་སྒྲོ་སྐུར་ཀུན་དང་བྲལ། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། དངོས་བསམ་གྱི་ཁྱད་པར་འབྱེད་པའི་ལེའུ་སྟེ་བརྒྱད་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །སེམས་ཉིད་ཐིག་ལེ་ཉག་གཅིག་ལ། །ཐེག་པ་དགུ་རུ་ཕྱེ་བ་ཡི། །དེ་ཡི་གཏན་ཚིགས་ཅི་ལྟར་ལགས། །གསང་བའི་བདག་པོས་གསུངས་པ། །སེམས་དཔའ་ཆེན་པོ་ཉོན་ཅིག །སེམས་ཀྱི་རང་བཞིན་གཅིག་མོད་ཀྱང་། །སེམས་ཀྱི་མཚན་ཉིད་མི་འདྲ་སྟེ། །དབང་པོ་རབ་འབྲིང་གསུམ་དུ་འབྱུང་། །དབང་པོ་རབ་ཀྱི་དོན་དུ་ནི། །ནང་པའི་བསྐྱེད་རྫོགས་གསུམ་དུ་བསྟན། །དབང་པོ་འབྲིང་གི་དོན་དུ་ནི། །ཕྱི་ཡི་ཀྲི་ཡོག་རྣམས་གསུམ་བསྟན། །དབང་པོ་ཐ་མའི་དོན་དུ་ནི། །སྡེ་སྣོད་གསུམ་གྱི་ཐེག་པ་བསྟན། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། ཐེག་པ་དགུའི་གཏན་ཚིགས་བསྟན་པའི་ལེའུ་སྟེ་དགུ་པའོ།། །།ཡང་གསོལ་པ། །ཀྱེ་ཀྱེ་གསང་བའི་བདག་པོ་ལགས། །སྡེ་སྣོད་གསུམ་གྱི་ཐེག་པ་ལ། །མཚན་ཉིད་དགུ་རུ་བསྟན་པ་ཅི་ཕྱིར་ལགས། །ནང་པ་སྔགས་ཀྱི་ཐེག་པ་ལ། །འབྲས་བུ་རྡོ་རྗེར་ཅི་ལྟར་བཏགས། །གསང་བའི་བདག་པོས་བསྟན་དུ་གསོལ། །གསུངས་པ། སེམསདཔའཆེན་པོ་ཉོན་ཅིག །མཚན་ཉིད་རྒྱུ་ཡི་ཐེག་པ་ནི། །དགེ་སྡིག་ལས་ཀྱིས་རྒྱུ་བྱས་པས འབྲས་བུ་བདེ་དང་སྡུག་བསྔལ་འདོད། །ཆོས་སྤྱོད་དགེ་བས་རྒྱུ་བྱེད་ནས། །དེ་ཉིད་ལམ་དུ་འཁྱེར་བའི་ཕྱིར། །རྒྱུ་ཡི་ཐེག་པར་བསྟན་པ་ཡིན། །འབྲས་བུ་རྡོ་རྗེའི་ཐེག་པ་ནི། །ཕྱག་རྒྱའི་དཀྱིལ་འཁོར་ལམ་བྱས་ནས། །འབྲས་བུ་དེ་ཉིད་ལམ་དུ་ཁྱེར། །རང་གི་ལུས་ངག་ཡིད་གསུམ་ནི། །སྐུ་གསུང་ཐུགས་ཀྱི་རྡོ་རྗེར་སྦྱོར། །དེ་ཕྱིར་རྡོ་རྗེ་ཐེག་པར་བཏགས། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། ཐེག་པའི་ངེས་ཚིག་བསྟན་པའི་ལེའུ་སྟེ་བཅུ་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །ཐེག་པའི་འཇུག་སྒོ་ཅི་ལྷར་ལགས། །གསང་བའི་བདག་པོས་བསྟན་དུ་གསོལ། །གསང་བའི་བདག་པོས་གསུངས་པ། སེམས་དཔའ་ཆེན་པོ་ཉོན་ཅིག །ཐེག་པའི་འཇུག་སྒོ་བཞི་ཡོད་དེ། །མུན་པ་དག་གི་འཁོར་སྒོ་དང་། །སྤྱོད་པའི་འདྲེན་སྒོ་དེ་དང་གཉིས། །ཐབས་ཀྱི་སྦྱོར་སྒོ་དེ་དང་གསུམ། །ངེས་པའི་གསང་སྒོ་དེ་དང་བཞི། །མུན་པའི་འཁོར་སྒོ་ཕྱེ་བ་ནི། །ཉོན་མོངས་དུག་གསུམ་སྒོ་ཡིས་བཅད། །ཉོན་མོངས་དུག་གསུམ་སྒོ་ཕྱེ་བས། །ཀུན་གཞི་སེམས་ཀྱི་ཁང་བུ་ན། །རང་ལ་ཡོད་པའི་རིན་པོ་ཆེ། །གཟུང་འཛིན་རྣམ་རྟོག་མཚན་མས་སྦས། །ནོར་བུ་རིན་ཆེན་དེ་རུ་སྟོར། །སྤྱོད་པའི་འདྲེན་སྒོ་ཕྱེ་བ་ནི། །མདོ་སྡེ་འདུལ་བ་མངོན་པ་གསུམ། །སྡེ་སྣོད་གསུམ་གྱི་སྒོ་ཡིས་བཅད། །སྡེ་སྣོད་གསུམ་གྱི་སྒོ་ཕྱེ་ནས། །ཆོས་སྤྱོད་དགེ་བའི་ལྡེ་མིག་གིས། །མཚན་ཉིད་ཐེག་པའི་སྒོ་ཕྱེ་སྟེ། །ལ་ལ་བདེན་བཞིའི་སྒོ་ནས་འཇུག །ལ་ལ་རྟེན་འབྲེལ་་སྒོ་ནས་འཇུག །ལ་ལ་བདེན་གཉིས་སྒོར་ཞུགས་ནས། །ཀུན་གཞི་སེམས་ཀྱི་ཁང་བུ་ན། །ནོར་བུ་རིན་ཆེན་ཡོད་པ་དེ། །ཕྲ་རགས་ཤེས་པའི་སྒྲིབ་པས་བསྒྲིབས། །ནོར་བུ་རིན་ཆེན་དེ་རུ་སྟོར། །ཐབས་ཀྱི་སྦྱོར་བའི་སྒོ་ཕྱེ་བས། །དག་པ་གསུམ་གྱི་སྒོར་ཞུགས་ཏེ། །ཀུན་གཞི་སེམས་ཀྱི་ཁང་བུ་ན། །ནོར་བུ་རིན་ཆེན་ཡོད་པ་དེ། །གཟུང་འཛིན་ཕྲ་མོའི་རྟོག་པས་བསྒྲིབས། །ནོར་བུ་རིན་ཆེན་དེ་རུ་སྟོར། །ལྟ་སྤྱོད་གཉིས་ཀྱི་སྒོར་ཞུགས་ནས། །ཀུན་གཞི་སེམས་ཀྱི་ཁང་བུ་ན། །ནོར་བུ་རིན་ཆེན་ཡོད་པ་དེ། །ཡེ་རྔམས་ཆོས་ཀྱི་སྒྲིབ་པས་བསྒྲིབས། །ནོར་བུ་རིན་ཆེན་དེ་རུ་སྟོར། །ཕྱག་རྒྱ་བཞི་ཡི་སྒོར་ཞུགས་ནས། །ཀུན་གཞི་སེམས་ཀྱི་ཁང་བུ་ན། །ནོར་བུ་རིན་ཆེན་ཡོད་པ་དེ། །བླང་དོར་གཉིས་ཀྱི་རྟོག་པས་བསྒྲིབས། །ནོར་བུ་རིན་ཆེན་དེ་རུ་སྟོར། །ཐབས་དང་ཤེས་རབ་སྒོ་ཕྱེ་ནས། །ཀུན་གཞི་སེམས་ཀྱི་ཁང་བུ་ན། །ནོར་བུ་རིན་ཆེན་ཡོད་པ་དེ། །རྩོལ་ཞིང་བསྒྲུབ་པའི་སྒྲིབ་པས་བསྒྲིབས། །ནོར་བུ་རིན་ཆེན་དེ་རུ་སྟོར། །དབྱིངས་དང་ཡེ་ཤེས་སྒོར་ཞུགས་ནས། །ཀུན་གཞི་སེམས་ཀྱི་ཁང་བུ་ན། །ནོར་བུ་རིན་ཆེན་ཡོད་པ་དེ། །རྒྱུ་འབྲས་འདས་པའི་སྒྲིབ་པས་བསྒྲིབས། །ནོར་བུ་རིན་ཆེན་དེ་རུ་སྟོར། །རིམ་པ་བརྒྱད་ཀྱི་བལྟ་བ་ཡིས། །རང་ལ་ཡོད་པའི་རིན་པོ་ཆེ། །རང་རང་ལྟ་སྤྱོད་རྩོལ་བས་བསྒྲིབས། །ནོར་བུ་རིན་ཆེན་མཐོང་བ་མེད། །ངེས་པའི་གསང་སྒོ་པྱེས་ནས་ནི། །གཉིས་མེད་ཡེ་ཤེས་སྒོར་ཞུགས་ཏེ། །རང་བྱུང་ཡེ་ཤེས་ཆེན་པོ་ཡིས། །མ་བཅོས་མཉམ་བཞག་མིག་གིས་བལྟས། །སྣང་མེད་སེམས་ཀྱི་དོན་མཐོང་བས མ་མཐོང་བ་ཡི་མཐོང་བའི་མིག །བརྒྱད་ཀྱིས་མ་མཐོང་རིན་པོ་ཆེ། ཤེན་ཏུ་རྣལ་འབྱོར་ཆེན་པོའི་མིག་གིས་མཐོང་ མཐོང་ཡང་དེ་ལ་ངོས་གཟུང་མེད། །ཐེག་པ་རིམ་པ་བརྒྱད་པོ་ཡིས། །རང་གི་གམ་དུ་བཞག་ནས་གཞན་དུ་བཙལ། །བསྐལ་པར་བཙལ་ཡང་མི་རྙེད་པས། །མདོངས་པས་ནམ་མཁར་བསྙེགས་པ་འདྲ། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། ཐེག་པའི་འཇུག་སྒོ་བསྟན་པའི་ལེའུ་སྟེ་བཅུ་གཅིག་པའོ།། །།ཡང་གསོལ་པ། ཀྱེ་ཀྱེ་གསང་བའི་དག་པོ་ལགས། །ཐེག་པའི་བསྲུང་མཚམས་ཇི་ལྟར་ལགས། །གསང་བའི་བདག་པོས་བསྟན་དུ་གསོལ། །གསང་བའི་བདག་པོས་གསུངས་པ། ཀྱེ་ཀྱེ་སེམས་དཔའ་ཆེན་པོ་ཉོན་ཅིག །ཉན་ཐོས་རང་རྒྱལ་བསྲུང་མཚམས་ནི། །ཉིས་བརྒྱ་ལྔ་བཅུའི་འདུལ་ཁྲིམས་རྣམས། །དཀའ་ཐུབ་དྲག་པོས་བསྲུང་བར་བྱེད། །མདོ་སྡེའི་ཐེག་པའི་བསྲུང་མཚམས་ནི། །རྩ་བའི་སྡོམ་པ་བཞི་པོ་ལ། །པྱེ་བས་སྡོམ་པ་ཉི་ཤུ་བསྲུང་། །བྱ་བའི་རྒྱུད་ཀྱི་ཐེག་པ་ནི། །མི་ཉམས་ཡན་ལག་བདུན་པོ་བསྲུང་། །ཡོ་ག་པ་ཡི་ཐེག་པ་ནི། །རྩ་བ་གསུམ་དང་ཡན་ལག་བདུན་ལྔཡང། །རྩ་བའི་ལྟུང་བ་བཅུ་བཞི་བསྲུང་། །མ་ཧྭ་ཡོ་གའི་ཐེག་པ་ནི། །རྩ་བ་གསུམ་དང་ཡན་ལག་ལྔ། །ཕྱེ་བས་ཉི་ཤུ་རྩ་བརྒྱད་བསྲུང་། །ཨ་ནུ་ཡོ་གའི་ཐེག་པ་ནི། །སྣང་སྲིད་ཕྱག་རྒྱའི་དཀྱིལ་འཁོར་ནི། །མི་འདའ་རྒྱན་གྱི་དམ་ཚིག་བསྲུང་། །ཨ་ཏི་ཡོ་གའི་ཐེག་པ་ནི། །མེད་པ་དང་ནི་ཕྱལ་བ་དང་། །གཅིག་པུ་དང་ནི་ལྷུན་གྱིས་གྲུབ། །ཨ་ཏི་ཡོ་གའི་དམ་ཚིག་སྟེ། །དེ་ལས་འདས་ན་ཚིག་པར་འགྱུར། །སྤྱིར་ན་གསང་སྔགས་དམ་ཚིག་ནི། །བསྲུང་ན་བསམ་གྱིས་མི་ཁྱབ་སྟེ། །ས་མ་ཡ་ནི་འབུམ་སྟེ་ཡོད། །ཅི་བཞིན་པ་ཡི་ཆོས་ཉིད་ལ། །མ་བཅོས་པ་ཡི་བློ་བཞག་སྟེ། །གཉིས་སུ་མེད་པའི་ཡེ་ཤེས་ཏེ། །མཉམ་ཉིད་གཡོ་བ་མེད་པ་ནི། །དམ་ཚིག་ཐམས་ཅད་བསྲུང་བ་ཡིན། །ཉམས་པའི་ཆད་པ་བྱུང་བ་ལས། །མགོན་སྐྱབས་དེ་ལས་ཆེ་བ་མེད། །ཅེས་གསུངས་སོ། །བང་མཛོད་འབྲུལ་གྱི་ལྡེའུ་མིག་ལས། ཐེག་པ་སོ་སོའི་བསྲུང་མཚམས་དང་། གསོ་ཐབས་བསྟན་པའི་ལེའུ་སྟེ་བཅུ་གཉིས་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །འཇིག་རྟེན་པ་ཡི་ཐེག་པ་དང་། །འཇིག་རྟེན་འདས་པའི་ཐེག་པ་ཡང་། །སྤྱོད་པའི་ཕྲིན་ལས་ཅི་ལྟར་ལགས། །གསང་བའི་བདག་པོས་བསྟན་དུ་གསོལ། །གསང་བའི་བདག་པོས་གསུངས་པ། སེམས་དཔའ་ཆེན་པོ་ཉོན་ཅིག །ཆད་པར་ལྟ་བའི་སྤྱོད་པ་ནི། །རྒྱུ་ཡོད་འབྲས་བུ་མེད་བརྟགས་ནས། །དགེ་བ་བཅུ་སྤང་མི་དགེ་བཅུ། །གང་ལ་ཐོགས་པ་མེད་པར་སྦྱོད། །རྟག་པར་ལྟ་བའི་སྤྱོད་པ་ནི། །མི་དགེ་བཅུ་སྤང་དགེ་བ་བཅུ། །དཀའ་ཐུབ་ཆེན་པོས་སྤྱོད་པར་བྱེད། །ཉན་ཐོས་དགྲ་བཅོམ་སྤྱོད་པ་ནི། །དགེ་བ་བཅུ་དང་མི་དགེ་བཅུ། །བདེ་སྡུག་ལས་ཀྱི་རྒྱུར་བརྟགས་ནས། །མི་དགེ་བཅུ་སྤང་དགེ་བ་བཅུ། །རང་གི་དོན་དུ་སྤྱོད་པར་བྱེད། །རང་རྒྱལ་གཉིས་ཀའི་དོན་དུ་སྤྱོད། །བྱང་ཆུབ་སེམས་དཔའི་སྤྱོད་པ་ནི། །མི་དགེ་བཅུ་སྤང་དགེ་བ་བཅུ། །གཞན་ཡི་དོན་དུ་སྤྱོད་པར་བྱེད། །ཕ་རོལ་ཕྱིན་པ་བཅུ་དག་ནི། །བདག་གཞན་གཉིས་ཀའི་དོན་དུ་སྤྱོད། །བྱ་བའི་རྒྱུད་དང་གཉིས་ཀའི་རྒྱུད། །ཞི་རྒྱས་དབང་དང་མངོན་སྤྱོད་བཞི། །བདག་གཞན་གཉིས་ཀའི་དོན་དུ་སྤྱོད། །རྣལ་འབྱོར་རྒྱུད་ཀྱི་ཐེག་པ་ནི། །སྙིང་རྗེ་ལ་སོགས་ཚད་མེད་བཞི། །གཞན་གྱི་དོན་དུ་སྦྱོད་པར་བྱེད། །བསྐྱེད་པ་མ་ཧྭ་ཡོ་ག་ནི། །ཏ་ན་དང་ནི་ཀྟ་ན་དང་། །དམ་རྫས་བདུད་རྩི་ལྔ་པོ་ལ། །ཐབས་ཆེན་བལྟ་བའི་སྤྱོད་པས་སྤྱོད། །རྫོགས་པ་ཨ་ནུ་ཡོ་ག་ནི། །དབྱིངས་དང་ཡེ་ཤེས་ལོངས་སྤྱོད་རྫོགས། །ཨ་ཏི་ཡོ་གའི་སྤྱོད་པ་ནི། །ལྟ་བསྒོམ་སྲོག་དང་ལྡན་པ་ཡི། ཁུགས་ལས་བྱུང་བའི་སྤྱོད་པ་ནི། །ཅི་ལྟར་སྨྱོན་པའི་སྤྱོད་པ་བཞིན། །གང་ལའང་ཐོགས་པ་མེད་པར་སྤྱོད། །ཅེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། འཇིག་རྟེན་དང་འཇིག་རྟེན་ལས་འདས་པའི་སྤྱོད་པ་བསྟན་པའི་ལེའུ་སྟེ་བཅུ་གསུམ་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །ཐེག་པའི་གོལ་སྒྲིབ་ཅི་ལྟར་ལགས། །གསང་བའི་བདག་པོས་བསྟན་དུ་གསོལ། །གསང་བའི་བདག་པོས་གསུངས་པ། སེམས་དཔའ་ཆེན་པོ་ཉོན་ཅིག །གོལ་སྒྲིབ་རང་གི་ངོ་བོ་ནི། །འོག་མ་འོག་མའི་བལྟ་བས་ནི། །གོང་མ་མ་མཐོང་སྒྲིབ་པ་ཡིན། །གོང་མ་གོང་མས་སྤྱོད་པ་ནི། །འོག་ལྟར་སྤྱད་པས་གོལ་ས་བྱུང་། །སྤྱིར་ན་གོལ་སྒྲིབ་དབྱེ་བ་ནི། །ལྟ་བའི་གོལ་སྒྲིབ་དབྱེ་བ་དང་། །ཐེག་པའི་གོལ་སྒྲིབ་བསྟན་པ་ནི། །གོལ་ས་སྤྱིར་ན་བཅོ་བརྒྱད་དེ། །སྒྲིབ་པ་སྐོར་གསུམ་སྤྱིར་བཅུ་གཉིས། །བསྡོམས་པས་སུམ་ཅུ་ཐམ་པའོ། །ལྟ་བའི་གོལ་སྒྲིབ་བསྟན་པ་ནི། །ལྟ་བ་དང་ནི་དམ་ཚིག་དང་། །ཕྲིན་ལས་དང་ནི་ཡེ་ཤེས་དང་། །ས་དང་ལམ་གྱི་རིམ་པ་དང་། །ཕྲ་བ་དང་ནི་རྒྱུད་དང་ནི། །ལུང་དང་མན་ངག་རྣམ་པ་བཅུ། །དེ་ལས་ཕྱེ་བས་གོལ་སྒྲིབ་ནི། །སུམ་ཅུ་དྲུག་ཅུའི་གྲངས་སུ་ཡོད། །ལ་ལ་དག་ལ་གོལ་ས་མང་། །ལ་ལ་གོལ་སྒྲིབ་མཉམ་པར་འདོད། །རྫོགས་ཆེན་ཨ་ཏི་ཡོ་ག་ལ། །གོལ་དང་མ་གོལ་གཉིས་སུ་མེད། །ཅེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། །གོལ་སྒྲིབ་རྣམ་པར་དབྱེ་བའི་ལེའུ་སྟེ་བཅུ་བཞི་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །འཇིག་རྟེན་པ་ཡི་ཐེག་པ་དང་། །འཇིག་རྟེན་འདས་པའི་ཐེག་པ་ཡི། །ལྟ་བའི་ཁྱད་པར་ཇི་ལྟར་ལགས། །གསང་བའི་བདག་པོས་བསྟན་དུ་གསོལ། །ཡང་གསུངས་པ། སེམས་དཔའ་ཆེན་པོ་ཉོན་ཅིག །འཇིག་རྟེན་པ་ཡི་ཐེག་པ་ནི། །སུམ་བརྒྱ་དྲུག་ཅུའི་གྲངས་སྙེད་ཡོད། །དེ་ལ་ལྟ་བ་བསྡུས་པ་ནི། །འཇིག་ཚོགས་དྲུག་ཅུའི་གྲངས་སྙེད་ཡོད། །སྔོན་གྱི་མཐར་གཏོགས་བཅོ་བརྒྱད་དང་། །ཕྱི་མའི་མཐའ་ལ་གཏོགས་པ་ནི། །བཞི་བཅུ་རྩ་བཞིའི་གྲངས་སུ་ཡོད། །བསྡོམས་པས་དྲུག་ཅུ་རྩ་གཉིས་ཡོད། །དེ་ལས་བསྡུས་ན་ཉི་ཤུ་ཡོད། །དེ་ལས་བསྡུས་པས་རྣམ་པ་བཞི། །བལྟ་བ་དེ་དག་རྒྱས་པ་ནི། །ཚངས་པའི་དྲ་པའི་མདོ་ལས་གསལ། །དེ་ལས་བསྡུས་པ་རྣམ་པ་གཉིས། །རྟག་པ་དང་ནི་ཆད་པའོ། །མུ་སྟེགས་ཆད་པའི་ལྟ་བ་ནི། ཁུསྣྲུ་ཡོད་འབྲས་བུ་མེད་པ་ནི། །ལུང་དང་རིག་པ་གཉིས་ཀྱིས་འདོད། །རྟག་པར་ལྟ་བའི་ལྟ་བ་ནི། ཁུ་ཡོད་འབྲས་བུ་ཡོད་པར་བལྟ། །སེམས་ཅན་ཀུན་གྱི་སྙིང་དཀྱིལ་ན། །བདག་ཅེས་བྱ་བའི་དངོས་པོ་ཞིག །ཆེ་སྟེ་ཆེ་ན་མཐེ་བོང་ཙམ། །ཆུང་སྟེ་ཆུང་ན་ཡུངས་འབྲུ་ཙམ། །ཡང་ཆུང་སྐྲ་ཡི་རྩེ་མོ་ཙམ། །ལུས་ཀྱི་བོངས་དང་སྦྱར་ཏེ་ཡོད། །ཕ་ཡི་རྒྱུ་ལས་མ་བྱུང་ཞིང་། །མ་ཡི་རྐྱེན་གྱིས་མ་བསྐྱེད་དེ། ཁྲེས་ཤིང་རིག་པའི་ངོ་བོ་སྲ །དུས་གསུམ་འཕེལ་འགྱུར་མེད་པ་ནི། །བདག་ཉིད་རྟག་པ་ཆེན་པོར་འདོད། །ཅེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། འཇིག་རྟེན་པའི་བལྟ་བ་བསྟན་པའི་ལེའུ་སྟེ་བཅོ་ལྔ་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །ཉན་ཐོས་ལྟ་བ་ཇི་ལྟར་ལགས། །གསང་བ་འི་བདག་པོས་བསྟན་དུ་གསོལ། །གསང་བའི་བདག་པོས་གསུངས་པ། ཀྱེ་ཀྱེ་སེམས་དཔའ་ཆེན་པོ་ཉོན། །ཉན་ཐོས་ལྟ་བ་རྣམ་གཉིས་ཏེ། །བྱེ་བྲག་བ་དང་མདོ་སྡེའོ། །བྱེ་བྲག་དོན་དམ་རྡུལ་ཕྲན་ཆ། །ཆ་མེད་ཕྱོགས་དང་བཅས་པར་འདོད། །མདོ་སྡེ་གཡག་རྔ་ནེ་སེང་ཚུལ། །ཀུན་རྫོབ་སྒྱུ་མའི་ཚུལ་དུ་འདོད་པ་ཡིན། །རང་རྒྱལ་ཕྱོགས་གཅིག་དེ་དང་མཐུན། །དེ་ལས་ཁྱད་པར་འཕགས་པ་ནི། །རྣམ་པར་རིག་བྱེད་མ་ཡིན་པའི། །གཟུགས་ལ་བདག་མེད་ཁྱད་པར་འཕགས། །ནང་གི་ཤེས་པ་སྐད་ཅིག་མ། །སྐྱེ་འགག་ཅན་དེ་རྒྱུ་འབྲས་མེད། །ཅེས་གསུངས་སོ། །བང་མཛོད་འཕྲུལ་གྱི་ལྡེ་མིག་ལས། ཉན་ཐོས་རང་རྒྱལ་གྱི་ལྟ་བ་མདོར་བསྟན་པའི་ལེའུ་སྟེ་བཅུ་དྲུག་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །མདོ་སྡེ་བྱང་ཆུབ་སེམས་དཔའ་ཡི། །དེ་ཡི་ལྟ་བ་ཅི་ལྷར་ལགས། །གསང་བའི་བདག་པོས་བསྟན་དུ་གསོལ། །གསང་བའི་བདག་པོས་གསུངས་པ། སེམས་དཔའ་ཆེན་པོ་ཉོན་ཅིག །མདོ་སྡེའི་ལྟ་བ་གསུམ་ཡོད་དེ། །སེམས་ཙམ་ཡོད་པའི་དབུ་མ་དང་། །མདོ་སྡེ་སྤྱོད་པའི་དབུ་མའོ། །རྣལ་འབྱོར་སྤྱོད་པའི་དབུ་མའོ། །སེམས་ཙམ་ལ་ཡང་གཉིས་ཡོད་དེ། །རྣམ་བཅས་དང་ནི་རྣམ་མེད་དོ། །རྣམ་བཅས་ལ་ཡང་གཉིས་ཡོད་དེ། །རྣམ་པ་བདེན་རྫུན་གཉིས་སུ་འདོད། །རྣམ་པ་བདེན་པའི་ལྟ་བ་ན། །ཕྱི་ཡི་ཡུལ་དང་ནང་གི་སེམས། །དོན་དམ་དུ་ནི་འབྲེལ་མེད་ཀྱང་། །ཀུན་རྫོབ་ཏུ་ནི་འབྲེལ་པར་འདོད། །ནང་གི་ཤེས་པ་སྐད་ཅིག་མ། །སྐད་ཅིག་ཆ་ཡིས་མི་རྟག་སྟེ། །དེ་ཉིད་རྒྱུན་གྱིས་རྟག་པའོ། །སྔ་མ་སྔ་མས་རྒྱུ་བྱས་ནས། །ཕྱི་མ་ཕྱི་མ་འབྲས་བུར་འདོད། །རྣམ་པར་རྫུན་པའི་བལྟ་བ་ནི། ཁོགོས་པ་བདེན་ཏེ་རྣམ་པ་རྫུན། །རྣམ་པ་ཤེས་དང་མགོ་སྙོམས་པ། །ཡང་དག་ཡོད་པ་མ་ཡིན་ཏེ། །དོན་དམ་དུ་ན་ཨ་ཅང་ཆེས། །ཀུན་རྫོབ་ཏུ་ཡང་འབྲེལ་མེད་འདོད། ཁོ།ས་པ་རང་རིག་གསལ་བ་ཙམ། །དེ་ལས་གཞན་པའི་ཆོས་མི་འདོད། །རྣམ་མེད་དག་གི་ལྟ་བ་ནི། །གཉིས་མེད་ཡེ་ཤེས་ཤེལ་ལྟ་བུ། །རང་རིག་གསལ་བའི་ངོ་བོར་འདོད། །མདོ་སྡེ་སྤྱི་ཡི་དབུ་མ་ནི། །ཆོས་རྣམས་ཡུལ་སེམས་གཉིས་སུ་འདོད། །ཡུལ་གྱི་རྒྱུ་ནི་ཕྲ་རབ་རྡུལ། །ཕྱོགས་ཆར་གཞིག་ན་གཅིག་མ་གྲུབ། །གཅིག་མ་གྲུབ་པའི་གཏན་ཚིགས་ཀྱིས། །གཅིག་གིས་བསགས་པའི་དུ་མ་ཡང་། །ཡང་དག་ཉིད་དུ་མི་འདོད་དེ། །རང་གི་རང་བཞིན་སྟོང་པར་འདོད། །ནང་གི་ཤེས་པ་སྐད་ཅིག་མ། །སྔ་མ་འདས་ཏེ་མི་གནས་སྟོང་། །ཕྱི་མ་མ་འོངས་མི་གནས་སྟོང་། །ད་ལྟར་འགགས་པར་གྱུར་པས་སྟོང་། །དུས་གསུམ་ཆ་ཡིས་སྟོང་པར་འདོད། །རྣལ་འབྱོར་སྤྱོད་པའི་ལྟ་བ་ནི། །ཕྱི་ཡི་ཡུལ་ལྷར་སྣང་བ་ནི། །ཀུན་རྫོབ་སྒྱུ་མའི་ཚུལ་ཙམ་དུ། །འཇའཚོནསྒྱུམའིཚུལདུ་སྣང་། །བང་མཛོད་འཕྲུལ་གྱི་ལྡེའུ་མིག་ལས། མདོ་སྡེའི་ཐེག་པའི་ལྟ་བ་བསྟན་པའི་ལེའུ་སྟེ་བཅུ་བདུན་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །གསང་སྔགས་ལྟ་བ་ཅི་ལྟར་ལགས། །གསང་བའི་བདག་པོས་བསྟན་དུ་གསོལ། །གསུངས་པ། སེམས་དཔའ་ཆེན་པོ་ཉོན་ཅིག །གསང་སྔགས་ཐུན་མོང་ལྟ་བ་ནི། །བདེན་པ་གཉིས་ཀྱི་མུ་བཟུང་སྟེ། །དོན་དམ་སྐྱེ་འགག་མེད་པར་འདོད། །ཀུན་རྫོབ་ཕྱག་རྒྱའི་དཀྱིལ་འཁོར་འདོད། །ཅུང་ཟད་ཕྱོགས་ཆ་མི་མཐུན་པ། །བྱ་བའི་རྒྱུད་ཀྱི་ཐེག་པ་ནི། །ཆོ་ག་ཡན་ལག་བཅུ་གཅིག་གིས། །བྱིན་གྱིས་བརླབས་ནས་ལྷ་རུ་འདོད། །དེ་ཡང་རྗེ་དང་ཁོལ་གྱི་ཚུལ། །གཉིས་ཀ་རྒྱུད་ཀྱིས་དཔོན་གཡོག་ཚུལ། །རྣལ་འབྱོར་རྒྱུད་ཀྱི་ཐེག་པས་ནི། །བྱང་ཆུབ་ལྔ་དང་ཆོ་འཕྲུལ་བཞིས། །ཡོངས་སུ་བརྟགས་ནས་ལྷ་རུ་འདོད། །དེ་ཡང་སྐྲུན་དང་གྲོགས་པོའི་ཚུལ། །བསྐྱེད་པ་མ་ཧྭ་ཡོ་ག་ནི། །ཏིང་འཛིན་གསུམ་དང་བསྙེན་བསྒྲུབ་བཞིས། །ཡོངས་སུ་བརྟགས་ནས་ལྷ་རུ་འདོད། །ཡེ་ཤེས་དམ་ཚིག་ཚུལ་མི་འཛིན། །རྫོགས་པ་ཨ་ནུ་ཡོ་ག་ནི། །ཕུང་པོ་ཁམས་དང་སྐྱེ་མཆེད་རྣམས། །ལྷ་དང་ལྷ་མོའི་དཀྱིལ་འཁོར་དུ། །མ་བསྐྱེད་རྫོགས་པའི་ཚུལ་དུ་འདོད། །ཅེས་གསུངས་སོ། །བང་མཛོད་འཕྲུལ་གྱི་ལྡེ་མིག་ལས། སྔགས་ཐུན་མོང་གི་བལྟ་བ་བསྟན་པའི་ལེའུ་སྟེ་བཅོ་བརྒྱད་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །རྫོགས་ཆེན་ཨ་ཏི་ཡོ་ག་ཡི། །བྱེ་བྲག་རྣམ་པར་ཕྱེ་བ་ལས། །དང་པོ་བལྟ་བ་མདོར་བསྟན་པའི། །རང་གི་ངོ་བོ་ཅི་ལྟར་ལགས། །གསང་བའི་བདག་པོས་བཤད་དུ་གསོལ། །གསུངས་པ། ཀྱེ་ཀྱེ་སེམས་དཔའ་ཆེན་པོ་ཉོན་ཅིག །རྫོགས་པ་ཆེན་པོའི་ལྟ་བ་ནི། །མ་འདྲེས་ཡོངས་སུ་རྫོགས་པ་ཡིན། །ཀུན་བྲལ་ཅི་མ་སྤངས་པ་ཡིན། །རྒྱ་ཆད་ཕྱོགས་ལྷུང་མེད་པ་ཡིན། །ཡིན་ཚུལ་ངེས་པ་མེད་པ་ལ། །སྣང་ཚུལ་ཅིར་ཡང་སྣང་བ་ཡིན། །རང་བཞིན་གཅིག་ཏུ་མ་ངེས་པ། །བལྟ་བ་ངོས་བཟུང་མེད་པ་ཡིན། །ཞེས་གསུངས་སོ། །ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །དེ་ཡི་གཏན་ཚིགས་ཅི་ལྟར་ལགས། །གསང་བའི་བདག་པོས་བསྟན་དུ་གསོལ། །གསུངས་པ། སེམས་དཔའ་ཆེན་པོ་ཉོན་ཅིག །བརྒྱད་ཀྱི་ལྷ་སྤྱོད་མ་འདྲེས་པ། །རྫོགས་ཆེན་ལམ་གྱི་ཡེ་ཤེས་ལ། །དེ་ཉིད་མ་འདྲེས་ཡོངས་སུ་རྫོགས། །བློས་བརྟགས་ཆོས་ནི་ཀུན་དང་བྲལ། །རང་སྣང་ངོ་བོ་ཅི་མ་སྤངས། །རང་བཞིན་གཅིག་ཏུ་མ་ངེས་ཤིང་། །གང་གི་ཕྱོགས་སུ་མ་ལྷུང་བས། །ལྟ་བ་དངོས་པོ་མེད་པ་ཡིན། །མི་མཐུན་བསམ་པ་སོ་སོ་ལ། །སྣང་ཚུལ་ཅིར་ཡང་སྣང་བའི་ཚུལ། །གང་ཡང་རྒྱ་མ་ཆད་པ་ཡིན། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། ལྟ་བ་མདོར་བསྟན་པའི་ལེའུ་སྙེ་བཅུ་དགུ་པའོ།། །།ཡང་སེམས་དཔའ་རྡོ་རྗེས་གསོལ་པ། །དེ་ཡི་སྣང་ཚུལ་ཅི་ལྟར་ལགས། །གསང་བའི་བདག་པོས་བསྟན་དུ་གསོལ། །གསང་བའི་བདག་པོས་གསུངས་པ། སེམས་དཔའ་ཆེན་པོ་ཉོན་ཅིག །བྱང་ཆུབ་སེམས་ལ་ཀུན་བརྟེན་པས། །བྱང་ཆུབ་སེམས་ནི་ས་ལྟར་སྣང་། །བྱང་ཆུབ་སེམས་ཀྱིས་ཀུན་སྡུད་པས། །བྱང་ཆུབ་སེམས་ནི་ཆུ་ལྟར་སྣང་། །ཀུན་ལ་སྙོམས་ཤིང་སྨིན་བྱེད་པས། །བྱང་ཆུབ་སེམས་ནི་མེ་ལྟར་སྣང་། །གཟུགས་མེད་མཁའ་ལ་རྒྱུ་བའི་ཕྱིར། །བྱང་ཆུབ་སེམས་ནི་རླུད་ལྟར་སྣང་། །སྣང་མེད་ཀུན་ལ་ཁྱབ་པའི་ཕྱིར། །བྱང་ཆུབ་མཁའ་ལྟར་སྣང་ཞེས་གསུངས། །ཀུན་གཞི་སེམས་ནི་ནམ་མཁའ་ལ། །རང་བྱུང་ཡེ་ཤེས་རང་ཤར་བས། །བྱང་ཆུབ་སེམས་ནི་ཤར་ཕྱོགས་ཡིན། །ཆོས་སྐུ་རང་ལ་ཡོད་པ་སྟེ། །མ་བཅོས་མཉམ་པར་བཞག་པས་ལྷོ། །བྱང་ཆུབ་སེམས་ནི་ལྷོ་ཕྱོགས་ཡིན། །མཚན་མའི་རྣམ་པར་རྟོག་པ་ཀུན། །གཉིས་མེད་ཡེ་ཤེས་ངང་དུ་ནུབ། །བྱང་ཆུབ་སེམས་ནི་ནུབ་ཕྱོགས་ཡིན། །བྱང་ཆུབ་སེམས་ཀྱི་ཆོས་ཉིད་ལ། །ཉོན་མོངས་སྐྱོན་གྱིས་མ་གོས་པས། །བྱང་ཆུབ་སེམས་ནི་བྱང་ཕྱོགས་ཡིན། །ཆོས་རྣམས་རྩ་བ་སེམས་སུ་འདུས། །བྱང་ཆུབ་སེམས་ནི་དབུས་ཀྱང་ཡིན། །རང་བྱུང་ཡེ་ཤེས་ཆེན་པོ་དེ། །ཡེ་ཤེས་ཀུན་གྱི་བླར་གྱུར་པས། །བྱང་ཆུབ་སེམས་ནི་སྟེང་ཡང་ཡིན། །མི་རྟོག་པ་ཡི་ཡེ་ཤེས་ཆེན་པོ་དེས །རྣམ་རྟོག་མཚན་མ་ཟིལ་མནན་པས། །བྱང་ཆུབ་སེམས་ནི་འོག་ཀྱང་ཡིན། །ཞེས་གསུངས་སོ། །ཐིག་ལེ་ཉག་གཅིག་བྱང་ཆུབ་སེམས། །ཟླུམ་ཞིང་རྣམ་པ་མ་འཕྲོས་པས། །བྱང་ཆུབ་སེམས་ནི་ཟླུམ་པོ་ཡིན། །ནམ་མཁའི་མཐའ་ལྟར་ཀུན་ཁྱབ་པས། །བྱང་ཆུབ་སེམས་ནི་གྲུ་བཞི་ཡིན། །བྱང་ཆུབ་སེམས་ཀྱི་ཆོས་ཉིད་ནི། །ཆོས་རྣམས་མ་ལུས་དབང་དུ་སྡུད། །བྱང་ཆུབ་སེམས་ནི་ཟླ་གམ་ཡིན། །བྱང་ཆུབ་སེམས་ཀྱི་ཆོས་ཉིད་དེ། །སྐུ་གསུང་ཐུགས་ཀྱི་བདག་ཉིད་ཀྱིས། །བྱང་ཆུབ་སེམས་ནི་ཟུར་གསུམ་ཡིན། །ཞེས་སོ། །ཡང་གསུངས་པ། བྱང་ཆུབ་སེམས་ཀྱི་ཆོས་ཉིད་ལ། །ཉོན་མོངས་སྐྱོན་གྱིས་མ་གོས་པས། །བྱང་ཆུབ་སེམས་ནི་དཀར་པོ་ཡིན། །ཆེ་བའི་ཡོན་ཏན་འབྱུང་བའི་ཕྱིར། །བྱང་ཆུབ་སེམས་ནི་སེར་པོ་ཡིན། །ཐུགས་རྗེ་ཀུན་ལ་ཆགས་པའི་ཕྱིན། །བྱང་ཆུབ་སེམས་ནི་དམར་པོ་ཡིན། །གང་ལ་ཐོགས་མེད་སྤྱོད་པའི་ཕྱིར། །བྱང་ཆུབ་སེམས་ནི་ལྗང་གུ་ཡིན། །སྣ་ཚོགས་ཅིར་ཡང་སྣང་བའི་ཕྱིར། །བྱང་ཆུབ་སེམས་ནི་ཁྲ་བོ་ཡིན། །གཞན་གྱིས་བསྒྱུར་དུ་མི་བ་་ཕྱིར། །བྱང་ཆུབ་སེམས་ནི་ནག་པོ་ཡིན། །ཞེས་སོ། །ཡང་གསུངས་པ། །བྱང་ཆུབ་སེམས་ཀྱི་ཆོས་ཉིད་ནི། །མ་སྐྱེས་སྟོང་པ་སྐྱེ་བ་མེད། །དེ་ནི་གཟུགས་མེད་ཁམས་ཡིན་ནོ། །སྐྱེ་བའི་ཆོ་འཕྲུལ་གཟུགས་སྣང་བ། །དེ་ནི་གཟུགས་ཀྱི་ཁམས་ཡིན་ཏེ། །འདོད་སྤྱོད་སྙིང་རྗེས་ཀུན་འདུས་པ། །དེ་ནི་འདོད་པའི་ཁམས་སུ་ཡིན། །ཞེས་སོ། །ཡང་གསུངས་པ། །སྣང་བ་ཐམས་ཅད་སེམས་ལ་སྣང་། །དེས་ན་སེམས་ཉིད་གཟུགས་ཀྱང་ཡིན། །གྲག་པ་སརྦ་སེམས་ལ་གྲག །དེས་ན་སེམས་ཉིད་སྒྲ་ཡང་ཡིན། །དྲི་མཆོག་སརྦ་སེམས་ལ་མནམ། །དེས་ན་སེམས་ཉིད་དྲི་ཡང་ཡིན། །རོ་མཆོག་སརྦ་སེམས་ལ་བྲོ། །དེས་ན་སེམས་ཉིད་རོ་ཡང་ཡིན། །རེག་བྱ་སརྦ་སེམས་ལ་ཚོར། །དེས་ན་སེམས་ཉིད་རེག་ཀྱང་ཡིན། །ཞེས་སོ། །ཡང་གསུངས་པ། འདོད་པ་སྲིད་གསུམ་སངས་རྒྱས་འདོད། །ཐུགས་རྗེ་ངང་གིས་དེ་ལ་ཆགས། །སེམས་ནི་འདོད་ཆགས་ཡིན་པར་འདོད། །ཞི་བ་བྱང་ཆུབ་སེམས་ལ་ཞི། །སྡང་བ་འཁོར་བའི་ཆོས་ལ་སྡང་། །སེམས་ནི་ཞེ་སྡང་ཡིན་པར་འདོད། །གཏི་བ་ཆོས་ཀྱི་དོན་ལ་གཏི། །མུག་པ་མཚན་མའི་ཆོས་ལ་མུག །སེམས་ནི་གཏི་མུག་ཡིན་པར་འདོད། །ང་ནི་ཆོས་ཀྱི་བྱང་ཆུབ་སེམས། །རྒྱལ་བ་འཁོར་བའི་ཆོས་ལས་རྒྱལ། །སེམས་ནི་ང་རྒྱལ་ཡིན་པར་འདོད། །ཕྲག་ནི་ཆོས་ཀྱི་དབྱིངས་ལ་ཕྲག །དོག་ནི་མཚན་མའི་ཆོས་ལ་དོག །སེམས་ནི་ཕྲག་དོག་ཡིན་པར་འདོད། །ཅེས་གསུངས་སོ། །རང་བྱུང་ཡེ་ཤེས་སྒྲིབ་མེད་པ། །སྟོན་པ་ཕུན་སུམ་ཚོགས་པ་ཡིན། །རིག་པ་འདུ་འབྲལ་མེད་པ་ཡིས། །དེ་འཁོར་ཕུན་སུམ་ཚོགས་པ་ཡིན། །སེམས་ཉིད་མ་བཅོས་རྣལ་བཞག་པ། །བསྟན་པ་ཕུན་སུམ་ཚོགས་པ་ཡིན། །ཞེས་སོ། །ཡང་གསུངས་པ། སེམས་རྟོག་སངས་རྒྱས་བྱུང་བའི་ཕྱིར། །དེས་ན་སེམས་ཉིད་རྒྱུ་ཡང་ཡིན། །མ་ཡེངས་གནས་པ་ལམ་ཡིན་པས། །དེས་ན་སེམས་ཉིད་ལམ་ཡང་ཡིན། །མངོན་དུ་གྱུར་པ་འབྲས་བུ་བས། །དེས་ན སེམས་ཉིད་འབྲས་བུ་ཡིན། །ཞེས་སོ། །ཡང་གསུངས་པ། །བྱང་ཆུབ་སེམས་ཀྱི་ཆོས་ཉིད་དེ། །མ་བཅོས་རྣལ་དུ་བཞག་པ་ནི། །དེ་ནི་ཆོས་དབྱིངས་ཡེ་ཤེས་ཡིན། །གསལ་བ་རྟོག་པ་མེད་པ་ནི། །དེ་ནི་མེ་ལོང་ཡེ་ཤེས་ཡིན། །སེམས་ལ་དབྱེ་བ་མེད་པ་ནི། །དེ་ནི་མཉམ་ཉིད་ཡེ་ཤེས་ཡིན། །སྣང་ཚུལ་ཅིར་ཡང་སྣང་བ་ནི། །དེ་ནི་ཀུན་རྟོག་ཡེ་ཤེས་ཡིན། །སེམས་ཀྱིས་ཀུན་ལ་དབང་བསྒྱུར་བས །དེ་ནི་བྱ་གྲུབ་ཡེ་ཤེས་ཡིན། །ཞེས་སོ། །ཡང་གསུངས་པ། །སེམས་ཉིད་ཅི་ལྟར་སྣང་བ་རྣམ་པར་སྣང་མཛད་ཡིན། །དུས་གསུམ་འཕོ་འགྱུར་མེད་པས་རྡོ་རྗེ་སེམས་དཔའ་ཡིན། །ཆེ་བའི་ཡོན་ཏན་འབྱུང་བས་རིན་ཆེན་འབྱུང་ལྡན་ཡིན། །སེམས་ཀྱིས་ཀུན་ལ་ཁྱབ་པས་སྣང་བ་མཐའ་ཡས་ཡིན། །བྱ་བཙལ་མེད་པར་གྲུབ་པས་དོན་ཡོད་གྲུབ་པ་ཡིན། །ཞེས་སོ། །ཡང་གསུངས་པ། མི་གཡོ་རང་བཞིན་གནས་པས་ཆོས་སྐུ་ཡིན། །གསལ་ལ་རྟོག་པ་མེད་པས་ལོངས་སྐུ་ཡིན། །སེམས་ལ་དབང་ཐོབ་ཅིར་ཡང་བསྒྱུར་ནུས་པས། །དེ་ནི་ཐུགས་རྗེ་སྤྲུལ་པའི་སྐུ། །རང་རིག་མངོན་དུ་གྱུར་པས་ནི། །མངོན་པར་བྱང་ཆུབ་སྐུ་རུ་འདོད། །གཉེན་པོས་འཕོ་འགྱུར་མེད་པ་ནི། །རྡོ་རྗེ་ལྟ་བུའི་སྐུ་རུ་འདོད། །ཅེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། སྣང་ཚུལ་བསྟན་པའི་ལེའུ་སྟེ་ཉི་ཤུ་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །ལྟ་བ་ཕྱོགས་ལྷུང་མེད་པའི་དོན། །དེ་དོན་བདག་ལ་བསྟན་དུ་གསོལ། །ཞེས་ཞུས་པས། ཀྱེ་སེམས་དཔའ་ཆེན་པོ་ཉོན་ཅིག །ཅི་ལྟར་ནམ་མཁའི་མཚན་ཉིད་ནི། །ཕོ་མོ་མ་ཡིན་མ་ནིང་མིན། །ཁ་དོག་དབྱིབས་དང་རིགས་མ་ཡིན། །ཕྱོགས་བཞི་མཚམས་དང་བླ་འོག་མིན། །ཕྱི་ནང་མ་ཡིན་སྣང་མུན་མིན། །གཅིག་དང་ཐ་དད་ཡོད་མེད་མིན། །སངས་རྒྱས་སྡུག་བསྔལ་བདེ་སྡུག་བསྔལ། །བཟང་ངན་ཆེ་ཆུང་སྐྱོན་ཡོན་ཏན། །གང་གི་ཕྱོགས་སུ་ལྟུང་བ་མེད། །བྱང་ཆུབ་སེམས་ཀྱང་དེ་དང་མཚུངས། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། ལྟ་བ་ཕྱོགས་ལྷུང་མེད་པར་བསྟན་པའི་ལེའུ་སྟེ་ཉེར་གཅིག་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །མ་འདྲེས་ཡོངས་སུ་རྫོགས་པའི་དོན། །དེ་དོན་བདག་ལ་བསྟན་དུ་གསོལ། །གསུངས་པ། སེམས་དཔའ་ཆེན་པོ་ཉོན་ཅིག །མཁའ་ལ་གཟུགས་སོགས་མ་འདྲེས་པ། །ཆུ་ནང་ཕྱོགས་སུ་གཟུགསཡོངས་སུ་རྫོགས། །འབྱུང་བ་རྣམ་བཞི་མ་འདྲེས་པ། །ནམ་མཁའི་ངང་དུ་ཡོངས་སུ་རྫོགས། །སྣ་ཚོགས་སྣལ་མ་མ་འདྲེས་པ། །ཟ་འོག་སྣམ་བུར་ཡོངས་སུརྫོགས། །ཚོནརྩིསྣལྔམའདྲེས་པ། །དཀྱིལའཁོརཆེནཔོརཡོངསསུ་རྫོགས། །རིནཆེནསྣལྔམའདྲེས་པ། །མཆོག་རབ་རི་ལ་ཡོངས་སུ་རྫོགས། །ཆོས་ཅན་ཕྱོགས་ནས་མ་འདྲེས་པ། །ཆོས་ཉིད་ཕྱོགས་སུ་ཡོངས་སུ་རྫོགས། །བསམ་དབང་ཕྱོགས་ནས་མ་འདྲེས་པ། །དངོས་དབང་ཕྱོགས་སུ་ཡོངས་སུ་རྫོགས། །ཀུན་རྫོགས་ཕྱོགས་ནས་མ་འདྲེས་པ། །དོན་དམ་ཕྱོགས་སུ་ཡོངས་སུ་རྫོགས། །ཞབྲུལ་རྟོག་ཕྱོགས་ནས་མ་འདྲེས་པ། །གཉིས་མེད་ཡེ་ཤེས་ཡོངས་སུ་རྫོགས། །བརྒྱད་ཀྱི་ལྟ་སྤྱོད་མ་འདྲེས་པ། །ཨ་ཏི་ཡོ་གར་ཡོངས་སུ་རྫོགས། །བང་མཛོད་འཕྲུལ་གྱི་ལྡེའུ་མིག་ལས། མ་འདྲེས་ཡོངས་སུ་རྫོགས་པའི་བལྟ་བ་བསྟན་པའི་ལེའུ་སྟེ་ཉེར་གཉིས་པའོ།། །།ཡང་གསོལ་པ། །ཀྱེ་ཀྱེ་གསང་བའི་བདག་པོ་ལགས། །དཔེར་མཚོན་ཚིག་གི་ལྡེ་མིག་གིས། །དོན་དམ་གསང་སྒོ་དབྱེ་བྱ་བ། །དེ་དོན་བདག་ལ་བསྟན་དུ་གསོལ། །གསང་བའི་བདག་པོས་གསུངས་པ། སེམས་དཔའ་ཆེན་པོ་ཉོན་ཅིག །མཁའ་ལ་ཤར་བའི་གཟུགས་སོགས་རྣམས། །དངས་པའི་རྒྱ་མཚོ་ཆེན་པོ་སྲ །དེ་ཉིད་མ་འདྲེས་ཡོངས་སུ་རྫོགས། །དེ་བཞིན་ཆོས་རྣམས་ཐམས་ཅད་ཀྱང་། །དམིགས་མེད་ཡེ་ཤེས་ངོ་བོ་ཆུ། །དེ་ཉིད་མ་འདྲེས་ཡོངས་སུ་རྫོགས། །མཁའ་ལ་ཤར་བའི་གཟུགས་སོགས་རྣམས། །དངས་པའི་རྒྱ་མཚོ་ཆེན་པོ་མྲ །བླང་བ་མེད་ཅིང་དོར་བ་མེད། །གཟུང་བ་མེད་ཅིང་གཏང་བ་མེད། །ལྡན་པ་མེད་ཅིང་བྲལ་བ་མེད། །དེ་བཞིན་ཆོས་རྣམས་ཐམས་ཅད་ཀྱང་། །གཉིས་མེད་ཡེ་ཤེས་ཆེན་པོ་ཡིས། །བླང་བ་མེད་ཅིང་དོར་བ་མེད། །གཟུང་བ་མེད་ཅིང་གཏང་བ་མེད། །ལྡན་པ་མེད་ཅིང་བྲལ་བ་མེད།།མཁའ་ལ་ཤར་བའི་གཟུགས་སོགས་དང་། །ཆུ་ནང་དག་གི་གཟུགས་བརྙན་གཉིས། །གཅིག་པ་མེད་ཅིང་ཐ་དད་མེད། །དཔེར་ན་ནམ་མཁའི་གཟུགས་སུ་གཅིག །ཆུ་ནང་གཟུགས་བརྙན་བསམ་ནི་ཁྱབ། །དེ་བཞིན་རིག་པ་གཅིག་པ་ལས། །རིག་པའི་རྩལ་ཤུགས་བསམ་མི་ཁྱབ། །མཁའ་ལ་གཟུགས་སོགས་ཤར་བ་ལ། །ཆུ་ནང་གཟུགས་བརྙན་ཤུགས་ཀྱིས་འབྱུང་། །ཀུན་གཞིའི་མཁའ་ལ་རིག་པ་ཤར། །རིག་པའི་རྩལ་ཤུགས་ཤུགས་ཀྱིས་འབྱུང་། །དཔེར་ན་ཆུ་ནང་གཟུགས་བརྙན་ཡང་། །སྣང་བ་དེ་ཡང་རང་བཞིན་མེད། །ཚོན་ལྔ་འདྲེས་པའི་ཁ་དོག་ལ། །འདི་ཞེས་གཅིག་ཏུ་ངོས་གཟུང་མེད། །དེ་བཞིན་སོ་སོར་དབྱེར་ཡང་མེད། །ཀུན་བྲལ་ཅི་ཡང་མ་སྤངས་པའོ། །ཆོས་རྣམས་འདུས་པའི་ཡེ་ཤེས་ལ། །འདི་ཞེས་གཅིག་ཏུ་ངོས་གཟུང་མེད། །དེ་བཞིན་སོ་སོར་དབྱེར་ཡང་མེད། །ཀུན་བྲལ་ཅི་ཡང་མ་སྤངས་པའོ། །སྣ་ཚོགས་དར་གྱིས་སྣལ་ཚོགས་ལ། །ཟ་འོག་སྣམ་བུར་བྱས་ཙམ་ན། །སྣ་ཚོགས་དར་གྱི་མིང་བྲལ་ནས། །ཟ་འོག་སྣམ་བུར་གཅིག་པ་བཞིན། །དེ་བཞིན་ཆོས་རྣམས་ཐ་དད་ཀྱང་། །གཉིས་མེད་ཡེ་ཤེས་བསྡུས་ཙམ་ན། །སྣ་ཚོགས་ཆོས་ཀྱི་མིང་བྲལ་ནས། །གཉིས་མེད་ཐིག་ལེ་ཆེན་པོར་གཅིག །གསེར་ལས་བྱས་པའི་རྫས་རྣམས་ཀུན། །མིང་དབྱིབས་ལ་སོགས་ཐ་དད་ཀྱང་། །ངོ་བོ་གསེར་ལ་གཅིག་པ་བཞིན། །སེམས་ཀྱིས་བརྟགས་པའི་ཆོས་རྣམས་ཀུན། །མིང་གི་རྣམ་གྲངས་ཐ་དད་ཀྱང་། །ཆོས་ཉིད་ངོ་བོར་དབྱེར་མེད་ཅིང་། །དཔེར་ན་རས་སྣམ་ཡུག་གཅིག་ལ། །ཚོན་གྱི་སྐྱོན་གྱིས་སོ་སོར་སྣང་། །སྣང་ཡང་རས་སུ་དབྱེར་མེད་ཅིང་། །དེ་བཞིན་སེམས་ཉིད་གཅིག་པ་ལས། །ཡུལ་དབང་རྐྱེན་གྱིས་སོ་སོར་སྣང་། །སྣང་ཡང་སེམས་ཀྱི་སྣང་བར་གཅིག ཁྲེལ་སྒོང་དག་གི་དྲུང་དུ་ནི། །ཁ་དོག་སྣ་ཚོགས་པ་བཞག་པས། །གང་བཞག་རྐྱེན་གྱིས་དེ་ལྟར་སྣང་། །སྣང་ཡང་ཤེལ་དུ་འགྱུར་བ་མེད། །དེ་བཞིན་ཆོས་ཉིད་རྒྱུ་གཅིག་པས། །འགྲོ་བ་རིགས་དྲུག་སོ་སོ་ནས། །བག་ཆགས་རྐྱེན་གྱིས་སོ་སོར་སྣང་། །ཆོས་ཉིད་རང་ལ་འགྱུར་བ་མེད། །རྒྱུ་ཉིད་གསེར་དུ་གཅིག་པ་ལས། །བཟོ་ཡི་ལས་ཀྱིས་བསྒྱུར་བྱས་ཏེ། །ཆོལ་ཟངས་དྲི་སྣོད་བྱས་ཙམ་ན། །གསེར་ཡང་ངན་པའི་རྒྱུ་རུ་སྣང་། །སྐུ་གཟུགས་མཆོད་རྟེན་བྱས་ཙམ་ན། །གསེར་ཡང་བཟང་པོའི་རྫས་སུ་སྣང་། །གསེར་གྱི་རྒྱུ་ལ་བཟང་ངན་མེད། །དེ་བཞིན་ཆོས་ཉིད་རྒྱུ་གཅིག་པས། །རྣམ་རྟོག་འཁྲུལ་པས་བརྟགས་ཙམ་ན། །ཡུལ་ཡང་མ་དག་འཇིག་རྟེན་ཁམས། །ངམ་གྲོག་གཡང་ས་ལུང་ཁུང་སྣང་། །ཡེ་ཤེས་ཅན་གྱི་ངོ་གང་ལ། །ཡུལ་ཡང་ཞིང་ཁམས་དག་པ་སྟེ། །བདེ་བ་ཅན་གྱི་གནས་སུ་སྣང་། །ཆོས་ཉིད་རང་གི་ངོ་བོ་ལ། །སྣང་དང་མི་སྣང་གཉིས་སུ་མེད། །སྨན་དང་དུག་ཏུ་གཅིག་པ་ལ། །ལ་ལའི་སྨན་ལ་ལ་ལའི་དུག །ཧ་ལ་ནག་པོའི་དུག་དག་ཀྱང་། །ཐབས་མཁས་བཟའ་ལེགས་སྨན་གྱི་མཆོག །སྨན་གྱི་རྒྱལ་པོ་བཅུད་ལེན་ཡང་། །ཐབས་མ་མཁས་ཤིང་བཟའ་ཉེས་ན། །ཧ་ལ་ནག་པོའི་དུག་ཏུ་འགྱུར། །དེ་བཞིན་འདོད་ཆགས་ཞེ་སྡང་ཡང་། །རྣམ་རྟོག་རླུད་གིས་མ་བསྐྱོད་ན། །དེ་ནི་རང་བྱུང་ཡེ་ཤེས་ཡིན། །རང་བྱུང་ཡེ་ཤེས་ཆེན་པོ་ཡང་། །རྣམ་རྟོག་རླུད་གིས་བསྐྱོད་ཙམ་ན། །འདོད་ཆགས་ཞེ་སྡང་གཏི་མུག་ཡིན། །ས་འོག་གནས་པའི་གསེར་དག་ནི། །བདག་པོ་མེད་ན་རྡོ་དང་འདྲ། །བདག་དང་འཕྲད་ན་མི་ཟད་གཏེར། །དགོས་འདོད་རེ་བ་དེ་ལས་འབྱུང་། །ཀུན་ལ་ཡོད་པའི་བྱང་ཆུབ་སེམས། །ཡེ་ཤེས་མེད་ན་འཁྲུལ་རྟོག་སེམས། །དགོས་པ་ཅི་ཡང་ཆེ་རྒྱུ་མེད། །གཉིས་མེད་ཡེ་ཤེས་ཤར་ཙམ་ན། །བདེ་བ་ཆེན་པོ་ཆོས་ཀྱི་སྐུ། །བྱིན་རླབས་ཡིད་བཞིན་ནོར་བུའི་ཚུལ། །དཔེར་ན་གཟུགས་རྣམས་སྣ་ཚོགས་ཀྱང་། །རི་རབ་ངོས་ལ་ཕྱིན་ཙམ་ན། །ཁ་དོག་གཅིག་ཏུ་འགྱུར་བ་བཞིན། །དེ་བཞིན་རྣལ་འབྱོརསོ་སོ་ནས། །མ་བཅོས་ངང་ལ་བློ་བཞག་ནས། །དེ་ཉིད་མངོན་དུ་གྱུར་ཙམ་ན། །ཆོས་སྐུ་བདེ་ཆེན་ཐོབ་པར་འགྱུར། །རྒྱུ་ནི་འབྱུང་ཆེན་རྣམ་ལྔ་ལ། །འབྲས་བུ་ཁམས་གསུམ་སེམས་ཅན་རྣམས། །རྒྱུ་ནི་ཁམས་གསུམ་སེམས་ཅན་ལ། །འབྲས་བུ་དུས་གསུམ་སངས་རྒྱས་སོ། ཁྲེང་ནི་མེ་ཡི་རྒྱུ་ཡིན་ཏེ། །མ་གཙུབས་བར་དུ་མེ་མི་འབྱུང་། །འོ་མ་མར་གྱི་རྒྱུ་ཡིན་ཏེ། །མ་དཀྲོགས་བར་དུ་མར་མི་འབྱུང་། །ཏིལ་འབྲུ་དག་ལ་མར་ཡོད་ཀྱང་། །མ་བཙིར་བར་དུ་མར་མི་འབྱུང་། །སེམས་ཅན་སངས་རྒྱས་རྒྱུ་ཡིན་ཏེ། །མ་བསྒོམས་བར་དུ་སངས་མི་རྒྱས། །ཞེས་རྒྱུ་འབྲས་གཉིས་ཀྱི་ཐེག་པ་ལ་དགོངས་ནས་གསུངས་པའོ། །བང་མཛོད་འཕྲུལ་གྱི་ལྡེའུ་མིག་ལས། དཔེས་མཚོན་ཚིག་གི་ལྡེ་མིག་གི་ལེའུ་སྟེ་ཉེར་གསུམ་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །རྫོགས་ཆེན་སྤྱོད་པའི་རྣལ་འབྱོར་པའི། །ལྟ་བའི་ཁོང་སྐྲན་ཅི་ལྟར་ལགས། །གསང་བའི་བདག་པོས་བསྟན་དུ་གསོལ། །གསང་བའི་བདག་པོས་གསུངས་པ། སེམས་དཔའ་ཆེན་པོ་ཉོན་ཅིག །སྔ་ཕྱི་མེད་པར་ཕྱང་ཆད་ན། །ཆད་པར་བལྟ་བའི་ལྟ་ངན་ཡིན། །གཞི་མི་སྤངས་ཤིང་རྟག་ཞེན་ན། །རྟག་པར་བལྟ་བའི་ལྟ་ངན་ཡིན། །རྡུལ་ཕྲན་ཆ་རུ་ཕྱོགས་ཞེན་ན། །ཉན་ཐོས་རང་རྒྱལ་ལྟ་ངན་ཡིན། །འདི་ཞེས་སེམས་སུ་གཅིག་འཛིན་ན། །མཚན་མར་རྟོགས་པའི་ངོ་བོ་སྟེ། །རྣམ་པར་རིག་པའི་ལྟ་ངན་ཡིན། །ཕྱོགས་ཆ་དྲུག་གི་གཏན་ཚིགས་དང་། །རྡོ་རྗེ་གཟེགས་མའི་གཏན་ཚིགས་དང་། །མུ་བཞི་སྐྱེ་འགོག་གཏན་ཚིགས་དང་། །གཅིག་དང་དུ་བྲལ་གཏན་ཚིགས་ཀྱིས། །གཞིགས་ནས་སྟོང་པར་འདོད་པ་དང་། །སྐད་ཅིག་དུས་གསུམ་ཆས་སྟོན་པ། །དེ་ནི་སྟོང་པ་བཟོ་མ་སྟེ། །མདོ་སྡེ་སྤྱོད་པའི་ལྟ་ངན་ཡིན། །མ་བཅོས་ཅི་བཞིན་ཆོས་ཉིད་ལ། །ལ་ལས་སྤངས་པའི་རྒྱུ་རུ་འདོད། །ལ་ལས་སྦྱངས་པའི་རྒྱུ་རུ་བལྟས། །མཚན་ཉིད་ཐེག་པའི་ལྷ་ངན་ཡིན། །གཟུང་འཛིན་མཐའ་ལ་གང་གནས་པ། །བྱ་བ་རྒྱུད་ཀྱི་ལྟ་ངན་ཡིན། །ལྟ་སྤྱོད་ཟུང་དུ་མ་ཆོམ་པ། །གཉིས་ཀ་རྒྱུད་ཀྱི་ལྟ་ངན་ཡིན། །བླང་དོར་མཐའ་ལ་གང་ཞེན་པ། །རྣལ་འབྱོར་རྒྱུད་ཀྱི་ལྟ་ངན་ཡིན། །རང་རྒྱུད་དག་པའི་ལྷར་འཛིན་པ། །རྣལ་འབྱོར་ཆེན་པོའི་ལྟ་ངན་ཡིན། །རྒྱུ་འབྲས་དབྱེ་བ་མེད་པ་ལ། །རྒྱུ་དང་འབྲས་བུ་གཉིས་བལྟ་བ། །ཨ་ནུ་ཡོ་གའི་ལྟ་ངན་ཡིན། །ཐུན་མོང་སྔགས་ཀྱི་ཐེག་པ་རྣམས། །བདེན་པ་གཉིས་ཀྱི་མུ་བཟུང་ནས། །ཕུང་པོ་ཁམས་དང་སྐྱེ་མཆེད་རྣམས། །གྲངས་སམ་རྟགས་ཀྱིས་ལྷར་འདོད་པ། །ལ་ལ་བྱིན་གྱིས་བརླབས་ནས་འདོད། །ལ་ལ་ཡོངས་སུ་བརྟགས་ནས་འདོད། །ལ་ལ་རང་རྒྱུད་དག་པར་འདོད། །ལ་ལ་མ་བསྐྱེད་རྫོགས་པར་འདོད། །ཐུན་མོང་སྔགས་ཀྱི་ལྟ་ངན་ཡིན། །སེམས་དཔའ་ཆེན་པོ་ཉོན་ཅིག །དཔེར་ན་མཁའ་ཟླའི་གཟུགས་གཅིག་ལས། །མིག་རྫི་ཅན་གྱིས་གཉིས་མཐོང་ཡང་། །མཁའ་ཟླ་ཉིད་ལ་གཉིས་སུ་མེད། །ཞོ་དཀྲོགས་རྐོག་ནང་དུ་ཆུ་བླུགས་པ། །མར་གྱི་མི་སྐྱོན་དར་བའི་སྐྱོན། །གང་དུ་བསྟན་པའི་ལྟ་ངན་རྣམས། །རང་རང་ཤེས་པ་འཁྲུལ་པ་ཡིན། །གཉིས་སུ་མེད་ལས་གཉིས་སུ་ཕྱེ། །ཅི་སྲིད་གཉིས་འཛིན་ཡོངས་ཀྱི་བར། །གཉིས་མེད་དོན་དང་འཕྲད་མི་འཀྱུར། །སེམས་དཔའ་ཆེན་པོ་ཉོན་ཅིག །ནམ་མཁའི་ཆ་ལ་བགོས་་དགཔམེདཀྱངམ་བྱེད། །བྱང་ཆུབ་སེམས་ལ་ཐུག་པ་མེད། །ཆོས་ཉིད་ཟབ་མོར་ངོས་མ་འཛིན། །གང་ལ་ཕྱོགས་ཞེན་མེད་པར་ཐོང་། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། ལྟ་བ་ངན་པའི་དུག་འཇོམས་པའི་ལེའུ་སྟེ་ཉེར་བཞི་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །རྫོགས་ཆེན་ལྟ་བའི་དོན་རྟོགས་པར། །ཡིད་ཆེས་དད་པ་ཅི་ལྟར་འབྱུང་། །གསང་བའི་བདག་པོས་བསྟན་དུ་གསོལ། །གསུངས་པ། སེམས་དཔའ་ཉོན་ཅིག །ཅི་ལྟར་སྣང་བའི་ཆོས་རྣམས་ཀུན། །བྱང་ཆུབ་སེམས་ཀྱི་ཆོས་ཉིད་ཡིན། །མི་སྣང་བ་ལ་མངོན་དུ་འབྱིན་ནུས་པ། །ཆོས་ཀྱི་སྙིང་པོ་ཡིན་པར་ཡིད་ཀྱང་ཆེས། །རྒྱུ་ལས་མ་བྱུང་རྐྱེན་གྱིས་མ་བསྐྱེད་པས། །རང་བྱུང་ཡེ་ཤེས་ཡིན་པར་ཡིད་ཀྱང་ཆེས། །རང་བཞིན་བཅུ་ཡིས་བཙལ་དུ་མེད་པའི་ཕྱིར། །མ་བཙལ་ལྷུན་གྱིས་གྲུབ་པ་ཡིན་པར་ཡིད་ཀྱང་ཆེས། །ཆོས་རྣམས་ཐམས་ཅད་གཏན་ལ་ཕེབས་པའི་ཕྱིར། །སྟོན་པའི་སྒྲོན་མ་ཡིན་པར་ཡིད་ཀྱང་ཆེས། །སྡེ་སྣོད་ཀུན་དང་རྒྱུད་ཀུན་གྱི། །འབྱུང་གནས་གཏན་ལ་འབེབས་པའི་ཕྱིར། །ཀུན་གྱི་སྤྱི་འགྲེལ་ཡིན་པར་ཡིད་ཀྱང་ཆེས། །རྒྱུ་འབྲས་ཐེག་པ་ཀུན་ལས་ཁྱད་འཕགས་པས། །ཐེག་པའི་ཡང་རྩེ་ཡིན་པར་ཡིད་ཀྱང་ཆེས། །དུས་གསུམ་སངས་རྒྱས་ཀུན་གྱི་ལམ་ཡིན་པས། །རྣམ་དག་ལམ་ཆེན་ཡིན་པར་ཡིད་ཀྱང་ཆེས། །ཆོས་རྣམས་ཐམས་ཅད་སེམས་སུ་འདུས་པའི་ཕྱིར། །ཀུན་གྱི་རྩ་བ་ཡིན་པར་ཡིད་ཀྱང་ཆེས། །ཐམས་ཅད་སེམས་ལ་གནས་པའི་ཕྱིར། །ཀུན་གྱི་གཞི་མ་ཡིན་པར་ཡིད་ཀྱང་ཆེས། །ཐམས་ཅད་སེམས་ལས་འབྱུང་བའི་ཕྱིར། །ཀུན་གྱི་འབྱུང་གནས་ཡིན་པར་ཡིད་ཀྱང་ཆེས། །ཐམས་ཅད་སེམས་ཀྱིས་བྱས་པའི་ཕྱིར། །ཀུན་གྱི་མཁན་པོ་ཡིན་པར་ཡིད་ཀྱང་ཆེས། །སརྦ་སེམས་ལས་མེད་པའི་ཕྱིར། །ཀུན་གྱི་ངོ་བོ་ཡིན་པར་ཡིད་ཀྱང་ཆེས། །སྣང་བ་མེད་པར་ཀུན་ལ་ཁྱབ་པའི་ཕྱིར། །གདལ་བ་ཆེན་པོ་ཡིན་པར་ཡིད་ཀྱང་ཆེས། །གཅིག་དང་དུ་མར་བགྲང་དུ་མེད་པའི་ཕྱིར། །ཐིག་ལེ་ཉག་གཅིག་ཡིན་པར་ཡིད་ཀྱང་ཆེས། །དུས་གསུམ་འཕོ་འགྱུར་མེད་པའི་ཕྱིར། །མི་ནུབ་རྒྱལ་མཚན་ཡིན་པར་ཡིད་ཀྱང་ཆེས། །ཆོས་ཀྱི་རང་བཞིན་མ་ངེས་པས། །ལྟ་བ་ངོས་གཟུང་མེད་པར་ཡིད་ཀྱང་ཆེས། །རང་ལ་ཡོད་ཀྱང་རྟོགས་པར་དཀའ་བའི་ཕྱིར། །གསང་བའི་མན་ངག་ཡིན་པར་ཡིད་ཀྱང་ཆེས། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། རྫོགས་པ་ཆེན་པོའི་ལྟ་བ་ལ་ཡིད་ཅི་ལྟར་ཆེས་པ་བསྟན་པའི་ལེའུ་སྟེ་ཉེར་ལྔ་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །གདེང་དང་ལྡན་པའི་རྣལ་འབྱོར་ལ། །རེ་དོགས་ཉམ་ང་ཡོད་དམ་མེད། །གསང་བའི་བདག་པོས་བསྟན་དུ་གསོལ། །གསུངས་པ། སེམས་དཔའ་ཆེན་པོ་ཉོན་ཅིག །ཁྱུང་ཆེན་གཤོག་རྫོགས་མཁའ་ལ་ལྡིང་བ་ལ། །ངམ་གྲོག་གཡང་ས་རྒྱ་མཚོའི་འཇིགས་པས་ཉམ་མི་ང་། །སེང་གེ་རྩལ་རྫོགས་གངས་གོང་ཉལ་བ་ལ། །གཅན་གཟན་ཕལ་པའི་འཇིགས་པས་ཉམ་མིང་། །རྣལ་འབྱོར་རིག་པའི་གདེང་ཆེན་ལྡན་པ་ལ། །ཁམས་གསུམ་འཁོར་བའི་གཡང་སས་ཉམ་མི་ང་། །གདེང་དང་ལྡན་པའི་རྣལ་འབྱོར་པས། །རང་བཞིན་མེད་པའི་དོན་རྟོགས་ན། །མཚན་མ་སྣང་རུང་མི་སྣང་རུང་། །སྐྱེ་ཤི་མེད་པའི་དོན་རྟོགས་ན། །འདུས་བྱས་རྟག་རུང་མི་རྟག་རུང་། །ཡེ་ནས་ཡིན་པའི་དོན་རྟོགས་ན། །ད་གདོད་རྩོལ་རུང་མ་རྩོལ་རུང་། །གཉིས་སུ་མེད་པའི་དོན་མཐོང་ན། །དུ་མར་འབྱེད་རུང་མ་འབྱེད་རུང་། །མཉམ་པ་ཉིད་ཀྱི་དོན་རྟོགས་ན། །བཟང་ངན་འབྱེད་རུང་མ་འབྱེད་རུང་། །བགྲོད་དུ་མེད་པའི་ལམ་རྙེད་ན། །གནས་ཀྱང་མཐོ་རུང་མ་མཐོ་རུང་། །གསལ་སྒྲིབ་མེད་པའི་དོན་རྟོགས་ན། །མུན་ཀྱང་སྲོས་རུང་མ་སྲོས་རུང་། །བརྗོད་དུ་མེད་པའི་ལམ་རྙེད་ན། །ཐ་སྙད་མཁས་རུང་མ་མཁས་རུང་། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། །རྫོགས་པ་ཆེན་པོའི་ལྟ་བའི་གདེང་བསྟན་པའི་ལེའུ་སྟེ་ཉེར་དྲུག་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །སྙིང་པོ་དོན་གྱི་མན་ངག་འདི། །གང་ཟག་གང་གི་སྤྱོད་ཡུལ་ལགས། །བསྟན་དུ་གསོལ། གསུངས་པ། །སེམས་དཔའ་ཆེན་པོ་ཉོན་ཅིག །སེང་གེ་དཀར་མོའི་འོ་མ་ཡང་། །རིན་ཆེན་སྣོད་དུ་བཞོ་བ་ལས། །སྣོད་ངན་དག་ཏུ་བཞོས་གྱུར་ན། །སྣོད་བཅུད་གཉིས་ཀ་བརླག་པར་འགྱུར། །ཟས་ཀྱི་རྒྱལ་པོ་བདུད་རྩི་ཡང་། །ལུས་སྟོབས་ཅན་གྱིས་བཟའ་བ་ལས། །ཕོ་བ་སྣོད་ངན་མི་འཇུ་སྐྲན། །ཆོས་ཀྱི་བལྟ་བའི་བདུད་རྩི་འདི། །བློ་ལྡན་འགའ་ཡི་སྤྱོད་ཡུལ་ལས། །བློ་དམན་དག་ལ་བསྟན་གྱུར་ན། །སྣོད་བཅ་གཉིས་ཀ་བརླག་པར་འགྱུར། །ཞེས་སོ། །བང་མཛོད་འཕྲུལ་གྱི་ལྡེའུ་མིག་ལས། རྫོགས་པ་ཆེན་པོ་ལྟ་བ་ཀུན་གྱི་ཐུན་མོང་མ་ཡིན་པར་བསྟན་པའི་ལེའུ་སྟེ་ཉེར་བདུན་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །རྫོགས་པ་ཆེན་པོའི་བལྟ་བ་ཡིས། །ཆོས་རྣམས་སྤྱི་ནི་ཅི་ལྟར་བཅིང་། །གསང་བའི་བདག་པོས་བསྟན་དུ་གསོལ། །གསུངས་པ་ཉོན་ཅིག །ལམ་གྱི་སྤྱི་ནི་གྲོང་གིས་བཅིངས། །ཆུ་ཕྲན་སྤྱི་ནི་རྒྱ་མཚོས་བཅིངས། །རི་བདུན་སྤྱི་ནི་རི་བོས་བཅིངས། །འབྱུང་བཞིའི་སྤྱི་ནི་ནམ་མཁས་བཅིངས། །ཐེག་བརྒྱད་སྤྱི་ནི་ཨ་ཏིས་བཅིངས། །སྐུ་གསུམ་སྤྱི་ནི་ཆོས་སྐུས་བཅིངས། །ཡེ་ཤེས་ལྔ་ཡི་སྤྱི་དག་ནི། །རང་བྱུང་ཡེ་ཤེས་ཆེན་པོས་བཅིངས། །སྣང་སྲིད་ཀུན་གྱི་སྤྱི་དག་ནི། །ཆོས་ཉིད་བྱང་ཆུབ་སེམས་གྱིས་བཅིངས། །ཞེས་གསུངས་སོ། །བང་མཛོད་འཕྲུལ་གྱི་ལྡེ་མིག་ལས། རྫོགས་པ་ཆེན་པོའི་བལྟ་བས་ཆོས་ཐམས་ཅད་ཀྱི་སྤྱི་ཅི་ལྟར་བཅིངས་པའི་ལེའུ་སྟེ་ཉེར་བརྒྱད་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །བྱང་ཆུབ་སེམས་ཀྱི་ཆོས་ཉིད་དེར། །སངས་རྒྱས་དགོངས་པ་ཅི་ལྟར་འདུས། །གསང་བའི་བདག་པོས་བསྟན་དུ་གསོལ། །ཀྱེ་སེམས་དཔའ་ཆེན་པོ་ཉོན་ཅིག །བྱང་ཆུབ་སེམས་ཀྱི་ཆོས་ཉིད་དེར། །སངས་རྒྱས་ཀུན་གྱི་དགོངས་འདུས་པ། །སྤྱི་འདུས་སྒོས་འདུས་ཐམས་ཅད་འདུས། །དཔེ་ཡིས་འདུས་ལ་དོན་གྱིས་འདུས། །རྟགས་དང་གཏན་ཚིགས་མཐུན་པར་འདུས། །སྤྱི་ཡི་འདུས་པ་བསྟན་པ་ནི། །རབས་བདུན་ཤཱཀྱ་ཐུབ་པ་དང་། །སྟོང་རྩ་གཉིས་ཀྱི་དགོངས་པ་ཡང་། །ཆོས་ཉིད་བྱང་ཆུབ་སེམས་སུ་འདུས། །སྒོས་ཀྱི་འདུས་པར་བསྟན་པ་ནི། །ཀུན་ཏུ་བཟང་པོའི་དགོངས་འདུས་པ། །བཟང་ངན་བླང་དོར་མེད་པར་འདུས། །རྡོ་རྗེ་སེམས་དཔའི་དགོངས་འདུས་པ། །སྐྱེ་འགག་འཕོ་འགྱུར་མེད་པར་འདུས། །རྣམ་པར་སྣང་མཛད་དགོངས་འདུས་པ། །ཡེ་ཤེས་ཀུན་གྱི་ལུས་ཅན་འདུས། །རིན་ཆེན་འབྱུང་ལྡན་དགོངས་འདུས་པ། །ཟག་མེད་གཏེར་གྱི་དགོངས་པར་འདུས། །སྣང་བ་མཐའ་ཡས་དགོངས་འདུས་པ། །ཁྱབ་གདལ་ཆེན་པོའི་དགོངས་པར་འདུས། །དོན་ཡོད་གྲུབ་པའི་དགོངས་འདུས་པ། །ཐོགས་མེད་ཡེ་ཤེས་དགོངས་པར་འདུས། །དཔེ་ནི་ཀུན་དཔེ་ནམ་མཁར་འདུས། །དོན་ནི་ཀུན་དོན་ཆོས་ཉིད་འདུས། །རྟགས་ནི་བྱང་ཆུབ་སེམས་ཉིད་འདུས། །གཏན་ཚིགས་རང་བྱུང་ཡེ་ཤེས་འདུས། །ཞེས་སོ། །ཡང་གསོལ་པ། དུས་གསུམ་སངས་རྒྱས་དགོངས་པ་ནི། །ནམ་མཁའ་ལྟ་བུར་གསུངས་པ་དེ། །དེ་དོན་བདག་ལ་བསྟན་དུ་གསོལ། །གསང་བའི་བདག་པོས་གསུངས་པ། ཉོན་ཅིག །ཅི་ལྷར་སྣང་བའི་ཆོས་རྣམས་ཀུན། །བྱང་ཆུབ་སེམས་ཀྱི་སྣང་བ་སྟེ། །དེ་ལ་ལྟ་བའི་ཡུལ་མ་མཆིས། །མི་རྟོག་པས་ན་མཉམ་པ་ཉིད། །དེ་བཞིན་ནམ་མཁའི་དགོངས་པར་བཤད། །དབང་པོའི་ངོ་ལ་གང་སྣང་བ། །གང་སྣང་དེ་ལ་མི་རྟོགས་ན། །དེ་བཞིན་ནམ་མཁའི་དགོངས་པར་བཤད། །ཚིག་དང་ཡི་གེའི་དོན་རྟོགས་ན། །ཚིག་དང་ཡི་གེའི་དོན་ལ་གནས་མེད་པ། །དེ་བཞིན་ནམ་མཁའི་དགོངས་པར་བཤད། །བསམ་དུ་མེད་པའི་ཆོས་ཉིད་ནི། །ཀུན་ལ་ཁྱབ་པའི་བདག་ཉིད་དུ། །ནམ་མཁའ་བཞིན་དུ་ཡེ་གནས་པ། །དེ་བཞིན་ནམ་མཁའི་དགོངས་པར་བཤད། །ཅི་བཞིན་པ་ཡི་ཆོས་ཉིད་ལ། །མ་བཅོས་པ་ཡི་བློ་བཞག་སྟེ། །མི་གཡོ་མཉམ་པའི་སེམས་གནས་པ། །དེ་བཞིན་ནམ་མཁའི་དགོངས་པར་བཤད། །ཅེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། བྱང་ཆུབ་སེམས་ཀྱི་ཆོས་ཉིད་དུ་སངས་རྒྱས་ཐམས་ཅད་ཀྱང་དགོངས་པ་འདུས་པར་བ ན་པའི་ལེའུ་སྟེ་ཉེར་དགུ་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །ཆོས་ཀྱི་སྐུ་དང་ཆོས་ཀྱི་དབྱིངས། །གཅིག་པ་ལགས་སམ་ཐ་དད་ལགས། །ཆོས་ཀྱི་སྐུ་དང་གཟུགས་སྐུ་གཉིས། །གཅིག་པ་ལགས་སམ་ཐ་དད་ལགས། །ཆོས་ཀྱི་སྐུ་དང་ཡེ་ཤེས་གཉིས། །གཅིག་པ་ལགས་སམ་ཐ་དད་ལགས། །མ་རིག་པ་དང་ཡེ་ཤེས་གཉིས། །གཅིག་པ་ལགས་སམ་ཐ་དད་ལགས། །ཆོས་ཅན་མཚན་མར་སྣང་བ་དང་། །ཆོས་ཉིད་རང་གི་ངོ་བོ་གཉིས། །གཅིག་པ་ལགས་སམ་ཐ་དད་ལགས། །དུས་གསུམ་བཞུགས་པའི་སངས་རྒྱས་དང་། །ཁམས་གསུམ་འཁོར་བའི་སེམས་ཅན་གཉིས། །གཅིག་པ་ལགས་སམ་ཐ་དད་ལགས། །གསང་བའི་བདག་པོས་བསྟན་དུ་གསོལ། །གསུངས་པ། ཉོན་ཅིག །ཆོས་ཀྱི་སྐུ་དང་ཆོས་ཀྱི་དབྱིངས། །ཉི་མ་དང་ནི་འོད་ཟེར་བཞིན། །གཅིག་པ་མ་ཡིན་ཐ་དད་མིན། །ཆོས་ཀྱི་སྐུ་དང་གཟུགས་སྐུ་གཉིས། །མཁའ་ཟླ་དང་ནི་ཆུ་ཟླ་བཞིན། །གཅིག་པ་མ་ཡིན་ཐ་དད་མིན། །ཆོས་ཀྱི་སྐུ་དང་ཡེ་ཤེས་གཉིས། །མར་མེ་དང་ནི་འོད་བཞིན་དུ། །གཅིག་པ་མ་ཡིན་ཐ་དད་མིན། །རང་བཞིན་གཅིག་གིས་འབྲེལ་པ་ཡིན། །མ་རིག་པ་དང་ཡེ་ཤེས་གཉིས། །མེ་ལོང་གཡའ་དང་མཁའ་སྤྲིན་བཞིན། །གཅིག་པ་མ་ཡིན་ཐ་དད་མིན། །ཆོས་ཅན་མཚན་མར་སྣང་བ་དང་། །ཆོས་ཉིད་རང་གི་ངོ་བོ་གཉིས། །སྣང་བ་དག་དང་མ་དག་པ། །དེ་ཡི་ཁྱད་པར་གཉིས་སྣང་སྟེ། །གཅིག་པ་མ་ཡིན་ཐ་དད་མིན། །དུས་གསུམ་བཞུགས་པའི་སངས་རྒྱས་དང་། །ཁམས་གསུམ་འཁོར་བའི་སེམས་ཅན་གཉིས། །འཁྲུལ་པ་བཟང་ངན་ཁྱད་པར་ཏེ། །གཅིག་པ་མ་ཡིན་ཐ་དད་མིན། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། རྫོགས་པ་ཆེན་པོའི་ལྟ་བའི་གནད་བསྟན་པའི་ལེའུ་སྟེ་སུམ་ཅུ་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །ཆོས་རྣམས་ཐིག་ལེ་དྲུག་བརྒྱད་བྱུང་འདུས་ན། །ཐིག་ལེའི་དོན་ནི་གང་དུ་སྐྱེལ། །གསང་བའི་བདག་པོས་བསྟན་དུ་གསོལ། །གསུངས་པ། སེམས་དཔའ་ཆེན་པོ་ཉོན་ཅིག །སྤྲོས་མེད་ཆོས་ཀྱི་ཐིག་ལེ་ནི། །བྱས་པ་མེད་པའི་བྱང་ཆུབ་སེམས། །རང་བཞིན་གནས་པའི་ཐིག་ལེར་བསྡུ། །སྤྲོས་མེད་དབྱིངས་ཉིད་གཉིས་མེད་པ། །འབྱེད་པ་མེད་པའི་ཐིག་ལེ་བསྡུ། །སྤྲོས་མེད་རྣམ་དག་བྱང་ཆུབ་སེམས། །གཉིས་སུ་མེད་པའི་ཐིག་ལེར་བསྡུ། །སྤྲོས་པ་མེད་པའི་བྱང་ཆུབ་སེམས། །སྤྲོས་མེད་ཡེ་ཤེས་ཐིག་ལེར་བསྡུ། །སྒྲིབ་པ་མེད་པའི་བྱང་ཆུབ་སེམས། །འགག་པ་མེད་པའི་ཐིག་ལེར་བསྡུ། །སྤྲོས་མེད་ཀུན་བཟང་བྱང་ཆུབ་སེམས། །བླང་དོར་མེད་པའི་ཐིག་ལེར་བསྡུ། །མཉམ་པ་ཉིད་ཀྱི་བྱང་ཆུབ་སེམས། །སྤྲོས་མེད་ལྷུན་གྲུབ་ཐིག་ལེར་བསྡུ། །རྩོལ་བསྒྲུབ་འདས་པའི་བྱང་ཆུབ་སེམས། །གཡོ་བ་མེད་པའི་ཐིག་ལེར་བསྡུ། །ཐིག་ལེ་དྲུག་གི་དོན་བསྡུས་པ། །མ་བཅོས་སེམས་ཀྱི་ཐིག་ལེར་བསྡུ། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། བྱང་ཆུབ་སེམས་ཀྱི་དོན་རྣམ་པར་འགྲེལ་ཞིང་བསྡུས་པའི་ལེའུ་སྟེ་སོ་གཅིག་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །ཚོགས་བསགས་འབྲས་བུ་མ་ལགས་པ། །ཁྱད་པར་སྐུ་གཅིག་ཡོད་དམ་མེད། །གསང་བའི་བདག་པོས་བསྟན་དུ་གསོལ། །གསུངས་པ། སེམས་དཔའ་ཆེན་པོ་ཉོན་ཅིག །སངས་རྒྱས་ཀུན་གྱི་མེས་ཆེན་པོ། །མཚོན་ཅིང་ངོས་གཟུང་མེད་པ་གཅིག །དུས་གསུམ་འདུས་མ་བྱས་པ་སྲ ཁུ་དང་རྐྱེན་གྱིས་མ་བསྐྱེད་པར། །ཆོས་རྣམས་ཀུན་གྱི་སྙིང་པོ་སྲ །རང་བཞིན་ལྷུན་གྱིས་གྲུབ་ནས་བཞུགས། །རྣམ་པ་ཀུན་ལྡན་རྣམ་པ་མེད། །དག་དང་མ་དག་རྣམ་པ་ཅན། །ཡོད་ཀྱང་རང་གིས་རང་མ་མཐོང་། །སྐྱེས་བུའི་ལུས་དང་བྱད་འགྲོགས་འདྲ། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། རྫོགས་པ་ཆེན་པོའི་ཁྱད་པར་གྱི་སྐུ་བསྟན་པའི་ལེའུ་སྟེ་སོ་གཉིས་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །རྫོགས་ཆེན་སྤྱོད་པའི་རྣལ་འབྱོར་པ། །ཅི་བཞིན་པ་ཡི་ཆོས་ཉིད་ལ མ་བཅོས་རྣལ་དུ་བཞག་པ་དེར། །འོག་མའི་རྩོལ་བསྒྲུབ་འདུས་མ་བྱས། །གསང་བའི་བདག་པོས་བསྟན་དུ་གསོལ། །གསུངས་པ། ཉོན་ཅིག །མ་བཅོས་རྣལ་དུ་བཞག་པ་དེ། །ཐེག་དམན་རྩོལ་བསྒྲུབ་ཀུན་འདུས་ཏེ། །འོག་མའི་བྱང་ཆུབ་དེ་ལ་རྫོགས། །ལེགས་པར་བསྔོ་བའི་སྨོན་ལམ་ཀུན་ཀྱང་དེ་ལ་རྫོགས། །ཉེས་པ་བཤགས་པའི་འགྱོད་པ་ཀུན་ཀྱང་རྫོགས། །འཕགས་པ་མཉེས་པའི་ཕྱི་ནང་མཆོད་པ་རྫོགས། །སྡོམ་དང་ཚུལ་ཁྲིམས་དམ་ཚིག་བསྲུང་མཚམས་རྫོགས། །དཀྱིལ་འཁོར་ཞུགས་དང་དབང་དང་དངོས་གྲུབ་རྫོགས། །སངས་རྒྱས་ས་དང་ཕ་རོལ་ཕྱིན་དྲུག་རྫོགས། །ཚོགས་བསགས་སྒྲིབ་སྦྱངས་རྩོལ་བསྒྲུབ་འབྲས་བུ་རྫོགས། །འགྲོ་དོན་མཐར་་ཕྱིན་ཕྲིན་ལས་རྣམ་བཞི་རྫོགས། །སེམས་ཅན་དོན་བྱེད་ཚད་མེད་རྣམ་བཞི་རྫོགས། །ལུས་ཀྱི་བསྐོར་བ་ཕྱག་རྒྱ་གར་ཡང་རྫོགས། །ངག་གི་འདོན་བཟླས་དབྱངས་དང་བསྟོད་པ་རྫོགས། །ཡིད་ཀྱི་ཏིང་འཛིན་ཕྱག་རྒྱ་དཀྱིལ་འཁོར་རྫོགས། །དེ་ཕྱིར་དགོས་ཆེད་དོན་གྱིས་བཤད་པ་ཡིན། །ཞེས་སོ། །བང་མཛོད་འཕྲུལ་གྱི་ལྡེའུ་མིག་ལས། ལམ་ཡོངས་སུ་རྫོགས་པའི་ལེའུ་སྟེ་སོ་གསུམ་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །རྫོགས་པ་ཆེན་པོའི་རྣལ་འབྱོར་པས། །སྤྱོད་པ་ཅི་ལྟར་སྤྱད་པར་བགྱི། །གསང་བའི་བདག་པོས་བསྟན་དུ་གསོལ། །གསུངས་པ། ཉོན་ཅིག །བཅོས་པའི་སྤྱོད་པ་མ་ཡིན་པ། །སྲོག་ལྡན་ཤུགས་ལས་བྱུང་བ་ཡི། །དགག་དབྱེ་མེད་པའི་སྤྱོད་པ་སྤྱད། །རེ་དོགས་བཅས་པའི་སེམས་གྲལ་བས། །བླང་དོར་མེད་པར་ཀུན་སྤྱད་ན། །སྤྱོད་པ་གླང་ཆེན་ཆུར་ཞུགས་ཡིན། །ཅི་ལྟར་ནམ་མཁའི་མདུང་བསྐོར་བཞིན། །དཔེ་གསུམ་དོན་དང་མཐུན་སྤྱད་ན། །ཀུན་ཏུ་བཟང་པོའི་སྤྱོད་པ་ཡིན། །མཉམ་པའི་ངང་ནས་མི་གཡོ་ཞིང་། །ལུས་ངག་ཡིད་གསུམ་་རྩོལ་སྤངས་པ། ཁེན་ཏུ་རྣལ་འབྱོར་སྤྱོད་པ་ཡིན། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། ཤིན་ཏུ་རྣལ་འབྱོར་གྱི་སྤྱོད་པ་བསྟན་པའི་ལེའུ་སྟེ་སོ་བཞི་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །རྫོགས་ཆེན་སྤྱོད་པའི་རྣལ་འབྱོར་པས། །བླ་མེད་བྱང་ཆུབ་ཆེན་པོ་འདི། །བཅོས་པས་གྲུབ་བམ་མ་བཅོས་གྲུབ། །བཙལ་བས་གྲུབ་བམ་མ་བཙལ་གྲུབ། །བསོད་ནམས་ཚོགས་ལ་བརྟེན་མི་བརྟེན། །སྒྲིབ་སྦྱང་དྲི་མ་བཀྲུ་མི་བཀྲུ། །ལམ་ལ་བགྲོད་པས་ཕྱིན་མི་ཕྱིན། །འདོད་པས་འགྲུབ་བམ་མི་འདོད་འགྲུབ། །གསང་བའི་བདག་པོས་བསྟན་དུ་གསོལ། །སེམས་དཔའ་ཆེན་པོ་ཉོན་ཅིག །བླ་མེད་བྱང་ཆུབ་ཆེན་པོ་དེ། །བཅོས་པས་གྲུབ་པ་མ་ཡིན་ཏེ། །མ་བཅོས་རྣལ་དུ་བཞག་པས་འགྲུབ། །དེ་ལ་གང་ཞིག་འཆོས་བྱེད་པ། །མི་ཤེས་སྨིག་རྒྱུ་འཆོས་པ་འདྲ། །བཙལ་པས་གྲུབ་པ་མ་ཡིན་ཏེ། །མ་བཙལ་མཉམ་པར་བཞག་པས་གྲུབ། །དེ་ལ་གང་ཞིག་རྩོལ་བྱེད་པ། །མདོངས་པས་ནམ་མཁའ་བསྙབ་པ་འདྲ། །བསོད་ནམས་ཚོགས་བསག་མི་དགོས་ཏེ། །གང་ཞིག་བསོད་ནམས་ཚོགས་གསོག་པ། །བྱིས་པས་རྩེད་མོ་བྱེད་པ་འདྲ། །སྦྱངས་པས་འབྱོངས་པར་མི་འགྱུར་ཏེ། །སོལ་བ་བྱི་དོར་བྱེད་པ་འདྲ། །བཀྲུས་པས་དག་པར་མི་འགྱུར་ཏེ། །དྲི་ཆུས་ལག་པ་བཀྲུ་བ་འདྲ། །བགྲོད་པས་ཕྱིན་པར་མི་འགྱུརཏེ། །ཁྱུངཆེནནམམཁའིམཐའ་འཚོལ་འདྲ། །འདོད་པས་རྙེད་པར་མི་འགྱུར་ཏེ། །རི་དྭགས་སྨིག་རྒྱུ་བསྙེག་པ་འདྲ། །དེས་ན་ཤིན་ཏུ་རྣལ་འབྱོར་པས། །རྒྱལ་པོ་བཞིན་དུ་ཙན་ནི་སྡོད། །བང་མཛོད་འཕྲུལ་གྱི་ལྡེའུ་མིག་ལས། སྤྱོད་པ་བླ་ན་མེད་པའི་ལེའུ་སྟེ་སོ་ལྔ་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །སྐད་ཅིག་དུས་ཀྱིས་གང་རྣམས་བསྡུ། །དངོས་པོ་གཞི་ཡིས་གང་རྣམས་བསྡུ། །གསང་བའི་བདག་པོས་གསུངས་པ། སེམས་དཔའ་ཆེན་པོ་ཉོན་ཅིག །ཆོས་རྣམས་མཚན་མར་སྣང་བ་དང་། །ཆོས་ཉིད་དོན་གྱི་ངོ་བོ་ལ། །དངོས་པོ་གཞི་ལ་ཐ་དད་མེད། །དུས་གསུམ་བཞུགས་པའི་སངས་རྒྱས་དང་། །ཁམས་གསུམ་འཁོར་བའི་སེམས་ཅན་རྣམས། །གཞི་ལ་ཐ་དད་བྱེ་བྲག་མེད། །མ་རིག་པ་ཡི་འཁྲུལ་པ་དང་། །རང་བྱུང་ཡེ་ཤེས་ཆེན་པོ་གཉིས། །གཞི་ལ་ཐ་དད་བྱེ་བྲག་མེད། །ཁམས་གསུམ་རྒྱུད་དྲུག་སྡུག་བསྔལ་དང་། །དུས་གསུམ་སངས་རྒྱས་བདེ་བ་གཉིས། །སེམས་ཀྱི་གཞི་ལ་ཐ་དད་མེད། །ཆོས་ཅན་མཚན་མའི་ཀུན་རྫོབ་དང་། །དོན་དམ་མཚན་མ་མེད་པ་གཉིས། །ཆོས་ཉིད་གཞི་ལ་ཐ་དད་མེད། །ཅེས་དང་། སེམས་དཔའ་ཆེན་པོ་ཉོན་ཅིག །རང་སེམས་རྟོགས་པས་སྤྱོད་པ་དང་། །མ་རིག་འཁྲུལ་པ་བྱུང་བ་ལ། །དུས་ལ་སྐད་ཅིག་བྱེ་བྲག་མེད། །མ་རིག་འཁྲུལ་པ་འབྱུང་བ་དང་། །ཁམས་གསུམ་འཁོར་བ་བླངས་པ་གཉིས། །སྐད་ཅིག་དུས་ལ་སྔ་ཕྱི་མེད། །མ་རིག་ཞབྲུལ་པ་ལོག་པ་དང་། །རང་བྱུང་ཡེ་ཤེས་ཤར་བ་ལ། །སྐད་ཅིག་དུས་ལ་སྔ་ཕྱི་མེད། །རང་བྱུང་ཡེ་ཤེས་ཤར་བ་དང་། །འཁྲུལ་པ་ཆོས་ཉིད་མཐོང་བ་ལ། །སྐད་ཅིག་དུས་ལ་སྔ་ཕྱི་མེད། །ཡེ་ཤེས་མངོན་དུ་གྱུར་པ་དང་། །འབྲས་བུ་ཆོས་སྐུ་ཐོབ་པ་ལ། །སྐད་ཅིག་དུས་ལ་སྔ་ཕྱི་མེད། །འབྲས་བུ་ཆོས་སྐུ་ཐོབ་པ་དང་། །གཟུགས་སྐུ་རྣམ་གཉིས་འབྱུང་བ་ལ། །སྐད་ཅིག་དུས་ལ་སྔ་ཕྱི་མེད། །བང་མཛོད་འཔྲུལ་གྱི་ལྡེའུ་མིག་ལས།སྐད་ཅིག་མའི་དུས་དང་གཞི་བསྡུ་བའི་ལེའུ་སྟེ་སོ་དྲུག་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །རྫོགས་ཆེན་ཨ་ཏི་ཡོ་ག་ནི། །ཆེ་བ་ལྔ་ཡིས་ཁྱད་པར་འཕགས། །དེ་ཡི་འཕགས་ལུགས་ཅི་ལྟར་ལགས། །གསང་བའི་བདག་པོས་གསུངས་པ། སེམས་དཔའ་ཆེན་པོ་ཉོན་ཅིག །མངོན་པར་སངས་རྒྱས་ཆེ་བ་ནི། །སྤྲོས་པ་མེད་པའི་བྱང་ཆུབ་སེམས། །སྣང་སྲིད་ཀུན་ལས་ཁྱད་པར་འཕགས། །ཨ་ཏི་ཡོ་གའི་ཆེ་བར་བཤད། །ཆོས་ཀྱི་དབྱིངས་ལས་ཆེ་བ་ནི། །ཐམས་ཅད་འབྱུང་བའི་བྱང་ཆུབ་སེམས། །འབྱུང་གནས་ཀུན་ལས་ཁྱད་པར་འཕགས། །ཨ་ཏི་ཡོ་གའི་ཆེ་བ་ཡིན། །བདག་ཉིད་སངས་རྒྱས་ཆེ་བ་ནི། །ལྷུན་གྱིས་གྲུབ་པའི་བྱང་ཆུབ་སེམས། །རྩོལ་བསྒྲུབ་ཀུན་ལས་ཁྱད་པར་འཕགས། །ཨ་ཏི་ཡོ་གའི་ཆེ་བ་ཡིན། །དེ་ཉིད་སངས་རྒྱས་ཆེ་བ་ནི། །མ་ནོར་པ་ཡི་བྱང་ཆུབ་སེམས། །གཏན་ཚིགས་ཀུན་ལས་ཁྱད་པར་འཕགས། །ཨ་ཏི་ཡོ་གའི་ཆེ་བ་ཡིན། །སངས་རྒྱས་མེད་པའི་ཆེ་བ་ནི། །སྒྲོ་སྐུར་བྲལ་བའི་བྱང་ཆུབ་སེམས། །བསམ་བརྗོད་ཀུན་ལས་ཁྱད་པར་འཕགས། །ལ་བཟླ་བ་ཡི་ཆེ་བ་ཡིན། །ཞེས་གསུངས་སོ། །བང་མཇོད་འཕྲུལ་གྱི་ལྡེའུ་མིག་ལས། ཁྱད་པར་འཕགས་པའི་ལེའུ་སྟེ་སོ་བདུན་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །ཆོས་ཉིད་དོན་གྱི་ངོ་བོ་དེ། །སྟོང་པ་ཡང་དག་ལགས་མ་ལགས། །སྟོང་པ་ཉིད་ཀྱི་ཁྱད་ཕྱེ་བ། །གསང་བའི་བདག་པོས་བསྟན་དུ་གསོལ། །གསང་བའི་བདག་པོས་གསུངས་པ། སེམས་དཔའ་ཆེན་པོ་ཉོན་ཅིག །ཆོས་ཉིད་དོན་གྱི་ངོ་བོ་དེ། །བློས་བརྟགས་ཆོས་ཀྱིས་སྟོང་པ་ལས། །རང་སྣང་ངོ་བོས་སྟོང་མ་མྱོང་། །ཆོས་ཉིད་རང་གི་ངོ་བོ་ལ། །སྟོང་དང་མི་སྟོང་གཉིས་སུ་མེད། །ཕྱོགས་གཅིག་སྤང་བའི་སྟོང་པ་དང་། །ཕྱོགས་བྲལ་སྟོང་པ་ཆེན་པོ་གཉིས། །སྟོང་པའི་མིང་དུ་འདྲ་མོད་ཀྱང་། །མི་མཐུན་ཁྱད་པར་ཤིན་ཏུ་ཆེ། །ཕྱོགས་གཅིག་སྤང་བའི་སྟོང་པ་དེ། །ཕྱོགས་གཅིག་ཡིན་ཏེ་ཕྱོགས་གཅིག་མིན། །ཐམས་ཅད་མ་ལུས་ཀུན་ལྡན་པའི། །ཕྱོགས་བྲལ་སྟོང་པ་ཆེན་པོ་ན། །ཀུན་བྲལ་དྲི་མ་སྤངས་པ་དང་། །རྒྱ་ཆད་ཕྱོགས་ལྷུང་མེད་པའི་ཕྱིར། །ཅི་ཡང་མིན་ལ་ཅི་ཡང་ཡིན། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། སྟོང་པ་ཉིད་ཀྱི་ཁྱད་པར་དབྱེ་བའི་ལེའུ་སྟེ་སོ་བརྒྱད་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །རྫོགས་ཆེན་གསང་བའི་ངེས་ཚིག་ཅི་ལྟར་ལགས། །གསང་བའི་བདག་པོས་གསུངས་པ། སེམས་དཔའ་ཆེན་པོ་ཉོན་ཅིག །ཅི་ལྟར་ནམ་མཁའི་མཚན་ཉིད་དུ། །སྣང་སྲིད་ཐམས་ཅད་ཤོང་བ་བཞིན། །སེམས་ཉིད་ཐེག་པ་ཆེན་པོ་འདིར། །ཡོད་པའི་ཆོས་དང་མེད་པའི་ཆོས། །དེ་བཞིན་སྲིད་དང་མི་སྲིད་དང་། །སངས་རྒྱས་སེམས་ཅན་བདེ་སྡུག་བསྔལ། །བཟང་ངན་ཆེ་ཆུང་སྐྱོན་ཡོན་ཏན། །ལྷག་མ་མེད་པར་ཡོངས་རྫོགས་པས། །དེ་ཕྱིར་དེ་ལ་རྫོགས་ཞེས་བྱ། །རིན་པོ་ཆེ་ཡི་གསེར་གླིང་ན། །ཐམས་ཅད་གསེར་ལས་མེད་པའི་ཕྱིར། །དོར་དུ་རུང་བ་ཡོད་མ་ཡིན། །རྫོགས་པ་ཆེན་པོའི་ཆོས་ཉིད་ལ། །སྤང་བ་གང་ཡང་མེད་པའི་ཕྱིར། །དོར་དུ་རུང་བ་ཡོད་མ་ཡིན། །ངོས་གཟུང་མེད་པའི་ལྟ་བ་ལ། །བླང་དུ་རུང་བ་ཡོད་མ་ཡིན། །དེས་ན་བླང་དོར་ཡོད་མ་ཡིན། །ཞེས་གསུངས་སོ། །བང་མརྗོད་འཕྲུལ་གྱི་ལྡེའུ་མིག་ལས། རྫོགས་པ་ཆེན་པོའི་ངེས་ཚིག་ལ་གཞི་རྫོགས་པ་ཆེན་པོར་ལྷག་མ་མེད་པར་ལ་བཟླ་བའི་ལེའུ་སྟེ་སོ་དགུ་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །རྫོགས་ཆེན་སྤྱོད་པའི་རྣལ་འབྱོར་པས། །ཕྱོགས་ཆ་སྤྱོད་པའི་ལྷ་བ་ལ། །དེ་ལ་བརྟེན་པར་མི་བྱ་ཞེས། །བདེརགཤེགསགསང་བའི་བདག་པོ་ཡིས། །ཕྱོགས་ཆ་ཅན་དུ་གསུངས་པ་དེ། །ངེས་དོན་ལགས་སམ་དགོངས་བཤད་ལགས། །སེམས་ཀྱིས་སེམས་ལ་བལྟ་མི་བལྟ། །ཡེ་སངས་རྒྱས་པ་ལགས་མ་ལགས། །གསང་བའི་བདག་པོས་གསུངས་པ། སེམས་དཔའ་ཆེན་པོ་ཉོན་ཅིག །ཕྱོགས་གཅིག་སྤངས་ནས་ཕྱོགས་གཅིག་བླང་། །ཕྱོགས་མཐུན་ཕྱོགས་ལ་ཐུག་པ་མེད། །ལྟ་བ་ངན་པའི་མཐའ་ཡིན་པས། །དེ་ལ་བརྟེན་པར་མི་བྱའོ། །ཁྱོད་ལ་སོགས་པའི་འཁོར་རྣམས་ཀྱིས། །བསྲེགས་བཅད་བརྡར་བའི་གསེར་བཞིན་དུ། །ཡོངས་སུ་བརྟགས་ལ་ང་ཡི་བཀའ། །བླང་བར་བྱ་ཡིས་གུས་ཕྱིར་མིན། །ང་ཡི་བཀའ་འདི་དགོངས་པ་ཅན། །ཡོད་མཐའ་དགྲོལ་ཕྱིར་མེད་ཅེས་བཤད། །མེད་མཐའ་དགྲོལ་ཕྱིར་ཡོད་ཅེས་བཤད། །གཉིས་འཛིན་དགྲོལ་ཕྱིར་ཉག་གཅིག་བཤད། །ཉག་གཅིག་མཐའ་དགྲོལ་སྤྲོས་བྲལ་བཤད། །སྤྲོས་བྲལ་དགྲོལ་ཕྱིར་བརྗོད་མེད་བཤད། །བརྗོད་མེད་དགྲོལ་ཕྱིར་ཁོང་འབྱམས་བཤད། །ལྟ་བ་འཕྲུལ་གྱི་ཁོང་འབྱམས་ཀྱི། །ཅི་ལྟར་ནམ་མཁའི་མདུང་བསྐོར་བཞིན། །གང་ལྟར་བསྐོར་ཡང་དོག་པ་མེད། །ཅི་ལྟར་འདམ་གྱི་ཕུར་པ་བཞིན། །གང་ལྟར་བསྒུལ་ཀྱང་བསྒུལ་དུ་བ་། །པགས་པ་རློན་པའི་མཐའ་བཞིན་དུ། །གང་ལྟར་འཐེན་ཡང་འཐེན་དུ་བཏུབ། །ཅི་ལྟར་སྨོན་པའི་ཚིག་བཞིན་དུ། །གང་ལྟར་སྨྲ་ཡང་སྨྲ་དབང་ཆེ། །ཅེས་གསུངས་སོ། །གསོལ་པ། འགྲོ་བའི་སེམས་རྒྱུད་གཉིས་མེད་པས། །སེམས་ཀྱིས་སེམས་ལ་བལྟ་རུ་མེད། །བལྟས་ཀྱང་མི་མཐོང་ས་མི་དམིགས། །བྱང་ཆུབ་སེམས་ཀྱི་ཆོས་ཉིད་དེ། ཁུ་རྐྱེན་གཞན་གྱིས་མ་བསྐྱེད་ཅིང་། །རྩོལ་བསྒྲུབ་དག་གིས་མི་འབྱུང་བས། །རང་བཞིན་ལྷུན་གྱིས་གྲུབ་པ་ཡིན། །དེ་ལ་དགོངས་ནས་སྟོན་པས་ཀྱང་། །ཡེ་སངས་རྒྱས་པར་མིང་དུ་བཏགས། །སེམས་ཉིད་རང་གི་ངོ་བོ་ལ། །སངས་རྒྱས་དང་ནི་སེམས་ཅན་གཉིས། །གང་དུ་ཡང་ནི་སེམས་མེད་དོ། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། །ལྟ་བའི་དུག་བསྟན་པའི་ལེའུ་སྟེ་བཞི་བཅུ་པའོ།། །།ཡང་གསོལ་པ། ཀྱེ་ཀྱེ་གསང་བའིབདག་པོ་ལགས། །དེ་དག་རྫོགས་ཆེན་ལྟ་བ་ནི། །མཐར་ཐུག་མེད་པར་མི་འགྱུར་རམ། །གསང་བའི་བདག་པོས་གསུངས་པ། སེམས་དཔའ་ཆེན་པོ་ཉོན་ཅིག །ཐུག་པ་མེད་པའི་མཐའ་ཡིན་ཏེ། །ཡང་དག་མཐའ་ལ་ཐུག་པ་མེད། །ཐུག་པ་མེད་པ་ཐུག་པའི་མཆོག །ཅེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། རྫོགས་པ་ཆེན་པོའི་ལྟ་བ་མཐར་ཐུག་པའི་ལེའུ་སྟེ་ཞེ་གཅིག་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །ཐེག་པའི་རིམ་པར་ཕྱེ་བ་ནི། དེ་ཡི་སྣང་ཚུལ་ཅི་ལྟར་ལགས། །གསང་བའི་བདག་པོས་གསུངས་པ། སེམས་དཔའ་ཆེན་པོ་ཉོན་ཅིག །རྫོགས་ཆེནཨཏིའིསྣངཚུལ་ནི། །ཅི་སྣང་ཅི་སྲིད་ཐམས་ཅད་ཀུན། །ཀུན་ཏུ་བཟང་པོའི་རོལ་པར་སྣང་། །རང་སྣང་ཡེ་ཤེས་རྒྱན་དུ་སྣང་། །ཐུན་མོང་སྔགས་ཀྱི་སྣང་ཚུལ་ནི། །རང་རང་མཐུན་པའི་ཡེ་ཤེས་སྣང་། །ཐེག་ཆེན་དབུ་མའི་སྣང་ཚུལ་ནི། །ཀུན་རྫོབ་དབུ་མའི་ཚུལ་དུ་སྣང་། །རྣམ་རིག་ཙམ་གྱི་སྣང་ཚུལ་ནི། །རང་རང་འཁྲུལ་པའི་ངོ་བོར་སྣང་། །ཉན་ཐོས་རང་རྒྱལ་སྣང་ཚུལ་ནི། །ཀུན་ཀྱང་རྡུལ་གྱི་ཕུང་པོར་སྣང་། །འགྲོ་དྲུག་སེམས་ཅན་སྣང་ཚུལ་ནི། །སོ་སོའི་ལས་དང་བག་ཆགས་སྣང་། །ཞེས་སོ། །བང་མཛོད་འཕྲུལ་གྱི་ལྡེའུ་མིག་ལས། འཇིག་རྟེན་དང་འཇིག་རྟེན་ལས་འདས་པ་རྣམས་ཀྱི་སྣང་ཚུལ་བསྟན་པའི་ལེའུ་སྟེ་ཞེ་གཉིས་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །ཐེག་པ་རིམ་པར་ཕྱེ་བ་ནི། །ཏིང་འཛིན་སྒོམ་ཐབས་ཅི་ལྟར་ལགས། །གསང་བའི་བདག་པོས་གསོལ་པ། སེམས་དཔའ་ཆེན་པོ་ཉོན་ཅིག །ཉན་ཐོས་ཐ་མའི་དམིགས་པ་ནི། །སེམས་ཀྱི་ཆགས་པ་སྤང་བའི་ཕྱིར། །ཀེང་རུས་ལ་སོགས་བསྒོམ་པར་བྱེད། །ཉན་ཐོས་འབྲིང་གི་དམིགས་པ་ནི། །དབུགས་དང་རྩོལ་བ་བགྲང་བར་བྱེད། །ཉན་ཐོས་རབ་ཀྱི་དམིགས་པ་ནི། །འདུ་ཤེས་མེད་པར་སྙོམས་ཞུགས་ནས། །ཞི་བ་ཕྱོགས་གཅིག་མུ་ལ་གནས། །ཉན་ཐོས་མདོ་སྡེའི་བསྒོམ་པ་ནི། །རང་སེམས་སྣ་རྩེར་གཏད་བྱས་ནས། །མ་ཡེངས་རྟག་ཏུ་གནས་པར་བྱེད། །རང་རྒྱལ་དག་གི་ཏིང་འཛིན་ནི། །འཁོར་ལོ་སེམས་སུ་བསྡུས་བྱས་ནས། །སེམས་ཉིད་ལ་ནི་གནས་པར་བྱེད། །རྣམ་རིག་ཙམ་གྱི་དམིགས་པ་ནི། ཁྲེས་པ་རང་རིག་གསལ་བ་ལ། །གཟུང་འཛིན་རྟོག་སྤྱོད་རྒྱུད་རཔ་ཡིན་ནམཔ་བྲལ་བར་གནས། །ཐེག་ཆེན་དབུ་མའི་བཞག་ཐབས་ནི། །སྒོ་ལྔ་གསལ་བའི་ཡེ་ཤེས་ལས། །ཡིད་ནི་རྟོག་པ་མེད་པར་གནས། །བྱ་བ་རྒྱུད་ཀྱི་ཐེག་པ་ནི། །ཡན་ལག་བཅུ་གཅིག་ཆོ་ག་ཡིས། །བྱིན་གྱིས་བརླབས་ནས་ལྷ་རུ་འདོད། །རྣལ་འབྱོར་ཡོ་གའི་ཐེག་པ་ནི། །བྱང་ཆུབ་ལྔ་དང་ཆོ་འཕྲུལ་བཞིས། །ཡོངས་སུ་བརྟགས་ནས་ལྷ་རུ་བསྒོམ། །མ་ཧྭ་ཡོ་གའི་ཐེག་པ་ནི། །ཏིང་འཛིན་གསུམ་དང་བསྙེན་བསྒྲུབ་བཞིས། །རང་རྒྱུད་དག་པའི་ལྷ་རུ་བསྒོམ། །ཨ་ནུ་ཡོ་གའི་ཐེག་པ་ནི། །སྙིང་པོ་ཙམ་ཞིག་བརྗོད་བྱས་ནས། །མ་བསྐྱེད་པ་ཡི་ལྷ་རུ་བསྒོམ། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། ཐེག་པ་ཐུན་མོང་གི་སེམས་ཀྱི་བཞག་ཐབས་བསྟན་པའི་ལེའུ་སྟེ་ཞེ་གསུམ་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །རྫོགས་པ་ཆེན་པོའི་བསྒོམ་གྱི་བཞག་ཐབས་བསྟན་དུ་གསོལ། །གསང་བའི་བདག་པོས་གསུངས་པས། །སེམས་དཔའ་ཆེན་པོ་ཉོན་ཅིག །རང་ལ་ཡོད་ཀྱིས་གཞན་ལ་བལྟ། །འགྲོ་ས་མེད་ཀྱིས་ཅོག་གེ་སྡོད། །ཡེ་ནས་ཡིན་གྱིས་གདོད་མ་རྩོལ། །ཕུག་ན་འདུག་གིས་སྒོར་མ་འབྱུང་། །རང་བྱུང་ཡེ་ཤེས་ཕུག་ནས་སྒོར་ཕྱུང་བས། །མཚན་མ་སྣ་ཚོགས་ཆོས་དང་ཏུག་གིས་ཕྲད། །དེ་ལ་བརྟགས་ཤིང་དཔྱད་པས་འཁོར་བའི་སྙིང་པོར་གྲུབ། །ཀྱེ་ཀྱེ་སེམས་དཔའ་ཆེན་པོ་ཉོན་ཅིག །བྱས་པའི་སྤྱོད་པ་སྤྱོད་པ་ཟང་མ་ཡིན། །དམིགས་པའི་བསྒོམ་པ་བསྒོམ་པ་ཟང་མ་མིན། །གསལ་བའི་ཡེ་ཤེས་ཡེ་ཤེས་ཟང་མ་མིན། །བསྒྲུབ་པའི་འབྲས་བུ་འབྲས་བུ་ཟང་མ་མིན། །ཕྱོགས་སུ་ལྷུང་བའི་བལྟ་བ་བལྟ་བ་ཟང་མ་ཡིན། ་།གས་ལས་བྱུང་བའི་སྤྱོད་པ་སྤྱོད་པ་ཟང་མ་ཡིན། །དམིགས་གཏད་མེད་ན་བསྒོམ་པ་ཟང་མ་ཡིན། །གསལ་འགྲིབ་མེད་ན་ཡེ་ཤེས་ཟང་མ་ཡིན། །ལྷུན་གྱིས་གྲུབ་ན་འབྲས་བུ་ཟང་མ་ཡིན། །ཕྱོགས་ལྷུང་མེད་ན་བལྟ་བ་ཟང་མ་ཡིན། །ཀྱེ་ཀྱེ་སེམས་དཔའ་ཆེན་པོ་ཉོན་ཅིག །ཆོས་ཉིད་ཇི་བཞིན་པ་ལ། བློ་ཅི་བཞིན་པ་བཞག་སྟེ། དབང་པོ་རྒྱ་ཡན། རིག་པ་ཁྱབ་གདལ། ལུས་སེམས་བཅོས་པ་མེད་པར་གཞག་པར་བྱ། །དབང་པོ་ཡུལ་ལ་ཡན་པ་བསྡུ་མི་བྱ། །ཡུལ་དང་དབང་པོ་མི་དབྱེ་ལྷུག་པར་བཞག །ཆོསཉིད་ངོ་ཡིས་མི་བཟུང་རང་སྣང་ངོ་བོར་བཞག །མ་ཡེངས་མཉམ་པར་བཞག་ཅིང་རྗེས་ཐོབ་རྟ་ལྟར་བཙའ། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། བྱང་ཆུབ་སེམས་ཀྱི་བཞག་ཐབས་བསྟན་པའི་ལེའུ་སྟེ་ཞེ་བཞི་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །རྫོགས་ཆེན་ལམ་གྱི་དགོངས་པ་གང་། །གསང་བའི་བདག་པོས་གསུངས་པ། སེམས་དཔའ་ཆེན་པོ་ཉོན་ཅིག །སྔོན་དུ་འགྲོ་བའི་ཆོ་ག་མྲ ཁྲེས་རབ་རྣམ་གསུམ་བློ་སྦྱང་འཚལ། །སྤང་བ་མེད་པའི་ཆོས་ཉིད་ལ། །རང་བྱུང་ཡེ་ཤེས་གཞི་བཙལ་འཚལ། །ཕྱོགས་ལྷུང་མེད་པའི་ལྷ་བ་ལ། །རྣལ་འབྱོར་བློ་ཡིས་རྒྱབ་བརྟེན་འཚལ། །གསལ་ལ་མི་རྟོག་རྣམ་གཉིས་ཀྱིས། །གཡས་གཡོན་གཉིས་ན་གཞོག་སྐོར་འཚལ། །མཚན་མ་སྤྲོ་རུ་མི་གཞུག་འཚལ། །ཉི་རྟ་བུ་ཤི་མ་བཞིན་དུ། །སེམས་ཉིད་ཐུབ་པར་བཙལ་ཡང་འཚལ། །རྣམ་རྟོག་མཚན་མ་འཕྲོ་སྲིད་ན། །མཁའ་དང་མཁའ་ཡི་སྤྲིན་བཞིན་དུ། །རང་བྱུང་རང་ཞིར་བཞག་ཀྱང་འཚལ། །ཏིང་འཛིན་ལས་སུ་རང་བ་ཡི། །དྲོད་རྟགས་མཚན་མ་བྱུང་ཡང་འཚལ། །བར་ཆད་ཆོ་འཕྲུལ་བཟློག་པའི་ཕྱིར། །བདུད་ཀྱི་གཅོད་ཡུལ་ཤེས་ཀྱང་འཚལ། །ལྟ་བསྒོམ་སྲོག་ལྡན་ཤུགས་བྱུང་བའི། །དགག་བསྒྲུབ་མེད་པའི་སྤྱོད་པ་འཚལ། །པ་ན་སེ་ཡི་འབྲས་བུ་བཞིན། །འབྲས་བུ་གཞི་ནས་སྨིན་ཡང་འཚལ། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། རྫོགས་ཆེན་ལམ་གྱི་དགོངས་པ་མདོར་བསྡུས་པའི་ལེའུ་སྟེ་ཞེ་ལྔ་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །ཐེག་པ་རིམ་པར་ཕྱེ་བ་ཡི། །འབྲས་བུ་ཐོབ་དུས་ཅི་ལྟར་ལགས། །གསང་བའི་བདག་པོས་གསུངས་པ། ཀྱེ་ཉོན་ཅིག །དུག་གསུམ་སྤངས་པའི་ཉན་ཐོས་དང་། །མ་རིག་འགེག་པའི་རང་རྒྱལ་དང་། །རྣམ་རྟོག་སྦྱང་བའི་མདོ་སྡེ་གསུམ། །བསྐལ་པ་གསུམ་གྱིས་སངས་རྒྱས་ས་ལ་་ར། །ལས་དང་བྱ་བ་གཙོར་བྱེད་པའི། །བྱ་བ་རྒྱུད་ཀྱི་ཐེག་པས་ནི། །མི་ཚེ་བདུན་གྱིས་རིག་འཛིན་་ར། །ཕྱག་རྒྱ་བཞི་ལ་གཙོར་བསྒྲུབ་པའི། །རྣལ་འབྱོར་རྒྱུད་ཀྱི་ཐེག་པས་ནི། །མི་ཚེ་གསུམ་གྱིས་སངས་རྒྱས་ས་ལ་སྦྱོར། །མ་ཧྭ་ཡོ་གའི་ཐེག་པས་ནི། །ཆོ་ག་ལྔ་ནི་རྫོགས་བྱས་ཤིང་། །ཡོ་བྱད་ལྔ་ནི་རྫོགས་བྱས་ནས། །སྔགས་ཀྱི་ཡན་ལག་ལྔ་རྫོགས་ན། །ཞག་ནི་སུམ་ཅུ་ཕྲག་དྲུག་ན། །ཚེ་ལ་དབང་བའི་དངོས་གྲུབ་ཐོབ། །ལོ་ནི་ཉིས་སྟོང་ལྔ་བརྒྱ་སྲ །ལོངས་སྤྱོད་རྫོགས་པའི་ཚུལ་བཟུང་ནས། །དོ་གཅིག་སངས་རྒྱས་ས་ལ་འགྲོ། །སྐུ་གསུམ་ལྷུན་གྱིས་གྲུབ་པར་འགྱུར། །ཨ་ནུ་ཡོ་གའི་ཐེག་པ་ནི། །བར་མ་ཆོད་པའི་ཚེ་གཅིག་གིས། །སངས་རྒྱས་ས་ལ་ངེས་པར་འགྲོ། །རྫོགས་ཆེན་ཨ་ཏི་ཡོ་ག་ནི། །རྣལ་འབྱོར་དུས་ལ་མི་ལྟོས་ཏེ། །ཅི་བཞིན་པ་ཡི་ཆོས་ཉིད་ལ། །མ་བཅོས་པ་ཡི་བློ་བཞག་སྟེ། ཁྲེས་པ་སོ་མ་མ་བཅོས་པར། །འབྲས་བུ་རང་བཞག་སྐུ་གསུང་ཐུགས། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། ཐེག་པའི་འབྲས་བུ་འཐོབ་དུས་བསྟན་པའི་ལེའུ་སྟེ་ཞེ་དྲུག་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །ཐེག་པ་རིམ་པར་པྱེ་བ་ཡི། །འབྲས་བུ་ཐོབ་ཚུལ་ཅི་ལྟར་ལགས། །གསང་བའི་བདག་པོས་གསུངས་པ། །སེམས་དཔའ་ཆེན་པོ་ཉོན་ཅིག །ཐེག་པ་སོ་སོའི་འབྲས་བུ་ནི། །ལ་ལས་དགྲ་བཅོམ་འབྲས་བུ་ཐོབ། །ལ་ལས་བསེ་རུ་ལྟ་བུར་ཐོབ། །ལ་ལས་སྐུ་གསུམ་ཡེ་ཤེས་བཞི། །ལ་ལས་རིགས་གསུམ་གོ་འཕང་ཐོབ། །ལ་ལས་རིགས་བཞིའི་གོ་འཕང་ཐོབ། །ལ་ལས་རྣམ་སྣང་གོ་འཕང་ཐོབ། །ལ་ལས་སྐུ་ལྔ་ཡེ་ཤེས་ལྔ། །ལ་ལས་དབྱིངས་གཅིག་ཡེ་ཤེས་གཅིག །རྫོགས་པ་ཨ་ཏིའི་འབྲས་བུ་ནི། །ཐོབ་མེད་འབྲས་བུ་རང་བཞིན་སྐུ་གསུམ་ཚུལ་ཡང་།བཞག་སྟེ། །མ་བཅོས་སེམས་ཀྱི་ངང་དུ་སྨིན། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། ཐེག་པའི་འབྲས་བུ་ཐོབ་བྱ་བསྟན་པའི་ལེའུ་སྟེ་ཞེ་བདུན་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། ། །རྫོགས་པ་ཆེན་པོའི་ཡེ་ཤེས་དང་། །ཐེག་པ་ཐུན་མོང་ཡེ་ཤེས་གཉིས། །དེ་ཡི་ཁྱད་པར་ཅི་ལྟར་ལགས། །གསང་བའི་བདག་པོས་གསུངས་པ། སེམས་དཔའ་ཆེན་པོ་ཉོན་ཅིག །རྫོགས་པ་ཆེན་པོའི་ཡེ་ཤེས་ནི། །རང་བཞིན་ནམ་མཁར་གནས་པ་འདྲ། །ཐེག་པ་ཐུན་མོང་ཡེ་ཤེས་ནི། །ཐེན་རྩེར་མིག་གི་ནམ་མཁའ་འདྲ། །ཐེན་རྩེར་མིག་གི་ནམ་མཁའ་མྲ །རང་བཞིན་ནམ་མཁའ་ཤོང་མི་འགྱུར། །རང་བཞིན་ནམ་མཁར་གནས་པ་ལ། །ཐེན་རྩེར་མིག་གི་ནམ་མཁའ་ནི། །རང་བཞིན་ནམ་མཁའི་ཆ་ལས་བྱུང་། །རང་བཞིན་ནམ་མཁའ་གནས་པ་ལ། །ཐེན་རྩེར་ནམ་མཁར་ལྟོས་པ་མེད། །ཐེན་རྩེར་མིག་གི་ནམ་མཁའ་མྲ །ཕྲ་རགས་ཐེན་རྩེར་ཆུད་པ་ཡང་། །དབྱིངས་ལ་ཡེ་ཤེས་འཇུག་པའི་ཚུལ། ཁྲེས་བྱ་ཤེས་བྱེད་གཉིས་ཀྱི་ཚུལ། །ཐོབ་བྱ་འཐོབ་བྱེད་གཉིས་ཀྱི་ཚུལ། །རྫོགསཔཆེནཔོའིཡེཤེསནི། །གདལབཆེནཔོརགནསཔའི་ཕྱིར། །དབྱིངས་དང་ཡེ་ཤེས་མི་འཇུག་སྟེ། ཁྲེས་བྱ་ཤེས་བྱེད་གཉིས་སུ་མེད། །རྟོག་བྱ་རྟོགས་བྱེད་གཉིས་སུ་མེད། །མཐོང་བྱ་མཐོང་བྱེད་གཉིས་སུ་མེད། །བསྒྲུབ་བྱ་སྒྲུབ་བྱེད་གཉིས་སུ་མེད། །ཐོབ་བྱ་འཐོབ་བྱེད་གཉིས་སུ་མེད། །ཅེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། ཡེཤེས་ཁྱད་པར་འབྱེད་པའི་ལེའུ་སྟེ་ཞེ་བརྒྱད་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །རང་བྱུང་ཡེ་ཤེས་ཞེས་བགྱི་བ། །རང་བྱུང་ཞེས་ནི་གང་ལ་བགྱི། །རྒྱུ་རྐྱེན་གཞན་གྱིས་མ་བསྐྱེད་པའི། །ཡེ་ཤེས་ཞེས་ནི་གང་ལ་བགྱི། །གསང་བའི་བདག་པོས་བསྟན་དུ་གསོལ། །གསུངས་པ། ཀྱེ་སེམས་དཔའ་ཆེན་པོ་ཉོན་ཅིག །རང་བྱུང་རྒྱུ་རྐྱེན་མེད་པ་ཡིན། །ཡེ་ཤེས་སྒྲིབ་པ་མེད་པ་ཡིན། །རང་བྱུང་ཡེ་ཤེས་ཆེན་པོ་དེ། །རྒྱུ་རྐྱེན་གཞན་གྱིས་མ་བསྐྱེད་ཅིང་། །རྩོལ་བསྒྲུབ་དག་ལས་མི་འབྱུང་བས། །རང་བྱུང་གཞན་ལ་རག་མ་ལུས། །ཡུལ་ལས་བྱུང་བའི་ཡེ་ཤེས་དེ། །ཡུལ་ལས་བྱུང་བས་རང་བྱུང་མིན། །ཡུལ་ལ་འཕེལ་འགྲིབ་ཡོད་པའི་ཕྱིར། །ཡེ་ཤེས་དེ་ཡང་གསལ་འགྲིབ་བཅས། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས།རང་བྱུང་ཡེ་ཤེས་ངོས་བཟུང་བའི་ལེའུ་སྟེ་ཞེ་དགུ་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །རང་བྱུངཡེཤེསཆེནཔོདང། །མ་རིག་པ་ཡི་འཁྲུལ་རྟོག་གཉིས། །ཀུན་གཞི་སེམས་ཀྱི་གཞི་མོ་ལ། །གང་གི་ངོ་བོར་ངེས་མ་ངེས། །གསང་བའི་བདག་པོས་བསྟན་དུ་གསོལ། །གསང་བའི་བདག་པོས་གསུངས་པ། །སེམས་དཔའ་ཆེན་པོ་ཉོན་ཅིག །མ་རིག་པ་དང་ཡེ་ཤེས་གཉིས། །ཀུན་གཞི་སེམས་ཀྱི་གཞི་མོ་ལ། །གང་དུ་ངེས་པ་མེད་པ་ལ། །རྐྱེན་གྱིས་སོ་སོར་བསླད་ནས་ནི། །མ་རིག་ཡེ་ཤེས་གཉིས་ཀྱི་ཚུལ། ཁོ།ས་རབ་ཐབས་སམ་ལུང་དག་ལ། །བརྟེན་ནས་ཡེ་ཤེས་སྐྱེ་བའི་ཚུལ། །ཕྱི་ནང་རྟོགས་པའི་རྐྱེན་བཞི་དང་། །ཡུལ་དུས་བསྐལ་པ་གསུམ་པོ་ལ། །བརྟེན་ནས་མ་རིག་འབྱུང་བའི་ཚུལ། །ཆོས་ཉིད་རང་གི་ངོ་བོ་ལ། །མ་རིག་ཡེ་ཤེས་གཉིས་སུ་མེད། །ཅེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། མ་རིག་པ་དང་ཡེ་ཤེས་གཉིས། ཀུན་གཞི་སེམས་ལ་ངེས་པ་མེད་པར་བསྟན་པའི་ལེའུ་སྟེ་ལྔ་བཅུ་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །རྟོགས་པ་ཅན་གྱིས་གང་ཟག་ལ། །མི་རྟོག་ཡེ་ཤེས་འཆར་མི་འཆར། །གསང་བའི་བདག་པོས་བསྟན་དུ་གསོལ། །གསུངས་པ། ཉོན་ཅིག །ཉི་མ་འོད་ཀྱི་རང་བཞིན་ཡང་། །སྤྲིན་ཚོགས་སྟུག་པོས་བསྒྲིབས་ཙམ་ན། །འཇིག་རྟེན་དག་ཏུ་འོད་མི་གསལ། །མ་ཤར་ཕ་དང་ཅིས་མ་འདྲ། །རྟོག་པ་སྔ་ཕྱི་གཉིས་བར་ནས། །མི་རྟོག་ཡེ་ཤེས་འཆར་མོད་ཀྱང་། །རྒྱུ་འབྲས་བསམ་རྒྱུད་དངཡེཤེས་ཀྱངཔ་ངོས་མ་ཟིན། །ཉོན་མོངས་སྡུག་བསྔལ་གྲོལ་བ་མེད། །ཅེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། རྟོག་པ་ཅན་ལ་ཡེ་ཤེས་ཀྱིས་ཕན་མི་ཐོགས་པའི་ལེའུ་སྟེ་ང་གཅིག་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །ཆོས་ཀྱི་སྐུ་དང་ལོངས་སྤྱོད་རྫོགས། །སྤྲུལ་པའི་སྐུ་དང་རྣམ་པ་གསུམ། །ཚུལ་གྱིས་བསྡུ་ན་གང་གིས་བསྡུ། །གསང་བའི་བདག་པོས་བསྟན་དུ་གསོལ། །གསང་བའི་བདག་པོས་གསུངས་པ། སེམས་དཔའ་ཆེན་པོ་ཉོན་ཅིག །སྟོན་པ་སྐུ་གསུམ་ཚུལ་བསྡུ་ན། །རྒྱུ་ཡི་དུས་ན་བྱང་ཆུབ་སེམས་སུ་ཀུན་ཀྱང་གཅིག །འབྲས་བུའི་དུས་ན་སངས་རྒྱས་ཡིན་པར་ཀུན་ཀྱང་གཅིག །འདུས་པའི་དུས་ན་སྔ་ཕྱི་མེད་པར་ཀུན་ཀྱང་གཅིག །ཆོས་སྐུའི་རང་བཞིན་ངོ་བོར་རང་བཞིན་མེད་པར་གཅིག །ཅེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། སྐུ་གསུམ་གྱི་ཚུལ་བསྡུ་བའི་ལེའུ་སྟེ་ང་གཉིས་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །ཕྱག་རྒྱ་བཞུགས་ཚུལ་ཅི་ལྟར་ལགས། །གསང་བའི་བདག་པོས་བསྟན་དུ་གསོལ། །གསུངས་པ་ཉོན་ཅིག །བྱང་ཆུབ་སེམས་ཀྱི་ཆོས་ཉིད་ནི། །༣བྲུལ་པའི་བློ་རུ་གནས་ཙམ་ན། །ཅི་ལྟར་སྣང་བའི་ཆོས་རྣམས་ཀུན། །བདེན་རྫུན་བློ་ཡིས་བཟུང་ནས་བཞུགས། །བྱང་ཆུབ་སེམས་སུ་བཞུགས་ཙམ་ན། །ཅི་ལྟར་སྣང་བའི་ཆོས་རྣམས་ཀུན། །མི་སྣང་བ་ལ་མངོན་དུ་འབྱིན་ནུས་པས། །ཆོས་རྣམས་ཀུན་གྱི་སྙིང་པོར་བཞུགས། །ཆོས་ཀྱི་སྐུ་རུ་བཞུགས་ཙམ་ན། །མི་རྟོག་མཉམ་པའི་ངོ་བོར་བཞུགས། །ལོངས་སྤྱོད་རྫོགས་སྐུར་བཞུགས་ཙམ་ན། །སྣ་ཚོགས་ཆོས་ལ་ལོངས་སྤྱོད་ཅིང་། །མ་སྤངས་ཡེ་ཤེས་རྒྱན་དུ་བཞུགས། །སྤྲུལ་པའི་སྐུ་རུ་བཞུགས་ཙམ་ན། །གང་ལ་གང་དགོས་དེར་སྤྲུལ་ནས། །དགོངས་པ་ཕུན་སུམ་ཚོགས་པར་བཞུགས། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། ཕྱག་རྒྱ་བཞུགས་ཚུལ་གྱི་ལེའུ་སྟེ་ང་གསུམ་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །ཆོས་སྐུས་ཁྱབ་པའི་ཁྱབ་ཚུལ་གྱི། །ཁྱད་པར་བྱེ་བྲག་ཅི་ལྟར་ལགས། །གསང་བའི་བདག་པོས་བསྟན་དུ་གསོལ། །གསུངས་པ། སེམས་དཔའ་ཆེན་པོ་ཉོན་ཅིག །ཆོས་སྐུ་ཐིག་ལེ་ཉག་གཅིག་གིས། །ཡ་ཐ་རྒྱལ་བའི་དཀྱིལ་འཁོར་ནས། །མནར་མེད་དམྱལ་བ་ཡན་ཆད་དུ། །ཏིལ་ལ་མར་གྱིས་ཁྱབ་པ་བཞིན། །ཀུན་ལ་ཁྱབ་པར་གནས་མོད་ཀྱང་། །མི་མཐུན་ཁྱད་པར་ཤིན་ཏུ་ཆེ། །སངས་རྒྱས་དབུས་ན་བཞུགས་ཙམ་ན། །དྲི་མེད་ཆོས་ཀྱི་སྐུ་རུ་བཞུགས། །མིང་ཡང་ཀུན་གཞི་བྱང་ཆུབ་སེམས། །རྣམ་དག་དེ་བཞིན་གཤེགས་པ་ལ། །ཀུན་གཞི་མིང་ཡང་མི་གྲགས་སོ། །འགྲོ་དྲུག་དབུས་ན་བཞུགས་ཙམ་ན། །དྲིར་བཅས་ཆོས་ཀྱི་སྐུ་རུ་བཞུགས། །མིང་ཡང་ཀུན་གཞི་བྱང་ཆུབ་སེམས། །ཡོད་ཀྱང་རང་གི་ངོ་མ་ཤེས། །དབུལ་མོའི་ནོར་དང་གྱད་ནོར་འདྲ། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། ཆོས་སྐུའི་ཁྱབ་ཚུལ་བསྟན་པའི་ལེའུ་སྟེ་ང་བཞི་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །བྱར་མེད་བྱང་ཆུབ་སེམས་ཆེན་དེ། །བཅོས་པས་གྲུབ་བམ་མ་བཅོས་འགྲུབ། །གསང་བའི་བདག་པོས་གསུངས་པ། །སེམས་དཔའ་ཆེན་པོ་ཉོན་ཅིག །བྱར་མེད་བྱང་ཆུབ་ཆེན་པོ་དེ། །བཅོས་པས་གྲུབ་པ་མ་ཡིན་ཏེ། །མ་བཅོས་རྣལ་དུ་བཞག་པས་གྲུབ། །སྔར་འདས་སངས་རྒྱས་ཐམས་ཅད་ཀྱིས། །ཅི་བཞིན་པ།་ལས་བཅོས་མ་བྱས། །ད་ལྟའི་སངས་རྒྱས་ཐམས་ཅད་ཀྱང་། །ཅི་བཞིན་པ་ལས་བཅོས་མི་མཛད། །མ་འོངས་སངས་རྒྱས་ཐམས་ཅད་ཀྱང་། །ཅི་བཞིན་པ་ལ་བཅོས་མི་འགྱུར། །གསང་བའི་བདག་པོ་ང་ཡིས་ཀྱང་། །ཅིབཞིན་པ་ལ་བཅོས་མ་མྱོང་། །སེམས་དཔའ་ཆེན་པོ་ཁྱོད་ཀྱིས་ཀྱང་། །ཅི་བཞིན་པ་ལ་བཅོས་མ་བྱེད། ཀྱེ་ཀྱེ་སེམས་དཔའ་ཆེན་པོ་ཉོན་ཅིག །ཆུ་མ་རྙོགས་ན་དངས། སེམས་མ་བཅོས་ན་གསལ། ལམ་མ་བགྲོད་ན་ཉེ།འབྲས་བུ་མ་དམིགས་ན་འཐོབ། ཉོན་ཅིག །རང་ལུས་མ་བཅོས་ལྷ་མ་བསྒོམས། །སྨྲ་བའི་ཚིག་དང་ངག་མ་འཆོས། །ཏིང་འཛིན་མ་བྱེད་སེམས་མ་འཆོས བཅོས་པས་རྣལ་དུ་འབྱོར་བ་མེད། །རྣལ་དུ་མ་འབྱོར་དོན་མི་འགྲུབ། །ཀྱེ་ཀྱེ་སེམས་དཔའ་ཆེན་པོ་ཉོན་ཅིག །ཅི་ལྟར་སྣང་བའི་ཆོས་རྣམས་དེ་བཞིན་ཉིད་དུ་གཅིག །དེ་ལ་སུ་ཡང་འཆོས་པར་མ་བྱེད་ཅིག །མ་བཅོས་མཉམ་པའི་རྒྱལ་པོ་དེ་ལ་ནི། །མི་རྟོག་ཆོས་ཀྱི་དགོངས་།པ།་དེ་ལ་ལྡན། །ཅི་བཞིན་པ་ལ་སུས་འཆོས་པ། །དེ་བཞིན་མྱ་ངན་མི་འདའ་སྟེ། །དེ་ནི་འཁོར་བའི་སྙིང་པོར་འགྲུབ། །ཅེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། བྱང་ཆུབ་སེམས་བཅོས་སུ་མེད་པའི་ལེའུ་སྟེ་ང་ལྔ་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །བླ་མེད་བྱང་ཆུབ་ཆེན་པོ་འདི། །བཙལ་བས་གྲུབ་བམ་མ་བཙལ་འགྲུབ། །གསང་བའི་བདག་པོས་བསྟན་དུ་གསོལ། །གསུངས་པ།སེམས་དཔའ་ཆེན་པོ་ཉོན་ཅིག །བླ་མེད་བྱང་ཆུབ་ཆེན་པོ་འདི། །བཙལ་བས་འགྲུབ་པ་མ་ཡིན་ཏེ། །མ་བཙལ་རྣལ་དུ་བཞག་པས་གྲུབ། །གདོད་ནས་སྙིང་པོ་བྱང་ཆུབ་ལ། །བཙལ་ཀྱང་དབྱིངས་ལས་བསྐྱོད་པ་མེད། །བཙལ་ན་རྩོལ་བའི་ནད་དུ་འགྱུར། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། བྱང་ཆུབ་སེམས་ལ་བཙལ་དུ་མེད་པའི་ལེའུ་སྟེ་ང་དྲུག་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །རྫོགས་པ་ཆེན་པོའི་ཆོས་ལུགས་ཀྱིས། །བསོད་ནམས་ཚོགས་ལ་བརྟེན་མི་ངག་འདི་ཡི་བརྟེན། །གསང་བའི་བདག་པོས་བསྟན་དུ་གསོལ། །གསུངས་པ། ཀྱེ་སེམས་དཔའ་ཆེན་པོ་ཉོན་ཅིག །གདོད་ནས་སྙིང་པོ་བྱང་ཆུབ་ལ། །བསོད་ནམས་ཚོགས་བསག་མི་དགོས་ཏེ། །མ་བསགས་འབྲས་བུ་གཞི་ལ་སྨིན། །དེང་འདིར་བསོད་ནམས་ཚོགས་བསགས་ནས། །ཕྱི་མར་འབྲས་བུ་ཐོབ་འདོད་པ། །བྱེ་མ་ལ་ནི་མར་བཙིར་འདྲ། ཁྲེས་རབ་ཆེན་པོས་མ་ཟིན་ན། །བསགས་ཀྱང་སྒྲིབ་པ་ཉིད་དུ་འགྱུར། །ཞེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། བསོད་ནམས་ཚོགས་བསག་པ་ལ་རག་མ་ལུས་པར་བསྟན་པའི་ལེའུ་སྟེ་ང་བདུན་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །རྫོགས་ཆེན་ལམ་གྱི་རྣལ་འབྱོར་པ། །ལམ་ལ་བགྲོད་དུ་ཡོད་དམ་མེད། །གསང་བའི་བདག་པོས་གསུངས་པ། །སེམས་དཔའ་ཆེན་པོ་ཉོན་ཅིག །ཆོས་ཉིད་ནམ་མཁའ་ལྟ་བུ་ལ། །བགྲོད་པས་ཕྱིན་པར་འདོད་པ་ནི། །ཁྱུང་ཆེན་ནམ་མཁའི་མཐའ་འཚོལ་འདྲ། །བགྲོད་པས་འབྲས་བུ་ཐོབ་འདོད་པ། །མདོངས་པས་ནམ་མཁར་བསྙེགས་པ་འདྲ། །ས་དང་ལམ་ལ་བགྲོད་བྱེད་པ། །བྱ་བྲལ་དོན་དང་མཐུན་པ་མེད། །རང་བཞིན་གནས་པ་ཉིད་ཀྱི་ཕྱིར། །ས་དང་ལམ་ལ་བགྲོད་མི་དགོས། །ཞེས་གསུངས་སོ། །བང་མཛོད་འཕྲུལ་གྱི་ལྡེ་མིག་ལས། ལམ་བགྲོད་དུ་མེད་པའི་ལེའུ་སྟེ་ང་བརྒྱད་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །རྫོགས་ཆེན་སྤྱོད་པའི་རྣལ་འབྱོར་ལ། །སྒྲོ་སྐུར་འདེབས་པ་འབྱུང་སྲིད་ན། །རྒོལ་རྩོད་ཐེ་ཚོམ་མན་ངག་ནི། །སྨྲབའིམཚོན ཆབསྟནདུགསོལ། །གསང་བའི་བདག་པོས་གསུངས་པ། སེམསདཔའཆེནཔོཉོནཅིག །ཐོག་མར་རྩོད་པ་འཆའ་དུས་སུ། །དགོངས་པ་མི་གཉིས་སྤྱི་བོར་བཞག །རྡོ་རྗེ་རིག་པའི་གཏན་ཚིགས་རྣམས། །རང་གི་རྒྱལ་ས་འཛིན་དུ་གཞུག །དྲི་བ་གསུམ་པོ་བརྟག་བྱ་སྟེ། །འདྲི་ན་འཕྲང་བསྒུག་ཟུར་གྱིས་སྒྲ། །བཟློག་ན་བརྫུན་ཏེ་སླར་ལ་འདྲི། །གྲུབ་མཐའ་མ་ལོངས་ལན་མ་གདབ། །གླན་ན་མྱུར་མགྱགས་མཚོན་ཆ་བརྡེག །ཡང་ན་འགལ་འབྲེལ་གཡུང་ངོར་འཇུག །དམན་པའི་ཐེག་པར་ཁས་ལེན་ན། །དཔེ་ཡིས་བརྟགས་ཤིང་སྤྱི་ནས་འདྲི། །རྫོགས་ཆེན་ལྟ་བར་ཁས་ལེན་ན། །དགོས་པ་དྲི་སྟེ་གན་རྐྱལ་གནན། །རྫོགས་ཆེན་ལྷ་བ་ཁ་འབྱམས་ནི། །ཡུལ་གཅིག་དུས་གཅིག་ངོ་བོ་གཅིག །གཟུགས་སྒྲ་དྲི་རོ་རེག་ལ་སོགས། །ཁ་དོག་དབྱིབས་དང་བཅོས་པ་རྣམས། །བརྟགས་ན་ཕྱོགས་སུ་ལྷུང་སྲིད་པས། །དེ་ལ་རྫོགས་ཆེན་ཁ་མི་འབྱམ། །རྒྱུ་མཚན་མི་ལྡན་དམ་མི་བཅའ། །ཆོས་ཉིད་དོན་གྱི་ངོ་བོ་དེ། །ཡིན་ཚུལ་ངེས་པ་མེད་པ་ལ། །མི་མཐུན་བསམ་ངོ་སོ་སོ་ལ། །སྣང་ཚུལ་ཅིར་ཡང་སྣང་བའི་ཕྱིར། །ལུང་མེད་བསྙོན་པ་རང་གི་ནི། །གྲུབ་མཐའ་དག་ལ་སྐྱོན་ཡོད་ནས། །གཞན་སྐྱོན་འོང་བ་ཤེས་ན་འབྱམས། །ཁོངས་ན་སྤངས་པའི་རྗེས་ཤུལ་དུ། །རླུང་གིས་ས་བོན་བསྐུར་ནས་ནི། །དབང་གསུམ་ཚུལ་གསུམ་ཡུལ་དང་དུས། །སྤྱི་དང་བྱེ་བྲག་ཤེས་པར་དབྱེ། །འགལ་འབྲེལ་ཡན་ལག་རྣམ་བཞི་པོས། །རང་གཞུང་བསྐྱབ་ཅིང་གཞན་སུན་འདོད། །འབྲེལ་པ་གྲུབ་ན་འགལ་བ་ལྡོག །གལ་ཏེ་འབྲེལ་པ་མ་གྲུབ་ན། །འགལ་བའི་རི་བོ་མཐོང་བར་འགྱུར། །རྫོགས་ཆེན་ལྟ་བ་ཁ་འབྱམས་ཡང་། །ཡང་ན་དབང་གསུམ་ཚུལ་གྱིས་འབྱམས། །ཡང་ན་དཔེ་དོན་གཉིས་ཀའི་འབྱམས། །ཡང་ན་ཕན་ཚུན་བལྟས་པས་འབྱམས། །ཡང་ན་ངོ་གའི་སྣང་ཚུལ་འབྱམས། །དེས་ནི་གཉིས་འགེག་འཕྲང་མི་ལྷུང་། །ཕྱི་རྒོལ་དག་གིས་ཚུག་མི་འགྱུར། །གལ་ཏེ་འབྲོས་སར་མ་ཐར་ན། །དོན་དེ་བཟློག་ཏེ་སླར་ལ་འདྲི། །ཡང་ན་བླ་མའི་བཀའ་རྒྱས་གདབ། །རྡོ་རྗེ་རིག་པའི་གཏན་ཚིགས་ལ། །ཆོས་ཉིད་རིག་པའི་རྒྱ་ཡིས་གདབ། །མཐུན་པར་སྣང་བའི་ཆོས་གཅིག་ལ། །མི་འདྲ་བ་ཡི་ནད་འདྲི་ན། །ཆོས་ཉིད་ཡིན་པར་ལན་ཡང་གདབ། །དེས་ཀྱང་བདེན་པ་མ་མཐུན་ན། །མི་མཐུན་མགོ་བསྒྲེས་སླར་ལ་བཟློག །མི་རིགས་པ་གཅིག་འདྲི་བྱེད་ན། །དེ་ཡང་དེ་ལྟར་གོང་མ་བཞིན། །འདྲི་ན་སུན་དབྱུང་གུས་ཕྱག་འཚལ། །བཟློག་ན་བརྫུས་ཏེ་འཕྲང་སྡོད་བྱ། །བརྫུས་ཏེ་གྲུབ་མཐའ་གཏན་ལ་དབབ། །གལ་ཏེ་རློམ་པར་འདོད་པ་ན། །སྐྱོན་གཉིས་ཚང་བའི་ཚིག་གཅིག་ལ། །རྫོགས་ཆེན་གྲུབ་མཐའ་འཆའ་རུ་གཞུག །གཡས་གཡོན་འབྲོས་པའི་འཔྲང་བཅད་ལ། །གཉིས་འགག་འཕྲང་དུ་བཙུད་དེ་བརྡབ། །གང་དུ་སླེབ་པར་དབྱུག་པས་བཏགས། །འོག་མའི་བལྟ་བའི་མཆོག་བཙལ་ལ། །མགོ་བསྒྲེ་བྱས་ཏེ་གཡང་དུ་བསྒྱུར། །མཐུན་པར་སྣང་བའི་ཆོས་གཅིག་ལ། །མི་འདྲ་བ་ཡི་ནད་ཀ་འདྲི། །ཆོས་གཅིག་ཡོད་པར་ཁས་བླངས་ནས། །སྨྲ་བར་མི་བྱེད་གསང་བྱེད་ན། །དེ་ཡི་གསང་ཁུང་བྲུ་བའི་ཕྱིར། །མི་རིགས་པ་གཅིག་ཁས་བླངས་ལ། །མགོ་བསྒྲེ་དེ་དང་བསྟུན་པར་བྱ། །ཞེས་སོ། །བང་མཛོད་འཕྲུལ་གྱི་ལྡེའུ་མིག་ལས། །རྒོལ་རྩོད་ཐེ་ཚོམ་གྱི་མན་ངག་བསྟན་པའི་ལེའུ་སྟེ་ང་དགུ་པའོ།། །།ཡང་གསོལ་པ། ཀྱེ་ཀྱེ་གསང་བའི་བདག་པོ་ལགས། །ཚིག་གི་དོན་གྱིས་ཅི་ལྟར་བཤད། །གསང་བའི་བདག་པོས་བསྟན་དུ་གསོལ། །ཀྱེ་སེམས་དཔའ་ཆེན་པོ་ཉོན་ཅིག །ཚིག་གི་དོན་གྱི་བཤད་ལུགས་ནི། །གོང་གི་ཤུགས་དང་འོག་གི་ཤུགས། །ཚིག་ཏུ་མི་བཏང་བཤད་ན་བགྲང་། །ཚེག་མིག་བགྲང་ཞིང་ཤིང་རྟ་ཞོན། །ཡན་ལག་ཤུགས་ཀྱིས་འབྲུ་རྣམས་བརྡའ། །ཚིག་འབྲུ་གར་འགྲོ་ཡན་ལག་དབང་། །རྩོད་པ་གྲོགས་ཀྱི་ཡི་གེ་ནི། །གཙོ་ལ་ཅུང་ཟད་ཙམ་ཞིག་ཡོད། །གྲོགས་ལ་ཆེད་དུ་འབོད་པར་བྱེད། །ཡན་ལག་ཤུགས་ཀྱི་འབྲུ་རྣམས། །གོ་གབདམསྙམ། །ཡན་ལག་གྲོགས་ཀྱི་དབང་དུའོ། །སྡེ་དོན་ལྔ་ཡི་ཀླད་རྒྱས་ནི། །རང་རང་ཐ་མར་ཤེས་པར་བྱ། །འབྲུ་དགུ་དང་པོའི་ཐ་མར་རོ། །དེ་ལྟར་དེ་བཞིན་དེ་འདྲ་གསུམ། །དཔེ་རུ་བསྟན་པའི་ཡི་གེ་ཡིན། །ཅི་ཕྱིར་གང་ཕྱིར་དེ་ཕྱིར་གསུམ། །དམིགས་ཀྱིས་གཏན་ཚིགས་དྲིས་པ་ལས། །གཅིག་གིས་གཏན་ཚིགས་བསྟན་པའོ། །དེ་ནི་འདི་ནི་ད་ནི་གསུམ། །དེ་ནི་ཞེས་པའི་ཡི་གེ་ནི། །འོག་ཏུ་བརྟན་ལ་ཕབ་སྟེ་སྟོན། །འདི་ནི་ཞེས་པའི་ཡི་གེ་ནི། །གོང་ལས་བཟློག་པའི་ཆོས་ཤིག་སྟོན། །ད་ནི་ཞེས་པའི་ཡི་གེ་ནི། །དོན་གཅིག་གོང་དུ་རྫོགས་ནས་ནི། །གཉིས་པ་སྟོན་པའི་རྐྱེན་ཞེས་བྱ། །དེ་ཡང་ཞེས་པའི་ཡི་གེ་ནི། །གོང་དུ་བསྟན་པའི་ཡི་གེའི་དོན། །འོག་གིས་གཏན་ལ་ཕབ་སྟེ་སྟོན། །འདི་ཡང་ཞེས་པའི་ཡི་གེ་ནི། །གོང་དང་འོག་དག་མཐུན་པར་སྟོན། །ཐར་ན་པར་ན་མདོར་ན་གསུམ། །ལ་བཅད་པ་ཡི་ཡི་གེར་བཤད། །དེ་ལ་ཞེས་པའི་ཡི་གེ་ནི། །གཞི་ལ་དགར་བའི་ཡི་གེ་སྟེ། །དང་གིས་རྣམ་གྲངས་བཤད་པ་ལ། །སོགས་པ་རྣམས་ཀྱིས་སྡེ་ཚན་བས། །ཐམས་ཅད་ཀུན་ནི་ལྷག་མེད་པའོ། །བང་མཛོད་འཕྲུལ་གྱི་ལྡེའུ་མིག་ལས། ཚིག་གི་དོན་གྱི་བཤད་ལུགས་བསྟན་པའི་ལེའུ་སྟེ་དྲུག་ཅུ་པའོ།། །།དེ་ནས་གསང་བའི་བདག་པོས། །སེམས་དཔའ་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ཀྱེ་ཀྱེ་སེམས་དཔའ་ཆེན་པོ་ཉོན་ཅིག །མན་ངག་འདི་ཡི་མཚན་ཟུང་ཞིག །མན་ངག་འདི་ཡི་མཚན་བཟུང་ན། །ཆོས་རྣམས་ཐམས་ཅད་བཟུང་དང་མཚུངས། །ཞེས། དེ་ནས་སེམས་དཔའ་རྡོ་རྗེས་གསོལ་པ། །ཀྱེ་ཀྱེ་གསང་བའི་བདག་པོ་ལགས། །མན་ངག་དམ་པའི་ཡི་གེ་འདི། །མཚན་ཟུང་ཞིག་པར་བསྒོ་བ་དེ། །མཚན་ནི་ཅི་ལྟར་གཟུང་བར་བགྱི། །གསང་བའི་བདག་པོས་བསྟན་དུ་གསོལ། །གསུངས་པ། །སེམས་དཔའ་ཆེན་པོ་ཉོན་ཅིག །མན་ངག་འདི་ཡི་མཚན་ཉིད་ནི། །རྒྱལ་པོའི་བང་མཛོད་དང་འདྲ་བའི་ཕྱིར། །བང་མཛོད་འཕྲུལ་གྱི་ལྡེའུ་མིག་ཅེས་བྱ་བར་ཟུང་ཞིག །ཐེག་པ་ཐམས་ཅད་ཀྱི་དོན་སྟོན་པའི་ཕྱིར། །ཐེག་པའི་སྤྱི་ཁོག་ཅེས་བྱ་བར་ཡང་ཟུང་ཞིག །མན་ངག་གཞུད་བསྡེབས་ནས་བསྟན་པའི་ཕྱིར། །རིན་པོ་ཆེ་གསེར་གྱི་ཕྲེང་བ་ཞེས་བྱ་བར་ཡང་ཟུང་ཞིག །དགོས་དགུ་རང་ལ་ཚང་བའི་ཕྱིར། །རིན་པོ་ཆེ་སྐྲུངས་པའི་མན་ངག་ཅེས་བྱ་བར་ཡང་ཟུང་ཞིག །མདོ་སྡེ་རྣམས་ཀྱི་མིག་སེལ་བའི་ཕྱིར། རིན་པོ་ཆེ་མིག་སེལ་ཞེས་བྱ་བར་ཡང་ཟུང་ཞིག །ཐམས་ཅད་བྱང་ཆུབ་སེམས་ཀྱི་སྣང་བར་ཤར་བའི་ཕྱིར། རང་བཞིན་དོན་ལྡན་གྱི་སྣང་བ་བཀོད་པ་ཞེས་བྱ་བར་ཡང་ཟུང་ཞིག །མན་ངག་གི་དཀའ་བ་བསྡུས་ཏེ་བཤད་པའི་ཕྱིར། རིན་པོ་ཆེ་རྒྱ་མདུད་བཀྲོལ་བ་ཞེས་བྱ་བར་ཡང་ཟུང་ཞིག །ཅེས་གསུངས་སོ། །བང་མཛོད་འཕྲུལ་གྱི་ལྡེའུ་མིག་ལས། མན་ངག་གི་དོན་ཡོངས་སུ་གཏད་པའི་ལེའུ་སྟེ་རེ་གཅིག་པའོ།། །།ལྟ་བ་ཐམས་ཅད་ཀྱི་གནད། མན་ངག་ཐམས་ཅད་ཀྱི་ཐེམ། བསྟན་པ་ཐམས་ཅད་ཀྱི་བཅུད་བཅུས་པ། དོན་མན་ངག་ལ་སྡེབས་པ། བང་མཛོད་འཕྲུལ་གྱི་ལྡེའུ་མིག་ཅེས་བྱ་བ། གསང་བའི་བདག་པོ་རྡོ་རྗེ་སེམས་དཔའ་ལ། མན་ངག་རིམ་པར་བཀོད་པའི་མདོ་རྫོགས་སོ། །ལེའུ་དྲུག་ཅུ་གཉིས་པའོ། །རྒྱལ་པོའི་མཇོད་ན་གང་ཡོད་པ། །རྒྱལ་པོ་ཉིད་ལས་གཞན་གྱིས་མིན། །བང་མཛོད་ཉིད་ལས་ཅི་བསྟན་པ། །ལྡེའུ་མིག་ཉིད་ལས་གཞན་གྱིས་མིན། །ཞེས་གསུངས་སོ། །རྫོགས་སོ།། །།