Ngb-pt-0100-vol-02-text
Front[edit]
Body[edit]
སོ། །དེ་ཕྱིར་གདམས་པའི་རྒྱ་རྣམས་གཅེས།། །། རྒྱ་གར་སྐད་དུ། ཙྭ་ན་གུ་རྒྱ་ནཱ་མ་ཏནྟྲ། །བོད་སྐད་དུ། ཡེ་ཤེས་གསང་བ་ཞེས་བྱ་བའི་རྒྱུད། ཡེ་ཤེས་གསང་བ་ཐུགས་ཀྱི་རང་བཞིན་ལ་ཕྱག་འཚལ་ལོ། །འདི་སྐད་བདག་གིས་བཤད་པའི་དུས་གཅིག་ན། ཡེ་ཤེས་གསང་བའི་གནས་ཆོས་ཉིད་ཀྱི་མཁའ། མཐའ་དབུས་མེད་པའི་གཞལ་ཡས་ཁང་ན་བཅོམ་ལྡན་འདས་རྫོགས་པ་ཆེན་པོ་བཞུགས་ཏེ། རང་བཞིན་གྱི་འཁོར་དང་། །རང་བཞིན་ལ་ལྟ་བའི་འཁོར་དང་། རང་བཞིན་རྟོགས་པའི་འཁོར་འདི་ལྟ་སྟེ། །ས་དང་། ཆུ་དང་། མེ་དང་། རླུད་དང་། ནམ་མཁའ་དང་། སྣང་བ་ཐམས་ཅད་དང་། ཡོངས་སུ་རྣལ་འབྱོར་ཞེས་བྱ་བ་དང་། རྣལ་འབྱོར་བ་ཆེན་པོ་ཞེས་བྱ་བ་དང་། སེམས་དཔའི་རྣལ་འབྱོར་ཞེས་བྱ་བ་དང་། ཤིན་ཏུ་རྣལ་འབྱོར་ཞེས་བྱ་བ་དང་། འདས་པའི་སངས་རྒྱས་དང་། མ་འོངས་པའི་སངས་རྒྱས་དང་།་ །ད་ལྟར་བྱུང་བའི་སངས་རྒྱས་རྣམས། འབྱེད་པ་མི་མངའ་བའི་ཐུགས་རྗེས་ཐབས་ཅིག་ཏུ་བཞུགས་སོ། །དེ་ནས་ལྷའི་དབང་པོས་ཕྱོགས་བཅུའི་སངས་རྒྱས་ཐམས་ཅད་ལ་འདི་སྐད་ཅེས་བསྐུལ་ཏོ། །གསུང་གི་༄༅ མངའ་བདག་ཐམས་ཅད་ཀྱིས། །རྩོལ་བའི་ཐེག་པ་མཐར་བརྟན་ནས། །རྩོལ་མེད་ཐེག་པ་མི་གསུང་བ། །ཐུགས་རྗེ་ཆེན་པོ་ཡལ་ལམ་ཅི། །སྐལ་ལྡན་གདུལ་བྱ་མཆིས་པས་ན། །ལྷུན་གྲུབ་ཐེག་པ་གསུང་དུ་གསོལ། །ཞེས་ཞུས་པ་དང་། །དེ་ནས་ཕྱོགས་བཚི་སངས་རྒྱས་ཐམས་ཅད་མགྲིན་གཅིག་ཏུ། །རྡོ་རྗེ་སེམས་དཔའ་ལ་འདི་སྐད་ཅེས་བཀའ་སྩལ་ཏོ། །དུས་གསུམ་སངས་རྒྱས་ཐམས་ཅད་ཀྱི། །ཐུགས་རྗེའི་རང་བཞིན་ཁྱོད་ཡིན་པས། །སངས་རྒྱས་ཀུན་གྱི་མཛད་པ་ཤར། །གསུང་གི་མངའ་བདག་ཐམས་ཅད་ཀྱི། །ཡེ་ཤེས་རང་བཞིན་ཁྱོད་ཡིན་པས། །ཐམས་ཅད་བྱང་ཆུབ་སེམས་སུ་གསལ། །བདེ་གཤེགས་མ་ལུས་ཐམས་ཅད་ཀྱི། །སྐུ་ཡི་ངོ་བོ་དང་ལྡན་པས། །རྨད་བྱུང་རོལ་པའི་སྐུ་རུ་ཤར། །གསུང་གི་མངའ་བདག་ཐམས་ཅད་ཀྱི། །གསུང་གི་བདག་ཉིད་རིག་པའི་གསུང་། །རྨད་བྱུང་རོལ་པའི་གསུང་དུ་ཤར། །ཚིག་གཅིག་དོན་ཀུན་རྫོགས་པའི་བདག །རིན་ཆེན་འཕྲུལ་གྱི་སྙིང་པོའི་སྒོ། །སྐལ་ལྡན་རྣམས་ལ་བསྟན་དུ་གསོལ། །རིན་ཆེན་འཕྲུལ་གྱི་ཐབས་ལྡན་པས། །གང་འདོད་མཐུན་པའི་སྒོ་དེ་ནས། །རྩོལ་མེད་དབྱིངས་དང་འཔྲད་པར་གྱིས། །བྱང་ཆུབ་སེམས་ཀྱི་དངོས་པོ་ལ། །བརྗོད་པའི་ཐ་སྙད་ཀུན་བྲལ་ཡང་། །མ་རྟོགསབློལཚིགསྒོནས། །གསུང་གི་སྒྲོན་མས་གསལ་པར་གྱིས། །ཞེས་གསུངས་སོ། །དེ་ནས་རྡོ་རྗེ་སེམས་དཔས་ཕྱག་ན་རྡོ་རྗེ་ཐུགས་ཀ་ནས་ཕྱུང་ནས། །རིན་པོ་ཆེ་རང་འབར་གྱི་འཁོར་ལོ་ལག་ཏུ་གཏད་ནས། །འདི་སྐད་ཅེས་གསུངས་སོ། །གཉིས་མེད་ཡེ་ཤེས་གསང་བའི་དོན། །བྱར་མེད་མི་རྩོལ་ཡེ་སངས་རྒྱས། །དབུ་མ་ཆེན་པོ་དྲང་པོའི་ལམ། །འདུས་པའི་ཚོགས་ལ་བསྟན་པར་གྱིས། །ཞེས་གསུངས་སོ། །དེ་ནས་སེམས་དཔའ་རྡོ་རྗེས། །རྡོ་རྗེ་སེམས་དཔའ་ལ་འདི་སྐད་ཅེས་གསོལ་ཏོ། །རྡོ་རྗེ་སེམ་དཔའ་ནམ་མཁའ་ཆེ། །ཚིག་གི་སྤྱོད་ཡུལ་མ་ཡིན་པས། །བདག་གིས་བགྲོ་བ་ཤིན་ཏུ་དཀའ། །མ་རྟོགས་པ་ལ་ཚིག་སྒོ་ནས། །མཚོན་ནས་རྟོགས་པར་བྱ་བའི་ཕྱིར། །ཅི་རིག་པར་ནི་རྣམ་པར་དགྲོལ། །ཞེས་ཞུས་པ་དང་། །དེ་ནས་སེས་དཔའ་རྡོ་རྗེས། ཤར་ཕྱོགས་རྡོ་རྗེ། རྣམ་པར་གནོན་པའི་ཞིང་ཁམས་ན། དེ་བཞིན་གཤེགས་པ་རྡོ་རྗེ་གསང་བ་ཞེས་བྱ་བ། མི་ཕྱེད་པའི་འཁོར་དང་བཅས་པ་ལ་འདི་སྐད་ཅེས་གསོལ་ཏོ། །སེམས་ཉིད་རྡོ་རྗེ་ལྟ་བུ་ལ། སྐྱེ་འགག་འབྱུང་བ་ཇི་ལྟར་ལགས། །ཞེས་གསོལ་པ་དང་། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེ་གསང་བས་བཀའ་སྩལ་པ། སེམས་ཉིད་མི་འགྱུར་རྡོ་རྗེ་ལ། སྐྱེ་འགག་ཡོད་པ་མ་ཡིན་ཏེ། །རྣམ་རྟོག་བློ་ལ་སྐྱེ་འགག་བྱུང་། །ཞེས་གསུངས་སོ། །དེ་ནས་ལྷོ་ཕྱོགས་ཀྱི་འཇིག་རྟེན་གྱི་ཁམས་རིན་པོ་ཆེ་སྣང་བ་ཞེས་བྱ་བན། དེབཞིནགཤེགསཔརིན་ཆེན་ཞབས་ཞེས་བྱ་བ། རང་འབར་སྣང་བའི་ཁྲི་ལ་བཞུགས་ཏེ། །ཉིད་ཀྱི་འཁོར་ལ་གསང་སྔགས་ཀྱི་དེ་ཁོ་ན་ཉིད་སྟོན་ཅིང་བཞུགས་པ་ལ། སེམས་དཔའ་རྡོ་རྗེས་འདི་སྐད་ཅེས་གསོལ་ཏོ། །བྱང་ཆུབ་སེམས་ཀྱི་རང་བཞིན་ལ། །རྒྱུ་རྐྱེན་རྩོལ་བས་མ་བསྒྲུབས་པར། །ཡོན་ཏན་འབྲས་བུ་ཇི་ལྟར་འཆར། །ཞེས་གསོལ་པ་དང་། དེ་ནས་དེ་བཞིན་གཤེགས་པ་རིན་ཆེན་ཞབས་ཀྱིས་བཀའ་སྩལ་པ། ཏཀྟ་ཀ་ཡི་རྒྱན་བཞིན་དུ། །རྒྱུ་འབྲས་མཐར་ཕྱིན་གཞི་ནས་རྫོགས། །ཐམས་ཅད་རང་བྱུང་སྙིང་པོའི་མཆོག །གསང་བའི་ཐབས་ཀྱིས་རྟོགས་གྱུར་ན། །ཉི་མའི་འོད་ལྟར་འབྲས་བུ་འཆར། །ཞེས་གསུངས་སོ། །དེ་ནས་ནུབ་ཕྱོགས་ན་པདྨ་བརྩེགས་པའི་ཞིང་ཁམས་ན། བཅོམ་ལྡན་འདས་པདྨའི་འོད་ཅེས་བྱ་བ། དྲི་མ་མེད་པའི་པདྨའི་གདན་ལ་བཞུགས་ཏེ། ཉིད་ཀྱི་འཁོར་ལ་གསང་སྔགས་ཀྱི་དེ་ཁོ་ན་ཉིད་སྟོན་ཅིང་བཞུགས་པ་ལ། སེམས་དཔའ་རྡོ་རྗེས་འདི་སྐད་ཅེས་གསོལ་ཏོ། །སེམས་ཉིད་པདྨ་ལྟར་དག་པར། །གཟུང་འཛིན་དྲི་མ་ཇི་ལྟར་བྱུང་། །ཞེས་གསོལ་པ་དང་། བཅོམ་ལྡན་འདས་པདྨའི་འོད་ཀྱིས་བཀའ་སྩལ་པ། པདྨ་འདམ་ན་གནས་བཞིན་དུ། །འདམ་གྱི་སྐྱོན་གྱིས་གོས་པ་མེད། །བྱང་ཆུབ་སེམས་ཀྱི་ངོ་བོ་ནི། །འཁོར་བའི་རྟོག་པར་མི་འགྱུར་ཏེ། །རྣམ་རྟོག་བློ་ལ་འཁོར་བ་བྱུང་། །ཞེས་གསུངས་སོ། །དེ་ནས་བྱང་ཕྱོགས་རྣམ་དག་གྲུབ་པ་ཞེས་བྱ་བའི་འཇིག་རྟེནན། དེབཞིནགཤེགསཔགྲུབ་པར་སྣང་བ་ཞེས་བྱ་བ། །རངབཞིནསྣང་བ་ཞེས་བྱབའི་གདན་ལ་བཞུགས་ཏེ། ཉིད་ཀྱི་འཁོར་ལ་ཆོས་སྔགས་ཀྱི་དེ་ཁོ་ན་ཉིད་སྟོན་ཅིང་བཞུགས་པ་ལ། སེམས་དཔའ་རྡོ་རྗེས་འདི་སྐད་ཅེས་གསོལ་ཏོ། །བཙལ་མེད་སེམསཀྱི་རང་བཞིན་ལ། འགྲོ་དོན་མཛད་པ་ཇི་ལྟར་འབྱུང་། །ཞེས་གསོལ་པདང་། དེ་བཞིན་གཤེགས་པ་གྲུབ་པར་སྣང་བས་བཀའ་སྩལ་པ། །རང་བྱུང་ཡེ་ཤེས་རྟོགས་གྱུརན། མཛད་པའི་བྱིན་རླབས་རང་ལས་འཆར། ཞེསགསུངས་སོ། །དེནས་དེ་བཞིན་གཤེགས་པ་རྣམ་པར་སྣང་མཛད་ཀྱིས་བཀའ་སྩལ་པ། འདུས་པའི་འཁོར་ཚོགས་ཁྱེད་རྣམས་ཀྱིས། །རྒྱལ་བ་ཀུན་གྱིས་ཐུགས་ཀྱིབཅུད། །ཡེ་ཤེས་གསངབ་རྟོགས་པར་གྱིས། །ཞེས་གསུངས་པདང་། །དེནས་སེམས་དཔའ་རྡོ་རྗེསྟནལསལངས་ཏེ། དེ་བཞིན་གཤེགས་པ་རྣམ་པརསྣང་མཛདལ་ཞུསཔ། ཁྱོདནིགསུང་གི་སེང་གེསྟེ། །ཡེ་ཤེས་གསང་བ་མ་རྟོགས་ན། །བི་མ་པར་ཡི་འབྲས་བུ་འདྲ། །སྨིནཀྱངའབྲས་བུ་མི་འབྱུང་བས། །ཡེ་ཤེས་གསང་བ་རྟོགས་པར་གྱིས། །ཐུགས་རྗེའི་མངའ་བདག་ཁྱོད་ཀྱིས་བསྟན། །དེ་དག་བདག་གིས་མ་རིག་པས། །ཡེ་ཤེས་གསང་བ་བསྟན་དུ་གསོལ། །ཞེས་ཞུས་པ་དང། དེ་ནསདེབཞིནགཤེགསཔརྣམ་པར་སྣང་མཛདཀྱིས་བཀའ་སྩལ་པ། སེམས་དཔའ་རྡོ་རྗེ་ད་ཉོན་ཅིག །ཡེ་ཤེས་གསང་བའིརངབཞིནནི། །སངས་རྒྱས་སེམས་ཅན་གཉིས་སུ་མེད། །ནམ་མཁའབཞིནདུཀུན་ཏུ་ཁྱབ། །མ་རིག་ཡེ་ཤེ་ཐ་དད་མེད། །མ་རྟོགས་རྟོགས་པ་ལམ་དུ་གཅིག །ཡེ་ཤེས་གསང་བའི་མཚན་ཉིད་ནི། །མ་རིག་འོད་གསལ་རྣམ་པར་དག །རྣམ་རྟོག་ཡེ་ཤེས་ཉིད་དུ་གནས། །གཞི་བཞག་རང་ལུགས་རིན་ཆེན་མཛོད། །མ་བྱུང་མ་བཙལ་གདོད་ནས་གནས། །ཡེ་ཤེས་གསང་བའི་རྣམ་པ་ནི། །སྣ་ཚོགས་སྣང་ལ་ངོས་གཟུང་མེད། །མི་དམིགས་སྒྱུ་མ་ལྷུན་གྲུབ་ནི། །རྟག་གསལ་ན་བལྟ་བ་ཡིན། །ཞེས་གསུངས་སོ། །ཡེ་ཤེས་གསང་བའི་རྒྱུད་ལས། གླེང་གཞིའི་ལེའུ་སྟེ་དང་པོའོ།། །།དེ་ནས་དེ་བཞིན་གཤེགས་པ་རྣམ་པར་སྣང་མཛད་ལ། །སེམས་དཔའ་རྡོ་རྗེས་འདི་སྐད་ཅེས་གསོལ་ཏོ། །གང་དག་ཇི་ལྟར་གང་རྣམས་ལ། །ཐབས་ཉིད་གང་གིས་རྣམ་པར་དབྱེ། །ཞེས་ཞུས་པ་དང་། །དེ་བཞིན་གཤེགས་པ་རྣམ་པར་སྣང་མཛད་ཀྱིས་བཀའ་སྩལ་པ། །བྱང་ཆུབ་སེམས་ཀྱི་རང་བཞིན་ནི། །སྣང་སྲིད་སྣོད་བཅུད་ཀུན་ལ་ཁྱབ། །ཆོས་རྣམས་ཀུན་གྱི་ངོ་བོར་ཤར། །སངས་རྒྱས་སྐུ་གསུང་ཡེ་ཤེས་ཐུགས། །སེམས་ཅན་ལུས་ངག་ཡིད་ལ་ཁྱབ། །ཐམས་ཅད་དབྱེར་མེད་བྱང་ཆུབ་སེམས། །དེ་ལྟར་དག་པའི་དོན་རིག་ན། །ཐམས་ཅད་སྐུ་གསུང་ཐུགས་ཡིན་ནོ། །རང་བྱུང་ལྔ་རུ་སྣང་བ་ལ། །རང་བྱུང་ཉིད་དུ་མ་རིག་པས། །ཞེན་པ་ལྔ་རུ་ཕྱིན་ཅི་ལོག །འབྲས་བུ་ཁམས་གསུམ་སེམས་ཅན་བྱུང་། །དཔེ་ནི་ནམ་མཁའ་ལྟ་བུ་སྟེ། །མཐའ་དང་དབུས་མེད་གདོད་ནས་དག ཁུ་ཡིས་མ་བསྒྲུབས་ཡེ་ནས་གྲུབ། །རྐྱེན་གྱིས་མི་ཤིགས་འགྱུར་བ་མེད། །ཕྱི་ནང་མེད་པར་ཡེ་གསལ་ཁྱབ། །འབྱུང་ཆེན་བཞི་པོ་ཐམས་ཅད་ཀུན། །ནམ་མཁའི་ངང་དུ་འདུས་པ་བཞིན། །སྣང་བའི་ཆོས་རྣམས་མ་ལུས་ཀུན། །རང་བཞིན་མེད་དེ་གདོད་ནས་དག །འཁོར་བའི་ཉོན་མོངས་ཆགས་སྡང་ཀུན། །མ་བཙལ་རང་བྱུང་རྒྱལ་པོར་ཤར། །ཅེས་ཀྱང་མཚོན་འདས་བྱང་ཆུབ་སེམས། །མི་འགྱུར་ལྷུན་རྫོགས་བདེ་ཆེན་སྐུ། །ཡངས་སོ་ཆེའོ་བདེ་ཆེན་སྐུ། །གདོད་ནས་དག་གོ་ཆོས་ཀྱི་སྐུ། །བསམ་དུ་མེད་དོ་བསྒོམ་དང་བྲལ། །མི་བསམ་རང་བཞིན་ལྷུག་པར་བཞག །མི་བསྡུ་མི་སྤྲོ་གྱི་ནར་བཞག །མ་ལུས་འདུས་པ་སྙིང་པོའི་དོན། ཁུ་ཡིས་མ་བསྐྱེད་རྐྱེན་དང་བྲལ། །བདེན་བཞི་རྟོགས་པའི་རྒྱུ་དང་བྲལ། །གདོད་ནས་ཡོད་པས་ཚོགས་མ་གསོག །ཡེ་ནས་དག་པས་སྒྲིབ་མི་སྦྱང་། །དག་པ་གསུམ་ལ་རག་མ་ལུས། ཁུ་ཡི་ཡན་ལག་སྒྲུབ་མི་བྱེད། །ཡེ་ནས་སངས་རྒྱས་ལྷུན་གྱིས་གྲུབ། །གཉིས་མེད་སེམས་ཀྱི་རང་བཞིན་ལ། །ངེས་མེད་དག་གིས་སྒྲུབ་མི་བྱེད། །རིགས་བཞི་འདོད་པའི་རྩོལ་བ་བྲལ། །མཚོན་མེད་སེམ་ཀྱི་ངོ་བོ་ལ། ཁྲེས་རབ་ཐབསཀྱིསམཚོནདུམེད། །རྒྱུ་འབྲས་བྲལ་བའི་རིག་པ་ལ། །དབྱིངས་དང་ཡེ་ཤེས་རྒྱུ་འབྲས་མེད། །འབྱུང་བ་ལྔ་ལ་རག་མ་ལུས། །སྐུ་གསུང་ཐུགས་ལ་རྟེན་མི་བཅའ། །རིག་པའི་བློ་ཡིས་མ་དཔྱད་ན། །རང་བཞིན་ཐོག་ཏུ་ཕེབས་པར་འགྱུར། །གདོད་ནས་མ་བཅོས་ཤིན་ཏུ་དགེ །བསམ་དང་བྲལ་བས་དེ་བཞིན་ཞོག །སེམས་ཀྱིས་རིག་པ་རྟོགས་གྱུར་ན། །སེམས་ཀྱི་རྟོགས་པ་བསམ་མི་ཁྱབ། །རྒྱུད་འགྲེལ་ཚིག་གིས་མ་བཀྲོལ་བར། །གཏན་ཚིགས་རིགས་པས་འབྱིན་པར་ནུས། །ཐོས་པ་བསམཔ་བསྒོམ་པ་གསུམ། །རྟོགས་པ་ཟླ་སྐར་ཉི་མ་བཞིན། །བྱང་ཆུབ་སེམས་ཀྱི་ངོ་བོ་ནི། །དམན་པའི་སེམས་ཀྱི་མི་རྟོགས་ཏེ། །གཏན་ཚིགས་གསུམ་གྱིས་ཤེས་པར་བྱ། །རང་གིས་རིག་པ་གསལ་བ་སྟེ། །རང་བཞིན་རིག་པ་ཅིར་ཡང་སྣང་། །བདག་ཉིད་སྣང་སྟོང་ཐ་དད་མེད། །བསྒྲུབ་བྱ་དག་གི་རང་བཞིན་ནི། །འཁྲུལ་པ་བྱང་ཆུབ་སེམས་སུ་ཤེས། །བདག་ཉིད་ཆེན་པོའི་གཏན་ཚིགས་ཀྱིས། །ཐམས་ཅད་བྱང་ཆུབ་སེམས་སུ་ཤེས། །གང་ལྟར་གནས་ཀྱང་ཆོས་ཉིད་དོ། །དབྱིངས་དང་ཡེ་ཤེས་གཏན་ཚིགས་ནི། །དབྱིངས་ནི་དག་པལི་རྒྱུ་ཡིན་ཏེ། །ཡེ་ཤེསའབྲས་བུ་ཉིད་དུ་གསལ། །གཅིག་ཏུ་འདུས་པས་གཟུང་འཛིན་མེད། །རང་བཞིན་དཔེ་དང་དོན་དང་ནི། །གཏན་ཚིགས་བཞི་རུ་ཤེས་པར་བྱ། །ཞེས་གསུངས་སོ། །ཡེ་ཤེས་གསང་བའི་རྒྱུད་ལས། །བྱང་ཆུབ་སེམས་ཀྱི་ལེའུ་སྟེ་གཉིས་པའོ།། །།དེ་ནས་སེམས་དཔའ་རྡོ་རྗེས། དེབཞིནགཤེགསཔརྣམ་པར་སྣང་མཛད་ལ་འདི་སྐད་ཅེས་ཞུས་སོ། །ཁྱོད་ནི་སྨྲ་བའི་སེང་གེ་སྟེ། །རྩོལ་བྲལ་བསྟན་པ་ཐུགས་ལ་རྫོགས། །བྱམས་མགོན་ཐུགས་རྗེ་ཆེན་པོ་ཡིས། །སྐལ་ལྡན་འདུས་པའི་ཚོགས་ཆེན་ལ། །བྱང་ཆུབ་སེམས་ཀྱི་རང་བཞིན་ནི། །གང་ལ་གསང་བ་བསྟན་དུ་གསོལ། །ཞེས་གསོལ་པ་དང་། །དེ་བཞིན་གཤེགས་པ་རྣམ་པར་སྣང་མཛད་ཀྱིས་བཀའ་སྩལ་པ། །སྟོན་པ་གསུམ་དང་རིམ་པ་བརྒྱད། །ཕྱིན་ཅི་ལོག་གསུམ་འགྲོ་དྲུག་ལ། །ཡེ་ཤེས་གསང་བ་ཉིད་དུ་བསྟན། །སྣང་བ་མ་བཅོས་ཆོས་ཀྱི་སྐུ། །རིག་པ་མ་སྤངས་ལོངས་སྤྱོད་རྫོགས། །ཐུགས་རྗེ་སྤྲུལ་པའི་སྐུ་རུ་ཤར། །ཆོས་སྐུ་ནམ་མཁའི་ཁམས་ཀུན་ཁྱབ། །ཞིང་ཁམས་སྣང་སྲིད་ཐམས་ཅད་ཡིན། །དུས་གསུམ་སངས་རྒྱས་ཐམས་ཅད་དང་། ཁམས་གསུམ་སེམས་ཅན་ཐམས་ཅད་ནི། །ཆོས་སྐུ་མ་བཅོས་འཁོར་དུ་འདུས། །རིག་པ་གསུམ་གྱི་བསྟན་པ་སྒྲོགས། །གསང་སྔགས་གཏེར་གྱི་མཛོད་འཛིན་ཅིང་། །མི་རྟོག་བརྡའ་མཇལ་གོ་ཞིང་རྟོགས། །སྤྲོས་མེད་བྱང་ཆུབ་སེམས་སུ་ཤར། །དེ་ལ་འདུ་ཞིང་འཕེལ་བའི་ཕྱིར། །ཐམས་ཅད་དེ་ཡི་འཁོར་དུ་བཤད། །ཆོས་སྐུ་དག་ལ་འགྱུར་མེད་པས། །མ་བཅོས་རང་བཞིན་དག་པ་ཡིན། །ཆོས་སྐུ་རང་བཞིན་སྤྲོས་མེད་པས། །ཡེ་ཤེས་སྐུ་ལ་སྤྲོས་མེད་གསལ། །དེས་ན་བྱིན་གྱིས་རླབས་ཀྱིས་བཤད། །ལོངས་སྤྱོད་རང་རིག་ཉིད་ཡིན་ཏེ། །གཟུགས་སུ་སྣང་བ་རྣམ་པ་ཡིན། །འདོད་པའི་བདེན་པ་ཐམས་ཅད་དང་། །རྒྱུད་ཀུན་མ་ལུས་ཐུན་མོང་གིས། །བདེ་བ་ངོས་འཛིན་རང་རིག་ཀྱང་། །རིག་པ་ཉིད་ན་གདོད་ནས་རྫོགས། །བསམ་གཏན་བཞི་ཡི་བདེ་བ་ཡང་། །ཁམས་གསུམ་ལྟ་ཡི་ལོངས་སྤྱོད་དེ། །སེམས་ཀྱི་བདེ་བ་རང་བཞིན་ཚང་། །སྐྱེ་མཆེད་མུ་བཞིའི་ཏིང་འཛིན་དེ། །རང་བྱུང་བྱང་ཆུབ་སེམས་ལ་རྫོགས། །གཉིས་འཛིན་ལྡན་པའི་བདེ་བ་དང་། །གཉིས་རྫོགས་ལྡན་པའི་མཐར་ཕྱིན་ཀྱང་། །མ་བསྒྲུབས་བདེ་བ་རང་བཞིན་རྫོགས། །དག་པ་གསུམ་དང་གཉིས་སུ་བལྟ། །བརྒྱུད་པའི་བྱིན་རླབས་བདེ་བ་ཡང་། །སེམས་ཉིད་རྟོགས་པ་ཉིད་ལ་གནས། །གསལ་བྱའི་རིམ་པས་དོན་མཛད་ཅིང་། །འདོད་པའི་སྟོབས་ཀྱིས་ཉེ་བར་བསྒྲུབ། །བགྲོད་པའི་རིམ་གྱིས་ཐོབ་པར་འགྱུར། །བདེ་བ་ཐབས་དང་ཤེས་རབ་ཀྱང་ རང་རིག་ཀུན་མཁྱེན་ཉིད་ལ་རྫོགས། །དབྱིངས་དང་ཡེ་ཤེས་ལྟ་བ་དང་། །ཏིང་འཛིན་ཤེས་རབ་རྩལ་ཆེ་ཡང་། ཁུ་ནི་དབྱིངས་སུ་རྫོགས་པ་སྟེ། །འབྲས་བུ་ཡེ་ཤེས་དཀྱིལ་འཁོར་བདེ། ཁུ་འབྲས་གཉིས་མེད་སེམས་ལ་རྫོགས། །དེས་ན་ལོངས་སྤྱོད་རྫོགས་པ་ཡིན། །མི་གནས་སེམས་ཀྱི་རང་བཞིན་ནི། །མ་བཅོས་ཆོས་སྐུར་བཞུགས་ཙམ་ན། །གནས་ནི་ཡང་དག་འོག་མིན་ཏེ། །འཁོར་ནི་བྱང་ཆུབ་སེམས་ཀྱི་འཁོར། །སྤྲོས་མེད་བྱིན་རླབས་ཕྱོགས་བཅུར་གསལ། །བསྟན་པ་ཕྱི་ནང་གསང་བ་གསུམ། །རང་བྱུང་ཡེ་ཤེས་ཆ་མཐུན་པས། །མ་བཅོས་རང་བྱུང་རྟག་པ་ཡིན། །ཆོས་སྐུ་རང་བྱུང་སྤྲོས་མེད་པས། །ཆོས་ཀྱི་སྐུ་ཡི་བསྟན་པ་བཤད། །སངས་རྒྱས་སེམས་ཅན་ཐམས་ཅད་དང་། །སྣང་སྲིད་སྣོད་བཅུད་མ་ལུས་པ། །ཆོས་ཉིད་ངང་ལས་མ་གཡོས་པས། །སེམས་ཉིད་ཆོས་སྐུའི་ཞིང་ཁམས་ཡིན། །ལོངས་སྤྱོད་སྐུ་ཡི་ཞིང་ཁམས་ནི། །འདོད་པའི་ལོངས་སྤྱོད་ཐམས་ཅད་དེ། །སྤྱོད་ཀྱང་མ་ཆགས་ལོངས་སྤྱོད་ཡིན། །བཟོད་ལྡན་ས་ཐོབ་འཁོར་དེ་ལ། །དགོངས་པས་སྐུ་དང་ཡེ་ཤེས་བཤད། །ཏིང་འཛིན་རིག་པའི་གདེང་གིས་གོ །མཚན་མའི་སྐུ་གསུང་མི་མངའ་བར། །བསྟན་པ་ཕྱི་པའི་གསང་སྔགས་གསུམ། །སྣང་བ་ཆ་མཐུན་ཡོད་པས་ན། །ལོངས་སྤྱོད་རྫོགས་པའི་བསྟན་པར་བཤད། །གནས་ནི་རིག་པའི་འོག་མིན་ཏེ། །རིག་པ་ས་བཅུ་ཐོབ་རྣམས་ལ། །རང་གི་ངོ་བོར་གསལ་བར་སྟོན། །ལོངས་སྤྱོད་རྫོགས་སྐུའི་མཛད་པ་ནི། །རང་འདོད་འབྲས་བུའི་མཐར་ཐུག་ཀྱང་། །མ་བཅོས་པ་ལ་མ་རེག་པས། །ལོངས་སྤྱོད་རྫོགས་སྐུའི་མཛད་པར་ཤར། །གདུལ་བྱ་དམན་པའི་འཁོར་དེ་ལ། །རྒྱལ་ཐབས་སྤྱི་བླུགས་དབང་སྐུར་ནས། །ཐོབ་མེད་བྱང་ཆུབ་སེམས་དང་ཕྲད། །མ་བགྲོད་རྟོག་པའི་འཇིམ་ལམ་བསྒྲལ། །བདེ་བ་ཕྲག་བརྒྱའི་དོན་ཐོབ་ནས། །ཞིང་ཁམས་ཐམས་ཅད་བདེ་བར་སྤྱོད། །རྒྱལ་ཐབས་སྤྱི་བླུགས་མ་ཐོབ་པར རང་ས་ཐོབ་ཀྱང་མཐར་མ་ཕྱིན། །དེས་ན་ལུང་བསྟན་བླ་མ་ཡིས། །རྒྱལ་སྲས་སྐལ་ལྡན་སློབ་མ་ལ། །པྲ་ཁྲིད་སེམས་ཀྱི་དོན་བསྟན་པས། །སེམས་ཉིད་རིན་ཆེན་གཉིས་མེད་ལ། །བསྐུར་བའི་ཆ་གཉིས་མི་རྟོག་ཀྱང་། །བརྡ་དོན་སྤྲད་པའི་མན་ངག་སྤྱིན། །ཐུགས་རྗེའི་རང་བཞིན་སྤྲུལ་པར་ཤར། །སྣ་ཚོགས་གདུལ་བྱའི་བསམ་པ་བཞིན། །ལམ་གཉིས་ཐོབ་ཀྱང་འགྲོ་དྲུག་འ་ས། །བསྟན་པ་སྡེ་སྣོད་གསུམ་དུ་བསྟན། །ཞིང་ཁམས་སྟོང་གསུམ་འཇིག་རྟེན་ཁམས། །ཐུགས་རྗེའི་གནས་ལ་ངེས་པ་མེད། །མ་བཅོས་རང་བྱུང་ཡེ་ཤེས་ནི། །རང་བྱུང་ཡེ་ཤེས་ལྔར་སྣང་ལ། །ཕྱིན་ཅི་ལོག་གི་བསམ་པ་ཡིས། །ཡེ་ཤེས་ཉིད་དུ་མ་རྟོགས་ཏེ། །ཡང་དག་ཞེན་པ་ལྔ་རུ་མཐོང་། །ཞེན་པ་ལྔ་ཡི་འབྲས་བུ་ནི། ཁམས་གསུམ་སེམས་ཅན་ཉིད་དུ་ཤར། །ངོ་བོ་སེམས་ལ་འགྱུར་བ་མེད། །འདོད་ཆགས་ལས་ཀྱི་ནམ་སྨིན་གྱིས། །ལྷ་ཡི་གནས་སུ་སྐྱེས་ནས་ཀྱང་། །ལྟུང་བའི་སྡུག་བསྔལ་ཡང་དག་མྱོང་། །འདོད་ཆགས་དངོས་ལ་མ་གྲུབ་པས། །འདོད་ཆགས་ཡེ་ཤེས་ཉིད་དུ་དག །བྱང་ཆུབ་སེམས་ལ་བསྐྱོད་པ་མེད། །ང་རྒྱལ་ལས་ཀྱི་རྣམ་སྨིན་གྱིས། །ལྷ་མིན་གནས་སུ་སྐྱེས་ནས་ཀྱང་། །འཐབ་རྩོད་སྡུག་བསྔལ་དངོས་མྱོང་ཡང་། །ང་རྒྱལ་ངོ་བོ་ཤེས་པ་ན། །ང་རྒྱལ་མ་སྤངས་གནས་སུ་དག །དེ་བས་ང་རྒྱལ་མི་གནས་སྟོང་། །ཕྲག་དོག་ལས་ཀྱི་རྣམ་སྨིན་གྱིས། །མི་ཡི་གནས་སུ་སྐྱེ་འགྱུར་ནས། །སྡུག་བསྔལ་སྣ་ཚོགས་མྱོང་འགྱུར་ཡང་། །ཕྲག་དོག་ཆོས་ཀྱི་དབྱིངས་ཡིན་པས། །ཕྲག་དོག་མ་སྤངས་གནས་སུ་དག །དེས་ན་བྱང་ཆུབ་དབྱིངས་མི་བསྐྱོད། །སེར་སྣའི་ལས་ཀྱི་རྣམ་སྨིན་གྱིས། །ཡི་དྭགས་བཀྲེས་སྐོམ་གནས་སུ་སྐྱེ། །བཀྲེས་སྐོམ་སྡུག་བསྔལ་མྱོང་འགྱུར་ཡང་། །སེར་སྣ་མ་བཅོས་བྱང་ཆུབ་སེམས། །སེམས་ཉིད་རང་བཞིན་སྟོང་པའི་ཕྱིར། །དེས་ན་དབྱིངས་ལ་འགྱུར་བ་མེད། །གཏི་མུག་ལས་ཀྱི་རྣམ་སྨིན་གྱིས། །དུད་འགྲོའི་གནས་སུ་བླུན་ལྐུགས་མྱོང་། །རིག་པ་ཕྲ་མོའི་ཆོས་ཤེས་ཀྱང་། །གཏི་མུག་མ་བཅོས་བྱང་ཆུབ་སེམས། །ཡུལ་ཡང་དེ་ལྟར་རིག་པས་ན། །གཏི་མུག་མ་སྤངས་གནས་སུ་དག །ཞེ་སྡང་ལས་ཀྱི་རྣམས་སྨིན་གྱིས། །དམྱལ་བའི་གནས་སུ་སྡུག་བསྔལ་མྱོང་། །ཞེ་སྡང་ཡེ་ཤེས་ཉིད་དུ་ཤེས། །ཐམས་ཅད་དེ་ལྟར་ཤེས་པས་ན། །ཅི་ཡང་མིན་པར་ཆོས་རྣམས་ཤེས། །ཐམས་ཅད་མཁྱེན་པའི་སྤྱན་གྱི་མཆོག །སྙིང་པོའི་དོན་གྱི་ཆོས་རྣམས་གསལ། །བསྟན་པ་རྒྱུ་འབྲས་ཐེག་པ་གསུམ། །འདུལ་མཛད་སྟོན་པ་དྲུག་སྣང་སྟེ། །ལྷ་ཡི་དབང་པོ་རྡོ་རྗེ་འཛིན། །ལྷ་མིན་སྟོན་པ་སྲིད་ཐུབ་འཛིན། །མི་ཡི་ཐུབ་པ་ཐུབ་དབང་པོ། །དུད་འགྲོའི་སྟོན་པ་གསལ་བྱེད་འབར། །ཡི་དྭགས་སྟོན་པ་སྟོབས་ཀྱི་བདག །བསིལ་བྱེད་འབར་བ་ཐུགས་རྗེའི་བདག །གདུལ་བྱ་འགྲོ་བ་དྲུག་ཡོད་པས། །ཡེ་ཤེས་རྣམ་པ་དྲུག་ཏུ་ཤར། །གང་ཟག་བློ་ལ་འཚམས་ཕྱོགས་སུ། །གང་དང་མཐུན་པའི་སྒོ་ནས་སྟོན། །ཞེས་གསུངས་སོ། །ཡེ་ཤེས་གསང་བའི་རྒྱུད་ལས། སྐུ་གསུམ་བསྟན་པའི་ལེའུ་སྟེ་གསུམ་པའོ།། །།དེ་ནས་སེམས་དཔའ་རྡོ་རྗེས། དེ་བཞིན་གཤེས་པ་རྣམ་པར་སྣང་མཛད་ལ་འདི་སྐད་ཅེས་གསོལ་ཏོ། ཁྱབ་བདག་མ་བཅོས་ལྷུན་གྲུབ་སྐུ། །རྩོལ་མེད་གནས་པས་མངོན་སངས་རྒྱས། །ཕྱོགས་རིས་མི་མངའ་ཉི་མ་ལྟར། །ཡེ་ཤེས་འོད་ཟེར་ཕྱོགས་བཅུར་བརྡལ། །སྙིང་རྗེས་དོན་མཛད་ལྷུན་གྱིས་གྲུབ། །ཕྱོགས་རིས་མི་མངའ་སྐུ་མཆོག་གིས། །རིམ་པ་བརྒྱད་ལ་གསང་བའི་དོན། །འདུས་པའི་ཚོགས་ལ་བསྟན་དུ་གསོལ། །ཞེས་གསོལ་པ་དང་། །དེ་ནས་དེ་བཞིན་གཤེགས་པ་རྣམ་པར་སྣང་མཛད་ཀྱིས་བཀའ་སྩལ་པ། གསུམ་ལ་ངོས་བཟུང་མི་མངའ་སྟེ། །བརྒྱད་ཀྱིས་རང་འདོད་གཉིས་ཀྱིས་ལོག །གཅིག་གིས་མ་རིག་ཁས་མི་ལེན། །དྲུག་གི་ལྔ་ཡི་འབྲས་བུ་མྱོང་། །དེས་ན་ཡེ་ཤེས་གསང་བ་ཡིན། །ཆོས་སྐུ་གདོད་ནས་དག་པ་ལ། །བརྟགས་པའི་གཟུང་འཛིན་ངང་གིས་མེད། །དེས་ན་ཆོས་ཉིད་གསང་བ་ཡིན། །ལོངས་སྤྱོད་རིག་པ་དག་པ་ལ། །ཕྱི་ནང་མེད་པར་སེམས་ཉིད་གསང་། །ཆོས་ཅན་མ་ཡིན་ཆོས་ཉིད་མིན། །ཅི་ཡང་མ་ཡིན་གྱི་ནར་ཞོག །འཁྲུལ་པ་སྣ་ཚོགས་ཅིར་སྟོན་ཀྱང་། །ཞེན་པའི་བསམ་པ་མ་གཏོགས་པ། །ཡང་དག་དངོས་པོར་གྲུབ་པ་མེད། །དཔེར་ན་ཐག་པ་སྦྲུལ་མཐོང་ཡང་། །ཐག་པའི་མཚན་ཉིད་སྦྲུལ་མ་ཡིན། །སྣང་བ་བརྟགསཔརཞེནམོད་ཀྱང་། །མ་བཅོས་སྣང་བ་བརྟགས་པ་མིན། །རོལ་པ་ལྷུན་གྲུབ་སྒྱུ་མ་དེ། །རྩོལ་མེད་སྒྱུ་མ་བདེ་མཆོག་བདེ། །མི་འགྱུར་རྡོ་རྗེ་བཙན་པོ་ཡིན། །མ་བཅོས་ལྷུན་གྲུབ་ཆེན་པོ་ལ། །ངེས་པ་མེད་པས་གསང་བར་བཤད། །གང་ཞིག་གཉིས་མཐོང་བ་ཡིས་ནི། །གཟུགས་མེད་ཕྲ་རབ་རྡུལ་དུ་མཐོང་། །སེམས་ལ་རྡུལ་མེད་ཕྱིན་ཅི་ལོག །བདག་མེད་ངེས་བཟུང་ཆོས་ཉིད་གསང་། །གང་ཞིག་ཆ་མཐུན་ནང་ནས་ནི། །བཅོ་ལྔ་་་དྲུག་ཟེར་ཆོས་ལ་གཅིག་མ་རྟོགས། །རྟེན་འབྲེལ་ཆོས་ལ་ངེས་བརྟགས་པས། ཁུ་མེད་ཆོས་ཀྱི་དོན་མ་མཐོང་། །གཉིས་མེད་སྐུ་ཡི་ངོ་བོ་ལ། །བདེན་གཉིས་ལྟ་བར་རྣམ་ཕྱེ་སྟེ། །དོན་དམ་སྟོང་པའི་དངོས་པོ་མེད། །རིག་བཞིའི་གཏན་ཚིགས་དག་གིས་ཚོལ། །དོན་གྱི་ངོ་བོ་རྟོགས་ནས་ནི། །ཞི་གནས་གང་ཟག་འདོད་པས་བསྒོམ། །ལྷག་མཐོང་འཕེལ་བའི་སྐབས་སུ་འདོད། །ལམ་གཉིས་སྦྱོར་བའི་རིམ་པ་སྟེ། །དོན་མཐོང་རགས་པའི་རྟོགས་པ་སྤངས། །ཕྲ་བའི་རིམ་པ་བཅུ་ཡི་བར། ཁེན་ཏུ་ཕྲ་བའི་སྒྲིབ་པ་ལ། །མཐར་ཐུག་ས་ཡི་སྦྱོར་བས་གཅོད། །རང་འདོད་རྟོགས་པའི་མཐར་ཐུག་ཡིན། །དེས་ན་བསྟི་གནས་དྲང་པ་ཡིས། །བགྲོད་མེད་བགྲོད་པས་ཡེ་ཤེས་གསང་། །བཙལ་མེད་བཅའ་བས་གྲུབ་པ་མེད། །བདག་དང་མི་མཐུན་ལོག་པ་བཞིན། །དེས་ན་འདུས་པའི་འཁོར་ཚོགས་ཁྱེད། །བཙལ་མེད་ཆོས་ལ་བཙལ་མི་བྱ། །བགྲོད་མེད་ཆོས་ལརངབཞིནཞོག །རྒྱལརྟགས་ཕྱི་པས་མཐོང་བ་ནི། །མཐོ་འཇམ་དམའ་རྩུབ་རིགས་གསུམ་འདོད། །དག་པ་གསུམ་གྱི་སྒོར་ཞུགས་ནས། །དམ་ཚིག་ཡེ་ཤེས་རྗེ་འབངས་ལྟ། །རྟོགས་པས་རྡོ་རྗེ་འཛིན་པའི་ས། །ངེས་པར་མཐོང་ཡང་གཅེས་མའི་ས མ་ཐོབ་རང་སྐྱོན་མེ་ལོང་ཚུལ། །རིམ་མམ་ཅིག་ཆར་རིམ་གྱིས་འཇུག །རྒྱལ་ཐབས་སྤྱི་བླུགས་ཚངས་པའི་དབང་། །སྐད་ཅིག་ཉིད་ཀྱིས་རྫོགས་སངས་རྒྱས། །མ་རྟོགས་དུས་གནས་ཐམས་ཅད་དུ། །དེ་ཉིད་ཚོད་དང་ལྡན་པ་ཡིན། །གཞི་ནས་འབྲས་བུ་ཡིན་པའི་དོན། །དམ་ཚིག་ཡེ་ཤེས་གྲོགས་པོའོ། །མཚན་མའི་དངོས་པོ་ཆུ་ཟླའི་ཚུལ། །མཐོང་བའི་དགོངས་པའི་ངོ་བོ་དང་། །དེ་ཉིད་མཚན་མ་མེད་བསྒོམས་པས། །སྟོང་ཉིད་ལ་སོགས་ཡེ་ཤེས་འགྲུབ། །གཅིག་ལའང་སྐུ་ལྔ་འབྱུང་བ་སྟེ། །ལྔ་དང་དེ་གཉིས་དེ་བཞིན་ནོ། །དེ་ཉིད་གྲངས་མཐུན་སྤྲུལ་པ་སྟེ། །དེ་ཡི་རྒྱུད་ལའང་བྱིན་བརླབས་ཏེ། །དེ་ལས་སྤྲུལ་པ་བསམ་མི་ཁྱབ། །སྐལ་ལྡན་རྣམས་ཀྱི་སེམས་ལ་སྣང་། །ཡོ་ག་རང་འདོད་བསམ་པ་ཡིས། །མཐར་ཐུག་འབྲས་བུ་ཡིན་འདོད་ཀྱང་། །དེ་ཡང་རྩོལ་བའི་འབྲས་བུ་ཡིན། །མ་བཅོས་ཇི་བཞིན་མ་རྟོགས་པས། །རང་སྣང་མ་བཅོས་ཡུལ་བྱས་ནས། །འཇུག་པའི་རིམ་པ་སྔ་མ་བཞིན། །བརྡའ་དོན་སྤྲད་པས་རྒྱལ་གྲལ་བཞག །བྱ་བའི་སྤྱོད་པ་དག་གིས་གནས། །བྱིན་བརླབས་རྒྱུད་པའི་ལྟ་བར་འདོད། །རྩོལ་བས་འཇུག་དང་གཉིས་ཀས་ལེན། །ཡོ་གའི་སྤྱོད་ལ་གང་གནས་པ། །འབྲས་བུ་ལམ་དུ་འཇུག་པ་སྟེ། །རང་འདོད་རྟོགས་པའི་ས་ཡིན་ཡང་། །མ་བཅོས་ཐ་མའི་ས་མ་རྟོགས། །སྨིན་ཀྱང་འབྲས་བུ་མི་འབྱུང་སྟེ། །བི་མ་པར་ཡི་འབྲས་བུ་བཞིན། །བསྐྱེད་པ་མ་ཧྭ་ཡོ་ག་ནི། །གཞི་ནས་འབྲས་བུ་དེ་བཞིན་ཏེ། །ཐ་མལ་གཙང་སྨེའི་ལམ་དུ་འདོད། །གཞི་ནས་འབྲས་བུ་ཡིན་པའི་དོན། །བསྐྱེད་པའི་རིམ་པ་བརྩམ་པ་དང་། །རྫོགས་པའི་རིམ་པས་འགྲུབ་པ་ཡིན། །ལམ་གཉིས་གྲོལ་དང་ཐབས་གཉིས་ཏེ། །རེ་རེའང་བསྐྱེད་དང་རྫོགས་པ་སྟེ། །གྲོལ་བའི་ལམ་ལ་བཞི་ཡིན་ནོ། །ཐམས་ལམ་ནང་དད་གསང་བ་གཉིས། །གཉིས་བཞི་བརྒྱད་དུ་ལྡན་པ་སྟེ། །བཅུ་གཉིས་དག་ཏུ་ཤེས་པར་བྱ། །ལྟ་སྤྱོད་དཀྱིལ་འཁོར་དབང་དམ་དང་། །སྒྲུབ་པ་ཕྲིན་ལས་ལས་རིམ་ནི། །ཕྱི་དང་ནང་དང་གསང་བ་སྟེ། །རང་བཞིན་གནས་དང་རྩོལ་བས་འཇུག ཁུད་ཀྱི་དངོས་པོ་གསུམ་དུ་བསྟན། །དང་པོ་བསྐྱེད་པའི་ཏིང་འཛིན་བསྒོམ། །བསྐྱེད་པའི་རྫོགས་དང་རྫོགས་པའི་བསྐྱེད། །སྐབས་དང་སྦྱར་བས་དེ་བཞིན་བསྒོམ། །དངོས་གྲུབ་རྒྱ་མཚོ་ལྟ་བུ་ནི། །གྲོལ་བའི་དཀྱིལ་འཁོར་ཡོངས་རྫོགས་པས། །དེ་མ་ཐག་ཏུ་ལྷུན་གྱིས་གྲུབ། །ནང་གི་ལམ་ལ་གང་འཇུག་པ། །བསྐྱེད་པས་དཀྱིལ་འཁོར་ལྔ་ལ་འཇུག །དེ་ཉིད་རྫོགས་པས་དེ་ཉིད་བདེ། །གསང་བའི་ཕོ་བྲང་རྩ་མདུད་གསུམ། །གྲུ་གསུམ་དཀྱིལ་འཁོར་ཉམས་དགའ་བའི། །བྱང་ཆུབ་སེམས་ཀྱི་དཀྱིལ་འཁོར་ཡིན། །སྤྲུལ་པ་དྲུག་ཅུ་དེ་དང་ལྡན། །དབུས་སུ་ཨ་ཡིརངབཞིནཏེ། །ཕྱིརིམ་བཞི་དང་བརྒྱད་དུ་ལྡན། །ཆོས་ཀྱི་འཁོར་ལོ་དག་ལ་བརྒྱད། །དེ་དཀྱིལ་དངས་མ་གསུམ་དག་སྟེ། །ལྔ་དབུས་ཐིག་ལེ༷་བྱང་ཆུབ་སེམས། །ཆོས་ཉིད་གསུམ་དང་ཡེ་ཤེས་གཅིག །རང་རྒྱུད་དག་ཏུ་ཤེས་པར་བྱ། །དེ་ཉིད་ཅི་འདྲར་སེམས་པ་ན། །ཆོས་ཉིད་རྩ་ལ་འོད་སེར་ཏེ། །དེ་དབྱིབས་ཟླུམ་པོ་དངུལ་ཟོ་བཞིན། །ས་བོན་སུ༷་ཏྲི་སྙིང་པོ་ཨཱོཾ༷༷ །དེ་དག་གསུམ་གྱི་ཁ་དོག་ནི། །ཟ་འོག་གུར་ཕུབ་ལྟ་བུར་གནས། །ཡེ་ཤེས་རྩ་ལ་འོད་མཐིང་ག །ཐག་པར་ཤེལ་སྒོང་བརྒྱུས་པ་འདྲ། །ས་བོན་སྙིང་པོ་ཨ་དྲི་ཧུ༷། །རང་རྒྱུད་འོད་དམར་ཟླ་གམ་འདྲ། །ཚུལ་ནི་དཔེ་ཡིས་ཤེས་པར་བྱ། །ས་བོན་སྙིང་པོ་པྲེ་དུ་ཨུ༷༷ །མ་རྟོགས་ས་བོན་ཨ་ལ་སོགས། །རྟོགས་པས་ཡེ་ཤེས་སྐུ་གསུང་ཐུགས། །གཉིས་སུ་མེད་པས་བསྲེག་པ་ཡིན། །བྱེ་བྲག་བཞི་རུ་གནས་པ་ནི། །རྣམ་ཤེས་བརྒྱད་ཀྱི་རྟེན་མ་སྟེ། ཁུ།་བ་བཞི་རུ་ཤེས་པར་བྱ། །སྙིགས་མ་གསུམ་ལ་གཉིས་སུ་རྒྱུ། །རྣམ་ཤེས་དྲུག་གི་ཚུལ་དང་མཐུན། །གང་གིས་གང་བྱེད་དེ་བཞིན་ནོ། །དེ་ཡི་ངང་ལ་རྟགས་གནས་ན། །བདེ་བའི་རྟག་རྣམས་འབྱུང་བར་འགྱུར། །གཡོ་ཞིང་འབར་ན་རྩོལ་བ་ཀློད། །ནམ་ཞིག་དེ་ལྟར་གསལ་འགྱུར་ན། ། སྙིང་པོ་གསུམ་དང་ས་བོན་དྲུག །ཡེ་ཤེསརངབཞིནའོདདུའབར། །ཐིག་ལེརངབཞིནམེདཔརཐིམ། ་སྣྲུ་བ་རིགས་ཀྱི་ཕ་ལ་གནས། །དབུགས་སོགསརངབཞིནམེདགྱུརནས། །རྩ་དབུགས་ནམ་མཁའ་ལྟར་ནང་ལ། །ཡེ་ཤེས་ཁྱབ་གདལ་ཀུན་ཏུ་བཟང་། །ཆོས་དབྱིངས་གསལ་བའི་གོ་སྐབས་འབྱེད། །གསང་བའི་ཤེས་རབ་ཡུམ་གྱི་དབྱིངས། །གཉིས་དང་དྲུག་ཅུའི་དཀྱིལ་ན་བཞུགས། ཁྲེས་རབ་ཐབས་ལ་སྙོམས་པར་འཇུག །ཐམས་ཅད་རྒྱས་བཏབ་དཀྱིལ་འཁོར་ཡིན། །ལྔ་ཡི་རང་བཞིན་ཉིད་དུ་བལྟ། །འཕྲོ་དང་འབར་བ་སྟེང་འོག་ཏུ། །སྟེང་གི་སྙིང་པོ་བསྐུལ་བྱས་པས། །བདེ་བ་ཆེན་པོའི་མཆོད་པ་ཡིན། །དེ་ཉིད་ཐིག་ལེ་མཉམ་སྦྱོར་བས། །དྲུག་དང་བཅུ་ཡི་དཀྱིལ་དུ་སྟེ། །དགྱེས་པ་ཆེན་པོའི་རོ་ཡིས་ནི། །བདེ་བ་ཆེན་པོར་སྟོབས་པར་བྱེད། ཁྲེས་བྱ་བྱུང་ཚད་བསོད་ནམས་ཀྱིས། །ཡུལ་རྣམས་སྒྱུ་མར་རང་སྣང་བ། །རོལ་མོའི་བདེ་བ་མཐའ་དག་གིས། །བདེ་བ་ཆེན་པོ་ཕྲིན་ལས་འཕྲོ། །སུམ་ཅུ་རྩ་གཉིས་དཀྱིལ་འཁོར་ན། །ཐིག་ལེ་དེ་དང་མཉམ་པའི་དབྱིངས། །ཀུན་གྱི་དངོས་ཡིན་ཀུན་གྱི་གཙོ། །བཅུ་དང་བཞི་ནི་མངོན་རྫོགས་པ། །གསུམ་དང་གཉིས་སུ་མང་དག་གནས། །ཀུན་གྱི་དངོས་པོར་བདག་ཉིད་གནས། །གསང་བའི་ལམ་ལ་གང་གནས་པ། །མཚོན་བྱེད་རིག་མའི་བདེ་བ་ཡིས། །ལྷན་ཅིག་སྐྱེས་པའི་དགའ་བ་རྟོགས། །བདེ་བ་གསལ་ལ་མི་རྟོག་པ། །རྡོ་རྗེ་འཛིན་པའི་ས་ཡིན་ཀྱང་། །དེ་ཡིས་དོན་རྣམས་མི་འཐོབ་སྟེ། །རྒྱལ་དང་དེ་ཡི་ཆ་བཞིན་ནོ། ཁེས་པ་དབང་སོགས་གློ་བུར་བས། །རང་གནས་ཡེ་ཤེས་མི་རྟོག་སྟེ། །འཛིན་པས་རང་རིག་མི་རྟོགས་བཞིན། །དངོས་འཛིན་ཞེན་པའི་རང་རིག་གིས། །ལྷུན་གྲུབ་རང་རིག་དོན་མི་མཐོང་། །རང་ས་ཐོབ་ནས་མ་བཅོས་པ། །སྔ་མ་བཞིན་ཏེ་འཇུག་པའང་འདྲ། །མཐར་ཕྱིན་ཨ་ནུ་ཡོ་ག་ལ། །རང་བཞིན་དབྱིངས་དང་ཡེ་ཤེས་ལ། །འཁྲུལ་པ་འཁོར་དང་རང་རྒྱུད་པ། །བདེར་གཤེགས་ཆོས་དབྱིངས་མ་བཅོས་གསལ། །རང་བཞིན་སྣང་བ་བཞིར་གནས་པ། །བདེ་གཤེགས་སྣང་བ་འབྲས་བུ་ཡིན། །འཁོར་གྱི་སྣང་བ་ལམ་པ་སྟེ། །ལམ་ལ་ཕྱི་ནང་གསང་བ་གསུམ། །ཅིག་ཅར་རིམ་པའང་དེ་བཞིན་ནོ། །རིམ་པར་འཇུག་པའི་ཚུལ་གྱིས་ནི། །བསྐྱེད་པར་བརྟན་པར་གྱུར་ནས་ནི། །རྫོགས་པའི་དོན་ལ་འཇུག་པར་བྱ། །མོས་པས་ནང་ཡང་དེ་བཞིན་ནོ། །གསང་བའི་དོན་ལ་དྲན་པས་བསྒོམ། །འབྲས་བུ་དབྱིངས་དང་ཡེ་ཤེས་ལ། །རང་འདོད་འབྲས་བུ་ཐོབ་འདོད་ཀྱང་། །མཐར་ཐུག་འབྲས་བུ་དེ་མ་ཡིན། །ཨེ་མའོ་ཡེ་ནས་གསང་བའི་ས། །རྩོལ་བའི་ལམ་གྱིས་ཐོབ་མ་ཡིན། །འགྲོ་དྲུག་ཞེན་པའི་དྲང་ཐད་དང་། །མུ་སྟེགས་རང་བསམ་ལོག་པ་དང་། །བརྒྱད་ཀྱིས་རང་འདོད་དབྱིངས་ལ་བལྟས། །ཕྱི་ནང་མེད་ལ་སྤྲོ་བསྡུ་བྱས། །ངོ་བོ་མེད་ལ་དམིགས་འཛིན་བྱས། །རང་བྱུང་ཉིད་ལ་རྒྱུ་ཡིས་བཙལ མ་བཅོས་ཅི་ཡང་མ་ཡིན་ལ། །ཅིར་ཡང་འཛིན་པའི་བསམ་པས་བརྟགས། །བགྲོད་མེད་འབྲས་བུ་ལྷུན་གྲུབ་ལ། ལམ་བརྒྱད་བགྲོད་པས་བགྲོད་མེད་བསླད། །དེས་ན་མ་བཅོས་དངོས་པོ་ལ། །ལོག་རྟོག་འཛིན་པའི་བློ་ཡིས་ནི། །ཇི་ལྟར་དཔྱད་ཀྱང་མ་ཡིན་པས། །མ་དཔྱད་རང་བཞིན་བཞག་པས་གོ །དཔྱད་མེད་སེམས་ལ་དཔྱད་པས་ན། །མ་ཡིན་ལོག་སྟེ་གཞན་ལྟ་བཞིན། །ཞེས་གསུངས་སོ། །ཡེ་ཤེས་གསང་བའི་རྒྱུད་ལས། །གང་ལ་གསང་བ་བསྟན་པའི་ལེའུ་སྟེ་བཞི་པའོ།། །།དེ་ནས་སེམས་དཔའ་རྡོ་རྗེས། །དེ་བཞིན་གཤེགས་པ་རྣམ་པར་སྣང་མཛད་ལ། འདི་སྐད་ཅེས་གསོལ་ཏོ། །ཐུགས་རྗེའི་བདག་པོས་གང་གསུངས་པ། །འདུས་པའི་ཚོགས་ཀྱིས་རྟོགས་པ་ནི། །སེམས་ཀྱི་རང་བཞིན་ཡེ་གནས་ལ། །ཞེན་དྲུག་ལོག་གསུམ་རྩོལ་བརྒྱད་ཀྱིས། །དེ་ཉིད་རང་བཞིན་གསང་བར་གསུངས། །གསུམ་ལ་ངོ་བཟུང་མེད་པས་གསང་། །ཐམས་ཅད་ཀུན་ལ་གསང་བས་ན། །དེ་ཉིད་གང་གིས་ཤེས་པར་འགྱུར། །གསུང་གི་མངའ་བདག་ཁྱོད་ཀྱིས་ཀྱང་། །ཀུན་ལ་གསང་བ་ཇི་ལྟར་རྟོགས། །ཞེས་གསོལ་བ་དང་། །དེ་ནས་དེ་བཞིན་གཤེགས་པ་རྣམ་པར་སྣང་མཛད་ཀྱིས་བཀའ་སྩལ་པ། །ཐེག་ཆེན་སེམས་ཀྱི་རང་བཞིན་ནི། །སྒྲ་དང་ཐ་སྙད་ཀུན་འདས་ཀྱང་། །སྣོད་ལྡན་རྟོགས་པར་འདོད་པ་ཡིས། །གཏན་ཚིགས་ཚད་མ་གསུམ་གྱིས་ནི། །དེ་རྒྱུ་རྟོགས་པའི་ཐབས་སུ་བཤད། །བྱ་བྲལ་རྫོགས་ལུང་རིག་པའི་ཉམས། །གྲོན་ཚེག་ཆུང་བའི་མན་ངག་གསུམ། །ཡེ་ཤེས་རྟོགས་པའི་རིགཔའིམཆོག །ཐབསཆེན་རྒྱུད་དང་བྱ་བྲལ་རྫོགས། །མཁའ་ཁྱབ་བྱང་ཆུབ་སེམས་ལུང་གིས། །སྣང་སྲིད་སེམས་སུ་གཏན་ལ་འབེབས། །ཡེ་ཤེས་གསང་བའི་ངོ་བོ་སྟོན། །བདག་ཉིད་གསང་བའི་དཀྱིལ་འཁོར་སྟོན། །ལུང་གསུམ་སྣང་བས་སྟོན་པའི་བཀའ། །ཡིན་པས་ང་ཡི་བཀའ་དང་མཐུན། །རིག་པས་ཉམས་སུ་ལེན་པ་ན། །ཡིད་ཆེས་རིག་པའི་གཏན་ཚིགས་སོ། །རྣམ་གསུམ་ལུང་གི་ངོ་བོ་ནི། །སེམས་ཉིད་རིག་པའི་ཆོས་ཡིན་ནོ། །ཐམས་ཅད་སེམས་སུ་འདུས་པས་ན། །སེམས་མ་ཡིན་པའི་ཆོས་མི་སྣང་། །ཇི་ལྟར་སྣང་བའི་ཆོས་རྣམས་ནི། །སེམས་ལ་སྣང་ཕྱིར་སེམས་ཡིན་ཏེ། །སེམས་ཉིད་རིག་པ་མ་ཡིན་ན། །དེ་ཉིད་ཇི་ལྟར་སྣང་བར་འགྱུར། །ཐ་དད་མཐོང་བར་བརྟགས་པ་སྟེ། །བག་ཆགསལོག་པས་འཁྲུལ་ཙམ་ན། །མེད་ཀྱང་ལོག་པར་སྣང་བ་སྟེ། །དུང་ལ་སེར་པོ་མཐོང་བ་བཞིན། །དུང་ཉིད་སེར་པོ་མ་ཡིན་ཏེ། །ཇི་ལྟར་དེ་ལ་སེར་པོར་མཐོང་། །དེས་ན་སེར་པོའང་ཡིན་འདོད་ནས། །དུང་ལ་སེར་པོ་ཡོད་པ་ན། །མ་འཁྲུལ་ཤེས་པས་ཅིས་མི་མཐོང་། །ཞེན་རྟོག་འཛིན་པའི་དབང་གིས་ན། །བརྟགས་པས་སྣ་ཚོགས་དག་ཏུ་མཐོང་། །དང་པོ་མཚན་མའི་རང་རིག་སྟེ། །གཉིས་པ་མེད་པས་རང་རིག་ཡིན། །གཉིས་པས་གཉིས་ཀ་མེད་པ་སྟེ། །མཚན་གཞི་མེད་པའི་མཚན་ཉིད་ནི། །མི་སྲིད་མེ་མེདཚབབཞིན། །གསུམལཞེནཔའིརངརིག་སྟེ། །རང་རིག་བདེ་བའིདོནལཞེན། །ཞེནཔསམབཅོས་དོན་མི་མཐོང་། །གཞི་ས་མ་བཅོས་རང་རིག་ནི། །ངོས་བཟུང་མེད་པས་གང་ཡང་མིན། །ཡེ་ཤེས་རོལ་པ་རང་སྣང་ལ། །བླ་མའི་ཞལ་ལས་ཤེས་པར་བྱ། །རོལ་པ་ཡེ་ཤེས་རང་སྣང་དང་། །རྟོག་པའི་ཞེན་པ་སྣ་ཚོགས་པ། །བྱེ་བྲག་མ་ཤེས་གཏི་མུག་བློ། །བྱང་ཆུབ་སེམས་ཀྱི་ལུང་གིས་ནི། །ཐམས་ཅད་སེམས་སུ་གཏན་ལ་འབེབས། །དེས་ན་བྱང་ཆུབ་སེམས་ཀྱི་ལུང་། །མ་བཅོས་སེམས་ཀྱི་རང་བཞིན་ལ། །བྱང་ཆུབ་སེམས་ཀྱི་རང་རིག་ནི། །བྱང་ཆུབ་སྙིང་པོར་དེ་མ་ཐག །རིག་པའི་ཚད་མ་ཉིད་ཀྱིས་ཤེས། །རིག་པའི་ཚད་མ་མ་སྐྱེས་ན། །སྒྲ་ཡིས་ཚད་མ་ཅི་བསྟན་ཀྱང་། །སྒྲ་ཡི་དོན་དང་དེ་འཕྲད་ནས། །སྒྲ་དོན་རྗེས་སུ་རྟོགས་མི་འགྱུར། །སྦྱི་ལ་རྟོག་པ་དེ་གནས་ཀྱང་། །རང་གི་མཚན་ཉིད་དེ་མ་ཡིན། །རིག་པའི་ཚད་མས་དོན་མཐོང་ན། །དེ་ཉིད་རིག་པའི་དོན་ལྡན་པས། །ལུང་སོགས་ཚད་མ་རྣམས་མི་དགོས། །དེ་ལྟར་དེ་ནི་རང་བཞིན་ནོ། །སློབ་ཚུལ་རིམ་པ་མ་ཡིན་ཏེ། །མ་བགྲོད་ཅིག་ཆར་འཇུག་པ་ཡིས། །དེ་བཞིན་གཞི་ལས་མ་གཡོས་པས། །མཐར་ཕྱིན་གཞི་ལས་གཡོས་པ་མེད། །རྫོགས་པའི་སེམས་ཀྱི་རང་བཞིན་ནོ། །བརྡའ་དོན་ཕྲད་པས་མཐར་ཕྱིན་ཀྱང་། །འཛིན་པ་དྲུག་ལ་ཞེན་པ་ཡིས། །རྟོག་པ་སེམས་སུ་ཤེས་པ་ལ། །བློ་ཡི་བྱེ་བྲག་བསམ་མི་ཁྱབ། ཁྲེས་པ་སྐྱེ་བ་གསུམ་ཡིན་པས། །མཐོང་བ་སྣ་ཚོགས་རིག་པའི་ཉམས། །དང་པོ་གནས་པའི་ཏིང་ངེ་འཛིན། །ཆུ་དྲག་འབབ་པའི་དཔེ་ཡིས་བསྟན། །མྱུར་དང་དལ་བས་འབབ་ཆུ་འདྲ། །གཉིས་པ་ལ་ནི་མི་གཡོ་བ། །རྒྱ་མཚོའི་གཏིང་བཞིན་མི་གཡོའོ། །གསུམ་པ་བཞི་པ་འབྲས་བུའི་ཉམས། །མཉམ་ཉིད་ཡེ་ཤེས་ལྷུན་གྱིས་གྲུབ། །སྣང་བ་རྣམ་རྟོག་ཅིར་མི་བལྟ། །དྲན་པ་ཀུན་སྤངས་ཡེ་ཤེས་ཉིད། །ཟིན་པས་རྩོལ་བའི་ནད་སྤངས་ཏེ། །ལྷུན་གྱིས་གནས་པར་བཞག་པ་ཡིན། །རིན་ཆེན་བརྒྱུད་པ་ཤེས་པའང་། །སློབ་དཔོན་སློབ་མའི་བྱེ་བྲག་དང་། །སྔོན་དུ་འགྲོ་དང་ཚད་ལྡན་པ། །བསྟན་པའི་དོན་ལ་བཞག་ཚུལ་ལོ། །དེ་ཡི་ཡོན་ཏན་དབྱེ་བ་དང་། །ཕྲིན་ལས་དམ་ཚིག་དོན་བཞིན་ནོ། །རྒྱུད་དང་མདོ་སྡེ་ཐུགས་ལ་རྫོགས། །བཀའ་གཞུང་རིག་པའི་དོན་ལ་མཁས། །དམན་པའི་བློ་སྤངས་ཁྱད་པར་ཀུན་མཁྱེན་པ། །རིག་པའི་ཤེས་རབ་ཏིང་འཛིན་ཉིད་ལ་གནས། །རྫས་དང་འབྲེལ་ངོར་མི་གཏོང་ཆུ་སྲིན་སྡེར་མོ་བཞིན། །ཐུགས་རྗེ་ཕྱོགས་རིས་མི་མཛད་ཀུན་ལ་སྙོམས། །དམན་པའི་སངས་རྒྱས་རེ་ཐག་ལས་པའི་ས། །སློབ་དཔོན་རྣམ་པ་གཉིས་སུ་བསྟན། །བརྡའ་དོན་ཕྲད་པའི་སློབ་དཔོན་ནི། །རང་རྒྱུད་མ་བཅོས་རྣམ་དག་པས། །དོན་དང་འབྲེལ་བའི་སྒྲ་ཚིག་གིས། །ཡེ་ཤེས་རིག་པའི་ངོ་བོ་སྟོན། །སྐྱེ་བ་མེད་པའི་བརྡ་དོན་སྤྲད། །དེ་ལྟར་མ་ཡིན་བརྡའ་དོན་བྲལ། །མ་ནོར་ངེས་པའི་སློབ་དཔོན་གྱིས། །ཐ་དད་མ་ཡིན་སློབ་མ་ལ། །སྒྲ་དང་མཚན་མ་མི་མངའབར། །ཇི་བཞིན་རིག་པའི་ངོ་བོ་བསྟན། །མི་རྟོག་བརྡ་དོན་གོ་ཞིང་རྟོགས། །བདེ་གཤེགས་ཀུན་གྱི་ངོ་བོ་ལ། །སེམས་ཅན་ཀུན་གྱི་དངོས་གཞི་ཡིན། །དེ་ཡི་སྟོབས་ཀྱིས་དེ་གསལ་ཞིང་། །དེ་ཉིད་ངང་ལ་དེ་གནས་ན། །དོན་རྣམས་རིག་པའི་ཕྱག་རྒྱ་ཅན། །མི་གཡོ་རྣམ་དག་སྨན་ཆེན་གྱིས། །གཅོང་རྙིང་ཡེ་ཤེས་ཉིད་དུ་སྦར། །འཁོར་བ་རྣམ་པར་དག་པ་སྟེ། །ཐམས་ཅད་མཁྱེན་པའི་ཡེ་ཤེས་ཀྱིས། །དུག་ཆེན་སྨན་དུ་བཏུལ་བ་ལྟར། །འཁོར་བ་ཡེ་ཤེས་ཉིད་དུ་གསལ། །སྙིང་པོ་དོན་གྱི་དེ་ཉིད་ནི། །གང་ལྟར་ཅི་ཡང་མ་ཡིན་པས། །ཐམས་ཅད་མཁྱེན་པའི་དགོངས་པ་ལ། །བདེན་པར་གཟིགས་པ་མི་མངའ་ལ། །དེ་བཞིན་རྫུན་པར་གཟིགས་པའང་མིན། །ཐམས་ཅད་གང་ཡང་མ་མཁྱེན་པས། །སྙིང་པོ་དོན་གྱི་ངོ་བོ་མཁྱེན། །མ་བཅོས་ཐུགས་ཀྱི་ཕྲིན་ལས་ཅན། །ཅིས་ཀྱང་བཅོས་མེད་ཅིས་མི་གཡོ། །གདོད་ནས་དག་པའི་ཆོས་ཉིད་ལ། །དྲན་པ་རྐྱེན་གྱིས་དེ་བཞིན་གནས། །ལྷུན་གྲུབ་སེམས་ལ་རྩོལ་བ་མེད། །རང་བྱུང་ཡེ་ཤེས་རྒྱུ་རྐྱེན་མེད། །མི་གནས་ཐུགས་ལ་ཕྱི་ནང་མེད། །སྟོང་པའི་ཡེ་ཤེས་དངོས་པོ་མེད། །མེ་ལོང་ལྟ་བུའི་ཡེ་ཤེས་ནི། ཁྲེས་བྱ་ཀུན་ལ་མངོན་ཕྱོགས་མེད། །མཉམ་ཉིད་ཡེ་ཤེས་ཆེ་ཆུང་མེད། །སོ་སོར་རྟོགས་པས་མ་འདྲེས་གསལ། །བྱ་བ་ནན་ཏན་ཐུགས་རྗེའི་དངོས། །རང་བྱུང་ཡེཤེསཉགགཅིགལ། །ཡོན་ཏན་ཆ་ནས་དུ་མར་གྲགས། །རང་རིག་ཉིད་ལ་ཡུལ་མེད་པས། །ཡུལ་གྱིས་བསྐྱེད་པའི་ཡེ་ཤེས་མིན། །རང་བྱུང་ཉིད་ལ་རྒྱུ་མེད་པས། ཁུ་ཡིས་བསྐྱེད་པའི་ཡེ་ཤེས་མིན། །ལྷུན་གྲུབ་ཉིད་ལ་རྩོལ་མེད་པས། །རྩོལ་བས་བསྐྱེད་པའི་ཡེ་ཤེས་མིན། །ནམ་མཁའ་ལྟ་བུའི་ཡེ་ཤེས་ལ། །ཕྱོགས་རིས་མེད་པར་ཡེ་གདལ་བ། །ལྷུན་གྱིས་གྲུབ་པའི་ཕྲིན་ལས་ཡིན། །རྣམ་དག་དབྱིངས་ལ་གནས་བཞིན་དུ། །ཡོངས་ལ་སྙོམས་པའི་ཐུགས་རྗེ་འབྱུང་། །འགྲོ་བ་གང་གི་ངོ་དག་ཏུ། །གང་ལ་འཚམས་པའི་ཐུགས་རྗེ་འབྱུང་། །སྐལ་ལྡན་གདུལ་བྱ་གནས་པ་ན། །ཐུགས་རྗེ་གདུལ་བྱ་བཞིན་དུ་འབྱུང་། །གདུལ་བྱ་གང་ཡང་མི་གནས་ན། །ཐུགས་རྗེའི་མཛད་པ་གང་ལ་འཆར། །གང་གིས་སྐལ་ལྡན་གདུལ་བྱ་ལ། །ཐུགས་རྗེ་གཞན་ཞིག་འདོད་པ་ནི། །རང་ཉིད་ཐུགས་རྗེར་མ་རྟོགས་ཏེ། །གཟུང་འཛིན་ཞབྲུལ་བའི་བློ་ཡིས་བརྟགས། །ཐུགས་རྗེ་གཞན་ལ་འཆར་ན་ནི། །སྡུག་བསྔལ་དྲག་པོའི་འཁོར་བ་ལ། །སྐྱོབ་པའི་ཐུགས་རྗེ་ཡལ་ལམ་ཅི། །ནམ་ཞིག་རང་རྒྱུད་དག་ཙམ་ན། །ཐུགས་རྗེ་གཞན་གྱིས་ཅི་ཞིག་བྱ། །རྟོག་པ་ཕྲ་རགས་གདུལ་བྱ་ལ། །ཡེ་ནས་རིག་པའི་ཐུགས་རྗེ་འཆར། །འགྲོ་འདུལ་ཐུགས་རྗེའི་ཕྲིན་ལས་སོ། །དམ་ཚིག་ཡིད་བཞིན་རིན་པོ་ཆེ། །རྒྱ་མཚོའི་ཕ་རོལ་སྒྲོལ་བའི་གྲུ། །མ་བཅོས་རིག་པའི་ཆོས་ཉིད་ལ། །མི་འགྱུར་ཡེ་ཤེས་གསལ་བར་གནས། །རྩོལ་བྲལ་རིག་པའི་དམ་ཚིག་གོ །དམ་ཚིག་མི་ལྡན་རྡོ་རྗེ་ནི། །བཀའ་རྒྱུད་དོན་ལ་མཁས་གསལ་ཡང་། །སྦྲེལ་མ་གཡང་དུ་འདྲིལ་བ་བཞིན། །བདག་གཞན་རྡོ་རྗེའི་ཁབ་ཏུ་འགྲོ །དེས་ན་དམ་ཚིག་གཞུང་ལྡན་ནི། །འཇིག་རྟེན་གྲགས་ངོར་ཆོས་མི་གཏོང་། །འབྲེལ་བ་རྫས་ཀྱི་ཆེད་མ་ཡིན། །བདག་གཞན་གནོད་པའི་ལས་མི་བྱེད། །ཀུན་ལ་སྙོམས་པའི་ཐུགས་ཀྱིས་གནས། །འཇིག་རྟེན་འབྲེལ་བའི་ཆེད་མི་བྱེད། །མ་བཅོས་དབྱིངས་ལ་མི་འགྱུར་བརྟན། །ཡེ་ཤེས་གདེང་གིས་མ་ཟིན་པར། །ཆགས་སྡང་ཞེན་པའི་ལས་མི་བྱེད། །སེམས་ཉིད་ཡེ་ཤེས་རྣམ་དག་ལ། །གནང་བཀག་ཆོས་ཡོད་མ་ཡིན་ཡང་། །ཞེན་པས་ཡེ་ཤེས་མ་རྟོགས་པར། །ལྷག་པའི་སྤྱོད་པ་གཙོ་ཆེར་འཛིན། །དེ་ཉིད་དོན་ལྡན་ལེགས་པ་ཆེ། །སློབ་མའི་བྱེ་བྲག་གཉིས་ལྡན་པ། །བརྡ་དོན་སྤྲད་པའི་སློབ་མ་ནི། །སྣོད་ལྡན་དམ་ཚིག་གཅེས་སུ་འཛིན། །སེམས་ཉིད་དག་པས་གདེང་བྱས་ནས། །དམ་ཚིག་མི་སྲུང་ཐ་མལ་སེམས། །རང་རྒྱུད་ངན་པས་དྲེགས་པ་དང་། །ཐོས་པ་ཆུང་བའི་བློ་སྦྲམ་དང་། །མན་ངག་བཅུད་ཆེན་འཛག་པ་དང་། །ཡེ་ནས་གློ་འཕང་དམའ་བ་དང་། །འཇིག་རྟེན་བྱ་བའི་རྒྱུ་བསྒྲུབ་རང་། །མུ་ཅོར་སྨྲ་ཞིང་མཁས་འདོད་དང་། །བླ་མ་སྲོག་ཏུ་མི་འཛིན་དང་། །མན་ངག་བསྒྲུབ་བྱར་མི་སེམས་ལ། །རྫོགས་ཆེན་རྣ་བརྒྱུད་བསྟན་བྱས་ན། །འདམ་ཤོད་གླིང་གི་དུར་ཁྲོད་དུ། །མཁའ་འགྲོ་རྣ་ཉན་འདུབ བཞིན། །འཆིབའིདུས་ཀྱི་སྔོན་རོལ་དུ། ཁྲ་ཁྲག་མངོན་དུ་ཟ་བར་བྱེད། །གཞུང་དུ་མི་ལྡན་སློབ་མ་ནི། །གྲིབབཞིན འཁོརཡངསྤང་བར་བྱ། །ལུས་སྲོག་ཐལ་ཡང་ཁར་དབྱུང་མིན། །འདུ་འབྲལ་བྱུང་ཡང་ལས་ཀྱིས་བྱུང་། །ཡོན་ཏན་དེ་ལྡན་སློབ་མ་ནི། །སྟོང་གསུམ་བཙལ་ཡང་གཅིག་ཀྱང་དཀོན། །མང་ཡང་གསུམ་ལས་འདའ་མི་བྱ། །མན་ངག་རྒྱལ་ཐེབས་ཅིག་ལ་བསྟན། །བསྐལ་པ་གྲངས་མེད་སྔོན་རོལ་ནས། །རྫོགས་ཆེན་དོན་ལ་སྦྱངས་སྦྱངས་པ། །ཡེ་ཤེས་གསང་བའི་སྣོད་དུ་བསྔགས། །སྒོ་ངའི་ནང་དུ་ཁྱུང་ཕྲུག་ལྟར། །འཁོར་བ་ཉིད་དུ་ཡེ་སངས་རྒྱས། །སྒོང་ཆག་མཁའ་ལ་འཕུར་བ་བཞིན། །རྟོགས་པས་མ་བཅོས་བླ་མའི་ས། །རྒྱ་མཚོའི་བཅུད་བསྡུས་བདུད་རྩི་བཞིན། །བཀའ་ཡི་བ་་བསྡུས་རྫོགས་ཆེན་འདི། །སྣོད་ལྡན་ངང་ཚུལ་བཟང་ལ་བསྟན། །དབང་དང་སྣོད་བརྟགས་ཆོ་ག་དང་། །གསོལ་བ་གདབ་དང་གནང་བ་སྤྱིན། །སྔོན་དུ་འགྲོ་བའི་རིམ་པའོ། །བདེ་གཤེགས་མ་ལུས་གསང་བའི་ཐུགས། །སྲིད་པ་གསུམ་ལ་གདོད་ནས་གནས། །གང་གིས་དེ་ནི་རྟོགས་གྱུར་ན། །དབང་རྣམས་ཀུན་གྱི་མཆོག་ཡིན་ཏེ། །སྲིད་པ་གསུམ་ན་ཡེ་དབང་བསྐུར། །རང་དབང་དམ་པས་སྣོད་དུ་བྱས། །གཞི་ནས་དབང་ཐོབ་བསྐུར་མི་དགོས། །རྟོགས་ཐབས་པྲ་ཁྲིད་ཐབས་ཀྱིས་ཤེས། །བཅོས་མའི་སྦྱོར་བའམ་རྣལ་མ་ཉིད། །གང་མོས་མཐུན་པའི་སྒོ་ནས་བསྟན། །ཐབས་སྦྱོར་བཅོས་མའི་སྒོ་ནས་ནི། །འཕྲུལ་གྱི་མེལོངབཞིནདུབསྟན། །རྟོགས་འདོད་ལྡན་ཡང་རྣལ་མའི་དོན་དུ་བྱ། །དོན་རྟོགས་བཅོས་མའི་སྦྱོར་བ་ཡང་། །ཚིག་དོན་ཁྱད་པར་བསྟན་པ་སྟེ། །དགོས་དོན་གོང་མའི་དོན་ལ་འཇུག །བརྗོད་དོན་ཐམས་ཅད་སེམས་སུ་བསྟན། །རྣལ་མ་མ་བཅོས་གཞི་ཉིད་བཞིན། །ལྷུན་གྲུབ་གསུམ་གྱི་དོན་ལ་འཇུག །རིམ་པར་འཇུག་པ་བཞི་ཡིས་སོ། །བྱ་བ་མེད་པའི་དཀྱིལ་འཁོར་གསུམ། །གདོད་ནས་རྩོལ་མེད་ལྷུན་གྱིས་གྲུབ། །ཡེ་ཤེས་ཉི་མའི་སྙིང་པོར་ཤར། །རང་གསལ་མུན་པ་ཡེ་ནས་དག །མ་ལུས་ཐིག་ལེ་ཆེན་པོ་ཉིད། །མི་གཡོ་རྣམ་རྟོག་ཡུལ་འདས་ལ། ཁུ་དང་འབྲས་བུར་རྟོག་འཛིན་ཅིང་། །མི་ཤེས་སྒྱུ་མའི་བློ་ཡིས་བཅིངས། །རང་སྣང་མ་བཅོས་ཉི་མ་དག །མ་བཙལ་ཉིད་བཞིན་སྣང་བས་ན། །སྙིང་པོའི་སེམས་ལ་གོལ་ས་མེད། །ཐམས་ཅད་གསལ་བའི་སྙིང་པོར་འབར། །ལོག་རྟོག་བློ་ཡི་དབང་གིས་ནི། །སྣང་སྲིད་འཁོར་བའི་ཁ་བརྒྱུད་ཀྱང་། །ཡེ་ཤེས་དབྱིངས་ལས་གཡོས་པ་མེད། །སངས་རྒྱས་རྣམས་ཀྱི་ཡེ་ཤེས་ནི། །བདག་ཏུ་རྟོག་པ་ཉིད་ལས་བྱུང་། །རྟོག་པའི་བློ་ལ་མཚན་མར་སྣང་། །མི་རྟོག་ཡེ་ཤེས་གྲོལ་བའི་ཐུགས། །ཡེ་ཤེས་མི་རྟོག་མེ་ལོང་གསལ། །མཁའ་ལ་འཇའ་ཚོན་བཞིན་དུ་སྣང་། །རང་བྱུང་ཡེ་ཤེས་ངོ་བོ་ལ རོལ་པའི་ཁྱད་པར་སྣང་བ་ནི། །སྣང་ལ་ངོས་བཟུང་ཡོད་མ་ཡིན། །ཆུ་ཡི་ཟླ་བ་ལྟ་བུར་སྣང་། །གང་སྣང་ཡེ་ཤེས་རོལ་པ་ལ། །གང་ཡང་མ་ཡིནཇིབཞིནཔ། །རངསྣང་མ་བཅོསདེབཞིནཉིད། །དངོས་ཉིད་མི་གཡོ་བདེ་ཆེན་ངང་། །བཙལ་ཞིང་གཡོ་བ་ཅི་ཡང་མེད། །དབྱིངས་དང་ཡེ་ཤེས་ཐ་སྙད་དེ། །དེ་ཉིད་མ་ཡིན་ཞེན་པའི་གནས། །རྨད་བྱུང་གཞལ་ཡས་སྤྲོས་བྲལ་ན། །འབར་བའི་ཡེ་ཤེས་བདེ་གཤེགས་གསུང་། །ཐུག་ཕྲད་ཉིད་དུ་བཞག་པ་སྟེ། །བླ་མའི་ཞལ་ལས་ཤེས་པར་བྱ། །སྤྱོད་པའི་སྒོ་ནས་སྣ་ཚོགས་པ། །ལུང་ལྡན་བླ་མས་ཤེས་པར་བྱ། །འབྲུལ་ཚིག་སྒྲ་ཡིས་ཤེས་པར་བརྟག །གང་ལ་གང་ཞིག་དེ་ཡིན་ན། །དེ་ཉིད་ཡེ་ཤེས་རིག་པ་འཆར། །མ་ཡིན་དེ་ཉིད་ལོག་པ་ན། །རིག་དང་མི་མཐུན་རང་བཞིན་ལོག །རླུང་དང་མཁྲིས་པའི་ཆོས་བཞིན་ནོ། །སྤྱོད་པས་ཆགས་སྡང་བྱེ་བྲག་ཤེས། །དེ་ཡི་དྲག་དལ་ག་་མའི་དོན། །དེ་ནས་རྡོ་རྗེ་སློབ་མ་ཡིས། །རིག་དོན་འདོད་པའི་གསོལ་བ་གདབ། །གནང་ན་དེ་ཉིད་རྒྱལ་ཚབ་བྱ། །རྩོལ་བྲལ་ཟིན་དང་མ་བཟུང་བར། །གསང་བའི་འཁོར་ལོ་ཡེ་ཤེས་གཏེར། །གསང་སྔགས་གཏེར་གྱི་མཛོད་འཛིན་ཅིང་། །རིག་པའི་བསྟན་པ་སྒྲོགས་པའི་བདག །གཞི་ཆའི་རིག་པ་རང་གསལ་ཏེ། །དུས་གསུམ་བདེ་གཤེགས་སྙིང་པོ་ཡིན། །གསུམ་ལྡན་འཁོར་བའི་རང་བཞིན་ནོ། །དུས་ཚོད་བླ་མའི་ཞལ་ལས་ཤེས། །གཞན་དུའང་དེ་བཞིན་ཁོ་ན་ཡིན། ཁེས་རབ་གསང་བའི་དཀྱིལ་འཁོར་ནི། །གུ་རུམ་སྦས་པ་དག་ཡིན་ཀྱང་། །གསལ་བྱེད་སྒྲོན་མ་དེ་ཡིས་མཐོང་། །ཡེ་གསལ་ཆེན་པོ་ཕྱོགས་མེད་ལ། །ཕྱི་ནང་མེད་པར་ཀུན་ལ་གསལ། །འཁོར་བ་རགས་པའི་ཆ་ཡིས་ནི། །དེ་ཉིད་ཕྲ་བའི་དོན་མི་མཐོང་། །བདེན་དོན་མཐོང་བས་བཅིངས་པ་གྲོལ། །རྫོགས་པ་ཡེ་ཤེས་དེ་ཉིད་གོ །ཉམས་བླངས་གོམས་པས་མཐའ་ཐུག་སྟེ། །ཇི་ལྟར་བསམ་པས་བཟུང་བའི་བློ། །མ་ལུས་པར་ནི་ཟད་གྱུར་ན། །མི་རྟོག་ཡེ་ཤེས་གསལ་མཐར་ཕྱིན། །འགྱུར་མེད་སེམས་ཀྱི་གཡུང་དྲུང་ལ། །ཡེ་ཤེས་རང་གསལ་གྱི་ནར་བཞག །དྲན་པ་རྐྱེན་གྱིས་མ་ཤོར་ཏེ། །དེ་ཉིད་ཚོད་དུ་ལྷུག་པར་ཞོག །མ་ནོར་སེམས་ཀྱི་སློབ་དཔོན་ལ། །ལུང་དོན་དྲན་པས་ཐག་བཅད་ཅིང་། །བསམ་མེད་དྲན་མེད་མི་གཡོ་བ། །མི་དཔྱད་ལེགས་པའི་དོན་མི་བཟུང་། །བསྡུ་བར་མ་ཡིན་སྤྲོ་བར་མིན། །མི་རྟོག་གསལབ་མ་བཅིངས་པ། །བརྟུལ་མ་ཡིན་ཏེ་འཇམ་པའི་ངང་། །རིག་པ་དེ་ཉིད་ཙམ་ལ་གནས། །སེམས་ཉིད་རང་བཞིན་ལྷུག་པའོ། །གླང་ཆེན་ལྟ་བུའི་སེམས་ལ་ནི། །མ་བཅོས་རང་ལུགས་ཉིད་དུ་བདེ། །བཙལ་བ་གླང་ཆེན་མྱོས་འདྲར་འགྱུར། །ནམ་མཁའི་ངོ་བོ་མ་བཅོས་ལྟར། །སེམས་ཉིད་རང་བཞིན་མ་བཅོས་བདེ། ཁྱུང་ཆེན་མཁའ་ལ་ལྡིང་བ་བཞིན། །མི་བཙལ་རང་བཞིན་གྱི་ན་བདེ། །ཐམས་ཅད་བཏང་བས་འཛིན་པ་མེད། །བྱ་བ་མེད་ཕྱིར་རྟོགས་པའི་ངང་། །སེམས་ཉིད་བསྒྲིམ་པར་མི་བྱ་ཞིང་། །ལུས་དང་ངག་ཀྱང་བཙལ་མི་བྱ། ཁྲེས་པ་མི་བསྡུ་ཡན་དུ་ཁྱེར། །སྣང་བ་མི་དགག་ཞེན་མི་བྱ། །མཚན་མའི་སྤྲོས་པས་འཆེལ་བ་ཡིས། །སྣ་ཚོགས་རྟོགས་པའི་སེམས་བྱུང་ན། །ལུས་སེམས་ཀློང་ལ་གཟེར་ཆེན་གདབ། ཁེན་ཏུ་དྲན་པས་གཡོ་བ་་། །སྟོང་ཉིད་བདེ་བའི་མན་ངག་སྤྱིན། །ཡེ་ཤེས་གསང་བའི་དགོངས་པ་ལ། །གང་ཡང་མ་ཡིན་དེ་ལྟར་ཡིན། །ཞེས་གསུངས་སོ། །ཡེ་ཤེས་གསང་བའི་རྒྱུད་ལས། གང་གིས་གསང་བའི་ལེའུ་ལྔ་པའོ།། །།དེ་ནས་སེམས་དཔའ་རྡོ་རྗེས། དེ་བཞིན་གཤེགས་པ་རྣམ་པར་སྣང་མཛད་ལ། །འདི་སྐད་ཅེས་གསོལ་ཏོ། །རིན་ཆེན་འཁོར་ལོ་གསང་བའི་ཐུགས། །འཕྲུལ་ཚིག་རིག་པའི་སྒྲོན་མ་ཡིས། །གུ་རུམ་སྦས་པའི་དོན་གསལ་ན། །དེ་ཉིད་གང་གིས་གསལ་བར་བགྱི། །ཞེས་གསོལ་པ་དང་། །དེ་ནས་དེ་བཞིན་གཤེགས་པ་རྣམ་པར་སྣང་མཛད་ཀྱིས་བཀའ་སྩལ་པ། །སེམས་དཔའ་ཆེན་པོ་ཚུར་ཉོན་ཅིག །མན་ངག་རིན་ཆེན་གསང་བ་ནི། །བཀའ་རྒྱུད་མ་ལུས་མཐའ་དག་གིས། །བརྗོད་བྱའི་སྙིང་པོ་དེ་ཉིད་ལས། །མིང་ཚིག་རྣམ་གྲངས་སྡུད་པའི་བདག །ཀུན་བརྗོད་གསུང་གི་འཁོར་ལོ་ཅན། །དུས་མཐའི་སྐད་ཅིག་ཉིད་ལ་ནི། །ཀློང་དགུ་བམ་པོ་ཉི་ཁྲི་ཉིད། །རིན་ཆེན་གསལ་བའི་ཆེད་དུ་གསུངས། །དེ་ཉིད་དགུ་ལྡན་སེམས་ཀྱི་གཞི། །རིན་ཆེན་ལམ་གྱིས་ཉམས་སུ་བླངས། །མ་བསྒྲུབས་འབྲས་བུ་ལྷུན་གྱིས་གྲུབ། །ལྟ་བའི་སེམས་ལ་བླང་དོར་མེད། །མཐའ་དབུས་མེད་པའི་སྙིང་པོ་ལེན། །ཡེ་ཤེས་མ་འགགས་གསལ་བར་སྣང་། །གནང་བཀག་མེད་པ་སྤྱོད་པའི་རྒྱན། །མི་བསམ་མི་ཡེངས་དགོངས་པའི་ཀློང་། །རྒྱལ་ཐབས་སྤྱི་བླུགས་ཚངས་པའི་དབང་། །བགྲོད་མེད་མཐར་ཕྱིན་སེམས་ཀྱི་ལམ། །བཅོས་མེད་དམ་ཚིག་གདོད་ནས་དག །རང་སྣང་འབྲས་བུ་ལྷུན་གྲུབ་ཀློང་། །སེམས་ཉིད་མ་བཅོས་རྣལ་མའི་གཞི། །དོན་དང་ངེས་ཚིག་དཔེ་ཡིས་བསྟན། །གཞི་དོན་ལྷུན་གྲུབ་རྣམ་གསུམ་ལ། །རྣམ་པ་རང་བཞིན་མཚན་ཉིད་རྣམས། །བདེ་བ་ཆེན་པོ་ལྷུན་གྲུབ་པ། །དུས་གསུམ་བདེ་གཤེགས་ཡེ་ཤེས་དང་། །འགྲོ་དྲུག་སེམས་ཀྱིས་མ་བཅོས་པ། །ཐ་དད་མ་ཡིན་རང་བཞིན་གཅིག །རྣམ་པ་ལྷུན་གྲུབ་སྒྱུ་མ་ནི། །རོལ་པ་བཟུང་བ་ངོས་བཟུང་མེད། །རང་གི་མཚན་ཉིད་ལྷུན་གྲུབ་ལ། །གཟུང་འཛིན་བཏགས་པ་གང་གིས་མེད། །དེ་ཉིད་དེ་ཡི་རང་བཞིན་ནོ། །མ་ལུས་དོན་གྱི་སྙིང་པོ་གཞི། །མི་ཤེས་རྟོག་པའི་རང་བཞིན་ཏེ། །རྟོག་ཙམ་ཉིད་ན་མི་རྟོག་པ། །ཐམས་ཅད་རོལ་པས་འཁོར་བའང་ཡིན། །འཛིན་རྟོག་མེད་པས་སངས་རྒྱས་ཡིན། །འཆིང་བ་བྲལ་བ་བལྟ་བ་ཡིན། །རང་འབར་གསལ་བའི་སྙིང་པོ་འབར། །མ་ལུས་འདུས་པའི་ལུས་པོ་ཆེ། །གཅིག་ནི་ཀུན་གྱི་རང་བཞིན་ཏེ། །ལྷག་མ་མེད་པར་ཡོངས་སུ་རྫོགས། །རིག་པའི་འཁོར་ལོ་འབུམ་ཕྲག་ལས། །གཞི་མཚོན་དཔེ་ཡི་རང་བཞིན་ནི། །མུན་པ་ཆུ་དང་ཉི་མས་བསྟན། །སེམས་ཉིད་རིག་པ་ཀ་དག་ལ། །ཞེན་པས་བརྟགས་པས་སྣང་མེད་པས། །སྨག་གི་མུན་རུམ་ལྟ་བུར་བཤད། །དངོས་མེད་རིག་པ་རང་སྣང་ལ། །ཡེ་ཤེས་རོལ་པ་མི་འགག་པས། །ཆུ་ཡི་གཉེར་མ་ལྟ་བུར་བཤད། །མ་བཅོས་སེམས་ཀྱི་མཚན་ཉིད་ལ། །རྩོལ་བས་བཀག་པ་མ་ཡིན་ཡང་། །གདོད་ནས་དག་པ་དྲི་མེད་པས། །ཉི་མ་ཤར་བ་ལྟ་བུར་བཤད། །ཐ་དད་རྟག་པར་འཛིན་པ་རྣམས། །རོལ་པའི་སྣང་བ་བཀག་པས་ཆད། །མཐའ་བྲལ་དབུ་མའི་དོན་འཛིན་པས། །མཐའ་གསུམ་གསལ་བའི་དགོས་པའོ། །རང་སྣང་ལྷུན་གྲུབ་ཡེ་གནས་ལ། །བགྲོད་པའི་ལམ་གྱིས་བཙལ་མི་དགོས། །མཐའ་མེད་ནམ་མཁའ་ལྟ་བུ་ལ། །བགྲོད་པས་ཕྱིན་པར་ག་ལ་འགྱུར། །སེམས་ལ་བགྲོད་པས་ཕྱིན་འདོད་ན། །མཁའ་ལ་ཚད་ཀྱིས་འཇལ་བ་འདྲ། །ལམ་བསྟན་པ་དང་ལམ་གྱི་དཔེ། །ངེས་པའི་དོན་ལྡན་དེ་ཉིད་ཡིན། །དོན་གྱི་ལམ་དང་ཚིག་གི་ལམ། །དོན་གྱི་ཐུག་ཕྲད་གསུམ་ཡིན་ལ། །དེ་ཡི་བརྡ་ཕྲད་ཚིག་གི་ལམ། །ཡེ་ཤེས་བགྲོད་མེད་རྫོགས་པའི་ལམ། །རྣམ་གྲོལ་འབྲས་བུ་ཀུན་གྱི་རྒྱུ། །ཡེ་ཤེས་གསང་བའི་དོན་རྟོགས་ན། །མི་གཡོ་སེམས་ཀྱི་དཀྱིལ་འཁོར་ན། །ཐེག་པ་ཀུན་གྱི་འབྲས་བུ་འཆར། །དེས་ན་ཀུན་གྲོལ་དགོངས་པའི་ཐུགས། །ལམ་ལ་རིམ་མེད་ཅིག་ཅར་འཇུག །རྣམ་རྟོག་ཕྲ་རགས་རིམ་གྱིས་ཤེས། །ཚིག་ལམ་རྐྱེན་གྱིསམམཚོནཔར། །མབཅོས་སེམས་ཀྱི་དོན་མི་ཤེས། །ཚིག་གིས་ལམ་གྱི་དོན་ལ་སྦྱོར། །གསང་དོན་མཐོང་བས་བདེ་བའི་ས། །འཛིན་པ་རགས་པའི་རྟོག་པ་དག །རང་བྱུང་ཡེ་ཤེས་ཉིད་དུ་གསལ། །མི་རྩོལ་བདེ་བའི་སེམས་ལ་གནས། །མི་འགྱུར་སྤྲོས་བྲལ་ཆོས་ཉིད་ལ། །འཛིན་བྲལ་བཏང་སྙོམས་རྣལ་འབྱོར་གྱིས། །སྐྱོན་ཉིད་བྱང་ཆུབ་སེམས་སུ་མཐོང་། །གཉིས་མེད་འོད་གསལ་ཆེན་པོ་ལ། །སྐྱོན་སྤང་ཡོན་ཏན་བླང་དུ་མེད། །བསམ་པ་མ་ལུས་སེམས་སུ་ཤེས། །མཐར་ཕྱིན་བྱང་ཆུབ་སེམས་ཀྱི་ལམ། །མར་མེའམ་པདྨ་འབབ་ཆུ་སོགས། །ཚིག་དང་སྐབས་ཀྱིས་དོན་ལ་སྦྱོར། །ལུས་དང་ངག་གི་རྩོལ་བ་དང་། །ཏིང་འཛིན་སེམས་ཀྱི་རིམ་མེད་པར། །ཐམས་ཅད་སྒྲོལ་བའི་རྫོགས་པའི་ལམ། །རེག་པའི་གནས་སུ་རྟོགས་པས་ཕྱིན། །དེས་ན་མཐར་ཕྱིན་འབྲས་བུའི་ལམ། །ཡེ་ནས་ཡོད་མེད་རྣམ་དག་ལམ། །སྐྱོན་ཡོན་རྣམ་དག་ཀུན་ཏུ་བཟང་། །དབྱེར་མེད་ཐམས་ཅད་མཚུངས་པའི་ལམ། །བྱང་ཆུབ་སེམས་ལ་རྒྱུ་མེད་པས། །རྒྱུ་ཡིས་བསྒྲུབ་པའི་འབྲས་བུ་མིན། །དང་པོ་ཡེ་ཤེས་རྒྱུ་མེད་པས། །རང་གསལ་ཉག་གཅིག་དྲི་མ་མེད། །རྩོལ་མེད་ནམ་མཁའ་བཞིན་དུ་གནས། །སངས་རྒྱས་སེམས་ཅན་ཀུན་ལ་ཁྱབ། །དེ་ཉིད་རྟོགས་པས་འབྲས་བུའི་ས། །འདས་པ་མ་འོངས་ད་ལྟར་ཡང་། །རྟོགས་པ་སྔ་ཕྱིའི་ཁྱད་པར་ལས། །དུས་གསུམ་གཅིག་སྟེ་ཁྱད་པར་མེད། །མ་བཅོས་ཐུགས་ཀྱི་རིག་པ་ལས། །སྔོན་མེད་ཕྱིས་མེད་ཉག་གཅིག་གསལ། །རང་བྱུང་འོད་གསལ་གདོད་ནས་ཡོད། ཁུ།་མེད་འབྲས་བུ་བྱང་ཆུབ་སེམས། །འབྲས་བུ་ཀུན་གྱི་བདག་ཉིད་ཡིན། །ཆོས་སྐུ་འབྲས་བུ་རང་གསལ་ལ། །རིན་ཆེན་འབར་བ་ལྷུན་གྲུབ་ལྟར། །ཐུགས་རྗེའི་བྱིན་རླབས་འདོད་དགུ་འཆར། །སྐལ་ལྡན་རང་རྐྱེན་ཉི་མ་བཞིན། །སེམས་ཅན་དུས་ན་སྐབས་ཀྱིས་མཐུན། །ལྷུན་གྲུབ་དུས་ན་ཕྱོགས་རིས་མེད། །འོད་གསལ་རིག་པའི་དཀྱིལ་འཁོར་ན། །རང་སྣང་འབྲས་བུ་རྒྱ་མཚོར་འཁྱིལ། །གསལ་བར་འབྲས་བུ་བདག་གཞན་མེད། །བདག་གཞན་འབྲས་བུར་སྣང་བ་ལ། །དངོས་དང་བསམ་པ་སྐབས་ཀྱིས་ཤེས། །གསལ་བར་རིག་པའི་བྱིན་རླབས་ནི། །ཆོས་ཉིད་རིག་པའི་གཞི་ལ་རྫོགས། །སྙིང་པོ་དོན་གྱི་གཞི་རྟོགས་ནས། །རང་བཞིན་ཚོགས་རྫོགས་སྒྲིབ་པ་མེད། །གཉིས་ཀྱིས་མི་བསྒྲུབ་སྤང་པ་མེད། །སྤང་མེད་ཐིག་ལེ་ཉིད་ཀྱི་དབྱིངས། །མཚོན་མེད་སེམས་ཀྱི་འབྲས་བུ་ནི། །རིག་མའི་བདེ་བས་མཚོན་དུ་མེད། །འོད་གསལ་རྒྱུ་འབྲས་གཉིས་མེད་ལ། ཁུ་འབྲས་གཉིས་སུ་རྟོག་པ་མིན། །གསལ་བར་རྫོགས་པའི་འབྲས་བུ་ནི། །འབྱུང་བ་ལྔ་ལ་རག་མ་ལས། །སྐུ་གསུང་ཐུགས་ལ་རྟེན་མི་འཆའ། །ཞེས་གསུངས་སོ། །ཡེ་ཤེས་གསང་བའི་རྒྱུད་ལས། རིན་ཆེན་གསལ་བར་བྱེད་པའི་ལེའུ་སྟེ་དྲུག་པའོ།། །།དེ་ནས་སེམས་དཔའ་རྡོ་རྗེས། །དེབཞིན གཤེགསཔརྣམ་པར་སྣང་མཛད་ལ་འདི་སྐད་ཅེས་གསོལ་ཅོ། །འོད་གསལ་ཐུགས་རྗེ་ལྷུན་གྲུབ་ཁྱོད། །རོལ་པའི་མཛད་པ་འབུམ་ཕྲག་ཡས། །འོད་གསལ་དབྱིངས་ལ་བཞུགས་བཞིན་དུ། །ཐུགས་རྗེའི་མཛད་པ་ཕྱོགས་བཅུར་བརྡལ། །འགྲོ་བའི་བསམ་པ་རེ་བ་སྐོང་། །ཡིད་བཞིན་ནོར་བུ་ལྟ་བུར་ཤར། ཁྱོད་ནི་སྣང་གསལ་སྒྲོན་མ་སྟེ། །མ་རིག་མུན་པ་དང་བར་བྱེད། །སྨན་ཆེན་བདུད་རྩི་བྱམས་མགོན་གྱིས། །རྫོགས་ཆེན་སེམས་ཀྱི་རང་བཞིན་ལ། །བཀག་མེད་སྤྱོད་པ་ཇི་ལྟར་བགྱི། །ཞེས་གསོལ་ཏོ། །དེ་ནས་དེ་བཞིན་གཤེས་པ་རྣམ་པར་སྣང་མཛད་ཀྱིས་བཀའ་སྩལ་པ།སྔགས་ཀྱི་སྤྱོད་པ་སྤྱོད་པའི་མཆོག །སེམས་ཀྱི་འཕྲོ་འདུའི་ལས་མི་བྱེད། །རང་གསལ་ཀློང་ལ་ཡེ་གནས་པས། །ནམ་མཁའ་རྡོ་རྗེ་མ་བཅོས་སེམས། །སྒོ་གསུམ་རྡོ་རྗེ་མ་བལ་བར། །ལུས་ཀྱིས་ཕྱག་རྒྱའི་ལས་མི་བྱེད། །ཐ་མལ་ལུས་སྤྱོད་དེ་བཞིན་ནོ། །ངག་གི་སྙིང་པོ་བཟླས་བརྗོད་མེད། །མ་བཅོས་གསུང་གི་སྤྱོད་པ་ལས། །ཞེན་པའི་ང་རྩོལ་གང་ཡང་མིན། །སེམས་ཀྱི་འཕྲོ་འདུའི་ལས་མི་བྱེད། །རང་གསལ་ཀློང་ལ་ཡེ་གནས་པས། །དྲན་བསམ་རྒྱུ་བ་གང་ཡང་མིན། །སྤྲོས་བྲལ་ནམ་མཁའ་ལྟ་བུ་ལ། །རང་གསལ་ཡེ་ཤེས་མ་བཅོས་པར། །རྩོལ་མེད་རང་བཞག་ལྷུག་པའོ། །གང་དུ་བསམ་བཞག་འོད་གསལ་མཁའ། །དུས་གསུམ་དྲན་པ་རྐྱེན་གྱིས་བཟུང་། །ཐ་སྙད་མཚན་མ་གཡོ་འགྱུར་ན། །ནམ་མཁའི་རྡོ་རྗེ་སྤྱོད་པ་ལ། །འོད་གསལ་ལྷག་པའི་སེམས་ཀྱིས་གནས། །རྣམ་རྟོག་དྲན་པ་གཡོས་ཙམ་ན། །རིན་ཆེན་འཕྲུལ་གྱི་སྙིང་པོའི་སྒོ། །དྲན་པའི་རྐྱེན་གྱིས་གཟུང་བར་བྱ། །ལུས་ངག་གཙོ་རུ་འཇོག་བྱེད་ན། །དེ་ཡང་སྤྱོད་ཉིད་སྤྱོད་མ་ཡིན། །སྤྱོད་མེད་རིག་པའི་སྤྱོད་པ་ལ། །རྩོལ་མེད་འབྲས་བུ་ལྷུན་གྱིས་གྲུབ། །བཅོས་མེད་སེམས་ཀྱི་རང་བཞིན་ལ བཅོས་པའི་སྤྱོད་པ་ཕྱིན་ཅི་ལོག །དངོས་བྲལ་རིག་པ་བདག་མེད་ལ། །བཏགས་པའི་བདག་འཛིན་ལོག་པ་བཞིན། །འོད་གསལ་རིག་པ་ལྷུན་གྲུབ་ལ། །རྩོལ་བའི་སྐྱོད་པས་སེམས་མི་མཐོང་། །བསམ་གྱིས་མི་ཁྱབ་འོད་གསལ་སེམས། །འགྱུར་མེད་དབྱིངས་ལས་མ་གཡོས་ཀྱང་། །རང་སྣང་ལྷུན་གྲུབ་བྱིན་རླབས་ལས། །སྐལ་ལྡན་བསམ་པ་ཇི་བཞིན་དུ། །འགྲོ་འདུལ་ཐབས་ཀྱི་སྤྱོད་པ་མཛད། །རང་སེམས་པདྨ་བཞིན་དག་ནས། །གཞན་དག་ཇི་ལྟར་མོས་བཞིན་མཛད། །གཡེམ་པར་འདོད་ལ་གཡེམ་པ་ཉིད། །རང་སེམས་གང་འཐད་སྒོ་དང་བསྟུན། །ཞེ་སྡང་མནར་སེམས་ང་རྒྱལ་ཉིད། །ཐབས་ཉིད་གསང་བའི་ལམ་དུ་བསྟན། །ཉན་ཐོས་ལ་སོགས་འཇུག་པའི་སྒོ །གང་མོས་མཐུན་པའི་ཐབས་ཀྱིས་བསྟན། །གསང་དོན་རྟོགས་ན་གང་ཡང་རུང་། །རང་བྱུང་ཡེ་ཤེས་ཉག་གཅིག་ལ། །གསང་བའི་དཀྱིལ་འཁོར་གྲངས་མེད་པ། །མཐུན་འཇུག་ཐབས་སུ་བསྟན་པ་ཡིན། །ཅི་ཡང་ཡིན་ནོ་གང་ཡང་རུང་། །སུ་ཞིག་ཐུགས་ཀྱི་དཀྱིལ་འཁོར་དུ། །གཏེར་དང་ལྡན་ནོ་ཁྱད་པར་ཆེ། །མ་བཀག་སེམས་རྟོགས་ཁྱད་པར་ལས། །སྒྲིབ་པར་གྱུར་པ་གང་ཞིག་ཡོད། །མ་བཀག་ཅི་བདེར་རྟོགས་པར་སྤྱོད། །སྣང་གསལ་རིག་པའི་གདེང་ལྡན་ན། །གདུལ་བྱ་མོས་པའི་ངོ་དག་ཏུ། །སྣ་ཚོགས་སྤྱོད་པ་རྒྱ་མཚོ་སྤྱོད། །གང་ཡང་མ་བཀག་ཀུན་ཏུ་བཟང་། །མཐར་ཕྱིན་དུས་གསུམ་སངས་རྒྱས་ཀྱིས། །དུག་ལྔ་རྟོགས་པའི་སྤྱོད་པ་ཡིས། །བྱ་བཙལ་ཀུན་བྲལ་ལྷུན་གྱིས་གྲུབ། །དུས་གསུམ་སངས་རྒྱས་གང་ལ་ཡང་། །སྤྱོད་པ་དེ་ལས་ཡོངས་མི་མངའ། །རྣམ་དག་སེམས་ཀྱི་སྦྱོད་རྟོགས་ན། །རྩོལ་བའི་སྤྱོད་པ་ལོག་པའི་ཆོས། །ལྷག་པའི་སྤྱོད་པ་འོད་གསལ་ཐུགས། །གང་ལ་སེམས་ཉིད་ལྷག་སྤྱོད་ཀྱང་། །ལྷག་པའི་སྦྱོད་པ་མོས་པ་འཇུག །སྐལ་ལྡན་ལྷག་པའི་དོན་ཟིན་ཀྱང་། །ཆེ་ལ་དམིགས་པའི་ཆ་སྙོམས་པས། །གོང་འོག་དམིགས་པའི་སེམས་དང་བྲལ། །རང་བཞིན་ནམ་མཁའ་རྡོ་རྗེ་དང་། །མཐུན་འཇུག་འགྲོ་འདུལ་ཐབས་ཀྱིས་སྤྱོད། །ཅེས་གསུངས་སོ། །ཡེ་ཤེས་གསང་བའི་རྒྱུད་ལས། བྱ་བ་དང་བྲལ་བའི་སྤྱོད་པ་བསྟན་པའི་ལེའུ་སྟེ་བདུན་པའོ།། །།དེ་ནས་སེམས་དཔའ་རྡོ་རྗེས། དེ་བཞིན་གཤེགས་པ་རྣམ་པར་སྣང་མཛད་ལ་འདི་སྐད་ཅེས་གསོལ་ཏོ། །གསང་འཛིན་ཐུགས་རྗེའི་མངའ་བདག་ཁྱོད། །རོལ་པའི་འཁོར་ལོ་གསུང་གི་བདག །སྐུ་ཡི་འཁོར་ལོ་མཁའ་ལྟར་ཁྱབ། །སྙིང་པོའི་དོན་ལྡན་ཀུན་མཁྱེན་ཐུགས། །སྔགས་ཀྱི་བདག་ཉིད་སྐྱོབ་པ་ལ། །འདུས་པའི་འཁོར་ཚོགས་མོས་པ་ཡིས། །དམ་ཚིག་གསང་བའི་དོན་ཞུ་བ། །གསང་བའི་དམ་ཚིག་བཤད་དུ་གསོལ། །ཞེས་གསོལ་པ་དང་། །དེ་བཞིན་གཤེགས་པ་་།མ་པར་སྣང་མཛད་ཀྱིས་བཀའ་སྩལ་པ། ལྷུན་གྲུབ་ཡེ་ཤེས་གསང་བ་ལ། །བསྒྲུབ་ཅིང་བཅས་པའི་དམ་ཚིག་མེད། །རིག་པ་གསལ་བའི་དམ་ཚིག་ནི། །རིན་ཆེན་འབར་བ་སྒྲོལ་བའི་སྐུ། །རྡོ་རྗེ་ཉི་མ་ལྟ་བུར་གནས། །ལྷུན་གྲུབ་ཕྱོགས་རིས་མེད་མིན་པས། །སྡོམ་དང་ཚུལ་ཁྲིམས་ཕྱོགས་མཚམས་དང་། །ཕྱི་ནང་གསང་བའི་དམ་ཚིག་ཡིན། །མ་བཅོས་གསང་བའི་དམ་ཚིག་ནི། །མེད་པ་ཕྱལ་པ་གཅིག་པུ་དང་། །ལྷུན་གྱིས་གྲུབ་པའི་དམ་ཚིག་གོ །རང་རིག་གདོད་ནས་ལྷུན་གྲུབ་ལ། །གཟུང་འཛིན་མཚན་མའི་ཆོས་མེད་པས། །བརྗོད་དུ་མེད་པའི་སེམས་ཉིད་ཀྱིས། །བསྲུང་དུ་མེད་པས་ངང་དུ་བསྡམ། །དེ་ཡང་བགྲུང་དུ་མེད་ན་བདེ། །གཉིས་མེད་སེམས་ཀྱི་དམ་ཚིག་ལ། །འདའ་མེད་སྲོག་གི་གནས་གྱུར་ན། །མ་བཅོས་རྒྱལ་བའི་དམ་ཚིག་ཡིན། །ནམ་མཁའ་ལྟ་བུར་གསལ་ཁྱབ་ལ། །མཐའ་དང་དབུས་མེད་མ་བཅོས་པས། །འདི་ཡིན་འདི་མིན་ཕྱོགས་དང་བྲལ། །ཕྱོགས་བྲལ་སྐྱེས་བུ་ཆེན་པོ་ངེས། །ཕྱོགས་གཅིག་སྤང་ཞིང་ཕྱོགས་གཅིག་བསྒྲུབ་ཏུ་མེད། །གཏད་མེད་འཛིནབྲལཆེནཔོལ། །ཕྱོགས་མཚམས་ངེས་པའི་ཆོས་མ་ཡིན། །བདེགཤེགསསེམས་ཅན་ཐམས་ཅད་ལ། །མ་བཅོས་སེམས་ཀྱི་རིག་པ་གཅིག །རྒྱུ་ཡིས་མ་བསྐྱེད་ཡེ་ནས་བྱུང་། །རྐྱེན་གྱིས་མ་སྦྱངས་གདོད་ནས་དག །རང་བཞིན་འོད་གསལ་རིག་པ་ལ། །མ་ལུས་དགོངས་པ་ཐམས་ཅད་འདུས། །དུས་གསུམ་སངས་རྒྱས་ཐམས་ཅད་ལ། །རང་བཞག་དགོངས་པ་གཅིག་ལས་མེད། །རང་སྣང་མི་འགྱུར་ཆོས་ཉིད་ལ། །རང་བཞག་རིག་པ་མི་གདའ་ན། །སེམས་ཉིད་གཅིག་པུ་དམ་ཚིག་སྟེ། །དུས་གསུམ་སངས་རྒྱས་ཐམས་ཅད་ལ། །དམ་ཚིག་འདི་ལས་ཡོངས་མི་མངའ། །རྣམ་དག་རང་བཞིན་འོད་གསལ་ལ། །ལུས་དང་ངག་གི་བྱ་རྩོལ་མེད། །ཏིང་འཛིན་སེམས་ཀྱིས་རིམ་བཙལ་མེད། །འདི་ནི་ཚིག་དང་བྲལ་བ་སྟེ། །གྱི་ན་ལྷུན་གྲུབ་དམ་ཚིག་ཡིན། །ལྷུན་གྲུབ་དམ་ཚིག་རྩོལ་བྲལ་ལ། །བཙལ་བའི་དམ་ཚིག་ཡེ་ནས་མེད། །སེལ་མེད་རིན་ཆེན་གླིང་བཞིན་དུ། །རྣམ་དག་ཡེ་ཤེས་རང་བྱུང་ལ། །སྐྱོན་གྱི་རང་བཞིན་ངང་གིས་དག །གཞི་རྩ་མེད་ཐེའི་སེམས་ཉིད་ལ །བཏགས་བའི་འཛིན་པ་རྣམ་པར་དག །ལྷུན་གྲུབ་འོད་གསལ་དག་པ་ལ། །རྣམ་རྟོག་བརྟག་པའི་སེམས་གྲུབ་ན། །མུ་སྟེགས་སངས་རྒྱས་ཅི་ལ་རྩོད། །སངས་རྒྱས་སེམས་ཅན་ཅི་ལ་གདགས། །རྟོགས་པ་དངོས་ལ་གྲུབ་པ་ན། །རིན་ཆེན་འཕྲུལ་གྱི་ལྡེ་མིག་གིས། །ཐ་མལ་ཞེན་པ་ཅི་ལྟར་བཟློག །ལྷུན་གྲུབ་དམ་ཚིག་བྱ་བཙལ་མེད། །ལྷུན་གྲུབ་རིན་ཆེན་སྙིང་པོ་ལྷར། །གཅིག་རྫོགས་རང་གསལ་དག་པར་རྫོགས། །ཀུན་རྫོགས་རང་བྱུང་སེམས་སུ་རྫོགས། །ཐམས་ཅད་ལྷུན་གྲུབ་རྣམ་པར་རྫོགས། །དེས་ན་ལྷུན་གྲུབ་རྫོགས་པ་ཆེ། །ཞེས་གསུངས་སོ། །ཡེ་ཤེས་གསང་བའི་རྒྱུད་ལས། །རྫོགས་པ་ཆེན་པོའི་དམ་ཚིག་བསྟན་པའི་ལེའུ་སྟེ་བརྒྱད་པའོ།། །།དེ་ནས་སེམས་དཔའ་རྡོ་རྗེས། །དེ་བཞིན་གཤེགས་པ་རྣམ་པར་སྣང་མཛད་ལ་འདི་སྐད་ཅེས་གསོལ་ཏོ། །བདག་ཅག་འདུས་པའི་འཁོར་ཚོགས་རྣམས། །ཐོག་མེད་དུས་ནས་རིན་ཆེན་བྲལ། །གསལ་མེད་ཁམས་གསུམ་འཁོར་བར་འཁྱམས། །དུས་འདིར་ཐུགས་རྗེའི་བྱིན་རླབས་ཀྱིས། །ཀུན་མཁྱེན་ཁྱེད་ཀྱི་འཁོར་དུ་འདུས། །རྟོག་པ་སེམས་སུ་ཤེས་པའི་ས། །ཀུན་མཁྱེན་ཁྱོད་ཀྱིས་གསུང་དུ་གསོལ། །ཞེས་གསོལ་པ་དང་། །དེ་བཞིན་གཤེགས་པ་རྣམ་པར་སྣང་མཛད་ཀྱིས་བཀའ་སྩལ་པ རོལ་པའི་སྒྲ་ལ་སེམས་གཏོད་ཅིག །རང་བྱུང་ཡེ་ཤེས་སེམས་ཀྱི་ས། །བརྗོད་པའི་ཐ་སྙད་ཀུན་བྲལ་ཡང་། །དམན་པའི་བློ་ཡིས་རྟོགས་བྱའི་ཕྱིར། །རིག་པ་གསུང་གི་སྒོ་ནས་བསྟན། །མ་བཅོས་རང་སྣང་བླ་མའི་ས། །སྦྱངས་པས་མ་ཡིན་ཡེ་ནས་གྲུབ། །རང་བྱུང་རྣམ་དག་ཀུན་བཟང་ས། །དབྱེར་མེད་ཆེ་མཆོག་ཆོས་ཀྱི་སྐུ། ཁུད་དང་མདོ་སྡེ་བླ་མེད་ས། །ཀུན་ཏུ་འོད་དང་རྡོ་རྗེ་འཛིན། །མ་ཆགས་པདྨ་སྟུག་པོ་བཀོད། །ཚེགས་ཆེན་ཡི་གེ་འཁོར་ལོ་དང་། །ཀུན་ཏུ་དབྱེ་བ་མེད་པའི་ས། །ས་དྲུག་སེམས་ལ་བགྲངས་པ་ཡང་། །མ་བཅོས་རྫོགས་པ་ཆེན་པོའི་ས། །རྟོགས་པའི་ཡོན་ཏན་དྲུག་ཏུ་བསྟན། །མ་བཅོས་ས་ལ་སྦྱང་པ་མེད། །འོད་གསལ་ལྷུན་གྲུབ་ཆེན་པོ་ལ། ས་ཡི་རིམ་པ་གང་ཡང་མེད། །རང་བྱུང་རིག་པ་རྟོགས་གྱུར་ན། །ནོར་བུ་རིན་ཆེན་ལྷུན་གྲུབ་ལྟར། །ཐམས་ཅད་སེམས་ལས་བྱུང་བའི་ཕྱིར། །རང་སྣང་བྱང་ཆུབ་སེམས་ཀྱི་ས། །འགྱུར་མེད་སེམས་ཀྱི་ངོ་བོ་ནི། །རྟོག་པ་མ་ཡིན་མི་རྟོག་མིན། །གང་ལའང་གནས་པ་མ་ཡིན་པ། །གནས་མེད་འཛིན་བྲལ་རིག་པའི་གནས། །མ་སྤངས་ཀུན་བྲལ་འོད་གསལ་གནས། །མི་གནས་གནས་པའི་ཆོས་ཉིད་ལ། །སྐལ་ལྡན་དང་པོ་འཇུག་པ་ན། །མཐར་ཕྱིན་ས་ལ་ཁྱད་པར་མེད། །དག་པ་ཐུགས་རྗེའི་རང་བཞིན་ཏེ། །རྟོགས་པའང་རང་བཞིན་སེམས་སུ་གཅིག །འཛིན་པའི་བློ་ཡིས་གཡོས་གྱུར་ཀྱང་། །རང་བྱུང་འོད་གསལ་འགྱུར་བ་མེད། །འགྱུར་མེད་ངང་ལ་ངང་བཞག་སྟེ། །མ་སྤྱད་སེམས་ཀྱི་གྱི་ནར་གནས། །དབང་པོ་ཡུལ་ལ་གང་སྣང་བ། །ཡེ་ཤེས་འོད་དུ་ཀུན་ལ་གསལ། །བཀྲག་གསལ་གཟུགས་ཀྱི་དཀྱིལ་འཁོར་ལ། །འོད་གསལ་རང་བྱུང་ངོ་མཚར་ཆེ། །བརྗོད་བྲལ་སྒྲ་ཡི་དཀྱིལ་འཁོར་ལ། །སྣང་བའི་ཡེ་ཤེས་རང་བཞིན་གསལ། །རང་བཞིན་སྣ་ཚོགས་དྲི་མེད་ལ། །ཡེ་ཤེས་གསལ་བར་རང་བྱུང་སེམས། །མུ་ཁ་རོ་ཡི་དཀྱིལ་འཁོར་ལ། །ལྕེ་ཡི་ཡེ་ཤེས་ངོ་མཚར་ཆེ། །གསལ་བ་རག་བྱའི་རང་བཞིན་ལ། །ཤེས་རབ་ལུས་ཀྱི་རང་བཞིན་གནས། །ཀུན་འདས་ཆོས་ཀྱི་དཀྱིལ་འཁོར་ལ། །ཡེ་ཤེས་ཐུགས་ཀྱི་རིག་པ་གསལ། །རང་བཞིན་བདེ་ཆེན་དཀྱིལ་འཁོར་དྲུག །གཉིས་མེད་རྡོ་རྗེ་འགྱུར་མེད་ལས། །ཡེ་ཤེས་མི་འབྲལ་འཛིན་པའི་ས། །འཛིན་པའི་ཡུལ་ལ་མ་ཆགས་ཤིང་། །ཀུན་མཁྱེན་དྲི་མ་དང་བྲལ་བས། །མ་ཆགས་པདྨ་ཅན་གྱི་ས། །རང་ཉིད་གསལ་བ་ཀུན་འདུས་པས། །ཚོགས་ཆེན་དཀྱིལ་འཁོར་ཡི་གེའི་ས། །མི་ཕྱེད་སེམས་ལ་སྟུག་པོ་བཀོད། །བྱང་ཆུབ་སེམས་ཀྱི་རང་བཞིན་ལ། །དབྱིངས་དང་ཡེ་ཤེས་དབྱེར་མེད་པས། །ཀུན་བཟང་དབྱེ་བ་མེད་པའི་ས། །མ་སྤངས་སེམས་ཉིད་ས་དག་ལ། །ས་རྣམས་མ་ལུས་ཐམས་ཅད་འདུས། །སྦྱངས་པའི་ས་རྣམས་ཐམས་ཅད་ནི། །སྦྱང་མེད་ས་ལ་སྦྱངས་པས་ན། །བསམ་པས་བཞག་སྟེ་རང་བཞིན་ལོག །མཐར་ཐུག་མ་ཡིན་རང་འདོད་ས། །དེས་ན་མ་བཅོས་རྫོགས་པའི་ས། །རང་བྱུང་ལྷུན་རྫོགས་ཁྱད་པར་ས། །ས་ཡི་ཁྱད་པར་ཅིར་བསྟན་ཀྱང་། །མ་བཅོས་རྫོགས་པའི་ས་ལ་འདུས། །ཞེས་གསུངས་སོ། །ཡེ་ཤེས་གསང་བའི་རྒྱུད་ལས། ས་བསྟན་པའི་ལེའུ་སྟེ་དགུ་པའོ།། །།དེ་ནས་སེམས་དཔའ་རྡོ་རྗེས། །དེ་བཞིན་གཤེག་པ་རྣམ་པར་སྣང་མཛད་ལ་འདི་སྐད་ཅེས་གསོལ་ཏོ། །ཐུགས་རྗེའི་མངའ་བདག་སྐྱོབ་པའི་ལྷ། །བསམ་གྱིས་མི་ཁྱབ་ཆེན་པོ་ཡིས། །གསང་བའི་ཐེག་པ་གསུངས་པ་འདི། །མ་འོངས་དུས་ན་ཇི་ལྟར་འབྱུང་། །ཞེས་གསོལ་པ་དང། །དེབཞིནགཤེགསཔརྣམ་པར་སྣང་མཛད་ཀྱིས་བཀའ་སྩལ་པ། །རྩོལ་བྲལ་གསང་བའི་ཐེག་པ་འདི། །ལྷ་གནས་གསུམ་དུ་གྲགས་འགྱུར་ནས། །ཡང་སྤྲུལ་གང་ཟག་ཐུགས་སྲས་ཀྱིས། །འཛམ་གླིང་དབུས་སུ་རྒྱས་པར་བྱེད། །རྒྱལ་སྲས་གསང་བའི་སྣོད་ལྡན་ལ། །རྣ་བརྒྱུད་རིག་པ་སྔགས་ཀྱི་དོན། །འཕྲུལ་ཚིག་རིག་པའི་སྒོ་ནས་སྟོན། །གསང་འཛིན་རིག་པའི་སྣོད་ལྡན་རྣམས། །མ་བཅོས་གསལ་བའི་དོན་གོ་ནས། །རྣམ་གྲོལ་འབྲས་བུ་འཐོབ་པར་འགྱུར། །དེ་ནས་གསང་བ་དམ་པ་འདི། །མཐའ་འཁོབ་ཡུལ་དུ་རྒྱས་པར་འགྱུར། །དེར་ཡང་གསང་བ་དམ་པ་འདིས། །སྐལ་ལྡན་གདུལ་བྱའི་ངོ་གང་དུ། །རིག་པའི་སྒྲོན་མ་བྱེད་པར་འགྱུར། །དེ་ནས་ཐུགས་རྗེའི་སྐལ་མེད་པས། །གསང་བ་དམ་པ་ནུབ་པར་འགྱུར། །གསང་བའི་ཐེག་པ་དམ་པ་འདི། །གཞན་གྱིས་ནུབ་པར་མི་འགྱུར་ཏེ། །དྲི་མེད་བདུད་རྩི་རྟོགས་དཀའ་ལ། །རྣ་བརྒྱུད་འཕྲུལ་ཚིག་མི་ལྡན་པས། །སྒྲ་བཞིན་སྤྱད་ནས་སྨྲ་བ་དག །ལྟ་སྤྱོད་ལེག་པའི་ང་རྒྱལ་ཅན། །མ་བཅོས་རང་སྣང་རོལ་པ་དང་། །རྣམ་རྟོག་ཞེན་པའི་བརྟགས་པ་དག །བྱེ་བྲག་མ་ཕྱེད་རྨོངས་པ་དག །རྡོ་ལ་གསེར་དུ་འཛིན་པ་ལྟར། །འོད་གསལ་ལྷུན་གྲུབ་རང་སྣང་དང་། །བརྟགས་པའི་ཞེན་པ་བསྲེས་ནས་སྨྲ། །མ་བཅོས་རིག་པ་གདེང་མེད་པར། །རང་ལྟར་ཡ་རབས་མཐོ་འདོད་ནས། །བབ་ཅོལ་འདོད་ལྔ་སྤྱོད་པས་ལོག །དེ་ཡི་དུས་ཀྱི་གང་ཟག་རྣམས། །སྦྲེལ་མ་གཡང་དུ་ལྷུངབ བཞིན། །རྡོརྗེའིཁབ་ཏུ་ལྟུང་འགྱུར་ནས། །བྱང་ཆུབ་སེམས་ཀྱི་རིགས་དང་བྲལ། །མགྱོགས་འགྲོ་སོ་མཚམས་འདས་དང་འདྲ། །དེ་ནས་ལྷོ་ཕྱོགས་རྒྱུད་དུ་རྒྱས། །སྐལ་ལྡན་གྲོལ་བའང་འབྱུང་བར་འགྱུར། །དེ་ནས་འཛམ་གླིང་དབུས་སུ་ནུབ། །སྤྲུལ་པ་ཐ་མའི་བསྟན་པ་ལ། །མ་འོངས་དུས་ན་འབྱུང་བར་འགྱུར། །དེ་ཡང་རང་བཞིན་རིགས་ཅན་དག །རྫོགས་ཆེན་འབྲས་བུའི་སྒོར་ཞུགས་ནས། །རྣམ་གྲོལ་འབྲས་བུ་འཐོབ་པར་འགྱུར། །བསྒོམ་དང་སྤྱོད་པའི་ཚུལ་མ་ནོར། །མཉམ་པའི་དོན་ལ་མཉམ་བཞག་ན། །དེ་མ་ཐག་ཏུ་རིག་པ་འཆར། །གསང་བའི་དོན་ལྡན་གང་ཟག་བཞི། །དེ་ཡི་དུས་ན་འབྱུང་བར་འགྱུར། །བསྟན་པ་བཅུད་ཀྱི་མཛོད་འཛིན་ཅིང་། །གསང་སྔགས་མ་ལུས་སྒྲོགས་པའི་བདག །དགོངས་སྤྱོད་ཟབ་མོའི་དོན་དང་ལྡན། །འཛིན་པ་ལོག་པའི་གང་ཟག་གིས། །གསང་བའི་ཐེག་པ་བསྣུབ་པར་འགྱུར། །འདས་པའི་དུས་ན་ཐེག་པ་འདི། །སྐལ་ལྡན་མངོན་རྫོགས་རྒྱལ་པོ་ཡིས། །ཐུགས་ཀྱི་སྲས་བདུན་རྣམས་ལ་བསྟན། །དེ་དག་རིག་པ་མཐར་ཕྱིན་ནས། །དེ་བཞིན་རྩོལ་བྲལ་ཆོས་ལ་བཀོད། །རྡོ་རྗེ་འཛིན་པའི་སྡེ་དཔོན་གྱིས། །སེམས་ཉིད་རིག་པའི་ཐེག་པ་བསྣུབ་བསྒྲུབས་མིན་ནམ། །ཞེས་གསུངས་སོ། །ཡེ་ཤེས་གསང་བའི་རྒྱུད་ལས། ལུང་བསྟན་པའི་ལེའུ་སྟེ་བཅུ་པའོ།། །།དེ་ནསདེབཞིནགཤེགསཔརྣམ་པར་སྣང་མཛད་ཀྱིས་སེམས་དཔའ་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །བྱང་ཆུབ་སེམས་འདི་ཀུན་ཏུ་བཟང་། །མ་ལུས་འདུས་པའི་སྙིང་པོ་མཆོག །ཐེག་པ་མཁའ་འདྲ་བལྟ་བའི་ཀློང་། །རྒྱ་མཚོ་ཡངས་པ་བདེ་བ་ཆེ། །ཀུན་འདུས་ཡེ་ཤེ་དག་པའི་འོད། །ཕྱོགས་མཚམས་ཀུན་ཏུ་གསལ་བར་འཕྲོ། །ཡེ་ཤེས་མེ་ལོང་ཐམས་ཅད་གསལ། །མ་བཅོས་གཟུགས་བརྙན་སྣང་བས་ན། །ཡེ་ཤེས་མེ་ལོང་དག་ཏུ་བཤད། །རང་རིག་ཡེ་ཤེས་འོད་གསལ་ལ། །མཐོ་དམན་རློམ་སེམས་ཆེ་ཆུང་མེད། །བདག་གཞན་གཉིས་མེད་རང་རིག་ལ། །འཛིན་པ་ཀུན་བྲལ་འོད་གསལ་དག །དབྱེར་མེད་ནམ་མཁའ་ལྟ་བུར་ཁྱབ། །སྣང་སྲིད་བྱང་ཆུབ་སེམས་སུ་མཉམ། །མཉམ་པ་རང་གསལ་ཕྱོགས་བཅུར་བརྡལ། །འོད་གསལ་རིག་པ་མཉམ་པར་བཤད། །བཅོས་མེད་དབྱིངས་ཀྱི་རང་བཞིན་ལ། །འཛིན་རྟོག་ཞེན་པའི་ཆོས་མེད་པས། །མི་འགྱུར་ཡེ་ཤེས་རང་བྱུང་ལ། །བདེན་པར་མི་འཛིན་བརྫུན་པའང་མིན། །འཛིན་མེད་རིག་པ་གཉིས་བྲལ་ལ། །གང་ཡང་མི་སྣང་ཀུན་ཏུ་བཟང་། །ཆོས་ཉིད་སེམས་ལ་དངོས་མེད་གསལ། །སྟོང་པ་ཀུན་མཁྱེན་ཡེ་ཤེས་ཐུགས། །དངོས་མེད་ཀུན་ལྡན་སྟོང་ཆེན་པོ། །འཛིན་མེད་རིག་པ་འོད་གསལ་བས། །སྟོང་ཉིད་ཡེ་ཤེས་དག་ཏུ་བཤད། །ཇི་ར་སྣང་བའི་ཆོས་རྣམས་ཀུན། །གཉིས་མེད་རིག་པ་ཀ་དག་ལ། །ཡེ་ཤེས་རོལ་པ་མ་འདྲེས་གསལ། །ཀུན་བཟང་ཆོས་ཉིད་སྤྲོས་མེད་ལ། །རོལ་པའི་འཁོར་ལོ་བསམ་མི་ཁྱབ། །འདུ་ཞིང་འཕྲོ་བ་རྒྱ་མཚོ་བཞིན། །འབར་བའི་ཡེ་ཤེས་རྨད་པོ་ཆེ། །རང་གསལ་རིག་པ་ཀུན་མཁྱེན་ཐུགས། །མཉམ་ལ་མ་འདྲེས་ཀུན་ཏུ་བཟང་། །མ་འདྲེས་གསལ་བའི་ཡེ་ཤེས་སོ། །མི་འདའ་ཕྱག་རྒྱ་ཆེན་པོ་ལས། །རང་བྱུང་མཛད་པ་ཅིར་ཡང་འགྱུར། །ལྷུན་གྲུབ་མཛད་པ་ཕྱོགས་རིས་མེད། །ཀུན་གྱི་སྙིང་པོ་རང་བྱུང་ལ། །ཐུགས་རྗེ་ལྷུན་གྲུབ་ཤར་འགྱུར་ནས། །གདུལ་བྱའི་བྱ་བ་ཀུན་མཛད་གསལ། །དེས་ན་བྱ་བ་ནན་ཏན་ནོ། །རང་གསལ་ཡེ་ནས་མ་བཅོས་པ། །དོན་དེ་ཤེས་པས་ཡེ་ཤེས་ཡིན། །ཆོས་ཉིད་ཀ་དག་འོད་གསལ་སེམས། །དོན་དེ་ཤེས་པས་ཡེ་ཤེས་ཡིན། །མ་བཀག་རང་རིག་རྒྱུ་མེད་གསལ། །རང་བྱུང་ཡེ་ཤེས་འགྱུར་མེད་སེམས། །འོད་གསལ་བསམ་གྱིས་མི་ཁྱབ་པ། ཀུན་བཟང་རོལ་པ་མཐའ་དབུས་མེད། །མི་རྩོལ་མཐའ་བྲལ་དབུ་མའི་སེམས། །མཚོན་འདས་རང་བཞིན་ཞེན་རྟོག་མེད། །གཉིས་མེད་རང་རིག་ཡུལ་དང་བྲལ། །རང་རིག་ཡེ་ཤེས་ཐིག་ལེ་དྲུག །བལྟ་སྤྱོད་དགོངས་པའི་རང་བཞིན་ནོ། །མ་འཕྲོས་ཟླ་བའི་དཀྱིལ་འཁོར་ལྟར། །མི་གཡོ་སེམས་ཉིད་མ་འཕྲོས་པ། །ཐིག་ལེ་སྤྲོས་བྲལ་ཡེ་སངས་རྒྱས། །བྱང་ཆུབ་སེམས་ཀྱི་ཁྱད་པར་ཆེ། །མངོན་པར་སངས་རྒྱས་ཆེ་བ་ལ། །ཡེ་ཤེས་ཐིག་ལེ་ཀུན་ཏུ་བཟང་། །རྣམ་གསུམ་ཐིག་ལེ་ཀུན་བཟང་ཉིད། །ཆོས་ཉིད་དབྱིངས་སུ་སངས་རྒྱས་ཆེ། །ཀུན་བཟང་ཐིག་ལེ་བྱང་ཆུབ་སེམས། །ཐམས་ཅད་ཡིན་པའི་ཆེ་བ་ཉིད། །རྩོལ་བྲལ་ལྷུན་གྲུབ་ཐིག་ལེ་ཉིད། །བདག་ཉིད་ཆེན་པོའི་སངས་རྒྱས་ཡིན། །མཐའ་བྲལ་འོད་གསལ་ཆེན་པོ་ནི། །སངས་རྒྱས་མེད་པའི་ཆེ་བར་བཤད། །མི་འགྱུར་བརྡལ་ཁྱབ་སྤྲོས་པ་བྲལ། །ཅེས་ཀྱང་མི་བསྐྱོད་སེམས་ཉིད་ཆེ། །འདུ་འབྲལ་གཉིས་མེད་རྡོ་རྗེ་ཉིད། །ཕྱི་ནང་མེད་པའི་གསལ་ཁྱབ་ལ། །ཕྱི་ནང་གསང་བའི་སྒོ་ཕུགས་མེད། །ཡུལ་དང་དབང་པོ་གདོད་ནས་དག །མཚན་མ་གཞིལ་བའི་སྐུ་མེད་པའི། །རྡོ་རྗེ་སེམས་དཔའ་མི་འགྱུར་ཆེ། །ཡེ་ཤེས་མཁའ་གསལ་ཀུན་ཏུ་བཟང་། །བསམ་མེད་མཁའ་གསང་ཡེ་སངས་རྒྱས། །ཅིར་ཡང་མི་དགོངས་ཆོས་ཉིད་དང་། །མི་འདའ་ཕྱག་རྒྱར་འགྱུར་མེད་སེམས། །མི་རྩོལ་མཐའ་བྲལ་དབུ་མའི་ལམ། །མཁའ་ལྟར་ཁྱབ་པའི་བདེ་ཆེན་པོ། །རྒྱུ་འབྲས་གཉིས་མེད་ཡེ་ནས་རྫོགས། །ཞེས་གསུངས་སོ། །ཡེ་ཤེས་གསང་བའི་རྒྱུད་ལས། ཡེ་ཤེས་བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་སེམས་དཔའ་རྡོ་རྗེས། །དེ་བཞིན་གཤེགས་པ་རྣམ་པར་སྣང་མཛད་ལ་འདི་སྐད་ཅེས་གསོལ་ཏོ། །ཀུན་ཏུ་བཟང་པོ་ཡེ་ཤེས་ཐུགས། །བདེ་ཆེན་གསུང་གི་འཁོར་ལོའི་བདག །བྱར་མེད་ཡེ་ཤེས་རོལ་པའི་སྐུ། །དབྱེར་མེད་རྡོ་རྗེ་མཆོག་གྱུར་ལ། །འདུས་པའི་འཁོར་ཚོགས་མོས་པས་འདུད། །རྩོལ་བྲལ་ཡེ་ཤེས་གསང་བའི་རྒྱུད། །ཆོས་ཉིད་གསང་བའི་ཆེད་དུ་གསུངས། །བདག་ཅག་འདུས་པའི་འཁོར་ཚོགས་ཀྱི་། །མཚན་གྱི་རྣམ་གྲངས་ཇི་ལྟར་གཟུང་། །ཞེས་གསོལ་པ་དང་། །དེ་ནས་དེ་བཞིན་གཤེགས་པ་རྣམ་པར་སྣང་མཛད་ཀྱིས་བཀའ་སྩལ་པ། །གསང་རྒྱུད་ཐེག་པའི་སྙིང་པོ་འདི། །ཉོན་མོངས་ཞེན་པའི་འབྲེལ་ཐག་ཆོད། །ཆོས་རྣམས་གསལ་བའི་ཡེ་ཤེས་སྒྲོན། །ཀུན་ཏུ་བཟང་པོའི་ཡེ་ཤེས་ཐུགས། །བདེ་ཆེན་མཛེས་པའི་ཡེ་ཤེས་རྒྱན། །གསལ་བའི་ཡེ་ཤེས་གསང་བའི་རྒྱུད། །འདི་ལ་མཐའ་དབུས་མེད་པས་ན། །ནམ་མཁའི་མཐའ་དང་མཉམ་པའི་རྒྱུད། །ཀུན་འདུས་མཉམ་པ་ཆེན་པོ་ཡིས། །གསང་བ་ཀུན་འདུས་རིག་པའི་གཏེར། །རང་བྱུང་འོད་གསལ་ཆེན་པོ་ལ། །ཞེན་པའི་བརྟགས་པ་གདོད་ནས་མེད། །མ་བཅོས་རང་སྣང་རྟོགས་པས་ན། །ཉོན་མོངས་ཞེན་པའི་འཕྲེང་ཐག་གཅོད། །ཐམས་ཅད་སེམས་སུ་འདུས་པས་ན། །སེམས་ཉིད་རང་གསལ་ཡེ་ཤེས་སྒྲོན། །མི་འགྱུར་ལྷུན་གྲུབ་རང་བྱུང་འདི། །ཇི་ལྟར་གནས་ཀྱང་ཀུན་ཏུ་བཟང་། །ཞེན་ཅིང་འཁྲུལ་པ་ཅིར་གྱུར་ཀྱང་། །རང་གསལ་ཡེ་ཤེས་ཀུན་ཏུ་བཟང་། །རིག་པ་བསམ་བྲལ་རྒྱལ་བའི་ཐུགས། །ཕྱོགས་མེད་བཏང་སྙོམས་ཆེན་པོ་ལ། །རྩོལ་བའི་སྡུག་བསྔལ་བྲལ་བས་བདེ། །བདེ་ཆེན་མཚན་ཉིད་ཀུན་ལས་འདས། །ཀུན་གྱི་འབྱུང་གནས་ལྷུན་གྲུབ་ཆེ། །རང་གསལ་ཡེ་ཤེས་དཀྱིལ་འཁོར་ནི། །སྐུ་དང་གསུང་ཐུགས་མཛེས་པའི་རྒྱན། །རང་གནས་ཡེ་ཤེས་བདེ་ཆེན་ཉིད། །རྣལ་འབྱོར་དགྱེས་པའི་རྒྱན་ཞེས་བྱ། །བསམ་མེད་ནམ་མཁའི་མཐའ་ལྟར་བྲལ། །བྱང་ཆུབ་སེམས་ལ་མཐའ་དབུས་མེད། །མི་འགྱུར་ནམ་མཁའ་རྟག་པ་ལྟར། །སེམས་ཉིད་ཡེ་གསལ་གཡུང་དྲུང་ངོ་། །ཐམས་ཅད་བྱང་ཆུབ་སེམས་སུ་འདུས། །ཐམས་ཅད་ཀུན་འདུས་ལྷུན་གྱིས་རྫོགས། །སྣང་སྲིད་འཁོར་བའི་ངོ་བོ་ལ། །གཉིས་མེད་རྒྱལ་བའི་དགོངས་པ་དག །འོད་གསལ་བཏང་སྙོམས་ཆེན་པོར་མཉམ། །བསྟན་པ་བཅུད་འདུས་གསང་ངཛོརིངཏེསྤྱིགྲེངགིསེ་སེགེང་ངསྙིགིངང་བའ་ཐབས། །གསང་མ ད་ ག་པ་ཐུགས་ཀྱ་ག ར། །བསྟན་པ་ ་འ ལ་གསང་རྒྱུད་འད། །གུ་ལང་ལུང་ ་ག ར་ཟ་མྲ ། ང་ འ་འ་མ་བླུགས་པ་བཞན། ། ང་ ་དཀྱལ་དུ་བཙའ་བར་གྱས། །སྲག་དང་བྲལ་བའི་ཁ་བཞིན་སྡོམས། །བསྟན་པའི་ཡང་སྙིང་སྙིང་ལྟར་ཟུང་། །གནས་ནི་བྲག་དང་ཆུ་ལ་སྦོས། །ཞེས་གསུངས་སོ། །ཡེ་ཤེས་གསང་བའི་རྒྱུད་ལས། མཚན་གྱི་རྣམ་གྲངས་བསྟན་པའི་ལེའུ་སྟེ་བཅུ་གཉིས་པའོ།། །།ཡེ་ཤེས་གསང་བ་ཞེས་བྱ་བའི་རྒྱུད་རྫོགས་སོ། །ཤི་སིདྷ་དང་བི་རོས་བསྒྱུར།། །།