Ngb-pt-0094-vol-01-text
Front
Body
གདམས། །རྒྱ་གར་གྱི་མཁས་པ་ཤི་སིདྷ་དང་། །བོད་ཀྱི་བསྡེ་བི་རོ་ཙ་ནས་བསྒྱུར་བའོ།། །། རྒྱ་གར་སྐད་དུ། བོ་དྷི་ཙིརྟི་ས་མརྙ་བྷ་དྲ་བིཕྲི་པ་རྭ་ཀྲ་མོ་ད་ཡ་ཏནྟྲ་ནཱ་མ། བོད་སྐད་དུ།བྱང་ཆུབ་ཀྱི་སེམས་ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ཅེས་བྱ་བ། དཔལ་ཀུན་ཏུ་བཟང་པོ་ཐིག་ལེ་བདེ་བ་ཆེན་པོར་རང་ཤར་བའི་སྐུ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་རིག་པ་རྩལ་གྱི་རྒྱལ་པོ་ཆེན་པོ། ཟང་ཐལ་འོག་མིན་གྱི་གནས་གསང་བ་མཆོག་གི་གཞལ་ཡས་ན་བཞུགས་པའི་ངང་ན་ཐིག་ལེ་ཆེན་པོ་རང་ཉིད་ལ་གཟིགས་ཏེ། ཅོག་བཞག་ཆེན་པོའི་ཏིང་ངེ་འཛིན་ཞེས་བྱ་བའི་ངང་ལ་སྙོམས་པར་ཞུགས་སོ། །དེའི་ཚེ་དུས་དེ་ཉིད་ཁོ་ནར། ངོ་བོ་ཉིད་ཀྱི་ཆོ་འཕྲུལ་ཇི་ལྟར་ཤར་བའི་བདེ་བར་གཤེགས་པ་རྣམས་དང་། །གཞན་ཡང་ཉིད་ལས་མ་འདས་པའི་སྟོང་གསུམ་འཇིག་རྟེན་པའི་འཁོར་ཐམས་ཅད་དང་ཐབས་ཅིག་སྟེ། གཞན་ཡང་གསང་བ་ཆེན་པོ་དེ་རྟོག་པ་དང་ལྡན་པའི་འཁོརརངབཞིནདོནལགནས་པ་དང། རངབཞིནབལྟབཆེནཔོ་དང་། རིག་པའི་སྣང་ཚུལ་ཇི་ལྟ་བར་རྟོགས་པའི་འཁོར་འབའ་ཞིག་གཉིས་སུ་མེད་པར་འདུས་སོ། །དེ་ནས་བཅོམ་ལྡན་འདས་རིག་པ་རྩལ་གྱི་རྒྱལ་པོ་ཆེན་པོ་དེ་ལྷུན་གྲུབ་ཟག་མེད་བདེ་བ་ཆེན་པོ་འདུ་འབྲལ་མེད་པའི་ཏིང་ངེ་འཛིན་ལ་སྙོམས་པར་ཞུགས་སོ། །དེའི་ཚེ་དེའི་དུས་ན། ཉིད་ལས་མི་གཞན་པའི་འཁོར་ཐམས་ཅད་ལྷུན་གྲུབ་འགག་པ་མེད་པར་རང་གསལ་བར་གྱུར་ཏོ། །དེ་ནས་བཅོམ་ལྡན་འདས་རིག་པའི་རྒྱལ་པོས་འདི་སྐད་ཅེས་གསུངས་སོ། །ལྷུན་གྲུབ་འགག་མེད་བདེ་ཆེན་ལ། འཁོར་བ་མྱང་འདས་ཅིར་ཤར་བ། །རིག་པའི་རྩལ་ཡིན་གཞན་ན་མེད། །རྟོགས་པའི་འཁོར་ཚོགས་དང་སེམས་ཀྱིས། །ཅིར་སྣང་ལྷུན་གྲུབ་ཆེན་པོར་གསལ། །ཞེས་གསུངས་པ་དང་།རྟོགས་པ་རང་གསལ་གྱི་ནང་ནས་རྡོ་རྗེ་སེམས་དཔའ་རང་བཞེངས་ནས། འདི་སྐད་ཅེས་གསོལ་ཏོ། །ཀྱེ་ཀྱེ་རིག་པའི་རྩལ་ཤར་བཅོམ་ལྡན་འདས། །གབ་པའི་དབྱིངས་ནས་མངོན་ཕྱུང་སྟེ། །ཕྲིན་ལས་མཛད་པ་ཅིར་ཡང་སྟོན། །ཐུགས་རྗེའི་ཆོ་འཕྲུལ་རིས་དང་བྲལ། །ཐིག་ལེ་ཟག་མེད་ཀུན་ཏུ་བཟང་། །ཟང་ཐལ་ཆེན་པོའི་དབྱིངས་ཉིད་ལས། །རང་བྱུང་ཕྱོགས་མེད་རང་གྲོལ་གྱིས། །གའུ་རིག་པའི་མཐོངས་གསལ་ནས། །གསང་དུ་མེད་པའི་ཚིག་བརྗོད་ནས། །རྟོགས་པའི་འཁོར་ལ་བསྟན་དུ་གསོལ། །ཨེ་མ་ཧོ། །གསུང་དུ་གསོལ་ཞེས་ཞུས་སོ། །དེ་ནས་རིག་པའིརྒྱལཔོཆེནཔོདེས། །རྡོ་རྗེ་སེམས་དཔའ་ལ་འདི་སྐད་ཅེས་བཀའ་སྩལ་པ།རིག་པ་ལྷུན་གྲུབ་ཟག་མེད་བདེ། །མཁའ་ལ་ཉི་མ་ཤར་བ་བཞིན། །འཁོར་འདས་ཀུན་ལ་ཁྱབ་པར་གསལ། །ཁྱབ་གསལ་གཉིས་མེད་ཐིག་ལེ་ཆེ། །ལྷུན་གྲུབ་ཆེན་པོའི་ངོ་བོར་ཤར། །འབད་པ་མེད་པར་ཡེ་སངས་རྒྱས། །འགྱུར་མེད་ཐ་སྙད་རྒྱུ་འབྲས་མེད། །རྣམ་ཀུན་བྱང་སེམས་བདེ་བར་གཤེགས། ཁྲེས་དང་མི་ཤེས་ཐ་སྙད་ཀྱང་། །ལྷུན་གྲུབ་ཉིད་ལས་གཞན་མ་གྲུབ། །འཁོར་བའི་རྐྱེན་འགྱུར་རྣམ་སྨིན་ལས། །འགྲོ་དྲུག་ཉིད་དུ་སྣང་བ་ལས། །ངོ་བོ་མ་ཡིན་རྐྱེན་ལྟར་ཤར། །ཀུན་བརྟགས་རྣམ་རྟོག་མཚན་ཉིད་ཀྱང་། །གང་ལྟར་བརྟགས་པ་དེ་ལྟར་སྣང་། །ཇི་ལྟར་རྟོག་པའི་རྣམ་གྲངས་ཀུན། །གཅིག་ལས་ཡུལ་དུས་ཀུན་ཏུ་རྒྱུ། །དཔེར་ན་ཉི་མའི་ཟེར་བཞིན་དུ། །ཐིག་ལེ་གཅིག་ལས་དུ་མ་མེད། །ལྷུན་གྲུབ་ཟང་ཐལ་རང་བཞིན་ནི། །མཐའ་དང་བྲལ་བའི་རྟོགས་མཐའ་མེད། །རང་གསལ་དགོངས་པར་གནས་པར་བྱའོ། །ལྷུན་གྲུབ་རང་བྱུང་འགག་མེད་ཀྱིས། །འཁོར་འདས་ཆོ་འཕྲུལ་ཉིད་དུ་བསྟན། །ལྷུན་གྲུབ་ཕྱོགས་མེད་འབྲས་བུ་ནི། །རང་བྱུང་ཡེ་ཤེས་ཉིད་ལ་རྫོགས། །རིག་པ་སྤྱི་བླུག་ཆེན་པོར་ཤར། །རྩོལ་མེད་རྩལ་སྤྲུགས་ཀླུང་ཆེན་ལས། །བགྲོད་མེད་ས་ཡི་ཡོན་ཏན་ཤར། །རང་སྣང་དབྱེར་མེད་ཅིག་ཆར་ས། །དེ་ལས་རྩོལ་མེད་འབྲས་བུའི་མཆོག། །རིག་པའི་རྩལ་ཤར་རྣལ་འབྱོར་པས། ཁྲེས་པ་ཆོས་སྐུ་རང་གསལ་ལ། །མ་ཡེངས་ཅོག་བཞག་ཉིད་དུ་བཞག །ཅེས་གསུངས་སོ། །ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལས། གླེང་གཞིའི་ལེའུ་སྟེ་དང་པོའོ།། །།དེ་ནས་རིག་པའི་རྒྱལ་པོ་དེས། རྡོ་རྗེ་སེམས་དཔའ་ལ་འདི་སྐད་ཅེས་གསུངས་སོ། །འཁོར་བའི་སྡུག་བསྔལ་ཅི་ཤར་དང་། །མྱ་ངན་འདས་པའི་བདེ་བ་ཉིད། །རིག་པའི་ཡེ་ཤེས་རྩལ་དུ་རྫོགས། །རྣམ་རྟོག་ཅི་སྐྱེ་རིག་པའི་རྩལ། །རང་བྱུང་ཡེ་ཤེས་འགག་མེད་ལ། །རྟོག་དང་རིག་པ་ཐ་དད་མེད། །ལྷུན་གྲུབ་ཕྱོགས་མེད་རིག་པའི་རྩལ། །ཀུན་སྤངས་ཀུན་གྱི་དངོས་གཞིར་ཤར། །གཟུང་འཛིན་ཕྲ་རགས་རྟོག་པ་རྣམས། །རོལ་པ་ཆེན་པོའི་ཆོ་འཕྲུལ་ཡིན། །ཡང་དག་དོན་ལ་བརྗོད་དུ་མེད། །མ་བཅོས་གོ་རྟོགས་མི་སྐྱེ་བས། །བརྗོད་མེད་བརྗོད་བྱ་ཚིག་གིས་མཚོན། །ཀུན་བཟང་ལྷུན་གྲུབ་གདལ་བ་ལ། །འཁོར་དང་མྱང་འདས་རྣམ་པར་དག །ཚིག་དང་ཚིག་དོན་བརྗོད་བྱ་བྲལ། །བྱ་བཙལ་བྲལ་ཞིང་གཉེན་པོ་མེད། ཤེས་པ་རང་གསལ་རང་ལ་ཞོག །བྱ་བ་བཏང་བའི་སྐྱེས་བུའམ། །རྒྱ་མཚོར་སྣང་བའི་རྫས་ལྟ་བུ། །བྱེད་སྤྱོད་མེད་པར་རང་བཞིན་གསལ། །གཟུང་འཛིན་རྒྱུ་འབྲས་གང་ཡང་མེད། །དེ་ལྟ་ཉིད་ཀྱིས་འབྲས་བུ་ཐོབ། །དྲང་དོན་རྩོལ་སེམས་ཁར་མ་ལུས། །རྣམ་རྟོག་ཀུན་བརྟགས་མཚན་མ་རྣམས། །རང་བྱུང་རང་གསལ་ཉིད་ཀྱི་ངང་། །ཆོས་ཉིད་ལྷུན་གྲུབ་འགག་མེད་ལས། །ཆོས་རྣམསརངབཞིནཉིདདུགནས། །དཔེར་ན་རིན་ཆེན་གསེར་གླིང་ན། །ས་རྡོ་མི་གནས་གསེར་དུ་སྣང་། །སེམས་ཉིད་རང་བྱུང་ཡེ་ཤེས་ལ། །ཅིར་སྣང་ཅི་སྲིད་བདེ་ཆེན་འབར། །དཔེར་ན་སྐས་ཀྱི་གདང་བུ་ལྟར། །རིམ་པར་བགྲང་མེད་སེམས་ཉིད་ལ། །བགྲོད་ཅོལ་ལམ་གྱི་ཐོགས་རྒྱུ་མེད། །རང་བྱུང་རང་ཤར་རྣམ་གྲོལ་ལམ། །བགྲོད་མེད་རྩོལ་བྲལ་རིག་པའི་ཀླུང་། །སྔ་ཕྱི་མེད་པར་མངོན་མཐར་ཕྱིན། །རིག་པ་རྩལ་གྱི་རང་བཞིན་ནི། །ཡེ་ཤེས་ཉི་མ་མངོན་ཤར་བས། །ཤར་བ་ཉིད་ན་ནུབ་པ་མེད། །ཀུན་བཟང་ཐིག་ལེ་ཆེན་པོ་ཉིད། །མ་བཅོས་ལྷུན་གྲུབ་གཡོ་བ་མེད། ་སྨྱུ་འབྲས་རྟོག་འཛིན་ཅི་ཡང་མེད། །ཡུལ་མེད་སྒྱུ་མ་ཡུལ་ལ་རོལ། །སེམས་ཉིད་ནམ་མཁའི་ཉི་མ་འདྲ། །རང་བྱུང་ལྷུན་གྲུབ་གདལ་བ་མེད། །བླང་དོར་གཉིས་མེད་འབད་རྩོལ་མེད། །མདོར་ན་རིག་པའི་རྩལ་ཞེས་བྱ། །མཁའ་ལ་ཉི་མ་ཤར་བ་བཞིན། །འདིར་གསལ་འདིར་མི་གསལ་དང་བྲལ། །ཀུན་ལ་ཁྱབ་ཅིང་དབྱེ་བསལ་མེད། །དེ་བཞིན་ལུང་དང་མན་ངག་དང་། །རིག་པ་དག་གི་རྩལ་དག་གིས། །སྣང་སྲིད་འཁོར་འདས་ཆོས་རྣམས་ཀུན། །སེམས་ཉིད་ཡིན་པར་ཐག་ཆོད་ན། །བྱང་སེམས་བདེ་བ་ཀུན་ལ་བརྡལ། །བྱང་ཆུབ་སེམས་ཀྱིས་བལྟ་ཐག་ཆད། །སེམས་ཉིད་ཉི་ཟེར་སྤྲོ་ཞིང་བསྡུ། །རིག་པ་རྩལ་གྱི་རང་བཞིན་ནི། །གང་ཡང་ཡིན་ནོ་ཅིར་ཡང་འཆར། །དེ་ཡང་བྱང་སེམས་བདེ་བའི་ཀློང་། །ཆོས་སྐུ་རང་གསལ་ངང་ལ་བཞག །བསམ་དང་བྲལ་བའི་ཡེ་ཤེས་མཐོང་། །རང་བྱུང་རང་གསལ་རྫོགས་པའི་དོན། །མཐའ་དབུས་བྲལ་བས་ཡེ་སངས་རྒྱས། །གྱི་ན་རྩོལ་བྲལ་དབུ་མའི་ལམ། །ཞེན་ཞིང་བྲལ་བས་གཟའ་གཏད་མེད། །ཕྱོགས་མེད་ལྷུན་འབྱམས་ཀུན་བཟང་འདིས། །འཁོར་འདས་རང་ལུགས་གཞི་བྱས་ནས། །རང་བྱུང་གཉིས་མེད་བདེ་དོན་རྟོགས། །རང་རིག་རང་གསལ་བླང་དོར་བྲལ། །རྣམ་དག་ལམ་ཆེན་དགོངས་པའི་ཕུགས། །ཁྱུང་ཆེན་དར་མ་མཁར་ལྡིང་བཞིན། །སྤྲོར་མེད་བསྡུར་མེད་རང་སར་གྲོལ། །རྩོལ་བསྒྲུབ་མེད་ཅིང་གཡང་ས་བྲལ། །གཡང་ས་ཉིད་ཀྱང་སེམས་སུ་ཤེས། །འཁོར་བ་ཉིད་ཀྱང་ཡེ་ཤེས་ལ། །ཡེ་ནས་འཁོར་འདས་གཉིས་སུ་མེད། །ལྷུན་གྲུབ་ཉིད་ལས་གཞན་དུ་མེད། །རང་རིག་ཅིར་ཡང་མ་གྲུབ་པས། །ཞེན་བློ་བསམ་འདོད་ཀུན་དང་བྲལ། །རིག་པ་མཐའ་བྲལ་སྟོང་པ་ཉིད། །འོད་གསལ་ནམ་མཁའི་རང་བཞིན་འདྲ། །གཟུང་འཛིན་མེད་པས་མཉམ་པའི་ངང་ རོལ་པའི་ཆོ་འབྲུལ་ཅིར་ཡང་སྟོན། །ཆོ་འཕྲུལ་བསྟན་ཡང་རང་རྒྱུད་བྲལ། །རིག་པ་སྒྱུ་མ་ཆུ་ཟླ་འདྲ། །ཀུན་ཏུ་འཆར་ཞིང་ལྷུན་གྱིས་གྲུབ། །འདི་ཡིན་འདི་མིན་ཐ་སྙད་བྲལ། །རིག་པ་མ་བསླད་དྲི་མ་བྲལ། །ནམ་མཁའ་ལྟ་བུའི་རིག་པ་ལ། །ནམ་མཁའ་དབྱིངས་ལྟར་བསམ་དང་བྲལ། །བསམ་མེད་བློ་བདེ་ནམ་མཁའབཞིན། །རངརྒྱུད་ཡེ་ཤེས་བསམ་དང་བྲལ། །མི་སྐྱེ་མི་འགག་ཅིར་མི་གནས། །རིག་པའི་རྒྱལ་པོ་བལྟ་བ་ཡིན། །བལྟར་མེད་ཡེངས་མེད་བལྟ་བ་ཡི་། །སྔ་ཕྱི་དུས་ལས་མ་དམིགས་ཏེ། །འགྱུར་མེད་སེམས་ཀྱི་གཡུང་དྲུང་ཡིན། །ཞེ་འདོད་དག་ལས་འབྱུང་མི་སྲིད། །འདོད་པ་མེད་ཅིང་ལེན་པ་དག །ལྷུན་གྲུབ་བདེ་འབྱམས་ཡངས་དོག་མེད། །རང་གྲོལ་དག་པ་ཆེན་པོ་ལ། །འཕོ་འགྱུར་མེད་པས་རྡོ་རྗེ་འདྲ། །རྣམ་རྟོག་རླུད་གིས་བསྐྱོད་གྱུར་ཀྱང་། །ལྷུན་གྲུབ་ངང་ལས་གཡོས་པ་མེད། །གཞི་འཛིན་རིག་པ་རྒྱ་མཚོ་བཞིན། །ཕྱི་ནང་གསང་བ་ཀུན་གྱི་དངོས། །མཐའ་དབུས་མེད་ཅིང་ཕྱོགས་དང་བྲལ། །རང་བྱུང་འགག་མེད་བལྟ་བ་ལ། །ལམ་དང་ལམ་གྱི་རྩོལ་བ་མེད། །རྡོ་རྗེ་ཉི་ཆེན་འབར་བ་ལྟར། །སྐྱེ་འཇིག་འཕོ་འགྱུར་ནུས་མཐའ་མེད། །རིན་ཆེན་གླིང་དང་ཉི་མ་ལྟར། །རང་གསལ་འགག་མེད་རྟོག་དང་བྲལ། །འཁོར་བའི་གནས་ཉིད་ཡེ་སངས་རྒྱས། །རང་སེམས་རིག་པ་གང་སྣང་བ། །བསམ་པ་ཅི་འགྱུས་ཡེ་ཤེས་ངང་། །ལྷུན་གྲུབ་གཞི་འཛིན་རིག་པ་ལ། །སེམས་ཅན་ཆོས་ཉིད་གང་ཡང་མེད། །དབུས་དང་མཐའ་བྲལ་དཀྱིལ་དུ་རྫོགས། །རྟོག་པ་མ་ཡིན་ཆད་མཐའ་མིན། །མི་རྟག་མ་ཡིན་རྟག་མཐའ་མེད། །ཤེསཔ་མི་འགག་འདོད་པ་མིན། །བྱ་བྱེད་མེད་ཅིང་རྩོལ་སེམས་དག །བགྲོད་མེད་རྩོལ་བྲལ་རིག་པའི་ཀློང་། །ཕྱོགས་བྲལ་ཕྱོགས་ལ་གནས་པ་མེད། རང་རིག་ཡུལ་མེད་ཡུལ་དང་བྲལ། །ལེན་མེད་འཛིན་མེད་འདོད་པ་མེད། །རང་བྱུང་འགག་མེད་མི་ལྡན་ན། །ཕྱོགས་འཛིན་མཐའ་ལ་ཞེན་པས་འཁྲུལ། །ཕྱོགས་མེད་རིག་པ་རང་ཤར་འདི། །ཐ་སྙད་མི་ལ་མི་གནས་ཏེ། །སྐྱེ་འགག་མེད་པར་རྣམ་བརྟགས་ཤིང་། །བཀྲི་དྲང་དྲང་འཐོམས་སེམས་ཅན་ལ། །ཐུགས་རྗེས་བཏེགས་ནས་འཁོར་ལོ་བསྐོར། །ཐ་སྙད་ལམ་གྱིས་འགྲོ་བ་འདྲེན། །སྣ་ཚོགས་སྣང་བའི་ཆོས་རྣམས་ཀུན། །སྐུ་གསུང་ཐུགས་ལས་མ་གཡོས་པའི། །མི་ཟད་འཁོར་ལོ་རྣམ་གསུམ་པོ། །ནམ་མཁའ་ལྟ་བུ་ཡེ་ནས་བསྐོར། །ཟག་མེད་བདེ་བ་ཡེ་ཤེས་སྐུ། །ལྷུན་གྲུབ་ཆེན་པོ་བསམ་མི་ཁྱབ། །གང་ཞིག་འགྲོ་བའི་སྒྲ་སྐད་རྣམས། །ཟག་མེད་བདེ་ཆེན་རིག་པའི་གསུང་། །གང་ཞིག་ཁ་དོག་དབྱིབས་སྣང་བ། །སྐུ་མཆོག་རྒྱན་གྱི་འཁོར་ལོ་ཟབ། །སེམས་ཉིད་དབྱེར་མེད་རྡོ་རྗེའི་ཐུགས། །གཉིས་སུ་མེད་པས་ཀུན་ཏུ་བཟང་། །སྐུ་གསུམ་མི་འབྲལ་བདེ་བ་ཆེ། །སེམས་ཉིད་ཡེ་ནས་སངས་རྒྱས་པས། །རྩོལ་བ་མེད་པར་ལྷུན་གྱིས་གྲུབ། འདོད་དགུ་བསྒྱུར་བའི་རིན་པོ་ཆེ། །བཀོལ་བ་མེད་ཅིང་དབྱིངས་ན་གསལ། །ཡི་གེ་མེད་ཅིང་ཚིག་ལས་འདས། །རིག་པ་རྩལ་ཞེས་བྱ་བ་ནི། །སྣང་སྲིད་འཁོར་འདས་ཆོས་རྣམས་ཀུན། །སེམས་མ་ཡིན་པའི་ཆོས་ཡོད་མིན། །ཆོས་རྣམས་མ་ལུས་ཐམས་ཅད་ཀུན། །རིག་པའི་རྩལ་དུ་རང་ཤར་བས། །དེ་ཉིད་ཆོས་སྐུ་རང་གསལ་བ། །ཡེངས་དང་མ་ཡེངས་མཐའ་ལས་གྲོལ། །རིག་པ་རང་གསལ་ཡེ་ཤེས་ལ། །རྟོགས་པ་ངེས་མེད་དོན་གྱི་མཆོག །རང་ཤར་རིག་པ་དབྱིངས་ན་གསལ། །རིག་པ་བརྡལ་ཁྱབ་རང་བཞིན་ལ། །རང་བྱུང་ཡེ་ཤེས་ངང་གིས་གསལ། །ཆོས་སྐུ་རང་གསལ་ངང་ཉིད་ལ། །ཞེན་འཆིང་མེད་ཅིང་དམིགས་དང་བྲལ། །རིག་པ་རྩལ་གྱི་རང་བཞིན་ནི། །དཔེར་ན་མཁའ་ལ་ཉི་ཤར་བཞིན། །རིག་པ་རང་གསལ་ཕྱོགས་དང་བྲལ། །ཕྱོགས་རྣམས་མེད་ཅིང་ཀུན་ལ་ཁྱབ། །སྣ་ཚོགས་རིག་པའི་ཆོས་སྐུར་གསལ། །ཞེས་གསུངས་སོ། །ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལས། །རིག་པ་རྩལ་གྱི་ལེའུ་སྟེ་གཉིས་པའོ།། །།དེ་ནས་རིག་པའི་རྒྱལ་པོ་ཀུན་ཏུ་བཟང་པོ་དེས། རྡོ་རྗེ་སེམས་དཔའ་ལ་འདི་སྐད་ཅེས་གསོལ་ཏོ། །ཀྱེ་ཀྱེ་དགོངས་པ་རང་ཤར་དབྱིངས་ན་ག་་ལ། །དོན་དམ་མ་རྟོགས་སྣང་མེད་ལ། །གབ་པའི་དོན་ཆེན་མངོན་དུ་ཕྱུང་། །བླ་མས་དགོངས་པའི་དབྱིངས་བརྟོལ་བའི། །ཚད་མ་ངག་ལྡན་བླ་མ་ཡིས། །མན་ངག་བདུད་རྩི་བཅུད་དུ་བསྟན། །བསླད་པས་མི་སློད་ཆོས་སྐུ་ལ། །རྣམ་རྟོག་ཀུན་བརྟགས་ག་ལ་ཡོད། །གསེར་ལ་གཡའ་བྱུང་གསེར་ཉིད་བསྒྲིབ། །གཡའ་བྱུང་གསེར་བས་འདས་པ་མེད། །ཐིག་ལེས་ཆོས་སྐུ་ཁྱབ་པར་གསལ། །དཔེར་ན་འཁོར་ལོས་སྒྱུར་རྒྱལ་ལ། །མཚན་དཔེ་ཞེན་མེད་རང་ལ་ཚང་། །དམིགས་ཕྱེད་རྒྱན་ཆ་རང་ལ་གསལ། །དེ་བཞིན་སེམས་ཅན་སེམས་ཉིད་ལ། །ཐིག་ལེ་ཆེན་པོ་ངོ་སྤྲོད་ན། །མ་བསླད་ཆོས་སྐུ་ངང་གིས་གསལ། །ཐིག་ལེ་ཆོས་སྐུ་རང་གསལ་ལ། །མཚན་དཔེ་ཞེན་མེད་རང་ལ་ཚངས། །ངོ་བོ་ཉིད་ནི་དམིགས་སུ་མེད། །གར་ཡང་མ་གཡོས་འགྱུར་བ་མེད། །ཉམས་སུ་བླང་མེད་གཟའ་གཏད་བྲལ། །སྐྱེ་མེད་འགག་མེད་ཤར་ནུབ་མེད། །གར་མཐོང་ཅིར་གསལ་ཆོས་སྐུར་མཐོང་། །གང་དུའང་མ་བགྲོད་ཀློང་དུ་གནས། །འབྱུང་འཇུག་མེད་ཅིང་གཞག་བྱ་བྲལ། །འདས་དང་མ་འོངས་ད་ལྟ་མྲ །སྣང་ཞེན་མེད་ཅིང་བགྲོད་དུ་མེད། །རང་བྱུང་ཡེ་ཤེས་རང་གསལ་བས། །མི་མཐུན་ཕྱོགས་དང་གཉེན་པོ་མེད། །དཔེར་ན་དམུས་ལོང་མིག་ཕྱེ་བས། །རང་ལུས་གཞན་ནས་བཙལ་མི་དགོས། །དེ་བཞིན་ཐིག་ལེ་ཆེན་པོ་ཡང་། །མཚན་མ་ཆོས་སྐུར་ངོ་ཤེས་ན། །མི་མཐུན་མེད་པས་གཉེན་པོ་མེད། །ཆོས་སྐུ་རང་གསལ་གདེང་རྙེད་ན། །བགྲོད་རྩོལ་འབད་པ་ག་ལ་ཡོད། །དམ་པར་བལྟ་མེད་ཞེན་འཆིང་མེད། །ཕྱོགས་རྣམས་མེད་ཅིང་ཕྱོགས་དང་བྲལ། །དཔེར་ན་ནམ་མཁའི་རང་བཞིན་ལྟར། །རང་གི་ངོ་བོ་རང་གསལ་ལྟར། །རང་གསལ་ཉིད་ལ་གནས་པ་མེད། །དམིགས་མེད་མཚན་མ་ཅིར་མི་གནས། །སྣང་སྟོང་ཀུན་གསལ་ཡེ་ཤེསསྐུ། །ཐིག་ལེ་རང་གསལ་རང་བཞིན་ལ། །སྣང་དང་སྟོང་པ་གཉིས་སུ་མེད། །དངོས་པོར་སྣང་བའི་ཐ་སྙད་རྣམས། །སྣང་ཞེས་ཐ་སྙད་ཅི་བྱུང་ཡང་། །མཚན་མ་རང་གྲོལ་ཐ་སྙད་བྲལ། །རྣམ་རྟོག་ཡེ་ཤེས་དགོངས་པར་ལྡན། །འཁོར་དང་མྱ་ངན་འདས་རྣམས་ཀུན། །གཉིས་ཀ་ཡེ་ཤེས་རང་གསལ་ལ། །དགག་སྒྲུབ་མེད་ཅིང་སྤང་བླང་མེད། །འབྱུང་འཇུག་མེད་ཅིང་རྣམ་བྲལ་མེད། །ཐ་སྙད་མེད་ཅིང་སྙིང་པོ་མེད། །དག་དང་མ་དག་ཚིག་མཐའ་བྲལ། །གང་ཡང་བདེ་དང་སྡུག་བསྔལ་མེད། །རྩོལ་བ་མེད་ཅིང་སྤྱོད་མཐའ་བྲལ། །བྱ་བྱེད་མེད་ཅིང་ཆོས་སྐུར་གསལ། །བྱེད་པ་མེད་ཅིང་འཆིང་གྲོལ་དག །བདག་གཞན་ཡེ་ནས་གཉིས་སུ་མེད། །འགྲོ་བ་རིགས་དྲུག་བདེར་གཤེགས་ཤིང་། །ཡོད་མེད་མཚན་མ་དབྱེར་མེད་ལ། །བླང་དོར་དབྱེ་བསལ་ངང་གིས་བྲལ། །མ་ལུས་ཆོས་རྣམས་ཐམས་ཅད་ཀུན། ཁེས་པ་ཆོས་སྐུར་རང་གསལ་བས། །ཀུན་ཏུ་བཟང་པོའི་དགོངས་པ་ལ། །གར་ཡང་མ་གཡོས་ཆོས་ཉིད་ཡིན། །རང་བྱུང་ཉིད་དུ་རང་གྲོལ་བས། །གཞན་དག་རྩོལ་བསྒྲུབ་ག་ལ་ཡོད། །སོ་སོར་རྟོགས་པའི་ཤེས་རབ་ཀྱིས། །ཐེག་པ་ནོ་བརྩེགས་རང་བྱུང་བྲལ། །རང་བྱུང་ཐིག་ལེ་གཅིག་ཏུ་འདུས། །ཐིག་ལེ་མི་རྟོག་རང་བཞིན་གསལ། །ཆོས་སྐུ་རྡོ་རྗེ་འགྱུར་མེད་ལུང་། །རང་བྱུང་ཡེ་ཤེས་རང་ལགས་པས། །ཐམས་ཅད་ཡེ་ཤེས་ངོ་བོར་གསལ། །ཞེས་གསུངས་སོ། །ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལས། གབ་པ་མངོན་དུ་ཕྱུང་བའི་ལེའུ་སྟེ་གསུམ་པའོ།། །།དེ་ནས་ཡང་རང་བྱུང་རིག་པའི་རྒྱལ་པོ་ཀུན་ཏུ་བཟང་པོ་དེས། རྡོ་རྗེ་སེམས་དཔའ་ལ་འདི་སྐད་ཅེས་གསོལ་ཏོ། །རང་བྱུང་ཡེ་ཤེས་འགག་མེད་ལ། །བཀག་པས་མི་ཁེགས་ཡེ་ཤེས་ཤར། །ཟང་ཐལ་ཆེན་པོའི་རང་བཞིན་ནི། །རང་གསལ་གང་དུ་མི་རྟོག་ཕྱིར། །བཙལ་མེད་རིག་པའི་ཤུགས་ལས་འབྱུང་། །དཔེར་ན་གླང་ཆེན་སྨྱོན་པ་ལྟར། །བཏགས་བྲོས་བཏང་ན་རང་ལྡོག་ལྟར། །རྣལ་འབྱོར་ཤེས་པ་ཡན་བཏང་ན། །མ་བཙལ་གནས་ལུགས་ངང་དུ་ལྡོག །རང་བྱུང་མི་འགག་རྩལ་དུ་ཁྱེར། །གང་ལའང་མ་ཆགས་ཐོགས་པ་མེད། །རང་ཤར་ཆེན་པོའི་ལྟ་བ་ལ། །དོན་འགྱུར་ཉམས་སུ་བླང་པ་མེད། །ཡེ་ཤེས་ཆེན་པོའི་ཆོ་འབྲུལ་ཡིན། །རང་བྱུང་རང་གསལ་ཟང་ཐལ་ཡིན། །ཟང་ཐལ་ཉིད་ལ་གཟུང་དུ་མེད། །འཛིན་མེད་རིག་པ་ཡེ་ཤེས་ཤར། །འཁྲུལ་རྟོག་སྡུག་བསྔལ་སྣ་ཚོགས་ཀྱང་། །མྱང་རྒྱུ་མེད་པར་ཤུགས་ལ་སྣང་། །རྩོལ་མེད་རང་བྱུང་རང་ས་ཟིན། །འདི་ལ་ཆེད་དུ་གཟུང་དུ་མེད། །འདི་ལ་ཉམས་སུ་བླངས་དང་བྲལ། །འདི་ལ་རྟོག་པས་དགག་ཏུ་མེད། །ཡེ་ཤེས་རང་ཤར་ལྟ་བའི་གདེངས། །རྩོལ་བ་མེད་པ་སྒོམ་པའི་མཆོག །བཙལ་མི་དགོས་པས་འབྲས་བུའི་དོན། །ཞེས་གསུངས་སོ། །ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལས། ཡེ་ཤེསཟང་ཐལ་གྱི་ལེའུ་སྟེ་བཞི་པའོ།། །།དེ་ནས་རིག་པའི་རྒྱལ་པོ་ཀུན་ཏུ་བཟང་པོ་དེས། རྡོ་རྗེ་སེམས་དཔའ་ལ་འདི་སྐད་ཅེས་བཀའ་སྩལ་ཏོ། །རྒྱལ་འགྲོ་ལམ་པའི་སེམས་ཅན་རྣམས། །ལྷུན་གྲུབ་ངང་ལ་དབྱེར་མེད་པས། །ཐམས་ཅད་མཁྱེན་པའི་སྤྲུལ་སྐུ་ཡིན། །ཐུག་ཕྲད་ཉིད་དུ་ཡེ་སངས་རྒྱས། །མ་བཅོས་སྐུ་གསུང་འཁོར་ལོ་བསྐོར། །ཆོས་རྣམས་ཀུན་བཟང་རོལ་པར་ཤར། །གང་ཡང་མ་ཡིན་ཆོས་ཀྱི་སྐུ། །གཞན་དུ་མི་རྟོག་བཙལ་དུ་མེད། །གང་ཡང་མ་སྤངས་ཀུན་ཏུ་རོལ། །དཔེར་ན་སྐྱེས་བུ་ངོ་ཤེས་དང་། །ཕྲད་པའི་དུས་ན་ཐེ་ཚོམ་མེད། །རྣལ་འབྱོར་དྲན་རིག་ཅི་འགྱུས་པ། །ཡེ་ཤེས་ཟང་ཐལ་ཆོས་སྐུར་ཤེས། །གང་ཡང་མ་སྤངས་རང་སར་གྲོལ། །གཞན་དུ་སྐད་ཅིག་ཙམ་ཡང་མེད། །ཐིག་ལེ་ཐུག་ཕྲད་ཆོས་ཀྱི་སྐུ། །རང་བཞིན་མི་འགྱུར་ཀ་དག་པའི། །སྤང་བྱ་སྤོང་བྱེད་གཉིས་སུ་མེད། །འབྲས་བུ་ཀུན་བཟང་གཏན་ཚིགས་ཡིན། །ཞེས་གསུངས་སོ། །ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལས། ཆོས་ཉིད་ཐུག་ཕྲད་ཀྱི་ལེའུ་སྟེ་ལྔ་པའོ།། །།དེ་ནས་བཅོམ་ལྡན་འདས་རིག་པའི་རྒྱལ་པོ་ཀུན་ཏུ་བཟང་པོ་དེས། །རྡོ་རྗེ་སེམས་དཔའ་ལ་འདི་སྐད་ཅེས་བཀའ་སྩལ་ཏོ། །བདེ་ཆེན་ལྷུན་གྲུབ་ཅོག་བཞག་ལ། །རྩོལ་མེད་རིག་པ་བསམ་དང་བྲལ། །གཟུང་འཛིན་གཉེན་པོ་རང་སར་གཞག །མཉམ་ཉིད་ཡེ་ཤེས་འབྲས་བུའི་མཆོག །ཅོག་བཞག་ཆེན་པོའི་ངང་དུ་གསལ། །དཔེར་ན་རྒྱ་མཚོ་དངས་པ་ལ། །གདོས་པ་མེད་པར་སྣང་སྲིད་གསལ། །རྣལ་འབྱོར་རང་རིག་ཅིར་གསལ་བ། །མིང་དང་གདགས་གཞི་གང་ཡང་མེད། །གདགས་གཞི་བྲལ་བ་དོན་གྱི་མཆོག །མཉམ་ཉིད་རང་གསལ་རིག་པའི་ཀློང་། །སྣང་བ་ཉིད་ན་གྲུབ་པ་མེད། །རང་རིག་སྟོང་ཉིད་མི་གཡོ་བ། །དེ་ལ་མི་རྩོལ་རྣལ་འབྱོར་མཆོག །དབང་པོའི་ངོ་ལ་གང་སྣང་བ། །མི་རྟོག་ཅིར་གསལ་གདགས་གཞི་བྲལ། །སྣང་མེད་མི་འགག་ཅིར་མི་དགོངས། །གཉེན་པོ་མེད་པས་འབད་རྩོལ་བྲལ། །ཞེས་གསུངས་སོ། །ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལས། མཉམ་ཉིད་ཅོག་བཞག་གི་ལེའུ་སྟེ་དྲུག་པའོ།། །།དེ་ནས་ཡང་བཅོམ་ལྡན་འདས་རིག་པའི་རྒྱལ་པོ་ཀུན་ཏུ་བཟང་པོ་དེས། རྡོ་རྗེ་སེམས་དཔའ་ལ་འདི་སྐད་ཅེས་བཀའ་སྩལ་ཏོ། །ཉོན་ཅིག་སེམས་དཔའ་རྡོ་རྗེ་ཁྱོད། །དབང་པོ་ཡང་རབ་དོན་རྫོགས་ནས། །འབྲིང་དང་དམན་པའི་དོན་བཤད་ཉོན། །ཆོས་སྐུ་ཉག་གཅིག་དངོས་མཚན་མེད། །དངོས་མེད་ཆོས་སྐུ་ཚོལ་འདོད་ན། །དཔེར་ན་གྲོང་རྒྱུའི་ཁྱི་རྐུན་གྱིས། །ཅང་མེད་ཁང་སྟོང་བཙལ་གྱུར་ཀྱང་། །འདོད་པ་མ་རྙེད་སུན་ཕྱིན་ནས། །ཞེན་ལོག་སླར་ལ་ཉལ་བ་ལྟར། ། རྣལ་འབྱོར་རང་རིག་ཅིར་སྐྱེས་ལ། །དབང་པོ་མི་དགག་ནང་དུ་བལྟ། །ཅིར་སྣང་བརྟགས་ཤིང་བདག་པོར་བལྟ། །གཟུང་འཛིན་གང་སྐྱེས་རྩ་བ་མེད། །ནང་དུ་བལྟ་ཞིང་ལྟ་མཁན་བཙལ། །བཙལ་བས་ཅིར་ཡང་མ་རྙེད་ཅིང་། །གང་དུའང་མ་མཐོང་མིང་མ་ཐོགས། །རྗེས་མེད་ནམ་མཁའི་བྱ་ལམ་འདྲ། །སྣང་མེད་རང་བྱུང་ནམ་མཁའ་འདྲ། །དེ་ལ་གནས་༄༅ པ་འབྲས་བུའི་མཆོག །ཅེས་གསུངས་སོ། །ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལས། ཚོལ་བ་རྗེས་མེད་ཀྱི་ལེའུ་སྟེ་བདུན་པའོ།། །།དེ་ནས་རིག་པའི་རྒྱལ་པོ་ཀུན་ཏུ་བཟང་པོ་དེས། །རྡོ་རྗེ་སེམས་དཔའ་ལ་བཀའ་སྩལ་པ། །ཆོས་སྐུ་ཡེ་ནས་དམིགས་གཏད་མེད། །དམིགས་གཏད་མེད་པའི་དོན་འདོད་ན། །དཔེར་ན་མིག་ནད་ཅན་དག་གིས། །གང་ཡང་རུང་བའི་དངོས་པོ་ལ། །རྒྱང་མིག་བལྟས་ཤིང་ཡིན་མིན་བརྟགས། །བརྟགས་པའི་རྗེས་ལ་དམིགས་པ་འཚུབས། །གང་མཐོང་མ་ཤེས་མདོངས་པ་ལྟར། །རྣལ་འབྱོར་སྐྱེས་བུ་གང་ཞིག་གིས། །རྫས་ཀྱི་རྣམ་པ་གང་རུང་བ། །འབྲུ་ཚུགས་བལྟས་ཤིང་མ་གཏང་ན། །དྲན་མེད་འཛིན་མེད་ལོང་གིས་སྐྱེ། །མ་བཏང་ཡུན་བསྲིང་ཡེ་ཤེས་འཆར། །ཡེ་ཤེས་མཁའ་མཉམ་ནམ་མཁའ་འདྲ། །དྲན་པ་མེད་པའི་བློང་བློང་པོ། །མྱོང་མེད་ཉམས་སྐྱེ་དྲན་རིག་འགག །དམིགས་པ་རྗེས་མེད་གྱི་ནར་འདུག །བཏང་སྙོམས་ཆེན་པོའི་ཆོས་སྐུ་ཐོབ། །ཅེས་གསུངས་སོ། །ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལས། དམིགས་པ་རྗེས་མེད་གྱི་ལེའུ་སྟེ་བརྒྱད་པའོ།། །།དེ་ནས་རིག་པའི་རྒྱལ་པོ་ཀུན་ཏུ་བཟང་པོས། རྡོ་རྗེ་སེམས་དཔའ་ལ་བཀའ་སྩལ་པ། དཔེར་ན་ཁྱུང་ཆེན་རྩོལ་མེད་ཀྱང་། །རྩོལ་བ་ཡིད་ཙམ་སྟེགས་ལ་བརྟེན། །རྟེན་མེད་ཡེ་ཤེས་ཐོབ་འདོད་ན། །དཔེར་ན་ཁྱི་གསར་རྟོད་བཏགས་ན། །གང་དུ་མི་འགྲོ་དེར་འཁོར་ལྟར། །གང་ཡང་རུང་བའི་མཚན་མའམ། །དམིགས་དང་བཅས་པའི་མཚན་མེད་ལ། །ཡེངས་པ་མེད་པར་བློ་གཏད་ནས། །མ་གོམས་བར་དུ་བརྟག་པར་བྱ། །གོམས་ཤིང་དམིགས་པ་གསལ་གྱུར་ནས། །ནུས་པ་ཕྲ་མོ་འབྱིན་ནུས་ན། །གདེང་གིས་ཟིན་བའི་བླ་མ་ཡིས། །ཀུན་བཟང་ལྷུན་གྲུབ་དགོངས་པའི་དོན། །དུས་དེ་ཁ་ནར་ལུང་ཕོག་ན། །སྙན་ཁུང་བརྒྱུད་པའི་མན་ངག་གིས། །རང་བྱུང་ཡེ་ཤེས་ཤུགས་ལས་འཆར། །མཚན་བཅས་མཚན་མེད་རང་སར་གྲོལ། །ཁྱུང་ཆེན་ནམ་མཁར་ལྡིང་བ་འདྲ། །དེ་ལྟར་མ་ཤེས་རྟོག་མེད་ན། །གང་ཡང་རུང་བའི་མཚན་མའམ། །བློ་རྩེ་གང་འཕྲོད་དམིགས་པ་ལས། །བལྟས་པས་ཤེས་དང་བརྟགས་པས་ཤེས། །བསྒོམས་པས་ཤེས་དང་བཤར་བས་ཤེས། །གཤུར་བས་ཤེས་དང་ལོག་གནོན་ཤེས། །ཐུན་མོང་ཐབས་ཀྱི་མན་ངག་དྲུག །མང་པོར་བསྒོམ་དང་རང་ཉིད་བསྒོམ། །མཚན་མ་ཅན་ལ་བསྟེན་ནས་ནི། །མཚན་མེད་ཡེ་ཤེས་ཤུགས་ལས་སྐྱེས། །ཟག་བཅས་དག་ལ་བརྟེན་ནས་ནི། །ཟག་མེད་བདེ་ཆེན་ཤུགས་ལས་འབྱུང་། །ཞེས་གསུངས་སོ། །ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལས། རྟོད་ཕུར་གྱི་ལེའུ་སྟེ་དགུ་པའོ།། །།དེ་ནས་བཅོམ་ལྡན་འདས་རིག་པའི་རྒྱལ་པོ་ཀུན་ཏུ་བཟང་པོས། རྡོ་རྗེ་སེམས་དཔའ་ལ་བཀའ་སྩལ་པ། རིག་པའི་རྩལ་ནི་རྣམ་གསུམ་སྟེ། །རང་བྱུང་བརྟགས་སྣང་གཉིས་མེད་གསུམ། །མཁའ་ལ་ཉི་ཤར་བྱ་བྱེད་སྤྲེལྭ །ཆུ་དང་འོ་མ་འདྲེས་ལྟར་སྣང་། །གབ་པ་མངོན་ཕྱུང་རྣམ་གསུམ་སྟེ། །རང་གནས་མ་ཤེས་ཡུལ་གྱིས་བསྒྲིབས། །གཉིས་སུ་མེད་དེ་རྣམ་གསུམ་པོ། །དམུས་ལོང་དམིགས་ཕྱེ་མེ་ལོང་དང་། །རིན་ཆེན་འདམ་ནས་ཐོན་ལྟར་སྣང་། །ཆོས་ཉིད་ཟང་ཐལ་རྣམ་གསུམ་སྟེ། །རང་བཞིན་རྩལ་རང་གཉིས་མེད་གསུམ། །ལྷོ་སྨྱུག་གླང་ཆེན་མན་ཤེལ་འདྲ། །ཆོས་ཉིད་གསུམ་ཕྲད་གསུམ་ཉིད་དེ། །རང་བྱུང་རྐྱེན་དང་གཉིས་མེད་གསུམ། །རིན་ཆེན་གསེར་གླིང་ངོ་ཤེས་མི། །རལ་གྲི་ཁ་མང་ལྟ་བུར་སྣང་། །ཅོག་བཞག་རྣམ་གསུམ་ཉིད་ཡིན་ཏེ། །གནས་ལུགས་འབྲས་བུ་ལམ་དང་གསུམ། །ནམ་མཁའ་དང་ནི་རྒྱ་མཚོ་དང་། །བྱ་བ་བཏང་བའི་སྐྱེས་ལྟར་སྣང་། །ཚོལ་བ་རྗེས་མེད་རྣམ་གསུམ་སྟེ། །ནང་དང་ཕྱི་དང་གཉིས་སུ་མེད། །ཁྱི་རྐུན་ནམ་མཁའི་བྱ་ལམ་དང་། །ཆུ་ལ་རལ་གྲི་བཏབ་ལྟར་སྣང་། །དམིགས་པ་རྗེས་མེད་དག་ཀྱང་གསུམ། །ཕྱི་དང་ནང་དང་གཉིས་སུ་མེད། །མ་འདྲིས་དབང་སྟོང་མིག་ནད་ཅན། །ཆུ་ལ་ཆུ་ཐིམ་ལྟ་བུར་སྣང་། །རྟོད་ཕུར་དག་ཀྱང་རྣམ་གསུམ་སྟེ། །དོན་ཡོད་གང་གསལ་ཞེན་པ་མེད། །བུམ་པ་བདུད་རྩི་བུ་ཆུང་གཟུགས། །ཁྱུངཕྲུགགཤོགརྫོགསལྟ་བུར་སྣང་། །སྣང་སྲིད་འཁོར་འདས་ལམ་པའི་ཆོས། །ཟབ་མོའི་གདམས་ངག་ཇི་སྙེད་པ། །འདི་རུ་མ་འདུས་གང་ཡང་མེད། །ཅེས་གསུངས་སོ། །ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལས། དབྱེ་ཐབས་འཁོར་ལོའི་མན་ངག་རྒྱ་ཆེ་གྲུབ་མཐའི་ལེའུ་སྟེ་བཅུ་པའོ།། །།དེ་ནས་རང་གྲོལ་རིག་པའི་རྒྱལ་པོ་ཀུན་ཏུ་བཟང་པོ་དེས། རྡོ་རྗེ་སེམས་དཔའ་ལ་བཀའ་སྩལ་པ། །རིག་པ་རྩལ་འབྱོངས་རྣལ་འབྱོར་ལ། །དྲོད་རྟགས་མཐར་ཕྱིན་འདི་ལྟར་འབྱུང་། །ཕྱི་དང་ནང་དང་གསང་བ་གསུམ། །འོད་དང་ཉི་ཤར་ཤེས་པ་འཕྱོ། །ཕྱོགས་རིས་མེད་དང་འདོད་པ་ཆུང་། །འབྲས་བུ་དག་ལ་མི་རེ་ཞིང་། །གཡེངས་པ་བདུད་ལ་ཉམ་ང་མེད། །རིག་པའི་ཆོ་འཕྲུལ་དག་ཏུ་འཆར། །གབ་པ་མངོན་ཕྱུང་མཐར་ཕྱིན་རྟགས། །ཕྱི་ནང་གསང་བ་གསུམ་དུ་འདུས། །ནམ་མཁའི་མཐོང་ཕྱེ་སྙིང་རྗེ་ཆེ། །ཆགས་མེད་བླ་མ་མཆེད་གྲོགས་གདུང་། །དམ་ཚིག་ལ་གནས་ཉེ་རིང་མེད། །སྤྱོད་ཡུལ་གང་ལ་ཞེ་འདོད་མེད། །ཡེ་ཤེས་ཟང་ཐལ་མཐར་ཕྱིན་རྟགས། །ཕྱི་ནང་གསང་བ་གསུམ་དུ་འབྱུང་། །ནམ་མཁར་འགྲོ་དང་ཐོགས་པ་མེད། །ལུས་ཡོད་མི་ཚོར་སྙམ་བྱེད་བྲལ། །སྤྱོད་ཡུལ་གང་ལ་ཡང་འཛིན་མེད་པའོ། །ཐུག་ཕྲད་གོམས་རྟགས་ངོ་ཤེས་ན། །ཕྱི་ནང་གསང་བའི་རྟགས་གསུམ་འབྱུང་། །གང་ལ་ཞུམ་མེད་སྐྱེངས་མེད་དང་། །གཙང་སྨེ་བླང་དོར་སྤང་ལེན་མེད། །ཅེར་མཐོང་ཐུག་ཕྲད་ཡེ་ཤེས་ཤར། །ཅོག་བཞག་ཀློང་གྱུར་མི་རྩོལ་རྟགས། །ཕྱི་དང་ནང་དང་གསང་བ་གསུམ། །རྩོལ་བ་ཆུང་དང་ཁོང་ཁྲོ་མེད། །ལུས་སེམས་རང་ལུགས་སྤྱོད་ཡུལ་བྲལ། །བཙལ་བ་རྗེས་མེད་རྩད་ཆོད་རྟགས། །ཕྱི་ནང་གསང་བ་གསུམ་དུ་འཆར། །རྩོལ་བ་ཆུང་དང་ཞེན་ཆགས་ལོག །སྒོ་གསུམ་ལས་ལ་རྗེས་མེད་འཆར། །དམིགས་པ་རྗེས་མེད་མཐིལ་ཕེབས་རྟགས། །ཕྱི་ནང་གསང་བ་གསུམ་དུ་འཆར། །གང་ལ་ཐིས་མི་འཛུགས་པ་དང་། །སེམས་ལ་གཏད་སོ་མ་རྙེད་ཅིང་། །དབྱེར་མེད་གཟུང་འཛིན་མེད་པར་འཆར། །རྟོད་ཕུར་དམིགས་པ་བརྟན་ཐོབ་རྟགས། །ཕྱི་ནང་གསང་བ་གསུམ་དུ་འཆར། །མེ་ཆུ་རླུད་དང་ཁ་དོག་ལྔ། །གཡོ་དང་འཕུར་བ་ཡང་བ་དང་། །སྟན་ལ་མི་སྣང་སྒྲ་མི་ཚོར། །གཉིད་ཆོམས་ཤིག་ནི་མི་ཚོར་དང་། །ཡར་མར་དབུགས་རྒྱུ་མི་ཚོར་དང་། །སྤྱོད་ཡུལ་སྒྱུ་མ་ལྟ་བུར་གསལ། །མཉམ་གཞག་རྗེས་ཐོབ་མེད་པ་དང་། །ཆིག་ཆོད་དག་ཏུ་ངང་གིས་འཆར། །ཞེས་གསུངས་སོ། །ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལས། དྲོད་རྟགས་འབྲས་བུ་བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་བཅོམ་ལྡན་འདས་རིག་པའི་རྒྱལ་པོ་ཀུན་ཏུ་བཟང་པོས། རྡོ་རྗེ་སེམས་དཔའ་ལ་བཀའ་སྩལ་པ། གདམས་ངག་དོན་རྟོགས་གདེང་ལྡན་ན། །དུས་དེ་ཁོ་ནར་འབྲས་བུ་འཐོབ། །སྤྱོད་ཡུལ་རིག་པ་རང་ཤར་ཡིན། ་གོས་པ་ལྷུག་པ་རང་བྱུང་ཉིད། །ཆགས་མེད་ཕྱོགས་མེད་རང་གྲོལཉིད། །ཞེནཔརངལོགཕྱོགས་རིས་མེད། །རེ་དོགས་མེད་ཅིང་ཕྱོགས་རིས་མེད། །དུ་མ་རོ་གཅིག་འཕེལ་འགྲིབ་མེད། །ལྷུན་གྲུབ་ཕྱག་རྒྱ་ཆེན་པོ་ཉིད། །ད་ལྟ་ཉིད་དུ་འབྲས་བུ་གྲུབ། །དེ་དུས་ཅིར་སྣང་ཡེ་ཤེས་ལ། །ལྷུན་གྲུབ་འགྱུར་མེད་སྐྱེ་བ་མེད། །རང་ཤར་སྤྲུལ་པ་དཔག་མེད་འགྱེད། །ཐམས་ཅད་འབྲས་བུ་རང་ཤར་ན། །ཐམས་ཅད་མཁྱེན་པའི་འབྲས་བུ་ཡིན། །འདྲེ་ལྡོག་སྤྱིའུ་ཚུགས་གར་སོང་ཡང་། །འབྲས་བུ་ཉིད་དེ་མངོན་སངས་རྒྱས། །འཁོར་འདས་དབྱེར་མེད་འབྲས་བུའི་མཆོག །འཁོར་བ་ཉིད་ལ་མྱང་འདས་གསལ། །སྡུག་བསྔལ་བདེ་བར་རང་ཤར་ན། །དོན་གྱི་འབྲས་བུ་སྐྱེ་བ་མེད། །ཅེས་གསུངས་སོ། །ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལས། འབྲས་བུ་མངོན་དུ་ཕྱུང་བའི་ལེའུ་སྟེ་བཅུ་གཉིས་པའོ།། །།དེ་ནས་བཅོམ་ལྡན་འདས་རིག་པའི་རྒྱལ་པོ་ཀུན་ཏུ་བཟང་པོ་དེ་ཉིད་སྣང་བ་རང་གྲོལ་ཡེ་ཤེས་རང་གསལ་གྱི་ཏིང་ངེ་འཛིན་ལ་སྙོམས་པར་ཞུགས་སོ། །དེའི་དུས་དེ་ཉིད་ཁོ་ནར་རྡོ་རྗེ་སེམས་དཔའ་ཉིད་ལས་མི་གཞན་པའི་འཁོར་རྣམས་ལ་འཛུམ་པ་མཛད་དེ། རིག་པའི་རྒྱལ་པོ་ལ་བསྟོད་པ། རིག་པའི་རྒྱལ་པོ་སྐྱེ་མེད་ནམ་མཁའི་ཐུགས། །རྡོ་རྗེའི་སྐུ་ལ་འགྱུར་མེད་སྐྱེ་འཇིག་བྲལ། །བྱིན་རླབས་གསུང་གིས་ཚིག་མེད་དོནལམཚོན། །འདུའབྲལམེད་པར་སྐུ་གསུང་ཐུགས་ཀྱི་ངང་། །ཨེ་མ་ཧོ། །ཨེ་མ་ཧོ། །ཞེས་བརྗོད་པས་རབ་ཏུ་དགྱེས་པར་གྱུར་ཏོ། །ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལས།བསྟོད་པའི་ལེའུ་སྟེ་བཅུ་གསུམ་པའོ།། །།དེ་ནས་བཅོམ་ལྡན་འདས་རིག་པའི་རྒྱལ་པོ་ཀུན་ཏུ་བཟང་པོ་དེས་རྡོ་རྗེ་སེམས་དཔའ་ལ་རྒྱུད་དང་མན་ངག་གི་དོན་གཏད་པ། ཀྱེ་ཀྱེ་རིག་པའི་སྐྱེས་བུ་ཆེན་པོས་རྒྱུད་འདི་ཟུང་། སྒྲ་དང་ཚིག་ཕྱིར་མ་འབྲེངས་དོན་གྱི་གཏེར། །ཡང་དག་དོན་ཆེན་གསང་བའི་རྒྱུད་མཆོག་འདི། །ང་ཡི་ཐུགས་བརྟོལ་དགོངས་པའི་བཅུད་ཕྱུང་ནས། །རྒྱ་མཚོ་ལྟ་བུར་གཏིང་ཟབ་དཔག་དཀའི་དོན། །ཀུན་དང་ཀུན་གྱི་ཐུན་མོང་མ་ཡིན་པས། །ཉིད་ལས་མི་གཞན་ཁྱད་མེད་འཁོར་རྣམས་ལ། །ཁྱབ་པར་སྟོན་ཅིག་སེམས་དཔའ་རྡོ་རྗེ་ཁྱོད། །སྣོད་ལྡན་ལས་འཕྲོ་ཡོད་པའི་གང་ཟག་གམ། །རིག་པ་སྤྱི་བླུགས་ཤར་བའི་གང་ཟག་ལ། །་་ཚོམི་ཡིད་གཉིས་མེད་པར་མྱུར་དུ་སྟོན། །ཞེས་གསུངས་པས། །ཉིད་ལས་མི་གཞན་པའི་འཁོར་ཐམས་ཅད་རྗེས་སུ་ཡི་རང་བར་གྱུར་ཏོ། །ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལས། རྒྱུད་གཏད་པ་དང་རྗེས་སུ་ཡི་རང་བ་བསྟན་པའི་ལེའུ་སྟེ་བཅུ་བཞི་པའོ། །ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལེའུ་བཅུ་བཞི་པ་རྫོགས་སོ། །ཤི་སིདྷ་དང་བི་རོས་བསྒྱུར་བའོ།། བརའདིརརིནཔོཆེགདམསངགསྣཚོགསལུབོརལོལཛུད།