Ngb-pt-0051-vol-01-text
Front
Body
རྒྱ་གར་སྐད་དུ། ཨ་ནཀྟ་ར་མ་ཧྭ་ཏརྙ་ནཱ་མ་རཏྣ་དྷ་ཛ་ར་ཛ་སརྙ་ཏི་དྲིསྒྱེ་ག་ག་ན་ས་མ་མ་མ་ཧྭ་ཏནྟྲ། བོད་སྐད་དུ། ཡི་གེ་མེད་པའི་རྒྱུད་ཆེན་པོ་ཞེས་བྱ་བ། རིན་པོ་ཆེ་རྒྱལ་མཚན་གྱི་རྒྱུད། རྒྱལ་པོའི་གདུང་རྒྱུད།ལྟ་བ་ནམ་མཁའ་དང་མཉམ་པའི་རྒྱུད་ཆེན་པོའོ། །ཨུཿབཅོམ་ལྡན་འདས་སྐུའི་སྣང་བ་རྒྱ་ཆེར་སྟོན་པ་ཉིད་ལ་ཕྱག་འཚལ་ལོ། །འདི་སྐད་བདག་གིས་བསྟན་པའི་དུས་གཅིག་ན། །རྒྱུད་ཐམས་ཅད་བཤད་དུ་མེད་དོ། །མཚན་མ་མེད་པའི་ཀློང་དུ་འདས་ཤིང་བཤད་དུ་མེད་དོ། །ལུང་ཐམས་ཅད་བསྟན་དུ་མེད་དོ། །མ་བཅོས་པའི་ཀློང་དུ་འདས་ཤིང་རྩོལ་བསྒྲུབ་མེད་པའོ། །མན་ངག་ཐམས་ཅད་མཚོན་དུ་མེད་པའོ། །མ་བསླད་པའི་ཀློང་དུ་འདས་ཤིང་། བསྒྲུབ་ཏུ་མེད་པའོ། །ཨེ་མ་ཧོ། །ཉོན་ཅིག་སྣང་བ་དམ་པའི་འཁོར་རྣམས། །སྣང་བ་ཐབས་ཀྱི་འཁོར་ལ་གནས་ལུགས་ཀྱི་རིག་པ་མ་འགགས་པར་གསལ་ལོ། །དེ་སྐད་ཅེས་རིག་པའི་གནས་ནས་སྔར་མ་གསུངས་སོ། །ད་ལྟ་ཉིད་དུ་མི་གསུང་ངོ་། །ཕྱིས་གསུང་བར་མི་འགྱུར་རོ། །ཨོ་འདི་སྐད་བདག་གིས་ཐོས་པའི་དུས་གཅིག་ན། །ཆོས་ཉིད་རང་སྣང་གི་ནམ་མཁའ་ལ། སྟོབས་ཀྱི་རིག་པ་མ་འགགས་པར་ཤར་བའི་ཚེ། །སྟོན་པ་ཉིད་སྣང་བ་མེད་པའི་སྐུས་བརྒྱན་པའི་ཀློང་ན་བཞུགས་ཏེ། དེའི་ཚེ་འཁོར་ནི་མི་སྣང་བའི་སྣང་བ་ཆེན་པོ་དང་ཐབས་ཅིག་ཏུ་བཞུགས་སོ། །དེ་ནས་དེ་ཡི་ཚེ་ཡིད་རྟོག་པ་དང་༄༅ བཅས་པས་འདི་སྐད་ཅེས་གསོལ་ཏོ། །ཀྱེ་མ་རིག་པའི་རྒྱལ་པོ་ཉིད། །སངས་རྒྱས་རྣམས་ཀྱི་ལྟ་བའི་དོན་གང་ལགས། །དགོངས་པའི་དོན་ཇི་ལྟ་བུ་ལགས། །ལུང་བསྟན་དུ་གསོལ། །ཐབས་བསྟན་དུ་གསོལ། །ཞེས་ཞུ་བ་ཉིད་རབ་ཏུ་ཞུས་སོ། །དེ་ནས་ཡང་སྣང་བ་མེད་པའི་ཀློང་ནས། སྟོན་པ་མེད་པའི་རིག་པས་བཀའ་སྩལ་པ། །ཀྱེ་མ་ཀྱེ་མ་མེད་བཞིན་དུ། །སྣང་བའི་འཁོར་རྣམས་རབ་ཏུ་ཉོན་ཅིག །ང་རང་བྱུང་ཡེ་ཤེས་ཀྱི་ལྟ་བ་ལ་བཅད་པའི་ཡུལ་མེད་དོ། །སྔར་འདས་པ་མེད་དོ། །ཕྱིར་འབྱུང་བ་མེད་དོ། ད་ལྟར་སྣང་བ་གང་ཡང་མེད་དོ། །ལས་མེད་དོ། །བག་ཆགས་མེད་དོ། །མ་རིག་པ་མེད་དོ། །སེམས་མེད་དོ། །ཡིད་མེད་དོ། ཁྲེས་རབ་མེད་དོ། །འཁོར་བ་མེད་དོ། །མྱ་ངན་ལས་འདས་པ་མེད་དོ། །རིག་པ་ཉིད་ཀྱང་ཡོད་པ་མ་ཡིན་ནོ། །ཡེ་ཤེས་ཀྱི་སྣང་བ་གང་ཡང་མེད་དོ། །དེ་ཐམས་ཅད་འཛིན་པ་མེད་པ་ལས་བྱུང་ངོ་། །ཀྱེ་མ་ང་རང་བྱུང་གི་ཡེ་ཤེས་ལ་སྲོག་མེད་པས། །དགེ་སྡིག་གི་མཐའ་ལས་འདས་པའོ། །ཨ་ཧོ། །ང་རང་བྱུང་གི་ཡེ་ཤེས་ལ་བྱ་བྱེད་མེད་པས། ཕྱི་ཡུལ་དང་ནང་སེམས་ལས་འདས་པའོ། །ཨེ་མ་ཧོ། །ང་རང་བྱུང་གི་ཡེ་ཤེས་གཞི་ལས་མ་གཡོས་པས། །སྣང་བའི་རྟོག་པ་ཆོད་པའོ། །ཨ་ཨ། ང་རང་བྱུང་གི་ཡེ་ཤེས་ལ་འདུ་འབྲལ་མེད་པས། །སྐུ་མངོན་པར་སྣང་བ་ཉིད་དོ། །ཧ་ཧ། །ང་རང་བྱུང་གི་ཡེ་ཤེས་ལ་གཟིགས་སྣང་གི་མཐའ་དང་བྲལ་བས་ཡུལ་ཀུན་ལས་འདས་པ་ཉིད་དོ། །ཨེ་ཧྭ། །ང་རང་བྱུང་གི་ཡེ་ཤེས་ལ་རྩིས་མེད་པས་གཟུང་འཛིན་ལས་འདས་པ་ཉིད་དོ། །ཨ་གེ། །ང་རང་བྱུང་གི་ཡེ་ཤེས་ལ་ཕྱི་ནང་གཉིས་དང་བྲལ་བས་སྐྱོན་དང་ཡོན་ཏན་ལས་འདས་པའོ། །ཨེ་ཨུ། ང་རང་བྱུང་གི་ཡེ་ཤེས་ལ་ཞབྲུལ་པ་ཀ་ནས་དག་པས། ཡིན་མིན་གྱི་མཐའ་ལས་འདས་པའོ། །ཧ་ཧེ། ང་རང་བྱུང་གི་ཡེ་ཤེས་ལ་ཆོས་མེད་པས་ཐབས་ལས་འདས་པ་ཉིད་དོ། །ཨེ་ཧ།ང་རང་བྱུང་གི་ཡེ་ཤེས་ལ་འགྱུ་བྱེད་མེད་པས་ཤེས་རབ་ལས་འདས་པའོ། །ཨེ་མ་ཧོ། །ང་ལ་སྟོང་པ་དང་སྣང་བ་མ་སྤངས་པར་རྫོགས་པའོ། །ང་ཉིད་ལ་གནས་ལུགས་དང་སྣང་ཐབས་གཉིས་མ་སྤངས་པར་རྫོགས་པའོ། །ང་ཉིད་ལ་ཡུལ་སེམས་གཉིས་མ་སྤངས་པར་རྫོགས་པའོ། །ང་ཉིད་ལ་སྲོག་དང་གཅོད་པ་གཉིས་མ་སྤངས་པར་རྫོགས་པའོ། །ང་ཉིད་ལ་སྡིག་པ་དང་རྣམ་སྨིན་གཉིས་མ་སྤངས་པར་རྫོགས་པའོ། །ང་ཉིད་ལ་བདག་དང་བདག་གིར་འཛིན་པ་གཉིས་མ་སྤངས་པར་རྫོགས་པའོ། །ང་ཉིད་ལ་རྟོག་པ་དང་དངོས་པོ་གཉིས་མ་སྤངས་པར་རྫོགས་པའོ། །ང་ཉིད་ལ་མཐོང་བ་དང་སྤྱོད་བྱེད་གཉིས་མ་སྤངས་པར་རྫོགས་པའོ། །ང་ཉིད་ལ་ཤེས་པ་དང་འཛིན་བྱེད་གཉིས་མ་སྤངས་པར་རྫོགས་པའོ། །ང་ཉིད་ལ་བྱེད་པ་དང་འཛིན་བྱེད་གཉིས་མ་སྤངས་བར་རྫོགས་པའོ། །ཀྱེ་མ་ང་ལ་སྐྱེ་དང་འཆི་བ་མེད་པས། །འགགས་པའི་ཆོས་ཉིད་ཡོངས་སུ་རྫོགས། །ང་ལ་ཕྱི་དང་ནང་མེད་པས། །གསལ་བའི་ཆོས་རྣམས་ཡོངས་སུ་རྫོགས། །ང་ལ་སྟོང་དང་དངོས་མེད་པས། །སྣང་བའི་ཆོས་ནི་ཡོངས་སུ་རྫོགས། །ང་ལ་དམིགས་པའི་ཡུལ་མེད་པས མཐོང་བའི་ཆོས་ནི་ཡོངས་སུ་རྫོགས། །ང་ལ་ལུས་དང་སེམས་མེད་པས། །རང་སྣང་ཆོས་ནི་ཡོངས་སུ་རྫོགས། །ང་ལ་བདག་དང་གཞན་མེད་པས། །རིག་པའི་ཆོས་ལྔ་ཡོངས་སུ་རྫོགས། །ང་ལ་བྱེད་པའི་རྒྱུ་མེད་པས། །བསམ་གཏན་ཆེན་པོ་ཡོངས་སུ་རྫོགས། །ང་ལ་ཕྱིན་པའི་ཡུལ་མེད་པས། །རང་སྣང་ཡུལ་ནི་ཡོངས་སུ་རྫོགས། །ང་ལ་ཕྱོགས་དང་རིས་མེད་པས། །གསང་བའི་ཡེ་ཤེས་ཡོངས་སུ་རྫོགས། །ང་ལ་སྣང་བ་འགག་མེད་པས། །དབྱིངས་ཀྱི་ཆོས་གསུམ་ཡོངས་སུ་རྫོགས། །ང་ལ་གཅིག་དང་གཉིས་མེད་པས། །ཐིག་ལེའི་ཆོས་རྣམས་ཡོངས་སུ་རྫོགས། །ང་ལ་མུན་དང་སྣང་མེད་པས། །མངོན་པར་སྣང་བའི་ཆོས་རྣམས་རྫོགས། །ང་ལ་བདག་རྟོག་གཉིས་མེད་པས། །སྟོང་པའི་ཆོས་ནི་ཡོངས་སུ་རྫོགས། །ང་ལ་དྲི་མ་གཉིས་མེད་པས། །གསལ་བའི་ཆ་ལྔ་ཡོངས་སུ་རྫོགས། །ང་ལ་སྐུ་ལྔ་རང་སྣང་བས། །ཞིང་ཁམས་ཐམས་ཅད་ཡོངས་སུ་རྫོགས། །ང་ལ་སྤྲོ་ཞིང་བསྡུ་མེད་པས། །ཡི་གེའི་དོན་རྣམས་ཡོངས་སུ་རྫོགས། །ང་ནི་འགྲན་བའི་ཟླ་མེད་ཀུན་ལས་རྒྱལ་བ་ཡིན། །ང་ནི་བཅོས་པའི་ཚིག་མེད་ཀུན་ལས་འཕགས་པ་ཡིན། །ང་ལ་མཐོང་བའི་ཡུལ་མེད་ཀུན་ལ་ཁྱབ་པ་ཡིན། །ང་ལ་གནས་པའི་ས་མེད་ཀུན་ལ་བརྟེན་པ་ཡིན། །ང་ནི་སྟོང་པའི་སེམས་མེད་ཀུན་ལས་མཚོན་པ་ཡིན། །ང་ནི་དྲན་པའི་ཡིད་མེད་ཀུན་ལ་འཇུག་པ་ཡིན། །ང་ནི་རེ་བ་ཉིད་མེད་ཀུན་ལ་ཡངས་པ་ཡིན། །ང་ནི་གཡང་ས་མེད་ཅིང་ཀུན་ལ་འཕྲོ་བ་ཡིན། །ང་ནི་འཁྲུལ་པའི་ཡུལ་མེད་སྣང་བ་ཆེན་པོ་ཡིན། །ང་ནི་སྤྱོད་པའི་རྒྱུ་མེད་ཀུན་ལ་སྤྱོད་པ་ཡིན། །ང་ནི་ཕྱིན་པའི་གནས་མེད་ཀུན་ལས་ཕ་རོལ་ཕྱིན། །ང་ནི་བྱ་བྱེད་གཉིས་མེད་སྣང་བ་སོ་སོ་པའོ། །ཐམས་ཅད་འབྱུང་ཞིང་འཁྲུལ་སྣང་ང་ཡི་སེམས། །ཐམས་ཅད་གནས་པས་འཁྲུལ་སྣང་ང་ཡི་ཐུགས། །ཐམས་ཅད་སྣང་བས་གབྲུལ་སྣང་ང་ཡི་སྐུ། །ཐམས་ཅད་གྲགས་པས་ཞབྲུལ་སྣང་ང་ཡི་གསུང་། །མཐོང་བ་མ་འགགས་ང་ཡི་གཟུགས་ལྟར་སྣང་། །ཐོས་པ་མ་འགགས་ང་ཡི་སྒྲ་ལྟར་གྲགས། །སྣོམ་བྱེད་མ་འགགས་ང་ཡི་དྲི་ལྟར་ཚོར། །མྱོང་བྱེད་མ་འགགས་ང་ཡི་རོ་ལྟརབདའ། །ཚོར་བྱེད་མ་འགགས་ང་ཡི་ཡིད་ལྟར་མགྱོགས། །གསང་བའི་ཉོན་མོངས་ང་ཡི་ཆོ་འཕྲུལ་ཏེ། །སངས་རྒྱས་སེམས་ཅན་ང་ཡི་དུར་ས་ཡིན། ཀུན་བྱེད་ང་ནི་སྣང་བ་རང་གསལ་ཆ། །སྣང་བ་མེད་པ་ཐོག་མའི་དུས་ཀྱི་ཚེ། །གཅོད་བྱེད་མགྱོགས་པའི་ཡིད་དྲུག་མ་འགགས་པས། །དྲན་བྱེད་མ་འགགས་ཚོགས་དྲུག་ལྷུག་པར་ཤར། །ཐོགས་པ་མེད་པའི་རླུད་ལྔ་བསྐྱོད་པ་ཡིས། །ཕོ་བྲང་མ་བཀོད་སྣང་བ་རྒྱ་ཡིས་བཏབ། །ཡེ་ནས་དག་པའི་སྐུ་ལྔ་འདུ་འབྲལ་མེད། །ཐབས་ལ་ཞེན་མེད་སྣང་བ་ལྷུག་པར་འཆར། །ཆགས་པ་མེད་པས་སྐུ་ལྔ་ཕྱི་ནང་མེད། །ཡངས་ཆེན་དག་པའི་སྐུ་ལྔ་རང་མངའ་བས། །སྟོང་པ་ཉིད་ཀྱི་སྣང་བ་རང་ཤར་བས། །ཕྱིན་པ་མེད་པའི་གནས་སུ་ཕ་རོལ་ཕྱིན། །སྟོང་པ་ཆེན་པོའི་སྤྱོད་ཡུལ་རང་གསལ་བས། །རྟོག་པ་མེད་པའི་སངས་རྒྱས་ཉག་གཅིག་མཐོང་། །བྱས་པ་མ་ཡིན་འཁོར་བའི་གདོས་ཐག་བཅད། །སངས་རྒྱས་པས་ཀྱང་སྐུ་གཅིག་གཅིག་གིས་བརྒྱན། །ཡེ་ཤེས་ལས་ནི་ཁྱད་པར་ཆེན་པོས་འཕགས། །ཀྱེ་མ། བསད་བཅད་ལས་ལ་དགའ་ན་སྣང་བ་ཆེན་པོ་གསལ། །སེམས་ཅན་ཐམས་ཅད་བསྒྲལ་ན་རང་སྣང་མ་དང་ཕྲད། །རྒྱུ་འབྲས་རྩད་ནས་བཅད་ན་རྒྱུ་དྲུག་རྩལ་གསུམ་འབྱོངས། །དགེ་བའི་རྒྱུན་ཐག་བཅད་ན་ལུ་གུ་རྒྱུད་དང་ཉེ། །ཕྱི་ནང་བྱ་བ་བཏང་ན་སྣང་བ་རྒྱ་ཡིས་ཐེབ། །སེམས་འཛིན་ལྟ་སྒོམ་མེད་ན་ཆོས་སྐུ་དངོས་པོ་ཡིན། །ལྟ་བའི་རྩལ་གསུམ་འབྱོངས་ན་སྣང་བ་སྐུ་ཡི་ཀློང་། །བྱ་བྱེད་གཡེང་བ་མེད་ན་ཆོས་ཉིད་བདེ་བའི་ས། །གཅིག་པུར་དལ་བར་འདུག་ན་རྩལ་གསུམ་ལུས་ལ་འབྱུང་། །ཐད་ཀ་གྲོགས་སུ་ཤེས་ན་ཅོག་བཞག་གཅིག་གི་ངང་། །དེ་དང་རྒྱུན་དུ་གནས་ན་དེ་ལ་ཅི་ཞིག་བྱ། །སྣང་བ་ཆེན་པོ་ཀུན་ལ་ཡང་དག་གནས། །གསང་བ་སྔགས་ཀྱི་དངོས་པོ་དེ་ཉིད་དོ། །ཞེས་ཡི་གེ་མེད་པའི་རྒྱུད་གསང་བ་ཉིད་ལས། རྗེས་སུ་གླེང་གཞིའི་ལེའུ་སྟེ་དང་པོའོ ་བམག་རྒ།་ །དེ་ནས་རིག་པའི་རང་བཞིན་གང་ཡང་མ་འགགས་པར་གསལ་བའི་དགོངས་པ་ལ་སྙོམས་པར་བཞུགས་སོ། །དེ་ནས་མེད་བཞིན་དུ་སྣང་བའི་བདག་པོས་འདི་སྐད་ཅེས་ཞུས་སོ། །ཀྱེ་མ་རིག་པའི་སྐུ་རྣམ་པར་དག་པ་ཆེན་པོས། ཡང་དག་པར་རྫོགས་པའི་སངས་རྒྱས་ཀྱི་རིག་པའི་དགོངས་པའི་བཞགས་ཆེན་པོ་གསུང་དུ་གསོལ། ཞེས་ཞུས་སོ། །དེ་ནས་གནས་ལུགས་ཀྱི་རིག་པས། སྣང་བ་ཐབས་ཀྱི་འཁོར་ལ་བཀའ་སྩལ་པ། ཀྱེ་མ། སྣང་རྒྱུད་མེད་ཀྱང་སྣང་བའི་འཁོར་རྣམས་ཉོན་ཅིག ངས་སྒྲིབ་ཕྱོགས་ཀྱིས་མ་བསྒྲིབས་པའི་སྣང་བ་ཉིད་བསྟན་གྱིས། ཤིན་ཏུ་སྣང་བའི་དོན་ལ་མ་ཡེངས་བར་ཉོན་ཅིགརྩ་བའི་དགོངས་པ་ཆེན་པོ་ནི། གྲངས་ནི་བཞི་ཡིས་གཏན་ལ་ཕེབས་པར་འགྱུར་རོ། །དེ་ཡང་འདི་ལྟ་སྟེ། རིག་པ་ཡེ་ཤེས་སུ་མ་ནོར་བར་བསྟན་པ། མི་འགྱུར་བ་རྩ་བའི་ལུང་ཆེན་པོ། ཡངས་པ་ཆོས་ཉིད་ཀྱི་སྣང་བ་ཆེན་པོ། དགོངས་པ་ཆོས་ཉིད་ཀྱི་སྟོབས་ཆེན་པོ། ལྟ་བ་རང་བྱུང་གི་འགྲོས་ཆེན་པོ། མི་འགྱུར་བའི་གཟེར་ཡིག་ཆེན་པོ། བརྟགས་པར་དཀའ་བའི་འཕྱོངས་ཆེན་པོ། བལྟ་བར་དཀའ་བའི་མེ་ལོང་ཆེན་པོ། བགྲོད་པར་དཀའ་བའི་ལམ་ཆེན་པོ། གནས་བར་དཀའ་བའི་ཡུལ་ཆེན་པོ། ཕྱིན་པར་དཀའ་བའི་ས་ཆེན་པོ། མེད་བཞིན་དུ་སྣང་བའི་སྣང་བ་ཆེན་པོ། གཏིང་མེད་པའི་དཔག་པར་དཀའ་བ་ཆེན་པོ། ཁྱབ་པ་མེད་པའི་ཡེ་གདངས་ཆེན་པོ། ཤེས་པ་ཆེན་པོ་ལ་གཅོད་བྱེད་ཆེན་པོ། ཡུལ་རིག་གཉིས་སུ་མེད་པའི་དགོངས་པ་ཆེན་པོ། བེམས་པོ་མེད་པའི་སྣང་བ་ཆེན་པོ། མི་འགྱུར་བའི་ཡེ་ཤེས་གསལ་བ་ཆེན་པོ། ཕྲ་བ་ལ་བཟུང་བར་དཀའ་བ་ཆེན་པོ། ཆེ་བ་ལ་མཐོང་བ་མེད་པ་ཆེན་པོ། ཟླུམ་ལ་དབྱིབས་མེད་པ་ཆེན་པོ། འཁྱུག་པ་ལ་དབུགས་མེད་པ་ཆེན་པོ། གསལ་བ་ལ་མདོག་གནག་པ་ཆེན་པོ། མེད་པ་ལ་གཉེན་པོ་ཆེན་པོ། སྣང་བ་ལ་བརྟགས་དཀའ་བ་ཆེན་པོ། སྟོང་པ་ལ་སྣང་བ་ཆེན་པོ། གཅིག་པ་ལ་རྒྱ་མ་ཆད་པ་ཆེན་པོ། གཉིས་ལྟར་སྣང་བ་ལ་ཡོངས་སུ་རྫོགས་པ་ཆེན་པོ། མཛེས་པ་ལ་རྒྱན་མེད་པ་ཆེན་པོ། གང་བ་ལ་སྟོང་པ་ཆེན་པོ། སྨིན་པ་ལ་མ་རྫོགས་པ་ཆེན་པོ། སྐུ་ལྟར་སྣང་བ་ལ་འགྲོ་འོང་མེད་པ་ཆེན་པོ། ཨེ་མ་ཧོ། ཁེན་ཏུ་གསང་བའི་དགོངས་པ་ཆེན་པོས། རང་རིག་འདུག་ཚུལ་གྱི་དེ་བཞིན་ཉིད་ལ་གནས་པར་བྱ་སྟེ། ཐིག་ལེ་ཉག་གཅིག་ཡེ་ཤེས་ཀྱི་གནས་ལུགས་ཆེན་པོ་ནི། གང་གི་ཕྱོགས་སུ་བལྷས་པས་གྲུབ་པ་མེད་པ་ཉིད་དོ། །དེ་ཡང་རིགས་ཀྱི་བུ་གྲོང་ཁྱེར་ཆེན་པོ་ལས་འདས་ཏེ། ནགས་ཀྱི་ཀློང་ཆེན་པོའི་དགོན་པར་གནས་པར་གྱིས་ཤིག ཕྱི་ནང་གི་བྱ་བ་དང་བྲལ་བར་བྱས་ཏེ། ལྟ་བའི་འཁྱེར་སོ་ཆེན་པོ་བཞི་པོ་འདི་དང་མ་བྲལ་ན། །སངས་རྒྱས་ཀྱི་བདེན་པ་དང་མ་བྲལ་བར་བར་དོ་མེད་པར་སྐད་ཅིག་མ་ལ་འཚང་རྒྱའོ། །ཐུགས་རྗེའི་སྒོ་མ་འགགས་པར་སྤྲུལ་པ་ཆེན་པོ་ཕྱོགས་བཅུར་མཛད་དོ། །དེ་ཡང་འདི་ལྟར་ཤེས་པར་བྱའོ། །རི་བོ་ཅོག་བཞག་གི་ལྟ་བ་དང་། རྒྱ་མཚོ་ཅོག་བཞག་གི་དགོངས་པ་དང་། རིག་པ་ཅོག་བཞག་གི་མན་ངག་བསྟན་པ་དང་། སྣང་བ་ཅེར་བཞག་གི་ཐབས་བསྟན་པའོ། །ཨེ་མ་ཧོ། །སངས་རྒྱས་ཆེན་པོའི་མཛད་སྤྱོད་ནི། །ཅོག་བཞག་བཞི་ལས་གཡོ་བ་མེད། །སངས་རྒྱས་ཉིད་ཀྱི་མཛད་པ་ནི། །དེ་ལས་མེད་པ་རང་གིས་བསྟན། ཨ་ཨ༷༷ རི་བོ་ཅོག་བཞག་ལྟ་བ་གསང་བ་ཉིད། །ཐེ་ཚོམ་ཡོད་པ་མ་ཡིན་འགྱུར་བ་ངང་གིས་མེད། །དེ་ཡང་ནམ་མཁའ་ཉིད་ཀྱི་ངང་ལ་རྣམ་པར་གསལ། །དོན་གྱི་ངོ་བོ་དེ་ཉིད་ལ། །བྱས་པ་མ་ཡིན་བྱེད་མཁན་ག་ལ་ཡོད། །བཅོས་པ་མ་ཡིན་བཅོས་པའི་བདག་པོ་མེད། །ལྟ་བ་མ་ཡིན་ལྟ་བྱེད་ཆོས་དང་བྲལ། །མཐོང་བ་མ་ཡིན་མཐོང་བྱེད་རྣམ་པར་གསལ། །སྣང་བྱེད་མ་ཡིན་སྣང་བའི་ཕྱོགས་དང་བྲལ། །བྲི་བ་མ་ཡིན་ཐོགས་མེད་ཕྱོགས་བཅུར་ཁྱབ། །རྩོལ་བ་མ་ཡིན་རྩོལ་བསྒྲུབ་ཆོས་དང་བྲལ། །གཅིག་པུ་མ་ཡིན་དུ་མའི་ཆོས་དང་བྲལ། །ཕྱི་ནང་མེད་པས་ཕྱི་ནང་མེད་པར་གསལ། །བལྷ་བྱ་མ་ཡིན་རྟག་ཆད་གཉིས་ལས་འདས། དེ་ལ་བལྟ་བ་མེད་པས་དེ་ལ་བལྟ་རུ་མེད། །ལྟ་བའི་དོན་ལས་མི་འདའ་ལྟ་བ་ངང་གིས་མེད། །དེ་ཡོད་མ་ཡིན་དེ་ཡི་ངང་དུ་གནས་པར་བྱ། །ཨེ་ལྒེ༷༷ །རྒྱ་མཚོ་ཅོག་བཞག་དག་གི་དགོངས་པ་ནི། །སྣང་བ་མ་ཡིན་སྣང་བར་བྱེད་པ་མིན། །སྟོང་པ་མ་ཡིན་སྟོང་པར་ཡོད་མ་ཡིན། །གསལ་བ་མ་ཡིན་གསལ་བ་ཆེན་པོའི་ཡུལ། །བྱིང་བ་མ་ཡིན་རྒོད་པ་ངང་གིས་མེད། །མ་གཡོས་མི་གཡོ་གཡོ་བར་མི་འགྱུར་ཏེ། །མ་སྤྱོད་མི་སྤྱོད་སྤྱོད་པ་ཀུན་ལས་འདས། །བྱས་པར་མ་བྱུང་བཞག་ཐབས་ཆེན་པོ་ལྟོས། །སྤྲོ་བསྡུ་མ་བྱེད་ཅོག་བཞག་གཅིག་གི་ངང་། །གནས་པ་མ་ཡིན་དེ་ལས་འདས་པ་མེད། །གསང་བའི་ཡེ་ཤེས་རྒྱ་མཚོ་ལྟ་བུ་ལ། །ཡེ་ཤེས་ལྷུན་འབྱམས་མ་བསྐྱོད་དབྱིངས་སུ་ཞོག །གཏིང་དཔག་དཀའ་བའི་རྒྱ་མཚོ་ཆེན་པོ་ནས། །ནུབ་པ་མེད་པའི་རྒྱལ་མཚན་རྩེ་ལ་ལྟོས། །སྟོང་པའི་སེམས་མེད་མ་བཅོས་ཆེན་པོའི་སྐུ། །བྱས་པ་མེད་པས་བྱེད་པ་ཀུན་ལས་རྒྱལ། །ཡེ་ནས་མ་བཅོས་རང་བྱུང་ཅོག་བཞག་ཉིད། །སྣང་བ་མ་བསྒྱུར་བློ་ཡིས་མ་བཅོས་པ། །ཆོས་ཉིད་མཁའ་ལ་གནས་ན་དགོངས་པ་ཉིད་དུ་བསྟན། །ཆོས་སྐུ་ཡེ་ཤེས་བསམ་པ་ཀུན་སྤང་སྟེ། །འགྱུ་བྱེད་མེ༷ ད༷་ན་བསྒོམ་པའི་དགོངས་པ་ཡིན། །དམིགས་པའི་ཕྱོགས་དག་མི་འཛིན་ན། །རྒྱ་མཚོའི་གཏིང་དུ་གཟའ་སྐར་ཤར་བ་བཞིན། །འཛིན་མེད་གསལ་ཆ་མ་འགགས་པས། །དགོངས་པའི་འདུག་ཚུལ་དེ་བཞིན་ནོ། །ཨཱོཾ་ཨཱོཾ་ཨཱོཾ། རིག་པ་ཅོག་བཞག་མན་ངག་ཉིད། །འདི་ནི་གསང་བའི་ཐུག་ས་ཡིན། །མིག་ནི་རབ་ཏུ་མནན་བྱ་སྟེ། །དེ་དང་འདུ་འབྲལ་མེད་པར་བརྟག །མིག་ཟུར་གཉིས་ལ་དབྱིངས་འབྱུང་བས། །འོད་ནི་ཕྲ་ལ་འཁྲིལ་བ་འབྱུང་། །དེ་ལས་ངོ་བོ་ལུ་གུ་རྒྱུད་ལྟར་འབྱུང་། །ཕྲ་དང་འཁྱུག་དང་འགྱུ་བའོ། །མིག་ནི་ནམ་མཁའི་ཁམས་སུ་བལྟ། །སངས་རྒྱས་སྐུ་ཡི་ཐིག་ལེར་འཆར། །དེ་ཉིད་གོམས་པའི་དྲོད་རྙེད་ནས། །རིག་པའི་སྐུ་ནི་ལུ་གུ་རྒྱུད། །སྐུ་དང་བཅས་པ་སྣང་བའོ། །སྣང་བ་གཅིག་ཆོད་དགོངས་པ་ནི། །རིག་པ་ཉིད་ནི་བཞག་ས་བཙལ། །གསང་བའི་གསང་བ་ཆེན་པོ་སྟེ། །སྣང་བ་སྟོབས་ཀྱི་ཕ་རོལ་སྒྲོལ། །ཆགས་པས་མ་བཅིངས་རང་སྣང་ངོ་། །དེ་ལ་གསང་སྔགས་ཉིད་ཀྱི་སྐུ། །ལུ་གུ་རྒྱུད་དུ་རབ་ཏུ་གསལ། །ལྔ་ལྔ་ཟུང་གིས་ཀུན་ལ་ཁྱབ། །སྣ་ཚོགས་པར་ཡང་འཆར་བར་བཤད། །རིག་པའི་སྣང་བ་ཐབས་མཁས་བྲས། །གསང་སྔགས་ལམ་ནི་སྣ་ཚོགས་པས། །སངས་རྒྱས་སྐུ་ནི་སྣ་ཚོགས་པའོ། །ཞབྲུལ་རྟོག་བློ་ནི་བསམ་མི་ཁྱབ། །དམིགས་པའི་ཡུལ་ཉིད་རྣམ་དག་པས། །མཚན་མའི་ཆོས་ནི་བརྗོད་ལས་འདས། །སྣང་བའི་རྐྱེན་ལྔ་འོད་དུ་གསལ། །ཕྲ་རགས་རིམ་པ་གཉིས་མེད་དེ། །རིག་པའི་ཡེ་ཤེས་སྐུ་ཡི་ཀློང་དུ་ཐིམ། །འགག་མེད་འོད་ལྔ་ཡུལ་སྣང་ཉིད། །གཟུགས་སྐུའི་བསམ་བཅས་ཉིད་དུ་བསྟན། །ང་ཉིད་རིག་པ་རང་སྣང་བས། །རིག་པའི་ཡེ་ཤེས་ཁྱབ་གདལ་བས། །སྣང་བ་ཆེན་པོ་གསལ་བ་རབ་ཏུ་ཆེ། །གསལ་བའི་རིག་པ་ང་ཡི་སྐུ་ལྟར་སྣང་། །བློ་ཡི་བྱེ་བྲག་བརྗོད་འདས་ཤིང་། །ཆོས་ཀྱི་སྐུ་ལ་བསམ་པ་མེད། །ཡེ་ཤེས་སྐུ་གཅིག་ཀུན་ཏུ་གསལ་བར་སྟོན། །གསང་བའི་ཡེ་ཤེས་རང་ཡིན་པས། །ཆགས་མེད་གསུང་གི་དཀྱིལ་འཁོར་ཆེ། །ཅོག་བཞག་ཉིད་དུ་ཐམས་ཅད་ཆུབ། །གསལ་བའི་ཡེ་ཤེས་ང་ཡི་ཀློང་། །རིག་པའི་གསལ་ཆ་ཕྱོགས་བཅུར་འཕྲོ། །གཅིག་བརྗོད་དུ་མ་མེད་པར་རིག །ཆོས་ཉིད་ཡེ་ནས་སྟོང་པར་གནས། །ཅོག་བཞག་ཨོ་ཡི་དགོངས་པ་ཉིད། །ལྟ་བ་དེ་ལྟར་གནས་པའོ། །ཨུ་ཨུ། །སྣང་བ་ཅེར་བཞག་ཐབས་ཆེན་ནི། །སྣང་བ་ཆེན་པོ་ཀུན་གྱི་གཞི་མ་ཡིན། །འབྱུང་བ་ལྔ་ཡི་སངས་རྒྱས་ཕ་ལྟར་སྣང་། །ཆེན་པོ་ལྔ་ཉིད་མ་ཡིན་སྣང་བར་གསལ། །མ་ཡེངས་ངང་དུ་འཛིན་མེད་ཆེན་པོར་ཞོག །གསང་སྔགས་ཆེན་པོའི་ཡེ་ཤེས་ཆེན་པོ་ལྔ། །ཆེན་པོ་ལྔ་ཡིས་མ་བསྐྱོད་དབྱིངས་སུ་ཞོག །རྡོ་རྗེ་སེམས་དཔའི་རིག་པ་ཅོག་བཞག་ནི། །ཆོས་ཀྱི་སྐུ་ནི་སྣང་བ་ཐམས་ཅད་བསྟན། །ཡེ་ཤེས་དག་པའི་སྣང་བ་ཅིར་སྣང་བས། །གསང་བའི་བཞག་ཐབས་ཅེར་བཞག་ཐབས་ཀྱི་ངང་། །སྐུ་ཡི་སྣང་བ་འབྱུང་ལྔ་མ་སྤངས་པས། །སྤང་བ་མ་ཡིན་ངང་གི་དོན་ལ་ཞོག །ཆོས་ཉིད་ཀློང་ཡངས་ཅེར་སྣང་ཆེན་པོར་བརྟགས། །རྫོགས་པ་ཆེན་པོར་བསྒོམ་རྒྱུ་མ་དམིགས་ཏེ། །ལྟ་བའི་འདུ་ས་ཆེན་མོ་དབྱིངས་ཀྱི་སྒྲོན་མ་ཡིན། །བསྒོམ་པའི་བསྐྱལ་ས་ལུ་གུ་རྒྱུད་དུ་བསྟན། །སྤྱོད་པའི་སྤྱོད་ས་ཆེན་པོ་དེ་དང་མ་བྲལ་ན། །རྣམ་གསུམ་ངོ་བོ་ཉིད་དེ་ཡིན་པར་གསུངས། །སངས་རྒྱས་དགོངས་པ་བྱར་མེད་ཆེན་པོའི་ཀློང་། །དེ་ལས་མ་འདས་ཆོས་ཉིད་བསྒྲུབ་ཏུ་མེད། །དེ་དང་མ་བྲལ་གསང་སྔགས་ལྷ་བའོ། །ཞེས་ཡི་གེ་མེད་པའི་རྒྱུད་གསང་བ་ཆེན་པོ་ལས། དགོངས་པ་བཅའ་གཞེའི་ལེའུ་སྟེ་གཉིས་པའོ།། ༷༷བརྐྱམཏུ། །།དེ་ནས་རིག་པ་མི་འགྱུར་བའི་ཀློང་། ཆོས་ཉིད་ཀྱིས་བརྒྱན་པའི་ཕོ་བྲང་ནས། རིག་པ་འགྱུར་བ་མེད་པའི་ཡེ་ཤེས་ཀྱི། འོད་ཀྱི་སྐུ་ཆེན་པོས་འདི་སྐད་ཅེས་སྨྲས་སོ། །ཨེ་མ་ཧོ། །རང་བཞིན་གྱི་སྣང་བ་རྣམ་པར་དག་པ་ཆེན་པོའི་ཡུལ་འདི་ནི། གསལ་ལ་འཚེར་བ་སྐུའི་ཕོ་བྲང་མི་འགྱུར་བར་གནས་པའོ། །འཁྲུལ་བ་གདུལ་བྱའི་སྣང་བ་འདི་ནི། རིག་པ་མཐའ་ཡས་པས། འཛད་པ་མེད་པའི་ཐུགས་རྗེ་སྣ་ཚོགས་པར་འབྱུང་བའོ། །ཆོས་ཉིད་ཡངས་པའི་སྣང་བ་ནི་གསལ་ལ་དངས་པ། ཡེ་ཤེསམེད་པའི་གཅིག་ལས་དུ་མར་འཆར་བའོ། །གསང་བའི་ཡུལ་སྣང་བའི་སྣང་བ་ཆེན་པོ་སྟེ། སྐུ་ཡི་སྣང་བ་ཆེན་པོ་སྣ་ཚོགས་པ་ཉིད་དེ། གསུང་འགག་པ་མེད་པར་དོན་བྱེད་ནུས་པའོ། །སངས་རྒྱས་ཀྱི་སྐུའི་འོད་བསམ་གྱིས་མི་ཁྱབ་པ་སྟེ། ཐིག་ལེའི་འདུ་འཕྲོ་ཟེར་ལྟར་རབ་ཏུ་འབར་རོ། །གསང་སྔགས་ཆེན་པོའི་མཛད་པ་མ་ལུས་པ་ལུས་པ་མེད་ཅིང་། སོ་སོར་འཕྲོ་བ་སྟེ། ཡེ་ནས་བཞག་ཐབས་བཞི་དང་འདུ་འབྲལ་མེད་པའོ། །ཨེ་མ་ཧོ། །གསང་སྔགས་ཉིད་ལ་གསང་སྔགས་ཉིད་གནས་པས། །ཡེ་ཤེས་ཉིད་ལས་ཡེ་ཤེས་ཆེན་པོར་འགྱུར། །ཆོས་ཉིད་མ་ལས་དཀྱིལ་དང་འཁོར་དུ་སྣང་། །སྐྱེ་བ་མེད་པའི་མངོན་སུམ་སངས་རྒྱས་ཀྱིས། །ཡུལ་མེད་རྣམ་པར་དག་པའི་སྣང་བ་མཐོང་། །སྐུ་དང་ཡེ་ཤེས་རང་ཆས་ངང་གིས་མེད། །སྟོང་པ་ཉིད་ལས་ཡེ་ཤེས་ཐུགས་འོད་འབར། །མུན་པ་མ་ཡིན་སྣང་བ་ཆེན་པོའོ། །དེ་ནས་མི་སྣང་བའི་སྣང་བ་ཆེན་པོས།རིག་པའི་སྐུ་ལུ་གུ་རྒྱུད་དུ་སྣང་བ་ཉིད་ལ་འདི་སྐད་ཅེས་གསོལ་ཏོ། །ཀྱེ་གསང་བའི་རིག་པ་འོད་དང་བཅས་པ། བདག་ཅག་རྣམས་ལ་གསལ་བའི་སྣང་བ་བསྟན་དུ་གསོལ། ཞེས་ཞུས་སོ། །དེ་ནས་རིག་པ་མཁའ་ཁྱབ་ཀྱི་ཡུལ་ཆེན་པོ་ནས། འདི་སྐད་ཅེས་གསུངས་སོ། །ཀྱེ་མ། སྣང་བའི་འཁོར་རྣམས་རབ་ཏུ་ཉོན་ཅིག ང་ཡང་དག་པའི་རིག་པ་ཉིད་ལ་འཁྲུལ་པ་མེད་དེ། དེ་གང་ཞེ་ན། རིག་པ་ལུ་གུ་རྒྱུད་ཀྱི་སྐུ་ཉིད། སྔར་འཁྲུལ་མ་མྱོང་། ད་ལྷ་འཁྲུལ་བ་མེད། ཕྱིས་འཁྲུལ་བ་མི་སྲིད་དོ། །དེའི་ཕྱིར་ན་མ་མཁྲུལ་བའི་སངས་རྒྱས་སོ། །དབྱིངས་རྣམ་པར་དག་པའི་སྒྲོན་མ་ཉིད་ཀྱང་སྔར་མ་བྱས། ད་ལྟ་མི་བྱེད། ཕྱིས་བྱེད་པར་མི་འགྱུར་རོ། །དེའི་ཕྱིར་ན་མ་བྱས་པའི་ཆོས་ཞེས་བྱའོ། །མ་བཅོས་པའི་མཆོག་ཆེན་པོ། །མ་བསླད་པའི་གཞི་ཆེན་པོ། མ་བསྒྱུར་བའི་སྣང་བ་ཆེན་པོ། །ཆེན་པོ་གསུམ་གྱི་བདག་ཉིད་དང་ལྡན་པ་ནི། མ་འཁྲུལ་བའི་སངས་རྒྱས་མ་བྱས་པའི་ཆོས་བསྟན་པ་ཞེས་བྱའོ། །རིག་པ་རྡོ་རྗེ་ལུ་གུ་རྒྱུད་ཀྱི་སྐུ་དེ་ཉིད་ནི། སྔར་འཁོར་བ་ན་གནས་མ་མྱོང་། ད་ལྟ་་འཁོར་བ་ན་གནས་མི་སྲིད། ཕྱིས་འཁོར་བ་ན་གནས་པ་མ་ཡིན་ནོ། །དབྱིངས་རྣམ་པར་དག་པའི་སྒྲོན་མ་དེ་ཉིད་ནི། སྔར་སེམས་ཅན་ཉིད་དང་བྲལ་མ་མྱོང་། ད་ལྟ་སེམས་དང་བྲལ་མི་སྲིད། ཕྱིས་འབྲལ་བར་མི་འགྱུར་རོ། །དེའི་ཕྱིར་ན་སྣང་བ་མེད་པ་ལས། སྣང་བ་ཤར་བའོ། །རིག་པ་རྡོ་རྗེ་ལུ་གུ་རྒྱུད་ཀྱི་སྐུ་དེ་ཉིད། སྔར་སངས་རྒྱས་མ་མྱོང་། ད་ལྟ་སངས་རྒྱས་མི་སྲིད། ཕྱིས་འཚང་རྒྱ་བར་མི་འགྱུར་རོ། །དབྱིངས་རྣམ་པར་དག་པའི་སྒྲོན་མ་དེ་ཉིད། སྔར་སེམས་ཅན་ལ་གནས་མ་མྱོང་། ད་ལྟ་གནས་མི་སྲིད། ཕྱིས་གནས་པར་མི་འགྱུར་རོ། །དེའི་ཕྱིར་ན་ལུང་བསྟན་དུ་མེད་པ་ལ། མན་ངག་མཚོན་དུ་ཡོད་པ་ཞེས་བྱའོ། །ཨེ་མ་ཧོ། །སངས་རྒྱས་དང་སེམས་ཅན་གཉིས་ནི། སྔར་རྒྱབ་གྱེས་མ་མྱོང་། ད་ལྟ་གྱེས་མི་སྲིད། ཕྱིས་གྱེས་པར་མི་འགྱུར་རོ། །དེའི་ཕྱིར་ན་ལུང་ལ་འཁྲུལ་པ་མེད་པ་ལ། མན་ངག་ལ་འཁྲུལ་པ་བྱུང་ངོ་ཞེས་བྱའོ། །སེམས་ཅན་ཐམས་ཅད་འཁོར་བ་ན་གནས་ཀྱང་།འཁོར་བ་ཉིད་སྔར་མཐོང་མ་མྱོང་། ད་ལྟ་མི་མཐོང་ངོ། །ཕྱིས་མཐོང་བར་མི་འགྱུར་རོ། །དེའི་ཕྱིར་ན་ཆོས་ཉིད་ལ་རྟོག་པ་ཡོད་ཀྱང་། གང་ཟག་ལ་རྟོག་པ་མེད་པ་ཞེས་བྱའོ། །ཡང་དག་པར་རྫོགས་པའི་སངས་རྒྱས་རྡོ་རྗེའི་སྐུ་ཉིད། སྔར་མ་རྟོགས། ད་མི་རྟོག ཕྱིས་རྟག་པར་མི་འགྱུར་རོ། །དེའི་ཕྱིར་ན་སངས་རྒྱས་ལ་རྟོག་པ་མེད་ཀྱང་། སྣང་ཚུལ་ལ་རྟོག་པ་ཞེས་བྱའོ། །སངས་རྒྱས་དང་སེམས་ཅནལདུསཆེནཔོམེདཔརབསྟན་པའོ། །རིག་པའི་གནས་ལུགས་དེ་ཉིད་ལ། འཁྲུལ་པ་མེད་ཀྱང་།སྣང་ཐབས་ལ་ཞགྲུལ་པ་ལྟར་སྣང་བའོ། །དེའི་ཕྱིར་ན་སངས་རྒྱས་དང་སེམས་ཅན་གཉིས་གཅིག་ལས་མ་གཡོས་པ་ཞེས་བྱའོ། །ཨེ་མ་ཧོ། །དགོངས་གཅིག་མཁའ་ཀློང་གཉིས་སུ་མེད། །གསང་སྔགས་རྡོ་རྗེ་སེམས་དཔའ་རིག་པའི་སྐུ། །རྟག་པ་མ་ཡིན་ཆད་པ་ཡོངས་ཀྱིས་མེད། །སྟོང་པ་མ་ཡིན་གསལ་བ་ངང་གིས་མེད། །རྒྱུ་མཐུན་མ་ཡིན་སྣང་བ་རང་སར་དག །བྱུང་ཚུལ་མ་ཡིན་བྱུང་ཚུལ་ཡོངས་སུ་རྫོགས། །བསྐྱེད་ཚུལ་མ་ཡིན་སྣང་ཚུལ་གཉིས་སུ་སྣང་། །ཆོས་ཉིད་མིང་དང་ཡང་དག་ཉིད་དུ་བྲལ། །དག་པའི་ནམ་མཁའ་ངོས་བཟུང་ཀུན་ལས་འདས། །ཨ་ཡི་སྣང་བ་སྐྱེ་མེད་ངོས་གཟུང་མེད། །གཉིས་མེད་དག་པའི་ཡེ་ཤེས་མཁའ་ལ་གསལ། །བྱ་བྱེད་མ་འགགས་དམིགས་པ་ཡོངས་ཀྱིས་མེད། །རང་བཞིན་མེད་པས་མེ་ལོང་གཟུགས་བརྙན་འདྲ། །མ་འགགས་འགག་མེད་ཀུན་གྱི་སྙིང་པོར་གནས། །གསང་བའི་གནས་ལུགས་དེ་བཞིན་ནོ། །ཀྱེ་ཀྱེ། སྐུ་ཡི་སྣང་བ་མ་འགགས་པས། །གསུང་གི་རོལ་པ་ཅིར་ཡང་སྟོན། །ཐུགས་ཀྱི་མཛད་པ་ཅི་ཡང་མཛད། །རིག་པའི་བྱ་བྱེད་མ་འགགས་པས། །སེམས་ཀྱི་རྟོག་པ་སྣ་ཚོགས་པའོ། །ཞེས་ཡི་གེ་མེད་པའི་རྒྱུད་ཆེན་པོ་ལས། མ་འཁྲུལ་པའི་རིག་པ་ཉིད་ལ། མ་བྱས་པའི་ཆོས་བསྟན་པའི་ལེའུ་སྟེ་གསུམ་པའོ།། །།ཏ།མཊཀ༷༷ །།དེ་ནས་ཡང་རྒྱུད་བྱས་པ་མེད་པའི་རིག་པས། ལུང་བྱེད་པ་མེད་པའི་ཀུན་ཏུ་བཟང་མོ་ལ་བཀའ་སྩལ་པ། དེའི་ཚེ་ཐབས་འགག་པ་མེད་པའི་སྣང་བའི་རྣ་བས་ཉན་པ། ཀྱེ་ཀྱེ། སྣང་རྒྱུད་དམིགས་པ་དང་བྲལ་བའི་ཡེ་ཤེས་ཆེན་པོ་དང་ལྡན་པ། རྡོ་རྗེ་ལུ་གུ་རྒྱུད་ཀྱི་སྐུ་ནི་གྲངས་མེད་པའི་སྣང་བ་ཆེན་པོ་སྟེ། སྐུ་དང་། ཐིག་ལེ་དང་། ཐིག་ལེའི་ཕྱེད་སྐུ་དང་། ཡེ་ཤེས་དང་། ཡེ་ཤེས་ཀྱི་གཟུགས་སྐུ་དང་། འོད་དང་འོད་ཀྱི་འཕྲོ་འདུ་དང་། དབུགས་མེད་པའི་འགྱུ་བ་དང་། སེམས་མེད་པའི་སྣ་ཚོགས་དང་། སྲོག་མེད་པའི་སྐུ་དང་བཅས་པའོ། །དབྱིངས་ཀྱི་སྒྲོན་མ་དག་པ་འདི་ལྟ་སྟེ། ཁྱབ་པ་མེད་པའི་རང་གདངས་དང་བཅས་པ། ཡུལ་མེད་པའི་གསལ་ཆ་དང་བཅས་པ། མ་བྱས་པའི་ར་བ་དང་བཅས་པ། མ་བྲིས་པའི་མུ་ཁྱུད་དང་བཅས་པ མ་བཅད་པའི་ཡུལ་དང་བཅས་པ། མ་བཀོད་པའི་སྣང་བ་དང་བཅས་པའོ། །དེ་ཡང་དབྱིངས་དང་རིག་པ་འདུ་འབྲལ་མེད་པར་གནས་ཏེ། མ་དམིགས་པའི་ཡུལ་སྣང་བ་ཆེན་པོ་སྟེ། དྲི་མའི་ཕྱོགས་མེད་པ་ལས། དེའི་ངོ་བོ་རྒྱུ་སངས་པ། རྐྱེན་དག་པ། ཡུལ་མ་འགགས་པ། རང་གྲོལ་བ། རང་གི་ངོ་བོ་དང་བཅས་པ། ཡུལ་དྲུག་ལས་འདས་པ། ཆེན་པོ་ལྔ་དབྱིངས་སུ་དག་པ། མི་འཇིག་པ། རྐྱེན་མེད་པ་ལས། རྐྱེན་གྱིས་གྲོལ་བ།བལྟར་མེད་པ་ལ་ངོ་མཚར་ཆེ་བ། ཕྱོགས་མེད་པ་ལ་ལྟ་བྱེད་མ་འགགས་པའོ། །ཀྱེ་མ། སྣང་བ་ལ་སྐུ་བསམ་གྱིས་མི་ཁྱབ་པ་འབྱུང་ངོ་། །དུ་མའི་ཐ་སྙད་སྤངས་པ་མེད་པའི་ཀློང་དུ་ཆུབ་པའོ། །སངས་རྒྱས་ཀྱི་སྐུ་རབ་ཏུ་༄༅ མང་བར་འཕྲོ་ ང་ཚུགས་པ་མེད་པའོ། །ངོ་བོ་ལས་མ་གཡོས་བཞན་དུ་སྣ་ཚོགས་སྟོན་པའོ། །འཁོར་བ་ལས་མ་འདས་པར་མྱ་ངན་ལས་འདས་པའོ། །ཆོས་ཀྱི་སྐུའི་སྣང་བ་ལས་མ་གཡོས་པའོ། །ཀུན་ཏུ་སྣང་ཞིང་ཟིལ་གྱིས་མི་གནོན་པ་ཉིད་དོ། །རིག་པའི་སྐུ་ནི་གསལ་ཆ་སྙོམས་པ་ཆེན་པོ་ཡིན་ཏེ། རྡོ་རྗེ་སྐུའི་སྣང་བ་རྒྱ་ཆེ་བ་མཐོང་བར་འགྱུར་ཏེ། ང་ནི་བྱེད་པ་ཉིད་ལས་རབ་ཏུ་འདས་པའོ། །ཞེས་ཡི་གེ་མེད་པའི་རྒྱུད་གསང་བ་ཆེན་པོ་ལས། དོན་དམ་པ་སྣང་བའི་ལེའུ་སྟེབཞི་པའོ།། །།ཁ་་་་་་ །།དེ་ནས་ཡང་ཡུལ་མེད་པའི་ཀློང་དག་པ་ལས། སྣང་བའི་ཕུང་པོ་བསམ་གྱིས་མི་ཁྱབ་པ་དང་བཅས་ཏེ། ཐབས་ཀྱི་རིག་པ། སྟོབས་ཀྱི་ཤེས་རབ་ལ་བཀའ་སྩལ་པ། མི་མཉམ་པའི་མཁའ་ཀློང་དག་པས་རབ་ཏུ་ཉན་ནོ། །ཀྱེ་ཀྱེ། སྣང་བ་འདིའི་མཚོན་ཚུལ་ལ། ཡི་གེ་མེད་ཅིང་ཚིག་ཐམས་ཅད་ལས་འདས་པའོ། །བརྗོད་པ་ཐམས་ཅད་ངང་གིས་མེད་པ་སྟེ། སྣ་ཚོགས་པའི་མཚོན་པ་ངང་གིས་མེད་པ། ཡུལ་མེད་པ། སེམས་མེད་པ། ཡི་གེ་མེད་པ། ཡི་གེ་མེད་པའི་ཕྱིར། རྒྱུད་མེད་པ། ལུང་མེད་པ། མན་ངག་ཐམས་ཅད་མེད་པ། ཚིག་ཐམས་ཅད་དང་བྲལ་བའོ། །བརྗོད་པ་ཐམས་ཅད་ཀྱིས་སྟོང་པའོ། །ཨེ་མ་ཧོ། །ཆོས་སྐུ་སྣང་བའི་ཀ་མེད་པས། །ང་ལ་ཡི་གེ་ཡོད་མ་ཡིན། །ང་ལ་སྐྱེ་བ་ཉིད་མེད་པས། །ཡི་གེ་ཨ་ནི་ཡེ་ནས་མེད། །ང་ལ་འགག་པའི་གནས་མེད་པས། །ཡི་གེ་ཨོ་ནི་ངང་གིས་མེད། །ང་ལ་འདུ་འབྲལ་གཉིས་མེད་པས། །ཡི་གེ་ཧཱུཾ༷་ནི་ཤིན་ཏུ་ཟད། །སྐུ་ཡི་སྣང་བ་སྣ་ཚོགས་པས། །ཡི་གེའི་མིང་ནི་ངང་གིས་སྟོང་། །གསང་སྔགས་མཚན་ཉིད་རང་གསལ་བས། །ཡི་གེའི་དངོས་པོ་ག་ལ་ཡོད། །སངས་རྒྱས་ཉག་གཅིག་རང་སྣང་བས། །མཚན་མའི་ཡི་གེ་གང་ཡང་མེད། །རིག་པ་ཉིད་ལ་རྒྱུ་མེད་པས། །བསྐྱེད་པའི་ཡི་གེ་ག་ལ་ཡོད། །ཡེ་ཤེས་སྐུ་ལྔ་རང་རྫོགས་པས། །རྫོགས་པའི་ཨ་ཡང་ཡོད་མ་ཡིན། །ཐིག་ལེ་ཉག་གཅིག་ཀུན་ཆུབ་པས། །སྤྲོས་པའི་ཡི་གེའི་མིང་ཡང་མེད། །སྣང་བ་མ་འདྲེས་ཡོངས་རྫོགས་པས། །བསྡུ་བའི་ཡི་གེ་མེད་པར་གསུང་། །རིག་པའི་སྐུ་ལ་དངོས་མེད་པས། །ཡི་གེ་འབྲུ་གསུམ་ཡོད་མ་ཡིན། །འོད་ལྔས་བརྒྱན་པའི་རིག་པ་ལ། །ཁ་དོག་ཉིད་དུ་མེད་པས་ན། །ཡི་གེའི་ཁ་དོག་ཡོད་པ་མིན། །ཟླུམ་འཁྱིལ་ལུ་གུ་རྒྱུད་ཉིད་ལ། །དབྱིབས་སུ་སྣང་བ་མེད་པའི་ཕྱིར། །ཡི་གེའི་དབྱིབས་སུ་འདོད་པ་མིན། །རིག་པ་དངོས་དང་དངོས་མེད་པས། །ཡི་གེ་བདག་འདོད་ཡོད་པ་མིན། །རིག་པའི་སྐུ་ལ་གཉིས་མེད་ཕྱིར། །ཡི་གེའི་གཟུང་འཛིན་ག་ལ་ཡོད། །རིག་པ་གཅིག་དང་གཉིས་མེད་པས། །ཡི་གེའི་ས་ལམ་ང་མི་འདོད། །རིག་པའི་སྣང་བ་རང་རྫོགས་པས། །ཡི་གེའི་ཚོགས་གཉིས་ངས་མི་འདོད། །རང་རིག་དཔེ་མཚོན་དངོས་མེད་པས། །ཡི་གེའི་དཔེ་ཡིས་ང་མི་མཐོང་། །རིག་པའི་སྐུ་ལ་དྲི་མེད་པས། །ཡི་གེའི་དྲི་མས་ང་མི་བསྒྲིབ། །རང་རིག་དགེ་དང་སྡིག་མེད་པས། །ཡི་གེའི་དགེ་སྡིག་གཉིས་ལས་འདས་པའོ། །ཨེ་མ་ཧོ། །ཡི་གེ་མེད་པའི་ཆོས་ཉིད་དག་པ་ལ། །ཡི་གེའི་སྒྱུ་རྩལ་གཉིས་སུ་བཏགས་པ་ཡོད་མ་ཡིན། །ཡི་གེའི་རྒྱུ་ནི་སྣ་ཚོགས་རབ་སྟོན་པས། །ཡི་གེ་ཉིད་ལ་དོན་མེད་ཡི་གེའི་དོན་གང་མེད། །ང་ཡི་རིག་པ་ཆོས་ལ་མ་བརྟེན་པས། །ཡི་གེའི་དོན་གྱིས་ང་ཡི་སྐུ་མི་མཐོང་། །ཐོག་མའི་རང་བྱུང་ཡེ་ཤེས་ཉིད། ཁུ།་རྐྱེན་གཉིས་ལ་མ་ལྟོས་པར། །ཡི་གེ་རྒྱུ་རྐྱེན་ང་མི་བསྒྲུབ། །ཡེ་ནས་སྐུ་གསུམ་རང་རྫོགས་པས། །ཡི་གེའི་ཚོགས་ལ་ང་མི་ལྟོས། །རྒྱུད་དང་ལུང་དང་མན་ངག་ཀྱང་། །ཡི་གེའི་ཚོགས་ལ་བརྟེན་པས་ན། ཁུ།ད་དང་ལུང་གིས་ང་ལ་བསྒྲིབ། །ཐོག་མའི་མགོན་པོ་དྲི་མེད་ཉིད། །འགྲན་ཟླ་མེད་པར་སངས་རྒྱས་པས། །ཡི་གེའི་དོན་ལ་ང་མི་གནས། །རང་བྱུང་རིག་པའི་རྒྱལ་པོ་ཉིད། །སྒྲོ་འདོགས་ཚིག་ལ་མ་བརྟེན་པས། །ཚིག་དང་ཡི་གེ་ང་ཡི་དུག །དང་པོ་བྱུང་ས་ཆེན་པོ་ལ། །ཚིག་གིས་བྱང་ཆུབ་མི་རྙེད་པས། །ཡི་གེའི་མཚན་ཉིད་ང་ལ་མེད། །བར་དུ་གྲོལ་ས་ཆེན་པོ་ལ། །རེ་དང་དོགས་པ་གཉིས་མེད་པས། །ཡི་གེའི་སྤང་ལེན་གང་ཡང་མེད། །རིག་པའི་རྣམ་པ་གྲངས་མང་བས། །བཞི་བཅུ་རྩ་གཉིས་ཡི་གེ་ཡང་། །དོན་དམ་ཉིད་ལ་ཡོད་མ་ཡིན། །སྐུ་ལྔ་འོད་ཀྱི་དཀྱིལ་འཁོར་ནང་། །བཏགས་པའི་ཡི་གེ་གཅིག་ཀྱང་མེད། །ང་ཡི་སྣང་བ་དག་པ་ལས། །གསལ་འགྱུར་ཡི་གེ་ངང་གིས་མེད། །གསང་བའི་རིག་པ་ལྷུན་རྫོགས་ལ། །ཡི་གེའི་མིང་ནི་གཅིག་ཀྱང་མེད། །གསང་སྔགས་ཨ་ཏིའི་སྣང་བ་ལ། །མཚན་མའི་ཡི་གེ་ཡོད་མ་ཡིན། །ཨ་ཏི་རང་རྫོགས་ཆེན་པོ་ལ། །འཁྲུལ་པའི་ཡི་གེ་མེད་པའོ། །ཞེས་ཡི་གེ་མེད་པའི་རྒྱུད་གསང་བ་ཆེན་པོ་ལས། རྫོགས་ཆེན་ཚིག་གིས་གོལ་བར་བསྟན་པའི་ལེའུ་སྟེ་ལྔ་པའོ།། ་་་མཿ །།དེ་ནས་ཡང་སྣང་བ་ཆེན་པོ་རང་བཞིན་གསལ་བའི་སྣང་བ་ལས། །ཆོས་ཉིད་འདུ་འབྲལ་མེད་པའི་རིག་པར་བཞེངས་ཏེ། སྣང་བའི་རྒྱན་ཀུན་ཏུ་བཟང་མོ་ལ་བཀའ་སྩལ་པ། ཀྱེ། བརྡའ་དང་ཡི་གེ་དང་ཐ་སྙད་ཐམས་ཅད་རབ་ཏུ་སྤངས་ཏེ། རང་གི་སྐུའི་སྣང་བ་ལ་རབ་ཏུ་ལྟོས་ཤིག ཕྱིའི་ལོངས་སྤྱོད་ཐམས་ཅད་ལ་མ་ཆགས་པར། གྲོགས་མེད་པའི་ནགས་ཁྲོད་དག་ཏུ། དེ་ཉིད་ལ་གནས་པར་གྱིས་ཤིག སྟོང་པ་ཕྱོགས་མེད་པའི་སྣང་བ་དེ་ཉིད་ལ་ལྟོས་ཤིག ཤིན་ཏུ་གཟུང་བར་དཀའ་བ་དག་གི་གཞི་གཟུང་བར་འདོད་ན། རིག་པ་རྡོ་རྗེ་ལུ་གུ་རྒྱུད་ཀྱི་སྐུ་ཟུང་ཞིག སྐྱེ་ཤི་མེད་པའི་དབྱིངས་གཅིག་ཏུ་འདྲིལ་བར་འདོད་ན། དབྱིངས་རྣམ་པར་དག་པའི་སྒྲོན་མ་དེ་ཉིད་ལ་ལྟོས་ཤིག གྲོགས་མེད་པར་གཅིག་པུར་འདུག་པར་འདོད་ན། སྣང་བ་ཅེར་བཞག་གི་དགོངས་པ་དང་མ་བྲལ་བར་གྱིས་ཤིག བལྟར་མེད་པའི་སྐུ་ལ་ལྟ་བར་འདོད་ན། གཅིག་པུ་ཐིག་ལེའི་གནས་སུ་རི་བོ་ཅོག་བཞག་གི་མན་ངག་ལ་མཐའ་བསྡུས་ཤིག རྐང་པ་མེད་པར་མཁའ་ལ་འགྲོ་བར་འདོད་ན། རིག་པ་ཅོག་བཞག་གི་མན་ངག་ལ་རྩལ་སྦྱོང་ཞིག ཕྱི་ནང་མེད་པར་ཟང་ཐལ་བར་འདོད་ན། རྒྱ་མཚོ་ཅོག་བཞག་གི་དགོངས་པ་ལ་རྟག་ཏུ་གནས་པར་གྱིས་ཤིག ཟང་ཐལ་གཅིག་རྫོགས་ཀྱི་དགོངས་པ་ཐོབ་པར་འདོད་ན། ཅོག་བཞག་བཞིའི་དོན་ཉིད་ལས་མ་འདའ་ཞིག འཁྲུལ་སྣང་ཞིང་ཁམས་སུ་འཆར་བར་འདོད་ན། སྒྲོན་མའི་དབྱིངས་རིག་གཉིས་དང་མ་བྲལ་བར་གྱིས་ཤིག དེ་ནི་སྐྱེ་བ་མེད་པའི་ཐབས་མཆོག་ཏུ་གསུངས་སོ། །ཨེ་མ་ཧོ། དངོས་པོ་མེད་པའི་སྣང་བ་ངོ་མཚར་ཆེ་བ་སྟེ། རགས་པའི་འབྱུང་བ་ལྔས་བསྒྲིབས་ཏེ། ལུང་མེད་པ་ལ་སྣང་མ་ནུས་སོ། །རིག་པ་རང་སྣང་གི་སྣང་བ་དེ་ནི། ལྷུན་བརྗིད་དེ། ཕྲ་བའི་ཉོན་མོངས་པས་བསྒྲིབས་ཏེ་རྟག་མ་ཐུབ་པའོ། །ཆོས་ཉིད་མ་བཀོད་པའི་སྣང་བ་གསལ་དངས་ཏེ། སྣ་ཚོགས་དུ་མའི་སྤྱོད་པས་བསྒྲིབས་ནས་མངོན་སུམ་དུ་མེད་པའོ། །དེ་ཡང་རིག་པའི་ངོ་བོ་བཟུང་བར་དཀའ་ཡང་། ཡེ་ཤེས་ཀྱི་རྩལ་དལ་བས་འགྲུབ། རིག་པའི་དབྱིངས་མི་འགྱུར་ཡང་། རིག་པའི་རྐྱེན་སྟོབས་ཟད་པས་འགྲུབ། རིག་པའི་རང་བཞིན་ཀུན་ལ་ཁྱབ་ཀྱང་། ཆོས་ཀྱི་སྐུའི་གདམས་ངག་ལ་ཐུག་གོ །ཞེས་ཡི་གེ་མེད་པའི་རྒྱུད་གསང་བ་ཆེན་པོ་ལས། རྫོགས་ཆེན་ཞལ་ཆེམས་སུ་བསྟན་བའི་ལེའུ་སྟེ་དྲུག་པའོ།། །།གནས་ལུགས་ཀྱི་རིག་པས་སྣང་ཐབས་ཀྱི་འཁོར་ལ་སྨྲས་པ། གསང་བ་ཡི་གེ་མེད་པའི་རྒྱུད་ཆེན་པོ། རིན་པོ་ཆེ་རྒྱལ་མཚན་གྱི་རྒྱུད། རྒྱལ་པོའི་གདུང་རྒྱུད། བལྟ་བ་ནམ་མཁའ་དང་མཉམ་པའི་རྒྱུད་ཆེན་པོ་རྫོགས་སོ།། །།ས་མ་ཡ། རྒྱ་རྒྱ་རྒྱ། འགྲེལ་བ་པདྨ་ཁ་འབྱེད་བྱ་བ་དང་། །བཤད་པའི་མིག་འབྱེད་བྱ་བ་ཡོད། །ཡི་གེ་མེད་པ་ཉིད་ལ་མ་བུ་ལྔ།། །། རྒྱ་གར་སྐད་དུ། སརྦ་ཏ་ཐུ་ག་ཏ་ས་མྱ་དྷི་པ་རུ་བྷ་ཁྲའ ཙྭ་ན་ས་མུ་དྭ་ཡ་སུ་ཏྲ། མ་ཧྭ་ཡུ་ན་གུརྒྱུ་ནུ་ཏི་ར་