Ngb-pt-0048-vol-01-text
Front
Body
རྒྱ་གར་སྐད་དུ། ཏནྟྲ་སརྦ་རྭ་ཛ་སྲུརུ་ཙནྟྲ་ཧྲི་ད་ཡ་པྲ་བྷ་ཛ་ལྭ་མྲི་ཏ་ས་མུ་དྲ་ཀུཎྜ་ལི་ཏསྟོ། བོད་སྐད་དུ། རྒྱུད་ཐམས་ཅད་ཀྱི་རྒྱལ་པོ་ཉི་ཟླའི་སྙིང་པོ་འོད་འབར་བ་བདུད་རྩིའི་རྒྱ་མཚོ་འཁྱིལ་པའི་རྒྱུད།སྔོན་ཐོག་སྤྱི་ཕུད་ཀྱི་སྟོན་པ་སྙིང་པོ་དེ་ཁོ་ན་ཉིད་ལ་ཕྱག་འཚལ་ལོ། །འདི་སྐད་བདག་གིས་བཤད་པའི་དུས་གཅིག་ན། ཆོས་ཉིད་ཁ་གཏིང་མེད་པའི་ཀློང་ན། རང་བྱུང་མུ་མཐའ་གྲོལ་བའི་སྟོན་པས་རང་སྣང་འོད་ཀྱི་འཁོར་ལ། གསལ་དག་རང་གྲོལ་གྱི་བསྟན་པ་བཤད། དུས་ཀྱི་རྒྱལ་པོ་ཐོག་མཐའ་མེད་པའི་དུས་ན། སྡུད་པ་པོ་ནི་རང་རིག་ཁྱེའུ་ཆུང་ངོ་། །དེ་ནི་སྔོན་བྱུང་ཐོག་མའི་ཕུན་སུམ་ཚོགས་པའོ། །རང་བྱུང་རྩལ་གྱི་ཕུན་སུམ་ཚོགས་པ་ལྔ། །སྟོན་པའི་རྒྱལ་པོ་རང་བྱུང་ངང་དངས་ཀྱིས། །འཁོར་གྱི་དམ་པ་རང་གསལ་ཁྱེའུ་ཆུང་ལ། །བསྟན་པའི་རྒྱལ་པོ་རང་དངས་ཆེན་པོ་བཤད། །འོད་གསལ་གནས་ན་སྔ་ཕྱི་མེད་དུས་སོ། །གཞི་རྩལ་དབྱེར་མེད་ཕུན་སུམ་ཚོགས་པ་ནི། །འོད་གསལ་གནས་ནས་ངང་དངས་སྟོན་པ་ཡིས། །རང་སྣང་འཁོར་ལ་རང་གྲོལ་བསྟན་པ་བཤད། །དུས་གསུམ་དབྱེར་མེད་རང་སངས་ཆེན་པོའི་དུས། །དེ་ཡི་རྗེས་འཇུག་ཕུན་སུམ་ཚོགས་པ་ནི། །འོད་གསལ་གནས་ནས་རྡོ་རྗེ་སེམས་དཔའ་ཡིས། །དགའ་རབ་རྡོ་རྗེ་སྙིང་པོའི་འཁོར་ལ་ནི། །ཀུན་རྫོབ་ཙམ་དུ་བླ་མེད་ཐེག་པ་བཤད། །ཡོངས་རྫོགས་ཐོད་རྒལ་མན་ངག་ཚིག་བརྗོད་དུ། །གདུངས་སོབ་མ་འོངས་དུས་ན་འབྱུང་བར་འགྱུར། །སྡུད་པ་པོ་ནི་རང་རིག་ཁྱེའུ་ཆུང་ངོ་། །ཞེས་གསུངས་སོ། །རྒྱུད་ཐམས་ཅད་ཀྱི་རྒྱལ་པོ་ཉི་ཟླའི་སྙིང་པོ་འོད་འབར་བ་བདུད་རྩིའི་རྒྱ་མཚོ་འཁྱིལ་པའི་རྒྱུད་ལས།ཕུན་སུམ་ཚོགས་པའི་ལེའུ་སྟེ་དང་པོའོ།། །།དེ་ནས་རང་སྣང་གསལ་དག་གིས། །མུ་མཐའ་ཡོངས་གྲོལ་སྟོན་པ་ལ། །ཕུན་སུམ་ཚོགས་པ་དེ་ལྟར་ན། །ཅི་ཡང་མེད་ལས་གང་མ་བྱུང་། །སྤྱི་གཞི་སྔོན་ཐོག་ཇི་ལྟར་གནས། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །བརྡའ་དང་གནད་ཀྱིས་བསྟན་བྱ་ཡི། །འཁོར་རྣམས་མ་ཡེངས་གུས་པས་ཉོན། །ཐོག་མ་ཡེ་ཡི་དུས་ཙམ་ན། །ཨ་ཨ་ཨའོ། །ནམ་མཁའ་མེད་པའི་སྔོན་རོལ་ན། །འབྱུང་བ་གང་ཡང་ཡོད་མ་ཡིན། །དངོས་མེད་མིང་མེད་མཚོན་ལས་འདས། །དེ་བཞིན་སངས་རྒྱས་སེམས་ཅན་གཉིས། །གང་ཡང་བཏགས་གྲུབ་མེད་པའི་ཚེ། །གང་ཡང་མ་གྲུབ་ཅིར་མི་སྣང་། །མིང་མེད་མཐའ་སྟོངས་བློ་ཡུལ་མིན། །ཡེ་སྟོང་གང་ལ་དངོས་པོ་མེད། །མངོན་སུམ་མི་སྣང་རང་བཞིན་ཁྱབ། །ཅེས་གསུངས་སོ། །རྒྱུད་ཐམས་ཅད་ཀྱི་རྒྱལ་པོ་ཉི་ཟླའི་སྙིང་པོ་འོད་འབར་བ་བདུད་རྩིའི་རྒྱ་མཚོ་འཁྱིལ་བའི་རྒྱུད་ལས། ཐོག་མའི་གཞིའི་གནས་ལུགས་བསྟན་པའི་ལེའུ་སྟེ་གཉིས་པའོ།། །།དེ་ནས་རང་སྣང་འོད་གསལ་གྱིས། །མུ་མཐའ་ཡོངས་གྲོལ་སྟོན་པ་ལ། །པུས་བཙུགས་ཐལ་སྦྱར་འདི་སྐད་ཞུས། །གཏིང་༄༅ ཡངས་ཆོས་ཉིད་དོན་གྱི་ངོ་བོ་ཇི་ལྟར་གནས། །འོད་གསལ་རྩལ་གྱི་ཡན་ལག་ཇི་ལྟར་ཤར། །ཆོས་ཅན་སྣང་སྲིད་སྣ་ཚོགས་ཇི་ལྟར་གྲོལ། །དེ་ཉིད་འགྲོལ་ཐབས་གདམས་ངག་ཇི་ལྟར་ལགས། །གྲོལ་བའི་འབྲས་བུ་ཇི་ལྟར་ཐོབ་པར་འགྱུར། །ཡོངས་རྫོགས་ཐེག་པར་རིམ་དགུ་དགོས་མི་དགོས། །ཐེག་པ་རིམ་པའི་གྲུབ་མཐའ་ཇི་ལྟར་ཤར། །མུ་མཐའ་གྲོལ་བའི་ལྟ་བསྒོམ་ཇི་ལྟར་མཐོང་། །གསང་སྔགས་ཟབ་མོ་བརྡའ་ཡིས་ཇི་ལྟར་བསྟན། །གནད་ཀྱི་གདམས་པ་དགོས་དོན་གང་དུ་འདུས། །ཉོན་མོངས་དུག་རྣམས་མ་སྤངས་ཇི་ལྟར་གྲོལ། །དུག་ལྔ་གཏན་ནས་བརླག་པར་ཇི་ལྟར་བགྱི། །མ་རིག་མུན་པ་ཀ་ནས་ཇི་ལྟར་དག །ང་བདག་འདི་དང་དུག་གསུམ་ཇི་ལྟར་བསད། །སེམས་ཅན་སངས་རྒྱས་ཚུལ་ནི་ཇི་ལྟར་རྒྱས། །འཁོར་བའི་སྡུག་བསྔལ་མྱ་ངན་ཇི་ལྟར་འདས། །མཚན་མར་སྣང་བའི་དངོས་པོ་ཇི་ལྟར་གྲོལ། །མཁའ་འགྲོ་གསང་བའི་བརྡའ་གནད་ཇི་ལྟར་གསུང་། །ཐེག་པ་རྣམས་ཀྱི་གྲུབ་མཐའ་ཇི་ལྟར་མེད། །ཡོངས་རྫོགས་ཐོད་རྒལ་བླ་མེད་ལྷ་བསྒོམ་གང་། །རིག་སེམས་ཡིད་བློ་རྩད་ནས་ཇི་ལྟར་བཅད། །སྣང་བ་འགྱུ་བ་ཀུན་གཞི་ཇི་ལྟར་གྲོལ། །སེམས་མེད་རིག་མེད་ཆོས་རྣམས་ཇི་ལྟར་ལགས། ཐེག་པའི་འཇུག་པ་ལྟ་སྒོམ་ཇི་ལྟར་མེད། རྣམ་རྟོག་སྡིག་པ་ཀ་ནས་ཇི་ལྟར་དག །བག་ཆགས་སྒྲིབ་པ་གཏན་ནས་ཇི་ལྟར་སངས། །སངས་རྒྱས་རྣམས་ཀྱི་ཐུགས་དགོངས་ཇི་ལྟར་འདུས། །ཆོས་རྣམས་ལ་བཟླ་ཆེན་པོ་ཇི་ལྟར་ལགས། །འཁྲུལ་ཆོད་བློ་ཟད་ཕུགས་སུ་ཇི་ལྟར་བསྐྱལ། །སྲིད་པ་ཐམས་ཅད་ལྟོ་ནས་ཇི་ལྟར་བཟློག །ཉོན་མོངས་དམག་དཔུང་ཆེན་པོ་ཇི་ལྟར་བཟློག །ཁམས་གསུམ་འཁོར་བ་རུ་ནས་ཇི་ལྟར་བཟློག །འགྲོ་བ་དྲུག་གི་གཡང་ས་ཇི་ལྟར་བཅད། །ཆོས་རྣམས་གོ་བཟློག་དོན་ནི་ཇི་ལྟར་རྟོགས། །འགྲོ་དྲུག་སྔ་ལོག་ཆེན་པོ་ཇི་ལྟར་བསྒྱུར། །གོང་འོག་ཐེག་པའི་བྱེ་བྲག་ཇི་ལྟར་དབྱེ། །ཆོས་མེད་ཟད་སར་བསྐྱལ་པའི་གདམས་པ་གང་། །སྡིག་བཅུ་མ་སྤངས་ཐར་པ་ཐོབ་ལགས་སམ། །དགེ་བཅུ་མ་སྤྱད་བྱང་ཆུབ་ཇི་ལྟར་ཐོབ། །ཚོགས་བསགས་སྨོན་ལམ་མེད་པར་སངས་རྒྱས་གང་། །ལྷ་དབང་མ་བསྐུར་དངོས་གྲུབ་ཇི་ལྟར་ཐོབ། །རྒྱུད་ཀྱི་རྒྱལ་པོས་ཇི་ལྟར་བཏུལ་བར་བྱ། །ཉི་ཟླའི་སྙིང་པོ་དཔེ་དོན་ཇི་ལྟར་ལགས། །དཔེ་མཚོན་སྙིང་པོའི་དོན་ནི་ཇི་ལྟར་འཆར། །བདུད་རྩིའི་རྒྱ་མཚོ་ཆེན་པོ་དཔེས་མཚོན་ནས། །གདམས་ངག་བདུད་རྩིའི་རྒྱ་མཚོར་ཇི་ལྟར་འཁྱིལ། །ཆོས་རྣམས་བློ་ཟད་ཅི་ལྟར་བསྐྱལ། །རྒྱུད་ཀྱི་མཚན་ཉིད་བཤད་པ་ཇི་ལྟར་ལགས། །ཀྱེ་སྟོན་པའི་རྒྱལ་པོ་ཐོག་མའི་སངས་རྒྱས་ཁྱོད། །འཁོར་གྱི་དམ་པ་རང་སྣང་གསལ་དག་ལ། །ཞུ་ཚིག་དེ་རྣམས་ཞུས་མཐའ་དགྲོལ་བ་ཞུ། །ཞེས་ཞུ་བ་རླབས་པོ་ཆེ་ཞུས་སོ། །ཉི་ཟླའི་སྙིང་པོ་འོད་འབར་བ་བདུད་རྩིའི་རྒྱ་མཚོ་འཁྱིལ་པའི་རྒྱུད་ལས། གླེང་སློང་བའི་ལེའུ་སྟེ་གསུམ་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ་ཞུས་པ། །གཏིང་ཡངས་ཆོས་ཉིད་དོན་དེ་ཡི། །ངོ་བོ་གནས་ལུགས་ཇི་ལྟར་གནས་པ་ལགས། །ཞེས་གསོལ་པ་དང་། སྟོན་པས་འཁོར་ལ་བཀའ་སྩལ་པ། གཏིང་ཡངས་ཆོས་ཉིད་དོན་གྱི་གནས་ལུགས་ནི། །བདག་གིས་ཟབ་པར་བཤད་ཀྱིས་གུས་པར་ཉོན། །ཨ་ཐང་འབོང་ཡང་ཏ་ཏི་ཨ། །གཏིང་ཡངས་དོན་གྱི་གནས་ལུགས་དེ། །ཅང་མེད་དངོས་མེད་བརྗོད་མེད་ཀྱང་། །རྟོག་པ་བསལ་ཕྱིར་རེ་ཞིག་བསྟན། །མུན་ཁུང་གསེར་འཚོལ་སྒྲོན་མེའི་དཔེས། །དོན་གྱི་གསེར་དང་སྤྲད་པར་བྱ། །གཏིང་ཡངས་དོན་གྱི་གནས་ལུགས་ནི། །སྔོན་ཐོག་ཅི་ཡང་མེད་པ་ཡིན། །ཐོག་མ་མིང་དང་བྲལ་བ་ཡིན། །གཞི་ལ་འཁྲུལ་པ་མེད་པ་ཡིན། །དངོས་གཞི་གྲུབ་པ་མེད་པ་ཡིན། །རླུད་ལྔ་འགྱུར་བ་མེད་པ་ཡིན། །འབྱུང་ལྔ་རང་སར་ཐིམ་པ་ཡིན། །འོད་ལྔ་རང་སར་དག་པ་ཡིན། །རྩལ་ལྔ་རང་སར་ཐིམ་པ་ཡིན། །ཟེར་ལྔ་རང་སར་དག་པ་དང་། ཁྲེས་པ་ཤེས་རྒྱུ་མེད་པ་དང་། །རིག་པ་སྐྱེ་བ་མེད་པ་དང་། །མ་རིག་ཀ་ནས་དག་པ་དང་། །མིན་འཁྲུལ་སྙེམས་བྱེད་མེད་པ་དང་། །སྟོང་པ་གསལ་བ་ལས་འདས་དང་། །ཐུགས་རྗེ་ཡོན་ཏན་འཆར་བ་མེད། །ཡིད་འཁོར་རྣམས་གསུམ་འཁྲུལ་ཆོད་ནས། །མུན་པའི་འཁོར་སྒོར་མ་འ་ས་པས། །རང་བཞིན་ངོ་བོ་ཐུགས་རྗེ་ལས། །མཆོག་གི་དང་པོ་སྐུ་གསུམ་འཆང་། །དེ་ཉིད་ཀློང་གྱུར་ཡེ་སངས་རྒྱས། །དམ་པ་དང་པོའི་སངས་རྒྱས་ཡིན། །ཆོས་ཉིད་དབྱིངས་སུ་མངོན་སངས་རྒྱས། །ཐོག་མའི་ཀུན་ཏུ་བཟང་པོའོ། །གཏིང་ཡངས་ཁ་གཏིང་མེད་པའི་དོན། །ཆོས་ཉིད་དོན་གྱི་གནས་ལུགས་ཡིན། །མི་སྣང་གསལ་བའི་རང་བཞིན་ཅན། །ཆོས་ཉིད་དོན་གྱི་གནས་ལུགས་ཡིན། །ཅང་མེད་ཅིར་སྣང་ཅིར་མ་གྲུབ། །ཆོས་ཉིད་གཏིང་མཐའ་ཡངས་པ་ཡིན། །སྣ་ཚོགས་མཚན་མའི་དངོས་པོ་མེད། །ཆོས་ཉིད་གཏིང་མཐའ་ཡངས་པ་ཡིན། །ཡེ་མེད་ཀུན་འབྱུང་སྟོང་པ་ཉིད། །ཆོས་ཉིད་གཏིང་མཐའ་ཡངས་པ་ཡིན། །དངོས་མེད་རང་བྱུང་གསལ་བའི་བདག །གཏིང་ཡངས་དོན་གྱི་གནས་ལུགས་ཡིན། །གཏིང་ཡངས་མི་མངོན་མཁའ་གསལ་དག །ཆོས་ཉིད་གཏིང་མཐའ་ཡངས་པ་ཡིན། །དངོས་པོར་མི་སྣང་ཡོངས་ལ་ཁྱབ། །གཏིང་ཡངས་དོན་གྱི་གནས་ལུགས་ཡིན། །དངོས་མེད་སྣ་ཚོགས་ཀུན་གྱི་གཞི། །ཀུན་ལྡན་གང་ཡང་གྲུབ་པ་མེད། །ལྷུན་གྲུབ་རྒྱ་མ་ཆད་པའི་དོན། །ཆོས་ཉིད་གཏིང་མཐའ་ཡངས་པ་ཡིན། །དངོས་པོ་དངོས་མེད་ཀུན་གྱི་བདག །ཆོས་ཉིད་གཏིང་མཐའ་ཡངས་པ་ཡིན། །དཔེ་མེད་ཟླ་མེད་མཚོན་དུ་མེད། །ཆོས་ཉིད་གཏིང་མཐའ་ཡངས་པ་ཡིན། །ཅིར་ཡང་མ་གྲུབ་ཅིར་ཡང་སྣང་། ཆོས་ཉིད་གཏིང་མཐའ་ཡངས་པ་དང་། །གཏིང་ཡངས་ཆོས་ཉིད་དོན་གནས་ལུགས། །སྐྱེ་མེད་ཀ་དག་ཡིད་དབྱེར་མེད། །ཡེ་ནས་ཆོས་ཉིད་རྣལ་མའོ། །འབྲས་བུ་ཡེ་གྲུབ་དངོས་གཞི་མེད། །རང་བཞིན་ཅང་མེད་ངོ་བོ་གསལ། །ཐུགས་རྗེ་རང་དངས་ཆེན་པོ་ཡིན། །ཡོན་ཏན་མ་བསྒྲུབས་རང་ལས་འཁྲུངས། ཕྲིན་ལས་ཐོགས་མེད་རང་སར་གྲོལ། །ཆོས་ཉིད་གཏིང་མཐའ་ཡངས་པ་ཡིན། །སྙིང་པོ་མ་བཅོས་གཤིས་སུ་གནས། །དངོས་མེད་ཟང་ཀ་རང་འཁྲུངས་ཡིན། །རིག་མེད་ཡིད་མེད་སེམས་ལས་འདས་པའོ། །ཆོས་ཉིད་གྲུབ་པའི་མཐའ་ལས་གྲོལ། །བསམ་བརྗོད་དམིགས་བློའི་ཡུལ་ལས་འདས། །ཞེས་གསུངས་སོ། །རྒྱུད་ཐམས་ཅད་ཀྱི་རྒྱལ་པོ་ཉི་ཟླའི་སྙིང་པོ་འོད་འབར་བ་བདུད་རྩིའི་རྒྱ་མཚོ་འཁྱིལ་པའི་རྒྱུད་ལས།གཏིང་ཡངས་ཆོས་ཉིད་དོན་གྱི་གནས་ལུགས་བསྟན་པའི་ལེའུ་སྟེ་བཞི་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡངས་གྲོལ་སྟོན་པ་ལ། འོད་གསལ་རྩལ་ཀྱི་ཡན་ལག་རྣམས། །ཆོས་ཉིད་ངང་ལས་ཇི་ལྟར་ཤར། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །འོད་གསལ་རྩལ་གྱི་འཆར་ལུགས་ནི། །དཔེ་དང་དོན་དུ་སྦྱར་ལ་བཤད། །འཁོར་རྣམས་མ་ཡེངས་གུས་པར་ཉོན། །དཔེར་ན་ཉི་མའི་སྙིང་པོ་ལ། །རྩལ་ཟེར་ཡན་ལག་ཤུགས་ལས་ཤར། །དེ་བཞིན་སྙིང་པོའི་གནས་ལུགས་ལས། །རིག་སྣང་རྩལ་ཟེར་ཤུགས་ལ་འཆར། །ཙསྡོན་གླ་རྩི་སྒོག་པ་ལ། །གང་ན་གནས་ཀྱང་དྲི་དང་ལྡན། །དེ་བཞིན་ཆོས་ཉིད་རང་བཞིན་ཡང་། །གང་ན་གནས་ཀྱང་འོད་དང་ལྡན། །ཉི་ཟླ་གར་ཡོད་འོད་གསལ་ཞིང་། །སྙིང་པོས་གར་ཁྱབ་རྩལ་ཟེར་འཆར། །དེ་ཡང་ཇི་ལྟར་འཆར་ཞེ་ན། །གཞི་མེད་ངང་ལས་ཀུན་གཞི་ཤར། །དངོས་མེད་ངང་ལས་དངོས་ཀུན་ཤར། །སྣང་མེད་ངང་ལས་སྣ་ཚོགས་ཤར། །ཡོད་མེད་ངང་ལས་འཁོར་འདས་ཤར། །གཉིས་མེད་ངང་ལས་མ་རིག་ཡེ་ཤེས་ཤར། །ཅིར་ཡང་གྲུབ་པ་མེད་པའི་ངང་ཉིད་ལས། །རང་བཞིན་ངོ་བོ་ཐུགས་རྗེ་གསུམ་དུ་ཤར། །རིག་དང་མ་རིག་རྣམ་གཉིས་ལས། །དེ་ལས་སྐུ་གསུམ་དུག་གསུམ་གཉིས་སུ་ཤར། །དེ་ལས་ཞིང་ཁམས་རྣམ་གསུམ་ཡིད་འཁོར་གསུམ་དུ་ཤར། །དེ་ལས་རང་སར་གྲོལ་དང་མ་གྲོལ་ལས། །འཆར་སྒོ་འཁྲུལ་སྒོ་གཉིས་སུ་ཤར་བ་སྟེ། །དེ་ལས་འགྱུ་དང་མི་འགྱུ་ལས། །རིག་མེད་སེམས་འཁྲུལ་ཞབྲུལ་མེད་ཤར། །དེ་ལས་རྟོགས་དང་མ་རྟོགས་པས། །གཟུགས་ལྔ་སྐུ་ལྔ་ཉིད་དུ་ཤར། །དེ་ལས་མངོན་དུ་གྱུར་དང་མ་གྱུར་པས། །འཁོར་བ་མྱང་འདས་གཉིས་སུ་ཤར། །ཅི་ཡང་མེད་ལས་ཅིར་ཡང་ཤར་བ་ཡིན། །རྟོགས་མ་རྟོགས་ལས་སངས་རྒྱས་སེམས་ཅན་གཉིས། །གཏིང་ཡངས་ཆོས་ཉིད་ང་ཡི་རྩལ་དུ་ཤར། །ཞེས་གསུངས་སོ། །རྒྱུད་ཐམས་ཅད་ཀྱི་རྒྱལ་པོ་ཉི་ཟླའི་སྙིང་པོ་འོད་འབར་བ་བདུད་རྩིའི་རྒྱུ་མཚོ་འཁྱིལ་བའི་རྒྱུད་ལས། འོད་གསལ་རྩལ་གྱི་ཡན་ལག་འཆར་ལུགས་བསྟན་པའི་ལེའུ་སྟེ་ལྔ་པའོ།། །།དེ་ནས་རང་སྣང་འོད་གསལ་གྱིས། །མུ་མཐའ་ཡོངས་གྲོལ་སྟོན་པ་ལ། །ཆོས་ཅན་སྣ་ཚོག་མུ་མཐའ་ཇི་ལྟར་གྲོལ། །སྟོན་པས་རང་སྣང་འཁོར་ལ་བཀའ་སྩལ་པ། །ཆོས་ཅན་སྣ་ཚོགས་མི་མཐའ་གྲོལ་ལུགས་ནི། །ཡོངས་རྫོགས་ཐོད་རྒལ་བླ་མེད་ཐེག་པ་འདིར། །རྩོལ་བསྒྲུབ་མ་བྱས་གྲོལ་བར་བཤད། །བྱ་བཙལ་རྩོལ་བསྒྲུབ་འཁོར་བའི་འདམ་དུ་ཚུད། །དེ་བས་བྱར་མེད་བློ་འདས་འདི། །ཅི་ཡང་མ་བྱས་ལས་རྣམས་ཟིན། །གང་ཡང་མ་བསྒྲུབ་དོན་རྣམས་གྲུབ། །ཅི་ལའང་མ་སྤྱད་གྲོལ་བ་ཐོབ། །གར་ཡང་མ་ཞུགས་ཆོས་སྒོ་མཐོང་། །ཅི་ཡང་བསྲུང་མེད་དོན་མི་འདའ། །སྒྲིབ་པ་མ་སྦྱངས་ཀ་ནས་དག །དམ་ཚིག་མ་བསྲུངས་རང་སྐྱོན་ཀ་ནས་དག །ལྟ་བ་མ་བལྟས་ཆོས་ཉིད་མཐོང་། །སྒོམ་པ་མ་བསྒོམས་སྙིང་པོའི་ཀློང་། །སྤྱོད་པ་མ་སྤྱད་ཆགས་སྡང་གྲོལ། །འབྲས་བུ་མ་བསྒྲུབས་རང་ལས་གྲུབ། །གང་ཡང་མ་བརྟགས་བློ་བཞག་པས། །མཚན་མ་སྣ་ཚོགས་རང་གྲོལ་གྱུར། །རྩོལ་བ་མེད་པར་རང་གནས་པས། །ཆོས་ཅན་སྣ་ཚོགས་རང་གྲོལ་གྱུར། །ཡིད་རིག་སེམས་བློ་དྲན་རྟོག་གིས། །གང་ལའང་རྟོག་དབྱོད་མ་བཅུག་པས། །ཆོས་ཅན་སྣ་ཚོགས་རང་གྲོལ་གྱུར། །སྒོ་ལྔ་གསལ་དངས་ཆོས་དབྱིངས་ལ། །ཡིད་སེམས་འཛིན་རྟོག་མ་སྐྱེས་ན། །ཆོས་ཅན་སྣ་ཚོགས་རང་གྲོལ་གྱུར། །སྣང་བ་རང་སྣང་ཆེན་པོ་ལ། །འཛིན་རྟོག་མ་བཅུག་རང་གྲོལ་གྱུར། །སྣང་སྲིད་སྣ་ཚོགས་ཇི་སྙེད་ལ། །མ་བཀག་མ་བསྒྲུབས་རང་གྲོལ་གྱུར། །སྤང་ལེན་མེད་པའི་སྣང་བ་རང་སོ་ལ། །མི་ལེན་མི་འདོར་མཉམ་པར་གནས་པ་ཡིས། །ཆོས་ཅན་སྣང་སྲིད་སྣ་ཚོགས་རང་གྲོལ་གྱུར། །ཆོས་ཉིད་གཏིང་མཐའ་ཡངས་པ་ཆེན་པོ་ལ། །རིག་པ་གཅིག་པུ་མུ་མཐའ་ཡོང་གྲོལ་བས། །ཆོས་ཅན་སྣང་སྲིད་སྣ་ཚོགས་མུ་མཐའ་གྲོལ། །ཞེས་གསུངས་སོ། ཁུད་ཐམས་ཅད་ཀྱི་རྒྱལ་པོ་ཉི་ཟླའི་སྙིང་པོ་འོད་འབར་བ་བདུད་རྩིའི་རྒྱ་མཚོ་འཁྱིལ་པའི་རྒྱུད་ལས། ཆོས་ཅན་སྣ་ཚོགས་མུ་མཐའ་གྲོལ་བར་བསྟན་པའི་ལེའུ་སྟེ་དྲུག་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །དེ་ཉིད་འགྲོལ་ཐབས་གདམས་ངག་གང་། ཞེས་ཞུས་པ་དང་།སྟོན་པས་འཁོར་ལ་བཀའ་སྩལ་པ། །དེ་ཉིད་འགྲོལ་ཐབས་ངས་བཤད་ཀྱིས། །འཁོར་རྣམས་མ་ཡེངས་གུས་པར་ཉོན། །གདམས་ངག་བདུད་རྩི་རྣམ་པ་གསུམ། །ཕྱི་རུ་སྣང་སྲིད་རང་གྲོལ་བདུད་རྩི་དང་། །ནང་དུ་དུག་གསུམ་འཇོམས་པའི་བདུད་རྩི་དང་། །གསང་བ་སྐྱེ་མེད་ཀ་དག་གོ །དེ་ལ་ཕྱི་ཡི་བདུད་རྩི་ནི། །སྣང་བ་སྣ་ཚོགས་རང་སོ་ལ། །གཟུང་འཛིན་དགག་བསྒྲུབ་མེད་པར་གྲོལ། །ནང་གི་བདུད་རྩི་བསྟན་པ་ནི། །དུག་གསུམ་སྐུ་གསུང་ཐུགས་སུ་བཅོམ། །དེ་ཡང་ཇི་ལྟར་བཅོམ་ཞེ་ན། །གཏི་མུག་ཆོས་སྐུས་བདུད་དངོས་བཅོམ། །ཞེ་སྡང་དུག་ནི་ལོངས་སྐུས་བཅོམ། །འདོད་ཆགས་དུག་ནི་སྤྲུལ་སྐུས་བཅོམ། །དེར་ནི་དུག་གསུམ་ནད་གཅོད་དེ། །སྐུ་གསུང་ཐུགས་ཀྱི་བདུད་རྩིས་བཅོམ། །གསང་བ་སྐྱེ་མེད་ཀ་དག་གི །བདུད་རྩི་ཆེན་པོ་བསྟན་པ་ནི། །ཆོས་ཉིད་གཏིང་མཐའ་ཡངས་པ་དང་། །ཆོས་ཅན་རིག་པ་མུ་མཐའ་གྲོལ། །སྙིང་པོ་སྐྱེ་བ་མེད་པ་དང་། ཡན་ལག་མ་འགགས་ཀ་ནས་དག །དངོས་མེད་རྣལ་མར་གནས་པ་དང་། །སྙིང་པོ་ལྷུན་གྲུབ་འཕོ་འགྱུར་མེད། །གསང་བ་བློ་ཡི་སྤྱོད་ཡུལ་མིན། །སྐྱེ་མེད་ཀ་དག་བདུད་རྩིའོ། །བདུད་རྩི་རྣམ་གསུམ་གདམས་ངག་འདིས། །རྣམ་པ་གསུམ་གྲོལ་སྐུ་གསུང་ཐུགས། །ཞེས་གསུངས་སོ། །ཉི་ཟླའི་སྙིང་པོ་འོད་འབར་བ་བདུད་རྩིའི་རྒྱ་མཚོ་འཁྱིལ་བའི་རྒྱུད་ལས། གྲོལ་ཐབས་ཀྱི་གདམས་ངག་བསྟན་པའི་ལེའུ་སྟེ་བདུན་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་སུ་གྲོལ་བ་ལ། །གྲོལ་བའི་འབྲས་བུ་ཇི་ལྟར་ཐོབ། །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །གྲོལ་བའི་འབྲས་བུ་ཐོབ་ལུགས་ལས། །སྣང་བ་གྲོལ་བའི་འབྲས་བུ་ནི། །གསལ་དག་ཟང་ཐལ་ཆོས་ཀྱི་དབྱིངས། །རིག་པ་གྲོལ་བའི་འབྲས་བུ་ནི། །སྐྱེ་མེད་ཀ་དག་ཆེན་པོ་ཐོབ། །སེམས་གཞི་གྲོལ་བའི་འབྲས་བུ་ནི། །དངོས་མེད་གཏིང་ཡངས་ཆེན་པོ་ཐོབ། །ཕྱི་དང་ནང་དང་གསང་བ་གསུམ། །སྣང་བ་རིག་པ་སེམས་གཞི་གསུམ། །སྣང་གྲོལ་རིག་མེད་སྐྱེ་མེད་གྲོལ། །ཞེས་གསུངས་སོ། །ཉི་ཟླའི་སྙིང་པོ་འོད་འབར་བ་བདུད་རྩིའི་རྒྱ་མཚོ་འཁྱིལ་པའི་རྒྱུད་ལས།གྲོལ་བའི་འབྲས་བུ་བསྟན་པའི་ལེའུ་སྟེ་བརྒྱད་པའོ།། །།དེ་ནས་ངང་དངས་རང་གྲོལ་གྱིས། །མུ་མཐའ་ཡོངས་གྲོལ་སྟོན་པ་ལ། །ཡོངས་རྫོགས་བླ་མེད་ཐེག་པ་འདིར། །ཐེག་པ་རིམ་དགུ་དགོས་མི་དགོས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཡོངས་རྫོགས་ཐོད་རྒལ་ཐེག་པ་སྲ །ཐེག་པ་མ་ལུས་ཀུན་འདུས་པས། །ཐེག་དགུའི་ལྟ་བ་མི་དགོས་སོ། །ཉན་ཐོས་རང་རྒྱལ་བྱང་སེམས་དང་། །ཀྲི་ཡ་ཨུ་པ་ཡོ་ག་དང་། །དེ་དག་བློས་བརྟགས་བྱས་ཆོས་ཡིན། །མ་ཧྭ་ཨ་ནུ་ཨ་ཏི་གསུམ། །དེ་གསུམ་ལྟ་བ་གཉིས་སུ་བཟུང་། །གཞི་ལ་ཐོས་པ་ཁ་འབྱམས་པས། །བློས་བརྟགས་ཐེག་དགུས་དགོས་པ་མེད། །ཅེས་གསུངས་སོ། །ཉི་ཟླའི་སྙིང་པོ་བདུད་རྩིའི་རྒྱ་མཚོ་འཁྱིལ་པའི་རྒྱུད་ལས། ཐེག་པ་རིམ་དགུ་མི་དགོས་པར་བསྟན་པའི་ལེའུ་སྟེ་དགུ་པའོ།། །།དེ་ནས་རང་སྣང་འོད་གསལ་གྱིས། །ཐེག་པའི་གྲུབ་མཐའ་མ་བསྒྲུབས་པར། །མཐའ་གྲོལ་ལྟ་སྒོམ་ཇི་ལྟར་མཐོང་། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །ཡོངས་རྫོགས་བླ་མེད་ཐེག་པ་ཡི། །ཐེག་གཞན་གྲུབ་མཐའ་མ་བསྒྲུབས་པར། །མཐའ་གྲོལ་བལྟ་བསྒོམ་མཐོང་བར་འགྱུར། །ཐེག་པའི་གྲུབ་མཐའ་ཐ་སྙད་ཡིན། །ཐ་སྙད་ཆོས་ཀྱིས་སངས་མི་རྒྱས། །དེར་ནི་གྲུབ་མཐའི་དགོས་པ་མེད། །བློས་བརྟགས་ཆོས་རྣམས་ཡོངས་གྲོལ་བས། །མཐའ་གྲོལ་བལྟ་བསྒོམ་ཆེན་པོ་༄༅ མཐོང་ མཐོང་བའི་དུས་ན་ངོས་བཟུང་མེད། །ཅེས་གསུངས་སོ། །ཉི་ཟླའི་སྙིང་པོ་བདུད་རྩིའི་རྒྱ་མཚོ་འཁྱིལ་པའི་རྒྱུད་ལས། ཐེག་པའི་གྲུབ་མཐའ་མ་བསྒྲུབས་པར་ལྟ་སྒོམ་མཐོང་བར་བསྟན་པའི་ལེའུ་སྟེ་བཅུ་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །གསང་སྔགས་བརྡའ་ཡིས་ཇི་ལྟར་བསྟན། །ཞེས་ཞུས་པ་དང་། །སྟོན་པས་འཁོར་ལ་བཀའ་སྩལ་པ། །མ་ཧྭ་དྷ་ཏི་ས་ཡ་ཨས་སྙོ་ཡ་དྷི་ཏྲ་ཡ། གསང་སྔགས་གནད་རྣམས་བརྡའ་ཡིས་བཤད། །འཁོར་རྣམས་མ་ཡེངས་ཡིད་ལ་ཟུང་། །གུ་རུ་བཛྲ་སཏྭ་ཤི་མསྨུ ཏ་ཐུ་ག་ཏ། བྱུརྙི་སརྦ་ན་མ། བུརྙ་ཡ། དྷརྨ་ཀྭ་ཡ། རཏྣ་ཀོ་ལ་ཏ་བྷ་ལི།ཨས་སྙོ་ཡ། སུ་་མ་ཧྭ་ལ་ཨས། ཞེས་བྱ་སྟེ། ཆོས་ཀྱི་དབྱིངས་ཀྱི་མཁའ་འགྲོ་མས་བརྡའ་ཆོས་གསུངས་པ། གནམ་རིམ་པ་བཅུ་གསུམ་གྱི་སྟེང་ན། ཡབ་ཁྲི་རྗེ་གཙུག་བརྟན་བྱ་བ་དང་། ཡུམ་སྣང་སྲིད་ཀྱི་བདག་མོ་སྟོང་གསལ་ཀུན་སྒྲོལ་མ་བྱ་བ་གཉིས་ཀྱིས། ཡུལ་མཁའ་ཀློང་ཀུན་འབྱུང་ཡངས་པ་ཅན་གྱི་ཕོ་བྲང་ཞེས་བྱ་བར། ཐབས་དང་ཤེས་རབ་གཉིས་སུ་མེད་པའི་སྦྱོར་བ་བྱས་པས། གཉིས་སུ་མེད་པའི་བྱིན་རླབས་ལས་བདུད་རྩི་དཀར་དམར་གྱི་ཆར་ནམ་མཁའ་ལ་བབས་པས་སེམས་ཅན་རྣམས་ཀྱིས་འཐུངས་པས་མགྲིན་པའི་ལམ་དུ་བརྒྱུད་དེ་ཐུགས་རྗེ་དབྱིངས་སུ་ཐིམ། སེམས་ཅན་ཐམས་ཅད་སྐྱེ་ཤི་མེད་པའི་དངོས་གྲུབ་ཐོབ་སྟེ་འགྲོ་དྲུག་ཏུ་མི་འཁོར་ཏེ། སྐྱེ་ཤི་རྩད་ནས་གཅོད་པའི་བརྡའོ། །ནམ་མཁའི་དབྱིངས་ནས་ཉི་ཟླ་ཤར། །གཏི་མུག་མ་རིག་མུན་པ་སངས། །ཞེས་གསུངས་སོ། །ཉི་ཟླའི་སྙིང་པོ་འོད་འབར་བ་བདུད་རྩིའི་རྒྱ་མཚོ་འཁྱིལ་པའི་རྒྱུད་ལས། སྟེང་ལྷའི་འཇིག་རྟེན་དུ་གསང་སྔགས་བརྡའ་ཆོས་སུ་གསུངས་པའི་ལེའུ་སྟེ་བཅུ་གཅིག་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །བར་དུ་བརྡའ་ཆོས་གསུང་དུ་གསོལ། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །བར་མིའི་འཇིག་རྟེན་ཁམས་སུ་མ་ཧྭ་གུ་རུ་པ་དང་། ཡེ་ཤེས་ཀྱི་མཁའ་འགྲོ་མས་ཆོས་གསུངས་པ། མ་ཧྭ་བློ་ཨ་ཨ། གནམ་ས་གའུ་ཁ་སྦྱོར་བར་སྣང་སྣང་གསལ་འོད་གསལ་གྱི་དཀྱིལ་འཁོར་གསང་བའི་གཞལ་ཡས་ཁང་ཞེས་བྱ་བར། ཡབ་ཁྱེའུ་ངང་དངས་ཀུན་རིག་འཕྲུལ་རྗེ་བཙན་བྱ་བ་དང་། ཡུམ་མཛེས་མ་ལྷན་ནེ་ལྕམ་གསལ་བའི་འབར་ཞེས་བྱ་བ་སྟེ། །ཡབ་ཡུམ་གཉིས་ཀྱིས་གཉིས་སུ་མེད་པར་སྦྱར་བའི་བྱིན་རླབས་ལས་བར་སྣང་སྟོང་ཁམས་གསལ་བའི་འཇིག་རྟེན་གྱི་ཁམས་ཐམས་ཅད་དུ་བསྐལ་པའི་མེ་བོ་ཆེ་འབར་ཏེ། སྣང་སྲིད་དངོས་པོ་བློས་བརྟགས་ཀྱི་ཆོས་ཐམས་ཅད་གཞོབ་ཏུ་བསྲེགས་ཏེ། ཉོན་མོངས་པ་ཐམས་ཅད་ས་བོན་མེད་པར་བརླགས་ནས། ཐལ་བ་ནི་གཟུགས་བསྡུས་དངོས་པོའི་ཆོས་ནས་རྒྱུ་ཆོས་བློས་བརྟགས་བྱ་བཙལ་མཐའ་ལ་ཞེན་པ་རྣམས་ཏེ། དེ་དག་ཐམས་ཅད་བསྐལ་པའི་འཐོར་རླུ་་ལ་བསྐུར་བས། སྣང་སྲིད་སྣང་བརྟགས་གཟུང་འཛིན་ཆགས་སྡང་གཅིག་ཀྱང་མ་ལུས་པ་རླུད་པོས་ཁྱེར་ནས་སྟོང་སངས་ཀྱིས་ཐལ་ལོ། །དེར་བར་སྣང་གསལ་བའི་ཁྲི་སྟེང་ན། སྣང་གསལ་འོད་ཀྱི་དཀྱིལ་འཁོར་ནས་གསལ་བའི་ཟླ་བ་ཤར་བས། གཏི་མུག་བག་ཆགས་སྒྲིབ་གཡོག་ཀྱི་མུན་པའི་སྨག་རུམ་ཐམས་ཅད་དུས་གཅིག་ཏུ་སངས་ནས། དེ་ནས་རིན་པོ་ཆེ་གསལ་བའི་འོད་ལྔ་ཤར་ཏེ། འོད་དེའི་རང་བཞིན་གསལ་བ་ལ། སྣང་བ་ངང་དངས་ཏེ་རང་བཞིན་མེད་པར་འོད་སྙིང་པོ་ལ་ཐིམ་མོ། །དེར་སྐལ་པ་དང་ལྡན་པ་རྣམས་ཀྱིས་གསང་སྔགས་བརྡའི་གནད་གོ་སྟེ། རྟོགས་ནས་སངས་རྒྱས་པས་སྐྱེ་ཤི་མེད་པར་འཁོར་བར་འ་ས་མི་སྲིད་དེ་རྡོ་རྗེ་ལྟ་བུའི་སྐུར་གྱུར་ཏོ། །དེ་ལྟར་སྐལ་ལྡན་གང་གིས་རྟོགས་ཀྱང་འགྲོ་དྲུག་སེམས་ཅན་གྱི་སྡུག་བསྔལ་གཅིག་ཀྱང་མི་མངའ་འོ། སརྦ་དྷརྨ་སྙིཏུ་ཨ་ཨ།དབྱིངས་སྐྱེ་བ་མེད་པར་ཐིམ་མོ། །རྒྱུད་ཐམས་ཅད་ཀྱི་རྒྱལ་པོ་ཉི་ཟླའི་སྙིང་པོ་འོད་འབར་བ་བདུད་རྩིའི་རྒྱ་མཚོ་མཁྱིལ་པའི་རྒྱུད་ལས། བར་མིའི་འཇིག་རྟེན་དུ་གསང་སྔགས་བརྡའ་བསྟན་པའི་ལེའུ་སྟེ་བཅུ་གཉིས་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། འོག་ཀླུའི་ཡུལ་དུ་བརྡའ་ཆོས་གསུང་དུ་གསོལ། །ཞེས་ཞུས་པས། བྷ་ར་ཏྲི་ཏྲ་མ་བྷ་ར་ཨ། ས་རིམ་པ་བཅུ་གསུམ་གྱི་འོག་ན། ཡབ་སྲིན་པོ་ཛ་ལ་རཀྟ་དང་། ཡུམ་བདུད་སྲིན་ནག་མོ་ཀུན་གྲོལ་མ་གཉིས། ཡབ་ཡུམ་གཉིས་སུ་མེད་པར་སྦྱོར་བའི་བྱིན་རླབས་ལས། སྦྱོར་མཚམས་ནས་བསྐལ་པའི་འཐོར་རླུད་ཆེན་པོ་བྱུང་ནས་སྣང་སྲིད་དངོས་པོ་རྟོག་ཚོགས་ཐམས་ཅད་རླུད་ལ་བསྐུར་ཏེ། རྣམ་རྟོག་ཉོན་མོངས་ཀྱི་རྩི་སྐྲུར་ཐམས་ཅད་གཅིག་ཀྱང་མ་ལུས་པ་ཁྱེར་ནས། དེར་སྣང་སྲིད་ཀྱི་དངོས་པོ་བློས་བརྟགས་འདུས་བྱས་ཀྱི་ཆོས་རྣམས་གཏན་མེད་པར་གྱུར་ཏེ། ནམ་མཁའ་སྟོང་པ་མཐའ་དང་དབུས་མེད་ཕྱོགས་དང་རིས་མེད་པར་སྟོང་སངས་ཀྱིས་ཐལ་ལོ། །རྟེན་མེད་ནམ་མཁའ་ལ་གནས་པའི་བརྡའ་ཆོས་ཡིན་གསུངས་སོ། །ཉི་ཟླའི་སྙིང་པོ་འོད་འབར་བའི་བདུད་རྩིའི་རྒྱ་མཚོ་འཁྱིལ་བའི་རྒྱུད་ལས། འོག་ཀླུའི་འཇིག་རྟེན་དུ་བརྡའ་ཆོས་བསྟན་པའི་ལེའུ་སྟེ་བཅུ་གསུམ་པའོ།། །།དེ་ནས་རང་སྣང་འོད་གསལ་གྱིས། །མུ་མཐའ་ཡོངས་གྲོལ་སྟོན་པ་ལ། །གནད་ཀྱི་དགོས་དོན་གང་དུ་འདུས། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །གནད་ཀྱི་དགོས་དོན་འདུ་ལུགས་ནི། །ཐོག་མཐའ་གཉིས་ཀྱི་གནད་དུ་འདུས། །སྔོན་ཐོག་ཡེ་ཡི་གནད་བསྟན་པ། །ཡེ་མེད་གཏིང་ཡངས་སྐྱེ་མེད་དབྱིངས། །རྒྱུ་རྐྱེན་སྐྱེ་འགག་མེད་པ་ནི། །ཐོག་མའི་གནད་དུ་ཤེས་པར་བྱ། །རྩལ་ཟེར་རིག་པ་གཡོ་འགྱུ་ནི། །ཐ་མའི་གནད་དུ་ཤེས་པ་བྱ། །དགོས་དོན་ཐོག་མཐའ་གཉིས་མེད་གནད། །འཁྲུལ་གནད་གཞི་ལ་བཟློག་གནད་བུ། །མ་གནད་བུ་ལ་བུ་གནད་མ། །མ་བུ་དབྱེར་མེད་དགོས་དོན་གནད། །སྣང་གནད་བུ་ལ་འཁྲུལ་གནད་མ། །སྣང་སེམས་དབྱེར་མེད་དགོས་དོན་སྟོང། །སྟོང་གནད་མ་ལ་དངོས་གནད་བུ། །སྟོང་ལས་ཀུན་འབྱུང་རང་གྲོལ་གནད། །གནད་ཀྱི་དགོས་དོན་དབྱེར་མེད་འདུས། །འཁྲུལ་པའི་གནད་ནི་ཡིད་རིག་སེམས། །་རིག་མེད་འགྱུ་མེད་སེམས་མེད་གནད། །གནད་ཀྱི་དགོས་དོན་འཁྲུལ་པ་སངས། །སྣང་གསལ་ཉི་མའི་གནད་ཡིན་ཏེ། །འོད་གསལ་ཟླ་བའི་གནད་ཡིན་ནོ། །སྒོ་ལྔ་ཡུལ་ལྔ་འཁྲུལ་བའི་གནད། །འཛིན་མེད་ཟང་ཐལ་འཁྲུལ་བཟློག་གནད། །སྲོག་གནད་སྙིང་ཡིན་བྱ་གནད་ཁ། །དེ་བཞིན་ཐོག་མཐའ་གཉིས་ཀྱི་གནད། །གནད་ཀྱི་དགོངས་དོན་འཁོར་འདས་གཉིས། །རྟོགས་དང་མ་རྟོགས་གཉིས་ལས་བྱུང་། །ཞེས་གསུངས་སོ། །ཉི་ཟླའི་སྙིང་པོ་བདུད་རྩིའི་རྒྱ་མཚོ་འཁྱིལ་པའི་རྒྱུད་ལས། གནད་ཀྱི་དགོས་དོན་འཁོར་འདས་གཉིས་སུ་བསྟན་པའི་ལེའུ་སྟེ་བཅུ་བཞི་པའོ།། །།དེ་ནས་རང་སྣང་འོད་གསལ་གྱིས། །མུ་མཐའ་ཡོངས་གྲོལ་སྟོན་པ་ལ། །ཉོན་མོངས་མ་སྤངས་ཅི་ལྟར་གྲོལ། །ཞེས་ཞུས་པས།སྟོན་པས་འཁོར་ལ་བཀའ་སྩལ་པ། །ཉོན་མོངས་མ་སྤངས་གྲོལ་ལུགས་ནི། །གཏི་མུག་མ་སྤངས་ཆོས་སྐུར་གྲོལ། །ཞེ་སྡང་མ་སྤངས་ལོངས་སྐུར་གྲོལ། །འདོད་ཆགས་མ་སྤངས་སྤྲུལ་སྐུར་གྲོལ། །ང་རྒྱལ་མ་སྤངས་དབྱེར་མེད་གྲོལ། །ཕྲག་དོག་མ་སྤངས་བདེ་ཆེན་གྲོལ། །ཞེས་གསུངས་སོ། །དུག་ལྔ་མ་སྤངས་རང་གྲོལ་བར་བསྟན་པའི་ལེའུ་སྟེ་བཅོ་ལྔ་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །དུག་ལྔ་གཏན་བརླག་ཇི་ལྟར་བགྱི། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་བ། །དུག་ལྔ་གཏན་ནས་བརླག་ལུགས་ནི། །ཟབ་པར་བཤད་ཀྱིས་གུས་པར་ཉོན། སྐྱེ་མེད་ཀ་དག་རྟོགས་པ་ཡིས། །གཏི་མུག་མ་རིག་གཏན་ནས་བརླག །འོད་གསལ་ཀ་དག་ཆོས་ཉིད་མཐོང་། །རང་སྣང་རང་བཞིན་སངས་རྒྱས་པས། །ཞེ་སྡང་ངོ་བོ་གཏན་ནས་བརླག །ཆོས་ཉིད་གསལ་གདངས་ཆེན་པོར་གནས། །ཆགས་མེད་འདོད་ཆགས་རང་གྲོལ་བས། །འདོད་ཆགས་ཞེན་པ་གཏན་ནས་བརླག །བདེ་ཆེན་གསང་བའི་ཀློང་ན་གནས། །ང་རྒྱལ་རང་བཞིན་རྣམ་དག་པའི། །ཆེ་བའི་འཛིན་པ་གཏན་ནས་བརླག །མཉམ་ཉིད་ཡེ་ཤེས་ཆེན་པོར་གནས། །མུ་མཐའ་ཡོངས་གྲོལ་གདམས་ངག་གིས། །ཕྲག་དོག་འཛིན་པ་གཏན་ནས་བརླག །གཉིས་འཛིན་གཏན་སངས་དོན་རྣམས་གྲུབ། །དུག་ལྔ་གཏན་བརླག་མིང་ཡང་མེད། །ཅེས་གསུངས་སོ། །ཉོན་མོངས་དུག་ལྔ་གཏན་ནས་བརླག་པར་བསྟན་པའི་ལེའུ་བཅུ་དྲུག་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །མ་རིག་ཀ་ནས་ཇི་ལྟར་དག །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །མ་རིག་ཀ་ནས་དག་ལུགས་ནི། །སྔོན་ནས་འཐིབས་པའི་མ་རིག་མུན་པ་ལ། །ཡེ་ཤེས་སྣང་གསལ་ཉི་མ་ཤར་བ་ཡིས། །མ་རིག་མུན་པའི་སྨག་རུམ་ཀ་ནས་དག །བསྐལ་བ་སྟོང་དུ་བསགས་པའི་གཏི་མུག་དང་། །རང་བྱུང་འོད་གསལ་ཆེན་པོའི་ཉི་མ་ཤར། །མ་རིག་མུན་པའི་སྒྲིབ་གཡོགས་ཀ་ནས་དག །ཅེས་གསུངས་སོ། །མ་རིག་པའི་སྨག་རུམ་ཀ་ནས་དག་པར་བསྟན་པའི་ལེའུ་བཅུ་བདུན་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །ང་བདག་དུག་གསུམ་ཇི་ལྟར་བསད། །ཅེས་ཞུས་པས། སྟོན་པས་འཁོར་ལ་བཀའ་སྩལ་པ། །ང་བདག་དུག་གསུམ་བསད་ལུགས་ནི། །ཟབ་པར་བཤད་ཀྱིས་འཁོར་རྣམས་ཉོན། །རང་བྱུང་ཡེ་ཤེས་གཤེད་མ་ཡིས། །འགོང་པོ་ང་བདག་དོན་སྙིང་ཕྱུང། །རང་བྱུང་ཡེ་ཤེས་ཆེན་པོར་གནས། །སྐུ་གསུམ་དཔའ་བོ་ཆེན་པོ་ཡིས། །ཉོན་མོངས་དུག་གསུམ་སྙིང་བཏོན་ནས། །སྐུ་གསུམ་རྒྱལ་བའི་ཕོ་བྲང་གདབ། །གཏི་མུག་བསད་པས་ཆོས་སྐུ་མཐོང་། །ཞེ་སྡང་བསད་པས་ལོངས་སྐུ་མཐོང་། །འདོད་ཆགས་བསད་པས་སྤྲུལ་སྐུ་མཐོང་། །དུག་གསུམ་བསད་པའི་སྐུ་གསུམ་མཐོང་། །ཞེས་གསུངས་སོ། །ང་བདག་དུག་གསུམ་བསད་པའི་ལེའུ་སྟེ་བཅོ་བརྒྱད་པའོ།། །།དེ་ནས་རང་སྣང་ཁྱེའུ་ཆུང་གིས། མུ་མཐའ་ཡོངས་གྲོལ་སྟོན་པ་ལ། །སེམས་ཅན་སངས་ནི་ཇི་ལྟར་རྒྱ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ངན་རྟོག་གྲོལ་ན་སངས་རྒྱས་ཡིན། །ཡིད་འཁྲུལ་སངས་ན་སངས་རྒྱས་ཡིན། །ཉོན་མོངས་མེད་ན་སངས་རྒྱས་ཡིན། །རྣམ་རྟོག་མེད་ན་སངས་རྒྱས་ཡིན། །དུག་ལྔ་བརླགས་ན་སངས་རྒྱས་ཡིན། །བློ་ལས་གྲོལ་ན་སངས་རྒྱས་ཡིན། །སྣང་གྲོལ་མཛིན་མེད་སངས་རྒྱས་ཡིན། །ཞེ་འདོད་མེད་ན་སངས་རྒྱས་ཡིན། །སྡུག་བསྔལ་མེད་ན་སངས་རྒྱས་ཡིན། །ཞེས་གསུངས་སོ། །སེམས་ཅན་སངས་རྒྱས་ཚུལ་བསྟན་པའི་ལེའུ་སྟེ་བཅུ་དགུ་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །འཁོར་བ་མྱ་ངན་ཇི་ལྟར་འདས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །འཁོར་བའི་སྡུག་བསྔལ་གྲོལ་ན་མྱ་ངན་འདས། །འཁོར་བའི་འཁྲུལ་སྣང་ཆོད་ན་མྱ་ངན་འདས། །འཁོར་བའི་ཆགས་སྡང་གྲོལ་ན་མྱ་ངན་འདས།འཁོར་བའི་གཉེན་འབྲེལ་སྤངས་ན་མྱ་ངན་འདས། །འཁོར་བའི་འདམ་ནས་ཐོན་ན་མྱ་ངན་འདས། །གཟུང་འཛིན་སྒྲོག་ལས་གྲོལ་ན་མྱ་ངན་འདས། །འཛིན་རྟོག་རྟོད་ཕུར་ཕྱིན་ན་མྱ་ངན་འདས། །ཉོན་མོངས་རྒྱ་ནས་ཐར་ན་མྱ་ངན་འདས། །རྣམ་རྟོག་དྲ་བ་ཆོད་ན་མྱ་ངན་འདས། །བྱ་བཙལ་ཞེ་འདོད་མེད་ན་མྱ་ངན་འདས། །ཞེས་གསུངས་སོ། །འཁོར་བའི་སྡུག་བསྔལ་ལས་གྲོལ་ནས་མྱ་ངན་ལས་འདས་པར་བསྟན་པའི་ལེའུ་སྟེ་ཉི་ཤུ་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །མཚན་མའི་དངོས་པོ་ཇི་ལྟར་གྲོལ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །མཚན་མའི་དངོས་པོ་གྲོལ་ལུགས་ནི། །སྣང་སྲིད་སྣོད་བཅུད་དངོས་པོ་ཀུན། །རང་སྣང་ཆོས་ཉིད་དབྱིངས་སུ་གྲོལ། །ཡུལ་གྱི་དངོས་པོ་རང་སར་གྲོལ། །སྡུག་བསྔལ་མཚན་མ་དངོས་མེད་གྲོལ། །འཁོར་བ་མྱ་ངན་འདས་པར་གྲོལ། །སྒོ་ལྔ་ཟང་ཐལ་ཆེན་པོར་གྲོལ། །ཡུལ་ཡང་འཛིན་ཞེན་མེད་པར་གྲོལ། །ཐམས་ཅད་རང་བཞིན་དངོས་མེད་གྲོལ། །ཞེས་གསུངས་སོ། །མཚན་མའི་དངོས་པོ་རང་སར་གྲོལ་བར་བསྟན་པའི་ལེའུ་སྟེ་ཉེར་གཅིག་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །མཁའ་འགྲོ་གསང་བའི་བརྡའ་གནད་གང་། ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །མ་ཧྭ་གུ་རུ་དམ་པ་དང་། ལས་ཀྱི་མཁའ་འགྲོ་མས་གསང་བའི་བརྡའ་ཆོས་གསུངས་པ། སེམས་ཅན་ཐམས་ཅད་ལ་གནོད་ཅིང་འཚེ་ལ་སྡུག་བསྔལ་དུ་འཇུག་པའི་དགྲའི་སྲོག་མ་བཅད་ན་སངས་མི་རྒྱའོ། །ཞེས་གསུངས་སོ། །དེ་ནས་རིན་ཆེན་གསལ་བའི་མཁའ་འགྲོ་མས་ལས་ཀྱི་མཁའ་འགྲོ་མ་ལ་ཞུས་པ། སེམས་ཅན་ཐམས་ཅད་ལ་གནོད་པའི་དགྲ་དེ་ནི་གང་ལགས། དེའི་སྲོག་རྩ་ཇི་ལྟར་བཅད། དགྲ་དེ་ལ་རྣམ་གྲངས་དུ་མཆིས། །དགྲ་དེའི་རྩ་བ་གང་དུ་མཚིས། །དགྲ་དེ་ལ་ཇོ་བོ་ཡོད་དམ་མེད། ཡོད་ན་དགྲ་དེའི་ཇོ་བོ་ཇི་ལྟར་འདུལ། །ཞེས་ཞུས་པ་དང་། ལས་ཀྱི་མཁའ་འགྲོ་མས་ལན་གསུངས་པ། སེམས་ཅན་ཐམས་ཅད་ལ་གནོད་ཅིང་འཚེ་བའི་དགྲ་ནི་དུག་ལྔ་ལགས་སོ། །དགྲ་དེའི་གྲངས་ནི་ཉོན་མོངས་བརྒྱད་ཁྲི་བཞི་སྟོང་ལགས་སོ། །དགྲ་དེའི་རྩ་བ་ནི་འགོང་པོ་ང་བདག་ཏུ་འདུས་སོ། །དགྲ་དེའི་ཇོ་བོ་ནི་མ་རིག་པ་ཞེ་འདོད་ལགས་སོ། །དགྲ་དེའི་སྲོག་རྩ་ནི་སྐྱེ་བ་མེད་པར་གཅོད་དོ། །ཞེས་གསུངས་སོ། །ཡང་རིན་ཆེན་མཁའ་འགྲོ་མས་ཞུས་པ། དགྲ་དེའི་སྲོག་རྩ་བཅད་ལགས་སམ། །ཞེས་ཞུས་པ་དང་། ལས་ཀྱི་མཁའ་འགྲོ་མས་ལན་གསུང་པ། དགྲ་དེའི་སྲོག་རྩ་ནི་བཅད་མི་དགོས་ཏེ། དགྲ་དེའི་རྩ་བ་ང་བདག་ཆོད་པས་འཆིའོ། །ཞེས་གསུངས་སོ། །ཡང་རིན་ཆེན་མཁའ་འགྲོ་མས་ཞུས་པ། ང་བདག་སྲོག་རྩ་ཇི་ལྟར་བཅད། །སྲོག་གཅོད་བཤན་པ་གང་གིས་བགྱི། །སྲོག་རྩ་བཅད་ཐབས་ཇི་ལྟར་བཅད། །དགྲ་དེའི་ཇོ་བོ་གང་གིས་འདུལ། །ཞེས་ཞུས་པ་དང་། ལས་ཀྱི་མཁའ་འགྲོ་མས་བཀའ་སྩལ་པ། དགྲ་དེའི་སྲོག་གཅོད་གཤེད་མ་ནི། །རང་བྱུང་རང་གྲོལ་བཤན་པ་ཡིས། །མུ་མཐའ་ཡས་པའི་གྲོགས་བཙལ་ནས། །སྐྱེ་མེད་ཀ་དག་དཔུང་བཅས་ཏེ། ཁྲེས་རབ་རལ་གྲིའི་མཚོན་ཁྱེར་ལ། །མུན་སྣང་གཉིས་ཀྱི་སོ་མཚམས་སུ། །འཕྲང་གསུམ་བཅད་ནས་མཁར་སྒོའི་ནང་། །ཡིད་འཁོར་གསུམ་གྱི་ཁང་པ་ན། །དགྲ་བོ་ང་བདག་འདུག་པ་ལ། །རང་བྱུང་ངང་དངས་བཤན་པ་ཡིས། ཁྲེས་རབ་རལ་གྲིས་སྐེ་བཅད་དེ། །རྡོ་རྗེ་ལྕགས་ཀྱུས་སྙིང་བཏོན་ནས། །མ་རིག་ང་བདག་སྲོག་བཅད་པས། །སྐྱེ་ཤི་རྩད་ཆོད་དབྱིངས་སུ་ཐིམ། །ཀ་དག་འོད་གསལ་ཀློང་ན་གནས། །སྐུ་གསུམ་ལྷུན་གྲུབ་དཔའ་བོ་ཡིས། །ཇོ་བོ་ཞེ་འདོད་སྲོག་རྩ་བཅད། །དེ་ལྟར་དགྲ་རྣམས་སྲོག་ཆོད་པས། །སྐྱེ་མེད་ཀ་དག་ཟང་ཀར་འབྱུང་། །བྱར་མེད་བློ་འདས་དབྱིངས་སུ་ཐིམ། །ཆོས་ཅན་རིག་པའི་མུ་མཐའ་གྲོལ། །ཆོས་ཉིད་གཏིང་མཐའ་ཡངས་པ་སྟེ། །མིང་མེད་མཐའ་སྟོངས་ཀློང་དུ་གྱུར། །ཞེས་གསུངས་སོ། །མཁའ་འགྲོ་གསང་བའི་བརྡའ་ཆོས་བསྟན་པའི་ལེའུ་སྟེ་ཉེར་གཉིས་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །ཐེག་པའི་གྲུབ་མཐའ་ཇི་ལྟར་མེད། །ཅེས་ཞུས་པས། །སྟོན་པས་འཁོར་ལ་བཀའ་སྩལ་པ། །ཡོངས་རྫོགས་བླ་མེད་དོན་རྟོགས་ན། །ཐེག་པའི་གྲུབ་མཐའ་ཀུན་འདུས་པས། །རིམ་དགུའི་གྲུབ་མཐའ་མེད་པར་བཤད། །དེ་ཡང་ཇི་ལྟར་མེད་ཅེ་ན། །ཉན་ཐོས་དཀའ་ཐུབ་འདུལ་ཁྲིམས་མེད། །རང་རྒྱལ་བརྟུལ་ཞུགས་ཚངས་སྤྱོད་མེད། །བྱང་སེམས་སྡོམ་པ་བསྲུང་བྱ་མེད། །ཀྲི་ཡའི་ཁྲུས་དང་གཙང་སྦྲ་མེད། །ཨུ་པའི་དྲི་མ་དག་བྱེད་མེད། །ཡོ་གའི་སྔགས་དང་ཕྱག་རྒྱ་མེད། །ཡོད་མེད་ཆོ་འཕྲུལ་རྣམ་བཞི་མེད། །མ་ཏོརེ་ཏིང་འཛིན་བསྙེན་བསྒྲུབ་མེད། །ཨ་ནུའི་དབྱིངས་དང་ཡེ་ཤེས་མེད། །ཨ་ཏིའི་སྣང་བ་ཆོས་སྐུ་དང་། །རིག་པ་སངས་རྒྱས་བཏགས་པ་མེད། །ཡོངས་རྫོགས་བླ་མེད་དོན་རྟོགས་ན། །རིམ་དགུའི་གྲུབ་མཐའ་ངང་གིས་མེད། །ཅེས་གསུངས་སོ། །ཡོངས་རྫོགས་བླ་མེད་ཐེག་པའི་དོན་རྟོགས་ན། ཐེག་པའི་གྲུབ་མཐའ་མེད་པར་བསྟན་པའི་ལེའུ་སྟེ་ཉེར་གསུམ་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །ཐོད་རྒལ་ལྟ་སྒོམ་ཇི་ལྟར་ལགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །བླ་མེད་ཐོད་རྒལ་ལྟ་སྒོམ་ནི། །དོན་ལ་མཚོན་བརྗོད་ལས་འདས་ཀྱང་། །མ་མཚོན་རྟོགས་པར་མི་འགྱུར་བས། །མུན་ཁུང་གསེར་སྒྲོན་ལྟ་བུར་བཤད། །མུ་མཐའ་ཡོངས་གྲོལ་ལྟ་བའི་རྒྱལ་པོ་ཡིན། །མུ་མེད་གཏིང་ཡངས་སྒོམ་པའི་རྒྱལ་པོ་ཡིན། །མཐའ་ཆོད་ཕྱོགས་བྲལ་སྤྱོད་པའི་རྒྱལ་པོ་ཡིན། །རེ་མེད་རང་གནས་འབྲས་བུའི་རྒྱལ་པོ་ཡིན། །ཡོངས་རྫོགས་ཐོད་རྒལ་ལྟ་བསྒོམ་ཁྱད་པར་འཕགས། །མུ་མེད་མཐའ་ཡས་ནམ་མཁའ་ཀློང་ཡངས་ལྟ་བ་ཡིན། །ཆོས་ཉིད་གཏིང་གྲོལ་རྒྱ་མཚོ་ཀློང་ཡངས་སྒོམ་པ་ཡིན། །མཐའ་སྟོངས་ཕྱོགས་མེད་གླང་ཆེན་སྨྱོན་པ་སྤྱོད་པ་ཡིན། །སྐུ་གསུམ་ལྷུན་གྲུབ་འབྲས་བུའི་རི་བོ་ཆེན་པོ་ཡིན། །ཞེས་གསུངས་སོ། །ཡོངས་རྫོགས་བླ་མེད་ཀྱི་བལྟ་སྒོམ་བསྟན་པའི་ལེའུ་སྟེ་ཉེར་བཞི་པའོ།། །།དེ་ནས་རང་སྣང་ཁྱེའུ་ཆུང་གིས། །༄༅ མུ་མཐའ་ཡོངས་གྲོལ་སྟོན་པ་ལ། །རིག་སེམས་ཡིད་བློའི་རྩད་གཅོད་གང་། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །དེ་དག་རྩ་བ་བཅད་ཐབས་ནི། །རིག་མེད་སྐྱེ་མེད་རྟོགས་པ་ཡིས། །རིག་སྐྱེ་འཁྲུལ་པ་རྩད་ནས་བཅད། །རང་བྱུང་ངང་དངས་རྟོགས་པ་ཡིས། །སེམས་འཁྲུལ་ཆགས་སྡང་རྩད་ནས་བཅད། །འགྱུ་མེད་ངང་ཐིམ་དོན་རྟོགས་པས། །ཡིད་འགྱུའི་འཛིན་རྟོག་རྩད་ནས་བཅད། །རིག་སེམས་ཡིད་ཀྱི་གཟུང་འཛིན་མེད། །འཁྲུལ་མེད་བློ་ཟད་རྟོག་ཚོགས་མེད། །ཅེས་གསུངས་སོ། །སེམས་རིག་ཡིད་བློ་རྩད་ནས་བཅད་པའི་ཐབས་བསྟན་པའི་ལེའུ་སྟེ་ཉེར་ལྔ་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །སྣང་བ་འགྱུ་བ་ཀུན་གཞི་ཡི། །གྲོལ་ལུགས་ཇི་ལྟར་བསྟན་དུ་གསོལ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སྣང་འགྱུ་གཞི་གསུམ་གྲོལ་ལུགས་ནི། །སྣང་བ་དགག་བསྒྲུབ་མི་བྱ་རང་སར་ཞོག །སྤང་ལེན་མེད་པས་སྣང་སྲིད་རང་གྲོལ་ལོ། །འགྱུ་བ་གཟུང་འཛིན་མི་བྱ་རིག་པའི་མིང་འཛིན་བཅད། །འགྱུ་མེད་ངང་དངས་རིག་པ་རང་སར་གྲོལ། །ཀུན་གཞི་སྐྱེ་མེད་བག་ཆགས་སྒྲིབ་གཡོགས་སངས། །སྙམ་བྱེད་རྩིས་གདབ་མི་བྱ་གཉེན་པོར་གྲོལ། །དེ་གསུམ་ཉིད་ཀྱང་གཅིག་ཏུ་གྲོལ་བ་ན། །སྣང་བྱེད་འགྱུ་མེད་ཀུན་གཞི་ཆོས་ཉིད་ཀློང་། །ཞེས་གསུངས་སོ། །སྣང་བ་འགྱུ་བ་ཀུན་གཞི་གྲོལ་ལུགས་བསྟན་པའི་སྟེ་ལེའུ་ཉེར་དྲུག་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །སེམས་རིག་ཆོས་རྣམས་ཇི་ལྟར་མེད། །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཡོངས་རྫོགས་ཐོད་རྒལ་བླ་མེད་ལ། །སེམས་རིག་ཆོས་རྣམས་ཡོད་མ་ཡིན། །དངོས་གཞི་མེད་པས་སེམས་མེད་དོ། །སྐྱེ་བ་མེད་ལས་རིག་པ་མེད། །ཐ་སྙད་མེད་པས་ཆོས་རྣམས་མེད། །དྲན་སེམས་འཁྲུལ་པ་ཡིན་པས་སེམས་ཀྱི་བཏགས་ཆགས་མེད། །རིག་པ་འཁྲུལ་རྒྱུ་ཡིན་པས་རིག་མེད་སྐྱེ་བ་མེད། །ཐེག་དགུ་བློ་ཆོས་ཡིན་པས་ཆོས་མེད་མུ་མཐའ་གྲོལ། །རིག་སེམས་ཆོས་གསུམ་མེད་པར་བསྟན་པའི་ལེའུ་སྟེ་ཉེར་བདུན་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །ཐེག་འཇུག་ལྟ་བསྒོམ་ཇི་ལྟར་མེད། །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཀུན་རྫོབ་ཐོད་རྒལ་སྒོར་ཞུགས་ནས། །ཐེག་པ་མ་ལུས་ཡོངས་རྫོགས་པས། །ཐེག་དགུའི་སྒོ་རུ་འཇུག་མི་དགོས། །ཐེག་པ་མེད་ཅིང་འཇུག་པ་མེད། །འཇུག་པའི་སྒོ་མེད་ལྟ་སྒོམ་མེད། །དེ་ཡང་ཇི་ལྟར་མེད་ཅེ་ན། །བདེན་པའི་རྟེན་འབྲེལ་བདེན་གཉིས་འཇུག་སྒོ་མེད། །བདག་མེད་རིས་མེད་སྟོང་པ་བཅོ་བརྒྱད་མེད། །ཡུལ་རྡུལ་རྟེན་འབྲེལ་བྱང་སེམས་ལྟ་སྒོམ་མེད། །རིགས་གསུམ་དག་པ་རིགས་ལྔ་སྐྱེ་འགག་མེད། །སྣང་སྟོང་རྒྱུ་འབྲས་ཡེ་སངས་ཞེ་འདོད་མེད། །དེར་ནི་བསྐྱེད་རྫོགས་གསུམ་གྱི་བལྟ་སྒོམ་མེད། །སྣང་སྟོང་གཉིས་མེད་དབྱིངས་དང་ཡེ་ཤེས་མེད། །ཅེས་གསུངས་སོ། །ཐེག་པའི་འཇུག་པ་ལྟ་སྒོམ་མེད་པར་བསྟན་པའི་ལེའུ་སྟེ་ཉེར་བརྒྱད་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །རྣམ་རྟོག་ཀ་ནས་ཇི་ལྟར་དག།ཅེས་ཞུས་པས། སྟོན་པས་འཁོར་ལ་བཀའ་སྩལ་པ། །ཡོངས་རྫོགས་བླ་མེད་ཐེག་པའི་དོན་རྟོགས་ན། །ཆོས་དབྱིངས་གཏིང་མཐའ་ཡངས་པ་ལ། །རིག་པ་མུ་མཐའ་ཡོངས་གྲོལ་བས། །སྡིག་དང་རྣམ་རྟོག་ཀ་ནས་དག །དཔེར་ན་བསྐལ་པའི་འཐོར་རླུ་་གིས། །རྩིས་སྐུར་མ་ལུས་ཀུན་དག་བཞིན། །གཏིང་ཡངས་མཐའ་གྲོལ་གདམས་པ་ཡིས། །ཐིག་ལེ་མཐོང་རྡོལ་ཡེ་ཤེས་གསལ། །འོད་གསལ་ཆོས་ཉིད་དོན་རྟོགས་པས། །རྣམ་རྟོག་སྒྲིབ་པ་ཀ་ནས་དག །སྐྱེ་མེད་དངོས་མེད་ཅང་མེད་རྟོགས། །མཚམས་མེད་ལྔ་དང་མི་དགེ་དག །སྙིང་པོའི་ཀློང་དུ་རབ་གནས་ནས། །དགེ་སྡིག་གཉིས་ཀ་མ་སྤྱད་པས། །རང་གྲོལ་ངན་སོང་སྐྱེ་ལྷུང་མེད། །གཏིང་ཡངས་སྙིང་པོའི་ཀློང་གནས་པས། །དགེ་སྡིག་གཉིས་ཀ་ཀ་ནས་དག །དཔེར་ན་ཤེལ་སྒོང་དག་པའི་ནང་། །སྨན་དུག་བཟང་ངན་གཉིས་དག་ལྟར། །གཏིང་ཡངས་མུ་མཐའ་ཡོངས་གྲོལ་བས། །རྟོག་སྒྲིབ་རྣམ་སྨིན་ཀ་ནས་དག །ཅེས་གསུངས་སོ། །རྣམ་རྟོག་སྒྲིབ་པ་ཀ་ནས་དག་པར་བསྟན་པའི་ལེའུ་སྟེ་ཉེར་དགུ་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །བག་ཆགས་སྒྲིབ་པ་ཇི་ལྟར་དག །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །འོད་གསལ་ཀ་དག་དོན་རྟོགས་པས། །བག་ཆགས་སྒྲིབ་པ་གཏན་ནས་སངས། །སེམས་ལ་དངོས་མེད་སྐྱེ་མེད་པས། །བག་ཆགས་སྒྲིབ་པ་གཏན་ནས་སངས། །སྐྱེ་མེད་ཀ་དག་དོན་རྟོགས་པས། །བག་ཆགས་སྒྲིབ་པ་གཏན་ནས་སངས། །གཞི་ལ་བག་ཆགས་སྒྲིབ་མེད་པས། །བག་ཆགས་སྒྲིབ་པ་གཏན་ནས་སངས། །ཐིག་ལེ་ཁོང་གསལ་གཏིང་གསལ་བས། །བག་ཆགས་སྒྲིབ་པ་གཏན་ནས་སངས། །རང་བྱུང་འོད་གསལ་སྒྲིབ་ཆགས་མེད། །ཅེས་གསུངས་སོ། །བག་ཆགས་སྒྲིབ་པ་གཏན་ནས་སངས་པར་བསྟན་པའི་ལེའུ་སྟེ་སུམ་ཅུ་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །གསང་སྔགས་བརྡའ་ཡིས་ཇི་ལྟར་བཤད། །ཅེས་ཞུས་པ་དང་། །སྟོན་པས་འཁོར་ལ་བཀའ་སྩལ་པ། །གསང་སྔགས་བརྡའ་ཡི་ཆོས་བཤད་ཀྱི། །འཁོར་རྣམས་མ་ཡེངས་གུས་པར་ཉོན། །ཨ་སྙོ་ཡ་ཧྲི་ཏྲ་དྷ་ཐི་མ་ཨ་ཨ། །སྣང་སྲིད་ཐམས་ཅད་ཀྱི་སྤྱི་མེས་སྔོན་ཐོག །ཁྲི་རྗེ་གཙུག་བརྟན་གྲགས་པ་བྱ་བ་དེས། ནམ་མཁའ་གོས་སུ་རྒྱན། ས་གཞི་གདན་དུ་བཏིང་། སྐར་མདའ་རྐེད་ལ་བཅིངས། ན་བུན་མགོ་ལ་གོན། འཇའ་ཚོན་རྒྱལ་མཚན་བྱས། གཡས་སུ་ཉི་མ་ཐོགས། གཡོན་དུ་ཟླ་བ་ཐོགས། སྣང་སྲིད་ལྟོ་བར་བཅུག རྒྱ་མཚོ་ཁྲོག་ཆོད་བྱས། འགྲོ་དྲུག་གི་སེམས་ཅན་ཐམས་ཅད་ཀྱི་སྙིང་བཏོན་ནས་ཟོས་པས། ལུས་ཐམས་ཅད་བདེ་བས་གང་སྟེ། སེམས་ཅན་ཐམས་ཅད་ཀྱི་སྙིང་བཏོན་ནས་ཟོས་ཀྱང་། དེ་ཐམས་ཅད་མ་ཤི་བར་སངས་རྒྱས་སྐད་དེ། དེ་ངོ་མཚར་ཆེའོ། །དེ་ནས་སྣང་སྲིད་ཐམས་ཅད་ཀྱི་མངའ་བདག་མོ། །སེམས་ཅན་ཐམས་ཅད་ཀྱི་འབྱུང་གནས་ཡུམ་སྲིད་པའི་རྒྱལ་མོ། །ཀུན་གཞི་ཀུན་གྱི་དབང་མོ་ཆེ་བྱ་བ་དེ་ལས་སྲིད་པའི་སེམས་ཅན་སྐྱེས་ཀྱང་སེམས་ཅན་མང་དུ་མ་སོང་ལ། སྐྱེས་པ་ཐམས་ཅད་ཤི་ཡང་ཉུང་དུ་མ་སོང་སྐད་དེ། དེ་ཡང་འཕེལ་བའམ་འགྲིབ་པའམ། ཟད་པ་དང་། གདབ་དང་། སྟོངས་པ་ཡང་མེད་དོ། །དེ་ཡང་ཤིན་ཏུ་ངོ་མཚར་ཆེའོ། །ཡང་ནམ་མཁའི་དབྱིངས་སྟོང་གསལ་གྱི་ལྷ་ཁང་ན། །དྲི་མེད་རང་གསལ་གྱི་ཁྱེའུ་ཆུང་བྱ་བ་དེས། འོད་ཀྱི་ན་བཟའ་གསོལ། འཇའ་ཚོན་སྣ་ལྔས་སྐ་རགས་བྱས། སྤྲིན་གྱི་ཞྭ་གོན། རླུད་པོ་རྐང་པས་མནན། ཆུ་གཏེར་ཁར་བླུགས། ཕྱག་གཡས་སུ་མཚོན་ཆའི་འཁོར་ལོ་བསྐོར་ནས། ཞབྲུལ་པ་གང་སྐྱེས་ཐམས་ཅད་རྩད་ནས་བཅད།གཡོན་དུ་ཉི་ཟླའི་སྒྲོན་མེ་ཐོགས་ནས་མ་རིག་པའི་སྒྲིབ་གཡོགས་བསལ། །བདུད་རྩིའི་བཅུད་འཐུངས་པས་སྣང་སྲིད་མཉམ་པར་སྦྱར། ནོར་བུ་རིན་པོ་ཆེ་སྙིང་ལ་བཅངས་པས་དགོས་འདོད་ཐམས་ཅད་རང་ལས་བྱུང་སྐད་དེ་ཤིན་ཏུ་ངོ་མཚར་ཆེའོ། །དེ་ཡང་ནམ་མཁའི་དབྱིངས་སུ་བལྟས། རྒྱ་མཚོའི་ཀློང་དུ་ཉལ། ཉི་ཟླའི་མཚམས་སུ་འདུག འོད་ལྔའི་ནང་དུ་བཞུགས། རླུ་་ནག་འ་་མས་ཁྱེར། རི་ལ་མེ་ཆེན་འབར་བའི་ལེའུ་སྟེ་སོ་གཅིག་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །སངས་རྒྱས་ཐུགས་དགོངས་ཇི་ལྟར་འདུས། །ཞེས་ཞུསླ་པ་དང་། སྟོན་པས་འཁོར་ལ་བཀའ་སྩལ་པ། །སངས་རྒྱས་རྣམས་ཀྱི་ཐུགས་དགོངས་ནི། །ཡོངས་རྫོགས་ཐོད་རྒལ་ཐེག་པར་འདུས། །དེ་ཡང་ཇི་ལྟར་འདུས་ཤེ་ན། །སྔོན་ཐོག་སྤྱི་ཕུད་ཐུགས་དགོངས་ནི། །དངོས་མེད་གཏིང་གསལ་དགོངས་པར་འདུས། །ཡེ་ཐོག་སྟོན་པའི་ཐུགས་དགོངས་ནི། །ཡེངས་མེད་གཏིང་ཡངས་དགོངས་པར་འདུས། །ཐོག་མའི་སངས་རྒྱས་དགོངས་པ་ནི། །གཏིང་མཐའ་ཡས་ལ་མུ་མཐའ་གྲོལ། །དམ་པ་དང་པོའི་ཐུགས་དགོངས་ནི། །སྐྱེ་མེད་ཆོས་ཉིད་དགོངས་པར་འདུས། །རྡོ་རྗེ་སེམས་དཔའི་ཐུགས་དགོངས་ནི། །རང་བྱུང་འོད་གསལ་དགོངས་པར་འདུས། །སེམས་དཔའ་རྡོ་རྗེའི་ཐུགས་དགོངས་ནི། །དབྱིངས་ནས་རིག་ཤར་དབྱིངས་སུ་གྲོལ། །ངང་དངས་ཁྱེའུ་ཆུང་ཐུགས་དགོངས་ནི། །ཆོས་ཅན་ཆོས་ཉིད་དབྱིངས་སུ་གྲོལ། །ལོངས་སྐུ་སྣང་མཛད་ཐུགས་དགོངས་ནི། །དངོས་མེད་སྣ་ཚོགས་རང་བཞིན་གྲུབ་པ་མེད། །སྤྲུལ་སྐུ་ཤཱཀཐུབ་ཐུགས་དགོངས་ནི། །རང་བཞིན་ཅིར་ཡང་མ་གྲུབ་པས། །ཆོས་རྣམས་གང་ཡང་ཡོད་མ་ཡིན། །འདས་དུས་སངས་རྒྱས་དགོངས་པ་ཡང་། །རང་བཞིན་སྟོང་ལ་ངོ་བོ་གསལ། །དེ་ལ་སངས་རྒྱས་དགོངས་པ་ནི། །སྣང་སྲིད་འཁོར་བའི་ཆོས་རྣམས་ཀུན། །རང་སར་གྲོལ་ནས་རང་བཞིན་མེད། །མ་འོངས་སངས་རྒྱས་དགོངས་པ་ནི། །འཁོར་བའི་ཆོས་ནི་འཁྲུལ་པ་སྟེ། །འཁྲུལ་པ་སངས་ནས་ཅིར་མ་གྲུབ། །དུས་གསུམ་སངས་རྒྱས་དགོང་འདུས་པས། །སྣ་ཚོགས་གསོག་སྣང་ཆོས་རྣམས་ཀུན། །བརྟགས་ན་ཅིར་ཡང་མེད་པ་ལ། །མ་བརྟགས་པ་ན་རང་བཞིན་གསལ། །དགའ་རབ་རྡོ་རྗེའི་ཐུགས་དགོངས་ནི། །མིང་མེད་མཐའ་སྟོངས་ཆོས་རྣམས་མེད། །ཅེས་གསུངས་སོ། །དེ་ནས་ཐུན་མོང་མ་ཡིན་པ། །དེ་ཁོ་ན་ཉིད་སངས་རྒྱས་རྣམས་ཀྱི་དགོངས་པ་འདུས་པ། །སྙིང་པོ་ལྷུན་གྲུབ་བྱང་ཆུབ་སེམས་ཀྱི་དགོངས་པ་ནི། །ཡེ་ནས་དངོས་པོ་མེད་པ་ལ། །རང་གསལ་རང་བཞིན་གྲུབ་པ་མེད། །རྒྱུ་རྐྱེན་གཉེན་པོས་བསྐྱེད་བཤིག་མེད། །དུས་གསུམ་འཕོ་འགྱུར་མེད་པ་ལ། །ཡེ་མེད་ཡེ་དངས་ཡེ་གསལ་བ། །རྣམ་པ་ཀུན་ལྡན་གང་ཡང་མེད། །སྐྱེ་བ་མེད་པ་འགག་པ་མེད། །རང་བྱུང་རང་སྣང་འོད་གསལ་བ། །ཅིར་སྣང་ཀ་ནས་དག་པ། གཉིས་མེད་རང་སར་གྲོལ་བ། བྱེད་པ་པོས་མ་བྱས་པ། རྒྱུ་ལས་མ་བྱུང་བ། རྐྱེན་གྱིས་མ་བསྐྱེད་པའོ། །དངོས་མེད་ཅང་མེད་མིང་མེད་པས། །བློ་འདས་ཆོས་མེད་བསྟན་མེད་པ། །ཚིག་མེད་བརྗོད་པའི་ཡུལ་ལས་འདས། མ་ལུས་སངས་རྒྱས་རྣམས་ཀྱི་ཐུགས་དགོངས་ནི། །བྱས་པས་མ་བྱུང་མ་བྱས་ཀློང་ན་གསལ། །བལྟས་པས་མ་མཐོང་མ་བལྟས་དབྱིངས་ན་གསལ། །བསྒོམས་པས་མ་རྙེད་མ་བསྒོམས་ཀློང་ན་གནས། །བཙལ་བས་མ་རྙེད་མ་བཙལ་རང་ལས་གྲུབ། །སྤྱད་པས་མ་གྲོལ་མ་སྤྱད་ཆགས་སྡང་གྲོལ། །བསྲུངས་པས་མ་ཐུབ་མ་བསྲུངས་ཀ་ནས་དག །སྣྲུངས་པས་མ་འབྱངས་མ་སྦྱངས་སྒྲིབ་པ་དག །ཕྱིན་པས་མ་གླེབས་མ་བགྲོད་སྡོད་པའི་ས། །བསྒྲུབས་པས་མ་གྲུབ་སྐུ་གསུམ་རང་ལས་གྲུབ། །ཡང་དག་སངས་རྒྱས་རྣམས་ཀྱི་དགོངས་འདུས་པ། །ཆོས་དབྱིངས་གཏིང་མཐའ་ཡངས་པར་འདུས། །ཆོས་ཅན་མུ་མཐའ་ཡོངས་གྲོལ་ལོ། །སྐྱེ་མེད་ཀ་དག་ཐུགས་དགོངས་འདུས། །དངོས་མེད་ཟང་ཀའི་དགོངས་པར་འདུས། །བྱར་མེད་བློ་འདས་དགོངས་པར་འདུས། །ཅང་མེད་དངོས་མེད་ཐུགས་དགོངས་ཡིན། །གསལ་དངས་རིན་ཆེན་མེད་པར་འདུས། །ཅང་མེད་ཅིར་སྣང་དེ་ཉིད་མེད། །གཞི་མེད་སྣ་ཚོགས་རང་བཞིན་མེད། །མེད་པ་རང་བྱུང་ངང་དུ་གྲོལ། །ཅིར་སྣང་རང་སྣང་ཉིད་དུ་གྲོལ། །གཤིས་ཀྱི་འདུག་ཚུལ་སྙིང་པོ་ནི། །མ་བཅོས་རྣལ་མ་རང་འཁྲུངས་སོ། །སོ་མ་ག་་མ་ལྷོད་པ་བག་ཡངས་སོ། །བདེ་བར་གཤེགས་པ་ཀུན་གྱི་ཐུགས་དགོངས་ནི། །བྱ་བཙལ་རྩོལ་བས་མི་རྙེད་མ་བྱས་ལྷུན་གྱིས་གྲུབ། །བཙལ་ཞིང་བསྒྲུབས་པས་མི་འགྲུབ་མ་བཙལ་རང་ལ་གྲུབ། །བལྟས་ཤིང་བསྒོམས་པས་མ་མཐོང་མ་བལྟས་རང་ལ་གསལ། །རྒྱུ་ཆོས་བློས་བརྟགས་ཆོས་མིན་བྱར་མེད་བློ་ལས་འདས། །དངོས་རྣམས་མིང་མེད་མཐའ་སྟོངས་བློ་ཡི་ཡུལ་ལས་འདས། །ཞེས་གསུངས་སོ། །སངས་རྒྱས་རྣམས་ཀྱི་ཐུགས་དགོངས་ཇི་ལྟར་འདུས་པར་བསྟན་པའི་ལེའུ་སྟེ་སོ་གཉིས་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །ཆོས་རྣམས་ལ་བཟླ་ཆེན་པོ་བཤད་དུ་གསོལ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སངས་རྒྱས་དགོངས་པ་ལ་བཟླའི་ཆོས་བཤད་ཀྱི། །འཁོར་རྣམས་ཉོན་ལ་ཐུགས་ཀྱི་དཀྱིལ་དུ་ཆོངས། །ཨ་དྷརྨ་སརྦ་དྷ་ཏུ་ཧྲི་ཏྲ་སྙོ་ཡ་ཐུ་ལ་ཨ་ཨ། ཡོངས་རྫོགས་ཐོད་རྒལ་ཆོས་རྣམས་ལ་བཟླ་འདི། །དབང་པོ་ཡང་རབ་ཐོད་རྒལ་ཆིག་ཆོད་ལས། །ཀུན་གྱི་ཐུན་མོང་མིན་ནོ་མ་བསྟན་ཅིག །ཀུན་རྫོབ་ཆོས་རྣམས་བླ་མེད་ལ་བཟླ་ཞིང་། སྔོན་ཐོག་མིང་མེད་ཆོས་ཉིད་སྐྱེ་མེད་ལ། །རང་བྱུང་རང་རྩལ་ཡན་ལག་རོལ་པའི་ཆོས། །བློས་བརྟགས་འཁྲུལ་པ་ཡིན་པས་ལ་ཟློ་བཤད། །དངོས་མེད་སྐྱེ་མེད་སྙིང་པོའི་གནས་ལུགས་ནི། །ཀུན་གཞི་མེད་ལ་རླུད་དང་འབྱུང་ལྔ་མེད། །སྙིང་པོ་མེད་ལ་འོད་དང་རྩལ་ཟེར་མེད། ཁྲེས་མེད་རིག་མེད་མ་རིག་འཁྲུལ་པ་མེད། །རང་བཞིན་ངོ་བོ་ཐུགས་རྗེ་རྣམ་གསུམ་མེད། ཡིད་འཁོར་གསུམ་མེད་ཡིད་རིག་སེམས་ཞབྲུལ་མེད། །འཆར་སྒོ་ཞབྲུལ་སྒོ་གཟུགས་ལྔ་སྐུ་ལྔ་མེད། །གསལ་དངས་མི་གཡོ་དོན་སྙིང་རྣམ་ལྔ་མེད། །དབང་པོ་རྣམ་ལྔ་རྣམ་ཤེས་ཚོགས་བརྒྱད་མེད། །ཡན་ལག་ལྔ་དང་གཟུགས་རྣམས་དངོས་པོ་མེད། །དུག་གསུམ་དུག་ལྔ་སྒོ་ལྔ་ཡུལ་ལྔམེད། །རིག་ཞབྲུལ་རྐྱེན་འཁྲུལ་གློ་བུར་ཞབྲུལ་པ་མེད། ཕྱི་ནང་ཡུལ་སེམས་གཟུང་འཛིན་དགག་བསྒྲུབ་མེད། །དགྲ་གཉེན་ཆགས་སྡང་བདག་གཞན་ངར་འཛིན་མེད། །སྐུ་དང་ཡེ་ཤེས་མིང་དུ་འདོགས་མཁན་མེད། །ཚིག་དང་ཡི་གེ་དཔེ་དོན་བརྗོད་མཚོན་མེད། །རྒྱུ་འབྲས་དགེ་སྡིག་གཉིས་སུ་སྟོན་མཁན་མེད། །བསྟན་བྱ་སྟོན་བྱེད་རིམ་དགུར་འཆད་མཁན་མེད། །ཆོས་རྣམས་ཉན་བཤད་དངོས་མེད་རང་བཞིན་མེད། ཁུ་རྐྱེན་གཉེན་པོ་སྐྱེ་འགག་འགྲོ་འོང་མེད། །འཕོ་འགྱུར་གནས་ས་བྱུང་ས་ལྡོག་ས་མེད། ཁྲེས་དང་མ་ཤེས་རྟོགས་དང་མ་རྟོགས་མེད། །སངས་རྒྱས་སེམས་ཅན་འཁོར་བ་མྱང་འདས་མེད། །མ་རིག་ཡེ་ཤེས་རྣམ་རྟོག་ཆོས་ཉིད་མེད། །སྐྱེ་རྒ་ན་འཆི་གནོད་གསུམ་ཆུ་བཞི་མེད། །སྣང་སྲིད་སྣོད་བཅུད་བློས་བརྟགས་ལྟ་སྒོམ་སྤྱོད་འབྲས་གང་ཡང་མེད། །ལྷུན་རྫོགས་ཕྲིན་ལས་རྩོལ་བ་བྱར་མེད་དེ། །བསྲུངས་སྦྱངས་བགྲོད་བསྒྲུབས་སྤངས་ཐོབ་སངས་རྒྱས་མེད། །དགེ་སྡིག་མཐོ་རིས་ངན་སོང་སྐྱེ་གནས་མེད། །མང་ཉུང་འཕེལ་འགྲིབ་སྣང་བརྟགས་བློ་ཆོས་མེད། །ཉམས་རྟོགས་དྲོད་དང་ཡོན་ཏན་ས་ཐོབ་མེད། །བདེ་སྡུག་ལོངས་སྤྱོད་ཡིན་མིན་གཉིས་ཀ་མེད། །གཞི་མེད་འཁྲུལ་མེད་བློ་ཡི་ཡུལ་ལས་འདས། །མིང་མེད་བསམ་བརྗོད་དམིགས་པའི་སྤྱོད་ཡུལ་གྲོལ། །ཞེས་གསུངས་སོ། །ཆོས་རྣམས་མ་ལུས་ལ་ཟློ་ཆེན་པོ་འདི། །བློ་དམན་རྣམས་ཀྱིས་སྤྱོད་ཡུལ་མ་ཡིན་པས། །ཡང་རབ་སྐལ་ལྡན་རྣམས་ཀྱི་ཐུགས་ལ་ཆོངས། །རྟོགས་ཤིང་མངོན་དུ་གྱུར་ན་དེ་ལྟར་ཡིན། །སྐལ་མེད་ཐོལ་བྱུང་ཀུན་ལ་བསྟན་གྱུར་ན། །དེ་དོན་མི་རྟོགས་སྐྲག་ཅིང་སྐུར་པ་འདེབས། །ཚིག་ཞེན་ཁ་ཆོས་དོན་མེད་འཆལ་བའི་རྒྱུ། །ཁ་རྫོགས་མིན་ནོ་ཆོས་དང་སེམས་སུ་བསྲེས། །ཡེ་ཤེས་ཡིན་ནོ་སྟོང་གསལ་མཐའ་གྲོལ་འདིས། །བློ་དངོས་འདྲེས་ནས་སྙིང་པོའི་ཀློང་དུ་ཉོལ། །བྱ་བ་ཀུན་ཐོང་རྟོག་མེད་དབྱིངས་སུ་སྡོད། །བྱར་མེད་རྣལ་མ་སྙིང་པོའི་དོན་ལ་ལྟོས། །མེད་པ་མ་ཡིན་གསལ་ཞིང་རིག་པ་ཆེ། །ཡོད་པ་མ་ཡིན་དངོས་པོར་རང་བཞིན་མེད། །གཉིས་པ་མ་ཡིན་གཉིས་མེད་ཆོས་ཉིད་དོན། །གོང་འོག་ཁྱད་པར་བློ་ཡི་ཚིག་དོན་རྩིས། །ཞེས་གསུངས་སོ། །ཆོས་རྣམས་ལ་བཟླ་ཆེན་པོའི་ལེའུ་སྟེ་སོ་གསུམ་པའོ།། །།དེ་ནས་རང་སྣང་ཁྱེའུ་ཆུང་གིས། མུ་མཐའ་ཡོངས་གྲོལ་སྟོན་པ་ལ། །འཁྲུལ་ཆོད་བློ་ཟད་ཕུགས་བསྐྱལ་གང་། །ཞེས་ཞུསླ་པ་དང་། སྟོན་པས་འཁོར་ལ་བཀའ་སྩལ་པ། །འཁྲུལ་པའི་རྒྱུ་རྐྱེན་རྩད་ནས་ཆོད། །འཁྲུལ་མེད་ཡེ་ཤེས་ཕུགས་སུ་བསྐྱལ། །འཁྲུལ་སྣང་འཁོར་བའི་ཆོས་རྣམས་ལ། །མི་བདེན་རང་བཞིན་སྟོང་པའི་ཕྱིར། །འཁྲུལ་ཆོད་ཆོས་ཉིད་དབྱིངས་སུ་བསྐྱལ། །དེ་མ་ཡིན་ལ་དེར་འཛིན་པའོ། །འཁྲུལ་པའི་ཤེས་པ་རྣམས་ཆོད་ནས། །སྡུག་བསྔལ་སངས་པས་མྱ་ངན་འདས། །བློ་ཟད་ཆོས་ཉིད་མཐའ་རུ་ཕྱིན། །འཁྲུལ་སངས་ཆོས་ཉིད་ཕུགས་སུ་བསྐྱལ། །ཞེས་གསུངས་སོ། །ཆོས་ཉིད་ཕུགས་སུ་བསྐྱལ་བར་བསྟན་པའི་ལེའུ་སྟེ་སོ་བཞི་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །སྲིད་པ་ལྟོ་ནས་ཇི་ལྟར་བསྒྱུར། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སྲིད་པ་ལྟོ་བསྒྱུར་འདི་ལྟར་བསྒྱུར། །ཁྱི་ཕག་བྱ་དང་སྦྲུལ་བསད་ལ། །མེ་འབར་མཚོ་སྐེམ་མུན་པ་བསལ། །སྐྱེ་མེ་ཀ་དག་རྟོགས་པ་ཡིས། །སྲིད་པ་སྐྱེ་བ་མེད་པར་བསྒྱུར། །སྐྱེ་འགག་གཉིས་མེད་རང་གྲོལ་བས། །སྲིད་པ་སངས་རྒྱས་དགོངས་པར་བསྒྱུར། །ཞེས་གསུངས་སོ། །སྲིད་པ་ལྷོ་བསྒྱུར་བསྟན་པའི་ལེའུ་སྟེ་སོ་ལྔ་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །ཉོན་མོངས་དམག་དཔུང་ཇི་ལྟར་བཟློག །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །མིང་ཆེད་བློ་ལས་འདས་པ་ཡི། །མུ་མཐའ་ཡོངས་གྲོལ་སྟོན་པ་ལ། །སྐྱེ་མེད་ཀ་དག་དཔའ་བོ་ཡིས། །ཉོན་མོངས་དམག་དཔུང་དགྲ་རྣམས་བཟློག །སྙིང་པོ་ཆོས་སྐུ་སྐྱེ་མེད་ཀྱིས། །ཉོན་མོངས་གཏི་མུག་དམག་དཔུང་བཟློག །རང་བྱུང་འོད་གསལ་ཆེན་པོ་ཡིས། །ཉོན་མོངས་ཞེ་སྡང་དམག་དཔུང་བཟློག །བདེ་ཆེན་འོད་གསལ་ཆེན་པོ་ཡིས། །ཉོན་མོངས་འདོད་ཆགས་དམག་དཔུང་བཟློག །སྤྲོས་གཅོད་རང་གྲོལ་དཔའ་བོ་ཡིས། །ཉོན་མོངས་ང་རྒྱལ་དམག་དཔུང་བཟློག །སྟོང་ལས་ཀུན་འབྱུང་རང་གྲོལ་གྱིས། །ཉོན་མོངས་ཕྲག་དོག་དམག་དཔུང་བཟློག །མུ་མཐའ་ཡོངས་གྲོལ་དཔའ་བོ་ཡིས། །ཉོན་མོངས་འཁོར་བའི་དམག་དཔུང་བཟློག །ཅེས་གསུངས་སོ། །ཉོན་མོངས་དམག་དཔུང་བཟློག་པའི་ལེའུ་སྟེ་སོ་དྲུག་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །འཁོར་བ་རུ་ནས་ཇི་ལྟར་བཟློག །སྟོན་པས་འཁོར་ལ་བཀའ་སྩལ་པ། །སྔོན་ཐོག་སྤྱི་ཕུད་དམག་དཔོན་གྱིས། །མུ་མཐའ་ཀུན་གྲོལ་དམག་རྣམས་བསགས། །རང་བྱུང་ངང་དངས་དཔའ་བོ་ཡིས། །མ་རིག་འཁོར་བའི་དམག་དཔུང་བཟློག །སྡུག་བསྔལ་རྣམ་དག་དཔའ་བོ་ཡིས། །འཁོར་བའི་སྡུག་བསྔལ་རུ་ནས་བཟློག །སྐྱེ་མེད་ཀ་དག་གདམས་ངག་གིས། །འཁོར་བའི་ཟུག་རྔུ་རུ་ནས་བཟློག །ཅེས་གསུངས་སོ། །འཁོར་བ་རུ་ནས་བཟློག་པའི་ལེའུ་སྟེ་སོ་བདུན་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །འགྲོ་དྲུག་གཡང་ས་ཇི་ལྟར་བཅད། །ཅེས་ཞུས་པས། སྟོན་པས་འཁོར་ལ་བཀའ་སྩལ་པ། །སྙིང་པོའི་རང་བཞིན་སྐྱེ་བ་མེད་པ་ལས། །རྩལ་ཟེར་ཡན་ལག་རྟོག་པའི་ཡིད་གཡོས་པས། །བདག་མེད་མ་རྟོགས་ཞེ་སྡང་དམྱལ་བར་སྐྱེས། །ཞེ་སྡང་རང་གྲོལ་དམྱལ་བའི་གཡང་ས་བཅད། །ཡིད་རྩད་མ་བཅད་སེར་སྣ་ཡི་དྭགས་གནས་སུ་སྐྱེས། །མ་བཅིངས་རང་གྲོལ་ཡི་དྭགས་གཡང་ས་བཅད། །འོད་གསལ་མ་རྟོགས་གཏི་མུག་བྱོལ་སོང་སྐྱེས། །ཡེ་ཤེས་འོད་གསལ་བྱོལ་སོང་གཡང་ས་བཅད། །ང་རྒྱལ་མ་གྲོལ་ལྷ་མིན་གནས་སུ་སྐྱེས། །མཉམ་ཉིད་རང་གྲོལ་ལྷ་མིན་གཡང་ས་བཅད། །ཕྲག་དོག་དག་གིས་མི་ཡི་གནས་སྐྱེས་པས། །དངོས་མེད་རང་གྲོལ་མི་ཡི་གཡང་ས་བཅད། །འདོད་ཆགས་ཞེན་པས་ལྷ་ཡི་གནས་སུ་སྐྱེས། །འགག་མེད་རང་གྲོལ་ལྷ་ཡི་གཡང་ས་བཅད། །སྐྱེ་མེད་སྙིང་པོ་ཆོས་སྐུ་ལྷུན་གྲུབ་པས། །མི་སྐྱེ་མི་འགག་འགྲོ་དྲུག་གཡང་ས་བཅད། །ཅེས་གསུངས་སོ། །འགྲོ་དྲུག་གཡང་ས་བཅད་པའི་ལེའུ་སྟེ་སོ་བརྒྱད་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །ཆོས་རྣམས་གོ་ལྡོག་ཇི་ལྟར་རྟོགས། །ཞེས་གསོལ་པ་དང་། སྟོན་པས་འཁོར་ལ་བཀའ་སྩལ་པ། །ཡོངས་རྫོགས་ཐོད་རྒལ་ཐེག་པ་ཡིས། ཁུ་འབྲས་ཆོས་རྣམས་གོ་བཟློག་པས། །བསྐྱེད་བྱ་སྐྱེད་བྱེད་མེད་པར་རྟོགས། །བློས་བརྟགས་ཆོས་རྣམས་གོ་བཟློག་པས། །བྱར་མེད་བློ་འདས་ཆོས་ཉིད་རྟོགས། །ཐེག་དགུའི་ཆོས་རྣམས་གོ་བཟློག་པས། །དགུ་རྩེ་བཅུ་འདས་ཡོངས་རྫོགས་རྟོགས། ཁུ།བ་མཐའི་ལྟ་སྒོམ་གོ་བཟློག་པས། །མཚོན་མེད་བལྟར་མེད་བསྒོམ་མེད་རྟོགས། །བྱས་ཆོས་རྩོལ་བསྒྲུབ་གོ་བཟློག་པས། །བྱར་མེད་ཀུན་རྫོགས་བླ་མེད་རྟོགས། །རིག་པ་གོ་བཟློག་རིག་མེད་རྟོགས། །ཡིད་འགྱུ་གོ་བཟློག་འགྱུ་མེད་ངང་དངས་རྟོགས། །སེམས་ གྱི་གོ་བཟློག་སེམས་མེད་ཆགས་མེད་རྟོགས། །སངས་རྒྱས་འདོད་ལས་གོ་བཟློག་སངས་རྒྱས་མེད། །ཅེས་གསུངས་སོ། །ཆོས་རྣམས་གོ་བཟློག་གི་ལེའུ་སྟེ་སོ་དགུ་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །དུག་ལྔ་སྔ་ལོག་ཇི་ལྟར་འགྱུར། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །དུག་ལྔ་སྔ་ལོག་སྐུ་ལྔར་འགྱུར། །དེ་ཡང་ཇི་ལྟར་འགྱུར་ཞེ་ན། །གཏི་མུག་སྔ་ལོག་ཆོས་སྐུར་འགྱུར། །ཞེ་སྡང་སྔ་ལོག་ལོངས་སྐུར་འགྱུར། །འདོད་ཆགས་སྔ་ལོག་སྤྲུལ་སྐུར་འགྱུར། །ང་རྒྱལ་སྔ་ལོག་མཉམ་པ་ཉིད། །ཕྲག་དོག་སྔ་ལོག་བདེ་ཆེན་སྐུ། །ཞེས་གསུངས་སོ། །དུག་ལྔ་སྔ་ལོག་བསྟན་་པའི་ལེའུ་སྟེ་བཞི་བཅུ་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །གསང་སྔགས་བརྡའ་ཡིས་ཇི་ལྟར་བཤད། །ཅེས་ཞུས་པས། སྟོན་པས་འཁོར་ལ་བཀའ་སྩལ་པ། །གསང་སྔགས་བརྡའ་ཡི་ཆོས་བསྟན་གྱིས། །འཁོར་རྣམས་མ་ཡེངས་གུས་པས་ཉོན། །ཨ་སྙོ་ཡ་དྷི་ཏྲ་ཨ་དྷ་ཐིམ་ཡ། །རི་མཆོག་རྩེ་ནས་བལྟས་པས་སྣང་སྲིད་ཐམས་ཅད་མཐོང་། །ཉི་མ་མཁའ་ལ་ཤར་ན་རྒྱལ་ཁམས་ཐམས་ཅད་གསལ། །ཨ་ཐ་སྟིས་ཐ་མ་ཧྭ་སུ་ཁ་ཧོ། །དེ་ནས་མཁའ་འགྲོ་གསང་བའི་བརྡའ་གནད་བཤད། །རིན་ཆེན་སྣང་གསལ་འོད་གསལ་གྱི་ལྷ་ཁང་ན། ལྷ་ཀུན་གྱི་སྤྱི་ཕུད་ཉི་ཟླའི་མེ་ལོང་ཅན་བྱ་བ་དང་། ལྷ་མོ་མཛེས་མ་འོད་སྟོང་ལྡན་མ་གཉིས་བཟའ་མི་བྱས་པས། སྣང་སྲིད་འཁོར་འདས་ཐམས་ཅད་ཉིད་དེ་གཉིས་ཀྱིས་བསྐྱེད་དེ་ཤིན་ཏུ་ངོ་མཚར་ཆེ་བའི་བརྡའོ། །ཡང་སྣང་གསལ་རྣམ་དག་འོད་གསལ་གྱི་ལྷ་ཁང་ན། །ཁྱེའུ་ཆུང་ཀུན་རིག་འཕྲུལ་གྱི་རྗེ་བཙན་དམ་པ་དང་། །ལྷ་མོ་ངང་དངས་འོད་གསལ་མཛེས་མ་འོད་འབར་མ་གཉིས་བཟའ་མི་བྱས་ནས་ཡབ་ཡུམ་གཉིས་མེད་སྦྱར་བ་ལསདེར་ཡུམ་ལ་སྲས་རང་བྱུང་འོད་གསལ་ཀུན་མཁྱེན་བྱ་བ་སྐུ་འཁྲུངས་པས། སྲས་དེས་ཕྱོགས་བཞི་མཚམས་བརྒྱད་དུ་ནམ་མཁའི་མཐའ་འཚོལ་དུ་ཕྱིན་པས། དེ་ལ་མཐའ་དབུས་མ་རྙེད་དེ་སྣང་སྲིད་འཁོར་འདས་ཀྱི་ཆོས་ཐམས་ཅད་སྤྲོས་པ་བཅད་ནས། །སྙིང་པོའི་ཀློང་དུ་ཐིམ་པའི་མན་ངག་གོ །ཡང་སྲས་འོད་གསལ་ཀུན་མཁྱེན་སྤྲོས་གཅོད་ཀྱིས། །འགྲོ་ས་མ་རྙེད་སླར་ལོག་སྟེ། འཇིགས་པའི་དགྲ་ཡིས་ཁྱེར་གྱིས་དོགས་ནས། རྒྱུ་འགྲུལ་མ་བྱས་པར་ཡིད་བཞིན་ནོར་བུ་བཅངས་ནས་ཁྱིམ་དུ་བསྡད་པས། རྩོལ་བསྒྲུབ་ཞེ་འདོད་བྱ་མ་དགོས་པར། དགོས་འདོད་ཐམས་ཅད་ཤུགས་ལས་བྱུང་། བྱ་བ་ཐམས་ཅད་བཏང་བས་ལས་རྣམས་ཟིན། །བྱ་བཙལ་རྩོལ་བསྒྲུབ་མེད་པས་དོན་རྣམས་གྲུབ། ཡེ་ནས་དོན་རྟོགས་རེ་དོགས་རྩད་ནས་བཅད། །ཐིག་ལེ་ཉག་གཅིག་གསང་བའི་བརྡའ་ཆོས་ཡིན། །ཞེས་གསུངས་སོ། །གསང་སྔགས་བརྡའ་ཆོས་བསྟན་པའི་ལེའུ་སྟེ་ཞེ་གཅིག་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །མཁའ་འགྲོ་གསང་བའི་བརྡའ་ཆོས་གང་། །ཞེས་ཞུས་པ་དང་། སྟོན་པས་འཁོར་ལ་བརྡའ་ཆོས་བཤད་པ། སྣ་བྲག་དགུ་རུམ་བརྩེགས་པའི་ནང་ནས་རིན་པོ་ཆེའི་གཏེར་རྙེད། རྒྱ་མཚོ་ཆེན་པོའི་ནང་ནས་རང་བྱུང་ངང་དངས་ཀྱི་ཁྱེའུ་ཆུང་གིས་རིན་པོ་ཆེ་གསེར་གྱི་ཟ་མ་ཏོག་ཏུ་ཡིད་བཞིན་གྱི་ནོར་བུ་རིན་པོ་ཆེ་རྙེད་ནས་ཟ་མ་ཏོག་ཏུ་བཅུག་སྟེ། མི་འགྱུར་མི་ཤིགས་པའི་རྒྱས་བཏབ་པའི་མན་ངག་གོ །རིན་པོ་ཆེ་སྣ་ཚོགས་འོད་འབར་བའི་ནང་ན། རིན་པོ་ཆེ་གཅིག་གཞན་པས་ཁྱད་དུ་འཕགས་ཏེ། དེ་ནི་སྙིང་པོ་མཆོག་གི་རིན་པོ་ཆེ་བྱ་བ་ཡིན་པས། རིན་པོ་ཆེ་སྣ་ཚོགས་དེ་ལས་འབྱུང་སྟེ། དེའི་ཁོང་དུ་འདུས་པའི་མན་ངག་གོ །མཁའ་འགྲོ་གསང་བའི་བརྡའི་ཆོས་བསྟན་པའི་ལེའུ་སྟེ་ཞེ་གཉིས་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །ཐེག་པའི་ཁྱད་པར་ཇི་ལྟར་དབྱེ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཡོངས་རྫོགས་ཐོད་རྒལ་ཐེག་པ་མྲ །ཐེག་པ་མ་ལུས་ཀུན་འདུས་ཀྱང་། །འོན་ཀྱང་རེ་ཞིག་དབྱེ་བ་བསྟན། །སེམས་ཅན་བློ་ཡ་ཁྱད་པར་ལས། །རབ་འ ང་གསུམ་དུ་ཕྱེ་བས་དགུ། །ཡང་རབ་ཐོད་རྒལ་ ག་ཆོད་དོ། །ཐེག་པའི་སྒོ་ཡང་དེ་ལྟར་བསྟན། །ཉན་ཐོས་རང་རྒྱལ་བྱང་སེམས་གསུམ། །ཐ་མའི་རབ་འབྲིང་གསུམ་ལ་བསྟན། །ཀྲི་ཡ་ཨུ་པ་ཡོ་ག་གསུམ། །འབྲིང་གི་རབ་འབྲིང་གསུམ་ལ་བསྟན། །མ་ཧྭ་ཨ་ནུ་ཨ་ཏི་གསུམ། །རབ་ཀྱི་རབ་འབྲིང་རྣམས་ལ་བསྟན། །ཡང་རབ་སྤྱི་ཏི་ཡོ་ག་སྟེ། །ཐོག་རྒལ་ཡང་ཏི་ཡོ་གའོ། །དབང་པོ་ཆིག་ཆོད་སྐལ་ལྡན་ལ། །ཡོངས་རྫོགས་ཐོད་རྒལ་བླ་མེད་བསྟན། །ཞེས་གསུངས་སོ། །ཐེག་པའི་དབྱེ་བ་བསྟན་པའི་ལེའུ་སྟེ་གསུམ་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །དེ་རྣམས་བལྟ་བ་ཇི་ལྟར་འདོད། །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཐེག་པའི་རིམ་པའི་ལྟ་བ་ནི། །བཤད་ཀྱིས་མ་ཡེངས་གུས་པར་ཉོན། །ཉན་ཐོས་ལྟ་བ་རྣམ་པ་གཉིས། །བྱེ་བྲག་སྨྲ་བའི་འདོད་ལུགས་ནི། །སྙིང་པོའི་རང་བཞིན་མ་རྟོགས་པས། །ཡན་ལག་བུ་ཡི་སྣང་ཚུལ་ལ། །ཕྱི་ཡུལ་རང་སེམས་སོ་སོར་མཐོང་ མཐོང་བས་བསྐོར་བ་བར་དང་བཅས། །གཡག་རྔ་ནེའུ་སིང་ལྟ་བུར་སྣང་། མདོ་སྡེ་པ་ཡི་ལྟ་བ་ནི། །རྡུལ་ཕྲན་མི་སྣངགོངབུགཅིགཏུསྣང། །བདག་མེད་ཚོགས་དྲུག་ཡུལ་འགེགས་འདོད། །དེ་ལས་རང་རྒྱལ་ལྟ་བས་འཕགས་པ་ནི། །ཕྱི་ཡི་ཡུལ་ཡང་འབྱུང་བ་རྟེན་འབྲེལ་སྣང་། །ནང་གི་སེམས་ཀྱང་རྟེན་འབྲེལ་རིམ་པ་སྣང་། །བདག་མེད་རྣམ་པར་རིག་པ་མེད་པར་འདོད། །དེ་ལས་འཕགས་པ་སེམས་ཙམ་བལྟ་བ་ནི། །རྣམ་བདེན་རྣམ་མེད་རྣམ་པ་གཉིས་སུ་འདོད། །རྣམ་པར་བདེན་པར་འདོད་པའི་ལྟ་བ་ནི། །རང་གི་རིག་པ་རྒྱུན་གྱི་རྟག་པ་ལ། །རྟོག་པ་སྐད་ཅིག་རྒྱུན་གྱིས་མི་རྟག་པ། །རྣམ་པར་སྣང་བ་སེམས་སུ་བདེན་པར་འདོད། །མཐའ་བཞི་བྲལ་བས་གཟུང་འཛིན་གཉིས་སྟོང་པ། །རང་རིག་གསལ་བའི་ངོ་བོ་གཅིག་ཏུ་འདོད། །སེམས་ཙམ་རྣམ་མེད་པ་ཡི་ལྟ་བ་ནི། །ཕྱི་རོལ་སེམས་ཀྱི་རྣམ་པ་མེད་པ་སྲ །རང་རིག་བདེན་པའི་ཤེས་པའི་ངོ་བོ་ལ། །དེ་ཉིད་གཞན་དུ་བརྗོད་དུ་མེད་པ་ལ། །གསལ་བྱེད་གཞན་ལ་ལྟོས་པ་ཅི་ཡང་མེད། །དབུ་མ་པ་ཡི་ལྟ་བའི་འདོད་ལུགས་ནི། །སྒྱུ་མར་འདོད་དང་རྣལ་འབྱོར་སྤྱོད་པའོ། །སྒྱུ་མ་ལྟ་བུའི་ལྟ་བའི་འདོད་ལུགས་ནི། །སྣང་སེམས་ཐམས་ཅད་སྒྱུ་མ་ཙམ་དུ་འདོད། །ཕྱི་ཡི་དངོས་པོ་དག་ནི་ཐམས་ཅད་ཀྱང་། །ཡང་དག་པར་ན་རང་བཞིན་གྲུབ་པ་མེད། །འཇིག་རྟེན་འཁོར་བའི་སྡུག་བསྔལ་སྒྱུ་མ་འདྲ། །བརྟགས་ཤིང་དཔྱད་ན་རང་བཞིན་གྲུབ་པ་མེད། །ཡོད་དང་མེད་དང་དབུས་དང་དབུས་མ་ཡིན། །ཀུན་རྫོབ་ཆུ་ཡི་ཟླ་བ་ཙམ་དུ་འདོད། །རྣལ་འབྱོར་སྤྱོད་པ་ལྟ་བའི་འདོད་ལུགས་ནི། །ཆོས་རྣམས་ཐམས་ཅད་མཉམ་པ་ཉིད་དུ་འདོད། །ཡོད་མེད་དངོས་པོ་ཅི་ཡང་འདོད་པ་མེད། །སྟོང་པ་བཅོ་བརྒྱད་ནམ་མཁའ་དང་འདྲའོ། །ཞེས་གསུངས་སོ། །མཚན་ཉིད་སྡེ་གསུམ་གྱི་ལྟ་བ་བསྟན་པའི་ལེའུ་སྟེ་ཞེ་བཞི་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །ཀྲི་ཡོག་སྡེ་གསུམ་བལྟ་བ་གང་། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །ཀྲི་ཡའི་བལྟ་བའི་འདོད་ལུགས་ནི། །དངོས་མེད་དངོས་པོ་མ་རྟོགས་པས། །ཡན་ལག་འདི་ལྟར་སྣང་བ་ཀུན། །རིགས་གསུམ་ལྷ་ཡི་དཀྱིལ་འཁོར་འདོད། །དོན་དམ་དག་པ་རྣམ་གསུམ་བལྟ། །སྙིང་པོ་མ་རྟོགས་ཨུ་པ་ཡས། །ཀུན་རྫོབ་རིགས་བཞི་ལྷ་དལ་ལ། །དོན་དམ་སྐྱེ་འགག་མེད་པར་འདོད། །ཡོ་གའི་བལྟ་བའི་འདོད་ལུགས་ནི། །སྙིང་པོ་མ་རྟོགས་ཡན་ལག་ལས། །ཀུན་རྫོབ་རིགས་ལྔའི་དཀྱིལ་འཁོར་འདོད། །རྣམ་ཤེས་ལྔ་པོ་རིགས་ལྔར་འདོད། །དོན་དམ་སྐྱེ་འགག་མེད་པར་འདོད། །ཅེས་གསུངས་སོ། །ཀྲི་ཡོག་སྡེ་གསུམ་གྱི་ལྟ་བ་བསྟན་པའི་ལེའུ་སྟེ་ཞེ་ལྔ་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །དེ་ལས་ཁྱད་པར་འཕགས་པ་ཡི། །བསྐྱེད་རྫོགས་གསུམ་གྱི་ལྟ་བ་གང་། །ཞེས་ཞུས་པ་དང་།སྟོན་པས་འཁོར་ལ་བཀའ་སྩལ་པ། །མ་ཧྭ་ཡོ་གའི་ལྟ་བའི་འདོད་ལུགས་ནི། །ཆོས་ཉིད་གཏིང་ཡངས་མ་རྟོགས་པས། །ཕྱི་ནང་སྣོད་བབ་སྣང་བ་ལ། །ཐབས་དང་ཤེས་རབ་གཉིས་སུ་འདོད། །སྣོད་ནི་ཐབས་ཀྱི་རང་བཞིན་ལ། །བཅུད་ནི་ཤེས་རབ་རང་བཞིན་ཏེ། །ཐབས་ནི་བསྐྱེད་པའི་རིམ་པའི་ཚུལ། ཁེས་རབ་རྫོགས་པའི་རིམ་པའི་ཚུལ། །ཐབས་ཤེས་གཉིས་སུ་སྣང་བ་ཡང་། །སྣང་སྟོང་གཉིས་མེད་ཟུང་འཇུག་འདོད། །དེ་ལས་འཕགས་པའི་ཨ་ནུ་ནི། །སྙིང་པོ་ཀ་དག་མ་རྟོགས་པས། །རྩལ་གྱི་ཡན་ལག་ཤེས་པ་ལ། །ཕྱི་ཡུལ་ཆོས་དབྱིངས་གཞལ་ཡས་ཁང་། །ནང་བཅུད་ལྷ་ཡི་རང་བཞིན་ཏེ། །དེ་ལྟར་གཉིས་ཀྱི་རང་བཞིན་ལས། །དབྱིངས་དང་ཡེ་ཤེས་གཉིས་མེད་འདོད། །དེ་ལས་ཁྱད་འཕགས་ཨ་ཏི་ནི། །གཏིང་ཡངས་མཐའ་གྲོལ་མ་རྟོགས་པས། །ཕྱི་ཡུལ་ཆོས་ཉིད་སྣང་བར་འདོད། །སྐྱེ་འགག་འགྱུར་བའི་ཤེས་པ་ལ། །རིག་པ་རང་བྱུང་ཆོས་སྐུར་འདོད། །བལྟ་བ་ཡེ་སངས་རྒྱས་པར་འདོད། །ཡིད་སྨོན་ཁ་ལ་འབྱམས་པ་ལས། །དེ་ལྟར་མངོན་དུ་གྱུར་པ་ཉུང་། །ཞེས་གསུངས་སོ། །མ་ཧྭ་ཨ་ནུ་ཨ་ཏི་གསུམ་གྱི་ལྟ་བ་བསྟན་པའི་ལེའུ་སྟེ་ཞེ་དྲུག་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །ཐེག་པ་དགུ་ལས་ཁྱད་འཕགས་པའི། །སྤྱི་ཏིའི་ལྟ་བ་ཇི་ལྟར་ལགས། །ཞེས་ཞུས་པས། །སྟོན་པས་འཁོར་ལ་བཀའ་སྩལ་པ། །ཀ་དག་ཀུན་གྲོལ་བལྷ་བའོ། །དཔེར་ན་ནམ་མཁའ་ཉི་ཟླ་ཤེལ་སྒོང་དུ། །སྣང་སྲིད་བཟང་ངན་སྨན་དང་དུག་བསྟན་ཡང་། །སྣང་བ་མ་འགགས་རང་བཞིན་ཀ་ནས་དག །དེ་བཞིན་སྙིང་པོ་ཀ་དག་ལ། །སྐུ་ལྔས་མ་བརྒྱན་དུག་ལྔས་མ་གོས་སོ། །མ་རིག་ཡེ་ཤེས་སྐྱོན་ཡོན་ཀ་ནས་དག །ཅེས་གསུངས་སོ། །སྤྱི་ཏི་ཡོ་གའི་ལྟ་བ་བསྟན་པའི་ལེའུ་སྟེ་ཞེ་བདུན་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །དེ་ལས་ཁྱད་པར་འཕགས་པ་ཡི། །ཡང་ཏིའི་ལྟ་སྒོམ་ཇི་ལྟར་ལགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཡང་ཏི་ཡོ་གའི་ལྟ་བ་ནི། །ཆོས་ཉིད་གཏིང་མཐའ་མེད་པ་ལ། །ཆོས་ཅན་ཐམས་ཅད་མུ་མཐའ་གྲོལ། །དཔེར་ན་ནམ་མཁའ་མཐའ་མེད་ལས། །ཆོ་འཕྲུལ་སྣ་ཚོགས་མཁའ་དབྱིངས་གྲོལ། །དེ་བཞིན་གཏིང་མཐའ་ཡངས་པ་ལ། །ཡན་ལག་རིག་པས་བརྟགས་སྣང་ཀུན། །རིག་པ་མུ་མཐའ་དབྱིངས་སུ་གྲོལ། །ཞེས་གསུངས་སོ། །ཡང་ཏིའི་ལྟ་བ་བསྟན་པའི་ལེའུ་སྟེ་ཞེ་བརྒྱད་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །ཡོངས་རྫོགས་ཐོད་རྒལ་ལྟ་བ་གང་། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སྙིང་པོ་མིང་མེད་མཐའ་གྲོལ་འདི། །བློ་ཡི་སྤྱོད་ཡུལ་མ་ཡིན་ཏེ། །འོན་ཀྱང་རེ་ཞིག་འཁོར་ལ་བསྟན། །དངོས་མེད་ཀུན་ལྡན་གང་མ་གྲུབ། །རིག་མེད་རིག་སྐྱེད་སྐྱེ་མེད་གྲོལ། །ཡེ་མེད་ཀུན་འབྱུང་མུ་མཐའ་གྲོལ། །རང་བཞིན་ལྷུན་གྱིས་གྲུབ་པ་ལ། །ངོ་བོ་གསལ་ལ་དག་པར་གྲོལ། །དེ་རྣམས་བསྡུས་པའི་བལྟ་བ་ནི། །དབྱིངས་ལས་ཀུན་ཤར་དབྱིངས་སུ་གྲོལ། །དཔེར་ན་ནོར་བུ་རིན་ཆེན་བཞིན། །ཀུན་འབྱུང་གང་ཡང་གྲུབ་པ་མེད། །འགག་མེད་ཆོ་འཕྲུལ་རང་སར་གྲོལ། །ཞེས་གསུངས་སོ། །ཡོངས་རྫོགས་ཐོད་རྒལ་གྱི་ལྟ་བ་བསྟན་པའི་ལེའུ་སྟེ་ཞེ་དགུ་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །ཆོས་རྣམས་ཟད་སར་ཇི་ལྟར་བསྐྱལ། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །ཆོས་རྣམས་ཟད་སར་བསྐྱལ་བ་ནི། །དངོས་མེད་ཡེ་གདངས་མིང་མེད་བློ་ལས་འདས། །རང་བཞིན་ཅང་མེད་ངོ་བོ་གསལ་ཞིང་ཁྱབ། །བློས་བརྟགས་ཆོས་མེད་འཁྲུལ་ཆོས་ཟད་སར་བསྐྱལ། །སེམས་མེད་རིག་མེད་ཆོས་རྣམས་ཟད་སར་བསྐྱལ། །ཅང་མེད་དངོས་མེད་བརྗོད་པའི་ཡུལ་ལས་འདས། །ཞེས་གསུངས་སོ། །ཆོས་མེད་ཟད་སར་བསྐྱལ་བའི་ལེའུ་སྟེ་ལྔ་བཅུ་པའོ།། །།དེ་ནས་རང་སྣང་ཁྱེའུ་ཆུང་གིས་། །མུ་མཐའ་ཡོངས་གྲོལ་སྟོན་པ་ལ། །གསང་བའི་བརྡའ་ཆོས་བཤད་དུ་གསོལ། །ཞེས་ཞུས་པས། །སྟོན་པས་འཁོར་ལ་བཀའ་སྩལ་པ། །ཨ་ཐ་དྷ་ཏི་ས་ཡ་ཨ། རྒྱ་གར་ཡུལ་གྱི་ཕ་རོལ། སྲིན་པོའི་ཡུལ་གྱི་ཚུར་རོལ་ན། དེ་གཉིས་ཀྱི་སོ་མཚམས་སུ་གྱད་རྩལ་པོ་ཆེ་གཅིག་གིས་སྲིན་པོ་ཐམས་ཅད་ཀྱི་སྐེ་བཅད། སྙིང་བཏོན་ནས་ཟོས་པས་རྒྱལ་ཁམས་ཐམས་ཅད་བདེ་བ་ལ་བཀོད་དེ། རྒྱ་གར་ཡུལ་དུ་ཆོས་ཀྱི་ཆར་ཆེན་པོ་བབས་པའི་མན་ངག་གོ །ཡང་དུར་ཁྲོད་བསིལ་བའི་ཚལ་ཞེས་བྱ་བ་ན། དུར་ཁྲོད་ཀྱི་བདག་མོ་འབར་མའི་གདོང་ཅན་མ་བྱ་བས་སེམས་ཅན་ཐམས་ཅད་ཀྱི་སྲོག་བཅད། ཤ་ཟོས་ཁྲག་འཐུངས་པས་འགྲོ་དྲུག་གཡང་ས་བཅད་དེ། སེམས་ཅན་ཐམས་ཅད་མི་མངོན་པའི་དབྱིངས་སུ་ཡེ་སངས་རྒྱས་པའི་མན་ངག་གོ །ཡང་རིན་པོ་ཆེ་སྟོང་ལྡན་གྱི་ལྷ་ཁང་ན། ཤེལ་སྐུ་ཀ་དག་ཆེན་པོ་ལ་འཁོར་གཟིའི་སྙིང་དང་ནོར་བུ་ཆུ་དངས་ཀྱིས་བསྐོར་བའི་མན་ངག་གོ །ཞེས་གསུངས་སོ། །མཁའ་འགྲོ་མ་གསང་བའི་བརྡའ་ཆོས་བསྟན་པའི་ལེའུ་སྟེ་ང་གཅིག་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །སངས་རྒྱས་ངོ་སྤྲོད་བརྡའ་ཆོས་གང་། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །འཁོར་རྣམས་མ་ཡེངས་གུས་པར་ཉོན། །མཁའ་དབྱིངས་གསལ་བའི་འོད་ཁང་ནས། །འོད་ལྔ་ཟང་ཐལ་དུ་ཤར་བའི་མན་ངག་གོ །ཡང་མུན་པའི་སྨག་རུམ་འཐིམས་པའི་ནང་དུ་གསལ་བའི་ཉི་མ་ཤར་བས་མུན་པ་ཀ་ནས་དག་སྟེ། སྣང་སྲིད་ཐམས་ཅད་གསལ་བའི་འོད་ཀྱིས་ཁེངས་པའི་མན་ངག་གོ །ཡང་སྣང་བའི་འོད་ཀྱི་ལྷ་ཁང་དང་། མུན་པའི་འཁོར་ཁང་ཆེན་མོ་གཉིས་ཡོད་དེ། མུན་པའི་སྒོ་བཅད་ནས། ཡེ་ཤེས་ཀྱི་འཆར་སྒོ་ཕྱེ་པས། སྣང་སྲིད་འཁོར་འདས་ཀྱི་སེམས་ཅན་ཐམས་ཅད་སངས་རྒྱས་སུ་གཟིགས་ཤིང་མཐོང་བའི་མན་ངག་གོ །ངོ་སྤྲོད་བརྡའ་ཆོས་བསྟན་པའི་ལེའུ་སྟེ་ང་གཉིས་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །མན་ངག་བརྡའ་ཆོས་བསྟན་དུ་གསོལ། །ཞེས་ཞུསླ་པས། སྟོན་པས་འཁོར་ལ་བཀའ་སྩལ་པ། །དུག་མ་ཟོས་ན་ནད་མི་ལྡང་། །སྨན་ཟོས་ནད་དང་བྲལ་ཞིང་བདེ་དང་ལྡན། །རིན་ཆེན་གསལ་བའི་ཁྱེའུ་ཆུང་ཁྱོད། །གར་ཡང་མ་འགྲོ་དབྱིངས་སུ་ཉོལ། ཅི་ཡང་མ་བྱེད་དལ་བར་སྡོད། །སྨྲ་བརྗོད་མ་མང་ཁ་རོག་འདུག །གྲོགས་ལ་མ་དགའ་གཅིག་པུར་བསྒོམ། །འཁོར་ཡུལ་ཆགས་སྡང་འབྲེལ་བ་ཆོད། །ཟང་ཟིང་འདུ་འཛི་ཀུན་བོར་ལ། །གཅིག་པུར་རི་ཁྲོད་དགོན་པར་སྒོམས། །བསྒོམ་དུ་མེད་ཀྱིས་སྐྱེ་མེད་དབྱིངས་སུ་ཉོལ། །སྤྱད་དུ་མེད་ཀྱིས་རྣལ་མར་དལ་བར་འདུག །བསྒྲུབ་ཏུ་མེད་ཀྱིས་སྙིང་པོའི་ཀློང་དུ་ཉོལ། །རྒྱུ་འབྲས་འདས་སོ་ལ་བཟླའི་ཆོས་མིན་བྱར་མེད་བློ་འདས་ལྟོས། སྣང་བརྟགས་ཆོས་མིན་མིང་མེད་བརྗོད་མེད་ལྟོས། །ཆོས་ཉིད་གཞི་ལ་ཞབྲུལ་བ་མི་མངའ་བར། །ང་བདག་མ་རིག་དབང་གིས་ཞབྲུལ་སྣང་ཡང་། །གདམས་པའི་གནད་ནི་གང་སྐྱེས་དུས་སུ་སངས། །སྣང་སྲིད་ཅིར་སྣང་རང་སར་གྲོལ་བ་ན། །དེ་ཀ་ཉིད་ལ་གནས་ལུགས་རྟོགས་ཞེས་བཤད། །ཅེས་གསུངས་སོ། །མན་ངག་གནད་ཀྱི་བརྡའ་ཆོས་རིན་ཆེན་སྐྲུངས་པ་ཞེས་བྱ་བའི་ལེའུ་སྟེ་ང་གསུམ་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །སྡིག་བཅུ་མསྤངས་གྲོལ་ལགས་སམ། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །ཡོངས་རྫོགས་ཐོད་རྒལ་བླ་མེད་ཀྱི། །ཆོས་ཉིད་གཏིང་མཐའ་ཡངས་པ་ལ། །རིག་པ་མཐའ་གྲོལ་དོན་རྟོགས་པས། །སྡིག་བཅུ་མ་སྤངས་གྲོལ་བར་བཤད། །དེ་ཡང་ཇི་ལྟར་གྲོལ་ཞེ་ན། །སྡིག་པ་ཆེད་དུ་མི་སྤྱོད་ཅིང་། །བློ་ཡི་རྟོགས་པས་མ་སྤངས་པས། །ཐར་པ་ཆེན་པོ་འཐོབ་པར་བཤད། །ཅེས་གསུངས་སོ། །མི་དགེ་སྤྱོད་སྤང་མེད་པར་གྲོལ་བར་བསྟན་པའི་ལེའུ་སྟེ་ང་བཞི་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །དགེ་བཅུ་མ་སྤྱད་བྱང་ཆུབ་གང་། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །ཡོངས་རྫོགས་བླ་མེད་སྒོར་ཞུགས་ནས། །ཆོས་དབྱིངས་ཀློང་ན་གནས་པའི་ཕྱིར། །དགེ་བཅུ་མ་སྤྱད་བྱང་ཆུབ་ཐོབ། །དེ་ཡང་ཇི་ལྟར་ཐོབ་ཅེ་ན། །ཆོས་ཉིད་གཏིང་ཡངས་སྙིང་པོའི་ཀློང་གནས་པས། །མཚན་བཅས་ཆོས་སྤྱོད་དང་དུ་མི་ལེན་ཏེ། །བྱམས་པ་ཕྱོགས་མེད་སྙིང་རྗེ་ཀུན་ལ་ཁྱབ། །ཀ་དག་མུ་མཐའ་ཡོངས་གྲོལ་དོན་རྟོགས་པས། །དགེ་བཅུ་མ་སྦྱད་བྱང་ཆུབ་ཐོབ། །ཅེས་གསུངས་སོ། །དགེ་བཅུ་མ་སྤྱད་པར་སངས་རྒྱས་པར་བསྟན་པའི་ལེའུ་སྟེ་ང་ལྔ་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །ཚོགས་བསགས་སྨོན་ལམ་མ་བཏབ་པར། །ཡང་དག་སངས་རྒྱས་ཇི་ལྟར་ཐོབ། །ཅེས་ཞུས་པས། སྟོན་པས་འཁོར་ལ་བཀའ་སྩལ་༄༅། པ། །ཡོངས་རྫོགས་ཐོད་རྒལ་དོན་རྟོགས་ན། །ཚོགས་གཉིས་མ་བསགས་ཡོངས་སུ་རྫོགས། །སྒྲིབ་གཉིས་མ་སྦྱངས་ཀ་ནས་དག །སྨོན་ལམ་མ་བཏབ་རང་ལས་གྲུབ། །སྙིང་པོ་ཆོས་སྐུར་རང་སངས་རྒྱས། །ཐེག་པ་འོག་མའི་ཆོས་བཞིན་དུ། །བྱ་རྩོལ་ཚོགས་གསོག་སྨོན་མེད་པར། །ཡང་དག་དོན་གྱི་སངས་རྒྱས་འཐོབ། །ཅེས་གསུངས་སོ། །སྨོན་ལམ་ཚོགས་རྫོགས་ལ་མི་ལྟོས་པར་སངས་རྒྱས་འཐོབ་པར་བསྟན་པའི་ལེའུ་སྟེ་ང་དྲུག་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །དཀྱིལ་འཁོར་ལྷ་དབང་མ་བསྐུར་བར། །དངོས་གྲུབ་འབྲས་བུ་ཇི་ལྟར་ཐོབ། །ཅེས་ཞུས་པས། སྟོན་པས་འཁོར་ལ་བཀའ་སྩལ་པ། །ཡོངས་རྫོགས་ཐོད་རྒལ་བླ་མེད་འདིར། །ཆོས་ཉིད་གཏིང་མཐའ་ཡངས་པའི་དཀྱིལ་འཁོར་ན། །རང་བྱུང་འོད་གསལ་ཆེན་པོའི་ལྷ་ཚོགས་བཞུགས། །ཆོས་ཅན་སྣང་སྲིད་འཁོར་བའི་སེམས་ཅན་ལ། །རིག་པ་མུ་མཐའ་ཡོངས་གྲོལ་དབང་བསྐུར་བས། །དངོས་གྲུབ་འབྲས་བུ་སྙིང་པོ་ཆོས་སྐུ་ཐོབ། །ཐེག་པ་འོག་མའི་དཀྱིལ་འཁོར་མ་ཞུགས་ཤིང་། །བྱ་བཙལ་ཞེ་འདོད་དབང་བསྐུར་མ་བྱས་པར། །སྙིང་པོ་ཀློང་ཡངས་ཆོས་ཉིད་དཀྱིལ་འཁོར་ན། །སྔོན་ཐོག་སྤྱི་ཕུད་ལྷ་ཆེན་ཀ་དག་བཞུགས། །བུམ་སོགས་རྫས་ཀྱི་དབང་རྣམས་མ་བསྐུར་བར། །རང་དབང་རང་གིས་ཐོབ་པའི་དབང་གི་མཆོག །དངོས་མེད་དངོས་གྲུབ་ཐོབ་པ་ངོ་མཚར་ཆེ། །ཐོག་མའི་སོ་མ་སྙིང་པོའི་དོན་རྟོགས་པས། །ཞེ་འདོད་དབང་བསྐུར་མ་བྱས་ཆོས་སྐུ་ཐོབ། །ཅེས་གསུངས་སོ། །དཀྱིལ་འཁོར་ལྷ་དབང་མ་བསྐུར་བར་སྙིང་པོ་ཆོས་སྐུ་འཕོ་འགྱུར་མེད་པའི་འབྲས་བུ་ཐོབ་པར་བསྟན་པའི་ལེའུ་སྟེ་ང་བདུན་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །རྒྱུད་ཀྱི་རྒྱལ་པོས་ཇི་ལྟར་བཏུལ། །ཞེས་ཞུསླ་པས། སྟོན་པས་འཁོར་ལ་བཀའ་སྩལ་པ། །རྒྱུད་རྗེ་ཡོངས་རྫོགས་ཐོད་རྒལ་གྱིས། །རྒྱུད་གཞན་ཕལ་པ་ཐམས་ཅད་བ་། །རྒྱུད་ཀྱི་རྒྱལ་པོ་སྤྱི་ཕུད་ཀྱིས། །ཐེག་འོག་བྱ་བཙལ་རྒྱུད་རྣམས་བཏུལ། །ཉི་ཟླའི་སྙིང་པོའི་རྒྱུད་ཆེན་གྱིས། །གཏི་མུག་མ་རིག་རྒྱུད་ཀུན་བཏུལ། །འོད་འབར་ཀ་དག་རྒྱུད་ཆེན་གྱིས། །བག་ཆགས་སྒྲིབ་གཡོགས་རྒྱུད་རྣམས་བཏུལ། །བདུད་རྩིའི་རྒྱ་མཚོའི་རྒྱུད་ཆེན་གྱིས། །ཉོན་མོངས་དུག་ལྔའི་རྒྱུད་རྣམས་བ་། །ཞེས་གསུངས་སོ། །རྒྱུད་ཀྱི་རྒྱལ་པོས་གཞན་བཏུལ་ཚུལ་བསྟན་པའི་ལེའུ་སྟེ་ང་བརྒྱད་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །ཉི་ཟླའི་སྙིང་པོའི་དཔེ་དོན་གང་། །ཞེས་ཞུས་པས། །སྟོན་པས་འཁོར་ལ་བཀའ་སྩལ་པ། །ཉི་ཟླའི་སྙིང་པོའི་དཔེ་དོན་ནི། །དཔེར་ན་ཉི་མའི་སྙིང་པོ་ཡིས། །སྙིང་པོ་གར་ཁྱབ་འོད་ཀྱིས་ཁྱབ། །རི་རབ་རྩེ་ནས་ཉི་ཤར་བས། །འོད་ཀྱིས་རྒྱལ་ཁམས་སྣང་སྲིད་གསལ། །གསལ་ཡང་སྙིང་པོ་བལྟར་མི་མཐོང་། །དེ་བཞིན་སེམས་ཅན་ཐམས་ཅད་ལ། །སེམས་ཀྱིས་གར་ཁྱབ་སྙིང་པོས་ཁྱབ། །སྙིང་པོས་གར་ཁྱབ་སེམས་ཀྱིས་ཁྱབ། །འགྲོ་དྲུག་སེམས་ཅན་ཐམས་ཅད་ལ། །རང་རིག་འོད་གསལ་ཀུན་ལྡན་ཡང་། །སེམས་ཀྱི་རང་བཞིན་མཐོང་བ་མེད། །རྟོགས་མ་རྟོགས་ཀྱིས་འཁོར་འདས་གཉིས། །མ་རིག་ཡེ་ཤེས་རྣམ་གཉིས་ལས། །རང་བྱུང་ཡེ་ཤེས་འོད་གསལ་བ། །མ་རིག་གཏི་མུག་ཀ་ནས་དག །བག་ཆགས་སྒྲིབ་གཡོགས་མུན་པ་སངས། །ཀ་དག་སངས་རྒྱས་དགོངས་པར་གནས། །སྣང་གསལ་ཉི་མའི་དཔེ་ཡིས་ནི། །གསལ་དག་མ་རིག་མུན་པ་སངས། །སྐྱེ་མེད་ཀ་དག་དགོངས་པའོ། །འོད་གསལ་ཟླ་བའི་རྒྱུད་ཀྱིས་ནི། །གཏི་མུག་བག་ཆགས་སྒྲིབ་པ་སངས། །རང་བྱུང་འོད་གསལ་དགོངས་པར་གནས། །ཉི་ཟླའི་སྙིང་པོ་མཐོང་བ་མེད་པ་བཞིན། །སེམས་ཉིད་སྙིང་པོ་དངོས་པོ་མེད། །དངོས་པོར་མ་མཐོང་བ་ནི་འོད་གསལ་ཉིད། །ཅེས་གསུངས་སོ། །ཉི་ཟླའི་དཔེ་དོན་བསྟན་པའི་ལེའུ་སྟེ་ང་དགུ་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །བདུད་རྩིའི་རྒྱ་མཚོའི་དཔེས་མཚོན་ཏེ། །གདམས་ངག་བདུད་རྩི་ཇི་ལྟར་འཁྱིལ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཐོག་མར་རྒྱ་མཚོའི་དཔེས་བསྟན་ནས། །དཔེར་ན་བདུད་རྩིའི་མཚོར་འཁྱིལ་བས། །གང་འཐུངས་ནད་འཐོན་སྐྱེ་འཆི་མེད། །དེ་ལྟར་གྱུར་ཀྱང་རྒྱ་མཚོ་དེ། །ཟད་པ་མེད་ཅིང་འཕེལ་བ་མེད། །གང་བ་མེད་ཅིང་སྟོངས་པ་མེད། །ཅེས་གསུངས་སོ། །དཔེ་བསྟན་པའི་ལེའུ་སྟེ་དྲུག་ཅུ་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །དཔེ་མཚོན་བདུད་རྩི་ཇི་ལྟར་འཁྱིལ། །ཞེས་ཞུས་པ་དང་། །སྟོན་པས་འཁོར་ལ་བཀའ་སྩལ་པ། །ཡོངས་རྫོགས་ཐོད་རྒལ་བདུད་རྩིའི་རྒྱ་མཚོ་ནི། །ཆོས་ཉིད་གཏིང་མཐའ་མེད་པའི་རྒྱ་མཚོ་དང་། །ཆོས་ཅན་རིག་པ་མཐའ་གྲོལ་བདུད་རྩི་དང་། །གྲོལ་གྱུར་མངོན་སངས་རྒྱས་པའི་བདུད་རྩིའོ། །དེ་ལས་དང་པོ་ཆོས་ཉིད་ཁ་གཏིང་དུ། །མེད་པའི་གདམས་ངག་བདུད་རྩི་བསྟན་པ་ནི། །སྣ་ཚོགས་སྣང་བ་ཡེ་མེད་དངོས་པོ་མེད། །དངོས་མེད་གཏིང་གསལ་ཁ་གསལ་སྙིང་པོར་གྲོལ། །གཤིས་ཀྱི་གནས་ལུགས་ངེས་པ་དམ་པ་ཉིད། །ཐོག་མཐའི་མིང་མེད་བློ་འདས་མཚོན་དུ་མེད། །སྐྱེ་མེད་ཀ་དག་དངོས་མེད་ཟང་ཀ་མ། །སོ་མ་རྣལ་མ་རང་འཁྲུངས་ཡེ་ནས་གྲུབ། །ཡེ་སངས་ཡེ་རྒྱས་ཡེ་ཟིན་ཡེ་རྫོགས་སོ། །མིང་མེད་མཐའ་སྟོངས་བསམ་བརྗོད་དམིགས་ཡུལ་གྲོལ། །ཞེས་གསུངས་སོ། །ཆོས་ཉིད་མུ་མེད་གཏིང་ཡངས་རྒྱ་མཚོར་འཁྱིལ་བའི་ལེའུ་སྟེ་རེ་གཅིག་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །ཆོས་ཅན་རིག་པའི་མུ་མཐའ་རྣམས། །ཡོངས་གྲོལ་བདུད་རྩིའི་རྒྱ་མཚོ་གང་། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །དུག་གསུམ་འཕྲང་སྒུགས་དགྲ་གསུམ་བསད། །སྣང་གསུམ་གཏན་དབབ་རྫོང་གསུམ་བཞུགས། །དགྲ་གསུམ་བསད་ལ་མཁར་གསུམ་བསྲུང་། །ཕུང་མཁན་སྙིང་བཏོན་ནམ་མཁར་ཉལ། །དེ་དོན་གདམས་ངག་བསྟན་པ་ན། །འཕྲང་གསུམ་འདས་དང་ད་ལྟ་ཕྱིས། །དགྲ་གསུམ་ཡིད་རིག་སེམས་དང་གསུམ། །རང་སྣང་རང་བཞིན་རང་གྲོལ་གསུམ། །སྐྱེ་མེད་ཀ་དག་བློ་འདས་རྫོང་། །དུག་གསུམ་དགྲ་བསད་སྐུ་གསུམ་མཁར། །ང་བདག་ཞེ་འདོད་གཟུང་འཛིན་ཐོན། །ཆོས་ཉིད་སྐྱེ་མེད་དབྱིངས་སུ་ཉོལ། །ཞེས་གསུངས་སོ། །དེ་ནས་ཆོས་ཅན་གྲོལ་ལུགས་ནི། །སྣང་སྲིད་སྣ་ཚོགས་སྣང་བ་ལ། །གནས་ལུགས་སྣང་ཚུལ་གྲོལ་ལུགས་གསུམ། །གནས་ལུགས་སྙིང་པོ་གཏིང་མཐའ་ཡས། །སྐྱེ་མེད་ཀ་དག་བློ་ལས་འདས། །སྣང་ཚུལ་ཡུལ་གྱི་སྣང་ལུགས་ལ། །རང་སྣང་རང་བཞིན་རང་སོ་གསུམ། །དེ་ལ་གྲོལ་ལུགས་རྣམ་གསུམ་སྟེ། །རང་སྣང་མ་བཀག་མ་ཞེན་རང་སར་གྲོལ། །སྣང་བའི་རང་བཞིན་དབྱེ་བསལ་མེད་པར་གྲོལ། །རིག་པ་སེམས་ཀྱི་གྲོལ་ལུགས་བསྟན་པ་ནི། །རིག་མེད་འགྱུ་མེད་སེམས་མེད་ངང་དངས་སུ། །ཞེན་འཛིན་ཐམས་ཅད་ཀ་དག་ཆེན་པོར་གྲོལ། །ཆོས་ཅན་གྲོལ་བས་ཆོས་ཉིད་བདུད་རྩིར་འཁྱིལ། །སྣང་བ་རང་སར་གྲོལ་ན་ཆོས་དབྱིངས་བདུད་རྩིར་འཁྱིལ། །ཀུན་གཞི་རང་སར་གྲོལ་ན་བདུད་རྩི་རྒྱ་མཚོར་འཁྱིལ། །ཞེས་གསུངས་སོ། །ཆོས་ཅན་རིག་པ་གྲོལ་བའི་བདུད་རྩིའི་རྒྱ་མཚོར་འཁྱིལ་པའི་ལེའུ་སྟེ་རེ་གཉིས་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །ཀློང་གྱུར་མངོན་སངས་རྒྱས་པ་ཡི། །མན་ངག་བདུད་རྩི་ཇི་ལྟར་འཁྱིལ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སྐྱེ་མེད་ཆོས་ཉིད་བདུད་རྩི་ཡིས། །སྙིང་པོ་ཀློང་གྱུར་མངོན་སངས་རྒྱས། །གཏིང་ཡངས་དོན་གྱི་བདུད་རྩི་ཡིས། །ཆོས་ཉིད་དབྱིངས་སུ་མངོན་སངས་རྒྱས། །སྙིང་པོ་ཀ་དག་བདུད་རྩི་ཡིས། །སྐྱེ་མེད་ཆོས་སྐུར་མངོན་སངས་རྒྱས། །སྔོན་ནས་རང་སེམས་སངས་རྒྱས་ཏེ། །དོན་རྟོགས་ཀློང་གྱུར་མངོན་སངས་རྒྱས། །ཞེས་གསུངས་སོ། །སྙིང་པོ་ཀློང་གྱུར་མངོན་སངས་རྒྱས་པའི་བདུད་རྩི་རྒྱ་མཚོར་འཁྱིལ་བའི་ལེའུ་སྟེ་རེ་གསུམ་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །ཡོངས་རྫོགས་བླ་མེད་ཐེག་པ་ལ། །གོལ་ས་སྒྲིབ་པ་ཡོད་དམ་མེད། །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཡོངས་རྫོགས་ཐོད་རྒལ་དོན་རྟོགས་ན། །གོལ་ས་སྒྲིབ་པ་འཁྲུལ་ས་མེད། །ཅེས་གསུངས་སོ། །དེ་ནས་འཁོར་གྱིས་ཡང་ཞུས་པ། །དེ་མ་རྟོགས་ཀྱི་གང་ཟག་ལ། །གོལ་ས་སྒྲིབ་པ་ཇི་ལྟར་འབྱུང་། །ཞེས་ཞུས་པས། །སྟོན་པས་འཁོར་ལ་བཀའ་སྩལ་པ། །གོལ་སྒྲིབ་ཉིས་སྟོང་ལྔ་བརྒྱ་ཡོད། །དབྱེ་བས་མི་རྫོགས་གསུམ་དུ་འདུས། །སྙིང་པོ་མ་རྟོགས་གོལ་ས་འབྱུང་། །ཀ་དག་མ་རྟོགས་སྒྲིབ་པས་བསྒྲིབས། །རང་ས་མ་ཟིན་འགྲོ་དྲུག་འཁྲུལ། །ཞེས་གསུངས་སོ། །ཡོངས་རྫོགས་མ་རྟོགས་པ་ལ་གོལ་སྒྲིབ་བསྟན་པའི་ལེའུ་སྟེ་རེ་བཞི་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །གོལ་སྒྲིབ་ཞབྲུལ་པ་ཇི་ལྟར་བཅད། །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཆོས་ཉིད་སྙིང་པོ་མ་རྟོགས་གོལ་ས་ཡང་། །གཏིང་ཡངས་སྙིང་པོའི་དོན་རྟོགས་གོལ་ས་མེད། །ཀ་དག་མ་རྟོགས་སྒྲིབ་པས་བསྒྲིབས་པ་ཡང་། །འོད་གསལ་དངོས་པོའི་དོན་རྟོགས་བསྒྲིབ་ཏུ་མེད། །སྒོ་ལྔ་འ་ས་པས་འཁྲུལ་པར་གྱུར་པ་ཡང་། །སྐྱེ་མེད་རང་ས་ཟིན་པས་ཞབྲུལ་རྩད་ཆོད། །ལྟ་བ་སྤྱོད་པ་ལ་སོགས་གོལ་ས་ཡང་། །ཞེ་འདོད་ཕྱོགས་དང་བྲལ་ས་མེད། །ཉན་ཐོས་ལ་སོགས་ཐེག་པའི་སྒྲིབ་པ་ཡང་། །ཀུན་རྫོགས་བླ་མེད་དོན་རྟོགས་སྒྲིབ་པ་མེད། །འགྲོ་དྲུག་འཁོར་བར་འཁྱམས་པའི་འཁྲུལ་པ་ཡང་། །མཐའ་གྲོལ་ཡིད་རྩད་ཆོད་པས་འཁྲུལ་དུ་མེད། །ཅེས་གསུངས་སོ། །གོལ་སྒྲིབ་འཁྲུལ་བ་རྩད་ནས་བཅད་པའི་ལེའུ་སྟེ་རེ་ལྔ་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །གོལ་སྒྲིབ་ལ་བཟླ་ཇི་ལྟར་ལགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཡོངས་རྫོགས་ཐོད་རྒལ་དོན་རྟོགས་ནས། །ཐེག་པ་མེད་པར་ལ་བཟླའོ། །རང་བྱུང་འོད་གསལ་དོན་རྟོགས་ན། །སྒྲིབ་པ་མེད་པར་ལ་བཟླའོ། །རང་སེམས་ཆོས་སྐུའི་དོན་རྟོགས་ན། །འཁོར་བ་མེད་པར་ལ་བཟླའོ། །དུག་གསུམ་ཀ་དག་དོན་རྟོགས་ན། །སྐུ་གསུམ་མེད་པར་ལ་བཟླའོ། །དུག་ལྔ་ཀ་དག་དོན་རྟོགས་ན། །སྐུ་ལྔ་མེད་པར་ལ་བཟླའོ། །གཏིང་ཡངས་མུ་མཐའ་ཀུན་གྲོལ་དོན་རྟོགས་ན། །མིང་མེད་བློ་འདས་ཆེན་པོར་ལ་བཟླའོ། །རང་སེམས་དངོས་མེད་ཆོས་སྐུའི་དོན་རྟོགས་ན། །ཐམས་ཅད་སངས་རྒྱས་ཞིང་ཁམས་ལ་བཟླའོ། །ཐེག་ཆོས་གྲུབ་མཐའ་མེད་པའི་དོན་རྟོགས་ན། །བསམ་བརྗོད་དམིགས་ལས་འདས་པར་ལ་བཟླའོ། །སེམས་རིག་སངས་རྒྱས་མེད་པའི་དོན་རྟོགས་ན། །བློ་ཟད་ཞབྲུལ་སངས་ཞེ་འདོད་མེད་པར་ལ་བཟླའོ། །ལྟ་སྒོམ་སྤྱོད་འབྲས་ཉམས་རྟགས་མེད་རྟོགས་ན། །བྱར་མེད་རྩོལ་བྲལ་བློ་ལས་འདས་པར་ལ་བཟླའོ། །ཞེས་གསུངས་སོ། །གོལ་སྒྲིབ་ཞབྲུལ་གསུམ་ལ་བཟླ་བའི་ལེའུ་སྟེ་རེ་དྲུག་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །སྙིང་པོ་དོན་གྱི་གདམས་པ་གང་། །ཞེས་ཞུས་པ་དང་། །སྟོན་པས་འཁོར་ལ་བཀའ་སྩལ་པ། །སྙིང་པོ་དོན་གྱི་གདམས་ངག་འདི། །སྐལ་ལྡན་ཐུགས་ཀྱི་དཀྱིལ་དུ་ཆོངས། །སྙིང་པོ་མིང་མེད་གཏིང་མཐའ་ཡས། །རིག་པ་སྐྱེ་མེད་མུ་མཐའ་གྲོལ། །དངོས་མེད་བློ་ཡི་སྤྱོད་ཡུལ་གྲོལ། །ཞེས་གསུངས་སོ། །སྙིང་པོ་དོན་གྱི་གདམས་པ་བསྟན་པའི་ལེའུ་སྟེ་རེ་བདུན་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །བདུད་རྩི་བཅུད་ཐིགས་རྣམ་གསུམ་གང་། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །བདུད་རྩི་བཅུད་ཐིགས་རྣམ་གསུམ་འདི། །གསལ་དག་རིན་ཆེན་ཐུགས་ལ་ཆོངས། །ཆོས་ཉིད་རྒྱ་མཚོའི་ཀློང་ནས་མ་སྤངས་བདུད་རྩིའི་བཅུད་ཐིགས་པས། །ཉིད་ལས་ཉིད་ཤར་དེ་ཉིད་ངང་དུ་གྲོལ། །སྐྱེ་མེད་རྒྱ་མཚོའི་ཀློང་ནས་བདུད་རྩིའི་བཅུད་ཐིགས་པས། །རང་བྱུང་འོད་གསལ་ཆེན་པོའི་དབྱིངས་སུ་གྲོལ། །ཆོས་ཅན་སྣང་སྲིད་ཀློང་ནས་བདུད་རྩིའི་བཅུད་ཐིགས་པས། །རང་སྣང་མ་སྤངས་མ་བསྒྲུབས་རྩིས་གདབ་མེད་པར་གྲོལ། །ཞེས་གསུངས་སོ། །བདུད་རྩི་བཅུད་ཐིགས་རྣམ་གསུམ་སྐལ་ལྡན་ལ་ཐིགས་པའི་ལེའུ་སྟེ་རེ་བརྒྱད་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །གདམས་ངག་རྩ་བའི་བཀའ་ཆོམས་རྣམ་གསུམ་གང་། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །གལ་འགེགས་འཕྲང་གནད་རྩ་བའི་ཆོས་གསུམ་ནི། །ང་ཡི་རང་བཞིན་ཅི་ཡང་མེད་པ་ལ། །ང་ཡི་མཚན་ཉིད་སྣ་ཚོགས་ཅིར་ཡང་ཤར། ཁྲར་ཙམ་ཉིད་ནས་སྣ་ཚོགས་རང་སར་གྲོལ། །ཞེས་གསུངས་སོ། །གདམས་ངག་རྩ་བའི་ཚོམ་བུ་བསྟན་པའི་ ལེའུ་སྟེ་རེ་དགུ་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །རྒོལ་རྩོད་སྨྲ་བའི་མཚོན་ཆ་གང་། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སྨྲ་བའི་མཚོན་ཆ་བསྐོར་བའི་ཐབས། །འཁོར་རྣམས་མ་ཡེངས་གུས་པར་ཉོན། །སྤྱི་ཏི་ཡང་ཏི་ཐོད་རྒལ་ལ། །ཐེག་པ་དགུ་ཡི་དགྲ་འོང་སྟེ། །ཨ་ཏི་ནས་ནི་ཉན་ཐོས་བར། །གྲུབ་མཐའ་མི་མཐུན་དགུ་ཡོད་པས། །དེ་དགུའི་རྒོལ་བ་བྱུང་བ་ན། །དང་པོ་བཙན་པོ་མཁར་དུ་བརྩིགས། །དེ་ནས་མི་འཇིགས་དཔའ་བོ་བཏང་། །དེ་ནས་སྲ་བའི་གོ་ཆ་བཙལ། །དེ་ནས་རྣོ་བའི་མཚོན་ཐོགས་ལ། །ཐེག་དགུ་རྩོད་པ་འདྲི་བའི་ཚེ། །ཕ་རོལ་གྲུབ་མཐའ་ཆབ་ཏུ་གཞུག །དཔའ་བོ་བཞག་ལ་བཙན་མཁར་བསྲུངས། །ཕར་ལ་སེམས་འདི་ཡོད་མེད་འདྲི། །ཡོད་ན་གཟུགས་དང་ཁ་དོག་འདྲི། །གལ་ཏེ་མེད་དོ་ཞེས་སྨྲ་ན། །སེམས་འདི་ཡེ་ནས་མེད་པ་ན། །སྣ་ཚོགས་སེམས་ཅན་གང་ལས་བྱུང་། །ཡིད་ལས་བྱུང་ཞེས་ཟེར་བ་ན། །མེད་པར་འདོད་པ་ཉམས་པར་འགྱུར། །དེ་ནས་འགྱུར་མེད་འཕྲང་དུ་གཞུག །ཅེས་གསུངས་སོ། །མཆོན་ཆའི་འཁོར་ལོ་དང་་པོ་བསྟན་པའི་ལེའུ་སྟེ་བདུན་ཅུ་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །འཁོར་ལོ་གཉིས་པ་ཇི་ལྟར་བསྐོར། །ཞེས་ཞུས་པ་དང། སྟོན་པས་འཁོར་ལ་བཀའ་སྩལ་པ། །ང་ཡི་ངོ་བོ་དངོས་པོ་མེད་པ་ལ། །དངོས་མེད་དེ་ཉིད་སྣ་ཚོགས་རང་སྣང་བའོ། །འདི་ལྟར་ཕྱི་ནང་སྣང་བའི་ཡུལ་རྣམས་ལ། །ཉན་ཐོས་རྡུལ་ཕྲན་གཟུང་འཛིན་གཉིས་སུ་བལྟ། །རང་རྒྱལ་རྟེན་འབྲེལ་རྣམ་པར་རིག་བྱེད་ཀྱིས། །རྡུལ་མེད་ཡུལ་གྱི་རྣམ་པ་སྟོང་པར་འདོད། །དེ་ལས་སེམས་ཙམ་པ་ཡིས་བརྒལ་བ་ནི། །ཡུལ་སྣང་ཐམས་ཅད་སེམས་ལས་མ་འདས་ཏེ། །དཀར་དམར་སྣ་ཚོགས་སེམས་ཉིད་སྣང་པའོ། །དེ་ལ་དབུ་མ་པ་ཡིས་བརྒལ་བ་ནི། །ཕྱི་རོལ་སྣ་ཚོགས་སེམས་ལས་ལོག་པ་སྟེ། །འཁོར་བའི་རང་བཞིན་སྒ་མའི་དཔེ་བརྒྱད་བལྟ། །དེ་ལ་བརྟགས་ཤིང་དཔྱད་པས་རང་བཞིན་མེད། །དེ་ལ་ཕྱི་རྒྱུད་ཀྲི་ཡ་པས་བརྒལ་བ། །ཕྱི་རོལ་སྣང་བ་རིགས་གསུམ་ལྷ་རུ་སྣང་། །དོན་དམ་རང་བཞིན་དག་པ་ཆོས་ཉིད་བལྟ། །ཨུ་པ་ཡ་་ལ་ལྟ་བ་གཞུང་ཚུགས་མེད། །དེ་ལ་ཡོ་ག་པ་ཡིས་བརྒལ་བ་ནི། །འདི་ལྟར་སྣང་བ་ཀུན་རྫོབ་རིགས་ལྔ་ལྷ། །དོན་དམ་སྐྱེ་འགག་མེད་པར་འདོད་པ་ཡིན། །ཕྱི་རྒྱུད་གསུམ་པས་ནང་རྒྱུད་ཁྱད་འཕགས་པ། །བསྐྱེད་པ་མ་ཧྭ་ཡོ་གས་སྣང་སྲིད་འདི། །སྣང་བ་མ་འགག་ལྷ་དང་ལྷ་མོར་སྣང་། །ཐབས་ཀྱི་རང་བཞིན་བསྐྱེད་པའི་རིམ་པའི་ཚུལ། །ལྷ་རྣམས་སྣང་ལ་རང་བཞིན་མེད་པར་འདོད། །ཤེས་རབ་རང་བཞིན་རྫོགས་པའི་རིམ་པ་ལ། །དོན་དམ་རང་བཞིན་སྣང་སྟོང་དབྱེར་མེད་འདོད། །དེ་ལ་ཨ་ནུ་ཡོ་གས་བརྒལ་བ་ནི། །སྣང་བ་ལྷ་དང་ལྷ་མོར་མི་འདོད་དེ། །ཆོས་ཀྱི་དབྱིངས་ལ་རིག་པ་ཡེ་ཤེས་སྣང་། །དོན་དམ་དབྱིངས་དང་ཡེ་ཤེས་གཉིས་མེད་བལྟ། །དེ་རྣམས་མན་ཆད་ཨ་ཏི་གསུམ་བཏོན་པ། །བྱ་བཙལ་རྩོལ་བསྒྲུབ་ཨ་ནུ་མན་ཆད་ཀྱིས། །ཞེ་འདོད་མེད་ལ་ལྟ་བ་ཞེ་འདོད་བྱུང་། །རྩོལ་བསྒྲུབ་མེད་ལ་བྱ་བཙལ་རྩོལ་བས་བསྒྲུབས། །ཡིད་སྨོན་བསྒོམས་པས་འདུས་བྱས་ཆོས་སྒོར་ཞུགས། །རང་ལ་བཞག་ནས་རྒྱང་དུ་བཙལ་བ་ཡིས། །ལོང་བས་ནམ་མཁའི་མཐའ་ནི་འཚོལ་དང་འདྲ། །བསྐལ་པ་བརྒྱར་ཡང་སངས་རྒྱས་འཐོབ་པ་མིན། །ཞེས་གསུངས་སོ། །ཐེག་པ་བརྒྱད་སུན་འབྱིན་པར་བསྟན་པའི་ལེའུ་སྟེ་དོན་གཅིག་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །ཨ་ཏི་སྨི་ཏིའི་ཁྱད་པར་གང་། དེ་གཉིས་རྩོད་པ་ཇི་ལྟར་བགྱི། །ཨ་ཏིས་སྤྱི་ཏི་ལ་རྒོལ་བར། །སྨྲ་བའི་མཚོན་ཆ་ཇི་ལྟར་བསྐོར། །ཞེས་ཞུས་པ་དང་། །སྟོན་པས་འཁོར་ལ་བཀའ་སྩལ་པ། །ཨ་ཏིའི་ཡོ་གའི་རྣལ་འབྱོར་བས། །སྤྱི་ཏིའི་ཐེག་པ་ལ་འདྲི་བ། །ཐེག་པ་དགུ་ལ་མ་གཏོགས་པའི། །སྤྱི་ཏི་བློས་བརྟགས་མ་ཡིན་ནམ། །མིན་ན་ང་ཡི་ཨ་ཏི་དང་། །སྤྱི་ཏི་ཁྱད་པར་གང་གིས་སྤགས། །ཞེས་པ་ཨ་ཏིས་བརྒལ་པ་ལ། །སྤྱི་ཏིའི་སྟོན་པས་ལན་སྨྲས་པ། །སེམས་ཅན་བློ་འདི་མ་ཟད་པས། །ཐེག་པ་ཟད་པ་མེད་པར་གསུངས། །ཉོན་མོངས་བརྒྱད་ཁྲི་བཞི་སྟོང་གི །གཉེན་པོར་ཆོས་སྒོ་དེ་སྙེད་གསུངས། །བློ་ལ་རབ་འབྲིང་རྣམ་པ་གསུམ། །དེ་ལས་གསུམ་གསུམ་ཕྱེ་བས་དགུ། །དེ་ལ་ཐེག་པ་དགུ་རུ་གསུངས། །དབང་པོ་ཡང་རབ་ཐོད་རྒལ་ལ། །སྤྱི་ཏི་ཡང་ཏི་ཐོད་རྒལ་བསྟན། །བློ་ཁྱད་ཡོད་ཕྱིར་ཐེག་ཁྱད་ཡོད། །བློ་མེད་འཁྲུལ་ཆོད་སངས་པ་ན། །ཐེག་པ་མེད་ཅིང་འཇུག་པ་མེད། །ཐེག་པ་གསུམ་གྱི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །གནས་ལ་ཕྱེ་བས་དགུ་ཡིན་ཏེ། ངེས་པའི་གདམས་ངག་གཅིག་ནས་འབྱུང་། །གཅིག་པོ་སྤྱི་ཏི་ཡོ་ག་ཡིན། །སྤྱི་ནི་ཐེག་པའི་དབྱིངས་ཕྱུང་སྟེ། །ཏི་ཡིས་ཀུན་གྱི་ཏི་ཀ་སྟོན། །ཡོ་ནི་ལྟ་སྤྱོད་ཟུང་འབྲེལ་ཏེ། །ག་ཡིས་རང་གནས་ཆིག་ཆོད་བསྟན། །ཁྱོད་ཀྱི་ཨ་ཏིའི་ལྟ་སྒོམ་གང་། སྤྱོད་པ་འབྲས་བུ་ཇི་ལྟར་སྒྲུབ། །འདི་ལྟར་སྣང་བ་ཇི་ལྷར་འདོད། །ཆོས་དང་སངས་རྒྱས་ཡོད་དམ་མེད། །དམྱལ་བ་ཡི་དྭགས་ཅི་ལ་ཟེར། །ཐོག་མ་སེམས་འདི་ཡོད་དམ་མེད། །མེད་ན་སེམས་ཅན་ག་ལས་འོང་། །ཡོད་ན་དེ་དུས་ཇི་ལྟར་གནས། །སངས་རྒྱས་སེམས་ཅན་རྣམ་པ་གཉིས། །དེ་གཉིས་གཞི་ལ་གཅིག་མི་གཅིག །གཅིག་ན་འཁོར་འདས་ཇི་ལྟར་འབྱུང་། །མི་གཅིག་འབྲེལ་པ་མེད་པར་འགྱུར། །འབྲེལ་མེད་བསྒྲུབས་པ་དོན་མེད་འགྱུར། །བྱེ་མ་ལས་ནི་མར་བཞིན་ནོ། །འབྲེལ་བ་ཡོད་ན་འབྲེལ་གཉིས་བརྟགས། །དང་པོ་བདག་ཉིད་གཅིག་པ་ན། །འཁྲུལ་བཅས་འཁྲུལ་མེད་ཕན་ཚུན་འགལ། །དེ་དང་དེ་ལས་བྱུང་འབྲེལ་ན། །སངས་རྒྱ་ལས་ནི་སེམས་ཅན་ནམ། །སེམས་ཅན་ལས་ནི་སངས་རྒྱས་བྱུང་། །དང་པོ་ལྟར་ན་མ་འཁྲུལ་པས། །སངས་རྒྱས་པ་ཡང་དོན་མེད་འགྱུར། །གཉིས་པ་ལྟར་ན་ཀུན་སངས་རྒྱས། །འབད་པ་མེད་པར་གྲོལ་བར་ཐལ། །ཡང་ན་འཁྲུལ་རྟོག་ཅན་དུ་འགྱུར། །གཞི་ལ་ཞབྲུལ་པ་ཡོད་དམ་མེད། །ཡོད་ན་སོལ་བའི་བྱི་དོར་བཞིན། །ཐོས་བསམ་བསྒོམས་ཀྱང་སངས་མི་རྒྱ། །གཞི་ལ་འཁྲུལ་པ་མེད་པ་ན། །སེམས་ཅན་ཐམས་ཅད་སངས་རྒྱས་རིགས། །གཞི་ལ་ཞབྲུལ་པ་མེད་པ་ལ། །གློ་བུར་འཁྲུལ་པ་བྱུང་ཟེར་ན། །ནམ་མཁའི་སྤྲིན་ལྟར་རང་སངས་རིགས། །ཐུག་པ་མེད་པའི་སྐྱོན་དུ་འགྱུར། །ཁྱོད་ཀྱི་ཨ་ཏིའི་ལྟ་བ་དེ། །རིག་པ་ཆོས་སྐུར་འདོད་མི་འདོད། །སྣང་བ་ཆོས་སྐུར་འདོད་མི་འདོད། །ཁྱོད་ཀྱི་ལྟ་སྒོམ་སྤྱོད་འབྲས་སྟོན། །དེ་ནས་བདག་གིས་ཁྱད་བཏོན་གྱིས། །ཞེས་པ་ཕར་ལ་དྲི་བར་བྱ། །ཞེས་གསུངས་སོ། །ཕར་ལ་རྩོད་ཟློག་དྲིས་པའི་ལེའུ་སྟེ་དོན་གཉིས་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །ཨ་ཏིར་སྨྲ་བའི་མཚོན་ཆ་གང་། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །དེ་ལ་ཨ་ཏིའི་འདོད་གཞུང་ནི། །ཡེ་གཞི་ལྷུན་གྲུབ་སྐྱེ་མེད་པས། །ཀ་དག་ལྷུན་གྲུབ་གཉིས་སུ་འདོད། །ལྟ་བ་སྣང་སྲིད་ཆོས་སྐུར་བལྟ། །སྒོམ་པ་སྟོང་པའི་ངང་ལ་བསྒོམ། །སྤྱོད་པ་བྱ་རྩོལ་མེད་པར་སྤྱོད། །འབྲས་བུ་རེ་དོགས་མེད་པར་བསྒྲུབ། །རིག་པ་ཡེ་སངས་རྒྱས་པར་འདོད། །སྣང་བ་ཆོས་ཉིད་ཞིང་ཁམས་ཡིན། །ཞེས་གསུངས་པ་དང་། དེ་ལ་སྤྱི་ཏིའི་མཚོན་གྱིས་བརྡེག །ཁྱོད་ཀྱི་ཡེ་མེད་སྔོན་རོལ་ན། །གཞི་ལ་ལྷུན་གྲུབ་ཡོད་པའི་ཕྱིར། །རྒྱ་ཆད་ཕྱོགས་ལྷུང་སྐྱོན་དུ་འགྱུར། །ཐོག་མ་གཞི་ལ་མིང་མེད་ལ། །ཁྱོད་ལ་གཞི་ལ་མིང་འདོགས་བྱུང་། །མིང་མེད་དམ་བཅའ་ཉམས་པར་འགྱུར། །ཡང་ནི་ཁྱོད་ཀྱི་གཞི་དེ་ཀ་དག་ན། །ནག་པོ་མ་དག་ཉིད་དུ་འགྱུར། །ཡེ་ཤེས་ཀ་དག་མ་རིག་བཅས། །ཁྱོད་ཀྱི་ལྟ་བ་ཆོས་སྐུ་ན། །ཆོས་སྐུ་འདུས་བྱས་ཡིན་ནམ་མིན། །ཡིན་ན་འདུས་བྱས་འཇིག་པ་ལྷར། །ཆོས་སྐུ་སྐྱེ་འཇིག་ཅན་དུ་འགྱུར། །མིན་ན་སྣང་བ་འཇིག་པ་དང་། །ཆོས་སྐུ་མི་འཇིག་མངོན་དུ་འགལ། །རིག་པ་སངས་རྒྱས་ཡིན་ནམ་མིན། །རིག་པ་སངས་རྒྱས་ཡིན་ཟེར་ན། །སངས་རྒྱས་དགོངས་པ་འགྱུར་མི་འགྱུར། །དེ་ནི་འགྱུར་བ་མེད་ཅེ་ན། །ཁྱོད་ཀྱི་རང་གི་རིག་པ་དེ། །སྔ་མ་འགགས་ལ་ཕྱི་མར་འགྱུར། །རིག་པ་སྐྱེ་འགག་འགྱུར་བའི་ཕྱིར། །འགྱུར་བ་མེད་དང་མངོན་སུམ་འགལ། །འགྱུར་ལྡོག་ཡོད་དོ་ཞེས་ཟེར་ན། །སངས་རྒྱས་སེམས་ཅན་དུ་འགྱུར་བས། །རིག་པ་སངས་རྒྱས་ཡིན་ན་ཉམས། །ཡང་ན་རིག་པ་རང་བྱུང་ཡེ་ཤེས་ན། །བསྒོམ་དུས་རིག་པ་སྐྱོན་མི་སྐྱོན། །གལ་ཏེ་མི་སྐྱོན་པར་འདོད་ན། །སྟོང་པའི་ངང་བསྒོམ་དོན་དང་འགལ། །སྤྱོད་འབྲས་ལ་སོགས་དགོས་པ་མེད། །དོན་མེད་ཚི་ཆད་ནད་དུ་འགྱུར། །གལ་ཏེ་རིག་པ་སྐྱོན་པ་ན། །རང་བྱུང་ཡེ་ཤེས་ཉམས་པར་འགྱུར། །ཞེས་གསུངས་སོ། །ཨ་ཏིར་སྨྲ་བའི་མཚོན་ཆའི་རང་བཞིན་བསྟན་པའི་ལེའུ་སྟེ་དོན་གསུམ་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །ཨ་ཏིས་སྤྱི་ཏིར་དྲི་བ་ཡིས། །སྨྲ་བའི་མཚོན་ཆ་ཇི་ལྟར་བསྐོར། །ཞེས་ཞུས་པ་དང་། །སྟོན་པས་འཁོར་ལ་བཀའ་སྩལ་པ། །ཨ་ཏིས་སྤྱི་ཏི་ལ་སྨྲ་བ། །ང་ཡི་འདོད་གཞུང་དེ་ལྟར་ན། །དེ་ལས་ཁྱོད་ཀྱིས་ཁྱོད་དཔོགས་དང་། །ཁྱོད་ཀྱི་སྤྱི་ཏིའི་རང་གཞུང་གིས། །ཐོག་མའི་དུས་ན་ཇི་ལྟར་འདོད། །སངས་རྒྱས་སེམས་ཅན་རྣམ་པ་གཉིས། །དེ་གཉིས་གཞི་ལ་གཅིག་ཉིད་དམ། །མི་གཅིག་ཟེར་ན་འབེལ་མེད་དམ། །གཞི་དེ་མཉམ་མམ་བཟང་ངན་ཡོད། །གཞི་ལ་འཁྲུལ་པ་ཡོད་དམ་མེད། །མེད་ན་གློ་བུར་པ་ཡིན་ན། །སེམས་དང་རིག་པ་ཡོད་དམ་མེད། །མེད་ན་སེམས་ཅན་གང་ནས་བྱུང་། །ཐེག་ཆོས་གྲུབ་མཐའ་ཡོད་དམ་མེད། །ཡོད་ན་བློས་བརྟགས་ཐ་སྙད་ཡིན། །མེད་ན་ཐོས་བསམ་དགོས་པ་མེད། །སངས་རྒྱས་བྱ་བ་ཡོད་དམ་མེད། །ཡོད་ན་སངས་རྒྱས་གང་ན་བཞུགས། །དམྱལ་བ་ཡི་དྭགས་ཡོད་དམ་མེད། །ཡོད་ན་དམྱལ་བ་སྟོན་དང་ཡེ། །མེད་ན་སྡིག་པས་གང་ལ་གནོད། །ཁྱོད་ཉིད་ལྟ་སྒོམ་ཇི་ལྷར་འདོད། །ཅེས་པ་ཨ་ཏིས་དྲིས་པ་དང་། རང་སྣང་ཁྱེའུ་ཆུང་གིས་སྨྲས་པ། །རྩོད་པའི་འཁོར་ལོ་འདི་ལྟར་བསྐོར། །མི་ཕིགས་སྲ་བའི་གོ་ཆ་གོན། །མི་ཕེབས་བཙན་པོའི་རྫོང་བཞུགས་ནས། །ལུང་དང་རིག་པའི་མཚོན་ཆས་བརྡེག །ཁྱོད་ཀྱིས་ང་ལ་འདྲི་བ་ལས། །ཐོག་མའི་དུས་ན་གནས་ལུགས་དེ། །ཆོས་ཉིད་གཞི་ལ་འདྲི་བའམ། །འོན་ཏེ་ཆོས་ཅན་རྩལ་ལ་འདྲི། །དང་པོ་ལྟར་ན་ཡེ་ཐོག་མ། །སྔོན་རོལ་མིང་མ་ཐོགས་པ་ལ། །གཏིང་ཡངས་བློ་ཡི་ཡུལ་ལས་གྲོལ། །སྐྱེ་མེད་མཚོན་བརྗོད་དམིགས་ལས་འདས། །སངས་རྒྱས་སེམས་ཅན་རྣམ་པ་གཉིས། །གཞི་ལ་གཅིག་མི་གཅིག་འདྲི་བ། །ངོ་བོ་མཚན་ཉིད་གང་ལ་འདྲི། །ངོ་བོ་ལྟར་ན་དེ་གཉིས་གཅིག །གནས་པ་དུས་ཀྱི་ཀུན་གཞི་གཅིག །མཚན་ཉིད་རྟོགས་མ་རྟོགས་ཀྱིས་གཉིས། །གཞི་ལ་བཟང་ངན་འདྲི་བ་དེ། །རྟོགས་དང་མ་རྟོགས་གང་ལ་འདྲི། །མ་རྟོགས་བློ་ལ་བཟང་ངན་སྣང་། གཞི་ལ་འཁྲུལ་པ་ཡོད་མེད་ནི། །ཆོས་ཉིད་གཞི་ལ་འཁྲུལ་བ་མེད། །དཔེར་ན་ཤེལ་སྒོང་དྲུང་དག་ཏུ། །དཀར་ནག་སྨན་དུག་གང་བསྟན་སྣང་། ཁེལ་ལ་གང་ཡང་གྲུབ་པ་མེད། །དེ་བཞིན་སྐྱེ་མེད་སྙིང་པོ་ལ། །རྩལ་ཟེར་འཁྲུལ་པ་ཅིང་སྣང་ཡང་། །གཞི་ལ་མ་གྲུབ་ཀ་ནས་དག །འཁྲུལ་པ་གཞི་ལ་མེད་པར་བཅད། །རིག་པ་རྩལ་ལམ་མ་འགགས་པར། །སྣ་ཚོགས་ཅིར་ཡང་འཆར་བར་སྣང་། །སེམས་རིག་ཡོད་མེད་འདྲི་བ་དེ། །རྟོགས་དང་མ་རྟོགས་གང་ལ་འདྲི། །དང་པོ་ལྟར་ན་གང་ཡང་མེད། །ངང་དངས་རང་སར་བརླག་པའོ། །མ་རྟོགས་བློ་ལ་འདྲི་བ་ན། །སྣང་སྲིད་སེམས་ཅན་ཐམས་ཅད་ལ། །ཡིད་རིག་སེམས་གསུམ་ཀུན་ལ་ཁྱབ། །སེམས་ཅན་གར་ཁྱབ་སེམས་རིག་ཡོད། །ཐེག་ཆོས་གྲུབ་མཐའ་ཡོད་མེད་དེ། །སངས་རྒྱས་དགོང་པ་ལ་འདྲིའམ། །འོན་ཏེ་སེམས་ཅན་བློ་ལ་འདྲི། །སངས་རྒྱས་དགོངས་པའི་ཀློང་གནས་ན། །ཐེག་ཆོས་གྲུབ་པའི་བློ་ཡང་མེད། །ཅི་ཕྱིར་སངས་རྒྱས་དགོངས་པ་དེ། །བློ་འདས་རྩིས་གདབ་མེད་པས་སོ། །སེམས་ཅན་བློ་ཡི་ངོ་གང་ལ། །ཐེག་ཆོས་གྲུབ་མཐའ་བསམ་མི་ཁྱབ། །ཇི་སྲིད་སེམས་ཅན་བློ་ཡོད་པར། །ཐེག་པ་སྣ་ཚོགས་གྲུབ་མཐའ་ཡོད། །སངས་རྒྱས་ཡོད་དམ་འདྲི་བ་དེ། །ཆོས་ཉིད་གཏིང་མཐའ་མེད་པ་དང་། །ཆོས་ཅན་ངོ་གཅིག་གང་ལ་འདྲི། །ཆོས་ཉིད་གཞི་ལ་འདྲི་བ་ན། །སངས་རྒྱས་མེད་པས་མིང་ཡང་མེད། །རང་ཉིད་སངས་རྒྱས་ཡིན་པས་གཞན་ན་མེད། །ཆོས་ཅན་ངོ་ལ་འདྲི་བ་ན། །མ་འགགས་རོལ་པ་སྣ་ཚོགས་ལ། །སངས་རྒྱས་ཡོད་པ་ལྟར་ཡང་སྣང་། །ཐེག་འོག་གཞུང་ཡིན་གོང་ལ་མེད། །དམྱལ་བ་ཡི་དྭགས་ཡོད་མེད་དེ། །རྟོགས་པའི་ངོ་ལ་འདྲི་བ་ན། །དམྱལ་བ་མེད་པས་སྡུག་བསྔལ་མེད། །མ་རྟོགས་པ་ཡི་ངོ་ལ་ནི། །སྡིག་པས་དམྱལ་བ་ལྟར་ཡང་སྣང་། །སྤྱི་ཏིའི་ལྟ་སྒོམ་དྲི་བ་དེ། །ང་ཡི་རང་བཞིན་མིང་མེད་བློ་འདས་ཀྱང་། །རེ་ཞིག་ཁྱོད་ལ་ལྟ་སྒོམ་བསྟན་པར་བྱ། །ཞེ་འདོད་གཏད་མེད་ཕྱོགས་བྲལ་ལྟ་བའི་རྒྱལ་པོ་ཡན། །དངོས་མེད་གཟའ་གཏད་མེད་པ་བསྒོམ་པའི་རྒྱལ་པོ་ཡིན། །ཟང་ཀ་རྣལ་མ་སོ་མ་གཏད་མེད་སྤྱོད་པའི་རྒྱལ་པོ་ཡིན། །དོན་ཆུང་རང་གནས་རེ་མེད་འབྲས་བུའི་རྒྱལ་པོ་ཡིན། །ཞེས་གསུངས་སོ། །སྤྱི་ཏི་སྨྲ་བའི་མཚོན་ཆའི་འཁོར་ལོ་བསྐོར་བའི་ལེའུ་སྟེ་དོན་བཞི་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །སྙིང་པོ་དོན་གྱི་ངོ་སྤྲོད་གང་། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །དོན་གྱི་ངོ་སྤྲོད་ཐིག་ལེ་མཐོང་བརྟོལ་ནས། །ཟང་ཐལ་གསང་ལམ་ཆེན་པོའི་མན་ངག་ལ། །རང་བཞིན་སྙིང་པོའི་གནས་ལུགས་དང་། །རྟོགས་ལུགས་ཡིན་ལུགས་ངོ་སྤྲོད་དང་། །གདམས་ངག་རྩ་ཚོམས་གསུམ་གསུམ་སྟེ། །ཡེ་མེད་གཏིང་ཡངས་ཆོས་སྐུ་དང་། །ཡེ་གདངས་རང་བྱུང་ངང་དངས་དང་། །རང་གསལ་དག་པའི་ཁྱེའུ་ཆུང་རྣམས། །རང་གསལ་ཆོས་དབྱིངས་འོད་ཁང་དུ། །འདུ་འབྲལ་མེད་པའི་ངོ་སྤྲོད་ནི། །རྩ་ཚོམས་འཕྲང་གནད་གལ་འགགས་བཞི། །སྒྲོན་མ་བཞི་ཡིས་ངོ་སྤྲོད་སྟེ། །དཔེར་ན་མུན་པར་གསེར་སྟོར་བ། །བཙལ་བས་མི་རྙེད་སྒྲོན་མེས་རྙེད། །དེ་བཞིན་མ་རིག་མུན་པའི་ནང་། །སྙིང་པོ་དོན་གྱི་གསེར་སྟོར་བ། །གཞན་མིན་སྒྲོན་མ་བཞི་ཡིས་རྙེད། །དེ་ལ་སྒྲོན་མ་རྣམ་པ་བཞི། །རང་གསལ་སེམས་ཀྱི་སྒྲོན་མ་དང་། །རྟོགས་པ་ཡེ་ཤེས་སྒྲོན་མ་དང་། །རང་བྱུང་ངང་དངས་སྒྲོན་མ་དང་། །སྙིང་པོ་ཆོས་ཉིད་སྒྲོན་མའོ། །སྒྲོན་མ་བཞི་ཡི་ངོ་སྤྲད་དེ། །སྙིང་པོའི་རང་བཞིན་དངོས་མེད་ལ། །དེ་ཉིད་སྣ་ཚོགས་རྟོགས་པར་ཤར། ཁྲར་ཙམ་ཉིད་ན་རང་སར་གྲོལ། །མིང་མེད་གཏིང་མཐའ་ཡོངས་གྲོལ་བ། །ཆོས་ཀྱི་དབྱིངས་སུ་མངོན་སངས་རྒྱས། །སྙིང་པོ་ཀློང་གྱུར་གཞི་ལ་ཐིམ། །དབྱེར་མེད་གདེང་ཟིན་འཁྲུལ་པ་སངས། །ཀ་དག་སྙིང་པོའི་ཀློང་ནས་ཤར། །ཞེས་གསུངས་སོ། །སྙིང་པོའི་ངོ་སྤྲོད་བསྟན་པའི་ལེའུ་སྟེ་དོན་ལྔ་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །གསང་མཛོད་ལྷ་ཡི་སྒོ་ལྔ་ལ། །ལྡེ་མིག་ལྔ་ཡིས་ཇི་ལྟར་དབྱེ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །མཚན་ཉིད་འདུལ་བའི་གསང་མཛོད་པ། །བྱ་རྩོལ་བསྲུང་སྡོམ་སྒོ་ཡིས་བཅད། །དག་པ་ཚིག་བརྒྱུད་གསང་མཛོད་ལ། །བྱ་བཙལ་རྩོལ་བསྒྲུབ་སྒོ་ཡིས་བཅད། །བསྐྱེད་རྫོགས་གཉིས་ཀྱི་གསང་མཛོད་ལ། །ཐབས་ཀྱི་སྦྱོར་སྒོ་དེ་ཡིས་བཅད། །རྫོགས་པ་ཨ་ཏིའི་གསང་མཛོད་ལ། །ཁ་རྫོགས་ཕྱལ་པའི་སྒོ་ཡིས་བཅད། །སྤྱི་ཏི་ཡང་ཏིའི་གསང་མཛོད་ལ། །གཞི་ཐོག་ཁ་འབྱམས་སྒོ་ཡིས་བཅད། །གསང་བའི་སྒོ་ལྕགས་ཕྱེ་བས་ནི། །སྙིང་པོ་དོན་གྱི་གཏེར་དང་འཕྲད། ཁྲེས་རབ་འཕྲུལ་གྱི་ལྡེ་མིག་གིས། །སྤྱོད་པའི་འདྲེན་སྒོ་ཕྱེ་བ་ཡིས། །མཚན་ཉིད་སྡེ་གསུམ་ཆོས་རྣམས་ཤེས། །དག་བྱེད་མངོན་པའི་ལྡེ་མིག་གིས། །བྱ་བཙལ་རྩོལ་བསྒྲུབ་སྒོ་ཕྱེ་བས། །རིགས་གསུམ་རིགས་ལྔའི་ལྷ་ཚོགས་༄༅ མཐོང་། །ཐབས་ཀྱི་སྦྱོར་སྒོའི་སྒོ་ལྕགས་ལ། །ཏིང་འཛིན་གསུམ་དང་བསྙེན་བསྒྲུབ་བཞིས། །ཐབས་ཀྱི་སྦྱོར་སྒོ་ཕྱེ་བ་ཡིས། །སྣང་སྲིད་ལྷ་དང་ལྷ་མོར་མཐོང་། །ཡེ་ཤེས་འཕྲུལ་གྱི་ལྡེ་མིག་གིས། ཁེས་རབ་གསང་སྒོ་ཕྱེ་བ་ཡིས། །དབྱིངས་དང་ཡེ་ཤེས་གཉིས་མེད་མཐོང་། །རང་བྱུང་རིག་པའི་ལྡེ་མིག་གིས། །ཁ་རྫོགས་ཕྱལ་བའི་སྒོ་ཕྱེ་བས། །སྣང་སྲིད་ཆོས་སྐུ་སངས་རྒྱས་མཐོང་། །སྣང་གསལ་ཟང་ཐལ་ལྡེ་མིག་གིས། །གཞི་ཐོག་ཁ་འབྱམས་སྒོ་ཕྱེ་བས། །སྐྱེ་མེད་ཀ་དག་ཆོས་སྐུ་མཐོང་། །གསང་མཛོད་ལྔ་ཡི་སྒོ་ཕྱེ་བས། །ངེས་པ་དོན་གྱི་ཆོས་ལྔ་ཤེས། །ཞེས་གསུངས་སོ། །གསང་མཛོད་ལྔའི་སྒོ་ལྕགས་ལ་འཕྲུལ་གྱི་ལྡེ་མིག་ལྔས་དབྱེ་བའི་ལེའུ་སྟེ་དོན་དྲུག་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །གསང་བའི་བརྡའ་ཡིས་ཇི་ལྟར་བཤད། །ཅེས་ཞུས་པ་དང་། །སྟོན་པས་གསང་སྔགས་བརྡས་བསྟན་པ། །ཨ་སྙོ་ཡ་ཏྲི་ཏྲི་ཨ་ཨ་ཨ། རི་བོ་དགུ་བརྩེགས་ཀྱི་སྟེང་དུ་ཤིང་རྩེ་མོ་བྱུང་རྒྱལ་སྐྱེས་ཏེ། ཤིང་དེ་ལ་རིན་པོ་ཆེ་གསེར་གྱི་ནེ་ཙོ་གཅིག་ཆགས་ནས་སྐད་སྣ་ཚོགས་སྒྲོགས་པའི་མན་ངག་གོ །གནམ་རིམ་པ་བཅུ་གསུམ་གྱི་ཁ་ན་རིན་པོ་ཆེ་བིཌརུའི་ཉི་ཟླ་ཤར་བས་སྣང་སྲིད་ཐམས་ཅད་གསལ་བའི་འོད་ཀྱི་ཁེབས་ཏེ། །མུན་པའི་སྨག་རུམ་ཐམས་ཅད་སྐད་ཅིག་ལ་སངས་པའི་མན་ངག །ནམ་མཁའི་དབྱིངས་ནས་བདུད་རྩིའི་བཅུད་གསུམ་ཐིགས་ནས་དེ་སྐལ་པ་དང་ལྡན་པ་རྣམས་ཀྱི་ཟོས་པས། །དུག་ལྔ་ཉོན་མོངས་ཀྱི་ནད་ཕྱིན་ཏེ། སྐྱེ་ཤིའི་རྩ་བ་ཆོད་དོ། །འགྲོ་དྲུག་གཡང་ས་བཅད། ཁམས་གསུམ་འཁོར་བ་མེད་དེ་སེམས་ཅན་ཐམས་ཅད་ཡེ་སངས་རྒྱས་པའི་མན་ངག །ཀྱེ་མ་ཧོ་སྐལ་ལྡན་རྣལ་འབྱོར་ཀུན། །དོན་དམ་སྐྱེ་མེད་མཐོང་འདོད་ན། །མིང་མེད་གཏིང་མཐའ་ཡས་པའི་ལྷ་ཁང་ལྟོས། །ཞེས་གསུངས་པ་དང་། །དེར་སྐལ་ལྡན་རྣམས་ཀྱིས་མིང་མེད་གཏིང་མཐའ་ཡས་པའི་ལྷ་ཁང་བལྟས་པས། ཅི་ཡང་མ་མཐོང་གང་ཡང་མི་འདུག་ནས། དོན་མེད་ཀྱི་མཁའ་འདྲ་ཤེས་རིག་གི་དྲན་སེམས་གཟུང་འཛིན་མེད་པར་རང་གྲོལ་ལོ། །གསང་སྔགས་བརྡས་བཤད་པའི་ལེའུ་སྟེ་དོན་བདུན་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །ཡོངས་རྫོགས་ཐོད་རྒལ་ཐེག་པ་མྲ །ཐེག་པ་རིམ་དགུ་ཇི་ལྟར་རྫོགས། །ཞེས་ཞུས་པ་དང་།སྟོན་པས་འཁོར་ལ་བཀའ་སྩལ་པ། །ཡོངས་རྫོགས་བླ་མེད་ཐེག་པ་འདིར། །ཐེག་པ་མ་ལུས་ཡོངས་རྫོགས་ཏེ། ཡུལ་རྡུལ་གཟུང་འཛིན་རང་གྲོལ་བས། །ཉན་ཐོས་ཐེག་པ་ཡོངས་སུ་རྫོགས། །རྟེན་འབྲེལ་རྣམ་པ་རིག་བྱེད་མེད། །རང་རྒྱལ་ཐེག་པ་ངང་གིས་རྫོགས། །བདེན་པ་གཉིས་སུ་མ་བཟུང་བས། །བྱང་སེམས་ཐེག་པ་ཡོངས་སུ་རྫོགས། །དག་གསུམ་རིགས་གསུམ་ལྷ་མེད་པས། །ཀྲི་ཡིའི་ཐེག་པ་ཡོངས་སུ་རྫོགས། །ཡར་བལྟ་མར་སྤྱོད་རྩེ་གཉིས་མེད། །ཨུ་པ་ཡ་ཡི་ཐེག་པ་རྫོགས། །རིགས་ལྔ་སྐྱེ་འགག་གཉིས་མེད་པས། །ཡོ་གའི་ཐེག་པ་ཡོངས་སུ་རྫོགས། །ཐབས་དང་ཤེས་རབ་གཉིས་མེད་པས། །མ་ཧྭ་ཡོ་གའི་ཐེག་པ་རྫོགས། །རྫོགས་ཚུལ་དབྱིངས་དང་ཡེ་ཤེས་མེད། །ཨ་ནུ་ཡོ་གའི་ཐེག་པ་རྫོགས། །རིག་པ་རང་བྱུང་མི་འདོད་པར། །སྣང་བ་ཡེ་ནས་ཆོས་སྐུ་ཡིན། །ཨ་ཏི་ཡོ་གའི་ཐེག་པ་རྫོགས། །ཀ་དག་མ་དག་མུ་མཐའ་གྲོལ། །སྤྱི་ཏི་ཡོ་གའི་ཐེག་པ་རྫོགས། །མིང་མེད་མཐའ་སྟོངས་བློ་ཡུལ་འདས། །ཡང་ཏི་ཡོ་གའི་ཐེག་པ་རྫོགས། །སྣང་སྲིད་འཁོར་འདས་ཐམས་ཅད་རྫོགས། །དཔེ་ནི་ཇི་ལྟར་རྫོགས་ཤེ་ན། །གནམ་ས་གཉིས་སུ་སྐྱེ་འགྲོ་གཟུགས་བསྡུས་རྫོགས། །འབྱུང་ཆེན་ནམ་མཁར་འབྱུང་བ་རྣམ་ལྔ་རྫོགས། །དཀྱིལ་འཁོར་ཆེན་པོར་ས་ཚོན་རྣམ་ལྔ་རྫོགས། །ཟ་འོག་སྣམ་བུར་དར་སྣ་སྣ་ཚོགས་རྫོགས། །ཕྱི་ཡི་རྒྱ་མཚོར་ཆུ་རྣམས་མ་ལུས་རྫོགས། །མཆོག་རབ་རི་བོར་རི་བདུན་རིན་ཆེན་རྫོགས། །ངག་གིས་བརྗོད་ཚད་སེམས་ཀྱིས་བརྟགས་ཚད་རྫོགས། །གཅིག་རྫོགས་གཉིས་རྫོགས་ཐམས་ཅད་མ་ལུས་རྫོགས། །ཡོད་མཐའ་མེད་མཐའ་རྟག་ཆད་གཉིས་ཀ་རྫོགས། །དགག་སྒྲུབ་སྤང་ལེན་སྣང་སྲིད་འཁོར་འདས་རྫོགས། །ཡོངས་རྫོགས་བླ་མེད་ཐོད་རྒལ་ཐིག་ལེ་སྲ །བརྟགས་སྣང་ཆོས་རྣམས་མ་ལུས་ཡོངས་སུ་རྫོགས། །ཞེས་གསུངས་སོ། རྒྱུད་ཐམས་ཅད་ཀྱི་སྤྱི་ཕུད་ཉི་ཟླའི་སྙིང་པོ་འོད་འབར་བ་བདུད་རྩིའི་རྒྱ་མཚོ་འཁྱིལ་བའི་རྒྱུད་ལས། །ཡོངས་རྫོགས་བླ་མེད་ཐོད་རྒལ་གྱི་ཐེག་པར་སྣང་སྲིད་འཁོར་འདས་མ་ལུས་པ་ཡོངས་སུ་རྫོགས་པར་བསྟན་པའི་ལེའུ་སྟེ་དོན་བརྒྱད་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །ཡོངས་རྫོགས་བླ་མེད་གསང་བ་ཡི། །བརྡའ་ཡི་ཆོས་རྣམས་ཇི་ལྟར་བཤད། །ཅེས་ཞུས་པ་དང་། སྟོན་པས་ཡོངས་རྫོགས་བརྡའ་བཤད་པ། ཨ་ཐ་མ་ཧྭ་སུ་ཁ་ཧོ། ཀྱེ་ཧོ་སྐལ་ལྡན་རིགས་ཀྱི་བུ། །འོད་གསལ་སྣང་གྲོལ་ལྷ་ཁང་དུ། །རང་རིག་གསལ་བའི་ཁྱེའུ་ཆུང་ཁྱོད། །གསལ་དག་རང་གྲོལ་དེ་ཁར་སྡོད། །ཀུན་བྱེད་ཆོས་རྣམས་མུ་མཐའ་གྲོལ། །ངང་དངས་གསལ་བའི་ཁྱེའུ་ཆུང་གིས། ཁྲེས་རབ་རལ་གྲི་མདའ་ཐོགས་ལ། །ཁྱི་ཕག་བྱ་སྤྲེལ་དུག་སྐྲུལ་གསོད། །རླུད་ནག་ཚུབས་མས་ཁྱེར་དུ་ཆུག །མེ་གསོད་ར་ཆོག་མཚོ་མོ་སྐོམས། །སྒྲོག་ཁྲོལ་རི་སྙིལ་ཕྱགས་མས་ཐོབ། །ཁྱོད་རང་རྒྱ་མཚོའི་གཏིང་དུ་ཉོལ་ལ་ནམ་མཁའི་དབྱིངས་སུ་ལྟོས། །དེ་ཡིས་རང་སེམས་ཀ་དག་མཐོང་བར་འགྱུར། །ཡོངས་རྫོགས་ཐོད་རྒལ་ཐེག་པ་བརྡའ་ཡིས་བསྟན། །ཆུ་རྣམས་ཀུན་གྱི་རྩ་བ་གར་འདུས་ལྟོས། །ཆུ་རྒྱལ་སྤྱི་ཕུད་གང་ཡིན་ཤེས་པར་གྱིས། །རི་རྣམས་ཀུན་གྱི་རྩེ་རྒྱལ་གང་ཡིན་ལྟོས། །སྣ་ཚོགས་རི་རྣམས་གར་འདུས་ཤེས་པར་གྱིས། །འབྱུང་བ་རྣམས་ཀྱི་སྤྱི་ཕུད་གང་ཡིན་ལྟོས། །འབྱུང་ཆུང་སྣ་ཚོགས་གང་འདུས་ཤེས་པར་གྱིས། །དར་ཟབ་རྣམས་ཀྱི་རྒྱལ་པོ་གང་ཡིན་ལྷོས། །སྣ་ཚོགས་དར་སྣ་གར་འདུས་ཤེས་པར་གྱིས། །གཟའ་སྐར་ཀུན་གྱི་སྤྱི་ཕུད་རྩེ་རྒྱལ་ལྟོས། །སྣ་ཚོགས་འོད་རྣམས་གར་འདུས་ཤེས་པར་གྱིས། ཤིང་རྣམས་ཀུན་གྱི་རྩེ་རྒྱལ་སྤྱི་ཕུད་ལྟོས། །སྣ་ཚོགས་ཤིང་རྣམས་གར་འདུས་ཤེས་པར་གྱིས། །སྨན་རྣམས་ཀུན་གྱི་སྤྱི་རྒྱལ་གང་ཡིན་ལྷོས། །སྣ་ཚོགས་སྨན་རྣམས་གར་འདུས་ཤེས་པར་གྱིས། །དེ་རྣམས་བརྡའ་དང་དཔེ་ཡིས་བསྟན་པ་བཞིན། །ཐེག་པ་རྣམས་ཀྱི་རྩེ་རྒྱལ་སྤྱི་ཕུད་ལྟོས། །ཐེག་པ་སྣ་ཚོགས་གར་འདུས་ཤེས་པར་གྱིས། །ཆོས་རྣམས་ཀུན་གྱི་རྩེ་རྒྱལ་སྤྱི་ཕུད་ལྟོས། །ཆོས་རྣམས་རྩ་བ་གར་འདུས་ཤེས་པར་གྱིས། །གྲུབ་མཐའ་ཀུན་གྱི་རྩེ་རྒྱལ་སྤྱི་ཕུད་ལྷོས། །གྲུབ་མཐའི་གོང་རྒལ་གང་ཡིན་ཤེས་པར་གྱིས། །རྒྱུད་རྣམས་ཀུན་གྱི་རྩེ་རྒྱལ་སྤྱི་ཕུད་ལྟོས། །རྒྱུད་སྡེ་སྣ་ཚོགས་གར་འདུས་ཤེས་པར་གྱིས། །ལུང་རྣམས་ཀུན་གྱི་སྤྱི་རྗེ་གང་ཡིན་ལྟོས། །ལུང་རྣམས་རྩ་བ་གང་འདུས་ཤེས་པར་གྱིས། །མན་ངག་རྣམས་ཀྱི་རྩ་བ་གར་འདུག་ལྟོས། །མན་ངག་རྒྱལ་པོ་གང་ཡིན་ཤེས་པར་གྱིས། །དཀྱིལ་འཁོར་རྣམས་ཀྱི་རྩེ་རྒྱལ་གང་ཡིན་ལྷོས། །འཇུག་སྒོའི་རྒྱལ་པོ་གར་འདུས་ཤེས་པར་གྱིས། །དབང་རྣམས་ཀུན་གྱི་རྩེ་རྒྱལ་སྤྱི་ཕུད་ལྷོས། །དབང་བསྐུར་སྣ་ཚོགས་གར་འདུས་ཤེས་པར་གྱིས། །དངོས་གྲུབ་ཀུན་གྱི་རྩེ་རྒྱལ་སྤྱི་ཕུད་ལྟོས། །བྱིན་རླབས་སྣ་ཚོགས་གར་འདུས་ཤེས་པར་གྱིས། །བལྟ་བསྒོམ་ཀུན་གྱི་རྩེ་རྒྱལ་སྤྱི་ཕུད་ལྟོས། །སྤྱོད་འབྲས་དམ་ཚིག་གར་འདུས་ཤེས་པར་གྱིས། །ཉོན་མོངས་ཀུན་ཀྱི་རྒྱལ་པོ་གང་ཡིན་ལྷོས། །ཁམས་གསུམ་འཁོར་པའི་རྩ་བ་གར་འདུས་ཤེས་པར་ཀྱིས། །དེ་འདུལ་གདམས་ངག་རྒྱལ་པོ་གང་ཡིན་ལྟོས། །འདུག་ལུགས་གདམས་ངག་གར་འདུས་ཤེས་པར་གྱིས། །ཀྱེ་ཧོ་སྐལ་ལྡན་རིགས་ཀྱི་བུ། །མུན་པའི་གླིང་དུ་སྒྲོན་མེ་ཐེགས། །འདམ་ནས་ཕྱུང་ལ་སྒྲོག་ནས་ཁྲོལ། །དྲ་བ་ཆོད་ལ་རྒྱ་ནས་ཐོན། །སྐྱེ་ན་སོད་ལ་ལངས་ན་སྙོལ། །ཆགས་ན་ཕྲོལ་ལ་ཞེན་ན་ཆོད། །འབར་ན་སོད་ལ་བཅིངས་ན་ཁྲོལ། །ཚུད་ན་ཐོན་ལ་འཐིབས་ན་སོལ། །རྩ་བ་ཕྱུང་ལ་ཡན་ལག་ཆོད། །སྐྱེད་ན་སེལ་ལ་བྱུང་ན་ཆུག །རིན་ཆེན་ཆོངས་ལ་ཁྱིམ་དུ་སྡོད། །མི་ཟད་པ་ཡི་གཏེར་རྙེད་ནས། །རྒྱུ་འགྲུལ་མ་བྱེད་ཆོས་ཉིད་དབྱིངས་སུ་ཉོལ། །བདུད་རྩིའི་བཅུད་འཐུངས་སྙིང་པོའི་ཀློང་དུ་སྡོད། །བྱ་བ་ཀུན་ཐོངས་རྣལ་མའི་ས་ལ་འདུག །བྲེལ་བ་ཀུན་ཆོད་བྱར་མེད་བློ་འདས་ལྟོས། །རྩ་བ་ཕྱིན་ལ་ལུབ་ཀྱིས་བསྡུས། །ལས་རྣམས་ཟིན་ལ་དོན་རྣམས་གྲུབ། །བློ་ཟད་འཁྲུལ་ཡང་སྙིང་པོའི་ཆོས་སྐུར་གནས། །ཞེས་གསུངས་སོ། །ཡོངས་རྫོགས་ཐོད་རྒལ་བླ་ན་མེད་པའི་ཐེག་པ་བརྡའི་སྒོ་ནས་བསྟན་པའི་ལེའུ་སྟེ་དོན་དགུ་པའོ།། །།དེ་ནས་ངང་དངས་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །རྒྱུད་ཀྱི་མཚན་འདི་ཇི་ལྟར་གསུངས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཡོངས་རྫོགས་རྒྱུད་ཀྱི་མཚན་བཤད་ཀྱི། །འཁོར་རྣམས་མ་ཡེངས་གུས་པར་ཉོན། །རྒྱུད་སྡེ་མ་ལུས་ཀུན་གྱི་སྤྱི་རྗེ་ཡིན། །དེ་ཕྱིར་རྒྱུད་སྡེ་ཀུན་གྱི་རྩེ་རྒྱལ་བྱ་བར་ཟུང་། །ཉི་ཟླའི་སྙིང་པོ་འོད་འབར་མ་རིག་སེལ། །དེ་ཕྱིར་ཉི་ཟླ་འོད་འབར་རྒྱུད་དུ་ཟུང་། །ཉོན་མོངས་བདུད་ལ་ཆོས་ཉིད་རྩིས་འདུལ་བས། །བདུད་རྩི་ནད་སེལ་བྱ་བར་ཟུང་། །མཁའ་ཀློང་རྣམ་དག་རྒྱ་མཚོར་འཁྱིལ་པས་ན། །སྐྱེ་མེད་ཀ་དག་སྨན་གྱི་རྒྱ་མཚོར་ཟུང་། །མུ་མཐའ་ཡོངས་གྲོལ་ལྟ་བའི་བདུད་རྩི་རྒྱ་མཚོར་འཁྱིལ། །ཆོས་ཉིད་གཏིང་མཐའ་ཡངས་པའིབསྒོམ་པའི་བདུད་རྩི་རྒྱ་མཚོར་འཁྱིལ། །ཆོས་ཀུན་མཚན་མ་ཀུན་གྲོལ་སྤྱོད་པའི་བདུད་རྩི་རྒྱ་མཚོར་འཁྱིལ། །སྙིང་པོ་དོན་དམ་འབྲས་བུ་བདུད་རྩི་རྒྱ་མཚོར་འཁྱིལ། །ཆོས་ཀུན་ཡོངས་རྫོགས་བདུད་རྩི་རྒྱ་མཚོར་འཁྱིལ། །དེ་ཕྱིར་བདུད་རྩི་རྒྱ་མཚོ་འཁྱིལ་པའི་རྒྱུད་དུ་ཟུང་། །ཐེག་པ་སྣ་ཚོགས་གསལ་བར་སྟོན་པའི་ཕྱིར། །ཆོས་ཀུན་གསལ་བའི་ཉི་ཟླ་བྱ་བར་ཟུང་། །ཆོས་རྣམས་ཀུན་གྱི་གོ་འབྱེད་འཕྲང་སེལ་ཕྱིར། །གོ་འབྱེད་འཕྲང་སེལ་ཆེན་པོའི་རྒྱུད་དུ་ཟུང་། །ཐེག་པ་ཐམས་ཅད་ལ་བཟླ་གཉའ་གཅོག་ཕྱིར། །ལ་ཟློ་གཉའ་གཅོག་ཐོད་རྒལ་བྱ་བར་ཟུང་། །སྣང་སྲིད་ཆོས་རྣམས་མ་ལུས་ཀུན་རྫོགས་པས། །ཡོངས་རྫོགས་བླ་མེད་ཐོད་རྒལ་ཐེག་པར་ཟུང་། །ཐེག་པ་ཀུན་གྱི་སྒོ་འབྱེད་བལྟ་བསྒོམ་སྟོན། ཁྲེས་རབ་འཕྲུལ་གྱི་ལྡེ་མིག་བྱ་བར་ཟུང་། །ཆོས་རྣམས་རིན་ཆེན་རྩར་ལ་བརྒྱུས་པ་ཡིས། །རིན་ཆེན་གསེར་གྱི་ཕྲེང་བ་བྱ་བར་ཟུང་། །ཞེས་གསུངས་སོ། །ཉི་ཟླའི་སྙིང་པོ་བདུད་རྩིའི་རྒྱ་མཚོ་འཁྱིལ་བའི་རྒྱུད་ལས། མཚན་བསྟན་པའི་ལེའུ་སྟེ་བརྒྱད་ཅུ་པའོ།། །།དེ་ནས་རང་སྣང་ཁྱེའུ་ཆུང་གིས། །མུ་མཐའ་ཡོངས་གྲོལ་སྟོན་པ་ལ། །རྒྱུད་འདི་གཏད་གནས་གང་ལ་གཏད། །ཅེས་ཞུས་པས། སྟོན་པས་གཏད་པའི་གནས་བསྟན་པ། །ཉི་ཟླའི་སྙིང་པོའི་རྒྱུད་འདི་ནི། །རི་རབ་བློ་ལ་ཉི་ཟླའི་སེམས། །ཤེས་རབ་རལ་གྲི་རྒྱ་མཚོའི་ཐུགས། །དམ་ཚིག་ཤེལ་སྒོང་རང་རྒྱུད་འཇམ། །བླ་མ་ལ་གུས་མན་ངག་ཐུབ། །ཆགས་པ་མེད་པར་ཡོན་རྣམས་འབུལ། །བཀའ་རྒྱུད་གཏེར་འཆང་དམ་ཚིག་བསྲུང་། །དེ་ལྟའི་སྣོད་ལ་རྒྱུད་འདི་གཏོད། །སྣོད་དང་མི་ལྡན་སློབ་མ་ནི། །རེ་ལྡེའི་རྒྱུད་ལ་ཚེར་མའི་སེམས། །ཕྱིར་སྲུལ་བློ་ལ་དུག་གི་སེམས། །དམ་མེད་ང་རྒྱལ་གཡོ་སྒྱུ་ཅན། །སློབ་དཔོན་གསང་ཞིང་རང་ཆེ་འབྱིན། །ཆེ་སྤྱོད་དྲེགས་པས་གྲོགས་མཆེད་བསླུ། །རིན་ཆེན་མེད་པར་གཡོ་སྒྱུས་འབྲལ། །ཕྲལ་ནས་མི་འཆད་ཟོང་དུ་འཚོང་། །སྡིག་ལ་རྔམས་ལ་དགེ་བ་དགགས། །རྒྱུད་ངན་ང་རྒྱལ་སེར་སྣ་ཅན། །དེ་ལྟའི་སྣོད་ལ་བྱིན་པ་ན། །བེའུ་སྦྲེལ་གཡང་ལ་ལྷུང་བ་བཞིན། །གཉིས་ཀ་རྡོ་རྗེ་དམྱལ་བར་འགྲོ། །དཔེར་ན་སེང་གེའི་འོ་མ་ཡང་། །སྣོད་ངན་ཕལ་པར་བླུགས་གྱུར་ན། །སྣོད་ཀྱང་ཆག་ལ་བཅུད་ཀྱང་འབོ། །དེ་བཞིན་རྒྱུད་ཀྱི་རྒྱལ་པོ་འདི། །སྣོད་མེད་དམ་ཉམས་ལ་བསྟན་ན། །ཆོས་དང་རང་ཉིད་གཉིས་ཀ་བརླག །དེ་བས་སྣོད་ཀྱི་ཁྱད་བརྟགས་གཅེས། །ཞེས་གསུངས་སོ། །རྒྱུད་ཐམས་ཅད་ཀྱི་རྒྱལ་པོ་ཉི་ཟླའི་སྙིང་པོ་འོད་འབར་བ་བདུད་རྩིའི་རྒྱ་མཚོ་འཁྱིལ་པའི་རྒྱུད་ལས། རྒྱུད་གཏད་པའི་གནས་བསྟན་པའི་ལེའུ་སྟེ་གྱ་གཅིག་པའོ།། །།རྒྱུད་ཐམས་ཅད་ཀྱི་རྒྱལ་པོ་ཉི་ཟླའི་སྙིང་པོ་འོད་འབར་བ་བདུད་རྩིའི་རྒྱ་མཚོའི་འཁྱིལ་པའི་རྒྱུད་ཆེན་པོ་རྫོགས་སོ།། །།བཀའ་རྒྱ། གཏད་རྒྱའོ། །ཨུ་རྒྱན་གུ་རུ་པདྨ་ཡིས། །ཕྱི་མར་ཅི་འབྱུང་ད་ལྟ་ཤེས། །ཡོངས་རྫོགས་བླ་མེད་འབྱུང་བའི་དུས། །སྐུ་དང་གསུང་གི་བསྟན་པ་ནུབ། །ཐུགས་ཀྱི་བསྟན་པ་དར་བའི་ཚེ། །དེ་དུས་ཡོངས་རྫོགས་ཐོད་རྒལ་འབྱུང་། །ལྔ་བརྒྱ་དུས་ཀྱི་ཐ་མ་ལ། །དུས་ངན་ཟེར་ཞིང་སྤྱོད་ངན་བྱེད། །སྡེ་འཁྲུག་ནད་རྒྱས་ཆོས་འཁོར་འཇོམས། །ཁྲིམས་ཞིག་བོད་ཁམས་སིལ་བུར་འགྲོ། །ཕ་སྐྲུན་ནང་འཐབ་ངན་འགྲན་བྱེད། །གོས་སུ་ཁྱི་ཐུལ་རྣལ་འབྱོར་མང་། །ཟོང་དུ་ཆོས་འཚོང་ལག་ཆར་མི་ཐོད་ཐོགས། །ཉམས་མྱོང་གླུར་ལེན་ཐོ་ཅོས་འགེངས། །མི་ཐུབ་རྣམ་གསུམ་བྱུང་དུས་སུ། །ཡོངས་རྫོགས་བླ་མེད་ཐེག་པ་འབྱུང་། །ཞེས་གསུངས་སོ། །ཨུ་རྒྱན་པདྨས་བཤད་ཅིང་། སྐ་བ་དཔལ་བརྩེགས་ཀྱིས་བསྒྱུར། རྒྱལ་པོ་ཁྲི་སྲོང་ལྡེ་བཙན་ལ་གཏད་པའོ། །གཏེར་རྒྱ། །གཏད་རྒྱ། སྦས་རྒྱ། ཟབ་རྒྱའོ།། །། རྒྱ་གར་སྐད་དུ། ཨ་ཛ་ནུ་ཤུཟློ་ས༷་སྐྲི་ཏ་ཏནྟྲ། བོད་སྐད་དུ། སྐྱེ་མེད་ཀ་དག་