Ngb-pt-0046-vol-01-text
Front[edit]
Body[edit]
རྒྱ།། །། རྒྱ་གར་སྐད་དུ། སརྦ་བྲརྙ྅ཤཱ་ཡ་སུ་ར་ས༷་གྲ་ཧ་གི་རི་ཀུ་ཊ་ཏནྟྲ། བོད་སྐད་དུ། སངས་རྒྱས་ཀུན་གྱི་དགོངས་པའི་བཅུད་བསྡུས་རི་བོ་བརྩེགས་པའི་རྒྱུད། དམ་པ་དང་པོའི་སངས་རྒྱས་ཀ་དག་རྣམ་པར་སྣང་བའི་སྐུ་ལ་ཕྱག་འཚལ་ལོ། །འདི་སྐད་བདག་གིས་རྟོགས་ཤིང་བཤད་པའི་དུས་གཅིག་ན། ཀུན་གཞི་མཁའ་ཀློང་རྣམ་པར་དག་པའི་གནས། རིན་པོ་ཆེ་འོད་སྣ་ཚོགས་འཕྲོ་བའི་གདངས། དབྱིངས་རྣམ་པར་དག་པའི་ཀློང་ཀུན་གཞིའི་ཕོ་བྲང་། རྩལ་ཟེར་ཡན་ལག་འོད་གསལ་ཀུན་འབྱུང་གི་མཁའ། སེམས་ཉིད་ཁྱབ་གདལ་ཆེན་པོའི་དཀྱིལ་འཁོར། རང་བཞིན་གྱིས་འོད་གསལ་བ། དེ་ཉིད་དུ་རྣམ་པར་དག་པ། རྒྱུ་རྐྱེན་འཕོ་འགྱུར་མེད་པ། སྐྱེ་འགག་གཉིས་སུ་མེད་པར་རང་གྲོལ་བ། རང་བྱུང་འོད་གསལ་རྣམ་དག་བསམ་མི་ཁྱབ་ཀྱི་ལྷ་ཁང་ནི་འཕྲོ་འདུ་དང་འཕེལ་འགྲིབ་མེད་པའི་གནས་སོ། །གནས་དེ་ན་ཡེ་ཐོག་མའི་སངས་རྒྱས། ཀ་དག་དངོས་མེད་ཟང་ཀ་མི་སྣང་གསལ་བའི་རང་བཞིན་དུ་བཞུགས་སོ། །སྟོན་པ་དེ་ཉིད་ལས་མི་གཞན་རང་བྱུང་རང་དངས་ཀྱི་འཁོར་ལ། ཆོས་ཀྱི་དབྱིངས་ཀྱི་བསྟན་པ། ཡེ་མེད་མཚོན་མེད་བློ་འདས་ཐ་སྙད་མིང་ལས་འདས་པའི་ཐེག་པ། ངག་ཏུ་མི་གསུང་བྱིན་གྱིས་རླབས་ཀྱིས་གསུངས་སོ། །ཡེ་ཐོག་གཞིའི་སྟོན་འཁོར་རོ། །བྱིན་གྱིས་རླབས་ཀྱི་སྟོན་པ་ནི། དམ་པ་དང་པོའི་སངས་རྒྱས་ཀུན་གྱི་སྤྱི་ཕུད་བྱ་བ་བཞུགས་སོ། །དེས་འོད་གསལ་རྣམ་དག་དཀྱིལ་འཁོར་ལ། བྱ་བཙལ་རྩོལ་བསྒྲུབ་མེད་པའི་བསྟན་པ་གསུངས་སོ། །ཡེ་ཤེས་མཐུའི་སྟོན་པ་ནི། རང་བཞིན་ཀུན་ཏུ་བཟང་པོས། རྡོ་རྗེ་སེམས་དཔའ་ལ་ཐུགས་ཀྱི་བསྟན་པ་བྱིན་གྱིས་རླབས་ཀྱིས་བཤད། སྔོན་བྱུང་ཕུན་སུམ་ཚོགས་པ་ལྔའོ། །དེའི་རྗེས་འཇུག་ཕུན་སུམ་ཚོགས་པ་ལྔ་ནི། སྟོན་པ་རྡོ་རྗེ་སེམས་དཔའ་ཡིས། །སེམས་ལྷག་ཅན་སོགས་འཁོར་རྣམས་ལ། །གསང་སྔགས་ཡང་ཏི་སྤྱི་ཐེག་བཤད། །འོད་གསལ་གནས་བཤད་ངོ་བོ་དུས། །རྗེས་འཇུག་ཕུན་སུམ་ཚོགས་པ་ལྔའོ། །དེའི་གདུང་གསོབ་ཕུན་སུམ་ཚོགས་པ་ལྔ་ནི། ཨུ་རྒྱན་གནས་སུ་དགའ་རབ་རྡོ་རྗེ་༄༅ ཡིས། །འཇམ་དཔལ་བཤེས་གཉེན་ལ་སོགས་འཁོར་རྣམས་ལ། །རྒྱུད་སྡེ་སྤྱི་བཤད་རིག་འཛིན་རིག་པས་བརྒྱུད། །གདུང་གསོབ་ཕུན་སུམ་ཚོགས་པ་ལྔའོ། །ཡེ་ཐོག་སྟོན་པའི་རྗེས་འཇུག་གདུང་འཚོབ་པའོ། །དམ་པ་དང་པོའི་རྗེས་འཇུག་གདུང་འཚོབ་ནི། །དེ་ཡི་རྗེས་འཇུག་འོད་གསལ་སྣང་མཛད་ཀྱིས། །འོག་མིན་གནས་སུ་ས་བཅུའི་འཁོར་ལ་བཤད། །གསང་སྔགས་བསྟན་པ་རང་གི་ངོ་བོ་ཡིས། །དེ་ཡི་གདུང་འཚོབ་ཕུན་སུམ་ཚོགས་ལྔ་ནི། །གསང་བའི་གནས་སུ་སྟོན་པ་ཧེ་རུ་ཀས། །གསང་སྔགས་བསྐྱེད་རིམ་ཞི་ཁྲེའི་འཁོར་ལ་བཤད། །དུས་ནི་མཚན་མ་སྣ་ཚོགས་དུས། །དམ་པ་དང་པོའི་གདུང་གསོབ་བོ། །རྡོ་རྗེ་སེམས་དཔའི་གདུང་འཚོབ་རྗེས་འཇུག་ནི། །ཁང་བཟང་གནས་སུ་སྤྲུལ་སྐུའི་སྟོན་པ་ཡིས། །མོས་ཚང་ཀུན་དགའ་བོ་ལ་སྡེ་སྣོད་རྣམ་གསུམ་བཤད། །སྤྲུལ་སྐུས་ཚིག་ཏུ་བསྡེབས་ཏེ་བཤད་པའི་དུས། །དེ་ཡི་གདུང་འཚོབ་ཕུན་སུམ་ཚོགས་ལྔ་ནི། །ཀུན་དགའ་བོ་ཡིས་འཛམ་གླིང་ཕུག་པ་མྲ །དགེ་སློང་ལྔ་བརྒྱའི་འཁོར་ལ་མདོ་སྡེ་འདུལ་བ་བཤད། །དུས་ནི་ཚིག་བསྡེབས་བཤད་པའི་དུས། །རྡོ་རྗེ་སེམས་དཔའི་རྗེས་འཇུག་གདུང་འཚོབ་བོ། །མདོར་བསྡུས་ཕུན་སུམ་ཚོགས་ལྔ་ནི། །རང་བཞིན་ངོ་བོ་ཐུགས་རྗེ་གསུམ། །ཆོས་སྐུ་སྐྱེ་བ་མེད་པའི་སྟོན་པ་དང་། ལོངས་སྐུ་ཡེ་ཤེས་མཐུ་ཡི་སྟོན་པ་དང་། སྤྲུལ་སྐུ་བྱིན་གྱིས་རླབས་ཀྱི་སྟོན་པ་ནི། །སྐྱེ་མེད་ཡེ་ཤེས་བྱིན་རླབས་སྟོན་པ་ཡིས། །སྟོན་པ་ཕུན་སུམ་ཚོགས་པས་བཤད། །ཆོས་སྐུ་གསུང་དུ་མེད་པའི་བསྟན་པ་དང་། ལོངས་སྐུ་རང་གི་ངོ་བོས་བསྟན་པ་དང་། །སྤྲུལ་སྐུ་གསུང་དུ་བརྗོད་པའི་བསྟན་པ་དང་། མེད་དང་ངོ་བོ་བརྗོད་པ་ནི། །བསྟན་པ་ཕུན་སུམ་ཚོགས་པར་བཤད། །ལོངས་སྐུ་སྤྲུལ་སྐུ་སེམས་དཔའ་ཆོས་སྐུའི་འཁོར། །ས་བཅུ་རིགས་ལྔ་ཡབ་ཡུམ་ལོངས་སྤྱོད་རྫོགས་པའི་འཁོར། །རིགས་དྲུག་སྡེ་བརྒྱད་འདོད་འདུས་སྤྲུལ་སྐུའི་འཁོར། །རང་རྒྱུད་འབྲེལ་དང་དོན་གྱིས་གཅིག །འདོད་པས་བསྡུས་པའི་འཁོར་རྣམས་ནི། །འཁོར་ནི་ཕུན་སུམ་ཚོགས་པར་བཤད། །ཆོས་དབྱིངས་རྣམ་པར་དག་པ་ཆོས་སྐུའི་གནས། །ཁྱད་པར་འོག་མིན་ལོངས་སྦྱོད་རྫོགས་པའི་གནས། །ཁང་བཟང་སྤྲུལ་པ་སྐུ་ཡི་གནས། །ཐམས་ཅད་སྡུད་དང་ཁྱད་པར་འཕགས། །ཁང་བཟང་སྤྲུལ་པ་བཞུགས་གནས་ནི། །གནས་ནི་ཕུན་སུམ་ཚོགས་པར་བཤད། །ཆོས་སྐུས་བྱིན་གྱི་རླབས་ཀྱིས་བཤད་པའི་དུས། །ལོངས་སྐུས་རང་གི་ངོ་བོས་བཤད་པའི་དུས། །སྤྲུལ་སྐུས་ཚིག་ཏུ་བསྡེབས་ཏེ་བཤད་པའི་དུས། །འདས་དང་མ་འོངས་ད་ལྟ་གསུམ། །དུས་ནི་ཕུན་སུམ་ཚོགས་པར་བཤད། །སྔོན་བྱུང་རྗེས་འཇུག་གདུང་གསོབདེབཞིནནོ། །གཅིག་དང་འབྲེལ་དང་ག་་ལ་འབེབས། །མ་ཚད་མེད་དང་དགོས་པ་ཚང་། །རྒྱུད་ཀྱི་ཕུན་སུམ་ཚོགས་པའོ། །ཞེས་གསུངས་སོ། །སངས་རྒྱས་ཀུན་གྱི་དགོངས་པའི་བཅ་འདུས་རི་བོ་བརྩེགས་པའི་རྒྱུད་ལས། ཕུན་སུམ་ཚོགས་པ་གསལ་བར་བསྟན་པའི་ལེའུ་སྟེ་དང་པོའོ།། །།དེ་ནས་ཡེ་ཐོག་ཀ་དག་སངས་རྒྱས་ལ། །རང་བྱུང་ངང་དངས་ཁྱེའུ་ཆུང་གིས། །ཕྱག་བཙལ་པུས་བཙུགས་ཐལ་མོ་སྦྱར་ཏེ་གུས་པས་འདི་སྐད་ཞུས། ཨ་ཐ་ཏིཇི་མ་ཧྭ་སུ་ཁ་ཧོ། ཕུན་སུམ་ཚོགས་པའི་དོན་ནི་དེ་ལྟར་ན། །གང་ཡང་མེད་པའི་སྔོན་རོལ་ན། །སྔོན་ཐོག་དུས་ན་ཇི་ལྟར་གནས། །སངས་རྒྱས་སེམས་ཅན་གཞི་ནི་ཇི་ལྟར་གནས། །ཡར་རྒྱས་མར་འཁྲུལ་སྐྱོན་ནི་གང་ནས་བྱུང་། །དེ་གཉིས་སྐྱོན་དང་ཡོན་ཏན་ཇི་ལྟར་ལགས། །སྙིང་པོ་ཀ་དག་གང་གིས་རྟོགས། །བྱར་མེད་བློ་འདས་ཇི་ལྟར་ལགས། །དངོས་མེད་རྣལ་མ་གང་གིས་ཐོབ། །སངས་རྒྱས་ཀུན་གྱི་ཐུགས་ཀྱི་བཅུད། །དགོངས་པའི་བཅུད་འདིར་ཇི་ལྟར་འདུས། །རི་བོ་བརྩེགས་པ་དཔེ་ཡེས་ཇི་ལྟར་བསྟན། །གསང་སྔགས་བརྡའ་ཡིས་ཇི་ལྟར་བཤད། །མ་བསྒྲུབས་འབྲས་བུ་ཇི་ལྟར་འཐོབ། །ཐེག་དགུའི་བལྟ་བསྒོམ་ཇི་ལྟར་ལགས། །དེ་ལས་སྤྱི་ཏི་གང་གིས་སྤགས། །སྤྱི་ཏི་ཡོ་གའི་དོན་རྟོགས་ནས། །གོལ་སྒྲིབ་འཁྲུལ་པ་ཡོད་དམ་མེད། ཁྲས་མེད་བློ་འདས་ལ་ཆེན་གང་དུ་བཟླ། །འཁོར་གྱིས་དོན་དྲིས་བཅོ་བརྒྱད་པོ། །སྟོན་པས་འཁོར་ལ་གནང་བར་ཞུ། ཁེན་ཏུ་ཟབ་པར་བཀའ་སྩོལ་ཅིག །ཅེས་ཞུ་བ་ཕུལ་ལོ། །རི་བོ་བརྩེགས་པའི་རྒྱུད་ལས། གླེང་སློང་བའི་ལེའུ་སྟེ་གཉིས་པའོ།། །།དེ་ནས་ངང་དངས་ཁྱེའུ་ཆུང་གིས། །ཡེ་ཐོག་ཀ་དག་སངས་རྒྱས་ལ། །གང་ཡང་མེད་པའི་སྔོན་རོལ་ན། སྔོན་ཐོག་དུས་ན་ཇི་ལྷར་གནས། །ཞེས་ཞུས་པས། ཡེ་ཐོག་ཀ་དག་སངས་རྒྱས་ཀྱིས། །འོད་དང་རྩལ་དང་ཤེས་རིག་དྲན་སེམས་དང་། །འགྱུ་བ་ཡིད་དང་ཡན་ལག་འགག་མེད་འཁོར། །རང་བྱུང་ངང་གསལ་འགག་མེད་འཁོར། །རང་བྱུང་ངང་དག་འོད་གསལ་འཁོར། །ས་ཆུ་མེ་རླུད་ནམ་མཁའ་དང་། །འདོད་ཆགས་ཞེ་སྡང་གཏི་མུག་ང་རྒྱལ་ཕྲག་དོག་ལྔ། དེ་སོགས་དུག་ལྔ་རྟོག་ཚོགས་ཉོན་མོངས་འཁོར་རྣམས་དང་།།འཛམ་གླིང་མི་རྣམས་ལྷ་སྲིན་སྡེ་བརྒྱད་དང་། །སྣང་སྲིད་སྐྱེ་འགུལ་ཡོད་མེད་རྟག་ཆད་དང་། །ས་བཅུའི་བྱང་ཆུབ་སེམས་དཔའ་རྒྱལ་བ་རིགས་ལྔ་དང་། །རྣལ་འབྱོར་རྣམ་བཞི་སྐལ་ལྡན་མོས་ཚོགས་དང་། །ངང་དངས་གསལ་དག་འཁོར་ཚོགས་ལ། །ཐོག་མའི་ཀུན་བཟང་ཀ་དག་རྣལ་མ་ཡི། །སྐུ་དང་གསུང་ཐུགས་ཡོན་ཏན་ཕྲིན་ལས་ལྔས། །འོད་ཟེར་རྣམ་ལྔ་ཕྱོགས་བཅུ་ཀུན་ཏུ་འཕྲོས། །སེམས་ཅན་རྣམས་ཀྱི་ངན་སོང་གསུམ། །སྦྱོང་བར་བྱེད་པའི་འོད་འཕྲོས་པས། །ཉོན་མོངས་པས་ནི་སེམས་འཁྲུགས་པས། །མི་ཤེས་འདམ་དུ་བྱིང་བ་ཡི སེམས་ཅན་ཀུན་ལ་སྨན་པ་དང་། །ཁྱབ་བདག་བདག་ལ་སྨན་པ་དང་།།བདག་དོན་བདག་ལ་ཐུགས་བརྩེའི་ཕྱིར། །ཉོན་མོངས་མ་ལུས་བསལ་བ་དང་། །མི་ཤེས་མ་ལུས་ཤེས་བྱའི་ཕྱིར། །དབང་ངོ་བསམ་པ་མཁྱེན་མཆོག་གིས། །བསམ་པའི་ཁྱད་པར་ཇི་བཞིན་དུ། །བློ་དང་གང་མཐུན་ཐེག་པ་ཡིས། །བླ་མེད་འབྲས་བུ་ཐོབ་བྱའི་ཕྱིར། །སེམས་ཅན་རྣམས་དང་མོས་ཚོགས་འཁོར། །བྱང་ཆུབ་རང་ཆས་སངས་རྒྱས་གཅེར་མཐོང་བཤད། །འཁོར་རྣམས་མ་ཡེངས་གུས་པས་ཉོན། །ཨ་ཨ་ཏིཛི་སྙོ་ཡེ་དྷརྨ་དྷ་ཏུཤཱ་ད་ཡ་མ་ཧྭ་སུ་ཁ་ཧོ། བྷ་ཏ་དྷརྨ་སརྦ་དྷ་ཏུ་ཐུ་ལ་ཧྲི་ད་ཡ་ཨ། སྔོན་ཐོག་སྔོན་མེད་མིང་དང་བྲལ་ན་ཡང་། །མི་འབྲལ་ཤེས་ཕྱིར་ངང་དངས་འཁོར་ལ་བཤད། །གང་ཡང་མེད་པའི་སྔོན་རོལ་ན། །ཐ་སྙད་མིང་གིས་མི་ཕེབས་ཏེ། །རྣམ་པ་ཀུན་ལྡན་རྣམ་པ་མེད། །དངོས་མེད་ཟང་ཀ་རྣལ་མ་དེ། །ཀ་དག་གཞི་མེད་ཀུན་གྱི་གཞི། །ཅང་མེད་ཅིར་སྣང་ཡེ་མེད་དེ། །ཤེས་མེད་ངང་དངས་སྟོང་སང་ངེ་། །དེ་ཉིད་རྣམ་ཤེས་ཡུལ་ལས་འདས། །དང་པོའི་སངས་རྒྱས་རྒྱུ་མེད་པས། །ཐོག་མ་མེད་པས་སྤྲོས་མེད་པའོ། །སངས་རྒྱས་ཐོག་མ་ཐ་མ་མེད། །ཡང་དག་མཐའ་ལ་རྣམ་པར་གནས། །ཡང་དག་བདག་མེད་དེ་བཞིན་ཉིད། །ཡེ་ཤེས་གཉིས་མེད་ཚུལ་འཆང་བ། །ཡེ་ཤེས་ལྡན་པ་ཡོད་མེད་ཤེས། །ཡེ་ཤེས་མིག་གཅིག་གདོད་ནས་དག །རྣམ་པར་རྟོག་མེད་ལྷུན་གྱིས་གྲུབ། །ཐུག་པ་མེད་པ་དཔེ་མེད་པ། །མི་མངོན་མི་སྣང་གསལ་བྱེད་མིན། །མི་འགྱུར་ཀུན་འགྲོ་ཁྱབ་པ་དེ། །དཔེར་བྱ་ཀུན་ལས་འདས་པའོ། །མིང་ཙམ་འདི་ཞེས་བསྟན་པར་ནི། །ཀ་དག་སངས་རྒྱས་མཚོན་དུ་མེད། །དངོས་མེད་བློ་འདས་ཐ་སྙད་མེད། །ཅེས་གསུངས་སོ། །སངས་རྒྱས་ཀུན་གྱི་དགོངས་པའི་བཅུད་འདུས་རི་བོ་བརྩེགས་པའི་རྒྱུད་ལས། གང་ཡང་མེད་པའི་སྔོན་རོལ་ན། དངོས་མེད་ཤེས་མེད་མཚོན་མེད་ཀ་དག་ཐ་སྙད་དང་དཔེ་དང་ཚིག་དང་ཡི་གེ་ལས་འདས་པར་བསྟན་པའི་ལེའུ་སྟེ་གསུམ་པའོ།། །།དེ་ནས་ངང་དངས་འོད་འབར་གྱིས། ཡེ་ཐོག་ཀ་དག་སངས་རྒྱས་ལ། །སངས་རྒྱས་སེམས་ཅན་གཞི་ནི་ཇི་ལྟར་ལགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཀ་དག་ངང་ལ་བྱེ་བྲག་མེད་ན་ཡང་། །རྩལ་གྱི་རིག་པ་བཤད་ཀྱིས་ཉོན། །སངས་རྒྱས་སེམས་ཅན་འཁོར་འདས་གཞི། །ཁྱབ་གཞི་གཡོ་གཞི་འབྱུང་གཞི་ནི། །ཀུན་གཞི་མཁའ་ཀློང་བརྡལ་ཁྱབ་ནི། །སངས་རྒྱས་སེམས་ཅན་འཁོར་འདས་གཞི། །དངོས་མེད་མཉམ་པའི་ཀློང་ན་ཀུན་འབྱུང་མཛོད་པོ་ཆེ། །རྩལ་ཟེར་སྣ་ཚོགས་འབྱུང་བའི་བང་མཛོད་ཡིན། །རྒྱ་མཚོ་ས་གསེར་བང་མཛོད་བཞིན། །མཉམ་པས་སྐྱེ་འབྱུང་ཟད་མེད་འགྱུར་བ་མེད། །ཅེས་གསུངས་སོ། །རི་བོ་བརྩེགས་པའི་རྒྱུད་ལས། སངས་རྒྱས་སེམས་ཅན་གྱི་གཞི་བསྟན་པའི་ལེའུ་སྟེ་བཞི་པའོ།། །།དེ་ནས་ངང་དངས་གསལ་དག་གིས། །ཡེ་ཐོག་ཀ་དག་སངས་རྒྱས་ལ། །གཉིས་ཀའི་གཞི་རུ་མཉམ་པ་ན། །ཡར་རྒྱས་མར་འཁྲུལ་སྐྱོན་ནི་གང་ནས་བྱུང་། །ཞུས་པ་དང་། སྟོན་པས་འཁོར་ལ་བཀལ་སྩལ་བ། །སྙིང་པོས་༄༅ ཁྱབ་པར་མཉམ་པ་ལ། །རིག་དང་མ་རིག་རྣམ་གཉིས་ལས། །ཡར་རྒྱས་མར་ཞབྲུལ་གཉིས་སུ་བྱུང་། །འགྱུ་དང་མི་འགྱུ་རྣམ་གཉིས་ལས། །སྐུ་གསུམ་དུག་གསུམ་གཉིས་སུ་བྱུང་། །འགྱུར་དང་མི་འགྱུར་རྣམ་གཉིས་ལས། །ཐོག་མའི་སངས་རྒྱས་འཁྲུལ་པ་བྱུང་། ཟིན་དང་མ་ཟིན་རྣམ་གཉིས་ལས། ཁྲེས་མི་ཤེས་ནི་གཉིས་སུ་བྱུང་། །འཕྲད་དང་མ་འཕྲད་རྣམ་གཉིས་ལས། །འཆར་སྒོ་ཞབྲུལ་སྒོ་གཉིས་སུ་བྱུང་། །རྟོགས་དང་མ་རྟོགས་རྣམ་གཉིས་ལས། །སྐུ་གསུམ་ཁམས་གསུམ་གཉིས་སུ་བྱུང་། །ངོ་བོ་གཅིག་ལ་སྣང་ཚུལ་གཉིས། །རྟོགས་དང་མ་རྟོགས་གཉིས་སུ་བྱུང་། །གཅིག་མིན་གཉིས་ནི་ཡིན་མ་ཡིན། །ཕུག་རོན་སྐ་དང་ག་པུར་འདྲ། །ངོ་བོ་གཅིག་ལ་སྣང་ཚུལ་གཉིས། །རྐྱེན་དང་གང་འཕྲད་སྨན་དུག་གཉིས། །དངོས་མེད་ཀུན་བྱེད་གཞི་གཅིག་ལ། །རྟོགས་དང་མ་རྟོགས་རྣམ་གཉིས་ལས། །སངས་རྒྱས་སེམས་ཅན་གཉིས་སུ་བྱུང་། །གཞི་གཅིག་ཤུགས་ལ་ལྡོག་བཅས་གཉིས། །སྔོན་ལ་གར་སྐྱེས་ལྡོག་བཅས་སོ། །དོན་རྟོགས་ཀ་དག་ཆོས་ཀྱི་སྐུ། །མ་རྟོགས་འགྲོ་དྲུག་འཁོར་བར་འ་ས། །ཞེས་གསུངས་སོ། །རི་བོ་བརྩེགས་པའི་རྒྱུད་ལས། ཡར་རྒྱས་མར་འཁྲུལ་བསྟན་པའི་ལེའུ་སྟེ་ལྔ་པའོ།། །།དེ་ནས་ངང་དངས་གསལ་དག་གིས། །ཡེ་ཐོག་ཀ་དག་སངས་རྒྱས་ལ། །དེ་ཉིད་སྐྱོན་དང་ཡོན་ཏན་ཇི་ལྟར་ལགས། །ཞེས་ཞུས་པ་ལས། སྟོན་པས་འཁོར་ལ་བཀའ་སྩལ་པ། །རྟོགས་ན་སྐྱོན་ཡོན་གཉིས་མེད་དེ། །མ་རྟོགས་བློ་ལ་སྐྱོན་ཡོན་བྱུང་། །སྐྱོན་གྱི་རྩ་བ་རླུད་གཡོས་ཡིན། །ཡེ་ཤེས་རླུད་གྱུར་ཡིད་རྟོག་སྐྱེ་མ་ནུས། །རིག་པ་སྙིང་པོར་ཐིམ་པས་འགྱུ་མ་ནུས། །སྙིང་པོ་རིག་པར་ཐིམ་པས་ཐོག་མར་ཡེ་སངས་རྒྱས། །སྙིང་པོར དང་འཕྲད་པས་ཡེ་ཤེས་རང་ས་ཟིན། །རིག་ཡིད་མ་རིག་རྩད་ཆོད་འཁྲུལ་པ་ཀ་ནས་དག །སྙིང་པོའི་ཀློང་དུ་ཡོན་ཏན་བསམ་མི་ཁྱབ། །རྟོགས་ཚད་མཁྱེན་ཚད་ཡོན་ཏན་བརྗོད་མི་ལངས། །ནམ་མཁའི་ཁམས་དང་ཉི་ཟླ་ནོར་བུའི་ཚུལ། །ཞེས་གསུངས་སོ། །རི་བོ་བརྩེགས་པའི་རྒྱུད་ལས། ཀ་དག་སངས་རྒྱས་ཀྱི་ཡོན་ཏན་བསྟན་པའི་ལེའུ་སྟེ་དྲུག་པའོ།། །།དེ་ནས་ངང་དངས་གསལ་དག་གིས། །ཐོག་མའི་སངས་རྒྱས་ཀུན་བཟང་ལ། །མ་རིག་འཁྲུལ་པའི་སྐྱོན་ནི་གང་ནས་བྱུང་། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སྐྱོན་ནི་རླུང་དང་མ་རིག་པ། །མཉམ་པའི་རང་བཞིན་མི་ཤེས་མ་རིག་རླུད་། །རླུང་གིས་རྐྱེན་བྱས་རིག་པས་ས་མ་ཟིན། །རིག་པས་ས་མ་ཟིན་པས་ཡིད་རྟོག་སྐྱེས། །ཡིན་ནམ་མིན་ནམ་མིང་གི་རྣམ་གྲངས་སྐྱེས། །མིང་ལ་བརྟགས་པས་སེམས་སུ་འདོད་པ་སྐྱེས། །སྐྱོན་གྱི་རྩ་བ་རླུང་རིག་ངར་འཛིན་གྱིས། །ལྡོག་ཐབས་མི་ཤེས་ཡིད་ཀྱི་འདོད་ཞེན་སྐྱེས། །དེ་རྣམས་སྟོབས་ཀྱིས་འོད་གཟུགས་ཁ་མིག་ཅན། །དེ་ཡི་སྐྱོན་གྱིས་ཉོན་མོངས་དྲུག་ཏུ་སྐྱེས། །བདག་འཛིན་དུག་ལྔ་འགོང་པོ་ང་བདག་གིས། །རིགས་དྲུག་སེམས་ཅན་འཁྲུལ་པས་འཁོར་བར་འཁྱམས། །གཟུང་འཛིན་ཡུལ་སེམས་ཕྱོགས་རིས་དགག་བསྒྲུབ་སྐྱོན། །སྣང་བརྟགས་ཆགས་སྡང་སྐྱོན་ལ་བརྗོད་མི་ལངས། །རྩ་བ་ཡིད་གཉིས་ང་བདག་ཞེ་འདོད་དུག་གསུམ་སྐྱོན་གྱི་རྩ་བ་ཡིན། །ཞེས་སུངས་སོ། །རི་བོ་བརྩེགས་པའི་རྒྱུད་ལས། སྐྱོན་གྱི་རྩ་བ་བསྟན་པའི་ལེའུ་སྟེ་བདུན་པའོ།། །།དེ་ནས་ངང་དངས་གསལ་དག་གིས། ཡེ་ཐོག་ཀ་དག་སངས་རྒྱས་ལ། །སྙིང་པོ་ཀ་དག་གང་གིས་རྟོགས། །ཞེས་ཞུས་པས། །སྟོན་པས་འཁོར་ལ་བཀའ་སྩལ་པ། །སྙིང་པོ་བཅུད་སྤུངས་གནད་ཆེན་བཤད། །འོད་གསལ་ངང་དངས་ཐུགས་ལ་ཆོངས། །སྙིང་པོ་ཀ་དག་རྟོགས་ཐབས་ལ། །ཞེ་འདོད་བྱ་རྩལ་རྩོལ་བསྒྲུབ་བཞག །མི་བལྟ་མི་བསྒོམ་མི་སྤྱོད་བློ་ལས་འདས། །དངོས་མེད་ཀ་དག་ཟང་མ་དེ། །བྱ་བཙལ་བསམ་འདས་མཚོན་དུ་མེད། །བློ་འདས་བསམ་བྲལ་དགོངས་པ་རྟོགས། །རྟོགས་པའི་དུས་ན་ཤེས་བརྗོད་མཐའ་དང་བྲལ། །དངོས་མེད་ཀུན་དངོས་ཅང་མེད་ཅིར་སྣང་དེ། །ཡེ་མེད་མིན་ཏེ་སྣ་ཚོགས་སྣང་། སྣ་ཚོགས་སྣང་ལ་དངོས་གཞི་མེད། །ཅང་མེད་མ་ཡིན་གཉིས་སུ་སྣང་། གཉིས་སུ་མ་གྲུབ་གཅིག་ཏུ་འདུག །གཅིག་ཏུ་མི་འདུག་དངོས་པོ་མེད། །དངོས་མེད་མཚན་ཉིད་བློ་ལས་འདས། །རེ་ཞིག་མཚོན་ན་གསལ་སྟོང་དབྱེར་མེད་དེ། །རང་བྱུང་འོད་གསལ་ངང་དངས་རྣམ་པར་དག །གསལ་དངས་སང་ངེ་དངས་ལ་གོ་སྐབས་མེད། །དེ་ཡིས་སྙིང་པོ་ཀ་དག་རྟོགས། །ཅི་ཡང་མ་ཡིན་བྱང་ཆུབ་སེམས། །དངོས་མེད་རྩིས་གདབ་བློ་ལས་འདས་པའོ། །སྙིང་པོ་བཅ་སྐྲུངས་གདམས་ངག་གནད། །ཅེས་གསུངས་སོ། །རི་བོ་བརྩེགས་པའི་རྒྱུད་ལས། སྙིང་པོ་ཀ་དག་རྟོགས་པའི་ལེའུ་སྟེ་བརྒྱད་པའོ།། །།དེ་ནས་ངང་དངས་གསལ་དག་གིས། ཡེ་ཐོག་ཀ་དག་སངས་རྒྱས་ལ། །བྱར་མེད་བློ་འདས་ཇི་ལྟར་ལགས། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། བྱར་མེད་བློ་འདས་ངས་བཤད་ཀྱིས། །འཁོར་རྣམས་མ་ཡེངས་གུས་པས་ཉོན། །དགུ་རྩེ་སྤྱི་ཏི་ཡོ་ག་ནི། །བྱ་བཙལ་རྩོལ་བ་མི་བྱེད་དེ། །མ་བཅོས་ངང་ལ་བཞག་པས་ཆོག །བྱས་པའི་ཆོས་རྣམས་འཇིག་པའི་ཕྱིར། །མ་བྱས་རང་བྱུང་ཆོས་ཤིག་བཤད། །རྩོལ་བསྒྲུབ་ཆོས་རྣམས་ཡིད་སྨོན་ཡིན། །རྩོལ་མེད་བསྒྲུབ་མེད་ཆོས་ཤིག་བཤད། །ཞེ་འདོད་བསམ་དཔྱད་བློ་ཡི་ཆོས། །ཞེ་འདོད་བསམ་བྲལ་བློ་འདས་ཆོས་ཤིག་བཤད། །ཅེས་གསུངས་སོ། །རི་བོ་བརྩེགས་པའི་རྒྱུད་ལས། བྱར་མེད་བློ་འདས་བཤད་པའི་ལེའུ་སྟེ་དགུ་པའོ།། །།དེ་ནས་ངང་དངས་གསལ་དག་གིས། །ཡེ་ཐོག་ཀ་དག་སངས་རྒྱས་ལ། །དངོས་མེད་རྣལ་མ་གང་གིས་ཐོབ། །ཅེས་ཞུསླ་པས། སྟོན་པས་འཁོརལ་བཀའ་སྩལ་བ། །དངོསམེད་རྣལ་མ་ཐོབ་ཐབས་ནི། །ལུས་ངག་ཡིད་གསུམ་རྩོལ་བཞག་ལ། །མི་བལྟ་མི་བསྒོམ་སྤྱོད་ཐོབ་མེད། །དངོས་མེད་ཡེ་ཤེས་བློ་ལས་འདས། །གསལ་སྟོང་ངང་ལ་མི་འབྲལ་བ། །སང་ངེ་སལ་ལེ་དངོས་མཚན་མེད། །གང་ཡང་མི་རྟོག་བསམ་ལས་འདས། །དངོས་མེད་རྣལ་མ་ཟང་ཀ་ལ། །གང་ལ་སེམས་མེད་རྟོག་འཛིན་མེད། །ཡིད་རིག་དྲན་བསམ་བློ་ལས་འདས། །ཞེ་འདོད་རྩིས་གདབ་མེད་པས་ཐོབ། །ཐོབ་པའི་དུས་ན་དངོས་མེད་བློ་ལས་འདས། །སྣང་སྲིད་ཆོས་ལ་དབྱེ་བསལ་འདས། །ཞེས་གསུངས་སོ། །རི་བོ་བརྩེགས་པའི་རྒྱུད་ལས། དངོས་མེད་ཐོབ་པའི་ལེའུ་སྟེ་བཅུ་པའོ།། །།དེ་ནས་ངང་དངས་གསལ་དག་གིས། །ཡེ་ཐོག་ཀ་དག་སངས་རྒྱས་ལ། །སངས་རྒྱས་ཀུན་གྱི་ཐུགས་ཀྱི་བཅུད། །དགོངས་པའི་ཡང་སྙིང་ཇི་ལྟར་འདུས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །དགོངས་པའི་ཡང་སྙིང་བཅུད་འདུས་ངས་བཤད་ཀྱིས། །འཁོར་རྣམས་མ་ཡེངས་ཐུགས་ལ་ཞོག །ཨ་ཐ་ཏིལྒ བཛྲ་སཏྭ་སྙོ། ཨ་སིདྷི་ཨ་ཨ། བུརྙ་སརྦ་མ་ལ་ཏིཛི་ཐུ་ལ་དུ་ན་ཨ་ཨ། དེ་ནས་ཡེ་ཐོག་སངས་རྒྱས་ཀྱིས། །དེ་བཞིན་གཤེགས་པ་ཐམས་ཅད་ཀྱི། །ཐུགས་ཀྱི་ཡང་སྙིང་དགོངས་པའི་བཅུད། །སངས་རྒྱས་ཀུན་གྱི་དགོངས་འདུས་བཤད། །འོད་གསལ་ངང་དངས་ཡིད་ལ་ཆོངས། །དངོས་མེད་ཀ་དག་བརྗོད་འདས་ཀྱང་། །བློ་དམན་རྟོགས་པ་སྐྱེ་ཕྱིར་བཤད། །ཆོས་ཉིད་རྣམ་པར་དག་པས་ན། །ཆོས་ཀུན་རང་བཞིན་རྣམ་དག་པ། །དེ་བཞིན་གཤེགས་པ་ཐམས་ཅད་ཀྱི། །ཐུགས་ཀྱི་ཡང་སྙིང་བཅུད་འདུས་འདི། །དགོངས་པའི་མདོ་རྣམས་གཅིག་བསྡུས་པ། །ཡེ་མེད་ཀ་དག་དངོས་མེད་ཀུན་བྱེད་ནི། །སྤྱོད་པ་ཐམས་ཅད་དང་བྲལ་བ། །མཐའ་དང་དབུས་ནི་མི་དམིགས་པ། །སྒྲོ་སྐུར་མེད་པ་བླང་དོར་མེད། །རྒྱུ་འབྲས་ལས་འདས་པ། ཡེ་ནས་དག་པ། ཡེ་ནས་ཟིན་པ། བྱ་བ་མེད་པ། བཙལ་པ་མེད་པ།བསྒྲུབ་པ་མེད་པ། བཙལ་དུ་མེད་པ། གཞན་ནས་མི་འབྱུང་བ། གཉེན་པོ་མེད་པ། བྱེད་པ་པོ་མེད་པ། མ་བྱས་པ། མ་བརྟགས་པ། བདག་མེད་པ། མ་བཅོས་པ། དེ་ཡིན་པ། ངེས་པ། མ་ནོར་བ། ཇི་བཞིན་པ། མ་འགགས་པ། མ་སྐྱེས་པ། མི་ནུབ་པ། མ་ལྷགས་པ། མི་སྣང་བ། མ་བྱུང་བ། །མི་འགྲོ་བ། ཡེ་ནས་གནས་པ། ཀུན་ལ་ཁྱབ་པ། མིང་མེད་པ། གཟུགས་མེད་པ། མཚན་མ་མེད་པ། ཐ་སྙད་མེད་པ། བལྟར་མེད་པ།གཟུང་དུ་མེད པ། མཚོན་དུ་མེད་པ། དཔེ་མེད་པ། ཚད་མེད་པ། བརྟག་ཏུ་མེད་པ། རྟོག་གེ་ལས་འདས་པ། དཔག་ཏུ་མེད་པ། བསམ་དུ་མེད་པ། བསམ་གྱིས་མི་ཁྱབ་པ། ཀུན་གྱི་འབྱུང་གནས། ཐམས་ཅད་ནས་ཐམས་ཅད་དུ་བཏང་སྙོམས་ཆེན་པོའོ། །སྟོང་པ་ཉིད་ལས་རིག་པར་ཤར། །རང་བྱུང་ངང་དངས་བྱུང་སར་ཐིམ། །སྐྱེ་མེད་ཀ་དག་བློ་ལས་འདས། །དངོས་མེད་ཀ་དག་ཟང་ཀ་ཡེ་དག་རྣལ་མ་ཤེས། །སྙིང་པོ་ཡང་སྙིང་བཅུད་འདུས་དེ་ཁོ་ནའོ། །ཡེ་ཐོག་ཀ་དག་གི་སངས་རྒྱས་ཀྱི་ཐུགས་ཀྱི་ཡང་སྙིང་དགོངས་པའི་བཅུད་བསྡུས་པའི་དཔེ་ནི། ཤེལ་གོང་། གསེར་དང་། ནམ་མཁའ། ཉི་ཟླ། ནོར་བུ། ཆུ་ཤིང་། རྒྱ་མཚོའི་ཚུལ། ཀ་དག་འགྱུར་མེད་ཕྱོགས་དང་བྲལ། །འོད་གསལ་ཀུན་ཁྱབ་དངོས་མེད་གཡོ་རྩོལ་མེད། །ཅེས་གསུངས་སོ། །རི་བོ་བརྩེགས་པའི་རྒྱུད་ལས། ཡེ་ཐོག་ཀ་དག་སངས་རྒྱས་ཀྱི་དགོངས་པའི་བཅུད་བསྡུས་བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་འོད་གསལ་ངང་དངས་ཀྱིས། །ཡེ་ཐོག་ཀ་དག་སངས་རྒྱས་ལ། །དུས་གསུམ་སངས་རྒྱས་ཐམས་ཅད་ཀྱི། །ཐུགས་ཀྱི་ཡང་སྙིང་གསལ་བའི་བཅུད་འདུས་གསུང་དུ་གསོལ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །དམ་པ་དང་པོའི་སངས་རྒྱས་འོད་མི་འགྱུར་བས་གསུངས་པ། ཆོས་ཀུན་རང་བཞིན་མེད་པ་ཉིད། །མྱ་ངན་འདས་ཤེས་དེ་ལ་བྱ། །སྟོང་ཉིད་རང་བཞིན་རྣམ་པར་དག །དེ་ཉིད་མི་གནས་བློ་ལས་འདས། །ཞེས་གསུངས་སོ། །དེ་ནས་རང་བྱུང་ངང་དངས་ཀྱིས། །འདི་སྐད་གསུངས་སོ། །སེམས་ཅན་གྱིས་སངས་རྒྱས་རྣམས་ཀྱི་གསལ་བའི་ཡང་སྙིང་བཅུད་འདུས། ཡེ་མེད་གདོད་ནས་ཀ་དག་ཟང་ཀ་རྣལ་མ་བློ་འདས་དེ་མཐོང་ན། །ཡེ་ཇི་བཞིན་པའི་ངོ་བོ་ཀ་དག་ཟང་ཀ་མཐོང་བ་ཡིན་ནོ། །མཐོང་མེད་དངོས་བྲལ་དམིགས་མེད་དེ་ནི་མཐོང་བ་ཡིན་ནོ། །དེ་ལ་ནི་ཆོས་རྡུལ་ཙམ་ཡང་མི་དམིགས་སོ། །དེ་ནི་ནམ་མཁའི་མཚན་ཉིད་དེ། དེ་ལ་ནི་བྱང་ཆུབ་པར་བྱ་བ་ཡང་མེད་ལ་གྲུབ་པར་བྱ་བ་ཡང་མེད། དེ་ལ་སེམས་ཅན་དུ་གདགས་པ་ཡང་མེད་དོ། །ཆོས་ཅན་ཡང་མེད་ལ། ཆོས་ཅན་དུ་གདགས་པ་ཡང་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ཀ་ནས་དག་པའི་བྱང་ཆུབ་སེམས་ཏེ། ནམ་མཁའ་ནི་མཚན་ཉིད་ཐམས་ཅད་དང་བྲལ་བའོ། །དེའི་ཕྱིར་ན་བྱང་ཆུབ་ནི། ཡེ་མེད་ཀ་དག་བློ་འདས་ལས་བཙལ་བར་བྱའོ། །ཀ་དག་དངོས་མེད་ཟང་ཀ་དེ། །རང་བཞིན་གྱིས་ཡོངས་སུ་དག་པའི་ཕྱིར། །དངོས་པོ་མེད་ཅིང་བློའི་བྱེད་པ་པོ་ལས་འདས་པས། ནང་ན་ཡང་མེད། ཕྱི་རོལ་ན་ཡང་མེད། གཉིས་ཀ་མེད་པར་ཡང་མི་དམིགས་སོ། །དེ་ལ་སངས་རྒྱས་ཀྱིས་མ་གཟིགས་མི་གཟིགས་གཟིགས་པར་མི་འགྱུར་རོ། །ཇི་ལྟར་མ་གཟིགས་ན། ཁ་དོག་དབྱིབས་དང་མུན་པར་མ་གཟིགས་སོ། །ཕོ་མོ་མ་ནིང་ཁམས་གསུམ་ཇི་ལྟ་བུར་ཡང་མ་གཟིགས་སོ། །ཀ་དག་དངོས་མེད་བློ་འདས་ནི། །མིང་དུ་བཏགས་པ་ཡང་མེད་དོ། །མིང་དུ་བཏགས་པ་ཐམས་ཅད་ནི་བླ་དགས་སུ་རིག་པར་བྱའོ། །དེའི་ཕྱིར་ན་སངས་རྒྱས་ནི་བླ་དགས་སོ། །ཆོས་ནི་བླ་དགས་སོ། །དགེ་འདུན་ཡང་བླ་དགས་སོ། །དེ་བཞིན་དུ་དབྱིངས་དང་ཡེ་ཤེས་དང་། ཆོས་ཀྱི་སྐུ་དང་། སྐུ་ཐ་དད་པ་དང་། སེམས་ཅན་དུ་འཇིག་རྟེན་ལ་སོགས་པ་ཐམས་ཅད་དུ་བཏགས་ཤིང་ཆགས་པ་ཇི་སྙེད་པ་བླ་དགས་འབའ་ཞིག་ཏུ་རིག་པར་བྱའོ། །བླ་དགས་གང་ཡིན་པ་དེ་ནི་གློ་བུར་དུ་མིང་དུ་བཏགས་པ་སྟེ། ཡེ་ནས་ལྡན་པ་མ་ཡིན་ནོ། །གལ་ཏེ་ཡེ་ནས་ལྡན་པ་ཞིག་ཡིན་ན་ནི། གང་གློ་བུར་བ་ཐམས་ཅད་ཕྱིས་མི་འབྱུང་བར་འགྱུར་རོ། །གང་ལ་མིང་བཏགས་གཞི་མེད། རྒྱུ་བཏགས་ཆགས་པ་གྲུབ་པ་ཡིན། དེ་ནི་བྱར་མེད་བྱས་སོ་ཡིན། །མི་སྣང་བ་ལ་ཀུན་སྣང་བ། །ཐམས་ཅད་ཐམས་ཅད་གློ་བུར་སྣང་། །སྣང་ཉིད་མེད་པའི་སྙིང་པོ་དེ། །ཡོད་མེད་གཉིས་སུ་དམིགས་པ་མེད། །སངས་རྒྱས་མེད་ལ་སངས་རྒྱས་དང་། །བྱང་ཆུབ་ཉིད་ལ་སོགས་པ་ཡི། །ཐ་སྙད་མིང་གི་བླ་དགས་རྣམས། །མི་ཤེས་བློ་ལ་བསྟན་ཕྱིར་བཏགས་། །དེ་ལ་དངོས་གཞི་ག་ལ་ཡོད། །ཐམས་ཅད་ནས་ཐམས་ཅད་དུ་བླ་དགས་ཀྱི་མཚན་མ་མེད་དོ། །རྣམ་པ་མེད་དོ། །ཡུལ་མེད་དོ། །འཇུག་པ་མེད་དོ། །སངས་པ་མེད་དོ། །ལུང་བསྟན་པ་མེད་དོ། །ངེས་པར་རྙེད་པ་མེད་དོ། །ཡེ་མེད་ཀ་དག་ཡེ་གསལ་རྣལ་མ་བློ་འདས་ཏེ། །ཐམས་ཅད་ནས་ཐམས་ཅད་དུ་བྱང་ཆུབ་པ་ཉིད་དོ། །སྟོང་པ་ཉིད་དོ། །དེ་ཁོ་ན་ཉིད་དོ། །ངེས་པ་དམ་པ་ཉིད་དོ། །གཞན་མ་ཡིན་པ་ཉིད་དོ། །སྐྱེ་བ་མེད་པ་ཉིད་དོ། །འགག་པ་མེད་པ་ཉིད་དོ། །དེ་བཞིན་ཉིད་དོ། །མ་ནོར་བ་དེ་བཞིན་ཉིད་དོ། །ཆོས་ཉིད་དོ། །ཆོས་ཀྱི་དབྱིངས་ཉིད་དོ། །བསམ་གྱིས་མི་ཁྱབ་པ་བསམ་དུ་མེད་པ་ཉིད་དོ། །དེ་དག་ཐམས་ཅད་ཀྱང་དངོས་པོ་ཀ་དག་བློ་འདས་ཉིད་དོ། །ཀ་ནས་དག་པ་ཟང་ཀ་དེ་ལ། གཅིག་དང་། མང་པོ་དང་། གཅིག་མང་པོར་སྣང་བ་དང་། མང་པོ་གཅིག་ཏུ་འགྱུར་བ་དེ་ལ་ནི། གཅིག་ཅེས་བྱ་བ་བློ་ལས་འདས་པའོ། །ཐ་དད་ཞེས་པ་གཉིས་སྣང་ལས་གྲོལ་བའོ། །ཞེས་གསུངས་སོ། །དེ་ནས་སངས་རྒྱས་ཀུན་ཏུ་བཟང་པོས། ཐུགས་ཀྱི་ཡང་སྙིང་བཀའ་སྩལ་པ། རང་བཞིན་གཅིག་པ་དང་། མ་གོས་པ་དང་། གོ་འབྱེད་པ་དང་། སྐྱེ་བ་མེད་པ་དང་། འཇིག་པ་མེད་པ་དང་། དབྱིབས་མེད་པ་དང་། ཁ་དོག་མེད་པ་དང་། འདུས་མ་བྱས་པ་དང་། གཟུང་བ་མེད་པ་དང་། འཛིན་པ་མེད་པ་དང་། མཐའ་དང་དབུས་མེད་པ་དང་། འཕེལ་བ་དང་འགྲིབ་པ་མེད་པ་དང་། འགྲོ་བ་དང་འོང་བ་མེད་པ་དང་། གཡོ་བ་དང་འགུལ་བ་མེད་པ་དང་། ཆགས་པ་དང་གནས་པ་མེད་པ་དང་། འཇིག་པ་དང་སྟོངས་པ་མེད་པ་དང་། འགྱུར་བ་དང་མ་ཁྱབ་པ་མེད་པ་དང་། མི་འབྱུང་བ་དང་མ་ཆུབ་པ་མེད་པ་དང་། སྐྱོ་བ་དང་དུབ་པ་མེད་པ་དང་། མཚན་ཉིད་དང་རྒྱུ་རྐྱེན་མེད་པ་དང་། འབྲས་བུ་དང་རྩོལ་བ་མེད་པ་དང་། མངོན་པར་འདུ་བྱེད་པ་མ་ཡིན་ནོ། །དཔེར་ན་ནམ་མཁའ་དང་འདྲའོ། །ནམ་མཁའ་དེ་ནི་ཡོད་པ་ལས་མེད་པར་འགྱུར་བ་མ་ཡིན། མེད་པ་ལས་ཡོད་པར་འགྱུར་བ་མ་ཡིན། །དེ་བཞིན་དུ་གསལ་བ་ལས་མི་གསལ་བར་འགྱུར་བའམ། མི་གསལ་བ་ལས་གསལ་བར་འགྱུར་བའམ། ཐ་དད་པ་ལས་གཅིག་ཏུ་འགྱུར་བ་དང་། ཡིན་པ་ལས་མིན་པར་འགྱུར་བ་དང་། མིན་པ་ལས་ཡིན་པར་འགྱུར་བ་དང་། ཉེ་བ་དང་རིང་བ་དང་། དེ་བཞིན་དུ་ཆེ་ཆུང་བཟང་ངན་བདེ་སྡུག་དང་། ཁྱབ་དང་མ་ཁྱབ་དང་། བྱུང་དང་མ་བྱུང་དང་། དག་དང་མ་དག་དང་། གྲུབ་དང་མ་གྲུབ་དང་། མཐོང་དང་མ་མཐོང་དང་། ཡངས་དང་དོག་དང་། དབྱིབས་དང་ཁ་དོག་དང་། ཕྱི་དང་ནང་དང་། སྐྱེ་བ་དང་འགགས་པ་དང་། འཕོ་དང་མི་འཕོ་དང་། འགྱུར་དང་མི་འགྱུར་དང་། མུན་པ་དང་སྣང་བ་དང་། སྔོན་དང་ཕྱི་མ་དང་། མཐའ་དང་དབུས་དང་། གོང་མ་དེ་དག་ཐམས་ཅད་ཀྱང་། བདག་དང་གཞན་དུ་གྱུར་པ་དང་། དེ་བཞིན་དུ་བླངས་ནས་དོར་བར་གྱུར་པ་དང་།དོར་བ་ལས་བླང་བར་གྱུར་བ་མེད་པའི་ཕྱིར། ནམ་མཁའ་ནི་ཐམས་ཅད་དུ་མ་བཅོས་པའོ། །དེ་བཞིན་དུ་དངོས་མེད་ཀ་དག་རྣལ་མ་ལ། དུས་ཐམས་ཅད་དུ་མ་བཅོས་མ་བསླད་པའོ། །མི་རྩོལ་མི་སེམས། བློ་བཅོས་ཞེ་འདོད་དང་རྩིས་གདབ་མེད་པར་གནས་སོ། །རྒྱལ་བ་ཀུན་ཏུ་བཟང་པོས་དེ་བཞིན་གཤེགས་པ་དུས་གསུམ་གྱི་སངས་རྒྱས་ཐམས་ཅད་ཀྱི་ཡང་སྙིང་དགོངས་པའི་བཅུད་བསྡུས་ནས་གསུངས་སོ། །དེ་ནས་དཔལ་རྡོ་རྗེ་སེམས་དཔས་ཐུགས་དགོངས་ཀྱི་བཅུད་བསྡུས་ནས་གསུངས་པ། བསམ་གྱིས་མི་ཁྱབ་ཆོས་འདི་རྣམས། དེ་བཞིན་ཉིད་དུ་གཅིག་པས་ན། །གང་གིས་དེ་བཞིན་དེ་ཤེས་ན། །ཀུན་ལ་དབང་བསྐུར་ཐོབ་པ་ཡིན། །རྡོ་རྗེ་སེམས་དཔས་གསུངས་སོ། །སངས་རྒྱས་ཀུན་གྱ་དགོངས་པའ་བཅུད། །སེམས་ལྷག་ཅན་གྱས་བཀའ་སྩལ་པ། ཀ་དག་རྣལ་མ་རང་དངས་པས། །འ ་ཞེས་ཚིག་ཏུ་མ་གསུངས་པ། ཁྱབ་པས་ག ག་པའ་བྱན་རླབས་ཀྱིས། །ཇི་ལྟར་འདོད་པས་སོ་སོར་འཇལ། །ཞེས་གསུངས་སོ། །དེ་ནས་སེམས་དཔའ་རྡོ་རྗེ་ཡིས། །དུས་གསུམ་བདེ་གཤེགས་ཐུགས་ཀྱི་བཅུད། །དགོངས་པའི་བཅུད་འདུས་བཀའ་སྩལ་པ། །བསམ་གྱིས་མི་ཁྱབ་ཀུན་ཤེས་ན། །བསམ་དུ་མེད་པར་དེ་བཞག་ལ། །དཔག་ཏུ་མེད་པའི་ཡོན་ཏན་འབྱུང་། །རྣམ་པ་ཐམས་ཅད་མཁྱེན་པ་ཡིན། །ཞེས་གསུངས་སོ། །དེ་ནས་འོད་གསལ་རྣམ་དག་གིས། །སངས་རྒྱས་ཀུན་གྱི་ཐུགས་ཀྱི་བཅུད། ཀུན་གྱི་རྩ་བ་འདིར་བཅད་པས། །འདི་དོན་གང་རིག་ཐོས་པའི་མཆོག །ཐམས་ཅད་འདི་ལས་འབྱུང་བས་ན། །འདི་ཤེས་ཀུན་ཤེས་ཤེས་རབ་མཆོག །ཅེས་གསུངས་སོ། །དེ་ནས་གསལ་དག་ངང་དངས་ཁྱེའུ་ཆུང་གིས། །སངས་རྒྱས་ཀུན་གྱི་ཐུགས་དགོངས་པ། །གསང་བའི་ནང་ནས་གསང་ཆེན་འདི། །ཉིད་ཀྱིས་ཉིད་ཀྱང་མི་མཐོང་བར། །གཞན་གྱིས་ཀ་དག་ག་ལ་མཐོང་། །ཞེས་གསུངས་སོ། །དེ་ནས་ངང་དངས་ཁྱེའུ་ཆུང་གིས། །སངས་རྒྱས་ཀུན་གྱི་བཅུད་གསུངས་པ། །ཆོས་རྣམས་ཀུན་གྱི་སྙིང་པོ་འདི། །གསེར་དང་མཁའ་བཞིནམི་འགྱུར་བས། །མི་ནུབ་སྟོར་བྲལ་མེད་པའི་ཕྱིར། །ཆོས་ཀྱི་དམ་པ་ཆེན་པོ་མཆོག །ཅེས་གསུངས་སོ། །དེ་ནས་ངང་དངས་རིན་ཆེན་གྱིས། །སངས་རྒྱས་ཐུགས་ཀྱི་བཅུད་ཕྱུང་བ། །མི་འགྱུར་ནམ་མཁའི་རང་བཞིན་ཏེ། །དག་པ་དག་ལ་དག་པ་ཉིད། །རྟོགས་པ་རྟོགས་པས་རྟོགས་པར་སྣང་། །སྤྱི་ལུས་དེར་སྣང་ཅི་ཡང་མེད། །ཅེས་གསུངས་སོ། །དྲི་མེད་རྣམ་དག་དགོངས་གསུངས་པ། །རང་བཞིན་ཀ་དག་མ་བཅོས་པས། །ཡོངས་ཀྱི་འོད་ལ་དེ་བཞིན་ཉིད། །ཀུན་གྱི་སྙིང་པོ་དེ་ཉིད་པས། །ཅིས་ཀྱང་མ་བསྒྲིབས་ནམ་མཁའ་ཆེ། །ཞེས་གསུངས་སོ། །ཞེན་མེད་ངང་དངས་བཅུད་གསུངས་པ། །སྟོང་པ་ཉིད་ཀྱི་སྙིང་པོ་ལ། །སྣ་ཚོགས་སྣང་བའི་འཁོར་གྱིས་བསྐོར། །སུས་ཀྱང་མ་བྱས་རང་བྱུང་ལ། །ཀ་དག་ཇི་བཞིན་དཀྱིལ་འཁོར་ཉིད། །ཅེས་གསུངས་སོ། །དེ་ནས་རིག་པའི་ཁྱེའུ་ཆུང་གིས། །སངས་རྒྱས་གསང་བའི་ཡང་སྙིང་གསུངས། །དངོས་མེད་ཀ་དག་མངོན་གྱུར་ན། །མེད་པ་མི་ཟད་འབྱུང་བ་ཡི། །ཆེ་བའི་ཡོན་ཏན་རྒྱུན་མི་འཆད། །ཅིར་སྣང་ཀུན་འབྱུང་རིན་ཆེན་གཏེར། །ཞེས་གསུངས་སོ། །ངང་དངས་ཀུན་གྲོལ་དགོངས་གསུངས་པ། །སངས་རྒྱས་ཀུན་གྱི་དགོངས་པ་འདི། ཤེས་ནས་དེ་ལ་གང་གནས་པ། །ཀ་དག་ཉིད་ལ་དབང་ཐོབ་པའོ དེ་བཞིནདགོངསཔའི་རིགས་འཛིན་ཉིད། །ཅེས་གསུངས་སོ། །དེ་ནས་ཀུན་རིག་འབྲུལ་རྗེ་ཡིས་། །སངས་རྒྱས་དགོངས་པའི་བཅུད་གསུངས་པ། །ཀ་དག་དངོས་མེད་ཟང་ཀ་མ། །གཞི་རྩ་མེད་པའི་སྐད་ཅིག་མ། །དེ་ཉིད་རིག་ན་བདེ་ཆེན་ཐོབ། །ཅེས་གསུངས་སོ། །ཡང་རིག་པའི་རྒྱལ་པོས་གསུངས་པ། །ཀ་དག་རྣལ་མ་དེ་ཉིད་ནི། །དཔག་ཅིང་གཞལ་བར་མཐའ་ཡས་པས། །དཔག་མེད་རྒྱལ་པོའི་ཕོ་བྲང་ཡིན། །དེས་ན་ཀུན་བཀོད་ཀུན་ཀྱང་དེར་གཅིག་གནས། །ཞེས་གསུངས་སོ། །ཡང་དངོས་མེད་ཀུན་བྱེད་དགོངས་པའི་བཅུད་གསུངས་པ། །ཡེ་ནས་ཀ་དག་མ་བཅོས་ཇི་བཞིན་པ། །ཆོས་སོ་ཅོག་གི་སྙིང་པོ་སྟེ། །མེད་པ་ལས་བྱུང་སྣ་ཚོགས་སྣང་། །སྣང་མེད་དེ་བཞིན་དཀྱིལ་འཁོར་རྫོགས། །ཞེས་གསུངས་སོ། །དེ་ནས་ཅང་མེད་ཅིར་སྣང་གཅོད་ཀྱིས་དགོངས་འདུས་གསུངས་པ། དེ་བཞིན་ཉིད་དུ་དོན་བསྟན་དུ། །དེ་བཞིན་ཉིད་དུ་ཀུན་གཅིག་པས། །གང་གིས་གང་ལ་གང་གིས་བསྟན། །ཉིད་ལ་ཉིད་གླེང་ཁོ་ནར་ཟད་དོ། །ཞེས་གསུངས་སོ། སེམས་ཉིད་ཀུན་བྱེད་རྒྱལ་པོས་དགོངས་པའི་བཅུད་གསུངས་པ། ཇི་སྙེད་བསམ་གྱིས་མི་ཁྱབ་པའི། །ཆོས་ཀུན་ཀ་དག་སྟོང་རིག་ན། །སངས་རྒྱས་ཀུན་དང་མཉམ་སྦྱོར་བས། །རྣལ་འབྱོར་ཆེན་པོའི་བསམ་གཏན་ཡིན། ཞེས་གསུངས་སོ། །གསལ་དངས་སྤྲོས་གཅོད་ཀྱིས་གསུངས་པ། །ཀ་དག་སྨྲ་བརྗོད་མེད་པ་ལས། །དེ་མཚོན་ཕྱིར་ན་ཐ་སྙད་བརྗོད། །གང་བརྗོད་པ་ཉིད་དངོས་མེད་ཉིད། །དེ་ཉིད་སྤྲོས་མེད་བློ་འདས་དོན། །ཞེས་གསུངས་སོ། །དེ་ནས་རང་བྱུང་རང་རིག་གིས་གསུངས་པ། །དངོས་མེད་ཀུན་སྣང་ཀུན་གྱི་གཞི། །སེམས་ཅན་སངས་རྒྱས་གཉིས་ཀྱི་དབྱིངས། །རིག་དང་མ་རིག་གཉིས་ཁོ་ན། །དག་དང་མ་དག་གཉིས་སུ་སྣང་། །ཞེས་གསུངས་སོ། །དེ་ནས་རང་དངས་རིན་ཆེན་གྱིས་གསུངས་པ། །བསམ་གྱིས་མི་ཁྱབ་མི་ཤེས་པར། །བསམ་མེད་ངང་དུ་གང་འཇོག་པ། །བྱིས་པ་དེ་ནི་བླུན་པ་ཡིན། །མུན་པའི་སྐྱེ་མཆེད་ཉིད་དུ་འགྱུར། །ཞེས་གོལ་བར་གསུངས་སོ། །དེ་ནས་འཛིན་མེད་ཀུན་གསལ་གྱིས་གསུངས་པ། །བསམ་མེད་བསམ་གྱིས་མི་ཁྱབ་ཆོས། །ལྷག་པར་མཐོང་ན་གཞི་གནས་པ། །རྣམ་རྟོག་སྤང་ལེན་གང་བྱེད་པ། །དེ་དག་སྒྲིབ་པ་མུ་མཐའ་ཡས། །ཞེས་གསུངས་སོ། །དངོས་མེད་ཟང་ཐལ་གྱིས་དགོངས་པའི་བཅུད་གསུངས་པ། དངོས་མེད་ཀུན་གྱི་རང་བཞིན་ནི། །མ་སྐྱེས་པ་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཅེས་གསུངས་སོ། །བློ་འདས་ཡེ་མེད་ཀྱིས་གསུངས་པ། །གདོད་དག་ཀུན་སྣང་ཡེ་ཤེས་འདི། །སུས་ཀྱང་མ་བྱས་རང་བྱུང་སྟེ། ཐམས་ཅད་འབྱུང་བའི་རྩ་བ་ནི། །རང་ལས་བྱུང་བའི་དཀྱིལ་འཁོར་རྫོགས། །ཞེས་གསུངས་སོ། གཉིས་སྣང་སྤྲོས་གཅོད་ཀྱིས་གསུངས་པ། །འཁོར་བ་དང་ནི་མྱ་ངན་འདས། །སོ་སོར་སྣང་བ་མ་ཡིན་ཏེ། །གློ་བུར་རྣམ་རྟོག་མཐའ་ཡས་པའི། །ཇི་བཞིན་ཉིད་དེ་རབ་དེས་ན། །དེ་ལ་འཁོར་བའི་རང་བཞིན་མེད། །ཅེས་གསུངས་སོ། །དེ་ནས་གསང་བའི་བདག་པོ་ཡིས། །སངས་རྒྱས་དགོངས་པའི་བཅུད་གསུངས་པ། །ཀ་དག་དེ་ཉིད་ཅིར་ཡང་མི་སྣང་ན། །གློ་བུར་རྣམ་རྟོག་ཐ་དད་པའི། །རྣམ་རྟོག་དེ་ནི་ཟད་པར་སྣང་། །སྣང་བ་ཉིད་ན་སྣང་བ་མེད། །ཅེས་གསུངས་སོ། །མངོན་རྫོགས་རྒྱལ་པོས་ཐུགས་ཀྱི་བཅུད་གསུངས་པ། །དངོས་མེད་ཀ་དག་ཡེ་མེད་ཡེ་ཤེས་དངོས་གྲུབ་པས། །ཟད་པ་མེད་ཅིང་འཕེལ་བ་མེད། །ད་གདོད་བསྒྲུབ་ཏུ་ག་ལ་ཡོད། །ཅེས་གསུངས་སོ། །རང་བྱུང་རྒྱལ་པོས་དགོངས་པའི་བ་་གསུངས་པ། །ཐོག་མ་མེད་ནས་བསགས་པ་ཡི། །རྣམ་རྟོག་སྤྱིན་ཕུང་དཔག་མེད་པ། །སྟོང་ཉིད་སྐད་ཅིག་རིག་པ་ཡིས། །དེ་བཞིན་ཉིད་དུ་རྣམ་པར་གསལ། །ཞེས་གསུངས་སོ། །པདྨ་དྲི་མེད་དགོངས་པའི་བབ་གསུངས་པ། །ཡོད་མཐོང་སྣང་གྲག་ཆོས་སོ་ཅོག །ཐ་དད་སྣ་ཚོགས་མཐའ་ཡས་ཀྱང་། །དངོས་མེད་ཀ་དག་དེ་བཞིན་ཉིད། །མ་བསྒྲིབས་འོད་གསལ་རྣམ་དག་གོ །ཞེས་གསུངས་སོ། །དེ་ནས་སྣ་ཚོགས་ལུབ་ཆུབ་དགོངས་པའི་བ་་གསུངས་པ། །དཔག་ཏུ་མེད་པའི་འཇིག་རྟེན་དུ། །སྒྲོན་མ་བསམ་གྱིས་མི་ཁྱབ་པས། །ཇི་སྙེད་པ་ཡི་ཆོས་བསྟན་པ། །མཐའ་ཡས་དོན་ནི་གཅིག་ཏུ་ཟད། །དངོས་མེད་ཟང་ཀ་ཀ་དག་དགོངས་བབ་དོ། །དེ་བཞིན་གཤེགས་པ་ཐམས་ཅད་ཀྱི། །སངས་རྒྱས་ཀུན་གྱི་ཐུགས་དགོངས་བཅུད། །སྙིང་པོ་ཡང་སྙིང་བཅུད་བསྡུས་པས། །ཐམས་ཅད་ཐམས་ཅད་ཇི་སྙེད་པ། །ཚིག་གི་ཐ་སྙད་ཙམ་དག་ལས། །འདི་ལས་བྱ་བ་ཅི་ཡང་མེད། །དངོས་མེད་ཀ་དག་ཡེ་སངས་རྒྱས། །ཨེ་ཧོ་ཨ་ཨ་སིརྙི་སིརྙི་ཨ་དྷ་ཐིམ། དུས་གསུམ་བདེ་གཤེགས་སངས་རྒྱས་ཀྱང་། །དངོས་མེད་ཀ་དག་ཐ་སྙད་བློ་འདས་ཏེ། །ཀ་དག་ལྷུན་གྲུབ་ཐུགས་དགོངས་བཅུད། །མ་ལུས་དགོངས་འདུས་རི་རབ་ལྷུན་གྲུབ་བརྩེགས། །ཞེས་གསུངས་སོ། །སངས་རྒྱས་ཀུན་གྱི་དགོངས་པའི་བཅུད་འདུས་རི་བོ་བརྩེགས་པའི་རྒྱུད་ལས། སངས་རྒྱས་ཐམས་ཅད་ཀྱི་ཐུགས་ཀྱི་ཡང་སྙིང་དགོངས་པའི་བབ་འདུས་པར་བསྟན་པའི་ལེའུ་སྟེ་བཅུ་གཉིས་པའོ།། །།དེ་ནས་ངང་དངས་ཁྱེའུ་ཆུང་གིས། །ཡེ་ཐོག་ཀ་དག་སངས་རྒྱས་ལ། །རི་བོ་བརྩེགས་པ་དཔེ་ཡིས་ཇི་ལྟར་བསྟན། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །དངོས་མེད་ཀ་དག་དཔེ་ལས་འདས་ན་ཡང་། །དོན་གསལ་འོད་གསལ་དཔེ་ཡིས་མཚོན་ནས་བཤད། །དཔེར་ན་རི་བོ་བརྩེགས་པ་ཡང་། །ལྷུན་པོའི་ངང་ལ་འགྱུར་མེད་བརྩེགས། །གཡོ་རྩོལ་འཕོ་འགྱུར་མེད་པར་གྲུབ། །ཡེ་མེད་གདོད་དག་ཀ་དག་བརྩེགས། །དངོས་མེད་བློ་འདས་བྱར་མེད་བརྩེགས། །སྟོང་གསལ་གདངས་ལ་དངས་སངས་བརྩེགས། །སྙིང་པོའི་ངང་དུ་ཡེ་ཤེས་བརྩེགས། །ཆོས་ཉིད་ཀློང་དུ་རྩལ་ཟེར་བརྩེགས། །ཆོས་སྐུའི་ཀློང་དུ་སྐུ་གསུམ་བརྩེགས། །སྙིང་པོ་སྐྱེ་འགག་གཉིས་མེད་བརྩེགས། །ཀ་དག་བསྟན་པ་མི་འགྱུར་ཏེ། །དངོས་མེད་མ་བཅོས་གསལ་ལ་དངས་པའོ། །ཀ་དག་བློ་འདས་བྱར་མེད་བརྩེགས། །ཡེ་ནས་རྒྱུན་ཆད་མེད་པ་སྟེ། །དེ་ཕྱིར་རི་བོ་བརྩེགས་པའི་རྒྱུད། །ཅེས་གསུངས་སོ། །རི་བོ་བརྩེགས་པའི་རྒྱུད་ལས། །རི་བོ་དཔེར་བསྟན་པའི་ལེའུ་སྟེ་བཅུ་གསུམ་པའོ།། །།དེ་ནས་ངང་དངས་ཁྱེའུ་ཆུང་གིས། །ཡེ་ཐོག་ཀ་དག་སངས་རྒྱས་ལ། །གསང་སྔགས་བརྡའ་ཡིས་ཇི་ལྟར་བཤད། །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །གསང་སྔགས་ལྟ་སྒོམ་བརྡའ་ཡིས་བསྟན། །ངང་དངས་ཁྱེའུ་ཆུང་ཐུགས་ལ་ཆོངས། །ཁྱུང་ཆེན་ནམ་མཁར་ལྡིང་བ་དང་། །རུས་སྦལ་འཁར་གཞོང་བཅུག་པ་དང་། །སྨྱོན་པ་གླང་པོ་ཆུར་ཞུགས་དང་། །རི་རྒྱལ་ལྷུན་པོ་འགྱུར་མེད་དང་། ཁྲེལ་གོང་ནོར་བུ་རིན་ཆེན་གསེར། །བརྡའ་དོན་གནད་འགྲོལ་མན་ངག་འདིས། ཁྲེས་རབ་ཅན་གྱི་བརྡའ་གནད་བཀྲོལ། །ཞེས་གསུངས་སོ། །སེང་གེ་ནམ་མཁའི་འབྲུག་ཐོས་དང་། །རུས་སྦལ་མཁའ་ལ་བསྙེག་པ་དང་། །རལ་གྲི་སྣུམ་གྱིས་ངར་བཏགས་དང་། །གླང་པོས་དམག་གི་ཚོགས་བསྒྱུར་དང་། །བཀྲེས་པ་གཡོས་ལེགས་ཟས་ཟ་དང་། །བཙོ་མ་གཡའ་དང་བྲལ་བ་དང་། །མེ་ལོང་དྲི་མ་བྲལ་བ་དང་། །ཉི་མ་མུན་པ་མེད་པ་དང་། རྒྱ་མཚོ་གཡོ་འགུལ་མེད་པ་དང་། །དུང་ཉིད་ཡེ་དག་དཀར་བ་དང་། །སྒྲོན་མེས་མུན་པ་སེལ་བ་དང་། །ཆུ་བོ་རྒྱུན་ཆད་མེད་པའོ། །ཞེས་གསུངས་སོ། །རི་བོ་བརྩེགས་པའི་རྒྱུད་ལས། གསང་སྔགས་བརྡས་བསྟན་པའི་ལེའུ་སྟེ་བཅུ་བཞི་པའོ།། །།དེ་ནས་ངང་དངས་ཁྱེའུ་ཆུང་གིས། །ཡེ་ཐོག་ཀ་དག་སངས་རྒྱས་ལ། །མ་བསྒྲུབས་འབྲས་བུ་ཇི་ལྟར་འཐོབ། །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཐེག་གཞན་ཞེ་འདོད་ངས་མ་བཤད། །རྩོལ་མེད་ཡེ་ནས་འབྲས་བུ་བསྟན། །ངང་དངས་ཁྱེའུ་ཆུང་ཐུགས་ལ་ཆོངས། །ཡེ་ནས་དག་པ་དངོས་མེད་དེ། །རང་ལ་གདོད་མ་ཉིད་ནས་གནས། །ཀ་དག་བློ་འདས་རྟོགས་པའི་ཐབས། །དེ་ལ་འབྲས་བུ་ཐོབ་ཅེས་བཤད། །ཅེས་གསུངས་སོ། །རི་བོ་བརྩེགས་པའི་རྒྱུད་ལས། འབྲས་བུ་བསྟན་པའི་ལེའུ་སྟེ་བཅོ་ལྔ་པའོ།། །།དེ་ནས་ངང་དངས་ཁྱེའུ་ཆུང་གིས། །ཡེ་ཐོག་ཀ་དག་སངས་རྒྱས་ལ། །ཐེག་དགུའི་ལྟ་སྒོམ་ཇི་ལྟར་ལགས། །ཞེས་ཞུས་པ་དང་། ཡེ་ཐོག་སྟོན་པས་བཀའ་སྩལ་པ། །སྙིང་པོ་ཀ་དག་བལྟར་མེད་ཀྱང་། །བློ་ཁྱད་ཐེག་པའི་ལྟ་སྒོམ་བཤད། །ངང་དངས་ཁྱེའུ་ཆུང་ཐུགས་ལ་ཆོངས། ཉན་ཐོས་པ་ཡི་ལྟ་སྒོམ་ནི། །ཡུལ་རྡུལ་གང་ཟག་བདག་མེད་བལྟ། །འགོག་པའི་སྙོམས་འཇུག་ཚོགས་དྲུག་ཡུལ་བཀག་བསྒོམ། །རང་རྒྱལ་པ་ཡི་ལྟ་སྒོམ་ནི། །རྟེན་འབྲེལ་བཅུ་གཉིས་རྣམ་པར་རིག་བྱེད་བལྟ། །བྱང་ཆུབ་སེམས་དཔའི་ལྟ་སྒོམ་ནི། །བདེན་པ་གཉིས་སུ་བལྟ་ལ་སྟོང་པར་བསྒོམ། །གསང་སྔགས་ཕྱི་རྒྱུད་ལྟ་སྒོམ་ནི། །དག་པ་ཆོས་ཉིད་ཀྲི་ཡའི་ལྷ་དྲུག་བསྒོམ། །ཨུ་པ་ཡ་ཡི་ལྟ་སྒོམ་ནི། །དཔོན་གཡོག་ཚུལ་ལྟར་སུམ་ཅུ་རྩ་བདུན་བསྒོམ། །ཡོ་ག་པ་ཡི་ལྟ་བ་ནི། །སྐྱེ་འགག་གཉིས་མེད་བྱང་ཆུབ་རྣམ་ལྔ་བསྒོམ། །མ་ཧྭ་ཡོ་གའི་ལྟ་སྒོམ་ནི། །སྣང་སྟོང་གཉིས་མེད་ཏིང་འཛིན་རྣམ་གསུམ་བསྒོམ། །ཨ་ནུ་ཡོ་གའི་ལྟ་སྒོམ་ནི། །དབྱིངས་དང་ཡེ་ཤེས་མ་བསྐྱེད་རྫོགས་ཚུལ་བསྒོམ། །ཨ་ཏི་ཡོ་གའི་ལྟ་བསྒོམ་ནི། །སྣང་སྲིད་ཆོས་སྐུ་སྟོང་པ་ཧད་པོར་བསྒོམ། །ཞེས་གསུངས་སོ། །རི་བོ་བརྩེགས་པའི་རྒྱུད་ལས། ཐེག་པའི་ལྟ་སྒོམ་བསྟན་པའི་ལེའུ་སྟེ་བཅུ་དྲུག་པའོ།། །།དེ་ནས་ངང་དངས་ཁྱེའུ་ཆུང་གིས། །ཡེ་ཐོག་ཀ་དག་སངས་རྒྱས་ལ། །དགུ་ལས་སྦྱི་ཏི་གང་གིས་སྤགས། །ཞེས་ཞུས་པ་དང་། །སྟོན་པས་འཁོར་ལ་བཀའ་སྩལ་པ། །དངོས་མེད་ཀ་དག་སྤགས་དང་མ་སྤགས་མེད། །བློ་ཁྱད་དགུ་རྩེའི་སྤྱི་རྗེའི་སྤགས་ཚུལ་ནི། །ཀ་དག་བློ་འདས་ཞེ་འདོད་རྟེན་མེད་ཀྱི། །ཕྱོགས་བྲལ་ལྟ་བ་དགུ་ལས་སྤགས། །ཡིད་སེམས་གཡོ་འགུལ་གང་ལའང་བསམ་བསྒོམ་མེད། །དྲན་སེམས་གང་ལ་མི་སྐྱེ་བསྒོམ་པའི་རྒྱལ་པོ་སྤགས། །གང་ཡང་མ་ཆགས་ཡིད་སྨོན་བློ་ལས་འདས། །ཞེས་གསུངས་སོ། །རི་བོ་བརྩེགས་པའི་རྒྱུད་ལས། དགུ་ལས་སྤྱི་ཏི་འཕགས་པའི་ལེའུ་སྟེ་བཅུ་བདུན་པའོ།། །།དེ་ནས་ངང་དངས་ཁྱེའུ་ཆུང་གིས། །ཡེ་ཐོག་ཀ་དག་སངས་རྒྱས་ལ། །དགུ་རྩེ་རྟོགས་ན་གོལ་སྒྲིབ་ཡོད་དམ་མེད། །ཅེས་ཞུས་པས། སྟོན་པས་འཁོར་ལ་བཀའ་སྩལ་པ། །སྤྱི་རྗེ་བློ་འདས་འདི་རྟོགས་ན། །གོལ་སྒྲིབ་འཁྲུལ་པ་གང་ཡང་མེད། །སྟོང་གསལ་ཀ་དག་གསལ་དག་སྟོང་། །ཡེ་མེད་གདོད་ནས་དངོས་གཞི་མེད། །གོལ་སྒྲིབ་འཁྲུལ་གསུམ་ཀ་ནས་དག །ཅེས་གསུངས་སོ། །སྟོན་པས་འཁོར་ལ་ཡང་གསུངས་པ། །དེ་མ་རྟོགས་ཀྱི་གང་ཟག་ལ། །གོལ་སྒྲིབ་འཁྲུལ་པ་བསམ་མི་ཁྱབ། །ཐེག་པ་རེ་ལ་བཅུ་ཚན་བཅུ། །གོལ་སྒྲིབ་སུམ་བརྒྱ་དྲུག་ཅུ་ཡོད། །མདོར་བསྡུས་རྣམ་པ་གསུམ་དུ་བསྡུས། །གནས་དོན་མ་རྟོགས་སྒྲིབ་པ་ཡིན། །ཀ་དག་མ་རྟོགས་འཁྲུལ་པ་ཡིན། །འོག་མ་འོག་མའི་ལྟ་སྒོམ་གྱིས། །གོང་མ་གོང་མ་བསྒྲིབས་པ་ཡིན། །ཞེས་གསུངས་སོ། །རི་བོ་བརྩེགས་པའི་རྒྱུད་ལས། གོལ་སྒྲིབ་འཁྲུལ་པ་བསྟན་པའི་ལེའུ་སྟེ་བཅོ་བརྒྱད་པའོ།། །།དེ་ནས་ངང་དངས་ཁྱེའུ་ཆུང་གིས། །ཡེ་ཐོག་ཀ་དག་སངས་རྒྱས་ལ། ཁྲེས་མེད་བློ་འདས་གོལ་སྒྲིབ་ལ་ནི་གང་དུ་བཟླ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། ཁེས་མེད་བློ་འདས་རྟོགས་པ་ཡིས། །སྙིང་པོ་མ་བུ་ངོ་འཕྲད་ཞབྲུལ་དུ་མེད། །དངོས་མེད་འོད་གསལ་མུན་སངས་སྒྲིབ་པ་མེད། །འགྲོ་སྒོ་མ་ནོར་གོལ་དུ་མེད། །གོལ་སྒྲིབ་ཞབྲུལ་གསུམ་ལ་བཟླའོ། །ཞེས་གསུངས་སོ། །རི་བོ་བརྩེགས་པའི་རྒྱུད་ལས། གོལ་སྒྲིབ་ཞབྲུལ་པ་ལ་བཟླ་བའི་ལེའུ་སྟེ་བཅུ་དགུ་པའོ།། །།དེ་ནས་ངང་དངས་ཁྱེའུ་ཆུང་གིས། །ཡེ་ཐོག་ཀ་དག་སངས་རྒྱས་ལ། །ལྟ་སྒོམ་ལ་བཟླ་ཇི་ལྟར་ལགས། །ཞེས་ཞུས་པས།སྟོན་པས་འཁོར་ལ་བཀའ་སྩལ་པ། །ལྟ་སྒོམ་སྤྱོད་འབྲས་ལ་བཟླ་ནི། །ཡིན་རྒྱུ་ཡེ་མེད་ཚིག་མེད་བལྟར་མེད་ཞེ་འདོད་མེད། །ལྟ་བའི་རྒྱལ་པོ་རྟེན་མེད་ཕྱལ་པས་ལྟ་བའི་ལ་ཆེན་བཟླ། །མིན་རྒྱུ་ཡེ་མེད་གཡོ་རྩོལ་དྲན་རྟོག་བསམ་དམིགས་མེད། །གཡོ་འགུལ་རྟོག་མེད་བསྒོམ་པའི་ལ་ཆེན་བཟླ། །བྱར་མེད་གང་ཡང་མ་ཆགས་སྤྱོད་པའི་ལ་ཆེན་བཟླ། །དངོས་མེད་གདོད་གྲུབ་ཀ་དག་བློ་འདས་འབྲས་བུའི་ལ་ཆེན་བཟླ། །ལྟ་སྒོམ་སྤྱོད་འབྲས་ལ་ཆེན་བཟླ། །རྟེན་མེད་མི་འགྱུར་རྟོག་དབྱོད་བློ་ལས་འདས། །གཞིར་བསྡུས་དབྱེར་མེད་གཅིག་ཏུ་བཟླ། །གཅིག་ནི་དངོས་མེད་ཀ་དག་གོ །ཞེས་གསུངས་སོ། །རི་བོ་བརྩེགས་པའི་རྒྱུད་ལས། ལྟ་སྒོམ་ལ་བཟླ་བའི་ལེའུ་སྟེ་ཉི་ཤུ་པའོ།། །།དེ་ནས་ངང་དངས་ཁྱེའུ་ཆུང་གིས། །ཡེ་ཐོག་ཀ་དག་སངས་རྒྱས་ལ། །མཚན་དང་གཏད་རྒྱ་ཇི་ལྟར་གཟུང་། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །དུས་གསུམ་དེ་བཞིན་གཤེགས་པས་གཅིག་ཏུ་བསྡུས། །སངས་རྒྱས་ཀུན་གྱི་ཐུགས་དགོངས་ཡང་སྙིང་བཅུད། །བཅུད་འདུས་རི་བོ་བརྩེགས་པ་སྐུ་གསུམ་ལྷུན་གྲུབ་བརྩེགས། །དེ་ཕྱིར་སངས་རྒྱས་ཀུན་གྱི་དགོངས་འདུས་རི་བོ་བརྩེགས་པར་ཟུང་། །ཐེག་པ་དགུ་ལས་ཁྱད་པར་འཕགས་པའི་ཕྱིར། །དགུ་རྩེ་སྤྱི་ཏི་ཡོ་ག་བྱ་བར་ཟུང་། །ལྟ་སྒོམ་སྤྱོད་འབྲས་ཀུན་གྱི་ལ་བཟླའི་ཕྱིར། །ལ་ཟློ་སྤྱི་རྒྱལ་ཀུན་གྱི་རྒྱུད་དུ་ཟུང་། །ཞེས་གསུངས་སོ། །སྟོན་པས་ཡང་གསུངས་པ། །རྒྱུད་འདི་གཏད་པའི་སློབ་མ་སྣོད་ལྡན་ནི། །རི་བོའི་བློ་ལ་ཉི་ཟླའི་སེམས། །རལ་གྲིའི་ཤེས་རབ་དར་དཀར་རྒྱུད། ཁེལ་གོང་དམ་ཚིག་བུ་ཆུང་སྤྱོད། །དེ་ལྡན་འཇིག་རྟེན་འདི་ན་དཀོན། །བླ་མ་གཙུག་ཁུར་དམ་ཚིག་བསྲུང་། ཁེས་རབ་ཆེ་ལ་གཏོང་ཕོད་ཆེ། །ངང་རིང་དགེ་སེམས་མན་ངག་འཆང་། །དེ་ལྟ་བུ་ལ་རྒྱུད་འདི་གཏད། །སྣོད་མེད་རྣམས་ལ་མ་གཏད་ཅིག །ཅེས་གསུངས་སོ། །སངས་རྒྱས་ཀུན་གྱི་དགོངས་པའི་བཅུད་བསྡུས་རི་བོ་བརྩེགས་པའི་རྒྱུད་ལས། མཚན་དང་གཏད་རྒྱ་བསྟན་པའི་ལེའུ་སྟེ་ཉེར་གཅིག་པའོ།། །།སངས་རྒྱས་ཀུན་གྱི་དགོངས་པའི་བཅུད་བསྡུས་རི་བོ་བརྩེགས་པའི་རྒྱུད་རྫོགས་སོ།། །། རྒྱ་གར་སྐད་དུ། ཨ་མ་ལ་ཤུདྷ་ཏནྟྲ་རཏྣ་མཧྭ་པྲ་ཀ་ཊ་ནཱ་མ། བོད་སྐད་དུ། དྲི་མེད་ཀ་དག་གི་རྒྱུད། རིན་པོ་ཆེ་གསལ་བ་ཆེན་པོ་ཞེས་བྱ་བ། བཅོམ་