Ngb-pt-0013-vol-01-text
Front
Body
བྱ། །འོད་གསལ་ཉིད་དུ་སྟོངས་ཀྱིས་འབྱུང་། །ཞེས་གསུངས་སོ། །ཐིག་ལེ་མཐོང་བརྡོལ་གྱི་རྒྱུད། རིག་པ་ཅུར་འབྱིན་གྱི་བརྡའ། སྲོག་གི་ཚན་པ། ཡང་ཏི་ནག་པོའི་རྒྱུད་རྫོགས་སོ།། །།རྒྱ་གར་སྐད་དུ། །ཏནྟྲ་གྲ་རྭ་ཛ་སྨུརླ་ཙནྟྲ་པྲ་དྷ་ཙྭ་ལ་ཨུ་ཀ་ཤཱ་བརྟ་བི་ཤུརྙོ་ས་མུ་དྲུ་བརྟ་པྲ་ཀ་ཊ་ཏནྟྲ་ནཱ་མ། བོད་སྐད་དུ། རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ཅེས་བྱ་བ། སྔོན་ཐོག་མའི་སངས་རྒྱས་སྐྱེ་མེད་ཀ་དག་ལ་ཕྱག་འཚལ་ལོ། །འདི་སྐད་བདག་གིས་ཅི་ཡང་མ་ཐོས་པ་གང་དུ་ཡང་མཚོན་བརྗོད་ལས་འདས་པའི་དུས་མེད་པ་ན། བཀོལ་མེད་གནས་སུ་ཀ་དག་སྟོན་པ་དེས། །འོད་གསལ་འཁོར་ལ་སྐྱེ་མེད་བསྟན་པ་བཤད། །དུས་ནི་དུས་གསུམ་གཅིག་སྟེ་སྔ་ཕྱི་མེད་པའི་དུས། །སྡུད་པ་པོ་ནི་གསལ་དག་རིན་པོ་ཆེའོ། །དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །ཕུན་སུམ་ཚོགས་པའི་དོན་ནི་དེ་ལྟར་ན། །དངོས་པོ་གཤིས་ཀྱི་གནས་ལུགས་ཇི་ལྟར་གནས། །འོད་གསལ་རྩལ་གྱི་ཡན་ལག་ཇི་ལྟར་ཤར། །སྙིང་པོའི་ཀློང་དུ་འོད་གསལ་ཇི་ལྟར་གྲོལ། །དེ་གཉིས་དབྱེར་མེད་གདམས་ངག་ཇི་ལྟར་ལགས། །ཐོད་རྒལ་ཐེག་པ་ཇི་ལྟར་བཤད། །ཉི་ཟླའི་སྙིང་པོ་སྤྱི་ཏི་ཡོ་ག་ལ། །གྲུབ་མཐའི་བློས་བཏགས་ཡོད་དམ་མེད། །རྩིས་གདབ་བློ་བྲལ་བསྟན་པ་ལ། །བྱ་བཙལ་བློ་ཆོས་མི་འཚལ་ལམ། །རྩོལ་སྒྲུབ་འདས་པའི་ཐེག་པ་ལ། །ལྟ་སྒོམ་སྤྱོད་འབྲས་དགོས་མི་དགོས། །ཐེག་དགུ་སྤང་ངམ་ཇི་ལྟ་བགྱི། །དཀྱིལ་འཁོར་དབང་དང་དངོས་གྲུབ་ལ། །རེ་བར་བྱ་བའམ་ཡེ་ནས་རྫོགས། །ཚོགས་དང་གཏོར་མ་མ་བཏང་བར། །ཚོགས་བསགས་སྨོན་ལམ་ཇི་ལྟར་རྫོགས། །ཉི་ཟླའི་སྙིང་པོ་སྤྱི་ཏི་ཡོ་ག་ལ། །གོལ་སྒྲིབ་འཁྲུལ་པ་ཡོད་དམ་མེད། །མ་རིག་ཡེ་ཤེས་ཡོད་དམ་མེད། །འཆར་སྒོ་འཁྲུལ་པ་ཅི་ལ་ཟེར། །རྟོགས་དང་མ་རྟོགས་ཡོད་དམ་མེད། །སངས་རྒྱས་སེམས་ཅན་ཅི་ལ་ཟེར། །དགེ་སྡིག་ལས་འཕྲོ་ཡོད་དམ་མེད། །མཐོ་རིས་ངན་སོང་ཅི་ལ་ཟེར། །རྫོགས་ཆེན་སྤྱི་ཏི་ཡོ་ག་ཡིས། །མ་བསྒྲུབས་འབྲས་བུ་ཇི་ལྟར་ཐོབ། །ཞུས་ཚིག་ཉི་ཤུ་རྩ་གཅིག་དེ། །སྟོན་པས་འཁོར་ལ་བཀའ་སྩོལ་ཅིག །ཤིན་ཏུ་ཟབ་པར་གསུང་དུ་གསོལ། །ཞེས་ཞུས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། ཕུན་སུམ་ཚོགས་པ་དང་ཞུས་ཚིག་ཉི་ཤུ་རྩ་གཅིག་གི་གླེང་སློང་བསྟན་པའི་ལེའུ་སྟེ་དང་པོའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །དངོས་པོ་གཤིས་ཀྱི་གནས་ལུགས་ཇི་ལྟར་གནས། །ཞུས་པས། སྟོན་པའི་རྒྱལ་པོ་སྐྱེ་མེད་ཀ་དག་གིས། །འཁོར་གྱི་དམ་པ་གསལ་དག་རིན་ཆེན་ལ། །རྫོགས་ཆེན་རྒྱལ་པོ་ཉི་ཟླའི་སྙིང་པོ་བཤད། །འཁོར་རྣམས་མ་ཡེངས་གུས་པས་ཉོན། །དོན་དམ་མཚོན་དང་བརྗོད་ལས་འདས་མོད་ཀྱང་། །རྩལ་གྱི་རིག་པ་བློ་དང་སྦྱར་ནས་བསྟན། །དཔེར་ན་མུན་ནག་རྫས་སྟོར་ལ། །ལག་ནོམ་རྩལ་བའི་རྙེད་པར་དཀའ། །སྣང་གསལ་སྒྲོན་མེ་ལ་བརྟེན་ནས། །བཙལ་བས་རྙེད་པར་ཐེ་ཚོམ་མེད། །དེ་བཞིན་མ་རིག་མུན་ནག་ཏུ། །ཆོས་ཉིད་ནོར་བུ་སྟོར་བ་དེ། །ཐ་སྙད་ཚིག་གི་རྙེད་པར་དཀའ། །མ་ནོར་བླ་མའི་ཞལ་དྲན་གྱིས། །རིན་ཆེན་བརྡ་ཡིས་རྙེད་པར་འགྱུར། །ཨ་ལ་ལ་ཧོ་ངོ་མཚར་ཆེ་བའི་བཀའ། །དངོས་པོ་གཤིས་ཀྱི་གནས་ལུགས་ནི། །གཏི་མུག་ཆོས་སྐུར་ཡེ་ནས་གནས། །ཞེ་སྡང་ལོངས་སྐུར་ཡེ་ནས་གནས། །འདོད་ཆགས་སྤྲུལ་པའི་སྐུ་རུ་གནས། །ང་རྒྱལ་སྐུ་གསུམ་དབྱེར་མེད་ཡིན། །ཕྲག་དོག་དོན་དམ་བདེ་བའི་སྐུ། །སྡུག་བསྔལ་མ་སྤངས་སྐུ་ལྔར་གྲོལ། །དུག་གསུམ་མ་སྤངས་སྐུ་གསུང་ཐུགས་སུ་གྲོལ། །མ་རིག་མ་སྤངས་ཡེ་ཤེས་ཆེན་པོར་གྲོལ། །སྒྲིབ་གཡོགས་མ་སྤངས་འོད་གསལ་ཆེན་པོར་གྲོལ། །རྣམ་རྟོག་མ་སྤངས་ཆོས་ཉིད་ཆེན་པོར་གྲོལ། །སེམས་ཅན་མ་སྤངས་སངས་རྒྱས་བསྒྲུབ་མེད་ཆེན་པོར་གྲོལ། །འཁོར་བ་མ་སྤངས་མྱང་འདས་ཆེན་པོར་གྲོལ། །སྣང་བ་མ་སྤངས་ཞིང་ཁམས་ཆེན་པོར་གྲོལ། །སྡུག་བསྔལ་མ་སྤངས་བདེ་བ་ཆེན་པོར་གྲོལ། །ཕྱི་ནང་མ་སྤངས་ཡུལ་སེམས་གཉིས་མེད་གྲོལ། །བཟང་ངན་མ་སྤངས་དགག་སྒྲུབ་མེད་པར་གྲོལ། །གཟུང་འཛིན་མ་སྤངས་དབྱེ་བསལ་མེད་པར་གྲོལ། །དངོས་པོ་གཤིས་ཀྱི་གནས་ལུགས་ནི། །ཡེ་ནས་སྐྱེ་མེད་ཆེན་པོར་གནས། །དུས་གསུམ་སྐྱེ་བར་མ་གསུངས་སོ། །ཀ་དག་ཆེན་པོར་ཡེ་ནས་གནས། །བློ་བུར་སྒྲིབ་གཡོགས་མ་གསུངས་སོ། །གཉིས་མེད་ཆེན་པོར་ཡེ་ནས་གནས། །གཉིས་འཛིན་རྟོག་པར་མ་གསུངས་སོ། །རྒྱུ་རྐྱེན་མེད་པར་ཡེ་ནས་གནས། །ཐོག་མཐའ་ཡོད་པར་མ་གསུངས་སོ། །གཉེན་པོས་བཅོས་བསྒྱུར་མེད་པར་གནས། །རྩོལ་བས་འགྲུབ་པར་མ་གསུངས་སོ། །དངོས་མེད་ཆེན་པོར་ཡེ་ནས་གྲོལ། །ཟང་ཐལ་ཆེན་པོར་ཡེ་ནས་གྲོལ། །སྤྱི་ཕུད་ཐོད་རྒལ་ཆེན་པོར་གནས། །ཞེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་ཀྱི་རྒྱུད་ལས། དངོས་པོ་གཤིས་ཀྱི་གནས་ལུགས་བསྟན་པའི་ལེའུ་སྟེ་གཉིས་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །འོད་གསལ་རྩལ་གྱི་ཡན་ལག་ཇི་ལྟར་ཤར། །ཞུས་པས། སྟོན་པས་འཁོར་ལ་བཀའ་སྩལ་པ། །དངོས་པོ་གཤིས་ཀྱི་རྩ་ཟེར་གཉིས་མེད་ཀྱང་། །འཁོར་གྱི་རྟོག་པ་བསལ་ཕྱིར་ཤར་ཚུལ་བཤད། །མཁའ་ཀློང་རྣམ་དག་གནས་ལུགས་ཀློང་དཀྱིལ་ནས། །མ་འགགས་འོད་གསལ་རྩལ་རྣམ་ཤར། །གཞི་རླུང་ང་ཡི་རྩལ་དུ་ཤར། །འོད་གསལ་ང་ཡི་རོལ་པའི་རྩལ། ཁྲེས་རིག་མ་འགགས་རོལ་པའི་རྩལ། །ངོ་བོ་རང་བཞིན་ང་ཡི་རྩལ། །དུས་གསུམ་ཡིད་འཁོར་ང་ཡི་རྩལ། །མ་རིག་ཡེ་ཤེས་ཡན་ལག་རྩལ། །འཆར་སྒོ་འཁྲུལ་སྒོ་ང་ཡི་རྩལ། །ཀུན་གཞི་རིག་ཡིད་ང་ཡི་རྩལ། །འཁྲུལ་ལུགས་རྣམ་གསུམ་ང་ཡི་རྩལ། །འཁྲུལ་སྨིན་ཕུང་ལྔ་ང་ཡི་རྩལ། །བཏང་བཟུང་ཞེན་པ་ང་ཡི་རྩལ། །ཕྱི་ནང་སྣོད་བཅུད་ང་ཡི་རྩལ། །ཡུལ་སེམས་གཉིས་ཀ་ང་ཡི་འཕྲུལ། །དགག་བསྒྲུབ་གཉིས་འཛིན་རོལ་པའི་རྩལ། །སྤང་ལེན་དབྱེ་བསལ་ཡན་ལག་རྩལ། །བཟང་ངན་རྩིས་གདབ་ཡན་ལག་རྩལ། །འཁོར་བ་མྱང་འདས་ཡན་ལག་རྩལ། །བདེ་དང་སྡུག་པ་ང་ཡི་རྩལ། །དགྲ་གཉེན་ཕྱོགས་རིས་ང་ཡི་རྩལ། །ཕྱོགས་མཚམས་ཁ་དོག་ཡན་ལག་རྩལ། །ཀུན་བཏགས་རིམ་དགུ་ཡན་ལག་རྩལ། །འགྲོ་བ་རིགས་དྲུག་ང་ཡི་རོལ་པར་ཤར། །རྟག་ཆད་རྣམ་གཉིས་རོལ་པར་ཤར། །གྲུབ་མཐའ་རྣམ་གཉིས་རོལ་པའི་རྩལ། །གྲུབ་མཐའི་ལྟ་སྒོམ་རོལ་པའི་རྩལ། །ཞེ་འདོད་བྱ་རྩལ་ཡན་ལག་རྩལ། །འགྱུས་ཚད་རིག་ཚད་ཡན་ལག་རྩལ། །རྟགས་ཚད་མ་ལུས་རོལ་པའི་རྩལ། །འཆད་ཚད་བརྗོད་ཚད་ཐམས་ཅད་༄༅ ང་ཡ་རྩལ་དུ་ཤར། །ཞེས་གསུངས་སོ། །རྒྱུད་ཀྱ་རྩེ་རྒྱལ་ཉ་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱ་རྒྱུད་ལས། འོད་གསལ་རྩལ་དང་ཡན་ལག་བསྟན་པའི་ལེའུ་སྟེ་གསུམ་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །སྙིང་པོའི་ཀློང་དུ་འོད་གསལ་ཇི་ལྟར་གྲོལ། །ཞུས་པས། སྟོན་པས་འཁོར་ལ་བཀའ་སྩལ་པ། །མཁའ་ཀློང་རྣམ་དག་ཆོས་དབྱིངས་སྙིང་པོ་མྲ །གཞི་རླུང་འོད་ལྔ་སྙིང་པོའི་ཀློང་དུ་ཐིམ། །རྩལ་ལྔ་ཟེར་ལྔ་སྙིང་པོའི་ཀློང་དུ་གྲོལ། །སྟོང་གསལ་འོད་འབར་སྙིང་པོའི་ཀློང་དུ་གྲོལ། །ཤེས་རིག་དྲན་པ་སྙིང་པོའི་ཀློང་དུ་གྲོལ། །རང་བཞིན་ངོ་བོ་སྙིང་པོའི་ཀློང་དུ་གྲོལ། །མ་རིག་ཡེ་ཤེས་སྙིང་པོའི་ཀློང་དུ་གྲོལ། །འཆར་སྒོ་འཁྲུལ་སྒོ་སྙིང་པོའི་ཀློང་དུ་གྲོལ། །གཏི་མུག་མ་སྤངས་མི་གནས་ཀློང་དུ་གྲོལ། །མ་རིག་མ་སྤངས་མི་གནས་ཀློང་དུ་གྲོལ། །སྒྲིབ་གཡོགས་མ་སྤངས་མི་གནས་ཀློང་དུ་གྲོལ། །འགྲོ་དྲུག་མ་སྤངས་མི་གནས་ཀློང་དུ་གྲོལ། །སྣང་སྲིད་སྣོད་བཅུད་སྙིང་པོའི་ཀློང་དུ་གྲོལ། །འཁོར་དང་མྱ་འདས་སྙིང་པོའི་ཀློང་དུ་གྲོལ། །བདེ་དང་སྡུག་བསྔལ་སྙིང་པོའི་ཀློང་དུ་གྲོལ། །བཟང་ངན་སྤང་ལེན་སྙིང་པོའི་ཀློང་དུ་གྲོལ། །ཡིན་མིན་དབྱེ་བསལ་སྙིང་པོའི་ཀློང་དུ་གྲོལ། །དགྲ་གཉེན་ཕྱོགས་རིས་སྙིང་པོའི་ཀློང་དུ་གྲོལ། །རྟག་ཆད་གཟུང་འཛིན་སྙིང་པོའི་ཀློང་དུ་གྲོལ། །རིག་ཚད་འགྱུ་ཚད་སྙིང་པོའི་ཀློང་དུ་གྲོལ། །དྲན་ཚད་བསམ་ཚད་སྙིང་པོའི་ཀློང་དུ་གྲོལ། །དུག་ལྔ་སྐུ་ལྔ་སྙིང་པོའི་ཀློང་དུ་གྲོལ། །རྣམ་རྟོག་བག་ཆགས་སྙིང་པོའི་ཀློང་དུ་གྲོལ། ཀུན་བཏགས་རིམ་དགུ་སྙིང་པོའི་ཀློང་དུ་གྲོལ། །གྲུབ་མཐའི་ལྟ་སྒོམ་ཐམས་ཅད་སྙིང་པོའི་ཀློང་དུ་གྲོལ། །མཚོན་ཚད་བཏགས་ཚད་སྙིང་པོའི་ཀློང་དུ་གྲོལ། །བྱ་བཙལ་རྩོལ་བསྒྲུབ་མ་བྱས་པར། །རང་བཞིན་ཤུགས་ཀྱིས་དེ་ལྟར་གྲོལ། །ཀློང་ནས་རྩལ་ཟེར་ཀློང་དུ་གྲོལ། །སྟོང་ལས་ཀུན་འབྱུང་སྟོང་པར་གྲོལ། །མེད་ལས་སྣ་ཚོགས་མེད་པར་གྲོལ། །ཐོལ་བྱུང་ཡིད་རིག་བྱུང་ཚད་གྲོལ། །ཝལ་བྱུང་དྲན་རྟོག་སྙིང་པོར་གྲོལ། །གཟུགས་སུ་སྣང་ཚད་བདེ་གཤེགས་སྐུ་རུ་གྲོལ། །སྒྲ་སྐད་ཐམས་ཅད་གྲགས་སྟོང་གསུང་དུ་གྲོལ། །དྲན་རྟོག་ཐམས་ཅད་སངས་རྒྱས་ཐུགས་སུ་གྲོལ། །ཁམས་གསུམ་སེམས་ཅན་ལུས་ངག་ཡིད་གསུམ་དེ། །དུས་གསུམ་སངས་རྒྱས་ཀུན་གྱི་སྐུ་གསུང་ཐུགས་སུ་གྲོལ། །སྣང་སྲིད་འཇིག་རྟེན་འཁོར་འདས་ཐམས་ཅད་ཀུན། །སངས་རྒྱས་ཞིང་ཁམས་འོད་གསལ་ཆེན་པོར་གྲོལ། །ཞེ་འདོད་རྩོལ་སྒྲུབ་བྱས་ནས་གྲོལ་བ་མ་ཡིན་ཏེ། །ཐོག་མ་ཉིད་ནས་མ་སྤངས་མི་གནས་གྲོལ། །ཉོན་མོངས་བརྒྱད་ཁྲི་བཞི་སྟོང་གྲོལ། །བློས་བཏགས་ཆོས་སྡེ་བརྒྱད་ཁྲི་བཞི་སྟོང་གྲོལ། །དཔེར་ན་སྦྲུལ་གྱི་མདུད་པ་བཞིན། །འཆིང་མཁན་གྲོལ་མཁན་མེད་པར་གྲོལ། །དེ་བཞིན་རྟག་ཆད་ཆོས་རྣམས་མ་ལུས་ཀུན། །མ་བཅིངས་མ་གྲོལ་སྙིང་པོའི་ཀློང་དུ་གྲོལ། །དཔེར་ན་རྔ་མའི་མདུད་པ་བཞིན། །མཚན་མ་སྣ་ཚོགས་རང་གྲོལ་ཉིད། །ཅེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། སྙིང་པོའི་ཀློང་དུ་འོད་གསལ་གྲོལ་བར་བསྟན་པའི་ལེའུ་སྟེ་བཞི་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །སྙིང་པོའི་ཡན་ལག་གཉིས་མེད་ཇི་ལྟར་ལགས། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །ཆོས་ཉིད་མཁའ་ཀློང་སྙིང་པོའི་ཀློང་དཀྱིལ་དུ། །འོད་གསལ་རྩལ་ཟེར་ཡན་ལག་མ་ལུས་ཐིམ། །སྙིང་པོ་རྩལ་ཟེར་གཉིས་མེད་ཐོག་མར་ཡེ་སངས་རྒྱས། །བྱ་བཙལ་རྩོལ་བས་མ་བསྒྲུབས་པར། །མཁའ་ལ་འཇའ་ཚོན་ཐིམ་པ་འདྲ། །ནམ་མཁར་ཆོ་འཕྲུལ་ཐིམ་པ་དང་། །འོ་མ་ཆུ་དང་འདྲེས་པ་དབྱེར་མི་ཕྱེད། །དེ་བཞིན་གཞི་རླུང་གཉིས་སུ་འདྲེས་པ་དབྱེར་མི་ཕྱེད། །རླུང་ལྔ་འབྱུང་ལྔ་གཉིས་མེད་དབྱེར་མི་ཕྱེད། །འོད་ལྔ་ཟེར་ལྔ་གཉིས་མེད་དབྱེར་མི་ཕྱེད། །ཤེས་པ་སྣང་ཚུལ་འགྱུ་མེད་དབྱེར་མི་ཕྱེད། །རང་བཞིན་ངོ་བོ་ཐུགས་རྗེ་དབྱེར་མི་ཕྱེད། །དུས་གསུམ་སྐུ་གསུམ་གཉིས་མེད་དབྱེར་མི་ཕྱེད། །ཡིད་འཁོར་འཁྲུལ་འཁོར་གཉིས་མེད་དབྱེར་མི་ཕྱེད། །མ་རིག་ཡེ་ཤེས་གཉིས་མེད་དབྱེར་མི་ཕྱེད། །འཁྲུལ་དང་མ་འཁྲུལ་གཉིས་མེད་དབྱེར་མི་ཕྱེད། །རྟོགས་དང་མ་རྟོགས་གཉིས་མེད་དབྱེར་མི་ཕྱེད། །སངས་རྒྱས་སེམས་ཅན་གཉིས་མེད་དབྱེར་མི་ཕྱེད། །འཁོར་བ་མྱང་འདས་གཉིས་མེད་དབྱེར་མི་ཕྱེད། །སངས་རྒྱས་འགྲོ་དྲུག་གཉིས་མེད་དབྱེར་མི་ཕྱེད། །སྣང་སྲིད་སྣོད་བཅུད་གཉིས་མེད་དབྱེར་མི་ཕྱེད། །དུག་ལྔ་སྐུ་ལྔ་གཉིས་མེད་དབྱེར་མི་ཕྱེད། །དུག་གསུམ་སྐུ་གསུམ་གཉིས་མེད་དབྱེར་མི་ཕྱེད། །རྣམ་རྟོག་ཆོས་ཉིད་གཉིས་མེད་དབྱེར་མི་ཕྱེད། །ཉོན་མོངས་བརྒྱད་ཁྲི་བཞི་སྟོང་དང་། །ཆོས་སྡེ་བརྒྱད་ཁྲི་བཞི་སྟོང་གཉིས་སུ་མེད། །ཕྱི་ནང་ཡུལ་སེམས་དབྱེ་བ་གཉིས་སུ་མེད། །གཟུགས་ལྔ་སྐུ་ལྔ་གཉིས་མེད་དབྱེ་རུ་མེད། །དབང་ལྔ་ཡུལ་ལྔ་དབྱེར་མེད་གཉིས་སུ་མེད། །སྒོ་ལྔ་གཟུགས་ལྔ་དབྱེར་མེད་གཉིས་སུ་མེད། །ཡིད་ལྔ་གསལ་དབང་དམིགས་འཛིན་གཉིས་སུ་མེད། །རིག་སེམས་མིང་འདོགས་ཉོན་མོངས་གཉིས་སུ་མེད། །འགྱུ་དྲན་གློ་རྟོག་འཛིན་ཞེན་གཉིས་སུ་མེད། །ཅི་ལ་སྤྱོད་ཀྱང་མ་ཞེན་མ་ཆགས་གཉིས་སུ་མེད། །སྡུག་བསྔལ་བདེ་བ་གཉིས་སུ་་དབྱེ་རུ་མེད། །བཟང་ངན་སྤང་ལེན་དབྱེར་མེད་གཉིས་སུ་མེད། །ཡིན་མིན་དབྱེ་བསལ་དབྱེར་མེད་གཉིས་སུ་མེད། །དགྲ་གཉེན་ཕྱོགས་རིས་གཉིས་མེད་དབྱེ་རུ་མེད། །ཕྱི་ནང་ཡུལ་སེམས་དགག་སྒྲུབ་གཉིས་སུ་མེད། །དཔེར་ན་རྒྱ་མཚོ་ཆེན་པོ་རུ། །ཆུ་བྲན་འདི་ཡིན་འདི་མིན་དབྱེར་མི་ཕྱེད། །དེ་བཞིན་སེམས་ཀྱིས་བརྟགས་པའི་ཆོས་རྣམས་ཀུན། །སྙིང་པོའི་ཀློང་དུ་ཐིམ་ནས་བློ་ལས་གྲོལ་ཙམ་ན། །ཆོས་རྣམས་འདི་ཡིན་འདི་མིན་དབྱེར་མི་ཕྱེད། །ཅིའི་ཕྱིར་ཞེ་ན་ཆོས་དང་ཆོས་ཉིད་འཕྲད་ནས་བློ་དངོས་འདྲེས་ཙམ་ན། །ཡིན་རྒྱུ་གང་ཡིན་མིན་རྒྱུ་གང་བློ་ཟད། །ཐེག་པ་གྲུབ་མཐའ་སྟོངས་ཙམ་ན། །ཡིན་མིན་དབྱེ་བསལ་མེད་དེ་ཀ་དག་ཆེན་པོར་གྲོལ། །སངས་རྒྱས་གཞན་ནས་མི་རེ་བློས་བཏགས་ཆོས་རྣམས་ཟད། །སྐྱེ་མེད་ཀ་དག་དངོས་མེད་དང་། །རྣལ་མ་བློ་འདས་ངོ་བོ་ཉིད། །ཅེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། སྙིང་པོ་དང་རྩལ་ཟེར་དབྱེར་མེད་བསྟན་པའི་ལེའུ་སྟེ་ལྔ་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །བློ་འདས་ཐེག་པ་ཇི་ལྟར་བཤད། །ཞུས་པས། སྟོན་པས་འཁོར་ལ་བཀའ་སྩལ་པ། །བློ་འདས་རང་ལ་བརྗོད་མེད་ཀྱང་། །འཁོར་གྱི་རྟོག་པ་བསལ་ཕྱིར་བཤད། །ཡང་ཏི་ཉི་ཟླའི་སྙིང་པོ་ཐེག་པའི་སྤྱི་ཕུད་འདི། །ཐེག་པའི་གོང་བརྒལ་རྫོགས་ཆེན་གཉའ་གཅོག་ཡིན། །ཉི་ཟླའི་སྙིང་པོ་ཐེག་དགུ་ཐོད་རྒལ་འདི། །འདི་གོ་ཀུན་གོའི་ཆོས་སུ་བཤད། །འདི་རྟོགས་ཀུན་རྟོགས་ཆོས་སུ་བཤད། །འདི་ཤེས་ཀུན་ཤེས་ཆོས་སུ་བཤད། །འདི་གསལ་ཀུན་གསལ་ཆོས་སུ་བཤད། །འདི་བཅངས་ཀུན་ཡོད་ཆོས་སུ་བཤད། །འདིར་ཞུགས་ཀུན་གྱི་སྒོར་བཞུགས་ཡིན། །འདི་བྲིས་ཆོས་ཀུན་བྲིས་པར་བཤད། །ཅིའི་ཕྱིར་ཞེ་ན་ཆོས་རྣམས་ཀུན་གྱི་རྩ་བའི་རྒྱུད་སྡེ་ཡིན། །ཐེག་པ་ཀུན་གྱི་སྤྱི་ཕུད་རྩེ་རྒྱལ་ཡིན། །བརྒྱད་ཁྲི་བཞི་སྟོང་གསལ་བར་སྟོན་པའི་ཉི་ཟླ་ཡིན། །ཐེག་པ་ཀུན་གྱི་གཏེར་མཛོད་ལྡེ་མིག་ཡིན། །བཏགས་ཆག་ཀུན་གྱི་ཞིང་ས་ཡིན། །ཐམས་ཅད་བསྐྱེད་པའི་ཡབ་ཡུམ་མཁའ་ཀློང་བྷ་ག་ཡིན། ཀུན་གྱི་ས་བོན་གཞི་མ་རྩ་བ་ཡིན། །ཀུན་གྱི་རྩ་བ་གཅིག་རྟོགས་པས། །ཀུན་ལ་དབང་བསྒྱུར་ཐོབ་པ་ཡིན། །ཡང་ཏི་འདི་ཡིས་ཆོས་རྣམས་གཏན་ལ་ཕེབས་པའི་ཕྱིར། །བསྟན་པའི་ཡང་སྙིང་འདི་ཐོས་པས། །འདི་ཐོས་གང་ཞིག་ཐོས་པའི་མཆོག །དཔེར་ན་མཆོག་རབ་རྩེ་ནས་རི་བྲན་ཐམས་ཅད་གསལ། །འབྱུང་ཆེན་ནམ་མཁར་འབྱུང་བ་ཐམས་ཅད་གསལ། །གནམ་ས་གཉིས་སུ་སྐྱེ་འགྲོ་ཐམས་ཅད་གསལ། །ཟ་འོག་སྣམ་བུར་དང་སྣ་སྣ་ཚོགས་གསལ། །བསམ་འཕེལ་ནོར་བུར་རིན་ཆེན་སྣ་ཚོགས་གསལ། །དཀྱིལ་འཁོར་ཆེན་པོར་ས་ཚོན་རྣམ་ལྔ་གསལ། །ཕྱི་ཡི་རྒྱ་མཚོར་ཆུ་བྲན་སྣ་ཚོགས་གསལ། །དེ་བཞིན་ཆོས་ཀུན་རྩ་རྒྱུད་ཉི་ཟླའི་སྙིང་པོར་གནས། །སེམས་ཀྱི་བཏགས་པའི་ཆོས་རྣམས་རིལ་པོར་གསལ། །ཨ་ཧོ་ང་ཡི་བཀའ་ཆེན་འདི་ལྟ་བུ། །གཞན་ནས་མི་འབྱུང་ཨ་ལ་ལ། །རང་བྱུང་ངོ་མཚར་ཁྱད་པར་ཅན། །དུག་གསུམ་སྐུ་གསུམ་ཡིན་པར་བཤད། །དུག་ལྔ་སྐུ་ལྔ་ཡིན་པར་བཤད། །མ་རིག་འོད་གསལ་ཆེན་པོར་བཤད། །གཏ་མུག་ཀ་དག་ཆེན་པོར་བཤད། །རྣམ་རྟོག་ཆོས་ཉད་ཆེན་པོར་བཤད། །མཚན་མའ་ཆོས་རྣམས་གཟགས་མོར་བཤད། །བྱ་བཙལ་མེད་པའ་ཆོས་སུ་བཤད། །རྩོལ་སྒྲུབ་མེད་པའ་ཆོས་སུ་བཤད། །ཞེ་འདོད་མེད་པའི་ཆོས་སུ་བཤད། །ལྟ་སྒོམ་སྤྱོད་འབྲས་མེད་པའི་ཆོས་སུ་བཤད། །དངོས་གྲུབ་ཡིད་སྨོན་མེད་པའི་ཆོས་སུ་བཤད། །སྐུ་དང་ཡེ་ཤེས་རང་ལ་ཚང་བའི་ཆོས་སུ་བཤད། །བློ་ཟད་གྲུབ་མཐའ་སྟོངས་པའི་ཆོས་སུ་བཤད། །མཚོན་བརྗོད་དམིགས་ལས་འདས་པའི་ཆོས་སུ་བཤད། །ཅེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། བློ་འདས་བཤད་ཐབས་བསྟན་པའི་ལེའུ་སྟེ་དྲུག་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །ཉི་ཟླའི་སྙིང་པོ་ཡང་ཏི་ཡོ་ག་ལ། །གྲུབ་མཐའི་བློས་བཏགས་ཡོད་དམ་མེད། །ཅེས་ཞུས་པས། སྟོན་པས་འཁོར་ལ་བཀའ་སྩལ་པ། །གྲུབ་མཐའི་བློས་བཏགས་བློ་ཡི་ཡུལ། །བློ་ཡི་ཡུལ་ལ་ངེས་པ་མེད། །བློ་ཡུལ་མ་ཟད་སངས་མི་རྒྱ། །དེ་ཕྱིར་ཡང་ཏི་ཉི་ཟླའི་སྙིང་པོའི་རྟོགས་པ་ལ། །ཐེག་པ་དགུ་ཡི་ཆོས་མི་དགོས། །འོན་ཀྱང་ཡང་ཏི་མ་རྟོགས་གང་ཟག་ལ། །ཐེག་པ་དགུ་ཡི་ལྟ་བསྒོམ་བསྟན། །མུ་སྟེགས་ཉན་ཐོས་རང་རྒྱལ་དང་། །སེམས་ཙམ་དབུ་མ་བྱང་སེམས་དང་། །ཀྲི་ཡུ་ཡོ་ག་ཨུ་པ་ཡ། །མ་ཧྭ་ཨ་ནུ་ཨ་ཏི་དགུ། །དེ་ཡི་གྲུབ་མཐའ་བློས་བཏགས་ནི། །རང་རང་དཀྱུས་ན་གསལ་ཕྱིར་རོ། །བློས་བཏགས་ཐ་སྙད་འདིར་མ་བསྟན། །ཉི་ཟླའི་སྙིང་པོ་རྟོགས་པ་ལ། །དེ་རྣམས་བློ་ཡིན་དགོས་པ་མེད། །འོན་ཀྱང་འཁྲུལ་རྨོངས་མི་ཤེས་བློ་ཅན་ལ། །རེ་ཞིག་ཚིག་གི་སྒྲོན་མེས་དོན་གྱི་དཔེར་མཚོན་པ། །དངོས་པོའི་ཆོས་ཅན་གཅིག་ལ་ནི། །མུ་སྟེགས་རྟག་ལྷ་བས་ནི་ཤེས་ཤིང་རིག་པའི་ངོ་བོར་བཏགས། །དེ་ཡང་རྫས་སུ་གྲུབ་པར་འདོད། །རྟག་འདོད་ཁ་དོག་དབྱིབས་ཀྱི་ཚད། །རང་རང་ལུས་དང་སྦྱར་ནས་ནི། །སྙིང་དཀྱིལ་ཉུང་འབྲུ་སྲན་ཙམ་པ། །ཁ་དོག་དཀར་ཚེར་སྣུམ་ལ་འདྲིལ། །ཞེས་གསུངས་སོ། །མུ་སྟེགས་ཆད་པའི་ལྟ་བ་ནི། །རྒྱུ་མེད་འབྲས་བུ་མེད་པར་འདོད། །མི་ཤི་ཐལ་བ་རླུང་ཁྱེར་བཞིན། །སླར་འཚོ་བ་དག་ག་ལ་ཡོད། །ཅེས་གསུངས་སོ། །ནང་པ་སངས་རྒྱས་ཐེག་པ་ནི། །ཆོས་ཅན་གང་རུང་གཅིག་ལ་ནི། །ཉན་ཐོས་ཕྲ་རགས་རྫས་སུ་གྲུབ་པར་འདོད། །བྱེ་བྲག་པ་ནི་བསྐོར་བ་བར་དང་བཅས་པར་འདོད། །དེ་ཡང་གཞུང་ལས་ཕྱི་ཡི་ཡུལ། །ཡུལ་ནི་ཕྲ་རབ་རྡུལ་དུ་སྣང་། །ཞེས་གསུངས་སོ། །རང་སངས་རྒྱས་ཀྱི་འདོད་པ་ནི། །རྡུལ་མིན་ཡུལ་གྱི་རྣམ་པ་སྟོང་། །རྣམ་པར་རིག་བྱེད་མ་ཡིན་འདོད། །ཅེས་གསུངས་སོ། །སེམས་ཙམ་པ་ཡི་འདོད་པ་ནི། །རྣམ་བདེན་རྣམ་རྫུན་རྣམ་གཉིས་ཏེ། །སེམས་ཙམ་རྣམ་བདེན་ལྟ་བ་ནི། །དཀར་དམར་སྣ་ཚོགས་སེམས་ཀྱི་སྣང་བར་འདོད། །འཇིག་རྟེན་ཁམས་ནི་སེམས་ཙམ་མོ། །ཞེས་གསུངས་སོ། །སེམས་ཙམ་རྣམ་རྫུན་ལྟ་བ་ནི། །ཡུལ་གྱི་རྣམ་པ་མེད་པ་མྲ །རང་རིག་རྒྱུན་གྱི་རྟག་པར་འདོད། །སྔ་མ་སྔ་མས་རྒྱུ་བྱས་ནས། །ཕྱི་མ་ཕྱི་མ་འབྲས་བུར་འདོད། །དེ་ཡང་གཞུང་ལས་ཀྱང་། །ཤེས་པ་བདེན་ཏེ་རྣམ་པ་རྫུན་། །མི་རྣམས་ལ་ནི་ཕྱི་རོལ་སྣང་། །འཇིག་རྟེན་པ་ལ་སེམས་ཙམ་མོ། །སེམས་ནི་ཡང་དག་དངོས་མ་ཡིན། །སེམས་ཙམ་དུ་ནི་ངས་བཤད་དོ། །ཞེས་གསུངས་སོ། །དབུ་མ་པ་ཡི་ལྟ་བ་ནི། །སེམས་ཙམ་སྤྱོད་པའི་དབུ་མ་དང་། །རྣལ་འབྱོར་སྤྱོད་པའི་དབུ་མའོ། །དེ་ཡང་རྣམ་པར་སྣང་བ་འདི་དག་ནི། །སྒྱུ་མར་འདོད་དང་རབ་ཏུ་མི་གནས་པ། །སྒྱུ་མ་ལྟ་བུའི་ལྟ་བ་ནི། །ཡུལ་གྱི་རྣམ་པ་མི་རྟག་མི་བདེན་སྒྱུ་མའི་ཚུལ། །ཆོས་རྣམས་རྨི་ལམ་ལྟ་བུ་ལ་སོགས་པ། །སྒྱུ་མའི་དཔེ་བརྒྱད་བཞིན་དུའོ། །རྣལ་འབྱོར་སྤྱོད་པའི་ལྟ་བ་ནི། །ཡུལ་གྱི་རྣམ་པ་གང་སྣང་ཡང་། །ཕྱོགས་ཆར་བཤིགས་པས་གཅིག་མ་གྲུབ། །གཅིག་མ་གྲུབ་པའི་གཏན་ཚིགས་ཀྱིས། །མཐའ་བཞི་བྲལ་ལོ་སྟོང་པར་གནས། །སྟོང་པ་བཅོ་བརྒྱད་སྤྲོས་པའི་མཐའ་བརྒྱད་འདས། །ཞེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། མཚན་ཉིད་སྡེ་གསུམ་གྱི་གྲུབ་མཐའ་བསྟན་པའི་ལེའུ་སྟེ་བདུན་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །ཕྱི་རྒྱུད་སྡེ་གསུམ་ཐེག་པ་ཇི་ལྟར་ལགས། །སྟོན་པས་འཁོར་ལ་བཀའ་སྩལ་པ། །ཀྲི་ཡུ་པ་ཡི་ལྟ་བ་ནི། །ཡུལ་གྱི་རྣམ་པ་སྣང་བ་ནི། །རིགས་གསུམ་ལྷ་ཡི་སྐུ་རུ་འདོད། །མཐོ་དམན་འཇམ་རྩུབ་རིགས་གསུམ་མགོན། །ཨུ་པ་ཡ་ཡི་ཐེག་པ་ནི། །ཀྲི་ཡར་སྤྱོད་ལ་ཡོ་གར་བལྟ། །གཉིས་ཀའི་རྒྱུད་ལས་གཞུང་ཚུགས་མེད། །ཡོ་ག་པ་ཡི་ཐེག་པ་ནི། །ཕྱི་ཡི་ཡུལ་དུ་སྣང་བ་དེ། །རིགས་ལྔ་ལྷ་ཡི་སྣང་བར་འདོད། །སྐྱེ་འགག་གཉིས་སུ་སྣང་བ་ལ། །དེ་ཡང་སྤུན་དང་གྲོགས་པོའི་ཚུལ། །ཞེས་གསུངས་སོ། །ནང་རྒྱུད་སྡེ་གསུམ་ཐེག་པ་ལ། །མ་ཧྭ་ཡོ་གའི་ཐེག་པ་ནི། །སྣང་བ་ཐམས་ཅད་ལྷ་དང་ལྷ་མོའི་དཀྱིལ་འཁོར་དུ། །ཕུང་པོ་ལྔ་ནི་རིགས་ལྔའི་ལྷ་རུ་བསྒོམ། །རྣམ་ཤེས་ཚོགས་བརྒྱད་སེམས་དཔའ་བརྒྱད། །འབྱུང་ལྔ་རིགས་ཀྱི་ཡུམ་ལྔར་བསྒོམ། །གཟུགས་སྒྲ་དྲི་རོ་མཆོད་པའི་ལྷ་མོ་བཞི། །ཡན་ལག་རྣམ་བཞི་སྒོ་མ་བཞི། །སྒལ་ཚིགས་རྩ་བརྒྱད་དབང་ཕྱུག་མ། །ཕུང་པེ་་ཁམས་དང་སྐྱེ་མཆེད་ལྷ་དང་ལྷ་མོའོ། །ཐབས་ཀྱི་རང་བཞིན་སྐྱེ་རིམ་ཚུལ། །ཤེས་རབ་རང་བཞིན་རྫོགས་རིམ་འདོད། །དེ་ཡང་གཞུང་ལས། །སྣང་བ་མི་འགག་ཐབས་ཡིན་ཏེ། །རང་བཞིན་མེད་པ་ཤེས་རབ་ཡིན། །ཞེས་གསུངས་སོ། །རྫོགས་པ་ཨ་ནུའི་ལྟ་བ་ནི། །ཡུལ་གྱི་རྣམ་པ་ཆོས་དབྱིངས་གཞལ་ཡས་ཁང་། །སྙིང་པོ་དྲན་ཙམ་མ་བསྐྱེད་རྫོགས་པའི་ལྷ། །ས་ཆུ་མེ་རླུད་སྣོད་བཅུད་བཅས། །ཀུན་ཀྱང་མ་བསྐྱེད་ཡོངས་རྫོགས་ལྷ། །ཞེས་གསུངས་སོ། །རྫོགས་ཆེན་ཨ་ཏིའི་ལྟ་བ་ནི། །ཆགས་ཞེན་ལ་སོགས་ཡུལ་གྱི་རྣམ་པ་རྣམས། །ཆོས་ཉིད་རོལ་པའི་སྣང་བར་འདོད། །སྟོང་གསུམ་འཇིག་རྟེན་དེ་རྣམས་ནི། །སྐུ་གསུང་ཐུགས་ཀྱི་རོལ་པར་ཤར་བའོ། །ཞེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། གསང་སྔགས་ཐེག་པའི་གྲུབ་མཐའ་ཕྱི་རྒྱུད་དང་ནང་རྒྱུད་བསྐྱེད་རྫོགས་གསུམ་བསྟན་པའི་ལེའུ་སྟེ་བརྒྱད་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །གོང་བརྒལ་སྤྱི་ཏི་ཇི་ལྟར་ལགས། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ།ཨེ་མ་ཧོ་ངོ་མཚར་ཁྱད་པར་འཕགས། །ཐེག་པ་དགུ་རྩེ་སྤྱི་ཏི་ཡོ་ག་འདི། །གཞན་ནས་མི་རྙེད་རང་ལས་རྙེད། །ཐེག་མཆོག་ངོ་མཚར་ཁྱད་པར་ཅན། །རྫོགས་ཆེན་སྤྱི་ཏིའི་ལྟ་བ་ནི། །སྣང་སྲིད་འཁོར་འདས་མ་ལུས་པ། །ཀ་དག་རྟེན་མེད་ཆེན་པོར་གྲོལ། །ཡིན་མིན་རྩིས་གདབ་མེད་པའི་དགོངས་པ་ཤར། །བྱ་བཙལ་རྩོལ་སྒྲུབ་མེད་པ་མྲ །ཟང་ཀ་རྣལ་མར་གནས་པའོ། །སྐྱེ་མེད་དངོས་མེད་འབྲས་བུ་བློ་ལས་འདས། །ཨེ་མ་ངོ་མཚར་རྨད་བྱུང་ཆོས། །གཞན་ལས་མི་འབྱུང་ཨ་ལས་བྱུང་། །ཨ་ལ་ལ་ཧོ། མ་ལུས་རིལ་པོར་ཀ་དག་ཆེན་པོར་གྲོལ། །ཞེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། སྤྱི་ཏིའི་ཐེག་པ་བསྟན་པའི་ལེའུ་སྟེ་དགུ་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །དེ་ལས་ཡང་ཏི་གང་གིས་འཕགས། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། ཨ་ཏི་ཏྲ་སྨྱོ་ཡ་ཐུ་ལ་དྷསྨེ་དྷ་ཏུ། ཨ་ཨ་ཐ་ཐི། ཡང་ཏི་ཉི་ཟླའི་སྙིང་པོ་འདི། །ལྟ་སྒོམ་སྤྱོད་འབྲས་བསྒྲུབ་ཏུ་མེད། །གཏད་མེད་དམིགས་མེད་སོ་མ་བློ་ལས་གྲོལ། །སྣང་བ་ཐམས་ཅད་མིང་མེད་ཆེན་པོར་གྲོལ། །ཀ་དག་སྐྱེ་མེད་དངོས་པོའི་ཆོས་རྣམས་མེད། །སྤྱི་ཏི་ཉིད་ལ་གང་གིས་འཕགས་ཞེ་ན། །སྣང་བའི་རྣམ་པ་གང་ལ་ཡང་། །མིང་འདོགས་མེད་པར་ཐིག་ལེ་སྤྱི་བརྟོལ་ཡིན། །དག་དང་མ་དག་མེད་པར་གཏི་མུག་ཆེན་པོར་གྲོལ། །ཁམས་གསུམ་སྡུག་བསྔལ་མེད་པར་འདི་ཀ་ལྟ་བུར་གྲོལ། །སངས་རྒྱས་སེམས་ཅན་འགྲོ་དྲུག་གནས་མེད་པར། །བློས་བཏགས་མིང་འདོགས་མེད་པར་གྲོལ། །ཆོས་ཟད་བློ་སྟོར་མཚོན་བརྗོད་བསམ་ལས་འདས་པར་གྲོལ། །སརྦ་དྷརྨུ་སྨྱོ་ཧ་ཐུ་ལ་མུ་ལ་ཨ། །ཅང་མེད་ཅིར་སྣང་མིང་མེད་ཆེན་པོར་གྲོལ། །ཞེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། རྫོགས་ཆེན་གཉའ་གཅོག་སྤྱི་ཏི་གོང་བརྒལ་ཡང་ཏི་བསྟན་པའི་ལེའུ་སྟེ་བཅུ་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །སྤྱི་འདས་བློ་བྲལ་བསྟན་པ་ལ། །བྱ་བཙལ་བློ་༄༅ ཆོས་ ་འཚལ་ལམ། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །ཡང་ཏ་ཉ་ཟླའ་ ང་པོ་ལ། །བྱ་བཙལ་རྩོལ་སྒྲུབ་མ་དགོས་ཏེ། །མ་བཅོས་རང་སར་གྲོལ་བས་མཆོག །ཆོས་རྣམས་ཐམས་ཅད་སྤྲོས་བཅད་ལ། །ལུས་ངག་ཡིད་གསུམ་དལ་བར་སྡོད། །སྤྱོད་ལམ་རྣམ་བཞི་ཅིར་སྤྱོད་ཀྱང་། །སྤྱོད་བཞིན་མ་ཆགས་བདེ་བའི་མཆོག །བལྟ་མི་བལྟ་ཡི་ལྟ་བ་མེད། །ལྟ་བ་རྩོལ་བས་སྒྲུབ་ཏུ་མེད། །བསྒོམ་མི་བསྒོམ་གྱི་སྒོམ་པ་མེད། །བསྒོམ་པ་རྩོལ་བས་བསྒྲུབ་ཏུ་མེད། །སྤྱོད་མི་སྤྱོད་ཀྱི་སྤྱོད་པ་མེད། །སྤྱོད་པ་རྩོལ་བས་བསྒྲུབ་ཏུ་མེད། །བསྒྲུབ་མི་བསྒྲུབ་ཀྱི་བསྒྲུབ་ཏུ་མེད། །འབྲས་བུ་རྩོལ་བས་བསྒྲུབ་ཏུ་མེད། །ཕྲིན་ལས་རྩོལ་བས་བསྒྲུབ་ཏུ་མེད། །དམ་ཚིག་རྩོལ་བས་བསྲུང་དུ་མེད། །ས་ལམ་རྩོལ་བས་བགྲོད་དུ་མེད། །ཅིར་སྣང་ཅིར་སྲིད་ལྟ་བ་ལ། །ལྟ་དང་མི་ལྟའི་རྩོལ་སྒྲུབ་མེད། །རིག་ཚད་འགྱུས་ཚད་གྲོལ་བ་ལས། །ཐུན་དུ་བཅད་པས་བསྒོམ་དུ་མེད། །གང་གང་སྣང་སྣང་སྤྱོད་པ་ལས། །རྩོལ་བས་ཆེད་དུ་སྤྱད་དུ་མེད། །ཀ་དག་འོད་གསལ་དམ་ཚིག་ལས། །ཆེད་དུ་བསྲུང་ཞིང་བསྡམ་དུ་མེད། །སྦྱང་བགྲོད་ཡེ་མེད་གྲོལ་བ་ལས། །ས་ལམ་སྦྱངས་ཤིང་བགྲོད་དུ་མེད། །འབྲས་བུ་ཡེ་ཀློང་མཐའ་སྟོངས་པས། །ཡིད་སྨོན་རེ་དོགས་རྩོལ་བ་མེད། །ཡང་ཏི་ཉི་ཟླའི་སྙིང་པོ་ལ། །ཞེ་འདོད་བྱ་རྩོལ་མི་བྱེད་དེ། །བྱར་མེད་ལྷུག་པར་བཞག་པས་ཆོག །མ་བཅོས་རྣལ་མ་རང་སར་ཞོག །ཆེད་དུ་རྩོལ་བསྒྲུབ་གང་ཡང་མེད། །འགྲོ་ཡན་འགྲོ་ཡན་རང་སར་གྲོལ། །སྡོད་ཀྱན་སྡོད་ཀྱན་རང་སར་གྲོལ། །ཉལ་ཀྱན་ཉལ་ཀྱན་རང་སར་གྲོལ། །ཟ་ཡན་ཟ་ཡན་རང་སར་གྲོལ། །སྡུག་གིན་སྡུག་གིན་རང་སར་གྲོལ། །སྐྱེད་ཀྱིན་སྐྱེད་ཀྱིན་རང་སར་གྲོལ། །གང་ན་གནས་ཀྱང་མ་ཆགས་རང་སར་གྲོལ། །ཅི་ལ་སྤྱོད་ཀྱང་མ་ཞེན་རང་སར་གྲོལ། །ཇི་སྐད་སྨྲས་ཀྱང་གྲག་སྟོང་གྲོལ། །ཅི་ཐོས་གང་ཡང་མ་ཉན་གྲོལ། །གང་ལ་རེག་ཀྱང་མ་བཏང་མ་བཟུང་གྲོལ། །སྒོ་ལྔ་གསལ་བའི་ཤེས་པ་ལ། །ཡིད་ལྔ་མ་བསྒྲུབས་ཟང་ཐལ་གྲོལ། །ཡིད་རིག་འགྱུས་ཀྱང་མ་བཟུང་གྲོལ། །སྐྱེ་མེད་འགག་མེད་སྣ་ཚོགས་ཀྱང་། །སྣ་ཚོགས་སྐྱེ་མེད་ཀློང་དུ་གྲོལ། །དངོས་མེད་དངོས་པོ་ཇི་སྙེད་ཀྱང་། །ངང་དངས་དངོས་མེད་ཀློང་དུ་གྲོལ། །ཅང་མེད་ཅིར་སྣང་དེ་ཀར་གྲོལ། །སྟོང་པའི་ཀློང་ནས་ཀུན་འབྱུང་སྟོང་པ་ངང་དུ་གྲོལ། །རྩ་ཟེར་རིག་སེམས་འོད་གསལ་ཆེན་པོར་གྲོལ། །འགྱུ་བ་དྲན་པ་བློ་དང་རྟོག་པ་ཡང་། །ངང་དངས་རང་སངས་སྙིང་པོའི་ཀློང་དུ་གྲོལ། །བློས་བཏགས་ཆོས་རྣམས་ཐམས་ཅད་ཀྱང་། །ཆེད་དུ་དགག་བསྒྲུབ་རྩོལ་བས་མ་སྤངས་པར། །ཀ་དག་དངོས་མེད་སྐྱེ་མེད་བྱར་མེད་བློ་ལས་འདས། །གནས་ལུགས་སྙིང་པོ་ཆིག་ཆོད་པ། །ཆོས་ཉིད་ཡང་དག་ངེས་པ་མ་ནོར་བ། །ཆིག་ཆོད་ཆོས་སྐུ་ལྷུན་གྲུབ་ཟང་ཐལ་ཡེ་ནས་གྲོལ། །ཡེ་དག་ཡེ་གསལ་ཡེ་གྲུབ་ཡེ་གནས་སོ། །ཡང་ཏི་ཉི་ཟླའི་སྙིང་པོ་ལ། །ད་གདོད་བྱ་བཙལ་རྩོལ་སྒྲུབ་ག་ལ་ཡོད། །ཅེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། སྤྱི་འདས་ཡང་ཏི་ལ་བྱ་བཙལ་བློ་ཆོས་མི་དགོས་པར་བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །རྩོལ་བསྒྲུབ་འདས་པའི་ཐེག་པ་ལ། །ལྟ་སྒོམ་སྤྱོད་འབྲས་དགོས་མི་དགོས། །ཞེས་ཞུསླ་པས། སྟོན་པས་འཁོར་ལ་བཀའ་སྩལ་པ། །ཡང་ཏི་རྩོལ་བསྒྲུབ་འདས་པ་ལས། །ལྟ་སྒོམ་སྤྱོད་འབྲས་བློ་ཡི་ཡུལ། །བློ་ཡི་ཡུལ་ལས་ངེས་པ་མེད། །བློ་ཡུལ་མ་ཟད་སངས་རྒྱས་ཆོས་མི་ཟད། །དེས་ན་ཡང་ཏི་ཉི་ཟླའི་སྙིང་པོ་ལ། །ཞེ་འདོད་ལྟ་བའི་སེམས་དང་བྲལ། །དམིགས་པ་སྒོམ་པའི་སེམས་དང་བྲལ། །བྱ་རྩོལ་སྤྱོད་པའི་སེམས་དང་བྲལ། །རེ་དོགས་འབྲས་བུའི་སེམས་དང་བྲལ། །ཐིག་ལེ་མཐོང་བརྟོལ་སེམས་དང་བྲལ། །ཞེ་འདོད་གཟའ་གཏད་ལྟ་བ་མེད། །ཀ་དག་འོད་གསལ་བསྒོམ་པ་ལ། །དམིགས་གཏད་ཡིད་གཟུངས་བསྒོམ་པ་མེད། །དངོས་མེད་བྱར་མེད་རྣལ་མ་ལ། །བྱ་བཙལ་མེད་པས་སྤྱོད་པ་མེད། །གསང་བའི་ཡང་སྙིང་བློ་འདས་ལ། །གཞན་ནས་རྙེད་པའི་སངས་རྒྱས་མེད། །ཡེ་ནས་སྐུ་གསུམ་ལྷུན་གྲུབ་ལ། །རེ་དོགས་འབྲས་བུ་ཡོངས་ཀྱིས་མེད། །མིང་མེད་ཕྱོགས་བྲལ་རྟོགས་པས་ལྟ་བ་མེད། །ཀ་དག་སྐྱེ་མེད་རྟོགས་པས་སྒོམ་པ་མེད། །དངོས་མེད་རྣལ་མ་རྟོགས་པས་བསམ་དུ་མེད། །སོ་མ་ལྷུག་པ་བག་ཡངས་རྟོགས་པས་སྤྱོད་པ་མེད། །ཡེ་ནས་རང་འཁྲུངས་རྟོགས་པས་འབྲས་བུ་མེད། །རྟག་ཆད་བློ་ལས་གྲོལ་བས་ལྟ་སྒོམ་མེད། །བློ་ཟད་ཉོན་མོངས་ཡེ་བརླག་ཡིད་སྨོན་སངས་རྒྱས་མེད། །ཡང་ཏི་ཡོ་ག་རྟོགས་པས་ན། །རིག་མེད་སེམས་མེད་ཆོས་རྣམས་མེད། །ཅེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། ཡང་ཏི་རྩོལ་སྒྲུབ་འདས་པ་ལ་ལྟ་སྒོམ་སྤྱོད་འབྲས་མི་དགོས་པར་བསྟན་པའི་ལེའུ་སྟེ་བཅུ་གཉིས་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །ཐེག་དགུ་སྤང་ངམ་ཇི་ལྟར་བགྱི། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །ཡང་ཏི་ཉི་ཟླའི་སྙིང་པོ་ལ། །ཐེག་དགུ་སྤངས་པས་རྫོགས་མི་འགྱུར། །ཐེག་དགུ་སྤངས་ལེན་མེད་པར་རྫོགས། །ཡུལ་སེམས་གཉིས་སུ་མ་བཟུང་བས། །ཉན་ཐོས་ལྟ་བ་ངང་གིས་རྫོགས། །རྟེན་འབྲེལ་རྣམ་པར་རིག་མེད་པས། །རང་རྒྱལ་ལྟ་བ་ངང་གིས་རྫོགས། །ཡུལ་སེམས་གཉིས་མེད་མ་བཟུང་བས། །སེམས་ཙམ་ལྟ་བ་ངང་གིས་རྫོགས། །དོན་དམ་ཀུན་རྫོབ་གཉིས་མེད་པས། །དབུ་མའི་ལྷ་བ་ངང་གིས་རྫོགས། །དག་པ་རིགས་གསུམ་མགོན་མེད་པས། །ཀྲི་ཡའི་ལྟ་བ་ངང་གིས་རྫོགས། །མར་སྤྱོད་ཡར་ལྟའི་སེམས་མེད་པས། །ཨུ་པའི་ལྟ་བ་ངང་གིས་རྫོགས། །རིགས་ལྔ་སྐྱེ་འགག་གཉིས༷་མེད་པས། །ཡོ་གའི་ལྟ་བ་ངང་གི་རྫོགས། །ནང་རྒྱུད་མ་ཧྭའི་་གོ་པ་ནི། །ཐབས་དང་ཤེས་རབ་གཉིས་མེད་པས། །མ་ཧྭའི་ལྟ་བ་ངང་གིས་རྫོགས། །དབྱིངས་དང་ཡེ་ཤེས་གཉིས་མེད་པས། །ཨ་ནུའི་ལྟ་བ་ངང་གིས་རྫོགས། །རིག་པ་འགྱུ་བའི་ཤེས་པ་ལ། །རང་རྒྱུད་མེད་པས་ཞེན་མེད་པ། །ཨ་ཏིའི་ལྟ་བ་ངང་གིས་རྫོགས་། །ཆོས་ཉིད་ཀ་དག་ཆེན་པོ་ལ། །དག་དང་མ་དག་གཉིས་མེད་པས། །སྤྱི་ཏིའི་ལྟ་བ་ངང་གིས་རྫོགས། །མཁའ་ཀློང་རྣམ་དག་ཆོས་ཉིད་སྙིང་པོ་ལ། །བློས་བཏགས་ཆོས་རྣམས་མ་ལུས་ཡོངས་སུ་རྫོགས། །རྫོགས་ཆེན་ཡང་ཏི་ཡོ་ག་ལ། །སྤང་ན་དུག་ལྔ་སྤང་ཀྱང་སྤང་ལེན་ཡིན། །བསྒྲུབ་ན་སྐུ་གསུམ་བསྒྲུབ་ཀྱང་རྩོལ་བསྒྲུབ་ཡིན། །སྤང་ལེན་མེད་པ་ཉི་ཟླའི་སྙིང་པོ་ཡིན། །ཞེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། ཡང་ཏི་ཉི་ཟླའི་སྙིང་པོར་ཐེག་པ་དགུ་མ་སྤངས་ངང་གིས་རྫོགས་པའི་ལེའུ་སྟེ་བཅུ་གསུམ་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །དཀྱིལ་འཁོར་དབང་དང་དངོས་གྲུབ་ལ། །རེ་བར་བྱ་བའམ་ཡེ་ནས་རྫོགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཡང་ཏི་ཉི་ཟླའི་སྙིང་པོ་ལ། །འཇུག་པའི་དཀྱིལ་འཁོར་རེ་བའི་དངོས་གྲུབ་མེད། །ཆོས་ཉིད་བྱང་ཆུབ་སེམས་ཀྱི་དཀྱིལ་འཁོར་ནི། །གདོད་ནས་གསལ་བས་འདྲིར་མི་རེ། །མཁའ་ཀློང་རྣམ་དག་ཆོས་དབྱིངས་དཀྱིལ་འཁོར་ན། །རང་བྱུང་སྙིང་པོའི་ལྷ་ཚོགས་ངང་གིས་གསལ། །ད་གདོད་མི་བསྐྱེད་ཡེ་ནས་རྫོགས་པའི་ལྷ་། །སྤྱན་འདྲེན་མཆོད་བསྟོད་མི་བྱེད་ཡེ་ནས་རང་ལ་རྫོགས། །དངོས་གྲུབ་གཞན་ནས་མི་རེ་རང་གི་སེམས་ལ་གྲུབ། །དཀྱིལ་འཁོར་གཞན་ནས་མི་བྲི་སེམས་ལ་རྫོགས། །ས་ཚོན་དཀྱིལ་འཁོར་འདུས་བྱས་ཡིན། །འདུས་བྱས་དཀྱིལ་འཁོར་ཐམས་ཅད་འཇིག །དེ་ཕྱིར་རང་བྱུང་སེམས་ཀྱི་དཀྱིལ་འཁོར་ནི། །རང་བཞིན་ངོ་བོ་ཐུགས་རྗེ་གསུམ། །ཐོག་མ་དང་པོའི་དཀྱིལ་འཁོར་ཡིན། །འདོད་ཆགས་ཞེ་སྡང་གཏི་མུག་གསུམ། །བདེ་གཤེགས་གསུམ་གྱི་དཀྱིལ་འཁོར་ཡིན། །སེམས་ཅན་ལུས་ངག་ཡིད་གསུམ་ཀྱང་། །སྐུ་གསུང་ཐུགས་ཀྱི་དཀྱིལ་འཁོར་ཡིན། །སྣང་སྲིད་སྣོད་བཅུད་འཇིག་རྟེན་རྣམས། །མ་བྲིས་འོད་གསལ་དཀྱིལ་འཁོར་ཡིན། །སྐྱེ་འགྲོ་སྣང་སྲིད་སེམས་ཅན་རྣམས། །མ་སྐྱེས་ཡོངས་རྫོགས་ལྷ་ཚོགས་ཡིན། །སྣང་བ་སྐུ་ཡི་དཀྱིལ་འཁོར་ཡིན། །སྒྲ་གྲག་གསུང་གི་དཀྱིལ་འཁོར་ཡིན། །དྲན་རྟོག་ཐུགས་ཀྱི་དཀྱིལ་འཁོར་ཡིན། །སྟོང་གསུམ་འཇིག་རྟེན་མ་ལུས་ཀུན། །ཡེ་གདོད་མ་ཉིད་ནས་ཀ་དག་ཡིན། །རང་བྱུང་འོད་གསལ་ཆེན་པོ་དེ། །གསལ་དག་སྒྲིབ་མེད་དཀྱིལ་འཁོར་ཡིན། །དཀྱིལ་འཁོར་དེ་ལྟར་རྫོགས་པས་བསྐྱེད་མི་དགོས། །སྙིང་པོ་ཆོས་དབྱིངས་དཀྱིལ་འཁོར་ལ། །རང་བྱུང་སྐྱེ་མེད་གཙོ་བོ་བཞུགས། །འོད་གསལ་ཤར་ཕྱོགས་དཀྱིལ་འཁོར་ལ། །ཀ་དག་སྒྲིབ་མེད་ལྷ་ཚོགས་གནས། །ལྷོ་ཕྱོགས་རང་བཞིན་དཀྱིལ་འཁོར་ལ། །རང་བྱུང་སངས་རྒྱས་ལྷ་ཡང་བཞུགས། །ཉོན་མོངས་རྣམ་རྟོག་ནུབ་པའི་ནུབ་ཕྱོགས་ན། །ངང་གསལ་ཁྱེའུ་ཆུང་ཡེ་ནས་མ་བསྐྱེང་བཞུགས། །བློས་བརྟགས་བརྒྱད་ཁྲི་བཞི་སྟོང་བྱང་བའི་བྱང་ཕྱོགས་ན། །བློས་བརྟགས་མཚན་མ་གྲོལ་བའི་ལྷ་ཡང་བཞུགས། །མ་བསྐྱེད་ཡོངས་སུ་རྫོགས་པར་བཞུགས། །རིགས་ལྔ་ཆ་མཐུན་ཁྱད་པར་འཕགས། །རྩོལ་བསྒྲུབ་བྱས་ནས་བཞུགས་པ་མ་ཡིན་ཏེ། །ཡེ་ཐོག་མ་ཉིད་ནས་བཞུགས་པ་ཡིན། །ཡེ་ནས་བཞུགས་པས་སྤྱན་མི་འདྲེན། །གདོད་ནས་དག་པས་སྒྲིབ་མི་སྦྱང་། །ཀ་ནས་དག་པས་ད་མི་མཆོད། །ཡེ་ནས་བཟང་བས་བསྟོད་མི་དགོས། །རང་ལ་རང་གནས་གཤེགས་བཞུད་མེད། །གོང་དུ་བཤད་པའི་དོན་རྟོགས་ན། །དེ་ལས་མི་འདའ་དམ་ཚིག་ཡིན། །ཀ་དག་སྐྱེ་མེད་དོན་རྟོགས་ན། །དེ་ལས་མི་མདའ་དམ་ཚིག་ཡིན། །མིང་མེད་བརྗོད་འདས་དོན་རྟོགས་ན། །དེ་ལས་མི་འདའ་དམ་ཚིག་ཡིན། །དངོས་མེད་ཟང་ཐལ་དོན་རྟོགས་ན། །དེ་ལས་མི་འདའ་དམ་ཚིག་ཡིན། །བྱར་མེད་བློ་འདས་དོན་རྟོགས་ན། །དེ་ལས་མི་འདའ་དམ་ཚིག་ཡིན། །ཡང་ཏི་ཉི་ཟླའི་དོན་རྟོགས་ན། །འོག་མར་མི་སྤྱོད་དམ་ཚའག་ཡན། །དམ་ཚིག་དམ་ ག་ཅེས་བྱ་བ། །སྐྱེ་མེད་ཀ་དག་དམ་ཚིག་ཡན། །དཔེར་ན་ཆུ་དང་ཤེལ་སྒོང་འདྲ། །ཕྱ་ནང་སྐྱོན་མེད་ཀ་ནས་དག །དེ་ལ་ཆེད་དུ་བསྲུང་ ་བསྡམ་དུ་མེད། །དངོས་གྲུབ་གཞན་ནས་རེ་བ་མེད། །རང་གི་སེམས་ལ་ཡེ་ནས་གྲུབ། །དངོས་གྲུབ་དངོས་གྲུབ་ཞེས་བྱ་བ། །དངོས་ནི་སྐྱེ་མེད་སྙིང་པོ་སྟེ། །གྲུབ་པ་ཀ་དག་འོད་གསལ་ལོ། །དངོས་ནི་དངོས་མེད་ཟང་ཐལ་ཏེ། །གྲུབ་ནི་བློ་འདས་བྱར་མེད་གྲུབ། །དེས་ན་དངོས་གྲུབ་ཅེས་སུ་བཤད། །གོང་གི་དཀྱིལ་འཁོར་ངེས་ཚིག་ཀྱང་། །དཔེར་ན་རི་བོ་མཆོག་རབ་དཀྱིལ། །གླིང་བཞི་གླིང་ཕྲན་འཁོར་ཡིན་ནོ། །འབྱུང་བ་རིམ་བརྩེགས་དཀྱིལ་ཡིན་ལ། །གླིང་ཕྲན་བཅུ་གཉིས་འཁོར་ཡིན་ནོ། །དེ་ལ་ལྕགས་རི་མུ་ཁྱུད་བསྐོར། །ཁ་དོག་ལྔ་ཡི་ས་ཚོན་ཡེ་ནས་བཀོད། །ཕྱོགས་བཞི་མཚམས་བཞི་སྒོ་བཞི་ཡེ་ནས་གནས། །སྣོད་ཀྱི་འཇིག་རྟེན་དཀྱིལ་འཁོར་ན། །བཅུད་ཀྱི་སེམས་ཅན་ལྷ་ཚོགས་ཡིན། །རང་བཞིན་ལྷུན་གྲུབ་བུདྷའི་ལྷ་ཚོགས་སོ། །བྱ་བཙལ་རྩོལ་བསྒྲུབ་མེད་པར་ཡེ་ནས་རྫོགས། །དཀྱིལ་འཁོར་དཀྱིལ་འཁོར་ཞེས་བྱ་ན། །དཀྱིལ་ནི་སྙིང་པོའི་ཀློང་ཡིན་ནོ། །འཁོར་ནི་ཀ་དག་སྐྱེ་མེད་ཡིན། །དཀྱིལ་ནི་ཡེ་ནས་གཞ་ཡིན་ཏེ། །འཁོར་ནི་སྣང་སྲིད་འཁོར་འདས་ཡིན། །དཀྱིལ་ནི་ཆོས་ཀྱི་དབྱིངས་ཡིན་ཏེ། །འཁོར་ནི་གསལ་དག་འོད་གསལ་ཡིན། །ཞེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། ཡང་ཏི་གནས་ལུགས་ཀྱི་དཀྱིལ་འཁོར་བསྟན་པའི་ལེའུ་སྟེ་བཅུ་བཞི་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །དཀྱིལ་འཁོར་ཆེན་པོ་དེ་ལྟར་ན། །དབང་བསྐུར་བྱིན་བརླབ་འཚལ་མི་འཚལ། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །རྫོགས་ཆེན་ཡང་ཏི་རྟོགས་པ་ལ། །བྱིན་བརླབ་དབང་སྐུར་མི་དགོས་ཏེ། །རང་སེམས་གདོད་དག་སྐྱེ་མེད་ནམ་མཁའ་ལ། །ཐིག་ལེ་མཐོང་བརྟོལ་ཀ་དག་ཉི་ཟླ་ཤར། །མ་རིག་ལས་དང་ཉོན་མོངས་ཡེ་ནས་བརླག །དེ་དག་འོད་གསལ་ཆེན་པོའི་དབང་རྫོགས་སོ། །སྙིང་པོ་འདུས་མ་བྱས་པའི་དཀྱིལ་འཁོར་དུ། །རིག་གསལ་ངང་དངས་ཁྱེའུ་ཆུང་ལ། །ཐིག་ལེ་ཁོང་གསལ་བཅུད་བསྡུས་དབང་བསྐུར་བས། །རང་གྲོལ་ཟང་ཐལ་དབང་ཐོབ་བོ། །མཁའ་ཀློང་རྣམ་དག་ཆོས་དབྱིངས་དཀྱིལ་འཁོར་དུ། །སེམས་རིག་ངང་དངས་ཁྱེའུ་ཆུང་ལ། །ཐོལ་བྱུང་ངང་དངས་དབང་སྐུར་བས། །རང་བྱུང་ངང་དངས་དབང་ཐོབ་བོ། །རིན་ཆེན་གསལ་དག་འོད་ཀྱི་དཀྱིལ་འཁོར་དུ།།རིག་པ་ངང་དངས་ཀུན་བྱེད་ཁྱེའུ་ཆུང་ལ། །བྱ་མེད་རྩོལ་བསྒྲུབ་འདས་པའི་དབང་བསྐུར་བས། །བློ་ཟད་ཆོས་མེད་གཏིང་རྫོགས་མཐའ་ཡས་དབང་ཐོབ་བོ། །དབང་བསྐུར་དབང་བསྐུར་བྱར་མེད་དེ། །རང་སེམས་ཀ་དག་ངང་ལ་རྫོགས་པ་ལ། །རྫས་དང་བུམ་པའི་རྟེན་མེད་ཀྱང་། །བྱར་མེད་བློ་འདས་དབང་བསྐུར་བས། །རྩོལ་བྲལ་མིང་མེད་དབང་ཐོབ་བོ། །དབང་ནི་རང་སེམས་སྐྱེ་བ་མེད། །བསྐུར་བ་ཀ་དག་ཆེན་པོར་བསྐུར། །ཐོབ་ནི་འཕོ་འགྱུར་མེད་པར་ཐོབ། །དབང་ནི་ངང་དངས་གསལ་དག་སྟེ། །བསྐུར་ནི་དངོས་མེད་རྣལ་མར་བསྐུར། །ཐོབ་ནི་ཟང་ཐལ་རང་བྱུང་ཐོབ། །དབང་ནི་སྟོང་པ་ཀུན་ཏུ་འབྱུང་། །བསྐུར་ནི་འཛིན་པ་རང་དག་བསྐུར། །ཐོབ་ནི་རྣམ་དག་ཡེ་ཤེས་ཐོབ། །གཞན་གྱིས་བསྐུར་བའི་མཁན་པོ་མེད། །རང་གི་སེམས་ལ་ཡེ་ནས་རྫོགས། །ཞེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། རྫོགས་ཆེན་ཡང་ཏི་རྟོགས་པ་ལ་དབང་དང་བྱིན་བརླབ་གཞན་ནས་རེ་མི་དགོས་པར་བསྟན་པའི་ལེའུ་སྟེ་བཅོ་ལྔ་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །ཚོགས་དང་གཏོར་མ་མ་བཏང་བར། །ཚོགས་བསགས་སྨོན་ལམ་ཇི་ལྟར་རྫོགས། །ཞེས་ཞུས་སོ། སྟོན་པས་འཁོར་ལ་བཀའ་སྩལ་པ། །རྫོགས་ཆེན་ཡང་ཏི་ཡོ་ག་ལ། །ཚོགས་དང་གཏོར་མ་མི་དགོས་ཏེ། །ཚོགས་གསོག་གཏོར་མ་དགོས་ན་ཡང་ཏི་མིན། །ཅི་ཕྱིར་རྩོལ་སྒྲུབ་ཡིད་སྨོན་ཡིན། །ཡིད་སྨོན་ཆོས་ཀྱིས་སངས་མི་རྒྱ། །དེ་བས་ཡང་ཏི་ཡོ་ག་ལ། །ཚོགས་དང་གཏོར་མ་ཡེ་ནས་རྫོགས། །ཡེ་ནས་རང་ལ་རྫོགས་ལུགས་ནི། །ཚོགས་ནི་སྣང་སྲིད་འཁོར་འདས་ཏེ། །ཕུལ་ནི་ཀ་དག་ཆེན་པོར་ཕུལ། །དགྱེས་ནི་རང་བྱུང་སྐྱེ་མེད་དགྱེས། །ཚོགས་ནི་དུག་ལྔ་དུག་གསུམ་སྟེ། །ཕུལ་ནི་སྐུ་ལྔ་སྐུ་གསུམ་ཕུལ། །དགྱེས་པ་དོན་དམ་འགྱུར་མེད་དགྱེས། །ཚོགས་ནི་མཚན་མའི་རྣམ་རྟོག་སྟེ། །ཕུལ་ནི་རྩིས་གདབ་མེད་པར་ཕུལ། །དགྱེས་ནི་ཆོས་དབྱིངས་ཀློང་ཆེན་གྱིས། །གཏོར་ནི་བློས་བཏགས་ཆོས་རྣམས་གཏོར། །མ་ནི་ཆོས་ཉིད་རྣལ་མ་ཡིན། །གཏོར་བ་གྲུབ་མཐའི་ལྟ་སྒོམ་གཏོར། །མ་ནི་ལྟ་སྤྱོད་བསྒྲུབ་པ་མེད། །ཚོགས་གཉིས་མ་བསགས་ཡེ་ནས་རྫོགས། །སྒྲིབ་གཉིས་མ་སྦྱངས་ཡེ་ནས་དག །ཚོགས་དང་གཏོར་མ་མ་བཏང་བར། །ཀ་དག་སྙིང་པོའི་ཀློང་དུ་གྱུར། །ཚོགས་གསོག་བྱས་པས་དེར་མི་སླེབ། །སྨོན་ལམ་ཞེས་པའི་རང་བཞིན་ཀྱང་། །འདིར་བཏབ་ཕྱི་མར་མི་རེའོ། །སྨོན་ལམ་གང་ཡིན་ཡིད་སྨོན་ཏེ། །སྨོན་ལམ་ཞེས་པའི་ཐ་ཚིག་ཡིན། །སྨོན་པའི་སངས་རྒྱས་རང་ལ་རྙེད། །དེ་ཉིད་ཐར་ལམ་འགྲོ་བའི་ལམ། །དེ་ན་སྨོན་ལམ་ཞེས་སུ་བཤད། །ཀ་དག་སྐྱེ་མེད་ཀློང་གྱུར་པས། །སྨོན་ལམ་མ་བཏབ་ཡེ་ནས་རྫོགས། །ཞེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། ཡང་ཏི་ཉི་ཟླའི་སྙིང་པོ་ལ་ཚོགས་གཏོར་སྤོན་ལམ་མི་དགོས་པར་བསྟན་པའི་ལེའུ་སྟེ་བཅུ་དྲུག་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། ཡང་ཏི་ཉི་ཟླའི་སྙིང་པོ་ལ། །གོལ་སྒྲིབ་འཁྲུལ་པ་ཡོད་དམ་མེད། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ་། །ཡང་ཏི་ཉི་ཟླའི་སྙིང་པོ་རྟོགས་པ་ན། །གོལ་སྒྲིབ་འཁྲུལ་པ་གང་ཡང་མེད། །ཡེ་ནས་ཐོག་མའི་དོན་རྟོགས་གོལ་དུ་མེད། །སྐྱེ་མེད་ཀ་དག་རྟོགས་པས་སྒྲིབ་པ་མེད། །བྱ་མེད་བློ་འདས་རྟོགས་པས་འཁྲུལ་དུ་མེད། །ཡེ་ཤེས་སྤྱི་བླུགས་རྟོགས་པས་ཐེག་པའི་གོལ་སྒྲིབ་མེད། །ཡང་ཏི་ཡོ་ག་རྟོགས་པས་ན། །གོལ་སྒྲིབ་ཉིས་སྟོང་ལྔ་བརྒྱ་ཡང་། །ཚིག་གི་གོང་འོག་ཐེག་པས་གཅིག་ཏུ་ཆོད། །གོལ་སྒྲིབ་ཆོད་པས་འཁྲུལ་པ་གང་ཡང་མེད། །ཅེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། ཡང་ཏི་ཉི་ཟླའི་སྙིང་པོ་རྟོགས་པ་ལ་གོལ་སྒྲིབ་འཁྲུལ་པ་མེད་པར་བསྟན་པའི་ལེའུ་སྟེ་བཅུ་བདུན་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །མ་རིག་ཡེ་ཤེས་ཡོད་དམ་མེད། །འཆར་སྒོ་འཁྲུལ་སྒོ་ཅི་ལ་ཟེར། །ཞུསླ་པས། སྟོན་པས་འཁོར་ལ་བཀའ་སྩལ་པ། །ཡང་ཏི་ཉི་ཟླའི་སྙིང་པོ་ལ། །མ་རིག་ཡེ་ཤེས་གང་ཡང་མེད། །དཔེར་ན་ཉི་ཟླའི་སྙིང་པོ་ལ། །མུན་པ་ཡོད་པར་མ་གསུངས་སོ། །དེ་བཞིན་ཀ་དག་སྟོན་པ་ཡི། །འོད་གསལ་དེ་ལ་མ་རིག་མེད། །བག་ཆགས་སྒྲིབ་མེད་འཁྲུལ་སྒོ་མེད། །ཡེ་དག་རང་གསལ་ཡེ་ཤེས་ལ། །སྙིང་པོ་ཀློང་དུ་གྱུར་པས་འཆར་སྒོ་མེད། །ཐིག་ལེ་མཐོང་བརྟོལ་གསལ་མེད་ལ། །མ་རག་ཡོད་པར་མ་མཐོང་ངོ་། །མ་རག་ཡེ་ཤེས་རྣམ་གཉས་ཀྱང་། །རྣམ་རྟོག་བློ་ལ་གཉས་སྣང་ཏེ། །ཡང་ཏའ་དོན་རྟོགས་གཉས་ཀ་མེད། །མ་རག་ཡེ་ཤེས་ཐ་དད་མེད། །མ་རྟོགས་རྟོགས་པས་ལམ་དུ་གཅིག །འཆར་སྒོ་འཁྲུལ་སྒོ་གང་ཡང་མེད། །ཐིག་ལེ་སྤྱི་བརྟོལ་རྟོགས་པས་ན། །འཆར་སྒོ་མེད་ལ་འཁྲུལ་སྒོ་མེད། །དཔེར་ན་མཚན་མོའི་མུན་ནག་ལ། །སྨུརླ་གསལ་བའི་ཉི་ཤར་བས། །མུན་པ་མ་སྤངས་འོད་དུ་གསལ། །འོད་དང་མུན་པ་ནམ་མཁར་གཅིག །དེ་བཞིན་མ་རིག་སྒྲིབ་གཡོགས་ལ། །ཐིག་ལེ་གསལ་དག་ཉི་ཤར་བས། །མ་རིག་མ་སྤངས་ཀ་དག་ཆེན་པོར་གསལ། །བག་ཆགས་སྒྲིབ་གཡོགས་འོད་གསལ་ཆེན་པོར་གསལ། །གཏི་མུག་ཆོས་སྐུ་རང་བཞིན་གཅིག །རྒྱུ་རྐྱེན་འཕོ་འགྱུར་མེད་པའི་དོན་རྟོགས་ནས། །སྙིང་པོ་ཡང་དག་མ་ནོར་ངེས་པའི་ལམ། །སྐྱེ་མེད་ཀ་དག་བྱ་མེད་བློ་འདས་ཡིན། །དངོས་མེད་ཟང་ཐལ་མིང་མེད་དོན་རྟོགས་པས། །འཆར་སྒོ་འཁྲུལ་སྒོ་གཉིས་ཀ་མེད། །དེ་ཕྱིར་ཐོག་མར་ཡེ་སངས་རྒྱས། །ཞེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། ཡང་ཏི་ཉི་ཟླའི་སྙིང་པོ་རྟོགས་པས་མ་རིག་ཡེ་ཤེས་འཆར་སྒོ་འཁྲུལ་སྒོ་མེད་པར་བསྟན་པའི་ལེའུ་སྟེ་བཅོ་བརྒྱད་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །རྟོགས་དང་མ་རྟོགས་ཡོད་དམ་མེད། །སངས་རྒྱས་སེམས་ཅན་ཅ་ལ་ཟེར། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །ཡང་ཏ་ཉ་ཟླའ་ ང་པོ་ལ། །རྟོགས་དང་མ་རྟོགས་ཐ་སྙད་བློ། །བློ་ཡུལ་མ་ཟད་གྲོལ་ ་ཐོབ།རྟོགས་དང་མ་རྟོགས་སྙང་པོ་གཅིག །ཡེ་ཡིན་གློ་བུར་མངོན་སངས་རྒྱས། །ཀ་དག་མི་འབྲལ་རྟོགས་པ་ལ། །བློ་ཡུལ་མེད་ཀྱིས་མ་རྟོག་ཅིག །རྟོག་མཁན་མེད་ཀྱིས་མ་རྟོག་ཅིག ཁྲེས་རྟོགས་མེད་ཀྱིས་མ་ཤེས་ཤིག །ཤེས་ཡུལ་མེད་ཀྱས་མ་ཤེས་ཤིག ཁྲེས་རྒྱུ་མེད་ཀྱིས་མ་ཤེས་ཤིག ཁེས་མཁན་མེད་ཀྱིས་མ་ཤེས་ཤིག །གང་གི་གང་རྟོགས་ཅི་ཞིག་རྟོགས། །རྟོགས་ན་སེམས་དེ་ཇི་ལྟར་འདུག ཁྲེས་ན་གང་ཤེས་ཅིས་ཅི་ཤེས། ཁེས་པའི་རྒྱུ་ནི་ཅི་ཞིག་འདུག །སྟོན་པས་འཁོར་ལ་བཀའ་སྩལ་པ། །ཐམས་ཅད་རྟོགས་པས་རྟོགས་རྒྱུ་མེད། །ཅང་མེད་ངང་དངས་ཆེན་པོ་ཡིན། །ཐ་སྙད་ཙམ་སྟེ་མཚོན་རྒྱུ་མེད། །རྟོགས་པ་པོ་ནི་དངོས་མེད་གྲོལ། ཁེས་མེད་ཀུན་ཤེས་ཤེས་རྒྱུའི་དངོས་པོ་གྲོལ། །སྐྱེ་མེད་ཀ་དག་དངོས་པོའི་བློ་ལས་འདས། །ཚིག་གིས་ཤེས་རྟོགས་གང་ཡང་ཡོད་མ་ཡིན། ཀུན་ཤེས་ཀུན་རྟོགས་གང་ཡང་མ་བཏགས་བཞག །རྟེན་མེད་ཀ་དག་འོད་གསལ་བློ་འདས་སོ། །ཞེས་གསུངས་སོ། །རང་གྲོལ་རང་གསལ་ཀློང་གྱུར་པས། །སངས་རྒྱས་སེམས་ཅན་གཉིས་ཀ་མེད། །སྟོང་པ་ཀུན་འབྱུང་སྟོང་པར་སངས། །རང་བྱུང་རང་གྲོལ་རང་སངས་རྒྱས། །གཏི་མུག་མུན་པ་ཀ་དག་རྒྱས། །སངས་རྒྱས་གཞན་ན་མེད་ཀྱིས་མ་རེ་ཞིག །ཡེ་ཡིན་ཀློང་གྱུར་ངོ་ཤེས་པས། །སེམས་ཅན་འཁོར་བ་མེད་ཀྱིས་མ་དོགས་ཤིག །གཉིས་མེད་གཉིས་སུ་དབྱེར་མེད་པས། །སེམས་ཅན་སངས་རྒྱས་གཉིས་མེད་གཉིས་ཀ་མེད། །ཅེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། རྟོགས་མ་རྟོགས་སངས་རྒྱས་སེམས་ཅན་གཞི་ལ་དབྱེར་མེད་པར་བསྟན་པའི་ལེའུ་སྟེ་བཅུ་དགུ་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །དགེ་སྡིག་ལས་འཕྲོ་ཡོད་དམ་མེད། །མཐོ་རིས་ངན་སོང་ཅི་ལ་ཟེར། །ཞུས་པས། སྟོན་པས་འཁོར་ལ་བཀའ་སྩལ་པ། །རྫོགས་ཆེན་ཡང་ཏི་ཡོ་ག་ལ། །དགེ་བ་མི་བསྒྲུབ་སྡིག་མི་འགེགས། །རང་སར་གྲོལ་ཞིང་སྐྱེ་མེད་རྟོགས། །དགེ་བ་ཆེད་དུ་མི་བྱེད་མཐོ་རིས་སྐྱེ་རུ་མེད། །སྡིག་པ་ཆེད་དུ་མི་བྱེད་ངན་སོང་སྐྱེ་རུ་མེད། །དགེ་སྡིག་གཉིས་པོ་ཆེད་དུ་མ་བྱས་པས། །མཐོ་རིས་ངན་སོང་རེ་དོགས་གཡང་ས་མེད། །ལས་འཕྲོ་མི་ལེན་འདི་ཀ་ལྟ་བུར་གྲོལ། །ཅི་སྟེ་ལས་ཀྱི་དབང་གྱུར་ན། །རང་བྱུང་ཡེ་ཤེས་ག་ལ་ཡོད། །མཐོ་རིས་ངན་སོང་བླ་དགས་ཡིན། །ཡང་དག་དོན་ལ་མཐོ་རིས་ངན་སོང་མེད། །སྐྱེ་མེད་ཀ་དག་རྟོགས་པ་ལ། །ངན་སོང་ལྟུང་བའི་རྒྱུ་ཡང་མེད། །ཐིག་ལེ་ཁོང་གསལ་དོན་རྟོགས་པས། །མཐོ་རིས་ངན་སོང་རྒྱུ་ཡང་མེད། །ཡེ་ཡིན་རང་སར་གྲོལ་གྱུར་པས། །ལས་འཕྲོ་མི་ལེན་མུ་མཐའ་ཡས། །ཀ་དག་མིང་མེད་དོན་རྟོགས་པས། །མཐོ་རིས་ངན་སོང་སྐྱེ་ལྟུང་མེད། །དགེ་སྡིག་ལས་འཕྲོའི་ཁར་མི་འོང་། །རྒྱུ་རྐྱེན་ཆོས་ལ་བློ་མི་གཏོད། །དགེ་སྡིག་གཉིས་ལ་རྟེན་མི་འཆའ། །རྒྱུ་འབྲས་གཉིས་ལ་རག་མ་ལུས། །བྱ་རྩོལ་ཞེ་འདོད་རེ་དོགས་མེད། །ཅེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། ཡང་ཏི་ཉི་ཟླའི་སྙིང་པོ་ལ་དགེ་སྡིག་མཐོ་རིས་ངན་སོང་མེད་པར་བསྟན་པའི་ལེའུ་སྟེ་ཉི་ཤུ་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །སངས་རྒྱས་བྱ་བ་ཡོད་དམ་མེད། །དམྱལ་བ་བྱ་བ་ཅི་ལ་ཟེར། །ཞུས་པས། སྟོན་པས་འཁོར་ལ་བཀའ་སྩལ་པ། །ཐིག་ལེ་མཐོང་བརྟོལ་དོན་རྟོགས་པས། །སངས་རྒྱས་མེད་པས་སངས་རྒྱས་མིང་ཡང་མེད། །རྙེད་པར་འདོད་པས་བསྐལ་པ་བརྒྱར་མི་རྙེད། །སངས་རྒྱས་གང་ཡིན་བླ་དགས་ཡིན། །བླ་དག་ཚིག་ལ་སངས་རྒྱས་མེད། །སངས་རྒྱས་གང་ཡིན་ཞེ་འདོད་ཡིན། །ཞེ་འདོད་སངས་རྒྱས་དགོས་པ་མེད། །སངས་རྒྱས་ཡོད་འདོད་ཡིད་སྨོན་ཡིན། །ཡིད་སྨོན་སངས་རྒྱས་དགོས་པ་མེད། །སངས་རྒྱས་མེད་པས་སངས་ལ་རྒྱས་རྒྱུ་མེད། །འདོད་པས་མི་མྱོང་རེ་དོགས་ཡིན། །སངས་རྒྱས་མེད་ཀྱིས་མ་རེ་ཅིག །དམྱལ་བ་མེད་ཀྱིས་མ་དོགས་ཤིག །རེ་དོགས་གཉིས་མེད་མཐའ་ཆོད་ཅིག །ཡེ་ཤེས་གཏིང་རྫོགས་མཐོང་བརྟོལ་བས། །དམྱལ་བར་སྐྱེ་བའི་རྒྱུ་མེད་དོ། །དམྱལ་བའི་གནས་མེད་ཀ་དག་ཀློང་། །དངོས་ལ་དམྱལ་བའི་རྒྱུ་མེད་པས། །དམྱལ་བ་མེ་ལྕེའི་ཕྲེང་བ་ཡང་། །བྱང་ཆུབ་སེམས་ཀྱི་ཞིང་ཁམས་ཡིན། །འདོད་ཆགས་སྤྲུལ་པའི་སྐུ་རུ་རྫོགས། །ལྷ་རུ་སྐྱེ་བའི་གཡང་ས་བཅད། །ཞེ་སྡང་ལོངས་སྤྱོད་རྫོགས་སྐུར་རྫོགས། །དམྱལ་བར་སྐྱེ་བའི་གཡང་ས་བཅད། །གཏི་མུག་ཆོས་སྐུར་ཆེན་པོར་རྫོགས། །བྱོལ་སོང་སྐྱེ་བའི་གཡང་ས་བཅད། །ང་རྒྱལ་ངོ་བོ་གཉིས་ཀྱི་སྐུ། །ལྷ་མིན་སྐྱེ་བའི་གཡང་ས་བཅད། །ཕྲག་དོག་དོན་དམ་བདེ་བའི་སྐུ། །མི་རུ་སྐྱེ་བའི་གཡང་ས་བཅད། །སེར་སྣ་དབྱེར་མེད་སྐུ་རུ་རྫོགས། །ཡི་དགས་སྐྱེ་བའི་གཡང་ས་བཅད། །ཀ་དག་མིང་མེད་བློ་འདས་རྟོགས། །དམྱལ་བ་ལ་སོགས་འགྲོ་དྲུག་མེད། །ཅེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། ཡང་ཏི་ཉི་ཟླའི་སྙིང་པོ་རྟོགས་པ་ལ་སངས་རྒྱས་དམྱལ་བ་མེད་པར་བསྟན་པའི་ལེའུ་སྟེ་ཉེར་གཅིག་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །རྫོགས་ཆེན་ཡང་ཏི་ཡོ་ག་ཡིས། །མ་བསྒྲུབས་འབྲས་བུ་ཇི་ལྟར་ཐོབ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཉི་ཟླའི་སྙིང་པོ་ཡང་ཏི་ལ། །འབྲས་བུ་ཐོབ་དང་མ་ཐོབ་གཉིས་མེད་ཀྱང་། །རྩོལ་བས་འབྲས་བུ་མི་འགྲུབ་སྟེ། །རེ་ཞིག་འཁོར་ལ་བྲོད་པ་བསྐྱེད་ཕྱིར་བཤད། །རེ་དོགས་འབྲས་བུ་ངས་མ་བཤད། །ཡིད་སྨོན་འབྲས་བུ་ངས་མ་བཤད། །ཞེ་འདོད་འབྲས་བུ་ངས་མ་བཤད། །བྱ་བཙལ་འབྲས་བུ་ངས་མ་བཤད། །ཚོགས་བསགས་འབྲས་བུ་ངས་མ་བཤད། །གཞན་ནས་འབྲས་བུ་རེ་བ་ངས་མ་བཤད། །གཞན་ནས་འབྲས་བུ་ཐོབ་པ་ངས་མ་བཤད། །སྔོན་ཐོག་ཡེ་ནས་རང་ལ་རང་ཆས་ལྡན། །གཉིས་མེད་ཀློང་དུ་ཀ་དག་རང་གྲོལ་ལ། །ཐིག་ལེ་སྤྱི་བརྟོལ་གསང་བའི་ཡང་སྙིང་བསྒྲུབ། །སྟོང་གསལ་འོད་འབར་ཀློང་དཀྱིལ་དུ། །ཐིག་ལེ་ཡང་གསང་བཅུད་བསྡུས་པས། །ཐིག་ལེ་ཁོང་གསལ་འབྲས་བུའོ། །ཆོས་ཉིད་གསང་བའི་ཕོ་བྲང་དུ། །ཡེ་ཤེས་གཏིང་རྫོགས་ཀ་དག་པས། །གཏིང་མཐའ་ཡས་པའི་འབྲས་བུའོ། །མཁའ་ཀློང་རྣམ་དག་དཀྱིལ་འཁོར་དུ། །སྐྱེ་མེད་ཀ་དག་བློ་འདས་པས། །མུ་མཐའ་ཡས་པའི་འབྲས་བུའོ། །བྱ་བཙལ་རྩོལ་བས་མ་བསྒྲུབས་མ་བྱས་པས། །ཡོད་མེད་དབྱེ་བསལ་མེད་པ་སྟེ། །མིང་མེད་ཆེན་པོར་རང་གྲོལ་ལོ། །ཀ་དག་སྐྱེ་མེད་དངོས་པོ་མེད། །བྱར་མེད་འབྲས་བུ་བློ་ལས་འདས། །བྱ་བཙལ་ཞེ་འདོད་མ་བསྒྲུབས་པས། །གསང་སྤྱོད་འཕྲུལ་གྱི་སྙིང་པོ་ཡང་སྙིང་འདི། །རང་བྱུང་རང་གྲོལ་རང་སངས་ཉིད་དུ་གྲོལ། །བདེ་གཤེགས་གསང་བའི་སྙིང་པོའི་བཅུད་འདི་རྟོགས། །རེ་དོགས་བློ་ཡིས་མ་བསྒྲུབས་པས། །ཡེ་མེད་གཏང་མེད་ཡོད་རྒྱུ་ ་ཡང་མེད། ། ག་ལེ་ཁོང་གསལ་ཡེ་ཤེས་ཟང་ཐལ་ལ། །སྟོང་པའ་ཀློང་ནས་ཀུན་འབྱུང་བས། །ངང་དངས་རང་སངས་རང་གྲོལ་ལོ། །བྱ་བཙལ་རྩོལ་བས་མ་བསྒྲུབས་པར། །འདི་ཀ་རང་དུ་གྲོལ་བ་ཐོབ། །བསྒྲུབས་ནས་གཞན་ནས་ཐོབ་པའི་འབྲས་བུ་མིན། །རེ་ཞིག་འབྲས་བུའི་མིང་བཏགས་གོང་ལྟར་རོ། །ཞེས་གསུངས་སོ། ཁུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། ཡང་ཏི་ཉི་ཟླ་རྟོགས་པས་མ་བསྒྲུབས་འབྲས་བུ་ཐོབ་པར་བསྟན་པའི་ལེའུ་སྟེ་ཉེར་གཉིས་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །རྒྱུད་ཀྱི་མཚན་བཤད་ཇི་ལྟར་བཤད། །ཅེས་ཞུས་པས། སྟོན་པས་འཁོར་ལ་བཀའ་སྩལ་པ། །རྒྱུད་གསུམ་རྩེ་རྒྱལ་ཉི་ཟླའི་རྒྱུད་དུ་འདུས། །རྒྱུད་རྣམས་ཀུན་གྱི་རྩེ་མོ་བྱུང་རྒྱལ་བས། ཁུད་སྡེ་ཀུན་གྱི་སྤྱི་ཕུད་རྩེ་རྒྱལ་ཡིན། །དེ་ཕྱིར་རྒྱུད་ཀྱི་རྩེ་རྒྱལ་རྒྱུད། །ཉི་ཟླ་འོད་འབར་རྒྱུད་ཆེན་དང་། །མཁའ་ཀློང་རྣམ་དག་རྒྱུད་ཆེན་དང་། །རྒྱ་མཚོ་ཀློང་གསལ་རྒྱུད་ཆེན་དང་། །དེ་གསུམ་རྒྱུད་ཀྱི་རྩེ་རྒྱལ་སྤྱི་ཕུད་ཡིན། །དེ་ནས་འཁོར་གྱིས་ཞུས་པ་ལ། །ཉི་ཟླ་འོད་འབར་རྒྱུད་ཀྱིས་དོན་ནི་གང་ཞིག་བསྟན། །མཁའ་ཀློང་རྣམ་དག་རྒྱུད་ཀྱིས་དོན་ནི་གང་ཞིག་བསྟན། །རྒྱ་མཚོ་ཀློང་གསལ་རྒྱུད་ཀྱིས་དོན་ནི་གང་ཞིག་བསྟན། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །ཉ་ཟླ་འོད་འབར་རྒྱུད་ཀྱས་ན། །ཉ་མས་གསལ་བའ་གོ་ཡང་འབྱེད། །སྣང་གསལ་གོ་འབྱེད་འོད་གསལ་རྒྱུད། ། ང་པོ་ཀ་དག་སྟོན་པ་སྟེ། །ཡེ་ཤེས་གསལ་དག་མཚོན་པའ་རྒྱུད། །འོད་ཆེན་རབ་ཏུ་འབར་བས་ནི། །གཏི་མུག་མ་རིག་མུན་པ་སེལ། །བག་ཆགས་སྒྲིབ་གཡོགས་ཀ་དག་རྒྱུད། །མུན་པའི་སྨག་རུམ་སངས་ཏེ་རང་སར་གྲོལ། །གསལ་བའི་གོ་འབྱེད་ཉི་མའི་རྒྱུད། །ཙནྟྲ་ཟླ་བའི་རྒྱུད་ཀྱིས་ནི། །མཐའ་ཡི་མུན་སེལ་འོད་འབར་རྒྱུད། །མ་རིག་མུན་པ་སེལ་བ་ཡིན། །མ་རིག་ཀ་དག་ཡེ་ཤེས་གསལ། །རྨོངས་པའི་མུན་པ་སེལ་བའི་རྒྱུད། །ཟླ་བའི་འོད་འབར་མ་རིག་གཏི་མུག་སངས། །ཉི་མའི་འོད་འབར་སྣང་གསལ་ཡེ་ཤེས་རྒྱས། །དེ་ཕྱིར་ཉི་ཟླ་འོད་འབར་རྒྱུད། །ཟླ་བའི་འོད་འབར་ཐབས་ཀྱི་རྒྱུད། །ཉི་མའི་འོད་འབར་ཤེས་རབ་རྒྱུད། །དེ་ཕྱིར་ཐབས་དང་ཤེས་རབ་གཉིས་མེད་རྒྱུད། །མཁའ་ཀློང་རྣམ་དག་རྒྱུད་ཀྱིས་ནི། །མཁའ་ནི་རིག་པའི་འོད་གསལ་མཁའ། །ཀློང་ནི་སྙིང་པོ་ཆོས་ཉིད་ཀློང་། །རྣམ་དག་འཁྲུལ་པ་རྣམ་པར་དག །དེ་ཕྱིར་མཁའ་ཀློང་རྣམ་དག་རྒྱུད། །མཁའ་ནི་རྩལ་ཟེར་འོད་གསལ་ལ། །ཀློང་ནི་སྙིང་པོ་ཀ་དག་ཀློང་། །རྣམ་དག་བློ་སབཏགས་ཆོས་རྣམས་འགགས། །དེ་ཕྱིར་མཁའ་ཀློང་རྣམ་དག་རྒྱུད། །མཁའ་ནི་སྣང་གསལ་ནམ་མཁའ་ལ། །ཀློང་ནི་ཆོས་ཉིད་དབྱིངས་ཀྱི་ཀློང་། །རྣམ་དག་ཆོས་ཅན་ཆོ་འཕྲུལ་དག །སྤྲིན་དང་ཁུ་རླངས་ཆར་སེར་ཀུན། །ནམ་མཁའི་ཀློང་དུ་ཡེ་ནས་དག །དེ་བཞིན་སྙིང་པོ་མཁའ་ཀློང་དུ། །ཡན་ལག་རྩལ་ཟེར་མ་ལུས་དག །དེ་ཕྱིར་མཁའ་ཀློང་རྣམ་དག་རྒྱུད་ཆེན་ཡིན། །རྒྱ་མཚོ་ཀློང་གསལ་རྒྱུད་ཀྱིས་ནི། །བལྟ་བ་རྒྱ་མཚོ་ཀློང་ན་གསལ། །བསྒོམ་པ་རྒྱ་མཚོ་ཀློང་ན་གསལ། །སྤྱོད་པ་རྒྱ་མཚོ་ཀློང་ན་གསལ། །འབྲས་བུ་རྒྱ་མཚོ་ཀློང་ན་གསལ། །དམ་ཚིག་རྒྱ་མཚོ་ཀློང་ན་གསལ། །ས་ལམ་རྒྱ་མཚོ་ཀློང་ན་གསལ། །མན་ངག་རྒྱ་མཚོ་ཀློང་ན་གསལ། །རྒྱུད་ལུང་རྒྱ་མཚོཀློང་ན་གསལ། །ཡེ་ཤེས་རྒྱ་མཚོ་ཀློང་ན་གསལ། །རྒྱ་ནི་སྙིང་པོ་འགྱུར་བ་མེད། །མཚོ་ནི་ཆོས་ཉིད་ཡངས་པའི་མཚོ། །ཀློང་ནི་མཚོན་མེད་བརྗོད་ལས་འདས། །གསལ་ནི་སྐྱེ་མེད་ཀ་ནས་གསལ། །དེ་ཕྱིར་རྒྱ་མཚོ་ཀློང་གསལ་རྒྱུད། །རྒྱ་མཚོ་ཀློང་གསལ་བྱ་བ་ནི། །རྒྱ་མཚོ་སྙིང་པོ་སྐྱེ་མེད་ཡིན། །ཀློང་ནི་ཆོས་ཉིད་ཐིག་པའི་ཀློང། །གསལ་ནི་ཀ་དག་འོད་འབར་གསལ། །དེ་ཕྱིར་རྒྱ་མཚོ་ཀློང་གསལ་རྒྱུད། །རྒྱ་ནི་གཏད་མེད་རྟེན་མེད་བསྟན། །མཚོས་ནི་དམིགས་མེད་གཡོ་མེད་བསྟན། །ཀློང་ནི་བྱར་མེད་སྤྲོས་བྲལ་བསྟན། །གསལ་བས་ཡེ་དག་སྒྲིབ་མེད་བསྟན། །དེས་ན་རྒྱ་མཚོ་ཀློང་གསལ་རྒྱུད། །རྒྱ་མཚོ་སྐྱེ་མེད་ཀ་དག་ལྟ་བ་བསྟན། །ཀློང་གིས་གཡོ་མེད་རྣལ་མའི་སྒོམ་པ་བསྟན། །གསལ་གྱིས་ལྷུག་པ་བག་ཡངས་གོ་བདེ་བ། །བྱར་མེད་སྤྲོས་བྲལ་སྤྱོད་པ་བསྟན། །རྒྱུད་ཀྱི་ཐོག་མ་བར་མཐའ་མྲ །ཡེ་ཤེས་རྒྱུན་དུ་གནས་པའི་ཕྱིར། །སྙིང་པོ་རྒྱུན་ཆད་མེད་པའི་རྒྱུད། །སྔོན་ཐོག་དུས་ནས་ཐ་མ་མྲ །སྐྱེ་མེད་རྒྱུན་དུ་གནས་པའི་ཕྱིར། །སྐྱེ་མེད་ཀ་དག་སྙིང་པོའི་རྒྱུད། །གཞི་རླུང་དུས་ནས་ད་ལྟའི་བར། །འོད་གསལ་རྒྱུན་དུ་གནས་པ་ཡིས། །སྣང་གསལ་འོད་འབར་གསལ་དག་རྒྱུད། །ཅེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། རྒྱུད་ཀྱི་མཚན་བཤད་བསྟན་པའི་ལེའུ་སྟེ་ཉེར་གསུམ་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །རྒྱུད་འདི་བསྟན་པའི་སྐལ་ལྡན་ཇི་ལྟ་བུ། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །དཔེར་ན་སེང་གེའི་འོ་མ་ཡང་། །རིན་ཆེན་གསེར་ཟོར་བླུགས་པ་ལས། །སྣོད་ངན་ཕལ་དུ་བཞོས་གྱུར་ན། །བཅུད་ཀྱང་འབོ་ལ་སྣོད་ཀྱང་ཆག །དེ་བཞིན་ཉི་ཟླ་ཡང་ཏི་ཡང་། །སྣོད་ལྡན་འགའ་ལ་བསྟན་པ་ལས། །སྣོད་མེད་དག་ལ་བསྟན་གྱུར་ན། །ཆོས་ཀྱང་ཤོར་ལ་རང་ཡང་བརླག །དེས་ན་སྣོད་ཀྱི་ཁྱད་པར་གཅེས། །རྒྱུད་འདི་བསྟན་པའི་སྐལ་ལྡན་ནི། །སྨྲས་པ་མི་འགྱུར་རི་རབ་ལྟ་བུའི་བློ། །སྙིང་རྗེ་ཕན་སེམས་ཆེ་ཞིང་དཀོན་མཆོག་མཆོད། །བླ་མ་གཙུག་ཁུར་གདམས་ངག་སྙིང་ལ་འཆང་། །དམ་ཚིག་གཞུང་བསྲུང་རྣམ་སྨིན་ལས་ལ་འཛེམ། །རྒྱུད་འཇམ་ངང་རིང་སྐྱོ་དུབ་མེད་ལ་གཏད། །ང་རྒྱལ་སེར་སྣ་ཆུང་ལ་ཆོས་ཕྱོགས་གཏོང་། །རིན་ཆེན་ལ་སོགས་ཟང་ཟིང་ནོར། །ཆགས་མེད་སེར་སྣ་མེད་པར་གཏོང་། །དེ་ལ་ཡང་ཏིའི་རྒྱུད་འདི་གཏད། །རང་རྒྱུད་ངན་ལ་གྲོགས་མཆེད་བསླུ། །དམ་ཚིག་མེད་ལ་བརྩེ་གདུང་ཆུང་། །ཆེ་དགའ་སྡིག་སྤྱོད་ཆགས་སེམས་ཅན། །གཡོ་སྒྱུ་ཁྲེལ་མེད་ཐབས་ཀྱིས་བསླུ། །ལོགས་ལྟ་བྱེད་ཅིང་སྒྲོ་སྐུར་འདེབས། །སློབ་དཔོན་གསང་ནས་རང་ཆེ་འབྱིན། །གཡོ་དང་ཐབས་ཀྱིས་མན་ངག་འབྲིད། །ལག་ཏུ་ཐོབ་ནས་ཟོང་དུ་འཚོང་། །དེ་ལྟ་བུ་ཡི་སྣོད་ངན་ལ། །ཡུལ་མཁར་སྟེར་ཀྱང་མི་སྦྱིན་ནོ། །དེ་ལྟ་བུ་ལ་བྱིན་གྱུར་ན། །གཉིས་བསྡོང་གཡང་ལ་ལྷུང་བ་བཞིན། །གཉིས་ཀ་རྡོ་རྗེ་དམྱལ་བར་འགྲོ། །ཞེས་གསུངས་སོ། ཁུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། རྒྱུད་གཏད་པ་དང་སྣོད་ཀྱི་ཁྱད་པར་བསྟན་པའི་ལེའུ་སྟེ་ཉེར་བཞི་པའོ།། །།གུ་རུ་ལ་བསྟན་པ་འབྱུང་བའི་དུས་ཇི་ཙམ་ན་ལགས། ཞུས་པས། ང་ཡི་ཡང་སྙིང་ཉི་ཟླ་འདི། སྐུ་དང་གསུང་གི་བསྟན་པ་ནུབ། །གསང་སྔགས་ཐུགས་ཀྱི་བསྟན་པ་དར། །ལྔ་བརྒྱ་དུས་ཀྱི་ཐ་མ་ལ། །དུས་ངན་ཟེར་ཞིང་སྤྱོད་ངན་བྱེད། །རྒྱ་བོད་བྱེ་ཞིང་རྒྱལ་ཁྲིམས་འཇིག །ཆོས་སུ་རྫོགས་ཆེན་དར། བསྡེ་རྣལ་འབྱོར་དར། གོས་སུ་རེ་ཐུལ་ཁྱི་ཐུལ་དར་ལ་ལག་ཆ་དབྱུག་པ་མི་མགོ་དར། །ད་ལྟ་སངས་རྒྱས་ཡིན་ཟེར་ཉོན་མོངས་ཁ་མ་བྲི། །ཟོངས་སུ་ཆོས་འཚོང་ཉམས་མྱོང་གླུ་རུ་ལན། །སྤྱོད་པ་བབ་ཆོལ་གླིང་ཀུན་ཐོ་ཅོས་འགེངས། །མན་ངག་གྲོང་བསྐོར་རྣ་བ་རྫུན་གྱིས་འགེངས། །རྣལ་འབྱོར་ཟས་ནོར་འདོད་ཕྱིར་སྲང་ཁར་སྤྲང་སྟེ་རྒྱུ། །རི་ཁྲོད་འགྲིམས་པའི་ལད་མོ་གྲོང་རྒྱུའི་རྣལ་འབྱོར་བྱེད། །བརྟུལ་ཞུགས་གསང་སྔགས་མེད་པར་སྤྱོད་པ་ཐོ་ཅོས་སྒྲ་སྐད་འགེངས། །དེ་ལྟར་བྱས་པས་ཚེ་ཐུང་ནད་ཀྱང་མང་། །མི་ཐུབ་དྲུག་པོ་འབྱུང་བའི་དུས། །བདེ་གཤེགས་བྱིན་རླབས་མི་ཐུབ་དུས། །འབྱུང་བ་ས་ཡིས་གསེར་མི་ཐུབ། །མཁའ་འགྲོས་བཅོལ་བའི་གཏེར་མི་ཐུབ། །སྐྱེ་འགྲོས་གཏད་པའི་བློ་མི་ཐུབ། །ཉན་ཐོས་འདུལ་བའི་ཁྲིམས་མི་ཐུབ། །བཙུན་མས་རང་གི་ལུས་མི་ཐུབ། །བཙུན་པས་མདའ་རྒྱག་བྱེད་པའི་དུས། །ཕ་སྤུན་ནང་རྒྱས་བྱེད་པའི་དུས། །ཕྱི་ཡི་སོ་ཁ་ནང་དུ་ཟུག །ལན་གཅིག་དེ་ལྟ་བུ་ཡི་དུས་གཅིག་མཆི། །ཞེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ཆེན། རྫོགས་པ་ཆེན་པོ་ཡང་ཏི། ཨུ་རྒྱན་གུ་རུ་པདྨ་དང་། །ལོསྣྲོ་བ་སྐ་བ་དཔལ་བརྩེགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།པདྨ་གསལ་བའི་བྲག་ཕུག་ནང་དུ་སྦས། མངའ་བདག་ཉང་རལ་པ་ཅན་དང་སྙེ་མོ་ཞུ་ཡས་གནོད་སྤྱིན་འབར་གྱིས་བཏོན། གཏེར་རྒྱ། གསང་རྒྱ། གཏད་རྒྱ། ཟབ་རྒྱ། རྒྱ་རྒྱ་རྒྱ། གསང་ངོ་། ཟབ་བོ།། །།རྒྱ་གར་སྐད་དུ། །བཛྲ་ས་ཏྭ་ཤ་ཏ་ཨ་ཀྟ་ར་ཀ་ཨ་སྟི་ཁེ་ཀོརྟི་མ་རྭ་ཛ་ཏནྟྲ་ནཱ་