Ngb-pt-0004-vol-01-text
Front[edit]
Body[edit]
ཕབ་པའོ། །གཏེར་རྒྱ། སྦས་རྒྱ། གཏད་རྒྱ།། །།རྒྱ་གར་སྐད་དུ། །ག་ག་ན་གརྫིཏ་ར་བ་ཎ་མི་ཀྟ་བྱོ་ཏཱ་བེ་ཤོསྙི་སྭ་མུ་ཛ་ས་མྱ་རྒྱ་ཛ་ཡ་མུ་དྲུ་གྲནྟྲ་ཏནྟྲ། བོད་སྐད་དུ། ནམ་མཁའ་འབྲུག་སྒྲོགས་ཐོག་བབས་ཀློང་འདུས་སྤྱི་རྒྱལ་རྒྱ་མདུད་ཀྱི་རྒྱུད། །ཐིག་ལེ་ཀུན་འདུས་ལ་ཕྱག་ཚལ་ལོ། །འདི་སྐད་བདག་གིས་ཅིར་ཡང་མ་ཐོས ཅིར་ཡང་མ་མཚོན། ཚིག་ཏུ་མ་བརྗོད། དུས་མེད་པ་ན། སྐྱེ་མེད་སྙིང་པོའི་ཀློང་ན་ཀ་དག་ཆོས་སྐུ་བཞུགས། །དངོས་མེད་ངང་དངས་འཁོར་ལ་བློ་འདས་བྱར་མེད་གསུངས། །སྔོན་མེད་ཕྱིས་མེད་དུས་གསུམ་དབྱེར་མེད་དུས། །སྡུད་པ་པོ་ནི་དངོས་མེད་ངང་དངས་སོ། །དེ་ནི་ཕུན་སུམ་ཚོགས་པར་བསྟན་པའོ། །དེ་ནས་ངང་དངས་ཁྱེའུ་ཆུང་གིས། །སྐྱེ་མེད་ཀ་དག་ཆོས་སྐུ་ལ། །ཕུན་སུམ་ཚོགས་དོན་དེ་ལྟར་ན། །སངས་རྒྱས་བྱ་བ་ཡོད་དམ་མེད། །སེམས་ཅན་བྱ་བ་ཅི་ལ་ཟེར། །དེ་ཉིད་ངོ་བོ་གཅིག་མི་གཅིག །གཅིག་ན་འཁོར་འདས་གཉིས་བྱུང་གང་། །མི་གཅིག་འབྲེལ་པ་མེད་ལགས་སམ། །ཞེས་སྟོན་པ་ལ་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སངས་རྒྱས་མེད་པས་སངས་རྒྱས་མིང་ཡང་མེད། །ཀ་དག་ཉིད་ལ་སངས་རྒྱས་ཡོད་མ་ཡིན། །སེམས་ཅན་བྱ་བ་འགྱུ་སེམས་སྡུག་བསྔལ་ཅན། །དེ་གཉིས་གཞི་ལ་གྲུབ་པ་གང་ཡང་མེད། །མེད་ལས་བྱུང་བས་ངོ་བོར་གཅིག་པ་སྟེ། །ངོ་བོ་གཅིག་ལ་སྣང་ཚུལ་རྣམ་པ་གཉིས། །འཁོར་དང་མྱ་ངན་འདས་པ་གཉིས་བྱུང་ཡང་། །ཐ་དད་མ་ཡིན་ངོ་བོར་འབྲེལ་པ་ཡིན། །ཞེས་གསུངས་སོ། །ཕུན་སུམ་ཚོགས་པ་དང་གླེང་བསློང་དང་གླེང་གཞིའི་ལེའུ་སྟེ་དང་པོའོ།། །།དེ་ནས་ངང་དངས་ཁྱེའུ་ཆུང་གིས། །ཀ་དག་ཉིད་ལ་འདི་སྐད་ཞུས། །སེམས་དང་ཆོས་རྣམས་ཡོད་དམ་མེད། །སྐུ་དང་ཡེ་ཤེས་གང་ལ་ཟེར། །དུག་ལྔ་སྐུ་ལྔ་ཡོད་དམ་མེད། །མ་རིག་ཡེ་ཤེས་ཅི་ལ་ཟེར། །འཁོར་བ་མྱང་འདས་ཡོད་དམ་མེད། །སངས་རྒྱས་སེམས་ཅན་ཅི་ལ་ཟེར། །དགེ་སྡིག་བྱ་བ་ཡོད་དམ་མེད། །མཐོ་རིས་ངན་སོང་ཅི་ལ་ཟེར། །ཆོས་རྣམས་ཉན་བཤད་ཡོད་དམ་མེད། །ཐེག་སྒོ་རབ་འབྱམས་ཅི་ལ་ཟེར། །བག་ཆགས་སྒྲིབ་གཡོགས་ཡོད་དམ་མེད། །ལས་འཕྲོ་རྣམ་སྨེན་ཅི་ལ ཟེར། །ཞེས་་ན་པ་ལ་ཞུས་སོ། །འཁོར་གྱིས་གླེང་སློང་བའི་ལེའུ་ ་གཉིས་པའོ།། །།དེ་ནས་ངང་དངས་ཁྱེའུ་ཆུང་གིས། །ཆོས་དང་སེམས་རིག་ཡོད་དམ་མེད། །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །དངོས་མེད་ཀ་དག་སྟོང་པ་ལ། །ཆོས་རྣམས་མིང་ཡང་ཡོད་མ་ཡིན། །ཆོས་སུ་སྣང་བ་འཁྲུལ་པའི་སེམས། །ཆོས་རྣམས་སེམས་ཀྱི་འཁྲུལ་པ་ཡིན། །བྱར་མེད་བློ་འདས་ཆོས་རྣམས་མེད། །སེམས་མེད་རིག་མེད་འཛིན་རྟོག་མེད། །སེམས་མེད་ཀ་དག་ཀློང་དུ་གྱུར། །རིག་མེད་ངང་དངས་སྟོང་སང་ངོ་། །གསལ་གདངས་ཅིར་ཡང་བརྗོད་དུ་མེད། །ཅེས་གསུངས་སོ། །སེམས་དང་ཆོས་མེད་པར་བསྟན་པའི་ལེའུ་སྟེ་གསུམ་པའོ།། །།དེ་ནས་ངང་དངས་ཁྱེའུ་ཆུང་གིས་ཞུས་པ། སྐུ་དང་ཡེ་ཤེས་ཅི་ལ་ཟེར། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སྐུ་དང་ཡེ་ཤེས་བླ་དགས་ཡིན། །ཀ་དག་ཉིད་ལ་སྐུ་དང་ཡེ་ཤེས་མེད། །ཅེས་གསུངས་སོ། །སྐུ་དང་ཡེ་ཤེས་མེད་པ་བསྟན་པའི་ལེའུ་སྟེ་བཞི་པའོ།། །།ངང་དངས་ཁྱེའུ་ཆུང་གིས་ཞུས་པ། །དུག་ལྔ་སྐུ་ལྔ་ཡོད་དམ་མེད། །མ་རིག་བྱ་བ་ཅི་ལ་ཟེར། །ཞུསླ་པས། སྟོན་པས་བཀའ་སྩལ་པ། ཀ་དག་དྲི་མེད་དུག་མེད་པས། །དུག་ལྔ་སྐུ་ལྔ་གཉིས་ཀ་མེད། །འདོད་ཆགས་ཞེ་སྡང་གཏི་མུག་མེད། །ང་རྒྱལ་ཕྲག་དོག་ཀ་ནས་དག །སྐུ་གསུམ་དབྱེར་མེད་སྐུ་ལྔ་མེ ་ ་རོང་ སལ་མ་རི ་མེ ཅང་མེ ་ཡེ་ སལ་ཡེ་ ས་མེ མ་རི ་ཡེ་ ས་ མ་ ངས་ཀྱང་ ་ ་མ་ ་ མ་ ཉིས་ལས མ་རི ་ཡེ་ ས་ བ་པ་མེ ཅེས་ སུངས་སོ ་ལྔ་མ་རིག་ཡེ་ཤེས་མེད་པར་བསྟན་པའི་ལེའུ་སྟེ་ལྔ་པའོ།། །།ངང་དངས་ཁྱེའུ་ཆུང་གིས་ཞུས་པ། །འཁོར་བ་མྱ་ངན་ཡོད་དམ་མེད། །སངས་རྒྱས་སེམས་ཅན་ཅི་ལ་ཟེར། །ཞུས་པས། སྟོན་པས་བཀའ་སྩལ་པ། །འཁོར་བ་མྱ་ངན་བློ་ཡི་ཡུལ། །ཆགས་སྡང་བློ་ཡུལ་མ་ཟད་པར། །འཁོར་བ་ཟད་པར་མི་འགྱུར་རོ། །དངོས་མེད་བློ་འདས་འཁོར་འདས་ཆོས། །རྣམ་རྟོག་རང་སངས་ཀ་དག་རྒྱས། །ཅི་ཡང་མི་འགྱུར་འཛིན་རྟོགས་སངས། །སྡུག་བསྔལ་ངང་དངས་བདེ་ཆེན་རྒྱས། །སེམས་ཅན་རྟོག་སངས་ཀ་དག་རྒྱས། །ཀ་དག་དངོས་མེད་བློ་འདས་ལ། །སངས་རྒྱས་སེམས་ཅན་ཡོད་མ་ཡིན། །ཞེས་གསུངས་སོ། །འཁོར་འདས་མེད་པར་བསྟན་པའི་ལེའུ་སྟེ་དྲུག་པའོ།། །།ངང་དངས་ཁྱེའུ་ཆུང་གིས་ཞུས་པ། །དགེ་སྡིག་མཐོ་རིས་ངན་སོང་གང་། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །ཀ་དག་རྟོགས་ན་དགེ་སྡིག་མེད། །གཉིས་ཀ་བྱར་མེད་མ་བྱས་པས། །མཐོ་རིས་ངན་སོང་སྐྱེ་ལྷུང་མེད། །དངོས་མེད་ཀ་དག་རྣལ་རྟོག་པས། །དགེ་སྡིག་མཐོ་རིས་ངན་སོང་མེད། །སྡིག་པ་མི་སྤྱོད་མི་དགེ་སྒྲོད། །ཀ་དག་རེ་དོགས་ཁར་མི་འཆོང་། །ཞེས་གསུངས་སོ། །དགེ་སྡིག་མེད་པར་བསྟན་པའི་ལེའུ་སྟེ་བདུན་པའོ།། །།ངང་དངས་ཁྱེའུ་ཆུང་གིས་ཞུས་པ། སྐྱེ་མེད་ཀ་དག་ཆོས་སྐུ་ལ། །ཐེག་པ་བརྒྱད་ཁྲི་བཞི་སྟོང་ཡོད་དམ་མེད། །ཉན་བཤད་མཚོན་ཚིག་ཅི་ལ་ཟེར། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །ཐེག་པ་བརྒྱད་ཁྲི་བཞི་སྟོང་རྣམས། །མ་རྟོགས་ལོག་རྟོགས་དྲང་ཕྱིར་ལས། །ཀ་དག་ངང་ལ་ཆོས་ཀུན་མེད། །མེད་ལས་སྣ་ཚོགས་མེད་ལ་ཐིམ། །དབྱེར་མེད་གཅིག་འདྲེས་ཐ་སྙད་མེད། །བློ་འདས་དངོས་མེད་རྟོགས་པ་ཡིན། །མཚོན་པའི་ཚིག་གོ་རྒྱ་མཚོ་མེད། །ཆོས་མེད་བཤད་མེད་ཉན་པ་མེད། །མཚོན་མེད་དཔེ་མེད་ཟླ་མེད་དོ། །ཞེས་གསུངས་སོ། །ཆོས་སྐུ་ལ་ཉན་བཤད་མེད་པར་བསྟན་པའི་ལེའུ་སྟེ་བརྒྱད་པའོ།། །།དེ་ནས་ངང་དངས་ཁྱེའུ་ཆུང་གིས། །སྐྱེ་མེད་ཀ་དག་ཆོས་སྐུ་ལ། །བག་ཆགས་སྒྲིབ་གཡོགས་ཡོད་དམ་མེད། །ལས་འཕྲོ་རྣམ་སྨིན་ཅི་ལ་ཟེར། །ཞེས་ཞུས་པས། །སྟོན་པས་འཁོར་ལ་བཀའ་སྩལ་པ། །སྟོང་གསལ་ཀ་དག་དོན་རྟོགས་ན། །བག་ཆགས་སྒྲིབ་གཡོགས་མ་རིག་མེད། །ལས་འཕྲོ་རྣམ་སྨིན་བསྒྲིབ་མི་སྲིད། །ཀ་དག་སྟོང་གསལ་དངས་སང་ངེ་། །གསལ་དག་ཀློང་ན་ཅི་ཡང་མེད། །ཅི་སྣང་ཅིར་ཡང་མ་གྲུབ་སྟེ། །རྩལ་སྣང་རང་བྱུང་ཉིད་དུ་དངས། །དབྱེར་མེད་གདེང་ལྡན་སྒྲིབ་གཡོགས་མེད། །ཅི་སྟེ་ལས་ཀྱི་དབང་གྱུར་ན། །རང་བྱུང་ཡེ་ཤེས་ཡོད་མ་ཡིན། །བྱར་མེད་ལས་མེད་རྣམ་སྨིན་མེད། །ཅེས་གསུངས་སོ། །བག་ཆགས་ལས་ཀྱི་རྣམ་སྨིན་མེད་པར་བསྟན་པའི་ལེའུ་སྟེ་དགུ་པའོ།། །།དེ་ནས་ངང་དངས་ཁྱེའུ་ཆུང་གིས་ཞུས་པ། །ནམ་མཁའ་འབྲུག་སྒྲོགས་དཔེ་ཡིས་མཚོན་ནས་ནི། །གནམ་ཐོག་རྒྱ་མཚོར་བབས་པ་ཇི་ལྟར་བསྟན། །ཆུ་སྲིན་ནོར་བུ་རྒྱ་མདུད་དཔེ་གང་མཚོན། །ཞེས་ཞུས་པ་དང་། དེ་ནས་སྟོན་པས་འཁོར་ལ་བཀའ་སྩལ་པ། །མཁའ་ཀློང་ཕྱོགས་མེད་ནམ་མཁའི་ཀློང་ཡངས་ནས། །ཀ་དག་སྤྱི་རྗེ་བློ་འདས་འབྲུག་སྒྲོགས་པས། །དངོས་མེད་ཀློང་ནས་སྟོང་གདངས་འབྲུག་སྟོང་ལྡིར། །སྤྱི་ཕུད་དགུ་རྩེ་རྣམ་དག་བློ་འདས་བབས། །འཁོར་བའི་རྒྱ་མཚོ་ཀློང་བཅས་ཉོན་མོངས་རླབས། །བྱ་རྩལ་ཞེ་འདོད་མེད་པར་ཆུ་སྲིན་མགྲིན་པར་ཆུད། །དགོས་འདོད་ཀུན་འབྱུང་ཡིད་བཞིན་ནོར་བུ་འཆང་། །དངོས་མེད་རྒྱ་ལས་བློ་འདས་འཕྲུལ་གྱི་མདུད། །དུས་གསུམ་མི་འགྱུར་ཐིག་ལེ་ཉག་གཅིག་རྒྱུད། །ཉོན་མོངས་གཏན་བརླག་གནམ་ཐོག་ཀློང་བབ་རྒྱུད། །དྲག་ལ་མྱུར་བས་རྡུག་མེད་ཐོག་བབས་པས། །ཀ་དག་དངོས་མེད་བློ་འདས་ཡང་གསང་རྒྱུད། །ནམ་མཁའི་དཔེས་བསྟན་སྙིང་པོ་ཆོས་ཉིད་སྟོན། །ཕྱོགས་མེད་སྟོང་གསལ་གསལ་ལ་དངོས་གཞི་མེད། །འབྲུག་སྒྲོག་དཔེས་མཚོན་མ་བཀག་རྩལ་ཟེར་སྟོན། །སྣང་སྟོང་གྲག་སྟོང་རིག་སྟོང་དབྱིངས་སུ་དངས། །ཡིད་རིག་གར་ཡང་མི་འགྱུ་སྙིང་པོ་མ་ལ་ཐིམ། །ཐོགས་བརྡུག་མེད་པའི་གདམས་པའི་ཐོག་བརྒྱབས་པས། །ཁམས་གསུམ་འགྲོ་དྲུག་ཉོན་མོངས་དུག་ལྔ་བརླག །རྒྱ་མཚོའི་ཀློང་གི་རུས་སྦལ་ནོར་བུ་མདུད། །དགོངས་པ་མི་འགྱུར་གཡོ་འགུལ་མེད་པའི་ཀློང་། །རུས་སྦལ་མཁར་གཞོང་བཅུག་པས་གར་མི་བརྟོལ། །ཀ་དག་དངོས་མེད་རྟོག་པ་ལས་གཞན་མེད། །མེད་ལས་སྣ་ཚོགས་ཅང་མེད་ཅིར་ཡང་སྣང་། །གཅིག་ནི་མ་གྲུབ་སྟོང་ཉིད་ལས་བྱུང་དངས་སང་ངེ་། །ཡེ་མེད་དངོས་མེད་སྟོང་གསལ་ངང་གིས་དངས། །གཏིང་གསལ་འོད་གསལ་ཅང་མེད་བྱ་བཙལ་མེད། །བསམ་མེད་བསམ་གྱིས་མི་ཁྱབ་མཚོན་ཚིག་མེད། །བརྟག་མེད་བརྟག་དཀའ་བཙལ་མེད་བཞག་ན་གསལ། །ཐ་སྙད་ཙམ་ཡིན་སྨྲ་བསམ་ཡུལ་ལས་འདས། །ཞེས་གསུངས་སོ། །ནམ་མཁའ་འབྲུག་སྒྲོགས་ཐོག་བབས་ཀློང་འདུས་སྤྱི་རྒྱལ་རྒྱ་མདུད་ཀྱི་རྒྱུད་ལས། རྒྱུད་ཀྱི་མཚོན་དཔེ་བསྟན་པའི་ལེའུ་སྟེ་བཅུ་པའོ།། །།ནམ་མཁའ་འབྲུག་སྒྲོགས་ཐོག་བབས་ཀློང་འདུས་སྤྱི་རྒྱལ་ཆུ་སྲིན་ནོར་བུ་འཕྲུལ་གྱི་རྒྱ་མདུད་གྱི་རྒྱུད་རྫོགས་སོ།། །།ཨུ་རྒྱན་གྱི་སློབ་དཔོན་པདྨ་འབྱུང་གནས་དང་། ལོསྣྲོ་བ་སྐ་བ་དཔལ་བརྩེགས་ཀྱིས་བསྒྱུར་ནས་ལྷ་སྲས་ཁྲི་སྲོང་ལྡེ་བཙན་ལ་གདམས་པ། རིན་པོ་ཆེའི་གཏེར་དུ་སྦས་སོ།། །།རྒྱ་གར་སྐད་དུ། དྲིཉི་མ་ཧྭ་ནི་ཡ་མ་རཏྣ་དི་པ་མྱུ་ལ་ཏནྟྲ། བོད་སྐད་དུ། ལྟ་བ་ལ་ཤན་ཆེན་པོ་རིན་ཆེན་