གཅོད་ཀྱི་གདམས་པ་ཐུགས་ཀྱི་སྙིང་པོའི་ལོ་རྒྱུས

From Rangjung Yeshe Wiki Texts
LONGCHENPA-PECIN-26-LA-014
Jump to navigation Jump to search

ཉམས་ཁྲིད་ཞག་བདུན་མ klong chen rab 'byams kyi gsung 'bum (pe cin 2009)· Volume 26(LA) ཟབ་དོན་གྱི་གཞུང

Title གཅོད་ཀྱི་གདམས་པ་ཐུགས་ཀྱི་སྙིང་པོའི་ལོ་རྒྱུས
Wylie gcod kyi gdams pa thugs kyi snying po'i lo rgyus


Author Longchenpa ཀློང་ཆེན་རབ་འབྱམས་པ་དྲི་མེད་འོད་ཟེར།
Location klong chen rab 'byams kyi gsung 'bum (pe cin 2009), volume 26(LA), text 14, pages 125–147 (BDRC scan pages)
Section klong chen rab 'byams pa dri med 'od zer gyi gsung thor bu › gcod kyi skor


Tibetan text E-text from the typeset Pe cin edition (input 2020 on rywikitexts), cleaned 21 November 2026; not proofread against the print.
BDRC MW1KG4884, outline 6.10.1.17
Citation Klong chen rab 'byams pa. gcod kyi gdams pa thugs kyi snying po'i lo rgyus. In Kun mkhyen klong chen rab 'byams kyi gsung 'bum, vol. 26, pp. 125–147. Pe cin: Krung go'i bod rig pa dpe skrun khang, 2009. BDRC MW1KG4884.
Notes Title from the first line of the e-text; text boundaries and page numbers from the BDRC outline of MW1KG4884.
[edit]

༄༅། །གཅོད་ཀྱི་གདམས་པ་ཐུགས་ཀྱི་སྙིང་པོའི་« »ལོ་རྒྱུས་བཞུགས་སོ། །

« སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །བཀའ་ཤེས་རབ་ཀྱི་ཕ་རོལ་ཏུ་ཕྱིན་པའི་གཅོད་ཀྱི་གདམས་པ་འདི་ལ། ཡིད་ཆེས་ཤིང་ཁུང་བཙུན་པར་བྱེད་པ་བླ་མ་བརྒྱུད་པའི་རིམ་པ་ནི། བཅོམ་ལྡན་འདས་ཤཱཀྱ་ཐུབ་པས། ཐུགས་དང་པོ་བྱང་ཆུབ་མཆོག་ཏུ་སེམས་བསྐྱེད། བར་དུ་བསྐལ་པ་གྲངས་མེད་གསུམ་དུ་ཚོགས་བསགས། ཐ་མ་མཛད་པ་བཅུ་གཉིས་ཀྱི་ཚུལ་དུ་སངས་རྒྱས་ནས། དེའི་འབྲས་བུ་ཆོས་ཀྱི་འཁོར་ལོ་གྲངས་མེད་པ་རྣམ་པ་གསུམ་དུ་བསྐོར་བ་ལས། འདི་གཉིས་པ་མཚན་ཉིད་མེད་པའི་ཆོས་ཀྱི་འཁོར་ལོ་ཤེས་རབ་ཀྱི་ཕ་རོལ་ཏུ་ཕྱིན་པའི་དགོངས་པ་ཡིན། དེ་ལ་ཡང་མངོན་པར་རྟོགས་པའི་ཕ་རོལ་ཏུ་ཕྱིན་པ་དང༌། སྙིང་པོ་དོན་གྱི་ཕ་རོལ་ཏུ་ཕྱིན་པ་གཉིས་ལས། འདི་སྙིང་པོ་དོན་གྱི་ཕ་རོལ་ཏུ་ཕྱིན་པ་ཡིན། རབ་འབྱོར་གྱིས་ཞུས། སྟོན་པས་གསུངས། ཀུན་དགའ་བོས་བསྡུས། བྱམས་པས་ལུང་བསྟན་ཏེ། སློབ་དཔོན་ཐོག་མེད་ལ་བཤད། དེས་སློབ་དཔོན་དབྱིག་གཉེན་ལ། དེས་སློབ་དཔོན་ཨཱརྱ་དེ་ཝ་ལ། དེས་དམ་པ་རིན་པོ་ཆེ་ལ་བཤད། དེ་ལའང་དམ་པའི་ལོ་རྒྱུས་ནི། ཁྱད་པར་དྲུག་དང་ལྡན་ཏེ། སྐྱེ་བ་བདུན་གྱི་ཆེ་བ༌། སྐྱེ་ས་ཡུལ་གྱི་ཆེ་བ། བྱིན་རླབས་ཐུགས་རྗེའི་ཆེ་བ། སྦྱངས་པ་ཐུགས་རྗེ་ཡོན་ཏན་གྱི་ཆེ་བ། འབྲས་བུ་དངོས་གྲུབ་ཀྱི་ཆེ་བའོ། །དེ་ལ་དང་པོ་ནི་སྐྱེ་བ་བདུན་དུ་གཞན་གྱིས་བར་མ་ཆོད་པར་མི་ལུས་གཙང་མ་རིགས་བཞི་ཐོབ། པཎྜི་ཏ་འབའ་ཞིག་ཏུ་གྱུར། སྐྱེ་བ་འདིར་རིགས་བཞིའི་ནང་ནས། ཁྱད་པར་འཕགས་པའི་རིགས་བྲམ་ཟེར་སྐྱེས། སྐྱེ་ས་ཡུལ་གྱི་ཆེ་བ་ནི། རྒྱ་གར་གྱི་ཡུལ་རྩ་རི་སེང་ཧ་བྱ་བ་ཐུགས་རྗེ་ཆེན་པོའི་བྱིན་གྱིས་བརླབས་པའི་གནས་དེར་སྐུ་འཁྲུངས་ཏེ། ཡབ་བྲམ་ཟེ་བརྩོན་འགྲུས་གོ་ཆ། ཡུམ་བྲམ་ཟེ་མོ་ས་ར་ཧ་པ་བྱ་བ་ལ་བུ་གསུམ་ཡོད་པའི་བར་པ་ཡིན། བསླབ་པ་ཚུལ་ཁྲིམས་ཀྱི་ཆེ་བ་ནི། ལོ་བཅུ་གསུམ་ལ་དཔལ་བཱི་ཀྲ་མ་ལ་ཤི་ལའི་གཙུག་ལག་ཁང་དུ། རབ་ཏུ་བྱུང་ནས་དགེ་ཚུལ་མཛད། བླ་མ་གསེར་གླིང་པ་ལ་བྱང་ཆུབ་མཆོག་ཏུ་སེམས་བསྐྱེད་ནས། བྱང་ཆུབ་སེམས་དཔའི་བསླབ་པ་བསྲུངས། རྣལ་འབྱོར་ཕོ་མོ་ལྔ་བཅུ་རྩ་བཞི་ལ་དབང་ཞུས་ནས་སྔགས་ཀྱི་དམ་ཚིག་བསྲུངས་བའོ། །བྱིན་རླབས་ཐུགས་རྗེའི་ཆེ་བ་ནི། རྣལ་འབྱོར་ཕོ་མོ་ལྔ་བཅུ་རྩ་བཞིས་རྗེས་སུ་བཟུང་ནས་དབང་གདམས་པ་དང་བཅས་པ་གནང༌། བྱིན་གྱིས་བརླབས་པའི་མཐུ་དང་ནུས་པ་དཔག་ཏུ་མེད་པ་དང་ལྡན་ཞིང༌། ཡི་དམ་དང་ཊཱཀྐི་མ་དང་བཅས་པ་དཔག་ཏུ་མེད་པས་དབང་དང་བྱིན་རླབ་ཀྱི་བཀའ་བབས་དུ་མ་དང་ལྡན་པས་མཆོག་ཐུན་མོང་གི་དངོས་གྲུབ་ལ་མངའ་བརྙེས་པའོ། །སྦྱངས་པ་ཡོན་ཏན་གྱི་ཆེ་བ་ནི། ལོ་ལྔ་ནས་འབྲི་ཀློག་བསླབས་པས་ལེགས་པར་མཁྱེན། ཕྱི་མཚན་ཉིད་ཀྱི་སྡེ་སྣོད། ནང་གསང་སྔགས་ཀྱི་རྒྱུད་སྡེ་མ་ལུས་པ་མཁྱེན་ཅིང༌། རིག་པའི་གནས་ལྔ་ལ་མཁས་པའི་པཎྜི་ཏ་ཆེན་པོ་ཡིན་ནོ། །འབྲས་བུ་དངོས་གྲུབ་ཀྱི་ཆེ་བ་ནི། ཐུན་མོང་གི་དངོས་གྲུབ་མ་ལུས་པ་ཐོབ། མཆོག་གི་དངོས་གྲུབ་ཕྱག་རྒྱ་ཆེན་པོའི་རྟོགས་པ་ཁྱད་པར་ཅན་མངོན་དུ་གྱུར་པའོ། །དེ་ལྟ་བུའི་བླ་མ་དེས། འགྲོ་བའི་དོན་དུ་བོད་དུ་ལན་མང་དུ་བྱོན་པ་ལས། ལན་གཅིག་དུས་སུ། སློ་དཔོན་རྒྱ་གར་ནས་བོད་ལ་ཚུར་བྱོན་དུས། དགེ་བཤེས་དངོས་གྲུབ་སྙིང་པོ་ཞེས་བྱ་བ། གཡོར་པོ་གྲ་ཐང་ནས་ཡིན་པ་ཞིག །རྒྱ་གར་དུ་ཕྱིན་ནས་ལོ་ཙཱ་བའི་ཆོས་སློབ་དུ་ཕྱིན་པ་ཡིན་ཟེར་བའི་ཆུ་ཤིང་གི་འཁར་བ་ལ། སེམས་ཅན་གྱི་གཟུགས་སྣ་ཚོགས་བཀོད་པ་ཐོགས་པ་ཞིག་དང༌། བླ་མ་སྨ་ར་སེར་པོ་ཅན་བྱ་བ། བོད་ཀྱི་ཆོས་པ་ལ་ཡིད་མ་ཆེས་པར། རྒྱ་གར་དུ་གདམས་པ་འཚོལ་དུ་ཕྱིན་པས་མ་རྙེད་པ་ཚུར་ལོག་སྟེ། བལ་ཡུལ་དུ་བླ་མ་མ་ཧཱ་མུ་ལར་ཕག་མོ་ཞུ་རུ་འགྲོ་བ་དང༌། ཚོང་པ་མང་པོ་བསྡེབས་ནས་བྱུང་སྟེ། བལ་ཡུལ་དུ་ཟླ་བ་ཙམ་འགོར། དེ་ནས་བོད་དུ་རྗེ་དམ་པ་སངས་རྒྱས་དང་བསྡེབས་ནས་འོངས། དེར་ཁོང་གཉིས་ཀྱིས་བསམ་པ་ལ། ཨ་ཙ་ར་འདི་གྲུབ་ཐོབ་ཞིག་ཡིན་པར་འདུག་སྟེ། མུ་སྟེགས་པ་དང༌། ནང་པ་སངས་རྒྱས་པ་གང་ཡིན་མ་ཤེས་པས། གདམས་པ་ནི་མ་ཞུས། དེ་ནས་མང་ཡུལ་དུ་སླེབས་པ་དང༌། ཨ་ཙ་རའི་ཚོང་བརྡལ་གཉིས་འདུག་པས། དེ་ཀུན་ཨ་ཙ་ར་དེ་ལ་མོས་གུས་དྲག་པོ་བྱེད། མེ་ཏོག་མང་པོ་འབུལ་གྱིན་འདུག་པས། བླ་མ་ཇི་སྐད་བྱ་བ་ཡིན་དྲིས་པས། འདི་རྒྱ་གར་ན་བླ་མ་པཎྜི་ཏ་ཀ་མ་ལ་ཤི་ལ་ཟེར། བོད་ན་དམ་པ་རྒྱ་གར་བ་བྱ་བ་གྲགས། པཎྜི་ཏ་གྲུབ་ཐོབ་མཁས་པ་ཆེན་པོ་ཞིག་ཡིན། སྔར་ཡང་བོད་དུ་མང་དུ་བྱོན། ད་རེས་ཀྱང་བོད་དུ་བྱོན་པར་འདུག་ཟེར་བས། དེར་ཁོང་རྣམས་ཀྱིས་བྱིན་རླབས་ཤིག་ཞུ་བྱས་པས། དགེ་བཤེས་ལ་འཁར་བ་དེ་ཐོང་འདི་འདྲ་མ་འཛིན་སེམས་བསྐྱེད་འཆོར་བའི་རྒྱུ་ཡིན། ངས་ཀྱང་ཤེས་ཏེ་མ་བྱས། སེམས་ཅན་བསླུས་ན་དགོས་པ་མེད། སྐྱུར་ལ་ཐོངས་གསུངས་སོ། །གདམས་པ་ཞིག་ཞུ་བྱས་པས། ཁྱེད་རང་ཕྱིའི་སྣང་བ་ནང་དུ་མ་ལེན། ནང་གི་རིག་པ་ཕྱིར་མ་སྤྲོ། སེམས་ལུས་ལ་མ་ཆགས་པར་ལུས་སེམས་ཕྲོལ་ལ་ཞོག །གསུངས་པས། དེ་ལ་ངེས་ཤེས་སུ་ཆོས་འཚོལ་དུ་ཕྱིན་པས་མ་རྙེད་པར། བོད་དུ་ལོག་པས་བླ་མ་གྲུབ་ཐོབ་དང་མཇལ་འདུག་སྙམ་ནས། བླ་མ་གང་དུ་གཤེགས་པའི་ཕྱག་ཕྱིར་འབྲངས་ཏེ། གདམས་པ་ཞིག་ཐོབ་པར་བྱ་དགོས་དགོངས་ནས། ཕྱག་ཕྱི་ལ་སོང༌། དེ་ནས་ལབ་རྟག་རི་བྱ་བར་སླེབས་ནས། མགྲོན་ཁང་ཞིག་ན་བཞུགས་ཏེ། བྱིན་རླབས་ཞུ་བར་མང་པོ་བྱུང་བ་ལ། མིག་ལོང་པ་ཕྱེད་པ་དང༌། རྣ་བ་འོན་པས་སྒྲ་ཐོས་པ་ལ་སོགས་བྱུང་བས། ཐམས་ཅད་ངོ་མཚར་སྐྱེས་སོ། །ཡུལ་དེར་དགེ་བཤེས་སྐྱོ་ཤཱཀྱ་ཡེ་ཤེས་ཞེས་བྱ་བ། མདོ་སྒྱུ་འཕྲུལ་གྱི་མཁན་པོ་ཞིག་གདན་དྲངས་ནས། ཆོས་གསུང་གིན་བཞུགས་པའི་ཕྱག་ཕྱི་ལ། མྱང་སྟོད་གྲགས་ཆེན་གྲགས་ཆུང་བྱ་བ། ཕ་མེས་སྔགས་པ་མཐུ་ཆེན་ལ་འགྲས་ནས། མཛེ་བྱུང་དོགས་པའི་བྱིས་པ་གཉིས། ཕ་མཛེ་ཕོ་ཞིག་གིས་འབུམ་བཅུ་གསུམ་དུམ་པ་ཞིག་དང་དངོས་པོ་མང་པོ་དང་བཅས་པ་ཕུལ། བྱིས་པ་གཉིས་ཀྱི་གཉེར་གཏད་ནས་ཡོད་པ་ལ། དགེ་བཤེས་སྐུ་བསོད་ཆེ་བས་གཡེང་བས་ཁྱེར་ཏེ། བྱིས་པ་དེ་གཉིས་ལ་ཉ་ར་མ་བྱུང་སྨན་མ་བྱིན། གདོན་གྱིས་ཟིན་པའི་རྟགས་མང་པོ་བྱུང་ཡང༌། དགེ་བཤེས་ཐུགས་ཁྲལ་དུ་སོང་ཡོད་པ་ལ། མགྲོན་ཁང་ནང་དུ་ཨ་ཙ་ར་བྱིན་རླབས་ཅན་ཞིག་འདུག་ཟེར་བ་ཐོས་ནས། དེར་ཕྱིན་ནས་ཞུས་པ། སྤྱིར་ཁྱེད་རྒྱ་གར་བ་རིག་པའི་འབྱུང་གནས་ཡིན་པ་དང༌། ཁྱད་པར་དུ་བླ་མ་ཁྱེད་བྱིན་རླབས་ཅན་ཞིག་འདུག་ཟེར་བ་ཐོས་པས། བདག་ལ་བྱིན་པ་ལྷ་འདྲེའི་ཟ་འཕྲོ་གཉིས་ཡོད་པས། དེ་ལ་བྱིན་རླབས་ཐུགས་ལ་འདོགས་པར་ཞུ་བྱས་པས། དེ་ཙུག་བྱ་ཡི་གསུངས་ནས། དེའི་དུས་སུ་བླ་མ་སྨ་ར་སེར་པོ་ཅན་ལ། ད་ནི་ཁྱོད་འདོད་པའི་གདམས་པ་ཞིག་འོང་བ་གདའ་འོ་གསུངས། དེར་བསྙེན་བཀུར་བྱས་ནས་གདམས་པ་ཞུས་པས། བྱིས་པ་གཉིས། བླ་མ་སྨ་ར་ཅན། དགེ་བཤེས་སྐྱོ་དང་བཞི་ལ་གདམས་པ་བཏབས་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ། སྒྱུ་འཕྲུལ་དུམ་ཚོགས་དྲུག །ངོ་སྤྲོད་ཞལ་གདམས་དང་བཅས་པ་གནང་སྟེ། དེ་ཉིད་དུ་གདམས་ངག་བཏབ། བྱིས་པ་གཉིས་ཀྱིས་ཉམས་ལེན་བྱས་པས་གྲུབ་ཐོབ་བཟང་པོ་རེ་བྱུང་ངོ༌། །དེ་ནས་བླ་མ་སྨ་ར་སེར་པོ་ཅན་ཕ་ཡུལ་དུ་བྱོན་ནས། གཅོད་འདི་དང་བལ་པོ་ཧ་ལུ་མ་ལ་ཞུས་པའི་ཇོ་མོ་ཞལ་ཆུང་མ་ཚང་བར་ཉམས་སུ་བླངས་ནས་སྒྲུབ་པ་ལ་བརྩོན་པར་མཛད་དོ། །གདམས་པ་གཞན་ལ་མ་བྱིན། འགྲོངས་ཁར་ཁོང་རང་གི་ཉེ་གནས་སྨྱོན་པ་འབའ་རེ་ལ་གནང་ངོ༌། །སྐྱོ་ཤཱཀྱ་ཡེ་ཤེས་ཀྱིས་ཁོ་བོ་རང་གི་དབོན་བསོད་ནམས་བླ་མ་ལ་གནང༌། དེས་མ་གཅིག་ལབ་ཀྱི་སྒྲོན་མ་ལ་གནང༌། དེ་ཡང་མ་ཅིག་འདི་ཡེ་ཤེས་ཀྱི་མཁའ་འགྲོ་མའི་སྤྲུལ་པ་ཡིན་པར་མདོ་ལས་གསལ་ཞིང༌། ཁྱད་པར་དུ་སློབ་དཔོན་པདྨས་ལུང་བསྟན་པའོ། །དེའི་ལོ་རྒྱུས་ནི། སློབ་དཔོན་པདྨ་ལ། དབང་རིན་ཆེན་ཁ་ཆེས་ཞུས་པ། ཨེ་མ་སློབ་དཔོན་ཆེན་པོ་ལགས། །མ་གཅིག་ཇོ་མོ་མཚོ་རྒྱལ་འདི། །གང་དང་གང་གི་སྤྲུལ་པ་ཡིན། །དོན་ཆེན་གང་ལ་དགོངས་ཏེ་བྱོན། །འདས་གྲོང་མངའ་འམ་རྣམ་པ་གང༌། །ཞེས་ཞུས་པས། ཨོ་རྒྱན་གུ་རུས་བཀའ་སྩལ་པ། མཚོ་རྒྱལ་མ་གཅིག་འདུག་པ་དེ། །དང་པོ་སྒྲོན་མའི་སྤྲུལ་པ་ཡིན། །དགོས་ཆེད་ང་ཡི་གསང་སྔགས་འཛིན། །ཕྱི་རབས་ལས་ཅན་ཀུན་གྱི་མ། །ཆོས་ཀྱི་འཁོར་ལོ་བསྐོར་བར་བྱེད། ། འདས་གྲོང་མི་མངའི་རྣལ་འབྱོར་མ། །ང་དང་སྐད་ཅིག་འབྲལ་མེད་མ། །རྣམ་ཐར་ལེགས་པའི་ཆ་ལུགས་ཀྱིས། །ཟག་མེད་བདེ་བ་སྟེར་བྱེད་མ། །མ་གཅིག་འདུག་པའི་མཚོ་རྒྱལ་འདི། །རང་བཞིན་གནས་ལས་མ་གཡོས་ཤིང༌། །ལོ་ནི་དྲུག་ཅུ་ཁ་རལ་ཚེ། །ལབ་ཀྱི་སྒྲོན་མ་བྱ་བ་སྤྲུལ། །ཕར་ཕྱིན་སྙིང་པོའི་དོན་གྲོལ་ནས། །སེམས་ཅན་ཆོས་ཀྱི་དབྱིངས་སུ་འགོད། །སྣ་ཚོགས་ངེས་མེད་སྤྱོད་པ་བྱེད། །མཚོ་རྒྱལ་མ་གཅིག་སྤྲུལ་པ་ཞེས། །ལུང་བསྟན་པ་དེ་ཡང༌། བོད་ཡུལ་དབུས་ཀྱི་ས་ཆ། གཡོ་རུ་ཡམ་ཤོད་སྨད། ཨེ་ཆེ་མོ་ལབ་ཅེས་བྱ་བར་སྐུ་འཁྲུངས་ཏེ། ཡབ་ཆོས་ལ་སྐྱབས། ཡུམ་ཀླུ་མོ་བཟའ་འབུམ་ལྕམ། མིང་བོ་འཁོར་ལོ། །མ་གཅིག་འདི་ཆུང་ཤོས་ཡིན། དང་པོ་ཡུམ་གྱི་ལྷུམས་སུ་ཞུགས་དུས། ཡུམ་གྱི་ལུས་ཡང་ཞིང་བདེ་བ་དང༌། ཏིང་ངེ་འཛིན་རང་ཤུགས་སྐྱེ་བ་དང༌། དངོས་སམ་ཉམས་སྣང་ལ་ཞག་གྲངས་མང་པོར་ལུང་པ་ཐམས་ཅད་པདྨ་ཁ་ཕྱེ་བ་བཞིན། འོད་ཀྱིས་ཉིན་མཚན་མེད་པར་ཁེངས་པ་དང༌། ཡུམ་གྱི་རྨི་ལམ་དུ་ནམ་མཁའ་གོས་སུ་གྱོན་པ། ས་གཞི་གདན་དུ་བཏིང་བ། སྤྱི་བོ་ན་རིན་པོ་ཆེ་འདུག་པ། སྨིན་མཚམས་ནས་འོད་ཁ་དོག་རྣམ་པ་ལྔ་ཤར་བ་རྨིས་སོ། །སྐུ་འཁྲུངས་ཁར་ཡང་ཡབ་ཡུམ་གྱི་མནལ་ལམ་དུ། རིན་པོ་ཆེ་ཞིག་སྐྱེས་ཏེ། དེ་ལ་རིན་པོ་ཆེ་མང་པོ་འཕེལ་ནས། སེམས་ཅན་གྱི་འདོད་པ་ཚིམས་པ་དང༌། འཁྲུངས་པ་ཞིག་ཏུའང༌། སྒྲ་དང་འོད་དང༌། ས་གཡོ་བ་ལ་སོགས་པ་བཀྲ་ཤིས་པའི་མཚན་མ་མང་པོ་བྱུང་ངོ༌། །ཡབ་ཡུམ་གཉིས་ལ་ཏིང་ངེ་འཛིན་རང་བཞིན་གྱིས་སྐྱེ་བ་དང༌། འཁྲུལ་པའི་སྣང་བ་གཏད་མེད་དུ་ཡལ་བ་བྱུང་ངོ༌། །དེ་ནས་བཙས་པའི་ཚེ། ཀུན་གྱི་ཡིད་དུ་འོང་བ། གཟི་བརྗིད་དང་ལྡན་པར་འདུག་པས། ཡུམ་གྱིས་མཚན་མེ་ཏོག་སྒྲོན་དུ་བཏགས། ཡབ་ཀྱིས་སྐྱིད་དགེ་བཏགས་སོ། །ལོ་བདུན་བརྒྱད་ལོན་དུས། སློབ་དཔོན་རྒྱལ་འབྱུང་ལ་ཡི་གེ་སློབ་དུ་བཏང་བས། ངོ་སྤྲད་པ་ཙམ་གྱིས་ཤེས་ཤིང༌། ཕ་རོལ་ཏུ་ཕྱིན་པ་ཀློག་པ་ཙམ་གྱིས་དགོངས་པ་ཐུགས་སུ་ཆུད་ཀྱང་གཞན་གྱིས་བློར་མ་ཤོང་བས་ཐ་མལ་གྱི་ཚུལ་དུ་བཞུགས། ཡབ་ཡུམ་གྱིས་ར་ལུག་འཚོར་བཅུག་པས། རྡེའུ་མང་པོ་བསགས་ནས་གྲངས་དང་རྩེ་མོ་བྱེད་ཀྱིན་འདུག་པས། གྲོང་པ་རྣམས་ན་རེ། ཁྱེད་ཀྱི་བུ་མོ་འདིས་ལུག་རྫི་མི་ཡོང༌། མོ་རང་རྡེའུ་ལ་རྩེ་མོ་བྱེད། ར་ལུག་ཡན་དུ་འཇུག་པར་གདའ་ཟེར་བས། ཡབ་ཀྱིས་བལྟར་ཕྱིན་པས། མོ་རྡེའུ་ལ་རྩེ་ཡིན་འདུག་པས། ཁྱོད་རྩེ་མོ་བྱེད་པར་འདུག །ར་ལུག་སྟོར་འགྲོ་བྱས་པས། བོར་ནས་མི་འགྲོ །མཁའ་འགྲོ་མས་ཉ་ར་བྱེད་པས། ཚང་ཡོང་གསུང་ངོ༌། །རྡེའུ་འདི་ཚོས་ཅི་བྱེད་བྱས་པས། ཆོས་ཀྱི་འགྲེས་རྐང་འདྲེན་པ་ཡིན་ཟེར། ཁྱོད་ཀྱིས་ཆོས་ཤེས་སམ་བྱས་པས། ཤེས་ཟེར། ཆོས་ཇི་ལྟར་ཤེས། ཁྱོད་ཀྱི་ཆོས་དེ་ཆོས་ལོག་མ་ཡིན་ནམ་བྱས་པས་ཆོས་ལོག་མིན། སངས་རྒྱས་ཀྱི་བཀའ་དགོངས་པ་ཐམས་ཅད་གཅིག་ཏུ་འདུས་པར་ཤེས། དེ་ཡང་སྡེ་སྣོད་གསུམ་སེམས་སུ་འདུས། སེམས་སྒྱུ་མ་ལྟ་བུར་ཤེས། སྒྱུ་མ་ལྟ་བུ་དེ། གཟུང་བ་དང་བྲལ་བར་རྟོགས་ཟེར། འོ་ན་དེ་ངོ་ཤེས་གང་ལ་འཛིན་བྱས་པས། བར་སྣང་གི་ནམ་མཁའ་ལ་ལྟོས་དང༌། སྐྱེ་འགགས་གནས་གསུམ་དང་བྲལ་བར་འདུག་པས། དེར་ངོས་འཛིན་གསུང༌། འོ་ན་ངོ་མཚར་ཆེ། ཁྱོད་སྐལ་ལྡན་དུ་འདུག་པས། ངས་སྡིག་པ་བསགས་འདུག །ད་ར་ལུག་མ་འཚོ་ཟེར་ནས། བུ་མོ་གཉིས་པོ། ལྷུང་དཀར་པོའི་སློབ་དཔོན་རྒྱལ་འབྱུང་ཞེས་པའི་དྲུང་དུ། ཆོས་སྒོར་བཅུག་སྟེ། མ་གཅིག་གི་མཚན་དད་པའི་སྒྲོན་མར་བཏགས། ཨ་ཅེར་དད་པའི་ལྷ་མོ་བཏགས། རྒྱས་འབྲིང་བསྡུས་གསུམ་བློ་ལ་འཆད་པ་བྱུང༌། གཡའི་སྤྱན་གཟུགས་ཀྱི་ལྟད་མོ་ལ་ཕྱིན་པས། བཀྲག་དང་སྐྱེ་གཟུགས་ལེགས་པའི་ཐག་ཆོད། ཁྲོམ་ཐམས་ཅད་ཀྱིས་འདི་ལྷ་མོ་བས་ལེགས་པར་འདུག་ཟེར་བས། ལབ་ཀྱི་སྒྲོན་མ་བཏགས་སོ། །གཙང་དུ་རྫོགས་ཆེན་དང་སྒྱུ་འཕྲུལ་དང༌། བྱམས་ཆོས་འགྲེལ་ཆུང་ལ་མཁས་པར་བསླབས། རྒྱུད་སྡེ་ཀུན་གྱི་དགོངས་པ་ལ་མཁས་པར་མཁྱེན་པར་མཛད། དེ་ནས་སྐབས་ཤིག་ཏུ། ཡོན་བདག་གཅིག་གི་ཀློག་འདོན་མཛད་པའི་དུས་སུ། དབྱེ་རོང་ནས་དགེ་བཤེས་ཐོད་པ་འབའ་རེ་བྱ་བ། མི་རབས་བཅོ་བརྒྱད་དུ། དགེ་བཤེས་ཀྱི་བརྒྱུད་པ་མ་ཆད་པའི་སྲས། ཐོད་པ་འབའ་རེ་བྱ་བ་སྤྱན་དྲངས་ནས། རིམ་གྲོ་ཞུས་པས། ཁོང་ཡང་གཏོར་མ་བཤམས་ནས། གྱེར་ཆོག་མི་བྱེད་པར་བཞུགས་འདུག་ལ། ཡོན་བདག་ན་རེ། ཕྲིན་ལས་མི་མཛད་པ་ཅི་ལགས་ཞུས་པས། དོ་ནུབ་གཏད་མེད་དུ་ཤེས་པ་དགའ་བ་ཞིག་བྱུང༌། བྱེད་སྙིང་མི་འདོད་གསུངས། ཡོན་བདག་ཕོ་མོ་ཚོ་ལའང༌། བློ་བདེ་གསལ་བྱས་ནས། ཅི་ཡང་བྱེད་སྙིང་མི་འདོད་པ་འདི་ཡིན་འདི་མིན་གྱི་དྲན་པ་སྟོར་གྱིས་འགྲོ་བ་ཞིག་འདུག །མི་རུང་བ་ཡིན་ནམ་བྱས་པས། དགེ་བཤེས་ན་རེ་མི་རུང་བ་མིན། མཆོད་གནས་མ་འདི་རིགས་ལྡན་གཅིག་ཏུ་འདུག །འདིའི་བྱིན་རླབས་བཀྲ་ཤིས་པར་འོངས་གསུངས། དེར་དགེ་བཤེས་ཀྱིས་མ་གཅིག་མཚན་ལྡན་མར་གཟིགས་ནས། ཡབ་ཡུམ་ལ་བུ་མོ་བསླངས་པས། ཡབ་ན་རེ་འདི་བུ་མོ་ཕལ་པ་མ་ཡིན། མི་སྟེར་རང་གི་མཆོད་གནས་བྱེད་པ་ཡིན་ཟེར། མ་ན་རེ། བུད་མེད་ཀྱི་ཆོས་འགོ་ཐོན་པ་འང་དཀའ་བས། དགེ་བཤེས་ཡོན་ཏན་རིགས་རྒྱུད་དང་ལྡན་པ་འདི་ལ་སྦྱིན་པ་དྲག་ཟེར་ནས། དགེ་བཤེས་ཀྱི་ཇོ་མོ་ལ་བྱིན་ནོ། །དེ་ནས་དགེ་བཤེས་ཀྱིས་ཇོ་མོ་སྔོན་མ་བཞག་ནས། མ་གཅིག་དང་སྡེབས་ནས། ཀོང་པོ་ལ་རྙེད་པ་འཚོལ་དུ་ཕྱིན་པས། ལོ་ལྔ་ན། རྟ་བཅུ་གཉིས་ཙམ་དང་བཅས་པ་རྙེད་དོ། །སྲས་མོ་ཞིག་ཀོང་པོར་འཁྲུངས་པ་ལས། མིང་རྒ་ལྕམ་དུ་བཏགས། གཅིག་ལམ་བར་དུ་འཁྲུངས་པས་ལམ་ལྕམ་དུ་བཏགས། དེ་ནས་གང་སོ་གཅིག་མོར་བཞུགས་པའི་དུས་སུ། སྲས་གཅིག་འཁྲུངས་པས། སྙིང་པོའི་དོན་གྲུབ་པ་ཞིག་འོང་གསུངས་ནས། སྙིང་པོའི་དོན་གྲུབ་བཏགས་སོ། །དེའི་རྟིང་ལ་སྲས་གཉིས་འཁྲུངས་པར་འདུག་པས་ང་གྲུ་གཉིས་ཏེ། སྲས་གསུམ་དུ་འཁྲུངས། དེ་ནས་བཟའ་མི་ཚོ་དབྱེས་ཏེ་ཆོས་མཛད་དོ། །མ་ཅིག་གི་ཞལ་ནས། ཡབ་སྲས་ཀུན་ལ་ཐམས་ཅད་ཆོས་བྱེད་དགོས་པ་ཡིན། འཇིག་རྟེན་གྱི་བྱ་བ་གང་ལའང་སྙིང་པོ་མེད། ང་ཡང་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་སྟོན་པ་ལ་མཁས་པ་ཞིག་གི་རྩར་འགྲོ་གསུངས་པས། གྲལ་མོ་ཆོག་དཀར་རྒྱན་བྱ་བ་ན་རེ། གྲ་ཐང་སྐྱ་མོ་ན། དགེ་བཤེས་གྲ་པ་མངོན་ཤེས་བྱ་བ་མཁས་པ། ཕ་རོལ་ཏུ་ཕྱིན་པའི་ཉན་བཤད་སྒོམ་གསུམ་བྱེད་པ་ཞིག་ཡོད་པར་འདུག་ཟེར་བས། དེར་མ་ཇོ་གཡག་མོ་བྱ་བ་འབྲི་ཀློག་ཤེས་པ་ཞིག་ཁྲིད། གསེར་སྲང་བཅུ་གཉིས་ཁྱེར་ཏེ། བྲོས་ནས་བྱོན་པས་དགེ་བཤེས་ཕར་ཕྱིན་གསུངས་པ་དང་འཛོམས་ཏེ། ཕྱག་རྟེན་ཕུལ་ནས་གསན་པ་མཛད། དགེ་བཤེས་གྲ་པའི་ཞལ་ནས། ཁྱོད་ཆོས་གསན་པ་ལ་རབ་ཏུ་བྱུང་ན་འཐད་གསུངས་པས། སྔར་ཡང་ཆོས་སྒོར་ཞུགས་པའི་རྒྱུ་མཚན་རྣམས་ཞུས་ཏེ། འོན་ཀྱང་བསྟན་པ་ལ་དགོངས་ནས། ཆོས་སྒོར་ཞུགས་ནས་མཚན་ཚུལ་ཁྲིམས་རྒྱན་དུ་བཏགས་སོ། །ལོ་བདུན་དུ་ཉི་ཁྲི་ལེ་བརྒྱད་མ། ལྕགས་གཟེར་ཅན། རྒྱས་འབྲིང་བསྡུས་གསུམ། མངོན་རྟོགས་རྒྱན་ཡི་གེ་གཅིག་མ་ཡན་ཆད་ཕར་ཕྱིན་མང་དུ་གསན་ཏེ་མཁན་པོས་ཐོས་བསམ་ཀློག་འདོན་དེ་ཙམ་ཡིན། ད་ཇི་ལྟར་དུ་དགོངས་གསུངས་པས། མ་གཅིག་གི་ཞལ་ནས། ཆོས་ཐམས་ཅད་སེམས་སུ་རྟོགས་ལ་སེམས་ལ་བལྟས་པས། སྣང་བ་སྣ་ཚོགས་སུ་ཤར་བ་ཐམས་ཅད། ངོ་སྤྲོད་སྣ་ཚོགས་སམ་འབའ་ཞིག་ཏུ་གོ་ཞིང༌། ཕྱིན་ཅི་མ་ལོག་པའི་ངེས་ཤེས་སྐྱེས། ཆོས་དྲིས་ཚད་ཀྱི་ལན་དོན་ཐོག་ནས་ཐེབས་པར་གདའ་གསུངས། འོ་དེ་རྟོགས་པ་ནང་ནས་ཤར་བ་བྱ་བ་ཡིན། གཞན་ག་ལ་སོང༌། སེམས་ཅན་ལ་ཕན་འདོགས་པ་ལ་དབང་གིས་ཆོས་ཀྱི་སྒོ་འབྱེད་དགོས་པས། དབང་རེ་ཞུས་ཤིག་གསུངས། དེ་དུས་དོན་དབང་ཞིག་གནང་བར་ཞུ་ཞེས་ཇོ་མོས་ཞུས་པས། ཁྱོད་ལ་དབང་བསྐུར་བའི་སློབ་དཔོན་དེ་ང་མིན། གཙང་ན་ཟུར་གྱི་ཀ་བ་བཞི་བྱ་བ་ན། སྐྱོ་སྟོན་རྣམ་གཉིས་བྱ་བ་ཡོད། དེར་བྱོན་ནས་ཞུས་གསུངས། དེར་མ་ཅིག་གིས་གསེར་ལྷག་མ་རྣམས་ཁྱེར་ནས། གཙང་ཕྱོགས་སུ་བྱོན་ཏེ། སྐྱོ་ཤཱཀྱ་ཡེ་ཤེས་དང་མཇལ། གསེར་སྲང་གསུམ་ཕུལ་ནས། དབང་བསྐུར་ཞིག་ཐུགས་ལ་འདོགས་པར་ཞུ་ཞུས་པས། ངས་དོ་ནུབ་ལྷ་ལ་འདྲི་གསུངས། ནང་པར་སྔ་བར་གསེར་ཁྱེར་ནས་བྱོན་ཏེ། ཊཱཀྐི་མ་སུ་ཁ་སིདྡྷིས་དམ་པ་བྱིན་གྱིས་བརླབས། དེས་བདག་བྱིན་གྱིས་བརླབས། ངས་སློབ་དཔོན་བསོད་ནམས་བླ་མ་བྱིན་གྱིས་བརླབས་པ་ཡིན། འདི་ཆིག་བརྒྱུད་ཡིན་པས་ཁྱོད་དགེ་བཤེས་བསོད་ནམས་བླ་མས་བྱིན་གྱིས་རློབས་པར་འདུག །དེར་བྱོན་ནས་ཞུས་གསུངས་ནས་གསེར་གཏད་དོ། ཁོང་གང་ན་བཞུགས་ཞུས་པས་ཁམས་སུམ་པ་གསེར་ཤོད་དུ་སློབ་མ་ཞིག་གིས་གསེར་འབུམ་བཞེངས་པའི་རབ་གནས་ལ་གདན་དྲངས་ནས་དེ་ན་ཡོད་གསུངས། དེར་བྱོན་པས་ཇ་ཡུལ་དུ་སྐོར་བ་བྱེད་པ་དང་མཇལ། དེར་གསེར་ཕུལ་ནས་སྔར་གྱི་ལོ་རྒྱུས་རྣམས་ཞུས་པས། ངས་དོ་ནུབ་ལྷ་ལ་འདྲིའོ་གསུངས། ནང་པར་བྱོན་པས་དབང་བསྐུར་བའི་དུས་ལ་བབ་པར་འདུག །ང་ཁམས་ནས་ཡར་སླེབས་ནས། སང་ཕོད་གང་བར་ངོས་ལ་ཤོག་ཅིག །དེའི་བར་དུ་གསོལ་བ་དྲག་ཏུ་ཐོབས་ཤིགས་གསུངས། མ་ཅིག་གིས་ཞུས་པ། ཆོས་ཟབ་ལ་བར་ཆད་འོངས་བས། བར་ཆད་མི་འོང་པ་ཞིག་ཞུ་ཞུས་པས། འོ་ན་དེ་ལྟར་བྱའོ་གསུངས་ནས། འཇུག་པ་སྐྱབས་འགྲོ་སེམས་བསྐྱེད། གསོལ་བ་གདབ་པ། བྱིན་རླབས་ལུས་སེམས་འབྲེལ་པའི་གདམས་ངག་ཕོག །སྒོམ་པ་ཡིད་ལ་མི་བྱེད་པར་ངོ་སྤྲད། ལྟ་བ་བདུད་ཀྱི་གཅོད་ཡུལ་མི་འགྱུར་བ་བསྟན་ཏེ། ཉམས་ལེན་དེ་ལ་གྱིས་གསུངས། དེར་བླ་མ་ཁམས་སུ་བྱོན། མ་གཅིག་ཚུར་བྱོན་ཟངས་རི་རྟགས་ལྡན་ན། ཀློག་འདོན་བྱེད་ཀྱིན་ཡོད་ན། སང་ཕོད་བླ་མ་ཁམས་ནས་འོལ་ཁར་བྱོན་ཏེ། ཟངས་རིར་ཕྱག་ཕེབས་པ་དང༌། མ་གཅིག་གིས་མཇལ་བས། ཇོ་མོས་མི་ཟས་ཟོས་ནས་རང་སྡིག་མ་བསགས་སམ་གསུངས། ངས་ཇོ་སྟོན་མཁན་པོ་གྲགས་པའི་དྲུང་དུ། ཕ་རོལ་ཏུ་ཕྱིན་པའི་ཆོས་མང་དུ་ཞུས། ད་ལྟ་ཀློག་འདོན་ཀུན་ཡང་ལྟ་རྟོག་གི་ཚུལ་དུ་འདོན་པ་ལགས་ཞུས་པས། ཕ་རོལ་ཏུ་ཕྱིན་པའི་གཞི་ལམ་འབྲས་གསུམ་ཡོད་པ་ཡིན་ཤོད་དང་གསུངས། གཞི་ལམ་གཉིས་བཤད་ནས། དོན་ཤེས་རབ་ཀྱི་ཕ་རོལ་ཏུ་ཕྱིན་པའི་རྩལ་དབང་ཁྱེད་ལ་ཞུ་བ་ཡིན་ཞུས་པས། དེར་ཕ་རྒྱུད་ཀྱི་གདམས་པ་ངོ་སྤྲོད་དང་བཅས་པ་གདན་ཐོག་གཅིག་ཏུ་རྫོགས་པར་གསུངས་པས། དགོངས་པ་གཅིག་ཏུ་ཁྲོལ་ལོག་གེ་བྱུང་བས། བླ་མ་ཤིན་ཏུ་མཉེས་ཏེ། སྙིང་པོའི་དོན་མ་ལུས་པ་གསུངས། དེ་ནས་ཡར་ལམ་གང་བར་ལྷ་ཁང་རྙིང་པར་ཞོང་སྟོན་འོངས་ལ། ཀློག་སྐྱ་ལྷས་སྐྱབས། བྱ་ཁྲོམ་པ། འཛི་ལྷས་པ་རྣམས་ཀྱི་ཞུ་བ་ཕུལ་ནས། དབང་ཞུས་དུས། དེར་བྱོན་པ་དང་དབང་བསྐུར་བའི་དུས་ལ་བབས་སོ་གསུངས། ཐོག་མར་གཅོད་དབང་སེམས་ལ་བསྐུར། དེ་ནས་སྒྱུ་འཕྲུལ་གྱི་དབང་མོ་ཆེ་མཛད་པའི་སྟ་གོན་གྱི་དུས་སུ། མ་ཅིག་ལ་བྱིན་ཕེབས་ཤིང་ལུས་ཁྲུ་གང་གིས་ས་ལ་མི་རེག་པར་ཞི་བའི་གར་སྣ་ཉི་ཤུ་རྩ་གསུམ་མཛད། གསུང་སང་ཀྲི་ཏའི་སྐད་དུ་སྨྲ། ཐུགས་ཐོགས་པ་མེད་པའི་ཏིང་ངེ་འཛིན་གྱི་སྒོ་དུ་མ་ཕྱེ། སྐུ་གཅེར་བུར་བྱས་ཏེ། ཁང་པའི་རྩིག་པ་ལ་ཐོགས་པ་མེད་པར་བྱོན་ནས་ལྷ་ཁང་རྒྱབ་ན་སྡོང་པོ་གསེར་ལྷག་ཅན་བྱ་བ་ཀླུ་དྲག་པོ་ལག་སྐྱོང་བྱ་བ་གནས་པའི་སར་བཞུགས་སོ། །དེའི་དུས་སུ་དག་པའི་སྣང་བ་མང་པོ་བྱུང་སྟེ། མཁའ་འགྲོ་མས་ཚོགས་འཁོར་དྲངས་པ་དང༌། ཆོས་གསུངས་ཤིང་ལུང་བསྟན་པ་མང་པོ་ཡོད་དོ། ། སང་བླ་མའི་དྲུང་དུ་བྱོན་ཙ་ན། མཆེད་གྲོགས་རྣམས་ན་རེ། དེ་དབང་བསྐུར་ལ་མི་བཞུགས་པར། དབང་ཟབ་མོ་དེ་མ་ཐོབ་ཟེར། མ་གཅིག་གི་ཞལ་ནས། འདུས་བྱས་རྫས་ཀྱི་དབང་དེ་ཁྱེད་རྣམས་ཀྱིས་ཐོབ། ཆོས་ཉིད་དོན་གྱི་དབང་ངས་ཐོབ་གསུངས། དེར་བླ་མས་མ་གཅིག་ལ་ཅེ་རེ་གཟིགས་ནས། ཞལ་འཛུམ་པ་མཛད་ནས། ཁྱེད་རྣམས་དེ་སྐད་མ་ཟེར་ཅིག །སྤྱིར་དབང་མ་བསྐུར་ཡང་ཐོབ་བསྐུར་ཀྱང་ཐོབ་པ་དང༌། བསྐུར་ན་ཐོབ་མ་བསྐུར་ན་མི་ཐོབ་པ་དང༌། བསྐུར་ཡང་མི་ཐོབ་མ་བསྐུར་ཡང་མི་ཐོབ་པ་ལས། འདིར་མ་བསྐུར་ཡང་ཐོབ་པ་འདི་དགོད་བྲོ། ཁྱེད་ཚོས་ཐོབ་པའི་དབང་ཆུ་ཐིགས་པ་རེ་ཙམ་ཡིན། འདི་ལ་རིག་པ་རྩལ་གྱི་དབང་ཐོབ་བུམ་པ་གང་འཇོ་བྱ་བ་ཡིན་གསུངས། བླ་མའི་ཞལ་ནས་མ་གཅིག་ལ་ཁྱེད་ལ་ཇི་ལྟ་བུ་བྱུང་གསུངས་པས། མ་ཅིག་གི་ཞལ་ནས། སྡོང་པོ་གསེར་ཀླག་ཏུ་བསྡད་ཙ་ན། སྐད་ཅིག་མ་ཅིག་ལ་དཔལ་ཨོ་རྒྱན་དུ་ཕྱིན་ནས། མཁའ་འགྲོ་མ་རྣམས་ཀྱིས་ཚོགས་འཁོར་རྒྱ་ཆེན་པོ་བསྐོར། ཡེ་ཤེས་ཀྱི་ཊཱཀྐི་མ་རྣམས་ཀྱིས་ཆོས་མང་དུ་གསུངས། ད་ལྟ་ཡང་བློ་ལ་འདུག །རྗེ་བཙུན་མ་སྒྲོལ་མ་དང་མཇལ་ཏེ། ཞལ་ནས་རྣལ་འབྱོར་མ་ཁྱོད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་དེའི་སྟེང་ནས། སྤྱོད་པ་རྐྱེན་ངན་ལ་ཐོག་རྫིས་གྱིས་ལ་གཉན་ས་བརྒྱ་རྩ་བརྒྱད་དུ་འགྲིམས་ལ། ཕྱིར་མི་ལྡོག་པའི་ས་ཐོབ་པར་འགྱུར། ཁྱོད་ཀྱི་རྗེས་སུ་ཞུགས་པའང་མང་དུ་གྲོལ་བར་འགྱུར་རོ་ཞེས་གསུངས་སོ། །ཊཱཀྐི་མས་གསུངས་པའི་ཆོས་ཇི་སྐད་བྱ་བ་ཡོད་གསུངས་པས། མ་ཅིག་ལ་མཁའ་འགྲོས་གསུངས་པའི་ཆོས་ཀྱི་རྣམ་གྲངས་འདི་ལྟར་ཡིན་ཞེས་བླ་མ་ལ་ཞུས་པས། ལྟ་བ་ནམ་མཁའ་སྤྲོས་བྲལ། སྒོམ་པ་སེམས་ཉིད་དྲི་མེད། སྤྱོད་པ་སེང་གེ་རྩལ་རྫོགས། འབྲས་བུ་ཉི་མ་མུན་སེལ། མན་ངག་ཚེ་ལོ་ཉི་ཤུ་རྩ་གཅིག་དང་བཅས་པ་ཡོད་བྱས་པས། བླ་མ་ཤིན་ཏུ་མཉེས་པར་གྱུར་ཏོ། །མཆེད་གྲོགས་རྣམས་ཀྱིས་དབང་ཇི་ལྟར་ཐོབ་ཟེར་བ་ལ། མ་ཅིག་གི་ཞལ་ནས། ངས་དབང་བཞི་སྐད་ཅིག་མ་ལ་ཐོབ་ཟེར་ཏེ། ཕྱི་བུམ་པའི་དབང་ལུས་ལ་བདེ་བ། བསྐྱེད་རིམ་མ་བསྒོམ་ཡང་གཟུགས་རང་སྣང་དུ་གྲོལ་ནས་ཡི་དམ་དང་ཊཱཀྐི་མས་བྱིན་གྱིས་བརླབས་པར་གདའ། ནང་གསང་བའི་དབང་ངག་ལ་ནུས་པ་ཐོབ། སྒྲ་གྲག་སྟོང་དུ་ཤེས་པས། བསྙེན་སྒྲུབ་སྒྲ་གྲག་སྔགས་སུ་དག་པས་མ་བཟླས་ཀྱང༌། ལྷ་འདྲེ་རང་བཞིན་གྱིས་ཆུན་པར་གདའོ། །ཤེས་རབ་ཡེ་ཤེས་ཀྱི་དབང་སེམས་ལ་བདེ་བ་རང་བྱུང་དུ་སྐྱེས། རྩ་རླུང་འགྲེམས་པ་སྤྲོ་བསྡུ་ཐེབས། ཁ་སྦྱོར་མ་བསྟེན་ཀྱང་བདེ་སྟོང་རྒྱུན་ཆད་མི་གདའོ། །དེ་ཁོ་ན་ཉིད་ཚིག་དབང་རིན་པོ་ཆེ། ལྡེ་མིག་གི་དབང་ཐོབ་པས། ཆོས་ཉིད་སྤྲོས་བྲལ་གྱི་དོན་རྟོགས། བདེ་གསལ་མི་རྟོག་པ་རང་བྱུང་དུ་ཤར། ཐུན་མོང་གི་དངོས་གྲུབ་རང་བྱུང་དུ་ཤུགས་ལས་འབྱུང༌། ཆོས་དྲིས་ཚད་ཀྱི་ལན་དོན་ཐོག་ཤས་ཆེར་ཐེབས་པར་གདའ་གསུངས། དེ་ནས་བླ་མའི་གསུངས་ནས། ཁྱེད་ཡེ་ཤེས་ཀྱི་མཁའ་འགྲོ་མའི་རིགས་ཡིན། དབང་རབ་ཐོད་རྒལ་རྟོགས་གྲོལ་དུས་མཉམ་ཡིན། ཞལ་མཇལ་གསུང་ཐོས་ཀྱང་ངན་སོང་དུ་མི་འགྲོ་བས། གསང་སྤྱོད་དུ་མ་ཞུགས་པར་འགྲོ་དོན་མཛོད། སྦས་ནས་སྡོད་པ་ཕངས་གསུངས་ནས། རྫོགས་པ་ཆེན་པོའི་རྒྱུད་ཉི་ཤུ་རྩ་ལྔ་པ། རྒྱ་མཚོ་ཀློང་ལ་སོགས་པ་རྣམས་མཛུབ་ཁྲིད་དུ་གསུངས། དེ་ལྟར་ན་རྒྱུད་སྡེ་གསང་སྔགས་རྣམས་ལ་དགོངས་པ་ཕྱོགས་མེད་དུ་གྲོལ་ཏེ། བྱིན་རླབས་ཀྱི་དྲོད་ཀྱིས་ཕན་པ་ཕྱོགས་མེད་དུ་རྒྱས་ནས་བྱུང་བས། འགའ་ཞིག་ན་རེ། འདི་ལ་ནུས་པ་འདི་ཙམ་འོང་བ། མུ་སྟེགས་ཀྱི་མཁའ་འགྲོ་མའི་རིགས་མིན་ནམ་ཟེར་བ་ལ། མ་ཇོ་གཡག་མོས་བླ་མ་ལ་བསྟེན་ལུགས་དང༌། ལུང་བསྟན་ལུགས་རྣམས་བཤད་པས་ཡིད་ཆེས་པར་གྱུར་ཏོ། ། དེ་ནས་མ་ཅིག་གཉན་ཁྲོད་དུ་བྱོན་ནས། སྤྱོད་པ་ངེས་མེད་ཀྱི་ཚུལ་དུ་བཞུགས་ཀྱིན་ཡོད་པའི་དུས། མ་ཅིག་གྲ་ཐང་ན་བཞུགས་པའི་སྐབས་ཤིག་ན། དམ་པ་རིན་པོ་ཆེ་འཕན་ཡུལ་ཉི་ཁུང་དགོན་པ་ན་བཞུགས་པའི་དུས། ཞིང་སྐྱོང་གི་ཊཱཀྐི་མ་མང་པོ་བྱོན་ནས། ཡུམ་ཆེན་མོའི་སྤྲུལ་པ་ཤར་ཕྱོགས་ཀྱི་མཁའ་འགྲོ་མ་དེས། མུ་སྟེགས་ཀྱི་མཁའ་འགྲོ་མ་ཐམས་ཅད་བརྟུལ་ནས། ད་ལྟ་བོད་ན་ཡེ་ཤེས་ཀྱི་མཁའ་འགྲོ་མས། མུ་སྟེགས་ཀྱི་མཁའ་འགྲོ་མ་བཞི་འདུལ་ཞིང༌། ཕ་རོལ་ཏུ་ཕྱིན་པའི་དོན་རྒྱས་པར་སྟོན་པའི་ཕྱིར། ལབ་ཀྱི་སྒྲོན་མ་ཞེས་བྱ་བར་སྐྱེ་བ་བཞེས་ནས་ད་ལྟ་གྲ་ཐང་ན་ཡོད་དེ་ལ་བཏུད་ཅིང་རྗེས་སུ་ཡི་རང་ཕུལ་ལ། ཕྱི་རབས་ཀྱི་ལས་ཅན་རྣམས་ཀྱི་དོན་དུ། ཕར་ཕྱིན་དོན་གྱི་བཀའ་དང༌། གདམས་ངག་མ་ལུས་པར་སྟོན་ཅིག་དང༌། སྙིགས་མའི་སེམས་ཅན་སྡུག་བསྔལ་གྱིས་གཟིར་བ་རྣམས་སྨིན་ཅིང་གྲོལ་བར་བྱེད་དོ་ཞེས་ལུང་བསྟན་བྱས་ནས། དམ་པ་རིན་པོ་ཆེ་གྲ་ཐང་དུ་བྱོན་པ་དང༌། མ་ཅིག་གནས་ལ་སྐོར་བ་བྱེད་པ་དང༌། མཇལ་ནས་བསྟོད་པ་མཛད་པ། ཤེས་རབ་ལྔ་དང་ལྡན་པ་ཡི། །ཡུམ་ཆེན་མཁའ་འགྲོའི་སྤྲུལ་པ་ཁྱེད། །རྣམ་ཐར་གསུམ་གྱི་སྒོ་ཕྱེ་ལ། །བདུད་ཀྱི་དཔུང་འཇོམས་མཛད་པ་ཡི། །ལབ་ཀྱི་སྒྲོན་མ་ཁྱོད་ལ་བསྟོད། །བདག་ད་ལྟར་ཁྱེད་ལ་ཕྱག་འཚལ་ལོ། ཁྱོད་ཀྱི་སྒོམ་དང་ཉམས་མྱོང་གིས། །སྙིགས་མའི་འགྲོ་རྣམས་སྨིན་གྲོལ་བྱེད། །ཕྱི་རབས་དོན་དུ་གདམས་ངག་བཤད། གསུངས་ནས། ཆོས་དབང་སེམས་ལ་བསྐུར་བ་དང༌། ཕར་ཕྱིན་དོན་གྱི་གཞུང་གདམས་པ་དྲོད་ཚད་ཞལ་ཤེས་དང་བཅས་པ་ཐམས་ཅད་གནང་ངོ༌། ཁྱོད་ལ་ཆོས་བཤད་མི་དགོས། ང་དང་ཁྱོད་ལ་དབྱེར་མེད། ཆུ་ལ་ཆུ་བཞག་འདྲ། ཁྱོད་རང་གི་དོན་རྟོགས་པ་དེ་ལ་ནན་ཏན་མཛོད། ཐེ་ཚོམ་ཟ་བ་འགའ་རེ་འདུག་ན་དེ་རྣམས་ལ་གཞན་དོན་གྱི་གདམས་ངག་འདི་ལྟར་དུ་ཐོབས་ཤིག །དེ་ཡང་མཐོ་རིས་ལྷ་མིའི་ལམ། ངེས་འབྱུང་དགྲ་བཅོམ་པ་ལ་སོགས་པའི་ལམ་གཉིས་ཡིན་ནོ། །གསུངས་སོ། །དེའི་དོན་ལྔ་པ་གཅིག་ཞུ་ལགས་ཞུས་པས། ལྷ་མིའི་ལམ་སྐྱབས་འགྲོ་སེམས་བསྐྱེད་མི་དགེ་བ་བཅུ་སྤོང་བ། དགེ་བ་བཅུ་དང་དུ་ལེན་པ་ཡིན། བྱང་ཆུབ་ཀྱི་ལམ་ལ་བྱིན་རླབས་ནམ་མཁའ་སྒོ་འབྱེད། སྒོམ་པ་འཛིན་མེད་བློ་བྲལ། ལྟ་བ་སྤྲོས་མེད་བདུད་ཀྱིས་མ་ཁྱེར་བ་དག་ཡིན་མོད་གསུངས། ཆོས་འདི་ཡི་བརྒྱུད་པ་གང་ཡིན་ཞུས་པས། ཡང་དག་པར་རྫོགས་པའི་སངས་རྒྱས། དེས་འཇམ་དཔལ་སྨྲ་བའི་སེང་གེ །དེས་ཊཱཀྐི་མ་སུ་ཁ་སིདྡྷི། དེས་བདག་ལ། ངས་སྐྱོ་ཤཱཀྱ་ཡེ་ཤེས། སྐྱོ་སྟོན་བསོད་ནམས་བླ་མ། དེས་ཁྱོད་རང་ལ་བསྟེན་པ་དེ་ཡིན་མོད་གསུངས། གཞན་ཡང་ཁ་འཐོར་གྱི་སྐོར་དང༌། ཞི་བྱེད་རྟེན་འབྲེལ་མ་ལ་སོགས་པ་ཞུས་སོ། །དེ་རྣམས་བཤད་པ་ཚིག་གི་བརྒྱུད་པ་ཡིན། བྱིན་རླབས་ཐུགས་རྗེའི་བརྒྱུད་པ་ནི། ཡུམ་ཆེན་མོ། རྗེ་བཙུན་སྒྲོལ་མ། དེས་མཁའ་འགྲོ་མ་བདེ་བའི་དངོས་གྲུབ། དེས་དམ་པ་རིན་པོ་ཆེ། བསྡུ་ན་རྟོགས་པ་ཡེ་ཤེས་ཀྱི་བརྒྱུད་པ་ནི། ཡེ་ཤེས་ཀྱི་མཁའ་འགྲོ་མ་དངོས་ལ། མ་གཅིག་གིས་གསན་ཏེ། མདོ་རྒྱས་འབྲིང་བསྡུས་གསུམ་ལ་ཁ་ཏོན་བགྱིས་དང་གདམས་པ་ཞིག་ནང་ནས་འཆར་གསུངས། དེ་ལྟ་བུའི་བཀའ་བྱིན་རླབས་དང་ལྡན་པའི་མ་ཅིག་དེ། རྩོད་པ་ཐམས་ཅད་དང་བྲལ་ཞིང༌། མདོ་བསྟན་བཅོས་དང༌། གྲུབ་ཐོབ་དུ་མས་ལུང་བསྟན་ཅིང༌། ཁྱད་པར་མདོ་དྭངས་སྙིགས་འབྱེད་པའི་ལེའུ་བརྒྱད་ཅུ་གསུམ་པ་ལས། ངའི་བསྟན་པ་སྙིགས་མའི་རྩོད་པ་རྒྱས་བའི་དུས། །བྱང་ཕྱོགས་ཁ་བ་ཅན་ལྗོངས་སུ། །ཤེས་རབ་ཕ་རོལ་ཕྱིན་མ་ཡི། །སྤྲུལ་པ་ལབ་སྒྲོན་ཞེས་བྱ་འབྱུང༌། །ཞེས་སོ། །ཡང་འཇམ་དཔལ་རྩ་རྒྱུད་རྒྱས་པ་ལས། ང་ཡི་བསྟན་པ་སྙིགས་མ་ལ། །བྱང་ཕྱོགས་ལབ་ཀྱི་གྲོང་ཁྱེར་དུ། །རྒྱལ་བའི་ཡུམ་གྱི་སྤྲུལ་པ་ནི། །སྒྲོན་མའི་མིང་ཅན་འབྱུང་བར་འགྱུར། །སྐྱེ་མེད་སྙིང་པོའི་དོན་སྟོན་ཅིང༌། །གྲོང་དང་གྲོང་ཁྱེར་རི་སུལ་དང༌། །དུར་ཁྲོད་བས་མཐའ་ཁྱབ་པར་ཉུལ། །དེ་ཡི་ཆོས་ནི་དར་བར་བྱེད། །ཅེས་སོ། །དམ་པའི་ཞལ་ནས། བོད་ན་ཡེ་ཤེས་ཀྱི་མཁའ་འགྲོ་མ་ཡིན་པ། ཆ་ལུགས་བུད་མེད་དུ་བཞུགས་པ་བཞི་འདུག །གང་ལགས་ཞུས་པས། ལབ་སྟོད་ཀྱི་མ་ཅིག་ཞ་མ། སྣ་ནམས་ཀྱི་ཤེས་པ་སྒྲོན་མེ། འབྲི་མཚམས་ཀྱི་ཞང་ལྕམ་འགྲོ་ཆུང༌། ཟངས་རིའི་མ་གཅིག་ལབ་སྒྲོན། ཁོང་བཞི་པོ་མོན་དང་དཔའ་གྲོའི་ས་མཚམས་སུ། རྡོ་གུར་བྱ་བའི་བྲག་ཕུག་ཡོད་པར་ཚོགས་ནས། ཚོགས་ཀྱི་འཁོར་ལོ་བསྐོར་ཞིང་འདུས་པའོ། །དེ་ཡང་མ་ཅིག་ཞ་མ་དེ་བདེ་མཆོག་གི་གྲུབ་ཐོབ་ཡིན། ཤེས་པ་སྒྲོན་མེ་དེ་ཀུ་རུ་ཀུ་ལའི་གྲུབ་ཐོབ་ཡིན། ཕྱག་རྒྱ་ཆེན་པོས་རྒྱུད་གྲོལ་བ་ཡིན། ཞང་ལྕམ་འགྲོ་ཆུང་དེ་ཡང་དག་གི་གྲུབ་ཐོབ་ཡིན། རྫོགས་ཆེན་གྱིས་རྒྱུད་གྲོལ་བ་ཡིན། མ་ཅིག་ལབ་ཀྱི་སྒྲོན་མ་ཁྲོས་མ་ནག་མོའི་གྲུབ་ཐོབ་ཡིན། གཅོད་ཀྱིས་རྒྱུད་གྲོལ་བ་ཡིན། དེ་རྣམས་ཀྱི་ནང་ནས་མཆོག་ཏུ་གྱུར་པ་ནི། མ་ཅིག་ལབ་སྒྲོན་ཡིན་ཏེ། མ་ཅིག་གཉན་ཁྲོད་དུ་མར་བྱོན་ཏེ། སྤྱོད་པ་མཐའ་བཏོན་ནས། ལྷ་ཀླུ་ཀུན་ཀྱང་བཀའ་ལ་ཉན་ཅིང༌། དམ་ལས་མི་འདའ། ཀླུ་ལག་སྐྱོང་དང༌། མ་དྲོས་པ་དུས་བཟང་ལ་ཆོས་ཉན་དུ་འོངས། ཡར་ལྷ་ཤམ་པོ། བལ་ཡུལ་གངས་རིའི་ཇོ་བོ་རྗེ་ཆེན་པོ། འོ་དེ་གུང་རྒྱལ་ལ་སོགས་ལྷ་འདྲེ་ཐམས་ཅད་ཀྱིས་སྲོག་སྔགས་ཕུལ། ཆོས་ལ་སྤྱོད་ནས་བྲན་བཞིན་དུ་ཉན་ནོ། །ཡར་ལྷ་ཤམ་པོ། རྒྱལ་པོ་སྡེ་བཞི་ལ་སོགས་པ་འཇིག་རྟེན་པ་དང༌། འཇིག་རྟེན་ལས་འདས་པའི་ཁྲོ་བོ་དཔག་ཏུ་མེད་པ་ལ། ཆོས་ཀྱི་འཁོར་ལོ་བསྐོར་བ་ལ་སོགས་ངོ་མཚར་བའི་ལྟས་མང་པོ་བྱུང་ཞིང༌། གཞན་ཡང་མངོན་ཤེས་དང༌། རྫུ་འཕྲུལ་བསམ་གྱིས་མི་ཁྱབ་པ་དང་ལྡན་ནས། སྙིགས་མའི་དུས་འདིར་རྩོད་པ་དང་བྲལ་བའི་མ་ཅིག་དེ་ལ། གཙོ་ཆེ་བའི་མན་ངག་མང་དུ་ཡོད་ཀྱང༌། སྐུ་གསུམ་གྲོལ་བའི་ལམ་མཆོག་ཏུ་གྱུར་པ་འདི་ལ། བརྒྱུད་པ་མང་དུ་གྱེས་ཏེ། ཐར་པའི་ལམ་སྲོལ་དུ་མ་ཞིག་འཛུགས་པ་ལགས་ཤིང༌། དེ་ཡང་བཀའ་མ་དང༌། གཏེར་མ་དང༌། ཐུགས་བརྒྱུད་ལ་སོགས་ཟུང་བཞི་ཡ་བརྒྱད་དོ། །སྤྱིར་མ་གཅིག་ལ་བུ་སློབ་མང་པོ་ཡོད་ཀྱང༌། བརྒྱུད་འཛིན་གྱི་སྲས་བཅུ་དྲུག་ཏུ་གྲགས་སོ། །དེ་ལ་སྲས་པོ་བཞི་སྲས་མོ་བཞི། རང་དང་མཉམ་པའི་སྲས་བརྒྱད་དོ། །སྲས་པོ་བཞི་ནི། འཁྲུངས་པའི་སྲས་རྒྱལ་བ་དོན་གྲུབ། བརྒྱུད་འཛིན་གྱི་སྲས་རྟོགས་ལྡན་ངག་གི་དབང་ཕྱུག །ཐུགས་ཟིན་གྱི་སྲས་གྲོལ་ཏི་རྒྱལ་བའི་འབྱུང་གནས། སྐལ་ལྡན་གྱི་སྲས་སྒོམ་ཆོས་སེང་གེ །རང་དང་འདྲ་བའི་སློབ་མ་རྒྱན་བཞི་བྱ་བ་ནི། ལབ་ལུང་གི་འབྲོ་བཟའ་རྒྱན། གངས་དཀར་ལྕེ་རང་གི་ཞང་ལྕམ་དཔལ་རྒྱན། གནོན་ཚེའི་ལྟོ་ཆ་འབུམ་རྒྱན། འཕན་ཡུལ་གྱི་ཉང་མོ་བསོད་ནམས་རྒྱན་ནོ། །རང་དང་མཉམ་པའི་སྲས་བརྒྱད་ནི། མཁྱེན་པ་རང་དང་མཉམ་པ་དྭགས་པོ་རོང་ཁའི་སྐྱེ་མེད་དགའ་ཡན། རྟོགས་པ་རང་དང་མཉམ་པ་ལྷོ་བྲག་གཏམ་ཤུལ་གྱི་ཞིག་པོ་ཧུར་ཐོན། ཐུགས་རྗེ་རང་དང་མཉམ་པ་འཕན་ཡུལ་གྱི་སྐལ་ལྡན་སེང་གེ །མངོན་ཤེས་རྫུ་འཕྲུལ་རང་དང་མཉམ་པ་མལ་གྲོ་ལ་ཡི་རྒྱལ་སྒོ་ཧག་ཐོན། འགྲོ་དོན་རང་དང་མཉམ་པ་གོང་པོའི་རྗེ་བཙུན་ཟིལ་གནོན་དང་བརྒྱད་དུ་བྱུང་ངོ༌། དེ་ལ་སྲས་དོན་གྲུབ་ནས་བརྒྱུད་པ་ཚོ་དབུས་ན་དར་ཆ་ཆེ། སྟོང་སྡེའི་བརྒྱུད་པ་ལྷོ་བྲག་ན་དར་ཆ་ཆེ། ཁུ་སྒོམ་ནས་བརྒྱུད་པ་གཙང་ན་དར་ཆ་ཆེ། རང་དང་མཉམ་པའི་སྲས་བརྒྱད་ནས་བརྒྱུད་པ་རྣམས་གཉལ་ལོ་རོང་སོགས་ཕྱོགས་མཐའ་དག་ན་ཅོལ་ལེ་ཁྱབ་བོ། །སྲས་མོ་རྒྱན་བཞིའི་སྐོར་ལ་སོགས་པ་ཚོ་ལ། བྱིན་རླབས་ཀྱི་བཀའ་བབས་ཏེ། མདོ་རྒྱུད་གཏེར་མའི་སྐོར་དུ་གྲགས་ཏེ། ཁམས་ན་དར་ཆ་ཆེ། འདི་དག་གི་བརྒྱུད་པ་ནི་ཡུམ་ཆེན་མོ། རྒྱལ་བ་ཤཱཀྱ་ཐུབ་པ། འཇམ་དཔལ། སྒྲོལ་མ། སུ་ཁ་སིདྡྷི། ཨཱརྱ་དེ་ཝ། དམ་པ་སངས་རྒྱས། མ་ཅིག་ལབ་སྒྲོན། ཁུ་སྒོམ་ཆོས་སེང༌། ལོ་རས་འཇམ་དབྱངས་མགོན་པོ། དངོས་གྲུབ་ཨ་སེང༌། སངས་རྒྱས་སེང་སྨན་ལུང་པ། དཔལ་ལྡན་རིན་ཆེན། ཌ་མེ་ཤི་ལ། དེས་བདག་ལའོ། །དེ་ལ་སྲས་རྣམས་ཀྱི་ནང་ནས་སྟོང་སྡེ་དང༌། གྲོལ་སྡེ་གཉིས་དང་འཇམ་དཔལ་ནས་གསུངས་ཚད་ཡི་གེ་ལ་མ་ཐེབས་སོ། ཁོང་རྣམ་གཉིས་ཀྱིས་མ་ཅིག་ལ་ཞུས་པས། གདུང་འཛིན་གྱི་སྲས་གང་ཙམ་ཡོད་ཅེས་ཞུས་པས། སྙིང་པོའི་དོན་མ་ནོར་བར་སྤྱོད་ཅིང༌། འགྲོ་བ་འདྲེན་པ་མང་རབ་འོང་བར་གདའ། དེ་ཀུན་ཁོ་མོའི་བརྒྱུད་འཛིན་ཡིན། བུས་ཀྱང་གདུང་འཛིན་ཏེ་མཆིས་གསུངས། དེ་ནས་བུའང་སྔར་ལ་ཨ་ར་བྱེད་དུས། བན་སྔགས་མཐུ་ཅན་དང་འགྲས་ཏེ། ཕྱིས་འགྱོད་དེ་དབང་མེད་སྔོན་གྱི་ལས་འཕྲོ་ཡི་སྐབས་ཕྱེ་ནས། མ་ཅིག་དྲུང་དུ་ཆོས་སྒོར་ཞུགས་ནས། མིང་རྒྱལ་བ་དོན་གྲུབ་ཏུ་བཏགས། ཆོས་ཁྲིད་ཚར་ནས་དཔེ་འབྲི་བར་ཞུ་བྱས་པས། ཁྱོད་ཀྱང་ཆོས་སྒོར་ཞུགས་པ་དེ་ཅུང་འཕྱིས། འཕྲལ་བློ་ལ་ཤར་ནས་བྲིས་ཚད་ཐོ་ཕྱིར་དུ་བྱུང་གིས་ཁྱེར་ཡོངས། ད་མོས་གུས་དང་ཉམས་ལེན་ལ་རགས་ལས་པ་ཡིན། ཁྱེད་རང་མོས་གུས་གྱིས་གསོལ་བ་ཐོབ་དང༌། དཔེ་ནང་ནས་འཆར་བའི་རིག་པ་གསལ་ཞིང་རྟོགས་པ་ཡོན་ཏན་གྱི་རྩལ་སྐྱེད་པ་བྱེད་དོ་གསུངས་སོ། །གཞན་ཡང་བུ་ཆེན་རྣམས་ཀྱི་ཐུགས་ཀྱི་ཉིང་ཁུ། ཞལ་གྱི་བདུད་རྩི། ཡི་གེར་ཐེབས་པ་མང་ཞིང་སྐུ་གཤེགས་ཁར་ཡང༌། སྔར་གྱི་གནང་བ་ཚོ་གནད་ཀྱི་སྙིང་པོ་འབའ་ཞིག་ཏུ་འདུག་ནའང། ད་ཉམས་ལེན་ཐུགས་ཀྱི་སྙིང་པོ་ཞིག་ཞུ་བྱས་པས། ངས་ཤེས་ཚད་བུ་དེས་ཤེས་ཡོད། ཁོ་ལ་ཞུས་གསུངས་པས། མ་ཅིག་རང་གི་ཞལ་ནས་གསུངས་པའི་གདམས་ངག་ཅིག་ཞུ་བྱས་པས། ཞལ་གདམས་བདུད་རྩིའི་སྙིང་གཏམ་ཉམས་ཀྱི་ཐིགས་པ། དགོས་དོན་བཅུད་ཀྱི་སྙིང་པོ་ལ་སོགས་པ་གནང་ནས། དེའི་ཚེ་ཐོག་མཚམས་ཡ་གིར་ཤོག་དྲིལ་གཅིག་ཡོད་ཀྱི། དེ་ལོངས་ལ་ཁྱེད་ཀྱི་སེམས་ཀྱི་མེ་ལོང་གྱིས། སེམས་རྟེན་དེ་ལ་ཡོང་བར་ཡོད་གསུངས། སྲས་དང་བུ་སློབ་རྣམས་ཀྱིས་མངོན་སུམ་དང༌། ཉམས་སྣང་རྨི་ལམ་དུ་སྤྲུལ་པ་དཔག་ཏུ་མེད་པ་མཐོང༌། ལ་ལས་ཡུམ་ཆེན་མོ། ལ་ལས་སྒྲོལ་མ། ལ་ལས་མཁའ་འགྲོ་མ་མང་པོའི་དབུས་ན་འདུག་པ་མཐོང༌། ལ་ལས་རྡོ་རྗེ་ཕག་མོར་མཐོང་བ་ལ་སོགས་པ་བསམ་གྱིས་མི་ཁྱབ། ཡང་ལན་གཅིག་སྲས་ཀྱི་རྗེས་སུ་འབྲང་ནས་ཕྱིན་པས། ནེའུ་གསིང་སྔོན་པོ་ཞིག་གི་ཐོག་ན་བྲག་དང་ཤུག་པ་ཡོད་པ། ཆུ་མིག་དཀར་པོ་ལྷོག་ལྷོག་པ་ཞིག་གི་འགྲམ་ན། རྡེའུ་སྔོ་ཁྲོམ་ཡོད་པ་གཅིག་ཏུ་མ་གཅིག་བཞུགས་པ་ལ། ཀླུའི་བུ་དང་བུ་མོ་མང་པོས། ཕྱག་དང་མཆོད་པ་དང་བསྐོར་བ་བྱེད་ཀྱིན་འདུག་གོ །འཇའ་ཚོན་སྣ་ལྔ་པ་ཞིག་གིས་གུར་ཕུབ་པ། དེ་ལ་མ་ཅིག་གིས་སྐུ་རྒྱབ་གཏད་ནས་བཞུགས་འདུག་པས། ལྟ་བའི་ཉམས་མགུར་ཁྲོ་ལོ་ལོ། དགའ་དགའ་དགྱེས་དགྱེས་ཞིག་ཏུ་འདུག་པས། དེ་ལྟར་མཐོང་མ་ཐག་ཏུ་མ་ལ་དད་པ་སྐྱེས་ནས། གསོལ་བ་འདི་ལྟར་དུ་བཏབ་བོ། །མ་གཉན་ས་རི་ཁྲོད་ཕྱོགས་མེད་ན། །སེམས་ཉམ་ང་མེད་པའི་རྣལ་འབྱོར་མ། །བློ་ཕྱོགས་རིས་མེད་པའི་ལྟ་བ་ཅན། །བུ་ལྟ་བས་གྲོལ་བར་བྱིན་གྱིས་རློབས། །ཅེས་དགོངས་སྤྱོད་མའི་གསོལ་འདེབས་དེ་དེའི་དུས་སུ་མཛད་དོ། ། ཡང་ལན་གཅིག་གི་དུས་སུ། ནུབ་མོ་ནམ་མཁའ་གསལ་བ་ལ། མ་གཅིག་གི་ཞལ་ནས། འོག་མིན་བལྟར་འདོད་དམ་གསུངས། འདོད་ལགས་ཞུས་པས། ང་ལ་འཇུས་ལ་མིག་ཚུམས་ཤིག་བྱས་པས། སྐད་ཅིག་མ་ལ་འོག་མིན་དུ་སླེབས་ནས། ཞིང་ཁམས་ཀྱི་བཀོད་པ་དཔག་ཏུ་མེད་པ་གཟིགས་ཏེ། མ་གཅིག་སྔ་དྲོའི་དུས་སུ་ཡུམ་ཆེན་མོར་མཛད་ནས་ཕ་རོལ་ཏུ་ཕྱིན་པའི་ཆོས་གསུངས། དེ་ནས་སྒྲོལ་མར་མཛད་ནས། ཐུགས་རྗེ་ཕྱོགས་རིས་མེད་པའི་ལག་ལེན་གྱི་སྐོར་མང་དུ་གསུངས། དགོངས་མོ་རྣལ་འབྱོར་མར་སྤྲུལ་ནས་སྔགས་འབྲས་བུའི་ཐེག་ཆེན་གྱི་སྐོར་གསུངས། བུ་ལ་ད་བཀོད་པ་འདི་ལྟ་བུ་མ་བཤད་པའི་རྫུ་འཕྲུལ་དང་བཀོད་པ་ཁྱོད་མིན་པ་ལ་རྫོགས་པར་བསྟན་པ་མེད། གཞན་གྱི་བློར་མི་ཤོངས་བས་གབ་པར་གྱིས་གསུངས་སོ། །དེའི་དུས་སུ་གདམས་པ་གནང་བ་ཚོ་བརྗེད་ཐོར་བཀོད་པ་ནི། ངོ་མཚར་བཀའ་བབས་ཀྱི་སྐོར་དང་གཅིག །གནད་འགགས་དྲིས་ལེན་གྱི་སྐོར་དང་གཉིས། མཁའ་འགྲོའི་ཞལ་གྱི་གདམས་པའི་སྐོར་དང་གསུམ། བརྒྱུད་པ་མ་བུ་བཞིའི་སྐོར་དང་བཞི། ཟབ་དོན་སྟོང་ཐུན་ལྔ་བརྒྱའི་སྐོར་དང་ལྔ་ལ་སོགས་པ་མང་དུ་བཞུགས་པ་ལགས་སོ། །དེ་ལ་སོགས་པ་རྫུ་འཕྲུལ་དང་ནུས་པ་མཆོག་དང་ལྡན་པས། གསུང་གི་བདུད་རྩི་དཔག་ཏུ་མེད་པ་ཞིག་བྱོན་པ་ལགས་སོ། །གཅེས་པར་འཛིན་ཞིང་སྐལ་ལྡན་གཙུག་གི་རྒྱན་དང༌། དོན་གྱི་སྒྲོན་མེ་བྱེད་པ་བསམ་གྱིས་མི་ཁྱབ་པ་ཡོད་ཅིང༌། ཀུན་ལ་ཕན་ཐོག་ཆེར་འདུག་པས། བསྡུ་བ་དང་རྣམ་གྲངས་དང༌། ཕྱོགས་གར་གཏོགས་པའི་དབྱེ་བ་ཞིག་ཞུ་བར་དགོངས་ནས། སྲས་ཐོད་པ་དང༌། ཁུ་སྒོམ་ལ་སོགས་པ་བུ་ཆེན་བཞིས་མ་ཅིག་ལ་ཞུས། གལ་ཏེ་མ་ཅིག་སྐུ་གཤེགས་ནས་གསུང་པའི་ཆོས་འདི་རྣམས་གང་དུ་བསྡུ། ཐོར་བུ་རྣམས་གང་དུ་མི་ལ་བྱིན། འདུས་པ་དགའ་བར་འདུག་པས། གྲངས་མང་རྩིས་སུ་གང་ལ་བགྱི་ཞུས་པས། མ་ཅིག་གི་ཞལ་ནས། ངའི་གདམས་པ་བུ་སློབ་རྣམས་ལ་སོང་བ་རེ་རེས་ཀྱང་ཆོག་པ་ཡོད། ཐམས་ཅད་འཛོམས་ནའང་ལེགས། ཆོས་ནི་གང་དང་ཡང་བསྟུན་ཏུ་བཅུག །འོན་ཀྱང་སྤུ་རིས་སུ་ཕྱེ་ན། ཕྱི་ཕ་རོལ་ཏུ་ཕྱིན་པ་ཡིན་པས། རྒྱས་འབྲིང་བསྡུས་གསུམ་མ་ཤེས་ཀྱང༌། སྡུད་པ་རེ་ཙམ་ལ་བཤད་པ་གྱིས། ནང་གསང་སྔགས་དང་མཐུན་པ་ཡིན་པས། རྒྱུད་སྡེ་ཆེན་པོ་མང་པོ་མ་ཤེས་ཀྱང༌། ཕག་མོའི་སྒྲུབ་ཐབས་རེ་ཙམ་སྐྱོངས་གསུངས། ཆོས་འདི་ལ་ཡངས་སུ་བྱའམ། དམ་དུ་བྱ་ཞུས་པས། ངས་ནི་ཡ་གི་དགེ་བའི་བཤེས་གཉེན་ནས། མ་གི་མཛེ་སྤྲང་ཡན་ཆོད་ལ་བཤད་དགོས་པ་བྱུང༌། དེ་ལ་དབང་ཐོབ་པ་ཇི་སྙེད་ཅིག་ཡོང་བར་འདུག་པས། ཆོས་ལ་ཡངས་སུ་བྱས་ན་ཐམས་ཅད་མཉམ་སྟཻ། གསང་སྔགས་ཀྱི་སྐད་མ་བཅུག་པར་ཕ་རོལ་ཏུ་ཕྱིན་པའི་དགོངས་པ་ནས་བཤད་པ་ཡིན། ཁྱེད་རང་རྣམས་ཀྱང་ཕ་རོལ་ཏུ་ཕྱིན་པའི་དགོངས་པར་བྱས་ནས་མང་དུ་གྱིས། ཡང་སྤྱིར་གསང་སྔགས་དང་མཐུན་དགོས། སྒོས་བླ་མེད་དང༌། ཡང་སྒོས་ཕ་རྒྱུད་དང་མ་རྒྱུད་གཉིས་ནས་སྤྱོད་པ་འདྲ་བཤད་པའི་ཉམས་ལེན་ཡིན་པས་སྔོན་ལ་དབང་རེ་བསྐུར་ལ། ཆོས་འཆད་དུས་ཚོགས་དང་གཏོར་མ་བཤམས་ལ་བཤད་དོ། །དབང་ལ་འཇུག་པའི་གང་ཟག་གི་རིམ་པ་དང་བསྟུན་ནས་ཡུལ་དང་སྦྱོར་བ་གལ་ཆེ། རྒྱུད་དང་མན་ངག་ཚོ་ལ་ལྟོས་དང་མཐུན་པའི་ལུང་དྲངས་ལ་བཤད་དོ། །བཀའ་ལ་དམ་པར་གྱིས། སུ་ཐོད་ཐོད་ལ་མ་བཤད། སྤྱིར་གཅོད་ཀྱི་སྐོར་ཚོ་བསྡུ་ན་མན་ངག་བདུད་ཀྱི་གཅོད་ཡུལ། རིགས་ཀྱིས་དབྱེ་ན། བཀའ་དང་ཉམས་བརྒྱུད་གཉིས། ཞུ་བ་པོ་གང་ཟག་གིས་དབྱེ་ན། ཕོ་བརྒྱུད་མོ་བརྒྱུད་གཉིས། ཡོངས་སུ་གྲགས་ཚུལ་གྱིས་དབྱེ་ན། བཀའ་མ་དང་གཏེར་མ་གཉིས། དངོས་པོའི་སྒོ་ནས་དབྱེ་ན། གཞུང་ཁྲིགས་ཆགས་དང་ཁ་འཐོར་ཁྲིགས་མེད་གཉིས་ཡིན། ཟུང་བཞི་ཡ་བརྒྱད་དུ་གྲགས་པའོ། །ཁྲིགས་ཆགས་ལ་བཞི་ཡིན། དེ་ལ་ཕྱི་བཀའ་ཚོམས་སུ་ཞིབ་རྒྱས་སུ་བསྟན་པ། ནང་གདམས་ངག་ལེ་ལག་ཏུ་བསྟན་པ། དགོས་དོན་ཞལ་གདམས་གནད་ཐེམས་སུ་བསྟན་པ། གསང་བ་བརྡ་ཆོས་བརྡ་རུ་བསྟན་པའོ། །འཕྲིས་གཅོད་ཀྱི་གཞུང་འཕྲུལ་ཆོས་དྲུག་པ། ཞལ་གདམས་བཅུ་བཞིར་བསྟན་པ་ཡིན། ད་རེས་སྐབས་སུ་བབས་པ་ནི། གཅོད་ཀྱི་གདམས་པ་གཅིག་ཏུ་བསྡུས་པ་གཅོད་མཁན་གྱི་ཉམས་མྱོང་ལྷན་ཅིག་ཏུ་དྲིལ་བ་བླ་མ་ཐམས་ཅད་ཀྱི་གསུང་སྒྲོས་ལྷན་ཅིག་ཏུ་སྟོན་པ། ཨ་མ་ཇོ་མོའི་གཅོད་སྐོར་ཇི་སྙེད་ཅིག་གསུང་གི་གདམས་པ་འདི་ལ་མ་འདུས་པ་མེད་ཅིང་མ་གྱེས་པ་གཅིག་ཀྱང་མེད་དོ། ། དེས་དོན་གསུམ་གྱིས་བསྟན་ཏེ། སྤྱི་ཁྲིད་བསྟན་པ་དང༌། ཉམས་ཁྲིད་བསྐྱངས་བ་དང༌། ཞལ་གདམས་སུ་བཏབ་པའོ། །དེ་ལ་སྤྱི་ཁྲིད་ནི་རྒྱབ་སྐྱོར་གྱི་ཆོས་ཡིན་པས། གཅོད་ཐམས་ཅད་ཀྱི་གོ་བ་སྐྱེད་པར་བྱེད། ཉམས་ཁྲིད་ཀྱིས་ལག་ལེན་དུ་བཏབ་ནས་ཁྲིད་དུ་བསྐྱངས། དེས་ཉམས་སུ་ལེན་དུ་འཇུག་པའོ། །ཞལ་གདམས་གེགས་སེལ་བོགས་འདོན་རྣམས་ཀྱིས་གཞན་དོན་སྒྲུབ་པའོ། །དེ་ལ་ཞལ་གདམས་སྒྲུབ་ཐབས་བྱིན་རླབས་སྒོ་འབྱེད། རྨི་ལམ་ཉི་ཟླ་སྒོ་འབྱེད། འཕོ་བ་ཐར་པའི་སྒོ་འབྱེད། བར་དོ་འོད་གསལ་སྒོ་འབྱེད། གེགས་སེལ་རྟེན་འབྲེལ་སྒོ་འབྱེད། བོགས་འདོན་ཡོན་ཏན་སྒོ་འབྱེད། གཞན་དོན་ཕྲིན་ལས་སྒོ་འབྱེད། གྲུབ་མཐའ་ཁྱད་འཕགས་སྒོ་འབྱེད་དང་བཅས་སོ། །དེ་རྣམས་ཞལ་གདམས་ཡིན་པས། གཅོད་ཀྱི་ངོ་སྤྲོད་ཁྲིད། གདམས་པ་རྣམས་ཚར་བའི་རྗེས་ལ་བྱིན་ནོ། །ལྷན་ཐབས་རྣམས་ནི་སྤྱི་ཁྲིད་ཀྱི་སྐབས་སུ་བསྟན་ལ་བཤད་དོ། །ཕ་རོལ་ཏུ་ཕྱིན་པའི་གཅོད་ཀྱི་ལོ་རྒྱུས་བསྟན་པ་རྣམས་རྫོགས་སོ།། །།«ཀུན་མཁྱེན་དྲི་མེད་འོད་ཟེར་གྱིས་མཛད་པ་མངྒ་ལཾ། དགེའོ།། །།

[edit]

This page is a cleaned copy of the following rywikitexts page, which stay unchanged:

Cleaning (21 November 2026): removed 1 running heads, 3 Word page fields. The «» marks are kept in the text: they enclose the small-print notes of the print, which are shown in small print with the marks hidden.

Part of the Longchenpa Collected Works (about this project).