རྩལ་དབང

From Rangjung Yeshe Wiki Texts
LONGCHENPA-PECIN-06-CHA-008
Jump to navigation Jump to search

ཁྲེགས་ཆོད་ངོ་སྤྲོད་མཐའ་གྲོལ་ཀློང་ཡངས klong chen rab 'byams kyi gsung 'bum (pe cin 2009)· Volume 6(CHA) ཐིག་ལེ་དངས་སྙིགས་འབྱེད་པ་དང་༔ རིགས་རྒྱུད་གཞག་ཐབས་ལག་ལེན

Title རྩལ་དབང
Wylie rtsal dbang


Author Longchenpa ཀློང་ཆེན་རབ་འབྱམས་པ་དྲི་མེད་འོད་ཟེར།
Location klong chen rab 'byams kyi gsung 'bum (pe cin 2009), volume 6(CHA), text 8, pages 73–77 (BDRC scan pages)
Section snying thig ya bzhi › mkha' 'gro snying thig


Tibetan text E-text from the typeset Pe cin edition (input 2020 on rywikitexts), cleaned 21 November 2026; not proofread against the print.
BDRC MW1KG4884, outline 1.2.2.10
Citation Klong chen rab 'byams pa. rtsal dbang. In Kun mkhyen klong chen rab 'byams kyi gsung 'bum, vol. 6, pp. 73–77. Pe cin: Krung go'i bod rig pa dpe skrun khang, 2009. BDRC MW1KG4884.
Notes Title from the first line of the e-text; text boundaries and page numbers from the BDRC outline of MW1KG4884.
[edit]

༄༅། །རྩལ་དབང་བཞུགས་པ་ལགས་སོ༔ དེ་ནས་ཀུན་བཟང་ཡབ་ཡུམ་གྱི༔ སྨིན་བྱེད་རིག་པའི་རྩལ་དབང་བསྐུར༔ མཚན་ཉིད་ལྡན་པའི་བླ་མ་ཡིས༔ སྐལ་བར་ལྡན་པའི་སློབ་བུ་ལ༔ རབ་འབྱམས་དབང་བསྐུར་གསུམ་དུ་བསྟན༔ བླ་མ་རྡོ་རྗེ་འཛིན་པ་ལ༔ མེ་ཏོག་ལན་དང་བཅས་ཏེ་ཞུ༔ གཏོར་ཚོགས་བཞི་སྡེ་གསུང་རབ་ཀློག༔ རིན་ཆེན་སྨན་འབྲུའི་མཎྜལ་ཕུལ༔ «འུཾགཊྭཾ༔ »མ་ཧཱ་གུ་རུ་ཀུན་བཟང་ཡབ་ཡུམ་ན་མོ་ཧཱུྃ༔ མ་ཧཱ་གུ་རུ་རྡོ་རྗེ་སེམས་དཔའ་ན་མོ་ཧཱུྃ༔ མཧཱ་གུ་རུ་དགའ་རབ་རྡོ་རྗེ་ན་མོ་ཧཱུྃ༔ མ་ཧཱ་གུ་རུ་ཤྲཱི་སིངྷ་ན་མོ་ཧཱུྃ༔ མ་ཧཱ་གུ་རུ་པདྨ་ཐོད་ཕྲེང་རྩལ་ན་མོ་ཧཱུྃ༔ མ་ཧཱ་གུ་རུ་དྷེ་ཝ་ཌཱཀྐི་ནི་སརྦ་སིདྡྷི་ཧཱུྃ་ཨཱཿ བྷོ་དྷི་ཙིཏྟ་ཛྙཱ་ན་ཨ་བྷི་ཥིཉྩ་ཧཱུྃ༔ སྨིན་གྲོལ་དོན་གྱི་ཞུ་བ་དབུལ༔ དེ་ནས་རྩལ་དབང་སེམས་ལ་བསྐུར༔ སེམས་རྟོགས་པས་ནི་སངས་རྒྱས་ཏེ༔ གང་ཤར་རིག་པའི་རྩལ་དུ་གྲོལ༔ རང་རིག་དབང་ཐོབ་རེ་དོགས་བྲལ༔ སྣང་སྲིད་རང་གི་རྩལ་དུ་གྲོལ༔ ཏི་ལ་མངོན་སུམ་རྩལ་དབང་ཐོབ༔ ངང་དངས་རང་བཞིན་བདག་ཉིད་ཆེ༔ རབ་འབྱམས་རིག་པའི་དབང་ཐོབ་བོ༔ རིག་པའི་རྩལ་དབང་མ་ཐོབ་ན༔ འདུས་བྱས་ཆོ་གས་གྲོལ་མི་སྲིད༔ རང་རྒྱུད་མ་སྨིན་གཞན་མི་གྲོལ༔ བོགས་རྣམས་དབང་གིས་འབྱིན་པར་བྱེད༔ རིན་ཆེན་བུ་ཆུང་ནོར་གྱི་དབྱིག༔ རབ་ཏུ་གཅེས་དང་ཡིད་འཐད་དབུལ༔ རང་རིག་རྩལ་གྱི་དབང་ཐོབ་ཚེ༔ ཆོས་རྣམས་སེམས་ལ་རྫོགས་ཕྱིར་གྲོལ༔ རབ་འབྱམས་བཀའ་ཡི་དབང་རྣམས་ཐོབ༔ སྨིན་གྲོལ་དབང་རྣམས་དེ་ལྟར་བསྐུར༔ རྒྱ་རྒྱ་རྒྱ༔ དགེའོ༔ ༔ ༄༅། །རྒྱུད་ཀྱི་བཅངས་ཐབས་བཞུགས་སོ༔ ཡིད་བཞིན་ནོར་བུའི་རྒྱུད་འདི་རྣམས༔ བསྟན་པ་གང་ལ་བབས་པ་ཡི༔ རིན་ཆེན་བཞུ་བའི་ཁུ་བ་ཡིས༔ གླེགས་བམ་སོར་བརྒྱད་ལེགས་བྲིས་ལ༔ རབ་གནས་སྣ་ཚོགས་གོས་ཀྱིས་གྲིལ༔ མཎྜལ་ཁར་བཞག་ཚོགས་གཏོར་བྱ༔ རིན་ཆེན་འབྲུ་སྨན་མཎྜལ་དབུལ༔ དབང་བསྐུར་རྒྱུད་བཀླག་བུ་ལ་བཏགས༔ དེ་ཉིད་བཅངས་པས་སངས་རྒྱའོ༔ ༄༅། །གཞན་དོན་བཞུགས་སོ༔ གཞན་གྱི་དོན་ཆེན་བྱ་བའི་ཕྱིར༔ མཚན་མ་འབྱུང་བའི་དུས་དག་ཏུ༔ རང་ཉིད་ཀུན་བཟང་རིགས་ལྔར་བསྒོམ༔ ཕྱོགས་དང་བསྟུན་ཏེ་རང་གི་ལྕེ༔ རྡོ་རྗེ་དང་ནི་རིན་ཆེན་དང་༔ པདྨ་དང་ནི་རལ་གྲི་དང་༔ འཁོར་ལོ་བསྒོམས་ཏེ་རྒྱུད་འདི་བརྗོད༔ འདི་ཡི་ཡོན་ཏན་བརྗོད་མི་ལངས༔ སྒྲ་འོད་མཚན་མ་དེ་དག་ཀུན༔ སུས་མཐོང་ཐོས་པར་གྱུར་པ་རྣམས༔ མྱུར་དུ་སངས་རྒྱས་སྤྲུལ་སྐུ་ཐོབ༔ འདི་ཉིད་མ་གསང་འ«བྲ»ས་མི་འབྱུང་༔ ༄༅། །རྟགས་བསྟན་བཞུགས་སོ༔ ཨེ་མ་འདི་འཆང་བཏགས་གྲོལ་སྐྱེས་བུ་ནི༔ དུས་གསུམ་རྒྱལ་བའི་མཆོད་རྟེན་ཡིན༔ དེ་ཉིད་འདས་ཚེ་གདུང་བཞུ་བས༔ འཇའ་འོད་ཟེར་དང་མེ་འོད་དུད་པའི་རྟགས༔ གདུང་རིགས་ལྔ་འམ་གཅིག་འབྱུང་ངེས༔ རྣལ་འབྱོར་ཕྱིར་མི་ལྡོག་རྟགས་སུ༔ རྡོ་རྗེ་རིན་ཆེན་པདྨའི་གདུང་༔ ལས་དང་དེ་བཞིན་གཤེགས་པའི་གདུང་༔ ཤ་ཁྲག་རུས་དང་ཡན་ལག་དང་༔ འབྱུང་འདུས་ལྔ་ལ་རྟེན་དུ་འབྱུང་༔ ཤ་རཱི་རམ་དང་ཆུ་རཱི་རམ༔ བ་རཱི་རམ་དང་ཉ་རཱི་རམ༔ པཉྩ་རམ་དང་ལྔ་ལྡན་གདུང་༔ རིགས་ལྔའི་གདུང་སྟེ་སྐུ་ཡང་འབྱུང་༔ དེ་རྣམས་སྐུ་ཐོབ་རྟགས་ཡིན་ཏེ༔ གསུང་ཐོབ་རྟགས་སུ་མེ་འོད་སྒྲ༔ འཇའ་ཚོན་ནམ་མཁའ་དངས་གསལ་བ༔ ངེས་པར་ཐུགས་ཐོབ་རྟགས་ཡིན་ནོ༔ གདུང་རིགས་ལྔ་ནི་འདི་ལས་འབྱུང་༔ མགོ་དང་ཁྲག་དང་རྒལ་ཚིགས་དང་༔ རྐང་དང་སྙིང་ལས་འབྱུང་བ་ཡིན༔ རྟགས་ལ་འབྲས་བུ་འདི་བཞིན་འབྱུང་༔ ཤ་རཱི་ཆུ་རཱི་བ་རཱི་ཡིས༔ སྐྱེ་མེད་ཡོན་ཏན་ལོངས་སྐུ་ཐོབ༔ ཉ་རཱི་པཉྩ་རམ་གྱིས་སུ༔ སྤྲུལ་སྐུ་སྐུ་ལྔ་ངེས་པར་ཐོབ༔ སངས་རྒྱས་སྐུ་ལྔ་ཡེ་ཤེས་ལྔ༔ རྒྱུད་འདི་བཏགས་གྲོལ་བཅངས་པས་འབྱུང་༔ གདུང་ཚད་ངེས་པ་མེད་པར་གསུངས༔ ༄༅། །ཡོན་ཏན་འབྱུང་ཚུལ་བཞུགས་སོ༔ ཨེ་མ་འདི་ནི་ཁྱད་པར་འཕགས༔ ཀུན་གྱི་སྤྱོད་ཡུལ་མ་ཡིན་ཏེ༔ དབང་པོ་རྣམ་ལྔ་འོད་གྱུར་ཅིང་༔ རྒན་གཞོན་ཕོ་མོ་དགེ་སྡིག་མེད༔ བག་ཆགས་བཟང་ངན་མེད་པ་རུ༔ འདི་ཉིད་བཅངས་པས་བུདྡྷ་འོ༔ ཐ་མ་དབུགས་ལ་སླེབ་ཀྱང་གྲོལ༔ སངས་རྒྱས་གདུང་འཛིན་སྲས་གཅིག་ཡིན༔ ༄༅། །ཆེ་བ་བསྟན་པ་བཞུགས་སོ༔ སྟོན་པ་ཀུན་བཟང་ཡབ་ཡུམ་གྱིས༔ ཉིད་ལས་མི་གཞན་སེམས་དཔའི་སྣོད༔ བྱིན་གྱིས་རླབས་ཀྱིས་བདག་ཉིད་ལ༔ བཏགས་པས་གཅིག་ཤེས་ཆོས་ཀུན་གྲོལ༔ བཅིངས་དང་གྲོལ་བའི་ཐབས་ལས་འདས༔ རྡོ་རྗེ་སེམས་དཔའི་བྱིན་རླབས་ཀྱིས༔ རང་བྱུང་དགའ་རབ་ཐུགས་ལ་ཤར༔ སིང་ཧ་ཉིད་ལ་རྒྱུད་གཏད་པ༔ ཀྱེ་ཀྱེ་ཛོ་ཀི་ཤྲཱི་སིང་༔ སྣང་སྲིད་འཁོར་འདས་ཐམས་ཅད་ཀུན༔ ས་བོན་འདི་ཉིད་མ་གཏོགས་པར༔ བསྟན་པའི་གསུང་ནི་ཚིག་ཙམ་ཡང་༔ ལྕེ་ཡི་དབང་པོས་བརྗོད་མི་ནུས༔ བྱིན་གྱིས་བརླབས་ཀྱི་རྒྱུད་ཚིག་འདི༔ གང་ལ་གནང་བའི་མི་དེས་ཀྱང་༔ མ་མཐོང་རྒྱུད་དང་བསྟན་བཅོས་རྣམས༔ ལྕེ་ཡི་དབང་པོས་བརྗོད་པར་ནུས༔ རྒྱུད་འདི་མ་རྟོགས་དགེ་བ་བཅུ༔ སྤྱད་ཀྱང་འཁོར་བ་ལས་མི་གྲོལ༔ དེ་སྔར་མཚམས་མེད་ལྔ་སྤྱད་ཀྱང་༔ འདི་ཕྲད་ངན་སོང་ལྟུང་མི་སྲིད༔ འདི་རིག་གཡོ་མེད་སྐྱེས་བུ་དེ༔ བསྒོམ་མི་དགོས་ཏེ་མཐོང་གྲོལ་འགྱུར༔ ཕ་རོལ་ཕྱིན་བཅུའི་སྙིང་པོའི་རྒྱུད༔ ཡང་དག་རྒྱུད་འདི་མ་རྟོགས་ན༔ དུས་གསུམ་ཀུན་ཏུ་སངས་མི་རྒྱ༔ དུས་གསུམ་སངས་རྒྱས་ཐམས་ཅད་ཀྱང་༔ འདི་ལ་བཏགས་གྲོལ་སངས་རྒྱས་ཏེ༔ སྐུ་ལྔ་འགྲོ་དོན་ལྷུན་གྱིས་གྲུབ༔ རང་རིག་རྣམ་དག་ས་གཅིག་ལ༔ ཐེག་པ་ཀུན་འདུས་ས་ལམ་རྫོགས༔ སྤྲུལ་སྐུས་དེ་སྐད་བཀའ་སྩལ་པས༔ སེང་ཧ་རང་རིག་གཟུང་འཛིན་གྲོལ༔ རང་བྱུང་དོན་ལ་ཡི་རངས་ཏེ༔ ཡང་ཏི་འབྲས་བུའི་རྒྱུད་འདི་བཟུང་༔ ཨ་ཏི་རང་ཤུགས་ཚིག་ཏུ་བྱོན༔ འབྲས་བུ་ཡོངས་རྫོགས་བཏགས་གྲོལ་རྒྱུད༔ ཨོ་རྒྱན་པདྨ་ཉིད་ལ་གཏད༔ ལྔ་ལྡན་བུ་ལ་འདི་སྟོན་ཅིག༔ སྐལ་ལྡན་སྤྱོད་ལམ་ངང་ཚུལ་བཟང་༔ རིགས་ལྡན་འཁོར་སུན་བློ་ཆེ་བ༔ བླ་མ་ལ་གུས་སྒྲུབ་ལ་བརྩོན༔ ཤེས་རབ་སྡུག་སྲན་སྙིང་རྗེ་ཆེ༔ ཞབས་ཏོག་ཅི་གསུངས་སྒྲུབ་ལ་གཏད༔ སྐལ་མེད་འཁོར་བས་མི་སུན་ཅིང་༔ བླ་མ་མི་ཁུར་བཀའ་སྩལ་གཅོག༔ བློ་ཆུང་སྒྲུབ་གཡེལ་གསང་མི་ཐུབ༔ རྫ་ཤིང་སྣོད་ངན་དེ་འདྲ་ལ༔ མི་སྤེལ་གསང་རྒྱ་དྲག་ཏུ་གདབ༔ སྣོད་དང་མི་ལྡན་གང་ཟག་ལ༔ ཟབ་ཆོས་བསྟན་ཀྱང་ལོག་པར་རྟོགས༔ ཡི་དྭགས་ཟས་ལ་དགྲར་མཐོང་འདྲ༔ སྣོད་ལྡན་མ་གཏོགས་སྤེལ་མི་བྱ༔ འབྲས་བུ་ཡོངས་རྫོགས་བཏགས་གྲོལ་སྙིང་པོའི་རྒྱུད༔ དྲི་མེད་སྙིང་པོ་ཞེས་བྱ་བ་མཐར་ཐུག་དོན་གྱི་མཆོག༔ ཡང་གསང་ལེའུ་གཅིག་པ་རྫོགས་སོ༔ ལས་ཅན་ཅིག་དང་འཕྲད་པར་ཤོག༔ སྐུའི་རྒྱ༔ གསུང་གི་རྒྱ༔ ཐུགས་ཀྱི་རྒྱ་ཡོད་དོ༔ ས་མ་ཡ༔ ཁཐཾ༔ ཨྠིྀ༔ དགེའོ༔

[edit]

This page is a cleaned copy of the following rywikitexts page, which stay unchanged:

Cleaning (21 November 2026): removed 1 running heads, 3 Word page fields, 4 embedded-object codes. The «» marks are kept in the text: they enclose the small-print notes of the print, which are shown in small print with the marks hidden.

Part of the Longchenpa Collected Works (about this project).