volume 010 329

༄༅། །ཉམས་ལེན་གནད་གྱི་སྒྲོན་མེ་བཞུགས་སོ། །

«དངོས་གྲུབ་མཆོག་སྩོལ་དཔལ་ལྡན་བླ་མ་དང༌། །མཁའ་འགྲོ་དམ་ཅན་རྒྱ་མཚོ་ལ་བཏུད་དེ། །སྐལ་བཟང་ཚེ་གཅིག་ཐར་པ་་འདོད་རྣམས་ཀྱིས། །དོན་དུ་ཉམས་ལེན་གནད་ཀྱི་སྒྲོན་མེ་བྲི། །འདིར་་འོད་གསལ་རྡོ་རྗེ་སྙིང་པོའི་ཐེག་པ་མངོན་སུམ་སྙིང་ཏིག་གི་གདམས་པ་འདི་ལ་གསུམ་སྟེ། བརྩོན་འགྲུས་རབ་ཚེ་འདིར་གྲོལ་བ། འབྲིང་བར་དོར་གྲོལ་བ། ཐ་མ་རང་བཞིན་སྤྲུལ་པ་སྐུའི་ཞིང་དུ་གྲོལ་བའོ། །དང་པོ་ལ་བཞི་སྟེ། ཆོས་ཉིད་མངོན་སུམ་གྱི་སྣང་བ། ཉམས་གོང་འཕེལ་གྱི་སྣང་བ། རིག་པ་ཚད་ཕེབས་ཀྱི་སྣང་བ། ཆོས་ཉིད་ཟད་པའི་སྣང་བའོ། །དང་པོ་ལའང་གཉིས་ཏེ། གདམས་པ་ལ་འཇུག་པའི་ཚུལ་དང༌། ཞུགས་ནས་ཇི་ལྟར་བསྒོམ་པའི་རིམ་པའོ། །དང་པོ་ནི་བླ་མ་མཚན་ཉིད་དང་ལྡན་པ་སྤྱིར་ཐེག་པ་མཐའ་དག་གི་དོན་ལ་མཁས་ཤིང༌། བྱམས་སྙིང་རྗེ་བྱང་ཆུབ་ཀྱི་སེམས་གསུམ་ཕུན་སུམ་ཚོགས་པས་གཞན་རྗེས་སུ་འཛིན་ཅིང༌། ཁྱད་པར་དུ་གསང་སྔགས་བླ་ན་མེད་པའི་ཚིག་དོན་ལ་སྣང་བ་ཐོབ་པས། ལྟ་སྒོམ་སྤྱོད་འབྲས་ཀྱི་དྲོད་ཚད་མངའ་བ་གཅིག་གིས་སློབ་མ་མཚན་ཉིད་དང་ལྡན་པ། བླ་མ་ལ་གུས་ཤིང་གཏོང་ཕོད་དང་དག་སྣང་ཆེ་བ། དམ་ཚིག་་དང་གདམས་པ་ལ་གནས་པས་ཐར་པའི་བྱང་ཆུབ་སྒྲུབ་པ་ལ་བརྩོན་ཞིང་བློ་ཆེ་ལ་ཁོང་ཡངས་པས་སྣོད་དུ་རུང་བ་དེས། སྔོན་དུ་བླ་མ་མཉེས་པར་བྱས་ཏེ། སྨིན་བྱེད་དབང་གི་རིམ་པས་རྒྱུད་སྦྱངས་ནས། མངོན་སུམ་འོད་གསལ་གྱི་་དོན་ལ་འཇུག་པའི་ཕྱིར། བྱ་བ་དགུ་ཕྲུགས་སུ་གཏད་པར་བྱའོ། །དེ་ཡང་ལུས་ཀྱིས་ཕྱིའི་བྱ་བ་ཚོང་དང་སོ་ནམ་ལ་སོགས་པ་འཇིག་རྟེན་གྱི་འདུ་འཛི་དང་གཡེང་བ། ནང་གི་བྱ་བ་ཐུན་མོང་གི་ཆོས་སྤྱོད་ཕྱག་དང་བསྐོར་བ་ལ་སོགས་པ། གསང་བའི་བྱ་བ་ཐུན་མོང་མ་ཡིན་པའི་ཕྱག་རྒྱ་གར་ལ་སོགས་པ་སྟེ། མདོར་ན་གཡོ་བྱེད་ལུས་ཀྱི་སྤྲོས་པ་མཐའ་དག་གཏང་ཤིང༌། ངག་གི་ཕྱིའི་བྱ་བ་ལོང་གཏམ་ཚིག་རྩུབ་ལ་སོགས་པ་འཇིག་རྟེན་ཐ་མལ་པའི་ངག་གི་སྨྲ་བརྗོད། ནང་གི་བྱ་བ་ཐུན་མོང་གི་འདོན་ཟློས་ཁ་ཏོན། གསང་བའི་བྱ་བ་ཐུན་མོང་མ་ཡིན་པའི་བཟླས་བརྗོད་ལ་སོགས་པ་སྟེ། མདོར་ན་སྨྲ་བརྗོད་ངག་གི་འཇུག་པ་མཐའ་དག་བཏང་ལ། སེམས་ཀྱི་ཕྱིའི་བྱ་བ་འཇིག་རྟེན་གྱི་རྣམ་རྟོགདནང་གི་བྱ་བ་ཐུན་མོང་གི་ཆོས་ལ་རྟོག་དཔྱོད་དང་བསམ་མནོ། གསང་བའི་བྱ་བ་ཐུན་མོང་མ་ཡིན་པའི་བསྐྱེད་རིམ་ལ་སོགས་པའི་བློས་བྱས་ཀྱི་སྒོམ་པ་ཐམས་ཅད་དེ། མདོར་ན་དྲན་བསམ་ཡིད་ཀྱི་འཕྲོ་འདུ་ཐམས་ཅད་བཏང་ལ་སྒོ་གསུམ་དལ་བ་བརྟེན་པར་བྱའོ། ། གཉིས་པ་ཞུགས་ནས་ཇི་ལྟར་བསྒོམ་པའི་རིམ་པ་ལ་གསུམ་སྟེ། སྔོན་འགྲོ་གནད་ཀྱིས་གཟིར་བ་དང༌། དངོས་གཞི་ངོ་སྤྲོད་པ་དང༌། རྗེས་སུ་ཉམས་སུ་བླང་བའོ། །དང་པོ་ནི། རབ་ཏུ་དབེན་པའི་གནས་སུ་ལུས་ངག་ཡིད་གསུམ་གྱི་སྔོན་འགྲོ་འབྱོངས་བར་བྱས་ནས། གནད་ལྔ་ལ་བསླབ་སྟེ་ལུས་ཀྱི་གནད་བཞུགས་སྟངས་གསུམ་གང་རུང་བྱའོ། །ཆོས་སྐུའི་བཞུགས་སྟངས་སེང་གེ་ལྟ་བུ་ནི། འགྱིང་ཚུགས་སུ་འདུག་ལ་ལ་གསོར་གཉིས་ནང་དུ་བསྒོངས་ཏེ། རྐང་མཐིལ་གཉིས་མདུན་དུ་སྤྲད་པའི་དབུས་སུ་བཙུགས་ལ། མཇིང་པ་དགྱེད་དེ། མིག་སྟེང་གི་ནམ་མཁའ་ལ་ཧར་པོར་བལྟའོ། ཁ་ཅིག་རྐང་མཐིལ་ས་ལ་ཕབ་ནས་ཙོག་པུར་འདུག་པའི་གཡས་གཡོན་གཉིས་སུ་ལག་པའི་མཐིལ་ས་ལ་འཛུགས་པར་འདོད་དེ། དགོངས་པ་ཅུང་ཟད་མ་ལོན་པར་སྣང་ངོ༌། །ལོངས་སྐུའི་བཞུགས་སྟངས་གླང་པོ་ཆེ་ཉལ་བ་ལྟ་བུ་ནི། པུས་བྲང་གཉིས་སྦྱར་ནས་ཁ་སྦུབ་པའི་རྐང་མཐིལ་གཉིས་ཕྱིར་བསྟན། ལག་པའི་གྲུ་མོ་གཉིས་ས་ལ་བཙུགས་པའི་ཐལ་མོ་གཉིས་ཀྱིས་འགྲམ་པ་བརྟེན་ལ་མིག་ཐད་ཀར་བལྟའོ། ། སྤྲུལ་སྐུའི་བཞུགས་སྟངས་དྲང་སྲོང་ཙོག་པུ་ལྟ་བུ་ནི། ཙོག་པུར་འདུག་པའི་པུས་མོའི་སྟེང་དུ་ལག་པ་གཉིས་བསྣོལ་ཏེ། ཐལ་མོས་གྲུ་མོ་གཉིས་བཀབ་ལ་མིག་ཅུང་ཟད་ཕབ་ལ་བལྟའོ། །བཞུགས་་སྟངས་གསུམ་གང་བཅའ་ཡང་བསྡམས་པ་བཅུམས་པ་ལྟ་བུ་མ་ཡིན་པར་ཆ་ཆ་ནས་ལྷོད་ཆགས་པ་གནད་དམ་པའོ། །སྒོ་ཡི་གནད་གཟིགས་སྟངས་གསུམ་གང་རུང་ལ་བསླབ་སྟེ། ཆོས་སྐུ་གཟིགས་སྟངས་གྱེན་དུ་གཙུག་ཏོར་རྣམ་པར་བལྟ་བ་ལྟ་བུ། ལོངས་སྐུའི་གཟིགས་སྟངས་ཟུར་ལ་བྲམ་ཟེ་སྨྱུག་མ་སྲོང་བ་ལྟ་བུ། སྤྲུལ་སྐུའི་གཟིགས་སྟངས་ཅུང་ཟད་ཐུར་དུ་ཕབ་པ་དྲང་སྲོང་བསམ་གཏན་སྒོམ་པ་ལྟ་བུའོ། ། གཟིགས་སྟངས་གང་ལ་ཡང་མིག་མི་འགུལ་པར་དངས་ལ་གློད་པ་གནད་དོ། ། རླུང་གི་གནད་རབ་ཏུ་དལ་བ་སྟེ། དེ་ཡང་སྣ་ནས་མི་གཏང་བར་ཁ་ནས་དྲང་ཞིང༌། ཕྱི་ནང་གི་རྒྱུ་བ་ཆ་མཉམ་པ་ལས། ལས་དང་པོ་པའི་དུས་སུ་ཅུང་ཟད་ནང་དུ་བསྡམ་པ་སྟེ། རྩོལ་བ་དང་བཅས་པ་མ་ཡིན་ནོ། ཁྱད་པར་དུ་དད་པ་དང་ངེས་འབྱུང་དང་ཏིང་ངེ་འཛིན་འཕེལ་དུས་ནང་དུ་དལ་བུས་རང་ལུགས་སུ་བཟུང་ལ་རྫོགས་པར་ཕྱིར་མི་གཏང་ལ། ཉོན་མོངས་པ་སྐྱེས་པ་དང་སྙིང་མི་དགའ་བ་ལ་སོགས་པའི་ཚེ་ཧ་དྲག་པོས་ཕྱིར་འཕངས་ལ་ཅུང་ཟད་ཕྱིར་གཟུང་བ་གནད་དོ། །ཡུལ་གྱི་གནད། ནམ་མཁའ་སྤྲིན་མེད་པའི་ངོས་སུ་བལྟ་བ་དང༌། ཉི་མ་རྩེ་ཤར་གྱི་དུས་སུ་ཉི་མ་ལས་འོག་ཏུ་ཁྲུ་གང་གི་ས་དང༌། ནུབ་ཁར་ནུབ་ཀྱི་ཕྱོགས་སུ་དེ་བཞིན་དུ་བྱ་བ་ནི་ཟེར་གཉིས་ཀྱིས་དུས་ཏེ། ལས་དང་པོ་པས། འོད་གསལ་འཆར་སླ་བའི་དགོས་པ་ཡོད་དོ། །ཡུལ་ལ་ཐག་རིང་པོ་ལ་ཇེ་་ཐུང་དུ་བསླབ་པ་ནི་གནད་དོ། །རིག་པའི་གནད་ཤེས་པ་གྲུང་བཏོན་ལ། ནམ་མཁའི་གདངས་སྔོན་པོ་དེ་ལ་མིག་མི་འགུལ་བས་མ་ཡེངས་པར་བལྟ་བའོ། ། དེ་ཡང་ཅུང་ཟད་ཀྱང་མ་ཡེངས་པར་བྱིང་རྒོད་མེད་པར་བལྟ་བ་གནད་ཡང་དག་པའོ། །གཉིས་པ་དངོས་གཞི་ངོ་སྤྲད་པ་ནི། གནད་དེ་་དག་ལ་གཟིར་བས། ནམ་མཁའི་དཀྱིལ་དུ་དང་པོ་དཀར་པོ་ཟང་ཟིང་དུ་སྣང་བ་ནི་ཡེ་ཤེས་སྐར་མ་ལམ་མེ་བ། །ཞེས་པ་ལས་འཇའ་འོད་ཁ་དོག་ལྔ་ལྡན་དང༌། ཐིག་ལེ་རྨ་བྱའི་མདོངས་ལྟ་བུ་དང༌། པདྨ་དང་མཆོད་རྟེན་དང༌། ལྷའི་སྐུ་དང༌། མུ་ཏིག་གི་དྲ་ཕྱེད་ལྟ་བུ་སྣང་བ་བསམ་གྱིས་མི་ཁྱབ་པ་འཆར་ཏེ། འགྲོ་བའི་མར་མེ་ཡེ་ཤེས་སྒྲོན་གཟི་བརྗིད་ཕུང་པོ་ལྟ་ན་སྡུགདཐཅེས་པའོ། །དེ་ཡང་རྩ་བཟང་བ་རྣམས་ལ་དང་པོ་ཉིད་ནས་ལྷ་སྐུ་ལ་སོགས་པ་སྣང་ཞིང༌། ངན་པ་རྣམས་ལའང་ཐིག་ལེ་དང་རིག་པ་རྡོ་རྗེ་ལུ་གུ་རྒྱུད་འཆར་ཏེ་དོན་ལ་འདྲའོ། །རྡོ་རྗེ་ལུ་གུ་རྒྱུད་ནི་ནང་གི་སྙིང་གའི་ཡེ་ཤེས་འོད་གསལ་གྱི་རྩའི་གདངས་ཕྱིར་སྣང་བ་སྟེ། དེ་ཡང་གསེར་གྱི་སྐུད་པ་ནམ་མཁར་བརྒྱངས་བ་ལྟ་བུའི་བར་བར་ན་ཐིག་ལེ་ཕྲ་མོ་རྨ་བྱའི་མདོངས་བརྒྱུས་པ་འདྲ་བའམ། མུ་ཏིག་གི་དྲ་བ་དྲ་ཕྱེད་འཕྱངས་པ་ལྟ་བུ་ལ་ཐིག་ལེས་བརྒྱན་པ་དེ་ཡིན་ནོ། །སྣང་བ་འདི་དག་མཐོང་བ་ནི་སྙིང་གའི་འོད་གསལ་ཀྱི་གདངས་མཐོང་བ་སྟེ། སངས་རྒྱས་སུམ་སྟོང་གི་ཞལ་མཐོང་རིག་པ་མངོན་སུམ་གྱི་དོན་རྟོགས་པ་ཞེས་བྱ་བས། ཕྱིན་ཆད་མངལ་གྱི་གྲོང་ཁྱེར་རྒྱུན་གཅོད་པས་གྲོང་ཁྱེར་རྒྱུན་གཅོད་གྱི་ལྟ་བ་རྟོགས་པ་ཞེས་བྱའོ། །དེ་ཡང་ཕྱི་འོད་ལྔ་ལ་བལྟས་པས། ནང་དུག་ལྔ་སྐད་ཅིག་ལ་གྲོལ་བས་རྣམ་པར་མི་རྟོག་པའི་ཡེ་ཤེས་མཐོང་བ་ཞེས་བྱའོ། །ཆོས་ཉིད་ཡིད་དཔྱོད་ལ་མ་ལུས་པར་སེམས་ཉིད་འོད་གསལ་མཐོང་བས། ཆོས་ཉིད་མངོན་སུམ་གྱི་དོན་མཐོང་བ་ཞེས་བྱའོ། །དེ་ཉིད་མཐོང་བས་དེ་བཞིན་གཤེགས་པའི་སྙིང་པོ་ཕྱོགས་གཅིག་མཐོང་བ་སྟེ། རིམ་གྱིས་སངས་རྒྱས་ཀྱི་ཞིང་ཁམས་ལ་སོགས་པ་མཐོང་ནས་གྲོལ་བར་འགྱུར་བས་ཐར་པའི་ལམ་སྣ་ཟིན་པ་ཞེས་བྱའོ། །འདི་ལྟར་སྣང་བ་རྒྱ་ཆེ་ཆུང་ལ་ལྟོས་ནས་བྱང་ཆུབ་སེམས་དཔའ་ས་བཅུ་རིམ་པས་བགྲོད་ཀྱང༌། ད་དུང་ཁམས་ཀྱི་ཡོན་ཏན་མཐའ་དག་མཐོང་བ་མ་ཡིན་ལ། སངས་རྒྱས་དུས་ཁམས་ཀྱི་ཡོན་ཏན་མཐར་ཐུག་མཐོང་བས་བྱང་ཆུབ་ཅེས་བརྗོད་པའང་དེ་ཡིན་ནོ། །དེས་ན་དེ་རིང་ཉིད་ནས་ཉམས་སུ་ལེན་པ་ལ་བརྩོན་པར་བྱའོ། །ཞེས་ངོ་སྤྲད་དོ། ། གསུམ་པ། རྗེས་ཉམས་སུ་བླང་བ་ནི། སྙིང་དབུས་འོད་རྩའི་ནང་ན་ཡེ་ཤེས་ཆེན་པོ་གནས་པ་ཡང༌། ངོ་བོ་སྟོང་པ་དང་ཐུགས་རྗེ་རིག་པ་གཉིས་སུ་མེད་པ་ནི་ཤེས་རབ་རང་བྱུང་གི་སྒྲོན་མ་ཡིན་ལ། རང་བཞིན་གསལ་བ་འཇའ་འོད་ཀྱི་ཁང་པ་ནི། དབྱིངས་རྣམ་པར་དག་པའི་སྒྲོན་མ་དང༌། དེའི་དབུས་ན་ལྔ་ལྡན་འོད་ཀྱི་ཚོམ་བུ་རིགས་ལྔ་སྐུ་ཡི་ཆ་ཅན་ནི། ཐིག་ལེ་སྟོང་པའི་སྒྲོན་མ་སྟེ། རྨ་བྱའི་མདོངས་ལྟ་བུའོ། ནང་གི་གདངས་ཕྱིར་ཤར་དུས་མིག་གི་ཨ་འབྲས་ཀྱི་འོད་གདངས་དམར་སེར་ཕྱིར་སྣང་བ་ལ་ཐིག་ལེ་སྟོང་པའི་སྒྲོན་མར་བཏགས་པ་ནི། གདངས་ཀྱི་ཐིག་ལེ་སྟོང་སྒྲོན་ཡིན་ལ། ནམ་མཁར་སྣང་བའི་འོད་སྣང་ལ་་དབྱིངས་རྣམ་དག་གི་སྒྲོན་མར་བཏགས་པ་ཡང་གདངས་ཀྱི་དབྱིངས་རྣམ་དག་གི་སྒྲོན་མའོ། །དེ་བཞིན་དུ་རིག་པ་རྡོ་རྗེ་ལུ་གུ་རྒྱུད་ཅེས་བཏགས་ཀྱང་རིག་གདངས་རྡོ་རྗེ་ལུ་གུ་རྒྱུད་དོ། །དེ་ལྟར་འོད་ནང་དུ་ལུ་གུ་རྒྱུད་གནས་པ་ལ་གཏད་ནས་མ་ཡེངས་པར་ཕྱིར་བསྒོམས་པས། ནང་དུ་སྟོང་གསལ་སྤྲོས་པ་དང་བྲལ་བའི་ཡེ་ཤེས་ཤར་བ་ནི། ཤེས་རབ་རང་བྱུང་གི་སྒྲོན་མ་ཞེས་བྱའོ། ། དེ་ལྟར་བཏགས་པ་ཡང༌། གནད་དེས་ཡེ་ནས་ཡོད་ཐོག་ཏུ་དུས་དེར་ཕེབས་པ་ལ་བཏགས་ཀྱིས་སྔར་མེད་གསར་བྱུང་གི་ཤེས་རབ་རང་བྱུང་གི་སྒྲོན་མ་ནི་མ་ཡིན་ནོ། །དེ་ལྟར་ཉམས་སུ་ལེན་དུས་སུ་བཞུགས་སྟངས་གསུམ་ལས། གཙོ་བོ་དྲང་སྲོང་ཙོག་པུ་བྱ་ཞིང༌། གཟིགས་སྟངས་གསུམ་ལས་ཐུར་དུ་ཅུང་ཟད་ཕབ་ལ་བལྟའོ། །གཞན་རྣམས་གྲོགས་ཙམ་དུ་བསླབ་བོ། །དེ་ཡང་་དཀར་ལང་ལོང་ལས་ཐིག་ལེ་མ་མཐོང་ན་མིག་གཉིས་མཉམ་པར་ཐད་དྲང་དུ་བལྟའོ། ། དབྱིངས་མ་མཐོང་ན་ཉི་མའི་དྲུང་ནས་ཟུར་ལ་བལྟས་ཏེ་ཁད་ཀྱིས་དྲང་ལ་བལྟ་བ་གནད་དོ། །དེ་ནས་དཀར་ཤས་ཆེ་ན་གཡས་སུ་བཟློག་པ་་དང༌། སེར་ཤས་ཆེ་ན་གྱེན་ལ་བཟློག་པ་དང༌། ལྗང་ཤས་ཆེ་ན་གཡོན་་དུ་བཟློག་པ་དང༌། དམར་ཤས་ཆེ་ན་ཐུར་དུ་དབབ་པ་དང༌། མཐིང་ཤས་ཆེ་ན་དབུས་སུ་དྲིལ་བ་དང༌། ལྔ་ལྡན་སྙོམས་པར་གསལ་ན་གཟིགས་སྟངས་གང་ཡིན་ལས་མི་འགྱུར་བ་གནད་ཡིན་ནོ། །འདིའི་དུས་སུ་ཆོས་སྐུའི་རྟེན་ཉི་མ་ལ་བསླབ་པ་ཡང༌། ཉིན་མོའི་ཉི་མ་ལས་ཁྲུ་གང་གི་འོག་གམ། གཡོན་དུ་ནམ་མཁའ་ལ་མིག་འབྲས་ཅུང་ཟད་བཟློག་ལ་བལྟས་པས། དབྱིངས་འོད་ལྔའི་དབུས་སུ་རྡོ་རྗེ་ལུ་གུ་རྒྱུད་ཐིག་ལེ་དང་བཅས་པ་མཐོང་དུས། ལོངས་སྐུའི་གཟིགས་སྟངས་ཀྱིས་ཉི་མ་ལས་ཇེ་རིང་དུ་ཟུར་ལ་ཁྲིད་ལ་ཡས་མན་ནམ་ཕན་ཚུན་གྱི་ཐད་དྲང་དུ་བཞག་པ་ལ་སྤྲུལ་སྐུའི་གཟིགས་སྟངས་ཀྱིས་་ཐུར་ལ་སེམས་མ་ཡེངས། མིག་མི་འགུལ། ངག་མི་སྨྲ། བཞུགས་སྟངས་མི་གཡོ་བར་གནས་པས་དབྱིངས་འོད་ལྔ་དང༌། རིག་པ་ལུ་གུ་རྒྱུད་་ཐིག་ལེ་དང་བཅས་པའི་སྣང་བ་གོང་དུ་མཆེད་པར་འགྱུར་རོ། །མཚན་མོ་་ཡོངས་སྐུའི་རྟེན་ཟླ་བ་ལ་བསླབ་པ་ཡང་ཚུལ་དེ་དང་འདྲ་བ་ལས། ཁྱད་པར་དུ་མིག་ཟླ་བའི་དཀྱིལ་དུ་གཏད་ནས་སེམས་མ་ཡེངས་པར་བཟུང་བས་སྣང་བ་མཆེད་པ་དང༌། ཉིན་མོ་མིག་གི་ཚ་བ་འཕེལ་ནས་ཅུང་ཟད་མི་གསལ་བ་གྲང་བས་སྙོམས་ཏེ། རབ་ཏུ་གསལ་པར་བྱེད་པས་རབ་ཏུ་ཟབ་བོ། སྤྲུལ་སྐུའི་རྟེན་སྒྲོན་མེ་ལ་བསླབ་པ་ཡང་དེ་དང་མཚུངས་པ་ལས། །མར་མེའི་དཀྱིལ་ནས་གཞན་དུ་ཁྲིད་ལ་བསྒོམ་པ་གནད་ཡིན་ནོ། །དེ་ཡང་ཉིན་མོ་མེ་ཤེལ་ལ་བསླབ་པས་འོད་སྣང་གོང་དུ་མཆེད་པ་དང༌། ཉིན་དུས་ཀྱི་འཁྲུལ་སྣང་འགགས་པས་མྱ་ངན་ལས་འདས་པའི་རང་ས་ཟིན་པར་བྱེད་ལ། མཚན་མོ་ཟླ་བ་སྟེ་ཆུ་ཤེལ་དྲི་མ་མེད་པ་དང་འོད་གསལ་སྒྲོན་མེ་ལ་བསླབས་པས་ལྔ་ལྡན་འོད་དུ་སྣང་བས་མཚན་མོའི་འཁྲུལ་པ་འཁོར་བའི་ཆ་གཟུགས་སྐུ་གཉིས་སུ་དག་པ་གདོད་མར་གྲོལ་བའི་དགོས་པ་ཡོད་དོ། །དེ་ཡང་སྔ་དྲོ་ཕལ་ཆེར་ཤར་ཕྱོགས་སུ་འོད་དཀར་པོ་མ་བྱུང་གི་བར་དུ་གཏད་ལ། དེ་ནས་སྣང་བ་དེ་ལྷོར་ཁྲིད་ནས་དར་ཅིག་བཞག་ཅིང་ཕར་ཕར་ཁྲིད་ནས་ནུབ་ཏུ་འོད་ལྔའི་སྣང་བ་ལ་གཏད་ཅིང༌། ཕྱི་འཕྲད་ནུབ་ཏུ་གཏད་དུས་ཟ་འོག་རིས་སུ་སྣང་བ་དེ་བྱང་དུ་ཁྲིད་ལ་བསླབ་བོ། །ཅུང་ཟད་ཙམ་ལས་ཁྲིད་མི་ནུས་པར་་ཡལ་ན་རྟེན་དང༌། མ་རེག་ཙམ་དུ་ཡུན་རིང་བར་བསླབ་ལ་ཇེ་རིང་དུ་འཁྲིད་ཅིང༌། འོད་སྣང་གི་ནང་དུ་ལུ་གུ་རྒྱུད་གནས་པ་ལ་བལྟ་བ་གནད་དམ་པའོ། །དེ་ལྟར་ཉམས་སུ་བླངས་པས། ཕྱི་གདངས་ཀྱི་ཐིག་ལེ་སྟོང་སྒྲོན་རྩོལ་མེད་་དུ་སྲན་མའི་འབྲུ་གུ་ཙམ་དང༌། མཐེ་བོང་ཙམ་རེ་རེ་ལས་གཉིས་འབྲེལ་དང་གསུམ་འབྲེལ་དུ་སྣང་ངོ༌། །འདི་ཉིད་ཀྱི་དུས་ན་ལུས་ཀྱི་རྟགས་སུ་འདུག་སྟངས་ལས་མི་འགུལ། ངག་བརྗོད་པ་ཉུང༌། སེམས་ཕྲ་རགས་ཀྱི་རྟོག་པ་ཉུང་བས་བདེ་གསལ་མི་རྟོག་པའི་ཏིང་ངེ་འཛིན་ལས་འབྲལ་མི་ཕོད་པ་་འབྱུང་ཞིང་ཚིག་དོན་དཔྱོད་པའི་ཤེས་རབ་ཀྱང་སྔར་མེད་པ་གསར་དུ་འཆར་རོ། །དེ་དུས་ཡེ་ཤེས་ཀྱི་སྣང་བ་སུམ་ཆ་ལ་དབང་ཐོབ་བོ། དབྱིངས་སྣང་་ཡང་དང་པོ་ཅུང་ཟད་ལས་ཇེ་ཆེར་མཆེད་དེ་ལང་ལིང་དུམ་བུར་ཁྲུ་གང་ཙམ་ཞིག་སྣང་བའོ། །འདིའི་དུས་སུ་བར་ཆད་ན་སྐྱེ་བ་གཅིག་གམ་གཉིས་ལས་མི་འགྱངས་པར་སངས་རྒྱ་བ་ཡིན་ནོ། ། དེ་དག་ནི་ཆོས་ཉིད་མངོན་སུམ་གྱི་སྣང་བའོ། །ཞར་ལ་འཕྲོས་པ་བརྗོད་དེ། དེ་ཡང་སྔོན་འགྲོ་ལུས་ངག་གི་གནད་མ་གཟིར་བའམ། དབང་པོ་རྟུལ་བ་ཁ་ཅིག་ལ་སྣང་བ་ལ་འཛིན་པའི་མངོན་རློམ་ཞུགས་པའི་གནད་ཀྱིས་བདུད་ཀྱི་བར་ཆད་ཀྱི་རྟགས་དང༌། ཏིང་ངེ་འཛིན་ཉམས་ཀྱི་རྟགས་འདྲེས་པ་འབྱུང་བ་ཡོད་ དེ། །བསྡུ་ན་བར་ཆད་བདུད་ཀྱི་རྟགས། འཕེལ་འགྲིབ་ཉམས་ཀྱི་རྟགས། མི་འགྱུར་གསང་བའི་རྟགས་དང་གསུམ་ལས། དང་པོ་ནི། ལུས་སྣ་ཚོགས་སུ་སྤྲུལ་ནུས་པའམ། སལ་མ་རེག་པར་འགྲོ་བ་ལ་སོགས་པ་སྟེ། གྲིབ་མའམ་མེ་ལོང་་དུ་གཟུགས་བརྙན་གཉིས་པར་འཆར་བས། དེ་དུས་ཁྲོ་བོ་བསྒོམ་པ་དང༌། དྲག་སྔགས་བཟླས་པ་དང༌། གུ་གུལ་དང་བདུད་རྩི་ཆེ་ཆུང་གི་ཆུས་མགོ་མཇུག་མེད་པར་བཀྲུ་ཞིང༌། ཡན་ལག་ལ་ལྡེར་སོ་བགྱིས་པའི་ས་འདག་གིས་བྱུག་ན་ཁྲ་བོར་འོང་བ་ཡིན་ནོ། །ཡང་གཞན་གྱི་སེམས་ཤེས་པ་དང༌། ཤེས་རབ་ཀློང་རྡོལ་ནས་ཆོས་ཀྱི་ཚིག་དོན་ཤེས་པ་ལྟ་བུ་ཡང་འབྱུང་བས། དེ་ལ་ཡང་དེ་ལྟར་བྱས་པས་བདུད་ཀྱི་རྟགས་རྣམས་བཟློག་ཅིང་ཡང་དག་པ་་ཡིན་ན། སྔར་བས་བཟང་དུ་འགྲོ་བ་ཡིན་ནོ། །ཡང་ལུས་ལ་འོད་དཀར་པོ་སླེག་སླེག་པའམ། དམར་ཕྲེང་ཕྲེང་པའམ། སེར་ལྷབ་ལྷབ་པ་ལ་སོགས་པ་སྟེ། མི་གསལ་ལ་འགྱུར་བ་བྱུང་ན་བདུད་ཀྱི་རྟགས་ཡིན་པས། ལུས་ཁྲོ་བོའི་འདུག་སྟངས། ངག་ཏུ་ཧཱུཾ་གི་སྒྲ་སྐད། སེམས་བསྐྱེད་རྫོགས་ཟབ་མོ་བསྒོམས་པས་གྲོལ་ལོ། །ཡང་དག་པའི་དོན་ནི་གསལ་དངས་ཕྱེད་པའི་ཁ་དོག་ལྔར་གསལ་བའོ། །ཡང་ཏིང་ངེ་འཛིན་ལ་བཞག་དུས་ན། སྒྲ་སྐད་སྣ་ཚོགས་སུ་གྲགས་པ་ན་སྙན་པ་ལ་ཞེན་པ་མི་སྐྱེ་ཞིང་ཉོན་མོངས་པའི་གཉེན་པོར་གྱུར་ན་ཡང་དག་པ། ལྡོག་པ་བདུད་ཀྱི་རྟགས་ཡིན་པས་ལུས་་སྟངས་སྟབས། ངག་ཏུ་ཨ། སེམས་ལྷར་གསལ་བས་ཞི་ངེས་སོ། །ཡང་མི་མ་ཡིན་པའི་གཟུགས་སྣ་ཚོགས་མཐོང་ཞིང་ལེགས་ཉེས་ལུང་སྟོན་པ་་དང༌། ཆོས་འཆད་པ་ལ་སོགས་བྱུང་དུས། ལུས་འདབ་ཆགས་ལྡིང་པ་ལྟ་བུ། ངག་ཏུ་ཨ། སེམས་སྟོང་ཉིད་བསྒོམས་པས་བདུད་ཡིན་ན་བཟློག་ལ། ཡང་དག་པ་ཡིན་ན་སྔར་བས་གསལ་ཏེ། སེམས་ཀྱི་ཉོན་མོངས་པ་ཞི་བར་བྱེད་དོ། །ཡང་མཁའ་འགྲོའམ་ཡི་དམ་ལྷའི་གཟུགས་ཅན་ནམ་མཁར་སྐབས་སྐབས་སུ་འོང་ཞིང༌། སྔ་མ་ལྟར་ཕྱིན་ན་ཡང་ལུས་ཁྲོ་བོའི་ལྟ་་སྟངས། ངག་ཏུ་ཧྲཱིཿ༑སེམས་ལྷར་བསྒོམས་པས་སྔ་མ་ལྟར་འགྱུར་རོ། །མདོར་ན་བར་ཆད་ཀྱི་རྟགས་ལ་སྔར་བས་གློ་བུར་དུ་ཤེས་པ་འགྱུར་ནས་དགའ་བློའི་ཞེན་པ་རང་ཚན་པ་འབྱུང་ཞིང༌། དགག་སྒྲུབ་ཆགས་སྡང་སྐྱེ། ཆོས་དང་ཇེ་འགལ་ལ་འགྲོ་བ་ཡིན་ལ། ཡང་དག་པ་ལ་ནི་དེ་ལས་ལྡོག་པར་འཆར་བས་ངོ་ཤེས་པ་གཅེས་སོ། །འཕེལ་འགྲིབ་ཉམས་ཀྱི་རྟགས་ནི། རླུང་སེམས་འདུ་ཚུལ་གྱིས་ཆེར་མ་བསྒོམ་ཀྱང༌། ནམ་མཁར་ལྷ་སྐུ་དང་འོད་སྣང་གིས་འཁྲིགས་པ་དང༌། ཏིང་ངེ་འཛིན་གློ་བུར་དུ་སྐྱེ་བ་ལྟ་བུ་བྱུང་དུས། སྐབས་སུ་ཆུའི་དཀྱིལ་དུ་བསྡད་ཅིང༌། མཇིང་པ་ཤིང་གི་བྱང་བུ་སོར་བཅུ་དྲུག་གི་བར་དུ་གཏིམས། ལུས་ལ་ཙན་དན་གྱི་མར་ཁུ་བྱུགས་ལ། དངོས་པོ་ཐ་མལ་རགས་པ་རང་ཚན་པར་བསྒོམ་ན་ཡང་དག་པའི་རྟགས་སུ་གྲོལ་ལོ། །ཡང་དེ་དུས་ལུས་ལ་བསིལ་བའི་གོས་གྱོན་ནས། ཁ་ཟས་བསིལ་བ་བརྟེན། ཨ་བཟླས་ཤིང༌། ལྷའི་སྐུ་མང་དུ་སྒོམས་པས་རྟགས་དེ་དག་ཡང་དག་པའི་རྟགས་སུ་འགྱུར་ཞིང༌། ལམ་སྒོམ་པའི་གྲོགས་སུ་འགྱུར་བ་ཡིན་ནོ། །མི་་འགྱུར་བ་གསང་བའི་རྟགས་ལ་རང་གིས་མཐོང་ལ་གཞན་ལ་མི་སྣང་བ། གཞན་གྱིས་མཐོང་ལ་རང་ལ་མི་མངོན་པ། རང་གཞན་གཉིས་ཀས་མཐོང་བ་དང་གསུལ་ལས། དང་པོ་ནི། ལུས་ཤིང་བལ་ལྟར་ཡང་བ་དང༌། ངག་གི་དབུགས་འགྱུ་བ་མི་ཚོར་བ་དང་སེམས་དྭངས་ལ་ཏིང་ངེ་འཛིན་དུ་གནས་པ་དང༌། གངས་ལ་བལྟས་པ་འཇུ་བ་དང༌། རི་བྲག་ལ་ཟང་ཐལ་བ་ལ་སོགས་པའོ། ། གཉིས་པ་ནི། ལུས་སྣུམ་ཞིང་སྐྲ་དཀར་གཉེར་མ་མེད་པ་དང༌། སྐྲ་དང་སེན་མོ་མི་སྐྱེ་བ་དང༌། མགྱོགས་ཤིང་ཆུ་ལ་མི་བྱིང་པ་དང༌། ས་ཆུ་མེ་རླུང་གིས་མི་གནོད་ཅིང་ནམ་མཁའ་ལ་འགྲོ་བ་དང༌། ལུས་ལ་རྡོ་རྗེ་དང༌། རིན་པོ་ཆེ་དང༌། པདྨ་དང༌། འཁོར་ལོ་ལ་སོགས་པ་ཕྱག་མཚན་དང་སྐུ་དང་ཡི་གེའི་གཟུགས་རང་བྱོན་པའོ། །གསུམ་པ་ནི། ཡིད་ལ་འགྱུར་པའི་རྟེན་འབྲེལ་གྱིས། གཞན་ལ་ཕན་པ་དང༌། ཅི་སྨྲས་ཆོས་སུ་འགྱུར་བ་དང༌། འཁྲུལ་པའི་ཚིག་མི་འབྱུང་བ་དང༌། ལྐུགས་པ་ལྟར་འགྱུར་བ་དང༌། ཆོས་སྣ་ཚོགས་ཀྱི་ཚིག་རང་རྡོལ་དུ་འབྱུང་བ་དང༌། གཏམ་རྒྱུད་མང་པོ་ཤེས་པ་དང༌། སྒྲ་སྐད་སྣ་ཚོགས་ཤེས་པ་དང༌། གྲུབ་མཐའི་ཚིག་རང་ཤར་དུ་བྱུང་ནས་ཤེས་པ་དང༌། རིགས་དྲུག་གི་སྐད་ཤེས་པ་དང༌། བེམས་པོའི་སྒྲ་ཤེས་པ་དང༌། ཉན་ཐོས་དང་རང་སངས་རྒྱས་་དང༌། བྱང་ཆུབ་སེམས་དཔའི་གསུང་ཐོས་ཤིང་གོ་བ་ལ་སོགས་པ་དང༌། ལུས་སེམས་འདྲེས་པའི་སེམས་ཐོགས་པ་མེད་པ་བཞིན་དུ། ལུས་ཐོགས་ཆགས་མེད་པས་ནམ་མཁའ་ལ་འགྲོ་ཞིང་ཆུ་ལ་མི་བྱིང་བས་རི་བྲག་ལ་སོགས་པ་ལ་ཟང་ཐལ་བ་དང༌། སྙིང་རྗེ་ཚད་མེད་པ་རང་ཤུགས་ཀྱིས་སྐྱེ་ཞིང་མངོན་ཤེས་འཆར་བ་དང༌། གང་དུ་བསམ་པའི་ཡུལ་དུ་ཕྱིན་པ་ལ་སོགས་པ་སྟེ་རེས་འབྱུང་རེས་མི་འབྱུང་བའི་ཚུལ་དུ་འབྱུང་ངོ༌། །ཡང་ལུས་ལ་སངས་རྒྱས་ཀྱི་ཕྱག་མཚན་ལ་སོགས་པ་སྣང་བ་དང༌། སྐྲ་དཀར་ནག་པོར་འགྱུར་ཞིང་་སོའུ་སྐྱེ་བ་དང༌། གཉེར་མ་མེད་ཅིང་ལུས་ཀྱི་སྐྱི་ངན་པ་སྦྲུལ་ལྤགས་བརྗེས་པ་ལྟར་བརྗེ་ནུས་པ་དང༌། བྱིས་པ་ལོ་བརྒྱད་པ་ལྟར་གཞོན་ཤ་ཆགས་པ་དང༌། ངག་གསང་ལ་འཇམ་ཞིང་སྙན་ལ་རྒྱང་རིང་པོར་ཐོས་པ་དང༌། སེམས་འབྱོངས་པས་ཟས་གོས་མི་དགོས་ཤིང་མཉམ་གཞག་ལ་ལོ་དང་ཟླ་བར་གནས་ནུས་པ་དང༌། རླུང་གར་འདོད་སར་འདྲོངས་པ་དང༌། གསོད་པའི་གཤེད་མ་བྱུང་ཡང་རེ་དོགས་དང་འཇིག་སྔངས་མི་སྐྱེ་བ་དང༌། ཉོན་མོངས་པ་རང་རྒྱུད་པ་སེམས་ལ་མི་འཆར་བ་དང༌། ཚིག་ལ་ཆེད་འཛིན་མེད་པས་ཟུངས་མི་ཐུབ་ཅིང་དོན་མེད་པ་དང༌། འཁྲུལ་པའི་གཏམ་མི་འབྱུང་ཞིང་རེས་འགའ་ལྐུགས་པ་ལྟར་འགྱུར་བ་དང༌། སྔར་མི་ཤེས་པའི་སྒྲ་སྐད་དང་ཆོས་ཀྱི་ཚིག་རང་རྡོལ་དུ་འབྱུང་བ་དང༌། སེམས་ཀྱང་འདས་མ་འོངས་ད་ལྟར་གྱི་བྱ་བས་གོ་རིམ་དང༌། ཁྲིགས་འགགས་པ་དང༌། འཁོར་འདས་ཀྱི་རེ་དོགས་བཟློག་པ་དང༌། དབུགས་ཕྱི་ནང་དུ་མི་རྒྱུ་བ་དང༌། །འཁྲུལ་པའི་སེམས་མི་འཆར་བའོ། །རྟགས་དེ་དག་སྔོན་འགྲོ་ལུས་ངག་ཡིད་གསུམ་གྱི་གནད་གཟིར་བ་དང༌། དངོས་གཞི་འོད་གསལ་སྒོམ་དུས་གང་དུ་ཡང་འབྱུང་བས་རེ་དོགས་དང་དགག་སྒྲུབ་མི་བྱའོ། །བྱས་ན་བདུད་ཀྱི་བར་ཆད་་དུ་འགྱུར་བའི་ཕྱིར་རོ། །དོན་གཉིས་པ་ཉམས་གོང་འཕེལ་གྱི་སྣང་བ་ནི་ལུས་གནད་ལ་སོགས་པ་སྔར་དང་འདྲ་བ་ལས། ཁྱད་པར་དུ་གླང་པོ་ཆེའི་བཞུགས་སྟངས་དང༌། ལོངས་སྐུའི་གཟིགས་སྟངས་གཙོ་བོར་བྱ་ཞིང༌། གཞན་གཉིས་གྲོགས་ཙམ་དུ་བསླབས་པས། འོད་འདོམ་གང་ཐིག་ལེ་མཐེ་བོང་ཙམ་ནས་ལྔ་ལྡན་སྐུའི་སྣང་བ་མ་ཤར་བའི་བར་གྱི་སྣང་བ་རྣམས་སོ། །དེ་ཡང་ཐིག་ལེ་སྟོང་པའི་སྒྲོན་མ་མཐེབ་མཛུབ་ཀྱི་རྩོལ་བ་མ་དགོས་པར་ནམ་མཁར་ཤར་དུས། དབྱིངས་རྣམ་པར་དག་པའི་སྒྲོན་མ་རྨ་བྱའི་མདོངས་ལྟར་་འོད་ལྔའི་མུ་ཁྱུད་ཅན་གྱི་དབུས་དཀར་པོ། སེར་པོ། དམར་པོ། ལྗང་གུ། མཐིང་ཀ་ལྔས་ཁྱབ་པ་འཇའ་ཚོན་ལྟ་བུ་ལ། ཐིག་ལེའི་དབུས་སུ་པདྨ་འདབ་མ་བཞིའི་རྣམ་པ་ཁ་དོག་མི་འདྲ་བས་བརྒྱན་པ་འཆར་ཏེ། བར་ཆད་ཀྱང་རང་བཞིན་སྤྲུལ་སྐུའི་ཞིང་དུ་སྐྱེས་ནས་སངས་རྒྱ་བའོ། །དེ་ནས་ཉམས་སུ་བླངས་པས་འོད་ལྔ་ནི། རྩིབས་ཤར་དང༌། གྱེན་འགྲེངས་དང༌། མདུང་རྩེ་ལྟ་བུ་དང༌། མདའ་ལྟ་བུ་དང༌། པདྨ་སྟོང་ལྡན་དང༌། ཡེ་ཤེས་མཁའ་ཐབས་ལྟ་བུར་སྣང་ཞིང༌། ཐིག་ལེ་ཡང་ལག་མཐིལ་ཙམ་དང༌། མེ་ལོང་ཙམ་ལ་སོགས་པ་འཆར་རོ། །འདིའི་དུས་སུ་དབྱིངས་དང་རིག་པ་་འདུས་པས་བར་དུ་ཆད་ཀྱང་བར་དོ་ལྷུན་གྲུབ་གྱི་སྣང་བ་ལ་གྲོལ་ངེས་སོ། །དེ་ཡང་དབྱིངས་སྣང་དེར་རེ་ལྡེ་ཙམ་ལས་མཆེད་དུས། རྩིབས་ཤར་ལ་མདུན་དུ་དྲིལ་ནས་བལྟ་བ་དང༌། གྱེན་འགྲེངས་ལ་ཐུར་དུ་དབབ་པ་དང༌། གྲུ་བཞི་ལ་གཡས་སུ་གཅུན་པ་དང༌། ཟླུམ་པོ་ལ་གཡོན་དུ་གཅུན་པ་དང༌། ཟླ་གམ་ལ་སྟེང་དུ་བལྟ་བ་དང༌། གྲུ་གསུམ་ལ་ཐུར་དུ་བལྟ་བ་དང༌། ཡེ་ཤེས་ལྔའི་སྣང་བ་མཁར་ཐབས་ལ་སོགས་པ་ལ་མཉམ་པར་བལྟ་བ་གནད་ཡང་དག་པའོ། །སྣང་བ་འདི་དག་གི་དུས་ན་ཉིན་མཚན་འདྲེས་པས། མཚན་མོ་ཡང་ཉིན་མོ་བཞིན་སྣང་ཞིང་འོད་གསལ་རྒྱུན་ཆད་མེད་དོ། །ཐིག་ལེ་ཡང་མང་ལ་འོད་ལྔའི་ར་བས་བསྐོར་ཞིང་འཁར་ཕོར་ཙམ་དང༌། འཁར་གཞོང་ཙམ་ལ་སོགས་པས་གང་ལ་འོད་སྣང་གིས་གང་དུ་བལྟས་པས་ཁྱབ་པར་འཆར་དུས། དབྱིངས་སྣང་ལས་རིན་པོ་ཆེའི་དྲ་བ་དང་དྲ་ཕྱེད་དང༌། མིག་མང་རིས་དང༌། མིག་ཚགས་ཀྱི་རྣམ་པ་ལྟ་བུ་དང༌། ཟ་འོག་གི་གུར་ཁྱིམ་ལྟ་བུ་དང༌། མཆོད་རྟེན་དང་གཞལ་མེད་ཁང་ལ་སོགས་པར་སྣང་དུས་་དབྱིངས་ཀྱི་རྒྱན་རྫོགས་པ་སྟེ། དེ་ཡང་དང་པོར་གོམས་པ་བར་ཆད་ན་ཡེ་ཤེས་བཞི་སྦྱོར་དང༌། བར་དུ་གོམས་པ་བར་ཆད་ཚོམ་བུའི་སྣང་བ་དང༌། མཆོག་ཏུ་གོམས་པ་ནི་འོད་གསལ་ཤར་བའི་སྐད་ཅིག་ལ་གྲོལ་བས་ཕྱི་མའི་སྣང་བ་མེད་དོ། །དེ་ཡང་ཉིན་མཚན་འདྲེས་དུས་འཁོར་བ་མྱང་འདས་སུ་གྲོལ་བས་གདོད་མའི་ཆོས་ཉིད་དུ་སངས་རྒྱ་ངེས་སོ། །དེ་ཡང་དང་པོ་དབྱིངས་སྣང་ལུང་བ་ཙམ་དང༌། །དེ་ནས་ཡུལ་གྲུ་ཙམ་དང༌། །དེ་ནས་གང་དུ་བལྟས་ཚད་ཁྱབ་པ་ཡིན་ནོ། །འདིའི་དུས་རྣམས་སུ་ཕྱིར་སྣང་བའི་་འོད་གསལ་དེ་དག་འབྱུང་བ་བཞིན་དུ། ནང་དུ་རིག་པའི་འོད་གསལ་ཏིང་ངེ་འཛིན་དང༌། སྤྱན་དང་མངོན་ཤེས་དང༌། རྫུ་འཕྲུལ་མང་པོ་འཆར་བ་་ཡིན་ནོ། །འདིར་སྣང་བའི་འོད་གསལ་དངོས་སུ་བསྟན་པས། རིག་པའི་་འོད་གསལ་ཞར་ལ་གོ་བར་དགོངས་ནས་མ་བསྟན་ནོ། །ཅིའི་ཕྱིར་ཞེ་ན། ཆོས་གཞན་དུ་རིག་པའི་ཚད་དངོས་སུ་བསྟན་ཡང༌། ཡུད་ཙམ་ཡང་རྟག་མི་་ཐུབ་པར་འགྱུར་བས་ཚད་གཟུང་དཀའ་ལ། སྣང་བ་ནི་རིམ་གྱིས་གསལ་བར་འགྱུར་བས་ངོས་གཟུང་སླ་བ་ལ་དགོངས་སོ། །དོན་གསུམ་པ། །རིག་པ་ཚད་ཕེབས་ཀྱི་སྣང་བ་ནི། །ལུས་ངག་གི་གནད་དེ་ལྟར་གོམས་པས་་དབྱིངས་སྣང་ནམ་མཁས་གང་ཁྱབ་ཏུ་སྣང་ཞིང༌། ཐིག་ལེའི་ནང་དུ་པད་འདབ་རྣམས་ཀྱི་དབུས་ཀྱི་ལྟེ་བ་དང་རྩིབས་བཞིར་ལྷ་ཡབ་རྣམས་ཀྱི་གཙུག་ཏོར་ནས་སྐུ་རྐྱང་པ་དང༌། རྒྱན་རྫོགས་པ་ནས་ཡུམ་དང་བཅས་པ་འཆར་ཞིང༌། ཆེ་ཆུང་བསེ་ཕུབ་ཙམ་ལ་སོགས་པར་སྣང་བའི་ཐུགས་ཀ་ནས། རང་གི་སྙིང་གར་ཟེར་ཐག་འོད་ལྔའི་སྙེ་ཚོན་ལྟ་བུས་འབྲེལ་བར་འཆར་རོ། །རང་གི་ལུས་ཀྱང་འོད་ཀྱི་འཁོར་ལོར་འཁྱིལ་བའི་སྤྱི་གཙུག་ནས་ཡར་ཐིག་ལེ་་འཁར་གཞོང་ཙམ་ལྔའམ་དགུ་བརྩེགས་པར་སྣང་བའོ། །དེ་ནས་རིམ་གྱིས་རང་གི་ལུས་རགས་པ་རྡོས་བཅས་སུ་སྣང་བ་ཇེ་ནུབ་ལས་མཐར་ལག་སོར་ཙམ་སྣང་བའི་དུས་ཆུན་ཆད་ནི། རིག་པ་ཚད་ཕེབས་ཞེས་བྱ་སྟེ་སྒོམ་པའི་རྩོལ་བ་མི་དགོས་པས། དེ་ཉིད་ཀྱི་ངང་ལ་གནས་པ་ཙམ་མོ། །འདིར་སློབ་དཔོན་ཆེན་པོ་པདྨ་ནི་ཡབ་ཡུམ་ཟུང་དུ་འབྲེལ་ནས་སྣང་བའི་འཕེལ་རྫོགས་པ་ལ་རིག་པ་ཚད་ཕེབས་སུ་བཞེད་ཅིང༌། བི་མ་ལ་ནི། སྐུའི་སྣང་བ་དང་པོ་མཐོང་ནས་རྫོགས་པའི་བར་ཐམས་ཅད་ལ་བཞེད་དོ། །དེ་ཡང་ཉམས་གོང་འཕེལ་གྱི་ཚེ་སྣང་བ་རྣམས་འགུལ་འཕྲིགས་ཅུང་ཟད་བྱེད་ལ། ཚད་ཕེབས་ཀྱི་ཚེ་མི་བྱེད་པར་སྡོད་པའོ། །འདི་དག་གི་དུས་སུ་འཕགས་པའི་ཡེ་ཤེས་སྐྱེས་པའི་རྟགས་ཆོས་ཉིད་དེ་ཁོ་ན་ཉིད་ཀྱི་ཁམས་སྙིང་པོའི་སྣང་བ་མཐོང་བས་སངས་རྒྱས་ཀྱི་ཞིང་ཐམས་ཅད་མཐོང་བ་དང༌། ཆོས་ཐོས་པ་དང༌། འོད་དང་རྫུ་འཕྲུལ་འབྱེད་པ་དང༌། ཏིང་ངེ་འཛིན་གྲངས་མེད་པ་ཐོབ་པ་དང༌། སྤྲུལ་པ་འགྱེད་པ་ལ་སོགས་པ་འབྱུང་བ་ཡིན་ནོ། ། དོན་བཞི་པ་ཆོས་ཉིད་ཟད་པའི་སྣང་བ་ནི། སྣང་བ་དེ་རྣམས་ཀྱི་འཕེལ་ཟད་པ་དང༌། ལུས་རྡོས་བཅས་ཀྱི་སྣང་བ་ཟད་པ་དང༌། རླུང་གཡོ་བྱེད་ཀྱི་རྣམ་རྟོག་ཟད་པས་ཟད་པ་ཞེས་བྱ་ལ། ཆོས་ཉིད་ནི་ཁམས་སྙིང་པོའི་འོད་གསལ་དམ་པའོ། །འདིའི་ཚེ་འོད་ཀྱི་ནང་ན་ལག་སོར་བཀྲམ་པ་ཙམ་སྣང་བ་ལས་གཞན་རྡོས་བཅས་སུ་སྣང་བ་གང་ཡང་མེད་དོ། །འདིའི་དུས་སུ་སྐྱེ་བ་ལ་རང་དབང་ཐོབ་པས་སྐྱེ་ཤི་མེད་པའི་སྐུ་རྡོ་རྗེ་ལྟ་བུ་གྲུབ་སྟེ། ལུས་དེ་ཉིད་ཀྱིས་སེམས་ཅན་གྱི་དོན་བསྒྲུབ་པར་འདོད་ན། བི་མ་ལ་དང༌། པདྨ་་འབྱུང་གནས་ལྟར་འཕོ་བ་ཆེན་པོའི་སྐུ་ཆུའི་ཟླ་བ་ལྟ་བུར་བཞེད་ནས་སེམས་ཅན་གྱི་དོན་མཛད་ཅིང༌། བར་དོའི་སེམས་ཅན་སུམ་སྟོང་ལ་བློའི་ཡེ་ཤེས་གཅིག་ཞུགས་པས་སྐད་ཅིག་གཅིག་ལ་གྲོལ་བའི་དོན་མཛད་པའོ། །དེ་ཡང་རང་གི་ལག་པའི་སོར་མོ་ལ་བལྟས་པས་ཇེ་རགས་ལ་ལོག་ནས་སྣང་བ་དང་་སེམས་ཅན་རྣམས་སྒྱུ་མ་དང་ཆུ་ཟླ་ཙམ་དུ་གཟིགས་ནས། དེ་དག་གི་བསམ་པ་དང་མཐུན་པར་དོན་མཛད་པའོ། །འཇུག་པ་ལ་རང་དབང་ཐོབ་པས་བེམས་པོ་རྣམས་ལ་རིག་པ་བཅུག་ནའང་འགུལ་བ་དང་སྐད་འབྱིན་ལ། བར་དོའི་སེམས་ཅན་ལ་རིག་པ་བཅུག་པས་གྲོལ་བ་ཐོབ་པ་འབྱུང་ངོ༌། །གལ་ཏེ་སྔར་གྱི་ལུས་དེས་སེམས་ཅན་གྱི་དོན་མི་བསྒྲུབ་ན་ལག་སོར་ལ་བལྟ་བ་སྤངས་ཏེ་འོད་གསལ་གྱི་ངང་ལ་མི་གཡོ་བས་ལག་སོར་ཀྱང་འོད་དུ་ཡལ་ཏེ། ཕྱི་སྣང་བའི་འོད་གསལ། ནང་ཕུང་པོའི་འོད་གསལ། གསང་བ་རིག་པའི་འོད་གསལ་གསུམ་ཀ་ནང་གསལ་གདོད་མའི་གཞི་གཞོན་ནུ་བུམ་པ་སྐུའི་ཞིང་དུ་གྲོལ་ནས་ཆོས་སྐུ་འཕོ་འགྱུར་མེད་པ། ལོངས་སྐུ་རང་གསལ་ཆེན་པོ། སྤྲུལ་སྐུ་འཆར་གཞི་མ་འགགས་པ་ཙམ་དུ་བཞུགས་ནས་སྐུ་དང་ཡེ་ཤེས་འདུ་འབྲལ་མེད་པའི་དགོངས་པ་ལས་མི་གཡོ་བར་བཞུགས་པ་ཡིན་ནོ། །དེའི་ངང་ལས་མ་གཡོས་བཞིན་དུ། འཇིག་རྟེན་གྱི་ཁམས་སུ་ནང་གསལ་ལས་ཕྱི་གསལ་ལྷུན་གྲུབ་སྟུག་པོ་བཀོད་པར་རང་སྣང་དུ་བཞེངས་པ་ལས། སེམས་དཔའ་ས་བཅུ་པ་ལ་སྐུ་རིགས་ལྔ་དང༌། སོ་སོའི་སྐྱེ་བོ་དང་ཉན་ཐོས་་དང་རང་སངས་རྒྱས་ཀྱི་རིགས་ཅན་རྣམས་ལ་མཆོག་གི་སྤྲུལ་པ་དང༌། སེམས་ཅན་གྱི་ཁམས་ཐམས་ཅད་དུ་བཟོ་དང་སྐྱེ་བ་སྤྲུལ་པ་ལ་སོགས་སྟེ། འགྲོ་བ་སོ་སོའི་སྟོན་པར་སྣང་བས་འཁོར་བ་མ་སྟོངས་ཀྱི་བར་དུ་གཞན་དོན་རྒྱ་ཆེ་བ་རྒྱུན་མི་ཆད་པ་ལྷུན་གྱིས་གྲུབ་པ་འབྱུང་བ་ཡིན་ནོ། །དེ་ལྟར་ཉམས་་སུ་ལེན་པ་ལ་བརྩོན་པ་ན། མཐའ་རྟེན་གྱི་མན་ངག་བཞིས་མཇུག་བསྡུ་བ་ལས། མི་འགུལ་བ་གསུམ་གྱིས་གཞི་བཅའ་བ། སྡོད་པ་གསུམ་གྱིས་ཚད་གཟུང་བ། ཐོབ་པ་གསུམ་གྱིས་གཟེར་གདབ་པ། གདེང་བཞིའི་གྲོལ་ཚད་གཟུང་བ་དང་བཞི་ལས། དང་པོ་ནི། ལུས་མི་འགུལ་བ་བཞུགས་སྟངས་གསུམ་ལས་མི་འདའ་བ། མིག་མི་འགུལ་བ་གཟིགས་སྟངས་གསུམ་ལས་མི་འདའ་བ། རླུང་རིག་མི་འགུལ་བ་དལ་བས་བཅོས་བསླད་མེད་པའི་ངང་ལས་མ་ཡེངས་པའོ། །གཉིས་པ་དེ་ལྟར་བསྒོམས་པས། ཕྱིའི་སྣང་བ་སྡོད་པས་རྐྱེན་ངན་གྲོགས་སུ་འཆར། ནང་སྒྱུ་ལུས་སྡོད་པས་་འཁྲུལ་བའི་བྱ་བ་དང་བྲལ། གསང་བ་རླུང་སེམས་སྡོད་པས་རྣམ་རྟོག་སྐྱེ་མི་སྲིད་པའོ། །འདིའི་ཚེ། རྟགས་ལུས་ངག་ལ་འཆར་བ་དང༌། ཚད་རྨི་ལམ་གྱིས་གཟུང་བ་གཉིས་འབྱུང་སྟེ། དེ་ཡང་ཆོས་ཉིད་མངོན་སུམ་གྱི་དུས་ན། འཇུག་སྟངས་ལས་མི་གཡོ་བས་ལུས་རུ་སྦལ་འཁར་གཞོང་དུ་བཅུག་པ་ལྟ་བུ་དང༌། ངག་བརྗོད་པ་ཉུང་བས་ལྐུགས་པ་ལྟ་བུ་དང༌། སེམས་ཞི་གནས་རྩེ་གཅིག་ལས་མི་གཡོ་བས་བྱ་སྙི་ལ་ཟིན་པ་ལྟ་བུའོ། །ཉམས་གོང་་འཕེལ་གྱི་དུས་ན། ལུས་གོས་དང་རྒྱན་ལ་ཆེད་དུ་མི་འཛིན་པས་ལྷུག་པར་གནས་པ་སྐྱེས་བུ་ནད་ཀྱིས་ཐེབས་པ་ལྟ་བུ་དང༌། ངག་ཆེད་འཛིན་ཞིག་པས་སྨྱོན་པའི་ཚིག་ལྟར་གང་དྲན་རང་རྡོལ་དུ་བྱུང་ནས་རྗེས་འཛིན་གྱི་འབྲེལ་མེད་པ་དང༌། སེམས་གང་ལའང་མི་རྟོག་པས་རྩི་དུག་གིས་ཐེབས་པ་ལྟ་བུའོ། །རིག་པ་ཚད་ཕེབས་ཀྱི་དུས་སུ། གང་ལ་ཡང་ཟང་ཐལ་ཞིང་སྟོབས་ཆེ་བས་ལུས་གླང་པོ་ཆེ་འདམ་དུ་བྱིང་བ་སྐད་ཅིག་གིས་ཐོན་པ་ལྟ་བུ་དང༌། ངག་ཤིན་ཏུ་སྙན་པ་གྲུལ་བུམ་གྱི་ཕྲུ་གུ་ལྟ་བུ་དང༌། སེམས་ཉོན་མོངས་པ་དང་བྱིང་རྒོད་ཐམས་ཅད་ལས་གྲོལ་ནས། ཉིན་མཚན་འོད་གསལ་གྱི་དགོངས་པ་ལ་གནས་པ་རིམ་ནད་བྱང་བའི་སྐྱེས་བུ་ལྟ་བུའོ། །ཆོས་ཉིད་ཟད་པའི་དུས་ན། ལུས་རྡོས་བཅས་ལས་གྲོལ་བས་བར་སྣང་གི་འཇའ་ཚོན་ལྟ་བུ་དང༌། ངག་གཞན་གྱི་རྗེས་སུ་ཟློས་པ་ཙམ་ལས་འཇིག་རྟེན་གྱི་ངོས་གཟུང་མེད་པས་བྲག་ཆའི་རྣམ་པ་ལྟ་བུ་དང༌། སེམས་གདོད་མར་ནུབ་ཏུ་ཉེ་བས་བར་སྣང་གི་སྤྲིན་དེངས་སུ་ཉེ་བ་ལྟ་བུའོ། །ཚད་རྨི་ལམ་གྱིས་གཟུང་བའང༌། དང་པོར་རྨི་ལམ་ངན་པ་ལོག་ནས། བག་ཆགས་བཟང་པོ་ཤ་སྟག་རྨི། བར་དུ་རྨི་ལམ་ཟིན། རྗེས་ལ་འོད་གསལ་གྱི་དབྱིངས་སུ་ནུབ་ནས་རྒྱུན་ཆད་པའོ། ། གསུམ་པ་ཐོབ་པ་གསུམ་གྱིས་གཟེར་གདབ་པ་ནི། ཕྱིའི་སྣང་བ་ལ་དབང་ཐོབ་པས་སྣང་རྐྱེན་ཞིང་ཁམས་སུ་གྲོལ། ནང་སྒྱུ་ལུས་ལ་དབང་ཐོབ་པས་རྡོས་བཅས་འོད་གསལ་དུ་གྲོལ། གསང་བ་རིག་པ་ལ་དབང་ཐོབ་པས་ཉོན་མོངས་ཡེ་ཤེས་སུ་གྲོལ་བའོ། །གདེང་བཞིའི་གྲོལ་ཚད་བསྟན་པ་ལ། ཡར་གྱི་གདེང་གཉིས་ནི། དེའི་ཚེ་ཡར་སངས་རྒྱས་ཐོབ་ཏུ་རེ་བ་དང༌། མ་ཐོབས་ཀྱིས་དོགས་པ་མེད་པའོ། །མར་གྱི་གཉིས་ནི། འཁོར་བར་ལྟུང་གིས་དོགས་པ་དང༌། མི་ལྟུང་ཐར་དུ་རེ་བ་མེད་པའོ། །དེ་ལྟར་ཉམས་སུ་ལེན་པ། དངོས་གཞི་ལ་ཞུགས་ནས། བརྩོན་འགྲུས་རབ་རྣམས་ནི་ལོ་གསུམ་དང་ཟླ་བ་གཅིག» །«འབྲིང་རྣམས་ལོ་བཞི་དང་ཟླ་བ་ལྔ་ཞག་དྲུགདཐ་མ་རྣམས་ལོ་བདུན་དང་ཟླ་བ་བཅུ་གཅིག་ན་རྡོས་བཅས་སུ་སྣང་བ་འོད་དུ་ཡལ་ནས། གདོད་མའི་ས་ལ་ལྷག་མེད་དུ་སངས་རྒྱས་ཐོབ་པ་ལ་ཐེ་ཚོམ་མེད་དོ། །དེ་དག་གིས་རབ་ཚེ་འདིར་གྲོལ་བའི་གདམས་པ་རྣམས་བཤད་ཟིན་ཏོ། །སྤྱི་དོན་གཉིས་པ། འབྲིང་བར་དོར་གྲོལ་བ་ལ་གསུམ་སྟེ། རང་བཞིན་གྱི་བར་དོར་ལྟ་སྒོམ་གྱིས་ཐག་གཅད་པ། འཆི་ཀའི་བར་དོར་ཆོས་ཉིད་ལ་གསལ་གདབ་པ། ཆོས་ཉིད་ཀྱི་བར་དོར་རང་སྣང་ལ་ཡིད་ཆེས་པའོ། །དང་པོ་ནི། སྐྱེས་ནས་འཆི་ལྟས་མ་བྱུང་གི་བར་་འདིར། བླ་མས་ངོ་སྤྲད་པ་མངོན་སུམ་སྙིང་ཏིག་གི་དོན་ལ་ཉིན་མཚན་མ་་ཡེངས་པར་བརྩོན་པས། ལྟ་སྒོམ་གྱི་དྲོད་ཚད་ཅུང་ཟད་ཐོབ་པའོ། །གཉིས་པ་ནི། འཆི་ལྟས་བྱུང་བའི་ཚེ། རང་ལ་གདམས་པ་གསལ་པོ་ཡོད་ན་དེས་ཆོག» །«མེད་ན་བླ་མའམ། རྡོ་རྗེ་སྤུན་གྱིས་བར་དོའི་འོད་གསལ་རྣམས་གསལ་གདབ་བོ། དེ་ཡང་གདབ་ལོང་མེད་པར་ཤི་ན་ཁོའི་ཁ་སྣ་དང་རང་གི་ཁ་སྣ་སྤྲད་དེ་རླུང་ཨཱོཾ་ཨཱཿཧཱུཾ་གསུམ་དུ་བསམ་ལ་འཕངས་པས། མིག་ཧྲིག་བྱུང་དུས་མྱུར་ལ་གསལ་བར་གདབ་སྟེ། བར་དོར་འོད་གསལ་གྱི་སྣང་བ་འཆར་བ་རང་སྣང་དུ་ངོ་ཤེས་པར་གྱིས་ལ་བཙན་ས་ཟུང་ཞིགདསླར་མ་ལྡོག་ཅིག» །«ཅེས་ལན་གསུམ་བརྗོད་དོ། ། དེས་ནི་མི་བརྟན་པོ་ལ་འཕྲིན་བསྐུར་བ་དོན་སར་འཕྲོད་པ་ལྟར་རང་ངོ་ཤེས་ སོ། །དེ་ནས་འབྱུང་བའི་ཐིམ་ཚུལ་ནི། ས་ས་ལ་ཐིམ་པས་ལུས་ལྗི། ལྡང་འདུག་མི་ནུས། ཆུ་ཆུ་ལ་་ཐིམ་པས་ཁ་སྣ་དང་མིག་ནས་ཆུ་དར་ཅིག་བྱུང་ནས་སྐམ་ མོ། །མེ་མེ་ལ་ཐིམ་པས་རྐང་ལག་གི་མཐའ་བཞི་ནས་དྲོད་དབུས་སུ་སྡུད་དོ། ། རླུང་རླུང་ལ་ཐིམ་པས་ཕྱི་དབུགས་རྒོད་ཅིང་དབུགས་བརྩེགས་མར་འབྱུང་ལ་ཀྲོག་གིས་་འཆད་དོ། །རླུང་རྣམ་པར་ཤེས་པ་ལ་ཐིམ་པས་ནང་དབུགས་ཚད་ཅིང༌། དར་ཅིག་བརྒྱལ་ནས་དྲན་མེད་དུ་འགྱུར་རོ། །དེའི་དུས་སུ་སྲོག་རྩ་ནས་ཁྲག་ཐིགས་གཅིག་སྙིང་ནང་དུ་བྱུང་བས་རིག་པའི་ཡེ་ཤེས་ལ་ཕོག་པའི་དུས་སོ། ། གསུམ་པ། ཆོས་ཉིད་ཀྱི་བར་དོར་རང་སྣང་དུ་ཡིད་ཆེས་པ་ལ་ཐིམ་ཚུལ་ལྔས་ངོས་ཟིན་པར་བྱ་བ་ལས། དང་པོ་ནི། རྣམ་ཤེས་ནམ་མཁར་་ཐིམ་པའི་ཚེ། སྙིང་དབུས་ནས་རིག་པ་འོད་རྩ་ལ་ཞུགས་ཏེ་མིག་ཏུ་གནས་པའི་སྐད་ཅིག་དང་པོ་ལ་ཀ་དག་གི་སྣང་བ་སྟོན་ཀའི་ནམ་མཁའ་སྤྲིན་དང་བྲལ་བ་ལྟ་བུ་འཆར་ཏེ། དེ་ཉིད་གདོད་མའི་གྲོལ་གཞི་བསམ་འདས་ཆེན་པོར་ཤེས་ན་དེའི་ངང་དུ་བཞག་པས་གྲོལ་ལོ། །དེ་ནས་ནམ་མཁའ་འོད་གསལ་ལ་ཐིམ་པས་སྐད་ཅིག་དང་པོར། འོད་ལྔའི་སྲད་བུའམ་སྐས་ཀྱི་འགྲམ་པ་ལྟ་བུར་ཤར་བ་ངོ་ཤེས་པའི་དུས་སུ་ཡར་གྱི་ཟང་ཐལ་དུ་གྲོལ་ལོ། །དེ་ནས་སྐད་ཅིག་གཉིས་པར་ཐུགས་རྗེའི་ཟེར་ཐག་ལས་ནམ་མཁའི་དབྱིངས་ཐམས་ཅད་འོད་ལྔའི་སྣང་བ་བསམ་གྱིས་མི་ཁྱབ་པར་ཤར་དུས། སྒྲ་འོད་ཟེར་གསུམ་ཁྲོ་བོའི་དཀྱིལ་འཁོར་དུ་ཤར་བ་ལ་རང་སྣང་དུ་ངོ་ཤེས་ན། རང་རིག་ཁྲོ་བོའི་སྐུ་ལ་ཐིམ་ནས་སངས་རྒྱའོ། ། དེ་ནས་འོད་གསལ་ཟུང་འཇུག་ལ་ཐིམ་པའི་ཚེ་སྣང་བ་ཐམས་ཅད་རིགས་ལྔ་ཚོམ་བུའི་ཞིང་དུ་དུས་མཉམ་དུ་ཤར་བ་ལ་ཤེས་རབ་ལྔ་རིམ་གྱིས་སྐྱེ་བས། བསམ་གཏན་གྱི་ཞལ་ལྔར་རིགས་ལྔའི་སྐུ་སྣང་བའི་ཐུགས་ཀ་དང༌། རང་གི་སྙིང་ཀར་ཟེར་ཐག་གིས་་འབྲེལ་བར་སྣང་ངོ༌། །དེ་ཡང་ཞག་དང་པོ་འོད་མཐིང་ཀ་ཆོས་ཀྱི་དབྱིངས་ཀྱི་ཡེ་ཤེས་སུ་ངོ་ཤེས་པས་རྣམ་པར་སྣང་མཛད་ཡབ་ཡུམ་ལ་རྡོ་རྗེ་སེམས་དཔའ་ལ་སོགས་པ་ཡབ་ཡུམ་ཟུང་བཞིས་བསྐོར་བ་མཐོང་དུས་གྲོལ་ལོ། །ཞག་གཉིས་པར་འོད་དཀར་པོ་མེ་ལོང་ཡེ་ཤེས་སུ་རྟོགས་པས་མི་བསྐྱོད་པ་དང༌། གསུམ་པར་སེར་པོ་མཉམ་ཉིད་ཡེ་ཤེས་སུ་རྟོགས་པས་རིན་ཆེན་འབྱུང་ལྡན། བཞི་པར་དམར་པོ་སོ་སོར་རྟོགས་པའི་ཡེ་ཤེས་སུ་རྟོགས་པས་སྣང་བ་མཐའ་ཡས། ལྔ་པར་ལྗང་ཁུ་བྱ་བ་ནན་ཏན་གྱི་ཡེ་ཤེས་སུ་རྟོགས་པས་དོན་ཡོད་གྲུབ་པ་ཡབ་ཡུམ་འཁོར་དང་བཅས་པ། ཚོམ་བུའི་དཀྱིལ་འཁོར་དུ་ཤར་བ་རང་ངོ་ཤེས་པས་གྲོལ་ལོ། །འདིའི་དུས་སུ་གནད་གསུམ་ལས། འཇུག་པ་ཤེས་པའི་གནད་ཀྱིས་འོད་རིག་པ་ལ་འཇུག་པ་སྣང་བ་དེ་་དག་སྙིང་གར་ནུབ་པ་དང༌། རིག་པ་འོད་ལ་འཇུག་པ་རང་གི་ལུས་སྣང་བ་་དེ་དག་གི་ཐུགས་ཀར་ཐིམ་པ་དེའི་ཚེ། རང་སྣང་དུ་ངོ་ཤེས་པས་རང་བཞིན་གྱི་བསམ་གཏན་ལ་གནས་སོ། །དེའི་ངང་ལ་གནས་པ་ཉིད་འོད་གསལ་ཡེ་ཤེས་ཀྱི་ལུས་སུ་ཤེས་པས་གྲོལ་བ་ལུས་ཀྱི་གནད་ཅེས་བྱའོ། །དེ་ནས་ཤེས་་ཐོག་ཏུ་གྲོལ་བ་ནི། མཐར་ཕྱིན་པ་ངོ་ཤེས་པའི་གནད་ཅེས་བྱ་སྟེ། དང་པོ་རང་སྣང་དུ་ངོ་ཤེས། དེ་ནས་ཤེས་ཐོག་ཏུ་གནས། གནས་ཐོག་ཏུ་གྲོལ་བ་ནི། གནད་གསུམ་ལ་མཁས་པའོ། །གནས་པའི་ཡུན་རིང་ཐུང་ནི། སྔོན་གྱི་ཏིང་ངེ་འཛིན་ལ་གནས་ཡུན་རིང་ཐུང་ཡིན་པས་འདིར་བསམ་གཏན་གྱི་ཞག་ཀྱང་དེ་ཡིན་ནོ། །དེ་ནས་ཟུང་འཇུག་ཡེ་ཤེས་ལ་ཐིམ་པ་ནི། །སྣང་བ་དེ་དག་རང་ལོག་ནས་སྙིང་གའི་ཕྱོགས་མཚམས་བཞིར། འོད་ཟེར་་དཀར་པོའི་སྣམ་བུ་ཤར་བས། གར་བལྟས་ཁྱབ་པའི་སྟེང་ན། ཐིག་ལེ་་དཀར་པོའི་དཀྱིལ་ན། མཐིང་ཁ་སེར་ལྗང་དམར་པོ་བཞིས་ཐིག་ཆུང་གིས་བརྒྱན་པ་ཤར་བ་ནི། མེ་ལོང་ཡེ་ཤེས་ཀྱི་རང་གདངས་སོ། །དེའི་སྟེང་ན་་སེར་པོ། དེའི་སྟེང་ན་དམར་པོ། དེའི་སྟེང་ན་མཐིང་ཀའི་སྣམ་བུ་ལ་རང་རང་གི་ཁ་དོག་དང་འདྲ་བའི་ཐིག་ལེ་ལ། ཁ་དོག་གཞན་གྱི་ཐིག་ཕྲན་གྱིས་བརྒྱན་པ་ཤར་བ་ནི་མཉམ་པ་ཉིད་དང༌། སོ་སོར་རྟོགས་པ་དང༌། ཆོས་ཀྱི་དབྱིངས་ཀྱི་ཡེ་ཤེས་རྣམས་ཀྱི་རང་གདངས་སོ། །ལྗང་ཁུ་མི་སྣང་བ་ནི་བྱ་བ་གྲུབ་པའི་རྩལ་མ་རྫོགས་པས་མི་སྣང་ངོ༌། །འདིའི་དུས་སུ་གྲོལ་བ་གསུམ་གྱི་གནད་ངོ་ཤེས་པར་བྱ་སྟེ། ལུས་རྡོས་བཅས་སུ་མེད་པས་འབྱུང་བ་བཞི་ལས་གྲོལ་བའོ། །རིག་པ་དྲི་མ་མེད་པས་ཉོན་མོངས་པ་ལས་གྲོལ་བའོ། ། འོད་གསལ་ཕྱི་ནང་མེད་པས་གཟུང་འཛིན་ལས་གྲོལ་བའོ། །དེ་་ཡང་རང་ངོ་ཤེས་པས་གདོད་མའི་ངང་དུ་གྲོལ་ལོ། །དེ་ནས་ཡེ་ཤེས་ལྷུན་གྲུབ་རིན་པོ་ཆེ་ལ་ཐིམ་པ་ནི། སྣང་བ་དེ་དག་ཐིམ་པའི་སྐད་ཅིག་ལ། སྟེང་འོག་ཕྱོགས་མཚམས་ཐམས་ཅད་སྟོན་ཀའི་ནམ་མཁའ་སྤྲིན་མེད་པ་ལྟར། མཐིང་ཀ་ལ་འོད་ལྔའི་མུ་ཁྱུད་ཀྱིས་སོ་སོར་བསྐོར་བ་ཉི་མའམ་ཟླ་བ་འཇས་བསྐོར་བ་ལྟ་བུའི་དབུས་སུ་ཡང་ཀུན་བཟང་ཡབ་ཡུམ། བར་དུ་རིགས་ལྔ་་ཡབ་ཡུམ། མར་རིགས་དྲུག་དང༌། དེའི་སྟོན་པ་ཐུབ་པ་དྲུག་རང་སྣང་བ་ལས། རང་ངོ་ཤེས་དུས་ཤར་ལུགས་བརྒྱད་དང༌། མངོན་ཤེས་དྲུག་དང༌། རྗེས་དྲན་དྲུག་དང༌། ཐིམ་ལུགས་བརྒྱད་ཀྱང་འབྱུང་ངོ༌། །དང་པོ་རང་ངོ་ཤེས་པར་བྱེད་པ་ལ་གདམས་ངག་གསུམ་ལས། རང་སྣང་ལ་ཡིད་ཆེས་པ་སྔར་འདྲིས་ཀྱི་མི་དང་འཕྲད་པ་ལྟ་བུའི་གདམས་པ་ནི། རང་སྣང་ལ་ཡིད་ཆེས་ཐོག་ཏུ་ཐེ་ཚོམ་མེད་པར་ཙན་གྱིས་འཇོག་པའོ། །མི་འགྱུར་བ་གསེར་གྱི་ཐུར་མ་ལྟ་བུའི་གདམས་ངག་ནི་ངོ་ཤེས་ཐོག་དེ་ཉིད་ལས་གཞན་དུ་མ་ཡེངས་པར་འཇོག་པའོ། །ཕྱིར་མི་ལྡོག་པ་དཔག་ཆེན་གྱི་མདའ་འཕངས་པ་ལྟ་བུའི་གདམས་ངག་ནི། ཤེས་ཐོག་ཏུ་གྲོལ་ནས་རང་གསལ་རྟོག་མེད་ལ་གནས་པའོ། །དེའི་ཚེ་ཤར་ལུགས་བརྒྱད་ནི། ཐུགས་རྗེ་ལྟར་ཤར་བས་་སེམས་ཅན་ཐམས་ཅད་ལ་བུ་གཅིག་པའི་མ་ལྟར་སྙིང་རྗེ་ཕྱོགས་མེད་དུ་འཇུག» །«འོད་ལྟར་ཤར་བས་སྣང་བ་དེ་དག་ལས་རང་འོད་མཆེད་པས་ནམ་མཁའ་ཐམས་ཅད་ཁེངས། སྐུ་ལྟར་ཤར་བས་འོད་ཟླུམ་གྱི་ནང་ཐམས་ཅད་ལྷའི་སྐུར་རང་སྣང༌། ཡེ་ཤེས་ལྟར་ཤར་བས་སངས་རྒྱས་ཀྱི་ཞིང་ཁམས་རང་སྣང༌། གཉིས་མེད་ལྟར་ཤར་བས་མི་རྟོག་པའི་ཏིང་ངེ་འཛིན་ལ་རྩེ་གཅིག་ཏུ་གནས། མཐའ་གྲོལ་ལྟར་ཤར་བས་སྣང་བའི་ཆོས་ཉིད་ཐམས་ཅད་ཟང་ཐལ་དུ་རྟོགས། མ་དག་པ་འཁོར་བའི་སྒོ་ལྟར་ཤར་བས་ཟ་འོག་གི་འོད་ཟླུམ་དུ་སྣང་བའི་འགྲོ་དྲུག་རྨི་ལམ་སྒྱུ་མ་ལྟར་རྟོགས། དག་པ་ཡེ་ཤེས་ཀྱི་སྒོ་ལྟར་ཤར་བས་ཇི་ལྟ་བ་དང་ཇི་སྙེད་པའི་མཁྱེན་ཆ་རང་གསལ་བའོ། །དེའི་ཚེ་མངོན་ཤེས་དྲུག་ལ། དབང་པོའི་མངོན་པར་ཤེས་པས་སྣང་རྐྱེན་ཞིང་ཁམས་སུ་གྲོལ། ཤེས་རབ་ཀྱི་མཐོང་བ་དག་པའི་མངོན་ཤེས་ཀྱིས་རང་སྣང་འོད་གསལ་དུ་རྟོགས། ཡེ་ཤེས་ཀྱི་མངོན་པར་ཤེས་པས་ཉོན་མོངས་པ་རང་སར་ཟད། སེམས་ལས་སུ་རུང་བའི་མངོན་པར་ཤེས་པས་ཏིང་ངེ་འཛིན་རྩེ་གཅིག་ལ་རང་གནས། ཟག་པ་ཟད་པའི་མངོན་པར་ཤེས་པས་ཕུང་པོས་བཅིངས་པ་རང་ཟད་པར་རྟོགས། ཡེ་ཤེས་གཟིགས་པའི་མངོན་ཤེས་ཀྱིས་རང་སྣང་ཆོས་ཉིད་དུ་རྟོགས། སངས་རྒྱས་ཀྱི་མཁྱེན་པ་རྫོགས་པའི་མངོན་ཤེས་ཀྱིས་རང་གཞན་གྱི་ལས་དང་རྒྱུད་ཀུན་ཏུ་མཁྱེན་པའོ། །དེ་བཞིན་དུ་རྗེས་དྲན་དྲུག་ལ། ལྟ་བ་རྗེས་སུ་དྲན་པས་ཐམས་ཅད་རང་བྱུང་གི་་ཡེ་ཤེས་སུ་རྟོགས། བསམ་གཏན་རྗེས་སུ་དྲན་པས་རྟོགས་ཐོག་ཏུ་མཉམ་པར་འཇོག» །«ལྷ་རྗེས་སུ་དྲན་པས་ལོངས་སྐུ་ཆོས་སྐུར་གྲོལ། གདམས་པ་རྗེས་སུ་དྲན་པས་འོད་གསལ་རང་ངོ་ཤེས། བླ་མ་རྗེས་སུ་དྲན་པས་བྱིན་རླབས་རང་ཤར། ཡི་དམ་རྗེས་སུ་དྲན་པས་དངོས་གྲུབ་རང་འགྲུབ་པའོ། །དེ་དག་གི་གནད་ཀྱིས་ཡར་ཀ་དག་ཆོས་ཉིད་ཀྱི་ཟད་ས་མཐོང་བས་གདོད་མའི་གྲོལ་ས་ངོས་ཟིན། ཐད་ཀར་རང་སྣང་ལོངས་སྐུའི་ཞིང་ཁམས་མཐོང་བས་རང་སྣང་སྐུ་དང་ཡེ་ཤེས་སུ་གྲོལ། མར་མ་དག་པ་སྤྲུལ་སྐུའི་གདུལ་ཞིང་མཐོང་བས་འཁོར་འདས་ལྟེ་མ་ཆད་པར་ཕྲིན་ལས་གཟིགས་པ་ལ་འཇུག་པའོ། །དེ་ནས་ཐིམ་ལུགས་བརྒྱད་ནི། ཕྱི་སྣང་བ་རྣམས་ནང་གསལ་དུ་ཐིམ་པས་གནམ་གང་གི་ཟླ་བ་དབྱིངས་སུ་འཁྱིལ་བ་ལྟ་བུ་སྟེ། དེ་ཡང་ཐུགས་རྗེ་ཐུགས་རྗེ་ལ་ཐིམ་པས་གདུལ་བྱ་དང་འདུལ་བྱེད་རྣམ་པར་དག» །«འོད་འོད་ལ་ཐིམ་པས་ཤེལ་འོད་ནང་དུ་བསྡུས་པ་ལྟར་རིས་མེད། སྐུ་སྐུ་ལ་ཐིམ་པས་བུམ་ནང་གི་མར་མེ་ལྟར་མཁྱེན་ཆ་ནང་དུ་གསལ། ཡེ་ཤེས་ཡེ་ཤེས་ལ་ཐིམ་པས་མ་པང་དུ་བུ་ཞུགས་པ་ལྟར་རིག་པ་བཞི་ལ་ཐིམ། གཉིས་མེད་གཉིས་མེད་ལ་ཐིམ་པས་དབའ་རླབས་ཆུར་ཐིམ་པ་ལྟར་ཆོས་ཅན་ཆོས་ཉིད་དུ་གྲོལ། མཐའ་གྲོལ་མཐའ་གྲོལ་ལ་ཐིམ་པས་སྣོད་ཀྱི་ནམ་མཁའ་ནམ་མཁའ་ཆེན་པོ་་དང་འདྲེས་པ་ལྟར་དམིགས་མེད་ཆོས་ཉིད་དུ་གནས། མ་དག་པ་འཁོར་བའི་སྒོ་དག་པ་ཡེ་ཤེས་ལ་ཐིམ་པས་སྦྲའི་ཆོན་ཐག་བསྡུས་པ་ལྟར་འཁོར་འདས་ཐིག་ལེ་ཉག་གཅིག་ཏུ་འདུས། དག་པ་ཡེ་ཤེས་ཀྱི་སྒོ་ངོ་བོ་ལ་ཐིམ་པས་སེང་གེས་གངས་ཟིན་པ་ལྟར་ཆོས་ཉིད་ཀ་དག་གི་ངང་ལ་རང་ས་ཟིན་པའོ། །དེ་ལྟར་ཐིམ་ཚུལ་གང་གི་ཚེ་རང་ངོ་ཤེས་ཀྱང་ཤར་ལུགས་ཀྱི་ངོ་བོ་རང་ཐོག་ཏུ་གནས་པས་གདོད་མའི་གྲོལ་ས་ཀ་དག་ལ་ཟིན་ནས། སླར་ཡང་ཆོས་སྐུའི་ངང་ལས་མ་གཡོས་པར་གཟུགས་སྐུ་གཉིས་སྣང་བས་སེམས་ཅན་གྱི་དོན་ལྷུན་གྲུབ་ཏུ་མཛད་པ་ནི་གདོད་མའི་གྲོལ་ས་སྟེ། རིག་པ་རང་ཤར་ལས། གྲོལ་ས་ཐོག་མ་གང་ཡིན་པའོ། །ཞེས་གསུངས་སོ། ། སྤྱི་དོན་གསུམ་པ་ཐ་མ་རང་བཞིན་སྤྲུལ་སྐུའི་ཞིང་དུ་གྲོལ་བའི་ཚུལ་ནི། དེ་ཡང་གོམས་པ་དང༌། བརྩོན་འགྲུས་རབ་རྣམས་ཉི་ཟླ་འཆར་ནུབ་ལྟར་ལྷུན་གྲུབ་ཀྱི་སྣང་བ་ནུབ་པ་དང༌། དག་པའི་ཞིང་དུ་སྐྱེ་བ་དུས་མཉམ་པས་སྲིད་པའི་བར་དོ་མེད་ལ། གཞན་རྣམས་ལ་རྨི་ལམ་གྱི་ཆ་ཙམ་དུ། སྲིད་པའི་བར་་དོ་སྣང་བ་ལས་བླ་མ་དམ་པའི་ཐུགས་རྗེ་དང༌། འོད་གསལ་ཆོས་ཉིད་མངོན་སུམ་ལ་གོམས་པའི་བདེན་པའི་བྱིན་རླབས་ལས། ཤར་ཕྱོགས་མངོན་པར་དགའ་བ་མི་འགྱུར་རྡོ་རྗེའི་ཞིང་དུ་པདྨ་ལས་རྫུས་ཏེ་སྐྱེས་ནས། མི་བསྐྱོད་པས་མེ་ལོང་ལྟ་བུའི་ཆོས་སྟོན་པས་ལོ་བརྒྱ་ཉི་ཤུ་རྩ་ལྔར་གནས་སོ། །ཞིང་དེ་ཡང་ཤེལ་གྱི་ས་གཞི་རིན་པོ་ཆེའི་ཁང་བུ་དང༌། ཁྲུས་ཀྱི་རྫིང་བུ་དང༌། མེ་ཏོག་གི་ཚལ་ལ་སོགས་པས་བརྒྱན་པ་དེར། རྡོ་རྗེ་མི་འཁྲུགས་པས་རྡོ་རྗེའི་རིགས་ཀྱི་སེམས་དཔའ་བྱེ་བ་ཁྲག་ཁྲིག་དཔག་ཏུ་མེད་པ་ལ་ཆོས་སྟོན་པའི་ཞལ་མཐོང་ཞིང་གསུངས་ཐོས་སོ། །དེ་ནས་སྐད་གཅིག་གིས་བར་དོ་མེད་པར་ལྷོ་དཔལ་དང་ལྡན་པར་པདྨ་ལས་རྫུས་ཏེ་སྐྱེས་ནས་གསེར་གྱི་ས་གཞི་རིན་པོ་ཆེ་སྣ་ཚོགས་ཀྱི་བཀོད་པས་མཛེས་པ་ན་བཅོམ་ལྡན་འདས་རིན་ཆེན་འབྱུང་ལྡན་གྱིས་འཁོར་རིན་ཆེན་རིགས་ཀྱི་ཚོགས་ལ་ཆོས་སྟོན་པ་མཐོང་ནས། དབང་བསྐུར་ཏེ་ལོ་བརྒྱ་ཉི་ཤུ་རྩ་ལྔར་གནས་པའི་འོག་ཏུ། ནུབ་པདྨ་བརྩེགས་པར་རྫུས་ཏེ་སྐྱེས་ནས། པདྨ་རཱ་གའི་ས་གཞི་ལ་རིན་པོ་ཆེ་སྣ་ཚོགས་ཀྱི་བཀོད་པས་མཛེས་པར། བཅོམ་ལྡན་འདས་སྣང་བ་མཐའ་ཡས་ཀྱིས་པདྨ་རིགས་ཀྱི་སེམས་དཔའ་ལ་ཆོས་སྟོན་པ་ན། བླ་ན་མེད་པའི་བྱང་ཆུབ་ཏུ་ལུང་བསྟན་པ་ཐོབ་ནས། ལོ་བརྒྱ་ཉི་ཤུ་རྩ་ལྔར་གནས་པའི་འོག་ཏུ་བྱང་ཕྱོགས་ལས་རབ་གྲུབ་པའི་འཇིག་རྟེན་དུ་སྐད་ཅིག་གིས་རྫུས་ཏེ་སྐྱེས་པ་ལས། ཞིང་དེ་ནི་རིན་པོ་ཆེ་མར་གད་ཏ་ལས་གྲུབ་པའི་རིན་པོ་ཆེ་སྣ་ཚོགས་ཀྱིས་གང་བར། བཅོམ་ལྡན་འདས་དོན་ཡོད་གྲུབ་པས་ལས་ཀྱི་རིགས་ཀྱི་བྱང་ཆུབ་སེམས་དཔའ་ལ་ཆོས་སྟོན་པས། ཚེ་དེ་ཉིད་ལ་སངས་རྒྱས་པར་བྱིན་གྱིས་བརླབས་ཤིང་དབུགས་ཕྱུང་ནས། ལོ་བརྒྱ་ཉི་ཤུ་རྩ་ལྔར་གནས་པའི་རྗེས་ལ། སྟེང་གི་ནམ་མཁའ་ལས་ཁྲོ་བོའི་དཀྱིལ་འཁོར་གྱི་སྣང་བ་མཐོང་མ་ཐག་ཏུ་རང་སྣང་དུ་ཤེས་པས། རང་ཐོག་ཏུ་གནས་པའི་སྐད་ཅིག་ལ་གདོད་མར་གྲོལ་ནས། ནང་གསལ་དུ་སྐུ་དང་ཡེ་ཤེས་འདུ་འབྲལ་མེད་པར་ལྷུན་གྱིས་གྲུབ་ནས་ཕྱི་གསལ་གྱི་འཆར་གཞི་བྱས་ཏེ། སེམས་ཅན་གྱི་་དོན་ཐམས་ཅད་རྟག་པ་རྒྱུན་མི་འཆད་པར་གཡོ་བ་དང་འབད་པས་རྩོལ་བ་མེད་པར་ལྷུན་གྱིས་གྲུབ་པའི་ཕྲིན་ལས་ཀྱི་མཛད་པ་ཡིན་ནོ། དེ་ཡང་རིགས་ལྔའི་ཞིང་དུ་ལོ་ལྔ་བརྒྱ་སོང་ནས་གྲོལ་ཏེ། རིག་པ་རང་ཤར་ལས། ལྔ་བརྒྱ་དག་ན་ངེས་པའི་སར་གྲོལ་ལོ། །ཞེས་གསུངས་སོ། །དེ་དག་ནི་སྐྱེ་བ་མ་དག་པ་མི་བརྒྱུད་པར་རང་བཞིན་སྤྲུལ་སྐུའི་ཞིང་དུ་གྲོལ་བའི་ཚུལ་བཤད་ཟིན་ཏོ།། །། དེ་ལྟར་གྲོལ་བའི་ངོ་བོ་ཡང༌། རང་གི་རིག་པ་ཡེ་ནས་སྐུ་དང་ཡེ་ཤེས་སུ་ཡོད་པའི་ངང་ལས། མ་རིག་པས་འཁོར་བར་འཁྲུལ་དུས། བླ་མའི་གདམས་པས་ངོ་སྤྲོད་པའི་དོན་ཉམས་སུ་བླངས་པས། དང་པོའི་གནས་ལུགས་གང་ཡིན་པའི་གཞི་ལ་བཙན་ས་ཟིན་ཏེ། འཕོ་འགྱུར་མེད་པར་གནས་པ་ནི་ཆོས་སྐུ་རང་གནས་ཀྱི་དགོངས་པ། མངོན་སུམ་འོད་གསལ་གྱི་གནད་ཡིག» །«ཡང་ཟབ་སྙིང་པོའི་གདམས་པ། གསང་སྔགས་་བླ་ན་མེད་པའི་ཡང་རྩེ། ཚེ་གཅིག་གིས་བྱང་ཆུབ་བསྒྲུབ་པའི་ཆོས་ཉིད། འཛམ་བུའི་གླིང་ན་དཀོན་པའི་ཟབ་ཆོས་མཐར་ཐུག་ཡིན་པས། སྐལ་བཟང་ཚེ་འདིར་གྲོལ་བར་འདོད་པ་དག་གིས་ཉིན་དང་མཚན་དུ་བརྩོན་པས་ཉམས་་སུ་བླང་བ་ལ་འབད་པར་བྱའོ། །དེ་ཡང་སྔོན་དུ་དབང་རྫོགས་པས་ཉམས་་སུ་ལེན་པ་ཡང༌། སྣོད་ལྡན་གཅིག་ནས་བདུན་ཚུན་ཆད་ལས་མང་དུ་མི་སྤེལ་ཞིང་བརྟག་ལ་བྱིན་ནོ། །དེས་ཀྱང་ཚེ་འདིའི་བྱ་བ་ཐམས་ཅད་སྤངས་ཏེ་གཅིག་པུར་དཔེན་པའི་གནས་སུ་སྒྲུབ་པ་ལ་བརྩོན་པས། རིག་འཛིན་གྱི་གྲལ་ལ་སྙཻག་པར་བྱ་བ་ནི། ཁོ་བོས་སྙིང་གཏམ་དུ་ལེགས་པར་གདམས་སོ། །གནད་འདི་དག་པདྨ་འབྱུང་གནས་ཀྱི་མཁའ་འགྲོ་སྙིང་ཏིག་དང༌། བི་མ་ལ་མི་ཏྲའི་གསང་བ་སྙིང་ཏིག་ལས་བྱུང་བ་བཞིན། ཡང་ཟབ་རྨད་དུ་བྱུང་བའི་སྙིང་ཕྱུང་ནས་བཀོད་པ་ཡིན་པས། སྣོད་མིན་ལ་གསང་ཞིང༌། སྣོད་ལྡན་་ཐར་པ་འདོད་པ་རྣམས་ལ་བསྟན་ནས། བླ་ན་མེད་པའི་བྱང་ཆུབ་ཀུན་ཏུ་བཟང་པོའི་གོ་འཕང་ཐོབ་པར་མཛོད་ཅིག» །«དེ་ལྟར་རང་གསང་བླ་མེད་སྙིང་པོའི་དོན། །མངོན་སུམ་སྙིང་ཏིག་ཡང་ཟབ་གནད་བསྡུས་ནས། །ཕྱི་རབས་དོན་དུ་བཀོད་པའི་དགེ་བ་དེས། །འགྲོ་ཀུན་འོད་གསལ་སྙིང་པོའི་་དོན་རྟོགས་ཤོག» «།བདག་ཀྱང་ནགས་རིའི་ནང་དུ་མངོན་དགའ་བས། །རྣམ་གཡེང་འདུ་འཛིའི་དགྲ་རྣམས་ཕམ་བྱས་ཏེ། །སྣང་བ་བཞི་པོ་རབ་ཏུ་མཐར་ཕྱིན་ནས། ། གདོད་མའི་ས་ལ་མངོན་པར་བྱང་ཆུབ་ཤོག །བདག་བཞིན་རྗེས་སུ་འཇུག་པའི་སྐལ་ལྡན་རྣམས། །ཡི་གེ་འདི་ལ་གཅེས་པས་ནན་ཏན་མཛོད། །ད་རེས་ཚེ་འདིར་ཐར་ལམ་ཟིན་ངེས་ཤིང༌། །མྱུར་དུ་རྒྱལ་བའི་གོ་འཕང་ཐོབ་པར་བྱེད། ། དེ་ཕྱིར་སྙིང་དང་འདྲ་བའི་བུ་རྣམས་ལ། །མ་འོངས་དུས་སུ་གཅིག་ནས་གཅིག་བརྒྱུད་དེ། །ཡང་དག་དོན་ལྡན་དེས་ཀྱང་ཉམས་བླང་ནས། །མྱུར་དུ་བྱང་ཆུབ་གོ་འཕང་ཐོབ་པར་ཤོག །རྫོགས་པ་ཆེན་པོ་ཡང་གསང་རྨད་དུ་བྱུང་བའི་རང་གནད་གསང་བ་ལས། ཉམས་ལེན་གནད་ཀྱི་སྒྲོན་མེ་ཞེས་བྱ་བ་ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་རྒྱུད་ལུང་མན་ངག་ཐམས་ཅད་ཀྱི་དོན་ཕྱོགས་གཅིག་ཏུ་བཀོད་པ་རྫོགས་སོ། །དཔལ་སྔགས་ཀྱི་བདག་མོ་རལ་གཅིག་མ་དང༌། སྲོག་སྒྲུབ་མ་དང༌། གཟའི་རྒྱལ་པོ་རཱ་ཧུ་ལས་བཀའ་འདི་སྲུང་ཤིག» །«དམ་ཅན་རྡོ་རྗེ་ལེགས་པ་ལ་གཏད་དོ། །ས་མ་ལ། ས་མ་ཡ། ས་མ་ཡ། རྒྱ་རྒྱ་རྒྱ། ངོ་སྤྲོད་རང་ཡིན་པས་མཐར་ཐུག་གོ །དགེའོ། ། དགེའོ། དགེའོ།། །།«མེས་པོའི་ཤུལ་བཞག་ལས། ཀློང་ཆེན་རབ་འབྱམས་ཀྱི་གསུང་འབུམ། ༼༡༠༽ཉམས་ལེན་གནད་གྱི་སྒྲོན་མེ།»- PAGE 74 -

- PAGE 99 -- PAGE 73 -