volume 010 307
༄༅། །ངེས་དོན་བྱང་ཆུབ་སྙིང་པོ་བཞུགས་སོ། །
«དོན་ཟབ་ཀུན་གྱི་འབྱུང་གནས་ཆེ། །བླ་མ་མཆོག་ལ་ཕྱག་འཚལ་ནས། ། རབ་གསང་མན་ངག་བླ་ན་མེད། །ངེས་དོན་བྱང་ཆུབ་སྙིང་པོ་བྲི། མངོན་སུམ་སྙིང་པོའི་དོན་ཉམས་སུ་ལེན་པའི་གྲོགས་སུ་རང་སྣང་ཡེ་ཤེས་ཆེན་པོའི་ཟབ་དོན་འདི་ལྟར་བསྒོམ་སྟེ། སྟན་བདེ་བ་ལ་སྐྱིལ་མོ་ཀྲུང་གིས་འདུག་པའི་པུས་མོ་གཉིས་ལ་ལག་པའི་ཐལ་མོ་བཀབ་ནས་རྒྱུ་ཞབས་སྒལ་པ་ལ་སྦྱར་ཏེ། མཇིང་པ་ཅུང་ཟད་ཕྱིར་དགྱེ་ལ་རླུང་རང་ལུགས་སུ་དལ་བར་རྒྱུ་བ་ན། འོག་རླུང་འཐེན་ཏེ་སྟེང་རླུང་ཁད་ཀྱིས་ཅུང་ཟད་མནན་ལ། འཁོར་ལོ་བཞིའི་དབུས་ཀྱི་རྩ་གསུམ་གསལ་བཏབ་ལ། དབུ་མའི་ནང་ལྟེ་བའི་ཐད་ཀ་ན་ཨ་ཤད་དམར་པོ་ལས་མེ་རྟ་རྔ་ཙམ་ཡར་སོང་བས་སྤྱི་བོ་བདེ་ཆེན་གྱི་འཁོར་ལོའི་ཧཾ་དཀར་པོ་ལ་ཕོག་ནས། བདུད་རྩི་བྱང་ཆུབ་སེམས་ཀྱི་རྒྱུན་རྒྱ་ཁབ་ཙམ་མར་བབས་པས་མགྲིན་པ་ལོངས་སྤྱོད་ཀྱི་འཁོར་ལོ་གང༌། ཡང་བབས་པས་སྙིང་ཀ་ཆོས་ཀྱི་འཁོར་ལོའི་དབུས་སུ་ཨེ་མཐིང་ཀ་བཞུགས་པས། བདེ་ཕྲི་ལི་ལི་གང་བ་ལ། དར་ཅིག་སེམས་གཟུང་བའི་རྗེས་ལ་ལྟེ་བ་སྤྲུལ་པའི་རྩ་འདབ་ཏུ་སོང་བས་ཨ་ཤད་ལ་ཕོག་མེའི་གསོས་བྱས། བ་སྤུའི་བུ་གའི་བར་བྱང་ཆུབ་སེམས་ཀྱི་ཐིག་ལེ་དཀར་དམར་འདྲེས་པས་ཁྱབ་པའི་བདེ་བ་ལ་ཡུན་རིང་དུ་བསྒོམས་པས། ཕྲ་རགས་ཀྱི་རྟོག་པ་བདེ་བ་ཆེན་པོའི་ངང་དུ་ནུབ་ནས། བདེ་བའི་སེམས་ལ་ཅེ་རེ་མ་ཡེངས་པར་གཏད་ལ་བསྒོམས་པས། མི་རྟོག་པ་དང་བདེ་གསལ་གྱི་ཡེ་ཤེས་ཞི་ལྷག་ཟུང་འཇུག་ཆེན་པོ་སྐྱེའོ། །དེ་ནས་བསམ་གྱིས་མི་ཁྱབ་པའི་འོད་གསལ་ལ་བསྒོམ་པ་ནི། སྤྱི་བོའི་ཧཾ་ལས་དྭངས་མ་དཀར་པོ་ཐམས་ཅད་འདུས་པའི་གོང་བུ་དཀར་པོ་མཐེ་བོང་ཙམ་མར་བྱུང༌། ལྟེ་བའི་ཨ་ལ་དྭངས་མ་དམར་པོ་ཐམས་ཅད་འདུས་པ་མཐེ་བོང་ཙམ་པ་ཡར་སོང་བས། སྙིང་གའི་ཨེ་ལ་འདྲེས་ཏེ། དངས་མ་དཀར་དམར་འདྲེས་པའི་ངོ་བོ་འོད་ཀྱི་ཐིག་ལེ་ཁ་དོག་ལྔ་ལྡན་མཐེ་བོང་ཙམ་དངས་ལ་འོད་གསལ་བའི་ངང་ལ་དར་ཅིག་མཉམ་པར་བཞག་ནས་སེམས་བཟུང་བས། དུ་བ་དང་སྨིག་རྒྱུ་ལ་སོགས་པའི་སྣང་བའི་འོད་གསལ་འཆར་རོ། །དེ་ནས་འོད་ཀྱི་གོང་བུར་ཇེ་ཆུང་ཇེ་ཕྲ་ལས། མཐར་ཅི་ཡང་མ་གྲུབ་པའི་ངང་ལ་ཕྱམ་མེར་བསྒོམས་པས། སེམས་ཀྱི་འཕྲོ་འདུ་གང་ཡང་མེད་པའི་ཡེ་ཤེས་ནམ་མཁའ་ལྟ་བུ་སྤྲོ་བསྡུ་དང་བྲལ་བ་འཆར་རོ། །དེའི་ངང་ལ་རྒྱུན་བསྲིང་པས་ཕྱི་ནང་བར་གསུམ་གཅིག་ཏུ་འདྲེས་ཏེ། ལུས་མེད་པ་སྙམ་པ་དང༌། གང་ལ་ཡང་དམིགས་པ་མེད་པ་དང༌། མཉམ་གཞག་ལས་འབྲལ་མི་ཕོད་པ་དང༌། ཅི་སྣང་བདེ་བར་འཆར་བ་དང༌། ངག་བརྗོད་སྙིང་མི་འདོད་པ་དང༌། ཕྲ་རགས་ཀྱི་འཛིན་པ་ནུབ་པ་དང༌། ཉིན་མཚན་འོད་གསལ་ལས་མི་གཡོ་བ་དང༌། མདོག་སྣུམ་པ་དང༌། མཁའ་འགྲོ་རང་བཞིན་གྱིས་འདུ་བ་དང༌། སྐྱེ་བོས་དཀའ་ཉན་པ་དང༌། ཚེ་རིང་ཞིང་ལོངས་སྤྱོད་དང་ལྡན་པ་དང༌། འཆི་ཁར་འོད་གསལ་གྱི་དགོངས་པ་གསལ་བ་དང༌། འདས་དུས་འཇའ་འོད་དང་རིང་བསྲེལ་འབྱུང་བ་དང༌། བར་དོར་གདོད་མའི་ས་ལ་མངོན་པར་བྱང་ཆུབ་པའི་ཡོན་ཏན་གྱི་དྲོད་རྟགས་ཕུན་སུམ་ཚོགས་པ་དང༌། གནས་སྐབས་དང་མཐར་ཐུག་གི་ཡོན་ཏན་དཔག་ཏུ་མེད་པ་འབྱུང་ངོ༌། །འདི་ནི་ཡང་ཟབ་གདམས་པའི་སྙིང་ཁུ་སྟེ། །མངོན་སུམ་བསྒོམ་པའི་གྲོགས་སུ་གནད་ཆེ་བས། ། སྐལ་ལྡན་རྣམས་ཀྱིས་བརྩོན་ཞིང་སྒྲུབ་པར་མཛོད། །དགེ་བས་འགྲོ་ཀུན་བྱང་ཆུབ་མཆོག་རེག་ཤོག །ངེས་དོན་བྱང་ཆུབ་སྙིང་པོ་ཞེས་བྱ་བ། ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་དཔལ་བསམ་གྱིས་མི་ཁྱབ་པའི་གནས་སུ་བཀོད་པ་རྫོགས་སོ། །དགེའོ། །དགེའོ། །དགེའོ།། །།«མེས་པོའི་ཤུལ་བཞག་ལས། ཀློང་ཆེན་རབ་འབྱམས་ཀྱི་གསུང་འབུམ། ༼༡༠༽ངེས་དོན་བྱང་ཆུབ་སྙིང་པོ།»- PAGE 166 -- PAGE 165 -
- PAGE 164 -